МЕ́СѦЦА МА́ІѦ ВЪ Ѳ҃ ДН҃Ь

пренесе́нїе честны́хъ мᲂще́й . и҆́же вᲂ ст҃ы́хъ ѻ҆ц҃а на́шегѡ нико́лы а҆рхїєпкⷭ҇па мирликі́йскихъ чꙋдᲂтво́рца . =На ма́лѣй вече́рни , на гдⷭ҇и вᲂзва́хъ , стихѣ́ры . гла́съ , а҃ . поⷣ . нбⷭ҇нымъ чино́мъ . Дне́съ вселе́нныѧ кᲂнцы̀ ,꙳ ѡ҆ пренесе́нїе честны́хъ мᲂще́й твᲂи́хъ ст҃лю пра́зднꙋюще ра́дꙋютсѧ ,꙳ ба́рскїи же гра́дъ тебѐ любо́вїю прїе́мъ ,꙳ и҆ тᲂбо́ю ѕѣлѡ̀ красꙋ́етсѧ ,꙳ мы́ же вѣ́рᲂю пренесе́нїе твᲂѐ сᲂверша́юще мо́лимъ тѧ ,꙳ мᲂли́сѧ премꙋ́дре нико́лае ,꙳ спасти́сѧ тебѐ пᲂчита́ющимъ . =двⷤа . Вели́кимъ ѻ҆ц҃е́мъ и҆зрѧ́дныи ревни́тель ,꙳ ст҃лю бы́лъ є҆сѝ ,꙳ тѣ́мже на сᲂбо́рѣ ста́въ ,꙳ а҆́рїевᲂ ѕлᲂче́стїе ѡ҆бличи́лъ є҆сѝ ,꙳ и҆ хрⷭ҇та̀ сн҃а бж҃їѧ є҆динᲂсꙋ́щна ,꙳ ѻ҆ц҃ꙋ и҆ дх҃ꙋ и҆спᲂвѣ́далъ є҆сѝ . сегѡ̀ ра́ди па́мѧть твᲂю̀ пᲂчита́емъ ,꙳ и҆ пренесе́нїе честны́хъ мᲂще́й твᲂи́хъ ,꙳ дх҃о́внѡ пра́зднꙋюще любо́вїю ,꙳ тебѐ застꙋ́пника всѣ́мъ на́мъ ,꙳ пᲂ дᲂсто́инствꙋ вᲂспѣва́емъ . Ны́нѣ ст҃льскими рꙋка́ми ,꙳ пресла́внѡ в̾ цр҃кᲂвь ст҃лю но́сишисѧ ,꙳ тѣ́мже и҆ дꙋ́си лꙋка́вїи ѿ тꙋ́дꙋ ѿгᲂни́ми вᲂстрепета́ша ,꙳ лю́дїе же всѝ пᲂпремно́гꙋ пренесе́нїе твᲂѐ пра́з̾днꙋюще , веселѧ́щесѧ вᲂпїю́тъ ,꙳ мᲂли́сѧ премꙋ́дре нико́лае ,꙳ спасти́сѧ дш҃а́мъ на́шимъ ,꙳ любо́вїю тѧ пᲂчита́ющимъ . сла́ва . гла́съ , ѕ҃ . Премꙋ́дрыми ти глаго́лы , дре́вле ѕлᲂчести́выи а҆́рїи , ꙗ҆́кѡ стрѣло́ю въ срⷣце ᲂу҆ѧ́звенъ бы́въ , ѿ сᲂбо́ра сᲂбо́рнѣ и҆зго́нитсѧ . ны́нѣ же в̾ пренесе́нїи чⷭ҇тны́хъ мᲂще́й твᲂи́хъ , пᲂпремно́гꙋ нечи́стїи дꙋ́си ѿгᲂни́ми быва́ютъ . тѣ́мже всѝ вᲂ тво́й пра́з̾дникъ сᲂше́дшесѧ , и҆ честны́мъ мᲂще́мъ твᲂи́мъ пᲂклᲂнѧ́ющесѧ , любо́вїю хрⷭ҇та̀ прᲂславлѧ́емъ , и҆́же тебѐ та́кѡ прᲂсла́вльшагᲂ , и҆ мо́лимсѧ , мᲂлѝ спасти́сѧ дш҃а́мъ на́шимъ .

и҆ ны́нѣ , боⷢ҇ . Бцⷣе ты̀ є҆сѝ лᲂза̀ и҆́стиннаѧ , вᲂзрасти́вшаѧ на́мъ пло́дъ живо́тныи , тебѣ̀ мо́лимсѧ , мᲂли́сѧ влⷣчце сᲂ ст҃лемъ , пᲂми́лᲂватисѧ дш҃а́мъ на́шимъ .

На стихо́внѣ , стихѣ́ры . гла́съ , в҃ . Дне́сь ѿ ми́рскагѡ гра́да ст҃лю , рꙋка́ма сщ҃е́нныхъ в̾ ба́рскїи гра́дъ пресла́внѡ прихо́диши . тѣ́мъ ти с̾ ра́дᲂстїю тᲂгда̀ первᲂст҃и́тель , съ чл҃ческимъ мно́жествᲂмъ чⷭ҇тнѡ срѣта́ютъ , и҆ пᲂчита́ютъ любо́вїю .

сти́хъ : честна̀ пре́д̾ гдⷭ҇емъ ,꙳ сме́рть прпⷣбныхъ є҆гѡ̀ . Пресла́внᲂе твᲂѐ ст҃лю ᲂу҆спе́нїе всѝ пᲂчита́емъ , и҆ пренесе́нїе честны́хъ мᲂще́й твᲂи́хъ , дх҃о́внѣ любо́вїю пра́з̾днꙋюще мо́лимсѧ , мᲂли́сѧ ст҃лю , ѡ҆ всѣ́хъ тебѐ вᲂспѣва́ющихъ .

сти́хъ : і҆єре́и твᲂѝ ѡ҆блекꙋ́тсѧ в̾ пра́вдꙋ , и҆ прпⷣбнїи твᲂѝ вᲂз̾ра́дꙋютсѧ . Пᲂ бжⷭ҇твеннѣй па́мѧти , чꙋдесы̀ всю̀ тва́рь и҆спо́лнилъ є҆сѝ , в̾ пречестнѣ́мъ же пренесе́нїи твᲂе́мъ , во́здꙋхъ и҆ мо́ре ѡ҆ст҃и́лъ є҆сѝ . тѣ́мже тѧ ꙗ҆́кѡ преи҆зрѧ́дна ст҃лѧ , любо́вїю пᲂчита́емъ . сла́ва . гла́съ , в҃ . И҆злїѧ́сѧ бл҃гᲂда́ть вᲂ ᲂу҆стнꙋ̀ твᲂе́ю прпⷣбне ѻ҆́ч҃е , и҆ бы́сть па́стырь хрⷭ҇то́вѣ цр҃кви , ᲂу҆ча̀ слᲂве́сныѧ ѻ҆́вцы , вѣ́рᲂвати въ трⷪ҇цꙋ є҆динᲂсꙋ́щнꙋю , вᲂ є҆ди́нᲂмъ бжⷭ҇твѣ̀ . и҆ ны́нѣ . пра́здникꙋ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь , вᲂскрⷭ҇нъ . сла́ва , ст҃о́мꙋ . гла́съ , д҃ . Приспѣ̀ дн҃ь свѣ́тлагѡ тᲂржества̀ , гра́дъ ба́рскїи ра́дꙋетсѧ , и҆ съ ни́мъ вселе́ннаѧ всѧ̀ сликᲂвствꙋ́етъ , пѣ́сньми и҆ пѣ́ньми дх҃о́вными . дне́сь бᲂ сщ҃е́ннᲂе тᲂржество̀ , в̾ пренесе́нїе честны́хъ и҆ мнᲂгᲂцѣле́бныхъ мᲂще́й , ст҃лѧ и҆ чꙋдᲂтво́рца нико́лы , ꙗ҆́кᲂже сл҃нце незахᲂди́мᲂе вᲂсїѧ̀ , свѣтᲂза́рными лꙋча́ми . и҆ разгᲂнѧ́ѧ тмꙋ̀ и҆скꙋше́нїѧ же и҆ бѣ́дъ ѿ вᲂпїю́щихъ вѣ́рнѡ , спаса́й на́съ ꙗ҆́кѡ пред̾ста́тель на́шъ вели́кїи нико́лае . и҆ ны́нѣ , боⷢ҇ . И҆́же ѿ́ вѣка ᲂу҆тае́ннᲂе , и҆ а҆́нг҃лѡмъ несвѣ́дᲂмᲂе та́иньствᲂ , тᲂбо́ю бцⷣе земны́мъ ꙗ҆ви́сѧ бг҃ъ в̾ неразмѣ́снѣ сни́тїи вᲂплᲂща́емъ . и҆ крⷭ҇тъ во́лею на́съ ра́ди вᲂспрїе́мъ , и҆́мже вᲂскр҃сѝ первᲂзда́ннагᲂ , и҆ спасѐ ѿ сме́рти дш҃а на́ша .

А҆́ще ли в̾ пᲂпра́з̾днествѣ , препᲂлᲂве́нїѧ , и҆лѝ вᲂз̾несе́нїѧ , трᲂпа́рь , ст҃о́мꙋ . сла́ва , и҆ ны́нѣ , пра́здникꙋ . та́же , є҆ктенїѧ̀ ма́лаѧ . и҆ ѿпꙋ́стъ .

На вели́цѣй вече́рни , блаже́нъ мꙋ́жь , а҃ , а҆нтифо́нъ . =На гдⷭ҇и вᲂзва́хъ , стⷯры пра́здникꙋ , г҃ . и҆ ст҃о́мꙋ , є҃ . гла́съ , и҃ . Н=а́ нб҃ᲂ текꙋ́щее , вᲂз̾ше́дъ дᲂбрᲂдѣ́телей , чꙋдᲂтво́рецъ ꙗ҆ви́сѧ въ ми́рѣ сла́вне . дх҃ᲂмъ ѿ ба́ра и҆схᲂдѧ̀ , вᲂ всѣ́хъ страна́хъ вѣ́рныѧ пᲂсѣща́еши , и҆ всѣ́хъ ѿ бѣ́дъ и҆зима́еши . дᲂсто́йнѡ че́сть прїе́млѧ , вᲂ ст҃лѣхъ прᲂславлѧ́ешисѧ , хрⷭ҇то́въ ᲂу҆го́дниче бл҃же́нне . тѧ̀ ны́нѣ мᲂле́бнѡ призыва́юще , ᲂу҆ми́льнѡ гл҃емъ , пᲂмᲂли́сѧ ст҃лю нико́лае , сп҃сꙋ всѣ́хъ , ᲂу҆мири́ти ми́ра , и҆ спастѝ дш҃а на́ша . Мᲂле́бными пѣ́сньми сше́дшесѧ празнᲂлю́бцы , на́шегѡ застꙋ́пника честно́е пренесе́нїе , ра́дᲂстнѡ вᲂсхва́лимъ . и҆́же всѧ̀ страны̀ прᲂсвѣща́етъ чꙋдесы̀ , и҆ скᲂрбѧ́щїѧ бжⷭ҇твенѣ ᲂу҆тѣша́етъ . ѡ҆би́димыѧ и҆збавлѧ́етъ . ми́лᲂстынею бг҃а ѡ҆дᲂлжи́въ , и҆ тᲂгѡ̀ ра́ди прїѧ́тъ , стᲂкра́тнᲂе вᲂзда́нїе . да всѝ взыва́емъ є҆мꙋ̀ , пᲂмᲂли́сѧ ст҃лю нико́лае сп҃сꙋ всѣ́хъ , ᲂу҆мири́ти ми́ра , и҆ спастѝ дш҃а на́ша . А҆́нг҃льскᲂе жела́нїе , свершѝ тече́нїемъ , є҆го́же во́ плᲂти недᲂсти́же . и҆ ꙗ҆́кѡ ра́бъ пᲂкᲂри́въ свᲂемꙋ̀ влⷣцѣ хрⷭ҇тꙋ̀ . ѿ ра́ки ны́нѣ мѵ́рᲂ то́чиши , да всѧ̀ ᲂу҆диви́ши чꙋдесы̀ свᲂи́ми , и҆ к̾ бг҃ᲂви приведе́ши вѣ́рныѧ . не ѿ ба́ра ны́нѣ призыва́емъ тѧ , нᲂ ѿ го́рнѧгѡ і҆єрⷭ҇ли́ма , и҆дѣ́же ра́дᲂстнѡ ликꙋ́еши , сᲂ а҆пⷭ҇лы и҆ прᲂро́ки и҆ ст҃ли . нᲂ пᲂмᲂли́сѧ бг҃ᲂно́се нико́лае сп҃сꙋ всѣ́хъ , ᲂу҆мири́ти ми́ра , и҆ спастѝ дш҃а на́ша .

сла́ва . гла́съ , ѕ҃ . Ст҃лемъ ᲂу҆дᲂбре́нїе , и҆ ѻ҆ц҃е́мъ сла́вꙋ , и҆сто́чника чꙋде́съ , и҆ вѣ́рнымъ застꙋ́пника вели́ка , сᲂше́дшесѧ ѽ празднᲂлю́бцы , пѣ́снеными пᲂхвала́ми вᲂспᲂе́мъ гл҃юще , ра́дꙋисѧ ми́рѧнѡмъ храни́телю , и҆ намѣ́стниче чⷭ҇тны́и , и҆ сто́лпе непᲂдви́жимыи . ра́дꙋисѧ свѣти́льниче всесвѣ́тлыи , и҆́же мирскі́ѧ кᲂнцы̀ прᲂсвѣща́ѧ чꙋдесы̀ . ра́дꙋисѧ скᲂрбѧ́щимъ бжⷭ҇твенаѧ ра́дᲂсте , и҆ ѡ҆би́димымъ те́плыи пᲂбо́рниче . и҆ ны́нѣ всебл҃же́нне нико́лае , непреста́й мᲂлѧ́сѧ хрⷭ҇тꙋ̀ бг҃ꙋ , ѡ҆ и҆́же вѣ́рᲂю и҆ любо́вїю чтꙋ́щихъ прⷭ҇нᲂра́дᲂстнꙋю , и҆ всепра́зднественꙋю па́мѧть твᲂю̀ . и҆ ны́нѣ , пра́здникꙋ .

та́же , вы́хᲂдъ . прᲂки́менъ , дню̀ .

Ѿ при́тчей , чте́нїе .

Па́мѧть пра́веднагѡ съ пᲂхвало́ю , и҆ блгⷭ҇ве́нїе гдⷭ҇не над̾ главо́ю є҆гѡ̀ . бл҃же́нъ чл҃къ , и҆́же ѡ҆брѣ́те премꙋ́дрᲂсть , и҆ сме́ртенъ и҆́же ᲂу҆вѣ́де ра́зꙋмъ . лꙋ́чше бᲂ сїю̀ кꙋпᲂва́ти , не́жели зла́та , и҆лѝ сребра̀ сᲂкро́вища , честнѣ́йши же є҆́сть ка́менїѧ мнᲂгᲂцѣ́ннагѡ . все́же честно́е недᲂсто́йнᲂ є҆́сть є҆́й , дᲂлгᲂта́ бᲂ дне́й и҆ лѣ́та живᲂта̀ в̾ десни́цѣ є҆ѧ̀ , и҆ в̾ шꙋ́ицѣ є҆ѧ̀ бᲂга́тьствᲂ и҆ сла́ва , ѿ ᲂу҆́стъ бᲂ є҆ѧ̀ и҆схо́дитъ пра́вда , зако́нъ же и҆ млⷭ҇ть на ꙗ҆зы́цѣ но́ситъ . пᲂслꙋ́шайте ᲂу҆́бѡ менѐ ѽ ча́да , честна́ѧ бᲂ рекꙋ̀ , бл҃же́нъ чл҃къ , и҆́же пꙋтѝ мᲂѧ̀ сᲂхрани́тъ . и҆схо́ди бᲂ мᲂѝ , и҆схо́ди живᲂта̀ , и҆ ᲂу҆гᲂто́ваетсѧ хᲂтѣ́нїе ѿ́ гдⷭ҇а . сегѡ̀ ра́ди мᲂлю̀ ва́съ , и҆ пред̾лага́ю мо́й гла́съ сн҃ᲂво́мъ чл҃ческимъ . ꙗ҆́кѡ а҆́зъ премꙋ́дрᲂсть всели́хъ , сᲂвѣ́тъ и҆ ра́зꙋмъ , и҆ смы́слъ а҆́зъ призва́хъ , мо́й сᲂвѣ́тъ и҆ ᲂу҆тверже́нїе , мо́й смы́слъ , мᲂѧ́ же крѣ́пᲂсть . а҆́зъ менѐ лю́бѧщїѧ люблю̀ , а҆ взыска́ющїи менѐ ѡ҆брѧ́щꙋтъ бл҃гᲂда́ть . разꙋмѣ́йте ᲂу҆́бѡ неѕло́бивїи кᲂва́рствᲂ , ненака́заннїи же прилага́йте срⷣца̀ . пᲂслꙋ́шайте менѐ и҆ па́ки , честна́ѧ бᲂ рекꙋ̀ , и҆ ѿве́рзꙋ ѿ ᲂу҆сте́нъ мᲂи́хъ пра́вдꙋ . ꙗ҆́кѡ и҆́стинѣ пᲂꙋчи́тсѧ гᲂрта́нь мо́й , ме́рзски же предᲂмно́ю ᲂу҆стны̀ лжи́выхъ . с̾ пра́вдᲂю всѝ глаго́лы ᲂу҆́стъ мᲂи́хъ . ни что́же в̾ ни́хъ стро́пᲂтнᲂ , ни развраще́ннᲂ . всѧ̀ пра́ва сꙋ́ть разꙋмѣва́ющимъ и҆́стинꙋ , и҆ здра́ва ѡ҆брѣта́ющимъ ра́зꙋмъ , наꙋчꙋ́ бᲂ ва́съ и҆́стинѣ , да бꙋ́детъ ѡ҆́ гдⷭ҇ѣ наде́жда ва́ша , и҆ и҆спо́лнитесѧ дх҃а .

Ѿ при́тчей , чте́нїе .

=Ѿ =ᲂу҆́стъ пра́веднагѡ ка́плетъ премꙋ́дрᲂсть , ꙗ҆зы́къ же непра́веднагѡ пᲂтреби́тсѧ . ᲂу҆стны̀ мꙋже́й пра́ведныхъ свѣ́дѧтъ блгⷣть , ᲂу҆ста́ же нечести́выхъ развраща́ютсѧ . мѣ́рила льсти́ва ме́рзᲂсть пре́д̾ гдⷭ҇емъ , мѣ́рилᲂ же пра́веднᲂ прїѧ́тнᲂ є҆мꙋ̀ є҆́сть . и҆дѣ́же а҆́ще вни́детъ дᲂсажде́нїе , тꙋ̀ и҆ без̾че́стїе . ᲂу҆ста́ же пра́ведныхъ пᲂꙋча́тсѧ премꙋ́дрᲂсти . сᲂверше́нїе пра́ведныхъ наста́витъ и҆́хъ . и҆ пᲂпᲂлзнᲂве́нїе закᲂнᲂѿмета́ющихсѧ ᲂу҆пасе́тъ и҆́хъ . непо́льзꙋетъ и҆мѣ́нїе в̾ де́нь ꙗ҆́рᲂсти , пра́вда же и҆збавлѧ́етъ ѿ сме́рти . ᲂу҆́меръ пра́ведныи ѡ҆ста́ви пᲂпече́нїе , ме́рзᲂстна же быва́етъ и҆ пᲂлзка̀ нечести́выхъ пᲂги́бель . пра́вда непᲂро́чнагѡ пра́вѡ и҆справлѧ́етъ пꙋтѝ , в̾ нече́стїе же впа́даетъ без̾зако́ненъ . пра́вда мꙋже́й пра́ведныхъ и҆збавлѧ́етъ и҆́хъ , нече́стїемъ же свᲂи́мъ пᲂтребѧ́тсѧ без̾зако́ннїи . скᲂнча́вшꙋсѧ мꙋ́жꙋ пра́веднꙋ , не ѡ҆скꙋдѣ́етъ наде́жда , пᲂхвала́ же нечести́выхъ пᲂтреби́тсѧ . пра́ведникъ ѿ сѣ́ти и҆зба́витсѧ , в̾ него́же мѣ́стᲂ предае́тсѧ нечести́выи . вᲂ ᲂу҆стѣ́хъ закᲂнᲂпрестꙋ́пныхъ сѣ́ть гра́жданᲂмъ , чꙋ́вствᲂ же пра́ведныхъ спѣ́шнᲂ . в̾ бла́гᲂсти пра́ведныхъ и҆справлѧ́етсѧ гра́дъ , и҆ в̾ пᲂги́бели нечести́выхъ ра́дᲂванїе . вᲂ бл҃гᲂслᲂве́нїи пра́ведныхъ вᲂз̾вы́ситсѧ гра́дъ , ᲂу҆сты́ же нечести́выхъ раскᲂпа́етсѧ . рꙋга́етсѧ гра́жданᲂмъ лише́нныи ра́зꙋма , мꙋ́жъ же мꙋ́дръ без̾мо́лвїе во́дитъ .

Ѿ премꙋ́дрᲂсти сᲂло́мѡни , чте́нїе .

Пра́ведникъ а҆́ще пᲂсти́гнетъ скᲂнча́тисѧ , в̾ пᲂко́й бꙋ́детъ . ста́рᲂсть бᲂ честна̀ , немнᲂгᲂлѣ́тна , ни в̾ числѣ̀ лѣ́тъ и҆зᲂчте́на . сѣди́на же є҆́сть мꙋ́дрᲂсть чл҃кѡмъ , и҆ во́зрастъ ста́рᲂсти житїѐ нескве́рнᲂ . бл҃гᲂꙋго́денъ бг҃ᲂви бы́въ , и҆ вᲂз̾лю́бленъ бы́сть , и҆ живы́и пᲂсредѣ̀ грѣ́шникъ преста́висѧ . вᲂсхище́нъ бы́сть , да не ѕло́ба и҆змѣни́тъ ра́зꙋма є҆гѡ̀ , и҆лѝ ле́сть прельсти́тъ дш҃ꙋ є҆гѡ̀ , раче́нїе бᲂ ѕло́е гꙋби́тъ до́браѧ , и҆ жела́нїе по́хᲂти премѣнѧ́етъ ᲂу҆́мъ неѕло́бивъ . скᲂнча́всѧ вма́лѣ , и҆спо́лни лѣ́та до́лга . ᲂу҆го́дна бᲂ бѣ̀ гдⷭ҇ви дш҃а є҆гѡ̀ . сегѡ̀ ра́ди пᲂтща́сѧ ѿ среды̀ лꙋка́вствїѧ . лю́дїе же ви́дѣвше и҆ неразꙋмѣ́вше , ни пᲂлᲂжи́ша въ пᲂмышле́нїи такᲂва́гѡ , ꙗ҆́кѡ бл҃гᲂда́ть и҆ ми́лᲂсть на прпⷣбныхъ є҆гѡ̀ , и҆ пᲂсѣще́нїе вᲂ и҆з̾бра́нныхъ є҆гѡ̀ .

На литі́и , стихѣ́ры . гла́съ , в҃ . Ѻ҆́ч҃е нико́лае , а҆́ще и҆ ми́рскаѧ страна̀ мᲂлчи́тъ , нᲂ ми́ръ ве́сь и҆́же тᲂбо́ю прᲂсвѣще́нныи , ми́рными бл҃гᲂꙋха́нїи , и҆ чꙋде́съ мно́жествᲂмъ , взыва́етъ пᲂхва́льными пѣ́сньми . и҆ спа́сшїисѧ тᲂбо́ю не ѡ҆сꙋжде́ни , с̾сꙋщими в̾ ми́рѣхъ , и҆ мы̀ пᲂю́ще вᲂпїе́мъ , мᲂлѝ спасти́сѧ дш҃а́мъ на́шимъ . гла́съ , д҃ . Ѻ҆́ч҃е нико́лае , прест҃а́гѡ дх҃а мирᲂпᲂло́жница сы́и . ꙗ҆́кѡ в̾ ми́рѣхъ бл҃гᲂꙋха́еши , бжⷭ҇твеными а҆рама́ты . хрⷭ҇то́вымъ бᲂ а҆пⷭ҇лѡмъ пᲂдо́бникъ бы́въ , вселе́ннꙋю ѡ҆бхо́диши слᲂвесы̀ чꙋде́съ твᲂи́хъ . тѣ́мже и҆ да́льнимъ ꙗ҆́кѡ бли́зъ , вᲂ снѣ̀ ꙗ҆влѧ́ѧсѧ ѿ сме́рти и҆збавлѧ́еши , и҆́же непра́веднымъ мече́мъ ᲂу҆́мрети хᲂтѧ́щїѧ , спаса́ѧ пресла́внѡ ѿ бѣ́дъ мно́гъ призыва́ющихъ тѧ . тѣ́мже и҆ на́съ ѿ нахᲂдѧ́щихъ лю́тъ свᲂбᲂдѝ , твᲂи́ми мл҃твами . гла́съ , и҃ . До́блестей твᲂи́хъ прпⷣбне ѻ҆́ч҃е плᲂды̀ , прᲂсвѣти́лъ є҆сѝ вѣ́рныхъ срⷣца̀ . кто́ бᲂ слы́ша без̾мѣ́рнᲂе твᲂѐ смире́нїе , и҆ терпѣ́нїе не ᲂу҆диви́тсѧ ; є҆́же к̾ ни́щимъ ти́хᲂсть , къ скᲂрбѧ́щимъ ᲂу҆тѣше́нїе . всѧ̀ бг҃ᲂлѣ́пнѡ наꙋчи́лъ є҆сѝ , ст҃лю нико́лае . и҆ ны́нѣ не ᲂу҆вѧда́емымъ вѣнце́мъ ᲂу҆вѧзе́сѧ , мᲂли́сѧ ѡ҆ дш҃а́хъ на́шихъ . На хвалꙋ̀ пᲂте́клъ є҆сѝ гдⷭ҇ню нико́лае , вᲂ вре́меннѣй жи́зни , и҆ то́й тѧ прᲂсла́ви на нбⷭ҇нѣй и҆́стиннѣй жи́зни . тѣ́мже дерзнᲂве́нїе стѧжа́въ к̾ немꙋ̀ , мᲂлѝ спастѝ дш҃а на́ша . сла́ва . гла́съ , ѕ҃ . Бл҃гі́и ра́бе вѣ́рныи , дѣ́лателю винᲂгра́да хрⷭ҇то́ва . ты̀ тѧгᲂтꙋ̀ дневнꙋ́ю пᲂне́слъ є҆сѝ , ты̀ да́нныи ти тала́нтъ вᲂз̾расти́лъ є҆сѝ , и҆ пᲂ тебѣ̀ прише́дшимъ неревнᲂва́въ . тѣ́мже и҆ врата̀ нбⷭ҇наѧ ѿверзо́шатисѧ . вни́ди в̾ ра́дᲂсть гдⷭ҇а свᲂегѡ̀ , и҆ мᲂлѝ ѡ҆ на́съ , ст҃е нико́лае . и҆ нн҃ѣ , пра́здникꙋ .

На стихо́внѣ , стⷯры . гла́съ , д҃ . поⷣ . ꙗ҆́кѡ до́блѧ .= Ѕ=вѣздꙋ̀ незахᲂди́мꙋю ,꙳ мнᲂгᲂсвѣ́тлагѡ сл҃нца ,꙳ и҆ нб҃ᲂ дш҃е́внᲂ , и҆з̾глаго́лющее ,꙳ сла́вꙋ бж҃їю спасе́нꙋю ,꙳ и҆ бжⷭ҇твенагѡ прᲂпᲂвѣ́дника ,꙳ прᲂсвѣ́щника ꙗ҆зы́кѡмъ .꙳ рѣкꙋ̀ и҆злива́ющꙋ во́ды ра́зꙋма ,꙳ и҆ напаѧ́ющꙋ вѣ́рныхъ срⷣца̀ ,꙳ да ᲂу҆блажи́мъ нико́лꙋ ,꙳ пресла́внагѡ ст҃лѧ .

сти́хъ : честна̀ пре́д̾ гдⷭ҇емъ , сме́рть прпⷣбныхъ є҆гѡ̀ . Въ мо́рѣ ст҃лю ,꙳ ꙗ҆влѧ́ютсѧ ше́ствїѧ твᲂѧ̀ ,꙳ па́че ᲂу҆ма̀ чл҃ческа .꙳ взѧ́тъ бᲂ ѿ ра́ки кᲂвче́гъ ,꙳ и҆ къ за́падѡмъ до́йде ѿ вᲂсто́ка .꙳ бл҃гᲂче́стнѡ пᲂслѣ́дствꙋющимъ ,꙳ ᲂу҆ченико́мъ твᲂи́мъ ѻ҆́крестъ ,꙳ че́сть твᲂрѧ́щимъ пᲂвелѣ́нїемъ влⷣки всѣ́хъ ,꙳ нико́лае пресла́вне .

сти́хъ : і҆єре́и твᲂѝ ѡ҆блекꙋ́тсѧ в̾ пра́вдꙋ , и҆ прпⷣбнїи твᲂѝ вᲂз̾ра́дꙋютсѧ . Ди́внымъ вᲂсхᲂжде́нїемъ ,꙳ во́дꙋ ѡ҆ст҃и́лъ є҆сѝ .꙳ и҆ к̾ ба́рꙋ гра́дꙋ прише́лъ є҆сѝ ,꙳ мѵ́рᲂ и҆стᲂчи́лъ є҆сѝ сла́вне ,꙳ и҆ стра́сти не и҆сцѣ́льныѧ и҆сцѣлѝ .꙳ тꙋ̀ сꙋ́щимъ бы́сть прибѣ́жище ,꙳ и҆ застꙋ́пникъ и҆ и҆зба́витель .꙳ кᲂ всѣ́хъ цр҃ю и҆ сп҃сꙋ мᲂлѧ́сѧ ,꙳ нико́лае ст҃лю .

сла́ва . гла́съ , ѕ҃ . Чл҃че бж҃їи , вѣ́рныи ра́бе , слꙋго̀ гдⷭ҇нь , мꙋ́жꙋ жела́нїи , сᲂсꙋ́де и҆з̾бра́нныи , сто́лпе и҆ ᲂу҆тверже́нїе цр҃кви , црⷭ҇твїю наслѣ́дниче , непремᲂлчѝ вᲂпїѧ̀ за ны̀ ко́ гдⷭ҇ꙋ .

и҆ ны́нѣ , пра́здникꙋ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , д҃ . Ѻ҆те́чествᲂ свᲂѐ ми́рскїи гра́дъ не ѡ҆ста́вль дх҃ᲂмъ , преди́внᲂ же во́ градъ ба́рскїи , пресла́внѡ тѣ́лᲂмъ пренесе́сѧ а҆рхїєре́ю нико́лае . и҆ пᲂ всю́дꙋ мно́жества чл҃ческаѧ , свᲂи́мъ прише́ствїемъ вᲂз̾весели́лъ є҆сѝ , бᲂлѧ́щїѧ и҆сцѣлѧ́ѧ . тѣ́мже тѧ̀ мо́лимъ ст҃лю , мᲂлѝ хрⷭ҇та̀ бг҃а да спасе́тъ дш҃а на́ша . двⷤа .

и҆ бцⷣе дв҃ᲂ ра́дꙋисѧ ,= аⷤ .=

На ᲂу҆́трени , на бг҃ъ гдⷭ҇ь , трᲂпа́рь , вᲂскрⷭ҇нъ , вⷤ . сла́ва , ст҃о́мꙋ . и҆ ны́нѣ , боⷢ҇ , по́ гласꙋ . А҆́ще ли , в̾ пᲂпра́з̾днествѣ , препᲂлᲂве́нїѧ , и҆ вᲂз̾несе́нїѧ , трᲂпа́рь , ст҃о́мꙋ , вⷤ . сла́ва , и҆ ны́нѣ , пра́здникꙋ .= Пᲂ а҃ , стихᲂло́гїи , сѣда́ленъ , пра́здникꙋ , вⷤ . Пᲂ в҃ , стихᲂло́гїи , сѣда́ленъ . гла́съ , д҃ . Оу҆диви́лъ є҆сѝ влⷣкᲂ ст҃лѧ свᲂегѡ̀ вᲂ страна́хъ , по́давъ є҆мꙋ̀ чꙋде́съ бл҃гᲂда́ть , недꙋ́ги разли́чныѧ ѿ чл҃къ ѿгᲂни́ти , и҆ сꙋ́щїѧ вᲂ ᲂу҆́захъ и҆збавлѧ́ти . ѡ҆би́димыѧ же ѿ лю́тъ и҆з̾и҆ма́ти . є҆мꙋ́же мᲂле́бнѡ вᲂпїе́мъ , ст҃ы́и нико́лае и҆зба́ви на́съ ѿ вра́гъ на́шихъ . =два́жды . сла́ва , и҆ ны́нѣ , боⷢ҇ . Нечи́стыхъ пᲂмышле́нїи мᲂи́хъ мно́жества , и҆ без̾мѣ́стныхъ мы́слей ѡ҆бꙋрева́нїѧ , кто̀ и҆зрещѝ мо́жетъ пренепᲂро́чнаѧ . настᲂѧ́нїѧ же беспло́тныхъ вра́гъ мᲂи́хъ , кто̀ и҆спᲂвѣ́сть , и҆ си́хъ ѕло́бꙋ ; нᲂ твᲂе́ю мᲂльбо́ю бл҃га́ѧ , си́хъ ми всѣ́хъ и҆збавле́нїе да́рꙋй .

Пᲂ пᲂлїєлеѡ́сѣ , сѣда́ленъ . гла́съ , а҃ . Ѡ҆свѧ́щь себѐ житїе́мъ сᲂверше́нымъ , и҆ ꙗ҆ви́сѧ ст҃ль бг҃а вы́шнѧгѡ . ѿ него́ же ᲂу҆крѣплѧ́емь , є҆рети́чествꙋющихъ ᲂу҆ста̀ загради́лъ є҆сѝ . тѣ́мъ твᲂѐ пренесе́нїе свѣ́тлѡ пра́з̾днꙋемъ , хрⷭ҇та̀ велича́юще . два́жды . сла́ва , и҆ ны́нѣ , боⷢ҇ . Без̾невѣ́стнаѧ чⷭ҇таѧ бцⷣе дв҃ᲂ , є҆ди́на вѣ́рнымъ пред̾ста́тельнице и҆ пᲂкро́ве , бѣ́дъ и҆ скᲂрбе́й , и҆ лю́тыхъ ѡ҆бстᲂѧ́нїи , всѣ́хъ и҆зба́ви , и҆́же на тѧ̀ ᲂу҆пᲂва́нїе ѻ҆трᲂкᲂви́це и҆мꙋ́щихъ . и҆ дш҃а на́ша спасѝ , бжⷭ҇твеными мᲂльба́ми сѝ .

степе́нна , д҃ гᲂ гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . Честна̀ пре́д̾ гдⷭ҇емъ , сме́рть прпⷣбныхъ є҆гѡ̀ .= сти́хъ . ч=то̀ вᲂз̾да́мъ гдⷭ҇ви ѡ҆ всѣ́хъ , и҆́хже вᲂз̾да́стъ ми . всѧ́кᲂ дыха́нїе .

є҆ѵⷢ҇а́лїе , ѿ і҆ѡа́нна . заⷱ҇ , л҃є , ѿ пᲂлꙋ̀ .

ѱало́мъ , н҃ . сла́ва . мл҃твъ ра́ди ст҃лѧ , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

Пᲂми́лꙋй мѧ бж҃е пᲂ вели́цѣй млⷭ҇ти твᲂе́й пᲂ мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , ѕ҃ . Наслѣ́дниче бж҃їи сᲂприча́стниче хрⷭ҇то́въ , слꙋго̀ гдⷭ҇нь ст҃е нико́лае , пᲂ и҆́мени твᲂемꙋ̀ та́кѡ и҆ житїѐ твᲂѐ . прᲂсїѧ́ бᲂ съ сѣди́нами ра́зꙋмъ , свидѣ́тельствᲂваше свѣ́тлᲂсть лица̀ твᲂегѡ̀ , дш҃е́внᲂе неѕло́бїе . и҆звѣ́ствᲂваше кро́тᲂсть , сло́ва мᲂлчали́вᲂе . жи́знь твᲂѧ̀ сла́вна , и҆ ᲂу҆спе́нїе сᲂ ст҃ы́ми , мᲂлѝ ѡ҆ дш҃а́хъ на́шихъ .

Кано́нъ , пра́здникꙋ , сᲂ і҆рмᲂсо́мъ , на́ ѕ҃ . и҆ ст҃о́мꙋ , на́ и҃ . =Кано́нъ , ст҃о́мꙋ . гла́съ , и҃ . пѣ́снь , а҃ . і҆рмо́съ . Пѣ́снь вᲂз̾сле́мъ лю́дїе чꙋдᲂтво́рцꙋ бг҃ꙋ , свᲂбо́ждьшемꙋ і҆и҃лѧ ѿ рабо́ты , пѣ́снь пᲂбѣ́днꙋю пᲂю́ща и҆ вᲂпїю́ща , вᲂспᲂе́мъ тебѣ̀ є҆ди́нᲂмꙋ влⷣцѣ . =запѣ́в̾ : Ст҃лю хрⷭ҇то́въ нико́лае , мᲂлѝ бг҃а ѡ҆ на́съ . Пѣ́снь ᲂу҆сте́нъ мᲂи́хъ прїимѝ бл҃гᲂда́телю хрⷭ҇тѐ , и҆ ᲂу҆ѧсни́ ми ꙗ҆зы́къ , не пᲂмина́ѧ мно́гихъ мᲂи́хъ грѣхо́въ . да вᲂспᲂю̀ честно́е житїѐ твᲂегѡ̀ ст҃лѧ , в̾ па́мѧть пренесе́нїѧ мᲂще́й є҆гѡ̀ . Чꙋдᲂтво́рныи да́ръ прїе́мъ , и҆ терпѣ́нїѧ вѣнцы̀ , ст҃льствᲂмъ ᲂу҆краша́ѧсѧ , бг҃ꙋ пᲂмᲂли́сѧ ѻ҆́ч҃е , прегрѣше́нїемъ прᲂще́нїе дарᲂва́ти на́мъ , сла́вѧщимъ твᲂѐ пренесе́нїе . Па́стырь хрⷭ҇то́ва ста́да ѻ҆́ч҃е , и҆ны́мъ ѻ҆вца́мъ пᲂсыла́ешисѧ , к̾ лати́нскᲂмꙋ ꙗ҆зы́кꙋ . да всѣ́хъ ᲂу҆диви́ши чꙋдесы̀ твᲂи́ми , и҆ кᲂ хрⷭ҇то́ви приведе́ши бл҃же́нне . є҆мꙋ́же и҆ ѡ҆ на́съ мᲂли́сѧ непреста́ннѡ .= боⷢ҇ . Д=але́че сꙋ́ще и҆нᲂгда̀ ꙗ҆зы́честїи наро́ди , ржⷭ҇тво́мъ твᲂи́мъ бцⷣе , къ бг҃ꙋ прибли́жихᲂмсѧ . ты́ бᲂ менѐ ѡ҆бᲂжи́вшагᲂ пᲂрᲂдѝ , и҆ дре́внїѧ клѧ́твы свᲂбо́ждьшагᲂ свᲂе́ю кро́вїю .

И҆́нъ , кано́нъ , нико́лѣ . гла́съ , д҃ . пѣ́снь , а҃ . і҆рмо́съ . Ѿве́рзꙋ ᲂу҆ста̀ мᲂѧ̀ . запѣ́въ : Ст҃лю хрⷭ҇то́въ нико́лае , мᲂлѝ бг҃а ѡ҆ на́съ . Прᲂсвѣтѝ дш҃ꙋ и҆ срⷣце мᲂлю́тисѧ , свѣтᲂда́вче тва́ри сᲂдѣ́телю , да́ръ пᲂда́ждь ми , вᲂспѣва́нїемъ пѣ́ти твᲂегѡ̀ ᲂу҆го́дника пречестна́гѡ . и҆́мже ми́ръ ѿ ско́рби и҆зба́ви . двⷤа . сла́ва . Є҆ди́нꙋ ты̀ ѡ҆брѣ́тъ премꙋ́дрᲂсть сли́чнꙋ , па́че ᲂу҆ма̀ и҆ смы́сла , вельмѝ ᲂу҆ви́дѣвъ , и҆ разᲂрѝ без̾бо́жнꙋю ле́сть . ᲂу҆мꙋдри́лъ є҆сѝ кᲂнцы̀ , бж҃їимъ ᲂу҆че́нїемъ . и҆ ны́нѣ , боⷢ҇ . Зачина́етсѧ превѣ́чныи , и҆ сᲂверше́ныи ѡ҆бнᲂвлѧ́етсѧ . и҆з̾ ѻ҆трᲂкᲂви́цы дѣ́тищь ражда́етсѧ . є҆го́же прᲂпᲂвѣ́да вᲂ двѣ̀ сꙋществѣ̀ , вᲂ є҆ди́нᲂмъ сᲂста́вѣ бг҃ᲂбл҃же́нне . Катава́сїѧ : Вᲂскрⷭ҇нїѧ дн҃ь .= в̾ пᲂпра́з̾днествѣ же препᲂлᲂве́нїѧ , и҆ вᲂз̾несе́нїѧ гдⷭ҇нѧ , катава́сїѧ , пра́здникꙋ .=

пѣ́снь , г҃ . і҆рмо́съ . Нбⷭ҇нᲂмꙋ крꙋ́гꙋ верхᲂтво́рче гдⷭ҇и , и҆ цр҃кви зижди́телю , ты̀ менѐ ᲂу҆твердѝ в̾ любвѝ свᲂе́й . жела́нїемъ сы́и кра́й , и҆ вѣ́рнымъ ᲂу҆тверже́нїе , є҆ди́не чл҃кᲂлю́бче . Неѕло́бивыи нра́вᲂмъ , и҆ кро́тᲂкъ ѻ҆́бразᲂмъ , житїѐ и҆мѣ́ѧ а҆́нг҃льскᲂе , бг҃ᲂбл҃же́нне нико́лае . непреста́й ѡ҆ на́съ мᲂлѧ́сѧ , є҆ди́нᲂмꙋ чл҃кᲂлю́бцꙋ . Кᲂто́рыи гра́дъ бл҃же́нне , не и҆мѣ́етъ тебѐ пᲂмо́щника ; каѧ́ ли дш҃а , не призыва́етъ твᲂегѡ̀ и҆́мени ; ко́егᲂ ли мѣ́ста не присѣща́еши , свᲂи́ми чꙋдесы̀ , ᲂу҆дивлѧ́ѧ всѧ̀ нико́лае . Ба́рскїи ᲂу҆́бѡ гра́дъ прїѧ́тъ тѣ́лᲂ твᲂѐ , а҆ дх҃ъ тво́й в̾ вы́шнѣмъ і҆єрⷭ҇ли́мѣ , и҆дѣ́же ликꙋ́еши сᲂ прⷪ҇рки и҆ а҆пⷭ҇лы , и҆ ст҃ли кꙋ́пнѡ , мᲂлѧ́сѧ ѡ҆ на́съ , є҆ди́нᲂмꙋ чл҃кᲂлю́бцꙋ . боⷢ҇ . Прᲂсвѣще́нїе ми и҆спрᲂсѝ , пречⷭ҇таѧ влⷣчце , ѡ҆мраче́нᲂмꙋ грѣхѝ мно́гими , пᲂро́ждьшаѧ свѣ́та всемꙋ̀ ми́рꙋ . страстнꙋ́ю мглꙋ̀ дале́че ѿженѝ , є҆ди́на бг҃ᲂблаже́наѧ .

и҆́нъ , і҆рмо́съ . Твᲂѧ̀ пѣвцы̀ бцⷣе . Є҆стество́мъ тѧ ѡ҆брѣто́хᲂмъ , крѣ́пкѡ ᲂу҆тѣше́нїе и҆ свѣ́тъ . и҆ ѕлы́хъ и҆змѣне́нїе . и҆́же ско́рбьми ѡ҆держи́мїи , и҆ без̾бо́жными ѡ҆мраче́нїи . двⷤа . сла́ва . Ст҃лю нико́лае , бж҃їѧ ᲂу҆ста̀ бы́въ , и҆з̾ ᲂу҆́стъ во́лка непрїѧ́знена , лю́ди и҆зба́вилъ є҆сѝ сла́вне . и҆ приве́лъ є҆сѝ твᲂрцꙋ̀ да́ръ , даѧ́и и҆сцѣле́нїѧ всѣ́мъ . и҆ ны́нѣ , боⷢ҇ . Є҆ди́нъ рᲂди́тисѧ и҆зво́ли пло́тїю и҆з̾ тебѐ . вы́ше сло́ва сы́и сло́вᲂ , бг҃ᲂмт҃и пречⷭ҇таѧ . ᲂу҆чи́телѧ и҆збра́въ и҆ слꙋгꙋ̀ , ст҃лѧ пе́рвагѡ .

кᲂнда́къ , и҆ и҆́кᲂсъ , пра́здникꙋ .

сѣда́ленъ , ст҃лю . гла́съ , а҃ . Пренесе́нїе твᲂи́хъ честны́хъ мᲂще́й , пᲂлᲂже́нїе на́мъ пра́з̾днества свѣ́тла , ст҃лю гдⷭ҇нь бы́сть прехва́льне . ꙗ҆́же хва́лимъ бл҃гᲂче́стнѡ и҆ мꙋ́дренѡ , чтꙋ́ще тебѐ незахᲂди́магᲂ свѣ́та , вѣ́рнымъ дᲂбро́та . двⷤа . сла́ва , и҆ ны́нѣ , пра́здникꙋ .

пѣ́снь , д҃ . і҆рмо́съ . Всѣ́дъ на кᲂнѧ̀ , на а҆пⷭ҇лы твᲂѧ̀ гдⷭ҇и , и҆ прїѧ́тъ рꙋка́ма си ᲂу҆зды̀ и҆́хъ , и҆ спасе́нїе бы́сть є҆жде́нїе твᲂѐ . вѣ́рᲂю вᲂпїю́щимъ тѝ , сла́ва си́лѣ твᲂе́й гдⷭ҇и . Свѣ́тᲂмъ вы́шнѧгѡ ѡ҆зарѧ́емъ ст҃лю , мᲂѐ срⷣце прᲂсвѣтѝ , и҆ тмꙋ̀ грѣхо́внꙋю ѿженѝ . да ра́дꙋѧсѧ пᲂю̀ твᲂѐ ст҃о́е пренесе́нїе . Вᲂстꙋ́пль на лѣ́ствицꙋ дᲂбрᲂдѣ́телей бл҃же́нне , чꙋдᲂтво́рецъ ꙗ҆ви́сѧ пᲂ все́й землѝ нико́лае . и҆ сегѡ̀ ра́ди ѿ ми́ръ ба́рстїи лю́дїе , прїе́млютъ ст҃ы́ѧ мо́щи твᲂѧ̀ . І҆єре́и вѣ́рнїи ѡ҆ тебѣ̀ хва́лѧтсѧ , и҆ кн҃зи хрⷭ҇тᲂлюби́вїи призыва́ютъ тѧ̀ , въ бранѣ́хъ пᲂмо́щника . и҆ мы̀ недᲂсто́йнїи пᲂд̾виза́емъ тѧ , к̾ бг҃ꙋ за ны̀ мᲂли́тисѧ нико́лае . боⷢ҇ . Чи́ны а҆́нг҃льскїѧ ᲂу҆дивлѧ́етъ бцⷣе , та́йны твᲂеѧ̀ глꙋбина̀ . и҆ бѣ́сы смꙋща́етъ , твᲂегѡ̀ ѻ҆́браза и҆ко́на . и҆ мы̀ кла́нѧемсѧ , вѣ́дꙋще тѧ бж҃їю мт҃рь .

и҆́нъ , і҆рмо́съ . Неи҆з̾слѣ́днᲂмꙋ бж҃їю сᲂвѣ́тꙋ . Нача́льнымъ бг҃ᲂгла́се бж҃їимъ прича́стїемъ , втᲂры́и свѣ́тъ ꙗ҆ви́сѧ , сїѧ́нїемъ прᲂсвѣща́емъ . слꙋжи́тель бᲂ є҆сѝ дᲂбрᲂдѣ́тели , преи҆зѧ́щенъ сла́вᲂю . двⷤа . сла́ва . И҆зба́ви ста́дᲂ свᲂѐ ѿ грѣхо́вныѧ бꙋ́ри , бѣ́дъ же и҆ во́лнъ прᲂти́вныхъ . ввᲂдѧ́ ны прⷭ҇нѡ к̾ приста́нищемъ без̾во́лненымъ , спасе́ными твᲂи́ми мл҃твами . и҆ ны́нѣ , боⷢ҇ . Є҆стество́мъ несказа́ннагᲂ вы́шшагᲂ свѣ́та , ꙗ҆́кѡ бᲂга́тьствᲂмъ млрⷭ҇дїѧ , ро́ждьшаѧ несказа́ннѡ , ѡ҆ ᲂу҆бо́жавшихъ на́съ пречⷭ҇таѧ , бж҃їимъ да́рᲂмъ ѡ҆бᲂга́ти .

пѣ́снь , є҃ . і҆рмо́съ . Мра́къ дш҃и мᲂеѧ̀ ѿженѝ свѣтᲂда́вче хрⷭ҇тѐ бж҃е , зачалᲂбы́тнꙋю тмꙋ̀ и҆згна́въ бе́здны , и҆ да́рꙋй ми свѣ́тъ пᲂвелѣ́нїи твᲂи́хъ сло́ве , да ᲂу҆́треннюѧ прᲂславлѧ́ю тѧ̀ . Въ ми́рѣхъ прⷭ҇то́лъ и҆мѣ́лъ є҆сѝ , в̾ ба́рѣ тѣ́лᲂ скры́лъ є҆сѝ . и҆ дх҃ᲂмъ на́ нб҃си пребыва́еши , ст҃лю нико́лае , сᲂ а҆пⷭ҇лы ꙗ҆́кѡ а҆пⷭ҇лъ . с̾ ни́ми же ѡ҆ на́съ мᲂлѝ , пᲂю́щихъ твᲂѐ пренесе́нїе . Всѣ́хъ хрⷭ҇тїа́нъ наде́жа , и҆ ѡ҆би́димымъ ве́лїи застꙋ́пникъ , и҆ бᲂлѧ́щимъ цѣли́тель , печа́льнымъ ᲂу҆тѣ́шитель , и҆ к̾ бг҃ꙋ ѿ чл҃къ хᲂда́тай , странѣ̀ на́шей ми́ръ и҆спрᲂсѝ . и҆ спаса́й ны ѿ пᲂга́ныхъ нахᲂжде́нїѧ . Пᲂгрꙋже́нꙋю дш҃ꙋ мᲂю̀ мно́гими страстьмѝ нико́лае , ᲂу҆мерщве́нꙋю грѣхᲂпаде́нїемъ , ѡ҆живѝ твᲂи́ми мл҃твами . и҆ напра́ви на пᲂкаѧ́нїе , да с̾ вѣ́рными всѣ́ми твᲂѐ сла́влю пренесе́нїе . боⷢ҇ . Є҆го́же тмы̀ а҆́нг҃льскїѧ , и҆ серафи́мскїѧ тᲂлпы̀ ᲂу҆жаса́ютсѧ , и҆ разꙋ́мнаѧ тва́рь трепе́щетъ , тᲂгѡ̀ ꙗ҆́кѡ младе́нца дв҃це пита́еши . є҆го́же ѡ҆бра́знᲂ на рꙋкꙋ̀ твᲂе́ю ви́дѧще , всегда̀ пᲂклᲂнѧ́емсѧ .

и҆́нъ , і҆рмо́съ . Оу҆диви́шасѧ всѧ́ческаѧ . Мно́гимъ чꙋдᲂтвᲂре́нїемъ , кра́снѣ но́зѣ стѧжа́въ , всѣ́мъ бл҃га́ѧ бл҃гᲂвѣсти́лъ є҆сѝ . ѿ вражды̀ ве́тхїѧ чꙋ́жа твᲂрѧ̀ , бж҃їимъ наꙋче́нїемъ спаси́ ны сщ҃е́нниче . двⷤа . сла́ва . ѽ =вы́ше ᲂу҆ма̀ нико́лае , на хребе́тъ мᲂрскі́и всѣ́дъ , сᲂ бл҃гᲂгᲂвѣ́йными мꙋ́жи , мно́гꙋ пꙋчи́нꙋ преше́дъ , ко́ градꙋ ба́рскꙋ прише́лъ є҆сѝ , бл҃же́нне нико́лае . =и҆ ны́нѣ , боⷢ҇ . Щи́тъ вѣ́рнымъ , бж҃їѧ мт҃и дв҃ᲂ . тѧ̀ вᲂи́стинꙋ сла́вимъ , а҆́нг҃льски зᲂвꙋ́ще ти , ра́дꙋисѧ блгⷭ҇ве́наѧ и҆ бл҃гᲂда́тнаѧ , слы́шанїе и҆ гл҃анїе стра́шнᲂ , и҆ ди́внᲂ пᲂко́ище влⷣцѣ тва́ри всѧ́кїѧ .

пѣ́снь , ѕ҃ . і҆рмо́съ . Ꙗ҆́кᲂже пррⷪ҇ка и҆зба́ви и҆з̾ глꙋбины̀ преи҆спо́днїѧ , хрⷭ҇тѐ бж҃е , и҆ менѐ ѿ грѣ́хъ мᲂи́хъ и҆зба́ви , ꙗ҆́кѡ чл҃кᲂлю́бецъ . и҆ напра́ви живо́тъ мо́й мᲂлю́тисѧ . Ꙗ҆́кѡ ѿ ѻ҆кри́на бжⷭ҇твеныѧ ти цр҃кви , нескꙋ́днѡ прїима́емъ здра́вїе тѣлесе́мъ , и҆ дш҃а́мъ ѡ҆чище́нїе , ст҃лю нико́лае . чꙋдеса́ бᲂ то́чиши бл҃гᲂда́тїю , несꙋмѣ́ннᲂю вѣ́рᲂю ᲂу҆пᲂва́ющимъ к̾ тебѣ̀ . Ѿ напа́стей раз̾ли́чныхъ , и҆ бѣ́дъ лю́тыхъ , и҆ скᲂрбе́й ѡ҆держа́щихъ ны . и҆ ѿ разли́чныхъ ѕлы́хъ ѻ҆́ч҃е , ꙗ҆́кѡ хрⷭ҇то́въ ᲂу҆го́дникъ пресла́вне , и҆зба́ви рабы̀ свᲂѧ̀ , дᲂстᲂдо́лжнѡ чтꙋ́щїѧ твᲂѐ ст҃о́е пренесе́нїе . Грѣхо́внымъ пла́менемъ и҆сте́рпъ , и҆ жите́йскимъ вѣ́трᲂмъ пᲂрева́емъ , ꙗ҆́кѡ дрꙋго́е сл҃нце ѻ҆́ч҃е , пᲂдо́бїе твᲂегѡ̀ ѻ҆́браза ви́дѣвъ . твᲂи́ми мл҃твами да сᲂгрѣ́юсѧ , слꙋжи́телю хрⷭ҇то́въ нико́лае . боⷢ҇ . Земны́хъ ᲂу҆́мъ , нбⷭ҇ныѧ та́йны неꙋвѣ́сть . ни тва́рь твᲂрца̀ ра́зꙋма недᲂмы́слитсѧ . прехо́дитъ бᲂ ᲂу҆ма̀ чл҃ча , ѿ дв҃ы ржⷭ҇тво̀ гдⷭ҇не . є҆́йже мᲂлѧ́щесѧ вѣ́рᲂю , грѣхо́въ прᲂсты́ню прїи́мемъ .

и҆́нъ , і҆рмо́съ . Бжⷭ҇твенᲂе сѐ . И҆́же лю́демъ бж҃їимъ спасе́нїе ᲂу҆гᲂто́валъ є҆сѝ . пло́тьскимъ пᲂдо́бїемъ ꙗ҆влѧ́ющагᲂсѧ , мно́гїѧ ра́ди бл҃гᲂда́ти , нико́лае прᲂпᲂвѣ́дниче , и҆ ꙗ҆зы́кѡмъ ᲂу҆чи́телю . двⷤа . сла́ва . И҆мѣ́лъ є҆сѝ пꙋ́ть мо́ре , и҆ стезѝ во́ды сᲂтвᲂри́лъ є҆сѝ . и҆ не пᲂзна́шатисѧ си́мъ стᲂпы̀ , ꙗ҆́кѡ дв҃дъ дх҃ᲂмъ пррⷪ҇чествᲂва бл҃же́нне ст҃лю . и҆ ны́нѣ , боⷢ҇ . Ты̀ две́рь свѣ́та сᲂтвᲂри́сѧ , и҆ цр҃кви сла́вы твᲂеѧ̀ бы́сть . гᲂра̀ присѣ́ннаѧ . чꙋдеса̀ прᲂро́кѡмъ . дв҃ᲂ ѻ҆трᲂкᲂви́це бг҃ᲂбл҃гᲂда́тнаѧ .

кᲂнда́къ . гла́съ , г҃ . Взы́де ꙗ҆́кѡ ѕвѣзда̀ ѿ вᲂсто́ка дᲂ за́пада , твᲂѧ̀ мо́щи ст҃лю нико́лае . мо́ре же ѡ҆ст҃и́сѧ ше́ствїемъ ти . и҆ гра́дъ ба́рскїи прїе́млѧ тᲂбо́ю бл҃гᲂда́ть . на́съ бᲂ ра́ди пᲂказа́сѧ чꙋдᲂтво́рецъ и҆зѧ́щенъ , преди́венъ и҆ ми́лᲂстивъ . и҆́кᲂсъ . Вᲂспᲂе́мъ ны́нѣ ст҃лѧ пѣ́сньми , ми́рскимъ лю́демъ па́стырѧ и҆ ᲂу҆чи́телѧ , да мл҃твами є҆гѡ̀ прᲂсвѣти́мсѧ . се́й бᲂ ꙗ҆ви́сѧ чи́стъ ве́сь , нетлѣ́ненъ дх҃ᲂмъ . хрⷭ҇то́ви принᲂсѧ̀ же́ртвꙋ непᲂро́чнꙋ , чи́стꙋ и҆ бл҃гᲂпрїѧ́тнꙋ . ꙗ҆́кѡ ст҃ль ѡ҆чище́нъ дш҃е́ю и҆ тѣ́лᲂмъ . и҆ и҆́стиненъ цр҃кви пред̾ста́тель и҆ пᲂбо́рникъ , и҆ чꙋдᲂтво́рецъ и҆зѧ́щенъ преди́венъ и҆ ми́лᲂстивъ .

пѣ́снь , з҃ . і҆рмо́съ . На́ пᲂли мᲂле́бнѣ , и҆нᲂгда̀ мꙋчи́тель пе́щь пᲂста́ви , на мꙋче́нїе бг҃ᲂмꙋ́дрыхъ в̾ не́йже , трѝ ѻ҆́трᲂцы пѣснᲂсло́вѧхꙋ є҆ди́нагѡ бг҃а , трїѐ вᲂспѣва́хꙋ гл҃юще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Дне́сь ра́дꙋютсѧ а҆́нг҃ли бж҃їи , рыда́етъ же бѣсо́вскᲂе мно́жествᲂ . спа́слъ бᲂ є҆сѝ лю́ди ѿ напа́сти , и҆ ѿгна́лъ є҆сѝ дꙋ́хи те́мныѧ . тѣ́мъ дᲂсто́йнѡ ѡ҆дᲂлѣ́выи нарица́ешисѧ . сегѡ̀ ра́ди вᲂпїе́мъ , ѻ҆ц҃ъ на́шихъ бж҃е блгⷭ҇ве́нъ є҆сѝ . Ѡ҆держи́мїи печа́лїю не́мᲂщи , разли́чными недꙋ́ги ᲂу҆трꙋже́ны , съ вѣ́рᲂю къ ра́цѣ ти влекꙋ́тсѧ . и҆ пᲂлꙋчи́вше твᲂеѧ̀ млⷭ҇ти , быстрᲂѻ҆бра́знѡ ѿхо́дѧтъ . ра́дᲂстнѡ пᲂю́ще , ѻ҆ц҃ъ на́шихъ бж҃е блгⷭ҇ве́нъ є҆сѝ . Пред̾стᲂѧ́тъ ти бл҃же́нне , сᲂбо́ри правᲂвѣ́рныхъ люде́й . и҆ хва́лѧтсѧ ѡ҆ тебѣ̀ цр҃ко́внїи ᲂу҆чи́тели . прᲂславлѧ́ютъ же тѧ̀ цр҃ѝ , ꙗ҆́кѡ застꙋ́пника . мы́ же ти мо́лимсѧ , спасѝ на́съ нико́лае пᲂю́щихъ , ѻ҆ц҃ъ на́шихъ бж҃е блгⷭ҇ве́нъ є҆сѝ . боⷢ҇ . ѽ ка́кѡ сп҃са мᲂегѡ̀ вᲂспᲂю̀ , є҆го́же тре́петнѡ хва́лѧтъ а҆́нг҃ли . нᲂ ты̀ ꙗ҆́кѡ мт҃и , свѣ́дꙋщи мно́гᲂе милᲂсе́рдїе сыно́вне , бл҃гᲂꙋтро́бїемъ пᲂнꙋ́ди . на тѧ́ бᲂ ᲂу҆пᲂва́емъ . ты́ бᲂ за ны̀ мᲂлѧ́щи бцⷣе , ѿ мꙋ́ки и҆збавлѧ́еши .

и҆́нъ , і҆рмо́съ . Непᲂслꙋжи́ша тва́ри . Веще́й ᲂу҆мꙋ̀ всемꙋ̀ чл҃ческᲂмꙋ ѡ҆бꙋѧ́вшꙋ ѕло́бᲂю , сла́дкᲂю со́лїю и҆сцѣлѝ сло́вᲂмъ свᲂи́мъ , и҆ пѣ́ти наꙋчѝ , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ бл҃гᲂслᲂве́нъ є҆сѝ . двⷤа . сла́ва . Ѽ пресла́внаѧ твᲂѧ̀ чꙋдеса̀ ꙗ҆́же сᲂтвᲂрѝ . недꙋ́ги бᲂ и҆сцѣлѧ́еши , и҆ бѣ́дъ и҆збавлѧ́еши . всѣ́мъ вᲂпи́ти пᲂвелѣва́ѧ , препѣ́тыи ѻ҆ц҃ъ на́шихъ бж҃е бл҃гᲂслᲂве́нъ є҆сѝ . и҆ ны́нѣ , боⷢ҇ . На́шемꙋ смире́нїю застꙋ́пница , и҆ стѣна̀ бг҃ᲂрᲂди́тельнице чⷭ҇таѧ . рабѝ твᲂѝ всегда̀ вѣ́рнѡ вᲂпїе́мъ , препѣ́тыи ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . А҆́нг҃лы нб҃са̀ , на прⷭ҇то́лѣ сла́вы сѣдѧ́щагѡ , и҆ ꙗ҆́кѡ бг҃а непреста́ннѡ сла́вимагѡ , бл҃гᲂслᲂви́те по́йте , и҆ превᲂзнᲂси́те є҆гѡ̀ во́ вѣки . А҆́нг҃ли нб҃съ , ꙗ҆́кѡ слꙋжи́телѧ тѧ вᲂспрїе́млютъ . прⷪ҇рцы и҆ а҆пⷭ҇ли , ꙗ҆́кѡ клевре́та срѣта́ютъ . и҆ дх҃ъ ст҃ы́и ѡ҆ тебѣ̀ весели́тсѧ . и҆ мы̀ грѣ́шнїи ми́лᲂсти про́симъ . Вели́ка вла́сть ѿ́ бг҃а , вдана́ ти є҆́сть нико́лае . мо́ре пᲂвинꙋ́етсѧ . вᲂздꙋ́хъ пᲂслꙋ́шаетъ . и҆ ꙗ҆зы́цы пᲂкᲂрѧ́ютсѧ , ви́дѧще пресла́внаѧ твᲂѧ̀ чꙋдеса̀ . Но́вᲂмꙋ і҆зра́илю , хрⷭ҇тїа́нскᲂмꙋ наро́дꙋ , сла́внѣйши мѡѷсе́ѧ пᲂказа́лъ є҆сѝ свᲂегѡ̀ ст҃лѧ нико́лꙋ , ѿ всѣ́хъ ѕо́лъ на́съ и҆збавлѧ́юща . боⷢ҇ . Ѡ҆чище́нїе грѣхо́въ , ꙗ҆́кѡ мт҃и бж҃їѧ и҆спрᲂсѝ . и҆ рꙋ́кꙋ ми прᲂстрѝ гжⷭ҇е , пᲂгрꙋже́нᲂмꙋ вᲂ глꙋбинѣ̀ неча́ѧнїѧ . да превᲂзнᲂша́емъ тѧ во́ вѣки всѧ̀ .

и҆́нъ , і҆рмо́съ . Ѻ҆́трᲂки бл҃гᲂчести́выѧ . Вᲂзрастѐ ꙗ҆́кѡ цвѣ́тъ бл҃гᲂꙋха́ненъ , ми́рскїѧ землѝ сла́вне , всѣ́мъ принᲂсѧ̀ , бл҃гᲂꙋха́нныѧ вᲂнѧ̀ , цѣле́бныѧ да́ры хва́лѧщимъ тѧ . гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . вⷤ . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Ка́плющаѧ бж҃їѧ сла́дᲂсть сла́вне , ꙗ҆́кѡ гᲂра̀ ма́сличнаѧ . мо́ре же и҆мѣ́лъ є҆сѝ пꙋ́ть , бжⷭ҇твеными си́лами прехᲂдѧ̀ , пꙋчи́нᲂю непᲂтᲂпи́мъ взыва́ше , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . и҆ ны́нѣ , боⷢ҇ . Лико́въ є҆сте́ственыхъ ᲂу҆таи́вшисѧ , ражда́еши и҆ пребыва́еши прⷭ҇нѡ дв҃ᲂю . сло́вᲂ бᲂ рᲂдила̀ є҆сѝ . чл҃къ бы́сть прелᲂже́нїемъ бжⷭ҇твенымъ . є҆мꙋ́же всѝ пᲂе́мъ , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки .

пѣ́снь , ѳ҃ . і҆рмо́съ . Бл҃гᲂслᲂве́нъ гдⷭ҇ь бг҃ъ і҆и҃левъ , вᲂз̾дви́гнꙋвыи ро́гъ спасе́нїѧ на́мъ , в̾ дᲂмꙋ̀ дв҃дᲂвѣ ѻ҆́трᲂка свᲂегѡ̀ . в̾ ни́хже пᲂсѣтѝ на́съ вᲂсто́къ свы́ше , и҆ напра́вилъ ны̀ є҆́сть на пꙋ́ть ми́ренъ . Бл҃гᲂслᲂве́нъ гдⷭ҇ь бг҃ъ нашъ , ꙗ҆́кѡ прᲂсла́ви ст҃лѧ вᲂ страна́хъ , чꙋде́съ стрꙋѝ и҆спꙋща́юща , в̾ ми́рѣхъ и҆ в̾ латы́нѣхъ всѧ̀ и҆сцѣлѧ́юща , и҆ в̾ рꙋсѝ млⷭ҇тивнѡ пᲂсѣща́юща . До́лгимъ сно́мъ ᲂу҆снꙋ́лъ є҆сѝ , и҆ тѣ́лᲂ в̾ ба́ръ на вѣ́рꙋ пꙋсти́лъ є҆сѝ . без̾со́нныи бы́сть застꙋ́пникъ , всѣ́мъ вѣ́рᲂю призыва́ющимъ тѧ . и҆ всѧ̀ застꙋпа́ѧ ѿ напа́стей , мл҃твами твᲂи́ми нико́лае . Бл҃гᲂслᲂве́нъ нб҃ꙋ и҆ землѝ твᲂре́цъ , бг҃ъ вседержи́тель , ѻ҆ц҃ъ без̾нача́ленъ и҆ всеси́ленъ . и҆ сн҃ъ пре́жде вѣ́къ , ѿ нѣ́дръ ѿрыгнᲂве́нᲂе сло́вᲂ , и҆́мже всѧ̀ бы́ша ꙗ҆́же ѡ҆ на́съ . и҆ дх҃ъ и҆схᲂдѧ́и ст҃ы́и . трⷪ҇це ст҃а́ѧ сла́ва тебѣ̀ . боⷢ҇ . И҆зви́тїемъ слᲂве́съ , пᲂ дᲂстᲂѧ́нїю тѧ̀ пᲂхвали́ти не дᲂстиза́ю , нбⷭ҇ныхъ си́лъ пребо́льшꙋ , и҆ тва́ри всеѧ̀ честнѣ́йшꙋю , бг҃а и҆ твᲂрца̀ пᲂро́ждьши пло́тїю . є҆го́же мᲂлѝ бцⷣе , да пᲂми́лꙋетъ ны̀ в̾ де́нь сꙋ́дныи .

и҆́нъ , і҆рмо́съ . Всѧ́къ зе́менъ . Па́мѧть твᲂѧ̀ дне́сь , прино́ситъ празднество̀ . а҆пⷭ҇льскїи ли́къ , и҆ мч҃нческїи сᲂбо́ръ ра́дꙋютсѧ , и҆ пра́веднїи дс҃и . вѣ́рнїи же тѧ̀ пѣ́сньми сла́вимъ , вᲂпїю́ще , ѿ всѣ́хъ скᲂрбе́й ст҃лю хрⷭ҇то́въ и҆зба́ви ны̀ . двⷤа . сла́ва . Пресла́внаѧ па́мѧть твᲂѧ̀ , на́мъ вᲂсїѧ́ла є҆́сть . и҆ ско́рѡ свѣ́тлѡ прᲂсвѣща́ющи , ст҃лю хрⷭ҇то́въ нико́лае мꙋ́дре . тѣ́мже мо́лимъ тѧ , пᲂмѧнѝ всѣ́хъ на́съ , и҆ ѿ прᲂти́вныѧ напа́сти всѧ́кїѧ , мᲂли́твами твᲂи́ми и҆зба́ви на́съ . и҆ ны́нѣ , боⷢ҇ . Оу҆мертвѝ на́ша плᲂтьскі́ѧ стра́сти и҆ по́хᲂти , бг҃ᲂрᲂди́тельнице чⷭ҇таѧ . ᲂу҆ста́ви и҆ страсте́й на́шихъ бꙋ́рю , ᲂу҆тᲂлѝ вᲂлне́нїе по́мыслъ , ᲂу҆крѣпѝ бл҃гᲂслᲂве́наѧ пречⷭ҇таѧ срⷣца̀ , вѣ́рнѡ чтꙋ́щихъ тѧ̀ застꙋ́пницꙋ .

свѣти́ленъ . Вели́ка чꙋдеса̀ твᲂѧ̀ прест҃ы́и нико́лае . ꙗ҆́кѡ ꙗ҆ви́сѧ вᲂ снѣ̀ , бг҃ᲂмꙋ́дрᲂмꙋ кᲂнстанти́нꙋ , трѝ во́ины спа́слъ є҆сѝ , без̾ вины̀ ᲂу҆мира́юща , та́кѡ и҆ на́съ спасѝ , прест҃ы́и нико́лае ст҃лю гдⷭ҇нь . два́жды .

сла́ва , и҆ ны́нѣ , пра́здникꙋ .

На хвали́тѣхъ , стихѣ́ры , на д҃ . гла́съ , а҃ . Вᲂз̾зрѣ́въ не ᲂу҆кло́ннѡ на высᲂтꙋ̀ ра́зꙋма , и҆ ᲂу҆зрѣ́въ не ꙗ҆вле́нныѧ премꙋ́дрᲂсти глꙋбинꙋ̀ , и҆ ᲂу҆че́нїи ми́ръ ѡ҆бᲂга́тилъ є҆сѝ ѻ҆́ч҃е . ѡ҆ на́съ при́снѡ мᲂли́сѧ хрⷭ҇то́ви , ст҃лю нико́лае . Чл҃че бж҃їи вѣ́рныи ᲂу҆го́дниче , стрᲂи́телю тᲂгѡ̀ та́йнамъ , мꙋ́жꙋ жела́нїи дх҃о́вныхъ , сто́лпе ѡ҆дш҃евле́ныи , и҆ бг҃ᲂдх҃нᲂве́нныи ѻ҆рга́не . ꙗ҆́кѡ бжⷭ҇твенᲂ сᲂкро́вище ми́рскаѧ цр҃кви ѡ҆брѣ́тши тѧ стѧжа̀ , и҆ мᲂли́твеника ѡ҆ дш҃а́хъ на́шихъ . гла́съ , в҃ . Пра́вилᲂ вѣ́рѣ и҆ ѻ҆́бразъ кро́тᲂсти , пᲂказа́ тѧ ста́дꙋ свᲂемꙋ̀ хрⷭ҇то́съ бг҃ъ ст҃лю нико́лае . в̾ ми́рѣхъ ᲂу҆́бѡ бл҃гᲂꙋха́ющꙋ ти , всю́дꙋ сїѧ́ютъ свѣ́тлѡ бжⷭ҇твенаѧ твᲂѧ̀ и҆справле́нїѧ . си́рымъ и҆ вдᲂви́цамъ пред̾ста́телю . тѣ́мже мᲂлѧ̀ непреста́й , спастѝ дш҃а на́ша . Ѻ҆́ч҃е нико́лае , мирᲂпᲂло́жница мᲂще́й твᲂи́хъ ми́ры ѡ҆бᲂгаща́етъ . и҆дѣ́же и҆ свѧ́заныѧ непра́веднѡ ѡ҆сꙋжде́ныѧ . вᲂ снѣ̀ цр҃е́ви ꙗ҆́вльсѧ , и҆ свᲂи́мъ ꙗ҆вле́нїемъ свᲂбᲂди́лъ є҆сѝ ѿ сме́рти и҆ ᲂу҆́зъ и҆ темни́цы . нᲂ и҆ ны́нѣ ꙗ҆́кᲂже тᲂгда̀ и҆ прⷭ҇нѡ , дерзнᲂве́нїе и҆мѣ́ѧ ко́ гдⷭ҇ꙋ , непреста́й мᲂлѧ̀ ѡ҆ дш҃а́хъ на́шихъ . сла́ва . гла́съ , є҃ . Вᲂстрꙋ́бимъ трꙋбо́ю пѣ́сней , и҆ взыгра́емъ пра́з̾днественаѧ , и҆ ликᲂвствꙋ́емъ ра́дꙋющесѧ , въ мᲂле́бнᲂе тᲂржество̀ бг҃ᲂно́снагѡ ѻ҆ц҃а . цр҃и и҆ кнѧ́зи да стекꙋ́тсѧ , и҆́же со́ннымъ стра́шнымъ ꙗ҆вле́нїемъ цр҃ѧ препира́юща , непᲂви́ннѡ держи́мыѧ трѝ ѿпꙋсти́ти во́ины . да вᲂсхва́лѧтъ па́стырѧ и҆ ᲂу҆чи́телѧ , и҆́же до́брагѡ па́стырѧ , па́стыремъ є҆динᲂревни́телѧ , сᲂше́дшесѧ вᲂсхва́лимъ . и҆́же в̾ недꙋ́зѣхъ врача̀ , и҆ в̾ бѣда́хъ и҆зба́вителѧ . грѣ́шнїи застꙋ́пника . ни́щїи сᲂкро́вище , и҆ и҆́же въ скᲂрбѣ́хъ ᲂу҆тѣ́шителѧ . спꙋ́тника пꙋ́ть ше́ствꙋющїи , на́ мᲂри сꙋ́щїи прави́телѧ . и҆ всѝ вездѣ̀ те́плѣ пред̾варѧ́юща , вели́кагѡ ст҃лѧ вᲂсхвалѧ́юще си́це рце́мъ , прест҃ы́и нико́лае пред̾варѝ , и҆ и҆зба́ви на́съ ѿ настᲂѧ́щїѧ бѣды̀ , и҆ спасѝ ста́дᲂ свᲂѐ мᲂли́твами сѝ .

и҆ ны́нѣ , пра́здникꙋ .

Славᲂсло́вїе вели́кᲂе . Пᲂ трⷭ҇то́мъ : трᲂпа́рь , вᲂскрⷭ҇нъ . сла́ва , ст҃о́мꙋ . и҆ ны́нѣ , боⷢ҇ , по́ гласꙋ . въ пᲂпра́з̾днествᲂ же препᲂлᲂве́нїѧ , и҆ вᲂз̾несе́нїѧ , трᲂпа́рь , ст҃о́мꙋ . сла́ва , и҆ ны́нѣ , пра́здникꙋ . та́же : є҆кте́нїи , и҆ ѿпꙋ́стъ .

На литꙋргі́и , бл҃же́нна , на и҃ . ѿ а҃ гѡ кано́на ст҃лю , пѣ́снь , г҃ ѧ . и҆ ѿ в҃ гѡ , пѣ́снь , ѕ҃ ѧ .

Пᲂ вхо́дѣ : трᲂпа́рь пра́здникꙋ , и҆лѝ вᲂскрⷭ҇нъ , и҆ ст҃лю . сла́ва , кᲂнда́къ ст҃лю . и҆ ны́нѣ , кᲂнда́къ пра́здникꙋ .

прᲂки́менъ , ѱл҃о́мъ дв҃дᲂвъ . Вᲂсхва́лѧтсѧ прпⷣбнїи вᲂ сла́вѣ , и҆ вᲂз̾ра́дꙋютсѧ на ло́жахъ свᲂи́хъ .= сти́хъ . вᲂспо́йте гдⷭ҇ви пѣ́снь но́вꙋ , ꙗ҆́кѡ ди́вна сᲂтвᲂрѝ гдⷭ҇ь . а҆пⷭ҇лъ , къ є҆вре́ѡмъ . заⷱ҇ , тл҃є . =а҆ллилꙋ́їѧ . Сщ҃е́нницы твᲂѝ ѡ҆блекꙋ́тсѧ в̾ пра́вдꙋ , и҆ препᲂдо́бнїи твᲂѝ вᲂз̾ра́дꙋютсѧ . є҆ѵⷢ҇а́лїе , ѿ лꙋкѝ . зача́лᲂ , к҃д . прича́стенъ , въ па́мѧть вѣ́чнꙋю бꙋ́детъ пра́ведникъ .