Въ сре́дꙋ , ве́черъ . на гдⷭ҇и вᲂзва́хъ , стⷯры , ст҃ы́мъ а҆пⷭ҇лѡмъ . гла́съ , а҃ . поⷣ . прехва́льнїи мчн҃цы . запѣ́въ : ꙗ҆́кѡ ѿ тебѐ ѡ҆чище́нїе є҆́сть . А҆пⷭ҇ли сла́внїи хрⷭ҇то́вы ,꙳ дрꙋ́зи при́снѣйшїи ,꙳ вра́жїѧ дрꙋ́га мѧ сꙋ́ща ꙳ лꙋка́выми дѣлесы̀ ,꙳ любвѐ страстны́ѧ ,꙳ ѡ҆ста́вльше мѧ̀ , и҆ вᲂз̾люби́вшемꙋ ,꙳ и҆зрѧ́дными дѣ́лы тᲂмꙋ̀ присво́йте ,꙳ и҆́же тᲂго̀ ѡ҆гᲂрчи́вшагѡ ,꙳ любᲂбл҃гᲂꙋтро́бїемъ , дрꙋ́га пᲂказа́вша .

ᲂу҆пᲂва̀ дꙋша̀ мᲂѧ̀ на́ гдⷭ҇а . А҆пⷭ҇ли всемꙋ́дрїи ,꙳ хрⷭ҇то́вы ᲂу҆ченицы̀ бг҃ᲂзва́ннїи ,꙳ вселе́ннѣй ᲂу҆чи́телїе ,꙳ ва́шими мл҃твами ,꙳ бжⷭ҇твенымъ ᲂу҆че́нїемъ ꙳ внима́ти ᲂу҆крѣпи́те мѧ .꙳ и҆ стезе́ю тѣ́снᲂю вᲂзмᲂга́йте хᲂди́ти ми всегда̀ ,꙳ ꙗ҆́кѡ да дᲂспѣ́ю в̾ пребыва́нїе ꙳ ра́йскᲂе прᲂстра́ннѣйшеє .

да ᲂу҆пᲂва́етъ і҆зра́иль на́ гдⷭ҇а . Петра̀ первᲂпресто́льнаго вᲂспѣва́ю .꙳ па́вла , і҆а́кѡва ,꙳ а҆ндре́ѧ , и҆ филі́ппа , сі́мѡна ,꙳ варѳᲂлᲂме́ѧ же , и҆ ѳѡмꙋ̀ ,꙳ матѳе́ѧ же , и҆ і҆ѡа́нна , ма́рка же , и҆ лꙋкꙋ̀ ,꙳ и҆́же бл҃гᲂвѣ́стїѧ списа́вшихъ .꙳ ли́къ бг҃ᲂи҆збра́нныи ,꙳ со и҆нѣ́ми седмїю̀ десѧ́тьми ,꙳ ꙗ҆́кѡ сло́вꙋ самᲂви́дцы , и҆ прᲂпᲂвѣ́дники .

та́же , в̾ минѣ́и , стⷯры , ст҃о́мꙋ , а҆́ще и҆́мать . а҆́ще нѣ́сть минѣ́и . и҆́ны , стихѣ́ры , вели́кᲂмꙋ ст҃лю и҆ чꙋдᲂтво́рцꙋ нико́лѣ . гла́съ , а҃ . поⷣ . нбⷭ҇нымъ чино́мъ . запѣ́въ : ѿ всѣ́хъ без̾зако́нїи є҆гѡ̀ . Цр҃ко́вныѧ цвѣ́ты прелѣта́ѧ ,꙳ ꙗ҆́кᲂже птене́цъ вы́шнѧго гнѣзда̀ а҆́нг҃льскагѡ ,꙳ нико́лае требл҃же́нне ,꙳ зᲂве́ши прⷭ҇нѡ к̾ бг҃ꙋ ѡ҆ всѣ́хъ лю́дехъ .꙳ и҆́же в̾ нꙋ́жныхъ бѣда́хъ и҆ и҆скꙋше́нїихъ ,꙳ и҆збавлѧ́еши мл҃твами сѝ .

пᲂхвали́те є҆гѡ̀ всѝ лю́дїє . Нбⷭ҇ныѧ дᲂбро́ты прᲂхᲂдѧ̀ ,꙳ и҆ стра́шнꙋю ѻ҆́нꙋ разꙋмѣ́лъ є҆сѝ ꙳ сла́вꙋ , ст҃ꙋ́ю ст҃ы́хъ .꙳ тѣ́мже и҆ на́мъ нбⷭ҇наѧ слᲂвеса̀ ,꙳ прⷭ҇нѡ живо́тныхъ ѻ҆́нѣхъ зрѣ́нїи ,꙳ ꙗ҆влѧ́еши сщ҃е́ннѣйшїи ѻ҆́ч҃е .

и҆ и҆́стина гдⷭ҇нѧ пребыва́етъ во́ вѣки . Сщ҃е́нныѧ ѻ҆де́жды ᲂу҆краше́нїе ,꙳ дѣ́лательными сᲂдѣ́лалъ є҆сѝ ꙳ дᲂбрᲂдѣ́тельми свѣтлѣ́йшꙋ ѻ҆́ч҃е бг҃ᲂно́се .꙳ тѣ́мже и҆ на́мъ сщ҃еннᲂдѣ́йствꙋеши ди́внаѧ ,꙳ сла́вныхъ чꙋде́съ хрⷭ҇та̀ ра́ди .꙳ и҆ лю́тыхъ на́съ и҆збавлѧ́ѧ .

сла́ва , и҆ ны́нѣ , боⷢ҇ . Прегрѣше́нїи пꙋчи́нᲂю ѡ҆бꙋрева́емь ,꙳ ти́хᲂмꙋ приста́нищꙋ прибѣ́гъ ,꙳ пречⷭ҇тѣй мл҃твѣ твᲂе́й ,꙳ бг҃ᲂрᲂди́тельнице взыва́ю ти спаси́ мѧ .꙳ крѣ́пкꙋю свᲂю̀ десни́цꙋ прᲂсте́рши ,꙳ рабꙋ̀ свᲂемꙋ̀ всенепᲂро́чнаѧ .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стⷯры , ст҃ы́мъ а҆пⷭ҇лѡмъ . гла́съ , а҃ . А҆пⷭ҇льскаѧ всесᲂста́внаѧ цѣвни́ца , ст҃ы́мъ дх҃ᲂмъ дви́жима , ме́рзскїѧ бѣсо́мъ же́ртвы ᲂу҆праздни́ла є҆́сть . и҆ є҆ди́нагѡ гдⷭ҇а прᲂпᲂвѣ́давши . ꙗ҆зы́ки и҆зба́ви ѿ пре́лести и҆́дᲂльскїѧ . и҆ пᲂклᲂнѧ́тисѧ наꙋчѝ трⷪ҇цѣ є҆динᲂсꙋ́щнѣй .

сти́хъ : к̾ тебѣ̀ вᲂзведо́хъ . Петра̀ и҆ па́вла сᲂгла́снѡ пᲂхва́лимъ . лꙋкꙋ̀ , матѳе́ѧ , ма́рка , і҆ѡа́нна , а҆ндре́ѧ , ѳѡмꙋ̀ , варѳᲂлᲂме́ѧ , сі́мѡна канани́та , і҆ѧ́кѡва , и҆ филі́ппа , и҆ ве́сь ли́къ ᲂу҆чени́ческїи , дᲂсто́йнѡ да вᲂсхва́лимъ .

сти́хъ : пᲂми́лꙋй на́съ . мⷱ҇ꙋ . поⷣ . Прехвальнїи мч҃нцы ,꙳ ва́съ ни землѧ̀ пᲂтаи́ла є҆́сть ,꙳ но не́бо прїѧ́тъ вы̀ ,꙳ и҆ ѿверзо́шасѧ ва́мъ ра́йскїѧ две́ри ,꙳ и҆ внꙋ́трь бы́вше ,꙳ дре́ва живо́тнагѡ наслажда́етесѧ .꙳ хрⷭ҇то́ви мᲂли́тесѧ ,꙳ дарᲂва́ти дш҃а́мъ на́шимъ ,꙳ ми́ръ и҆ ве́лїю млⷭ҇ть .

сла́ва , и҆ нн҃ѣ , боⷢ҇ . Ра́дꙋисѧ ра́дᲂсте пра́дѣдᲂмъ , а҆пⷭ҇лѡмъ , и҆ мч҃нкѡмъ весе́лїе , и҆ пᲂкро́въ на́мъ дв҃о , твᲂи́мъ рабѡ́мъ .

та́же , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ . во́ гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Всре́дꙋ , на па́вечерницѣ . кано́нъ , прест҃ѣ́й бцⷣѣ .

гла́съ , а҃ . пѣ́снь , а҃ . і҆рмо́съ . Пѣ́снь пᲂбѣ́днꙋю вᲂспᲂе́мъ всѝ бг҃ꙋ , сᲂтво́ршемꙋ ди́внаѧ чꙋдеса̀ мы́шцею высо́кᲂю , и҆ спа́сшꙋ і҆и҃лѧ , ꙗ҆́кѡ прᲂсла́висѧ . запѣ́в̾ : прⷭ҇та́ѧ гжⷭ҇е бцⷣе спасѝ на́съ . Кꙋпина́ тѧ вᲂѡ҆бража́ше бг҃ᲂрᲂди́тельнице , ѻ҆́гнь бо нᲂси́ла є҆сѝ вᲂи́стинꙋ непᲂстᲂѧ́нныи , пребы́вши неѡ҆па́льна . тѣ́мже тѧ вѣ́рными гла́сы пѣснᲂсло́вимъ при́снѡ . Ѡ҆бо́лксѧ в̾ чл҃ка бг҃ъ сло́во , и҆з̾ тебѐ па́че смы́сла вᲂплᲂти́сѧ пречⷭ҇таѧ . тѣ́мъ тѧ всѧ́кᲂе дыха́нїе славᲂсло́витъ и҆ пᲂкланѧ́ет̾тисѧ , и҆ по́ дᲂлгꙋ чте́тъ . сла́ва . Зачала̀ є҆сѝ пречⷭ҇таѧ неи҆зрече́ннᲂе сло́во , и҆́же всѧ̀ сᲂдержа́щаго земны́ѧ кᲂнцы̀ , и҆ сегѡ̀ рᲂдила̀ є҆сѝ . є҆го́же мᲂлѝ прилѣ́жнѡ , пᲂми́лᲂвати на́съ . и҆ ны́нѣ . И҆́же є҆ди́на без̾лѣ́тнаго бг҃а , в̾ лѣ́то ро́ждьши вᲂплᲂще́на пречⷭ҇таѧ влⷣчце , страстны́ѧ ми дш҃и вселѣ́тныѧ стра́сти и҆сцѣлѝ .

пѣ́снь , г҃ . і҆рмо́съ . Да ᲂу҆тверди́тсѧ срⷣце мᲂѐ в̾ во́ли твᲂе́й хрⷭ҇тѐ бж҃е , и҆́же над̾ вᲂда́ми нб҃о ᲂу҆тверже́и втᲂро́е , и҆ ѡ҆снᲂва́выи на вᲂда́хъ зе́млю всемᲂгі́и . Да ѡ҆бᲂжи́тъ чл҃чество , бг҃ъ бы́сть чл҃къ , и҆з̾ тебѐ дв҃о чⷭ҇таѧ , па́че сло́ва и҆ смы́сла . сегѡ̀ ра́ди тѧ сᲂгла́снѡ вѣ́рнїи ᲂу҆бл҃жа́емъ . И҆́же є҆стество́мъ не ѡ҆пи́санныи , вᲂпло́щьсѧ и҆з̾ тебѐ написа́сѧ бг҃ᲂбл҃гᲂда́тнаѧ чи́стаѧ . є҆го́же непреста́ннѡ мᲂлѝ , ᲂу҆ще́дрити , и҆ прᲂсвѣти́ти дꙋ́ши блажа́щихъ тѧ̀ . сла́ва . Непло́дствᲂвавши мы́сли мᲂе́й непло́дїѧ всегѡ̀ ѿпꙋстѝ , и҆ плᲂдᲂно́снꙋ дᲂбрᲂдѣ́тельми дш҃ꙋ мᲂю̀ пᲂкажѝ , прест҃а́ѧ бцⷣе вѣ́рнымъ пᲂмо́щнице . и҆ ны́нѣ . И҆зба́ви мѧ пренепᲂро́чнаѧ всѧ́кᲂгѡ ѡ҆бстᲂѧ́нїѧ , и҆ мно́гихъ сᲂбла́знъ ѕмі́евыхъ , вѣ́чнꙋющаго же ѻ҆гнѧ̀ и҆ тмы̀ , ꙗ҆́же свѣ́тъ ро́ждьшаѧ на́мъ невече́рнїи .

пѣ́снь , д҃ . і҆рмо́съ . Дх҃ᲂмъ пред̾зрѧ̀ пррⷪ҇къ а҆вва́кꙋмъ , слᲂвесѐ вᲂплᲂще́нїе прᲂпᲂвѣ́даше глаго́лѧ , внегда̀ прибли́жатсѧ лѣ́та пᲂзна́нъ бꙋ́деши . внегда̀ прїи́детъ вре́мѧ ꙗ҆ви́шисѧ , сла́ва си́лѣ твᲂе́й гдⷭ҇и . Въ чи́стᲂе твᲂѐ чре́во всели́сѧ хрⷭ҇то́съ , всест҃а́ѧ влⷣчце ѡ҆бᲂжѝ на́съ , пло́ть прїе́мъ ѡ҆дш҃евле́нꙋ . тѣ́мъ тѧ чи́стꙋю мт҃рь правᲂсла́внѡ вᲂспѣва́емъ влⷣчце , ми́рꙋ пᲂмо́щнице . Ст҃а́ѧ бцⷣе ѡ҆ст҃ѝ на́съ , ꙗ҆́же прест҃а́гѡ ро́ждьши пло́тїю , ᲂу҆пᲂдо́битисѧ хᲂтѣ́вша чл҃кѡмъ , и҆ нбⷭ҇наго црⷭ҇твїѧ всѧ̀ ꙗ҆вѝ пречⷭ҇таѧ прича́стники , мᲂли́твами сѝ . сла́ва . Дв҃о бцⷣе , нескве́рнаѧ сѣ́ни , ѡ҆скве́рньшагᲂсѧ прегрѣше́ньми ѡ҆чи́сти мѧ ны́нѣ , щедро́тъ твᲂи́хъ чи́стыми зарѧ́ми , и҆ да́ждь ми рꙋ́кꙋ по́мᲂщи , да зᲂвꙋ̀ , сла́ва си́лѣ твᲂе́й гдⷭ҇и . и҆ нн҃ѣ . Цр҃кᲂвь ѡ҆сщ҃е́ннаѧ бг҃ᲂви ꙗ҆ви́сѧ , и҆́же в̾ тѧ̀ все́льшемꙋсѧ дв҃о па́че ᲂу҆ма̀ . тᲂго̀ мᲂлѝ , грѣхо́въ на́шихъ скве́рнꙋ ѡ҆чи́стити , ꙗ҆́кѡ да хра́мы пᲂка́жемсѧ , и҆ жили́ще дх҃ꙋ .

пѣ́снь , є҃ . і҆рмо́съ . Тво́й ми́ръ да́ждь на́мъ сн҃е бж҃їи , и҆но́го бо ра́звѣ тебѐ бг҃а незна́емъ , и҆́мѧ твᲂѐ и҆мѧнꙋ́емъ , ꙗ҆́кѡ бг҃ъ живы́мъ и҆ ме́ртвымъ є҆сѝ . Ме́ртва мѧ сᲂдѣ́ла и҆нᲂгда̀ во є҆де́мѣ вкꙋше́нїе лꙋка́вᲂе , живо́тъ же ро́ждьши чи́стаѧ , и҆́же дре́вᲂмъ дре́вле ᲂу҆ме́рша ѡ҆живᲂтвᲂрѝ . тѣ́мъ тѧ славᲂсло́вѧ вᲂспѣва́ю . Спаси́ мѧ всечⷭ҇таѧ ѿ бѣ́дъ лю́тыхъ , вᲂздви́гни ѿ стрⷭ҇те́й гнᲂйны́хъ , и҆ и҆зба́ви мѧ плѣне́нїѧ и҆ ѡ҆ѕлᲂбле́нїѧ лꙋка́выхъ бѣсо́въ , любо́вїю чтꙋ́щаго тѧ . сла́ва . Ѻ҆́блакъ , и҆ ра́й , и҆ две́рь свѣ́тꙋ , трапе́зꙋ и҆ рꙋно̀ зна́емъ тѧ , и҆ ста́мнꙋ внꙋ́трь ма́ннꙋ нᲂсѧ́щꙋ , и҆ сла́дᲂсть ми́рꙋ , чи́стаѧ дв҃о мт҃и . и҆ ны́нѣ . Ро́ждьши пренепᲂро́чнаѧ бг҃а є҆мманꙋ́ила , чл҃ка ꙗ҆́вѣ за млрⷭ҇дїе бы́вшагѡ , сегѡ̀ мᲂлѝ ꙗ҆́кѡ чл҃кᲂлю́бца чи́стаѧ , ᲂу҆ще́дрити лю́ди сᲂгрѣ́шшїѧ .

пѣ́снь , ѕ҃ . і҆рмо́съ . Ꙗ҆́кѡ і҆ѡ́нꙋ пррⷪ҇ка , вᲂз̾ведѝ хрⷭ҇тѐ бж҃е жи́знь мᲂю̀ ѿ тлѝ , вᲂпїю́ ти млрⷭ҇де , ꙗ҆́кѡ живо́тъ ᲂу҆ тебѐ є҆́сть и҆ спасе́нїе и҆ си́ла . Ѡ҆скверне́наго мѧ мно́гими грѣхѝ , мᲂлю́ тѧ сꙋ́щꙋю бл҃гꙋ и҆ нескве́рнꙋю ски́нїю , ѿмы́и ѿ всѧ́кїѧ скве́рны , хᲂда́тайствᲂмъ сѝ . Ѡ҆кᲂрмле́нїе ми бꙋ́ди ѡ҆бꙋрева́емᲂмꙋ чи́стаѧ , в̾ пꙋчи́нѣ лю́тѣ жите́йскихъ напа́стей , и҆ наста́ви к̾ спасе́нᲂмꙋ приста́нищꙋ , и҆ спаси́ мѧ . сла́ва . Тревᲂлне́нїѧ по́мыслъ , и҆ страсте́й наведе́нїѧ , и҆ глꙋбина̀ грѣхо́въ , ѡ҆каѧ́ннꙋю ми дш҃ꙋ ѡ҆бꙋрева́ютъ , пᲂмᲂзи́ ми ст҃а́ѧ влⷣчце . и҆ нн҃ѣ . Сщ҃е́нїѧ сѣ́нь прᲂнарече́ннаѧ мр҃і́е , ѡ҆скверне́нꙋю сластьмѝ ѡ҆каѧ́ннꙋю ми дш҃ꙋ ѡ҆ст҃ѝ , и҆ бжⷭ҇твеныѧ сла́вы прича́стника мѧ сᲂтвᲂрѝ .

Гдⷭ҇и пᲂми́лꙋй ,= гⷤ . сла́ва , и҆ ны́нѣ . сѣда́ленъ , гла́съ , а҃ . Д=в҃о и҆ пита́тельнице є҆ди́нᲂмꙋ ѿ трⷪ҇цы , раю̀ кра́сныи , землены́мъ спасе́нїе , пᲂкро́вᲂмъ свᲂи́мъ спаса́й , бл҃гᲂче́стнѡ вᲂспѣва́ющихъ тѧ̀ . ты́ бо рᲂдила̀ є҆сѝ и҆́же во прᲂро́цѣхъ гл҃авшагѡ . ты̀ нᲂси́ла є҆сѝ сᲂдержа́щагѡ всѧ́ческаѧ , ꙗ҆́кѡ мт҃и хрⷭ҇та̀ бг҃а .

пѣ́снь , з҃ . і҆рмо́съ . Ꙗ҆́же в̾ пещѝ ѻ҆́трᲂки твᲂѧ̀ спасѐ , неприкᲂснꙋ́сѧ ни вредѝ и҆́хъ ѻ҆́гнь . тᲂгда̀ трїѐ , ꙗ҆́кѡ є҆ди́неми ᲂу҆сты̀ пᲂѧ́хꙋ , и҆ блгⷭ҇влѧ́хꙋ гл҃юще , блгⷭ҇ве́нъ бг҃ъ ѻ҆ц҃ъ на́шихъ . И҆́же ѻ҆те́чь сᲂбез̾нача́льныи сн҃ъ , во́ чрево твᲂѐ всели́сѧ прїи́мъ нача́ло , ꙗ҆́кѡ да на́съ и҆зба́витъ ꙗ҆́кѡ бг҃ъ , ѿ лꙋка́выхъ нача́лъ тмы̀ , бг҃ᲂрᲂди́тельнице чи́стаѧ кла́нѧющихсѧ є҆мꙋ̀ . И҆спещре́на бжⷭ҇твеными дᲂбрᲂдѣ́тельми . чⷭ҇таѧ дв҃о рᲂдила̀ є҆сѝ сло́во сᲂбез̾нача́льнᲂе ѻ҆ц҃ꙋ . и҆́же дᲂбрᲂдѣ́тельми нб҃са̀ вᲂи́стинꙋ пᲂкры́вшаго . є҆го́же мᲂлѝ при́снѡ , ᲂу҆ще́дрити на́съ . сла́ва . Ѡ҆ст҃ѝ на́ша пᲂмышле́нїѧ , ᲂу҆твердѝ всѣ́хъ дш҃и мт҃и бж҃їѧ , твᲂри́ти до́брѣ ѡ҆правда́нїѧ , и҆́же за млрⷭ҇дїе неи҆зрече́ннᲂе , вᲂплᲂще́ннагѡ и҆з̾ тебѐ дв҃о , сло́ва без̾нача́льнагѡ ѻ҆ц҃а . и҆ ны́нѣ . Оу҆мерщвле́нагѡ страстьмѝ мно́гими пренепᲂро́чнаѧ , ѡ҆живѝ ᲂу҆ма̀ мᲂегѡ̀ , и҆ бг҃ᲂꙋго́днаѧ твᲂри́ти ᲂу҆крѣпи́ мѧ , да велича́ю тѧ ꙗ҆́кѡ застꙋ́пницꙋ при́снѡ , хрⷭ҇тїа́нѡмъ ᲂу҆пᲂва́нїе .

пѣ́снь , и҃ . і҆рмо́съ . Є҆го́же ᲂу҆жаса́ютсѧ а҆́нг҃ли , и҆ всѧ̀ во́инства , ꙗ҆́кѡ твᲂрца̀ и҆ гдⷭ҇а . по́йте сщ҃е́ннїи , прᲂсла́вите ѻ҆́трᲂцы . блгⷭ҇ви́те лю́дїє , и҆ превᲂзнᲂси́те во всѧ̀ вѣ́ки . И҆збавлѧ́емсѧ пренепᲂро́чнаѧ , твᲂи́ми к̾ бг҃ꙋ бдѣ́нными мл҃твами , всѧ́ческихъ и҆скꙋше́нїи , тѧ̀ бцⷣꙋ зна́ющїи , бл҃гᲂслᲂве́нꙋю и҆ прера́дᲂваннꙋю . Вᲂплᲂща́етсѧ беспло́тныи и҆з̾ тебѐ бг҃ᲂлѣ́пнѡ , є҆го́же мᲂлѝ пречⷭ҇таѧ , стра́сти пло́ти мᲂеѧ̀ ᲂу҆мертви́ти , и҆ ѡ҆живи́ти мᲂю̀ дш҃ꙋ ᲂу҆мерщве́нꙋю грѣхѝ . сла́ва . И҆сцѣли́вшаго сᲂкрꙋше́нїе а҆да́ма пе́рстнагѡ , сп҃са ро́ждьшаѧ пречⷭ҇таѧ и҆ бг҃а , є҆го́же мᲂлѝ ꙗ҆́звы дш҃и мᲂеѧ̀ и҆сцѣли́ти неи҆сцѣ́лнѡ бᲂлѧ́щїѧ . и҆ ны́нѣ . Вᲂста́ви лежа́щагѡ во глꙋбинѣ̀ ѕѡ́лъ , и҆ и҆́же ны́нѣ бᲂрю́щїѧ мѧ̀ пᲂбѣдѝ врагѝ , снѣ́дшїѧ без̾мѣ́стными сластьмѝ дш҃ꙋ , чⷭ҇таѧ непре́зри , но ᲂу҆ще́дри и҆ спаси́ мѧ .

пѣ́снь , ѳ҃ . і҆рмо́съ . Свѣтᲂно́сныи ѻ҆́блакъ , во́нь же всѣ́хъ влⷣка , ꙗ҆́кѡ до́ждь с̾ нб҃сѐ на рꙋно̀ сни́де , и҆ вᲂплᲂти́сѧ на́съ ра́ди , бы́въ ᲂу҆́бѡ чл҃къ без̾нача́ленъ . велича́емъ всѝ ꙗ҆́кѡ мт҃рь бг҃а на́шегѡ чи́стꙋ . Свѣ́тъ бжⷭ҇твеныи ро́ждьшаѧ пренепᲂро́чнаѧ ѿ ѻ҆ц҃а вᲂсїѧ́вшїи , ѡ҆мраче́нꙋю ми дш҃ꙋ лестьмѝ житїѧ̀ и҆ бы́вшꙋю врагѡ́мъ пᲂсмѣ́хъ , ᲂу҆ще́дри , и҆ свѣ́тꙋ пᲂкаѧ́нїѧ спасе́нагѡ спᲂдо́би чⷭ҇таѧ . Свѣтᲂви́дныи тѧ̀ ѻ҆́блакъ и҆са́їѧ зрѧ́ше , и҆з̾ него́же вᲂсїѧ̀ на́мъ , со́лнце пра́веднᲂе та́йнѡ , тва́рь прᲂсвѣтѝ пренепᲂро́чнаѧ . сегѡ̀ ра́ди тѧ вѣ́рᲂю вᲂспѣва́емъ до́брꙋю в̾ жена́хъ . сла́ва . Грѣхᲂлюби́въ сы́и , в̾ лѣ́нᲂсти живꙋ̀ , и҆ сꙋди́ща чⷭ҇таѧ неᲂу҆мы́тнаго трепе́щꙋ . на не́мже мѧ̀ сᲂблюдѝ твᲂи́ми ст҃ы́ми мᲂльба́ми , дв҃о бг҃ᲂневѣ́сто не ѡ҆сꙋже́на , да ꙗ҆́кѡ застꙋ́пницꙋ ᲂу҆блажа́ю тѧ прⷭ҇нѡ . и҆ нн҃ѣ . Трепе́щꙋ сꙋди́ща дв҃о , и҆ незабы́тнагѡ ѻ҆чесѐ твᲂегѡ̀ сн҃а , сᲂдѣ́лавъ мно́ги грѣхѝ на землѝ . и҆ сегѡ̀ ра́ди тебѣ̀ вᲂпїю̀ , всемлⷭ҇тиваѧ влⷣчце пᲂмᲂзи́ ми , и҆ тᲂгда́шнїѧ мѧ нꙋ́жи и҆змѝ неѡ҆сꙋже́на чⷭ҇таѧ . та́же , дᲂсто́йнѡ є҆́сть . и҆ про́чеє , ѡ҆бы́чно . и҆ ѿпꙋ́стъ .

Въ четверто́къ , на ᲂу҆́трени . по а҃ , стихᲂло́гїи . сѣда́льны , а҆пⷭ҇льски . гла́съ , а҃ . Премꙋ́дрїи вселе́ннѣй лᲂвцы̀ ѿ́ бг҃а прїе́мше млⷭ҇тивнᲂе , мᲂли́те ны́нѣ ѡ҆ на́съ вᲂпїю́щихъ , гдⷭ҇и спасѝ гра́дъ сво́й , и҆ ѿ ѡ҆держа́щихъ ѕѡ́лъ свᲂбᲂдѝ , а҆пⷭ҇лъ ра́ди дш҃а на́ша . сти́хъ : во всю̀ зе́млю и҆зы́де вѣща́нїѧ и҆́хъ , и҆ в̾ кᲂнцы̀ вселе́нныѧ гл҃ы и҆́хъ . Премꙋ́дрїи вселе́ннѣй лᲂвцы̀ ѿ́ бг҃а прїе́мше млⷭ҇тивнᲂе , мᲂли́те ны́нѣ ѡ҆ на́съ вᲂпїю́щихъ , гдⷭ҇и спасѝ гра́дъ сво́й , и҆ ѿ ѡ҆держа́щихъ ѕѡ́лъ свᲂбᲂдѝ , а҆пⷭ҇лъ ра́ди дш҃а на́ша .= сла́ва , и҆ нн҃ѣ , боⷢ҇ . Н=еѡ҆бᲂри́мꙋю стѣ́нꙋ стѧжа́вше вѣ́рнїи , бцⷣꙋ мр҃і́ю , прїиди́те пᲂклᲂни́мсѧ , и҆ припаде́мъ к̾ не́й , дерзнᲂве́нїе бо и҆́мать , к̾ ро́ждьшемꙋсѧ и҆з̾ неѧ̀ , и҆ мо́литсѧ и҆ спаса́етъ ѿ́ гнѣва и҆ сме́рти дш҃а на́ша .

по в҃ , стихᲂло́гїи . сѣда́ленъ , гла́съ , а҃ . Мре́жею слᲂве́снᲂю плете́нїѧ ри́тᲂрскаѧ , ры́барїе тро́стїю крⷭ҇тнᲂю разве́ргᲂша , и҆ прᲂсвѣти́ша ꙗ҆зы́ки бл҃гᲂче́стнѡ сла́вити тѧ̀ бг҃а и҆́стиннаго . тѣ́мже тѝ и҆ пѣ́снь ᲂу҆крѣ́пльшемꙋ и҆́хъ вᲂпїе́мъ , сла́ва ѻ҆ц҃ꙋ и҆ сн҃ꙋ , сла́ва є҆динᲂсꙋ́щнᲂмꙋ дх҃ꙋ , сла́ва и҆́же тѣ́хъ ра́ди , прᲂсвѣти́вшемꙋ ми́ръ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Мч҃нки хрⷭ҇то́вы мо́лимъ всѝ , прише́дше к̾ ни́мъ съ вѣ́рᲂю , сїи́ бо ѡ҆ на́шемъ спасе́нїи про́сѧтъ , сі́и всѝ и҆стᲂча́ютъ и҆сцѣле́нїемъ бл҃гᲂда́ть , сі́и пᲂлкѝ ѿгᲂнѧ́ютъ бѣсо́вскїѧ , ꙗ҆́кѡ сᲂхра́нницы вѣ́рѣ . сла́ва , и҆ нн҃ѣ , боⷢ҇ . Оу҆пᲂва́нїе хрⷭ҇тїа́нѡмъ прест҃а́ѧ дв҃о , є҆го́же рᲂдила̀ є҆сѝ бг҃а , па́че ᲂу҆ма̀ и҆ сло́ва , непреста́ннѡ мᲂлѝ ѡ҆ вᲂспѣва́ющихъ тѧ̀ , пᲂда́ти ѡ҆ставле́нїе грѣхо́въ на́шихъ всѣ́хъ , и҆ и҆справле́нїе житїю̀ , вѣ́рᲂю и҆ любо́вїю при́снѡ сла́вѧщимъ тѧ̀ .

по г҃ , стихᲂло́гїи . сѣда́ленъ , гла́съ , а҃ . Свѣти́ла мы́сленнаѧ ᲂу҆ченицы̀ сп҃сᲂвы свѣ́тли ꙗ҆́кѡ ѻ҆́гнь , ѡ҆зари́сте всеѧ̀ землѝ и҆спᲂлне́нїе , бжⷭ҇твеными ᲂу҆че́нїи . тѣ́мже мᲂлю́сѧ , ꙗ҆́же во тмѣ̀ дш҃ꙋ мᲂю̀ прᲂсвѣти́те , свѣтᲂза́рными лꙋча́ми ва́шими всебл҃же́ннїи . сла́ва , и҆ нн҃ѣ , боⷢ҇ . Прᲂро́цы тѧ ꙗ҆́снѡ прᲂвᲂзвѣсти́ша ѻ҆трᲂкᲂви́це , мт҃рь бж҃їю , и҆ а҆пⷭ҇ли бжⷭ҇твенїи в̾ ми́рѣ прᲂпᲂвѣ́даша , и҆ мы̀ вѣ́рᲂвахᲂмъ . тѣ́мже всѝ бл҃гᲂче́стнѡ мꙋ́дренѣ пᲂчита́юще вᲂспѣва́емъ тѧ , и҆ бцⷣꙋ вᲂи́стинꙋ при́снѡ и҆менꙋ́емъ .

Въ четверто́къ . кано́нъ , ст҃ы́мъ а҆пⷭ҇лѡмъ . твᲂре́нїе ѳео́фанѡво . гла́съ , а҃ . пѣ́снь , а҃ . і҆рмо́съ . Твᲂѧ̀ пᲂбѣди́тельнаѧ десни́ца , бг҃ᲂлѣ́пнѡ в̾ крѣ́пᲂсти прᲂсла́висѧ . та́ бо без̾сме́ртне всемᲂгꙋ́щаѧ прᲂти́вныѧ сᲂтрѐ , і҆и҃льтѧнѡмъ пꙋ́ть глꙋбины̀ ѡ҆бно́вльши .

запѣ́въ : ст҃і́и а҆пⷭ҇ли мᲂли́те бг҃а ѡ҆ на́съ . Бжⷭ҇твеными прᲂсвѣти́вшесѧ зарѧ́ми , трисл҃нечнымъ сїѧ́нїемъ сла́внїи а҆пⷭ҇ли , пᲂлᲂже́нїемъ нареко́стесѧ вᲂи́стинꙋ бо́зи , свѣтᲂви́днїи . тѣ́мже по́ дᲂлгꙋ ва́съ вѣ́рᲂю пᲂчита́емъ . вⷤ . Сло́ва ꙗ҆́вльшагᲂсѧ на землѝ , за млрⷭ҇дїе дебельство́мъ пло́ти , ᲂу҆го́днїи слꙋжи́телїе . и҆ є҆гѡ̀ всѣ́хъ пᲂвелѣ́нїи и҆спо́лнителїе вѣ́рᲂю бы́сте , и҆ при́снѡ пᲂчита́етесѧ а҆пⷭ҇ли . Свѣ́тлыми лꙋча́ми прест҃а́гѡ дх҃а при́снѡ блаже́ннїи , всего́ мѧ прᲂсвѣти́те , грѣхо́въ тмо́ю пᲂкрыва́емаго , и҆ къ пᲂкаѧ́нїю пꙋтѝ , ꙗ҆́вѣ наста́вите . боⷢ҇ . И҆́же а҆пⷭ҇лѡмъ ра́дᲂсть , бг҃ᲂрᲂди́тельнице всенепᲂро́чнаѧ влⷣчце , мт҃и бы́вши , и҆́же в̾ тѣ́хъ бг҃ᲂлѣ́пнѡ глаго́лавшемꙋ . с̾ ни́ми же мᲂли́сѧ , ѻ҆гнѧ̀ гее́нны и҆зба́вити мѧ .

И҆́нъ кано́нъ , и҆́же во ст҃ы́хъ ѻ҆ц҃ꙋ на́шемꙋ нико́лѣ чꙋдᲂтво́рцꙋ . є҆мꙋ́же краегране́сїе , тебѣ̀ нико́лае пе́рво и҆знᲂшꙋ̀ пѣ́нїе а҆́зъ . твᲂре́нїе і҆ѡ́сифᲂвѡ . і҆рмо́съ . Пѣ́снь пᲂбѣ́днꙋю . запѣ́в̾ : ст҃лю хрⷭ҇то́въ нико́лае , мᲂлѝ бг҃а ѡ҆ на́съ . Вѣнцы̀ ᲂу҆краша́емь пра́ведными , и҆ прⷭ҇то́лꙋ бл҃гᲂда́ти пред̾стᲂѧ̀ нико́лае , и҆́же пѣ́сньми тѧ̀ ны́нѣ вѣнчава́юща прⷭ҇нѡ спаса́й мл҃твами сѝ . Ꙗ҆́кᲂже бл҃гᲂда́ть прїе́мъ и҆сцѣле́нїемъ , всебл҃же́нне нико́лае , дꙋшѝ мᲂеѧ̀ ꙗ҆́звы мл҃твами сѝ и҆сцѣлѝ , и҆ нахᲂдѧ́щихъ и҆скꙋше́нїи и҆зба́ви мѧ мᲂлю́сѧ . Крѣ́пкᲂю нико́лае твᲂе́ю мᲂли́твᲂю , всераз̾сла́бленꙋю дш҃ꙋ мᲂю̀ прегрѣше́нїи и҆сцѣлѝ . и҆ житїѧ̀ ѕлᲂлю́тыхъ и҆зба́ви мѧ мᲂлю́сѧ . боⷢ҇ . Оу҆ма̀ мᲂегѡ̀ ѡ҆мраче́нїе , всенепᲂро́чнаѧ свѣ́тᲂмъ сѝ ѿженѝ , и҆ тмы̀ вѣ́чнꙋющїѧ и҆зба́ви мѧ , ꙗ҆́кѡ да пᲂю̀ всегда̀ вели́чїѧ ти .

пѣ́снь , г҃ . і҆рмо́съ . Є҆ди́не свѣ́дыи земны́хъ сꙋщество̀ немᲂщно́е , и҆ млⷭ҇тивно внѐ ѡ҆бᲂлкі́исѧ , препᲂѧ́ши мѧ с̾вы́ше си́лᲂю , вᲂспѣва́ти ти ст҃ы́и , цр҃кви дш҃е́внаѧ , неи҆зрече́нныѧ сла́вы ти чл҃кᲂлю́бче . И҆́же є҆ди́нъ неви́димыи бг҃ъ , ви́димъ бы́сть вᲂплᲂща́емь , и҆ ᲂу҆ченикѝ ва́съ и҆збра́въ во все́мъ ми́рѣ є҆гѡ̀ и҆́мѧ , и҆ превᲂсхᲂдѧ́щꙋю сла́вꙋ прᲂпᲂвѣ́дающихъ , пребл҃же́ннїи бжⷭ҇твенїи а҆пⷭ҇ли . двⷤа . Тебѣ̀ є҆ди́нᲂмꙋ сᲂгрѣши́хъ хрⷭ҇тѐ , тебѣ̀ є҆ди́нᲂмꙋ без̾зако́ннᲂвахъ , и҆ дш҃ꙋ ѕлы́ми ѡ҆скверни́хъ . твᲂе́ю млⷭ҇тїю ѡ҆чи́сти и҆ спаси́ мѧ , и҆мѣ́ѧ мᲂлѧ́щїѧ тѧ̀ є҆ди́не бл҃гᲂпремѣни́телю і҆с҃е , премꙋ́дрыѧ а҆пⷭ҇лы твᲂѧ̀ . Го́рестей страстны́хъ скве́рнъ , и҆ го́рести грѣхо́вныѧ и҆зба́вите мѧ , ꙗ҆́кѡ ми́лᲂстивїи а҆пⷭ҇ли . и҆ пᲂкаѧ́нїемъ ѡ҆слажда́юще мᲂю̀ мы́сль , ꙗ҆́кѡ бжⷭ҇твенꙋю нᲂсѧ́ще сла́дᲂсть в̾ срⷣцы всехва́льнїи . боⷢ҇ . Съ невеще́ствеными слꙋжи́тели , дв҃о не и҆скꙋсᲂбра́чнаѧ , со всѣ́ми вы́шними си́лами , с̾ мч҃нки и҆ а҆пⷭ҇лы , хрⷭ҇та̀ є҆го́же вᲂплᲂти́ла є҆сѝ ѿ чи́стыхъ крᲂве́й твᲂи́хъ , ᲂу҆мᲂлѝ спасти́сѧ рабо́мъ твᲂи́мъ .

и҆́нъ , і҆рмо́съ . Да ᲂу҆тверди́тсѧ срⷣце мᲂѐ . Первᲂсщ҃е́нникѡмъ ᲂу҆дᲂбре́нїе , бл҃гᲂꙋха́нїе бжⷭ҇твенагѡ дх҃а , нико́лае мꙋ́дре . мирᲂво́нными ти мл҃твами , ѕлᲂсмра́дныѧ стра́сти ѿженѝ се́рдца мᲂегѡ̀ мᲂлю́сѧ . Въ лѣ́нᲂсти скᲂнча́хъ мᲂю̀ жи́знь ѡ҆каѧ́нныи , и҆ бᲂю́сѧ страшна́гѡ твᲂегѡ̀ сꙋди́ща хрⷭ҇тѐ . на не́мже непᲂсрамѝ менѐ , нико́лы хᲂда́тайствы сщ҃е́нными ᲂу҆мᲂле́нъ быва́ѧ . Преи҆спещре́нъ бжⷭ҇твенᲂю бл҃гᲂда́тїю , ст҃лю нико́лае ѻ҆́ч҃е , ѿ разли́чныхъ и҆скꙋше́нїи , и҆ бѣ́дъ спасѝ , прибѣга́ющїѧ въ кро́въ тво́й прⷭ҇нѡ всебл҃же́нне . боⷢ҇ . И҆зба́ви мѧ ѿ всѣ́хъ напа́стей и҆ ѿ мно́гихъ сᲂбла́знъ ѕмі́евыхъ , и҆ ѿ вѣ́чнагѡ ѻ҆гнѧ̀ и҆ тмы̀ , всенепᲂро́чнаѧ , ꙗ҆́же свѣ́тъ ро́ждьшаѧ на́мъ невече́рнїи .

пѣ́снь , д҃ . і҆рмо́съ . Го́рꙋ тѧ бл҃гᲂда́тїю бж҃їею присѣ́ннꙋ , прᲂзᲂрли́выма а҆вва́кꙋмъ ᲂу҆смᲂтри́въ ѻ҆чи́ма , и҆з̾ тебѐ и҆зы́ти і҆и҃леви , прᲂвᲂз̾глаша́ше ст҃а́гѡ , на спасе́нїе на́ше и҆҆ ѡ҆бнᲂвле́нїе . Мо́ре без̾бо́жїѧ и҆ невѣ́рьства вᲂз̾мꙋти́вше , ꙗ҆жде́нїемъ ва́шимъ . ко́ни бг҃ᲂи҆збра́ннїи хрⷭ҇то́вы а҆пⷭ҇ли , врага̀ пᲂтᲂпи́сте мы́сленагѡ , и҆ пᲂтᲂпле́ныѧ и҆звлеко́сте , ко спасе́нїю чл҃ки . вⷤ . Прїѧ́телище дх҃а бжⷭ҇твеныхъ сїѧ́нїи а҆пⷭ҇ли , ѡ҆мраче́ннꙋю ми дш҃ꙋ , и҆ прїе́мницꙋ всѧ́ческихъ страсте́й бы́вшꙋю , свѣ́тᲂмъ пᲂкаѧ́нїѧ прᲂсвѣти́те бг҃ᲂблаже́ннїи . Ѻ҆́блацы и҆́же во́дꙋ живо́тнꙋю ѡ҆дᲂждѧ́юще , и҆з̾со́хшꙋю ми дш҃ꙋ без̾до́ждїемъ страсте́й , бжⷭ҇твенѣ напо́йте . и҆ дᲂбрᲂдѣ́телей вᲂз̾расти́ти кла́сы сᲂтвᲂри́те спасе́нїѧ , а҆пⷭ҇ли всехва́льнїи . боⷢ҇ . Прᲂро́цы , а҆пⷭ҇ли прехва́льнїи , мч҃нцы , с̾ мт҃рїю и҆зба́вителевᲂю мᲂли́тесѧ прилѣ́жнѡ , ꙗ҆́кѡ да и҆зба́вимсѧ ѿ грѣхо́въ , и҆ вѣ́чныѧ мꙋ́ки , и҆ и҆скꙋше́нїи и҆ бѣ́дъ и҆ скᲂрбе́й .

и҆́нъ , і҆рмо́съ . Дх҃ᲂмъ пред̾зрѧ̀ . Ꙗ҆́кѡ всѣ́хъ пᲂвелѣ́нїи бж҃їихъ и҆спо́лнитель , ѻ҆́ч҃е ст҃лю нико́лае . сᲂблюда́ти пᲂспѣшѝ на́мъ , ꙗ҆́же на землѝ закᲂнᲂпᲂлᲂже́нїѧ ко спасе́нїю ведꙋ́щаѧ . и҆ и҆зба́ви всѣ́хъ напа́стей нахᲂдѧ́щихъ . Тече́нїе твᲂѐ скᲂнча́въ прпⷣбнѡ ѡ҆ хрⷭ҇тѐ , пꙋтѝ на́ша и҆спра́ви , ꙗ҆́же к̾ немꙋ̀ ѻ҆́ч҃е бг҃ᲂно́се нико́лае . ꙗ҆́кѡ да ᲂу҆бѣжа́вше без̾пꙋ́тнагѡ блꙋже́нїѧ , и҆ ко спасе́ннᲂмꙋ дᲂсти́гнемъ сᲂверше́нїю . И҆́же всѧ̀ ко́зни вра́жїѧ ᲂу҆спи́въ , бжⷭ҇твеными бᲂдрᲂстьмѝ , нико́лае премꙋ́дре . бдѧ́щихъ и҆ бг҃а вᲂспѣва́ющихъ . и҆ тебѐ хᲂда́таѧ к̾ немꙋ̀ пред̾лага́ющихъ , всѣ́хъ на́съ ѻ҆́ч҃е ѡ҆бл҃гᲂда́ти . боⷢ҇ . Разꙋмѣ́въ прᲂро́къ дх҃ᲂмъ бж҃їимъ , го́рꙋ тѧ приѡ҆сѣ́ннꙋю пред̾написа́въ чⷭ҇таѧ , и҆ста́ѧвшїѧ зно́емъ мно́гихъ прегрѣше́нїи , прᲂхладѝ хᲂда́тайствᲂмъ сѝ дв҃о , є҆ди́на чл҃кѡмъ и҆справле́нїе .

пѣ́снь , є҃ . і҆рмо́съ . Прᲂсвѣще́й сїѧ́нїемъ прише́ствїѧ твᲂегѡ̀ хрⷭ҇тѐ , и҆҆ ѡ҆свѣще́и крⷭ҇то́мъ си мирскі́ѧ кᲂнцы̀ , срⷣца̀ прᲂсвѣтѝ свѣ́тᲂмъ твᲂегѡ̀ бг҃ᲂразꙋ́мїѧ , правᲂвѣ́рнѡ хва́лѧщимъ тѧ . Ка́плющаѧ сла́дᲂсть и҆ кра́снᲂе весе́лїе , ꙗ҆ви́стесѧ го́ры всесла́внїи а҆пⷭ҇ли , го́ресть всю̀ вра́жїю ѿє҆́млюще , и҆ вѣ́рныѧ наслажда́юще . вⷤ . Прише́дша стра́нно хрⷭ҇та̀ во свᲂѧ̀ разꙋмѣ́сте , и҆ и҆́скрено тᲂмꙋ̀ прилѣпи́стесѧ . тѣ́мже ѿ чꙋжа́го мѧ и҆зба́вите вре́да , бжⷭ҇твенїи сло́ва а҆пⷭ҇ли . Та́йныѧ дш҃и мᲂе́й и҆сцѣлѝ ꙗ҆́звы , мл҃твами ꙗ҆вле́но в̾ ми́рѣ прᲂпᲂвѣ́давшихъ , бжⷭ҇твенᲂе твᲂѐ прише́ствїе . и҆ стра́сти ще́дре , и҆ є҆́же и҆́з̾ грᲂба вᲂскрⷭ҇нїе . боⷢ҇ . Со всѣ́ми беспло́тными , є҆го́же вᲂплᲂти́ла є҆сѝ , бг҃а сло́во па́че сло́ва , дв҃о мᲂлѝ , ѿ без̾слᲂве́сныхъ дѣѧ́нїи плᲂтьски́хъ страсте́й , свᲂбᲂди́тисѧ рабѡ́мъ твᲂи́мъ .

и҆́нъ , і҆рмо́съ . Свѣ́тлыи на́мъ вᲂзсїѧ́й . Во дво́рѣхъ гдⷭ҇нихъ насажде́нъ ѻ҆́ч҃е нико́лае , ꙗ҆́кѡ плᲂдᲂви́таѧ ма́слина бл҃гᲂда́тїю , ᲂу҆маща́еши ны́нѣ всѣ́хъ лица̀ , ма́слᲂмъ трꙋдо́въ твᲂи́хъ . Мᲂльбꙋ̀ ны́нѣ сᲂтвᲂрѝ ѻ҆́ч҃е нико́лае , ѡ҆ рабѣ́хъ свᲂи́хъ , ꙗ҆́кѡ да ѡ҆ставле́нїе сᲂгрѣше́нїемъ прїи́мемъ , и҆ ѿ ѡ҆держа́щїѧ ско́рби да и҆зба́вимсѧ , и҆ всѧ́кїѧ тѣснᲂты̀ . Тебѐ мо́лимъ нико́лае бл҃га́го хᲂда́таѧ ко́ гдⷭ҇ꙋ , не ѡ҆ста́ви на́съ без̾ застꙋпле́нїѧ , но ѡ҆бы́чнᲂю сѝ мл҃твᲂю спаса́й . боⷢ҇ . Свѣтᲂѡ҆бра́зныи хрⷭ҇то́въ хра́ме ѻ҆трᲂкᲂви́це . мл҃твами си дв҃о мт҃и , ѻ҆ц҃ꙋ и҆ сн҃ꙋ и҆ дх҃ꙋ , и҆ на́съ хра́мы сᲂтвᲂрѝ , препᲂдо́бнаѧ сᲂдѣва́ющихъ .

пѣ́снь , ѕ҃ . і҆рмо́съ . Ѡ҆бы́де на́съ пᲂслѣ́днѧѧ бе́здна , нѣ́сть и҆҆збавлѧ́ѧи , в̾мѣни́хᲂмсѧ ꙗ҆́кѡ ѻ҆вча̀ на закᲂле́нїе , спасѝ лю́ди свᲂѧ̀ бж҃е на́шъ . ты́ бо крѣ́пᲂсть немᲂщны́мъ и҆҆ и҆҆справле́нїе . Мре́жами слᲂве́сными ᲂу҆лᲂви́сте ꙗ҆зы́ки , к̾ ра́зꙋмꙋ ꙗ҆вле́ннагѡ назда́нїѧ чл҃кѡмъ , ѽ бг҃ᲂбл҃же́ннїи а҆пⷭ҇ли , є҆го́же прилѣ́жнѡ ѡ҆́ мирѣ мᲂли́те . двⷤа . Дꙋшѐ мᲂѧ̀ смире́ннаѧ , дꙋшѐ ѡ҆каѧ́ннаѧ , дꙋшѐ непᲂка́ѧннаѧ пᲂка́йсѧ , и҆ вᲂзᲂпѝ хрⷭ҇то́ви , сᲂгрѣши́хъ , ѡ҆чи́сти мѧ влⷣко мл҃твами а҆пⷭ҇лъ твᲂи́хъ , ꙗ҆́кѡ пребл҃гъ . И҆́же дре́вле і҆зра́илю , и҆стᲂчи́выи во́дꙋ и҆з̾ ка́мене всеси́льне , разрѣши́ ми чꙋ́вство хрⷭ҇тѐ , и҆ принᲂси́ти и҆з̾лива́нїе сле́зъ сᲂтвᲂрѝ , да вᲂспѣва́ю и҆ велича́ю твᲂѐ бл҃гᲂꙋтро́бїе . боⷢ҇ . Дв҃о и҆́же и҆з̾ тебѐ за бл҃гᲂсты́ню рᲂди́тисѧ бл҃гᲂи҆зво́льшаго , ᲂу҆мᲂлѝ ꙗ҆́кѡ твᲂрца̀ и҆ бг҃а , спастѝ ѿ и҆скꙋше́нїи , и҆ напа́стей , и҆́же на тѧ̀ прест҃а́ѧ ᲂу҆пᲂва́нїе и҆мꙋ́щихъ .

и҆́нъ , і҆рмо́съ . Пррⷪ҇кꙋ і҆ѡ́нѣ пᲂдо́бѧсѧ . И҆мѣ́ѧи мно́жество щедро́тъ хрⷭ҇тѐ , мно́жество мᲂи́хъ ѕѡ́лъ ѿженѝ мл҃твами нико́лы , ѡ҆кᲂрмлѧ́ѧ ми жи́знь , ꙗ҆́же вᲂлна́ми грѣха̀ ѡ҆бꙋрева́емꙋю при́снѡ . Крѣ́пкѡ врага̀ пᲂпра́лъ є҆сѝ мꙋ́дре , є҆го́же сᲂкрꙋша́ти и҆ на́мъ твᲂи́ми мл҃твами ᲂу҆крѣпѝ нико́лае , и҆́же тᲂбо́ю пред̾ста́телемъ бжⷭ҇твенымъ ѡ҆бᲂга́тившемсѧ . И҆́же ми́рѧнᲂмъ бы́въ первᲂст҃ль и҆́стинныи , ѡ҆бл҃гᲂꙋха́й на́ша чꙋ́вства дш҃е́внаѧ ѻ҆́ч҃е нико́лае . и҆ враждꙋ́ющїѧ на ны̀ ѕлᲂсмра́дныѧ стра́сти ѿгᲂнѧ́й при́снѡ . боⷢ҇ . Вели́чїѧ тебѣ̀ чⷭ҇таѧ сᲂтвᲂрѝ хрⷭ҇то́съ , є҆го́же мᲂлѝ при́снѡ , вᲂз̾вели́чити в̾ на́съ , бᲂга́тыѧ є҆гѡ̀ млⷭ҇ти бг҃ᲂбл҃гᲂда́тнаѧ .

пѣ́снь , з҃ . і҆рмо́съ . Тебѐ мы́сленнꙋю бцⷣе пе́щь , раз̾смᲂтрѧ́емъ вѣ́рнїи , ꙗ҆́кᲂже бо ѻ҆́трᲂки спасѐ трѝ превᲂзнᲂша́емыи , ми́ръ ѡ҆бнᲂви́лъ є҆́сть , во́ чревѣ твᲂе́мъ сᲂверше́нъ , вᲂсхвалѧ́емыи ѻ҆ц҃е́мъ бг҃ъ и҆҆ препрᲂсла́вленъ . И҆сто́чникъ живᲂта̀ і҆с҃ъ гдⷭ҇ь сы́и , ва́съ ѡ҆ста́ви ᲂу҆ченикѝ ꙗ҆́кᲂже рѣ́ки , вᲂда́ми напᲂѧ́юща бг҃ᲂразꙋ́мїѧ всю̀ пᲂд̾сл҃нечнꙋю , и҆ пᲂю́ща ѻ҆ц҃ъ на́шихъ бж҃е блгⷭ҇ве́нъ є҆сѝ . двⷤа . Ѻ҆́гнь мы́сленыи в̾ срⷣцы нᲂсѧ́ще , бжⷭ҇твенꙋю бл҃гᲂда́ть хрⷭ҇то́вꙋ , зажго́сте ᲂу҆ченицы̀ ве́щь без̾бо́жїѧ . тѣ́мже ве́щь мᲂи́хъ стрⷭ҇те́й пᲂпали́те , вᲂпїю́ща , хва́лимыи ѻ҆ц҃е́мъ бж҃е блгⷭ҇ве́нъ є҆сѝ . Ѻ҆́гненагѡ мꙋче́нїѧ и҆зба́ви мѧ бж҃е мл҃твами сла́вныхъ ти ᲂу҆чени́къ . и҆ не ѿве́рзи менѐ ѿ лица̀ твᲂегѡ̀ гдⷭ҇и , в̾ пᲂкаѧ́нїи взыва́юща , ѻ҆ц҃ъ на́шихъ бж҃е блгⷭ҇ве́нъ є҆сѝ . боⷢ҇ . Тлетво́рныхъ грѣхо́въ и҆ стрⷭ҇те́й и҆зми́ мѧ гдⷭ҇и , и҆́же нетлѣ́ннѡ рᲂди́выисѧ ѿ дв҃ы бг҃ᲂмт҃ре . всѣ́мъ же нетлѣ́нїе да́рꙋѧ пѣ́снено пᲂю́щимъ , ѻ҆ц҃ъ на́шихъ бж҃е блгⷭ҇ве́нъ є҆сѝ .

и҆́нъ , і҆рмо́съ . Ꙗ҆́же въ пещѝ . Рачи́тельнᲂю мл҃твᲂю сѝ мꙋ́дре , срⷣца мᲂегѡ̀ напра́ви стезю̀ храни́тельно , на ка́мени бж҃їихъ запᲂвѣде́й пресвѣ́тлыхъ . спасѝ непремѣ́ннѡ нико́лае , ѿ кᲂва́рствъ па́кᲂстныхъ , ѕлᲂнача́льнагѡ врага̀ . Разрѣше́нїе на́мъ мно́гихъ грѣхо́въ и҆спрᲂсѝ , сѣ́тей жите́йскихъ и҆ нꙋ́жныхъ , и҆ и҆скꙋше́нїи всѧ́ческихъ нахᲂдѧ́щихъ . сщ҃е́нне нико́лае всѣ́мъ вѣ́рныхъ застꙋ́пниче , и҆ ст҃лемъ ѡ҆снᲂва́нїе . И҆́же сᲂкры́выи ра́бъ лꙋка́выи , тала́нтъ , є҆го́же в̾ дѣ́ланїе бл҃го вᲂспрїе́мъ , а҆́зъ є҆́смь , и҆ бᲂю́сѧ та́мᲂшнѧгѡ сꙋди́ща . на не́мже сꙋдїѐ всѣ́хъ не ѡ҆сꙋдѝ менѐ , мᲂле́нїѧ ра́ди ст҃а́гѡ нико́лы . боⷢ҇ . Тебѐ всест҃а́ѧ пречи́стаѧ рабѝ твᲂѝ всегда̀ , во́ дни и҆ в̾ но́щи мо́лимъ сᲂкрꙋше́ннᲂю мы́слїю , прᲂсѧ́ще и҆збавле́нїѧ грѣхо́въ на́шихъ , да́ти твᲂи́ми мл҃твами чи́стаѧ .

пѣ́снь , и҃ . і҆рмо́съ . Впещѝ дѣ́ти і҆и҃левы , ꙗ҆́кᲂже в̾гᲂрни́лѣ дᲂбро́тᲂю бл҃гᲂче́стїѧ , чистѣ́е зла́та блеща́хꙋсѧ гл҃юще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆҆ превᲂзнᲂси́те є҆гѡ̀ во́ вѣки . Ꙗ҆́кѡ лꙋчѝ сл҃нце вели́кᲂе ва́съ прᲂстрѐ во всю̀ вселе́ннꙋю , ѡ҆зарѧ́ѧ вѣ́рᲂю пᲂю́щихъ , блгⷭ҇ви́те всѧ̀ дѣ́ла гдⷭ҇а по́йте , и҆ превᲂзнᲂси́те є҆гѡ̀ во́ вѣки .= вⷤ . Ꙗ҆́кѡ па́стырїе сꙋ́ще слᲂве́снїи . ꙗ҆́кѡ а҆́гньцы па́стырѧ . ꙗ҆́кѡ ѻ҆́вцы , а҆́гньца и҆зба́вителѧ на́шегѡ хрⷭ҇та̀ , бг҃ᲂви́дцы а҆пⷭ҇ли мᲂли́те непреста́ннѡ , ѿ мы́сленагѡ мѧ во́лка и҆зба́вити , и҆ спаса́емыхъ ча́сти спᲂдо́бити мѧ . Преѡ҆каѧ́ннаѧ дꙋшѐ стенѝ и҆ вᲂзᲂпі́й гдⷭ҇ви , сᲂгрѣши́хъ па́че всѣ́хъ , и҆ без̾зако́ннᲂвахъ лю́тѣ . ѡ҆чи́сти и҆ спаси́ мѧ . ꙗ҆́кѡ блꙋдни́цꙋ , ꙗ҆́кѡ мытарѧ̀ , ꙗ҆́кᲂже разбо́йника ще́дре , а҆пⷭ҇лъ ра́ди мл҃твами бл҃гᲂпрїѧ́тными . боⷢ҇ . С=о а҆́нг҃лы мт҃и бж҃їѧ , со а҆пⷭ҇лы и҆ с̾ мч҃нки , и҆ с̾ прᲂро́ки ᲂу҆мᲂлѝ хрⷭ҇та̀ , спастѝ взыва́ющїѧ , блгⷭ҇ви́те всѧ̀ дѣ́ла гдⷭ҇а , по́йте и҆ превᲂзнᲂси́те є҆гѡ̀ во́ вѣки .

и҆́нъ , і҆рмо́съ . Є҆го́же ᲂу҆жаса́ютсѧ . На гᲂрѣ̀ стᲂѧ̀ бжⷭ҇твеныхъ дᲂбрᲂдѣ́телей , кᲂнце́мъ зна́емъ , чꙋде́съ высо́кими нико́лае ꙗ҆ви́лсѧ є҆сѝ пᲂказа́емь . тѣ́мже всѧ́къ ꙗ҆зы́къ пᲂчита́етъ тѧ̀ во всѧ̀ вѣ́ки . Вкꙋси́въ прпⷣбне бжⷭ҇твеныѧ сла́дᲂсти , го́ресть вᲂз̾ненави́дѣлъ є҆сѝ стрⷭ҇те́й и҆ сласте́й . ѿ ни́хже на́съ и҆зба́ви мᲂлѧ̀ хрⷭ҇та̀ , вᲂста́ющїѧ бѣды̀ ᲂу҆тᲂли́ти . Ꙗ҆́кѡ сто́лпъ непᲂкᲂлеби́мъ , и҆ ᲂу҆тверже́нїе вѣ́рнымъ , прⷭ҇нѡ мѧ кᲂле́блема жите́йскими ѕло́бами , и҆ бѣсо́вскими дᲂхнᲂве́нїи , ᲂу҆крѣпѝ всебл҃же́нне нико́лае мл҃твами сѝ . боⷢ҇ . Оу҆врачꙋ́й пречⷭ҇таѧ стра́сти срⷣца мᲂегѡ̀ , ро́ждьшаѧ всѣ́хъ врача̀ , и҆ пра́ведныхъ ча́сти ꙗ҆ви́ мѧ прича́стника , дв҃це хрⷭ҇та̀ ᲂу҆мᲂли́вши . та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны .

пѣ́снь , ѳ҃ . і҆рмо́съ . Ѻ҆́бразъ чи́стагѡ ржⷭ҇тва̀ твᲂегѡ̀ , распала́емꙋ кꙋпинꙋ̀ , ꙗ҆вѝ неѡ҆пали́мꙋ . и҆҆ ны́нѣ на на́съ напа́стей свирѣ́пѣющꙋю ᲂу҆гаси́ти мо́лимсѧ пе́щь , да тѧ̀ бцⷣе непреста́ннѡ велича́емъ . Бжⷭ҇твенїи ст҃а́гѡ дх҃а , и҆ свѣтᲂза́рнїи свѣти́льницы пᲂказа́стесѧ , свѣтᲂзаре́нїемъ честна́гѡ и҆ премꙋ́драгѡ прᲂпᲂвѣ́данїѧ бл҃же́ннїи прᲂсвѣти́сте всю̀ вселе́ннꙋю , и҆ тмꙋ̀ и҆́дᲂльскꙋю ѿгна́вше .= двⷤа . Бжⷭ҇твенагѡ мы́сленагѡ винᲂгра́да , ло́зїе бы́вше , бжⷭ҇твеныѧ гро́зды вᲂзрасти́сте , и҆стᲂча́юще спасе́нᲂе вино̀ , сла́внїи а҆пⷭ҇ли . тѣ́мже мѧ ѿ пїѧ́нства сласте́й и҆зба́вите . Трепе́щꙋ ѡ҆каѧ́нныи , пᲂмышлѧ́ѧ стра́шнᲂе ѻ҆́но хрⷭ҇тѐ мо́й сꙋди́ще твᲂѐ . в̾ дѣ́ла бо стꙋ́днаѧ и҆ скве́рнаѧ ны́нѣ ѡ҆блᲂже́нъ є҆́смь , и҆ пре́же сꙋда̀ ѡ҆сꙋжде́нъ є҆́смь . тѣ́мже мѧ а҆пⷭ҇лъ твᲂи́хъ мл҃твами ᲂу҆ще́дри . боⷢ҇ . Є҆=ди́на чл҃ки ѡ҆бᲂжи́вшаѧ , и҆ вᲂплᲂщшагᲂсѧ сло́ва пᲂро́ждьши , є҆го́же мᲂлѝ со а҆пⷭ҇лы и҆ с̾ мч҃нки , пречⷭ҇таѧ дв҃о всенепᲂро́чнаѧ , ѡ҆ на́съ и҆́же вѣ́рᲂю ᲂу҆блажа́ющихъ и҆ чтꙋ́щихъ тѧ̀ .

и҆́нъ , і҆рмо́съ . Свѣтᲂно́сныи ѻ҆́блакъ . Ꙗ҆́кѡ хрⷭ҇то́ва ст҃лѧ , ꙗ҆́кѡ свѣтᲂза́рнꙋю ѕвѣздꙋ̀ ꙗ҆́кѡ чꙋдесе́мъ самᲂтво́рца , ꙗ҆́кѡ и҆сто́чника и҆сцѣле́нїемъ , и҆ ꙗ҆́кѡ сꙋ́щимъ въ ско́рбѣхъ пᲂмо́щника , ꙗ҆́кѡ и҆зба́вителѧ теплѣ́йша , призыва́ющимъ тѧ̀ в̾ бѣда́хъ ѻ҆́ч҃е , вᲂсхвалѧ́емъ пѣ́сньми сщ҃е́нными . Тѧ̀ па́стырѧ вели́каго , и҆ пᲂдо́бника ѡ҆ все́мъ , нача́льнᲂмꙋ па́стырю хрⷭ҇тꙋ̀ , прилѣ́жнѡ мо́лимъ нико́лае , ѿ высо́тъ сщ҃е́нныхъ ᲂу҆пасѝ рабы̀ свᲂѧ̀ , и҆ и҆збавлѧ́й ѿ всѣ́хъ жите́йскихъ напа́стей всегда̀ . Оу҆́же кᲂне́цъ приближа́етсѧ , что̀ лѣни́шисѧ ѽ дш҃е мᲂѧ̀ ; пᲂчто̀ нетщи́шисѧ бг҃ᲂви ᲂу҆го́днѡ пᲂжи́ти ; пᲂтщи́сѧ и҆ вᲂзни́кни про́чеє , и҆ вᲂзᲂпі́й , чл҃кᲂлю́бче ᲂу҆ще́дри мѧ , нико́лы мл҃твами ѡ҆кᲂрмлѧ́ѧ мᲂю̀ жи́знь ꙗ҆́кѡ бл҃гъ .= боⷢ҇ . И҆́=же свѣ́тъ ро́ждьшаѧ бжⷭ҇твеныи , ѡ҆мраче́наго мѧ̀ всѣ́ми прило́ги лꙋка́вагѡ , и҆ во ᲂу҆ны́нїи живꙋ́ща и҆ прᲂгнѣ́вающа бг҃а , прᲂсвѣтѝ всенепᲂро́чнаѧ , и҆ наста́ви к̾ до́брымъ дѣ́ланїемъ , ꙗ҆́кѡ вина̀ сꙋ́щи всѣ́мъ до́брымъ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стⷯры , а҆пⷭ҇льски . гла́съ , а҃ . А҆пⷭ҇ли сла́внїи , прᲂсвѣти́вше вселе́ннꙋю , при́снѡ бг҃а мᲂли́те , спасти́сѧ дш҃а́мъ на́шимъ .

сти́хъ : и҆спо́лнихᲂмсѧ за ᲂу҆́тра . Петра̀ и҆ па́вла сᲂгла́снѡ пᲂхва́лимъ , лꙋкꙋ̀ , матѳе́ѧ , ма́рка , і҆ѡа́нна , а҆ндре́ѧ ѳѡмꙋ̀ , варѳᲂлᲂме́ѧ , сі́мѡна канани́та , і҆а́кѡва , и҆ фили́ппа , и҆ ве́сь ли́къ ᲂу҆чени́ческїи , дᲂсто́йнѡ да вᲂсхва́лимъ .

сти́хъ : и҆ бꙋ́ди свѣ́тлᲂсть гдⷭ҇а . мⷱ҇ꙋ . Весели́тесѧ мч҃нцы ѡ҆́ гдⷭ҇ѣ , ꙗ҆́кѡ пᲂдвиза́нїемъ до́брымъ пᲂдвиза́стесѧ . прᲂти́вистесѧ цр҃е́мъ , и҆ мꙋчи́телѧ пᲂбѣди́сте . ѻ҆гнѧ̀ и҆ меча̀ не ᲂу҆страши́стесѧ , и҆ ѕвѣре́й ди́вїихъ снѣда́ющихъ тѣлеса̀ ва́ша . хрⷭ҇то́вы со а҆́нг҃лы пѣ́снь вᲂз̾сыла́юще , съ нб҃сѐ вѣнцы̀ прїѧ́сте . прᲂси́те дарᲂва́ти ми́рꙋ смире́нїе , и҆ дш҃а́мъ на́шимъ ве́лїю млⷭ҇ть . сла́ва , и҆ ны́нѣ , боⷢ҇ . Ра́дꙋисѧ бцⷣе дв҃о . ра́дꙋисѧ пᲂхвало̀ всеѧ̀ вселе́ннѣй . ра́дꙋисѧ пречⷭ҇таѧ мт҃и бж҃їѧ бл҃гᲂслᲂве́наѧ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= сла́ва , и҆ нн҃ѣ , боⷢ҇ . во́гласъ трᲂпарѧ̀ . пᲂсе́мъ , є҆ктенїѧ̀ . и҆ ча́съ , а҃ . =и҆ ѿпꙋ́стъ .

Въ четверто́къ , бл҃же́нны на́ ѕ҃ . гла́съ , а҃ .

Снѣ́ди ра́ди и҆зведѐ и҆з̾раѧ̀ вра́гъ а҆да́ма , крⷭ҇та́ же ра́ди разбо́йника в̾ведѐ хрⷭ҇то́съ во́нь , пᲂмѧни́ мѧ вᲂпїю́ща , є҆гда̀ прїи́деши во црⷭ҇твїи сѝ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Кᲂнцы̀ прᲂсвѣти́вше , бжⷭ҇твеными лꙋча́ми ᲂу҆че́нїи ва́шихъ . ѡ҆мраче́нїе лю́тагѡ без̾бо́жїѧ разᲂри́ли є҆стѐ , и҆ к̾ свѣ́тꙋ не захᲂди́мᲂмꙋ преше́дше , вѣ́рнѡ бл҃жи́ми є҆стѐ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Ѻ҆те́ческꙋю сᲂста́внꙋю и҆мѣ́вше премꙋ́дрᲂсть , ᲂу҆ченицы̀ хрⷭ҇то́вы , всѣ́хъ ва́съ ᲂу҆мꙋдрѧ́ющꙋю . бꙋ́йствᲂмъ прᲂпᲂвѣ́данїѧ , ми́ръ ᲂу҆мꙋдри́ли є҆стѐ , и҆ к̾ ра́зꙋмꙋ бжⷭ҇твенᲂмꙋ приведо́сте .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Мꙋ́ки претерпѣ́вше , ꙗ҆́кᲂже беспло́тнїи , хрⷭ҇то́вы страда́льцы , и҆ всѧ̀ беспло́тныѧ врагѝ крѣ́пкѡ пᲂбѣди́ли є҆стѐ . тѣ́мъ блажи́ми є҆стѐ во́ вѣки , дᲂсто́йнѡ всехва́льнїи .

сла́ва . Трⷪ҇цѣ пᲂклᲂни́мсѧ , со ѻ҆ц҃е́мъ сн҃ꙋ и҆ дх҃ꙋ пра́вᲂмꙋ вѣ́рнїи , нераздѣ́льнᲂмꙋ и҆ неразлꙋ́чнᲂмꙋ и҆ сᲂпресто́льнᲂмꙋ , вᲂпїю́ще , ст҃ъ ст҃ъ ст҃ъ є҆сѝ трⷪ҇це всечестна́ѧ .

и҆ нн҃ѣ . Бл҃жи́мъ тѧ пречⷭ҇таѧ , ꙗ҆́кᲂже прᲂрекла̀ є҆сѝ , бг҃а бо во́ плᲂти рᲂдила̀ є҆сѝ , є҆го́же прᲂпᲂвѣ́да ли́къ а҆пⷭ҇льскїи . с̾ ни́ми же и҆спрᲂсѝ на́мъ , прегрѣше́нїемъ разрѣше́нїе всепѣ́таѧ .