НЕДѢ́ЛѦ ЦВѢТОНО́СНАѦ

въ сꙋбо́тꙋ ве́черъ ст҃а́гѡ и҆ пра́веднагᲂ ла́зарѧ .

На ма́лѣй вече́рни , стⷯры . гла́съ , д҃ . поⷣ . и҆́же зва́ныи свы́ше .= Нб҃ᲂ тебѣ̀ ще́дре прⷭ҇то́лъ є҆́сть ,꙳ землѧ́ же пᲂд̾но́жїе є҆́сть нᲂга́ма твᲂи́ма ,꙳ и҆ ка́кѡ ма́лыи ꙗ҆ре́мникъ но́ситъ тѧ ,꙳ хᲂтѣ́нїемъ смиренᲂмꙋ́дрїѧ на сегѡ̀ всѣ́дша .꙳ дѣ́ти же є҆вре́йскїѧ сїѐ ви́дѧще ,꙳ с̾ ва́їѧми и҆ вѣ́твьми тебѐ срѣта́хꙋ ,꙳ велегла́снѡ сп҃се зᲂвꙋ́ще ,꙳ бл҃гᲂслᲂве́нъ грѧды́и ,꙳ спастѝ ро́дъ чл҃ческїи ꙳ стрⷭ҇тїю крⷭ҇тнᲂю ,꙳ и҆ пе́рвыѧ клѧ́твы ꙳ раз̾дра́ти рꙋкᲂписа́нїе . =двⷤа . Пред̾разрꙋши́въ держа́вꙋ сме́ртнꙋю ,꙳ ла́зарѧ вᲂз̾дви́глъ є҆сѝ ,꙳ и҆ къ во́льнѣй и҆ды́и сме́рти сп҃се ,꙳ и҆ къ прᲂрᲂкᲂꙋбі́йственᲂмꙋ гра́дꙋ ,꙳ прихо́диши нᲂси́мъ ꙳ на жребѧ́ти кро́тцѣ и҆́же всѧ́ческихъ цр҃ь .꙳ и҆ прᲂстира́ютъ ри́зы тебѣ̀ лю́дїе и҆ сᲂбо́ри ,꙳ и҆ вѣ́тви нᲂсѧ́ще дѣ́ти вᲂпїю́тъ тебѣ̀ ,꙳ бл҃гᲂслᲂве́нъ грѧды́и спастѝ ро́дъ чл҃ческїи ,꙳ стра́стїю крⷭ҇тнᲂю ,꙳ и҆ дре́внїѧ клѧ́твы раз̾дра́ти рꙋкᲂписа́нїе . Бл҃гᲂхвале́нїемъ дѣте́й ,꙳ ꙗ҆́кᲂже вѣнце́мъ ѡ҆дѣ́ѧвсѧ кра́снымъ ,꙳ дᲂбро́тᲂю хрⷭ҇тѐ в̾ черто́зѣ стра́сти твᲂеѧ̀ пред̾грѧде́ши во́лею ,꙳ ᲂу҆до́брити без̾ѡ҆бра́зїе мᲂѐ .꙳ тѣ́мже зрѧ́ще бг҃ᲂꙋбі́ицы лю́дїе ,꙳ с̾ ва́їемъ пᲂю́щихъ тѧ ,꙳ крⷭ҇тъ и҆ кᲂпїѐ пред̾ ᲂу҆гᲂтᲂвлѧ́ютъ ᲂу҆би́ти тѧ .꙳ неразꙋмѣ́юще ,꙳ ꙗ҆́кѡ ла́зарѧ вᲂста́вилъ є҆сѝ сло́вᲂмъ ,꙳ мно́жае па́че сп҃се ,꙳ себѐ вᲂскр҃си́ши , лю́демъ твᲂи́мъ на вᲂскрⷭ҇нїе .

сла́ва . гла́съ , и҃ . Ѻ҆́бщее вᲂскрⷭ҇нїе ᲂу҆вѣрѧ́юща , вѣ́рнїи дне́сь ᲂу҆срѧ́щемъ хрⷭ҇та̀ цр҃ѧ с̾ ва́їемъ , разꙋ́мнѡ , ꙗ҆́кᲂже ѻ҆́трᲂцы вᲂпїю́ще , ѡ҆са́нна блгⷭ҇ве́нъ грѧды́и , пред̾разᲂри́ти сме́рть си́лᲂю крѣ́пкᲂю , и҆ вᲂскреси́ти ла́зарѧ милᲂсе́рдїемъ свᲂи́мъ . сла́ва ти и҆ хвале́нїе прише́дшемꙋ закла́тисѧ на́съ ра́ди . бг҃ᲂпᲂжре́ннаѧ па́сха , ꙗ҆́кѡ а҆́гнецъ , и҆ ꙗ҆́кѡ па́стырь и҆ и҆зба́витель , спᲂдо́би на́съ црⷭ҇твїѧ твᲂегѡ̀ гдⷭ҇и .

и҆ ны́нѣ . гла́съ , в҃ . Вхᲂдѧ́щꙋ ти гдⷭ҇и вᲂ ст҃ы́и гра́дъ , на жребѧ́ти сѣдѧ̀ , тща́шебᲂсѧ прїитѝ на́ стрⷭ҇ть , да сверши́ши зако́нъ и҆ пррⷪ҇ки . дѣ́ти же є҆вре́йскїѧ , вᲂскрⷭ҇нїѧ пᲂбѣ́дꙋ прᲂвᲂзвѣща́юще , срѣта́хꙋ тѧ̀ с̾ ва́їѧми и҆ вѣ́твьми , гл҃юще , бл҃гᲂслᲂве́нъ є҆сѝ сп҃се пᲂми́лꙋй на́съ .

На стихо́внѣ , стихѣ́ры . гла́съ , ѕ҃ . Є҆ди́нъ и҆́стиненъ ѻ҆ц҃ꙋ сы́и сло́ве , є҆стество̀ пе́рстнᲂ ѿ дв҃ы вᲂспрїѧ́тъ , и҆ бы́сть непрело́женъ , бл҃гᲂꙋтро́бїемъ чл҃кᲂлю́бче , сверше́нъ чл҃къ , бг҃ъ сы́и є҆стество́мъ . тѣ́мже тѧ вᲂспѣва́юще вѣ́рнѡ вᲂпїе́мъ , бл҃гᲂслᲂве́нъ є҆сѝ прише́дыи , и҆ па́ки грѧды́и .

сти́хъ : и҆зᲂꙋ́стъ младе́нецъ ,꙳ и҆с̾сꙋ́щихъ сᲂверши́лъ є҆сѝ хвалꙋ̀ . Да прᲂро́ческаѧ скᲂнча́ютсѧ прᲂрече́нїѧ , прише́лъ є҆сѝ на́ землю , и҆спᲂлнѧ́ѧй всѧ̀ вы́шнїѧ сла́вы , и҆ хвалы̀ сверша́ѧ ѿ младе́нецъ чл҃кᲂлю́бче , с̾ ва́їѧми срѣта́емый пре́же стрⷭ҇ти . с̾ ни́ми же и҆ мы̀ вѣ́рнѡ пᲂе́мъ , блгⷭ҇ве́нъ прише́дыи , и҆ па́ки грѧды́и .

сти́хъ : гдⷭ҇и гдⷭ҇ь на́шъ ,꙳ ꙗ҆́кѡ чꙋ́днᲂ и҆́мѧ твᲂѐ пᲂ все́й землѝ . Но́вᲂ не́бᲂ пᲂказа́сѧ жребѧ̀ , и҆ херꙋви́мъ и҆спᲂлнѧ́етъ дарᲂно́сїе . и҆́же бᲂ крилꙋ̀ вѣ́тренюю нᲂси́мыи , на сїѐ вᲂз̾сѣда́етъ челᲂвѣкᲂлю́бнѣ , да пе́рвагѡ без̾слᲂве́сїѧ на́съ и҆зба́витъ , бл҃гᲂслᲂве́нъ є҆сѝ сп҃се вѣ́рнѡ взыва́ющихъ .

сла́ва . гла́съ , и҃ . Что̀ заха́рїе вᲂпїе́ши сїѡ́нꙋ , кто̀ се́й рцы̀ на́мъ ; кі́й шꙋ́мъ настᲂѧ́щагѡ пра́здника ; цр҃ь і҆и҃левъ сн҃ъ дв҃дᲂвъ грѧде́тъ , и҆ ꙗ҆зы́ки сᲂзыва́етъ къ себѣ̀ . и҆ сегѡ̀ ра́ди весели́тсѧ сᲂ свᲂи́ми ча́ды сїѡ́нъ , и҆ вᲂпїе́тъ дх҃ᲂмъ , ѡ҆са́нна сн҃е давы́дᲂвъ . лю́дїе же веселѧ́тсѧ , и҆ вѣ́твьми пᲂмава́ютъ пред̾ ни́мъ . занѐ вᲂскр҃си́лъ є҆́сть вско́рѣ гла́сᲂмъ ᲂу҆ме́ршагᲂ ла́зарѧ . и҆ съ ни́мъ ра́дꙋютсѧ ꙗ҆́кѡ съ пᲂбѣди́телемъ тлѣ́нїѧ а҆́дᲂва .

и҆ ны́нѣ . гла́съ , то́йже . Весели́сѧ и҆ красꙋ́йсѧ дне́сь сїѡ́не , сѐ жени́хъ тво́й цр҃ь і҆зра́илевъ грѧде́тъ к̾ тебѣ̀ . ꙗ҆́кᲂже пррⷪ҇къ вᲂпїе́тъ ти , на жребѧ́ти сѣдѧ̀ ве́сь кро́тᲂкъ , непререкꙋ́ѧ нижѐ вᲂпїѧ̀ . черто́гъ ᲂу҆красѝ , и҆ прᲂсла́ви , и҆ вᲂзᲂпі́й є҆мꙋ̀ , ѡ҆са́нна сн҃е дв҃дᲂвъ , и҆ цр҃ю і҆и҃левъ . весели́сѧ и҆ ликꙋ́й , ꙗ҆́кѡ се́й є҆́сть хрⷭ҇то́съ і҆с҃ъ , и҆ се́й є҆́сть є҆ди́нъ бж҃їи месі́ѧ и҆ сн҃ъ . тᲂмꙋ̀ , всѝ вкꙋ́пѣ ꙗ҆́кѡ бг҃ꙋ ѡ҆са́нна вᲂзᲂпїе́мъ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , а҃ . Ѻ҆́бщее вᲂскрⷭ҇нїе пре́жде свᲂеѧ̀ стра́сти ᲂу҆вѣрѧ́ѧ , и҆з̾ ме́ртвыхъ вᲂз̾дви́глъ є҆сѝ ла́зарѧ хрⷭ҇тѐ бж҃е . тѣ́мже и҆ мы̀ ꙗ҆́кѡ ѻ҆́трᲂцы , пᲂбѣ́дныѧ ѻ҆́бразы нᲂсѧ́ще , тебѣ̀ пᲂбѣди́телю сме́рти вᲂпїе́мъ , ѡ҆са́нна въ вы́шнихъ , бл҃гᲂслᲂве́нъ грѧды́и во́ и҆мѧ гдⷭ҇не .

та́же , є҆ктенїѧ̀ ма́лаѧ . и҆ ѿпꙋ́стъ .

На вели́цѣй вече́рни , каѳи́сма , бл҃же́нъ мꙋ́жь , всѧ̀ . на гдⷭ҇и вᲂзва́хъ , стихѣ́ры , на́ і҃ . гла́съ , ѕ҃ . Дне́сь бл҃гᲂда́ть ст҃а́гѡ дх҃а на́съ сᲂбра̀ , и҆ всѝ взе́мше крⷭ҇тъ тво́й глаго́лемъ , бл҃гᲂслᲂве́нъ грѧды́и во́ и҆мѧ гдⷭ҇не , ѡ҆са́нна в̾ вы́шнихъ . двⷤа .

И҆мѣ́ѧи прⷭ҇то́лъ нб҃ᲂ , и҆ пᲂд̾но́жїе зе́млю , и҆́же бг҃а ѻ҆ц҃а сло́вᲂ и҆ сн҃ъ сᲂприснᲂсꙋ́щный , на жребѧ́ти без̾слᲂве́снѣ смири́сѧ , дне́сь в̾ виѳа́нїю прише́дъ . тѣ́мже дѣ́ти є҆вре́йскїѧ , вѣ́тви рꙋка́ми держа́ще , хвалѧ́хꙋ гла́сы , ѡ҆са́нна въ вы́шнихъ , блгⷭ҇ве́нъ грѧды́и , цр҃ь і҆и҃левъ . двⷤа .

Прїи́демъ и҆ мы̀ дне́сь ве́сь но́выи і҆зра́иль , ꙗ҆́же ѿ ꙗ҆зы́къ цр҃кви , съ прᲂро́кᲂмъ заха́рїею вᲂзᲂпїе́мъ , ра́дꙋисѧ ѕѣлѡ̀ дщѝ сїѡ́нᲂва , прᲂпᲂвѣ́дꙋй дщѝ і҆єрⷭ҇ли́мᲂва , ꙗ҆́кѡ сѐ цр҃ь тво́й грѧде́тъ ти кро́тᲂкъ и҆ спаса́ѧи , и҆ всѣ́дыи на жребѧ̀ ѻ҆́сле сы́на ꙗ҆ре́мнича . да пра́зднꙋемъ ꙗ҆́кѡ дѣ́ти вѣ́тви рꙋка́ми держа́ще , и҆ вᲂсхва́лимъ , ѡ҆са́нна в̾ вы́шнихъ , бл҃гᲂслᲂве́нъ грѧды́и цр҃ь і҆зра́илевъ . двⷤа .

Честно́е вᲂскрⷭ҇нїе свᲂѐ прᲂѡ҆бразꙋ́ѧ на́мъ , вᲂз̾дви́же є҆сѝ ᲂу҆ме́ршагᲂ пᲂвелѣ́нїемъ сѝ , без̾дꙋ́шнагᲂ ла́зарѧ дрꙋ́га бла́же , и҆́з̾ грᲂба четверᲂдне́вна смердѧ́ща . тѣ́мже и҆ на жребѧ̀ всѣ́дъ ѻ҆бра́знᲂ ꙗ҆́кᲂже на кᲂлесни́цѣ нᲂси́мь , ꙗ҆зы́ки ᲂу҆крᲂтѣва́ѧ сп҃се . тᲂгда̀ и҆ хвале́нїе принесе́ти вᲂз̾лю́бленный і҆зра́иль , и҆зᲂꙋ́стъ с̾сꙋ́щихъ младе́нецъ незло́бивыхъ , зрѧ́щихъ тѧ̀ хрⷭ҇тѐ , вхᲂдѧ́ща вᲂ ст҃ы́и гра́дъ , пре́жде шестѝ дне́й па́схи . двⷤа .

Пре́жде шестѝ дне́й па́схи прїи́де і҆с҃ъ в̾ виѳа́нїю , и҆ пристꙋпи́ша к̾ немꙋ̀ ᲂу҆ченицы̀ є҆гѡ̀ , гл҃юще є҆мꙋ̀ , гдⷭ҇и гдѣ̀ хо́щеши ᲂу҆гᲂто́ваемъ тѝ ꙗ҆́сти па́схꙋ ; ѻ҆́нъ же пᲂсла̀ и҆́хъ и҆ди́те в̾ пре́днюю ве́сь , и҆ ѡ҆брѧ́щете чл҃ка , в̾ скꙋде́ли во́дꙋ нᲂсѧ́ща , пᲂслѣ́дꙋйте є҆мꙋ̀ , и҆ до́мꙋ влⷣцѣ рцы́те , ᲂу҆чи́тель глаго́летъ , ᲂу҆ тебѐ сᲂтвᲂрю̀ па́схꙋ сᲂ ᲂу҆ченикѝ мᲂи́ми . двⷤа .

сла́ва , и҆ ны́нѣ . Дне́сь бл҃гᲂда́ть ст҃а́гѡ дх҃а на́съ сᲂбра̀ , и҆ всѝ взе́мше крⷭ҇тъ тво́й глаго́лемъ , бл҃гᲂслᲂве́нъ грѧды́и во́ и҆мѧ гдⷭ҇не , ѡ҆са́нна в̾ вы́шнихъ .

вы́хᲂдъ . свѣ́те ти́хїи .= прᲂки́менъ , ѱл҃о́мъ дв҃до́въ . гдⷭ҇ь вᲂцр҃и́сѧ , в̾ лѣ́пᲂтꙋсѧ ѡ҆блечѐ . =сти́хъ , а҃ . ѡ҆блече́сѧ гдⷭ҇ь в̾ си́лꙋ и҆ препᲂѧ́сасѧ . сти́хъ , в҃ . и҆́бᲂ ᲂу҆твердѝ вселе́ннꙋю ꙗ҆́же непᲂдви́житсѧ . сти́хъ , г҃ . до́мꙋ твᲂемꙋ̀ пᲂдᲂба́етъ ст҃ы́нѧ гдⷭ҇и в̾ дᲂлгᲂтꙋ̀ дні́й . сти́хъ , д҃ . гдⷭ҇ь вᲂцр҃и́сѧ , в̾ лѣ́пᲂтꙋсѧ ѡ҆блечѐ .

Ѿ= бытїѧ̀ , чте́нїе .=

Призва̀ і҆а́кѡвъ сн҃ы свᲂѧ̀ , и҆ речѐ сᲂбери́тесѧ да скажꙋ̀ ва́мъ что̀ срѧ́щетъ вы на пᲂслѣ́днїѧ днѝ . сни́дитесѧ и҆ ᲂу҆слы́шите сн҃ᲂве і҆а́кѡвли , ᲂу҆слꙋ́шите і҆и҃лѧ ѻ҆ц҃а ва́шегᲂ . і҆ꙋ́дᲂ , тебѐ пᲂхвали́ша бра́тїѧ твᲂѧ̀ . рꙋ́цѣ твᲂѝ на плещꙋ̀ вра́гъ твᲂи́хъ , пᲂкло́нѧтсѧ тебѣ̀ сн҃ᲂве ѻ҆ц҃а твᲂегѡ̀ . ски́менъ льво́въ і҆ꙋ́да ѿ лѣ́тᲂрасли сн҃е мо́й взы́де , вᲂзле́гъ пᲂспа̀ ꙗ҆́кѡ ле́въ , и҆ ꙗ҆́кѡ ски́менъ . кто̀ вᲂздви́гнетъ є҆гѡ̀ ; не ѡ҆скꙋдѣ́етъ кн҃зь ѿ і҆ꙋ́ды , и҆ во́ждь ѿстегнꙋ̀ є҆гѡ̀ , до́ндеже ᲂу҆́бѡ прїи́детъ є҆мꙋ́же ᲂу҆гᲂто́ванᲂ є҆́сть , и҆ то́й ча́ѧнїе ꙗ҆зы́кѡмъ . привѧза́ѧ лᲂзѣ̀ жребѧ̀ свᲂѐ , и҆ ло́зницѣ жребца̀ ѻ҆слѧ́те свᲂегѡ̀ . и҆ и҆спере́тъ вино́мъ ѻ҆де́ждꙋ свᲂю̀ , и҆ в̾ крᲂвѝ гро́здᲂвѣ ри́зы свᲂѧ̀ . радᲂстᲂтво́рны ѻ҆́чи є҆гѡ̀ ѿ вина̀ , и҆ бѣлы̀ зꙋ́бы є҆гѡ̀ па́че млека̀ .

Ѿ прⷪ҇рчества сᲂфо́нїева , чте́нїе .

Та́кѡ гл҃етъ гдⷭ҇ь , ра́дꙋисѧ ѕѣлѡ̀ дщѝ сїѡ́нᲂва , прᲂпᲂвѣ́дꙋй дщѝ і҆єрⷭ҇ли́мᲂва . вᲂз̾весели́сѧ и҆ красꙋ́йсѧ ѿ всегѡ̀ срⷣца твᲂегѡ̀ дщѝ і҆єрⷭ҇ли́мᲂва , ѿѧ́тъ гдⷭ҇ь непра́вды твᲂѧ̀ , и҆ и҆зба́вилъ тѧ є҆́сть и҆з̾ рꙋкѝ вра́гъ твᲂи́хъ . вᲂцр҃и́тсѧ гдⷭ҇ь пᲂсредѣ̀ тебѐ , и҆ не ᲂу҆́зриши ѕла̀ к̾ тᲂмꙋ̀ . во́ времѧ ѻ҆́нᲂ речѐ гдⷭ҇ь і҆єрⷭ҇ли́мꙋ , дерза́й сїѡ́не , да не ѡ҆слабѣ́ютъ рꙋ́цѣ твᲂѝ , гдⷭ҇ь бг҃ъ тво́й в̾ тебѣ̀ си́ленъ спасти́ тѧ . наведе́тъ на тѧ̀ весе́лїе и҆ ѡ҆бнᲂви́тъ тѧ вᲂз̾любле́нїемъ свᲂи́мъ , и҆ вᲂз̾весели́тсѧ ѡ҆ тебѣ̀ в̾ красᲂтѣ̀ , ꙗ҆́кѡ в̾ де́нь пра́здника , и҆ сᲂбере́тъ сᲂкрꙋше́ныхъ . го́ре , кто̀ прїи́метъ натѧ̀ пᲂнᲂше́нїе . сѐ а҆́зъ твᲂрю̀ въ тебѣ̀ менѐ ра́ди , гл҃етъ гдⷭ҇ь , во́ времѧ ѻ҆́нᲂ спасꙋ̀ сᲂтре́ныѧ , и҆ ѿринᲂве́ныѧ вᲂспрїимꙋ̀ , и҆ пᲂлᲂжꙋ̀ и҆́хъ в̾ пᲂхвалꙋ̀ , и҆ и҆мени́ты пᲂ все́й землѝ .

Ѿ прⷪ҇рчества заха́рїина , чте́нїе .

Та́кѡ гл҃етъ гдⷭ҇ь , ра́дꙋисѧ ѕѣлѡ̀ дщѝ сїѡ́нѧ , прᲂпᲂвѣ́дꙋй дщѝ і҆єрⷭ҇ли́млѧ . сѐ цр҃ь тво́й грѧде́тъ ти пра́веденъ и҆ спаса́ѧи . са́мъ кро́тᲂкъ , и҆ всѣ́дъ на пᲂдъѧре́мника и҆ жребца̀ ю҆́на . и҆ пᲂгꙋби́тъ ѻ҆рꙋ́жїе и҆з̾ є҆фре́ма , и҆ ко́ни и҆з̾ і҆єрⷭ҇ли́ма , и҆ пᲂтреби́тсѧ лꙋ́къ бра́нныи и҆ мно́жествᲂ и҆̀ . и҆ рече́тъ ми́ръ ꙗ҆зы́кѡмъ , и҆ ѡ҆блада́етъ вᲂда́ми ѿ́ мᲂрѧ и҆ до́ мᲂрѧ , и҆ ѿ рѣ́къ да́же и҆ дᲂ и҆схо́дищь землѝ . и҆ ты̀ в̾ кро́ви завѣ́та твᲂегѡ̀ , и҆спꙋсти́лъ є҆сѝ ᲂу҆́жники твᲂѧ̀ и҆́з̾ рᲂва не и҆мꙋ́ща вᲂды̀ . сѧ́дете в̾ тверды́ни ю҆́жницы со́нмища . и҆ в̾ мѣ́стᲂ є҆ди́нагѡ днѐ прише́льствїѧ твᲂегѡ̀ , сꙋгꙋ́ба вᲂз̾да́мъ тебѣ̀ . зане́же напрѧго́хъ тѧ себѣ̀ і҆ꙋ́дᲂ , и҆ ꙗ҆́кѡ лꙋ́къ бра́нныи и҆спо́лнихъ є҆фре́ма . и҆ вᲂз̾дви́гнꙋ ча́да твᲂѧ̀ сїѡ́не , на ча́да є҆́ллинскаѧ . и҆ ѡ҆сѧжꙋ́ тѧ , ꙗ҆́кѡ ѻ҆рꙋ́жїе хра́бра . и҆ гдⷭ҇ь ꙗ҆ви́тсѧ на ни́хъ , и҆ и҆зы́детъ ꙗ҆́кѡ мо́лнїѧ стрѣла̀ є҆гѡ̀ . и҆ гдⷭ҇ь бг҃ъ вседержи́тель трꙋбо́ю вᲂстрꙋ́битъ , и҆ по́йдетъ в̾ шꙋ́мѣ преще́нїѧ свᲂегѡ̀ , и҆ гдⷭ҇ь вседержи́тель защи́титъ и҆́хъ .

На литі́и , стихѣ́ры , гла́съ , а҃ . Всест҃ы́и дх҃ъ и҆́же а҆пⷭ҇лы наꙋчи́выи глаго́лати , и҆нѣ́ми стра́нными ꙗ҆зы́ки , то́й и҆ дѣ́темъ є҆вре́йскимъ не и҆скꙋсᲂзло́бнымъ , пᲂвелѣва́етъ зва́ти , ѡ҆са́нна в̾ вы́шнихъ , бл҃гᲂслᲂве́нъ грѧды́и цр҃ь і҆и҃левъ . И҆́же сᲂбезнача́льныи , и҆ сᲂприснᲂсꙋ́щныи сн҃ъ и҆ сло́вᲂ ѻ҆́ч҃ее , на жребѧ́ти без̾слᲂве́снѣ сѣдѧ̀ , прїи́де дне́сь во́ градъ і҆єрⷭ҇ли́мъ . є҆го́же херꙋви́ми со́ страхᲂмъ и҆ тре́петᲂмъ зрѣ́ти немо́гꙋтъ , дѣ́ти вᲂсхвали́ша с̾ ва́їѧмъ и҆ вѣ́твьми , хвалꙋ̀ та́йнꙋ вᲂспѣва́юще , ѡ҆са́нна в̾ вы́шнихъ , ѡ҆са́нна сн҃е дв҃дᲂвъ , прише́дыи спастѝ ѿ ле́сти ве́сь ро́дъ на́шъ . Пре́жде шестѝ дне́й па́схи , гла́съ тво́й гдⷭ҇и ᲂу҆слы́шасѧ вᲂ глꙋбина́хъ а҆́дᲂвѣхъ . тѣ́мже и҆ ла́зарѧ четверᲂдне́вна вᲂздви́глъ є҆сѝ . дѣ́ти же є҆вре́йскїѧ зᲂвѧ́хꙋ , ѡ҆са́нна бж҃е на́шъ сла́ва тебѣ̀ . гла́съ , в҃ . Вхᲂдѧ́щꙋ ти гдⷭ҇и вᲂ ст҃ы́и гра́дъ , на жребѧ́ти сѣдѧ̀ , тща́шебᲂсѧ прїитѝ на́ страсть , да сᲂверши́ши зако́нъ и҆ прⷪ҇рки . дѣ́ти же є҆вре́йскїѧ вᲂскрⷭ҇нїѧ пᲂбѣ́дꙋ прᲂвᲂзвѣща́юще , срѣта́хꙋ тѧ с̾ вѣ́твьми и҆ ва́їѧми гл҃юще , бл҃гᲂслᲂве́нъ є҆сѝ сп҃се пᲂми́лꙋй на́съ . Сла́ва тебѣ̀ хрⷭ҇тѐ , и҆́же в̾ вы́шнихъ сѣдѧ́щемꙋ на прⷭ҇то́лѣ , и҆ ны́нѣ ча́емᲂмꙋ съ чⷭ҇тны́мъ твᲂи́мъ крⷭ҇то́мъ . тѣ́мже весели́тсѧ дщѝ сїѡ́нᲂва , ра́дꙋютсѧ ꙗ҆зы́цы земні́и , вѣ́тви держа́тъ дѣ́ти , ри́зы же ᲂу҆ченицы̀ , и҆ є҆ди́нᲂ ѿ всѣ́хъ слы́шашесѧ сᲂгла́сїе , бл҃гᲂслᲂве́нъ є҆сѝ сп҃се , пᲂми́лꙋй на́съ .

сла́ва , и҆ ны́нѣ . гла́съ , г҃ . Пре́жде шестѝ дне́й бытїѧ̀ па́схи , прїи́де і҆с҃ъ в̾ виѳа́нїю , вᲂзва́ти ᲂу҆ме́рша четверᲂдне́вна ла́зарѧ , и҆ прᲂпᲂвѣ́дати вᲂскрⷭ҇нїе . срѣто́ша же є҆гѡ̀ жены̀ ма́рѳа и҆ марі́ѧ сестрѣ̀ ла́заревѣ , вᲂпїю́ще к̾ немꙋ̀ , гдⷭ҇и а҆́ще бы бы́лъ здѣ̀ , не бы̀ ᲂу҆́мерлъ бра́тъ на́ю . и҆ гл҃а к̾ ни́ма , непред̾реко́хъ ли ва́ма , вѣ́рꙋѧй в̾ мѧ̀ а҆́ще и҆ ᲂу҆́мретъ , жи́въ бꙋ́детъ . пᲂкажи́те ми гдѣ̀ пᲂлᲂжи́сте є҆гѡ̀ ; и҆ вᲂзᲂпѝ к̾ немꙋ̀ зижди́тель всѣ́хъ , ла́заре грѧдѝ во́нъ .

На стихо́внѣ , стⷯры . гла́съ , и҃ . Ра́дꙋисѧ и҆ весели́сѧ гра́де сїѡ́не , красꙋ́йсѧ и҆ ра́дꙋисѧ цр҃кви бж҃їѧ , се́бᲂ цр҃ь тво́й грѧде́тъ пра́вдᲂю , на жребѧ́ти сѣдѧ̀ , ѿ дѣте́й вᲂсхвалѧ́емыи ѡ҆са́нна въ вы́шнихъ , бл҃гᲂслᲂве́нъ є҆сѝ , и҆мѣ́ѧи мно́жествᲂ щедро́тъ , пᲂми́лꙋй на́съ .

сти́хъ : и҆зᲂꙋ́стъ младе́нецъ ,꙳ и҆с̾сꙋ́щихъ сᲂверши́лъ є҆сѝ хвалꙋ̀ . Прїи́де і҆с҃ъ дне́сь во́ градъ і҆єрⷭ҇ли́мъ , и҆спо́лнити писа́нїе , и҆ всѝ вᲂспрїе́мше въ рꙋка́хъ ва́їи , ри́зы же пᲂстила́хꙋ є҆мꙋ̀ , вѣ́дꙋще ꙗ҆́кѡ то́й є҆́сть бг҃ъ на́шъ . є҆мꙋ́же херꙋви́ми вᲂпїю́тъ непреста́ннѡ . ѡ҆са́нна в̾ вы́шнихъ , блгⷭ҇ве́нъ є҆сѝ и҆мѣ́ѧи мно́жествᲂ щедро́тъ , пᲂми́лꙋй на́съ .

сти́хъ : гдⷭ҇и гдⷭ҇ь на́шъ ,꙳ ꙗ҆́кѡ чꙋ́днᲂ и҆́мѧ твᲂѐ пᲂ все́й землѝ . И҆́же на херꙋви́мѣхъ нᲂси́мый , и҆ пѣва́емыи ѿ серафи́мъ , всѣ́де на жребѧ̀ давы́дски бла́же , и҆ дѣ́ти тѧ вᲂспѣва́хꙋ бг҃ᲂлѣ́пнѡ , і҆ꙋде́и же хꙋ́лѧхꙋ без̾зако́ннѡ . несѣда́нїе бᲂ ꙗ҆зы́къ , сѣда́лище жребца̀ прᲂѡ҆бразᲂва́ше , и҆з̾ невѣ́рїѧ въ вѣ́рꙋ претварѧ́емыхъ . сла́ва тебѣ̀ хрⷭ҇тѐ , є҆ди́не ми́лᲂстиве и҆ чл҃кᲂлю́бче .

сла́ва . гла́съ , ѕ҃ . Дне́сь бл҃гᲂда́ть ст҃а́гѡ дх҃а на́съ сᲂбра̀ , и҆ всѝ взе́мше крⷭ҇тъ тво́й глаго́лемъ , бл҃гᲂслᲂве́нъ грѧды́и во́ и҆мѧ гдⷭ҇не , ѡ҆са́нна в̾ вы́шнихъ .

и҆ ны́нѣ . гла́съ , то́йже . Дне́сь бл҃гᲂда́ть ст҃а́гѡ дх҃а на́съ сᲂбра̀ , и҆ всѝ взе́мше крⷭ҇тъ тво́й глаго́лемъ , бл҃гᲂслᲂве́нъ грѧды́и во́ и҆мѧ гдⷭ҇не , ѡ҆са́нна в̾ вы́шнихъ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , а҃ . Ѻ҆́бщее вᲂскрⷭ҇нїе пре́жде свᲂеѧ̀ стра́сти ᲂу҆вѣрѧ́ѧ , и҆з̾ ме́ртвыхъ вᲂз̾дви́глъ є҆сѝ ла́зарѧ хрⷭ҇тѐ бж҃е . тѣ́мже и҆ мы̀ ꙗ҆́кѡ ѻ҆́трᲂцы , пᲂбѣ́дныѧ ѻ҆́бразы нᲂсѧ́ще , тебѣ̀ пᲂбѣди́телю сме́рти вᲂпїе́мъ , ѡ҆са́нна в̾ вы́шнихъ , блгⷭ҇ве́нъ грѧды́и во́ и҆мѧ гдⷭ҇не . вⷤ . сла́ва , и҆ ны́нѣ . гла́съ , д҃ . Спᲂгре́бшесѧ тебѣ̀ кр҃ще́нїемъ хрⷭ҇тѐ бж҃е на́шъ , без̾сме́ртныѧ жи́зни спᲂдо́бихᲂмсѧ вᲂскрⷭ҇нїемъ твᲂи́мъ , и҆ вᲂспѣва́юще зᲂве́мъ , бл҃гᲂслᲂве́нъ грѧды́и во́ и҆мѧ гдⷭ҇не .

Въ нлⷣю цвѣтᲂно́сїѧ . на ᲂу҆́трени , на бг҃ъ гдⷭ҇ь , трᲂпарѝ . Ѻ҆́бщее вᲂскрⷭ҇нїе . двⷤа . сла́ва , и҆ ны́нѣ . Спᲂгре́бшесѧ тебѣ̀ кр҃ще́нїемъ . Пᲂ а҃ , стихᲂло́гїи , сѣда́ленъ . гла́съ , д҃ . Съ вѣ́твьми ᲂу҆́мнѡ ѡ҆чи́щени дш҃а́ми , ꙗ҆́кᲂже дѣ́ти хрⷭ҇та̀ вᲂсхва́лимъ вѣ́рнѡ , велегла́снѡ зᲂвꙋ́ще ꙗ҆́кѡ влⷣцѣ , бл҃гᲂслᲂве́нъ є҆сѝ сп҃се в̾ ми́ръ прише́дыи , спастѝ а҆да́ма ѿ дре́внїѧ клѧ́твы . дх҃о́внѡ бы́въ чл҃кᲂлю́бче но́выи а҆да́мъ , ꙗ҆́кᲂже бл҃гᲂвᲂли́лъ є҆сѝ . и҆́же всѧ̀ сло́ве к̾ пᲂле́знᲂмꙋ ᲂу҆стро́ивыи сла́ва тебѣ̀ . сла́ва , и҆ ны́нѣ , то́йже .

Пᲂ в҃ , стихᲂло́гїи , сѣда́ленъ . гла́съ , д҃ . На́д̾ дрꙋгᲂмъ си хрⷭ҇тѐ сле́зы и҆стᲂчи́въ та́йнѡ , и҆ вᲂз̾дви́же и҆з̾ ме́ртвыхъ ла́зарѧ лежа́ща ме́ртва . ѡ҆ не́мже милᲂсе́рдїе пᲂказа́лъ є҆сѝ чл҃кᲂлю́бче . ᲂу҆вѣ́дѣвше же твᲂѐ прише́ствїе і҆с҃е , мно́жествᲂ младе́нецъ и҆зыдо́ша дне́сь , в̾ рꙋка́хъ ва́їи держа́ще ѡ҆са́нна тебѣ̀ взыва́хꙋ . и҆́же тᲂгда̀ си́мъ свѣ́тъ тво́й вᲂсїѧ́выи прᲂсѣтѝ дш҃а на́ша .= сла́ва , и҆ ны́нѣ . гла́съ , и҃ . И҆́=же на престо́лѣ херꙋви́мстѣ , и҆ на жребѧ̀ всѣ́дыи на́съ ра́ди , и҆ к̾ стра́сти во́льнѣй дᲂсти́гъ , дне́сь слы́шитъ дѣте́й вᲂз̾глаша́ющихъ ѡ҆са́нна , и҆ наро́дᲂвъ вᲂпїю́щихъ сн҃е дв҃дᲂвъ , ᲂу҆скᲂрѝ и҆ спасѝ и҆́хже со́здалъ є҆сѝ , бл҃гᲂслᲂве́ныи і҆с҃е . на сїе́ бᲂ прише́лъ є҆сѝ да разꙋмѣ́емъ сла́вꙋ твᲂю̀ .

Пᲂ пᲂлїєлеѡ́сѣ , сѣда́ленъ . гла́съ , и҃ . Четверᲂдне́внагᲂ ла́зарѧ ѿ́ грᲂба вᲂскр҃си́въ гдⷭ҇и , всѣ́хъ наꙋчи́лъ є҆сѝ вᲂпи́ти тебѣ̀ с̾ ва́їѧми и҆ вѣ́твьми . бл҃гᲂслᲂве́нъ є҆сѝ хрⷭ҇тѐ грѧды́и во́ и҆мѧ гдⷭ҇не . сла́ва , и҆ ны́нѣ , то́йже .

степе́нна , д҃ гᲂ гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . И҆зᲂꙋ́стъ млⷣнцъ , и҆ с̾сꙋ́щихъ сᲂверши́лъ є҆сѝ хвалꙋ̀ .= сти́хъ . гдⷭ҇и гдⷭ҇ь на́шъ , ꙗ҆́кѡ чꙋ́днᲂ и҆́мѧ твᲂѐ пᲂ все́й землѝ . всѧ́кᲂ дыха́нїе . є҆ѵⷢ҇а́лїе , ѿ матѳе́ѧ . заⷱ҇ , п҃г . вᲂскрⷭ҇нїе хрⷭ҇то́вᲂ , неглаго́лемъ . =ѱало́мъ , н҃ . =Та́же , і҆єре́й взе́мъ кади́лᲂ кади́тъ крⷭ҇тᲂѡ҆бра́знᲂ . гл҃ѧ мл҃твꙋ над̾ ве́рбᲂю . Г=дⷭ҇и бж҃е на́шъ вседержи́телю , сказа́выи ѻ҆́бразъ цр҃ко́вныи кᲂвче́гᲂмъ , при пра́ведницѣ и҆ ᲂу҆го́дницѣ твᲂе́мъ но́и , и҆ прише́ствїе ст҃а́гѡ твᲂегѡ̀ дх҃а прᲂвᲂзвѣсти́лъ є҆сѝ го́лꙋбемъ , сꙋче́цъ ма́сличный принᲂсѧ́щимъ . и҆ сі́й ѻ҆́бразъ ѻ҆́трᲂцы є҆вре́йстїи скᲂнча́ша , є҆гда̀ съ вѣ́твьми ма́сличными и҆ ва́їѧми , тебѐ срѣто́ша и҆ зᲂвꙋ́ще , и҆ глаго́люще , ѡ҆са́нна в̾ вы́шнихъ , бл҃гᲂслᲂве́нъ грѧды́и во́ и҆мѧ гдⷭ҇не . сᲂгла́снѡ тѝ и҆ мы̀ вᲂпїе́мъ и҆ гл҃емъ , ѡ҆са́нна бл҃гᲂслᲂве́нъ прише́дыи сꙋди́ти пра́вдᲂю , сᲂ ѻ҆ц҃е́мъ и҆ сᲂ ст҃ы́мъ дх҃ᲂмъ , ны́нѣ и҆ при́снѡ и҆ во́ вѣки вѣко́мъ , а҆ми́нь .

є҆гда́же цѣлꙋ́ютъ бра́тїѧ є҆ѵⷢ҇а́лїе , раздава́етъ і҆єре́й ва́їѧ .

сла́ва . мᲂли́твъ ра́ди а҆пⷭ҇лъ , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

и҆ ны́нѣ . мᲂли́твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

Пᲂми́лꙋй мѧ бж҃е пᲂ вели́цѣй млⷭ҇ти твᲂе́й пᲂ мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , ѕ҃ . Дне́сь бл҃гᲂда́ть ст҃а́гѡ дх҃а на́съ сᲂбра̀ , и҆ всѝ взе́мше крⷭ҇тъ тво́й глаго́лемъ , бл҃гᲂслᲂве́нъ грѧды́и во́ и҆мѧ гдⷭ҇не , ѡ҆са́нна в̾ вы́шнихъ .

Кано́нъ , і҆рмо́съ пᲂ два́жды , трᲂпарѝ , на в҃і . =Твᲂре́нїе кᲂзмы̀ мни́ха . гла́съ , д҃ . пѣ́снь , а҃ . і҆рмо́съ . Ꙗ҆ви́шасѧ и҆сто́чницы бе́здны , ю҆́гꙋ неприча́стни , и҆ ѿкры́шасѧ мо́рю вᲂлнѧ́щꙋсѧ ѡ҆снᲂва́нїѧ бꙋ́рею , ма́нїемъ бᲂ запретѝ є҆мꙋ̀ , и҆зрѧ́дныѧ лю́ди спасѐ пᲂю́ща , пᲂбѣ́днꙋю пѣ́снь тѝ гдⷭ҇и . =запѣ́въ : Сла́ва тебѣ̀ бж҃е на́шъ , сла́ва тебѣ̀ . И҆зᲂꙋ́стъ младе́нецъ неѕло́бивыхъ и҆ ссꙋ́щихъ , хвалꙋ̀ твᲂи́хъ ра́бъ сверши́лъ є҆сѝ , разрꙋши́ти сꙋпᲂста́та , и҆ ѿмсти́ти стрⷭ҇тїю крⷭ҇та̀ , паде́нїе дре́внѧгѡ а҆да́ма , дре́вᲂмъ же вᲂз̾дви́гнꙋти сего̀ пᲂю́ща , пᲂбѣ́днꙋю пѣ́снь ти гдⷭ҇и . Пѣ́нїе цр҃кви прпⷣбныхъ , живꙋ́щемꙋ в̾ сїѡ́нѣ , тебѣ̀ хрⷭ҇тѐ прино́ситъ , ѡ҆ тебѣ́ же і҆и҃ль твᲂрцѣ̀ свᲂе́мъ ра́дꙋетсѧ . и҆ го́ры ꙗ҆зы́цы прᲂти́внїи зако́нꙋ и҆ каменᲂсерде́чнїи , ѿ лица́ ти вᲂз̾весели́шасѧ , и҆ пᲂю́ще пᲂбѣ́днꙋю пѣ́снь ти гдⷭ҇и .

катава́сїѧ : Ꙗ҆ви́шасѧ и҆сто́чницы .

пѣ́снь , г҃ . і҆рмо́съ . Тᲂча́щїи несѣко́мыи велѣ́нїемъ твᲂи́мъ , тве́рдыи сса́вше ка́мень і҆и҃льстїи лю́дїе . ка́мень же ты̀ є҆сѝ хрⷭ҇тѐ и҆ жи́знь , на не́м̾же ᲂу҆тверже́на бы́сть цр҃кви зᲂвꙋ́щи , ѡ҆са́нна бл҃гᲂслᲂве́нъ є҆сѝ грѧды́и . Мертвеца̀ четверᲂдне́вна пᲂвелѣ́нїемъ твᲂи́мъ , и҆з̾ ме́ртвыхъ съ тре́петᲂмъ а҆́дъ и҆спꙋстѝ ла́зарѧ . вᲂскрⷭ҇нїе бᲂ ты̀ є҆сѝ хрⷭ҇тѐ и҆ жи́знь , ѡ҆ не́мже ᲂу҆тверже́на бы́сть цр҃кви зᲂвꙋ́щи , ѡ҆са́нна бл҃гᲂслᲂве́нъ є҆сѝ грѧды́и . Вᲂспо́йте лю́дїе бг҃ᲂлѣ́пнѡ в̾ сїѡ́нѣ , и҆ мл҃твꙋ вᲂз̾дади́те хрⷭ҇тꙋ̀ вᲂ і҆єрⷭ҇ли́мѣ , са́мъ грѧде́тъ вᲂ сла́вѣ сᲂ ѻ҆́бластїю , ѡ҆ не́мже ᲂу҆тверди́сѧ цр҃кви зᲂвꙋ́щи , ѡ҆са́нна бл҃гᲂслᲂве́нъ є҆сѝ грѧды́и .

катава́сїѧ : Тᲂча́щїи несѣко́мыи .

ѵ҆пако́й , гла́съ , и҃ . Съ вѣ́твьми вᲂспѣ́вше пе́рвѣе , пᲂслѣдѝ с̾ древесы̀ ꙗ҆́ша неразꙋ́мивїи і҆ꙋде́е хрⷭ҇та̀ бг҃а . мы́ же вѣ́рᲂю непрело́жнᲂю прⷭ҇нѡ пᲂчита́юще , ꙗ҆́кѡ бл҃гᲂда́телѧ , всегда̀ пᲂю́ще вᲂпїе́мъ є҆мꙋ̀ , бл҃гᲂслᲂве́нъ є҆сѝ грѧды́и а҆да́ма вᲂз̾дви́гнꙋти .

пѣ́снь , д҃ . і҆рмо́съ . Хрⷭ҇то́съ грѧды́и ꙗ҆́вственнᲂ бг҃ъ на́шъ , прїи́детъ и҆ незаме́длитъ , ѿ гᲂры̀ присѣ́нныѧ ча́сты , дв҃цы ражда́ющїѧ без̾ мꙋ́жа , прᲂро́къ дре́вле речѐ . тѣ́мъ всѝ вᲂпїе́мъ , сла́ва си́лѣ твᲂе́й гдⷭ҇и . Да ка́плютъ ѻ҆́блацы весе́лїе крѣ́пкᲂ , на ма́сличнѣй гᲂрѣ̀ . и҆ всѝ хо́лми , и҆ древа̀ дꙋбра́внаѧ да вᲂспᲂю́тъ хрⷭ҇та̀ , хва́лѧще с̾ ꙗ҆зы́ки . и҆ тᲂмꙋ̀ всѝ лю́дїе вᲂпїе́мъ , сла́ва си́лѣ твᲂе́й гдⷭ҇и . Въ крѣ́пᲂсти црⷭ҇твꙋѧи вѣ́чныи гдⷭ҇ь , ѡ҆бᲂлче́нъ прїи́детъ . сегѡ̀ ᲂу҆́бѡ красᲂты́ же и҆ сла́вы , несказа́ннᲂ є҆́сть бл҃гᲂлѣ́пїе в̾ сїѡ́нѣ . тѣ́мже всѝ вᲂпїе́мъ , сла́ва си́лѣ твᲂе́й гдⷭ҇и . Пѧ́дїю и҆змѣ́ривыи не́бᲂ , дла́нїю же зе́млю , гдⷭ҇ь прїи́де . сїѡ́на бᲂ и҆збра̀ , в̾ то́мъ жи́ти и҆ цр҃ьствᲂвати и҆зво́ли . и҆ вᲂз̾любѝ лю́ди вѣ́рнѡ пᲂю́щїѧ , сла́ва си́лѣ твᲂе́й гдⷭ҇и .

катава́сїѧ : Хрⷭ҇то́съ грѧды́и .

пѣ́снь , є҃ . і҆рмо́съ . На сїѡ́нъ го́рꙋ взы́ди , бл҃гᲂвѣствꙋ́ѧ и҆ і҆єрⷭ҇ли́мꙋ прᲂпᲂвѣ́даѧи , крѣ́пᲂстїю вᲂзне́съ гла́съ , пресла́внаѧ глаго́лана бы́ша ѡ҆ тебѣ̀ гра́де бж҃їи , ми́ръ на і҆и҃лѧ и҆ спасе́нїе ꙗ҆зы́кѡмъ . И҆́же в̾ вы́шнихъ сѣдѧ́и на херꙋви́мѣхъ бг҃ъ , и҆ призира́ѧи на смире́нныѧ , то́й грѧде́тъ вᲂ сла́вѣ сᲂ ѻ҆́бластїю , да и҆спо́лнѧтсѧ всѧ́ческаѧ бжⷭ҇твеныѧ хвалы̀ є҆гѡ̀ . ми́ръ на і҆и҃лѧ , и҆ спасе́нїе ꙗ҆зы́кѡмъ . Сїѡ́не , гᲂро̀ бж҃їѧ ст҃а́ѧ , і҆єрⷭ҇ли́мѣ ѻ҆́крⷭ҇тъ ѻ҆́чи твᲂѝ вᲂз̾ведѝ , и҆ ви́ждь со́браннаѧ ча́да твᲂѧ̀ в̾ тебѣ̀ , се́бᲂ прїидо́ша и҆з̾дале́ча пᲂклᲂни́тисѧ цр҃ю твᲂемꙋ̀ . ми́ръ на і҆и҃лѧ , и҆ спасе́нїе ꙗ҆зы́кѡмъ .

катава́сїѧ : На сїѡ́нъ го́рꙋ взы́ди .

пѣ́снь , ѕ҃ . і҆рмо́съ . Вᲂзᲂпи́ша с̾ весе́лїемъ пра́ведныхъ дꙋ́си , ны́нѣ ми́рꙋ завѣ́тъ но́въ завѣща́етсѧ , и҆ крᲂпле́нїемъ ѡ҆бнᲂвѧ́тсѧ лю́дїе , бж҃їею кро́вїю . Прїимѝ і҆и҃лю бж҃їе црⷭ҇твᲂ , и҆ пребыва́ѧи вᲂ тмѣ̀ , свѣ́тъ да ᲂу҆́зриши вели́къ , и҆ крᲂпле́нїемъ да ѡ҆бнᲂвѧ́тсѧ лю́дїе , бжⷭ҇твенᲂю кро́вїю . Разрѣшены̀ свᲂѧ̀ ᲂу҆́зники сїѡ́нѣ и҆спꙋстѝ , и҆ ѿ́ рᲂва невѣ́дѣнїѧ без̾во́дна вᲂз̾ведѝ , и҆ крᲂпле́нїемъ да ѡ҆бнᲂвѧ́тсѧ лю́дїе , бжⷭ҇твенᲂю кро́вїю .

катава́сїѧ : Вᲂзᲂпи́ша с̾ весе́лїемъ .

кᲂнда́къ , гла́съ , ѕ҃ . На прⷭ҇то́лѣ на́ нб҃си , на жребѧ́ти на землѝ нᲂси́мь хрⷭ҇тѐ бж҃е , ѿ а҆́нг҃лъ хвале́нїе , и҆ ѿ дѣте́й вᲂспѣва́нїе прїе́млѧ , зᲂвꙋ́щихъ ти , бл҃гᲂслᲂве́нъ є҆сѝ прише́дыи а҆да́ма вᲂз̾дви́гнꙋти . и҆́кᲂсъ . Пᲂне́же а҆́да свѧза́въ , и҆ сме́рть ᲂу҆мертви́лъ є҆сѝ , и҆ ми́ра вᲂста́вилъ є҆сѝ , с̾ ва́їемъ ѻ҆́трᲂцы вᲂсхвалѧ́хꙋ тѧ̀ хрⷭ҇тѐ , ꙗ҆́кѡ пᲂбѣди́телѧ , и҆ вᲂпїю́ще ти дне́сь , ѡ҆са́нна сн҃е дв҃дᲂвъ . не к̾ тᲂмꙋ́ бᲂ речѐ , закала́ютсѧ младе́нцы , за младе́нца мр҃і́ина , нᲂ за всѧ̀ и҆ младе́нцы и҆ ста́рцы , є҆ди́нъ распина́ешисѧ . и҆ к̾ тᲂмꙋ̀ на на́съ невмѣсти́тсѧ ме́чь . твᲂѧ́ бᲂ ре́бра прᲂбᲂдꙋ́тсѧ кᲂпїе́мъ . тѣ́мже ра́дꙋющесѧ гл҃емъ , бл҃гᲂслᲂве́нъ є҆сѝ грѧды́и а҆да́ма вᲂз̾дви́гнꙋти .

пѣ́снь , з҃ . і҆рмо́съ . Спасы́и вᲂ ѻ҆гнѝ а҆враа́мскїѧ сѝ дѣ́ти , и҆ халдѣ́и ᲂу҆би́въ , ꙗ҆́же без̾ пра́вды пра́ведныѧ ᲂу҆лᲂвлѧ́хꙋ , препѣ́тыи гдⷭ҇и бж҃е ѻ҆ц҃ъ бл҃гᲂслᲂве́нъ є҆сѝ . Пᲂклᲂнѧ́ющесѧ лю́дїе , и҆ сᲂ ᲂу҆ченикѝ ра́дꙋющесѧ , съ ва́їѧми ѡ҆са́нна сн҃ꙋ давы́дᲂвꙋ зᲂвѧ́хꙋ , препѣ́тыи гдⷭ҇и бж҃е ѻ҆ц҃ъ бл҃гᲂслᲂве́нъ є҆сѝ . Не и҆скꙋсᲂзло́бнᲂе мно́жествᲂ , є҆щѐ младе́нствꙋющее є҆стество̀ , бг҃ᲂлѣ́пнѡ тѧ цр҃ѧ і҆и҃лева ѻ҆́трᲂчески пᲂѧ́хꙋ , препѣ́тыи гдⷭ҇и бж҃е ѻ҆ц҃ъ бл҃гᲂслᲂве́нъ є҆сѝ . Съ ва́їѧми тѧ хрⷭ҇тѐ , и҆ вѣ́твьми хва́лѧще мно́жествᲂ , блгⷭ҇ве́нъ прише́дыи цр҃ь вѣко́мъ вᲂпїѧ́хꙋ , препѣ́тыи гдⷭ҇и бж҃е ѻ҆ц҃ъ блгⷭ҇ве́нъ є҆сѝ .

катава́сїѧ : Спасы́и вᲂ ѻ҆гнѝ .

пѣ́снь , и҃ . і҆рмо́съ . Весели́сѧ і҆єрⷭ҇ли́мѣ , тᲂржествꙋ́йте лю́бѧщїи сїѡ́на , црⷭ҇твꙋѧи бᲂ во́ вѣки гдⷭ҇ь си́ламъ прїи́детъ . да гᲂвѣ́етъ всѧ̀ землѧ̀ ѿ лица̀ є҆гѡ̀ , и҆ да вᲂпїе́тъ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . На жребѧ̀ мла́дᲂ всѣ́дъ , црⷭ҇твꙋѧи тᲂбо́ю сїѡ́нѣ хрⷭ҇то́съ , прїи́де бᲂ без̾слᲂве́снꙋю и҆́дᲂльскꙋю пре́лесть разрꙋши́ти , и҆ неꙋдержа́ннᲂе стремле́нїе ᲂу҆ста́вити всѣ́хъ ꙗ҆зы́кѡвъ , вᲂ є҆́же пѣ́ти , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Бг҃ъ тво́й сїѡ́нѣ , ра́дꙋисѧ ѕѣлѡ̀ , црⷭ҇твꙋѧи бᲂ во́ вѣки хрⷭ҇то́съ , се́й ꙗ҆́кᲂже пи́шетъ , кро́тᲂкъ и҆ спаса́ѧи , пра́ведныи и҆зба́витель на́шъ прїи́де на жребѧ́ти , кᲂне́чнᲂе вра́жїе ᲂу҆би́ти шата́нїе . є҆мꙋ́же вᲂпїе́мъ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Ѡ҆скꙋдѣ̀ бжⷭ҇твеныхъ даро́въ , закᲂнᲂпрестꙋ́пнᲂе со́нмище непᲂкᲂри́выхъ . до́мъ бᲂ мᲂли́твы бж҃їѧ , верте́пъ сᲂтвᲂри́ша разбо́йническъ , и҆ ѿ́ срⷣца и҆зба́вителѧ ѿри́нꙋвше . є҆мꙋ́же пᲂе́мъ , блгⷭ҇ви́те всѧ̀ дѣ́ла гдⷭ҇нѧ гдⷭ҇а . катава́сїѧ : Хва́лимъ блгⷭ҇ви́мъ . Весели́сѧ і҆єрⷭ҇ли́мѣ .

честнѣ́йшꙋю непᲂе́мъ .

пѣ́снь , ѳ҃ . і҆рмо́съ . Бг҃ъ гдⷭ҇ь и҆ ꙗ҆ви́сѧ на́мъ , сᲂста́вите пра́здникъ , и҆ веселѧ́щесѧ прїиди́те вᲂз̾вели́чимъ хрⷭ҇та̀ , с̾ ва́їѧми и҆ вѣ́твьми , пѣ́сньми зᲂвꙋ́ще , бл҃гᲂслᲂве́нъ грѧды́и во́ и҆мѧ гдⷭ҇а сп҃са на́шегѡ . Ꙗ҆зы́цы пᲂчто̀ шата́етесѧ писа́ньми ; и҆ сщ҃е́нницы пᲂчто̀ тще́тнымъ пᲂꙋчи́стесѧ ; кто̀ се́й ре́кше є҆мꙋ́же дѣ́ти с̾ ва́їѧми и҆ вѣ́твьми и҆ пѣ́сньми зᲂвꙋ́тъ , бл҃гᲂслᲂве́нъ грѧды́и во́ и҆мѧ гдⷭ҇а сп҃са на́шегѡ . Сѐ ᲂу҆́бѡ бг҃ъ на́шъ , є҆мꙋ́же никто́же пᲂдо́бенъ , пра́веденъ всѧ́къ пꙋ́ть и҆з̾ѡ҆брѣ́тъ , и҆ дадѐ вᲂз̾лю́бленнᲂмꙋ і҆и҃лю . пᲂ си́хже с̾ чл҃ки пᲂживѐ ꙗ҆́вльсѧ , блгⷭ҇ве́нъ грѧды́и во́ и҆мѧ гдⷭ҇а сп҃са на́шегѡ . Сᲂбла́зны стезѝ , что̀ бли́зъ вы̀ пᲂлᲂжи́сте непᲂкᲂри́вїи ; но́ги ва́ша ско́ры кро́вь и҆злїѧ́ти влⷣчню . нᲂ вᲂскрⷭ҇нетъ всѣ́хъ спастѝ зᲂвꙋ́щихъ , бл҃гᲂслᲂве́нъ грѧды́и во́ и҆мѧ гдⷭ҇а сп҃са на́шегѡ .

катава́сїѧ : Бг҃ъ гдⷭ҇ь и҆ ꙗ҆ви́сѧ на́мъ . и҆ пᲂкло́н̾ дᲂ землѝ . =Свѣти́льна же , неглаго́лемъ , нᲂ то́чїю . Ст҃ъ гдⷭ҇ь бг҃ъ на́шъ . =три́жды , на́ гласъ , д҃ .

На хвали́тѣхъ , стихѣ́ры , на́ ѕ҃ . гла́съ , д҃ . Хᲂтѧ́щꙋ ти вни́ти вᲂ ст҃ы́и гра́дъ гдⷭ҇и , вѣ́тви садо́вныѧ лю́дїе нᲂша́хꙋ , тебѐ пᲂю́ще всѣ́хъ влⷣкꙋ . зрѧ́ще тѧ на жребѧ́ти сѣдѧ́ща , ꙗ҆́кᲂже на херꙋви́мѣхъ зрѧ́хꙋ . и҆ сегѡ̀ ра́ди си́це вᲂпїѧ́хꙋ , ѡ҆са́нна в̾ вы́шнихъ блгⷭ҇ве́нъ є҆сѝ прише́дыи , и҆ па́ки грѧды́и во́ и҆мѧ гдⷭ҇не . двⷤа . Мно́жествᲂ наро́да гдⷭ҇и пᲂстила́хꙋ пᲂ пꙋтѝ ри́зы свᲂѧ̀ . дрꙋзі́и же рѣ́захꙋ вѣ́тви ѿ древе́съ , и҆ нᲂша́хꙋ . пред̾ и҆дꙋ́щїи же и҆ пᲂслѣ́дꙋющїи , вᲂпїѧ́хꙋ гл҃юще , ѡ҆са́нна сн҃е дв҃дᲂвъ , блгⷭ҇ве́нъ є҆сѝ прише́дыи , и҆ па́ки грѧды́и во́ и҆мѧ гдⷭ҇не . двⷤа . И҆зы́дите ꙗ҆зы́цы , и҆зы́дите лю́дїе , и҆ ви́дите дне́сь , цр҃ѧ нбⷭ҇нагᲂ , ꙗ҆́кѡ на прⷭ҇то́лѣ высо́цѣ , на жребѧ́ти хꙋ́дѣ вᲂ і҆єрᲂсали́мъ вхᲂдѧ́ща . ро́де і҆ꙋде́йскїи невѣ́рныи и҆ прелюбᲂдѣ́ивыи , грѧдѝ и҆ ви́ждь , є҆го́же ви́дѣ і҆са́їѧ , в̾ пло́ти на́съ ра́ди прише́дша . ка́кѡ ᲂу҆невѣща́етъ себѣ̀ , ꙗ҆́кѡ цѣлᲂмꙋ́дрена но́вагѡ сїѡ́на , и҆ ѿме́щетъ ѡ҆сꙋжде́нᲂе со́нмище . тѣ́мже въ нетлѣ́ннѣ бра́цѣ и҆ нескве́рненѣ , нескве́рнїи сте́кшесѧ хва́лѧтъ съ не и҆скꙋсᲂзло́бными дѣтьмѝ . с̾ ни́миже пᲂю́ще вᲂпїе́мъ пѣ́снь а҆́нг҃льскꙋю , ѡ҆са́нна в̾ вы́шнихъ , и҆мꙋ́щемꙋ ве́лїю млⷭ҇ть . Ѻ҆́бщее вᲂскрⷭ҇нїе пре́жде во́льныѧ стрⷭ҇ти твᲂеѧ̀ , вᲂ ᲂу҆вѣ́ренїе всѣ́хъ пред̾пᲂказа́въ хрⷭ҇тѐ бж҃е . ла́зарѧ ᲂу҆́бѡ въ виѳа́нїи , крѣ́пкᲂю си́лᲂю твᲂе́ю , четверᲂдне́вна ме́ртва вᲂскр҃си́лъ є҆сѝ . и҆ слѣпце́мъ же видѣ́нїе , ꙗ҆́кѡ свѣтᲂда́вецъ бг҃ъ дарᲂва́лъ є҆сѝ . и҆ вᲂ ст҃ы́и гра́дъ сᲂ ᲂу҆ченикѝ свᲂи́ми в̾ше́лъ є҆сѝ , сѣдѧ̀ на жребѧ́ти ѻ҆́сли , прᲂро́ческаѧ сверша́ѧ прᲂпᲂвѣ́данїѧ , и҆́же на херꙋви́мѣхъ нᲂси́мыи , и҆ дѣ́ти є҆вре́йскїѧ съ вѣ́твьми и҆ ва́їемъ пред̾срѣта́хꙋ тѧ . тѣ́мже и҆ мы̀ вѣ́тви ма́сличныѧ нᲂсѧ́ще и҆ ва́їѧ , бл҃гᲂда́рственѡ тебѣ̀ вᲂпїе́мъ , ѡ҆са́нна в̾ вы́шнихъ , блгⷭ҇ве́нъ грѧды́и во́ и҆мѧ гдⷭ҇не . сла́ва , и҆ ны́нѣ . гла́съ , ѕ҃ . Пре́жде шестѝ дне́й па́схи , прїи́де і҆с҃ъ в̾ виѳа́нїю , и҆ пристꙋпи́ша к̾ немꙋ̀ ᲂу҆ченицы̀ є҆гѡ̀ гл҃юще є҆мꙋ̀ , гдⷭ҇и , гдѣ̀ хо́щеши ᲂу҆гᲂто́ваемъ ти ꙗ҆́сти па́схꙋ ; ѻ҆́нъ же пᲂсла̀ и҆́хъ , и҆ди́те в̾ пре́днюю ве́сь , и҆ ѡ҆брѧ́щете чл҃ка в̾ скꙋде́ли во́дꙋ нᲂсѧ́ща , пᲂслѣ́дꙋйте є҆мꙋ̀ , и҆ до́мꙋ влⷣцѣ рцы́те , ᲂу҆чи́тель гл҃етъ , ᲂу҆ тебѐ сᲂтвᲂрю̀ па́схꙋ сᲂ ᲂу҆ченикѝ мᲂи́ми .= Славᲂсло́вїе вели́кᲂе .=

трᲂпа́рь : ѻ҆́бщее вᲂскрⷭ҇нїе . є҆ктенїѧ̀ , и҆ ѿпꙋ́стъ . ча́съ , а҃ . и҆ кᲂне́чныи ѿпꙋ́стъ .

На часѣ́хъ , трᲂпа́рь := ѻ҆́=бщее вᲂскрⷭ҇нїе . сла́ва , спᲂгре́бшесѧ тебѣ̀ кр҃ще́нїемъ . пᲂ трⷭ҇то́мъ , кᲂнда́къ , пра́здникꙋ .

А҆́ще ли неприлꙋчи́тсѧ бы́ти литꙋргі́и . На часѣ́хъ бл҃же́нна , ѿ кано́на , пѣ́снь , г҃ , и҆ ѕ҃ ѧ .

На литꙋргі́и . а҆нтиѳо́нъ , а҃ . ѱало́мъ , рд҃і . Вᲂз̾люби́хъ ꙗ҆́кѡ ᲂу҆слы́ша гдⷭ҇ь гла́съ мᲂле́нїѧ мᲂегѡ̀ . мл҃твами бцⷣы сп҃се спасѝ на́съ . сти́хъ . Ꙗ҆́кѡ приклᲂнѝ ᲂу҆́хᲂ свᲂѐ мнѣ̀ , и҆ во́ дни мᲂѧ̀ призᲂвꙋ̀ . мл҃твами бцⷣы сп҃се спасѝ на́съ . сти́хъ . Ѡ҆бъѧ́ша мѧ бᲂлѣ́зни сме́ртныѧ , и҆ бѣды̀ а҆́дᲂвы ѡ҆брѣто́ша мѧ . мл҃твами бцⷣы сп҃се спасѝ на́съ . сти́хъ . Ско́рби и҆ бᲂлѣ́зни ѡ҆брѣто́хъ , и҆ и҆́мѧ гдⷭ҇не призва́хъ . мл҃твами бцⷣы сп҃се спасѝ на́съ . сла́ва . мл҃твами бцⷣы сп҃се спасѝ на́съ . и҆ ны́нѣ . мл҃твами бцⷣы сп҃се спасѝ на́съ .

а҆нтиѳо́нъ , в҃ . ѱало́мъ , р҃є . Вѣ́рᲂвахъ тѣ́мже и҆ вᲂз̾глаго́лахъ , а҆́зъ же смири́хсѧ ѕѣлѡ̀ . спасѝ на́съ сн҃е бж҃їи , всѣ́дыи на жребѧ̀ пᲂю́щихъ тѝ , а҆ллилꙋ́їѧ , а҆ллилꙋ́їѧ , а҆ллилꙋ́їѧ . сти́хъ . А҆́зъ же рѣ́хъ вᲂꙋ́жасѣ мᲂе́мъ . спасѝ на́съ сн҃е бж҃їи . сти́хъ . Что̀ вᲂз̾да́мъ гдⷭ҇ви ѡ҆ всѣ́хъ , и҆́хже вᲂз̾да́стъ ми . спасѝ на́съ сн҃е бж҃їи . сти́хъ . Ча́шꙋ спасе́нїѧ прїимꙋ̀ , и҆ и҆́мѧ гдⷭ҇не призᲂвꙋ̀ . спасѝ на́съ сн҃е бж҃їи . сла́ва , и҆ нн҃ѣ . Є҆динᲂро́дныи сн҃е .

а҆нтиѳо́нъ , г҃ . ѱало́мъ , рз҃і . И҆спᲂвѣ́дайтесѧ гдⷭ҇ви ꙗ҆́кѡ бл҃гъ , ꙗ҆́кѡ в̾ вѣ́къ млⷭ҇ть є҆гѡ̀ . трᲂпа́рь : ѻ҆́бщее вᲂскрⷭ҇нїе . сти́хъ . Да рече́тъ ᲂу҆́бѡ до́мъ і҆и҃левъ , ꙗ҆́кѡ бл҃гъ , ꙗ҆́кѡ в̾ вѣ́къ млⷭ҇ть є҆гѡ̀ . ѻ҆́бщее вᲂскрⷭ҇нїе . сти́хъ . Да рече́тъ ᲂу҆́бѡ до́мъ а҆арѡ́нь , ꙗ҆́кѡ бл҃гъ , ꙗ҆́кѡ в̾ вѣ́къ млⷭ҇ть є҆гѡ̀ . ѻ҆́бщее вᲂскрⷭ҇нїе . сти́хъ . Да рекꙋ́тъ ᲂу҆́бѡ всѝ бᲂѧ́щїисѧ гдⷭ҇а , ꙗ҆́кѡ бл҃гъ , ꙗ҆́кѡ в̾ вѣ́къ млⷭ҇ть є҆гѡ̀ . ѻ҆́бщее вᲂскрⷭ҇нїе . вхо́дъ : Бл҃гᲂслᲂве́нъ грѧды́и во́ и҆мѧ гдⷭ҇не , бл҃гᲂслᲂви́хᲂмъ вы̀ и҆́з̾ дᲂмꙋ гдⷭ҇нѧ , бг҃ъ гдⷭ҇ь и҆ ꙗ҆ви́сѧ на́мъ .

трᲂпа́ри : Ѻ҆́бщее вᲂскрⷭ҇нїе пре́жде свᲂеѧ̀ стрⷭ҇ти ᲂу҆вѣрѧ́ѧ , и҆з̾ ме́ртвыхъ вᲂз̾дви́глъ є҆сѝ ла́зарѧ хрⷭ҇тѐ бж҃е . тѣ́мже и҆ мы̀ ꙗ҆́кѡ ѻ҆́трᲂцы , пᲂбѣ́дныѧ ѻ҆́бразы нᲂсѧ́ще , тебѣ̀ пᲂбѣди́телю сме́рти вᲂпїе́мъ , ѡ҆са́нна в̾ вы́шнихъ , блгⷭ҇ве́нъ грѧды́и во́ и҆мѧ гдⷭ҇не . сла́ва . Спᲂгре́бшесѧ тебѣ̀ кр҃ще́нїемъ хрⷭ҇тѐ бж҃е на́шъ , без̾сме́ртныѧ жи́зни спᲂдо́бихᲂмсѧ вᲂскрⷭ҇нїемъ твᲂи́мъ , и҆ вᲂспѣва́юще зᲂве́мъ , бл҃гᲂслᲂве́нъ грѧды́и во́ и҆мѧ гдⷭ҇не . и҆ ны́нѣ . кᲂнда́къ : На престо́лѣ на́ нб҃си , на жребѧ́ти на землѝ нᲂси́мь хрⷭ҇тѐ бж҃е , ѿ а҆́нг҃лъ хвале́нїе , и҆ ѿ дѣте́й вᲂспѣва́нїе прїе́млѧ , зᲂвꙋ́щихъ ти , бл҃гᲂслᲂве́нъ є҆сѝ прише́дыи а҆да́ма вᲂздви́гнꙋти . та́же , трⷭ҇то́е . прᲂки́менъ , ѱл҃о́мъ дв҃дᲂвъ . Бл҃гᲂслᲂве́нъ грѧды́и во́ и҆мѧ гдⷭ҇не , бг҃ъ гдⷭ҇ь и҆ ꙗ҆ви́сѧ на́мъ . сти́хъ . и҆спᲂвѣ́дайтесѧ гдⷭ҇ви ꙗ҆́кѡ бл҃гъ , ꙗ҆́кѡ в̾ вѣ́къ млⷭ҇ть є҆гѡ̀ . а҆пⷭ҇лъ , къ филипписе́ᲂмъ . заⷱ҇ , см҃з . а҆ллилꙋ́їѧ . Вᲂспо́йте гдⷭ҇ви пѣ́снь но́вꙋ . сти́хъ . ви́дѣша всѝ ꙗ҆зы́цы спасе́нїе бг҃а на́шегѡ . є҆ѵⷢ҇а́лїе , ѿ і҆ѡа́нна . заⷱ҇ , м҃а . и҆ =быва́етъ литꙋргі́ѧ златᲂꙋ́стᲂва . =прича́стенъ , блгⷭ҇ве́нъ грѧды́и во́ и҆мѧ гдⷭ҇не , бг҃ъ гдⷭ҇ь и҆ ꙗ҆ви́сѧ на́мъ .

На трапе́зѣ же , ᲂу҆тѣше́нїе бра́тїи . ꙗ҆ди́мъ ры́бꙋ , и҆ вино̀ пїе́мъ , бл҃гᲂдарѧ́ще бг҃а .