Гла́съ з҃.
на Гдⷭ҇и воззва́хъ, поста́вимъ стїхѡ́въ д҃: и҆ пое́мъ г҃ воскрⷭ҇ны, повторѧ́юще а҃-й. Стїхи̑ры воскрⷭ҇ны, гла́съ з҃:
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.
Прїиди́те, возра́дꙋемсѧ гдⷭ҇еви, сокрꙋши́вшемꙋ сме́рти держа́вꙋ, и҆ просвѣти́вшемꙋ человѣ́ческїй ро́дъ, со безпло́тными зовꙋ́ще: содѣ́телю и҆ сп҃се на́шъ, сла́ва тебѣ̀.
Крⷭ҇тъ претерпѣ́лъ є҆сѝ сп҃се, и҆ погребе́нїе на́съ ра́ди, сме́ртїю же, ꙗ҆́кѡ бг҃ъ сме́рть ᲂу҆мертви́лъ є҆сѝ. тѣ́мже покланѧ́емсѧ тридне́вномꙋ воскрⷭ҇нїю твоемꙋ̀: гдⷭ҇и, сла́ва тебѣ̀.
А҆пⷭ҇ли ви́дѣвше воскрⷭ҇нїе содѣ́телѧ, чꙋдѧ́хꙋсѧ, пою́ще хвалꙋ̀ а҆́гг҃льскꙋю: сїѧ̀ сла́ва є҆́сть цр҃ко́внаѧ, сїѐ бога́тство црⷭ҇твїѧ, пострада́вый на́съ ра́ди, гдⷭ҇и, сла́ва тебѣ̀.
Сла́ва, и҆ ны́нѣ, бг҃оро́диченъ, догма́тїкъ, гла́съ з҃:
Стра́шно и҆ неизрече́нно вои́стиннꙋ, є҆́же ѡ҆ тебѣ̀ содѣ́ѧнное та́инство нескве́рнаѧ: сло́во бо всѣ́хъ вино́вное, па́че вины̀ и҆ сло́ва, ст҃ы́мъ дх҃омъ вопло́щшеесѧ родила̀ є҆сѝ, и҆з̾ себѐ пло́ть прїи́мша, своегѡ̀ є҆стества̀ непрело́жнѡ пребы́вша. соше́дшымсѧ бо ѻ҆бои́мъ самобы́тнѣ, по ѵ҆поста́си є҆ди́нственной, сꙋгꙋ́бъ є҆стество́мъ происхо́дитъ: ве́сь бг҃ъ, и҆ ве́сь чл҃вѣ́къ, во ѻ҆бои́хъ соверше́нствїихъ, дѣйстви́тельными сво́йствы и҆з̾ѧвлѧ́ѧ: пострада́въ бо на крⷭ҇тѣ̀ пло́тїю, безстра́стный то́йже пребы́сть бж҃е́ственнѣ: ꙗ҆́кѡ человѣ́къ ᲂу҆мры́й, па́ки ѡ҆живѐ ꙗ҆́кѡ бг҃ъ тридне́венъ, держа́вꙋ сме́ртнꙋю низложи́въ, и҆з̾ и҆стлѣ́нїѧ и҆зба́вль человѣ́чество. того̀ ꙗ҆́кѡ и҆зба́вителѧ и҆ сп҃са ро́да на́шегѡ бг҃омт҃и молѝ, низпосла́ти на́мъ щедро́тъ є҆гѡ̀ ве́лїю млⷭ҇ть.
Та́же, Свѣ́те ти́хїй: Посе́мъ прокі́менъ: Гдⷭ҇ь воцр҃и́сѧ три́жды. Сті́хъ: Ѡ҆блече́сѧ гдⷭ҇ь въ си́лꙋ, и҆ препоѧ́сасѧ.
Та́же, Сподо́би гдⷭ҇и, въ ве́черъ се́й: І҆ере́й же є҆ктенїѝ не глаго́летъ, но пое́мъ на стїхо́внѣ стїхи́рꙋ воскрⷭ҇нꙋ, гла́съ з҃:
Воскрⷭ҇лъ є҆сѝ и҆з̾ гро́ба сп҃се мі́ра, и҆ совоздви́глъ є҆сѝ человѣ́ки съ пло́тїю твое́ю: гдⷭ҇и, сла́ва тебѣ̀.
И҆́ны стїхи̑ры прест҃ѣ́й бцⷣѣ, гла́съ з҃:
Подо́бенъ: Неради́вше ѡ҆ вре́менныхъ:
Сті́хъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
Восто́къ сл҃нца мы́сленнагѡ дв҃о была̀ є҆сѝ, на за́падѣхъ є҆́же по на́мъ бы́вшагѡ є҆стества̀: но ꙗ҆́кѡ и҆мꙋ́щи дерзнове́нїе, того̀ молѝ бцⷣе всепѣ́таѧ, ѿ безмѣ́рныхъ прегрѣше́нїй свободи́ти дꙋ́шы на́шѧ.
Сті́хъ: Слы́ши дщѝ и҆ ви́ждь, и҆ приклонѝ ᲂу҆́хо твоѐ.
Же́злъ и҆з̾ ко́рене і҆ессе́ева дв҃о, ꙗ҆́вѣ прозѧбла̀ є҆сѝ, насаждє́нїѧ пре́лести и҆з̾ ко́рене потре́бльшаго: но ꙗ҆́кѡ и҆мꙋ́щи дерзнове́нїе, непреста́ннѡ молѝ, и҆скорени́ти всепѣ́таѧ, се́рдца моегѡ̀ стра̑сти, и҆ тогѡ̀ всади́ти стра́хъ, и҆ сп҃сти́ мѧ.
Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.
Врата̀ бж҃їѧ, прест҃а́ѧ, ѿ вра́тъ а҆́довыхъ и҆зба́ви мѧ̀, и҆ пꙋ́ть покаѧ́нїѧ покажи́ ми, и҆́мже ѡ҆брѧ́щꙋ врата̀ къ жи́зни ввѡдѧ́щаѧ: заблꙋ́ждшихъ наста́внице, ро́дъ вѣ́рныхъ человѣ̑къ соблюда́й, и҆ сп҃са́й дꙋ́шы на́шѧ.
Сла́ва, и҆ ны́нѣ, бг҃оро́диченъ: И҆з̾ тебѐ всест҃а́ѧ бцⷣе дв҃о, неизрече́ннѡ роди́сѧ хрⷭ҇то́съ бг҃ъ на́шъ, вои́стиннꙋ сы́й бг҃ъ превѣ́чный, и҆ чл҃вѣ́къ но́въ. ѻ҆́во ᲂу҆́бѡ сы́й, присносꙋ́щенъ: ѻ҆́во же на́съ ра́ди бы́въ: сп҃са́етъ бо собо́ю, коегѡ́ждо є҆стества̀ сво́йство, ѻ҆́вѣмъ ᲂу҆́бѡ сїѧ́ѧ чꙋдесы̀, ѻ҆́вѣмъ же ᲂу҆вѣрѧ́ѧ страстьмѝ, тѣ́мже є҆ди́нъ и҆ то́йже, и҆ ᲂу҆мира́етъ ꙗ҆́кѡ человѣ́къ, и҆ ꙗ҆́кѡ бг҃ъ востае́тъ. є҆го́же молѝ чⷭ҇таѧ, неискꙋсобра́чнаѧ, сп҃сти́сѧ дꙋша́мъ на́шымъ.
Та́же, Ны́нѣ ѿпꙋща́еши: Трист҃о́е, и҆ по Ѻ҆́ч҃е на́шъ: Тропа́рь воскрⷭ҇нъ. Сла́ва, и҆ ны́нѣ, бг҃оро́диченъ є҆гѡ̀, и҆ ѿпꙋ́стъ.
на Гдⷭ҇и воззва́хъ, поста́вимъ стїхѡ́въ і҃: и҆ пое́мъ стїхи̑ры воскрⷭ҇ны, гла́съ з҃. Творе́нїе і҆ѡа́нна дамаски́на.
Сті́хъ: И҆зведѝ и҆з̾ темни́цы дꙋ́шꙋ мою̀, и҆сповѣ́датисѧ и҆́мени твоемꙋ̀.
Прїиди́те, возра́дꙋемсѧ гдⷭ҇еви, сокрꙋши́вшемꙋ сме́рти держа́вꙋ, и҆ просвѣти́вшемꙋ человѣ́ческїй ро́дъ, со безпло́тными зовꙋ́ще: содѣ́телю и҆ сп҃се на́шъ, сла́ва тебѣ̀.
Сті́хъ: Менѐ ждꙋ́тъ првⷣницы, до́ндеже возда́си мнѣ̀.
Крⷭ҇тъ претерпѣ́лъ є҆сѝ сп҃се, и҆ погребе́нїе на́съ ра́ди, сме́ртїю же ꙗ҆́кѡ бг҃ъ сме́рть ᲂу҆мертви́лъ є҆сѝ. тѣ́мже покланѧ́емсѧ тридне́вномꙋ воскрⷭ҇нїю твоемꙋ̀: гдⷭ҇и, сла́ва тебѣ̀.
Сті́хъ: И҆з̾ глꙋбины̀ воззва́хъ къ тебѣ̀ гдⷭ҇и, гдⷭ҇и, ᲂу҆слы́ши гла́съ мо́й.
А҆пⷭ҇ли ви́дѣвше воскрⷭ҇нїе содѣ́телѧ, чꙋдѧ́хꙋсѧ, пою́ще хвалꙋ̀ а҆́гг҃льскꙋю: сїѧ̀ сла́ва є҆́сть цр҃ко́внаѧ, сїѐ бога́тство црⷭ҇твїѧ: пострада́вый на́съ ра́ди, гдⷭ҇и, сла́ва тебѣ̀.
И҆́ны стїхи̑ры а҆натѡ́лїевы, гла́съ то́йже.
Сті́хъ: Да бꙋ́дꙋтъ ᲂу҆́ши твоѝ вне́млющѣ гла́сꙋ моле́нїѧ моегѡ̀.
А҆́ще и҆ ꙗ҆́тъ бы́лъ є҆сѝ хрⷭ҇тѐ, ѿ беззако́нныхъ мꙋже́й: но ты́ ми є҆сѝ бг҃ъ, и҆ не постыждꙋ́сѧ: бїе́нъ бы́лъ є҆сѝ по плеще́ма, не ѿмета́юсѧ: на крⷭ҇тѣ̀ пригвожде́нъ бы́лъ є҆сѝ, и҆ не таю̀: воста́нїемъ твои́мъ хвалю́сѧ: сме́рть бо твоѧ̀ живо́тъ мо́й, всеси́льне и҆ чл҃вѣколю́бче гдⷭ҇и, сла́ва тебѣ̀.
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Дв҃дское прⷪ҇ро́чество и҆сполнѧ́ѧ хрⷭ҇то́съ, вели́чествїе въ сїѡ́нѣ своѐ ᲂу҆ч҃нкѡ́мъ ѿкры́лъ є҆́сть, хвали́ма показꙋ́ѧ себѐ, и҆ сла́вима при́снѡ, со ѻ҆ц҃е́мъ же и҆ дх҃омъ ст҃ы́мъ: пе́рвѣе ᲂу҆́бѡ безпло́тна, ꙗ҆́кѡ сло́ва, послѣди́ же на́съ ра́ди воплоще́на, и҆ ᲂу҆мерщвле́на ꙗ҆́кѡ чл҃вѣ́ка, и҆ воскр҃сша со вла́стїю, ꙗ҆́кѡ чл҃вѣколю́бца.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Соше́лъ є҆сѝ во а҆́дъ хрⷭ҇тѐ, ꙗ҆́коже восхотѣ́лъ є҆сѝ: и҆спрове́рглъ є҆сѝ сме́рть, ꙗ҆́кѡ бг҃ъ и҆ влⷣка: и҆ воскрⷭ҇лъ є҆сѝ тридне́венъ, совоскр҃си́въ а҆да́ма ѿ а҆́довыхъ ᲂу҆́зъ и҆ тлѣ́нїѧ, зовꙋ́ща и҆ глаго́люща: сла́ва воскрⷭ҇нїю твоемꙋ̀ є҆ди́не чл҃вѣколю́бче.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.
Во гро́бѣ положе́нъ бы́лъ є҆сѝ ꙗ҆́кѡ спѧ̀ гдⷭ҇и: и҆ воскр҃слъ є҆сѝ тридне́венъ, ꙗ҆́кѡ си́ленъ въ крѣ́пости, совоскр҃си́въ а҆да́ма ѿ тлѝ сме́ртныѧ, ꙗ҆́кѡ всеси́ленъ.
И҆́ны стїхи̑ры бцⷣѣ, па́ѵла а҆морре́йскагѡ, гла́съ в҃.
Подо́бенъ: Є҆гда̀ ѿ дре́ва:
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Ты̀ є҆сѝ а҆́гг҃лѡвъ ра́дость, ты̀ є҆сѝ человѣ́кѡвъ сла́ва, ты̀ вѣ́рныхъ наде́жда, влⷣчце всепѣ́таѧ, предста́тельница на́ша: и҆ къ тебѣ̀ прибѣга́емъ во всѧ́кой нꙋ́жди, ꙗ҆́кѡ да мольба́ми твои́ми, ѿ стрѣ́лъ вра́жїихъ па́гꙋбы дꙋшетлѣ́нныѧ. и҆ всѧ́кихъ скорбе́й и҆зба́вимсѧ всѝ воспѣва́ющїи тѧ̀ бг҃оневѣ́стнаѧ.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Ты́ ми бцⷣе, ᲂу҆пова́нїе, ты́ ми предста́тельница и҆ стѣна̀ и҆ прибѣ́жище, влⷣчце препѣ́таѧ, ꙗ҆́же бг҃а пло́тїю неискꙋсомꙋ́жнѡ ро́ждши мі́рꙋ сп҃си́телѧ: ты̀ мольба́ми твои́ми ѿ ѡ҆держа́щихъ на́съ и҆зба́ви и҆скꙋше́нїй, и҆ бѣ́дъ и҆ ѡ҆бстоѧ́нїй, є҆ди́на хрⷭ҇тїа́нъ прибѣ́жище.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Оу҆кротѝ пло́ти моеѧ̀ стремлє́нїѧ, ᲂу҆гасѝ пла́мень страсте́й мои́хъ, ѿимѝ ѿ менѐ бцⷣе, зно́й лꙋка́вый жела́нїѧ моегѡ̀, и҆ непрекло́нный мо́й ѻ҆бы́чай возвратѝ дв҃о, ѿ всѧ́кагѡ бѣсо́вскагѡ стремле́нїѧ: ꙗ҆́кѡ да въ тишинѣ̀ се́рдца, и҆ въ безстра́стїи дꙋшѝ моеѧ̀, пѣсносло́влю тѧ̀ всепѣ́тꙋю.
Сла́ва, и҆ ны́нѣ, бг҃оро́диченъ: Мт҃и ᲂу҆́бѡ позна́ласѧ є҆сѝ, па́че є҆стества̀, бцⷣе, пребыла́ же є҆сѝ дв҃а, па́че сло́ва и҆ ра́зꙋма: и҆ чꙋдесѐ ржⷭ҇тва̀ твоегѡ̀ сказа́ти ѧ҆зы́къ не мо́жетъ. пресла́внꙋ бо сꙋ́щꙋ зача́тїю чⷭ҇таѧ, непости́женъ є҆́сть ѡ҆́бразъ рожде́нїѧ: и҆дѣ́же бо хо́щетъ бг҃ъ, побѣжда́етсѧ є҆стества̀ чи́нъ. тѣ́мже тѧ̀ всѝ, мт҃рь бж҃їю вѣ́дꙋще, мо́лимъ ти сѧ прилѣ́жнѡ, молѝ сп҃сти́сѧ дꙋша́мъ на́шымъ.
Та́же, Свѣ́те ти́хїй: Прокі́менъ днѐ: Гдⷭ҇ь воцр҃и́сѧ: И҆ про́чее по ѻ҆бы́чаю.
На стїхо́внѣ стїхи̑ры воскрⷭ҇ны, гла́съ з҃:
Воскрⷭ҇лъ є҆сѝ и҆з̾ гро́ба сп҃се мі́ра, и҆ совоздви́глъ є҆сѝ человѣ́ки съ пло́тїю твое́ю: гдⷭ҇и сла́ва тебѣ̀.
И҆́ны стїхи̑ры по а҆лфави́тꙋ.
Сті́хъ: Гдⷭ҇ь воцр҃и́сѧ, въ лѣ́потꙋ ѡ҆блече́сѧ.
Воскрⷭ҇шемꙋ и҆з̾ ме́ртвыхъ, и҆ просвѣти́вшемꙋ всѧ̑, прїиди́те поклони́мсѧ: ѿ а҆́дова бо мꙋчи́тельства на́съ свободи́лъ є҆́сть, свои́мъ тридне́внымъ воскрⷭ҇нїемъ живо́тъ на́мъ дарова́вый, и҆ ве́лїю млⷭ҇ть.
Сті́хъ: И҆́бо ᲂу҆твердѝ вселе́ннꙋю, ꙗ҆́же не подви́житсѧ.
Во а҆́дъ соше́дъ хрⷭ҇тѐ, сме́рть плѣни́лъ є҆сѝ, и҆ тридне́венъ воскр҃съ, на́съ совоскр҃си́лъ є҆сѝ, сла́вѧщихъ твоѐ всеси́льное воста́нїе, гдⷭ҇и чл҃вѣколю́бче.
Сті́хъ: До́мꙋ твоемꙋ̀ подоба́етъ ст҃ы́нѧ гдⷭ҇и, въ долготꙋ̀ дні́й.
Стра́шенъ ꙗ҆ви́лсѧ є҆сѝ гдⷭ҇и, во гро́бѣ лежѧ̀ ꙗ҆́кѡ спѧ̀: воскре́съ же тридне́венъ ꙗ҆́кѡ си́ленъ, а҆да́ма совоскр҃си́лъ є҆сѝ зовꙋ́ща: сла́ва воскрⷭ҇нїю твоемꙋ̀, є҆ди́не чл҃вѣколю́бче.
Сла́ва, и҆ ны́нѣ, бг҃оро́диченъ: Под̾ кро́въ тво́й влⷣчце, всѝ земноро́днїи прибѣга́юще, вопїе́мъ тѝ: бцⷣе ᲂу҆пова́нїе на́ше, и҆зба́ви ны̀ ѿ безмѣ́рныхъ прегрѣше́нїй, и҆ сп҃сѝ дꙋ́шы на́шѧ.
Та́же, Ны́нѣ ѿпꙋща́еши: Трист҃о́е, и҆ по Ѻ҆́ч҃е на́шъ:
Глаго́лемъ тропа́рь воскрⷭ҇нъ, гла́съ з҃:
Разрꙋши́лъ є҆сѝ крⷭ҇то́мъ твои́мъ сме́рть, ѿве́рзлъ є҆сѝ разбо́йникꙋ ра́й: мѷроно́сицамъ пла́чь преложи́лъ є҆сѝ, и҆ а҆пⷭ҇лѡмъ проповѣ́дати повелѣ́лъ є҆сѝ: ꙗ҆́кѡ воскрⷭ҇лъ є҆сѝ хрⷭ҇тѐ бж҃е, да́рꙋѧй мі́рови ве́лїю млⷭ҇ть.
Сла́ва, и҆ ны́нѣ, бг҃оро́диченъ: Ꙗ҆́кѡ на́шегѡ воскрⷭ҇нїѧ сокро́вище, на тѧ̀ надѣ́ющыѧсѧ всепѣ́таѧ, ѿ ро́ва и҆ глꙋбины̀ прегрѣше́нїй возведѝ: ты́ бо пови̑нныѧ грѣхꙋ̀ сп҃сла̀ є҆сѝ, ро́ждши сп҃се́нїе на́ше: ꙗ҆́же пре́жде ржⷭ҇тва̀ дв҃а, и҆ въ ржⷭ҇твѣ̀ дв҃а, и҆ по ржⷭ҇твѣ̀ па́ки пребыва́еши дв҃а.
Та́же и҆ ѿпꙋ́стъ.
І҆рмо́съ: Сокрꙋши́вшемꙋ бра̑ни мы́шцею свое́ю, и҆ вса́дники триста́ты погрꙋзи́вшемꙋ, пои́мъ є҆мꙋ̀, ꙗ҆́кѡ и҆зба́вителю на́шемꙋ бг҃ꙋ: ꙗ҆́кѡ просла́висѧ.
Припѣ́въ: Прест҃а́ѧ бцⷣе, сп҃сѝ на́съ.
Ꙗ҆́кѡ ᲂу҆краше́нїе пѣ́нїемъ, и҆ пѣ́снь бг҃оподо́бнꙋ бл҃годаре́нїѧ тѝ да́ры прино́симъ: є҆́же ра́дꙋйсѧ ны́нѣ чⷭ҇таѧ, ꙗ҆́кѡ ѿ печа́ли ра́дость на́мъ подала̀ є҆сѝ.
Млⷭ҇ти твоеѧ̀ бл҃года́ть, и҆ покро́ва крѣ́пость, не премолчи́мъ дв҃о пречⷭ҇таѧ: ꙗ҆́кѡ ѿ бѣ́дъ лю́тыхъ на́съ сп҃сла̀ є҆сѝ.
Сла́ва: Ѿ разли́чныхъ и҆зба́вльшесѧ и҆скꙋше́нїй и҆ скорбе́й, мт҃рними твои́ми мл҃твами пречⷭ҇таѧ, согла́снѡ и҆ те́плѣ бл҃годаре́нїѧ тебѣ̀ всѝ гла́сы пои́мъ.
И҆ ны́нѣ: Рѧ́снами и҆спещре́на ꙗ҆́кѡ златы́ми добродѣ́тельми, и҆ дх҃а бл҃года́тьми пречⷭ҇таѧ, ꙗ҆́кѡ невѣ́ста ѻ҆́ч҃а ᲂу҆краси́вшисѧ, вои́стиннꙋ ꙗ҆ви́ласѧ є҆сѝ мт҃и бг҃ꙋ.
І҆рмо́съ: Въ нача́лѣ нб҃са̀ всеси́льнымъ сло́вомъ твои́мъ ᲂу҆твержде́й гдⷭ҇и сп҃се, и҆ вседѣ́тельнымъ и҆ бж҃їимъ дх҃омъ, всю̀ си́лꙋ и҆́хъ, на недви́жимѣмъ мѧ̀ ка́мени и҆сповѣ́данїѧ твоегѡ̀ ᲂу҆твердѝ.
Ра́дости бж҃е́ственныѧ вели́чїе, ꙗ҆́кѡ ѿ нача́ла на́мъ весе́лїю, бл҃годаре́нїѧ гла́сы прино́симъ прилѣ́жнѡ, почита́юще ю҆̀ ꙗ҆́кѡ предста́тельницꙋ на́шꙋ.
И҆̀же тобо́ю и҆зба́вльшесѧ ѿ бѣ́дъ, и҆ тебѐ ра́ди ра́дость полꙋчи́вше, мт҃и безневѣ́стнаѧ, ꙗ҆́кѡ пода́тельницꙋ бл҃гꙋ́ю, и҆ застꙋ́пницꙋ бл҃гохва́льнꙋ всѝ прославлѧ́емъ.
Сла́ва: И҆змѣне́нїе прегрѣше́нїй и҆ напа́стей, бж҃е́ственною твое́ю мл҃твою прїе́млюще, мт҃и хрⷭ҇та̀ бг҃а, ꙗ҆́кѡ винꙋ̀ бл҃ги́хъ воспѣва́емъ тѧ̀ вѣ́рнѡ бл҃года́рными гла́сы.
И҆ ны́нѣ: Ꙗ҆́же ра́дости и҆сто́чникъ безсме́ртныѧ, то́читъ стрꙋи̑ при́снѡ, и҆ сп҃са́етъ всѣ́хъ сама̀: ꙗ҆́кѡ присножи́зненное на́мъ бл҃годаѧ́нїе, мт҃и хрⷭ҇та̀ бг҃а.
І҆рмо́съ: Покры́ла є҆́сть нб҃са̀ хрⷭ҇тѐ бж҃е, смотре́нїемъ твои́мъ, добродѣ́тель неизрече́нныѧ мꙋ́дрости твоеѧ̀ чл҃вѣколю́бче.
Досто́йнꙋ тѝ пѣ́снь ра́дованїѧ чⷭ҇таѧ дв҃о, веселѧ́щесѧ прино́симъ, и҆зба́вльшесѧ ѿ бѣ́дъ твои́ми мл҃твами.
Бл҃года́рственнѡ тебѣ̀ дв҃о чⷭ҇таѧ, дꙋше́вныма рꙋка́ма вно́симъ пѣ́нїе, бж҃е́ственными пѣ́сньми и҆гра́юще, ѿ печа́ли и҆зба́вльшесѧ мно́гїѧ.
Сла́ва: Воздвиго́ша на ны̀ бѣды̑ мнѡ́ги страстні́и грѣсѝ: но бж҃е́ственнымъ твои́мъ покро́вомъ чⷭ҇таѧ, на́съ и҆зба́ви.
И҆ ны́нѣ: Бл҃же́ни вои́стиннꙋ чтꙋ́щїи тѧ̀, бцⷣе пречⷭ҇таѧ, ꙗ҆́кѡ тобо́ю грѣха̀ и҆ печа́ли и҆зба́вихомсѧ.
І҆рмо́съ: Но́щь несвѣтла̀ невѣ̑рнымъ хрⷭ҇тѐ, вѣ̑рнымъ же просвѣще́нїе въ сла́дости слове́съ твои́хъ: сегѡ̀ ра́ди къ тебѣ̀ ᲂу҆́тренюю, и҆ воспѣва́ю твоѐ бж҃ество̀.
Грѣха̀ потреби́телѧ хрⷭ҇та̀ дв҃о родила̀ є҆сѝ, и҆́мже ѿ напа́стей и҆ болѣ́зней сп҃се́сѧ мі́ръ: тѣ́мже ра́дꙋйсѧ, и҆ мы̀ вопїе́мъ тѝ, и҆зба́вльшїисѧ печа́лей.
Ѡ҆б̾е́мшесѧ разли́чными напа́стьми чⷭ҇таѧ влⷣчце, и҆ печа́лїю и҆ ско́рбїю, и҆ лю́тымъ ѡ҆бстоѧ́нїемъ, ѿча́ѧвшесѧ мы̀ весе́лїѧ, наде́ждꙋ тѧ̀ ѡ҆брѣто́хомъ.
Сла́ва: Ꙗ҆́кѡ сп҃се́нїѧ храни́лище на́мъ рабѡ́мъ твои̑мъ чⷭ҇таѧ, ѿгонѧ́еши напа̑сти, и҆ соблюда́еши невреди́мы. тѣ́мже прича̑стницы мно́гихъ твои́хъ бла̑гъ, бл҃годари́мъ тѧ̀ пѣ́сньми.
И҆ ны́нѣ: Бл҃годари́мъ тѧ̀ и҆зба́вльшесѧ тобо́ю грѣхѡ́въ мно́гихъ, и҆ не́мощей и҆ болѣ́зней и҆ недꙋ̑гъ лю́тыхъ пречⷭ҇таѧ влⷣчце: наде́жда бо є҆сѝ тверда̀ твои̑мъ вѣ̑рнымъ рабѡ́мъ.
І҆рмо́съ: Во глꙋбинꙋ̀ грѣхо́внꙋю впа́дсѧ бл҃же, ꙗ҆́кѡ і҆ѡ́на ѿ ки́та вопїю́ ти: возведѝ ѿ тлѝ живо́тъ мо́й, и҆ сп҃си́ мѧ чл҃вѣколю́бче.
А҆́гг҃льстїи ѧ҆зы́цы досто́йнѡ твоѧ̑ хвалы̑ воспѣ́ти не мо́гꙋтъ чⷭ҇таѧ: мы́ же ны́нѣ ра́бски взе́мшесѧ, ра́дованїе гаврїи́лово прино́симъ тѝ.
Во глꙋбинꙋ̀ печа́ли и҆ ѡ҆бстоѧ́нїѧ грѣхѝ на́шими впа́дше, и҆зба́вихомсѧ тобо́ю ѿ нꙋ́жды и҆ напа́стей, дв҃о бцⷣе чⷭ҇таѧ.
Сла́ва: Под̾ до́лгомъ содѣ́ласѧ ве́сь мі́ръ, чⷭ҇таѧ, бл҃годари́ти, и҆ хвали́ти, и҆ сла́вити бл҃года́ть твою̀ бл҃гоче́стнѡ: тобо́ю бо бѣ́дъ и҆ печа́лей и҆зба́влени бы́хомъ.
И҆ ны́нѣ: Въ нощѝ и҆ во днѝ, ꙗ҆́вѣ и҆ вта́й, под̾ тво́й прибѣга́емъ покро́въ, пречⷭ҇таѧ дв҃о, и҆̀же тѧ̀ вѣ́рнѡ славосло́вѧщїи.
Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ, гла́съ з҃.
Гдⷭ҇и, мы̀ є҆смы̀ лю́дїе твоѝ, и҆ ѻ҆́вцы па́жити твоеѧ̀, заблꙋ́ждшихъ ꙗ҆́кѡ па́стырь ѡ҆братѝ на́съ, тле́ю расточе́ныхъ соберѝ на́съ: поми́лꙋй ста́до твоѐ, ᲂу҆млⷭ҇рдисѧ на лю́ди твоѧ̑, мл҃твами бцⷣы, є҆ди́не безгрѣ́шный.
І҆рмо́съ: Въ пе́щь ѻ҆́гненнꙋю вве́ржени прпⷣбнїи ѻ҆́троцы, ѻ҆́гнь въ ро́сꙋ преложи́ша, воспѣва́нїемъ си́це вопїю́ще: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Ра́дованїе бл҃года́рственное тебѣ̀ прино́симъ, мт҃и бж҃їѧ: ꙗ҆́кѡ вои́стиннꙋ тобо́ю и҆зба́влени всѧ́кагѡ ѕла́гѡ начина́нїѧ, и҆ согла́снѡ тебѣ̀ пое́мъ: бл҃гослове́нна є҆сѝ.
Водвори́хомсѧ въ ве́черъ въ пла́чи печа́лей, и҆ ча́ѧнїи ѕлы́хъ: но твои́мъ бг҃олѣ́пнымъ кро́вомъ дв҃о, ѡ҆боже́ни бы́вше, ѡ҆брѣто́хомъ ра́дость заꙋ́тра: ты́ бо сп҃сла̀ є҆сѝ на́съ.
Сла́ва: Ꙗ҆́кѡ бж҃е́ственное прибѣ́жище, мы̀ покро́въ тво́й всѝ стѧжа́вше къ бг҃ꙋ, въ напа́стехъ и҆ гоне́нїихъ и҆ грѣсѣ́хъ, къ тебѣ̀ прибѣга́емъ, и҆ тобо́ю и҆змѣне́нїе прїе́млемъ, пречⷭ҇таѧ.
И҆ ны́нѣ: Бл҃года́ть мл҃твы твоеѧ̀ чⷭ҇таѧ, проповѣ́дꙋемъ ᲂу҆сты̀ и҆ дх҃омъ, сла́внаѧ: ꙗ҆́кѡ тебѐ ра́ди, напа́сти и҆ бꙋ́ри, и҆ тѧ́жкихъ печа́лей, и҆ грѣха̀ страсте́й всѝ и҆збавлѧ́емсѧ.
І҆рмо́съ: Стра́шнаго херꙋві́мѡмъ, и҆ чꙋ́днаго серафі́мѡмъ, и҆ мі́рꙋ творца̀, сщ҃е́нницы и҆ рабѝ, и҆ дꙋ́си пра́ведныхъ, по́йте, бл҃гослови́те и҆ превозноси́те є҆го̀ во вѣ́ки.
Ꙗ҆́кѡ и҆зба́вльшесѧ бꙋ́ри грѣхо́вныѧ и҆ страсте́й, и҆ напа́стей твои́ми мл҃твами бцⷣе бл҃га́ѧ, бл҃года́рственнымъ гла́сомъ, ра́дꙋйсѧ, вопїе́мъ тѝ: ꙗ҆́кѡ тобо́ю ѿ печа́ли въ ра́дость преше́дше.
Въ болѣ́знехъ и҆ напа́стехъ ѡ҆держи̑мыѧ не пре́зри бл҃га́ѧ, но мольбꙋ̀ хꙋдꙋ́ю ᲂу҆слы́шавши, свободѝ на́съ ѿ скорбе́й вели́кихъ: да вѣ́рнѡ твою̀ мл҃твꙋ чⷭ҇таѧ, воспѣва́емъ.
Сла́ва: Прегрѣше́нїй разрꙋше́нїю вина̀, ны́нѣ возста́ви на́съ ѿ печа́лей, напа́стей и҆ страсте́й человѣ̑къ, и҆ и҆скꙋше́нїѧ неподо́бна: твои́ми же бцⷣе бж҃е́ственными мольба́ми, и҆зба́ви на́съ ѿ ни́хъ пресла́внѡ.
И҆ ны́нѣ: Щедрѡ́ты твоѧ̑ на всѣ́хъ всегда̀ низпосыла́ютсѧ, хрⷭ҇тѐ, бл҃года́тїю вои́стиннꙋ и҆ мольба́ми ро́ждшїѧ тѧ̀: ѿ тебе́ бо прїе́млемъ хрⷭ҇тїа́не млⷭ҇ть твою̀, сп҃се млⷭ҇тиве.
І҆рмо́съ: Па́че є҆стества̀ мт҃рь, и҆ по є҆стествꙋ̀ дв҃ꙋ, є҆ди́нꙋ въ жена́хъ бл҃гослове́ннꙋю, пѣ́сньми вѣ́рнїи бцⷣꙋ велича́емъ.
Ра́дованїе по достоѧ́нїю, со гла́сомъ восклица́нїѧ тебѣ̀ дв҃о, ны́нѣ прино́симъ со а҆́гг҃ломъ гаврїи́ломъ, и҆зба́вльшесѧ ѿ разли́чныхъ и҆скꙋше́нїй бцⷣе, мл҃твами твои́ми.
Ра́дость и҆ весе́лїе, и҆ ра́дованїе бж҃е́ственное, дв҃о неискꙋсомꙋ́жнаѧ, на́мъ ᲂу҆мно́жисѧ бж҃їе: се́ бо пла́чꙋщїисѧ лю́тѣ, ра́дꙋемсѧ мл҃твами твои́ми.
Сла́ва: Же́ртвꙋ хвале́нїѧ пожрꙋ̀, и҆ ѧ҆зы́комъ и҆ гла́сомъ, пѣ́снь бл҃года́рственнꙋю воздаю́ ти прилѣ́жнѡ, дв҃о: ꙗ҆́кѡ да тебѣ̀ молѧ́сѧ, въ де́нь печа́ли тобо́ю и҆зба́влюсѧ.
И҆ ны́нѣ: Сра́дꙋемсѧ пречⷭ҇таѧ, бж҃е́ственномꙋ твоемꙋ̀ ржⷭ҇твꙋ̀ бл҃гоче́стнѡ: ра́дость бо на́мъ и҆сточи́ла є҆сѝ ѿ напа́стей и҆ печа́лей. тѣ́мже тѝ бл҃года́рнѡ и҆ мы̀ пѣ́снь соверша́емъ, вѣ́рнѡ воспѣва́юще тѧ̀.
Та́же, Досто́йно є҆́сть: Трист҃о́е. По Ѻ҆́ч҃е на́шъ: тропарѝ, и҆ про́чее по ѻ҆бы́чаю, и҆ ѿпꙋ́стъ.
Въ недѣ́лю ᲂу҆́тра на полꙋ́нощницѣ,
канѡ́нъ прест҃ѣ́й и҆ живонача́льнѣй трⷪ҇цѣ, [є҆го́же краестро́чїе: Хвалю̀ трⷪ҇це тѧ̀, є҆динонача́льное є҆стество̀.] Творе́нїе митрофа́ново. Гла́съ з҃:
І҆рмо́съ: Ма́нїемъ твои́мъ на земны́й ѡ҆́бразъ преложи́сѧ, пре́жде ᲂу҆доборазлива́емое водно́е є҆стество̀ гдⷭ҇и: тѣ́мже немо́креннѡ пѣшеше́ствовавъ і҆и҃ль, пое́тъ тебѣ̀ пѣ́снь побѣ́днꙋю.
Припѣ́въ: Прест҃а́ѧ трⷪ҇це бж҃е на́шъ, сла́ва тебѣ̀.
Ѿве́рзи мѝ ᲂу҆ста̀ ᲂу҆́мнаѧ се́рдца, и҆ ᲂу҆стнѣ̀ веще́ствєнныѧ ко хвалѣ̀ твое́й, трисвѣ́тлое є҆ди́но бж҃ество̀ всѣ́хъ, пѣ́ти тебѣ̀ пѣ́снь свѣтодѣ́телю, бл҃года́рственнꙋю.
Да преизли́шнее твоеѧ̀ бл҃гости пока́жеши, создала̀ є҆сѝ человѣ́ка трⷪ҇це безмѣрноси́льнаѧ: то́кмѡ ѡ҆́бразъ бре́нный твоегѡ̀ нача́льнагѡ содѣ́телю, гдⷭ҇ьства.
Оу҆́мъ безнача́льный, сло́во соприсносꙋ́щное роди́вый, и҆ дх҃а собезнача́льнаго просїѧ́вый, сподо́би є҆ди́номꙋ бг҃ꙋ по сꙋществꙋ̀ соѡбра́знꙋ на́съ покланѧ́тисѧ трїѷпоста́сномꙋ.
Бг҃оро́диченъ: Ꙗ҆ви́лсѧ є҆сѝ при кꙋпинѣ̀ мѡѷсе́ю бж҃їй сло́ве, ꙗ҆́кѡ ѻ҆́гнь чисти́тельный, не ѡ҆палѧ́ѧ же ѿню́дъ, є҆́же ѿ дв҃ы проѡбразꙋ́ѧ твоѐ воплоще́нїе, и҆́мже человѣ́ки воѡбрази́лъ є҆сѝ.
І҆рмо́съ: Въ нача́лѣ нб҃са̀, всеси́льнымъ сло́вомъ твои́мъ ᲂу҆твержде́й гдⷭ҇и сп҃се, и҆ вседѣ́тельнымъ и҆ бж҃їимъ дх҃омъ всю̀ си́лꙋ и҆́хъ: на недви́жимѣмъ мѧ̀ ка́мени и҆сповѣ́данїѧ твоегѡ̀ ᲂу҆твердѝ.
И҆́же є҆ди́нственнаго и҆ трисїѧ́ннаго, и҆ вседѣ́тельнаго тѧ̀ влⷣкꙋ воспѣва́юще, грѣхѡ́въ и҆ и҆скꙋше́нїй про́симъ и҆збавле́нїѧ безмѣрноси́льный бж҃е: да не ᲂу҆́бѡ пре́зриши, вѣ́рою твою̀ бл҃гость сла́вѧщихъ.
Ѻ҆́трасль ꙗ҆ви́сѧ ѿ ѻ҆ц҃а̀, ꙗ҆́кѡ ѿ ко́рене безнача́льна бг҃ъ сло́во, и҆ равномо́щенъ со сра́сленымъ и҆ бж҃е́ственнымъ дх҃омъ: и҆ сегѡ̀ ра́ди вѣ́рнїи, трⷪ҇чное ли́цы є҆ди́но гдⷭ҇ьство сла́вимъ.
Равносла́вно и҆ сра́слено, трїѷпоста́сное є҆стество̀ нераздѣ́льнѣ и҆ раздѣ́льнѣ, и҆ є҆динонача́льнꙋю трⷪ҇цꙋ вси́ тѧ славосло́вимъ вѣ́рнїи: и҆ покланѧ́ющесѧ про́симъ согрѣше́нїй проще́нїѧ.
Бг҃оро́диченъ: Неизмѣ́ннѡ человѣ́кѡмъ ᲂу҆подо́бльсѧ по всемꙋ̀ бж҃їй сло́ве, ѿ чⷭ҇тыѧ ѻ҆трокови́цы проше́лъ є҆сѝ ꙗ҆́вѣ: и҆ всѣ̑мъ показа́лъ є҆сѝ бг҃онача́лїе трисїѧ́нное, и҆ є҆ди́нственное сꙋщество́мъ неизмѣ́нныхъ ѵ҆поста́сей.
Гдⷭ҇и поми́лꙋй, три́жды.
Сѣда́ленъ, гла́съ з҃. Подо́бенъ: И҆́же менѐ ра́ди:
Согрѣши́вшыѧ поми́лꙋй трⷪ҇це ст҃а́ѧ, рабы̑ твоѧ̑: и҆ прїимѝ ка́ющыѧсѧ тебѣ̀ бл҃гоꙋтро́бне, и҆ проще́нїѧ сподо́би.
Сла́ва, и҆ ны́нѣ, бг҃оро́диченъ: Ѡ҆ѕло́блєнныѧ дꙋ́шы на́шѧ грѣхмѝ, ᲂу҆бл҃жѝ всечⷭ҇таѧ бцⷣе, и҆ и҆зба́ви ѿ прегрѣше́нїй тебѐ пою́щыѧ бг҃оневѣ́сто.
І҆рмо́съ: Ѻ҆́ч҃а нѣ́дра не ѡ҆ста́вль, и҆ соше́дъ на зе́млю хрⷭ҇тѐ бж҃е, та́йнꙋ ᲂу҆слы́шахъ смотре́нїѧ твоегѡ̀, и҆ просла́вихъ тѧ̀ є҆ди́не чл҃вѣколю́бче.
Содержи́тельнаѧ трисвѣ́тлаѧ є҆ди́нице, бг҃онача́льнаѧ и҆ сп҃си́тельнаѧ всѣ́хъ, твоѧ̑ пѣвцы̀ ны́нѣ ѡ҆градѝ, и҆ сп҃сѝ ѿ ско́рби, и҆ страсте́й, и҆ всѧ́кагѡ ѡ҆ѕлобле́нїѧ.
Назна́менательныхъ рече́нїй, твоегѡ̀ непостижи́магѡ трисвѣ́тлагѡ бж҃ества̀, недоꙋмѣва́юще воспѣва́емъ тѧ̀ чл҃вѣколю́бче гдⷭ҇и, и҆ прославлѧ́емъ твою̀ си́лꙋ.
На землѝ ꙗ҆́кѡ на нб҃сѣ́хъ со безпло́тными ли́ки, є҆ди́нице и҆ трⷪ҇це, нераздѣ́льнѡ тѧ̀ раздѣлѧ́емъ, и҆ любо́вїю сла́вимъ, ꙗ҆́кѡ сꙋ́щими всѣ́ми влады́чествꙋющꙋю.
Бг҃оро́диченъ: Ѻ҆ч҃скїѧ сла́вы не ѿстꙋ́пль, къ на́шей хꙋ́дости снизше́лъ є҆сѝ во́лею, вопло́щьсѧ пресꙋ́щественный: и҆ возне́слъ є҆сѝ къ бж҃е́ственнѣй сла́вѣ, ꙗ҆́кѡ бл҃гоꙋтро́бенъ.
І҆рмо́съ: Но́щь несвѣтла̀ невѣ̑рнымъ хрⷭ҇тѐ, вѣ̑рнымъ же просвѣще́нїе въ сла́дости слове́съ твои́хъ: сегѡ̀ ра́ди къ тебѣ̀ ᲂу҆́тренюю, и҆ воспѣва́ю твоѐ бж҃ество̀.
Свѣтонача́льное є҆стество̀ трⷪ҇це начерта́ньми, и҆ є҆ди́нице въ совѣ́тѣ и҆ сла́вѣ и҆ че́сти, ᲂу҆твердѝ на́съ въ твое́й любвѝ.
Оу҆́мъ, и҆ сло́во, и҆ дх҃ъ, є҆ди́но бг҃онача́льное и҆ трисо́лнечное є҆стество̀ сла́вѧще, про́симъ и҆зба́витисѧ и҆скꙋше́нїй, и҆ всѧ́кихъ скорбе́й.
Бг҃оро́диченъ: Воѡбра́жьсѧ бж҃їй сло́ве, въ є҆стество̀ человѣ́ческое, ѿ ст҃ы́ѧ дв҃ы, трⷪ҇цꙋ во є҆ди́ницѣ наꙋчи́лъ є҆сѝ пѣ́ти, соѡбра́знꙋ и҆ сопресто́льнꙋ.
І҆рмо́съ: Пла́вающаго въ молвѣ̀ жите́йскихъ попече́нїй, съ корабле́мъ потоплѧ́ема грѣхѝ, и҆ дꙋшетлѣ́нномꙋ ѕвѣ́рю примета́ема, ꙗ҆́кѡ і҆ѡ́на хрⷭ҇тѐ вопїю́ ти: и҆з̾ смертонѡ́сныѧ глꙋбины̀ возведи́ мѧ.
Є҆диносла́внꙋю держа́вꙋ, и҆ є҆динонача́льное бг҃онача́лїе, тремѝ ѵ҆поста́сьми сꙋ́щее, непремѣ́ннѣ съ дрꙋ́гъ дрꙋ́гомъ сла́вимъ, разли́чїе и҆мꙋ́ще то́кмѡ, бытїе́мъ ко́йждо сво́йства.
Оу҆́мнїи тѧ̀ чи́нове а҆́гг҃льскихъ красо́тъ хва́лѧтъ, трисо́лнечное бг҃онача́лїе: съ ни́миже и҆ мы̀ бре́нными ᲂу҆сты̀, ꙗ҆́кѡ твори́тельнꙋ всѣ́хъ, є҆ди́нꙋ пѣсносло́вимъ, и҆ вѣ́рнѡ сла́вимъ.
Бг҃оро́диченъ: Недоꙋмѣ́ннымъ сло́вомъ, сло́во ро́ждшеесѧ ѿ сл҃нца ѻ҆ц҃а̀, и҆́но сл҃нце, пре́жде вѣ̑къ, ѿ дв҃ы напослѣ́докъ возсїѧ̀: и҆ є҆ди́нственнаго тремѝ ли́цы, недомы́слимаго бг҃а проповѣ́да.
Сѣда́ленъ, гла́съ з҃:
Подо́бенъ: Ѻ҆гнѧ̀ свѣтлѣ́йши:
Трⷪ҇це є҆диносꙋ́щнаѧ, є҆ди́нице всѣ́хъ трїѷпоста́снаѧ, поми́лꙋй, ꙗ҆̀же создала̀ є҆сѝ, безсме́ртнаѧ: попалѧ́ющи ѕлѡ́бы прегрѣша́ющихъ, и҆ просвѣща́ющи сердца̀ пою́щихъ бл҃гоꙋтро́бїе твоѐ, бж҃е на́шъ, сла́ва тебѣ̀.
Сла́ва, и҆ ны́нѣ, бг҃оро́диченъ: Ѻ҆гнѧ̀ свѣтлѣ́йши, свѣ́та дѣ́йственнѣйши млⷭ҇ть бл҃года́ти твоеѧ̀ влⷣчце, попалѧ́ющи грѣхѝ человѣ́кѡвъ, и҆ ѡ҆роша́ющи мы̑сли хва́лѧщихъ вели̑чїѧ твоѧ̑, бцⷣе пренепоро́чнаѧ.
І҆рмо́съ: Въ пе́щь ѻ҆́гненнꙋю вве́ржени прпⷣбнїи ѻ҆́троцы, ѻ҆́гнь въ ро́сꙋ преложи́ша, воспѣва́нїемъ си́це вопїю́ще: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Свѣтолꙋ́чными блиста́нїи при́снѡ сїѧ́ѧ, трисвѣ́те бж҃е, є҆ди́нице непристꙋ́пнаѧ и҆ пресꙋ́щнаѧ сп҃сѝ, и҆̀же въ тѧ̀ влⷣко, вѣ́рꙋющыѧ бл҃гоче́стнѡ, и҆ покланѧ́ющыѧсѧ тебѣ̀.
Рече́нїємъ бж҃е́ственныхъ прⷪ҇рѡ́къ повинꙋ́ющесѧ, є҆ди́наго тѧ̀ то́чїю бг҃а всѣ́хъ сла́вимъ въ трїе́хъ начерта́нїихъ, си́це вопїю́ще: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Пе́рстными ᲂу҆стна́ми мы̀ съ невеще́ственными чи́нми, пѣ́сньми трⷪ҇це ст҃а́ѧ, тѧ̀ пое́мъ во є҆ди́нствѣ сꙋщества̀, вопїю́ще: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Бг҃оро́диченъ: Да и҆́же созда́вый а҆да́ма, возсози́ждетъ па́ки, всечⷭ҇таѧ, и҆з̾ тебѐ ꙗ҆́вѣ вочеловѣ́чисѧ, человѣ́ки ѡ҆божи́въ си́це вопїю́щыѧ: бл҃гослове́нъ пречⷭ҇таѧ, пло́дъ твоегѡ̀ чре́ва.
І҆рмо́съ: Неѡпа́льнаѧ ѻ҆гню̀ въ сїна́и прича́щшаѧсѧ кꙋпина̀, бг҃а ꙗ҆вѝ медленоѧзы́чномꙋ и҆ гꙋгни́вомꙋ мѡѷсе́ови, и҆ ѻ҆́троки ре́вность бж҃їѧ трѝ непребѡри́мыѧ во ѻ҆гнѝ пѣвцы̀ показа̀: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те во всѧ̑ вѣ́ки.
Со́лнца лꙋча́ми трисїѧ́ннагѡ ѡ҆зари́тисѧ свѣтодѣ́тельными сподо́би, сердца́мъ пѣвцє́въ твои́хъ: и҆ ны́нѣ зрѣ́ти добро́тꙋ твою̀ трⷪ҇це, є҆ди́нице, ꙗ҆́кѡ мо́щно да́рꙋй всегда̀, всѣ̑мъ вѣ́рою подо́бною, твоѐ вели́чїе пѣсносло́вѧщымъ во всѧ̑ вѣ́ки.
Держи́ши всѧ́чєскаѧ, трⷪ҇чное и҆ є҆ди́нственное гдⷭ҇онача́лїе безнача́льное, и҆ ᲂу҆правлѧ́еши нб҃о и҆ зе́млю. тѣ́мже мѧ̀ любо́вїю твое́ю привлачи́ма при́снѡ, сохранѝ пѣ́ти тебѣ̀: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те во всѧ̑ вѣ́ки.
Хра́мъ мѧ̀ твоеѧ̀ трисвѣ́тныѧ сотворѝ зарѝ, бл҃годѣ́телю чл҃вѣколю́бче: и҆ прича́стїѧ и҆ прїѡбще́нїѧ непристꙋ́пна врагѡ́мъ неви̑димымъ, и҆ плотски̑мъ страсте́мъ влⷣко, покажѝ, є҆динонача́льный бж҃е мо́й и҆ гдⷭ҇и сла́вы, пѣсносло́вити тѧ̀ во всѧ̑ вѣ́ки.
Бг҃оро́диченъ: Свѣ́тъ бг҃онача́льный ѿ чре́ва твоегѡ̀ возсїѧ́вый, бг҃ома́ти пречⷭ҇таѧ, ве́сь мі́ръ трисо́лнечнымъ свѣ́томъ ѡ҆зарѝ, и҆ зе́млю ꙗ҆́коже дрꙋго́е нб҃о показа̀, пою́щꙋ: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те во всѧ̑ вѣ́ки.
І҆рмо́съ: Мт҃и бж҃їѧ и҆ дв҃а, ро́ждшаѧ и҆ дѣ́вствꙋющаѧ па́ки, не є҆стества̀ дѣ́ло, но бж҃їѧ снизхожде́нїѧ: тѣ́мъ ꙗ҆́кѡ є҆ди́нꙋ бж҃їихъ чꙋде́съ сподо́бльшꙋюсѧ, тѧ̀ при́снѡ велича́емъ.
Высокосло́вити и҆ пѣ́ти тѧ̀ досто́йнѡ, є҆го́же въ вы́шнихъ непреста́ннѡ серафі́ми воспѣва́ютъ, не возмога́емъ бре́ннїи: ѻ҆ба́че ꙗ҆́кѡ влⷣкꙋ всѣ́хъ дерза́юще, и҆ чл҃вѣколю́бнѣйшаго бг҃а велича́емъ.
Тѣле́сныѧ болѣ́зни и҆зба́ви, и҆ дꙋше́внагѡ пристра́стїѧ пѣвцы̀ твоѧ̑, є҆ди́нственнаѧ трⷪ҇це нераздѣ́льнаѧ, и҆ сохрани́тисѧ невреждє́ннымъ ѿ всѣ́хъ жите́йскихъ и҆скꙋше́нїй сподо́би.
Равноси́льнаѧ, бг҃онача́льнаѧ, трисвѣ́тнаѧ, всеси́льнаѧ держа́во, неизмѣ́ннаѧ добро́то сꙋ́щественныѧ бл҃гости, да́ждь прегрѣше́нїй разрѣше́нїе твои̑мъ рабѡ́мъ, и҆ и҆скꙋше́нїй, и҆ страсте́й и҆зба́ви.
Бг҃оро́диченъ: Оу҆́мъ и҆ дꙋ́шꙋ, и҆ плотско́е смѣше́нїе прїе́мъ бцⷣе, ѿ твои́хъ ложе́снъ пречⷭ҇тыхъ, бг҃ъ сло́во пои́стиннѣ человѣ́къ ꙗ҆ви́сѧ: и҆ бж҃е́ственнагѡ сꙋщества̀ ѻ҆́бщника человѣ́ка ꙗ҆́вѣ показа́лъ є҆́сть.
Посе́мъ, припѣ́вы григо́рїа сїнаи́та: Досто́йно є҆́сть: И҆ про́чее полꙋ́нощницы, пи́сано въ концѣ̀ кни́ги сеѧ̀.
На ᲂу҆́трени по шестоѱа́лмїи:
Бг҃ъ гдⷭ҇ь, и҆ ꙗ҆ви́сѧ на́мъ: на гла́съ з҃. И҆ глаго́лемъ тропа́рь воскрⷭ҇нъ: Разрꙋши́лъ є҆сѝ крⷭ҇то́мъ твои́мъ сме́рть: Два́жды. Сла́ва, и҆ ны́нѣ, бг҃оро́диченъ: Ꙗ҆́кѡ на́шегѡ воскрⷭ҇нїѧ сокро́вище:
Та́же, ѻ҆бы́чное стїхосло́вїе ѱалти́ра.
По а҃-мъ стїхосло́вїи сѣда́льны воскрⷭ҇ны, гла́съ з҃:
Жи́знь во гро́бѣ возлежа́ше, и҆ печа́ть на ка́мени надлежа́ше, ꙗ҆́кѡ цр҃ѧ̀ спѧ́ща во́ини стрежа́хꙋ хрⷭ҇та̀: и҆ а҆́гг҃ли сла́влѧхꙋ ꙗ҆́кѡ бг҃а безсме́ртна, жєны́ же взыва́хꙋ: воскр҃се гдⷭ҇ь, подаѧ̀ мі́рови ве́лїю млⷭ҇ть.
Сті́хъ: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀.
Тридне́внымъ погребе́нїемъ твои́мъ плѣни́вый сме́рть, и҆ и҆стлѣ́вша человѣ́ка живоно́снымъ воста́нїемъ твои́мъ воскр҃си́вый хрⷭ҇тѐ бж҃е, ꙗ҆́кѡ чл҃вѣколю́бецъ, сла́ва тебѣ̀.
Сла́ва, и҆ ны́нѣ, бг҃оро́диченъ: Распе́ншагосѧ на́съ ра́ди, и҆ воскрⷭ҇шаго хрⷭ҇та̀ бг҃а на́шего, и҆ низложи́вшаго сме́рти держа́вꙋ, непреста́ннѡ молѝ бцⷣе дв҃о: да сп҃се́тъ дꙋ́шы на́шѧ.
По в҃-мъ стїхосло́вїи, сѣда́льны воскрⷭ҇ны, гла́съ з҃:
Запеча́танꙋ гро́бꙋ, живо́тъ ѿ гро́ба возсїѧ́лъ є҆сѝ хрⷭ҇тѐ бж҃е: и҆ две́ремъ заключє́ннымъ, ᲂу҆ч҃нкѡ́мъ предста́лъ є҆сѝ всѣ́хъ воскрⷭ҇нїе, дх҃ъ пра́вый тѣ́ми ѡ҆бновлѧ́ѧ на́мъ, по вели́цѣй твое́й млⷭ҇ти.
Сті́хъ: И҆сповѣ́мсѧ тебѣ̀ гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.
На гро́бъ теча́хꙋ жєны̀, со слеза́ми мѵ́ра носѧ́щѧ: и҆ во́инѡмъ стрегꙋ́щымъ тѧ̀ всѣ́хъ цр҃ѧ̀, глаго́лахꙋ къ себѣ̀: кто̀ ѿвали́тъ на́мъ ка́мень; воскр҃се вели́ка совѣ́та а҆́гг҃лъ, попра́вый сме́рть: всеси́льне гдⷭ҇и, сла́ва тебѣ̀.
Сла́ва, и҆ ны́нѣ, бг҃оро́диченъ: Ра́дꙋйсѧ бл҃года́тнаѧ бцⷣе дв҃о, приста́нище и҆ предста́тельство ро́да человѣ́ческагѡ, и҆з̾ тебе́ бо воплоти́сѧ и҆зба́витель мі́ра: є҆ди́на бо є҆сѝ мт҃и и҆ дв҃а, при́снѡ бл҃гослове́на и҆ препросла́влена. молѝ хрⷭ҇та̀ бг҃а ми́ръ дарова́ти все́й вселе́ннѣй.
Ѵ҆пакоѝ, гла́съ з҃:
И҆́же на́шъ зра́къ воспрїе́мый, и҆ претерпѣ́вый крⷭ҇тъ пло́тски, сп҃си́ мѧ воскрⷭ҇нїемъ твои́мъ хрⷭ҇тѐ бж҃е, ꙗ҆́кѡ чл҃вѣколю́бецъ.
Степє́нна, гла́съ з҃.
Плѣ́нъ сїѡ́нь ѿ ле́сти ѡ҆брати́въ, и҆ менѐ сп҃се, ѡ҆живѝ, и҆з̾има́ѧ рабо́тныѧ стра́сти.
Въ ю҆́гъ сѣ́ѧй скѡ́рби пѡ́стныѧ со сле́зами, се́й ра́достныѧ по́жнетъ рꙋкоѧ̑ти присноживопита́нїѧ.
Сла́ва: Ст҃ы́мъ дх҃омъ и҆сто́чникъ бж҃е́ственныхъ сокро́вищъ, ѿ негѡ́же премꙋ́дрость, ра́зꙋмъ, стра́хъ: томꙋ̀ хвала̀ и҆ сла́ва, че́сть и҆ держа́ва.
И҆ ны́нѣ, то́йже.
А҆́ще не гдⷭ҇ь сози́ждетъ до́мъ дꙋше́вный, всꙋ́е трꙋжда́емсѧ: ра́звѣ бо тогѡ̀ ни дѣѧ́нїе, ни сло́во соверша́етсѧ.
Плода̀ чре́вна, ст҃і́и дх҃одви́жнѡ прозѧба́ютъ ѻ҆те́чєскаѧ преда̑нїѧ, сн҃оположе́нїѧ.
Сла́ва: Ст҃ы́мъ дх҃омъ, всѧ́чєскаѧ є҆́же бы́ти и҆́мꙋтъ: пре́жде бо всѣ́хъ бг҃ъ, всѣ́хъ гдⷭ҇ьство, свѣ́тъ непристꙋ́пенъ, живо́тъ всѣ́хъ.
И҆ ны́нѣ, то́йже.
Боѧ́щїисѧ гдⷭ҇а, пꙋти̑ живота̀ ѡ҆брѣ́тше, ны́нѣ и҆ при́снѡ ᲂу҆бл҃жа́ютсѧ сла́вою нетлѣ́нною.
Ѻ҆́крестъ трапе́зы твоеѧ̀, ꙗ҆́кѡ сте́блїе ви́дѧ и҆сча̑дїѧ твоѧ̑, ра́дꙋйсѧ и҆ весели́сѧ, приводѧ̀ сїѧ̑ хрⷭ҇то́ви ꙾пастыренача́льникꙋ꙾[[пастыренача́льниче]].
Сла́ва: Ст҃ы́мъ дх҃омъ глꙋбина̀ дарова́нїй, бога́тство сла́вы, сꙋде́бъ глꙋбина̀ ве́лїѧ: є҆диносла́венъ ѻ҆ц҃ꙋ̀, и҆ сн҃ꙋ, слꙋжи́мь бо.
И҆ ны́нѣ, то́йже.
Прокі́менъ, гла́съ з҃: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀. Сті́хъ: И҆сповѣ́мсѧ тебѣ̀ гдⷭ҇и, всѣ́мъ се́рдцемъ мои́мъ. Та́же, Всѧ́кое дыха́нїе: Сті́хъ: Хвали́те бг҃а во ст҃ы́хъ є҆гѡ̀. Є҆ѵⷢ҇лїе воскрⷭ҇но: Воскрⷭ҇нїе хрⷭ҇то́во: ѱало́мъ н҃: и҆ прѡ́чаѧ порѧ́дꙋ.
Канѡ́нъ воскрⷭ҇нъ, гла́съ з҃:
І҆рмо́съ: Ма́нїемъ твои́мъ на земны́й ѡ҆́бразъ преложи́сѧ, пре́жде ᲂу҆доборазлива́емое водно́е є҆стество̀ гдⷭ҇и: тѣ́мже немо́креннѡ пѣшеше́ствовавъ і҆и҃ль, пое́тъ тебѣ̀ пѣ́снь побѣ́днꙋю.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Ѡ҆сꙋди́сѧ сме́ртное мꙋчи́тельство дре́вомъ, непра́ведною сме́ртїю ѡ҆сꙋжде́нꙋ тѝ гдⷭ҇и: ѿню́дꙋже кнѧ́зь тьмы̀ тебѣ̀ не ѡ҆долѣ́въ, пра́веднѡ и҆згна́нъ бы́сть.
А҆́дъ тебѣ̀ прибли́жисѧ, и҆ зꙋбы̀ не возмо́гъ сте́рти тѣ́ло твоѐ, челюстьмѝ сокрꙋши́сѧ. ѿню́дꙋже сп҃се, бѡлѣ́зни разрꙋ́шъ смє́ртныѧ, воскрⷭ҇лъ є҆сѝ тридне́венъ.
Бг҃оро́диченъ: Разрѣши́шасѧ бѡлѣ́зни прама́тере є҆́ѵы: болѣ́зни бо и҆збѣжа́вше, неискꙋсомꙋ́жнѡ родила̀ є҆сѝ. ѿню́дꙋже ꙗ҆́вѣ бцⷣꙋ, пречⷭ҇таѧ, вѣ́дꙋще тѧ̀, всѝ сла́вимъ.
И҆́нъ канѡ́нъ крⷭ҇товоскрⷭ҇нъ, гла́съ з҃:
І҆рмо́съ: По́нтомъ покры̀ фараѡ́на съ колесни́цами:
Два̀ и҆стѡ́чника на́мъ на крⷭ҇тѣ̀ и҆сточѝ сп҃съ живонѡ́снаѧ ѿ своегѡ̀ прободе́ннагѡ ребра̀. пои́мъ є҆мꙋ̀: ꙗ҆́кѡ просла́висѧ.
Во гро́бъ всели́всѧ, и҆ воскр҃съ тридне́венъ, нетлѣ́нїе подадѐ, ча́ѧнїе хрⷭ҇то́съ смє́ртнымъ. пои́мъ є҆мꙋ̀: ꙗ҆́кѡ просла́висѧ.
Бг҃оро́диченъ: Є҆ди́на дв҃а и҆ по ржⷭ҇твѣ̀ показа́ласѧ є҆сѝ: зижди́телѧ бо мі́рови воплоще́нна родила̀ є҆сѝ: тѣ́мже ра́дꙋйсѧ, тебѣ̀ всѝ зове́мъ.
И҆́нъ канѡ́нъ прест҃ѣ́й бцⷣѣ, [є҆гѡ́же краегране́сїе по а҆лфави́тꙋ.] Гла́съ з҃.
І҆рмо́съ: Ма́нїемъ твои́мъ на земны́й:
Бе́зднꙋ ро́ждшаѧ бл҃гоꙋтро́бїѧ дв҃о, дꙋ́шꙋ мою̀ ѡ҆зарѝ свѣтоно́снымъ твои́мъ сїѧ́нїемъ, ꙗ҆́кѡ да досто́йнѡ воспою̀ твои́хъ чꙋде́съ бе́зднꙋ.
Стрѣло́ю грѣхо́вною ᲂу҆ѧ́звлены на́съ сло́во ви́дѣвъ, ꙗ҆́кѡ бл҃годѣ́тель ᲂу҆ще́дри: ѿню́дꙋже несказа́ннѡ соедини́сѧ всечⷭ҇таѧ, ꙾пло́тїю, и҆́же и҆з̾ тебѐ꙾[[пло́ти ꙗ҆́же и҆з̾ тебѐ]] пребж҃е́ственный.
Бы́сть сме́ртїю ꙗ҆́то є҆стество̀, тлѣ́нное же и҆ ме́ртвенное человѣ́ческое, влⷣчце: ты́ же жи́знь заче́нши, сїѐ ѿ и҆стлѣ́нїѧ къ животꙋ̀ возвела̀ є҆сѝ.
Катава́сїа: Ѿве́рзꙋ ᲂу҆ста̀ моѧ̑:
І҆рмо́съ: Въ нача́лѣ нб҃са̀ всеси́льнымъ сло́вомъ твои́мъ ᲂу҆твержде́й гдⷭ҇и сп҃се, и҆ вседѣ́тельнымъ и҆ бж҃їимъ дх҃омъ всю̀ си́лꙋ и҆́хъ, на недви́жимѣмъ мѧ̀ ка́мени и҆сповѣ́данїѧ твоегѡ̀ ᲂу҆твердѝ.
Ты̀ возше́дъ на дре́во, ѡ҆ на́съ болѣ́знꙋеши во́лею бл҃гоꙋтро́бне сп҃се, и҆ терпи́ши ꙗ҆́звꙋ, примире́нїѧ хода́тайственнꙋ, и҆ сп҃се́нїѧ вѣ̑рнымъ: є҆́юже твоемꙋ̀ млⷭ҇тиве, всѝ примири́хомсѧ роди́телю.
Ты́ мѧ ѡ҆чи́стивъ ѿ ꙗ҆́звы, дꙋше́ю ᲂу҆ѧ́звленнаго ѕмі́евымъ ᲂу҆грызе́нїемъ хрⷭ҇тѐ, и҆ показа́лъ є҆сѝ свѣ́тъ, во тьмѣ̀ дре́вле мнѣ̀ слежа́щꙋ и҆ во тлѣ́нїи: крⷭ҇то́мъ бо во а҆́дъ соше́дъ, менѐ совоскр҃си́лъ є҆сѝ.
Бг҃оро́диченъ: Неискꙋсомꙋ́жныѧ твоеѧ̀ мт҃ре мольба́ми ми́ръ мі́рови пода́ждь, сп҃се, и҆ несказа́нныѧ твоеѧ̀ сла́вы славосло́вѧщыѧ тѧ̀ сподо́би.
И҆́же на крⷭ҇тѣ̀ стрⷭ҇ти претерпѣ́вый, и҆ разбо́йникꙋ ра́й ѿве́рзый, ꙗ҆́кѡ бл҃годѣ́тель и҆ бг҃ъ, ᲂу҆твердѝ мо́й ᲂу҆́мъ въ во́лю твою̀, є҆ди́не чл҃вѣколю́бче.
Воскр҃сы́й тридне́венъ и҆з̾ гро́ба, и҆ живо́тъ мі́рови возсїѧ́вый, ꙗ҆́кѡ жизнода́вецъ и҆ бг҃ъ, ᲂу҆твердѝ мо́й ᲂу҆́мъ въ во́лю твою̀, є҆ди́не чл҃вѣколю́бче.
Бг҃оро́диченъ: Ꙗ҆́кѡ бг҃а безсѣ́меннѡ заче́нши, и҆ ѿ клѧ́твы є҆́ѵꙋ и҆зба́вльши, дв҃о мт҃и марїа́мъ, молѝ ѿ тебѐ вопло́щшагосѧ бг҃а, сп҃стѝ ста́до твоѐ.
Ѕмі́й поползы́й и҆з̾ є҆де́ма, менѐ ѡ҆боже́нїѧ жела́нїемъ прельсти́въ, ве́рже въ зе́млю: но и҆́же млⷭ҇тивъ, и҆ є҆стество́мъ бл҃гоꙋтро́бенъ, ᲂу҆ще́дривъ бг҃осодѣ́ла, во чре́во твоѐ все́льсѧ, и҆ подо́бенъ мнѣ̀ бы́въ мт҃и дв҃о.
Бл҃гослове́нъ пло́дъ твоегѡ̀ чре́ва, дв҃о бцⷣе, всѣ́хъ ра́досте, ра́дость бо всемꙋ̀ мі́рꙋ родила̀ є҆сѝ, и҆ весе́лїе вои́стиннꙋ разгонѧ́ющее печа́ль грѣхо́внꙋю, бг҃оневѣ́сто.
Жи́знь вѣ́чнꙋю, и҆ свѣ́тъ бг҃ороди́тельнице дв҃о, и҆ ми́ръ родила̀ є҆сѝ на́мъ, дре́внихъ человѣ̑къ бра́нь ꙗ҆́же ко ѻ҆ц҃ꙋ̀ и҆ бг҃ꙋ, ᲂу҆кротѣва́ющїй, вѣ́рою и҆ и҆сповѣ́данїемъ бл҃года́ти.
І҆рмо́съ: Ѻ҆́ч҃а нѣ́дра не ѡ҆ста́вль, и҆ соше́дъ на зе́млю хрⷭ҇тѐ бж҃е, та́йнꙋ ᲂу҆слы́шахъ смотре́нїѧ твоегѡ̀, и҆ просла́вихъ тѧ̀ є҆ди́не чл҃вѣколю́бче.
Своѧ̑ плещѝ да́въ, и҆́же ѿ дв҃ы вопло́щьсѧ, на ра̑ны, рабꙋ̀ прегрѣши́вшꙋ, бїе́нъ быва́етъ влⷣка непови́ненъ, разрѣша́ѧ моѧ̑ согрѣшє́нїѧ.
Предстоѧ́въ сꙋди́щꙋ сꙋді́й законопрестꙋ́пныхъ, ꙗ҆́кѡ ѡ҆сꙋди́мый ꙾пови́ненъ быва́етъ꙾[[и҆стѧзꙋ́етсѧ]], и҆ заꙋша́етсѧ бре́нною рꙋко́ю, созда́вый человѣ́ка ꙗ҆́кѡ бг҃ъ, и҆ сꙋдѧ́й пра́веднѡ землѝ.
Бг҃оро́диченъ: Ꙗ҆́кѡ вои́стиннꙋ мт҃и бж҃їѧ, творца̀ твоего̀ и҆ сн҃а молѝ, къ сп҃си́тельномꙋ напра́вити мѧ̀ приста́нищꙋ всенепоро́чнаѧ сла́внагѡ є҆гѡ̀ хотѣ́нїѧ.
Не вѣ́дый грѣха̀, и҆ є҆гѡ̀ ра́ди бы́въ гдⷭ҇и, є҆́же не бы́лъ є҆сѝ воѡбража́ешисѧ, прїе́мъ чꙋ́ждее, да сп҃се́ши мі́ръ, и҆ ᲂу҆бїе́ши прельсти́въ мꙋчи́телѧ.
На крⷭ҇тѣ̀ воздви́женъ бы́лъ є҆сѝ, и҆ пра́ѻтца а҆да́ма разрѣши́лъ є҆сѝ грѣ́хъ [є҆гѡ́же ра́ди твою̀ ᲂу҆слы́шахъ си́лꙋ:] ꙗ҆́кѡ всѧ̑ сп҃стѝ пома̑занныѧ твоѧ̑ прише́лъ є҆сѝ.
Бг҃оро́диченъ: Ты̀ рожде́йсѧ ѿ дв҃ы, ᲂу҆мира́еши, ѡ҆живлѧ́еши же а҆да́ма мы́слїю заблꙋ́ждшаго: и҆́бо ᲂу҆боѧ́сѧ сме́рть крѣ́пости твоеѧ̀, ꙗ҆́кѡ всѧ̑ сп҃стѝ растлѣ́вшыѧсѧ прише́лъ є҆сѝ.
И҆збра́ннаѧ всѧ̀ и҆ до́браѧ, ꙗ҆́вльшисѧ бг҃ꙋ пре́жде созда́нїѧ свѣ́тлостїю всепѣ́таѧ, ꙾свѣтоли́тїемъ твои́мъ꙾[[свѣтоли́тїѧ твоегѡ̀]] пою́щыѧ тѧ̀ просвѣтѝ.
Бг҃а человѣ́кѡмъ родила̀ є҆сѝ чⷭ҇таѧ, воплоще́нна ѿ чⷭ҇тыхъ крове́й твои́хъ, и҆збавлѧ́юща согрѣше́нїй мно́гихъ, любо́вїю сла́вѧщыѧ и҆ почита́ющыѧ тѧ̀ мт҃и дв҃о.
Сщ҃еннодѣ́йствꙋетъ є҆стество̀ слове́сное, возсїѧ́вшемꙋ и҆з̾ тебѐ всепѣ́таѧ, та́инствꙋ неизрече́нномꙋ ржⷭ҇тва̀ твоегѡ̀ наꙋчи́вшеесѧ ны́нѣ, пребл҃же́ннаѧ.
І҆рмо́съ: Но́щь не свѣтла̀ невѣ̑рнымъ хрⷭ҇тѐ, вѣ̑рнымъ же просвѣще́нїе въ сла́дости слове́съ твои́хъ: сегѡ̀ ра́ди къ тебѣ̀ ᲂу҆́тренюю, и҆ воспѣва́ю твоѐ бж҃ество̀.
За твоѧ̑ рабы̑ продае́шисѧ хрⷭ҇тѐ, и҆ по лани́тѣ ᲂу҆даре́нїе терпи́ши, свобо́дѣ хода́тайственно пою́щымъ: къ тебѣ̀ ᲂу҆́тренюю, и҆ воспѣва́ю твоѐ бж҃ество̀.
Бж҃е́ственною твое́ю си́лою хрⷭ҇тѐ, не́мощїю плотско́ю крѣ́пкаго низложи́лъ є҆сѝ, и҆ побѣди́телѧ мѧ̀ сме́рти, сп҃се, воскрⷭ҇нїемъ показа́лъ є҆сѝ.
Бг҃оро́диченъ: Бг҃а родила̀ є҆сѝ мт҃и чⷭ҇таѧ, воплоще́ннаго и҆з̾ тебѐ бг҃олѣ́пнѡ всепѣ́таѧ: поне́же не позна́ла є҆сѝ мꙋ́жеска по́ла, но ѿ ст҃а́гѡ ражда́еши дх҃а.
Є҆гда̀ со беззако́нными вмѣни́всѧ, возне́слсѧ є҆сѝ на ло́бнѣмъ, свѣти̑ла сокрыва́хꙋсѧ, и҆ землѧ̀ колеба́шесѧ, и҆ цр҃ко́внаѧ свѣ́тлость раздра́сѧ, є҆вре́йское ꙗ҆влѧ́ющи ѿпаде́нїе.
Тебѐ разрꙋши́вшаго мꙋчи́телевꙋ всю̀ си́лꙋ крѣ́постїю непостижи́магѡ твоегѡ̀ бж҃ества̀, и҆ мє́ртвыѧ твои́мъ воскрⷭ҇нїемъ воздви́гшаго пѣ́сньми сла́вимъ.
Бг҃оро́диченъ: Мт҃и цр҃ѧ̀ и҆ бг҃а всепѣ́таѧ бцⷣе, вѣ́рою и҆ любо́вїю тѧ̀ пѣ́сньми восхвалѧ́ющымъ при́снѡ, ѡ҆чище́нїе прегрѣше́нїй твои́ми мольба́ми низпослѝ.
Лѣ́ствицꙋ ᲂу҆зрѣ́въ і҆а́кѡвъ, къ высотѣ̀ ᲂу҆твержде́нꙋ, ѡ҆́бразꙋ наꙋчи́сѧ, неискꙋсобра́чнаѧ тебѐ: тобо́ю бо бг҃ъ чл҃вѣ́кѡмъ прїѡбщи́сѧ, всечⷭ҇таѧ влⷣчце.
И҆збавле́нїе вѣ́чное тобо́ю дв҃о, ны́нѣ ѡ҆брѣ́тше ᲂу҆се́рднѡ зове́мъ тѝ: є҆́же ра́дꙋйсѧ бг҃оневѣ́стнаѧ: и҆ твои́мъ свѣ́томъ возра́довавшесѧ всепѣ́таѧ, пѣ́сньми тѧ̀ пое́мъ.
Є҆ди́нꙋ тѧ̀ жени́хъ посредѣ̀ те́рнїѧ крі́нъ дв҃о, ѡ҆брѣ́тъ, чистоты̀ блиста́нїемъ свѣтѧ́щꙋсѧ, и҆ свѣ́томъ дв҃ства всенепоро́чнаѧ, невѣ́стꙋ воспрїѧ́тъ.
І҆рмо́съ: Пла́вающаго въ молвѣ̀ жите́йскихъ попече́нїй, съ корабле́мъ потоплѧ́ема грѣхѝ, и҆ дꙋшетлѣ́нномꙋ ѕвѣ́рю примета́ема, ꙗ҆́кѡ і҆ѡ́на хрⷭ҇тѐ, вопїю́ ти: и҆з̾ смертоно́сныѧ глꙋбины̀ возведи́ мѧ.
Воспомина́хꙋ тѧ̀ заключє́нныѧ во а҆́дѣ дꙋ́шы, и҆ ѡ҆ста́вльшыѧсѧ првⷣныхъ, и҆ ѿ тебѐ сп҃се́нїѧ молѧ́хꙋсѧ: є҆́же крⷭ҇то́мъ хрⷭ҇тѐ, по́далъ є҆сѝ преиспѡ́днимъ, прише́дъ ꙗ҆́кѡ бл҃гоꙋтро́бенъ.
Ко ѡ҆дꙋшевле́нномꙋ твоемꙋ̀ и҆ нерꙋкотворе́нномꙋ хра́мꙋ, разрꙋше́нꙋ бы́вшꙋ страда́ньми, воззрѣ́ти па́ки ли́къ а҆пⷭ҇льскїй ѿча́ѧсѧ: но па́че наде́жды покло́ньсѧ, воскре́сша повсю́дꙋ проповѣ́да.
Бг҃оро́диченъ: Неизрече́ннагѡ ржⷭ҇тва̀ твоегѡ̀ всенепоро́чнагѡ ѡ҆́бразъ, дв҃о бг҃оневѣ́стнаѧ, и҆́же на́съ ра́ди, кто̀ ѿ человѣ̑къ сказа́ти возмо́жетъ; ꙗ҆́кѡ бг҃ъ неѡпи́саннѣ, сло́во соедини́всѧ тебѣ̀, пло́ть и҆з̾ тебѐ бы́сть.
На крⷭ҇тѣ̀ возне́ссѧ сп҃се во́лею, вра́жїю плѣни́лъ є҆сѝ держа́вꙋ, на се́мъ пригвозди́въ грѣхо́вное бл҃же, рꙋкописа́нїе.
И҆з̾ ме́ртвыхъ воскр҃съ сп҃се вла́стїю, совоздви́глъ є҆сѝ человѣ́ческїй ро́дъ, живо́тъ и҆ нетлѣ́нїе дарова́вый на́мъ, ꙗ҆́кѡ чл҃вѣколю́бецъ.
Бг҃оро́диченъ: Є҆го́же родила̀ є҆сѝ бцⷣе несказа́ннѡ бг҃а на́шего, молѧ́щи не преста́й, и҆зба́витисѧ ѿ бѣ́дъ пою́щымъ тѧ̀, чⷭ҇таѧ приснодв҃о.
Зако́ннїи тѧ̀ ѡ҆́бразы, и҆ прⷪ҇ро́чєскаѧ прⷪ҇речє́нїѧ ꙗ҆́вѣ предвозвѣща́хꙋ, хотѧ́щꙋю роди́ти бл҃годѣ́телѧ чⷭ҇таѧ всеѧ̀ тва́ри, многоча́стнѣ и҆ многоѡбра́знѣ бл҃годѣ́йствовавшаго вѣ́рнѡ воспѣва́ющихъ тѧ̀.
Оу҆стра́ншагосѧ дре́вле навѣ́томъ человѣкоꙋбі́йцы, а҆да́ма первозда́ннаго ра́йскїѧ бж҃е́ственныѧ сла́дости, неискꙋсобра́чнаѧ па́ки возвела̀ є҆сѝ, ро́ждши и҆́же ѿ престꙋпле́нїѧ на́съ и҆зба́вившаго.
И҆́же хотѣ́нїемъ бж҃е́ственнымъ, содѣ́тельною же си́лою всѐ составле́й ѿ не сꙋ́щихъ, и҆з̾ чре́ва твоегѡ̀ чⷭ҇таѧ, произы́де, и҆ сꙋ́щыѧ во тьмѣ̀ сме́ртнѣй, бг҃онача́льнѣйшими мо́лнїѧми ѡ҆сїѧ̀.
Конда́къ, гла́съ з҃: Не ктомꙋ̀ держа́ва сме́ртнаѧ возмо́жетъ держа́ти человѣ́ки: хрⷭ҇то́съ бо сни́де сокрꙋша́ѧ и҆ разорѧ́ѧ си̑лы є҆ѧ̀. свѧзꙋ́емь быва́етъ а҆́дъ, прⷪ҇ро́цы согла́снѡ ра́дꙋютсѧ: предста̀, глаго́люще, сп҃съ сꙋ́щымъ въ вѣ́рѣ, и҆зыди́те вѣ́рнїи въ воскрⷭ҇нїе.
І҆́косъ: Вострепета́ша до́лѣ преиспѡ́днѧѧ дне́сь, а҆́дъ и҆ сме́рть є҆ди́нагѡ ѿ трⷪ҇цы: землѧ̀ поколеба́сѧ, вра́тницы же а҆́довы ви́дѣвше тѧ̀ ᲂу҆жасо́шасѧ: всѧ́ же тва́рь со прⷪ҇ро́ки ра́дꙋющисѧ пое́тъ тебѣ̀ побѣ́днꙋю пѣ́снь, и҆зба́вителю бг҃ꙋ на́шемꙋ, разрꙋши́вшемꙋ ны́нѣ сме́ртнꙋю си́лꙋ. да воскли́кнемъ и҆ возопїи́мъ ко а҆да́мꙋ, и҆ къ сꙋ́щымъ и҆з̾ а҆да́ма: дре́во сего̀ па́ки введѐ. и҆зыди́те вѣ́рнїи въ воскрⷭ҇нїе.
І҆рмо́съ: Пе́щь ѻ҆́троцы ѻ҆гнепа́льнꙋ дре́вле росоточа́щꙋ показа́ша, є҆ди́наго бг҃а воспѣва́юще, и҆ глаго́люще: превозноси́мый ѻ҆тцє́въ бг҃ъ, и҆ препросла́вленъ.
Дре́вомъ ᲂу҆мерщвлѧ́етсѧ а҆да́мъ, во́лею преслꙋша́нїе содѣ́лавъ: послꙋша́нїемъ же хрⷭ҇то́вымъ па́ки ѡ҆бновлѧ́емь є҆́сть. мене́ бо ра́ди распина́етсѧ сн҃ъ бж҃їй, препросла́вленный.
Тебѐ воскре́сшаго хрⷭ҇тѐ, и҆з̾ гро́ба, тва́рь всѧ̀ воспѣ̀: ты́ бо жи́знь сꙋ́щымъ во а҆́дѣ процвѣ́лъ є҆сѝ, мє́ртвымъ воскрⷭ҇нїе, и҆̀же во тьмѣ̀, свѣ́тъ препросла́вленный.
Бг҃оро́диченъ: Ра́дꙋйсѧ дщѝ а҆да́ма тлѣ́ннагѡ. ра́дꙋйсѧ є҆ди́на бг҃оневѣ́сто. ра́дꙋйсѧ, є҆́юже тлѧ̀ и҆згна́на бы́сть, ꙗ҆́же бг҃а ро́ждши: є҆го́же молѝ чⷭ҇таѧ, сп҃сти́сѧ всѣ̑мъ на́мъ.
И҆́же на дре́вѣ крⷭ҇тнѣмъ грѣхо́вное жа́ло притꙋпи́въ, и҆ а҆да́мова престꙋпле́нїѧ рꙋкописа́нїе разрꙋши́въ копїе́мъ ребра̀ твоегѡ̀, бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
И҆́же въ ребро̀ прободе́нъ бы́въ, и҆ кропле́ньми кро́ве бж҃е́ственныѧ зе́млю ѡ҆чи́стивъ, кровьмѝ і҆дѡлобѣ́сїѧ ѡ҆скверне́ннꙋю, бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Бг҃оро́диченъ: Є҆́же пре́жде сл҃нца просвѣще́нїѧ, возсїѧ́вши мі́рови бг҃ороди́тельнице хрⷭ҇та̀, ѿ тьмы̀ и҆зба́вльшаго, и҆ просвѣща́юща всѧ̑ бг҃овѣ́дѣнїемъ: бл҃гослове́нъ є҆сѝ зовꙋ́щыѧ, бж҃е ѻ҆тє́цъ на́шихъ.
Преиспещре́нꙋ, позлаще́нꙋ ᲂу҆́тварь тѧ̀ и҆мꙋ́щꙋ возлюбѝ созда́тель тво́й дв҃о, и҆ гдⷭ҇ь: превозноси́мый ѻ҆тцє́въ бг҃ъ и҆ препросла́вленъ.
Ѡ҆чища́етсѧ ѻ҆трокови́це, ᲂу҆́гль дре́вле и҆са́їа прїе́мъ: знамена́тельнѣ твоѐ ржⷭ҇тво̀ ви́дѣвъ, превозноси́маго ѻ҆тцє́въ бг҃а, и҆ препросла́влена.
Ѡ҆́бразы знамена́тельнаѧ дре́вле бж҃е́ственнагѡ твоегѡ̀ ржⷭ҇тва̀, бж҃е́ственнїи прⷪ҇ро́цы зрѧ́ще, ра́достнѡ воспѣва́юще взыва́хꙋ: превозноси́мый ѻ҆тцє́въ бг҃ъ, и҆ препросла́вленъ.
І҆рмо́съ: Неѡпа́льнаѧ ѻ҆гню̀ въ сїна́и прича́щшаѧсѧ кꙋпина̀, бг҃а ꙗ҆вѝ медленоѧзы́чномꙋ и҆ гꙋгни́вомꙋ мѡѷсе́ови, и҆ ѻ҆́троки ре́вность бж҃їѧ трѝ непребори́мыѧ во ѻ҆гнѝ пѣвцы̀ показа̀: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те во всѧ̑ вѣ́ки.
Пречⷭ҇тый а҆́гнецъ слове́сный за мі́ръ закла́нъ бы́въ, преста́ви ꙗ҆̀же по зако́нꙋ приноси̑маѧ, ѡ҆чи́стивъ сего̀ кромѣ̀ прегрѣше́нїй ꙗ҆́кѡ бг҃ъ, при́снѡ зовꙋ́ща: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те во всѧ̑ вѣ́ки.
Нетлѣ́нна не сꙋ́щи пре́жде стрⷭ҇ти, воспрїѧ́таѧ ѿ созда́телѧ пло́ть на́ша, по стрⷭ҇ти и҆ воскрⷭ҇нїи неприкоснове́нна тлѣ́нїю ᲂу҆стро́исѧ, и҆ смє́ртныѧ ѡ҆бновлѧ́етъ, зовꙋ́щыѧ: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те во всѧ̑ вѣ́ки.
Бг҃оро́диченъ: Твоѐ чисто́тное и҆ всенепоро́чное, дв҃о, скве́рное и҆ ме́рзское вселе́нныѧ ѡ҆чи́сти, и҆ была̀ є҆сѝ на́шегѡ примире́нїѧ къ бг҃ꙋ вина̀, пречⷭ҇таѧ: тѣ́мже тѧ̀ дв҃о всѧ̑ дѣла̀ бл҃гослови́мъ, и҆ превозно́симъ во всѧ̑ вѣ́ки.
Претерпѣ́вшаго стра̑сти во́лею, и҆ на крⷭ҇тѣ̀ пригвожде́на хотѣ́нїемъ, и҆ разрꙋ́шшаго си̑лы а҆́довы, по́йте сщ҃е́нницы, лю́дїе превозноси́те во всѧ̑ вѣ́ки.
Оу҆праздни́вшаго сме́рти держа́вꙋ, и҆ ѿ гро́ба воскрⷭ҇шаго со сла́вою, и҆ сп҃сшаго чл҃вѣ́ческїй ро́дъ, по́йте сщ҃е́нницы, лю́дїе превозноси́те во всѧ̑ вѣ́ки.
Бг҃оро́диченъ: Є҆ди́наго бл҃гоꙋтро́бнаго, превѣ́чнаго сло́ва, напослѣ́докъ ѿ дв҃ы рожде́на, и҆ разрѣ́шшаго дре́внюю клѧ́твꙋ, по́йте сщ҃е́нницы, лю́дїе превозноси́те во всѧ̑ вѣ́ки.
Свѣ́томъ ржⷭ҇тва̀ твоегѡ̀, страннолѣ́пнѡ вселе́ннꙋю просвѣти́ла є҆сѝ бг҃ороди́тельнице, сꙋ́ща бо вои́стиннꙋ бг҃а на ѡ҆б̾ѧ́тїѧхъ но́сиши твои́хъ, просвѣща́юща вѣ̑рныѧ при́снѡ зовꙋ́щыѧ: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те во всѧ̑ вѣ́ки.
Пое́мъ чⷭ҇таѧ, бл҃гоче́стнѡ твоѐ чре́во, бг҃а вмѣсти́вшее несказа́ннѡ воплоща́ема, да́вшаго всѣ́мъ вѣ̑рнымъ бг҃оразꙋ́мїѧ просвѣще́нїе, при́снѡ зовꙋ́щымъ: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те во всѧ̑ вѣ́ки.
Свѣ́та твоегѡ̀ блиста́ньми, тебѐ пою́щыѧ свѣтови́дны содѣ́лала є҆сѝ, свѣтороди́тельнице бцⷣе чⷭ҇таѧ: свѣ́та бо ꙗ҆ви́ласѧ є҆сѝ селе́нїе, ᲂу҆ѧснѧ́ющи свѣ́томъ зовꙋ́щыѧ: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те во всѧ̑ вѣ́ки.
Та́же, пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а: съ припѣ́вомъ: Чⷭ҇тнѣ́йшꙋю херꙋві̑мъ:
І҆рмо́съ: Нетлѣ́нїѧ и҆скꙋше́нїемъ ро́ждшаѧ, и҆ всехитрецꙋ̀ сло́вꙋ пло́ть взаимода́вшаѧ, мт҃и неискꙋсомꙋ́жнаѧ дв҃о бцⷣе: прїѧ́телище нестерпи́магѡ, село̀ невмѣсти́магѡ зижди́телѧ твоегѡ̀, тѧ̀ велича́емъ.
И҆̀же бж҃ествꙋ̀ стра́сть прилага́ющїи, заꙋсти́тесѧ всѝ чꙋждемꙋ́дреннїи: гдⷭ҇а бо сла́вы пло́тїю распѧ́та, не распѧ́та же є҆стество́мъ бж҃е́ственнымъ, ꙗ҆́кѡ во двою̀ є҆стєствꙋ̀ є҆ди́наго велича́емъ.
И҆̀же тѣлесє́мъ воста́нїю невѣ́рꙋющїи, ко хрⷭ҇то́вꙋ ше́дше гро́бꙋ, наꙋчи́тесѧ: ꙗ҆́кѡ ᲂу҆мерщвле́на бы́сть, и҆ воскр҃се па́ки пло́ть жизнода́вца, во ᲂу҆вѣре́нїе послѣ́днѧгѡ воскрⷭ҇нїѧ, на не́же ᲂу҆пова́емъ.
Трⷪ҇ченъ: Не бжⷭ҇твъ трⷪ҇цꙋ, но ѵ҆поста́сей, нижѐ є҆ди́ницꙋ ли́цъ, но бжⷭ҇тва̀ чтꙋ́ще, ссѣца́емъ же сїю̀ дѣлѧ́щихъ: слива́емъ же па́ки, слїѧ́нїе дерза́ющихъ на сїю̀, ю҆́же велича́емъ.
Свѣ́тъ ѿ свѣ́та, ѻ҆́ч҃ее сїѧ́нїе сла́вы безлѣ́тнѡ ѡ҆сїѧ́вый, ꙗ҆́коже во тьмѣ̀ чл҃вѣ́ческомꙋ житїю̀ хрⷭ҇то́съ возсїѧ̀, и҆ гонѧ́щꙋю прогна̀ тьмꙋ̀: є҆го́же непреста́ннѡ вѣ́рнїи велича́емъ.
Стра̑сти плѡтскі́ѧ, и҆ крѣ́пость бж҃ества̀, во хрⷭ҇тѣ̀ ви́дѧще, мꙋ́дрствꙋющїи є҆ди́но сло́жное є҆стество̀, да посра́мѧтсѧ: то́й бо ꙗ҆́кѡ человѣ́къ ᲂу҆́бѡ ᲂу҆мира́етъ, ꙗ҆́коже всегѡ̀ содѣ́тель востае́тъ.
Мѵ́ро мє́ртвымъ, живо́мꙋ же пѣ́нїе: сле́зы ᲂу҆мира́ющымъ, животꙋ́ же всѣ́хъ пѣ́снь жєны̀ принеси́те, и҆́же воста́нїѧ проповѣ́дникъ вопїѧ́ше, бл҃говѣствꙋ́ѧ хрⷭ҇то́во воскрⷭ҇нїе.
Бг҃оро́диченъ: Бг҃а ра́звѣ тебѐ и҆но́гѡ не зна́ю, цр҃ковь вопїе́тъ тѝ: ѿ невѣ́рныхъ мѧ̀ ꙗ҆зы̑къ невѣ́стꙋ свою̀ и҆збра́вый, да́ждь ᲂу҆́бѡ сло́ве, вѣ̑рнымъ сп҃се́нїе, ро́ждшїѧ тѧ̀ мл҃твами, ꙗ҆́кѡ бл҃гоꙋтро́бенъ.
Ра́дости на́мъ вѣ́чныѧ хода́таица и҆ весе́лїѧ ꙗ҆ви́ласѧ є҆сѝ приснодв҃о ѻ҆трокови́це, и҆зба́вителѧ ро́ждши, и҆́стиною и҆ дх҃омъ бж҃е́ственнымъ того̀ чтꙋ́щихъ, ꙗ҆́кѡ бг҃а и҆збавлѧ́ющаго.
Поѧ̀ дв҃дъ, тво́й пра́ѻтєцъ, пречⷭ҇таѧ, тѧ̀ ковче́гъ и҆менꙋ́етъ ст҃ы́ни бж҃е́ственныѧ, преесте́ственнѣ бг҃а вмѣсти́вшꙋю, во ѻ҆ч҃ескихъ сѣдѧ́щаго нѣ́дрѣхъ, є҆го́же непреста́ннѡ вѣ́рнїи велича́емъ.
Ꙗ҆́кѡ вои́стиннꙋ превы́шши є҆сѝ всеѧ̀ тва́ри ѻ҆трокови́це: зижди́телѧ во всѣ́хъ тѣле́снѣ на́мъ родила̀ є҆сѝ. тѣ́мже ꙗ҆́кѡ мт҃и є҆ди́нагѡ влⷣки, но́сиши проти́вꙋ всѣ́хъ нача́льнѣ побѣжде́нїе.
По катава́сїи, є҆ктенїа̀ ма́лаѧ. Та́же, Ст҃ъ гдⷭ҇ь бг҃ъ на́шъ. Посе́мъ є҆ѯапостїла́рїй ᲂу҆́треннїй.
На хвали́техъ стїхи̑ры воскрⷭ҇ны. Гла́съ з҃:
Сті́хъ: Сотвори́ти въ ни́хъ сꙋ́дъ напи́санъ: сла́ва сїѧ̀ бꙋ́детъ всѣ̑мъ прпⷣбнымъ є҆гѡ̀.
Воскр҃се хрⷭ҇то́съ и҆з̾ ме́ртвыхъ, разрꙋ́шъ смє́ртныѧ ᲂу҆́зы: бл҃говѣстѝ землѐ, ра́дость ве́лїю, по́йте нб҃са̀ бж҃їю сла́вꙋ.
Сті́хъ: Хвали́те бг҃а во ст҃ы́хъ є҆гѡ̀, хвали́те є҆го̀ во ᲂу҆тверже́нїи си́лы є҆гѡ̀.
Воскрⷭ҇нїе хрⷭ҇то́во ви́дѣвше, поклони́мсѧ ст҃о́мꙋ гдⷭ҇ꙋ і҆и҃сꙋ: є҆ди́номꙋ безгрѣ́шномꙋ.
Сті́хъ: Хвали́те є҆го̀ на си́лахъ є҆гѡ̀, хвали́те є҆го̀ по мно́жествꙋ вели́чествїѧ є҆гѡ̀.
Хрⷭ҇то́вꙋ воскрⷭ҇нїю кла́нѧющесѧ не преста́емъ: то́й бо сп҃слъ є҆́сть на́съ ѿ беззако́нїй на́шихъ, ст҃ы́й гдⷭ҇ь і҆и҃съ, ꙗ҆вле́й воскрⷭ҇нїе.
Сті́хъ: Хвали́те є҆го̀ во гла́сѣ трꙋ́бнѣмъ, хвали́те є҆го̀ во ѱалти́ри и҆ гꙋ́слехъ.
Что̀ возда́мы гдⷭ҇еви ѡ҆ всѣ́хъ, ꙗ҆̀же воздадѐ на́мъ; на́съ ра́ди бг҃ъ въ человѣ́цѣхъ, за и҆стлѣ́вшее є҆стество̀ сло́во пло́ть бы́сть, и҆ всели́сѧ въ ны̀, къ неблагода̑рнымъ, бл҃годѣ́тель: къ плѣ́нникѡмъ, свободи́тель: ко и҆̀же во тьмѣ̀ сѣдѧ́щымъ, сл҃нце пра́вды: на крⷭ҇тѣ̀, безстра́стный: во а҆́дѣ, свѣ́тъ: въ сме́рти, живо́тъ: воскрⷭ҇нїе, па́дшихъ ра́ди. къ немꙋ́же возопїи́мъ: бж҃е на́шъ, сла́ва тебѣ̀.
И҆́ны стїхи̑ры а҆натѡ́лїевы, гла́съ то́йже.
Сті́хъ: Хвали́те є҆го̀ въ тѷмпа́нѣ и҆ ли́цѣ, хвали́те є҆го̀ во стрꙋ́нахъ и҆ ѻ҆рга́нѣ.
Врата̀ а҆́дова сокрꙋши́лъ є҆сѝ гдⷭ҇и, и҆ сме́ртнꙋю держа́вꙋ ᲂу҆праздни́лъ є҆сѝ крѣ́пкою си́лою твое́ю, и҆ совоздви́глъ є҆сѝ мє́ртвыѧ, и҆̀же ѿ вѣ́ка во тьмѣ̀ спѧ́щыѧ, бж҃е́ственнымъ и҆ сла́внымъ воскрⷭ҇нїемъ твои́мъ, ꙗ҆́кѡ цр҃ь всѣ́хъ и҆ бг҃ъ всеси́ленъ.
Сті́хъ: Хвали́те є҆го̀ въ кѷмва́лѣхъ доброгла́сныхъ, хвали́те є҆го̀ въ кѷмва́лѣхъ восклица́нїѧ: всѧ́кое дыха́нїе да хва́литъ гдⷭ҇а.
Прїиди́те возра́дꙋемсѧ гдⷭ҇еви, и҆ возвесели́мсѧ ѡ҆ воскрⷭ҇нїи є҆гѡ̀, ꙗ҆́кѡ совоздви́же мє́ртвыѧ ѿ а҆́довыхъ нерѣши́мыхъ ᲂу҆́зъ: и҆ дарова̀ мі́рови ꙗ҆́кѡ бг҃ъ жи́знь вѣ́чнꙋю, и҆ ве́лїю млⷭ҇ть.
Сті́хъ: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀.
Блиста́ѧйсѧ а҆́гг҃лъ, на ка́мени сѣдѧ́ше живопрїе́мнагѡ гро́ба, и҆ жена́мъ мѷроно́сицамъ бл҃говѣствова́ше, глаго́лѧ: воскр҃се гдⷭ҇ь, ꙗ҆́коже пре́жде речѐ ва́мъ, возвѣсти́те ᲂу҆ч҃нкѡ́мъ є҆гѡ̀, ꙗ҆́кѡ предварѧ́етъ вы̀ въ галїле́и: мі́рови же подае́тъ жи́знь вѣ́чнꙋю, и҆ ве́лїю млⷭ҇ть.
Сті́хъ: И҆сповѣ́мсѧ тебѣ̀ гдⷭ҇и всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.
Почто̀ небрего́ма сотвори́сте ка́мене краеꙋго́льнагѡ. ѽ пребеззако́ннїи і҆ꙋдє́и; сѐ то́й є҆́сть, є҆го́же положѝ бг҃ъ въ сїѡ́нѣ: и҆́же и҆з̾ ка́мене и҆сточи́вый въ пꙋсты́ни во́дꙋ, и҆ на́мъ и҆сточа́ѧй ѿ ре́бръ свои́хъ безсме́ртїе. се́й є҆́сть ка́мень, и҆́же ѿ горы̀ дв҃и́ческїѧ ѿсѣ́ксѧ без̾ хотѣ́нїѧ мꙋ́жеска: сн҃ъ чл҃вѣ́чь грѧды́й на ѻ҆́блацѣхъ нбⷭ҇ныхъ, къ ве́тхомꙋ де́ньми, ꙗ҆́коже речѐ данїи́лъ, и҆ вѣ́чно є҆гѡ̀ црⷭ҇тво.
Сла́ва, стїхи́ра є҆ѵⷢ҇льскаѧ. И҆ ны́нѣ, бг҃оро́диченъ: Пребл҃гослове́нна є҆сѝ: Славосло́вїе вели́кое. Та́же тропа́рь воскрⷭ҇нъ:
Дне́сь сп҃се́нїе мі́рꙋ бы́сть, пое́мъ воскр҃сшемꙋ и҆з̾ гро́ба, и҆ нача́льникꙋ жи́зни на́шеѧ: разрꙋши́въ бо сме́ртїю сме́рть, побѣ́дꙋ дадѐ на́мъ, и҆ ве́лїю млⷭ҇ть.
И҆ є҆ктенїѝ, и҆ ѿпꙋ́стъ.
На лїтꙋргі́и бл҃жє́нна, гла́съ з҃:
Красе́нъ бѣ̀ и҆ до́бръ въ снѣ́дь, и҆́же менѐ ᲂу҆мертви́вый пло́дъ: хрⷭ҇то́съ є҆́сть дре́во живо́тное, ѿ негѡ́же ꙗ҆ды́й не ᲂу҆мира́ю, но вопїю̀ съ разбо́йникомъ: помѧни́ мѧ гдⷭ҇и, во црⷭ҇твїи твое́мъ.
Сті́хъ: Бл҃же́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ.
На крⷭ҇тъ возне́ссѧ ще́дре, а҆да́мово рꙋкописа́нїе дре́внѧгѡ грѣха̀ загла́дилъ є҆сѝ, и҆ сп҃слъ є҆сѝ ѿ пре́лести ве́сь ро́дъ человѣ́ческїй. тѣ́мже воспѣва́емъ тѧ̀ бл҃годѣ́телю гдⷭ҇и.
Сті́хъ: Бл҃же́ни миротво́рцы, ꙗ҆́кѡ ті́и сы́нове бж҃їи нарекꙋ́тсѧ.
Пригвозди́лъ є҆сѝ на крⷭ҇тѣ̀ ще́дре, грѣхѝ на́шѧ хрⷭ҇тѐ, и҆ твое́ю сме́ртїю сме́рть ᲂу҆мертви́лъ є҆сѝ воздви́гнꙋвый ᲂу҆ме́ршыѧ и҆з̾ ме́ртвыхъ: тѣ́мже покланѧ́емсѧ твоемꙋ̀ ст҃о́мꙋ воскрⷭ҇нїю.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
И҆злїѧ̀ ꙗ҆́дъ ѕмі́й въ слꙋ́хи є҆́ѵины и҆ногда̀: хрⷭ҇то́съ же на дре́вѣ крⷭ҇тнѣмъ и҆сточи́лъ є҆́сть мі́рови жи́зни сла́дость. тѣ́мже взыва́емъ: помѧнѝ на́съ гдⷭ҇и, во црⷭ҇твїи твое́мъ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
Во гро́бѣ ꙗ҆́кѡ сме́ртенъ положе́нъ бы́лъ є҆сѝ, животѐ всѣ́хъ хрⷭ҇тѐ: и҆ верєѝ а҆́дѡвы сломи́лъ є҆сѝ: и҆ воскр҃съ во сла́вѣ тридне́венъ ꙗ҆́кѡ си́ленъ, всѣ́хъ просвѣти́лъ є҆сѝ: сла́ва твоемꙋ̀ воста́нїю.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Гдⷭ҇ь воскр҃съ тридне́венъ и҆з̾ ме́ртвыхъ, дарова̀ ми́ръ сво́й ᲂу҆ч҃нкѡ́мъ, и҆ си́хъ бл҃гослови́въ посла̀ ре́къ: всѧ̑ приведи́те во црⷭ҇твїе моѐ.
Сла́ва, трⷪ҇ченъ: Свѣ́тъ ѻ҆ц҃ъ, свѣ́тъ сн҃ъ и҆ сло́во, свѣ́тъ дх҃ъ ст҃ы́й: но є҆ди́нъ свѣ́тъ трѝ, є҆ди́нъ бо бг҃ъ въ трїе́хъ ᲂу҆́бѡ ли́цѣхъ, є҆ди́нѣмъ же є҆стествѣ̀ и҆ нача́лѣ, несѣко́мъ и҆ неслїѧ́нъ, сы́й превѣ́чный.
И҆ ны́нѣ, бг҃оро́диченъ: Родила̀ є҆сѝ сн҃а и҆ сло́во ѻ҆́ч҃ее, пло́тїю на́съ ра́ди, ꙗ҆́коже вѣ́сть бцⷣе, са́мъ. тѣ́мже дв҃о мт҃и, ѡ҆боже́ни бы́вше тобо́ю, ра́дꙋйсѧ, тебѣ̀ зове́мъ, хрⷭ҇тїа́нѡмъ ᲂу҆пова́нїе.
Прокі́менъ, гла́съ з҃: Гдⷭ҇ь крѣ́пость лю́демъ свои̑мъ да́стъ: гдⷭ҇ь бл҃гослови́тъ лю́ди своѧ̑ ми́ромъ: Сті́хъ: Принеси́те гдⷭ҇еви сн҃ове бж҃їи, принеси́те гдⷭ҇еви сы́ны ѻ҆́вни. А҆ллилꙋ́їа: Бл҃го є҆́сть и҆сповѣ́датисѧ гдⷭ҇еви, и҆ пѣ́ти и҆́мени твоемꙋ̀ вы́шнїй. Сті́хъ: Возвѣща́ти заꙋ́тра млⷭ҇ть твою̀, и҆ и҆́стинꙋ твою̀ на всѧ́кꙋ но́щь.