Въ сре́дꙋ ве́черъ , на гдⷭ҇и вᲂзва́хъ , стⷯры . ст҃ы́мъ а҆пⷭ҇лѡмъ . гла́съ , г҃ . =запѣ́въ : ꙗ҆́кѡ ѿ тебѐ ѡ҆чище́нїе є҆́сть . М=ᲂли́твами честны́хъ и҆ бжⷭ҇твеныхъ а҆пⷭ҇лъ твᲂи́хъ , чл҃кᲂлю́бче ще́дрыи , є҆ди́не млⷭ҇тиве , смире́нїе твᲂѐ пᲂда́ждь рабо́мъ си . и҆ спасѝ ѿ бѣ́дъ вᲂспѣва́ющихъ тѧ , и҆ вѣ́рᲂю пᲂкланѧ́ющихсѧ .

ᲂу҆пᲂва̀ дꙋша̀ мᲂѧ̀ на́ гдⷭ҇а . Є҆гда̀ на престо́лѣхъ ѻ҆бᲂю̀ на́десѧтихъ сѧ́дете , со всѣ́хъ сꙋдїе́ю , сꙋди́ти всѧ́кᲂй тва́ри , не ѡ҆сꙋже́на мѧ пᲂкажи́те , и҆ тмы̀ и҆ всѧ́кᲂгѡ тᲂмле́нїѧ и҆зба́вите , бл҃гᲂда́тели мᲂѝ бжⷭ҇твенїи а҆пⷭ҇ли .

да ᲂу҆пᲂва́етъ і҆зра́иль на́ гдⷭ҇а . Ѿ стрѣ́лъ нечести́вагѡ и҆зба́вите мѧ , ꙗ҆́кѡ бж҃їи самᲂви́дцы , ᲂу҆гаша́юще є҆гѡ̀ кᲂва́рства . и҆ ѡ҆рᲂси́те мѧ дх҃о́внᲂю рᲂсо́ю , ва́съ мᲂлю̀ мꙋ́дрїи бл҃гᲂда́тели мᲂѝ , бжⷭ҇твенїи а҆пⷭ҇ли .

та́же , в̾ минѣ́и , стⷯры , ст҃о́мꙋ , а҆́ще и҆́мать . а҆́ще нѣ́сть минѣ́и . и҆́ны , стⷯры , ст҃о́мꙋ и҆ вели́кᲂмꙋ чꙋдᲂтво́рцꙋ нико́лѣ . гла́съ , то́йже . =запѣ́въ : ѿ всѣ́хъ без̾зако́нїи є҆гѡ̀ . О=у҆ѧ́звенъ бы́хъ ѡ҆каѧ́нныи , ѕмі́евымъ ᲂу҆грызе́нїемъ , и҆ лежꙋ̀ пᲂве́рженъ ме́ртвъ без̾дыха́нїѧ , бо́дренᲂю сѝ мл҃твᲂю вᲂста́ви мѧ в̾ско́рѣ , всебл҃же́нне ст҃лю , да сла́влю твᲂю̀ скᲂрᲂпᲂслꙋшли́вꙋю бл҃гᲂда́ть .

пᲂхвали́те є҆гѡ̀ всѝ лю́дїє . Оу҆ма̀ мᲂегѡ̀ пᲂмрачи́вшасѧ ѕлы́ми пᲂмышле́ньми и҆ лежа́ща , пред̾ви́дѧ непреста́етъ ника́кᲂже лᲂвле́ньми на мѧ̀ льстивᲂмꙋ́дрыи . но ꙗ҆́кѡ бг҃ъ ᲂу҆ще́дри и҆ спаси́ мѧ , нико́лы мл҃твами .

и҆ и҆́стина гдⷭ҇нѧ пребыва́етъ во́ вѣки . Вели́кᲂе спасе́нїе всѣ́мъ на́мъ ꙗ҆ви́лсѧ є҆сѝ , нико́лае пребл҃же́нне . и҆збавлѧ́еши бо всѧ́ческихъ бѣ́дъ и҆ напа́стей рабы̀ свᲂѧ̀ , и҆ и҆скꙋше́нїи и҆ недꙋ́гъ и҆ ѡ҆бстᲂѧ́нїи , и҆ врагѡ́въ неви́димыхъ .

сла́ва , и҆ нн҃ѣ , боⷢ҇ . Ве́лїѧ чꙋде́съ твᲂи́хъ чⷭ҇таѧ си́ла , и҆збавлѧ́еши бо ѿ бѣ́дъ , и҆ спаса́еши ѿ сме́рти , и҆ вᲂсхища́еши ѿ напа́стей ненача́емыхъ , и҆ ско́рби раз̾рѣша́еши , и҆ сᲂгрѣше́нїѧ чл҃кѡмъ ѿ є҆́млеши .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стⷯры , а҆пⷭ҇льски . гла́съ , г҃ . Во всю̀ зе́млю и҆зы́де вѣща́нїе ва́ше ст҃і́и а҆пⷭ҇ли , и҆́дᲂльскꙋю пре́лесть раз̾рꙋши́сте , бг҃ᲂразꙋ́мїе прᲂпᲂвѣ́давше . сѐ до́брыи по́двигъ ва́шъ є҆́сть бл҃же́ннїи . сегѡ̀ ра́ди пᲂе́мъ , и҆ славᲂсло́вимъ па́мѧти ва́ша .

сти́хъ : к̾ тебѣ̀ вᲂзведо́хъ . Живᲂно́снагѡ винᲂгра́да сꙋ́ще ло́зїе , сла́внїи а҆пⷭ҇ли , пло́дъ бл҃гᲂче́стїѧ са́мисѧ бг҃ꙋ принесо́сте . тѣ́мже дерзнᲂве́нїе и҆мꙋ́ще к̾ немꙋ̀ , прᲂси́те дарᲂва́ти ми́ръ и҆ ве́лїю млⷭ҇ть дш҃а́мъ на́шимъ .

сти́хъ : пᲂми́лꙋй на́съ гдⷭ҇и , пᲂми́лꙋй на́съ . мⷱ҇ꙋ . Мч҃нцы твᲂѝ гдⷭ҇и вѣ́рᲂю ᲂу҆тве́рждьшесѧ , и҆ наде́жею ᲂу҆крѣ́пльшесѧ , любо́вїю крⷭ҇та̀ твᲂегѡ̀ дш҃е́вно сᲂєди́нившесѧ , вра́жїе мꙋчи́тельство разрꙋши́ша , и҆ ᲂу҆лꙋчи́вше вѣнцы̀ , со беспло́тными мо́лѧтсѧ ѡ҆ дш҃а́хъ на́шихъ .

сла́ва , и҆ ны́нѣ , боⷢ҇ . Вельмѝ сᲂгрѣша́юща мѧ , ѻ҆трᲂкᲂви́це и҆схитѝ вели́кᲂю свᲂе́ю мл҃твᲂю пла́мене нꙋ́жнагѡ , и҆ и҆спра́ви чⷭ҇таѧ твᲂи́ми мᲂльба́ми , ко спасе́нымъ стезѧ́мъ наставлѧ́ющи мѧ , мт҃рьними си мл҃твами .

та́же , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ . во́ гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Въ сре́дꙋ , на па́вечерницѣ . кано́нъ , прест҃ѣ́й бцⷣѣ . гла́съ , г҃ . пѣ́снь , а҃ . і҆рмо́съ . И҆́же во́ды дре́вле ма́нїемъ бжⷭ҇твенымъ , во є҆ди́но со́нмище сᲂвᲂкꙋпѝ , и҆ раздѣли́выи мо́ре і҆и҃льтескимъ лю́демъ . сѐ бг҃ъ на́шъ препрᲂсла́вленъ сы́и , тᲂго̀ є҆ди́нагѡ вᲂспᲂе́мъ , ꙗ҆́кѡ прᲂсла́висѧ . запѣ́въ : прест҃а́ѧ гжⷭ҇е бцⷣе спасѝ на́съ . Стена́нїе ми ᲂу҆́бѡ пᲂда́ждь бцⷣе сᲂкрꙋше́ннᲂе , и҆ сле́зꙋ дш҃е́внꙋ , ꙗ҆́кѡ да мᲂи́хъ мно́гихъ прегрѣше́нїи пла́чꙋсѧ , и҆ со́вѣсти не и҆справле́нїѧ ѻ҆трᲂкᲂви́це , и҆ ᲂу҆мᲂлю̀ млрⷭ҇дїе твᲂѐ . По́мыслы пᲂпᲂлза́юсѧ , и҆ впа́даю въ бе́зднꙋ пᲂги́бели . и҆ твᲂѐ дв҃о ны́нѣ мᲂлю̀ застꙋпле́нїе , ᲂу҆твердѝ непᲂкᲂлѣби́мо немᲂже́нїе ᲂу҆ма̀ мᲂегѡ̀ , на ка́мени тве́рдѣ бж҃їихъ запᲂвѣде́й . сла́ва . Смᲂко́вницꙋ нᲂшꙋ̀ беспло́дїѧ бᲂю́сѧ пᲂсѣче́нїѧ и҆ прѝ , да не во ѻ҆́гнь по́слетъ мѧ̀ зижди́тель мо́й бг҃ъ . влⷣчце пред̾вари́вши , пᲂкаѧ́нїѧ мѧ̀ дѣ́лы плᲂдᲂно́сна сᲂтвᲂрѝ , да сла́влю тѧ̀ . и҆ ны́нѣ . Ꙗ҆́кѡ непᲂро́ченъ хра́мъ цр҃е́въ , страстьмѝ без̾мѣ́стными ѡ҆скве́рньшеєсѧ срⷣце мᲂѐ , мᲂлю́сѧ ѡ҆чи́сти пречⷭ҇таѧ . цѣлᲂмꙋ́дрїемъ же и҆ чи́стымъ житїе́мъ , дѣ́лы ѡ҆бᲂгатѝ бг҃ᲂбл҃гᲂда́тнаѧ .

пѣ́снь , г҃ . і҆рмо́съ . И҆́же ѿ несꙋ́щихъ всѧ̀ приведы́и , сло́вᲂмъ сᲂзида́ема , сᲂверша́ема же дх҃ᲂмъ , вседержи́телю вы́шнїи , в̾ любвѝ свᲂе́й ᲂу҆твердѝ менѐ . Бᲂрю́щїи и҆ ѡ҆скᲂрблѧ́ющїи мѧ̀ мно́зи сꙋ́ть , и҆ нѣ́сть ѡ҆сла́бы ѡ҆брѣстѝ и҆збавле́нїѧ ѿ ѡ҆быше́дшихъ мѧ̀ . но непре́зри чⷭ҇таѧ мᲂльбꙋ̀ мᲂю̀ . Ѻ҆тѧгче́нъ мно́жествᲂмъ ѕлы́хъ , и҆ мно́гими прегрѣше́нїи мᲂи́ми , к̾ высᲂтѣ̀ нбⷭ҇нѣй вᲂз̾зрѣ́ти немᲂгꙋ̀ , но ѡ҆ставле́нїе ми пᲂда́ждь , пречи́стаѧ . сла́ва . Расто́ргнꙋти смире́нꙋю ми дш҃ꙋ , ѕмі́й лꙋка́выи по всѧ̀ днѝ пᲂкꙋша́етсѧ . но семꙋ̀ сᲂкрꙋшѝ бцⷣе , дш҃етлѣ́нныѧ зꙋ́бы . и҆ ны́нѣ . И҆зба́ви мѧ̀ бцⷣе всѧ́кїѧ ѡ҆держа́щїѧ бѣды̀ , и҆ грѣхо́вныѧ бꙋ́ри раба̀ твᲂегѡ̀ , и҆ к̾ спасе́нᲂмꙋ мѧ̀ приста́нищꙋ напра́ви , твᲂи́ми мл҃твами .

пѣ́снь , д҃ . і҆рмо́съ . Пᲂлᲂжѝ к̾ на́мъ тве́рдꙋю любо́вь сѝ гдⷭ҇и , є҆динᲂро́днаго бо тѝ сн҃а на́съ ра́ди на сме́рть в̾да́лъ є҆сѝ . тѣ́мже тѝ вᲂпїе́мъ вᲂсхвалѧ́юще , сла́ва си́лѣ твᲂе́й . Трепе́щꙋ пᲂмышлѧ́ѧ грѣхо́въ мᲂи́хъ пꙋчи́нꙋ , и҆ сᲂпрᲂти́вныхъ пᲂмышле́нїи , лю́тᲂе и҆ вели́кᲂе вᲂлне́нїе . но ты̀ ѡ҆кᲂрмѝ , и҆ к̾ тишинѣ̀ напра́ви мѧ пречⷭ҇таѧ . Недᲂвѣ́дѣнїе тѧ́жко , дш҃ꙋ мᲂю̀ ны́нѣ пᲂсти́же , неразꙋ́мїе и҆ забве́нїе ѕлы́мъ , и҆́хже в̾ житїѝ сᲂдѣ́ѧхъ . но ты̀ ᲂу҆́бѡ пречⷭ҇таѧ на пᲂкаѧ́нїе сᲂдѣ́ѧнныхъ мно́ю наведи́ мѧ . сла́ва . Ѻ҆́гнь страсте́й сле́зными стрꙋѧ́ми ᲂу҆гасѝ , и҆ ᲂу҆давлѧ́ющеє мѝ ᲂу҆́мъ , жите́йскᲂе тревᲂлне́нїе и҆ те́рнїе пᲂпалѝ , ѻ҆гне́мъ дх҃а бг҃ᲂрᲂди́тельнице . ты́ бо пᲂкро́въ мѝ є҆сѝ и҆ пᲂхвала̀ . и҆ ны́нѣ . Мᲂлво́ю напа́стей и҆ тревᲂлне́нїи ве́сь пᲂтᲂплѧ́емь є҆́смь , лꙋка́выми по́мыслы , и҆ во глꙋбинꙋ̀ ѿча́ѧнїѧ прⷭ҇нѡ низ̾влеко́мъ , вᲂпїю́ ти влⷣчце спасѝ мѧ̀ раба̀ твᲂегѡ̀ .

пѣ́снь , є҃ . і҆рмо́съ . Ꙗ҆́кѡ ви́дѣ и҆са́їѧ ѻ҆бра́знѡ на прⷭ҇то́лѣ превысо́цѣ бг҃а , ѿ а҆́нг҃лъ сла́вы да́ры прїе́млюща , ѽ ѡ҆каѧ́нныи вᲂпїѧ́ше а҆́зъ , прᲂви́дѣхъ вᲂплᲂща́ема бг҃а , свѣ́та невече́рнѧ , и҆ ми́рᲂмъ ѡ҆блада́юща . Дш҃и мᲂеѧ̀ бᲂлѣ́знь , и҆ пло́ти немᲂже́нїе , вѣ́си дв҃це , и҆ ᲂу҆ма̀ мᲂегѡ̀ гни́лᲂсть и҆ непᲂстᲂѧ́тельнᲂе . тѣ́мже спᲂдо́би мѧ̀ млⷭ҇ти и҆ бл҃гᲂда́ти твᲂеѧ̀ , да тѧ̀ сла́влю спаса́емь кро́вᲂмъ твᲂи́мъ . Не затвᲂри́ ми млрⷭ҇дїѧ щедро́тъ твᲂи́хъ , влⷣчце всенепᲂро́чнаѧ , но во ᲂу҆миле́нїи прихᲂдѧ́щемꙋ к̾ тебѣ̀ , пᲂда́ждь твᲂеѧ̀ млⷭ҇ти . и҆ лю́тыхъ премѣне́нїе и҆ прᲂсвѣще́нїе , ꙗ҆́кѡ да бл҃гᲂда́рнѡ пᲂю̀ вели́чїѧ тѝ . сла́ва . Оу҆мно́жишасѧ дв҃о ненави́дѧщїи мѧ̀ всꙋ́е , и҆ ѡ҆скᲂрблѧ́ющїи нн҃ѣ , па́че вла́съ главы̀ мᲂеѧ̀ чи́стаѧ , и҆́щꙋще расто́ргнꙋти , и҆ снѣ́дь сᲂтвᲂри́ти себѣ̀ . си́хъ ᲂу҆́бѡ стꙋда̀ и҆спо́лньши вᲂз̾вратѝ . и҆ ны́нѣ . И҆́же ми́рᲂви ми́ръ , и҆ спасе́нїе всѣ́мъ пᲂда́вшаѧ , ꙗ҆́кѡ бжⷭ҇твеныи ми́ръ пᲂро́ждьши дв҃о , бра́нь страсте́й дш҃и мᲂеѧ̀ , и҆ тѣ́ла чи́стаѧ ᲂу҆мирѝ , стра́хᲂмъ и҆ любо́вїю сп҃са хрⷭ҇та̀ .

пѣ́снь , ѕ҃ . і҆рмо́с̾ . Бе́здна пᲂслѣ́днѧѧ грѣхо́въ ѡ҆бы́де мѧ , и҆ и҆счеза́етъ дх҃ъ мо́й . но прᲂсте́ръ влⷣко высо́кꙋю свᲂю̀ мы́шцꙋ , ꙗ҆́кѡ петра́ мѧ ᲂу҆пра́вителю спасѝ . Въ дѣ́лѣ и҆ сло́вѣ и҆ дѣѧ́нїи , нѣ́сть ѕлѣ̀ пᲂжи́вша на землѝ , ꙗ҆́кᲂже а҆́зъ . тѣ́мже твᲂѐ прᲂшꙋ̀ влⷣчце чл҃кᲂлю́бїе , ᲂу҆лꙋчи́ти млⷭ҇ти . Дѣѧ́нїѧ ѕлы́хъ прегрѣше́нїи , печа́ли ражда́ютъ всѣ́мъ . тѣ́мже го́рькими напа́стьми ѡ҆держи́ми є҆смы̀ ны́нѣ , пᲂмᲂзѝ на́мъ ꙗ҆́же є҆ди́на хрⷭ҇тїа́нѡмъ спасе́нїе . сла́ва . И҆ ражда́еши , и҆ чиста̀ по ржⷭ҇твѣ̀ ꙗ҆ви́сѧ бцⷣе дв҃о . тѣ́мже мᲂлѝ свᲂѐ ржⷭ҇тво̀ прⷭ҇нѡ , да и҆зба́вимсѧ ѿ всѧ́кᲂгѡ вре́да вра́жїѧ твᲂѝ рабѝ . и҆ ны́нѣ . Мл҃твами пречⷭ҇тыѧ мт҃ре твᲂеѧ̀ , и҆ всѣ́хъ пррⷪ҇къ и҆ мч҃нкъ , и҆ сщ҃е́нныхъ ᲂу҆чени́къ , сло́ве бж҃їи пᲂда́ждь на́мъ ми́ръ , и҆ ѡ҆чище́нїе прегрѣше́нїемъ .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , г҃ . Всѐ житїѐ мᲂѐ в̾ лѣ́нᲂсти мно́зѣ пре́йде пречⷭ҇таѧ , и҆ ны́нѣ прибли́жихсѧ ко и҆схо́дꙋ мᲂегѡ̀ вре́мене , и҆ ᲂу҆страши́хсѧ ѿ враго́въ мᲂи́хъ , да нерасто́ргнꙋтъ дш҃ꙋ мᲂю̀ всенепᲂро́чнаѧ , и҆ въ пᲂги́бели мѧ̀ глꙋбинꙋ̀ ѿпꙋ́стѧтъ . но ᲂу҆ще́дри раба̀ твᲂегѡ̀ дв҃о , и҆ и҆зба́ви мѧ̀ си́хъ ѡ҆ѕлᲂбле́нїѧ .

пѣ́снь , з҃ . і҆рмоⷭ҇ . Ꙗ҆́кᲂже дре́вле , бл҃гᲂчести́выѧ трѝ ѻ҆́трᲂки прᲂхла́ди , во пла́мени халдѣ́йстѣмъ , свѣ́тлымъ бжⷭ҇тва̀ ѻ҆гне́мъ . и҆ на́съ ѡ҆зарѝ блгⷭ҇ве́нъ є҆сѝ взыва́юща , бж҃е ѻ҆ц҃ъ на́шихъ . Тебѐ мт҃рь бж҃їю чⷭ҇тꙋю и҆ непᲂро́чнꙋю , ѡ҆скверне́ныи тѣ́лᲂмъ и҆ дш҃е́ю , и҆ ѡ҆каѧ́нныи дѣѧ́ньми нечи́стыми , мᲂлю̀ влⷣчце , надѣ́ѧсѧ на млⷭ҇ть твᲂю̀ , ᲂу҆ще́дри мѧ пречⷭ҇таѧ . Прегрѣше́нїи мᲂи́хъ мно́жество , и҆ ѕлы́хъ и҆спыта́нїе , недᲂꙋмѣ́нїемъ мѧ̀ препира́етъ ѕѣлѡ̀ , и҆ во ѿчаѧ́нїѧ влече́тъ мѧ глꙋбинꙋ̀ . но ты̀ пречⷭ҇таѧ влⷣчце спаси́ мѧ пᲂгиба́ющаго , и҆ лю́тѣ пᲂтᲂплѧ́ема . сла́ва . Мно́жествᲂмъ щедро́тъ твᲂеѧ̀ бл҃гᲂсти , грѣхо́въ на́шихъ мно́жество пре́зри бла́же . и҆ бл҃гᲂпремѣ́ненъ бꙋ́ди немо́лчнѡ зᲂвꙋ́щимъ , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . и҆ нн҃ѣ . Ѿ бре́нїѧ стрⷭ҇те́й , и҆ глꙋбины̀ скᲂрбе́й , и҆ напа́стей жите́йскихъ , привлецы̀ на́съ къ без̾стра́стїю чи́стаѧ , и҆ ра́дᲂстнᲂмꙋ весе́лїю бл҃гᲂслᲂве́наѧ зᲂвꙋ́щихъ , ты̀ є҆сѝ є҆ди́на бг҃ᲂбл҃гᲂда́тнаѧ .

пѣ́снь , и҃ . і҆рмо́съ . Веще́ственна ѻ҆гнѧ̀ пла́мень невеще́ственнымъ ᲂу҆гаси́ша , бжⷭ҇твеннїи ѻ҆́трᲂцы пᲂѧ́хꙋ , блгⷭ҇ви́те всѧ́каѧ дѣ́ла гдⷭ҇нѧ гдⷭ҇а . Сласте́й го́ресть , чꙋ́вства всѧ̀ тѣле́снаѧ прᲂше́дши , дш҃ꙋ мᲂю̀ без̾мѣ́стнѡ ѡ҆калѧ́етъ , и҆ в̾ сме́рть влече́тъ , влⷣчце ми́рꙋ , бꙋ́ди ми спасе́нїе . На тѧ̀ дш҃ꙋ и҆ срⷣце и҆ тѣ́ло вᲂз̾лᲂжи́хъ , не и҆́мамъ бо и҆ны́ѧ наде́жи , ра́звѣ тебѐ влⷣчце , є҆ю́же пᲂлꙋчꙋ̀ млⷭ҇ти . тѣ́мже ми пᲂда́ждь , бᲂга́тꙋю твᲂю̀ млⷭ҇ть и҆ бл҃гᲂда́ть . сла́ва . Ѕмі́й мѧ̀ ꙗ҆́дᲂмъ припᲂлзнꙋ́въ , плᲂтьско́ю сла́стїю ѡ҆каѧ́ннꙋю дш҃ꙋ мᲂю̀ лю́тѣ ᲂу҆мᲂрѝ . но ѡ҆живѝ сїю̀ сᲂпрᲂти́вными лѣчба́ми , чⷭ҇таѧ твᲂи́ми мл҃твами . и҆ нн҃ѣ . Ꙗ҆́же бг҃а и҆ сп҃са ро́ждьшаѧ , мирᲂнача́льника тᲂго̀ мᲂлѝ , ми́ръ ми́рᲂви пᲂсла́ти вско́рѣ , ꙗ҆́кѡ да в̾ ми́рѣ тᲂго̀ славᲂсло́вимъ .

пѣ́снь , ѳ҃ . і҆рмо́съ . Тебѐ неѡ҆пали́мꙋю кꙋпинꙋ̀ , и҆ ст҃ꙋ́ю дв҃ꙋ мт҃рь сꙋ́щꙋ свѣ́та и҆ бцⷣꙋ , наде́ждꙋ всѣ́хъ на́съ велича́емъ . Скве́рнꙋ страстны́хъ пᲂмышле́нїи , мᲂегѡ̀ ᲂу҆ма̀ ѡ҆чи́сти чи́стаѧ , в̾ без̾стра́стїѧ ри́зꙋ свѣ́тлꙋю ѡ҆дѣва́ющи мѧ̀ . Ѿве́рзи ми дв҃о бжⷭ҇твеныѧ вхо́ды пᲂкаѧ́нїѧ , вхо́ды стрⷭ҇те́й , и҆ сласте́й мᲂи́хъ загражда́ющи , и҆ вᲂз̾бранѧ́ющи си́лᲂю свᲂе́ю . сла́ва . Оу҆слы́ши гла́съ стᲂна́нїѧ мᲂегѡ̀ , и҆ гла́съ пла́ча мᲂегѡ̀ , и҆ пᲂда́ждь ѡ҆чище́нїе и҆ спасе́нїе , ѡ҆каѧ́ннѣй мᲂе́й дш҃и , дв҃о всенепᲂро́чнаѧ . и҆ ны́нѣ . Ви́дѣ данїи́лъ прᲂро́къ твᲂѐ ржⷭ҇тво̀ дв҃о . ви́дѣ рѣснᲂти́вно вᲂи́стинꙋ и҆́же на прⷭ҇то́лѣ , ви́дѣ є҆го́же де́ньми ве́тхаго вᲂз̾гласѝ . та́же , дᲂсто́йнѡ є҆́сть . и҆ про́чеє , ѡ҆бы́чно . и҆ ѿпꙋ́стъ .

Въ четверто́къ , на ᲂу҆́трени . по а҃ , стихᲂло́гїи . сѣда́льны , а҆пⷭ҇лѡмъ . гла́съ , г҃ . Прїиди́те всѝ , а҆пⷭ҇лы вᲂсхва́лимъ ꙗ҆́кѡ ко́рмчїѧ , и҆́дᲂльскꙋю бо пре́лесть ᲂу҆праздни́ша , и҆ к̾ свѣ́тꙋ жи́зни вᲂз̾ведо́ша , и҆ в̾ трⷪ҇цꙋ вѣ́рᲂвати наꙋчи́ша . тѣ́мже дне́сь па́мѧть и҆́хъ чⷭ҇тнꙋ́ю сᲂверша́юще вѣ́рнїи , сла́вимъ хрⷭ҇та̀ бг҃а на́шегѡ . сти́хъ : во всю̀ зе́млю и҆зыдо́ша веща́нїѧ и҆́хъ , и҆ в̾ кᲂнцы̀ вселе́нныѧ гл҃ы и҆́хъ . А҆пⷭ҇лъ твᲂи́хъ па́мѧть ᲂу҆ѧсни́лъ є҆сѝ гдⷭ҇и , ꙗ҆́кѡ всеси́ленъ , ꙗ҆́кѡ ᲂу҆крѣпи́лъ є҆сѝ и҆́хъ , страсте́мъ твᲂи́мъ пᲂдо́битисѧ , и҆ пᲂбѣди́ша мꙋ́жески вра́жїю си́лꙋ , тѣ́мже и҆ прїѧ́ша и҆сцѣле́нїемъ бл҃гᲂда́ти . тѣ́хъ мл҃твами чл҃кᲂлю́бче , ми́ръ пᲂда́ждь лю́демъ твᲂи́мъ . сла́ва , и҆ ны́нѣ , боⷢ҇ . Непᲂстижи́маго и҆ неѡ҆пи́саннаго , є҆динᲂсꙋ́щнаго без̾нача́льнᲂмꙋ ѻ҆ц҃ꙋ , во́ чрево свᲂѐ та́йнѡ вмѣсти́ла є҆сѝ бцⷣе . є҆ди́но и҆ несмѣ́снѡ ѿ трⷪ҇цы бжⷭ҇тво̀ разꙋмѣ́хᲂмъ , ржⷭ҇тво̀ твᲂѐ в̾ ми́рѣ сла́вѧще . тѣ́мже и҆ бл҃гᲂда́рнѡ вᲂпїе́мъ тѝ , ра́дꙋисѧ ѡ҆бра́дᲂваннаѧ .

по в҃ , стихᲂло́гїи . сѣда́льны , гла́съ , г҃ . Всю̀ напᲂи́ша зе́млю стрꙋѧ́ми а҆пⷭ҇ли , бж҃їѧ сло́ва , и҆ вᲂзрастѐ кла́съ вѣ́ры , и҆ кᲂнцы̀ вселе́нныѧ напо́лни , пле́велы бо всѧ̀ пᲂсѣко́ша . тѣ́мже всѣ́хъ хрⷭ҇тꙋ̀ бг҃ꙋ приведо́ша , кр҃ща́юще тѣ́хъ в̾ трⷪ҇цꙋ несᲂзда́ннꙋю . сти́хъ : нб҃са̀ пᲂвѣ́даютъ сла́вꙋ бж҃їю , твᲂре́нїе же рꙋ́кꙋ є҆гѡ̀ вᲂз̾вѣща́етъ тве́рдь . Всю̀ напᲂи́ша зе́млю стрꙋѧ́ми а҆пⷭ҇ли , бж҃їѧ сло́ва , и҆ вᲂзрастѐ кла́съ вѣ́ры , и҆ кᲂнцы̀ вселе́нныѧ напо́лни , пле́велы бо всѧ̀ пᲂсѣко́ша . тѣ́мже всѣ́хъ хрⷭ҇тꙋ̀ бг҃ꙋ приведо́ша , кр҃ща́юще тѣ́хъ в̾ трⷪ҇цꙋ несᲂзда́ннꙋю . сти́хъ : ди́венъ бг҃ъ во ст҃ы́хъ свᲂи́хъ бг҃ъ і҆зра́илевъ . мⷱ҇ꙋ . Страстᲂте́рпцы ст҃і́и мᲂли́те млⷭ҇тиваго бг҃а , да прегрѣше́нїемъ ѡ҆ставле́нїе пᲂда́стъ дш҃а́мъ на́шимъ . сла́ва , и҆ ны́нѣ , боⷢ҇ . Прᲂро́цы прᲂпᲂвѣ́даша , а҆пⷭ҇ли наꙋчи́ша , и҆ мч҃нцы и҆спᲂвѣ́даша , и҆ мы̀ вѣ́рᲂвахᲂмъ бцⷣꙋ тѧ̀ вᲂи́стинꙋ сꙋ́щꙋю , тѣ́мже и҆ велича́емъ ржⷭ҇тво̀ твᲂѐ пречⷭ҇таѧ .

по г҃ , стихᲂло́гїи . сѣда́ленъ , гла́съ , г҃ . А҆пⷭ҇лы твᲂѧ̀ хрⷭ҇тѐ , в̾ кᲂнцы̀ земны́ѧ пᲂсла́лъ є҆сѝ ꙗ҆́кѡ млрⷭ҇дъ , ꙗ҆́кѡ и҆з̾ ѡ҆щре́ныѧ си́льнѣ стрѣ́лы , закала́юще всѧ́ко нече́стїе и҆ ѕлᲂсꙋ́етьство , и҆ насажда́юще спасе́ннаѧ ᲂу҆че́нїѧ . тѣ́хъ мᲂльба́ми ще́дре , смире́нїе пᲂда́ждь дш҃а́мъ на́шимъ . сла́ва , и҆ нн҃ѣ , боⷢ҇ . Оу҆мертви́вшꙋюсѧ дш҃ꙋ мᲂю̀ , сᲂгрѣше́ньми мно́гими , всенепᲂро́чнаѧ влⷣчце ѡ҆живѝ , ꙗ҆́кѡ дерзнᲂве́нїе мт҃рьне к̾ сн҃ꙋ свᲂемꙋ̀ и҆мꙋ́щи . ты́ бо є҆ди́на рᲂдила̀ є҆сѝ па́че ᲂу҆ма̀ и҆ смы́сла , сло́во сᲂбез̾нача́льнᲂе ѻ҆ц҃ꙋ и҆ дх҃ꙋ , живо́тъ и҆ нетлѣ́нїе ми́рꙋ да́рꙋюща при́снѡ , и҆ ве́лїю млⷭ҇ть .

Кано́нъ , ст҃ы́мъ сла́внымъ и҆ всехва́льнымъ а҆пⷭ҇лѡмъ . твᲂре́нїе ѳеѡ́фанᲂво . глаⷭ҇ , г҃ . пѣ́снь , а҃ . і҆рмо́съ . И҆́же во́ды дре́вле ма́нїемъ бжⷭ҇твенымъ , во є҆ди́но со́нмище сᲂвᲂкꙋпѝ , и҆ раздѣли́выи мо́ре і҆и҃льтескимъ лю́демъ . сѐ бг҃ъ на́шъ препрᲂсла́вленъ сы́и , тᲂго̀ є҆ди́нагѡ вᲂспᲂе́мъ , ꙗ҆́кѡ прᲂсла́висѧ . запѣ́въ : ст҃і́и а҆пⷭ҇ли , мᲂли́те бг҃а ѡ҆ на́съ . Цр҃ко́вныѧ стᲂлпы̀ ѡ҆снᲂва́нїѧ вѣ́ры , бл҃гᲂче́стнаѧ ᲂу҆тверже́нїѧ , и҆ вѣ́рныѧ всѧ̀ ᲂу҆твержа́ющаѧ , прїидѣ́те ᲂу҆бл҃жи́мъ сщ҃е́нныѧ а҆пⷭ҇лы , ꙗ҆́кѡ да мᲂльба́ми и҆́хъ спаса́емсѧ . двⷤа . Са́мъ себѐ пре́жде сꙋда̀ блꙋ́дныи ᲂу҆бᲂѧ́всѧ ѡ҆сꙋжда́ю , ѕла́ бо дѣ́ла бесчи́сленаѧ стѧжа́хъ . тѣ́мже мᲂлю́тисѧ пра́ведныи сꙋдїѐ , ѿча́ѧннаго мѧ̀ спасѝ , бжⷭ҇твеными мᲂльба́ми а҆пⷭ҇лъ твᲂи́хъ . Непревра́тнїи стᲂлпы̀ бл҃гᲂче́стїѧ , прельще́нїемъ мѧ̀ вра́жїимъ препѧ́таго , и҆ на землѝ лежа́щаго и҆ бѣ́дствꙋющаго , и҆ недᲂꙋмѣ́ющагᲂсѧ и҆спра́вите , ꙗ҆́кѡ да ѡ҆брѧ́щꙋ и҆збавле́нїе , ѡ҆ ни́хже сᲂгрѣши́хъ . боⷢ҇ . Со ст҃ы́ми прⷪ҇рки , со а҆пⷭ҇лы и҆ мч҃нки , и҆́же и҆з̾ тебѐ вᲂпло́щшагᲂсѧ гдⷭ҇а , прилѣ́жнѡ чи́стаѧ мᲂлѝ , ꙗ҆́кѡ да плᲂтьскі́ѧ на́ша всѧ̀ стра́сти ᲂу҆мертви́тъ , и҆ живо́тъ вѣ́чныи на́мъ да́рꙋетъ .

Дрꙋгі́и кано́нъ , ст҃о́мꙋ и҆ вели́кᲂмꙋ чꙋдᲂтво́рцꙋ нико́лѣ . твᲂре́нїе і҆ѡ́сифᲂво . гла́съ , г҃ . і҆рмо́съ . Пᲂе́мъ гдⷭ҇ви . запѣ́въ : ст҃лю хрⷭ҇то́въ нико́лае , мᲂлѝ бг҃а ѡ҆ на́съ . Пресвѣ́тлаго свѣти́льника неꙋгаси́маго , на землѝ сꙋ́щаго стᲂлпа̀ , и҆ к̾ приста́нищꙋ бжⷭ҇твенᲂмꙋ призыва́юща , и҆́же вᲂлна́ми жите́йскими при́снѡ пᲂтᲂплѧ́емїи , нико́лꙋ всѝ пᲂчте́мъ , и҆ любо́вїю ᲂу҆блажи́мъ . Си́лᲂю бж҃їею всеблаже́нне ᲂу҆крѣплѧ́емь , ре́внᲂсть бл҃гᲂче́стїѧ по ра́зꙋмꙋ стѧжа́лъ є҆сѝ . тѣ́мже хᲂтѧ́щїѧ непра́веднѡ ᲂу҆́мрети и҆зба́вилъ є҆сѝ . сегѡ̀ ра́ди тѧ мо́лимъ , всѧ́кᲂгѡ непра́веднагѡ ѡ҆ѕлᲂбле́нїѧ , и҆зба́ви на́съ нико́лае . Мᲂле́нїѧ гдⷭ҇ви ѻ҆́ч҃е не ѡ҆скꙋ́днѡ принᲂсѝ ты̀ , ꙗ҆́кѡ да грѣхо́въ и҆ пла́мене мꙋче́нїѧ вѣ́чнꙋющагѡ , и҆ напа́стей и҆ скᲂрбе́й и҆зба́витъ на́съ , ꙗ҆́кѡ є҆ди́нъ преблагі́и . боⷢ҇ . Кᲂвче́гъ бжⷭ҇твеныи , и҆́же вмѣсти́вшꙋю закᲂнᲂда́вца , на́ша без̾зако́нїѧ всѣ́хъ ѿє҆́млющагѡ , ра́ди млрⷭ҇дїѧ несказа́нныѧ пꙋчи́ны , мр҃і́ю пречⷭ҇тꙋю сᲂгла́снѡ вᲂспᲂе́мъ .

пѣ́снь , г҃ . і҆рмо́съ . И҆́же ѿ несꙋ́щихъ всѧ̀ приведы́и , сло́вᲂмъ сᲂзида́ема , сᲂверша́ема же дх҃ᲂмъ , вседержи́телю вы́шнїи , в̾ любвѝ свᲂе́й ᲂу҆твердѝ менѐ . И҆́же ми́рꙋ кᲂнцы̀ ᲂу҆че́нїѧ бжⷭ҇твенагѡ и҆спо́лнивше , дш҃ꙋ мᲂю̀ и҆спо́лните дᲂбрᲂдѣ́тельныхъ дѣѧ́нїи , и҆ пᲂмышле́нїи бл҃ги́хъ , хрⷭ҇то́вы самᲂви́дцы . двⷤа . Ѿ сᲂбла́знъ мно́гихъ лꙋка́вагѡ , и҆ ѿ всѧ́кїѧ ско́рби , и҆ ѿ всѧ́кїѧ тѣснᲂты̀ , ѿ всѧ́кᲂгѡ ѡ҆бстᲂѧ́нїѧ , ᲂу҆чн҃цы̀ хрⷭ҇то́вы и҆зба́вите мѧ . Оу҆вы̀ дш҃е мᲂѧ̀ ѡ҆каѧ́ннаѧ и҆ смире́ннаѧ , ча́стѡ сᲂгрѣша́ющи , и҆ бг҃а прᲂгнѣ́вающи , ка́кѡ и҆спро́сиши прᲂще́нїе ѕлы́мъ , и҆́хже непреста́еши твᲂрѧ́щи . боⷢ҇ . Бжⷭ҇твенаѧ лѣ́ствице , ю҆́же ви́дѣ і҆а́кѡвъ , по не́й же сни́де бг҃ъ , вᲂзнᲂсѧ̀ на́съ , прилѣ́жнѡ мᲂлѝ со а҆пⷭ҇лы ᲂу҆ще́дрити на́съ .

и҆́нъ , і҆рмо́съ . Непло́днаѧ дш҃е . И҆зᲂщре́нъ ме́чь дх҃о́мъ ꙗ҆ви́лсѧ є҆сѝ мꙋ́дре , лꙋка́выѧ плевелы̀ є҆рети́чествꙋющихъ пᲂсѣца́ѧ , и҆ дᲂбрᲂдѣ́телей стезѝ спасе́ныѧ вѣ́рнымъ ᲂу҆глажда́ѧ ѻ҆́ч҃е нико́лае . Тебѣ̀ и҆сто́чникꙋ , и҆́же и҆стᲂча́ющꙋ и҆сцѣле́нїемъ пᲂто́ки , мо́лимсѧ ст҃е , скве́рны страсте́й всѣ́хъ на́съ мл҃твами си ѡ҆мы́й , бѣ́дъ и҆ скᲂрбе́й и҆збавлѧ́ѧ . Крѣ́пкими сѝ мл҃твами низ̾лага́ѧ врага̀ , и҆ ны́нѣ на́нь ᲂу҆крѣпѝ , немᲂщнꙋ́ющїѧ пᲂмышле́нїѧ на́ша , страстны́ми прило́ги , мᲂли́твами сѝ ѻ҆́ч҃е ст҃е нико́лае . боⷢ҇ . Оу҆́мъ разꙋмѣ́ти немо́жетъ , и҆́же па́че ᲂу҆ма̀ рᲂжде́нїе , чꙋ́днагѡ ржⷭ҇тва̀ твᲂегѡ̀ бг҃ᲂрᲂди́тельнице всенепᲂро́чнаѧ . тѣ́мже мᲂлю́ тѧ , ᲂу҆́мъ мо́й ѡ҆бл҃гᲂда́ти прⷭ҇нѡ сла́вити тѧ .

пѣ́снь , д҃ . і҆рмо́съ . Пᲂлᲂжѝ к̾ на́мъ тве́рдꙋю любо́вь сѝ гдⷭ҇и , є҆динᲂро́днаго бо тѝ сн҃а на́съ ра́ди на сме́рть в̾да́лъ є҆сѝ . тѣ́мже тѝ вᲂпїе́мъ вᲂсхвалѧ́юще , сла́ва си́лѣ твᲂе́й . Ꙗ҆́кᲂже мо́лнїѧ , и҆ ꙗ҆́кѡ лꙋчѝ незахᲂди́магѡ сл҃нца , а҆пⷭ҇лы прᲂстира́ѧ сло́ве , въ мирскі́ѧ кᲂнцы̀ , всѣ́хъ прᲂсвѣти́въ , и҆ без̾бо́жїѧ мра́къ ѿгна́лъ є҆сѝ . вⷤ . Мо́ре лю́тагѡ грѣха̀ сло́ве ѡ҆бꙋрева́етъ мѧ , и҆ вᲂлне́нїѧ без̾чи́нныхъ пᲂмышле́нїи , смире́ннꙋю дш҃ꙋ мᲂю̀ смꙋща́ютъ . ѡ҆кᲂрми́телю гдⷭ҇и , ᲂу҆чени́къ твᲂи́хъ мᲂльба́ми спаси́ мѧ . Оу҆жаса́юсѧ пᲂмышлѧ́ѧ страшна́гѡ ти влⷣко прише́ствїѧ , и҆́мамъ бо пре́жде сꙋда̀ , мᲂю̀ ѡ҆сꙋжа́ющꙋ мѧ̀ внꙋ́трь со́вѣсть , и҆ пре́жде мꙋча́щїѧ мꙋ́ки , нечꙋ́вствїе мᲂѐ . боⷢ҇ . Сло́ве бж҃їи , и҆́же рᲂжде́исѧ ѿ дв҃ы бг҃ᲂѻ҆трᲂкᲂви́цы , тᲂѧ̀ хᲂда́тайствы сщ҃е́нными , и҆ премꙋ́дрыхъ а҆пⷭ҇лъ твᲂи́хъ сп҃се , всѧ́кᲂгѡ ѡ҆бстᲂѧ́нїѧ , и҆ всѧ́кїѧ нꙋ́жи и҆зба́ви дш҃а на́ша .

и҆́нъ , і҆рмо́с̾ . Присѣ́ннꙋю го́рꙋ . Къ бг҃ꙋ хᲂда́таѧ , всѧ́къ вѣ́рныи всегда̀ нико́лае пред̾лага́етъ тѧ . тѣ́мже тѧ мо́лимъ , ѿ напа́стей лю́тыхъ , и҆ паде́нїи грѣхо́вныхъ на́съ и҆зба́ви ѻ҆́ч҃е . Во́дꙋ жи́вꙋ в̾ срⷣцы и҆мы́и бл҃гᲂда́ть гдⷭ҇ню , ѡ҆рᲂша́еши при́снѡ мꙋ́дре , и҆́же зно́емъ скᲂрбе́й и҆ сꙋхᲂто́ю грѣхо́въ бѣ́дствꙋющихъ , ѡ҆каѧ́ннѣ пᲂги́бнꙋти и҆мꙋ́щихъ , всебл҃же́нне . И҆́же и҆збавле́и и҆нᲂгда̀ , ведо́мыѧ на сме́рть непра́веднѡ всебл҃же́нне . ны́нѣ и҆ на́съ спасѝ ѿ челᲂвѣ́къ тлетво́рныхъ стꙋже́нїѧ , и҆ ѿ всѧ́кїѧ бѣсо́вскїѧ ле́сти . боⷢ҇ . Вᲂпло́щшеєсѧ сло́во , премно́жествᲂмъ бл҃гᲂꙋтро́бїѧ , неи҆зрече́нно рᲂдила̀ є҆сѝ , тᲂго̀ мᲂлѝ пречⷭ҇таѧ , плᲂтьскі́ѧ стра́сти и҆ скве́рны всѣ́хъ и҆зба́вити , и҆ всѣ́хъ нꙋ́жныхъ житїѧ̀ .

пѣ́снь , є҃ . і҆рмо́с̾ . На землѝ неви́димыи ꙗ҆ви́сѧ , и҆ со земны́ми во́лею пᲂживѐ непᲂсти́жимыи . и҆ к̾ тебѣ̀ ᲂу҆́треннююще , вᲂспѣва́емъ тѧ чл҃кᲂлю́бче . На землѝ вᲂпло́щьсѧ , сᲂдѣ́лалъ є҆сѝ ᲂу҆ченикѝ небеса̀ , вѣща́юща хрⷭ҇тѐ сла́вꙋ твᲂю̀ . тѣ́хъ ра́ди ᲂу҆́бѡ гдⷭ҇и дꙋ́ши на́ша пᲂми́лꙋй . двⷤа . Ѿ страсте́й и҆ ѿ всѧ́кїѧ нꙋ́жи , ѿ лю́тагѡ ѡ҆бстᲂѧ́нїѧ , сло́ве и҆зба́ви рабы̀ свᲂѧ̀ , а҆пⷭ҇лъ твᲂи́хъ бл҃гᲂпрїѧ́тными мл҃твами . Оу҆вы̀ мнѣ̀ дш҃е всестрастна́ѧ , ка́кѡ хо́щеши стра́шнᲂмꙋ сꙋдꙋ̀ пред̾ста́ти беспло́дна сꙋ́щи ; пᲂтщи́сѧ пᲂка́йсѧ дᲂбрᲂдѣ́телей плᲂды̀ вᲂз̾раща́ющи . боⷢ҇ . И҆́же на землѝ ꙗ҆́вльшагᲂсѧ неи҆зрече́ннѡ съ пло́тїю , ѿ чи́стыхъ крᲂве́й твᲂи́хъ чи́стаѧ , мᲂлѝ ꙗ҆́кѡ сн҃а свᲂегѡ̀ всегда̀ , ѡ҆чище́нїе на́мъ дарᲂва́ти .

и҆́нъ , і҆рмо́съ . Свѣ́тᲂмъ твᲂи́мъ . Свѣ́тꙋ чи́стᲂмꙋ пред̾стᲂѧ̀ , и҆ ѿ тꙋ́дꙋ при́снѡ и҆схᲂдѧ́щими зарѧ́ми прᲂсвѣща́емь ѻ҆́ч҃е , и҆спрᲂсѝ всѣ́мъ ѡ҆чище́нїе и҆ смире́нїе . Менѐ и҆́же па́че всѣ́хъ чл҃къ тебѐ прᲂгнѣ́вавша ᲂу҆мо́мъ неразꙋ́мнымъ , пребл҃гі́и ᲂу҆ще́дри , нико́лы те́плыми мл҃твами . Во ᲂу҆ны́нїи и҆з̾жи́хъ мᲂю̀ жи́знь , мᲂлю́тисѧ ѻ҆́ч҃е нико́лае , вᲂз̾дви́гни к̾ пᲂкаѧ́нїю мᲂѐ пᲂмышле́нїе пᲂмраче́ннᲂе . боⷢ҇ . Ꙗ҆́кѡ є҆ди́на а҆́нг҃лѡмъ ра́дᲂсть бл҃гᲂра́дᲂваннаѧ , ра́дᲂсти и҆спо́лни мᲂю̀ мы́сль сѣ́тꙋющꙋю , и҆ лѣ́нᲂстїю пᲂгрꙋжа́емꙋю .

пѣ́снь , ѕ҃ . і҆рмо́с̾ . Бе́здна пᲂслѣ́днѧѧ грѣхо́въ ѡ҆бы́де мѧ , и҆ и҆счеза́етъ дх҃ъ мо́й . но прᲂсте́ръ влⷣко высо́кꙋю свᲂю̀ мы́шцꙋ , ꙗ҆́кѡ петра́ мѧ ᲂу҆пра́вителю спасѝ . Бе́зднꙋ премꙋ́дрᲂсти дх҃о́вныѧ и҆стᲂчи́вше а҆пⷭ҇льскᲂе сᲂсло́вїе , мирскі́ѧ мꙋ́дрᲂсти и҆з̾сꙋшѝ всѧ̀ тече́нїѧ , и҆ напᲂѝ бл҃гᲂчести́выхъ сᲂставле́нїѧ . двⷤа . Вᲂз̾дᲂхнѝ и҆ прᲂслези́сѧ смире́ннаѧ дш҃е мᲂѧ̀ , и҆ вᲂзᲂпі́й ко́ гдⷭ҇ꙋ гл҃ющи , сᲂгрѣши́хъ ти влⷣко . но ѡ҆чи́сти мѧ млрⷭ҇де , мᲂльба́ми премꙋ́дрыхъ а҆пⷭ҇лъ твᲂи́хъ . Пᲂтеко́ша пᲂто́цы стрⷭ҇те́й , и҆ пᲂтᲂпи́ша мᲂю̀ дш҃е́внꙋю хра́минꙋ , рѣ́ки дх҃о́вныѧ бы́вше а҆пⷭ҇ли , сᲂкрꙋше́нагѡ мѧ к̾ живᲂтꙋ̀ ѡ҆бнᲂви́те . боⷢ҇ . Сᲂбо́ръ тѧ а҆пⷭ҇лъ хрⷭ҇тѐ мо́литъ с̾ ро́ждьшею тѧ , ѡ҆чище́нїе низ̾пᲂсла́ти и҆ смире́нїе рабо́мъ твᲂи́мъ , ꙗ҆́кѡ чл҃кᲂлю́бецъ и҆ бг҃ъ бл҃гᲂпремѣни́тель .

и҆́нъ , і҆рмо́съ . Глꙋбина̀ страсте́й . Оу҆мертви́въ вᲂз̾держа́нїемъ ᲂу҆́ды , стѧжа́лъ є҆сѝ жи́знь нестарѣ́емꙋ , є҆́йже и҆ на́съ ѻ҆́бщники твᲂи́ми мл҃твами сᲂдѣ́лай мꙋ́дре , и҆збѣжа́нїемъ ѕла́го грѣха̀ . Вѣ́трилᲂмъ сщ҃е́нныхъ твᲂи́хъ мл҃твъ , напа́стей мнᲂгᲂѡбра́зныхъ , и҆ грѣхо́вныѧ глꙋбины̀ и҆зба́ви на́съ , ко приста́нищꙋ живᲂта̀ превᲂдѧ̀ мꙋ́дре ст҃лю . Оу҆краси́въ ми́рскїи престо́лъ , ꙗ҆ви́лсѧ є҆сѝ красᲂта̀ первᲂсщ҃е́нникѡмъ . но мл҃твами твᲂи́ми , ѿ мирски́хъ напа́стей , спаса́й на́съ невреди́мы ст҃лю . боⷢ҇ . Всели́сѧ во ᲂу҆тро́бꙋ твᲂю̀ сло́во , мт҃и чⷭ҇таѧ , и҆́же дре́вле в̾ челᲂвѣ́цѣхъ все́льшꙋюсѧ ѿ престꙋпле́нїѧ тлю̀ , ꙗ҆́кѡ бг҃ъ є҆ди́нъ внѣ̀ и҆з̾гна́лъ є҆́сть , за млрⷭ҇дїе ми́лᲂсти .

пѣ́снь , з҃ . і҆рмо́съ . Пе́рвїе тѣ́лꙋ злато́мꙋ , пе́рс̾скᲂю че́стїю дѣ́ти непᲂклᲂни́шасѧ , трїѐ пᲂю́ще пᲂсредѝ пе́щи ѻ҆гнѧ̀ , ѻ҆ц҃е́мъ бг҃ъ бл҃гᲂслᲂве́нъ є҆сѝ . И҆́же свѣ́тъ ми́рꙋ хрⷭ҇то́съ , свѣ́тъ ва́съ пᲂказа̀ , свѣтᲂно́снїи а҆пⷭ҇ли , раз̾гᲂнѧ́ющихъ тмꙋ̀ прельще́нїѧ , и҆ прᲂсвѣща́ющи вѣ́рныхъ мы́сли . двⷤа . Ꙗ҆́же на на́съ вра́жїѧ сѣ́ти сᲂкрꙋши́те , бг҃ᲂгла́снїи а҆пⷭ҇ли , и҆ стезѝ на́мъ пᲂкаѧ́нїѧ ᲂу҆гла́дите , и҆́же к̾ ва́мъ прибѣга́ющимъ . Ѡ҆бъю҆ро́дѣвшꙋю дш҃ꙋ мᲂю̀ , плᲂтьски́ми страстьмѝ , со́ль бжⷭ҇твенаѧ сꙋ́ще бг҃ᲂглаго́ливїи гдⷭ҇ни а҆пⷭ҇ли , ѡ҆чи́стите вѣ́рнѡ ѡ҆живлѧ́юще . боⷢ҇ . Дᲂбро́то і҆а́кѡвлѧ , до́брыми мѧ̀ зра́ки прᲂсвѣтѝ мᲂлю́сѧ , мᲂлѧ́щисѧ ны́нѣ со а҆пⷭ҇лы , ро́ждьшемꙋсѧ ѿ твᲂи́хъ чи́стыхъ крᲂве́й .

и҆́нъ , і҆рмо́съ . Трїѐ ѻ҆́трᲂцы в̾ пещѝ . Гꙋбѧ́щаго дре́вле гдⷭ҇нѧ лю́ди , безꙋ́мнаго а҆́рїѧ ᲂу҆дави́лъ є҆сѝ , жи́лами слᲂве́съ твᲂи́хъ , ꙗ҆́кѡ па́стырь нача́льныи и҆́стиненъ ѻ҆́ч҃е нико́лае . Ст҃о преше́лъ є҆сѝ прест҃о́е житїѐ свᲂѐ , со ст҃ы́ми живе́ши ѻ҆́ч҃е нико́лае , сщ҃е́нїе пᲂсыла́ѧ и҆ прᲂсвѣще́нїе , и҆́же бл҃гᲂче́стнѡ тѧ̀ бл҃жа́щимъ . Ꙗ҆́кѡ гᲂто́ва тѧ и҆зба́вителѧ , ꙗ҆́кѡ те́пла застꙋ́пника , призыва́емъ прⷭ҇нѡ ѻ҆́ч҃е нико́лае , ѿ стрⷭ҇те́й на́съ и҆зба́ви , и҆ неча́емыхъ напа́стей нахᲂдѧ́щихъ на ны̀ . боⷢ҇ . Менѐ и҆́же небреже́нїемъ дш҃ꙋ ѡ҆мрачи́вшаго , прᲂсвѣтѝ чⷭ҇таѧ ꙗ҆́же свѣ́тъ ро́ждьшаѧ , срⷣца мᲂегѡ̀ вᲂз̾жиза́ющи свѣ́щникъ , ꙗ҆́кѡ да ᲂу҆се́рдїемъ бл҃ги́мъ сла́влю тѧ .

пѣ́снь , и҃ . і҆рмо́съ . Въ непᲂстᲂѧ́ннѣмъ ѻ҆гнѝ сᲂвᲂкꙋ́пльшесѧ , и҆́же бл҃гᲂче́стїѧ пред̾стᲂѧ́ще ю҆́нᲂши , пла́менѣмъ же неврежде́ни , бжⷭ҇твенꙋю пѣ́снь пᲂѧ́хꙋ , блгⷭ҇ви́те всѧ́каѧ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Оу҆ѧзви́хсѧ страсте́й ѻ҆рꙋ́жїемъ , и҆ ѡ҆стрꙋпи́хъ срⷣце безꙋ́мїемъ ѕло́бы сᲂдѣ́телемъ , а҆пⷭ҇ли сла́внїи и҆сцѣли́те мѧ всегѡ̀ недᲂꙋмѣ́ющасѧ , дш҃а́мъ и҆ тѣ́лᲂмъ вра́чеве сꙋ́ще . двⷤа . Во всю̀ зе́млю прᲂпᲂвѣ́дникѡвъ , вѣща́нїе и҆зы́де бжⷭ҇твенᲂе , ᲂу҆ча́щеє правᲂсла́внѡ ѡ҆ є҆ди́нственᲂмъ сꙋществѣ̀ , є҆ди́но є҆стество̀ честѝ ст҃ы́ѧ трⷪ҇цы . и҆ є҆ди́но вᲂи́стинꙋ гдⷭ҇ьство , и҆ є҆ди́но црⷭ҇тво во всѧ̀ вѣ́ки . Менѐ мнᲂгᲂсᲂгрѣши́вшаго и҆ дᲂлгᲂтерпѣ́нїе твᲂѐ бжⷭ҇твенᲂе и҆з̾жи́вша , въ пребыва́нїи прегрѣше́нїи , вᲂз̾вратѝ влⷣко , вѣ́дыи мᲂю̀ не́мᲂщь сло́ве , и҆ лѣ́нᲂсть и҆ ѕлᲂмꙋ́дрїе . боⷢ҇ . Бжⷭ҇твенаѧ клещѐ , ꙗ҆́же бжⷭ҇твенагѡ ᲂу҆́глѧ неи҆зрече́ннѡ прїе́мши бцⷣе , страсте́й мᲂи́хъ разжже́ннᲂе ᲂу҆́глїе , ᲂу҆гасѝ пречⷭ҇таѧ рᲂсо́ю твᲂи́хъ мл҃твъ , и҆ всесла́вныхъ и҆ бжⷭ҇твеныхъ а҆пⷭ҇лъ .

и҆́нъ , і҆рмо́съ . А҆́нг҃лъ ми немо́лчно . Зе́млю кро́ткихъ наслѣ́дᲂвалъ є҆сѝ , кро́тᲂкъ прпⷣбне бы́въ . тѣ́мжетисѧ мᲂлю̀ , вѣ́рнѡ ᲂу҆крᲂтѝ мл҃твами сѝ , пᲂдвиза́ющаѧсѧ на мѧ̀ при́снѡ лꙋка́вагѡ тревᲂлне́нїѧ . Ꙗ҆́кᲂже и҆зба́вилъ є҆сѝ вᲂево́ды , и҆́же непра́веднѡ ᲂу҆́мрети хᲂтѧ́щїѧ , та́кѡ ѿ чл҃къ лꙋка́выхъ ѡ҆ѕлᲂбле́нїѧ на́съ и҆зба́ви , и҆ ѿ всѧ́кᲂгѡ бѣсо́вскагѡ навѣ́та , нико́лае мᲂлѧ̀ сп҃са . Пꙋ́ть пᲂказа́лъ є҆сѝ чл҃кѡмъ пра́выи и҆ спасе́ныи , на́ньже наста́ви на́съ в̾ житїѝ прᲂхᲂдѧ́щихъ , нико́лае мл҃твами твᲂи́ми , ꙗ҆́кѡ да кꙋ́пнѡ в̾ни́демъ в̾ живо́тнаѧ врата̀ . боⷢ҇ . Крѣ́пᲂсть и҆ пѣ́нїе мᲂѐ є҆́сть , и҆́же и҆з̾ тебѐ рᲂжде́исѧ пречⷭ҇таѧ . є҆го́же прилѣ́жнѡ мᲂлѝ дв҃о , раз̾сла́бленаго мѧ̀ страстьмѝ ᲂу҆крѣпи́ти , и҆ твᲂри́ти спасе́наѧ є҆гѡ̀ пᲂвелѣ́нїѧ . та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны .

пѣ́снь , ѳ҃ . і҆рмо́с̾ . Взако́ннѣмъ сѣннᲂписа́нїи , ѻ҆́бразъ ви́димъ вѣ́рнїи , всѧ́ко бо ѻ҆трᲂча̀ лᲂжесна̀ разверза́ѧ ст҃о бг҃ᲂви , тѣ́мъ первᲂрᲂжде́ннᲂе сло́во , ѿ ѻ҆ц҃а без̾нача́льна сн҃а , первᲂрᲂжде́на и҆з̾ мт҃ре неи҆скꙋ́сныѧ бра́кꙋ велича́емъ . И҆́же слᲂвесы̀ твᲂи́хъ ᲂу҆чени́къ , ᲂу҆тверди́лъ є҆сѝ земны́ѧ кᲂнцы̀ , ѻ҆ц҃а без̾нача́льнаго сло́ве . тѣ́хъ мᲂльба́ми , и҆ менѐ и҆́же к̾ стрⷭ҇те́мъ без̾слᲂве́снымъ пᲂпо́лзшасѧ , и҆ бѣсо́вскимъ прельще́нїемъ пᲂтᲂплѧ́ема ᲂу҆ще́дри . вⷤ . Дш҃е мᲂѧ̀ страсте́мъ рабо́тающаѧ ᲂу҆стремле́нїѧмъ , пᲂстрада́вшемꙋ на́съ ра́ди принесѝ мᲂльбы̀ , ꙗ҆́кѡ да и҆зба́витъ тѧ̀ лю́тыхъ , мᲂлѧ́щимсѧ прᲂѧвле́ннѡ сщ҃е́ннымъ ᲂу҆ченико́мъ , ᲂу҆пᲂдо́бльшимсѧ тᲂго̀ плᲂтьски́мъ страда́нїемъ . Хрⷭ҇то́вы ᲂу҆ченицы̀ , є҆гда̀ съ ни́мъ сꙋди́ти сѧ́дете и҆́же сꙋдꙋ̀ пᲂви́нныхъ , неѡ҆сꙋже́ннꙋ мᲂю̀ дш҃ꙋ сᲂблюди́те , ѡ҆скверне́нꙋю без̾мѣ́стными дѣ́лы , ꙗ҆́кѡ бл҃зі́и мᲂѝ пред̾ста́телїе , и҆ ꙗ҆́кѡ ми́рꙋ застꙋ́пницы . боⷢ҇ . Дв҃о чⷭ҇таѧ , дв҃о пречⷭ҇таѧ , хрⷭ҇то́ва пᲂла́то , дв҃о прест҃а́ѧ , ст҃а́гѡ ст҃ы́хъ бг҃а , па́че вины̀ и҆ сло́ва ро́ждьшаѧ , со а҆пⷭ҇лы ст҃ы́ми ѡ҆ всѣ́хъ мᲂли́сѧ .

и҆́нъ , і҆рмо́съ . На сѷна́йстѣй гᲂрѣ̀ . Ꙗ҆́кѡ ѡ҆гражде́нїе бжⷭ҇твенᲂе и҆ ᲂу҆тверже́нїе , и҆ до́брᲂе прибѣ́жище , и҆́же земны́и ми́ръ стѧжа́ тѧ , и҆ хᲂда́тайствы бо твᲂи́ми прⷭ҇нѡ и҆збавлѧ́емсѧ , ѿ всѧ́кᲂгѡ и҆скꙋше́нїѧ и҆ тѣснᲂты̀ ѻ҆́ч҃е нико́лае . тѣ́мже во хвале́нїи вѣ́рнѡ ᲂу҆блажа́емъ тѧ . Оу҆тѣснѧ́емъ бы́въ мно́гими ѡ҆бстᲂѧ́нїи , къ прᲂстра́нствꙋ прибѣга́ю всебл҃же́нне , те́плыхъ мᲂли́твъ твᲂи́хъ , претвᲂрѝ дш҃и мᲂе́й бᲂлѣ́зни вᲂпїю́ ти , во́лны ᲂу҆крᲂтѝ ѿчаѧ́нїѧ , и҆ ᲂу҆мирѝ мᲂегѡ̀ ᲂу҆ма̀ смꙋще́нїе . Твᲂрца̀ настᲂи́тъ прише́ствїе , сꙋди́ти все́й землѝ , и҆ негᲂто́въ сы́и ѡ҆каѧ́нныи , ве́сь ᲂу҆страша́юсѧ , пᲂмышлѧ́ѧ ѕо́лъ мᲂи́хъ мно́жество , гдⷭ҇и дᲂлгᲂтерпѣли́ве , ᲂу҆ще́дри и҆ спаси́ мѧ , бжⷭ҇твеными нико́лы мᲂли́твами , прпⷣбнагѡ твᲂегѡ̀ . боⷢ҇ . Прᲂсвѣще́нїе ми спасе́нᲂе ꙗ҆ви́сѧ , ꙗ҆́же ро́ждьшаѧ свѣ́тъ , дш҃и мᲂеѧ̀ ѻ҆́блаки раз̾гᲂнѧ́ющи мра́чныѧ и҆ лю́тыѧ ꙗ҆́кѡ да сн҃ъ днѐ мл҃твами тѝ бꙋ́дꙋ , сᲂдѣва́ѧ прпⷣбнаѧ , и҆ ꙗ҆́кѡ да в̾ пѣснᲂслᲂвле́нїи прпⷣбнѣ ᲂу҆блажа́ю тѧ̀ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стихѣ́ры , а҆пⷭ҇льски . гла́съ , г҃ . Во всю̀ зе́млю и҆зы́де вѣща́нїе ва́ше ст҃і́и а҆пⷭ҇ли , и҆́дᲂльскꙋю ле́сть разрꙋши́сте , бг҃ᲂразꙋ́мїе прᲂпᲂвѣ́давше . сѐ до́брыи по́двигъ ва́шъ є҆́сть блаже́ннїи . тѣ́мже пᲂе́мъ и҆ славᲂсло́вимъ ва́ша па́мѧти .

сти́хъ : и҆спо́лнихᲂмсѧ за ᲂу҆́тра . Хрⷭ҇то́вы за́пᲂвѣди непᲂро́чнѡ сᲂхра́ньше ст҃і́и а҆пⷭ҇ли , тꙋ́не прїѧ́сте тꙋ́не пᲂдава́ете , и҆сцѣлѧ́юще стра́сти дꙋ́шъ и҆ тѣле́съ на́шихъ . тѣ́мже и҆мꙋ́ще дерзнᲂве́нїе , тᲂго̀ мᲂли́те пᲂми́лᲂватисѧ дш҃а́мъ на́шимъ .

сти́хъ : и҆ бꙋ́ди свѣ́тлᲂсть . мⷱ҇ꙋ . Ꙗ҆́кѡ свѣти́ла в̾ ми́рѣ сїѧ́ете и҆ по сме́рти ст҃і́и мч҃нцы , по́двигᲂмъ до́брымъ пᲂдви́гшесѧ . и҆мꙋ́ще дерзнᲂве́нїе хрⷭ҇та̀ мᲂли́те , пᲂми́лᲂватисѧ дш҃а́мъ на́шимъ . сла́ва , и҆ нн҃ѣ , боⷢ҇ . Без̾ сѣ́мене зачала̀ є҆сѝ ѿ́ дх҃а ст҃а . и҆ славᲂсло́вѧще вᲂспѣва́емъ тѧ̀ , ра́дꙋисѧ прест҃а́ѧ дв҃о .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= сла́ва , и҆ нн҃ѣ , боⷢ҇ . во́гласъ трᲂпарѧ̀ . пᲂсе́мъ , є҆ктенїѧ̀ . и҆ ча́съ , а҃ . =и҆ ѿпꙋ́стъ .

Въ четверто́къ , бл҃же́нны . гла́съ , г҃ .

Ѿве́ргшаго хрⷭ҇тѐ за́пᲂвѣдь твᲂю̀ пра́ѻ҆ц҃а а҆да́ма , и҆з̾ раѧ̀ и҆з̾гна́лъ є҆сѝ . разбо́йника же ще́дре , и҆спᲂвѣ́давша тѧ̀ на крⷭ҇тѣ̀ , во́нь всели́лъ є҆сѝ , зᲂвꙋ́ща , пᲂмѧни́ мѧ сп҃се во црⷭ҇твїи сѝ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . И҆́же тро́стїю крⷭ҇тнᲂю и҆з̾ глꙋбины̀ невѣ́жьствїѧ , лю́ди и҆зве́дше а҆пⷭ҇ли , и҆ є҆́ллинскꙋю пре́лесть ѿгна́сте ѿ землѝ , и҆ неле́стнїи спаси́теле бы́сте вѣ́рнымъ вᲂи́стинꙋ , тѣ́мже бл҃жи́ми є҆стѐ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Ꙗ҆́кѡ лꙋчѝ та́йныѧ и҆ свѣти́ла пра́веднагѡ сл҃нца , бы́вше сла́внїи а҆пⷭ҇ли , ѕлᲂче́стїѧ тмꙋ̀ ѿгна́ли є҆стѐ , и҆ к̾ свѣ́тꙋ бг҃ᲂразꙋ́мїѧ наста́висте всѧ̀ лю́ди , тѣ́мже вы̀ пᲂчита́емъ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Мꙋ́камъ раз̾жже́нїѧ претерпѣ́сте , свы́ше страда́льцы бл҃гᲂда́ти ро́сꙋ прїѧ́ли є҆стѐ . и҆ чл҃ческїѧ стра́сти , ꙗ҆́кѡ хрⷭ҇то́вы ᲂу҆го́дницы при́снѡ бл҃гᲂче́стнѡ мꙋ́дрїи и҆сцѣлѧ́ете . тѣ́мже всѣ́хъ ва́съ ст҃і́и сла́вимъ .

сла́ва . Трⷪ҇цы сщ҃е́ннїи прᲂпᲂвѣ́дницы , пе́тре и҆ па́вле , ма́рко и҆ лꙋка̀ , матѳе́є сі́мѡне , і҆а́кѡве , а҆ндре́є , и҆ і҆ѡа́нне , ѳᲂмо̀ , варѳᲂлᲂмі́е , и҆ филі́ппе мꙋ́дре , прилѣ́жнѡ всегда̀ є҆ѧ̀ мᲂли́те , и҆зба́вити на́съ ѿ всѧ́кᲂгѡ ѡ҆бстᲂѧ́нїѧ .

и҆ ны́нѣ . А҆пⷭ҇лѡмъ дᲂбро́то , и҆ ст҃ы́хъ страстᲂте́рпецъ ра́дᲂсте , бг҃ᲂра́дᲂваннаѧ влⷣчце ѡ҆ на́съ мᲂлѝ , всѣ́хъ сп҃са и҆ бг҃а . ꙗ҆́кѡ да прегрѣше́нїи прїи́мемъ ѡ҆ставле́нїе , и҆ бжⷭ҇твеныѧ жи́зни всѝ прича́стницы бꙋ́демъ .