Во вто́рникъ , ве́черъ . на гдⷭ҇и вᲂзва́хъ , стⷯры , чⷭ҇тно́мꙋ и҆
живᲂтвᲂрѧ́щемꙋ крⷭ҇тꙋ̀ . гла́съ , г҃ . =запѣ́въ : ꙗ҆́кѡ ѿ тебѐ ѡ҆чище́нїе
є҆́сть . Т=ва́рь ѡ҆ст҃и́сѧ є҆ди́не дᲂлгᲂтерпѣли́ве , чⷭ҇тно́ю кро́вїю твᲂе́ю ,
и҆ска́павшею ѿ ре́бръ твᲂи́хъ . рѣ́ки же и҆з̾сꙋшены̀ бы́ша мнᲂгᲂбо́жїѧ , и҆
а҆да́мъ и҆зба́висѧ ѡ҆сꙋжде́нїѧ , распѧ́тїемъ ти сло́ве .
ᲂу҆пᲂва̀ дꙋша̀ мᲂѧ̀ на́ гдⷭ҇а . И҆́же всѧ́ческихъ твᲂре́цъ и҆ гдⷭ҇ь , и҆
всѣ́хъ бг҃ъ , ѡ҆бнищава́етъ во́лею . стрⷭ҇ть за чл҃ки претерпѣ́лъ є҆́сть ,
на крⷭ҇тъ вᲂз̾дви́жемъ , клѧ́твᲂю зако́ннᲂю .
да ᲂу҆пᲂва́етъ і҆и҃ль на́ гдⷭ҇а . Распина́ешисѧ бл҃гᲂда́телю гдⷭ҇и
хᲂтѣ́нїемъ , кᲂпїе́мъ же в̾ ре́бра свᲂѧ̀ прᲂбᲂде́нъ бы́въ живᲂда́вче , два̀
и҆сто́чника без̾ сме́ртїѧ и҆стᲂчи́лъ є҆сѝ . тѣ́мже непреста́ннѡ всѝ вѣ́рнѡ
сла́вимъ , твᲂѧ̀ стрⷭ҇ти ще́дре .
та́же , в̾ минѣ́и , стⷯры , ст҃о́мꙋ , а҆́ще и҆́мать . а҆́ще нѣ́сть
минѣ́и . и҆́ны , стихѣ́ры , бцⷣѣ . гла́съ , то́йже . =запѣ́въ : ѿ всѣ́хъ
без̾зако́нїи є҆гѡ̀ . З=рѧ́щи и҆́же и҆з̾ тебѐ рᲂжде́ннаго всенепᲂро́чнаѧ ,
пᲂвѣ́шена на́ древѣ , вᲂсклица́ше вᲂпїю́щи , любе́знѣйшеє мᲂѐ ча́до , гдѣ̀
твᲂѧ̀ за́йде дᲂбро́та свѣтᲂно́снаѧ , ᲂу҆дᲂбри́вшагѡ чл҃ческᲂе є҆стество̀ .
пᲂхвали́те є҆гѡ̀ всѝ лю́дїє . Ѻ҆рꙋ́жїемъ ᲂу҆ѧ́звена мѧ , началᲂзло́бнагѡ
ѕмі́ѧ , и҆́спᲂлꙋ ме́ртва на ѻ҆дрѣ̀ лежа́ща ѿча́ѧнїѧ , ѻ҆трᲂкᲂви́це и҆сцѣлѝ
вско́рѣ , врачева́нїемъ твᲂеѧ̀ мл҃твы , и҆ спаси́ мѧ наде́же мᲂѧ̀ и҆ пᲂкро́ве .
и҆ и҆́стина гдⷭ҇нѧ пребыва́етъ во́ вѣки . Ѿлᲂжѝ дш҃е не ᲂу҆до́бь нᲂси́маѧ
бремена̀ , твᲂи́хъ дре́внихъ прегрѣше́нїи , и҆ ꙗ҆рьмꙋ̀ вы́ю пᲂд̾клᲂнѝ ле́гкᲂмꙋ
свᲂегѡ̀ гдⷭ҇а , и҆́же ѿ дв҃ы вᲂсїѧ́вшемꙋ , а҆́нг҃льскимъ гла́сᲂмъ , ꙗ҆́кѡ
и҆з̾ ѻ҆́блака ле́гка .
сла́ва , и҆ ны́нѣ , крⷭ҇тᲂбоⷢ҇ . Свѣ́тᲂмъ твᲂи́хъ мл҃твъ дв҃о прᲂсвѣтѝ ,
ꙗ҆́кѡ мт҃и вы́шнѧгѡ , смире́нꙋю ми дш҃ꙋ , да ви́жꙋ пꙋ́ть спасе́ныи , є҆го́же бо
зрѣ́ти немᲂгꙋ̀ ѡ҆каѧ́нныи , ѿ сꙋ́щагѡ во мнѣ̀ грѣха̀ .
та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и
в̾ ве́черъ се́й . на стихо́внѣ , стⷯры , крⷭ҇тны . гла́съ , г҃ . Крⷭ҇тꙋ̀
твᲂемꙋ̀ пᲂклᲂнѧ́емсѧ хрⷭ҇тѐ честно́мꙋ , сᲂхра́нникꙋ ми́рᲂви , спасе́нїю на́мъ
грѣ́шникѡмъ , вели́кᲂмꙋ ѡ҆чище́нїю , цр҃е́мъ пᲂбѣ́дѣ , и҆ пᲂхвалѣ̀ все́й
вселе́ннѣй .
сти́хъ : к̾ тебѣ̀ вᲂзведо́хъ . Крⷭ҇тᲂѡ҆бра́знѡ мѡѷсе́й на гᲂрѣ̀ рꙋ́цѣ
вᲂздѣ́въ к̾ высᲂтѣ̀ , а҆мали́ка пᲂбѣжда́ше . ты́ же сп҃се дла́ни прᲂсте́ръ
на крⷭ҇тѣ̀ чⷭ҇тнѣ́мъ , ѡ҆бъє́мъ мѧ спа́слъ є҆сѝ ѿ рабо́ты вра́жїѧ . и҆
да́лъ ми є҆сѝ зна́менїе живо́тнᲂе , бѣжа́ти ѿ лꙋ́ка прᲂти́вныхъ ми . сегѡ̀
ра́ди сло́ве пᲂклᲂнѧ́юсѧ крⷭ҇тꙋ̀ твᲂемꙋ̀ честно́мꙋ .
сти́хъ : пᲂми́лꙋй на́съ гдⷭ҇и . мⷱ҇ꙋ . Прⷪ҇ро́цы и҆ а҆пⷭ҇ли хрⷭ҇то́вы , и҆
мч҃нцы , наꙋчи́ша ны пѣ́ти трⷪ҇цꙋ є҆динᲂсꙋ́щнꙋю , и҆ прᲂсвѣти́ша ꙗ҆зы́ки
прельще́ныѧ , и҆ прича́стники а҆́нг҃лѡмъ сᲂтвᲂри́ша сн҃ы чл҃ческїѧ .
сла́ва , и҆ ны́нѣ , крⷭ҇тᲂбоⷢ҇ . Зрѧ́щи и҆́же и҆з̾ тебѐ рᲂжде́ннаго
всенепᲂро́чнаѧ , пᲂвѣ́шена на́ древѣ , пла́каше вᲂпїю́щи , вᲂз̾лю́бленᲂе мᲂѐ
ча́до , гдѣ̀ твᲂѧ̀ за́йде дᲂбро́та свѣтᲂно́снаѧ , дᲂбро̀ сᲂтвᲂри́вшагѡ
чл҃ческᲂмꙋ ро́дꙋ .
та́же , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь ,
ст҃о́мꙋ . сла́ва , и҆ ны́нѣ , крⷭ҇тᲂбоⷢ҇ . во́ гласъ трᲂпарѧ̀ . пᲂсе́мъ ,
є҆ктенїѧ̀ . =и҆ ѿпꙋ́стъ .
Во вто́рникъ , на па́вечерницѣ . кано́нъ , прест҃ѣ́й бцⷣѣ . гла́съ , г҃ .
пѣ́снь , а҃ . і҆рмо́съ . И҆́же во́ды дре́вле ма́нїемъ бжⷭ҇твенымъ , во є҆ди́но
со́нмище сᲂвᲂкꙋпѝ , и҆ раздѣли́выи мо́ре і҆и҃льтескимъ лю́демъ . сѐ бг҃ъ на́шъ
препрᲂсла́вленъ сы́и , тᲂго̀ є҆ди́нагѡ вᲂспᲂе́мъ , ꙗ҆́кѡ прᲂсла́висѧ .
запѣ́въ : прест҃а́ѧ гжⷭ҇е бцⷣе спасѝ на́съ . Ꙗ҆́кѡ и҆сто́чникъ млрⷭ҇дїѧ и҆
млⷭ҇ти , вѣ́дыи тѧ бж҃їю мт҃рь , пристꙋ́пль мᲂлю́сѧ твᲂе́й бл҃гᲂсти , да́ти ми
ᲂу҆миле́нїе , ꙗ҆́кѡ да сѣ́тꙋю и҆ пла́чꙋсѧ прегрѣше́нїи мᲂи́хъ , всечⷭ҇таѧ
влⷣчце . Дш҃е́вныхъ мѝ сле́зъ да́ждь ка́пли , ѡ҆мыва́ющїѧ скве́рнꙋ всю̀
мᲂи́хъ дѣѧ́нїи , и҆ лꙋка́ваѧ пᲂмышле́нїѧ , всю̀ ѡ҆чища́ющїѧ дш҃и мᲂеѧ̀
нечистᲂтꙋ̀ , и҆ цр҃кᲂвь твᲂрѧ́щїѧ мѧ бж҃їѧ дх҃а . сла́ва . Ѻ҆бꙋрева́емь
вᲂлно́ю , и҆ тревᲂлне́нїемъ мᲂи́хъ прегрѣше́нїи , и҆ лю́тѣ всегда̀ бᲂрца̀
рабо́тами пᲂтᲂплѧ́емь , и҆ во глꙋбинꙋ̀ пᲂги́бели нн҃ѣ ѿпꙋще́нъ , вᲂпїю́ ти
пренепᲂро́чнаѧ спаси́ мѧ . и҆ нн҃ѣ . Млрⷭ҇дїѧ ра́ди млⷭ҇ти влⷣчце всѣ́хъ ,
пᲂми́лꙋй ѡ҆каѧ́ннꙋю ми дш҃ꙋ , и҆ ѻ҆гнѧ̀ и҆зба́ви мѧ вѣ́чнꙋющагѡ , и҆
бѣсо́вскагѡ напа́данїѧ , и҆́же пᲂд̾ кро́въ тво́й бцⷣе нн҃ѣ прибѣга́ющагѡ .
пѣ́снь , г҃ . і҆рмо́съ . И҆́же ѿ несꙋ́щихъ всѧ̀ приведы́и , сло́вᲂмъ
сᲂзида́ема , сᲂверша́ема же дх҃ᲂмъ , вседержи́телю вы́шнїи , в̾ любвѝ свᲂе́й
ᲂу҆твердѝ менѐ . Свѣ́тᲂмъ бжⷭ҇твенымъ ѡ҆зарѝ всепѣ́таѧ , ѡ҆мраче́нныи ᲂу҆́мъ
мо́й ѕлы́ми по́мыслы . ты́ бо свѣ́тъ рᲂдила̀ є҆сѝ , вᲂсїѧ́вшїи ѿ ѻ҆ц҃а
прⷭ҇нᲂсꙋ́щныи . Запе́нъ дш҃и мᲂе́й стᲂпы̀ и҆́же пра́ведныхъ вра́гъ , к̾ землѝ
приразѝ . но твᲂе́ю десни́цею влⷣчце чи́стаѧ вᲂста́ви мѧ . сла́ва .
Мытаре́выми гла́сы , ѡ҆каѧ́нныи а҆́зъ зᲂвꙋ́ ти , ѡ҆чи́сти мѧ влⷣчце , и҆
прегрѣше́нїемъ ѡ҆ставле́нїе , твᲂе́ю мᲂли́твᲂю пᲂда́ждь рабꙋ̀ твᲂемꙋ̀ . и҆
ны́нѣ . И҆сцѣлѝ ꙗ҆́звы дш҃е́вныѧ , и҆ мнᲂгᲂмꙋ́тнᲂе пᲂмышле́нїи вᲂлне́нїе ,
влⷣчце ᲂу҆ти́ши , и҆ ми́рнᲂе ми ᲂу҆стрᲂе́нїе да́ждь .
пѣ́снь , д҃ . і҆рмо́съ . Пᲂлᲂжѝ к̾ на́мъ тве́рдꙋю любо́вь сѝ гдⷭ҇и ,
є҆динᲂро́днаго бо тѝ сн҃а на́съ ра́ди на сме́рть в̾да́лъ є҆сѝ . тѣ́мже тѝ
вᲂпїе́мъ вᲂсхвалѧ́юще , сла́ва си́лѣ твᲂе́й . Пло́ть сластьмѝ , и҆
сладᲂстра́стїемъ ѡ҆скверни́хъ , и҆ дш҃и мᲂеѧ̀ чистᲂтꙋ̀ , скве́рными мы́сльми
ѡ҆калѧ́хъ , и҆ ᲂу҆́мъ пᲂмрачи́хъ , непре́зри ᲂу҆́бѡ влⷣчце раба̀ твᲂегѡ̀ .
И҆збавле́нїе ми бꙋ́ди , и҆ прибѣ́жище и҆ держа́ва , ро́гъ же спасе́нїѧ чⷭ҇таѧ
и҆ застꙋ́пница , всѧ́кїѧ мѧ ско́рби и҆збавлѧ́ющи всегда̀ , и҆ врагѝ мᲂѧ̀ всѧ̀
пᲂсрамлѧ́ющи . сла́ва . Мно́гими напа́стьми ны́нѣ ѡ҆держи́мь є҆́смь
ѡ҆каѧ́нныи , и҆ бѣсо́вскими кᲂва́рствы , всегда̀ при́снѡ пᲂгрꙋжа́емь ,
прибѣга́ю ти ны́нѣ , те́плᲂю сѝ мл҃твᲂю спаси́ мѧ раба̀ твᲂегѡ̀ . и҆ ны́нѣ .
Но́щь мѧ̀ несвѣтла̀ стрⷭ҇те́й ѡ҆держи́тъ ѡ҆каѧ́ннаго . но свѣ́тᲂмъ твᲂи́мъ
бл҃га́ѧ , дш҃и мᲂеѧ̀ ѻ҆́блаки раз̾женѝ и҆ к̾ свѣ́тꙋ наста́ви пᲂвелѣ́нїи
бж҃їихъ , всенепᲂро́чнаѧ .
пѣ́снь , є҃ . і҆рмо́съ . Ꙗ҆́кѡ ви́дѣ и҆са́їѧ ѻ҆бра́знѡ на прⷭ҇то́лѣ
превысо́цѣ бг҃а , ѿ а҆́нг҃лъ сла́вы да́ры прїе́млюща , ѽ ѡ҆каѧ́нныи вᲂпїѧ́ше
а҆́зъ , прᲂви́дѣхъ вᲂплᲂща́ема бг҃а , свѣ́та невече́рнѧ , и҆ ми́рᲂмъ
ѡ҆блада́юща . Вре́мѧ живᲂта̀ мᲂегѡ̀ ꙗ҆́кѡ ды́мъ и҆счезѐ , и҆ к̾ сме́ртнымъ
две́ремъ прибли́жихсѧ , и҆ ᲂу҆жаса́юсѧ бѣсо́вскагѡ напа́данїѧ , дѣ́ла бо тѣ́хъ
дѣ́ѧхъ всегда̀ , но всенепᲂро́чнаѧ ᲂу҆ще́дри и҆ спаси́ мѧ . И҆з̾сꙋша́ющи
дв҃о ѕо́лъ мᲂи́хъ бе́зднꙋ , пᲂда́ждь ми рѣ́ки слеза́мъ , и҆ ᲂу҆гасѝ ве́сь
страсте́й мᲂи́хъ пла́мень ѻ҆трᲂкᲂви́це , и҆ спᲂдо́би и҆зба́витисѧ ѻ҆гнѧ̀ , и҆
про́чихъ мꙋче́нїи в̾ де́нь сꙋ́дныи . сла́ва . Бᲂлѣ́вшꙋю дш҃ꙋ мᲂю̀ грѣхѝ
пречⷭ҇таѧ , и҆сцѣлѝ твᲂи́мъ ми́лᲂванїемъ . и҆ спᲂдо́би мѧ твᲂри́ти
во смире́нїи , сн҃а твᲂегѡ̀ пᲂвелѣ́нїѧ при́снѡ , ꙗ҆́кѡ да вᲂспрїимꙋ̀ сегѡ̀
бл҃гᲂсть . и҆ ны́нѣ . Ѻ҆б̾вдᲂвѣ́вшаѧ сн҃е мо́й невѣ́стныѧ ѻ҆де́жды ,
бжⷭ҇твенаѧ цр҃кви твᲂѧ̀ , ѿ ре́бръ ст҃ы́ѧ кро́ве ѡ҆дѣ́ѧсѧ . а҆́зъ же бᲂлѣ́знꙋю ,
всѧ̀ бᲂлѣ́зни твᲂѧ̀ зрѧ́щи на крⷭ҇тѣ̀ , ꙗ҆́же сло́вꙋ мт҃и рыда́ющи глаго́лаше .
пѣ́снь , ѕ҃ . і҆рмо́с̾ . Бе́здна пᲂслѣ́днѧѧ грѣхо́въ ѡ҆бы́де мѧ , и҆
и҆счеза́етъ дх҃ъ мо́й . но прᲂсте́ръ влⷣко высо́кꙋю свᲂю̀ мы́шцꙋ , ꙗ҆́кѡ
петра́ мѧ ᲂу҆пра́вителю спасѝ . Вели́ко тѧ̀ бж҃їи сн҃ъ грѣ́шникѡмъ прибѣ́жище
пᲂказа̀ , вᲂпло́щьсѧ бг҃ᲂневѣ́сто ѿ чи́стыхъ крᲂве́й твᲂи́хъ . тѣ́мже млⷭ҇тива
твᲂи́мъ рабо́мъ бꙋ́ди . Прᲂсвѣтѝ заре́ю твᲂе́ю бл҃га́ѧ , ѡ҆мраче́ннїи срⷣца
мᲂегѡ̀ ѻ҆́чи , по́мыслы непᲂдо́бными . и҆ свѣ́тꙋ сн҃а сᲂтвᲂрѝ , и҆ в̾мѣ́стѡ
свѣ́тло мѧ̀ вселѝ . сла́ва . Во́лны страстны́хъ пᲂмышле́нїи , всегда́ мѧ
смꙋща́ютъ пречⷭ҇таѧ , лꙋка́выхъ же дꙋхѡ́въ бꙋ́ри пᲂгрꙋжа́ютъ . но ᲂу҆тверди́ мѧ
на ка́мени без̾стра́стїѧ . и҆ ны́нѣ . Оу҆снꙋ́хъ въ сме́рти дш҃е́внѣй , и҆
во́ грᲂбѣ лежꙋ̀ ѿча́ѧнїѧ . но да́ждь ми рꙋ́кꙋ и҆ вᲂз̾дви́гни мᲂлю́сѧ ,
к̾ пᲂкаѧ́нїю жи́зни наставлѧ́ющи мѧ̀ .
Гдⷭ҇и пᲂми́лꙋй ,= гⷤ . сла́ва , и҆ ны́нѣ . сѣда́ленъ , гла́съ , г҃ . Ж=е́злъ
си́лы стѧжа́вше , крⷭ҇тъ сн҃а твᲂегѡ̀ бцⷣе тѣ́мъ пᲂбѣжда́емъ вра́жїѧ
шата́нїѧ , любо́вїю тѧ̀ всегда̀ велича́ющїи .
пѣ́снь , з҃ . і҆рмо́съ . Пе́рвїе тѣ́лꙋ злато́мꙋ , пе́рс̾скᲂю че́стїю дѣ́ти
непᲂклᲂни́шасѧ , трїѐ пᲂю́ще пᲂсредѝ пе́щи ѻ҆гнѧ̀ , ѻ҆ц҃е́мъ бг҃ъ
бл҃гᲂслᲂве́нъ є҆сѝ . Крѣ́пᲂстїю препᲂѧ́ши чи́стаѧ дш҃ꙋ мᲂю̀ , и҆з̾немо́гшꙋю
грѣхѝ . и҆ спаси́ мѧ сн҃ꙋ твᲂемꙋ̀ , вᲂпїю́ща , ѻ҆ц҃ъ на́шихъ бж҃е блгⷭ҇ве́нъ
є҆сѝ . Сме́ртнагѡ часа̀ ᲂу҆бᲂѧ́всѧ , без̾сме́ртнаго ра́ди и҆ вѣ́чнаго
мꙋче́нїѧ , тебѣ̀ припа́даю спаси́ мѧ ѻ҆трᲂкᲂви́це , ѿ сѣ́ти лᲂвѧ́щихъ
бг҃ᲂрᲂди́тельнице . сла́ва . Ꙗ҆́же невмѣсти́маго бг҃а , во́ чрево
вмѣсти́вшаѧ , мно́гими прегрѣше́нїи ᲂу҆тѣшнѧ́емыи ᲂу҆́мъ мо́й бцⷣе свᲂбᲂдѝ
си́хъ ѡ҆сꙋже́нїѧ . и҆ нн҃ѣ . Ро́дъ чл҃ческїи тѧ̀ мо́литъ бцⷣе , влⷣчце
пᲂми́лꙋй рабы̀ свᲂѧ̀ , и҆́же вѣ́рᲂю сн҃ꙋ твᲂемꙋ̀ вᲂпїю́щихъ , ѻ҆ц҃ъ на́шихъ
бж҃е бл҃гᲂслᲂве́нъ є҆сѝ .
пѣ́снь , и҃ . і҆рмо́съ . Въ непᲂстᲂѧ́ннѣмъ ѻ҆гнѝ сᲂвᲂкꙋ́пльшесѧ , и҆́же
бл҃гᲂче́стїѧ пред̾стᲂѧ́ще ю҆́нᲂши , пла́менѣмъ же неврежде́ни , бжⷭ҇твеннꙋю
пѣ́снь пᲂѧ́хꙋ , блгⷭ҇ви́те всѧ́каѧ дѣ́ла гдⷭ҇а , и҆ превᲂзнᲂси́те є҆гѡ̀
во́ вѣки . Пᲂзави́дѣвъ блꙋ́днᲂмꙋ вᲂи́стинꙋ , и҆ житїѐ мᲂѐ всѐ скᲂнча́въ
во грѣсѣ́хъ . ны́нѣ зᲂвꙋ̀ сᲂгрѣши́хъ ти , сᲂтвᲂри́ мѧ ѻ҆трᲂкᲂви́це ꙗ҆́кѡ
є҆ди́нᲂгѡ ѿ нае́мникъ , сн҃а и҆ зижди́телѧ твᲂегѡ̀ , да тѧ̀ сла́влю во всѧ̀
вѣ́ки . Напо́лнисѧ ѕѡ́лъ дш҃а мᲂѧ̀ , и҆ привмѣне́нъ бы́хъ со всѣ́ми в̾ ро́въ
низ̾хᲂдѧ́щими . но ты́ мѧ бцⷣе дв҃о , и҆зведѝ и҆з̾ ꙗ҆́мы страстны́ѧ , и҆
ѿ бре́нїѧ тимѣ́нна ѕѡ́лъ мᲂи́хъ . сла́ва . Мᲂлю́сѧ хрⷭ҇то́ви . ро́ждьшаѧ
сегѡ̀ ѿ ст҃ы́хъ ти чре́слъ бцⷣе , мно́гихъ мѝ прегрѣше́нїемъ да́ти
прᲂще́нїе . да пᲂю̀ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀
во́ вѣки . и҆ ны́нѣ . Є҆гда̀ бж҃їимъ пᲂвелѣ́нїемъ , хо́щетъ дш҃а мᲂѧ̀
ѿ житїѧ̀ сегѡ̀ ѿи҆тѝ , ѿ сѣ́ти лᲂвѧ́щихъ и҆схитѝ пречⷭ҇таѧ , тебѣ̀
вᲂпїю́щаго , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀
во́ вѣки .
пѣ́снь , ѳ҃ . і҆рмо́с̾ . Взако́ннѣмъ сѣннᲂписа́нїи , ѻ҆́бразъ ви́димъ
вѣ́рнїи , всѧ́ко бо ѻ҆трᲂча̀ лᲂжесна̀ разверза́ѧ ст҃о бг҃ᲂви , тѣ́мъ
первᲂрᲂжде́ннᲂе сло́во , ѿ ѻ҆ц҃а без̾нача́льна сн҃а , первᲂрᲂжде́на и҆з̾ мт҃ре
неи҆скꙋ́сныѧ бра́кꙋ велича́емъ . Ро́дъ чл҃ческїи всенепᲂро́чнаѧ , твᲂе́ю
непᲂбѣди́мᲂю мᲂли́твᲂю ны́нѣ ѡ҆бᲂга́щьсѧ , вᲂпїе́тъ де́нь и҆ но́щь ,
непреста́й всегда̀ мᲂлѧ́щисѧ , твᲂрцꙋ̀ и҆ сн҃ꙋ свᲂемꙋ̀ , ᲂу҆ще́дрити пᲂю́щїѧ
тѧ . Стрѣ́лы страсте́й без̾мѣ́стныхъ , дш҃ꙋ мᲂю̀ ᲂу҆ѧ́звиша бѣсо́вскими
прило́ги , сᲂпрᲂти́вными стрѣла́ми пᲂмышле́нїи , всегда̀ ᲂу҆́мъ мо́й
смꙋща́ютъ . тѣ́мже и҆сцѣлѝ ѻ҆трᲂкᲂви́це , не и҆сцѣ́льныѧ ми ꙗ҆́звы . сла́ва .
Ѿи҆мѝ чⷭ҇таѧ бг҃ᲂневѣ́сто ѿ менѐ , бᲂрю́щихъ вра́гъ ра́ны вско́рѣ .
вᲂста́нїѧ бо тѣ́хъ , и҆ мно́гᲂе лꙋка́вство и҆ на́глᲂсть к̾ тᲂмꙋ̀ нетерплю̀
ѡ҆каѧ́нныи . но пᲂтщи́сѧ и҆зба́вити мѧ . и҆ нн҃ѣ . Ты̀ немᲂже́нїе вѣ́си ,
смире́наго ми тѣлесѐ , ꙗ҆́звы дш҃и мᲂеѧ̀ , срⷣца мᲂегѡ̀ стᲂна́нїе , и҆ ᲂу҆ма̀
мᲂегѡ̀ заблꙋже́нїе и҆ пре́лести . тѣ́мже твᲂи́мъ млрⷭ҇дїемъ , ѡ҆бᲂю́дꙋ да́ждь
и҆сцѣле́нїе . та́же , дᲂсто́йнѡ є҆́сть . и҆ про́чеє , ѡ҆бы́чно . и҆
ѿпꙋ́стъ .
Въ сре́дꙋ , на ᲂу҆́трени . по а҃ , стихᲂло́гїи . сѣда́льны , крⷭ҇тны .
гла́съ , г҃ . Крⷭ҇тъ вᲂдрꙋзи́сѧ на землѝ , и҆ кᲂснꙋ́сѧ небесѝ . не ꙗ҆́кѡ
дре́вꙋ дᲂсѧ́гшꙋ высᲂтꙋ̀ , но тебѣ̀ и҆́же на не́мъ и҆спᲂлнѧ́ющемꙋ всѧ́ческаѧ .
гдⷭ҇и сла́ва тебѣ̀ . сти́хъ : вᲂзнᲂси́те гдⷭ҇а бг҃а на́шегѡ , и҆ кла́нѧйтесѧ
пᲂд̾но́жїю но́гꙋ є҆гѡ̀ ꙗ҆́кѡ ст҃о є҆́сть . На кипари́сѣ и҆ пѣ́вгѣ и҆ ке́дрѣ ,
вᲂз̾несе́сѧ а҆́гньче бж҃їи , да спасе́ши и҆́же вѣ́рᲂю пᲂкланѧ́ющїѧсѧ ,
во́льнᲂмꙋ твᲂемꙋ̀ распѧ́тїю . хрⷭ҇тѐ бж҃е сла́ва тебѣ̀ . сла́ва , и҆ ны́нѣ ,
крⷭ҇тᲂбоⷢ҇ . Же́злъ си́лы стѧжа́вше крⷭ҇тъ сн҃а твᲂегѡ̀ бцⷣе . тѣ́мъ
низ̾лага́емъ вра́жїѧ шата́нїѧ , и҆́же любо́вїю тебѐ непреста́ннѡ
велича́ющїи .
по в҃ , стихᲂло́гїи . сѣда́льны , гла́съ , г҃ . Крⷭ҇тъ и҆ сме́рть
пᲂстрада́ти вᲂсхᲂтѣ̀ , пᲂсредѣ̀ тваре́й тᲂго̀ вᲂдрꙋзи́лъ є҆сѝ . є҆гда̀
бл҃гᲂи҆зво́ли сп҃се тѣ́ло свᲂѐ пригвᲂзди́ти , тᲂгда̀ и҆ сл҃нце лꙋчѝ сᲂкры̀ .
и҆ сїѧ̀ раз̾бо́йникъ зрѧ̀ , на крⷭ҇тѣ́ тѧ вᲂспѣва́ше , вᲂпїѧ̀
бл҃гᲂгᲂвѣ́йнѡ , пᲂмѧни́ мѧ гдⷭ҇и ; и҆ вᲂспрїѧ́тъ вѣ́рᲂвавъ ра́й . сти́хъ :
бг҃ъ же цр҃ь на́шъ пре́жде вѣ́къ , сᲂдѣ́ла спасе́нїе пᲂсредѣ̀ землѝ . Не
и҆сче́тнѣй вла́сти твᲂе́й , и҆ во́льнᲂмꙋ распѧ́тїю , а҆́нг҃льскаѧ во́инства
дивлѧ́хꙋсѧ зрѧ́ще гл҃ахꙋ , ка́кѡ и҆́же неви́димыи , пло́тїю ᲂу҆ранѧ́шесѧ .
хᲂтѧ̀ и҆зба́вити ѿ и҆стлѣ́нїѧ чл҃чество ; тѣ́мже ꙗ҆́кѡ бл҃гᲂда́телю вᲂпїе́мъ
тѝ , сла́ва хрⷭ҇тѐ смᲂтре́нїю твᲂемꙋ̀ . сти́хъ : ди́венъ бг҃ъ во ст҃ы́хъ
свᲂи́хъ , бг҃ъ і҆и҃левъ . мⷱ҇ꙋ . Во ѡ҆рꙋжи́вшесѧ в̾ пᲂсо́бїе хрⷭ҇то́во , и҆
ѡ҆бо́лкшесѧ во ѻ҆рꙋ́жїе вѣ́ры , ѡ҆пᲂлче́нїѧ вра́жїѧ страда́льчески
низ̾лᲂжи́сте , ᲂу҆се́рдно бо наде́ждею жи́зни , претерпѣ́сте всѧ̀ мꙋчи́тельскаѧ
преще́нїѧ и҆ ра́ны . тѣ́мже и҆ вѣнцы̀ прїѧ́сте , мч҃нцы хрⷭ҇то́вы
терпѣливᲂдꙋ́шнїи . сла́ва , и҆ ны́нѣ , крⷭ҇тᲂбоⷢ҇ . Пᲂно́снꙋю ще́дре
сме́рть , ра́ди распѧ́тїѧ во́лею претерпѣ́лъ є҆сѝ , є҆́же ро́ждьшаѧ зрѧ́щи
ᲂу҆ѧзвлѧ́шесѧ . є҆ѧ́же мᲂльба́ми за бл҃гᲂꙋтро́бїе млⷭ҇ти твᲂеѧ̀ , є҆ди́не
пребл҃гі́и чл҃кᲂлю́бче гдⷭ҇и , ᲂу҆ще́дри и҆ спасѝ ми́ръ , взе́млѧи ми́ра
грѣхѝ .
по г҃ , стихᲂло́гїи . сѣда́ленъ , гла́съ , г҃ . Распѧ́тїе и҆ сме́рть
прїѧ́тъ , живо́тъ без̾сме́ртныи и҆стᲂчи́лъ є҆сѝ на́мъ хрⷭ҇тѐ сп҃се , и҆
ѿ тлѝ ми́ръ свᲂбᲂди́въ . тѣ́мже твᲂѧ̀ сла́вимъ жизнᲂда́вче чл҃кᲂлю́бче ,
стра́сти спасе́ныѧ , и҆́ми же всѝ спаса́емсѧ , честна́гѡ крⷭ҇та̀ твᲂегѡ̀ ,
ми́ръ и҆ непᲂбѣди́мᲂе ѻ҆рꙋ́жїе и҆мꙋ́ще . сла́ва , и҆ ны́нѣ , крⷭ҇тᲂбоⷢ҇ .
Неи҆скꙋсᲂбра́чнаѧ чи́стаѧ мт҃и твᲂѧ̀ хрⷭ҇тѐ , зрѧ́щи тѧ̀ ме́ртва ви́сѧща
на́ древѣ , мт҃рьски рыда́ющи гл҃аше , что́ ти вᲂз̾дадѐ є҆вре́йскїи
без̾зако́нныи со́нмъ , и҆ не бл҃гᲂда́рныи , и҆́же мно́гихъ и҆ вели́кихъ твᲂи́хъ
сн҃е мо́й дарѡ́въ наслади́всѧ ; пᲂю̀ твᲂѐ бжⷭ҇твенᲂе сᲂше́ствїе .
Кано́нъ , честно́мꙋ и҆ живᲂтвᲂрѧ́щемꙋ крⷭ҇тꙋ̀ . є҆мꙋ́же краегране́сїе .
бᲂлѣ́зни ᲂу҆ста́вилъ є҆сѝ чл҃кᲂмъ бᲂлѣ́зньми сло́ве . твᲂре́нїе і҆ѡ́сифᲂво .
гла́съ , г҃ . пѣ́снь , а҃ . і҆рмо́съ . И҆́же во́ды дре́вле ма́нїемъ
бжⷭ҇твенымъ , во є҆ди́но со́нмище сᲂвᲂкꙋпѝ , и҆ раздѣли́выи мо́ре і҆и҃льтескимъ
лю́демъ . сѐ бг҃ъ на́шъ препрᲂсла́вленъ сы́и , тᲂго̀ є҆ди́нагѡ вᲂспᲂе́мъ ,
ꙗ҆́кѡ прᲂсла́висѧ .
запѣ́въ : сла́ва гдⷭ҇и крⷭ҇тꙋ̀ твᲂемꙋ̀ честно́мꙋ . Мнᲂгᲂбᲂлѣ́зненыѧ стра́сти
ᲂу҆ста́вилъ є҆сѝ сло́ве , стрⷭ҇тьмѝ честны́ѧ пло́ти твᲂеѧ̀ . и҆ чл҃ки спа́слъ
є҆сѝ , и҆́хже ᲂу҆ѧ́зви сᲂпрᲂтивᲂбᲂре́цъ , бл҃гᲂче́стнѡ пᲂклᲂнѧ́ющїѧсѧ ,
недᲂмы́сленᲂмꙋ смᲂтре́нїю твᲂемꙋ̀ . И҆́же свѧза́выи в̾ раѝ ле́стїю
челᲂвѣ́ка , за́пᲂвѣди престꙋпле́нїемъ , ᲂу҆́зами свѧ́занъ є҆́сть нерѣши́мыми ,
гдⷭ҇и , и҆́ми же вᲂплᲂща́емь хᲂтѣ́нїемъ свѧ́занъ бы́лъ є҆сѝ , раз̾рѣша́ѧ
прегрѣше́нїѧ на́ша чл҃кᲂлю́бче . мⷱ҇ꙋ . Бѣ́дствꙋющꙋ зрѧ́ще страстᲂте́рпцы
тва́рь , бѣсо́вскими лестьмѝ , вѣ́рнымъ ꙗ҆ви́шасѧ приста́нища небꙋ́рнаѧ . всю̀
лꙋка́вагѡ си́лꙋ , стрꙋѧ́ми крᲂвны́ми пᲂтᲂпи́ша великᲂи҆мени́тїи . мⷱ҇ꙋ .
Ли́къ мꙋ́ченическїи , ликᲂстᲂѧ́нїю вы́шнемꙋ свѣ́тлѡ сᲂчта́сѧ , блиста́ньми
всегда̀ ѡ҆зарѧ́ѧсѧ несᲂзда́ннагѡ бжⷭ҇тва̀ . и҆ сꙋ́щїѧ на землѝ ѡ҆зарѧ́етъ ,
тᲂго̀ чꙋдеса̀ вѣ́рᲂю сла́вѧщихъ . боⷢ҇ . Превы́шши вы́шнихъ ꙗ҆ви́ласѧ є҆сѝ
чинѡ́въ , ро́ждьши на землѝ бг҃а сло́ва пречⷭ҇таѧ , и҆́же на́съ къ небе́снымъ ,
свᲂи́ми страстьмѝ и҆ крⷭ҇то́мъ чⷭ҇тны́мъ вᲂз̾ве́дшаго , бл҃гᲂсти ра́ди .
и҆́нъ , кано́нъ , прест҃ѣ́й бцⷣѣ . гла́съ , г҃ . і҆рмо́съ , то́йже .
=запѣ́въ : прест҃а́ѧ гжⷭ҇е бцⷣе спасѝ на́съ . Напаѧ́тисѧ бᲂга́тнѡ слеза́ми
пᲂда́ждь , бразда́мъ дш҃и мᲂеѧ̀ дв҃о , и҆ пло́дъ принᲂси́ти стᲂри́чествꙋющїи
влⷣчце спᲂдо́би мѧ . и҆ срⷣце мᲂѐ весе́лїѧ и҆спо́лни , да сла́влю тѧ̀ .
Млрⷭ҇дїѧ ра́ди млⷭ҇ти влⷣчце всѣ́хъ , пᲂми́лꙋй страстнꙋ́ю мᲂю̀ дш҃ꙋ , и҆
ѻ҆гнѧ̀ и҆зба́ви мѧ вѣ́чнагѡ , и҆ бѣсо́вскагѡ наше́ствїѧ бцⷣе , и҆́же
пᲂд̾ кро́въ тво́й ны́нѣ прибѣга́ющаго . Ꙗ҆́кѡ нескве́рныи хра́мъ царе́въ ,
страстьмѝ ѡ҆скве́рньшеєсѧ без̾мѣ́стными срⷣце мᲂѐ , мᲂлю́сѧ пречⷭ҇таѧ ,
ѡ҆чи́сти мл҃твами сѝ , и҆ чи́стагѡ житїѧ̀ дѣ́лы ѡ҆бᲂга́ти бг҃ᲂра́дᲂваннаѧ .
Ч=то̀ лѣ́нᲂстїю житїѐ дш҃е страстна́ѧ прехо́диши , и҆ небᲂи́шисѧ днѐ
стра́шнагѡ сꙋда̀ ; но вᲂста́ни про́чеє ѿ сᲂгрѣше́нїѧ ᲂу҆ны́нїи , ᲂу҆се́рднѡ и҆
те́плѣ ны́нѣ вᲂзᲂпі́й , спаси́ мѧ влⷣчце чⷭ҇таѧ .
пѣ́снь , г҃ . і҆рмо́съ . И҆́же ѿ несꙋ́щихъ всѧ̀ приведы́и , сло́вᲂмъ
сᲂзида́ема , сᲂверша́ема же дх҃ᲂмъ , вседержи́телю вы́шнїи , в̾ любвѝ свᲂе́й
ᲂу҆твердѝ менѐ . Тебѐ и҆́же є҆стество́мъ бжⷭ҇тва̀ без̾стрⷭ҇тнаго , стра́стна
бы́вша пло́тїю бл҃гᲂсти ра́ди , дре́вᲂмъ ᲂу҆мертви́лъ є҆́сть є҆вре́йскїи
сᲂбо́ръ , и҆́же на́съ ѡ҆без̾сме́ртствꙋющаго . На вᲂда́хъ пᲂвѣ́шенъ сло́ве
зе́млю , на́ древѣ пᲂвѣ́шенъ бы́сть во́лею , вᲂз̾вᲂдѧ́ мѧ к̾ нбⷭ҇нымъ ,
в̾ ѕло́бныи ро́въ в̾па́дшагᲂсѧ . мⷱ҇ꙋ . Преи҆спещре́нни ра́нами сщ҃е́ннѡ ,
хрⷭ҇то́вы всехва́льнїи мч҃нцы гдⷭ҇ви пред̾стᲂитѐ , ѿ него́ же прїе́млюще
бᲂга́тнᲂю рꙋко́ю вᲂз̾даѧ́нїѧ . мⷱ҇ꙋ . Ра́дᲂстнᲂю дш҃е́ю к̾ ра́намъ ѿлꙋча́хꙋсѧ
мч҃нцы , пᲂслѣ́днюю ѕмі́еви печа́ль твᲂрѧ́ще , и҆ а҆́нг҃льскїѧ ли́ки ра́дᲂсти
и҆спᲂлнѧ́юще . боⷢ҇ . Вᲂз̾дви́жена зрѧ́щи на крⷭ҇тѣ̀ хрⷭ҇та̀ ,
не и҆скꙋсᲂбра́чнаѧ пла́чꙋщи гл҃аше , за́йде сла́вы сл҃нце ѿ ѻ҆́чїю мᲂе́ю ,
прᲂсвѣща́ѧ и҆́же во тмѣ̀ сꙋ́щихъ .
и҆́нъ і҆рмо́съ , то́йже . И҆зба́ви гее́нны , и҆ всѣ́хъ и҆ны́хъ бᲂлѣ́зней
в̾ ча́съ сꙋ́дныи , раба̀ свᲂегѡ̀ всенепᲂро́чнаѧ , и҆ прича́стника сᲂтвᲂрѝ ,
сн҃а и҆ бг҃а твᲂегѡ̀ црⷭ҇твїю . И҆сцѣлѝ мᲂѧ̀ ꙗ҆́звы дш҃е́вныѧ , и҆
мнᲂгᲂмѧте́жнꙋю пᲂмышле́ней бꙋ́рю , влⷣчце ᲂу҆ти́ши , и҆ ми́рнᲂе
ᲂу҆стрᲂе́нїе ми пᲂда́ждь . Страстьмѝ нн҃ѣ распа́льшасѧ лю́тѣ , и҆ нѣ́сть
и҆сцѣле́нїѧ дш҃и мᲂе́й , всенепᲂро́чнаѧ . но не до кᲂнца̀ менѐ ѡ҆ста́ви ,
раба̀ твᲂегѡ̀ дв҃о .= О=у҆мерщве́на мѧ сꙋ́ща дш҃е́ю , ѿ мно́жества ѡ҆ѕлᲂбле́нїѧ
страсте́й , ѡ҆живѝ , ꙗ҆́же ро́ждьши влⷣчце , живᲂда́вца хрⷭ҇та̀ несказа́нно .
пѣ́снь , д҃ . і҆рмо́съ . Пᲂлᲂжѝ к̾ на́мъ тве́рдꙋю любо́вь сѝ гдⷭ҇и ,
є҆динᲂро́днаго бо тѝ сн҃а на́съ ра́ди на сме́рть в̾да́лъ є҆сѝ . тѣ́мже тѝ
вᲂпїе́мъ вᲂсхвалѧ́юще , сла́ва си́лѣ твᲂе́й . Дᲂсажде́нїе вᲂи́стинꙋ , и҆́же
че́сти всѧ́кїѧ превы́шшїи влⷣко , претерпѣ́лъ є҆сѝ хрⷭ҇тѐ , по главѣ̀
тро́стїю бїе́мь , ꙗ҆́кѡ да престꙋпле́нїемъ мѧ ѡ҆без̾че́ствᲂвана , пᲂчте́ши
чл҃кᲂлю́бче . Вѣнце́мъ терно́внымъ ᲂу҆вѧзе́сѧ хᲂтѧ̀ дᲂлгᲂтерпѣли́ве , ꙗ҆́кᲂже
цр҃ь и҆́стинныи , и҆ тернᲂно́снᲂе хᲂтѣ́нїе грѣха̀ пᲂсѣ́клъ є҆сѝ ,
пѣснᲂсло́вѧщихъ твᲂѧ̀ сп҃се страда́нїѧ . мⷱ҇ꙋ . Несᲂкрꙋше́ни тᲂмле́нїемъ
ра́нъ , пребы́сте мч҃нцы , сᲂкрꙋша́юще пре́лесть вра́жїю , и҆ нᲂга́ми тᲂго̀
пᲂпира́юще , без̾мѣ́рнѡ хва́лѧщасѧ , и҆ го́рдᲂстїю всегѡ̀ вᲂзнᲂша́ющасѧ .
мⷱ҇ꙋ . Тѣлесы̀ тлѣ́нными , нетлѣ́нїе бжⷭ҇твенᲂе стѧжа́вше . страстьмѝ
стра́сти честнѣ́й , без̾сме́ртнᲂмꙋ крѣ́пкѡ пᲂдо́бѧщесѧ , всехва́льнїи мч҃нцы ,
беспло́тнымъ вᲂи́стинꙋ сᲂприча́стницы . боⷢ҇ . Сви́тᲂкъ тѧ̀ и҆нᲂгда̀ пррⷪ҇къ
ѻ҆трᲂкᲂви́це зрѧ́ше , в̾ не́мже пе́рстᲂмъ ѻ҆́ч҃їимъ написа́сѧ сло́во
вᲂплᲂща́емо . и҆ пра́ѻ҆ч҃еє рꙋкᲂписа́нїе , кᲂпїе́мъ раз̾дра̀ пречⷭ҇таѧ .
и҆́нъ і҆рмо́съ , то́йже . Є҆гда̀ в̾ нᲂщѝ жени́хъ прїи́детъ , сꙋди́ти
землѝ , тᲂгда̀ бл҃гᲂвᲂлѝ пречⷭ҇таѧ и҆зы́ти ми во срѣ́тенїе є҆мꙋ̀ со свѣ́тлᲂю
свѣще́ю , и҆ пᲂклᲂни́тисѧ тᲂго̀ прише́ствїю . Но́щь мѧ̀ несвѣ́тлаѧ
страсте́й , сᲂдержи́тъ раба̀ твᲂегѡ̀ . но свѣ́тᲂмъ сѝ бл҃га́ѧ дш҃и мᲂеѧ̀
ѻ҆́блакъ разᲂрѝ , и҆ к̾ свѣ́тꙋ наста́ви , пᲂвелѣ́нїи бж҃їихъ всенепᲂро́чнаѧ .
Бꙋ́рею и҆скꙋше́ньми , и҆ тревᲂлне́нїи ве́сь пᲂтᲂплѧ́емь є҆́смь . лꙋка́выми
пᲂмышле́нїи , и҆ во глꙋбинꙋ̀ при́снѡ низ̾влеко́мъ ѿчаѧ́нїѧ . спасѝ влⷣчце ,
вᲂпїю́ ти раба̀ твᲂегѡ̀ . Є҆гда̀ ѿ́ плᲂти дш҃а мᲂѧ̀ , хо́щетъ раз̾лꙋчи́тисѧ ,
тᲂгда̀ пред̾ста́вши мнѣ̀ ми́лᲂстивнѡ , бѣсо́вскагѡ наше́ствїѧ и҆схи́ти
ѻ҆трᲂкᲂви́це , и҆́щꙋщихъ мᲂю̀ пᲂги́бель .
пѣ́снь , є҃ . і҆рмо́с̾ . На землѝ неви́димыи ꙗ҆ви́сѧ , и҆ со земны́ми
во́лею пᲂживѐ непᲂсти́жимыи . и҆ к̾ тебѣ̀ ᲂу҆́треннююще , вᲂспѣва́емъ тѧ
чл҃кᲂлю́бче . Ꙗ҆́кᲂже а҆́гнецъ вᲂз̾дви́жесѧ на́ древо , и҆ ѻ҆ц҃ꙋ же́ртва
принесе́сѧ ѡ҆ на́съ бл҃же , и҆ же́ртвы и҆́дᲂльскїѧ ᲂу҆гаси́лъ є҆сѝ
всеси́льне . Прᲂбᲂде́сѧ в̾ ре́бра живᲂда́вче кᲂпїе́мъ , два̀ и҆сто́чника
спасе́нїѧ прᲂлива́еши , и҆́же ѿ трⷪ҇цы тѧ̀ є҆ди́нᲂгѡ вᲂз̾вѣща́ющимъ , дѣ́йства
два̀ нᲂсѧ́щаго . мⷱ҇ꙋ . Оу҆тверже́нїе крѣ́пкѡ , и҆ не пᲂкᲂлѣ́блемыи ка́мень ,
тѧ̀ і҆с҃е крѣ́пцыи страстᲂте́рпцы , вѣ́рᲂю ѡ҆брѣ́тше , ꙗ҆́кᲂже ка́менїе
честно́е себѐ наз̾да́ша . мⷱ҇ꙋ . Си́лᲂю бж҃їею ᲂу҆крѣплѧ́еми вѣ́рᲂю , всю̀
лю́тꙋю си́лꙋ льсти́вагѡ пᲂбѣди́́ли є҆стѐ страстᲂно́сцы мꙋ́ченицы , и҆ свѣ́тлѡ
вѣнча́стесѧ . боⷢ҇ . И҆стлѣ́вшеє пре́жде престꙋпле́нїемъ є҆стество̀ на́ше ,
ꙗ҆́кѡ нетлѣ́ннѡ ро́ждьши хрⷭ҇та̀ , ѡ҆бнᲂви́ла є҆сѝ прⷭ҇та́ѧ влⷣчце ,
пред̾ста́тельнице дш҃а́мъ на́шимъ .
и҆́нъ і҆рмо́съ , то́йже . Ви́ждь чи́стаѧ бᲂлѣ́знь , смире́ныѧ и҆ страстны́ѧ
дш҃и мᲂеѧ̀ . ви́ждь и҆ беспло́тныхъ вра́гъ вᲂста́нїѧ , и҆ ѿ тѣ́хъ врежде́нїѧ
и҆зба́ви мѧ . Бѣсо́вскими и҆скꙋше́ньми , ᲂу҆ма̀ мᲂегѡ̀ всегда̀ в̾ без̾мѣ́стныѧ
по́мыслы привлачи́ма , не ѡ҆ста́ви влⷣчце , но ᲂу҆твердѝ непрело́жнѡ .= С=о
грѣ́шники ꙗ҆дꙋ́щъ ꙗ҆ви́сѧ сн҃ъ тво́й , мно́гїѧ ра́ди млⷭ҇ти . и҆́мже
ᲂу҆пᲂдо́блена мѧ чⷭ҇таѧ ны́нѣ пᲂми́лꙋй , па́че всѣ́хъ сᲂгрѣши́вшаго . Да
не ꙗ҆́рᲂстїю ѡ҆бличꙋ́сѧ сн҃а твᲂегѡ̀ , во́ времѧ тᲂго̀ прише́ствїѧ , нижѐ
гнѣ́вᲂмъ є҆гѡ̀ да кажню́сѧ всепѣ́таѧ , но спаси́ мѧ мл҃твами свᲂи́ми .
пѣ́снь , ѕ҃ . і҆рмо́с̾ . Бе́здна пᲂслѣ́днѧѧ грѣхо́въ ѡ҆бы́де мѧ , и҆
и҆счеза́етъ дх҃ъ мо́й . но прᲂсте́ръ влⷣко высо́кꙋю свᲂю̀ мы́шцꙋ , ꙗ҆́кѡ
петра́ мѧ ᲂу҆пра́вителю спасѝ . Ѕмі́й мѧ , и҆зведѐ и҆з̾ є҆де́ма , льсти́вымъ
бра́шнᲂмъ , льсти́выи прельстѝ . хрⷭ҇то́съ же на́ древо вᲂз̾дви́гсѧ во́лею ,
дре́внїи мнѣ̀ вхо́дъ па́ки пᲂдаѧ̀ . Оу҆ѧзви́сѧ и҆́же на́съ ᲂу҆ѧзви́выи , и҆
неи҆сцѣ́ленъ пребы́сть , ᲂу҆ѧзви́вшимсѧ твᲂи́мъ ребрѡ́мъ бл҃гᲂда́телю гдⷭ҇и .
вѣ́рнїи же и҆сцѣле́хᲂмъ твᲂи́ми ра́нами , и҆́ми же во́лею ᲂу҆ѧзви́лсѧ є҆сѝ .
мⷱ҇ꙋ . Ꙗ҆ви́стесѧ пᲂсредѣ̀ ѻ҆гнѧ̀ премꙋ́дрїи хрⷭ҇то́вы ѻ҆рꙋ́жницы , ꙗ҆́кᲂже
хлѣ́бы и҆спеца́еми , и҆ бг҃ꙋ всѣ́хъ цр҃ю на трапе́зꙋ принᲂси́мы , непреста́ннѡ
весе́лїе наслѣ́дꙋете . мⷱ҇ꙋ . Пᲂдава́ете и҆сцѣле́нїѧ рѣ́ки ,
ѿ неи҆стᲂщи́маго и҆сто́чника текꙋ́щїѧ , и҆ страсте́мъ тече́нїѧ ,
стрⷭ҇тᲂте́рпцы и҆з̾сꙋша́ете , и҆ напаѧ́ете вѣ́рныхъ сᲂставле́нїѧ . боⷢ҇ .
Ме́ртвᲂсть зрѧ́щи , и҆́же ѿ твᲂи́хъ крᲂве́й , сло́ва вᲂпло́щшагᲂсѧ во́лею
всепѣ́таѧ , мт҃рьски вᲂсклица́ше , и҆ живᲂтꙋ̀ сꙋ́ща вино́внаго велича́ше ,
мт҃и дв҃о влⷣчце .
и҆́нъ і҆рмо́съ , то́йже . Вᲂлна́ми жите́йскими ᲂу҆мᲂвре́днѡ , а҆́зъ
ѡ҆каѧ́нныи вы́нꙋ пᲂтᲂплѧ́емь є҆́смь , и҆ вѣ́тры вра́жїими всегда̀ вѣ́емь
є҆́смь . и҆ ны́нѣ зᲂвꙋ́ ти , бцⷣе пᲂмᲂзи́ ми . Стрꙋѝ сле́зъ дх҃о́вныхъ
пᲂда́ждь ми , ѻ҆трᲂкᲂви́це пренепᲂро́чнаѧ , ꙗ҆́кѡ да ѡ҆мы́ю ка́лъ прегрѣше́нїи
мᲂи́хъ , и҆ страсте́й мᲂлвꙋ̀ , и҆ скве́рны тѣле́сныѧ . Оу҆снꙋ́хъ в̾ сме́рть
дш҃е́внꙋю , и҆ во́ грᲂбѣ лежꙋ̀ ѿчаѧ́нїѧ , но да́ждь ми рꙋ́кꙋ мᲂлю́сѧ , и҆
вᲂста́ви мѧ к̾ пᲂкаѧ́нїю , к̾ живᲂтꙋ̀ наставлѧ́ющи мѧ влⷣчце .= И҆=з̾сꙋшѝ
мꙋ́тныѧ рѣ́ки бг҃ᲂрᲂди́тельнице , лꙋка́выхъ мᲂи́хъ дѣѧ́нїи , стрꙋѧ́ми
ᲂу҆миле́нїѧ , и҆ к̾ вᲂда́мъ ѡ҆слабле́нїѧ и҆спра́ви в̾ дн҃ь сꙋ́дныи .
пѣ́снь , з҃ . і҆рмо́съ . Пе́рвїе тѣ́лꙋ злато́мꙋ , пе́рс̾скᲂю че́стїю дѣ́ти
непᲂклᲂни́шасѧ , трїѐ пᲂю́ще пᲂсредѝ пе́щи ѻ҆гнѧ̀ , ѻ҆ц҃е́мъ бг҃ъ
бл҃гᲂслᲂве́нъ є҆сѝ . Бᲂлѣ́зньми свᲂи́ми , ᲂу҆ста́вилъ є҆сѝ на́ша бᲂлѣ́зни
чл҃кᲂлю́бче , и҆ ны́нѣ к̾ жи́зни небᲂлѣ́зненѣй приве́лъ є҆сѝ , и҆́же твᲂи́мъ
честны́мъ страсте́мъ , пᲂклᲂнѧ́ющихсѧ бл҃гᲂче́стнѡ бж҃е всѣ́хъ . Є҆гда́ тѧ
ᲂу҆зрѣ̀ хрⷭ҇тѐ тва́рь распина́ема , и҆з̾мѣни́сѧ и҆ трепета́ше . землѧ̀
трѧса́шесѧ . распаде́жесѧ ка́менїе , и҆ сᲂкрыва́ше свѣ́тъ сл҃нечнᲂе тече́нїе .
мⷱ҇ꙋ . Зако́нꙋ пᲂкᲂрѧ́ющесѧ хрⷭ҇то́вꙋ , без̾зако́нныхъ ᲂу҆клᲂни́шасѧ
ласка́нїи мꙋ́ченицы , и҆ зако́ннѡ пᲂсредѣ̀ сꙋди́ща стра́ждꙋще , сла́внѡ
вѣнчава́хꙋсѧ . мⷱ҇ꙋ . Не ѡ҆пали́стесѧ ѻ҆гне́мъ , ѻ҆гнѧ̀ теплѣ́йше
прᲂи҆звᲂле́нїе стѧжа́вше , страстᲂте́рпцы гдⷭ҇ни вѣнцено́сцы , вᲂпїю́ще , бж҃е
бл҃гᲂслᲂве́нъ є҆сѝ . боⷢ҇ . Стᲂѧ́ше зрѧ́щи хрⷭ҇та̀ на крⷭ҇тѣ̀ вᲂз̾дви́жена ,
є҆го́же рᲂдила̀ є҆сѝ пречⷭ҇таѧ и҆ вᲂпїѧ́ше не без̾ча́днꙋ ꙗ҆ви́ мѧ , ю҆́же
сᲂблюдѐ чи́стꙋ и҆ по ржⷭ҇твѣ̀ .
и҆́нъ і҆рмо́съ , то́йже . Ꙗ҆́кѡ ми́лᲂстива мт҃и бж҃їѧ , рабы̀ твᲂѧ̀ влⷣчце
ми́лᲂсти спᲂдо́би , и҆́же вѣ́рᲂю сн҃ꙋ твᲂемꙋ̀ вᲂпїю́щихъ , ѻ҆ц҃е́мъ бж҃е
бл҃гᲂслᲂве́нъ є҆сѝ . Па́жить пᲂтребѝ чи́стаѧ грѣхо́въ мᲂи́хъ , и҆ скве́рныхъ
дѣѧ́нїи , да вѣ́рᲂю сн҃ꙋ твᲂемꙋ̀ взыва́ю , ѻ҆ц҃е́мъ бж҃е бл҃гᲂслᲂве́нъ є҆сѝ .
Ро́дъ чл҃ческїи тебѐ мо́литъ , бцⷣе влⷣчце пᲂми́лꙋй рабы̀ твᲂѧ̀ , и҆́же
вѣ́рᲂю сн҃ꙋ твᲂемꙋ̀ вᲂпїю́щихъ , ѻ҆ц҃е́мъ бж҃е бл҃гᲂслᲂве́нъ є҆сѝ . На
стра́шнѣмъ сꙋди́щи хрⷭ҇то́вѣ , є҆гда̀ хᲂщꙋ̀ сꙋди́тисѧ , ꙗ҆́кѡ пᲂви́нныи
пречⷭ҇таѧ , ꙗ҆ви́мисѧ ѿ всѧ́кїѧ мꙋ́ки и҆збавлѧ́ющи мѧ , те́плымъ сѝ
пред̾ста́тельствᲂмъ .
пѣ́снь , и҃ . і҆рмо́съ . Вавило́нскаѧ пе́щь ѻ҆́трᲂки неѡ҆палѝ ,
ни бжⷭ҇твенныи же ѻ҆́гнь , дв҃ыѧ нерастли́лъ є҆́сть . тѣ́мъ с̾ дѣтьмѝ вѣ́рнѡ
вᲂпїе́мъ , блгⷭ҇ви́те всѧ́каѧ дѣ́ла гдⷭ҇нѧ гдⷭ҇а . Тебѣ̀ распе́ншꙋсѧ ,
ѿве́рзесѧ па́ки ра́й . и҆ ѡ҆браща́ющеєсѧ на ны̀ ѻ҆рꙋ́жїе , плещѝ дае́тъ ,
кᲂпїѧ̀ ᲂу҆стыдѣ́всѧ прᲂбо́дшагѡ , ст҃а́ѧ ре́бра твᲂѧ̀ хрⷭ҇тѐ мнᲂгᲂмлⷭ҇тиве .
Кᲂпїе́мъ ти бᲂре́цъ ᲂу҆ѧзви́сѧ и҆ паде́сѧ , пады́и же а҆да́мъ к̾ жи́зни
вᲂз̾враща́етсѧ . вᲂпїѧ̀ тебѣ̀ во́лею закла́вшемꙋсѧ хрⷭ҇тѐ , бл҃гᲂслᲂвѧ́ тѧ и҆
сла́влѧ , бж҃е мо́й мнᲂгᲂми́лᲂстиве . мⷱ҇ꙋ . Ми́ръ прᲂсвѣща́етсѧ бᲂре́ньми
ва́шими , и҆ мꙋ́жествᲂмъ страда́льцы , неи҆сче́тными чꙋдесы̀ , тмы̀ бᲂлѣ́зней
и҆збавлѧ́етсѧ , вѣ́рнѡ вᲂпїѧ̀ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . мⷱ҇ꙋ .
Смѣ́хъ зри́тсѧ пᲂд̾ нᲂга́ми ва́шими ст҃і́и , и҆́же пе́рвѣе хвалѧ́исѧ зе́млю
пᲂтреби́ти и҆ мо́ре . хрⷭ҇то́съ же живᲂно́снᲂю ᲂу҆краша́етъ десни́цею , и҆
неꙋвѧда́ющими вѣнцы̀ , ва́съ при́снѡ сла́внїи . боⷢ҇ . Влѣ́та пᲂрᲂдила̀
є҆сѝ , и҆́же лѣ́тъ вы́шшаго , разрѣша́ющаго лѣ́тныѧ ᲂу҆́зы , ᲂу҆́зами свᲂи́ми
пречⷭ҇таѧ , а҆да́ма первᲂзда́ннаго , и҆ свѧзꙋ́юща є҆гѡ̀ сᲂю́зᲂмъ , сла́дкїѧ
свᲂеѧ̀ любвѐ .
и҆́нъ , і҆рмо́съ . Въ непᲂстᲂѧ́ннемъ ѻ҆гнѝ . Не преста́й чⷭ҇таѧ мᲂлѧ́щи ,
и҆́же во ᲂу҆миле́нїи тебѐ чтꙋ́щимъ , и҆зба́витисѧ сѣ́тей дїа́вᲂлихъ , и҆
сн҃ꙋ твᲂемꙋ̀ вᲂпїю́щимъ , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀
во́ вѣки .= Є҆гда̀ бжⷭ҇твенымъ пᲂвелѣ́нїемъ , хо́щетъ дш҃а мᲂѧ̀ ѿ житїѧ̀
и҆зы́ти , ѿ сѣте́й лᲂвѧ́щихъ и҆схи́ти бцⷣе , пᲂю́ща , бл҃гᲂслᲂви́те всѧ̀ дѣ́ла
гдⷭ҇а , и҆ превᲂзнᲂси́те є҆гѡ̀ во́ вѣки . Но́щь мѧ несвѣ́тлаѧ сᲂдержи́тъ ,
дѣ́лы бо те́мными пᲂрабо́тихсѧ . но сама́ мѧ свѣ́тᲂмъ сѝ , ꙗ҆́же свѣ́тꙋ
две́ри , ѡ҆зарѝ пᲂю́ща , бл҃гᲂслᲂви́те всѧ̀ дѣ́ла гдⷭ҇а , и҆ превᲂзнᲂси́те
є҆гѡ̀ во́ вѣки . Пᲂда́ждь свᲂю̀ ми́лᲂсть влⷣчце ми́рꙋ , твᲂемꙋ̀ рабꙋ̀ мᲂлю́
тѧ , и҆ ча́емаго преще́нїѧ лю́ди твᲂѧ̀ и҆схи́ти всечⷭ҇таѧ . да тебѣ̀ зᲂве́мъ
бл҃гᲂдарѧ́ще , сла́ва тебѣ̀ всѣ́хъ цр҃це . =та́же , пѣ́снь бцⷣѣ . вели́читъ
дш҃а мᲂѧ̀ .= и҆ =пᲂкло́ны .
пѣ́снь , ѳ҃ . і҆рмо́съ . Кꙋпино́ю и҆ ѻ҆гне́мъ прᲂпи́саннꙋю в̾ сѷна́и ,
зако́нᲂдавцꙋ мѡѷсе́ю , и҆ бжїи во́ чревѣ не ѡ҆па́льно заче́ншꙋю ѻ҆́гнь ,
всесвѣ́тлꙋю и҆ негаси́мꙋю свѣщꙋ̀ , сꙋ́щꙋю бцⷣꙋ , хвала́ми чтꙋ́ще тѧ̀
велича́емъ . Да ѡ҆брѧ́щеши дра́хмꙋ , ю҆́же пᲂгꙋби́лъ є҆сѝ хрⷭ҇тѐ , вᲂз̾же́гъ
на крⷭ҇тѣ̀ свᲂю̀ пло́ть бл҃же , и҆ ѻ҆́бщники твᲂри́ши ра́дᲂсти , си́лы свᲂѧ̀
вы́шнїѧ жизнᲂда́вче . с̾ ни́ми же ꙗ҆́кѡ бл҃гᲂда́телѧ , в̾ пѣ́снехъ чтꙋ́ще тѧ̀
велича́емъ . Ꙗ҆́кѡ вᲂз̾дви́же хрⷭ҇тѐ свᲂѝ рꙋ́цѣ на крⷭ҇тѣ̀ , ѡ҆сла́бленѣи
мᲂѝ пре́жде рꙋ́цѣ страстьмѝ мно́зѣми , и҆ кᲂлѣ́на к̾ тече́нїю бжⷭ҇твенᲂмꙋ
вᲂи́стинꙋ ѡ҆сла́бленаѧ ᲂу҆крѣпи́лъ є҆сѝ си́лᲂю свᲂе́ю . тѣ́мже бл҃гᲂда́рнѡ тѧ̀
велича́емъ . мⷱ҇ꙋ . Сгараю́ще пла́менемъ , без̾мѣ́рныхъ ра́нъ , ро́сꙋ тѧ̀
ѡ҆брѣто́ша хрⷭ҇тѐ прᲂхла́днꙋю , твᲂѝ крѣ́пцїи и҆ чꙋ́днїи страда́льцы .
тѣ́мже ра́дꙋющесѧ и҆дѧ́хꙋ пꙋте́мъ , надѣ́ѧнїемъ по́честей , пѣ́сньми тѧ̀
велича́юще мнᲂгᲂми́лᲂстиве . мⷱ҇ꙋ . Мно́жество страда́лецъ ст҃ы́хъ ли́къ ,
мо́литъ тѧ̀ хрⷭ҇тѐ за сᲂбо́ръ люде́й , мно́го прᲂгнѣ́вающихъ , мно́жествᲂмъ
твᲂи́хъ ще́дре млⷭ҇тей , ѡ҆чи́сти мно́жество без̾зако́нїи на́шихъ , ꙗ҆́кѡ
чл҃кᲂлю́бецъ . боⷢ҇ . Нᲂсѧ́щи чл҃ческїи зра́къ , зарю̀ ѻ҆́ч҃ꙋю дв҃о рᲂдила̀
є҆сѝ . є҆го́же вᲂз̾дви́жена на крⷭ҇тѣ̀ , сл҃нце нетерпѧ̀ зрѣ́ти ѡ҆мрача́шесѧ ,
и҆ мра́къ ѿхᲂжда́ше и҆дᲂлᲂбѣ́сїѧ . тѣ́мже с̾ ни́мъ тѧ̀ велича́емъ .
и҆́нъ , і҆рмо́съ . Въ зако́ннемъ сѣннᲂписа́нїи . Приближа́етсѧ дш҃е
кᲂне́цъ , при две́рехъ сꙋ́дъ , ѿстꙋпѝ ѿ дѣ́лъ сра́мныхъ , прїими́сѧ за бл҃гꙋ́ю
жи́знь . и҆́маши бо спᲂсо́бницꙋ бцⷣꙋ , и҆збавлѧ́ющꙋ тѧ̀ ѿ всѧ́кихъ
ѡ҆ѕлᲂбле́нїи . Въ разбо́йники мы́сленыѧ в̾падо́хъ ѡ҆каѧ́нныи , и҆ тѣ́хъ
кᲂзньмѝ , ѿ ри́зы мᲂеѧ̀ дᲂбрᲂдѣ́телей ᲂу҆мᲂвре́днѡ сᲂвлеко́хсѧ . и҆
дш҃етлѣ́нными страстьмѝ и҆спо́лненъ , вᲂпїю́ ти влⷣчце всенепᲂро́чнаѧ
непре́зри менѐ .= Жи́знь мᲂѧ̀ всѧ̀ пречⷭ҇таѧ , ᲂу҆ны́нїемъ скᲂнчева́етсѧ , и҆
прибли́жихсѧ а҆́дꙋ ны́нѣ ѿча́ѧнїемъ . но и҆справле́нїе ми да́ждь чⷭ҇таѧ , и҆
не ѡ҆ста́ви менѐ в̾не́мъ ѡ҆ѕло́битисѧ , прибѣга́ющаго к̾ пᲂкро́вꙋ твᲂемꙋ̀ .
Т=ы̀ немᲂже́нїе вѣ́си смире́ннагѡ ми тѣлесѐ , ꙗ҆́звы дш҃и мᲂеѧ̀ , срⷣца мᲂегѡ̀
стᲂна́нїе , ᲂу҆ма̀ мᲂегѡ̀ заблꙋже́нїе и҆ пре́лесть . тѣ́мже твᲂи́мъ
млрⷭ҇дїемъ , ѻ҆бᲂю́дꙋ да́ждь и҆сцѣле́нїе .
та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀
ма́лаѧ . и҆ свѣти́ленъ . и҆ ѱалмы̀ ѡ҆бы́чны .
на стихо́внѣ , стихѣ́ры , крⷭ҇тны . гла́съ , г҃ . Дре́во преслꙋша́нїѧ
ми́рᲂви сме́рть прᲂзѧбѐ , дре́во же крⷭ҇тнᲂе живо́тъ и҆ нетлѣ́нїе дарᲂва̀ .
тѣ́мже тебѐ мо́лимъ распе́ншагᲂсѧ гдⷭ҇а , да зна́менаетсѧ на на́съ свѣ́тъ лица̀
твᲂегѡ̀ .
сти́х̾ : и҆спо́лнихᲂмсѧ за ᲂу҆́тра . За́вистїю пи́щи и҆з̾гна́нъ бы́хъ ,
паде́нїемъ па́дсѧ лю́тымъ . но непрезрѣ̀ влⷣко , вᲂспрїе́мъ менѐ ра́ди є҆́же
по мнѣ̀ распѧ́тїе си , и҆ спаса́еши мѧ , и҆ в̾ сла́вꙋ в̾во́диши . и҆зба́вителю
мо́й сла́ва тебѣ̀ .
сти́хъ : и҆ бꙋ́ди свѣ́тлᲂсть . мⷱ҇ꙋ . Си́лы ст҃ыхъ а҆́нг҃лъ ᲂу҆диви́шасѧ ,
мч҃нческимъ страда́нїемъ , ꙗ҆́кѡ пло́тїю ѡ҆блᲂже́ни , ѡ҆ мꙋ́кахъ неради́ша ,
пᲂдо́бницы бы́вше страсте́мъ сп҃са хрⷭ҇та̀ , и҆ мо́лѧтсѧ ѡ҆ дш҃а́хъ на́шихъ .
сла́ва , и҆ ны́нѣ , крⷭ҇тᲂбоⷢ҇ . На крⷭ҇тѣ́ тѧ вᲂз̾дви́жена хрⷭ҇тѐ мо́й
ꙗ҆́кѡ ᲂу҆зрѣ̀ , а҆́гница мнᲂгᲂпѣ́таѧ , и҆ дв҃аѧ мт҃и твᲂѧ̀ , рыда́ющи
с̾ пла́чемъ вᲂпїѧ́ше , сн҃е мо́й и҆ бж҃е мо́й , не без̾ча́днꙋ мѧ ꙗ҆вѝ ,
ю҆́же сᲂхрани́лъ є҆сѝ чи́стꙋ и҆ по ржⷭ҇твѣ̀ .
та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ .
трᲂпа́рь , ст҃о́мꙋ .= сла́ва , и҆ ны́нѣ , крⷭ҇тᲂбоⷢ҇ . во́ гласъ трᲂпарѧ̀ .
пᲂсе́мъ , є҆ктенїѧ̀ . и҆ ча́съ , а҃ . =и҆ ѿпꙋ́стъ .
Въ сре́дꙋ , бл҃же́нны . гла́съ , г҃ .
Ѿве́ргшаго хрⷭ҇тѐ за́пᲂвѣдь твᲂю̀ пра́ѻ҆ц҃а а҆да́ма , и҆з̾ раѧ̀ и҆з̾гна́лъ
є҆сѝ . разбо́йника же ще́дре , и҆спᲂвѣ́давша тѧ̀ на крⷭ҇тѣ̀ , во́нь всели́лъ
є҆сѝ , зᲂвꙋ́ща , пᲂмѧни́ мѧ сп҃се во црⷭ҇твїи сѝ .
бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе .
Распѧ́тсѧ менѐ ра́ди , и҆ прᲂбо́дсѧ і҆с҃е мо́й в̾ ре́бра , два̀ и҆сто́чника
и҆стᲂчи́лъ ми є҆сѝ спасе́нїѧ . тѣ́мже спасе́нъ бы́въ стрⷭ҇тїю ти хрⷭ҇тѐ ,
вᲂспѣва́ю и҆ сла́влю млрⷭ҇дїе твᲂѐ . пᲂмѧни́ мѧ сп҃се во црⷭ҇твїи си .
бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ
всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Со без̾зако́нникᲂма
в̾мѣни́всѧ , без̾зако́нїѧ всѣ́хъ взѧ́лъ є҆сѝ і҆с҃е . и҆ те́рнїемъ вѣнча́всѧ
ꙗ҆́кѡ цр҃ь всѣ́хъ , грѣхо́внᲂе те́рнїе пра́ѻ҆ц҃а , и҆з̾ ко́рене хрⷭ҇тѐ
пᲂсѣца́еши . тѣ́мже вѣ́рᲂю твᲂѧ̀ стра́сти , ны́нѣ сла́вимъ .
ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . И҆́же
страсте́мъ хрⷭ҇то́вымъ ᲂу҆пᲂдо́бльшесѧ до́блїи страда́льцы , всесла́внїи
мч҃нцы , и҆ вра́жїю пре́лесть низ̾лᲂжи́сте си́лᲂю хрⷭ҇то́вᲂю , и҆ нбⷭ҇нꙋю
сла́вꙋ пᲂлꙋчи́сте . ѡ҆ всѣ́хъ на́съ ст҃і́и мᲂли́тесѧ .
сла́ва . Трисᲂста́внаѧ є҆ди́нице , и҆ нераздѣ́льнаѧ трⷪ҇це вседѣ́тельнаѧ ,
сꙋщество̀ є҆ди́но и҆ си́ла , пѣвцы̀ свᲂѧ̀ пᲂкры́й ѿ всѧ́кᲂгѡ вре́да вра́жїѧ .
и҆ црⷭ҇твїю спᲂдо́би , є҆го́же пᲂлꙋчи́ша и҆́же до́брѣ пᲂжи́вшїи .
и҆ ны́нѣ . Зрѧ́щи на крⷭ҇тѣ̀ , є҆го́же ѿ крᲂве́й чи́стыхъ вᲂплᲂти́ла
є҆сѝ , пла́чꙋщи и҆ в̾зыва́ше бг҃ᲂрᲂди́тельнице дв҃о , что́ се ча́до , со́ньмъ
лꙋка́выи вᲂз̾дадѐ тебѣ̀ , ᲂу҆мертви́выи тѧ , живᲂта̀ вѣ́рныхъ всѣ́хъ
вᲂскрⷭ҇нїе .