ТРІѠ́ДІОНЪ
сі́есть
трипѣ́снецъ
съ бг҃омъ ст҃ы́мъ,
ѡ҆бдержа́й подоба́ющее є҆мꙋ̀ послѣ́дованїе.
꙳
Репри́нтное воспроизведе́нїе
и҆зда́нїѧ 1915 го́да
Недѣ́лѧ,
въ ню́же чте́тсѧ сщ҃е́нное и҆ ст҃о́е є҆ѵⷢ҇лїе, при́тчи
мытарѧ̀ и҆ фарїсе́а.
Въ сꙋббѡ́тꙋ ве́чера,
по предначина́тельнѣмъ ѱалмѣ̀, стїхосло́вимъ, Бл҃же́нъ мꙋ́жъ: а҃-ю каѳі́смꙋ всю̀. На
Гдⷭ҇и воззва́хъ, поста́вимъ стїхѡ́въ і҃: и҆ пое́мъ ѻ҆смогла́сника стїхи̑ры воскрⷭ҇ны г҃: и҆
а҆нато́лїевы д҃: и҆ трїѡ́ди самогла́сны двѣ̀, повторѧ́юще пе́рвꙋю.
Гла́съ а҃.
Не помо́лимсѧ фарїсе́йски, бра́тїе: и҆́бо возносѧ́й себѐ смири́тсѧ. смири́мъ себѐ пред̾ бг҃омъ, поще́нїемъ мыта́рски зовꙋ́ще: млⷭ҇тивъ бꙋ́ди, бж҃е, на́мъ грѣ̑шнымъ.
Фарїсе́й тщесла́вїемъ побѣжда́емь, мыта́рь покаѧ́нїемъ преклонѧ́емь, пристꙋпи́ста къ тебѣ̀ є҆ди́номꙋ влⷣцѣ. но ѻ҆́въ ᲂу҆́бѡ похвали́всѧ, лиши́сѧ бл҃ги́хъ: ѻ҆́въ же ничто́же вѣща́въ, сподо́бисѧ дарова́нїй. въ си́хъ воздыха́нїихъ ᲂу҆тверди́ мѧ, хрⷭ҇тѐ бж҃е, ꙗ҆́кѡ чл҃вѣколю́бецъ.
Сла́ва, гла́съ и҃:
Вседержи́телю гдⷭ҇и, вѣ́мъ, коли́кѡ мо́гꙋтъ сле́зы: є҆зекі́ю бо ѿ вра́тъ сме́ртныхъ возведо́ша грѣ́шнꙋю ѿ многолѣ́тныхъ согрѣше́нїй и҆зба́виша, мытарѧ́ же па́че фарїсе́а ѡ҆правда́ша: и҆ молю́сѧ, къ ни́мъ сопричтѝ и҆ поми́лꙋй мѧ̀.
И҆ ны́нѣ, бг҃оро́диченъ а҃, рѧдова́гѡ гла́са.
На лїті́и стїхи́ра, ст҃а́гѡ ѡ҆би́тели, по ѡ҆бы́чаю.
Сла́ва, гла́съ г҃:
Мытарѧ̀ и҆ фарїсе́а разли́чїе разꙋмѣ́вши, дꙋшѐ моѧ̀, ѻ҆́вагѡ ᲂу҆́бѡ возненави́ждь горды́нный гла́съ, ѻ҆́вагѡ же ревнꙋ́й благоꙋмиле́ннѣй мл҃твѣ, и҆ возопі́й: бж҃е, млⷭ҇тивъ бꙋ́ди мнѣ̀ грѣ́шномꙋ и҆ поми́лꙋй мѧ̀.
И҆ ны́нѣ, бг҃оро́диченъ воскрⷭ҇нъ, въ то́йже гла́съ.
На стїхо́внѣ стїхи̑ры ѻ҆смогла́сника по а҆лфави́тꙋ.
Сла́ва, гла́съ є҃:
Ѡ҆тѧгче́нныма ѻ҆чи́ма мои́ма ѿ беззако́нїй мои́хъ, не могꙋ̀ воззрѣ́ти и҆ ви́дѣти высотꙋ̀ нбⷭ҇нꙋю: но прїими́ мѧ, ꙗ҆́кѡ мытарѧ̀ ка́ющасѧ, сп҃се, и҆ поми́лꙋй мѧ̀.
И҆ ны́нѣ, бг҃оро́диченъ, въ то́йже гла́съ: Хра́мъ и҆ две́рь є҆сѝ: Тропа́рь: Бцⷣе дв҃о:
глаго́летсѧ три́жды. И҆ быва́етъ бл҃гослове́нїе хлѣ́бѡвъ, и҆ раздаѧ́нїе. И҆ чте́нїе ве́лїе въ посла́нїихъ а҆пⷭ҇льскихъ.
[зрѝ] Послѣ́дованїе прилꙋчи́вшагѡсѧ ст҃а́гѡ въ недѣ́лю сїю̀, и҆ въ блꙋ́днагѡ, пое́мъ въ пѧто́къ на повече́рїи, и҆лѝ є҆гда̀ є҆кклисїа́рхъ разсꙋ́дитъ: а҆́ще то́кмѡ не слꙋчи́тсѧ ко́егѡ вели́кагѡ ст҃а́гѡ, и҆лѝ ст҃а́гѡ хра́мꙋ: занѐ хра́мъ и҆ не вели́кагѡ ст҃а́гѡ, бо́льши вослѣ́дꙋетсѧ вели́кагѡ ст҃а́гѡ, на сво́й є҆мꙋ̀ хра́мный пра́здникъ, є҆́же до́лжно є҆́сть бдѣ́нїю быва́ти, и҆ ника́коже ѡ҆ставлѧ́ти въ па́мѧть є҆гѡ̀, нижѐ прелага́етсѧ на и҆́нъ де́нь. Но пое́мъ слꙋ́жбꙋ хра́мꙋ, ꙗ҆́коже и҆ срѣ́тенїю гдⷭ҇ню, во всѧ̑ дни̑, въ нѧ́же и҆ срѣ́тенїе гдⷭ҇не быва́етъ.
На ᲂу҆́трени,
по шестѝ ѱалмѣ́хъ, Бг҃ъ гдⷭ҇ь: на гла́съ ѻ҆смогла́сника. И҆ глаго́лемъ тропа́рь воскрⷭ҇нъ два́жды: бг҃оро́диченъ є҆ди́ножды, и҆ ѡ҆бы̑чнаѧ стїхослѡ́вїѧ. Сѣда́льны ѻ҆смогла́сника. По непоро́чныхъ тропари̑: А҆́гг҃льскїй собо́ръ: ѵ҆пакоѝ. Степе́нны, и҆ прокі́менъ гла́са: Всѧ́кое дыха́нїе: Є҆ѵⷢ҇лїе воскрⷭ҇но рѧ́дꙋ. Воскрⷭ҇нїе хрⷭ҇то́во: ѱало́мъ н҃.
Сла́ва, гла́съ и҃:
Покаѧ́нїѧ ѿве́рзи мѝ двє́ри, жизнода́вче: ᲂу҆́тренюетъ бо дꙋ́хъ мо́й ко хра́мꙋ ст҃о́мꙋ твоемꙋ̀,хра́мъ носѧ́й тѣле́сный ве́сь ѡ҆скверне́нъ: но ꙗ҆́кѡ ще́дръ, ѡ҆чи́сти бл҃госе́рдою твое́ю млⷭ҇тїю.
И҆ ны́нѣ, бг҃оро́диченъ:
На сп҃се́нїѧ стєзѝ наста́ви мѧ̀, бцⷣе: стꙋ́дными бо ѡ҆скверни́хъ дꙋ́шꙋ грѣхмѝ, и҆ въ лѣ́ности всѐ житїѐ моѐ и҆жди́хъ: но твои́ми мл҃твами и҆зба́ви мѧ̀ ѿ всѧ́кїѧ нечистоты̀.
Та́же, гла́съ ѕ҃.
Поми́лꙋй мѧ̀, бж҃е, по вели́цѣй млⷭ҇ти твое́й, и҆ по мно́жествꙋ щедро́тъ твои́хъ, ѡ҆чи́сти беззако́нїе моѐ.
Мно́жєства содѣ́ѧнныхъ мно́ю лю́тыхъ помышлѧ́ѧ ѡ҆каѧ́нный, трепе́щꙋ стра́шнагѡ днѐ сꙋ́днагѡ: но надѣ́ѧсѧ на млⷭ҇ть бл҃госе́рдїѧ твоегѡ̀, ꙗ҆́кѡ дв҃дъ вопїю́ ти: поми́лꙋй мѧ̀, бж҃е, по вели́цѣй твое́й млⷭ҇ти.
Канѡ́нъ воскрⷭ҇нъ ѻ҆смогла́сника, со і҆рмосо́мъ на д҃, и҆ крⷭ҇товоскрⷭ҇ный на два̀, и҆ бцⷣы на два̀: и҆ въ трїѡ́ди на ѕ҃.
Творе́нїе геѡ́ргїа. [Є҆гѡ́же краестро́чїе въ бг҃оро́дичнахъ: Геѡ́ргїа.] Гла́съ ѕ҃:
Пѣ́снь а҃:
І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль:
Хрⷭ҇то́съ, при́тчами приводѧ̀ всѧ̑ ко и҆справле́нїю житїѧ̀, мытарѧ̀ возвыша́етъ ѿ смире́нїѧ, показа́въ фарїсе́а возвыше́нїемъ смирѧ́ема.
Ви́дѧ ѿ смире́нїѧ че́сть высокотворѧ́щꙋю, ѿ возноше́нїѧ же паде́нїе лю́тое, ревнꙋ́й мытарє́вымъ дѡ́брымъ, и҆ фарїсе́йскꙋю ѕло́бꙋ возненави́ждь.
Всѧ́кое бл҃го́е ѿ возноше́нїѧ и҆стоща́етсѧ, всѧ́кое же ѕло́е ѿ смире́нїѧ потреблѧ́етсѧ: є҆́же ѡ҆блобыза́имъ вѣ́рнїи, гнꙋша́ющесѧ ꙗ҆́вѣ нра́ва тщесла́внагѡ.
Всѣ́хъ цр҃ь, хотѧ̀, да смиреномꙋ̑дри быва́ютъ ᲂу҆ч҃нцы̀ є҆гѡ̀, наказꙋ́ѧ ᲂу҆ча́ше ревнова́ти мытаре́вꙋ воздыха́нїю и҆ смире́нїю.
Сла́ва: Ꙗ҆́кѡ мыта́рь стеню̀, и҆ съ рыда́ньми немо́лчными, гдⷭ҇и, ны́нѣ прихождꙋ̀ ко твоемꙋ̀ бл҃госе́рдїю: ᲂу҆ще́дри и҆ менѐ, во смире́нїи жи́знь ны́нѣ препровожда́юща.
[Г] Бг҃оро́диченъ: Ра́зꙋмъ, совѣ́тъ, ча́ѧнїе, тѣ́ло, дꙋ́шꙋ и҆ дꙋ́хъ, влⷣчце, возлага́ю къ тебѣ̀: ѿ лю́тыхъ вра̑гъ и҆ напа́стей и҆ бꙋ́дꙋщагѡ преще́нїѧ и҆зба́ви, и҆ сп҃си́ мѧ.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃:
І҆рмо́съ: Нѣ́сть ст҃ъ, ꙗ҆́коже ты̀:
Ѿ гно́ища ᲂу҆́бѡ страсте́й смире́нный возноша́етсѧ, ѿ высоты́ же добродѣ́телей низпа́даетъ лю́тѣ всѧ́къ высокосе́рдый: є҆гѡ́же ѡ҆́браза ѕло́бнагѡ ᲂу҆бѣжи́мъ.
Тщесла́вїе и҆стоща́етъ бога́тство пра́вды, смире́нїе же расточа́етъ страсте́й мно́жество: є҆мꙋ́же подража́ющыѧ ны̀ ча́сти сподо́би мытаре́вы, сп҃се.
Ꙗ҆́кѡ мыта́рь и҆ мы̀ бїю́ще себѐ въ пє́рси, ᲂу҆миле́ннѡ вопїе́мъ: млⷭ҇тивъ бꙋ́ди, бж҃е, на́мъ грѣ̑шнымъ, ꙗ҆́кѡ да сегѡ̀ прїи́мемъ ѡ҆ставле́нїе.
Къ ре́вности прїи́демъ вѣ́рнїи, содѣва́юще кро́тость, смире́нїю соживꙋ́ще во стена́нїи се́рдца,пла́чи же и҆ мл҃твѣ, ꙗ҆́кѡ да и҆́мамы ѿ бг҃а проще́нїе.
Сла́ва: Ѿри́немъ вѣ́рнїи нестерпи́мꙋю горды́ню, возноше́нїе же лю́тое, и҆ киче́нїе ме́рзкое, и҆ ѕлѣ́йшее фарїсе́ево бг҃ꙋ нелѣ́пое свирѣ́пство.
[Е] Бг҃оро́диченъ: На тѧ̀ є҆ди́но прибѣ́жище надѣ́ѧвсѧ, да не лишꙋ́сѧ до́брагѡ ча́ѧнїѧ: но да ᲂу҆лꙋчꙋ̀ твою̀ по́мощь, чтⷭ҇аѧ, всѧ́кагѡ вре́да лю́тыхъ и҆збавлѧ́емь.
Сѣда́льны, гла́съ д҃.
Подо́бенъ: Ско́рѡ предварѝ:
Смире́нїе вознесѐ ᲂу҆стыжде́ннагѡ ѕлы́ми мытарѧ̀: возстена́вша и҆, млⷭ҇тивъ бꙋ́ди, къ зижди́телю воззва́вша: возноше́нїе же низложѝ ѿ пра́вды ѡ҆каѧ́ннаго фарїсе́а велерѣ́чꙋюща. тѣ́мже поревнꙋ́имъ дѡ́брымъ, ѕлы́хъ ѿстꙋпа́юще.
Сла́ва: Смире́нїе дре́вле вознесѐ мытарѧ̀, съ пла́чемъ возопи́вша, млⷭ҇тивъ бꙋ́ди, и҆ сего̀ ѡ҆правда̀. томꙋ̀ подража́имъ всѝ, во глꙋбинꙋ̀ ѕѡ́лъ впа́дшїи, и҆ возопїи́мъ сп҃сꙋ и҆з̾ глꙋбины̀ се́рдца: согрѣши́хомъ, млⷭ҇тивъ бꙋ́ди, є҆ди́не чл҃вѣколю́бче.
И҆ ны́нѣ, бг҃оро́диченъ: Ско́рѡ прїимѝ, влⷣчце, молє́нїѧ на̑ша, и҆ сїѧ̑ принесѝ твоемꙋ̀ сн҃ꙋ и҆ бг҃ꙋ, гпⷭ҇жѐ всенепоро́чнаѧ: разрѣшѝ ѡ҆бстоѧ̑нїѧ къ тебѣ̀ притека́ющихъ, сокрꙋшѝ кѡ́зни, и҆ низложѝ де́рзость воѡрꙋжа́ющихсѧ безбо́жнѡ на рабы̑ твоѧ̑, пречтⷭ҇аѧ.
Пѣ́снь д҃.
І҆рмо́съ: Хрⷭ҇то́съ моѧ̀ си́ла:
Сло́во, смири́вшеесѧ да́же и҆ до зра́ка ра́бїѧ, и҆зрѧ́дный показа̀ пꙋ́ть возноше́нїѧ, смире́нїе: є҆мꙋ́же подража́ѧ, всѧ́кїй возноша́етсѧ смирѧ́ѧсѧ.
Вознесе́сѧ првⷣникъ фарїсе́й, и҆ низпадѐ: во мно́жествѣ же ѕѡ́лъ ѡ҆тѧгча́емый смири́сѧ мыта́рь, и҆ вознесе́сѧ, нежда́ннѡ ѡ҆правда́емый.
Нищеты̀ хода́тайственно ꙗ҆ви́сѧ возноше́нїе ѿ бога́тства добродѣ́телей: и҆ а҆́бїе пода́тель ѡ҆правда́нїѧ смире́нїе ѿ кра́йнїѧ нищеты̀, є҆́же стѧ́жимъ.
Предре́клъ є҆сѝ, влⷣко, ꙗ҆́кѡ велемꙋ́дрствꙋющымъ противоста́неши всѧ́чески, и҆ смирє́ннымъ бл҃года́ть твою̀ пода́си, сп҃се: смири́вшымсѧ ны́нѣ на́мъ твою̀ бл҃года́ть низпослѝ.
Сла́ва: Къ бж҃е́ственномꙋ возноше́нїю при́снѡ возводѧ̀ на́съ сп҃съ и҆ влⷣка, высокотво́рное показа̀ смире́нїе: но́ги бо ᲂу҆ч҃нкѡ́мъ свои́ма рꙋка́ма ѡ҆бмы̀.
[Ѡ] Бг҃оро́диченъ: Ꙗ҆́кѡ свѣ́тъ непристꙋ́пный ро́ждшаѧ, дꙋшѝ моеѧ̀ тьмꙋ̀ свѣти́тельною заре́ю разженѝ, дв҃о, и҆ къ стезѧ́мъ сп҃се́нїѧ житїѐ моѐ рꙋково́дствꙋй.
Пѣ́снь є҃.
І҆рмо́съ: Бж҃їимъ свѣ́томъ твои́мъ, бл҃же:
Фарїсе́євымъ добродѣ́телемъ потщи́мсѧ подража́ти, и҆ поревнова́ти мытаре́вꙋ смире́нїю, во ѻ҆бою̀ ненави́дѧще безмѣ́стное возноше́нїе и҆ па́гꙋбꙋ паде́нїй.
Пра́вды тече́нїе тще́тно ꙗ҆ви́сѧ, сопрѧжѐ бо є҆мꙋ̀ фарїсе́й самомнѣ́нїе: а҆́бїе же непра́вды бре́мѧ ᲂу҆праздни́сѧ, є҆гда̀ мыта́рь высокотво́рнѣй добродѣ́тели стѧжа̀ спꙋ́тника смире́нїе.
На колесни́цѣ добродѣ́телей мнѧ́шесѧ тещѝ фарїсе́й: но пѣ́шїй па́че лѷді́йскїѧ колесни́цы текі́й, мыта́рь до́брѣ предварѝ, припрѧ́гъ щедро́тѣ смире́нїе.
Мытаре́вꙋ при́тчꙋ всѝ ᲂу҆разꙋмѣ́вше ᲂу҆мо́мъ, прїиди́те поревнꙋ́имъ слеза́мъ, дꙋ́хъ сокрꙋше́нный бг҃ꙋ приносѧ́ще, грѣхѡ́въ и҆́щꙋще ѡ҆ставле́нїѧ.
Сла́ва: Возносли́вый и҆ ѕло́бный, гордели́вый же и҆ де́рзый нра́въ фарїсе́евъ, лю́тый велехва́льный, дале́че ѿри́немъ разꙋ́мнїи, ꙗ҆́кѡ да не ѡ҆бнажи́мсѧ бж҃е́ственныѧ бл҃года́ти.
[Р] Бг҃оро́диченъ: Же́злъ си́лы низпослѝ, бл҃га́ѧ, всѣ̑мъ на́мъ, къ тебѣ̀ прибѣга́ющымъ, ѡ҆блада́нїе посредѣ̀ всѣ́хъ вра̑гъ подаю́щи и҆ всѧ́кагѡ вре́да и҆з̾има́ющи.
Пѣ́снь ѕ҃.
І҆рмо́съ: Жите́йское мо́ре:
Житїѧ̀ по́прище мыта́рь вкꙋ́пѣ и҆ фарїсе́й теча́ста: но ѻ҆́въ ᲂу҆́бѡ высокоꙋ́мїемъ содержи́мь, сра́мнѣ ᲂу҆тонꙋ̀, ѻ҆́въ же смире́нїемъ сп҃се́сѧ.
Житїѧ̀ пра́веднѡ преходѧ́ще тече́нїе, подража́имъ ᲂу҆́бѡ мытаре́вꙋ мꙋдрова́нїю ревни́тельнѡ: бѣжи́мъ же киче́нїѧ ме́рзкагѡ фарїсе́а, и҆ жи́ви бꙋ́демъ.
Нра́вѡмъ поревнꙋ́имъ сп҃са і҆и҃са, и҆ є҆гѡ̀ смире́нїю, жела́юще непреста́нное ра́дости селе́нїе полꙋчи́ти, во странѣ̀ живꙋ́щихъ водворѧ́ющесѧ.
Показа́лъ є҆сѝ, влⷣко, твои̑мъ ᲂу҆ч҃нкѡ́мъ высокотво́рное смире́нїе: ле́нтїемъ препоѧ́санъ по чре́слѡмъ, но́зѣ ᲂу҆мы́лъ є҆сѝ, и҆ семꙋ̀ ѡ҆́бразꙋ подража́ти повелѣ́лъ є҆сѝ.
Сла́ва: Житїѐ проидо́ста фарїсе́й добродѣ́тельми, и҆ мыта́рь прегрѣше́ньми. но ѻ҆́въ ᲂу҆́бѡ, ѿ го́рдости ᲂу҆мовре́дныѧ, подве́ржесѧ ᲂуниже́нїю: ѻ҆́въ же возноша́етсѧ, смиреномꙋ́дръ ꙗ҆́вльсѧ.
[Г] Бг҃оро́диченъ: На́га въ простотѣ҆ и҆ нехи́тростнѣй жи́зни созда́на, ѡ҆дѣ́ѧ мѧ̀ вра́гъ престꙋпле́нїѧ ле́стїю и҆ пло́ти дебельство́мъ: ны́нѣ же твои́мъ хода́тайствомъ, ѻ҆трокови́це, сп҃са́юсѧ.
Конда́къ, гла́съ д҃.
Подо́бенъ: Ꙗ҆ви́лсѧ є҆сѝ дне́сь:
Фарїсе́ева ᲂу҆бѣжи́мъ высокоглаго́ланїѧ, и҆ мытаре́вѣ наꙋчи́мсѧ высотѣ̀ глагѡ́лъ смире́нныхъ, въ покаѧ́нїи взыва́юще: сп҃се мі́ра, млⷭ҇тивъ бꙋ́ди рабѡ́мъ твои̑мъ.
Вторы́й конда́къ, гла́съ г҃.
Подо́бенъ: Дв҃а дне́сь:
Воздыха̑нїѧ принесе́мъ мыта̑рскаѧ гдⷭ҇ви, и҆ къ немꙋ̀ пристꙋ́пимъ грѣ́шнїи ꙗ҆́кѡ влⷣцѣ: хо́щетъ бо спасе́нїѧ всѣ́хъ человѣ́кѡвъ: ѡ҆ставле́нїе подае́тъ всѣ̑мъ ка́ющымсѧ. на́съ бо ра́ди воплоти́сѧ, бг҃ъ сы́й, ѻ҆ц҃ꙋ̀ собезнача́льный.
І҆́косъ: Са́ми себѐ, бра́тїе, всѝ смири́мъ воздыха́ньми, и҆ рыда́ньми побїе́мъ со́вѣсть: да въ сꙋдѣ̀ тогда̀ вѣ́чнѣмъ та́мѡ ꙗ҆ви́мсѧ вѣ́рнїи непови́нни, полꙋчи́вше ѡ҆ставле́нїе. та́мѡ бо є҆́сть вои́стиннꙋ ѡ҆слабле́нїе, є҆́же ви́дѣти на́мъ ны́нѣ ᲂу҆мо́лимъ: та́мѡ болѣ́знь ѿбѣжѐ, печа́ль и҆ и҆з̾ глꙋбины̀ воздыха̑нїѧ, во є҆де́мѣ ди́внѣмъ, є҆гѡ́же хрⷭ҇то́съ є҆́сть зижди́тель, бг҃ъ сы́й, ѻ҆ц҃ꙋ̀ собезнача́льный.
Предисло́вїе вкра́тцѣ сѷнаѯа̑рїй ѯанѳопꙋ́ла на трїѡ́дь.
Нїки́фора каллі́ста ѯанѳопꙋ́ла сѷнаѯа̑рїи важнѣ̀йшыѧ пра́здники трїѡ́ди, и҆з̾ѧснѧ́ющїи причи́нꙋ є҆ди́нагѡ коегѡ́ждо ѿ ни́хъ, ка́кѡ и҆ когда̀ и҆з̾ нача́ла бы́сть, и҆ каковы́ѧ ра́ди вины̀ си́це ны́нѣ и҆мѣ́ютсѧ и҆ ѿ ст҃ы́хъ и҆ бг҃оно́сныхъ ѻ҆тє́цъ ᲂу҆чине́ни сꙋ́ть, съ нѣ́кїими назида́ньми, начина́ющїисѧ ѿ недѣ́ли мытарѧ̀ и҆ фарїсе́а и҆ конча́ющїисѧ недѣ́лею всѣ́хъ ст҃ы́хъ.
До́лженствꙋетъ по шестѣ́й пѣ́сни чита́тисѧ пре́жде ᲂу҆́бѡ, по ѡ҆бы́чаю, мині́йный сѷнаѯа́рїй, пото́мъ же настоѧ́щїй.
Стїхѝ на трїѡ́дь:
Зижди́телю го́рнихъ и҆ до́льнихъ,
Прїе́млѧй трист҃ꙋ́ю пѣ́снь ѿ а҆́гг҃лѡвъ,
И҆ ѿ человѣ́къ трипѣ́снецъ прїимѝ.
На мытарѧ̀ и҆ фарїсе́а:
Фарїсе́йствꙋѧй бꙋ́ди дале́че ѿ це́ркви:
Внꙋ́трь бо сеѧ̀ пребыва́етъ хрⷭ҇то́съ, и҆́мже смире́ный прїе́млетсѧ.
Въ настоѧ́щїй же де́нь, съ бг҃омъ и҆ трїѡ́дь начина́емъ, си́рѣчь трипѣ́снецъ, и҆лѝ кни́гꙋ трипѣ́сненныхъ канѡ́нѡвъ. Кни́гꙋ ᲂу҆́бѡ сїю̀ мно́зи ѿ ст҃ы́хъ и҆ бг҃оно́сныхъ пѣснотво́рєцъ на́шихъ ѻ҆тє́цъ, ѿ ст҃а́гѡ дх҃а дви́жими, до́брѣ и҆ ꙗ҆́кѡ досто́ѧше сложи́ша: пе́рвый же ѿ всѣ́хъ сїѐ,трипѣ́сненный си́рѣчь канѡ́нъ, во ѡ҆́бразъ мню̀ ст҃ы́ѧ и҆ живонача́льныѧ трⷪ҇цы, ᲂу҆мы́сли вели́кїй пѣснотво́рецъ косма̀ въ вели́цѣй и҆ ст҃ѣй седми́цѣ стрⷭ҇те́й гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀, сочини́въ пѣ̑сни съ краегране́сїемъ по наименова́нїю вма́лѣ не коегѡ́ждо днѐ. По немъ и҆ про́чїи ѻ҆тцы, па́че же и҆ны́хъ ѳео́дѡръ и҆ і҆ѡ́сифъ стꙋді́тє, подража́юще ѻ҆́номꙋ пѣснотво́рцꙋ, и҆ длѧ̀ про́чихъ седми́цъ ст҃ы́ѧ и҆ вели́кїѧ четыредесѧ́тницы счини́вше, свое́й и҆́мъ ѡ҆би́тели стꙋді́йстѣй преда́ша, ᲂу҆чини́вше и҆ сложи́вше наипа́че пѣ̑сни канѡ́нѡвъ, та́кожде и҆ про́чыѧ ча̑сти кни́ги ѿвсю́дꙋ ѿ ѻ҆тє́цъ собра́вше и҆ сниска́вше. И҆ поне́же ᲂу҆́бѡ пе́рвый из̾ дне́й седми́цы заключа́етсѧ во днѝ гдⷭ҇ни [недѣ́лѧ], и҆́же, ꙗ҆́кѡ воскрⷭ҇ный, є҆́сть и҆ пе́рвый и҆ ѻ҆смый, послѣ́днїй: то ѻ҆тцы̀ пѣснотво́рцы, наивѧ́щше и҆сполнѧ́юще своѐ намѣ́ренїе, на вторы́й де́нь сердми́цы, ре́кше понедѣ́льникъ, ᲂу҆станови́ша пе́рвꙋю пѣ́снь канѡ́на: на тре́тїй де́нь, ре́кше вто́рникъ, вторꙋ́ю пѣ́снь: на четве́ртый же, ре́кше сре́дꙋ, тре́тїю пѣ́снь: на пѧ́тый, ре́кше четвертокъ, четве́ртꙋю: на шестый, ре́кше пѧтокъ, пѧ́тꙋю: на сꙋббѡ́тꙋ же, на шесты́й и вмѣ́стѣ седмы́й де́нь, шестꙋ́ю и҆ седмꙋ́ю пѣ̑сни, та́кожде и҆ про́чыѧ двѣ̀, ѻ҆смꙋ́ю и҆ девѧ́тꙋю, ꙗ҆̀же ꙗ҆́кѡ гла́внѣйшыѧ, ѻ҆́бщнѡ по всѧ̑ дни̑ седми́цы и҆мѣ́ютсѧ: ꙗ҆́кѡже и бж҃е́ственный косма̀ положѝ въ вели́цѣй сꙋббѡ́тѣ, четырепѣ́снецъ та́мѡ сотвори́въ, а҆́ще по́слѣжде, премꙋ́дрѣйшагѡ цр҃ѧ льва̀ повелѣ́нїемъ, є҆пⷭ҇кпъ и҆дрꙋ́нскїй, мона́хъ ма́ркъ и҆ содѣ́ла и҆ въ по́лный канѡ́нъ. Трїѡ́дь же кни́га сїѧ̀ и҆менꙋ́етсѧ ᲂу҆сло́внѡ, не всегда̀ бо трипѣ́снецъ и҆́мать, и̑ногда́ же и҆ пѡ́лныѧ канѡ́ны предлага́етъ: но мню̀, ꙗ҆́кѡ ѿ мно́жайшагѡ сїѐ и҆менова́нїе прїѧ́тъ, и҆лѝ же и҆менова́сѧ трипѣ́снецъ тогѡ̀ ра́ди, ꙗ҆́кѡ пе́рвїи напи́сани бы́ша трипѣ́снцы вели́кїѧ седми́цы. Мы́сль ᲂу҆́бѡ ᲂу҆ ст҃ы́хъ ѻ҆тє́цъ на́шыхъ бы́сть сїѧ̀, є҆́же все́ю кни́гою трїѡ́дїю вкра́тцѣ всѧ̑ бж҃їѧ къ на́мъ бл҃годѣѧ̑нїѧ и҆знача́ла воспомѧнꙋ́ти и҆ на па́мѧть всѣ̑мъ привести́: ка́кѡ ѿ бг҃а созда́ни бы́хомъ, да́ннꙋю же на́мъ ко ᲂу҆пражне́нїю за́повѣдь ѿве́ргше, ѿ ра́йскїѧ сла́дости и҆згна́ни и ѿве́ржени бы́хомъ по за́висти ѕлонача́льника ѕмі́ѧ и҆ врага̀, низложе́ннагѡ за го́рдость. И҆ ка́кѡ пребыва́хомъ ѿве́ржени ѿ бл҃ги́хъ и҆ води́ми ѿ дїа́вола. Ка́кѡ же сн҃ъ и҆ сло́во бж҃їе, млⷭ҇рдїемъ свои́мъ сострада́въ, преклони́въ нб҃са̀ сни́де, и҆ въ дв҃ꙋ всели́сѧ, и҆ на́съ ра́ди бы́сть чл҃вѣ́къ, и҆ на нб҃са̀ восхожде́нїе показа̀ по немꙋ̀ жи́тельствомъ, сі́есть, наипа́че смире́нїемъ, и҆ посто́мъ, и҆ воздержа́нїемъ ѿ ѕлы́хъ, и҆ про́чими свои́ми дѣѧ́нїи. И҆ ка́кѡ пострада̀, и҆ воскре́се, и҆ на нб҃са̀ взы́де па́ки, и҆ дх҃а ст҃а́го низпосла̀ ст҃ы̑мъ свои̑мъ ᲂу҆ч҃нкѡ́мъ и҆ а҆пⷭ҇лѡмъ, и҆ ка́кѡ проповѣ́данъ бы́сть ѿ всѣ́хъ си́хъ, ꙗ҆́кѡ сн҃ъ бж҃їй и҆ бг҃ъ соверше́нный. И҆ є҆ли̑ка па́ки бж҃е́ственнїи а҆пⷭ҇ли бл҃года́тїю прест҃а́гѡ дх҃а сотвори́ша, ꙗ҆́кѡ ѿ конє́цъ землѝ про́повѣдїю ст҃ы̑ѧ всѧ̑ вкꙋ́пѣ собра́ша, наполнѧ́юще вы́шнїй мі́ръ, є҆́же и҆ бѧ́ше и҆знача́ла намѣ́ренїе созда́вшагѡ. Сїѧ̀ ᲂу҆́бѡ є҆́сть гла́внаѧ мы́сль трїѡ́ди.
Настоѧ́щїи же трїѐ пра́здницы: мытарѧ̀ и҆ фарїсе́а, и҆ блꙋ́днагѡ сы́на, и҆ втора́гѡ прише́ствїѧ, ст҃ы́ми ѻ҆тцы̀ ᲂу҆мы́слишасѧ, ꙗ҆́коже нѣ́кое пред̾ѡбꙋче́нїе и҆ поѻщре́нїе, да мы̀ пред̾ꙋстро́имсѧ и҆ гото́ви бꙋ́демъ къ дх҃ѡ́внымъ подвигѡ́мъ постѡ́въ, ѡ҆ста́вльше скве́рное ѿ ѻ҆бы́чаѧ навыкнове́нїе. И҆ пе́рвѣе ᲂу҆́бѡ всѣ́хъ мытаре́вꙋ и҆ фарїсе́евꙋ при́тчꙋ на́мъ предлага́ютъ, и҆ седми́цꙋ сїю̀ пред̾ѡглаше́нїемъ и҆менꙋ́ютъ. Ꙗ҆́коже бо на тѣлє́снꙋю бра́нь и҆тѝ хотѧ́щїи ѿ воевѡ́дъ вре́мѧ бра́ни ᲂу҆знаю́тъ пре́жде, ꙗ҆́кѡ да ѡ҆рꙋ̑жїѧ ѡ҆чи́стивше и҆ ᲂу҆гла́дивше, и҆ дрꙋга̑ѧ всѧ̑ до́брѣ ᲂу҆стро́ивше, и҆ всѧ́ко претыка́нїе ᲂу҆страни́вше, къ подвигѡ́мъ ᲂу҆се́рднѡ снарѧ́дѧтсѧ и҆ всѐ протрѐбное снабдѧ́тъ: мно́гажды же и҆ пре́жде сраже́нїѧ, и҆ словеса̀, и҆ пѡ́вѣсти, и҆ при̑тчи, воевѡ́ды и҆́мъ приво́дѧтъ, на ре́вность и҆з̾ѻщрѧ́юще и҆́хъ дꙋ́шы, лѣ́ность же, и҆ боѧ́знь, и҆ ᲂу҆ны́нїе, и҆ всѐ дрꙋго́е бѣ́дственное ѿгонѧ́ще. Та́кѡ и҆ бж҃е́ственнїи ѻ҆тцы̀ ѡ҆ и҆мѣ́ющемъ бы́ти на де́мѡны ѡ҆полче́нїи постѡ́въ возглаша́ютъ предварѧ́юще, ꙗ҆́кѡ да мы̀ ѡ҆чи́стимъ себѐ ѿ стра́сти, а҆́ще ка́ѧ прїѧ́та бы́сть въ на́шѧ дꙋ́шы пре́жде, и҆ ѿ ꙗ҆́да, до́лгое вре́мѧ дѣ́йствовавшагѡ въ на́съ, є҆ще́ же потщи́мсѧ стѧжа́ти и҆ ѿ бл҃ги́хъ дѣ́лъ, а҆́ще чесѡ̀ не и҆́мамы, и҆ ꙗ҆́кѡ лѣ́по є҆́сть воѡрꙋжи́вшесѧ, та́кѡ гото́ви къ поста̀ подвигѡ́мъ да по́йдемъ. Поне́же ᲂу҆́бѡ пе́рвое ѡ҆рꙋ́жїе къ добродѣ́тели є҆́сть покаѧ́нїе и҆ смире́нїе, и҆ па́ки велича́йшее преткнове́нїе къ то́й є҆́сть го́рдость и҆ выше́нїе: тогѡ̀ ра́ди ст҃ї́и ѻ҆тцы̀ пе́рвѣе всѣ́хъ предлага́ютъ настоѧ́щꙋю достовѣ́рнꙋю ѿ бж҃е́ственнагѡ є҆ѵⷢ҇лїа при́тчꙋ, фарїсе́емъ ᲂу҆́бѡ поꙋща́юще на́съ стра́сть го́рдости и҆ киче́нїѧ ѿложи́ти, мытаре́мъ же па́ки сопроти́вное стра́сти сеѧ̀, смире́нїе и҆ покаѧ́нїе прїѡбрѣстѝ. Поне́же пе́рваѧ и҆ го́ршаѧ стра́сть є҆́сть горды́нѧ и҆ киче́нїе, тѣ́хъ бо ра́ди падѐ съ нб҃сѐ и҆ дїа́волъ, пре́жде ᲂу҆́бѡ денни́ца, си́хъ же ра́ди тьма̀ бы́вый и҆ и҆менꙋ́емый, и҆ родонача́льникъ а҆да́мъ си́хъ же ра́ди ѿ сла́дости бы́сть и҆згна́нъ: тогѡ̀ ра́ди си́ми нѣ́кимъ ѡ҆́бразомъ поꙋща́ютъ ст҃ї́и, да ѡ҆ свои́хъ по́двизѣхъ никто́же вы́ситсѧ, и҆ на бли́жнѧго да не востае́тъ, но смире́нъ при́снѡ да бꙋ́детъ. Гдⷭ҇ь бо гѡ́рдымъ проти́витсѧ, смирє́ннымъ же дае́тъ бл҃года́ть (І҆а́кѡв. д҃: ѕ҃). Лꙋ́чше бо є҆́сть согрѣши́вшемꙋ ѡ҆брати́тисѧ, не́жели подвиза́вшемꙋсѧ вы́ситисѧ. Речѐно бо є҆́сть: глаго́лю ва́мъ, ꙗ҆́кѡ сни́де мыта́рь ѡ҆правда́нъ па́че, не́жели фарїсе́й (Лꙋк. иі҃: ді҃). Ѡ҆б̾ѧвлѧ́етъ ᲂу҆́бѡ при́тча, да никто́же вы́ситсѧ, а҆́ще и҆ бл҃га̑ѧ дѣ́ѧй є҆́сть, но при́снѡ да смирѧ́етсѧ, и҆, а҆́ще и҆ въ послѣ̑днѧѧ ѕла̑ѧ впаде́тъ, да мо́литсѧ ѿ дꙋшѝ бг҃ꙋ, занѐ не дале́че ѿ сп҃се́нїѧ є҆́сть. [Мыта́рь ᲂу҆́бѡ є҆́сть, и҆́же ѿ кнѧзе́й прїе́млетъ вла́сть собира́нїѧ да́ней, и ѿсю́дꙋ кра́йнею непра́вдою по́льзꙋетсѧ и҆ ѕлопрїѡбрѣта́етъ. Фарїсе́й же а҆́ки бы ѿсѣ́ченъ кто̀ ѿ про́чихъ и҆ превосходѧ́й и҆́хъ разꙋмѣ́нїемъ. Саддꙋке́й же [ѿ садѡ́ка нѣ́коегѡ], є҆́сть пра́ведный: седе́къ бо є҆вре́йски є҆́сть пра́вда. Три́ бо бѧ́хꙋ ᲂу҆ є҆врє́й разгла̑сїѧ: є҆ссе́и, фарїсе́и и҆ саддꙋке́и, и҆̀же не прїе́млѧхꙋ ни воскрⷭ҇нїѧ, ни а҆́гг҃ла, ни дх҃а].
Ст҃ы́хъ всѣ́хъ пѣснотво́рцевъ твои́хъ мл҃и́твами, хрⷭ҇тѐ бж҃е на́шъ, поми́лꙋй на́съ. А҆ми́нь.
Пѣ́снь з҃:
І҆рмо́съ: Росода́тельнꙋ ᲂу҆́бѡ пе́щь:
Ѡ҆правда́нїѧ дѣ́лы возвыша́емый, сѣтьмѝ тщесла́вїѧ лю́тѣ ᲂу҆лови́сѧ фарїсе́й, безмѣ́рнѡ хвалѧ́сѧ: мыта́рь же ле́гкимъ крило́мъ смире́нїѧ возне́ссѧ, бг҃ꙋ прибли́жисѧ.
Ѡ҆́бразъ смире́нїѧ а҆́ки лѣ́ствицꙋ ᲂу҆потреби́въ, мыта́рь къ нбⷭ҇нѣй высотѣ̀ возвы́сисѧ: горды́нею же гнило́ю и҆ безꙋ́мїемъ ѡ҆каѧ́нный возне́ссѧ фарїсе́й, сни́де до а҆́да преиспо́днѧгѡ.
Пра́веднымъ ᲂу҆́бѡ кѡ́зни ᲂу҆строѧ̀ѧ лꙋка́вый, ѡ҆бразмѝ тщесла́вїѧ ᲂу҆ловлѧ́етъ: грѣ́шныхъ же сѣтьмѝ ѿча́ѧнїѧ свѧзꙋ́етъ. но ѿ ѻ҆бои́хъ ѕѡ́лъ, мытарѧ̀ ревни́телїе, и҆зба́витисѧ потщи́мсѧ.
Въ мл҃твѣ бг҃ꙋ на́шемꙋ припаде́мъ, вѣ́рнїи, слеза́ми и҆ те́плыми воздыха̑нїи подража́юще мытаре́вꙋ высокотво́рномꙋ смире́нїю, пою́ще: бл҃гослове́нъ є҆си,̀ бж҃е ѻ҆тє́цъ на́шихъ.
Сла́ва: Наставлѧ́ѧ ᲂу҆ч҃нкѝ, предглаго́лалъ є҆сѝ, влⷣко, не мꙋ́дрствовати высѡ́каѧ, но смирє́нными води́тисѧ ᲂу҆чѝлъ єсѝ, сп҃се. тѣ́мже зове́мъ тебѣ̀ вѣ́рнїи: бл҃гослове́нъ є҆сѝ, бж҃е ѻ҆тє́цъ на́шихъ.
[І] Бг҃оро́диченъ: Прекра́снꙋю и҆ бж҃е́ственнꙋю лѣ́ствицꙋ, ю҆́же дре́вле ви́дѣ і҆а́кѡвъ, ѿ до́лꙋ просте́ртꙋю къ высотѣ̀, вѣ́мы тѧ̀, чтⷭ҇аѧ, низводѧ́щꙋю свы́ше бг҃а воплоще́на, и҆ земны̑ѧ па́ки возводѧ́щꙋю.
Пѣ́снь и҃:
І҆рмо́съ: И҆з̾ пла́мене преподѡ́бнымъ:
Смиренномꙋ́дреннымъ нра́вомъ мыта́рь воздохнꙋ́въ, гдⷭ҇а млⷭ҇тива ѡ҆брѣ́те, и҆ сп҃се́нъ бы́сть: ѡ҆́бразомъ же лю́тымъ ѧ҆зы́ка велерѣ́чивагѡ ѿ ѡ҆пра́вданїѧ ѿпадѐ фарїсе́й.
Фарїсе́ева кича́щасѧ произволе́нїѧ, и҆ и҆менова́нїѧ чистоты̀, бѣжи́мъ, вѣ́рнїи, ревнꙋ́юще до́брѣ мытаре́вꙋ поми́лованномꙋ смире́нїю и҆ нра́вꙋ.
Гла́сы мытарѧ̀, вѣ́рнїи, вѣща́имъ въ цр҃кви ст҃ѣ́й: бж҃е, млⷭ҇тивъ бꙋ́ди! да съ ни́мъ ᲂу҆лꙋчи́мъ проще́нїе, и҆зба́вльшесѧ па́гꙋбы велехва́льнагѡ фарїсе́а.
Воздыха́нїю мытаре́вꙋ всѝ поревнꙋ́имъ: и҆ бг҃ꙋ бесѣ́дꙋюще те́плыми слеза́ми, возопїи́мъ є҆мꙋ̀: чл҃вѣколю́бче, согрѣши́хомъ, бл҃госе́рде ще́дрый, млⷭ҇тивъ бꙋ́ди и҆ сп҃сѝ.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Стена́нїемъ мытаре́вымъ бг҃ъ преклони́сѧ, ѡ҆правди́въ же сего̀ показа̀, да всѝ преклонѧ́ютсѧ при́снѡ, въ воздыха́нїихъ и҆ слеза́хъ просѧ́ще прегрѣше́нїй разрѣше́нїѧ.
[А] Бг҃оро́диченъ: Не вѣ́мъ па́че тебє̀ и҆но́гѡ застꙋпле́нїѧ, тѧ̀ предлага́ю мл҃твенницꙋ, чтⷭ҇аѧ всенепоро́чнаѧ: тѧ̀ къ рожде́нномꙋ и҆з̾ тебє̀ хода́таицꙋ дви́жꙋ: ѿ всѣ́хъ ѡ҆печа́лꙋющихъ свобо́дна мѧ̀ покажѝ.
Пѣ́снь ѳ҃:
І҆рмо́съ: Бг҃а человѣ́кѡмъ:
Пꙋ́ть возноше́нїѧ смире́нїе, ѿ хрⷭ҇та̀ взе́мше спасе́нїѧ ѡ҆́бразъ, мытаре́вꙋ ѡ҆бы́чаю поревнꙋ́имъ, киче́нїе возноше́нїѧ дале́че ѿмета́юще, нра́вомъ же смиреномꙋ́дрїѧ бг҃а ᲂу҆молѧ́юще.
Дꙋше́внꙋю горды́ню ѿве́ржимъ, нра́въ пра́вый во смиреномꙋ́дрїи стѧ́жимъ, себѐ ѡ҆правда́ти не тщи́мсѧ, тщесла́вїѧ киче́нїе возненави́димъ, и҆ съ мытаре́мъ бг҃а ᲂу҆мо́лимъ.
Мл҃твы мытарє́вы содѣ́телю млⷭ҇ти принесе́мъ, фарїсе́евыхъ ѿвраща́ющесѧ безбл҃года́тныхъ мл҃твъ и҆ велехва́льныхъ гласѡ́въ, и҆̀же на бли́жнѧго сꙋ́дъ возво́дѧтъ: да бг҃а млⷭ҇тива и҆ свѣ́тъ привлече́мъ.
Мно́гимъ собра́нїемъ прегрѣше́нїй ѡ҆тѧгче́нъ, и҆з̾ѻби́лїемъ ѕло́бы мытарѧ̀ преидо́хъ, и҆ фарїсе́ево велехва́льное киче́нїе притѧжа́хъ, ѿвсю́дꙋ пꙋ́стъ бы́въ всѣ́хъ бл҃ги́хъ: гдⷭ҇и, пощади́ мѧ.
Твоегѡ̀ сподо́би бл҃же́нства, тебє̀ ра́ди дꙋ́хомъ ни́щы сꙋ́щыѧ: ᲂу҆че́нїемъ бо твоегѡ̀ повелѣ́нїѧ, дꙋ́хъ сокрꙋше́нъ тебѣ̀ прино́симъ: є҆го́же прїе́мъ, сп҃се, сп҃сѝ тебѣ̀ слꙋжа́щыѧ.
Сла́ва: Бг҃ꙋ мыта́рь нѣ́когда помоли́выйсѧ, въ цр҃ковь вѣ́рнѣ вше́дъ, ѡ҆правда́сѧ: съ воздыха́ньми бо и҆ слеза́ми и҆ съ сокрꙋше́нїемъ се́рдца прише́дъ, всѐ грѣхѡ́въ бре́мѧ ѿложѝ ᲂу҆моле́ньми.
Бг҃оро́диченъ: Пѣ́ти, сла́вити, и҆ бл҃жи́ти тѧ̀ дава́й на́мъ, досто́йнѡ чтꙋ́щымъ тѧ̀, пречтⷭ҇аѧ, и҆ ржⷭ҇тво̀ твоѐ велича́ющымъ, є҆ди́на бл҃гослове́ннаѧ: ты́ бо є҆сѝ похвала̀ хрⷭ҇тїа́нѡмъ, и҆ къ бг҃ꙋ мл҃твенница бл҃гопрїѧ́тнаѧ.
Є҆ѯапостїла́рїй воскрⷭ҇ный. Та́же трїѡ́ди. Сла́ва:
Подо́бенъ: Со ᲂу҆ч҃нкѝ взы́демъ:
Высокорѣ́чїѧ ᲂу҆бѣжи́мъ фарїсе́ева ѕлѣ́йшагѡ, смире́нїю же навы́кнемъ мытаре́вꙋ и҆зрѧ́днѣйшемꙋ, да вознесе́мсѧ, вопїю́ще къ бг҃ꙋ со ѻ҆́нѣмъ: млⷭ҇тивъ бꙋ́ди рабѡ́мъ твои̑мъ, хрⷭ҇тѐ сп҃се, роди́выйсѧ ѿ дв҃ы во́лею, и҆ крⷭ҇тъ претерпѣ́вый, совоздви́гнꙋвый мі́ръ твои́мъ бж҃е́ственнымъ могꙋ́тствомъ.
И҆ ны́нѣ, бг҃оро́диченъ, подо́бенъ:
Творе́цъ созда́нїѧ, и҆ бг҃ъ всѣ́хъ, пло́ть человѣ́ческꙋю прїѧ́тъ и҆з̾ непоро́чныѧ ᲂу҆тро́бы твоеѧ̀, всепѣ́таѧ бцⷣе: и҆ и҆стлѣ́вшее моѐ є҆стество̀ всѐ ѡ҆бновѝ, па́ки ꙗ҆́коже пре́жде ржⷭ҇тва̀ ѡ҆ста́вль тѧ̀ по ржⷭ҇твѣ̀. ѿѻнꙋ́дꙋже тѧ̀ вѣ́рою всѝ восхвалѧ́юще, зове́мъ: ра́дꙋйсѧ, мі́рꙋ сла́во.
На хвали́техъ стїхи̑ры воскрⷭ҇ны ѻ҆смогла́сника, д҃.
И҆ трїѡ́ди самогла́сны д҃:
Не помо́лимсѧ фарїсе́йски, бра́тїе: Фарїсе́й тщесла́вїемъ: [Пи́саны на вече́рни.]
Гла́съ г҃:
Сті́хъ: Воскрⷭ҇нѝ, гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀.
Мытарѧ̀ и҆ фарїсе́а разли́чїе разꙋмѣ́вши, дꙋшѐ моѧ̀, ѻ҆́вагѡ ᲂу҆́бѡ возненави́ждь горды́нный гла́съ, ѻ҆́вагѡ же ревнꙋ́й бл҃гоꙋмиле́ннѣй мл҃твѣ, и҆ возопі́й: бж҃е, млⷭ҇тивъ бꙋ́ди мнѣ̀ грѣ́шномꙋ и҆ поми́лꙋй мѧ̀.
Сті́хъ: И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.
Фарїсе́а велехва́льный гла́съ вѣ́рнїи возненави́дѣвше, мытаре́вѣ же бл҃гоꙋмиле́ннѣй мл҃твѣ поревнова́вше, не высѡ́каѧ мꙋ́дрствꙋимъ, но себѐ смирѧ́юще, со ᲂу҆миле́нїемъ воззове́мъ: бж҃е, ѡ҆чи́сти грѣхѝ на́шѧ.
Сла́ва, гла́съ и҃:
Ѿ дѣ́лъ похвале́ньми ѡ҆правда́юща себѐ, фарїсе́а ѡ҆сꙋди́лъ є҆сѝ, гдⷭ҇и, и҆ мытарѧ̀ смири́вшасѧ и҆ воздыха́ньми ѡ҆чище́нїѧ просѧ́ща ѡ҆правда́лъ є҆сѝ: не внима́еши бо велемꙋ́дреннымъ помыслѡ́мъ, и҆ сокрꙋшє́ннаѧ сердца̀ не ᲂу҆ничижа́еши. тѣ́мже и҆ мы̀ во смире́нїи припа́даемъ тебѣ̀, пострада́вшемꙋ на́съ ра́ди: пода́ждь проще́нїе и҆ ве́лїю млⷭ҇ть.
И҆ ны́нѣ: Пребл҃гослове́на є҆сѝ, бцⷣе дв҃о:
Славосло́вїе вели́кое и҆ ѿпꙋ́стъ.
И҆ ѡ҆бы́чнѡ лїті́а въ притво́рѣ, въ не́йже пое́мъ: Сла́ва, и҆ ны́нѣ: Стїхи́рꙋ ᲂу҆́треннюю є҆ѵⷢ҇льскꙋю. И҆ ча́съ пе́рвый.
[зрѝ] Подоба́етъ вѣ́дати, ꙗ҆́кѡ стїхи̑ры всѧ̑ а҃і ᲂу҆́трєннїѧ є҆ѵⷢ҇льскїѧ, ѿ сеѧ̀ настоѧ́щїѧ недѣ́ли, и҆ да́же до всѣ́хъ ст҃ы́хъ, на лїті́ахъ ᲂу҆́треннихъ пою́тсѧ въ притво́рѣ, на Сла́ва, и҆ ны́нѣ.
Вѣ́стно же бꙋ́ди, ꙗ҆́кѡ ѿ сеѧ̀ недѣ́ли начина́емъ честѝ въ притво́рѣ, по ѿпꙋ́стѣ лїті́и, ѡ҆глашє́нїѧ ст҃а́гѡ ѻ҆тца̀ на́шегѡ ѳео́дѡра стꙋді́та. И҆ а҆́ще та́мо є҆́сть и҆гꙋ́менъ, чтꙋ́тсѧ ѿ негѡ̀: а҆́ще же нѝ, то ѿ є҆кклисїа́рха, стоѧ́щымъ, и҆ со внима́нїемъ послꙋ́шающымъ бра́тїѧмъ. По сконча́нїи же чте́нїѧ глаго́лемъ тропа́рь прпⷣбномꙋ ѳео́дѡрꙋ, гла́съ и҃: Правосла́вїѧ наста́вниче: без̾ бг҃оро́дична. И҆ соверше́нный ѿпꙋ́стъ.
На лїтꙋргі́и,
блажє́нны ѻ҆смогла́сника: и҆ ѿ канѡ́на пѣ́снь ѕ҃. Прокі́менъ прилꙋчи́вшагосѧ гла́са. А҆пⷭ҇лъ къ тїмоѳе́ю, зача́ло сч҃ѕ. А҆ллилꙋ́їа. Є҆ѵⷢ҇лїе ѿ лꙋкѝ, зача́ло п҃ѳ. Прича́стенъ: Хвали́те гдⷭ҇а съ нб҃съ:
[зрѝ] Подоба́етъ вѣ́дати, ꙗ҆́кѡ въ се́й седми́цѣ и҆номꙋ́дрствꙋющїи соде́ржатъ по́стъ, глаго́лемый а҆рцивꙋ́рїевъ. Мы́ же, [мона́си] на кі́йждо де́нь [се́ же, и҆ въ сре́дꙋ и҆ пѧто́къ:] вкꙋша́емъ сы́ръ и҆ ꙗ҆́ица, [въ ѳ҃ ча́съ.] мїрѧ́не же ꙗ҆дѧ́тъ мѧ́со, ѡ҆блича́юще ѻ҆́нѣхъ велѣ́нїе толи́кїѧ є҆́реси.
А҆́ще слꙋчи́тсѧ пра́здникъ срѣ́тенїѧ гдⷭ҇нѧ въ сꙋббѡ́тꙋ мѧсопꙋ́стнꙋю, слꙋ́жба ᲂу҆ме́ршихъ пое́тсѧ въ гробни́цѣ всѧ̀, ве́черъ и҆ ᲂу҆́трѡ: а҆́ще же нѣ́сть гробни́цы, то̀ пое́тсѧ въ сїю̀ сꙋббѡ́тꙋ пред̾ недѣ́лею ѡ҆ блꙋ́днѣмъ: а҆ та́мѡ въ сꙋббѡ́тꙋ мѧсопꙋ́стнꙋю, то́чїю пра́здника є҆ди́номꙋ пое́тсѧ.
