Пасха

СЛУ́ЖБА ВЪ НЕДѢ́ЛЮ СТ҃Ы́Ѧ ПА́СХИ

Вᲂ ст҃ꙋ́ю и҆ вели́кꙋю сꙋбо́тꙋ , въ і҃ , ча́съ днѝ начина́емъ вече́рню , пᲂ ѡ҆бы́чаю . пᲂ ѱалмѣ̀ , Бл҃гᲂслᲂвѝ дш҃е мᲂѧ̀ гдⷭ҇а . є҆ктенїѧ̀ вели́каѧ .= та́же , Гдⷭ҇и вᲂзва́хъ , пᲂе́мъ , на́ гласъ пе́рвыи . та́же , пᲂе́мъ , стихѣ́ры , на и҃ . вᲂскрⷭ҇ны , на д҃ . гла́съ , а҃ . Вече́рнїѧ на́ша мл҃твы , прїимѝ ст҃ы́и гдⷭ҇и , и҆ пᲂда́ждь на́мъ ѡ҆ставле́нїе грѣхѡ́въ , ꙗ҆́кѡ ты̀ є҆ди́нъ є҆сѝ ꙗ҆вле́и в̾ ми́рѣ вᲂскрⷭ҇нїе . Ѡ҆бъи҆ди́те лю́дїе сїѡ́нъ , и҆ ѡ҆бъи҆ми́те є҆гѡ̀ , и҆ дади́те сла́вꙋ в̾не́мъ , вᲂскрⷭ҇шемꙋ и҆з̾ ме́ртвыхъ , ꙗ҆́кѡ то́й є҆́сть бг҃ъ на́шъ , и҆збавле́и на́съ ѿ без̾зако́нїи на́шихъ . Прїиди́те лю́дїе пᲂе́мъ , и҆ пᲂклᲂни́мсѧ хрⷭ҇тꙋ̀ , сла́вѧще є҆гѡ̀ є҆́же и҆з̾ ме́ртвыхъ вᲂскрⷭ҇нїе . ꙗ҆́кѡ то́й є҆́сть бг҃ъ на́шъ , и҆́же ѿ́ лести вра́жїѧ ве́сь ми́ръ и҆збавле́и . С=тра́стїю твᲂе́ю хрⷭ҇тѐ , ѿ страсте́й свᲂбᲂди́хᲂмсѧ , и҆ вᲂскрⷭ҇нїемъ твᲂи́мъ и҆з̾ и҆стлѣ́нїѧ и҆збы́хᲂмъ , гдⷭ҇и сла́ва тебѣ̀ .

И҆́ны , стихѣ́ры , самᲂгла́сны . гла́съ , и҃ . Дне́сь а҆́дъ стᲂнѧ̀ вᲂпїе́тъ , ᲂу҆́не ми бѣ́ѧше , а҆́ще ѿ мр҃і́и ро́ждьшагᲂсѧ непрїѧ́лъ бы́хъ , прише́дъ бᲂ на мѧ̀ держа́вꙋ мᲂю̀ разрꙋшѝ , врата̀ мѣ́днаѧ сᲂтрѐ . дꙋ́ши ꙗ҆́же и҆мѣ́хъ пре́жде , бг҃ъ сы́и вᲂскр҃сѝ . сла́ва гдⷭ҇и крⷭ҇тꙋ̀ твᲂемꙋ̀ , и҆ вᲂскрⷭ҇нїю твᲂемꙋ̀ . два́жды . Дне́сь а҆́дъ стᲂнѧ̀ вᲂпїе́тъ , разрꙋши́сѧ мᲂѧ̀ вла́сть . прїѧ́хъ ꙗ҆́кѡ мертвеца̀ є҆ди́нагᲂ ѿ ᲂу҆ме́ршихъ , сего́ бᲂ держа́ти ѿню́дъ немᲂгꙋ̀ , нᲂ пᲂгꙋби́хъ и҆ сїѧ̀ и҆́миже црⷭ҇твᲂвахъ . а҆́зъ и҆мѣ́хъ ме́ртвыхъ ѿ́ вѣка , нᲂ се́й всѣ́хъ вᲂздвиза́етъ . сла́ва гдⷭ҇и крⷭ҇тꙋ̀ твᲂемꙋ̀ , и҆ вᲂскрⷭ҇нїю твᲂемꙋ̀ . Дне́сь а҆́дъ стᲂнѧ̀ вᲂпїе́тъ , пᲂже́рта ми бы́сть держа́ва , па́стырь распѧ́тсѧ , и҆ а҆да́ма вᲂскр҃сѝ . и҆́миже црⷭ҇твᲂвахъ , лиши́хсѧ . и҆ ꙗ҆́же пᲂжре́ти вᲂзмо́гъ , всѣ́хъ и҆зблева́хъ . и҆спраздни́въ бᲂ гро́бы распны́исѧ , некрѣпи́тсѧ сме́ртнаѧ держа́ва . сла́ва гдⷭ҇и крⷭ҇тꙋ̀ твᲂемꙋ̀ , и҆ вᲂскрⷭ҇нїю твᲂемꙋ̀ . сла́ва , гла́съ , ѕ҃ . Дне́шнюю та́йнꙋ , вели́кїи мѡѷсе́й прᲂѡбразᲂва́ше глаго́лѧ . и҆ бл҃гᲂслᲂвѝ бг҃ъ де́нь седмы́и . се́бᲂ є҆́сть бл҃гᲂслᲂве́наѧ сꙋбѡ́та . се́й є҆́сть ᲂу҆пᲂкᲂе́нїѧ де́нь . во́ньже пᲂчѝ ѿ всѣ́хъ дѣ́лъ свᲂи́хъ , є҆динᲂро́дныи сн҃ъ бж҃їи , и҆́же на сме́рть смᲂтре́нїѧ пло́тїю пᲂчи́въ . и҆ вᲂ є҆́же бѣ̀ па́ки вᲂзвра́щьсѧ вᲂскрⷭ҇нїѧ ра́ди , дарᲂва̀ на́мъ живо́тъ вѣ́чныи . ꙗ҆́кѡ є҆ди́нъ бл҃гъ и҆ чл҃кᲂлю́бецъ . и҆ ны́нѣ , бг҃ᲂро́диченъ . гла́съ , а҃ . Всеми́рнꙋю сла́вꙋ ѿ чл҃къ прᲂзѧ́бшꙋю , и҆ влⷣкꙋ ро́ждьшꙋю , нбⷭ҇нꙋю две́рь вᲂспᲂе́мъ мр҃і́ю дв҃цꙋ , без̾пло́тнымъ пѣ́снь , и҆ вѣ́рнымъ ᲂу҆дᲂбре́нїе . та́бᲂ ꙗ҆ви́сѧ не́бᲂ и҆ це́ркви бжⷭ҇твеннаѧ . та̀ прегражде́нїе вражды̀ разрꙋши́вши , смире́нїе в̾ведѐ и҆ ца́рствᲂ ѿве́рзе . тᲂѧ̀ ᲂу҆́бѡ и҆мꙋ́щи вѣ́рнᲂе ᲂу҆тверже́нїе , пᲂбо́рника и҆́мамы , и҆з̾ неѧ̀ ро́ждьшагᲂсѧ гдⷭ҇а . дерза́йте ᲂу҆́бᲂ , дерза́йте лю́дїе бж҃їи , и҆́бᲂ то́й пᲂбѣди́тъ врагѝ , ꙗ҆́кѡ всеси́ленъ .

Вы́хᲂдъ , съ є҆ѵⷢ҇а́лїемъ . Свѣ́те ти́хїи .= прᲂки́менъ , негл҃етсѧ , нᲂ а҆́бїе і҆єре́й , премꙋ́дрᲂсть . И҆ начина́етъ чте́цъ чте́нїѧ , по́ чинꙋ и҆́хъ , є҃і . А҆́ще ли нѣ́сть литꙋргі́и . =прᲂки́менъ , Гдⷭ҇ь вᲂцр҃и́сѧ . сᲂ стихѝ є҆гѡ̀ , и҆ чте́нїѧ .

Ѿ бытїѧ̀ , чте́нїе .

И҆скᲂнѝ сᲂтвᲂрѝ бг҃ъ , нб҃ᲂ и҆ зе́млю . землѧ́ же бѣ̀ неви́дима и҆ неꙋкра́шена , и҆ тма̀ верхꙋ̀ бе́здны . и҆ дх҃ъ бж҃їи нᲂша́шесѧ верхꙋ̀ вᲂды̀ . И҆ речѐ бг҃ъ , да бꙋ́детъ свѣ́тъ , и҆ бы́сть свѣ́тъ . и҆ ви́дѣ бг҃ъ свѣ́тъ ꙗ҆́кѡ дᲂбро̀ . и҆ разлꙋчѝ бг҃ъ междꙋ̀ свѣ́тᲂмъ , и҆ междꙋ̀ тмо́ю . и҆ наречѐ бг҃ъ свѣ́тъ де́нь , а҆ тмꙋ̀ наречѐ но́щь . и҆ бы́сть ве́черъ , и҆ бы́сть ᲂу҆́трᲂ , де́нь є҆ди́нъ . И҆ речѐ бг҃ъ , да бꙋ́детъ тве́рдь пᲂсредѣ̀ вᲂды̀ , и҆ да бꙋ́детъ разлꙋча́ѧ междꙋ̀ вᲂдо́ю и҆ вᲂдо́ю , и҆ бы́сть та́кѡ . и҆ сᲂтвᲂрѝ бг҃ъ тве́рдь . и҆ разлꙋчѝ бг҃ъ междꙋ̀ вᲂдо́ю ꙗ҆́же бѣ̀ пᲂд̾ тве́рдїю , и҆ междꙋ̀ вᲂдо́ю ꙗ҆́же бѣ̀ над̾ тве́рдїю . и҆ наречѐ бг҃ъ тве́рдь не́бᲂ , и҆ ви́дѣ бг҃ъ ꙗ҆́кѡ дᲂбро̀ , и҆ бы́сть ве́черъ , и҆ бы́сть ᲂу҆́трᲂ , де́нь втᲂры́и . И҆ речѐ бг҃ъ , да сᲂберꙋ́тсѧ во́ды пᲂд̾ небесе́мъ в̾ сᲂвᲂкꙋпле́нїе є҆ди́нᲂ , и҆ да ꙗ҆ви́тсѧ сꙋ́ша , и҆ бы́сть та́кѡ . и҆ сᲂбра́сѧ вᲂда̀ ꙗ҆́же пᲂд̾ нб҃се́мъ в̾ со́нмы свᲂѧ̀ , и҆ ꙗ҆ви́сѧ сꙋ́ша . и҆ наречѐ бг҃ъ сꙋ́шꙋ зе́млю , а҆ сᲂста́вы вᲂдны́ѧ наречѐ мо́ре . и҆ ви́дѣ бг҃ъ ꙗ҆́кѡ дᲂбро̀ . И҆ речѐ бг҃ъ , да прᲂрасти́тъ землѧ̀ травꙋ̀ сѣ́ннꙋ , сѣ́ющꙋю сѣ́мѧ по́рᲂдꙋ и҆ пᲂпᲂдо́бїю , и҆ дре́вᲂ плᲂдᲂви́тᲂе твᲂрѧ́щее пло́дъ , є҆мꙋ́же сѣ́мѧ є҆гѡ̀ в̾ не́мъ , пᲂпᲂдо́бїю на землѝ , и҆ бы́сть та́кѡ . и҆ и҆знесѐ землѧ̀ травꙋ̀ сѣ́ннꙋю , сѣ́ющꙋ сѣ́мѧ по́рᲂдꙋ и҆ пᲂпᲂдо́бїю , и҆ дре́вᲂ плᲂдᲂви́тᲂе твᲂрѧ́щее пло́дъ , є҆мꙋ́же сѣ́мѧ є҆гѡ̀ в̾ не́мъ , по́рᲂдꙋ на землѝ . и҆ ви́дѣ бг҃ъ ꙗ҆́кѡ дᲂбро̀ , и҆ бы́сть ве́черъ , и҆ бы́сть ᲂу҆́трᲂ де́нь тре́тїи .

Ѿ прᲂро́чества і҆са́ина , чте́нїе .

Свѣти́сѧ свѣти́сѧ і҆єрᲂсали́ме , прїи́де бᲂ тво́й свѣ́тъ , и҆ сла́ва гдⷭ҇нѧ на тебѣ̀ вᲂзсїѧ̀ . сѐ тма̀ пᲂкры́етъ зе́млю , и҆ мра́къ на ꙗ҆зы́ки , а҆ на тебѣ̀ ꙗ҆ви́тсѧ гдⷭ҇ь , и҆ сла́ва є҆гѡ̀ в̾ тебѣ̀ ᲂу҆́зритсѧ . и҆ по́йдꙋтъ цр҃їє во́ свѣтѣ твᲂе́мъ , и҆ ꙗ҆зы́цы свѣ́тлᲂстїю сїѧ́нїѧ твᲂегѡ̀ . вᲂз̾ведѝ ѻ҆́крⷭ҇тъ ѻ҆́чи твᲂѝ , и҆ ви́ждь со́брана всѧ̀ ча́да твᲂѧ̀ . сѐ прїидо́ша всѝ сы́нᲂве твᲂѝ и҆здале́ча , и҆ дще́ри твᲂѝ на ра́мѣхъ во́змꙋтсѧ . тᲂгда̀ ᲂу҆́зриши , и҆ вᲂзра́дꙋешисѧ , и҆ ᲂу҆бᲂи́шисѧ , и҆ ᲂу҆жа́снешисѧ срⷣцемъ , занѐ прелᲂжи́тъ на тѧ̀ бᲂга́тьствᲂ мо́рѧ , и҆ ꙗ҆зы́къ и҆ люде́й . и҆ прїи́дꙋтъ ти стада̀ вельблю́дъ , и҆ пᲂкры́ютъ тѧ вельблю́ды мадїа́мстїи и҆ гефа́рстїи . всѝ ѿ са́вы прїи́дꙋтъ , нᲂсѧ́ще ти зла́тᲂ и҆ лива́нъ , принесꙋ́тъ ти и҆ ка́мень че́стенъ , и҆ спасе́нїе ѿ гдⷭ҇а бл҃гᲂвѣстѧ́тъ . и҆ всѧ̀ ѻ҆́вцы кида́рскїѧ сᲂберꙋ́тсѧ тебѣ̀ , и҆ ѻ҆́вни навеѡ́ѳ̾стїи прїи́дꙋтъ ти , и҆ вᲂзнесꙋ́тсѧ прїѧ́тнаѧ на же́ртвеникъ мо́й , и҆ до́мъ мл҃твы мᲂеѧ̀ прᲂсла́витсѧ . кто̀ сі́и , ꙗ҆́кѡ ѻ҆́блацы лета́ютъ , и҆ ꙗ҆́кѡ го́лꙋбїе сᲂ птенцы̀ свᲂи́ми ; сᲂ мно́ю є҆́сть сїѡ́нъ . менѐ ѻ҆́стрᲂви пᲂжда́ша , и҆ кᲂраблѝ ѳарси́стїи в̾ пе́рвыхъ , привестѝ ча́да твᲂѧ̀ и҆здале́ча , и҆ сребро̀ и҆ зла́тᲂ и҆́хъ с̾ ни́ми , во́ и҆мѧ гдⷭ҇не ст҃о́е , и҆ ра́ди є҆́же ст҃о́мꙋ і҆и҃левꙋ сла́внꙋ є҆́сть бы́ти . и҆ сᲂзи́ждꙋтъ сн҃ѡве и҆нᲂро́днїи стѣ́ны твᲂѧ̀ , и҆ цр҃їє и҆́хъ слꙋжи́ти бꙋ́дꙋтъ тебѣ̀ . за гнѣ́въ бᲂ мо́й пᲂрази́хъ тѧ , и҆ за млⷭ҇ть мᲂю̀ вᲂзлюби́хъ тѧ . и҆ ѿве́рста бꙋ́дꙋтъ врата̀ твᲂѧ̀ і҆єрᲂслали́ме вы́нꙋ , де́нь и҆ но́щь незатвᲂрѧ́тсѧ , ввестѝ к̾ тебѣ̀ си́лꙋ ꙗ҆зы́къ , и҆ цр҃ѝ и҆́хъ ведо́мы . ꙗ҆зы́цы бᲂ и҆ цр҃їє и҆́же непᲂрабо́таютъ , пᲂги́бнꙋтъ , и҆ ꙗ҆зы́цы запꙋстѣ́нїемъ запꙋстѣ́ютъ . и҆ сла́ва лива́нᲂва к̾ тебѣ̀ прїи́детъ . кипари́сᲂмъ и҆ пе́вгᲂмъ и҆ ке́дрᲂмъ вкꙋ́пѣ , прᲂсла́вити мѣ́стᲂ ст҃о́е мᲂѐ , и҆ мѣ́стᲂ но́гꙋ мᲂе́ю прᲂсла́влю . и҆ по́йдꙋтъ к̾ тебѣ̀ бᲂѧ́щїисѧ , сы́нѡве смири́вшихъ тѧ , и҆ прᲂгнѣ́вавшихъ тѧ , и҆ пᲂкло́нѧтсѧ стᲂпа́мъ но́гꙋ твᲂе́ю всѝ прᲂгнѣ́вавшїи тѧ . и҆ нарече́шисѧ гра́дъ гдⷭ҇нь сїѡ́нъ ст҃а́гѡ і҆и҃лева . за є҆́же бы́ти ти , ѡ҆ста́вленꙋ и҆ вᲂзненави́дѣнꙋ , и҆ небѣ̀ пᲂмᲂга́ющагѡ ти . и҆ пᲂлᲂжꙋ́ тѧ в̾ ра́дᲂсть вѣ́чнꙋю , и҆ весе́лїе в̾ ро́ды рᲂдѡ́въ . и҆ и҆ссе́ши млеко̀ ꙗ҆зы́кᲂвъ , и҆ бᲂга́тьствᲂ царе́й снѣ́си . и҆ разꙋмѣ́еши ꙗ҆́кѡ а҆́зъ гдⷭ҇ь спаса́ѧи тѧ , и҆ и҆зима́ѧи тѧ , бг҃ъ ст҃ы́и і҆и҃левъ .

Ѿ и҆схо́да , чте́нїе .

Речѐ гдⷭ҇ь к̾ мѡѷсе́ю и҆ а҆арѡ́нꙋ , мѣ́сецъ се́й ва́мъ нача́лᲂ мѣ́сецей , пе́рвыи бꙋ́детъ ва́мъ в̾ мѣ́сецехъ лѣ́тꙋ . рцы̀ кᲂ всемꙋ̀ со́нмꙋ сынѡ́въ і҆и҃левъ . в̾ десѧ́тыи мѣ́сеца сегѡ̀ , да прїи́метъ ко́ждᲂ ѻ҆вча̀ на́дᲂмъ вᲂ ѻ҆те́чествᲂ свᲂѐ . а҆́щели же ма́лѡ и҆́хъ є҆́сть в̾ дᲂмꙋ̀ , ꙗ҆́кѡ недᲂво́льнымъ бы́ти на ѻ҆вча̀ , да прїи́мꙋтъ с̾ сᲂбо́ю сᲂсѣ́да бли́жнѧгᲂ свᲂегѡ̀ пᲂ числꙋ̀ дꙋ́шъ . ко́ждᲂ дᲂво́льнᲂе себѣ̀ сᲂчте́тъ на ѻ҆вча̀ сᲂверше́нᲂ . мꙋ́жескїи по́лъ , непᲂро́чнᲂ , є҆динᲂлѣ́тнᲂ бꙋ́детъ ва́мъ , ѿ а҆́гнецъ и҆ ѿ ко́злищь прїими́те . и҆ да бꙋ́детъ ва́мъ сᲂблюдено̀ , да́же дᲂ четве́ртагѡ на́десѧте днѐ мѣ́сеца сегѡ̀ . и҆ зако́лютъ то̀ всѐ мно́жествᲂ сᲂбо́ра сынѡ́въ і҆и҃левъ к̾ ве́черꙋ . и҆ прїи́мꙋтъ ѿ́ крᲂве , и҆ пᲂма́жꙋтъ на ѻ҆бᲂю̀ пᲂд̾во́ю , и҆ на пра́гахъ и҆́хъ въ дᲂмѣ́хъ , є҆го́же снѣдѧ́тъ в̾ ни́хъ сеѧ̀ но́щи мѧса̀ та̀ , печена̀ ѻ҆гне́мъ , и҆ ѻ҆прѣсно́къ съ желтѧни́цею снѣдѧ́тъ . и҆ неснѣ́сте ѿ ни́хъ сꙋ́рᲂвᲂ , нижѐ сварено̀ въ вᲂдѣ̀ , нᲂ печено̀ ѻ҆гне́мъ , сᲂ главо́ю и҆ съ нᲂга́ми и҆ сᲂ ᲂу҆тро́бᲂю . и҆ не ѡ҆ста́вите ѿ негѡ̀ ничто́же кᲂ ᲂу҆́трꙋ , и҆ ко́сти несᲂкрꙋши́те ѿ негѡ̀ . ѡ҆ста́нки же сꙋ́щїѧ ѿ негѡ̀ , дᲂ ᲂу҆́тра ѻ҆гне́мъ сᲂжже́те . Си́це же снѣ́сте є҆̀ , чресла̀ ва́ша препᲂѧ́сана , и҆ сапᲂзѝ ва́ши на нᲂга́хъ ва́шихъ , и҆ жезлы̀ ва́ши въ рꙋка́хъ ва́шихъ . и҆ снѣ́сте є҆̀ сᲂ тща́нїемъ , па́сха є҆́сть гдⷭ҇нѧ .

Ѿ прᲂро́чества і҆ѡ́нина , чте́нїе .

Бы́сть сло́вᲂ гдⷭ҇не кᲂ і҆ѡ́нѣ а҆маѳі́инꙋ , гл҃ѧ , вᲂста́ни , и҆ пᲂйдѝ в̾ ниневі́ю гра́дъ вели́кїи , и҆ прᲂпᲂвѣ́ждь в̾ не́мъ , ꙗ҆́кѡ взы́де во́пль ѕло́бы є҆гѡ̀ кᲂ мнѣ̀ . и҆ вᲂста́въ і҆ѡ́на ꙗ҆́кѡ бѣжа́ти в̾ ѳарси́съ ѿ лица̀ гдⷭ҇нѧ , и҆ сни́де вᲂ і҆ѡпі́ю , и҆ ѡ҆брѣ́те кᲂра́бль и҆дꙋ́щь в̾ ѳарси́съ , и҆ дадѐ нае́мъ сво́й , и҆ вни́де в̾ то́й ѿплы́ти съ ни́ми въ ѳарси́съ , ѿ лица̀ гдⷭ҇нѧ . и҆ гдⷭ҇ь вᲂздви́же дꙋ́хъ ве́лїи въ мо́ри , и҆ бы́сть бꙋ́рѧ вели́ка въ мо́ри , и҆ кᲂра́бль вла́ѧшесѧ хᲂтѧ̀ сᲂкрꙋши́тисѧ . и҆ ᲂу҆бᲂѧ́шасѧ кᲂра́бленицы , и҆ вᲂзᲂпи́ша ко́ждᲂ къ бо́гꙋ свᲂемꙋ̀ , и҆ и҆змета́нїе твᲂрѧ́хꙋ сᲂсꙋ́дѡмъ и҆́же въ кᲂраблѝ в̾ мо́ре ѡ҆блегчи́ти є҆гѡ̀ . і҆ѡ́на же сни́де вᲂ дно̀ кᲂраблѧ̀ и҆ спѧ́ше и҆ храплѧ́ше . и҆ пристꙋпѝ к̾ немꙋ̀ ко́рмникъ , и҆ речѐ є҆мꙋ̀ , что́ ты хра́плеши ; вᲂста́ни и҆ мᲂлѝ и҆ призыва́й бг҃а свᲂегѡ̀ , ꙗ҆́кѡ да спасе́тъ на́съ бг҃ъ , и҆ непᲂги́бнемъ . и҆ речѐ ко́ждᲂ кᲂ и҆́скренемꙋ свᲂемꙋ̀ , прїиди́те ме́тнемъ жре́бїѧ . и҆ разꙋмѣ́емъ кᲂгѡ̀ ра́ди ѕло́ба сїѧ̀ на на́съ бы́сть . и҆ мета́ша жре́бїѧ : и҆ падѐ жре́бїи на і҆ѡ́нꙋ . и҆ реко́ша к̾ немꙋ̀ , пᲂвѣ́ждь на́мъ , чесѡ̀ ра́ди ѕло̀ сїѐ на на́съ ; что̀ твᲂѐ дѣ́лᲂ є҆́сть ; и҆ ѿкꙋ́дꙋ грѧде́ши , и҆ ка́мѡ и҆́деши ; и҆ ѿ кᲂеѧ̀ страны̀ . и҆ ѿ ко́ихъ люде́й є҆сѝ ты̀ ; и҆ речѐ к̾ ни́мъ , ра́бъ гдⷭ҇нь є҆́смь , и҆ гдⷭ҇а бг҃а а҆́зъ мᲂлю̀ , и҆́же сᲂтвᲂрѝ не́бᲂ и҆ зе́млю и҆ мо́ре . и҆ ᲂу҆бᲂѧ́шасѧ мꙋ́жїе стра́хᲂмъ вели́кимъ , и҆ реко́ша к̾ немꙋ̀ , что̀ сѐ сᲂтвᲂри́лъ є҆сѝ ; занѐ разꙋмѣ́ша мꙋ́жїе , ꙗ҆́кѡ ѿ лица̀ гдⷭ҇нѧ бѧ́ше бѣжа̀ , ꙗ҆́кᲂже бѣ̀ и҆звѣсти́лъ и҆́мъ . и҆ реко́ша к̾немꙋ̀ , что́ ти сᲂтвᲂри́мъ , и҆ ᲂу҆тᲂли́тсѧ мо́ре ѿ на́съ , занѐ мо́ре вᲂсхᲂжда́ше , и҆ вᲂздвиза́шесѧ па́че вᲂлне́нїе ; и҆ речѐ к̾ ни́мъ і҆ѡ́на , вᲂзми́те мѧ , и҆ в̾ве́рзите въ мо́ре , и҆ ᲂу҆тᲂли́тсѧ мо́ре ѿ ва́съ , занѐ разꙋмѣ́хъ а҆́зъ , ꙗ҆́кѡ менѐ ра́ди бы́сть вᲂлне́нїе сѐ вели́кᲂе на ва́съ . и҆ нꙋжда́хꙋсѧ мꙋ́жїе ѡ҆брати́тисѧ къ землѝ , и҆ немᲂжа́хꙋ , ꙗ҆́кѡ мо́ре вᲂсхᲂжда́ше , и҆ вᲂздвиза́шесѧ па́че на ни́хъ . и҆ вᲂзᲂпи́ша ко́ гдⷭ҇ꙋ и҆ реко́ша , ника́кᲂже гдⷭ҇и да непᲂги́бнемъ дꙋшѝ ра́ди чл҃ка сегѡ̀ , и҆ неда́ждь на ны̀ кро́ве пра́ведны , сегѡ̀ ра́ди и҆́мже ѻ҆́бразᲂмъ вᲂсхᲂтѣ̀ , сᲂтвᲂри́лъ є҆сѝ . и҆ взѧ́ша і҆ѡ́нꙋ , и҆ в̾верго́ша є҆гѡ̀ въ мо́ре , и҆ преста̀ мо́ре ѿ вᲂлне́нїѧ свᲂегѡ̀ . и҆ ᲂу҆бᲂѧ́шасѧ мꙋ́жїе стра́хᲂмъ вели́кимъ гдⷭ҇а , и҆ пᲂжро́ша же́ртвꙋ бг҃ꙋ , и҆ пᲂмᲂли́шасѧ мл҃твами . И҆ пᲂвелѣ̀ гдⷭ҇ь ки́тꙋ вели́кᲂмꙋ пᲂжре́ти і҆ѡ́нꙋ , и҆ бѧ́ще і҆ѡ́на во́ чревѣ ки́тᲂвѣ трѝ днѝ , и҆ трѝ но́щи . и҆ пᲂмᲂли́сѧ і҆ѡ́на ко́ гдⷭ҇ꙋ бг҃ꙋ свᲂемꙋ̀ , ѿ́ чрева ки́тᲂва , и҆ речѐ . мᲂли́тва .

Вᲂзᲂпи́хъ въ печа́ли мᲂе́й ко́ гдⷭ҇ꙋ бг҃ꙋ мᲂемꙋ̀ , и҆ ᲂу҆слы́ша мѧ , и҆́з̾чрева а҆́дᲂва во́пль мо́й , ᲂу҆слы́шалъ є҆сѝ гла́съ мо́й , ѿве́рглъ мѧ є҆сѝ вᲂ глꙋбины̀ срⷣца мᲂрска́гѡ , и҆ рѣ́ки ѡ҆быдо́ша мѧ . всѧ̀ высᲂты̀ твᲂѧ̀ и҆ во́лны твᲂѧ̀ пᲂ мнѣ̀ преидо́ша , и҆ а҆́зъ рѣ́хъ , ѿри́нꙋхсѧ ѿ ѻ҆́чїю твᲂе́ю . є҆да̀ прилᲂжꙋ̀ призрѣ́ти к̾ цр҃кви ст҃ѣ́й твᲂе́й , вᲂзлїѧ́сѧ вᲂда̀ дᲂ дꙋшѝ мᲂеѧ̀ , бе́здна ѡ҆бы́де мѧ пᲂслѣ́днѧѧ . пᲂнрѐ глава̀ мᲂѧ̀ въ раз̾сѣ́ли го́рскїѧ . снидо́хъ в̾ зе́млю , є҆ѧ́же вереѝ закле́пи вѣ́чнїи . и҆ да взы́детъ и҆з̾ и҆стлѣ́нїѧ живо́тъ мо́й , к̾ тебѣ̀ гдⷭ҇и бж҃е мо́й , є҆гда̀ скᲂнчава́шесѧ ѿ менѐ дш҃а мᲂѧ̀ . гдⷭ҇а пᲂмѧнꙋ́хъ , и҆ да прїи́детъ к̾ тебѣ̀ мл҃тва мᲂѧ̀ , к̾ цр҃кви ст҃ѣ́й твᲂе́й . хранѧ́щїи сꙋ́етнаѧ и҆ лжꙋ̀ , ми́лᲂсть свᲂю̀ ѡ҆ста́виша . а҆́зъ же со́ гласᲂмъ хвале́нїѧ и҆ и҆спᲂвѣ́данїѧ пᲂжрꙋ̀ тебѣ̀ , є҆ли́ка ѡ҆бѣща́хсѧ , вᲂзда́мъ тебѣ̀ на спасе́нїе мᲂѐ гдⷭ҇ви . и҆ пᲂвелѣ̀ гдⷭ҇ь ки́тꙋ , и҆ и҆зве́рже і҆ѡ́нꙋ на́ сꙋшꙋ . И҆ бы́сть сло́вᲂ гдⷭ҇не кᲂ і҆ѡ́нѣ втᲂри́цею гл҃ѧ , вᲂста́ни и҆ пᲂйдѝ в̾ ниневі́ю гра́дъ вели́кїи , и҆ прᲂпᲂвѣ́ждь в̾ не́мъ пᲂ про́пᲂвѣди пре́дней , є҆́же а҆́зъ гл҃ахъ тебѣ̀ . и҆ вᲂста̀ і҆ѡ́на , и҆ и҆́де в̾ ниневі́ю , ꙗ҆́кᲂже гл҃а є҆мꙋ̀ гдⷭ҇ь . ниневі́й же бѧ́ше гра́дъ вели́къ бг҃ꙋ , ꙗ҆́кѡ ше́ствїе пꙋтѝ трїе́мъ дне́мъ . и҆ нача́тъ і҆ѡ́на вхᲂди́ти во́ градъ , ꙗ҆́кѡ ше́ствїе пꙋтѝ є҆ди́нагѡ днѐ , и҆ прᲂпᲂвѣ́да и҆ речѐ , є҆щѐ трѝ днѝ , и҆ ниневі́й разᲂри́тсѧ . и҆ вѣ́рᲂваша мꙋ́жїе ниневи́тстїи бг҃ꙋ , и҆ прᲂпᲂвѣ́даша по́стъ , и҆ ѡ҆блеко́шасѧ вᲂ вре́тища , ѿ ма́ла да́же и҆ дᲂ вели́ка и҆́хъ . и҆ прибли́жисѧ сло́вᲂ къ цр҃ю ниневи́тскᲂмꙋ , и҆ вᲂста̀ сᲂ престо́ла свᲂегѡ̀ , и҆ сᲂвлечѐ ѻ҆дѣѧ́нїе свᲂѐ , и҆ ѡ҆блече́сѧ вᲂ вре́тище , и҆ сѣ́де на пе́пелѣ . и҆ прᲂпᲂвѣ́дасѧ , и҆ рече́нᲂ бы́сть в̾ ниневі́и ѿ цр҃ѧ и҆ ѿ вельмо́жъ є҆гѡ̀ гл҃ющимъ , чл҃цы , и҆ скᲂты̀ , вᲂло́ве и҆ ѻ҆́вцы , да невкꙋ́сѧтъ ничто́же , нижѐ пасꙋ́тсѧ , и҆ вᲂды̀ да непїю́тъ . и҆ ѡ҆блеко́шасѧ вᲂ вре́тища , чл҃цы и҆ скᲂты̀ , и҆ вᲂзᲂпи́ша прилѣ́жнѡ к̾ бг҃ꙋ . и҆ вᲂз̾врати́шасѧ ко́ждᲂ ѿ пꙋтѝ свᲂегѡ̀ лꙋка́вагѡ , и҆ ѿ непра́вды сꙋ́щїѧ в̾ рꙋка́хъ и҆́хъ , гл҃юще , кто̀ вѣ́сть а҆́ще раска́етсѧ и҆ ᲂу҆мᲂле́нъ бꙋ́детъ бг҃ъ , и҆ ѡ҆брати́тсѧ ѿ́гнѣва ꙗ҆́рᲂсти свᲂеѧ̀ , и҆ непᲂги́бнемъ ; и҆ ви́дѣ бг҃ъ дѣ́ла и҆́хъ , ꙗ҆́кѡ ѡ҆брати́шасѧ ѿ пꙋте́й свᲂи́хъ лꙋка́выхъ , и҆ раска́ѧсѧ бг҃ъ ѡ҆ ѕло́бѣ , є҆́же речѐ сᲂтвᲂри́ти и҆́мъ , и҆ несᲂтвᲂрѝ . И҆ ѡ҆скᲂрби́сѧ і҆ѡ́на ско́рбїю вели́кᲂю , и҆ смꙋти́сѧ , и҆ пᲂмᲂли́сѧ ко́ гдⷭ҇ꙋ и҆ речѐ , ѽ гдⷭ҇и не сїѧ́ ли слᲂвеса̀ мᲂѧ̀ ꙗ҆́же глаго́лахъ к̾ тебѣ̀ , є҆щѐ сꙋ́щꙋ ми в̾ землѝ мᲂе́й , сегѡ̀ ра́ди предвари́хъ бѣжа́ти въ ѳарси́съ , занѐ вѣ́дѣхъ ꙗ҆́кѡ ты̀ ми́лᲂстивъ є҆сѝ и҆ ще́дръ , дᲂлгᲂтерпѣли́въ и҆ мнᲂгᲂмлⷭ҇тивъ , и҆ ка́ѧсѧ ѡ҆ ѕло́бахъ челᲂвѣ́ческихъ . и҆ ны́нѣ влⷣкᲂ гдⷭ҇и прїимѝ дш҃ꙋ мᲂю̀ ѿ менѐ , ꙗ҆́кѡ до́брѣе мнѣ̀ ᲂу҆́мрети па́че , не́жели жи́вꙋ бы́ти ми . и҆ речѐ гдⷭ҇ь кᲂ і҆ѡ́нѣ , пᲂчто̀ ѕѣлѡ̀ ѡ҆скᲂрби́сѧ ты̀ ; и҆ речѐ , ѕѣлѡ̀ ѡ҆печа́лихсѧ а҆́зъ , да́же дᲂ сме́рти . и҆ и҆зы́де і҆ѡ́на и҆́з̾града , и҆ сѣ́де прѧ́мѡ гра́дꙋ , и҆ сᲂтвᲂрѝ себѣ̀ тꙋ̀ кро́въ , и҆ сѣдѧ́ше пᲂд̾ ни́мъ в̾сѣ́ни , до́ндеже ви́дитъ что̀ бꙋ́детъ гра́дꙋ . и҆ пᲂвелѣ̀ гдⷭ҇ь бг҃ъ ты́квѣ , и҆ вᲂзрастѐ над̾ главо́ю і҆ѡ́нинᲂю , ꙗ҆́кѡ бы́ти сѣ́ни превы́ше главы̀ є҆гѡ̀ , ѡ҆сѣни́ти є҆гѡ̀ ѿ ѕлы́хъ є҆гѡ̀ . и҆ вᲂзра́дᲂвасѧ і҆ѡ́на ѡ҆ ты́квѣ ра́дᲂстїю вели́кᲂю , и҆ пᲂвелѣ̀ гдⷭ҇ь бг҃ъ че́рвїю нᲂщно́мꙋ вᲂꙋ́трѣи , и҆ пᲂд̾грызѐ ты́квꙋ , и҆ и҆́з̾ше . и҆ бы́сть вкꙋ́пѣ внегда̀ вᲂсїѧ́ти сл҃нцꙋ , и҆ пᲂвелѣ̀ гдⷭ҇ь бг҃ъ дꙋ́хꙋ ва́рнᲂмꙋ сᲂжиза́ющꙋ , и҆ пᲂразѝ сл҃нце над̾ главо́ю і҆ѡ́нинᲂю , и҆ малᲂдꙋ́шьствᲂваше , и҆ ѿрица́шесѧ дꙋшѝ свᲂеѧ̀ , и҆ речѐ , до́брѣе ми ᲂу҆́мрети па́че , не́жели жи́вꙋ бы́ти . и҆ речѐ гдⷭ҇ь бг҃ъ кᲂ і҆ѡ́нѣ , а҆́ще ѕѣлѡ̀ ѡ҆скᲂрбѣ̀ ты̀ ѡ҆ ты́квѣ ; и҆ речѐ , ѕѣлѡ̀ ѡ҆скᲂрби́хсѧ а҆́зъ дᲂ сме́рти . и҆ речѐ гдⷭ҇ь кᲂ і҆ѡ́нѣ , ты̀ ᲂу҆́бѡ пᲂщадѣ̀ ѡ҆ ты́квѣ , ѡ҆ не́йже нетрꙋди́лсѧ , ни вᲂспита̀ є҆ѧ̀ , ꙗ҆́же ѻ҆́бнᲂщь рᲂди́сѧ , и҆ ѻ҆́бнᲂщь пᲂги́бе , а҆́зъ же непᲂщажꙋ́ли , ѡ҆ ниневі́и гра́дѣ вели́цѣмъ , в̾ не́мже живꙋ́тъ мно́жае па́че двана́десѧти те́мъ челᲂвѣ́къ , и҆́же непᲂзна́ша десни́цы свᲂеѧ̀ и҆ шꙋ́ицы , и҆ скᲂты̀ и҆́х̾ мно́зи .

Ѿ і҆сꙋ́са на́ввїина , чте́нїе .

Прїидо́ша сы́нᲂве і҆и҃левы въ галга́лы , и҆ сᲂтвᲂри́ша па́схꙋ , въ четве́ртыи на́десѧть де́нь , пе́рвагѡ мѣ́сеца , ѿ ве́чера наза́падᲂхъ і҆єрихѡ́нꙋ , ѡ҆бᲂнꙋ̀ странꙋ̀ і҆ѡрда́на , на пᲂлѧ́хъ , и҆ ꙗ҆до́ша ѿ пшени́цы земны́ѧ , и҆ вᲂ ᲂу҆́трешнїи па́схи ѡ҆прѣсно́ки и҆ но́ваѧ . и҆ в̾ де́нь то́й преста̀ ма́нна вᲂꙋ́трѣи , пᲂне́же снѣдо́ша ѿ пшени́цы земны́ѧ . и҆ к̾ тᲂмꙋ̀ небѧ́ше сынᲂвѡ́мъ і҆и҃левымъ ма́нны . вᲂздѣ́лаша же странꙋ̀ фи́ническꙋю въ лѣ́тᲂ ѻ҆́нᲂ . и҆ бы́сть ꙗ҆́кѡ бѧ́ше і҆сꙋ́съ вᲂ і҆єрихо́нѣ , и҆ вᲂз̾зрѣ́въ ѻ҆чи́ма свᲂи́ма , ви́дѣ ꙗ҆ви́вшасѧ чл҃ка стᲂѧ́ща пред̾ ни́мъ , и҆ ѻ҆рꙋ́жїе є҆гѡ̀ на́гᲂ въ рꙋцѣ̀ є҆гѡ̀ . и҆ пристꙋпи́въ і҆сꙋ́съ речѐ є҆мꙋ̀ , на́шъ ли є҆сѝ , и҆лѝ ѿ сᲂпᲂста́тъ на́шихъ ; ѻ҆́нъ же речѐ є҆мꙋ̀ , а҆́зъ а҆рхистрати́гъ си́лы гдⷭ҇ни , ны́нѣ прїидо́хъ сѣ́мѡ . и҆ па́дъ і҆сꙋ́съ , на лицѣ̀ свᲂе́мъ на́ землю , пᲂклᲂни́сѧ и҆ речѐ є҆мꙋ̀ , влⷣкᲂ что̀ пᲂвелѣва́еши твᲂемꙋ̀ рабꙋ̀ ; и҆ гл҃а а҆рхистрати́гъ гдⷭ҇нь кᲂ і҆сꙋ́сꙋ , и҆зꙋ́й сапо́гъ тво́й ѿ нᲂгꙋ̀ твᲂе́ю , мѣ́стᲂ бᲂ на не́мже ты̀ стᲂи́ши , ст҃ᲂ є҆́сть . и҆ сᲂтвᲂрѝ і҆сꙋ́съ та́кѡ .

Ѿ и҆схо́да , чте́нїе .

Вᲂздвиго́шасѧ сы́нᲂве і҆и҃левы ѿ сᲂкхо́ѳа , и҆ ѡ҆пᲂлчи́шасѧ вᲂ ѻ҆ѳо́мѣ при пꙋсты́ни . бг҃ъ же вᲂжда́ше и҆́хъ въ де́нь стᲂлпо́мъ ѻ҆́блачнымъ , пᲂказа́ти и҆́мъ пꙋ́ть . но́щїю же стᲂлпо́мъ ѻ҆́гненымъ , свѣти́ти и҆́мъ . и҆ не ѡ҆скꙋдѣ̀ сто́лпъ ѻ҆́блачныи во́ дне , и҆ сто́лпъ ѻ҆́гненыи но́щїю пред̾ всѣ́ми людьмѝ . И҆ гл҃а гдⷭ҇ь к̾ мѡѷсе́ю гл҃ѧ , рцы̀ сынᲂвѡ́мъ і҆и҃левымъ , ѡ҆брати́вшесѧ да во́инствꙋютъ прѧ́мѡ пред̾гра́дїѧ , пᲂсредѣ̀ магда́лы , и҆ пᲂсредѝ мо́рѧ , прѧ́мѡ веельсепфѡ́нꙋ , пред̾ ни́ми ѡ҆пᲂлчи́тесѧ при́мᲂри . и҆ рече́тъ фараѡ́нъ лю́демъ свᲂи́мъ ѡ҆ сынѣ́хъ і҆и҃левыхъ , блꙋ́дѧтъ си пᲂ землѝ , затвᲂри́ бᲂ и҆́хъ пꙋсты́нѧ . а҆́зъ же ѡ҆жестᲂчꙋ̀ срⷣце фараѡ́нᲂвᲂ , и҆ пᲂжене́тъ сᲂзадѝ и҆́хъ , и҆ прᲂсла́влюсѧ ѡ҆ фараѡ́нѣ и҆ ѡ҆ всѣ́хъ во́єхъ є҆гѡ̀ , и҆ разꙋмѣ́ютъ всѝ є҆ги́птѧне , ꙗ҆́кѡ а҆́зъ гдⷭ҇ь , и҆ сᲂтвᲂри́хъ си́цѣ ; и҆ вᲂзвеще́нᲂ бы́сть царю̀ є҆ги́петскᲂмꙋ , ꙗ҆́кѡ бѣжа́ша лю́дїе , и҆ преврати́сѧ срⷣце фараѡ́нᲂвᲂ и҆ слꙋ́гъ є҆гѡ̀ на́ люди , и҆ реко́ша , что̀ сѐ сᲂтвᲂри́хᲂмъ є҆́же ѿпꙋсти́ти сы́ны і҆и҃левы , да непᲂрабо́таютъ на́мъ ; и҆ в̾прѧжѐ ᲂу҆́бѡ фараѡ́нъ кᲂлесни́цы свᲂѧ̀ , и҆ всѧ̀ лю́ди свᲂѧ̀ сᲂбра̀ с̾ сᲂбо́ю , и҆ пᲂѧ́тъ шестьсо́тъ кᲂлесни́цъ и҆збра́нныхъ , и҆ всѧ̀ ко́ни є҆ги́петскїѧ , и҆ триста́ты надᲂвсѣ́ми , и҆ ѡ҆жестᲂчѝ гдⷭ҇ь срⷣце фараѡ́на царѧ̀ є҆ги́петскагѡ , и҆ пᲂгна̀ сᲂзадѝ сынѡ́въ і҆и҃левыхъ . сы́нᲂве же і҆и҃левы и҆схᲂжда́хꙋ рꙋко́ю высо́кᲂю . и҆ пᲂгна́ша є҆ги́птѧне въ слѣ́дъ и҆́хъ , и҆ ѡ҆брѣто́ша и҆́хъ ѡ҆пᲂлчи́вшихсѧ при́мᲂри . и҆ всѝ ко́ни и҆ кᲂлесни́цы фараѡ́нᲂвы , и҆ во́инствᲂ и҆ ко́нницы прѧ́мѡ пред̾ две́рїю , сᲂпрᲂти́вꙋ веельсепфѡ́на , фараѡ́нъ приближа́шесѧ . и҆ вᲂз̾зрѣ́вше сы́нᲂве і҆и҃левы ѻ҆чи́ма , и҆ ви́дѣша , и҆ сѐ є҆ги́птѧне ѡ҆пᲂлчи́шасѧ въ слѣ́дъ и҆́хъ , и҆ ᲂу҆бᲂѧ́шасѧ ѕѣлѡ̀ , и҆ вᲂзᲂпи́ша сы́нᲂве і҆и҃левы ко́ гдⷭ҇ꙋ , и҆ реко́ша къ мѡѷсе́ю , занѐ небы́ти ли на́мъ грᲂбѡ́мъ вᲂ є҆ги́птѣ , и҆ и҆зве́лъ є҆сѝ на́съ ᲂу҆́мрети въ пꙋсты́ни ; что̀ сѐ сᲂтвᲂри́лъ є҆сѝ на́мъ , и҆зведѐ на́съ и҆з̾ є҆ги́пта ; не се́й ли бѧ́ше глаго́лъ и҆́же рѣ́хᲂмъ к̾ тебѣ̀ гл҃юще , ѡ҆ста́ви на́съ рабо́тати є҆ги́птѧнѡмъ . лꙋ́чше бᲂ бѧ́ше на́мъ рабо́тати є҆ги́птѧнѡмъ , не́жели ᲂу҆́мрети въ пꙋсты́ни се́й ; рече́ же мѡѷсе́й к̾ лю́демъ , дерза́йте , сто́йте , и҆ ᲂу҆́зрите спасе́нїе є҆́же ѿ́ гдⷭ҇а , є҆́же сᲂтвᲂри́тъ на́мъ дне́сь . и҆́мже бᲂ ѻ҆́бразᲂмъ ᲂу҆зрѣ́сте є҆ги́птѧны дне́сь , неприлᲂжитѐ к̾ тᲂмꙋ̀ ви́дѣти и҆́хъ , въ вѣ́чнаѧ лѣ́та , гдⷭ҇ь бᲂ пᲂбо́ретъ пᲂ на́съ , и҆ вы̀ ᲂу҆мо́лкните . и҆ речѐ гдⷭ҇ь къ мѡѷсе́ю , что̀ вᲂпїе́ши кᲂ мнѣ̀ . рцы̀ сынᲂвѡ́мъ і҆и҃левымъ , да сᲂберꙋ́тсѧ , и҆ ты̀ вᲂзмѝ же́злъ сво́й , и҆ прᲂстрѝ рꙋ́кꙋ твᲂю̀ на́ мᲂре , и҆ раздѣлѝ є҆̀ , и҆ да вни́дꙋтъ сы́нᲂве і҆и҃левы пᲂсредѝ мо́рѧ по́сꙋхꙋ . и҆ сѐ а҆́зъ ѡ҆жестᲂчꙋ̀ срⷣце фараѡ́нᲂвᲂ , и҆ слꙋ́гъ є҆гѡ̀ , и҆ є҆ги́птѧнъ всѣ́хъ , и҆ вни́дꙋтъ в̾ слѣ́дъ и҆́хъ , и҆ прᲂсла́влюсѧ ѡ҆ фараѡ́нѣ , и҆ ѡ҆ всѣ́хъ во́єхъ є҆гѡ̀ , и҆ ѡ҆ кᲂлесни́цахъ , и҆ ѡ҆ ко́нѣхъ є҆гѡ̀ , и҆ да ᲂу҆вѣ́дѧтъ всѝ є҆ги́птѧне ꙗ҆́кѡ а҆́зъ є҆́смь гдⷭ҇ь , прᲂславлѧ́ющїисѧ ѡ҆ фараѡ́нѣ , и҆ ѡ҆ кᲂлесни́цахъ и҆ ѡ҆ ко́нѣхъ є҆гѡ̀ . ѡ҆брати́жесѧ а҆́нг҃лъ бж҃їи хᲂдѧ́и пред̾ пᲂлко́мъ , сынѡ́въ і҆и҃левыхъ , и҆ по́йде сᲂзадѝ и҆́хъ , вᲂздви́жесѧ и҆ сто́лпъ ѻ҆́блачныи ѿ лица̀ и҆́хъ , и҆ ста̀ сᲂзадѝ и҆́хъ , и҆ вни́де пᲂсредѣ̀ пᲂлка̀ є҆ги́петскагѡ , и҆ пᲂсредѣ̀ пᲂлка̀ сынѡ́въ і҆и҃левыхъ , и҆ бы́сть тма̀ и҆ мгла̀ , и҆ прїи́де но́щь , и҆ несмѣси́шасѧ дрꙋ́гъ ко́ дрꙋгꙋ всю̀ но́щь . прᲂстре́ же мѡѷсе́й рꙋ́кꙋ на́ мᲂре , и҆ вᲂзгна̀ гдⷭ҇ь мо́ре , вѣ́трᲂмъ ю҆́гᲂмъ нꙋ́жнымъ всю̀ но́щь , и҆ разстꙋпи́сѧ вᲂда̀ , и҆ сᲂтвᲂрѝ мо́ре сꙋ́шꙋ . и҆ внидо́ша сы́нᲂве і҆и҃левы пᲂсредѣ̀ мо́рѧ по́ сꙋхꙋ , и҆ вᲂда̀ и҆́мъ бы́сть стѣна̀ ѡ҆деснꙋ́ю , и҆ стѣна̀ ѡ҆шꙋ́юю . гна́ша же є҆ги́птѧне , и҆ внидо́ша в̾ слѣ́дъ и҆́хъ , и҆ всѧ́къ ко́нь фараѡ́нᲂвъ , и҆ кᲂлесни́цы и҆ вса́дники пᲂсредѣ̀ мо́рѧ . бы́сть же в̾ стра́жꙋ ᲂу҆́тренюю , и҆ вᲂз̾зрѣ̀ гдⷭ҇ь на́пᲂлкъ є҆ги́петскїи , въ стᲂлпѣ̀ ѻ҆́гненᲂмъ и҆ ѻ҆́блачнᲂмъ , и҆ смѧтѐ по́лкъ є҆ги́петскїи , и҆ свѧза̀ ѻ҆́си кᲂлесни́цамъ и҆́хъ , и҆ ведѧ́ше и҆́хъ съ нꙋ́ждею . и҆ реко́ша є҆ги́птѧне , бѣжи́мъ ѿ лица̀ і҆и҃лева , гдⷭ҇ь бᲂ пᲂсо́бствꙋетъ пᲂ ни́хъ , на є҆ги́птѧны . рече́ же гдⷭ҇ь к̾ мѡѷсе́ю , прᲂстрѝ рꙋ́кꙋ твᲂю̀ на́ мᲂре , и҆ расто́ргни є҆̀ , и҆ да сᲂвᲂкꙋпи́тсѧ вᲂда̀ , и҆ да пᲂкры́етъ є҆ги́птѧны , съ кᲂлесни́цами и҆ сᲂ вса́дники , и҆ ᲂу҆стро́итсѧ вᲂда̀ , кᲂ днꙋ̀ на мѣ́стᲂ свᲂѐ . прᲂстре́ же мѡѷсе́й рꙋ́кꙋ на́ мᲂре , и҆ и҆стрѧсѐ гдⷭ҇ь є҆ги́птѧны пᲂсредѣ̀ мо́рѧ . и҆ ѡ҆брати́вшисѧ вᲂда̀ , пᲂкры̀ кᲂлесни́цы и҆ вса́дники , и҆ всю̀ си́лꙋ фараѡ́нᲂвꙋ , и҆дꙋ́щꙋю в̾ слѣ́дъ и҆́хъ в̾ мо́ре . є҆ги́птѧне же бѣжа́ша пᲂд̾ вᲂдо́ю , и҆ не ѡ҆ста̀ ѿ ни́хъ ни є҆ди́нъ . сы́нᲂве же і҆и҃левы прᲂидо́ша по́ сꙋхꙋ пᲂсредѣ̀ мо́рѧ . вᲂда́ же и҆́мъ стѣна̀ бы́сть ѡ҆деснꙋ́ю , и҆ стѣна̀ ѡ҆шꙋ́юю . и҆ и҆зба́ви гдⷭ҇ь і҆и҃лѧ въ де́нь ѻ҆́нъ , и҆з̾ рꙋкѝ є҆ги́птѧнъ . и҆ ви́дѣ і҆зра́иль є҆ги́птѧны и҆зме́рша прикра́и мо́рѧ . ви́дѣвше же і҆и҃льтѧне рꙋ́кꙋ вели́кꙋю ꙗ҆́же сᲂтвᲂрѝ гдⷭ҇ь є҆ги́птѧнѡмъ , и҆ ᲂу҆бᲂѧ́шасѧ всѝ лю́дїе гдⷭ҇а , и҆ вѣ́рᲂваша бг҃ꙋ , и҆ мѡѷсе́ю ᲂу҆го́дникꙋ є҆гѡ̀ . тᲂгда̀ вᲂспѣ̀ мѡѷсе́й , и҆ сы́нᲂве і҆и҃левы , пѣ́снь сїю̀ гдⷭ҇ви , и҆ реко́ша . чте́цъ гл҃етъ . Пᲂе́мъ гдⷭ҇ви , на́гласъ , є҃ . Сла́внѡ бᲂ прᲂсла́висѧ . Ко́ни и҆ вса́дники вве́рже въ мо́ре , пᲂе́мъ гдⷭ҇ви . И҆ лю́дїе пᲂю́тъ : Сла́внѡ бᲂ прᲂсла́висѧ . Пᲂмо́щникъ и҆ пᲂкрᲂви́тель мо́й гдⷭ҇ь , бы́сть мнѣ̀ вᲂ спасе́нїе . пᲂе́мъ гдⷭ҇ви . Се́й ми є҆́сть бг҃ъ , и҆ прᲂсла́влю и҆̀ , бг҃ъ ѻ҆ц҃а мᲂегѡ̀ , и҆ вᲂзнесꙋ̀ и҆̀ . пᲂе́мъ гдⷭ҇ви . Гдⷭ҇ь сᲂкрꙋша́ѧи бра́ни , гдⷭ҇ь и҆́мѧ є҆мꙋ̀ , кᲂлесни́цы фараѡ́нᲂвы и҆ си́лꙋ є҆гѡ̀ в̾ве́рже въ мо́ре . пᲂе́мъ гдⷭ҇ви . И҆збра́нныѧ вса́дники и҆ триста́ты пᲂтᲂпѝ в̾ чермнѣ́мъ мо́ри . пᲂе́мъ гдⷭ҇ви . Пꙋчи́нᲂю пᲂкры̀ и҆́хъ , пᲂгрѧзо́ша вᲂ глꙋбинѣ̀ ꙗ҆́кѡ ка́мень . пᲂе́мъ гдⷭ҇ви . Десни́ца твᲂѧ̀ гдⷭ҇и прᲂсла́висѧ в̾ крѣ́пᲂсти . пᲂе́мъ гдⷭ҇ви . Десна́ѧ ти рꙋка̀ гдⷭ҇и сᲂкрꙋшѝ врагѝ , и҆ мно́жествᲂмъ сла́вы твᲂеѧ̀ сте́рлъ є҆сѝ сᲂпрᲂти́вныхъ . пᲂе́мъ гдⷭ҇ви . Пᲂсла́лъ є҆сѝ гнѣ́въ сво́й , и҆ пᲂѧдѐ и҆́хъ ꙗ҆́кѡ сте́блїе , и҆ дх҃ᲂмъ ꙗ҆́рᲂсти твᲂеѧ̀ разстꙋпи́сѧ вᲂда̀ . пᲂе́мъ гдⷭ҇ви . Ѡ҆гꙋстѣ́ша ꙗ҆́кѡ стѣна̀ во́ды , ѡ҆гꙋстѣ́ша и҆ во́лны пᲂсредѣ̀ мо́рѧ . пᲂе́мъ гдⷭ҇ви . Речѐ вра́гъ , гна́въ пᲂсти́гнꙋ , раздѣлю̀ кᲂры́сть , насы́щꙋ дш҃ꙋ мᲂю̀ , ᲂу҆тнꙋ̀ мече́мъ мᲂи́мъ , ѡ҆дᲂлѣ́етъ рꙋка̀ мᲂѧ̀ . пᲂе́мъ гдⷭ҇ви . Пᲂсла́лъ є҆сѝ дх҃ъ сво́й , и҆ пᲂкры̀ и҆́хъ мо́ре , пᲂгрѧзо́ша ꙗ҆́кѡ ѻ҆́лᲂвᲂ в̾ вᲂдѣ̀ ѕѣ́льнѣ . пᲂе́мъ гдⷭ҇ви . Кто̀ пᲂдо́бенъ тебѣ̀ въ бᲂзѣ́хъ гдⷭ҇и ; кто̀ пᲂдо́бенъ тебѣ̀ прᲂсла́вленъ вᲂ ст҃ы́хъ , ди́венъ вᲂ сла́вахъ , твᲂрѧ́и чꙋдеса̀ ; пᲂе́мъ гдⷭ҇ви . Прᲂсте́рлъ є҆сѝ десни́цꙋ свᲂю̀ , и҆ пᲂжрѐ и҆́хъ землѧ̀ , наста́вилъ є҆сѝ пра́вдᲂю твᲂе́ю лю́ди твᲂѧ̀ сїѧ̀ , ꙗ҆́же и҆зба́ви . пᲂе́мъ гдⷭ҇ви . Вве́лъ є҆сѝ крѣ́пᲂстїю свᲂе́ю вᲂ ѻ҆би́тель ст҃ꙋ́ю твᲂю̀ , слы́шаша ꙗ҆зы́цы и҆ прᲂгнѣ́вашасѧ , бᲂлѣ́зни прїѧ́ша живꙋ́щїи в̾ филисти́мѣ . пᲂе́мъ гдⷭ҇ви . Тᲂгда̀ смꙋти́шасѧ влады́ки є҆до́мстїи , и҆ кнѧ́зи мᲂа́встїи . прїѧ́тъ и҆́хъ тре́петъ , и҆ раста́ѧшасѧ всѝ живꙋ́щїи в̾ ханаа́нѣ . пᲂе́мъ гдⷭ҇ви . Нападѐ на ни́хъ стра́хъ и҆ тре́петъ , вели́чїемъ мы́шцы твᲂеѧ̀ , да ѡ҆ка́менѧтсѧ . пᲂе́мъ гдⷭ҇ви . До́ндеже прᲂидо́ша лю́дїе твᲂѝ гдⷭ҇и , до́ндеже прᲂидо́ша лю́дїе твᲂѝ сі́и , и҆́хже стѧжа̀ . пᲂе́мъ гдⷭ҇ви . Вве́дъ насадѝ ѧ҆̀ въ го́рꙋ дᲂстᲂѧ́нїѧ твᲂегѡ̀ , въ гᲂто́вᲂе жили́ще твᲂѐ , є҆́же сᲂдѣ́ла гдⷭ҇и , ст҃ы́ню гдⷭ҇и , є҆́же ᲂу҆гᲂто́вастѣ рꙋ́цѣ твᲂѝ . пᲂе́мъ гдⷭ҇ви . Гдⷭ҇ь црⷭ҇твꙋѧ вѣ́ки , и҆ на́ вѣки и҆ є҆щѐ . ꙗ҆́кѡ вни́де фараѡ́нъ съ ко́ньми и҆ съ кᲂлесни́цами и҆ вса́дники в̾ мо́ре , и҆ наведѐ на ни́хъ гдⷭ҇ь во́дꙋ мᲂрскꙋ́ю . пᲂе́мъ гдⷭ҇ви . Сы́нᲂве же і҆и҃левы прᲂидо́ша по́сꙋхꙋ пᲂсредѣ̀ мо́рѧ . сла́ва , пᲂе́мъ гдⷭ҇ви . и҆ ны́нѣ , пᲂе́мъ гдⷭ҇ви . и҆ чте́цъ : Сла́внᲂ бᲂ прᲂсла́висѧ .

Ѿ прᲂро́чества сᲂфо́нїева , чте́нїе .

Та́кѡ глаго́летъ гдⷭ҇ь , пᲂтерпѝ менѐ в̾ де́нь вᲂскрⷭ҇нїѧ мᲂегѡ̀ , вᲂ свидѣ́тельствᲂ мᲂѐ , занѐ сꙋ́дъ мо́й въ со́нмища ꙗ҆зы́къ , прїѧ́ти царѧ̀ , и҆ и҆злїѧ́ти на ни́хъ гнѣ́въ сво́й , и҆ ве́сь гнѣ́въ ꙗ҆́рᲂсти мᲂеѧ̀ , занѐ ѻ҆гне́мъ рве́нїѧ мᲂегѡ̀ пᲂѧде́на бꙋ́детъ всѧ̀ землѧ̀ , ꙗ҆́кѡ тᲂгда̀ приѡ҆брѧ́щꙋ на́ люди ꙗ҆зы́къ в̾ ро́дъ и҆́хъ , є҆́же призыва́ти всѣ́мъ и҆́мѧ гдⷭ҇не , рабо́тати є҆мꙋ̀ пᲂд̾ и҆́гᲂмъ є҆ди́нѣмъ . ѿ кᲂне́цъ рѣ́къ є҆ѳїѡ́пскихъ , прїимꙋ̀ мᲂлѧ́щихъ мѧ , съ раз̾сѣ́ѧнными принесꙋ́тъ же́ртвы мнѣ̀ . въ де́нь ѻ҆́нъ не и҆́маши пᲂстыди́тисѧ ѡ҆ всѣ́хъ начина́нїихъ твᲂи́хъ , и҆́хже нече́ствᲂвалъ є҆сѝ въ мѧ̀ , ꙗ҆́кѡ тᲂгда̀ ѿи҆мꙋ̀ ѿ тебѐ ᲂу҆кᲂри́зны , дᲂсажде́нїѧ твᲂегѡ̀ , и҆ к̾ тᲂмꙋ̀ не и҆́маши прилᲂжи́ти велича́тисѧ в̾ гᲂрѣ̀ ст҃ѣ́й мᲂе́й . и҆ ѡ҆ста́влю в̾ тебѣ̀ лю́ди кро́тки и҆ смире́ны , и҆ бꙋ́дꙋтъ надѣ́ѧтисѧ на́ и҆мѧ гдⷭ҇не , и҆ бл҃гᲂгᲂвѣ́ютъ ѡ҆ и҆́мени гдⷭ҇ни ѡ҆ста́нцы і҆и҃левы , и҆ несᲂтвᲂрѧ́тъ непра́вдꙋ , и҆ невᲂз̾гл҃ютъ сꙋ́етнаѧ , и҆ не ѡ҆брѧ́щетсѧ вᲂ ᲂу҆стѣ́хъ и҆́хъ ꙗ҆зы́къ льсти́въ , зане́же ті́и пᲂжирꙋ́ютъ и҆ ᲂу҆гнѣздѧ́тсѧ , и҆ небꙋ́детъ ᲂу҆страша́ющагᲂ и҆́хъ . Ра́дꙋисѧ ѕѣлѡ̀ дщѝ сїѡ́нᲂва , прᲂпᲂвѣ́дꙋй дщѝ і҆єрⷭ҇ли́мᲂва , весели́сѧ и҆ преꙋкраша́йсѧ ѿ всегѡ̀ срⷣца твᲂегѡ̀ дщѝ і҆єрⷭ҇ли́мᲂва , ѿ ꙗ҆́тъ гдⷭ҇ь непра́вдᲂванїѧ твᲂѧ̀ , и҆ и҆зба́вилъ тѧ є҆́сть ѿ рꙋкѝ вра́гъ твᲂи́хъ . вᲂцари́тсѧ гдⷭ҇ь пᲂсредѣ̀ тебѐ , и҆ не ᲂу҆́зриши к̾ тᲂмꙋ̀ ѕла̀ .

Ѿ црⷭ҇твїѧ тре́тїѧгѡ , чте́нїе .

Бы́сть сло́вᲂ гдⷭ҇не кᲂ и҆лїѝ глаго́лѧ , вᲂста́ни и҆ и҆дѝ въ саре́ффꙋ сидо́нскꙋю , и҆ сѣдѝ тꙋ̀ , и҆ сѐ запᲂвѣ́дахъ тꙋ̀ женѣ̀ вдᲂви́цѣ препита́ти тѧ . и҆ вᲂста́въ и҆ и҆́де въ саре́ффꙋ , и҆ прїи́де вᲂ врата̀ гра́да , и҆ сѐ тꙋ̀ бѧ́ше жена̀ вдᲂви́ца сᲂбира́ше дро́вца . и҆ вᲂзᲂпѝ съ жа́ждею и҆лїѧ̀ , и҆ речѐ к̾ не́й , вᲂзмѝ ᲂу҆́бѡ ма́лѡ вᲂды̀ въ сᲂсꙋ́дѣ , и҆ напїю́сѧ . и҆ и҆́де взѧ́ти , и҆ вᲂзᲂпѝ в̾ слѣ́дъ є҆ѧ̀ и҆лїѧ̀ и҆ речѐ , прїимѝ ᲂу҆́бѡ ми ᲂу҆крꙋ́хъ хлѣ́ба въ рꙋцѣ̀ твᲂе́й , и҆ да ꙗ҆́мъ . и҆ речѐ жена̀ , жи́въ гдⷭ҇ь бг҃ъ мо́й , а҆́ще є҆́сть ᲂу҆ менѐ в̾ сᲂкро́вищи что̀ , нᲂ ра́звѣ є҆ли́кѡ приго́рща мꙋкѝ в̾ вᲂдᲂно́сѣ , и҆ ма́лѡ ма́сла въ чва́нцѣ , и҆ сѐ сᲂбира́ю двѣ̀ пᲂлѣ́нцѣ , и҆ вше́дъ сᲂтвᲂрю̀ себѣ̀ и҆ ча́дᲂмъ свᲂи́мъ , и҆ снѣ́мы и҆ ᲂу҆́мремъ . и҆ речѐ и҆лїѧ̀ къ не́й , пᲂтщи́сѧ вни́ди , и҆ несᲂтвᲂрѝ пᲂ гл҃ꙋ твᲂемꙋ̀ , нᲂ сᲂтвᲂрѝ мнѣ̀ ѿтꙋ́дꙋ ѻ҆прѣсно́къ ма́лъ пре́же , и҆ принеси́ ми , себѣ́ же и҆ ча́дѡмъ свᲂи́мъ да сᲂтвᲂри́ши по́слѣжде . ꙗ҆́кѡ та́кѡ гл҃етъ гдⷭ҇ь бг҃ъ і҆и҃левъ , вᲂдᲂно́съ мꙋкѝ не ѡ҆скꙋдѣ́етъ , и҆ чва́нецъ ма́сла не ᲂу҆ма́литсѧ , до́дне до́ндеже да́стъ гдⷭ҇ь до́ждь на лицѐ всеѧ̀ землѝ . и҆ и҆́де жена̀ и҆ сᲂтвᲂрѝ пᲂ гл҃ꙋ и҆лїинꙋ̀ , и҆ дадѐ є҆мꙋ̀ , и҆ ꙗ҆дѧ́ше са́мъ , и҆ та̀ , и҆ ча́да є҆ѧ̀ . и҆ ѿ тᲂгѡ̀ днѐ , вᲂдᲂно́съ бра́шна не ѡ҆скꙋдѣ̀ , и҆ чва́нецъ ма́сла не ᲂу҆ма́лисѧ , пᲂ гл҃ꙋ гдⷭ҇ню , є҆́же гл҃а рꙋко́ю и҆лїино́ю . И҆ бы́сть пᲂси́хъ , и҆ разбᲂлѣ́сѧ сн҃ъ жены̀ , гᲂспᲂжѝ до́мꙋ , и҆ бѣ̀ бᲂлѣ́знь є҆гѡ̀ крѣпка̀ ѕѣлѡ̀ , до́ндеже не ѡ҆ста̀ в̾ не́мъ дꙋ́хъ . и҆ речѐ жена̀ кᲂ и҆лїѝ , что̀ мнѣ̀ и҆ тебѣ̀ чл҃че бж҃їи , прише́лъ є҆сѝ кᲂ мнѣ̀ є҆́же вᲂспᲂмѧнꙋ́ти непра́вды мᲂѧ̀ , и҆ ᲂу҆мᲂри́ти сн҃а мᲂегѡ̀ ; и҆ речѐ и҆лїѧ̀ к̾ женѣ̀ , да́ждь ми сн҃а свᲂегѡ̀ , и҆ взѧ́тъ є҆гѡ̀ ѿ нѣ́дра є҆ѧ̀ , и҆ вᲂзнесѐ є҆гѡ̀ въ го́рницꙋ , в̾ не́йже са́мъ пᲂчива́ше тꙋ̀ , и҆ пᲂлᲂжѝ є҆гѡ̀ на ѻ҆дрѣ̀ свᲂе́мъ . и҆ вᲂзᲂпѝ и҆лїѧ̀ ко́ гдⷭ҇ꙋ и҆ речѐ , ѽ гдⷭ҇и , сᲂдѣ́телю вдо́вѣй , ᲂу҆неѧ́же а҆́зъ живꙋ̀ , ты̀ ѡ҆ѕло́билъ є҆сѝ є҆́же ᲂу҆мᲂри́ти сн҃а є҆ѧ̀ . и҆ дꙋ́нꙋ на ѻ҆́трᲂчища три́жды , и҆ призва̀ гдⷭ҇а бг҃а и҆ речѐ , гдⷭ҇и бж҃е мо́й , да вᲂз̾врати́тсѧ ᲂу҆́бѡ дш҃а ѻ҆́трᲂчища сегѡ̀ во́нь , и҆ бы́сть та́кѡ . и҆ вᲂзᲂпѝ ѻ҆́трᲂчищь , и҆ ᲂу҆слы́ша гдⷭ҇ь , и҆ гла́сᲂмъ и҆лїины́мъ вᲂз̾врати́сѧ дш҃а ѻ҆́трᲂчища , и҆ ѡ҆живѐ . и҆ пᲂѧ́тъ и҆лїѧ̀ ѻ҆́трᲂчища , и҆ сведѐ є҆гѡ̀ ѿ го́рницы в̾ до́мъ , и҆ дадѐ и҆̀ ма́тери є҆гѡ̀ . и҆ речѐ и҆лїѧ̀ , ви́ждь ꙗ҆́кѡ жи́въ є҆́сть сн҃ъ тво́й . и҆ речѐ жена̀ кᲂ и҆лїѝ , сѐ а҆́зъ разꙋмѣ́хъ , ꙗ҆́кѡ ты̀ чл҃къ бж҃їи є҆сѝ , и҆ глаго́лъ гдⷭ҇нь вᲂ ᲂу҆стѣ́хъ твᲂи́хъ и҆́стиненъ .

Ѿ прᲂро́чества і҆са́ина , чте́нїе .

Да вᲂзра́дꙋетсѧ дш҃а мᲂѧ̀ ѡ҆́ гдⷭ҇ѣ , ѡ҆блече́ бᲂ мѧ в̾ ри́зꙋ спасе́нїѧ , и҆ ѻ҆де́жею весе́лїѧ ѡ҆дѣ́ѧ мѧ , и҆ ꙗ҆́кѡ на жениха̀ вᲂзлᲂжѝ на мѧ̀ вѣне́цъ , и҆ ꙗ҆́кѡ невѣ́стꙋ ᲂу҆краси́ мѧ красᲂто́ю , ꙗ҆́кѡ землѧ̀ растѧ́щаѧ цвѣ́тъ сво́й , и҆ ꙗ҆́кѡ вертᲂгра́дъ сѣ́мена свᲂѧ̀ прᲂзѧба́ѧ , та́кѡ прᲂсїѧ́етъ гдⷭ҇ь пра́вдꙋ и҆ ра́дᲂсть предᲂ всѣ́ми ꙗ҆зы́ки . Сїѡ́на ра́ди непремᲂлчꙋ̀ , і҆єрᲂсали́ма ра́ди непᲂпꙋщꙋ̀ , до́ндеже ᲂу҆́бѡ и҆зы́детъ ꙗ҆́кѡ свѣ́тъ пра́вда мᲂѧ̀ , и҆ спасе́нїе мᲂѐ ꙗ҆́кѡ свѣти́лᲂ раз̾жже́тсѧ . и҆ ᲂу҆́зрѧтъ ꙗ҆зы́цы пра́вдꙋ твᲂю̀ , и҆ всѝ ца́рїе сла́вꙋ твᲂю̀ . и҆ прᲂзᲂвꙋ́тъ тѧ и҆́менемъ но́вымъ , є҆́же гдⷭ҇ь и҆менꙋ́етъ є҆̀ . и҆ бꙋ́деши вѣне́цъ дᲂбро́ты в̾ рꙋцѣ̀ гдⷭ҇ни , и҆ глави́зна црⷭ҇твїѧ в̾ рꙋцѣ̀ бг҃а твᲂегѡ̀ , и҆ к̾ тᲂмꙋ̀ ненарече́шисѧ ѡ҆ста́вленъ , и҆ землѧ̀ твᲂѧ̀ к̾ тᲂмꙋ̀ ненарече́тсѧ пꙋста̀ . ты́ бᲂ прᲂзᲂве́шисѧ и҆́менемъ мᲂи́мъ , и҆ землѧ̀ твᲂѧ̀ вселе́ннаѧ , ꙗ҆́кѡ бл҃гᲂизво́ли гдⷭ҇ь на тебѣ̀ , и҆ землѧ̀ твᲂѧ̀ насели́тсѧ . и҆ ꙗ҆́кѡ живѧ́и ю҆́нᲂша съ дѣ́вᲂю , та́кѡ пᲂживꙋ́тъ сы́нᲂве твᲂѝ съ тᲂбо́ю . и҆ бꙋ́детъ и҆́мже ѻ҆́бразᲂмъ вᲂзвесели́тсѧ жени́хъ ѡ҆ невѣ́стѣ , та́кѡ вᲂзвесели́тсѧ гдⷭ҇ь ѡ҆ тебѣ̀ .

Ѿ бытїѧ̀ , чте́нїе .

Бы́сть пᲂ глаго́лѣхъ си́хъ , бг҃ъ и҆скꙋша́ше а҆враа́ма , и҆ речѐ к̾ немꙋ̀ , а҆враа́ме , а҆враа́ме . и҆ речѐ , сѐ а҆́зъ . и҆ речѐ , пᲂймѝ сн҃а свᲂегѡ̀ вᲂзлю́бленнагᲂ , є҆го́же вᲂзлюби́лъ є҆сѝ і҆саа́ка , и҆ и҆дѝ в̾ зе́млю высо́кꙋю , и҆ вᲂзнесѝ є҆гѡ̀ в̾ тре́бꙋ на є҆ди́нꙋ ѿ го́ръ , ю҆́же а҆́ще ти пᲂкажꙋ̀ . вᲂста́въ же а҆враа́мъ ᲂу҆́трᲂ , ѡ҆седла̀ ѻ҆сла̀ свᲂего̀ , и҆ пᲂѧ́тъ съ сᲂбо́ю два̀ ѻ҆́трᲂчища раба̀ , и҆ і҆саа́ка сн҃а свᲂего̀ , и҆ свѧза́въ дрᲂва̀ к̾ тре́бѣ вᲂста́въ и҆́де , и҆ прїи́де на мѣ́стᲂ и҆дѣ́же речѐ є҆мꙋ̀ бг҃ъ , в̾де́нь тре́тїи . и҆ вᲂз̾зрѣ́въ а҆враа́мъ ѻ҆чи́ма свᲂи́ма ви́дѣ мѣ́стᲂ и҆здале́ча , и҆ речѐ а҆враа́мъ рабо́ма свᲂи́ма , сѣди́те тꙋ̀ сᲂ ѻ҆слѧ́темъ , а҆́зъ же и҆ дѣ́тищь до́йдема дᲂ ѻ҆́ндѣ , и҆ пᲂклᲂни́вшесѧ вᲂзврати́мсѧ к̾ ва́мъ . прїѧ́тъ же а҆враа́мъ дрᲂва̀ тре́бныѧ , и҆ вᲂзлᲂжѝ і҆саа́кꙋ сн҃ꙋ свᲂемꙋ̀ . взѧ́же в̾ рꙋ́цѣ ѻ҆́гнь и҆ но́жь , и҆ и҆до́ста ѻ҆́ба вкꙋ́пѣ . рече́ же і҆саа́къ кᲂ а҆враа́мꙋ ѻ҆ц҃ꙋ свᲂемꙋ̀ ѻ҆́ч҃е , ѻ҆́нъ же речѐ , что̀ є҆́сть ча́дᲂ ; рече́ же , сѐ ѻ҆́гнь и҆ дрᲂва̀ , гдѣ̀ є҆́сть ѻ҆вча̀ на тре́бꙋ ; рече́ же а҆враа́мъ , бг҃ъ ᲂу҆́зритъ ѻ҆вча̀ себѣ̀ є҆́же на тре́бꙋ ча́дᲂ . и҆ и҆до́ша же ѻ҆́ба вкꙋ́пѣ , и҆ прїидо́ста на мѣ́стᲂ и҆дѣ́же речѐ є҆мꙋ̀ бг҃ъ . и҆ сᲂзда̀ а҆враа́мъ тꙋ̀ же́ртвеникъ , и҆ вᲂзлᲂжѝ дрᲂва̀ , и҆ свѧза̀ і҆саа́ка сн҃а свᲂегѡ̀ , вᲂзлᲂжѝ є҆гѡ̀ на же́ртвеникъ верхꙋ̀ дро́въ . и҆ прᲂстрѐ а҆враа́мъ рꙋ́кꙋ свᲂю̀ прїѧ́ти но́жь , закла́ти сн҃а свᲂегѡ̀ , и҆ вᲂзва̀ є҆гѡ̀ а҆́нг҃лъ гдⷭ҇нь с̾ небесѐ , и҆ речѐ є҆мꙋ̀ , а҆враа́ме а҆враа́ме . ѻ҆́нъ же речѐ , сѐ а҆́зъ . рече́ же , невᲂзлᲂжѝ рꙋ́кꙋ свᲂю̀ на ѻ҆́трᲂчища , ни сᲂтвᲂрѝ є҆мꙋ̀ ничто́же . ны́нѣ бᲂ разꙋмѣ́хъ ꙗ҆́кѡ бᲂи́шисѧ ты̀ бг҃а , и҆ непᲂщадѣ̀ сы́на свᲂегѡ̀ вᲂзлю́бленнагᲂ менѐ ра́ди . и҆ вᲂз̾зрѣ̀ а҆враа́мъ ѻ҆чи́ма свᲂи́ма , и҆ ви́дѣ , и҆ сѐ ѻ҆ве́нъ є҆ди́нъ ᲂу҆вѧ́зе держи́мъ за рᲂга̀ в̾ садꙋ̀ саве́кᲂвѣ . и҆ и҆́де а҆враа́мъ , и҆ взѧ́тъ ѻ҆вна̀ , и҆ вᲂзнесѐ є҆гѡ̀ на всепло́дїе , вмѣ́стѡ і҆саа́ка сн҃а свᲂегѡ̀ , и҆ наречѐ а҆враа́мъ и҆́мѧ мѣ́стꙋ тᲂмꙋ̀ , гдⷭ҇ь ви́дѣ . и҆ да рекꙋ́тъ и҆ дᲂ дне́сь , на гᲂрѣ̀ гдⷭ҇ь ꙗ҆ви́сѧ . И҆ вᲂзва̀ а҆́нг҃лъ гдⷭ҇нь а҆враа́ма втᲂро́е с̾ нб҃сѐ , гл҃ѧ , сᲂбо́ю клѧ́хсѧ гл҃етъ гдⷭ҇ь , пᲂне́же сᲂтвᲂри́лъ є҆сѝ глаго́лъ се́й , и҆ непᲂщадѣ̀ сн҃а свᲂегѡ̀ вᲂзлю́бленнагᲂ менѐ ра́ди . вᲂи́стинꙋ ᲂу҆́бѡ бл҃гᲂслᲂвѧ̀ бл҃гᲂслᲂвлю́ тѧ , и҆ мно́жа ᲂу҆мно́жꙋ сѣ́мѧ твᲂѐ ꙗ҆́кѡ ѕвѣ́зды нбⷭ҇ныѧ , и҆ ꙗ҆́кѡ песо́къ и҆́же въ скра́й мо́рѧ . и҆ наслѣ́дитъ сѣ́мѧ твᲂѐ гра́ды сᲂпᲂста́тныхъ , и҆ бл҃гᲂслᲂвѧ́тсѧ ѡ҆ сѣ́мени твᲂе́мъ всѝ ꙗ҆зы́цы зе́мстїи , зане́же пᲂслꙋ́шалъ є҆сѝ гла́са мᲂего̀ .

Ѿ прᲂро́чества і҆са́ина , чте́нїе .

Дх҃ъ гдⷭ҇нь на мнѣ̀ , и҆́мже пᲂма́за мѧ , бл҃гᲂвѣсти́ти ни́щимъ пᲂсла́ мѧ , и҆ и҆сцѣли́ти сᲂкрꙋше́нныѧ срⷣцемъ , прᲂпᲂвѣ́дати плѣне́нымъ ѿпꙋще́нїе , и҆ слѣпы́мъ прᲂзрѣ́нїе , призва́ти лѣ́тᲂ гдⷭ҇не прїѧ́тнᲂ , и҆ де́нь вᲂздаѧ́нїѧ бг҃а на́шегѡ . ᲂу҆тѣ́шити всѧ̀ пла́чꙋщїѧ , да́ти пла́чꙋщимсѧ сїѡ́на . сла́вꙋ за пе́пелъ . пᲂма́занїе весе́лїѧ а҆́чꙋщимъ . и҆ ᲂу҆краше́нїе сла́вы , за́ дꙋхъ ᲂу҆ны́нїѧ . и҆ нарекꙋ́тсѧ ро́дᲂве пра́вды , насажде́нїе гдⷭ҇не въ сла́вꙋ . и҆ сᲂзи́ждꙋтсѧ пꙋсты́ни вѣ́чныѧ , запꙋстѣ́вшїѧ пре́жде . вᲂздви́гнꙋтъ и҆ ѡ҆бнᲂвѧ́тъ гра́ды запꙋстѣ́вшїѧ , ѿ́рᲂда и҆ ро́да . и҆ прїи́дꙋтъ и҆нᲂро́днїи пасꙋ́ще ѻ҆́вцы твᲂѧ̀ , и҆ и҆нᲂплеме́нницы винᲂгра́дницы и҆ ѻ҆рачѝ ва́мъ . вы́ же сщ҃е́нницы гдⷭ҇ни нарече́тесѧ , и҆ слꙋже́бницы бг҃ꙋ ва́шемꙋ . и҆ рече́тсѧ ва́мъ , крѣ́пᲂсть ꙗ҆зы́къ пᲂѧ́сте , и҆ въ бᲂга́тьствѣ и҆́хъ ᲂу҆диви́тесѧ . и҆ стꙋ́дъ ва́шъ сꙋгꙋ́быи . и҆ за сра́мъ , вᲂзра́дꙋетесѧ въ ча́сти и҆́хъ . сегѡ̀ ра́ди зе́млю свᲂю̀ втᲂри́цею наслѣ́дите , и҆ вᲂзвесели́тесѧ вѣ́чнѡ над̾ главо́ю и҆́хъ . а҆́зъ бᲂ є҆́смь гдⷭ҇ь любѧ́и пра́вдꙋ , и҆ ненави́дѧи хище́нїѧ ѿ непра́вды . и҆ да́мъ трꙋ́дъ и҆́хъ пра́ведникѡмъ , и҆ завѣ́тъ вѣ́ченъ завѣща́ю и҆́мъ . и҆ пᲂзна́ютсѧ вᲂ ꙗ҆зы́цѣхъ сѣ́мена и҆́хъ и҆ внꙋ́цы и҆́хъ пᲂсредѣ̀ люде́й . и҆ всѧ́къ ви́дѧ и҆́хъ , пᲂзна́етъ и҆́хъ , ꙗ҆́кѡ сі́и сꙋ́ть сѣ́мѧ бл҃гᲂслᲂве́нᲂ ѿ́ бг҃а . и҆ весе́лїемъ вᲂзвеселѧ́тсѧ ѡ҆́ гдⷭ҇ѣ .

Ѿ црⷭ҇твїѧ четве́ртагѡ , чте́нїе .

Бы́сть де́нь , и҆ ми́мѡ и҆́де є҆лисе́й в̾ сᲂма́нъ , и҆ тꙋ̀ жена̀ вели́ка , и҆ ᲂу҆держа̀ є҆гѡ̀ снѣ́сти хлѣ́бъ . и҆ бы́сть мно́жицею вхᲂди́ти є҆мꙋ̀ и҆ и҆схᲂди́ти , и҆ ᲂу҆клᲂнѧ́шесѧ та́мѡ ꙗ҆́сти . и҆ речѐ жена̀ к̾ мꙋ́жꙋ свᲂемꙋ̀ , сѐ ᲂу҆́бѡ разꙋмѣ́хъ ꙗ҆́кѡ чл҃къ бж҃їи ст҃ъ ми́мѡ хо́дитъ сквᲂзѣ̀ на́съ всегда̀ . сᲂтвᲂри́мъ ᲂу҆́бѡ є҆мꙋ̀ го́рничнᲂ мѣ́стᲂ ма́лᲂ , и҆ пᲂста́вимъ є҆мꙋ̀ та́мѡ ѻ҆́дръ , и҆ трапе́зꙋ и҆ престо́лъ и҆ свѣ́щникъ . и҆ бꙋ́детъ внегда̀ вхᲂди́ти є҆мꙋ̀ к̾ на́мъ , и҆ ᲂу҆клᲂнѧ́тисѧ та́мѡ . и҆ бы́сть де́нь , и҆ вни́де та́мѡ и҆ ᲂу҆клᲂни́сѧ в̾ го́рницꙋ и҆ спа̀ тꙋ̀ . и҆ речѐ гїѡзі́ю ѻ҆́трᲂчищꙋ свᲂемꙋ̀ , призᲂви́ ми сᲂмантѧны́ню сїю̀ . и҆ призва̀ ю҆̀ , и҆ ста̀ пред̾ ни́мъ . и҆ речѐ є҆мꙋ̀ , рцы̀ ᲂу҆́бѡ к̾ не́й , сѐ ᲂу҆диви́ла є҆сѝ на́мъ вседне́внᲂе сїѐ , и҆ что̀ пᲂдᲂба́етъ ми сᲂтвᲂри́ти тебѣ̀ ; а҆́ще є҆́сть тебѣ̀ сло́вᲂ к̾ цр҃ю , и҆лѝ ко́ кнѧзю си́лы ; ѻ҆на́ же речѐ , нѣ́сть , пᲂсредѣ̀ люде́й свᲂи́хъ а҆́зъ є҆́смь живꙋ́щи . и҆ речѐ к̾ гїѡзі́ю , что̀ пᲂдᲂба́етъ сᲂтвᲂри́ти є҆́й ; и҆ речѐ гїѡзі́й ѻ҆́трᲂчищь є҆гѡ̀ , и҆ па́че сы́на нѣ́сть ᲂу҆ неѧ̀ , а҆ мꙋ́жъ є҆ѧ̀ нѣ́сть ста́ръ . и҆ речѐ , призᲂвѝ є҆ѧ̀ , и҆ призва̀ ю҆̀ , и҆ ста̀ пред̾ две́рми . и҆ речѐ є҆лисе́й к̾ не́й , во́ времѧ сѐ ꙗ҆́кѡ ча́съ жи́въ , и҆ ты̀ за́чнеши сы́на . ѻ҆на́ же речѐ , нѝ гдⷭ҇и мо́й чл҃че бж҃їи , несᲂлжѝ рабѣ̀ твᲂе́й . и҆ во́ чревѣ прїѧ́тъ жена̀ , и҆ рᲂдѝ сы́на во́ времѧ сїѐ , ꙗ҆́кѡ ча́съ жи́въ , ꙗ҆́кᲂже глаго́ла к̾ не́й є҆лисе́й . и҆ ᲂу҆страби́сѧ ѻ҆́трᲂчищь . и҆ бы́сть внегда̀ и҆зы́де кᲂ ѻ҆тцꙋ̀ свᲂемꙋ̀ к̾ жнꙋ́щимъ , и҆ речѐ кᲂ ѻ҆тцꙋ̀ свᲂемꙋ̀ , глава́ ми бᲂли́тъ . и҆ речѐ ѻ҆те́цъ кᲂ ѻ҆́трᲂчищꙋ , несѝ є҆гѡ̀ к̾ ма́тери є҆гѡ̀ . и҆ то́й несѐ є҆гѡ̀ к̾ ма́тери є҆гѡ̀ . и҆ ᲂу҆́спе на кᲂлѣ́нꙋ є҆ѧ̀ дᲂ пᲂлꙋ́дне , и҆ ᲂу҆́мре . и҆ вᲂзнесѐ є҆гѡ̀ , и҆ пᲂлᲂжѝ на ѻ҆дрѣ̀ чл҃ка бж҃їѧ , и҆ затвᲂрѝ хра́минꙋ , и҆ и҆зы́де . и҆ призва̀ мꙋ́жа свᲂегѡ̀ и҆ речѐ , пᲂслѝ ᲂу҆́бѡ ми є҆ди́нагѡ ѿ ѻ҆́трᲂчищь , и҆ є҆ди́нагѡ ѿ ѻ҆слѧ́тъ , и҆ текꙋ̀ дᲂ чл҃ка бж҃їѧ и҆ вᲂз̾вращꙋ́сѧ . и҆ речѐ , что̀ ꙗ҆́кѡ и҆́деши к̾ немꙋ̀ дне́сь , нено́въ мѣ́сецъ нижѐ сꙋбо́та . ѻ҆на́ же речѐ , ми́ръ . и҆ ѡ҆седла̀ ѻ҆сла̀ , и҆ речѐ кᲂ ѻ҆́трᲂчищꙋ свᲂемꙋ̀ , ведѝ и҆ и҆дѝ да незадержи́ши мѧ є҆́же всѣ́сти , ꙗ҆́кѡ а҆́ще рекꙋ́ ти грѧдѝ , и҆ по́йдеши и҆ до́йдеши к̾ чл҃кꙋ бж҃їю в̾ го́рꙋ карми́льскꙋю . и҆ бы́сть ꙗ҆́кѡ ви́дѣ є҆лисе́й грѧдꙋ́щꙋ є҆ѧ̀ , и҆ речѐ к̾ гїѡзі́ю ѻ҆́трᲂчищꙋ свᲂемꙋ̀ , сѐ сᲂмантѧны́нѧ ѻ҆на̀ и҆́детъ , ны́нѣ тецы̀ вᲂ срѣ́тенїе є҆́й , и҆ рече́ши ми́ръ тебѣ̀ , ми́ръ мꙋ́жꙋ твᲂемꙋ̀ , ми́ръ ѻ҆́трᲂчищꙋ . ѻ҆на́ же речѐ ми́ръ , и҆ прїи́де к̾ є҆лисе́ю в̾ го́рꙋ , и҆ ꙗ҆́тсѧ за́ нᲂзѣ є҆гѡ̀ . и҆ прибли́жисѧ гїѡзі́й ѿри́нꙋти ю҆̀ , и҆ речѐ є҆лисе́й , ѡ҆ста́ви ю҆̀ , ꙗ҆́кѡ дш҃а є҆ѧ̀ приско́рбна є҆́сть є҆́й , и҆ гдⷭ҇ь ᲂу҆кры̀ ѿ менѐ , и҆ невᲂзвѣстѝ мнѣ̀ . ѻ҆на́ же речѐ , є҆гда̀ прᲂси́хъ сы́на ᲂу҆́ гдⷭ҇а мᲂегѡ̀ , ꙗ҆́кѡ реко́хъ , непрельстѝ менѐ . и҆ речѐ є҆лисе́й гїѡзі́ю , препᲂѧ́ши чресла̀ свᲂѧ̀ , и҆ вᲂзмѝ же́злъ мо́й в̾ рꙋ́цѣ свᲂѝ , и҆ пᲂйдѝ , ꙗ҆́кѡ а҆́ще ѡ҆брѧ́щеши мꙋ́жа да неблгⷭ҇ви́ши є҆гѡ̀ . и҆ а҆́ще блгⷭ҇ви́тъ тѧ мꙋ́жъ , не ѿвѣща́й є҆мꙋ̀ . и҆ вᲂзлᲂжѝ же́злъ мо́й на лицѐ ѻ҆́трᲂчищꙋ . и҆ речѐ ма́ти ѻ҆трᲂча́те , жи́въ гдⷭ҇ь , и҆ жива̀ дш҃а твᲂѧ̀ , а҆́ще ѡ҆ста́влю тебѐ . и҆ вᲂста́въ є҆лисе́й , и҆ и҆́де в̾ слѣ́дъ є҆ѧ̀ . и҆ гїѡзі́й и҆́де пред̾ не́ю . и҆ вᲂзлᲂжѝ же́злъ на лицѐ ѻ҆́трᲂчищꙋ , и҆ небѣ̀ гла́са и҆ небѣ̀ слы́шанїѧ , и҆ вᲂзврати́сѧ в̾ срѣ́тенїе є҆гѡ̀ , и҆ вᲂзвѣстѝ є҆мꙋ̀ глаго́лѧ , невᲂста̀ ѻ҆́трᲂчищь . и҆ вни́де є҆лисе́й в̾ хра́минꙋ , и҆ сѐ ѻ҆́трᲂчищь ᲂу҆ме́рыи пᲂлᲂже́нъ на ѻ҆дрѣ̀ є҆гѡ̀ . и҆ вни́де є҆лисе́й , и҆ затвᲂрѝ две́ри ѿ ѻ҆бо́ю са́мꙋю , и҆ пᲂмᲂли́сѧ ко́ гдⷭ҇ꙋ . и҆ взы́де и҆ лѧ́же на ѻ҆́трᲂчищи , и҆ пᲂлᲂжѝ ᲂу҆ста̀ свᲂѧ̀ , на ᲂу҆стѣ́хъ є҆гѡ̀ , и҆ ѻ҆́чи свᲂѝ на ѻ҆́чїю є҆гѡ̀ , и҆ рꙋ́цѣ свᲂѝ , на́ рꙋцѣ є҆гѡ̀ , и҆ плеснѣ̀ свᲂѝ , на плеснꙋ̀ є҆гѡ̀ , и҆ дꙋ́нꙋ на́нь , и҆ ѡ҆бъи́де ѡ҆ не́мъ . и҆ раз̾грѣ́ѧсѧ пло́ть ѻ҆́трᲂчища , и҆ ѡ҆брати́сѧ и҆ ѡ҆бхᲂдѝ въ хра́минѣ сю́дꙋ и҆ сю́дꙋ . и҆ взы́де и҆ над̾клᲂни́сѧ над̾ ѻ҆́трᲂчища дᲂ се́дмь кра́тъ , и҆ ѿве́рзе ѻ҆́трᲂчищь ѻ҆́чи свᲂѝ . и҆ вᲂзᲂпѝ є҆лисе́й къ гїѡзі́ю , и҆ речѐ , призᲂви́ми сᲂмантѧны́ню тꙋ̀ . и҆ вᲂзва̀ ю҆̀ , и҆ вни́де к̾ немꙋ̀ , и҆ речѐ є҆́й , прїимѝ сы́на твᲂегѡ̀ . и҆ взы́де жена̀ , и҆ падѐ на нᲂгꙋ̀ є҆гѡ̀ , и҆ пᲂклᲂни́сѧ є҆мꙋ̀ дᲂ землѝ , и҆ пᲂѧ́тъ сы́на свᲂегѡ̀ , и҆ и҆зы́де .

Ѿ прᲂро́чества і҆са́ина , чте́нїе .

Та́кѡ глаго́летъ гдⷭ҇ь , гдѣ̀ вᲂзведы́и ѿ землѝ па́стырѧ ѻ҆вца́мъ свᲂи́мъ ; гдѣ̀ є҆́сть пᲂлᲂжи́выи в̾ ни́хъ дх҃ъ ст҃ы́и , и҆ вᲂзведы́и десни́цею мѡѷсе́ѧ ; мы́шцею сла́вы є҆гѡ̀ ᲂу҆крѣпѣ̀ вᲂда̀ ѿ лица̀ є҆гѡ̀ , сᲂтвᲂри́ти себѣ̀ и҆́мѧ вѣ́чнᲂ , и҆ прᲂведѐ и҆́хъ сквᲂзѣ̀ бе́зднꙋ , ꙗ҆́кѡ кᲂнѧ̀ сквᲂзѣ̀ пꙋсты́ню , и҆ не ᲂу҆трꙋди́шасѧ . и҆ ꙗ҆́кѡ скᲂты̀ по́ пᲂлю , и҆ неꙋбᲂѧ́шасѧ . и҆ сни́де дх҃ъ ѿ́ гдⷭ҇а , и҆ наста́ви и҆́хъ . си́це вᲂди́лъ є҆́сть лю́ди свᲂѧ̀ , сᲂтвᲂри́ти себѣ̀ и҆́мѧ сла́внᲂ . ѡ҆брати́сѧ с̾ небесѐ гдⷭ҇и , и҆ ви́ждь ѿ́ дᲂмꙋ ст҃а́гѡ твᲂегѡ̀ и҆ сла́вы . гдѣ̀ є҆́сть ре́внᲂсть твᲂѧ̀ и҆ крѣ́пᲂсть твᲂѧ̀ . гдѣ̀ є҆́сть мно́жествᲂ млⷭ҇ти твᲂеѧ̀ , и҆ щедро́тъ твᲂи́хъ , ꙗ҆́кѡ ми́лᲂваше на́съ гдⷭ҇и . ты́ бᲂ є҆сѝ на́шъ ѻ҆ц҃ъ , ꙗ҆́кѡ а҆враа́мъ неꙋвѣ́дѣ на́съ , и҆ і҆и҃ль непᲂзна̀ на́съ . нᲂ ты̀ гдⷭ҇и ѻ҆ц҃ъ на́шъ и҆збавлѧ́ѧ на́съ , и҆ ѿ зача́ла и҆́мѧ твᲂѐ на на́съ є҆́сть . что̀ ᲂу҆клᲂни́лъ є҆сѝ на́съ гдⷭ҇и ѿ пꙋтѝ твᲂегѡ̀ , и҆ ѡ҆жести́лъ є҆сѝ срⷣца̀ на́ша , ꙗ҆́кѡ небᲂѧ́тисѧ тебѐ ; ѡ҆брати́сѧ ра́бъ твᲂи́хъ ра́ди , и҆ племе́нъ дᲂстᲂѧ́нїѧ твᲂегѡ̀ , да пᲂнѐ ма́лѡ наслѣ́димъ гᲂры̀ ст҃ы́ѧ твᲂеѧ̀ . прᲂти́вницы на́ши пᲂпра́ша ст҃ы́ню твᲂю̀ , бы́хᲂмъ ꙗ҆́кѡ и҆спе́рва , є҆гда̀ невладѣ̀ на́ми , нижѐ бѣ̀ нарече́нᲂ и҆́мѧ твᲂѐ на на́съ . а҆́ще ѿве́рзеши не́бᲂ , тре́петъ прїи́мꙋтъ го́ры ѿ тебѐ , и҆ раста́ютсѧ ꙗ҆́кᲂже та́етъ во́скъ ѿ лица̀ ѻ҆гнѧ̀ , и҆ пᲂжже́тъ ѻ҆́гнь сᲂпᲂста́ты твᲂѧ̀ , и҆ ꙗ҆́вѣ бꙋ́детъ и҆́мѧ твᲂѐ сᲂпрᲂти́внымъ . ѿ лица̀ твᲂегѡ̀ ꙗ҆зы́цы вᲂзмѧтꙋ́тсѧ . є҆гда̀ сᲂтвᲂри́ши сла́внаѧ , тре́петъ прїи́мꙋтъ ѿ тебѐ го́ры . ѿ́вѣка неслы́шахᲂмъ , нижѐ ѻ҆́чи на́ши ви́дѣша бг҃а , ра́звѣ тебѐ . и҆ дѣ́ла твᲂѧ̀ и҆́стинна , ꙗ҆́же сᲂтвᲂри́ши терпѧ́щимъ тѧ . ми́лᲂсть бᲂ срѧ́щетъ , твᲂрѧ́щихъ пра́вдꙋ , и҆ пꙋтѝ твᲂѧ̀ пᲂмѧ́нꙋтъ .

Ѿ прᲂро́чества і҆єремі́ина , чте́нїе .

Та́кѡ глаго́летъ гдⷭ҇ь , сѐ дні́е грѧдꙋ́тъ , и҆ завѣща́ю до́мꙋ і҆и҃левꙋ , и҆ до́мꙋ і҆ꙋ́дᲂвꙋ завѣ́тъ но́въ , не пᲂ завѣ́тꙋ є҆́же завѣща́хъ ѻ҆ц҃е́мъ и҆́хъ , въ де́нь во́ньже є҆́мшꙋ ми за́ рꙋкꙋ и҆́хъ , и҆звестѝ и҆з̾ землѝ є҆ги́петскїѧ , занѐ ті́и непребы́ша в̾ завѣ́тѣ мᲂе́мъ , и҆ а҆́зъ неради́хъ ѡ҆ ни́хъ гл҃етъ гдⷭ҇ь . ꙗ҆́кѡ се́й завѣ́тъ , и҆́же завѣща́ю до́мꙋ і҆и҃левꙋ . по́днехъ ѻ҆́нѣхъ речѐ гдⷭ҇ь , даю̀ зако́ны мᲂѧ̀ в̾ смы́слы и҆́хъ , и҆ на срⷣца́хъ и҆́хъ напишꙋ̀ ѧ҆̀ , и҆ бꙋ́дꙋ и҆́мъ в̾ бг҃а , и҆ ті́и бꙋ́дꙋтъ мнѣ̀ в̾ лю́ди . и҆ ненаꙋча́тъ к̾ тᲂмꙋ̀ ко́ждᲂ и҆́скренѧгѡ свᲂегѡ̀ , и҆ ко́ждᲂ бра́та свᲂегѡ̀ гл҃ѧ , пᲂзна́й гдⷭ҇а , ꙗ҆́кѡ всѝ ᲂу҆вѣ́дѧтъ мѧ ѿ ма́лагѡ и҆́хъ и҆ дᲂ вели́ка , речѐ гдⷭ҇ь , занѐ млⷭ҇тивъ бꙋ́дꙋ непра́вдамъ и҆́хъ , и҆ грѣхѝ и҆́хъ непᲂмѧнꙋ̀ к̾ тᲂмꙋ̀ .

Ѿ прᲂро́чества данїи́лᲂва , чте́нїе .

Въ лѣ́тᲂ ѻ҆смᲂнадесѧ́тᲂе , навꙋхᲂдᲂнᲂсо́ръ ца́рь сᲂтвᲂрѝ ѻ҆́бразъ зла́тъ , высᲂта̀ є҆мꙋ̀ лакте́й шестьдесѧ́тъ , и҆ ширᲂта̀ є҆гѡ̀ лакте́й ше́сть . и҆ пᲂста́ви є҆гѡ̀ на́пᲂлѣ деи́рѣ , в̾ странѣ̀ вавило́нстѣй . и҆ пᲂсла̀ навꙋхᲂдᲂнᲂсо́ръ ца́рь , сᲂбра́ти всѧ̀ вели́кїѧ мѣ́стныѧ кнѧ́зи , и҆ влады́ки , и҆ вᲂево́ды , и҆ вᲂждѝ , и҆ мꙋчи́тели , и҆ сꙋ́щихъ над̾ властьмѝ , и҆ всѧ̀ кнѧ́зи страна́мъ , и҆ прїитѝ на ѡ҆бнᲂвле́нїе кꙋми́ра , є҆го́же пᲂста́ви навꙋхᲂдᲂнᲂсо́ръ ца́рь . И҆ сᲂбра́шасѧ мѣ́стнїи кнѧ́зи , и҆ влады́ки , и҆ вᲂево́ды , вᲂждѝ и҆ мꙋчи́тели вели́цыи , и҆ и҆́же над̾ властьмѝ , и҆ всѝ кнѧ́зи страна́мъ прїидо́ша на ѡ҆бнᲂвле́нїе тѣ́ла , є҆го́же пᲂста́ви навꙋхᲂдᲂнᲂсо́ръ ца́рь . и҆ ста́ша пред̾ кꙋми́рᲂмъ , и҆ прᲂпᲂвѣ́дникъ вᲂпїѧ́ше крѣ́пᲂстїю , ва́мъ глаго́летсѧ ꙗ҆зы́цы , лю́дїе , племена̀ , во́ньже ча́съ а҆́ще ᲂу҆слы́шите гла́съ трꙋбы̀ , свирѣ́лей же и҆ гꙋ́слей , ѡ҆бра́зїѧ же ѻ҆рга́нᲂвъ , и҆ пѣ́вницъ сᲂгла́сїѧ , и҆ всѧ́кагѡ ро́да мꙋсикі́йска , па́дающе пᲂклᲂнѧ́йтесѧ тѣ́лꙋ злато́мꙋ , є҆го́же пᲂста́ви навꙋхᲂдᲂнᲂсо́ръ ца́рь . и҆ и҆́же а҆́ще непа́дъ пᲂклᲂни́тсѧ в̾ то́й ча́съ вве́рженъ бꙋ́детъ в̾ пе́щь ѻ҆гне́мъ гᲂрѧ́щꙋю ; И҆ бы́сть є҆гда̀ ᲂу҆слы́шаша лю́дїе гла́съ трꙋ́бъ , свирѣ́лей же и҆ гꙋ́слей , ѡ҆бра́зїѧ же ѻ҆рга́нъ , и҆ пѣ́вницъ сᲂгла́сїѧ , и҆ всѧ́кагѡ ро́да мꙋсикі́йска , па́дающе лю́дїе , племена̀ и҆ ꙗ҆зы́цы , пᲂклᲂнѧ́хꙋсѧ тѣ́лꙋ злато́мꙋ , є҆го́же пᲂста́ви навꙋхᲂдᲂнᲂсо́ръ ца́рь , прѧ́мѡ и҆́мъ . Тᲂгда̀ пристꙋпи́ша мꙋ́жїе халдѣ́йстїи , и҆ ѡ҆клевета́ша і҆ꙋде́и . ѿвѣща́вше реко́ша царю̀ , навꙋхᲂдᲂнᲂсо́ре царю̀ , во́ вѣки живѝ , ты̀ царю̀ , пᲂлᲂжи́лъ є҆сѝ пᲂвелѣ́нїе всѧ́кᲂмꙋ челᲂвѣ́кꙋ , и҆́же а҆́ще ᲂу҆слы́шитъ гла́съ трꙋбы̀ , свирѣ́лей же , и҆ гꙋ́слей , цѣвни́цы же и҆ пѣ́снивцы , и҆ сᲂгла́сїѧ , и҆ всѧ́кᲂгѡ ро́да мꙋсикі́йска , да па́дъ пᲂкло́нитсѧ тѣ́лꙋ злато́мꙋ , є҆го́же пᲂста́ви . а҆́щели же нѝ , в̾ве́рженъ бꙋ́детъ въ пе́щь ѻ҆гне́мъ гᲂрѧ́щꙋю . сꙋ́ть ᲂу҆́бѡ мꙋ́жїе і҆ꙋде́и , и҆́хже пᲂста́вилъ є҆сѝ ѡ҆ дѣ́лѣхъ страны̀ вавилѡ́нскїѧ , седра́хъ , миса́хъ , и҆ а҆́ведныи , и҆́же непᲂслꙋ́шаша пᲂвелѣ́нїѧ твᲂегѡ̀ царю̀ , и҆ бᲂгѡ́мъ твᲂи́мъ неслꙋ́жатъ , и҆ тѣ́лꙋ злато́мꙋ є҆го́же пᲂста́вилъ є҆сѝ , непᲂклᲂнѧ́ютсѧ . тᲂгда̀ навꙋхᲂдᲂнᲂсо́ръ ца́рь в̾ ꙗ҆́рᲂсти и҆ гнѣ́вѣ речѐ привестѝ , седра́ха миса́ха и҆ а҆́веднагᲂ . и҆ мꙋ́жїе ѻ҆нѝ приведе́ни бы́ша пред̾ царѧ̀ . и҆ ѿвѣща̀ навꙋхᲂдᲂнᲂсо́ръ и҆ речѐ и҆́мъ , а҆́ще ᲂу҆́бѡ вᲂи́стинꙋ , седра́хъ миса́хъ и҆ а҆́ведныи , бᲂгѡ́мъ мᲂи́мъ неслꙋ́жите , и҆ тѣ́лꙋ злато́мꙋ , є҆го́же пᲂста́вихъ непᲂклᲂнѧ́етесѧ , ны́нѣ ᲂу҆́бѡ а҆́ще є҆стѐ гᲂто́ви , да ꙗ҆́кѡ ᲂу҆слы́шите гла́съ трꙋбы̀ , свирѣ́лей же и҆ гꙋ́слей , цѣвни́цъ же и҆ пѣ́снивецъ , и҆ всѧ́кᲂгѡ ро́да мꙋсикі́йскихъ , па́дше ѻ҆́бразꙋ є҆го́же сᲂтвᲂри́хъ , пᲂклᲂнѧ́йтесѧ . а҆́щели же непᲂкло́нитесѧ , в̾ то́й ча́съ в̾ве́ржени бꙋ́дѣте в̾ пе́щь ѻ҆гне́мъ гᲂрѧ́щꙋю . и҆ кто̀ є҆́сть бг҃ъ и҆́же и҆́зметъ ва́съ и҆з̾ рꙋкꙋ̀ мᲂе́ю ; и҆ ѿвѣща́ша , седра́хъ , миса́хъ , и҆ а҆́ведныи , глаго́люще , царю̀ навꙋхᲂдᲂнᲂсо́ре , не и҆́мамы пᲂтре́бꙋ ѡ҆ глаго́лѣ се́мъ ѿвѣща́ти тебѣ̀ . є҆́сть бᲂ бг҃ъ на́шъ на́ небесѣхъ , є҆мꙋ́же мы̀ слꙋ́жимъ , си́ленъ и҆зъѧ́ти на́съ ѿ пе́щи ѻ҆гне́мъ гᲂрѧ́щїѧ , и҆ ѿ рꙋкꙋ̀ твᲂе́ю царю̀ и҆зба́витъ на́съ . и҆ а҆́ще ли разꙋ́мнѡ да бꙋ́детъ ти ѽ царю̀ , ꙗ҆́кѡ бᲂгѡ́мъ твᲂи́мъ неслꙋ́жимъ , и҆ тѣ́лꙋ злато́мꙋ є҆го́же пᲂста́вилъ є҆сѝ непᲂклᲂнѧ́емсѧ . тᲂгда̀ навꙋхᲂдᲂнᲂсо́ръ ца́рь и҆спо́лнисѧ ꙗ҆́рᲂсти , и҆ гнѣ́ва , и҆ видѣ́нїе лица̀ є҆гѡ̀ и҆змѣни́сѧ , на седра́ха , миса́ха и҆ а҆́веднагᲂ . и҆ речѐ разжжи́те пе́щь се́дмь седми́цею , до́ндеже дᲂ кᲂнца̀ раз̾гᲂри́тсѧ . и҆ мꙋже́мъ в̾ крѣ́пᲂсти речѐ , ѡ҆кᲂва́вше седра́ха , миса́ха и҆ а҆́веднагᲂ , в̾ве́рзите в̾ пе́щь ѻ҆гне́мъ гᲂрѧ́щꙋю . Тᲂгда̀ мꙋ́жїе ѻ҆́ни ѡ҆ко́вани бы́ша , съ га́щами свᲂи́ми , и҆ клᲂбꙋкѝ и҆ сапᲂгѝ и҆ ѻ҆де́ждами свᲂи́ми , и҆ в̾ве́ржени бы́ша пᲂсредѝ пе́щи ѻ҆гне́мъ гᲂрѧ́щїѧ , пᲂне́же глаго́лъ царе́въ превᲂз̾мо́же , и҆ пе́щь раз̾жже́на бы́сть ѕѣлѡ̀ . и҆ мꙋ́жы ѻ҆́ны ѡ҆бᲂлга́вшїѧ , седра́ха , миса́ха , и҆ а҆́веднагᲂ , и҆ жжѐ и҆́хъ пла́мень ѻ҆́гненыи ѻ҆́крестъ . И҆ мꙋ́жїе ті́и трїѐ , седра́хъ , миса́хъ , и҆ а҆́ведныи , падо́ша пᲂсредѝ пе́щи ѻ҆гне́мъ гᲂрѧ́щїѧ ѡ҆ко́вани . и҆ хᲂжда́хꙋ пᲂсредѝ пла́мене , пᲂю́ще бг҃а и҆ бл҃гᲂсло́вѧще гдⷭ҇а . и҆ ста́въ с̾ ни́ми а҆за́рїѧ пᲂмᲂли́сѧ си́це , и҆ ѿве́рзе ᲂу҆ста̀ свᲂѧ̀ пᲂсредѝ ѻ҆гнѧ̀ , и҆ речѐ . мᲂли́тва .

Бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ , и҆ хва́льнᲂ и҆ прᲂсла́вленᲂ и҆́мѧ твᲂѐ во́ вѣки . ꙗ҆́кѡ пра́веденъ є҆сѝ ѡ҆ всѣ́хъ , и҆́хже сᲂтвᲂри́лъ є҆сѝ на́мъ , и҆ всѧ̀ дѣ́ла твᲂѧ̀ и҆́стинна , и҆ пра́ви пꙋтїѐ твᲂѝ . и҆ всѝ сꙋдѝ твᲂѝ и҆́стинни . и҆ сꙋдьбы̀ и҆́стинны сᲂтвᲂри́лъ є҆сѝ вᲂ все́мъ , ꙗ҆́же наведѐ на ны̀ , и҆ на гра́дъ ст҃ы́и ѻ҆ц҃ъ на́шихъ і҆єрⷭ҇ли́мъ . ꙗ҆́кѡ и҆́стинᲂю и҆ сꙋдо́мъ наве́лъ є҆сѝ сїѧ̀ всѧ̀ на ны̀ , грѣ́хъ ра́ди на́шихъ , ꙗ҆́кѡ сᲂгрѣши́хᲂмъ и҆ без̾зако́ннᲂвахᲂмъ ѿстꙋпи́ти ѿ тебѐ , и҆ прегрѣши́хᲂмъ вᲂ все́мъ , и҆ за́пᲂвѣдей твᲂи́хъ непᲂслꙋ́шахᲂмъ , нижѐ сᲂблюдо́хᲂмъ нижѐ сᲂтвᲂри́хᲂмъ , ꙗ҆́кᲂже запᲂвѣ́да на́мъ , да бл҃гᲂ на́мъ бꙋ́детъ . и҆ всѧ̀ ꙗ҆́же наведѐ на́мъ , и҆́стиннымъ сꙋдо́мъ сᲂтвᲂри́лъ є҆сѝ , и҆ пре́далъ є҆сѝ на́съ ме́рзскимъ ѿстꙋ́пникᲂмъ , в̾ рꙋ́ки враго́мъ без̾зако́ннымъ . и҆ царе́ви непра́веднꙋ и҆ лꙋка́внѣйшꙋ па́че всеѧ̀ землѝ . и҆ ны́нѣ нѣ́сть на́мъ ѿве́рсти ᲂу҆́стъ , стꙋ́дъ и҆ пᲂнᲂше́нїе бы́хᲂмъ рабѡ́мъ твᲂи́мъ и҆ чтꙋ́щимъ тѧ . непреда́ждь на́съ дᲂ кᲂнца̀ и҆́мене твᲂегѡ̀ ра́ди , и҆ неразᲂрѝ завѣ́та твᲂегѡ̀ , и҆ не ѿста́ви млⷭ҇ть твᲂю̀ ѿ на́съ , а҆враа́ма ра́ди вᲂзлю́бленнагѡ ѿ тебѐ и҆ за і҆саа́ка раба̀ твᲂегѡ̀ , и҆ і҆и҃лѧ ст҃а́гѡ твᲂегѡ̀ . и҆́мже глаго́ла ᲂу҆мно́жити сѣ́мѧ и҆́хъ , ꙗ҆́кѡ ѕвѣ́зды нбⷭ҇ныѧ , ꙗ҆́кѡ песо́къ в̾скра́й мо́рѧ . ꙗ҆́кѡ влⷣкᲂ ᲂу҆ма́лихᲂмсѧ па́че всѣ́хъ ꙗ҆зы́къ , и҆ є҆смы̀ смире́ни пᲂ все́й землѝ дне́сь , грѣ́хъ ра́ди на́шихъ . и҆ нѣ́сть во́ времѧ сѐ , ни кнѧ́зѧ ни прᲂро́ка ни вᲂждѧ̀ , ни всесᲂжже́нїѧ , ни же́ртвы , ни принᲂше́нїѧ , ни кади́ла , ни мѣ́ста , є҆́же пᲂжре́ти пред̾ тᲂбо́ю , и҆ ѡ҆брѣстѝ ми́лᲂсть . нᲂ дш҃е́ю сᲂкрꙋше́нᲂю и҆ дх҃ᲂмъ смире́ннымъ , да прїѧ́ти бꙋ́демъ , ꙗ҆́кѡ вᲂ всесᲂжже́нїихъ ѻ҆́внихъ и҆ ю҆́нчихъ , и҆ ꙗ҆́кѡ вᲂ тма́хъ а҆́гнецъ тꙋ́ченъ . та́кѡ да бꙋ́детъ же́ртва на́ша пред̾ тᲂбо́ю дне́сь , и҆ скᲂнча́етсѧ пᲂ тебѣ̀ , ꙗ҆́кѡ нѣ́сть стꙋда̀ ᲂу҆пᲂва́ющимъ на тѧ̀ . и҆ ны́нѣ вᲂслѣ́дꙋемъ всѣ́мъ срⷣцемъ , и҆ бᲂи́мсѧ тебѐ , и҆ и҆́щемъ лица̀ твᲂегѡ̀ . непᲂсрамѝ на́съ , нᲂ сᲂтвᲂрѝ с̾ на́ми пᲂ смᲂтре́нїю твᲂемꙋ̀ , и҆ пᲂ мно́жествꙋ млⷭ҇ти твᲂеѧ̀ , и҆ и҆змѝ на́съ пᲂ чꙋдесе́мъ твᲂи́мъ , и҆ да́ждь сла́вꙋ и҆́мени твᲂемꙋ̀ гдⷭ҇и , и҆ да пᲂсра́мѧтсѧ всѝ ꙗ҆влѧ́ющїи рабѡ́мъ твᲂи́мъ ѕла́ѧ . и҆ да пᲂстыдѧ́тсѧ ѿ всѧ́кїѧ си́лы , и҆ крѣ́пᲂсть и҆́хъ да сᲂкрꙋши́тсѧ , и҆ разꙋмѣ́ютъ , ꙗ҆́кѡ ты̀ є҆сѝ гдⷭ҇ь бг҃ъ є҆ди́нъ , и҆ сла́венъ пᲂ все́й вселе́ннѣй . и҆ непреста́ша в̾мета́ющїи и҆́хъ слꙋгѝ царе́вы , жгꙋ́ще пе́щь на́фѳᲂю и҆ смᲂло́ю , и҆ и҆з̾гре́бми , и҆ ло́зїемъ . и҆ раз̾лива́шесѧ пла́мень над̾ пе́щїю на лактѧ̀ четы́редесѧть и҆ де́вѧть , и҆ ѡ҆бы́де и҆ пᲂжжѐ ꙗ҆́же ѡ҆брѣ́те , ѡ҆ пе́щи халдѣ́йстѣй . а҆́нг҃лъ же гдⷭ҇нь сни́де кꙋ́пнѡ сᲂ а҆за́рїинᲂю ча́дїю в̾ пе́щь , и҆ ѿѧ́тъ пла́мень ѻ҆́гненыи ѿ пе́щи , и҆ сᲂтвᲂрѝ пᲂсредѣ̀ пе́щи ꙗ҆́кѡ дх҃ъ хла́денъ шꙋмѧ́щь , и҆ неприкᲂснꙋ́сѧ и҆́хъ ѿню́дъ ѻ҆́гнь , ни ѡ҆скᲂрбѝ , ни стꙋжѝ и҆́мъ . тᲂгда̀ ті́и трїѐ ꙗ҆́кѡ є҆ди́нѣми ᲂу҆сты̀ пᲂѧ́хꙋ , и҆ бл҃гᲂслᲂвлѧ́хꙋ и҆ сла́влѧхꙋ бг҃а в̾ пещѝ гл҃юще . Бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ , и҆ препѣ́тыи и҆ превᲂзнᲂси́мыи во́ вѣки . и҆ бл҃гᲂслᲂве́нᲂ и҆́мѧ сла́вы твᲂеѧ̀ ст҃о́е , и҆ препѣ́тᲂе и҆ превᲂзнᲂси́мᲂе во́ вѣки . бл҃гᲂслᲂве́нъ є҆сѝ в̾ цр҃кви ст҃ы́ѧ сла́вы твᲂеѧ̀ , и҆ препѣ́тыи и҆ превᲂзнᲂси́мыи во́ вѣки . бл҃гᲂслᲂве́нъ є҆сѝ ви́дѧи бе́здны , сѣдѧ́и на херꙋви́мѣхъ , и҆ препѣ́тыи и҆ превᲂзнᲂси́мыи во́ вѣки . бл҃гᲂслᲂве́нъ є҆сѝ на прⷭ҇то́лѣ сла́вы црⷭ҇твїѧ твᲂегѡ̀ , и҆ препѣ́тыи и҆ превᲂзнᲂси́мыи во́ вѣки . бл҃гᲂслᲂве́нъ є҆сѝ на тве́рди нбⷭ҇нѣй , и҆ препѣ́тыи и҆ превᲂзнᲂси́мыи во́ вѣки .

чте́цъ гл҃етъ : Бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . мы́ же , на́ гласъ , є҃ : По́йте и҆ превᲂзнᲂси́те є҆гѡ̀ во́ вѣки . Бл҃гᲂслᲂви́те а҆́нг҃ли гдⷭ҇ни нб҃са̀ гдⷭ҇нѧ гдⷭ҇а , по́йте и҆ превᲂзнᲂси́те є҆гѡ̀ во́ вѣки . Бл҃гᲂслᲂви́те во́ды всѧ̀ ꙗ҆́же превы́ше небе́съ , и҆ всѧ̀ си́лы гдⷭ҇ни гдⷭ҇а , по́йте и҆ превᲂзнᲂси́те є҆гѡ̀ во́ вѣки . Бл҃гᲂслᲂви́те сл҃нце и҆ мцⷭ҇ъ , ѕвѣ́зды нбⷭ҇ныѧ гдⷭ҇а , по́йте и҆ превᲂзнᲂси́те є҆гѡ̀ во́ вѣки . Бл҃гᲂслᲂви́те всѧ́къ до́ждь и҆ рᲂса̀ и҆ всѝ дꙋ́си гдⷭ҇а , по́йте и҆ превᲂзнᲂси́те є҆гѡ̀ во́ вѣки . Бл҃гᲂслᲂви́те ѻ҆́гнь и҆ ва́ръ стꙋ́дъ и҆ зно́й гдⷭ҇а , по́йте и҆ превᲂзнᲂси́те є҆гѡ̀ во́ вѣки . Бл҃гᲂслᲂви́те ро́сы и҆ и҆́ней , ле́ди и҆ мра́зъ гдⷭ҇а , по́йте и҆ превᲂзнᲂси́те є҆гѡ̀ во́ вѣки . Бл҃гᲂслᲂви́те сла́ны и҆ снѣ́зи , но́щи и҆ дні́е гдⷭ҇а , по́йте и҆ превᲂзнᲂси́те є҆гѡ̀ во́ вѣки . Бл҃гᲂслᲂви́те свѣ́тъ и҆ тма̀ , мо́лнїѧ и҆ ѻ҆́блацы гдⷭ҇а , по́йте и҆ превᲂзнᲂси́те є҆гѡ̀ во́ вѣки . Бл҃гᲂслᲂви́те землѧ̀ го́ры и҆ хо́лми , и҆ всѧ̀ прᲂзѧба́ющаѧ на не́й гдⷭ҇а , по́йте и҆ превᲂзнᲂси́те є҆гѡ̀ во́ вѣки . Бл҃гᲂслᲂви́те и҆сто́чницы мᲂрѧ̀ и҆ рѣ́ки , ки́ти и҆ всѧ̀ дви́жꙋщаѧсѧ в̾ вᲂда́хъ гдⷭ҇а , по́йте и҆ превᲂзнᲂси́те є҆гѡ̀ во́ вѣки . Бл҃гᲂслᲂви́те всѧ̀ пти́цы нбⷭ҇ныѧ , ѕвѣ́рїе и҆ всѝ ско́ти , гдⷭ҇а по́йте и҆ превᲂзнᲂси́те є҆гѡ̀ во́ вѣки . Бл҃гᲂслᲂви́те сн҃ᲂве чл҃честїи , да бл҃гᲂслᲂви́тъ і҆и҃ль гдⷭ҇а , по́йте и҆ превᲂзнᲂси́те є҆гѡ̀ во́ вѣки . Бл҃гᲂслᲂви́те сщ҃е́нницы гдⷭ҇ни рабѝ гдⷭ҇ни , гдⷭ҇а , по́йте и҆ превᲂзнᲂси́те є҆гѡ̀ во́ вѣки . Бл҃гᲂслᲂви́те дꙋ́си и҆ дꙋ́ши пра́ведныхъ , препᲂдо́бнїи и҆ смире́ннїи срⷣцемъ , гдⷭ҇а , по́йте и҆ превᲂзнᲂси́те є҆гѡ̀ во́ вѣки . Бл҃гᲂслᲂви́те , а҆на́нїѧ , а҆за́рїѧ , миса́илъ , гдⷭ҇а , по́йте и҆ превᲂзнᲂси́те є҆гѡ̀ во́ вѣки . Бл҃гᲂслᲂви́те а҆пⷭ҇ли прᲂро́цы и҆ мч҃нцы гдⷭ҇ни , гдⷭ҇а по́йте и҆ превᲂзнᲂси́те є҆гѡ̀ во́ вѣки . Бл҃гᲂслᲂви́мъ ѻ҆ц҃а и҆ сы́на и҆ ст҃а́гѡ дх҃а гдⷭ҇а , по́йте и҆ превᲂзнᲂси́те є҆гѡ̀ во́ вѣки . Ны́нѣ и҆ при́снѡ и҆ во́ вѣки вѣкѡ́мъ а҆ми́нь , гдⷭ҇а по́йте , и҆ превᲂзнᲂси́те є҆гѡ̀ во́ вѣки . Хва́лимъ бл҃гᲂслᲂви́мъ пᲂкланѧ́емсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки .

та́же , є҆ктенїѧ̀ ма́лаѧ . вмѣ́стᲂ же трⷭ҇та́гѡ . Є҆ли́цы вᲂ хрⷭ҇та̀ крⷭ҇ти́стесѧ .

прᲂки́менъ , ѱл҃о́мъ дв҃дᲂвъ . Всѧ̀ землѧ̀ да пᲂкло́нит̾тисѧ , и҆ пᲂе́тъ тебѣ̀ , да пᲂе́тъ же и҆́мени твᲂемꙋ̀ вы́шнїи . сти́хъ . вᲂскли́кните гдⷭ҇ви всѧ̀ землѧ̀ , по́йте же и҆́мени є҆гѡ̀ . а҆пⷭ҇лъ , к̾ =ри́млѧнᲂмъ . заⷱ҇ , ч҃а . а҆ллилꙋ́їѧ . ѱл҃о́мъ дв҃дᲂвъ , неглаго́лемъ . нᲂ а҆́бїе сти́хъ . вᲂскрⷭ҇нѝ бж҃е сꙋдѝ землѝ . =то́же и҆ лю́дїе пᲂю́тъ . сти́хъ . бг҃ъ ста̀ въ со́нмѣ бᲂгѡ́въ , пᲂсреди́ же бᲂгѡ́въ раз̾сꙋ́дитъ . сти́хъ . дᲂко́лѣ сꙋ́дите не пра́вдꙋ , и҆ ли́цъ грѣ́шничь ѡ҆бинꙋ́етесѧ .= сти́хъ . неꙋвѣ́дѣша ни разꙋмѣ́ша , вᲂ тмѣ̀ хо́дѧтъ . =сти́хъ . вᲂскрⷭ҇нѝ бж҃е сꙋдѝ землѝ . є҆ѵⷢ҇а́лїе , ѿ =матѳе́ѧ . заⷱ҇ , рє҃і . =И҆ бжⷭ҇твенаѧ литꙋргі́ѧ , вели́кагѡ васи́лїѧ . прича́стенъ . вᲂста̀ ꙗ҆́кѡ спѧ̀ гдⷭ҇ь , и҆ вᲂскр҃се спаса́ѧ на́съ .

А҆́щели нѣ́кїѧ нꙋ́жды ра́ди вели́кїѧ , нѣ́сть литꙋргі́и , то̀ на стихо́внѣ , стихѣ́ры , вᲂскрⷭ҇ны . гла́съ , а҃ . Стра́стїю твᲂе́ю хрⷭ҇тѐ , ѿ страсте́й свᲂбᲂди́хᲂмсѧ , и҆ вᲂскрⷭ҇нїемъ твᲂи́мъ и҆з̾ и҆стлѣ́нїѧ и҆збы́хᲂмъ , гдⷭ҇и сла́ва тебѣ̀ .

сти́хъ : гдⷭ҇ь вᲂцр҃и́сѧ ,꙳ в̾ лѣ́пᲂтꙋсѧ ѡ҆блечѐ . Да ра́дꙋетсѧ тва́рь , нб҃са̀ да веселѧ́тсѧ , рꙋка́ми да вᲂспле́щꙋтъ ꙗ҆зы́цы с̾ весе́лїемъ , хрⷭ҇то́съ бᲂ бг҃ъ на́шъ , на крⷭ҇тѣ̀ пригвᲂздѝ грѣхѝ на́ша . и҆ сме́рть ᲂу҆мертви́въ , жи́знь на́мъ дарᲂва̀ , па́дшагᲂ а҆да́ма всеро́дна вᲂскр҃си́въ , ꙗ҆́кѡ чл҃кᲂлю́бецъ .

сти́хъ : и҆́бᲂ ᲂу҆твердѝ вселе́ннꙋю ,꙳ ꙗ҆́же непᲂдви́житсѧ . Цр҃ь сы́и нб҃ꙋ и҆ землѝ непᲂсти́жимыи , во́лею распѧ́тсѧ за чл҃кᲂлю́бїе . є҆го́же а҆́дъ срѣ́тъ до́лѣ ѡ҆гᲂрчи́сѧ , и҆ пра́ведныхъ дꙋ́ши прїе́мше и҆ ра́дᲂвахꙋсѧ . а҆да́мъ же ви́дѣвъ тѧ̀ зижди́телѧ вᲂ преи҆спо́днихъ вᲂста̀ . ѽ чꙋдесѝ , ка́кѡ сме́рть вкꙋсѝ , ꙗ҆́же всѣ́хъ жи́знь ; нᲂ ꙗ҆́кᲂже и҆зво́ли ми́ра прᲂсвѣти́ти , вᲂпїю́ща и҆ гл҃юща , вᲂскр҃сы́и и҆з̾ ме́ртвыхъ , гдⷭ҇и сла́ва тебѣ̀ .

сти́хъ : до́мꙋ твᲂемꙋ̀ пᲂдᲂба́етъ ,꙳ ст҃ы́ни гдⷭ҇и в̾ дᲂлгᲂтꙋ̀ дні́й . Жены̀ мѷрᲂно́сицы , ми́рᲂ нᲂсѧ́ще сᲂ тща́нїемъ и҆ съ рыда́нїемъ , гро́ба твᲂегѡ̀ дᲂстиго́ша , и҆ не ѡ҆брѣ́тше пречⷭ҇тагᲂ тѣ́ла твᲂегѡ̀ . ѿ а҆́нг҃ла же ᲂу҆вѣ́дѣвше но́вᲂе и҆ пресла́внᲂе чꙋ́дᲂ , а҆пⷭ҇лѡмъ гл҃ахꙋ , вᲂскр҃се гдⷭ҇ь , пᲂдаѧ́и ми́рᲂви ве́лїю млⷭ҇ть .

сла́ва , и҆ ны́нѣ , бг҃ᲂро́диченъ . Сѐ и҆спо́лнисѧ и҆са́инᲂ прᲂрече́нїе , дв҃ᲂю бᲂ рᲂдила̀ є҆сѝ . и҆ пᲂ ржⷭ҇твѣ̀ ꙗ҆́кѡ пре́жде ржⷭ҇тва̀ пребыва́еши , бг҃ъ бᲂ бѣ̀ рᲂжде́исѧ , тѣ́мъ же и҆ є҆стество̀ но́вᲂ премѣни́сѧ . нᲂ ѽ бг҃ᲂма́ти , мᲂли́твы твᲂи́хъ ра́бъ вᲂ твᲂе́й цр҃кви принᲂси́мыѧ ти непре́зри . нᲂ ꙗ҆́кѡ бл҃гᲂꙋтро́бнагѡ , свᲂи́ма рꙋка́ма пᲂнᲂси́вшаѧ , на свᲂѧ̀ рабы̀ ᲂу҆милᲂсе́рдисѧ , и҆ мᲂлѝ спасти́сѧ дш҃а́мъ на́шимъ .

Ны́нѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпарѝ , гла́съ , в҃ . Бл҃гᲂѡбра́зныи і҆ѡ́сифъ со́ крⷭ҇та̀ с̾не́мъ пречи́стᲂе тѣ́лᲂ твᲂѐ , и҆ плащани́цею чи́стᲂю ѡ҆б̾ви́въ , и҆ сᲂ бл҃гᲂꙋха́ньми , во́ грᲂбѣ но́вѣ закры́въ пᲂлᲂжѝ , нᲂ в̾ тре́тїи де́нь вᲂскр҃се сп҃се , да́рꙋѧ ми́рᲂви ве́лїю млⷭ҇ть . сла́ва . Є҆гда̀ сни́де къ сме́рти живᲂтѐ без̾сме́ртныи , тᲂгда̀ а҆́да ᲂу҆мертви́лъ є҆сѝ блиста́нїемъ бжⷭ҇тва̀ . є҆гда́ же ᲂу҆ме́ршїѧ ѿ преи҆спо́днихъ вᲂскресѝ , всѧ̀ си́лы нбⷭ҇ныѧ взыва́хꙋ тѝ , жизнᲂда́вче хрⷭ҇тѐ бж҃е сла́ва тебѣ̀ . и҆ ны́нѣ . Мѷрѡно́сицамъ жена́мъ при́ грᲂбѣ пред̾ста́въ а҆́нг҃лъ вᲂпїѧ́ше , ми́рᲂ ме́ртвымъ є҆́сть дᲂсто́йнѡ , хрⷭ҇то́съ же и҆стлѣ́нїю ꙗ҆ви́сѧ чꙋ́ждь . нᲂ вᲂзᲂпі́йте пᲂю́ще , вᲂскр҃се гдⷭ҇ь да́рꙋѧ ми́рᲂви ве́лїю млⷭ҇ть .

Честнѣ́йшꙋю херꙋви́мъ , и҆ про́чаѧ , и҆ ѿпꙋ́стъ : И҆́же на́съ ра́ди , и҆ на́шегѡ ра́ди спасе́нїѧ смири́въ себѐ , и҆ в̾ на́шꙋ нищетꙋ̀ ѡ҆блече́сѧ , и҆ во́лею стрⷭ҇ти претерпѣ́въ , и҆ сме́рть вкꙋси́въ , и҆ во́ грᲂбѣ пᲂлᲂжи́выисѧ , хрⷭ҇то́съ и҆́стинныи бг҃ъ на́шъ , мл҃твами пречⷭ҇тыѧ є҆гѡ̀ мт҃ре , и҆ всѣ́хъ ст҃ы́хъ пᲂми́лꙋетъ и҆ спасе́тъ на́съ , ꙗ҆́кѡ бл҃гі́и чл҃кᲂлю́бецъ . а҆ми́нь .

Въ тꙋ́же сꙋбо́тꙋ вели́кꙋю ве́черъ . пᲂе́мъ , па́вечерницꙋ ма́лꙋю , на не́йже пᲂе́мъ . =Кано́нъ , на бг҃ᲂтѣле́снᲂе пᲂгребе́нїе гдⷭ҇а бг҃а и҆ сп҃са на́шегѡ і҆с҃а хрⷭ҇та̀ , и҆ на пла́чь бцⷣы , твᲂре́нїе симеѡ́на лᲂгᲂѳе́та , сᲂ і҆рмᲂсо́мъ , на́ ѕ҃ . і҆рмоⷭ҇ , вⷤ . гла́съ , ѕ҃ . пѣ́снь , а҃ . і҆рмо́съ . Вᲂлно́ю мᲂрско́ю скры́вшагѡ дре́вле , гᲂни́телѧ мꙋчи́телѧ , пᲂд̾ земле́ю скры́ша , спасе́ныхъ дѣ́ти . нᲂ мы̀ ꙗ҆́кѡ ѻ҆трᲂкᲂви́ца гдⷭ҇ви пᲂе́мъ , сла́внᲂ бᲂ прᲂсла́висѧ . =вⷤ . запѣ́въ : Сла́ва тебѣ̀ бж҃е на́шъ , сла́ва тебѣ̀ . Хᲂтѧ̀ свᲂѐ сᲂзда́нїе сп҃се мо́й ѡ҆живи́ти , на крⷭ҇тѣ̀ пᲂвѣ́шенъ бы́сть , и҆ гвᲂздьмѝ ᲂу҆ѧзви́сѧ , твᲂѧ́ же непᲂро́чнаѧ мт҃и пред̾стᲂѧ́щи , распала́шесѧ срⷣцемъ влⷣкᲂ , зрѧ́щи твᲂи́хъ крᲂве́й то́ки . Преклᲂни́въ сѝ бжⷭ҇твенꙋю вы́ю сп҃се мо́й , сᲂесте́ственᲂ жи́зненъ на́ древѣ ᲂу҆снꙋ́лъ є҆сѝ . всѧ́же тва́рь кᲂле́блетсѧ , и҆ зы́блютсѧ нбⷭ҇ныхъ а҆́нг҃лъ чи́нᲂве , зрѧ́ще тѧ пло́тїю стра́жꙋща . сла́ва . Хᲂтѧ́щи мт҃и пристꙋпѝ в̾ та́йнѣ , к̾ таѧ́щемꙋтисѧ ᲂу҆ченикꙋ̀ і҆ѡ́сифꙋ , и҆ та́йнѡ пла́чꙋщи мᲂлѧ́шесѧ , пречⷭ҇тᲂе и҆спрᲂси́ти тѣ́лᲂ твᲂѐ , ᲂу҆ пила́та без̾зако́ннагѡ сꙋдїѝ . и҆ ны́нѣ . Пристꙋпѝ к̾ пилатꙋ надѣ́ющисѧ не ᲂу҆сꙋмни́сѧ , и҆ и҆спрᲂсѝ пречⷭ҇тᲂе тѣ́лᲂ хрⷭ҇та̀ бг҃а , и҆ сне́мъ ѿ́ древа во́ грᲂбѣ твᲂе́мъ скры́й є҆̀ , да нека́кѡ па́ки прᲂбᲂдꙋ́тъ ре́бра неми́лᲂстивїи .

катава́сїѧ : Вᲂлно́ю мᲂрско́ю .

пѣ́снь , г҃ . і҆рмо́съ . Тебѣ̀ на вᲂда́хъ пᲂвѣ́сившагѡ всю̀ зе́млю не ѡ҆держи́мѡ , тва́рь ви́дѣвши на ло́бнѣмъ ви́сѧща , ᲂу҆́жасᲂмъ ѡ҆держи́ма бѣ , нѣ́сть ст҃а ра́звѣ тебѐ гдⷭ҇и взыва́юща . двⷤⷤа . Никто́же смѣ́етъ и҆спрᲂси́ти пречⷭ҇тᲂе тѣ́лᲂ ᲂу҆чи́телевᲂ , ви́симᲂе на́ древѣ , без̾дꙋ́шнᲂ ме́ртвᲂ и҆ ᲂу҆ѧ́звенᲂ же , и҆ пᲂнᲂше́ньми стрѣлѧ́емᲂ , па́че же ре́бра и҆скᲂпᲂва́ема . Ѿве́ржесѧ пе́рвыи ᲂу҆чени́къ пе́тръ , и҆ ѡ҆ста́виша ᲂу҆чи́телѧ всѝ , ᲂу҆мили́сѧ бл҃гᲂѡбра́зне , и҆спрᲂси́въ снесѝ тѣ́лᲂ влⷣки мᲂегѡ̀ , и҆ є҆ди́на да ѡ҆пла́чꙋ ꙗ҆́кѡ любе́знѣйшее ми ча́дᲂ , люби́мᲂе мт҃ри . сла́ва . Пла́чꙋщꙋ твᲂю̀ мт҃рь ꙗ҆́кѡ ви́де і҆ѡ́сифъ , ѽ хрⷭ҇тѐ мо́й , и҆ слы́ша гл҃ы бᲂлѣ́знены , ᲂу҆мили́сѧ , и҆ пла́чь спᲂдви́же . и҆ ско́рѡ пᲂтща́сѧ , и҆спрᲂси́ти тѣ́лᲂ твᲂѐ пречⷭ҇тᲂе . и҆ ны́нѣ . Твᲂемꙋ̀ и҆звᲂле́нїю призрѣ́въ , да́рꙋетъ твᲂѐ бжⷭ҇твенᲂе тѣ́лᲂ пила́тъ , и҆ сне́мъ ѿ́ древа с̾ никᲂди́мᲂмъ , в̾ зе́млю і҆ѡ́сифъ вᲂсклᲂнѝ , и҆ землѧ̀ пᲂтрѧсе́сѧ , и҆ мертвецы̀ и҆з̾ а҆́да ѿдава́ше ско́рᲂстїю .

катава́сїѧ : Тебѣ̀ на вᲂда́хъ .

пѣ́снь , д҃ . і҆рмо́съ . Є҆́же на крⷭ҇тѣ̀ твᲂѐ бжⷭ҇твеннᲂе смире́нїе , прᲂви́дѧ а҆вва́кꙋмъ , ᲂу҆жа́снᲂ вᲂпїѧ́ше , ты̀ си́льныхъ с̾сѣчѐ держа́вꙋ бл҃гі́и , прїѡбщи́всѧ сꙋ́щимъ вᲂ а҆́дѣ , ꙗ҆́кѡ всеси́ленъ . двⷤа . Ѡ҆бъе́мши тебѐ всенепᲂро́чнаѧ , лᲂбыза́ше закла́нїѧ пречⷭ҇тыхъ ᲂу҆́дъ твᲂи́хъ , с̾ тᲂбо́ю ᲂу҆мрꙋ̀ гл҃ющи , лїѧ́нїе бᲂ твᲂи́хъ всепречⷭ҇тыхъ крᲂве́й нетерплю̀ ча́дᲂ зрѣ́ти . Прїе́мши тѧ ро́ждьшаѧ и҆ на кᲂлѣ́нꙋ тѧ хрⷭ҇тѐ свᲂе́ю вᲂзлᲂжи́вши , пла́чꙋщи ѡ҆блᲂбыза́ше ти рꙋ́цѣ , и҆ и҆з̾ ре́бръ ѡ҆тира́ющи ка́плющꙋю бжⷭ҇твенꙋю кро́вь твᲂю̀ влⷣкᲂ . сла́ва . Без̾гла́снаѧ ᲂу҆ста̀ цѣлꙋ́ющи , ро́ждьшаѧ тѧ хрⷭ҇тѐ , и҆ къ себѣ̀ прилᲂжи́вши , пла́чꙋщи ѡ҆блᲂбыза́ше , твᲂѐ є҆́же на землѝ глаго́льнᲂ живо́тнᲂ , пᲂжи́вша чл҃ка ꙗ҆́кѡ бг҃а . и҆ ны́нѣ . Да́ры принесо́ша ти влⷣкᲂ пе́рстїи царѝ , ꙗ҆́кѡ бг҃ꙋ пᲂклᲂнѧ́ющесѧ . нн҃ѣ же пᲂгребе́нїю пᲂма́занїѧ ча́дᲂ , ꙗ҆́кѡ сме́ртнꙋ никᲂди́мъ несе́тъ , глаго́лѧ , ка́кѡ тѧ пᲂгребꙋ̀ бж҃е мо́й .

катава́сїѧ : Є҆́же на крⷭ҇тѣ̀ твᲂѐ .

пѣ́снь , є҃ . і҆рмо́съ . Къ тебѣ̀ ᲂу҆́треннюю , милᲂсе́рдїѧ ра́ди самᲂгѡ̀ па́дшагѡ , прело́жшасѧ непрело́жнᲂ , и҆ до́ страсти без̾стра́стїемъ прекло́ньшасѧ сло́ве бж҃їи , ми́ръ пᲂда́ждь ми чл҃кᲂлю́бче . двⷤа . Нетерплю̀ ча́дᲂ без̾дꙋ́шна тѧ держа́ти , є҆го́же дᲂѧ́хъ мла́дѧ на рꙋка́хъ мᲂи́хъ и҆гра́юща , а҆́ще ᲂу҆́бѡ схо́диши кᲂ а҆да́мꙋ вᲂ а҆́дъ , сни́дꙋ и҆ а҆́зъ , и҆ вᲂзвѣщꙋ̀ є҆́ввѣ твᲂѧ̀ та́иньства . Нерыда́й мт҃и , хрⷭ҇то́съ речѐ бжⷭ҇твенѣ ро́ждьшей , ᲂу҆́зриши бᲂ мѧ па́ки вᲂскре́сша , и҆ свѣ́тлѡ тебѣ̀ є҆́же ра́дꙋисѧ вѣща́юща , и҆ а҆да́ма съ є҆́ввᲂю вᲂз̾дви́гнꙋвша . сла́ва . Ка́кѡ терплю̀ ча́дᲂ ᲂу҆тро́бᲂю бᲂлѣ́зни , ѻ҆́чи твᲂѝ лᲂбыза́ющи ᲂу҆га́снꙋвшїи на́ древѣ , и҆́хже пре́жде зрѧ́хъ ꙗ҆́кѡ кра́сны дᲂбро́тᲂю сїѧ́юща , и҆ слѣпы́хъ прᲂсвѣща́юща , ма́нїемъ ти бжⷭ҇твенымъ . и҆ ны́нѣ . Сни́дꙋ ли па́че ви́дѣти твᲂю̀ сла́вꙋ вᲂ а҆́дѣ сн҃е мо́й , и҆ па́ки сᲂвзы́дꙋ . нетерплю́ бᲂ ти без̾дыха́нїѧ тѣ́лᲂ держа́ти недви́жимᲂ , и҆ ᲂу҆ѧ́звена ᲂу҆деса̀ ѡ҆блᲂбызᲂва́ти .

катава́сїѧ : Къ тебѣ̀ ᲂу҆́треннюю .

пѣ́снь , ѕ҃ . і҆рмо́съ . Ꙗ҆́тъ бы́сть нᲂ неꙋде́ржанъ в̾пе́рсѣхъ ки́тᲂвѣхъ і҆ѡ́на , тво́й бᲂ ѻ҆́бразъ нᲂсѧ̀ , пᲂстрада́вша и҆ пᲂгребе́нїю дана̀ , ꙗ҆́кѡ ѿ черто́га ѿ ѕвѣ́рѧ и҆з̾ше́дъ . приглаша́ше же кꙋстᲂді́и , хранѧ́щїи всꙋ́е лжꙋ̀ , млⷭ҇ти ва́шеѧ ѡ҆ста́вили є҆стѐ . двⷤа . Ка́кѡ ѿрече́сѧ пе́тре сп҃са , є҆го́же и҆спᲂвѣ́далъ є҆сѝ хрⷭ҇та̀ , сн҃а бг҃ꙋ живо́мꙋ , и҆ ѡ҆ста́вилъ є҆сѝ на́ древѣ є҆ди́нагᲂ ра́спѧта , без̾дыха́нїѧ и҆ бе́з̾вида . нижѐ гро́бᲂмъ тѣ́лᲂ скꙋ́тати пᲂтща́лсѧ є҆сѝ ско́рѡ , чⷭ҇таѧ ма́терски рыда́ющи вѣща́ше . Да́ждь ми сло́вᲂ , ѿ сладча́йшихъ сло́ве ᲂу҆сте́нъ , чи́стаѧ с̾ пла́чемъ ти вᲂпїѧ́ше , нетерплю́ тѧ без̾дыха́нїѧ пᲂлᲂжи́ти во́ грᲂбѣ сн҃е мо́й , и҆́же в̾ ме́ртвыхъ свᲂбо́дна . ви́ждь влⷣкᲂ свᲂю̀ мт҃рь рыда́ющꙋ беспреста́ннѡ , срⷣце бᲂ мᲂѐ про́йде ѻ҆рꙋ́жїе пᲂпалѧ́ющее . сла́ва . Прїиди́те всѧ̀ си́лы нбⷭ҇ныѧ , ви́дите тѣ́лᲂ хрⷭ҇то́вᲂ ѡ҆ста́вленᲂ , ѿ дрꙋго́въ и҆ зна́емыхъ всѣ́хъ , и҆ и҆зѧ́щныхъ ᲂу҆чени́къ , и҆ ᲂу҆страши́тесѧ . є҆ди́на бᲂ пла́чꙋсѧ рыда́ющи ѡ҆ ча́дѣ закла́ннᲂмъ ми , сᲂ є҆ди́нѣмъ ᲂу҆ченико́мъ вᲂзлю́бленнымъ пᲂсла́нникᲂмъ є҆гѡ̀ . и҆ ны́нѣ . Сᲂзыва́ше дрꙋги́ни мѷрѡно́сицы сло́ве , нескве́рнаѧ чⷭ҇таѧ , и҆ спᲂдвиза́ше в̾ рыда́нїе , прїиди́те дрꙋги́ни и҆ ѡ҆пла́чите вᲂпїю́ще , ᲂу҆чи́телевᲂ тѣ́лᲂ мнᲂгᲂстрада́льнᲂе . прїиди́те и҆ ви́дите без̾гла́сна ᲂу҆ста̀ , ᲂу҆стнѣ̀ недви́жимѣ , сᲂмже́нѣ ѻ҆́чи , є҆мꙋ́же в̾ рꙋцѣ̀ дыха́нїе живы́хъ є҆́сть . катава́сїѧ : Ꙗ҆́тъ бы́сть .

кᲂнда́къ . гла́съ , ѕ҃ . И҆́же бе́зднꙋ затвᲂри́выи , ме́ртвъ зри́тсѧ . сми́рнᲂю и҆ плащани́цею по́витъ , во́ грᲂбѣ пᲂлага́етсѧ , ꙗ҆́кѡ ме́ртвъ без̾ сме́ртныи . жены́ же прїидо́ша пᲂма́зати є҆гѡ̀ ми́рᲂмъ , пла́чꙋще го́рькѡ и҆ вᲂпїю́ще , сѝ сꙋбо́та є҆́сть преблгⷭ҇ве́ннаѧ , в̾ ню́же хрⷭ҇то́съ ᲂу҆снꙋ́въ , вᲂскр҃се тридне́внѡ . и҆́кᲂсъ . И҆́же сᲂдержа́и кᲂнцы̀ , на кре́стъ вᲂзнесе́сѧ , и҆ рыда́ше всѧ̀ тва́рь , тᲂго̀ ви́дѧщи ви́сѧща на́га на́ древѣ . сл҃нце лꙋчѝ скры̀ , и҆ ѕвѣ́зды свѣ́тъ ѿлᲂжи́ша . землѧ́ же сᲂ мно́гимъ стра́хᲂмъ пᲂкᲂлеба́сѧ , и҆ мо́ре пᲂбѣжѐ , и҆ ка́менїе распаде́сѧ . гро́бы же мно́зи ѿверзо́шасѧ , и҆ тѣлеса̀ вᲂста́ша ст҃ы́хъ чл҃къ . а҆́дъ ни́зꙋ сто́нетъ . і҆ꙋде́и сᲂвѣ́тꙋютъ , ѡ҆клевета́ти хрⷭ҇то́вᲂ вᲂскрⷭ҇нїе . жены́ же взыва́хꙋ , сїѧ̀ сꙋбо́та преблгⷭ҇ве́наѧ , в̾ ню́же хрⷭ҇то́съ ᲂу҆снꙋ́въ , вᲂскр҃се тридне́внѡ .

пѣ́снь , з҃ . і҆рмо́съ . Не и҆зрече́ннᲂе чꙋ́дᲂ и҆́же в̾ пещѝ и҆зба́вивыи , прпⷣбныѧ ѻ҆́трᲂки и҆з̾ пла́мени , во́ грᲂбѣ но́вѣ бездꙋ́шенъ пᲂлага́етсѧ , на спасе́нїе на́мъ пᲂю́щимъ , и҆зба́вителю бж҃е блгⷭ҇ве́нъ є҆сѝ . двⷤа . Съ нб҃съ а҆́нг҃льстїи сᲂбо́ри прини́кше дивлѧ́хꙋсѧ , ви́дѧще ме́ртва на ло́нѣ мт҃рнѣ . є҆мꙋ́же пред̾стᲂѧ́ще съ тре́петᲂмъ зрѧ́тъ , ᲂу҆ ѻ҆ц҃а в̾ нѣ́дрѣхъ сꙋ́ща , и҆ ме́ртвыхъ и҆з̾ гро́бъ вᲂз̾дви́гша . Теча́хꙋ всѝ гᲂрѣ̀ и҆ до́лꙋ зы́блющесѧ а҆́нг҃льстїи чи́нᲂве , ви́дѣти тѣ́лᲂ хрⷭ҇то́вᲂ без̾дыха́нїѧ лежа́щᲂ мт҃ри на ло́нѣ , и҆ чꙋ́дᲂмъ сᲂдержи́ми бы́вше , вᲂз̾враща́хꙋсѧ со́ страхᲂмъ ᲂу҆жаса́ющесѧ вᲂпїѧ́хꙋ , и҆зба́вителю бж҃е блгⷭ҇ве́нъ є҆сѝ . сла́ва . Тайнᲂсло́вникꙋ твᲂегѡ̀ ржⷭ҇тва̀ влⷣкᲂ , дв҃аѧ гл҃ющи , пла́каше го́рькѡ , ᲂу҆вы̀ мнѣ̀ гаврїи́ле , гдѣ̀ бл҃гᲂвѣ́стїе ; гдѣ́ ми є҆́же ра́дꙋисѧ ; гдѣ̀ є҆́же блгⷭ҇ве́наѧ ; и҆з̾ ᲂу҆тро́бы бᲂ мᲂеѧ̀ свѣ́тъ , ᲂу҆гасѐ на крⷭ҇тѣ̀ . и҆ ны́нѣ . Ка́кѡ без̾зако́ннїи лю́дїе ча́дᲂ сладча́йшее непᲂщадѣ́ша , на́га на́ древѣ зрѧ́ще тѧ ви́сѧща , нᲂ ꙗ҆́кᲂже ѕвѣ́рїе сꙋро́вїи прᲂбᲂдо́ша бжⷭ҇твенаѧ ре́бра твᲂѧ̀ ; ка́кѡ нераста́ѧсѧ тва́рь кᲂле́блющисѧ , нᲂ всѧ̀ вѣ́дѣ ꙗ҆́кѡ рꙋко́ю твᲂе́ю сло́ве сᲂдержа́щасѧ .

катава́сїѧ : Не и҆зрече́ннᲂе чꙋ́дᲂ .

пѣ́снь , и҃ . і҆рмо́съ . Оу҆жасни́сѧ бᲂѧ́исѧ нб҃ᲂ , и҆ да пᲂдви́жатсѧ ѡ҆снᲂва́нїѧ землѝ . сѐ ᲂу҆́бѡ в̾ мертвецѣ́хъ вмѣнѧ́етсѧ и҆́же в̾ вы́шнихъ живы́и , и҆ во́ грᲂбѣ ма́лѣ ѡ҆битᲂва́етъ . є҆го́же дѣ́ти блгⷭ҇ви́те , сщ҃е́ннїи по́йте , и҆ превᲂзнᲂси́те є҆гѡ̀ во́ вѣки . двⷤа . Оу҆жасни́сѧ нб҃ᲂ и҆ землѐ , и҆ скры́й сл҃нце свѣ́та свᲂегѡ̀ зарю̀ , се́бᲂ и҆́же свѣ́тъ в̾ тебѣ̀ пᲂлᲂжи́выи , и҆з̾ бᲂкꙋ̀ мᲂе́ю вᲂсїѧ́выи бг҃ъ , є҆ди́нъ ꙗ҆́кѡ вѣ́сть . на́ древѣ за́йде , хᲂтѧ̀ а҆да́ма вᲂскреси́ти . без̾дыха́нїѧ же держа́щи , нетерплю̀ бᲂлѣ́зни . Ка́кѡ ти сн҃е мо́й и҆ бж҃е , тѣ́лᲂ пречи́стᲂе во́ грᲂбѣ те́мнѣ пᲂкры́ю , и҆́же гро́бы и҆стᲂщи́вшагᲂ , и҆ вᲂз̾вращꙋ́сѧ тщи́ма рꙋка́ма незрѧ́щи тѧ ча́дᲂ , нетерплю̀ ѿстꙋпи́ти ѿ тебѐ ѽ сн҃е мо́й , па́че же ᲂу҆мрꙋ̀ , и҆ вᲂ а҆́дъ сни́дꙋ . сла́ва . Слы́ши нб҃ᲂ и҆ землѐ , и҆ внꙋши́те ма́тернѧѧ мᲂѧ̀ рыда́нїѧ , се́бᲂ сᲂдѣ́тель ва́шъ ѿ без̾зако́нныхъ рꙋ́къ распѧ́сѧ , и҆ сѐ ꙗ҆ви́сѧ без̾ви́да и҆ без̾дыха́нїѧ на ма́тернихъ ло́нѣхъ , ѿ распе́ншихъ закла́нъ бы́въ сᲂзда́тель . и҆ ны́нѣ . Є҆гда̀ вᲂпїѧ́ше чи́стаѧ , гла́са твᲂегѡ̀ слы́шала бы́хъ сладча́йшагᲂ і҆с҃е , и҆ ᲂу҆стнѣ̀ бг҃ᲂлѣ́пнѣ дви́жимѣ , и҆ ѻ҆́чи твᲂѝ свѣ́тлѡ сїѧ́ющїи , красны̀ дᲂбро́тᲂю . ꙗ҆́кѡ да бы́хъ сн҃е мо́й па́ки вᲂскрⷭ҇ша тѧ ви́дѣла , и҆ ра́дᲂсти и҆спо́лниласѧ вмѣ́стѡ го́рькихъ сле́зъ .

катава́сїѧ : Оу҆жасни́сѧ бᲂѧ́исѧ .

пѣ́снь , ѳ҃ . і҆рмо́съ . Нерыда́й менѐ мт҃и , взира́ющи во́ грᲂбѣ , є҆го́же пло́тїю без̾сѣ́мени зачала̀ є҆́си сн҃а . вᲂста́нꙋ бᲂ и҆ сла́венъ бꙋ́дꙋ , и҆ вᲂзнесꙋ̀ сᲂ сла́вᲂю , немо́лчнѡ ꙗ҆́кѡ бг҃ъ , вѣ́рᲂю и҆ любо́вїю тѧ велича́ющїѧ . двⷤⷤа . Вмѣ́стѡ пеле́нъ сн҃е мо́й , въ пᲂнѧ́вꙋ тѧ пᲂвива́ю . вмѣ́стѡ же ꙗ҆́слей свѣ́те мо́й , во́ грᲂбѣ тѧ пᲂлага́ю те́мнѣ . вмѣ́стѡ же млека̀ , слеза́ми ѡ҆крᲂплѧ́ю пречи́стѣи ти ᲂу҆стнѣ̀ . вмѣ́стѡ же живо́тныхъ и҆ кра́сныхъ ти глаго́лъ , ме́ртвꙋ бесѣ́дꙋю . Нерыда́й менѐ мт҃и ꙗ҆́кѡ сме́ртна во́ грᲂбѣ , є҆го́же в̾ пелена́хъ сꙋ́ща ꙗ҆́кѡ бг҃а ви́дѣла є҆сѝ , и҆ бл҃гᲂгᲂвѣ́йнѡ ѿ во́лхвъ пе́рсскихъ пᲂклᲂнѧ́ема , во́инствᲂмъ же а҆́нг҃лъ вᲂзᲂпи́вшимъ , сла́ва вᲂскрⷭ҇шемꙋ , тебѣ́ бᲂ пе́рвѣе ꙗ҆влю́сѧ . сла́ва . И҆дѝ ча́дᲂ вᲂ а҆́дъ , ꙗ҆́кѡ бг҃ъ вᲂскреси́ти сᲂ а҆да́мᲂмъ , ꙗ҆́же и҆з̾ а҆да́ма па́дшїѧ в̾ тлю̀ . а҆́зъ же мт҃рни сле́зы тᲂча́щи , пред̾ враты̀ прѧ́мѡ гро́ба твᲂегѡ̀ сѣжꙋ̀ бж҃е мо́й , до́ндеже вᲂскре́снеши . =и҆ ны́нѣ . ѽ =всебл҃же́ннаѧ мт҃и , не ᲂу҆̀ пред̾ враты̀ гро́ба рыда́ющи слезѝ про́чее , вᲂста́нꙋ бᲂ и҆ прᲂсла́влюсѧ , и҆ свѣ́тлѡ тебѣ̀ є҆́же ра́дꙋисѧ прᲂвѣща́въ , ра́дᲂсть неи҆з̾гл҃аннꙋю пᲂслю̀ на нб҃са̀ вᲂз̾ше́дъ .

катава́сїѧ : Нерыда́й менѐ мт҃и , взира́ющи во́ грᲂбѣ , є҆го́же пло́тїю без̾сѣ́мени зачала̀ є҆́си сн҃а . вᲂста́нꙋ бᲂ и҆ сла́венъ бꙋ́дꙋ , и҆ вᲂзнесꙋ̀ сᲂ сла́вᲂю , немо́лчнѡ ꙗ҆́кѡ бг҃ъ , вѣ́рᲂю и҆ любо́вїю тѧ велича́ющїѧ . пᲂкло́н̾ дᲂ землѝ .

пᲂсе́мъ , трⷭ҇то́е , и҆ пᲂ ѻ҆́ч҃е на́шъ .= кᲂнда́къ . И҆́же бе́зднꙋ затвᲂри́выи . =и҆ про́чее ѡ҆бы́чнᲂ .

в̾ кᲂнцѣ̀ па́вечерницы ѿпꙋ́стъ : И҆́же на́съ ра́ди во́лею пᲂлᲂжи́выисѧ во́ грᲂбѣ , хрⷭ҇то́съ и҆́стинныи бг҃ъ на́шъ , мл҃твами пречⷭ҇тыѧ є҆гѡ̀ мт҃ре , и҆ прпⷣбныхъ и҆ бг҃ᲂно́сныхъ ѻ҆ц҃ъ на́шихъ , и҆ всѣ́хъ ст҃ы́хъ пᲂми́лꙋетъ и҆ спасе́тъ на́съ , ꙗ҆́кѡ бл҃гі́и чл҃кᲂлю́бецъ . а҆ми́нь .

Пᲂ ѿпꙋ́стѣ па́вечерницы , предлага́етсѧ чте́нїе , в̾ дѣѧ́нїихъ ст҃ы́хъ а҆пⷭ҇лъ , ѿ нача́ла . и҆ чтꙋ́тъ да́же дᲂ часа̀ четве́ртагѡ но́щи . всѧ́же дѣѧ́нїѧ да прᲂчита́ютсѧ дᲂ кᲂнца̀ .

Пᲂсе́мъ же вжига́етъ параєклисїа́рхъ , всѧ̀ канди́ла , пᲂ мѣ́стѡмъ . и҆ взе́мъ ѿ настᲂѧ́телѧ бл҃гᲂслᲂве́нїе . и҆ та́кѡ и҆зше́дъ , ᲂу҆дарѧ́етъ в̾ би́лᲂ . Чте́цъ же сᲂверша́етъ чте́нїе . Пᲂ скᲂнча́нїи же чте́нїѧ . а҆́бїе , Бл҃гᲂслᲂви́вшꙋ і҆єре́ю , гл҃емъ . трⷭ҇то́е , и҆ пᲂ ѻ҆́ч҃е на́шъ . гдⷭ҇и пᲂми́лꙋй , в҃і . слава , и҆ ны́нѣ .= прїиди́те пᲂклᲂни́мсѧ , гⷤ . ѱл҃о́мъ , н҃ . =і҆єре́й , вᲂз̾гла́съ . Ми́лᲂстїю и҆ щедро́тами . таже , Кано́нъ вели́кїѧ сꙋбо́ты , гла́съ , ѕ҃ . твᲂре́нїе , ма́рка мни́ха . і҆рмо́съ , пᲂ вⷤ , а҆ трᲂпарѝ , на в҃і . пᲂслѣди́ же , і҆рмо́съ , ѻ҆́ба ли́ка вкꙋ́пѣ . пѣ́снь , а҃ . і҆рмо́съ . Вᲂлно́ю мᲂрско́ю скры́вшагѡ дре́вле , гᲂни́телѧ мꙋчи́телѧ , пᲂд̾ земле́ю скры́ша , спасе́ныхъ дѣ́ти . нᲂ мы̀ ꙗ҆́кѡ ѻ҆трᲂкᲂви́ца гдⷭ҇ви пᲂе́мъ , сла́внᲂ бᲂ прᲂсла́висѧ . запѣ́въ : Сла́ва тебѣ̀ бж҃е на́шъ , сла́ва тебѣ̀ . Гдⷭ҇и бж҃е мо́й , и҆схо́днᲂе пѣ́нїе , и҆ над̾гро́бнꙋю тѝ пѣ́снь вᲂспᲂе́мъ , є҆́же пᲂгребе́нїемъ твᲂи́мъ жи́зни мᲂеѧ̀ вхо́ды ѿве́рзшемꙋ , и҆ сме́ртїю сме́рть разо́ршемꙋ , и҆ а҆́да ᲂу҆мертви́вшемꙋ . Гᲂрѣ́ тѧ на прⷭ҇то́лѣ преми́рнаѧ , и҆ до́лꙋ во́ грᲂбѣ пᲂд̾земна́ѧ ви́дѧще сп҃се мо́й , зы́блѧхꙋсѧ ᲂу҆мерщве́нїемъ твᲂи́мъ , па́че ᲂу҆ма́ бᲂ ви́дѣнъ бы́сть мертве́цъ живᲂтꙋ̀ нача́льникъ . Да твᲂеѧ̀ сла́вы всѧ̀ и҆спо́лниши , сше́лъ є҆сѝ в̾ ни́жнѧѧ землѝ и҆ пᲂгре́бсѧ . и҆ нескры́сѧ ᲂу҆́бѡ ѿ тебѐ сᲂста́въ мо́й и҆́же вᲂ а҆́дѣ , и҆ и҆стлѣ́вша мѧ , но́ва твᲂри́ши чл҃кᲂлю́бче .

пѣ́снь , г҃ . і҆рмо́съ . Тебѣ̀ на вᲂда́хъ пᲂвѣ́сившагѡ всю̀ зе́млю не ѡ҆держи́мѡ , тва́рь ви́дѣвши на ло́бнѣмъ ви́сѧща , ᲂу҆́жасᲂмъ ѡ҆держи́ма бѣ , нѣ́сть ст҃а ра́звѣ тебѐ гдⷭ҇и взыва́юща . Ѻ҆́бразы пᲂгребе́нїѧ твᲂегѡ̀ пᲂказа́лъ є҆сѝ , видѣ́нїѧ ᲂу҆мно́живъ , ны́нѣ же сᲂкрᲂве́нныѧ твᲂѧ̀ та́йны , бг҃ᲂмꙋ́жнѡ ᲂу҆ѧсни́лъ є҆сѝ , и҆ вᲂ а҆́дѣ сꙋ́щимъ влⷣкᲂ . нѣ́сть ст҃а ра́звѣ тебѐ чл҃кᲂлю́бче . Прᲂсте́рлъ є҆сѝ на́ древѣ дла́ни свᲂѝ сп҃се , и҆ сᲂвᲂкꙋпи́лъ є҆сѝ ꙗ҆́же дре́вле раз̾стᲂѧ́щїѧсѧ , ѡ҆дѣѧ́нїемъ є҆́же вᲂ плащани́цѣ и҆ во́ грᲂбѣ , ѡ҆кᲂва́нныѧ разрѣши́лъ є҆сѝ . нѣ́сть ст҃а ра́звѣ тебѐ чл҃кᲂлю́бче . Гро́бᲂмъ и҆ печа́тьми , невмѣсти́ме сᲂдержи́мъ бы́лъ є҆сѝ хᲂтѣ́нїемъ . и҆́бᲂ си́лꙋ свᲂю̀ дѣ́йствы пᲂказа́лъ є҆сѝ , бл҃гᲂдѣ́тельнѡ пᲂю́щимъ , нѣ́сть ст҃а ра́звѣ тебѐ чл҃кᲂлю́бче .

Гдⷭ҇и пᲂми́лꙋй , гⷤ .

сѣда́ленъ . гла́съ , а҃ . Гро́бъ тво́й сп҃се , во́ини стрегꙋ́ще , ме́ртви бы́ша , ѿ ѡ҆блиста́нїѧ ꙗ҆́вльшагᲂсѧ а҆́нг҃ла , прᲂпᲂвѣ́дающа жена́мъ вᲂскрⷭ҇нїе . тебѐ сла́вимъ тлѝ пᲂтреби́телѧ . тебѣ̀ припа́даемъ вᲂскре́сшемꙋ и҆́з̾ грᲂба , є҆ди́нᲂмꙋ бг҃ꙋ на́шемꙋ . слава , и҆ ны́нѣ . то́йже . и҆ чте́тсѧ сло́вᲂ , ст҃а́гѡ є҆пифа́нїѧ ки́прскагѡ . є҆мꙋ́же нача́лᲂ . Что̀ сѐ дне́сь без̾мо́лвїе мно́гᲂ .

пѣ́снь , д҃ . і҆рмо́съ . Є҆́же на крⷭ҇тѣ̀ твᲂѐ бжⷭ҇твеннᲂе смире́нїе , прᲂви́дѧ а҆вва́кꙋмъ , ᲂу҆жа́снᲂ вᲂпїѧ́ше , ты̀ си́льныхъ с̾сѣчѐ держа́вꙋ бл҃гі́и , прїѡбщи́всѧ сꙋ́щимъ вᲂ а҆́дѣ , ꙗ҆́кѡ всеси́ленъ . Седмы́и де́нь дне́сь ѡ҆ст҃и́лъ є҆сѝ , є҆го́же дре́вле бл҃гᲂслᲂви́лъ є҆сѝ ᲂу҆пᲂкᲂе́нїемъ дѣ́лъ , прево́диши бᲂ всѧ́ческаѧ и҆ ѡ҆бнᲂвлѧ́еши , препᲂчива́ѧ сп҃се мо́й и҆ назида́ѧ . Си́лᲂю лꙋ́чшею ѡ҆дᲂлѣ́вшꙋ тебѣ̀ , ѿ́ плᲂти твᲂеѧ̀ дш҃а раздѣли́сѧ . растерза́ющи сꙋгꙋ́бѡ ᲂу҆́зы сме́рти и҆ а҆́дꙋ , сло́ве держа́вᲂю твᲂе́ю . А҆́дъ сло́ве срѣ́тъ тѧ ѡ҆гᲂрчи́сѧ , чл҃ка зрѧ̀ ѡ҆бᲂже́на , ᲂу҆ѧ́звена же ра́нами , и҆ всеси́льна дѣ́телїю , стра́шнымъ же си́мъ ѻ҆́бразᲂмъ ᲂу҆бїе́нъ бы́сть .

пѣ́снь , є҃ . і҆рмо́съ . Бг҃ᲂѧвле́нїѧ ти хрⷭ҇тѐ , є҆́же к̾ на́мъ ми́лᲂстивнѡ бы́вшагѡ , и҆са́їѧ свѣ́тъ ви́дѧ невече́рнїи , и҆з̾ нᲂщѝ ᲂу҆́треннюѧ взыва́ше , вᲂскре́снꙋтъ ме́ртвїи и҆҆ вᲂста́нꙋтъ и҆́же вᲂ грᲂбѣ́хъ , и҆҆ всѝ и҆́же на землѝ вᲂз̾ра́дꙋютсѧ . Ѡ҆бнᲂвлѧ́еши земны́ѧ сᲂдѣ́телю , зе́мленъ бы́въ , и҆ плащани́ца и҆ гро́бъ ꙗ҆влѧ́ютъ є҆́же в̾ тебѣ̀ сло́ве та́иньствᲂ . бл҃гᲂѡбра́зныи бᲂ сᲂвѣ́тникъ тебѐ ро́ждьшагᲂсѧ сᲂвѣ́тъ ѡ҆бразꙋ́етъ , в̾ тебѣ̀ велелѣ́пнѡ , нᲂвᲂтвᲂрѧ́ща мѧ̀ . Сме́ртїю сме́ртнᲂе , и҆ пᲂгребе́нїемъ тлѣ́ннᲂе ѡ҆бнᲂвлѧ́еши , нетлѣ́ннѡ твᲂри́ши бг҃ᲂлѣ́пнѡ без̾сме́ртнѡ твᲂрѧ̀ прїѧ́тїе . пло́ть бᲂ твᲂѧ̀ и҆стлѣ́нїѧ неви́дѣ влⷣкᲂ , ни дш҃а твᲂѧ̀ вᲂ а҆́дѣ страннᲂлѣ́пнѡ ѡ҆ста́влена бы́сть . И҆з̾ небра́чныѧ прᲂше́дъ , и҆ прᲂбᲂде́нъ въ ре́бра сᲂдѣ́телю мо́й , и҆з̾ ни́хъ сᲂдѣ́лалъ є҆сѝ ѡ҆бнᲂвле́нїе є҆́ввинᲂ , а҆да́мъ бы́въ , ᲂу҆снꙋ́въ па́че є҆стества̀ сно́мъ є҆сте́ственымъ . вᲂздви́гнꙋвсѧ ѿ сна̀ и҆ пло́ти тлѣ́нїѧ , ꙗ҆́кѡ всеси́ленъ .

пѣ́снь , ѕ҃ . і҆рмо́съ . Ꙗ҆́тъ бы́сть нᲂ неꙋде́ржанъ в̾пе́рсѣхъ ки́тᲂвѣхъ і҆ѡ́на , тво́й бᲂ ѻ҆́бразъ нᲂсѧ̀ , пᲂстрада́вша и҆ пᲂгребе́нїю дана̀ , ꙗ҆́кѡ ѿ черто́га ѿ ѕвѣ́рѧ и҆з̾ше́дъ . приглаша́ше же кꙋстᲂді́и , хранѧ́щїи всꙋ́е лжꙋ̀ , млⷭ҇ти ва́шеѧ ѡ҆ста́вили є҆стѐ . Оу҆бїе́нъ бы́сть , нᲂ неразлꙋчи́сѧ сло́ве , є҆ѧ́же прїѡбщи́сѧ пло́ти . а҆́ще бᲂ и҆ разᲂри́сѧ хра́мъ во́ времѧ стра́сти , нᲂ и҆ та́кѡ є҆ди́нъ небѣ̀ пра́зденъ сᲂста́въ бжⷭ҇тва̀ пло́ти твᲂеѧ̀ , вᲂ ѡ҆бᲂи́хъ бᲂ є҆ди́нъ є҆сѝ сн҃ъ сло́вᲂ бж҃їе , бг҃ъ и҆ чл҃къ . Чл҃кᲂꙋбі́йственᲂ бы́сть паде́нїе а҆да́мᲂвᲂ , нᲂ не бг҃ᲂꙋбі́йственᲂ . а҆́ще бᲂ и҆ пᲂстрада̀ твᲂѐ плᲂтьско́е пе́рстнᲂе сꙋщество̀ , нᲂ бжⷭ҇тво̀ без̾стра́стнᲂ пребы́сть . тлѣ́ннᲂе же в̾ нетлѣ́нїе премѣни́сѧ . и҆ нетлѣ́нныѧ жи́зни пᲂказа́лъ є҆сѝ и҆сто́чникъ вᲂскрⷭ҇нїемъ . Ца́рствꙋетъ а҆́дъ , нᲂ невѣ́чнꙋетъ ро́дᲂмъ чл҃ческимъ . ты́бᲂ сп҃се пᲂлᲂжи́сѧ во́ грᲂбѣ , крѣ́пкᲂю и҆ живᲂнача́льнᲂю дла́нїю , сме́рти ключѝ разве́рглъ є҆сѝ . и҆ прᲂпᲂвѣ́далъ є҆сѝ и҆́же ѿ́ вѣка тꙋ̀ спѧ́щимъ , и҆збавле́нїе нело́жнᲂе , бы́въ ме́ртвымъ пе́рвенецъ .

Гдⷭ҇и пᲂми́лꙋй , гⷤ . сла́ва , и҆ ны́нѣ .

пѣ́снь , з҃ . і҆рмо́съ . Не и҆зрече́ннᲂе чꙋ́дᲂ и҆́же в̾ пещѝ и҆зба́вивыи , прпⷣбныѧ ѻ҆́трᲂки и҆з̾ пла́мени , во́ грᲂбѣ но́вѣ бездꙋ́шенъ пᲂлага́етсѧ , на спасе́нїе на́мъ пᲂю́щимъ , и҆зба́вителю бж҃е блгⷭ҇ве́нъ є҆сѝ . Оу҆ѧ́звенъ бы́сть а҆́дъ в̾ срⷣце , прїе́мъ прᲂбᲂде́нагᲂ кᲂпїе́мъ в̾ ре́бра , и҆ вᲂз̾дыха́етъ ѻ҆гне́мъ бжⷭ҇твенымъ снѣда́емь , на спасе́нїе на́мъ пᲂю́щимъ , и҆зба́вителю бж҃е блгⷭ҇ве́нъ є҆сѝ . Бᲂга́тъ гро́бъ , в̾ себе́ бᲂ прїе́мъ ꙗ҆́кѡ спѧ́ща сᲂдѣ́телѧ , и҆ жи́зни бжⷭ҇твенᲂе сᲂкро́вище пᲂказа́сѧ , на спасе́нїе на́мъ пᲂю́щимъ , и҆зба́вителю бж҃е блгⷭ҇ве́нъ є҆сѝ . Зако́нᲂмъ ᲂу҆ме́ршихъ є҆́же во́ грᲂбѣ пᲂлᲂже́нїе , ꙗ҆́же всѣ́хъ прїе́млетъ жи́знь . и҆ сегѡ̀ и҆сто́чника пᲂказꙋ́етъ вᲂста́нїю , на спасе́нїе на́мъ пᲂю́щимъ , и҆зба́вителю бж҃е блгⷭ҇ве́нъ є҆сѝ . Є҆ди́нᲂ бѧ́ше неразлꙋ́чнᲂ , є҆́же вᲂ а҆́дѣ и҆ во́ грᲂбѣ и҆ вᲂ є҆де́мѣ , бжⷭ҇тво̀ хрⷭ҇то́вᲂ сᲂ ѻ҆ц҃е́мъ и҆ дх҃ᲂмъ , на спасе́нїе на́мъ пᲂю́щимъ , и҆зба́вителю бж҃е блгⷭ҇ве́нъ є҆сѝ .

пѣ́снь , и҃ . і҆рмо́съ . Оу҆жасни́сѧ бᲂѧ́исѧ нб҃ᲂ , и҆ да пᲂдви́жатсѧ ѡ҆снᲂва́нїѧ землѝ . сѐ ᲂу҆́бѡ в̾ мертвецѣ́хъ вмѣнѧ́етсѧ и҆́же в̾ вы́шнихъ живы́и , и҆ во́ грᲂбѣ ма́лѣ ѡ҆битᲂва́етъ . є҆го́же дѣ́ти блгⷭ҇ви́те , сщ҃е́ннїи по́йте , и҆ превᲂзнᲂси́те є҆гѡ̀ во́ вѣки . Разрꙋши́сѧ пречи́стыи хра́мъ , па́дшꙋю же вᲂставлѧ́етъ сѣ́нь . а҆да́мꙋ бᲂ пе́рвᲂмꙋ , втᲂры́и и҆́же в̾ вы́шнихъ живы́и сни́де , да́же дᲂ а҆́дᲂвыхъ сᲂкро́вищь . є҆го́же дѣ́ти блгⷭ҇ви́те , сщ҃е́ннїи по́йте , лю́дїе превᲂзнᲂси́те є҆гѡ̀ во́ вѣки . Преста̀ де́рзᲂсть ᲂу҆ченико́мъ , а҆римаѳе́й же пᲂбѣжда́етъ і҆ѡ́сифъ , ме́ртва бᲂ и҆ на́га зрѧ̀ и҆́же надᲂвсѣ́ми бг҃а , про́ситъ и҆ пᲂгреба́етъ , зᲂвы́и , дѣ́ти блгⷭ҇ви́те , сщ҃е́ннїи по́йте , лю́дїе превᲂзнᲂси́те є҆гѡ̀ во́ вѣки . ѽ чꙋде́съ но́выхъ , ѽ бл҃гᲂсти , ѽ неи҆зрече́ннагѡ терпѣ́нїѧ ; сѐ ᲂу҆́бѡ во́лею пᲂд̾ земле́ю пᲂкрыва́етсѧ , и҆́же в̾ вы́шнихъ живы́и . и҆ ꙗ҆́кѡ льсте́цъ ѡ҆клевета́емь быва́етъ бг҃ъ . є҆го́же дѣ́ти блгⷭ҇ви́те , сщ҃е́ннїи по́йте , лю́дїе превᲂзнᲂси́те є҆гѡ̀ во́ вѣки .

пѣ́снь , ѳ҃ . і҆рмо́съ . Нерыда́й менѐ мт҃и , взира́ющи во́ грᲂбѣ , є҆го́же пло́тїю без̾сѣ́мени зачала̀ є҆́си сн҃а . вᲂста́нꙋ бᲂ и҆ сла́венъ бꙋ́дꙋ , и҆ вᲂзнесꙋ̀ сᲂ сла́вᲂю , немо́лчнѡ ꙗ҆́кѡ бг҃ъ , вѣ́рᲂю и҆ любо́вїю тѧ велича́ющїѧ . Въ стра́ннѣмъ ти ржⷭ҇твѣ̀ , бᲂлѣ́зней и҆з̾бѣжа́вши . и҆ па́че є҆стества̀ бл҃же́нна бы́хъ , без̾нача́льне сн҃е . ны́нѣ же тѧ бж҃е мо́й , без̾дыха́нїѧ зрѧ́щи ме́ртва , ѻ҆рꙋ́жїемъ печа́ли растерза́юсѧ лю́тѣ . нᲂ вᲂскреснѝ , ꙗ҆́кѡ да вᲂзвели́чꙋсѧ .= З=емлѧ̀ пᲂкрыва́етъ мѧ хᲂтѧ́ща ѽ мт҃и , нᲂ ᲂу҆страша́ютсѧ а҆́дᲂвы вра́тницы , ѡ҆дѣ́ѧнна ви́дѧще ѻ҆де́ждею ѡ҆крᲂва́вленнᲂю ѿмще́нїѧ . враги́ бᲂ крⷭ҇то́мъ пᲂпра́въ , ꙗ҆́кѡ бг҃ъ вᲂскреснꙋ̀ а҆́бїе , и҆ прᲂсла́влюсѧ . Да ра́дꙋетсѧ тва́рь , да веселѧ́тсѧ всѝ земнᲂро́днїи , вра́гъ бᲂ плѣне́нъ бы́сть а҆́дъ . съ ми́рᲂмъ жены̀ да срѣта́ютъ , а҆да́ма сᲂ є҆́ввᲂю ѿ тлѣ́нїѧ и҆збавлѧ́юща всеро́дна , в̾ тре́тїи дн҃ь вᲂскреснꙋ́вша .

Пᲂ ѳ҃ й пѣ́сни і҆рмо́съ ѻ҆́ба ли́ка вкꙋ́пѣ . и҆ пᲂкло́нъ дᲂ землѝ . та́же , трⷭ҇то́е , и҆ пᲂ ѻ҆́ч҃е на́шъ . трᲂпа́рь , гла́съ , в҃ . Є҆гда̀ сни́де к̾ сме́рти . є҆ктенїѧ̀ . Пᲂми́лꙋй на́съ бж҃е .

Пᲂсе́мъ є҆клисїа́рхъ раздае́тъ свѣщѝ бра́тїи .

Пᲂнᲂма́рь же ᲂу҆дарѧ́етъ в̾ вели́кᲂе би́лᲂ , и҆ кле́плетъ дᲂво́льнѡ . дрꙋгі́и же пᲂнᲂма́рь , в̾жига́етъ свѣщѝ всѧ̀ , и҆ паникади́ла пᲂсредѝ цр҃кве . ᲂу҆стрᲂѧ́етъ же сᲂсꙋ́ды два̀ сᲂ ᲂу҆́глїемъ гᲂрѧ́щимъ , и҆ влага́етъ в̾ ни́хъ ѳимїа́нꙋ дᲂво́льнѡ бл҃гᲂво́ннагѡ . и҆ пᲂставлѧ́етъ є҆ди́нъ сᲂсꙋ́дъ средѝ цр҃кве . а҆ дрꙋгі́и вᲂ ст҃ѣ́мъ ѻ҆лтарѝ , пред̾ престо́лᲂмъ . ꙗ҆́кѡ да напо́лнитсѧ цр҃квь всѧ̀ бл҃гᲂꙋха́нїѧ . та́же быва́етъ и҆схᲂже́нїе сᲂ крⷭ҇ты̀ и҆ ѻ҆́бразы в̾ притво́ръ , сѣ́верными две́рьми . ѻ҆бᲂи́мъ ликѡ́мъ пᲂю́щимъ .

стихѣ́рꙋ , гласъ , ѕ҃ . Вᲂскрⷭ҇нїе твᲂѐ хрⷭ҇тѐ сп҃се , а҆́нг҃ли пᲂю́тъ на́ нб҃сѣхъ . и҆ на́съ на землѝ спᲂдо́би , чи́стыми срⷣцы̀ тебѐ сла́вити . гⷤ .

Тᲂгда̀ ᲂу҆дарѧ́ютъ въ камбана́рїи , вᲂ всѧ̀ древа̀ , и҆ желѣ́знᲂе , и҆ тѧ́жкїѧ камба́ны , и҆ кле́плютъ дᲂво́льнѡ . И҆ прише́дъ въ притво́ръ , ста́нꙋтъ по́ чинꙋ сᲂ ѻ҆́бразы , лице́мъ к̾ за́падꙋ . и҆гꙋ́менъ же взе́мъ кади́лᲂ в̾ пра́вꙋю рꙋ́кꙋ , крⷭ҇тъ же в̾ лѣ́вꙋю рꙋ́кꙋ , кади́тъ ѻ҆́бразы , и҆ ли́ки , и҆ бра́тїю . та́же , пᲂкади́въ две́ри крⷭ҇тᲂѡ҆бра́знѡ , три́жды , и҆ вᲂз̾гласи́тъ велегла́снѡ :

Сла́ва ст҃ѣ́й є҆динᲂсꙋ́щней и҆ живᲂтвᲂрѧ́щей нераздѣли́мей трⷪ҇цѣ , всегда̀ и҆ ны́нѣ и҆ при́снѡ и҆ во́ вѣки вѣкѡ́мъ . И҆ =на́мъ пᲂю́щимъ , а҆ми́нь . Начина́етъ , пᲂ а҆ми́нѣ , і҆єре́й сᲂ дїа́кᲂнᲂмъ , велегла́снѡ . =трᲂпа́рь , гла́съ , є҃ . Хрⷭ҇то́съ вᲂскр҃се и҆з̾ ме́ртвыхъ сме́ртїю на сме́рть настꙋпѝ , и҆ гро́бнымъ живо́тъ дарᲂва̀ . Пᲂе́тъ же , і҆єре́й , вⷤ . Въ тре́тїи же в̾ по́лы . Пра́выи же ли́къ пᲂе́тъ : и҆ гро́бнымъ живо́тъ дарᲂва̀ . Кли́рицы пᲂю́тъ : хрⷭ҇то́съ вᲂскр҃се , три́жды . и҆ а҆́бїе , і҆єре́й гл҃етъ . сти́хъ , а҃ . Да вᲂскрⷭ҇нетъ бг҃ъ , и҆ разы́дꙋтсѧ вразѝ є҆гѡ̀ .= К=ли́рицы пᲂю́тъ : хрⷭ҇то́съ вᲂскр҃се , гⷤ .

сти́хъ , в҃ . Ꙗ҆́кѡ и҆счеза́етъ ды́мъ да и҆сче́знꙋтъ . Кли́рицы пᲂю́тъ : хрⷭ҇то́съ вᲂскр҃се , гⷤ .

сти́хъ , г҃ . Та́кѡ да пᲂги́бнꙋтъ грѣ́шницы ѿ лица̀ бж҃їѧ , а҆ пра́ведницы вᲂз̾веселѧ́тсѧ .= К=ли́рицы пᲂю́тъ : хрⷭ҇то́съ вᲂскр҃се , гⷤ .

сти́хъ , д҃ . Се́й дн҃ь и҆́же сᲂтвᲂрѝ гдⷭ҇ь , вᲂз̾ра́дꙋемсѧ и҆ вᲂз̾весели́мсѧ во́нь .

Кли́рицы пᲂю́тъ : хрⷭ҇то́съ вᲂскр҃се , гⷤ .

Сла́ва . Кли́рицы пᲂю́тъ : хрⷭ҇то́съ вᲂскр҃се , гⷤ .

И҆ ны́нѣ . Кли́рицы пᲂю́тъ : хрⷭ҇то́съ вᲂскр҃се , гⷤ .

і҆єре́й пᲂе́тъ : Хрⷭ҇то́съ вᲂскр҃се и҆з̾ ме́ртвыхъ , сме́ртїю на сме́рть настꙋпѝ . Ѿверза́етъ две́ри цр҃ко́вныѧ , и҆ вхо́дитъ в̾ цр҃квь с̾ чⷭ҇тны́мъ крⷭ҇то́мъ . пред̾ и҆дꙋ́ще є҆мꙋ̀ сᲂ двѣма̀ лампа́дᲂма , и҆ бра́тїѧмъ пᲂю́щимъ : и҆ гро́бнымъ живо́тъ дарᲂва̀ . та́же , ᲂу҆дарѧ́ютъ вᲂ всѧ̀ дре́ва и҆ желѣ́знаѧ , и҆ тѧ́жкїѧ камба́ны , и҆ кле́плютъ дᲂво́льнѡ , трѝ часа̀ . Вше́дъ же і҆єре́й , вᲂ ст҃ы́и ѻ҆лта́рь . та́же , дїа́кᲂнъ гл҃етъ , є҆ктенїю̀ вели́кꙋю .= Ми́рᲂмъ гдⷭ҇ꙋ пᲂмо́лимсѧ . =И҆ =пᲂ вᲂз̾гла́сѣ начина́етъ і҆єре́й , і҆рмо́съ . Вᲂскрⷭ҇нїѧ дн҃ь , велегла́снѡ . =та́же , Пра́здникъ , ста́вимъ , средѝ цр҃кве . И҆ пᲂе́мъ кано́нъ , па́сцѣ . твᲂре́нїе , ки́ръ і҆ѡа́нна дамаскина̀ . і҆рмо́съ , пᲂ дⷤ . а҆ трᲂпарѝ , на в҃і . пᲂслѣди́ же , і҆рмо́съ , пᲂ вⷤ . На всѣ́хъ же пѣ́снехъ , твᲂри́тъ і҆єре́й нача́лᲂ , кᲂемꙋ́ждᲂ ли́кꙋ нача́ти .

Кано́нъ , гла́съ , а҃ . пѣ́снь , а҃ . і҆рмо́съ . Вᲂскрⷭ҇нїѧ дн҃ь , прᲂсвѣти́мсѧ лю́дїе , па́сха гдⷭ҇нѧ па́сха , ѿ сме́рти ᲂу҆́бѡ къ жи́зни , и҆ ѿ землѝ на́ нб҃ᲂ , хрⷭ҇то́съ бг҃ъ на́съ преве́лъ є҆́сть , пᲂбѣ́днꙋю пᲂю́ща . запѣ́в̾ : Хрⷭ҇то́съ вᲂскр҃се и҆з̾ ме́ртвыхъ . Ѡ҆чи́стимъ чꙋ́вствїѧ и҆ ᲂу҆́зримъ , непристꙋ́пнымъ свѣ́тᲂмъ , вᲂскрⷭ҇нїѧ хрⷭ҇то́ва , блиста́ющесѧ и҆ ра́дꙋйтесѧ рекꙋ́ща , ꙗ҆́снѡ да ᲂу҆слы́шимъ , пᲂбѣ́днꙋю пᲂю́ще . Небеса̀ ᲂу҆́бѡ дᲂсто́йнѡ да веселѧ́тсѧ , землѧ́ же да ра́дꙋетсѧ , да пра́зднꙋетъ же ми́ръ , ви́димыи же ве́сь и҆ неви́димыи , хрⷭ҇то́съ бᲂ вᲂста́лъ є҆́сть , весе́лїе вѣ́чнᲂе . та́же , є҆ктенїѧ̀ . вᲂз̾гла́съ . Ꙗ҆́кѡ твᲂѧ̀ держа́ва , и҆ твᲂѐ є҆́сть црⷭ҇твᲂ , и҆ си́ла и҆ сла́ва ѻ҆ц҃а и҆ сн҃а и҆ ст҃а́гѡ дх҃а , ны́нѣ и҆ при́снѡ и҆ во́ вѣки вѣкѡ́мъ .

пѣ́снь , г҃ . і҆рмоⷭ҇ . Прїиди́те пи́вᲂ пїе́мъ но́вᲂ , не ѿ ка́мене непло́дна чꙋдᲂдѣ́емᲂе , нᲂ нетлѣ́нїѧ и҆сто́чника , и҆́з̾ грᲂба ѡ҆дᲂжди́вша хрⷭ҇та̀ , ѡ҆ не́мже ᲂу҆твержа́емсѧ . Нн҃ѣ всѧ̀ и҆спо́лнишасѧ свѣ́та , нб҃ᲂ же и҆ землѧ̀ и҆ преиспо́днѧѧ , да пра́зднꙋетъ ᲂу҆́бѡ всѧ̀ тва́рь вᲂста́нїе хрⷭ҇то́вᲂ , ѡ҆ не́мже ᲂу҆твержа́етсѧ . Вчера̀ сраспина́хтисѧ хрⷭ҇тѐ , вчера̀ спᲂгребо́хтисѧ , и҆ сᲂвᲂста́ю дне́сь сᲂвᲂскре́сшꙋ ти , са́мъ мѧ прᲂсла́ви сп҃се , вᲂ ца́рствїи свᲂе́мъ .= та́же , є҆ктенїѧ̀ . вᲂз̾гла́съ . Ꙗ҆́=кѡ благі́и и҆ чл҃кᲂлю́бецъ бг҃ъ є҆сѝ , и҆ тебѣ̀ сла́вꙋ вᲂз̾сыла́емъ ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ , ны́нѣ и҆ при́снѡ и҆ во́ вѣки вѣкѡ́мъ .

ѵ҆пако́й . гла́съ , д҃ . Предвари́ша ᲂу҆́трᲂ , ꙗ҆́же съ мр҃і́ею , и҆ ѡ҆брѣто́ша ка́мень ѿвале́нъ ѿ́ грᲂба , слы́шахꙋ ѿ а҆́нг҃ла , и҆́же во́ свѣтѣ приснᲂсꙋ́щнѣмъ сꙋ́щагѡ , съ ме́ртвыми не и҆щи́те ꙗ҆́кѡ чл҃ка . ви́дите гро́бныѧ пелены̀ , тецы́те и҆ ми́рꙋ прᲂпᲂвѣ́дите , ꙗ҆́кѡ вᲂста̀ гдⷭ҇ь ᲂу҆мертви́выи сме́рть , ꙗ҆́кѡ то́й є҆́сть сн҃ъ бж҃їи , спаса́ѧи ро́дъ чл҃ческїи .

пѣ́снь , д҃ . і҆рмо́съ . На бж҃їи стра́жи , бг҃ᲂгл҃ивыи а҆вва́кꙋмъ да ста́нетъ съ на́ми , и҆ ꙗ҆ви́тъ свѣтᲂно́сна а҆́нг҃ла , велегла́снѡ гл҃юща , дне́сь спасе́нїе ми́рꙋ , ꙗ҆́кѡ вᲂскр҃се хрⷭ҇то́съ , ꙗ҆́кѡ всеси́ленъ . Мꙋ́жескїи ᲂу҆́бѡ по́лъ , ꙗ҆́кѡ разве́рзе двⷭ҇твенꙋю ᲂу҆тро́бꙋ , бы́сть хрⷭ҇то́съ , ꙗ҆́кѡ чл҃къ же , а҆́гнецъ нарече́сѧ . непᲂро́ченъ же ꙗ҆́кѡ невкꙋсѝ скве́рны , на́ша ᲂу҆́бᲂ па́сха , ꙗ҆́кѡ бг҃ъ и҆́стиненъ и҆ сᲂверше́нъ ꙗ҆ви́сѧ . Ꙗ҆́кѡ є҆динᲂлѣ́тенъ а҆́гнецъ , бл҃гᲂслᲂве́ныи на́мъ вѣне́цъ хрⷭ҇то́съ , во́лею за всѣ́хъ закла́нъ бы́сть . па́сха ѡ҆чи́стилище , и҆ а҆́бїе и҆́з̾ грᲂба краснѡ̀ , пра́веднᲂе на́мъ вᲂсїѧ̀ сл҃нце . Бг҃ᲂѻ҆ц҃ъ ᲂу҆́бѡ дв҃дъ , пред̾ сѣ́ннымъ кᲂвче́гᲂмъ скака́ше и҆гра́ѧ . лю́дїе же бж҃їи ст҃і́и , ѻ҆́бразᲂмъ сбытїѐ зрѧ́ще , весели́мсѧ бжⷭ҇твенѣ , ꙗ҆́кѡ вᲂскр҃се хрⷭ҇то́съ , ꙗ҆́кѡ всеси́ленъ . та́же , є҆ктенїѧ̀ . вᲂз̾гла́съ . Ꙗ҆́кѡ бл҃гᲂслᲂви́сѧ , и҆ прᲂсла́висѧ , пречестно́е и҆ великᲂлѣ́пᲂе и҆́мѧ твᲂѐ , ѻ҆ц҃а и҆ сн҃а и҆ ст҃а́гѡ дх҃а , ны́нѣ и҆ при́снѡ и҆ во́ вѣки вѣкѡ́мъ .

пѣ́снь , є҃ . і҆рмо́съ . Оу҆́тренюемъ ᲂу҆́тренюю глꙋбᲂкꙋ̀ , и҆ вмѣ́стѡ ми́ра , пѣ́снь принесе́мъ влⷣцѣ , и҆ хрⷭ҇та̀ ᲂу҆́зримъ пра́веднᲂе сл҃нце , всѣ́мъ жи́знь вᲂсїѧ́юща . Без̾чи́сленᲂе твᲂѐ млрⷭ҇дїе , и҆́же а҆́дᲂвыми ᲂу҆́зами , сᲂдержи́ми зрѧ́ще , къ свѣ́тꙋ и҆дѧ́хꙋ хрⷭ҇тѐ , весе́лыми нᲂга́ми , па́схꙋ хва́лѧще вѣ́чнꙋю . Пристꙋ́пимъ свѣтᲂно́снїи , и҆схᲂдѧ́щꙋ хрⷭ҇тꙋ̀ и҆́з̾ грᲂба ꙗ҆́кѡ женихꙋ̀ . и҆ спра́зднꙋемъ празднᲂлюбе́зными чи́нми , па́схꙋ бж҃їю спаси́тельнꙋю . та́же , є҆ктенїѧ̀ . вᲂз̾гла́съ . Ꙗ҆́кѡ ты̀ є҆сѝ бг҃ъ на́шъ , бг҃ъ ми́лᲂвати и҆ спаса́ти . и҆ тебѣ̀ сла́вꙋ вᲂз̾сыла́емъ , ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ , нн҃ѣ и҆ прⷭ҇нѡ и҆ во́ вѣки вѣкѡ́мъ .

пѣ́снь , ѕ҃ . і҆рмо́с̾ . Сни́де в̾ преиспо́днїѧ страны̀ землѝ , и҆ сᲂкрꙋшѝ вереѝ вѣ́чныѧ преиспо́днїѧ свѧ́занныѧ хрⷭ҇тѐ , и҆ тридне́внѡ , ꙗ҆́кѡ ѿ ки́та і҆ѡ́на , вᲂскр҃се ѿ́ грᲂба . Сᲂхрани́въ цѣ́ла зна́менїѧ хрⷭ҇тѐ , вᲂскр҃съ ѿ́ грᲂба , и҆́же ключа̀ дв҃ыѧ невреди́выи въ рᲂжествѣ̀ свᲂе́мъ , и҆ ѿве́рзлъ є҆сѝ на́мъ ра́йскїѧ две́ри . Сп҃се мо́й живо́е , а҆ не же́ртвенᲂе закᲂле́нїе ꙗ҆́кѡ бг҃ъ , са́мъ себѐ во́лею приве́дъ кᲂ ѻ҆ц҃ꙋ . сᲂвᲂскреси́ же всеро́дна а҆да́ма , вᲂскр҃се ѿ́ грᲂба .= та́же , є҆ктенїѧ̀ . вᲂз̾гла́съ . Т=ы́ бᲂ є҆сѝ цр҃ь ми́рᲂви , и҆ спа́съ дꙋша́мъ на́шимъ , и҆ тебѣ̀ сла́вꙋ вᲂз̾сыла́емъ , ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ , ны́нѣ и҆ при́снѡ и҆ во́ вѣки вѣкѡ́мъ .

кᲂнда́къ . гла́съ , и҃ . А҆́ще и҆ во́ грᲂбъ сни́де без̾сме́ртне , нᲂ а҆́дᲂвꙋ разрꙋши́лъ є҆сѝ си́лꙋ , и҆ вᲂскр҃се ꙗ҆́кѡ пᲂбѣди́тель хрⷭ҇тѐ бж҃е , жена́мъ мѷрѡно́сицамъ ра́дᲂсть прᲂвѣща́въ , и҆ свᲂи́мъ а҆пⷭ҇лѡмъ ми́ръ дарᲂва̀ , и҆́же па́дшимъ пᲂдаѧ̀ вᲂскрⷭ҇нїе . и҆́кᲂсъ . И҆́же пре́жде сл҃нца сл҃нцꙋ заше́дшꙋ и҆нᲂгда̀ во́ грᲂбъ , предвари́ша кᲂ ᲂу҆́трꙋ взыска́юще , ꙗ҆́кѡ во́ дне мѷрѡно́сицы дв҃ы . и҆ дрꙋга̀ къ дрꙋзѣ́й вᲂпїѧ́хꙋ , ѽ дрꙋги́нѧ , прїиди́те вᲂнѧ́ми пᲂма́жемъ тѣ́лᲂ живᲂно́снᲂе и҆ пᲂгребе́нᲂе , пло́ть вᲂскреси́вша па́дшагѡ а҆да́ма , лежа́ща во́ грᲂбѣ , и҆́демъ и҆ пᲂтщи́мсѧ ꙗ҆́кᲂже вᲂлсвѝ , и҆ пᲂклᲂни́мсѧ , и҆ принесе́мъ мѵ́рѡ , ꙗ҆́кѡ да́ры . не в̾ пелены̀ , нᲂ в̾ плащани́цꙋ ѡ҆бви́тᲂмꙋ , и҆ съ пла́чемъ вᲂзᲂпїе́мъ , Ѽ влⷣкᲂ вᲂста́ни , и҆́же па́дшимъ пᲂдаѧ̀ вᲂскрⷭ҇нїе .

Вᲂскрⷭ҇нїе хрⷭ҇то́вᲂ ви́дѣвше , пᲂклᲂни́мсѧ ст҃о́мꙋ гдⷭ҇ꙋ і҆с҃ꙋ , є҆ди́нᲂмꙋ без̾грѣ́шнᲂмꙋ [пᲂкло́н̾] , крⷭ҇тꙋ̀ твᲂемꙋ̀ пᲂклᲂнѧ́емсѧ хрⷭ҇тѐ , и҆ ст҃о́е вᲂскрⷭ҇нїе твᲂѐ пᲂе́мъ и҆ сла́вимъ [пᲂкло́н̾] . ты́ бᲂ є҆сѝ бг҃ъ на́шъ , ра́зве бᲂ тебѐ и҆но́гᲂ незна́емъ , и҆́мѧ твᲂѐ нарица́емъ . прїиди́те всѝ вѣ́рнїи , пᲂклᲂни́мсѧ ст҃о́мꙋ хрⷭ҇то́вꙋ вᲂскрⷭ҇нїю [пᲂкло́н̾] , се́бᲂ прїи́де крⷭ҇та̀ ра́ди ра́дᲂсть всемꙋ̀ ми́рꙋ , всегда̀ бл҃гᲂслᲂви́мъ гдⷭ҇а , и҆ пᲂе́мъ вᲂскрⷭ҇нїе є҆гѡ̀ , распѧ́тїе бᲂ претерпѣ̀ , и҆ сме́ртїю сме́рть разрꙋшѝ . три́жды .

Вᲂскр҃съ і҆с҃ъ ѿ́ грᲂба , ꙗ҆́кᲂже прᲂречѐ , и҆ дарᲂва̀ на́мъ живо́тъ вѣ́чныи , ми́ръ и҆ ве́лїю млⷭ҇ть ,= гⷤ .=

пѣ́снь , з҃ . і҆рмо́съ . Ѻ҆́трᲂки ѿ пе́щи и҆зба́вивъ , бы́въ ᲂу҆́бѡ чл҃къ , стра́ждетъ ꙗ҆́кѡ сме́ртенъ , и҆ стра́стїю ме́ртвенᲂю въ нетлѣ́нїе ѡ҆блачи́тъ бл҃гᲂлѣ́пїе , є҆ди́нъ бл҃гᲂслᲂве́нъ ѻ҆ц҃е́мъ бг҃ъ и҆ препрᲂсла́вленъ . Жены̀ с̾ мѵ́рᲂмъ бг҃ᲂмꙋ́дрыѧ , вᲂслѣ́дъ тебѐ теча́хꙋ . є҆го́же ꙗ҆́кѡ ме́ртва , сᲂ слеза́ми и҆ска́хꙋ , пᲂклᲂни́шасѧ и҆ ра́дꙋющесѧ живо́мꙋ бг҃ꙋ , и҆ па́схꙋ та́йнꙋю , твᲂи́мъ хрⷭ҇тѐ ᲂу҆ченикѡ́мъ бл҃гᲂвѣсти́ша . Ꙗ҆́кѡ вᲂи́стинꙋ сщ҃е́ннаѧ и҆ всепра́зднственнаѧ , сїѧ̀ спаси́тельнаѧ но́щь и҆ свѣтᲂза́рнаѧ , свѣтᲂно́снагѡ днѐ , вᲂста́нїю сꙋ́щи прᲂпᲂвѣ́дница , в̾ не́й же без̾лѣ́тныи свѣ́тъ , и҆́з̾ грᲂба пло́тьски всѣ́мъ вᲂсїѧ̀ . Сме́рти пра́зднꙋемъ ᲂу҆мерщве́нїе , а҆́дᲂвᲂ разрꙋше́нїе , и҆но́гѡ живᲂта̀ вѣ́чнагѡ нача́лᲂ , и҆ и҆гра́юще пᲂе́мъ вино́внагᲂ , є҆ди́нагѡ бл҃гᲂслᲂве́на ѻ҆ц҃е́мъ бг҃а и҆ препрᲂсла́влена .= та́же , є҆ктенїѧ̀ . вᲂз̾гла́съ . Ꙗ҆́=кѡ ѿ тебѣ̀ є҆́сть и҆сто́чникъ бл҃ги́хъ , и҆ вᲂспрїѧ́тїе без̾сме́ртныѧ жи́зни . и҆ тебѣ̀ сла́вꙋ вᲂз̾сыла́емъ , ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ , ны́нѣ и҆ при́снѡ и҆ во́ вѣки вѣкѡ́мъ .

пѣ́снь , и҃ . і҆рмо́съ . Се́й ᲂу҆́бѡ нарече́нныи ст҃ы́и дн҃ь , є҆ди́нъ сꙋбо́тамъ цр҃ь и҆ гдⷭ҇ь , пра́здникъ пра́здникᲂмъ и҆ тᲂржество̀ є҆́сть тᲂржество́мъ , во́ньже бл҃гᲂслᲂви́мъ хрⷭ҇та̀ во́ вѣки . Прїиди́те но́вагѡ винᲂгра́да ча́да , бжⷭ҇твенагѡ весе́лїѧ , в̾ наро́читᲂмъ днѝ вᲂскрⷭ҇нїѧ , црⷭ҇твїѧ хрⷭ҇то́ва прїѡбщи́мсѧ , пᲂю́ще є҆гѡ̀ ꙗ҆́кѡ бг҃а во́ вѣки . Вᲂзведѝ ѻ҆́крестъ ѻ҆́чи твᲂѝ сїѡ́не и҆ ви́ждь , се́бᲂ прїидо́ша къ тебѣ̀ , ꙗ҆́кѡ бг҃ᲂсвѣ́тлаѧ свѣти́ла , ѿ за́пада и҆ сѣ́вера и҆ мо́рѧ , и҆ вᲂсто́ка ча́да твᲂѧ̀ , в̾ тебѣ̀ бл҃гᲂслᲂвѧ́ще хрⷭ҇та̀ во́ вѣки . трⷪ҇ченъ . Ѻ҆́ч҃е вседержи́телю и҆ сло́ве и҆ дꙋ́ше , тре́ми сᲂединѧ́емᲂе въ сᲂста́вѣхъ є҆стество̀ , пресꙋ́щественыи и҆ пребжⷭ҇твеныи , в̾ тѧ̀ крⷭ҇ти́хᲂмсѧ и҆ тѧ̀ блгⷭ҇ви́мъ вᲂ всѧ̀ вѣ́ки . та́же , є҆ктенїѧ̀ . вᲂз̾гла́съ . Ꙗ҆́кѡ бл҃гᲂслᲂви́сѧ и҆́мѧ твᲂѐ , и҆ прᲂсла́висѧ црⷭ҇твᲂ твᲂѐ , ѻ҆ц҃а и҆ сн҃а и҆ ст҃а́гѡ дх҃а , нн҃ѣ и҆ прⷭ҇нѡ и҆ во́ вѣки вѣкѡ́мъ .

пѣ́снь , ѳ҃ . і҆рмо́съ . Свѣти́сѧ свѣти́сѧ но́выи і҆єрⷭ҇ли́ме , сла́ва бᲂ гдⷭ҇нѧ на тебѣ̀ вᲂсїѧ̀ . ликꙋ́й нн҃ѣ и҆ весели́сѧ сїѡ́не , ты́ же чⷭ҇таѧ красꙋ́йсѧ бцⷣе , ѡ҆ вᲂста́нїи ржⷭ҇тва̀ твᲂегѡ̀ . ѽ бжⷭ҇твенагѡ , ѽ любе́знагѡ , ѽ сла́дкагѡ ти гла́са , с̾ на́ми ᲂу҆́бѡ нело́жнѡ ѡ҆бѣща́лсѧ є҆сѝ бы́ти , дᲂ скᲂнча́нїѧ вѣ́ка хрⷭ҇тѐ , є҆го́же вѣ́рнїи держа́вꙋ и҆ наде́ждꙋ и҆мꙋ́ще ра́дꙋемсѧ . ѽ па́сха вели́ка , и҆ сщ҃е́ннаѧ хрⷭ҇тѐ . ѽ мꙋ́дрᲂсте сло́вᲂ бж҃їе и҆ си́лᲂ , пᲂдава́й на́мъ и҆́стѣе тебѐ причаща́тисѧ , въ невече́рнѣмъ днѝ црⷭ҇твїѧ твᲂегѡ̀ . та́же , є҆ктенїѧ̀ . вᲂз̾гла́съ . Ꙗ҆́кѡ тѧ̀ хва́лѧтъ всѧ̀ си́лы нбⷭ҇ныѧ , ѻ҆ц҃а и҆ сн҃а и҆ ст҃а́гѡ дх҃а , нн҃ѣ и҆ при́снѡ и҆ во́ вѣки вѣкѡ́мъ . свѣти́ленъ . Пло́тїю ᲂу҆снꙋ́въ ꙗ҆́кѡ ме́ртвъ , цр҃ь и҆ гдⷭ҇ь , тридне́венъ вᲂскр҃се , и҆ а҆да́ма вᲂздви́гъ и҆з̾ тлѝ , и҆ ᲂу҆праздни́въ сме́рть . па́сха нетлѣ́нїѧ , ми́рꙋ спасе́нїе . три́жды .

пᲂсе́мъ , Хвали́те гдⷭ҇а съ небе́съ . сїѧ́ же , трѝ , ѱалма̀ , глаго́лемъ вᲂ всю̀ свѣ́тлꙋю недѣ́лю .

На хвали́тѣхъ , стихѣ́ры , вᲂскрⷭ҇ны , гла́съ , а҃ . хвали́те є҆гѡ̀ на си́лахъ є҆гѡ̀ ,꙳ хвали́те є҆гѡ̀ пᲂ премно́гᲂмꙋ вели́чествїю є҆гѡ̀ . Пᲂе́мъ твᲂю̀ хрⷭ҇тѐ спасе́нꙋю стрⷭ҇ть , и҆ сла́вимъ твᲂѐ вᲂскрⷭ҇нїе .

хвали́те є҆гѡ̀ во́ гласѣ трꙋ́бнѣмъ ,꙳ хвали́те є҆гѡ̀ вᲂ ѱалты́ри и҆ гꙋ́слѣхъ . Распѧ́тїе претерпѣ́въ , и҆ сме́рть ᲂу҆праздни́въ , и҆ вᲂскр҃съ и҆з̾ ме́ртвыхъ , ᲂу҆мирѝ на́шꙋ жи́знь гдⷭ҇и , ꙗ҆́кѡ є҆ди́нъ всеси́ленъ .

хвали́те є҆гѡ̀ в̾ тѷмпа́нѣ и҆ ли́цѣ ,꙳ хвали́те є҆гѡ̀ вᲂ стрꙋ́нахъ и҆ ѻ҆рга́нѣхъ . И҆́же а҆́да плѣни́въ , и҆ чл҃ка вᲂскр҃си́въ , вᲂскрⷭ҇нїемъ свᲂи́мъ хрⷭ҇тѐ , спᲂдо́би на́съ чи́стымъ срⷣцемъ пѣ́ти , и҆ сла́вити тѧ̀ .

хвали́те є҆гѡ̀ в̾ кѷмва́лѣхъ дᲂбрᲂгла́сныхъ , хвали́те є҆гѡ̀ в̾ кѷмва́лѣхъ вᲂсклица́нїѧ .꙳ всѧ́кᲂ дыха́нїе да хва́литъ гдⷭ҇а . Бг҃ᲂлѣ́пнᲂе твᲂѐ смᲂтре́нїе сла́вѧще , вᲂпїе́мъ ти хрⷭ҇тѐ , рᲂди́сѧ ѿ дв҃ы , и҆ неразлꙋ́ченъ бѣ̀ ѿ ѻ҆ц҃а , пᲂстрада̀ ꙗ҆́кѡ чл҃къ , и҆ во́лею претерпѣ̀ распѧ́тїе , и҆ вᲂскр҃се и҆́з̾грᲂба ꙗ҆́кѡ ѿ черто́га и҆з̾ше́дъ , да спасе́ши всегѡ̀ ми́ра , гдⷭ҇и сла́ва тебѣ̀ .

стⷯры па́сцѣ . гла́съ , є҃ . =Да вᲂскрⷭ҇нетъ бг҃ъ ,꙳ и҆ разы́дꙋтсѧ вразѝ є҆гѡ̀ . П=а́сха сщ҃е́ннаѧ на́мъ дне́сь пᲂказа́сѧ , па́сха но́ва ст҃а́ѧ , па́сха таи́нственнаѧ , па́сха всечестна́ѧ , па́сха хрⷭ҇та̀ и҆зба́вителѧ , па́сха непᲂро́чнаѧ , па́сха вели́каѧ , па́сха вѣ́рнымъ , па́сха двѣ́ри ра́йскїѧ на́мъ ѿверза́ющаѧ , па́сха всѣ́хъ ѡ҆сщ҃а́ющаѧ вѣ́рныхъ .

Ꙗ҆́кѡ и҆счеза́етъ ды́мъ ,꙳ да и҆сче́знꙋтъ . Прїиди́те ѿ видѣ́нїѧ жены̀ бл҃гᲂвѣ́стницы , и҆ сїѡ́нꙋ рцы́те , прїимѝ ѿ на́съ ра́дᲂсть бл҃гᲂвѣ́щенїѧ вᲂскрⷭ҇нїѧ хрⷭ҇то́ва , красꙋ́йсѧ и҆ ликꙋ́й , и҆ ра́дꙋисѧ і҆єрⷭ҇ли́ме , цр҃ѧ хрⷭ҇та̀ ᲂу҆́зрѣвъ и҆́з̾ грᲂба , ꙗ҆́кѡ жениха̀ и҆схᲂдѧ́ща .

Та́кѡ да пᲂги́бнꙋтъ грѣ́шницы ѿ лица̀ бж҃їѧ ,꙳ а҆ пра́ведницы да вᲂз̾веселѧ́тсѧ . Мѷрѡно́сицы жены̀ , ѕѣлѡ̀ ра́нѡ пред̾ста́ша гро́бꙋ живᲂда́вца , и҆ ѡ҆брѣто́ша а҆́нг҃ла на ка́мени сѣдѧ́ща , и҆ то́й прᲂвѣща́въ и҆́мъ , си́це глаго́лаше , что̀ и҆́щете жива́гѡ с̾ ме́ртвыми ; что̀ пла́чете нетлѣ́ннагᲂ вᲂ тлѝ ; ше́дше прᲂпᲂвѣ́дите ᲂу҆ченикѡ́мъ є҆гѡ̀ .

Се́й де́нь и҆́же сᲂтвᲂрѝ гдⷭ҇ь ,꙳ вᲂз̾ра́дꙋемсѧ и҆ вᲂз̾весели́мсѧ во́нь . Па́сха кра́сна , па́сха гдⷭ҇нѧ па́сха , па́сха всечестна́ѧ на́мъ вᲂз̾сїѧ̀ . па́сха , ра́дᲂстїю дрꙋ́гъ дрꙋ́га прїи́мемъ . Ѽ па́сха , и҆збавле́нїе ско́рби , и҆́бᲂ и҆́з̾ грᲂба дне́сь , ꙗ҆́кѡ ѿ черто́га вᲂз̾сїѧ̀ хрⷭ҇то́съ , жены̀ ра́дᲂсти и҆спо́лни глаго́лѧ , прᲂпᲂвѣ́дите а҆пⷭ҇лѡмъ .

Сла́ва , и҆ ны́нѣ . гла́съ , то́йже . Вᲂскрⷭ҇нїѧ де́нь , прᲂсвѣти́мсѧ тᲂржество́мъ , и҆ дрꙋ́гъ дрꙋ́га прїи́мемъ , и҆ рце́мъ бра́тїе , и҆ ненави́дѧщимъ на́съ , прᲂсти́мъ всѧ̀ вᲂскрⷭ҇нїемъ , и҆ та́кѡ вᲂзᲂпїе́мъ , хрⷭ҇то́съ вᲂскре́се и҆з̾ ме́ртвыхъ , сме́ртїю сме́рть пᲂпра́въ , и҆ сꙋ́щимъ вᲂ грᲂбѣ́хъ живо́тъ дарᲂва̀ .

Хрⷭ҇то́съ вᲂскр҃се и҆з̾ме́ртвыхъ сме́ртїю на сме́рть настꙋпѝ , и҆ гро́бнымъ живо́тъ дарᲂва̀ , гⷤ .

Пᲂсе́мъ пᲂ кры́лᲂсᲂмъ , пᲂе́мъ , хрⷭ҇то́съ вᲂскр҃се , мно́гажды , до́ндеже сᲂверши́тсѧ цѣлᲂва́нїе . Пᲂ скᲂнча́нїи же цѣлᲂва́нїѧ , чте́тсѧ сло́вᲂ і҆ѡа́нна златᲂꙋ́стагѡ ѿ настᲂѧ́телѧ , ѡ҆бра́щшасѧ на за́падъ лице́мъ . Па́влᲂвы ᲂу҆ста̀ , хрⷭ҇то́вы ᲂу҆ста̀ . хрⷭ҇то́вы же ᲂу҆ста̀ , па́влᲂвы ᲂу҆ста̀ . ᲂу҆ста̀ златᲂꙋ́стᲂвы , хрⷭ҇то́вы и҆ па́влᲂвы ᲂу҆ста̀ . =И҆́же вᲂ ст҃ы́хъ ѻ҆ц҃а на́шегѡ і҆ѡа́нна златᲂꙋ́стагѡ , а҆рхїєпкⷭ҇па кᲂнстанти́на гра́да . Сло́вᲂ на ст҃ꙋ́ю па́схꙋ ᲂу҆чи́тельнᲂ . и҆ ѡ҆ є҆́же ѡ҆пᲂздѣ́вшихъ к̾ по́двигꙋ по́стнᲂмꙋ , бл҃гᲂслᲂвѝ ѻ҆́ч҃е .=

И҆́же а҆́ще кто̀ бг҃ᲂлюби́въ , и҆ бл҃гᲂвѣ́ренъ и҆ бл҃гᲂчести́въ , да прїи́метъ сегѡ̀ до́брагѡ би́сера , и҆ наслади́тсѧ ны́нѣшнѧгѡ честнѣ́йшагѡ тᲂржества̀ ; и҆́же а҆́ще кто̀ є҆́сть бл҃гᲂразꙋ́менъ ѿ ра́бъ бл҃гᲂнра́вныхъ , да вни́детъ ра́дꙋѧсѧ въ ра́дᲂсть гдⷭ҇а свᲂегѡ̀ ; а҆́ще кто̀ дѣ́лалъ є҆́сть пᲂстѧ́сѧ , да вᲂспрїи́метъ нн҃ѣ сре́бреникъ ; а҆́ще кто̀ ѿ пе́рвагѡ часа̀ дѣ́лалъ є҆́сть , да прїи́метъ дне́сь пра́ведныи до́лгъ ; а҆́ще кто̀ пᲂ тре́тїемъ часѣ̀ прїи́де , бл҃гᲂдарѧ̀ да пра́зднꙋетъ ; а҆́ще кто̀ пᲂ шесто́мъ часѣ̀ дᲂсти́же , ничто́же да ᲂу҆сᲂмни́тсѧ , и҆́бᲂ ни чи́мъ же ѿщетѣва́етсѧ ; а҆́ще ли кто̀ и҆ девѧ́тагѡ часа̀ ᲂу҆лиши́сѧ , да пристꙋ́питъ без̾ сᲂмнѣ́нїѧ , ничто́же бᲂѧ́сѧ ; а҆́ще кто̀ и҆ вᲂ є҆динᲂнадесѧ́тыи ча́съ прїи́де , да не ᲂу҆страши́тсѧ срамлѧ́ѧсѧ замедлѣ́нїемъ . чл҃кᲂлюби́въ бᲂ є҆́сть влⷣка , прїе́млетъ пᲂслѣ́днѧгᲂ , ꙗ҆́кᲂже и҆ пе́рвагѡ . ᲂу҆тѣша́етъ , и҆́же въ є҆динᲂнадесѧ́тыи ча́съ прише́дшагᲂ , ꙗ҆́кᲂже дѣ́лавшагᲂ ѿ пе́рвагѡ часа̀ ; и҆ пᲂслѣ́днѧгᲂ ми́лꙋетъ , и҆ пе́рвагѡ ᲂу҆тѣша́етъ . и҆ ѻ҆́нᲂмꙋ дае́тъ , и҆ семꙋ̀ да́рствꙋетъ . и҆ дѣ́ланїе пᲂчита́етъ , и҆ предлᲂже́нїе хва́литъ , и҆ спѣ́хъ ᲂу҆ме́длившагѡ лю́битъ ; Тѣ́мже ᲂу҆́бѡ вни́дите всѝ , в̾ ра́дᲂсть гдⷭ҇а свᲂегѡ̀ , и҆ пе́рвїи и҆ втᲂрі́и и҆ пᲂслѣ́днїи , мздꙋ̀ прїими́те . бᲂга́тїи и҆ ᲂу҆бо́зїи и҆ ни́щїи , дрꙋ́гъ со́ дрꙋгᲂмъ ликꙋ́йте . вᲂзде́ржницы и҆ лѣни́вїи де́нь пᲂчти́те . пᲂсти́вшїисѧ и҆ непᲂсти́вшїисѧ , вᲂзвесели́тесѧ дне́сь . трапе́за цр҃ко́внаѧ гᲂто́ва и҆спо́лнь , наслади́тесѧ всѝ . теле́цъ ᲂу҆пита́нныи пред̾лежи́тъ . никто́же и҆зы́ди а҆́лченъ , всѝ наслади́тесѧ пи́ра цр҃ко́внагѡ , всѝ вᲂспрїими́те бᲂга́тьствᲂ бл҃гᲂсти . да никто́же рыда́й нищеты̀ , ꙗ҆ви́бᲂсѧ ѻ҆́бщее црⷭ҇твᲂ . никто́же да ѡ҆слабѣ́етъ , никто́же да пла́четсѧ сᲂгрѣше́нїи , ѿпꙋще́нїе бᲂ кꙋ́пнѡ и҆ ѡ҆ставле́нїе ѿ́ грᲂба вᲂсїѧ̀ . никто́же да ᲂу҆бᲂи́тсѧ сме́рти , свᲂбᲂди́ бᲂ на́съ сп҃сᲂва сме́рть . ᲂу҆гаси́ бᲂ є҆ѧ̀ , и҆́же ѿ неѧ̀ держи́мыи . ᲂу҆мꙋ́чи а҆́да сше́дыи вᲂ а҆́дъ . го́ре бы́сть є҆мꙋ̀ вкꙋси́вшꙋ пло́ть є҆гѡ̀ . и҆ сѐ предвари́въ и҆са́їѧ вᲂзᲂпѝ , а҆́дъ речѐ ѡ҆гᲂрчи́сѧ , срѣ́тъ тѧ̀ до́лѣ . ѡ҆гᲂрчи́сѧ , и҆́бᲂ пᲂрꙋ́ганъ бы́сть . прїѧ́тъ тѣ́лᲂ и҆ бг҃ꙋ прирази́сѧ . прїѧ́тъ зе́млю , и҆ срѣ́те нб҃ᲂ . прїѧ́тъ є҆́же ви́дѧше , и҆ впадѐ вᲂ є҆́же невѣ́дѧше ; гдѣ́ ти сме́рте жа́лᲂ ; гдѣ́ ти а҆́де пᲂбѣ́да ; вᲂста̀ хрⷭ҇то́съ , и҆ низлᲂжи́сѧ а҆́дъ . вᲂста̀ хрⷭ҇то́съ , и҆ падо́ша бѣ́сѡве . вᲂскр҃се хрⷭ҇то́съ , и҆ ра́дꙋютсѧ а҆́нг҃ли . вᲂскр҃се хрⷭ҇то́съ , и҆ жи́знь живе́тъ вᲂ все́мъ ми́рѣ . вᲂскр҃се хрⷭ҇то́съ , и҆ мертве́цъ ни є҆ди́нъ во́ грᲂбѣ . хрⷭ҇то́съ бᲂ вᲂста̀ ѿ ме́ртвыхъ , нача́тᲂкъ ᲂу҆ме́ршимъ бы́сть . тᲂмꙋ̀ сла́ва и҆ держа́ва , во́ вѣки вѣкѡ́мъ , а҆ми́нь . скᲂнча́вшꙋ же настᲂѧ́телю , та́кᲂвᲂе чте́нїе . Рекꙋ́тъ є҆мꙋ̀ всѝ бра́тїѧ , ра́внымъ гла́сᲂмъ .= Мно́га лѣ́тъ ти влⷣкᲂ . та́же , всѝ сꙋ́щїи в̾ цр҃кви глаго́лютъ . трᲂпа́рь , гла́съ , и҃ . Ѿ= ᲂу҆́стъ твᲂи́хъ , ꙗ҆́кᲂже свѣтᲂлꙋ́чнаѧ зарѧ̀ вᲂсїѧ́вши , бг҃ᲂда́ннаѧ тѝ бл҃гᲂда́ть , вселе́ннꙋю прᲂсвѣтѝ . несребрᲂлю́бнᲂ ми́рᲂви сᲂкро́вище пᲂлᲂжѝ , нᲂ высᲂтꙋ̀ на́мъ смиренᲂмꙋ́дрїѧ пᲂказа̀ , и҆ свᲂи́ми слᲂвесы̀ наказꙋ́ѧ , ѻ҆́ч҃е і҆ѡа́нне златᲂꙋ́сте , мᲂлѝ сло́ва хрⷭ҇та̀ бг҃а , спасти́сѧ дш҃а́мъ на́шимъ .

пᲂсе́мъ : є҆ктенїѧ̀ : пᲂми́лꙋй на́съ бж҃е . і҆єре́й , вᲂз̾гла́съ . та́же : и҆спо́лнимъ заꙋ́треннїѧ мл҃твꙋ . и҆ пᲂ вᲂз̾гла́сѣ : сы́и бл҃гᲂслᲂве́нъ . и҆ мы̀ : а҆ми́нь . ᲂу҆твердѝ бж҃е вѣ́рꙋ хрⷭ҇тїа́нскꙋю .

та́же , дїа́кᲂнъ : Премꙋ́дрᲂсть . мы́ же : Хрⷭ҇то́съ вᲂскр҃се и҆з̾ ме́ртвыхъ сме́ртїю на сме́рть настꙋпѝ , и҆ гро́бнымъ живо́тъ дарᲂва̀ .= три́жды , с̾ пᲂкло́нами .= пᲂсе́мъ і҆єре́й твᲂри́тъ , ѿпꙋ́стъ , держа́и крⷭ҇тъ . пᲂе́тъ : Хрⷭ҇то́съ вᲂскр҃се и҆з̾ ме́ртвыхъ , сме́ртїю сме́рть пᲂпра́въ . мы́ же : И҆ сꙋ́щимъ вᲂ грᲂбѣ́хъ живо́тъ дарᲂва̀ . і҆єре́й : И҆́стинныи бг҃ъ на́шъ , мл҃твами пречⷭ҇тыѧ є҆гѡ̀ мт҃ре , си́лᲂю чⷭ҇тна́гѡ и҆ живᲂтвᲂрѧ́щагѡ крⷭ҇та̀ , и҆ ст҃ы́хъ сла́вныхъ и҆ всехва́льныхъ а҆пⷭ҇лъ , и҆ всѣ́хъ ст҃ы́хъ пᲂми́лꙋетъ и҆ спасе́тъ на́съ , ꙗ҆́кѡ бл҃гі́и чл҃кᲂлю́бецъ . та́же , і҆єре́й крⷭ҇тъ вᲂзвыша́ѧ гл҃етъ : Хрⷭ҇то́съ вᲂскр҃се . гⷤ . мы́ же ѿвѣща́емъ : Вᲂи́стинꙋ вᲂскр҃се . гⷤ . и҆ пᲂе́мъ : И҆ =на́мъ дарᲂва̀ живо́тъ вѣ́чныи , пᲂклᲂнѧ́емсѧ тридне́внᲂмꙋ є҆гѡ̀ вᲂскрⷭ҇нїю =[пᲂкло́нъ] .

та́же , а҃ й ча́съ . Хрⷭ҇то́съ вᲂскр҃се , гⷤ . пѣ́нїемъ . Вᲂскрⷭ҇нїе хрⷭ҇то́вᲂ ви́дѣвше , гⷤ . Предвари́ша ᲂу҆́трᲂ , аⷤ . А҆́ще и҆ во́ грᲂбъ сни́де , аⷤ . Во́ грᲂбѣ с̾ пло́тїю , аⷤ . сла́ва . Ꙗ҆́кѡ живᲂно́сецъ . и҆ нн҃ѣ . Вы́шнѧгѡ ѡ҆сщ҃е́ннѡ . та́же , пра́вᲂй кры́лᲂсъ : Гдⷭ҇и пᲂми́лꙋй , м҃ . сла́ва , и҆ ны́нѣ . Чтⷭ҇нѣ́йшꙋю херꙋви́мъ . И҆́менемъ гдⷭ҇нимъ бл҃гᲂслᲂвѝ ѻ҆́ч҃е . і҆єре́й , гл҃етъ : За мл҃твъ ст҃ы́хъ ѻ҆ц҃ъ на́шихъ . и҆ ѿпꙋ́стъ , а҃ мꙋ часꙋ̀ , си́це . і҆єре́й , гл҃етъ : Сла́ва тебѣ̀ бж҃е на́шъ , ᲂу҆пᲂва́нїе на́ше сла́ва тебѣ̀ .

и҆ мы̀ пᲂе́мъ : сла́ва , и҆ ны́нѣ . гдⷭ҇и пᲂми́лꙋй , вⷤ . гдⷭ҇и бл҃гᲂслᲂвѝ . і҆єре́й , гл҃етъ : Вᲂскр҃сы́и и҆з̾ ме́ртвыхъ , хрⷭ҇то́съ и҆́стинныи бг҃ъ на́шъ , мл҃твами пречⷭ҇тыѧ є҆гѡ̀ мт҃ре , си́лᲂю чⷭ҇тна́гѡ и҆ живᲂтвᲂрѧ́щагѡ крⷭ҇та̀ , и҆ ст҃ы́хъ сла́вныхъ и҆ всехва́льныхъ а҆пⷭ҇лъ , и҆ всѣ́хъ ст҃ы́хъ пᲂми́лꙋетъ и҆ спасе́тъ на́съ , ꙗ҆́кѡ бл҃гі́и чл҃кᲂлю́бецъ .

та́же , прᲂще́нїе .

<< Previous

Contents

Next >>