Въ четверто́къ ве́чера,

на Гдⷭ҇и воззва́хъ, стїхи̑ры чⷭ҇тно́мꙋ, и҆ животворѧ́щемꙋ крⷭ҇тꙋ̀. Гла́съ а҃.

Подо́бенъ: Прехва́льнїи мч҃нцы:

Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.

На крⷭ҇тѣ̀ пречⷭ҇тѣи рꙋ́цѣ твоѝ просте́рлъ є҆сѝ хрⷭ҇тѐ, ѿ тебѐ дале́че бы́вшыѧ призыва́ѧ, и҆ бли́зъ тебѐ ᲂу҆строѧ́ѧ. тѣ́мже молю́сѧ тѝ: плѣне́на мѧ̀ бы́вша страстьмѝ соберѝ, и҆ покаѧ́нїе мѝ да́рꙋй, всѧ́кꙋ скве́рнꙋ страстнꙋ́ю ѡ҆чища́ющее.

Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.

Дла̑ни пречⷭ҇тыѧ твоѧ̑ хрⷭ҇тѐ, на дре́вѣ возне́слъ, и҆ твоѧ̑ пе́рсты ѡ҆кровави́лъ є҆сѝ, хотѧ̀ и҆зба́вити бж҃е́ственныхъ рꙋ́къ твои́хъ дѣ́ло, чл҃вѣколю́бче а҆да́ма, престꙋпле́нїемъ держи́ма въ црⷭ҇твїихъ сме́ртныхъ: є҆го́же воздви́глъ є҆сѝ вла́стїю твое́ю всеси́льне.

Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.

Претерпѣ́лъ є҆сѝ пострада́ти на́съ ра́ди сп҃се, и҆́же є҆стество́мъ непрело́женъ, и҆ безстра́стный бж҃ество́мъ, распина́ешисѧ безнача́льне со ѕлодѣ́и, ты̀ безгрѣ́шне хрⷭ҇тѐ: и҆ со́лнце не терпѧ̀ дерзнове́нїѧ помрачи́сѧ, и҆ землѧ̀ всѧ̀ трѧса́шесѧ, творца́ тѧ мі́рꙋ позна́вши.

И҆́ны стїхи̑ры крⷭ҇тобг҃оро́дичны, гла́съ и҆ подо́бенъ то́йже

Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе: и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.

Дв҃а нескве́рнаѧ и҆ногда̀ на дре́вѣ ви́дѧщи, є҆го́же и҆з̾ безсѣ́менна родѝ чре́ва, не терпѧ́щи ᲂу҆тро́бы ᲂу҆ѧзвле́нїѧ, власы̀ терза́ющи глаго́лаше: и҆́же манове́нїемъ содержа́й тва́рь всю̀, ка́кѡ на крⷭ҇тъ воздви́глсѧ є҆сѝ ꙗ҆́кѡ ѡ҆сꙋжде́нъ, всѧ́кѡ хотѧ̀ сп҃стѝ чл҃вѣ́чество;

Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.

И҆ па́ки глаго́ли тꙋ́же стїхи́рꙋ.

Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.

Ѽ ча́до неизрече́нное ѻ҆ц҃а̀ пребезнача́льна, глаго́лаше пречⷭ҇таѧ, на крⷭ҇тѣ̀ взира́ющи моѐ рожде́нїе, ка́кѡ не ᲂу҆разꙋмѣ́ю, за ка̑ѧ тебѣ̀ сїѧ̑ возда́ша безбл҃года́тнїи лю́дїе; но во є҆́же прише́лъ є҆сѝ сп҃стѝ твоѐ созда́нїе, всѧ̑ терпи́ши долготерпѣли́внѣ, бл҃гоꙋтро́бне.

Сла́ва, и҆ ны́нѣ, крⷭ҇тобг҃оро́диченъ: Вкꙋше́нїе дре́внее а҆да́мово го́рькое, вкꙋси́вый же́лчи и҆ ѻ҆́цта, ᲂу҆слади́лъ є҆сѝ ча́до сладча́йшее, возне́ссѧ на дре́вѣ: тѣ́мже мѧ̀ ꙗ҆́кѡ сꙋдїѧ̀ пра́ведный, враче́бною стра́стїю твое́ю ᲂу҆сладѝ влⷣко, воскре́съ ꙗ҆́кѡ всеси́ленъ, дв҃а глаго́лаше слезѧ́щи.

Та́же, Свѣ́те ти́хїй: Прокі́менъ днѐ. Та́же, Сподо́би гдⷭ҇и въ ве́черъ се́й:

На стїхо́внѣ стїхи̑ры крⷭ҇тны. Гла́съ а҃:

Крⷭ҇тъ воздрꙋзи́сѧ на ло́бнѣмъ, и҆ процвѣтѐ на́мъ безсме́ртїе ѿ и҆сто́чника приснотекꙋ́щагѡ, ребра̀ сп҃сова.

Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ, сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.

Неразрꙋше́на стѣна̀ на́мъ є҆́сть чⷭ҇тны́й крⷭ҇тъ сп҃совъ, на него́ бо надѣ́ющесѧ сп҃са́емсѧ всѝ.

Сті́хъ: Поми́лꙋй на́съ гдⷭ҇и, поми́лꙋй на́съ: ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ, наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.

Мч҃нченъ: Мл҃твами гдⷭ҇и всѣ́хъ ст҃ы́хъ, и҆ бцⷣы, тво́й ми́ръ да́ждь на́мъ, и҆ поми́лꙋй на́съ ꙗ҆́кѡ є҆ди́нъ ще́дръ.

Сла́ва, и҆ ны́нѣ, крⷭ҇тобг҃оро́диченъ: Заколе́нїе твоѐ непра́ведное хрⷭ҇тѐ, дв҃а зрѧ́щи, пла́чꙋщи вопїѧ́ше тѝ: ча́до сладча́йшее, ка́кѡ без̾ пра́вды стра́ждеши; и҆ ка́кѡ на дре́вѣ ви́сиши, и҆́же всю̀ зе́млю повѣ́сивый на вода́хъ; не ѡ҆ста́ви менѐ є҆ди́нꙋ, бл҃годѣ́телю многомлⷭ҇тиве, мт҃рь и҆ рабꙋ̀ твою̀, молю́сѧ.

Та́же, Ны́нѣ ѿпꙋща́еши: Трист҃о́е, и҆ по Ѻ҆́ч҃е на́шъ: Тропа́рь ст҃о́мꙋ, и҆ ѿпꙋ́стъ.

Въ четверто́къ на повече́рїи,

канѡ́нъ прест҃ѣ́й бцⷣѣ. Гла́съ а҃.

Пѣ́снь а҃

І҆рмо́съ: Го́рькїѧ рабо́ты и҆зба́вльсѧ і҆и҃ль, непроходи́мое про́йде ꙗ҆́кѡ сꙋ́шꙋ, врага̀ зрѧ̀ потоплѧ́ема, пѣ́снь ꙗ҆́кѡ бл҃годѣ́телю пое́тъ бг҃ꙋ, чꙋдодѣ́ющемꙋ мы́шцею высо́кою, ꙗ҆́кѡ просла́висѧ.

Во ѿча́ѧнїи ѡ҆держи́мь є҆́смь, мно́жество помышлѧ́ю прегрѣше́нїй мои́хъ, и҆ сꙋдїѝ ѿвѣ́тъ, влⷣчце бцⷣе: но ты́ ми бꙋ́ди бж҃е́ственнаѧ хода́таица, премѣнѧ́ющи є҆го̀ милосе́рдїемъ твои́мъ.

Хрїстїа́нское прибѣ́жище, па́дающихъ и҆справле́нїе, пречи́стаѧ, согрѣша́ющихъ ѡ҆чище́нїе, и҆зба́ви мѧ̀ прѝ стра́шныѧ, и҆ ѻ҆гнѧ̀ негаси́магѡ, жи́знь вѣ́чнꙋю подаю́щи мѝ.

Сла́ва: Тебѐ дв҃о є҆ди́нꙋ всѝ вѣ́рнїи стѧжа́хомъ застꙋ́пницꙋ тве́рдꙋ, ты́ бо бг҃а родила̀ є҆сѝ. тѣ́мже хвала́ми всѝ чи́стаѧ тѧ̀ ᲂу҆блажа́емъ, ро́ди всѝ земні́и по глаго́лꙋ твоемꙋ̀.

И҆ ны́нѣ: На крⷭ҇тѣ̀ ви́дѣвши чи́стаѧ зижди́телѧ и҆ сн҃а твоего̀ всенепоро́чнаѧ, ᲂу҆́жаса и҆спо́лншисѧ глаго́лаше: что̀ сїѐ ча́до ꙗ҆́кѡ ѕлочести́вїи возда́ша тѝ ѕла̑ѧ воз̾ блага̑ѧ, ꙗ҆̀же ꙗ҆ви́лъ є҆сѝ и҆̀мъ;

Пѣ́снь г҃

І҆рмо́съ: Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ гдⷭ҇и.

Всѝ прⷪ҇ро́цы тѧ̀ мт҃рь бж҃їю проповѣ́дахꙋ ѡ҆́бразы пресла́вными: мы̀ сбытїѐ ꙗ҆́снѡ ви́дѧще вѣ́рꙋемъ, и҆ про́симъ ᲂу҆лꙋчи́ти тобо́ю бж҃е́ственныѧ ти́хости.

Влⷣчце мі́ра, сп҃се́нїе вѣ́рныхъ и҆ застꙋпле́нїе, ꙗ҆̀же и҆з̾ глꙋбины̀ се́рдца воздыха̑нїѧ моѧ̑, воспꙋща́єма чⷭ҇таѧ, и҆ сле́зъ то́ки прїе́мши, свѧ́заннаго прегрѣше́нїи мно́гими и҆зба́ви и҆ сп҃си́ мѧ.

Сла́ва: И҆мꙋ́щи ꙗ҆́кѡ мт҃и дерзнове́нїе чⷭ҇таѧ, ко хрⷭ҇тꙋ̀ бг҃ꙋ, ѿ а҆га́рѧнскихъ ча́дъ и҆зба́витисѧ на́мъ молѝ при́снѡ, и҆ ѿ всѧ́кагѡ вре́да, и҆ бл҃года́рнѡ сла́вити є҆го̀, пренепоро́чнаѧ, ᲂу҆твердѝ.

И҆ ны́нѣ: На крⷭ҇тѣ̀ вознесе́на сн҃а своего̀ зрѧ́щи пречⷭ҇таѧ, восклица́ше, и҆ въ болѣ́зни се́рдца возглаша́ше вопїю́щи. сн҃е, что́ ти содѣ́ѧша насы́щшїисѧ твои́хъ дарѡ́въ ѕлочести́вїи и҆ беззако́ннїи;

Пѣ́снь д҃

І҆рмо́съ: Же́злъ и҆з̾ ко́рене і҆ессе́ова, и҆ цвѣ́тъ ѿ негѡ̀ хрⷭ҇тѐ ѿ дв҃ы прозѧ́блъ є҆сѝ, и҆з̾ горы̀ хва́льный, прїѡсѣне́нныѧ ча́щи, прише́лъ є҆сѝ вопло́щьсѧ ѿ неискꙋсомꙋ́жныѧ невеще́ственный и҆ бж҃е, сла́ва си́лѣ твое́й гдⷭ҇и.

Низложѝ сꙋровство̀ лꙋка́выхъ вра̑гъ, и҆ кова̑рства ꙗ҆̀же приноси̑маѧ на мѧ̀: и҆ ѡ҆блецы́ мѧ твое́ю крѣ́постїю, всенепоро́чнаѧ, невреди́ма при́снѡ соблюда́ющи, цѣ́ла и҆ непоколеби́ма, свѣ́тлѡ тѧ̀ воспѣва́ющаго.

Побѣжде́нъ зако́номъ пло́ти, безмѣ̑стнаѧ дѣ́лаю беззакѡ́нїѧ всестра́стный, и҆ всѧ́чески не смѣ́ю возвестѝ ѻ҆́ко моѐ влⷣчце чⷭ҇таѧ, къ тебѣ̀: но ты̀ зако́номъ млⷭ҇рдїѧ твоегѡ̀ сп҃си́ мѧ ѻ҆каѧ́ннаго, сп҃си́ мѧ.

Сла́ва: Є҆ди́нꙋ тѧ̀ вѣ́рнїи съ бг҃омъ, ᲂу҆пова́нїе непосты́дно и҆ застꙋпле́нїе и҆́мамы влⷣчце: твои́ми мл҃твами и҆зба́ви на́съ ѿ всѧ́кихъ вра̑гъ: ви́димыхъ и҆ неви́димыхъ, вре́да и҆ и҆скꙋше́нїй, да тѧ̀ непреста́ннѡ сла́вимъ.

И҆ ны́нѣ: Без̾ сѣ́мене є҆го́же родила̀ є҆сѝ сн҃а, зрѧ́щи всенепоро́чнаѧ на крⷭ҇тѣ̀ пригвожде́на, восклица́ше мт҃рски, и҆ рыда́ющи глаго́лаше: что̀ є҆́же на тебѣ̀ сн҃е мо́й, ви́жꙋ но́вое и҆ пресла́вное, и҆ недовѣ́домое чꙋ́до;

Пѣ́снь є҃

І҆рмо́съ: Бг҃ъ сы́й ми́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща посла́лъ є҆сѝ на́мъ. тѣ́мъ бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще славосло́вимъ тѧ̀ чл҃вѣколю́бче.

Мл҃твꙋ неꙋсы́пнꙋ и҆мꙋ́щи, и҆ те́плое застꙋпле́нїе ѡ҆ рабѣ́хъ твои́хъ, во всѧ́кихъ напа́ствꙋемыхъ житїѧ̀ бѣда́хъ предвари́вши дв҃о, и҆схитѝ, и҆ сп҃сѝ, да не печа́лїю поже́рты бꙋ́демъ и҆ и҆стлѣ́емъ.

Мр҃і́е бж҃їе жили́ще, менѐ жили́ще бы́вша лꙋка́выхъ дꙋхѡ́въ дѣ́лы скве́рными, и҆ си́хъ и҆сполнѧ́ющаго во́лю безꙋ́мнѡ, покаѧ́нїемъ ꙗ҆вѝ бг҃ꙋ жили́ще.

Сла́ва: Болѧ́щыѧ ны̀ лю́тѣ дꙋше́ю вкꙋ́пѣ и҆ тѣ́ломъ, страстьмѝ грѣхо́вными, и҆сцѣлѝ ꙗ҆́кѡ млⷭ҇рдаѧ и҆ бг҃а мт҃и: ты́ бо вели́кагѡ вои́стиннꙋ дꙋша́мъ же и҆ тѣ́лѡмъ врача̀ родила̀ є҆сѝ хрⷭ҇та̀, неѡскꙋ́дный и҆сто́чникъ жи́зни.

И҆ ны́нѣ: На дре́вѣ крⷭ҇тнѣмъ зрѧ́щи сн҃а, разлива́шесѧ ᲂу҆тро́бою, и҆ со слеза́ми взыва́ше пренепоро́чнаѧ: ᲂу҆жаса́юсѧ твоегѡ̀ долготерпѣ́нїѧ сн҃е мо́й, но́вое ви́дѧщи чꙋ́до: ка́кѡ безгрѣ́шенъ сы́й непра́веднꙋю терпи́ши сме́рть;

Пѣ́снь ѕ҃

І҆рмо́съ: И҆з̾ ᲂу҆тро́бы і҆ѡ́нꙋ млⷣнца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее про́йде сохра́ншее нетлѣ́ннꙋ: є҆го́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ.

Мѵ́ра мы́сленнагѡ прїѧ́телище была̀ є҆сѝ, всю̀ зе́млю ѡ҆бл҃гоꙋха́вшагѡ бж҃ества̀ бл҃ги́ми вонѧ́ми, прест҃а́ѧ бг҃оневѣ́сто. тѣ́мже бл҃гоꙋха́нїемъ мл҃твы твоеѧ̀ всѧ́кое ѕлосмра́дїе потребѝ ѿ дꙋшѝ мои́хъ прегрѣше́нїй.

Ѻ҆́гнь сласте́й ѕѣлѡ̀ ѡ҆палѧ́етъ мѧ̀, и҆ ѡ҆скорблѧ́етъ смире́нное моѐ се́рдце, и҆ къ безмѣ́стномꙋ дѣ́ланїю совокꙋплѧ́етъ мѧ̀ беззако́ннѡ. потщи́сѧ се́й ᲂу҆гаси́ти, ꙗ҆́же ѻ҆́гнь бж҃е́ственный ро́ждшаѧ, сп҃се́нїе моѐ бг҃оневѣ́стнаѧ.

Сла́ва: И҆зба́ви на́съ дв҃о всепѣ́таѧ, ѿ напа́стей вра̑гъ ви́димыхъ и҆ неви́димыхъ, и҆ соблюдѝ мт҃и бж҃їѧ правосла́вною вѣ́рою вои́стиннꙋ бцⷣꙋ тѧ̀ и҆сповѣ́дающихъ: и҆́маши бо при́снѡ мо́щь, ꙗ҆́кѡ ро́ждши созда́вшаго всѧ́чєскаѧ.

И҆ ны́нѣ: При крⷭ҇тѣ̀ стоѧ́щи, и҆ ви́дѧщи своего̀ сн҃а, пло́тїю ви́сима пренепоро́чнаѧ, распала́ше печа́лїю ᲂу҆тро́бꙋ свою̀, и҆ слеза́ми ѡ҆блива́ющи взыва́ше: ча́до, вои́стиннꙋ неизглаго́ланно на всѧ̑ человѣ́ки твоѐ бл҃гоꙋтро́бїе.

Та́же, Гдⷭ҇и поми́лꙋй, три́жды. Сла́ва, и҆ ны́нѣ:

Сѣда́ленъ, гла́съ а҃. Подо́бенъ: Гро́бъ тво́й:

Нескве́рнаѧ а҆́гница, а҆́гнца и҆ па́стырѧ ви́сѧща ме́ртва на дре́вѣ зрѧ́щи, рыда́ющи вѣща́ше, мт҃рски восклица́ющи: ка́кѡ претерплю̀ твоѐ, є҆́же па́че сло́ва сн҃е мо́й, сни́тїе и҆ во́льныѧ стра́сти, бж҃е пребл҃гі́й;

Пѣ́снь з҃

І҆рмо́съ: Ѻ҆́троцы бл҃гоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѝ пла́мене стоѧ́ще поѧ́хꙋ: ѻ҆тцє́въ бж҃е бл҃гослове́нъ є҆сѝ.

Не терплю̀ бѣсо́вскагѡ прило́га и҆ молвы̀, помрача́етъ бо мѝ ᲂу҆́мъ пла́мень сласте́й плотски́хъ: но не пре́зри менѐ, ст҃а́ѧ бцⷣе, ᲂу҆пова́нїе моѐ на тѧ̀ возложи́вшагѡ.

Безневѣ́стнаѧ дв҃о, всест҃а́ѧ бг҃оневѣ́сто влⷣчце, прегрѣше́нїй мои́хъ плени̑цы разрѣшѝ мл҃твами твои́ми, и҆ сою́зъ любвѐ хрⷭ҇то́вы присовокꙋпѝ, добродѣ́тельныѧ плоды̀ принести́ ми.

Сла́ва: Ꙗ҆́же всѣ̑мъ сꙋ́щымъ въ мі́рѣ, застꙋ́пница є҆сѝ и҆ стѣна̀ хрⷭ҇тїа́нѡмъ, и҆ прибѣ́жище непосты́дно чⷭ҇таѧ мр҃і́е тѣ́мже вѣ́рою тѧ̀ чтꙋ́ще вопїе́мъ хрⷭ҇тꙋ̀: ѻ҆тє́цъ на́шихъ бж҃е бл҃гослове́нъ є҆сѝ.

И҆ ны́нѣ: Прест҃а́ѧ дв҃а зрѧ́щи сн҃а своего̀ ви́сима на крⷭ҇тѣ̀, ᲂу҆жа́снѡ дивлѧ́шесѧ, и҆ глаго́лаше: ка́кѡ претерплю̀ ᲂу҆мерщвле́на ви́дѧщи тѧ̀ нача́льника жи́зни, и҆ жизнода́вца.

Пѣ́снь и҃

І҆рмо́съ: Чꙋ́да преесте́ственнагѡ показа̀ ѡ҆́бразъ, ѻ҆гнеро́снаѧ пе́щь дре́вле: ѻ҆́гнь бо не ѡ҆палѝ ю҆́ныѧ дѣ́ти, хрⷭ҇то́во ꙗ҆влѧ́ѧ безсѣ́менное ѿ дв҃ы бж҃е́ственное ржⷭ҇тво̀. тѣ́мъ воспѣва́юще воспои́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Влⷣчце мі́ра бцⷣе, во глꙋбинѣ̀ ѕѡ́лъ поги́бели менѐ погрꙋже́ннаго ѕлоꙋ́мнѣ сластьмѝ плотски́ми, и҆ пристра́стїемъ вещьмѝ житїѧ̀, возведѝ є҆ди́на млⷭ҇рдїемъ твои́мъ. не и҆́мамъ бо наде́жды сп҃се́нїѧ ѿню́дъ: ве́сь бо є҆́смь, чⷭ҇таѧ, во ѿча́ѧнїи.

Ты̀ є҆сѝ сп҃се́нїе всѣ́хъ человѣ́кѡвъ, ꙗ҆́же бг҃а ро́ждши неизрече́ннымъ ѡ҆́бразомъ: ты̀ вѣ́рныхъ сп҃си́тельница бцⷣе, и҆ слѣпы́хъ наста́вница, и҆ па́дающихъ и҆справле́нїе. тѣ́мже тѧ̀ восхвалѧ́юще хрⷭ҇тꙋ̀ зове́мъ: бл҃гослови́те всѧ̑ дѣла̀ гдⷭ҇а, по́йте и҆ превозноси́те є҆го̀ во вѣ́ки.

Сла́ва: Стѣ́нꙋ претве́рдꙋ тѧ̀ стѧжа́вше, сп҃се́нїѧ на́шегѡ наде́ждꙋ на тѧ̀ возложи́хомъ, бг҃ома́ти. но ты̀ бꙋ́ди рабѡ́мъ твои̑мъ приста́нище, и҆ стѣна̀ неѡбори́ма, и҆ ко є҆́же вопи́ти непреста́ннѡ напра́ви: да бл҃гослови́тъ тва́рь всѧ́каѧ гдⷭ҇а, и҆ превозно́ситъ є҆го̀ во вѣ́ки.

И҆ ны́нѣ: Оу҆тро́бою ма́терски растерза́ема, и҆ слеза́ми мно́гими и҆сполнѧ́ема, ꙗ҆́же чи́стѡ ро́ждшаѧ тѧ̀ зрѧ́щи на крⷭ҇тѣ̀, стена́ньми неꙋтѣ́шными взыва́ше: болѣ́зни и҆збѣ́гши въ ржⷭ҇твѣ̀ твое́мъ сн҃е мо́й, болѣ́знїю ны́нѣ ѡ҆держи́ма є҆́смь, ви́дѧщи зра́къ тво́й безче́стенъ.

Пѣ́снь ѳ҃

І҆рмо́съ: Неизглаго́ланное дв҃ы та́инство: нб҃о бо сїѧ̀, и҆ престо́лъ херꙋві́мскїй, и҆ свѣтоно́сный черто́гъ показа́сѧ, хрⷭ҇та̀ бг҃а вседержи́телѧ, сїю̀ бл҃гоче́стнѡ ꙗ҆́кѡ бцⷣꙋ велича́емъ.

Ѡ҆калѧ́хъ безче́стїѧ страстьмѝ дꙋ́шꙋ мою̀ ѻ҆каѧ́нный, всю́ же дꙋшетлѣ́нными страстьмѝ ѡ҆скверни́хъ пло́ть: но ꙗ҆́кѡ чⷭ҇таѧ же и҆ нескве́рнаѧ, ты́ мѧ ѡ҆чи́сти мно́жествомъ млⷭ҇ти твоеѧ̀.

Не стѧжа́хъ ра́звѣ тебѐ чⷭ҇таѧ прибѣ́жища, не зна́ю влⷣчце, и҆́ны на землѝ застꙋ́пницы тве́рдыѧ и҆ покро́ва: тѣ́мже къ тебѣ̀ те́плѣ притеко́хъ, просѧ̀ тобо́ю прїѧ́ти согрѣше́нїй и҆збавле́нїе.

Сла́ва: Всепѣ́таѧ, твоѧ̑ рабы̑ ны́нѣ млⷭ҇тивнѡ зри́ши свы́ше, вѣ́рою бл҃гоче́стною соблюда́ющи, и҆ твои́ми моли́твами всѧ́ческихъ и҆збавлѧ́ющи на́съ ѡ҆бстоѧ́нїй, и҆́стиннꙋю тѧ̀ чтꙋ́щихъ бцⷣꙋ чⷭ҇тꙋю.

И҆ ны́нѣ: Ꙗ҆́же безсѣ́менное рожде́нїе позна́вшаѧ, тѧ̀ чл҃вѣколю́бче на дре́вѣ крⷭ҇тнѣмъ повѣ́шена ꙗ҆́кѡ ви́дѣ, вопїѧ́ше: сн҃е и҆ бж҃е мо́й всеси́льне, человѣ́ки сп҃стѝ хотѧ́й, ка́кѡ прїѧ́лъ є҆сѝ ны́нѣ распѧ́тїе;

Та́же, Досто́йно є҆́сть: И҆ покло́нъ. Та́же Трист҃о́е. И҆ по Ѻ҆́ч҃е на́шъ: тропарѝ, и҆ про́чее ѻ҆бы́чное, и҆ ѿпꙋ́стъ.

Въ пѧто́къ ᲂу҆́тра,

по а҃-мъ стїхосло́вїи сѣда́льны крⷭ҇тны. Гла́съ а҃:

Распе́ншꙋсѧ тѝ хрⷭ҇тѐ, поги́бе мꙋчи́тельство, и҆ попра́на бы́сть си́ла вра́жїѧ: ни а҆́гг҃лъ бо, ни человѣ́къ, но ты̀ са́мъ гдⷭ҇и сп҃слъ є҆сѝ на́съ, сла́ва тебѣ̀.

Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.

Крⷭ҇та̀ твоегѡ̀ дре́вꙋ покланѧ́емсѧ чл҃вѣколю́бче, ꙗ҆́кѡ на то́мъ пригвозди́лсѧ є҆сѝ животѐ всѣ́хъ: ра́й ѿве́рзлъ є҆сѝ сп҃се, вѣ́рою прише́дшемꙋ къ тебѣ̀ разбо́йникꙋ, и҆ пи́щи сподо́билъ є҆сѝ и҆сповѣ́дꙋющаго тѧ̀: помѧни́ мѧ гдⷭ҇и. прїимѝ ꙗ҆́коже ѻ҆́наго, и҆ на́съ вопїю́щихъ тебѣ̀: согрѣши́хомъ всѝ, млⷭ҇рдїемъ твои́мъ не пре́зри на́съ.

Сла́ва, и҆ ны́нѣ, крⷭ҇тобг҃оро́диченъ: Нескве́рнаѧ а҆́гница, а҆́гнца и҆ па́стырѧ повѣ́шена на дре́вѣ ме́ртва зрѧ́щи, пла́чꙋщи вѣща́ше, мт҃рски восклица́ющи: ка́кѡ претерплю̀ твоѐ, є҆́же па́че сло́ва сн҃е мо́й сни́тїе, и҆ вѡ́льныѧ стрⷭ҇ти, бж҃е пребл҃гі́й;

По в҃-мъ стїхосло́вїи сѣда́льны крⷭ҇тны, гла́съ а҃:

Ѻ҆рꙋ́жїе крⷭ҇тное во бране́хъ ꙗ҆ви́сѧ и҆ногда̀ бл҃гочести́вомꙋ царю̀ кѡнстанті́нꙋ, непобѣди́маѧ побѣ́да на врагѝ, вѣ́ры ра́ди, сегѡ̀ трепе́щꙋтъ сопроти̑вныѧ си̑лы, сїѐ бы́сть вѣ̑рнымъ сп҃се́нїе, и҆ па́ѵлꙋ похвала̀.

Сті́хъ: Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ.

И҆́же дре́вле а҆да́ма ѿ пе́рсти созда́вый, бре́нною рꙋко́ю заꙋше́нъ бы́въ ще́дре, и҆ распѧ́тїе претерпѣ́лъ є҆сѝ, порꙋга̑нїѧ же и҆ ра̑ны. ѽ чꙋдесѐ! ѽ мно́гагѡ долготерпѣ́нїѧ твоегѡ̀! сла́ва гдⷭ҇и живонѡ́снымъ твои̑мъ стрⷭ҇те́мъ, и҆́миже на́съ сп҃слъ є҆сѝ.

Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.

Мч҃нченъ: Страда́нїѧ похвало́ю, и҆ вѣне́чною по́честїю, сла́внїи стрⷭ҇тоте́рпцы, ѡ҆дѣ́ѧвшесѧ тобо́ю гдⷭ҇и, терпѣ́нїемъ ᲂу҆́бѡ ра́нъ беззако́нныхъ побѣди́ша, и҆ си́лою бж҃е́ственною ѿ нб҃съ побѣ́дꙋ прїѧ́ша. тѣ́хъ мл҃твами и҆ на́съ свободѝ ѿ неви́димагѡ врага̀ сп҃се, и҆ сп҃сѝ на́съ.

Сла́ва, и҆ ны́нѣ, крⷭ҇тобг҃оро́диченъ: Зрѧ́щи тѧ̀ хрⷭ҇тѐ, всенепоро́чнаѧ мт҃и, ме́ртва на крⷭ҇тѣ̀ просте́рта, вопїѧ́ше: сн҃е мо́й собезнача́льне ѻ҆ц҃ꙋ̀ и҆ дх҃ꙋ, что̀ неизрече́нное твоѐ сїѐ смотре́нїе, и҆́мже сп҃слъ є҆сѝ ще́дре, пречⷭ҇тꙋю рꙋкꙋ̀ твоє́ю созда́нїе;

По г҃-мъ стїхосло́вїи сѣда́льны крⷭ҇тны. Гла́съ а҃:

На дре́вѣ тѧ̀ сло́ве крⷭ҇тнѣмъ, сл҃нца сла́вы і҆и҃се, за млⷭ҇рдїе млⷭ҇ти, повѣ́шена пло́тїю во́лею, ꙗ҆́кѡ ви́дѣ сл҃нце, не терпѧ́щи дерзнове́нїѧ, помрачи́сѧ. тѣ́мже ѡ҆мраче́ннꙋю мою̀ дꙋ́шꙋ просвѣтѝ неприкоснове́ннымъ свѣ́томъ твои́мъ, и҆ сп҃си́ мѧ, молю́сѧ.

На крⷭ҇тѣ̀ пригвозди́лсѧ є҆сѝ во́лею ще́дре, ѡ҆божи́лъ є҆сѝ и҆стлѣ́вшее на́ше сꙋщество̀, и҆ человѣкоꙋбі́йцꙋ ѕмі́ѧ ᲂу҆мертви́лъ є҆сѝ. но ᲂу҆твердѝ правосла́вїе въ ми́рѣ, и҆ низложѝ є҆реті́чествꙋющихъ воста̑нїѧ, чⷭ҇тны́мъ крⷭ҇то́мъ твои́мъ.

Сла́ва, и҆ ны́нѣ, крⷭ҇тобг҃оро́диченъ: И҆̀же твоѐ застꙋпле́нїе стѧжа́вше пречⷭ҇таѧ, и҆ твои́ми мл҃твами ѿ бѣ́дъ и҆збавлѧ́емсѧ: крⷭ҇то́мъ бо сн҃а твоегѡ̀ всегда̀ храни́ми вездѣ̀, по до́лгꙋ тѧ̀ всѝ бл҃гоче́стнѡ велича́емъ.

Канѡ́нъ чⷭ҇тно́мꙋ и҆ животворѧ́щемꙋ крⷭ҇тꙋ̀, [є҆гѡ́же краегране́сїе: Стра́сть чⷭ҇тнꙋ́ю хвалю̀ влⷣчню.] Творе́нїе гдⷭ҇и́на і҆ѡ́сифа. Гла́съ а҃.

Пѣ́снь а҃

І҆рмо́съ: Помо́гшемꙋ бг҃ꙋ во є҆гѵ́птѣ мѡѷсе́ови, и҆ тѣ́мъ фараѡ́на со всево́инствомъ погрꙋзи́вшемꙋ, побѣ́днꙋю пѣ́снь пои́мъ, ꙗ҆́кѡ просла́висѧ.

Стрⷭ҇ти претерпѣ́въ на́съ ра́ди, и҆́же є҆стество́мъ безстра́стенъ, и҆ ра́спѧтъ бы́въ съ разбо́йникома, началоѕло́бнаго ѕмі́ѧ ᲂу҆мертви́лъ є҆сѝ сло́ве, и҆ сп҃слъ є҆сѝ покланѧ́ющыѧсѧ тебѣ̀.

Восто́къ восто́кѡвъ сы́й, къ за́падѡмъ ѿринове́номꙋ є҆стествꙋ̀ на́шемꙋ і҆и҃се прише́лъ є҆сѝ: тебе́ же сл҃нца зрѧ̀ распина́ема, свѣ́тъ сво́й сокры̀.

Мч҃нченъ: Сме́ртїю вре́менною жи́знь вѣ́чнꙋю премѣни́вше до́брѣ страда́льцы сла́внїи, црⷭ҇твїѧ нбⷭ҇нагѡ сподо́бистесѧ: сегѡ̀ ра́ди прославлѧ́етесѧ, и҆ бл҃жи́ми є҆стѐ.

Мч҃нченъ: И҆̀же стрⷭ҇те́мъ хрⷭ҇тѡ́вымъ ᲂу҆подо́бльшесѧ до́блественнѣ, стра̑сти и҆сцѣлева́ете земны́хъ, рꙋкодѣ́йствїемъ та́йнымъ, и҆ сло́вомъ прого́ните дꙋ́хи, ст҃і́и мч҃нцы.

Бг҃оро́диченъ: Ꙗ҆́коже а҆́гница зрѧ́щи на крⷭ҇тѣ̀ хрⷭ҇та̀ воздви́жена, и҆ взира́ющи а҆́гнца восклица́ющи вопїѧ́ше: гдѣ̀ твоѧ̀ за́йде добро́та, долготерпѣли́ве сн҃е пребезнача́льне;

И҆́нъ канѡ́нъ прест҃ѣ́й бцⷣѣ. Гла́съ а҃.

І҆рмо́съ: Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ сп҃сшемꙋ і҆и҃лѧ, ꙗ҆́кѡ просла́висѧ.

Ꙗ҆́же є҆ди́на безлѣ́тнаго бг҃а въ лѣ́то ро́ждши воплоще́нна, всест҃а́ѧ пречⷭ҇таѧ, вселѣ̑тныѧ стра̑сти преѻкаѧ́нныѧ моеѧ̀ дꙋшѝ и҆сцѣлѝ.

Стрꙋ́пы дꙋшѝ моеѧ̀, и҆ се́рдца недоꙋмѣ́нїе, помышле́нїй ѡ҆мраче́нїе, и҆ ᲂу҆́мное побѣжде́нїе потребѝ пречⷭ҇таѧ, ꙗ҆́кѡ млⷭ҇тиваѧ, твои́ми мл҃твами.

Ꙗ҆́же свѣ́тъ ро́ждшаѧ и҆зба́вителѧ моего̀, тьмы̀ и҆ мꙋ́къ вѣ́чныхъ и҆зба́ви мѧ̀ пречⷭ҇таѧ: ꙗ҆́кѡ да сп҃са́емь воспѣва́ю бл҃гоꙋтро́бїе твоѐ.

Въ пꙋчи́нѣ лю́тыхъ, и҆ въ молвѣ̀ страсте́й потоплѧ́емь є҆́смь а҆́зъ, твою̀ пречⷭ҇таѧ призыва́ю тишинꙋ̀: сп҃си́ мѧ, приста́нище бо є҆сѝ вѣ́рныхъ.

Пѣ́снь г҃

І҆рмо́съ: Да ᲂу҆тверди́тсѧ се́рдце моѐ въ во́ли твое́й хрⷭ҇тѐ бж҃е, и҆́же над̾ вода́ми нб҃о ᲂу҆твержде́й второ́е, и҆ ѡ҆снова́вый на вода́хъ зе́млю всеси́льне.

На крⷭ҇тѣ̀ дла̑ни распросте́рлъ є҆сѝ, и҆ пе́рсты бж҃е́ственныѧ ѡ҆кровави́въ, дѣ́ло рꙋкꙋ̀ твоє́ю влⷣко, а҆да́ма ᲂу҆бі́йственныѧ рꙋкѝ и҆збавлѧ́ѧ, ꙗ҆́кѡ є҆ди́нъ бл҃гъ и҆ чл҃вѣколю́бецъ.

Въ ре́бра прободе́нъ бы́лъ є҆сѝ копїе́мъ влⷣко, и҆справлѧ́ѧ ре́бренное поползнове́нїе, на дре́во возне́слсѧ є҆сѝ, дре́вле бѣдꙋ̀ прїе́мшаго дре́ва плодо́мъ, въ ра́й вводѧ̀ съ разбо́йникомъ бл҃горазꙋ́мнымъ.

Мч҃нченъ: Церкѡ́внаѧ ᲂу҆твержде́нїѧ, бл҃гоче́стїѧ пре́днїѧ столпы̀, потреби́тели вра́жїѧ, гдⷭ҇ни мч҃ники, мы́слїю чи́стою пѣ́сненнѡ да ᲂу҆бл҃жи́мъ.

Мч҃нченъ: Ꙗ҆́кѡ бж҃е́ственное сꙋ́ще ло́зїе мы́сленнагѡ вїногра́да мч҃ницы, гро́здїе и҆знесо́ша на́мъ ꙗ҆́вѣ, терпѣ́нїѧ и҆злива́ющее вїно̀, и҆ всѣ́хъ вѣ́рныхъ сердца̀ веселѧ́щее.

Бг҃оро́диченъ: Бл҃гослове́нъ пло́дъ чре́ва твоегѡ̀ дв҃о всепѣ́таѧ, и҆стлѣ́вшаѧ плодо́мъ дре́ва, ра́ди крⷭ҇та̀ своегѡ̀, нетлѣ́нїѧ ᲂу҆стро́ивый прича́стники, бж҃е́ственною бл҃года́тїю.

И҆́нъ. І҆рмо́съ то́йже

Непло́дныѧ мы́сли моеѧ̀ безпло́дїе всѐ потребѝ, и҆ плодоно́снꙋ добродѣ́тельми дꙋ́шꙋ мою̀ покажѝ, пречⷭ҇таѧ бцⷣе, вѣ̑рнымъ помо́щнице.

И҆зба́ви мѧ̀ всенепоро́чнаѧ, всѧ́кагѡ ѡ҆бстоѧ́нїѧ, мно́гихъ собла́знъ ѕмїе́выхъ, и҆ вѣ́чнагѡ ѻ҆гнѧ̀, и҆ тьмы̀, ꙗ҆́же свѣ́тъ ро́ждшаѧ превѣ́чный.

Стра́шнымъ сꙋди́щемъ чⷭ҇таѧ, и҆ ѻ҆гне́мъ ѻ҆́нѣмъ неꙋгаси́мымъ, и҆ ѿвѣ́томъ лю́тымъ ве́сь ѡ҆сꙋжде́нъ є҆́смь: потщи́сѧ сп҃сти́ мѧ влⷣчце пречⷭ҇таѧ, раба̀ твоего̀.

Да ѡ҆божи́тъ человѣ́чество, бг҃ъ бы́сть чл҃вѣ́къ и҆з̾ тебѐ дв҃о чⷭ҇таѧ, па́че сло́ва и҆ смы́сла: сегѡ̀ ра́ди тѧ̀ согла́снѡ всѝ вѣ́рнїи ᲂу҆блажа́емъ.

Пѣ́снь д҃

І҆рмо́съ: Оу҆слы́шахъ гдⷭ҇и слꙋ́хъ тво́й, и҆ ᲂу҆боѧ́хсѧ: разꙋмѣ́хъ дѣла̀ твоѧ̑, прⷪ҇ро́къ глаго́лаше, и҆ просла́вихъ си́лꙋ твою̀.

Законода́вецъ пра́веденъ сы́й, со беззако́нники вмѣне́нъ бы́лъ є҆сѝ, на дре́во возне́слсѧ є҆сѝ бл҃годѣ́телю гдⷭ҇и, всѣ́хъ ѡ҆правда́ти хотѧ̀.

Си̑лы всѧ̑ ᲂу҆диви́шасѧ а҆́гг҃льскїѧ, на крⷭ҇тѣ̀ тебѐ зрѧ́щи возноси́ма сл҃нце, и҆ тьмы̀ нача́льныѧ си̑лы побѣжде́ни бы́ша.

Мч҃нченъ: И҆сцѣле́нїй бл҃года́ть ѿ дꙋхо́вныхъ дарова́нїй поче́рпше мч҃нцы, всѣ̑мъ ѿмыва́ютъ стра̑сти дꙋшетлѣ̑нныѧ бж҃їею бл҃года́тїю.

Мч҃нченъ: Дрема́нїе ѿри́нꙋвше нерадѣ́нїѧ стрⷭ҇тоте́рпцы, бо́дростїю бж҃е́ственною, и҆ вѣ́рою ѕвѣре́й ᲂу҆спи́ша стремлє́нїѧ, и҆ ра́дꙋющесѧ пострада́ша.

Бг҃оро́диченъ: Оу҆вы̀ мнѣ̀ ча́до, что̀ бꙋ́дꙋ; ка́кѡ зрю́ тѧ на дре́во воздви́жена, и҆ без̾ пра́вды ᲂу҆мерщвлѧ́ема живо́тъ подаю́щаго; дв҃а пла́чꙋщи глаго́лаше.

И҆́нъ

І҆рмо́съ: Дх҃омъ прови́дѧ прⷪ҇ро́че а҆ввакꙋ́ме словесѐ воплоще́нїе, проповѣ́далъ є҆сѝ вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ: сла́ва си́лѣ твое́й гдⷭ҇и.

Дв҃о бцⷣе, нескве́рнаѧ сѣ́не, ѡ҆скверне́на мѧ̀ прегрѣше́ньми ѡ҆чи́сти щедро́тами твои́ми, чистѣ́йшими кропле́ньми: да́ждь мѝ рꙋ́кꙋ по́мощи, да зовꙋ̀: сла́ва тебѣ̀ чⷭ҇таѧ бг҃оневѣ́сто.

Хра́мъ ѡ҆свѧще́нъ ꙗ҆ви́ласѧ є҆сѝ бг҃ꙋ, въ тѧ̀ все́льшемꙋсѧ па́че ᲂу҆ма̀: того̀ молѝ, грѣхо́вныхъ скве́рнъ на́съ ѡ҆чи́стити, ꙗ҆́кѡ да хра́мъ позна́емсѧ, и҆ ѻ҆би́телище дх҃о́вное.

Поми́лꙋй мѧ̀ бцⷣе, ꙗ҆́же є҆ди́на млⷭ҇тей и҆сто́чникъ ро́ждшаѧ, и҆ разрѣшѝ дꙋшѝ моеѧ̀ лю́тꙋю болѣ́знь, и҆ недоꙋмѣ́нїе серде́чное: сле́зъ стрꙋю̀ и҆ ᲂу҆миле́нїе пре́жде конца̀ пода́ждь, и҆ лю́тыхъ и҆збавле́нїе.

Ст҃а́ѧ бцⷣе, ѡ҆свѧтѝ на́съ, прест҃а́го ро́ждши пло́тїю, ᲂу҆подо́битисѧ хотѧ́щаго человѣ́кѡмъ, и҆ нбⷭ҇номꙋ црⷭ҇твїю прича́стники всѣ́хъ покажѝ, пречⷭ҇таѧ, твои́ми мл҃твами.

Пѣ́снь є҃

І҆рмо́съ: Свѣ́тлый на́мъ возсїѧ́й свѣ́тъ присносꙋ́щный, ᲂу҆́тренюющымъ ѡ҆ сꙋдьба́хъ за́повѣдей твои́хъ, влⷣко чл҃вѣколю́бче хрⷭ҇тѐ бж҃е на́шъ.

На крⷭ҇тѣ̀ пло́тїю воздвиза́емь, ꙗ҆зы́ки призва́лъ є҆сѝ невѣ́дꙋющыѧ тебѐ, къ твоемꙋ̀ позна́нїю, сꙋдїѐ всѣ́хъ, є҆ди́не млⷭ҇тиве хрⷭ҇тѐ бж҃е на́шъ.

Тебѣ̀ на сꙋди́щи ста́вшꙋ непра́веднѣмъ, пра́ведне гдⷭ҇и, ѡ҆правда́сѧ пре́жде ѡ҆сꙋжде́нный а҆да́мъ, и҆ зове́тъ: сла́ва распѧ́тїю твоемꙋ̀, долготерпѣли́ве гдⷭ҇и.

Мч҃нченъ: Ꙗ҆́коже ра́й бг҃онасажде́нный ꙗ҆ви́стесѧ мꙋ́чєницы, стрⷭ҇ти чⷭ҇тны́ѧ ꙗ҆́кѡ цвѣ́ты бл҃гоꙋха́нныѧ и҆мꙋ́ще, и҆́миже бл҃гоꙋха́етсѧ вѣ́рныхъ дꙋша̀ всѧ́каѧ.

Мч҃нченъ: Бл҃гоцвѣ̑тнаѧ и҆ бл҃гоплодѡви́таѧ древеса̀, и҆̀же вѣ́ры безсме́ртїѧ пло́дъ процвѣто́ша, и҆ ѕло́бы корє́нїѧ и҆сторго́ша, воспои́мъ мꙋ́ченики гдⷭ҇ни.

Бг҃оро́диченъ: Же́злъ чⷭ҇тны́й, ꙗ҆́же прозѧ́бшїй цвѣ́тъ неꙋвѧда́ющїй, ꙗ҆́кѡ ᲂу҆зрѣ̀ на дре́во возноси́ма того̀, вопїѧ́ше: влⷣко, не безча́днꙋ ꙗ҆ви́ мѧ.

И҆́нъ

І҆рмо́съ: Тво́й ми́ръ да́ждь на́мъ сн҃е бж҃їй, и҆но́гѡ бо ра́звѣ тебѐ бг҃а не зна́емъ, и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ.

Ме́ртва мѧ̀ содѣ́ла и҆ногда̀ во є҆де́мѣ вкꙋше́нїе лꙋка́вое: но ꙗ҆́же жи́знь ро́ждшаѧ пречи́стаѧ, дре́вле дре́вомъ ᲂу҆ме́ршаго ѡ҆живи́ мѧ ны́нѣ, и҆ пода́ждь ᲂу҆миле́нїе.

Сп҃си́ мѧ пречⷭ҇таѧ, ѿ бѣ́дъ лю́тыхъ и҆ воздви́гни мѧ̀ ѿ гно́ѧ страсте́й, и҆ и҆зба́ви мѧ̀ плѣне́нїѧ и҆ ѡ҆ѕлобле́нїѧ лꙋка́выхъ бѣсѡ́въ, твоего̀ непотре́бнаго раба̀.

Зѣ̑ницы дꙋшѝ моеѧ̀ ѡ҆зарѝ чⷭ҇таѧ, зрѣ́ти мѝ при́снѡ бж҃е́ственнꙋю свѣ́тлость, и҆ твою̀ сла́вꙋ всенепоро́чнаѧ, ꙗ҆́кѡ да полꙋчꙋ̀ млⷭ҇ть и҆ вѣ́чнꙋю сла́вꙋ.

Ѻ҆́блакъ и҆ ра́й, и҆ две́рь тѧ̀ свѣ́та, трапе́зꙋ, и҆ рꙋно̀ вѣ́мы, рꙋ́чкꙋ внꙋ́трь ма́ннꙋ носѧ́щꙋ, сла́дость мі́рꙋ, чⷭ҇таѧ дв҃о мт҃и.

Пѣ́снь ѕ҃

І҆рмо́съ: Прⷪ҇ро́ка сп҃слъ є҆сѝ ѿ ки́та чл҃вѣколю́бче, и҆ менѐ и҆з̾ глꙋбины̀ прегрѣше́нїй возведѝ, молю́сѧ.

И҆́же че́сти всѧ́кїѧ превы́шши, безче́стїе претерпѣ́лъ є҆сѝ хрⷭ҇тѐ, на крⷭ҇тѣ̀ воздви́женъ, чл҃вѣ́ки почестѝ хотѧ̀.

Подписꙋ́еши мнѣ̀ ѡ҆ставле́нїе, порабоще́нномꙋ льсти́вымъ, тро́стїю бїе́мь хрⷭ҇тѐ бж҃е на́шъ пребл҃гі́й.

Мч҃нченъ: Болѣ́зньми страда́нїй къ неболѣ́зненнѣй преидо́сте ст҃і́и кончи́нѣ, и҆ неизрече́нныѧ ра́дости сподо́бльшесѧ.

Мч҃нченъ: Разжего́стесѧ ᲂу҆́гльми хрⷭ҇то́вы любвѐ премꙋ́дрїи: тѣ́мже во ѻ҆́гнь вмета́еми не ѡ҆палѧ́еми пребы́сте.

Бг҃оро́диченъ: По ржⷭ҇твѣ̀ всенепоро́чнаѧ, ꙗ҆́коже и҆ пре́жде ржⷭ҇тва̀ пребыла̀ є҆сѝ: бг҃а бо родила̀ є҆сѝ дре́вомъ человѣ́ка сп҃сшаго.

И҆́нъ

І҆рмо́съ: Прⷪ҇ро́ка і҆ѡ́нꙋ подража́ѧ вопїю̀: живо́тъ мо́й бл҃же свободѝ и҆з̾ тлѝ, и҆ сп҃си́ мѧ сп҃се мі́ра, зовꙋ́ща: сла́ва тебѣ̀.

Ѡ҆скверне́на мѧ̀ мно́гими грѣхѝ, молю́сѧ тебѣ̀ є҆ди́ной бл҃го́й, и҆ нескве́рнѣй сѣ́ни: ѡ҆мы́й ѿ всѧ́кїѧ скве́рны, хода́тайствомъ твои́мъ.

Ѡ҆корми́тельница мѝ бꙋ́ди чⷭ҇таѧ, вла́емꙋ въ пꙋчи́нѣ лю́тыхъ, жите́йскими нꙋ́ждами, и҆ и҆спра́ви, къ при́сномꙋ приста́нищꙋ, и҆ сп҃си́ мѧ.

Треволне́нїе помышле́нїй, и҆ страсте́й нахождє́нїѧ, и҆ глꙋбина̀ грѣхо́внаѧ, ѻ҆каѧ́ннꙋю мою̀ дꙋ́шꙋ ѡ҆бꙋрева́ютъ: помози́ ми ст҃а́ѧ влⷣчце.

Сщ҃е́ннаѧ сѣ́не показа́ннаѧ, мр҃і́е, ѡ҆скверне́ннꙋю сластьмѝ ѻ҆каѧ́ннꙋю мою̀ дꙋ́шꙋ ѡ҆свѧтѝ.

Пѣ́снь з҃

І҆рмо́съ: Пе́щь сп҃се ѡ҆роша́шесѧ, ѻ҆́троцы же ликꙋ́юще поѧ́хꙋ: ѻ҆тцє́въ бж҃е бл҃гослове́нъ є҆сѝ.

Распина́емь тва́рь поколеба́лъ є҆сѝ: ᲂу҆мерщвлѧ́емь ѕмі́ѧ ᲂу҆мертви́лъ є҆сѝ: бл҃гослове́нъ є҆сѝ хрⷭ҇тѐ бж҃е ѻ҆тє́цъ на́шихъ.

Напоѧ́етсѧ же́лчїю долготерпѣли́вый, и҆сточа́ѧ мѝ сла́дость сп҃си́тельнꙋю, сла́достною снѣ́дїю лише́нномꙋ ра́йскїѧ пи́щи.

Мч҃нченъ: Мч҃нцы ноготьмѝ стрꙋ́жеми, ме́ртвости дебельство̀ ѿложи́вше, красотꙋ́ же бж҃е́ственнꙋю ѿ бг҃а прїѧ́ша.

Мч҃нченъ: Стрⷭ҇тьмѝ стрⷭ҇ти хрⷭ҇то́вѣй пречⷭ҇тѣй подо́бѧщесѧ, до́блїи мч҃нцы, ра̑ны вра́жїѧ ᲂу҆до́бь претерпѣ́сте.

Бг҃оро́диченъ: Распина́ема зрѧ́щи гдⷭ҇а непоро́чнаѧ бг҃оро́дица, глаго́лаше: ᲂу҆вы̀ мнѣ̀ сн҃е мо́й, ка́кѡ ᲂу҆мира́еши, животѐ и҆ наде́ждо вѣ́рныхъ;

И҆́нъ

І҆рмо́съ: Сꙋ́щымъ въ пещѝ ѻ҆трокѡ́мъ твои̑мъ сп҃се, не прикоснꙋ́сѧ, нижѐ стꙋжѝ ѻ҆́гнь. тогда̀ трїѐ, ꙗ҆́кѡ є҆ди́нѣми ᲂу҆сты̀ поѧ́хꙋ и҆ бл҃гословлѧ́хꙋ, глаго́люще: бл҃гослове́нъ бг҃ъ ѻ҆тє́цъ на́шихъ.

Ѡ҆скве́рншꙋюсѧ страстьмѝ дꙋ́шꙋ мою̀ ѡ҆свѧтѝ, пречⷭ҇таѧ бг҃оневѣ́сто, и҆ ᲂу҆ма̀ моегѡ̀ лю́тое плѣне́нїе, и҆ се́рдца недоꙋмѣ́нїе, и҆ бѣсѡ́вскаѧ ᲂу҆стремлє́нїѧ вско́рѣ потребѝ чⷭ҇таѧ.

Оу҆мерщвле́нный страстьмѝ плотски́ми, всенепоро́чнаѧ, ѡ҆живѝ ᲂу҆́мъ мо́й, и҆ бг҃ꙋ ᲂу҆гѡ́днаѧ соверша́ти ᲂу҆крѣпѝ мѧ̀: да велича́ю тѧ̀, и҆ сла́влю при́снѡ бл҃гоꙋтро́бїе твоѐ.

Дв҃о мт҃и, ꙗ҆́же є҆ди́на бг҃а ро́ждшаѧ, ᲂу҆мертвѝ плотскі̑ѧ моѧ̑ сла̑сти, и҆ дꙋше́внꙋю мою̀ скве́рнꙋ ѿмы́й вско́рѣ: и҆ и҆стѧза́нїѧ бѣсѡ́въ лꙋка́выхъ и҆зба́ви, и҆ сп҃си́ мѧ.

Преиспещре́на бж҃е́ственными добродѣ́тельми, родила̀ є҆сѝ сло́во собезнача́льно ѻ҆ц҃ꙋ̀, чⷭ҇таѧ дв҃о, добродѣ́тельми нб҃са̀ вои́стиннꙋ покры́вшаго: є҆го́же молѝ при́снѡ ᲂу҆ще́дрити на́съ.

Пѣ́снь и҃

І҆рмо́съ: Пѣсносло́вцы въ пещѝ сп҃сшагѡ дѣ́ти, и҆ громопла́меннꙋю прело́жшаго на ро́сꙋ, хрⷭ҇та̀ бг҃а по́йте и҆ превозноси́те во всѧ̑ вѣ́ки.

Є҆гда̀ на крⷭ҇тѣ̀ сп҃се пригвозди́лсѧ є҆сѝ, колеба́шесѧ тва́рь: сл҃нце ᲂу҆ста́ви лꙋчы̀, и҆ ка́менїе распада́шесѧ, и҆ а҆́дъ ско́рѡ ѡ҆бнажа́шесѧ, не терпѧ̀ держа́вы твоеѧ̀.

За ѡ҆сꙋжде́нїе ѿринове́ннагѡ ѡ҆сꙋжде́нїе пострада́въ, за прїе́мшаго наготꙋ̀, на́гъ на дре́вѣ ви́сѣлъ є҆сѝ ще́дре: ве́лїѧ твоѧ̀ держа́ва и҆ долготерпѣ́нїе.

Мч҃нченъ: И҆́же безплѡ́тнымъ сожи́телїе, хрⷭ҇тѡ́вы во́ини, крⷭ҇то́мъ ꙗ҆́кѡ бронѧ́ми ѡ҆болче́ни, къ сопротивобо́рцꙋ ѡ҆полчи́шасѧ, и҆ того̀ кра́сными нога́ми попра́ша.

Мч҃нченъ: Стоѧ́хꙋ посредѣ̀ сꙋди́ща съ закле́пми до́блїи, на ᲂу҆́ды раздроблѧ́еми, и҆ зда́нїе разорѧ́юще пре́лести, и҆ бѣсѡ́вскаѧ трє́бища разбива́юще.

Бг҃оро́диченъ: Ꙗ҆́же нб҃съ превы́шшаѧ, воздви́жена на дре́вѣ, и҆ низлага́ющаго воздвижє́нїѧ вра̑жїѧ, зрѧ́щи є҆ди́наго вы́шнѧго, воспѣва́ше того̀ велегла́снѡ.

И҆́нъ

І҆рмо́съ: Є҆гѡ́же ᲂу҆жаса́ютсѧ а҆́гг҃ли, и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте сщ҃е́нницы, просла́вите ѻ҆́троцы, бл҃гослови́те лю́дїе и҆ превозноси́те во всѧ̑ вѣ́ки.

Воплоща́етсѧ безпло́тный и҆з̾ тебѐ бг҃олѣ́пнѡ: є҆го́же молѝ пречⷭ҇таѧ, стра̑сти моѧ̑ плотскі̑ѧ ᲂу҆мертви́ти, и҆ ѡ҆живи́ти дꙋ́шꙋ мою̀ ᲂу҆мерщвле́ннꙋю грѣха́ми.

И҆сцѣлѧ́ющаго сокрꙋше́нїе а҆да́ма пе́рстнагѡ, сп҃са родила̀ є҆сѝ пречⷭ҇таѧ и҆ бг҃а: того̀ ᲂу҆молѝ, ꙗ҆́звы дꙋшѝ моеѧ̀ и҆сцѣли́ти, ꙗ҆́же неисцѣ́льнѡ болѧ́щыѧ.

Воздви́гни слежа́ща мѧ̀ во глꙋбинѣ̀ ѕлы́хъ, и҆ ны́нѣ борю́щаго мѧ̀ побѣдѝ, чⷭ҇таѧ, и҆ ᲂу҆ѧ́звленнꙋю безмѣ́стными сластьмѝ дꙋ́шꙋ мою̀ пречⷭ҇таѧ не пре́зри, но ᲂу҆ще́дри, и҆ сп҃си́ мѧ.

И҆збавлѧ́емсѧ всѧ́ческихъ и҆скꙋше́нїй, пречⷭ҇таѧ, твои́ми къ бг҃ꙋ бо́дренными мл҃твами, тебѐ бцⷣꙋ свѣ́дꙋщїи бл҃гослове́ннꙋю и҆ ѡ҆бра́дованнꙋю.

Та́же, пѣ́снь бцⷣы: Вели́читъ дꙋша̀ моѧ̀ гдⷭ҇а: И҆ покло́ны.

Пѣ́снь ѳ҃

І҆рмо́съ: Тѧ̀, ю҆́же ви́дѣ мѡѷсе́й неѡпали́мꙋю кꙋпинꙋ̀, и҆ лѣ́ствицꙋ ѡ҆дꙋшевле́ннꙋю, ю҆́же і҆а́кѡвъ ви́дѣ, и҆ две́рь нбⷭ҇нꙋю, є҆́юже про́йде хрⷭ҇то́съ бг҃ъ на́шъ, пѣ́сньми мт҃и чⷭ҇таѧ велича́емъ.

Ѽ ка́кѡ лю́дїе непокори́вїи преда́ша тѧ̀ крⷭ҇тꙋ̀, є҆ди́наго долготерпѣли́ваго во́лею ѡ҆бнища́вшаго, и҆ стра̑сти прїе́мшаго, и҆ безстра́стїю хода́таѧ бы́вша, всѣ̑мъ ѿ а҆да́ма попо́лзшымсѧ!

Распѧ́тїе безче́стное прїѧ́тъ хрⷭ҇тѐ пло́тїю, почестѝ хотѧ̀ ѡ҆безче́ствованнаго чл҃вѣ́ка страстьмѝ безслове́сными, и҆ дре́внюю добро́тꙋ погꙋ́бльша: сла́ва па́че ᲂу҆ма̀ милосе́рдїю твоемꙋ̀.

Мч҃нченъ: Сл҃нце незаходи́мое хрⷭ҇тѐ, ᲂу҆́треневавшыѧ къ тебѣ̀, и҆ тьмꙋ̀ страда́нїй преше́дшыѧ ма́нїемъ тѝ, къ свѣ́тꙋ наста́вилъ є҆сѝ твоеѧ̀ неизрече́нныѧ сла́вы и҆ свѣ́тлости: просвѣтѝ ᲂу҆̀бо на́съ тѣ́хъ мл҃твами.

Мч҃нченъ: По́лкъ мч҃нкъ сщ҃е́нныхъ, тьмы̑ мы́сленныхъ врагѡ́въ побѣдѝ, и҆ тьма́мъ примѣни́сѧ ст҃ы́хъ си́лъ, и҆ тьмы̑ страсте́й дꙋ́шъ на́шихъ, манове́нїемъ вседѣ́тельнымъ и҆сцѣлѧ́ютъ при́снѡ.

Бг҃оро́диченъ: Свѣ́томъ дв҃о, и҆з̾ тебѐ возсїѧ́вшагѡ свѣ́та пло́тїю, ᲂу҆́мъ мо́й, ѡ҆зарѝ, и҆ се́рдце просвѣтѝ, тьмꙋ̀ ѿгонѧ́ющи грѣхо́внꙋю, и҆ ᲂу҆ны́нїѧ моегѡ̀ всѧ́кꙋ мглꙋ̀ прогонѧ́ющи.

И҆́нъ

І҆рмо́съ: Свѣтоно́сный ѻ҆́блакъ, во́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де, и҆ воплоти́сѧ на́съ ра́ди, бы́въ человѣ́къ, безнача́льный, велича́емъ всѝ ꙗ҆́кѡ мт҃рь бг҃а на́шегѡ чⷭ҇тꙋю.

Грѣхолюби́въ сы́й въ лѣ́ности пребыва́ю, и҆ сꙋди́ща, чⷭ҇таѧ, неꙋмы́тнагѡ трепе́щꙋ: въ не́мже мѧ̀ соблюдѝ твои́ми ст҃ы́ми мл҃твами бг҃оневѣ́сто, неѡсꙋжде́нна, да ꙗ҆́кѡ предста́тельницꙋ мою̀ ᲂу҆бл҃жа́ю тѧ̀, пречⷭ҇таѧ.

Оу҆жаса́юсѧ сꙋди́ща дв҃о, и҆ незабве́ннагѡ ѻ҆́ка твоегѡ̀ сн҃а, содѣ́ѧвъ мнѡ́гїѧ грѣхѝ на землѝ, и҆ сегѡ̀ ра́ди тебѣ̀ вопїю̀: всемлⷭ҇рдаѧ влⷣчце помози́ ми, и҆ тогда́шнїѧ бѣды̀ и҆зба́ви мѧ̀, и҆ сп҃сѝ, чⷭ҇таѧ.

Ко́ль стра́шенъ де́нь и҆спыта́нїѧ, ѻ҆трокови́це! ко́ль ᲂу҆жа́сенъ ѿвѣ́тъ! ко́ль горька̀ бѣда̀! кто̀ постои́тъ про́чее пречⷭ҇таѧ влⷣчце; поми́лꙋй стра́стнꙋю мою̀ дꙋ́шꙋ, и҆ пре́жде конца̀ да́ждь мѝ ѡ҆ставле́нїе, пречⷭ҇таѧ.

Ꙗ҆́же свѣ́тъ ро́ждшаѧ бж҃е́ственный, и҆з̾ ѻ҆ц҃а̀ возсїѧ́вшїй, ѡ҆мраче́ннꙋю мою̀ дꙋ́шꙋ лестьмѝ жите́йскими, и҆ бы́вшꙋю врагѡ́въ порꙋга́нїе всенепоро́чнаѧ ᲂу҆ще́дри, и҆ свѣ́тꙋ покаѧ́нїѧ сп҃си́тельнагѡ сподо́би, чⷭ҇таѧ.

Та́же: Досто́йно є҆́сть: И҆ покло́нъ до землѝ. Та́же, є҆ктенїа̀, и҆ свѣти́ленъ, и҆ ѱалмы̀ ѻ҆бы́чны.

На стїхо́внѣ стїхи̑ры крⷭ҇тны. Гла́съ а҃:

Тебѐ на дре́вѣ пригво́ждшагосѧ пло́тїю, и҆ живо́тъ на́мъ пода́вшаго, ꙗ҆́кѡ сп҃са и҆ влⷣкꙋ пои́мъ непреста́ннѡ.

Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ. во всѧ̑ дни̑ на́шѧ возвесели́хомсѧ: за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ, и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.

Твои́мъ крⷭ҇то́мъ хрⷭ҇тѐ, є҆ди́но ста́до бы́сть а҆́гг҃лѡвъ и҆ человѣ́кѡвъ, и҆ во є҆ди́номъ собо́рѣ нб҃о и҆ землѧ̀ весели́тсѧ: гдⷭ҇и сла́ва тебѣ̀.

Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.

Мч҃нченъ: Стрⷭ҇тоте́рпцы хрⷭ҇тѡ́вы прїиди́те лю́дїе всѝ почти́мъ пѣ́ньми и҆ пѣ́сньми дх҃о́вными, свѣти́льники мі́ра, и҆ проповѣ́дники вѣ́ры, и҆сто́чники приснотекꙋ́щыѧ, и҆з̾ ни́хже и҆стека́ютъ вѣ̑рнымъ и҆сцѣлє́нїѧ. тѣ́хъ моли́твами хрⷭ҇тѐ бж҃е на́шъ, ми́ръ да́рꙋй мі́рꙋ твоемꙋ̀, и҆ дꙋша́мъ на́шымъ ве́лїю млⷭ҇ть.

Сла́ва, и҆ ны́нѣ: крⷭ҇тобг҃оро́диченъ:

Подо́бенъ: Прехва́льнїи мч҃нцы:

А҆́гнца, а҆́гница и҆ всенепоро́чнаѧ влⷣчца, на крⷭ҇тѣ̀ ꙗ҆́кѡ ви́дѣвши зра́ка не и҆мꙋ́ща, ни добро́ты, ᲂу҆вы̀ мнѣ̀, пла́чꙋщи глаго́лаше: гдѣ̀ добро́та твоѧ̀ за́йде сладча́йшїй; гдѣ̀ бл҃голѣ́пїе; гдѣ̀ бл҃года́ть сїѧ́ющаѧ, ѡ҆́браза твоегѡ̀, сн҃е мо́й любе́знѣйшїй;

Въ пѧто́къ бл҃жє́нны, гла́съ а҃:

Снѣ́дїю и҆зведѐ и҆з̾ раѧ̀ вра́гъ а҆да́ма: крⷭ҇то́мъ же введѐ хрⷭ҇то́съ во́нь разбо́йника, помѧни́ мѧ, зовꙋ́ща, є҆гда̀ прїи́деши во црⷭ҇твїи твое́мъ.

Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.

Распе́нсѧ безгрѣ́шне, грѣхѝ всѣ́хъ взѧ́лъ є҆сѝ хрⷭ҇тѐ, и҆ прободе́нъ бы́лъ є҆сѝ въ ре́бра, сп҃се́нїѧ пото́ки и҆сточи́лъ є҆сѝ, воды́ же и҆ кро́ве, назида́ѧ сокрꙋшє́нныѧ тле́ю.

Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.

На дре́вѣ пригвожда́емь во́лею і҆и҃се бж҃е, всѐ ѿѧ́лъ є҆сѝ ще́дре а҆да́мово стра́стное разꙋмѣ́нїе: ꙗ҆́звами же честны́ми бѣсо́вское мно́жество ᲂу҆ѧзви́лъ є҆сѝ.

Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.

Мч҃нченъ: И҆̀же стрⷭ҇те́мъ ᲂу҆подо́бльшесѧ, во́лею пострада́вшемꙋ пло́тїю, мч҃нцы сла́внїи, при́снѡ стра̑сти и҆сцѣлѧ́ете неисцѣ́льныѧ, недꙋ́ги же ѿго́ните ѿ человѣ̑къ си́лою дх҃о́вною.

Сла́ва: Равноси́льнꙋю, є҆диноче́стнꙋю трⷪ҇цꙋ сла́вимъ тѧ̀, ѻ҆ц҃а̀ безнача́льнаго бг҃а, и҆ сн҃а, и҆ дх҃а ст҃а́го, є҆ди́но трїѷпоста́сное бг҃онача́лїе, вѣ́рою велича́емъ.

И҆ ны́нѣ: На крⷭ҇тѣ́ тѧ пригвожде́на, ꙗ҆́кѡ ᲂу҆зрѣ̀ хрⷭ҇тѐ бж҃е, ꙗ҆́же тебѐ ро́ждшаѧ пло́тїю, пла́чꙋщи вѣща́ше: что́ ти воздадѐ, ѽ сн҃е мо́й, є҆вре́йскїй собо́ръ законопрестꙋ́пный;