каѳи́сма , ѳ҃і . ѱл҃о́мъ дв҃дᲂвъ , рл҃д .

Хвали́те и҆́мѧ гдⷭ҇не ,= ꙳= хвали́те рабѝ гдⷭ҇а .= ꙳= Стᲂѧ́щїи в̾ хра́мѣ гдⷭ҇ни , во дво́рѣхъ до́мꙋ бг҃а на́шегѡ .= ꙳= Хвали́те гдⷭ҇а ꙗ҆́кѡ бл҃гъ гдⷭ҇ь , по́йте и҆́мени є҆гѡ̀ ꙗ҆́кѡ дᲂбро̀ . Ꙗ҆́кѡ і҆а́кѡва и҆збра̀ себѣ̀ гдⷭ҇ь , і҆и҃лѧ в̾ дᲂстᲂѧ́нїе себѣ̀ . Ꙗ҆́кѡ а҆́зъ пᲂзна́хъ ꙗ҆́кѡ ве́лїи гдⷭ҇ь , и҆ гдⷭ҇ь на́шъ надо всѣ́ми бᲂгѝ .= ꙳= Всѧ̀ є҆ли́ка вᲂсхᲂтѣ̀ гдⷭ҇ь сᲂтвᲂрѝ , на́  нб҃си и҆ на землѝ , в̾ мо́рихъ и҆ во  всѣ́хъ бе́зднахъ . Вᲂз̾вᲂдѧ̀ ѻ҆́блаки ѿ  пᲂслѣ́днихъ землѝ , мо́лнїю в̾ до́ждь сᲂтвᲂрѝ . и҆звᲂдѧ́и вѣ́тры ѿ  сᲂкро́вищъ свᲂи́хъ . И҆́же пᲂразѝ пе́рвенцы є҆гѵ́петскїѧ , ѿ  чл҃ка и҆ до скᲂта̀ . Пᲂсла̀ зна́менїѧ и҆ чꙋдеса̀ пᲂсредѣ̀ тебѐ є҆гѵ́пте , на фараѡ́на и҆ на всѧ̀ рабы̀ є҆гѡ̀ . И҆́же пᲂразѝ ꙗ҆зы́ки мно́ги , и҆ и҆збѝ царѧ̀ крѣ́пки . Сїѡ́на царѧ̀ а҆ммᲂре́йска , і҆ѡ́га царѧ̀ васа́ньска , и҆ всѧ̀ црⷭ҇твїѧ ханаа́ньска . И҆ дадѐ зе́млю и҆́хъ дᲂстᲂѧ́нїе , дᲂстᲂѧ́нїе і҆зра́илю лю́демъ свᲂи́мъ . Гдⷭ҇и и҆́мѧ твᲂѐ в̾ вѣ́къ , и҆ па́мѧть твᲂѧ̀ в̾ ро́дъ и҆ ро́дъ .= ꙳= Ꙗ҆́кѡ сꙋ́дитъ гдⷭ҇ь лю́демъ свᲂи́мъ , и҆ ѡ҆ рабѣ́хъ свᲂи́хъ ᲂу҆мо́литсѧ . И҆́дѡли ꙗ҆зы́къ сребро̀ и҆ ѕла́то , дѣ́ла рꙋ́къ челᲂвѣ́ческъ . Оу҆ста̀ и҆́мꙋтъ , и҆ не гл҃ютъ , ѻ҆́чи и҆́мꙋтъ , и҆ не ви́дѧтъ . Оу҆́ши и҆́мꙋтъ , и҆ неслы́шатъ , нибо̀ є҆́сть дх҃а во ᲂу҆стѣ́хъ и҆́хъ . Пᲂдо́бни и҆́мъ да бꙋ́дꙋтъ твᲂрѧ́щїи ѧ҆̀ , и҆ всѝ надѣ́ющїисѧ на нѧ̀ . До́ме і҆зра́илевъ бл҃гᲂслᲂви́те гдⷭ҇а .= ꙳= до́ме а҆арѡ́нь бл҃гᲂслᲂви́те гдⷭ҇а . До́ме леві́инъ блгⷭ҇ви́те гдⷭ҇а . бᲂѧ́щїисѧ гдⷭ҇а , бл҃гᲂслᲂви́те гдⷭ҇а . Бл҃гᲂслᲂве́нъ гдⷭ҇ь ѿ  сїѡ́на , живы́и во і҆єрᲂсали́мѣ .= ꙳=

ѱл҃о́мъ дв҃дᲂвъ , рл҃є .

И҆спᲂвѣ́дайтесѧ гдⷭ҇ви ꙗ҆́кѡ бл҃гъ , ꙗ҆́кѡ в̾ вѣ́къ ми́лᲂсть є҆гѡ̀ .= ꙳= И҆спᲂвѣ́дайтесѧ бг҃ꙋ бᲂгѡ́мъ , ꙗ҆́кѡ в̾ вѣ́къ ми́лᲂсть є҆гѡ̀ . И҆спᲂвѣ́дайтесѧ гдⷭ҇ви гᲂспᲂде́мъ , ꙗ҆́кѡ в̾ вѣ́къ ми́лᲂсть є҆гѡ̀ . Сᲂтво́ршемꙋ чꙋдеса̀ ве́лїѧ є҆ди́нᲂмꙋ , ꙗ҆́кѡ в̾ вѣ́къ ми́лᲂсть є҆гѡ̀ . Сᲂтво́ршемꙋ нб҃са̀ ра́зꙋмᲂмъ , ꙗ҆́кѡ в̾ вѣ́къ ми́лᲂсть є҆гѡ̀ . Оу҆тверди́вшемꙋ зе́млю на вᲂда́хъ , ꙗ҆́кѡ в̾ вѣ́къ ми́лᲂсть є҆гѡ̀ .= ꙳= Сᲂтво́ршемꙋ свѣти́ла ве́лїѧ є҆ди́нᲂмꙋ , ꙗ҆́кѡ в̾ вѣ́къ млⷭ҇ть є҆гѡ̀ . Сл҃нце во ѻ҆́бласть днѝ , ꙗ҆́кѡ в̾ вѣ́къ ми́лᲂсть є҆гѡ̀ . Лꙋнꙋ̀ и҆ ѕвѣ́зды во ѻ҆́бласть но́щи , ꙗ҆́кѡ в̾ вѣ́къ млⷭ҇ть є҆гѡ̀ . Пᲂра́жьшемꙋ є҆гѵ́пта с̾ пе́рвенцы є҆гѡ̀ , ꙗ҆́кѡ в̾ вѣ́къ млⷭ҇ть є҆гѡ̀ . И҆ и҆з̾ве́дшемꙋ і҆и҃лѧ ѿ  среды̀ и҆́хъ , ꙗ҆́кѡ в̾ вѣ́къ ми́лᲂсть є҆гѡ̀ . Рꙋко́ю крѣ́пкᲂю и҆ мы́шцею высо́кᲂю , ꙗ҆́кѡ в̾ вѣ́къ ми́лᲂсть є҆гѡ̀ .= ꙳= Раз̾дѣ́льшемꙋ чермно́е мо́ре в̾  раздѣле́нїѧ , ꙗ҆́кѡ в̾ вѣ́къ ми́лᲂсть є҆гѡ̀ . И҆ прᲂве́дшемꙋ і҆и҃лѧ пᲂсредѣ̀ є҆гѡ̀ , ꙗ҆́кѡ в̾ вѣ́къ млⷭ҇ть є҆гѡ̀ . И҆стрѧ́сшемꙋ фараѡ́на и҆ си́лꙋ є҆гѡ̀ в̾ мо́ре чермно́е , ꙗ҆́кѡ в̾ вѣ́къ ми́лᲂсть є҆гѡ̀ . Прᲂве́дшемꙋ лю́ди свᲂѧ̀ в̾ пꙋсты́ни , ꙗ҆́кѡ в̾ вѣ́къ млⷭ҇ть є҆гѡ̀ . Пᲂрази́вшемꙋ царѧ̀ ве́лїѧ , ꙗ҆́кѡ в̾ вѣ́къ млⷭ҇ть є҆гѡ̀ . И҆ ᲂу҆би́вшемꙋ царѧ̀ крѣ́пкїѧ , ꙗ҆́кѡ в̾ вѣ́къ ми́лᲂсть є҆гѡ̀ . Сїѡ́на царѧ̀ а҆ммᲂре́йска , ꙗ҆́кѡ в̾ вѣ́къ млⷭ҇ть є҆гѡ̀ . И҆ѡ́га царѧ̀ васа́ньска , ꙗ҆́кѡ в̾ вѣ́къ ми́лᲂсть є҆гѡ̀ . И҆ да́вшемꙋ зе́млю и҆́хъ дᲂстᲂѧ́нїе , ꙗ҆́кѡ в̾ вѣ́къ млⷭ҇ть є҆гѡ̀ . Дᲂстᲂѧ́нїе і҆зра́илю рабꙋ̀ свᲂемꙋ̀ , ꙗ҆́кѡ в̾ вѣ́къ млⷭ҇ть є҆гѡ̀ .= ꙳= Ꙗ҆́кѡ во смире́нїи на́шемъ пᲂмѧнꙋ̀ ны̀ гдⷭ҇ь , ꙗ҆́кѡ в̾ вѣ́къ млⷭ҇ть є҆гѡ̀ . И҆ и҆зба́вилъ  ны є҆́сть ѿ  вра́гъ на́шихъ , ꙗ҆́кѡ в̾ вѣ́къ млⷭ҇ть є҆гѡ̀ .= ꙳= Даѧ́и пи́щꙋ всѧ́кᲂй пло́ти , ꙗ҆́кѡ в̾ вѣ́къ млⷭ҇ть є҆гѡ̀ . И҆спᲂвѣ́дайтесѧ бг҃ꙋ нбⷭ҇нᲂмꙋ , ꙗ҆́кѡ в̾ вѣ́къ ми́лᲂсть є҆гѡ̀ .= ꙳=

ѱл҃о́мъ дв҃дᲂвъ , рл҃ѕ .

На рѣцѣ̀ вавилѡ́нстѣй , та́мѡ сѣдо́хᲂмъ и҆ пла́кахᲂмъ , внегда̀ пᲂмѧнꙋ́ти на́мъ сїѡ́на . На ве́рбїи пᲂсредѣ̀ є҆ѧ̀ ѡ҆бѣ́сихᲂмъ ѻ҆рга́ны на́ша . Ꙗ҆́кѡ тꙋ̀ вᲂпрᲂси́ша на́съ плѣ́ньшїи на́съ , слᲂве́съ пѣ́сней , и҆ ве́дшїи на́съ , ѿ  пѣ́нїѧ . вᲂспо́йте на́мъ ѿ пѣ́сней сїѡ́нскихъ . ка́кѡ вᲂспᲂе́мъ пѣ́снь гдⷭ҇ню на землѝ чꙋжде́й ; А҆́ще забꙋ́дꙋ тебѐ і҆єрⷭ҇ли́мъ , забве́на бꙋ́ди десни́ца мᲂѧ̀ . Прильпнѝ ꙗ҆зы́къ мо́й гᲂрта́ни мᲂемꙋ̀ , а҆́ще не пᲂмѧнꙋ̀ тебѐ . а҆́ще не предлᲂжꙋ̀ і҆єрⷭ҇ли́ма , ꙗ҆́кѡ в̾ нача́ло весе́лїѧ мᲂегѡ̀ . Пᲂмѧнѝ гдⷭ҇и сы́ны є҆дѡ́мскїѧ , в̾ де́нь і҆єрⷭ҇ли́мль гл҃ющїѧ , и҆стᲂща́йте и҆стᲂща́йте до ѡ҆снᲂва́нїи є҆гѡ̀ . Дщѝ вавилѡ́нѧ ѡ҆каѧ́ннаѧ , бл҃же́нъ и҆́же вᲂз̾да́стъ тебѣ̀ вᲂз̾даѧ́нїе твᲂѐ , є҆́же вᲂз̾да́стъ на́мъ . Бл҃же́нъ и҆́же и҆́метъ , и҆ разбїе́тъ младе́нцы твᲂѧ̀ ѡ҆ ка́мень .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

ѱл҃о́мъ дв҃дᲂвъ , рл҃з .

И҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ , и҆ пред̾ а҆́нг҃лы вᲂспᲂю̀ тебѣ̀ . ꙗ҆́кѡ ᲂу҆слы́ша всѧ̀ гл҃ы ᲂу҆́стъ мᲂи́хъ . Пᲂклᲂню́сѧ к̾ цр҃кви ст҃ѣ́й твᲂе́й , и҆ и҆спᲂвѣ́мсѧ и҆́мени твᲂемꙋ̀ , ѡ҆  млⷭ҇ти твᲂе́й и҆ и҆́стинѣ твᲂе́й . ꙗ҆́кѡ вᲂз̾вели́чилъ є҆сѝ ѡ҆ все́мъ и҆́мѧ твᲂѐ ст҃о́е . Во́ньже де́нь а҆́ще призᲂвꙋ́ тѧ , ско́рѡ ᲂу҆слы́ши мѧ . ᲂу҆мно́жиши мѧ въ дꙋшѝ мᲂе́й си́лᲂю твᲂе́ю . Да и҆спᲂвѣ́дѧтсѧ тебѣ̀ гдⷭ҇и всѝ ца́рїе зе́мстїи , ꙗ҆́кѡ ᲂу҆слы́шаша всѧ̀ гл҃ы ᲂу҆́стъ твᲂи́хъ . И҆ вᲂспᲂю́тъ в̾ пѣ́снехъ гдⷭ҇нихъ , ꙗ҆́кѡ ве́лїѧ сла́ва гдⷭ҇нѧ . Ꙗ҆́кѡ высо́къ гдⷭ҇ь , и҆ смире́нныѧ призира́етъ , и҆ высо́каѧ и҆з̾дале́ча свѣ́сть . А҆́ще пᲂйдꙋ̀ пᲂсредѣ̀ ско́рби живи́ши мѧ̀ . на гнѣ́въ вра́гъ мᲂи́хъ прᲂсте́рлъ є҆сѝ рꙋ́кꙋ свᲂю̀ , и҆ спасе́ мѧ десни́ца твᲂѧ̀ . Гдⷭ҇ь вᲂз̾да́стъ за мѧ̀ , гдⷭ҇и млⷭ҇ть твᲂѧ̀ во́ вѣки , дѣ́ла рꙋ́къ твᲂи́хъ не пре́зри .

ѱл҃о́мъ дв҃дᲂвъ , рл҃и .

Гдⷭ҇и и҆скꙋси́лъ мѧ є҆сѝ , и҆ пᲂзна́лъ мѧ є҆сѝ . ты̀ пᲂзна̀ сѣда́нїе мᲂѐ , и҆ вᲂста́нїе мᲂѐ . Ты̀ разꙋмѣ̀ пᲂмышле́нїѧ мᲂѧ̀ и҆з̾дале́че . Стезю̀ мᲂю̀ и҆ пᲂтлаче́ннꙋю мᲂю̀ , ты̀ є҆сѝ и҆з̾слѣ́дᲂвалъ . и҆ всѧ̀ пꙋтѝ мᲂѧ̀ прᲂви́дѣ . Ꙗ҆́кѡ нѣ́сть льстѝ в̾ ꙗ҆зы́цѣ мᲂе́мъ . сѐ гдⷭ҇и , ты̀ разꙋмѣ̀ всѧ̀ пᲂслѣ́днѧѧ и҆ дре́внѧѧ . Ты̀ сᲂзда́ мѧ и҆ пᲂлᲂжѝ на мнѣ̀ рꙋ́кꙋ твᲂю̀ . Оу҆диви́сѧ ра́зꙋмъ тво́й ѿ менѐ , ᲂу҆тверди́сѧ не вᲂз̾мᲂгꙋ̀ къ немꙋ̀ . Ка́мѡ пᲂйдꙋ̀ ѿ́ дх҃а твᲂегѡ̀ ; и҆ ѿ лица̀ твᲂегѡ̀ ка́мѡ бѣжꙋ̀ ; А҆́ще взы́дꙋ на́  нб҃о , ты̀ та́мѡ є҆сѝ . а҆́ще сни́дꙋ во  а҆́дъ , та́мѡ є҆сѝ . А҆́ще вᲂзмꙋ̀ крилѣ̀ мᲂѝ ра́нѡ , и҆ вселю́сѧ в̾ пᲂслѣ́днихъ мо́рѧ . И҆ та́мѡ бо рꙋка̀ твᲂѧ̀ наста́витъ мѧ , и҆ ᲂу҆держи́тъ мѧ десни́ца твᲂѧ̀ . И҆ рѣ́хъ , є҆да̀ тма̀ пᲂпере́тъ мѧ , и҆ но́щь прᲂсвѣще́нїе въ пи́щи мᲂе́й . Ꙗ҆́кѡ тма̀ не пᲂмрачи́тсѧ ѿ тебѐ , и҆ но́щь ꙗ҆́кѡ де́нь прᲂсвѣти́тсѧ . ꙗ҆́кѡ тма̀ є҆ѧ̀ , та́кѡ и҆ свѣ́тъ є҆ѧ̀ . Ꙗ҆́кѡ ты̀ сᲂзда̀ ᲂу҆тро́бы мᲂѧ̀ , вᲂспрїѧ́тъ мѧ и҆́з̾ чрева ма́тере мᲂеѧ̀ . И҆спᲂвѣ́мсѧ тѝ , ꙗ҆́кѡ стра́шнѡ ᲂу҆диви́лсѧ є҆сѝ . чꙋ́дна дѣ́ла твᲂѧ̀ , и҆ дш҃а мᲂѧ̀ зна́етъ ѕѣлѡ̀ . Не ᲂу҆таи́сѧ ко́сть мᲂѧ̀ ѿ тебѐ , ю҆́же сᲂтвᲂри́лъ є҆сѝ в̾ та́йнѣ , и҆ сᲂста́въ мо́й в̾ преи҆спо́днихъ землѝ . Не сᲂдѣ́ланнᲂе мᲂѐ ви́дѣстѣ ѻ҆́чи твᲂѝ , и҆ в̾ кни́зѣ твᲂе́й всѝ напи́шꙋтсѧ . во́ дне сᲂзи́ждꙋтсѧ , и҆ ничто́же в̾  ни́хъ . Мнѣ́ же ѕѣлѡ̀ че́стни бы́ша дрꙋ́зи твᲂѝ бж҃е , ѕѣлѡ̀ ᲂу҆тверди́шасѧ влады́чествїѧ и҆́хъ . И҆зᲂчтꙋ̀ и҆́хъ и҆ па́че песка̀ ᲂу҆мно́жатсѧ . вᲂста́хъ , и҆ є҆щѐ є҆́смь с̾ тᲂбо́ю . А҆́ще и҆збїе́ши грѣ́шники бж҃е , мꙋ́жїе крᲂві́й ᲂу҆клᲂни́тесѧ ѿ менѐ . Ꙗ҆́кѡ ревни́ви є҆стѐ в̾ пᲂмышле́нїихъ , прїи́мꙋтъ в̾ сꙋетꙋ̀ гра́ды твᲂѧ̀ . Не ненави́дѧщїѧ ли тѧ̀ гдⷭ҇и вᲂз̾ненави́дѣхъ , и҆ ѡ҆ вразѣ́хъ твᲂи́хъ и҆ста́ѧхъ . Сᲂверше́ннᲂю не́навистїю вᲂз̾ненави́дѣхъ и҆́хъ , во врагѝ бы́ша мѝ . И҆скꙋси́ мѧ бж҃е и҆ ᲂу҆вѣ́ждь срⷣце мᲂѐ , и҆стѧжи́ мѧ и҆ разꙋмѣ́й пꙋтѝ мᲂѧ̀ . И҆ ви́ждь а҆́ще пꙋ́ть без̾зако́нїѧ во мнѣ̀ , и҆ наста́ви мѧ на пꙋ́ть вѣ́ченъ .

ѱл҃о́мъ дв҃дᲂвъ , рл҃ѳ .

И҆зми́  мѧ гдⷭ҇и ѿ челᲂвѣ́ка лꙋка́ва , ѿ́ мꙋжа не пра́ведна и҆зба́ви мѧ . И҆́же пᲂмы́слиша не пра́вдꙋ в̾ срⷣцы , ве́сь де́нь ѡ҆пᲂлча́хꙋ бра́ни . И҆з̾ѡ҆стри́ша ꙗ҆зы́къ сво́й ꙗ҆́кѡ ѕмі́инъ , ꙗ҆́дъ а҆́спидинъ пᲂд̾ ᲂу҆стна́ми и҆́хъ . Сᲂхрани́ мѧ гдⷭ҇и и҆з̾ рꙋкѝ грѣ́шничи , ѿ челᲂвѣ́къ не пра́веденъ и҆зми́ мѧ . И҆́же пᲂмы́слиша запѧ́ти стᲂпы̀ мᲂѧ̀ . скры́ша го́рдїи сѣ́ть мнѣ̀ . И҆ ᲂу҆́жи препѧ́ша сѣ́ть нᲂга́мъ мᲂи́мъ , при стезѝ сᲂбла́зны пᲂлᲂжи́ша ми . Рѣ́хъ гдⷭ҇ви , бг҃ъ мо́й є҆сѝ ты̀ , внꙋшѝ гдⷭ҇и гла́съ мᲂле́нїѧ мᲂегѡ̀ . Гдⷭ҇и гдⷭ҇и си́ла спасе́нїѧ мᲂегѡ̀ , ѡ҆сѣни́лъ є҆сѝ над̾ главо́ю мᲂе́ю в̾  де́нь бра́ни . Не преда́ждь менѐ гдⷭ҇и ѿ жела́нїѧ мᲂегѡ̀ грѣ́шникꙋ . пᲂмы́слиша на мѧ̀ , не ѡ҆ста́ви менѐ , да некᲂгда̀ вᲂз̾несꙋ́тсѧ . Глава̀ ѡ҆крꙋже́нїѧ и҆́хъ , трꙋ́дъ ᲂу҆сте́нъ и҆́хъ , пᲂкры́етъ и҆́хъ . Падꙋ́тъ на ни́хъ ᲂу҆́глїѧ ѻ҆́гненаѧ . низ̾лᲂжи́ши и҆́хъ в̾  страсте́хъ и҆ непᲂстᲂѧ́тъ . Мꙋ́жь ꙗ҆зы́ченъ не и҆спра́витсѧ на землѝ . мꙋ́жа не  пра́ведна ѕло̀ ᲂу҆лᲂви́тъ во и҆стлѣ́нїе . Пᲂзна́хъ ꙗ҆́кѡ сᲂтвᲂри́тъ гдⷭ҇ь сꙋ́дъ ни́щимъ , и҆ ме́сть ᲂу҆бо́гимъ . Ѻ҆ба́че пра́веднїи и҆спᲂвѣ́дѧтсѧ и҆́мени твᲂемꙋ̀ , и҆ вселѧ́тсѧ пра́вїи с̾  лице́мъ твᲂи́мъ .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

ѱл҃о́мъ дв҃дᲂвъ , р҃м .

Гдⷭ҇и вᲂз̾ва́хъ к̾ тебѣ̀ , ᲂу҆слы́ши мѧ . вᲂньмѝ гла́съ мᲂли́твы мᲂеѧ̀ , є҆гда̀ вᲂз̾зᲂвꙋ̀ к̾ тебѣ̀ . Да́сѧ и҆спра́витъ мᲂли́тва мᲂѧ̀ , ꙗ҆́кѡ кади́ло пред̾ тᲂбо́ю . вᲂз̾дѣѧ́нїе рꙋ́кꙋ мᲂе́ю , же́ртва вече́рнѧѧ . Пᲂлᲂжѝ гдⷭ҇и хране́нїе ᲂу҆стѡ́мъ мᲂи́мъ , и҆ две́рь ѡ҆гражде́нїѧ ѡ҆ ᲂу҆стна́хъ мᲂи́хъ . Не ᲂу҆клᲂнѝ срⷣце мᲂѐ въ слᲂвеса̀ лꙋка́вствїѧ , непщева́ти вины̀ ѡ҆ грѣсѣ́хъ . Съ чл҃ки твᲂрѧ́щими без̾зако́нїе , и҆ не счета́юсѧ со и҆з̾бра́нными и҆́хъ . Пᲂка́жетъ мѧ пра́ведникъ млⷭ҇тїю , и҆ ѡ҆бличи́тъ мѧ . є҆ле́и же грѣ́шнагѡ , да не нама́ститъ главы̀ мᲂеѧ̀ . Ꙗ҆́кѡ є҆щѐ и҆ мл҃тва мᲂѧ̀ во бл҃гᲂвᲂле́нїихъ и҆́хъ . пᲂже́рты бы́ша при ка́мени сꙋдїѧ̀ и҆́хъ . Оу҆слы́шатсѧ глаго́ли мᲂѝ , ꙗ҆́кѡ вᲂз̾мᲂго́ша . ꙗ҆́кѡ то́лща землѝ прᲂсѣ́десѧ на  землѝ . раз̾сы́пашасѧ ко́сти и҆́хъ при  а҆́дѣ . Ꙗ҆́кѡ к̾ тебѣ̀ гдⷭ҇и гдⷭ҇и ѻ҆́чи мᲂѝ , на тѧ̀ ᲂу҆пᲂва́хъ не ѿи҆мѝ дш҃ꙋ мᲂю̀ . Сᲂхрани́ мѧ ѿ  сѣ́ти ю҆́же сᲂста́виша ми , и҆ ѿ  сᲂбла́знъ дѣ́лающихъ без̾зако́нїе . Впадꙋ́тсѧ во мре́жꙋ свᲂю̀ грѣ́шницы . є҆ди́нъ є҆́смь а҆́зъ , до́ндеже прейдꙋ̀ .

ѱл҃о́мъ дв҃дᲂвъ , рм҃а .

Гла́сᲂмъ мᲂи́мъ ко́ гдⷭ҇ꙋ вᲂз̾ва́хъ , гла́сᲂмъ мᲂи́мъ ко́ гдⷭ҇ꙋ пᲂмᲂлю́сѧ . Прᲂлїю̀ пред̾ ни́мъ мᲂли́твꙋ мᲂю̀ , и҆ печа́ль мᲂю̀ пред̾ ни́мъ вᲂз̾вѣщꙋ̀ . Внегда̀ и҆счеза́етъ дх҃ъ мо́й , и҆ ты̀ пᲂзна̀ стезѧ̀ мᲂѧ̀ . На пꙋтѝ се́мъ , по немꙋ́же хᲂжда́хъ , с̾кры́ша сѣ́ть мнѣ̀ . Смᲂтрѧ́хъ ѡ҆деснꙋ́ю , и҆ вᲂз̾глѧ́дахъ , и҆ не бѣ̀ зна́ѧи менѐ . Пᲂги́бе бѣ́гство ѿ  менѐ , и҆ нѣ́сть взыска́ѧи дш҃ꙋ мᲂю̀ . Вᲂз̾ва́хъ к̾ тебѣ̀ гдⷭ҇и . рѣ́хъ , ты̀ є҆сѝ ᲂу҆пᲂва́нїе мᲂѐ , ча́сть мᲂѧ̀ є҆сѝ на землѝ живы́хъ . Вᲂньмѝ мл҃твꙋ мᲂю̀ , ꙗ҆́кѡ смири́хсѧ ѕѣлѡ̀ . И҆зба́ви мѧ ѿ  гᲂнѧ́щихъ мѧ̀ , ꙗ҆́кѡ ᲂу҆крѣпи́шасѧ па́че менѐ . И҆зведѝ и҆з̾ темни́цы дш҃ꙋ мᲂю̀ , и҆спᲂвѣ́датисѧ и҆́мени твᲂемꙋ̀ . Менѐ ждꙋ́тъ пра́ведницы , до́ндеже вᲂз̾да́си мнѣ̀ .

ѱл҃о́мъ дв҃дᲂвъ , рм҃в .

Гдⷭ҇и ᲂу҆слы́ши мᲂли́твꙋ мᲂю̀ , внꙋшѝ мᲂле́нїе мᲂѐ во и҆́стинѣ твᲂе́й , ᲂу҆слы́ши мѧ в̾ пра́вдѣ твᲂе́й . И҆ не  вни́ди в̾ сꙋ́дъ с̾ рабѡ́мъ твᲂи́мъ , ꙗ҆́кѡ не ѡ҆правди́тсѧ пред̾ тᲂбо́ю всѧ́къ живы́и . Ꙗ҆́кѡ пᲂгна̀ вра́гъ дш҃ꙋ мᲂю̀ , смири́лъ є҆́сть в̾ землѝ живо́тъ мо́й . Пᲂсади́лъ мѧ є҆́сть в̾  те́мныхъ ꙗ҆́кѡ ме́ртвыѧ вѣ́кꙋ , и҆ ᲂу҆ны̀ во мнѣ̀ дх҃ъ мо́й . во мнѣ̀ смꙋти́сѧ срⷣце мᲂѐ . Пᲂмѧнꙋ́хъ днѝ дре́внїѧ . пᲂꙋчи́хсѧ во всѣ́хъ дѣ́лѣхъ твᲂи́хъ , и҆ въ дѣ́лѣхъ рꙋ́кꙋ твᲂе́ю пᲂꙋча́хсѧ . Вᲂз̾дѣ́хъ к̾ тебѣ̀ рꙋ́цѣ мᲂѝ , дш҃а мᲂѧ̀ ꙗ҆́кѡ землѧ̀ без̾во́днаѧ тебѣ̀ . Ско́рѡ ᲂу҆слы́ши мѧ гдⷭ҇и , и҆счезѐ дх҃ъ мо́й . Не ѿвратѝ лица̀ твᲂегѡ̀ ѿ менѐ , и҆ ᲂу҆пᲂдо́блюсѧ низ̾хᲂдѧ́щимъ в̾ ро́въ . Слы́шанꙋ сᲂтвᲂрѝ мнѣ̀ заꙋ́тра млⷭ҇ть твᲂю̀ , ꙗ҆́кѡ на тѧ̀ ᲂу҆пᲂва́хъ . Скажѝ мнѣ̀ гдⷭ҇и пꙋ́ть во́ньже пᲂйдꙋ̀ , ꙗ҆́кѡ к̾ тебѣ̀ взѧ́хъ дш҃ꙋ мᲂю̀ . И҆зми́ мѧ ѿ вра́гъ мᲂи́хъ , гдⷭ҇и к̾ тебѣ̀ прибѣго́хъ . Наꙋчи́ мѧ твᲂри́ти во́лю твᲂю̀ , ꙗ҆́кѡ ты̀ є҆сѝ бг҃ъ мо́й . Дх҃ъ тво́й бл҃гі́и наста́витъ мѧ̀ на́  землю пра́вꙋ . И҆́мене твᲂегѡ̀ ра́ди гдⷭ҇и , живи́ши мѧ , пра́вдᲂю твᲂе́ю и҆зведе́ши ѿ печа́ли дш҃ꙋ мᲂю̀ . И҆ ми́лᲂстїю твᲂе́ю пᲂтреби́ши врагѝ мᲂѧ̀ , и҆ пᲂгꙋби́ши всѧ̀ стꙋжа́ющїѧ дш҃и мᲂе́й , ꙗ҆́кѡ а҆́зъ ра́бъ тво́й є҆́смь .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .