Въ сꙋббѡ́тꙋ мѧсопꙋ́стнꙋю
па́мѧть соверша́емъ всѣ́хъ ѿ вѣ́ка ᲂу҆со́пшихъ правосла́вныхъ хрⷭ҇тїа́нъ, ѻ҆тє́цъ и҆ бра́тїй на́шихъ.
Въ пѧто́къ ве́чера
по предначина́тельнѣмъ ѱалмѣ̀, и҆ ѡ҆бы́чнѣмъ стїхосло́вїи, на Гдⷭ҇и воззва́хъ, поста́вимъ стїхѡ́въ ѕ҃: и҆ пое́мъ ѻ҆смогла́сника стїхи̑ры мч҃нчны трѝ, рѧдова́гѡ гла́са: и҆ трїѡ́ди подо́бны, трѝ.
Гла́съ и҃.
Подо́бенъ: Во є҆де́мѣ ра́й:
Ѿ вѣ́ка ᲂу҆ме́ршихъ всѣ́хъ по и҆́мени, вѣ́рою пожи́вшихъ бл҃гоче́стнѡ, дне́сь па́мѧть сотворѧ́юще вѣ́рнїи, сп҃са и҆ гдⷭ҇а воспои́мъ, просѧ́ще прилѣ́жнѡ, да сподо́битъ си́хъ въ ча́съ сꙋда̀ ѿвѣ́тъ благі́й да́ти томꙋ̀ бг҃ꙋ на́шемꙋ, сꙋдѧ́щемꙋ все́й землѝ, десно́е є҆мꙋ́ предстоѧ́нїе полꙋчи́ти въ ра́дости, въ ча́сти првⷣныхъ и҆ во ст҃ы́хъ жре́бїи свѣ́тлѣмъ, и҆ достѡ́йны бы́ти нбⷭ҇нагѡ црⷭ҇твїѧ є҆гѡ̀.
Твое́ю кро́вїю человѣ́ки и҆скꙋпи́вый, сп҃се, и҆ сме́ртїю твое́ю ѿ сме́рти го́рькїѧ и҆зба́вивый на́съ, и҆ жи́знь вѣ́чнꙋю подаѧ́й на́мъ воскрⷭ҇нїемъ твои́мъ, ᲂу҆поко́й, гдⷭ҇и, всѧ̑ ᲂу҆со́пшыѧ бл҃гоче́стнѡ, и҆лѝ въ пꙋсты́нѧхъ и҆лѝ во градѣ́хъ, и҆лѝ въ мо́ри, и҆лѝ на землѝ, и҆лѝ на всѧ́комъ мѣ́стѣ: цари́ же, сщ҃е́нники, а҆рхїерє́и, мона́хи, и҆ бѣльцы̀ въ во́зрастѣ всѧ́комъ всеро́днѣмъ: и҆ сподо́би ѧ҆̀ нбⷭ҇нагѡ црⷭ҇твїѧ твоегѡ̀.
И҆з̾ ме́ртвыхъ воста́нїемъ твои́мъ, хрⷭ҇тѐ, сме́рть ᲂу҆жѐ не ѡ҆блада́етъ ᲂу҆ме́ршими бл҃гоче́стнѡ. тѣ́мже мо́лимсѧ прилѣ́жнѡ: рабы̑ твоѧ̑ ᲂу҆поко́й во дво́рѣхъ твои́хъ и҆ въ нѣ́дрѣхъ а҆враа́ма, ѿ а҆да́ма да́же додне́сь, послꙋжи́вшыѧ тебѣ̀ чи́стѡ, ѻ҆тцы̀ и҆ бра́тїю на́шꙋ, дрꙋ́ги вкꙋ́пѣ и҆ сро́дники, всѧ́каго человѣ́ка въ житїѝ послꙋжи́вша вѣ́рнѡ и҆ къ тебѣ̀ преста́вльшасѧ многови́днѡ и҆ многоѡбра́знѡ, бж҃е: и҆ сподо́би ѧ҆̀ нбⷭ҇нагѡ црⷭ҇твїѧ твоегѡ̀.
Сла́ва, гла́съ и҃:
Пла́чꙋ и҆ рыда́ю, є҆гда̀ помышлѧ́ю сме́рть, и҆ ви́ждꙋ во гробѣ́хъ лежа́щꙋ по ѡ҆́бразꙋ бж҃їю созда́ннꙋю на́шꙋ красотꙋ̀, без̾ѡбра́знꙋ, безсла́внꙋ, не и҆мꙋ́щꙋ ви́да. ѽ чꙋдесѐ! что̀ сїѐ є҆́же ѡ҆ на́съ бы́сть та́инство; ка́кѡ преда́хомсѧ тлѣ́нїю; ка́кѡ сопрѧго́хомсѧ сме́рти; вои́стиннꙋ бг҃а повелѣ́нїемъ, ꙗ҆́коже пи́сано є҆́сть, подаю́щагѡ преста́вльшымсѧ ᲂу҆покое́нїе.
И҆ ны́нѣ, бг҃оро́диченъ пе́рвый, гла́са. Свѣ́те ти́хїй: Вмѣ́стѡ же прокі́мена пое́мъ а҆ллилꙋ́їа, на гла́съ и҃: Сті́хъ: Бл҃же́ни, ꙗ҆́же и҆збра́лъ и҆ прїѧ́лъ є҆сѝ, гдⷭ҇и, и҆ па́мѧть и҆́хъ въ ро́дъ и҆ ро́дъ. Сті́хъ: Дꙋ́шы и҆́хъ во бл҃ги́хъ водворѧ́тсѧ.
На стїхо́внѣ мч҃нченъ гла́са, и҆ два̀ ме́ртвєнна, і҆ѡа́нна дамаски́на.
Стїхи́ же припѣва́емъ вышеречє́нныѧ: Бл҃же́ни, ꙗ҆̀же и҆збра́лъ и҆ прїѧ́лъ є҆сѝ, гдⷭ҇и, и҆ па́мѧть и҆́хъ въ ро́дъ и҆ ро́дъ.
И҆ Дꙋ́шы и҆́хъ во бл҃ги́хъ водворѧ́тсѧ.
Сла́ва, гла́съ ѕ҃:
Нача́токъ мнѣ̀ и҆ соста́въ зижди́тельное твоѐ бы́сть повелѣ́нїе: восхотѣ́въ бо ѿ неви́димагѡ и҆ ви́димагѡ є҆стества̀ жи́ва мѧ̀ соста́вити, ѿ землѝ тѣ́ло моѐ созда́лъ є҆сѝ, да́лъ же мѝ є҆сѝ дꙋ́шꙋ бж҃е́ственнымъ твои́мъ и҆ животворѧ́щимъ вдохнове́нїемъ. тѣ́мже, сп҃се, рабы̑ твоѧ̑ во странѣ̀ живꙋ́щихъ и҆ въ селе́нїихъ првⷣныхъ ᲂу҆поко́й.
И҆ ны́нѣ, бг҃оро́диченъ, гла́съ то́йже:
Мл҃твами ро́ждшїѧ тѧ̀, хрⷭ҇тѐ, и҆ мч҃нкъ твои́хъ, а҆пⷭ҇тѡлъ, прⷪ҇рѡ́къ, ст҃и́телей, прпⷣбныхъ и҆ првⷣныхъ, и҆ всѣ́хъ ст҃ы́хъ, ᲂу҆со́пшыѧ рабы̑ твоѧ̑ ᲂу҆поко́й.
Ны́нѣ ѿпꙋща́еши:
Тропа́рь, гла́съ и҃:
Глꙋбино́ю мꙋ́дрости чл҃вѣколю́бнѡ всѧ̑ стро́ѧй, и҆ поле́зное всѣ̑мъ подава́ѧй, є҆ди́не содѣ́телю, ᲂу҆поко́й, гдⷭ҇и, дꙋ́шы ра̑бъ твои́хъ: на тѧ́ бо ᲂу҆пова́нїе возложи́ша, творца̀ и҆ зижди́телѧ и҆ бг҃а на́шего.
Сла́ва, и҆ ны́нѣ, бг҃оро́диченъ, гла́съ то́йже:
Тебѐ и҆ стѣ́нꙋ и҆ приста́нище и҆́мамы, и҆ мл҃твенницꙋ бл҃гопрїѧ́тнꙋ къ бг҃ꙋ, є҆го́же родила̀ є҆сѝ, бцⷣе безневѣ́стнаѧ, вѣ́рныхъ сп҃се́нїе.
Є҆ктенїа̀, и҆ ѿпꙋ́стъ.
По ѿпꙋще́нїи же вече́рни, твори́мъ въ притво́рѣ паннѷхі́дꙋ за ᲂу҆со́пшихъ, и҆ пое́мъ канѡ́нъ рѧдова́гѡ гла́са мє́ртвымъ
На ᲂу҆́трени
по шестоѱа́лмїи, а҆ллилꙋ́їа, на гла́съ и҃.
Тропа́рь: Глꙋбино́ю мꙋ́дрости: [Два́жды]. Сла́ва, и҆ ны́нѣ, бг҃оро́диченъ: Тебѐ и҆ стѣ́нꙋ, и҆ приста́нище: И҆ ѡ҆бы́чное стїхосло́вїе. Чтꙋ́тсѧ же и҆ слова̀ ѡ҆ ме́ртвыхъ, къ корі́нѳѧнѡмъ въ а҃-мъ посла́нїи. Пою́тъ же сѧ и҆ непоро́чны на двѣ̀ статїи̑, съ припѣ̑вы:
Бл҃гослове́нъ є҆сѝ, гдⷭ҇и, наꙋчи́ мѧ: на гла́съ є҃.
И҆ по ни́хъ тропарѝ ме́ртвыхъ, гла́съ є҃.
Припѣ́въ: Бл҃гослове́нъ є҆сѝ, гдⷭ҇и, наꙋчи́ мѧ ѡ҆правда́нїємъ твои̑мъ.
Ст҃ы́хъ ли́къ ѡ҆брѣ́те и҆сто́чникъ жи́зни и҆ две́рь ра́йскꙋю: да ѡ҆брѧ́щꙋ и҆ а҆́зъ пꙋ́ть покаѧ́нїемъ. поги́бшее ѻ҆вча̀ а҆́зъ є҆́смь: воззови́ мѧ, сп҃се, и҆ сп҃си́ мѧ.
Бл҃гослове́нъ є҆сѝ, гдⷭ҇и:
А҆́гнца бж҃їѧ проповѣ́давше, и҆ закла́ни бы́вше ꙗ҆́коже а҆́гнцы, и҆ къ жи́зни нестарѣ́емѣй, ст҃і́и, и҆ присносꙋ́щнѣй преста́вльшесѧ: того̀ прилѣ́жнѡ, мч҃нцы, моли́те, долгѡ́въ разрѣше́нїе на́мъ дарова́ти.
Бл҃гослове́нъ є҆сѝ, гдⷭ҇и:
Въ пꙋ́ть ᲂу҆́зкїй хо́ждшїи приско́рбный, всѝ въ житїѝ крⷭ҇тъ ꙗ҆́кѡ ꙗ҆ре́мъ взе́мшїи, и҆ мнѣ̀ послѣ́довавшїи вѣ́рою, прїиди́те наслади́тесѧ и҆̀хже ᲂу҆гото́вахъ ва́мъ по́честей и҆ вѣнцє́въ
нбⷭ҇ныхъ.
Бл҃гослове́нъ є҆си, гдⷭ҇и:
Ѡ҆́бразъ є҆́смь неизрече́нныѧ твоеѧ̀ сла́вы, а҆́ще и҆ ꙗ҆́звы ношꙋ̀ прегрѣше́нїй: ᲂу҆ще́дри твоѐ созда́нїе, влⷣко, и҆ ѡ҆чи́сти твои́мъ бл҃госе́рдїемъ, и҆ вожделѣ́нное ѻ҆те́чество пода́ждь мѝ, раѧ̀ па́ки жи́телѧ мѧ̀ сотворѧ́ѧ.
Бл҃гослове́нъ є҆си, гдⷭ҇и:
Дре́вле ᲂу҆́бѡ ѿ не сꙋ́щихъ созда́вый мѧ̀, и҆ ѡ҆́бразомъ твои́мъ бж҃е́ственнымъ почты́й: престꙋпле́нїемъ же за́повѣди па́ки мѧ̀ возврати́вый въ зе́млю, ѿ неѧ́же взѧ́тъ бы́хъ, на є҆́же по подо́бїю возведѝ, дре́внею добро́тою воз̾ѡбрази́тисѧ.
Бл҃гослове́нъ є҆си, гдⷭ҇и:
Оу҆поко́й, бж҃е, рабы̑ твоѧ̑, и҆ ᲂу҆чинѝ ѧ҆̀ въ раѝ, и҆дѣ́же ли́цы ст҃ы́хъ, гдⷭ҇и, и҆ пра́вєдницы сїѧ́ютъ ꙗ҆́кѡ свѣти̑ла: ᲂу҆со́пшыѧ рабы̑ твоѧ̑ ᲂу҆поко́й, презира́ѧ и҆́хъ всѧ̑ согрѣшє́нїѧ.
Сла́ва: Трисїѧ́тельное є҆ди́нагѡ бж҃ества̀ бл҃гоче́стнѡ пои́мъ, вопїю́ще: ст҃ъ є҆си,̀ ѻ҆́ч҃е безнача́льный, собезнача́льный сн҃е и҆ бж҃е́ственный дш҃е: просвѣтѝ, на́съ, вѣ́рою тебѣ̀ слꙋжа́щихъ, и҆ вѣ́чнагѡ ѻ҆гнѧ̀ и҆схитѝ.
И҆ ны́нѣ: Ра́дꙋйсѧ, чⷭ҇таѧ, бг҃а пло́тїю ро́ждшаѧ во сп҃се́нїе всѣ́хъ, є҆́юже ро́дъ человѣ́ческїй ѡ҆брѣ́те сп҃се́нїе: тобо́ю да ѡ҆брѧ́щемъ ра́й, бцⷣе чⷭ҇таѧ бл҃гослове́ннаѧ.
А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]
Посе́мъ є҆ктенїа̀ ѡ҆ ᲂу҆со́пшихъ: Па́ки и҆ па́ки:
І҆ере́й мл҃твꙋ: Бж҃е дꙋхѡ́въ: Мы́ же: Гдⷭ҇и, поми́лꙋй, м҃.
И҆ по возгла́сѣ сѣда́ленъ, гла́съ є҃:
Поко́й, сп҃се на́шъ, съ првⷣными рабы̑ твоѧ̑, и҆ сїѧ̑ вселѝ во дворы̀ твоѧ̑, ꙗ҆́коже є҆́сть пи́сано, презира́ѧ ꙗ҆́кѡ бл҃гъ прегрѣшє́нїѧ и҆́хъ вѡ́льнаѧ и҆ невѡ́льнаѧ, и҆ всѧ̑ ꙗ҆̀же въ вѣ́дѣнїи и҆ не въ вѣ́дѣнїи, чл҃вѣколю́бче.
Сла́ва, и҆ ны́нѣ, бг҃оро́диченъ:
Ѿ дв҃ы возсїѧ́вый мі́рꙋ, хрⷭ҇тѐ бж҃е, сы́ны свѣ́та то́ю показа́вый, поми́лꙋй на́съ.
Стїхосло́вимъ же: Гдⷭ҇ви пое́мъ:
Канѡ́нъ же пое́мъ ст҃а́гѡ ѡ҆би́тели на ѕ҃: и҆ трїѡ́ди на и҃. Пое́тъ же сѧ и҆ втора́ѧ пѣ́снь без̾ стїхосло́вїѧ. И҆ пѣ̑сни ѱалти́ри. Канѡ́нъ творе́нїе стꙋді́та [въ трⷪ҇чныхъ и҆ бг҃оро́дичныхъ тропаре́хъ краестро́чїе: Недосто́йнагѡ ѳео́дѡра.] Гла́съ и҃.
Пѣ́снь а҃.
І҆рмо́съ: Пѣ́снь возсле́мъ, лю́дїе:
Всѝ помо́лимсѧ хрⷭ҇тꙋ̀, творѧ́ще дне́сь па́мѧть ѿ вѣ́ка ᲂу҆ме́ршихъ, да ѿ вѣ́чнагѡ ѻ҆гнѧ̀ и҆зба́витъ ѧ҆̀, ᲂу҆со́пшыѧ въ вѣ́рѣ и҆ наде́ждѣ жи́зни вѣ́чныѧ.
Глꙋбино́ю сꙋде́бъ твои́хъ, хрⷭ҇тѐ, всепремꙋ́дрѣ ты̀ пред̾ѡпредѣли́лъ є҆сѝ коегѡ́ждо кончи́нꙋ жи́зни, предѣ́лъ и҆ ѡ҆́бразъ. тѣ́мже, ꙗ҆́же покры̀ гро́бъ во всѧ́кой странѣ̀, на сꙋдѣ̀ сп҃сѝ, всеще́дрый.
Предѣ́лы жи́зни на́шеѧ да́вый, гдⷭ҇и, тѣ́мже ᲂу҆со́пшыѧ ѿ жите́йскїѧ но́щи, сщ҃е́нники правосла̑вныѧ, цари́ же и҆ всѧ̑ лю́ди твоѧ̑, покажѝ сы́ны днѐ невече́рнѧгѡ.
Ꙗ҆̀же покры̀ вода̀, и҆ бра́нь пожа́тъ и҆ ꙗ҆̀же трꙋ́съ ѡ҆б̾ѧ́тъ, и҆ ᲂу҆бі̑йцы ᲂу҆би́ша, и҆ ꙗ҆́же ѻ҆́гнь попалѝ вѣ̑рныѧ, млⷭ҇тиве, ᲂу҆чини въ ча́стѝ првⷣныхъ.
Всѧ̑ презира́ѧй плѡтскі́ѧ до́лги на́шѧ, сп҃се на́шъ, во всѧ́комъ во́зрастѣ всегѡ̀ ро́да человѣ́ча, пред̾ сꙋди́щемъ твои́мъ поста́ви неѡсꙋжде́ны, тебѣ̀ созда́телю ѿвѣща́ющыѧ.
[Т] Сла́ва, трⷪ҇ченъ: Є҆̀ди́нагѡ є҆стества̀ трѝ пою̀ ли́ца самоѷпоста̀снаѧ, нерожде́нна ѻ҆ц҃а̀, сн҃а ро́ждшагосѧ и҆ дх҃а ст҃а́го безнача́льное црⷭ҇тво, вла́сть, бж҃ество̀ є҆ди́но.
[О] Бг҃оро́диченъ: Вои́стиннꙋ ты̀ ꙗ҆ви́ласѧ є҆сѝ на землѝ нб҃о бо́льшее вы́шнѧгѡ нб҃сѐ, безневѣ́стнаѧ дв҃о: и҆з̾ тебє́ бо возсїѧ̀ со́лнце въ мі́рѣ, влⷣчествꙋѧй пра́вдою.
Катава́сїа: Пѣ́снь возсле́мъ, лю́дїе, чꙋ́дномꙋ бг҃ꙋ на́шемꙋ, свободи́вшемꙋ ѿ ра́бства і҆и҃лѧ, пѣ́снь побѣ́днꙋю пою́ще и҆ вопїю́ще: пои́мъ тебѣ̀ є҆ди́номꙋ влⷣцѣ.
Пѣ́снь в҃.
І҆рмо́съ: Ви́дите, ви́дите, ꙗ҆́кѡ а҆́зъ є҆́смь бг҃ъ ва́шъ, пре́жде вѣ̑къ рожде́нный ѿ ѻ҆ц҃а̀, и҆ ѿ дв҃ы въ послѣ̑днѧѧ без̾ мꙋ́жа зачны́йсѧ, и҆ разрꙋши́вый грѣ́хъ пра́ѻтца а҆да́ма, ꙗ҆́кѡ чл҃вѣколю́бецъ.
Ви́дите, ви́дите, ꙗ҆́кѡ а҆́зъ є҆́смь бг҃ъ ва́шъ, пра́веднымъ сꙋдо́мъ водрꙋзи́вый предѣ́лы жи́зни, въ нетлѣ́нїе ѿ тлѝ прїе́млѧй всѧ̑ ᲂу҆со́пшыѧ въ наде́ждѣ вѣ́чнагѡ воскрⷭ҇нїѧ.
Ѿ четы́рехъ конє́цъ прїе́млѧй, гдⷭ҇и, вѣ́рнѡ ᲂу҆со́пшыѧ, въ мо́ри, и҆лѝ на землѝ, и҆лѝ въ рѣка́хъ, и҆сто́чницѣхъ, и҆лѝ є҆́зерѣхъ, и҆лѝ въ кла́дѧзехъ, снѣ́дь бы́вшыѧ ѕвѣрє́мъ и҆ пти́цамъ и҆
гадѡ́мъ, всѧ̑ ᲂу҆поко́й.
Во твое́й дла́ни всѧ́ческаѧ, гдⷭ҇и, предразсꙋди́лъ є҆сѝ: разрѣ́шшыѧсѧ въ соста́вы четы́ри, въ прише́ствїи твое́мъ собра́въ воскр҃сѝ, проща́ѧ тѣ̑мъ всѧ̑ ꙗ҆̀же въ невѣ́дѣнїи и҆ вѣ́дѣнїи прегрѣшє́нїѧ.
Ѽ стра́шнагѡ твоегѡ̀ втора́гѡ, гдⷭ҇и, прише́ствїѧ! занѐ ꙗ҆́кѡ въ ви́дѣ мо́лнїи на зе́млю прише́дъ, воздви́гнеши всѐ созда́нїе твоѐ сꙋди́тисѧ: въ вѣ́рѣ тебѣ̀ пожи́вшихъ, тогда̀ срѣ́сти тѧ̀ и҆ съ тобо́ю бы́ти сподо́би.
[Ѵ] Сла́ва, трⷪ҇ченъ: Пресоверше́ннаѧ є҆ди́нице, пребж҃е́ственнаѧ, трїѷпоста́снаѧ, нерожде́нне ѻ҆́ч҃е и҆ сн҃е є҆диноро́дне, дш҃е ѿ ѻ҆ц҃а̀ и҆сходѧ́й, сн҃омъ же ꙗ҆влѧ́ѧйсѧ: сꙋщество̀ є҆ди́но и҆ є҆стество̀, гдⷭ҇ьство, црⷭ҇тво, сп҃сѝ всѣ́хъ на́съ.
[А] Бг҃оро́диченъ: Неизглаго́лемо є҆́сть чꙋ́до твоегѡ̀ ржⷭ҇тва̀, мт҃и дв҃о: ка́кѡ бо и҆ ражда́еши, и҆ чиста̀ є҆сѝ въ то́мже; ка́кѡ ѻ҆троча̀ ражда́еши, и҆ не вѣ́си и҆скꙋ́са мꙋ́жеска ѿню́дъ; ꙗ҆́коже вѣ́сть па́че є҆стества̀ ѿ тебє̀ новолѣ́пнѡ сло́во бж҃їе ро́ждшеесѧ.
Катава́сїа: Ви́дите, ви́дите, ꙗ҆́кѡ а҆́зъ:
Пѣ́снь г҃.
І҆рмо́съ: Оу҆твержде́й рꙋко́ю:
Преше́дшыѧ во сла́вѣ бл҃гоче́стнѣй житїѧ̀, тече́нїе, сподо́би, бж҃е, вѣнце́мъ пра́вды ѡ҆дѣ́ѧтисѧ и҆ вѣ́чныхъ бла̑гъ наслади́тисѧ.
Внеза́пꙋ восхищє́нныѧ, попалє́нныѧ ѿ мо́лнїи, и҆ ᲂу҆ме́ршыѧ ѿ мра́за и҆ ѿ всѧ́кїѧ ра́ны, ᲂу҆поко́й, бж҃е, є҆гда̀ ѻ҆гне́мъ всѧ̑ и҆скꙋ́сиши.
Приснобꙋ́рное житїѧ̀ мо́ре преплы́вшыѧ, хрⷭ҇тѐ, въ нетлѣ́нное твоегѡ̀ житїѧ̀ приста́нище сподо́би притещѝ, правосла́внымъ житїе́мъ ᲂу҆пра́влєнныѧ.
И҆̀хже всѧ́кое є҆стество̀ морски́хъ живо́тныхъ и҆ пти́цъ небе́сныхъ прїѧ́тъ во снѣде́нїе твои́ми сꙋдьба́ми, воскр҃сѝ, хрⷭ҇тѐ бж҃е, въ послѣ́днїй де́нь со сла́вою.
[Н] Сла́ва, трⷪ҇ченъ: Мы́сленнѡ кꙋ́пнѡ є҆́же пресѣщѝ бж҃е́ственнꙋю є҆ди́ницꙋ въ трѝ лица̑, про́стѡ совокꙋплѧ́ю несѣкѡ́маѧ: ꙗ҆́коже бо ско́рость мо́лнїи, трисїѧ́ющаѧ ви́дитсѧ во є҆ди́нствѣ.
[А] Бг҃оро́диченъ: Недоꙋмѣ́нно є҆́сть твоѐ чꙋ́до: без̾ мꙋ́жа бо ражда́еши, и҆ дв҃ство твоѐ, чтⷭ҇аѧ, соблюда́еши ро́ждши. тѣ́мже а҆́гг҃лъ мно́жество и҆ человѣ́ческїй ро́дъ пое́тъ тѧ̀ во вѣ́ки.
Катава́сїа: Оу҆твержде́й рꙋко́ю твое́ю, сло́ве бж҃їй, нб҃са̀, просвѣще́нїемъ твоегѡ̀ и҆́стиннагѡ позна́нїѧ ᲂу҆твердѝ сердца̀ и҆ на́съ, на тѧ̀ надѣ́ющихсѧ.
Сѣда́ленъ, гла́съ є҃:
Подо́бенъ: Собезнача́льное сло́во:
На́съ ра́ди претерпѣ́вый крⷭ҇тъ и҆ сме́рть, ᲂу҆мертви́вый а҆́дъ, и҆ съ собо́ю воскр҃си́вый мє́ртвыѧ, преста́вльшыѧсѧ ѿ на́съ, сп҃се, ᲂу҆поко́й, ꙗ҆́кѡ чл҃вѣколю́бецъ бг҃ъ, и҆ въ тре́петное и҆ стра́шное прише́ствїе твоѐ, жизнода́вче, ꙗ҆́кѡ и҆мѣ́ѧй мно́жество млⷭ҇ти, црⷭ҇твїѧ твоегѡ̀ сподо́би.
Сла́ва, то́йже. И҆ ны́нѣ, бг҃оро́диченъ:
Ско́рый тво́й покро́въ и҆ по́мощь и҆ млⷭ҇ть покажѝ на рабѣ́хъ твои́хъ, и҆ во́лны, чтⷭ҇аѧ, ᲂу҆кротѝ сꙋ́етныхъ помышле́нїй, и҆ па́дшꙋю мою̀ дꙋ́шꙋ возста́ви, бцⷣе: вѣ́мъ бо, вѣ́мъ, дв҃о, ꙗ҆́кѡ мо́жеши, є҆ли́ка и҆ хо́щеши.
Пѣ́снь д҃.
І҆рмо́съ: И҆з̾ горы̀ прїѡсѣне́нныѧ:
Ѻ҆тцы̀ и҆ пра́ѻтцы, дѣ́ды и҆ пра́дѣды, ѿ пе́рвыхъ и҆ до послѣ́днихъ во бл҃гозако́нїи и҆ бл҃говѣ́рїи ᲂу҆ме́ршыѧ, всѧ̑ помѧнѝ сп҃се на́шъ.
Въ горѣ̀, на пꙋтѝ, во гробѣ́хъ, въ пꙋсты́нѧхъ житїѐ ѡ҆ста́вльшыѧ въ вѣ́рѣ, мона́хи же и҆ бѣльцы̀, ю҆́ношы и҆ ста́рцы, со ст҃ы́ми, хрⷭ҇тѐ, вселѝ.
Ѿ печа́ли и҆ ра́дости прише́дшыѧ нежда́ннѡ, въ вѣ́рѣ а҆́бїе премѣни́вшыѧ житїѐ, во бл҃годе́нствїи пострада́вшыѧ и҆лѝ ѕлоде́нствїи, всѧ̑ ᲂу҆поко́й, сп҃се на́шъ.
Ꙗ҆̀же ᲂу҆бѝ ме́чь и҆ ко́нь, совосхи́ти гра́дъ, снѣ́гъ и҆ тꙋ́ча ᲂу҆мно́женнаѧ: ꙗ҆̀же ᲂу҆давѝ плі́нѳа, и҆лѝ пе́рсть посы́па, хрⷭ҇тѐ сп҃се на́шъ, ᲂу҆поко́й.
[Ѯ] Сла́ва, трⷪ҇ченъ: Стра́нно ꙗ҆́кѡ є҆ди́но и҆ трѝ, бж҃ество̀, всѐ по є҆ди́номꙋ лицꙋ̀ нераздѣ́льно: ѻ҆ц҃ъ бо, сн҃ъ и҆ дх҃ъ ст҃ы́й є҆́сть покланѧ́емь, ꙗ҆́кѡ є҆ди́нъ бг҃ъ.
[І] Бг҃оро́диченъ: Напра́ви на́съ, дв҃о, мл҃твами твои́ми, ѡ҆бꙋрева́ємыѧ волно́ю грѣха̀ ᲂу҆правлѧ́ющи во сп҃си́тєльнаѧ приста̑нища, гдⷭ҇ороди́тельнице, и҆збавлѧ́ющи ѿ всѧ́кихъ лю́тыхъ.
Катава́сїа: И҆з̾ горы̀ прїѡсѣне́нныѧ, є҆ди́ныѧ бцⷣы, хотѧ́ща тѧ̀, сло́ве, воплоти́тисѧ, прⷪ҇ро́къ бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.
Пѣ́снь є҃.
І҆рмо́съ: Оу҆́тренюетъ дх҃ъ мо́й:
Оу҆ме́ршихъ бл҃гоче́стнѡ ѿ вѣ́ка коегѡ́ждо па́мѧть дне́сь творѧ́ще гдⷭ҇и, прилѣ́жнѡ тѝ вопїе́мъ: всѧ̑ ᲂу҆поко́й со ст҃ы́ми твои́ми.
Ꙗ҆́же прїѧ́лъ є҆сѝ ѿ всѧ́кагѡ ро́да и҆ ро́да, въ царѣ́хъ, во кнѧзе́хъ и҆лѝ мона́шествꙋющихъ правосла̑вныѧ, ще́дре, и҆зба́ви ѿ вѣ́чнагѡ мꙋче́нїѧ.
Всѣ̑мъ созда̑ннымъ тобо́ю полє́зное вѣ́дый, гдⷭ҇и, и҆̀мже попꙋсти́лъ є҆сѝ внеза́пными паде́жми нежда́ннѡ ᲂу҆мре́ти, и҆зба́ви ѿ мꙋ́ки всѧ́кїѧ, бж҃е на́шъ.
Ѿ ѻ҆гнѧ̀ при́снѡ палѧ́щагѡ, и҆ ѿ тьмы̀ несвѣти́мыѧ, ѿ скре́жета зꙋ́бнагѡ и҆ че́рвїѧ безконе́чнѡ мꙋ́чащагѡ, и҆ ѿ всѧ́кагѡ мꙋче́нїѧ и҆зба́ви, сп҃се на́шъ, всѧ̑ вѣ́рнѡ ᲂу҆ме́ршыѧ.
[О] Сла́ва, трⷪ҇ченъ: Є҆динопрⷭ҇то́льнаѧ, безнача́льнаѧ, трїѷпоста́снаѧ є҆ди́нице, въ раздѣле́нїи є҆ди́нство и҆ вопроти́въ ли́цємъ є҆стество̀ и҆мꙋ́щаѧ, совокꙋпѝ на́съ во є҆ди́но хотѣ́нїе твои́хъ за́повѣдей.
[Ѵ] Бг҃оро́диченъ: Чтⷭ҇нѣ́йши па́че ѻ҆гнезра́чныхъ серафі̑мъ ꙗ҆ви́ласѧ є҆сѝ, чтⷭ҇аѧ, поро́ждши си̑мъ непристꙋ́пнаго і҆и҃са сп҃са, воплоще́нїемъ ѡ҆божи́вшаго земноро́дныхъ смѣше́нїе.
Катава́сїа: Оу҆́тренюетъ дꙋ́хъ мо́й къ тебѣ̀, бж҃е, занѐ свѣ́тъ повелѣ̑нїѧ прише́ствїѧ твоегѡ̀: тѣ́҆́ми ᲂу҆̀бо ѡ҆зарѝ ᲂу҆́мъ на́шъ, влⷣко, и҆ наста́ви на стезю̀ жи́зни.
Пѣ́снь ѕ҃.
І҆рмо́съ: Содержи́ма мѧ̀:
Сме́рти болѣ̑зни разрѣши́вый страда́нїемъ твои́мъ, нача́льниче жи́зни бж҃е на́шъ, ᲂу҆со́пшыѧ ѿ вѣ́ка рабы̑ твоѧ̑ ᲂу҆поко́й.
Ихже ᲂу҆би́ша чарѡ́внаѧ напоє́нїѧ, ѡ҆тра̑вы, кѡ́стнаѧ ᲂу҆давлє́нїѧ, неизглаго́ланными твои́ми сꙋдьба́ми, со ст҃ы́ми, гдⷭ҇и ᲂу҆поко́й.
Є҆гда̀ сꙋди́ти бꙋ́деши всѧ́чєскимъ, стоѧ́щымъ наги̑мъ и҆ ѿкровє́ннымъ пред̾ лице́мъ твои́мъ: тогда̀, ще́дре, пощадѝ послꙋжи́вшыѧ тѝ вѣ́рнѡ, бж҃е.
Є҆гда̀ послѣ́днею трꙋбо́ю вострꙋби́тъ тво́й а҆рха́гг҃лъ, въ воскрⷭ҇нїе жи́зни всѣ́хъ: тогда̀, хрⷭ҇тѐ, рабы̑ твоѧ̑ ᲂу҆поко́й.
Ѿ вѣ́ка ꙗ҆̀же прїѧ́лъ є҆сѝ вѣ̑рныѧ, бж҃е, ве́сь ро́дъ человѣ́ческїй сподо́би, со слꙋжа́щими тебѣ̀, во вѣ́ки сла́вити тѧ̀.
[Ѳ] Сла́ва, трⷪ҇ченъ: Бг҃онача́лїе трист҃о́е, є҆динопрⷭ҇то́льное, ѻ҆́ч҃е, сн҃е со ст҃ы́мъ дх҃омъ, ты̀ є҆сѝ бг҃ъ мо́й, вседержи́тельствомъ твои́мъ содержа́й всѐ.
[Е] Бг҃оро́диченъ: і҆ессе́е пра́ѻтче, взыгра́й: занѐ ѿ ко́рене твоегѡ̀ возсїѧ̀ цвѣ́тъ жи́зни, ѿ чⷭ҇тыѧ ѻ҆трокови́цы хрⷭ҇то́съ бг҃ъ, сп҃са́ѧй мі́ръ.
Катава́сїа: Содержи́ма мѧ̀ грѣхи̑ мно́гими и҆ припа́дающа щедро́тамъ твои̑мъ, прїимѝ ꙗ҆́кѡ прⷪ҇ро́ка, чл҃вѣколю́бче гдⷭ҇и, и҆ сп҃си́ мѧ.
Конда́къ, гла́съ и҃:
Со ст҃ы́ми ᲂу҆поко́й, хрⷭ҇тѐ, дꙋ́шы ра̑бъ твои́хъ, и҆дѣ́же нѣ́сть болѣ́знь, ни печа́ль, ни воздыха́нїе, но жи́знь безконе́чнаѧ.
І҆́косъ: Са́мъ є҆ди́нъ є҆сѝ безсме́ртенъ, сотвори́вый и҆ созда́вый человѣ́ка. земні́и ᲂу҆́бо ѿ землѝ созда́хомсѧ, и҆ въ зе́млю тꙋ́южде по́йдемъ, ꙗ҆́коже повелѣ́лъ є҆сѝ, созда́вый мѧ̀ и҆ рекі́й мѝ: ꙗ҆́кѡ землѧ̀ є҆сѝ, и҆ въ зе́млю ѿи́деши: а҆́може всѝ человѣ́цы по́йдемъ, надгро́бное
рыда́нїе творѧ́ще пѣ́снь: а҆ллилꙋ́їа.
Сѷнаѯа́рїй пе́рвѣе мине́и: та́же настоѧ́щїй.
Стїхѝ: Не воспомина́й прегрѣше́нїй ᲂу҆ме́ршихъ, сло́ве,
Бл҃гі̑ѧ твоѧ̑ щедрѡ́ты мє́ртвы не показꙋ́ѧй.
Въ сі́й де́нь бж҃е́ственнѣйшїи ѻ҆тцы̀ ᲂу҆зако́ниша соверша́ти па́мѧть всѣ́хъ ѿ вѣ́ка бл҃гоче́стнѡ сконча́вшихсѧ человѣ́кѡвъ, вины̀ ра́ди сицевы̀. Поне́же нѣ́цыи безвре́меннꙋю под̾е́млютъ сме́рть мно́гажды въ чꙋжде́й странѣ̀, въ мо́ри же и҆ непрохо́димыхъ гора́хъ, стремни́нахъ же и҆ про́пастехъ, и҆ въ гꙋби́тельныхъ повѣ́трїихъ и҆ гла́дѣхъ и҆ бра́нехъ, ѿ ѻ҆гнѧ̀ и҆ мра́за и҆ ѿ и҆ні̑ѧ всѧ̑кїѧ смє́рти претерпѣ́вшїи: ра́внѡ же и҆ ᲂу҆бо́зїи сꙋ́щїи и҆ неимꙋ́щїи, и҆ ᲂу҆зако́неныхъ ѱалмопѣ́нїй и҆ поминове́нїй не полꙋчи́ша: тогѡ̀ ра́ди человѣколю́бїемъ дви́жими бж҃е́ственнїи ѻ҆тцы̀ па́мѧть си́хъ всѣ́хъ ѻ҆́бщнѡ твори́ти собо́рнѣй цр҃кви ᲂу҆зако́ниша, ѿ сщ҃е́нныхъ а҆пⷭ҇лъ прїе́мше: да и҆ нѣ́кимъ слꙋ́чаемъ ѡ҆со́бнѣ не полꙋчи́вшїи ᲂу҆зако́ненныхъ: ны́нѣ ѻ҆́бщею па́мѧтїю и҆ сі́и помина́ютсѧ: показꙋ́юще, ꙗ҆́кѡ и҆ ра́ди и҆́хъ быва́ємаѧ, вели́кꙋ тѣ̑мъ хода́тайствꙋютъ по́льзꙋ. Сїѧ̀ ᲂу҆́бѡ є҆́сть є҆ди́на вина̀ бж҃їей цр҃кви си́це твори́ти па́мѧть дꙋша́мъ. Втора́ѧ же, поне́же на ᲂу҆́трешнїй де́нь хотѧ́хꙋ положи́ти второ́е хрⷭ҇то́во прише́ствїе: согла́снѡ семꙋ̀ и҆ дꙋша́мъ па́мѧть сотворѧ́ютъ, гдⷭ҇а ꙗ҆́кѡ стра́шнаго и нелицепрїѧ́тнаго сꙋдїю̀ ᲂу҆молѧ́юще, ѡ҆бы́чнꙋю млⷭ҇ть къ ни̑мъ ᲂу҆потреби́ти, и҆ во ѡ҆бѣтова́ннѣмъ наслажде́нїи тѣ́хъ ᲂу҆чини́ти. И҆́накѡ же, ст҃і́и ѻ҆тцы̀, хотѧ́ще въ бꙋ́дꙋщꙋю недѣ́лю и҆зложи́ти а҆да́мово и҆згна́нїе, ꙗ҆́кѡ нѣ́кое ᲂу҆покое́нїе пред̾ꙋмышлѧ́ютъ: занѐ всѧ̑ ꙗ҆́же ѡ҆ на́съ, ко́нчатсѧ настоѧ́щимъ ны́нѣ воспомина́емымъ ᲂу҆покое́нїемъ: да ѿтꙋ́дꙋ ꙗ҆́кѡ и҆з̾ нача́ла на́чнꙋтъ, [послѣ́днѣйшее бо всѣ́хъ и҆мѣ́ющихъ бы́ти с на́ми, бꙋ́детъ ѿ неподкꙋ́пнагѡ сꙋдїѝ пожи́вшихъ и҆спыта́нїе,] и҆ да си́ми ᲂу҆страши́вше, къ поста̀ подвигѡ́мъ человѣ́ки сотворѧ́тъ бл҃гоꙋдѡ́бны. Въ сꙋббѡ́тꙋ же при́снѡ дꙋша́мъ па́мѧть твори́мъ, ꙗ҆́кѡ сꙋббѡ́та є҆вре́йски зна́менꙋетъ ᲂу҆покое́нїе. Поне́же ᲂу҆ме́ршїи ѿ жите́йскихъ и҆ про́чихъ всѣ́хъ ᲂу҆поко́ишасѧ, тогѡ̀ ра́ди и҆ въ поко́ищнѣмъ днѝ за ни́хъ мольбы̑ твори́мъ: сїѐ ᲂу҆́бѡ и҆ на всѧ́кꙋ сꙋббѡ́тꙋ ᲂу҆держа́сѧ быва́ти: ны́нѣ же соверша́емъ вселе́нское поминове́нїе, за всѧ́каго молѧ́щесѧ бл҃гочести́ваго. Бж҃е́ственнїи ᲂу҆́бѡ ѻ҆тцы̀, вѣ́дꙋще, ꙗ҆́кѡ за ᲂу҆со́пшихъ быва́ємыѧ па̑мѧти, ми́лѡстыни и҆ слꙋ̑жбы вели́кꙋ тѣ̑мъ подаю́тъ ѡ҆сла́бꙋ и҆ по́льзꙋ: це́ркви заповѣ́дꙋютъ сїѐ твори́ти, и҆ ѡ҆со́бнѣ за є҆ди́наго коего́ждо и҆ ѻ҆́бще за всѣ́хъ, ѿ ст҃ы́хъ а҆пⷭ҇лъ сїѐ прїе́мше, ꙗ҆́кѡ рече́сѧ, ꙗ҆́коже и҆ дїонѵ́сїй а҆реопагі́тъ глаго́летъ.
ꙗ҆́кѡ по́льзꙋ прино́сѧтъ дꙋша́мъ ѡ҆ ни́хъ быва́ємаѧ: ꙗ҆́вѣ ᲂу҆́бѡ и҆ ѿ и҆́ныхъ мно́гихъ, ра́внѡ же и҆ ѿ по́вѣсти ст҃а́гѡ мака́рїа, и҆́же мимоходѧ̀ на пꙋтѝ ѻ҆брѣ́те сꙋ́хꙋ лби́нꙋ нечести́ва мꙋ́жа є҆́ллина, и҆ вопроша́ше: и҆́мꙋтъ ли когда̀ сꙋ́щїи во а҆́дѣ нѣ́кое чꙋ́вство ᲂу҆тѣше́нїѧ; Та́ѧ же ѿвѣща̀, ре́кши: ꙗ҆́кѡ ті́и мно́гꙋ ѡ҆сла́бꙋ и҆́мꙋтъ, внегда̀ за ᲂу҆со́пшихъ мо́лишисѧ, ѻ҆́тче. Творѧ̀ше бо сїѐ вели́кїй и҆ молѧ́шесѧ бг҃ꙋ, ᲂу҆вѣ́дати жела́ѧ, быва́етъ ли ѿсю́дꙋ нѣ́каѧ по́льза преждеꙋсо́пшымъ. и҆ григо́рїй бесѣ́довникъ мл҃твою царѧ̀ траїа́на сп҃сѐ, а҆́ще и҆ слы́ша ѿ бг҃а, да не мо́литсѧ когда́ ѡ҆ нечести́вѣмъ. Та́кожде и҆ бг҃оме́рзкаго ѳео́фїла ѳеодѡ́ра цари́ца ст҃ы́ми мꙋжмѝ и҆ и҆сповѣ́дники ѿ мꙋче́нїй и҆схитѝ и҆ спасѐ, ꙗ҆́коже повѣствꙋ́етсѧ. Похвалѧ́ютъ же ѡ҆ ᲂу҆со́пшихъ даѧ̑нїѧ ꙗ҆́кѡ бл҃га̑ѧ, и҆ мно́зи ѿ ст҃ы́хъ ѻ҆тє́цъ, глаго́люще и҆́нꙋдѣ: ᲂу҆мы́слимъ ѿше́дшымъ по́льзꙋ, дади́мъ и҆́мъ прили́чное поможе́нїе, сі́есть ми́лѡстыни и҆ приношє́нїѧ: и҆́бо ве́щь сїѧ̀ прино́ситъ си̑мъ вели́кое поспѣше́нїе и҆ наипа́че прибы́токъ и҆ по́льзꙋ: не всꙋ́е бо и҆ не слꙋча́йнѡ сїѐ ᲂу҆зако́нисѧ и҆ бж҃їей цр҃кви ѿ всемꙋ́дрыхъ хрⷭ҇то́выхъ ᲂу҆чени̑къ преда́сѧ, да на стра́шныхъ та́йнахъ па́мѧть твори́тъ свѧще́нникъ ѡ҆ ᲂу҆со́пшихъ въ вѣ́рѣ. И҆ па́ки: въ предсме́ртнѣмъ ᲂу҆чине́нїи твоегѡ̀ достоѧ́нїѧ, въ числѣ̀ наслѣ́дникѡвъ, вмѣ́стѣ съ ча́ды и҆ срѡ́дники твои́ми, да и҆́мать завѣща́нїе твоѐ и҆ и҆́мѧ сꙋдїѝ бг҃а, и҆ да не ѡ҆бездо́литъ па́мѧти ни́щихъ, и҆ а҆́зъ бꙋ́дꙋ си̑мъ спорꙋ́чникъ. И҆ па́ки: а҆́ще во бл҃гоче́стїи сконча́выйсѧ и҆ въ воздꙋ́хъ разложи́сѧ, не ѿрица́йсѧ ма́сла и҆ свѣ́щъ, хрⷭ҇та̀ бг҃а призыва́ѧ, на гро́бѣ возжещѝ: прїѧ̑тна бо сꙋ́ть сїѧ̑ бг҃ꙋ, и҆ мно́гое прино́сѧтъ воздаѧ́нїе. А҆́ще ᲂу҆́бѡ грѣ́шенъ ᲂу҆ме́рый, да разрѣши́ши є҆гѡ̀ прегрѣшє́нїѧ: а҆́ще же пра́веденъ, да мзда́мъ приложе́нїе бꙋ́детъ: а҆́ще же приключи́тсѧ, ꙗ҆́кѡ нѣ́кїй, стра́ненъ и҆ ни́щь сы́й, не и҆́мать ѡ҆ си́хъ пекꙋ́щагѡсѧ: но бг҃ъ, пра́веденъ и҆ чл҃вѣколю́бецъ сы́й, возмѣ́ритъ и҆ ѻ҆́номꙋ за нищетꙋ̀, ꙗ҆́кѡ вѣ́сть, ра́внꙋ ми́лость. И҆́накѡ же, и҆ приносѧ́й за сицєвы́хъ соприча́стникъ мзды быва́етъ, ꙗ҆́кѡ любо́вь ѡ҆ сп҃се́нїи бли́жнѧгѡ показꙋ́ѧй. ꙗ҆́коже и҆но́го помазꙋ́ѧй мѵ́ромъ, са́мъ себѐ пре́жде бл҃гоꙋха́етъ. Не и҆сполнѧ́ющїи ᲂу҆́бо повелѣ́нное и҆ завѣ́ты въ сицевы́хъ сꙋ́дъ всѧ́чески и҆мѣ́ти бꙋ́дꙋтъ. До́ндеже ᲂу҆́бѡ второ́е прїи́детъ хрⷭ҇то́во прише́ствїе, быва́ємаѧ за ᲂу҆со́пшихъ по́льзꙋ и҆́мъ даю́тъ, ꙗ҆́коже бж҃е́ственнїи ѻ҆тцы̀ глаго́лютъ: и҆ наипа́че содѣ́лавшымъ ма̑лаѧ нѣ̑каѧ бл҃га̑ѧ, є҆гда̀ съ живꙋ́щими бѧ́хꙋ сопричте́ни. А҆́ще ᲂу҆́бѡ бж҃е́ственное писа́нїе [ꙗ҆́кѡже потре́бно є҆́сть] и҆ глаго́летъ нѣ̑каѧ ко вразꙋмле́нїю мно́гихъ, но бж҃їе человѣколю́бїе мно́жайше побѣжда́етъ. А҆́ще бо ра́вный вѣ́съ ѡ҆брѧ́щетсѧ до́брыхъ и҆ гнꙋ́сныхъ, побѣжда́етъ чл҃вѣколю́бїе. А҆́ще же ѕлы́хъ мѣ́рило и҆ тѧгча́йше бꙋ́детъ ма́лымъ чи́мъ, преѡдолѣва́етъ па́ки превосходѧ́щаѧ бл҃гость.
Вѣ́домо же бꙋ́ди, ꙗ҆́кѡ позна́ютъ та́мѡ дрꙋ́гъ дрꙋ́га всѝ, и҆́хже зна́ютъ и҆ и҆́хже никогда́же ви́дѣша, [ꙗ҆́коже бж҃е́ственный глаго́летъ златоꙋ́стый, ѿ при́тчи ѡ҆ бога́томъ и҆ ла́зарѣ сїѐ показꙋ́ѧ], ѻ҆ба́че не тѣле́снымъ нѣ́кимъ ѡ҆́бразомъ: [во є҆ди́нѣмъ бо во́зрастѣ бꙋ́дꙋтъ всѝ, не сохра́ньше при́знакѡвъ приро́дныхъ:] позна́ютъ же прозри́тельнымъ ѻ҆́комъ дꙋше́внымъ, ꙗ҆́кѡ и҆ ст҃і́и ѻ҆тцы̀ и҆́ндѣ глаго́лютъ: ꙗ҆́кѡ да́же и҆ до ѻ҆́бщагѡ воскресе́нїѧ, даде́сѧ ст҃ы̑мъ дрꙋ́гъ дрꙋ́га познава́ти и҆ свесели́тисѧ: грѣ́шнїи же и҆ сегѡ̀ лиши́шасѧ. Ст҃ы̑мъ же мꙋ́ченикѡмъ даде́сѧ назира́ти, и҆ ꙗ҆̀же мы̀ твори́мъ, и҆ посѣща́ти. Тогда́ же дрꙋ́гъ дрꙋ́га всѝ позна́ютъ, є҆гда̀ и҆ сокровє́ннаѧ всѣ́хъ ꙗ҆вѧ́тсѧ. Вѣ́домо же бꙋ́ди, ꙗ҆́кѡ ны́нѣ въ нѣ́кихъ мѣ́стѣхъ ѿлꙋче́нныхъ дꙋ́шы ст҃ы́хъ пребыва́ютъ, и҆ грѣ́шныхъ па́ки ѡ҆со́бь: ѻ҆́вїи ᲂу҆пова́нїемъ ра́дꙋющесѧ, ѻ҆́вїи же ѕлы́хъ ча́ѧнїемъ печа́лꙋющесѧ. Є҆щѐ бо не прїѧ́ша ст҃і́и ѡ҆бѣтова́нїѧ бл҃ги́хъ, ꙗ҆́коже глаго́летъ бж҃е́ственный а҆пⷭ҇лъ, бг҃ꙋ лꙋ́чшее что̀ ѡ҆ на́съ предзрѣ́вшꙋ, да не без̾ на́съ соверше́нство прїи́мꙋтъ (Є҆вр. а҃і: м҃).
Подоба́етъ же вѣ́дати, ꙗ҆́кѡ въ прѡ́пасти впа́дающїи, и҆ во ѻ҆́гнь, и҆ въ мо́ре, и҆ глаго́лємыѧ па̑гꙋбы, и҆ стꙋ́дєни и҆ гла́дъ, сїѐ стра́ждꙋтъ не по слꙋ́чаю и҆ не без̾ бж҃їѧ повелѣ́нїѧ: сїѧ̑ бо сꙋ́ть бж҃їѧ сꙋдьбы̑, и҆́хже ѻ҆́ва быва́ютъ по бл҃говоле́нїю, ѻ҆́ва же по попꙋще́нїю: дрꙋга̑ѧ же быва́ютъ и҆ ᲂу҆вѣ́домле́нїѧ ра́ди и҆ преще́нїѧ, и҆ ᲂу҆цѣломꙋдре́нїѧ и҆ны́хъ. И҆ предзна́тельнымъ ᲂу҆́бѡ ра́зꙋмомъ бг҃ъ вѣ́сть всѧ̑ и҆ зна́етъ, и҆ во́лею є҆гѡ̀ всѧ̑ быва́ютъ, ꙗ҆́коже и҆ ѡ҆ пти́цахъ глаго́летъ ст҃о́е є҆ѵⷢ҇лїе. Ѻ҆ба́че не та́кѡ сїѐ до́лжно є҆́сть разꙋмѣ́ти, ꙗ҆́кѡ бг҃ъ є҆ди́нымъ свои́мъ всемогꙋ́щимъ и҆ неизслѣ́димымъ хотѣ́нїемъ ѡ҆предѣлѧ́етъ глаго́лемꙋю сꙋдьбꙋ̀ человѣ́ка и ничи́мже мо́жетъ человѣ́къ таковы́ѧ сꙋдьбы̀ ѿврати́ти и҆лѝ и҆збѣ́гнꙋти: но ѻ҆́вомꙋ ᲂу҆́бѡ ᲂу҆дави́тисѧ, ѻ҆́вомꙋ же про́стѡ ᲂу҆мре́ти, и҆ ѻ҆́вомꙋ ᲂу҆́бѡ ста́рꙋ, ѻ҆́вомꙋ же мла́дꙋ ѡ҆предѣле́но є҆́сть. Та́кѡ бо мꙋ́дрствꙋютъ нѣ́цыи, не разꙋмѣва́юще про́мысла бж҃їѧ. Бж҃е́ственнїи же ѻ҆тцы̀, сло́вꙋ бж҃їю послѣ́дꙋюще, наꙋчи́ша на́съ, ꙗ҆́кѡ ѡ҆предѣлѧ́етъ ᲂу҆́бѡ бг҃ъ сꙋдбꙋ̀ человѣ́ка, ѻ҆ба́че твори́тъ сїѐ, поели́кꙋ, ꙗ҆́кѡ всѧ̑ вѣ́дый, ѿ вѣ́ка зна́етъ жи́тельство є҆ди́нагѡ коегѡ҆ждо на́съ и соѡбра́знѡ семꙋ́ жи́тельствꙋ ѡпредѣлѧ́етъ и҆ вре́мѧ, и҆ ѡ҆́бразъ сме́рти, сокраща́етъ жи́знь и҆лѝ прибавлѧ́етъ, всѧ̑ къ по́льзѣ ᲂу҆строѧ́ѧ. Глаго́летъ бо а҆пⷭ҇лъ къ корі́нѳѧнѡмъ пишѧ̀: занѐ недосто́йнѣ причаща́етесѧ, сегѡ̀ ра́ди въ ва́съ мно́зи не́мощни и҆ недꙋ́жливи, и҆ спѧ́тъ дово́льни (а҃ Корі́нѳ. а҃і: л҃) си́рѣчь, ᲂу҆мира́ютъ мно́зи. И҆ дв҃дъ глаго́летъ: не возведѝ менѐ въ преполове́нїе дне́й мои́хъ (ѱал. р҃а: к҃є), и҆ пѧ̑ди положи́лъ є҆сѝ дни̑ моѧ̑ (ѱал. л҃и: ѕ҃). И҆ соломѡ́нъ: сы́не, чтѝ ѻ҆тца̀ твоего̀, ꙗ҆́кѡ да бꙋ́деши многолѣ́тенъ. И҆ па́ки: да не ᲂу҆́мреши не во вре́мѧ твоѐ (Є҆ккл. з҃: и҃і). И҆ во і҆́ѡвѣ, ко є҆лїфа́зꙋ бг҃ъ глаго́летъ: потреби́лъ бы́хъ ᲂу҆́бѡ ва́съ, а҆́ще бы не і҆́ѡва ра́ди раба̀ моего̀ (І҆́ѡв. м҃в: и҃). А҆́ще же ѿ вѣ́ка сꙋдьба̀ человѣ́кꙋ ѡ҆предѣлѝсѧ, ничто́же тогда̀ до́брое житїѐ по́льзꙋетъ, нижѐ ѕло́е вреди́ти мо́жетъ. А҆́ще напредъ ѡ҆предѣлє́на сꙋ́ть всѧ̑, чесѡ̀ ра́ди и҆ бг҃ꙋ мо́лимсѧ и҆ по́мощи и҆лѝ и҆збавле́нїѧ ѿ негѡ̀ про́симъ, чесѡ̀ ра́ди и҆ враче́й призыва́емъ: Но премѣнѧ́етъ бг҃ъ пра́ведный сво́й сꙋ́дъ человѣ́ческагѡ ра́ди раска́ѧнїѧ и҆ належа́щꙋю па́гꙋбꙋ
ѿвраща́етъ.
За сїю̀ винꙋ̀ дꙋша́мъ па́мѧть твори́мъ: ꙗ҆̀же въ првⷣныхъ твои́хъ селе́нїихъ ᲂу҆чинѝ, влⷣко хрⷭ҇тѐ, и҆ поми́лꙋй на́съ, ꙗ҆́кѡ є҆ди́нъ безсме́ртенъ. а҆ми́нь.
Пѣ́снь з҃.
І҆рмо́съ: Въ нача́лѣ зе́млю ѡ҆снова́вый:
Бл҃гоче́стнѡ ѿ вѣ́ка преста́вльшихсѧ па́мѧть творѧ́ще, вопїе́мъ: бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
Внеза́пꙋ бл҃гоче́стнѡ ᲂу҆ме́ршыѧ, и҆ ѿ верже́нїѧ всѧ́ческагѡ па́дшагѡ, ѿ дре́ва, желѣ́за, всѧ́кагѡ ка́мене, ᲂу҆поко́й, бж҃е, ᲂу҆со́пшыѧ вѣ̑рныѧ.
Въ стра́шное твоѐ прише́ствїе, ще́дре, ѡ҆деснꙋ́ю со ѻ҆вца́ми твои́ми поста́ви правосла́внѡ тѝ въ жи́зни послꙋжи́вшыѧ, хрⷭ҇тѐ, и҆ преста́вльшыѧсѧ къ тебѣ̀.
Въ ли́цѣ и҆збра́нныхъ твои́хъ, хрⷭ҇тѐ, вчинѝ твоѧ̑ рабы̑, да вопїю́тъ тебѣ̀: бл҃гослове́нъ є҆сѝ во вѣ́ки, гдⷭ҇и, бж҃е ѻ҆тє́цъ на́шихъ.
Ѿ землѝ пе́рсть содѣ́ѧвый, пло́ть дх҃омъ ѡ҆животвори́вый, сп҃се ще́дрый, ꙗ҆́же прїѧ́лъ є҆сѝ, ᲂу҆поко́й, бж҃е, въ нестарѣ́ющей жи́зни.
[О] Сла́ва, трⷪ҇ченъ: Ꙗ҆́коже въ трїѐхъ со́лнцѣхъ во є҆ди́нѣмъ же свѣ́та срастворе́нїи, бж҃ество̀ да воспое́тсѧ, ѻ҆ц҃ъ, и҆ сн҃ъ и҆ бж҃е́ственный дх҃ъ, є҆ди́нъ є҆стество́мъ, но трѝ ѵ҆поста́сьми.
[Д] Бг҃оро́диченъ: Дв҃дское согла́снѡ воспѣва́емъ тѝ пѣ́нїе, го́рꙋ тѧ̀ бж҃їю нарица́юще, дв҃о, въ не́йже всели́всѧ пло́тїю сло́во, ѡ҆бг҃отворѝ на́съ дх҃о́внѡ въ себѣ̀.
Катава́сїѧ: Въ нача́лѣ зе́млю ѡ҆снова́вый, и҆ нб҃са̀ сло́вомъ ᲂу҆тверди́вый, бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
Пѣ́снь и҃.
І҆рмо́съ: На горѣ̀ ст҃ѣ́й просла́вльшасѧ:
Сокрꙋши́вый пе́рвѣе сѣ́нь сме́ртнꙋю, возсїѧ́въ ꙗ҆́кѡ со́лнце и҆з̾ гро́ба, сы́ны воскрⷭ҇нїѧ твоегѡ̀ сотворѝ, гдⷭ҇и сла́вы, всѧ̑ ᲂу҆ме́ршыѧ въ вѣ́рѣ, во вѣ́ки.
Безвѣ́стныхъ и҆ сокрове́нныхъ свѣ́дѣтелю, є҆гда̀ и҆́маши ѿкры́ти дѣла̀ тьмы̀ и҆ совѣ́ты серде́цъ на́шихъ, тогда̀ не и҆стѧжѝ сло́ва со всѣ́ми вѣ́рою ᲂу҆со́пшими.
Є҆гда̀ и҆́маши сѣ́сти на прⷭ҇то́лѣ, и҆ повели́ши на сꙋ́дъ предста́ти, сѡ́браннымъ трꙋбо́ю ѿ конє́цъ землѝ: тогда̀ пощадѝ всѣ́хъ, хрⷭ҇тѐ, ꙗ҆́кѡ млⷭ҇тивый.
Оу҆ме́ршымъ внеза́пꙋ ѿ слꙋ́чаєвъ, ѿ кли́ча же ѕѣ́льнагѡ, и҆ ско́рагѡ тече́нїѧ, заꙋше́нїѧ, ᲂу҆давле́нїѧ и҆ лѧга́нїѧ, гдⷭ҇и сла́вы, въ вѣ́рѣ ᲂу҆со́пшымъ ѡ҆сла́би во вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
[Ѡ] Ꙗ҆́кѡ є҆ди́ницꙋ сꙋщество́мъ пою́ тѧ, ꙗ҆́кѡ трⷪ҇цꙋ ли́цы тѧ̀ чтꙋ̀: ѻ҆́ч҃е, и҆ сн҃е, и҆ дш҃е прест҃ы́й, безнача́льнꙋю держа́вꙋ твоегѡ̀ црⷭ҇твїѧ сла́влю во вѣ́ки.
[Р] Бг҃оро́диченъ: Стрꙋѝ живы́ѧ и҆сто́чникъ запечатлѣ́нный показа́ласѧ є҆си,̀ бцⷣе дв҃о: без̾ мꙋ́жа бо гдⷭ҇а ро́ждши, водо́ю безсме́ртїѧ вѣ̑рныѧ напаѧ́ши во вѣ́ки.
Хва́лимъ, бл҃гослови́мъ:
Катава́сїѧ: На горѣ̀ ст҃ѣ́й просла́вльшасѧ, и҆ въ кꙋпинѣ̀ та́йнꙋ приснодв҃ы ѻ҆гне́мъ мѡѷсе́ови ꙗ҆́вльшаго, гдⷭ҇а по́йте и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: Проѧвле́нное на горѣ̀ законополо́жникꙋ:
И҆дѣ́же є҆́сть веселѧ́щихсѧ жили́ще ст҃ы́хъ твои́хъ, гдⷭ҇и, всѧ̑ ѿ вѣ́ка въ вѣ́рѣ и҆ наде́ждѣ ᲂу҆со́пшыѧ ра́доватисѧ сподо́би.
Оу҆ме́ршыѧ бж҃їимъ преще́нїемъ, ѿ сме́ртныхъ громѡ́въ всѧ́кихъ съ нб҃сѐ и҆знесе́нныхъ, ѿ землѝ разсѣ́дшїѧсѧ, ѿ мо́рѧ возшꙋмѣ́вша, всѧ̑ вѣ̑рныѧ, хрⷭ҇тѐ, ᲂу҆поко́й.
Всѧ́кїй во́зрастъ, ста́рцы и҆ ю҆́ныѧ, ѻ҆́троки и҆ дѣ́ти, младе́нцы и҆ ссꙋ́щыѧ млеко̀, мꙋ́жеское є҆стество̀ и҆ же́нское, ᲂу҆поко́й, бж҃е, ꙗ҆̀же прїѧ́лъ є҆сѝ вѣ̑рныѧ.
Ѿ ꙗ҆дови́тыхъ ᲂу҆грызе́нїй ᲂу҆ме́ршыѧ, ѿ поглоще́нїѧ ѕмїє́въ, ѿ попра́нїѧ ко́ней, и҆ ѿ ᲂу҆давле́нїѧ, и҆ повѣ́шенїѧ ѿ бли́жнѧгѡ, вѣ́рою тѝ послꙋжи́вшыѧ ᲂу҆поко́й.
Коего́ждо по и҆́мени въ вѣ́рѣ ᲂу҆ме́ршыѧ, ѿ вѣ́ка и҆ ѿ ро́да родѡ́въ, неѡсꙋжде́ннѡ предста́ти тебѣ̀, сло́ве, въ прише́ствїи твое́мъ сподо́би.
[О] Сла́ва, трⷪ҇ченъ: Є҆ди́ный въ трⷪ҇цѣ бж҃е, сла́ва тебѣ̀ непреста́ннѡ: а҆́ще бо и҆ бг҃ъ кі́йждо, но є҆ди́нъ є҆стество́мъ є҆́сть, ѻ҆ц҃ъ, и҆ сн҃ъ, и҆ дх҃ъ, трисвѣ́тлыми сво́йствы.
[Ѵ] Бг҃оро́диченъ: Па́че ᲂу҆ма̀ ржⷭ҇тво̀ твоѐ: ражда́еши бо пре́жде сꙋ́щаго, и҆ несказа́ннѡ млеко́мъ пита́еши пищеда́вца мі́рꙋ: держи́ши же содержа́щаго всѧ̑, хрⷭ҇та̀ є҆ди́наго и҆зба́вителѧ на́шего всенепоро́чнаѧ.
Катава́сїа: Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀ ржⷭ҇тво̀ приснодв҃ы, въ на́ше вѣ́рныхъ сп҃се́нїе, пѣ́сньми немо́лчными велича́емъ.
Є҆ѯапостїла́рїй.
Подо́бенъ: Нб҃о ѕвѣзда́ми:
Живы́ми и҆ ме́ртвыми ѡ҆блада́ѧй ꙗ҆́кѡ бг҃ъ, ᲂу҆поко́й твоѧ̑ рабы̑ въ селе́нїихъ и҆збра́нныхъ: а҆́ще бо и҆ согрѣши́ша, сп҃се, но не ѿстꙋпи́ша ѿ тебѐ.
Дрꙋгі́й, Сла́ва:
Подо́бенъ: Жєны̀, ᲂу҆слы́шите:
Оу҆поко́й, гдⷭ҇и, рабы̑ твоѧ̑ во странѣ̀ живы́хъ, ѿѻнꙋ́дꙋже ѿбѣжѐ болѣ́знь, печа́ль вкꙋ́пѣ и҆ воздыха́нїе: ѡ҆чи́сти ꙗ҆́кѡ чл҃вѣколю́бецъ, ꙗ҆́же въ житїѝ согрѣши́ша: є҆ди́нъ бо безгрѣ́шенъ є҆сѝ и҆ млⷭ҇тивъ, ме́ртвыхъ и҆ живы́хъ влⷣка.
Бг҃оро́диченъ: Мр҃і́е бг҃оневѣ́сто, хрⷭ҇та̀ непреста́ннѡ молѝ ѡ҆ на́съ рабѣ́хъ твои́хъ, съ бг҃оглаго́ливыми прⷪ҇рѡ́ки, и҆ мч҃нкъ собѡ́ры, і҆ера̑рхи же и҆ прпⷣбными, и҆ всѣ́ми првⷣными, да бꙋ́демъ снаслѣ̑дницы нбⷭ҇нагѡ црⷭ҇твїѧ.
На хвали́техъ стїхи̑ры, на д҃, гла́съ и҃.
Подо́бенъ: Во є҆де́мѣ ра́й:
Прїиди́те пре́жде конца̀, всѝ бра́тїе, пе́рсть на́шꙋ ви́дѧще и҆ є҆стества̀ на́шегѡ немощно́е и҆ хꙋ́дость на́шꙋ, и҆ коне́цъ ᲂу҆́зримъ, и҆ ѻ҆҆́рганы сосꙋ́да пло́тскагѡ, и҆ ꙗ҆́кѡ пра́хъ человѣ́къ, снѣ́дь че́рвїємъ и҆ тлѣ́нїе: ꙗ҆́кѡ сꙋ́хи кѡ́сти на́шѧ, всѧ́кѡ не и҆мꙋ́щыѧ дыха́нїѧ. во гро́бы вни́кнемъ: гдѣ̀ сла́ва; гдѣ̀ добро́та зра́ка; гдѣ̀ бл҃гоглаго́ливый ѧ҆зы́къ; гдѣ̀ брѡ́вь; и҆лѝ гдѣ̀ ѻ҆́ко; всѧ̑ пра́хъ и҆ сѣ́нь. тѣ́мже пощадѝ, сп҃се, всѣ́хъ на́съ.
Что̀ прельща́етсѧ человѣ́къ хвалѧ́сѧ; что̀ всꙋ́е мѧте́тсѧ, и҆ са́мъ бре́нїе вско́рѣ; что̀ не помышлѧ́етъ пе́рсть, ꙗ҆́кѡ пра́хъ є҆́сть є҆ѧ̀ смѣше́нїе, и҆ гно́ѧ и҆ тлѣ́нїѧ ѿложе́нїе; а҆́ще ᲂу҆́бѡ бре́нїе є҆смы̀ человѣ́цы, что̀ прилѣпи́хомсѧ землѝ; и҆ а҆́ще хрⷭ҇тꙋ̀ є҆смы̀ сро́дни, что̀ не притека́емъ къ немꙋ̀; ѿве́ргше ᲂу҆́бо привре́меннꙋю и҆ текꙋ́щꙋю жи́знь, всѝ жи́зни нетлѣ́ннѣй послѣ́дꙋимъ, ꙗ҆́же є҆́сть хрⷭ҇то́съ, просвѣще́нїе дꙋ́шъ на́шихъ.
Рꙋко́ю твое́ю созда́вый а҆да́ма, и҆ поста́вивый предѣ́лъ нетлѣ́нїѧ и҆ ме́ртвости, сп҃се, и҆ жи́зни во бл҃года́ти, ѿ тлѣ́нїѧ же свободи́вый, и҆ къ пе́рвѣй преложи́вый жи́зни, са́мъ рабы̑ твоѧ̑, влⷣко, ꙗ҆̀же прїѧ́лъ є҆сѝ ѿ на́съ, съ првⷣными и҆ въ ли́цѣ и҆збра́нныхъ ᲂу҆поко́й: и҆ си́хъ и҆мена̀ написа́въ въ кни́зѣ живо́тнѣй, и҆ воскр҃си́въ во гла́сѣ а҆рха́гг҃ловѣ и҆ трꙋбы̀ шꙋ́мѣ, сподо́би ѧ҆̀ нбⷭ҇нагѡ црⷭ҇твїѧ твоегѡ̀.
Хрⷭ҇то́съ воскр҃се, разрѣши́въ ᲂу҆́зы а҆да́ма первозда́ннагѡ, и҆ а҆́довꙋ разрꙋши́въ крѣ́пость. дерза́йте, всѝ ме́ртвїи: ᲂу҆мертви́сѧ сме́рть, плѣне́нъ бы́сть и҆ а҆́дъ съ не́ю, и҆ хрⷭ҇то́съ воцр҃и́сѧ, распны́йсѧ и҆ воскр҃сы́й. то́й на́мъ дарова̀ нетлѣ́нїе пло́ти, то́й воздвиза́етъ на́съ, и҆ да́рꙋетъ воскрⷭ҇нїе на́мъ, и҆ сла́вы ѻ҆́ныѧ съ весе́лїемъ всѧ̑ сподоблѧ́етъ, въ вѣ́рѣ непрекло́ннѣй вѣ́ровавшыѧ те́плѣ въ него̀.
Сла́ва, гла́съ в҃:
Ме́ртвенъ: Ꙗ҆́кѡ цвѣ́тъ ᲂу҆вѧда́етъ, и҆ ꙗ҆́кѡ сѣ́нь ми́мѡ грѧде́тъ, и҆ разрꙋша́етсѧ всѧ́кїй человѣ́къ. па́ки же гласѧ́щей трꙋбѣ̀, ме́ртвїи всѝ ꙗ҆́кѡ въ трꙋ́сѣ воста́нꙋтъ ко твоемꙋ̀ срѣ́тенїю, хрⷭ҇тѐ бж҃е: тогда̀, влⷣко, дꙋ́хи ра̑бъ твои́хъ, ꙗ҆̀же преста́вилъ є҆сѝ ѿ на́съ, во ст҃ы́хъ твои́хъ селе́нїихъ ᲂу҆чинѝ при́снѡ.
И҆ ны́нѣ, бг҃оро́диченъ: Ра́дꙋйсѧ, мр҃і́е бцⷣе, хра́ме неразрꙋши́мый, па́че же ст҃ы́й, ꙗ҆́коже вопїе́тъ прⷪ҇ро́къ, ст҃ъ хра́мъ тво́й, ди́венъ въ пра́вдѣ.
На стїхо́внѣ подо́бны стїхѝ, ѳеофа́на, ѻ҆смогла́сника по гла́сꙋ.
Сла́ва, гла́съ ѕ҃, [Дамаски́ново:]
Болѣ́знь а҆да́мꙋ бы́сть дре́ва вкꙋше́нїе дре́вле во є҆де́мѣ, є҆гда̀ ѕмі́й ꙗ҆́дъ и҆зблева̀: тѣ́мъ бо вни́де сме́рть всеро́днаѧ, снѣда́ющаѧ человѣ́ка. но прише́дъ влⷣка низложѝ ѕмі́ѧ, и҆ ᲂу҆покое́нїе на́мъ дарова̀. къ немꙋ̀ ᲂу҆̀бо возопїи́мъ: пощадѝ, сп҃се, и҆ ꙗ҆̀же прїѧ́лъ є҆сѝ со и҆збра́нными твои́ми ᲂу҆поко́й.
И҆ ны́нѣ, бг҃оро́диченъ, гла́съ то́йже:
Ты̀ є҆сѝ бг҃ъ на́шъ, всѧ̑ въ мꙋ́дрости содѣва́ѧй и҆ соверша́ѧй. прⷪ҇ро́ки посла́лъ є҆сѝ, хрⷭ҇тѐ, прорещѝ твоѐ прише́ствїе, и҆ а҆пⷭ҇лы, проповѣ́дати твоѧ̑ вели̑чїѧ: и҆ ѻ҆́вїи ᲂу҆́бѡ прореко́ша прише́ствїе твоѐ, ѻ҆́вїи же креще́нїемъ просвѣти́ша ꙗ҆зы́ки: мꙋ́чєницы же пострада́вше, прїѧ́ша ꙗ҆̀же жела́хꙋ. и҆ мо́литъ тѧ̀ ли́къ ѻ҆бои́хъ, съ ро́ждшею тѧ̀: ᲂу҆поко́й, бж҃е, дꙋ́шы, ꙗ҆̀же прїѧ́лъ є҆сѝ. сподо́би и҆ на́съ црⷭ҇твїѧ твоегѡ̀, крⷭ҇тъ претерпѣ́вый на́съ ра́ди ѡ҆сꙋжде́нныхъ, и҆зба́вителю на́шъ и҆ бж҃е.
Бл҃го є҆́сть и҆сповѣ́датисѧ: Трист҃о́е, тропа́рь: Глꙋбино́ю мꙋ́дрости: Сла́ва, и҆ ны́нѣ: Тебѐ и҆ стѣ́нꙋ:
Присовокꙋплѧ́емъ же и҆ пе́рвый ча́съ. И҆ ѿпꙋ́стъ.
На лїтꙋргі́и и҆з̾ѡбрази́тєльнаѧ: и҆ ѿ канѡ́на трїѡ́ди, пѣ́снь г҃ и҆ ѕ҃. Прокі́менъ а҆пⷭ҇ла, гла́съ ѕ҃: Дꙋ́шы и҆́хъ во бл҃ги́хъ водворѧ́тсѧ. Сті́хъ: Къ тебѣ̀, гдⷭ҇и, воздвиго́хъ дꙋ́шꙋ мою̀: А҆пⷭ҇лъ къ корі́нѳѧнѡмъ, зача́ло рм҃ѕ: дрꙋгі́й за ᲂу҆поко́й, къ солꙋ́нѧнѡмъ, зача́ло с҃ѻ, А҆ллилꙋ́їа, гла́съ ѕ҃: Бл҃же́ни, ꙗ҆̀же и҆збра́лъ и҆ прїѧ́лъ є҆сѝ, гдⷭ҇и. Сті́хъ: И҆ па́мѧть и҆́хъ въ ро́дъ и҆ ро́дъ. Є҆ѵⷢ҇лїе ѿ лꙋкѝ, зача́ло р҃є: дрꙋго́е ᲂу҆со́пшымъ, ѿ і҆ѡа́нна, зача́ло ѕ҃і. Кїнѡні́къ: Бл҃же́ни, ꙗ҆̀же и҆збра́лъ и҆ прїѧ́лъ є҆сѝ, гдⷭ҇и, и҆ па́мѧть и҆́хъ въ ро́дъ и҆ ро́дъ.
Вѣ́дати же подоба́етъ, ꙗ҆́кѡ сїѐ послѣ́дованїе быва́етъ непремѣ́ннѡ и҆ въ сꙋббѡ́тꙋ пред̾ ст҃о́ю пѧтдесѧ́тницею.
