кафизма 18

каѳи́сма , и҃і . ѱл҃о́мъ дв҃дᲂвъ , рѳ҃і .

Ко́ гдⷭ҇ꙋ внегда̀ скᲂрбѣ́хъ вᲂз̾ва́хъ , и҆ ᲂу҆слы́ша мѧ . Гдⷭ҇и и҆зба́ви дш҃ꙋ мᲂю̀ ѿ ᲂу҆сте́нъ не пра́веденъ , и҆ ѿ ꙗ҆зы́ка льсти́ва . Что̀ да́стсѧ тебѣ̀ ; и҆лѝ что̀ прилᲂжи́тсѧ тѝ к̾ ꙗ҆зы́кꙋ льсти́вꙋ . Стрѣ́лы си́льнагѡ и҆з̾ѡ҆щрены̀ , съ ᲂу҆́гльми пꙋсты́нными . Оу҆вы̀ мнѣ̀ , ꙗ҆́кѡ прише́льствїе мᲂѐ ᲂу҆да́лисѧ . всели́хсѧ съ се́лы кида́рскими . Мно́гѡ прише́льствᲂва дш҃а мᲂѧ̀ . Съ ненави́дѧщими ми́ра , бѣ́хъ ми́ренъ . є҆гда̀ гл҃ахъ и҆́мъ , бᲂрѧ́хꙋ мѧ тꙋ́не .

ѱл҃о́мъ дв҃дᲂвъ , р҃к .

Вᲂз̾ведо́хъ ѻ҆́чи мᲂѝ в̾ го́ры , ѿ ню́дꙋ же прїи́детъ по́мᲂщь мᲂѧ̀ . По́мᲂщь мᲂѧ̀ ѿ́ гдⷭ҇а , сᲂтво́ршагѡ нб҃о и҆ зе́млю . Не да́ждь во смѧте́нїе нᲂгѝ твᲂеѧ̀ , нижѐ вᲂз̾дре́млетъ хранѧ́и тѧ̀ . Сѐ не  вᲂз̾дре́млетъ ни ᲂу҆́снетъ хранѧ́и і҆и҃лѧ . Гдⷭ҇ь сᲂхрани́тъ тѧ , гдⷭ҇ь пᲂкро́въ тво́й на́  рꙋкꙋ деснꙋ́ю твᲂю̀ . Во́ дне со́лнце не ѡ҆жже́тъ тебѐ , ни лꙋна̀ но́щїю . Гдⷭ҇ь сᲂхрани́тъ тѧ ѿ всѧ́кᲂгѡ ѕла̀ , сᲂхрани́тъ дш҃ꙋ твᲂю̀ гдⷭ҇ь . Гдⷭ҇ь сᲂхрани́тъ вхᲂжде́нїе твᲂѐ , и҆ и҆схᲂжде́нїе твᲂѐ , ѿ ны́нѣ и҆ до́ вѣка .

ѱл҃о́мъ дв҃дᲂвъ , рк҃а .

Вᲂз̾весели́хсѧ ѡ҆ ре́кшихъ мнѣ̀ , в̾ до́мъ гдⷭ҇нь вни́демъ . Стᲂѧ́ще бѧ́хꙋ но́ги на́ша , во дво́рѣхъ твᲂи́хъ і҆єрⷭ҇ли́ме . І҆єрⷭ҇ли́мъ зи́ждемъ ꙗ҆́кѡ гра́дъ , є҆мꙋ́же прича́стїе є҆гѡ̀ вкꙋ́пѣ . Та́мѡ бо взыдо́ша кᲂлѣ́на , кᲂлѣ́на гдⷭ҇нѧ свидѣ́нїе і҆и҃лево , и҆спᲂвѣ́датисѧ и҆́мени гдⷭ҇ню . Ꙗ҆́кѡ тꙋ̀ сѣдо́ша престо́ли на сꙋдѣ̀ , престо́ли в̾ дᲂмꙋ̀ дв҃дᲂвѣ . Вᲂпрᲂси́те же ꙗ҆́же ѡ҆́ мирѣ і҆єрⷭ҇ли́мꙋ и҆ ѻ҆би́лїе лю́бѧщимъ тѧ̀ . Бꙋ́ди же ми́ръ в̾ си́лѣ твᲂе́й , и҆ ѻ҆би́лїе в̾ стᲂлпꙋ̀ стѣна́хъ твᲂи́хъ . Ра́ди бра́тїи мᲂи́хъ , и҆ бли́жнихъ мᲂи́хъ , глаго́лахъ ᲂу҆́бѡ ми́ръ ѡ҆ тебѣ̀ . До́мꙋ ра́ди гдⷭ҇а бг҃а на́шегѡ , взыска́хъ блага́ѧ тебѣ̀ .

ѱл҃о́мъ дв҃дᲂвъ , рк҃в .

Къ тебѣ̀ вᲂз̾ведо́хъ ѻ҆́чи мᲂѝ , живꙋ́щемꙋ на́  нб҃си . Сѐ ꙗ҆́кѡ ѻ҆́чи ра́бъ в̾ рꙋ́кꙋ гᲂспо́дїи свᲂи́хъ . ꙗ҆́кѡ ѻ҆́чи рабы́ни в̾ рꙋкꙋ̀ гᲂспᲂжѝ свᲂеѧ̀ . Та́кѡ ѻ҆́чи на́ши ко́ гдⷭ҇ꙋ бг҃ꙋ на́шемꙋ , до́ндеже ᲂу҆ще́дритъ ны̀ . Пᲂми́лꙋй на́съ гдⷭ҇и , пᲂми́лꙋй на́съ . ꙗ҆́кѡ пᲂмно́гꙋ и҆спо́лнихᲂмсѧ ᲂу҆ничиже́нїѧ . Пᲂмно́гꙋ и҆спо́лнисѧ дш҃а на́ша , ᲂу҆ничиже́нїе гᲂбзꙋ́ющихъ , и҆ ᲂу҆ничиже́нїе гᲂрды́мъ .

ѱл҃о́мъ дв҃дᲂвъ , рк҃г .

Ꙗ҆́кѡ а҆́ще не бы̀ гдⷭ҇ь въ на́съ , да рече́тъ ᲂу҆́бѡ і҆и҃ль , ꙗ҆́кѡ а҆́ще не бы̀ гдⷭ҇ь въ на́съ . Внегда̀ вᲂста́ти чл҃кѡмъ на ны̀ , ᲂу҆́бѡ жи́вы пᲂже́рли бы́ша на́съ . Внегда̀ прᲂгнѣ́ватисѧ ꙗ҆́рᲂсти и҆́хъ на ны̀ , ᲂу҆́бѡ вᲂда̀ пᲂтᲂпи́ла  бы на́съ . Пᲂто́къ пре́йде дш҃а на́ша . ᲂу҆́бѡ пре́йде дш҃а на́ша во́дꙋ не  пᲂстᲂѧ́ннꙋю . Бл҃гᲂслᲂве́нъ гдⷭ҇ь , и҆́же неда́стъ на́съ в̾ лᲂви́твꙋ зꙋбо́мъ и҆́хъ . Дш҃а на́ша ꙗ҆́кѡ пти́ца и҆зба́висѧ ѿ сѣ́ти лᲂвѧ́щихъ , сѣ́ть сᲂкрꙋши́сѧ , и҆ мы̀ и҆зба́влени бы́хᲂмъ . По́мᲂщь на́ша во́  и҆мѧ гдⷭ҇не , сᲂтво́ршагѡ не́бо и҆ зе́млю . сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

ѱл҃о́мъ дв҃дᲂвъ , рк҃д .

Надѣ́ющїисѧ на́  гдⷭ҇а , ꙗ҆́кѡ гᲂра̀ сїѡ́нъ , не  пᲂд̾ви́житсѧ во́ вѣки живы́и во  і҆єрⷭ҇ли́мѣ . Го́ры ѻ҆́крестъ є҆гѡ̀ , и҆ гдⷭ҇ь ѻ҆́крестъ люде́й свᲂи́хъ , ѿ  ны́нѣ и҆ до́ вѣка . Ꙗ҆́кѡ не ѡ҆ста́витъ гдⷭ҇ь жезла̀ грѣ́шныхъ , на жре́бїи пра́ведныхъ . ꙗ҆́кѡ да не про́стрꙋтъ пра́веднїи в̾ без̾зако́нїи рꙋ́къ свᲂи́хъ . Оу҆блажѝ гдⷭ҇и бл҃ги́мъ и҆ пра́вымъ срⷣцемъ . Оу҆клᲂнѧ́ющїѧжесѧ въ  развраще́нїе , ѿведе́тъ гдⷭ҇ь съ твᲂрѧ́щими без̾зако́нїе , ми́ръ на і҆и҃лѧ .

ѱл҃о́мъ дв҃дᲂвъ , рк҃є .

Внегда̀ вᲂз̾врати́тъ гдⷭ҇ꙋ плѣ́нъ сїѡ́нь , бы́хᲂмъ ꙗ҆́кѡ ᲂу҆тѣ́шени . Тᲂгда̀ и҆спо́лнишасѧ ра́дᲂсти ᲂу҆ста̀ на́ша , и҆ ꙗ҆зы́къ на́шъ весе́лїѧ . Тᲂгда̀ рекꙋ́тъ во  ꙗ҆зы́цѣхъ , вᲂз̾вели́чилъ є҆́сть гдⷭ҇ь сᲂтвᲂри́ти с̾ ни́ми . Вᲂз̾вели́чилъ є҆́сть гдⷭ҇ь сᲂтвᲂри́ти с̾ на́ми , бы́хᲂмъ веселѧ́щесѧ . Вᲂз̾вратѝ гдⷭ҇и плѣне́нїе на́ше , ꙗ҆́кѡ пᲂто́ки ю҆́гᲂмъ . Сѣ́ющїи слеза́ми , ра́дᲂстїю по́жнꙋтъ . Хᲂдѧ́щїи хᲂжда́хꙋ , и҆ пла́кахꙋсѧ , мета́юще сѣ́мена свᲂѧ̀ . грѧдꙋ́ще же прїи́дꙋтъ ра́дᲂстїю взе́млюще рꙋкᲂѧ́ти свᲂѧ̀ .

ѱл҃о́мъ дв҃дᲂвъ , рк҃ѕ .

А҆́ще не гдⷭ҇ь сᲂзи́ждетъ до́мꙋ , в̾сꙋ́е трꙋди́шасѧ зи́ждꙋщїи . а҆́ще не гдⷭ҇ь сᲂхрани́тъ гра́дъ , в̾сꙋ́е бдѧ̀ стрегі́и . Всꙋ́е ва́мъ є҆́сть ᲂу҆́треневати . вᲂста́нѣте по сѣда́нїи ꙗ҆дꙋ́щїи хлѣ́бъ бᲂлѣ́зни . внегда̀ да́стъ вᲂз̾лю́бленнымъ свᲂи́мъ со́нъ . Сѐ дᲂстᲂѧ́нїе гдⷭ҇не сы́нᲂве , мзда̀ плᲂда̀ чре́внѧгѡ . Ꙗ҆́кѡ стрѣ́лы в̾  рꙋцѣ̀ си́льнагѡ , та́кѡ сы́нᲂве ѿѧ́тыхъ . Бл҃же́нъ и҆́же и҆спо́лнитъ жела́нїе свᲂѐ ѿ ни́хъ . Не пᲂстыдѧ́тсѧ є҆гда̀ глаго́лютъ враго́мъ свᲂи́мъ во вратѣ́хъ .

ѱл҃о́мъ дв҃дᲂвъ , рк҃з .

Бл҃же́ни всѝ бᲂѧ́щїисѧ гдⷭ҇а , хᲂдѧ́щїи в̾  пꙋте́хъ є҆гѡ̀ . Трꙋды̀ пло́дъ свᲂи́хъ снѣ́си . бл҃же́нъ є҆сѝ , и҆ дᲂбро̀ тебѣ̀ бꙋ́детъ . жена̀ твᲂѧ̀ , ꙗ҆́кѡ лᲂза̀ плᲂдᲂви́та во страна́хъ до́мꙋ твᲂегѡ̀ . Сы́нᲂве твᲂѝ , ꙗ҆́кѡ нᲂвᲂсажде́на ма́слина , ѻ҆́крестъ трапе́зы твᲂеѧ̀ . Сѐ та́кѡ бл҃гᲂслᲂви́тсѧ чл҃къ бᲂѧ́исѧ гдⷭ҇а . Бл҃гᲂслᲂви́тъ тѧ гдⷭ҇ь ѿ сїѡ́на , и҆ ᲂу҆́зриши бл҃га́ѧ і҆єрⷭ҇ли́мꙋ , всѧ̀ днѝ живᲂта̀ твᲂегѡ̀ . И҆ ᲂу҆́зриши сы́ны сыно́въ твᲂи́хъ , ми́ръ на і҆и҃лѧ .

ѱл҃о́мъ дв҃дᲂвъ , рк҃и .

Мно́жицею бра́шасѧ со мно́ю ѿ ю҆́нᲂсти мᲂеѧ̀ , да  рече́тъ ᲂу҆́бѡ і҆и҃ль . Мно́жицею бра́шасѧ со мно́ю ѿ ю҆́нᲂсти мᲂеѧ̀ , и҆́бо не премᲂго́ша мѧ . На хребтѣ̀ мᲂе́мъ дѣ́лаша грѣ́шницы , ᲂу҆да́лиша без̾зако́нїѧ свᲂѧ̀ . Гдⷭ҇ь пра́веденъ ссѣчѐ вы́ѧ грѣ́шникᲂмъ . да пᲂстыдѧ́тсѧ и҆ вᲂз̾вратѧ́тсѧ вспѧ́ть , всѝ ненави́дѧщїи сїѡ́на . Да бꙋ́дꙋтъ ꙗ҆́кѡ трава̀ на  зда́нїихъ , ꙗ҆́же пре́жде вᲂстᲂрже́нїѧ и҆́зсше . Ꙗ҆́же не и҆спо́лни рꙋкѝ свᲂеѧ̀ жнѧ́и , и҆ ло́на свᲂегѡ̀ рꙋкᲂѧ́ти сᲂбира́ѧи . И҆ не рѣ́ша ми́мѡ хᲂдѧ́щїи , бл҃гᲂслᲂве́нїе гдⷭ҇не на  вы̀ . бл҃гᲂслᲂви́хᲂмъ вы̀ во́ и҆мѧ гдⷭ҇не . сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

ѱл҃о́мъ дв҃дᲂвъ , рк҃ѳ .

И҆з̾ глꙋбины̀ вᲂз̾ва́хъ к̾ тебѣ̀ гдⷭ҇и ,= гдⷭ҇и ᲂу҆слы́ши гла́съ мо́й . Бꙋ́дѣтѣ ᲂу҆́ши твᲂѝ , вне́млющѣ гла́съ мᲂли́твы мᲂеѧ̀ . А҆́ще без̾зако́нїѧ на́зриши гдⷭ҇и , гдⷭ҇и кто̀ пᲂстᲂи́тъ . =ꙗ҆́кѡ ѿ  тебѐ ѡ҆чище́нїе є҆́сть . И҆́мене ра́ди твᲂегѡ̀ пᲂтерпѣ́хъ тѧ гдⷭ҇и . пᲂтерпѣ̀ дш҃а мᲂѧ̀ в̾ сло́во твᲂѐ , ᲂу҆пᲂва̀ дш҃а мᲂѧ̀ на́ гдⷭ҇а . Ѿ стра́жа ᲂу҆́тренѧѧ до́ нᲂщи , ѿ  стра́жа ᲂу҆́тренѧѧ , да ᲂу҆пᲂва́етъ і҆и҃ль на́  гдⷭ҇а . Ꙗ҆́кѡ ѿ́  гдⷭ҇а млⷭ҇ть , и҆ мно́го ѿ  негѡ̀ и҆збавле́нїе , и҆ то́й и҆зба́витъ і҆и҃лѧ ѿ  всѣ́хъ без̾зако́нїи є҆гѡ̀ .

ѱл҃о́мъ дв҃дᲂвъ , р҃л .

Гдⷭ҇и не вᲂз̾несе́сѧ срⷣце мᲂѐ , ни вᲂз̾несо́стѣсѧ ѻ҆́чи мᲂѝ . ни хᲂди́хъ в̾ вели́кихъ , ни  в̾ ди́вныхъ па́че менѐ . А҆́ще не  смире́нѡ мꙋ́дрствᲂвахъ , но вᲂз̾несо́хъ дш҃ꙋ мᲂю̀ . ꙗ҆́кѡ ѿдᲂе́нᲂе на ма́терь свᲂю̀ , та́кѡ вᲂз̾да́си на́  дш҃ꙋ мᲂю̀ . Да ᲂу҆пᲂва́етъ і҆зра́иль на́  гдⷭ҇а , ѿ ны́нѣ и҆ до́ вѣка .

ѱл҃о́мъ дв҃дᲂвъ , рл҃а .

Пᲂмѧнѝ гдⷭ҇и дв҃да , и҆ всю̀ кро́тᲂсть є҆гѡ̀ . Ꙗ҆́кѡ клѧ́тсѧ гдⷭ҇ви , ѡ҆бѣща́сѧ бг҃ꙋ і҆а́кѡвлю . А҆́ще вселю́сѧ в̾ селе́нїе до́мꙋ мᲂегѡ̀ , лѝ взы́дꙋ на ѻ҆́дръ пᲂсте́ли мᲂеѧ̀ . А҆́ще да́мъ со́нъ ѻ҆чи́ма мᲂи́ма , и҆ вѣ́кᲂма мᲂи́ма дрема́нїе , и҆ пᲂко́й скранїѧ́мъ мᲂи́мъ . До́ндеже ѡ҆брѧ́щꙋ мѣ́сто гдⷭ҇ви , селе́нїе бг҃ꙋ і҆а́кѡвлю . Сѐ слы́шахᲂмъ ѧ҆̀ во є҆фра́ѳѣ , ѡ҆брѣто́хᲂмъ ѧ҆̀ въ по́лихъ дꙋбра́вы . Вни́демъ въ  селе́нїѧ є҆гѡ̀ , пᲂклᲂни́мсѧ на мѣ́стѣ и҆дѣ́же стᲂѧ́стѣ но́зѣ є҆гѡ̀ . Вᲂскрⷭ҇нѝ гдⷭ҇и в̾ пᲂко́й тво́й . ты̀ и҆ кїѡ́тъ ст҃ы́ни твᲂеѧ̀ . Сщ҃е́нницы твᲂѝ ѡ҆блекꙋ́тсѧ пра́вдᲂю , и҆ препᲂдо́бнїи твᲂѝ вᲂз̾ра́дꙋютсѧ . Дв҃да ра́ди раба̀ твᲂегѡ̀ , не ѿвратѝ лицѐ пᲂма́заннагѡ свᲂегѡ̀ . Клѧ́тсѧ гдⷭ҇ь дв҃дꙋ и҆́стинᲂю , и҆ не ѿве́ржетсѧ є҆ѧ̀ . ѿ плᲂда̀ чре́ва твᲂегѡ̀ , пᲂсаждꙋ̀ на престо́лѣ твᲂе́мъ . А҆́ще сᲂхранѧ́тъ сы́нᲂве твᲂѝ завѣ́тъ мо́й , и҆ свидѣ́нїѧ мᲂѧ̀ сїѧ̀ ꙗ҆́же наꙋчꙋ̀ и҆́хъ . и҆ сы́нᲂве и҆́хъ до́ вѣка сѧ́дꙋтъ на прⷭ҇то́лѣ твᲂе́мъ . Ꙗ҆́кѡ и҆збра̀ гдⷭ҇ь сїѡ́на , и҆ и҆зво́ли и҆̀ в̾ жили́ще себѣ̀ . Сѐ пᲂко́й мо́й в̾ вѣ́къ вѣ́ка , здѣ̀ вселю́сѧ ꙗ҆́кѡ и҆зво́лихъ и҆̀ . Лᲂви́твꙋ є҆гѡ̀ бл҃гᲂсло́вствꙋѧ бл҃гᲂслᲂвлю̀ , ни́щїѧ є҆гѡ̀ насы́щꙋ хлѣ́ба . Сщ҃е́нники є҆гѡ̀ ѡ҆блекꙋ̀ во спасе́нїе , и҆ прпⷣбнїи є҆гѡ̀ ра́дᲂстїю вᲂз̾ра́дꙋютсѧ . Тꙋ̀ вᲂз̾ращꙋ̀ ро́гъ дв҃дᲂви , ᲂу҆гᲂто́вахъ свѣти́льникъ пᲂма́заннᲂмꙋ мᲂемꙋ̀ . Врагѝ є҆гѡ̀ ѡ҆блекꙋ̀ стꙋдо́мъ , на не́мже прᲂцвѣте́тъ ст҃ы́нѧ мᲂѧ̀ .

ѱл҃о́мъ дв҃дᲂвъ , рл҃в .

Сѐ что̀ дᲂбро̀ , и҆лѝ что̀ красно̀ ; но є҆́же жи́ти бра́тїи вкꙋ́пѣ . Ꙗ҆́кѡ мѵ́ро на главꙋ̀ схᲂдѧ́щее на́  брадꙋ , бра́дꙋ а҆арѡ́ню . схᲂдѧ́щее на ѻ҆ме́ты ѻ҆де́жды є҆гѡ̀ . Ꙗ҆́кѡ рᲂса̀ а҆єрмѡ́нскаѧ схᲂдѧ́щаѧ на́  гᲂры сїѡ́нскїѧ . ꙗ҆́кѡ тꙋ̀ запᲂвѣ́да гдⷭ҇ь блгⷭ҇ве́нїе , и҆ живо́тъ до́ вѣка .

ѱл҃о́мъ дв҃дᲂвъ , рл҃г .

Сѐ ны́нѣ бл҃гᲂслᲂви́те гдⷭ҇а всѝ рабѝ гдⷭ҇ни , стᲂѧ́щїи в̾ хра́мѣ гдⷭ҇ни , во дво́рѣхъ до́мꙋ бг҃а на́шегѡ . Въ но́щехъ вᲂз̾дѣжи́те рꙋ́ки ва́ша во ст҃а́ѧ , и҆ бл҃гᲂслᲂви́те гдⷭ҇а . бл҃гᲂслᲂви́тъ тѧ гдⷭ҇ь ѿ сїѡ́на , сᲂтвᲂри́выи нб҃о и҆ зе́млю .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

<< Previous

Contents

Next >>