МЦⷭ҇А Ѻ҆КТѦБРѦ̀ ВЪ К҃Ѕ ДН҃Ь

ст҃а́гѡ великᲂмч҃нка дими́трїѧ . и҆ вᲂспᲂмина́нїе вели́кагѡ трꙋ́са . =А҆́ще хо́щетъ пред̾ста́тель твᲂри́мъ бдѣ́нїе всено́щнᲂе . На ма́лѣй вече́рни , на гдⷭ҇и вᲂзва́хъ , стихѣ́ры , на д҃ . гла́съ , а҃ . пᲂдо́бенъ . нбⷭ҇нымъ чино́мъ . И҆́же ѡ҆снᲂва́нїе всеѧ̀ землѝ пᲂвиза́ѧи бг҃ъ ,꙳ стрѧса́ѧи є҆ди́нъ мᲂрско́е ло́же ,꙳ ꙗ҆́кѡ сᲂзда́тель всѣ́хъ ,꙳ и҆зба́ви на́съ пра́веднагѡ гнѣ́ва трꙋ́снагѡ ,꙳ твᲂи́мъ млрⷭ҇дїемъ чл҃кᲂлю́бче ,꙳ при́снѡ ᲂу҆мᲂлѧ́емъ . =двⷤа . Фесалᲂникі́и ликꙋ́етъ ѡ҆ па́мѧти твᲂе́й ,꙳ и҆ сᲂзыва́етъ всѧ̀ ѻ҆кре́стныѧ гра́ды ,꙳ дими́трїе требл҃же́нне ,꙳ сᲂверши́ти твᲂѐ свѣтᲂно́снᲂе тᲂржество̀ .꙳ с̾ ни́ми же сᲂше́дшесѧ и҆ мы̀ ,꙳ пѣ́сненѡ пᲂхвалѧ́емъ по́двиги твᲂѧ̀ . Прїиди́те вѣ́рнїи сᲂше́дшесѧ ,꙳ пᲂхва́лимъ хрⷭ҇то́ва ѻ҆рꙋ́жника ,꙳ и҆ до́блѧгᲂ свѣти́льника дими́трїѧ ,꙳ и҆́же всѐ вра́жїе наси́лїе пᲂпра́вша .꙳ семꙋ̀ вᲂпїю́ще вѣ́рᲂю ,꙳ ѡ҆ на́съ хрⷭ҇то́ви мч҃нче мᲂли́сѧ . сла́ва . гла́съ , ѕ҃ . Дне́сь вселе́ннаѧ всѧ̀ , страстᲂте́рпческими прᲂсвѣща́етсѧ зарѧ́ми , хрⷭ҇то́ва цр҃кви цвѣты̀ ᲂу҆краша́ема , дими́трїе вᲂпїе́тъ тѝ . ᲂу҆го́дниче хрⷭ҇то́въ , и҆ пред̾ста́телю те́плыи , непреста́й мᲂлѧ́сѧ ѡ҆ рабѣ́хъ свᲂи́хъ .

и҆ ны́нѣ , боⷢ҇ . Бцⷣе ты̀ є҆сѝ лᲂза̀ и҆́стиннаѧ , вᲂзрасти́вшаѧ на́мъ пло́дъ живо́тныи , тебѣ̀ мо́лимсѧ , мᲂли́сѧ влчⷣце сᲂ страстᲂте́рпчемъ , пᲂми́лᲂватисѧ дш҃а́мъ на́шимъ .

прᲂки́менъ , дню̀ .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фᲂвъ . И҆́мамы тѧ̀ мно́гихъ ,꙳ да́телѧ дарᲂва́нїи ,꙳ ᲂу҆го́дниче гдⷭ҇нь .꙳ и҆спᲂлнѧ́еши бᲂ прᲂше́нїѧ ,꙳ ꙗ҆́же и҆́мамы всегда̀ .

сти́хъ : пра́ведникъ ꙗ҆́кѡ фи́никъ прᲂцвѣте́т̾ ,꙳ и҆ ꙗ҆́кѡ кѣ́дръ и҆́же въ лива́нѣ ᲂу҆мно́житсѧ . Пѣ́нїѧ сла́дкаѧ ,꙳ страсте́й пᲂхвале́нїѧ ,꙳ бл҃гᲂда́темъ вᲂздаѧ́нїѧ ,꙳ пред̾лᲂже́нїе бл҃же́нне ,꙳ прїимѝ дими́трїе .

сти́хъ : насажде́ни в̾ дᲂмꙋ̀ гдⷭ҇ни ,꙳ вᲂ дво́рѣхъ бг҃а на́шегѡ прᲂцвѣтꙋ́тъ . Дᲂбро́та страда́льцемъ ,꙳ бл҃гᲂлѣ́пїе мч҃нкѡмъ ,꙳ цр҃е́мъ храни́телю ,꙳ прїимѝ ны́нѣ пᲂхвалꙋ̀ ,꙳ вѣ́рᲂю сла́вѧщихъ тѧ̀ .

сла́ва , и҆ ны́нѣ , боⷢ҇ . Дѣ́лᲂ бл҃гᲂлѣ́пнѡ ,꙳ дв҃аѧ пᲂ ржⷭ҇твѣ̀ .꙳ прижи́тїе бг҃ъ сло́вᲂ ,꙳ чл҃чᲂ є҆стество̀ и҆мы́и ,꙳ и҆ ꙗ҆влѧ́ѧ веще́ственаѧ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , г҃ . Вели́ка ѡ҆брѣ́те въ бѣда́хъ тебѐ пᲂмо́щника вселе́ннаѧ страстᲂте́рпче , пᲂга́ныѧ пᲂбѣжда́юща . ꙗ҆́кᲂже бᲂ лі́евꙋ низ̾лᲂжѝ гᲂрды́ню , на по́двигъ ᲂу҆крѣпи́въ не́стᲂра . та́кѡ ст҃е дими́трїе хрⷭ҇та̀ бг҃а мᲂлѝ дарᲂва́ти на́мъ ве́лїю млⷭ҇ть . сла́ва , и҆ ны́нѣ . трᲂпа́рь , трꙋ́сꙋ . Призира́ѧи на́ землю , и҆ твᲂрѧ̀ ю҆̀ трѧсти́сѧ , и҆зба́ви на́съ стра́шнагѡ трꙋ́са и҆ преще́нїѧ хрⷭ҇тѐ бж҃е на́шъ . и҆ низ̾пᲂслѝ на́мъ ми́лᲂсти твᲂѧ̀ бᲂга́тыѧ бцⷣы ра́ди , ꙗ҆́кѡ є҆ди́нъ бл҃гъ и҆ чл҃кᲂлю́бецъ .

та́же , є҆ктенїѧ̀ ма́лаѧ . и҆ ѿпꙋ́стъ .

На вели́цѣй вече́рни , блаже́нъ мꙋ́жь , а҃ , а҆нтифо́нъ . =На гдⷭ҇и вᲂзва́хъ , стихѣ́ры , на и҃ . гла́съ , в҃ . пᲂдо́бенъ . є҆гда̀ ѿ́ древа . Свѣ́тиши ѻ҆те́чествꙋ сѝ всегда̀ , сла́вныи дими́трїе мч҃нче , ꙗ҆́кѡ звѣзда̀ свѣ́тлаѧ . пᲂкрыва́еши бᲂ прⷭ҇нѡ сїѐ ѿ па́кᲂсти вра́гъ , и҆ и҆збавлѧ́еши ѡ҆ѕлᲂбле́нїѧ и҆ бꙋ́ри всѧ́ческїѧ . тѣ́мъ ра́дᲂстнѡ прино́ситъ , мᲂле́бнꙋю па́мѧть бл҃же́нне сᲂверша́ѧ , вѣ́рᲂю же и҆ любо́вїю пᲂѧ̀ гдⷭ҇а , тѧ̀ прᲂсла́вльшагᲂ . =двⷤа . Мч҃нче стрⷭ҇тᲂте́рпче хрⷭ҇то́въ , чꙋдесы̀ свѣ́тиши ми́рᲂви ꙗ҆́кᲂже сл҃нце , ст҃е дими́трїе . тѣ́мъ в̾ па́мѧть твᲂю̀ наслажда́емсѧ всѝ твᲂи́хъ чꙋде́съ бл҃же́нне , и҆зрѧ́днаѧ тᲂржествꙋ́юще вѣ́рᲂю дерзнᲂве́нїе ᲂу҆́бѡ и҆мы́и , мᲂли́сѧ ко́ гдⷭ҇ꙋ , спастѝ ѿ тлѧ̀ и҆ ско́рбей рабы̀ свᲂѧ̀ . Ко́пїѧми прᲂбᲂде́нъ в̾ ре́бра , прᲂбо́дшагѡ ра́ди сп҃са на крⷭ҇тѣ̀ ре́бра . тᲂго́ бᲂ ᲂу҆ѧзвле́нїѧ любо́вїю пᲂревнᲂва́лъ є҆сѝ , страстᲂте́рпче дими́трїе , ꙗ҆влѧ́ѧ всѣ́мъ непᲂбѣди́мᲂе свидѣ́тельства твᲂегѡ̀ . тѣ́мъ и҆ ᲂу҆ѧ́звленъ гᲂни́тель низ̾падѐ , прїе́мъ ты̀ и҆скꙋше́нїе и҆спᲂвѣ́данїѧ , страда́льче хрⷭ҇то́въ .

и҆́ны , стихѣ́ры . гла́съ , и҃ . поⷣ . ѽ =пресла́внᲂе чꙋ́дᲂ . ѽ =пресла́внᲂе чꙋ́дᲂ ,꙳ на́ нб҃си и҆ на землѝ ра́дᲂсть дне́сь ,꙳ в̾ па́мѧть вᲂсїѧ̀ дими́трїѧ мч҃нка .꙳ ѿ а҆́нг҃лъ хвала́ми вѣнча́етсѧ ,꙳ и҆ ѿ чл҃къ пѣ́нїе прїе́млетъ .꙳ ѽ ка́кѡ пᲂстрада̀ ,꙳ ка́кѡ до́брѣ пᲂд̾виза́сѧ .꙳ и҆́мже вра́гъ паде́сѧ лꙋка́выи ,꙳ хрⷭ҇тꙋ̀ пᲂбѣ́ждьшꙋ и҆̀ . =два́жды . ѽ =пресла́внᲂмꙋ чꙋдесѝ ,꙳ чꙋде́сными свѣ́тлᲂстьми ,꙳ сл҃нца свѣтлѣ́йше ,꙳ при́снѡ дими́трїи свѣ́титъ кᲂнце́мъ ,꙳ ѿ невече́рнѧгѡ свѣ́та ѡ҆блиста́емь ,꙳ и҆ в̾ незахᲂди́мѣмъ свѣ́тѣ красꙋ́ѧсѧ .꙳ є҆го́же сїѧ́ньми ѻ҆́блацы ѿгна́ни бы́ша ва́рварстїи .꙳ недꙋ́зи преста́ша ,꙳ и҆ бѣ́сᲂве пᲂбѣди́шасѧ . =ѽ =пресла́внᲂе чꙋ́дᲂ ,꙳ хрⷭ҇та̀ ра́ди прᲂбᲂде́нъ ,꙳ требл҃же́нне дими́трїе ,꙳ врагꙋ̀ всегда̀ ꙗ҆ви́сѧ ѻ҆рꙋ́жїе ѡ҆бᲂю́дꙋ ѻ҆стро̀ .꙳ пᲂжина́ѧ враго́мъ выше́нїѧ ,꙳ и҆ низ̾лага́ѧ бѣсо́вскаѧ шата́нїѧ .꙳ є҆мꙋ́же вᲂзᲂпїе́мъ ,꙳ ст҃ы́и дими́трїе пᲂкры́й на́съ ,꙳ вѣ́рнѡ пᲂчита́ющихъ тѧ̀ любо́вїю всегда̀ .

сла́ва . гла́съ , ѕ҃ . Дне́сь сᲂзыва́етъ на́съ , страстᲂте́рпца всеми́рнᲂе тᲂржество̀ . прїиди́те ᲂу҆́бѡ празднᲂлю́бцы , свѣ́тлѡ пра́зднꙋемъ па́мѧть є҆гѡ̀ глаго́люще , ра́дꙋисѧ и҆́же ри́зꙋ нече́стїѧ раздра́въ вѣ́рᲂю , мꙋ́жествᲂ же дх҃о́внᲂе себѣ̀ налᲂжи́въ . ра́дꙋисѧ ᲂу҆пра́зднивыи всѧ̀ кᲂзнᲂдѣ́йства чꙋжа́гѡ , си́лᲂю да́нᲂю тѝ ѿ є҆ди́нагѡ бг҃а . ра́дꙋисѧ и҆́же прᲂбᲂде́нымъ ти ре́брᲂмъ , бл҃же́ннꙋю стрⷭ҇ть хрⷭ҇то́вꙋ дх҃о́внѣ на́мъ живᲂписа́въ . є҆го́же мᲂлѝ , страда́льцемъ ᲂу҆дᲂбре́нїе дими́трїе , и҆зба́витисѧ на́мъ ви́димыхъ и҆ неви́димыхъ вра́гъ , и҆ спасти́сѧ дш҃а́мъ на́шимъ .

и҆ нн҃ѣ , боⷢ҇ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невᲂспѣва́етъ твᲂегѡ̀ пречи́стагѡ ржⷭ҇тва̀ ; без̾лѣ́тныи бᲂ ѿ ѻ҆ц҃а вᲂзсїѧ́въ сн҃ъ є҆динᲂро́дныи , то́й же ѿ тебѐ чи́стыѧ про́йде , несказа́ннѡ вᲂпло́щьсѧ . є҆стество́мъ бг҃ъ сы́и , и҆ є҆стество́мъ бы́въ чл҃къ на́съ ра́ди . не вᲂ двᲂю̀ лицꙋ̀ раздѣлѧ́емъ . нᲂ вᲂ двᲂю̀ є҆стествꙋ̀ несмѣ́снᲂ пᲂзнава́емъ . тᲂгѡ̀ мᲂлѝ чи́стаѧ и҆ всебл҃же́ннаѧ , пᲂми́лᲂватисѧ дш҃а́мъ на́шимъ . та́же , вы́хᲂдъ . прᲂки́менъ , дню̀ .

Ѿ прᲂро́чества и҆са́ина , чте́нїе .

Ѡ҆брати́сѧ гдⷭ҇и ѿ нб҃съ , и҆ ви́ждь ѿ́ дᲂмꙋ ст҃а́гѡ твᲂегѡ̀ и҆ сла́вы . гдѣ̀ є҆́сть мно́жествᲂ млⷭ҇ти твᲂеѧ̀ и҆ щедро́тъ твᲂи́хъ , ꙗ҆́кѡ люблѧ́ше на́съ гдⷭ҇и . ты́ бᲂ ѻ҆ц҃ъ на́шъ є҆сѝ . ꙗ҆́кѡ а҆враа́мъ непᲂзна̀ на́съ , і҆и҃ль неꙋвѣ́дѣ на́съ . нᲂ ты̀ гдⷭ҇и ѻ҆ц҃ъ на́шъ и҆збавле́и на́съ . ѿ и҆спе́рва и҆́мѧ твᲂѐ на на́съ є҆́сть . пᲂчто̀ заблꙋди́лъ є҆сѝ на́съ ѿ пꙋтѝ твᲂегѡ̀ . ѡ҆жести́лъ є҆сѝ срⷣца̀ на́ша небᲂѧ́тисѧ тебѐ . ѡ҆брати́сѧ ра́бъ твᲂи́хъ ра́ди , закᲂлѣ́па наслѣ́дїѧ твᲂегѡ̀ , да ма́лᲂ наслѣ́дствимъ го́рꙋ ст҃ꙋ́ю твᲂю̀ . сᲂпрᲂти́внїи на́ши пᲂпра́ша ст҃ы́ню твᲂю̀ , бы́хᲂмъ ꙗ҆́кᲂже и҆спе́рва є҆гда̀ небѣ̀ с̾ на́ми , ни нарече́сѧ и҆́мѧ твᲂѐ на на́съ , а҆́ще ѿве́рзеши нб҃ᲂ , тре́петъ прїи́мꙋтъ ѿ тебѐ го́ры , и҆ раста́ютсѧ ꙗ҆́кᲂже та́етъ во́скъ ѿ ѻ҆гнѧ̀ , и҆ пᲂпали́тъ ѻ҆́гнь сᲂпᲂста́ты твᲂѧ̀ . ꙗ҆́вѣ бꙋ́детъ и҆́мѧ твᲂѐ пред̾ сᲂпрᲂти́вными . ѿ лица̀ твᲂегѡ̀ ꙗ҆зы́цы вᲂз̾мꙋтѧ́тсѧ . є҆гда̀ сᲂтвᲂри́ши сла́внаѧ , тре́петъ прїи́мꙋтъ ѿ тебѐ го́ры . ѿ́ вѣка неслы́шахᲂмъ , ни ѻ҆́чи на́ши ви́дѣша бг҃а ра́звѣ тебѐ , и҆ дѣ́ла твᲂѧ̀ и҆́стинна . и҆ сᲂтвᲂри́ши терпѧ́щимъ тѧ млⷭ҇ть . срѧ́щетъ бᲂ млⷭ҇ть твᲂрѧ́щїѧ пра́вдꙋ , и҆ пꙋтѝ твᲂѧ̀ пᲂмѧнꙋ́тъ . и҆ нн҃ѣ гдⷭ҇и ѻ҆ц҃ъ на́шъ ты̀ є҆сѝ . мы́ же бре́нїе и҆ ты̀ сᲂдѣ́тель , дѣ́ла рꙋ́къ твᲂи́хъ всѝ мы̀ , непрᲂгнѣ́вайсѧ на ны̀ гдⷭ҇и дᲂ ѕѣла̀ , и҆ не во́ времѧ пᲂмѧне́ши грѣхѝ на́ша . и҆ ны́нѣ при́зри гдⷭ҇и , ꙗ҆́кѡ лю́дїе твᲂѝ всѝ мы̀ .

Ѿ прᲂро́чества и҆са́ина , чте́нїе .

Та́кѡ глаго́летъ гдⷭ҇ь , всѝ ꙗ҆зы́цы сᲂбра́шасѧ вкꙋ́пѣ , и҆ сᲂберꙋ́тсѧ кнѧ́зи ѿ ни́хъ . и҆ кто̀ вᲂзвѣсти́тъ сїѧ̀ в̾ ни́хъ ; и҆ ꙗ҆́кᲂже и҆з̾ нача́ла кто̀ слы́шана сᲂтвᲂри́тъ ва́мъ ; да приведꙋ́тъ свидѣ́тели свᲂѧ̀ , и҆ ѡ҆правдѧ́тсѧ , и҆ да ᲂу҆слы́шатъ , и҆ да рекꙋ́тъ и҆́стинꙋ . бꙋ́дете ми свидѣ́тели , и҆ а҆́зъ свидѣ́тель , гл҃етъ гдⷭ҇ь бг҃ъ , и҆ ѻ҆́трᲂкъ , є҆го́же и҆збра́хъ , да пᲂзна́ете и҆ вѣ́рꙋете ми , и҆ разꙋмѣ́ете ꙗ҆́кѡ а҆́зъ є҆́смь . и҆ пре́жде менѐ не бы́сть и҆́нъ бг҃ъ , и҆ пᲂ мнѣ̀ небꙋ́детъ . а҆́зъ є҆́смь бг҃ъ , и҆ нѣ́сть ра́звѣ менѐ спаса́ѧи . а҆́зъ вᲂзвѣсти́хъ и҆ спасо́хъ , и҆ ᲂу҆ничижи́хъ , и҆ небѣ̀ в̾ва́съ ѿчꙋжде́нїѧ . вы̀ мнѣ̀ свидѣ́тели , и҆ а҆́зъ свидѣ́тель гл҃етъ гдⷭ҇ь бг҃ъ . и҆ є҆щѐ ѿ нача́ла а҆́зъ є҆́смь , и҆ нѣ́сть и҆́же ѿ рꙋкꙋ̀ мᲂе́ю и҆збавлѧ́ѧи . сᲂтвᲂрю̀ , и҆ кто̀ ѿврати́тъ то̀ ; си́це гл҃етъ гдⷭ҇ь бг҃ъ , и҆збавлѧ́ѧи ва́съ ст҃ы́и і҆и҃левъ .

Ѿ премꙋ́дрᲂсти сᲂло́мѡни , чте́нїе .

Пра́ведникъ а҆́ще пᲂсти́гнетъ скᲂнча́тисѧ , в̾ пᲂко́й бꙋ́детъ . ста́рᲂсть бᲂ честна̀ не мнᲂгᲂлѣ́тна ни в̾ числѣ̀ лѣ́тъ и҆счита́етсѧ . сѣди́ны же сꙋ́ть , мꙋ́дрᲂсть челᲂвѣ́кѡмъ . и҆ во́зрастъ ста́рᲂсти , житїѐ нескве́рнᲂ . бл҃гᲂꙋго́денъ бг҃ᲂви бы́въ , вᲂз̾лю́бленъ бы́сть . и҆ живы́и пᲂсредѣ̀ грѣ́шникъ , преста́вленъ бы́сть . вᲂсхище́нъ бы́сть , да не ѕло́ба и҆змѣни́тъ ра́зꙋма є҆гѡ̀ , и҆лѝ ле́сть прельсти́тъ дш҃ꙋ є҆гѡ̀ . раче́нїе бᲂ ѕло́е , гꙋби́тъ до́браѧ , и҆ паре́нїе по́хᲂти , премѣнѧ́етъ ᲂу҆́мъ неѕло́бивъ . скᲂнча́всѧ в̾ма́лѣ , и҆спо́лни лѣ́та мно́га , ᲂу҆го́дна бᲂ бѣ̀ гдⷭ҇ви дш҃а є҆гѡ̀ . сегѡ̀ ра́ди пᲂтща́сѧ ѿ среды̀ ѕло́бы . лю́дїе же ви́дѣвше и҆ неразꙋмѣ́вше , ни пᲂлᲂжи́ша в̾ пᲂмышле́нїи такᲂва́гѡ , ꙗ҆́кѡ бл҃гᲂда́ть и҆ млⷭ҇ть в̾ прпⷣбныхъ є҆гѡ̀ , и҆ пᲂсѣще́нїе вᲂ и҆збра́нныхъ є҆гѡ̀ .

На литі́и , стихѣ́ры . гла́съ , а҃ . Весели́сѧ ѡ҆́ гдⷭ҇ѣ гра́де сᲂлꙋ́не , ра́дꙋисѧ и҆ ликꙋ́й вѣ́рᲂю свѣ́тлѡ ѡ҆дѣ́ѧвсѧ , дими́трїѧ всесла́внагѡ страда́льца и҆ мч҃нка и҆́стинѣ въ нѣ́дрѣхъ и҆мѣ́ѧ ꙗ҆́кѡ сᲂкро́вище . наслади́сѧ чꙋде́съ и҆сцѣле́нїѧ зрѧ̀ . и҆ ви́ждь низлага́юща и҆нᲂплеме́нникъ шата́нїѧ . и҆ бл҃гᲂда́рнѡ сп҃сꙋ вᲂзᲂпі́й , гдⷭ҇и сла́ва тебѣ̀ . Пѣ́сней красᲂто́ю настᲂѧ́щїи ᲂу҆ѧсни́мъ де́нь , и҆ вᲂз̾гласи́мъ мч҃нка по́двиги . пред̾лежи́тъ бᲂ на́мъ вᲂ бл҃гᲂхвале́нїе вели́кїи дими́трїи . и҆́бᲂ бѣсо́вскаѧ нахᲂжде́нїѧ мꙋ́жески пᲂгꙋби́въ , к̾ сꙋди́лищꙋ ᲂу҆се́рднѡ прїи́де . и҆ пᲂбѣди́тельнаѧ сла́внѡ прине́съ , сп҃сᲂви мо́литсѧ , спасти́сѧ дш҃а́мъ на́шимъ . гла́съ , в҃ . Въ преми́рнаѧ селе́нїѧ дх҃ъ тво́й , дими́трїе мч҃нче мꙋ́дре , хрⷭ҇то́съ бг҃ъ пᲂлᲂжѝ непᲂро́чнѡ . ты́ бᲂ трⷪ҇цѣ бы́лъ є҆сѝ пᲂбо́рникъ , и҆ на сꙋди́щи мꙋ́жески пᲂстрада̀ ꙗ҆́кѡ а҆дама́нтъ тве́рдыи . прᲂбᲂде́нъ же бы́въ в̾ ре́бра свᲂѧ̀ всече́стне , пᲂдо́бѧсѧ и҆́же на́ древѣ прᲂбᲂде́нᲂмꙋ , на спасе́нїе всемꙋ̀ ми́рꙋ . чꙋдесе́мъ прїѧ́лъ є҆сѝ дѣ́йствᲂ , чл҃кѡмъ пᲂдаѧ̀ и҆сцѣле́нїѧ незави́стнѡ . тѣ́мже тѝ дне́сь ᲂу҆спе́нїе пра́з̾днꙋемъ пᲂ дᲂстᲂѧ́нїю , сла́вѧще тѧ̀ прᲂсла́вльшагᲂ гдⷭ҇а .= сла́ва . гла́съ , є҃ . С=теце́мсѧ вѣ́рᲂю и҆ любо́вїю , вᲂзᲂпїе́мъ пра́з̾днственаѧ , и҆ вᲂспле́щемъ рꙋка́ми всѝ , в̾ настᲂѧ́щее тᲂржество̀ , первᲂнача́льника на́шегѡ . во́инства нбⷭ҇наѧ да веселѧ́тсѧ . и҆ прᲂбо́дшагᲂсѧ за прᲂбᲂде́нагᲂ кᲂпїе́мъ цр҃ѧ гдⷭ҇а и҆ гᲂрды́ню лі́евꙋ низло́жша де́рзᲂстнѣ . да чꙋди́тсѧ землѧ́ же и҆ мо́ре , свѣ́тлагѡ свѣти́льника пресла́внымъ зна́менїемъ . пᲂ до́лгꙋ да вᲂсхва́лѧтъ ю҆́нїи , ю҆́нᲂсти ѡ҆бꙋзда́телѧ . и҆ и҆́же в̾ ста́рᲂсти же́злъ . и҆́же въ бѣда́хъ пред̾ста́телѧ . ни́щїи ѡ҆бᲂга́титесѧ . и҆́же вᲂ бл҃гᲂше́ствїи стрᲂи́телѧ . пᲂбо́рника во́ини , и҆ и҆́же в̾ пꙋчи́нѣ спла́вателѧ . сᲂ всѣ́ми свᲂегѡ̀ тве́рдагᲂ пᲂбо́рника гра́де сᲂлꙋ́нскїи , мᲂлѧ̀ си́це вᲂзᲂпі́и . пресла́вне дими́трїе , пред̾варѝ и҆ и҆змѝ на́съ ѿ всѧ́кїѧ нꙋ́жды , и҆ спасѝ рабы̀ свᲂѧ̀ мᲂли́твами .

и҆ ны́нѣ , боⷢ҇ . Вᲂстрꙋ́бимъ трꙋбо́ю пѣ́сней . прекло́ньшибᲂсѧ свы́ше всецр҃ца мт҃и и҆ дв҃а , бл҃гᲂслᲂве́ньми вѣньчава́етъ вᲂспѣва́ющихъ ю҆̀ . цр҃їе и҆ кн҃зи да стекꙋ́тсѧ , и҆ цр҃цѣ да вᲂспле́щꙋтъ въ пѣ́нїихъ , цр҃ѧ ро́ждьшей , и҆́же сме́ртїю ѡ҆держи́мыхъ пе́рвѣе , разрѣши́ти чл҃кᲂлю́бнѡ бл҃гᲂи҆зво́лившагᲂ . па́стыри и҆ ᲂу҆чи́тели , до́брагѡ па́стырѧ пречⷭ҇тꙋю мт҃рь , сᲂше́дшесѧ вᲂсхва́лимъ . свѣ́щникъ златᲂза́рныи . свѣтᲂно́сныи ѻ҆́блакъ , нб҃съ ши́ршїи . ѡ҆дш҃е́вленыи же кᲂвче́гъ , ѻ҆гнезра́чныи влады́чень престо́лъ . маннᲂпрїе́мнꙋю златꙋ́ю рꙋ́чкꙋ , нарече́ннꙋю сло́вꙋ две́рь . всѣ́мъ хрⷭ҇тїа́нѡмъ прибѣ́жище . пѣ́сньми бг҃ᲂгла́сными пᲂхвалѧ́юще , си́це рцѣ́мъ , пᲂла́тᲂ сло́ва , спᲂдо́би смире́нныхъ на́съ нбⷭ҇нᲂмꙋ црⷭ҇твїю . ничто́же бᲂ не невᲂз̾мо́жнᲂ хᲂда́тайствꙋ твᲂемꙋ̀ .

На стихо́внѣ , стⷯры , трꙋ́сꙋ . гла́съ , в҃ . Землѝ смꙋща́емѣ гнѣ́ва твᲂегѡ̀ стра́хᲂмъ , хо́лми и҆ го́ры трѧсꙋ́тсѧ гдⷭ҇и , нᲂ бл҃гᲂꙋтро́бїѧ ѻ҆́кᲂмъ на на́съ призрѣ́въ , не ꙗ҆́рᲂстїю твᲂе́ю прᲂгнѣ́вайсѧ наны̀ . нᲂ ᲂу҆милᲂсе́рдивсѧ на дѣ́ла рꙋ́кꙋ твᲂе́ю , стра́шнагѡ на́съ преще́нїѧ трꙋ́са свᲂбᲂдѝ , ꙗ҆́кѡ бл҃гъ и҆ чл҃кᲂлю́бецъ .

сти́хъ : призира́ѧ на́ землю ,꙳ и҆ твᲂрѧ̀ ю҆̀ трѧсти́сѧ . Стра́шенъ є҆сѝ гдⷭ҇и , и҆ кто̀ стерпи́тъ пра́веднагѡ тѝ гнѣ́ва ; и҆лѝ кто̀ тебѐ ᲂу҆мо́литъ ; и҆лѝ кто̀ ᲂу҆крᲂти́тъ бл҃гі́и , ѡ҆́ людѣхъ сᲂгрѣ́шшихъ и҆ ѿча́ѧвшихсѧ ; нбⷭ҇нїи чи́нᲂве , а҆́нг҃ли нача́ла и҆ вла́сти , престо́ли и҆ гдⷭ҇ьствїѧ , херꙋви́ми и҆ серафи́ми , ѡ҆ на́съ тебѣ̀ вᲂпїю́тъ . ст҃ъ ст҃ъ ст҃ъ є҆сѝ гдⷭ҇и , дѣ́ла рꙋ́кꙋ твᲂе́ю непре́зри бла́же , за милᲂсе́рдїе ми́лᲂсти , спасѝ гра́дъ пᲂгиба́ющїи .

сти́хъ : гла́съ , ѕ҃ . стрѧсѐ зе́млю и҆ смꙋтѝ ю҆̀ ,꙳ и҆сцѣлѝ сᲂкрꙋше́нїе є҆ѧ̀ ꙗ҆́кѡ пᲂдви́жасѧ . Ни неви́тѧне сᲂгрѣше́нїи ра́ди , и҆́же трꙋ́сᲂмъ преще́нїѧ пᲂги́бель слы́шахꙋ . хᲂда́тайственымъ же зна́менїемъ ѿ ки́та і҆ѡ́ны вᲂста́нїемъ , пᲂкаѧ́нїе ᲂу҆мᲂлѝ . нᲂ ꙗ҆́кᲂже ѻ҆́нѣхъ во́пль люде́й твᲂи́хъ сᲂ младе́нцы и҆ скᲂты̀ ᲂу҆ще́дривъ прїѧ́тъ . и҆ на́съ наказа́емы , тридне́внымъ вᲂста́нїемъ пᲂщадѝ и҆ пᲂми́лꙋй .

сла́ва . гла́съ , и҃ . И҆мѣ́етъ ᲂу҆́бѡ бжⷭ҇твенаѧ твᲂѧ̀ дш҃а и҆ непᲂро́чнаѧ , сла́вныи дими́трїе , нбⷭ҇ныи і҆єрⷭ҇ли́мъ жили́ще . и҆́же в̾ стѣна́хъ пречи́стыма рꙋка́ма неви́димагᲂ бг҃а вᲂѡ҆брази́сѧ . и҆́мать же и҆ всечестно́е и҆ мнᲂгᲂстрада́льнᲂе твᲂѐ тѣ́лᲂ , преи҆зрѧ́дныи се́й хра́мъ на землѝ , сᲂкро́вище некра́дᲂмᲂе чꙋдесе́мъ , и҆ недꙋ́гᲂмъ ѿгна́нїе . во́нь же притека́юще , и҆сцѣле́нїѧ пᲂчерпа́емъ . сᲂблюдѝ всехва́льне тебѐ велича́ющїи гра́дъ , ѿ сᲂпрᲂти́вныхъ прираже́нїи , дерзнᲂве́нїе ꙗ҆́кѡ и҆мѣ́ѧ к̾ хрⷭ҇тꙋ̀ , тебѐ прᲂсла́вльшемꙋ .

и҆ ны́нѣ , боⷢ҇ . Без̾невѣ́стнаѧ дв҃ᲂ , ꙗ҆́же бг҃а без̾ сѣ́мени заче́ньши пло́тїю , мт҃и бг҃а вы́шнѧгѡ , твᲂи́хъ ра́бъ мᲂльбы̀ прїимѝ всенепᲂро́чнаѧ , всѣ́мъ пᲂдаю́щи ѡ҆чище́нїе прегрѣше́нїемъ . ны́нѣ на́ша мᲂле́нїѧ прїе́мши , мᲂлѝ спасти́сѧ всѣ́мъ на́мъ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь , мч҃нкꙋ , двⷤа . и҆ бцⷣе дв҃ᲂ ра́дꙋисѧ ,= аⷤ .=

На ᲂу҆́трени , на бг҃ъ гдⷭ҇ь , трᲂпа́рь , трꙋ́сꙋ , двⷤа . сла́ва , мч҃нкꙋ . и҆ нн҃ѣ , трꙋ́сꙋ . =Пᲂ а҃ , стихᲂло́гїи , сѣда́ленъ . гла́съ , д҃ . Дими́трїѧ дне́сь страстᲂте́рпца пра́здникъ сᲂтвᲂрѧ́емъ бг҃ᲂмꙋ́дренᲂ , ꙗ҆́кѡ хрⷭ҇то́ви непреста́ннѡ мᲂлѧ́щасѧ , всѣ́мъ да́тисѧ ми́ръ и҆ ми́лᲂсть . =вⷤ . сла́ва , и҆ нн҃ѣ , боⷢ҇ . Те́плᲂе застꙋпле́нїе сꙋ́щимъ въ бѣда́хъ , на́шꙋ пᲂмо́щницꙋ и҆ къ бг҃ꙋ премѣне́нїе . є҆ѧ́же ра́ди тлѝ и҆зба́вихᲂмсѧ , бцⷣꙋ вѣ́рнїи ᲂу҆блажа́емъ .

Пᲂ в҃ , стихᲂло́гїи , сѣда́ленъ . гла́съ , д҃ . Па́мѧть твᲂѧ̀ сла́вне мч҃нче дими́трїе ᲂу҆ѧснѝ дне́сь цр҃кᲂвь хрⷭ҇то́вꙋ , и҆ всѧ̀ сᲂбра̀ пѣ́сньми пᲂ дᲂстᲂѧ́нїю вᲂсхвали́ти тѧ бг҃ᲂмꙋ́дре , ꙗ҆́кѡ вᲂи́стинꙋ во́ина , и҆ враго́мъ пᲂтреби́телѧ . тѣ́мже мᲂльба́ми твᲂи́ми и҆зба́ви на́съ ѿ и҆скꙋше́нїи . вⷤ . сла́ва , и҆ ны́нѣ , боⷢ҇ . Пᲂе́мъ тѧ̀ бг҃ᲂневѣ́стᲂ мт҃и хрⷭ҇та̀ бг҃а , сла́вѧще ржⷭ҇тво̀ твᲂѐ непᲂсти́жимᲂе . и҆́мже и҆зба́вихᲂмсѧ ѿ́ лести дїа́вᲂли , и҆ всѧ́ческихъ бѣ́дъ , влⷣчце бцⷣе . и҆ вѣ́рнѡ взыва́емъ , пᲂми́лꙋй ста́дᲂ свᲂѐ є҆ди́на всепѣ́таѧ .

Пᲂ пᲂлїєлеѡ́сѣ , сѣда́ленъ . гла́съ , и҃ . Сїѧ́нїѧ чꙋде́съ , ꙗ҆́кѡ лꙋчѝ ѡ҆блиста́еши , и҆ всѧ̀ прᲂсвѣща́еши ми́рᲂви кᲂнцы̀ , ꙗ҆́кѡ ѕвѣзда̀ пресвѣ́тлаѧ . и҆ красно̀ бл҃гᲂꙋха́еши ꙗ҆́кᲂже дрꙋгі́и ра́й , и҆ дш҃а весели́ши , и҆ ᲂу҆ставлѧ́еши недꙋ́ги . тѣ́мже тѧ̀ всебл҃же́нне по́ дᲂлгꙋ пᲂе́мъ , и҆ любо́вїю пᲂчита́емъ честнꙋ́ю па́мѧть твᲂю̀ , страстᲂте́рпче дими́трїе . мᲂлѝ хрⷭ҇та̀ бг҃а , сᲂгрѣше́ней ѡ҆ставле́нїе дарᲂва́ти , чтꙋ́щимъ любо́вїю ст҃ꙋ́ю па́мѧть твᲂю̀ . вⷤ . сла́ва , и҆ нн҃ѣ , боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ блажи́мъ ро́дᲂве чл҃честїи . и҆́бᲂ ѻ҆́гнь всели́сѧ в̾ тѧ̀ бжⷭ҇тва̀ . и҆ ꙗ҆́кѡ млⷣнца дᲂи́ши зижди́телѧ и҆ гдⷭ҇а . тѣ́мже а҆́нг҃льски чл҃ческїи ро́дъ , дᲂсто́йнѡ сла́вимъ прест҃о́е ржⷭ҇тво̀ твᲂѐ . и҆ сᲂгла́снѡ вᲂпїе́мъ ти , мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , вᲂспѣва́ющим̾ дᲂсто́йнᲂ сла́вꙋ твᲂю̀ .

степе́нна , д҃ гᲂ гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . Вᲂзвесели́тсѧ пра́ведникъ ѡ҆́ гдⷭ҇ѣ , и҆ ᲂу҆пᲂва́етъ на́нь . сти́хъ . ᲂу҆слы́ши бж҃е мл҃твꙋ мᲂю̀ , внегда̀ мᲂли́тимисѧ къ тебѣ̀ .= всѧ́кᲂ дыха́нїе . =є҆ѵⷢ҇а́лїе , ѿ матѳе́ѧ . заⷱ҇ , л҃ѕ . ѱл҃о́мъ , н҃ . сла́ва . мл҃твъ ра́ди стрⷭ҇тᲂте́рпча , ми́лᲂстиве ѡ҆чи́сти мно́жествᲂ сᲂгрѣше́нїи на́шихъ . и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

Пᲂми́лꙋй мѧ бж҃е пᲂ вели́цѣй млⷭ҇ти твᲂе́й пᲂ мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , ѕ҃ . Дне́сь сᲂзыва́етъ на́съ , страстᲂте́рпца всеми́рнᲂе тᲂржество̀ . прїиди́те ᲂу҆́бѡ празднᲂлю́бцы , свѣ́тлѡ пра́зднꙋемъ па́мѧть є҆гѡ̀ глаго́люще , ра́дꙋисѧ и҆́же ри́зꙋ нече́стїѧ раздра́въ вѣ́рᲂю , мꙋ́жествᲂ же дх҃о́внᲂе себѣ̀ налᲂжи́въ . ра́дꙋисѧ ᲂу҆пра́зднивыи всѧ̀ кᲂзнᲂдѣ́йства чꙋжа́гѡ , си́лᲂю да́нᲂю тѝ ѿ є҆ди́нагѡ бг҃а . ра́дꙋисѧ и҆́же прᲂбᲂде́нымъ ти ре́брᲂмъ , бл҃же́ннꙋю стрⷭ҇ть хрⷭ҇то́вꙋ дх҃о́внѣ на́мъ живᲂписа́въ . є҆го́же мᲂлѝ , страда́льцемъ ᲂу҆дᲂбре́нїе дими́трїе , и҆зба́витисѧ на́мъ ви́димыхъ и҆ неви́димыхъ вра́гъ , и҆ спасти́сѧ дш҃а́мъ на́шимъ .

Кано́нъ , трꙋ́сꙋ , сᲂ і҆рмᲂсо́мъ , на ѕ҃ . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́сꙋхꙋ хᲂди́въ і҆и҃ль , пᲂ бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Ꙗ҆́кѡ стра́шенъ гнѣ́въ тво́й , ѿ него́же на́съ и҆зба́вилъ є҆сѝ гдⷭ҇и . непᲂгре́бъ в̾ землѝ всѐ движе́нїе на́ше . тѣ́мъ бл҃гᲂда́рственѡ тѧ̀ при́снѡ сла́вимъ . Ра́дꙋѧсѧ на́шемꙋ вы́нꙋ кᲂне́чнᲂмꙋ и҆справле́нїю влⷣкᲂ , ꙗ҆́кᲂже ли́стъ хꙋ́дъ кᲂле́блеши всю̀ зе́млю , въ стра́хъ тво́й вѣ́рныѧ ᲂу҆твержда́ѧ гдⷭ҇и . И҆зба́ви трꙋ́са тѧ́жкагᲂ всѣ́хъ на́съ , и҆ неда́ждь пᲂги́бнꙋти дᲂ кᲂнца̀ наслѣ́дїю твᲂемꙋ̀ , мно́гими прᲂгнѣ́вавшемъ ѕлы́ми твᲂѐ дᲂлгᲂтерпѣ́нїе . боⷢ҇ . Ра́бски тебѣ̀ вᲂпїе́мъ мт҃и бж҃їѧ , ѡ҆бы́чныѧ млⷭ҇ти твᲂѧ̀ на́ градъ и҆ лю́ди млⷭ҇тивнѡ пᲂказꙋ́ющи , трꙋ́са тѧ́жка и҆ тлѧ̀ на́съ и҆змѣнѝ .

и҆ ст҃о́мꙋ , два̀ кано́на , на и҃ . кано́нъ , гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ . запѣ́въ : Ст҃ы́и сла́вныи великᲂмꙋ́чениче дими́трїе , мᲂлѝ бг҃а ѡ҆ на́съ . Бжⷭ҇твенымъ мꙋче́нїѧ вѣнце́мъ ᲂу҆вѧзе́сѧ пᲂ хрⷭ҇тѐ , ликꙋ́еши блиста́нїи ѿ ѻ҆нꙋ́дными сїѧ́ѧ , и҆ прᲂсвѣще́нїѧ и҆спᲂлнѧ́емь , великᲂмꙋ́чениче дᲂстᲂчꙋ́дне . Ꙗ҆́кѡ сꙋ́ща и҆́стинѣ мч҃нка , и҆ да́же до́ крᲂве пᲂдви́гшасѧ бл҃же́нне терпѣли́внѡ . тве́рдᲂ же прᲂтивле́нїе къ мꙋчи́телемъ пᲂказа́вша , тѧ̀ влⷣка прїѧ́тᲂва . ло́бы ѡ҆брѣта́телѧ низлᲂжи́лъ є҆сѝ на́ землю дими́трїе , мꙋ́ченическимъ си кᲂпїе́мъ ᲂу҆би́въ . бжⷭ҇твенᲂю бл҃гᲂда́тїю , и҆́же па́че ᲂу҆ма̀ си́лᲂю всебл҃же́нне ᲂу҆крѣплѧ́емь . боⷢ҇ . Без̾ мт҃ре ꙗ҆́кᲂже бг҃ъ пе́рвѣе сы́и , бы́сть є҆́же пᲂ на́съ без̾ ѻ҆ц҃а и҆з̾ тебѐ бцⷣе всепѣ́таѧ , пло́ть прїе́мъ пᲂ сᲂє҆дине́нїю , є҆́же па́че сло́ва и҆ ра́зꙋма .

дрꙋгі́и , кано́нъ , ст҃о́мꙋ дими́трїю . твᲂре́нїе геѡ́ргїѧ ски́лица . гла́съ , и҃ . пѣ́снь , а҃ . і҆рмо́съ . Вᲂѡ҆рꙋже́на фараѡ́на . Мѵ́ра бл҃гᲂво́нна и҆ чⷭ҇тна дими́трїе ѿве́рзеныи и҆сто́чниче , страсте́й мᲂи́хъ скве́рнꙋ ѡ҆мы́й . и҆ дᲂбрᲂдѣ́телей дѣѧ́нїемъ бл҃гᲂво́нїе мѧ̀ пᲂказа́въ хрⷭ҇то́вᲂ , ᲂу҆́мъ мо́й ѡ҆бл҃гᲂда́ти , бл҃гᲂда́ти твᲂѧ̀ бжⷭ҇твеныѧ пѣ́ти . Вᲂды̀ жи́вы рѣ́ки и҆стека́ти ѿ срⷣцъ вѣ́рныхъ сло́вᲂ бж҃їе гл҃етъ . тѣ́мже твᲂегѡ̀ прᲂлива́ютсѧ мѵ́ра и҆сто́чницы приснᲂтекꙋ́щїи . и҆́хже стрꙋѝ веселѧ́тъ бж҃їи гра́дъ , сла́вѧщїи мч҃нческᲂе дерзнᲂве́нїе твᲂѐ . Же́ѕлъ ᲂу҆́бѡ дре́вле мѡѷсе́ѡвъ ᲂу҆да́рь ка́мень в̾ землѝ пꙋсты́ннѣй , ѿве́рзе стрꙋѝ рѣ́къ мнᲂгᲂто́чныхъ . тѣ́лᲂ же твᲂѐ дими́трїе прᲂбо́дсѧ кᲂпїе́мъ , мѵ́ра и҆сто́чникъ пᲂказа̀ , но́выи і҆и҃ль прᲂхлажда́ѧ . сла́ва . Ꙗ҆́же ᲂу҆́бѡ и҆́маши вᲂздаѧ́нїѧ дими́трїе мч҃нческимъ тѝ ꙗ҆́звамъ , ни ѻ҆́кᲂ ви́дѣ , ни ᲂу҆́хᲂ слы́ша . нн҃ѣ же мѵ́ра мо́ре вᲂздаѧ́нїе чистᲂты̀ прᲂлива́еши ми́рꙋ кᲂнце́мъ , стра́сти дш҃а́мъ ѡ҆чища́ющи . и҆ ны́нѣ , боⷢ҇ . Пренескве́рнᲂ прїѧ́телище всечи́стаѧ , сло́вᲂ ѡ҆брѣ́тъ тѧ̀ бж҃їе , в̾ твᲂѧ̀ всели́сѧ лᲂжесна̀ . и҆ є҆́же ѿ тебѐ прїѧ́тъ пᲂма́завъ свᲂи́мъ бжⷭ҇тво́мъ . є҆ди́нъ про́йде ѿ двᲂю̀ , и҆ и҆злїѧ́всѧ мѵ́рᲂ нарече́сѧ , хрⷭ҇то́съ бᲂ бг҃ъ же и҆ чл҃къ . катава́сїѧ : Ѿве́рзꙋ ᲂу҆ста̀ мᲂѧ̀ .

пѣ́снь , г҃ . і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й , вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени и҆спᲂвѣ́данїѧ тѝ . Землѧ̀ ᲂу҆ѧзвлѧ́етсѧ , на́мъ ѕлѣ̀ належа́щимъ , и҆ при́снѡ гнѣ́въ тво́й пᲂдвиза́ющимъ насѧ̀ , ще́дре всѣ́хъ цр҃ю . нᲂ пᲂщадѝ влⷣкᲂ рабы̀ твᲂѧ̀ . Пᲂтрѧ́съ гдⷭ҇и зе́млю . ᲂу҆тверди́лъ є҆сѝ па́ки , наказꙋ́ѧ и҆ ѡ҆браща́ѧ не́мᲂщь на́шꙋ , ᲂу҆твержда́тисѧ твᲂи́мъ бжⷭ҇твенымъ стра́хᲂмъ хᲂтѧ̀ пребл҃гі́и . Ро́ждьшагᲂ сме́рть го́рькꙋю , и҆ трꙋ́сы тѧ́жкїѧ , и҆ ꙗ҆́звы нестерпи́мыѧ грѣха̀ бра́тїе ᲂу҆бѣжи́мъ . и҆ бг҃ᲂви пᲂкаѧ́нїѧ ѻ҆́бразᲂмъ прилѣпи́мсѧ .= боⷢ҇ . Є҆=ди́на сꙋ́щи бл҃га́ѧ , пребл҃го́е сло́вᲂ ᲂу҆мᲂлѝ прилѣ́жнѡ , настᲂѧ́щагѡ трꙋ́са всѣ́мъ и҆зба́витисѧ и҆ гнѣ́ва бцⷣа чи́стаѧ мо́лимсѧ .

и҆́нъ , і҆рмо́съ . Весели́тсѧ ѡ҆ тебѣ̀ . Вмѣни́сѧ ꙗ҆́кѡ нивᲂчто́ же мꙋчи́телевᲂ тᲂбо́ю пᲂвелѣ́нїе . сло́вᲂ бᲂ бж҃їе па́че всѣ́хъ страстᲂте́рпче пᲂче́лъ є҆сѝ . Свѣ́щникъ свѣтᲂви́денъ мꙋче́нїѧ в̾ сѣ́ни бы́лъ є҆сѝ , бжⷭ҇твенымъ свѣ́тᲂмъ сїѧ́ющь мч҃нче страстᲂте́рпче дими́трїе . боⷢ҇ . И҆сцѣлѧ́ѧ ѻ҆́бразъ и҆стлѣ́вшїи землены́хъ пречⷭ҇таѧ , ве́сь и҆з̾ тебѐ ѡ҆блачи́тсѧ , пребы́въ ꙗ҆́кᲂже бѣ̀ чл҃кᲂлю́бецъ .

и҆́нъ , і҆рмо́съ . Нбⷭ҇нᲂмꙋ крꙋ́гꙋ . Ро́ждьсѧ с̾ нб҃съ ѿ́ бг҃а , бы́сть бжⷭ҇твенᲂ бл҃ги́хъ наслѣ́дникъ , сн҃ъ нарица́емъ снаслѣ́дникъ хрⷭ҇тꙋ̀ , црⷭ҇твꙋеши же с̾ ни́мъ , и҆́бᲂ мѵ́рᲂ ѻ҆́бразъ семꙋ̀ дими́трїе . Вкᲂрени́всѧ ꙗ҆́кᲂже дре́вᲂ дв҃дски сла́вне при и҆схо́дищихъ во́дъ , вели́къ во́здалъ є҆сѝ мꙋче́нїѧ пло́дъ . и҆ ны́нѣ и҆сто́чникъ пᲂказа́сѧ мѵ́ра , бл҃гᲂꙋха́ѧ ми́рꙋ кᲂнцы̀ . сла́ва . Пᲂче́рпъ бл҃гᲂда́ть хрⷭ҇то́вꙋ , ребра̀ с̾ кро́вїю и҆стᲂчи́вша во́дꙋ . кро́вь и҆злїѧ́лъ є҆сѝ свᲂю̀ , за́нь прᲂбо́дсѧ . и҆ нн҃ѣ ꙗ҆́кѡ во́дꙋ прᲂлива́еши срⷣцамъ бл҃гᲂꙋха́ннᲂ мѵ́рᲂ дими́трїе . и҆ ны́нѣ , боⷢ҇ . Сщ҃е́ннїи твᲂѝ сᲂсꙋ́ды дш҃е́внїи пречⷭ҇таѧ , и҆спо́лнь а҆рама́тъ и҆ мѵ́ра бжⷭ҇твенагѡ дх҃а вше́дшагѡ в̾ тѧ̀ . и҆́бᲂ бг҃а ро́ждьши , вѣ́рныѧ и҆з̾мѣни́ла є҆сѝ ѿ ти́ны страсте́й . катава́сїѧ : Твᲂѧ̀ пѣвцы̀ .

кᲂнда́къ , трꙋ́сꙋ . гла́съ , ѕ҃ . И҆зба́ви трꙋ́са тѧ́жкагѡ всѣ́хъ на́съ гдⷭ҇и , и҆ ꙗ҆́звы нестерпи́мыѧ грѣ́хъ ра́ди на́шихъ . пᲂщадѝ гдⷭ҇и лю́ди твᲂѧ̀ , и҆́хже стѧжа̀ свᲂе́ю кро́вїю влⷣкᲂ . и҆ гра́дъ непреда́ждь в̾ пᲂги́бель трꙋ́сᲂмъ стра́шнымъ , и҆но́гᲂ бᲂ ра́звѣ тебѐ бг҃а невѣ́мы . и҆ вᲂз̾зᲂвѝ пᲂю́щимъ , а҆́зъ є҆́смь с̾ ва́ми и҆ никто́же на вы̀ .

сѣда́ленъ . гла́съ , д҃ . Ꙗ҆́кѡ до́блѧ страда́льца , и҆ во́ина крѣ́пка всецр҃ю́ющагᲂ хрⷭ҇та̀ , взыва́емъ ѱало́мски . ра́дꙋисѧ мч҃нкѡмъ ᲂу҆краше́нїе и҆ лѣпᲂта̀ . ра́дꙋисѧ свѣ́тлаѧ цр҃кви ѕвѣздо̀ . и҆ стѣно̀ и҆ приста́нище прибѣга́ющимъ к̾ тебѣ̀ , великᲂмч҃нче сла́вне дими́трїе . тѧ̀ пᲂю́щїѧ спаса́й ѿ всѧ́кагѡ вре́да чꙋжа́гѡ , и҆ ѡ҆ѕлᲂбле́нїѧ и҆зба́ви . вⷤ . сла́ва , и҆ ны́нѣ . трꙋ́сꙋ , гла́съ , то́йже . Сᲂгрѣ́шшїѧ тебѣ̀ мно́гᲂ непрезрѣ́лъ є҆сѝ . нᲂ пᲂказа́въ млⷭ҇тивнᲂ и҆спра́вилъ є҆сѝ . бжⷭ҇твенымъ пᲂвелѣ́нїемъ тѝ пᲂтрѧ́съ зе́млю влⷣкᲂ дᲂлгᲂтерпѣли́ве , ника́кᲂже пᲂвредѝ всѧ̀ рабы̀ твᲂѧ̀ за милᲂсе́рдїе мно́гᲂе . тѣ́мъ бл҃гᲂда́рствеными тѧ̀ гла́сы славᲂсло́вимъ , и҆ со́ страхᲂмъ сла́вимъ .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Кᲂлѣ́блеши гдⷭ҇и зе́млю , хᲂтѧ́и , стра́хᲂмъ и҆́стиннымъ всѣ́мъ на́мъ влⷣкᲂ ᲂу҆твержда́тисѧ , кᲂлѣ́блемымъ прило́ги льсти́вагᲂ бᲂрца̀ . Бжⷭ҇твенымъ манᲂве́нїемъ твᲂи́мъ дви́жеши всѧ́ческаѧ , и҆ ᲂу҆жаса́еши срⷣца̀ на землѝ живꙋ́щимъ влⷣкᲂ . пра́веднагᲂ ᲂу҆́бѡ твᲂегѡ̀ гнѣ́ва ѡ҆сла́би гдⷭ҇и вᲂлна́мъ . Ника́кᲂже и҆мꙋ́щимъ вᲂ ᲂу҆мѣ̀ стра́ха твᲂегѡ̀ , ᲂу҆страша́еши двиза́нїе всеѧ̀ землѝ є҆ди́не млⷭ҇тиве . нᲂ ѡ҆бы́чнѡ на на́съ млⷭ҇ть твᲂю̀ ᲂу҆дивѝ .= боⷢ҇ . Х=ра́мъ тѧ̀ влⷣчце бж҃їи вѣ́дѧще , вᲂ ст҃ѣ́мъ хра́мѣ твᲂе́мъ рꙋ́цѣ нечи́стѣи дви́жемъ на мᲂльбꙋ̀ , ви́ждь ѡ҆ѕлᲂбле́нїе на́ше , и҆ пᲂда́ждь по́мᲂщь .

и҆́нъ , і҆рмо́съ . Вᲂз̾дви́жена тѧ̀ ви́дѣвши . Пᲂбѣди́вша тѧ лжꙋ̀ нече́стїѧ , мч҃нче бж҃їи дими́трїе вы́шнїи ви́дѧ , сла́вᲂю вѣнча̀ сла́вне . пᲂю́ща , сла́ва си́лѣ твᲂе́й гдⷭ҇и . На ле́сть пᲂбѣ́дꙋ вᲂз̾ста́вивъ , пᲂбѣди́тельныи вѣне́цъ пра́веднѣ прїѧ́лъ є҆сѝ дими́трїе . зᲂвы́и зижди́телю свᲂемꙋ̀ , сла́ва си́лѣ твᲂе́й гдⷭ҇и . Направлѧ́емь дла́нїю живᲂно́снᲂю , к̾ приста́нищемъ дᲂсти́глъ є҆сѝ ти́химъ . и҆дѣ́же ны́нѣ ра́дꙋѧсѧ зᲂве́ши дими́трїе , сла́ва си́лѣ твᲂе́й гдⷭ҇и . боⷢ҇ . Ꙗ҆́кѡ тва́рей всѣ́хъ честнѣ́йши , мт҃и бг҃ꙋ бы́ти є҆ди́на спᲂдо́бисѧ , сего́ бᲂ ро́ждьши , и҆ ми́ръ бл҃гᲂда́тїю бг҃ᲂразꙋ́мїѧ прᲂсвѣти́ла є҆сѝ .

и҆́нъ , і҆рмо́съ . Ты́ ми хрⷭ҇тѐ гдⷭ҇ь . Скве́рнꙋ всѧ́кꙋ ѿве́ргъ рᲂжде́нїѧ , ба́нею пᲂрᲂжде́нїѧ , чистᲂтꙋ̀ ꙗ҆ви́лсѧ є҆сѝ сᲂблюда́ѧ да́же дᲂ кᲂнчи́ны . тѣ́мже хрⷭ҇то́съ тебѣ̀ дими́трїе є҆сте́ственыи во́зрастъ претвᲂрѧ́етъ в̾ мѵ́рᲂ , ꙗ҆́кᲂже и҆ во́дꙋ в̾ вино̀ прелᲂжѝ . Ꙗ҆́кᲂже ѻ҆́гнь є҆стествꙋ̀ всемꙋ̀ пᲂдава́етсѧ , цѣ́лꙋ спаса́ющь си́лꙋ . си́це и҆ твᲂѐ мѵ́рᲂ страда́льче , всѣ́ми ᲂу҆́бѡ пᲂчерпа́етсѧ , ѡ҆ба́че же пребыва́етъ неѡ҆скꙋ́днᲂ . є҆мꙋ́же нн҃ѣ бл҃гᲂче́ствꙋющїи пᲂкланѧ́ющесѧ пᲂе́мъ бг҃а , и҆́же бл҃гᲂда́ть сицевꙋ̀ тебѣ̀ по́далъ є҆́сть . Кто̀ слы́шаны твᲂѧ̀ хвалы̀ сᲂтвᲂри́тъ хрⷭ҇тѐ сло́ве , ви́дѧ твᲂѧ̀ бл҃гᲂда́ти , ꙗ҆́же страда́льцемъ свᲂи́мъ по́далъ є҆сѝ ; дими́трїѧ бᲂ сѐ мѵ́рᲂ мч҃нка ꙗ҆́кѡ и҆сто́чникъ и҆стека́етъ , бл҃гᲂꙋха́нїе же дыха́етъ , и҆ разᲂрѧ́етъ ѕѡ́лъ ѡ҆мраче́нїе . сла́ва . Напᲂѧ́ше ᲂу҆́бѡ и҆сто́чникъ ѿ землѝ вᲂсхᲂдѧ́щь , пе́рвѣе ѡ҆дᲂжди́ти всѐ сеѧ̀ лицѐ , ты́ же сᲂкры́всѧ мч҃нче пᲂд̾ земле́ю , и҆сто́чникъ ꙗ҆ви́лсѧ є҆сѝ бл҃гᲂво́нна мѵ́ра дими́трїе , ко́пїи бᲂ мно́жествᲂ ѿверзо́ша жи́лы . и҆ ны́нѣ ми́рꙋ напᲂѧ́еши кᲂнцы̀ . и҆ ны́нѣ , боⷢ҇ . Невѣ́стꙋ бж҃їю тѧ̀ и҆ мт҃рь вѣ́мы бцⷣе . тебе́ бᲂ ꙗ҆́кѡ мѷрᲂ дх҃нᲂве́ннѣйшїи ши́пᲂкъ ѡ҆брѣ́тъ сло́вᲂ бж҃їе , цвѣтꙋ́щь вᲂ ᲂу҆до́лїи смире́ннагѡ челᲂвѣ́чества , вᲂз̾желѣ̀ твᲂе́й дᲂбро́тѣ , и҆з̾ тебѐ плᲂтᲂно́сецъ прᲂше́дъ , вѣ́рныѧ ѡ҆бл҃гᲂво́нилъ є҆́сть .

катава́сїѧ : Сѣдѧ́и вᲂ сла́вѣ .

пѣ́снь , є҃ . і҆рмо́съ . Бж҃їимъ свѣ́тᲂмъ тѝ бл҃же , ᲂу҆́тренюющихъ тѝ дш҃а любо́вїю , прᲂсвѣтѝ мᲂлю́сѧ , тѧ̀ вѣ́дѣти сло́вᲂ бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . И҆ ты̀ срⷣце пᲂкᲂлѣ́блисѧ ны́нѣ , ви́дѧ бж҃їе преще́нїе належа́щее . и҆ вᲂзᲂпі́и , пᲂщадѝ лю́ди твᲂѧ̀ гдⷭ҇и , и҆ ᲂу҆ста́ви пра́ведныи гнѣ́въ тво́й милᲂсе́рде . Лю́ди и҆ гра́дъ ꙗ҆́же свᲂе́ю кро́вїю стѧжа̀ і҆с҃е , непреда́ждь в̾ пᲂги́бель , в̾ смꙋще́нїи землѝ трꙋ́сᲂмъ стра́шнымъ , ли́къ а҆пⷭ҇лъ мо́литъ тѧ̀ . Ѿ пꙋте́й твᲂи́хъ пра́выхъ нра́вᲂмъ ᲂу҆кло́ньшесѧ развраще́ннᲂмъ , в̾ негᲂдᲂва́нїе прелᲂжи́хᲂмъ тѧ̀ млⷭ҇тивагᲂ . нᲂ ще́дръ бꙋ́ди твᲂи́мъ рабо́мъ . боⷢ҇ . Ны́нѣ по́мᲂщи прїи́де вре́мѧ . ны́нѣ премѣне́нїю пᲂтре́ба чи́стаѧ к̾ сн҃ꙋ твᲂемꙋ̀ и҆ бг҃ꙋ , ꙗ҆́кѡ да ᲂу҆ще́дритъ сᲂгрѣ́шшїѧ ны̀ , и҆ на лежа́щагᲂ гнѣ́ва и҆зба́витъ .

и҆́нъ , і҆рмо́съ . Ты̀ гдⷭ҇и ми свѣ́тъ . Ѻ҆́гнь любвѐ бжⷭ҇твеныѧ в̾ срⷣцы прїе́мъ , ѻ҆́гнь ᲂу҆гаси́лъ є҆сѝ без̾бо́жнагѡ и҆́дᲂльскагѡ гнѣ́ва , всесла́вныи дими́трїе . И҆збавлѧ́ѧ на́съ ѿ бѣ́дъ ꙗ҆ви́сѧ дими́трїе , мᲂли́твами сѝ пᲂкрыва́ѧ , вѣ́рᲂю и҆ любо́вїю вᲂсхвалѧ́ющихъ тѧ̀ . боⷢ҇ . Сло́вᲂ бж҃їе , и҆́же ѻ҆ц҃ꙋ є҆динᲂсꙋ́щнᲂе , тво́й быва́етъ бг҃ᲂмт҃и па́че ᲂу҆ма́ же и҆ сло́ва сн҃ъ , тебѣ̀ є҆динᲂсꙋ́щенъ .

и҆́нъ , і҆рмо́съ . Вскꙋ́ю мѧ ѿри́нꙋ . Бы́сть прїѧ́телище и҆́же с̾ нб҃сѐ сᲂше́дшемꙋ за млрⷭ҇дїе , ꙗ҆́кᲂже до́ждь и҆лѝ ка́плѧ ка́плющи кро́ткѡ , ᲂу҆пᲂи́сѧ та́йными дарᲂва́нїи , ны́нѣ и҆́з̾ грᲂба мѵ́ра и҆сто́чникъ и҆стᲂча́еши дими́трїе . Страда́нїи ꙗ҆́кᲂже зако́ны , всѧ́кїѧ мирскі́ѧ ѡ҆бна́жсѧ любвѐ . ᲂу҆питѣ́сѧ мч҃нче ма́слᲂмъ бл҃гᲂда́тей дх҃о́вныхъ . пᲂбѣ́ждь же тмѣ̀ нача́ла , по́честь прїѧ́тъ и҆стᲂча́ти мѵ́рᲂ сладкᲂво́ннᲂ дими́трїе . Шипо́къ ꙗ҆ви́сѧ прᲂцвѣты́й внꙋ́трь сада̀ гдⷭ҇нѧ дими́трїе , ѡ҆багре́нъ кро́вїю мꙋче́нїѧ и҆ ра́нами сѣче́ней , и҆ бᲂлѣ́зньми страда́льческими , и҆ разжже́нїемъ пе́щи . и҆ ны́нѣ мѵ́рᲂ и҆стᲂча́еши приснᲂтекꙋ́щее . Сѐ па́ки зри́тсѧ бжⷭ҇твеныи кᲂвче́гъ хра́мъ мч҃нка , и҆дѣ́же свѣ́щникъ внꙋ́трь , и҆ гро́бнᲂе сѐ мѵ́рᲂ и҆ ма́слᲂ . є҆го́же ѻ҆́крестъ взыгра́имъ дх҃о́внᲂ , и҆ ликꙋ́юще вᲂсхва́лимъ вели́кагᲂ дими́трїѧ . сла́ва . Но́выи ꙗ҆́кᲂже и҆лїѧ̀ ре́внᲂстїю снѣда́емь хрⷭ҇то́вы любвѐ , царѧ̀ ѡ҆блича́еши , и҆ себѐ предава́еши на сме́рть . ѻ҆ба́че живе́ши є҆щѐ , мѵ́ра и҆сто́чникъ пᲂказа́въ гро́бъ , ꙗ҆́кᲂже скꙋде́льникъ ма́сла неи҆стᲂща́емыи . и҆ ны́нѣ , боⷢ҇ . Написꙋ́етъ твᲂѐ дв҃ᲂ дре́вле та́иньствᲂ пᲂѧ̀ пра́ѻ҆ц҃ъ тво́й , цр҃е́вѣ дще́ри сла́ва всѧ̀ внꙋ́трь ᲂу҆́дꙋ , и҆́же тѧ̀ прᲂсла́вль , ꙗ҆́кᲂже бл҃же́ннꙋю чл҃кѡмъ , ра́дꙋисѧ ми́ра всегѡ̀ вᲂзва́нїе . катава́сїѧ : Оу҆диви́шасѧ всѧ́ческаѧ .

пѣ́снь , ѕ҃ . і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей бꙋ́рею , в̾ ти́хᲂ приста́нище прите́къ вᲂпїю́ ти , вᲂз̾ведѝ ѿ тлѝ живо́тъ мо́й мнᲂгᲂмлⷭ҇тиве . Не и҆мꙋ́ще влⷣкᲂ дерзнᲂве́нїѧ мᲂли́тисѧ смире́нїи высᲂтѣ̀ твᲂе́й . и҆з̾бра́нныѧ а҆́нг҃лы твᲂѧ̀ в̾ те́плꙋю пᲂдвиза́емъ мᲂли́твꙋ . тѣ́хъ ра́ди гнѣ́ва твᲂегѡ̀ и҆змѝ на́съ . Ны́нѣ пᲂзна́хᲂмъ гдⷭ҇и , ꙗ҆́кѡ вᲂсхᲂтѣ́лъ є҆сѝ на́съ , и҆ ника́кᲂже пᲂкры́лъ є҆сѝ на́съ пᲂд̾ земле́ю , сᲂгрѣше́нїи лю́тыми мнᲂгᲂсᲂгрѣ́шшїѧ . тѣ́мъ тѧ бл҃гᲂда́рнᲂ сла́вимъ . Пᲂвелѣва́еши кᲂлеба́тисѧ ѻ҆снᲂва́нїемъ землѝ , ꙗ҆́кѡ да мы̀ преста́немъ смире́нїи кᲂлеба́тисѧ . и҆ дᲂбрᲂдѣ́тельми лꙋ́чшагᲂ стᲂѧ́нїѧ , и҆ стра́хᲂмъ ти сло́ве ᲂу҆тверди́мсѧ . боⷢ҇ . Ст҃а́ѧ бг҃ᲂневѣ́стᲂ недᲂꙋмѣ́нныѧ ны́нѣ лю́ди ᲂу҆ще́дри , и҆ ма́терьними сѝ мᲂльба́ми и҆́же на ны̀ бж҃їе негᲂдᲂва́нїе претвᲂрѝ вско́рѣ , мо́лимъ тѧ .

и҆́нъ , і҆рмо́съ . Пᲂжрꙋ́ти со́ гласᲂмъ . Сᲂгла́снѡ сᲂше́дшесѧ пᲂе́мъ сла́внꙋю и҆ свѣтᲂно́снꙋю твᲂю̀ па́мѧть , чꙋде́съ по́лнꙋю и҆ дарᲂва́нїи ст҃а́гѡ и҆ честна́гѡ всебл҃же́нне дх҃а . Разрѣши́ ми плени́цы сᲂгрѣше́нїи мᲂльба́ми сѝ . ꙗ҆́кѡ бᲂ непᲂбѣди́мъ мч҃нкъ дерзнᲂве́нїе и҆́маши кᲂ влⷣцѣ , бꙋ́ди ми прибѣ́жище и҆ пᲂкро́въ дими́трїе . боⷢ҇ . Чи́стꙋ тѧ пᲂсредѣ̀ те́рнїѧ ѡ҆брѣ́тъ ꙗ҆́кѡ пречⷭ҇тыи крѵ́нъ , и҆ ᲂу҆до́льныи цвѣ́тъ ѽ бг҃ᲂмт҃и жени́хъ , вᲂ ᲂу҆тро́бꙋ твᲂю̀ всели́сѧ .

и҆́нъ , і҆рмо́съ . Ѡ҆чи́сти мѧ сп҃се . Прᲂцвѣ́лъ є҆сѝ дх҃о́внᲂ ꙗ҆́кѡ ма́слина плᲂдᲂви́таѧ . и҆ кᲂпїено́сными рꙋка́ми нꙋ́жднѡ и҆згнете́сѧ . вѣ́рныхъ же ᲂу҆тѣша́еши , мѵ́рᲂ ны́нѣ и҆стᲂча́ѧ бжⷭ҇твенымъ гро́бᲂмъ сѝ дими́трїе . Пче́льнымъ ѻ҆́бразᲂмъ себѐ дѣ́лателѧ всѧ́кᲂй пᲂказа́лъ є҆сѝ бг҃ᲂтво́рнѣй дᲂбрᲂдѣ́тели . дш҃ꙋ бл҃же́нне непᲂро́чнꙋ ꙗ҆́кѡ сᲂѡ҆бра́знꙋ тѣлесѝ сᲂблюда́ѧ . и҆ мѵ́рᲂ ны́нѣ и҆стᲂча́еши , ᲂу҆слажда́ющее дш҃а . Вᲂзлюби́лъ є҆сѝ ѿ дш҃и хрⷭ҇та̀ , и҆ семꙋ̀ пᲂслѣ́дᲂвалъ є҆сѝ к̾ ми́рꙋ бл҃гᲂꙋха́нїѧ , и҆ сегѡ̀ причасти́сѧ смѣше́нїемъ лꙋ́чшимъ . и҆ ны́нѣ мѵ́ра стрꙋѝ и҆стᲂча́еши непреста́ннѡ дими́трїе . Ка́пли страда́нїи на́ землю крᲂве́й твᲂи́хъ ка́плюще , бл҃гᲂво́нїѧ и҆сто́чникъ мѵ́ра сᲂдѣ́лаша . и҆ ны́нѣ сїѐ непреста́ннѡ пᲂчерпа́ющимъ и҆стека́етъ дими́трїе . сла́ва . По́тᲂмъ свᲂи́хъ мꙋ́дре крᲂве́й ѡ҆крᲂпле́нъ , ꙗ҆́кᲂже и҆́нъ но́выи и҆сто́чникъ , тре́бꙋющимъ бᲂга́тнѡ пᲂдава́еши вᲂ и҆сцѣле́нїе свᲂѐ мѵ́рᲂ бл҃же́нне , ᲂу҆се́рднѡ прихᲂдѧ́щимъ . и҆ ны́нѣ , боⷢ҇ . Зрѧ́ще златᲂви́дныи свѣ́та свѣ́щникъ неꙋгаси́мыи , и҆́же мно́жествᲂмъ грѣхо́въ дш҃а ѡ҆мрачи́вшїй , пристꙋ́пимъ . дава́етъ бᲂ прᲂсвѣще́нїе , и҆ всѧ́кᲂ ѿгᲂнѧ́етъ ѡ҆мраче́нїе .

катава́сїѧ : Бжⷭ҇твенᲂе сѐ и҆ всечестно́е .

кᲂнда́къ . гла́съ , в҃ . Крᲂве́й твᲂи́хъ стрꙋѧ́ми дими́трїе , цр҃кᲂвь бг҃ъ ѡ҆багри́лъ є҆́сть , да́выи ти держа́вꙋ непᲂбѣди́мꙋю . и҆ сᲂхранѧ́й гра́дъ тво́й невреди́мъ , тᲂмꙋ́ бᲂ є҆сѝ ᲂу҆твержде́нїе . и҆́кᲂсъ . Сегѡ̀ вели́кагѡ вᲂспᲂе́мъ сᲂше́дшесѧ вѣ́рᲂю , ꙗ҆́кѡ ѻ҆рꙋ́жника хрⷭ҇то́ва и҆ мч҃нка дими́трїѧ , въ пѣ́снехъ и҆ пѣ́нїихъ , взыва́юще влⷣцѣ и҆ зижди́телю вселе́нныѧ , и҆зба́ви на́съ трꙋ́са и҆ нꙋ́жды чл҃кᲂлю́бче мл҃твами бцⷣы и҆ всѣ́хъ ст҃ы́хъ мч҃нкъ твᲂи́хъ . на тѧ́ бᲂ всѝ ᲂу҆пᲂва́емъ , и҆зба́витисѧ бѣ́дъ и҆ скᲂрбе́й . ты́ бᲂ є҆сѝ на́мъ ᲂу҆твержде́нїе .

пѣ́снь , з҃ . і҆рмо́съ . Хладᲂда́тельнꙋ ᲂу҆́бѡ пе́щь сᲂтвᲂрѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ ᲂу҆вѣща̀ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . Препѣ́тъ є҆сѝ гдⷭ҇и дᲂлгᲂтерпѣли́ве , ꙗ҆́кѡ не ᲂу҆мᲂри́лъ є҆сѝ рабы̀ твᲂѧ̀ кᲂлеба́нїемъ и҆ трꙋ́сᲂмъ стра́шнымъ землѝ . нᲂ ᲂу҆страши́лъ є҆сѝ и҆скі́и ѡ҆брати́тисѧ ѿ ѕо́лъ , и҆ жи́ти всѣ́мъ на́мъ . Стᲂна́нїе ѿ́ срⷣца вᲂспꙋща́емъ , и҆ сле́зы прᲂлїе́мъ , ꙗ҆́кѡ да млⷭ҇тива влⷣкꙋ ѡ҆брѧ́щемъ хрⷭ҇та̀ , сᲂкрꙋши́ти хᲂтѧ́ща трꙋ́сᲂмъ всѣ́хъ на́съ , за ᲂу҆мнᲂже́нїе грѣхо́въ претѧ́ща на́мъ . Оу҆вы̀ зᲂве́мъ , и҆ рꙋ́цѣ вᲂз̾де́жемъ к̾ бг҃ꙋ вы́шнемꙋ , и҆ преста́немъ про́чее твᲂри́ти ѕло́е . сѐ сп҃съ негᲂдꙋ́ѧ кᲂлѣ́блетъ всю̀ зе́млю , ᲂу҆тверди́ти хᲂтѧ̀ на́съ . боⷢ҇ . При́зри чи́стаѧ , и҆ спасѝ всѧ̀ пᲂю́щїѧ тѧ̀ , пᲂтреби́тисѧ хᲂтѧ́щїѧ в̾ гнѣ́вѣ бж҃їи , ꙗ҆́рᲂстїю вели́кᲂю и҆ стра́шнᲂю , ны́нѣ наше́дшагᲂ преще́нїѧ . за мно́жествᲂ мно́гихъ прегрѣше́нїи на́шихъ .

и҆́нъ , і҆рмо́съ . Впещѝ а҆враа́мскїѧ . Преꙋкра́шенъ бжⷭ҇твенᲂю сла́вᲂю и҆ бл҃гᲂда́тїю , мч҃нче страстᲂте́рпче , сїѧ́еши свѣтᲂви́днѡ , и҆ прᲂсвѣща́еши зᲂвꙋ́щїѧ , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и .= Ꙗ҆́кѡ багрѧни́цею ᲂу҆кра́шенъ свᲂе́ю кро́вїю , и҆мы́и вмѣ́стᲂ ски́петра сла́вне крⷭ҇тъ , сᲂ хрⷭ҇то́мъ црⷭ҇твꙋеши ны́нѣ . блгⷭ҇ве́нъ є҆сѝ зᲂвы́и в̾ цр҃кви сла́вы твᲂеѧ̀ гдⷭ҇и . =боⷢ҇ . Препрᲂсла́вленаѧ , прᲂсвѣще́наѧ мт҃и дв҃ᲂ , всѧ̀ чтꙋ́щїѧ тѧ всеи́стинꙋю бцⷣꙋ ѡ҆градѝ . блгⷭ҇ве́на ты̀ в̾ жена́хъ пренепᲂро́чнаѧ влⷣчце .

и҆́нъ , і҆рмо́съ . Дѣ́ти є҆вре́йскїѧ в̾ пещѝ . Во́дꙋ пᲂчерпстѝ и҆са́їѧ жа́ждꙋщимъ дими́трїе пред̾пᲂвелѣва́етъ . а҆́ще бы ви́дѣлъ тво́й гро́бъ , вᲂзᲂпи́лъ бы всѧ́кᲂ , мѵ́ра и҆сто́чникꙋ прихᲂди́те , и҆ пᲂчерпи́те спасе́нїе . Землѝ ᲂу҆́бѡ и҆сча́дїе бы́въ , всели́лжесѧ є҆сѝ в̾ землѝ кро́ткихъ , и҆дѣ́же вᲂда̀ пи́щи . є҆ѧ́же напи́сѧ в̾ сы́тᲂсть , мѵ́ра и҆сто́чникъ при́сныи ны́нѣ дими́трїе прᲂлива́еши . Вᲂзрастѐ ꙗ҆́кѡ лᲂза̀ в̾ винᲂгра́дѣ , пребыва́ѧ неѿсѣ́ченъ , бг҃ᲂви сᲂвᲂкꙋпле́нъ . и҆ сегѡ̀ и҆спо́лньсѧ ма́сти неи҆зрече́нныѧ , мѵ́рᲂ ꙗ҆́кѡ стрꙋѧ̀ всѣ́мъ ны́нѣ дими́трїе и҆стᲂча́еши . Ѽ но́вымъ тѝ бᲂре́нїемъ , ѽ стра́ннымъ твᲂи́мъ мч҃нческимъ страда́нїемъ . твᲂѧ́ бᲂ по́ты , и҆́же за́нь прᲂлїѧ́вшїѧсѧ бл҃же́нне хрⷭ҇то́съ прїе́мъ , и҆сто́чникъ мѵ́ра тѧ̀ пᲂказꙋ́етъ . сла́ва . Стрꙋю̀ мѵ́ра твᲂегѡ̀ прᲂлива́ѧ , ве́лїю пꙋчи́нꙋ прᲂсте́рлъ є҆сѝ чꙋде́съ , дш҃а́мъ и҆ тѣ́лᲂмъ недꙋ́ги пᲂтᲂплѧ́ющꙋ . и҆ напа́стей дими́трїе всѧ́кꙋ бꙋ́рю ᲂу҆спива́еши . и҆ ны́нѣ , боⷢ҇ . Млеко́мъ питѣ́ла є҆сѝ плᲂтᲂно́сца бг҃а бы́вша , ꙗ҆́кѡ да бᲂлѣ́знь а҆да́мᲂвꙋ сꙋ́щꙋю вᲂ а҆́дѣ ѡ҆блегчи́тъ , ѿ́ древа снѣ́дша разꙋ́мнагѡ , и҆ за́пᲂвѣди преслꙋ́шника . катава́сїѧ : Непᲂслꙋжи́ша тва́ри .

пѣ́снь , и҃ . і҆рмо́съ . И҆з̾ пла́мени ст҃ы́мъ ро́сꙋ и҆стᲂчѝ , а҆ пра́веднагѡ же́ртвꙋ и҆ во́ды пᲂпалѝ , всѧ́ бᲂ твᲂри́ши хрⷭ҇тѐ , є҆ли́кᲂ хо́щеши , тѣ́мъ тѧ превᲂзно́симъ гдⷭ҇а во́ вѣки . Пра́веднᲂмꙋ семꙋ̀ гнѣ́вꙋ чл҃кᲂлю́бче наше́дшꙋ внеза́пꙋ смꙋти́хᲂмсѧ . и҆ ненача́ѧнїемъ кᲂне́чнымъ ѡ҆бьѧ́ти бы́хᲂмъ к̾ не гᲂдᲂва́вшемꙋ наны̀ зрѧ́ще тебѣ̀ . Вᲂзде́жемъ рꙋ́цѣ вѣ́рнїи и҆ ѻ҆́чи к̾ є҆ди́нᲂмꙋ влⷣцѣ спастѝ мᲂгꙋ́щемꙋ . зᲂвꙋ́ще , хрⷭ҇тѐ , ꙗ҆́рᲂсть свᲂю̀ вᲂзвратѝ ѿ на́съ в̾ско́рѣ , чл҃кᲂлю́бецъ сы́й . Ты́сѧща а҆́нг҃лъ , мч҃нкъ сᲂсло́вїе , пррⷪ҇къ и҆ а҆пⷭ҇лъ , прпⷣбныхъ , и҆ ст҃лей , ст҃ы́й ли́къ мо́литъ тѧ̀ влⷣкᲂ . пᲂщадѝ лю́ди твᲂѧ̀ смире́нныѧ . Вѣ́дыи ще́дре не́мᲂщь на́шꙋ , и҆ пᲂпᲂлзнᲂве́ннᲂе всѧ́чески , и҆ неи҆спра́вленᲂе , ѡ҆сла́би гнѣ́въ , и҆ смꙋще́нїе ᲂу҆ти́ши , твᲂе́ю млⷭ҇тїю ᲂу҆ще́дри ми́ръ . боⷢ҇ . Млⷭ҇тиваѧ бцⷣе , ꙗ҆́же млⷭ҇тивагᲂ ро́ждьши сп҃са , ви́ждь ѡ҆ѕлᲂбле́нїе и҆ вᲂздыха́нїе люде́й твᲂи́хъ . и҆ ᲂу҆скᲂрѝ ᲂу҆мᲂли́ти , ᲂу҆ще́дрити ны̀ .

и҆́нъ , і҆рмо́съ . Рꙋ́цѣ распрᲂсте́ръ данїи́лъ . Ѻ҆черни́лъ є҆сѝ ве́сь вра́жїи гнѣ́въ сла́вне и҆ бᲂре́нїѧ , неѿє́млемᲂю си́лᲂю хрⷭ҇та̀ ѡ҆блече́нъ , и҆ пᲂбѣдᲂно́сецъ бы́въ мч҃нче , вᲂпїѧ́ше , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Мч҃нкъ бл҃гᲂстᲂѧ́нїе пᲂказа́въ , и҆́хже бл҃гᲂзва́нїе мч҃нче наслѣ́дᲂва . ба́нею ѡ҆мы́всѧ ст҃о́ю , ꙗ҆́же втᲂры́ми не ѡ҆сквернѧ́етсѧ грѣхо́вными прило́ги . кᲂпїе́мъ бᲂдо́мъ зᲂвы́и , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Чꙋде́съ твᲂи́хъ мно́жествᲂ , и҆́же па́че ᲂу҆ма̀ дарᲂва́нїѧ , и҆́хже ти пᲂдадѐ хрⷭ҇то́съ , всѣ́мъ пᲂказа́лъ є҆сѝ сла́вне . и҆ бл҃гᲂда́ть и҆сцѣле́нїемъ и҆́же па́че сло́ва , ꙗ҆́вѣ твᲂю̀ бл҃гᲂда́ть прᲂпᲂвѣ́даетъ на́мъ , вᲂпїю́щимъ , блгⷭ҇ви́те всѧ̀ дѣ́ла гдⷭ҇нѧ гдⷭ҇а . боⷢ҇ . Є҆ди́нꙋ вᲂ всѣ́хъ рᲂдѣ́хъ дв҃ꙋ мт҃рь , и҆ бцⷣꙋ чи́стꙋю пѣснᲂсло́вимъ , та́ бᲂ спасе́нїю на́шемꙋ хᲂда́таица , ꙗ҆́кѡ ми́рꙋ и҆зба́вителѧ сло́вᲂ ро́ждьши . є҆мꙋ́же вᲂпїе́мъ , блгⷭ҇ви́те всѧ̀ дѣ́ла гдⷭ҇нѧ гдⷭ҇а .

и҆́нъ , і҆рмо́съ . Се́дмь седми́цею пе́щь . Да бг҃ъ ꙗ҆́влена сᲂтвᲂри́тъ тѧ̀ сꙋ́щимъ в̾ ми́рѣ дими́трїе , негаси́мꙋ свѣщꙋ̀ дш҃е́внꙋю сᲂхра́ньша , ма́слᲂмъ дѣ́телей напᲂенꙋ̀ всегда̀ . и҆ ꙗ҆́кᲂже черто́жныѧ тебѣ̀ ѿверзо́шасѧ две́ри . приснᲂтекꙋ́щь и҆сто́чникъ тѧ̀ мѵ́ра бжⷭ҇твенагᲂ пᲂказꙋ́етъ , вᲂзмѣ́здїе чистᲂты̀ сїю̀ дадѐ бл҃гᲂда́ть . Не ѿ́ крᲂви ꙗ҆́кᲂже речѐ честно́е є҆ѵⷢ҇а́лїе , ни ѿ во́лѧ пло́ти дими́трїе , ѿ́ бг҃а же рᲂди́сѧ . вᲂплᲂще́нагᲂ пᲂчита́ѧ бг҃а , кро́вь же ᲂу҆се́рднѡ тᲂгѡ̀ ра́ди свᲂю̀ и҆злїѧ́въ . вᲂспрїѧ́лъ є҆сѝ свы́ше чꙋде́снꙋю бл҃гᲂда́ть . Ты̀ лѣ́ствица ꙗ҆ви́сѧ ѡ҆дш҃е́влена , на землѝ ᲂу҆́бѡ ᲂу҆тверждена̀ стᲂпа́ми пло́ти . дᲂ нб҃съ же дᲂсѧ́жꙋщи , бг҃а бᲂ ѡ҆бᲂгати́сѧ ᲂу҆твержде́ннагᲂ мч҃нче в̾ тебѣ̀ . сто́лпъ же ꙗ҆ви́сѧ , пᲂма́занъ ма́слᲂмъ по́двигъ мꙋче́нїѧ . и҆ ны́нѣ и҆стᲂча́еши вѣ́рᲂю пристꙋпа́ющимъ и҆сто́чникъ бжⷭ҇твенагѡ мѵ́ра . Тѧ̀ рѣкꙋ̀ прᲂписа̀ бж҃їю навᲂдненꙋ̀ пᲂѧ̀ дв҃дъ прⷪ҇рчески дими́трїе , се́бᲂ неи҆стᲂща́емᲂ прихᲂжде́нїе мѵ́ра твᲂегѡ̀ . тѣ́мъ и҆ мно́жествᲂ рѣ́къ навᲂднѧ́ющесѧ , гла́сы свᲂѧ̀ вᲂзвы́сѧтъ . рꙋка́ми же вᲂспле́щꙋтъ въ сла́вꙋ си́лы прᲂсла́вльшагᲂ тѧ̀ бг҃а . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Гдⷭ҇ь є҆ди́нъ трист҃ы́и ты̀ бж҃е всеси́льне , є҆го́же бг҃ᲂсло́вꙋѧ страда́лецъ дими́трїи , въ темни́цѣ затвᲂрѧ́етсѧ . и҆ съ скᲂрпі́ею чꙋ́вственᲂю , ѕмїѧ̀ ᲂу҆мᲂри́въ мы́сленагᲂ . и҆ гᲂрды́ню лі́евꙋ низло́жь не́стᲂрᲂмъ бжⷭ҇твенымъ , кᲂпїе́мъ прᲂбᲂда́етсѧ . и҆ мѵ́рᲂ ны́нѣ ѿ́ грᲂба и҆стᲂча́етъ . и҆ ны́нѣ , боⷢ҇ . Пᲂ а҆да́мѣ , гдⷭ҇ь . пᲂ є҆́ввѣ , ты̀ всечⷭ҇таѧ . гаврїи́лъ , пᲂ льсти́внѣмъ ѕмїѝ . крⷭ҇тъ же за́ древᲂ . вертᲂгра́дъ гро́ба , вмѣ́стᲂ є҆де́ма . ра́дꙋисѧ , вмѣ́стᲂ печа́ли . кᲂпїѐ , вмѣ́стᲂ пла́меннагѡ ѻ҆рꙋ́жїѧ . и҆ багрѧни́ца , вмѣ́стᲂ смᲂко́внагѡ ли́ствїѧ . тѧ̀ ᲂу҆́бѡ пᲂе́мъ ѻ҆трᲂкᲂви́це , ꙗ҆́кѡ си́мъ вино́внꙋ . катава́сїѧ : Хва́лимъ бл҃гᲂслᲂви́мъ . Ѻ҆́трᲂки бл҃гᲂчести́выѧ .

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́нг҃льстїи зрѣ́ти . тᲂбо́ю бᲂ пречⷭ҇таѧ ꙗ҆ви́сѧ на́мъ сло́вᲂ вᲂплᲂще́ннᲂ , є҆го́же велича́юще , с̾ нбⷭ҇ными вѡ́и тѧ̀ велича́емъ . Сѐ всѝ мы̀ сᲂгрѣши́хᲂмъ . и҆ стра́шнᲂ ᲂу҆́бѡ , землѧ̀ несᲂгрѣ́шши мꙋ́читсѧ . наказꙋ́ѧ бᲂ на́съ чл҃кᲂлю́бецъ , всю̀ ю҆̀ кᲂле́блетъ . прїи́мемъ чꙋ́вствᲂ , и҆ ѡ҆ спасе́нїи свᲂе́мъ пᲂпецѣ́мсѧ . Часо́мъ и҆ лѣ́тᲂмъ сы́и гдⷭ҇ь , вᲂ мгнᲂве́нїи ѻ҆́ка вᲂсхᲂтѣ̀ сте́рти рабы̀ свᲂѧ̀ . мно́гимъ же милᲂсе́рдїемъ сѝ влⷣкᲂ вᲂз̾врати́лсѧ є҆сѝ . бл҃гᲂдари́мъ тѧ̀ безъѿвѣ́тнїи мы̀ , є҆ди́не чл҃кᲂлю́бче . Трꙋ́са , меча̀ , го́рька ᲂу҆бїе́нїѧ , и҆ ꙗ҆зы́къ хрⷭ҇тѐ наше́ствїѧ , паде́нїѧ , и҆ гла́да , па́гꙋбы , и҆ ѡ҆ѕлᲂбле́нїѧ всѧ́кᲂгᲂ и҆но́гᲂ ще́дре , и҆зба́ви гра́дъ сво́й . и҆ всѧ́кꙋ странꙋ̀ , вѣ́рᲂю пѣснᲂсло́вѧщихъ тѧ̀ . Землѧ̀ без̾ ꙗ҆зы́ка вᲂпїе́тъ стᲂнѧ́щи , пᲂчто́ мѧ ѕлы́ми ѡ҆сквернѧ́ете мно́гими чл҃цы ; ва́съ влⷣка щадѧ̀ , є҆ди́нꙋ менѐ ᲂу҆ѧзвлѧ́етъ . прїими́те чꙋ́вствᲂ , и҆ пᲂкаѧ́нїемъ бг҃а ᲂу҆мᲂли́те . боⷢ҇ . Тлѧ̀ в̾ ржⷭ҇твѣ̀ непрїе́мши , тлѣ́нїѧ дв҃ᲂ и҆змѣнѝ всѣ́хъ на́съ , и҆ трꙋ́са тѧ́жкагѡ и҆ печа́ли ᲂу҆ставлѧ́ющи , влⷣчнѧгѡ негᲂдᲂва́нїѧ , твᲂи́мъ мт҃рьнимъ премѣне́нїемъ , бг҃ᲂра́дᲂваннаѧ .

и҆́нъ , і҆рмо́съ . Ка́мень нерꙋкᲂсѣ́чныѧ гᲂры̀ . Раздерѝ сᲂꙋ́зы прегрѣше́нїи , тѧ̀ пᲂю́щимъ страстᲂте́рпче , и҆ ᲂу҆ста́ви страсте́мъ прило́ги . мᲂлвꙋ̀ разᲂрѝ є҆ресе́мъ , и҆ напа́стей ᲂу҆ти́ши бꙋ́рю , мл҃твами свᲂи́ми . Напра́ви к̾ стезѧ́мъ пра́вымъ нбⷭ҇нагᲂ црⷭ҇твїѧ , сщ҃е́ннᲂе твᲂѐ ста́дᲂ вѣнцено́сче . и҆ наста́ви на па́жить спасе́нꙋю , на мѣ́стᲂ вѣ́чнᲂе . боⷢ҇ . Ꙗ҆́кѡ ко́рене и҆сто́чникъ , и҆ винꙋ̀ нетлѣ́нїѧ тѧ̀ дв҃ᲂ , всѝ вѣ́рнїи надѣ́ющесѧ хвала́ми пᲂчита́емъ , ты́ бᲂ сᲂста́внᲂе на́мъ без̾сме́ртїе и҆стᲂчи́ла є҆сѝ .

и҆́нъ , і҆рмо́съ . Оу҆диви́сѧ ᲂу҆́бѡ ѡ҆ се́мъ . Прїе́мъ свᲂю̀ стклѧ́ницꙋ дш҃е́внꙋю , дᲂбрᲂдѣ́телей бжⷭ҇твенагѡ мѵ́ра и҆спо́лненꙋ . и҆мѣ́ѧ же хрⷭ҇та̀ , прекло́ньша тебѣ̀ мꙋ́чениче главꙋ̀ , ꙗ҆́кѡ ᲂу҆пᲂко́ившасѧ житїѧ̀ твᲂегѡ̀ свѣ́тлᲂстїю чистᲂты̀ тѣ́мъ ᲂу҆бл҃жи́лсѧ є҆сѝ , и҆ бл҃гᲂда́ти и҆спо́лнисѧ , мѵ́рᲂ тᲂчи́ти мирски́мъ кᲂнце́мъ . Сѐ ча́ющихъ тѧ вᲂздаѧ́нїи неи҆зрече́нныхъ свѣ́тлаѧ прᲂѡ҆браже́нїѧ , сѐ и҆сто́чникъ мѵ́ра приснᲂтекꙋ́щь ѽ страда́льче . бг҃ᲂви ᲂу҆́бѡ пред̾стᲂѧ̀ сᲂ дерзнᲂве́нїемъ мч҃нчески , странѣ̀ на́шей и҆спрᲂсѝ на врагѝ пᲂбѣ́дꙋ , и҆ црⷭ҇тва кᲂне́цъ неѿє́млемъ . Ѻ҆́бразᲂмъ крⷭ҇та̀ пᲂбѣдᲂтво́рца пᲂбѣди́лъ є҆сѝ лі́евᲂ сꙋрᲂвство̀ . и҆ пᲂбѣди́телѧ не́стᲂра и҆ сᲂстрада́льца пᲂста́вль . и҆ ны́нѣ всѧ́къ ꙗ҆зы́къ ва́рварскїи рабо́тенъ пᲂкᲂрѝ странѣ̀ на́шей . сᲂдѣ́тельствꙋѧ , и҆ сво́иньствꙋѧ , ᲂу҆крѣплѧ́ѧ велича́ѧ земны́ѧ кᲂнцы̀ дими́трїе . Те́плᲂю се́рдца любо́вїю к̾ твᲂемꙋ̀ честно́мꙋ кᲂвче́гꙋ прибѣга́ющїѧ мч҃нче хрⷭ҇то́въ , мѵ́рᲂмъ прᲂлива́ющимсѧ рѣка́ми , твᲂи́ми мᲂльба́ми , и҆зба́ви дѣ́лъ дш҃етлѣ́нныхъ и҆ пᲂто́па страсте́й смра́да . ѡ҆бᲂнѧ́нїѧ же пᲂкажѝ тѣ́хъ гдⷭ҇ви бл҃гᲂво́нна . сла́ва . Де́нь ра́дᲂсти дх҃о́вныѧ сᲂверша́емъ дими́трїе , ви́дѧще мѵ́рᲂ твᲂѐ ве́сь напᲂлнѧ́юще и҆сто́чникъ . ты́ же страсте́мъ ѡ҆мраче́нїе разᲂрѧ́ѧ , ꙗ҆́кѡ бжⷭ҇твенагѡ и҆спо́лненъ свѣ́та . ꙗ҆́кѡ во́ дне дава́й хᲂди́ти бл҃гᲂѡ҆бра́знѡ , бж҃їи же ви́дѣти свѣ́тъ непристꙋ́пныи . и҆ ны́нѣ , боⷢ҇ . Ты̀ всечⷭ҇таѧ злата́ѧ гᲂлꙋби́ца є҆сѝ , ꙗ҆́кѡ сꙋче́цъ ма́слинныи прᲂзѧ́бши сло́вᲂ бж҃їе , пᲂма́завшее тѣ́лѡ твᲂѐ ма́слᲂмъ бжⷭ҇тва̀ . є҆го́же въ срⷣцы ꙗ҆́кѡ кᲂвче́гъ прїе́мъ страда́лецъ . ѿ́ грᲂба мѵ́рᲂ то́читъ . и҆ ᲂу҆маща́етъ вѣ́рныхъ ли́ца .

катава́сїѧ : Всѧ́къ зе́менъ .= Дᲂсто́йнѡ є҆́сть . свѣти́ленъ . Крⷭ҇то́мъ вᲂѡ҆рꙋжи́лъ є҆сѝ не́стᲂра , тѣ́мъ лі́евꙋ разᲂрѝ гᲂрды́ню дими́трїе . на сꙋди́щи , ꙗ҆́кᲂже хрⷭ҇то́съ ѿверза́еши ре́бра свᲂѧ̀ , и҆́миже ста́дᲂ свᲂѐ сᲂхранѧ́й . =сла́ва , и҆ ны́нѣ , трꙋ́сꙋ . Гдⷭ҇и призира́ѧи на́ землю съ нб҃сѐ , и҆ твᲂрѧ̀ ю҆̀ всю̀ трѧсти́сѧ . и҆зба́ви на́съ ѿ́ трꙋса , бцⷣа мл҃твами , ю҆́же дарᲂва́лъ є҆сѝ хрⷭ҇тїа́нѡмъ пред̾ста́тельницꙋ .

На хвали́тѣхъ , стихѣ́ры , на д҃ . гла́съ , д҃ . поⷣ . ꙗ҆́кѡ до́блѧ .= Прᲂбᲂде́нъ бы́въ ,꙳ бᲂрца̀ свᲂи́ми ко́пїѧми ᲂу҆ѧзви́лъ є҆сѝ ,꙳ и҆ ме́ртва сᲂтвᲂри́лъ є҆сѝ ,꙳ и҆ недѣ́йствена ,꙳ є҆го́же ѕло́бы дими́трїе на́съ и҆зба́ви .꙳ крѣ́пки на́ страсти мꙋ́чащїѧ всегда̀ сᲂдѣва́ѧ ,꙳ сщ҃е́нными сѝ мл҃твами .꙳ бжⷭ҇твенымъ стра́хᲂмъ ᲂу҆милѧ́ѧ срⷣца ,꙳ и҆ дш҃а на́ша ст҃е . =два́жды . Рѣкꙋ́ тѧ и҆спо́лненꙋ во́дъ дх҃о́вныхъ ,꙳ вѣ́дѧще ст҃е ,꙳ мо́лимъ и҆ста́ѧвшаѧ дш҃а на́ша ,꙳ стрⷭ҇те́й престꙋпле́ньми ,꙳ млⷭ҇тїю сѝ мно́гᲂю ,꙳ сщ҃е́ннѡ ѡ҆рᲂсѝ ,꙳ и҆ ѡ҆мы́й сꙋ́щꙋю скве́рнꙋ .꙳ и҆ премно́гихъ и҆зба́ви бѣ́дъ ,꙳ и҆ вѣ́чнагѡ мꙋче́нїѧ . Ꙗ҆́кѡ свѣти́льникъ пресвѣ́телъ ,꙳ на землѝ пᲂказа́лсѧ є҆сѝ .꙳ чꙋде́съ сїѧ́ньми ,꙳ пᲂд̾сл҃нчнꙋю прᲂсвѣща́еши всегда̀ ,꙳ дими́трїе сла́вне .꙳ мглы̀ ѡ҆мраче́нїе ѿгᲂнѧ̀ мᲂльба́ми сѝ дш҃а́мъ на́шимъ .꙳ и҆ недꙋ́ги и҆сцѣлѝ ,꙳ и҆́же любо́вїю твᲂрѧ́щимъ твᲂю̀ па́мѧть ,꙳ красᲂта̀ мꙋ́ченикѡмъ и҆ пᲂхвала̀ .= сла́ва . гла́съ , д҃ . самᲂгла́сенъ . И҆́=же ко́пїѧми наслѣ́дᲂвавша , спасе́ныхъ ре́бръ бл҃гᲂда́ть прᲂбᲂде́ныхъ кᲂпїе́мъ . и҆з̾ ни́хже на́мъ и҆стᲂча́етъ сп҃съ , жи́зни и҆ нетлѣ́нїѧ во́ды , дими́трїѧ пᲂчте́мъ . премꙋ́драгᲂ вᲂ ᲂу҆че́нїихъ , и҆ вѣне́чника въ мч҃нцѣхъ . и҆́же кро́вїю скᲂнча́вшагᲂ страда́нїѧ тече́нїе , и҆ чꙋдесы̀ прᲂсїѧ́вша все́й вселе́ннѣй , ревни́телѧ влⷣчнѧ и҆ млⷭ҇тива нищелю́бца . и҆́же вᲂ мно́гихъ мно́жицею бѣда́хъ лю́тыхъ , сᲂлꙋ́нѧнѡмъ пред̾ста́телѧ . є҆го́же и҆ лѣ́тнꙋю па́мѧть пᲂчита́юще , сла́вимъ хрⷭ҇та̀ бг҃а , дѣ́йствꙋюща є҆гѡ̀ ра́ди всѣ́мъ и҆сцѣле́нїѧ .

и҆ ны́нѣ , боⷢ҇ . И҆зба́ви на́съ ѿ бѣ́дъ на́шихъ мт҃и хрⷭ҇та̀ бг҃а , ро́ждьшаѧ всѣ́хъ твᲂрца̀ , да всѝ вᲂпїе́мъ ти , ра́дꙋисѧ є҆ди́на спасе́нїе дꙋ́шъ на́шихъ . Славᲂсло́вїе вели́кᲂе , и҆ ѿпꙋ́стъ .

На литꙋргі́и , бл҃же́нна . ѿ кано́на трꙋ́сꙋ , пѣ́снь , г҃ ѧ , на д҃ . и҆ ст҃о́мꙋ , пѣ́снь , ѕ҃ ѧ , на д҃ .

Пᲂ вхо́дѣ , а҆́ще хра́мъ хрⷭ҇то́въ , и҆лѝ ст҃ы́мъ : трᲂпа́рь трꙋ́сꙋ , и҆ дими́трїю . сла́ва , кᲂнда́къ дими́трїю . и҆ ны́нѣ , трꙋ́сꙋ .

Пᲂ вхо́дѣ , а҆́ще ли хра́мъ бцⷣы : трᲂпа́рь трꙋ́сꙋ , и҆ хра́мꙋ , и҆ дими́трїю . кᲂнда́къ хра́мꙋ . сла́ва , дими́трїю . и҆ ны́нѣ , трꙋ́сꙋ .

прᲂки́менъ , ѱл҃о́мъ дв҃дᲂвъ . Спасѝ гдⷭ҇и лю́ди свᲂѧ̀ , и҆ бл҃гᲂслᲂвѝ дᲂстᲂѧ́нїе свᲂѐ . сти́хъ . къ тебѣ̀ гдⷭ҇и вᲂз̾зᲂвꙋ̀ , бж҃е мо́й непремᲂлчѝ ѿ менѐ . и҆ ст҃о́мꙋ . Вᲂз̾весели́тсѧ пра́ведникъ ѡ҆́ гдⷭ҇ѣ , и҆ ᲂу҆пᲂва́етъ на́нь . а҆пⷭ҇лъ , трꙋ́сꙋ , къ є҆вре́ѡмъ . заⷱ҇ , тл҃а , ѿ пᲂлꙋ̀ .= и҆ ст҃о́мꙋ , къ тимᲂфе́ю . заⷱ҇ , сч҃в . а҆ллилꙋ́їѧ . Бж҃е ѿри́нꙋлъ ны̀ є҆сѝ , и҆ низ̾лᲂжи́лъ ны̀ є҆сѝ . =сти́хъ . стрѧ́се зе́млю и҆ смꙋтѝ ю҆̀ , и҆сцѣлѝ сᲂкрꙋше́нїе є҆ѧ̀ , ꙗ҆́кѡ пᲂдви́жасѧ . и҆ ст҃о́мꙋ . пра́ведникъ ꙗ҆́кѡ фи́никъ прᲂцвѣте́тъ , и҆ ꙗ҆́кѡ ке́дръ и҆́же в̾ лива́нѣ ᲂу҆мно́житсѧ . є҆ѵⷢ҇а́лїе , трꙋ́сꙋ , ѿ матѳе́ѧ . заⷱ҇ , к҃з . и҆ ст҃о́мꙋ , ѿ і҆ѡа́нна . заⷱ҇ , н҃в . прича́стенъ , хвали́те гдⷭ҇а с̾ нб҃съ . дрꙋгі́и , въ па́мѧть вѣ́чнꙋю бꙋ́детъ пра́ведникъ . дневны́и же , а҆пⷭ҇лъ , и҆ є҆ѵⷢ҇а́лїе , нѣ́цыи чтꙋ́тъ на часѣ́хъ . дрꙋзі́и же , пᲂд̾ зача́лᲂ , в̾ среди́нѣ . и҆ні́и же за́ день .

Пᲂдᲂба́етъ вѣ́дати . а҆́ще слꙋчи́тсѧ великᲂмꙋ́ченика дими́трїѧ и҆ трꙋ́са , в̾ нлⷣю .

Въ сꙋбо́тꙋ , ве́черъ , на ма́лѣй вече́рни . на гдⷭ҇и вᲂзва́хъ , стⷯры вᲂскрⷭ҇ны , вᲂ ѻ҆кта́и . сла́ва , дими́трїю . и҆ ны́нѣ , боⷢ҇ , гла́сꙋ ма́лыѧ вече́рни .

на стихо́внѣ , стⷯры , є҆ди́на вᲂскрⷭ҇на . и҆ дими́трїю стихо́вна ма́лыѧ вече́рни сᲂ стихѝ є҆ѧ̀ . сла́ва , и҆ ны́нѣ , боⷢ҇ , по́рѧдꙋ . пᲂ трⷭ҇то́мъ , трᲂпа́рь , вᲂскрⷭ҇нъ . сла́ва , дими́трїю . и҆ ны́нѣ , трᲂпа́рь , трꙋ́сꙋ . та́же , є҆ктенїѧ̀ ма́лаѧ . и҆ ѿпꙋ́стъ .

на вели́цѣй вече́рни . пᲂ ѻ҆бы́чнᲂй стихᲂло́гїи . на гдⷭ҇и вᲂзва́хъ , стⷯры вᲂскрⷭ҇ны , г҃ . и҆ трꙋ́сꙋ , г҃ , ꙗ҆́же сꙋ́ть пи́саны на вели́цѣй вече́рни , на стихо́внѣ . гла́съ , в҃ . и҆ дими́трїю , д҃ . сла́ва , дими́трїю .= и҆ ны́нѣ , боⷢ҇ , пе́рвыи , гла́сꙋ . прᲂки́менъ , дню̀ . чте́нїѧ , г҃ . =на литі́и , стихѣ́ра хра́мꙋ , и҆ стихѣ́ры дими́трїю . сла́ва , дими́трїю .= и҆ ны́нѣ , боⷢ҇ , є҆гѡ̀ . =на стихо́внѣ , стⷯры , вᲂскрⷭ҇ны . сла́ва , дими́трїю .= и҆ ны́нѣ , боⷢ҇ , по́ гласꙋ ст҃а́гѡ . на бл҃гᲂслᲂве́нїе хлѣ́бᲂмъ , трᲂпа́рь , бцⷣе дв҃ᲂ ра́дꙋисѧ , вⷤ . и҆ дими́трїю , аⷤ . =а҆́ще нѣ́сть бдѣ́нїѧ . пᲂ ѻ҆́ч҃е на́шъ . трᲂпа́рь , вᲂскрⷭ҇нъ . сла́ва , дими́трїю . и҆ ны́нѣ , трᲂпа́рь . на па́вечерницѣ . пᲂдᲂсто́йнѣ , и҆ пᲂ трⷭ҇то́мъ , кᲂнда́къ , дими́трїю . сла́ва , и҆ ны́нѣ . кᲂнда́къ , трꙋ́сꙋ . на ᲂу҆́трени , на бг҃ъ гдⷭ҇ь , трᲂпа́рь вᲂскрⷭ҇нъ , два́жды . сла́ва , дими́трїю . и҆ ны́нѣ , трꙋ́сꙋ . пᲂ а҃ , стихᲂло́гїи , сѣда́ленъ , вᲂскрⷭ҇нъ . сла́ва , и҆ нн҃ѣ , боⷢ҇ , и҆́же пᲂ трᲂпарѣ̀ вᲂскрⷭ҇нᲂмъ , настᲂѧ́щагᲂ гла́са . пᲂ в҃ , стихᲂло́гїи , сѣда́ленъ , вᲂскрⷭ҇нъ . сла́ва , и҆ ны́нѣ , боⷢ҇ , є҆гѡ̀ . пᲂ непᲂро́чнахъ , трᲂпарѝ и҆́хъ . гла́съ , є҃ . и҆ ѵ҆пако́й . та́же , мнᲂгᲂми́лᲂстивᲂ . и҆ сѣда́льны дими́трїю ѻ҆́ба пᲂ аⷤ , без̾ бг҃ᲂро́дичныхъ . сла́ва , сѣда́ленъ , и҆́же пᲂ пᲂлїєлеѡ́сѣ . и҆ ны́нѣ , боⷢ҇ , є҆гѡ̀ . степе́нна , и҆ прᲂки́менъ , гла́сꙋ . є҆ѵⷢ҇а́лїе вᲂскрⷭ҇нᲂ . вᲂскрⷭ҇нїе хрⷭ҇то́вᲂ . ѱало́мъ , н҃ . стⷯра , вᲂскрⷭ҇на . Кано́нъ вᲂскрⷭ҇нъ , сᲂ і҆рмᲂсо́мъ , на д҃ . и҆ бцⷣѣ на в҃ . и҆ трꙋ́сꙋ на д҃ . и҆ дими́трїю , є҆ди́нъ кано́нъ на д҃ . катава́сїѧ : ѿве́рзꙋ ᲂу҆ста̀ мᲂѧ̀ . пᲂ г҃ , пѣ́сни : кᲂнда́къ , трꙋ́сꙋ . кᲂнда́къ , дими́трїю , и҆ и҆́кᲂсъ , и҆ сѣда́ленъ , двⷤа . сла́ва , и҆ нн҃ѣ , сѣда́ленъ , трꙋ́сꙋ . пᲂ ѕ҃ , пѣ́сни : кᲂнда́къ , и҆ и҆́кᲂсъ , вᲂскрⷭ҇нъ . свѣти́ленъ , вᲂскрⷭ҇нъ . сла́ва , дими́трїю . и҆ ны́нѣ , трꙋ́сꙋ . на хвали́тѣхъ , стⷯры , вᲂскрⷭ҇ны , д҃ . и҆ дими́трїю , сᲂ сла́внымъ д҃ , сᲂ стихѝ .

сти́х̾ , а҃ : пра́ведникъ ꙗ҆́кѡ фи́никъ прᲂцвѣте́т̾ , и҆ ꙗ҆́кѡ кѣ́дръ и҆́же въ лива́нѣ ᲂу҆мно́житсѧ . сти́хъ , в҃ : насажде́ни в̾ дᲂмꙋ̀ гдⷭ҇ни , вᲂ дво́рѣхъ бг҃а на́шегѡ прᲂцвѣтꙋ́тъ . сла́ва , стихѣ́ра , є҆ѵⷢ҇а́льскаѧ . и҆ ны́нѣ , пребл҃гᲂслᲂве́нна є҆сѝ бцⷣѣ дв҃ᲂ . славᲂсло́вїе вели́кᲂе . пᲂ трⷭ҇то́мъ , трᲂпа́рь , вᲂскрⷭ҇нъ то́чїю . є҆ктенїѝ , и҆ ѿпꙋ́стъ . и҆ ча́съ , а҃ .

на а҃ мъ , часѣ̀ : трᲂпа́рь , вᲂскрⷭ҇нъ . сла́ва , трꙋ́сꙋ . пᲂ ѻ҆́ч҃е на́шъ , кᲂнда́къ , вᲂскрⷭ҇нъ . и҆ кᲂне́чный ѿпꙋ́стъ . на г҃ мъ , часѣ̀ : трᲂпа́рь , вᲂскрⷭ҇нъ . сла́ва , дими́трїю . пᲂ ѻ҆́ч҃е на́шъ , кᲂнда́къ , трꙋ́сꙋ .

на ѕ҃ мъ , часѣ̀ : трᲂпа́рь , вᲂскрⷭ҇нъ . сла́ва , трꙋ́сꙋ . пᲂ ѻ҆́ч҃е на́шъ , кᲂнда́къ , дими́трїю .

на ѳ҃ мъ , часѣ̀ : трᲂпа́рь , вᲂскрⷭ҇нъ . сла́ва , дими́трїю . пᲂ ѻ҆́ч҃е на́шъ , кᲂнда́къ , вᲂскрⷭ҇нъ .

на литꙋргі́и , бл҃же́нна гла́сꙋ , на д҃ . и҆ трꙋ́сꙋ , пѣ́снь , г҃ , на д҃ . и҆ дими́трїю , пѣ́снь , ѕ҃ , на д҃ .

Пᲂ вхо́дѣ , а҆́ще хра́мъ хрⷭ҇то́въ : трᲂпа́рь вᲂскрⷭ҇нъ , и҆ трꙋ́сꙋ , и҆ дими́трїю . кᲂнда́къ вᲂскрⷭ҇нъ . сла́ва , дими́трїю . и҆ ны́нѣ , трꙋ́сꙋ .

Пᲂ вхо́дѣ , а҆́ще хра́мъ бцⷣы : трᲂпа́рь вᲂскрⷭ҇нъ , и҆ трꙋ́сꙋ , и҆ хра́мꙋ , и҆ дими́трїю . кᲂнда́къ вᲂскрⷭ҇нъ , и҆ хра́мꙋ . сла́ва , дими́трїю . и҆ ны́нѣ , трꙋ́сꙋ .

Пᲂ вхо́дѣ , а҆́ще хра́мъ ст҃ы́мъ : трᲂпа́рь вᲂскрⷭ҇нъ , и҆ трꙋ́сꙋ , и҆ дими́трїю . кᲂнда́къ вᲂскрⷭ҇нъ . сла́ва , дими́трїю . и҆ ны́нѣ , трꙋ́сꙋ .

Прᲂки́менъ , а҆пⷭ҇лъ , а҆ллилꙋ́їѧ , и҆ є҆ѵⷢ҇а́лїе , трꙋ́сꙋ , и҆ ст҃о́мꙋ . прича́стенъ , хвали́те гдⷭ҇а с̾ нб҃съ . дрꙋгі́и , въ па́мѧть вѣ́чнꙋю . настᲂѧ́щїѧ же нлⷣи , и҆ а҆пⷭ҇лъ , и҆ є҆ѵⷢ҇а́лїе , чтѝ пᲂд̾ главꙋ̀ .