Стїхи́ра є҆ѵⷢ҇льскаѧ а҃, гла́съ а҃.

На го́рꙋ ᲂу҆ч҃нкѡ́мъ и҆дꙋ́щымъ за земно́е вознесе́нїе, предста̀ гдⷭ҇ь, и҆ поклони́вшесѧ є҆мꙋ̀, и҆ да́нныѧ вла́сти вездѣ̀ наꙋчи́вшесѧ, въ поднбⷭ҇нꙋю посыла́хꙋсѧ, проповѣ́дати є҆́же и҆з̾ ме́ртвыхъ воскрⷭ҇нїе, и҆ є҆́же на нб҃са̀ возше́ствїе: и҆̀мже и҆ во вѣ́ки спребыва́ти нело́жный ѡ҆бѣща́сѧ хрⷭ҇то́съ бг҃ъ, и҆ сп҃съ дꙋ́шъ на́шихъ.

Стїхи́ра є҆ѵⷢ҇льскаѧ в҃, гла́съ в҃.

Съ мѵ́ры прише́дшымъ ꙗ҆̀же съ марі́ею жена́мъ, и҆ недоꙋмѣва́ющымсѧ, ка́кѡ бꙋ́детъ и҆̀мъ ᲂу҆лꙋчи́ти жела́нїе, ꙗ҆ви́сѧ ка́мень взѧ́тъ, и҆ бж҃е́ственный ю҆́ноша ᲂу҆толѧ́ѧ мѧте́жъ дꙋ́шъ и҆́хъ: воста́ бо глаго́летъ, і҆и҃съ гдⷭ҇ь. тѣ́мже проповѣ́дите проповѣ́дникѡмъ є҆гѡ̀, ᲂу҆ч҃никѡ́мъ въ галїле́ю тещѝ, и҆ ви́дѣти є҆го̀ воскр҃сша и҆з̾ ме́ртвыхъ, ꙗ҆́кѡ жизнода́вца и҆ гдⷭ҇а.

Стїхи́ра є҆ѵⷢ҇льскаѧ г҃, гла́съ г҃.

Магдали́нѣ марі́и сп҃сово бл҃говѣствꙋ́ющей и҆з̾ ме́ртвыхъ воскрⷭ҇нїе и҆ ꙗ҆вле́нїе, не вѣ́рꙋюще ᲂу҆ч҃нцы̀, поноси́ми бы́ша ѡ҆ жестосе́рдїи: но зна́менми воѡрꙋ́жшесѧ и҆ чꙋдесы̀, ко проповѣ́данїю посыла́хꙋсѧ, и҆ ты̀ ᲂу҆́бѡ гдⷭ҇и, къ нача́льномꙋ свѣ́тꙋ возне́слсѧ є҆сѝ ѻ҆ц҃ꙋ̀, ѻ҆ни́ же проповѣ́даша всю́дꙋ сло́во, чꙋдесы̀ ᲂу҆вѣрѧ́юще. тѣ́мже просвѣти́вшесѧ тѣ́ми, сла́вимъ твоѐ є҆́же и҆з̾ ме́ртвыхъ воскрⷭ҇нїе, человѣколю́бче гдⷭ҇и.

Стїхи́ра є҆ѵⷢ҇льскаѧ д҃, гла́съ д҃.

Оу҆́тро бѣ̀ глꙋбоко̀, и҆ жєны̀ прїидо́ша на гро́бъ тво́й, хрⷭ҇тѐ: но тѣ́ло не ѡ҆брѣ́тесѧ жела́емое и҆́ми: тѣ́мже недоꙋмѣва́ющымсѧ, ꙗ҆̀же въ ри́захъ блеща́щихсѧ предста̑вшаѧ глаго́ласта: что̀ жива́гѡ съ ме́ртвыми и҆́щете; воста̀, ꙗ҆́коже предрѣчѐ, что̀ не по́мните гл҃гѡ́лъ є҆гѡ̀; И҆́маже вѣ́ровавшѧ ви̑дѣннаѧ проповѣ́дахꙋ, но мнѧ́хꙋсѧ лжа̀ благовѣ́щєнїѧ: та́кѡ бы́ша є҆щѐ ко́сни ᲂу҆ч҃нцы̀: но пе́тръ течѐ и҆ ви́дѣвъ просла́ви твоѧ̑ въ себѣ̀ чꙋдеса̀.

Стїхи́ра є҆ѵⷢ҇льскаѧ є҃, гла́съ є҃.

Ѽ премꙋ́дрыхъ сꙋде́бъ твои́хъ хрⷭ҇тѐ! ка́кѡ петрꙋ̀ ᲂу҆́бѡ плащани́цами є҆ди́нѣми да́лъ є҆сѝ разꙋмѣ́ти твоѐ воскрⷭ҇нїе; лꙋцѣ́ же и҆ клео́пѣ спꙋтьше́ствꙋѧ бесѣ́довалъ є҆сѝ, и҆ бесѣ́дꙋѧй не а҆́бїе себѐ ꙗ҆влѧ́еши: тѣ́мже и҆ поноси́мъ быва́еши, ꙗ҆́кѡ є҆ди́нъ прише́льствꙋѧй во і҆ерⷭ҇ли́мъ, и҆ не причаща́ѧйсѧ въ коне́цъ совѣ́та и҆́хъ: но и҆́же всѧ̑ къ созда́нїѧ по́лзѣ стро́ѧ, и҆ ꙗ҆̀же ѡ҆ тебѣ̀ прⷪ҇ро́чєствїѧ ѿкры́лъ є҆сѝ, и҆ внегда̀ блгⷭ҇ви́ти хлѣ́бъ позна́лсѧ є҆сѝ и҆̀мъ, є҆ю́же и҆ пре́жде тогѡ̀ сердца̀ къ позна́нїю твоемꙋ̀ распала́стасѧ: ꙗ҆̀же и҆ ᲂу҆ч҃нкѡ́мъ со́браннымъ ᲂу҆жѐ ꙗ҆́снѡ проповѣ́даста твоѐ воскрⷭ҇нїе, и҆́мже поми́лꙋй на́съ.

Стїхи́ра є҆ѵⷢ҇льскаѧ ѕ҃, гла́съ ѕ҃.

И҆́стинный ми́ръ ты̀ хрⷭ҇тѐ, къ человѣ́кѡмъ бж҃їй ми́ръ тво́й даѧ̀, по воста́нїи ᲂу҆ч҃нкѡ́мъ, пристра́шны показа́лъ є҆сѝ ѧ҆̀, мнѧ́щыѧ дꙋ́хъ ви́дѣти: но ᲂу҆ти́шилъ є҆сѝ мѧте́жъ дꙋшѝ и҆́хъ, показа́вый рꙋ́цѣ и҆ но́зѣ твоѝ. ѻ҆ба́че не вѣ́рꙋющымъ є҆щѐ, бра́шенъ причаще́нїемъ, и҆ ᲂу҆че́нїй воспомина́нїемъ, ѿве́рзлъ є҆сѝ и҆́хъ ᲂу҆́мъ, є҆́же разꙋмѣ́ти писа̑нїѧ: и҆̀мже и҆ ѻ҆ч҃еское ѡ҆бѣтова́нїе ѡ҆бѣща́въ, и҆ бл҃гослови́въ ѧ҆̀, ѿстꙋпи́лъ є҆сѝ на нб҃о. тѣ́мже съ ни́ми покланѧ́емсѧ тебѣ̀, гдⷭ҇и сла́ва тебѣ̀.

Стїхи́ра є҆ѵⷢ҇льскаѧ з҃, гла́съ з҃.

Сѐ тьма̀, и҆ ра́нѡ, и҆ что̀ ᲂу҆ гро́ба марі́е стои́ши, мно́гꙋю тьмꙋ̀ и҆мѣ́ющи въ ра́зꙋмѣ, въ не́йже, гдѣ̀ положе́нъ бы́сть, вопроша́еши, і҆и҃съ; но ви́ждь сри́щꙋщѧсѧ ᲂу҆ч҃никѝ, ка́кѡ плащани́цами и҆ сꙋдаре́мъ воскрⷭ҇нїе ѡ҆брѣто́ша, и҆ помѧнꙋ́ша ꙗ҆̀же ѡ҆ си́хъ писа̑нїѧ. съ ни́миже и҆ и҆́миже и҆ мы̀ вѣ́ровавше, воспѣва́емъ тѧ̀ жизнода́вца хрⷭ҇та̀.

Стїхи́ра є҆ѵⷢ҇льскаѧ и҃, гла́съ и҃.

Марі̑ины сле́зы не всꙋ́е пролива́ютсѧ те́плѣ, се́ бо сподо́бисѧ и҆ ᲂу҆ча́щихъ а҆́гг҃лѡвъ, и҆ видѣ́нїѧ самогѡ̀ і҆и҃са: тѣ́мже и҆ ѿсыла́етсѧ не прикаса́тисѧ хрⷭ҇тꙋ̀. но ѻ҆ба́че проповѣ́дница посыла́етсѧ твои̑мъ ᲂу҆ч҃нкѡ́мъ, и҆̀мже бл҃говѣствова́нїе носѧ́щи, є҆́же ко ѻ҆те́ческомꙋ жре́бїю восхо́дъ возвѣща́ющи: съ не́юже сподо́би и҆ на́съ ꙗ҆вле́нїѧ твоегѡ̀ влⷣко гдⷭ҇и.

Стїхи́ра є҆ѵⷢ҇льскаѧ ѳ҃, гла́съ є҃.

Ꙗ҆́кѡ въ послѣ̑днѧѧ лѣ̑та, сꙋ́щꙋ по́здѣ ѿ сꙋббѡ́тъ предста́лъ є҆сѝ дрꙋгѡ́мъ хрⷭ҇тѐ, и҆ чꙋдесе́мъ чꙋ́до и҆звѣствꙋ́еши, заключє́ннымъ вхо́дѡмъ двє́рнымъ, є҆́же и҆з̾ ме́ртвыхъ твоѐ воскрⷭ҇нїе: но и҆спо́лнилъ є҆сѝ ра́дости ᲂу҆ч҃никѝ, и҆ дх҃а ст҃а́го препода́лъ є҆сѝ и҆̀мъ, и҆ вла́сть по́далъ є҆сѝ ѡ҆ставле́нїѧ грѣхѡ́въ и҆ ѳѡмы̀ не ѡ҆ста́вилъ є҆сѝ въ невѣ́рствїѧ погрꙋжа́тисѧ бꙋ́ри. тѣ́мже пода́ждь и҆ на́мъ ра́зꙋмъ и҆́стинный, и҆ ѡ҆ставле́нїе прегрѣше́нїй бл҃гоꙋтро́бне гдⷭ҇и.

Стїхи́ра є҆ѵⷢ҇льскаѧ і҃, гла́съ ѕ҃.

По є҆́же во а҆́дъ соше́ствїи, и҆ є҆́же и҆з̾ ме́ртвыхъ воскрⷭ҇нїи, скорбѧ́ще ꙗ҆́коже досто́ѧше, ѡ҆ разлꙋче́нїи твое́мъ хрⷭ҇тѐ, ᲂу҆ч҃нцы̀ на дѣ́ланїе ѡ҆брати́шасѧ, и҆ па́ки кораблѝ и҆ мрє́жи, и҆ ло́ва нигдѣ́же: но ты̀ сп҃се, ꙗ҆ви́всѧ ꙗ҆́кѡ влⷣка всѣ́хъ, ѡ҆деснꙋ́ю мрє́жи повелѣва́еши воврещѝ, и҆ бы́сть сло́во дѣ́ло вско́рѣ, и҆ мно́жество ры́бъ мно́гое, и҆ ве́черѧ стра́ннаѧ гото́ва на землѝ: є҆ѧ́же причасти́вшымсѧ тогда̀ твои̑мъ ᲂу҆ч҃нкѡ́мъ, и҆ на́съ ны́нѣ мы́сленнѡ сподо́би наслади́тисѧ, чл҃вѣколю́бче гдⷭ҇и.

Стїхи́ра є҆ѵⷢ҇льскаѧ а҃і, гла́съ и҃.

Ꙗ҆влѧ́ѧ себѐ ᲂу҆ч҃никѡ́мъ твои̑мъ, сп҃се, по воскрⷭ҇нїи сі́мѡнꙋ да́лъ є҆сѝ ѻ҆ве́цъ па́ствꙋ, за любвѐ воздаѧ́нїе, ꙗ҆́же ѡ҆ па́ствѣ, попече́нїѧ и҆щѧ̀. тѣ́мже и҆ глаго́лалъ є҆сѝ: а҆́ще лю́биши мѧ̀ пе́тре, пасѝ а҆́гнцы моѧ̑, пасѝ ѻ҆́вцы моѧ̑. ѻ҆́нъ же а҆́бїе показꙋ́ѧ дрꙋголю́бное, ѡ҆ дрꙋзѣ́мъ ᲂу҆ченицѣ̀ вопроша́ше: и҆́хже мл҃твами хрⷭ҇тѐ, ста́до твоѐ сохранѧ́й, ѿ волкѡ́въ гꙋбѧ́щихъ є҆̀.