МЦⷭ҇А НОѦБРѦ̀ ВЪ Г҃І ДН҃Ь

и҆́же вᲂ ст҃ы́хъ ѻ҆ц҃а на́шегѡ і҆ѡа́нна златᲂꙋ́стагѡ , а҆рхїєпⷭ҇кпа кᲂнстанти́на гра́да .

На ма́лѣй вече́рни , на гдⷭ҇и вᲂзва́хъ , стихѣ́ры . гла́съ , а҃ . поⷣ . нбⷭ҇нымъ чинѡ́мъ . Крⷭ҇тлѧ пᲂдража́ѧ тезᲂиме́ннагᲂ до́брѣ ,꙳ вᲂздержа́нїемъ ѻ҆́ч҃е .꙳ и҆ и҆лїѝ вели́кᲂмꙋ пᲂсто́мъ и҆ чистᲂто́ю .꙳ ре́внᲂстїю ᲂу҆ѧ́звенъ ѻ҆бᲂи́хъ златᲂꙋ́сте ,꙳ на црⷭ҇кᲂе ᲂу҆си́лїе дерза́еши ,꙳ ꙗ҆́кѡ па́стырь цр҃кви хрⷭ҇то́вѣ . двⷤа . Бжⷭ҇твенымъ въ дᲂхнᲂве́нїемъ сло́ва ,꙳ прᲂте́къ пᲂ пи́саннᲂмꙋ всю̀ зе́млю .꙳ вѣща́нїе пᲂвелѣ́нїи твᲂи́хъ ѻ҆́ч҃е прᲂсвѣтѝ ми́ръ .꙳ ѿве́рзъ на́мъ пᲂкаѧ́нїѧ вхᲂжде́нїе .꙳ ни́щихъ пᲂпече́нїемъ ,꙳ вᲂѡ҆бража́ѧ хрⷭ҇то́вᲂ є҆ѵⷢ҇а́лїе . Чи́стᲂе дш҃и твᲂеѧ̀ и҆ нескве́рнᲂе свѣ́та ,꙳ сл҃нчныѧ зарѝ сїѧ́етъ ми́рᲂви ,꙳ пᲂвелѣ́нїи бл҃гᲂче́стїѧ ,꙳ ѻ҆́ч҃е мꙋ́дре і҆ѡа́нне златᲂꙋ́сте ,꙳ и҆ мглꙋ̀ ѿго́нитъ ,꙳ и҆ прᲂсвѣща́етъ вселе́ннꙋю къ бл҃гᲂче́стїю .

сла́ва . гла́съ , в҃ . Тѧ̀ вели́кагᲂ ст҃лѧ , и҆ па́стырѧ неѕло́бива и҆ прпⷣбна . пᲂкаѧ́нїю прᲂпᲂвѣ́дника . златᲂслᲂве́снаѧ ᲂу҆ста̀ бл҃гᲂда́ти . хва́лѧщїи , любо́вїю мо́лимсѧ пᲂда́ждь на́мъ мл҃твы твᲂѧ̀ ѻ҆́ч҃е , вᲂ ѿда́нїе дш҃ъ на́шихъ . и҆ ны́нѣ , боⷢ҇ . прᲂки́менъ , дню̀ .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фᲂвъ . До́мъ дх҃о́вныи ,꙳ ѿ дѣѧ́нїи ,꙳ ꙗ҆́кѡ ка́менїи сᲂгражде́нъ ,꙳ и҆ ми́ръ пᲂкрыва́ѧи ,꙳ премꙋ́дрыи златᲂꙋ́стъ .

сти́хъ : ᲂу҆ста̀ мᲂѧ̀ вᲂз̾гл҃ютъ премꙋ́дрᲂсть ,꙳ и҆ пᲂꙋче́нїе срⷣца мᲂегѡ̀ ра́зꙋмъ . Зако́нъ ꙗ҆́кѡ мѡѷсе́й ,꙳ прїе́мъ ѿ́ гдⷭ҇а златᲂꙋ́сте ,꙳ ми́ра ᲂу҆мꙋдрѝ ,꙳ и҆ прᲂсвѣтѝ ,꙳ бжⷭ҇твеными ти ᲂу҆че́нїи .

сти́хъ : ᲂу҆ста̀ пра́веднагѡ пᲂꙋча́тсѧ премꙋ́дрᲂсти ,꙳ и҆ ѧ҆зы́къ є҆гѡ̀ вᲂз̾гл҃етъ сꙋ́дъ . До́мъ дх҃о́венъ ,꙳ бл҃гᲂда́ти все́й ,꙳ сло́ва премꙋ́дрᲂсти ,꙳ ꙗ҆ви́сѧ внꙋ́трь и҆мы́и ,꙳ златᲂꙋ́сте бл҃же́нне .

сла́ва , и҆ нн҃ѣ , боⷢ҇ . Ра́дꙋисѧ ,꙳ ꙗ҆́же ра́дᲂсть ми́рꙋ прїе́мшаѧ ,꙳ хрⷭ҇та̀ жизнᲂда́вца ,꙳ и҆ ᲂу҆тᲂли́вшаѧ печа́ль ,꙳ дв҃ᲂ пра́матерню .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , и҃ . Ѿ ᲂу҆́стъ твᲂи́хъ ꙗ҆́кᲂже свѣтᲂлꙋ́чнаѧ зарѧ̀ вᲂсїѧ̀ , бг҃ᲂмъ да́ннаѧ тѝ бл҃гᲂда́ть , вселе́ннꙋю прᲂсвѣща́ѧ . несребрᲂлю́бнᲂ сᲂкро́вище ми́рᲂви пᲂлᲂжѝ , нᲂ высᲂтꙋ̀ на́мъ смиренᲂмꙋ́дрїѧ пᲂказа̀ , и҆ свᲂи́ми слᲂвесы̀ наказꙋ́ѧ , ѻ҆́ч҃е і҆ѡа́нне ѕлатᲂꙋ́сте , мᲂлѝ сло́ва хрⷭ҇та̀ бг҃а спасти́сѧ дш҃а́мъ на́шимъ . сла́ва , и҆ ны́нѣ , боⷢ҇ . И҆́же на́съ ра́ди рᲂжде́исѧ ѿ дв҃ы , и҆ распѧ́тїе претерпѣ́въ бл҃гі́и , и҆спрᲂве́ргїи сме́ртїю сме́рть , и҆ вᲂскрⷭ҇нїе ꙗ҆́вль ꙗ҆́кѡ бг҃ъ , непре́зри и҆́хже сᲂзда̀ рꙋко́ю свᲂе́ю . ꙗ҆вѝ чл҃кᲂлю́бїе свᲂѐ млⷭ҇тиве . прїимѝ ро́ждьшꙋю тѧ̀ бцⷣꙋ мᲂлѧ́щꙋсѧ за ны̀ , и҆ спасѝ сп҃се на́шъ лю́ди сᲂгрѣ́шшїѧ . та́же , є҆ктенїѧ̀ ма́лаѧ . и҆ ѿпꙋ́стъ .

На вели́цѣй вече́рни , блаже́нъ мꙋ́жь , а҃ , а҆нтифо́нъ . =На гдⷭ҇и вᲂзва́хъ , стихѣ́ры , на и҃ . гла́съ , д҃ . поⷣ . ꙗ҆́кѡ до́блѧ . Златᲂкᲂва́ннꙋю трꙋбꙋ̀ ,꙳ бг҃ᲂдᲂхнᲂве́нныи ѻ҆рга́нъ ,꙳ бг҃ᲂсло́вїѧ пꙋчи́нꙋ неи҆счерпа́емꙋю ,꙳ цр҃ко́внᲂе ᲂу҆твержде́нїе ,꙳ ᲂу҆ма̀ нбⷭ҇нагᲂ ,꙳ премꙋ́дрᲂсти глꙋбинꙋ̀ ,꙳ ча́шꙋ всезлатꙋ́ю ,꙳ и҆злива́ющꙋ рѣ́ки ᲂу҆че́нїи медᲂто́чныхъ ,꙳ и҆ напаѧ́ющꙋ тва́рь ,꙳ пѣ́сненѡ вᲂспѣва́емъ . =три́жды . Звѣздꙋ̀ незахᲂди́мꙋю ,꙳ зарѧ́ми прᲂсвѣща́ющꙋ ᲂу҆че́нїи ,꙳ всю̀ пᲂд̾со́лнечнꙋю .꙳ пᲂкаѧ́нїю прᲂпᲂвѣ́дателѧ .꙳ гꙋ́бꙋ всезлатꙋ́ю ,꙳ мᲂкрᲂтꙋ̀ лю́тꙋю невѣ́денїѧ взе́млющꙋ ,꙳ и҆ ѡ҆рᲂша́ющꙋ срⷣца̀ и҆ста́ѧвшаѧ грѣхѝ ,꙳ і҆ѡа́нна пᲂ дᲂстᲂѧ́нїю ,꙳ златᲂслᲂве́снагᲂ пᲂчте́мъ . три́жды . И҆́же на землѝ а҆́нг҃лъ ,꙳ и҆ нбⷭ҇ныи чл҃къ .꙳ ла́стᲂвица бг҃ᲂгл҃ива и҆ мнᲂгᲂгла́сна ,꙳ дᲂбрᲂдѣ́телей сᲂкро́вище .꙳ ка́мень неразсѣ́дныи ,꙳ вѣ́рнымъ вᲂѡ҆браже́нїе .꙳ мч҃нкѡмъ пᲂдо́бенъ ,꙳ равнᲂстᲂѧ́тель ст҃ы́хъ а҆́нг҃лъ ,꙳ а҆пⷭ҇лѡмъ є҆динᲂѡ҆бра́зенъ .꙳ в̾ пѣ́снехъ да вᲂзвели́читсѧ златᲂꙋ́стъ . два́жды .

сла́ва . гла́съ , ѕ҃ . Прпⷣбне требл҃же́нне ст҃ѣ́йшїи ѻ҆́ч҃е , па́стырю до́брыи , и҆ началᲂпа́стырѧ хрⷭ҇та̀ ᲂу҆ченичѐ , пᲂлᲂжи́выи дш҃ꙋ ѡ҆ ѻ҆вца́хъ , ты̀ и҆ ны́нѣ всехва́льне і҆ѡа́нне златᲂꙋ́сте , прᲂсѝ мл҃твами твᲂи́ми , дарᲂва́ти на́мъ ве́лїю млⷭ҇ть .

и҆ нн҃ѣ , боⷢ҇ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невᲂспѣва́етъ твᲂегѡ̀ пречи́стагѡ ржⷭ҇тва̀ ; без̾лѣ́тныи бᲂ ѿ ѻ҆ц҃а вᲂзсїѧ́въ сн҃ъ є҆динᲂро́дныи , то́й же ѿ тебѐ чи́стыѧ про́йде , несказа́ннѡ вᲂпло́щьсѧ . є҆стество́мъ бг҃ъ сы́и , и҆ є҆стество́мъ бы́въ чл҃къ на́съ ра́ди . не вᲂ двᲂю̀ лицꙋ̀ раздѣлѧ́емъ . нᲂ вᲂ двᲂю̀ є҆стествꙋ̀ несмѣ́снᲂ пᲂзнава́емъ . тᲂгѡ̀ мᲂлѝ чи́стаѧ и҆ всебл҃же́ннаѧ , пᲂми́лᲂватисѧ дш҃а́мъ на́шимъ . та́же , вы́хᲂдъ . прᲂки́менъ , дню̀ .

Ѿ при́тчей , чте́нїе .

Па́мѧть пра́веднагѡ с̾ пᲂхвала́ми , и҆ блгⷭ҇ве́нїе гдⷭ҇не на главѣ̀ є҆гѡ̀ . бл҃же́нъ чл҃къ , и҆́же ѡ҆брѣ́те мꙋ́дрᲂсть , и҆ сме́ртенъ и҆́же ᲂу҆вѣ́дѣ ра́зꙋмъ . лꙋ́чше бᲂ сїю̀ кꙋпᲂва́ти , не́жели зла́та и҆ сребра̀ сᲂкро́вища . честнѣ́йши бᲂ є҆́сть ка́менїѧ мнᲂгᲂцѣ́нна , все́же чⷭ҇тно́е , недᲂсто́йнѡ є҆́сть є҆́й . дᲂлгᲂта́ бᲂ дні́й , и҆ лѣ́та живᲂта̀ , в̾ десни́цѣ є҆ѧ̀ , и҆ в̾ шꙋ́ицѣ є҆ѧ̀ бᲂга́тьствᲂ и҆ сла́ва . ѿ ᲂу҆́стъ бᲂ є҆ѧ̀ и҆схо́дитъ пра́вда , зако́нъ же и҆ млⷭ҇ть , на ѧ҆зы́цѣ но́ситъ . пᲂслꙋ́шайте ᲂу҆́бѡ менѐ , ѽ ча́да , честна́ѧ бᲂ рекꙋ̀ , и҆ бл҃же́нъ чл҃къ , и҆́же пꙋтѝ мᲂѧ̀ храни́тъ . и҆схо́ди бᲂ мᲂѝ , и҆схо́ди живᲂта̀ , и҆ ᲂу҆гᲂто́ваетсѧ хᲂтѣ́нїе ѿ́ гдⷭ҇а . сегѡ̀ ра́ди мᲂлю̀ ва́съ , и҆ пред̾лага́ю мо́й гла́съ сн҃ᲂво́мъ чл҃ческимъ . ꙗ҆́кѡ а҆́зъ премꙋ́дрᲂсть всели́хъ , сᲂвѣ́тъ и҆ ра́зꙋмъ , и҆ смы́слъ а҆́зъ призва́хъ . мо́й сᲂвѣ́тъ и҆ ᲂу҆тверже́нїе , мо́й ра́зꙋмъ , мᲂѧ́ же крѣ́пᲂсть . а҆́зъ менѐ лю́бѧщїѧ люблю̀ , и҆ взыска́ющїи менѐ ѡ҆брѧ́щꙋтъ бл҃гᲂда́ть . разꙋмѣ́йте ᲂу҆́бѡ неѕло́бивїи кᲂва́рствᲂ , ненака́занїи же прилага́йте срⷣца̀ . пᲂслꙋ́шайте менѐ и҆ па́ки , честна́ѧ бᲂ рекꙋ̀ , и҆ ѿве́рзꙋ ѿ ᲂу҆сте́нъ мᲂи́хъ пра́вдꙋ . ꙗ҆́кѡ и҆́стинѣ пᲂꙋча́етсѧ гᲂрта́нь мо́й , ме́рзски же предᲂ мно́ю ᲂу҆стны̀ лжи́выхъ . с̾ пра́вдᲂю всѝ гл҃ы ᲂу҆́стъ мᲂи́хъ , ни что́же в̾ ни́хъ стро́пᲂтнᲂ ни развращено̀ . всѧ̀ пра́ва сꙋ́ть разꙋмѣва́ющимъ и҆́стинꙋ , и҆ здра́ва ѡ҆брѣта́ющимъ ра́зꙋмъ . наꙋчꙋ́ бᲂ ва́съ и҆́стинѣ , да бꙋ́детъ ѡ҆́ гдⷭ҇ѣ наде́жа ва́ша , и҆ и҆спо́лнитесѧ дх҃а .

Ѿ= при́тчей , чте́нїе .=

=Ѿ =ᲂу҆́стъ пра́веднагѡ ка́плетъ премꙋ́дрᲂсть , ꙗ҆зы́къ же непра́веднагѡ пᲂтреби́тсѧ . ᲂу҆сты̀ мꙋже́й пра́ведныхъ свѣ́дѧтъ бл҃гᲂда́ть , ᲂу҆ста́ же нечести́выхъ разᲂрѧ́тсѧ . мѣ́рила ле́стна ме́рзᲂсть пре́д̾ гдⷭ҇емъ , мѣ́рилᲂ же пра́веднᲂ прїѧ́тнѡ є҆мꙋ̀ є҆́сть . и҆дѣ́же а҆́ще вни́детъ дᲂсажде́нїе , тꙋ̀ и҆ бесче́стїе . ᲂу҆ста̀ смире́ныхъ пᲂꙋча́тсѧ премꙋ́дрᲂсти , кᲂнчи́на же пра́ведныхъ наста́витъ и҆́хъ . и҆ пᲂпᲂлзнᲂве́нїе закᲂнᲂпрестꙋ́пникъ плѣни́тъ ѧ҆̀ . непо́льзꙋетъ и҆мѣ́нїе в̾ дн҃ь ꙗ҆́рᲂсти , пра́вда же и҆збавлѧ́етъ ѿ сме́рти . ᲂу҆мира́ѧ пра́ведныи , ѡ҆ставлѧ́етъ пᲂпече́нїе . ме́рзᲂстна же быва́етъ и҆ на́гла нечести́выхъ пᲂги́бель . пра́вда непᲂро́чнагѡ и҆справлѧ́етъ пꙋтѝ , нече́стїемъ же свᲂи́мъ па́даетъ без̾зако́нныи . пра́вда мꙋже́й пра́ведныхъ и҆збавлѧ́етъ и҆́хъ , без̾сᲂвѣ́тїемъ же ᲂу҆лᲂвлѧ́ютсѧ закᲂнᲂпрестꙋ́пнїи . скᲂнча́вшꙋсѧ мꙋ́жꙋ пра́веднꙋ , не ѡ҆скꙋдѣ́етъ наде́жа , хвала́ же нечести́выхъ пᲂтреби́тсѧ . пра́ведникъ ѿ лᲂви́твы и҆збѣ́гнетъ , вмѣ́стᲂ же є҆гѡ̀ предае́тсѧ нечести́выи . вᲂ ᲂу҆стѣ́хъ закᲂнᲂпрестꙋ́пныхъ сѣ́ть гражда́нѡмъ , чꙋ́вствᲂ же пра́ведныхъ бл҃гᲂспѣ́шнѡ . вᲂ бл҃гᲂсти пра́ведныхъ и҆спра́витсѧ гра́дъ , и҆ въ пᲂги́бели нечести́выхъ ра́дᲂванїе . вᲂ бл҃гᲂслᲂве́нїи пра́ведныхъ вᲂзвы́ситсѧ гра́дъ , ᲂу҆сты́ же нечести́выхъ раскᲂпа́етсѧ . рꙋга́етсѧ гражда́нѡмъ лише́ныи ра́зꙋма . мꙋ́жъ же мꙋ́дръ без̾мо́лвїе во́дитъ .

Ѿ премꙋ́дрᲂсти сᲂло́мᲂни , чте́нїе .

Пᲂхвалѧ́емꙋ пра́ведникꙋ , вᲂз̾веселѧ́тсѧ лю́дїе . без̾сме́ртїе бᲂ є҆́сть па́мѧть є҆гѡ̀ , ꙗ҆́кѡ ѿ́ гдⷭ҇а пᲂзнава́етсѧ и҆ ѿ чл҃къ , и҆ ᲂу҆го́дна гдⷭ҇ви дш҃а є҆гѡ̀ .= =вᲂзлюби́те ᲂу҆́бѡ мꙋ́дрᲂсть , и҆ пᲂживетѐ . вᲂсхᲂщи́те є҆ѧ̀ , и҆ нака́зани бꙋ́дете . нача́лᲂ бᲂ є҆ѧ̀ любы̀ , и҆ сᲂблюде́нїе зако́нꙋ . пᲂчти́те премꙋ́дрᲂсть , да во́ вѣки црⷭ҇твꙋете . вᲂзвѣщꙋ̀ ва́мъ , и҆ нескры́ю ѿ ва́съ та́инъ бж҃їихъ . ꙗ҆́кѡ то́й мꙋ́дрᲂсти наста́вникъ є҆́сть , и҆ мꙋ́дрыхъ и҆спра́витель , и҆ всѧ́кꙋ смы́слꙋ и҆ дѣ́лꙋ хитре́цъ , и҆ всѣ́мъ смы́слᲂмъ наꙋчи́тъ мꙋ́дрᲂсть . є҆́сть бᲂ в̾ не́й дх҃ъ разꙋ́менъ и҆ ст҃ъ , и҆ сїѧ́нїе свѣ́та приснᲂсꙋ́щнагѡ , и҆ ѻ҆́бразъ бл҃гᲂсти бж҃їѧ . та̀ и҆ дрꙋ́ги бж҃їѧ и҆ пррⷪ҇ки ᲂу҆стрᲂѧ́етъ . бл҃гᲂлѣ́пнѣйши є҆́сть сл҃нца , и҆ па́че сᲂтвᲂре́нїѧ ѕвѣ́здъ свѣ́тᲂмъ сказа́ема ѡ҆брѣта́етсѧ пе́рвѣйши . та̀ ᲂу҆гᲂжда́ющимъ є҆́й ѿ бᲂлѣ́зней и҆збавлѧ́етъ , и҆ наста́витъ на стезѝ пра́вы , и҆ да́стъ и҆́мъ ра́зꙋмъ и҆мѣ́ти ст҃ы́хъ , и҆ сᲂхрани́тъ ѧ҆̀ ѿ лᲂвѧ́щихъ , по́двигъ крѣ́пᲂкъ пᲂда́стъ и҆́мъ . да разꙋмѣ́ютъ всѝ ꙗ҆́кѡ си́льнѣйши є҆́сть всегѡ̀ бл҃гᲂче́стїе , и҆ непремо́жетъ ѕло́ба ни кᲂли́же мꙋ́дрᲂсти , ни пре́йдетъ ѕлы́ѧ ѡ҆блича́ющи сꙋ́дъ . реко́ша же в̾ себѣ̀ пᲂмы́сливше непра́веднѡ , наси́льствꙋемъ пра́веднᲂмꙋ , и҆ непᲂщади́мъ препᲂдо́бства є҆гѡ̀ , ни ᲂу҆срами́мсѧ сѣди́нъ ста́рᲂсти мнᲂгᲂлѣ́тны , бꙋ́детъ бᲂ на́мъ крѣ́пᲂсть зако́нꙋ . и҆ ᲂу҆лᲂви́мъ пра́веднагᲂ , ꙗ҆́кѡ не ᲂу҆го́денъ на́мъ є҆́сть , и҆ сᲂпрᲂти́витсѧ дѣло́мъ на́шимъ , и҆ пᲂно́ситъ на́мъ ѿпаде́нїе зако́на , и҆ ѡ҆блича́етъ на́мъ сᲂгрѣше́нїѧ наказа́нїѧ на́шегѡ . вᲂзвѣща́етъ на́мъ ра́зꙋмъ и҆мѣ́ти бж҃їи , и҆ ѻ҆́трᲂка гдⷭ҇нѧ себѐ и҆менꙋ́етъ , и҆ бы́сть на ѡ҆бличе́нїе пᲂмышле́нїемъ на́шимъ , и҆ тѧ́жекъ на́мъ є҆́сть . и҆ ви́димъ ꙗ҆́кѡ непᲂдо́бнѡ и҆нѣ́мъ житїѐ є҆гѡ̀ , и҆ и҆змѣнены̀ стезѝ є҆гѡ̀ . въ пᲂрꙋга́нїе вмѣни́хᲂмсѧ є҆мꙋ̀ , и҆ ᲂу҆далѧ́етсѧ ѿ пꙋте́й на́шихъ ꙗ҆́кѡ ѿ нечисто́тъ , и҆ блажи́тъ пᲂслѣ́днѧѧ пра́ведныхъ . ви́димъ ᲂу҆́бѡ а҆́ще слᲂвеса̀ є҆гѡ̀ и҆́стина сꙋ́ть , и҆ ᲂу҆смо́тримъ сбытїѧ̀ є҆гѡ̀ . рꙋга́нїемъ и҆ мꙋ́кᲂю и҆стѧ́жемъ є҆гѡ̀ . да разꙋмѣ́емъ кро́тᲂсть є҆гѡ̀ , и҆ и҆скꙋ́симъ без̾ѕло́бствᲂ є҆гѡ̀ , сме́ртїю без̾ѡ҆бра́знᲂю ѡ҆сꙋ́димъ є҆гѡ̀ , бꙋ́детъ бᲂ пᲂсѣще́нїе ѿ слᲂве́съ є҆гѡ̀ . сїѧ̀ пᲂмы́слиша и҆ прельсти́шасѧ , ѡ҆слѣпи́ бᲂ и҆́хъ ѕло́ба и҆́хъ , и҆ неразꙋмѣ́ша та́инъ бж҃їихъ . и҆ неразсꙋди́ша ꙗ҆́кѡ ты̀ є҆сѝ бг҃ъ є҆ди́нъ живᲂтꙋ̀ и҆мѣ́ѧи и҆ сме́рти вла́сть , и҆ спаса́ѧ во́ времѧ ско́рби , и҆ и҆збавлѧ́ѧи ѿ всѧ́кагѡ ѕла̀ , ще́дръ и҆ млⷭ҇тивъ даѧ̀ препᲂдо́бнымъ свᲂи́мъ бл҃гᲂда́ть , и҆ свᲂе́ю мы́шцею го́рдымъ прᲂтивлѧ́ѧсѧ .

На литі́и , стихѣ́ры . гла́съ , а҃ . Свѣти́льниче і҆ѡа́нне , ᲂу҆ста̀ златᲂви́дна , ᲂу҆дᲂбре́нїе бг҃ᲂсᲂдѣ́ѧнныхъ дᲂбрᲂдѣ́телей . и҆ ѻ҆би́телище писа́нїи тайнᲂнача́льныхъ . ты̀ пречⷭ҇тᲂе ст҃о́мꙋ дх҃ꙋ нетлѣ́ннᲂе сᲂкро́вище бы́лъ є҆сѝ . ѿ ню́дꙋ же вᲂзвесели́лъ є҆сѝ всю̀ цр҃кᲂвь , спасе́нымъ ти сло́вᲂмъ бᲂга́тымъ . дерзнᲂве́нїе ᲂу҆́бѡ ѡ҆брѣ́тъ къ бг҃ꙋ , в̾ наслажде́нїи вы́шнѧгѡ наслѣ́дїѧ , мᲂли́сѧ ѡ҆ на́съ ѻ҆́ч҃е ст҃ы́и . гла́съ , в҃ . Златы́ми слᲂвесы̀ твᲂи́ми , цр҃кᲂвь ꙗ҆́кѡ ᲂу҆́тварїю злато́ю ᲂу҆краси́вшисѧ і҆ѡа́нне златᲂꙋ́сте , невѣ́стьски ра́дꙋющисѧ вᲂпїе́тъ ти . насыти́хсѧ ѿ твᲂи́хъ златᲂтᲂчи́выхъ во́дъ , ᲂу҆краси́вшисѧ златᲂтка́нными и҆ медᲂтᲂчи́выми пи́вы . ѿ дѣѧ́нїи бᲂ в̾ видѣ́нїѧ вᲂсхᲂждꙋ̀ , кро́ткими ти пᲂꙋче́ньми , и҆ кᲂ хрⷭ҇тꙋ̀ разꙋ́мнᲂмꙋ женихꙋ̀ примѣша́ющисѧ съ црⷭ҇твꙋю є҆мꙋ̀ . тѣ́мъ и҆ мы̀ сᲂвᲂкꙋ́пльшесѧ въ па́мѧть твᲂю̀ зᲂве́мъ , не ѿстꙋпа́й мᲂлѧ́сѧ за ны̀ ко́ гдⷭ҇ꙋ , спастѝ дш҃а на́ша . Прїѧ́лъ є҆сѝ ст҃лю го́рнюю филᲂсо́фїю , и҆ внѣ̀ ми́ра бы́въ пᲂживѐ вы́ше ви́димыхъ , и҆ зерца́лᲂ бж҃їе нескве́рнᲂ ꙗ҆ви́сѧ , сы́и бᲂ при́снѡ сᲂєдине́нъ свѣ́тᲂмъ , и҆ свѣ́тъ прїе́мъ ꙗ҆снѣ́йшїи , блаже́нныи ᲂу҆лꙋчи́въ кᲂне́цъ . мᲂли́сѧ златᲂꙋ́сте ѡ҆ дш҃а́хъ на́шихъ . гла́съ , д҃ . Гл҃ы златᲂза́рными , зе́млю і҆ѡа́нне премꙋ́дре напᲂи́лъ є҆сѝ , златᲂтᲂчи́вꙋ и҆мѣ́ѧ дш҃ꙋ же и҆ тѣ́лᲂ пребᲂга́те . всѧ̀ пᲂзлати́въ слᲂвесы̀ свᲂи́ми златᲂдѣ́телю . и҆ пᲂвелѣ́нїи свᲂи́хъ кни́ги написа́въ златᲂпи́саны , вᲂзлетѣ̀ на́ нб҃ᲂ . тѣ́мъ вᲂпїе́мъ ти , златᲂсло́ве и҆ златᲂꙋ́сте , хрⷭ҇та̀ бг҃а мᲂлѝ спастѝ дш҃а на́ша . Пᲂдᲂба́ше црⷭ҇твꙋющемꙋ гра́дꙋ , і҆ѡа́нна и҆мѣ́ти а҆рхїєре́ѧ , ꙗ҆́кѡ нѣ́кꙋю ᲂу҆́тварь црⷭ҇кꙋю , и҆ златᲂкᲂва́ннꙋю трꙋбꙋ̀ , всѧ̀ ѡ҆глаша́ющꙋ кᲂнцы̀ , спасе́ными пᲂвелѣ́ньми . и҆ всѧ̀ пᲂдвиза́ющꙋ к̾ ре́внᲂсти пѣ́нїи бг҃ᲂлѣ́пныхъ . к̾ немꙋ́же вᲂзᲂпїе́мъ , златᲂсло́ве и҆ златᲂꙋ́сте , хрⷭ҇та̀ бг҃а мᲂлѝ спастѝ дш҃а на́ша . сла́ва . гла́съ , д҃ . Бы́сть златᲂꙋ́сте бг҃ᲂдх҃нᲂве́ныи ѻ҆рга́нъ , и҆́мже на́мъ дх҃ъ ст҃ы́и гл҃а , бг҃ᲂзна́менныи гла́съ . и҆ прᲂтечѐ кᲂнцы̀ вѣща́нїе ᲂу҆че́нїи твᲂи́хъ . и҆ пᲂдража́тель бы́сть а҆пⷭ҇лѡмъ прпⷣбне , ли́ка пᲂсти́же ѻ҆́нᲂгѡ є҆го́же вᲂз̾желѣ́лъ є҆сѝ . мᲂли́сѧ гдⷭ҇ви всебл҃же́нне , ᲂу҆мири́ти ми́ра , и҆ спастѝ дш҃а на́ша . и҆ нн҃ѣ , боⷢ҇ . Пᲂда́ждь ᲂу҆тѣше́нїе , свᲂи́мъ рабо́мъ всенепᲂро́чнаѧ , ᲂу҆тᲂлѧ́ющи лю́таѧ на ны̀ ѡ҆б̾стᲂѧ́нїѧ , всѧ́кїѧ ско́рби на́съ и҆з̾мѣнѧ́ющи . тѧ́ бᲂ є҆ди́нꙋ тве́рдᲂ и҆ и҆звѣ́стнѡ ѡ҆снᲂва́нїе и҆́мамы , и҆ твᲂѐ застꙋпле́нїе стѧжа́хᲂмъ , да непᲂстыди́мсѧ влⷣчце , тебѐ призыва́юще . пᲂтщи́сѧ на мᲂли́твꙋ тебѣ̀ вᲂпїю́щихъ , ра́дꙋисѧ влⷣчце всѣ́мъ пᲂмо́щнице , ра́дᲂсте и҆ пᲂкро́ве дш҃а́мъ на́шимъ .

На стихо́внѣ , стихѣ́ры , гла́съ , є҃ . поⷣ . ра́дꙋисѧ живᲂно́сныи крⷭ҇те . Ра́дꙋисѧ златᲂза́рныи и҆ кра́сныи , цр҃кви бг҃ᲂдх҃нᲂве́нныи ѻ҆рга́не . ѧ҆зы́че чл҃кᲂлю́бїѧ , пᲂкаѧ́нїѧ на́мъ разли́чныѧ ѻ҆́бразы пᲂд̾писꙋ́ющїи . ᲂу҆́ме свѣтᲂза́рныи . ла́стᲂвице златᲂꙋ́стаѧ . гᲂлꙋ́бице и҆́же ѱало́мски междᲂра́мїѧ златᲂсїѧ́ющи , дᲂбрᲂдѣ́телей зе́ленᲂстїю . стрꙋѧ̀ златᲂви́днаѧ , прᲂлива́ющи и҆сцѣле́нїѧ . ᲂу҆ста̀ бжⷭ҇твенаѧ , и҆ бжⷭ҇твенагѡ чл҃кᲂлю́бїѧ пᲂрꙋчи́тельнаѧ . хрⷭ҇та̀ мᲂлѝ пᲂсла́ти дш҃а́мъ на́шимъ , ве́лїю млⷭ҇ть .

сти́хъ : ᲂу҆ста̀ мᲂѧ̀ вᲂз̾гл҃ютъ премꙋ́дрᲂсть ,꙳ и҆ пᲂꙋче́нїе срⷣца мᲂегѡ̀ ра́зꙋмъ . Ра́дꙋисѧ си́рымъ ѻ҆́ч҃е , и҆ ѡ҆би́димымъ бы́страѧ по́мᲂщь , ни́щимъ пᲂдаѧ́нїе , а҆́лчꙋщимъ пи́ща , сᲂгрѣша́ющимъ и҆справле́нїе , дш҃а́мъ бл҃гᲂꙋго́дныи врачꙋ̀ и҆ честнѣ́йшїи . бг҃ᲂсло́вїѧ высо́кагᲂ и҆спыта́нїе , сказа́нїе писа́нїи дх҃о́вныхъ , зако́нъ дѣ́йственыи . пра́вилᲂ пра́вѣйшее видѣ́нїѧ и҆ дѣѧ́нїѧ премꙋ́дрᲂсти кра́йнїѧ , хрⷭ҇та̀ низ̾пᲂсла́ти дш҃а́мъ на́шимъ мᲂлѝ ве́лїю млⷭ҇ть .

сти́хъ : ᲂу҆ста̀ пра́веднагѡ пᲂꙋча́тсѧ премꙋ́дрᲂсти ,꙳ и҆ ѧ҆зы́къ є҆гѡ̀ вᲂз̾гл҃етъ сꙋ́дъ . До́мъ сщ҃е́нныхъ дᲂбрᲂдѣ́телей , сщ҃е́нныи себѐ сᲂверши́лъ є҆сѝ . в̾ тебѣ́ бᲂ жили́ще ꙗ҆́кѡ вᲂ ст҃ѣ́мъ хра́мѣ , и҆ честнѣ́йшемъ ѻ҆́ч҃е пᲂлᲂжѝ премꙋ́дрѡ ѡ҆кᲂрми́въ . и҆ чꙋ́вства тѣле́снаѧ , ꙗ҆́кѡ въ не ѡ҆кра́дᲂмѣ сᲂкро́вищи сᲂблю́лъ є҆сѝ пᲂмышле́нїѧ , страстны́хъ смꙋще́нїи . ѿ ню́дꙋ же бг҃ᲂви́днѣйши пребл҃же́нне бы́въ , цр҃кви пред̾ста́тельствᲂмъ ᲂу҆кра́шенъ , хрⷭ҇та̀ мᲂлѝ пᲂдаю́щагᲂ ми́рᲂви ве́лїю млⷭ҇ть .

сла́ва . гла́съ , ѕ҃ . Трꙋба̀ златᲂгла́снаѧ пᲂказа́сѧ златᲂглаго́ливе златᲂꙋ́сте , златᲂдѣ́йствꙋѧ срⷣца̀ вѣ́рныхъ , златᲂимени́тыми пᲂꙋче́ньми . прᲂро́чески бᲂ и҆зы́де вѣща́нїе , и҆справле́нїи твᲂи́хъ прпⷣбне ѻ҆́ч҃е , и҆ ми́ра всегѡ̀ кᲂнцы̀ прᲂсвѣтѝ . и҆ ны́нѣ , боⷢ҇ . Твᲂре́цъ и҆ и҆зба́витель мо́й пречⷭ҇таѧ хрⷭ҇то́съ гдⷭ҇ь , и҆з̾ твᲂи́хъ лᲂже́снъ прᲂше́дъ , в̾ мѧ̀ ѡ҆бо́лксѧ , пе́рвыѧ клѧ́твы а҆да́ма свᲂбᲂдѝ , тѣ́мже тѝ пречⷭ҇таѧ , ꙗ҆́кѡ бж҃їи мт҃ри невѣ́стѣ и҆ дв҃ѣй вᲂи́стинꙋ , вᲂпїе́мъ немо́лчнᲂ . ра́дꙋйсѧ а҆́нг҃льски . ра́дꙋйсѧ влⷣчце , пред̾ста́тельнице и҆ пᲂкро́ве , и҆ спасе́нїе дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь , ст҃лю , двⷤа . и҆ бцⷣе дв҃ᲂ ра́дꙋисѧ ,= аⷤ .=

На ᲂу҆́трени , на бг҃ъ гдⷭ҇ь , трᲂпа́рь , ст҃лю , двⷤа . сла́ва , и҆ ны́нѣ , боⷢ҇ , вᲂскрⷭ҇нъ . =Пᲂ а҃ , стихᲂло́гїи , сѣда́ленъ . гла́съ , а҃ . Златᲂѡ҆бра́знаѧ ѕвѣзда̀ земны́мъ вᲂсїѧ́лъ є҆сѝ златᲂꙋ́сте свѣ́тлѡ , і҆ѡа́нне всебл҃же́нне , прᲂсвѣща́ѧ кᲂнцы̀ зарѧ́ми слᲂве́съ твᲂи́хъ . тѣ́мъ дне́сь всест҃ꙋ́ю тѝ па́мѧть пра́зднꙋюще , грѣхо́въ всѣ́хъ про́симъ ѡ҆ставле́нїѧ . =два́жды . сла́ва , и҆ ны́нѣ , боⷢ҇ . Без̾невѣ́стнаѧ чⷭ҇таѧ бцⷣе мр҃і́е , є҆ди́на вѣ́рнымъ спасе́нїе и҆ пᲂкро́ве , бѣ́дъ и҆ скᲂрбе́й и҆ лю́тыхъ ѡ҆бстᲂѧ́нїи всѣ́хъ и҆зба́ви на тѧ̀ ᲂу҆пᲂва́нїе ѻ҆трᲂкᲂви́це и҆мꙋ́щихъ . и҆ дш҃а на́ша спасѝ бжⷭ҇твеными мл҃твами твᲂи́ми .

Пᲂ в҃ , стихᲂло́гїи , сѣда́ленъ . гла́съ , є҃ . Свѣти́льника слᲂве́снагᲂ бг҃ᲂдх҃нᲂве́нныхъ писа́нїи , наставлѧ́ющагᲂ на́съ к̾ пᲂкаѧ́нїю , мно́гаѧ и҆скꙋше́нїѧ претерпѣ́вша , златᲂꙋ́стагѡ вѣ́рнїи , ꙗ҆́кѡ наꙋ́чшесѧ ѿ негѡ̀ пᲂчте́мъ по́ дᲂлгꙋ . мо́литбᲂсѧ гдⷭ҇ви спасти́сѧ дш҃а́мъ на́шимъ . двⷤа . сла́ва , и҆ ны́нѣ , боⷢ҇ . Ди́внᲂ чꙋ́дᲂ зача́тїѧ , и҆ неи҆зрече́нныи ѻ҆́бразъ ржⷭ҇тва̀ , в̾ тебѣ̀ ᲂу҆ви́дѣсѧ чⷭ҇таѧ прⷭ҇нѡ дв҃ᲂ , ᲂу҆дивлѧ́етъ мѝ ᲂу҆́мъ , и҆ ᲂу҆жаса́етъ ми пᲂмышле́нїѧ , сла́ва твᲂѧ̀ бцⷣе , пᲂ всѣ́хъ прᲂстре́сѧ , к̾ спасе́нїю дш҃а́мъ на́шимъ .

Пᲂ пᲂлїєлеѡ́сѣ , сѣда́лен̾ . гла́съ , и҃ . Сᲂкро́вище ꙗ҆ви́сѧ дх҃о́внᲂе бжⷭ҇твеными слᲂвесы̀ , ꙗ҆́кѡ вᲂи́стинꙋ , ми́рᲂви златᲂꙋ́сте прᲂсїѧ́въ кᲂнце́мъ . бᲂга́тьствᲂ спасе́нᲂе всѣ́мъ по́далъ є҆сѝ , наставлѧ́ѧ бл҃же́нне лю́ди к̾ пᲂкаѧ́нїю . тѣ́мъ и҆ тече́нїе сᲂверши́въ житїѧ̀ , прⷭ҇то́лꙋ пред̾стᲂи́ши вы́шнѧгѡ прⷭ҇нѡ па́мѧтне і҆ѡа́нне златᲂꙋ́сте , мᲂлѝ хрⷭ҇та̀ бг҃а , грѣхо́въ ѡ҆ставле́нїе дарᲂва́ти , чтꙋ́щимъ любо́вїю ст҃ꙋ́ю па́мѧть твᲂю̀ . двⷤа . сла́ва , и҆ ны́нѣ , боⷢ҇ . Нбⷭ҇нꙋю две́рь и҆ кᲂвче́гъ , всест҃ꙋ́ю го́рꙋ , свѣтᲂза́рныи ѻ҆́блакъ , вᲂспᲂе́мъ неѡ҆пали́мꙋю кꙋпинꙋ̀ , слᲂве́сныи ра́й , є҆́ввинᲂ вᲂзва́нїе , вселе́ннѣй все́й нача́льнᲂе сᲂкро́вище , ꙗ҆́кѡ спасе́нїе в̾ не́й сᲂдѣ́ѧсѧ ми́рᲂви , и҆ ѡ҆ставле́нїе дре́внихъ прегрѣше́нїи . тѣ́мъ и҆ вᲂпїе́мъ к̾ не́й , мᲂли́сѧ хрⷭ҇тꙋ̀ бг҃ꙋ , грѣхо́въ ѡ҆ставле́нїе дарᲂва́ти , бл҃гᲂче́стнѡ пᲂкланѧ́ющимсѧ ржⷭ҇твꙋ̀ твᲂемꙋ̀ .

степе́нна , д҃ гᲂ гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . Оу҆ста̀ мᲂѧ̀ вᲂз̾глаго́лютъ премꙋ́дрᲂсть , и҆ пᲂꙋче́нїе срⷣца мᲂегѡ̀ ра́зꙋмъ . сти́хъ . ᲂу҆слы́шите сїѧ̀ всѝ ꙗ҆зы́цы , внꙋши́те всѝ живꙋ́щїи пᲂ вселе́ннѣй . всѧ́кᲂ дыха́нїе .

є҆ѵⷢ҇а́лїе , ѿ і҆ѡа́нна . заⷱ҇ , л҃є , ѿ пᲂлꙋ̀ . ѱало́мъ , н҃ .

сла́ва . мᲂли́твъ ра́ди ст҃лѧ , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

Пᲂми́лꙋй мѧ бж҃е пᲂ вели́цѣй млⷭ҇ти твᲂе́й пᲂ мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , ѕ҃ . Прпⷣбне требл҃же́нне сщ҃е́нныи ѻ҆́ч҃е , па́стырю до́брыи , нача́льнагѡ па́стырѧ хрⷭ҇та̀ ᲂу҆ченичѐ , пᲂлᲂжи́выи дш҃ꙋ пᲂ ѻ҆вца́хъ , са́мъ ны́нѣ прехва́льне і҆ѡа́нне златᲂꙋ́сте , и҆спрᲂсѝ мᲂли́твами свᲂи́ми , дарᲂва́ти на́мъ ве́лїю ми́лᲂсть .

Кано́нъ , бцⷣѣ . сᲂ і҆рмᲂсо́мъ , на́ ѕ҃ . и҆ ст҃о́мꙋ на и҃ . =Кано́нъ , прест҃ѣ́й бцⷣѣ . твᲂре́нїе ѳеѡ́фанᲂвѡ . гла́съ , и҃ . пѣ́снь , а҃ . і҆рмо́съ . Во́дꙋ прᲂше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вᲂпїѧ́ше , и҆зба́вителю бг҃ꙋ на́шемꙋ пᲂе́мъ . =запѣ́в̾ : Прест҃а́ѧ гжⷭ҇е бцⷣе спасѝ на́съ .= М=но́гими сᲂдержи́мъ напа́стьми , к̾ тебѣ̀ прибѣга́ю спасе́нїѧ и҆скі́й , ѽ мт҃и сло́вꙋ и҆ дв҃ᲂ , ѿ лю́тыхъ и҆ нꙋ́жныхъ мѧ спасѝ . Страсте́й мѧ смꙋща́ютъ прило́зи , и҆ мно́гїѧ печа́ли и҆спᲂлнѧ́ютъ ми дш҃ꙋ , ᲂу҆мирѝ ѻ҆трᲂкᲂви́це , тишино́ю сн҃а и҆ бг҃а твᲂегѡ̀ всенепᲂро́чнаѧ . Сп҃са ро́ждьшꙋю тѧ̀ и҆ бг҃а , мᲂлю̀ дв҃це и҆зба́вити мѧ̀ ѿ лю́тъ . к̾ тебѣ́ бᲂ ны́нѣ прибѣга́ю , прᲂстира́ѧ дш҃ꙋ и҆ пᲂмышле́нїе . Въ ско́рби мѧ сꙋ́ща и҆ в̾ тꙋзѣ̀ , пᲂсѣще́нїѧ бжⷭ҇твенагѡ прᲂмышле́нїѧ є҆́же ѿ тебѐ спᲂдо́би , є҆ди́на бг҃ᲂмт҃и ꙗ҆́кѡ бл҃га̀ бл҃го́мꙋ же рᲂди́тельнице .

Кано́нъ ст҃о́мꙋ , и҆мы́и краегране́сїе сѐ . дх҃о́вна пᲂю́ тѧ златᲂꙋ́ста . твᲂре́нїе ѳеѡ́фанᲂвᲂ . гла́съ , и҃ . пѣ́снь , а҃ . і҆рмо́съ . Вᲂѡ҆рꙋжена фараѡ́на .= запѣ́в̾ : Ст҃лю хрⷭ҇то́въ і҆ѡа́нне златᲂꙋ́сте , мᲂлѝ бг҃а ѡ҆ на́съ . Пᲂкаѧ́нїѧ бы́въ те́плыи прᲂпᲂвѣ́дникъ златᲂꙋ́сте , пᲂка́ѧтисѧ ѻ҆́ч҃е бг҃ᲂви , за мѧ̀ мᲂли́сѧ , ѿ всегѡ̀ срⷣца мᲂегѡ̀ . и҆ дре́внихъ прегрѣше́нїи и҆сцѣли́ти ѡ҆стрꙋпле́нїѧ , твᲂи́мъ милᲂсе́рдїемъ ᲂу҆мᲂлѝ . Всѧ̀ зарѝ ст҃а́гѡ дх҃а ѻ҆́ч҃е прїи́мъ , всесвѣ́телъ ꙗ҆ви́сѧ сто́лпъ , пред̾хᲂдѧ̀ цр҃кви прпⷣбне . свѣ́телъ же ѻ҆́блакъ всебл҃же́нне ѡ҆сѣнѧ́ющь , правᲂсла́вныхъ со́нмища . =сла́ва . Хрⷭ҇то́мъ пᲂста́вленъ ᲂу҆чи́тель бжⷭ҇твена пᲂвелѣ́нїѧ , златᲂѡ҆бра́знымъ ꙗ҆зы́кᲂмъ во́лею бг҃ᲂмꙋ́дрᲂю , бᲂга́тнѡ ты̀ и҆стᲂча́ѧ бж҃їѧ рѣ́ки во́дъ и҆спо́лнены дх҃о́вныхъ , ꙗ҆ви́сѧ бг҃ᲂгла́се златᲂꙋ́сте .= и҆ ны́нѣ , боⷢ҇ . Прекра́шенᲂ разли́чїемъ бл҃гᲂда́ти бг҃ᲂра́дᲂваннаѧ , ѻ҆́ч҃ее сло́вᲂ вᲂплᲂще́нᲂ бы́вше млрⷭ҇дїемъ мно́гимъ па́че ᲂу҆ма̀ и҆ слᲂвесѐ , блгⷭ҇ве́наѧ пᲂрᲂдила̀ є҆сѝ , пребы́вши дв҃ᲂю нескве́рнаѧ . =катава́сїѧ : Ѿве́рзꙋ ᲂу҆ста̀ .

пѣ́снь , г҃ . і҆рмо́съ . Нбⷭ҇нᲂмꙋ крꙋ́гꙋ верхᲂтво́рче гдⷭ҇и , и҆ цр҃кви зижди́телю , ты̀ менѐ ᲂу҆твердѝ в̾ любвѝ свᲂе́й . жела́нїемъ сы́и кра́й , и҆ вѣ́рнымъ ᲂу҆тверже́нїе , є҆ди́не чл҃кᲂлю́бче . Застꙋпле́нїе и҆ пᲂкро́въ жи́зни мᲂе́й , пᲂлᲂжи́хъ тѧ бг҃ᲂрᲂди́тельнице дв҃ᲂ , ты̀ менѐ ѡ҆кᲂрмѝ к̾ приста́нищꙋ свᲂемꙋ̀ , бл҃ги́мъ вино́вна , и҆ вѣ́рнымъ ᲂу҆тверже́нїе , є҆ди́на всепѣ́таѧ . Мᲂлю̀ дв҃це , дш҃е́внᲂе смꙋще́нїе , и҆ печа́ли бꙋ́рю разᲂри́ти ми . ты́ бᲂ бг҃ᲂневѣ́стнаѧ , нача́льника тишинѣ̀ хрⷭ҇та̀ рᲂдила̀ є҆сѝ , є҆ди́на пречи́стаѧ . Бл҃гᲂда́телѧ ро́ждьши до́брымъ вино́внагᲂ , бл҃гᲂдѣѧ́нїѧ бᲂга́тьствᲂ всѣ́мъ и҆стᲂчѝ . всѧ́ бᲂ мо́жеши , ꙗ҆́кѡ си́льна в̾ крѣ́пᲂсти , хрⷭ҇та̀ ро́ждьши бг҃ᲂбл҃же́ннаѧ . Лю́тыми недꙋ́ги , и҆ бᲂлѣ́знеными стрⷭ҇тьмѝ и҆стѧза́емꙋ , дв҃ᲂ ты́ ми пᲂмᲂзѝ , и҆сцѣле́нїемъ бᲂ неѡ҆скꙋ́днᲂ тѧ̀ зна́ю сᲂкро́вище , некра́дᲂмᲂ и҆ неи҆здае́мᲂ .

и҆́нъ , і҆рмо́съ . Оу҆тверже́и нб҃са̀ . Оу҆́мъ тво́й хрⷭ҇то́мъ ѡ҆бᲂга́щьсѧ , твᲂи́мъ чи́стымъ житїе́мъ чл҃кѡмъ спасе́нїѧ бы́сть , пᲂспѣ́шенъ пᲂвѣсти́тель , сᲂдѣ́йственъ златᲂꙋ́сте , ᲂу҆чи́тельства и҆стᲂча́ѧ спасе́наѧ бг҃ᲂдх҃нᲂве́нне . Ѿ невеще́ственыхъ сᲂкро́вищь дх҃а ты̀ ѡ҆бᲂга́щьсѧ . ѿ и҆сто́чникъ спасе́ныхъ пᲂче́рплъ є҆сѝ , приснᲂтекꙋ́щїи и҆сто́чникъ ᲂу҆че́ней , и҆ напᲂѝ цр҃ко́внᲂе всепрепᲂдо́бне ѻ҆́ч҃е лицѐ . сла́ва . Ѡ҆лѧденѣ́вшаѧ дш҃е́вныѧ ѻ҆́ч҃е бразды̀ , премꙋ́дрымъ дѣ́ланїемъ слᲂве́съ ѡ҆чи́стилъ є҆сѝ мꙋ́дрѡ . и҆ плᲂдᲂно́сны ꙗ҆ви́лъ є҆сѝ , нбⷭ҇ными тꙋ́чами сїѧ̀ напᲂѧ́ѧ бг҃ᲂпрїѧ́тне .= и҆ ны́нѣ , боⷢ҇ . Пᲂро́ка в̾ тебѣ̀ и҆ скве́рны нѣ́сть ѿ ню́дъ дв҃це , ѻ҆би́тель же па́че ꙗ҆ви́сѧ нбⷭ҇ныхъ бл҃гъ . в̾ тѧ́ бᲂ всели́сѧ дᲂбрᲂдѣ́тели всѧ̀ ст҃ы́нѧ всенепᲂро́чнаѧ . =катава́сїѧ : Твᲂѧ̀ пѣвцы̀ .

сѣда́ленъ . гла́съ , и҃ . Неи҆зрече́нныѧ премꙋ́дрᲂсти бг҃ᲂви́днѡ пᲂче́рпъ бᲂга́тьствᲂ та́йнᲂе . всѣ́мъ сниска́лъ є҆сѝ правᲂсла́вныѧ во́ды . вѣ́рныхъ ᲂу҆́бѡ веселѧ́ща срⷣца̀ прпⷣбне , невѣ́рныхъ же пᲂвелѣ́нїѧ дᲂсто́йнѡ пᲂгрꙋжа́юща . тѣ́мъ пᲂ дᲂстᲂѧ́нїю вᲂзда́нїѧ твᲂи́хъ бᲂлѣ́зней прїѧ́тъ приснᲂпа́мѧтне , трⷪ҇це пᲂбо́рниче і҆ѡа́нне златᲂꙋ́сте , мᲂлѝ хрⷭ҇та̀ бг҃а , грѣхо́въ ѡ҆ставле́нїе дарᲂва́ти , пра́зднꙋющимъ любо́вїю ст҃ꙋ́ю па́мѧть твᲂю̀ . сла́ва . И҆́же свы́ше премꙋ́дрᲂсти навы́къ , и҆ бл҃гᲂда́ти слᲂве́съ ѿ́ бг҃а , всѣ́мъ вᲂсїѧ́лъ є҆сѝ ꙗ҆́кѡ зла́тᲂ в̾ гᲂрни́лѣ . и҆ ст҃ꙋ́ю трⷪ҇цꙋ є҆ди́ницꙋ прᲂпᲂвѣ́далъ є҆сѝ . сребрᲂлю́бнꙋю ле́сть ᲂу҆стрѣли́въ слᲂвесы̀ свᲂи́ми . тѣ́мже и҆ ре́внᲂстїю цр҃цꙋ ѡ҆бличи́лъ є҆сѝ . а҆́рїевᲂ пᲂсрами́лъ є҆сѝ и҆нᲂплеме́ннᲂе ᲂу҆че́нїе і҆ѡа́нне златᲂꙋ́сте . мᲂлѝ хрⷭ҇та̀ бг҃а , грѣхо́въ ѡ҆ставле́нїе дарᲂва́ти , чтꙋ́щимъ любо́вїю ст҃ꙋ́ю па́мѧть твᲂю̀ .= и҆ ны́нѣ , боⷢ҇ . Ꙗ҆́=кѡ всенепᲂро́чнаѧ невѣ́ста твᲂрцꙋ̀ . ꙗ҆́кѡ не и҆скꙋсᲂмꙋ́жнаѧ мт҃и и҆зба́вителѧ , ꙗ҆́кѡ прїѧ́телище сꙋ́щи ᲂу҆тѣ́шителѧ препѣ́таѧ , без̾зако́нїю мѧ сꙋ́ща скве́рнᲂ жили́ще , и҆ бѣсо́мъ и҆гра́лище в̾ ра́зꙋмѣ бы́вша , пᲂтщи́сѧ и҆ си́хъ ѕлᲂдѣ́йствїѧ мѧ и҆зба́вити . свѣ́тлᲂ жили́ще дᲂбрᲂдѣ́тельми сᲂдѣ́лавши . свѣтᲂпрїе́мнице нетлѣ́ннаѧ , раз̾женѝ ѻ҆́блакъ страсте́й . и҆ вы́шнѧгѡ наслѣ́дїѧ спᲂдо́би , и҆ свѣ́тꙋ невече́рнемꙋ мл҃твами сѝ .

пѣ́снь , д҃ . і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́иньствᲂ , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Страсте́й мᲂи́хъ смꙋще́нїе , ꙗ҆́же ко́рмчїю ро́ждьши гдⷭ҇а , бꙋ́рю ᲂу҆ти́ши мᲂи́хъ прегрѣше́нїй , бг҃ᲂневѣ́стнаѧ . Милᲂсе́рдїѧ бе́зднꙋ призыва́ющꙋ твᲂю̀ пᲂда́ждь ми , ꙗ҆́же бл҃гᲂсе́рдагᲂ ро́ждьши , и҆ сп҃са всѣ́мъ пᲂю́щимъ тѧ̀ . Наде́жꙋ и҆ ᲂу҆тверже́нїе , и҆ спасе́нїѧ стѣ́нꙋ недви́жимꙋ , стѧжа́вше тѧ̀ всенепᲂро́чнаѧ , ѕлᲂлю́тыхъ всѣ́хъ и҆збавлѧ́емсѧ .= Н=а ѻ҆дрѣ̀ бᲂлѣ́зни мᲂеѧ̀ грѣхо́внѣ слежа́ща мѧ̀ , ꙗ҆́кѡ чл҃кᲂлюби́ва , пᲂмᲂзи́ ми бцⷣе мт҃и прⷭ҇нѡ дв҃ᲂ .

и҆́нъ , і҆рмо́съ . Ты́ ми хрⷭ҇тѐ гдⷭ҇ь . Дрꙋга́гѡ на́мъ а҆пⷭ҇лѡмъ є҆динᲂѡ҆бра́зна , и҆́же прᲂмышлѧ́ѧ всѣ́хъ прᲂмы́сленикъ , ꙗ҆́кѡ бл҃гъ дадѐ хрⷭ҇то́съ , тѧ̀ нбⷭ҇нагѡ тайнѡᲂу҆чи́телѧ , и҆ прᲂпᲂвѣ́дника , и҆ бжⷭ҇твенагѡ прᲂро́ка вы́шнихъ і҆ѡа́нне всебл҃же́нне златᲂꙋ́сте . Златᲂза́рна и҆ златᲂслᲂве́сна златᲂꙋ́стагѡ і҆ѡа́нна , всепᲂзлати́вшагᲂ златᲂви́дными сїѧ́нїи ᲂу҆че́нїѧ , и҆ ми́ръ ꙗ҆зы́кѡмъ прᲂсвѣти́вша . зла́та свѣтлѣ́йшꙋ и҆ свѣ́та по́лнѣйшꙋ , и҆стᲂча́юща бл҃гᲂда́ть бжⷭ҇твенꙋю . Ве́сь бы́сть бж҃їе жили́ще , ве́сь ꙗ҆ви́сѧ а҆рга́нъ дх҃о́вныи , вᲂз̾глаша́ющь всѧ́кꙋ дᲂбрᲂдѣ́тель , бг҃ᲂдх҃нᲂве́нныхъ пѣ́нїи спасе́наѧ сказа́нїѧ . и҆ дᲂбро́тꙋ ꙗ҆влѧ́ѧ нбⷭ҇нагѡ црⷭ҇твїѧ , і҆ѡа́нне всебл҃же́нне златᲂꙋ́сте . сла́ва . Ты̀ бж҃їе млрⷭ҇дїе распрᲂстрѐ , пᲂкаѧ́нїѧ ѻ҆́бразы и҆злага́ѧ . и҆ ѕлы́хъ ѿбѣжа́нїѧ и҆зѧ́щнѡ пᲂꙋча́ѧ пребл҃же́нне и҆ всекᲂне́чнѣ . и҆ дѣ́лъ и҆зрѧ́дныхъ пᲂꙋче́нїе и҆стᲂча́ѧ всече́стне ѻ҆́ч҃е златᲂꙋ́сте .= и҆ ны́нѣ , боⷢ҇ . С=ъ бг҃ᲂмъ застꙋ́пницꙋ тѧ̀ стѧжа́хᲂмъ . ты́ бᲂ бж҃їѧ мт҃и бы́сть твᲂрца̀ и҆ сᲂдѣ́телѧ , и҆ на́ше вᲂѡ҆браже́нїе прїе́мша всенепᲂро́чнаѧ . и҆ сїѐ спа́сша ѿ тлѝ и҆ сме́рти , и҆ сла́вᲂю бжⷭ҇твенᲂю прᲂсла́вльшагᲂ .

катава́сїѧ : Сѣдѧ́и вᲂ сла́вѣ .

пѣ́снь , є҃ . і҆рмо́съ . Прᲂсвѣтѝ на́съ пᲂвелѣ́нїемъ

сѝ гдⷭ҇и , и҆ мы́шцею высо́кᲂю , твᲂегѡ̀ ми́ра пᲂда́ждь на́мъ , є҆ди́не чл҃кᲂлю́бче . И҆спо́лни чи́стаѧ весе́лїѧ живᲂта̀ на́шегѡ , твᲂю̀ нетлѣ́ннꙋю даю́щи ра́дᲂсть , весе́лїѧ ро́ждьши сꙋ́щагѡ винꙋ̀ . И҆зба́ви на́съ ѿ бѣ́дъ бцⷣе чⷭ҇таѧ , вѣ́чнᲂе ро́ждьши и҆збавле́нїе , и҆ ми́ра всѧ́къ ᲂу҆́мъ преи҆мꙋ́щагᲂ . Разрѣшѝ мглꙋ̀ прегрѣше́нїй мᲂи́хъ бг҃ᲂневѣ́стᲂ , свѣ́тᲂмъ твᲂеѧ̀ свѣ́тлᲂсти , ꙗ҆́же свѣ́тъ ро́ждьшаѧ бжⷭ҇твеный и҆ превѣ́чный . И҆сцѣлѝ чи́стаѧ дш҃и мᲂеѧ̀ немᲂже́нїе , пᲂсѣще́нїемъ сѝ ᲂу҆бѣ́ждьшисѧ , и҆ здра́вїе мᲂльба́ми сѝ пᲂда́ждь мѝ .

и҆́нъ , і҆рмо́съ . Вскꙋ́ю мѧ ѿри́нꙋ . Цр҃ко́внагᲂ свѣти́льника вси́ тѧ свѣ́мы свѣтᲂви́дна , и҆ дш҃а́мъ спасе́нїе . и҆схита́ющагᲂ си́хъ и҆з̾ гᲂрта́нѧ смертᲂно́сна , и҆ къ живᲂтꙋ̀ наставлѧ́юща вѣ́чнꙋющꙋ , ѻ҆́ч҃е приснᲂсло́выи . Рꙋши́ши ѡ҆пᲂлче́нїѧ є҆рети́чествꙋющихъ требл҃же́нне , ѡ҆гради́всѧ бл҃гᲂче́стїѧ ѻ҆рꙋ́жїемъ , и҆ мꙋ́жествᲂмъ дш҃е́внымъ сщ҃е́нне . сᲂбира́еши же ра́дꙋѧсѧ пресвѣ́тлѡ правᲂсла́вныхъ ли́ки сᲂю́зᲂмъ дх҃о́внымъ . сла́ва . И҆спо́лнь ꙗ҆́кѡ ча́шꙋ бжⷭ҇твеныхъ а҆рама́тъ , лани́тѣ твᲂѝ вселе́ннꙋю , разꙋ́мными бл҃гᲂꙋха́нїи веселѧ́тъ . ᲂу҆́мнагѡ ми́ра пᲂма́занїемъ , и҆ дᲂбро́тᲂю слᲂве́съ твᲂи́хъ премꙋ́дре .= и҆ ны́нѣ , боⷢ҇ . Ꙗ҆́кѡ бг҃а заче́ншꙋ сᲂдѣ́телѧ же и҆ твᲂрца̀ и҆ гдⷭ҇а , ро́ди всѝ чл҃честїи чи́стаѧ ᲂу҆бл҃жа́ютъ , и҆ беспло́тныхъ разꙋ́мнаѧ чинᲂнача́лїѧ , ꙗ҆́кѡ мт҃рь бж҃їю тѧ сла́вѧще . катава́сїѧ : О=у҆диви́шасѧ всѧ́ческаѧ .

пѣ́снь , ѕ҃ . і҆рмоⷭ҇ . Мл҃твꙋ прᲂлїю̀ ко́ гдⷭ҇ꙋ , и҆ тᲂмꙋ̀ вᲂз̾вѣщꙋ̀ печа́ль мᲂю̀ . ꙗ҆́кѡ ѕѡ́лъ дш҃а мᲂѧ̀ напо́лнисѧ , и҆ живо́тъ мо́й а҆́дꙋ прибли́жисѧ . и҆ мᲂлю́сѧ ꙗ҆́кѡ і҆ѡ́на , ѿ тлѝ бж҃е мо́й вᲂз̾веди́ мѧ . Сме́рти и҆ тлѝ ꙗ҆́кѡ спа́слъ є҆́сть , са́мъсѧ и҆з̾да́въ на сме́рть , тлѣ́нїемъ и҆ сме́ртїю мᲂѐ є҆стество̀ ꙗ҆́тᲂ бы́вшее . дв҃ᲂ мᲂлѝ гдⷭ҇а и҆ сн҃а свᲂегѡ̀ , врагѡ́въ ѕлᲂдѣ́йствїѧ мѧ̀ и҆зба́вити . Застꙋ́пницꙋ тѧ̀ живᲂтꙋ̀ свѣ́мъ , и҆ храни́тельницꙋ тве́рдꙋ дв҃це , напа́стей рѣша́щꙋ мᲂлвы̀ , и҆ нало́ги бѣсо́мъ ѿгᲂнѧ́щꙋ . и҆ мᲂлю́сѧ всегда̀ , страсте́й мѧ и҆зба́вити всенепᲂро́чнаѧ .= Ꙗ҆́=кѡ стѣ́нꙋ и҆ прибѣ́жище стѧжа́хᲂмъ , и҆ дш҃а́мъ тѧ̀ сᲂверше́нᲂе спасе́нїе , и҆ прᲂстра́нствᲂ в̾ ско́рбѣхъ ѻ҆трᲂкᲂви́це . и҆ свѣ́тᲂмъ тѝ прⷭ҇нѡ ра́дꙋемсѧ , ѽ влⷣчце , ны́нѣ на́съ ѿ стрⷭ҇те́й и҆ бѣ́дъ спасѝ . На ѻ҆дрѣ̀ нн҃ѣ не́мᲂщїю низ̾лежꙋ̀ , и҆ нѣ́сть и҆сцѣле́нїѧ пло́ти мᲂе́й . нᲂ ꙗ҆́же бг҃а и҆ сп҃са ми́рꙋ , и҆ и҆зба́вителѧ недꙋ́гᲂмъ ро́ждьшаѧ , тебѣ̀ мᲂлю́сѧ бл҃го́й , ѿ и҆стлѣ́нїѧ бᲂлѣ́зней вᲂста́ви мѧ .

и҆́нъ , і҆рмо́съ . Ѡ҆чи́сти мѧ сп҃се . Премꙋ́дрᲂстїю дх҃о́внᲂю ми́ра всегѡ̀ ѡ҆бᲂгати́лъ є҆сѝ , слᲂве́сныи пᲂда́тель бы́въ бᲂга́тыи . бᲂга́та бᲂ свы́ше ст҃лю бл҃гᲂда́ть и҆злїѧ́сѧ вᲂ ᲂу҆стна́хъ твᲂи́хъ . Вᲂ всю̀ зе́млю ꙗ҆́кѡ мо́лнїѧ и҆зы́де вѣща́нїе твᲂѐ . и҆ си́ла же твᲂи́хъ гл҃ъ златᲂꙋ́сте , ꙗ҆́кѡ трꙋба̀ велегла́снаѧ вселе́нныѧ всѧ̀ ѡ҆гласѝ кᲂнцы̀ . сла́ва . Свы́ше вᲂ и҆стка́ннꙋю ри́зꙋ ѡ҆дѣ́ѧвсѧ пребл҃же́нне дᲂбрᲂдѣ́телей , и҆ слᲂве́съ красᲂто́ю ѡ҆блᲂжи́всѧ . и҆́стины ꙗ҆ви́сѧ сла́внᲂе ᲂу҆твержде́нїе .= и҆ ны́нѣ , боⷢ҇ . В=седержи́тельнᲂю си́лᲂю нᲂсѧ́и всѧ́ческаѧ , в̾ немᲂщнꙋ́ю пло́ть и҆з̾ тебѐ ѡ҆дѣ́ѧвсѧ дв҃ᲂ пренепᲂро́чнаѧ , на бл҃гᲂдѣѧ́нїе чл҃кѡмъ , чл҃кᲂлю́бецъ .

катава́сїѧ : Бжⷭ҇твенᲂе сѐ и҆ всечестно́е .

кᲂнда́къ . гла́съ , ѕ҃ . Съ нб҃съ прїе́мъ бжⷭ҇твенꙋю бл҃гᲂда́ть , и҆ свᲂи́ми ᲂу҆стна́ми всѣ́хъ наꙋча́ѧ , пᲂкланѧ́тисѧ въ трⷪ҇цѣ є҆ди́нᲂмꙋ бг҃ꙋ , і҆ѡа́нне златᲂꙋ́сте всебл҃же́нне прпⷣбне . дᲂсто́йнѡ хва́лимъ тѧ , є҆си́ бᲂ наста́вникъ , ꙗ҆́кѡ бжⷭ҇твенаѧ ꙗ҆влѧ́ѧ . и҆́кᲂсъ . Всѣ́хъ твᲂрцꙋ̀ прекланѧ́ю кᲂлѣ́ни , превѣ́чнᲂмꙋ сло́вꙋ рꙋ́цѣ вᲂз̾дѣва́ю , сло́ва прᲂсѧ̀ бл҃гᲂда́ть , да вᲂспᲂю̀ прпⷣбнагѡ , є҆го́же са́мъ прᲂсла́ви . рече́ бᲂ про́рᲂкꙋ живы́и во́ вѣки , сла́вѧщїѧ мѧ вѣ́рᲂю , прᲂсла́влю . и҆́же ᲂу҆́бѡ въ дре́внихъ самꙋ́ила вᲂзнесы́и , прᲂсла́ви и҆ ны́нѣ ст҃лѧ . тала́нтъ бᲂ є҆го́же прїѧ́тъ , до́брѣ кꙋ́плю сᲂтво́рь цр҃е́ви принесѐ . тѣ́мже и҆ превᲂзнесѐ є҆гѡ̀ пребᲂга́тыи . сегѡ̀ бл҃гᲂда́ть прᲂшꙋ̀ недᲂсто́йныи те́плѣ , сло́вᲂ прїѧ́ти ми . да вᲂзмᲂгꙋ̀ бл҃гᲂче́стнѡ вᲂспѣ́ти и҆ а҆́зъ . кᲂнце́мъ бᲂ то́й є҆́сть наста́вникъ , ꙗ҆́кѡ бжⷭ҇твенаѧ ꙗ҆влѧ́ѧ .

пѣ́снь , з҃ . і҆рмо́съ . И҆́же ѿ і҆ꙋде́и , дᲂше́дше ѻ҆́трᲂцы в̾ вавилѡ́нъ дре́вле , вѣ́рᲂю ᲂу҆тверже́нїи , пла́мень пе́щныи пᲂпра́вше гл҃юще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . На́ше спасе́нїе ꙗ҆́кᲂже вᲂсхᲂтѣ̀ сп҃се , ᲂу҆стро́ити во́ чревᲂ дв҃ыѧ всели́сѧ . ю҆́же ми́рꙋ застꙋ́пницꙋ пᲂказа̀ . ѻ҆ц҃ъ на́шихъ бж҃е бл҃гᲂслᲂве́нъ є҆сѝ .= В=ᲂли́телѧ млⷭ҇ти , є҆го́же рᲂдѝ мт҃и ны́нѣ ᲂу҆мᲂлѝ , и҆зба́вити мѧ ѿ прегрѣше́нїй и҆ дш҃е́вныѧ скве́рны , сн҃ꙋ твᲂемꙋ̀ зᲂвꙋ́ща , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Сᲂкро́вище спасе́нїѧ , и҆ и҆сто́чникъ нетлѣ́нїѧ , тебѐ ро́ждьшꙋю , сто́лпъ ᲂу҆тверже́нїѧ , и҆ две́рь пᲂкаѧ́нїѧ , вᲂпїю́щимъ пᲂказа̀ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Тѣле́сныѧ недꙋ́ги , и҆ дш҃е́вныѧ грѣхѝ , бг҃ᲂрᲂди́тельнице , любо́вїю пристꙋпа́ющимъ к̾ кро́вꙋ твᲂемꙋ̀ дв҃це , и҆сцѣли́ти спᲂдо́би , ꙗ҆́же сп҃са хрⷭ҇та̀ на́мъ ро́ждьшаѧ .

и҆́нъ , і҆рмо́с̾ . Бж҃їѧ схᲂжде́нїѧ . Бл҃гᲂсти бе́зднꙋ и҆ бл҃гᲂꙋтро́бїѧ навы́къ бж҃їѧ . пᲂрꙋчи́тель ꙗ҆ви́сѧ спасе́нїю ка́ющимсѧ те́плѣ , и҆ вседꙋ́шнѡ гдⷭ҇ви зᲂвꙋ́щимъ , бл҃гᲂслᲂве́нъ бг҃ъ ѻ҆ц҃ъ на́шихъ . Вчинѧ́еши златᲂꙋ́сте ᲂу҆че́нїи твᲂи́ми всѐ пᲂмышле́нїе , и҆ дш҃е́вныѧ ᲂу҆врачꙋ́еши не́мᲂщи ꙗ҆́кѡ милᲂсе́рдъ , и҆ бл҃гᲂтекꙋ́щимъ спᲂе́ши веселѧ́сѧ , бл҃гᲂслᲂве́нъ бг҃ъ ѻ҆ц҃ъ на́шихъ . сла́ва . Вᲂзнесе́сѧ бы́въ и҆збра́нъ препᲂдо́бенъ неѕло́бивъ сщ҃е́нникъ вы́шнѧгѡ , пра́вдᲂю ѡ҆дѣ́ѧнъ свѣ́тлѡ , и҆ весе́лїемъ зᲂвы́и всебᲂга́те , бл҃гᲂслᲂве́нъ бг҃ъ ѻ҆ц҃ъ на́шихъ .= и҆ ны́нѣ , боⷢ҇ . З=ачала̀ є҆сѝ пречⷭ҇таѧ надᲂ всѣ́ми бг҃а и҆ гдⷭ҇а , бл҃гᲂвᲂли́вшагᲂ спастѝ чл҃ческїи ро́дъ , ѿ тлѣ́нїѧ и҆ сме́рти . є҆го́же пᲂ дᲂстᲂѧ́нїю пᲂю́ще зᲂве́мъ , бл҃гᲂслᲂве́нъ бг҃ъ ѻ҆ц҃ъ на́шихъ .

катава́сїѧ : Непᲂслꙋжи́ша тва́ри .

пѣ́снь , и҃ . і҆рмо́съ . Цр҃ѧ нбⷭ҇нагѡ , є҆го́же пᲂю́тъ вѡ́и а҆́нг҃льстїи . хвали́те и҆ превᲂзнᲂси́те є҆гѡ̀ во́ вѣки . По́мᲂщи ꙗ҆́же ѿ тебѐ тре́бꙋющїѧ , непре́зри дв҃ᲂ пᲂю́щїѧ , и҆ превᲂзнᲂсѧ́щїѧ хрⷭ҇та̀ во́ вѣки . Немᲂже́нїе дш҃и мᲂеѧ̀ и҆сцѣлѧ́еши и҆ тѣле́сныѧ бᲂлѣ́зни дв҃ᲂ , ꙗ҆́кѡ да тѧ̀ пᲂе́мъ , и҆ превᲂзно́симъ чи́стꙋю во́ вѣки . И҆сцѣле́нїемъ бᲂга́тьствᲂ и҆злива́еши , вѣ́рнѡ пᲂю́щимъ тѧ̀ дв҃це , и҆ превᲂзнᲂсѧ́щимъ хрⷭ҇та̀ во́ вѣки . Напа́стныѧ ты̀ прило́ги ѿгᲂнѧ́еши , и҆ страстны́ѧ нахо́ды дв҃ᲂ , ꙗ҆́кѡ да тѧ̀ пᲂе́мъ и҆ превᲂзно́симъ чи́стꙋю во́ вѣки .

и҆́нъ , і҆рмо́съ . Се́дмь седми́цею пе́щь . И҆́же разꙋ́мнѡ слᲂвесы̀ твᲂи́ми бесѣ́дꙋюще златᲂꙋ́сте , бг҃ᲂсло́вїю честно́мꙋ ᲂу҆чи́мсѧ . и҆ всѐ пло́дствꙋемъ бл҃ги́хъ прїѡ҆брѣ́тенїе . и҆ ѕло́бнагѡ ѿбѣга́емъ вре́да . ѻ҆́бщїи бᲂ прᲂмы́сленикъ спасе́нїѧ бы́сть , вᲂпїѧ̀ превᲂзнᲂси́те хрⷭ҇та̀ во́ вѣки . За ны̀ мᲂлѝ влⷣкꙋ златᲂꙋ́сте млрⷭ҇днымъ дерзнᲂве́нїемъ , и҆ млⷭ҇тивнᲂю и҆ чл҃кᲂлю́бнᲂю тѝ ѻ҆́ч҃е любо́вїю . тѧ́ бᲂ къ сп҃сꙋ пред̾лага́емъ вѣ́рнїи хᲂда́таѧ и҆ пред̾ста́телѧ , и҆ теплѣ́йша мл҃твеника бг҃ᲂмꙋ́дре і҆єра́рхе пребл҃же́нне і҆ѡа́нне . блгⷭ҇ви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Ю҆́нᲂшскᲂ прᲂтивле́нїе и҆ непрекло́ннѡ мꙋдрᲂва́нїе , и҆ црⷭ҇твꙋющихъ непра́вдꙋ ѡ҆бличи́лъ є҆сѝ . те́плѣ пред̾ста́въ ѡ҆би́димымъ прпⷣбне . и҆ си́рымъ и҆ вдᲂви́цамъ и҆ ни́щимъ ѻ҆ц҃ъ бы́лъ є҆сѝ любо́внымъ пред̾лᲂже́нїемъ . превᲂзнᲂси́те вᲂпїѧ̀ хрⷭ҇та̀ во́ вѣки .= и҆ ны́нѣ , боⷢ҇ . Тѣле́сными ѡ҆браже́нїи , и҆ разли́чными гада́нїи и҆ ѻ҆бразы̀ , и҆ зако́нными прᲂрица́нїи , твᲂѐ прᲂвᲂзвѣсти́ша бг҃ᲂглаго́ливїи ржⷭ҇тво̀ па́че є҆стества̀ ди́внᲂе дв҃ᲂ . тѣ́мъ тѧ̀ веселѧ́щесѧ бл҃гᲂче́стнѡ вᲂспѣва́емъ , и҆ превᲂзно́симъ хрⷭ҇та̀ во́ вѣки . =катава́сїѧ : Хва́лимъ блгⷭ҇ви́мъ . Ѻ҆́трᲂки бл҃гᲂчести́выѧ .

пѣ́снь , ѳ҃ . і҆рмо́съ . Вᲂи́стинꙋ бцⷣꙋ тѧ̀ и҆спᲂвѣ́дающе , спасе́ннїи тᲂбо́ю дв҃це чⷭ҇таѧ , с̾ нбⷭ҇ными вѡ́и тѧ̀ велича́емъ .= Т=о́ка сле́зъ мᲂи́хъ не ѿврати́сѧ , ꙗ҆́же ѿ всѧ́кагѡ лица̀ всѧ̀ сле́зы ѿе́мшагѡ , дв҃це хрⷭ҇та̀ ро́ждьшаѧ . Ра́дᲂсти мᲂѐ се́рдце и҆спо́лни дв҃ᲂ , ꙗ҆́же ра́дᲂсти прїе́мши и҆спᲂлне́нїе грѣхо́внꙋю печа́ль пᲂтреблѧ́ющи . Свѣ́та твᲂегѡ̀ зарѧ́ми прᲂсвѣтѝ дв҃ᲂ , мра́къ невѣ́денїѧ ѿгᲂнѧ́щи , бл҃гᲂвѣ́рнѡ бцⷣꙋ тѧ̀ и҆спᲂвѣ́дающихъ . Въ мѣ́стѡ ѡ҆ѕлᲂбле́нїѧ , не́мᲂщи низ̾лежа́щагѡ , дв҃ᲂ и҆сцѣлѝ , и҆з̾ не здра́вїѧ вᲂ здра́вїе претвᲂрѧ́ющи .

и҆́нъ , і҆рмо́съ . Оу҆диви́сѧ ᲂу҆́бѡ . Вᲂи́стинꙋ наслажда́ѧсѧ ѻ҆́ч҃е жи́зни , ѡ҆ не́йже пᲂдвиза́сѧ є҆ли́кѡ мо́щнѡ на землѝ житїе́мъ пᲂдо́бнѡ а҆́нг҃льскимъ , и҆ хрⷭ҇то́въ стѧжа́въ ꙗ҆зы́къ , и҆ ᲂу҆ста̀ ти́хаѧ . спасти́сѧ бг҃ᲂглаго́ливе мᲂли́ тѧ вѣ́рᲂю разли́чнѡ бл҃жа́щимъ . Слᲂвеса̀ твᲂѧ̀ пребл҃же́нне слᲂвеса̀ жи́зни , живо́тъ хᲂда́тайствꙋюща непреста́ннѡ . тѧ́ бᲂ и҆сто́чника текꙋ́ща пᲂказа̀ хрⷭ҇то́съ , и҆ рѣкꙋ̀ прᲂлива́ющꙋ бжⷭ҇твеныѧ на́мъ то́ки ᲂу҆че́нїѧ . пи́щи вᲂи́стинꙋ пᲂто́къ . ѡ҆ставле́нїѧ же стрꙋю̀ , и҆ пᲂкаѧ́нїѧ свѣ́тла прᲂпᲂвѣ́дника . сла́ва . Хᲂда́тай ꙗ҆ви́сѧ сщ҃еннᲂнача́льниче , бг҃ꙋ и҆ чл҃кѡмъ пресвѣ́тлыи . ты́ бᲂ свѣти́лᲂ пᲂказа́сѧ бл҃гᲂче́стїѧ бг҃ᲂсвѣ́тлᲂе , и҆ бжⷭ҇твеныѧ бы́сть млⷭ҇тыни наста́вникъ . тѣ́мъ тѧ златᲂсло́ве серде́чнᲂю любо́вїю , нн҃ѣ дᲂсто́йнᲂ ᲂу҆бл҃жа́емъ .= и҆ ны́нѣ , боⷢ҇ . Ч=и́стаѧ препрᲂсла́вленаѧ мт҃и бг҃ꙋ , пᲂю́щїѧ тѧ любо́вїю спасѝ . и҆скꙋше́нїи мно́жествᲂ разрѣша́ющи млⷭ҇тивнѡ , ꙗ҆́кѡ бг҃а ро́ждьши . всѧ̀ є҆ли́ка хо́щеши сᲂверша́еши беспретыка́нїѧ , и҆ мо́жеши дв҃ᲂ . тѣ́мъ тѧ всѝ велича́емъ .

катава́сїѧ : Всѧ́къ зе́менъ .= Дᲂсто́йнѡ є҆́сть . свѣти́ленъ . Златᲂза́рными слᲂвесы̀ твᲂи́ми хрⷭ҇то́ва цр҃кви ᲂу҆краша́етсѧ ѽ златᲂꙋ́сте ѻ҆́ч҃е . дш҃а́ же веселѧ́тсѧ вѣ́рныхъ пᲂчита́юще всест҃ꙋ́ю ти па́мѧть . ты́ бᲂ всѣ́хъ пᲂказа́сѧ пᲂкаѧ́нїю наста́вникъ и҆ во́ждь спасе́нїю . два́жды . сла́ва , и҆ ны́нѣ , боⷢ҇ . П=ᲂд̾ кро́въ тво́й чи́стаѧ прибѣга́ю ѻ҆каѧ́нныи . мᲂлѝ бл҃гᲂсе́рдагᲂ , ꙗ҆́кѡ да пᲂлꙋчꙋ̀ млⷭ҇ть в̾ де́нь сꙋда̀ . є҆гда̀ и҆спыта́етъ ми в̾ та́йнѣ сᲂдѣ́ѧннаѧ , да и҆зба́влюсѧ тᲂбо́ю ѡ҆сꙋжде́нїѧ стра́шнагѡ бл҃гᲂслᲂве́наѧ мр҃і́е .

На хвали́тѣхъ , стихѣ́ры , на д҃ . гла́съ , д҃ . поⷣ . да́лъ є҆сѝ зна́менїе . Сᲂсꙋ́дъ честнѣ́йшїи ,꙳ бжⷭ҇твеннᲂмꙋ дх҃ꙋ бы́сть ,꙳ и҆ па́стырь сщ҃е́ннѣйшїи .꙳ а҆́нг҃лъ на землѝ ,꙳ сто́лпъ цр҃ко́вныи и҆ пᲂвелѣ́нїи степе́нь .꙳ грѣ́шнымъ пᲂрꙋчи́тель .꙳ ка́ющимсѧ бжⷭ҇твенᲂе ᲂу҆тѣше́нїе ,꙳ ни́щимъ же прᲂмы́сленикъ и҆ си́рымъ ᲂу҆тѣше́нїе ,꙳ і҆ѡа́нне златᲂꙋ́сте ,꙳ мл҃твениче ѡ҆ дш҃а́хъ на́шихъ . двⷤа . Сл҃нце мнᲂгᲂсвѣ́тлᲂе ,꙳ вселе́ннꙋю слᲂвесы̀ твᲂи́ми ѡ҆зарѧ́ѧ ,꙳ бы́сть ѕвѣзда̀ свѣтлѣ́йша ,꙳ свѣща̀ свѣтѧ́щаѧ зарѧ̀ ,꙳ и҆́же в̾ мо́ри ми́ра всегда̀ ѡ҆бꙋрева́емыхъ ,꙳ привлечѐ кᲂ приста́нищꙋ ти́хᲂмꙋ ,꙳ и҆ спасе́нᲂмꙋ бл҃гᲂда́тїю .꙳ златᲂсло́ве златᲂꙋ́сте ,꙳ мᲂли́твениче ѡ҆ дш҃а́хъ на́шихъ . А҆́нг҃лъ земны́и ,꙳ и҆ нбⷭ҇ныи челᲂвѣ́къ ,꙳ славі́й дᲂбрᲂгла́сныи .꙳ рѣка̀ и҆спᲂлнѧ́ема слᲂве́сныхъ во́дъ .꙳ ѻ҆́блакъ тꙋ́чи разꙋ́мныѧ ,꙳ всѣ́мъ на́мъ бᲂга́тнѡ ка́плющи .꙳ спасе́нїѧ ᲂу҆чи́тель ,꙳ и҆ пᲂкаѧ́нїю пᲂспѣ́шникъ ,꙳ і҆ѡа́нне златᲂꙋ́сте ,꙳ вᲂи́стинꙋ бы́лъ є҆сѝ .

сла́ва . гла́съ , и҃ . Златы́ми слᲂвесы̀ , и҆ бг҃ᲂвѣща́нными пᲂвелѣ́нїи ᲂу҆краси́въ бж҃їю цр҃кᲂвь . бᲂга́тьствᲂ дх҃о́внѡ скры́лъ є҆сѝ в̾ не́й , твᲂѧ̀ бг҃ᲂпреда́ннаѧ слᲂвеса̀ . тѣ́мъ вѣне́цъ ѿ нетлѣ́нныхъ цвѣто́въ и҆ съ пле́тши пѣ́сней , сщ҃е́ннѣй твᲂе́й прино́ситъ па́мѧти , всезлаты́и дш҃е́ю и҆ ѧ҆зы́кᲂмъ і҆ѡа́нне златᲂꙋ́сте . нᲂ ꙗ҆́кѡ и҆мѣ́ѧ дерзнᲂве́нїе препᲂдо́бне , мᲂли́сѧ ѡ҆ дш҃а́хъ на́шихъ .

и҆ нн҃ѣ , боⷢ҇ . Влⷣчце прїимѝ мл҃твꙋ ра́бъ свᲂи́хъ , и҆ и҆зба́ви на́съ ѿ всѧ́кїѧ нꙋ́жды и҆ печа́ли . Славᲂсло́вїе вели́кᲂе , и҆ ѿпꙋ́стъ .

На литꙋргі́и , бл҃же́нна , на и҃ . ѿ кано́на , ст҃лю , пѣ́снь г҃ ѧ , и҆ ѕ҃ ѧ .

Пᲂ вхо́дѣ , а҆́ще ли хра́мъ хрⷭ҇то́въ , и҆лѝ бцⷣы : трᲂпа́рь хра́мꙋ , и҆ ст҃лю . сла́ва , кᲂнда́къ ст҃лю . и҆ ны́нѣ , хра́мꙋ .

Пᲂ вхо́дѣ , а҆́ще хра́мъ ст҃ы́мъ : трᲂпа́рь хра́мꙋ , и҆ ст҃лю . кᲂнда́къ хра́мꙋ . сла́ва , ст҃лю . и҆ ны́нѣ , кᲂнда́къ : застꙋ́пнице хрⷭ҇тїа́нѡмъ .

прᲂки́менъ , ѱл҃о́мъ дв҃дᲂвъ . Оу҆ста̀ мᲂѧ̀ вᲂз̾глаго́лютъ премꙋ́дрᲂсть , и҆ пᲂꙋче́нїе срⷣца мᲂегѡ̀ ра́зꙋмъ . сти́хъ . ᲂу҆слы́шите сїѧ̀ всѝ ꙗ҆зы́цы , внꙋши́те всѝ живꙋ́щїи пᲂ вселе́ннѣй . а҆пⷭ҇лъ , къ є҆вре́ѡмъ . зача́лᲂ , ти҃і . а҆ллилꙋ́їѧ . Оу҆ста̀ пра́веднагѡ пᲂꙋча́тсѧ премꙋ́дрᲂсти , и҆ ѧ҆зы́къ є҆гѡ̀ вᲂз̾глаго́летъ сꙋ́дъ . сти́хъ . зако́нъ бг҃а є҆гѡ̀ в̾ срⷣцы є҆гѡ̀ , и҆ неза́пнꙋтсѧ стᲂпы̀ є҆гѡ̀ . є҆ѵⷢ҇а́лїе , ѿ і҆ѡа́нна . зача́лᲂ , л҃ѕ . прича́стенъ , въ па́мѧть вѣ́чнꙋю бꙋ́детъ пра́ведникъ .