Є҆ѯапостїла́рїи всеѧ̀ седми́цы, самопѣ́снѡ

Въ понедѣ́льникъ: Не́бо ѕвѣзда́ми ᲂу҆краси́вый ꙗ҆́кѡ бг҃ъ, и҆ твои́ми а҆́гг҃лы всю̀ зе́млю просвѣти́вый, содѣ́телю всѣ́хъ, пою́щыѧ тѧ̀ сп҃са́й.

Бг҃оро́диченъ: Сла́дость а҆́гг҃лѡвъ, скорбѧ́щихъ ра́дость, хрⷭ҇тїа́нъ предста́тельница дв҃о мт҃и гдⷭ҇нѧ, застꙋпѝ на́съ, и҆ и҆зба́ви вѣ́чныхъ мꙋ́къ.

Во вто́рникъ: Прⷣте́чꙋ і҆ѡа́нна, и҆ крⷭ҇ти́телѧ сп҃сова, во прⷪ҇ро́цѣхъ прⷪ҇ро́ка, и҆ пꙋсты́ни воспита́нїе, є҆лїсаве́тино рожде́нїе восхва́лимъ всѝ.

Бг҃оро́диченъ: Сла́дость а҆́гг҃лѡвъ: Зрѝ въ понедѣ́льникъ:

Въ сре́дꙋ и҆ пѧто́къ: Крⷭ҇тъ - храни́тель всеѧ̀ вселе́ннаѧ, крⷭ҇тъ - красота̀ цр҃кве, крⷭ҇тъ - вѣ́рныхъ ᲂу҆твержде́нїе, крⷭ҇тъ - а҆́гг҃лѡвъ сла́ва и҆ де́мѡнѡвъ ꙗ҆́зва.

Крⷭ҇тобг҃оро́диченъ: Оу҆ крⷭ҇та̀ предстоѧ́щи, тѧ̀ безсѣ́меннѡ ро́ждшаѧ, и҆ рыда́ющи вопїѧ́ше: ᲂу҆вы̀ сладча́йшее ча́до, ка́кѡ заше́лъ є҆сѝ ѿ ѻ҆́чїю мое́ю; ка́кѡ въ ме́ртвыхъ вмѣни́лсѧ є҆сѝ;

Въ четверто́къ:

Подо́бенъ: Жєны̀ ᲂу҆слы́шите:

Во всю̀ подсо́лнечнꙋю те́кше проповѣ́дасте хрⷭ҇то́во ѿ дв҃ы ст҃о́е воплоще́нїе вои́стиннꙋ, ѿ пре́лести ѡ҆браща́юще ꙗ҆зы́ки, и҆ просвѣща́юще, и҆ всѧ̑ наꙋча́юще трⷪ҇цꙋ почита́ти ст҃ꙋ́ю, а҆пⷭ҇ли сп҃сѡвы.

Подо́бны: Вели́каго началопа́стырѧ, и҆ і҆ера́рха всѝ, предсѣда́телѧ мѷрлѷкі́йскаго нїкола́а хва́лимъ: мнѡ́ги бо мꙋ́жи сп҃сѐ, непра́веднѡ ᲂу҆мре́ти и҆мꙋ́щыѧ, царю̀ ꙗ҆влѧ́етсѧ со а҆ѵла́вїемъ во снѣ̀, рѣшѧ̀ непра́ведное и҆зрече́нїе.

Бг҃оро́диченъ: Мр҃і́е чистѣ́йшаѧ, злата́ѧ кади́льнице, невмѣсти́магѡ бж҃ества̀ прїѧ́телище бы́вшее, въ не́мже ѻ҆ц҃ъ бл҃говолѝ, сн҃ъ же всели́сѧ, и҆ дх҃ъ ст҃ы́й ѡ҆сѣни́въ тѧ̀ ѻ҆трокови́це показа̀ бцⷣꙋ.

Въ сꙋббѡ́тꙋ: И҆́же и҆ ме́ртвыми и҆ живы́ми ѡ҆блада́ѧй ꙗ҆́кѡ бг҃ъ, и҆ ст҃ы́ми твои́ми всю̀ зе́млю просвѣти́вый, содѣ́телю всѣ́хъ, пою́щыѧ тѧ̀ сп҃са́й.

Бг҃оро́диченъ: Мы̀ ѡ҆ тебѣ̀ хва́лимсѧ бцⷣе, и҆ къ бг҃ꙋ тѧ̀ и҆́мамы предста́тельство, прострѝ рꙋ́кꙋ твою̀ неѡбори́мꙋю, и҆ сокрꙋшѝ врагѝ на́шѧ, твои̑мъ низпослѝ рабѡ́мъ по́мощь ѿ ст҃а́гѡ.