Во вто́рникъ , ве́черъ . на гдⷭ҇и вᲂзва́хъ , стихѣ́ры крⷭ҇тны . гла́съ , а҃ . поⷣ . прехва́льнїи мчн҃цы . запѣ́въ : ꙗ҆́кѡ ѿ тебѐ ѡ҆чище́нїе є҆́сть . На крⷭ҇тѣ̀ пригвᲂжда́емь ,꙳ хрⷭ҇то́съ бг҃ъ ꙗ҆́кѡ чл҃къ ,꙳ чл҃ческᲂе є҆стество̀ ѡ҆бᲂжѝ ,꙳ и҆ началᲂѕло́бнаго ᲂу҆мертвѝ ѕмі́ѧ .꙳ на́съ свᲂбᲂди́лъ є҆́сть ꙳ клѧ́твы , ꙗ҆́же ѿ́ древа ,꙳ ꙗ҆́кѡ бл҃гᲂꙋтро́бенъ .꙳ прише́дъ ꙗ҆́кѡ да всѣ́мъ пᲂда́стъ ,꙳ бл҃гᲂслᲂве́нїе и҆ ве́лїю млⷭ҇ть .

ᲂу҆пᲂва̀ дш҃а мᲂѧ̀ на́ гдⷭ҇а . Всѧ́кїѧ превы́шши ꙳ че́сти сы́и влⷣко ,꙳ ѡ҆без̾че́ститисѧ бл҃гᲂвᲂли́лъ є҆сѝ .꙳ пᲂно́снꙋю претерпѣ́въ ще́дре ꙳ на́ древѣ сме́рть ,꙳ є҆ѧ́же ра́ди без̾сме́ртїе ꙳ ѡ҆бъѧ́тъ ро́дъ чл҃ческїи .꙳ и҆ жи́знь пе́рвꙋю вᲂспрїѧ́тъ ,꙳ тебѣ̀ ᲂу҆ме́ршꙋ пло́тїю всеси́льне .

да ᲂу҆пᲂва́етъ і҆и҃ль на́ гдⷭ҇а . Крⷭ҇тѐ всечестны́и ,꙳ вѣ́рнымъ всѣ́мъ ѡ҆чи́стилище ,꙳ цр҃е́мъ держа́во ,꙳ всѣ́хъ ѡ҆ст҃и тебѣ̀ пᲂклᲂнѧ́ющихсѧ ,꙳ и҆ хрⷭ҇та̀ сла́вѧщихъ ,꙳ и҆́же рꙋ́цѣ пречⷭ҇тѣи ꙳ прᲂсте́ршаго на тебѣ̀ ,꙳ не и҆зрече́ннагѡ ра́ди бл҃гᲂꙋтро́бїѧ ,꙳ и҆ кᲂнцы̀ землѝ всѧ̀ во є҆ди́но сᲂбра́вшагѡ .

та́же , в̾ минѣ́и , стⷯры , ст҃о́мꙋ , а҆́ще и҆́мать . а҆́ще нѣ́сть минѣ́и . и҆́ны , стⷯры , прест҃ѣ́й бцⷣѣ . поⷣ . нбⷭ҇нымъ чинѡ́мъ . запѣ́въ : ѿ всѣ́хъ без̾зако́нїи є҆гѡ̀ . Оу҆ крⷭ҇та̀ пред̾стᲂѧ́щи сн҃а и҆ бг҃а свᲂегѡ̀ ,꙳ и҆ дᲂлгᲂтерпѣ́нїе тᲂго̀ сматрѧ́ющи ,꙳ гл҃аше пла́чꙋщи мт҃и чи́стаѧ ,꙳ ᲂу҆вы̀ мнѣ̀ ча́до сладча́йшеє ,꙳ что̀ сїѧ̀ стра́ждеши непра́веднѡ сло́ве бж҃їи .꙳ да спасе́ши чл҃чество .

пᲂхвали́те є҆гѡ̀ всѝ лю́дїє . Оу҆ крⷭ҇та̀ пред̾стᲂѧ́щи , невѣ́сто неи҆скꙋсᲂмꙋ́жнаѧ ,꙳ и҆ ꙗ҆́же ѿ бᲂлѣ́зней ꙗ҆́звы прїе́млющи вᲂпїѧ́ше ,꙳ да небез̾ча́днꙋ мѧ ꙗ҆ви́ши ча́до мᲂѐ ,꙳ ро́ждьшꙋю тѧ̀ сло́ве бж҃їи .꙳ неѡ҆ста́ви мѧ є҆ди́нꙋ є҆динᲂро́дныи ,꙳ ѻ҆ц҃ꙋ сᲂприснᲂсꙋ́щныи .

и҆ и҆́стина гдⷭ҇нѧ пребыва́етъ во́ вѣки . Внегда̀ тѧ̀ ражда́хъ , бᲂлѣ́зни ника́кᲂже и҆мѣ́хъ ,꙳ и҆ ка́кѡ ны́нѣ бᲂлѣ́зни пᲂдъє́млю ,꙳ тебѣ̀ сло́ве не пра́ведно распина́емꙋ ,꙳ вᲂпїѧ́ше го́рькѡ дв҃аѧ слезѧ́щи .꙳ ᲂу҆вы̀ мнѣ̀ , нетерплю̀ ви́дѣти на крⷭ҇тѣ̀ ꙳ вᲂздви́жена тѧ̀ чл҃кᲂлю́бче .

сла́ва , и҆ ны́нѣ , крⷭ҇тᲂбоⷢ҇ . Свᲂегѡ̀ сн҃а и҆ влⷣкꙋ дре́вле ꙗ҆́кѡ ви́дѣла є҆сѝ ,꙳ на крⷭ҇тѣ̀ рꙋ́цѣ распрᲂсте́рша ,꙳ и҆ кᲂпїе́мъ ре́бра и҆скᲂпᲂва́ема ,꙳ мт҃и чи́стаѧ рыда́ющи в̾зыва́ше .꙳ ᲂу҆вы̀ мнѣ̀ ка́кѡ стра́жеши ,꙳ стра́сти чл҃кѡмъ ѿє҆́млѧи чл҃кᲂлю́бче .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стⷯры , крⷭ҇тны . гла́съ , а҃ . Крⷭ҇тъ вᲂдрꙋзи́сѧ на ло́бнѣмъ , и҆ прᲂцвѣтѐ на́мъ без̾сме́ртїе . ѿ и҆сто́чника приснᲂтекꙋ́ща ребра̀ сп҃сᲂва .

сти́хъ : к̾ тебѣ̀ вᲂзведо́хъ ѻ҆́чи . Неразрꙋше́на стѣна̀ , на́мъ є҆́сть чⷭ҇тны́и крⷭ҇тъ сп҃сᲂвъ . на́нь бо надѣ́ющесѧ , спаса́емсѧ всѝ .

сти́хъ : пᲂми́лꙋй на́съ гдⷭ҇и . мⷱ҇ꙋ . =Ѽ =до́брѣй кꙋ́пли ва́шей ст҃і́и , ꙗ҆́кѡ кро́ви да́сте , и҆ нбⷭ҇наѧ наслѣ́дᲂвасте . и҆ вре́меннѡ и҆скꙋси́вшесѧ , вѣ́чнѡ веселите́сѧ . вᲂи́стинꙋ дᲂбра̀ ва́ша кꙋ́плѧ . тлѣ́ннаѧ бо ѡ҆ста́вльше , нетлѣ́ннаѧ вᲂспрїѧ́сте . и҆ со а҆́нг҃лы ликᲂствꙋ́юще , пᲂе́те непреста́ннѡ трⷪ҇цꙋ є҆динᲂсꙋ́щнꙋю .

сла́ва , и҆ ны́нѣ , крⷭ҇тᲂбоⷢ҇ . поⷣ . нбⷭ҇нымъ чино́мъ . Вᲂздви́жена ꙗ҆́кѡ ви́дѣ на крⷭ҇тѣ̀ а҆́гньца ,꙳ непᲂро́чнаѧ дв҃а пла́чꙋщи вᲂпїѧ́ше ,꙳ сла́дкᲂе мᲂѐ ча́до ,꙳ что̀ но́вᲂе и҆ пресла́внᲂе видѣ́нїе ,꙳ ка́кѡ сᲂдержа́и всѧ́ческаѧ го́рстїю ,꙳ на́ древѣ пригвᲂжда́ешисѧ пло́тїю .

та́же , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ . во́ гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Во вто́рникъ , на па́вечерницѣ . кано́нъ , прест҃ѣ́й бцⷣѣ . гла́съ , а҃ . пѣ́снь , а҃ . і҆рмо́съ . Твᲂѧ̀ пᲂбѣди́тельнаѧ десни́ца , бг҃ᲂлѣ́пнѡ в̾ крѣ́пᲂсти прᲂсла́висѧ . та́ бо без̾сме́ртне всемᲂгꙋ́щаѧ прᲂти́вныѧ сᲂтрѐ , і҆и҃льтѧнѡмъ пꙋ́ть глꙋбины̀ ѡ҆бно́вльши .

запѣ́въ : прест҃а́ѧ гжⷭ҇е бцⷣе спасѝ на́съ . И҆́же во́инствᲂмъ нбⷭ҇нымъ неви́димыи , ѻ҆трᲂкᲂви́це всенепᲂро́чнаѧ . пло́ть прїѧ́тъ ѿ́ плᲂти твᲂеѧ̀ , и҆ ѡ҆бнᲂвѝ и҆стлѣ́вшїѧ престꙋпле́нїемъ пе́рвымъ . Пѣ́сньми ᲂу҆блажи́мъ вѣ́рнїи , бж҃їѧ сло́ва па́че слᲂвесѐ рᲂди́тельницꙋ . сїѧ́ бо пренепᲂро́чнаѧ землены́мъ ꙗ҆ви́сѧ ᲂу҆краше́нїе , и҆ всѣ́мъ сᲂгрѣша́ющимъ пред̾ста́тельница бы́сть . сла́ва . Ꙗ҆ви́сѧ прᲂстра́ннѣйши нб҃съ , твᲂрца́ бо всѧ́ческимъ в̾мѣ́щши мт҃и прⷭ҇нѡ дв҃о . тѣ́мже вᲂпїю́ ти , тѣснᲂты̀ всѧ́кїѧ мѧ смертᲂро́дныѧ , и҆зба́ви бг҃ᲂра́дᲂваннаѧ . и҆ ны́нѣ . Да́ждь на́мъ по́мᲂщь чⷭ҇таѧ , ѡ҆бꙋрева́емымъ мᲂлво́ю скᲂрбе́й . низ̾лᲂжѝ враго́въ на́шихъ лꙋка́ваѧ вᲂзнᲂше́нїѧ , и҆ пᲂда́ждь всѣ́мъ спасе́нїе , бл҃гᲂче́стнѡ тѧ сла́вѧщимъ .

пѣ́снь , г҃ . і҆рмо́съ . Є҆ди́не свѣ́дыи земны́хъ сꙋщество̀ немᲂщно́е , и҆ млⷭ҇тивно внѐ ѡ҆бᲂлкі́исѧ , препᲂѧ́ши мѧ с̾вы́ше си́лᲂю , вᲂспѣва́ти ти ст҃ы́и , цр҃кви дш҃е́внаѧ , неи҆зрече́нныѧ сла́вы ти чл҃кᲂлю́бче . По́лныи и҆з̾лива́етсѧ на́съ ра́ди , и҆ прїе́млетъ без̾нача́льныи ѿ тебѐ нача́ло дв҃о всенепᲂро́чнаѧ . и҆ ви́дитсѧ неви́димыи , и҆ пита́ѧи всѧ́ческаѧ , млеко́мъ пита́етсѧ , ѡ҆бнᲂви́ти чл҃ки прᲂмышлѧ́ѧ . И҆сцѣлѝ сᲂкрꙋше́нїе на́ше , дв҃о бракᲂнеи҆скꙋ́снаѧ , и҆сцѣли́телѧ ро́ждьшаѧ и҆ гдⷭ҇а , и҆́же вхо́дъ на́мъ сказа́вша жи́зни бл҃гᲂда́тїю . є҆го́же непреста́ннѡ мᲂлѝ , ᲂу҆ще́дрити и҆ спастѝ рабы̀ твᲂѧ̀ . сла́ва . Ꙗ҆́же є҆ди́на є҆стество̀ чл҃кѡмъ ѡ҆бᲂжи́вши , па́че є҆стества̀ всенепᲂро́чнаѧ , рᲂжде́нᲂмꙋ и҆з̾ тебѐ мᲂли́сѧ , сᲂгрѣше́ней на́шихъ прᲂще́нїе да́ти , и҆ ра́дᲂванїе вѣ́чнᲂе . прест҃а́ѧ дв҃о всепѣ́таѧ . и҆ ны́нѣ . Въ лѣ́нᲂсти и҆з̾жи́въ жи́знь , припа́даю ти пречⷭ҇таѧ , є҆́же к̾ бг҃ꙋ при́сными мл҃твами твᲂи́ми вᲂз̾дви́гни ми ᲂу҆́мъ . и҆ прᲂсвѣтѝ всего́ мѧ ѡ҆черне́наго , пᲂкаѧ́нїѧ свѣтлᲂстьмѝ , да вѣ́рᲂю и҆ любо́вїю сла́влю тѧ̀ .

пѣ́снь , д҃ . і҆рмо́съ . Го́рꙋ тѧ бл҃гᲂда́тїю бж҃їею присѣ́ннꙋ , прᲂзᲂрли́выма а҆вва́кꙋмъ ᲂу҆смᲂтри́въ ѻ҆чи́ма , и҆з̾ тебѐ и҆зы́ти і҆и҃леви , прᲂвᲂз̾глаша́ше ст҃а́гѡ , на спасе́нїе на́ше и҆҆ ѡ҆бнᲂвле́нїе . Бжⷭ҇твенꙋю тѧ̀ пᲂла́тꙋ сло́ва зна́емъ , в̾ ню́же всели́сѧ пло́тїю , ѡ҆бнᲂвѝ на́съ и҆стлѣ́вшїѧ стрⷭ҇тьмѝ . тѣ́мже чⷭ҇таѧ бж҃їю мт҃рь тѧ̀ чте́мъ , и҆ и҆́же ѿ тебѐ ро́ждьшагᲂсѧ сла́вимъ . Всели́сѧ вᲂꙋтро́бꙋ твᲂю̀ дв҃о , сло́во вᲂпло́щьсѧ , и҆ все́льшꙋюсѧ пре́жде клѧ́твꙋ в̾ є҆стество̀ чл҃ческᲂе и҆з̾гна̀ . и҆ свᲂи́мъ бжⷭ҇твенымъ сᲂвᲂкꙋпле́нїемъ ѡ҆бᲂжѝ бг҃ᲂлѣ́пнѡ . сегѡ̀ ра́ди тѧ̀ вᲂспѣва́емъ . сла́ва . Ме́ртвᲂсть пᲂдъѧ́тъ а҆да́мъ всенепᲂро́чнаѧ , ѿ не́ле же вкꙋсѝ плᲂда̀ тлѣ́ннагѡ . нн҃ѣ же твᲂи́мъ ржⷭ҇тво́мъ ѡ҆живѐ , и҆ в̾ селе́нїихъ ра́йскихъ вᲂдвᲂрѧ́етсѧ . сегѡ̀ ра́ди тѧ̀ по́ дᲂлгꙋ вᲂспѣва́емъ . и҆ ны́нѣ . Оу҆ста́вила є҆сѝ то́къ сме́ртныи , ро́ждьши без̾сме́ртїѧ и҆сто́чника хрⷭ҇та̀ бг҃а чи́стаѧ . тᲂго̀ ᲂу҆́бѡ мᲂлѝ бг҃ᲂбл҃гᲂда́тнаѧ , дꙋшѝ мᲂеѧ̀ ᲂу҆мᲂри́вшїѧ и҆сцѣли́ти стра́сти и҆ спасти́ мѧ .

пѣ́снь , є҃ . і҆рмо́съ . Прᲂсвѣще́й сїѧ́нїемъ прише́ствїѧ твᲂегѡ̀ хрⷭ҇тѐ , и҆҆ ѡ҆свѣще́и крⷭ҇то́мъ си мирскі́ѧ кᲂнцы̀ , срⷣца̀ прᲂсвѣтѝ свѣ́тᲂмъ твᲂегѡ̀ бг҃ᲂразꙋ́мїѧ , правᲂвѣ́рнѡ хва́лѧщимъ тѧ . Вᲂсїѧ̀ ѿ́ чрева ти незахᲂди́мᲂе сл҃нце пренепᲂро́чнаѧ , и҆ тмꙋ̀ до кᲂнца̀ пᲂтребѝ , и҆ зе́млю ᲂу҆ѧснѝ ра́зꙋмы бжⷭ҇твеными . тѣ́мже вѣ́рнѡ вᲂспѣва́емъ тѧ . Ра́дꙋисѧ а҆́нг҃льскїи гла́съ взыва́емъ ти пречⷭ҇таѧ , рᲂдила́ бо є҆сѝ вели́кагѡ сᲂвѣ́та а҆́нг҃ла , и҆́же ѻ҆ц҃ꙋ сᲂбез̾нача́льна , пло́ть бы́вшаго дв҃о , за є҆́же спастѝ чл҃ка . сла́ва . Гдⷭ҇ь все́льсѧ чⷭ҇таѧ во́ чрево твᲂѐ , и҆́же бл҃гᲂче́стнѡ во́нь вѣ́рꙋющїѧ , и҆зба́вилъ є҆́сть ѿ влады́чествїѧ вра́жїѧ . тѣ́мже велегла́снѡ всѝ вᲂспѣва́емъ тѧ̀ пречⷭ҇таѧ . и҆ ны́нѣ . Ѡ҆бо́лксѧ в̾ мѧ̀ влⷣка , и҆з̾ тебѐ про́йде всенепᲂро́чнаѧ , и҆ и҆стлѣ́вшеє є҆стество̀ ѡ҆бᲂжѝ . но тᲂго̀ мᲂлѝ бг҃ᲂрᲂди́тельнице , на́га всѧ́кагѡ грѣха̀ сᲂтвᲂри́ти мѧ .

пѣ́снь , ѕ҃ . і҆рмо́съ . Ѡ҆бы́де на́съ пᲂслѣ́днѧѧ бе́здна , нѣ́сть и҆҆збавлѧ́ѧи , в̾мѣни́хᲂмсѧ ꙗ҆́кѡ ѻ҆вча̀ на закᲂле́нїе , спасѝ лю́ди свᲂѧ̀ бж҃е на́шъ . ты́ бо крѣ́пᲂсть немᲂщны́мъ и҆҆ и҆҆справле́нїе . Без̾ сѣ́мене бг҃а во́ чревѣ зачала̀ є҆сѝ , дв҃ᲂю пребы́вши по ржⷭ҇твѣ̀ всенепᲂро́чнаѧ стра́шнѣмъ . тѣ́мже хвала́ми сла́вимъ тѧ , и҆́же тᲂбо́ю пречи́стаѧ и҆зба́вльшесѧ клѧ́твы . Лѣ́ствица ю҆́же і҆а́кѡвъ ви́дѣ , гᲂра̀ присѣ́ннаѧ , всесвѣ́тлыи ѻ҆́блакъ бжⷭ҇твенагѡ свѣ́та . две́рь є҆ю́же бг҃ъ є҆ди́нъ про́йде , бл҃гᲂслᲂве́наѧ в̾ жена́хъ , ты̀ є҆сѝ пренепᲂро́чнаѧ . сла́ва . Зако́нъ є҆сте́ственыхъ крᲂмѣ̀ рᲂдила̀ є҆сѝ , дв҃о бракᲂнеи҆скꙋ́снаѧ , сло́во бж҃їе и҆пᲂста́снᲂе , и҆сцѣлѧ́ющаго на́ше сᲂкрꙋше́нїе . є҆го́же прилѣ́жнѡ мᲂлѝ , спастѝ всѣ́хъ на́съ . и҆ ны́нѣ . Бᲂлѣ́вшꙋю дш҃ꙋ престꙋпле́ньми принᲂсѧ̀ , взыва́ю ти всест҃а́ѧ пресла́внаѧ чⷭ҇таѧ , и҆сцѣлѝ и҆ спаси́ мѧ хᲂда́тайствᲂмъ ти , ꙗ҆́кѡ да вᲂспᲂю̀ и҆ велича́ю застꙋпле́нїе твᲂѐ .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , а҃ . И҆́же твᲂѐ застꙋпле́нїе стѧжа́вше пречⷭ҇таѧ бцⷣе дв҃о , ꙗ҆́кѡ да твᲂи́ми мл҃твами и҆збавлѧ́емсѧ ѿ напа́стей на́шихъ . крⷭ҇то́мъ бо сн҃а твᲂегѡ̀ всегда̀ храни́ми , по́ дᲂлгꙋ тѧ̀ всѝ бл҃гᲂвѣ́рнѡ велича́емъ .

пѣ́снь , з҃ . і҆рмо́съ . Тебѐ мы́сленнꙋю бцⷣе пе́щь , раз̾смᲂтрѧ́емъ вѣ́рнїи , ꙗ҆́кᲂже бо ѻ҆́трᲂки спасѐ трѝ превᲂзнᲂша́емыи , ми́ръ ѡ҆бнᲂви́лъ є҆́сть , во́ чревѣ твᲂе́мъ сᲂверше́нъ , вᲂсхвалѧ́емыи ѻ҆ц҃е́мъ бг҃ъ и҆҆ препрᲂсла́вленъ . Зако́на сѣ́ни и҆ пре́днѧѧ гада́нїѧ бг҃ᲂгла́сныхъ прᲂро́къ , твᲂѐ без̾сѣ́меннᲂе ржⷭ҇тво̀ , ꙗ҆́вѣ прᲂвᲂз̾вѣсти́ша пречи́стаѧ всенепᲂро́чнаѧ . є҆́же вᲂспѣва́юще зᲂве́мъ , вᲂспѣ́тагѡ ѻ҆ц҃е́мъ бг҃а и҆ препрᲂсла́вленагѡ . Вᲂсто́къ сл҃нца рᲂдила̀ є҆сѝ , бг҃ᲂбл҃гᲂда́тнаѧ чⷭ҇таѧ , прᲂсвѣ́щшагѡ вѣ́рныхъ всѣ́хъ и҆спᲂлне́нїѧ , но́щь же ᲂу҆ма́льшагѡ ѕлᲂче́стїѧ . тѣ́мже чте́мъ вᲂспѣ́тагѡ ѻ҆ц҃е́мъ бг҃а , и҆ препрᲂсла́вленаго . сла́ва . Кꙋпина̀ и҆нᲂгда̀ не ѡ҆па́льнаѧ , всенепᲂро́чнаѧ твᲂѐ во ѡ҆бража́ше чре́во . и҆́бо не ѡ҆пали́ тѧ ѿ ню́дъ ѻ҆́гнь бжⷭ҇тва̀ . тѣ́мже мᲂлю́ тѧ , ѻ҆гнѧ̀ не гаси́магѡ и҆зба́ви мѧ . ꙗ҆́кѡ да пᲂю̀ немо́лчнѡ чи́стаѧ вели́чїѧ твᲂѧ̀ . и҆ ны́нѣ . Мт҃и бж҃їѧ вѣ́рнымъ по́мᲂще , сᲂгрѣша́ющимъ ѡ҆чище́нїе , бл҃ги́мъ всѣ́мъ пᲂда́тельнице , прїими́ мѧ припа́дающа , и҆ бл҃гᲂꙋтро́бїемъ свᲂи́мъ млⷭ҇тивнымъ , прихᲂдѧ́щагѡ с̾ пла́чемъ , и҆ прᲂсѧ́щаго раз̾рѣше́нїѧ , сᲂгрѣше́нїемъ мᲂи́мъ .

пѣ́снь , и҃ . і҆рмо́съ . Впещѝ дѣ́ти і҆и҃левы , ꙗ҆́кᲂже в̾гᲂрни́лѣ дᲂбро́тᲂю бл҃гᲂче́стїѧ , чистѣ́е зла́та блеща́хꙋсѧ гл҃юще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆҆ превᲂзнᲂси́те є҆гѡ̀ во́ вѣки . Зако́ннїи ѻ҆́брази , и҆ пре́днѧѧ гада́нїѧ дв҃о , гдⷭ҇ню чⷭ҇тꙋю мт҃рь пред̾сказа́ша ꙗ҆́вѣ . мы́ же и҆зведе́нїе ве́щемъ нн҃ѣ ви́дѧще , пᲂе́мъ тѧ̀ сᲂгла́снѡ , и҆ славᲂсло́вимъ во всѧ̀ вѣ́ки . Оу҆краси́сѧ бжⷭ҇твеными дᲂбро́тами , без̾ раз̾сꙋже́нїѧ в̾ дᲂбро́тахъ , сло́во бж҃їе ро́ждьши всенепᲂро́чнаѧ . и҆́же красᲂта́ми бжⷭ҇твеными всѣ́хъ срⷣца̀ ᲂу҆ѧснѧ́юща , и҆́же вѣ́рᲂю пѣснᲂсло́вѧщихъ є҆гѡ̀ во всѧ̀ вѣ́ки . сла́ва . Сщ҃е́нными гла́сы , и҆з̾ дале́ча сказа́ша пррⷪ҇цы , мт҃рь тѧ̀ бы́ти всенепᲂро́чнаѧ влⷣцѣ бг҃ꙋ . є҆мꙋ́ же всѝ зᲂве́мъ , бл҃гᲂслᲂви́те всѧ̀ дѣ́ла гдⷭ҇а , по́йте и҆ превᲂзнᲂси́те є҆гѡ̀ во́ вѣки . и҆ ны́нѣ . Ꙗ҆́кѡ красна̀ , ꙗ҆́кѡ предᲂбра̀ дв҃це , кра́снагѡ в̾ дᲂбро́тахъ , па́че вины̀ рᲂдила̀ є҆сѝ хрⷭ҇та̀ . є҆мꙋ́же всѝ зᲂве́мъ , бл҃гᲂслᲂви́те всѧ̀ дѣ́ла гдⷭ҇а , по́йте и҆ превᲂзнᲂси́те є҆гѡ̀ во́ вѣки .

пѣ́снь , ѳ҃ . і҆рмо́съ . Ѻ҆́бразъ чи́стагѡ ржⷭ҇тва̀ твᲂегѡ̀ , распала́емꙋ кꙋпинꙋ̀ , ꙗ҆вѝ неѡ҆пали́мꙋ . и҆҆ ны́нѣ на на́съ напа́стей свирѣ́пѣющꙋю ᲂу҆гаси́ти мо́лимсѧ пе́щь , да тѧ̀ бцⷣе непреста́ннѡ велича́емъ . Є҆стество̀ є҆́же пре́жде ѡ҆сꙋже́ннᲂе землены́хъ дв҃о , преєсте́ственымъ тѝ бжⷭ҇твенымъ ржⷭ҇тво́мъ без̾сме́ртїе ᲂу҆лꙋчѝ , и҆ дᲂбро́тꙋ пре́жнюю вᲂспрїѧ́тъ , пᲂю́ще тѧ̀ сᲂгла́снѡ , ра́дᲂстными пѣ́сньми . Но́сиши всѧ̀ нᲂсѧ́щаго , и҆ млеко́мъ питѣ́еши , всѣ́мъ пи́щꙋ даю́щаго . ве́лїе и҆ стра́шно , є҆́же па́че ᲂу҆ма̀ твᲂѐ та́инство , кᲂвче́же чⷭ҇тна́гѡ сщ҃е́нства дв҃о бцⷣе . тѣ́мже тѧ̀ всѝ ᲂу҆бл҃жа́емъ . сла́ва . Свѣ́тъ мнѣ̀ лежа́щꙋ пречⷭ҇таѧ , в̾ лѣ́нᲂсти тмы̀ нн҃ѣ вᲂсїѧ́й . ѡ҆слѣплѧ́ющїѧ ми по́мыслы страсте́й рѣша́щи . и҆ ми́ръ глꙋбо́къ всенепᲂро́чнаѧ , при́снѡ сᲂдѣва́ющи в̾ дꙋшѝ мᲂе́й сла́вити тѧ̀ . и҆ нн҃ѣ . Страшꙋ́сѧ сꙋди́ща не ᲂу҆мы́тнагѡ , и҆ сꙋдїѝ незабве́ннагѡ всенепᲂро́чнаѧ . и҆́мамъ бо мно́жества сᲂгрѣше́нїи без̾ числа̀ , в̾ лѣ́нᲂсти жи́въ всестрастны́и . тѣ́мже мѧ̀ бцⷣе ᲂу҆ще́дривши пᲂми́лꙋй . та́же , дᲂсто́йнѡ є҆́сть . и҆ про́чеє , ѡ҆бы́чно . и҆ ѿпꙋ́стъ .

Въ сре́дꙋ , на ᲂу҆́трени . по а҃ , стихᲂло́гїи . сѣда́льны , крⷭ҇тны . гла́съ , а҃ . Распе́ншꙋтисѧ хрⷭ҇тѐ , пᲂги́бе мꙋчи́тельство , и҆ пᲂпра́на бы́сть си́ла вра́жїѧ . ни а҆́нг҃лъ бо ни чл҃къ , но ты̀ са́мъ гдⷭ҇и спа́слъ є҆сѝ на́съ , сла́ва тебѣ̀ . сти́хъ : вᲂзнᲂси́те гдⷭ҇а бг҃а на́шегѡ , и҆ кла́нѧйтесѧ пᲂд̾но́жїю но́гꙋ є҆гѡ̀ ꙗ҆́кѡ ст҃о є҆́сть . Крⷭ҇та̀ твᲂегѡ̀ дре́вꙋ , пᲂклᲂнѧ́емсѧ чл҃кᲂлю́бче , ꙗ҆́кѡ на не́мъ пригвᲂзди́лсѧ є҆сѝ живᲂтѐ всѣ́хъ . и҆ ра́й ѿве́рзлъ є҆сѝ сп҃се , вѣ́рᲂю прише́дшемꙋ к̾ тебѣ̀ разбо́йникꙋ , и҆ пи́щи спᲂдо́билъ є҆сѝ и҆спᲂвѣ́дающаго тѧ̀ , пᲂмѧни́ мѧ гдⷭ҇и , и҆ прїимѝ ꙗ҆́кᲂже ѻ҆́нᲂго и҆ на́съ зᲂвꙋ́щихъ сᲂгрѣши́хᲂмъ всѝ , млрⷭ҇дїемъ свᲂи́мъ непре́зри на́съ . сла́ва , и҆ нн҃ѣ , крⷭ҇тᲂбоⷢ҇ . А҆́гньца на крⷭ҇тѣ̀ а҆́гница зрѧ́щи , с̾ разбо́йникᲂма распина́ема тѧ̀ дᲂлгᲂтерпѣли́ве сло́ве , и҆ кᲂпїе́мъ в̾ ре́бра прᲂбᲂда́ема . вᲂсклица́ше вᲂпїю́щи мт҃рьски , что̀ стра́ннᲂе и҆ ᲂу҆жа́снᲂе і҆с҃е мо́й таи́нство несказа́нно сᲂверша́емᲂе . ка́кѡ пᲂкрыва́ешисѧ гро́бᲂмъ неѡ҆пи́санныи бг҃ъ , да мѧ̀ ро́ждьшꙋю тѧ̀ неѡ҆ста́виши , сн҃е мо́й сладча́йшїи .

по в҃ , стихᲂло́гїи . сѣда́льны , гла́съ , а҃ . Спасѝ гдⷭ҇и лю́ди свᲂѧ̀ , и҆ бл҃гᲂслᲂвѝ дᲂстᲂѧ́нїе свᲂѐ . пᲂбѣ́ды держа́ве рᲂсси́йстей на сᲂпᲂста́ты да́рꙋѧ , и҆ свᲂѧ̀ сᲂхранѧ́ѧ крⷭ҇то́мъ лю́ди . сти́хъ : бг҃ъ же цр҃ь на́шъ пре́жде вѣ́къ , сᲂдѣ́ла спасе́нїе пᲂсредѣ̀ землѝ . Ѻ҆рꙋ́жїе крⷭ҇тнᲂе в̾ бранѣ́хъ , ꙗ҆ви́сѧ нѣ́кᲂгда бл҃гᲂчести́вᲂмꙋ цр҃ю кᲂнстанти́нꙋ , непᲂбѣди́маѧ пᲂбѣ́да на врагѝ вѣ́ры ра́ди . сегѡ̀ трепе́щꙋтъ сᲂпрᲂти́вныѧ си́лы , се́й бы́сть вѣ́рнымъ спасе́нїе , и҆ па́влꙋ пᲂхвала̀ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Ра́нами ст҃ы́хъ и҆́хже по тебѣ̀ пᲂстрада́ша , ᲂу҆мᲂле́нъ бꙋ́ди гдⷭ҇и , и҆ всѧ̀ на́ши бᲂлѣ́зни и҆ стра́сти и҆сцѣлѝ , чл҃кᲂлю́бче мо́лимсѧ . сла́ва , и҆ нн҃ѣ , крⷭ҇тᲂбоⷢ҇ . И҆́же твᲂѐ застꙋпле́нїе стѧжа́вше пречⷭ҇таѧ , и҆ твᲂи́ми мл҃твами ѿ бѣ́дъ и҆збавлѧ́емсѧ . крⷭ҇то́мъ бо сн҃а твᲂегѡ̀ всегда̀ храни́ми вездѣ̀ , по́ дᲂлгꙋ тѧ̀ всѝ бл҃гᲂче́стнѡ велича́емъ .

по г҃ , стихᲂло́гїи . сѣда́ленъ , гла́съ , а҃ . На́ древѣ тѧ̀ сло́ве крⷭ҇тнѣмъ , за милᲂсе́рдїе млⷭ҇ти пᲂвѣ́шена пло́тїю во́лею . ꙗ҆́кѡ ви́дѣ сл҃нце , нетерпѧ́ше дерзнᲂве́нїѧ пᲂмрачи́сѧ . тѣ́мже ѡ҆мраче́нꙋю дꙋ́шꙋ мᲂю̀ прᲂсвѣтѝ , неприкᲂснᲂве́ннымъ свѣ́тᲂмъ сѝ , и҆ спаси́ мѧ мᲂлю́сѧ . сла́ва , и҆ ны́нѣ , крⷭ҇тᲂбоⷢ҇ . Нескве́рнаѧ а҆́гнице , а҆́гньца и҆ па́стырѧ , пᲂвѣ́шена на́ древѣ ме́ртва зрѧ́щи . пла́чꙋщи вѣща́ше , мт҃рьски вᲂсклица́ющи , ка́кѡ претѣрплю̀ твᲂѐ є҆́же па́че сло́ва сн҃е мо́й сни́тїе , и҆ во́льныѧ стра́сти бж҃е преблагі́и .

Въ сре́дꙋ , кано́нъ , чⷭ҇тно́мꙋ и҆ живᲂтвᲂрѧ́щемꙋ крⷭ҇тꙋ̀ . є҆мꙋ́же краегране́сїе . крⷭ҇то́мъ спаса́емъ є҆́смь , пᲂстрада́вшагѡ влⷣки . твᲂре́нїе і҆ѡ́сифᲂвѡ . гла́съ , а҃ . пѣ́снь , а҃ . і҆рмо́съ . Лю́ты рабо́ты и҆збы́въ і҆и҃ль , и҆ непрᲂхᲂди́мᲂе про́йде ꙗ҆́кѡ по́ сꙋхꙋ . врага̀ зрѧ̀ пᲂтᲂплѧ́ема , пѣ́снь в̾ весе́лїи пᲂе́тъ бг҃ꙋ , чꙋдᲂтвᲂрѧ́щемꙋ мы́шцею высо́кᲂю , ꙗ҆́кѡ прᲂсла́висѧ .

запѣ́въ : сла́ва гдⷭ҇и крⷭ҇тꙋ̀ твᲂемꙋ̀ чⷭ҇тно́мꙋ . На крⷭ҇тѣ̀ вᲂз̾двиза́емь хрⷭ҇тѐ , сᲂвᲂз̾дви́же па́дшагᲂсѧ чл҃ка , и҆ всю̀ вра́жїю си́лꙋ низ̾ве́рглъ є҆сѝ сло́ве . тѣ́мже твᲂѧ̀ стрⷭ҇ти вᲂспѣва́ю , пᲂстрада́вшаго , и҆ ѿ стрⷭ҇те́й и҆зба́вльшаго мѧ̀ . Сла́вѣ гдⷭ҇ь ты̀ є҆сѝ , и҆́же сла́вᲂю вѣнча́выи чл҃ка те́рнїемъ вѣнча́сѧ . ꙗ҆́кѡ да тернᲂно́снᲂе є҆стество̀ на́ше сᲂтвᲂри́ши плᲂдᲂно́сно , сади́телю бжⷭ҇твеныхъ дѣѧ́нїи . мⷱ҇ꙋ . Ст҃ы́хъ сᲂбо́ръ прест҃ы́и , зако́нно пᲂстрада́лъ є҆́сть . и҆ кꙋ́пнѡ крᲂве́й ст҃ы́хъ тече́нїемъ тва́рь ѡ҆ст҃и́лъ є҆́сть , и҆ ѡ҆скверне́ныѧ бѣсо́мъ же́ртвы принᲂси́мыѧ , ѡ҆́ бз҃ѣ ѻ҆ц҃ѣ пᲂтреби́лъ є҆́сть . мⷱ҇ꙋ . Ва́ша всест҃і́и мч҃нцы ѻ҆́блацы мꙋче́нїѧ , нескры́ша терпѣли́ваѧ бᲂре́нїѧ . тѣ́мже па́че сл҃нечныхъ лꙋ́чь сла́внїи ꙗ҆ви́стесѧ , ѡ҆блиста́юще ꙗ҆́вѣ зарѝ сїѧ́нїѧ . боⷢ҇ . Ѻ҆рꙋ́жїемъ снѣда́шесѧ пречⷭ҇таѧ стрⷭ҇те́й сн҃а свᲂегѡ̀ . ꙗ҆́кѡ зрѧ́ше тᲂго̀ кᲂпїе́мъ прᲂбᲂда́ема , и҆ сꙋ́щемꙋ є҆́же в̾ ра́й вᲂз̾бранѧ́ѧ ѿрѣва́ющемꙋ кᲂпїю̀ , недаю́щꙋ вѣ́рнымъ бжⷭ҇твенагѡ вхо́да .

Дрꙋгі́и кано́нъ , прест҃ѣ́й бцⷣѣ . і҆рмо́съ . Твᲂѧ̀ пᲂбѣди́тельнаѧ десни́ца . запѣ́в̾ : прест҃а́ѧ гжⷭ҇е бцⷣе спасѝ на́съ . Стрꙋѝ мнѣ̀ сле́зъ дш҃е́вныхъ да́рꙋй всенепᲂро́чнаѧ , ꙗ҆́же и҆сто́чника ѡ҆ставле́нїѧ ро́ждьши , грѣхо́внꙋю скве́рнꙋ ѿмыва́юща , и҆ во смире́нїи жи́знь мᲂю̀ и҆звᲂдѧ́ща . Превы́шши бы́сть чⷭ҇таѧ тва́рей , бг҃а вᲂпло́щши . тѣ́мже мᲂлю́ тѧ ѿ́гнᲂѧ стрⷭ҇те́й вᲂста́ви мѧ , и҆ къ бжⷭ҇твенѣй высᲂтѣ̀ без̾стра́стїѧ вᲂзведѝ . Ми́лᲂстива мѝ ꙗ҆ви́сѧ чи́стаѧ , в̾ дн҃ь сꙋ́дныи мᲂлю́сѧ . всѧ́кᲂгѡ и҆збавлѧ́ющи мѧ стра́шнагѡ стᲂѧ́нїѧ , и҆ лю́тагѡ мꙋче́нїѧ , прибѣга́ющаго пᲂд̾ кро́въ тво́й пречⷭ҇таѧ влⷣчце . Мра́кᲂмъ грѣхо́внымъ ѡ҆держи́ма мѧ , и҆ па́дша , пречⷭ҇таѧ вᲂздви́гни . слеза́мъ тꙋ́чꙋ да́ждь мѝ , и҆́ми же ѡ҆мы́ю скве́рнаѧ дѣ́ла . тѧ́ бо є҆ди́нꙋ застꙋ́пницꙋ и҆́мамы бцⷣе .

пѣ́снь , г҃ . і҆рмо́съ . Немꙋ́дрᲂстїю ни бᲂга́тствᲂмъ да хва́литсѧ ме́ртвенныи свᲂи́мъ , но вѣ́рᲂю гдⷭ҇нею , правᲂсла́внѡ взыва́ѧ хрⷭ҇тꙋ̀ бг҃ꙋ , и҆ пᲂѧ̀ прⷭ҇нѡ . на ка́мени твᲂи́хъ запᲂвѣде́й ᲂу҆тверди́ мѧ влⷣко . И҆скᲂпа́ша тѝ без̾зако́ннїи , рꙋ́цѣ и҆ но́зѣ і҆с҃е мо́й . и҆́же дла́нїю неи҆зрече́ннѡ сᲂзда́вшаго пе́рвѣе хрⷭ҇тѐ бж҃е чл҃ка , и҆ стрⷭ҇тїю ѿ стрⷭ҇те́й и҆ тлѝ всѣ́хъ свᲂбо́ждьшꙋ . Да ста́нетъ вᲂпїѧ́ше і҆с҃ъ , лꙋна́ же и҆ сл҃нце , є҆́же на крⷭ҇тѣ̀ прᲂписꙋ́ѧ пᲂстрада́вшаго влⷣкꙋ пло́тїю , свѣти́лᲂмъ пᲂмраче́нїе . и҆́мже тмы̀ нача́ла лꙋка́ваѧ пᲂсра́млена бы́вша . мⷱ҇ꙋ . Терпѧ́хꙋ ᲂу҆се́рднѡ ра́ны сла́внїи мч҃нцы , и҆ ᲂу҆ѧзвлѧ́еми , велїа́ра ѕмі́ѧ ᲂу҆ѧзвлѧ́юще крѣ́пкѡ . тѣ́мже дꙋ́шъ на́шихъ ра́ны и҆сцѣлѧ́ютъ при́снѡ , бжⷭ҇твенымъ манᲂве́нїемъ . мⷱ҇ꙋ . Ка́пища бѣсо́вскаѧ и҆ хра́мы , разᲂри́сте мч҃нцы . бᲂлѣ́зньми же и҆ мꙋ́жествᲂмъ са́ми себѐ пресла́внѡ хра́мы вᲂз̾дви́гнꙋсте бл҃гᲂда́тїю , в̾мѣсти́тельны ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ . боⷢ҇ . Въ ча́съ стрⷭ҇те́й , кра́снагѡ дᲂбро́тᲂю зрѧ́ше дв҃ца , видѣ́нїѧ нижѐ дᲂбро́ты и҆мꙋ́ща , вᲂпїѧ́ше го́рько чⷭ҇таѧ вᲂсклица́ющи , ᲂу҆вы̀ мнѣ̀ , ка́кѡ стра́ждеши сн҃е , ѿ страсте́й всѣ́хъ хᲂтѧ̀ и҆зба́вити .

и҆́нъ , і҆рмо́съ . Є҆ди́не свѣ́дыи земны́хъ . Хра́мъ была̀ є҆сѝ пречⷭ҇таѧ , всѣ́ми црⷭ҇твꙋющагѡ , бы́вша мѧ верте́пъ дш҃етлѣ́нныхъ разбо́йникъ , и҆схи́ти ѿ тѣ́хъ ѡ҆ѕлᲂбле́нїѧ . и҆ бжⷭ҇твенагѡ дх҃а чи́сто жили́ще ꙗ҆ви́ мѧ . двⷤа . Сле́зъ мѝ пᲂслѝ тꙋ́чꙋ , и҆з̾сꙋша́ющꙋ тече́нїѧ лꙋка́выхъ мᲂи́хъ дѣѧ́нїй мᲂлю́сѧ . ꙗ҆́же бл҃гᲂꙋтро́бїѧ ро́ждьши ти́хꙋю пꙋчи́нꙋ , хрⷭ҇та̀ бг҃а на́шегѡ , бцⷣе дв҃о всепѣ́таѧ . Крѣ́пᲂсть на́мъ и҆ сто́лпъ непᲂкᲂлѣби́мъ бꙋ́ди бг҃ᲂра́дᲂваннаѧ , и҆ щи́тъ , и҆ ѻ҆рꙋ́жїе непᲂбѣди́мᲂе . мы́сленыхъ вра́гъ пᲂлкѝ ѿ на́съ вᲂз̾бранѧ́ющи , бцⷣе пречⷭ҇таѧ , и҆́же вѣ́рᲂю и҆ любо́вїю пᲂчита́ющихъ тѧ .

пѣ́снь , д҃ . і҆рмо́съ . Слы́шаше дре́вле а҆вва́кꙋмъ , хрⷭ҇тѐ тво́й чꙋ́дныи слꙋ́хъ , и҆ со́ страхᲂмъ взыва́ше , ѿ ю҆́га бг҃ъ прїи́детъ , и҆ ст҃ы́и ѿ гᲂры̀ присѣ́нныѧ ча́сты , спастѝ свᲂѧ̀ пᲂма́занныѧ , сла́ва си́лѣ твᲂе́й гдⷭ҇и . Ра́ны ᲂу҆́бѡ и҆ ꙗ҆́звы хрⷭ҇тѐ претерпѣ́лъ є҆сѝ , ꙗ҆́звы срⷣца мᲂегѡ̀ и҆сцѣлѧ́ѧ , же́лчи вкꙋси́въ го́рькїѧ , сла́дкагѡ вкꙋ́са тлетво́рнагѡ ѿє҆́млѧ вре́дъ . на́ древѣ же пригво́ждьсѧ , дре́внюю клѧ́твꙋ пᲂтреби́лъ є҆сѝ . Дале́че ѿринᲂве́нныѧ ѿ тебѐ ꙗ҆зы́ки , вᲂз̾двиза́емь на крⷭ҇тѣ̀ бли́зъ привлечѐ , примири́лъ є҆сѝ на́съ ѻ҆ц҃ꙋ дᲂлгᲂтерпѣли́ве в̾ средꙋ̀ в̾ведѐ ꙗ҆́кѡ хᲂда́тай себѐ . и҆ пᲂсредѣ̀ землѝ стрⷭ҇ть претерпѣ́лъ є҆сѝ пᲂно́снꙋю . мⷱ҇ꙋ . Въ мо́ри крᲂве́й ва́шихъ бг҃ᲂблаже́ннїи , со всѣ́ми свᲂи́ми во́инствы , мы́сленыи фараѡ́нъ , впа́дъ пᲂтᲂпи́сѧ . тѣ́мже ра́дᲂстїю вы̀ , преи҆до́сте ко ѡ҆бѣтᲂва́ннѣй землѝ , и҆ нбⷭ҇нїи гра́жане бы́сте . мⷱ҇ꙋ . Вᲂзмᲂго́ша ᲂу҆крѣплѧ́еми хрⷭ҇то́вᲂю стрⷭ҇тїю бл҃же́ннїи , стра́сти разли́чныѧ вᲂспрїѧ́ти на честнѣ́й пло́ти . сегѡ̀ ра́ди ᲂу҆ставлѧ́ютъ стрⷭ҇ти дш҃а́мъ же и҆ тѣ́лᲂмъ , вᲂсхвалѧ́ющихъ тѣ́хъ и҆ блажа́щихъ всегда̀ . боⷢ҇ . Непра́веднѡ зрѧ́щи закᲂле́нїе хрⷭ҇тѐ , тебѐ ро́ждьшаѧ вᲂпїѧ́ше ти , пра́ведныи сꙋдїѐ сн҃е , ка́кѡ непра́веднѡ ѡ҆сꙋди́сѧ , хᲂтѧ́и ѡ҆правди́ти и҆́же престꙋпле́нїемъ ѡ҆сꙋжде́ныѧ дре́вле , и҆ к̾ тлѣ́нїю пᲂпо́лзшїѧсѧ .

и҆́нъ , і҆рмо́съ . Го́рꙋ тѧ бл҃гᲂда́тїю . Бѣсо́вскими лестьмѝ , лю́тѣ ѿвлачи́маго мѧ ѿ запᲂвѣде́й бж҃їихъ , непре́зри бл҃га́ѧ , но ᲂу҆ще́дри мᲂлю́сѧ , и҆ тᲂго̀ пре́лести пᲂкажи́ мѧ вы́шша , прибѣга́ющаго пречⷭ҇таѧ к̾ твᲂе́й ми́лᲂсти . вⷤ . Є҆ди́не сы́и млⷭ҇тиве хрⷭ҇тѐ бж҃е , тебѐ ро́ждьшїѧ мл҃твами , и҆́же на тѧ̀ ᲂу҆пᲂва́ющихъ пᲂми́лꙋй и҆ ᲂу҆ще́дри , и҆ к̾ свѣ́тꙋ запᲂвѣде́й твᲂи́хъ наста́ви , и҆ вѣ́чнѣй жи́зни спᲂдо́би . Оу҆снꙋ́вша в̾ сме́рть , и҆ во́ грᲂбѣ лежа́ща ѿчаѧ́нїѧ пречⷭ҇таѧ , ѡ҆ко́вана желѣ́зы прегрѣше́нїи мᲂи́хъ , твᲂе́ю бо́дренᲂю мл҃твᲂю вᲂз̾дви́гни , и҆ к̾ пᲂкаѧ́нїю и҆спра́ви мᲂлю́сѧ .

пѣ́снь , є҃ . і҆рмо́съ . Свѣ́тъ тво́й незахᲂди́мыи вᲂз̾сїѧ́й хрⷭ҇тѐ въ срⷣца̀ вѣ́рнѡ пᲂю́щихъ тѧ , и҆ ми́ръ сво́й да́рꙋй на́мъ , и҆́же па́че ᲂу҆ма̀ . ꙗ҆́кѡ да ѿ́ нᲂщи невѣ́денїѧ , ко́ дню запᲂвѣде́й твᲂи́хъ притека́юще , славᲂсло́вимъ тѧ̀ чл҃кᲂлю́бче . Сл҃нце скры̀ свѣ́тъ , на́ древѣ на́га тебѐ сп҃се зрѧ̀ ви́сѧща , и҆́же на вᲂда́хъ пᲂвѣ́шшаго зе́млю . ка́менїе же ка́менѧ ꙗ҆́кѡ ѡ҆щꙋти́ша вᲂз̾дви́жена , распада́шесѧ стра́хᲂмъ , и҆ ѡ҆снᲂва́нїѧ пᲂкᲂлѣба́шасѧ . Вᲂз̾дви́женъ на́ древо , и҆ гвᲂздьмѝ пригво́ждьсѧ , ѡ҆крᲂвави́въ сѝ пе́рсты дᲂлгᲂтерпѣли́ве . и҆ кᲂпїе́мъ прᲂбᲂда́емь в̾ ре́бра , и҆сцѣлѧ́ѧ ꙗ҆́звы а҆да́мᲂвы , и҆́же прїѧ́тъ ребра̀ пᲂслꙋ́шавъ , и҆ преслꙋ́шавъ сᲂтво́ршаго и҆̀ . мⷱ҇ꙋ . Ра́и ꙗ҆ви́сѧ мꙋ́ченикъ мно́жество , живо́тнᲂе и҆мѣ́ѧ пᲂсредѣ̀ дре́во хрⷭ҇та̀ . за него́ же пᲂно́снꙋю до́блественымъ по́мыслᲂмъ , сме́рть претерпѣ́вше , и҆́же снѣ́дїю ро́дꙋ нача́льники ᲂу҆мертви́вшагѡ ѕмі́ѧ , бжⷭ҇твенᲂю си́лᲂю ᲂу҆мертви́ша . мⷱ҇ꙋ . Крᲂвны́ми ка́плѧми хрⷭ҇то́вы страда́льцы , без̾бо́жїѧ глꙋбинꙋ̀ и҆з̾сꙋши́сте , и҆ бжⷭ҇твеныхъ и҆стᲂче́нїи чꙋде́съ сщ҃е́нныхъ , стрⷭ҇те́мъ тече́нїѧ дш҃а́мъ же и҆ тѣ́лᲂмъ загража́ете . тѣ́мже дᲂстᲂдо́лжнѡ ᲂу҆бл҃жа́еми є҆стѐ . боⷢ҇ . Дивлѧ́шесѧ непᲂро́чнаѧ , на́ древѣ зрѧ́щи хрⷭ҇та̀ вᲂз̾дви́жена во́лею , и҆ пла́чꙋщи вᲂпїѧ́ше , сн҃е мо́й и҆ бж҃е , бᲂлѣ́зни в̾ ржⷭ҇твѣ̀ и҆з̾бѣ́гши , ны́нѣ же бᲂлѣ́зни стражꙋ̀ , непра́веднѡ ѿ без̾зако́нныхъ распина́емꙋ тѝ .

и҆́нъ , і҆рмо́съ . Прᲂсвѣще́й сїѧ́нїемъ . Пᲂто́цы мно́гихъ мᲂи́хъ прегрѣше́нїи приверго́шасѧ , и҆ хра́мъ дш҃и мᲂеѧ̀ низ̾лᲂжи́ша пречⷭ҇таѧ . но ꙗ҆́же и҆справле́нїе пра́ѻ҆ц҃емъ бцⷣе , вᲂста́ви мѧ раба̀ свᲂегѡ̀ . двⷤа . Въ тимѣ́нїи мѧ̀ страсте́й ᲂу҆глѣ́бнꙋвша ѡ҆каѧ́ннаго , и҆ бꙋ́рею мно́гихъ сᲂгрѣше́нїи пᲂтᲂплѧ́ема , рꙋ́кꙋ пᲂда́вши мѝ влⷣчце вᲂзведи́ мѧ , и҆ ко приста́нищꙋ пᲂкаѧ́нїѧ напра́ви . Дш҃е́вныхъ мᲂи́хъ скве́рнъ , ѡ҆чище́нїе да́рꙋй , и҆ плᲂтьски́хъ мѧ бᲂлѣ́зней и҆сцѣлѝ мᲂлю́сѧ . и҆ ѿ ѻ҆бдержа́щагѡ лю́тагѡ ᲂу҆ны́нїѧ , премѣнѝ мл҃твами сѝ .

пѣ́снь , ѕ҃ . і҆рмо́съ . Ве́сь ѿ стрⷭ҇те́й без̾мѣ́рныхъ сᲂдержи́мь є҆́смь , и҆ нало́жи ѕѡ́лъ низ̾лежꙋ̀ . но вᲂз̾ведѝ и҆з̾ и҆стлѣ́нїѧ хрⷭ҇тѐ , ꙗ҆́кᲂже дре́вле і҆ѡ́нꙋ . и҆ твᲂе́ю стра́стїю без̾стра́стїе мѝ да́рꙋй . ꙗ҆́кѡ да во́ гласѣ хвале́нїѧ , и҆́стиннымъ дх҃ᲂмъ пᲂжрꙋ́ ти . Є҆гда̀ мѡѷсе́й рꙋ́цѣ вᲂздѣ́въ на высᲂтꙋ̀ , твᲂѧ̀ стра́сти во ѡ҆бража́ше , прᲂсте́ршагѡ на́ древѣ дла́ни , и҆ лꙋка́вᲂмꙋ разрꙋши́вша держа́вꙋ па́гꙋбнꙋю . тѣ́мже и҆зба́вителѧ вѣ́дꙋще тѧ и҆ сп҃са , пᲂе́мъ чл҃кᲂлю́бче . Ме́ртвᲂсть претерпѣ́лъ є҆сѝ вᲂз̾двиза́емь на́ древо , и҆ ᲂу҆мертви́телѧ на́шегѡ ᲂу҆мᲂри́лъ є҆сѝ . и҆ ѡ҆живи́въ рꙋ́кꙋ твᲂе́ю хрⷭ҇тѐ сᲂзда́нїе . в̾ ре́бра же кᲂпїе́мъ прᲂбᲂда́емь , и҆стᲂчи́лъ є҆сѝ двѣ̀ рѣцѣ̀ ѡ҆ставле́нїѧ , во двᲂю̀ во́лю вᲂспѣва́емыи . мⷱ҇ꙋ . Честна̀ ва́ша сме́рть ст҃і́и пред̾ гдⷭ҇емъ нн҃ѣ бы́сть , пᲂче́тшемъ всѣ́хъ честны́ми свᲂи́ми страстьмѝ , и҆ без̾че́стнагѡ велїа́ра пᲂсрами́вшимъ , всѣ́ми прилᲂже́нїи мꙋ́къ низ̾лᲂжи́ти всѣ́хъ ва́съ ко́зньствꙋющаго . мⷱ҇ꙋ . Ѿ =всеѧ̀ дш҃и ко всѣ́мъ ѿлꙋчи́стесѧ мнᲂгᲂви́дны премꙋ́дрїи мꙋче́нїемъ , всю̀ ѡ҆брѣто́сте спᲂсо́бствꙋющꙋю ва́мъ по́мᲂщь и҆́же во всѐ челᲂвѣ́чество ѡ҆бо́лкшагᲂсѧ . тѣ́мже на ᲂу҆́ды с̾сѣка́еми , и҆ ѻ҆гню̀ приближа́ющесѧ веселѧ́стесѧ . =боⷢ҇ . Распѧ́тїе твᲂѐ зрѧ́щи пречⷭ҇таѧ вᲂпїѧ́ше , сн҃е что̀ зри́мᲂе стра́ннᲂе видѣ́нїе , и҆́же стрⷭ҇ти бᲂлѧ́щимъ и҆сцѣлѧ́ѧи . ка́кѡ стрⷭ҇ть хрⷭ҇тѐ терпи́ши во́лею . что́ ти вразѝ вᲂз̾да́ша бл҃гᲂда́телю , зане́же бл҃гᲂда́ть прїѧ́ша .

и҆́нъ , і҆рмоⷭ҇ . Ѡ҆бы́де на́съ . Рꙋкᲂписа́нїѧ пречⷭ҇таѧ прегрѣше́нїи мᲂи́хъ кᲂпїе́мъ расто́ргни , ро́ждьшагᲂсѧ и҆з̾ без̾сѣ́меннаго ти чре́ва . в̾ кни́зѣ мѧ написа́ти спᲂдо́би и҆збра́нныхъ , прибѣга́ющаго бжⷭ҇твенᲂмꙋ пᲂкро́вꙋ твᲂемꙋ̀ . вⷤ . Ѡ҆чи́сти хрⷭ҇тѐ рабы̀ свᲂѧ̀ мл҃твами ро́ждьшїѧ тѧ̀ , и҆ низ̾пᲂслѝ ꙗ҆́кѡ є҆ди́нъ бл҃гъ сᲂгрѣше́нїемъ прᲂще́нїе . ты́ бо є҆сѝ сп҃съ , и҆ и҆зба́витель всѣ́мъ надѣ́ющимсѧ на тѧ̀ . Оу҆мерщве́на мѧ стрⷭ҇тьмѝ пречⷭ҇таѧ дв҃о , ꙗ҆́же живᲂда́вца ро́ждьшаѧ , ѡ҆живѝ ны́нѣ твᲂи́ми мл҃твами , и҆ пᲂбѣди́телѧ ꙗ҆ви́ мѧ на врага̀ ѕла́гѡ . тѧ́ бо є҆ди́нꙋ и҆́мамы к̾ бг҃ꙋ пᲂмо́щницꙋ на́шꙋ .

пѣ́снь , з҃ . і҆рмо́съ . Прᲂидо́ша ꙗ҆́кѡ в̾ черто́зѣ , пе́щныи пла́мень непᲂстᲂѧ́нныи , и҆́же за бл҃гᲂче́стїе и҆нᲂгда̀ , ѻ҆́трᲂцы ст҃і́и пᲂказа́вшесѧ ꙗ҆́вѣ , и҆ сᲂгла́снѡ пᲂю́ще пѣ́снь , ѻ҆ц҃е́мъ бж҃е бл҃гᲂслᲂве́нъ є҆сѝ . Влⷣко сы́и ѿ раба̀ прїѧ́тъ ᲂу҆даре́нїе , свᲂбᲂди́ти мѧ хᲂтѧ̀ пᲂрабо́щенаго ѕлᲂдѣ́ю . на крⷭ҇тѣ́ же пригво́ждьсѧ сп҃се мо́й , ꙗ҆́кѡ да пᲂю́ща спасе́шимѧ , и҆́же ѻ҆ц҃е́мъ бж҃е бл҃гᲂслᲂве́нъ є҆сѝ . Пᲂтрѧсе́сѧ всѧ̀ тва́рь , распина́емꙋ ти бл҃гᲂꙋтро́бне гдⷭ҇и , и҆ кᲂпїе́мъ прᲂбᲂда́емꙋ ти , вра́гъ всетѣле́снꙋю прїѧ́тъ ꙗ҆́звꙋ . ᲂу҆ѧ́звеныи же а҆да́мъ и҆сцѣлѣ̀ вᲂпїѧ̀ , бл҃гᲂслᲂве́нъ бг҃ъ ѻ҆ц҃ъ на́шихъ . мⷱ҇ꙋ . Крⷭ҇то́мъ ѡ҆граже́но страстᲂте́рпецъ во́инство сла́внᲂе , ѡ҆пᲂлче́нїѧ вра́жїѧ пᲂгꙋбѝ бл҃гᲂда́тїю , и҆ пᲂбѣ́ды вѣнцы̀ прїѧ́тъ , вᲂпїѧ̀ , бл҃гᲂслᲂве́нъ бг҃ъ ѻ҆ц҃ъ на́шихъ . мⷱ҇ꙋ . Ѻ҆гнѧ̀ сильнѣ́йше стѧжа́вше страда́льцы прᲂи҆звᲂле́нїе , не ѡ҆па́льшесѧ ѻ҆гне́ви приближа́ющесѧ , но пᲂпали́сте ѕлᲂче́стїѧ лꙋка́вагѡ ве́щь , вᲂпїю́ще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . боⷢ҇ . Ржⷭ҇тво̀ твᲂѐ дв҃це пресла́внѡ вѣ́ки рᲂдѝ , и҆ вᲂз̾дви́женъ на крⷭ҇тъ , па́дшїѧсѧ сᲂвᲂздви́же , и҆ нбⷭ҇ныѧ жи́тели пᲂказа̀ вᲂпїю́щихъ , ѻ҆ц҃е́мъ бж҃е блгⷭ҇ве́нъ є҆сѝ .

и҆́нъ , і҆рмоⷭ҇ . Тебѐ мы́сленнꙋю . Ꙗ҆́кѡ и҆сто́чника жи́зни ро́ждьшаѧ , ᲂу҆ме́ршꙋю ми дш҃ꙋ живᲂно́снᲂю десни́цею пречⷭ҇таѧ вᲂскр҃сѝ , и҆ вᲂпи́ти спᲂдо́би во ᲂу҆миле́нїи срⷣца мᲂегѡ̀ , прехва́льныи ѻ҆ц҃е́мъ бж҃е бл҃гᲂслᲂве́нъ є҆сѝ . вⷤ . Но́въ а҆да́мъ ѿ чи́стыхъ крᲂве́й твᲂи́хъ . бы́ти и҆зво́лилъ є҆́сть , и҆́же пре́же вѣ́къ бг҃ъ . є҆го́же ны́нѣ мᲂлѝ , ѡ҆бетша́вшаго мѧ̀ ѡ҆бнᲂви́ти , зᲂвꙋ́ща , прехва́льныи ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Гнѣ́ва пꙋте́мъ вра́гъ прихᲂдѧ̀ , вᲂсхи́тити хᲂтѧ̀ неща́днѡ дш҃ꙋ мᲂю̀ смире́ннꙋю . сегѡ̀ сᲂвѣ́ты пречⷭ҇таѧ разрꙋшѝ , и҆ пᲂю́ща мѧ ᲂу҆ще́дри , вᲂсхвалѧ́емыи ѻ҆ц҃е́мъ бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Чꙋ́до па́че є҆стества̀ пᲂказа̀ ѻ҆́бразъ , ѻ҆гнеро́снаѧ пе́щь дре́вле , и҆́бо ѻ҆́гнь не ѡ҆палѝ ю҆́нᲂшы дѣ́ти , хрⷭ҇то́во сказꙋ́ѧ без̾сѣ́меннᲂе ѿ дв҃ы бжⷭ҇твеннᲂе ржⷭ҇тво̀ . тѣ́мже вᲂспѣва́юще пᲂе́мъ , да блгⷭ҇ви́тъ тва́рь всѧ́каѧ гдⷭ҇а , и҆ превᲂзно́ситъ є҆гѡ̀ во́ вѣки . Ра́спѧтъ бы́сть на крⷭ҇тѣ̀ во́лею , и҆́же ма́нїемъ не́бо прᲂстры́и . гвᲂздьми́ же пригвᲂзди́сѧ , ᲂу҆праздни́ти хᲂтѧ̀ пᲂпᲂлзе́нїе стра́ннᲂе , первᲂзда́ннагѡ а҆да́ма . сегѡ̀ ра́ди вᲂспѣва́юще пᲂе́мъ , да бл҃гᲂслᲂви́тъ тва́рь всѧ́каѧ гдⷭ҇а , и҆ превᲂзно́ситъ є҆гѡ̀ во́ вѣки . Є҆гда́ тѧ ка́менѧ на ка́мени , каменᲂсерде́чныи ли́къ вᲂздви́же , го́ры пᲂкᲂлѣба́шасѧ , землѧ̀ пᲂтрѧсе́сѧ сло́ве бж҃їи , и҆ дꙋ́ши кᲂле́блемыѧ ᲂу҆тверди́шасѧ къ бжⷭ҇твенѣй жи́зни . сегѡ̀ ра́ди вᲂспѣва́юще пᲂе́мъ , да бл҃гᲂслᲂви́тъ тва́рь всѧ́каѧ гдⷭ҇а , и҆ превᲂзно́ситъ є҆гѡ̀ во́ вѣки . мⷱ҇ꙋ . И҆стка́ша ѻ҆де́жꙋ спасе́ннꙋю себѣ̀ ꙗ҆́вѣ ст҃і́и , страстᲂте́рпцы , в̾ нагᲂтѣ̀ тѣле́съ стра́ждꙋще терпѣли́внѡ , и҆ пᲂсыпа́нїе ра́намъ прїе́млюще . и҆ нн҃ѣ вᲂспѣва́ютъ ра́дꙋющесѧ , да бл҃гᲂслᲂви́тъ тва́рь всѧ́каѧ гдⷭ҇а , и҆ превᲂзно́ситъ є҆гѡ̀ во́ вѣки . мⷱ҇ꙋ . Нᲂгᲂтьмѝ не ми́лᲂстивно , страстᲂте́рпцы стрꙋ́жеми , и҆ неща́дно на ᲂу҆́ды с̾сѣца́еми , и҆ ра́намъ всѧ́ческимъ причаща́ющесѧ , и҆ и҆стꙋка́ннымъ непᲂжро́ша , мꙋ́жества же стᲂлпѝ вѣ́рнымъ ꙗ҆ви́шасѧ . бл҃гᲂслᲂви́те хрⷭ҇та̀ дѣ́ла всѧ̀ зᲂвꙋ́ще , и҆ превᲂзнᲂси́те є҆гѡ̀ во́ вѣки . боⷢ҇ . Да тѧ̀ прᲂгнѣ́ваетъ безꙋ́мныхъ сᲂбо́ръ , ꙗ҆́кѡ мнѧ́ше ѿ землѝ взѧ́ти тѧ , без̾ча́дна бы́хъ и҆ смꙋща́юсѧ , и҆ ма́терьски срⷣцемъ бᲂлѣ́знꙋю , неи҆скꙋсᲂмꙋ́жнаѧ вᲂпїѧ́ше и҆нᲂгда̀ , на крⷭ҇тѣ̀ ви́дѧщи тѧ̀ вᲂздви́жена . с̾ не́ю же тва́рь сла́витъ тѧ̀ всѣ́хъ и҆зба́вителѧ і҆с҃е во́ вѣки .

и҆́нъ , і҆рмо́съ . Въ пещѝ дѣ́ти і҆и҃левы .= Прᲂсвѣти́ ми ѻ҆́чи срⷣчьнїи две́рь свѣ́та чⷭ҇таѧ , ѻ҆́блакъ страсте́й , и҆ тмꙋ̀ глꙋбо́кꙋю разгᲂнѧ́ющи , да пᲂю̀ , всѧ̀ дѣ́ла гдⷭ҇а по́йте , и҆ превᲂзнᲂси́те є҆гѡ̀ во́ вѣки . =двⷤа . Ѻ҆ всѣ́хъ влⷣчце чⷭ҇таѧ непреста́й мᲂлѧ́щисѧ , и҆́же тебѐ призыва́ющихъ ꙗ҆́кѡ мт҃рь бж҃їю , дв҃о всенепᲂро́чнаѧ , и҆ вᲂпїю́щихъ , бл҃гᲂслᲂви́те всѧ̀ дѣ́ла гдⷭ҇а , по́йте и҆ превᲂзнᲂси́те є҆гѡ̀ во́ вѣки . Спасе́нїѧ винꙋ̀ хрⷭ҇та̀ неи҆зрече́ннѡ ро́ждьшаѧ , мᲂлѝ ѡ҆ всѣ́хъ вᲂпїю́щихъ прилѣ́жнѡ дв҃о всепѣ́таѧ , бл҃гᲂслᲂви́те всѧ̀ дѣ́ла гдⷭ҇а , по́йте и҆ превᲂзнᲂси́те є҆гѡ̀ во́ вѣки . та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны .

пѣ́снь , ѳ҃ . і҆рмо́съ . Не и҆з̾глаго́ланна дв҃ыѧ та́йна , є҆го́же бо невмѣсти́ша гᲂрѣ̀ нбⷭ҇наѧ вели́чествїѧ , вмѣща́етсѧ вᲂꙋтро́бꙋ . тѣ́мже сᲂше́дшесѧ ᲂу҆бл҃жа́емъ ю҆̀ , и҆ вѣ́рᲂю и҆ весе́лїемъ велича́емъ . Ꙗ҆́кᲂже ви́дѣ тѧ дре́вле , на́ древѣ пᲂвѣ́шена сп҃се , и҆́же зе́млю пᲂвѣ́сившаго на вᲂда́хъ без̾мѣ́рныхъ , разбо́йникъ бл҃гᲂразꙋ́мныи , и҆ вѣ́рнѡ вᲂпїѧ́ше ти , пᲂмѧни́ мѧ . с̾ ни́мже бл҃гᲂче́стнѡ твᲂѧ̀ стра́сти прᲂславлѧ́емъ . Распина́емь пᲂкᲂлѣба́лъ є҆сѝ землѝ ѡ҆снᲂва́нїѧ . кᲂпїе́мъ же прᲂбᲂда́емь , и҆стᲂча́еши без̾сме́ртныѧ ка́пли , кро́вь и҆ во́дꙋ . и҆́миже чл҃чество ѡ҆чи́стилъ є҆сѝ ѿ страсте́й і҆с҃е . тѣ́мже тѧ вᲂспѣва́юще велича́емъ . мⷱ҇ꙋ . Веселѧ́хꙋсѧ въ мꙋче́нїихъ ст҃і́и , са́ми себѐ пᲂѡ҆щрѧ́юще , ꙗ҆́кᲂже на пи́щꙋ до́блїи , ста́немъ вᲂпїю́ще , се́бо ѿве́рзе пᲂдвиза́нїе хрⷭ҇то́съ . вѣнцы̀ ны́нѣ пᲂдае́тъ тѣ́мъ , и҆́хже вᲂзлюбѝ . мⷱ҇ꙋ . Прᲂсвѣща́етсѧ всѣ́хъ вѣ́рныхъ є҆ди́нственᲂе тᲂржество̀ . страда́нїѧ пᲂчита́юще , всѣ́хъ непᲂбѣди́мыхъ мч҃нкъ , тмы̀ бᲂлѣ́зней . и҆́хже ра́ди небᲂлѣ́зненѣй спᲂдо́бишасѧ жи́зни , и҆ пи́щи , и҆ приснᲂсꙋ́щнᲂмꙋ наслажде́нїю . боⷢ҇ . Чл҃кᲂлю́бца сло́ва неи҆зрече́ннѡ пᲂрᲂдѝ . є҆го́же зрѧ́щи ѻ҆трᲂкᲂви́ца во́лею стра́жꙋща , вᲂпїѧ́ше , что́ се ; бг҃ъ без̾стрⷭ҇тенъ стрⷭ҇ть прїе́млетъ , ꙗ҆́кѡ да ѿ стрⷭ҇те́й и҆зба́витъ , и҆́же вѣ́рᲂю пᲂклᲂнѧ́ющихсѧ є҆мꙋ̀ .

и҆́нъ , і҆рмо́с̾ . Ѻ҆́бразъ чи́стаго .= Вᲂзмѝ тѧ́жкᲂе бре́мѧ мᲂи́хъ сᲂгрѣше́нїи , бцⷣе всепѣ́таѧ . и҆ легча́йшеє и҆́го сн҃а и҆ бг҃а твᲂегѡ̀ , спᲂдо́би мѧ нᲂси́ти . и҆ по стезѝ ше́ствᲂвати , и҆́же к̾ го́рнемꙋ сᲂверше́нїю вᲂз̾вᲂдѧ́щїи . =вⷤ . Трепе́щꙋ пᲂмышлѧ́ѧ всенепᲂро́чнаѧ , стра́шныи де́нь прише́ствїѧ хрⷭ҇то́ва . всѧ́ бо жи́знь мᲂѧ̀ во грѣсѣ́хъ скᲂнча́сѧ , и҆ страсте́й дш҃а мᲂѧ̀ и҆спо́лнисѧ . но ᲂу҆ще́дри мѧ , и҆ всѧ́кᲂгѡ и҆зба́ви тᲂгда̀ ѡ҆сꙋже́нїѧ . Прїимѝ пречⷭ҇таѧ влⷣчце , непᲂтре́бнаго раба̀ твᲂегѡ̀ мᲂле́нїѧ , и҆ дꙋшѝ мᲂеѧ̀ и҆ тѣ́ла смꙋще́нїе , в̾ глꙋбо́кꙋю ти́шинꙋ прелᲂжѝ . ꙗ҆́кѡ да тѧ̀ велича́ю спаса́емь .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стⷯры , крⷭ҇тны . гла́съ , а҃ . Тебѐ и҆́же на́ древѣ пригво́ждьшагᲂсѧ пло́тїю , и҆ живо́тъ на́мъ пᲂда́вшагѡ , ꙗ҆́кѡ сп҃са и҆ влⷣкꙋ пᲂе́мъ непреста́ннѡ .

сти́хъ : и҆спо́лнихᲂмсѧ за ᲂу҆́тра . Твᲂи́мъ крⷭ҇то́мъ хрⷭ҇тѐ , є҆ди́но ста́до бы́сть а҆́нг҃лѡмъ и҆ чл҃кѡмъ . и҆ во є҆ди́нᲂмъ сᲂбо́рѣ нб҃о и҆ землѧ̀ весели́тсѧ вᲂпїѧ̀ , гдⷭ҇и сла́ва тебѣ̀ .

сти́хъ : и҆ бꙋ́ди свѣ́тлᲂсть гдⷭ҇а бг҃а . мⷱ҇ꙋ . Ва́съ всехва́льнїи мч҃нцы , ни ско́рбь ни тѣснᲂта̀ , ни гла́дъ ни гᲂне́нїе , нижѐ ра́ны , ни ꙗ҆́рᲂсть ѕвѣре́й , ни ме́чь , нижѐ ѻ҆́гнь претѧ́и , разлꙋчи́ти ѿ́ бг҃а вᲂз̾мᲂго́ша . любо́вїю же па́че к̾ немꙋ̀ , ꙗ҆́кѡ в̾ чꙋжи́хъ пᲂдви́гшесѧ тѣлесѣ́хъ , є҆стество̀ забы́вше , и҆ сме́рть презрѣ́сте . тѣ́мже и҆ по дᲂстᲂѧ́нїю бᲂлѣ́зней ва́шихъ мздꙋ̀ прїѧ́сте , и҆ нбⷭ҇нагѡ црⷭ҇твїѧ наслѣ́дницы бы́сте , мᲂли́тесѧ ѡ҆ дш҃а́хъ на́шихъ . сла́ва , и҆ ны́нѣ , крⷭ҇тᲂбоⷢ҇ . Оу҆ крⷭ҇та̀ твᲂегѡ̀ пред̾стᲂѧ́щи сло́ве бж҃їи , а҆́гница и҆ непᲂро́чнаѧ мт҃и твᲂѧ̀ , рыда́ющи вᲂпїѧ́ше , ᲂу҆вы̀ мнѣ̀ сн҃е , ка́кѡ ᲂу҆мира́еши на крⷭ҇тѣ̀ . ᲂу҆вы̀ мнѣ̀ свѣ́те мо́й сла́дкїи , гдѣ̀ твᲂеѧ̀ дᲂбро́ты нн҃ѣ за́йде зра́къ , краснѣ́йшїи па́че всѣ́хъ чл҃къ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= сла́ва , и҆ ны́нѣ , крⷭ҇тᲂбоⷢ҇ . во́гласъ трᲂпарѧ̀ . пᲂсе́мъ , є҆ктенїѧ̀ . =и҆ =ча́съ , а҃ . =и҆ ѿпꙋ́стъ .

Въ сре́дꙋ , бл҃же́нны . гла́съ , а҃ .

Снѣ́ди ра́ди и҆зведѐ и҆з̾раѧ̀ вра́гъ а҆да́ма , крⷭ҇та́ же ра́ди разбо́йника в̾ведѐ хрⷭ҇то́съ во́нь , пᲂмѧни́ мѧ вᲂпїю́ща , є҆гда̀ прїи́деши во црⷭ҇твїи сѝ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Пᲂно́снꙋю претерпѣ́лъ є҆сѝ стрⷭ҇ть хрⷭ҇тѐ , и҆ пᲂнᲂше́нїе на́ше всѧ́кᲂе ѿѧ́лъ є҆сѝ бл҃же , и҆ вы́шнѧгѡ црⷭ҇твїѧ прича́стники на́съ ꙗ҆ви́лъ є҆сѝ , пᲂклᲂнѧ́ющихсѧ твᲂемꙋ̀ сᲂше́ствїю .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . А҆да́мᲂво хрⷭ҇тѐ ѡ҆бнаже́нїе , ты̀ пᲂкрыва́ѧ ѡ҆бнажи́всѧ пло́тїю . вᲂзне́сжесѧ на крⷭ҇тъ , вᲂзне́слъ є҆сѝ на́съ ѿ глꙋбины̀ ѕлы́хъ . тѣ́мже , твᲂѐ сло́ве сла́вимъ ст҃о́е схᲂжде́нїе .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Ст҃ы́ми ва́шими стрꙋ́пы , прехва́льнїи мч҃нцы , мно́жество бѣсо́въ ѡ҆стрꙋпи́вше . всѧ̀ чл҃ческаѧ ꙗ҆́звы и҆ стрꙋ́пы , бл҃гᲂда́тїю всегда̀ вᲂи́стинꙋ и҆сцѣлѧ́ете .

сла́ва . Трⷪ҇ца прᲂсвѣща́етъ всѣ́хъ , и҆́же чи́стѣ чтꙋ́щихъ тꙋ̀ и҆ вѣ́дѧщихъ є҆ѧ̀ , держа́вꙋ и҆мꙋ́щꙋ неразᲂри́мꙋю . є҆́йже вᲂзᲂпїе́мъ , спасѝ и҆́же любо́вїю трⷪ҇це пᲂю́щихъ тѧ̀ .

и҆ ны́нѣ . Пред̾стᲂѧ́щи всенепᲂро́чнаѧ при крⷭ҇тѣ̀ , и҆ зрѧ́щи хрⷭ҇та̀ пригвᲂжде́нна пло́тїю , вᲂсклица́ющи вᲂпїѧ́ше , гдѣ̀ твᲂѧ̀ за́йде милᲂсе́рде ны́нѣ дᲂбро́та сла́вѣ гдⷭ҇и .