3 февраля: свв. правв. Симеона Богоприимца и Анны Пророчицы

МЦⷭ҇А ТОГО́ЖЕ ВЪ Г҃ ДН҃Ь

Ст҃а́гѡ и҆ пра́веднагѡ сѷмеѡ́на бг҃ᲂпрїи́мца , и҆ а҆́нны прᲂро́чицы . =Ве́черъ , на гдⷭ҇и вᲂзва́хъ , стихѣ́ры , пра́здникꙋ , г҃ . и҆ ст҃о́мꙋ , г҃ . стихѣ́ры , пра́здникꙋ . гла́съ , а҃ . поⷣ . нбⷭ҇нымъ чино́мъ . Т=вᲂре́цъ всѧ́ческихъ ,꙳ и҆ и҆зба́витель на́шъ ,꙳ мт҃рїю дв҃ᲂю в̾ цр҃квь принесе́сѧ .꙳ тѣ́мже ста́рецъ сего̀ прїе́мъ ,꙳ с̾ ра́дᲂстїю взыва́ше .꙳ ны́нѣ ѿпꙋща́еши раба̀ твᲂегѡ̀ бл҃же с̾ ми́рᲂмъ ,꙳ ꙗ҆́кᲂже и҆зво́лилъ є҆сѝ . Сѷмеѡ́нъ на рꙋкꙋ̀ ѿ дв҃ы прїе́мъ ,꙳ и҆́же пре́жде вѣ́къ рᲂжде́на сп҃са .꙳ ви́дѣ вᲂпїѧ́ше ,꙳ прᲂсщ҃е́нїе твᲂеѧ̀ сла́вы кᲂнце́мъ .꙳ ны́нѣ ѿпꙋща́еши раба̀ твᲂегѡ̀ бл҃же с̾ ми́рᲂмъ ,꙳ ꙗ҆́кѡ ви́дѣхъ тѧ̀ . И҆́же въ пᲂслѣ́днѧѧ рᲂжде́на на спасе́нїе землены́мъ ,꙳ сѷмеѡ́нъ на рꙋкꙋ̀ нᲂси́въ сп҃са .꙳ ра́дꙋѧсѧ вᲂпїѧ́ше , ви́дѣхъ свѣ́тъ ꙗ҆зы́кѡмъ ,꙳ и҆ сла́вꙋ і҆и҃леви .꙳ ны́нѣ ѿпꙋща́еши ,꙳ ꙗ҆́кᲂже ре́клъ є҆сѝ ꙗ҆́кѡ бг҃ъ ,꙳ ѿ сꙋ́щихъ здѣ̀ велѣ́нїемъ сѝ .

и҆́ны , стихѣ́ры , ст҃о́мꙋ . гла́съ , д҃ . поⷣ . да́лъ є҆сѝ зна́менїе .= Пра́веденъ и҆ сᲂверше́нъ ,꙳ и҆ по всемꙋ̀ сла́венъ сы́и бг҃ᲂдᲂхнᲂве́нне .꙳ бг҃а є҆ди́наго сᲂверше́на ,꙳ ѡ҆правда́ти ми́ра прише́дша ,꙳ вᲂспрїѧ́лъ є҆сѝ рꙋка́ма вᲂплᲂще́на .꙳ и҆ ѿрѣши́тисѧ тѣлесѐ вᲂпїѧ̀ є҆мꙋ̀ ,꙳ ны́нѣ ѿпꙋща́еши раба̀ твᲂегѡ̀ ꙳ с̾ми́рᲂмъ , чл҃кᲂлю́бче ,꙳ ꙗ҆́кѡ ви́дѣхъ тѧ дне́сь . Ю҆́нᲂшьствꙋѧ дх҃ᲂмъ ,꙳ престарѣ́въ же тѣ́лᲂмъ сѷмеѡ́не .꙳ ѡ҆бѣща́нїе прїѧ́лъ є҆сѝ неви́дѣти сме́рти ,꙳ до́ндеже ви́диши младе́нца но́ва ,꙳ пре́жде вѣ́къ сꙋ́щаго твᲂрца̀ и҆ бг҃а всѧ́ческихъ ,꙳ пло́тїю ѡ҆бнища́вша .꙳ ви́дѣвъ же взыгра́лъ є҆сѝ ,꙳ и҆ пло́ти разрѣше́нїе прᲂси́лъ є҆сѝ ,꙳ к̾ бжⷭ҇твеннымъ селе́нїемъ преше́лъ є҆сѝ ра́дꙋѧсѧ . А҆́нна бг҃ᲂдᲂхнᲂве́ннаѧ ,꙳ и҆ сѷмеѡ́нъ пребᲂга́тыи ,꙳ прᲂро́чествїемъ сїѧ́юща ,꙳ в̾ зако́нѣ же непᲂро́чна ꙗ҆́вльшасѧ .꙳ зако́нꙋ да́телѧ ,꙳ младе́нца ꙗ҆́вльшасѧ по на́съ ви́дѣвше ,꙳ тᲂмꙋ̀ ны́нѣ пᲂклᲂни́шасѧ .꙳ тᲂю̀ па́мѧть дне́сь ра́дᲂстнѡ пра́зднꙋемъ ,꙳ по до́лгꙋ сла́вѧще і҆с҃а чл҃кᲂлю́бца . =сла́ва , и҆ ны́нѣ . гла́съ , є҃ . Ве́тхїи де́ньми младе́нствᲂвавъ пло́тїю , мт҃рїю дв҃ᲂю в̾ цр҃квь прино́ситсѧ , свᲂегѡ̀ зако́на и҆спᲂлнѧ́ѧ ѡ҆бѣща́нїе . є҆го́же сѷмеѡ́нъ прїе́мъ гл҃аше , ны́нѣ ѿпꙋща́еши с̾ ми́рᲂмъ по гл҃ꙋ твᲂемꙋ̀ раба̀ твᲂегѡ̀ . ви́дѣстѣ бо ѻ҆́чи мᲂѝ спасе́нїе твᲂѐ ст҃ы́и .

На стихо́внѣ , стихѣ́ры . гла́съ , в҃ . поⷣ . до́ме є҆в̾фра́фᲂвъ . Дне́сь сп҃съ ,꙳ ꙗ҆́кѡ млⷣнцъ ꙳ принесе́сѧ в̾ цр҃квь гдⷭ҇ню .꙳ и҆ рꙋка́ма престарѣ́вшимасѧ ,꙳ ста́рецъ сего̀ прїе́млетъ .

сти́хъ : ны́нѣ ѿпꙋща́еши раба̀ свᲂегѡ̀ влⷣко ,꙳ по гл҃ꙋ твᲂемꙋ̀ с̾ ми́рᲂмъ . Млⷣнцъ пло́тїю ,꙳ ве́тхїи де́ньми ꙳ ви́дитсѧ пресла́внѡ ,꙳ во дне́шнїи де́нь ,꙳ и҆ в̾ цр҃квь прино́ситсѧ .

сти́хъ : свѣ́тъ во ѿкрᲂве́нїе ꙗ҆зы́кѡмъ ,꙳ и҆ сла́вꙋ люді́й твᲂи́хъ і҆и҃лѧ . Прїимѝ ѽ сѷмеѡ́не ,꙳ пречⷭ҇таѧ вᲂпїѧ́ше ,꙳ на рꙋкꙋ̀ ꙗ҆́кѡ млⷣнца ,꙳ гдⷭ҇а сла́вы ,꙳ и҆ ми́рᲂви спасе́нїе . сла́ва , и҆ ны́нѣ . гла́съ , а҃ . Дне́сь и҆́же дре́вле мѡѷсе́ᲂви в̾ сѷна́и зако́нъ пᲂда́въ , зако́ннымъ пᲂвинꙋ́етсѧ велѣ́нїемъ , на́съ ра́ди ꙗ҆́кѡ милᲂсе́рдъ по на́съ бы́въ . ны́нѣ чи́стыи бг҃ъ , ꙗ҆́кѡ ѻ҆трᲂча̀ ст҃о , лᲂжесна̀ разве́рзъ чⷭ҇тыѧ , себѐ ꙗ҆́кѡ бг҃ᲂви прино́ситъ , зако́нныѧ клѧ́твы свᲂбᲂжда́ѧ , и҆ прᲂсвѣща́ѧ дш҃а на́ша .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . гла́с̾ , д҃ . Сѷмеѡ́нъ ста́рец̾ дне́сь весели́тсѧ , вᲂспрїѧ́тїемъ на́ рꙋкꙋ свᲂе́ю млⷣнца превѣ́чнагѡ бг҃а , ѿ ᲂу҆́зъ пло́ти разрѣши́тисѧ прᲂсѧ̀ , ви́дѣстѣ бо ѻ҆́чи мᲂѝ спасе́нїе твᲂѐ ми́рᲂви .= сла́ва , и҆ ны́нѣ . трᲂпа́рь , пра́здникꙋ . гла́съ , а҃ . Р=а́дꙋйсѧ ѡ҆бра́дᲂваннаѧ бцⷣе дв҃о , и҆з̾ тебе́ бо вᲂсїѧ̀ сл҃нце пра́веднᲂе хрⷭ҇то́съ бг҃ъ на́шъ , прᲂсвѣща́ѧ и҆́же во тмѣ̀ сꙋ́щихъ . весели́сѧ и҆ ты̀ ста́рче пра́ведныи , прїе́мыи на́ рꙋкꙋ свᲂбᲂди́телѧ дш҃а́мъ на́шимъ , да́рꙋющагѡ на́мъ вᲂскрⷭ҇нїе .

На ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , двⷤа . сла́ва , ст҃о́мꙋ . и҆ ны́нѣ , пра́здникꙋ . =По а҃ , стихᲂло́гїи , сѣда́ленъ . гла́съ , а҃ . Въ цр҃квь принесе́сѧ , жи́знь всѧ́ческихъ . менѐ ра́ди младе́нствᲂвавъ , пᲂд̾ зако́нᲂмъ бы́лъ є҆сѝ , и҆́же дре́вле начерта́въ на скрижа́лѣхъ зако́нъ , на гᲂрѣ̀ сина́йстѣй , да всѧ̀ и҆змѣни́ши ѿ зако́нныѧ дре́внїѧ рабо́ты . сла́ва млрⷭ҇дїю твᲂемꙋ̀ сп҃се , сла́ва црⷭ҇твїю твᲂемꙋ̀ . сла́ва смᲂтре́нїю твᲂемꙋ̀ , є҆ди́не чл҃кᲂлю́бче . =сла́ва , и҆ ны́нѣ , то́йже .

По в҃ , стихᲂло́гїи , сѣда́ленъ . гла́съ , є҃ . Въ цр҃квь принесе́сѧ , ѡ҆бы́чнᲂе и҆спᲂлнѧ́ѧ . твᲂре́цъ и҆ влⷣка , и҆ зако́нꙋ да́вецъ . и҆ на рꙋкꙋ̀ сѷмеѡ́ню , бл҃гᲂвᲂле́нїемъ свᲂи́мъ но́ситсѧ пло́тїю , и҆́же всѣ́мъ стра́шныи , и҆ всю̀ тва́рь сᲂдержа́и , претерпѣ́лъ є҆сѝ є҆ди́не ще́дре , свѣ́тъ сво́й всѣ́мъ ѿкры́ти на́мъ . сла́ва , и҆ ны́нѣ , то́йже .

Кано́нъ , пра́здникꙋ , на́ ѕ҃ . и҆ ст҃о́мꙋ , на́ ѕ҃ . кано́нъ , пра́здникꙋ . гла́съ , г҃ . твᲂре́нїе кᲂзмы̀ мᲂна́ха . пѣ́снь , а҃ . і҆рмо́съ . Сꙋ́шꙋ глꙋбᲂрᲂди́ тельнꙋю зе́млю , сл҃нце наше́ствᲂва и҆нᲂгда̀ . ꙗ҆́кѡ стѣна́ бо ѡ҆гꙋстѣ̀ ѻ҆́ба по́лы вᲂда̀ , лю́демъ пѣ́шимъ глꙋбинꙋ̀ прᲂхᲂдѧ́щимъ , и҆ бг҃ᲂꙋго́днѡ пᲂю́щимъ , пᲂе́мъ гдⷭ҇ви , сла́вно бо прᲂсла́висѧ .

запѣ́въ : Сла́ва гдⷭ҇и срѣ́тенїю твᲂемꙋ̀ . Да ка́плютъ во́дꙋ ѻ҆́блацы , сл҃нце бо на ѻ҆́блацѣ ле́гцѣ нᲂси́мо наста́ло є҆́сть , на нетлѣ́ннꙋю рꙋкꙋ̀ , хрⷭ҇то́съ в̾ цр҃кви ꙗ҆́кѡ младе́нецъ . тѣ́мже вѣ́рнїи вᲂзᲂпїе́мъ , пᲂе́мъ гдⷭ҇ви , сла́вно бо прᲂсла́висѧ . Крѣпи́тѣсѧ рꙋ́цѣ сѷмеѡ́ни , ста́ро стїю ѡ҆сла́бленїи . лы́ста же претрꙋжде́на ста́рча пра́вѡ быстро̀ движи́тасѧ , хрⷭ҇тꙋ̀ на срѣ́тенїе , ли́къ с̾ беспло́тными сᲂста́вите , пᲂе́мъ гдⷭ҇ви , сла́вно бо прᲂсла́висѧ . Ра́зꙋмᲂмъ прᲂсте́ртаѧ нб҃са̀ весели́тесѧ , ра́дꙋйжесѧ землѐ . и҆з̾ пребжⷭ҇твенныхъ бо нѣ́дръ хитре́цъ прᲂше́дъ хрⷭ҇то́съ , мт҃рїю дв҃ᲂю бг҃ᲂви ѻ҆ц҃ꙋ прино́ситсѧ младе́нецъ , и҆́же пре́жде всѣ́хъ , сла́вно бо прᲂсла́висѧ .

кано́нъ , ст҃о́мꙋ . є҆мꙋ́же краегране́сїе си́це : прїимѝ пѣ́нїе сѷмеѡ́не бг҃ᲂпрїѧ́тне . гла́съ , д҃ . пѣ́снь , а҃ . і҆рмо́съ . Ѿве́рзꙋ ᲂу҆ста̀ мᲂѧ̀ , и҆ напо́лнѧтсѧ дх҃а , и҆ сло́во ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ тᲂржествꙋ́ѧ , и҆ вᲂспᲂю̀ ра́дꙋѧсѧ тᲂѧ̀ чꙋдеса̀ .

запѣ́въ : Ст҃ы́и пра́ведныи сѷмеѡ́не , мᲂлѝ бг҃а ѡ҆ на́съ . Въ пра́ведныхъ се́лѣхъ ра́дᲂстнѡ вᲂдвᲂрѧ́ѧсѧ , пра́веднагѡ гдⷭ҇а , сѷмеѡ́не пра́ведныи . и҆́же бжⷭ҇твеннᲂе твᲂѐ твᲂрѧ́щїѧ ѡ҆правда́ти преставле́нїе , мᲂлѝ пребл҃же́нне . Въ зако́нѣ бы́въ сщ҃еннᲂдѣ́йственикъ сщ҃е́нне , є҆го́же зако́нъ прᲂпᲂвѣ́да , млⷣнца ви́дѣлъ є҆сѝ . и҆ є҆стества̀ зако́нᲂмъ бг҃ᲂпрїѧ́тне ᲂу҆́меръ , и҆ къ без̾сме́ртнᲂмꙋ ра́дꙋѧсѧ преста́висѧ живᲂтꙋ̀ . И҆́же рꙋка́ма держа́щаго вселе́ннѣй кᲂнцы̀ , дв҃и́ческима нᲂси́ма рꙋка́ма ви́дѣлъ є҆сѝ . и҆ честны́ма свᲂи́ма прїе́мъ рꙋка́ма , мѡѷсе́ѧ вы́ш̾ши ꙗ҆ви́лсѧ є҆сѝ пребᲂга́те . боⷢ҇ . По́лныи и҆з̾лїѧ́сѧ , превѣ́чныи начина́етсѧ . сло́во ѡ҆дебелѣва́етъ , сᲂдѣ́тель зи́ждетсѧ . не в̾мѣсти́мыи в̾мѣща́етсѧ во́ чревѣ твᲂе́мъ бг҃ᲂбл҃гᲂда́тнаѧ .

пѣ́снь , г҃ . і҆рмо́съ . Оу҆тверже́нїе на тѧ̀ надѣ́ющимсѧ , ᲂу҆твердѝ гдⷭ҇и цр҃кᲂвь свᲂю̀ , ю҆́же стѧжа̀ чⷭ҇тно́ю сѝ кро́вїю . Первᲂрᲂжде́нъ и҆з̾ ѻ҆ц҃а пре́жде вѣ́къ , первᲂрᲂжде́нъ младе́нецъ и҆з̾ дв҃ы нетлѣ́нны . а҆да́мꙋ рꙋ́кꙋ прᲂстира́ѧ ꙗ҆ви́сѧ . Младᲂꙋ́мна бы́вша пре́лестїю первᲂз̾да́ннагѡ , па́ки и҆справлѧ́ѧ бг҃ъ сло́во , младе́нствᲂвавъ ꙗ҆ви́сѧ . Землѝ и҆сча́дїе , па́ки те́кши к̾ не́й , бжⷭ҇тва̀ сᲂѡ҆бра́знᲂе є҆стество̀ сᲂдѣ́тель ꙗ҆́кѡ непрело́жно , младе́нствᲂвавъ ꙗ҆вѝ .

и҆́нъ , і҆рмо́съ . Ꙗ҆́кѡ непло́ды рᲂдѝ , ѿ ꙗ҆зы́къ цр҃кви . и҆ мно́гѡ ѡ҆ ча́дѣхъ и҆знемо́же со́нмище . чꙋ́днᲂмꙋ бг҃ꙋ на́шемꙋ вᲂзᲂпїе́мъ , ст҃ъ є҆сѝ гдⷭ҇и . Вᲂзне́съсѧ дѣѧ́ньми , сщ҃е́нными бг҃ᲂгла́сне . ꙗ҆́кѡ свѣтᲂви́дѣнъ сто́лпъ высо́къ ꙗ҆́вѣ , прест҃о́мꙋ дх҃ꙋ бы́лъ є҆сѝ . тѣ́мже вᲂсхвалѧ́емъ тѧ̀ . И҆́же зако́нꙋ гдⷭ҇а разве́рзшаго лᲂжесна̀ дв҃ча , и҆ млⷣнца плᲂтᲂно́сна , сѷмеѡ́не бы́вша нᲂси́лъ є҆сѝ , да́рꙋющаго всѣ́мъ и҆збавле́нїе . И҆́же рꙋка́ма чл҃ка со́здавъ , рꙋка́ма твᲂи́ма вᲂпло́щьсѧ держи́мь є҆́сть , ѡ҆сщ҃а́ѧ тѧ̀ ꙗ҆́вѣ . и҆ к̾ жи́зни бꙋ́дꙋщей прᲂси́вшасѧ , бл҃же́нне ѿпꙋща́етъ тѧ̀ . боⷢ҇ . Мы́сленаѧ ты̀ клѣща̀ , ᲂу҆́гль нᲂсѧ́щи бжⷭ҇твенныи , и҆́же ѿ твᲂи́хъ крᲂве́й вᲂплᲂще́на па́че ᲂу҆ма̀ , сѷмеѡ́нъ ꙗ҆́кѡ ви́дѣ пренепᲂро́чнаѧ , ра́дꙋѧсѧ ᲂу҆блажа́ше .

кᲂнда́къ , ст҃о́мꙋ . гла́съ , д҃ . Ста́рецъ дне́сь ѿрѣши́тисѧ ѿ ю҆́зъ мᲂлѧ́шесѧ , сегѡ̀ житїѧ̀ тлѣ́ннагѡ . хрⷭ҇та̀ вᲂспрїѧ́тъ на рꙋкꙋ̀ зижди́телѧ и҆ гдⷭ҇а . сѣда́ленъ . гла́съ , д҃ . На гᲂрѣ̀ сѷна́йстѣй дре́вле , ви́дѣвъ мѡѷсе́й за́днѧѧ бж҃їѧ , и҆ то́нко бжⷭ҇твенныи гла́съ , спᲂдо́бисѧ во́ мрацѣ же и҆ ви́хрѣ . ны́нѣ же сѷмеѡ́нъ вᲂплᲂще́нагѡ бг҃а непрело́жнѡ на́съ ра́ди , рꙋка́ма прїѧ́тъ , и҆ ра́дꙋѧсѧ и҆дѧ́ше ѿ сꙋ́щихъ здѣ̀ , к̾ жи́зни приснᲂсꙋ́щнѣй . тѣ́мже вᲂпїѧ́ше , ны́нѣ ѿпꙋща́еши раба̀ свᲂегѡ̀ влⷣко . сла́ва , и҆ ны́нѣ , то́йже .

пѣ́снь , д҃ . і҆рмо́съ . Пᲂкры́ла є҆́сть нб҃са̀ дᲂбрᲂдѣ́тель твᲂѧ̀ хрⷭ҇тѐ , и҆з̾ кїѡ́та бо прᲂше́дъ , ст҃ы́ѧ твᲂеѧ̀ нетлѣ́нныѧ мт҃ре , в̾ цр҃кви сла́вы ти ꙗ҆ви́сѧ , ꙗ҆́кѡ младе́нецъ на рꙋкꙋ̀ нᲂси́мъ . и҆ и҆спо́лнишасѧ всѧ̀ твᲂегѡ̀ хвале́нїѧ . Ра́дꙋйсѧ сѷмеѡ́не неи҆зрече́ннымъ таи́нниче , бцⷣа вᲂпїѧ́ше , є҆го́же ѿ ст҃а́гѡ ѡ҆ дре́вле вᲂз̾вѣсти́тисѧ дх҃а , младе́нствᲂвавша сло́ва хрⷭ҇та̀ на рꙋкꙋ̀ прїимѝ . зᲂвы́и є҆мꙋ̀ , и҆спо́лнишасѧ всѧ̀ твᲂегѡ̀ хвале́нїѧ . На него́ же ᲂу҆пᲂва́лъ є҆сѝ сѷмеѡ́не , во́зрастъ дѣ́тищныи , ра́дꙋѧсѧ пᲂд̾имѝ хрⷭ҇та̀ . і҆и҃лю бжⷭ҇твеннᲂе ᲂу҆тѣше́нїе . зако́нꙋ твᲂрца̀ и҆ влⷣкꙋ , и҆спᲂлнѧ́ющагѡ зако́нꙋ чи́нъ , зᲂвы́и є҆мꙋ̀ , и҆спо́лнишасѧ всѧ̀ твᲂегѡ̀ хвале́нїѧ . Ви́дѣ сѷмеѡ́нъ сло́во без̾нача́льнᲂе , с̾ пло́тїю ꙗ҆́кѡ на прⷭ҇то́лѣ херꙋви́мстѣ дв҃цею нᲂси́мо , вино́внаго бы́тїю всѧ́ческихъ . ꙗ҆́кѡ млⷣнцꙋ дивѧ́сѧ вᲂпїѧ́ше є҆мꙋ̀ , и҆спо́лнишасѧ всѧ̀ твᲂегѡ̀ хвале́нїѧ .

и҆́нъ , і҆рмо́съ . Сѣдѧ́и во сла́вѣ , на прⷭ҇то́лѣ бжⷭ҇твеннѣ , на ѻ҆́блацѣ ле́гцѣ , прїи́де і҆с҃ъ пребжⷭ҇твенныи , ѿ пречⷭ҇тыѧ дв҃ы , спасе́ же вᲂпїю́щїѧ , сла́ва хрⷭ҇тѐ си́лѣ твᲂе́й . Престарѣ́лсѧ є҆сѝ в̾ ста́рᲂсти , вѣ́рᲂю же ѡ҆бнᲂвлѧ́шесѧ , но́ва млⷣнца хᲂтѧ̀ ви́дѣти сѷмеѡ́не пресᲂверше́наго . ѡ҆бнᲂвлѧ́юща ми́ра , ѡ҆бетша́вшаго прило́гᲂмъ ве́тхагѡ бᲂрца̀ . Оу҆блажи́мъ сᲂгла́снѡ , сѷмеѡ́на бл҃же́ннаго , ꙗ҆́кѡ спᲂдо́бльшасѧ ви́дѣти бг҃а бл҃же́ннаго , в̾ пло́ть ѡ҆бо́лкшасѧ . ꙗ҆́кѡ да сᲂтвᲂри́тъ бл҃же́нны , ѻ҆каѧ́нны пре́жде бы́вшїѧ . Закᲂнᲂда́вца свѣ́мъ , и҆ зако́нныхъ є҆стества̀ вᲂпло́щ̾шасѧ крᲂмѣ̀ . зако́нъ же но́въ в̾се́льша , сѷмеѡ́нъ взыва́ше є҆ди́но , гдⷭ҇и ны́нѣ ѿпꙋсти́ мѧ к̾ жи́зни нетлѣ́ннѣй . боⷢ҇ . И҆́же рꙋко́ю всѧ̀ нᲂсѧ́и , на рꙋкꙋ̀ нᲂси́мь при́снѡ дв҃ыѧ . сїю̀ и҆ херꙋви́мъ сᲂдѣ́ла и҆ серафи́мъ вы́ш̾шꙋ , ꙗ҆́кѡ рᲂди́тельницꙋ . ю҆́же пᲂе́мъ , и҆ бл҃гᲂче́стнѡ ᲂу҆блажа́емъ .

пѣ́снь , є҃ . і҆рмо́съ . Ꙗ҆́кѡ ви́дѣ и҆са́їѧ ѻ҆бра́знѡ на прⷭ҇то́лѣ превысо́цѣ бг҃а , ѿ а҆́гг҃лъ сла́вы да́ры прїе́млюща , ѽ ѻ҆каѧ́нныи вᲂпїѧ́ше а҆́зъ , прᲂви́дѣхъ вᲂплᲂща́ема бг҃а , свѣ́та невече́рнѧ , и҆ ми́рᲂмъ ѡ҆блада́юща . Разꙋмѣ́въ бжⷭ҇твенныи ста́рецъ , прᲂѧ́вленꙋю дре́вле прⷪ҇ркꙋ сла́вꙋ , пло́тїю сло́ва зрѧ̀ мт҃рїю держи́ма , ѽ ра́дꙋисѧ вᲂпїѧ́ше чⷭ҇таѧ , ꙗ҆́кѡ прⷭ҇то́лъ бо держи́ши бг҃а , свѣ́та невече́рнѧ , и҆ ми́рᲂмъ ѡ҆блада́юща . Пᲂкло́ньсѧ ста́рецъ , и҆ стᲂпа́мъ бжⷭ҇твенѡ прикᲂснꙋ́сѧ , неи҆скꙋсᲂбра́чныѧ и҆ бж҃їѧ мт҃ре , ѻ҆́гнь речѐ но́сиши чⷭ҇таѧ . млⷣнца бᲂю́сѧ ѡ҆бъѧ́ти бг҃а , свѣ́та невече́рнѧ , и҆ ми́рᲂмъ ѡ҆блада́юща . Ѡ҆чища́етсѧ и҆са́їѧ ѿ серафи́ма ᲂу҆́гль прїе́мъ . ста́рецъ вᲂпїѧ́ше бж҃їи мт҃ри , ты̀ ꙗ҆́кѡ клеща́ми , рꙋка́ма прᲂсвѣща́еши мѧ . пᲂда́вши ми є҆го́же но́сиши свѣ́та невече́рнѧ , и҆ ми́рᲂмъ ѡ҆блада́юща .

и҆́нъ , і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твᲂе́й , ты́ бо бракᲂнеи҆скꙋси́маѧ дв҃це , прїѧ́тъ во ᲂу҆тро́бѣ надᲂвсѣ́ми сꙋ́щагѡ бг҃а , и҆ рᲂдила̀ є҆сѝ без̾лѣ́тнагѡ сн҃а , всѣ́мъ вᲂспѣва́ющимъ тѧ̀ ми́ръ пᲂдава́юща . Оу҆ма̀ чистᲂто́ю , бг҃ᲂви вседержи́телю ꙗ҆́кѡ а҆́гг҃лъ пᲂслꙋжи́въ бл҃же́нне . кро́вными же́ртвами , ѡ҆чи́стилъ є҆сѝ дре́вле лю́ди і҆и҃левы , кро́вь спасе́нꙋю прᲂѡ҆бразꙋ́ѧ ꙗ҆́снѡ . Са́мъ себѐ сᲂтвᲂри́лъ є҆сѝ хра́мъ бг҃ꙋ прест҃ъ . дѣ́лы бжⷭ҇твенными бг҃ᲂгла́се . тѣ́мже ꙗ҆́кѡ млⷣнца во ст҃ѣ́мъ хра́мѣ ви́дѣлъ є҆сѝ бг҃а с̾ пло́тїю , тѧ̀ преставлѧ́юща къ бжⷭ҇твеннымъ селе́нїемъ . Вᲂспᲂе́мъ дне́сь дх҃о́внѡ ликꙋ́юще всѝ , сѷмеѡ́на бг҃ᲂпрїи́мца , и҆ с̾ни́мъ а҆́ннꙋ цѣлᲂмꙋ́дрꙋю , прᲂро́ки сꙋ́ща бж҃їѧ . и҆ сего̀ ви́дѣвшаѧ , на́съ ра́ди младе́нствᲂвавша . боⷢ҇ . Не ѡ҆пали́въ лᲂже́снъ твᲂи́хъ , и҆́же є҆стество́мъ не и҆змѣ́нныи , є҆ди́на херꙋви́мъ ст҃ѣ́йши . чл҃къ ꙗ҆ви́сѧ и҆з̾ тебѐ ражда́емь . и҆ ѿстꙋ́пльшаѧ тлѣ́нїемъ , всѧ̀ сᲂвᲂкꙋпѝ бг҃ᲂмт҃и ржⷭ҇тво́мъ твᲂи́мъ .

пѣ́снь , ѕ҃ . і҆рмо́съ . Вᲂзᲂпѝ к̾ тебѣ̀ ви́дѣвъ ста́рецъ ѻ҆чи́ма спасе́нїе , є҆́же лю́демъ прїи́де ѿ́ бг҃а хрⷭ҇тѐ , ты̀ бг҃ъ мо́й . Сїѡ́нꙋ ты̀ ка́мень вᲂз̾лᲂжи́сѧ , непᲂкᲂри́вымъ претыка́нїе , и҆ сᲂбла́знꙋ ка́мень . нерꙋши́мᲂе вѣ́рнымъ спасе́нїе . И҆звѣ́стно нᲂсѧ̀ начерта́нїе , и҆́же пре́жде вѣ́къ тѧ и҆з̾расти́вшаго . землены́хъ за млрⷭ҇дїе , ны́нѣ не́мᲂщїю ѡ҆блᲂжи́сѧ . Сн҃ꙋ вы́шнѧгѡ , сн҃ꙋ дв҃ыѧ , бг҃ꙋ ѻ҆трᲂча́ти бы́вшемꙋ , пᲂкло́ньшꙋмисѧ , ны́нѣ ѿпꙋстѝ с̾ ми́рᲂмъ .

и҆́нъ , і҆рмо́съ . Вᲂзᲂпи́лъ прᲂѡ҆бразꙋ́ѧ пᲂгребе́нїе тридне́внᲂе , пррⷪ҇къ і҆ѡ́на в̾ ки́тѣ бг҃ꙋ мᲂлѧ́сѧ , ѿ тлѝ спаси́ мѧ , і҆с҃е цр҃ю сы́и си́ламъ . Вᲂзᲂпи́лъ є҆сѝ внегда̀ ви́дѣ гдⷭ҇а , ꙗ҆́кᲂже ѡ҆бѣща́сѧ ны́нѣ раба̀ твᲂегѡ̀ сп҃се ѿпꙋстѝ . и҆́же во а҆́дѣ сꙋ́щимъ всѣ́мъ твᲂѐ бжⷭ҇твеннᲂе вᲂз̾вѣща́юща вᲂплᲂще́нїе . Оу҆краси́сѧ , и҆ мѡѷсе́ѧ свѣтлѣ́йши бы́лъ є҆сѝ , на рꙋкꙋ̀ кра́снаго прїе́мъ , сѷмеѡ́не ста́рче , на́съ ра́ди по на́съ младе́нца бы́вша . Вᲂда́ми тѧ и҆спо́лнена бжⷭ҇твенными сꙋ́щи , и҆ ко а҆́дᲂвнымъ врато́мъ с̾ше́дша , ви́дѣвше и҆́же та́мѡ свѧ́занїи сѷмеѡ́не , бжⷭ҇твенныѧ рᲂсы̀ и҆спо́лнишасѧ . боⷢ҇ . Оу҆лᲂви́ти мѧ всегда̀ и҆́щетъ прелꙋка́выи . но тᲂго́ мѧ сѣ́тей и҆схитѝ влⷣчце , и҆ бжⷭ҇твеннымъ кро́вᲂмъ крилꙋ̀ твᲂе́ю цѣ́ла сᲂблюдѝ .

кᲂнда́к̾ , пра́здникꙋ . гла́съ , а҃ . И҆́же ᲂу҆тро́бꙋ дв҃чꙋ ѡ҆ст҃и́въ ржⷭ҇тво́мъ сѝ , и҆ рꙋ́цѣ сѷмеѡ́ни бл҃гᲂслᲂви́въ , ꙗ҆́кᲂже пᲂдᲂба́ше пред̾вари́въ . и҆ ны́нѣ спа́слъ є҆сѝ на́съ хрⷭ҇тѐ бж҃е . но ᲂу҆мирѝ во бранѣ́хъ житїѐ на́ше , и҆ ᲂу҆крѣпѝ люде́й , и҆́хже вᲂз̾люби́лъ є҆сѝ , є҆ди́не чл҃кᲂлю́бче . и҆́кᲂсъ . Къ бцⷣѣ притеце́мъ вѣ́рнїи , хᲂтѧ́щїи сн҃а є҆ѧ̀ ви́дѣти , к̾ сѷмеѡ́нꙋ и҆дꙋ́ща . є҆го́же с̾ нб҃сѐ беспло́тнїи ви́дѧще , дивлѧ́хꙋсѧ гл҃юще , чꙋ́днаѧ зри́мъ ны́нѣ и҆ пресла́внаѧ , непᲂстижи́маѧ и҆ несказа́ннаѧ . и҆́же бо а҆да́ма сᲂзда́выи , нᲂси́мь є҆́сть ꙗ҆́кѡ млⷣнцъ . невмѣсти́мыи вмѣща́етсѧ на рꙋкꙋ̀ сѷмеѡ́ню , и҆́же в̾ нѣ́дрѣхъ неѡ҆пи́санныи сы́и ѻ҆ц҃а свᲂегѡ̀ , во́лею ѡ҆писꙋ́етсѧ пло́тїю а҆ не бжⷭ҇тво́мъ , є҆ди́нъ чл҃кᲂлю́бецъ .

пѣ́снь , з҃ . і҆рмо́съ . Тебѐ в̾ пещѝ ѡ҆рᲂси́вшагѡ дѣ́ти бл҃гᲂслᲂви́ша , и҆ въ дв҃ꙋ нетлѣ́ннѡ все́ль шасѧ , бг҃а сло́ва пᲂе́мъ бл҃гᲂче́стнѡ хва́лѧще , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . А҆да́мꙋ пᲂказꙋ́ѧ и҆дꙋ̀ , во а҆́дѣ живꙋ́щꙋ , и҆ є҆́ввѣ принᲂсѧ̀ бл҃гᲂвѣ́стїе , сѷмеѡ́нъ вᲂпїѧ́ше , с̾ прⷪ҇рки ликꙋ́ѧ , бл҃гᲂслᲂве́нъ бг҃ъ ѻ҆ц҃ъ на́шихъ . Ро́да земле́мна и҆збавлѧ́ѧ бг҃ъ , да́же до а҆́да прїи́детъ . плѣ́ннымъ же пᲂда́стъ всѣ́мъ ѡ҆ставле́нїе , и҆ прᲂзрѣ́нїе слѣпы́мъ . ꙗ҆́кѡ и҆ нѣмы́мъ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . И҆ твᲂѐ срⷣце нетлѣ́ннаѧ ѻ҆рꙋ́жїе про́йдетъ , сѷмеѡ́нъ бцⷣѣ прᲂвᲂз̾гласѝ , на крⷭ҇тѣ̀ взира́ющи свᲂегѡ̀ сн҃а . є҆мꙋ́же вᲂпїе́мъ , блгⷭ҇ве́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . Непᲂслꙋжи́ша тва́ри бг҃ᲂмꙋ́дрїи па́че зижди́телѧ , но ѻ҆́гненнᲂе преще́нїе , мꙋ́жески пᲂпра́вше ра́дᲂвахꙋсѧ пᲂю́ще , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ бл҃гᲂслᲂве́нъ є҆сѝ . Зако́ннѡ гдⷭ҇ви вседержи́телю , ты̀ пᲂслꙋжи́лъ є҆сѝ . пра́веденъ ꙗ҆́кѡ вᲂи́стинꙋ , и҆ в̾ зако́нѣ непᲂро́ченъ бл҃же́нне бы́въ . тѣ́мже пᲂѧ́ше , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Ра́дᲂсть печа́льнымъ прїи́де , и҆збавле́нїе і҆и҃лю вᲂи́стинꙋ , ꙗ҆ви́сѧ ꙗ҆́кѡ младе́нецъ в̾ цр҃кви свᲂе́й . ѿпꙋща́ѧ мѧ к̾ жи́зни бꙋ́дꙋщей , сѷмеѡ́нъ вᲂпїѧ́ше ра́дꙋѧсѧ . За млрⷭ҇дїе щедро́тъ твᲂи́хъ , прїѡ҆брѣте́на мѧ̀ зако́нᲂмъ писа́нїѧ , прегᲂр̾бле́на мѧ̀ ста́рᲂстїю , ѿпꙋстѝ сп҃се раба̀ твᲂегѡ̀ . ꙗ҆́кѡ ви́дѣхъ тѧ̀ , сѷмеѡ́нъ взыва́ше , на землѝ нᲂсѧ́ща пло́ть . боⷢ҇ . Не и҆стᲂщи́въ по́лныи , пречⷭ҇тыхъ нѣ́дръ прᲂзѧ́бшаго ѻ҆ц҃а , в̾ твᲂи́хъ нѣ́дрѣхъ чⷭ҇таѧ , ꙗ҆́кѡ млⷣнецъ сѣди́тъ , ᲂу҆гᲂто́ваѧ и҆́мже вᲂсхᲂтѣ̀ ᲂу҆пᲂдо́битисѧ пречⷭ҇таѧ , сщ҃е́нно ꙗ҆́вѣ сѣда́лище .

пѣ́снь , и҃ . і҆рмо́съ . Въ непᲂстᲂѧ́ннѣмъ ѻ҆гнѝ сᲂвᲂкꙋ́пльшесѧ , и҆́же бл҃гᲂче́стїѧ пред̾стᲂѧ́ще ю҆́нᲂши , пла́менѣмъ же неврежде́ни , бжⷭ҇твеннꙋю пѣ́снь пᲂѧ́хꙋ , блгⷭ҇ви́те всѧ́каѧ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Лю́дїе і҆и҃леви , ва́шꙋ сла́вꙋ є҆м̾манꙋ́ила зрѧ́ще , ѻ҆трᲂча̀ и҆з̾ дв҃ы , пред̾ лице́мъ бжⷭ҇твеннагѡ кᲂвче́га нн҃ѣ ликꙋ́йте , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Сѐ сѷмеѡ́нъ вᲂпїѧ́ше , пререка́емᲂе зна́менїе се́й бꙋ́детъ , бг҃ъ сы́и и҆ ѻ҆трᲂча̀ . семꙋ̀ вѣ́рнїи вᲂзᲂпїе́мъ , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Живо́тъ сы́и се́й бꙋ́детъ , паде́нїе невѣ́рнымъ , младе́нствᲂвавъ бг҃ъ сло́во . ꙗ҆́кѡ вᲂста́нїе всѣ́мъ вѣ́рнѡ зᲂвꙋ́щимъ , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки .

и҆́нъ , і҆рмо́съ . Ѻ҆́трᲂки бл҃гᲂчести́выѧ в̾ пещѝ , ржⷭ҇тво̀ бг҃ᲂро́диче спасло̀ є҆́сть . тᲂгда̀ ᲂу҆́бѡ ѡ҆бразꙋ́емо , ны́нѣ же дѣ́йствꙋемо , вселе́ннꙋю всю̀ вᲂз̾дви́же пѣ́ти , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . Ѻ҆вдᲂвѣ́вша ми́ра бжⷭ҇твенныѧ сла́вы , прише́дша ꙗ҆́кѡ невѣ́стꙋ ᲂу҆краси́ти пребжⷭ҇твеннагѡ , вдᲂви́ца сꙋ́щаѧ а҆́нна всехва́льнаѧ , и҆ прᲂро́чества бл҃гᲂда́тїю блиста́ющи , прᲂсла́ви тᲂгѡ̀ . и҆ хᲂтѧ́щаѧ бы́ти всѣ́мъ пред̾стᲂѧ́щимъ , сказа́ше бжⷭ҇твеннᲂе и҆збавле́нїе . Кро́вныѧ же́ртвы принᲂша́ше , а҆́гньца и҆́же за млрⷭ҇дїе несказа́нно , кро́вь спасе́нꙋю бл҃же́нне сщ҃е́нно прᲂвᲂз̾вѣща́ѧ и҆здале́ча . є҆го́же вᲂплᲂще́на ᲂу҆держа́въ сѷмеѡ́не , прᲂсла́вилсѧ є҆сѝ па́че мѡѷсе́ѧ и҆ всѣ́хъ прⷪ҇ро́къ . Ви́дѣвъ жела́емаго , разрѣше́нїе прїѧ́лъ є҆сѝ тѣле́снᲂе бг҃ᲂдᲂхнᲂве́нне . и҆ ꙗ҆́кᲂже зрѣла̀ пшени́ца , преше́лъ є҆сѝ ко ѻ҆ц҃е́мъ сла́вне , вᲂспита́всѧ в̾ ста́рᲂсти до́брѣ . тѣ́мже твᲂю̀ всепра́з̾днественꙋю па́мѧть , ра́дᲂстїю дш҃е́внᲂю сᲂверша́емъ . боⷢ҇ . Ꙗ҆́кѡ кри́нъ бл҃гᲂꙋха́ненъ , ꙗ҆́кѡ шипо́къ , ꙗ҆́кѡ бжⷭ҇твенѡ ᲂу҆ха́нїе ѡ҆брѣ́тъ тѧ̀ сло́во пребжⷭ҇твеннᲂе , пречⷭ҇таѧ бг҃ᲂневѣ́сто , и҆ в̾ твᲂю̀ ᲂу҆тро́бꙋ всели́сѧ , бл҃гᲂꙋха́ѧ на́ше є҆стество̀ смра́да и҆спо́лньшеесѧ є҆́же ѿ грѣ́хъ , мр҃і́е бцⷣе .

катава́сїѧ : Хва́лимъ бл҃гᲂслᲂви́мъ . Въ непᲂстᲂѧ́ннѣмъ ѻ҆гнѝ [пᲂкло́н̾] .

пѣ́снь , ѳ҃ . і҆рмо́съ . Въ зако́ннѣмъ сѣннᲂписа́ нїи , ѻ҆́бразъ ви́димъ вѣ́рнїи , всѧ́ко бо ѻ҆трᲂча̀ лᲂжесна̀ разверза́ѧ ст҃о бг҃ᲂви , тѣ́мъ первᲂро жде́ннᲂе сло́во , ѿ ѻ҆ц҃а без̾нача́льна сн҃а , первᲂрᲂжде́на и҆з̾ мт҃ре неи҆скꙋ́сныѧ бра́кꙋ вели ча́емъ . И҆́же дре́внимъ нᲂвᲂрᲂжде́ннᲂю го́рличищꙋ сꙋпрꙋ́гꙋ , верстꙋ́ же птенцꙋ̀ , и҆́миже бжⷭ҇твенныи ста́рецъ , и҆ цѣлᲂмꙋ́дренаѧ а҆́нна прⷪ҇рчица , и҆́же ѿ дв҃ы рᲂжде́ннᲂмꙋ , и҆ сн҃ꙋ є҆динᲂра́сленᲂмꙋ ѻ҆ц҃ꙋ , в̾ цр҃кᲂвь принᲂси́мꙋ слꙋ́ жатъ велича́юще . Во́здалъ ми є҆сѝ вᲂпїѧ́ше сѷмеѡ́н̾ , спасе́нїѧ си хрⷭ҇тѐ ра́дᲂванїе , вᲂспрїимѝ свᲂегѡ̀ слꙋжи́телѧ , сѣ́немъ претрꙋжде́наго . но́вей бл҃гᲂда́ти сщ҃еннᲂпрᲂпᲂвѣ́дника и҆ таи́н ника , во хвале́нїи велича́емъ . Сщ҃еннᲂлѣ́пнѡ и҆спᲂвѣ́дашесѧ а҆́нна прᲂрица́ющи , цѣлᲂмꙋ́дре наѧ и҆ прпⷣбнаѧ и҆ ста́рица влⷣцѣ , в̾ цр҃кви ꙗ҆́в̾ственѡ . бцⷣꙋ же прᲂпᲂвѣ́дающи , всѣ́мъ сꙋ́щимъ велича́ше .

и҆́нъ , і҆рмо́съ . Є҆́вва ᲂу҆́бѡ недꙋ́гᲂмъ ѡ҆слꙋша́нїѧ , клѧ́твꙋ всели́ла є҆́сть . ты́ же дв҃о бцⷣе прᲂзѧбе́нїемъ прижи́тїѧ твᲂегѡ̀ , ми́рᲂви бл҃гᲂслᲂве́нїе прᲂцвѣла̀ є҆сѝ . тѣ́мъ тѧ̀ всѝ велича́емъ . Че́стнѣ рꙋ́цѣ твᲂѝ вᲂи́стинꙋ , прикᲂснꙋ́вшїисѧ бг҃ᲂпрїѧ́тнѣ , бжⷭ҇твеннымъ ᲂу҆дᲂво́мъ , прикаса́ющагᲂсѧ гᲂра́мъ , ꙗ҆́кᲂже пᲂе́тъ дв҃дъ , и҆ вᲂз̾ды́мѧтсѧ . бл҃же́нъ вᲂи́стинꙋ ты̀ бы́сть . тѣ́мже дᲂсто́йнѡ вᲂсхвалѧ́емъ тѧ̀ . Ра́ка твᲂѧ̀ и҆стᲂча́етъ вѣ́рнымъ и҆сцѣле́нїѧ . па́мѧть же бл҃же́нне сїѧ́ющи па́че сл҃нца , и҆ всѣ́мъ дш҃а прᲂсвѣща́ющи , и҆ мра́ка мы́сленаго вᲂсхища́ющи , сщ҃еннᲂтаи́нниче всече́стне . Прᲂсвѣща́етъ сїѧ́нїемъ мы́сленымъ , ꙗ҆́кѡ сл҃нце и҆ лꙋна̀ пᲂд̾сл҃нчнꙋю , а҆́нна цѣлᲂмꙋ́дренаѧ и҆ прᲂро́чица , ста́рецъ же сѷмеѡ́нъ сла́вныи . и҆́хже ра́ди на́съ чл҃кᲂлю́бче гдⷭ҇и , грѣхо́вныѧ тмы̀ и҆зба́ви . боⷢ҇ . Ꙗ҆́вльшисѧ тебѣ̀ мт҃ри бг҃ꙋ , ꙗ҆́кѡ ви́дѣ бцⷣе ста́рецъ , речѐ ꙗ҆́кᲂже прⷪ҇ркъ , сѐ тво́й сн҃ъ , на вᲂста́нїе и҆ паде́нїе мно́гимъ лежи́тъ влⷣчце , и҆ в̾ зна́менїе неꙋдо́бь сказа́емо .

свѣти́ленъ , пра́здникꙋ . Дх҃ᲂмъ во ст҃и́лищи пред̾ста́въ ста́рецъ , на рꙋкꙋ̀ вᲂспрїѧ́тъ зако́нꙋ влⷣкꙋ , вᲂпїѧ̀ ны́нѣ сᲂꙋ́зъ мѧ плᲂтьски́хъ разрѣшѝ , ꙗ҆́кᲂже ре́клъ є҆сѝ с̾ ми́рᲂмъ . ви́дѣхъ бо ѻ҆чи́ма ѿкрᲂве́нїе ꙗ҆зы́кѡмъ , и҆ і҆и҃лю спасе́нїе . сла́ва , и҆ ны́нѣ , то́йже .

На стихо́внѣ , стихѣ́ры . гла́съ , ѕ҃ . поⷣ . в̾ =тре́тїи де́нь . В=ᲂспрїимѝ речѐ сѷмеѡ́не ,꙳ зижди́телѧ всѧ́ческимъ рꙋка́ма .꙳ ѽ ста́рче пᲂд̾и҆мѝ хрⷭ҇та̀ ,꙳ є҆го́же дв҃аѧ ѻ҆трᲂкᲂви́ца ꙳ рᲂдѝ без̾сѣ́мене ,꙳ на ра́дᲂсть ро́дꙋ на́шемꙋ .

сти́хъ : ны́нѣ ѿпꙋща́еши раба̀ свᲂегѡ̀ влⷣко ,꙳ по гл҃ꙋ твᲂемꙋ̀ с̾ ми́рᲂмъ . Зако́нꙋ твᲂрца̀ и҆ бг҃а ,꙳ є҆го́же трепе́щꙋтъ а҆́гг҃льскаѧ мно́жества ,꙳ сᲂше́дшесѧ вᲂспᲂе́мъ лю́дїе .꙳ є҆ди́наго бл҃гᲂда́телѧ ,꙳ и҆ зако́нꙋ закᲂнᲂпᲂлᲂжи́телѧ ,꙳ спасе́нїѧ дш҃а́мъ на́шимъ .

сти́хъ : свѣ́тъ во ѿкрᲂве́нїе ꙗ҆зы́кѡмъ ,꙳ и҆ сла́вꙋ люді́й твᲂи́хъ і҆и҃лѧ . Ны́нѣ ѿпꙋща́еши влⷣко раба̀ твᲂегѡ̀ ,꙳ ꙗ҆́кᲂже ре́клъ є҆сѝ с̾ ми́рᲂмъ .꙳ ꙗ҆́кѡ ви́дѣхъ тѧ̀ хрⷭ҇тѐ ,꙳ свѣ́та первᲂвѣ́чнаго ,꙳ сᲂꙋ́зъ мѧ плᲂтьски́хъ ,꙳ во ѿкрᲂве́нїе ꙗ҆зы́кѡмъ и҆ і҆и҃лю . сла́ва , и҆ ны́нѣ . гла́съ , в҃ . Є҆мꙋ́же вы́шнїи слꙋжи́телїе мо́лѧтсѧ , до́лꙋ ны́нѣ сѷмеѡ́нъ ве́щныма рꙋка́ма прїе́мъ , бжⷭ҇твеннᲂе чл҃кѡмъ сᲂедини́тисѧ прᲂпᲂвѣ́да . и҆ челᲂвѣ́ка нбⷭ҇на бг҃а ви́дѧи , ѿлꙋча́ѧсѧ сꙋ́щихъ на землѝ , ра́дᲂстнѡ взыва́ше , и҆́же во тмѣ̀ сꙋ́щимъ , невече́рнїи свѣ́тъ ѿкрыва́ѧ , гдⷭ҇и сла́ва тебѣ̀ .

На литꙋргі́и , бл҃же́нна , пра́здникꙋ , пѣ́снь , а҃ ѧ . и҆ ст҃о́мꙋ , пѣ́снь , ѕ҃ ѧ . прᲂки́менъ , ѱл҃о́мъ дв҃дᲂвъ . вᲂз̾весели́тсѧ пра́ведникъ ѡ҆́ гдⷭ҇ѣ , и҆ ᲂу҆пᲂва́етъ на́нь . сти́хъ . ᲂу҆слы́ши бж҃е мᲂли́твꙋ мᲂю̀ , внегда̀ мᲂли́тимисѧ къ тебѣ̀ . а҆пⷭ҇лъ , къ є҆вре́ѡмъ . заⷱ҇ , тк҃а , ѿ пᲂлꙋ̀ .= а҆ллилꙋ́їѧ . свѣ́тъ вᲂсїѧ̀ пра́ведникꙋ , и҆ пра́вымъ срⷣцемъ весе́лїе . =є҆ѵⷢ҇а́лїе , ѿ =лꙋкѝ . заⷱ҇ , и҃ . =прича́стен̾ . въ па́мѧть вѣ́чнꙋю бꙋ́детъ пра́ведникъ .

<< Previous

Contents

Next >>