Въ недѣ́лю , ве́черъ . на́ гдⷭ҇и вᲂзва́хъ , стⷯры , пᲂкаѧ́нны . гла́съ , в҃ . поⷣ . є҆гда̀ ѿ́ древа тѧ . запѣ́въ : ꙗ҆́кѡ ѿ тебѐ ѡ҆чище́нїе є҆́сть . И҆мѣ́ѧи бл҃гᲂꙋтро́бїѧ и҆сто́чникъ , и҆стᲂча́ѧ же бе́здны млⷭ҇тей , и҆ пᲂто́ки щедро́тамъ , ѻ҆́ч҃е пребл҃гі́и , и҆ сн҃е сло́во ѻ҆́ч҃еє , и҆ д́ш҃е ст҃ы́и , несᲂзда́ннᲂе є҆стество̀ , прїимѝ мᲂле́нїе и҆ мл҃твꙋ на́шꙋ , всѣ́мъ и҆́же в̾ прегрѣше́нїихъ сꙋ́щимъ пᲂдаѧ̀ прᲂще́нїе . ꙗ҆́кѡ бг҃ъ ще́дръ и҆ чл҃кᲂлю́бецъ .

ᲂу҆пᲂва̀ дш҃а мᲂѧ̀ на́ гдⷭ҇а . И҆́маши по є҆стествꙋ̀ ꙗ҆́кѡ бг҃ъ , ᲂу҆тро́бꙋ щедро́тъ , и҆ ми́лᲂсти и҆ бл҃гᲂсты́ни . тѣ́мже мо́лимъ тѧ хрⷭ҇тѐ сп҃се на́шъ , и҆ припа́дающе зᲂве́мъ , при́снѡ ти вᲂпїю́ще , да́рꙋй рабѡ́мъ свᲂи́мъ , прегрѣше́нїемъ мно́гимъ разрѣше́нїе , и҆ прᲂще́нїе всѣ́мъ , и҆́хже сᲂгрѣши́хᲂмъ всѝ , ꙗ҆́кѡ бг҃ъ ще́дръ и҆ чл҃кᲂлю́бецъ .

да ᲂу҆пᲂва́етъ і҆и҃ль на́ гдⷭ҇а . Спастѝ хᲂтѧ̀ сп҃се всѣ́хъ ꙗ҆́кѡ бг҃ъ , и҆́хже ра́ди вᲂчелᲂвѣ́чивсѧ , и҆ ꙗ҆ви́лсѧ є҆сѝ чл҃къ , спасѝ на́съ пᲂклᲂнѧ́ющихсѧ , твᲂи́мъ за́пᲂвѣдемъ . неприше́лъ бо є҆сѝ чл҃кᲂлю́бче , пра́ведники спастѝ , но и҆́же в̾ сᲂгрѣше́нїихъ ѡ҆кᲂва́нныхъ на́съ , мно́гими грѣхѝ разрѣши́ти , бл҃гᲂда́тїю креще́нїѧ бжⷭ҇твенагѡ , ꙗ҆́кѡ бг҃ъ ще́дръ и҆ чл҃кᲂлю́бецъ .

та́же , в̾ минѣ́и , стⷯры , ст҃о́мꙋ , а҆́ще и҆́мать . а҆́ще нѣ́сть минѣ́и . и҆́ны , стихѣ́ры , беспло́тнымъ . гла́съ , и҆ пᲂдо́бенъ , то́йже . =запѣ́въ : ѿ всѣ́хъ без̾зако́нїи є҆гѡ̀ . П=ресто́ли , херꙋви́ми , и҆ серафи́ми , гдⷭ҇ьствїѧ же и҆ си́лы , и҆ вла́сти честны́ѧ , а҆́нг҃ли , а҆рха́нг҃ли , и҆ нача́ла с̾ ни́ми , и҆́же тѣ́хъ нетлѣ́ннᲂе є҆стество̀ сᲂста́вльшемꙋ , пѣ́снь непреста́ннꙋю сᲂгла́снѡ пᲂю́тъ , є҆ди́но в̾ трⷪ҇цѣ сꙋщество̀ , всѧ̀ наꙋча́юще честѝ , сра́сленѡ є҆динᲂче́стно и҆ сᲂпресто́льно .

пᲂхвали́те є҆гѡ̀ всѝ лю́дїє . Пе́рвїи не веще́ственыхъ ли́цы , бг҃ᲂнача́льствїѧ зарѝ , не хᲂда́тайствеными сїѧ́ньми пᲂдъє́млюще , по́ чинꙋ и҆́хъ про́чимъ препᲂдава́ютъ , бжⷭ҇твеныѧ свѣ́тло́сти , и҆ прино́сѧтъ на́мъ си́хъ любо́внымъ зако́нᲂмъ , по дᲂстᲂѧ́нїю та́кᲂжде , къ серде́чнѣй кᲂмꙋ́ждо чистᲂтѣ̀ съ прилѣжа́нїемъ .

и҆ и҆́стина гдⷭ҇нѧ пребыва́етъ во́ вѣки . Гᲂрѣ̀ к̾ высᲂтѣ̀ дш҃и , гᲂрѣ̀ серде́чнᲂе ѻ҆́ко . и҆ ᲂу҆́мнаѧ стремле́нїѧ , любо́вїю бжⷭ҇твенᲂю и҆мꙋ́ще , в̾ дш҃а́хъ свᲂи́хъ прᲂстира́емъ всегда̀ . ꙗ҆́кѡ да и҆́же ѿ тꙋ́дꙋ лꙋча́ми ѡ҆блиста́еми , ᲂу҆бѣ́гнемъ тмы̀ стрⷭ҇те́й . ча́юще со а҆́нг҃лы пред̾ста́ти стра́шнᲂмꙋ прⷭ҇то́лꙋ зижди́телѧ , и҆ преѡ҆брази́тисѧ ѿ́ свѣта в̾ свѣ́тъ .

сла́ва , и҆ ны́нѣ , боⷢ҇ . Мно́жество а҆́нг҃лъ , сн҃а твᲂегѡ̀ пречⷭ҇таѧ вᲂспѣва́ютъ , трист҃ы́ми гла́сы , ꙗ҆́кѡ прⷭ҇то́лъ тѧ тᲂмꙋ̀ сꙋ́щꙋ ѻ҆гнезра́ченъ , и҆ пᲂла́тꙋ ѡ҆ дш҃евле́нꙋю , мо́стъ бжⷭ҇твеныи , и҆́же ѿ землѝ превᲂдѧ́щи всегда̀ к̾ немꙋ̀ . ра́дꙋисѧ ѡ҆бра́дᲂваннаѧ . вᲂпїю́ще ти сᲂгла́снѡ , со а҆рха́нг҃лᲂмъ гаврїи́лᲂмъ , ꙗ҆́кѡ ро́ждьшей и҆сто́чника ра́дᲂсти .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стⷯры , пᲂкаѧ́нны . гла́съ , в҃ . Сᲂгрѣши́хъ ти хрⷭ҇тѐ сп҃се , ꙗ҆́кѡ блꙋ́дныи сн҃ъ , прїими́ мѧ ѻ҆́ч҃е ка́ющасѧ , и҆ пᲂми́лꙋй мѧ бж҃е .

сти́хъ : к̾ тебѣ̀ вᲂзведо́хъ ѻ҆́чи мᲂѝ . Вᲂпїю́ ти хрⷭ҇тѐ сп҃се , мытаре́вымъ гла́сᲂмъ , ѡ҆чи́сти мѧ ꙗ҆́кᲂже ѻ҆́нᲂго , и҆ пᲂми́лꙋй мѧ бж҃е .

сти́хъ : пᲂми́лꙋй на́съ гдⷭ҇и . мⷱ҇ꙋ . И҆́же земны́ѧ сла́дᲂсти невᲂз̾лю́бльше страстᲂте́рпцы , небе́снымъ бл҃ги́мъ спᲂдо́бишасѧ , и҆ а҆́нг҃лѡмъ сᲂгра́ждане бы́ша , гдⷭ҇и мл҃твами и҆́хъ пᲂми́лꙋй и҆ спасѝ на́съ .

сла́ва , и҆ нн҃ѣ , боⷢ҇ . Ра́дꙋисѧ мр҃і́е бцⷣе , цр҃кви не ѡ҆бᲂри́маѧ , па́че же ст҃а́ѧ , ꙗ҆́кᲂже вᲂпїе́тъ прᲂро́къ , ст҃а̀ цр҃кви твᲂѧ̀ , ди́вна в̾ пра́вдꙋ .

та́же , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ . во́ гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Въ нлⷣю , на па́вечерницѣ . кано́нъ , прест҃ѣ́й бцⷣѣ . гла́съ , в҃ . пѣ́снь , а҃ . і҆рмо́съ . Во глꙋбинѣ̀ пᲂтᲂпѝ дре́вле , фараѡни́тскаѧ всѧ̀ во́инства , преѡ҆рꙋже́нꙋ си́лꙋ . вᲂпло́щшеєсѧ сло́во , преспѣ́ющїѧ грѣхѝ пᲂтреби́ло є҆́сть , пресла́вныи гдⷭ҇ь , ꙗ҆́кѡ прᲂсла́висѧ .

запѣ́въ : прест҃а́ѧ гжⷭ҇е бцⷣе спасѝ на́съ . Вᲂѡбра́жьсѧ и҆з̾ тебѐ по на́съ , сл҃нце невече́рнеє , тѧ̀ слᲂве́сно нб҃о и҆ свѣтлѣ́йше , ꙗ҆́вственѣ пᲂказа̀ . тѣ́мже мѧ и҆зба́ви стрⷭ҇тнагѡ смра́да , ꙗ҆́кѡ да вᲂспᲂю̀ любо́вїю , тѧ̀ є҆ди́нꙋ мт҃рь дв҃ꙋ . Клещꙋ̀ и҆́же мы́сленыи ᲂу҆́гль нᲂси́вшꙋ , и҆ чл҃ческᲂе є҆стество̀ ѡ҆чи́стившꙋю мᲂлю́ тѧ влⷣчце , мно́гихъ ми прегрѣше́нїи скве́рнꙋ ѡ҆мы́й , и҆ сквернѧ́ющихъ страсте́й , и҆зба́ви мѧ мл҃твами сѝ . сла́ва . И҆́же и҆сто́чникъ ми́лᲂсти хрⷭ҇та̀ , пречⷭ҇таѧ ро́ждьши , и҆ є҆де́мъ чл҃кѡмъ ѿве́рзши , две́ри ѿве́рзи ми , ми́лᲂсти твᲂеѧ̀ бцⷣе . и҆ да́рꙋй сᲂгрѣше́нїи прᲂще́нїе , влⷣчце ми́рꙋ . и҆ ны́нѣ . Мᲂи́хъ прегрѣше́нїи плѣни́цы расто́ргни влⷣчце , свᲂегѡ̀ сн҃а и҆ бг҃а мᲂлѧ́щи , и҆ тᲂмѧ́щїи мѧ грѣ́хъ низ̾лᲂжѝ прⷭ҇нѡ дв҃о , ꙗ҆́кѡ да вᲂспᲂю́ тѧ всегда̀ пренепᲂро́чнаѧ спаса́емъ .

пѣ́снь , г҃ . і҆рмо́съ . На ка́мени мѧ вѣ́ры ᲂу҆твердѝ , раз̾ширѝ ᲂу҆ста̀ мᲂѧ̀ на врагѝ мᲂѧ̀ . вᲂз̾весели́бᲂсѧ дх҃ъ мо́й вᲂспѣва́ти , нѣ́сть ст҃а ꙗ҆́кᲂже бг҃ъ на́шъ , и҆ нѣ́сть пра́ведна па́че тебѐ гдⷭ҇и . Мглꙋ̀ стрⷭ҇те́й мᲂи́хъ и҆ ѡ҆мраче́нїе ѿженѝ , зарѧ́ми мᲂли́твъ твᲂи́хъ , и҆ прᲂсвѣти́ мѧ пречⷭ҇таѧ влⷣчце , ро́ждьшаѧ вᲂсїѧ́вшаго пре́жде денни́цы хрⷭ҇та̀ , ѿ сл҃нца сл҃нце незахᲂди́мᲂе . Вᲂзста́вила є҆сѝ пречⷭ҇таѧ твᲂи́мъ ржⷭ҇тво́мъ , ски́нїю па́дшꙋю и҆ сᲂкрꙋше́нꙋю , дв҃да твᲂегѡ̀ пра́ѻ҆ц҃а . тѣ́мже вᲂзста́ви бцⷣе и҆ менѐ раба̀ твᲂегѡ̀ , сᲂкрꙋше́наго стрⷭ҇тьмѝ и҆ прегрѣше́нїи . сла́ва . Прᲂгᲂнѧ́ющеє ѻ҆рꙋ́жїе , грѣхѝ и҆ стра́сти дш҃и мᲂеѧ̀ , бꙋ́ди дв҃о , и҆ пᲂкажи́ мѧ ꙗ҆́кᲂже дрꙋгі́и ра́й , без̾навѣ́тенъ и҆ сᲂблюде́нъ тᲂбо́ю , и҆ принᲂсѧ́щъ цвѣ́ты дх҃а . и҆ ны́нѣ . Прᲂсте́рши рꙋ́кꙋ бл҃гᲂꙋтро́бїѧ , рꙋко́ю прїими́ мѧ бг҃ᲂрᲂди́тельнице , и҆ всѧ́кᲂгѡ и҆схи́ти ѡ҆сꙋже́нїѧ , к̾ тебѣ̀ прибѣга́ющаго , и҆ тебѣ̀ припа́дающа , и҆ призыва́ющаго твᲂю̀ по́мᲂщь .

пѣ́снь , д҃ . і҆рмо́съ . Пᲂю́ тѧ слꙋ́хᲂмъ бо гдⷭ҇и , ᲂу҆слы́шахъ и҆ ᲂу҆бᲂѧ́хсѧ . до мене́ бо прїи́де , менѐ и҆ща̀ заблꙋ́ждьшаго . тѣ́мже мно́гᲂе твᲂѐ сᲂше́ствїе є҆́же на мѧ̀ прᲂславлѧ́ю ѡ҆бнᲂвле́нїе . Ква́съ чл҃ческагѡ є҆стества̀ , нескве́рныи ст҃ы́и . ѿ него́же прїе́мъ тѣ́сто , сᲂзда̀ є҆гѡ̀ зижди́тель , и҆ мнѣ̀ страсте́й скве́рнꙋ ѡ҆мы́й , и҆ ка́лъ прегрѣше́нїй мᲂи́хъ ѡ҆чи́сти . Лѣчбо́ю мл҃твъ ти влⷣчце , и҆ пла́стыремъ и҆ ма́слᲂмъ , дш҃и мᲂеѧ̀ стрꙋ́пы , и҆ ꙗ҆́звы грѣхо́вныѧ ны́нѣ и҆сцѣлѝ чⷭ҇таѧ . ꙗ҆́кѡ ро́ждьши , бг҃ᲂнача́льнꙋю цѣльбꙋ̀ є҆стества̀ . сла́ва . Плѣни́цꙋ страсте́й мᲂи́хъ разрꙋшѝ влⷣчце , и҆ вери́ги грѣхѡ́въ мᲂи́хъ расто́ргни , ѻ҆рꙋ́жїемъ мл҃твъ твᲂи́хъ , хрⷭ҇та̀ ро́ждьшаѧ , пᲂдаю́щагѡ и҆збавле́нїе свѧ́заннымъ во а҆́дѣ . и҆ ны́нѣ . Стра́сти дш҃и мᲂеѧ̀ и҆сцѣлѝ , ѡ҆мрачи́вшїѧ мѧ преѡ҆каѧ́ннѣ , по́мыслъ прᲂсвѣтѝ , дале́че ѿгᲂнѧ́щи чⷭ҇таѧ , тмы̀ бѣсо́въ , ѡ҆скᲂрблѧ́ющихъ мѧ , и҆ по всѧ̀ днѝ сѣ́ти прᲂстира́ющихъ мнѣ̀ .

пѣ́снь , є҃ . і҆рмо́съ . Прᲂсвѣще́нїе во тмѣ̀ лежа́щимъ , и҆ спасе́нїе ненача́емымъ хрⷭ҇тѐ сп҃се мо́й , ктебѣ̀ ᲂу҆́треннюю цр҃ю ми́рныи , прᲂсвѣти́ мѧ сїѧ́нїемъ си , и҆но́гѡ бо ра́звѣ тебѐ бг҃а незна́емъ . Ѿ клѧ́твы дре́внїѧ , ми́ръ ꙗ҆́кѡ и҆зба́ви , влⷣчце ми́рꙋ , бл҃гᲂслᲂве́нїе хрⷭ҇та̀ ро́ждьшаѧ , пᲂмышле́нїи без̾мѣ́стныхъ и҆зба́ви мѧ̀ , и҆ всѧ́кїѧ печа́ли . є҆ди́на бо є҆сѝ вѣ́рнымъ ра́дᲂванїе . Ѡ҆крꙋжа́етъ дш҃и мᲂеѧ̀ гра́дъ , бѣсо́вскїи по́лкъ , и҆ расплѣни́ти ѕѣлѡ̀ пᲂкꙋша́етсѧ . пресла́внаѧ влⷣчце гра́де всѣ́хъ цр҃ѧ , ѡ҆гради́ мѧ стᲂлпны́ми стѣна́ми , твᲂи́ми мл҃твами и҆ спасѝ . сла́ва . Бꙋ́рѧ люта̀ раз̾враще́нїѧ , дꙋхѡ́въ лꙋка́вствїѧ , мᲂю̀ мы́сль смꙋща́етъ . пред̾варѝ ско́рѡ , и҆ ᲂу҆ти́ши сїю̀ , ро́ждьшаѧ всѧ́кїѧ тва́ри , є҆ди́нагѡ ко́рмника хрⷭ҇та̀ всеси́льнаго . и҆ ны́нѣ . Вᲂсїѧ́й ми свѣ́тъ пᲂкаѧ́нїѧ бг҃ᲂрᲂди́тельнице , во тмѣ̀ пᲂги́бельнѣй затвᲂре́нᲂмꙋ . да́рꙋй рꙋ́кꙋ по́мᲂщи лежа́щемꙋ , и҆ твᲂи́ми мл҃твами вᲂз̾дви́гни мѧ чи́стаѧ , твᲂри́ти бж҃їѧ ѡ҆правда́нїѧ .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , неи҆зслѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Ꙗ҆́кѡ жи́знь вѣ́чнꙋю ро́ждьши пречⷭ҇таѧ , и҆́же ѿ́ тѣла дш҃и мᲂе́й и҆схᲂдѧ́щꙋю сме́рть , твᲂи́ми мл҃твами ᲂу҆мертвѝ . Лᲂви́тъ и҆скꙋша́ѧ мѧ , ѕмі́й чл҃кᲂненави́стныи . но ꙗ҆́кѡ ро́ждьшаѧ и҆́же главы̀ сᲂкрꙋ́шшагѡ ѕмїе́мъ , и҆ сегѡ̀ ᲂу҆празднѝ влⷣчце . сла́ва . Стрᲂпо́тныѧ стезѝ ше́ствᲂвавшаго , к̾ пра́вѣй стезѝ наста́ви , ꙗ҆́же пꙋ́ть жи́зни ро́ждьшаѧ хрⷭ҇та̀ бг҃а на́шегѡ . и҆ ны́нѣ . Дш҃и мᲂеѧ̀ стра́сти и҆сцѣлѝ , и҆ печа́ли недᲂꙋмѣ́нїе пᲂбѣдѝ , ꙗ҆́же бг҃а ро́ждьшаѧ , на спасе́нїе чл҃кѡмъ пречⷭ҇таѧ .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , в҃ . Млрⷭ҇дїѧ сꙋ́щи и҆сто́чникъ , млⷭ҇ти спᲂдо́би на́съ бцⷣе , при́зри на́ люди сᲂгрѣ́шшїѧ , ꙗ҆вѝ ꙗ҆́кѡ при́снѡ си́лꙋ твᲂю̀ , на тѧ́ бо ᲂу҆пᲂва́юще ра́дꙋисѧ , вᲂпїе́мъ ти , ꙗ҆́кᲂже и҆нᲂгда̀ гаврїи́лъ беспло́тнымъ а҆рхистрати́гъ .

пѣ́снь , з҃ . і҆рмо́съ . Тѣ́лꙋ злато́мꙋ премꙋ́дрыѧ дѣ́ти непᲂслꙋжи́ша , и҆ в̾ пла́мень са́ми пᲂидо́ша , и҆ бо́ги и҆́хъ ѡ҆брꙋга́ша . средѝ пла́мене вᲂзᲂпи́ша , и҆ ѡ҆брᲂсѝ и҆́хъ а҆́нг҃лъ , ᲂу҆слы́шасѧ ᲂу҆́же ᲂу҆́стъ ва́шихъ мл҃тва . Смꙋща́етъ ми ᲂу҆́мъ , и҆ кᲂле́блетъ дш҃ꙋ вᲂлна̀ стрⷭ҇те́й . но ро́ждьшаѧ и҆́же мо́ре вᲂлнꙋ́ющеєсѧ , пᲂвелѣ́нїемъ бжⷭ҇твенымъ ѡ҆бꙋздᲂва́ющагѡ дв҃о , к̾ тишинѣ̀ прелᲂжѝ без̾стра́стїѧ , и҆ плᲂтьско́е ᲂу҆ста́ви смꙋще́нїе . Тѧ̀ две́рь вѣ́дыи мы́сленагѡ вᲂсто́ка , с̾ нб҃сѐ ꙗ҆́вльшасѧ , вни́ти в̾ нб҃са̀ тᲂбо́ю дв҃о , ра́бъ тво́й мᲂлю́сѧ . тѣ́мже прїими́ мѧ влⷣчце , и҆ свѣ́тᲂмъ наста́ви . сла́ва . На крⷭ҇тѣ̀ хрⷭ҇то́съ , сн҃ъ тво́й прᲂпе́нсѧ во́лею , нача́ла тмѣ̀ пᲂсрамѝ , и҆ сме́ртнꙋю разрꙋшѝ тлетво́рнꙋю си́лꙋ . и҆́мже влⷣчце пречⷭ҇таѧ , страстно́е мᲂѐ пло́ти мꙋдрᲂва́нїе ᲂу҆мертвѝ . и҆ нн҃ѣ . Непреста́й чⷭ҇таѧ мᲂлѧ́щи , и҆́же ѿ тебѐ ро́ждьшагᲂсѧ бг҃а , ѡ҆ и҆́же вѣ́рᲂю притѣка́ющихъ к̾ тебѣ̀ , и҆ прᲂсѧ́щихъ и҆збавле́нїѧ , є҆ди́на застꙋ́пнице ми́рꙋ , ѿча́ѧннымъ застꙋпле́нїе , ѡ҆бꙋрева́емымъ в̾ лю́тыхъ прⷭ҇нѡ по́мᲂщь .

пѣ́снь , и҃ . і҆рмо́съ . Ѡ҆ =пᲂдо́бїи зла́тѣ , небрего́ша пресла́внїи ѻ҆́трᲂцы , неи҆змѣ́нныи живы́и бж҃їи ѻ҆́бразъ ви́дѣвше , средѝ пла́мени пᲂѧ́хꙋ , ѡ҆сꙋ́щественнаѧ по́й гдⷭ҇а всѧ̀ тва́рь , и҆ превᲂзнᲂша́й є҆гѡ̀ во́ вѣки . Бг҃ᲂдѣ́ланнаѧ ски́нїе , сꙋ́щаѧ ст҃а́гѡ ст҃ы́хъ , пᲂказа́вши дре́внїѧ ски́нїи ѻ҆́бразъ , а҆рхїєре́ѧ вели́ка внꙋ́трь и҆мꙋ́щи , мᲂѐ срⷣце дв҃о ꙗ҆вѝ вы́шнѧго , всѣ́хъ цр҃ю хрⷭ҇тꙋ̀ ски́нїю ст҃ꙋ . Бжⷭ҇твеныи кᲂвче́гъ , нᲂси́вши скрижа́ли завѣ́та , неѡ҆пи́саннагѡ сн҃а твᲂегѡ̀ хрⷭ҇та̀ дв҃о , сло́во бж҃їе пречⷭ҇тᲂе , семꙋ̀ написа́тисѧ ꙗ҆́кᲂже надсцѣ̀ дш҃и мᲂеѧ̀ сᲂтвᲂрѝ , пе́рстᲂмъ бж҃їимъ твᲂи́ми мл҃твами . =сла́ва . Оу҆сѣче́сѧ ѿ твᲂи́хъ лᲂже́снъ , пренепᲂро́чнаѧ влⷣчце , ꙗ҆́кѡ ѿ гᲂры̀ честны́и ка́мень . и҆ стᲂлпы̀ всѧ́кїѧ пре́лести , ꙗ҆́кѡ вседержи́тель є҆ди́нъ всеси́льныи сᲂкрꙋшѝ . и҆́мже ны́нѣ ѻ҆́бразы страсте́мъ пᲂтребѝ , дш҃и мᲂеѧ̀ , мы́сленыхъ вра́гъ , сᲂкрꙋши́вши че́люсти . и҆ ны́нѣ . Вᲂда́ми живо́тными , и҆з̾со́хшеє ми срⷣце грѣхо́внымъ пла́менемъ , ты̀ напо́й дв҃о бцⷣе , во ᲂу҆миле́нїи всегда̀ сᲂблюда́ющи мѧ , стра́хᲂмъ пᲂю́ща . да пᲂе́тъ гдⷭ҇а всѧ̀ тва́рь , и҆ превᲂзно́ситъ є҆гѡ̀ во́ вѣки .

пѣ́снь , ѳ҃ . і҆рмо́съ . Ꙗ҆́же пре́жде сл҃нца , свѣти́льника бг҃а вᲂз̾сїѧ́вша , пло́тїю к̾ на́мъ прише́дша и҆з̾ бᲂкꙋ̀ дв҃чꙋ , неи҆зрече́ннѡ вᲂчл҃чьшасѧ , бл҃гᲂслᲂве́ннаѧ чⷭ҇таѧ , тѧ̀ бцⷣе велича́емъ . Пра́вдѣ сл҃нце чⷭ҇таѧ хрⷭ҇та̀ вᲂсїѧ́ла є҆сѝ , и҆ нб҃о пᲂказа́сѧ пресвѣ́тло . и҆́мже но́щь стрⷭ҇те́й , твᲂи́ми мл҃твами разᲂрѝ , и҆ дш҃ꙋ мᲂю̀ прᲂсвѣтѝ , и҆ срⷣце мᲂѐ ѡ҆зарѝ и҆ ᲂу҆ѧснѝ . Сꙋдѝ бцⷣе , и҆ препрѝ лю́тагѡ мᲂегѡ̀ сᲂпᲂста́та , и҆ ѿ тᲂго́ мѧ ѡ҆скᲂрбле́нїѧ и҆зба́ви , сꙋдїю́ бо бл҃га́го и҆ пра́веднагѡ рᲂдила̀ є҆сѝ , и҆́же в̾ нѣ́дрѣхъ бжⷭ҇тва̀ , ѡ҆сꙋди́вшаго сме́рть . сла́ва . И҆́же беспло́тныхъ сꙋщества̀ , ꙗ҆́кѡ бг҃ъ сᲂставле́и , и҆з̾ тебѐ дв҃о ѻ҆трᲂкᲂви́це вᲂплᲂти́сѧ . тѣ́мже и҆зба́ви мѧ , плᲂтьска́гѡ стрⷭ҇те́й ѡ҆бстᲂѧ́нїѧ , и҆ плᲂтьска́гѡ мꙋдрᲂва́нїѧ , твᲂегѡ̀ раба̀ , свᲂи́ми мл҃твами . и҆ ны́нѣ . Разрꙋши́ла є҆сѝ є҆́ввинꙋ печа́ль , а҆да́ма но́ваго ро́ждьши , и҆́же пре́же а҆да́мᲂво є҆стество̀ сᲂзда́вшаго . тѣ́мже разрꙋшѝ и҆ мᲂи́хъ прегрѣше́нїи рꙋкᲂписа́нїе , напа́стей и҆ скᲂрбе́й , и҆ страсте́й мѧ свᲂбᲂдѝ . та́же , дᲂсто́йнѡ є҆́сть . и҆ про́чеє , ѡ҆бы́чно . и҆ ѿпꙋ́стъ .

Въ пᲂнедѣ́льникъ , на ᲂу҆́трени . по а҃ , стихᲂло́гїи . сѣда́льны , пᲂкаѧ́нны . гла́съ , в҃ . Ꙗ҆́кѡ во́лны мᲂрскі́ѧ вᲂста́ша на мѧ̀ , без̾зако́нїѧ мᲂѧ̀ , и҆ ꙗ҆́кѡ кᲂра́бль в̾ пꙋчи́нѣ , а҆́зъ є҆ди́нъ пᲂгрꙋжа́юсѧ сᲂгрѣше́нїи мᲂи́ми . но в̾ ти́хᲂе приста́нище пᲂкаѧ́нїѧ , наста́ви мѧ гдⷭ҇и и҆ спаси́ мѧ . сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . А҆́зъ є҆́смь дре́во непло́днᲂе гдⷭ҇и , пᲂкаѧ́нїѧ плᲂда̀ нетвᲂрѧ̀ ѿ ню́дъ , и҆ пᲂсѣче́нїѧ бᲂю́сѧ , и҆ ѻ҆гнѧ̀ ѻ҆́нᲂго ᲂу҆страша́юсѧ негаси́магѡ . тѣ́мже тѧ̀ мᲂлю̀ , пре́же ѻ҆́нᲂѧ бѣды̀ ѡ҆братѝ и҆ спаси́ мѧ . сла́ва , и҆ ны́нѣ , боⷢ҇ . Милᲂсе́рдїѧ сꙋ́щи и҆сто́чникъ , млⷭ҇ти спᲂдо́би на́съ бцⷣе , при́зри на́ люди сᲂгрѣ́шшїѧ , ꙗ҆вѝ ꙗ҆́кѡ при́снѡ си́лꙋ твᲂю̀ , на тѧ́ бо ᲂу҆пᲂва́юще , ра́дꙋисѧ вᲂпїе́мъ ти , ꙗ҆́кᲂже и҆нᲂгда̀ гаврїи́лъ , беспло́тнымъ а҆рхистрати́гъ .

по в҃ , стихᲂло́гїи . сѣда́льны , гла́съ , в҃ . Пᲂми́лꙋй мѧ речѐ дв҃дъ , и҆ а҆́зъ тебѣ̀ зᲂвꙋ̀ сᲂгрѣши́хъ сп҃се , мᲂѧ̀ грѣхѝ пᲂкаѧ́нїемъ ѡ҆чи́сти , и҆ пᲂми́лꙋй мѧ . сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Пᲂми́лꙋй мѧ бж҃е пᲂми́лꙋй мѧ . ѡ҆ двᲂю̀ грѣхꙋ̀ дв҃дъ пла́кашесѧ , а҆́зъ же ѡ҆ тма́хъ прегрѣше́нїихъ вᲂпїю́ ти . ѻ҆́нъ пᲂсте́лю слеза́ми ѡ҆мака́ше , а҆́зъ же ка́пли є҆ди́ны непритѧжа́хъ . ѿчаѧва́юсѧ и҆ мᲂлю̀ , пᲂми́лꙋй мѧ бж҃е по вели́цѣй млⷭ҇ти твᲂе́й . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Тебѐ ѡ҆дѣва́ющагѡ нб҃о ѻ҆блакѝ , и҆мꙋ́ще ст҃і́и ѻ҆дѣѧ́нїе въ ми́рѣ , мꙋ́ки ѿ без̾зако́нникъ претерпѣ́ша , и҆ ле́сть и҆́дᲂльскꙋю ᲂу҆праздни́ша . тѣ́хъ мл҃твами и҆ на́съ свᲂбᲂдѝ ѿ неви́димагѡ врага̀ сп҃се , и҆ спасѝ на́съ . сла́ва , и҆ ны́нѣ , боⷢ҇ . Тебѐ велича́емъ бцⷣе вᲂпїю́ще , ра́дꙋисѧ незахᲂди́магѡ свѣ́та ѻ҆́блаче . сегѡ̀ нᲂси́ла в̾ нѣ́дрѣхъ свᲂи́хъ сла́вѣ гдⷭ҇а .

по г҃ , стихᲂло́гїи . сѣда́ленъ , гла́съ , в҃ . Въ невѣ́дѣнїи и҆ ра́зꙋмѣ сᲂгрѣша́ѧ , в̾ нᲂщѝ и҆ во́ дни тебѐ хрⷭ҇тѐ прᲂгнѣ́ваю , є҆ди́нъ на землѝ без̾зако́нїи мᲂи́ми , є҆ди́не бл҃гі́и без̾грѣ́шне ѡ҆братѝ и҆ спаси́ мѧ , мᲂльба́ми а҆́нг҃лъ твᲂи́хъ , прише́дыи млрⷭ҇дїемъ грѣ́шныхъ призва́ти на пᲂкаѧ́нїе . сла́ва , и҆ нн҃ѣ , боⷢ҇ . Бцⷣе без̾невѣ́стнаѧ чⷭ҇таѧ , ꙗ҆́же без̾ сѣ́мене ро́ждьшаѧ всѣ́хъ влⷣкꙋ , тᲂго̀ со а҆́нг҃лы мᲂлѝ , и҆зба́витисѧ на́мъ ѿ всѧ́кᲂгѡ недᲂꙋмѣ́нїѧ , и҆ да́ти ᲂу҆миле́нїе и҆ свѣ́тъ дш҃а́мъ на́шимъ , и҆ сᲂгрѣше́нїи ѡ҆чище́нїе , ꙗ҆́же є҆ди́на вско́рѣ застꙋпа́ющи .

Кано́нъ , ᲂу҆миле́нїѧ ко́ гдⷭ҇ꙋ на́шемꙋ і҆с҃ꙋ хрⷭ҇тꙋ̀ , и҆ ст҃ы́мъ є҆гѡ̀ мч҃нкѡмъ . є҆мꙋ́же краегране́сїе си́це , тꙋ́чꙋ да́ждь ми слеза́мъ , бж҃їи сло́ве . твᲂре́нїе і҆ѡ́сифᲂво . гла́съ , в҃ . пѣ́снь , а҃ . і҆рмо́съ . Грѧди́те лю́дїє , пᲂе́мъ пѣ́снь хрⷭ҇тꙋ̀ бг҃ꙋ , раз̾дѣ́льшемꙋ мо́ре , и҆ прᲂве́дшꙋ лю́ди ꙗ҆́же и҆спꙋстѝ и҆з̾ рабо́ты є҆ги́петскїѧ , ꙗ҆́кѡ прᲂсла́висѧ . запѣ́въ : сла́ва тебѣ̀ бж҃е на́шъ , сла́ва тебѣ̀ . Вᲂпло́щьсѧ сло́ве , и҆ непра́ведники ꙗ҆́кᲂже речѐ , но грѣ́шныѧ прише́лъ є҆сѝ призва́ти на пᲂкаѧ́нїе . мно́гѡ сᲂгрѣши́вша прїимѝ и҆ спаси́ мѧ . Є҆ди́нъ а҆́зъ грѣхо́мъ пᲂрабо́щенъ є҆́смь , є҆ди́нъ а҆́зъ стрⷭ҇те́мъ две́ри ѿверзо́хъ . бл҃гᲂпремѣни́телю є҆ди́не , ѡ҆брати́въ мѧ спасѝ млрⷭ҇дїемъ си . запѣ́въ : ст҃і́и мч҃нцы , мᲂли́те бг҃а ѡ҆ на́съ . мⷱ҇ꙋ . На сꙋди́щи твᲂе́мъ гдⷭ҇и , вѣнцы̀ нᲂсѧ́ще пред̾стᲂѧ́тъ стрⷭ҇тᲂно́сцы , лꙋка́ваго пᲂбѣди́ша де́рзᲂсть , и҆ без̾сме́ртїемъ ѡ҆бᲂга́тишасѧ . мⷱ҇ꙋ . Стрꙋѝ на́мъ и҆сцѣле́нїемъ и҆стᲂча́юще страстᲂте́рпцы , всегда̀ тече́нїѧ пло́ти на́шеѧ стра́сти и҆з̾сꙋша́ютъ , си́лᲂю бжⷭ҇твенагѡ дх҃а . боⷢ҇ . Ꙗ҆́же и҆сто́чникъ без̾стра́стїѧ ро́ждьшаѧ , ᲂу҆ѧ́звенаго мѧ̀ страстьмѝ , ѻ҆трᲂкᲂви́це и҆сцѣлѝ , и҆ ѻ҆гнѧ̀ вѣ́чнагѡ и҆схи́ти мѧ , є҆ди́на бг҃ᲂра́дᲂваннаѧ .

Дрꙋгі́и кано́нъ , ст҃ы́мъ нбⷭ҇нымъ беспло́тнымъ а҆́нг҃лѡмъ . є҆мꙋ́же краегране́сїе , пᲂю̀ хвалꙋ̀ ли́кꙋ а҆́нг҃льскᲂмꙋ . твᲂре́нїе ѳеѡ́фанᲂво . і҆рмо́съ . Нетре́нꙋ не ѡ҆бы́чнꙋ . запѣ́въ : ст҃і́и а҆рха́нг҃ли и҆ а҆́нг҃ли , мᲂли́те бг҃а ѡ҆ на́съ . Оу҆́глїе бг҃ᲂно́снᲂе , заре́ю раз̾жже́гшесѧ твᲂегѡ̀ сꙋщества̀ , беспло́тныѧ ꙗ҆ви́лъ є҆сѝ ли́ки , тебѐ хрⷭ҇тѐ сла́вѧща ꙗ҆́кѡ всеси́льна . Си́лꙋ нетлѣ́нїѧ , и҆ сла́вꙋ стѧжа́вше без̾сме́ртїѧ дарᲂва́ннꙋю , а҆́нг҃ли хрⷭ҇тѐ , є҆́же к̾ тебѣ̀ приближе́нїемъ прᲂсвѣща́ютсѧ . Ꙗ҆ви́шасѧ свѣтᲂно́сцы , ꙗ҆́же невеще́ственꙋю пᲂказꙋ́юще по є҆стествꙋ̀ , ѡ҆бразмѝ а҆́нг҃ли хрⷭ҇тѐ , чꙋ́вственѣ вᲂѡ҆бразꙋ́юще чистᲂтꙋ̀ . боⷢ҇ . Чи́ни а҆́нг҃льстїи ржⷭ҇твꙋ́ ти и҆́же па́че є҆стества̀ , слꙋ́жатъ ра́дꙋющесѧ чⷭ҇таѧ , си́хъ бо рᲂдила̀ є҆сѝ бг҃а и҆ гдⷭ҇а .

пѣ́снь , г҃ . і҆рмо́съ . Оу҆твердѝ на́съ сᲂбо́ю гдⷭ҇и , дре́вᲂмъ ᲂу҆мерщве́и прегрѣше́нїѧ . и҆ стра́хъ тво́й всадѝ в̾ срⷣца̀ на́ша , ꙗ҆́кѡ чл҃кᲂлю́бецъ . И҆́же во́ чрево хрⷭ҇тѐ вше́дыи нетлѣ́ннᲂе , и҆стлѣ́вшꙋю страстьмѝ дш҃ꙋ мᲂю̀ , пᲂкаѧ́нїемъ ѡ҆бнᲂвѝ , и҆ свѣ́та приснᲂсꙋ́щнагѡ , ꙗ҆вѝ и҆спо́лненꙋ . Пᲂслꙋ́шахъ врага̀ прᲂгнѣ́вающагѡ , и҆ всѧ́къ грѣ́хъ сᲂверши́хъ , и҆ безꙋ́мнѡ прᲂгнѣ́вахъ тебѐ чл҃кᲂлю́бче , є҆ди́наго дᲂлгᲂтерпѣли́ваго . мⷱ҇ꙋ . Крⷭ҇то́мъ ѡ҆гражде́ни непᲂбѣди́мїи ѻ҆рꙋ́жницы сп҃сᲂвы , ꙗ҆́кᲂже стѣ́ны разᲂри́ша ѻ҆́ бз҃ѣ , ле́стнаѧ ᲂу҆тверже́нїѧ . мⷱ҇ꙋ . Си́лᲂю бжⷭ҇твенᲂю немᲂщно́е ва́ше ᲂу҆крѣ́пльше , до́блїи стрⷭ҇тᲂте́рпцы , крѣ́пᲂсть бᲂрца̀ всекᲂне́чнѣй па́гꙋбѣ преда́сте . боⷢ҇ . Мр҃і́е злата́ѧ кади́льнице , страсте́й мᲂи́хъ вᲂню̀ ѿженѝ , и҆ ᲂу҆тверди́ мѧ кᲂле́блемаго , прило́гми льсти́вагѡ бᲂрца̀ .

и҆́нъ , і҆рмо́съ . Лꙋ́къ сᲂкрꙋши́сѧ си́льныхъ . И҆́же є҆стество́мъ без̾сме́ртенъ бг҃ъ , премꙋ́дре сᲂдѣва́ѧ бл҃гᲂда́тїю , во́инства без̾сме́ртнаѧ ꙗ҆влѧ́етъ . двⷤа . Ны́нѣ пред̾стᲂѧ́ще жела́нїемъ кра́йнимъ хрⷭ҇то́ви , спасти́сѧ всѣ́мъ на́мъ а҆́нг҃ли мᲂли́тесѧ . боⷢ҇ . Нача́ло пᲂд̾лѣ́тно прїе́мъ и҆звѣ́стнѡ и҆з̾ тебѐ , и҆́же лѣ́тᲂмъ твᲂре́цъ мт҃и при́снѡ дв҃о .

пѣ́снь , д҃ . і҆рмо́съ . Пᲂю́ тѧ слꙋ́хᲂмъ бо гдⷭ҇и , ᲂу҆слы́шахъ и҆ ᲂу҆бᲂѧ́хсѧ . до мене́ бо прїи́де , менѐ и҆ща̀ заблꙋ́ждьшагѡ . тѣ́мже мно́гᲂе твᲂѐ сᲂше́ствїе є҆́же на мѧ̀ прᲂславлѧ́ю ѡ҆бнᲂвле́нїе . Въ ка́лъ грѣхо́вныи впа́дъ , и҆ вы́шнеє бл҃гᲂѡбра́зїе пᲂгꙋби́хъ гдⷭ҇и , и҆ бᲂю́сѧ мꙋче́нїѧ . тѣ́мже пᲂкаѧ́нїѧ красᲂто́ю , смире́ннꙋю дш҃ꙋ мᲂю̀ прᲂсвѣтѝ . Льсти́выми гл҃ы , льсти́выи ѿ тебе́ мѧ ᲂу҆кра́де , снѣ́дь себѣ̀ сᲂдѣ́ла . бж҃е всѣ́хъ , сегѡ̀ ѕло́бы и҆схи́ти мѧ , и҆ пᲂкаѧ́нїѧ ѻ҆бразы̀ призᲂви́ мѧ . мⷱ҇ꙋ . Предава́еми на снѣ́дь ѕвѣре́мъ , и҆ ѻ҆гне́мъ жго́ми мч҃нцы , и҆ ѡ҆дира́еми , и҆ на ᲂу҆́ды раз̾дрᲂблѧ́еми , хрⷭ҇та̀ пᲂмо́щника и҆мꙋ́ще не ѿверго́стесѧ . тᲂго̀ прилѣ́жнѡ мᲂли́те за мѧ̀ ѡ҆каѧ́ннаго . мⷱ҇ꙋ . Є҆ди́ницꙋ чтꙋ́ще сꙋщество́мъ , и҆ трⷪ҇цꙋ ли́цы , бжⷭ҇тво̀ несᲂзда́нно , сᲂзда́нїе ника́кᲂже пᲂче́тше , вы̀ хрⷭ҇то́вы мч҃нцы пᲂзна́сте и҆̀ , сегѡ̀ ра́ди мꙋ́ки всѧ́кїѧ претерпѣ́сте . боⷢ҇ . Вᲂплᲂща́етсѧ и҆з̾ чⷭ҇тыхъ крᲂве́й твᲂи́хъ , и҆ чл҃кѡмъ сᲂєдинѧ́етсѧ хᲂтѧ̀ гдⷭ҇ь пречⷭ҇таѧ , и҆ прїе́млетъ ка́ющїѧсѧ , и҆́же дре́вле пᲂгрꙋже́ныѧ грѣхмѝ , твᲂи́ми мᲂльба́ми чи́стаѧ преклᲂнѧ́емъ .

и҆́нъ , і҆рмо́съ . Оу҆слы́шахъ гдⷭ҇и . Мᲂли́твеники привᲂжꙋ́ ти беспло́тныѧ , и҆́хже ще́дре прїе́мъ ꙗ҆́кѡ бл҃гᲂꙋтро́бенъ , ѿ грѣхѡ́въ мѧ и҆зба́ви . Оу҆мꙋ̀ приближа́ющесѧ всевино́внᲂмꙋ , ᲂу҆́мᲂве бжⷭ҇твенїи ѡ҆чища́еми , прᲂсвѣща́ютсѧ превы́шними ра́зꙋмы . Бжⷭ҇твенаѧ ᲂу҆краше́нїѧ , нбⷭ҇нагѡ чинᲂнача́лїѧ бжⷭ҇твенымъ дх҃ᲂмъ ᲂу҆краша́еми , сᲂхранѧ́еми сꙋ́ть непрело́жно . боⷢ҇ . Разꙋмѣ́въ тѧ и҆з̾ дале́ча дв҃це , бг҃а нᲂсѧ́щꙋ вᲂплᲂще́нна на́ рꙋкꙋ свᲂе́ю , и҆са́їѧ пред̾вᲂзвѣстѝ .

пѣ́снь , є҃ . і҆рмо́съ . Свѣ́та пᲂда́телю , и҆ вѣко́мъ тво́рче гдⷭ҇и , во́ свѣтѣ твᲂи́хъ пᲂвелѣ́нїи наста́ви на́съ , ра́звѣ бо тебѐ и҆но́гѡ бг҃а незна́емъ . И҆́же прᲂсвѣти́выи ѻ҆́чи слѣпо́мꙋ , ѡ҆слѣпле́нꙋю дш҃ꙋ мᲂю̀ прᲂсвѣтѝ , и҆ бдѣ́ти сїю̀ ᲂу҆крѣпѝ , в̾ дѣѧ́нїѧ бл҃га́ѧ , сна́ же лѣ́нᲂстнагѡ до кᲂнца̀ вᲂз̾ненави́дѣти . И҆сцѣлѝ є҆ди́не сп҃се , ᲂу҆ѧ́звленꙋю ми дш҃ꙋ вᲂи́стинꙋ , ꙗ҆́звᲂю лю́тᲂю грѣха̀ , и҆́же дре́вле в̾ разбо́йники в̾па́дшемꙋ , ꙗ҆́звы и҆сцѣли́выи . мⷱ҇ꙋ . Сᲂбо́ръ честны́хъ страда́лецъ , сᲂбо́ръ без̾зако́нныхъ гᲂни́телей пᲂсрамѝ , мнᲂгᲂви́дны бᲂлѣ́зни претерпѣ́вше . и҆ ны́нѣ со сщ҃е́нными сᲂбо́ры а҆́нг҃льскими , прⷭ҇нѡ ра́дꙋютсѧ . мⷱ҇ꙋ . Звѣ́зды мнᲂгᲂсвѣ́тлыѧ , зарю̀ терпѣ́нїѧ и҆спꙋща́юще , и҆ вѣ́рныхъ дш҃а дх҃ᲂмъ бжⷭ҇твенымъ прᲂсвѣща́юще , пресвѣ́тлїи ꙗ҆́вльшесѧ мч҃нцы . боⷢ҇ . Но́во ꙗ҆́кѡ мла́дѧ на́мъ , пре́жде вѣ́чнагѡ сн҃а рᲂдила̀ є҆сѝ , во двꙋ̀ хᲂтѣ́нїю и҆ дѣѧ́нїю сꙋ́ща сꙋгꙋ́ба , ꙗ҆́кѡ чл҃ка в̾кꙋ́пѣ же и҆ бг҃а всепѣ́таѧ .

и҆́нъ , і҆рмо́съ . Оу҆́гль и҆са́їи прᲂѧвле́исѧ . Бжⷭ҇твенагѡ бг҃ᲂнача́лїѧ бли́зъ сїѧ́юще , херꙋви́ми и҆ серафи́ми свѣ́тлᲂстїю , со прⷭ҇то́лы превзѧ́тыми , бг҃ᲂпᲂдо́бнѡ про́чаѧ прᲂсвѣща́ютъ . двⷤа . Ꙗ҆́кѡ всегѡ̀ свѣтᲂли́тїѧ пᲂда́телю сло́ве бж҃їи , зерца́ла свѣтᲂви́днаѧ приведѐ твᲂѧ̀ зарѝ с̾ весе́лїемъ , и҆ ра́зꙋмᲂмъ не ᲂу҆кло́ннымъ прїе́млющаѧ . боⷢ҇ . Ра́дᲂсть тебѣ̀ , и҆́же пра́ѻ҆ц҃емъ сѣ́тᲂванїе разрѣша́ющꙋю , гаврїи́лъ сщ҃е́ннᲂа҆рха́нг҃лъ съ небесѐ слетѣ́въ , бл҃гᲂвѣствᲂва́ше чⷭ҇таѧ бг҃ᲂневѣ́сто .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , неи҆зслѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Низ̾па́дсѧ ѕло́бᲂю ѕмїе́вᲂю , и҆ на ѻ҆дрѣ̀ ѿча́ѧнїѧ лежꙋ̀ , и҆́же раз̾сла́бленыѧ гл҃ᲂмъ вᲂз̾дви́гнꙋвыи хрⷭ҇тѐ , и҆ менѐ вᲂз̾дви́гни . Вѣ́ема вѣ́трᲂмъ ѕмі́ѧ , и҆ пᲂтᲂплѧ́ема всегда̀ вᲂлна́ми грѣхо́вными , спаси́ мѧ ꙗ҆́кᲂже петра̀ чл҃кᲂлю́бче гдⷭ҇и . мⷱ҇ꙋ . Преминꙋ́вше предѣ́лы є҆стества̀ , ꙗ҆́же па́че є҆стества̀ мꙋ́ки претерпѣ́сте , сегѡ̀ ра́ди и҆́же па́че ᲂу҆ма̀ бл҃ги́мъ спᲂдо́бистесѧ мч҃нцы . мⷱ҇ꙋ . Ꙗ҆́кѡ до́брїи , ꙗ҆́кѡ кра́снїи , ꙗ҆́кѡ честні́и , дᲂбрᲂтво́рнᲂмꙋ и҆ кра́снᲂмꙋ счета́стесѧ , ѡ҆ на́съ всегда̀ мᲂлѧ́щесѧ , пресла́внїи мч҃нцы . боⷢ҇ . Ѿ всѣ́хъ рᲂдѡ́въ , твᲂре́цъ и҆збра̀ тебѐ всенепᲂро́чнаѧ , дᲂбро́тꙋ і҆а́кѡвлю , ю҆́же вᲂз̾любѝ , и҆ и҆з̾ тебѐ вᲂсїѧ́въ ꙗ҆ви́сѧ .

и҆́нъ , і҆рмо́съ . Гла́съ гл҃ъ мᲂле́нїѧ . Бжⷭ҇твенаѧ мѣ́ста сла́вы твᲂеѧ̀ , нача́льнагѡ свѣ́та влⷣко хрⷭ҇тѐ , свѣтᲂблиста́нными раз̾же́гшесѧ сїѧ́ньми , заре́ю свѣтᲂвидѣ́нїемъ вѣ́чнѡ пребыва́ютъ . вⷤ . Си́лᲂю бжⷭ҇твенᲂю ᲂу҆крѣплѧ́еми серафи́ми , зᲂвꙋ́ще гла́сы немо́лчными , пѣ́нїе трист҃о́е , честѝ вᲂз̾во́дѧтъ на́съ є҆стество̀ трисᲂста́внᲂе . боⷢ҇ . Клѧ́тсѧ ꙗ҆́кᲂже речѐ гдⷭ҇ь , и҆́стинᲂю дре́вле дв҃дꙋ , и҆́з̾ чрева твᲂегѡ̀ прᲂше́дъ и҆спо́лни , пᲂрᲂдила́ бо є҆сѝ ѻ҆трᲂкᲂви́це , и҆́же не́бᲂмъ и҆ земле́ю црⷭ҇твꙋющагѡ .

пѣ́снь , з҃ . і҆рмо́съ . Ѡ҆ тѣ́лѣ зла́тѣ на́ пᲂли деи́рѣ слꙋжи́мѣмъ , трїѐ ѻ҆́трᲂцы неради́ша ѡ҆ без̾бо́жнѣмъ велѣ́нїи , но пᲂсредѣ̀ пла́мени в̾ве́ржени , прᲂхлажда́еми пᲂѧ́хꙋ , блгⷭ҇ве́нъ бг҃ъ ѻ҆ц҃ъ на́шихъ . Оу҆́мнымъ развраще́нїемъ , и҆ бѣсо́вскими прило́ги всѧ́кᲂгѡ стꙋда̀ и҆спо́лнихсѧ , дале́че бы́хъ запᲂвѣде́й твᲂи́хъ ꙗ҆́кᲂже блꙋ́дныи . нн҃ѣ же ѡ҆браща́ѧсѧ зᲂвꙋ̀ , сᲂгрѣши́хъ ꙗ҆́кᲂже ѻ҆́нъ , невᲂзгнꙋша́йсѧ менѐ і҆с҃е , вᲂплᲂще́исѧ менѐ ра́ди . Бж҃е всѧ́ческихъ , ни невги́тѧны запреще́нїѧ ража́ющаго сме́рть , пᲂка́ѧвшїѧсѧ дре́вле спа́слъ є҆сѝ . та́кᲂже є҆ди́не чл҃кᲂлю́бче , премно́гимъ блꙋдо́мъ ѡ҆скверне́нᲂе срⷣце мᲂѐ нн҃ѣ ѡ҆браща́ющеєсѧ , лю́тыхъ и҆зба́ви мꙋ́къ . мⷱ҇ꙋ . Оу҆ѧзви́сѧ лю́тѣ ᲂу҆ѧзви́ти ва́съ вᲂсхᲂтѣ́выи , ѕлᲂдѣ́й , бг҃ᲂбл҃же́ннїи бжⷭ҇твенїи мч҃нцы , и҆ не и҆сцѣ́ленъ пребы́сть . всѣ́мъ же вѣ́рнымъ и҆сцѣле́нїе , ꙗ҆́звы ва́ша ꙗ҆ви́шасѧ , ᲂу҆ѧ́звенымъ прило́гᲂмъ ве́тхаго запина́телѧ . мⷱ҇ꙋ . Ни ѕвѣре́й лю́тыхъ , ни мꙋчи́телей преще́нїѧ , ни ѻ҆гнѧ̀ , ни ра́нъ , ни меча̀ сѣкꙋ́щаго , ни раз̾жже́ныхъ ᲂу҆бᲂѧ́стесѧ сᲂсꙋ́дъ . но ꙗ҆́кᲂже в̾ чꙋжи́хъ тѣлесѣ́хъ , всѧ̀ претерпѣ́сте , великᲂмꙋ́ченицы , сегѡ̀ ра́ди вѣнча́ни бы́сте . боⷢ҇ . Невеще́ственагѡ свѣ́та жили́ще , чре́во твᲂѐ бы́сть , пречⷭ҇таѧ бг҃ᲂневѣ́сто ѻ҆трᲂкᲂви́це , свѣтлᲂстьмѝ бжⷭ҇твенагѡ ра́зꙋма , без̾бо́жїе ѿгна́вшагѡ . є҆го́же пᲂю́ще зᲂве́мъ , бл҃гᲂслᲂве́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . Вѣті́и ꙗ҆ви́шасѧ . Ѻ҆́крⷭ҇тъ прⷭ҇то́ла неи҆зрече́нныѧ тѝ сла́вы , ликꙋ́юще прⷭ҇нѡ нбⷭ҇нїи ᲂу҆мѝ , немо́лчными ᲂу҆стна́ми вᲂспѣва́ютъ , пребжⷭ҇твеныи бж҃е на́шъ бл҃гᲂслᲂве́нъ є҆сѝ . вⷤ . Є҆гда̀ ви́дѣша тѧ а҆́нг҃льстїи чи́ни , на нб҃са̀ с̾ пло́тїю вᲂзнᲂси́ма , врата́ же нбⷭ҇наѧ ѿверзо́ша ти , пᲂю́ще , пребжⷭ҇твеныи бж҃е на́шъ блгⷭ҇ве́нъ є҆сѝ . боⷢ҇ . Зако́нꙋ тѧ нача́тᲂкъ , и҆ прᲂро́кѡмъ ѻ҆трᲂкᲂви́це , гаврїи́лъ пᲂказꙋ́ѧ вᲂпїѧ́ше , сѐ ты̀ ражда́еши є҆ди́на всепѣ́таѧ , пребжⷭ҇твенагѡ на́мъ бг҃а .

пѣ́снь , и҃ . і҆рмо́съ . Впе́щь ѻ҆́гненнꙋю , к̾ дѣ́темъ є҆вре́йскимъ сᲂше́дшагѡ , и҆ пла́мень на хла́дъ прело́жшагѡ бг҃а , по́йте всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Пᲂд̾падо́хъ лꙋка́вᲂмꙋ , и҆ кᲂзньмѝ є҆гѡ̀ пᲂрабᲂще́нъ бы́хъ , и҆ зрѧ́ мѧ льсти́выи в̾ небреже́нїи мно́зѣ , хва́литсѧ . сего́ мѧ и҆схи́ти , и҆́же заблꙋ́ждьшимъ ѡ҆браще́нїе ще́дрыи . Разрѣши́ мѧ , нерѣши́мыми ᲂу҆́зами сᲂдержи́ма тѣле́сными , и҆́же нерѣши́мыѧ разрѣши́выи ѿ вѣ́чныхъ ᲂу҆́зъ , и҆ тещѝ к̾ стезѧ́мъ напра́ви спасе́нымъ , хрⷭ҇тѐ сп҃се ми́рꙋ . мⷱ҇ꙋ . И҆́же стрⷭ҇те́мъ дѣ́латель , на мнѣ̀ смире́ннѣмъ всю̀ ѕло́бꙋ сᲂдѣ́ѧ вᲂи́стинꙋ . и҆́же страсте́мъ хрⷭ҇то́вымъ ꙗ҆́кѡ вᲂи́стинꙋ пᲂдо́бницы бл҃же́ннїи мч҃нцы , си́хъ и҆зба́вите мѧ вреже́нїѧ . мⷱ҇ꙋ . Кᲂлѣ́на непрекло́ньше и҆стꙋка́ннымъ , в̾ пе́щь ра́нъ , ꙗ҆́кᲂже ѻ҆́трᲂцы в̾ ве́ржени бы́сте дре́вле , и҆ рᲂсо́ю бжⷭ҇твенᲂю ꙗ҆́вльшесѧ неѡ҆па́льни , прехва́льнїи мч҃нцы , пᲂетѐ хрⷭ҇та̀ во́ вѣки . боⷢ҇ . И҆з̾немо́гшꙋю мно́гими прило́гми лꙋка́вагѡ , ѡ҆каѧ́ннꙋю ми дш҃ꙋ бг҃ᲂрᲂди́тельнице , цѣле́бными си мᲂльба́ми дв҃о здра́вꙋ сᲂдѣ́лай , да тѧ̀ сла́влю во всѧ̀ вѣ́ки .

и҆́нъ , і҆рмо́съ . Ѡ҆ пᲂдо́бїи ѕла́тѣ . Пᲂдо́бїѧ твᲂеѧ̀ бл҃гᲂсти , сᲂста́вилъ є҆сѝ а҆́нг҃лы , за́пᲂвѣди твᲂѧ̀ крѣ́пᲂстїю сᲂверша́ющїѧ сло́ве , и҆ спᲂспѣ́шствꙋющїѧ всѣ́мъ вѣ́рнымъ зва́ти , ѡ҆сꙋ́щественаѧ по́й гдⷭ҇а всѧ̀ тва́рь , и҆ превᲂзнᲂша́й є҆гѡ̀ во́ вѣки . Бжⷭ҇твеными дᲂбрᲂдѣ́тельми , нбⷭ҇нᲂе ᲂу҆краси́лъ є҆сѝ житїѐ , ст҃ы́хъ а҆́нг҃лъ сщ҃еннᲂнача́лїе , прᲂсвѣща́ѧ си́хъ тебѣ̀ хрⷭ҇тѐ вᲂпїю́ща , ѡ҆сꙋ́щественаѧ по́й гдⷭ҇а всѧ̀ тва́рь , и҆ превᲂзнᲂша́й є҆гѡ̀ во́ вѣки . Ра́дꙋющесѧ свѣ́тлѡ , вᲂспᲂе́мъ бжⷭ҇твенᲂе пѣ́нїе беспло́тныхъ не ѡ҆сла́бнѡ . и҆ влⷣкꙋ бг҃ᲂсло́вѧще , пѣ́сньми вᲂзᲂпїе́мъ , ѡ҆сꙋ́щественаѧ по́й гдⷭ҇а всѧ̀ тва́рь , и҆ превᲂзнᲂша́й є҆гѡ̀ во́ вѣки . боⷢ҇ . Пра́вᲂсть ꙗ҆́же мꙋ́дрѣ всѧ̀ пра́вѧщаѧ , вᲂзлюбѝ дᲂсто́йнѡ тѧ пречⷭ҇тꙋю дв҃ꙋ , несказа́ннѡ прест҃а́ѧ бцⷣе в̾ тѧ̀ все́льшаѧсѧ . ю҆́же при́снѡ сла́вѧще непреста́ннѡ , ꙗ҆́кѡ гдⷭ҇а и҆ влⷣкꙋ превᲂзно́симъ во всѧ̀ вѣ́ки . та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны .

пѣ́снь , ѳ҃ . і҆рмо́съ . И҆́же ѿ́ бг҃а бг҃а сло́ва , неи҆зрече́ннᲂю мꙋ́дрᲂстїю , прише́дшагѡ ѡ҆бнᲂви́ти а҆да́ма , ꙗ҆́дїю тлѣ́нїѧ па́дшагѡ ѕлѣ̀ , ѿ ст҃ы́ѧ же дв҃цы , неи҆зрече́нно вᲂплᲂща́ема на́съ ра́ди , вѣ́рнїи є҆динᲂмꙋ́дреннѡ пѣ́сньми велича́емъ . Сѐ вре́мѧ дѣ́ланїѧ , что̀ спи́ши безꙋма̀ дш҃е во ᲂу҆ны́нїи глꙋбо́цѣ , вᲂста́ни слеза́ми прᲂсвѣтѝ свѣщꙋ̀ свᲂю̀ . пᲂтщи́сѧ , приближа́етсѧ жени́хъ дш҃а́мъ . не ᲂу҆кᲂснѝ , да не ѡ҆ста́неши бжⷭ҇твеныхъ двере́й внѣ̀ ᲂу҆́дꙋ . Ѽ ко́ль стра́шно твᲂѐ сꙋди́ще , ꙗ҆влѧ́ющи всѧ́ко дѣѧ́нїе на́го , пред̾ а҆́нг҃лы и҆ чл҃ки . ѽ лю́тᲂе и҆зрече́нїе , є҆́же сᲂгрѣ́шшимъ хо́щеши да́ти . ѿ него́ же и҆зба́ви мѧ хрⷭ҇тѐ пре́жде кᲂнца̀ , пᲂдаѧ́ми ѡ҆браще́нїе слеза́ми . мⷱ҇ꙋ . Зна́менавшесѧ бжⷭ҇твенᲂю а҆́гньца и҆ па́стырѧ кро́вїю , сла́внїи бжⷭ҇твенїи страда́льцы , закала́еми ра́дᲂвахꙋсѧ , ꙗ҆́кᲂже неѕло́бивїи а҆́гньцы , и҆ ны́нѣ первᲂро́дныхъ цр҃кᲂвь ст҃ꙋ́ю , ю҆́же на́ нб҃сѣхъ прᲂсвѣща́ютъ . мⷱ҇ꙋ . Сл҃нечныхъ сїѧ́нїи ꙗ҆́кᲂже свѣти́льницы ꙗ҆́вльшесѧ , лꙋча́ми страда́нїи ва́шихъ , всѧ́кꙋ дш҃ꙋ ѡ҆зарѧ́ете , и҆ всѧ́кꙋ тмꙋ̀ пре́лести ѿгᲂнѧ́ете , до́блїи страда́льцы . сегѡ̀ ра́ди дᲂсто́йнѡ вѣ́рᲂю бл҃жи́ми є҆стѐ . боⷢ҇ . Пᲂщади́ мѧ гдⷭ҇и пᲂщадѝ , є҆гда̀ хо́щеши сꙋди́ти , и҆ не ѡ҆сꙋдѝ менѐ во ѻ҆́гнь ни ꙗ҆́рᲂстїю твᲂе́ю ѡ҆бличѝ менѐ , мо́литъ тѧ̀ дв҃аѧ , ꙗ҆́же тебѐ хрⷭ҇тѐ ро́ждьшаѧ , и҆ а҆́нг҃лъ мно́жество , и҆ мч҃нкъ сᲂсло́вїе .

и҆́нъ , і҆рмо́съ . Ве́сь є҆сѝ жела́нїе . Бѣлᲂѡбразꙋ́юще ꙗ҆ви́шасѧ а҆́нг҃ли свѣтᲂѡбра́знѡ , бжⷭ҇твенымъ ᲂу҆ченико́мъ твᲂи́мъ , пᲂвѣ́дающе твᲂѐ втᲂро́е прише́ствїе хрⷭ҇тѐ . с̾ни́ми же тѧ̀ всѝ бг҃ᲂсло́вѧще велича́емъ . двⷤа . Ꙗ҆́кѡ бл҃гᲂдѣ́тель всѧ́кагѡ є҆стества̀ слᲂве́снагѡ , твᲂри́ши пе́рвѣй сѝ зарѝ втᲂрꙋ́ю свѣ́тлᲂстъ , кра́йнїѧ ра́ди бл҃гᲂсти . тѣ́мже тѧ всѝ бл҃гᲂдарѧ́ще велича́емъ . боⷢ҇ . Разꙋмѣ́въ ти пречⷭ҇таѧ , свѣтᲂѡбра́знᲂе дв҃ство и҆ ᲂу҆ди́вльсѧ , ра́дᲂсть тебѣ̀ принесѐ , бжⷭ҇твеныи а҆рхистрати́гъ . с̾ ни́мъ же тѧ бл҃гᲂче́стнѡ мꙋ́дренѡ велича́емъ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стⷯры . гла́съ , в҃ . Сᲂдѣ́ѧнныхъ мᲂи́хъ лю́тъ , пᲂмышлѧ́ю без̾мѣ́стнаѧ , к̾ твᲂи́мъ прибѣга́ю щедро́тамъ , мытаре́ви пᲂдо́бѧсѧ , и҆ блꙋдни́цѣ слези́вшей , и҆ блꙋ́днᲂмꙋ сн҃ꙋ . тѣ́мже и҆ припа́даю ти млⷭ҇тиве , пре́же да́же не ѡ҆сꙋди́ши мѧ , пᲂщади́ мѧ бж҃е и҆ пᲂми́лꙋй мѧ .

сти́хъ : и҆спо́лнихᲂмсѧ за ᲂу҆́тра . Без̾зако́нїѧ мᲂѧ̀ пре́зри гдⷭ҇и , и҆́же ѿ дв҃ы рᲂжде́исѧ , и҆ срⷣце мᲂѐ ѡ҆чи́сти , цр҃квь сїѐ твᲂрѧ̀ ст҃о́мꙋ твᲂемꙋ̀ дх҃ꙋ . не ѿри́ни менѐ ѿ твᲂегѡ̀ лица̀ , и҆́же без̾мѣ́рнꙋю и҆мѣ́ѧи ве́лїю млⷭ҇ть .

сти́хъ : и҆ бꙋ́ди свѣ́тлᲂсть . мⷱ҇ꙋ . По хрⷭ҇тѐ пᲂстрада́сте да́же до сме́рти , ѽ страстᲂте́рпцы мч҃нцы , д́ш҃и бо и҆́мате на́ нб҃сѣхъ в̾ рꙋцѣ̀ бж҃їи , и҆ по́мирꙋ всемꙋ̀ пᲂчита́еми сꙋ́ть ва́ши мо́щи . сщ҃е́нницы и҆ цр҃їе пᲂкланѧ́ютсѧ , и҆ лю́дїє всѝ ра́дꙋющесѧ ѡ҆бы́чнѡ вᲂпїе́мъ , со́нъ че́стенъ пред̾гдⷭ҇емъ , сме́рть прпⷣбныхъ є҆гѡ̀ . сла́ва , и҆ нн҃ѣ , боⷢ҇ . На тѧ̀ ᲂу҆пᲂва́нїе бцⷣе вᲂзлᲂжи́хᲂмъ , ча́ѧнїѧ да не ѿ паде́мъ , спасѝ на́съ ѿ бѣ́дъ , пᲂмо́щнице недᲂꙋмѣ́емымъ , и҆ сᲂпрᲂти́вныхъ сᲂвѣ́ты разᲂрѝ , ты́ бо є҆сѝ на́ше спасе́нїе бл҃гᲂслᲂве́наѧ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= сла́ва , и҆ нн҃ѣ , боⷢ҇ . во́гласъ трᲂпарѧ̀ . пᲂсе́мъ , є҆ктенїѧ̀ . и҆ ча́съ , а҃ . =и҆ ѿпꙋ́стъ .

Въ пᲂнедѣ́льникъ , бл҃же́нны . гла́съ , в҃ .

Гла́съ ти прино́симъ разбо́йничь , и҆ мо́лимсѧ , пᲂмѧнѝ на́съ гдⷭ҇и во црⷭ҇твїи свᲂе́мъ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Спаси́ мѧ гдⷭ҇и бж҃е , и҆ ѻ҆́бщника сᲂтвᲂрѝ ча́сти , и҆́же ѿ дш҃и вᲂзлю́бльшимъ тѧ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Всѧ̀ нбⷭ҇наѧ во́инства , со́ страхᲂмъ слꙋ́жатъ ти ꙗ҆́кѡ бг҃ꙋ , и҆́хже мл҃твами спасѝ на́съ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Ѻ҆рꙋ́жїемъ вѣ́ры страда́льцы . пᲂбѣди́сте пᲂлкѝ вра́жїѧ , и҆ принесе́ни бы́сте к̾ бг҃ꙋ .

сла́ва . Пᲂчита́ютъ чи́ни ᲂу҆́мнїи , съ чл҃ческимъ ро́дᲂмъ , трⷪ҇цꙋ про́стꙋ , є҆ди́нᲂгѡ же сꙋщества̀ бжⷭ҇тво̀ .

и҆ ны́нѣ . Пречⷭ҇таѧ влⷣчце , ꙗ҆́же бг҃а без̾ сѣ́мене ро́ждьшаѧ , тᲂго̀ мᲂлѝ спасти́сѧ на́мъ .