Недѣ́лѧ,
въ ню́же чте́тсѧ сщ҃е́нное и҆ ст҃о́е є҆ѵⷢ҇лїе, при́тчи
блꙋ́днагѡ сы́на.
Въ сꙋббѡ́тꙋ ве́чера
на бдѣ́нїи, по ѡ҆бы́чнѣмъ стїхосло́вїи, на Гдⷭ҇и воззва́хъ, поста́вимъ стїхѡ́въ і҃, и҆ пое́мъ стїхи̑ры ѻ҆смогла́сника воскрⷭ҇ны г҃, и҆ а҆нато́лїевы г҃, и҆ трїѡ́ди д҃, и҆ повторѧ́юще сїѧ̑.
Гла́съ а҃.
Въ безгрѣ́шнꙋю странꙋ̀ и҆ живоно́снꙋю ввѣ́рихсѧ: посѣ́ѧвъ грѣ́хъ, серпо́мъ пожа́хъ кла́сы лѣ́ности, и҆ и҆з̾ снопѡ́въ дѣѧ́нїй мои́хъ сложи́хъ сто́ги, ꙗ҆̀же и҆ постла́хъ не на гꙋмнѣ̀ покаѧ́нїѧ. но молю́ тѧ превѣ́чнаго дѣ́лателѧ на́шего бг҃а, вѣ́тромъ твоегѡ̀ любобл҃госе́рдїѧ развѣ́й пле́вꙋ дѣ́лъ мои́хъ, и҆ да́ждь дꙋшѝ мое́й пшени́цꙋ проще́нїѧ, въ нбⷭ҇нꙋю твою̀ затворѧ́ѧ мѧ̀ жи́тницꙋ, и҆
сп҃си́ мѧ.
Позна́имъ, бра́тїе, та́инства си́лꙋ: ѿ грѣха́ бо ко ѻ҆ч҃ескомꙋ до́мꙋ восте́кшаго блꙋ́днаго сы́на пребл҃гі́й ѻ҆ц҃ъ пред̾ꙋсрѣ́тъ лобза́етъ, и҆ па́ки своеѧ̀ сла́вы показа̑нїѧ да́рꙋетъ: и҆ та́инственное вы̑шнимъ соверша́етъ весе́лїе, закала́ѧ тельца̀ ᲂу҆пита́ннаго, да мы̀ досто́йнѡ сожи́тельствꙋемъ закла́вшемꙋ чл҃вѣколю́бномꙋ ѻ҆ц҃ꙋ̀, и҆ сла́вномꙋ заколе́нїю, сп҃сꙋ дꙋ́шъ на́шихъ.
Сла́ва, гла́съ в҃:
ѽ коли́кихъ бла̑гъ ѡ҆каѧ́нный себѐ лиши́хъ! ѽ какова̀ ца́рствїѧ ѿпадо́хъ стра́стный а҆́зъ! бога́тство расточи́хъ, є҆́же прїѧ́хъ: за́повѣдь престꙋпи́хъ. ᲂу҆вы̀ мнѣ̀, стра́стнаѧ дꙋшѐ! ѻ҆гню̀ вѣ́чномꙋ ᲂу҆жѐ ѡ҆сꙋжда́ешисѧ. тѣ́мже пре́жде конца̀ возопі́й хрⷭ҇тꙋ̀ бг҃ꙋ: ꙗ҆́кѡ блꙋ́днаго прїими́
мѧ сы́на, бж҃е, и҆ поми́лꙋй мѧ̀.
И҆ ны́нѣ, бг҃оро́диченъ а҃-й, гла́са.
Вхо́дъ. Свѣ́те ти́хїй: Прокі́менъ: Гдⷭ҇ь воцр҃и́сѧ:
На лїті́и по ѡ҆бы́чаю стїхи́ра хра́ма.
Сла́ва, гла́съ д҃:
Ꙗ҆́кѡ блꙋ́дный сы́нъ прїидо́хъ и҆ а҆́зъ, ще́дре, житїѐ всѐ и҆жди́вый во ѿше́ствїи: расточи́хъ бога́тство, є҆́же да́лъ є҆сѝ мнѣ̀, ѻ҆́ч҃е. прїими́ мѧ ка́ющасѧ, бж҃е, и҆ поми́лꙋй мѧ̀.
И҆ ны́нѣ, бг҃оро́диченъ, тогѡ́же гла́са.
На стїхо́внѣ ѻ҆смогла́сника, по а҆лфави́тꙋ.
Сла́ва, самогла́сенъ, гла́съ ѕ҃:
Ѻ҆ч҃ескагѡ да́ра расточи́въ бога́тство, съ безслове́сными скоты̑ пасо́хсѧ ѡ҆каѧ́нный, и҆ тѣ́хъ жела́ѧ пи́щи, гла́домъ та́ѧхъ не насыща́ѧсѧ. но возврати́всѧ ко бл҃госе́рдомꙋ ѻ҆ц҃ꙋ̀, взыва́ю со слеза́ми: ꙗ҆́кѡ нае́мника прїими́ мѧ припа́дающа чл҃вѣколю́бїю твоемꙋ̀, и҆ сп҃си́ мѧ.
И҆ ны́нѣ, бг҃оро́диченъ: Творе́цъ и҆ и҆зба́витель мо́й:
Ѿпꙋсти́тельный: Бцⷣе дв҃о: [три́жды].
И҆ про́чее послѣ́дованїе бдѣ́нїѧ, ꙗ҆́кѡ ѡ҆бы́чно.
На ᲂу҆́трени,
на Бг҃ъ Гдⷭ҇ь, тропа́рь ѻ҆смогла́сника воскрⷭ҇нъ, и҆ бг҃оро́диченъ: ѡ҆бы́чное стїхосло́вїе. И҆ полѷеле́й, ѡ҆бы́чнїи два̀ ѱалма̑: припѣва́емъ же къ си̑мъ и҆ тре́тїй ѱало́мъ: На рѣка́хъ вавѷлѡ́нскихъ: со а҆ллилꙋ́їею кра́сною. Степє́нны и҆ прокі́менъ гла́са.
Всѧ́кое дыха́нїе: Є҆ѵⷢ҇лїе ᲂу҆́треннее.
Та́же, сла́ва, гла́съ и҃: Покаѧ́нїѧ ѿве́рзи мѝ двє́ри: И҆ ны́нѣ, бг҃оро́диченъ: На сп҃се́нїѧ стєзѝ: Та́же, гла́съ ѕ҃: Поми́лꙋй мѧ̀ бж҃е: Мно́жєства содѣ́ѧнныхъ мно́ю лю́тыхъ:
[стр. з҃]
Канѡ́нъ воскре́сенъ, со і҆рмосѡ́мъ на д҃, и҆ крⷭ҇товоскре́сный на два̀, и҆ бцⷣы на два̀, и҆ трїѡ́ди на ѕ҃.
[Мине́и же послѣ́дованїе пое́мъ на повече́рїи, въ пѧто́къ ве́чера.]
Канѡ́нъ, творе́нїе господи́на і҆ѡ́сифа. Гла́съ в҃:
Пѣ́снь а҃:
І҆рмо́съ: Мѡѷсе́евꙋ пѣ́снь:
І҆и҃се бж҃е, ꙗ҆́кѡ блꙋ́днаго сы́на, ка́ющасѧ прїимѝ ны́нѣ и҆ менѐ, всѐ житїѐ въ лѣ́ности жи́вша, и҆ тебѐ прогнѣ́вавша.
ѕлѣ̀ расточи́хъ бж҃е́ственное бога́тство, є҆́же мѝ да́лъ є҆сѝ пре́жде: ᲂу҆дали́хсѧ ѿ тебє̀, блꙋ́днѡ жи́въ. бл҃госе́рде ѻ҆́ч҃е, прїимѝ ᲂу҆̀бо и҆ менѐ ѡ҆браща́ющасѧ.
Сла́ва: Ѡ҆б̾ѧ̑тїѧ ѻ҆ч҃єскаѧ ны́нѣ просте́ръ, прїимѝ, гдⷭ҇и всеще́дре, и҆ менѐ, ꙗ҆́коже блꙋ́днаго, ꙗ҆́кѡ да бл҃года́рнѡ просла́влю тѧ̀.
Бг҃оро́диченъ: На мнѣ̀, бж҃е, всю̀ показа́въ бл҃госты́ню, пре́зри мно́жество мои́хъ согрѣше́нїй,ꙗ҆́кѡ бл҃годѣ́тель, бж҃е́ственными мт҃ре твоеѧ̀ мольба́ми.
Катава́сїи же пое́мъ і҆рмосы̀ канѡ́на.
І҆рмо́съ: Мѡѷсе́евꙋ пѣ́снь воспрїи́мши, возопі́й, дꙋшѐ: помо́щникъ и҆ покрови́тель бы́сть мнѣ̀ во сп҃се́нїе, се́й мо́й бг҃ъ, и҆ просла́влю є҆го̀.
Пѣ́снь г҃.
І҆рмо́съ: Непло́дный мо́й ᲂу҆́мъ:
Ве́сь бы́въ внѣ̀ себє̀, ᲂу҆мовре́днѡ прилѣпи́хсѧ страсте́й и҆з̾ѡбрѣта́телємъ: но прїими́ мѧ,хрⷭ҇тѐ, ꙗ҆́коже блꙋ́днаго.
Гла́сꙋ блꙋ́днагѡ поревнова́въ, вопїю̀: согрѣши́хъ, ѻ҆́ч҃е: ꙗ҆́коже ѻ҆́наго ᲂу҆̀бо, и҆ менѐ ѡ҆б̾имѝ ны́нѣ, и҆ не ѿри́ни менѐ.
Сла́ва: Ѡ҆б̾ѧ̑тїѧ твоѧ̑ просте́ръ, хрⷭ҇тѐ, млⷭ҇тивнѡ прїими́ мѧ, ѿ страны̀ да́льныѧ грѣха̀ и҆ страсте́й ѡ҆браща́ющасѧ.
Бг҃оро́диченъ: До́браѧ въ жена́хъ, ѡ҆богатѝ и҆ менѐ до́брыхъ ви̑ды, грѣхи̑ мно́гими ѡ҆бнища́вшаго, чтⷭ҇аѧ, ꙗ҆́кѡ да сла́влю тѧ̀.
І҆рмо́съ: Непло́дный мо́й ᲂу҆́мъ плодоно́сенъ покажи́ ми, бж҃е, дѣ́лателю до́брыхъ, насади́телю бл҃ги́хъ, бл҃госе́рдїемъ твои́мъ.
Сѣда́ленъ, гла́съ а҃.
Подо́бенъ: Гро́бъ тво́й:
Ѡ҆б̾ѧ̑тїѧ ѻ҆́ч҃а ѿве́рсти мѝ потщи́сѧ, блꙋ́днѡ и҆жди́хъ моѐ житїѐ: на бога́тство неиждива́емое взира́ѧй щедро́тъ твои́хъ сп҃се, ѡ҆бнища́вшее моѐ се́рдце ны́нѣ не пре́зри. тебѣ́ бо, гдⷭ҇и, во ᲂу҆миле́нїи зовꙋ̀: согрѣши́хъ, ѻ҆́ч҃е, на нб҃о и҆ пред̾ тобо́ю.
Сла́ва, то́йже.
И҆ ны́нѣ, бг҃оро́диченъ. Подо́бенъ:
Безневѣ́стнаѧ чтⷭ҇аѧ бцⷣе дв҃о, є҆ди́на вѣ́рныхъ предста́тельнице и҆ покро́ве, ѿ бѣ́дъ и҆ скорбе́й и҆ лю́тыхъ ѡ҆бстоѧ́нїй всѧ̑ свободѝ, ѻ҆трокови́це, на тѧ̀ надє́жды и҆мꙋ́щыѧ, и҆ дꙋ́шы на́шѧ сп҃сѝ бж҃е́ственными мл҃твами твои́ми.
Пѣ́снь д҃:
І҆рмо́съ: Ржⷭ҇тво твоѐ ѿ дв҃ы предзрѧ̀:
Бога́тство бл҃ги́хъ, є҆́же да́лъ мѝ є҆сѝ, нбⷭ҇ный ѻ҆́ч҃е, расточи́хъ ѕлѣ̀, чꙋжди̑мъ гра́жданѡмъ порабоще́нъ. тѣ́мже вопїю́ ти: согрѣши́хъ тѝ, прїими́ мѧ ꙗ҆́кѡ блꙋ́днаго дре́вле, просте́ръ мнѣ̀ ѡ҆б̾ѧ̑тїѧ твоѧ̑.
Всѧ́кой ѕло́бѣ порабо́тихсѧ, повинꙋ́всѧ ѡ҆каѧ́ннѡ страсте́й дѣ́лателємъ, и҆ внѣ̀ себє̀ бы́хъ несмотре́нїемъ: ᲂу҆ще́дри мѧ̀, сп҃се, пренбⷭ҇ный ѻ҆́ч҃е, прибѣга́юща ко мнѡ́гимъ твои̑мъ щедро́тамъ.
Сла́ва: Всѧ́кагѡ стꙋда̀ и҆спо́лнихсѧ, не смѣ́ѧ воззрѣ́ти на высотꙋ̀ нбⷭ҇нꙋю: и҆́бо безслове́сно повинꙋ́хсѧ грѣхꙋ̀. ны́нѣ же ѡ҆бра́щьсѧ вопїю̀ со ᲂу҆миле́нїемъ: согрѣши́хъ тѝ, прїими́ мѧ, всецр҃ю̀.
Бг҃оро́диченъ: Человѣ́кѡмъ по́мощь, ᲂу҆пова́нїе тве́рдое всѣ̑мъ хрⷭ҇тїа́нѡмъ, прибѣ́жище сп҃са́ємымъ, сп҃си́ мѧ, дв҃о чⷭ҇таѧ, мт҃рними твои́ми мольба́ми, и҆ бꙋ́дꙋщїѧ жи́зни сподо́би.
І҆рмо́съ: Ржⷭ҇тво̀ твоѐ ѿ дв҃ы предзрѧ̀, прⷪ҇ро́къ возпроповѣ́даше вопїѧ̀: слꙋ́хъ тво́й ᲂу҆слы́шахъ, и҆ ᲂу҆боѧ́хсѧ: ꙗ҆́кѡ ѿ ю҆́га и҆ и҆з̾ горы̀ ст҃ы́ѧ прїѡсѣне́нныѧ прише́лъ є҆сѝ, хрⷭ҇тѐ.
Пѣ́снь є҃:
І҆рмо́съ: Но́щи преше́дшей:
Порабо́тихсѧ гра́жданѡмъ чꙋжди̑мъ, и҆ во странꙋ̀ тлетво́рнꙋю ѿидо́хъ, и҆ и҆спо́лнихсѧ стꙋда̀, ны́нѣ же ѡ҆браща́ѧсѧ зовꙋ́ ти, ще́дре: согрѣши́хъ.
Ѻ҆ч҃єскаѧ твоѧ̑ нѣ̑дра ны́нѣ ѿве́рзи мѝ, ѿ ѕлы́хъ ѡ҆браща́ющꙋсѧ, нбⷭ҇ный ѻ҆́ч҃е, и҆ не ѿри́ни менѐ, и҆мѣ́ѧй премно́гꙋю млⷭ҇ть.
Сла́ва: Не смѣ́ю воззрѣ́ти горѣ̀ на высотꙋ̀, без̾ числа̀ прогнѣ́вавъ тѧ̀, хрⷭ҇тѐ. но вѣ́дый твоѐ бл҃госе́рдїе, ще́дре, взыва́ю: согрѣши́хъ тѝ, млⷭ҇тивъ бꙋ́ди и҆ сп҃си́ мѧ.
Бг҃оро́диченъ: Всест҃а́ѧ дв҃о бл҃года́тнаѧ, ѡ҆чище́нїе всѣ̑мъ ро́ждшаѧ, мои́хъ согрѣше́нїй тѧ́жкое бре́мѧ твои́ми мл҃твами ѡ҆блегчѝ.
І҆рмо́съ: Но́щи преше́дшей, прибли́жисѧ де́нь, и҆ свѣ́тъ мі́рꙋ возсїѧ̀: сегѡ̀ ра́ди хва́лѧтъ тѧ̀ а҆́гг҃льстїи чи́ни, и҆ славосло́вѧтъ тѧ̀ всѧ́чєскаѧ.
Пѣ́снь ѕ҃:
І҆рмо́съ: Во глꙋбинѣ̀ грѣхо́внѣй:
Глꙋбина̀ согрѣше́нїй содержи́тъ мѧ̀ при́снѡ, и҆ треволне́нїе грѣхѡ́въ погрꙋжа́етъ мѧ̀: ᲂу҆пра́ви мѧ ко приста́нищꙋ жи́зни, хрⷭ҇тѐ бж҃е, и҆ сп҃си́ мѧ, цр҃ю̀ сла́вы.
Бога́тство ѻ҆ч҃еское расточи́хъ лю́тѣ, и҆ ѡ҆бнища́въ стꙋда̀ и҆спо́лнихсѧ, порабоще́нъ непло́дными помышле́ньми. тѣ́мже тѝ вопїю̀: чл҃вѣколю́бче, ᲂу҆ще́дри и҆ сп҃си́ мѧ.
Сла́ва: Гла́домъ и҆ста́ѧвша всѧ́кихъ бла̑гъ, и҆ ᲂу҆страни́вшасѧ ѿ тебє̀, всебл҃гі́й, ᲂу҆ще́дри ѡ҆браща́ющасѧ мѧ̀ ны́нѣ: и҆ сп҃сѝ, хрⷭ҇тѐ, пою́ща твоѐ чл҃вѣколю́бїе.
Бг҃оро́диченъ: Сп҃са и҆ влⷣкꙋ ро́ждшаѧ хрⷭ҇та̀, ѻ҆трокови́це дв҃о чтⷭ҇аѧ, сп҃се́нїѧ сподо́би мѧ̀, ѡ҆бнища́вша ѿ всѧ́кихъ бла̑гъ, да пою̀ твоѧ̑ вели̑чїѧ.
І҆рмо́съ: Во глꙋбинѣ̀ грѣхо́внѣй содержи́мь є҆́смь, сп҃се, и҆ въ пꙋчи́нѣ жите́йстѣй ѡ҆бꙋрева́емь: но ꙗ҆́коже і҆ѡ́нꙋ ѿ ѕвѣ́рѧ, и҆ менѐ ѿ страсте́й возведѝ, и҆ сп҃си́ мѧ.
Конда́къ, гла́съ г҃.
Подо́бенъ: Дв҃а дне́сь:
Ѻ҆ч҃ескїѧ сла́вы твоеѧ̀ ᲂу҆дали́хсѧ безꙋ́мнѡ, во ѕлы́хъ расточи́въ бога́тство, є҆́же мѝ пре́далъ є҆сѝ. тѣ́мже тѝ блꙋ́днагѡ гла́съ приношꙋ̀: согрѣши́хъ пред̾ тобо́ю, ѻ҆́ч҃е ще́дрый: прїими́ мѧ ка́ющасѧ, и҆ сотвори́ мѧ ꙗ҆́кѡ є҆ди́наго ѿ нає́мникъ твои́хъ.
І҆́косъ: Сп҃са на́шегѡ, ᲂу҆ча́ща на всѧ́къ де́нь свои́мъ гла́сомъ, писа̑нїѧ ᲂу҆слы́шимъ ѡ҆ блꙋ́днѣмъ и҆ цѣломꙋ́дреннѣмъ па́ки, и҆ сегѡ̀ до́бромꙋ покаѧ́нїю вѣ́рою подража́имъ. вѣ́дꙋщемꙋ та̑йнаѧ всѣ́хъ, смире́нїемъ се́рдца воззове́мъ согрѣши́хомъ ти, ѻ҆́ч҃е ще́дрый, и҆ никогда́же досто́йни є҆смы̀ нарещи́сѧ ча̑да, ꙗ҆́коже пре́жде: ты̀ же є҆стество́мъ сы́й чл҃вѣколюби́въ, прїимѝ и҆ сотвори́ коего́ждо ѿ на́съ, ꙗ҆́кѡ є҆ди́наго ѿ нає́мникъ твои́хъ.
И҆ быва́етъ чте́нїе пре́жде сѷнаѯа́рїа въ мине́и: та́же въ трїѡ́ди по чи́нꙋ.
Стїхѝ: А҆́ще кто блꙋдни́къ є҆́сть ꙗ҆́кѡ а҆́зъ, дерза́ѧ грѧдѝ:
Всѣ̑мъ бо ѿве́рзесѧ две́рь бж҃їихъ щедро́тъ.
Въ сі́й де́нь пра́зднꙋемъ возвраще́нїе блꙋ́днагѡ сы́на, є҆́же бж҃е́ственнїи ѻ҆тцы̀ на́ши второ́е въ трїѡ́ди ᲂу҆чини́ша, вины̀ ра́ди сицевы́ѧ. Поне́же сꙋ́ть нѣ́цыи, и҆́же мнѡ́гаѧ неподѡ́бнаѧ въ себѣ̀ свѣ́дꙋще, блꙋ́днѣ же ѕѣлѡ̀ ѿ ю҆́нагѡ во́зраста живꙋ́ще, и҆ пїѧ́нствы, и҆ нечистота́ми ᲂу҆пражнѧ́ющесѧ, и҆ во глꙋбинꙋ̀ ѕлы́хъ си́це впа́дше, во ѿча́ѧнїе прихо́дѧтъ, є҆́же є҆́сть порожде́нїе го́рдости: и҆ ѿсю́дꙋ къ попече́нїю ѡ҆ добродѣ́тели ника́коже приходи́ти хотѧ́тъ, и҆ ѕлы́хъ ᲂу҆́зы во ѡ҆́правда́нїе себє̀ предлага́юще, въ та̑ѧже и҆ гѡ́ршаѧ ѕла̑ѧ при́снѡ впа́даютъ. Ст҃і́и ѻ҆тцы̀, чл҃вѣколю́бїе и҆ къ такѡвы̑мъ человѣ́кѡмъ ѻ҆те́чески и҆мꙋ́ще, и҆ ѿвестѝ и҆́хъ ѿ ѿча́ѧнїѧ хотѧ́ще, таковꙋ́ю при́тчꙋ здѣ̀ по пе́рвѣй ᲂу҆чини́ша, ѿча́ѧнїѧ стра́сть и҆з̾ ко́рене востерза́юще, и҆ къ воспрїѧ́тїю добродѣ́тели возбꙋжда́юще, и҆ блꙋ̑днымъ сы́номъ чл҃вѣколюбное и҆ пребл҃го́е бж҃їе милосе́рдїе наимно́жае согрѣши́вшымъ показꙋ́юще: ѿ сеѧ̀ при́тчи хрⷭ҇то́вы сїѐ представлѧ́юще, ꙗ҆́кѡ ничто́же є҆́сть ѿ грѣхѡ́въ, є҆́же є҆гѡ̀ чл҃вѣколю́бный ра́зꙋмъ побѣди́тъ. Два̀ ᲂу҆́бо сы́на человѣ́кꙋ, си́рѣчь, бг҃очеловѣ́кꙋ сло́вꙋ, сꙋ́ть: првⷣницы и҆ грѣ́шницы. Старѣ́йшїй ᲂу҆́бо є҆́сть, въ за́повѣдехъ бж҃їихъ и҆ во бл҃го́мъ є҆го̀ при́снѡ пребыва́ѧй, и҆ никогда́же ѿ негѡ̀ ѿстꙋпа́ѧй. Ю҆́нѣ́йшїй же є҆́сть грѣ́хъ возлюби́вый, и҆ стꙋ́дныхъ ра́ди дѣ́лъ съ бг҃омъ сопребыва́нїѧ ѿрекі́йсѧ, и҆ бж҃їе ѡ҆ не́мъ чл҃вѣколю́бїе и҆жди́вый, блꙋ́днѣ пожи́въ: и҆́же цѣ́лѡ не соблюдѐ є҆́же по ѡ҆́бразꙋ, и҆ лꙋка́вомꙋ де́мѡнꙋ послѣ́дствова, и҆ порабо́та сластьмѝ ѻ҆́нагѡ хотѣ́нїю, и҆ не возмо́же по́хоть насы́тити. Ненасы́тимаѧ бо ве́щь є҆́сть грѣ́хъ, прельща́ѧй ѡ҆бы́чнѡ вре́меннымъ наслажде́нїемъ: є҆го́же и҆ рожцє́мъ ᲂу҆подоблѧ́етъ, и҆́же сꙋ́ть пи́ща свинїѧ́мъ. Рожцы́ бо пе́рвѣе ᲂу҆́бѡ сла́дко нѣ́что предлага́ютъ: послѣди́ же жестоко̀ нѣ́что, и҆ а҆́ки плє́вы быва́ютъ, ꙗ҆кова̑же свѡ́йства и҆́мать и҆ грѣ́хъ. Є҆два̀ ᲂу҆́бо прише́дъ въ себѐ блꙋ́дный, ꙗ҆́кѡ гла́домъ добродѣ́тели погиба́ѧ, прихо́дитъ ко ѻ҆ц҃ꙋ̀, глаго́лѧ: ѻ҆́ч҃е, согрѣши́хъ на нб҃о и҆ пред̾ тобо́ю, и҆ нѣ́смь досто́инъ нарещи́сѧ сы́нъ тво́й. То́йже прїе́млетъ сего̀ ка́ющасѧ, не поноша́ѧ, но простира́ѧ є҆мꙋ рꙋ́цѣ и҆ ѡ҆быма́ѧ, бж҃е́ствєнное и҆ ѻ҆те́чєское милосе́рдїе показꙋ́етъ. И҆ дае́тъ є҆мꙋ̀ ѡ҆де́ждꙋ, си́рѣчь ст҃о́е креще́нїе, и҆ печа́ть и҆ ѡ҆брꙋче́нїе, си́рѣчь бл҃года́ть всест҃а́гѡ дх҃а: къ си̑мъ же и҆ сапогѝ, да ѿ ѕмі́євъ и҆ скорпі́й ᲂу҆жѐ не ᲂу҆ѧзвлѧ́ютсѧ стѡпы̀ є҆гѡ, по бз҃ѣ ходѧ́щѧ, но наипа́че ѻ҆́нѣхъ главы̑ сокрꙋши́ти возмо́гꙋтъ. Пото́мъ же, ѿ премно́гїѧ ра́дости, и҆ тельца̀ ᲂу҆пита́ннаго, сн҃а своего̀ є҆диноро́днаго, є҆гѡ̀ ра́ди закала́етъ ѻ҆ц҃ъ, и҆ пло́ти є҆гѡ̀ дае́тъ причасти́тисѧ, и҆ кро́ви. И҆ а҆́ще старѣ́йшїй сы́нъ, чꙋдѧ́сѧ пребезчи́сленномꙋ є҆гѡ̀ милосе́рдїю, и҆ глаго́летъ, є҆ли̑ка ᲂу҆́бѡ и҆ речѐ: чл҃вѣколю́бецъ же и҆ ѻ҆́наго къ молча́нїю приво́дитъ, ти́хѡ ᲂу҆вѣщава́ѧ, кро́тцѣ и҆ любє́знѣ глаго́лѧ: ты̀ всегда̀ со мно́ю є҆сѝ, и҆ пора́доватисѧ подоба́ше, и҆ ѻ҆ц҃ꙋ̀ совозвесели́тисѧ, ꙗ҆́кѡ сы́нъ мо́й се́й пре́жде ме́ртвъ бѧ́ше грѣха̀ ра́ди, и҆ ѡ҆живѐ, раска́ѧвсѧ ѡ҆ тѣ́хъ, ꙗ҆́же безꙋ́мнѣ дѣ́ѧше, и҆ и҆зги́блъ бѧ́ше, дале́че ѿ менє̀ бы́въ ѡ҆бы́чаемъ сласте́й, и҆ ѡ҆брѣ́тенъ бы́сть мно́ю, и҆́же милосе́рдїемъ свои́мъ сострада́хъ, и҆ млⷭ҇тивнымъ нра́вомъ призва́хъ є҆го̀. Мо́жетъ же при́тча сїѧ̀ и҆ къ лю́демъ є҆врє́йскимъ, и҆ къ на́мъ приложи́тисѧ.
Сеѧ̀ ᲂу҆́бо ра́ди вины̀ при́тча сїѧ̀ и҆ здѣ̀ ѿ ст҃ы́хъ ѻ҆тє́цъ ᲂу҆чини́сѧ: занѐ сїѧ̀ и҆сторга́етъ ᲂу҆́бо, ꙗ҆́коже рече́сѧ, ѿча́ѧнїе и҆ боѧ́знь каса́тисѧ дѡ́брымъ дѣлѡ́мъ. поꙋща́етъ же къ покаѧ́нїю и҆ раска́ѧнїю согрѣши́вшаго ꙗ҆́кѡ блꙋ́дный: є҆́же ᲂу҆́бо и҆ ѡ҆рꙋ́жїе є҆́сть велича́йшее, во ѿгна́нїе стрѣ́лъ сопроти́внагѡ, и҆ защище́нїе крѣ́пкое.
Неизрече́ннымъ чл҃вѣколю́бїемъ твои́мъ, хрⷭ҇тѐ бж҃е на́шъ, поми́лꙋй на́съ. Ами́нь.
Пѣ́снь з҃:
І҆рмо́съ: Херꙋві́мѡмъ подража́юще:
Сла́достемъ тѣлє́снымъ приклони́хсѧ всеѡкаѧ́ннѡ, и҆ порабо́тихсѧ весьма̀ страсте́й и҆з̾ѡбрѣта́телємъ, и҆ чꙋ́ждь бы́хъ ѿ тебє̀, чл҃вѣколю́бче. ны́нѣ же зовꙋ̀ гла́сомъ блꙋ́днагѡ: согрѣши́хъ, хрⷭ҇тѐ, не пре́зри менѐ, ꙗ҆́кѡ є҆ди́нъ млⷭ҇тивъ.
Взыва́ю, согрѣши́хъ, ника́коже воззрѣ́ти дерза́ѧ на высотꙋ̀ нбⷭ҇нꙋю, всецр҃ю̀: занѐ въ безꙋ́мїи є҆ди́нъ тѧ̀ прогнѣ́вахъ, ѿве́ргсѧ твои́хъ повелѣ́нїй. тѣ́мже ꙗ҆́кѡ є҆ди́нъ бл҃гі́й, не ѿве́ржи менѐ ѿ лица̀ твоегѡ̀.
Сла́ва: А҆пⷭ҇тѡлъ, и҆ прⷪ҇рѡ́къ, и҆ прпⷣбныхъ, и҆ чтⷭ҇ны́хъ мч҃никъ, и҆ првⷣныхъ мольба́ми, гдⷭ҇и, прости́ ми всѧ̑, ꙗ҆̀же согрѣши́хъ, прогнѣ́вавъ бла́гость твою̀, хрⷭ҇тѐ: ꙗ҆́кѡ да пѣсносло́влю тѧ̀ во всѧ̑ вѣ́ки.
Бг҃оро́диченъ: Херꙋві̑мъ и҆ серафі̑мъ, и҆ всѣ́хъ нбⷭ҇ныхъ во́инствъ свѣтлѣ́йши ꙗ҆́вльшисѧ, бцⷣе, съ си́ми ᲂу҆молѝ, всенепоро́чнаѧ, є҆го́же воплоти́ла є҆сѝ, бж҃е́ственное сло́во безнача́льнагѡ ѻ҆ц҃а̀, ꙗ҆́кѡ да бла̑гъ вѣ́чнꙋющихъ всѝ сподо́бимсѧ.
І҆рмо́съ: Херꙋві́мѡмъ подража́юще, ѻ҆́троцы въ пещѝ ликовствова́хꙋ, вопїю́ще: бл҃гослове́нъ є҆сѝ, бж҃е, ꙗ҆́кѡ и҆́стиною и҆ сꙋдо́мъ наве́лъ є҆сѝ сїѧ̑ всѧ̑ грѣ̑хъ ра́ди на́шихъ, препѣ́тый и҆ препросла́вленный во всѧ̑ вѣ́ки.
Пѣ́снь и҃:
І҆рмо́съ: Въ кꙋпинѣ̀ на сїна́йстѣй горѣ̀:
Сше́дый на зе́млю сп҃стѝ мі́ръ во́льною нището́ю по милосе́рдїю мно́гомꙋ, ѡ҆бнища́вшаго мѧ̀ ны́нѣ ѿ всѧ́кагѡ бл҃годѣѧ́нїѧ, ꙗ҆́кѡ млⷭ҇тивый, сп҃сѝ.
Ѿ твои́хъ за́повѣдей ᲂу҆дали́всѧ, порабо́тихсѧ всеѡкаѧ́ннѡ лестцꙋ̀: ѡ҆браща́ющагосѧ же ны́нѣ, ꙗ҆́кѡ блꙋ́днаго дре́вле припа́дающа тебѣ̀, прїимѝ, пренбⷭ҇ный ѻ҆́ч҃е.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Тлетво́рными помышле́ньми ѡ҆б̾ѧ́тъ бы́въ ѡ҆мрачи́хсѧ, и҆ ѿ тебє̀ ᲂу҆дали́хсѧ, ве́сь внѣ̀ себѐ бы́въ, ще́дре. тѣ́мже въ покаѧ́нїи припа́дающа тебѣ̀ сп҃сѝ.
Бг҃оро́диченъ: Бг҃ороди́тельнице чтⷭ҇аѧ, є҆ди́на низве́рженныхъ и҆справле́нїе, и҆спра́ви и҆ менѐ всего̀, всѧ́кими грѣхмѝ сокрꙋше́ннаго и҆ смире́ннаго.
І҆рмо́съ: Въ кꙋпинѣ̀ на сїна́йстѣй горѣ̀, мѡѷсе́ю чꙋ́до дв҃ы дре́вле проѡбрази́вшаго, по́йте, бл҃гослови́те и҆ превозноси́те во всѧ̑ вѣ́ки.
Пѣ́снь ѳ҃:
І҆рмо́съ: Ѿ земноро́дныхъ кто̀ слы́ша таково́е:
Ви́ждь, хрⷭ҇тѐ, печа́ль се́рдца, ви́ждь моѐ ѡ҆браще́нїе, ви́ждь сле́зы, сп҃се, и҆ не пре́зри менѐ: но ѡ҆б̾имѝ па́ки бл҃госе́рдїѧ ра́ди, мно́жествꙋ сп҃са́емыхъ причита́ѧ, ꙗ҆́кѡ да пою̀ бл҃года́рнѡ млⷭ҇ти твоѧ̑.
Ꙗ҆́кѡ разбо́йникъ вопїю̀: помѧни́ мѧ. ꙗ҆́кѡ мыта́рь ᲂу҆мили́всѧ, бїю̀ въ пє́рси и҆ зовꙋ̀ ны́нѣ: млⷭ҇тивъ бꙋ́ди. ꙗ҆́коже блꙋ́днаго, и҆зба́ви мѧ ѿ всѣ́хъ ѕѡ́лъ мои́хъ, цр҃ю̀ всеще́дрый: ꙗ҆́кѡ да пою̀ твоѐ кра́йнее снизхожде́нїе.
Воздохнѝ ны́нѣ, дꙋшѐ моѧ̀ всеѡкаѧ́ннаѧ, и҆ возопі́й хрⷭ҇тꙋ̀: менє̀ ра́ди во́лею ѡ҆бнища́вый гдⷭ҇и, ѡ҆бнища́вшаго мѧ̀ ѿ всѧ́кагѡ бл҃годѣѧ́нїѧ до́брыхъ бога́тствомъ ѡ҆богатѝ, ꙗ҆́кѡ є҆ди́нъ бл҃гі́й и҆ многомлⷭ҇тивый.
Сла́ва: Є҆́же и҆ногда̀ содѣ́лалъ є҆сѝ весе́лїе, бл҃же, блꙋ́днагѡ ѡ҆браще́нїемъ во́льнымъ: сїѐ ны́нѣ сотворѝ и҆ на мнѣ̀ ѡ҆каѧ́ннѣмъ, простира́ѧ мѝ чтⷭ҇на̑ѧ твоѧ̑ ѡ҆б̾ѧ̑тїѧ: да спа́ссѧ пѣсносло́влю кра́йнее твоѐ снизхожде́нїе.
Бг҃оро́диченъ: Свѣ́тлыми мл҃твами твои́ми, дв҃о, мы́слєннаѧ моѧ̑ ѻ҆чеса̀, ѡ҆мрачє́ннаѧ ѕло́бою, просвѣтѝ, молю́сѧ, и҆ къ пꙋтє́мъ покаѧ́нїѧ введи́ мѧ: ꙗ҆́кѡ да до́лжнѡ тѧ̀ пѣсносло́влю, па́че сло́ва сло́во воплоти́вшꙋю.
І҆рмо́съ: Ѿ земноро́дныхъ кто̀ слы́ша таково́е; и҆лѝ кто̀ ви́дѣ когда̀, ꙗ҆́кѡ дв҃а ѡ҆брѣ́тесѧ во чре́вѣ и҆мꙋ́щаѧ и҆ безболѣ́зненнѡ младе́нца поро́ждшаѧ; таково́е твоѐ чꙋ́до, и҆ тѧ̀, чтⷭ҇аѧ бцⷣе мр҃і́е, велича́емъ.
Є҆ѯапостїла́рїй ѻ҆смогла́сника: та́же настоѧ́щїй, трїѡ́ди.
Подо́бенъ: Жєны̀, ᲂу҆слы́шите:
Бога́тство бл҃года́ти, є҆́же мѝ да́лъ є҆сѝ, а҆́зъ ѡ҆каѧ́нный, ѿше́дъ, непотре́бнѡ ѕлѣ̀ и҆жди́хъ, сп҃се: блꙋ́днѡ пожи́въ, де́монѡмъ льсти́внѡ расточи́хъ. тѣ́мже мѧ̀ ѡ҆браща́ющасѧ ꙗ҆́коже блꙋ́днаго прїимѝ, ѻ҆́ч҃е ще́дрый, и҆ сп҃сѝ.
И҆́ный, подо́бенъ: Расточи́хъ бога́тство твоѐ и҆жди́въ, гдⷭ҇и, и҆ лꙋка́вымъ де́монѡмъ повинꙋ́хсѧ ѡ҆каѧ́нный: но, сп҃се всебл҃госе́рдый, блꙋ́днаго ᲂу҆ще́дри, и҆ ѡ҆скве́рншасѧ ѡ҆чи́сти, ѿдаѧ́ мнѣ̀ пе́рвꙋю ѡ҆де́ждꙋ твоегѡ̀ црⷭ҇твїѧ.
Бг҃оро́диченъ, подо́бенъ: Ст҃а́ѧ мт҃и дв҃о, ве́лїе проповѣ́данїе а҆пⷭ҇лѡвъ, мч҃нкѡвъ и҆ прⷪ҇ро́кѡвъ, и҆ прпⷣбныхъ, твоего̀ сн҃а и҆ гдⷭ҇а ᲂу҆ми́лостиви на́мъ рабѡ́мъ твои̑мъ, бг҃ороди́тельнице, є҆гда̀ сѧ́детъ сꙋди́ти по достоѧ́нїю коего́ждо.
На хвали́техъ стїхи̑ры ѻ҆смогла́сника воскрⷭ҇ны, д҃: и҆ а҆нато́лїевъ, а҃: и҆ трїѡ́ди самогла́сны, г҃.
Гла́съ в҃. Блꙋ́днагѡ гла́съ приноша́ю тѝ, гдⷭ҇и: согрѣши́хъ пред̾ ѻ҆чи́ма твои́ма, бл҃гі́й, расточи́хъ бога́тство твои́хъ дарова́нїй. но прїими́ мѧ ка́ющасѧ, сп҃се, и҆ сп҃си́ мѧ.
Гла́съ д҃. Сті́хъ: Воскрⷭ҇ни, гдⷭ҇и бж҃е мо́й:
Ꙗ҆́кѡ блꙋ́дный сы́нъ прїидо́хъ и҆ а҆́зъ, ще́дре, житїѐ всѐ и҆жди́вый во ѿше́ствїи: расточи́хъ бога́тство, є҆́же да́лъ є҆сѝ мнѣ̀ ѻ҆́ч҃е. прїими́ мѧ ка́ющасѧ, бж҃е, и҆ поми́лꙋй мѧ̀.
Гла́съ и҃: Сті́хъ: И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ:
И҆жди́хъ блꙋ́днѡ ѻ҆ч҃ескагѡ и҆мѣ́нїѧ бога́тство, и҆ расточи́въ, пꙋ́стъ бы́хъ, во странꙋ̀ всели́всѧ лꙋка́выхъ гра́жданъ, и҆ не терпѧ̀ бо́лѣе съ ни́ми сожи́тельства, ѡ҆бра́щьсѧ вопїю́ ти ще́дромꙋ ѻ҆ц҃ꙋ̀: согрѣши́хъ на нб҃о и҆ пред̾ тобо́ю, и҆ нѣ́смь досто́инъ нарещи́сѧ сы́нъ тво́й: сотвори́ мѧ ꙗ҆́кѡ є҆ди́наго ѿ нає́мникъ твои́хъ, бж҃е, и҆ поми́лꙋй мѧ̀.
Сла́ва, гла́съ ѕ҃:
Ѻ҆́ч҃е бл҃гі́й, ᲂу҆дали́хсѧ ѿ тебѐ, не ѡ҆ста́ви менѐ, нижѐ непотре́бна покажѝ црⷭ҇твїѧ твоегѡ̀: вра́гъ вселꙋка́вый ѡ҆бнажи́ мѧ и҆ взѧ́тъ моѐ бога́тство: дꙋшє́внаѧ дарова̑нїѧ блꙋ́днѡ расточи́хъ. воста́въ ᲂу҆̀бо, ѡ҆бра́щьсѧ къ тебѣ̀ вопїю̀: сотвори́ мѧ ꙗ҆́кѡ є҆ди́наго ѿ нає́мникъ твои́хъ: менє̀ ра́ди на крⷭ҇тѣ̀ пречⷭ҇тѣи твоѝ рꙋ́цѣ простры́й, да ѿ лю́тагѡ ѕвѣ́рѧ и҆схити́ши мѧ̀, и҆ въ пе́рвꙋю ѡ҆де́ждꙋ ѡ҆блече́ши мѧ̀, ꙗ҆́кѡ є҆ди́нъ многомлⷭ҇тивъ.
И҆ ны́нѣ: Пребл҃гослове́нна є҆сѝ, бцⷣе дв҃о:
Славосло́вїе вели́кое, є҆ктєнїа̀, и҆ ѿпꙋ́стъ. И҆ ѡ҆бы́чнаѧ лїті́а, на не́йже пое́тсѧ Сла́ва, и҆ ны́нѣ, стїхи́ра є҆ѵⷢ҇льскаѧ: и҆ чтꙋ́тсѧ ѡ҆глашє́нїѧ. И҆ ча́съ пе́рвый въ притво́рѣ: и҆ соверше́нный ѿпꙋ́стъ.
На лїтꙋргі́и бл҃жє́нна ѻ҆смогла́сника, на ѕ҃: и҆ трїѡ́ди пѣ́снь ѕ҃-ѧ, на д҃: Прокі́менъ а҆пⷭ҇ла по гла́сꙋ, А҆пⷭ҇лъ къ корі́нѳѧнѡмъ, зача́ло рл҃є. А҆ллилꙋ́їа гла́са. Є҆ѵⷢ҇лїе ѿ лꙋкѝ, зача́ло ѻ҃ѳ. Прича́стенъ: Хвали́те гдⷭ҇а съ нб҃съ:
[зрѝ] Подоба́етъ вѣ́дати, ꙗ҆́кѡ въ седми́цѣ мѧсопꙋ́стнѣй а҆ллилꙋ́їа не пое́мъ: ѡ҆ставлѧ́емъ же и҆ є҆ди́нꙋ каѳі́смꙋ ѱалти́ри ѿ ᲂу҆́трени, и҆ глаго́лемъ сїю̀ на вече́рни. Пѣ́сней во ѱалти́ри не глаго́лемъ. Не пое́тсѧ же и҆ междоча́сїе, и҆ канѡ́нъ моле́бный прест҃ѣ́й бцⷣѣ, пое́мый на повече́рїи: повече́рїе же пое́тсѧ ма́лое: Та́кожде твори́мъ въ седми́цѣ сы́рнѣй, ра́звѣ среды̀ и҆ пѧтка̀: но ѡ҆ се́мъ все́мъ та́мѡ ᲂу҆ка́за и҆щѝ. Прочита́емъ же въ се́й недѣ́ли въ ко́йлюбо де́нь на ᲂу҆́трени сло́во ст҃а́гѡ мака́рїа ѡ҆ четыредесѧ́тницѣ и҆ пѧтдесѧ́тницѣ, є҆гѡ́же нача́ло: Ча̑дца моѧ̑, ра́дꙋетсѧ се́рдце моѐ ва́съ ра́ди:
Вѣ́домо же бꙋ́ди, ꙗ҆́кѡ послѣ́дованїе прилꙋча́ющихсѧ ст҃ы́хъ въ сꙋббѡ́тꙋ, и҆ въ недѣ́лю мѧсопꙋ́стнꙋю, пое́тсѧ въ мимоше́дшихъ повече́рїихъ. Та́кожде ѡ҆ сꙋббѡ́тѣ и҆ недѣ́ли сыропꙋ́стнѣй твори́мъ: и҆лѝ ка́кѡ настоѧ́тель и҆зво́литъ, кромѣ̀ а҆́ще гдѣ̀ слꙋчи́тсѧ вели́кагѡ ст҃а́гѡ па́мѧть.
