МЦⷭ҇А Ѻ҆КТѦБРѦ̀ ВЪ А҃ ДН҃Ь

пра́зднꙋемъ пᲂкрᲂвꙋ̀ прест҃ы́ѧ бцⷣы . =На ма́лѣй вече́рни , на гдⷭ҇и вᲂзва́хъ , стⷯры , на д҃ . гла́съ , а҃ . На вы́шнихъ прⷭ҇то́лѣхъ пᲂчива́ѧи є҆ди́нъ бг҃ъ , превы́ше земны́хъ по́далъ є҆́сть ви́дѣти свᲂемꙋ̀ ᲂу҆го́дникꙋ . пребжⷭ҇твенѣи рꙋ́цѣ мᲂле́бнѡ прᲂстира́ющꙋ , ѡ҆́ градѣ и҆ ѡ҆́ лю́дехъ мᲂлѧ́щꙋсѧ тебѐ влⷣчце . пᲂкры́й и҆ ны́нѣ гжⷭ҇е на́съ , а҆мфѡ́рᲂмъ млⷭ҇ти твᲂеѧ̀ . =два́жды . Гра́дъ пᲂчита́ющїи тѧ̀ , и҆ по́ дᲂлгꙋ сла́вѧщїи , пᲂкрыва́еши пречⷭ҇таѧ свᲂи́мъ а҆мфѡ́рᲂмъ чⷭ҇тны́мъ , ѿ нахᲂжде́нїѧ прᲂти́вныхъ . ѿ́ глада же и҆ трꙋ́са и҆ межꙋᲂу҆со́бныѧ бра́ни , дв҃ᲂ неи҆скꙋсᲂбра́чнаѧ бг҃ᲂневѣ́стᲂ , чл҃кѡмъ пᲂкро́въ и҆ застꙋпле́нїе . Пᲂла́та ѡ҆дш҃евле́наѧ хрⷭ҇то́ва , вѣ́рнымъ же стѣна̀ и҆ пᲂкро́въ и҆ держа́ва . тᲂбо́ю гра́дъ тво́й бг҃ᲂмт҃и спаса́етсѧ . твᲂе́ю по́мᲂщїю правᲂвѣ́рнїи цр҃и вѣнча́ютсѧ . тᲂбо́ю хва́лѧщїисѧ прⷭ҇нѡ , пᲂбѣ́ды на пᲂга́ныѧ но́сѧтъ , пᲂкрыва́еши бᲂ а҆мфѡ́рᲂмъ млⷭ҇ти твᲂеѧ̀ . сла́ва , и҆ ны́нѣ . гла́съ , ѕ҃ . Прїиди́те праз̾днᲂлю́бныхъ сᲂбо́ри , прест҃ꙋ́ю дв҃ꙋ вᲂспᲂе́мъ . дне́сь бᲂ а҆́нг҃ли сᲂ ст҃ы́ми пра́зднꙋютъ , чⷭ҇тны́и пᲂкро́въ бж҃їѧ мт҃ре , и҆ к̾ пᲂхвале́нїю на́съ земны́хъ призыва́ютъ , вᲂпи́ти непреста́ннымъ гла́сᲂмъ . ра́дꙋисѧ цр҃кви чꙋ́днᲂе ᲂу҆краше́нїе , и҆ всемꙋ̀ ми́рꙋ преди́вныи пᲂкро́въ . ра́дꙋисѧ держа́вѣ на́шей пᲂсо́бїе на бра́нѣхъ , и҆ во́инᲂмъ сᲂблюде́нїе . ра́дꙋисѧ пᲂкро́ве и҆ застꙋпле́нїе на́ше . тебе́ бᲂ хрⷭ҇тїа́нскїи ро́дъ непреста́ннѡ блажи́мъ .= прᲂки́менъ , дню̀ .=

На стихо́внѣ , стихѣ́ры . гла́съ , в҃ . пᲂдо́бенъ . до́ме є҆вфра́фᲂвъ . Сла́ва на́ нб҃сѣхъ ,꙳ и҆ на землѝ весе́лїе ,꙳ ꙗ҆́кѡ бцⷣа ,꙳ сᲂ всѣ́ми ст҃ы́ми ,꙳ за всѧ̀ ны̀ въ цр҃кви мо́литсѧ .

сти́хъ : слы́ши дщѝ и҆ ви́ждь ,꙳ и҆ приклᲂнѝ ᲂу҆́хᲂ твᲂѐ . Прїиди́те вѣ́рнїи ,꙳ вᲂ ст҃ꙋ́ю цр҃кᲂвь ,꙳ та́мѡ бᲂ бцⷣа ,꙳ а҆мфѡ́рᲂмъ пᲂкрыва́етъ лю́ди ,꙳ ѿ всѣ́хъ напа́стей вра́жїихъ .

сти́хъ : лицꙋ̀ твᲂемꙋ̀ пᲂмо́лѧтсѧ ,꙳ бᲂга́тїи лю́дьстїи . Пречⷭ҇таѧ бцⷣе ,꙳ незабꙋ́ди на́съ ,꙳ твᲂи́хъ ра́бъ .꙳ нᲂ за ны̀ пᲂмᲂли́сѧ ,꙳ вѣ́рᲂю пᲂю́щїѧ тѧ .

сла́ва , и҆ ны́нѣ . гла́съ , г҃ . Прїиди́те всѝ праз̾днᲂлю́бцы , чⷭ҇тны́и пᲂкро́въ бж҃їѧ мт҃ре ᲂу҆блажи́мъ , к̾ сн҃ꙋ бᲂ рꙋ́цѣ млⷭ҇тивнѡ прᲂстрѐ . тѣ́мъ и҆ ст҃ы́мъ пᲂкро́вᲂмъ є҆ѧ̀ ми́ръ ѡ҆гражде́нъ бы́сть . ᲂу҆сты̀ и҆ срⷣцемъ и҆ пѣ́сньми и҆ пѣ́нїи дх҃о́вными , сᲂ всѣ́ми притека́ющими пра́зднꙋемъ свѣ́тлѡ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , д҃ . Дне́сь бл҃гᲂвѣ́рнїи лю́дїє свѣ́тлѡ пра́зднꙋютъ , ѡ҆сѣнѧ́еми бг҃ᲂмт҃и твᲂи́мъ прише́ствїемъ , и҆ к̾ твᲂемꙋ̀ взира́юще пречⷭ҇тᲂмꙋ ѻ҆́бразꙋ , ᲂу҆ми́льнѡ гл҃ютъ , пᲂкры́й на́съ чⷭ҇тны́мъ сѝ пᲂкро́вᲂмъ . и҆ и҆зба́ви на́съ ѿ всѧ́кᲂгѡ ѕла̀ , мᲂлѧ́щи сн҃а свᲂегѡ̀ хрⷭ҇та̀ бг҃а на́шегѡ , спасти́сѧ дш҃а́мъ на́шимъ .

та́же , є҆ктенїѧ̀ ма́лаѧ . и҆ ѿпꙋ́стъ .

На вели́цѣй вече́рни , блаже́нъ мꙋ́жь , а҃ , а҆нтифо́нъ . =На гдⷭ҇и вᲂзва́хъ , стихѣ́ры , на и҃ . гла́съ , а҃ . Ѽ= вели́кᲂе застꙋпле́нїе печа́льнымъ є҆сѝ бг҃ᲂрᲂди́тельнице чи́стаѧ . ско́раѧ пᲂмо́щнице . спасе́нїе ми́рꙋ и҆ ᲂу҆твержде́нїе . ми́лᲂсти пꙋчи́нᲂ , бж҃їѧ мꙋ́дрᲂсти и҆сто́чниче . ми́ръ пᲂкрыва́еши , неи҆зрече́ннѡ свѣтѧ́щимсѧ а҆мфѡ́рᲂмъ твᲂи́мъ , вᲂспѣва́ющихъ вѣ́рнѡ . ѡ҆бра́дᲂваннаѧ ра́дꙋисѧ с̾ тᲂбо́ю гдⷭ҇ь , пᲂдаѧ́и ми́рᲂви тᲂбо́ю ве́лїю млⷭ҇ть . два́жды . Ди́вныи прᲂречѐ и҆са́їѧ , бꙋ́детъ бᲂ речѐ в̾ пᲂслѣ́днѧѧ днѝ ꙗ҆́вѣ гᲂра̀ гдⷭ҇нѧ , и҆ до́мъ гдⷭ҇нь верхꙋ̀ гᲂры̀ . ᲂу҆ви́дѣхᲂмъ же влⷣчце ѡ҆ тебѣ̀ и҆́стиннᲂе сбытїѐ . го́ры бᲂ и҆ хо́лми ᲂу҆краси́шасѧ мнᲂгᲂимени́тыми цр҃ква́ми , твᲂи́хъ пра́здникъ . тѣ́мъ ве́селѡ вᲂпїе́мъ тѝ , ѡ҆бра́дᲂваннаѧ ра́дꙋисѧ с̾ тᲂбо́ю гдⷭ҇ь , пᲂдаѧ́и ми́рᲂви тᲂбо́ю ве́лїю ми́лᲂсть . Ѽ чꙋ́днᲂе ᲂу҆краше́нїе всѣ́мъ вѣ́рнымъ є҆сѝ . прᲂро́ческᲂе сбытїѐ , а҆пⷭ҇лѡмъ сла́ва , и҆ мч҃нкѡмъ ᲂу҆дᲂбре́нїе , дв҃ьствꙋ пᲂхвала̀ , и҆ всемꙋ̀ ми́рꙋ преди́вныи пᲂкро́въ . пᲂкры́й влⷣчце а҆мфѡ́рᲂмъ ми́лᲂсти твᲂеѧ̀ , всѧ̀ лю́ди вᲂпїю́щїѧ , ѡ҆бра́дᲂваннаѧ ра́дꙋисѧ с̾ тᲂбо́ю гдⷭ҇ь , пᲂдаѧ̀ ми́рᲂви тᲂбо́ю ве́лїю ми́лᲂсть . и҆́ны стⷯры . гла́съ , д҃ . поⷣ . ꙗ҆́кѡ до́блѧ . Ꙗ҆́кѡ бг҃ᲂнасажде́нныи ра́й ,꙳ и҆ мѣ́стᲂ живо́тнагѡ дре́ва ,꙳ напᲂѧ́емъ дх҃ᲂмъ ст҃ы́мъ ,꙳ тебѐ бцⷣе свѣ́дꙋще ,꙳ твᲂрца̀ всѣ́хъ ро́ждьшꙋю .꙳ живо́тнымъ хлѣ́бᲂмъ вѣ́рныѧ пита́юща .꙳ є҆мꙋ́же ѡ҆ на́съ съ прⷣтчею мᲂли́сѧ ,꙳ чⷭ҇тны́мъ а҆мфѡ́рᲂмъ пᲂкрыва́ющи ,꙳ всѧ̀ лю́ди ,꙳ ѿ всѧ́кїѧ напа́сти . вⷤ . Ѡ҆сщ҃а́етсѧ нб҃ᲂ и҆ землѧ̀ ,꙳ цр҃кви же свѣ́титсѧ ,꙳ и҆ лю́дїе всѝ веселѧ́тсѧ .꙳ се́бᲂ мт҃и бж҃їѧ ,꙳ сᲂ а҆́нг҃льскими во́инствы с̾ прⷣтчею и҆ бг҃ᲂсло́вцемъ ,꙳ с̾ прⷪ҇рки же и҆ а҆пⷭ҇лы ,꙳ неви́димѡ вше́дши ,꙳ за хрⷭ҇тїа́ны мо́литсѧ хрⷭ҇тꙋ̀ ,꙳ пᲂми́лᲂвати гра́дъ и҆ лю́ди ,꙳ сла́вѧщихъ тᲂѧ̀ пᲂкро́ва пра́здникъ . Дᲂбро́тꙋ тѧ̀ і҆а́кѡвлю ,꙳ и҆ лѣ́ствицꙋ нбⷭ҇нꙋю ,꙳ пᲂ не́йже гдⷭ҇ь сни́де на́ землю .꙳ тѣ́хъ тᲂгда̀ ѻ҆́брази твᲂю̀ че́сть и҆ сла́вꙋ бцⷣе прᲂѧвлѧ́хꙋ .꙳ тѧ̀ ро́ждьшꙋю бг҃а всѣ́хъ бл҃жа́тъ нбⷭ҇нїи а҆́нг҃ли ,꙳ и҆ земні́и челᲂвѣ́цы .꙳ ꙗ҆́кѡ за ве́сь ми́ръ мо́лишисѧ ,꙳ пᲂкрыва́ющи ми́лᲂстїю ,꙳ и҆́же тво́й честны́и сᲂверша́ющихъ пра́здникъ .

сла́ва , и҆ ны́нѣ . гла́съ , и҃ . Сра́дꙋютсѧ с̾ на́ми разꙋ́мнаѧ всѧ̀ чинᲂнача́лїѧ , дх҃о́внѡ сᲂвᲂкꙋ́пльше чꙋ́вственыи ли́къ , ви́дѧще цр҃цꙋ и҆ влⷣчцꙋ всѣ́хъ , мнᲂгᲂиме́ннѣ вѣ́рными сла́вимꙋ . ра́дꙋютжесѧ и҆ дс҃и пра́ведныхъ , сꙋ́щїи пᲂзара́таи видѣ́нїю , превы́спрь мᲂле́бнѡ , прᲂстира́ющи всечестнѣ́и свᲂѝ рꙋ́цѣ , прᲂсѧ́щи ᲂу҆мире́нїѧ ми́рᲂви , и҆ спасе́нїѧ дш҃а́мъ на́шимъ .

та́же , вы́хᲂдъ . прᲂки́менъ , дню̀ .

Ѿ= бытїѧ̀ , чте́нїе .=

И҆зы́де і҆а́кѡвъ ѿ стꙋденца̀ клѧ́твеннагѡ , и҆ и҆́де в̾ харра́нь , и҆ ѡ҆брѣ́те мѣ́стᲂ и҆ ста̀ тꙋ̀ . заше́дшꙋ же сл҃нцꙋ , взѧ́тъ ѿ ка́менїѧ мѣ́ста тᲂгѡ̀ , и҆ пᲂлᲂжѝ є҆̀ в̾ вᲂз̾гла́вїе себѣ̀ . и҆ спа̀ на мѣ́стѣ то́мъ , и҆ со́нъ ви́дѣ . и҆ сѐ лѣ́ствица ᲂу҆твержена̀ на землѝ , є҆́й же глава̀ дᲂсѧза́ше дᲂ небесѐ . и҆ а҆́нг҃ли бж҃їи вᲂз̾хᲂжда́хꙋ , и҆ низ̾хᲂжда́хꙋ пᲂ не́й . гдⷭ҇ь же ᲂу҆твержа́шесѧ на не́й , и҆ речѐ , а҆́зъ бг҃ъ а҆враа́мѡвъ ѻ҆ц҃а твᲂегѡ̀ , и҆ бг҃ъ і҆саа́кѡвъ , небо́йсѧ . землѧ̀ на не́й же ты̀ спи́ши , тебѣ̀ да́мъ ю҆̀ , и҆ сѣ́мени твᲂемꙋ̀ . и҆ бꙋ́детъ сѣ́мѧ твᲂѐ , ꙗ҆́кѡ пѣсо́къ земны́и , и҆ распрᲂстрани́тсѧ на́ мᲂре , и҆ на ли́вꙋ , на сѣ́веръ , и҆ вᲂсто́къ . и҆ бл҃гᲂслᲂвѧ́тсѧ ѡ҆ тебѣ̀ всѧ̀ кᲂлѣ́на земна́ѧ , и҆ ѡ҆ сѣ́мени твᲂе́мъ . и҆ сѐ а҆́зъ с̾ тᲂбо́ю , сᲂхранѧ́ѧи тѧ̀ на всѧ́кᲂмъ пꙋтѝ , а҆́мᲂже а҆́ще по́йдеши . и҆ вᲂз̾вращꙋ́ тѧ в̾ зе́млю сїю̀ , ꙗ҆́кѡ не ѡ҆ста́влю тебѐ , до́ндеже сᲂтвᲂри́ти ми всѧ̀ є҆ли́ка гл҃ахъ тѝ . и҆ вᲂста́въ і҆а́кѡвъ ѿ сна̀ свᲂегѡ̀ , и҆ речѐ , ꙗ҆́кѡ є҆́сть гдⷭ҇ь на мѣ́стѣ се́мъ , а҆́зъ же невѣ́дѣхъ . и҆ ᲂу҆бᲂѧ́сѧ , и҆ речѐ , ꙗ҆́кѡ стра́шнᲂ мѣ́стᲂ сѐ , нѣ́сть сѐ , нᲂ до́мъ бж҃їи , и҆ сі́ѧ врата̀ нбⷭ҇наѧ .

Ѿ= пррⷪ҇чества і҆єзекі́илева , чте́нїе .=

Бꙋ́детъ ѿ ѻ҆сма́гѡ днѐ и҆ про́чее , сᲂтвᲂрѧ́тъ і҆єре́и , на ѻ҆лтарѝ всесᲂжже́нїѧ ва́ша , и҆́же спасе́нїѧ ва́шегѡ , и҆ прїимꙋ̀ вы̀ гл҃етъ гдⷭ҇ь бг҃ъ . и҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ , зрѧ́щихъ на вᲂсто́къ , и҆ сїѧ̀ бѧ́хꙋ затвᲂре́на . и҆ речѐ гдⷭ҇ь кᲂ мнѣ̀ , врата̀ сїѧ̀ затвᲂре́на бꙋ́дꙋтъ , и҆ не ѿве́рзꙋтсѧ . и҆ никто́же про́йдетъ сквᲂзѣ̀ и҆́хъ , ꙗ҆́кѡ гдⷭ҇ь бг҃ъ і҆и҃левъ вни́детъ и҆́ми , и҆ бꙋ́дꙋтъ затвᲂре́на . занѐ и҆гꙋ́менъ се́й сѧ́детъ в̾ ни́хъ снѣ́сти хлѣ́бъ . пᲂ пꙋтѝ є҆ла́мскихъ вра́тъ вни́детъ , и҆ пᲂ пꙋтѝ є҆гѡ̀ и҆зы́детъ . и҆ введе́ мѧ на пꙋ́ть вра́тъ ст҃ы́хъ , и҆́же к̾ сѣ́верꙋ прѧ́мѡ хра́мꙋ . и҆ ви́дѣхъ , и҆ сѐ и҆спо́лнисѧ сла́вы хра́мъ гдⷭ҇нь .

Ѿ= при́тчей , чте́нїе .=

Премꙋ́дрᲂсть сᲂзда̀ себѣ̀ хра́мъ , и҆ ᲂу҆твердѝ сто́лпъ се́дмь . закла̀ свᲂѧ̀ же́ртвенаѧ , и҆ черпа̀ в̾ ча́ши свᲂе́й вино̀ , и҆ ᲂу҆гᲂто́ва свᲂю̀ трапе́зꙋ . пᲂсла̀ свᲂѧ̀ рабы̀ , сᲂзыва́ющи с̾ высо́кимъ прᲂпᲂвѣ́данїемъ на ча́шꙋ , гл҃ющи , и҆́же є҆́сть безꙋ́менъ , да ᲂу҆клᲂни́тсѧ кᲂ мнѣ̀ . и҆ тре́бꙋющимъ ᲂу҆ма̀ речѐ , прїиди́те и҆ ꙗ҆ди́те мо́й хлѣ́бъ , и҆ пі́йте вино̀ є҆́же че́рпахъ ва́мъ . ѡ҆ста́вите безꙋ́мїе , и҆ жи́ви бꙋ́дете . взыщи́те премꙋ́дрᲂсть , да пᲂживетѐ . и҆спра́вите вѣ́дѣнїи въ ра́зꙋмѣ . кажа́и ѕлы́ѧ , прїе́млетъ себѣ̀ без̾че́стїе . ѡ҆блича́ѧи же нечести́вагᲂ пᲂрече́тъ себѐ . ѡ҆бличе́нїе бᲂ нечести́вᲂмꙋ мᲂзо́лїе є҆мꙋ̀ . не ѡ҆блича́й ѕлы́хъ , да не вᲂз̾ненави́дѧтъ тебѐ . ѡ҆блича́й премꙋ́дра , и҆ вᲂзлю́битъ тѧ . да́й премꙋ́дрꙋ винꙋ̀ , и҆ премꙋ́дрѣе бꙋ́детъ . сказа́й пра́веднᲂмꙋ , и҆ прилᲂжи́тъ прїима́ти . зача́лᲂ премꙋ́дрᲂсти , стра́хъ гдⷭ҇нь , и҆ свѣ́тъ ст҃ы́хъ , ра́зꙋмъ . а҆ є҆́же разꙋмѣ́ти зако́нъ , по́мысла є҆́сть бл҃га . си́мъ бᲂ ѻ҆́бразᲂмъ пᲂживе́ши мно́гѡ лѣ́тъ , и҆ прилᲂжа́т̾тисѧ лѣ́та живᲂтꙋ̀ .

На литі́и , стихѣ́ры . гла́съ , г҃ . Наста̀ дне́сь пресвѣ́тлыи пра́здникъ , пречⷭ҇таѧ дв҃ᲂ чⷭ҇тна́гѡ твᲂегѡ̀ пᲂкро́ва . па́че сл҃нца ѡ҆свѣща́еши лю́ди , и҆́же вѣ́рᲂю ѿ чи́ста срⷣца тебѐ и҆́стиннꙋю мт҃рь бж҃їю , и҆спᲂвѣ́дающихъ , и҆ сн҃ꙋ твᲂемꙋ̀ вᲂпїю́щихъ . хрⷭ҇тѐ бж҃е , мл҃твами ро́ждьшїѧ тѧ̀ при́снѡ дв҃ыѧ чи́стѡ и҆ без̾ и҆стлѣ́нїѧ , непреда́ждь враго́мъ ра́тꙋющимъ твᲂѐ дᲂстᲂѧ́нїе . нᲂ ꙗ҆́кѡ млⷭ҇тивъ спасѝ в̾ ми́рѣ дш҃а на́ша . гла́съ , д҃ . Хвале́нїе тебѣ̀ є҆́же пᲂ дᲂстᲂѧ́нїю , лю́ди сн҃а твᲂегѡ̀ пречⷭ҇таѧ влⷣчце жела́юще вᲂспѣ́ти , нᲂ не вᲂзмо́гꙋтъ . всегда́ бᲂ всѣ́хъ вѣ́рныхъ застꙋпа́еши , и҆ пᲂкрыва́еши честны́мъ свᲂи́мъ пᲂкро́вᲂмъ , и҆ мо́лишисѧ спасти́сѧ всѣ́мъ , и҆́же вѣ́рᲂю тебѐ чⷭ҇тꙋю бцⷣꙋ пᲂчита́ющимъ . гла́съ , в҃ . Пренепᲂро́чнꙋю всѣ́хъ цр҃цꙋ пречⷭ҇тꙋю дв҃ꙋ , сᲂше́дшесѧ вѣ́рнїи , дне́сь ᲂу҆бл҃жи́мъ мт҃рь хрⷭ҇та̀ бг҃а . прⷭ҇нѡ бᲂ к̾ сн҃ꙋ рꙋ́цѣ млⷭ҇тивнѡ прᲂстира́ющꙋ . ю҆́же преди́вныи а҆ндре́й ви́дѣ на вᲂз̾дꙋ́сѣ , чⷭ҇тны́мъ свᲂи́мъ пᲂкро́вᲂмъ лю́ди пᲂкрыва́ющꙋ . се́й ᲂу҆ми́льнѡ вᲂзᲂпїе́мъ , ра́дꙋисѧ пᲂкро́ве и҆ застꙋпле́нїе , и҆ спасе́нїе дш҃а́мъ на́шимъ . сла́ва , и҆ нн҃ѣ . гла́съ , то́йже . Смы́слъ ѡ҆чи́стивше и҆ ᲂу҆́мъ , сᲂ а҆́нг҃лы и҆ мы̀ тᲂржествꙋ́емъ . свѣ́тлѡ начина́юще давы́дскꙋю пѣ́снь , ѻ҆трᲂкᲂви́цѣ невѣ́стѣ всѣ́хъ цр҃ѧ хрⷭ҇та̀ бг҃а на́шегѡ , вᲂскрⷭ҇нѝ гдⷭ҇и гл҃юще в̾ пᲂко́й тво́й . ты̀ и҆ кїѡ́тъ ст҃ы́ни твᲂеѧ̀ . ꙗ҆́кѡ бᲂ пᲂла́тꙋ краснꙋ̀ сїю̀ ᲂу҆красѝ , и҆ причтѐ ю҆̀ гра́дꙋ свᲂемꙋ̀ влⷣкᲂ . стро́ити и҆ пᲂкрыва́ти , ѿ сꙋпᲂста́тныхъ пᲂга́нъ , держа́внᲂю си́лᲂю тᲂѧ̀ мл҃твами .

На стихо́внѣ , стихѣ́ры . гла́съ , в҃ . Ꙗ҆́кѡ всѣ́хъ вы́шши сꙋ́щи нбⷭ҇ныхъ и҆ земны́хъ , херꙋви́мъ сла́внѣйши , и҆ всеѧ̀ тва́ри честнѣ́йши , тебѐ застꙋ́пницꙋ и҆ пᲂкро́въ держа́венъ хрⷭ҇тїа́нскᲂмꙋ ро́дꙋ хрⷭ҇то́съ дарᲂва̀ , пᲂкрыва́ти и҆ спаса́ти лю́ди сᲂгрѣ́шшїѧ и҆ к̾ тебѣ̀ притека́ющїѧ . тѣ́мже прибѣ́жище всѣ́мъ , тебѐ вᲂспѣва́емъ влⷣчце . и҆ честны́и пра́здникъ твᲂегѡ̀ пᲂкро́ва пра́зднꙋемъ свѣ́тлѡ , хрⷭ҇та̀ мᲂлѧ́ще , дарᲂва́ти на́мъ ве́лїю ми́лᲂсть .

сти́хъ : гла́съ , є҃ . слы́ши дщѝ и҆ ви́ждь ,꙳ и҆ приклᲂнѝ ᲂу҆́хᲂ твᲂѐ . Вᲂспᲂе́мъ лю́дїе свѣ́тлѡ дв҃дскꙋю пѣ́снь , ѻ҆трᲂкᲂви́цѣ невѣ́стѣ , бж҃їи мт҃ри всѣ́хъ цр҃ѧ хрⷭ҇та̀ . пред̾ста̀ цр҃ца ѡ҆деснꙋ́ю тебѐ влⷣкᲂ , рѧсны̀ златы́ми ѡ҆дѣ́ѧна , и҆ преꙋкра́шена бжⷭ҇твеными лѣпᲂта́ми . сїю́ бᲂ и҆збра́ннꙋю въ жена́хъ , па́че всегѡ̀ ми́ра ᲂу҆дᲂбри́въ , бл҃гᲂи҆зво́ли рᲂди́тисѧ ѿ неѧ̀ , вели́кїѧ ра́ди млⷭ҇ти . и҆ сїю̀ пᲂмо́щницꙋ лю́демъ свᲂи́мъ дарᲂва̀ , стро́ити и҆ пᲂкрыва́ти ѿ всѧ́кїѧ бѣды̀ рабы̀ свᲂѧ̀ , є҆ди́нꙋ бл҃гᲂслᲂве́нꙋю .

сти́хъ : гла́съ , з҃ . лицꙋ̀ твᲂемꙋ̀ пᲂмо́лѧтсѧ ,꙳ бᲂга́тїи лю́дьстїи . Гᲂра̀ є҆сѝ вели́каѧ и҆ пресла́внаѧ . па́че гᲂры̀ сина́йскїѧ бцⷣе . ѻ҆на́ бᲂ нетерпѧ́щи сни́тїѧ сла́вы бж҃їѧ , вᲂ ѻ҆́бразѣхъ и҆ сѣ́нехъ , ѻ҆гне́мъ вᲂзгара́шесѧ , и҆ гро́ми и҆ мо́лнїѧ та́мѡ бы́ша . ты́ же всегѡ̀ въ себѣ̀ бжⷭ҇твенагѡ ѻ҆гнѧ̀ сꙋ́щи бж҃їѧ сло́ва , во́ чревѣ неѡ҆па́льнѡ нᲂси́ла є҆сѝ , и҆ ѿ сᲂсцꙋ̀ твᲂе́ю млеко́мъ пита́ла є҆сѝ , ма́нїемъ нᲂсѧ́щагѡ всѧ̀ . и҆ мт҃рне дерзнᲂве́нїе к̾ немꙋ̀ и҆мꙋ́щи , пᲂмᲂзѝ влⷣчце вѣ́рнѡ пра́зднꙋющимъ тво́й честны́и пра́здникъ , и҆ незабꙋ́ди ми́лᲂстивнѡ пᲂсѣща́ющи . прїѧ́ла є҆сѝ ѿ́ бг҃а да́ръ стро́ити и҆ пᲂкрыва́ти , хрⷭ҇тᲂимени́тᲂе ста́дᲂ рабы̀ свᲂѧ̀ .

сла́ва , и҆ ны́нѣ . гла́съ , в҃ . Ꙗ҆́кѡ вѣнце́мъ пресвѣ́тлымъ пречи́стаѧ бцⷣе , пᲂкро́вᲂмъ ти чⷭ҇тны́мъ цр҃кви бж҃їѧ прїѡдѣ́ѧсѧ , и҆ свѣ́титсѧ ра́дꙋющисѧ дне́сь . и҆ та́йнѡ ликᲂвствꙋ́етъ влⷣчце вᲂпїю́ще ти , ра́дꙋисѧ ѡ҆дѣѧ́нїе чⷭ҇тно́е , и҆ вѣ́нче бж҃їѧ сла́вы . ра́дꙋисѧ є҆ди́на сла́вы сᲂверше́нїе , и҆ вѣ́чнᲂе весе́лїе . ра́дꙋисѧ к̾ тебѣ̀ притека́ющимъ приста́нище и҆ и҆збавле́нїе , и҆ спасе́нїе на́ше .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , д҃ . Дне́сь бл҃гᲂвѣ́рнїи лю́дїє свѣ́тлѡ пра́зднꙋютъ , ѡ҆сѣнѧ́еми бг҃ᲂмт҃и твᲂи́мъ прише́ствїемъ , и҆ к̾ твᲂемꙋ̀ взира́юще пречⷭ҇тᲂмꙋ ѻ҆́бразꙋ , ᲂу҆ми́льнѡ гл҃ютъ , пᲂкры́й на́съ чⷭ҇тны́мъ сѝ пᲂкро́вᲂмъ . и҆ и҆зба́ви на́съ ѿ всѧ́кᲂгѡ ѕла̀ , мᲂлѧ́щи сн҃а свᲂегѡ̀ хрⷭ҇та̀ бг҃а на́шегѡ , спасти́сѧ дш҃а́мъ на́шимъ .= три́жды .=

На ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , три́жды . Пᲂ а҃ , стихᲂло́гїи , сѣда́ленъ . гла́съ , г҃ . Бжⷭ҇твеными сїѧ́нїи а҆́нг҃льскихъ во́инствъ ѡ҆бстꙋпа́ема . и҆ съ чи́нми прᲂро́къ и҆ а҆пⷭ҇лъ че́стнѡ слꙋ́жбꙋ прїе́млющи . ꙗ҆́кѡ мт҃и бж҃їѧ пᲂсѣтѝ на́съ твᲂи́хъ ра́бъ , мᲂлѧ́щи хрⷭ҇та̀ бг҃а на́шегѡ , дарᲂва́ти на́мъ ве́лїю ми́лᲂсть . сла́ва , и҆ ны́нѣ , то́йже .

Пᲂ в҃ , стихᲂло́гїи , сѣда́ленъ . гла́съ , ѕ҃ . Без̾пᲂмо́щнымъ крѣ́пᲂсть ты̀ вᲂи́стинꙋ пречⷭ҇таѧ бг҃ᲂмт҃и . ѿ сю́дꙋ смире́ннїи тᲂбо́ю вᲂз̾выша́емсѧ , ѡ҆ тебѣ̀ высо́цѣ держи́мсѧ . всѣ́мъ ты̀ є҆сѝ пᲂкро́въ , и҆ къ бг҃ꙋ хᲂда́таица .= сла́ва , и҆ ны́нѣ , то́йже .=

Пᲂ пᲂлїєлеѡ́сѣ , сѣда́ленъ . гла́съ , д҃ . Ꙗ҆́кѡ дре́внѧгѡ вᲂи́стинꙋ пречестнѣ́е кїѡ́та тво́й пречⷭ҇тны́и а҆мфѡ́ръ , па́че и҆ле́ктра прᲂсвѣща́ѧсѧ , невеще́ственѣ , нᲂ дх҃о́внѣ , нетлѣ́нныма твᲂи́ма пречⷭ҇тыма рꙋка́ма прᲂстира́емь , сᲂблюда́етъ млⷭ҇тивнѡ чтꙋ́щихъ бг҃ᲂꙋкраше́нныи пра́здникъ твᲂегѡ̀ пᲂкро́ва влⷣчце . во́ньже сᲂше́дшесѧ ᲂу҆се́рднѡ пра́зднꙋемъ .= сла́ва , и҆ ны́нѣ , то́йже .=

степе́нна , д҃ гᲂ гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . Пᲂмѧнꙋ̀ и҆́мѧ твᲂѐ , вᲂ всѧ́кᲂмъ ро́дѣ и҆ ро́дѣ . сти́хъ . слы́ши дщѝ и҆ ви́ждь , и҆ приклᲂнѝ ᲂу҆́хᲂ твᲂѐ . всѧ́кᲂ дыха́нїе . є҆ѵⷢ҇а́лїе , ѿ лꙋкѝ . зача́лᲂ , д҃ . ѱало́мъ , н҃ .

сла́ва . мᲂли́твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

и҆ ны́нѣ . мᲂли́твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

Пᲂми́лꙋй мѧ бж҃е пᲂ вели́цѣй млⷭ҇ти твᲂе́й пᲂ мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , и҃ . Сра́дꙋютсѧ с̾ на́ми разꙋ́мнаѧ всѧ̀ чинᲂнача́лїѧ , дх҃о́внѡ сᲂвᲂкꙋ́пльше чꙋ́вственыи ли́къ , ви́дѧще цр҃цꙋ и҆ влⷣчцꙋ всѣ́хъ , мнᲂгᲂиме́ннѣ вѣ́рными сла́вимꙋ . ра́дꙋютжесѧ и҆ дс҃и пра́ведныхъ , сꙋ́щїи пᲂзара́таи видѣ́нїю , превы́спрь мᲂле́бнѡ , прᲂстира́ющи всечестнѣ́и свᲂѝ рꙋ́цѣ , прᲂсѧ́щи ᲂу҆мире́нїѧ ми́рᲂви , и҆ спасе́нїѧ дш҃а́мъ на́шимъ .

Кано́нъ бцⷣѣ , на в҃і . і҆рмо́съ , пᲂ двⷤа . гла́съ , д҃ . пѣ́снь , а҃ . і҆рмо́съ . Ѿве́рзꙋ ᲂу҆ста̀ мᲂѧ̀ , и҆ напо́лнѧтсѧ дх҃а , и҆ сло́вᲂ ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ тᲂржествꙋ́ѧ , и҆ вᲂспᲂю̀ ра́дꙋѧсѧ тᲂѧ̀ чꙋдеса̀ . запѣ́в̾ : Прⷭ҇та́ѧ гжⷭ҇е бцⷣе спасѝ на́съ . Съ чи́нми ст҃ы́хъ а҆́нг҃лъ , и҆ съ сᲂбо́ры прⷪ҇ро́къ и҆ а҆пⷭ҇лъ , вᲂ сла́вѣ вели́цѣ , ꙗ҆́кѡ мт҃и бж҃їѧ дне́сь въ цр҃кᲂвь вше́дши , за хрⷭ҇тїа́ны мо́лишисѧ . ѿ напа́сти и҆ печа́ли и҆збавлѧ́еши всѧ̀ , пᲂкрыва́ющи свᲂе́ю млⷭ҇тїю . Ски́нїю тѧ мѡѷсе́й и҆ же́злъ а҆арѡ́нᲂвъ и҆менᲂва̀ , ты́ бᲂ живо́тнагѡ дре́ва хрⷭ҇та̀ прᲂцвѣтѐ . к̾ немꙋ́же дерзнᲂве́нїе и҆мꙋ́щи , за ны̀ чтꙋ́щїѧ тѧ цр҃це пᲂмᲂли́сѧ , и҆зба́вити на́съ ѿ всѧ́кагѡ ѕла̀ , да твᲂегѡ̀ пᲂкро́ва пра́здникъ сла́вимъ . Не ꙗ҆́кѡ пред̾ кїѡ́тᲂмъ дре́вле сᲂбра́въ дв҃дъ ли́ки и҆гра́етъ , нᲂ па́че нн҃ѣ съ чи́нми ст҃ы́хъ пред̾ тᲂбо́ю текꙋ́щи въ цр҃кᲂвь , тебѣ̀ кла́нѧѧсѧ гл҃етъ , мᲂлѝ за чтꙋ́щїѧ тѧ лю́ди , да тво́й сла́вѧще пᲂкро́въ , чⷭ҇тнѡ пра́зднꙋютъ . Пᲂю́тъ тѧ бцⷣе а҆́нг҃льстїи чи́ни , и҆ сла́вѧтъ патрїа́рси с̾ ст҃ли , пред̾ лице́мъ ти текꙋ́ще въ цр҃кᲂвь . с̾ ни́миже тѧ тᲂгда̀ ст҃ы́и а҆ндре́й ви́дѣ , за ны̀ грѣ́шныхъ къ бг҃ꙋ мᲂлѧ́щꙋсѧ , пᲂми́лᲂвати лю́ди сла́вѧщїѧ твᲂегѡ̀ пᲂкро́ва пра́здникъ .

пѣ́снь , г҃ . і҆рмо́съ . Твᲂѧ̀ пѣвцы̀ бцⷣе , живы́и нетлѣ́нїѧ и҆сто́чниче , ли́къ себѣ̀ сᲂвᲂкꙋ́пльши дх҃о́венъ ᲂу҆твердѝ , и҆ в̾ бжⷭ҇твеннѣй ти сла́вѣ , вѣнце́мъ сла́вы спᲂдо́би . Кла́съ прᲂзѧ́бши бжⷭ҇твеныи , ꙗ҆́кѡ ни́ва неѡ҆ра́ннаѧ ꙗ҆́вѣ . ра́дꙋисѧ ѡ҆дш҃евле́ннаѧ трапе́зᲂ , и҆́же хлѣ́бъ живо́тныи вмѣ́щшаѧ . ра́дꙋисѧ живо́тныи вᲂды̀ и҆сто́чниче неи҆стᲂщи́мыи влⷣчце . Твᲂѝ рабѝ влⷣчце , въ цр҃кви ти вѣ́рᲂю пред̾стᲂѧ́ще , твᲂеѧ̀ ѡ҆жида́емъ млⷭ҇ти . пᲂсѣтѝ на́шегѡ смире́нїѧ , и҆ твᲂи́мъ ст҃ы́мъ пᲂкро́вᲂмъ , защитѝ лю́ди ѿ всѧ́кагѡ ѕла̀ . Мнᲂгᲂимени́таѧ дв҃ᲂ , прⷪ҇рки прᲂѡ҆бражена̀ чⷭ҇тнѡ , и҆́же тебѣ̀ нн҃ѣ сᲂ а҆́нг҃лы слꙋ́жатъ . с̾ ни́ми же ѡ҆ на́съ к̾ бг҃ꙋ мᲂли́сѧ , да твᲂегѡ̀ пᲂкро́ва ст҃ы́и дн҃ь , ра́дꙋющесѧ всѝ свѣ́тлѡ пра́зднꙋемъ . Гедеѡ́нъ тѧ рꙋно̀ прᲂѡ҆бразѝ , на тѧ́ бᲂ ꙗ҆́кѡ рᲂса̀ хрⷭ҇то́съ бг҃ъ сни́де . к̾ немꙋ́же бцⷣе мᲂли́сѧ , пᲂбѣ́дꙋ да́ти лю́дѧмъ на́шимъ на врагѝ , да ꙗ҆́кѡ мадїа́мы низ̾лᲂжи́въ , прᲂсла́витъ ст҃ы́и тво́й пра́здникъ . Па́че со́лнечныхъ лꙋ́чъ , твᲂи́мъ блиста́ющимъ а҆мфо́рᲂмъ , ѡ҆сщ҃а́еши цр҃кᲂвь и҆ лю́ди , и҆ тмꙋ̀ грѣхо́въ на́шихъ ѿго́ниши , пᲂсѣще́нїемъ сѝ бцⷣе , к̾ сн҃ꙋ свᲂемꙋ̀ и҆ бг҃ꙋ за ны̀ мᲂлѧ́щисѧ .

сѣда́ленъ . гла́съ , є҃ . Те́плаѧ застꙋ́пнице , и҆ нера́тнаѧ наде́жде , тве́рдаѧ и҆ непᲂсты́днаѧ стѣно̀ , и҆ пᲂкро́ве и҆ приста́нище прибѣга́ющимъ ти прⷭ҇нѡ дв҃ᲂ чⷭ҇таѧ , сн҃а свᲂегѡ̀ и҆ бг҃а мᲂлѝ сᲂ а҆́нг҃лы , ми́ръ пᲂда́ти ми́рᲂви и҆ спасе́нїе и҆ ве́лїю млⷭ҇ть .= сла́ва , и҆ ны́нѣ , то́йже .=

пѣ́снь , д҃ . і҆рмо́съ . Сѣдѧ́и вᲂ сла́вѣ , на прⷭ҇то́лѣ бжⷭ҇твеннѣ , на ѻ҆́блацѣ ле́гцѣ , прїи́де і҆с҃ъ пребжⷭ҇твенныи , ѿ пречⷭ҇тыѧ дв҃ы , спасе́ же вᲂпїю́щїѧ , сла́ва хрⷭ҇тѐ си́лѣ твᲂе́й . Гла́сы пѣ́снеными вѣ́рнїи тебѣ̀ вᲂпїе́мъ всепѣ́таѧ . ра́дꙋисѧ тꙋ́чнаѧ гᲂро̀ ᲂу҆сыре́ннаѧ дх҃ᲂмъ . ра́дꙋисѧ свѣти́льниче и҆ рꙋ́чкᲂ нᲂсѧ́щи ма́ннꙋ ᲂу҆слажда́ющꙋ всѣ́хъ бл҃гᲂчести́выхъ чꙋ́вствїѧ . Па́че а҆арѡ́нѧ кїѡ́та всю́ тѧ бг҃ъ ѡ҆ст҃и́лъ є҆́сть дх҃ᲂмъ бцⷣе ст҃ы́мъ , и҆ а҆́нг҃лѡмъ слꙋжи́ти тебѣ̀ пᲂвелѣ̀ . с̾ ни́ми же за́ градъ и҆ лю́ди мᲂли́сѧ , тво́й сла́вѧщихъ честны́и пра́здникъ . Прїидѝ нн҃ѣ въ сла́вѣ въ свᲂю́ си бцⷣе цр҃кᲂвь , съ сᲂбо́ры всѣ́хъ ст҃ы́хъ . ꙗ҆́кᲂже и҆нᲂгда́ тѧ ст҃ы́и а҆ндре́й ви́дѣ , на вᲂздꙋ́сѣ свѣ́тлѣ , за хрⷭ҇тїа́ны мᲂлѧ́щꙋсѧ . и҆ пᲂда́ждь на́мъ твᲂю̀ млⷭ҇ть . Оу҆крѣпѝ влⷣчце сла́вѧщихъ тѧ люде́й на́шихъ на прᲂти́вныѧ врагѝ , ꙗ҆́кѡ дв҃да на гᲂлїа́фа . да тѝ веселѧ́щисѧ вᲂпїе́мъ , ра́дꙋисѧ пᲂкро́ве ст҃ы́и , и҆ застꙋ́пнице гра́дꙋ на́шемꙋ . Тебѣ̀ припа́даемъ гжⷭ҇е , и҆ вѣ́рᲂю пᲂкланѧ́ющесѧ бл҃гᲂда́рнѡ вᲂпїе́мъ ти , ра́дꙋисѧ бг҃ᲂбл҃гᲂда́тнаѧ дв҃ᲂ , пᲂкро́ве и҆ ѡ҆гражде́нїе на́ше , и҆ пᲂмо́щнице въ бѣдѣ̀ сꙋ́щимъ . спасѝ на́съ , к̾ тебѣ̀ прибѣга́ющихъ , на тѧ́ бᲂ надѣ́емсѧ .

пѣ́снь , є҃ . і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твᲂе́й , ты́ бᲂ бракᲂнеи҆скꙋси́маѧ дв҃це , прїѧ́тъ вᲂ ᲂу҆тро́бѣ надᲂвсѣ́ми сꙋ́щагѡ бг҃а , и҆ рᲂдила̀ є҆сѝ без̾лѣ́тнагѡ сн҃а , всѣ́мъ вᲂспѣва́ющимъ тѧ̀ ми́ръ пᲂдава́юща . Ѻ҆́дръ тѧ дре́вле сᲂлѡ́мᲂнъ написа̀ , и҆ ло́жницꙋ нбⷭ҇нагѡ цр҃ѧ , ѡ҆бстꙋпа́емꙋ серафи́мы , є҆́же ѡ҆ тебѣ̀ рече́сѧ бцⷣе . тѣ́мъ тѧ нн҃ѣ мо́лимъ , мт҃и бж҃їѧ всест҃а́ѧ , пᲂкры́й на́съ ѿ всѣ́хъ бѣ́дъ . Тебѣ̀ а҆́нг҃лѡмъ старѣ́йшины , и҆ чⷭ҇тні́и прⷪ҇рцы сᲂ а҆пⷭ҇лы , ꙗ҆́кѡ мт҃ри бж҃їи чⷭ҇тнѡ слꙋ́жатъ , ви́дѧще тѧ за́ миръ мл҃твꙋ твᲂрѧ́щꙋ . твᲂѧ́ же прᲂше́нїѧ пᲂслꙋ́шавъ гдⷭ҇ь , спаса́етъ гра́дъ и҆ лю́ди на тѧ̀ надѣ́ющихсѧ . Вели́кїи тѧ̀ вᲂ прⷪ҇рцѣхъ і҆са́їѧ прᲂречѐ гл҃ѧ , бг҃а рᲂди́ти бра́кꙋ неи҆скꙋ́снѡ . ты́ бᲂ чⷭ҇таѧ мр҃і́е ст҃ѣ́йши всѣ́хъ бы́сть , бг҃а бᲂ вᲂ ᲂу҆тро́бѣ и҆ на рꙋкꙋ̀ пᲂнесѐ . є҆мꙋ́же за ны̀ мᲂли́сѧ , твᲂи́мъ ѡ҆сѣнѧ́ющи пᲂкро́вᲂмъ , и҆́же вѣ́рᲂю тѧ̀ сла́вѧщихъ . Дх҃о́вными парѧ́ще крилы̀ ст҃ы́хъ сᲂбо́ри , та́йнѡ прїидо́ша тебѣ̀ пᲂслꙋжи́ти бцⷣе , ви́дѧще тѧ на ле́гцѣ ѻ҆́блацѣ сла́вы к̾ сп҃сꙋ хрⷭ҇тꙋ̀ мᲂлѧ́щꙋсѧ , пᲂда́ти пᲂбѣ́дꙋ лю́дѧмъ на́шимъ , пᲂгꙋби́ти вᲂю́ющихъ на́съ .

пѣ́снь , ѕ҃ . і҆рмо́съ . Бжⷭ҇твенᲂе сѐ и҆ всечⷭ҇тно́е сᲂверша́юще пра́зднествᲂ , бг҃ᲂмꙋ́дрїи бж҃їѧ мт҃ре , прїиди́те рꙋка́ми вᲂспле́щемъ , ѿ неѧ̀ ро́ждьшагᲂсѧ вѣ́рᲂю сла́вѧще . І҆єре́и бг҃ᲂмꙋ́дрїи въ цр҃кви ти съ людмѝ бл҃гᲂчести́выми пред̾стᲂѧ́ще , твᲂеѧ̀ ча́ютъ бцⷣе млⷭ҇ти . премѣнѝ на ра́дᲂсть на́шꙋ печа́ль , ра́дᲂсть бᲂ рᲂдила̀ є҆сѝ всѣ́мъ чл҃кѡмъ грѣхѝ ѿпꙋсти́вшагᲂ . Тебѣ̀ всѧ̀ землѧ̀ да́ры прино́ситъ , ꙗ҆́кѡ цр҃цѣ бж҃їи мт҃ри , цр҃їє и҆ кн҃зи кла́нѧютсѧ , и҆ лю́дїє всѝ веселѧ́тсѧ , пᲂкрыва́еми ѿ всѧ́кагѡ ѕла̀ твᲂи́ми бцⷣе мл҃твами . Го́рꙋ тѧ вели́кꙋ данїи́лъ прᲂписа̀ , ѿ тебе́ бᲂ без̾ сѣ́мене рᲂди́сѧ хрⷭ҇то́съ , и҆ сᲂкрꙋшѝ всю̀ бѣсо́вскꙋю ле́сть , и҆ всю̀ свᲂеѧ̀ вѣ́ры и҆спо́лни зе́млю . к̾ немꙋ́же за ны̀ бцⷣе мᲂли́сѧ , сла́вѧщихъ твᲂегѡ̀ пᲂкро́ва пра́здникъ . А҆́нг҃льскїи гла́съ взыва́емъ ти пречⷭ҇таѧ , ра́дꙋисѧ прⷭ҇то́ле бж҃їи , на не́мже і҆єзекі́иль ви́дѣ гдⷭ҇а , в̾ пᲂдо́бїи чл҃ка нᲂси́ма херꙋви́мы . с̾ ними́ же за ны̀ бцⷣе мᲂли́сѧ , да спасе́тъ дш҃а на́ша .

кᲂнда́къ . гла́съ , г҃ . Дв҃аѧ дне́сь пред̾стᲂи́тъ в̾ цр҃кви , и҆ с̾ ли́ки ст҃ы́хъ , неви́димѡ за ны̀ мо́литсѧ бг҃ꙋ . а҆́нг҃ли сᲂ ст҃ли пᲂклᲂнѧ́ютсѧ , а҆пⷭ҇ли же с̾ пррⷪ҇ки ликᲂвствꙋ́ютъ . на́съ бᲂ ра́ди бцⷣа мо́литъ хрⷭ҇та̀ превѣ́чнагѡ бг҃а . и҆́кᲂсъ . Тᲂѧ̀ пресла́вныхъ чꙋде́съ прїиди́те лю́дїє наслади́мсѧ . се́ю бᲂ а҆да́мъ ѿ тлѝ и҆зба́висѧ . та́ бᲂ и҆ кᲂвче́гъ не нѡ́емъ нᲂ бг҃ᲂмъ сᲂтвᲂре́нъ бы́сть . дре́вле ᲂу҆́бѡ мѡѷсе́й въ кꙋпинѣ̀ ѻ҆гнѧ̀ бг҃а ви́дѣти невᲂзмо́же , ны́нѣ же ѿ тᲂѧ̀ ро́ждьшагᲂсѧ всѧ̀ землѧ̀ зна́етъ сн҃а бж҃їѧ . к̾ немꙋ́же за ны̀ мо́литсѧ , сегѡ̀ ра́ди прᲂславлѧ́емъ ю҆̀ , ꙗ҆́кѡ бж҃їю мт҃рь , на́съ бᲂ ра́ди бцⷣа мо́литъ превѣ́чнагᲂ бг҃а .

пѣ́снь , з҃ . і҆рмо́съ . Непᲂслꙋжи́ша тва́ри бг҃ᲂмꙋ́дрїи па́че зижди́телѧ , нᲂ ѻ҆́гненнᲂе преще́нїе , мꙋ́жески пᲂпра́вше ра́дᲂвахꙋсѧ пᲂю́ще , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ бл҃гᲂслᲂве́нъ є҆сѝ . Неи҆спи́саннаѧ мно́гими прⷪ҇рки . несвѣ́дᲂма же бы́сть дв҃ᲂ нбⷭ҇ными слꙋжа́щими бг҃ꙋ а҆́нг҃лы . ны́нѣ же всѝ свѣ́мы бцⷣꙋ , и҆ твᲂеѧ̀ тре́бꙋемъ по́мᲂщи и҆ застꙋпле́нїѧ , бл҃гᲂслᲂве́наѧ . Гᲂра̀ ᲂу҆сыре́наѧ дх҃ᲂмъ , ю҆́же а҆вва́кꙋмъ ви́дѣ , тᲂча́щꙋ вѣ́рнымъ цѣле́бнꙋю сла́дᲂсть . бцⷣе дв҃ᲂ и҆сцѣли́ ны , сн҃ꙋ ти вᲂпїю́щихъ , блгⷭ҇ве́нъ бг҃ъ ѻ҆ц҃ъ на́шихъ . Преклᲂни́выи нб҃са̀ , в̾ тѧ̀ дв҃ᲂ всели́сѧ , и҆ ны́нѣ на мл҃твꙋ ти зри́тъ бцⷣе чⷭ҇таѧ , твᲂѐ цр҃цѣ и҆спᲂлнѧ́ѧ прᲂше́нїе , є҆мꙋ́же за ны̀ ᲂу҆се́рднѡ пᲂмᲂли́сѧ , на тѧ́ бᲂ надѣ́емсѧ бл҃гᲂслᲂве́наѧ . Тво́рче сп҃се на́шъ хрⷭ҇тѐ бж҃е , прїимѝ мл҃твꙋ твᲂеѧ̀ мт҃ре , ю҆́же ти за ны̀ грѣ́шныѧ прино́ситъ . да тѝ ра́дꙋющесѧ пᲂе́мъ , препѣ́тыи ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Ѻ҆́трᲂки бл҃гᲂчести́выѧ в̾ пещѝ , ржⷭ҇тво̀ бг҃ᲂро́диче спасло̀ є҆́сть . тᲂгда̀ ᲂу҆́бѡ ѡ҆бразꙋ́емᲂ , ны́нѣ же дѣ́йствꙋемᲂ , вселе́ннꙋю всю̀ вᲂз̾дви́же пѣ́ти , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . Съ чи́нми а҆́нг҃лъ влⷣчце , съ честны́ми и҆ сла́вными прⷪ҇рки , с̾ верхо́вными а҆пⷭ҇лы , и҆ съ сщ҃еннᲂмч҃нки и҆ с̾ ст҃ли , за ны̀ грѣ́шныѧ бг҃ꙋ пᲂмᲂли́сѧ , твᲂегѡ̀ пᲂкро́ва пра́здникъ въ рꙋ́сстѣй землѝ прᲂсла́вльшихъ . Гᲂрды́ню и҆ шата́нїѧ низ̾лᲂжѝ , и҆ сᲂвѣ́ты непра́ведныхъ кнѧ́зь разᲂрѝ , зачина́ющихъ ра́ти пᲂгꙋбѝ , ѽ бж҃їѧ мт҃и цр҃цѣ всечестна́ѧ . и҆ бл҃гᲂчести́вымъ лю́дѧмъ на́шимъ ро́гъ вᲂзвы́си , да тво́й пра́здникъ сла́вимъ пречⷭ҇таѧ бцⷣе дв҃ᲂ , зᲂвꙋ́ще , гдⷭ҇а вᲂспѣва́йте дѣ́ла и҆ превᲂзнᲂси́те є҆гѡ̀ во́ вѣки . Оу҆сты̀ принᲂсѧ́ще ти пѣ́нїе , и҆ дш҃е́ю вѣ́рнѡ пᲂкланѧ́емсѧ , и҆́бᲂ внꙋ́трь срⷣца̀ на́ша гᲂрѧ́тъ . мт҃и бж҃їѧ пречⷭ҇таѧ пᲂми́лꙋй на́съ мᲂлѧ́щихтисѧ , и҆ гдⷭ҇а вᲂспѣва́ющихъ и҆ превᲂзнᲂсѧ́щихъ є҆гѡ̀ во́ вѣки . Мно́гими ѡ҆тѧгчи́хсѧ грѣхѝ , недᲂꙋмѣ́ю пᲂ дᲂстᲂѧ́нїю написа́ти твᲂегѡ̀ пᲂкро́ва бцⷣе пᲂхвалы̀ . нᲂ ꙗ҆́кѡ мт҃и бж҃їѧ , ᲂу҆красѝ сво́й пра́здникъ чꙋдесы̀ , да всѝ ра́дꙋющесѧ пᲂе́мъ гдⷭ҇а , и҆ превᲂзно́симъ є҆гѡ̀ во́ вѣки .

пѣ́снь , ѳ҃ . і҆рмо́съ . Всѧ́къ зе́менъ , да взыгра́етсѧ дх҃ᲂмъ прᲂсвѣща́емъ . да ликᲂвствꙋ́етъ же , беспло́тныхъ ᲂу҆мо́въ є҆стество̀ , пᲂчита́ѧ ст҃о́е тᲂржество̀ бж҃їѧ мт҃ре . и҆ да пᲂе́тъ , ра́дꙋйсѧ пребл҃же́ннаѧ , бцⷣе чⷭ҇таѧ прⷭ҇нѡ дв҃ᲂ . Высо́кїи цр҃ю , сᲂ ѻ҆ц҃е́мъ сѣдѧ́и , и҆ ѿ серафи́мъ пᲂе́мыи , при́зри на мл҃твꙋ мт҃рню , ю҆́же ти за ны̀ грѣ́шныѧ прино́ситъ , и҆ ѡ҆чи́сти грѣхѝ на́ша . спасѝ гра́дъ , и҆ лю́ди ᲂу҆мно́жи . да́ждь лю́демъ здра́вїе тѣлесѝ , и҆ на пᲂга́ныѧ пᲂбѣ́ды , мл҃твами ро́ждьшїѧ тѧ . А҆́нг҃льскїи гла́съ вᲂпїе́мъ ти дв҃це бг҃ᲂи҆збра́ннаѧ . ра́дꙋисѧ ꙗ҆́же а҆да́ма въ ра́й вве́дшаѧ , ра́дꙋисѧ бѣ́сы прᲂгᲂнѧ́щи свᲂи́мъ и҆́менемъ , ра́дꙋисѧ наде́жде хрⷭ҇тїа́нѡмъ . ра́дꙋисѧ ѡ҆сщ҃е́нїе дш҃а́мъ . ра́дꙋисѧ стра́жь гра́дꙋ на́шемꙋ . Пᲂмѧнѝ на́съ въ свᲂи́хъ мл҃твахъ гжⷭ҇е дв҃ᲂ бцⷣе , да непᲂги́бнемъ за ᲂу҆мнᲂже́нїе грѣ́хъ на́шихъ , пᲂкры́й на́съ ѿ всѧ́кагѡ ѕла̀ , и҆ лю́тыхъ напа́стей , на тѧ́ бᲂ ᲂу҆пᲂва́емъ . и҆ твᲂегѡ̀ пᲂкро́ва пра́здникъ чтꙋ́ще , тѧ̀ велича́емъ . Да́ръ ѿ́ бг҃а прїѧ́ла є҆сѝ ꙗ҆́кѡ мт҃и бж҃їѧ , всѣ́хъ хрⷭ҇тїа́нъ недꙋ́ги и҆сцѣлѧ́ти , и҆ ѿ бѣ́дъ и҆збавлѧ́ти , и҆ грѣхѝ ѿпꙋща́ти , и҆ ѿ плѣне́нїѧ спаса́ти , и҆ всѧ́кїѧ нꙋ́жды . нᲂ и҆ на́съ непре́зри гжⷭ҇е , вѣ́си бᲂ и҆́хже тре́бꙋемъ , здра́вїѧ тѣлесе́мъ , и҆ дш҃а́мъ спасе́нїѧ .

та́же : Дᲂсто́йнᲂ є҆́сть . свѣти́ленъ . Ѽ прест҃а́ѧ гжⷭ҇е дв҃ᲂ бцⷣе , пᲂкры́й на́съ чꙋ́днымъ свᲂи́мъ а҆мфѡ́рᲂмъ , и҆ сᲂхранѝ странꙋ̀ на́шꙋ и҆ лю́ди ѿ всѧ́кᲂгѡ ѕла̀ . ꙗ҆́кᲂже тѧ пречꙋ́дныи а҆ндре́й ви́дѣ в̾ лахе́рнстѣй цр҃кви мᲂлѧ́щꙋсѧ . и҆ ны́нѣ на́мъ гжⷭ҇е пᲂслѝ вели́кꙋю твᲂю̀ млⷭ҇ть . гⷤ .

На хвали́тѣхъ , стихѣ́ры . гла́съ , и҃ . поⷣ . Ѽ пресла́внᲂе чꙋ́дᲂ . Тебѣ̀ припа́дающе гжⷭ҇е , и҆ ᲂу҆ми́льнѡ кла́нѧющесѧ мо́лимъ тѧ .꙳ ра́дꙋисѧ бг҃ᲂбл҃же́ннаѧ влⷣчце ,꙳ мнᲂгᲂимени́таѧ дв҃ᲂ ,꙳ прⷪ҇рки прᲂѡ҆браже́наѧ че́стнѡ .꙳ в̾ тѧ́ бᲂ ꙗ҆́кѡ рᲂса̀ хрⷭ҇то́съ бг҃ъ сни́де ,꙳ и҆ рᲂдила̀ є҆сѝ бра́кꙋ неи҆скꙋ́сна чⷭ҇таѧ ,꙳ и҆ на рꙋкꙋ̀ пᲂнесѐ всѣ́хъ твᲂрца̀ и҆ гдⷭ҇а .꙳ є҆мꙋ́же ны́нѣ ѡ҆ на́съ мᲂли́сѧ ,꙳ сла́вѧщихъ вѣ́рнѡ твᲂегѡ̀ пᲂкро́ва пра́здникъ . двⷤа . Пᲂю́тъ тѧ дв҃ᲂ бцⷣе а҆́нг҃льстїи чи́ни ,꙳ и҆ сла́вѧтъ патрїа́рси сᲂ ст҃ли ,꙳ и҆ ст҃і́и а҆пⷭ҇ли ,꙳ ꙗ҆́кѡ мт҃ри бж҃їи че́стнѡ слꙋ́жатъ ти .꙳ ви́дѧще тѧ за́ миръ мл҃твꙋ твᲂрѧ́щꙋ ,꙳ къ сп҃сꙋ всѣ́хъ хрⷭ҇тꙋ̀ бг҃ꙋ .꙳ є҆мꙋ́же пᲂмᲂли́сѧ , сᲂхрани́ти гра́дъ и҆ лю́ди ,꙳ сла́вѧщихъ тѧ̀ вѣ́рнѡ ,꙳ и҆ твᲂегѡ̀ пᲂкро́ва пра́здникъ чтꙋ́щихъ . Па́че а҆арѡ́нѧ кїѡ́та ,꙳ всю́ тѧ бг҃ъ ѡ҆свѧти́лъ є҆́сть ,꙳ дх҃ᲂмъ бцⷣе ст҃ы́мъ .꙳ и҆ па́че со́лнечныхъ лꙋ́чь ,꙳ свᲂи́мъ свѣтѧ́щимсѧ а҆мфѡ́рᲂмъ ,꙳ ѡ҆свѣща́еши цр҃квь и҆ лю́ди , и҆ тмꙋ̀ грѣхо́въ на́шихъ ѿгᲂнѧ́еши .꙳ и҆збавлѧ́еши же ѿ бѣ́дъ и҆ скᲂрбе́й ,꙳ и҆́же вѣ́рᲂю чтꙋ́щихъ ,꙳ твᲂегѡ̀ честна́гѡ пᲂкро́ва пра́здникъ . сла́ва , и҆ нн҃ѣ . гла́съ , ѕ҃ . Ꙗ҆́кѡ ви́дѣ тебѐ пречꙋ́дныи а҆ндре́й на вᲂздꙋ́сѣ , сᲂ а҆рха́нг҃льскимъ мно́жествᲂмъ , сᲂ а҆пⷭ҇лы и҆ прᲂро́ки , и҆ мно́жествᲂмъ мч҃нкъ , сн҃ꙋ свᲂемꙋ̀ и҆ бг҃ꙋ на́шемꙋ ѡ҆́ градѣ и҆ ѡ҆́ людѣхъ мᲂлѧ́щꙋсѧ влⷣчце , и҆ честны́мъ свᲂи́мъ пᲂкро́вᲂмъ пᲂкрыва́ющꙋ . не ѡ҆скꙋдѣ́й и҆ ны́нѣ пречⷭ҇таѧ , спастѝ и҆зрѧ́днᲂе дᲂстᲂѧ́нїе твᲂегѡ̀ сн҃а . и҆́же пречестны́и пра́здникъ тво́й пра́зднꙋющихъ мнᲂгᲂпѣ́таѧ .

Славᲂсло́вїе вели́кᲂе , и҆ ѿпꙋ́стъ . На литꙋргі́и , бл҃же́нна , на и҃ . ѿ кано́на , пѣ́снь г҃ ѧ , и҆ ѕ҃ ѧ .

Пᲂ вхо́дѣ : трᲂпа́рь , пра́здникꙋ . сла́ва , и҆ ны́нѣ . кᲂнда́къ , пра́здникꙋ .

прᲂки́менъ , пѣ́снь бцⷣы . Вели́читъ дш҃а мᲂѧ̀ гдⷭ҇а , и҆ вᲂз̾ра́дᲂвасѧ дх҃ъ мо́й ѡ҆́ бз҃ѣ сп҃сѣ мᲂе́мъ . сти́хъ . ꙗ҆́кѡ призрѣ̀ на смире́нїе рабы̀ свᲂеѧ̀ , се́бᲂ ѿ ны́нѣ блажа́тъ мѧ всѝ ро́ди . а҆пⷭ҇лъ , къ є҆вре́ѡмъ . заⷱ҇ , т҃к . а҆ллилꙋ́їѧ . Слы́ши дщѝ и҆ ви́ждь , и҆ приклᲂнѝ ᲂу҆́хᲂ твᲂѐ . сти́хъ . лицꙋ̀ твᲂемꙋ̀ пᲂмо́лѧтсѧ бᲂга́тїи лю́дьстїи . є҆ѵⷢ҇а́лїе , ѿ лꙋкѝ . заⷱ҇ , н҃д . прича́стенъ , ча́шꙋ спасе́нїѧ прїимꙋ̀ , и҆ и҆́мѧ гдⷭ҇не призᲂвꙋ̀ .