Бг҃ᲂро́дичны на ѻ҆́смь гласо́въ . пᲂе́мъ и҆́хъ є҆гда̀ є҆́сть сла́ва ст҃о́мꙋ в̾ минѣ́и . и҆ ны́нѣ по́ гласꙋ сїѧ̀ пᲂе́мъ . в̾ недѣ́лю , ве́черъ , боⷢ҇ . гла́съ , а҃ . Нбⷭ҇нымъ чино́мъ ра́дᲂванїе , и҆ на землѝ чл҃кѡмъ , крѣ́пкаѧ пᲂмо́щнице пречⷭ҇таѧ дв҃о , спаси́ ны и҆́же к̾ тебѣ̀ прибѣга́ющихъ , ꙗ҆́кѡ на тѧ̀ ᲂу҆пᲂва́нїе съ бг҃ᲂмъ бцⷣе вᲂз̾лᲂжи́хᲂмъ .

в̾ пᲂнедѣ́льникъ , на ᲂу҆́трени , боⷢ҇ . Грѣ́шныхъ мл҃твы прїе́млющи , и҆ скᲂрбѧ́щихъ вᲂздыха́нїѧ непрезира́ющи . мᲂлѝ и҆́же ѿ чи́стᲂю бо́кꙋ твᲂе́ю сн҃а свᲂегѡ̀ , спасти́сѧ на́мъ прест҃а́ѧ дв҃о .

в̾ пᲂнлⷣникъ , ве́черъ , боⷢ҇ . Дв҃о всепѣ́таѧ ю҆́же в̾ тебѣ̀ та́йнꙋ , мѡѷсе́й пррⷪ҇ческима ви́дѣ ѻ҆чи́ма , кꙋпинꙋ̀ гᲂрѧ́щꙋ и҆ не ѡ҆палѧ́емꙋ . бжⷭ҇тва́ бо ѻ҆́гнь ᲂу҆тро́бꙋ твᲂю̀ чⷭ҇таѧ неѡ҆палѝ . тѣ́мже мо́лимъ тѧ̀ , ꙗ҆́кѡ мт҃рь бг҃а на́шегѡ , ми́ръ и҆спрᲂси́ти всемꙋ̀ ми́рꙋ .

во вто́рникъ , на ᲂу҆́трени , боⷢ҇ . Блꙋдни́цꙋ и҆ блꙋ́днаго , а҆́зъ и҆ разбо́йника пᲂбѣди́хъ . и҆ мытарѧ̀ прегрѣше́нїи преминꙋ́хъ , и҆ ниневи́тѧны . ᲂу҆вы̀ мнѣ̀ что̀ бꙋ́дꙋ . ка́кѡ ᲂу҆бѣ́гнꙋ мꙋ́ки а҆́зъ ѡ҆каѧ́нныи . чи́стаѧ припа́даю тѝ ᲂу҆ще́дри мѧ млⷭ҇тїю си , ꙗ҆́кᲂже ѻ҆нѣ́хъ сн҃ъ тво́й спа́слъ є҆́сть .

в̾ сре́дꙋ , ве́черъ , боⷢ҇ . Ра́дꙋисѧ ра́дᲂсте пра́дѣдᲂм̾ , а҆пⷭ҇лѡмъ , и҆ мч҃нкѡмъ весе́лїе , и҆ пᲂкро́въ на́мъ дв҃о , твᲂи́мъ рабо́мъ .

в̾ четверто́къ , на ᲂу҆́трени , боⷢ҇ . Ра́дꙋисѧ бцⷣе дв҃о . ра́дꙋисѧ пᲂхвало̀ всеѧ̀ вселе́ннѣй . ра́дꙋисѧ пречⷭ҇таѧ мт҃и бж҃їѧ бл҃гᲂслᲂве́наѧ .

в̾ пѧто́к̾ , ве́черъ , боⷢ҇ . Вᲂи́стинꙋ па́че ᲂу҆ма̀ твᲂѧ̀ чꙋ́днаѧ вели́чїѧ , ржⷭ҇тва̀ твᲂегѡ̀ бг҃ᲂневѣ́сто , ꙗ҆́же прᲂпᲂвѣ́даша прⷪ҇рцы всѝ , всѧ̀ пресла́внаѧ . зача́тїе и҆ ржⷭ҇тво̀ всепѣ́таѧ , недᲂмы́слено и҆ несказа́нно . и҆́мже ми́ръ спа́слъ є҆́сть , ꙗ҆́кѡ ми́лᲂсердъ .

в̾ сꙋбо́тꙋ , на ᲂу҆́трени , боⷢ҇ . Ра́дꙋисѧ ѿ на́съ ст҃а́ѧ бцⷣе дв҃о , чи́стыи сᲂсꙋ́де все́й вселе́ннѣй , свѣщѐ неꙋгаси́маѧ , вмѣсти́лище невмѣсти́магѡ , цр҃кви неѡ҆бᲂри́маѧ . ра́дꙋисѧ и҆з̾ неѧ́же рᲂди́сѧ а҆́гнецъ бж҃їи , взе́млѧи грѣхѝ всегѡ̀ ми́ра .

въ недѣ́лю , ве́черъ , боⷢ҇ . гла́съ , в҃ . Ра́дꙋисѧ мр҃і́е бцⷣе , цр҃кви не ѡ҆бᲂри́маѧ , па́че же ст҃а́ѧ , ꙗ҆́кᲂже вᲂпїе́тъ прᲂро́къ , ст҃а̀ цр҃кви твᲂѧ̀ , ди́вна въ пра́вдꙋ .

в̾ пᲂнлⷣникъ , на ᲂу҆́трени , боⷢ҇ . Натѧ̀ ᲂу҆пᲂва́нїе бцⷣе вᲂзлᲂжи́хᲂмъ , ча́ѧнїѧ да не ѿ паде́мъ , спасѝ на́съ ѿ бѣ́дъ , пᲂмо́щнице недᲂꙋмѣ́емымъ , и҆ сᲂпрᲂти́вныхъ сᲂвѣ́ты разᲂрѝ , ты́ бо є҆сѝ на́ше спасе́нїе бл҃гᲂслᲂве́наѧ .

в̾ пᲂнлⷣникъ , ве́черъ , боⷢ҇ . Непрᲂхᲂди́маѧ две́ре , та́йно запечатлѣ́ннаѧ , бл҃гᲂслᲂве́наѧ бцⷣе дв҃о , прїимѝ мл҃твы на́ша , и҆ принесѝ ѧ҆̀ сн҃ꙋ свᲂемꙋ̀ , и҆ бг҃ꙋ на́шемꙋ , да спасе́тъ тебѐ ра́ди дш҃а на́ша .

во вто́рникъ , на ᲂу҆́трени , боⷢ҇ . Спасѝ ѿ бѣ́дъ рабы̀ свᲂѧ̀ бцⷣѣ дв҃о , ꙗ҆́кѡ всѝ по́ бз҃ѣ к̾ тебѣ̀ прибѣга́емъ , ꙗ҆́кѡ к̾ нерꙋши́мѣй стѣнѣ̀ и҆ пред̾ста́тельницѣ .

в̾ сре́дꙋ , ве́черъ , боⷢ҇ . Ꙗ҆́кѡ плᲂдᲂви́та ма́слина дв҃аѧ ѿрастѝ тебѐ плᲂда̀ живо́тнаго , плᲂдᲂнᲂси́ти ми́рᲂви ве́лїю и҆ бᲂга́тꙋю млⷭ҇ть .

в̾ четверто́къ , на ᲂу҆́трени , боⷢ҇ . Всѐ ᲂу҆пᲂва́нїе мᲂѐ , на тѧ̀ вᲂз̾лага́ю мт҃и бж҃їѧ , сᲂхрани́ мѧ во свᲂе́мъ си кро́вѣ .

в̾ пѧто́къ , ве́черъ , боⷢ҇ . Спасѝ ѿ бѣ́дъ рабы̀ свᲂѧ̀ бцⷣѣ дв҃о , ꙗ҆́кѡ всѝ по́ бз҃ѣ к̾ тебѣ̀ прибѣга́емъ , ꙗ҆́кѡ к̾ нерꙋши́мѣй стѣнѣ̀ и҆ пред̾ста́тельницѣ .

в̾ сꙋбо́тꙋ , на ᲂу҆́трени , боⷢ҇ . Всѐ ᲂу҆пᲂва́нїе мᲂѐ , на тѧ̀ вᲂз̾лага́ю мт҃и бж҃їѧ , сᲂхрани́ мѧ во свᲂе́мъ си кро́вѣ .

въ недѣ́лю , ве́черъ , боⷢ҇ . гла́съ , г҃ . Влⷣчце пред̾ ста́тельнице всѣ́мъ мᲂлѧ́щимтисѧ , тᲂбо́ю дерза́емъ , и҆ тᲂбо́ю хва́лимсѧ , и҆ к̾ тебѣ̀ всѐ ᲂу҆пᲂва́нїе на́ше є҆́сть , мᲂлѝ ро́ждьшагᲂсѧ и҆з̾ тебѐ за непᲂтре́бныѧ рабы̀ твᲂѧ̀ .

в̾ пᲂнедѣ́льникъ , на ᲂу҆́трени , боⷢ҇ . Ст҃а чⷭ҇таѧ первᲂпᲂхвало̀ сꙋ́щи нбⷭ҇нымъ чинѡ́мъ . а҆пⷭ҇лѡмъ пѣ́нїе , и҆ пррⷪ҇кѡмъ събытїѐ . влⷣчце прїимѝ мл҃твы на́ша .

в̾ пᲂнедѣ́льникъ , ве́черъ , боⷢ҇ . Въ жена́хъ ст҃а́ѧ бцⷣе мт҃и без̾невѣ́стнаѧ , мᲂлѝ є҆го́же є҆сѝ рᲂдила̀ цр҃ѧ и҆ бг҃а , да спасе́тъ на́съ ꙗ҆́кѡ чл҃кᲂлю́бецъ .

во вто́рникъ , на ᲂу҆́трени , боⷢ҇ . Без̾ сѣ́мене зачала̀ є҆сѝ ѿ дх҃а ст҃а , и҆ славᲂсло́вѧще вᲂспѣва́емъ тѧ̀ , ра́дꙋисѧ прест҃а́ѧ дв҃о .

в̾ сре́дꙋ , ве́черъ , боⷢ҇ . Вельмѝ сᲂгрѣша́юща мѧ , ѻ҆трᲂкᲂви́це и҆схитѝ вели́кᲂю свᲂе́ю мл҃твᲂю пла́мене нꙋ́жнагѡ , и҆ и҆спра́ви чⷭ҇таѧ твᲂи́ми мᲂльба́ми , ко спасе́нымъ стезѧ́мъ наставлѧ́ ющи мѧ , мт҃рьними си мл҃твами .

в̾ четверто́къ , на ᲂу҆́трени , боⷢ҇ . Без̾ сѣ́мене зачала̀ є҆сѝ ѿ дх҃а ст҃а , и҆ славᲂсло́вѧще вᲂспѣва́емъ тѧ̀ , ра́дꙋисѧ прест҃а́ѧ дв҃о .

в̾ пѧто́къ , ве́черъ , боⷢ҇ . Вжена́хъ ст҃а́ѧ бцⷣе мт҃и без̾невѣ́стнаѧ , мᲂлѝ є҆го́же є҆сѝ рᲂдила̀ цр҃ѧ и҆ бг҃а , да спасе́тъ на́съ ꙗ҆́кѡ чл҃кᲂлю́бецъ .

в̾ сꙋбо́тꙋ , на ᲂу҆́трени , боⷢ҇ . Без̾ сѣ́мене зачала̀ є҆сѝ ѿ дх҃а ст҃а , и҆ славᲂсло́вѧще вᲂспѣва́емъ тѧ̀ , ра́дꙋисѧ прест҃а́ѧ дв҃о .

въ нлⷣю , ве́черъ , боⷢ҇ . гла́съ , д҃ . Ра́дꙋисѧ свѣ́та ѻ҆́блаче . ра́дꙋисѧ свѣ́щниче свѣ́тлыи . ра́дꙋисѧ рꙋ́чко в̾ не́й же ма́нна . ра́дꙋисѧ же́зле а҆арѡ́нᲂвъ . ра́дꙋисѧ кꙋпино̀ неѡ҆пали́маѧ . ра́дꙋисѧ черто́же . ра́дꙋисѧ прⷭ҇то́ле . ра́дꙋисѧ гᲂро̀ ст҃а́ѧ . ра́дꙋисѧ прибѣ́жище . ра́дꙋисѧ бжⷭ҇твенаѧ трапе́зо . ра́дꙋисѧ две́рь та́йнаѧ . ра́дꙋйсѧ всѣ́мъ ра́дᲂсте .

в̾ пᲂнлⷣникъ , на ᲂу҆́трени , боⷢ҇ . Бцⷣе всѣ́мъ цр҃це , правᲂсла́внымъ пᲂхвало̀ , є҆рети́чествꙋющихъ шата́нїѧ разᲂрѝ , и҆ ли́ца и҆́хъ пᲂсрамѝ , не кла́нѧющихсѧ ни чтꙋ́щихъ , пречⷭ҇таѧ честны́и ѻ҆́бразъ тво́й .

в̾ пᲂнедѣ́льникъ , ве́черъ , боⷢ҇ . И҆зба́ви на́съ ѿ бѣ́дъ на́шихъ мт҃и хрⷭ҇та̀ бг҃а , ро́ждьшаѧ всѣ́хъ твᲂрца̀ , да всѝ вᲂпїе́мъ ти , ра́дꙋисѧ є҆ди́на спасе́нїе дꙋ́шъ на́шихъ .

во вто́рникъ , на ᲂу҆́трени , боⷢ҇ . Ѿ всѣ́хъ бѣ́дъ рабы̀ свᲂѧ̀ сᲂхранѝ бл҃гᲂслᲂве́наѧ бцⷣе , да тѧ̀ сла́вимъ наде́жꙋ дш҃а́мъ на́шимъ .

в̾ сре́дꙋ , ве́черъ , боⷢ҇ . И҆мꙋ́ще тѧ бцⷣе ᲂу҆пᲂва́нїе и҆ пᲂмо́щницꙋ , вра́жїихъ навѣ́тъ небᲂи́мсѧ , ꙗ҆́кѡ спаса́еши дꙋ́ши на́ши .

въ четверто́къ , на ᲂу҆́трени , боⷢ҇ . Тѧ̀ стѣ́нꙋ стѧжа́хᲂмъ бцⷣе пречⷭ҇таѧ , и҆ бл҃гᲂꙋти́шнᲂе приста́нище и҆ ᲂу҆тверже́нїе . тѣ́мже мᲂлю́сѧ , и҆́же в̾ житїѝ ѡ҆бꙋрева́емь ѡ҆кᲂрмѝ и҆ спаси́ мѧ .

въ пѧто́къ , ве́черъ , боⷢ҇ . Свѣщѐ неꙋгаси́маѧ , престо́ле пра́ведныи пречⷭ҇таѧ влⷣчце , мᲂлѝ спасти́сѧ дш҃а́мъ на́шимъ .

в̾ сꙋбо́тꙋ , на ᲂу҆́трени , боⷢ҇ . Є҆ди́на чи́стаѧ и҆ пречⷭ҇таѧ дв҃о , ꙗ҆́же бг҃а без̾сѣ́меннѡ ро́ждьшаѧ , мᲂлѝ спасти́сѧ дш҃а́мъ на́шимъ .

въ недѣ́лю , ве́черъ , боⷢ҇ . гла́съ , є҃ . Стра́шно и҆ пресла́вно , и҆ ве́лїе та́инство . невмѣсти́мыи во́ чрево в̾мѣсти́сѧ , и҆ мт҃и по ржⷭ҇твѣ̀ па́ки пребы́сть дв҃а , бг҃а бо рᲂдѝ и҆з̾ неѧ̀ вᲂплᲂще́нна . тᲂмꙋ̀ вᲂзᲂпїе́мъ , тᲂмꙋ̀ пѣ́снь рце́мъ , со а҆́нг҃лы вᲂспѣва́юще , ст҃ъ є҆сѝ без̾нача́льныи бж҃е , и҆́же на́съ ра́ди вᲂчл҃чивыисѧ сла́ва тебѣ̀ .

в̾ пᲂнлⷣникъ , на ᲂу҆́трени , боⷢ҇ . Ѡ҆бра́дᲂваннаѧ хᲂда́тайствꙋй твᲂи́ми мл҃твами , и҆ и҆спрᲂсѝ дш҃а́мъ на́шимъ мно́жествѡ щедро́тъ , и҆ ѡ҆чище́нїе мно́гимъ прегрѣше́нїемъ мо́лимсѧ .

в̾ пᲂнедѣ́льникъ , ве́черъ , боⷢ҇ . Оу҆тᲂлѝ бᲂлѣ́зни мно́го вᲂздыха́ющїѧ дш҃и мᲂеѧ̀ , ᲂу҆ста́вившаѧ всѧ́кꙋ сле́зꙋ ѿ лица̀ землѝ . ты́ бо чл҃кѡмъ бᲂлѣ́зни ѿгᲂнѧ́еши , и҆ грѣ́шныхъ ско́рби разрꙋша́еши . тебе́ бо всѝ стѧжа́хᲂмъ наде́ждꙋ и҆ ᲂу҆тверже́нїе , прест҃а́ѧ мт҃и дв҃о .

во вто́рникъ , на ᲂу҆́трени , боⷢ҇ . Ѡ҆бра́дᲂваннаѧ хᲂда́тайствꙋй твᲂи́ми мл҃твами , и҆ и҆спрᲂсѝ дш҃а́мъ на́шимъ мно́жествѡ щедро́тъ , и҆ ѡ҆чище́нїе мно́гимъ прегрѣше́нїемъ мо́лимсѧ .

в̾ сре́дꙋ , ве́черъ , боⷢ҇ . Бл҃жи́мъ тѧ̀ бцⷣе дв҃о , и҆ сла́вимъ тѧ̀ вѣ́рнїи по́ дᲂлгꙋ , гра́дъ непᲂкᲂлеби́мыи , стѣ́нꙋ не ѡ҆бᲂри́мꙋю , тве́рдꙋю пред̾ста́тельницꙋ , и҆ прибѣ́жище дш҃а́мъ на́шимъ .

в̾ четверто́къ , на ᲂу҆́трени , боⷢ҇ . Бл҃жи́мъ тѧ̀ бцⷣе дв҃о , ꙗ҆́кѡ и҆з̾ тебѐ вᲂсїѧ̀ сл҃нце пра́веднᲂе хрⷭ҇то́съ , и҆мѣ́ѧи ве́лїю млⷭ҇ть .

в̾ пѧто́къ , ве́черъ , боⷢ҇ . Ѡ҆бра́дᲂваннаѧ хᲂда́тай ствꙋй твᲂи́ми мл҃твами , и҆ и҆спрᲂсѝ дш҃а́мъ на́шимъ мно́жествѡ щедро́тъ , и҆ ѡ҆чище́нїе мно́гимъ прегрѣше́нїемъ мо́лимсѧ .

в̾ сꙋбо́тꙋ , на ᲂу҆́трени , боⷢ҇ . Ѽле ѻ҆каѧ́ннаѧ дш҃е , кі́и ѿвѣ́тъ и҆́маши рещѝ сꙋдїѝ во ѻ҆́нъ ча́съ , є҆гда̀ престо́ли пᲂста́вѧтсѧ на сꙋдѣ̀ , и҆ сꙋдїѧ̀ прїи́детъ ѿ нб҃съ , сᲂше́дъ со тма́ми а҆́нг҃льскими ; є҆гда̀ сѧ́детъ на сꙋди́щи , прю̀ сᲂтвᲂри́ти с̾ рабы̀ непᲂтре́бными , пᲂдо́бными мнѣ̀ , что̀ ѿвѣща́ти и҆́маши ; что́же принестѝ тᲂгда̀ ; пᲂи́стинѣ ни что́же , ᲂу҆́мъ и҆ тѣ́ло ѡ҆скверни́въ сѝ . тѣ́мже припадѝ къ дв҃ѣй , и҆ зᲂвѝ непреста́ннѡ , пᲂда́ти тебѣ̀ бᲂга́тнѡ грѣхо́въ прᲂще́нїе .

въ недѣ́лю , ве́черъ , боⷢ҇ . гла́съ , ѕ҃ . А҆рха́нг҃льски вᲂспᲂе́мъ вѣ́рнїи , нбⷭ҇ныи черто́гъ , и҆ две́рь запечатлѣ́ннꙋ вᲂи́стинꙋ , ра́дꙋисѧ , є҆ѧ́же ра́ди ѿрастѐ на́мъ сп҃съ всѧ́ческихъ хрⷭ҇то́съ жизнᲂда́вецъ и҆ бг҃ъ . низ̾лᲂжѝ влⷣчце мꙋчи́тели , безбо́жныѧ врагѝ на́ша . рꙋко́ю сѝ пречⷭ҇таѧ , ᲂу҆пᲂва́нїе хрⷭ҇тїа́нѡмъ .

въ пᲂнлⷣникъ , на ᲂу҆́трени , боⷢ҇ . А҆рха́нг҃льскᲂе сло́во прїе́мши , и҆ херꙋви́мскїи прⷭ҇то́лъ пᲂказа́сѧ , и҆ на рꙋкꙋ̀ нᲂси́ла є҆сѝ бцⷣе наде́жꙋ дш҃а́мъ на́шимъ .

въ пᲂнлⷣникъ , ве́черъ , боⷢ҇ . Никто́же притека́ѧ къ тебѣ̀ , пᲂсра́мленъ ѿ тебѐ и҆схо́дитъ чⷭ҇таѧ дв҃о бцⷣе , но про́ситъ бл҃гᲂда́ти , и҆ прїе́млетъ дарᲂва́нїе к̾ пᲂле́знᲂмꙋ прᲂше́нїю .

во вто́рникъ , на ᲂу҆́трени , боⷢ҇ . Вели́кимъ дарѡ́мъ спᲂдо́биласѧ є҆сѝ , є҆ди́на пречⷭ҇таѧ дв҃о мт҃и бж҃їѧ , ꙗ҆́кѡ рᲂдила̀ є҆сѝ на́мъ є҆ди́нᲂго ѿ трⷪ҇цы , хрⷭ҇та̀ жизнᲂда́вца , во спасе́нїе дш҃а́мъ на́шимъ .

в̾ сре́дꙋ , ве́черъ , боⷢ҇ . Ѻ҆́ко срⷣца мᲂегѡ̀ вᲂспꙋща́ю к̾ тебѣ̀ влⷣчце , непре́зри ма́лᲂе ми вᲂз̾дыха́нїѧ в̾ ча́съ , є҆гда̀ сꙋ́дитъ сн҃ъ тво́й ми́рꙋ , бꙋ́ди ми пᲂкро́въ и҆ пᲂмо́щница .

въ четверто́къ , на ᲂу҆́трени , боⷢ҇ . Прелᲂже́нїе скᲂрбѧ́щимъ , премѣне́нїе бᲂлѧ́щимъ є҆сѝ бцⷣе всепѣ́таѧ , спасѝ гра́дъ и҆ лю́ди . бᲂри́мымъ смире́нїе , ѡ҆бꙋрева́емымъ тишина̀ , є҆ди́на пред̾ста́тельница вѣ́рнымъ .

в̾ пѧто́къ , ве́черъ , боⷢ҇ . Мᲂли́твами ро́ждьшїѧ тѧ хрⷭ҇тѐ , мч҃нкъ твᲂи́хъ , и҆ а҆пⷭ҇лъ и҆ пррⷪ҇къ , и҆ ст҃лей , прпⷣбныхъ , и҆ пра́ведныхъ , и҆ всѣ́хъ ст҃ы́хъ , ᲂу҆со́пшїѧ рабы̀ свᲂѧ̀ пᲂко́й .

въ сꙋбо́тꙋ , на ᲂу҆́трени , боⷢ҇ . Бг҃а и҆з̾ тебѐ вᲂплᲂти́вшасѧ разꙋмѣ́хᲂмъ бцⷣе дв҃о . тᲂгѡ̀ мᲂлѝ ѡ҆ спасе́нїи дш҃ъ на́шихъ .

в̾ нлⷣю , ве́черъ , боⷢ҇ . гла́съ , з҃ . Є҆́же ра́дꙋисѧ тебѣ̀ зᲂве́мъ со а҆́нг҃лѡмъ бг҃ᲂневѣ́сто , черто́гъ и҆ две́рь , и҆ прⷭ҇то́лъ ѻ҆́гненъ , нарица́юще тебѐ , и҆ несѣко́мꙋю го́рꙋ , и҆ кꙋпинꙋ̀ неѡ҆пали́мꙋю .

в̾ пᲂнлⷣникъ , на ᲂу҆́трени , боⷢ҇ . Оу҆мирѝ мл҃твами бцⷣы жи́знь на́шꙋ вᲂпїю́щихъ тѝ , ми́лᲂстивыи , гдⷭ҇и сла́ва тебѣ̀ .

в̾ пᲂнлⷣникъ , ве́черъ , боⷢ҇ . Ра́дꙋисѧ сл҃нца ѻ҆́блаче мы́сленагѡ и҆ не и҆зрече́ннагѡ влⷣчце . ра́дꙋисѧ всесвѣ́тлаѧ свѣщѐ . ра́дꙋисѧ свѣ́щниче всезлаты́и . тᲂбо́ю прест҃а́ѧ , є҆́вва и҆зба́висѧ ѿ клѧ́твы . но ꙗ҆́кѡ и҆мꙋ́щи дерзнᲂве́нїе , к̾ бл҃гᲂпремѣ́ннᲂмꙋ сн҃ꙋ свᲂемꙋ̀ и҆ бг҃ꙋ , мт҃рьнею сѝ мл҃твᲂю не ѡ҆скꙋдѣ́й , мᲂли́тисѧ пречⷭ҇таѧ .

во вто́рникъ , на ᲂу҆́трени , боⷢ҇ . Свѣ́тъ хрⷭ҇тѐ вᲂсїѧ́лъ є҆сѝ ѿ дв҃ы , и҆ прᲂсвѣти́лъ є҆сѝ ро́дъ чл҃ческїи , гдⷭ҇и сла́ва тебѣ̀ .

въ сре́дꙋ , ве́черъ , боⷢ҇ . Є҆ди́нꙋ по ржⷭ҇твѣ̀ пречⷭ҇тꙋю дв҃ꙋ вᲂспᲂе́мъ , ꙗ҆́кѡ мт҃рь бг҃а сло́ва , гл҃юще , сла́ва тебѣ̀ .

в̾ четверто́къ , на ᲂу҆́трени , боⷢ҇ . Рᲂди́всѧ ѿ дв҃ы несказа́нно хрⷭ҇тѐ , и҆ прᲂсвѣти́лъ є҆сѝ сꙋ́щїѧ во тмѣ̀ , вᲂпїю́щїѧ гдⷭ҇и сла́ва тебѣ̀ .

в̾ пѧто́къ , ве́черъ , боⷢ҇ . Ꙗ҆́же є҆ди́на невмѣсти́ маго прїе́мши , и҆ ро́ждьши бг҃а сло́ва вᲂпло ще́нна , мᲂлѝ спасти́сѧ дш҃а́мъ на́шимъ .

въ сꙋбо́тꙋ , на ᲂу҆́трени , боⷢ҇ . Пᲂе́мъ тѧ пречⷭ҇таѧ бцⷣе и҆ сла́вимъ , є҆го́же рᲂдила̀ є҆сѝ бг҃а сло́ва , зᲂвꙋ́ще сла́ва тебѣ̀ .

в̾ нлⷣю , ве́черъ , боⷢ҇ . гла́съ , и҃ . А҆рха́нг҃ла гаврїи́ла гла́съ вᲂспрїи́мше рце́мъ , ра́дꙋисѧ мт҃и бж҃їѧ , ꙗ҆́же жизнᲂда́вца хрⷭ҇та̀ ми́рꙋ ро́ждьшаѧ .

в̾ пᲂнлⷣникъ , на ᲂу҆́трени , боⷢ҇ . Нбⷭ҇наѧ пᲂю́тъ тѧ ѡ҆бра́дᲂваннаѧ мт҃и без̾невѣ́стнаѧ , и҆ мы̀ славᲂсло́вимъ , не и҆з̾слѣ́дᲂваннᲂе твᲂѐ ржⷭ҇тво̀ бцⷣе . мᲂлѝ спасти́сѧ дш҃а́мъ на́шимъ .

въ пᲂнлⷣникъ , ве́черъ , боⷢ҇ . Ра́дꙋисѧ вселе́ннѣй пᲂхвало̀ . ра́дꙋисѧ цр҃кви гдⷭ҇нѧ . ра́дꙋисѧ гᲂро̀ присѣ́ннаѧ . ра́дꙋисѧ всѣ́мъ прибѣ́жище . ра́дꙋисѧ свѣ́щниче златы́и , ра́дꙋисѧ сла́во правᲂсла́вныхъ честна́ѧ . ра́дꙋисѧ мр҃і́е мт҃и хрⷭ҇та̀ бг҃а , ра́дꙋисѧ раю̀ . ра́дꙋисѧ бжⷭ҇твенаѧ трапе́зо . ра́дꙋисѧ хра́ме . ра́дꙋисѧ ста́мно всезлата́ѧ . ра́дꙋисѧ всѣ́хъ ᲂу҆пᲂва́нїе .

во вто́рникъ , на ᲂу҆́трени , боⷢ҇ . Кро́въ тво́й бцⷣе дв҃о врачевство̀ є҆́сть дх҃о́внᲂе , во́нь бо прибѣга́юще ѿ дш҃е́вныхъ недꙋ́гъ и҆збавлѧ́емсѧ .

въ сре́дꙋ , ве́черъ , боⷢ҇ . А҆́зъ пᲂд̾ кро́въ тво́й прибѣга́ю , дв҃о ст҃а́ѧ бцⷣе , вѣ́мъ бо ꙗ҆́кѡ ѡ҆брѧ́щꙋ тᲂбо́ю спасе́нїе , мо́жеши ᲂу҆́бѡ чⷭ҇таѧ пᲂмᲂщѝ мнѣ̀ .

в̾ четверто́к̾ , на ᲂу҆́трени , боⷢ҇ . И҆схи́ти мѧ влⷣчце рꙋкѝ ѕмі́евы чл҃кᲂꙋбі́йца , хᲂтѧ́ща мѧ лꙋка́в ствᲂмъ пᲂглᲂти́ти дᲂкᲂнца̀ , сᲂкрꙋшѝ че́люсти є҆гѡ̀ мᲂлю́ тѧ , и҆ ко́зни разᲂрѝ . ꙗ҆́кѡ да и҆збы́въ ѿ нᲂгте́й є҆гѡ̀ , велича́ю застꙋпле́нїе твᲂѐ .

в̾ пѧто́къ , ве́черъ , боⷢ҇ . Влⷣчце прїимѝ мл҃твы ра́бъ свᲂи́хъ , и҆ и҆зба́ви на́съ ѿ всѧ́кїѧ нꙋ́жды и҆ печа́ли .

в̾ сꙋбо́тꙋ , на ᲂу҆́трени , боⷢ҇ . Чи́стаѧ дв҃о , сло́вꙋ две́ри , бг҃а на́шегѡ мт҃и , мᲂлѝ спасти́сѧ на́мъ .