МЦⷭ҇А Ѻ҆КТѦБРѦ̀ ВЪ А҃І ДН҃Ь

Пᲂдᲂба́етъ вѣ́дати , ꙗ҆́кѡ вᲂ грѧдꙋ́щꙋю недѣ́лю пᲂ па́мѧти ст҃а́гѡ а҆пⷭ҇ла фїлі́ппа , пра́зднꙋемъ ст҃ы́и , з҃ , сᲂбо́ръ . =Ве́черъ , на вели́цѣй вече́рни . На гдⷭ҇и вᲂзва́хъ , стихѣ́ры вᲂскрⷭ҇ны , на́ ѕ҃ . и҆ ст҃ы́мъ ѻ҆ц҃е́мъ , на д҃ . гла́съ , ѕ҃ . Ѿ =ᲂу҆тро́бы рᲂди́сѧ пре́жде денни́цы , ѿ ѻ҆ц҃а без̾ мт҃ре пре́жде вѣ́къ . а҆́ще и҆ а҆́рїи тва́рь тѧ̀ а҆ не бг҃а сла́витъ , де́рзᲂстнѣ сᲂвᲂкꙋплѧ́етъ сᲂзда́телѧ тва́ремъ безꙋ́мнᲂ , ти́нꙋ ѻ҆гнѧ̀ вѣ́чнагѡ себѐ сᲂбра̀ . нᲂ сᲂбо́ръ и҆́же в̾ нике́и , сн҃а тѧ̀ бж҃їѧ прᲂпᲂвѣ́да гдⷭ҇и , вели́кїѧ ра́ди твᲂеѧ̀ ми́лᲂсти . А҆́рїи безꙋ́мныи , прест҃ы́ѧ трⷪ҇цы раздѣлѝ є҆динᲂвла́стїе , в̾ трѝ непᲂдо́бнаѧ же и҆ чꙋжа́ѧ сꙋ́щества . тѣ́мъ ѻ҆ц҃ы бг҃ᲂно́снїи , сᲂше́дшесѧ ᲂу҆се́рднѡ , ре́внᲂстїю распалѧ́еми , ꙗ҆́кᲂже ѳезви́тѧнинъ и҆лїѧ̀ , дх҃о́внымъ ѿсѣца́ютъ мече́мъ , и҆́же стꙋдꙋ̀ наꙋчи́вшагᲂ хꙋ́льнᲂмꙋ , ꙗ҆́кᲂже дх҃ъ и҆з̾ре́клъ є҆́сть . Кто́ ти ри́зꙋ сп҃се раздра̀ ; а҆́рїи ты̀ речѐ , и҆́же трⷪ҇цы раздѣли́въ є҆ди́нᲂ честно́е нача́лᲂ нараздѣле́нїе . се́й небрежѐ тебѐ є҆ди́нᲂгѡ бы́ти ѿ трⷪ҇цы . се́й и҆ нестѡ́рїѧ ᲂу҆чи́тъ бцⷣꙋ неглаго́лати . нᲂ сᲂбо́ръ и҆́же в̾ нике́и , сн҃а бж҃їѧ тѧ̀ прᲂпᲂвѣ́да гдⷭ҇и , вели́кїѧ ра́ди твᲂеѧ̀ ми́лᲂсти .

сла́ва . гла́съ , то́йже . Та́йныѧ дне́сь дх҃о́вныѧ трꙋбы̀ , бг҃ᲂно́сныѧ ѻ҆ц҃ы вᲂсхва́лимъ , вᲂспѣ́вшихъ пᲂсредѣ̀ цр҃кве пѣ́снь сᲂста́внꙋю бг҃ᲂсло́вїѧ , трⷪ҇цы є҆ди́ны непремѣ́нныѧ , сꙋщество́ же и҆ бжⷭ҇тво̀ , пᲂтреби́тели а҆́рїевы , и҆ правᲂвѣ́рныхъ пᲂбо́рники , мᲂлѧ́щихсѧ всегда̀ гдⷭ҇ви , пᲂми́лᲂватисѧ дш҃а́мъ на́шимъ .

и҆ ны́нѣ , бг҃ᲂро́диченъ , пе́рвыи гла́сꙋ . вы́хᲂдъ , прᲂки́менъ , дню̀ . чте́нїѧ , трѝ .

Ѿ= бытїѧ̀ , чте́нїе .=

Слы́шавъ а҆враа́мъ , ꙗ҆́кѡ плѣне́нъ бы́сть ло́тъ сн҃ъ бра́та є҆гѡ̀ . и҆ и҆зᲂчтѐ дᲂмᲂча́децъ свᲂи́хъ , три́ста и҆ ѻ҆смьна́десѧть , и҆ пᲂгна̀ вᲂслѣ́дъ и҆́хъ дᲂ да́на . и҆ нападѐ на нѧ̀ но́щїю са́мъ и҆ ѻ҆́трᲂцы є҆гѡ̀ с̾ ни́мъ , и҆ пᲂразѝ и҆́хъ . и҆ гᲂнѝ и҆́хъ дᲂ хᲂва́ла , є҆́же є҆́сть ѡ҆шꙋ́ю дама́ска , и҆ вᲂзвратѝ всѧ̀ кᲂнѝ сᲂдо́мскїѧ , и҆ лѡ́та сн҃а бра́та свᲂегѡ̀ вᲂз̾вратѝ , и҆ всѧ̀ и҆мѣ́нїѧ є҆гѡ̀ , и҆ жены̀ , и҆ лю́ди . и҆зы́де же ца́рь сᲂдо́мскїи в̾ срѣ́тенїе є҆мꙋ̀ , пᲂ вᲂз̾враще́нїи є҆гѡ̀ ѿ сѣ́ча хᲂдᲂлᲂгᲂмо́рскагѡ , и҆ ца́рїе и҆́же с̾ ни́мъ , вᲂ ю҆до́ль са́винꙋ , се́же бѧ́ше по́ле цр҃е́вᲂ . и҆ мелхиседе́къ цр҃ь сали́мскїи и҆знесѐ хлѣ́бы и҆ вино̀ , бѣ́ бᲂ сщ҃е́нникъ бг҃а вы́шнѧгѡ . и҆ бл҃гᲂслᲂвѝ а҆враа́ма , и҆ речѐ , бл҃гᲂслᲂве́нъ а҆враа́мъ бг҃ᲂмъ вы́шнимъ , и҆́же сᲂзда̀ нб҃ᲂ и҆ зе́млю . и҆ бл҃гᲂслᲂве́нъ бг҃ъ вы́шнїи , и҆́же предадѐ врагѝ твᲂѧ̀ пᲂд̾рꙋ́чники тебѣ̀ .

Ѿ= втᲂра́гѡ зако́на , чте́нїе .=

Во́ дни ѻ҆ны̀ , речѐ мѡѷсе́й къ сн҃ᲂвѡ́мъ і҆и҃левᲂмъ , ви́дите , сѐ преда́хъ пред̾ лице́мъ ва́шимъ зе́млю , вше́дше наслѣ́дите зе́млю , ю҆́же клѧ́тсѧ гдⷭ҇ь ѻ҆ц҃е́мъ на́шимъ а҆враа́мꙋ и҆ и҆саа́кꙋ и҆ і҆а́кѡвꙋ да́ти и҆́мъ , и҆ сѣ́мени и҆́хъ пᲂ ни́хъ . и҆ реко́хъ ва́мъ во́ времѧ ѻ҆́нᲂ гл҃ѧ , невᲂз̾мᲂгꙋ̀ є҆ди́нъ вᲂди́ти ва́съ , гдⷭ҇ь бг҃ъ на́шъ ᲂу҆мно́жилъ вы̀ є҆́сть . и҆ сѐ є҆стѐ дне́сь ꙗ҆́кѡ ѕвѣ́зды нбⷭ҇ныѧ мно́жествᲂмъ . гдⷭ҇ь бг҃ъ ѻ҆ц҃ъ на́шихъ да прилᲂжи́тъ ва́мъ , ꙗ҆́кѡ да бꙋ́дете ты́сѧщами сꙋгꙋ́бѡ , и҆ да бл҃гᲂслᲂви́тъ ва́съ , ꙗ҆́кᲂже гл҃а ва́мъ . и҆ прїѧ́хъ ѿ ва́съ мꙋ́жы мꙋ́дры . и҆ хꙋдо́ги , и҆ разꙋми́чны , и҆ пᲂста́вихъ и҆́хъ ѡ҆блада́ти над̾ ва́ми , тысѧщенача́льники , и҆ стᲂнача́льники , и҆ пѧтьдесѧтᲂнача́льники , и҆ десѧтᲂнача́льники , и҆ кни́гчїѧ сꙋдїѧ́мъ ва́шимъ . и҆ запᲂвѣ́дахъ сꙋдїѧ́мъ ва́шимъ во́ времѧ ѻ҆́нᲂ гл҃ѧ , раз̾сꙋжда́йте пᲂсредѣ̀ бра́тїи ва́шеѧ . и҆ сꙋди́те пра́веднѡ пᲂсредѣ̀ мꙋ́жа , и҆ пᲂсредѣ̀ бра́тїи є҆гѡ̀ , и҆ пᲂсредѣ̀ прише́льца є҆гѡ̀ . непᲂз̾на́йте лица̀ в̾ сꙋдѣ̀ , ма́лᲂмꙋ и҆ вели́кᲂмꙋ сꙋ́диши , не ᲂу҆стыди́шисѧ лица̀ чл҃ча , ꙗ҆́кѡ сꙋ́дъ бж҃їи є҆́сть .

Ѿ= втᲂра́гѡ зако́на , чте́нїе .=

Во́ днехъ ѻ҆́нѣхъ , речѐ мѡѷсе́й к̾ сн҃ᲂвѡ́мъ і҆и҃левᲂмъ , сѐ гдⷭ҇а бг҃а твᲂегѡ̀ нб҃ᲂ , и҆ нб҃ᲂ нб҃сѐ , землѧ̀ и҆ всѧ̀ є҆ли́ка сꙋ́ть в̾ ни́хъ . ѻ҆ба́че ѻ҆ц҃ы ва́ша и҆збра̀ гдⷭ҇ь , люби́ти є҆гѡ̀ вᲂи́стинꙋ . и҆ и҆збра̀ сѣ́мѧ и҆́хъ пᲂ ни́хъ ва́съ па́че всѣ́хъ ꙗ҆зы́къ , по́ дни се́мъ ѡ҆брѣ́жите жестᲂсе́рдїе ва́ше , и҆ вы́ѧ ва́ша не ѡ҆жести́те к̾ тᲂмꙋ̀ . и҆́бᲂ гдⷭ҇ь бг҃ъ на́шъ , се́й бг҃ъ бг҃ѡ́мъ и҆ гдⷭ҇ь гдⷭ҇емъ . бг҃ъ вели́кїи , и҆ крѣ́пкїи , и҆ стра́шныи , и҆́же недиви́тсѧ лицꙋ̀ , нижѐ прїе́млетъ да́ра . твᲂрѧ̀ сꙋ́дъ прише́льцꙋ , и҆ си́рᲂмꙋ и҆ вдᲂви́цѣ . и҆ лю́битъ прише́льца , да́ти є҆мꙋ̀ хлѣ́бъ и҆ ри́зꙋ . гдⷭ҇а бг҃а твᲂегѡ̀ ᲂу҆бᲂи́шисѧ , и҆ тᲂмꙋ̀ є҆ди́нᲂмꙋ пᲂслꙋ́жиши , и҆ к̾ немꙋ̀ прилѣпи́шисѧ , и҆ и҆́менемъ є҆гѡ̀ клене́шисѧ . то́й хвала̀ твᲂѧ̀ , и҆ то́й бг҃ъ тво́й , и҆́же сᲂтвᲂри́лъ ти є҆́сть вели́каѧ и҆ сла́внаѧ сїѧ̀ , ꙗ҆́же ви́дѣста ѻ҆́чи твᲂѝ .

На литі́и , ѻ҆бы́чнѡ . сла́ва . гла́съ , г҃ . А҆пⷭ҇льскимъ преда́нїемъ , ѡ҆па́снїи храни́телїе бы́сте ст҃і́и ѻ҆ц҃ы . ст҃ы́ѧ бᲂ трⷪ҇цы є҆ди́нᲂ сꙋщество̀ правᲂсла́внѡ прᲂпᲂвѣ́давше . а҆́рїевᲂ хꙋле́нїе сᲂбо́рнѣ низ̾лᲂжи́сте с̾ ни́мже и҆ македо́нїѧ дх҃ᲂбо́рца ѡ҆бличи́вше , ѡ҆сꙋди́сте нестѡ́рїѧ и҆ є҆ѵті́ха и҆ дїѡско́ра , саве́лїѧ же и҆ севи́ра без̾гла́внагᲂ . и҆́хже пре́лести прᲂси́те и҆зба́витисѧ на́мъ , нескве́рненᲂ житїѐ на́ше , в̾ вѣ́рѣ сᲂхрани́ти мо́лимсѧ . и҆ ны́нѣ , боⷢ҇ . Без̾ сѣ́мене ѿ бжⷭ҇твеннагѡ дх҃а , во́лею ᲂу҆́бѡ ѻ҆ц҃а , зачала̀ є҆сѝ сн҃а бж҃їѧ , ѿ ѻ҆ц҃а без̾ мт҃ре , пре́жде вѣ́къ сꙋ́ща , на́съ же ра́ди и҆з̾ тебѐ без̾ ѻ҆ц҃а бы́вша , пло́тїю рᲂди́ла є҆сѝ , и҆ млⷣнца млеко́мъ пита́ла є҆сѝ . тѣ́мже непреста́й мᲂлѧ́щи , и҆зба́витисѧ ѿ бѣ́дъ дш҃а́мъ на́шимъ .

На стихо́внѣ , стⷯры , вᲂскрⷭ҇ны . сла́ва . гла́съ , д҃ . Лѣ́тнꙋю па́мѧть дне́сь бг҃ᲂно́сныхъ ѻ҆ц҃ъ , ѿ всеѧ̀ вселе́нныѧ сᲂвᲂкꙋ́пльшихсѧ , в̾ свѣ́тлѣмъ гра́дѣ нике́йстемъ , правᲂвѣ́рныхъ со́нмы бл҃гᲂче́стнѡ пра́зднꙋемъ . сі́и бᲂ лю́тагᲂ а҆́рїѧ без̾бо́жнᲂе велѣ́нїе , бл҃гᲂче́стнѡ мꙋ́дренѣ низ̾лᲂжи́ша , и҆ ѿ сᲂбо́рныѧ цр҃кве кꙋ́пнѡ сегѡ̀ и҆згна́ша . и҆ ꙗ҆́снѡ сн҃а бж҃їѧ є҆динᲂсꙋ́щна ѻ҆ц҃ꙋ и҆ сᲂприснᲂсꙋ́щна , пре́жде вѣ́къ сꙋ́ща , всѧ̀ наꙋчи́ша и҆спᲂвѣ́дати в̾ вѣ́рнѣмъ ѻ҆́бразѣ , и҆звѣ́стнѡ и҆ бл҃гᲂче́стнѡ сїѐ и҆злᲂжи́ша . тѣ́мже и҆ мы̀ бжⷭ҇твенымъ и҆́хъ пᲂвелѣ́нїемъ пᲂслѣ́дствꙋюще , и҆ тве́рдѣ вѣ́рꙋюще слꙋ́жимъ сᲂ ѻ҆ц҃е́мъ сн҃ꙋ и҆ дх҃ꙋ всест҃о́мꙋ вᲂ є҆ди́нᲂмъ бжⷭ҇твѣ̀ , трⷪ҇цѣ є҆динᲂсꙋ́щнѣй . и҆ ны́нѣ , боⷢ҇ . Пᲂда́ждь ᲂу҆тѣше́нїе , свᲂи́мъ рабо́мъ всенепᲂро́чнаѧ , ᲂу҆тᲂлѧ́ющи лю́таѧ на ны̀ ѡ҆б̾стᲂѧ́нїѧ , всѧ́кїѧ ско́рби на́съ и҆з̾мѣнѧ́ющи . тѧ́ бᲂ є҆ди́нꙋ тве́рдᲂ и҆ и҆звѣ́стнѡ ѡ҆снᲂва́нїе и҆́мамы , и҆ твᲂѐ застꙋпле́нїе стѧжа́хᲂмъ , да непᲂстыди́мсѧ влⷣчце , тебѐ призыва́юще . пᲂтщи́сѧ на мл҃твꙋ тебѣ̀ вᲂпїю́щихъ , ра́дꙋисѧ влⷣчце всѣ́мъ пᲂмо́щнице , ра́дᲂсте и҆ пᲂкро́ве дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь : бцⷣе дв҃ᲂ ра́дꙋисѧ , вⷤ . трᲂпа́рь , ѻ҆ц҃е́мъ . гла́съ , и҃ . Препрᲂсла́вленъ є҆сѝ хрⷭ҇тѐ бж҃е на́шъ , и҆́же свѣти́ла на землѝ ѻ҆ц҃ы на́ша ѻ҆снᲂва́выи , и҆ тѣ́ми кᲂ и҆́стиннѣй вѣ́рѣ всѣ́хъ на́съ наста́вилъ є҆сѝ . мнᲂгᲂмлⷭ҇тиве сла́ва тебѣ̀ . аⷤ .

На ᲂу҆́трени , на бг҃ъ гдⷭ҇ь , трᲂпа́рь вᲂскрⷭ҇нъ , двⷤа . сла́ва , ѻ҆ц҃е́мъ . и҆ ны́нѣ , боⷢ҇ . пᲂ кафи́смахъ , сѣда́льны вᲂскрⷭ҇ны . =степе́нна . прᲂки́менъ . и҆ =є҆ѵⷢ҇а́лїе , вᲂскрⷭ҇нᲂ .

Кано́нъ вᲂскрⷭ҇нъ , сᲂ і҆рмᲂсо́мъ , на д҃ . и҆ крⷭ҇тᲂвᲂскрⷭ҇нъ , два̀ . и҆ бцⷣѣ , два̀ . и҆ ѻ҆ц҃е́мъ , на́ ѕ҃ .

Кано́нъ , ст҃ы́мъ ѻ҆ц҃е́мъ . и҆мѣ́ѧ краегране́сїе сѐ . пᲂю̀ бжⷭ҇твеныхъ сᲂбра́нїе седьмо́е . гла́съ , и҃ . пѣ́снь , а҃ . і҆рмо́с̾ . Вᲂѡ҆рꙋже́на фараѡ́на . запѣ́в̾ : Ст҃і́и ѻ҆ц҃ы , мᲂли́те бг҃а ѡ҆ на́съ . Пѣснᲂсло́вити седмы́и сᲂбо́ръ жела́ющꙋ мѝ ны́нѣ , седми́хъ да́ждь бл҃гᲂда́ть сᲂбра́нїѧ ᲂу҆тѣ́шителѧ гдⷭ҇и , ᲂу҆мꙋдри́вша сїѧ̀ ѻ҆гнеѧзы́чнᲂ , и҆ хꙋ́льнᲂе ꙗ҆зыкᲂбѣ́сїе преста́вивша . Бо́льшᲂ ѿ нача́тка число̀ седмо́е , сᲂдѣ́тельства бᲂ бж҃їѧ первᲂѡ҆бра́знѡ бы́сть . всѧ́ческᲂе ѕло́бы разрꙋше́нїе в̾ седмы́и де́нь ны́нѣ , и҆ всѣ́мъ є҆ресе́мъ ᲂу҆ставле́нїе , в̾ равнᲂчи́сленᲂе сᲂбра́нїе . сла́ва . Пᲂбѣди́въ бг҃ᲂбо́рнагᲂ а҆́рїѧ в̾ нике́и пре́жде па́стырьскимъ жеѕло́мъ , правᲂсла́внѡ напра́ви цр҃кᲂвь пᲂвелѣ́ньми ли́къ ѻ҆ц҃ъ . и҆ ны́нѣ всѧ̀ пᲂсрамѝ и҆кᲂнᲂбо́рцы , ꙗ҆́кѡ пᲂсо́бникъ . и҆ нн҃ѣ , боⷢ҇ . Ꙗ҆́кᲂже ѻ҆ц҃ы наꙋчи́ша бл҃гᲂче́стнᲂ и҆спᲂвѣ́дающе вѣ́рнѡ , дв҃ьственꙋю ᲂу҆тро́бꙋ без̾ бᲂлѣ́зни ро́ждьшꙋю с̾ пло́тїю беспло́тнагᲂ , кла́нѧемсѧ тᲂгѡ̀ написꙋ́юще ѻ҆́бразъ , и҆ че́стнѡ лᲂбыза́емъ .

катава́сїѧ : Ѿве́рзꙋ ᲂу҆ста̀ .

пѣ́снь , г҃ . і҆рмо́съ . Оу҆тверже́и нб҃са̀ в̾ нача́тцѣ . Непᲂкᲂлеба́тисѧ хрⷭ҇то́вѣ цр҃кви нерꙋши́мѣ бы́ти , ѿ негѡ̀ та́йнѡ ᲂу҆чи́ми бжⷭ҇твенїи пастыренача́льницы . сїю̀ пᲂкᲂлеба́ти хᲂтѧ́щихъ , ꙗ҆́кѡ а҆нти́христᲂвы ча́сти ѿ бл҃гᲂчести́выхъ ѿлꙋчи́ша . Ѡ҆чища́етъ ѿ мꙋ́тнагѡ и҆ смра́днагѡ пᲂто́ка , ѿ и҆сто́чника спасе́нагѡ пᲂче́рпъ , и҆ жа́ждꙋщїѧ лю́ди хрⷭ҇то́вы насыща́етъ , ᲂу҆че́нїи стрꙋѧ́ми ѻ҆те́ческᲂе сᲂбра́нїе . сла́ва . На ненави́дныхъ вᲂи́стинꙋ хрⷭ҇тїѧнᲂѡ҆глаго́льникъ стече́нїе хрⷭ҇тᲂлюби́выхъ седмо́е , во́ градѣ свѣ́тлѣмъ нике́йстѣмъ бы́сть . є҆мꙋ́же цр҃їе и҆ри́на и҆ кᲂнстанти́нъ , є҆динᲂмꙋ́дренїи . и҆ ны́нѣ , боⷢ҇ . Всѧ́къ да ѿстꙋпа́етъ нечести́въ , и҆́же ѻ҆́браза нечте́тъ честна́гѡ бцⷣы , и҆ тꙋ̀ непрᲂпᲂвѣ́даѧ хрⷭ҇та̀ бг҃ᲂмꙋ́жнѡ ро́ждьшꙋю , ѻ҆гню̀ да ѿсыла́етсѧ сжига́емь без̾кᲂне́чнѡ .

катава́сїѧ : Твᲂѧ̀ пѣвцы̀ .

кᲂнда́къ , и҆ и҆́кᲂсъ , вᲂскрⷭ҇нъ . сѣда́ленъ , гла́съ , д҃ . Свѣти́льницы пресвѣ́тлїи и҆́стины хрⷭ҇то́вы , ми́ра прᲂсвѣти́сте ᲂу҆че́нїемъ ва́шимъ ѻ҆ц҃ы бг҃ᲂгл҃ивїи , пᲂгꙋби́вше є҆́реси ѕлᲂвѣ́рныхъ хꙋ́льникъ , пᲂгаси́сте пла́меннаѧ хꙋ́лѧщихъ смꙋще́нїѧ . тѣ́мъ ꙗ҆́кѡ ст҃лїе хрⷭ҇то́вы всѣ́хъ прᲂсвѣща́ете . двⷤа . сла́ва , и҆ ны́нѣ , боⷢ҇ . Дв҃ᲂ всенепᲂро́чнаѧ , пребᲂга́тагᲂ бг҃а пᲂро́ждьши , сᲂ беспло́тными тᲂгѡ̀ непреста́ннѡ мᲂлѝ , ѡ҆ставле́нїе прегрѣше́нїи и҆ и҆справле́нїе житїѧ̀ да́ти на́мъ пре́жде кᲂнца̀ , вѣ́рᲂю и҆ любо́вїю пᲂю́щимъ тѧ̀ по́ дᲂлгꙋ , є҆ди́на мнᲂгᲂпѣ́таѧ .

пѣ́снь , д҃ . і҆рмо́съ . Ты́ ми хрⷭ҇тѐ гдⷭ҇ь . Глаго́лъ бж҃їи и҆мꙋ́ще стрѣ́лꙋ и҆ ме́чь , всѧ̀ кꙋ́пнᲂ и҆скала́ютъ врагѝ , ѻ҆бразо́въ крⷭ҇тныхъ . непᲂчита́ющихъ . та́кᲂ же и҆зᲂбраже́нїѧ хрⷭ҇то́ва и҆ бцⷣы , и҆ ст҃ы́хъ всѣ́хъ ѻ҆ц҃ы бг҃ᲂви́днїи . Ꙗ҆́кᲂже седьмїю̀ трꙋ́бъ и҆ є҆рихѡ́нᲂвы стѣ́ны седмы́мъ падо́ша ѡ҆бхᲂжде́нїемъ . си́це седмїю̀ сᲂбо́рᲂве всѐ ѡ҆пᲂлче́нїе на хрⷭ҇та̀ вᲂз̾нᲂсѧ́щеесѧ низ̾лᲂжи́ша в̾ про́пасть , сᲂбра́нїемъ седмы́мъ бг҃ᲂгла́сныхъ трꙋ́бъ дх҃о́вныхъ . сла́ва . Ю҆́нᲂшьскᲂе прᲂтивле́нїе ꙗ҆влѧ́ѧ , и҆ бж҃їимъ рве́нїемъ распалѧ́емь ѻ҆те́ческїй сᲂбо́ръ , и҆лїины̀ стꙋ́дныѧ сщ҃е́нники ᲂу҆мᲂрѝ . тѣ́мъ сᲂ дерзнᲂве́нїемъ хрⷭ҇то́вꙋ ѻ҆́бразꙋ любо́вїю пᲂкланѧ́тисѧ пᲂвелѣ́лъ є҆́сть . и҆ ны́нѣ , боⷢ҇ . Ты̀ ᲂу҆пᲂва́нїе мѝ пречⷭ҇таѧ , ты́ ми пѣ́нїе , ты́ ми приста́нище , ты́ ми ѡ҆кᲂрмле́нїе , ꙗ҆́же бг҃а сло́ва ѻ҆́ч҃а вᲂплᲂще́нна несᲂчета́ннѡ ро́ждьши . тѣ́мъ твᲂемꙋ̀ несꙋмѣ́ннѡ кла́нѧюсѧ ѻ҆́бразꙋ , крѣ́пᲂстїю твᲂе́ю вᲂз̾мᲂга́ѧ .

катава́сїѧ : Сѣдѧ́и вᲂ сла́вѣ .

пѣ́снь , є҃ . і҆рмо́съ . Вскꙋ́ю мѧ ѿри́нꙋ . Высо́кимъ ра́зꙋмᲂмъ раз̾смᲂтри́вше , ѿлꙋчи́сте и҆кᲂнᲂбо́рца ꙗ҆́кѡ и҆нᲂплеме́ннѡ мꙋ́дрствꙋюща честні́и ѻ҆ц҃ы . и҆ че́сть хрⷭ҇то́вꙋ ѻ҆́бразꙋ ꙗ҆́кѡ дᲂсто́йнѡ пᲂдаѧ́ти пᲂвелѣ́сте . сла́ва . Ны́нѣ вре́мѧ весе́лїѧ , ны́нѣ спасе́нїѧ де́нь ꙗ҆ви́сѧ . вᲂзвесели́мсѧ сегѡ̀ ра́ди , и҆ хрⷭ҇то́ви ра́дꙋющесѧ вᲂзᲂпїе́мъ , ми́ръ да́ждь на́мъ сво́й , мл҃твами ѻ҆ц҃ъ ст҃ы́хъ седма́гѡ со́нма чл҃кᲂлю́бче . и҆ нн҃ѣ , боⷢ҇ . За бл҃гᲂꙋтро́бїе млрⷭ҇дїѧ , ѿ дв҃ы ро́ждьсѧ сн҃ъ бж҃їи несᲂвра́тнѡ . чꙋжа́ѧ нᲂсѧ̀ , и҆мы́и ꙗ҆́кѡ свᲂѧ̀ . и҆ зра́кᲂмъ свᲂи́мъ ѡ҆пи́санъ ви́дитсѧ во́лею , сꙋщество́мъ сы́и не ѡ҆пи́санъ .

катава́сїѧ : Оу҆диви́шасѧ всѧ́ческаѧ .

пѣ́снь , ѕ҃ . і҆рмо́съ . Ѡ҆чи́сти мѧ сп҃се . Да вᲂска́плютъ го́ры сла́дᲂсть . є҆рети́ческᲂе бᲂ мно́жествᲂ ѿгна́нᲂ бы́сть , ꙗ҆́дъ прᲂлива́ющихъ го́ркїи . ѻ҆́бразᲂмъ ст҃ы́мъ ѡ҆ставле́нїѧ . сла́ва . Нб҃ᲂ и҆ землѧ̀ сᲂгла́снѡ да пра́зднꙋютъ , дще́ри бж҃їи вели́чествᲂ . и҆́бᲂ велича́етсѧ , ѿлᲂжи́вши сїю̀ ᲂу҆ничижа́ющихъ . и҆ ны́нѣ , боⷢ҇ . Ѿ мт҃ре сн҃ъ ѻ҆ч҃ь без̾ ѻ҆ц҃а , пе́рвѣе же без̾ мт҃ре бг҃ᲂлѣ́пнѡ ро́ждьсѧ , и҆ пᲂрᲂди́въ мѧ . тѣ́мъ ро́ждьшꙋю с̾ рᲂжде́нымъ вᲂѡ҆бразꙋ́ѧ лᲂбыза́ю .

катава́сїѧ : Бжⷭ҇твенᲂе сѐ и҆ всечестно́е .

кᲂнда́къ . гла́съ , и҃ . А҆пⷭ҇льскᲂе прᲂпᲂвѣ́данїе , и҆ ѻ҆ц҃ъ ᲂу҆че́нїе цр҃кви є҆ди́нᲂю вѣ́рᲂю запечатлѣ̀ . и҆ ри́зꙋ нᲂсѧ́щи и҆́стинѣ , и҆стка́нꙋ ѿ вы́шнѧгѡ бг҃ᲂсло́вїѧ , и҆справлѧ́етъ и҆ сла́витъ бл҃гᲂче́стїѧ вели́кᲂе та́иньствᲂ . и҆́кᲂсъ . Высо́кимъ прᲂпᲂвѣ́данїемъ бж҃їю цр҃кᲂвь ᲂу҆слы́шимъ вᲂпїю́щꙋ , жа́ждаи да прїи́детъ кᲂ мнѣ̀ . ча́шꙋ є҆ѧ́же держꙋ̀ , ча́ша є҆́сть премꙋ́дрᲂсти . сїѐ пи́вᲂ и҆́стины сло́вᲂмъ раствᲂре́нᲂ , вᲂды̀ непрᲂлива́емы прерѣка́нїѧ , нᲂ и҆спᲂвѣ́данїѧ . ю҆́же пїѧ̀ ны́нѣшнїи і҆и҃ль , бг҃а зри́тъ вѣща́юща , ви́дите ви́дите , ꙗ҆́кѡ а҆́зъ са́мъ є҆́смь , и҆ непремѣнѧ́юсѧ . а҆́зъ бг҃ъ пе́рвыи , а҆́зъ и҆ пᲂ си́хъ , и҆ па́че менѐ и҆́нъ нѣ́сть ѿ ню́дъ . ѿ сю́дꙋ причаща́ющїисѧ насы́тѧтсѧ , и҆ вᲂсхва́лѧтъ бл҃гᲂче́стїѧ вели́кᲂе та́иньствᲂ .

пѣ́снь , з҃ . і҆рмо́съ . Бж҃їѧ схᲂжде́нїѧ . Пᲂбѣжда́ютсѧ є҆ресе́й нача́льницы пᲂвелѣ́нїи бг҃ᲂглаго́ливыхъ мꙋже́й , и҆́же че́сть ѻ҆́браза первᲂѡ҆бра́знᲂмꙋ сᲂчетава́ющихъ , и҆ пра́вѡ ꙗ҆́кᲂже речѐ вели́кїи васи́лїи бл҃гᲂсло́вѧщихъ бг҃а ѻ҆ц҃ъ на́шихъ . Хра́ми ᲂу҆краша́ютсѧ свѣ́тлыми ѻ҆бразы̀ ᲂу҆дᲂбрѧ́еми . сегѡ̀ ра́ди ᲂу҆кра́шени в̾ цр҃ква́хъ , и҆́же па́че всѣ́хъ земны́хъ краснѣ́йшемꙋ дᲂбро́тᲂю сᲂвᲂспѣва́ютъ пᲂю́ще , бл҃гᲂслᲂве́нъ бг҃ъ ѻ҆ц҃ъ на́шихъ . сла́ва . Свѣ́тъ ѡ҆блиста́въ , дале́че тмѣ̀ нечести́выхъ ѿгна́нѣ . сегѡ̀ ра́ди всѧ́ческаѧ свѣ́та и҆спо́лньшесѧ , свѣтᲂда́телѧ хрⷭ҇та̀ с̾ весе́лїемъ пᲂю́тъ глаго́люще , бл҃гᲂслᲂве́нъ бг҃ъ ѻ҆ц҃ъ на́шихъ . и҆ ны́нѣ , боⷢ҇ . Пречⷭ҇таѧ влⷣчца , на́шегѡ спасе́нїѧ є҆ди́на наде́жа , стра́шнѡ пᲂро́ждьшаѧ цр҃ѧ царе́мъ хрⷭ҇та̀ , и҆ на рꙋкꙋ̀ тᲂгѡ̀ нᲂсѧ́щи ꙗ҆́кѡ младе́нца , и҆ спᲂкланѧ́ема напи́саннᲂ , ꙗ҆́кᲂже ѻ҆ц҃ы реко́ша .

катава́сїѧ : Непᲂслꙋжи́ша тва́ри .

пѣ́снь , и҃ . і҆рмо́съ . Се́дмь седми́цею пе́щь . Зако́нъ ᲂу҆ставлѧ́етъ и҆зѧ́щнѡ ѻ҆те́ческᲂе сᲂбра́нїе , бл҃гᲂчести́вымъ любе́знѡ пᲂкло́нныи , и҆ написа́нїе сщ҃е́ннагѡ ѻ҆́браза . любᲂчести́выхъ же лѣ́тнꙋю па́мѧть ꙗ҆́кѡ ча́да сᲂверша́емъ бл҃гᲂпᲂкᲂри́ва ѻ҆́нѣхъ , и҆ любо́вїю и҆ко́нꙋ хрⷭ҇то́вꙋ лᲂбыза́емъ . пᲂю́ще , дѣ́ти бл҃гᲂслᲂви́те сщ҃е́ннїи , вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . Се́дмь седми́цею прекланѧ́хꙋ смире́ныхъ высᲂкᲂмꙋ́дрїи . и҆ дᲂбрᲂдѣ́тельныхъ ᲂу҆стремле́нїемъ вᲂскраща́хꙋ , и҆́ми же пᲂтвᲂрѧ́хꙋ бжⷭ҇твенаѧ дѣѧ́нїѧ и҆́хъ . нᲂ и҆́же седма́гѡ сᲂбо́ра сᲂше́дшесѧ ны́нѣ ѻ҆ц҃ы в̾ нике́и , гᲂрды́ню тѣ́хъ є҆ди́нᲂю и҆стᲂрго́ша се́дмь седме́рнѣйше . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Стрѣ́лы младе́нецъ быва́ютъ ѱало́мски старᲂмꙋ́дрымъ , младе́нчествᲂ мꙋ́дрствꙋющихъ ꙗ҆́звы и҆ ѡ҆ране́нїѧ . бжⷭ҇твенᲂю же си́лᲂю и҆знемᲂга́ютъ ꙗ҆зы́цы мно́зи хꙋлы̀ глаго́лющихъ на высᲂтꙋ̀ , и҆ всѧ́къ кто̀ ѻ҆ц҃а , сн҃а и҆ дх҃а бг҃а є҆ди́нᲂгᲂ невѣ́сть всѣ́хъ винꙋ̀ и҆ є҆ди́нствᲂ . и҆ нн҃ѣ , боⷢ҇ . Сᲂдѣва́етсѧ младе́нецъ самᲂво́льнѡ млⷭ҇ти ра́ди сᲂдѣ́тель ѿ чи́стыхъ крᲂве́й твᲂи́хъ , сᲂхра́нь тѧ пᲂ ржⷭ҇твѣ̀ преѡ҆чи́стᲂваннꙋю всю̀ чи́стꙋ , и҆ ѡ҆скве́рньшїисѧ ѡ҆чища́етъ ѻ҆́бразъ . тѣ́мъ вᲂ и҆ко́нахъ сᲂѡ҆бразꙋ́етътисѧ є҆стество́мъ зе́мленъ , бг҃ъ сы́и сꙋщество́мъ . катава́сїѧ : Хва́лимъ бл҃гᲂслᲂви́мъ . Ѻ҆́трᲂки бл҃гᲂчести́выѧ .

пѣ́снь , ѳ҃ . і҆рмо́съ . Оу҆диви́сѧ ᲂу҆́бѡ ѡ҆ се́мъ нб҃ᲂ . Вели́кїи в̾ крѣ́пᲂсти и҆ сᲂвѣ́тᲂмъ , и҆́же всѧ̀ сᲂдержа́й непᲂсти́жимᲂ , є҆ди́ныи бж҃е крѣ́пкїи пренача́льне всѣ́хъ цр҃ю , цр҃кᲂвь ᲂу҆твердѝ правᲂсла́вїемъ сѝ сᲂблюда́ѧ ѻ҆ц҃ъ пресла́вныхъ мᲂльба́ми , ѡ҆бличи́вшихъ ѕлᲂвѣ́рныхъ . Вели́кихъ спᲂдо́бистесѧ по́честей на землѝ бг҃ᲂмꙋ́дренѡ ст҃і́и , ꙗ҆́кѡ хрⷭ҇то́въ ѻ҆́бразъ пᲂчто́сте любе́знѡ . ны́нѣ же стѣ́нь ѿло́жьше и҆ пᲂкрᲂве́нїе плᲂтьско́е , тᲂгѡ̀ самᲂли́чнѡ к̾ лицꙋ̀ зритѐ , вели́кихъ спᲂдᲂблѧ́еми . сла́ва . Оу҆́же да нака́жемсѧ всѐ во́иньствᲂмъ ва́рварскимъ без̾слᲂве́сїемъ , всѣ́хъ сᲂдѣ́телю пᲂпꙋсти́лъ є҆сѝ ᲂу҆стремле́нїе . ты̀ разᲂрѝ тѣ́хъ свирѣ́пствᲂ є҆́же на ны̀ , и҆ хрⷭ҇тїа́нствꙋ на́шемꙋ спᲂсо́бьствꙋй ᲂу҆пᲂва́ющемꙋ на тѧ̀ , бл҃гᲂдерзнᲂве́нными мл҃твами ѻ҆ц҃ъ , и҆́мже сᲂверша́емъ па́мѧть . и҆ ны́нѣ , боⷢ҇ . Разꙋмѣ́ти та́йны стра́шнагѡ тѝ ржⷭ҇тва̀ никᲂли́же мо́жетъ зе́мленъ ᲂу҆́мъ , нᲂ нижѐ высᲂкᲂмы́сленыи а҆́нг҃льскїи , ꙗ҆́кѡ бг҃а рᲂдила̀ є҆сѝ вᲂплᲂще́ннагᲂ вы́ше є҆стества̀ . тѣ́мъ тѧ̀ бцⷣꙋ вѣ́дꙋще и҆ сᲂ ѻ҆́нѣмъ написꙋ́юще велича́емъ .

катава́сїѧ : Всѧ́къ зе́менъ .= Дᲂсто́йнѡ є҆́сть .=

свѣти́ленъ , вᲂскрⷭ҇нъ . сла́ва , ѻ҆ц҃е́мъ . Ѿ нача́ла бᲂри́тельныи , а҆́рїевᲂ наси́лїе свирѣ́пᲂ наведѐ сп҃се на цр҃кᲂвь твᲂю̀ . нᲂ пᲂдви́гшесѧ ѻ҆те́ческᲂе во́инствᲂ , тᲂгѡ̀ пᲂбѣдѝ . и҆ є҆динᲂсꙋ́щна тѧ̀ сло́ва ѻ҆ц҃ꙋ вѣ́рнѡ сла́витъ . и҆ нн҃ѣ , боⷢ҇ . И҆з̾ тебѐ пресꙋ́щественыи бг҃ъ чи́стаѧ в̾ смѣше́нїе чл҃ческагᲂ є҆стества̀ мно́гагᲂ ра́ди млрⷭ҇дїѧ па́че є҆стества̀ ѡ҆дѣ́ѧсѧ , несмѣси́въ ᲂу҆ка́занїѧ двᲂю̀ ѻ҆трᲂкᲂви́це є҆стествꙋ̀ . нᲂ є҆ди́нъ сн҃ъ бы́лъ є҆́сть пᲂ ѻ҆бᲂю̀ сꙋществꙋ̀ .

На хвали́тѣхъ , стⷯры , вᲂскрⷭ҇ны , д҃ . и҆ ѻ҆ц҃е́мъ , д҃ . гла́съ , ѕ҃ . поⷣ . всѐ ᲂу҆пᲂва́нїе .= Всѐ сᲂбра́вше ,꙳ дш҃е́внᲂе хꙋдо́жествᲂ ,꙳ и҆ бжⷭ҇твенымъ дх҃ᲂмъ смᲂтри́вше ,꙳ нбⷭ҇нᲂе и҆ чⷭ҇тно́е вᲂ ѡ҆браже́нїе ,꙳ чⷭ҇тні́и ѻ҆ц҃ы ,꙳ бг҃ᲂчерта́ннѡ написа́ша в̾ не́мъ ꙗ҆вле́ннѣе ,꙳ ро́ждьшемꙋ сᲂбез̾нача́льнᲂе сло́вᲂ наꙋча́ютъ ,꙳ и҆ всеи́стиннѡ є҆динᲂсꙋ́щнѡ ,꙳ а҆пⷭ҇льскимъ пᲂслѣ́дствꙋюще ꙗ҆́вьственѡ наꙋче́нїемъ ,꙳ бг҃ᲂсла́внїи и҆ пребᲂга́тїи ,꙳ вᲂи́стинꙋ и҆ бг҃ᲂмꙋ́дрїи . В=сю̀ прїе́мше ,꙳ разꙋ́мнꙋю зарю̀ дх҃а ст҃а́гѡ ,꙳ вышеє҆сте́ственагѡ прᲂрече́нїѧ ,꙳ ма́лыми глаго́лы и҆ мно́гимъ ра́зꙋмᲂмъ ,꙳ бг҃ᲂдх҃нᲂве́ннѡ вᲂзвѣща́юще ,꙳ ꙗ҆́кѡ хрⷭ҇тᲂпрᲂпᲂвѣ́дницы ,꙳ є҆ѵⷢ҇а́льскимъ пред̾стᲂѧ́ще пᲂвелѣ́нїемъ бл҃же́ннїи ,꙳ и҆ бл҃гᲂче́стнымъ преда́нїемъ .꙳ свы́ше прїе́мше тѣ́хъ ѿкрᲂве́нїе ꙗ҆́вѣ ,꙳ и҆ прᲂсвѣ́щшесѧ и҆злᲂжи́ша вѣ́рꙋ ,꙳ бг҃ᲂнаꙋче́нꙋю .

сти́хъ : бг҃ъ бᲂгѡ́мъ гдⷭ҇ь гл҃а ,꙳ и҆ призва̀ зе́млю ѿ вᲂсто́къ сл҃нца дᲂ за́падъ . Всѐ сᲂвᲂкꙋ́пльше ,꙳ па́стырьскᲂе и҆скꙋше́нїе ,꙳ и҆ ꙗ҆́рᲂсть пᲂдви́гше пра́веднꙋю зако́ннѡ ,꙳ тѧ́жкїѧ ѿгна́вше и҆ па́гꙋбныѧ во́лки ,꙳ пра́щею дх҃о́внᲂю ,꙳ и҆з̾ве́ргше ѿ и҆спᲂлне́нїѧ цр҃ко́внагѡ ,꙳ па́дшихъ въ сме́рть ,꙳ и҆ ꙗ҆́кѡ неи҆сцѣ́льнѡ недꙋ́гᲂвавшихъ ,꙳ бжⷭ҇твенїи па́стырїе ,꙳ ꙗ҆́кѡ рабѝ при́снїи хрⷭ҇то́вы ,꙳ и҆ бжⷭ҇твенагѡ прᲂпᲂвѣ́данїѧ ,꙳ ᲂу҆чи́телїе сщ҃е́ннїи .

сти́хъ : сᲂбери́те є҆мꙋ̀ препᲂдо́бныѧ є҆гѡ̀ ,꙳ завѣща́ющїѧ завѣ́тъ є҆гѡ̀ ѡ҆ же́ртвахъ . Всѐ сᲂбра́вше ,꙳ дш҃е́внᲂе хꙋдо́жествᲂ ,꙳ и҆ бжⷭ҇твенымъ дх҃ᲂмъ смᲂтри́вше ,꙳ нбⷭ҇нᲂе и҆ честно́е вᲂѡ҆браже́нїе ,꙳ честні́и ѻ҆ц҃ы ,꙳ бг҃ᲂчерта́ннѡ написа́ша в̾ не́мъ ꙗ҆вле́ннѣе ,꙳ ро́ждьшемꙋ сᲂбез̾нача́льнᲂе сло́вᲂ наꙋча́ютъ ,꙳ и҆ всеи́стиннѡ є҆динᲂсꙋ́щнѡ ,꙳ а҆пⷭ҇льскимъ пᲂслѣ́дствꙋюще ꙗ҆́вьственѡ наꙋче́нїемъ ,꙳ бг҃ᲂсла́внїи и҆ пребᲂга́тїи ,꙳ вᲂи́стинꙋ и҆ бг҃ᲂмꙋ́дрїи .

сла́ва . гла́съ , и҃ . Ст҃ы́хъ ѻ҆ц҃ъ ли́къ , ѿ кᲂне́цъ вселе́нныѧ сте́кшесѧ , ѻ҆ц҃а и҆ сн҃а и҆ ст҃а́гѡ дх҃а , є҆ди́нᲂ сꙋщество̀ прᲂпᲂвѣ́даша и҆ є҆стество̀ , и҆ та́иньствᲂ бг҃ᲂсло́вїѧ ꙗ҆́снѡ преда́ша цр҃кви . и҆́хже пᲂхвалѧ́юще вѣ́рᲂю ᲂу҆блажа́емъ гл҃юще , ѽ бжⷭ҇твеныи по́лче бг҃ᲂвѣща́нныи . ѻ҆рꙋ́жницы ѡ҆пᲂлче́нїѧ гдⷭ҇нѧ , ѕвѣ́зды мнᲂгᲂсвѣ́тлыѧ разꙋ́мныѧ тве́рди , мы́сленагѡ сїѡ́на неѡ҆бᲂри́мїи стᲂлпѝ , мѷрᲂꙋха́ннїи цвѣ́ти ра́йстїи , всезлата́ѧ ᲂу҆ста̀ сло́ва , нике́йскаѧ пᲂхвало̀ , и҆ вселе́ннѣй ᲂу҆краше́нїе , прилѣ́жнѡ мᲂли́тесѧ ѡ҆ дш҃а́хъ на́шихъ .

и҆ ны́нѣ , гла́съ , в҃ . Преблгⷭ҇ве́на є҆сѝ бцⷣе дв҃ᲂ , вᲂпло́щшимбᲂсѧ и҆з̾ тебѐ , а҆́дъ плѣни́сѧ , а҆да́мъ призва́сѧ . клѧ́тва пᲂтреби́сѧ , и҆ є҆́вва свᲂбᲂди́сѧ . сме́рть ᲂу҆мертви́сѧ , и҆ мы̀ ѡ҆жи́хᲂмъ . тѣ́мъ пᲂю́ще вᲂзᲂпїе́мъ , бл҃гᲂслᲂве́нъ бг҃ъ на́шъ , и҆зво́ливыи та́кѡ .

Славᲂсло́вїе вели́кᲂе , и҆ ѿпꙋ́стъ . и҆ стихѣ́ра , є҆ѵⷢ҇а́льскаѧ . ча́съ , а҃ . и҆ кᲂне́чныи ѿпꙋ́стъ .

На литꙋргі́и , бл҃же́нна , гла́сꙋ , на́ ѕ҃ . и҆ ѻ҆ц҃е́мъ , пѣ́снь г҃ ѧ , на д҃ .

Пᲂ вхо́дѣ , а҆́ще хра́мъ хрⷭ҇то́въ : трᲂпа́рь , вᲂскрⷭ҇нъ , и҆ ѻ҆ц҃е́мъ . кᲂнда́къ , вᲂскрⷭ҇нъ . сла́ва , ѻ҆ц҃е́мъ . и҆ ны́нѣ , хра́мꙋ .

Пᲂ вхо́дѣ , а҆́ще хра́мъ бцⷣы : трᲂпа́рь , вᲂскрⷭ҇нъ , и҆ хра́мꙋ , и҆ ѻ҆ц҃е́мъ . кᲂнда́къ , вᲂскрⷭ҇нъ . сла́ва , ѻ҆ц҃е́мъ . и҆ ны́нѣ , хра́мꙋ .

Пᲂ вхо́дѣ , а҆́ще ли хра́мъ ст҃ы́мъ : трᲂпа́рь , вᲂскрⷭ҇нъ , и҆ ѻ҆ц҃е́мъ , и҆ хра́мꙋ . кᲂнда́къ , вᲂскрⷭ҇нъ . сла́ва , хра́мꙋ . и҆ ны́нѣ , ѻ҆ц҃е́мъ .

прᲂки́менъ гла́сꙋ . и҆ дрꙋгі́и , пѣ́снь ѻ҆ц҃е́мъ . бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ , и҆ хва́льнѡ и҆ прᲂсла́вленѡ и҆́мѧ твᲂѐ во́ вѣки . а҆пⷭ҇лъ , дню̀ , и҆ ѻ҆ц҃е́мъ , къ є҆вре́ѡмъ . заⷱ҇ , тл҃д .= а҆ллилꙋ́їѧ , гла́сꙋ . и҆ ѻ҆ц҃е́мъ , сти́хъ . бг҃ъ бᲂгѡ́мъ гдⷭ҇ь глаго́ла , и҆ призва̀ зе́млю ѿ вᲂсто́къ сл҃нца дᲂ за́падъ . =є҆ѵⷢ҇а́лїе , дню̀ , и҆ ѻ҆ц҃е́мъ , ѿ і҆ѡа́нна . заⷱ҇ , н҃ѕ . прича́стенъ , хвали́те гдⷭ҇а с̾ нб҃съ . дрꙋгі́и , в̾па́мѧть вѣ́чнꙋю бꙋ́детъ пра́ведникъ .