на Гдⷭ҇и воззва́хъ, стїхи̑ры покаѧ́нны. Гла́съ з҃:
Подо́бенъ: Дне́сь бди́тъ бцⷣа:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Возведѝ твоѝ ѻ҆́чи, ѽ дꙋшѐ моѧ̀! и҆ на бж҃їе воззрѝ смотре́нїе и҆ бл҃гоꙋтро́бїе, ка́кѡ нб҃са̀ преклони́въ на зе́млю сни́де, да вознесе́тъ тебѐ ѿ ѻ҆каѧ́нства твои́хъ страсте́й, и҆ поста́витъ тѧ̀ на ка́мени вѣ́ры. ѽ ди́вство стра́шнагѡ чꙋдесѐ! сла́ва и҆стоща́нїю твоемꙋ̀ чл҃вѣколю́бче.
Сті́хъ: И҆́мене ра́ди твоегѡ̀, потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Ви́ждь твоѧ̑ пребеззакѡ́ннаѧ дѣла̀, ѽ дꙋшѐ моѧ̀! и҆ почꙋди́сѧ, ка́кѡ тѧ̀ землѧ̀ но́ситъ; ка́кѡ не разсѣ́десѧ; ка́кѡ ди́вїи ѕвѣ́рїе не снѣда́ютъ тебѐ; ка́кѡ же и҆ сл҃нце незаходи́мое сїѧ́ти тебѣ̀ не преста̀; воста́ни, пока́йсѧ, и҆ возопі́й ко гдⷭ҇ꙋ: согрѣши́хъ тѝ: согрѣши́хъ, поми́лꙋй мѧ̀.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.
И҆мꙋ́ще на тѧ̀ ᲂу҆пова́нїе всеси́льне гдⷭ҇и, тебѐ мо́лимъ, всѧ́кихъ бѣ́дъ, страсте́й же и҆ мѧте́жа на́мъ и҆зба́витисѧ: ꙗ҆́кѡ да жи́знь на́шꙋ ми́рнѡ пре́йдемъ, и҆ въ чистотѣ̀ пожи́вше ѡ҆брѧ́щемъ въ де́нь сꙋ́дный, бл҃гопремѣ́нна тебѐ влⷣкꙋ и҆ млⷭ҇тива.
Та́же мине́и стїхи̑ры ст҃о́мꙋ. А҆́ще ли нѣ́сть мине́и: и҆́ны стїхи̑ры безплѡ́тнымъ ст҃ы̑мъ а҆́гг҃лѡмъ, гла́съ з҃:
Подо́бенъ: Не ктомꙋ̀ возбранѧ́еми:
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе: и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Зарѧ́ми просвѣща́еми трⷪ҇цы, и҆̀же вѣ́рою ва́съ пою́щыѧ, просвѣти́те а҆рха́гг҃ли.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Прича́стїемъ свѣ́ти вторі́и, показꙋ́еми свѣ́ти соверше́нни, предста́ти на́мъ свѣ́тꙋ пе́рвомꙋ моли́тесѧ.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Кро́вомъ кри́лъ ва́шихъ сохранѧ́йте вѣ̑рныѧ всѧ̑ ѿ дꙋхѡ́въ лꙋка́вствїѧ, тьмꙋ̀ разорѧ́юще.
Сла́ва, и҆ ны́нѣ, бг҃оро́диченъ: Всѝ пѣ́сньми со а҆́гг҃лы бцⷣѣ возопїи́мъ, ꙗ҆́кѡ сп҃са мі́рꙋ родила̀ є҆́сть, по ржⷭ҇твѣ́ же па́ки пребы́сть дв҃а, и҆ мі́ръ и҆зба́ви ѿ пре́лести ржⷭ҇тво́мъ свои́мъ, и҆ пи́щꙋ подадѐ на́мъ неиждива́емꙋю, млеко́мъ пита́ющаѧ свободи́телѧ дꙋ́шъ на́шихъ.
Та́же, Свѣ́те ти́хїй: Прокі́менъ днѐ: и҆ Сподо́би гдⷭ҇и, въ ве́черъ се́й:
На стїхо́внѣ стїхи̑ры покаѧ́нны, гла́съ з҃:
Ꙗ҆́кѡ блꙋ́дный сы́нъ прїидо́хъ а҆́зъ ще́дре, прїими́ мѧ припа́дающаго, ꙗ҆́кѡ є҆ди́наго ѿ нає́мникъ твои́хъ бж҃е и҆ поми́лꙋй мѧ̀ чл҃вѣколю́бче.
Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
Ꙗ҆́кѡ впады́й въ разбо́йники и҆ ᲂу҆ѧ́звленъ: та́кѡ и҆ а҆́зъ впадо́хъ ѿ мно́гихъ грѣхѡ́въ, и҆ ᲂу҆ѧ́звлена мѝ є҆́сть дꙋша̀. къ комꙋ̀ прибѣ́гнꙋ пови́нный а҆́зъ; то́кмѡ къ тебѣ̀ бл҃гоꙋтро́бномꙋ дꙋша́мъ врачꙋ̀: и҆зле́й на мѧ̀ бж҃е, вели́кꙋю твою̀ млⷭ҇ть.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ и҆ ᲂу҆ничиже́нїѧ го́рдыхъ.
Мч҃нченъ: Сла́ва тебѣ̀ хрⷭ҇тѐ бж҃е, а҆пⷭ҇толѡвъ похвало̀, и҆ мч҃нкѡвъ весе́лїе: и҆́хже про́повѣдь трⷪ҇ца є҆диносꙋ́щнаѧ.
Сла́ва, и҆ ны́нѣ, бг҃оро́диченъ: Є҆́же ра́дꙋйсѧ, тебѣ̀ зове́мъ со а҆́гг҃ломъ, бг҃оневѣ́сто, черто́гъ и҆ две́рь, и҆ прⷭ҇то́лъ ѻ҆́гненный нарица́юще тебѐ, и҆ несѣко́мꙋю го́рꙋ, и҆ кꙋпинꙋ̀ неѡпали́мꙋю.
Та́же, Ны́нѣ ѿпꙋща́еши: Трист҃о́е. По Ѻ҆́ч҃е на́шъ: тропарѝ, є҆ктенїа̀, и҆ ѿпꙋ́стъ.
канѡ́нъ моле́бный прест҃ѣ́й бцⷣѣ. Гла́съ з҃:
І҆рмо́съ: Ма́нїемъ твои́мъ на земны́й ѡ҆́бразъ преложи́сѧ, пре́жде ᲂу҆доборазлива́емое водно́е є҆стество̀ гдⷭ҇и: тѣ́мже немо́креннѡ пѣшеше́ствовавъ і҆и҃ль, пое́тъ тебѣ̀ пѣ́снь побѣ́днꙋю.
Чи́нове а҆́гг҃лъ ꙗ҆́кѡ вои́стиннꙋ и҆ врѣснотꙋ̀ мт҃рь тѧ̀ бг҃а всѣ́хъ чтꙋ́тъ пречⷭ҇таѧ: но и҆ ны́нѣ ѿ бре́нныхъ ᲂу҆сте́нъ мои́хъ прїимѝ пѣ́снь моле́бнꙋю.
Оу҆мертвѝ пло́ти моеѧ̀ и҆ є҆щѐ живꙋ́щꙋю ѕло́бꙋ, жи́знь и҆́стиннꙋю ро́ждшаѧ, пречⷭ҇таѧ: и҆ страсте́й и҆ прегрѣше́нїй пода́ждь чⷭ҇таѧ, твоемꙋ̀ рабꙋ̀ и҆збавле́нїе.
Сла́ва: Со́лнце ѿ со́лнца, безлѣ́тное сло́во непости́жнѡ возсїѧ́вшее, во вре́мѧ возсїѧ̀. є҆гѡ́же зарѧ́ми просвѣтѝ дв҃о, дꙋ́шы на́шѧ, и҆ вразꙋмѝ.
И҆ ны́нѣ: Подоба́етъ тебѐ бцⷣе хвале́нїѧ сло́во всегда̀ дѣ́йствꙋемо: но мы̀ мо́лимъ тѧ̀ чⷭ҇таѧ, сп҃сѝ ѿ всѧ́кїѧ жите́йскїѧ печа́ли, къ тебѣ̀ прибѣга́ющихъ.
І҆рмо́съ: Въ нача́лѣ нб҃са̀ всеси́льнымъ сло́вомъ твои́мъ ᲂу҆твержде́й гдⷭ҇и сп҃сѐ, и҆ вседѣ́тельнымъ и҆ бж҃їимъ дх҃омъ, всю̀ си́лꙋ и҆́хъ: на недви́жимѣмъ мѧ̀ ка́мени и҆сповѣ́данїѧ твоегѡ̀ ᲂу҆твердѝ.
Ѿда́въ до́лги раболѣ́пнѡ бл҃горазꙋ́мнѣ, твои́хъ бл҃года́тей влⷣчце, те́плѣ воспѣва́ю тѧ̀ пречⷭ҇таѧ, мт҃и сло́ва, и҆ всѣ́хъ и҆зба́вителѧ: но и҆ ны́нѣ и҆зми́ мѧ ѿ жите́йскихъ настоѧ́нїй.
Оу҆мерщвле́на а҆да́ма ѿ престꙋпле́нїѧ дре́вле, лꙋ́чшїѧ пречⷭ҇таѧ, жи́зни сподо́била є҆сѝ ꙗ҆́вѣ, живонача́льное влⷣчце ро́ждшаѧ сло́во: но и҆ ны́нѣ мѧ̀ сме́ртнагѡ грѣха̀ свободѝ.
Сла́ва: Ѡ҆жестѣ́въ пло́ти страстны́й зако́нъ, и҆ ны́нѣ ѡ҆скорблѧ́етъ, дх҃о́вный, и҆ къ лютѣ́йшымъ похоте́мъ совокꙋплѧ́етъ ᲂу҆́мъ мо́й пречⷭ҇таѧ: но безстра́стїѧ ми́ръ пода́ждь мѝ вско́рѣ твои́ми мл҃твами.
И҆ ны́нѣ: Несказа́ннѡ во ᲂу҆тро́бѣ пречⷭ҇таѧ, заче́нши хрⷭ҇та̀ содержи́телѧ всѣ́хъ, земноро́дныхъ сꙋщество̀ разрѣши́ла є҆сѝ ѿ а҆́довыхъ вере́й: но и҆ ны́нѣ многоплетє́нныѧ плени̑цы тлѣ́ющыѧ мѧ̀ расто́ргни.
І҆рмо́съ: Ѻ҆́ч҃а нѣ́дра не ѡ҆ста́вль, и҆ соше́дъ на зе́млю хрⷭ҇тѐ бж҃е, та́йнꙋ ᲂу҆слы́шахъ смотре́нїѧ твоегѡ̀, и҆ просла́вихъ тѧ̀ є҆ди́не чл҃вѣколю́бче.
Но́щїю борю́сѧ со тьмо́ю лю́тыхъ, ѡ҆мрачи́въ по́мыслъ: две́ри свѣ́та, твои́ми лꙋча́ми ѡ҆зари́ мѧ, и҆ го́рести и҆змѝ вско́рѣ, и҆ печа́ли.
Грѣхѡ́въ мно́жествомъ стѧ́гнꙋтъ, и҆ плени́цами напа́стей вельмѝ свѧ́занъ, твою̀ влⷣчце, ны́нѣ по́мощь призыва́ю, да и҆зба́влюсѧ всѧ́кїѧ мꙋ́ки.
Сла́ва: Собо́рища ѕлы́хъ и҆ лю́тыхъ, и҆ зави́стныхъ и҆ лꙋка́выхъ человѣ̑къ совѣ́ты разорѝ всепѣ́таѧ, и҆ всѧ́кїѧ мѧ̀ и҆зба́ви печа́ли житїѧ̀ и҆ ско́рби.
И҆ ны́нѣ: Возвраще́нїѧ слове́съ лжи́выхъ и҆ дѣ́йствъ ꙗ҆̀же на мѧ̀, мече́мъ твои́хъ мл҃твъ ссѣцы̀ влⷣчце, и҆ вско́рѣ разрꙋшѝ, и҆ всѧ́кїѧ мѧ̀ и҆зба́ви печа́ли.
І҆рмо́съ: Но́щь не свѣтла̀ невѣ̑рнымъ хрⷭ҇тѐ, вѣ̑рнымъ же просвѣще́нїе въ сла́дости слове́съ твои́хъ: сегѡ̀ ра́ди къ тебѣ̀ ᲂу҆́тренюю, и҆ воспѣва́ю твоѐ бж҃ество̀.
Непобѣди́маѧ стѣна̀ сꙋ́щи вѣ̑рнымъ, и҆ покро́въ бꙋ́ди рабꙋ̀ твоемꙋ̀ дв҃о, и҆ ѿ всѧ́кїѧ нꙋ́ждныѧ и҆зба́ви печа́ли и҆ ѡ҆ѕлобле́нїѧ.
Недꙋ́гꙋю ѕѣлѡ̀, лю́тѣ ѡ҆ѕло́бленный ѿ ѻ҆бою̀ странꙋ̑ пречⷭ҇таѧ, дꙋше́внꙋю си́лꙋ и҆ тѣле́снꙋю ю҆́же под̾ѧ́хъ, твои́ми мл҃твами и҆сцѣлѝ.
Сла́ва: Въ пꙋчи́нꙋ дв҃о щедро́тъ твои́хъ ны́нѣ прибѣга́ю ра́бъ тво́й, ѿ ѡ҆держа́щагѡ мѧ̀ совѣ́та непра́веднагѡ да и҆зба́влюсѧ, и҆ ѡ҆ѕлобле́нїѧ.
И҆ ны́нѣ: Превозноси́ма є҆́сть сла́ва твои́хъ мл҃твъ всю́дꙋ, дв҃о мт҃и пречⷭ҇таѧ: и҆́миже ны́нѣ мѧ̀ всѧ́кагѡ и҆зба́ви жите́йскагѡ настоѧ́нїѧ.
І҆рмо́съ: Пла́вающаго въ молвѣ̀ жите́йскихъ попече́нїй, съ корабле́мъ потоплѧ́ема грѣхѝ, и҆ дꙋшетлѣ́нномꙋ ѕвѣ́рю примета́ема, ꙗ҆́кѡ і҆ѡ́на хрⷭ҇тѐ, вопїю́ ти: и҆з̾ смертоно́сныѧ глꙋбины̀ возведи́ мѧ.
Речє́нїѧ и҆ словеса̀ всѣ́хъ вѣ́рнѡ восхвалѧ́ютъ тѧ̀ чⷭ҇таѧ, ꙗ҆́кѡ всѣ́хъ человѣ̑къ до́лгъ ржⷭ҇тво́мъ твои́мъ ꙗ҆́вѣ разрꙋши́сѧ: но и҆ ны́нѣ пѣвє́цъ твои́хъ мольбꙋ̀ прїимѝ, и҆ и҆зба́ви и҆скꙋше́нїй и҆ печа́лей.
Болѧ́ща мѧ̀ и҆ стра́стнымъ грѣхо́внымъ те́рнїемъ бодо́ма, и҆́щꙋща ю҆́же ѿ тебѐ цѣльбꙋ̀ пречⷭ҇таѧ, ѿ всѧ́кїѧ болѣ́зни же и҆ ско́рби и҆змѝ, и҆ и҆зба́ви ѿ напа́стей и҆ печа́лей.
Сла́ва: Земноро́дныхъ є҆стество̀, на нб҃о бцⷣе проѧвле́ннѡ возвела̀ є҆сѝ, бы́вши пала́та цр҃ѧ̀ сла́вы: тѣ́мже мѧ̀ ѿ бе́здны мно́гихъ прегрѣше́нїй, и҆ напа́стей, и҆ страсте́й возведѝ.
И҆ ны́нѣ: Вопло́щшеесѧ сло́во па́че ᲂу҆ма̀ и҆ сло́ва, дв҃о чⷭ҇таѧ, родила̀ є҆сѝ, безслове́сїѧ на́съ и҆зба́вльшаго: тѣ́мже тѧ̀ словесы̀ бж҃е́ственными непреста́ннѡ воспѣва́емъ, и҆ вѣ́рнѡ сла́вимъ.
Та́же, Гдⷭ҇и поми́лꙋй: три́жды. Сла́ва, и҆ ны́нѣ:
Сѣда́ленъ, гла́съ з҃.
Влⷣчце, прогнѣ́васѧ сн҃ъ тво́й на грѣ̑шныѧ рабы̑ твоѧ̑: ще́драго бо на гнѣ́въ ѡ҆брати́хомъ мы̀, но на млⷭ҇ть претворѝ є҆го̀ чⷭ҇таѧ. ᲂу҆млⷭ҇рдисѧ мт҃и бж҃їѧ, ᲂу҆молѝ бл҃гоꙋтро́бнаго мольба́ми самодви́жными, плѣнє́ныѧ и҆зба́ви.
І҆рмо́съ: Въ пе́щь ѻ҆́гненнꙋю вве́ржени прпⷣбнїи ѻ҆́троцы, ѻ҆́гнь въ ро́сꙋ преложи́ша, воспѣва́нїемъ си́це вопїю́ще: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Оу҆кра́шена рѧ́снами чистоты̀, пречⷭ҇таѧ ѻ҆трокови́це: дꙋ́шꙋ мою̀ ны́нѣ претворѝ ѿ ѕло́бы скве́рныѧ къ бж҃е́ственнѣй добро́тѣ, бл҃гослове́ннаѧ влⷣчце, предста́тельнице ро́да на́шегѡ.
Свирѣ́пѣютъ ны́нѣ ѕло́бы бѣсѡ́вскїѧ ѕѣлѡ̀, и҆ ѻ҆́гнь страсте́й мнѣ̀ возжига́ютъ, но па́че твои́ми зарѧ́ми, си́хъ до конца̀ попалѝ щедро́тами твои́ми, предста́тельнице ро́да на́шегѡ.
Сла́ва: Ѡ҆ на́съ твоего̀ сн҃а молѧ́щи пречⷭ҇таѧ мт҃и бж҃їѧ, не преста́й ѿню́дъ мл҃твами твои́ми, человѣ́ческихъ печа́лей и҆ бѣ́дъ и҆з̾има́ющи рабы̑ твоѧ̑.
И҆ ны́нѣ: Пресꙋ́щный сн҃ъ ѿ тебѐ дв҃о, пло́ть прїѧ́тъ непрело́жно, и҆ человѣ́къ бы́сть, да сп҃се́тъ пою́щыѧ: бл҃гослове́нъ пречⷭ҇таѧ, пло́дъ твоегѡ̀ чре́ва.
І҆рмо́съ: Ѻ҆́троцы зовѧ́хꙋ въ пещѝ ѡ҆роше́ни: тва́рь да бл҃гослови́тъ всѧ́чєскаѧ сло́вомъ созда́вшаго, и҆ превозно́ситъ є҆го̀ во вѣ́ки.
Па́жити страстны̑ѧ, и҆ многоѡбра́зныѧ бѣды̑ ѡ҆крꙋжа́ютъ вои́стиннꙋ влⷣчце, твоего̀ раба̀: но и҆зба́ви мѧ̀ тѣ́хъ всѧ́кагѡ и҆скꙋше́нїѧ.
Да прїи́детъ ны́нѣ на ны̀ держа́внаѧ твоѧ̀ дла́нь влⷣчце, и҆ ча́емыѧ человѣ́ческїѧ ско́рби да и҆зба́витъ на́съ.
Сла́ва: Сѣ̑ти лꙋка́выхъ и҆ ѕлосовѣ́тныхъ человѣ̑къ сокрꙋшѝ, чⷭ҇таѧ бг҃ороди́тельнице: и҆ твоего̀ раба̀ и҆зба́ви ѿ всѧ́кїѧ нꙋ́жди.
И҆ ны́нѣ: Є҆ди́но сꙋ́щее вѣ́рныхъ приста́нище бж҃е́ственно, дв҃о чⷭ҇таѧ, молю́ тѧ и҆зба́вити мѧ̀ сꙋ́щїѧ въ мо́ри житїѧ̀ бꙋ́ри го́рькїѧ.
І҆рмо́съ: Ра́дꙋйсѧ невѣ́сто свѣ́тлаѧ, мт҃и свѣтода́вца: ра́дꙋйсѧ вмѣсти́вшаѧ невмѣсти́маго во ᲂу҆тро́бѣ твое́й: ра́дꙋйсѧ самѣ́хъ херꙋві́мѡвъ че́стншаѧ, ро́ждшаѧ сп҃са дꙋ́шъ на́шихъ.
Ѿигра́сѧ ꙗ҆́кѡ жребе́цъ ѿ за́повѣдей влⷣки, брозда́ми твои́хъ мл҃твъ да востѧ́гнꙋсѧ пречⷭ҇таѧ, къ пꙋтѝ ско́рагѡ ᲂу҆строе́нїѧ.
Низвлеко́мь є҆́смь ѕѣлѡ̀ поползнове́нїемъ неразꙋ́мнымъ къ дѣѧ́нїю лꙋка́вагѡ грѣха̀ моегѡ̀: и҆зба́ви мѧ̀ бж҃е, преложе́нїѧ го́ршагѡ.
Сла́ва: И҆сцѣле́нїе пе́рвое ꙗ҆́вльшисѧ человѣ́ческагѡ сꙋщества̀, и҆сцѣли́ла сокрꙋше́нїе а҆да́ма и҆ є҆́ѵы: и҆сцѣли́ же и҆ менѐ бцⷣе, твои́ми мольба́ми.
И҆ ны́нѣ: Цѣломꙋ́дренъ ᲂу҆́мъ пода́ждь мѝ, и҆ чи́сто се́рдце, и҆ ра́зꙋмъ смотрели́въ: да сохраню̀ влⷣчце, пречⷭ҇тыѧ за́пѡвѣди бг҃а моегѡ̀.
Та́же: Досто́йно є҆́сть: и҆ покло́нъ. Трист҃о́е. По Ѻ҆́ч҃е на́шъ: тропарѝ, и҆ про́чее ѻ҆бы́чно, и҆ ѿпꙋ́стъ.
по а҃-мъ стїхосло́вїи сѣда́льны покаѧ́нны, гла́съ з҃:
И҆мꙋ́щи дꙋшѐ моѧ̀, врачевство̀ покаѧ́нїѧ, пристꙋпѝ припа́дающи, и҆ воздыха́нїемъ зовꙋ́щи: врачꙋ̀ дꙋ́шъ же и҆ тѣле́съ, чл҃вѣколю́бче, свободи́ мѧ ѿ мно́гихъ мои́хъ согрѣше́нїй: сопричти́ мѧ блꙋдни́цѣ, и҆ разбо́йникꙋ, и҆ мытарю̀, и҆ да́рꙋй мѝ бж҃е, беззако́нїй мои́хъ проще́нїе, и҆ сп҃си́ мѧ.
Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.
И҆́же петро́во ѿверже́нїе слеза́ми ѡ҆чи́стивый, и҆ мытаре́ва согрѣшє́нїѧ воздыха́нїемъ прости́вый чл҃вѣколю́бче гдⷭ҇и, поми́лꙋй мѧ̀.
Сла́ва, и҆ ны́нѣ, бг҃оро́диченъ: Превозшла̀ є҆сѝ си̑лы нбⷭ҇ныѧ, занѐ хра́мъ показа́ласѧ є҆сѝ бж҃е́ственный, бл҃гослове́ннаѧ бцⷣе: ꙗ҆́кѡ ро́ждшаѧ хрⷭ҇та̀ сп҃са дꙋ́шъ на́шихъ.
По в҃-мъ стїхосло́вїи сѣда́льны покаѧ́нны, гла́съ з҃:
Мытаре́вꙋ покаѧ́нїю не поревнова́хъ, и҆ блꙋдни́цы сле́зъ не стѧжа́хъ: недоꙋмѣ́юсѧ бо ѿ ѡ҆слѣпле́нїѧ такова́гѡ и҆справле́нїѧ. но твои́мъ бл҃гоꙋтро́бїемъ хрⷭ҇тѐ бж҃е, сп҃си́ мѧ, ꙗ҆́кѡ чл҃вѣколю́бецъ.
Сті́хъ: Гдⷭ҇и да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.
Пꙋчи́на жите́йскаѧ ѡ҆бꙋрева́етъ мѧ̀ гдⷭ҇и, волнє́нїѧ беззако́нїй мои́хъ погрꙋжа́ютъ мѧ̀ влⷣко: но прострѝ твою̀ рꙋ́кꙋ ꙗ҆́коже петро́ви, и҆ сп҃си́ мѧ чл҃вѣколю́бче.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мч҃нченъ: Ст҃і́и, моли́тесѧ ѡ҆ставле́нїю да́тисѧ на́мъ прегрѣше́нїй на́шихъ, и҆ ча́емыхъ лю́тыхъ и҆зба́витисѧ на́мъ, и҆ го́рькїѧ сме́рти, мо́лимсѧ.
Сла́ва, и҆ ны́нѣ, бг҃оро́диченъ: Чⷭ҇тнѣ́йши сла́вныхъ херꙋві́мѡвъ є҆сѝ прест҃а́ѧ дв҃о, ѻ҆ни́ бо бж҃е́ственныѧ не терпѧ́ще си́лы, кри́лы покрыва́юще ли́ца слꙋ́жбꙋ соверша́ютъ: ты́ же воплоще́нно сло́во самови́днѡ зрѧ́щи но́сиши, є҆го́же непреста́ннѡ молѝ ѡ҆ дꙋша́хъ на́шихъ.
По г҃-мъ стїхосло́вїи, сѣда́льны, гла́съ з҃:
Подо́бенъ: Пло́дъ чре́ва:
Разли́чныхъ страсте́й, и҆ согрѣше́нїй мои́хъ бꙋ́рѧ потоплѧ́етъ мѧ̀ во глꙋбинꙋ̀ ѿча́ѧнїѧ: но мл҃твами а҆́гг҃лъ твои́хъ, і҆и҃се многомлⷭ҇тиве, ꙗ҆́кѡ блꙋ́днаго сп҃си́ мѧ.
Гото́висѧ дꙋшѐ моѧ̀, въ животѣ̀ твое́мъ, проти́вꙋ бꙋ́дꙋщей жи́зни не сꙋмнѣ́тисѧ. та́мѡ бо никто́же помога́ѧй, ни бога́тство, ни си́ла, ни дрꙋ́зи, ни кнѧ́зи: но то́кмѡ показа́нїе дѣ́лъ и҆ бж҃їе чл҃вѣколю́бїе.
Сла́ва, и҆ ны́нѣ, бг҃оро́диченъ: Бцⷣе дв҃о нескве́рнаѧ, сн҃а твоего̀ молѝ съ го́рними си́лами, проще́нїю прегрѣше́нїй на́мъ пре́жде конца̀ дарова́тисѧ, вѣ́рнѡ тѧ̀ сла́вѧщымъ.
Канѡ́нъ покаѧ́ненъ ко гдⷭ҇ꙋ на́шемꙋ і҆и҃сꙋ хрⷭ҇тꙋ̀, и҆ ст҃ы̑мъ є҆гѡ̀ мч҃нкѡмъ. Творе́нїе і҆ѡ́сифово. Гла́съ з҃:
І҆рмо́съ: Поспѣ́шествовавшемꙋ бг҃ꙋ во є҆гѵ́птѣ мѡѷсе́ови, и҆звестѝ і҆и҃лѧ, томꙋ̀ є҆ди́номꙋ пои́мъ, ꙗ҆́кѡ просла́висѧ.
Въ пꙋчи́нꙋ лю́тыхъ впа́дъ, вопїю́ ти: рꙋ́кꙋ мѝ прострѝ ще́дре, и҆ сп҃си́ мѧ ꙗ҆́кѡ петра̀, чл҃вѣколю́бче.
Менѐ ка́ющагосѧ хрⷭ҇тѐ, ꙗ҆́коже блꙋдни́цꙋ ѿ согрѣше́нїй мно́гихъ ѡ҆мы́й манове́нїемъ млⷭ҇ти твоеѧ̀, да вѣ́рою сла́влю тѧ̀.
Мч҃нченъ: И҆́же ст҃ы̑ѧ твоѧ̑ хрⷭ҇тѐ, горни́ломъ просвѣти́вый многови́дныхъ ра́нъ, тѣ́хъ моле́нїемъ ѿ помраче́нїѧ страсте́й и҆зба́ви мѧ̀.
Мч҃нченъ: Терпѣ́нїемъ ра́нъ ѡ҆чи́стившесѧ, со́лнца мно́жае ѡ҆блиста́ша ст҃і́и мч҃нцы, и҆ пре́лесть помрачи́ша.
Бг҃оро́диченъ: Ꙗ҆́же предста́тельнице вѣ́рныхъ, ꙗ҆́же согрѣша́ющихъ ѡ҆браще́нїе къ бг҃ꙋ, дв҃о всепѣ́таѧ мл҃твами твои́ми сп҃си́ мѧ.
Дрꙋгі́й канѡ́нъ ст҃ы̑мъ безплѡ́тнымъ а҆́гг҃лѡмъ, [є҆гѡ́же краегране́сїе: Безпло́тныхъ похвалꙋ̀ седьмꙋ́ю ношꙋ̀.] Творе́нїе ѳеофа́ново. Гла́съ з҃:
І҆рмо́съ: И҆стрѧ́сшемꙋ бг҃ꙋ фараѡ́на въ мо́ри чермнѣ́мъ, пѣ́снь побѣ́днꙋю пои́мъ, ꙗ҆́кѡ просла́висѧ.
Неисчетноси́льне хрⷭ҇тѐ, твои́мъ свѣ́томъ ѡ҆зари́въ мо́й ᲂу҆́мъ, а҆́гг҃лы твоѧ̑ пѣ́ти вдохнѝ, ꙗ҆́кѡ всеси́ленъ. [Два́жды.]
Крѣ́пкꙋю и҆мꙋ́ще свѣ́тлость, и҆з̾ бг҃онача́льнагѡ происходѧ́щꙋ и҆сто́чника, нбⷭ҇нїи ли́цы пѣ́сньми хрⷭ҇та̀ почита́ютъ.
Бг҃оро́диченъ: Оу҆кра́шенꙋ тѧ̀ чⷭ҇таѧ бж҃е́ственными свѣтлостьмѝ, вѣ́рнїи вѣ́мы, ꙗ҆́вѣ ра́дꙋйсѧ тебѣ̀ всѝ зове́мъ.
І҆рмо́съ: Оу҆тверди́сѧ се́рдце моѐ въ гдⷭ҇ѣ, вознесе́сѧ ро́гъ мо́й въ бз҃ѣ мое́мъ: разшири́шасѧ на врагѝ моѧ̑ ᲂу҆ста̀ моѧ̑, возвесели́хсѧ ѡ҆ сп҃се́нїи твое́мъ.
Но́щїю безмѣ́стными содержи́мь бы́хъ грѣхѝ, свѣ́томъ мѧ̀ покаѧ́нїѧ ны́нѣ ѡ҆зарѝ, свѣтода́телю чл҃вѣколю́бче, да вѣ́рою сла́влю тѧ̀.
Пꙋтїѐ всѝ, по ни́хже ходи́хъ въ житїѝ, въ про́пасть сласте́й мѧ̀ низри́нꙋша: і҆и҃се, покаѧ́нїѧ мѝ бж҃е́ствєнныѧ пꙋти̑ покажѝ.
Мч҃нченъ: До́блественнымъ нра́вомъ сконча́вше по́двиги, вѣнцє́въ сподо́бистесѧ нбⷭ҇ныхъ, всесла́внїи мч҃нцы, ѡ҆ всѣ́хъ молѧ́щесѧ.
Мч҃нченъ: Тьмы̑ болѣ́зней претерпѣ́вше стрⷭ҇тоте́рпцы, тьма́ми бл҃ги́хъ сподо́бистесѧ, тьма́мъ совокꙋплѧ́еми безпло́тныхъ си́лъ.
Бг҃оро́диченъ: Бг҃а ро́ждши нбⷭ҇нагѡ цр҃ѧ̀ дв҃о, во мнѣ̀ ца́рствꙋющїй грѣ́хъ низложѝ, и҆ ᲂу҆ще́дривши сп҃си́ мѧ.
І҆рмо́съ: Оу҆тверди́сѧ вѣ́рою хрⷭ҇то́ва цр҃ковь, и҆́бо непреста́ннѡ пѣ́сньми вопїе́тъ пою́щи: ст҃ъ є҆сѝ гдⷭ҇и, и҆ тѧ̀ пое́тъ дꙋ́хъ мо́й.
Хода́тає бы́вше бж҃е́ственнагѡ ꙗ҆вле́нїѧ ли́цы а҆́гг҃льстїи, и҆ невеще́ственнѡ зоветѐ непреста́ннѡ: ст҃ъ є҆сѝ гдⷭ҇и, сп҃са́ѧ дꙋ́шы на́шѧ.
Любо́вїю зако́нною дрꙋ́гъ дрꙋ́гꙋ бж҃е́ствєннаѧ сїѧ̑нїѧ ѿдаю́ще, бл҃гочи́ннѡ хрⷭ҇тꙋ̀ поетѐ: ст҃ъ є҆сѝ гдⷭ҇и, є҆ди́не многомлⷭ҇тиве.
Пе́рвѣй зарѝ вторы́ѧ свѣ́тлости житїю̀ бл҃гоче́ствꙋющїи поревнꙋ́имъ, хрⷭ҇тꙋ̀ пою́ще: ст҃ъ є҆сѝ гдⷭ҇и, сп҃са́ѧ дꙋ́шы на́шѧ.
Бг҃оро́диченъ: И҆́же ѿ не сꙋ́щихъ всѧ̑ приведы́й во́лею, ѿ тебѐ дв҃о, пло́ть взае́млетъ сло́во, человѣ́къ бы́въ, за млⷭ҇рдїе чл҃вѣколю́бецъ.
І҆рмо́съ: Покры́ла є҆́сть нб҃са̀ хрⷭ҇тѐ бж҃е, смотре́нїемъ твои́мъ, добродѣ́тель неизрече́нныѧ мꙋ́дрости твоеѧ̀, чл҃вѣколю́бче.
Хотѧ́й всѣ̑мъ человѣ́кѡмъ ще́дре сп҃сти́сѧ, сп҃си́ мѧ престꙋпи́вшаго твоѧ̑ повелѣ̑нїѧ сло́ве, и҆ не ᲂу҆ничижѝ менѐ.
Подклони́хсѧ безсловє́снымъ страсте́мъ, и҆ скотѡ́мъ ѻ҆каѧ́нный ᲂу҆подо́бихсѧ, ще́дре сло́ве бж҃їй, ᲂу҆ще́дривъ сп҃си́ мѧ.
Мч҃нченъ: Вѧ́жеми, и҆ ѻ҆гне́мъ поджига́еми, попали́сте пре́лесть, воспалѧ́еми ре́вностїю бл҃гоче́стїѧ мч҃нцы.
Мч҃нченъ: Ра́й мы́сленный ꙗ҆ви́стесѧ, посредѣ̀ и҆мꙋ́ще дре́во живо́тное бл҃же́ннїи, хрⷭ҇та̀ садодѣ́телѧ всѧ́ческихъ.
Бг҃оро́диченъ: Дв҃о чⷭ҇таѧ бг҃обл҃года́тнаѧ, ѡ҆бл҃годати́вши ᲂу҆́мъ мо́й ѡ҆мраче́нный, невѣ́дѣнїѧ соверше́ннѡ свободѝ.
І҆рмо́съ: Оу҆слы́шахъ слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑, и҆ ᲂу҆жасо́хсѧ гдⷭ҇и.
И҆сцѣли́ти дꙋ́ши моеѧ̀ стрꙋ́пы, предстоѧ́ще хрⷭ҇тꙋ̀ ꙗ҆́кѡ слꙋжи́тели и҆збра́ннїи, ли́цы а҆́гг҃льстїи томꙋ̀ помоли́тесѧ.
Вѡ́инства безпло́тныхъ влⷣко, тво́й прⷭ҇то́лъ бл҃гоговѣ́йнѡ ѡ҆бстоѧ́ще, ꙗ҆́снѡ при́снѡ вопїю́тъ: сла́ва си́лѣ твое́й гдⷭ҇и.
Оу҆диви́шасѧ а҆́гг҃льстїи чи́нове, зрѧ́ще тебѐ хрⷭ҇тѐ, съ пло́тїю на землѝ живꙋ́ща со сме́ртными человѣ́ки.
Бг҃оро́диченъ: всепѣ́таѧ, и҆ бг҃ома́ти пречⷭ҇таѧ, ро́ждшаѧ бг҃а несказа́ннѡ пло́тїю, тебѣ̀ мо́лимсѧ, молѝ сп҃сти́сѧ на́мъ.
І҆рмо́съ: Оу҆́тренююще, сло́ве, въ сла́вꙋ твою̀ и҆ хвалꙋ̀, восхвалѧ́емъ непреста́ннѡ ѡ҆́бразъ крⷭ҇та̀ твоегѡ̀, є҆го́же да́лъ є҆сѝ на́мъ ѻ҆рꙋ́жїе въ по́мощь.
Лѣ́ностїю житїѐ и҆жди́хъ, и҆ трепе́щꙋ неизбѣ́жнагѡ твоегѡ̀ сꙋди́ща, на не́мже сꙋди́тисѧ хощꙋ̀ стра́стный а҆́зъ, ᲂу҆ще́дри мѧ̀ гдⷭ҇и.
И҆́же ѻ҆́чи слѣпцє́мъ просвѣти́вый сло́ве, дꙋшѝ моеѧ̀ зѣ̑ницы лю́тѣ ѡ҆мрачє́нныѧ ѿве́рзи, зрѣ́ти свѣ́тъ повелѣ́нїй твои́хъ.
Мч҃нченъ: Крѣ́пкою мы́слїю хрⷭ҇та̀ и҆сповѣ́дающе, претерпѣ́сте ра̑ны всѧ́кагѡ мꙋче́нїѧ, до́блественнїи страда́льцы: тѣ́мже бл҃жи́ми є҆стѐ.
Мч҃нченъ: Преплы́вше всѣ́хъ мꙋче́нїй треволне́нїе, достиго́сте къ приста́нищꙋ вы́шнѧгѡ црⷭ҇твїѧ, тишины̀ и҆́стинныѧ мч҃нцы и҆сполнѧ́еми.
Бг҃оро́диченъ: И҆́же хотѣ́нїемъ всѧ̑ сотвори́вый бг҃ъ сло́во, па́че сло́ва дв҃о и҆з̾ тебѐ воплоти́сѧ: того̀ ᲂу҆́бѡ прилѣ́жнѡ ѡ҆ всѣ́хъ молѝ.
І҆рмо́съ: Къ тебѣ̀ ᲂу҆́тренюю, и҆ тебѣ̀ вопїю̀ бл҃гоꙋтро́бне гдⷭ҇и: ѡ҆мраче́ннꙋю грѣхмѝ дꙋ́шꙋ мою̀, свѣ́томъ ѡ҆зари́въ за́повѣдей твои́хъ, наста́ви.
Сщ҃е́ннѣйшими и҆ многовѣща́нными ᲂу҆сты̀ пою́тъ серафі́ми пребезнача́льное и҆ пребж҃е́ственное нача́ло, невеще́ственными свѣтоли́тїи просвѣща́еми.
Сщ҃е́нными и҆ многосвѣ́тлыми кри́лы покрыва́ютсѧ херꙋві́ми, къ бж҃е́ственномꙋ сїѧ́нїю не смѣ́юще зрѣ́ти, мꙋ́дрости пребж҃е́ственныѧ приведе́нїѧ.
Разꙋ́мнѡ бж҃е́ственнагѡ и҆ всебога́тнагѡ, прⷭ҇то́ли сла́внїи, краснѣ́йшагѡ наслажда́ющесѧ блиста́нїѧ, зри́тели неизрече́нныхъ премі́рнѡ ꙗ҆влѧ́ютсѧ.
Бг҃оро́диченъ: Оу҆́мъ пребж҃е́ственный, человѣ́ческомꙋ пречⷭ҇таѧ, примѣша́етсѧ въ пречⷭ҇тѣмъ и҆ всесвѧтѣ́мъ твое́мъ чре́вѣ, соедини́всѧ неслїѧ́ннѡ и҆ неизмѣ́ннѡ по ѵ҆поста́си.
І҆рмо́съ: І҆ѡ́на и҆з̾ чре́ва а҆́дова вопїѧ́ше: возведѝ ѿ тлѝ живо́тъ мо́й. мы́ же тебѣ̀ вопїе́мъ: всеси́льне сп҃се, поми́лꙋй на́съ.
Ѡ҆бы́де мѧ̀ бе́здна прегрѣше́нїй, снидо́хъ во глꙋбинꙋ̀ поги́бели: возведи́ мѧ сло́ве, ꙗ҆́коже и҆ногда̀ і҆ѡ́нꙋ ѿ и҆стлѣ́нїѧ къ жи́зни.
Ѡ҆бꙋрева́етъ мѧ̀ помышле́нїй треволне́нїе, ко приста́нищꙋ и҆́стиннагѡ покаѧ́нїѧ и҆спра́ви мѧ̀ ще́дре, въ тишинѣ̀ соблюда́ѧ се́рдце моѐ.
Мч҃нченъ: Ст҃і́и мч҃нцы защити́вшесѧ вѣ́рою, ло́жнагѡ мꙋчи́телей ласка́нїѧ ᲂу҆клони́шасѧ: и҆ стрѣла́ми вра́жїими не ᲂу҆ѧ́звлени бы́ша.
Мч҃нченъ: Возноша́еми къ бг҃ꙋ въ любвѝ, и҆ возненави́дѣша мїрскꙋ́ю любо́вь мч҃нцы, и҆ дрꙋ́зи всѧ́ческихъ творцꙋ̀ ꙗ҆ви́шасѧ.
Бг҃оро́диченъ: Пое́мъ тѧ̀ препѣ́таѧ ѻ҆трокови́це, ро́ждшꙋю прест҃о́е сло́во, є҆го́же всѧ̑ си̑лы нбⷭ҇ныѧ воспѣва́ютъ немо́лчными гла́сы.
Ю҆́ношески свѣтлостьмѝ гдⷭ҇онача́лїѧ ѡ҆блиста́еми, и҆ неизрече́ннꙋю сла́вꙋ тогѡ̀ воспѣва́юще, гдⷭ҇ьствїѧ при́снѡ ꙗ҆влѧ́ютсѧ. [Два́жды.]
Любе́знѡ си́льнѣ премогꙋ́щꙋю си́лꙋ, взира́юще бж҃е́ствєнныѧ си̑лы, въ крѣ́пости пребыва́ютъ ꙗ҆́вѣ возмога́еми.
Бг҃оро́диченъ: Ѿ ца́рска колѣ́на произше́дши дв҃о, родила̀ є҆сѝ па́че є҆стества̀ сло́во всѣ́хъ цр҃ѧ̀, и҆ дв҃а вои́стиннꙋ соверши́ласѧ є҆сѝ.
І҆рмо́съ: Пе́щь горѧ́щꙋю ѡ҆роси́лъ є҆сѝ сп҃се, ѻ҆́троки сп҃слъ є҆сѝ пою́щыѧ и҆ глаго́лющыѧ: бл҃гослове́нъ є҆сѝ во вѣ́ки гдⷭ҇и бж҃е, ѻ҆тє́цъ на́шихъ.
Пожрѝ дꙋшѐ, же́ртвꙋ хвале́нїѧ бг҃ꙋ, потщи́сѧ и҆ пока́йсѧ, до́ндеже то́ргъ є҆́сть жите́йскїй: ны́нѣ кꙋ́плю дѣ́й до́брыхъ придаѧ́нїй.
Приближа́етсѧ дꙋшѐ, сме́ртное посѣче́нїе, плоды̀ достѡ́йны сотворѝ: да не ꙗ҆́кѡ непло́дное дре́во вве́ржешисѧ во ѻ҆́гнь гее́нскїй, и҆ воспла́чешисѧ неꙋтѣ́шнѡ.
Мч҃нченъ: Ст҃і́и мч҃нцы, пе́щь пре́лести ᲂу҆гаси́вше кро́вными тꙋ́чами, вопїѧ́хꙋ ꙗ҆́коже ѻ҆́троцы: ѻ҆тє́цъ на́шихъ бж҃е бл҃гослове́нъ є҆сѝ.
Мч҃нченъ: Сы́нове свѣ́та бы́сте, свѣ́тꙋ жела́емомꙋ примѣси́вшесѧ мч҃нцы: и҆ всѧ̑ сꙋ̑щаѧ во тьмѣ̀ просвѣща́ете, и҆ пре́лести тьмꙋ̀ ѿгонѧ́ете.
Бг҃оро́диченъ: Кꙋпина̀ тѧ̀ проѡбража́ше чⷭ҇таѧ, неѡпали́маѧ, ѻ҆́гнь бо родила̀ є҆сѝ непостоѧ́нный дв҃о. тѣ́мже вопїю́ ти: попалѝ веще́ствєнныѧ моѧ̑ стра̑сти.
І҆рмо́съ: Въ пе́щь ѻ҆́гненнꙋю вве́ржени прпⷣбнїи ѻ҆́троцы, ѻ҆́гнь въ ро́сꙋ преложи́ша, воспѣва́нїемъ си́це вопїю́ще: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Славосло́вѧтъ неꙋкло́ннѡ, тво́й прⷭ҇то́лъ хрⷭ҇тѐ ꙗ҆́вѣ ѡ҆крꙋжа́юще, ᲂу҆́мнѣ а҆́гг҃льскаѧ ликостоѧ̑нїѧ, бл҃гослове́нъ є҆сѝ, зовꙋ́ще, бж҃е ѻ҆тє́цъ на́шихъ. [Два́жды.]
Ѿѻнꙋ́дными тѧ̀ нача̑ла ᲂу҆се́рдїи, ѡ҆ є҆ди́номъ нача́лѣ невеще́ственнѡ ѡ҆браща́еми, непреста́нными славословле́ньми зовꙋ́тъ: бл҃гослове́нъ є҆сѝ бж҃е ѻ҆тє́цъ на́шихъ.
Бг҃оро́диченъ: Є҆ди́нꙋ ѵ҆поста́сь во двою̀ сꙋщєствꙋ̀, бг҃ороди́тельнице, хрⷭ҇та̀ є҆ди́наго без̾ сѣ́мене родила̀ є҆сѝ, стра́шное соверша́юща смотре́нїе, бг҃а ѻ҆тє́цъ на́шихъ.
І҆рмо́съ: Въ пещѝ ѻ҆́троки подража́юще, дх҃о́внꙋю ро́сꙋ прїе́мшїи, вѣ́рою зове́мъ: бл҃гослови́те дѣла̀ гдⷭ҇нѧ гдⷭ҇а.
Сло́во прїѧ́хъ ꙗ҆́кѡ свѣ́щникъ сїѧ́ющъ, но къ безсловє́снымъ преклони́хсѧ ѻ҆каѧ́нный страсте́мъ, и҆ во тьмѣ̀ ѕло́бнѣй ше́ствꙋю всегда̀.
Гдⷭ҇ь бли́зъ, ꙗ҆́коже вѣ́рꙋемъ: попецы́сѧ дꙋшѐ, и҆ не ᲂу҆ныва́й, побдѝ и҆ возопі́й бо́дреннѡ: ще́дрый чл҃вѣколю́бче, сп҃си́ мѧ.
Мч҃нченъ: Вкꙋси́вше бж҃е́ственныѧ сла́дости, го́ресть болѣ́зненнꙋю претерпѣ́сте, и҆ ны́нѣ наслажда́етесѧ бж҃е́ственнѣйшихъ. сло́ва причаще́нїй, мч҃нцы.
Мч҃нченъ: Внидо́сте къ бж҃е́ственномꙋ поко́ю, ᲂу҆лꙋчи́сте до́брыхъ, и҆́хже надѣ́ѧстесѧ, всехва́льнїи мч҃нцы: сегѡ̀ ра́ди досто́йнѡ ва́съ ᲂу҆бл҃жа́емъ.
Бг҃оро́диченъ: Разрѣши́сѧ ѿ клѧ́твы ржⷭ҇тво́мъ твои́мъ дв҃о, человѣ́ческое смѣше́нїе: и҆́бо всебл҃гослове́ннаго, бл҃гослове́ньми всѧ̑ ᲂу҆краша́ющаго родила̀ є҆сѝ.
І҆рмо́съ: Є҆ди́наго безнача́льнаго цр҃ѧ̀ сла́вы, є҆го́же бл҃гословѧ́тъ нбⷭ҇ныѧ си̑лы, и҆ трепе́щꙋтъ чи́ни а҆́гг҃льстїи, по́йте сщ҃е́нницы, лю́дїе превозноси́те є҆го̀ во вѣ́ки.
И҆̀же всѐ жела́нїе къ бг҃ꙋ прело́жше, ꙗ҆̀же ѿѻнꙋ́дꙋ наслажда́ющесѧ зарѧ́ми а҆рха́гг҃ли, ва́съ воспѣва́ющымъ и҆зба́витисѧ напа́стей, хрⷭ҇та̀ ᲂу҆моли́те всѣ́хъ цр҃ѧ̀. [Два́жды.]
Оу҆́мове сꙋ́ще чⷭ҇тнѣ́йшїи, всѧ́кагѡ и҆змѣне́ни веще́ственнагѡ пристра́стїѧ, ѽ а҆́гг҃ли! сп҃си́те всѣ́хъ, любо́вїю съ ва́ми хрⷭ҇та̀ превозносѧ́щихъ во всѧ̑ вѣ́ки.
Бг҃оро́диченъ: Свѣ́тъ непристꙋ́пный бцⷣе дв҃о, во чре́вѣ твое́мъ прїе́мши неизрече́ннѡ, просвѣти́ла є҆сѝ сꙋ́щыѧ во тьмѣ̀ житїѧ̀, сла́вити бл҃гоче́стнѡ хрⷭ҇та̀ произше́дшаго и҆з̾ тебѐ несказа́ннѡ.
Та́же пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а: съ припѣ́вомъ: Чⷭ҇тнѣ́йшꙋю херꙋві̑мъ: и҆ покло́ны.
І҆рмо́съ: Па́че є҆стества̀ мт҃рь, и҆ по є҆стествꙋ̀ дв҃ꙋ, є҆ди́нꙋ въ жена́хъ бл҃гослове́ннꙋю пѣ́сньми вѣ́рнїи бцⷣꙋ велича́емъ.
Сѐ сꙋ́дъ приближа́етсѧ, и҆ ѡ҆сꙋжде́нїю дѣла̀ и҆мѣ́ѧ, са́мъ ѿчаѧва́юсѧ: пра́ведный сꙋдїѐ хрⷭ҇тѐ бж҃е, не ѡ҆сꙋдѝ менѐ.
Ꙗ҆́коже вѣ́рнаѧ ханане́а, поми́лꙋй мѧ̀, вопїю̀ тѝ: ꙗ҆́коже погорбле́нꙋю дре́вле и҆спра́ви мѧ̀, є҆́же стꙋпа́ти пра́вѡ къ стезѧ́мъ твои̑мъ чл҃вѣколю́бче.
Мч҃нченъ: Совлеко́стесѧ всѧ́кїѧ съ ри́зами ѕло́бы, и҆ ѡ҆дѣѧ́ньми ѕѣ́льныхъ мꙋче́нїй, сла́вы ѻ҆де́ждꙋ себѣ̀ страда́льцы и҆схода́таисте.
Мч҃нченъ: Бж҃е́ственна страна̀ живꙋ́щихъ, сїѡ́нъ вы́шнїй гра́дъ, перворо́дныѧ ва́съ прїѧ́тъ, ѡ҆сїѧва́емыхъ добро́тами пѡ́двигъ страда́льцы.
Бг҃оро́диченъ: Просвѣти́тельными лꙋча́ми возсїѧ́вшагѡ сло́ва и҆з̾ тебѐ дв҃о чⷭ҇таѧ, ѡ҆зари́ мѧ, грѣхѡ́въ и҆ страсте́й во тьмѣ̀ покрыва́ема.
І҆рмо́съ: Всепѣ́таѧ нб҃съ превы́шшаѧ, безнача́льное сло́во безсѣ́меннѡ заче́ншаѧ, и҆ воплоще́ннаго бг҃а ро́ждшаѧ человѣ́кѡмъ: тѣ́мъ тѧ̀ всѝ велича́емъ.
Сїѧ́ньми бг҃онача́льнагѡ свѣтоли́тїѧ наслажда́ющесѧ всѝ ли́цы а҆́гг҃льстїи, препросла́вленнаго бг҃а непреста́ннѡ воспѣва́ютъ, и҆ сла́вѧтъ при́снѡ велича́юще. [Два́жды.]
И҆зба́витисѧ мнѣ̀ страсте́й ѡ҆бдержа́нїѧ, ѽ херꙋві́ми и҆ серафі́ми, си̑лы, вла̑сти, а҆́гг҃ли, а҆рха́гг҃ли, нача̑ла же и҆ прⷭ҇то́ли, и҆ гдⷭ҇ьствїѧ, хрⷭ҇та̀ моли́те прилѣ́жнѡ.
Бг҃оро́диченъ: Ꙗ҆́кѡ мт҃и ны́нѣ къ сн҃ꙋ твоемꙋ̀ бцⷣе, дерзнове́нїе и҆мꙋ́щи, любо́вїю пою́щихъ тѧ̀ и҆зба́ви ѿ прегрѣше́нїй лю́тыхъ, и҆ недꙋ́гѡвъ, и҆ бѣ́дъ, всест҃а́ѧ: да вси́ тѧ при́снѡ велича́емъ.
Та́же, досто́йно є҆́сть: и҆ покло́нъ. Є҆ктенїа̀, и҆ свѣти́ленъ, и҆ ѱалмы̀ ѻ҆бы̑чныѧ.
На стїхо́внѣ стїхи̑ры покаѧ́нны, гла́съ з҃:
Ꙗ҆́кѡ непло́днꙋю смоко́вницꙋ, не посѣцы̀ менѐ сп҃се, грѣ́шнаго, но на мнѡ́гаѧ лѣ̑та пожда́нїе мѝ да́рꙋй, напаѧ́ѧ дꙋ́шꙋ мою̀ слеза́ми покаѧ́нїѧ, да пло́дъ принесꙋ̀ тѝ млⷭ҇тыни.
Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑ и҆ на дѣла̀ твоѧ̑, и҆ наста́ви сы́ны и҆́хъ.
Ꙗ҆́кѡ сл҃нце сы́й пра́ведное, просвѣтѝ сердца̀ пою́щихъ тѧ̀: гдⷭ҇и, сла́ва тебѣ̀.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Па́мѧть ст҃ы́хъ твои́хъ стрⷭ҇тоте́рпєцъ пра́зднꙋюще, тѧ̀ пои́мъ: гдⷭ҇и, сла́ва тебѣ̀.
Сла́ва, и҆ ны́нѣ, бг҃оро́диченъ: Оу҆мирѝ мл҃твами бцⷣы жи́знь на́шꙋ, вопїю́щихъ тѝ: млⷭ҇тиве гдⷭ҇и, сла́ва тебѣ̀.
Та́же, Бл҃го є҆́сть: Трист҃о́е. По Ѻ҆́ч҃е на́шъ: тропарѝ. Є҆ктенїа̀, и҆ ча́съ пе́рвый, и҆ ѿпꙋ́стъ.
Въ понедѣ́льникъ бл҃жє́нны, гла́съ з҃:
Красе́нъ бѣ̀ и҆ до́бръ въ снѣ́дь, и҆́же менѐ ᲂу҆мертви́вый пло́дъ: хрⷭ҇то́съ є҆́сть дре́во живо́тное, ѿ негѡ́же ꙗ҆ды́й не ᲂу҆мира́ю, но вопїю̀ съ разбо́йникомъ: помѧнѝ мѧ̀ гдⷭ҇и, во црⷭ҇твїи твое́мъ.
Сті́хъ: Бл҃же́ни и҆́згнани пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Ꙗ҆́кѡ вѣ́рнаѧ ханане́а зовꙋ̀ въ болѣ́зни се́рдца моегѡ̀: поми́лꙋй мѧ̀ сп҃се, ꙗ҆́кѡ бл҃гъ: и҆́бо дꙋ́шꙋ и҆́мамъ бѣ́дствꙋющꙋю всѧ́кими козньмѝ вра́жїими, и҆ ѡ҆бꙋрева́емꙋ при́снѡ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ на вы̀ лжꙋ́ще менѐ ра́ди.
Херꙋві́ми, и҆ серафі́ми, и҆ прⷭ҇то́ли, нача̑ла и҆ си̑лы, при́снѡ а҆рха́гг҃ли, а҆́гг҃лѡвъ вѡ́инства, и҆ гдⷭ҇ьствїѧ, и҆ премꙋ́дрыхъ власте́й собо́ри, тебѐ сла́вѧтъ, бл҃годѣ́телю гдⷭ҇и.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Вра̑жїѧ лꙋка̑ваѧ возношє́нїѧ, къ бг҃ꙋ возвыша́еми низверго́ша соверше́ннѡ страда́льцы: и҆ побѣди́тели ꙗ҆́вльшесѧ, въ ра́дости ны́нѣ на нб҃сѣ́хъ живꙋ́тъ, сла́вою нетлѣ́нною блиста́юще.
Сла́ва: Трⷪ҇це нераздѣ́льнаѧ, є҆ди́ница є҆диноесте́ственнѡ, трили́чное сꙋщество̀, покланѧ́емсѧ тѝ съ вы́шними си́лами: ѻ҆́ч҃е, и҆ сн҃е, и҆ дш҃е ст҃ы́й, є҆ди́номꙋ бж҃ествꙋ̀, є҆ди́ной си́лѣ: є҆ди́нъ бг҃ъ, трⷪ҇ца є҆диносꙋ́щнаѧ.
И҆ ны́нѣ: Сластьмѝ ѡ҆скверни́хсѧ жите́йскими, къ тебѣ̀ нескве́рнѣй прибѣго́хъ дв҃о: поро́ка всѧ́кагѡ и҆ согрѣше́нїй и҆зба́ви всеѻкаѧ́ннꙋю мою̀ дꙋ́шꙋ, ꙗ҆́кѡ да ᲂу҆бл҃жа́ю тѧ̀ приснобл҃же́ннꙋю.