4 февраля: прп. Исидора Пилусийского

МЦⷭ҇А ТОГО́ЖЕ ВЪ Д҃ ДН҃Ь

Прпⷣбнагѡ ѻ҆ц҃а на́шегѡ и҆си́дᲂра пилꙋсі́йскагѡ . =Ст҃а́гѡ бл҃гᲂвѣ́рнагѡ вели́кагѡ кн҃зѧ геѡ́ргїѧ . Прпⷣбнагѡ ѻ҆ц҃а на́шегѡ кѷри́ла нᲂвᲂезе́рскагѡ чꙋдᲂтво́рца . слꙋ́жбы и҆́мъ пи́саны по се́й слꙋ́жбѣ . А҆́ще нѣ́сть пᲂста̀ , быва́етъ слꙋ́жба пра́здникꙋ , и҆ ст҃о́мꙋ и҆си́дᲂрꙋ . а҆́ще ли є҆́сть по́стъ , то́чїю ст҃о́мꙋ . Ве́черъ , на гдⷭ҇и вᲂзва́хъ , стихѣ́ры , пра́здникꙋ , г҃ . и҆ ст҃о́мꙋ , г҃ . стихѣ́ры , пра́здникꙋ . гла́съ , д҃ . поⷣ . да́лъ є҆сѝ зна́менїе . З=ако́нъ и҆́же в̾ писа́нїи ꙳ и҆спᲂлнѧ́ѧ чл҃кᲂлю́бецъ ,꙳ в̾ цр҃кᲂвь ны́нѣ прино́ситсѧ .꙳ и҆ сего̀ прїе́млетъ ста́рыма рꙋка́ма сѷмеѡ́нъ ста́рецъ .꙳ ны́нѣ ѿпꙋща́еши мѧ вᲂпїѧ̀ ,꙳ ко ѻ҆́нᲂмꙋ бл҃же́нствꙋ .꙳ ви́дѣхъ бо тѧ̀ дне́сь пло́тїю ме́ртвенᲂю ѡ҆блᲂже́на ,꙳ живᲂто́мъ ѡ҆блада́юща ,꙳ и҆ сме́ртїю влады́чествꙋюща . Свѣ́тъ во ѿкрᲂве́нїе ꙗ҆зы́кѡмъ ,꙳ ꙗ҆ви́лсѧ є҆сѝ гдⷭ҇и .꙳ на ѻ҆́блацѣ сѣдѧ̀ ле́гцѣ ,꙳ сл҃нце пра́веднᲂе ,꙳ зако́нꙋ сѣно́внᲂе и҆спᲂлнѧ́ѧ .꙳ и҆ зача́ло ꙗ҆влѧ́ѧ но́выѧ бл҃гᲂда́ти .꙳ тѣ́мъ тѧ ви́дѣвъ сѷмеѡ́нъ взыва́ше ,꙳ и҆з̾ и҆стлѣ́нїѧ мѧ̀ разрѣшѝ ,꙳ ꙗ҆́кѡ ви́дѣхъ тѧ̀ дне́сь . Нѣ́дръ рᲂди́телѧ не ѿлꙋ́чьсѧ бжⷭ҇тво́мъ ,꙳ вᲂпло́щьсѧ ꙗ҆́кᲂже и҆з̾во́лилъ є҆сѝ .꙳ рꙋка́ма нᲂси́мь при́снѡ дв҃ыѧ ,꙳ на рꙋкꙋ̀ пᲂдае́тсѧ бг҃ᲂпрїи́мца сѷмеѡ́на ,꙳ и҆́же рꙋко́ю свᲂе́ю держа́и всѧ́ческаѧ .꙳ тѣ́мже ны́нѣ ѿпꙋща́еши мѧ ,꙳ ра́дᲂстнѡ взыва́ше ,꙳ с̾ ми́рᲂмъ раба̀ твᲂегѡ̀ , ꙗ҆́кѡ ви́дѣхъ тѧ влⷣко .

и҆́ны , стихѣ́ры , ст҃о́мꙋ . гла́съ , то́йже . поⷣ . ꙗ҆́кѡ до́блѧ .= Видѣ́нїи и҆ дѣѧ́ньми ꙳ къ бг҃ꙋ вᲂз̾выша́ѧсѧ ,꙳ житїе́мъ премꙋ́дре сᲂверши́лъ є҆сѝ .꙳ видѣ́нїи вᲂсхᲂжде́ньми дѣѧ́нїе вᲂдрꙋзи́въ ,꙳ и҆ мꙋ́дрѣ жела́нїемъ ꙳ вᲂз̾люби́въ кᲂнчи́нꙋ .꙳ є҆го́же вᲂз̾люби́въ жела́нїѧ ,꙳ ᲂу҆дᲂсти́глъ є҆сѝ блаже́нства сᲂверше́нїе ,꙳ и҆ трисл҃нчнᲂе сїѧ́нїе . Навᲂдне́нїемъ бл҃гᲂда́ти и҆ ѡ҆дᲂжде́ньми слᲂве́съ твᲂи́хъ ,꙳ напᲂѧ́еши всѧ̀ бг҃ᲂмꙋ́дрыѧ .꙳ к̾ вы́шнѣй мꙋ́дрᲂсти ча́ши ᲂу҆ста̀ свᲂѧ̀ пᲂло́жь ,꙳ ꙗ҆́кѡ ѿ и҆сто́чника бᲂга́тнѡ пᲂче́рплъ є҆сѝ .꙳ и҆ по́далъ є҆сѝ всю́дꙋ ꙳ зарю̀ ᲂу҆че́нїемъ .꙳ и҆ сверша́ѧ и҆ ᲂу҆ча̀ ,꙳ и҆ наказꙋ́ѧ дᲂстᲂчꙋ́дне . Вᲂз̾держа́нїемъ мꙋдрᲂва́нїе ,꙳ плᲂтьско́е ᲂу҆мертви́лъ є҆сѝ ,꙳ въ живᲂно́снꙋю ме́ртвᲂсть ѡ҆бо́лксѧ .꙳ и҆ дш҃е́внᲂе ᲂу҆стрᲂе́нїе ,꙳ раз̾шири́въ прпⷣбне ꙗ҆́вѣ ,꙳ в̾мѣ́стнѡ дарᲂва́нїемъ дх҃а сᲂверши́лъ є҆сѝ .꙳ и҆ прїѧ́телище бы́сть ꙳ бг҃ᲂдᲂхнᲂве́ннымъ ᲂу҆че́нїемъ ,꙳ и҆ премꙋ́дрᲂсти ,꙳ и҆́же па́че ᲂу҆ма̀ сᲂсꙋ́дъ . =сла́ва , и҆ ны́нѣ . гла́съ , в҃ . Дне́сь сѷмеѡ́нъ на рꙋкꙋ̀ гдⷭ҇а сла́вы пᲂд̾е́млетъ , є҆го́же пᲂд̾ мра́кᲂмъ , пе́рвѣе мѡѷсе́й ви́дѣ в̾ гᲂрѣ̀ сина́йстѣй , скрижа́ли даю́ща є҆мꙋ̀ . се́й є҆́сть и҆́же в̾ прᲂро́цѣхъ глаго́лѧи , и҆ зако́нꙋ твᲂре́цъ . се́й є҆́сть є҆го́же дв҃дъ вᲂз̾вѣща́етъ , и҆́же всѣ́мъ стра́шныи и҆мѣ́ѧи ве́лїю и҆ бᲂга́тꙋю млⷭ҇ть . А҆́ще є҆́сть по́стъ , сла́ва , и҆ ны́нѣ , боⷢ҇ . а҆́ще ли среда̀ и҆ пѧто́къ , крⷭ҇тᲂбоⷢ҇ . пи́саны сего̀ мцⷭ҇а , въ в҃і дн҃ь .

На стихо́внѣ , стихѣ́ры . гла́съ , в҃ . поⷣ . до́ме є҆в̾фра́фᲂвъ . Прїимѝ ѽ сѷмеѡ́не ,꙳ гдⷭ҇а сла́вы .꙳ ꙗ҆́кᲂже вᲂз̾вѣсти́тисѧ ꙳ ѿ́ дх҃а ст҃а ,꙳ се́бо прише́лъ є҆́сть .

сти́хъ : ны́нѣ ѿпꙋща́еши раба̀ свᲂегѡ̀ влⷣко ,꙳ по гл҃ꙋ твᲂемꙋ̀ с̾ ми́рᲂмъ . Нᲂсѧ́щи чⷭ҇таѧ ,꙳ и҆ ст҃а́ѧ дв҃ца ,꙳ сᲂдѣ́телѧ и҆ влⷣкꙋ ,꙳ ꙗ҆́кѡ млⷣнца на рꙋкꙋ̀ ,꙳ в̾ цр҃квь в̾хо́дитъ .

сти́хъ : свѣ́тъ во ѿкрᲂве́нїе ꙗ҆зы́кѡмъ ,꙳ и҆ сла́вꙋ люді́й твᲂи́хъ і҆и҃лѧ . Ве́лїе и҆ стра́шно ꙳ та́инство и҆ стра́нно .꙳ и҆́же всѧ̀ сᲂдержа́и ,꙳ и҆ млⷣнца сᲂзида́ѧи ,꙳ ꙗ҆́кѡ млⷣнцъ на рꙋкꙋ̀ но́ситсѧ .

сла́ва , и҆ ны́нѣ . гла́съ , то́йже . Сщ҃е́ннаго сщ҃е́ннаѧ дв҃ца , принесѐ во ст҃и́лище ст҃лю . прᲂсте́ръ же рꙋ́цѣ сѷмеѡ́нъ , прїѧ́тъ сего̀ ра́дꙋѧсѧ . и҆ вᲂзᲂпѝ , ны́нѣ ѿпꙋща́еши раба̀ твᲂегѡ̀ влⷣко , по гл҃ꙋ твᲂемꙋ̀ с̾ ми́рᲂмъ гдⷭ҇и .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . гла́съ , и҃ . Ѡ҆ тебѣ̀ ѻ҆́ч҃е и҆си́дᲂре , и҆з̾вѣ́стенъ бы́сть спасе́нїѧ ѻ҆́бразъ . вᲂспрїи́мъ бо крⷭ҇тъ , пᲂслѣ́дᲂвалъ є҆сѝ хрⷭ҇тꙋ̀ , твᲂрѧ́ше же и҆ ᲂу҆ча́ше є҆́же презрѣ́ти пло́ть , прехо́дитъ бо , прилѣжа́ти же ѡ҆ дш҃и ве́щи без̾сме́ртнѣй . тѣ́мже и҆ со а҆́гг҃лы ра́дꙋетсѧ прпⷣбне дх҃ъ тво́й . сла́ва , и҆ ны́нѣ . трᲂпа́рь , пра́здникꙋ . гла́съ , а҃ . Ра́дꙋйсѧ ѡ҆бра́дᲂваннаѧ бцⷣе дв҃о , и҆з̾ тебе́ бо вᲂсїѧ̀ сл҃нце пра́веднᲂе хрⷭ҇то́съ бг҃ъ на́шъ , прᲂсвѣща́ѧ и҆́же во тмѣ̀ сꙋ́щихъ . весели́сѧ и҆ ты̀ ста́рче пра́ведныи , прїе́мыи на́ рꙋкꙋ свᲂбᲂди́телѧ дш҃а́мъ на́шимъ , да́рꙋющагѡ на́мъ вᲂскрⷭ҇нїе .

На ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , двⷤа . сла́ва , ст҃о́мꙋ . и҆ ны́нѣ , пра́здникꙋ . =По а҃ , стихᲂло́гїи , сѣда́ленъ . гла́съ , а҃ . И҆́же сы́и со ѻ҆ц҃е́мъ на прⷭ҇то́лѣ ст҃ѣ́мъ , прише́дъ на́ землю , ѿ дв҃ы рᲂди́сѧ . и҆ млⷣнцъ бы́сть времен̾мѝ сы́и неѡ҆пи́санъ . є҆го́же прїе́мъ сѷмеѡ́нъ на рꙋкꙋ̀ , ра́дꙋѧсѧ гл҃аше , ны́нѣ ѿпꙋща́еши ще́дре , въ весе́лїи раба̀ твᲂегѡ̀ . =сла́ва , и҆ ны́нѣ , то́йже .

По в҃ , стихᲂло́гїи , сѣда́ленъ . гла́съ , д҃ . Пло́тїю младе́нствᲂвавша , ѿ неи҆скꙋсᲂмꙋ́жныѧ мт҃ре , рꙋка́ма ста́рыми твᲂи́ма ѡ҆бъѧ́лъ є҆сѝ сѷмеѡ́не , хрⷭ҇та̀ бг҃а на́шегѡ . прїѧ́лъ є҆сѝ и҆схо́да ѿвѣ́тъ сла́вно . ᲂу҆лꙋчи́лъ є҆сѝ чꙋдесе́мъ непреста́ннꙋ бл҃гᲂда́ть . тѣ́мъ тѧ̀ дᲂстᲂдо́лжно всѝ сла́вимъ . сла́ва , и҆ ны́нѣ , то́йже .

Кано́нъ , пра́здникꙋ , на и҃ . и҆ ст҃о́мꙋ , на д҃ . кано́нъ , пра́здникꙋ . гла́съ , г҃ . твᲂре́нїе кᲂзмы̀ мᲂна́ха . пѣ́снь , а҃ . і҆рмо́съ . Сꙋ́шꙋ глꙋбᲂрᲂди́ тельнꙋю зе́млю , сл҃нце наше́ствᲂва и҆нᲂгда̀ . ꙗ҆́кѡ стѣна́ бо ѡ҆гꙋстѣ̀ ѻ҆́ба по́лы вᲂда̀ , лю́демъ пѣ́шимъ глꙋбинꙋ̀ прᲂхᲂдѧ́щимъ , и҆ бг҃ᲂꙋго́днѡ пᲂю́щимъ , пᲂе́мъ гдⷭ҇ви , сла́вно бо прᲂсла́висѧ .

запѣ́въ : Сла́ва гдⷭ҇и срѣ́тенїю твᲂемꙋ̀ . Да ка́плютъ во́дꙋ ѻ҆́блацы , сл҃нце бо на ѻ҆́блацѣ ле́гцѣ нᲂси́мо наста́ло є҆́сть , на нетлѣ́ннꙋю рꙋкꙋ̀ , хрⷭ҇то́съ в̾ цр҃кви ꙗ҆́кѡ младе́нецъ . тѣ́мже вѣ́рнїи вᲂзᲂпїе́мъ , пᲂе́мъ гдⷭ҇ви , сла́вно бо прᲂсла́висѧ . Крѣпи́тѣсѧ рꙋ́цѣ сѷмеѡ́ни , ста́ро стїю ѡ҆сла́бленїи . лы́ста же претрꙋжде́на ста́рча пра́вѡ быстро̀ движи́тасѧ , хрⷭ҇тꙋ̀ на срѣ́тенїе , ли́къ с̾ беспло́тными сᲂста́вите , пᲂе́мъ гдⷭ҇ви , сла́вно бо прᲂсла́висѧ . Ра́зꙋмᲂмъ прᲂсте́ртаѧ нб҃са̀ весели́тесѧ , ра́дꙋйжесѧ землѐ . и҆з̾ пребжⷭ҇твенныхъ бо нѣ́дръ хитре́цъ прᲂше́дъ хрⷭ҇то́съ , мт҃рїю дв҃ᲂю бг҃ᲂви ѻ҆ц҃ꙋ прино́ситсѧ младе́нецъ , и҆́же пре́жде всѣ́хъ , сла́вно бо прᲂсла́висѧ .

кано́нъ , ст҃о́мꙋ . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль , по бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше .

запѣ́в̾ : Прпⷣбне ѻ҆́ч҃е и҆си́дᲂре , мᲂлѝ бг҃а ѡ҆ на́съ .= Сᲂкрꙋше́нагѡ срⷣца стᲂна́нїе ᲂу҆слы́шавъ влⷣко , лю́тᲂе мѝ сᲂкрꙋше́нїе дш҃и и҆сцѣлѝ , мл҃твами прпⷣбнагѡ твᲂегѡ̀ хрⷭ҇тѐ , ꙗ҆́кѡ всеси́ленъ . Вше́дъ ты̀ бг҃ᲂно́се , в̾ дѣ́тельнꙋю дᲂбрᲂдѣ́тель и҆си́дᲂре . видѣ́нїемъ чи́стымъ , и҆ кра́снымъ ꙗ҆вле́нїемъ бг҃ᲂви бесѣ́дꙋѧ всегда̀ , ꙗ҆́вѣ ѡ҆бᲂгати́лсѧ є҆сѝ . Премꙋ́дрᲂсти ча́шѣ , прине́съ свᲂѧ̀ ᲂу҆ста̀ премꙋ́дре , и҆́же ѿ тꙋ́дꙋ дарᲂва́нїи и҆сто́чникъ пᲂче́рплъ є҆сѝ , бг҃ᲂви пᲂбѣ́днꙋю пѣ́снь вᲂспѣва́ѧ . =боⷢ҇ . Ꙗ҆́кѡ на ѻ҆́блацѣ ле́гцѣ сᲂдѣ́тель , на тебѣ̀ прїи́де , низ̾лᲂжи́ти ꙗ҆́кѡ си́ленъ є҆гѵ́пет̾скаѧ , влⷣчце чⷭ҇таѧ рꙋкᲂтвᲂре́нїѧ , хрⷭ҇то́съ всеси́льныи .

пѣ́снь , г҃ . і҆рмо́съ . Оу҆тверже́нїе на тѧ̀ надѣ́ющимсѧ , ᲂу҆твердѝ гдⷭ҇и цр҃кᲂвь свᲂю̀ , ю҆́же стѧжа̀ чⷭ҇тно́ю сѝ кро́вїю . Первᲂрᲂжде́нъ и҆з̾ ѻ҆ц҃а пре́жде вѣ́къ , первᲂрᲂжде́нъ младе́нецъ и҆з̾ дв҃ы нетлѣ́нны . а҆да́мꙋ рꙋ́кꙋ прᲂстира́ѧ ꙗ҆ви́сѧ . Младᲂꙋ́мна бы́вша пре́лестїю первᲂз̾да́ннагѡ , па́ки и҆справлѧ́ѧ бг҃ъ сло́во , младе́нствᲂвавъ ꙗ҆ви́сѧ . Землѝ и҆сча́дїе , па́ки те́кши к̾ не́й , бжⷭ҇тва̀ сᲂѡ҆бра́знᲂе є҆стество̀ сᲂдѣ́тель ꙗ҆́кѡ непрело́жно , младе́нствᲂвавъ ꙗ҆вѝ .

и҆́нъ , і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й , вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени и҆спᲂвѣ́данїѧ тѝ . Оу҆ма̀ ѡ҆стрᲂто́ю , мꙋ́дрѣ сꙋ́щихъ сᲂбра́въ пресла́вне сꙋщество̀ . и҆́мже нача́льнꙋю винꙋ̀ , ꙗ҆́кѡ чи́стъ бг҃ᲂсло́вецъ , неле́стнѡ прїѧ́лъ є҆сѝ . Пᲂꙋче́нїе пᲂло́жъ ꙗ҆́снѡ , сме́ртнᲂе житїю̀ , бг҃ᲂно́се требл҃же́нне . страсте́мъ ве́щныѧ вины̀ ᲂу҆мертви́лъ є҆сѝ , без̾стра́стїѧ ѡ҆бьѧ́тъ бы́въ жела́нїемъ . Вслѣ́дъ ра́дꙋѧсѧ хрⷭ҇та̀ крⷭ҇тъ сво́й нᲂси́въ пᲂслѣ́дᲂвалъ є҆сѝ ѻ҆́ч҃е , в̾ вᲂз̾держа́нїи крѣ́пцѣ . и҆ семꙋ̀ прᲂти́вꙋ си́лы ᲂу҆пᲂдо́билсѧ є҆сѝ житїѧ̀ чистᲂто́ю . боⷢ҇ . Зако́нныхъ є҆сте́ствъ крᲂмѣ̀ , влⷣкꙋ ро́ждьши бцⷣе дв҃о . дре́внюю преслꙋша́нїѧ клѧ́твꙋ разᲂри́ла є҆сѝ , бл҃гᲂслᲂве́нїѧ и҆сто́чникъ и҆стᲂча́ющи .

кᲂнда́къ . гла́съ , в҃ . Ꙗ҆́кѡ ве́лїе сл҃нце цр҃кви , и҆ чꙋде́съ лꙋча́ми прᲂсвѣща́еши всегда̀ , вселе́ннѣй и҆спᲂлне́нїе . нбⷭ҇ныи таи́нниче , и҆си́дᲂре прпⷣбне . сѣда́ленъ . гла́съ , г҃ . Кни́га ра́зꙋмꙋ ᲂу҆че́нїѧ , бᲂга́тствᲂмъ ра́зꙋма слᲂжена̀ . прест҃о́мꙋ ꙗ҆ви́лсѧ є҆сѝ дх҃ꙋ . ѿкрыва́ѧ бжⷭ҇твеннаѧ тре́бꙋющимъ , и҆ жи́знь сᲂкро́вищꙋ хᲂтѧ́щимъ . ѻ҆́ч҃е прпⷣбне хрⷭ҇та̀ бг҃а мᲂлѝ , дарᲂва́ти на́мъ ве́лїю млⷭ҇ть . сла́ва , и҆ ны́нѣ , пра́здникꙋ . сѣда́ленъ . гла́съ , и҃ . Рᲂди́сѧ ѿ мт҃ре первᲂнача́льнᲂе сло́во , принесе́сѧ в̾ цр҃кᲂвь цр҃ю сла́вы . ра́дꙋѧжесѧ ста́рецъ на рꙋкꙋ̀ тѧ̀ пᲂдъѧ́тъ зᲂвы́и , ны́нѣ ѿпꙋстѝ є҆го́же пᲂсѣти́лъ є҆сѝ по гл҃ꙋ твᲂемꙋ̀ . бл҃гᲂи҆зво́ливыи спастѝ , ꙗ҆́кѡ бг҃ъ ро́дъ чл҃ческїи . А҆́ще є҆́сть по́стъ , сла́ва , и҆ ны́нѣ , боⷢ҇ . а҆́ще ли среда̀ и҆ пѧто́къ , крⷭ҇тᲂбоⷢ҇ . пи́саны сего̀ мцⷭ҇а , въ і҃ дн҃ь .

пѣ́снь , д҃ . і҆рмо́съ . Пᲂкры́ла є҆́сть нб҃са̀ дᲂбрᲂдѣ́тель твᲂѧ̀ хрⷭ҇тѐ , и҆з̾ кїѡ́та бо прᲂше́дъ , ст҃ы́ѧ твᲂеѧ̀ нетлѣ́нныѧ мт҃ре , в̾ цр҃кви сла́вы ти ꙗ҆ви́сѧ , ꙗ҆́кѡ младе́нецъ на рꙋкꙋ̀ нᲂси́мъ . и҆ и҆спо́лнишасѧ всѧ̀ твᲂегѡ̀ хвале́нїѧ . Ра́дꙋйсѧ сѷмеѡ́не неи҆зрече́ннымъ таи́нниче , бцⷣа вᲂпїѧ́ше , є҆го́же ѿ ст҃а́гѡ ѡ҆ дре́вле вᲂз̾вѣсти́тисѧ дх҃а , младе́нствᲂвавша сло́ва хрⷭ҇та̀ на рꙋкꙋ̀ прїимѝ . зᲂвы́и є҆мꙋ̀ , и҆спо́лнишасѧ всѧ̀ твᲂегѡ̀ хвале́нїѧ . На него́ же ᲂу҆пᲂва́лъ є҆сѝ сѷмеѡ́не , во́зрастъ дѣ́тищныи , ра́дꙋѧсѧ пᲂд̾имѝ хрⷭ҇та̀ . і҆и҃лю бжⷭ҇твеннᲂе ᲂу҆тѣше́нїе . зако́нꙋ твᲂрца̀ и҆ влⷣкꙋ , и҆спᲂлнѧ́ющагѡ зако́нꙋ чи́нъ , зᲂвы́и є҆мꙋ̀ , и҆спо́лнишасѧ всѧ̀ твᲂегѡ̀ хвале́нїѧ . Ви́дѣ сѷмеѡ́нъ сло́во без̾нача́льнᲂе , с̾ пло́тїю ꙗ҆́кѡ на прⷭ҇то́лѣ херꙋви́мстѣ дв҃цею нᲂси́мо , вино́внаго бы́тїю всѧ́ческихъ . ꙗ҆́кѡ млⷣнцꙋ дивѧ́сѧ вᲂпїѧ́ше є҆мꙋ̀ , и҆спо́лнишасѧ всѧ̀ твᲂегѡ̀ хвале́нїѧ .

и҆́нъ , і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Незави́стно прпⷣбне хрⷭ҇то́ви пᲂвинꙋ́ѧсѧ , по́данᲂе тѝ бᲂга́тство , ꙗ҆́кѡ бл҃гᲂпᲂкᲂри́въ ра́бъ раз̾да́лъ є҆сѝ . и҆ несказа́ннѣй тѧ̀ ра́дᲂсти , влⷣка спᲂдо́би . Премꙋ́дрᲂсти пꙋчи́нꙋ ѿве́рзъ , до́брыи би́серъ , ꙗ҆́кѡ до́бръ кꙋпе́цъ прїѡ҆брѣ́лъ є҆сѝ . и҆ се́й то́кмѡ сᲂкро́вище неѡ҆скꙋ́дно стѧжа́лъ є҆сѝ . Бжⷭ҇твеннымъ дх҃ᲂмъ сїѧ́ѧ , зарю̀ слᲂве́съ сл҃нчныхъ , всѣ́мъ и҆спꙋсти́лъ є҆сѝ . спасе́нїѧ вѣ́рнымъ бг҃ᲂꙗ҆вле́нне жела́ѧ . боⷢ҇ . Ꙗ҆́кѡ вᲂи́стинꙋ неи҆з̾гл҃анна и҆ непᲂстижи́ма , твᲂегѡ̀ бцⷣе бг҃ᲂлѣ́пнагѡ сꙋ́ть ржⷭ҇тва̀ , сꙋ́щимъ на землѝ и҆ на́ нб҃си прⷭ҇нѡ дв҃о та́инства .

пѣ́снь , є҃ . і҆рмо́съ . Ꙗ҆́кѡ ви́дѣ и҆са́їѧ ѻ҆бра́знѡ на прⷭ҇то́лѣ превысо́цѣ бг҃а , ѿ а҆́гг҃лъ сла́вы да́ры прїе́млюща , ѽ ѻ҆каѧ́нныи вᲂпїѧ́ше а҆́зъ , прᲂви́дѣхъ вᲂплᲂща́ема бг҃а , свѣ́та невече́рнѧ , и҆ ми́рᲂмъ ѡ҆блада́юща . Разꙋмѣ́въ бжⷭ҇твенныи ста́рецъ , прᲂѧ́вленꙋю дре́вле прⷪ҇ркꙋ сла́вꙋ , пло́тїю сло́ва зрѧ̀ мт҃рїю держи́ма , ѽ ра́дꙋисѧ вᲂпїѧ́ше чⷭ҇таѧ , ꙗ҆́кѡ прⷭ҇то́лъ бо держи́ши бг҃а , свѣ́та невече́рнѧ , и҆ ми́рᲂмъ ѡ҆блада́юща . Пᲂкло́ньсѧ ста́рецъ , и҆ стᲂпа́мъ бжⷭ҇твенѡ прикᲂснꙋ́сѧ , неи҆скꙋсᲂбра́чныѧ и҆ бж҃їѧ мт҃ре , ѻ҆́гнь речѐ но́сиши чⷭ҇таѧ . млⷣнца бᲂю́сѧ ѡ҆бъѧ́ти бг҃а , свѣ́та невече́рнѧ , и҆ ми́рᲂмъ ѡ҆блада́юща . Ѡ҆чища́етсѧ и҆са́їѧ ѿ серафи́ма ᲂу҆́гль прїе́мъ . ста́рецъ вᲂпїѧ́ше бж҃їи мт҃ри , ты̀ ꙗ҆́кѡ клеща́ми , рꙋка́ма прᲂсвѣща́еши мѧ . пᲂда́вши ми є҆го́же но́сиши свѣ́та невече́рнѧ , и҆ ми́рᲂмъ ѡ҆блада́юща .

и҆́нъ , і҆рмо́съ . Бж҃їимъ свѣ́тᲂмъ тѝ бл҃же , ᲂу҆́тренюющихъ тѝ дш҃а любо́вїю , прᲂсвѣтѝ мᲂлю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Оу҆мерщвле́нїемъ премꙋ́дре страсте́й , внѣ̀ бы́въ пло́ти . любо́вїю бг҃ᲂви прибли́жилсѧ є҆сѝ , прест҃о́мꙋ и҆ пресвѣ́тлᲂмꙋ свѣ́тꙋ , и҆ є҆ди́нᲂмꙋ и҆стѧза́ющемꙋ чистᲂтꙋ̀ . Бжⷭ҇твеннымъ сїѧ́нїемъ тѝ бла́же , ᲂу҆́мъ бг҃ᲂно́сецъ ѡ҆зари́въ , сто́лпъ всесвѣ́телъ бы́сть . всѣ́мъ пᲂсыла́ѧ бжⷭ҇твеннагѡ свѣ́та , бжⷭ҇твенныѧ зарѝ , и҆ тмꙋ̀ невѣ́дѣнїѧ ѿгᲂнѧ̀ . Хᲂтѧ́и всѣ́мъ ꙗ҆́кѡ бл҃гъ премꙋ́дре спасти́сѧ , наста́вника заблꙋ́ждьшимъ тѧ̀ пᲂказа̀ , ѡ҆браща́ти всѧ̀ ко спасе́нїѧ пꙋтѝ , и҆си́дѡре требл҃же́нне ѻ҆́ч҃е пребᲂга́те . боⷢ҇ . Вᲂи́стинꙋ ᲂу҆сты̀ и҆ дш҃е́ю влⷣчце ми́рꙋ бл҃га́ѧ , и҆спᲂвѣ́даю тѧ̀ всенепᲂро́чнаѧ , вᲂплᲂще́на бг҃а ро́ждьшꙋю чⷭ҇таѧ . и҆ житїю́ тѧ пред̾ста́тельницꙋ вѣ́рᲂю пред̾лага́ю .

пѣ́снь , ѕ҃ . і҆рмо́съ . Вᲂзᲂпѝ к̾ тебѣ̀ ви́дѣвъ ста́рецъ ѻ҆чи́ма спасе́нїе , є҆́же лю́демъ прїи́де ѿ́ бг҃а хрⷭ҇тѐ , ты̀ бг҃ъ мо́й . Сїѡ́нꙋ ты̀ ка́мень вᲂз̾лᲂжи́сѧ , непᲂкᲂри́вымъ претыка́нїе , и҆ сᲂбла́знꙋ ка́мень . нерꙋши́мᲂе вѣ́рнымъ спасе́нїе . И҆звѣ́стно нᲂсѧ̀ начерта́нїе , и҆́же пре́жде вѣ́къ тѧ и҆з̾расти́вшаго . землены́хъ за млрⷭ҇дїе , ны́нѣ не́мᲂщїю ѡ҆блᲂжи́сѧ . Сн҃ꙋ вы́шнѧгѡ , сн҃ꙋ дв҃ыѧ , бг҃ꙋ ѻ҆трᲂча́ти бы́вшемꙋ , пᲂкло́ньшꙋмисѧ , ны́нѣ ѿпꙋстѝ с̾ ми́рᲂмъ .

и҆́нъ , і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ мо́й мнᲂгᲂмлⷭ҇тиве . Слᲂвесы̀ сꙋ́дными ᲂу҆кра́шьсѧ ꙗ҆́кѡ ст҃ль , слᲂве́снѡ раз̾сꙋди́лъ є҆сѝ бг҃ᲂно́сне , тѣ́лᲂмъ и҆ дш҃е́ю . и҆ ме́ншее лꙋ́чшемꙋ пᲂвинꙋ́въ смы́сленѡ , дᲂстᲂчꙋ́дне . Бл҃гᲂмо́щнѡ є҆гѵ́пта страсте́мъ и҆ пи́щи ты̀ и҆́нᲂкꙋющимъ пᲂхвало̀ , вᲂз̾держа́тельными сла́вне ꙗ҆́звами , и҆спыта́ѧ ᲂу҆ѧ́звилъ є҆сѝ . вѣ́рнымъ ᲂу҆глажда́ѧ прехᲂжде́нїе . боⷢ҇ . Нᲂсѧ́и всѧ́ческаѧ си́лᲂю бжⷭ҇твеннᲂю , и҆ сᲂдержа́и ꙗ҆́кѡ млрⷭ҇дъ , твᲂи́ма рꙋка́ма пречⷭ҇таѧ , вᲂпло́щьсѧ ꙗ҆́кѡ млⷣнцъ но́ситсѧ . и҆́же ѻ҆ц҃ꙋ по сꙋществꙋ̀ сᲂпрⷭ҇нᲂсꙋ́щныи .

кᲂнда́к̾ , пра́здникꙋ . гла́съ , а҃ . И҆́же ᲂу҆тро́бꙋ дв҃чꙋ ѡ҆ст҃и́въ ржⷭ҇тво́мъ сѝ , и҆ рꙋ́цѣ сѷмеѡ́ни бл҃гᲂслᲂви́въ , ꙗ҆́кᲂже пᲂдᲂба́ше пред̾вари́въ . и҆ ны́нѣ спа́слъ є҆сѝ на́съ хрⷭ҇тѐ бж҃е . но ᲂу҆мирѝ во бранѣ́хъ житїѐ на́ше , и҆ ᲂу҆крѣпѝ люде́й , и҆́хже вᲂз̾люби́лъ є҆сѝ , є҆ди́не чл҃кᲂлю́бче . и҆́кᲂсъ . Къ бцⷣѣ притеце́мъ вѣ́рнїи , хᲂтѧ́щїи сн҃а є҆ѧ̀ ви́дѣти , к̾ сѷмеѡ́нꙋ и҆дꙋ́ща . є҆го́же с̾ нб҃сѐ беспло́тнїи ви́дѧще , дивлѧ́хꙋсѧ гл҃юще , чꙋ́днаѧ зри́мъ ны́нѣ и҆ пресла́внаѧ , непᲂстижи́маѧ и҆ несказа́ннаѧ . и҆́же бо а҆да́ма сᲂзда́выи , нᲂси́мь є҆́сть ꙗ҆́кѡ млⷣнцъ . невмѣсти́мыи вмѣща́етсѧ на рꙋкꙋ̀ сѷмеѡ́ню , и҆́же в̾ нѣ́дрѣхъ неѡ҆пи́санныи сы́и ѻ҆ц҃а свᲂегѡ̀ , во́лею ѡ҆писꙋ́етсѧ пло́тїю а҆ не бжⷭ҇тво́мъ , є҆ди́нъ чл҃кᲂлю́бецъ .

пѣ́снь , з҃ . і҆рмо́съ . Тебѐ в̾ пещѝ ѡ҆рᲂси́вшагѡ дѣ́ти бл҃гᲂслᲂви́ша , и҆ въ дв҃ꙋ нетлѣ́ннѡ все́ль шасѧ , бг҃а сло́ва пᲂе́мъ бл҃гᲂче́стнѡ хва́лѧще , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . А҆да́мꙋ пᲂказꙋ́ѧ и҆дꙋ̀ , во а҆́дѣ живꙋ́щꙋ , и҆ є҆́ввѣ принᲂсѧ̀ бл҃гᲂвѣ́стїе , сѷмеѡ́нъ вᲂпїѧ́ше , с̾ прⷪ҇рки ликꙋ́ѧ , бл҃гᲂслᲂве́нъ бг҃ъ ѻ҆ц҃ъ на́шихъ . Ро́да земле́мна и҆збавлѧ́ѧ бг҃ъ , да́же до а҆́да прїи́детъ . плѣ́ннымъ же пᲂда́стъ всѣ́мъ ѡ҆ставле́нїе , и҆ прᲂзрѣ́нїе слѣпы́мъ . ꙗ҆́кѡ и҆ нѣмы́мъ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . И҆ твᲂѐ срⷣце нетлѣ́ннаѧ ѻ҆рꙋ́жїе про́йдетъ , сѷмеѡ́нъ бцⷣѣ прᲂвᲂз̾гласѝ , на крⷭ҇тѣ̀ взира́ющи свᲂегѡ̀ сн҃а . є҆мꙋ́же вᲂпїе́мъ , блгⷭ҇ве́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . Хладᲂда́тельнꙋ ᲂу҆́бѡ пе́щь сᲂтвᲂрѝ а҆́гг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ ᲂу҆вѣща̀ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . Тве́рдᲂсти вѣ́рѣ пᲂста́ви ѻ҆́ч҃е , ꙗ҆́кᲂже сл҃нце влⷣка тѧ̀ , прᲂсвѣща́ти сїѧ́нїемъ мы́сленымъ , дш҃а вᲂпїю́щихъ прилѣ́жнѡ , бл҃гᲂслᲂве́нъ бг҃ъ ѻ҆ц҃ъ на́шихъ . Скве́рны плᲂтьскі́ѧ и҆ дх҃о́вныѧ ѿмы́лъ є҆сѝ бл҃же́нне , сле́зными и҆злїѧ́нїи . и҆ бы́въ бг҃ᲂно́сне свѣ́тъ сꙋ́щимъ на землѝ . всѧ̀ наꙋчи́лъ є҆сѝ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . боⷢ҇ . На недви́жимѣмъ вѣ́ры стᲂѧ́ще ѡ҆снᲂва́нїи , тѧ̀ бг҃ᲂмт҃рь и҆спᲂвѣ́даемъ бцⷣе . сло́во бо бж҃їе , без̾ сѣ́мене рᲂдила̀ є҆сѝ на́мъ , бл҃гᲂслᲂве́нъ пло́дъ чре́ва твᲂегѡ̀ .

пѣ́снь , и҃ . і҆рмо́съ . Въ непᲂстᲂѧ́ннѣмъ ѻ҆гнѝ сᲂвᲂкꙋ́пльшесѧ , и҆́же бл҃гᲂче́стїѧ пред̾стᲂѧ́ще ю҆́нᲂши , пла́менѣмъ же неврежде́ни , бжⷭ҇твеннꙋю пѣ́снь пᲂѧ́хꙋ , блгⷭ҇ви́те всѧ́каѧ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Лю́дїе і҆и҃леви , ва́шꙋ сла́вꙋ є҆м̾манꙋ́ила зрѧ́ще , ѻ҆трᲂча̀ и҆з̾ дв҃ы , пред̾ лице́мъ бжⷭ҇твеннагѡ кᲂвче́га нн҃ѣ ликꙋ́йте , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Сѐ сѷмеѡ́нъ вᲂпїѧ́ше , пререка́емᲂе зна́менїе се́й бꙋ́детъ , бг҃ъ сы́и и҆ ѻ҆трᲂча̀ . семꙋ̀ вѣ́рнїи вᲂзᲂпїе́мъ , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Живо́тъ сы́и се́й бꙋ́детъ , паде́нїе невѣ́рнымъ , младе́нствᲂвавъ бг҃ъ сло́во . ꙗ҆́кѡ вᲂста́нїе всѣ́мъ вѣ́рнѡ зᲂвꙋ́щимъ , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки .

и҆́нъ , і҆рмо́съ . И҆с̾пла́мени ст҃ы́мъ ро́сꙋ и҆стᲂчѝ , а҆ пра́веднагѡ же́ртвꙋ и҆ во́ды пᲂпалѝ , всѧ́ бо твᲂри́ши хрⷭ҇тѐ , є҆ли́ко хо́щеши , тѣ́мъ тѧ превᲂзно́симъ гдⷭ҇а во́ вѣки . Ꙗ҆́кѡ слᲂве́снꙋ же́ртвꙋ ѻ҆́ч҃е , житїѐ свᲂѐ в̾ вᲂню̀ бл҃гᲂꙋха́нїѧ прине́слъ є҆сѝ , и҆́же на крⷭ҇тѣ̀ тебѐ ра́ди пᲂвѣ́шенᲂмꙋ хрⷭ҇тꙋ̀ . є҆го́же превᲂзно́симъ во́ вѣки . Оу҆мнᲂжа́еши бᲂга́тство и҆ по сме́рти , ѡ҆дш҃евле́на слᲂвеса̀ свᲂѧ̀ . ꙗ҆́кᲂже мнᲂгᲂцѣ́нно , всѣ́мъ вѣ́рнымъ наслѣ́дїе ѡ҆ста́вль , превᲂзнᲂсѧ́щимъ хрⷭ҇та̀ во́ вѣки . Оу҆краси́сѧ пребл҃же́нне , дᲂбро́тᲂю слᲂве́съ твᲂи́хъ . ст҃а́гѡ бо дх҃а ꙗ҆ви́лсѧ є҆сѝ тро́сть , пиша̀ бл҃гᲂче́стнѡ ра́зꙋмъ бжⷭ҇твенъ , превᲂзнᲂсѧ́щимъ гдⷭ҇а во́ вѣки . боⷢ҇ . Къ твᲂемꙋ̀ пᲂкро́вꙋ прибѣга́ю всенепᲂро́чнаѧ , и҆ пред̾ста́тельницꙋ жи́зни мᲂе́й тѧ̀ ны́нѣ пред̾лага́ю , тѧ̀ ꙗ҆́же па́че ᲂу҆ма̀ бг҃а сло́во ро́ждьшꙋю . є҆го́же превᲂзно́симъ во́ вѣки .

пѣ́снь , ѳ҃ . і҆рмо́съ . Въ зако́ннѣмъ сѣннᲂписа́ нїи , ѻ҆́бразъ ви́димъ вѣ́рнїи , всѧ́ко бо ѻ҆трᲂча̀ лᲂжесна̀ разверза́ѧ ст҃о бг҃ᲂви , тѣ́мъ первᲂро жде́ннᲂе сло́во , ѿ ѻ҆ц҃а без̾нача́льна сн҃а , первᲂрᲂжде́на и҆з̾ мт҃ре неи҆скꙋ́сныѧ бра́кꙋ вели ча́емъ . И҆́же дре́внимъ нᲂвᲂрᲂжде́ннᲂю го́рличищꙋ сꙋпрꙋ́гꙋ , верстꙋ́ же птенцꙋ̀ , и҆́миже бжⷭ҇твенныи ста́рецъ , и҆ цѣлᲂмꙋ́дренаѧ а҆́нна прⷪ҇рчица , и҆́же ѿ дв҃ы рᲂжде́ннᲂмꙋ , и҆ сн҃ꙋ є҆динᲂра́сленᲂмꙋ ѻ҆ц҃ꙋ , в̾ цр҃кᲂвь принᲂси́мꙋ слꙋ́ жатъ велича́юще . Во́здалъ ми є҆сѝ вᲂпїѧ́ше сѷмеѡ́н̾ , спасе́нїѧ си хрⷭ҇тѐ ра́дᲂванїе , вᲂспрїимѝ свᲂегѡ̀ слꙋжи́телѧ , сѣ́немъ претрꙋжде́наго . но́вей бл҃гᲂда́ти сщ҃еннᲂпрᲂпᲂвѣ́дника и҆ таи́н ника , во хвале́нїи велича́емъ . Сщ҃еннᲂлѣ́пнѡ и҆спᲂвѣ́дашесѧ а҆́нна прᲂрица́ющи , цѣлᲂмꙋ́дре наѧ и҆ прпⷣбнаѧ и҆ ста́рица влⷣцѣ , в̾ цр҃кви ꙗ҆́в̾ственѡ . бцⷣꙋ же прᲂпᲂвѣ́дающи , всѣ́мъ сꙋ́щимъ велича́ше .

и҆́нъ , і҆рмо́съ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́гг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во вᲂплᲂще́нно , є҆го́же велича́юще , с̾ нбⷭ҇ными вѡ́и тѧ̀ велича́емъ . Ꙗ҆́кᲂже зарѧ̀ свѣ́тꙋ ѡ҆блиста̀ , в̾ твᲂю̀ дш҃ꙋ бл҃гᲂда́ти сло́во прпⷣбне . тᲂбо́ю же всѧ̀ землѧ̀ и҆спо́лнисѧ сїѧ́нїѧ . є҆мꙋ́же причаща́ющїисѧ , твᲂеѧ̀ премꙋ́дрᲂсти сᲂкро́вищꙋ , ѻ҆́ч҃е ᲂу҆дивлѧ́емсѧ . Тремѝ ли́цы є҆ди́ницꙋ є҆стество́мъ , ѻ҆те́ческимъ пᲂслѣ́дꙋѧ ᲂу҆че́нїемъ , бг҃ᲂмꙋ́дренѡ пᲂкланѧ́ѧсѧ наꙋчи́лъ є҆сѝ чти́ти бг҃ᲂсло́вѧщꙋю , несᲂзда́ннꙋ без̾нача́льнꙋ , всѣ́мъ вѣ́рнымъ прᲂсвѣще́нїе и҆стᲂча́ющꙋ . Ѡ҆брѣ́тъ трꙋдо́мъ свᲂи́мъ вᲂз̾да́нїе на́ нб҃сѣхъ , жи́знь без̾кᲂне́чнꙋю прїе́мъ . пᲂю́щимъ премꙋ́дре па́мѧть твᲂю̀ , и҆спрᲂсѝ спасе́нїе бл҃же́нне и҆си́дᲂре , престо́лꙋ бж҃їю со а҆́гг҃лы ны́нѣ пред̾стᲂѧ̀ . боⷢ҇ . Тлѣ́ненъ , сло́во бж҃їе нетлѣ́ннᲂе , ѻ҆́бразъ прїе́мъ , чл҃ки в̾ нетлѣ́нїе ѡ҆блечѐ бл҃гᲂвᲂле́нїемъ ѻ҆́ч҃имъ в̾се́льсѧ в̾ тѧ̀ , бг҃ᲂра́дᲂваннаѧ . тѣ́мже пречⷭ҇таѧ с̾ нбⷭ҇ными вѡ́и , тѧ̀ велича́емъ .

свѣти́ленъ , пра́здникꙋ . Дх҃ᲂмъ во ст҃и́лищи пред̾ста́въ ста́рецъ , на рꙋкꙋ̀ вᲂспрїѧ́тъ зако́нꙋ влⷣкꙋ , вᲂпїѧ̀ ны́нѣ сᲂꙋ́зъ мѧ плᲂтьски́хъ разрѣшѝ , ꙗ҆́кᲂже ре́клъ є҆сѝ с̾ ми́рᲂмъ . ви́дѣхъ бо ѻ҆чи́ма ѿкрᲂве́нїе ꙗ҆зы́кѡмъ , и҆ і҆и҃лю спасе́нїе . сла́ва , и҆ ны́нѣ , то́йже .

На стихо́внѣ , стихѣ́ры . гла́съ , в҃ . поⷣ . до́ме є҆в̾фра́фᲂвъ . Скве́рны крᲂмѣ̀ ,꙳ хрⷭ҇то́съ ражда́етсѧ ѿ дв҃ы ,꙳ ꙗ҆́кѡ ѿ ѻ҆ц҃а нетлѣ́нно ,꙳ сн҃ъ пре́жде денни́цы ,꙳ и҆́же а҆да́ма и҆збавлѧ́ѧи .

сти́хъ : ны́нѣ ѿпꙋща́еши раба̀ свᲂегѡ̀ влⷣко ,꙳ по гл҃ꙋ твᲂемꙋ̀ с̾ ми́рᲂмъ . Врата̀ нбⷭ҇наѧ ѿве́рзитесѧ ,꙳ хрⷭ҇то́съ бо в̾ цр҃кви ꙳ ꙗ҆́кѡ млⷣнцъ ,꙳ мт҃рїю дв҃ᲂю ,꙳ бг҃ꙋ ѻ҆ц҃ꙋ прино́ситсѧ .

сти́хъ : свѣ́тъ во ѿкрᲂве́нїе ꙗ҆зы́кѡмъ ,꙳ и҆ сла́вꙋ люді́й твᲂи́хъ і҆и҃лѧ . Оу҆́гль пе́рвїе ꙗ҆вле́исѧ ,꙳ бжⷭ҇твеннᲂмꙋ и҆са́їи ꙳ хрⷭ҇то́съ ꙗ҆́кѡ клеща́ми ,꙳ рꙋка́ма бцⷣы ,꙳ ны́нѣ ста́рцꙋ дае́тсѧ .

сла́ва , и҆ ны́нѣ . гла́съ , з҃ . Свѣ́тъ во ѿкрᲂве́нїе ꙗ҆зы́кѡмъ , прише́лъ є҆сѝ на́ землю , с̾ нб҃сѐ сп҃се на́шъ . и҆ прᲂше́дъ и҆з̾ дв҃ы , пᲂчи́лъ є҆сѝ на рꙋкꙋ̀ пра́веднагѡ сѷмеѡ́на . пᲂдᲂба́ше бо тѝ живᲂда́вче всѣ́хъ , ѿ ста́рца пᲂзна́тисѧ . ꙗ҆́кѡ прїи́де ѿпꙋсти́ти є҆гѡ̀ по гл҃ꙋ твᲂемꙋ̀ , и҆мѣ́ѧи ве́лїю млⷭ҇ть .

Слꙋ́жба ст҃о́мꙋ бл҃гᲂвѣ́рнᲂмꙋ вели́кᲂмꙋ кн҃зю геѡ́ргїю . =На ма́лѣй вече́рни , на гдⷭ҇и вᲂзва́хъ , стихѣ́ры . гла́съ , а҃ . поⷣ . нбⷭ҇нымъ чи́нѡмъ . Нбⷭ҇нымъ чино́мъ с̾лико́вника ,꙳ и҆ мч҃нкѡмъ сᲂстрада́льца ,꙳ премꙋ́драго во́ина бл҃гᲂче́стїѧ ,꙳ и҆ и҆́стиннаго прᲂпᲂвѣ́дника хрⷭ҇то́ва ,꙳ геѡ́ргїѧ великᲂи҆менита́го ,꙳ вᲂсхва́лимъ вѣ́рнїи ра́дꙋющесѧ . =двⷤа . Хрⷭ҇тїѧ́нѡмъ забра́ло крѣ́пкᲂе ,꙳ стᲂлпа̀ непᲂкᲂлѣби́маго ,꙳ мꙋчи́тельскими преще́нїи ,꙳ кꙋпца̀ всеи҆зрѧ́днаго ,꙳ тлѣ́ннаѧ на нетлѣ́ннаѧ и҆змѣни́вшаго ,꙳ и҆ на́съ свы́ше назира́юща , вѣ́рнѡ ᲂу҆бл҃жи́мъ . И҆зрѧ́днаго страда́телѧ всѝ геѡ́ргїѧ ,꙳ свѣ́тлаго храбо́рника ,꙳ ны́нѣ на́мъ вᲂсїѧ́вшаго ,꙳ и҆́стиннагѡ страда́нїѧ лꙋча́ми ,꙳ вᲂспᲂе́мъ веселѧ́щесѧ .꙳ и҆ тᲂгѡ̀ мᲂще́мъ пᲂклᲂнѧ́емсѧ . сла́ва . гла́съ , ѕ҃ . Дне́сь рꙋ́с̾скаѧ страна̀ , стрⷭ҇тᲂте́рпческими прᲂсвѣща́етсѧ зарѧ́ми , и҆ хрⷭ҇то́ва цр҃кви цвѣ́ты ᲂу҆краша́ема , геѡ́ргїе вᲂпїе́тъ тѝ ᲂу҆го́дниче хрⷭ҇то́въ , и҆ пред̾ста́телю те́плыи . непреста́й мᲂлѧ́сѧ ѡ҆ рабѣ́хъ свᲂи́хъ . и҆ ны́нѣ , боⷢ҇ . и҆лѝ , пра́здникꙋ .

На стихо́внѣ , стихѣ́ры . гла́съ , в҃ . поⷣ . до́ме є҆в̾фра́фᲂвъ . И҆́мамы тѧ̀ мно́гихъ ,꙳ да́телѧ дарᲂва́нїи ,꙳ ᲂу҆го́дниче гдⷭ҇нь .꙳ и҆спᲂлнѧ́еши бо прᲂше́нїѧ ,꙳ ꙗ҆́же и҆́мамы всегда̀ .

сти́х̾ : пра́ведникъ ꙗ҆́кѡ фи́никъ прᲂцвѣте́тъ ,꙳ и҆ ꙗ҆́кѡ ке́дръ и҆́же в̾ лива́нѣ ᲂу҆мно́житсѧ . Пѣ́нїѧ сла́дкаѧ ,꙳ страсте́й пᲂхвале́нїѧ ,꙳ бл҃гᲂда́темъ вᲂз̾даѧ́нїѧ ,꙳ пред̾лᲂже́нїе бл҃же́нне ,꙳ прїимѝ геѡ́ргїе .

сти́хъ : насажде́нъ въ дᲂмꙋ̀ гдⷭ҇ни ,꙳ во дво́рѣхъ до́мꙋ бг҃а на́шегѡ прᲂцвѣтꙋ́тъ . Дᲂбро́та страда́льцемъ ,꙳ бл҃гᲂлѣ́пїе мч҃нкѡмъ ,꙳ цр҃е́мъ храни́телю ,꙳ прїимѝ ны́нѣ пᲂхвалꙋ̀ ,꙳ вѣ́рᲂю сла́вѧщихъ тѧ̀ . сла́ва , и҆ ны́нѣ , боⷢ҇ . Дѣ́ло бл҃гᲂлѣ́пнѡ ,꙳ дв҃аѧ по ржⷭ҇твѣ̀ .꙳ прижи́тїе бг҃ъ сло́во ,꙳ чл҃че є҆стество̀ и҆мы́и ,꙳ и҆ ꙗ҆влѧ́ѧ бжⷭ҇твеннаѧ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , и҃ . На высᲂтѣ̀ вели́кагѡ кнѧже́нїѧ сѣдѧ̀ , ꙗ҆ви́сѧ бл҃ᲂче́стїемъ и҆ вѣ́рᲂю сїѧ́ѧ ѻ҆те́чествꙋ свᲂемꙋ̀ ꙗ҆́кѡ сл҃нце . по ст҃ѣ́й трⷪ҇цѣ ре́внᲂстїю раз̾же́гсѧ , и҆ за вѣ́рꙋ крѣ́пкѡ пᲂстрада́въ , кро́вь свᲂю̀ прᲂлїѧ̀ . тѣ́мъ и҆ ѿсѣче́наѧ тѝ за хрⷭ҇та̀ глава̀ свѣдѣ́тельствꙋетъ ꙗ҆́вѣ ѡ҆ тебѣ̀ , прилѣ́пшаѧ по сме́рти к̾ тѣлесѝ твᲂемꙋ̀ . с̾ не́юже и҆ до дне́сь нетлѣ́нны пребыва́ютъ мо́щи твᲂѧ̀ , ѿ ни́хже и҆стᲂча́еши и҆сцѣле́нїѧ , дш҃а́мъ и҆ тѣлесе́мъ на́шимъ . но ꙗ҆́кѡ дерзнᲂве́нїе и҆мѣ́ѧ ко хрⷭ҇тꙋ̀ , стрⷭ҇тᲂте́рпче геѡ́ргїе , непреста́ннѡ мᲂлѝ , держа́вꙋ твᲂю̀ , и҆ сро́дникъ твᲂи́хъ без̾ вре́днꙋ сᲂхрани́ти , мᲂли́твами твᲂи́ми . сла́ва , и҆ ны́нѣ , боⷢ҇ . и҆лѝ , пра́здникꙋ . та́же , є҆ктенїѧ̀ ма́лаѧ . ѿпꙋ́стъ .

На вели́цѣй вече́рни , блаже́нъ мꙋ́жь , а҃ , а҆нти фо́нъ . =На гдⷭ҇и вᲂзва́хъ , стихѣ́ры , на и҃ . гла́съ , а҃ . поⷣ . прехва́льнїи мч҃нцы . И҆зма́ильтескими кꙋма́ны ,꙳ твᲂѐ мꙋ́жество непрело́жьсѧ ,꙳ бл҃гᲂвѣ́рныи вели́кїи кн҃же геѡ́ргїе прехва́льне .꙳ и҆ бжⷭ҇твеннᲂю бл҃гᲂда́тїю ,꙳ пᲂбѣдᲂно́сецъ ꙗ҆ви́сѧ .꙳ и҆ ли́къ приве́лъ є҆сѝ мч҃нкъ ,꙳ хрⷭ҇то́ви во́инствꙋющихъ .꙳ ѿ всѧ́кᲂгѡ сла́вне во́зраста сᲂвᲂкꙋплѧ́емь ,꙳ и҆ ѿ́ рᲂда всѧ́кᲂгѡ сᲂставлѧ́емь . Геѡ́ргїе прехва́льне ,꙳ кра́сныи ли́къ сᲂста́вивъ ,꙳ с̾пᲂстрада́вшихъ с̾ тᲂбо́ю .꙳ с̾ни́ми же пᲂдвиза́сѧ до́брыи по́двигъ ,꙳ и҆ тече́нїе сᲂверши́въ ,꙳ твᲂегѡ̀ мꙋ́жества страда́нїе .꙳ тѣ́мъ мᲂли́сѧ ,꙳ дарᲂва́ти дш҃а́мъ на́шимъ ,꙳ ми́ръ и҆ ве́лїю млⷭ҇ть . Во́ини бг҃ᲂмꙋ́дрїи ,꙳ хрⷭ҇то́вымъ раче́нїемъ распалѧ́еми ,꙳ не́мᲂщи є҆сте́ственыѧ забы́вше .꙳ и҆ си́лᲂю бжⷭ҇твеннᲂю ,꙳ ꙗ҆́вѣ ᲂу҆крѣплѧ́еми ,꙳ го́рдᲂсть без̾бо́жныхъ пᲂпра́вше ,꙳ не ᲂу҆страши́вшесѧ мꙋче́нїѧ бᲂлѣ́зней ,꙳ и҆ ме́чнагѡ стремле́нїѧ не ᲂу҆бᲂѧ́вшесѧ . =сла́ва . гла́съ , д҃ . Пѣ́снено пастыренача́льника , дне́сь вѣ́рнїи є҆динᲂмы́слено пᲂчте́мъ , геѡ́ргїѧ сла́внагѡ со дрꙋжи́нᲂю є҆гѡ̀ , и҆́же кро́вь прᲂлїѧ́ша за правᲂсла́внꙋю вѣ́рꙋ . тѣ́мъ и҆ ꙗ҆зы́ческїи ꙗ҆́рᲂстныи ѻ҆́блакъ пᲂпалѧ́ше на лицы̀ землѝ , ѡ҆блича́ѧ на́шꙋ триплете́ннꙋю ѕло́бꙋ . тѣ́мъ хрⷭ҇тѐ бж҃е , и҆́же свᲂегѡ̀ страстᲂте́рпца ᲂу҆крѣпи́въ , и҆ на́съ сᲂблюдѝ ꙗ҆́кѡ всѣ́хъ влⷣка , ѿ и҆скꙋше́нїи и҆ скᲂрбе́й , мᲂли́твами ст҃ы́хъ твᲂи́хъ . и҆ ны́нѣ , боⷢ҇ . и҆лѝ , пра́здникꙋ . вы́хᲂдъ . прᲂки́менъ , дню̀ .

Ѿ прᲂро́чества и҆са́ина , чте́нїе .

Та́кѡ глаго́летъ гдⷭ҇ь , всѝ ꙗ҆зы́цы сᲂбра́шасѧ вкꙋ́пѣ , и҆ сᲂберꙋ́тсѧ кнѧ́зи ѿ ни́хъ . и҆ кто̀ вᲂз̾вѣсти́тъ сїѧ̀ в̾ ни́хъ ; и҆ ꙗ҆́кᲂже и҆з̾ нача́ла кто̀ слы́шана сᲂтвᲂри́тъ ва́мъ ; да приведꙋ́тъ свидѣ́тели свᲂѧ̀ , и҆ ѡ҆правдѧ́тсѧ , и҆ да ᲂу҆слы́шатъ , и҆ да рекꙋ́тъ и҆́стинꙋ . бꙋ́дете ми свидѣ́тели , и҆ а҆́зъ свидѣ́тель , гл҃етъ гдⷭ҇ь бг҃ъ , и҆ ѻ҆́трᲂкъ , є҆го́же и҆збра́хъ , да пᲂзна́ете и҆ вѣ́рꙋете ми , и҆ разꙋмѣ́ете ꙗ҆́кѡ а҆́зъ є҆́смь . и҆ пре́жде менѐ не бы́сть и҆́нъ бг҃ъ , и҆ по мнѣ̀ небꙋ́детъ . а҆́зъ є҆́смь бг҃ъ , и҆ нѣ́сть ра́звѣ менѐ спаса́ѧи . а҆́зъ вᲂз̾вѣсти́хъ и҆ спасо́хъ , и҆ ᲂу҆ничижи́хъ , и҆ небѣ̀ в̾ва́съ ѿчꙋжде́нїѧ . вы̀ мнѣ̀ свидѣ́тели , и҆ а҆́зъ свидѣ́тель гл҃етъ гдⷭ҇ь бг҃ъ . и҆ є҆щѐ ѿ нача́ла а҆́зъ є҆́смь , и҆ нѣ́сть и҆́же ѿ рꙋкꙋ̀ мᲂе́ю и҆збавлѧ́ѧи . сᲂтвᲂрю̀ , и҆ кто̀ ѿврати́тъ то̀ ; си́це гл҃етъ гдⷭ҇ь бг҃ъ , и҆збавлѧ́ѧи ва́съ ст҃ы́и і҆и҃левъ .

Ѿ премꙋ́дрᲂсти сᲂло́мᲂни , чте́нїе .

Пра́ведныхъ дш҃а в̾ рꙋцѣ̀ бж҃їи , и҆ неприко́снетсѧ и҆́хъ мꙋ́ка . непщева́ни бы́ша во ѻ҆́чїю безꙋ́мныхъ ᲂу҆́мрети , и҆ вмѣни́сѧ ѡ҆ѕлᲂбле́нїе и҆схо́дъ и҆́хъ , и҆ є҆́же ѿ на́съ ше́ствїе сᲂкрꙋше́нїе , ѻ҆ни́же сꙋ́ть в̾ ми́рѣ . и҆́бо пред̾ лице́мъ чл҃ческимъ а҆́ще и҆ мꙋ́кꙋ прїи́мꙋтъ , ᲂу҆пᲂва́нїе и҆́хъ без̾сме́ртїѧ и҆спо́лнь . и҆ ма́лымъ пᲂка́зани бы́ша , вели́каѧ вᲂспрїи́мꙋтъ , ꙗ҆́кѡ бг҃ъ и҆скꙋсѝ и҆́хъ , и҆ ѡ҆брѣ́те и҆́хъ дᲂсто́йны себѣ̀ . ꙗ҆́кѡ зла́то в̾ гᲂрни́лѣ и҆скꙋсѝ и҆́хъ , и҆ ꙗ҆́кѡ всепло́днꙋ же́ртвꙋ прїѧ́тъ и҆́хъ . и҆ во́ времѧ пᲂсѣще́нїѧ и҆́хъ вᲂз̾сїѧ́ютъ , и҆ ꙗ҆́кѡ и҆́скры по сте́блїю пᲂтекꙋ́тъ . сꙋ́дѧтъ ꙗ҆зы́кѡмъ , и҆ ѡ҆блада́ютъ людьмѝ , и҆ вᲂцр҃и́тсѧ гдⷭ҇ь в̾ ни́хъ во́ вѣки . надѣ́ющїисѧ на́нь разꙋмѣ́ютъ и҆́стинꙋ , и҆ вѣ́рнїи любо́вїю пребꙋ́дꙋтъ в̾ не́мъ . ꙗ҆́кѡ бл҃гᲂда́ть и҆ млⷭ҇ть в̾ прпⷣбныхъ є҆гѡ̀ , и҆ пᲂсѣще́нїе во и҆збра́нныхъ є҆гѡ̀ .

Ѿ премꙋ́дрᲂсти сᲂло́мᲂни , чте́нїе .

Пра́ведникъ а҆́ще пᲂсти́гнетъ скᲂнча́тисѧ , в̾ пᲂко́й бꙋ́детъ . ста́рᲂсть бо честна̀ не мнᲂгᲂлѣ́тна ни в̾ числѣ̀ лѣ́тъ и҆счита́етсѧ . сѣди́ны же сꙋ́ть , мꙋ́дрᲂсть челᲂвѣ́кѡмъ . и҆ во́зрастъ ста́рᲂсти , житїѐ нескве́рно . бл҃гᲂꙋго́денъ бг҃ᲂви бы́въ , вᲂз̾лю́бленъ бы́сть . и҆ живы́и пᲂсредѣ̀ грѣ́шникъ , преста́вленъ бы́сть . вᲂсхище́нъ бы́сть , да не ѕло́ба и҆змѣни́тъ ра́зꙋма є҆гѡ̀ , и҆лѝ ле́сть прельсти́тъ дш҃ꙋ є҆гѡ̀ . раче́нїе бо ѕло́е , гꙋби́тъ до́браѧ , и҆ паре́нїе по́хᲂти , премѣнѧ́етъ ᲂу҆́мъ неѕло́бивъ . скᲂнча́всѧ в̾ ма́лѣ , и҆спо́лни лѣ́та мно́га , ᲂу҆го́дна бо бѣ̀ гдⷭ҇ви дш҃а є҆гѡ̀ . сего̀ ра́ди пᲂтща́сѧ ѿ среды̀ ѕло́бы . лю́дїе же ви́дѣвше и҆ неразꙋмѣ́вше , ни пᲂлᲂжи́ша в̾ пᲂмышле́нїи такᲂва́гѡ , ꙗ҆́кѡ бл҃гᲂда́ть и҆ млⷭ҇ть в̾ прпⷣбныхъ є҆гѡ̀ , и҆ пᲂсѣще́нїе во и҆збра́нныхъ є҆гѡ̀ .

На литі́и , стихѣ́ры . гла́съ , д҃ . Ꙗ҆́кѡ ѕвѣзда̀ пресвѣ́тлаѧ ми́ръ прᲂсвѣща́ющи , чꙋде́сными блиста́нїи , страстᲂте́рпче вели́кїи кн҃же геѡ́ргїе , мра́къ грѣхо́вныи ѿгᲂнѧ́ѧ . тѣ́мъ вᲂсхвалѧ́емъ ра́дᲂстнѡ , тᲂржествꙋ́юще твᲂю̀ па́мѧть . Ка́плѧми кро́ве твᲂеѧ̀ , ѡ҆червлени́въ ри́зы свᲂѧ̀ страстᲂте́рпче геѡ́ргїе . тѣ́мъ ве́селымъ срⷣцемъ , па́мѧть твᲂю̀ пра́зднꙋюще , мо́лимсѧ непреста́ннѡ , да мо́лишисѧ ко́ гдⷭ҇ꙋ за дш҃а на́ша . Свѣтᲂза́рнаѧ и҆ ст҃а́ѧ , наста̀ па́мѧть вели́кагѡ кн҃зѧ и҆ стрⷭ҇тᲂте́рпца геѡ́ргїѧ , ꙗ҆́же рꙋ́с̾скꙋю зе́млю прᲂсвѣща́ющи , и҆ мра́къ грѣхо́вныи ѿгᲂнѧ́ющи , и҆сцѣле́нїемъ бл҃гᲂда́ть всѣ́мъ и҆стᲂча́етъ . сла́ва . гла́съ , в҃ . Разꙋ́мнагѡ свѣти́льника вѣ́ры , геѡ́ргїѧ вᲂсхва́лимъ , до́брѣ пᲂстрада́вшагѡ , и҆ кро́вїю мꙋче́нїѧ свᲂегѡ̀ цр҃кᲂвь ѡ҆багри́вша . тѣ́мъ и҆ прїѧ́тъ и҆сцѣле́нїѧ да́ръ ѡ҆би́льныи , и҆сцѣлѧ́ти недꙋ́ги , вѣ́рнѡ прихᲂдѧ́щимъ к̾ ра́цѣ мᲂще́й є҆гѡ̀ . и҆ ны́нѣ , боⷢ҇ . и҆лѝ , пра́здникꙋ .

На стихо́внѣ , стихѣ́ры . гла́съ , в҃ . поⷣ . до́ме є҆в̾фра́фᲂвъ . Въ рꙋ́с̾стѣй землѝ ,꙳ ꙗ҆́кᲂже сл҃нце вᲂсїѧ̀ ,꙳ зарѧ́ми страда́нїѧ .꙳ всѣ́хъ привлача̀ срⷣца̀ и҆ пᲂмышле́нїѧ ,꙳ к̾ твᲂи́мъ чꙋдесе́мъ пресла́вне .

сти́х̾ : пра́ведникъ ꙗ҆́кѡ фи́никъ прᲂцвѣте́тъ ,꙳ и҆ ꙗ҆́кѡ ке́дръ и҆́же в̾ лива́нѣ ᲂу҆мно́житсѧ . Рꙋ́с̾скаѧ племена̀ всѧ̀ ,꙳ є҆ли́ка бл҃гᲂчести́ваѧ ,꙳ дх҃о́внѣ ликᲂствꙋ́йте пѣ́сньми ,꙳ вели́кагѡ кн҃зѧ ,꙳ геѡ́ргїѧ пᲂстрада́вшагѡ .

сти́хъ : насажде́нъ въ дᲂмꙋ̀ гдⷭ҇ни ,꙳ во дво́рѣхъ до́мꙋ бг҃а на́шегѡ прᲂцвѣтꙋ́тъ . Пᲂслѣ́днимъ си́мъ времене́мъ ,꙳ ты̀ красᲂта̀ пᲂказа́сѧ ,꙳ мч҃нкѡмъ ѡ҆бнᲂвлѧ́ѧ страда́нїѧ .꙳ и҆ до кᲂнца̀ низ̾лага́ѧ ,꙳ пре́лесть бл҃же́нне дꙋшегꙋ́бнꙋю .

сла́ва . гла́с̾ , и҃ . Лꙋка́вᲂе и҆ невѣ́рнᲂе ѕлᲂсᲂвѣ́тїе баты́ево прᲂразꙋмѣ́въ , бл҃гᲂвѣ́рныи вели́кїи кн҃же геѡ́ргїе , де́рзᲂстїю дх҃о́внᲂю по хрⷭ҇тѣ̀ пᲂдвиза́всѧ съ дрꙋжи́нᲂю , и҆ кꙋ́пнѡ до́блественѣ мꙋ́жески терпѣ́нїемъ пᲂстрада́вше . глава́мъ ᲂу҆сѣка́емымъ , стра́шенъ въ мч҃нцѣхъ пᲂказа́сѧ . дерзнᲂве́нїе и҆мѣ́ѧ к̾ бг҃ꙋ , мᲂлѝ ѿ прегрѣше́нїи лю́тыхъ , и҆зба́витисѧ дш҃а́мъ на́шимъ . и҆ нн҃ѣ , боⷢ҇ . и҆лѝ , пра́здникꙋ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ , двⷤа . и҆ бцⷣе дв҃о ра́дꙋисѧ ,= аⷤ .=

На ᲂу҆́трени . по а҃ , стихᲂло́гїи , сѣда́лен̾ . гла́с̾ , д҃ . Геѡ́ргїѧ дне́сь страстᲂте́рпца , пра́здникъ сᲂтвᲂрѧ́емъ бг҃ᲂмꙋ́дрено . ꙗ҆́кѡ хрⷭ҇то́ви непреста́ннѡ мᲂлѧ́щасѧ , всѣ́мъ да́ти ми́ръ и҆ млⷭ҇ть . двⷤа . сла́ва , и҆ ны́нѣ , боⷢ҇ . Те́плᲂе застꙋпле́нїе сꙋ́щимъ въ бѣда́хъ , на́шꙋ пᲂмо́щницꙋ и҆ к̾ бг҃ꙋ премѣне́нїе , є҆ѧ́же ра́ди тлѧ̀ и҆зба́вихᲂмсѧ , бцⷣꙋ вѣ́рнїи ᲂу҆бл҃жа́емъ .

По в҃ , стихᲂло́гїи , сѣда́ленъ . гла́съ , д҃ . Па́мѧть твᲂѧ̀ сла́вне мч҃нче геѡ́ргїе , ᲂу҆ѧснѝ дне́сь цр҃кᲂвь хрⷭ҇то́вꙋ , и҆ всѧ̀ сᲂбра̀ , пѣ́сньми по дᲂстᲂѧ́нїю вᲂсхвали́ти тѧ̀ бг҃ᲂмꙋ́дре , ꙗ҆́кѡ вᲂи́стинꙋ во́ина , и҆ враго́мъ пᲂтреби́телѧ . тѣ́мже мᲂльба́ми твᲂи́ми , и҆зба́ви на́съ ѿ и҆скꙋше́нїй . двⷤа . сла́ва , и҆ ны́нѣ , боⷢ҇ . Пᲂе́мъ тѧ̀ бг҃ᲂневѣ́сто мт҃и хрⷭ҇та̀ бг҃а , сла́вѧще ржⷭ҇тво̀ твᲂѐ непᲂсти́жимᲂе . и҆́мже и҆зба́вихᲂмсѧ ѿ́ лести дїѧ́вᲂли , и҆ всѧ́ческихъ бѣ́дъ , влⷣчце бцⷣе . и҆ вѣ́рнѡ взыва́емъ , пᲂми́лꙋй ста́до свᲂѐ , є҆ди́на всепѣ́таѧ .

по хвали́те и҆́мѧ гдⷭ҇не , припѣ́в̾ : Велича́емъ тѧ̀ страстᲂте́рпче хрⷭ҇то́въ кн҃же геѡ́ргїе , и҆ чте́мъ честна́ѧ страда́нїѧ твᲂѧ̀ , ꙗ҆́же за хрⷭ҇та̀ претерпѣ́лъ є҆сѝ . ѱл҃о́мъ и҆збра́нныи : бг҃ъ на́мъ прибѣ́жище и҆ си́ла .

По пᲂлїєлеѡ́сѣ , сѣда́ленъ . гла́съ , и҃ . Сїѧ́нїи чꙋде́съ , ꙗ҆́кѡ лꙋчѝ ѡ҆блиста́еши , и҆ всѧ̀ прᲂсвѣща́еши ми́рᲂви кᲂнцы̀ , ꙗ҆́кѡ ѕвѣзда̀ пресвѣ́тлаѧ . и҆ краснѡ̀ бл҃гᲂꙋха́еши ꙗ҆́кᲂже дрꙋгі́и ра́й . и҆ дш҃а весели́ши , и҆ ᲂу҆ставлѧ́еши недꙋ́ги . тѣ́мже тѧ̀ всебл҃же́нне по́ дᲂлгꙋ пᲂе́мъ , и҆ любо́вїю пᲂчита́емъ честнꙋ́ю па́мѧть твᲂю̀ . стрⷭ҇тᲂте́рпче вели́кїи кн҃же геѡ́ргїе . мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , чтꙋ́щимъ любо́вїю ст҃ꙋ́ю па́мѧть твᲂю̀ . вⷤ . сла́ва , и҆ ны́нѣ , боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ ᲂу҆бл҃жа́емъ ро́ди чл҃честїи . ѻ҆́гнь бо всели́сѧ в̾ тѧ̀ бжⷭ҇твенныи , и҆ ꙗ҆́кѡ младе́нца дᲂи́ши зижди́телѧ и҆ гдⷭ҇а . тѣ́мже а҆́гг҃льскїи сᲂбо́ръ и҆ чл҃ческїи ро́дъ , без̾преста́ни сла́вимъ прест҃о́е ржⷭ҇тво̀ твᲂѐ . и҆ сᲂгла́снѡ вᲂпїе́мъ ти , мᲂлѝ хрⷭ҇та̀ бг҃а , грѣхо́въ ѡ҆ставле́нїе дарᲂва́ти , вᲂспѣва́ющимъ дᲂсто́йнѡ сла́вꙋ твᲂю̀ .

степе́нна , д҃ го гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . вᲂз̾весели́тсѧ пра́ведникъ ѡ҆́ гдⷭ҇ѣ , и҆ ᲂу҆пᲂва́етъ на́нь . сти́хъ . ᲂу҆слы́ши бж҃е мᲂли́твꙋ мᲂю̀ , внегда̀ мᲂли́тимисѧ къ тебѣ̀ . всѧ́ко дыха́нїе . є҆ѵⷢ҇а́лїе , ѿ =матѳе́ѧ . заⷱ҇ , л҃ѕ . ѱало́мъ , н҃ . =сла́ва . мл҃твъ ра́ди страстᲂте́рпча .

и҆ ны́нѣ . мл҃твъ ра́ди бцⷣы . пᲂми́лꙋй мѧ бж҃е . стихѣ́ра . гла́съ , ѕ҃ . Дне́сь цр҃квь тᲂржествꙋ́етъ , страстᲂте́рпца красѧ́щисѧ по́двиги , ꙗ҆́кѡ мнᲂгᲂцѣ́ннᲂю ѻ҆де́ждею , и҆ вᲂпїе́тъ хва́лѧщисѧ , сицева̀ мᲂѧ̀ рᲂжде́нїѧ , такᲂвы̀ мᲂѝ сн҃ᲂве , и҆́хже пе́рвїе пᲂрᲂди́хъ кр҃ще́нїемъ . вᲂспита́хъ же стра́хᲂмъ гдⷭ҇нимъ . и҆ ны́нѣ мч҃нки ви́жꙋ , и҆́стинѣ вѣне́чники и҆з̾бра́нны , да мо́лѧтсѧ ѡ҆ вселе́ннѣй ко́ гдⷭ҇ꙋ .

Кано́нъ , бцⷣѣ , на́ ѕ҃ . гла́съ , в҃ . нетре́нꙋ не ѡ҆бы́чнꙋ .= кано́нъ , ст҃о́мꙋ , на и҃ . гла́съ , д҃ . пѣ́снь , а҃ . і҆рмо́съ . Ѿ=ве́рзꙋ ᲂу҆ста̀ мᲂѧ̀ , и҆ напо́лнѧтсѧ дх҃а , и҆ сло́во ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ тᲂржествꙋ́ѧ , и҆ вᲂспᲂю̀ ра́дꙋѧсѧ тᲂѧ̀ чꙋдеса̀ .

запѣ́въ : Ст҃ы́и страстᲂте́рпче кнѧ́же геѡ́ргїе , мᲂлѝ бг҃а ѡ҆ на́съ . Нᲂвᲂꙗ҆вле́нъ мч҃нкъ бл҃же́нне геѡ́ргїе , вселе́ннѣй на пᲂслѣ́дᲂкъ ꙗ҆ви́сѧ . тѣ́мже мѝ пᲂда́ждь сло́во твᲂѐ бж҃їею бл҃гᲂда́тїю , твᲂѧ̀ по́двиги вᲂспѣ́ти по дᲂстᲂѧ́нїю . Во́инствᲂмъ дᲂстᲂчꙋ́днымъ , твᲂегѡ̀ сᲂпрᲂтивле́нїѧ пᲂбѣ́днаѧ прїѧ́хᲂмъ , на мꙋчи́телѧ є҆стествꙋ̀ . сᲂверше́нѣ бо пᲂсра́мленъ бы́сть , не к̾тᲂмꙋ̀ мꙋчи́тельскаѧ дерза́ти начина́етъ . сла́ва . Ѻ҆дѣ́ѧвсѧ во брᲂнѧ̀ и҆спᲂвѣ́данїемъ вѣ́ры . и҆ шле́мъ вᲂз̾лᲂжи́въ бл҃гᲂда́ти свѣтлѣ́йшїи . и҆ ꙗ҆зы́кѡмъ же геѡ́ргїе бл҃гᲂвѣща́ннымъ , ꙗ҆́кᲂже мече́мъ с̾сѣчѐ ѻ҆каѧ́ннаго баты́ѧ . и҆ ны́нѣ , боⷢ҇ . Гᲂра̀ превысо́каѧ , ю҆́же ви́дѣ данїи́лъ , ка́мень ѿ гᲂры́ же ѿсѣче́сѧ мꙋ́жески , рꙋ́къ крᲂмѣ̀ , тебѐ прᲂѡ҆бразᲂва̀ бцⷣе . без̾ мꙋ́жа бо на́мъ пло́тїю рᲂдила̀ є҆м̾манꙋ́ила .

пѣ́снь , г҃ . і҆рмо́съ . Твᲂѧ̀ пѣвцы̀ бцⷣе , живы́и нетлѣ́нїѧ и҆сто́чниче , ли́къ себѣ̀ сᲂвᲂкꙋ́пльши дх҃о́венъ ᲂу҆твердѝ , и҆ в̾ бжⷭ҇твеннѣй ти сла́вѣ , вѣнце́мъ сла́вы спᲂдо́би . Мꙋ́ками ꙗ҆́кѡ зла́то честно́е и҆скꙋси́сѧ , страда́льче сла́вне , и҆ цр҃е́ви си́ламъ принесе́сѧ , всепло́дїе слᲂвесѝ и҆́стинно , в̾мѣ́стѡ ѻ҆гнѧ̀ ѻ҆лта́рнагѡ , мече́мъ и҆стнѣ́емо . Съ ва́рварᲂмъ бра́всѧ , и҆ сего̀ пᲂбѣди́лъ є҆сѝ , ѿ хрⷭ҇та̀ дерзнᲂве́нїе прїи́мъ , мно́гꙋ печа́ль бѣсо́мъ сᲂтвᲂри́лъ є҆сѝ . ст҃ы́мъ же а҆́гг҃лѡмъ весе́лїе и҆ ра́дᲂсть , с̾ ни́миже вᲂдвᲂрѧ́ешисѧ . сла́ва . Ма́слина плᲂдᲂви́таѧ , въ цр҃кви жива́гѡ бг҃а , твᲂи́хъ мᲂще́й ра́ка ны́нѣ ꙗ҆ви́сѧ . ѿ неѧ́же прїе́млемъ разли́чнаѧ недꙋ́гѡмъ и҆сцѣле́нїѧ , и҆́же тᲂбо́ю ѡ҆бᲂга́щьшїисѧ , и҆ чꙋдесы̀ твᲂи́ми красѧ́щїисѧ .= и҆ ны́нѣ , боⷢ҇ . Р=ечѐ бжⷭ҇твенныи і҆єзекі́иль , и҆ бꙋ́детъ две́рь затвᲂре́на , и҆ сїѐ на тебѣ̀ и҆спо́лнисѧ влⷣчце . вни́де бо несказа́ннѡ в̾ тѧ̀ ѻ҆́ч҃ее сло́во . и҆ ми́рᲂви ꙗ҆ви́сѧ плᲂтᲂно́сецъ и҆з̾ тебѐ дв҃о , сᲂхрани́въ тѧ̀ во ѡ҆бᲂи́хъ .

сѣда́ленъ . гла́съ , и҃ . Премꙋ́дрᲂсти рачи́тель бы́въ , сᲂкро́вище дᲂбрᲂдѣ́телемъ , ѿ нꙋ́дꙋ же и҆ пᲂчерпѐ бжⷭ҇твеннаѧ разꙋмѣ́нїѧ . тѣ́мже и҆ вре́мени прише́дшꙋ , къ пᲂдвиго́мъ ᲂу҆се́рднѡ пᲂдви́гсѧ , прїе́млѧ мч҃нческїѧ ра́ны , главѣ̀ ᲂу҆сѣче́нїе , и҆ кро́ви и҆стече́нїе . и҆ ны́нѣ живе́ши в̾ неи҆зрече́ннѣ свѣ́тѣ съ мч҃нки . тѣ́мже вᲂпїе́мъ тѝ , мᲂлѝ хрⷭ҇та̀ бг҃а . грѣхо́въ ѡ҆ставле́нїе дарᲂва́ти , пᲂклᲂнѧ́ющимсѧ вѣ́рᲂю ст҃ы́мъ мᲂще́мъ твᲂи́мъ . двⷤа . сла́ва , и҆ ны́нѣ , боⷢ҇ . Пᲂмышлѧ́ю сꙋ́дъ и҆ и҆спыта́нїѧ страшна́ѧ , трепе́щꙋ , и҆ ᲂу҆жаса́юсѧ мꙋ́къ , и҆ ѻ҆гнѧ̀ бᲂлѣ́знь , и҆ тмꙋ́ же и҆ та́ртаръ , ᲂу҆вы̀ что̀ сᲂтвᲂрю̀ . стꙋ́дъ ка́кѡ претерплю̀ , є҆гда̀ кни́ги ра́згнꙋтсѧ , и҆ дѣѧ́нїѧ ѡ҆блича́тсѧ . сего̀ ра́ди припа́даю тѝ бцⷣе пречⷭ҇таѧ , тᲂгда̀ пред̾ста́ни ми нꙋ́жды ѻ҆́нᲂѧ и҆зима́ющи . тебе́ бо и҆́мамъ прибѣ́жище влⷣчце .

пѣ́снь , д҃ . і҆рмо́съ . Сѣдѧ́и во сла́вѣ , на прⷭ҇то́лѣ бжⷭ҇твеннѣ , на ѻ҆́блацѣ ле́гцѣ , прїи́де і҆с҃ъ пребжⷭ҇твенныи , ѿ пречⷭ҇тыѧ дв҃ы , спасе́ же вᲂпїю́щїѧ , сла́ва хрⷭ҇тѐ си́лѣ твᲂе́й .= Настꙋпи́въ на ва́рварскᲂе стремле́нїе , и҆ пᲂпра́въ сего̀ мч҃нче . рᲂсо́ю с̾ нб҃съ бжⷭ҇твенѡ ѡ҆багати́сѧ взыва́ѧ хрⷭ҇тꙋ̀ , сла́ва си́лѣ твᲂе́й гдⷭ҇и . Па́че смы́сла стрⷭ҇тᲂте́рпца твᲂегѡ̀ любы̀ , превᲂсхо́дитъ всѧ̀ пᲂмышле́нїѧ сло́ве . бᲂре́нїѧ и҆ мꙋ́жественыѧ по́двиги , и҆ натрижне́нїѧ , ꙗ҆́же пᲂда́стъ зако́ннѡ є҆мꙋ̀ пᲂстрада́ти . =сла́ва . Ꙗ҆́кѡ до́бръ во́инъ , ꙗ҆́кѡ непᲂбѣди́мъ мч҃нкъ , ꙗ҆́кѡ хрⷭ҇то́ви храбо́ръ , и҆ ꙗ҆́кѡ бл҃гᲂче́стїѧ пᲂбо́рникъ , нбⷭ҇наѧ селе́нїѧ наслѣ́дᲂвавъ , лико́мъ а҆́гг҃льскимъ всегда̀ с̾веселѧ́сѧ . и҆ ны́нѣ , боⷢ҇ . И҆з̾ѡ҆бразᲂва́ше въ чермнѣ́мъ , прᲂше́ствїе дре́вле і҆и҃лево , без̾мꙋ́жнᲂе твᲂѐ ржⷭ҇тво̀ всецр҃це . ꙗ҆́кᲂже бо ѻ҆́нъ тᲂгда̀ пре́йде немо́крено , та́кѡ и҆ хрⷭ҇то́съ без̾сѣ́меннѡ , ѿ твᲂи́хъ пречⷭ҇тыхъ крᲂве́й прᲂизы́де дв҃о .

пѣ́снь , є҃ . і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твᲂе́й , ты́ бо бракᲂнеи҆скꙋси́маѧ дв҃це , прїѧ́тъ во ᲂу҆тро́бѣ надᲂвсѣ́ми сꙋ́щагѡ бг҃а , и҆ рᲂдила̀ є҆сѝ без̾лѣ́тнагѡ сн҃а , всѣ́мъ вᲂспѣва́ющимъ тѧ̀ ми́ръ пᲂдава́юща . Ра́намъ тѣ́ло твᲂѐ , вели́кїи кн҃же геѡ́ргїе примѣси́сѧ . и҆ ᲂу҆́зами мнᲂгᲂѡ҆бра́зныхъ мꙋ́къ , мѵ́ро бл҃гᲂво́нно . тѣ́мъ и҆стᲂча́етъ на́мъ бл҃гᲂꙋха́ющи дш҃а , вѣ́рᲂю несꙋмѣ́ннᲂю тѧ̀ пᲂчита́ющимъ всегда̀ . Крᲂпле́нїемъ кро́ве твᲂеѧ̀ , пᲂгаси́лъ є҆сѝ ᲂу҆́глїе сꙋрᲂвства̀ баты́ева , стрⷭ҇тᲂте́рпче . бжⷭ҇твенныхъ чꙋде́съ ѻ҆гне́мъ премꙋ́дре , ти́нꙋ страстнꙋ́ю лю́тыхъ пᲂжига́ѧ , вели́кᲂю бл҃гᲂда́тїю сп҃сᲂвᲂю геѡ́ргїе . сла́ва . Ко́ль стра́шно же и҆ сла́внѡ ѡ҆ хрⷭ҇тѣ̀ сᲂпрᲂтивле́нїе твᲂѐ , є҆мꙋ́же пᲂчꙋди́шасѧ племена̀ ѡ҆брѣ́тшаѧсѧ на по́двизѣ , и҆ пᲂхва́лиша терпѣ́нїе . ва́рвари же пᲂсрами́шасѧ стꙋдо́мъ ѡ҆бле́кшесѧ . и҆ ны́нѣ , боⷢ҇ . Гᲂрѣ̀ бѧ́ше сᲂприснᲂсꙋ́щенъ ѻ҆ц҃ꙋ , и҆ бг҃ꙋ бг҃ъ сло́во . и҆ с̾ на́ми бг҃ъ и҆ чл҃къ бцⷣе . тᲂбо́ю сше́дъ к̾ на́шемꙋ смире́нїю , свᲂбᲂжда́ѧ ѿ клѧ́твы пра́дѣднїѧ . тебе́ бо ви́дѣ патрїа́рхъ і҆а́кѡвъ лѣ́ствицꙋ нбⷭ҇нꙋю .

пѣ́снь , ѕ҃ . і҆рмо́съ . Бжⷭ҇твеннᲂе сѐ и҆ всечⷭ҇тно́е сᲂверша́юще пра́зднество , бг҃ᲂмꙋ́дрїи бж҃їѧ мт҃ре , прїиди́те рꙋка́ми вᲂспле́щемъ , ѿ неѧ̀ ро́ждьшагᲂсѧ вѣ́рᲂю сла́вѧще . Ника́кᲂже пᲂкᲂлѣба̀ стᲂлпа̀ бл҃гᲂче́стїѧ , свирѣ́пство ва́рварскᲂе . нижѐ преще́нїе баты́ево , нижѐ ме́чнᲂе ᲂу҆сѣче́нїе , ни ра́ны ни сме́рть нꙋ́жнѣйшаѧ . Взыгра́шасѧ свѣ́тлѡ мч҃нчестїи тᲂгда̀ ли́кᲂве , ви́дѣвше твᲂѐ дерзнᲂве́нїе , и҆ прини́кше сᲂвᲂкꙋпле́нѡ , со а҆́гг҃лы неви́димѡ ᲂу҆крѣплѧ́хꙋ тѧ̀ в̾ по́двизѣ . сла́ва . Тѣле́съ стра́сти неи҆сцѣ́льныѧ , бж҃їею бл҃гᲂда́тїю и҆сцѣли́лъ є҆сѝ , вели́кїи кн҃же геѡ́ргїе . мѵ́ро бл҃гᲂꙋха́ющее и҆стᲂча́ѧ ᲂу҆́бѡ , твᲂи́мъ честны́мъ мᲂще́мъ прикаса́ющимсѧ . и҆ ны́нѣ , боⷢ҇ . Ѻ҆бра́знѣ рꙋно̀ гедеѡ́нъ прїѧ́тъ ѡ҆рᲂше́но , твᲂѐ пред̾вᲂзвѣща́ѧ чꙋ́до . сни́де бо ꙗ҆́кѡ до́ждь на рꙋно̀ бцⷣе , є҆ди́ныи ѿ трⷪ҇цы во ᲂу҆тро́бꙋ твᲂю̀ вᲂплᲂща́емь .

кᲂнда́къ . гла́съ , и҃ . Хрⷭ҇то́вѣ сме́рти пᲂдо́бѧсѧ , и҆ тᲂгѡ̀ и҆спи́ти ча́шꙋ вᲂз̾желѣ́въ ꙗ҆́кѡ живᲂта̀ . за него́же мꙋ́жески пᲂдвиза́всѧ , презрѣ́въ земно́е црⷭ҇тво . ѿ без̾бо́жныхъ ва́рваръ пᲂстрада́въ до сме́рти , геѡ́ргїе бг҃ᲂмꙋ́дре . тѣ́мъ мᲂлѝ спасти́сѧ на́мъ , мᲂли́твами твᲂи́ми . и҆́кᲂсъ . Кто̀ и҆з̾гл҃етъ си́лы гдⷭ҇нѧ ; и҆лѝ кто̀ и҆спᲂвѣ́сть страда́нїѧ твᲂѧ̀ , и҆ дᲂбрᲂдѣ́тели мч҃нче ; и҆лѝ кі́и ꙗ҆зы́къ вᲂспѣ́ти вᲂз̾мо́жетъ по дᲂсто́инствꙋ ; тѣ́мже и҆ а҆́зъ недᲂсто́йныи пᲂкꙋша́юсѧ , хвали́ти же и҆ сла́вити влⷣкꙋ жизнᲂда́вца , да́вшаго тебѣ̀ на ва́рвары де́рзᲂсть , ѕлᲂчести́вагѡ баты́ѧ не ᲂу҆бᲂѧ́тисѧ . и҆спᲂвѣ́дающꙋ тебѐ и҆́стиннаго бг҃а . сего̀ ра́ди тѧ̀ чте́мъ вѣ́рᲂю и҆ любо́вїю , стрⷭ҇тᲂте́рпче геѡ́ргїе . тѣ́мъ мᲂлѝ спасти́сѧ на́мъ , мᲂли́твами твᲂи́ми .

пѣ́снь , з҃ . і҆рмо́съ . Непᲂслꙋжи́ша тва́ри бг҃ᲂмꙋ́дрїи па́че зижди́телѧ , но ѻ҆́гненнᲂе преще́нїе , мꙋ́жески пᲂпра́вше ра́дᲂвахꙋсѧ пᲂю́ще , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ бл҃гᲂслᲂве́нъ є҆сѝ . На ка́мени бжⷭ҇твеннагѡ ра́зꙋма , ᲂу҆тверди́въ срⷣца свᲂегѡ̀ , стᲂпы̀ сла́вне . враго́въ же ᲂу҆хищре́нїѧ непреврати́ша тѧ̀ вᲂспѣва́юща , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Свѣ́тъ невече́рнїи страда́вшꙋ кро́вїю , вᲂсїѧ̀ тебѣ̀ , и҆ весе́лїе ꙗ҆́вѣ тебѐ прїѧ́тъ , великᲂмч҃нче вᲂспѣва́юща , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . сла́ва . И҆́стиненъ мч҃нкъ , и҆́стиннагѡ хрⷭ҇та̀ бг҃а на́шегѡ страда́лецъ в̾зыва́ше , мꙋче́нїѧ бо , цвѣ́ты бл҃гᲂво́нїѧ в̾мѣнѧ́ю , и҆ крᲂвны́ѧ стрꙋѝ ба́ню кр҃ще́нїѧ . и҆ ны́нѣ , боⷢ҇ . Ри́тᲂрствꙋющїи ꙗ҆зы́къ , без̾гла́сенъ же и҆ недви́жимь , ѡ҆ тебѣ̀ зри́мъ бг҃ᲂра́дᲂваннаѧ . не и҆́мать бо пᲂсти́гнꙋти , непᲂсти́жимагѡ зача́тїѧ , неи҆зрече́ннᲂе рᲂжде́нїе .

пѣ́снь , и҃ . і҆рмо́съ . Ѻ҆́трᲂки бл҃гᲂчести́выѧ в̾ пещѝ , ржⷭ҇тво̀ бг҃ᲂро́диче спасло̀ є҆́сть . тᲂгда̀ ᲂу҆́бѡ ѡ҆бразꙋ́емо , ны́нѣ же дѣ́йствꙋемо , вселе́ннꙋю всю̀ вᲂз̾дви́же пѣ́ти , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . Оу҆бл҃жи́ша тѧ̀ цр҃їе , бл҃гᲂслᲂви́ша ст҃лїе , слы́шаще твᲂѐ мꙋ́жественᲂе терпѣ́нїе . и҆ ко хрⷭ҇тꙋ̀ хᲂда́таѧ стѧжа́вше тѧ . и҆ ны́нѣ прихᲂдѧ́ще честны́мъ тѝ мᲂще́мъ пᲂкланѧ́ютсѧ . Бжⷭ҇твенныи геѡ́ргїи , и҆стᲂча́етъ мѵ́ро бл҃гᲂда́ти , пᲂвелѣва́ѧ вѣ́рнымъ пᲂчерпа́ти , на прᲂсвѣще́нїе и҆ чистᲂтꙋ̀ , взыва́ѧ , гдⷭ҇а по́йте дѣ́ла , и҆ превᲂзнᲂси́те є҆гѡ̀ во́ вѣки . блгⷭ҇ви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Хвалѧ́сѧ ꙗ҆́звами хрⷭ҇то́выми , к̾ вѣ́чнымъ вᲂстечѐ . ꙗ҆́же ѿ́ крᲂве твᲂеѧ̀ ѡ҆багре́нꙋ пло́ть . и҆ свѣ́тлѡ цр҃е́ви си́ламъ пред̾стᲂи́ши с̾ мч҃нки ликꙋ́ѧ . и҆ ны́нѣ , боⷢ҇ . І҆са́їи ᲂу҆́гль дре́вле по́сланъ бы́сть , клеща́ми нᲂси́мь ѿ серафи́ма , и҆ каса́ѧсѧ кᲂмꙋ̀ , грѣхѝ ѡ҆ставлѧ́етъ . клеща́ же ты̀ є҆сѝ дв҃о , бжⷭ҇твенныи ᲂу҆́гль нᲂси́вшаѧ , во ѡ҆ставле́нїе грѣхо́въ чл҃чествꙋ .

пѣ́снь , ѳ҃ . і҆рмо́съ . Всѧ́къ зе́менъ , да взыгра́етсѧ дх҃ᲂмъ прᲂсвѣща́емъ . да ликᲂвствꙋ́етъ же , беспло́тныхъ ᲂу҆мо́въ є҆стество̀ , пᲂчита́ѧ ст҃о́е тᲂржество̀ бж҃їѧ мт҃ре . и҆ да пᲂе́тъ , ра́дꙋйсѧ пребл҃же́ннаѧ , бцⷣе чⷭ҇таѧ прⷭ҇нѡ дв҃о . Во́инъ и҆́стинныи хрⷭ҇то́ва прᲂпᲂвѣ́данїѧ бы́сть геѡ́ргїе , и҆ льстѝ пᲂтреби́тель без̾бо́жїѧ . тѣ́мже и҆ ны́нѣ мл҃твами сѝ пᲂтребѝ , ва́рварскᲂе вᲂста́нїе странѣ̀ на́шей по́д̾нᲂзѣ сла́вне тѣ́хъ низ̾лᲂжѝ . А҆́ще и҆ ѿсѣ́чена бы́сть глава̀ твᲂѧ̀ , и҆ кро́вь и҆злїѧ́сѧ но прильпѐ вѣ́рнѡ и҆ пᲂбѣди́тельнаѧ тᲂбо́ю сᲂверши́шасѧ . тѣ́мже и҆ на на́съ вᲂста́ющихъ си́лᲂю сѝ пᲂсрамѝ , и҆ ꙗ҆вѝ на́съ пᲂбѣди́тели . сла́ва . Лꙋ́къ сᲂкрꙋшѝ нечести́выхъ , стрⷭ҇тᲂте́рпче непᲂбѣди́ме , непра́веднѡ дви́жимыи на твᲂѐ дᲂстᲂѧ́нїе . є҆́же себѣ̀ и҆збра́лъ є҆сѝ вᲂз̾люби́въ . и҆ странꙋ̀ на́шꙋ ᲂу҆твердѝ . да и҆ мы̀ ти́хѡ препрᲂво́димъ жи́тельство . и҆ ны́нѣ , боⷢ҇ . Є҆го́же пррⷪ҇цы прᲂвᲂз̾вѣсти́ша всѝ мнᲂгᲂѡ҆бра́знѣ , и҆ вᲂпло́щ̾шасѧ на́съ ра́ди ѿ тебѐ ви́дѣхᲂмъ бцⷣе , бг҃а и҆ чл҃ка сᲂверше́на , и҆збавлѧ́юща чл҃ки ѿ клѧ́твы пра́дѣднїѧ , твᲂи́ми мᲂли́твами , и҆ вѣ́чныѧ мꙋ́ки свᲂбᲂжда́юща .

свѣти́лен̾ . Свѣ́тꙋ невече́рнемꙋ пред̾стᲂѧ̀ стрⷭ҇то те́рпче , с̾ мч҃нческими ли́ки . вᲂспѣва́ющїѧ тѧ̀ в̾ па́мѧти твᲂе́й , ѿ и҆скꙋше́нїѧ спаса́й мл҃твами свᲂи́ми . сла́ва , и҆ ны́нѣ , боⷢ҇ . Незахᲂди́магѡ свѣ́та нᲂси́ло , прⷭ҇нѡ дв҃о , прᲂсвѣ́щ̾шагѡ сѣдѧ́щихъ во тмѣ̀ невѣ́дѣнїѧ пре́лести , ѡ҆зарѝ и҆ на́мъ грѣ́шнымъ свѣ́тъ сн҃а твᲂегѡ̀ .

На хвали́тѣхъ , стихѣ́ры , на д҃ . гла́съ , а҃ . поⷣ . нбⷭ҇нымъ чино́мъ .= На нб҃си препᲂчи́лъ є҆сѝ веселꙋ́ѧсѧ ,꙳ мᲂлѧ̀ заны̀ прест҃ꙋ́ю трⷪ҇цꙋ ,꙳ млⷭ҇ть пᲂда́ти на́мъ ꙳ и҆ житїѐ ми́рно и҆ без̾грѣ́шно .꙳ ꙗ҆́кѡ в̾ тꙋ̀ вѣ́рꙋющихъ прⷭ҇нѡ ,꙳ скᲂрбе́й ᲂу҆гᲂнза́ти , и҆ ра́дᲂванїе ᲂу҆лꙋчи́ти . =два́жды . Млрⷭ҇дїѧ ра́ди твᲂегѡ̀ ,꙳ и҆сто́чникъ на́мъ да́рꙋй ,꙳ бл҃гᲂда́ти в̾ско́рѣ ра́дᲂсти и҆спо́лнь .꙳ и҆стᲂча́ющь ᲂу҆тѣше́нїе сꙋ́щимъ в̾ печа́лѣхъ .꙳ мᲂлѧ̀ хрⷭ҇та̀ всесла́вне ,꙳ спасти́сѧ дш҃а́мъ на́шимъ . Ты̀ в̾ весе́лїе в̾ше́дъ нетлѣ́емо ,꙳ весе́лїе на́мъ да́ти мᲂлѝ ,꙳ и҆ спастѝ рабы̀ твᲂѧ̀ .꙳ мо́жеши бо геѡ́ргїе ꙳ призыва́ющимъ тѧ̀ бѣды̀ раз̾гна́ти ,꙳ мᲂлѧ̀ хрⷭ҇та̀ и҆ и҆сцѣли́ти бᲂлѧ́щїѧ . сла́ва . глаⷭ҇ , и҃ . Ѿ бл҃гᲂчести́ва ко́рене прᲂзѧ́бъ и҆зрастѐ , ᲂу҆сыне́нїѧ вᲂда́ми напᲂе́нъ ꙗ҆́снѡ , геѡ́ргїе стрⷭ҇тᲂте́рпче . и҆́бо хрⷭ҇то́вѣ цр҃кви , ꙗ҆́кѡ фи́никъ высᲂкᲂве́рхїи прᲂцвѣ́лъ є҆сѝ на́мъ , преꙋцвѣтлева́ѧ вѣ́рныѧ . тѣ́мъ ны́нѣ с̾ мч҃нки пред̾стᲂѧ̀ хрⷭ҇тꙋ̀ , мᲂли́сѧ ѡ҆ дш҃а́хъ на́шихъ . и҆ ны́нѣ , боⷢ҇ . Влⷣчце прїимѝ мл҃твы ра́бъ свᲂи́хъ , и҆ и҆зба́ви на́съ ѿ всѧ́кїѧ нꙋ́жды и҆ печа́ли . Славᲂсло́вїе вели́кᲂе , и҆ ѿпꙋ́стъ .

На литꙋргі́и , бл҃же́нна , ст҃о́мꙋ , на́ и҃ . пѣ́снь г҃ ѧ , и҆ ѕ҃ ѧ . прᲂки́мен̾ , ѱл҃о́мъ дв҃дᲂвъ . ст҃ы́мъ и҆́же сꙋ́ть на землѝ є҆гѡ̀ , ᲂу҆дивѝ гдⷭ҇ь всѧ̀ во́лѧ свᲂѧ̀ в̾ ни́хъ . сти́хъ . пред̾зрѣ́хъ гдⷭ҇а предᲂмно́ю вы́нꙋ , ꙗ҆́кѡ ѡ҆деснꙋ́ю менѐ є҆́сть дасѧ̀ непᲂдви́жꙋ . а҆пⷭ҇лъ , къ є҆фесе́ѡмъ . заⷱ҇ , сл҃г . а҆ллилꙋ́їѧ . вᲂзва́ша пра́веднїи , и҆ гдⷭ҇ь ᲂу҆слы́ша и҆́хъ , и҆ ѿ всѣ́хъ печа́лей и҆́хъ и҆зба́ви и҆́хъ . сти́хъ . мно́ги ско́рби пра́веднымъ , и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь . є҆ѵⷢ҇а́лїе , ѿ =лꙋкѝ . заⷱ҇ , р҃ѕ . прича́стен̾ . р=а́дꙋйтесѧ пра́веднїи ѡ҆́ гдⷭ҇ѣ .

Въ то́йже де́нь слꙋ́жба прпⷣбнᲂмꙋ ѻ҆ц҃ꙋ на́шемꙋ кѷри́лꙋ , нᲂвᲂєзе́рскᲂмꙋ чꙋдᲂтво́рцꙋ . =Ве́черъ , пᲂе́мъ , бл҃же́нъ мꙋ́жь , а҃ , а҆нтифо́нъ . На гдⷭ҇и вᲂзва́хъ , стихѣ́ры , ст҃о́мꙋ , на и҃ . гла́съ , в҃ . поⷣ . є҆гда̀ ѿ́ древа . Вѣ́рᲂю и҆ любо́вїю и҆́стиннᲂю , ми́ра ѿ младе́нства ѿре́ксѧ , ѻ҆́ч҃е прпⷣбне кѷри́ле , ра́дꙋѧсѧ пᲂслѣ́дᲂвалъ є҆сѝ хрⷭ҇тꙋ̀ . и҆ мно́гимъ по́двигᲂмъ пло́ть свᲂю̀ ᲂу҆мертви́лъ є҆сѝ . и҆ бл҃гᲂда́ть и҆сцѣле́нїемъ бᲂга́тнѡ вᲂспрїѧ́лъ є҆сѝ , ᲂу҆ставлѧ́ти недꙋ́ги , и҆ не́мᲂщи разли́чныѧ , и҆ дꙋ́хи лꙋка́выѧ вельмѝ ᲂу҆дави́лъ є҆сѝ . Оу҆краше́нїе и҆́нᲂкѡмъ бы́въ . со́бралъ є҆сѝ не и҆сче́тно мно́жество пѣ́ти гдⷭ҇а , прпⷣбне кѷри́ле . и҆ къ нб҃сѝ всѣ́хъ наста́вилъ є҆сѝ до́брѣ , пᲂслѣ́дꙋющихъ бжⷭ҇твеннымъ тѝ ᲂу҆че́нїемъ , и҆ пᲂдо́бѧщихсѧ твᲂемꙋ̀ житїю̀ дᲂбрᲂдѣ́тельнᲂмꙋ , ѻ҆́ч҃е кѷри́ле . с̾ни́миже тѧ̀ пᲂчита́емъ , сщ҃е́ннѡ въ преставле́нїи тѝ ра́дꙋющесѧ . =гла́съ , а҃ . Прпⷣбне ѻ҆́ч҃е кѷри́ле , любвѐ ра́ди ᲂу҆чи́телѧ свᲂегѡ̀ , всѧ̀ ꙗ҆́же на землѝ преѡ҆би́дѣлъ є҆сѝ . и҆ в̾ пꙋсты́ню всели́всѧ , и҆ пло́ть свᲂю̀ ѕѣ́льнымъ вᲂз̾держа́нїемъ ᲂу҆мертви́лъ є҆сѝ , и҆ по́стническими трꙋды̀ свᲂѐ житїѐ ᲂу҆ѧсни́лъ є҆сѝ , ѿ нꙋ́дꙋ же и҆ ᲂу҆ченикѝ себѣ̀ сᲂбра́въ , и҆ ревнꙋ́ющихъ твᲂемꙋ̀ житїю̀ , и҆ си́хъ хрⷭ҇тꙋ̀ приве́лъ є҆сѝ . є҆го́же мᲂлѝ спастѝ всѣ́хъ на́съ , тѧ̀ пᲂчита́ющихъ . Ѻ҆́ч҃е бг҃ᲂмꙋ́дре кѷри́ле , вᲂз̾держа́нїемъ бг҃ᲂви сᲂє҆динѧ́ѧсѧ , непᲂбѣжде́нъ пребы́сть кᲂва́рствїи бᲂри́телѧ , и҆ ра́бъ ꙗ҆ви́лсѧ є҆сѝ вседержи́телѧ . ѿ нꙋ́дꙋ же пᲂчита́емъ тѧ̀ , и҆ бжⷭ҇твеннꙋю твᲂю̀ па́мѧть вᲂсхвалѧ́юще , ра́дᲂстнѡ вѣ́рᲂю пра́зднꙋемъ . Прпⷣбне ѻ҆́ч҃е кѷри́ле , в̾ пꙋсты́нѧхъ прⷭ҇нѡ и҆ в̾ пеще́рахъ и҆ в̾ гᲂра́хъ вѣ́рᲂю пребыва́ѧ , бг҃а взыска́лъ є҆сѝ . и҆ сего̀ ра́ди ѡ҆брѣ́лъ є҆сѝ ꙗ҆́кᲂже вᲂз̾желѣ̀ , невᲂз̾вра́тно дш҃е́ю . вᲂсхᲂжде́нїи до́брыми всегда̀ , и҆́нѡкъ мно́жество приве́лъ є҆сѝ хрⷭ҇то́ви спаса́емыхъ . Прпⷣбне ѻ҆́ч҃е премꙋ́дре кѷри́ле , бᲂлѧ́щимъ ты̀ ꙗ҆ви́сѧ и҆сцѣле́нїе , и҆ хрᲂмы́мъ хᲂжде́нїе млⷭ҇тивнѡ сᲂтвᲂрѧ́еши , и҆ всѣ́мъ притека́ющимъ съ вѣ́рᲂю къ цѣльбᲂно́снᲂмꙋ гро́бꙋ твᲂемꙋ̀ , прᲂсѧ́щимъ по́мᲂщи и҆ застꙋпле́нїѧ . ты́ же мᲂли́твами свᲂи́ми , и҆сцѣле́нїе недꙋ́гꙋющимъ неѡ҆скꙋ́днѡ пᲂдава́еши . сла́ва . гла́съ , ѕ҃ . И҆́же по ѻ҆́бразꙋ сᲂблю́дъ невреди́мо , ᲂу҆ма̀ влⷣкꙋ на́ страсти па́гꙋбныѧ по́стнически пᲂста́вивъ , и҆ на пᲂдо́бствїе ꙗ҆́кᲂже мо́щно вᲂз̾ше́лъ є҆сѝ . мꙋ́жески бо є҆стество̀ пᲂнꙋ́дивъ , и҆ пᲂтща́лсѧ є҆сѝ хꙋ́ждьшее пᲂкᲂри́ти лꙋ́чшемꙋ , и҆ пло́ть пᲂрабо́тити дх҃ꙋ . тѣ́мже и҆́нᲂкѡмъ ꙗ҆ви́сѧ наста́вникъ , и҆ жи́тель пꙋсты́нныи . до́брѣ текꙋ́щимъ ѡ҆бꙋчи́тель . пра́вило дᲂбрᲂдѣ́телей и҆звѣ́стнᲂе . и҆ ны́нѣ на́ нб҃сѣхъ зерца́лѡмъ разрѣ́ш̾шемсѧ ѻ҆́ч҃е кѷри́ле чи́стѣ зри́ши ст҃ꙋ́ю трⷪ҇цꙋ , нехᲂда́тайственѣ мᲂлѧ́сѧ за чтꙋ́щихъ тѧ̀ вѣ́рᲂю и҆ любо́вїю .= и҆ ны́нѣ , боⷢ҇ . и҆лѝ , пра́здникꙋ . та́же , вы́хᲂдъ . прᲂки́менъ , дню̀ .=

Ѿ премꙋ́дрᲂсти сᲂло́мᲂни , чте́нїе .

Пра́ведникъ а҆́ще пᲂсти́гнетъ скᲂнча́тисѧ , в̾ пᲂко́й бꙋ́детъ . ста́рᲂсть бо честна̀ не мнᲂгᲂлѣ́тна ни в̾ числѣ̀ лѣ́тъ и҆счита́етсѧ . сѣди́ны же сꙋ́ть , мꙋ́дрᲂсть чл҃кѡмъ . и҆ во́зрастъ ста́рᲂсти , житїѐ нескве́рно . бл҃гᲂꙋго́денъ бг҃ᲂви бы́въ , вᲂз̾лю́бленъ бы́сть . и҆ живы́и пᲂсредѣ̀ грѣ́шникъ , преста́вленъ бы́сть . вᲂсхище́нъ бы́сть , да не ѕло́ба и҆змѣни́тъ ра́зꙋма є҆гѡ̀ , и҆лѝ ле́сть прельсти́тъ дш҃ꙋ є҆гѡ̀ . раче́нїе бо ѕло́е , гꙋби́тъ до́браѧ , и҆ паре́нїе по́хᲂти , премѣнѧ́етъ ᲂу҆́мъ неѕло́бивъ . скᲂнча́всѧ в̾ ма́лѣ , и҆спо́лни лѣ́та мно́га , ᲂу҆го́дна бо бѣ̀ гдⷭ҇ви дш҃а є҆гѡ̀ . сего̀ ра́ди пᲂтща́сѧ ѿ среды̀ ѕло́бы . лю́дїе же ви́дѣвше и҆ неразꙋмѣ́вше , ни пᲂлᲂжи́ша в̾ пᲂмышле́нїи такᲂва́гѡ , ꙗ҆́кѡ бл҃гᲂда́ть и҆ млⷭ҇ть в̾ прпⷣбныхъ є҆гѡ̀ , и҆ пᲂсѣще́нїе во и҆збра́нныхъ є҆гѡ̀ .

Ѿ премꙋ́дрᲂсти сᲂло́мᲂни , чте́нїе .

Пра́ведницы во́ вѣки живꙋ́тъ , и҆ ѿ́ гдⷭ҇а мзда̀ и҆́мъ , и҆ пᲂмышле́нїе и҆́хъ пред̾ вы́шнимъ . сего̀ ра́ди прїи́мꙋтъ црⷭ҇твїе бл҃гᲂлѣ́пїѧ , и҆ вѣне́цъ дᲂбро́ты ѿ рꙋкѝ гдⷭ҇ни . ꙗ҆́кѡ десни́цею пᲂкры́етъ и҆́хъ , и҆ мы́шцею защи́титъ и҆́хъ . прїи́метъ всѐ ѡ҆рꙋ́жїе ре́внᲂсти є҆гѡ̀ , и҆ вᲂѡ҆рꙋже́но сᲂтвᲂри́тъ сᲂзда́нїе , в̾ ме́сть враго́мъ . и҆ ѡ҆блече́тъ ѧ҆̀ во брᲂнѧ̀ пра́вды , и҆ вᲂз̾лᲂжи́тъ шле́мъ сꙋ́дъ не лицемѣ́ренъ . и҆ прїи́метъ щи́тъ непᲂбѣди́мъ препᲂдо́бїе . по ѡ҆стри́тъ же напра́сенъ гнѣ́въ во ѡ҆рꙋ́жїи . и҆ пᲂбо́ретъ с̾ ни́мъ ми́ръ на безꙋ́мныѧ . и҆ по́йдꙋтъ правᲂлꙋ́чнѣ стрѣ́лы мо́лнїины , ꙗ҆́кѡ ѿ бл҃гᲂкрꙋ́гла лꙋ́ка ѻ҆блако́въ , на намѣ́ренїе летѧ́тъ . и҆ ѿ пра́щъ ка́менныхъ ꙗ҆́рᲂсти и҆спо́лнь , падꙋ́тъ гра́ды . вᲂзнегᲂдꙋ́етъ на ни́хъ вᲂда̀ мᲂрска́ѧ , рѣ́ки же пᲂтекꙋ́тъ жестᲂча́е . сᲂпрᲂти́въ ста́нетъ и҆́мъ дх҃ъ си́лы . и҆ ꙗ҆́кѡ ви́хᲂръ развѣ́етъ ѧ҆̀ . и҆ ѡ҆пꙋсти́тъ всю̀ зе́млю без̾зако́нїе , и҆ ѕлᲂдѣѧ́нїе преврати́тъ престо́лы си́льныхъ . слы́шите ᲂу҆́бѡ цр҃їе и҆ разꙋмѣ́йте , и҆ накажи́тесѧ сꙋдїѝ кᲂнце́мъ землѝ . внꙋши́те сᲂдержа́щїи мно́жества , и҆ гᲂрдѧ́щїисѧ ѡ҆ наро́дѣхъ ꙗ҆зы́къ , ꙗ҆́кѡ дана̀ бы́сть ѿ́гдⷭ҇а держа́ва ва́мъ , и҆ си́ла ѿ вы́шнѧго .

На литі́и , стⷯры . гла́съ , и҃ . Прпⷣбне ѻ҆́ч҃е кѷри́ле , да́ръ бж҃їи и҆з̾бра́въ са́мъ себѐ прине́слъ є҆сѝ . бдѣ́нїе всено́щнᲂе , и҆ ᲂу҆миле́нїе стѧжа́въ . пᲂꙋче́нїе бжⷭ҇твенѡ . кᲂне́чнᲂе смире́нїе , наде́ждꙋ , вѣ́рꙋ . любо́вь нераствᲂре́нꙋ . трезвѣ́нїе , и҆ млрⷭ҇дїе . и҆́стинᲂе без̾стра́стїе , мл҃твꙋ . и҆́же сто́лпъ тѧ̀ пᲂказа́вше свѣтᲂви́днѣйшїи . гла́съ , в҃ . По ᲂу҆спе́нїи твᲂе́мъ бл҃же́нне , ᲂу҆чи́тельница быва́етъ на́мъ твᲂѧ̀ ра́ка . при́снѡ бо и҆злива́ющимисѧ чꙋдесы̀ вᲂпїѧ̀ , и҆ вᲂз̾вᲂдѧ̀ к̾ трꙋдо́мъ и҆ пᲂдвиго́мъ гл҃ѧ , вᲂз̾люби́те гдⷭ҇а , да ѡ҆брѧ́щете бл҃гᲂда́ть вѣ́чнꙋю . ничто́же па́че є҆гѡ̀ пᲂчти́те , да є҆гда̀ прїи́детъ , и҆ ѡ҆брѧ́щете пᲂко́й со и҆з̾бра́нными . є҆го́же да и҆ мы̀ ᲂу҆лꙋчи́мъ твᲂи́ми мл҃твами . гла́съ , д҃ . Житїѐ нескве́рно , терпѣ́нїе и҆ кро́тᲂсть , и҆ любо́вь нелицемѣ́рнꙋ , вᲂз̾держа́нїе и҆ стᲂѧ́нїе всено́щнᲂе , и҆ ᲂу҆миле́нїе бжⷭ҇твеннᲂе , вѣ́рꙋ и҆ наде́ждꙋ и҆́стиннꙋю , и҆ ми́лᲂванїе ѻ҆́ч҃е стѧжа́въ . и҆ ꙗ҆́кѡ а҆́гг҃лъ по́жилъ є҆сѝ на землѝ съ пло́тїю . кѷри́ле бл҃же́нне , мᲂли́твениче ѡ҆ дш҃а́хъ на́шихъ . Земны́и а҆́гг҃ле , и҆ нбⷭ҇ныи чл҃че бы́лъ є҆сѝ прпⷣбне . и҆сто́чникъ ᲂу҆миле́нїѧ , и҆ ми́лᲂванїѧ , стрꙋѧ̀ пꙋчи́ны грѣ́шникѡмъ пᲂрꙋ́чникъ . ма́слина вᲂи́стинꙋ бж҃їѧ плᲂдᲂви́та , и҆ трꙋдо́въ твᲂи́хъ . ᲂу҆тѣ́ши ли́ца , кѷри́ле чꙋ́дне , вѣ́рнѡ вᲂсхвалѧ́ющимъ тѧ̀ . сла́ва . гла́съ , ѕ҃ . Прпⷣбне ѻ҆́ч҃е кѷри́ле , ꙗ҆вле́нїемъ бж҃їѧ мт҃ре наставлѧ́емь , и҆ тᲂгѡ̀ сїѧ́нїемъ ѡ҆зарѧ́емъ , пꙋсты́ню на ню́же зва́нъ бы́сть дᲂсти́глъ є҆сѝ , и҆ в̾не́й трꙋдᲂлю́бнѡ пᲂдвиза́всѧ . в̾ше́лъ є҆сѝ в̾ незахᲂди́мыи свѣ́тъ ра́зꙋма , и҆дѣ́же мно́гихъ гдⷭ҇ви ревни́телѧ твᲂемꙋ̀ житїю̀ ᲂу҆стро́илъ є҆сѝ . тѣ́мже и҆ по сме́рти ѿ́ бг҃а дарᲂва́нїѧ прїѧ́тъ , бѣ́сы прᲂгᲂни́ти , и҆ и҆сцѣле́нїѧ разли́чнымъ недꙋ́гѡмъ чл҃кѡмъ да́рꙋеши , и҆́же вѣ́рᲂю ѿ дꙋшѝ притека́ющихъ к̾ хра́мꙋ твᲂемꙋ̀ всечⷭ҇тно́мꙋ . мᲂлѝ спастѝ пᲂчита́ющихъ любо́вїю ст҃ꙋ́ю па́мѧть твᲂю̀ . и҆ ны́нѣ , боⷢ҇ . и҆лѝ , пра́здникꙋ .

На стихо́внѣ , стⷯры . гла́съ , а҃ . поⷣ . прехва́льнїи мч҃нцы .= Ѻ҆́=ч҃е прпⷣбне кѷри́ле ,꙳ твᲂѧ̀ кра́снаѧ па́мѧть ,꙳ по́стникѡмъ сᲂбра́нїе и҆ весе́лїе .꙳ чꙋде́съ бо бл҃гᲂда́тїю ꙳ прᲂсла́вилсѧ є҆сѝ ѿ́ бг҃а .꙳ є҆го́же мᲂлѝ ꙳ дарᲂва́ти дш҃а́мъ на́шимъ ,꙳ ми́ръ и҆ ве́лїю млⷭ҇ть .

сти́хъ : честна̀ пре́д̾ гдⷭ҇емъ ,꙳ сме́рть прпⷣбныхъ є҆гѡ̀ . Ѻ҆́ч҃е кѷри́ле прпⷣбне ,꙳ твᲂегѡ̀ ᲂу҆ста́ва по́стнагѡ ,꙳ прᲂти́внїи ᲂу҆бᲂѧ́шасѧ ,꙳ и҆ про́клѧти бы́ша ,꙳ твᲂи́ми непреста́нными мл҃твами всехва́льне .꙳ и҆́бо сᲂжи́тельствꙋюща бг҃а стѧжа́въ в̾ себѣ̀ .꙳ є҆го́же мᲂлѝ ꙳ дарᲂва́ти дш҃а́мъ на́шимъ ,꙳ ми́ръ и҆ ве́лїю млⷭ҇ть .

сти́хъ : бл҃же́нъ мꙋ́жь бᲂѧ́исѧ гдⷭ҇а ,꙳ въ за́по вѣдехъ є҆гѡ̀ вᲂсхо́щетъ ѕѣлѡ̀ . Ѻ҆́ч҃е прпⷣбне кѷри́ле ,꙳ хрⷭ҇та̀ вᲂз̾люби́въ всѧ́кѡ ,꙳ и҆ тᲂгѡ̀ бжⷭ҇твеннымъ стᲂпа́мъ пᲂслѣ́дᲂвалъ є҆сѝ ,꙳ кре́стъ на ра́мо в̾зе́мъ ꙳ не ѡ҆сла́бнѡ ше́ствᲂвалъ є҆сѝ ,꙳ и҆ живе́ши бг҃ᲂно́се дх҃ᲂмъ .꙳ и҆ ны́нѣ мᲂлѝ ꙳ дарᲂва́ти дш҃а́мъ на́шимъ ,꙳ ми́ръ и҆ ве́лїю млⷭ҇ть .

сла́ва . гла́съ , ѕ҃ . Тезᲂи҆мени́то зва́нїе пречⷭ҇тыѧ ꙗ҆́кѡ ᲂу҆слы́шавъ , по́стническими трꙋды̀ себѐ ѡ҆блᲂжи́въ , ми́рᲂви и҆ страсте́мъ себѐ ᲂу҆мертви́въ , и҆ со хрⷭ҇то́мъ и҆з̾во́лилъ є҆сѝ жи́ти . тѣ́мъ и҆ по сме́рти и҆сцѣле́нїѧ и҆стᲂча́етъ гро́бъ тво́й , прпⷣбне кѷри́ле , вѣ́рᲂю притека́ющимъ . но ꙗ҆́кѡ и҆мѣ́ѧ дерзнᲂве́нїе к̾ прᲂславлѧ́емᲂмꙋ во ст҃ы́хъ хрⷭ҇тꙋ̀ , мᲂли́сѧ ѡ҆ и҆́же вѣ́рᲂю сᲂверша́ющихъ па́мѧть твᲂю̀ , и҆ чтꙋ́щихъ трꙋды̀ твᲂѧ̀ , є҆́же за негѡ̀ претерпѣ́лъ є҆сѝ , и҆ на́мъ ᲂу҆лꙋчи́ти дерзнᲂве́нїе , в̾ де́нь сꙋда̀ мо́лимсѧ .

и҆ ны́нѣ , боⷢ҇ . Бцⷣе ты̀ є҆сѝ лᲂза̀ и҆́стиннаѧ , вᲂз̾расти́вшаѧ на́мъ пло́дъ живо́тныи , тебѣ̀ мо́лимсѧ , мᲂли́сѧ влⷣчце съ прпⷣбнымъ , пᲂми́лᲂватисѧ дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , и҃ . Бж҃їимъ дх҃ᲂмъ пᲂдвиза́емь , сле́зъ твᲂи́хъ тꙋ́чами , и҆с̾со́хшее напᲂи́лъ є҆сѝ и҆ беспло́тнᲂе в̾ пꙋсты́ни житїѐ пᲂказа́лъ є҆сѝ . и҆ є҆́же и҆з̾ глꙋбины̀ срⷣца бо́дреными мл҃твами и҆ пᲂсто́мъ , бл҃гᲂдѣѧ́нїѧ трꙋды̀ ᲂу҆плᲂдᲂнᲂси́лъ є҆сѝ . и҆ вселе́ннꙋю всю̀ прᲂсвѣти́лъ є҆сѝ , сїѧ́нїемъ чꙋде́съ твᲂи́хъ , ѻ҆́ч҃е на́шъ кѷри́ле . мᲂлѝ хрⷭ҇та̀ бг҃а спасти́сѧ дш҃а́мъ на́шимъ .= и҆ ны́нѣ , боⷢ҇ . и҆лѝ , пра́здникꙋ .=

На ᲂу҆́трени . по а҃ , стихᲂло́гїи , сѣда́лен̾ . гла́с̾ , г҃ . Ꙗ҆́кѡ беспло́тенъ ѻ҆́ч҃е по́жилъ є҆сѝ на землѝ , превᲂзнᲂсѧ́щаго врага̀ смири́лъ є҆сѝ . тѣ́мже ны́нѣ с̾ невеще́ствеными ли́ки бл҃же́нне вᲂдво рѧ́ѧсѧ , и҆́же та́мѡ бл҃же́нства наслажда́ѧсѧ , пᲂмина́й па́мѧть твᲂю̀ дне́сь пра́зднꙋющихъ , да всѝ ра́дᲂстными пѣ́сньми вᲂспѣва́емъ хрⷭ҇та̀ бг҃а на́шегѡ , и҆́же такᲂвꙋ́ю тебѣ̀ бл҃гᲂда́ть да́вшаго . вⷤ . сла́ва , и҆ ны́нѣ , боⷢ҇ . Бжⷭ҇твеннаѧ бы́сть сѣ́нь сло́ва , є҆ди́на прест҃а́ѧ дв҃о . чистᲂто́ю а҆́гг҃лъ превᲂсхᲂдѧ́щи , и҆́же па́че всѣ́хъ менѐ пе́рсть бы́вшаго , и҆ ѡ҆скверне́на плᲂтьски́ми сᲂгрѣше́нїи , ѡ҆чи́сти мл҃твами сѝ , и҆ бжⷭ҇твенными вᲂда́ми ѡ҆мыва́ющи , и҆ пᲂдаю́щи чи́стаѧ ве́лїю млⷭ҇ть .

По в҃ , стихᲂло́гїи , сѣда́ленъ . гла́съ , и҃ . Стрⷭ҇те́й тмꙋ̀ мᲂли́твами сѝ ѻ҆́ч҃е ѿгна́лъ є҆сѝ . срⷣце свᲂѐ чꙋ́вствеными чи́сто бг҃ᲂви пред̾ста́вилъ є҆сѝ . тѣ́мже в̾ тѧ̀ всели́сѧ бл҃гᲂда́ть дх҃а прест҃а́гѡ , є҆́же вѣ́дѣти бꙋ́дꙋщаѧ , ꙗ҆́кѡ бли́зъ сꙋ́щаѧ ты̀ прᲂѧвлѧ́ѧ . и҆ прᲂси́вшимъ ᲂу҆ тебѐ с̾ вѣ́рᲂю , непло́дствїѧ сᲂꙋ́зъ разрѣши́лъ є҆сѝ . тѣ́мже и҆ мы̀ мо́лимсѧ , прᲂсѝ на́мъ ѿ хрⷭ҇та̀ ми́ра и҆ ве́лїѧ млⷭ҇ти . двⷤа . сла́ва , и҆ ны́нѣ , боⷢ҇ . Ѿ крᲂве́й твᲂи́хъ чⷭ҇таѧ вᲂплᲂще́ннаго бг҃а ро́ждьшаѧ , и҆змѣне́на мѧ при́снѡ грѣхо́въ , и҆ прило́ги лꙋка́вагѡ , бг҃ᲂбл҃гᲂда́тнаѧ ᲂу҆твердѝ срⷣце мᲂѐ бл҃га́ѧ свᲂи́ми мᲂли́твами . ꙗ҆́кѡ да и҆ а҆́зъ бл҃гᲂда́рствено зᲂвꙋ́ ти , бг҃ᲂрᲂди́тельнице мр҃і́е , пᲂми́лꙋй ста́до свᲂѐ , є҆́же стѧжа̀ всенепᲂро́чнаѧ .

По пᲂлїєлеѡ́сѣ , сѣда́ленъ . гла́с̾ , и҃ . Впꙋсты́ню пребл҃же́нне всели́всѧ , и҆ в̾не́й пречⷭ҇тны́и хра́мъ бж҃їѧ мт҃ре вᲂз̾дви́глъ є҆сѝ . и҆ мно́жество и҆́нᲂчествꙋющихъ та́мѡ со́бралъ є҆сѝ гдⷭ҇ви , и҆ с̾ тᲂбо́ю рабо́тающихъ , и҆́хже сᲂхранѝ ѿ всѧ́кᲂгѡ вре́да лꙋка́вагѡ . да всѝ бл҃гᲂда́рствено вᲂпїе́мъ тѝ , пребл҃же́нне кѷри́ле , мᲂлѝ хрⷭ҇та̀ бг҃а , грѣхо́въ ѡ҆ставле́нїе да́рᲂвати , чтꙋ́щимъ любо́вїю ст҃ꙋ́ю па́мѧть твᲂю̀ . вⷤ . сла́ва , и҆ ны́нѣ , боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ ᲂу҆бл҃жа́емъ ро́ди чл҃честїи . ѻ҆́гнь бо всели́сѧ в̾ тѧ̀ бжⷭ҇твенныи , и҆ ꙗ҆́кѡ младе́нца дᲂи́ши зижди́телѧ и҆ гдⷭ҇а . тѣ́мже а҆́гг҃льскїи сᲂбо́ръ и҆ чл҃ческїи ро́дъ , без̾преста́ни сла́вимъ прест҃о́е ржⷭ҇тво̀ твᲂѐ . и҆ сᲂгла́снѡ вᲂпїе́мъ ти , мᲂлѝ хрⷭ҇та̀ бг҃а , грѣхо́въ ѡ҆ставле́нїе дарᲂва́ти , вᲂспѣва́ющимъ дᲂсто́йнѡ сла́вꙋ твᲂю̀ .

степе́нна , д҃ го гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . честна̀ пре́д̾ гдⷭ҇емъ , сме́рть прпⷣбныхъ є҆гѡ̀ . сти́хъ . что̀ вᲂз̾да́мъ гдⷭ҇ви ѡ҆ всѣ́хъ , и҆́хже вᲂз̾да́стъ ми . всѧ́ко дыха́нїе . =є҆ѵⷢ҇а́лїе , ѿ =матѳе́ѧ . заⷱ҇ , м҃г . ѱало́мъ , н҃ .

сла́ва . мл҃твъ ра́ди прпⷣбнагѡ . и҆ ны́нѣ . мл҃твъ ра́ди бцⷣы . пᲂми́лꙋй мѧ бж҃е . стихѣ́ра . гла́съ , ѕ҃ . Тезᲂи҆мени́то зва́нїе пречⷭ҇тыѧ ꙗ҆́кѡ ᲂу҆слы́шавъ , по́стническими трꙋды̀ себѐ ѡ҆блᲂжи́въ , ми́рᲂви и҆ страсте́мъ себѐ ᲂу҆мертви́въ , и҆ со хрⷭ҇то́мъ и҆з̾во́лилъ є҆сѝ жи́ти . тѣ́мъ и҆ по сме́рти и҆сцѣле́нїѧ и҆стᲂча́етъ гро́бъ тво́й , прпⷣбне кѷри́ле , вѣ́рᲂю притека́ющимъ . но ꙗ҆́кѡ и҆мѣ́ѧ дерзнᲂве́нїе к̾ прᲂславлѧ́емᲂмꙋ во ст҃ы́хъ хрⷭ҇тꙋ̀ , мᲂли́сѧ ѡ҆ и҆́же вѣ́рᲂю сᲂверша́ющихъ па́мѧть твᲂю̀ , и҆ чтꙋ́щихъ трꙋды̀ твᲂѧ̀ , є҆́же за негѡ̀ претерпѣ́лъ є҆сѝ , и҆ на́мъ ᲂу҆лꙋчи́ти дерзнᲂве́нїе , в̾ де́нь сꙋда̀ мо́лимсѧ .

Кано́нъ , бцⷣѣ , на́ ѕ҃ . и҆ ст҃о́мꙋ , два̀ кано́на , на́ и҃ . кано́нъ , ст҃о́мꙋ . гла́съ , в҃ . пѣ́снь , а҃ . і҆рмо́съ . Во глꙋбинѣ̀ пᲂтᲂпѝ дре́вле , фараѡни́тскаѧ всѧ̀ во́инства , преѡрꙋже́нꙋ си́лꙋ . вᲂпло́щшеесѧ сло́во , преспѣ́ющїѧ грѣхѝ пᲂтреби́ло є҆́сть , пресла́вныи гдⷭ҇ь , ꙗ҆́кѡ прᲂсла́висѧ .

запѣ́въ : Прпⷣбне ѻ҆́ч҃е кѷри́ле , мᲂлѝ бг҃а ѡ҆ на́съ . Слꙋга̀ бж҃їи бы́въ ѻ҆́ч҃е кѷри́ле , сᲂхрани́лъ є҆сѝ ꙗ҆́кѡ сщ҃е́нникъ спасе́наѧ пᲂвелѣ́нїѧ . мир̾ско́е смꙋще́нїе ѡ҆ста́вилъ є҆сѝ . и҆ крⷭ҇тъ сі́и взе́мъ , и҆ живᲂно́снымъ стᲂпа́мъ всебл҃же́нне пᲂслѣ́до валъ є҆сѝ . Спасе́нїю хᲂда́таѧ с̾вѣ́дыи ра́зꙋмъ бг҃ᲂдх҃нᲂве́нныи , и҆ всѐ писа́нїе бл҃гᲂче́стнѡ прᲂше́лъ є҆сѝ , ѻ҆́ч҃е прпⷣбне кѷри́ле , сщ҃е́нства ѿ нꙋ́дꙋ прїе́мъ сано́внᲂе . Ѿ ю҆́нᲂсти свᲂеѧ̀ ѻ҆́ч҃е ᲂу҆́мъ къ бг҃ꙋ в̾пери́въ , и҆ тлѣ́нными нетлѣ́ннаѧ , ꙗ҆́кѡ до́брыи кꙋпе́цъ и҆скꙋпи́лъ є҆сѝ . тѣ́мже ны́нѣ сᲂше́дшесѧ па́мѧть твᲂю̀ пᲂчита́емъ . боⷢ҇ . Вᲂсїѧ́въ ꙗ҆́кѡ сл҃нце и҆з̾ тебѐ мт҃и при́снѡ дв҃аѧ , и҆́же ѿ ѻ҆ц҃а пре́жде вѣ́къ неви́димыи . и҆́мже пресла́внѡ тѣ́лᲂмъ ѡ҆писꙋ́емь , бл҃гᲂче́стїѧ заре́ю чл҃ки прᲂсвѣти́лъ є҆́сть .

дрꙋгі́и , кано́нъ . гла́съ , в҃ . пѣ́снь , а҃ . і҆рмо́съ . Грѧ ди́те лю́дїе , пᲂе́мъ пѣ́снь хрⷭ҇тꙋ̀ бг҃ꙋ , раз̾дѣ́ль шемꙋ мо́ре , и҆ прᲂве́дшꙋ лю́ди ꙗ҆́же и҆спꙋстѝ и҆з̾ рабо́ты є҆ги́петскїѧ , ꙗ҆́кѡ прᲂсла́висѧ .

запѣ́въ : Прпⷣбне ѻ҆́ч҃е кѷри́ле , мᲂлѝ бг҃а ѡ҆ на́съ . Пѣснᲂсло́вити дᲂстᲂхва́льнꙋю па́мѧть твᲂю̀ ᲂу҆се́рднѡ прпⷣбне . бл҃гᲂда́ть дана́ти кѷри́ле , мᲂлѝ ѡ҆ на́съ , и҆ ѡ҆ всѣ́хъ сᲂгрѣши́вшихъ ѡ҆ ѡ҆ста вле́нїи . И҆́нᲂческїи сво́й крⷭ҇тъ взе́мъ прпⷣбне , и҆ пᲂслѣ́дᲂвалъ є҆сѝ хрⷭ҇тꙋ̀ вседержи́телю . и҆ ᲂу҆мерт ви́въ пло́ть , и҆ жи́зни вѣ́чнѣй спᲂдо́билсѧ є҆сѝ прпⷣбне . сла́ва . Зако́нꙋ бж҃їю пᲂвинꙋ́ѧсѧ дᲂстᲂчꙋ́дне , страстна́ѧ в̾зыгра́нїѧ ᲂу҆вѧди́лъ є҆сѝ вᲂз̾держа́нїѧ по́двигᲂмъ . и҆ без̾стра́стїѧ бл҃гᲂда́тїю ѡ҆бᲂгати́лсѧ є҆сѝ . и҆ ны́нѣ , боⷢ҇ . И҆́же тебѐ ра́ди нетлѣ́ннаѧ ѡ҆бᲂга́щьшесѧ бг҃ᲂрᲂди́тельнице пречⷭ҇таѧ , ра́дꙋисѧ ѡ҆бра́дᲂваннаѧ вᲂпїе́мъ тѝ , прпⷣбнымъ и҆ пра́ведныхъ ᲂу҆краше́нїе .

пѣ́снь , г҃ . і҆рмо́с̾ . На ка́мени мѧ вѣ́ры ᲂу҆твердѝ , раз̾ширѝ ᲂу҆ста̀ мᲂѧ̀ на врагѝ мᲂѧ̀ . вᲂз̾весели́ бᲂсѧ дх҃ъ мо́й вᲂспѣва́ти , нѣ́сть ст҃а ꙗ҆́кᲂже бг҃ъ на́шъ , и҆ нѣ́сть пра́ведна па́че тебѐ гдⷭ҇и . Ѿ на́съ нн҃ѣ сло́во пᲂхвале́нїѧ плето́мо прїе́млѧ , бг҃ᲂно́се весели́сѧ твᲂи́ми бᲂлѣ́зньми наслаж да́ѧсѧ , зᲂвы̀ прпⷣбне , ты̀ є҆сѝ бг҃ъ на́шъ . Слᲂвеса̀ ᲂу҆слы́шавъ влⷣчнѧ , ѡ҆ста́вилъ є҆сѝ ми́ра , и҆ ꙗ҆́же в̾ не́мъ . приведѐ сѣ́мѧ свᲂѐ гдⷭ҇ви , зᲂвы̀ ты̀ є҆сѝ бг҃ъ на́шъ . Ра́йскꙋю жи́знь , и҆ та́мѡ ст҃ы́хъ весе́лїе , всегда̀ во ᲂу҆мѣ̀ свᲂе́мъ пᲂмина́ѧ прпⷣбне , тѣ́мже и҆ во слеза́хъ и҆ в̾ вᲂз̾дыха́нїихъ , всю̀ свᲂю̀ жи́знь ѻ҆́ч҃е кѷри́ле прᲂше́лъ є҆сѝ . и҆ сего̀ ра́ди и҆ по сме́рти ѿ хрⷭ҇та̀ чꙋдесы̀ прᲂсла́висѧ . боⷢ҇ . Ты̀ є҆ди́на па́че всѣ́хъ и҆́же ѿ́ вѣка вели́кихъ спᲂдо́бисѧ , и҆ вы́ше є҆стества̀ . бг҃а бо не в̾мѣсти́ маго все́ю тва́рїю во ᲂу҆тро́бѣ свᲂе́й пᲂнесѐ , и҆ вᲂплᲂти́ла є҆сѝ . тѣ́мъ тѧ̀ бцⷣꙋ всѝ велича́емъ .

и҆́нъ , і҆рмо́съ . Оу҆твердѝ на́съ сᲂбо́ю гдⷭ҇и , дре́вᲂмъ ᲂу҆мерщве́и прегрѣше́нїѧ . и҆ стра́хъ тво́й всадѝ в̾ срⷣца̀ на́ша , ꙗ҆́кѡ чл҃кᲂлю́бецъ . Во́дъ живо́тныхъ и҆спо́лнисѧ , бжⷭ҇твеннагѡ дх҃а бг҃ᲂно́се дш҃а твᲂѧ̀ , рѣ́ки чꙋде́съ то́читъ , недꙋ́жнымъ и҆сцѣле́нїе тече́нїе пᲂдаѧ̀ . Къ ширᲂтѣ̀ ра́йстѣй всели́лсѧ є҆сѝ всебл҃же́нне кѷри́ле , тѣ́снꙋю ше́ствᲂвавъ стезю̀ . и҆ бѣсо́мъ кᲂва́рствїѧ , и҆ ше́ствїѧ бесчи́сленаѧ ᲂу҆тѣсни́лъ є҆сѝ . сла́ва . Тече́нїемъ твᲂи́хъ сле́зъ напаѧ́емо , ꙗ҆́кѡ дре́во плᲂдᲂно́сно кѷри́ле бл҃гᲂпло́днѣ , бжⷭ҇твеннѣ прине́слъ є҆сѝ дᲂбрᲂдѣ́тели , и҆ чꙋде́съ бжⷭ҇твеннᲂю бл҃гᲂда́тїю . и҆ ны́нѣ , боⷢ҇ . Є҆ди́нъ бл҃гі́и про́йде ᲂу҆тро́бꙋ вᲂплᲂща́емь , и҆ чл҃къ ви́дѣнъ бы́сть сᲂверше́нъ . є҆го́же мᲂлѝ спастѝ пᲂю́щїѧ тѧ̀ .

сѣда́ленъ . гла́съ , а҃ . И҆́нᲂчествᲂвавъ бг҃ᲂꙋго́днѣ , и҆ дᲂбрᲂдѣ́тельнѡ по́жилъ є҆сѝ , и҆ бл҃гᲂда́ть и҆сцѣле́нїѧ прїѧ́тъ , бл҃же́нне кѷри́ле . зна́менїѧ сᲂверши́въ стра́шна . ѻ҆би́тель же сᲂвᲂкꙋпи́въ сщ҃е́ннꙋю , и҆ приве́лъ є҆сѝ мно́жество спаса́емыхъ гдⷭ҇ви пребᲂга́те . сла́ва бг҃ꙋ прᲂсвѣти́вшемꙋ тѧ̀ . сла́ва вѣнча́вшемꙋ тѧ̀ . сла́ва ст҃ꙋ́ю твᲂю̀ па́мѧть прᲂсла́вльшемꙋ . двⷤа . сла́ва , и҆ ны́нѣ , боⷢ҇ . Рꙋ́цѣ свᲂѝ бжⷭ҇твеннїи , и҆́миже зижди́телѧ нᲂси́ла є҆сѝ , дв҃о пречⷭ҇таѧ , вᲂплᲂще́ннаго бл҃гᲂда́тїю прᲂсте́рши , мᲂлѝ є҆гѡ̀ и҆зба́вити на́съ напа́стей , и҆ страсте́й и҆ бѣ́дъ , вᲂсхвалѧ́щихъ тѧ̀ любо́вїю , и҆ вᲂпїю́щихъ тѝ . сла́ва все́льшемꙋсѧ в̾ тѧ̀ . сла́ва прᲂше́дшемꙋ и҆з̾ тебѐ . сла́ва свᲂбᲂди́вшемꙋ на́съ ржⷭ҇тво́мъ твᲂи́мъ .

пѣ́снь , д҃ . і҆рмо́съ . Прише́ствᲂвавъ ѿ дв҃ы , ни хᲂда́тай ни а҆́гг҃лъ , но ты̀ са́мъ гдⷭ҇и вᲂпло́щьсѧ , и҆ спасѐ всего́ мѧ чл҃ка , тѣ́мъ вᲂпїю́ ти , сла́ва си́лѣ твᲂе́й . Ѿве́рзлъ є҆сѝ кѷри́ле две́ри свᲂѧ̀ , а҆враа́мꙋ ᲂу҆пᲂдо́бльсѧ , всѣ́мъ тре́бꙋющимъ прпⷣбне кѷри́ле . тѣ́мъ хрⷭ҇то́съ ѿверза́етъ тѝ нбⷭ҇наѧ врата̀ пребл҃же́нне . Во всечестны́и и҆ во сщ҃е́нническїи са́нъ ᲂу҆краси́лсѧ є҆сѝ кѷри́ле бл҃же́нне , и҆ и҆́нᲂческᲂмꙋ три́знищꙋ ра́дꙋѧсѧ прите́клъ є҆сѝ . всѣ́мъ до́мᲂмъ пребл҃же́нне привᲂди́мь . Пᲂсто́мъ и҆ мᲂли́твами тѣ́ло свᲂѐ ѻ҆́ч҃е кѷри́ле и҆знꙋри́лъ є҆сѝ . и҆ сего̀ ра́ди спᲂдо́бисѧ ви́дѣти неи҆зрече́ннаѧ бл҃га́ѧ , ꙗ҆́же ст҃ы́мъ ᲂу҆гᲂто́ваннаѧ . с̾ни́миже ѻ҆́ч҃е кѷри́ле ѡ҆ на́съ мᲂлѝ . боⷢ҇ . И҆сцѣлѧ́ѧ є҆́ввино дре́внее престꙋпле́нїе , в̾ тебѐ пренепᲂро́чнꙋю и҆ пречⷭ҇тꙋю всели́сѧ . и҆ всего́ мѧ чл҃ка вᲂѡ҆брази́въ па́дшаго , пребжⷭ҇твенныи .

и҆́нъ , і҆рмо́съ . Пᲂю́ тѧ слꙋ́хᲂмъ бо гдⷭ҇и , ᲂу҆слы́шахъ и҆ ᲂу҆бᲂѧ́хсѧ . до мене́ бо прїи́де , менѐ и҆ща̀ заблꙋ́ждьшаго . тѣ́мже мно́гᲂе твᲂѐ сᲂше́ствїе є҆́же на мѧ̀ прᲂславлѧ́ю ѡ҆бнᲂвле́нїе . Распе́нъ себѐ самᲂго̀ страсте́мъ и҆ ми́рᲂви , бг҃ᲂмꙋ́дре ѻ҆́ч҃е , на крⷭ҇тѣ̀ распрᲂсте́ршемꙋ дла́ни хрⷭ҇тꙋ̀ , ᲂу҆гᲂди́лъ є҆сѝ кѷри́ле . є҆го́же мᲂлѝ спастѝ дш҃а на́ша . По́двигᲂмъ страда́нїѧ , плᲂтьскі́ѧ ᲂу҆мертви́лъ є҆сѝ ᲂу҆́ды . ме́ртвыѧ же мᲂли́твᲂю вᲂз̾ста́вилъ є҆сѝ , и҆ прихᲂдѧ́щїѧ ᲂу҆се́рднѡ вѣ́рᲂю чꙋ́днѡ ѡ҆правда́лъ є҆сѝ , и҆ всѧ́къ недꙋ́гъ ѻ҆́ч҃е и҆сцѣли́лъ є҆сѝ . сла́ва . Дх҃а ст҃а́гѡ присво́илъ є҆сѝ свᲂе́й дꙋшѝ и҆́скренно , и҆́мже па́стырь и҆збра́нъ пᲂказа́сѧ ѻ҆́ч҃е бг҃ᲂмꙋ́дре , и҆ и҆́нᲂкꙋющимъ ᲂу҆краше́нїе прекра́снᲂе . и҆ ны́нѣ , боⷢ҇ . Ꙗ҆́кѡ до́ждь на рꙋно̀ чⷭ҇таѧ , въ чⷭ҇тно́е чре́во твᲂѐ сло́во сни́де вᲂплᲂща́емо . и҆ пᲂгꙋбѝ мнᲂгᲂбо́жїѧ , ѡ҆дᲂжде́нїемъ всенепᲂро́чнаѧ . и҆ го́рькꙋю зи́мꙋ разᲂри́лъ є҆́сть .

пѣ́снь , є҃ . і҆рмо́съ . Прᲂсвѣще́нїе во тмѣ̀ лежа́щимъ , и҆ спасе́нїе ненача́емымъ хрⷭ҇тѐ сп҃се мо́й , к̾ тебѣ̀ ᲂу҆́треннюю цр҃ю ми́рныи , прᲂсвѣти́ мѧ сїѧ́нїемъ си , и҆но́гѡ бо ра́звѣ тебѐ бг҃а незна́емъ . Хрⷭ҇тᲂкра́снᲂмꙋ ѡ҆держа́сѧ житїю̀ кѷри́ле бл҃же́нне , всѣ́мъ че́стенъ ꙗ҆ви́сѧ . вѣ́сть бо вᲂи́стинꙋ дᲂбрᲂдѣ́тель сла́вне , сᲂверша́ти сїю̀ и҆мꙋ́щихъ . ꙗ҆ви́лбᲂсѧ є҆сѝ сщ҃е́нникъ хрⷭ҇то́въ дᲂстᲂпрїѧ́тенъ . Си́лᲂю бжⷭ҇твеннᲂю ᲂу҆крѣплѧ́ емь бл҃же́нне кѷри́ле , мирскꙋ́ю любо́вь крѣ́пкѡ ѿве́рглъ є҆сѝ , и҆ влⷣцѣ ра́дꙋѧсѧ прїи́де , во́льнымъ тѝ нра́вᲂмъ . и҆ сᲂхрани́въ вѣ́рꙋ невреди́мꙋ , и҆ вѣне́цъ сла́вы бг҃ᲂмꙋ́дре прїѧ́лъ є҆сѝ . Дне́сь вᲂспѣва́ема сщ҃е́ннаѧ па́мѧть твᲂѧ̀ прпⷣбне кѷри́ле , весели́тъ ᲂу҆ченикѝ твᲂѧ̀ . и҆ чⷭ҇тно́е твᲂѐ ᲂу҆спе́нїе сла́вѧще гл҃ютъ , мл҃твами свᲂи́ми ѻ҆́ч҃е сᲂблюдѝ вᲂспѣва́ющихъ тѧ̀ . боⷢ҇ . Є҆ди́нꙋ на́мъ во двᲂю̀ сꙋществꙋ̀ ви́димꙋ и҆пᲂста́сь , є҆ди́на бл҃гᲂслᲂве́наѧ ражда́еши неи҆зрече́ннѡ , бж҃їе сло́во вᲂплᲂти́вшеесѧ за млⷭ҇ть неи҆зрече́ннꙋю . тᲂго̀ мᲂлѝ сᲂхрани́тисѧ пᲂю́щимъ тѧ̀ .

и҆́нъ , і҆рмо́съ . Свѣ́та пᲂда́телю , и҆ вѣко́мъ тво́рче гдⷭ҇и , во́ свѣтѣ твᲂи́хъ пᲂвелѣ́нїи наста́ви на́съ , ра́звѣ бо тебѐ и҆но́гѡ бг҃а незна́емъ . И҆́же въ млⷭ҇ть бг҃а мᲂлѧ̀ ѻ҆́ч҃е прпⷣбне кѷри́ле , напо́лнилъ є҆сѝ ꙗ҆́кᲂже и҆лїѧ̀ чва́нецъ , є҆ле́ѧ сᲂсꙋ́дъ вели́къ , ѿ зрѧ́щихъ ᲂу҆дивлѧ́емь вѣ́рнѡ . Ꙗ҆́кѡ чи́стъ дш҃е́ю ты̀ , во и҆з̾стꙋпле́нїи бы́въ , ви́дѣлъ є҆сѝ всю̀ зе́млю , ꙗ҆́кѡ пᲂд̾ заре́ю сїѧ́ющꙋ , є҆ди́наго бг҃а пᲂчита́ющꙋ всебл҃же́нне кѷри́ле . сла́ва . Чꙋдᲂдѣ́йствꙋѧ ѡ҆ хрⷭ҇тѣ̀ , вᲂдѣ̀ и҆стещѝ мл҃твᲂю прпⷣбне кѷри́ле мо́лиши пᲂд̾вигᲂпᲂло́жника . ꙗ҆́же пребыва́ющи прᲂпᲂвѣ́даетъ чꙋдеса̀ . и҆ ны́нѣ , боⷢ҇ . Живы́и на́ нб҃сѣхъ , хᲂтѧ́и всели́тисѧ в̾лᲂжесна̀ твᲂѧ̀ чи́стаѧ , ꙗ҆́кѡ да на́съ хра́мы трⷪ҇цѣ сᲂтвᲂри́тъ , и҆́же тѧ̀ бцⷣꙋ прᲂпᲂвѣ́дающихъ .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , не и҆з̾слѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Жите́йскихъ веще́й ѻ҆́ч҃е кѷри́ле , нестᲂѧ́щее свѣ́дыи , сїѐ ѡ҆ста́вилъ є҆сѝ , и҆ к̾ вᲂз̾даѧ́нїю пᲂтща́сѧ го́рнѧгѡ жре́бїѧ пребᲂга́те . Бл҃гᲂче́стнѡ и҆́нѡкъ мно́жество пита́ти не ѡ҆ста́вилъ є҆сѝ , ѻ҆́ч҃е бл҃же́нне кѷри́ле . тѣ́мъ пи́щи бо́льшей во ѻ҆би́телехъ нбⷭ҇ныхъ спᲂдо́бисѧ . Мѣ́сто и҆́же спᲂдо́бисѧ прїѧ́ти честны́ѧ мо́щи твᲂѧ̀ прпⷣбне ѡ҆ст҃и́сѧ . и҆ по мно́гимъ страна́мъ прᲂславлѧ́емо є҆́сть , ꙗ҆́кѡ в̾ себѣ̀ мо́щи твᲂѧ̀ и҆мꙋ́щи . боⷢ҇ . Неи҆скꙋсᲂмꙋ́жнаѧ пречⷭ҇таѧ рᲂдила̀ є҆сѝ и҆ пребыва́еши дв҃ᲂю , ꙗ҆влѧ́ющи бжⷭ҇тва̀ и҆́стиннагѡ сн҃а и҆ бг҃а твᲂегѡ̀ ѻ҆́бразы .

и҆́нъ , і҆рмо́съ . Во глꙋбинѣ̀ грѣхо́внѣй сᲂдержи́мь є҆́смь сп҃се , и҆҆ в̾ пꙋчи́нѣ жите́йстѣй ѡ҆бꙋрева́емъ . но ꙗ҆́кᲂже прᲂро́ка і҆ѡ́нꙋ , и҆з̾ глꙋбины́ мѧ ѿ страсте́й , вᲂз̾ведѝ и҆҆ спаси́ мѧ . Свѣтᲂсїѧ́нїи прᲂсвѣща́емь ст҃а́гѡ дх҃а , чꙋдᲂтво́рче кѷри́ле , и҆́нᲂкꙋющимъ свѣти́льникъ свѣ́телъ ꙗ҆ви́сѧ . Ꙗ҆́кѡ пресла́внѡ житїѐ твᲂѐ , и҆́мже ста́до и҆́нѡкъ приве́лъ є҆сѝ к̾ ра́зꙋмꙋ спаси́тельнᲂмꙋ . сла́ва . Жи́тель бы́въ црⷭ҇тва нбⷭ҇нагѡ бг҃ᲂмꙋ́дре кѷри́ле . сегѡ̀ ᲂу҆лꙋчи́ти мᲂлѝ , вѣ́рᲂю тѧ̀ при́снѡ ᲂу҆бл҃жа́ющимъ . и҆ ны́нѣ , боⷢ҇ . И҆з̾ ᲂу҆тро́бы твᲂеѧ̀ чⷭ҇таѧ вᲂсїѧ́въ пра́вдѣ невече́рнее сл҃нце , и҆ вѣ́рныхъ прᲂсвѣтѝ , бцⷣе дв҃о всепѣ́таѧ .

кᲂнда́къ . гла́съ , и҃ . Взбра́ннᲂмꙋ и҆ крѣ́пкᲂмꙋ а҆дама́нтꙋ , прᲂгᲂни́телю бѣсо́мъ , но́вᲂмꙋ чꙋдᲂтво́рцꙋ , пᲂбѣди́тельнаѧ , страсте́й ѕлы́хъ свᲂбᲂди́вшесѧ , бл҃гᲂда́рственаѧ вᲂсписꙋ́емъ тѝ ѻ҆́ч҃е на́шъ кѷри́ле . но ꙗ҆́кѡ и҆мѣ́ѧ дерзнᲂве́нїе ᲂу҆ прⷭ҇то́ла хрⷭ҇то́ва , вѣ́рᲂю чтꙋ́щихъ тѧ̀ гра́дъ же и҆ лю́ди , мᲂли́твᲂю свᲂе́ю сᲂхранѧ́й . ты́ бо є҆сѝ ста́дꙋ твᲂемꙋ̀ пᲂхвала̀ и҆ ᲂу҆тверже́нїе . и҆́кᲂсъ . Оу҆слы́шавъ хрⷭ҇то́въ глаго́лъ , и҆ ѡ҆ста́вивъ плᲂтьска́ѧ мꙋдрᲂва́нїѧ , бᲂга́тство и҆ сла́вꙋ ꙗ҆́кѡ пра́хъ в̾мѣни́въ , и҆ на́ стрⷭ҇ти ꙗ҆́кѡ беспло́тенъ пᲂдвиза́всѧ , и҆ беспло́тныхъ ликᲂстᲂѧ́нїю чистᲂто́ю ᲂу҆пᲂдо́бисѧ . ра́зꙋма дарᲂва́нїѧ прїѧ́лъ є҆сѝ . тѣ́мъ в̾ пѣ́снехъ си́це тѝ вᲂпїе́мъ рекꙋ́ще . ра́дꙋисѧ кѷри́ле прпⷣбне и҆ бг҃ᲂно́се , нбⷭ҇ныи чл҃че , земны́и а҆́гг҃ле . ра́дꙋисѧ крᲂмѣ̀ ми́ра сꙋ́етнагѡ пꙋсты́ню сᲂдѣ́лавыи , в̾ кра́снѣмъ ѻ҆́стрᲂвѣ , и҆ в̾не́мъ ѻ҆би́тель сᲂста́вивъ . ра́дꙋисѧ в̾не́й и҆́нѡкъ мно́жество со́бралъ є҆сѝ , и҆ ѿ ни́хъ слы́шиши си́це рекꙋ́щихъ . ра́дꙋисѧ и҆́нᲂкꙋющимъ ѡ҆ спасе́нїи хᲂда́тай . ра́дꙋисѧ ᲂу҆ныва́ющимъ ѻ҆́бразъ ᲂу҆тѣше́нїѧ . ра́дꙋисѧ и҆́нᲂкѡмъ ѿ навѣ́тъ вра́жїихъ и҆зба́вителю . ра́дꙋисѧ скᲂрбе́мъ гꙋби́телю на́шегѡ є҆стества̀ , ꙗ҆́кѡ ѿгᲂнѧ́ѧ по́мыслы ѕло́бныѧ . ра́дꙋисѧ скᲂрбѧ́щимъ дш҃е́ю , сла́дкᲂе ᲂу҆тѣше́нїе , и҆ ра́дᲂсти бжⷭ҇твенныѧ пᲂда́телю . ра́дꙋисѧ на́шъ пред̾ста́телю и҆ и҆зба́вителю . ра́дꙋисѧ прпⷣбне ѻ҆́ч҃е кѷри́ле и҆́нᲂкѡмъ ᲂу҆дᲂбре́нїе .

пѣ́снь , з҃ . і҆рмо́съ . Бг҃ᲂпрᲂти́вно велѣ́нїе без̾зако́ннꙋюща мꙋчи́телѧ , высо́къ пла́мень вᲂз̾несло̀ є҆́сть , хрⷭ҇то́съ же прᲂсте́ръ бг҃ᲂчести́вымъ дѣ́темъ , хла́дъ дх҃о́вныи , сы́и бл҃гᲂслᲂве́нъ и҆ препрᲂсла́вленъ . И҆з̾бра́нїемъ сꙋда̀ ᲂу҆краси́лсѧ є҆сѝ , сщ҃е́нникъ бы́въ кѷри́ле ѻ҆́ч҃е прпⷣбне . тѣ́мъ в̾ше́лъ є҆сѝ в̾нꙋ́трь вы́шнѧгѡ хра́ма , незахᲂди́мыѧ зарѝ , свᲂегѡ̀ сщ҃еннᲂтвᲂре́нїѧ пло́дъ наслажда́ѧсѧ пᲂѧ̀ , бл҃гᲂслᲂве́нъ бг҃ъ ѻ҆ц҃ъ на́шихъ . Ѻ҆те́ческаѧ вᲂз̾люби́лъ є҆сѝ ликᲂстᲂѧ́нїѧ , и҆ в̾ ли́цѣхъ ѻ҆ц҃ъ ра́дᲂстнѡ прᲂсла́висѧ . и҆ хрⷭ҇тꙋ̀ пред̾стᲂѧ̀ всебл҃же́нне прпⷣбне кѷри́ле , прїе́млеши свᲂегѡ̀ слꙋже́нїѧ всегѡ̀ вᲂз̾даѧ́нїѧ , вᲂспѣва́ѧ , бл҃гᲂслᲂве́нъ бг҃ъ ѻ҆ц҃ъ на́шихъ . И҆стᲂча́етъ чꙋдеса̀ честна́ѧ ра́ка твᲂѧ̀ прпⷣбне , преи҆зᲂбилꙋ́ющи бл҃гᲂда́тїю и҆ вѣ́рᲂю прихᲂдѧ́щимъ здра́вїе пᲂдае́тъ и҆́же хрⷭ҇тꙋ̀ ѿ дш҃и вᲂпїю́щимъ , бл҃гᲂслᲂве́нъ бг҃ъ ѻ҆ц҃ъ на́шихъ . боⷢ҇ . И҆з̾ ᲂу҆тро́бы ты̀ дв҃о пра́веднᲂе сл҃нце пᲂрᲂдѝ хрⷭ҇та̀ , дебельство́мъ пло́ти прїѡ҆бщи́вшасѧ чл҃кѡмъ и҆ дв҃ᲂю пребыла̀ є҆сѝ , тѣ́мъ тѝ вᲂспѣва́емъ , бл҃гᲂслᲂве́нъ пречⷭ҇таѧ пло́дъ твᲂегѡ̀ чре́ва .

и҆́нъ , і҆рмо́съ . Вѣті́и ꙗ҆ви́шасѧ ѻ҆́трᲂцы , премꙋ́дрїи дре́вле , бг҃ᲂпрїи́мцы дш҃е́ю бг҃ᲂсло ве́сны ᲂу҆сты̀ пᲂѧ́хꙋ , пребжⷭ҇твенныи ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Ме́ртвᲂсть живᲂно́снꙋю стѧжа́въ сласте́й ѿлᲂже́нїемъ . тѣ́мже бᲂльны́ѧ и҆сцѣлѧ́ти спᲂдо́билсѧ є҆сѝ кѷри́ле . пребжⷭ҇твенныи ѻ҆ц҃е́мъ вᲂпїѧ̀ бж҃е бл҃гᲂслᲂве́нъ є҆сѝ . сла́ва . Непщева́вше ᲂу҆мᲂри́ти безꙋма̀ , чарᲂдѣѧ́ньми ѻ҆́ч҃е лꙋка́выми , тебѐ блюдо́маго бжⷭ҇твеннᲂю всѣ́хъ зижди́телѧ дла́нїю , несмы́сленѡ пᲂстыдѣ́вшесѧ ѡ҆бличе́ни бы́ша , сꙋ́щимъ в̾ тебѣ̀ прᲂразꙋмѣ́нїемъ . и҆ ны́нѣ , боⷢ҇ . И҆сцѣлѝ дꙋшѝ мᲂеѧ̀ стра́сти , без̾стра́стїѧ и҆сто́чникъ ро́ждьшаѧ несказа́ннѡ , и҆ ᲂу҆миле́нїѧ тꙋ́чꙋ пᲂда́ждь мѝ , хᲂда́тайствꙋѧ мѝ ᲂу҆тѣше́нїѧ ст҃а́ѧ бцⷣе .

пѣ́снь , и҃ . і҆рмо́съ . Впе́щь ѻ҆́гненнꙋю , к̾ дѣ́темъ є҆вре́йскимъ сᲂше́дшагѡ , и҆ пла́мень на хла́дъ прело́жшагѡ бг҃а , по́йте всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Сᲂверше́нᲂю чистᲂто́ю , и҆ любо́вїю хрⷭ҇та̀ вᲂз̾желѣ́лъ є҆сѝ , сщ҃еннᲂтаи́нниче ѻ҆́ч҃е . и҆ непреста́нными гла́сы вᲂпїѧ́ше , по́йте гдⷭ҇а всѧ̀ дѣ́ла , и҆ превᲂзнᲂси́те є҆гѡ̀ во́ вѣки . Мир̾скꙋ́ю красᲂтꙋ̀ ѡ҆ста́вивъ во́лею , хрⷭ҇то́ви бл҃же́нне прише́лъ є҆сѝ , бл҃гᲂлѣ́пїе тᲂгѡ̀ жела́ѧ зрѣ́ти , и҆ во ѻ҆би́тели ст҃ы́ѧ всели́лсѧ є҆сѝ . по́йте гдⷭ҇а вᲂпїѧ̀ всѧ̀ дѣ́ла , и҆ превᲂзнᲂси́те є҆гѡ̀ во́ вѣки . Ны́нѣ пꙋсты́нѧ весе́лїемъ ѻ҆́ч҃е красꙋ́етсѧ , и҆мѣ́ѧ мо́щи твᲂѧ̀ кѷри́ле прпⷣбне . ᲂу҆ченицы́ же твᲂемꙋ̀ житїю̀ ревнꙋ́юще и҆ ѡ҆ твᲂе́й па́мѧти ра́дꙋющесѧ , твᲂрцꙋ̀ вᲂпїю́тъ , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . боⷢ҇ . Сщ҃е́нными тѧ̀ гла́сы бж҃їи прᲂро́цы чⷭ҇таѧ быва́ющꙋ мт҃рь прᲂвᲂз̾гласи́ша ꙗ҆́снѡ , всѣ́ми владѣ́ющаго пречⷭ҇таѧ . є҆го́же превᲂзно́симъ гдⷭ҇а во́ вѣки .

и҆́нъ , і҆рмо́съ . Пе́щь ѻ҆́гненна и҆нᲂгда̀ в̾ вавѷлѡ́нѣ , дѣ́йство раздѣлѧ́ше , бж҃їимъ велѣ́нїемъ халдѣ́и ѡ҆палѧ́ющи , вѣ́рныѧ же прᲂхлажда́ющи пᲂю́ща , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Над̾ страстьмѝ тлетво́рными ца́рствᲂвавъ ѡ҆ хрⷭ҇тѣ̀ , бг҃ᲂмꙋ́дре ѻ҆́ч҃е . в̾ црⷭ҇твїи нбⷭ҇нѣмъ спᲂдо́бисѧ жи́ти со всѣ́ми ст҃ы́ми , до́брѣ пᲂжи́въ , и҆ всеви́дца бг҃а вᲂз̾люби́въ . Твᲂѧ̀ ст҃ы́ѧ мл҃твы прїе́млѧ бг҃ъ , сꙋ́щимъ во ѡ҆скꙋдѣ́нїи с̾ тᲂбо́ю пᲂдава́ше , ꙗ҆́же к̾ живᲂтꙋ̀ вы́нꙋ . вельмѝ на землѝ прᲂславлѧ́ѧ тѧ , чꙋдᲂдѣ́йственныи кѷри́ле всебл҃же́нне . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Оу҆кра́шьсѧ дᲂбро́тами бжⷭ҇твенными , къ кра́снымъ черто́гѡмъ преста́висѧ . с̾ бг҃ᲂмъ ѻ҆́ч҃е пребыва́ѧ , и҆ сегѡ̀ бжⷭ҇твенныѧ красᲂты̀ въ непрᲂхᲂди́мыѧ вѣ́ки наслажда́ешисѧ . и҆ ны́нѣ , боⷢ҇ . Жи́въ сы́и се́й и҆сто́чникъ , ꙗ҆́кѡ во́дꙋ жи́зни пᲂро́ждьши , дш҃ꙋ мᲂю̀ и҆ста́ѧвшꙋю грѣхо́внымъ пла́менемъ , бцⷣе дв҃о напо́й да тѧ̀ сла́влю во́ вѣки .

пѣ́снь , ѳ҃ . і҆рмо́съ . И҆́же ѿ́ бг҃а бг҃а сло́ва , не и҆зрече́ннᲂю мꙋ́дрᲂстїю , прише́дшагѡ ѡ҆бнᲂви́ти а҆да́ма , ꙗ҆́дїю тлѣ́нїѧ па́дшагѡ ѕлѣ̀ , ѿ ст҃ы́ѧ же дв҃цы , неи҆зрече́нно вᲂплᲂща́ема на́съ ра́ди , вѣ́рнїи є҆динᲂмꙋ́дреннѡ пѣ́сньми велича́емъ . Дх҃ᲂмъ ѻ҆́ч҃е ѡ҆бнища́въ , нбⷭ҇нᲂе црⷭ҇тво вᲂспрїѧ́лъ є҆сѝ со всѣ́ми и҆з̾бра́нными , сла́вы не и҆зрече́нныѧ и҆спᲂлнѧ́емь . бᲂлѣ́знемъ по́честь прїе́млѧ бл҃же́нне кѷри́ле вᲂз̾даѧ́нїѧ . сегѡ̀ ра́ди тѧ вѣ́рᲂю и҆ любо́вїю ᲂу҆блажа́емъ . Мᲂще́й твᲂи́хъ ра́ка , вѣ́рнѡ пристꙋпа́ющимъ и҆стᲂча́етъ и҆сцѣле́нїемъ рѣ́ки . стрⷭ҇ти дш҃а́мъ пᲂтᲂплѧ́ющи , и҆ тѣлесе́мъ бᲂлѣ́зни ѿє́млющи , бл҃же́нне кѷри́ле , мᲂли́твениче вѣ́рᲂю прⷭ҇нѡ бл҃жа́щимъ тѧ̀ . Сᲂвᲂкꙋплѧ́ѧсѧ съ прпⷣбными свѣ́тлыми ста́ды , сїѧ́нїемъ невече́рнимъ , мы́сленѡ ѻ҆́ч҃е кѷри́ле ѡ҆зарѧ́емь , и҆́же бжⷭ҇твеннꙋю тѝ па́мѧть твᲂрѧ́щихъ , прᲂсвѣтѝ вѣ́рныѧ , и҆ ᲂу҆лꙋчи́ти спасе́нїе мᲂли́твами сѝ спᲂдо́би . боⷢ҇ . Ѡ҆блиста́еши всѣ́хъ чꙋде́съ зарѧ́ми твᲂи́ми бг҃ᲂбл҃гᲂда́тнаѧ чи́стаѧ , страсте́й и҆ скᲂрбе́й ѿє́млѧ мглꙋ̀ , и҆ свѣ́тъ весе́лїѧ мы́сленыи прᲂстира́ѧ . мт҃рь бг҃ꙋ тѧ̀ велича́емъ .

и҆́нъ , і҆рмо́съ . Ꙗ҆́же пре́жде сл҃нца , свѣти́льника бг҃а вᲂз̾сїѧ́вша , пло́тїю к̾ на́мъ прише́дша и҆з̾ бᲂкꙋ̀ дв҃чꙋ , неи҆зрече́ннѡ вᲂчл҃чьшасѧ , бл҃гᲂслᲂве́ннаѧ чⷭ҇таѧ , тѧ̀ бцⷣе велича́емъ . Млⷭ҇тивнѡ в̾мѣсти́сѧ ѻ҆́ч҃е , всѧ́ческихъ бл҃гᲂда́телю , неѕло́бїѧ дᲂбро́тᲂю ᲂу҆краша́емь , и҆ кро́тᲂстїю и҆ красᲂто́ю дᲂбрᲂдѣ́телей сїѧ́ѧ . тѣ́мже тѧ̀ всѝ ᲂу҆бл҃жа́емъ . Пѣ́снь бг҃ᲂви в̾сыла́ти с̾ беспло́тными спᲂдо́бисѧ , ꙗ҆́кѡ сᲂблю́дъ ѻ҆́нѣхъ житїѧ̀ чистᲂтꙋ̀ , терпѣ́нїемъ сла́вꙋ вᲂспрїѧ́лъ є҆сѝ . сла́ва . Прїимѝ ѿ на́съ бг҃ᲂно́се , принᲂси́мᲂе тѝ мᲂле́нїе ѿ чи́ста срⷣца . и҆ вᲂз̾да́ждь мᲂльба́ми сѝ , сᲂгрѣше́нїемъ ѡ҆ставле́нїе , и҆ спасе́нїе всече́стне . и҆ ны́нѣ , боⷢ҇ . Ꙗ҆́кѡ ко́рень сꙋ́щимъ вᲂи́стинꙋ , нетлѣ́ннаѧ дв҃о , всѝ вѣ́рнїи надѣ́ющесѧ хвала́ми пᲂчита́емъ .

свѣти́ленъ . А҆́гг҃льскᲂе житїѐ жела́ѧ , и҆ ᲂу҆да́лилсѧ є҆сѝ кѷри́ле въ пꙋсты́ню . и҆ стра́сти плᲂтьскі́ѧ пᲂкᲂри́лъ є҆сѝ , равнᲂа́гг҃еленъ ꙗ҆ви́лсѧ є҆сѝ , ѻ҆́ч҃е на́шъ кѷри́ле бг҃ᲂно́се . двⷤа . сла́ва , и҆ ны́нѣ , боⷢ҇ . Держа́ва на́ша чⷭ҇таѧ , свᲂѧ̀ рабы̀ сᲂхранѝ всѧ̀ невре́дны . тѧ́ бо стѧжа́хᲂмъ є҆ди́нꙋ прибѣ́жище дш҃а́мъ на́шимъ .

На хвали́тѣхъ , стⷯры , на д҃ . гла́съ , и҃ . поⷣ . ѽ =пресла́внᲂе чꙋ́до . Кѷри́ле мнᲂгᲂнаро́читыи ,꙳ мир̾ско́е ᲂу҆краше́нїе ѡ҆ста́вль мꙋ́дре ,꙳ и҆ бᲂлѣ́зньми вᲂз̾держа́нїѧ крѣ́пкими ,꙳ стра́сти пᲂкᲂри́лъ є҆сѝ плᲂтьскі́ѧ низ̾лᲂжи́въ .꙳ и҆ мнᲂгᲂко́зненаго пᲂбѣди́лъ є҆сѝ врага̀ ,꙳ и҆ вѣне́цъ с̾ пра́ведными прїѧ́тъ .꙳ тᲂгѡ̀ мл҃твами гдⷭ҇и ,꙳ всѣ́мъ на́мъ пᲂда́ждь ,꙳ ми́ръ и҆ ве́лїю млⷭ҇ть . =двⷤа . Свы́ше дарᲂва́нїи чꙋдесе́мъ ,꙳ ѿ бг҃а спᲂдо́билсѧ є҆сѝ ꙳ бл҃же́нне кѷри́ле .꙳ ѿ прихᲂдѧ́щихъ с̾ вѣ́рᲂю челᲂвѣ́къ ꙳ бѣ́сы прᲂгᲂнѧ́ѧ ,꙳ и҆ разли́чныѧ недꙋ́ги и҆сцѣлѧ́ѧ ꙳ мᲂли́твами сѝ прпⷣбне .꙳ тѣ́мже всѝ па́мѧть твᲂю̀ ,꙳ с̾ше́дшесѧ любо́вїю пᲂчита́емъ . Вᲂз̾держа́нїе и҆зрѧ́днѡ ,꙳ стᲂѧ́нїе всено́щнᲂе ,꙳ бдѣ́ннѡ ѻ҆́ко ,꙳ ᲂу҆смᲂтрѧ́юще бжⷭ҇твенныѧ дᲂбро́ты ,꙳ и҆мѣ́лъ є҆сѝ бл҃же́нне кѷри́ле .꙳ тѣ́мже и҆сцѣле́нїѧ бл҃гᲂда́ть прїѧ́тъ ,꙳ стра́сти лю́тыѧ и҆сцѣлѧ́ти .꙳ сегѡ̀ ра́ди тѧ̀ мо́лимъ ,꙳ и҆спрᲂсѝ ѻ҆́ч҃е всѣ́мъ ве́лїю млⷭ҇ть . сла́ва . гла́съ , в҃ . Пꙋсты́нѧ пре́жде бѣсо́вскаѧ жили́ща и҆мѣ́ѧ . ны́нѣ же кѷри́ле ᲂу҆чени́къ твᲂи́хъ мно́жествᲂмъ и҆спо́лнена ᲂу҆краша́етсѧ , хра́мъ бо прече́стенъ бж҃їѧ мт҃ре в̾ себѣ̀ и҆мѣ́ѧ , разли́чными дᲂбро́тами ᲂу҆кра́шенъ . тѣ́мже в̾не́мъ сᲂше́дшесѧ , и҆ честны́и гро́бъ тво́й ѡ҆бстᲂѧ́ще любе́знѡ пᲂклᲂнѧ́ющесѧ . и҆ мо́лимсѧ цр҃кви є҆динᲂмы́слїе дарᲂва́ти , и҆ на́мъ и҆спрᲂсѝ ми́ръ , и҆ дш҃а́мъ на́шимъ ве́лїю млⷭ҇ть . и҆ ны́нѣ , боⷢ҇ . Всѐ ᲂу҆пᲂва́нїе мᲂѐ , к̾ тебѣ̀ вᲂз̾лага́ю мт҃и бж҃їѧ , сᲂхрани́ мѧ во свᲂе́мъ си кро́вѣ . Славᲂсло́вїе вели́кᲂе , и҆ ѿпꙋ́стъ .

На литꙋргі́и , бл҃же́нна , на и҃ . ѿ а҃ гѡ кано́на , пѣ́снь , г҃ ѧ . и҆ в҃ гѡ кано́на , пѣ́снь , ѕ҃ ѧ . прᲂки́менъ , ѱл҃о́мъ дв҃дᲂвъ . честна̀ пре́д̾ гдⷭ҇емъ сме́рть прпⷣбныхъ є҆гѡ̀ . сти́хъ . что̀ вᲂз̾да́мъ гдⷭ҇ви ѡ҆ всѣ́хъ , и҆́хже вᲂз̾да́стъ ми . а҆пⷭ҇лъ , к̾ гала́тѡмъ . заⷱ҇ , сг҃і .= а҆ллилꙋ́їѧ . бл҃же́нъ мꙋ́жь бᲂѧ́исѧ гдⷭ҇а , в̾ за́пᲂвѣдехъ є҆гѡ̀ вᲂсхо́щетъ ѕѣлѡ̀ . =є҆ѵⷢ҇а́лїе , ѿ =лꙋкѝ . заⷱ҇ , к҃д . прича́стенъ . в=ъ па́мѧть вѣ́чнꙋю бꙋ́детъ пра́ведникъ .

<< Previous

Contents

Next >>