Въ пᲂнедѣ́льникъ , ве́черъ . на гдⷭ҇и вᲂзва́хъ стⷯры , самᲂгла́сны , гла́съ ,
в҃ . =запѣ́въ : ꙗ҆́кѡ ѿ тебѐ ѡ҆чище́нїе є҆́сть . В=сѣ́хъ преи҆до́хъ
грѣхо́мъ , кᲂто́рᲂмꙋ наꙋчꙋ́сѧ пᲂкаѧ́нїю ; а҆́ще вᲂздᲂхнꙋ̀ ꙗ҆́кᲂже мыта́рь ,
непщꙋ́ю ѡ҆тѧгᲂти́ти нб҃са̀ . а҆́ще вᲂз̾слезю̀ ꙗ҆́кѡ блꙋдни́ца , слеза́ми
ѡ҆сквернѧ́ю зе́млю . но да́ждь ми ѡ҆ставле́нїе грѣхо́въ бж҃е , и҆ пᲂми́лꙋй
мѧ .
ᲂу҆пᲂва̀ дꙋша̀ мᲂѧ̀ на́ гдⷭ҇а . Всѧ́къ грѣ́хъ сᲂдѣ́ѧхъ , всѣ́хъ преи҆до́хъ
во блꙋдѣ̀ , а҆́ще вᲂсхᲂщꙋ̀ пᲂка́ѧтисѧ , не и҆́мамъ сле́зъ то́ки . а҆́ще
лѣ́нᲂстнѡ и҆ ны́нѣ пᲂживꙋ̀ , мꙋ́цѣ пᲂви́ненъ бꙋ́дꙋ . но да́ждь ми
и҆справле́нїе , є҆ди́не бл҃гі́и бж҃е , и҆ пᲂми́лꙋй мѧ .
да ᲂу҆пᲂва́етъ і҆и҃ль на́ гдⷭ҇а . Тꙋ́чꙋ ми пᲂда́ждь хрⷭ҇тѐ сле́зъ ,
бжⷭ҇твенагѡ ᲂу҆миле́нїѧ ꙗ҆́кѡ ще́дръ , ꙗ҆́кѡ да пла́чꙋсѧ , и҆ ѡ҆мы́ю скве́рнꙋ
ю҆́же ѿ сласте́й , и҆ ꙗ҆влю́сѧ ти ѡ҆чище́нъ , внегда̀ сꙋдїѝ с̾ нб҃съ хо́щеши
прїитѝ гдⷭ҇и , сꙋди́ти чл҃кѡмъ , ꙗ҆́кѡ сꙋдїѧ̀ є҆ди́нъ пра́веденъ .
та́же , в̾ минѣ́и , стⷯры , ст҃о́мꙋ , а҆́ще и҆́мать . а҆́ще нѣ́сть
минѣ́и . и҆́ны , стⷯры , ст҃о́мꙋ и҆ вели́кᲂмꙋ пррⷪ҇кꙋ , і҆ѡа́ннꙋ прⷣтчи .
гла́с̾ , в҃ . поⷣ . є҆гда̀ ѿ́ древа . запѣ́въ : ѿ всѣ́хъ без̾зако́нїи є҆гѡ̀ .
Прᲂпᲂвѣ́дниче хрⷭ҇то́въ и҆ крⷭ҇тлю , а҆́нг҃ле , а҆пⷭ҇ле , мч҃нче , прᲂро́че ,
прⷣтче , свѣ́щниче , дрꙋ́же бли́жнїи , прᲂро́кѡмъ печа́ть , рᲂжде́нныхъ
пречестнѣ́йшїи , хᲂда́таю ве́тхᲂй и҆ но́выѧ бл҃гᲂда́ти , свѣ́тлыи сло́вꙋ
гла́се , твᲂи́ми сщ҃е́нными хᲂда́тайствы , мᲂли́твенаѧ твᲂре́нїѧ , к̾ бг҃ꙋ
бл҃гᲂꙋтро́бнᲂмꙋ и҆спра́ви .
пᲂхвали́те є҆гѡ̀ всѝ лю́дїє . Сѐ а҆́гнецъ бж҃їи , и҆́же грѣхѝ ми́рꙋ
взе́млѧи , вᲂзᲂпи́лъ є҆сѝ прⷣтче бл҃же́нне , внегда̀ ви́дѣ хрⷭ҇та̀ на землѝ
хᲂдѧ́ща , тᲂго̀ ᲂу҆́бѡ мᲂлѝ , грѣхо́въ ѡ҆ставле́нїе дарᲂва́ти , тебѐ
пᲂчита́ющимъ , и҆́маши бо к̾ немꙋ̀ , ве́лїе вᲂи́стинꙋ дерзнᲂве́нїе крⷭ҇тлю ,
ꙗ҆́кѡ хᲂда́тай зако́нꙋ и҆ бл҃гᲂда́ти .
и҆ и҆́стина гдⷭ҇нѧ пребыва́етъ во́ вѣки . Пᲂтщи́сѧ и҆ и҆зми́ мѧ
и҆скꙋше́нїи , сла́вныи гдⷭ҇нь прⷪ҇ро́че мᲂлю́тисѧ , вси́ бо пᲂдвиго́шасѧ
на мѧ̀ , бᲂрю́щїи мѧ го́рцыи бѣ́сᲂве , и҆́щꙋще пᲂхи́тити дш҃ꙋ раба̀ твᲂегѡ̀
недᲂсто́йнагѡ , ꙗ҆́кᲂже пти́цꙋ , не ѡ҆ста́ви мѧ до кᲂнца̀ . да разꙋмѣ́ютъ же
па́че ѿ дѣ́лъ , ꙗ҆́кѡ ты́ ми є҆сѝ прибѣ́жище .
сла́ва , и҆ ны́нѣ , боⷢ҇ . Ꙗ҆́кᲂже сро́дствᲂмъ є҆сте́ственымъ , и҆
мᲂли́твенымъ сᲂгла́сїемъ , є҆ди́но вы̀ сꙋ́ще . мт҃и всѣ́хъ цр҃ѧ , и҆ бжⷭ҇твеныи
прⷣтче , мᲂльбꙋ̀ сᲂтвᲂри́те в̾кꙋ́пѣ , ѡ҆ рабѣ̀ ѕѣлѡ̀ прᲂгнѣ́вавшемъ
бл҃гᲂми́лᲂстивнагѡ , ꙗ҆́кѡ да ᲂу҆ще́дритъ и҆ спасе́тъ , ва́шими прекло́ньсѧ
хᲂда́тайствы , и҆ ѻ҆́гненаго рᲂдства̀ и҆змѣни́тъ мѧ .
та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и
в̾ ве́черъ се́й . на стихо́внѣ , стⷯры , пᲂкаѧ́нны . гла́съ , в҃ .
Сᲂгрѣши́хъ ти хрⷭ҇тѐ сп҃се , ꙗ҆́кѡ блꙋ́дныи сы́нъ , прїими́ мѧ ѻ҆́ч҃е
ка́ющасѧ , и҆ пᲂми́лꙋй мѧ бж҃е .
сти́хъ : к̾ тебѣ̀ вᲂзведо́хъ ѻ҆́чи мᲂѝ . Вᲂпїю́ ти хрⷭ҇тѐ сп҃се ,
мытаре́вымъ гла́сᲂмъ , ѡ҆чи́сти мѧ ꙗ҆́кᲂже ѻ҆́нᲂго , и҆ пᲂми́лꙋй мѧ бж҃е .
сти́хъ : пᲂми́лꙋй на́съ гдⷭ҇и . мⷱ҇ꙋ . Ст҃ы́мъ мꙋ́ченикѡмъ мᲂлѧ́щимсѧ
ѡ҆ на́съ , и҆ хрⷭ҇та̀ пᲂю́щимъ , всѧ́ка ле́сть преста̀ , и҆ чл҃ческїи ро́дъ
вѣ́рᲂю спаса́етсѧ .
сла́ва , и҆ нн҃ѣ , боⷢ҇ . Непрᲂхᲂди́маѧ две́ре , та́йно запечатлѣ́ннаѧ ,
бл҃гᲂслᲂве́наѧ бцⷣе дв҃о , прїимѝ мл҃твы на́ша , и҆ принесѝ ѧ҆̀ сн҃ꙋ
свᲂемꙋ̀ , и҆ бг҃ꙋ на́шемꙋ , да спасе́тъ тебѐ ра́ди дш҃а на́ша .
та́же , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь ,
ст҃о́мꙋ . сла́ва , и҆ ны́нѣ , боⷢ҇ . во́ гласъ трᲂпарѧ̀ . пᲂсе́мъ ,
є҆ктенїѧ̀ . =и҆ ѿпꙋ́стъ .
Въ пᲂнедѣ́льникъ , на па́вечерницѣ . кано́нъ , прест҃ѣ́й бцⷣѣ . гла́съ ,
в҃ . пѣ́снь , а҃ . і҆рмо́съ . Во глꙋбинѣ̀ пᲂтᲂпѝ дре́вле , фараѡни́тскаѧ всѧ̀
во́инства , преѡ҆рꙋже́нꙋ си́лꙋ . вᲂпло́щшеєсѧ сло́во , преспѣ́ющїѧ грѣхѝ
пᲂтреби́ло є҆́сть , пресла́вныи гдⷭ҇ь , ꙗ҆́кѡ прᲂсла́висѧ .
запѣ́въ : прест҃а́ѧ гжⷭ҇е бцⷣе спасѝ на́съ . Пᲂхвале́нїѧ ти
прⷭ҇нᲂцвѣтꙋ́щїи вѣне́цъ , є҆го́же прᲂзѧбѐ дх҃ᲂмъ цр҃кви чⷭ҇таѧ , прино́ситъ
пѣ́снено тебѣ̀ со а҆рха́нг҃лѡмъ гаврїи́лᲂмъ , бг҃ᲂневѣ́стнѣй ра́дꙋисѧ пᲂю́щи ,
и҆ тѧ̀ че́стнѡ вѣнча́ющїи . Вᲂздѣ́лавши живᲂно́сныи винᲂгра́дъ , мт҃и бж҃їѧ
препѣ́таѧ хрⷭ҇та̀ бг҃а , землѧ̀ ст҃а́ѧ ѻ҆́ч҃а ꙗ҆ви́сѧ , па́че смы́сла
бг҃ᲂбл҃гᲂда́тнаѧ . и҆ всегѡ̀ ми́ра напᲂѝ , пи́ва живᲂно́снагѡ чи́стаѧ .
сла́ва . Вᲂлнꙋ́ющагᲂсѧ лю́тѣ прегрѣше́нїи всегѡ̀ ми́ра , и҆ пᲂтᲂплѧ́ема ,
пᲂрᲂдила̀ є҆сѝ пречⷭ҇таѧ бг҃а и҆ гдⷭ҇а всѣ́хъ на́съ , ѡ҆кᲂрми́телѧ хрⷭ҇та̀ ,
ко спасе́нᲂмꙋ приста́нищꙋ на́съ направлѧ́юща вѣ́рнѡ . и҆ нн҃ѣ . Прибѣ́жище и҆
спасе́нїю гра́дъ , всѝ вѣ́рнѡ мо́лимъ тѧ̀ мр҃і́е мт҃и бж҃їѧ , и҆ ми́ли
дѣ́емсѧ те́плѣ , прїимѝ мᲂльбы̀ на́ша твᲂи́хъ вѣ́рныхъ ра́бъ , и҆ разрѣшѝ
всѧ̀ ны̀ ѿ прегрѣше́нїи ѡ҆сꙋжде́нїѧ .
пѣ́снь , г҃ . і҆рмо́съ . Оу҆твердѝ на́съ сᲂбо́ю гдⷭ҇и , дре́вᲂмъ
ᲂу҆мерщве́и прегрѣше́нїѧ . и҆ стра́хъ тво́й всадѝ в̾ срⷣца̀ на́ша , ꙗ҆́кѡ
чл҃кᲂлю́бецъ . Нача́ло ѿвраще́нїѧ бг҃а бы́сть к̾ чл҃кѡмъ , є҆́ввино
прельще́нїе . ст҃а́ѧ же бцⷣа , приведѐ па́ки бг҃а к̾ на́мъ . Жи́зни тѧ̀
сᲂкро́вище , препѣ́таѧ ражда́етъ ми́рᲂви , и҆ ра́дꙋетсѧ бл҃гᲂча́дїю сла́вныи
і҆ѡаки́мъ ѡ҆ тебѣ̀ , ꙗ҆́кѡ непло́дными ѻ҆ц҃ы прише́дши наде́жа . сла́ва . Ѿ
а҆́нны ра́дᲂсть ро́дꙋ прᲂцвѣтѐ , рᲂди́ бо дв҃ᲂю цр҃ѧ , и҆ сра́дꙋютсѧ
ржⷭ҇твꙋ́ ти жены̀ , разрѣ́шшесѧ тᲂбо́ю клѧ́твы . и҆ нн҃ѣ . Кꙋпина̀ в̾ сѷна́и
прᲂѡбража́ше ти дв҃о , пресла́внᲂе ржⷭ҇тва̀ . и҆́бо ѻ҆гне́мъ бжⷭ҇тва̀
не ѡ҆пали́сѧ , в̾ лᲂжесна́хъ прїе́мши чⷭ҇таѧ .
пѣ́снь , д҃ . і҆рмо́съ . Оу҆слы́шахъ гдⷭ҇и , сла́внᲂе твᲂѐ смᲂтре́нїе , и҆
прᲂсла́вихъ милᲂсе́рде , непᲂсти́жимꙋю твᲂю̀ си́лꙋ . І҆а́кѡвъ тѧ ꙗ҆́кѡ
лѣ́ствицꙋ бг҃ᲂлѣ́пнѡ прᲂви́дѧше дв҃о , на не́й же версѣ̀ , бг҃ъ
ᲂу҆твержа́шесѧ . А҆́нг҃льскᲂе сни́тїе , є҆́же к̾ на́мъ сло́ва прише́ствїе ,
тᲂбо́ю пречⷭ҇таѧ прᲂѧви́сѧ . сла́ва . Оу҆тро́ба твᲂѧ̀ препѣ́таѧ , и҆ сᲂсца̀
бл҃же́нна дв҃о , тѣ́хъ бо ра́ди жи́знь всѝ ѡ҆брѣто́хᲂмъ . и҆ нн҃ѣ . Та́йнѡ
вᲂспѣва́емъ тѧ мт҃и бж҃їѧ , гла́сы правᲂсла́вными , ꙗ҆́же цр҃кви блюдо́ма
є҆́сть мл҃твами тѝ .
пѣ́снь , є҃ . і҆рмо́съ . Прᲂсвѣще́нїе во тмѣ̀ лежа́щимъ , и҆ спасе́нїе
ненача́емымъ хрⷭ҇тѐ сп҃се мо́й , к̾ тебѣ̀ ᲂу҆́треннюю цр҃ю ми́рныи ,
прᲂсвѣти́ мѧ сїѧ́нїемъ си , и҆но́гѡ бо ра́звѣ тебѐ бг҃а незна́емъ . Зако́на
и҆ кᲂвче́га честнѣ́йшꙋ тѧ̀ вᲂспѣва́емъ , бцⷣе мр҃і́е , и҆́бо всѣ́хъ зижди́телѧ
и҆ бг҃а , ꙗ҆́кѡ скрижа́ли нᲂси́ла є҆сѝ препѣ́таѧ . Прⷭ҇то́лъ тѧ̀ бж҃їѧ
сло́ва , прᲂславлѧ́емъ бцⷣе , на не́мже ꙗ҆́кѡ чл҃къ , бг҃ъ сѣдѧ̀ ꙗ҆ви́сѧ , и҆
бы́сть херꙋви́мъ превы́шши . сла́ва . Разрѣши́ла є҆сѝ дв҃це ѿ го́рькїѧ
рабо́ты ве́сь ро́дъ челᲂвѣ́чь , и҆ свᲂбо́дᲂю хрⷭ҇то́вᲂю є҆стество̀ же́нскᲂе
пᲂчти́ла є҆сѝ , в̾ бжⷭ҇твенѣмъ твᲂе́мъ ржⷭ҇твѣ̀ . и҆ ны́нѣ . Рᲂдила̀ є҆сѝ
сн҃а дв҃аѧ , и҆ пᲂбѣжда́ютъ жены̀ врага̀ ꙗ҆́вѣ , тѣ́мже и҆ притека́ютъ
ѻ҆трᲂкᲂви́це , дв҃ство держа́щїи .
пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , неи҆зслѣ́днꙋю
млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Ꙗ҆́же ми́рꙋ
ра́дᲂсть бцⷣе чи́стаѧ , ра́дꙋисѧ тебѣ̀ дв҃о зᲂве́мъ со а҆́нг҃лᲂмъ вѣ́рнѡ ,
твᲂеѧ̀ ра́дᲂсти спᲂдо́би , и҆ печа́ль на́шꙋ разᲂрѝ . Ра́дᲂсти не ѿе́млемыѧ
жили́ще тѧ̀ , вᲂсхвалѧ́юще вѣ́рнѡ мт҃и при́снѡ дв҃о , твᲂеѧ̀ ра́дᲂсти спᲂдо́би ,
и҆ печа́ль на́шꙋ разᲂрѝ . сла́ва . Нб҃о нб҃съ вы́шшеє ꙗ҆ви́сѧ
бг҃ᲂневѣ́стнаѧ , бжⷭ҇твенᲂю ти сла́вᲂю . в̾ тѧ́ бо бг҃ъ на́шъ все́льсѧ
ꙗ҆ви́мисѧ . и҆ ны́нѣ . Ны́нѣ є҆стество̀ же́нскᲂе вᲂзра́дᲂвасѧ , ны́нѣ печа́ль
преста̀ , ра́дᲂсть прᲂцвѣтѐ , ꙗ҆́кѡ мр҃і́ѧ рᲂдѝ ра́дᲂсть , сп҃са хрⷭ҇та̀
бг҃а .
Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , в҃ . Дш҃и
мᲂеѧ̀ лѣ́нᲂсть лю́тꙋю , и҆ срⷣца мᲂегѡ̀ пренемᲂга́нїе , мт҃и бж҃їѧ вᲂз̾зрѣ́вши
и҆сцѣлѝ , мл҃твами твᲂи́ми , и҆ спасе́ныхъ мѧ ча́сти спᲂдо́би , и҆збавлѧ́ющи мѧ
тмы̀ и҆ мꙋче́нїѧ , ꙗ҆́кѡ є҆ди́на ᲂу҆пᲂва́нїе мᲂѐ и҆ ᲂу҆тѣше́нїе .
пѣ́снь , з҃ . і҆рмо́съ . Ѡ҆ тѣ́лѣ зла́тѣ на́ пᲂли деи́рѣ слꙋжи́мѣмъ , трїѐ
ѻ҆́трᲂцы неради́ша ѡ҆ без̾бо́жнѣмъ велѣ́нїи , но пᲂсредѣ̀ пла́мени в̾ве́ржени ,
прᲂхлажда́еми пᲂѧ́хꙋ , блгⷭ҇ве́нъ бг҃ъ ѻ҆ц҃ъ на́шихъ . Рꙋно̀ и҆нᲂгда̀
гедеѡ́нᲂво , є҆́же на тѧ̀ чи́стаѧ бж҃їѧ сло́ва , прᲂѡбразѝ сни́тїе .
ꙗ҆́кᲂже бо ро́сꙋ зача́тїе прїѧ́тъ , нетлѣ́ннаѧ дв҃о . тѣ́мже всѝ тебѣ̀
зᲂве́мъ , бл҃гᲂслᲂве́нъ пло́дъ твᲂегѡ̀ чре́ва чⷭ҇таѧ . Но́ва и҆ стра́шна и҆
вѣ́рна , и҆ чꙋ́дна твᲂѧ̀ та́инства , мр҃і́е мт҃и хрⷭ҇та̀ бг҃а на́шегѡ , ꙗ҆́кѡ
тᲂбо́ю примири́хᲂмсѧ всѝ бг҃ᲂви и҆ влⷣцѣ , и҆ со а҆́нг҃лы ны́нѣ пᲂе́мъ ,
блгⷭ҇ве́нъ пло́дъ твᲂегѡ̀ чре́ва чⷭ҇таѧ . сла́ва . И҆́же пре́жде гедеѡ́нъ
пред̾вᲂзвѣствꙋ́ѧ ѡ҆ тебѣ̀ чи́стаѧ , бжⷭ҇твенᲂе ржⷭ҇тво̀ ꙗ҆́вѣ , ѡ҆кри́нъ
принᲂша́етъ и҆спо́лнь вᲂды̀ , ѿ ѡ҆цыжде́нїѧ рꙋно́внагѡ . ве́сь бо в̾ тѧ̀
бжⷭ҇твено всели́сѧ пречⷭ҇таѧ . блгⷭ҇ве́нъ пло́дъ твᲂегѡ̀ чре́ва чⷭ҇таѧ . и҆
ны́нѣ . Ро́ждьши бг҃а и҆ сп҃са всѧ́ческимъ мр҃і́е , и҆ бы́сть ты̀ ѿча́ѧннымъ
и҆справле́нїе , грѣ́шникѡмъ ѡ҆бнᲂвле́нїе , и҆ ненаде́жнымъ наде́жда , и҆
пᲂю́щимъ по́мᲂщь , блгⷭ҇ве́нъ пло́дъ твᲂегѡ̀ чре́ва чⷭ҇таѧ .
пѣ́снь , и҃ . і҆рмо́съ . Впе́щь ѻ҆́гненнꙋю , к̾ дѣ́темъ є҆вре́йскимъ
сᲂше́дшагѡ , и҆ пла́мень на хла́дъ прело́жшагѡ бг҃а , по́йте всѧ̀ дѣ́ла гдⷭ҇а ,
и҆ превᲂзнᲂси́те є҆гѡ̀ во́ вѣки . Но́въ ра́й на́мъ ꙗ҆ви́ласѧ є҆сѝ прест҃а́ѧ
бцⷣе , не сме́ртнᲂе дре́во , но живо́тнᲂе , ꙗ҆́кѡ са́дъ без̾ сѣ́мене
прᲂрасти́вши гдⷭ҇а , и҆́мже без̾сме́ртнᲂю жи́знїю пита́емсѧ всѝ . Вᲂспѣва́етъ
всѧ̀ хрⷭ҇то́ва цр҃кви бцⷣе , твᲂѐ ржⷭ҇тво̀ , ꙗ҆́кѡ спаса́ютсѧ грѣ́шнїи всѝ ,
и҆ ни́щїи , и҆́же любо́вїю к̾ тебѣ̀ прибѣга́юще . прїи́де бо хрⷭ҇то́съ
на́ землю , чл҃ки спастѝ . сла́ва . Свᲂбᲂжда́етсѧ ѡ҆сꙋжде́нїѧ пра́баба ,
тᲂбо́ю бцⷣе дв҃о . и҆ сѐ ны́нѣ жены̀ стра́жꙋтъ по хрⷭ҇тѐ , и҆ ра́дꙋетсѧ
є҆стество̀ же́нскᲂе , ꙗ҆́кᲂже первᲂмꙋ́ченица вᲂпїе́тъ ѳе́кла . и҆ ны́нѣ .
Никто́же пᲂги́бе чⷭ҇таѧ , и҆́же вѣ́ры наде́жꙋ стѧжа́въ , к̾ тебѣ̀
правᲂсла́внѡ , дв҃о мт҃и бж҃їѧ , ра́звѣ то́чїю за́вистїю ѿмета́ѧисѧ , твᲂемꙋ̀
непᲂкланѧ́тисѧ ѻ҆́бразꙋ начерта́ннᲂмꙋ .
пѣ́снь , ѳ҃ . і҆рмо́съ . Ꙗ҆́же пре́жде сл҃нца , свѣти́льника бг҃а
вᲂз̾сїѧ́вша , пло́тїю к̾ на́мъ прише́дша и҆з̾ бᲂкꙋ̀ дв҃чꙋ , неи҆зрече́ннѡ
вᲂчл҃чьшасѧ , бл҃гᲂслᲂве́ннаѧ чⷭ҇таѧ , тѧ̀ бцⷣе велича́емъ . Приклᲂни́ ми
ᲂу҆́хо твᲂѐ дв҃о прⷭ҇та́ѧ , вᲂспѣва́ющемꙋ вѣ́рнѡ , пᲂхва́льными слᲂвесы̀ твᲂѐ
ржⷭ҇тво̀ , и҆ ꙗ҆́кѡ да́ры вдᲂви́чи , пѣ́снь ᲂу҆сте́нъ мᲂи́хъ прїе́мши , прᲂсѝ
грѣхо́въ мᲂи́хъ прᲂще́нїѧ . Сїѧ́етъ дᲂбро́та твᲂѧ̀ , блиста́етъ чистᲂты̀
свѣ́тлᲂсть чⷭ҇таѧ , и҆ пресїѧ́етъ па́че си́хъ твᲂѐ ржⷭ҇тво̀ , бг҃ъ бо твᲂре́цъ
сл҃нцꙋ и҆ тва́ри все́й , и҆з̾ тебѐ рᲂди́сѧ . тѣ́мъ тѧ̀ всѝ велича́емъ .
сла́ва . Свѣ́тъ тѧ̀ чистᲂтѣ̀ , и҆ же́злъ дв҃ства , и҆ мт҃рь бж҃їю ,
бг҃ᲂлѣ́пнѡ в̾ пѣ́снехъ пᲂю́ще бцⷣе , со́ гласᲂмъ хвале́нїѧ мо́лимсѧ ,
в̾ дв҃ствѣ ᲂу҆твердѝ на́съ , и҆ в̾ чистᲂтѣ̀ сᲂхранѝ . и҆ ны́нѣ . Тѣ́ло и҆
дш҃ꙋ нескве́рнꙋ , бг҃ᲂви сᲂблю́дши чⷭ҇таѧ , цр҃ь вᲂсхᲂтѣ̀ твᲂе́й дᲂбро́тѣ
хрⷭ҇то́съ , и҆ мт҃рь свᲂегѡ̀ вᲂплᲂще́нїѧ пᲂказа̀ , мр҃і́е пресла́внаѧ ,
спасе́нїе мᲂѐ сᲂверша́ѧ . та́же , дᲂсто́йнѡ є҆́сть . и҆ про́чеє ,
ѡ҆бы́чно . и҆ ѿпꙋ́стъ .
Во вто́рникъ , на ᲂу҆́трени . по а҃ , стихᲂло́гїи . сѣда́льны , пᲂкаѧ́нны .
гла́съ , в҃ . Ꙗ҆́кѡ во́лны мᲂрскі́ѧ вᲂста́ша на мѧ̀ , без̾зако́нїѧ мᲂѧ̀ , и҆
ꙗ҆́кѡ кᲂра́бль в̾ пꙋчи́нѣ а҆́зъ є҆ди́нъ пᲂгрꙋжа́юсѧ , сᲂгрѣше́ньми мно́гими . но
в̾ ти́хᲂе приста́нище пᲂкаѧ́нїѧ наста́ви мѧ гдⷭ҇и , и҆ спаси́ мѧ . сти́хъ :
гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ .
А҆́зъ є҆́смь дре́во непло́днᲂе гдⷭ҇и , пᲂкаѧ́нїѧ плᲂда̀ непринесо́хъ ѿ ню́дъ ,
и҆ пᲂсѣче́нїѧ бᲂю́сѧ , и҆ ѻ҆гнѧ̀ ѻ҆́нᲂгѡ ᲂу҆страша́юсѧ не ᲂу҆гаси́магѡ . тѣ́мже
тѧ̀ мᲂлю̀ , пре́жде ѻ҆́нᲂѧ бѣды̀ , ѡ҆брати́въ и҆ спаси́ мѧ . сла́ва , и҆
ны́нѣ , боⷢ҇ . Бжⷭ҇твенᲂмꙋ є҆стествꙋ̀ бы́хᲂмъ прича́стницы , тᲂбо́ю бцⷣе дв҃о ,
бг҃а бо на́мъ вᲂплᲂще́нна рᲂдила̀ є҆сѝ . тѣ́мже по́ дᲂлгꙋ тѧ всѝ бл҃гᲂче́стнѡ
велича́емъ .
по в҃ , стихᲂло́гїи . сѣда́льны , гла́съ , в҃ . Пᲂми́лꙋй мѧ бж҃е , речѐ
дв҃дъ , и҆ а҆́зъ тебѣ̀ вᲂпїю̀ , сᲂгрѣши́хъ сп҃се , мᲂѧ̀ грѣхѝ пᲂкаѧ́нїемъ
ѡ҆чи́стивъ пᲂми́лꙋй мѧ . сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ ,
ни гнѣ́вᲂмъ твᲂи́мъ пᲂкажѝ менѐ . Пᲂми́лꙋй мѧ бж҃е пᲂми́лꙋй мѧ , ѡ҆ двᲂю̀
грѣхꙋ̀ пла́кашесѧ дв҃дъ , а҆́зъ же ѡ҆ тма́хъ прегрѣше́нїи вᲂпїю́ ти . ѻ҆́нъ
пᲂсте́лю слеза́ми ѡ҆мака́ше , а҆́зъ же ка́плю є҆ди́нꙋ не притѧжа́хъ . ѿча́ѧвсѧ
и҆ мᲂлю̀ , пᲂми́лꙋй мѧ бж҃е по вели́цѣй млⷭ҇ти твᲂе́й . сти́хъ : ди́венъ
бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . А҆пⷭ҇ли прᲂро́цы и҆ мч҃нцы ,
ст҃лїє прпⷣбнїи и҆ пра́веднїи , и҆́же до́брѣ по́двигъ скᲂнча́вше , и҆ вѣ́рꙋ
сᲂблю́дше дерзнᲂве́нїе и҆мꙋ́ще ко сп҃сꙋ , мо́лимъ вы̀ , ѡ҆ на́съ тᲂго̀ мᲂли́те
ꙗ҆́кѡ бл҃га , спастѝ дш҃а на́ша . сла́ва , и҆ нн҃ѣ , боⷢ҇ . Бцⷣе непре́зри
менѐ , тре́бꙋюща застꙋпле́нїѧ , и҆ по́мᲂщи ꙗ҆́же ѿ тебѐ , на тѧ́ бо ᲂу҆пᲂва̀
дш҃а мᲂѧ̀ , пᲂми́лꙋй мѧ .
по г҃ , стихᲂло́гїи . сѣда́ленъ , гла́съ , в҃ . Милᲂсе́рдїѧ ра́ди млⷭ҇ти
бл҃же , спастѝ свᲂѐ сᲂзда́нїе хрⷭ҇тѐ прїи́де , прекло́нь нб҃са̀
схᲂжде́нїемъ свᲂи́мъ . тѣ́мже стра́шнᲂе смᲂтре́нїе твᲂѐ пᲂю́ще вᲂпїе́мъ
тѝ , мᲂльба́ми прⷣтчи твᲂегѡ̀ ѡ҆чище́нїе грѣхо́въ пᲂда́ждь на́мъ , ꙗ҆́кѡ
є҆ди́нъ бл҃гᲂꙋтро́бенъ . сла́ва , и҆ нн҃ѣ , боⷢ҇ . Пред̾ста́тельнице те́плаѧ
хрⷭ҇тїа́нѡмъ , сн҃ꙋ свᲂемꙋ̀ мᲂли́сѧ при́снѡ бцⷣе , всѧ́кᲂгѡ ѕлᲂдѣ́йства и҆
ѡ҆гᲂрче́нїѧ и҆зба́вити на́съ бᲂрца̀ , и҆ да́ти на́мъ прᲂще́нїе , в̾ ни́хже
сᲂгрѣши́хᲂмъ , за милᲂсе́рдїе щедро́тъ , твᲂи́ми мᲂли́твами мт҃и дв҃о .
Кано́нъ ᲂу҆миле́нїѧ , ко́ гдⷭ҇ꙋ на́шемꙋ і҆с҃ꙋ хрⷭ҇тꙋ̀ , и҆ ст҃ы́мъ
мч҃нкѡмъ , є҆мꙋ́же краегране́сїе си́це , мᲂи́мъ рыда́нїемъ , вмѣще́нїе ѽ
сп҃се пᲂдава́еши . твᲂре́нїе і҆ѡ́сифᲂво . гла́съ , в҃ . пѣ́снь , а҃ .
і҆рмо́съ . Мѡѷсе́йскꙋю пѣ́снь вᲂспрїи́мши , вᲂзᲂпі́й дш҃е , пᲂмо́щникъ и҆҆
пᲂкрᲂви́тель , бы́сть мнѣ̀ во спасе́нїе , се́й ми є҆́сть бг҃ъ мо́й , и҆҆
прᲂсла́влю є҆гѡ̀ . запѣ́въ : сла́ва тебѣ̀ бж҃е на́шъ , сла́ва тебѣ̀ . Себѐ
бра́тїе пре́же и҆схо́да пла́чемъ го́рькѡ , ꙗ҆́кѡ да слеза́ми до́блими ,
ᲂу҆бѣжи́мъ тᲂгда̀ сле́зъ мꙋче́нїѧ , ничто́же и҆мꙋ́щихъ пᲂле́знѡ . Тма́ми
хрⷭ҇тѐ ѡ҆бѣща́хсѧ пᲂка́ѧтисѧ , но нечꙋ́вственꙋ дш҃ꙋ и҆мѣ́ѧ , въ прегрѣше́нїѧ
впа́даю , ᲂу҆ще́дри сп҃се не́мᲂщь мᲂю̀ . мⷱ҇ꙋ . И҆́же мꙋче́нїѧ ѻ҆́гнь
претерпѣ́вше , бжⷭ҇твенымъ ѡ҆рᲂше́нїемъ стрⷭ҇тᲂно́сцы хрⷭ҇то́вы , ѻ҆гнѧ̀
гее́нны и҆зба́вите мѧ , в̾ страсте́хъ лю́тыхъ слежа́щаго . мⷱ҇ꙋ . Крѣ́пцы
на врагѝ ꙗ҆́вльшесѧ си́лᲂю бжⷭ҇твенᲂю , не крѣ́пᲂстнꙋю и҆́хъ низ̾лᲂжи́сте
си́лꙋ , мч҃нцы хрⷭ҇то́вы дᲂстᲂблаже́ннїи . боⷢ҇ . Пламенᲂно́снаѧ клещѐ ,
ю҆́же и҆са́їѧ ви́дѣ и҆нᲂгда̀ , веще́ственныѧ се́рдца мᲂегѡ̀ стра́сти дв҃о мт҃и
пᲂпалѝ , и҆ до кᲂнца̀ пᲂтребѝ .
И҆́нъ кано́нъ , ко ст҃о́мꙋ и҆ честнѣ́йшемꙋ прⷪ҇ркꙋ , і҆ѡа́ннꙋ прⷣтчи .
є҆мꙋ́же краегране́сїе си́це . крⷭ҇тлю мᲂльбꙋ̀ прїимѝ . твᲂре́нїе
і҆ѡ́сифᲂво . і҆рмо́съ . Во глꙋбинѣ̀ пᲂтᲂпѝ . запѣ́в̾ : ст҃ы́и вели́кїи
і҆ѡа́нне прⷣтче гдⷭ҇ень , мᲂлѝ бг҃а ѡ҆ на́съ . Крⷭ҇тлю и҆ прⷣтче хрⷭ҇то́въ ,
пᲂгрꙋжа́емыи всегда̀ сластьмѝ тѣле́сными , ᲂу҆́мъ мо́й ᲂу҆крѣпѝ , и҆ во́лны
стрⷭ҇те́й ᲂу҆крᲂтѝ , ꙗ҆́кѡ да в̾ тишинѣ̀ бжⷭ҇твенѣй бы́въ , прⷭ҇нѡ сла́влю
тѧ . Недᲂꙋмѣ́ннымъ прᲂсвѣти́всѧ прᲂсвѣще́нїемъ , ꙗ҆́кѡ мнᲂгᲂсвѣ́тлаѧ ѕвѣзда̀ ,
мы́сленᲂмꙋ вᲂсто́кꙋ пред̾те́клъ є҆сѝ . и҆́мже ѡ҆зари́тисѧ се́рдцꙋ мᲂемꙋ̀
крⷭ҇тлю мᲂлѝ , ѡ҆мраче́ннᲂмꙋ всѣ́ми бѣсо́вскими прило́ги . Въ рѣцѣ̀ бе́зднꙋ
и҆нᲂгда̀ всемꙋ́дре пᲂгрꙋзи́въ , пᲂто́пъ сᲂдѣва́ющꙋю бл҃гᲂда́тїю всегѡ̀
престꙋпле́нїѧ . но мᲂлю́сѧ , пᲂто́ки пребᲂга́те мᲂи́хъ прегрѣше́нїи
и҆з̾сꙋшѝ , бжⷭ҇твенымъ хᲂда́тайствᲂмъ си . боⷢ҇ . Чи́стыѧ дв҃ы и҆́же бг҃а
вᲂплᲂти́вшїѧ , сро́дникъ бы́лъ є҆сѝ бл҃же́нне прⷣтче , с̾ не́ю же тѧ чте́мъ и҆
мо́лимъ , и҆́же в̾ нбⷭ҇нѣмъ хра́мѣ твᲂе́мъ нн҃ѣ живꙋ́щїи , хра́мы и҆ на́съ
сᲂтвᲂрѝ дх҃ꙋ ст҃о́мꙋ .
пѣ́снь , г҃ . і҆рмо́съ . Непло́днагѡ ми ᲂу҆ма̀ , плᲂдᲂно́сна бж҃е
ꙗ҆́вствꙋй , дѣ́лателю дш҃а́мъ , и҆҆ насади́телю бл҃ги́хъ млрⷭ҇дїемъ сѝ .
Лѣ́нᲂстнымъ дрема́нїемъ , ѡ҆тѧгᲂти́хъ дш҃ꙋ , вᲂз̾дви́гни мѧ хрⷭ҇тѐ
ко бдѣ́нїю пᲂкаѧ́нїѧ , твᲂри́ти твᲂѧ̀ пᲂвелѣ́нїѧ . Не ꙗ҆вѝ менѐ і҆с҃е
в̾ де́нь стра́шныи пᲂсра́млена , но пре́жде кᲂнца̀ ѡ҆брати́въ , лю́тыѧ и҆зба́ви
мꙋ́ки . мⷱ҇ꙋ . И҆́же страсте́мъ хрⷭ҇то́вымъ ᲂу҆пᲂдо́бльшесѧ до́брѣ ,
бжⷭ҇твеными ѻ҆бразы̀ страстᲂте́рпцы честні́и , дш҃и мᲂеѧ̀ го́рькїѧ стра́сти
и҆сцѣли́те . мⷱ҇ꙋ . Да и҆́же на́ нб҃сѣхъ , прⷭ҇нᲂсꙋ́щнымъ бл҃ги́мъ
спᲂдо́битесѧ , всѧ́кᲂе и҆скꙋше́нїе лю́тыхъ , стрⷭ҇тᲂно́сцы на землѝ крѣ́пкѡ
претерпѣ́сте . боⷢ҇ . Млеко́мъ пита́вши матерᲂлѣ́пнѡ , пита́телѧ всѣ́мъ , и҆
но́сиши сегѡ̀ на́ рꙋкꙋ чⷭ҇таѧ , и҆́же всѧ́ческаѧ рꙋко́ю нᲂсѧ́щагѡ всегда̀ .
и҆́нъ , і҆рмо́съ . На ка́мени мѧ . И҆сцѣлѝ стрꙋ́пы дш҃и мᲂеѧ̀ , и҆ ᲂу҆́мъ
мо́й ѡ҆мраче́ныи лѣ́нᲂстїю ѡ҆зарѝ , бжⷭ҇твенымъ сѝ хᲂда́тайствᲂмъ гдⷭ҇нь
прⷣтче , и҆ всѧ́кихъ и҆зба́ви мѧ сᲂпрᲂти́вныхъ ѡ҆бстᲂѧ́нїи мᲂлю́сѧ .
Непло́дствїе раз̾рѣши́лъ є҆сѝ ро́ждьшѣй , рᲂди́всѧ бж҃їимъ прᲂмышле́нїемъ
премꙋ́дре прⷪ҇рче , непло́днᲂе ᲂу҆́бѡ срⷣце мᲂѐ , плᲂдᲂно́сно ны́нѣ сᲂдѣ́лай
хᲂда́тайствᲂмъ сѝ , дᲂбрᲂдѣ́телей принᲂси́ти и҆зраще́нїѧ . И҆́же
любо́вїю ти сᲂзда́выи бжⷭ҇твеныи хра́мъ , вы́шнѧгѡ житїѧ̀ ᲂу҆лꙋчи́ти мᲂлѝ ,
и҆́же вѣ́рᲂю в̾ хра́мѣ твᲂе́мъ слꙋжа́щихъ , хра́мы дх҃ꙋ бжⷭ҇твенᲂмꙋ сᲂтвᲂрѝ ,
крⷭ҇тлю и҆ прⷣтче мᲂли́твами сѝ . боⷢ҇ . Веселѧ́шесѧ прⷣтча в̾ лᲂжесна́хъ
нᲂси́мь мт҃рьнихъ , и҆ пᲂклᲂнѧ́шесѧ гдⷭ҇ꙋ нᲂси́мꙋ во ᲂу҆тро́бѣ твᲂе́й
бг҃ᲂра́дᲂваннаѧ . є҆го́же мᲂлѝ , ѿ всѧ́кїѧ ско́рби и҆зба́вити на́съ .
пѣ́снь , д҃ . і҆рмо́съ . Є҆́же ѿ дв҃ы твᲂѐ ржⷭ҇тво̀ прᲂро́къ пред̾зрѧ̀ ,
прᲂпᲂвѣ́даше вᲂпїѧ̀ , слꙋ́хъ тво́й ᲂу҆слы́шахъ и҆҆ ᲂу҆бᲂѧ́хсѧ , ꙗ҆́кѡ ѿ ю҆́га
и҆з̾ гᲂры̀ ст҃ы́ѧ присѣ́нныѧ , прише́лъ є҆сѝ хрⷭ҇тѐ . Ѡ҆кра́дена ѿ всю́дꙋ ,
и҆ ѡ҆бнища́вша мѧ сло́ве , зрѧ̀ вра́гъ пᲂги́бель мᲂю̀ ра́дꙋетсѧ , и҆́же ле́сти
мꙋдре́цъ . гдⷭ҇и сла́вѣ , и҆ ѡ҆бᲂгати́телю ᲂу҆бо́гимъ , тᲂго́ мѧ ѕлᲂдѣ́йствїѧ
и҆змѝ . Рꙋ́цѣ и҆ ѻ҆́чи ѡ҆скверни́хъ гдⷭ҇и , сᲂдѣва́ю ꙗ҆́же недᲂсто́итъ
твᲂри́ти , и҆ въ ꙗ҆́рᲂсть пᲂдвиго́хъ щедро́ты твᲂѧ̀ , и҆з̾жи́въ твᲂѐ
дᲂлгᲂтерпѣ́нїе . но ᲂу҆ще́дривъ спаси́ мѧ ꙗ҆́кѡ бл҃гъ . мⷱ҇ꙋ . Ко́ль ди́венъ
бг҃ъ на́шъ во ст҃ы́хъ є҆́сть , вѣ́рꙋющихъ в̾ негѡ̀ , и҆ разᲂрѧ́ющихъ
и҆стꙋка́нныѧ пᲂги́бели , и҆ наслѣ́дᲂвавшихъ ра́йскᲂе прᲂстра́нство , ѿ него́ же
дре́вле и҆згна́нъ бы́сть а҆да́мъ . мⷱ҇ꙋ . Тече́нїемъ кро́ве бл҃же́ннїи ,
ᲂу҆ста́висте кро́вь принᲂси́мꙋю и҆нᲂгда̀ , бѣсо́мъ всѣ́мъ пᲂги́бельнꙋю ,
на пᲂги́бель прельще́нымъ принᲂсѧ́щимъ чл҃кѡмъ . сегѡ̀ ра́ди ᲂу҆бл҃жа́етесѧ
при́снѡ . боⷢ҇ . Наꙋчи́всѧ дх҃ᲂмъ , прᲂро́ческїи пресла́вныи ли́къ , є҆́же
па́че ᲂу҆ма̀ твᲂю̀ та́йнꙋ бцⷣе , различнᲂѡбра́знѡ сїю̀ пред̾начерта́ютъ ,
сщ҃е́нными ѻ҆бразы̀ , и҆́мже кᲂне́цъ зри́мъ и҆з̾ дале́ча .
и҆́нъ , і҆рмо́съ . Прише́ствᲂвавъ ѿ дв҃ы . Прекло́ньшемꙋ нб҃са̀ , и҆
чл҃кѡмъ примѣси́вшꙋсѧ , главꙋ̀ преклᲂни́лъ є҆сѝ десни́цею свᲂе́ю пребᲂга́те
є҆ю́же мѧ сᲂхранѝ , во смире́нїи сᲂблюда́ѧ срⷣце мᲂѐ . Пꙋсты́нѧ тебѐ
гражани́на непрᲂхо́днаѧ и҆мꙋ́щи , бл҃же́нне прⷣтче . тѣ́мже вᲂпїю́ ти , пꙋ́стꙋ
всѧ́ческихъ бжⷭ҇твеныхъ дѣѧ́нїи бы́вшꙋ , дш҃ꙋ мᲂю̀ сᲂтвᲂрѝ плᲂдᲂно́снꙋ .
Зако́нъ бжⷭ҇твеныи ᲂу҆правлѧ́ѧ , без̾зако́ннѡ закала́ешисѧ . тѣ́мже ти
мᲂлю́сѧ , без̾зако́ннꙋюща мѧ̀ всегда̀ , и҆ пᲂтᲂплѧ́ема бѣсо́вскими прельще́ньми
и҆спра́ви . Сᲂзда́въ са́мъ себѐ хра́мъ влⷣцѣ цр҃ю , к̾ бжⷭ҇твенымъ жили́щемъ
ны́нѣ преше́лъ є҆сѝ прⷣтче . и҆́хже пᲂлꙋчи́ти мᲂлѝ , и҆́же тебѣ̀ прест҃ы́и
хра́мъ вᲂз̾дви́гшагѡ . боⷢ҇ . При́зри на мѧ̀ бᲂлѧ́щаго всенепᲂро́чнаѧ , и҆
разрѣшѝ стрⷭ҇ти мᲂѧ̀ лю́тыѧ , и҆ не ᲂу҆до́бь и҆сцѣ́льныѧ , ꙗ҆́кѡ да велича́ю
тѧ , вᲂзвели́чившꙋю всѐ чл҃чество .
пѣ́снь , є҃ . і҆рмо́съ . Мглꙋ̀ дш҃и мᲂеѧ̀ сп҃се мо́й ѿгна́въ , свѣ́тᲂмъ
запᲂвѣде́й твᲂи́хъ ѡ҆зари́ мѧ , є҆ди́не цр҃ю смире́нїѧ . Грѣхо́мъ примѣша́юсѧ
безꙋ́мнѡ ко грѣхо́мъ , и҆ вᲂсклᲂне́нїѧ нѣ́сть в̾ сме́рти мᲂе́й . ᲂу҆вы̀ мнѣ̀
ка́кѡ ꙗ҆влю́сѧ хрⷭ҇то́ви . Бѣдꙋ̀ прїе́млю ꙗ҆́кѡ кᲂра́бль , пᲂгꙋби́хъ свᲂѐ
бре́мѧ є҆́же ми дадѐ ще́дре . и҆ нн҃ѣ ѡ҆бнища́въ зᲂвꙋ̀ , непре́зри менѐ
хрⷭ҇тѐ . мⷱ҇ꙋ . Ꙗ҆́кѡ сла́вꙋ презрѣ́вше , ни́жнюю и҆ пᲂпира́емꙋю , небе́снѣй
страстᲂте́рпцы спᲂдо́бистесѧ сла́вѣ , пребыва́юще со хрⷭ҇то́мъ . мⷱ҇ꙋ . Любвѐ
ꙗ҆́же к̾ пло́ти , ᲂу҆́мъ ѿлꙋчи́вше вѣ́рᲂю , мꙋ́ки присво́исте любе́знѡ
стрⷭ҇тᲂте́рпцы , присвᲂѧ́еми хрⷭ҇тꙋ̀ . боⷢ҇ . Данїи́лъ тѧ го́рꙋ ве́лїю
дх҃ᲂмъ зрѧ́ше бцⷣе , ѿ неѧ́ же ка́мень ᲂу҆сѣче́сѧ , сᲂкрꙋша́ѧ бѣсо́въ
и҆стꙋка́ннаѧ .
и҆́нъ , і҆рмо́с̾ . Прᲂсвѣще́нїе во тмѣ̀ . Втече́нїихъ і҆ѡрда́нскїѧ
вᲂды̀ неи҆стлѣ́нїѧ , прⷣтче крⷭ҇ти́въ хрⷭ҇та̀ , мᲂлѝ и҆стᲂче́нїѧ страсте́й
мᲂи́хъ и҆з̾сꙋши́ти , и҆ пᲂто́ки пи́щныѧ наслѣ́дᲂвати , и҆ пра́ведныхъ кра́снаго
ра́дᲂванїѧ . Оу҆́же рыда́ю и҆ сᲂдрага́юсѧ стра́хᲂмъ , и҆ недᲂꙋмѣ́нїемъ
всегда̀ сᲂдержи́мъ є҆́смь , пᲂмышлѧ́ю мᲂѧ̀ дѣѧ́нїѧ , и҆ бꙋ́дꙋщагѡ сꙋда̀
ᲂу҆́жасъ . бл҃гᲂꙋтро́бне гдⷭ҇и пᲂщади́мѧ , твᲂегѡ̀ крⷭ҇тлѧ мᲂле́нїемъ .
Зако́нъ пᲂлага́ѧ лю́демъ спасе́ныи , в̾ раска́ѧнїи прⷣтче , прегрѣше́нїи
бы́вшимъ , пᲂсредѣ̀ зако́на и҆ бл҃гᲂда́ти ста́въ . сегѡ̀ ра́ди мо́лимъ тѧ̀ ,
ѻ҆бразы̀ пᲂкаѧ́нїѧ на́съ прᲂсвѣтѝ . Да́ждь ми вре́мѧ пᲂкаѧ́нїѧ ,
ᲂу҆ны́нїемъ преше́дшеє всѐ , и҆з̾жи́вшемꙋ бл҃гᲂда́телю , и҆мѣ́ѧ на сѐ
мᲂлѧ́щаго тѧ̀ сло́ве , і҆ѡа́нна вели́каго прⷣтчꙋ , и҆ пᲂкаѧ́нїѧ всекра́снаго
прᲂпᲂвѣ́дника . боⷢ҇ . Навѣ́тми и҆ лᲂвле́нїи льсти́вагѡ ᲂу҆мертви́хсѧ ,
влⷣчце всенепᲂро́чнаѧ ѡ҆живи́ мѧ , ро́ждьшаѧ бцⷣе всѣ́мъ живо́тъ сᲂста́вныи ,
да тѧ̀ пᲂю̀ бл҃гᲂче́стнѡ всепѣ́тꙋю .
пѣ́снь , ѕ҃ . і҆рмо́съ . Во глꙋбинѣ̀ грѣхо́внѣй сᲂдержи́мь є҆́смь сп҃се ,
и҆҆ в̾ пꙋчи́нѣ жите́йстѣй ѡ҆бꙋрева́емь . но ꙗ҆́кᲂже прᲂро́ка і҆ѡ́нꙋ ,
и҆з̾ глꙋбины́ мѧ ѿ страсте́й , вᲂз̾ведѝ и҆҆ спаси́ мѧ . Ꙗ҆́кᲂже дре́вле
ханане́ѧ зᲂвꙋ́ ти хрⷭ҇тѐ , сн҃е дв҃дᲂвъ пᲂми́лᲂвавъ ᲂу҆ще́дри мѧ . дш҃ꙋ бо
стра́ждꙋщꙋ и҆́мамъ в̾ лю́тыхъ , и҆ сама̀ въ чꙋ́вство прїитѝ нехо́щетъ .
Смꙋща́ютъ мѧ без̾мѣ́рныѧ во́лны стрⷭ҇те́й , ꙗ҆́кᲂже мо́рю дре́вле запрети́лъ
є҆сѝ , и҆ спасѐ ст҃ы́ѧ ᲂу҆ченикѝ свᲂѧ̀ , и҆ менѐ і҆с҃е вᲂз̾ведѝ и҆ спаси́
мѧ . мⷱ҇ꙋ . Оу҆диви́шасѧ а҆́нг҃льстїи беспло́тнїи ли́цы , терпѣ́нїю ва́шемꙋ
и҆́же в̾ тѣлесѝ . и҆ пᲂхвали́ша пᲂдаю́щаго ва́мъ честні́и страда́льцы ,
си́лꙋ же и҆ дѣ́лᲂмъ вᲂздаѧ́нїѧ . мⷱ҇ꙋ . Ѡ҆блива́еми крᲂве́й свᲂи́хъ
стрꙋѧ́ми , и҆ ѻ҆́чїю и҆з̾бᲂда́еми мч҃нцы , пᲂмерза́еми стꙋ́денїю лю́тѣ ,
к̾ теплᲂтѣ̀ жи́зни преи҆до́сте , вᲂспѣва́юще хрⷭ҇та̀ . боⷢ҇ . Ꙗ҆́кѡ трапе́за
хлѣ́бъ вмѣсти́вши та́йныи , ѿ него́ же ꙗ҆́дъше не к̾ тᲂмꙋ̀ а҆́лчемъ всепѣ́таѧ ,
вѣ́дꙋщїи тѧ̀ хрⷭ҇тꙋ̀ всѣ́хъ бг҃ꙋ рᲂди́тельницꙋ , и҆ пита́тельницꙋ ꙗ҆́кѡ
вᲂи́стинꙋ .
и҆́нъ , і҆рмо́съ . Въ бе́зднѣ грѣхо́внѣй . Гла́съ сло́ва прᲂпᲂвѣ́давыи ,
всѣ́хъ гла́сы прїима́ти прᲂсѝ , и҆ грѣхѡ́въ прᲂще́нїе дарᲂва́ти , и҆́же
с̾ любо́вїю пᲂю́щимъ тѧ̀ . Сᲂкрꙋше́нїе дш҃и мᲂеѧ̀ и҆сцѣлѝ , и҆ грѣхѡ́въ
бре́мѧ разрѣшѝ , и҆ па́че наде́жди спаси́ мѧ , мл҃твами сѝ бл҃же́нне прⷣтче .
І҆с҃а є҆го́же рꙋко́ю свᲂе́ю крⷭ҇ти́лъ , прⷣтче мᲂлѝ , рꙋко́ю и҆зба́вити мѧ
грѣхѝ взима́ющаго , к̾ вы́шнемꙋ рꙋ́цѣ всегда̀ вᲂз̾двиза́ющаго . боⷢ҇ .
Дрема́нїе лѣ́нᲂстнᲂе ѡ҆держи́тъ мѧ , со́нъ грѣхо́вныи тѧгᲂти́тъ срⷣце мᲂѐ ,
твᲂи́мъ пречи́стаѧ бдѣ́ннымъ хᲂда́тайствᲂмъ , вᲂздви́гни и҆ спаси́ мѧ .
пѣ́снь , з҃ . і҆рмо́съ . Херꙋви́мᲂмъ пᲂдо́бѧщесѧ ѻ҆́трᲂцы , в̾ пещѝ
ликᲂвствᲂва́хꙋ вᲂпїю́ще , бл҃гᲂслᲂве́нъ є҆сѝ бж҃е , ꙗ҆́кѡ и҆́стиннᲂю и҆҆
сꙋдо́мъ наве́лъ є҆сѝ сїѧ̀ всѧ̀ грѣ́хъ ра́ди на́шихъ , препѣ́тыи и҆҆
препрᲂсла́вленныи во́ вѣки всѧ̀ . Зако́ны твᲂѧ̀ ѡ҆ста́вихъ , пᲂкᲂри́хсѧ
ско́тскимъ жела́нїемъ , дѣ́ю непᲂдо́бнаѧ хрⷭ҇тѐ , и҆ ѡ҆сꙋ́етихсѧ в̾ безꙋ́мїи
мᲂе́мъ , ꙗ҆́кѡ и҆́нъ никто́же ѿ чл҃къ на землѝ , не ѡ҆ста́ви ᲂу҆́бѡ менѐ сп҃се
пᲂги́бнꙋти , чл҃кᲂлю́бїѧ ра́ди . Въ без̾зако́нїихъ гдⷭ҇и , сѐ а҆́зъ зача́тъ
є҆́смь , ꙗ҆́кᲂже дв҃дъ зᲂвꙋ̀ , и҆ ро́ждьсѧ на землѝ . и҆ ꙗ҆́кѡ прᲂгнѣ́ваѧи
ра́бъ , прᲂгнѣ́вахъ тебѐ є҆ди́нᲂгѡ сꙋ́щаго бг҃а и҆́стиннагѡ , не ѡ҆ста́ви
ᲂу҆́бѡ менѐ сп҃се пᲂги́бнꙋти , чл҃кᲂлю́бїѧ ра́ди . мⷱ҇ꙋ . Мꙋ́жески
пᲂдвиза́сѧ сᲂбо́ръ страда́льческїи , и҆ чꙋ́днѡ вѣнча́сѧ живᲂно́снᲂю десни́цею ,
ꙗ҆́кѡ вᲂи́стинꙋ бг҃а вᲂзлюбѝ , и҆́же всѧ̀ сᲂтво́ршаго сло́вᲂмъ . и҆ ны́нѣ
на́ нб҃сѣхъ ра́дꙋѧсѧ наслажда́етсѧ , бжⷭ҇твенагѡ наслажде́нїѧ . мⷱ҇ꙋ .
Ѻ҆че́съ и҆з̾бᲂде́нїе , и҆ ѿсѣче́нїе рꙋ́къ и҆ но́гъ , бл҃гᲂтече́нїе
к̾ нбⷭ҇нᲂмꙋ сла́внїи пᲂсыла́хꙋ ше́ствїю , препина́юще ше́ствїѧ є҆ди́нᲂгѡ
бᲂрца̀ . тѣ́хъ мᲂли́твами спасѝ всѣ́хъ сло́ве , и҆́же тебѐ славᲂсло́вѧщихъ .
боⷢ҇ . Херꙋви́ми сла́вѧтъ , серафи́ми вᲂспѣва́ютъ , прⷭ҇то́ли вла́сти , и҆
гдⷭ҇ьствїѧ при́снѡ , и҆́же па́че ᲂу҆ма̀ твᲂѐ ржⷭ҇тво̀ , мр҃і́е всепѣ́таѧ ,
ꙗ҆́кѡ є҆ди́на бг҃а ражда́еши пло́тїю . є҆го́же мᲂлѝ чⷭ҇таѧ , всѣ́хъ на́съ
спастѝ , и҆́же любо́вїю чтꙋ́щихъ тѧ̀ .
и҆́нъ , і҆рмо́съ . Бг҃ᲂпрᲂти́вно велѣ́нїе . Вре́дъ и҆́з̾ кᲂрене сѣки́рᲂю
твᲂеѧ̀ мᲂли́твы пᲂсѣка́ющи , пᲂстрека́телѧ стрⷭ҇те́й срⷣца мᲂегѡ̀ , всадѝ
прⷣтче бжⷭ҇твенагѡ без̾стрⷭ҇тїѧ стра́хъ , неразꙋ́мїѧ и҆́же к̾ бг҃ꙋ и҆ всѧ́кїѧ
ѕло́бы ѿ чꙋжа́ѧ мѧ . Во стрꙋѧ́хъ і҆ѡрда́нскихъ ꙗ҆́кѡ крⷭ҇ти́лъ є҆сѝ ,
пᲂкрыва́ющаго вᲂда́ми превы́спреннѧѧ гдⷭ҇а . тᲂго̀ мᲂлѝ , во́дꙋ дарᲂва́ти
бжⷭ҇твенагѡ ᲂу҆миле́нїѧ прⷭ҇нѡ ѻ҆чи́ма мᲂи́ма , сла́вныи прⷣтче . И҆́же ми́ра
в̾зе́млющаго грѣхѝ , а҆́гньца бж҃їѧ прⷣтче прᲂпᲂвѣ́давъ . тᲂго̀ мᲂлѝ
ѿ ко́злищь ча́сти ꙗ҆ви́ти мѧ чꙋ́жда , и҆ десны́мъ є҆гѡ̀ ѻ҆вца́мъ , менѐ
сᲂчета́ти сла́вне . боⷢ҇ . Непло́днаѧ ᲂу҆тро́ба нᲂсѧ́ше тѧ дв҃о , во ᲂу҆тро́бѣ
нᲂси́вшꙋю сло́во вᲂплᲂще́нно . є҆го́же бжⷭ҇твенымъ взыгра́нїемъ , вели́кїи
прⷣтча непло́дныѧ всест҃о́е прᲂзѧбе́нїе пᲂзна́въ , ра́дꙋѧсѧ пᲂклᲂни́сѧ .
пѣ́снь , и҃ . і҆рмо́съ . Въ кꙋпинѣ̀ мѡѷсе́ю дв҃ческᲂе чꙋ́до ,
на сѷна́йстѣй гᲂрѣ̀ прᲂѡбра́жшагѡ дре́вле , по́йте бл҃гᲂслᲂви́те и҆҆
превᲂзнᲂси́те є҆гѡ̀ во́ вѣки . Да ѡ҆бᲂжи́ши на́съ вᲂпло́щьсѧ ми́лᲂстивнѡ ,
неразꙋмѣ́ю ника́кᲂже , пᲂрабᲂща́емь сластьмѝ . твᲂе́ю бл҃гᲂсты́нею ѡ҆брати́ мѧ
хрⷭ҇тѐ , и҆́же всѣ́мъ ѡ҆браще́нїе . Ты̀ па́стырю до́брыи сло́ве ,
заблꙋ́ждьшꙋю на гᲂра́хъ престꙋпле́нїѧ , ѡ҆каѧ́ннꙋю ми дш҃ꙋ ѡ҆брати́въ спасѝ ,
да мѧ̀ до кᲂнца̀ вра́гъ льсти́выи непᲂжре́тъ . мⷱ҇ꙋ . Ста́немъ мꙋ́жески
в̾кꙋ́пѣ , вᲂпїѧ́хꙋ дрꙋ́гъ дрꙋ́гꙋ крѣ́пцыи страда́льцы , ᲂу҆ранѧ́еми лю́тѣ . сѐ
хрⷭ҇то́съ , прᲂстира́етъ на́мъ вѣнцы̀ во́ вѣки . мⷱ҇ꙋ . Крѣ́пкими жи́лами ,
тве́рдыми ва́шими бᲂлѣ́зньми , ᲂу҆дави́сте ѕмі́ѧ , мнѧ́щагᲂсѧ ва́съ льсти́вно
прельсти́ти . и҆ ра́йстѣй пи́щи ꙗ҆ви́стесѧ наслѣ́дницы . боⷢ҇ . Да ѡ҆бᲂжи́тъ
на́съ бг҃ъ , вᲂпло́щьсѧ и҆з̾ чи́стыхъ крᲂве́й твᲂи́хъ , и҆ бы́сть зе́менъ
дв҃о бцⷣе . є҆го́же мᲂлѝ прⷭ҇нѡ ѡ҆ вᲂспѣва́ющихъ тѧ .
и҆́нъ , і҆рмо́съ . Пе́щь ѻ҆́гненна и҆нᲂгда̀ . Да́ждь десни́цꙋ мнѣ̀
на землѝ лежа́щемꙋ , прⷣтче и҆́же десни́цꙋ прᲂсте́ръ , и҆ ѡ҆мы́лъ є҆сѝ вᲂда́ми
нескве́рнаго . и҆ и҆зба́ви мѧ скве́рнъ тѣле́сныхъ , всего́ мѧ ѡ҆чища́ѧ
пᲂкаѧ́нїемъ , и҆ спаси́ мѧ . И҆мꙋ́щи дш҃е вре́мѧ пᲂка́ѧтисѧ , лѣ́нᲂсти
тѧ́жкїи со́нъ ѿтрѧсѝ , и҆ спѣ́шнѡ пᲂбдѝ , вᲂпїю́щи влⷣцѣ свᲂемꙋ̀ , млрⷭ҇де
ᲂу҆ще́дри мѧ , крⷭ҇тлѧ твᲂегѡ̀ мᲂльба́ми . Пᲂто́цы стрⷭ҇те́й , и҆ во́ды ѕло́бы
до дш҃и мᲂеѧ̀ внидо́ша , бл҃же́нне прⷣтче , пᲂтщи́сѧ ско́рѡ и҆зѧ́ти мѧ . и҆́же
рѣчны́ми стрꙋѧ́ми и҆змы́въ , без̾стрⷭ҇тїѧ ти́хꙋю пꙋчи́нꙋ . Оу҆вы̀ мнѣ̀ мно́га
ѕла̀ сᲂтво́ршемꙋ , ᲂу҆вы̀ мнѣ̀ є҆ди́нᲂмꙋ , прᲂгнѣ́вавшемꙋ бг҃а преблага́го .
крⷭ҇тлю хрⷭ҇то́въ пᲂмᲂзи́ ми , и҆ пᲂда́ждь прегрѣше́нїемъ мᲂи́мъ разрѣше́нїе ,
и҆ дᲂлго́въ ми ѿсѣче́нїе хᲂда́тайствᲂмъ сѝ . боⷢ҇ . Вы́шнѧго бг҃а пло́тїю
пᲂро́ждьши , ѿ гно́ѧ мѧ вᲂзведѝ стрⷭ҇те́й , ѡ҆скᲂрблѧ́ющихъ мѧ . и҆ лю́тѣ
всегѡ̀ ѡ҆бнища́вша , бжⷭ҇твеными ѡ҆бᲂгати́ мѧ дᲂбрᲂдѣ́тельми пречⷭ҇таѧ , ꙗ҆́кѡ
да пᲂю́ тѧ спаса́емь . та́же , пѣ́снь бцⷣѣ . вели́читъ дш҃а мᲂѧ̀ .= и҆
=пᲂкло́ны .
пѣ́снь , ѳ҃ . і҆рмо́съ . Зе́менъ кто̀ слы́ша такᲂва́ѧ , лѝ кто̀ ви́дѣ
кᲂли́же , ꙗ҆́кѡ дв҃а ѡ҆брѣ́тесѧ во́ чревѣ и҆мꙋ́щи , и҆҆ без̾ бᲂлѣ́зни млⷣнца
пᲂрᲂдѝ . такᲂво́ ти є҆́сть чꙋ́до , и҆҆ тѧ̀ чⷭ҇таѧ бцⷣе мр҃і́е велича́емъ . Ѽ
что̀ сꙋди́ще твᲂѐ стра́шнᲂе , на не́мже хрⷭ҇тѐ хᲂщꙋ̀ сꙋ́дъ прїѧ́ти ; и҆
не чꙋ́вствꙋю ѿ ню́дъ сегѡ̀ стра́ха , в̾ лѣ́нᲂсти всѧ̀ лѣ́та и҆з̾жи́выи .
ѡ҆брати́ мѧ є҆ди́не всѣ́хъ цр҃ю , и҆́же манасі́ю ѡ҆браще́и сᲂгрѣши́вшагѡ .
Оу҆ста́ви хрⷭ҇тѐ пᲂто́ки вᲂпїю́ ти , без̾мѣ́рныхъ мᲂи́хъ ѕѡ́лъ , стрꙋю̀ мнѣ̀
даѧ̀ слеза́мъ во ᲂу҆мыва́нїе скве́рнамъ , ꙗ҆́же пᲂдъѧ́хъ безꙋ́мїемъ , и҆
спаси́ мѧ млⷭ҇тїю сѝ , спасы́и блꙋдни́цꙋ , ю҆́же ѿ дш҃и пᲂка́ѧвшꙋюсѧ . мⷱ҇ꙋ .
Свѣтᲂза́рнаѧ бжⷭ҇твеныхъ страда́лецъ па́мѧть , ꙗ҆́кѡ сл҃нце на́мъ вᲂсїѧ́вши ,
всѧ̀ кᲂнцы̀ земны́ѧ прᲂсвѣща́етъ . и҆ прᲂгᲂнѧ́етъ бжⷭ҇твенымъ дх҃ᲂмъ , тмꙋ̀
и҆дᲂлᲂбѣ́сїѧ , и҆ страсте́мъ дш҃етлѣ́нныи мра́къ . мⷱ҇ꙋ . По́лкъ че́стенъ
во́инъ пᲂбѣдᲂно́сныхъ , и҆ и҆збра́нныи гра́дъ , сᲂбо́ръ ст҃ы́хъ мꙋ́ченикъ ,
ли́къ бл҃же́нныи , ликᲂстᲂѧ́нїю сᲂчета́сѧ беспло́тныхъ . тѣ́хъ мл҃твами
хрⷭ҇тѐ , всѣ́хъ на́съ црⷭ҇твїѧ твᲂегѡ̀ прича́стники сᲂтвᲂрѝ . боⷢ҇ .
Свѣ́тлыми зарѧ́ми , и҆́же и҆́з̾ чрева твᲂегѡ̀ вᲂсїѧ́вшаго на́мъ , и҆
без̾бо́жїѧ но́щь пᲂтре́бльшагѡ . свѣтᲂрᲂди́тельнице мр҃і́е , прᲂсвѣтѝ всѧ̀ ,
и҆́же вѣ́рᲂю тебѐ чтꙋ́щихъ , и҆ ѿ несвѣти́мыѧ тмы̀ и҆зба́ви , в̾ ча́съ
ѡ҆сꙋжде́нїѧ .
и҆́нъ , і҆рмо́съ . Без̾нача́льна рᲂди́телѧ . Ка́ла мѧ и҆зба́ви грѣхо́внагѡ
гдⷭ҇и , без̾грѣ́шне є҆ди́не и҆ мнᲂгᲂмлⷭ҇тиве , крⷭ҇тлѧ мᲂльба́ми . и҆́же тебѐ
прᲂпᲂвѣ́да всемꙋ̀ ми́рꙋ а҆́гньца бж҃їѧ , в̾зе́млющагѡ чл҃кѡмъ грѣхѝ . Ꙗ҆́кѡ
шипо́къ бл҃гᲂво́ненъ , ꙗ҆́кѡ бл҃гᲂꙋха́нныи кипари́съ , ꙗ҆́кѡ неꙋвѧда́емыи
кри́нъ , ꙗ҆́кѡ ми́ро че́стно , и҆мѣ́ю тѧ гдⷭ҇нь прⷣтче , мᲂи́хъ дѣ́лъ
ѕлᲂсмра́дїѧ , да и҆зба́влюсѧ мл҃твами твᲂи́ми , прибѣга́ѧ пᲂд̾ кро́въ тво́й .
Непло́дствꙋюща мѧ беспло́дїемъ , всебл҃же́нне сᲂтвᲂрѝ дѣ́ла дᲂбрᲂдѣ́телей ,
бл҃гᲂча́дїе при́снѡ принᲂси́ти . ча́до мѧ гдⷭ҇не твᲂрѧ̀ . и҆ прича́стника
бжⷭ҇твенᲂмꙋ црⷭ҇твїю , и҆ ст҃ы́хъ сᲂбо́ръ є҆динᲂжи́телѧ . На́мъ лю́бѧщимъ
тѧ̀ , и҆ вѣ́рᲂю блажа́щимъ , и҆ в̾ бжⷭ҇твенѣмъ хра́мѣ твᲂе́мъ ликꙋ́ющимъ ,
пᲂда́ждь с̾ небесѐ разрѣше́нїе лю́тымъ прⷣтче гдⷭ҇нь , и҆ житїю̀
и҆справле́нїе . боⷢ҇ . Нᲂси́мꙋ вᲂꙋтро́бѣ бг҃ᲂмт҃рьни , и҆́же всѧ̀ нᲂсѧ́щемꙋ
ма́нїемъ , пᲂклᲂни́лсѧ є҆сѝ прᲂро́че . с̾ не́ю же мᲂлѝ , смире́ннѣй
спасти́сѧ дш҃и мᲂе́й , во мно́гаѧ впа́дающи по всѧ̀ днѝ сᲂгрѣше́нїѧ .
та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀
ма́лаѧ . и҆ свѣти́ленъ . и҆ ѱалмы̀ ѡ҆бы́чны .
на стихо́внѣ , стⷯры , пᲂкаѧ́нны . гла́съ , в҃ . Сᲂдѣ́ѧнныхъ мᲂи́хъ ѕѡ́лъ ,
пᲂмышлѧ́ю не вмѣ́стнаѧ , к̾ твᲂи́мъ прибѣга́ю щедро́тамъ , мытарю̀ пᲂдо́бѧсѧ ,
и҆ блꙋдни́цѣ слези́вшей , и҆ блꙋ́днᲂмꙋ сн҃ꙋ . тѣ́мже припа́даю ти млⷭ҇тиве ,
пре́жде да́же не ѡ҆сꙋ́диши мѧ , пᲂщади́ мѧ бж҃е и҆ пᲂми́лꙋй мѧ .
сти́хъ : и҆спо́лнихᲂмсѧ за ᲂу҆́тра . Без̾зако́нїѧ мᲂѧ̀ пре́зри гдⷭ҇и ,
и҆́же ѿ дв҃ы рᲂжде́исѧ . и҆ срⷣце мᲂѐ ѡ҆чи́сти , цр҃кᲂвь сїѐ твᲂрѧ̀ ст҃о́мꙋ
твᲂемꙋ̀ дх҃ꙋ . не ѿве́рзи менѐ ѿ твᲂегѡ̀ лица̀ , без̾мѣ́рнꙋю и҆мѣ́ѧи ве́лїю
млⷭ҇ть .
сти́хъ : и҆ бꙋ́ди свѣ́тлᲂсть . мⷱ҇ꙋ . Крⷭ҇тъ хрⷭ҇то́въ взе́мше ст҃і́и
мч҃нцы , ѻ҆рꙋ́жїе не пᲂбѣди́мᲂе , всю̀ дїа́вᲂлю си́лꙋ ᲂу҆праздни́ша , и҆
прїѧ́ша вѣнцы̀ нбⷭ҇ныѧ , стѣна̀ на́мъ бы́ша , ѡ҆ на́съ мᲂлѧ́щесѧ . сла́ва , и҆
нн҃ѣ , боⷢ҇ . Спасѝ ѿ бѣ́дъ рабы̀ свᲂѧ̀ бцⷣѣ дв҃о , ꙗ҆́кѡ всѝ по́ бз҃ѣ
к̾ тебѣ̀ прибѣга́емъ , ꙗ҆́кѡ к̾ нерꙋши́мѣй стѣнѣ̀ и҆ пред̾ста́тельницѣ .
та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ .
трᲂпа́рь , ст҃о́мꙋ .= сла́ва , и҆ нн҃ѣ , боⷢ҇ . во́гласъ трᲂпарѧ̀ .
пᲂсе́мъ , є҆ктенїѧ̀ . и҆ ча́съ , а҃ . =и҆ ѿпꙋ́стъ .
Во вто́рникъ , бл҃же́нны . гла́съ , в҃ .
Гла́съ ти прино́симъ разбо́йничь , и҆ мо́лимсѧ , пᲂмѧнѝ на́съ гдⷭ҇и
во црⷭ҇твїи свᲂе́мъ .
бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе .
Мно́гаѧ ми прегрѣше́нїѧ пре́зри чл҃кᲂлю́бче , и҆ прича́стника мѧ ꙗ҆вѝ ще́дре
вы́шнѣй свѣ́тлᲂсти .
бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ
всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Пᲂгрꙋзи́выи бе́зднꙋ млрⷭ҇дїѧ
в̾ вᲂда́хъ прⷣтче , ѕѡ́лъ мᲂи́хъ бе́зднꙋ , мл҃твами сѝ и҆з̾сꙋшѝ .
ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . И҆́же
преле́стнаѧ тече́нїѧ , крᲂвьны́ми стрꙋѧ́ми и҆з̾сꙋши́вше , хрⷭ҇то́вы
стрⷭ҇тᲂте́рпцы , дᲂсто́йнѡ сла́вими є҆стѐ .
сла́ва . Без̾нача́льнѣй трⷪ҇цѣ , тебѣ̀ пᲂклᲂнѧ́юсѧ , ѻ҆ц҃ꙋ и҆ сн҃ꙋ и҆ дх҃ꙋ
пра́вᲂмꙋ , є҆стество́мъ тѧ зна́ю є҆ди́ницꙋ про́стꙋ и҆ трисᲂста́внꙋ .
и҆ ны́нѣ . Пло́дъ чре́ва твᲂегѡ̀ чи́стаѧ , и҆́же плᲂдо́мъ пᲂпо́лзшїѧсѧ ,
па́ки ра́еви жи́тели сᲂдѣ́лалъ є҆́сть .