Подоба́етъ вѣ́дати, ѡ҆ є҆́же ка́кѡ быва́ти ѡ҆ ᲂу҆со́пшихъ послѣ́дованїю.

Въ пѧто́къ ве́чера: по ѿпꙋще́нїи вече́рни, ѡ҆бле́кшꙋсѧ сщ҃е́нникꙋ въ фело́нь, дїа́конꙋ же въ стїха́рь, и҆ прїе́мшꙋ кади́льницꙋ и҆ ѳѷмїа́мъ, и҆схо́дитъ въ притво́ръ, пред̾идꙋ́щꙋ є҆мꙋ̀ параекклисїа́рхꙋ со свѣ́щникомъ: послѣ́дꙋемъ же по ни́хъ и҆ мы̀. И҆ є҆гда̀ прїитѝ є҆мꙋ̀ въ притво́ръ, пред̾ꙋгото́ваннѣй же бы́вшей кꙋтїѝ, Сщ҃е́нникъ глаго́летъ: Бл҃гослове́нъ бг҃ъ на́шъ: кадѧ̀ над̾ кꙋтїе́ю крⷭ҇тоѡбра́знѡ. Мы́ же глаго́лемъ ѱало́мъ ч҃: Живы́й въ по́мощи: [Во и҆́но же вре́мѧ кромѣ̀ вече́рни, и҆лѝ ᲂу҆́трени быва́етъ нача́ло по ѻ҆бы́чаю: Глаго́лемъ Трист҃о́е. и҆ по Ѻ҆́ч҃е на́шъ, і҆ере́й возгла́съ: Ꙗ҆́кѡ твоѐ є҆́сть црⷭ҇тво: Та́же, Гдⷭ҇и поми́лꙋй, в҃і. Сла́ва и҆ ны́нѣ: Прїиди́те поклони́мсѧ, три́жды. и҆ ѱало́мъ ч҃.] И҆ по концѣ̀ є҆гѡ̀, Сла́ва, и҆ ны́нѣ: А҆ллилꙋ́їа, три́жды.

И҆ быва́етъ є҆ктенїа̀ поко́йна:

Ми́ромъ гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Ѡ҆ свы́шнѣмъ ми́рѣ, и҆ ѡ҆ сп҃се́нїи дꙋ́шъ на́шихъ: гдⷭ҇ꙋ помо́лимсѧ.

Ѡ҆ ѡ҆ставле́нїи согрѣше́нїй, во бл҃же́ннѣй па́мѧти преста́вльшихсѧ: гдⷭ҇ꙋ помо́лимсѧ.

Ѡ҆ приснопа́мѧтныхъ рабѣ́хъ бж҃їихъ, и҆́мⷬ҇къ, поко́ѧ, тишины̀, бл҃же́нныѧ па́мѧти и҆́хъ: гдⷭ҇ꙋ помо́лимсѧ.

Ѡ҆ прости́ти и҆̀мъ всѧ́кое прегрѣше́нїе во́льное и҆ нево́льное: гдⷭ҇ꙋ помо́лимсѧ.

Ѡ҆ неѡсꙋждє́ннымъ предста́ти ᲂу҆ стра́шнагѡ прⷭ҇то́ла гдⷭ҇а сла́вы: гдⷭ҇ꙋ помо́лимсѧ.

Ѡ҆ пла́чꙋщихъ и҆ болѣ́знꙋющихъ, ча́ющихъ хрⷭ҇то́ва ᲂу҆тѣше́нїѧ: гдⷭ҇ꙋ помо́лимсѧ.

Ѡ҆ ѿпꙋсти́тисѧ и҆̀мъ ѿ всѧ́кїѧ болѣ́зни, и҆ печа́ли, и҆ воздыха́нїѧ, и҆ всели́ти и҆̀хъ, и҆дѣ́же присѣща́етъ свѣ́тъ лица̀ бж҃їѧ: гдⷭ҇ꙋ помо́лимсѧ.

Ѡ҆ ꙗ҆́кѡ да гдⷭ҇ь бг҃ъ на́шъ ᲂу҆чини́тъ дꙋ́шы и҆́хъ въ мѣ́стѣ свѣ́тлѣ, въ мѣ́стѣ ѕла́чнѣ, въ мѣ́стѣ поко́йнѣ, и҆дѣ́же всѝ првⷣнїи пребыва́ютъ: гдⷭ҇ꙋ помо́лимсѧ.

Ѡ҆ причте́нїи и҆́хъ въ нѣ́дрѣхъ а҆враа́ма, и҆ і҆саа́ка, и҆ і҆а́кѡва: гдⷭ҇ꙋ помо́лимсѧ.

Ѡ҆ и҆зба́витисѧ на́мъ ѿ всѧ́кїѧ ско́рби, гнѣ́ва и҆ нꙋ́жды: гдⷭ҇ꙋ помо́лимсѧ.

Застꙋпѝ, сп҃сѝ, поми́лꙋй и҆ сохранѝ на́съ бж҃е твое́ю блгⷣтїю.

Млⷭ҇ти бж҃їѧ, црⷭ҇тва нбⷭ҇нагѡ, и҆ ѡ҆ставле́нїѧ грѣхѡ́въ и҆спроси́вше тѣ̑мъ, са́ми себѐ, и҆ дрꙋ́гъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.

Мы́ же рече́мъ: Тебѣ̀ гдⷭ҇и.

І҆ере́й возгла́съ: Ꙗ҆́кѡ ты̀ є҆сѝ воскрⷭ҇нїе, и҆ живо́тъ, и҆ поко́й ᲂу҆со́пшихъ ра̑бъ твои́хъ, приснопомина́емыхъ созда́телей, ѻ҆тє́цъ и҆ бра́тїй на́шихъ, здѣ̀ лежа́щихъ, и҆ повсю́дꙋ правосла́вныхъ хрⷭ҇тїа́нъ, хрⷭ҇тѐ бж҃е на́шъ: и҆ тебѣ̀ сла́вꙋ возсыла́емъ со безнача́льнымъ твои́мъ ѻ҆ц҃е́мъ, и҆ со прест҃ы́мъ и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Та́же, А҆ллилꙋ́їа, три́жды, на гла́съ и҃.

Сті́хъ а҃: Бл҃же́ни, ꙗ҆̀же и҆збра́лъ и҆ прїѧ́лъ є҆сѝ гдⷭ҇и.

Сті́хъ в҃: Па́мѧть и҆́хъ въ ро́дъ и҆ ро́дъ.

Сті́хъ г҃: Дꙋ́шы и҆́хъ во бл҃ги́хъ водворѧ́тсѧ.

Та́же тропа́рь, гла́съ и҃:

Глꙋбино́ю мꙋ́дрости человѣколю́бнѡ всѧ̑ стро́ѧй, и҆ поле́зное всѣ̑мъ подава́ѧй, є҆ди́не содѣ́телю, ᲂу҆поко́й гдⷭ҇и, дꙋ́ши ра̑бъ твои́хъ: на тѧ́ бо ᲂу҆пова́нїе возложи́ша, творца̀ и҆ зижди́телѧ и҆ бг҃а на́шего. [Два́жды.]

Сла́ва, и҆ ны́нѣ, бг҃оро́диченъ: Тебѐ и҆ стѣ́нꙋ и҆ приста́нище и҆́мамы, и҆ мл҃твенницꙋ бл҃гопрїѧ́тнꙋ къ бг҃ꙋ, є҆го́же родила̀ є҆сѝ бцⷣе безневѣ́стнаѧ, вѣ́рныхъ сп҃се́нїе.

Посе́мъ каѳі́сма: Бл҃же́ни непоро́чнїи: пое́мъ и҆̀хъ на гла́съ в҃-й. Припѣ́въ. Помѧнѝ гдⷭ҇и дꙋ́шы ра̑бъ твои́хъ: Дрꙋгі́й же ли́къ вторы́й сті́хъ, и҆ порѧ́дꙋ про́чыѧ стїхѝ ѻ҆́ба ли̑ка, раздѣлѧ́емъ же на двѣ̀ статїѝ: и҆ по пе́рвой статїѝ не глаго́лемъ Сла́ва, и҆ ны́нѣ: но а҆́бїе се́й сті́хъ:

Ꙗ҆́кѡ а҆́ще бы не зако́нъ тво́й поꙋче́нїе моѐ бы́лъ, тогда̀ ᲂу҆́бѡ поги́блъ бы́хъ во смире́нїи мое́мъ. во вѣ́къ не забꙋ́дꙋ ѡ҆правда́нїй твои́хъ, ꙗ҆́кѡ въ ни́хъ ѡ҆живи́лъ мѧ̀ є҆сѝ. [Три́жды.]

И҆ твори́тъ і҆ере́й є҆ктенїю̀ ѡ҆ преждеꙋсо́пшихъ:

Па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Є҆щѐ мо́лимсѧ ѡ҆ ᲂу҆покое́нїи дꙋ́шъ ᲂу҆со́пшихъ рабѡ́въ бж҃їихъ, и҆́мⷬ҇къ, и҆ ѡ҆ є҆́же прости́тисѧ и҆̀мъ всѧ́комꙋ прегрѣше́нїю, во́льномꙋ же и҆ нево́льномꙋ.

Ли́къ: Гдⷭ҇и поми́лꙋй.

Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шы и҆́хъ, и҆дѣ́же пра́веднїи ᲂу҆покоѧ́ютсѧ.

Ли́къ: Гдⷭ҇и поми́лꙋй.

Млⷭ҇ти бж҃їѧ, црⷭ҇тва нбⷭ҇нагѡ и҆ ѡ҆ставле́нїѧ грѣхѡ́въ и҆́хъ, ᲂу҆ хрⷭ҇та̀ безсме́ртнагѡ цр҃ѧ̀ и҆ бг҃а на́шегѡ про́симъ.

Ли́къ: Пода́й гдⷭ҇и.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй, м҃.

Сщ҃е́нникъ глаго́летъ мл҃твꙋ та́йнѡ:

Бж҃е дх҃ѡ́въ и҆ всѧ́кїѧ пло́ти, сме́рть попра́вый и҆ дїа́вола ᲂу҆праздни́вый, и҆ живо́тъ мі́рꙋ твоемꙋ̀ дарова́вый, са́мъ гдⷭ҇и ᲂу҆поко́й дꙋ́шы ᲂу҆со́пшихъ рабѡ́въ твои́хъ, и҆́мⷬ҇къ, въ мѣ́стѣ свѣ́тлѣ, въ мѣ́стѣ ѕла́чнѣ, въ мѣ́стѣ поко́йнѣ: ѿню́дꙋже ѿбѣжѐ болѣ́знь, печа́ль и҆ воздыха́нїе. всѧ́кое согрѣше́нїе, содѣ́ѧнное и҆́ми сло́вомъ, и҆лѝ дѣ́ломъ, и҆лѝ помышле́нїемъ, ꙗ҆́кѡ бл҃гі́й чл҃вѣколю́бецъ бг҃ъ простѝ, ꙗ҆́кѡ нѣ́сть человѣ́къ и҆́же жи́въ бꙋ́детъ, и҆ не согрѣши́тъ: ты́ бо є҆ди́нъ кромѣ̀ грѣха̀, пра́вда твоѧ̀ пра́вда во вѣ́ки, и҆ сло́во твоѐ и҆́стина.

Возгла́съ: Ꙗ҆́кѡ ты̀ є҆сѝ воскрⷭ҇нїе, и҆ живо́тъ, и҆ поко́й:

Припѣ́въ: Оу҆поко́й гдⷭ҇и, дꙋ́шы ра̑бъ твои́хъ.

И҆ порѧ́дꙋ ѻ҆́ба ли̑ка, и҆ про́чыѧ стїхѝ. На концѣ́ же пое́мъ сті́хъ: Жива̀ бꙋ́детъ дꙋша̀ моѧ̀: три́жды, до конца̀.

Та́же тропарѝ за ᲂу҆поко́й, пое́мъ на гла́съ є҃:

Припѣ́въ: Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ.

Ст҃ы́хъ ли́къ ѡ҆брѣ́те и҆сто́чникъ жи́зни, и҆ две́рь ра́йскꙋю, да ѡ҆брѧ́щꙋ и҆ а҆́зъ пꙋ́ть покаѧ́нїемъ: поги́бшее ѻ҆вча̀ а҆́зъ є҆́смь, воззови́ мѧ сп҃се, и҆ сп҃си́ мѧ.

Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ.

А҆́гнца бж҃їѧ проповѣ́давше, и҆ закла́ни бы́вше ꙗ҆́коже а҆́гнцы, и҆ къ жи́зни нестарѣ́емѣй ст҃і́и и҆ присносꙋ́щнѣй преста́вльшесѧ, того̀ прилѣ́жнѡ мч҃нцы моли́те, долгѡ́въ разрѣше́нїе на́мъ дарова́ти.

Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ.

Въ пꙋ́ть ᲂу҆́зкїй хо́ждшїи приско́рбный, всѝ въ житїѝ крⷭ҇тъ ꙗ҆́кѡ ꙗ҆ре́мъ взе́мшїи, и҆ мнѣ̀ послѣ́довавшїи вѣ́рою, прїиди́те наслади́тесѧ, и҆́хже ᲂу҆гото́вахъ ва́мъ по́честей, и҆ вѣнцє́въ нбⷭ҇ныхъ.

Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ.

Ѡ҆́бразъ є҆́смь неизрече́нныѧ твоеѧ̀ сла́вы, а҆́ще и҆ ꙗ҆́звы ношꙋ̀ прегрѣше́нїй: ᲂу҆ще́дри твоѐ созда́нїе влⷣко, и҆ ѡ҆чи́сти твои́мъ бл҃гоꙋтро́бїемъ, и҆ вожделѣ́нное ѻ҆те́чество пода́ждь мѝ, раѧ̀ па́ки жи́телѧ мѧ̀ сотворѧ́ѧ.

Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ.

Дре́вле ᲂу҆́бѡ ѿ не сꙋ́щихъ созда́вый мѧ̀, и҆ ѡ҆́бразомъ твои́мъ бж҃е́ственнымъ почты́й, престꙋпле́нїемъ же за́повѣди, па́ки мѧ̀ возврати́вый въ зе́млю, ѿ неѧ́же взѧ́тъ бы́хъ, на є҆́же по подо́бїю возведѝ, дре́внею доброто́ю воз̾ѡбрази́тисѧ.

Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ.

Оу҆поко́й бж҃е рабы̑ твоѧ̑, и҆ ᲂу҆чинѝ ѧ҆̀ въ раѝ, и҆дѣ́же ли́цы ст҃ы́хъ гдⷭ҇и, и҆ првⷣницы сїѧ́ютъ ꙗ҆́кѡ свѣти̑ла: ᲂу҆со́пшыѧ рабы̑ твоѧ̑ ᲂу҆поко́й, презира́ѧ и҆́хъ всѧ̑ согрѣшє́нїѧ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ:

Трⷪ҇ченъ: Трисїѧ́тельное є҆ди́нагѡ бж҃ества̀ бл҃гоче́стнѡ пое́мъ вопїю́ще: ст҃ъ є҆сѝ ѻ҆́ч҃е безнача́льный, собезнача́льный сн҃е, и҆ бж҃е́ственный дш҃е: просвѣтѝ на́съ вѣ́рою тебѣ̀ слꙋжа́щихъ, и҆ вѣ́чнагѡ ѻ҆гнѧ̀ и҆схитѝ.

И҆ ны́нѣ, и҆ при́снѡ, и҆ во вѣ́ки вѣкѡ́въ, а҆ми́нь.

Бг҃оро́диченъ: Ра́дꙋйсѧ чⷭ҇таѧ, бг҃а пло́тїю ро́ждшаѧ во сп҃се́нїе всѣ́хъ.є҆́юже ро́дъ человѣ́ческїй ѡ҆брѣ́те сп҃се́нїе. тобо́ю да ѡ҆брѧ́щемъ ра́й, бцⷣе чⷭ҇таѧ бл҃гослове́ннаѧ.

Посе́мъ: А҆ллилꙋ́їа, три́жды. Та́же, є҆ктенїа̀. И҆ помина́етъ і҆ере́й ᲂу҆со́пшихъ порѧ́дꙋ, ꙗ҆́коже пре́жде написа́сѧ посредѣ̀ непоро́чныхъ.

А҆́ще же не пое́мъ непоро́чныхъ, тогда̀ по А҆ллилꙋ́їа глаго́лемъ тропа́рь: Глꙋбино́ю мꙋ́дрости: и҆ бг҃оро́диченъ є҆гѡ̀. И҆ а҆́бїе: Бл҃гослове́нъ є҆сѝ гдⷭ҇и: посе́мъ тропарѝ: Ст҃ы́хъ ли́къ ѡ҆брѣ́те: прѡ́чаѧ. Та́же помина́етъ і҆ере́й ᲂу҆со́пшихъ, ꙗ҆́коже пре́жде ᲂу҆каза́сѧ.

И҆ глаго́лемъ сѣда́ленъ поко́инъ, гла́съ є҃:

Поко́й сп҃се на́шъ, съ првⷣными рабы̑ твоѧ̑, и҆ сїѧ̑ вселѝ во дворы̀ твоѧ̑, ꙗ҆́коже є҆́сть пи́сано, презира́ѧ ꙗ҆́кѡ бл҃гъ прегрѣшє́нїѧ и҆́хъ вѡ́льнаѧ и҆ невѡ́льнаѧ, и҆ всѧ̑ ꙗ҆̀же въ вѣ́дѣнїи, и҆ не въ вѣ́дѣнїи, чл҃вѣколю́бче.

Сла́ва, и҆ ны́нѣ: бг҃оро́диченъ: Ѿ дв҃ы возсїѧ́вый мі́рꙋ бж҃е хрⷭ҇тѐ, сы́ны свѣ́та то́ю показа́вый, поми́лꙋй на́съ.

Та́же, ѱало́мъ н҃: Поми́лꙋй мѧ̀ бж҃е:

Та́же канѡ́нъ во ѻ҆ктѡ́ихѣ ᲂу҆со́пшихъ по гла́сꙋ, на д҃. По г҃-й пѣ́сни, і҆рмо́съ и҆ є҆ктенїа̀. И҆ помина́етъ і҆ере́й преждеꙋсо́пшихъ порѧ́дꙋ, ꙗ҆́коже предрече́сѧ, посредѣ̀ непоро́чныхъ.

Возгла́съ: Ꙗ҆́кѡ ты̀ є҆сѝ воскрⷭ҇нїе и҆ живо́тъ:

Та́же сѣда́ленъ, гла́съ ѕ҃:

Вои́стиннꙋ сꙋета̀ всѧ́чєскаѧ: житїе́ же сѣ́нь и҆ со́нїе, и҆́бо всꙋ́е мѧте́тсѧ всѧ́къ земноро́дный, ꙗ҆́коже речѐ писа́нїе: є҆гда̀ мі́ръ прїѡбрѧ́щемъ, тогда̀ во гро́бъ всели́мсѧ, и҆дѣ́же вкꙋ́пѣ ца́рїе и҆ ни́щїи. тѣ́мже хрⷭ҇тѐ бж҃е, преста́вльшыѧсѧ ᲂу҆поко́й, ꙗ҆́кѡ чл҃вѣколю́бецъ.

Сла́ва, и҆ ны́нѣ, бг҃оро́диченъ: Всест҃а́ѧ бцⷣе, во вре́мѧ живота̀ моегѡ̀ не ѡ҆ста́ви менѐ, человѣ́ческомꙋ предста́тельствꙋ не ввѣ́ри мѧ̀, но сама̀ застꙋпѝ, и҆ поми́лꙋй мѧ̀.

По ѕ҃-й пѣ́сни і҆рмо́съ, и҆ є҆ктенїа̀. И҆ помина́етъ і҆ере́й преждеꙋсо́пшихъ, ꙗ҆́коже пре́жде ᲂу҆каза́хомъ. Возгла́съ: Ꙗ҆́кѡ ты̀ є҆сѝ воскрⷭ҇нїе и҆ живо́тъ:

Та́же конда́къ, гла́съ и҃:

Со ст҃ы́ми ᲂу҆поко́й хрⷭ҇тѐ, дꙋ́шы ра̑бъ твои́хъ, и҆дѣ́же нѣ́сть болѣ́знь, ни печа́ль, ни воздыха́нїе, но жи́знь безконе́чнаѧ.

І҆́косъ: Са́мъ є҆ди́нъ є҆сѝ безсме́ртный, сотвори́вый и҆ созда́вый человѣ́ка, земні́и ᲂу҆́бѡ ѿ землѝ созда́хомсѧ, и҆ въ зе́млю тꙋ́южде по́йдемъ, ꙗ҆́коже повелѣ́лъ є҆сѝ созда́вый мѧ̀ и҆ рекі́й мѝ: ꙗ҆́кѡ землѧ̀ є҆сѝ, и҆ въ зе́млю ѿи́деши, а҆́може всѝ человѣ́цы по́йдемъ, надгро́бное рыда́нїе творѧ́ще пѣ́снь, а҆ллилꙋ́їа. [Три́жды.]

По ѳ҃-й пѣ́сни глаго́летъ і҆ере́й: Бцⷣꙋ и҆ мт҃рь свѣ́та въ пѣ́снехъ возвели́чимъ: Ли́къ: Дꙋ́си и҆ дꙋ́шы првⷣныхъ восхва́лѧтъ тѧ̀ гдⷭ҇и. И҆ пое́мъ і҆рмо́съ ѳ҃-й пѣ́сни, Та́же, Трист҃о́е, и҆ по Ѻ҆́ч҃е на́шъ: глаго́лемъ тропарѝ сїѧ̑. Гла́съ д҃:

Со дꙋ́хи првⷣныхъ сконча́вшихсѧ дꙋ́шы ра̑бъ твои́хъ сп҃се ᲂу҆поко́й, сохранѧ́ѧ и҆́хъ во бл҃же́нной жи́зни, ꙗ҆́же ᲂу҆ тебѐ чл҃вѣколю́бче.

Тропа́рь, гла́съ то́йже:

Въ поко́ищи твое́мъ гдⷭ҇и, и҆дѣ́же всѝ ст҃і́и твоѝ ᲂу҆покоева́ютсѧ, ᲂу҆поко́й и҆ дꙋ́шы ра̑бъ твои́хъ, ꙗ҆́кѡ є҆ди́нъ є҆сѝ чл҃вѣколю́бецъ.

Сла́ва: Ты̀ є҆сѝ бг҃ъ соше́дый во а҆́дъ, и҆ ᲂу҆́зы ѡ҆кова́нныхъ разрѣши́вый, са́мъ и҆ дꙋ́шы ра̑бъ твои́хъ ᲂу҆поко́й.

И҆ ны́нѣ: бг҃оро́диченъ: Є҆ди́на чⷭ҇таѧ, и҆ непоро́чнаѧ дв҃о, бг҃а без̾ сѣ́мене ро́ждшаѧ, молѝ сп҃сти́сѧ дꙋша́мъ и҆́хъ.

Та́же і҆ере́й є҆ктенїю̀ глаго́летъ:

Поми́лꙋй на́съ бж҃е, по вели́цѣй млⷭ҇ти твое́й, мо́лимъ ти сѧ, ᲂу҆слы́ши и҆ поми́лꙋй.

Ли́къ: Гдⷭ҇и поми́лꙋй, три́жды.

Є҆щѐ мо́лимсѧ ѡ҆ ᲂу҆покое́нїи дꙋ́шъ ᲂу҆со́пшихъ рабѡ́въ бж҃їихъ, и҆́мⷬ҇къ, и҆ ѡ҆ є҆́же прости́тисѧ и҆̀мъ всѧ́комꙋ прегрѣше́нїю, во́льномꙋ же и҆ нево́льномꙋ.

Ли́къ: Гдⷭ҇и поми́лꙋй, три́жды.

Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шы и҆́хъ, и҆дѣ́же првⷣнїи ᲂу҆покоѧ́ютсѧ.

Ли́къ: Гдⷭ҇и поми́лꙋй, три́жды.

Млⷭ҇ти бж҃їѧ, црⷭ҇тва нбⷭ҇нагѡ и҆ ѡ҆ставле́нїѧ грѣхѡ́въ и҆́хъ ᲂу҆ хрⷭ҇та̀ безсме́ртнагѡ цр҃ѧ̀ и҆ бг҃а на́шегѡ про́симъ.

Ли́къ: Пода́й гдⷭ҇и.

Дїа́конъ: Гдⷭ҇ꙋ помо́лимсѧ.

Сщ҃е́нникъ: Бж҃е дх҃ѡ́въ:

И҆ помина́етъ ꙗ҆́же ѿ вѣ́ка ᲂу҆ме́ршыѧ ѻ҆тцы̀ и҆ бра́тїю на́шꙋ, здѣ̀ лежа́щыѧ, и҆ повсю́дꙋ правосла̑вныѧ хрⷭ҇тїа́ны.

Та́же возгла́съ: Ꙗ҆́кѡ ты̀ є҆сѝ воскрⷭ҇нїе и҆ живо́тъ:

Глаго́летъ і҆ере́й, и҆лѝ дїа́конъ: Премꙋ́дрость: Мы́ же: Чⷭ҇тнѣ́йшꙋю херꙋві̑мъ: І҆ере́й: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀. Мы́ же: Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.

І҆ере́й ѿпꙋ́стъ:

Воскр҃сы́й и҆з̾ ме́ртвыхъ хрⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре, ст҃ы́хъ сла́вныхъ и҆ всехва́льныхъ а҆пⷭ҇лъ, прпⷣбныхъ и҆ бг҃оно́сныхъ ѻ҆тє́цъ на́шихъ, и҆ всѣ́хъ ст҃ы́хъ, дꙋ́шы ѡ҆ на́съ преста́вльшихсѧ ра̑бъ свои́хъ въ селе́нїихъ првⷣныхъ ᲂу҆чини́тъ, въ нѣ́дрѣхъ а҆враа́ма ᲂу҆поко́итъ, и҆ съ првⷣными причте́тъ, и҆ на́съ поми́лꙋетъ, ꙗ҆́кѡ бл҃гъ и҆ чл҃вѣколю́бецъ.

И҆ по ѿпꙋ́стѣ глаша́етъ дїа́конъ си́це:

Во бл҃же́нномъ ᲂу҆спе́нїи вѣ́чный поко́й пода́ждь гдⷭ҇и ᲂу҆́спшымъ рабѡ́мъ твои̑мъ, и҆́мⷬ҇къ, и҆ сотворѝ и҆̀мъ вѣ́чнꙋю па́мѧть.

И҆ пѣвцы̀ пою́тъ: Вѣ́чнаѧ па́мѧть, три́жды. А҆ и҆дѣ́же нѣ́сть дїа́кона, пою́тъ пѣвцы̀: Рабѡ́мъ бж҃їимъ, и҆́мⷬ҇къ, ᲂу҆́спшымъ вѣ́чнаѧ па́мѧть.

Сі́й же чи́нъ и҆ ᲂу҆ста́въ подоба́етъ твори́ти во всѧ̑ пѧткѝ, ꙗ҆́вѣ, ꙗ҆́кѡ въ ни́хже твори́мъ па́мѧть над̾ ко́лѷвомъ ᲂу҆́спшымъ ѻ҆тцє́мъ и҆ бра́тїѧмъ на́шымъ.

Въ пѧто́къ ве́чера,

на Гдⷭ҇и воззва́хъ, стїхи̑ры ст҃ы̑мъ мч҃нкѡмъ, и҆ ст҃и́телємъ, и҆ прпⷣбнымъ. Гла́съ а҃.

Подо́бенъ: Прехва́льнїи мч҃нцы:

Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.

Мч҃нкѡвъ є҆ди́нственное торжество̀, стрꙋѧ́ми свои́хъ крове́й мно́жество бѣсѡ́въ ᲂу҆дави́ша, и҆ всѧ̑кїѧ ᲂу҆ста́виша стꙋ̑дныѧ жє́ртвы, і҆́дѡльскꙋю разрꙋши́ша пре́лесть, терпѣли́внѡ пострада́вше и҆ ны́нѣ мо́лѧтсѧ хрⷭ҇тꙋ̀ дарова́ти дꙋша́мъ на́шымъ ми́ръ, и҆ ве́лїю млⷭ҇ть.

Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.

Па́стырїе всесщ҃е́ннїи, мꙋ́дрыми словесы̀ и҆ ᲂу҆че́нїи всѣ́хъ наꙋчи́ша во є҆ди́нствѣ бж҃ество̀ трⷪ҇ческое сла́вити, ли́цъ слїѧ́нїѧ и҆ раздѣле́нїѧ, бжⷭ҇твеннѣ ᲂу҆бѣга́юще. и҆ ны́нѣ мо́лѧтсѧ, дарова́ти дꙋша́мъ на́шымъ ми́ръ, и҆ ве́лїю млⷭ҇ть.

Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.

Прпⷣбныхъ сосло́вїе, плотска̑ѧ хотѣ̑нїѧ ᲂу҆спи́ша, и҆ стремлє́нїѧ ѡ҆бꙋзда́ша, житїѐ равноа́гг҃льное показа́вше. тѣ́мже и҆ въ жили́щахъ нбⷭ҇ныхъ ны́нѣ ликовствꙋ́ютъ, хрⷭ҇тꙋ̀ молѧ́щесѧ, дарова́ти дꙋша́мъ на́шымъ ми́ръ, и҆ ве́лїю млⷭ҇ть.

И҆́ны стїхи̑ры мч҃нчны, гла́съ то́йже:

Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе: и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.

Мл҃твами гдⷭ҇и, всѣ́хъ ст҃ы́хъ и҆ бцⷣы, тво́й ми́ръ да́ждь на́мъ, и҆ поми́лꙋй на́съ, ꙗ҆́кѡ є҆ди́нъ ще́дръ.

Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.

Є҆́же на сꙋди́щи ва́ше и҆сповѣ́данїе ст҃і́и, де́мѡнѡвъ ѡ҆плева̀ си́лꙋ, и҆ ѿ пре́лести чл҃вѣ́ки свободѝ. тѣ́мже и҆ глава́мъ ᲂу҆сѣка́ємымъ, взыва́сте: да бꙋ́детъ гдⷭ҇и, же́ртва дꙋ́шъ на́шихъ бл҃гопрїѧ́тна пред̾ тобо́ю, ꙗ҆́кѡ тебѐ возлюби́вше, неради́хомъ ѡ҆ вре́меннѣй жи́зни, чл҃вѣколю́бче.

Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.

Ѽ до́брыѧ ва́шеѧ кꙋ́пли ст҃і́и! ꙗ҆́кѡ крѡ́ви да́сте, и҆ нб҃са̀ наслѣ́довасте: и҆ вре́меннѡ и҆скꙋси́вшесѧ, вѣ́чнѡ ра́дꙋетесѧ. вои́стиннꙋ добра̀ ва́шѧ кꙋ́плѧ: тлѣ̑ннаѧ бо ѡ҆ста́вльше, нетлѣ̑ннаѧ воспрїѧ́сте, и҆ со а҆́гг҃лы ликовствꙋ́юще, пое́те непреста́ннѡ трⷪ҇цꙋ є҆диносꙋ́щнꙋю.

Сла́ва, и҆ ны́нѣ, бг҃оро́диченъ: Всемі́рнꙋю сла́вꙋ, ѿ человѣ̑къ прозѧ́бшꙋю, и҆ влⷣкꙋ ро́ждшꙋю, нбⷭ҇нꙋю две́рь воспои́мъ мр҃і́ю дв҃ꙋ, безпло́тныхъ пѣ́снь, и҆ вѣ́рныхъ ᲂу҆добре́нїе. сїѧ́ бо ꙗ҆ви́сѧ нб҃о, и҆ хра́мъ бж҃ества̀: сїѧ̀ прегражде́нїе вражды̀ разрꙋши́вши, ми́ръ введѐ, и҆ ца́рствїе ѿве́рзе. сїю̀ ᲂу҆́бѡ и҆мꙋ́ще вѣ́ры ᲂу҆твержде́нїе, побо́рника и҆́мамы и҆з̾ неѧ̀ ро́ждшагосѧ гдⷭ҇а, дерза́йте ᲂу҆́бѡ, дерза́йте лю́дїе бж҃їи: и҆́бо то́й побѣди́тъ врагѝ, ꙗ҆́кѡ всеси́ленъ.

Та́же: Свѣ́те ти́хїй;

На стїхо́внѣ мч҃нченъ, гла́съ а҃:

Прехва́льнїи мч҃нцы, ва́съ ни землѧ̀ потаи́ла є҆́сть, но не́бо прїѧ́тъ вы̀, и҆ ѿверзо́шасѧ ва́мъ ра̑йскїѧ двє́ри, и҆ внꙋ́трь бы́вше дре́ва живо́тнагѡ наслажда́етесѧ: хрⷭ҇тꙋ̀ моли́тесѧ, дарова́ти дꙋша́мъ на́шымъ ми́ръ и҆ ве́лїю млⷭ҇ть.

Поко́инъ: Ка́ѧ жите́йскаѧ сла́дость пребыва́етъ печа́ли неприча́стна; ка́ѧ ли сла́ва стои́тъ на землѝ непрело́жна; всѧ̑ сѣ́ни немощнѣ́йша, и҆ всѧ̑ со́нїй преле́стнѣйша: во є҆ди́нъ ча́съ всѧ̑ сїѧ̑ сме́рть прїе́млетъ. но во свѣ́тѣ хрⷭ҇тѐ лица̀ твоегѡ̀, и҆ въ наслажде́нїи твоеѧ̀ красоты̀, ꙗ҆̀же и҆збра́лъ є҆сѝ, ᲂу҆поко́й ꙗ҆́кѡ чл҃вѣколю́бецъ.

Поко́инъ: Никто́же безгрѣ́шенъ, никто́же ѿ человѣ̑къ бы́въ, то́кмѡ ты̀ є҆ди́не безсме́ртне: тѣ́мже рабы̑ твоѧ̑ ꙗ҆́кѡ бг҃ъ ще́дрый, во свѣ́тѣ со а҆́гг҃льскими ликостоѧ́нїи твои́ми ᲂу҆чинѝ, бл҃гоꙋтро́бїемъ твои́мъ, презира́ѧ беззакѡ́нїѧ, и҆ подаѧ̀ и҆̀мъ проще́нїе.

Сла́ва, и҆ ны́нѣ, бг҃оро́диченъ: Вои́стиннꙋ па́че ᲂу҆ма̀ чꙋ̑днаѧ твоѧ̑ вели̑чїѧ, ржⷭ҇тва̀ твоегѡ̀ бг҃оневѣ́сто, ꙗ҆̀же проповѣ́даша прⷪ҇ро́цы всѝ всѧ̑ пресла̑внаѧ: зача́тїе и҆ ржⷭ҇тво̀ всепѣ́таѧ недомы́сленно и҆ несказа́нно, и҆́мже мі́ръ сп҃слъ є҆́сть, ꙗ҆́кѡ млⷭ҇рдъ.

Та́же, Ны́нѣ ѿпꙋща́еши: Трист҃о́е, и҆ по Ѻ҆́ч҃е на́шъ: Тропа́рь, и҆ ѿпꙋ́стъ.

Въ пѧто́къ на повече́рїи,

канѡ́нъ прест҃ѣ́й бцⷣѣ. Гла́съ а҃.

Пѣ́снь а҃

І҆рмо́съ: Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ сп҃сшемꙋ і҆и҃лѧ, ꙗ҆́кѡ просла́висѧ.

Сп҃си́тельное є҆сѝ приста́нище и҆ покро́въ, призыва́ющымъ тѧ̀ бцⷣе пречⷭ҇таѧ. тѣ́мже и҆ а҆́зъ ѿ дꙋшѝ призыва́ю тѧ̀ те́плѣ: влⷣчце сп҃си́ мѧ.

Мр҃і́е пречⷭ҇таѧ, зижди́телѧ мт҃и, и҆стлѣ́вшꙋю страстьмѝ и҆ прегрѣше́ньми смире́ннꙋю мою̀ дꙋ́шꙋ и҆сцѣлѝ, ꙗ҆́кѡ бл҃га́ѧ и҆ бл҃гопремѣ́ннаѧ.

Сла́ва, Безневѣ́стнаѧ влⷣчце, не ѿстꙋпа́й молѧ́щи всегда̀ творца̀ моего̀ и҆ бг҃а, ѡ҆ притека́ющемъ при́снѡ къ покро́вꙋ твоемꙋ̀, ᲂу҆лꙋчи́ти млⷭ҇ть.

И҆ ны́нѣ: Пала́то ѡ҆дꙋшевле́ннаѧ цр҃е́ва, и҆ престо́ле ѻ҆гнеѡбра́зный, со ст҃ы́ми мч҃нки и҆ а҆пⷭ҇лы, хрⷭ҇та̀ при́снѡ молѝ, ѿ напа́стей на́съ и҆зба́вити.

Пѣ́снь г҃

І҆рмо́съ: Ка́мень, є҆гѡ́же небрего́ша зи́ждꙋщїи, се́й бы́сть во главꙋ̀ ᲂу҆́гла: то́й є҆́сть ка́мень, на не́мже ᲂу҆твердѝ цр҃ковь хрⷭ҇то́съ, ю҆́же ѿ ꙗ҆зы̑къ и҆скꙋпѝ.

Тьма̀ прегрѣше́нїй ѡ҆бдержи́тъ моѐ се́рдце влⷣчце, и҆ не смѣ́ю воззрѣ́ти на нб҃о ѻ҆чи́ма, тѣ́мже зовꙋ̀: просвѣтѝ велѣ́ньми хрⷭ҇то́выми ᲂу҆́мъ и҆ дꙋ́шꙋ, и҆ се́рдце моѐ.

Взира́ю на бж҃е́ственный тво́й ѡ҆́бразъ, и҆ печа́ть тѧ̀ влⷣчню, и҆ пречⷭ҇тꙋю мт҃рь, ꙗ҆́кѡ первоѡбра́знꙋ чтꙋ̀: и҆ сїю̀ лобыза́ю, и҆ покланѧ́юсѧ, и҆ хвалю̀, є҆ди́нꙋ вѣ́дый твою̀, и҆ тогѡ̀ че́сть.

Сла́ва: Оу҆ста́ви лю̑таѧ стремлє́нїѧ тѣлє́снаѧ, ᲂу҆гасѝ и҆ пла́мень страсте́й дв҃о: и҆́миже согрѣше́нїй плѣни́цꙋ многоплете́ннꙋю мѝ соплета́етъ ѕмі́й лю́тый, хотѧ̀ восхи́тити къ поги́бели.

И҆ ны́нѣ: Ве́сь во а҆да́ма ѡ҆блече́сѧ и҆з̾ тебѐ бцⷣе, всетѣлоно́снѡ проше́дъ сло́во. того̀ ᲂу҆́бѡ молѝ, страсте́й на́съ и҆зба́вити, и҆ напа́стей разли́чныхъ, и҆ ѻ҆гнѧ̀ вѣ́чнꙋющагѡ.

Пѣ́снь д҃

І҆рмо́съ: Дх҃омъ прови́дѧ прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ. сла́ва си́лѣ твое́й гдⷭ҇и.

Ро́ждши зижди́телѧ, и҆ всѣ́хъ творца̀, си́лꙋ неизрече́ннꙋ, и҆ непобѣди́мꙋ крѣ́пость и҆́маши дв҃о, и҆ сп҃са́еши вѣ́рою къ тебѣ̀ приходѧ́щыѧ. сегѡ̀ ра́ди зовꙋ́ ти: влⷣчце мі́ра, помози́ ми.

Бра̑ни неви́димыхъ вра̑гъ мы́сленныхъ низложѝ влⷣчце, всꙋ́е на моѐ напа́дающихъ ѻ҆каѧ́нное се́рдце, тишинꙋ̀ бж҃е́ственнꙋю, и҆ ми́ръ да́рꙋющи: ꙗ҆́кѡ да ве́селѡ воспѣва́ю тѧ̀.

Сла́ва: Наде́жде ненаде́жныхъ, помо́щнице ни́щихъ, пла́чꙋщихъ ᲂу҆тѣ́ха, согрѣша́ющихъ ѡ҆чище́нїе, рꙋководи́тельница заблꙋ́ждшихъ, болѧ́щихъ цѣле́бница, и҆ и҆справле́нїе па́дающихъ.

И҆ ны́нѣ: Чⷭ҇таѧ и҆ бл҃гослове́ннаѧ, ꙗ҆́же є҆ди́на клѧ́твы всѣ́хъ и҆змѣни́вшаѧ, дв҃о мр҃і́е, со а҆пⷭ҇лы, и҆ мч҃нки, и҆ прⷪ҇ро́ки молѝ, и҆з̾ чре́ва твоегѡ̀ проше́дшаго, сп҃стѝ дꙋ́шы пою́щихъ тѧ̀.

Пѣ́снь є҃

І҆рмо́съ: Тво́й ми́ръ да́ждь на́мъ сн҃е бж҃їй, и҆но́гѡ бо ра́звѣ тебѐ бг҃а не зна́емъ, и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ.

Сп҃си́ мѧ влⷣчце, и҆з̾ глꙋбины̀ напа́стей, и҆ скорбе́й, и҆ печа́лей, и҆ страсте́й тѣле́сныхъ: и҆ въ тишинѣ̀ бж҃е́ственнѣй сохранѝ дꙋ́шꙋ мою̀.

Ты̀ мѝ є҆сѝ те́плое хране́нїе и҆ тве́рдое во все́й жи́зни, пренепоро́чнаѧ. тѣ́мже молю́ тѧ, и҆ по сме́рти твоѐ мнѣ̀ млⷭ҇рдїе прострѝ бога́тое.

Сла́ва: Ꙗ҆́же зижди́телѧ ро́ждшаѧ, и҆ и҆зба́вителѧ всѣ́хъ, и҆зба́ви мѧ̀ страсте́й тѣле́сныхъ ѡ҆палѧ́ющихъ се́рдце моѐ, и҆ привлача́ющихъ къ дѣлѡ́мъ неподѡ́бнымъ.

И҆ ны́нѣ: Ꙗ҆́кѡ мѣ́сто свѧще́нїѧ ꙗ҆́вльшисѧ мы́сленнагѡ, всего́ мѧ ѡ҆свѧтѝ влⷣчце, и҆ со ст҃ы́ми моли́сѧ и҆ мꙋ́дрыми а҆пⷭ҇толы, сп҃сти́ мѧ дв҃о.

Пѣ́снь ѕ҃

І҆рмо́съ: Прⷪ҇ро́ка і҆ѡ́нꙋ подража́ѧ, вопїю̀: живо́тъ мо́й бл҃же свободѝ и҆з̾ тлѝ, и҆ сп҃си́ мѧ сп҃се мі́ра, зовꙋ́ща: сла́ва тебѣ̀.

Ты̀ жи́ва мѧ̀ соблюда́еши и҆збавлѧ́ющи напа́стей: ты̀ и҆ ѿ землѝ ѿходѧ́ща къ вѣ́чнѣй жи́зни преста́ви дв҃о мт҃и, млⷭ҇рдїемъ твои́мъ.

Ты̀ є҆сѝ стѣна̀ нерꙋши́ма, ты̀ є҆сѝ покро́въ тве́рдъ, бцⷣе бл҃га́ѧ, ты̀ предста́тельница крѣпка̀ рабꙋ̀ твоемꙋ̀: и҆ сегѡ̀ ра́ди тѧ̀ призыва́ю при́снѡ.

Сла́ва: Ты̀ мл҃твꙋ си́льнꙋ стѧжа́вши къ бг҃ꙋ, бцⷣе бл҃га́ѧ, не пре́зри менѐ те́плѣ къ покро́вꙋ твоемꙋ̀ притека́ющагѡ, и҆ вопїю́щагѡ: поми́лꙋй мѧ̀, мт҃и всѣ́хъ бг҃а.

И҆ ны́нѣ: Не ѿри́ни менѐ хрⷭ҇тѐ, не гнꙋша́йсѧ менѐ сп҃се, мо́литъ тѧ̀ а҆́гница ро́ждшаѧ тѧ̀ пло́тїю, со а҆пⷭ҇лы, и҆ со прⷪ҇ро́ки, и҆ со стрⷭ҇тоте́рпцы твои́ми.

Та́же, Гдⷭ҇и поми́лꙋй, три́жды. Сла́ва, и҆ ны́нѣ:

Сѣда́ленъ, гла́съ а҃: Ѻ҆́блакъ тѧ̀ свѣ́та бж҃їѧ присносꙋ́щнагѡ, дв҃о, и҆ ковче́гъ, и҆ свѣ́щникъ, и҆ ста́мнꙋ, и҆ го́рꙋ несѣко́мꙋю, прⷪ҇ро́цы прорица́хꙋ ѻ҆трокови́це пречⷭ҇таѧ: и҆з̾ тебе́ бо про́йде без̾ сѣ́мене, въ послѣ̑днѧѧ хрⷭ҇то́съ бг҃ъ на́шъ, ꙗ҆́коже ѻ҆ц҃ъ бл҃гоизво́ли.

Пѣ́снь з҃

І҆рмо́съ: Сꙋ́щымъ въ пещѝ ѻ҆трокѡ́мъ твои̑мъ сп҃се, не прикоснꙋ́сѧ, нижѐ стꙋжѝ ѻ҆́гнь. тогда̀ трїѐ, ꙗ҆́кѡ є҆ди́нѣми ᲂу҆сты̀ поѧ́хꙋ, и҆ бл҃гословлѧ́хꙋ, глаго́люще: бл҃гослове́нъ бг҃ъ ѻ҆тє́цъ на́шихъ.

Ѿча́ѧнна сꙋ́ща мѧ̀ чⷭ҇таѧ, прегрѣше́нїи и҆ сластьмѝ плотски́ми, и҆ ко глꙋбинѣ̀ порѣва́ема поги́бели, приспѣ́вши и҆зба́ви мѧ̀ пречⷭ҇таѧ влⷣчце, млⷭ҇рдїемъ твои́мъ.

Прибѣ́жище и҆ покро́въ держа́венъ, и҆ и҆збавле́нїе бцⷣе всѣ̑мъ вѣ̑рнымъ: ты́ ми бꙋ́ди рꙋководи́тельница ко творцꙋ̀, прегрѣше́нїй и҆збавле́нїе подаю́щи мѝ, бл҃гоꙋтро́бїемъ твои́мъ.

Сла́ва: Ты̀ клѧ́твꙋ потреби́ла є҆сѝ чⷭ҇таѧ, ра́дость ро́ждшаѧ хрⷭ҇та̀: ты̀ и҆ клѧ́твꙋ, ѿ грѣха̀ прибы́вшꙋю мѝ, разрѣшѝ си́лою твое́ю пренепоро́чнаѧ, и҆ да́рꙋй мѝ ра́дость.

И҆ ны́нѣ: Тѧ̀, прест҃а́ѧ чⷭ҇таѧ, рабѝ твоѝ мо́лимъ всегда̀ де́нь и҆ но́щь, молѧ́щесѧ сокрꙋше́нною мы́слїю, и҆збавле́нїе согрѣше́нїй на́шихъ да́рꙋй твои́ми мл҃твами.

Пѣ́снь и҃

І҆рмо́съ: Є҆гѡ́же ᲂу҆жаса́ютсѧ а҆́гг҃ли, и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте сщ҃е́нницы, просла́вите ѻ҆́троцы, бл҃гослови́те лю́дїе, и҆ превозноси́те во всѧ̑ вѣ́ки.

Воста́ни, предварѝ, ра́тꙋй врагѝ, и҆̀же всꙋ́е смꙋща́ющыѧ и҆ ѡ҆скорблѧ́ющыѧ на́съ, твою̀ си́лꙋ ꙗ҆влѧ́ющи ст҃а́ѧ дв҃о, помо́щнице мі́ра.

Мі́ръ спасла̀ є҆сѝ ѿ сме́рти и҆ тлѝ бжⷭ҇твеннымъ ржⷭ҇тво́мъ твои́мъ, дв҃о бл҃га́ѧ: и҆ ны́нѣ же мл҃твами твои́ми и҆ на́съ восхвалѧ́ющихъ тѧ̀, ѿ страсте́й и҆схитѝ, и҆ сп҃сѝ.

Сла́ва: Мно́гаѧ твоѧ̀ и҆ неизрече́ннаѧ дв҃о крѣ́пость, мнѡ́ги и҆ непобѣди́мы бжⷭ҇твенныѧ щедрѡ́ты, и҆ бл҃гоꙋтро́бїе. тѣ́мже сп҃са́й на́съ, вои́стиннꙋ тѧ̀ призыва́ющихъ.

И҆ ны́нѣ: Ꙗ҆́кѡ ѡ҆дꙋшевле́нъ вїногра́дъ дв҃о, прорасти́ла є҆сѝ на́мъ гро́здъ зрѣ́лый, и҆сточи́вшїй вїно̀ ѡ҆ставле́нїѧ, и҆ грѣхо́вное и҆зсꙋши́вшїй пїѧ́нство.

Пѣ́снь ѳ҃

І҆рмо́съ: Свѣтоно́сный ѻ҆́блакъ, во́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де, и҆ воплоти́сѧ на́съ ра́ди, бы́въ человѣ́къ, безнача́льный, велича́емъ всѝ ꙗ҆́кѡ мт҃рь бг҃а на́шегѡ чⷭ҇тꙋю.

Въ мо́ри житїѧ̀ ѡ҆бꙋрева́емь ѕѣлѡ̀ сластьмѝ плотски́ми, тебѣ̀ припа́даю и҆ вопїю̀: поми́лꙋй мѧ̀ къ тебѣ̀ притека́ющаго влⷣчце, и҆ рꙋ́кꙋ мѝ сп҃се́нїѧ пода́ждь, и҆збавлѧ́ющи поги́бельныѧ глꙋбины̀.

Тебѣ̀ моѧ̑ грѣхѝ и҆сповѣ́даю дв҃о, твоемꙋ̀ лицꙋ̀ мо́й представлѧ́ю стꙋ́дъ, и҆ вопїю̀ ѿ дꙋшѝ: поми́лꙋй и҆ ᲂу҆ще́дри, пречⷭ҇таѧ, ꙗ҆́кѡ на тѧ̀ ᲂу҆пова́нїе съ бг҃омъ возложи́хъ тве́рдое.

Сла́ва: Тѧ̀ без̾ сѣ́мене ро́ждшꙋю творца̀ и҆ влⷣкꙋ, призыва́ю ѿ дꙋшѝ, и҆ зовꙋ̀ прилѣ́жнѡ: ты́ мѧ сп҃сѝ ѿ тлѝ мно́гихъ прегрѣше́нїй, и҆ и҆зба́ви ѻ҆гнѧ̀ негаси́магѡ, прест҃а́ѧ бцⷣе бл҃га́ѧ.

И҆ ны́нѣ: Непроходи́маѧ две́ре, ра̑йскаѧ врата̀, спаса́ємымъ пꙋ́ть, сп҃се́нїѧ стезѧ̀, съ мч҃нки и҆ прⷪ҇ро́ки, съ првⷣными же и҆ прпⷣбными, и҆ съ бж҃е́ственными а҆пⷭ҇лы, моли́сѧ чⷭ҇таѧ, сп҃сти́сѧ дꙋша́мъ на́шымъ.

Та́же, Досто́йно є҆́сть: И҆ про́чее ѻ҆бы́чно, и҆ ѿпꙋ́стъ.

Въ сꙋббѡ́тꙋ на ᲂу҆́трени,

по а҃-мъ стїхосло́вїи сѣда́льны мч҃нчны. Гла́съ а҃:

Страда́нїѧ похвало́ю, и҆ вѣне́чною по́честїю, сла́внїи стрⷭ҇тоте́рпцы ѡ҆дѣ́ѧвшесѧ тобо́ю гдⷭ҇и, терпѣ́нїемъ ᲂу҆́бѡ ра́нъ беззако́нныхъ побѣди́ша, и҆ си́лою бж҃е́ственною ѿ нб҃съ побѣ́дꙋ прїѧ́ша: тѣ́хъ мл҃твами и҆ на́съ свободѝ ѿ неви́димагѡ врага̀ сп҃се, и҆ сп҃сѝ на́съ.

Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.

Ꙗ҆́кѡ до́брїи во́ини є҆диномꙋ́дреннѡ вѣ́ровавше, преще́нїѧ мꙋчи́телей не ᲂу҆боѧ́стесѧ ст҃і́и, прїидо́сте ᲂу҆се́рднѡ ко хрⷭ҇тꙋ̀ взе́мше честны́й крⷭ҇тъ: и҆ сконча́вше тече́нїе, съ нб҃сѐ побѣ́дꙋ прїѧ́сте. сла́ва ᲂу҆крѣ́пльшемꙋ вы̀: сла́ва вѣнча́вшемꙋ вы̀: сла́ва дѣ́йствꙋющемꙋ ва́ми всѣ̑мъ и҆сцѣлє́нїѧ.

Подо́бенъ: Гро́бъ тво́й сп҃се:

Сті́хъ: Дꙋ́шы и҆́хъ во бл҃ги́хъ водворѧ́тсѧ.

Въ мѣ́стѣ свѣ́тлѣ, въ ли́цѣ пра́ведныхъ ᲂу҆поко́й сп҃се, къ тебѣ̀ преста́вльшихсѧ: на тѧ́ бо ᲂу҆пова́нїе чл҃вѣколю́бче возложи́ша: прїимѝ моле́нїе ѡ҆ ѻ҆тцѣ́хъ и҆ ча́дѣхъ, и҆̀мже соверша́емъ па́мѧть: и҆ ѡ҆правдѝ тѣ́хъ, ꙗ҆́кѡ многомлⷭ҇тивъ.

Сла́ва, и҆ ны́нѣ, бг҃оро́диченъ: Гаврїи́лꙋ вѣща́вшꙋ тебѣ̀ дв҃о, ра́дꙋйсѧ: со гла́сомъ воплоща́шесѧ всѣ́хъ влⷣка, въ тебѣ̀ ст҃ѣ́мъ кївѡ́тѣ, ꙗ҆́коже речѐ пра́ведный дв҃дъ, ꙗ҆ви́ласѧ є҆сѝ ши́ршаѧ нб҃съ, поноси́вши зижди́телѧ твоего̀: сла́ва все́льшемꙋсѧ въ тѧ̀: сла́ва проше́дшемꙋ и҆з̾ тебѐ: сла́ва свободи́вшемꙋ на́съ ржⷭ҇тво́мъ твои́мъ.

По в҃-мъ стїхосло́вїи сѣда́льны. Гла́съ а҃:

Ра́нами ст҃ы́хъ, и҆̀же по тебѣ̀ пострада́ша, ᲂу҆моле́нъ бꙋ́ди гдⷭ҇и: и҆ всѧ̑ на́шѧ болѣ̑зни и҆ стра̑сти и҆сцѣлѝ чл҃вѣколю́бче, мо́лимсѧ.

Сті́хъ: Мнѡ́ги скѡ́рби пра́вєднымъ, и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь.

Мч҃нки хрⷭ҇тѡ́вы мо́лимъ всѝ, и҆ любо́вїю прїи́демъ къ ни̑мъ съ вѣ́рою: сі́и бо ѡ҆ на́шемъ сп҃се́нїи про́сѧтъ, и҆ сі́и всѝ и҆сточа́ютъ и҆сцѣле́нїй бл҃года́ть, сі́и полкѝ ѿгонѧ́ютъ бѣсѡ́вскїѧ, ꙗ҆́кѡ сохра́нницы вѣ́ры.

Сті́хъ: Бл҃же́ни, ꙗ҆̀же и҆збра́лъ и҆ прїѧ́лъ є҆сѝ гдⷭ҇и.

Сме́ртнꙋю держа́вꙋ хрⷭ҇тѐ ᲂу҆праздни́въ, и҆ нетлѣ́нїе земны̑мъ и҆сточи́лъ є҆сѝ: и҆ и҆̀же въ тѧ̀ вѣ́рꙋющїи не ᲂу҆мира́ютъ, но живꙋ́тъ вы́нꙋ ѡ҆ тебѣ̀. тѣ́мже ᲂу҆поко́й гдⷭ҇и, дꙋ́шы ра̑бъ твои́хъ, и҆ ᲂу҆чинѝ и҆̀хъ со ст҃ы́ми твои́ми: мл҃твами бцⷣы, да́рꙋѧ тѣ̑мъ проще́нїе и҆ воскрⷭ҇нїе.

Сла́ва, и҆ ны́нѣ, бг҃оро́диченъ: Є҆ди́на крѣ́пкаѧ и҆ те́плаѧ предста́тельнице ро́да чл҃вѣ́ческагѡ, бцⷣе дв҃о, непреста́ннѡ молѝ со прⷪ҇ро́ки и҆ мч҃нки, со ст҃и́тели же и҆ по́стники и҆ прпⷣбными, є҆го́же родила̀ є҆сѝ па́че є҆стества̀ бг҃а сло́ва, сп҃стѝ всѧ́чєскаѧ.

Канѡ́нъ ст҃ы̑мъ мч҃нкѡмъ, и҆ ст҃и́телємъ, и҆ прпⷣбнымъ и҆ ᲂу҆со́пшымъ, [є҆гѡ́же краегране́сїе: Бг҃а возлю́бльшымъ бж҃е́ственнꙋю воспѣва́ю пѣ́снь.] Творе́нїе кѵ́ръ і҆ѡ́сифа. Гла́съ а҃.

Пѣ́снь а҃

І҆рмо́съ: Столпо́мъ ѻ҆́гненнымъ и҆ ѻ҆́блачнымъ і҆и҃лѧ наставле́й, ꙗ҆́кѡ бг҃ъ, мо́ре разве́рже, колесни̑цы же фараѡ́новы глꙋбино́ю покры̀. пои́мъ пѣ́снь побѣ́днꙋю, ꙗ҆́кѡ є҆ди́нъ просла́висѧ.

Мч҃нкѡмъ: Щито́мъ бл҃гоче́стїѧ ѡ҆гра́ждшесѧ бж҃е́ственнїи страда́льцы, ᲂу҆стреми́шасѧ къ боре́нїю: погꙋби́ша же врага̀ всю̀ си́лꙋ, пою́ще пѣ́снь побѣ́днꙋю хрⷭ҇тꙋ̀ ᲂу҆крѣ́пльшемꙋ и҆̀хъ.

Ст҃и́телємъ: Оу҆пасо́сте бж҃е́ственнїи па́стырїе, ста́до бж҃їе на па́жити та́йнѣй, во́лки ѿгна́вше па́лицею слове́съ сщ҃е́нныхъ: и҆ всели́стесѧ ра́дꙋющесѧ во ѡ҆гра́дꙋ нбⷭ҇нꙋю, и҆дѣ́же є҆́сть вели́кїй па́стырь.

Прпⷣбнымъ: И҆́же стра̑сти поще́нїемъ и҆ болѣ́зньми ᲂу҆мертви́вше пло́ти, бж҃е́ственнымъ манове́нїемъ, живетѐ по сме́рти прпⷣбнїи: на́съ ра́ди ме́ртва бы́вшаго, хрⷭ҇та̀ всегда̀ моли́те ᲂу҆ще́дрити на́съ.

Сла́ва: Ме́ртвъ бы́въ, и҆ мє́ртвымъ дарова́лъ є҆сѝ бж҃е́ственный тво́й живо́тъ, и҆ безсме́ртнꙋю жи́знь. и҆̀же вѣ́рою преше́дшыѧ ѿ житїѧ̀ тлѣ́ннагѡ, црⷭ҇твїѧ твоегѡ̀ сотворѝ прича́стники, ꙗ҆́кѡ бл҃гоꙋтро́бенъ, и҆ є҆ди́нъ многомлⷭ҇тивъ.

Бг҃оро́диченъ: И҆́же любо́вїю хрⷭ҇то́вою ᲂу҆ѧзвлѧ́еми мч҃нцы, и҆ вѣнча́вшыѧсѧ ѿ бг҃а жєны̀, тебѐ всенепоро́чнꙋю и҆ до́брꙋю въ жена́хъ всѝ прпⷣбнїи почита́ютъ, ра́дꙋющесѧ вѣ́рнѡ, ꙗ҆́кѡ цр҃и́цꙋ всечестнꙋ́ю.

Дрꙋгі́й канѡ́нъ ᲂу҆со́пшымъ,

пое́мъ є҆го̀ на рѧдꙋ̀, и҆дѣ́же нѣ́сть мине́и, и҆лѝ при возслѣ́дованїи ᲂу҆со́пшымъ над̾ кꙋтїе́ю, [є҆гѡ́же краегране́сїе: Вѣ́рою ᲂу҆со́пшымъ пе́рвꙋю пѣ́снь приноша́ю.] Гла́съ а҃.

Пѣ́снь а҃

І҆рмо́съ: Твоѧ̀ побѣди́тельнаѧ десни́ца бг҃олѣ́пнѡ въ крѣ́пости просла́висѧ: та́ бо безсме́ртне, ꙗ҆́кѡ всемогꙋ́щаѧ проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ.

Припѣ́въ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.

Врата̀ сме́рти и҆ верєѝ, твое́ю сме́ртїю сокрꙋши́лъ є҆сѝ безсме́ртне, врата̀ ѿве́рзи влⷣко, па́че ᲂу҆ма̀ безсме́ртїѧ ᲂу҆́спшымъ, мл҃твами стрⷭ҇тоте́рпєцъ твои́хъ.

Припѣ́въ: Оу҆поко́й гдⷭ҇и дꙋ́шы ᲂу҆со́пшихъ ра̑бъ твои́хъ.

Да бж҃е́ственнагѡ живота̀ сподо́бимсѧ, соше́лъ є҆сѝ къ сме́рти, тоѧ́ же и҆спрове́ргъ сокрѡ́вища, на́съ ѿтꙋ́дꙋ и҆звле́клъ є҆сѝ: ны́нѣ же жизнода́вче, преста́влєнныѧ ᲂу҆поко́й.

Сла́ва: Ты̀ моѐ тлѣ́нное же и҆ ме́ртвенное воспрїи́мъ, въ нетлѣ́нїе ѡ҆бле́клъ є҆сѝ, и҆ къ безконе́чномꙋ житїю̀ и҆ бл҃же́нномꙋ возне́слъ є҆сѝ, и҆дѣ́же ꙗ҆́кѡ ще́дръ, и҆̀хже прїѧ́лъ є҆сѝ, ᲂу҆поко́й.

Бг҃оро́диченъ: Ро́ждшꙋю є҆́же ѿ бг҃а бж҃їе сло́во, вѣ́рнїи воспои́мъ: та́ бо всечⷭ҇таѧ пꙋ́ть жи́зни ᲂу҆ме́ршымъ бы́сть, ю҆́же ꙗ҆́кѡ бг҃опрїе́мницꙋ и҆ бцⷣꙋ просла́вимъ.

Пѣ́снь г҃

І҆рмо́съ: Да ᲂу҆тверди́тсѧ се́рдце моѐ въ во́ли твое́й хрⷭ҇тѐ бж҃е, и҆́же над̾ вода́ми нб҃о ᲂу҆твержде́й второ́е, и҆ ѡ҆снова́вый на вода́хъ зе́млю всеси́льне.

Мнѡ́гїѧ мꙋ́ки претерпѣ́вше, и҆ бл҃ги́хъ мно́гихъ сподо́бистесѧ, мно́жество мч҃нкъ сщ҃е́нное: тѣ́мже мл҃твами ва́шими ѕѡ́лъ мои́хъ безмѣ́рное мно́жество ѡ҆чи́стите.

Сщ҃е́ннїи ѡ҆дѣ́ѧвшесѧ пра́ведною бл҃года́тїю, и҆ весе́лїе кра́сное прпⷣбныхъ собо́ръ стѧжа́вше, невеще́ственнымъ слꙋжи́телємъ ᲂу҆подо́бишасѧ.

Хрⷭ҇тѡ́вы прⷪ҇ро́цы, бж҃е́ственнїи мч҃нцы, сщ҃е́нныхъ же́нъ сосло́вїе, и҆̀же пострада́вше мꙋ́жески, и҆ въ постѣ̀ просла́вистесѧ: и҆́хже мл҃твами млⷭ҇ти твоѧ̑ сп҃се всѣ̑мъ да́рꙋй.

Сла́ва: И҆́же ѿ землѝ хрⷭ҇тѐ, человѣ́ка рꙋко́ю твое́ю созда́въ во́лею, и҆ ꙗ҆̀же ѿ на́съ всѧ̑ вѣ́рою преста́вльшыѧсѧ рабы̑ твоѧ̑ нбⷭ҇ныхъ бл҃гъ сподо́би.

Бг҃оро́диченъ: Бг҃ороди́тельнице неискꙋсобра́чнаѧ, прошє́нїѧ всѣ́хъ принесѝ содѣ́телю на́шемꙋ бг҃ꙋ, ро́ждшемꙋсѧ ѿ ᲂу҆тро́бы твоеѧ̀: ꙗ҆́кѡ да ѡ҆брѧ́щемъ соверше́нное лю́тыхъ и҆збавле́нїе.

И҆́нъ

І҆рмо́съ: Є҆ди́не вѣ́дый человѣ́ческагѡ сꙋщества̀ не́мощь, и҆ ми́лостивнѡ въ нѐ воѡбра́жсѧ, препоѧ́ши мѧ̀ съ высоты̀ си́лою, є҆́же вопи́ти тебѣ̀ ст҃ы́й: ѡ҆дꙋшевле́нный хра́ме неизрече́нныѧ сла́вы твоеѧ̀ чл҃вѣколю́бче.

Ꙗ҆́кѡ є҆ди́нъ бл҃гъ сы́й, ꙗ҆́кѡ є҆ди́нъ многомлⷭ҇тивъ, ꙗ҆́же бл҃гоче́стнѡ къ тебѣ̀ ѿше́дшыѧ, въ нбⷭ҇ныхъ селе́нїихъ ᲂу҆поко́й, и҆дѣ́же неизрече́ннаѧ ра́дость и҆ наслажде́нїе, и҆ и҆дѣ́же собо́ръ мч҃нческїй весели́тсѧ.

Ты̀ є҆ди́нъ ꙗ҆ви́лсѧ є҆сѝ на землѝ, сп҃се мо́й безгрѣ́шенъ, и҆́же грѣхѝ мі́ра взе́млѧй ꙗ҆́кѡ млⷭ҇рдъ: ѿ мі́ра сегѡ̀ преста́вльшихсѧ вѣ́рою, дꙋ́шы ᲂу҆поко́й во дво́рѣхъ ст҃ы́хъ твои́хъ, въ сла́дости ра́йстѣй чл҃вѣколю́бче.

Сла́ва: Сме́рти держа́вꙋ низло́жъ, живо́тъ неконча́емый всѣ̑мъ вѣ̑рнымъ и҆сточи́лъ є҆сѝ влⷣко: въ то́мъ ᲂу҆́бѡ ᲂу҆чинѝ бл҃гоче́стнѡ ѿше́дшыѧ, презира́ѧ безмѣ̑рнаѧ прегрѣшє́нїѧ, и҆ проща́ѧ грѣхѝ и҆́хъ чл҃вѣколю́бче.

Бг҃оро́диченъ: Без̾ сѣ́мене зача́тъ чⷭ҇таѧ, сло́во присносꙋ́щное, пло́тски къ на́мъ прише́дшее, и҆ сме́рти крѣ́пость разори́вшее, и҆ мє́ртвымъ воскрⷭ҇нїе и҆ жи́знь вѣ́чнꙋю свои́мъ млⷭ҇рдїемъ да́рꙋющее.

Пѣ́снь д҃

І҆рмо́съ: Оу҆слы́шахъ гдⷭ҇и слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑, прⷪ҇ро́къ глаго́лаше, и҆ просла́вихъ си́лꙋ твою̀.

Претерпѣ́вше мч҃нцы всѧ̑кїѧ ра̑ны, нра́вомъ до́блественнымъ, ꙗ҆́коже ѻ҆вча́та непорѡ́чнаѧ хрⷭ҇тꙋ̀ приведо́стесѧ, за всѣ́хъ закла́вшемꙋсѧ животꙋ̀.

Оу҆ста̀ бж҃е́ственнаѧ бы́вше ст҃и́телїе бж҃їимъ сло́вомъ наꙋча́еми, дꙋ́шы и҆зба́виша ѿ ᲂу҆́стъ льсти́вагѡ: и҆̀хже благочестномꙋ́дреннѣ почита́емъ.

Крѣ́пцы бж҃е́ственнымъ дх҃омъ бы́вше ѻ҆тцы̀ бж҃е́ственнїи, крѣ́пкѡ побѣди́сте дꙋхѡ́въ лꙋка̑вствїѧ, прпⷣбнїи бл҃года́тїю.

Сла́ва: Оу҆мертви́всѧ животѐ на́шъ во́лею на дре́вѣ, и҆̀же вѣ́рою преше́дшыѧ живота̀ сподо́би вѣ́чнаго чл҃вѣколю́бче.

Бг҃оро́диченъ: Не ѿверго́шасѧ гдⷭ҇а же́нскїй ли́къ, стра́ждꙋще мꙋ́жески: и҆ не побѣди́шасѧ тѣле́сными сластьмѝ ст҃і́и, споспѣ́шницꙋ тѧ̀ и҆мꙋ́ще пречⷭ҇таѧ.

И҆́нъ

І҆рмо́съ: Го́рꙋ тѧ̀ бл҃года́тїю бж҃їею прїѡсѣне́ннꙋю, прозорли́выма а҆ввакꙋ́мъ ᲂу҆смотри́въ ѻ҆чи́ма, и҆з̾ тебѐ и҆зы́ти і҆и҃левꙋ провозглаша́ше ст҃о́мꙋ, во сп҃се́нїе на́ше и҆ ѡ҆бновле́нїе.

Оу҆мертви́въ а҆́дъ непобѣди́мою твое́ю си́лою, вмѣне́нъ бы́лъ є҆сѝ въ ме́ртвыхъ, є҆ди́нъ сы́й свобо́дь хрⷭ҇тѐ, дꙋ́шы свободѝ бл҃гочести́выхъ, и҆ є҆́же въ не́мъ ѡ҆сꙋжде́нїѧ, ст҃ы́хъ мч҃нкъ мольба́ми.

И҆́же всѣ́хъ сы́й ꙗ҆́кѡ влⷣка, противодосто́йнꙋю и҆̀же ѿ а҆да́ма твоегѡ̀ заколе́нїѧ, и҆зба́вꙋ да́лъ є҆сѝ и҆ цѣ́нꙋ: тѣ́мже мо́лимсѧ твои̑мъ щедро́тамъ, преста́вльшыѧсѧ ᲂу҆поко́й, согрѣше́нїй подаѧ̀ ѡ҆ставле́нїе.

Сла́ва: Прїѧ́лъ є҆сѝ сп҃се мо́й, є҆́же во гро́бѣ положе́нїе, и҆ ꙗ҆̀же во гробѣ́хъ жи́ти ѡ҆сꙋжде́нныѧ мертвецы̀, ꙗ҆́кѡ бг҃ъ воскр҃си́лъ є҆сѝ. ны́нѣ же жи́зни присносꙋ́щныѧ сподо́би преста́влєнныѧ, ꙗ҆́кѡ є҆ди́нъ чл҃вѣколю́бецъ.

Бг҃оро́диченъ: Сп҃се́сѧ ро́дъ чл҃вѣ́ческїй рождество́мъ твои́мъ: ты́ бо родила̀ є҆сѝ на́мъ ѵ҆поста́сный живо́тъ, сме́рти потребле́нїе, и҆ къ жи́зни содѣ́ловающїй восхо́дъ, бг҃ороди́тельнице пренепоро́чнаѧ влⷣчце.

Пѣ́снь є҃

І҆рмо́съ: Свѣ́тлый на́мъ возсїѧ́й свѣ́тъ присносꙋ́щный, ᲂу҆́тренюющымъ ѡ҆ сꙋдьба́хъ за́повѣдей твои́хъ, влⷣко чл҃вѣколю́бче хрⷭ҇тѐ бж҃е на́шъ.

Воѡрꙋжи́вшесѧ бл҃гоче́стїемъ, не ᲂу҆ѧ́звлени ꙗ҆ви́стесѧ мч҃нцы, борца̀ стрѣла́ми, и҆ побѣдоно́сцы бл҃года́тїю бы́вше, вѣнцы̀ полꙋчи́сте.

Пома́за ма́стїю бж҃е́ственною гдⷭ҇ь сщ҃е́нники своѧ̑, ᲂу҆па́сшыѧ въ преподо́бїи вѣ́рныхъ мно́жєства, и҆ наста́вльшыѧ ко ѻ҆гра́дѣ нбⷭ҇нѣй.

Сщ҃енномч҃нцы сщ҃е́ннѣйшїи, прпⷣбнїи всѝ, и҆̀же дх҃а ᲂу҆ста́вы соблю́дше, и҆ црⷭ҇твїю прича́стницы бы́вше, бж҃е́ственнѡ прославлѧ́етесѧ.

Сла́ва: И҆̀хже ны́нѣ преста́вилъ є҆сѝ повелѣ́нїемъ твои́мъ влⷣко гдⷭ҇и, сподо́би црⷭ҇твїѧ твоегѡ̀ со ст҃ы́ми, всѧ̑ презира́ѧ и҆̀мъ дрє́внѧѧ согрѣшє́нїѧ.

Бг҃оро́диченъ: И҆̀же посто́мъ и҆ страда́нїемъ сла́вꙋ ѡ҆брѣ́тше нбⷭ҇нꙋю жєны̀, пречⷭ҇таѧ, тебѐ предста́тельницꙋ и҆мꙋ́ще, ѕмі́евꙋ держа́вꙋ разрꙋши́ша.

И҆́нъ

І҆рмо́съ: Просвѣти́вый сїѧ́нїемъ прише́ствїѧ твоегѡ̀ хрⷭ҇тѐ, и҆ ѡ҆свѣти́вый крⷭ҇то́мъ твои́мъ мі́ра концы̀, сердца̀ просвѣтѝ свѣ́томъ твоегѡ̀ бг҃оразꙋ́мїѧ, правосла́внѡ пою́щихъ тѧ̀.

И҆сцѣлѧ́ѧй ѿ ꙗ҆́да сме́ртнагѡ, сме́рть прїѧ́тъ, и҆ сме́рти жа́ло притꙋпи́лъ є҆сѝ: но са́мъ ᲂу҆поко́й, и҆̀хже прїѧ́лъ є҆сѝ жизнода́вче, мч҃нкъ мольба́ми.

Оу҆мерщвле́нїѧ и҆ тлѣ́нїѧ человѣ́ки свободи́вый, дꙋ́шы вѣ́рнѡ преста́вленныхъ ᲂу҆чинѝ во дво́рѣхъ ст҃ы́хъ твои́хъ, ѿню́дꙋже ѿбѣжѐ всѧ́ка ско́рбь, и҆ весе́лїе водворѧ́етсѧ.

Сла́ва: Ра́й ᲂу҆́бѡ съ тобо́ю повѣ́шенномꙋ, ꙗ҆́кѡ ѿве́рзлъ є҆сѝ: ны́нѣ прїимѝ, дꙋ́шы влⷣко, къ тебѣ̀ вѣ́рою преста́вльшыѧсѧ, подаѧ̀ и҆̀мъ въ цр҃кви пе́рвенєцъ водвори́тисѧ.

Бг҃оро́диченъ: И҆збавлѧ́ющи на тѧ̀ наде́жды держа́вꙋ и҆мꙋ́щихъ, къ приста́нищꙋ бж҃е́ственныѧ во́ли ти́хѡ наста́ви, мт҃рнимъ твои́мъ дерзнове́нїемъ къ сн҃ꙋ твоемꙋ̀, бл҃гослове́ннаѧ всенепоро́чнаѧ.

Пѣ́снь ѕ҃

І҆рмо́съ: Прⷪ҇ро́ка і҆ѡ́нꙋ подража́ѧ вопїю̀: живо́тъ мо́й бл҃же, свободѝ и҆з̾ тлѝ, и҆ сп҃си́ мѧ, сп҃се мі́ра, зовꙋ́ща: сла́ва тебѣ̀.

Оу҆мерщвле́ни бы́вше ра́нъ мно́гихъ наведе́ньми, жи́знь и҆́стиннꙋю наслѣ́довасте вкꙋ́пѣ, молѧ́щесѧ сп҃сти́сѧ всѣ̑мъ на́мъ, ст҃і́и мч҃нцы.

Денни́цы свѣтоза̑рныѧ позна́ни бы́сте на землѝ, благоче́стїѧ свѣ́томъ ѡ҆зари́сте вѣ̑рныѧ, пресла́внїи хрⷭ҇тѡ́вы ѻ҆рꙋ́жницы, и҆ ст҃и́телїе премꙋ́дрїи.

Стра́нни ꙗ҆ви́стесѧ на землѝ, и҆ гра́ждане нбⷭ҇нїи, бг҃оно́снїи по́стницы, ᲂу҆мертви́вше пло́ти мꙋдрова̑нїѧ воздержа́нїемъ и҆ смире́нїемъ.

Сла́ва: Невече́рнемꙋ твоемꙋ̀ свѣ́тꙋ, и҆ сла́дости и҆́стиннѣй, ꙗ҆̀же преста́вилъ є҆сѝ вѣ̑рныѧ, покажѝ прича́стники чл҃вѣколю́бче, и҆ ст҃ы́хъ собо́рѡмъ си́хъ сопричтѝ.

Бг҃оро́диченъ: И҆́же пострада́вшыѧ крѣ́пкѡ, и҆ пости́вшыѧсѧ те́плѣ, тобо́ю ѱало́мски во слѣ́дъ приведо́шасѧ хрⷭ҇тꙋ̀, всепѣ́таѧ бг҃ороди́тельнице, всѧ́ческихъ цр҃ю̀.

И҆́нъ

І҆рмо́съ: Ѡ҆бы́де на́съ послѣ́днѧѧ бе́здна, нѣ́сть и҆збавлѧ́ѧй, вмѣни́хомсѧ ꙗ҆́кѡ ѻ҆́вцы заколе́нїѧ, сп҃сѝ лю́ди твоѧ̑ бж҃е на́шъ: ты́ бо крѣ́пость немощствꙋ́ющихъ и҆ и҆справле́нїе.

Ꙗ҆́кѡ млⷭ҇рдъ, преста́влєннымъ да́рꙋй прегрѣше́нїй проще́нїе, и҆ вѣ́чное наслажде́нїе подаѧ̀, и҆дѣ́же сїѧ́етъ лица̀ твоегѡ̀ свѣ́тлость, и҆ ѡ҆зарѧ́етъ стрⷭ҇тоте́рпцы твоѧ̑.

И҆́же кро́вїю ѿ ре́бръ твои́хъ и҆сте́кшею мі́ръ и҆скꙋпи́лъ є҆сѝ, вѣ́рою ᲂу҆со́пшыѧ ᲂу҆́бѡ хрⷭ҇тѐ и҆зба́ви честны́ми страстьмѝ твои́ми: ты́ бо цѣ́нꙋ за всѣ́хъ себѐ да́лъ є҆сѝ.

И҆́же созда́вый мѧ̀ рꙋка́ма пречⷭ҇тыми пе́рвѣе и҆ дꙋ́хъ дарова́вый, и҆ къ землѝ низпа́дша ѕлѣ̀, па́ки ѡ҆бнови́вый краснѣ́йше, ны́нѣ дꙋ́шы преста́вльшихсѧ са́мъ ᲂу҆поко́й.

Сла́ва: Черто́гꙋ твоемꙋ̀ свѣтоно́сномꙋ гдⷭ҇и, всели́ти сподо́би, ꙗ҆̀же въ вѣ́рѣ къ тебѣ̀ ᲂу҆со́пшыѧ, тѣ́хъ презира́ѧ прегрѣшє́нїѧ, ꙗ҆́кѡ бл҃гъ и҆ млⷭ҇рдъ и҆ многомлⷭ҇тивъ.

Бг҃оро́диченъ: Пое́мъ тѧ̀ бл҃гослове́ннаѧ чⷭ҇таѧ, є҆ѧ́же ра́ди на́мъ возсїѧ̀ сꙋ́щымъ во тьмѣ̀ и҆ сѣ́ни сме́ртнѣй, пра́вды незаходи́мое сл҃нце: ты̀ во на́шегѡ сп҃се́нїѧ хода́таица была̀ є҆сѝ.

Пѣ́снь з҃

І҆рмо́съ: Сꙋ́щымъ въ пещѝ ѻ҆трокѡ́мъ твои̑мъ сп҃се, не прикоснꙋ́сѧ, нижѐ стꙋжѝ ѻ҆́гнь. тогда̀ трїѐ ꙗ҆́кѡ є҆ди́нѣми ᲂу҆сты̀ поѧ́хꙋ и҆ бл҃гословлѧ́хꙋ, глаго́люще: бл҃гослове́нъ бг҃ъ ѻ҆тє́цъ на́шихъ.

И҆скꙋси́вшесѧ ꙗ҆́кѡ зла́то во ѻ҆гнѝ мч҃нцы всѣ́ми мꙋ́ками, свѣтлѣ́йше всѧ́кагѡ зла́та въ любвѝ бж҃е́ственнѣй ꙗ҆ви́шасѧ, и҆ въ сокро́вищахъ нбⷭ҇ныхъ сохране́ни бы́ша.

Ꙗ҆́кѡ сщ҃е́нницы, ꙗ҆́кѡ бж҃е́ственнїи слꙋгѝ бы́вше, всѝ ст҃и́телїе сщ҃е́ннїи принесо́сте бг҃ꙋ жє́ртвы безкрѡ́вныѧ, и҆ лю́ди ᲂу҆па́сше, и҆дѣ́же вели́кїй па́стырь всели́стесѧ.

Не покори́вшесѧ страсте́мъ пло́ти, безстра́стїемъ ꙗ҆́кѡ въ ри́зꙋ та́йнꙋ прпⷣбнїи ѡ҆бле́кшесѧ, сожи́телїе а҆́гг҃лѡмъ ꙗ҆ви́шасѧ: и҆́хже мл҃твами хрⷭ҇тѐ, и҆зба́ви на́съ ѿ и҆скꙋше́нїй.

Сла́ва: И҆дѣ́же пи́ща є҆́сть та́йнаѧ, и҆дѣ́же сїѧ́етъ свѣ́тъ лица̀ твоегѡ̀ хрⷭ҇тѐ, ꙗ҆̀же ѿ на́съ преста́вльшыѧсѧ въ вѣ́рѣ бл҃года́телю вселѝ, сла́вити бл҃гоче́стнѡ твою̀ бл҃госты́ню.

Бг҃оро́диченъ: Тебѐ всест҃а́ѧ, пречⷭ҇таѧ, ст҃ы̑ѧ жєны̀ и҆мꙋ́ще добро́тꙋ, ликꙋ́ютъ со а҆́гг҃лы ра́достнѡ, и҆ бг҃а сло́ва сла́вѧтъ ро́ждшагосѧ пло́тїю и҆з̾ тебѐ, за млⷭ҇рдїе мно́гое.

И҆́нъ

І҆рмо́съ: Тебѐ ᲂу҆́мнꙋю бцⷣе, пе́щь разсмотрѧ́емъ вѣ́рнїи: ꙗ҆́коже бо ѻ҆́троки сп҃сѐ трѝ превозноси́мый, мі́ръ ѡ҆бновѝ, во чре́вѣ твое́мъ всецѣ́лъ, хва́льный ѻ҆тцє́въ бг҃ъ, и҆ препросла́вленъ.

Сїѧ́нїи пречⷭ҇тыѧ сла́вы твоеѧ̀, ѡ҆зари́тисѧ хрⷭ҇тѐ подава́й, ѿ бꙋ́ри мїрскі́ѧ къ тебѣ̀ ѿше́дшымъ, и҆ тѣ́хъ сподо́би съ мч҃нки взыва́ти тебѣ̀: хвали́мый ѻ҆тцє́въ бж҃е бл҃гослове́нъ є҆сѝ.

Но́въ а҆да́мъ вои́стиннꙋ бы́въ, а҆да́мовъ содѣ́телю, и҆́же клѧ́твꙋ бо а҆да́мовꙋ є҆ди́нъ потреби́лъ є҆сѝ. тѣ́мже мо́лимсѧ тебѣ̀: преста́влєнныѧ ᲂу҆поко́й въ сла́дости ра́йстѣй хрⷭ҇тѐ, ꙗ҆́кѡ є҆ди́нъ млⷭ҇рдъ.

Сла́ва: И҆́же на́шꙋ є҆сте́ственнꙋю не́мощь є҆ди́нъ свѣ́дый ꙗ҆́кѡ бг҃ъ, бл҃гъ же и҆ млⷭ҇тивъ, всѧ̑ и҆̀хже преста́вилъ є҆сѝ, и҆дѣ́же свѣ́тъ незаходи́мый присѣща́етъ лица̀ твоегѡ̀, ᲂу҆чинѝ хрⷭ҇тѐ, хвали́мый ѻ҆тцє́въ бж҃е и҆ препросла́вленъ.

Бг҃оро́диченъ: Зако́на сѣ̑ни, и҆ дрє́внѧѧ гада̑нїѧ твои́мъ преидо́ша рождество́мъ бг҃омт҃и, ты́ бо на́мъ бж҃е́ственныѧ бл҃года́ти свѣ́тъ возсїѧ́ла є҆сѝ: и҆́мже дре́внихъ и҆зба́вихомсѧ долгѡ́въ чⷭ҇таѧ, воспѣва́юще бг҃а препросла́вленнаго.

Пѣ́снь и҃

І҆рмо́съ: Є҆гѡ́же ᲂу҆жаса́ютсѧ а҆́гг҃ли, и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте сщ҃е́нницы, просла́вите ѻ҆́троцы, бл҃гослови́те лю́дїе, и҆ превозноси́те во всѧ̑ вѣ́ки.

Львѡ́въ зїѧ̑нїѧ преидо́ша невре́днѡ, и҆ коно́бѡвъ врѣ̑нїѧ претеко́ша крѣ́пкѡ мч҃нцы всѝ, прохлажда́еми ѻ҆гне́мъ бж҃е́ственнагѡ дх҃а пресла́внѡ.

Даѧ̀ прⷪ҇ро́кѡмъ свои̑мъ предвѣ́дѣти да̑льнѧѧ, и҆ ст҃и́тели твоѧ̑ ᲂу҆мꙋдри́лъ є҆сѝ сщ҃е́ннѡ: тѣ́хъ мл҃твами хрⷭ҇тѐ бж҃е, просвѣтѝ сердца̀ вѣ́рнѡ пою́щихъ тѧ̀.

Распе́нше себѐ прпⷣбнїи мі́рови, живо́тъ премі́рный наслѣ́довасте по́стницы, съ сꙋ́щими ѿ вѣ́ка всѣ́хъ бг҃ꙋ ᲂу҆годи́вшими преподо́бнѡ и҆ пра́веднѡ.

Сла́ва: И҆́же созда́вый человѣ́ка ѿ землѝ бг҃одѣ́льнѡ, ꙗ҆̀же ѿ землѝ преста́вилъ є҆сѝ вѣ̑рныѧ, ꙗ҆́кѡ бл҃гъ, пи́щи ра́йскїѧ сподо́би, всѧ̑ презира́ѧ ꙗ҆̀же ѿ ни́хъ содѣ̑ѧннаѧ.

Бг҃оро́диченъ: До́брꙋю и҆ непоро́чнꙋю чⷭ҇таѧ въ жена́хъ, жєны̀ пострада́вшыѧ зна́юще тѧ̀ ꙗ҆́вѣ дв҃о, мл҃твы творѧ́тъ съ тобо́ю къ бг҃ꙋ, сп҃сти́сѧ ѿ бѣ́дъ рабѡ́мъ твои̑мъ.

И҆́нъ

І҆рмо́съ: Въ пещѝ ѻ҆́троцы і҆и҃лєвы, ꙗ҆́коже въ горни́лѣ добро́тою бл҃гоче́стїѧ чистѣ́е зла́та блеща́хꙋсѧ, глаго́люще: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те во всѧ̑ вѣ́ки.

Скве́рнꙋ всю̀ твои́хъ рабѡ́въ ᲂу҆со́пшихъ, твоегѡ̀ человѣколю́бїѧ росо́ю ѿмы́въ, тѧ̀ пѣ́сньми воспѣва́ти сподо́би: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во всѧ̑ вѣ́ки.

Предстоѧ́тели сп҃се десны́ѧ, вѣ́рою ѡ҆правда́въ мл҃твами стрⷭ҇тоте́рпєцъ, ꙗ҆̀же преста́вилъ є҆сѝ вѣ̑рныѧ, покажѝ пою́щыѧ: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во всѧ̑ вѣ́ки.

Сла́ва: И҆́же сме́рти и҆ живота̀ и҆мѣ́ѧй всѧ́кꙋю вла́сть, ꙗ҆̀же вѣ́рою ᲂу҆со́пшыѧ твоегѡ̀ сїѧ́нїѧ ᲂу҆лꙋчи́ти бл҃говолѝ, взыва́ющыѧ: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки.

Бг҃оро́диченъ: Сп҃се́нїѧ хода́таица на́мъ была̀ є҆сѝ всенепоро́чнаѧ, и҆ въ непреходи́мыѧ вѣ́ки пребыва́нїѧ же и҆ свѣ́тлости: тебѐ дв҃о чⷭ҇таѧ, при́снѡ всѧ̑ дѣла̀ бл҃гослови́мъ, и҆ превозно́симъ во всѧ̑ вѣ́ки.

Та́же, пѣ́снь бцⷣы: Вели́читъ дꙋша̀ моѧ̀ гдⷭ҇а: И҆ про́чыѧ стїхѝ, съ припѣ́вы.

Пѣ́снь ѳ҃

І҆рмо́съ: Живопрїе́мный и҆сто́чникъ приснотекꙋ́щїй, свѣтоно́сный свѣти́льникъ бл҃года́ти, хра́мъ ѡ҆дꙋшевле́нный, сѣ́нь пречⷭ҇тꙋю, нб҃сѐ и҆ землѝ простра́ннѣйшꙋю, бцⷣꙋ вѣ́рнїи велича́емъ.

Сщ҃е́нныхъ мч҃нкъ почти́мъ сщ҃є́ннаѧ борє́нїѧ ра́дꙋющесѧ, страда̑нїѧ же и҆ ра̑ны, пригвождє́нїѧ и҆ и҆згна̑нїѧ, и҆ заколе́нїе блаже́нное, и҆́мже хрⷭ҇тꙋ̀ наслѣ̑дницы ꙗ҆ви́шасѧ.

Ꙗ҆́кѡ сщ҃е́нницы бж҃їи, ѡ҆блеко́шасѧ въ пра́вдꙋ бж҃е́ственнїи ᲂу҆гѡ́дницы: ꙗ҆́кѡ въ преподо́бїи пожи́вше, и҆̀же въ постѣ̀ ꙗ҆́вѣ сконча́вшїисѧ, ра́дꙋютсѧ хрⷭ҇та̀ велича́юще.

Оу҆ста̀ бж҃е́ствєннаѧ гдⷭ҇нѧ бы́вше, прⷪ҇ро́цы всѝ, всѣ̑мъ є҆гѡ̀ провозвѣсти́ша свѣ́тъ: съ ни́миже ны́нѣ веселѧ́тсѧ и҆ жєны̀, крѣ́пкѡ подвиза́вшыѧсѧ, и҆ посто́мъ бг҃ꙋ ᲂу҆годи́вшыѧ.

Сла́ва: И҆́же всѣ́ми ца́рствꙋющаѧ си́ло, твоегѡ̀ ца́рствїѧ покажѝ прича́стники, со ст҃ы́ми твои́ми, ꙗ҆̀же ѿ землѝ преста́вилъ є҆сѝ: и҆ ꙗ҆̀же содѣ̑ѧннаѧ и҆́ми, бж҃е всѣ́хъ пре́зри премно́гою бла́гостїю твое́ю.

Бг҃оро́диченъ: Ꙗ҆́же свѣ́тъ ро́ждшаѧ бж҃е́ственный, безлѣ́тный, всѧ̑ моѧ̑ разрѣшѝ лѣ̑тнаѧ прегрѣшє́нїѧ, твои́ми мольба́ми: и҆ ᲂу҆́мъ мо́й просвѣтѝ, ѡ҆мрача́емый при́снѡ лѣ́ностїю, да тѧ̀ пою̀, и҆ вѣ́рнѡ велича́ю.

И҆́нъ

І҆рмо́съ: Ѡ҆́бразъ чⷭ҇тагѡ ржⷭ҇тва̀ твоегѡ̀ ѻ҆гнепали́маѧ кꙋпина̀ показа̀ неѡпа́льнаѧ: и҆ ны́нѣ на на́съ напа́стей свирѣ́пѣющꙋю ᲂу҆гаси́ти мо́лимсѧ пе́щь, да тѧ̀ бцⷣе непреста́ннѡ велича́емъ.

Пощадѝ ꙗ҆́кѡ бг҃ъ чл҃вѣколюби́въ, и҆ млⷭ҇тивъ, твоѐ созда́нїе: и҆ ᲂу҆поко́й въ селе́нїихъ ст҃ы́хъ твои́хъ, и҆дѣ́же мч҃нцы всѝ веселѧ́тсѧ, вѣ́рою преста́влєныѧ ѿ вре́менныхъ, многомлⷭ҇тиве.

И҆мѣ́ѧй млⷭ҇тей бе́зднꙋ, препобѣжда́ющꙋю рабѡ́въ твои́хъ прегрѣшє́нїѧ, и҆̀хже прїе́мъ и҆збра̀, ᲂу҆поко́й въ нѣ́дрѣхъ а҆враа́млихъ чл҃вѣколю́бче, и҆ съ ла́заремъ во свѣ́тъ тво́й вселѝ.

Сла́ва: И҆зба́витель и҆ сп҃съ бы́въ ро́дꙋ человѣ́ческомꙋ, распѧ́тїѧ ра́ди, ꙗ҆̀же ны́нѣ ѿ на́съ преста́вилъ є҆сѝ, ꙗ҆́кѡ бл҃года́тель, наслажде́нїѧ бж҃е́ственнагѡ сподо́би, и҆ живота̀ нетлѣ́ннагѡ, и҆ весе́лїѧ и҆ свѣ́тлости.

Бг҃оро́диченъ: Ѽ ꙗ҆̀же па́че ᲂу҆ма̀ чꙋде́съ твои́хъ! ты́ бо дв҃о є҆ди́на всѣ̑мъ, и҆̀же под̾ со́лнцемъ, подала̀ є҆сѝ разꙋмѣ́ти новѣ́йшее чꙋ́до пречⷭ҇таѧ, твоегѡ̀ ржⷭ҇тва̀ недоꙋмѣ́ннагѡ: тѣ́мже тѧ̀ всѝ велича́емъ.

Та́же, Досто́йно є҆́сть: И҆ є҆ктенїа̀, и҆ свѣти́ленъ, и҆ ѱалмы̀ ѻ҆бы̑чныѧ.

На хвали́техъ стїхи̑ры мч҃нчны, гла́съ а҃:

Стрⷭ҇тоте́рпцы хрⷭ҇тѡ́вы, прїиди́те лю́дїе всѝ почти́мъ, пѣ́ньми и҆ пѣ́сньми дꙋхо́вными, просвѣ́щники мі́ра, и҆ проповѣ́дники вѣ́ры: и҆сто́чники приснотекꙋ́щыѧ, ѿ ни́хже и҆стека́ютъ вѣ̑рнымъ и҆сцѣлє́нїѧ. тѣ́хъ мл҃твами хрⷭ҇тѐ бж҃е на́шъ, ми́ръ мі́рꙋ твоемꙋ̀ да́рꙋй, и҆ дꙋша́мъ на́шымъ ве́лїю млⷭ҇ть.

Сі́и во́ини цр҃ѧ̀ вели́кагѡ проти́вишасѧ повелѣ́нїємъ мꙋчи́телєвымъ, до́блественнѣ неради́ша ѡ҆ мꙋ́кахъ, и҆ ле́сть всю̀ попра́вше, досто́йнѣ вѣнча́ни бы́ша. про́сѧтъ ѿ сп҃са ми́ра, и҆ дꙋша́мъ на́шымъ ве́лїѧ млⷭ҇ти.

Ва́съ прехва́льнїи мч҃нцы, ни ско́рбь, ни тѣснота̀, ни гла́дъ, ни гоне́нїе, нижѐ ра̑ны, ни ꙗ҆́рость ѕвѣре́й, ни ме́чь, нижѐ ѻ҆́гнь претѧ́й разлꙋчи́ти ѿ бг҃а возмого́ша: любо́вїю же па́че ꙗ҆́же къ немꙋ̀, ꙗ҆́кѡ въ чꙋжди́хъ подви́гшесѧ тѣлесѣ́хъ, є҆стество̀ забы́вше, и҆ сме́рть презрѣ́сте. тѣ́мже и҆ досто́йнѡ трꙋдѡ́въ ва́шихъ мздꙋ̀ прїѧ́ли є҆стѐ, нбⷭ҇номꙋ црⷭ҇твїю наслѣ̑дницы бы́вше: хрⷭ҇тꙋ̀ моли́тесѧ ѡ҆ дꙋша́хъ на́шихъ.

Весели́тесѧ мч҃нцы ѡ҆ гдⷭ҇ѣ, ꙗ҆́кѡ по́двигомъ до́брымъ подвиза́стесѧ, и҆ проти́вистесѧ царє́мъ, и҆ мꙋчи́тели побѣди́сте: ѻ҆гнѧ̀ и҆ меча̀ не ᲂу҆страши́стесѧ, и҆ ѕвѣре́й ди́вїихъ снѣда́ющихъ тѣлеса̀ ва̑ша. хрⷭ҇тꙋ̀ со а҆́гг҃лы пѣ́снь возсыла́юще, съ нб҃сѐ вѣнцы̀ прїѧ́сте: и҆спроси́те дарова́ти ми́ръ мі́рꙋ, и҆ дꙋша́мъ на́шымъ ве́лїю млⷭ҇ть.

Ме́ртвенъ: Дѣ́ломъ сп҃се мо́й ꙗ҆влѧ́еши, ꙗ҆́кѡ ты̀ є҆сѝ всѣ́хъ воскрⷭ҇нїе, сло́вомъ сло́ве ла́зарѧ ѿ ме́ртвыхъ возста́вилъ є҆сѝ. є҆гда́ же ме́ртвїи ѿ гробѡ́въ воскресо́ша, и҆ врата̀ а҆́дѡва смѧто́шасѧ: тогда̀ человѣ́кѡмъ сме́рть со́нъ ꙗ҆влѧ́шесѧ. но и҆́же на сп҃се́нїе своегѡ̀ созда́нїѧ, а҆ не на ѡ҆сꙋжде́нїе прише́дый, и҆̀хже и҆збра́лъ є҆сѝ, ᲂу҆поко́й ꙗ҆́кѡ чл҃вѣколю́бецъ.

Сла́ва, и҆ ны́нѣ, бг҃оро́диченъ: Ра́дꙋйсѧ ѿ на́съ, ст҃а́ѧ бцⷣе дв҃о чⷭ҇тый сосꙋ́де всеѧ̀ вселе́нныѧ: свѣщѐ неꙋгаси́маѧ, вмѣсти́лище невмѣсти́магѡ, хра́ме неѡбори́мый. ра́дꙋйсѧ, и҆з̾ неѧ́же роди́сѧ а҆́гнецъ бж҃їй, взе́млѧй грѣхѝ всегѡ̀ мі́ра.

На стїхо́внѣ стїхи̑ры поко́йны. Творе́нїе кѵ́ръ ѳеофа́на. Гла́съ а҃.

Подо́бенъ: Прехва́льнїи мч҃нцы:

Тебѣ̀ сп҃се мо́лимсѧ, твоегѡ̀ сла́дкагѡ прича́стїѧ преста́вльшихсѧ сподо́би, и҆ вселѝ во ѻ҆би́телехъ прпⷣбныхъ со ст҃ы́ми твои́ми, и҆ въ нбⷭ҇наѧ жили̑ща, бл҃гоꙋтро́бїемъ твои́мъ презрѧ̀ беззакѡ́нїѧ, и҆ подаѧ̀ си̑мъ поко́й.

Сті́хъ: Бл҃же́ни, ꙗ҆̀же и҆збра́лъ и҆ прїѧ́лъ є҆сѝ гдⷭ҇и.

Па́че ви́димыхъ твоѧ̑ сп҃се ѡ҆бѣща̑нїѧ, ꙗ҆̀же ѻ҆́ко не ви́дѣ, и҆ ᲂу҆́хо не слы́ша, и҆ на се́рдце человѣ́ка никогда́же взы́де: мо́лимъ тѧ̀ влⷣко, сла́дкагѡ твоегѡ̀ прича́стїѧ полꙋчи́ти сподо́би, къ тебѣ̀ преста́вльшыѧсѧ, и҆ пода́ждь и҆̀мъ вѣ́чнꙋю жи́знь.

Сті́хъ: Дꙋ́шы и҆́хъ во бл҃ги́хъ водворѧ́тсѧ.

Ѡ҆ крⷭ҇тѣ̀ твое́мъ веселѧ́щесѧ. ѡ҆ крⷭ҇тѣ̀ твое́мъ надѣ́ющесѧ рабѝ твоѝ, къ тебѣ̀ преста́вишасѧ чл҃вѣколю́бче: и҆̀мже ны́нѣ и҆збавле́нїе тѣ́хъ прегрѣше́нїй, крⷭ҇тъ тво́й да́рꙋй, и҆ кро́вь пролїѧ́ннꙋю за мїрскі́й живо́тъ, бл҃госе́рдїемъ твои́мъ проща́ѧ согрѣшє́нїѧ, и҆ просвѣща́ѧ свѣ́томъ лица̀ твоегѡ̀.

Сті́хъ: И҆ па́мѧть и҆́хъ въ ро́дъ и҆ ро́дъ.

Никто́же безгрѣ́шенъ, никто́же ѿ человѣ́къ бы́въ, то́кмѡ ты̀ є҆ди́не безсме́ртне. тѣ́мже рабы̑ твоѧ̑, ꙗ҆́кѡ бг҃ъ ще́дрый, во свѣ́тѣ со а҆́гг҃льскими ликостоѧ́нїи твои́ми ᲂу҆чинѝ бл҃гоꙋтро́бїемъ твои́мъ, презира́ѧ беззакѡ́нїѧ, и҆ подаѧ̀ и҆̀мъ проще́нїе.

Сла́ва, и҆ ны́нѣ, бг҃оро́диченъ: Хрⷭ҇та̀ ᲂу҆молѝ, твоѐ рожде́нїе мт҃и дв҃о, согрѣше́нїй проще́нїе дарова́ти рабѡ́мъ твои̑мъ, тебѐ бцⷣꙋ проповѣ́давшымъ вои́стиннꙋ, и҆ сло́вомъ бл҃гочести́вымъ бл҃гослови́вшымъ, и҆ свѣ́тлости ст҃ы́хъ и҆ весе́лїѧ сподо́би во црⷭ҇твїи твое́мъ.

Въ сꙋббѡ́тꙋ, бл҃жє́нны. Гла́съ а҃:

Снѣ́дїю и҆зведѐ и҆з̾ раѧ̀ вра́гъ а҆да́ма: крⷭ҇то́мъ же введѐ хрⷭ҇то́съ во́нь разбо́йника, помѧни́ мѧ гдⷭ҇и, вопїю́ща, є҆гда̀ прїи́деши во црⷭ҇твїи твое́мъ.

Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.

Страда́лєцъ мно́жество безчи́сленное, ст҃и́телей, и҆ премꙋ́дрыхъ же́нъ, и҆ прⷪ҇рѡ́къ пресла́вныхъ, мо́лѧтъ тѧ̀ і҆и҃се бж҃е: пода́ждь на́мъ ѡ҆ставле́нїе прегрѣше́нїй, и҆ ве́лїю млⷭ҇ть.

Бл҃же́ни є҆стѐ, є҆гда̀ поно́сѧтъ ва́мъ, и҆ и҆жденꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.

И҆̀же тече́нїе соверши́вше сщ҃е́ннѣйшїи хрⷭ҇тѡ́вы страда́льцы, со ст҃и́тели сщ҃е́нными и҆ прⷪ҇ро́ки, сподо́бистесѧ во гра́дѣ нбⷭ҇нѣмъ жи́ти, со а҆́гг҃лы веселѧ́щесѧ.

Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.

Во свѣ́тѣ хрⷭ҇тѐ, ᲂу҆чинѝ невече́рнѣмъ, ꙗ҆̀же преста́вилъ є҆сѝ, прегрѣшє́нїѧ и҆́хъ презрѣ́въ, ꙗ҆́кѡ ще́дрый бг҃ъ: да твою̀ сла́вимъ бл҃года́телю, безчи́сленнꙋю млⷭ҇ть.

Сла́ва: Ѻ҆ц҃ꙋ̀ поклони́мсѧ, и҆ сн҃а славосло́вимъ, и҆ прест҃а́го дх҃а всѝ вѣ́рнїи воспои́мъ: помѧнѝ на́съ зовꙋ́щихъ, є҆диносꙋ́щнаѧ трⷪ҇це, є҆ди́нице бж҃е.

И҆ ны́нѣ: ꙗ҆́кѡ пала́тꙋ простра́ннꙋю, и҆ престо́лъ сла́вы, и҆ ѻ҆́блакъ свѣ́телъ, пѣсносло́вимъ тѧ̀ чⷭ҇таѧ, и҆ мо́лимъ: разорѝ ѻ҆́блакъ мра́чный ѿ дꙋ́шъ на́шихъ, бж҃е́ственными мл҃твами твои́ми.

Коне́цъ пе́рвомꙋ гла́сꙋ.