каѳи́сма , в҃ . ѱл҃о́мъ дв҃дᲂвъ , ѳ҃ .

И҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ , пᲂвѣ́мъ всѧ̀ чꙋдеса̀ твᲂѧ̀ . Вᲂз̾ра́дꙋюсѧ и҆ вᲂз̾веселю́сѧ ѡ҆ тебѣ̀ , пᲂю̀ и҆́мени твᲂемꙋ̀ вы́шнїи . Внегда̀ вᲂз̾врати́тисѧ врагꙋ̀ мᲂемꙋ̀ в̾спѧ́ть , и҆знемо́гꙋтъ и҆ пᲂги́бнꙋтъ ѿ лица̀ твᲂегѡ̀ . Ꙗ҆́кѡ сᲂтвᲂри́лъ є҆сѝ сꙋ́дъ мо́й , и҆ прю̀ мᲂю̀ . Сѣ́лъ є҆сѝ на престо́лѣ сꙋдѧ́и пра́вдꙋ , запрети́лъ є҆сѝ ꙗ҆зы́кѡмъ , и҆ пᲂги́бе нечести́выи , и҆́мѧ є҆гѡ̀ пᲂтреби́лъ є҆сѝ въ вѣ́къ , и҆ въ вѣ́къ вѣ́ка . Врагꙋ̀ ѡ҆скꙋдѣ́ша ѻ҆рꙋ́жїѧ в̾ кᲂне́цъ , и҆ гра́ды разрꙋши́лъ є҆сѝ . Пᲂги́бе па́мѧть є҆гѡ̀ с̾ шꙋ́мᲂмъ , и҆ гдⷭ҇ь пребыва́етъ во́ вѣки . Оу҆гᲂто́ва на сꙋ́дъ престо́лъ сво́й , и҆ то́й сꙋ́дитъ вселе́ннѣй въ пра́вдꙋ . Сꙋ́дитъ лю́демъ в̾ пра́вдꙋ . И҆ бы́сть гдⷭ҇ь прибѣ́жище ᲂу҆бо́гᲂмꙋ , пᲂмо́щникъ во́ бл҃го вре́мѧ в̾ печа́лѣхъ . И҆ да ᲂу҆пᲂва́ютъ на тѧ̀ зна́ющїи и҆́мѧ твᲂѐ , ꙗ҆́кѡ не ѡ҆ста́вилъ є҆сѝ взыска́ющихъ тѧ̀ гдⷭ҇и . По́йте гдⷭ҇ви живꙋ́щемꙋ въ сїѡ́нѣ , вᲂз̾вѣсти́те во ꙗ҆зы́цѣхъ начина́нїѧ є҆гѡ̀ . Ꙗ҆́кѡ взыска́ѧи кро́ви и҆́хъ пᲂмѧнꙋ̀ , не забы̀ зва́нїѧ ᲂу҆бо́гихъ . Пᲂми́лꙋй мѧ гдⷭ҇и , ви́ждь смире́нїе мᲂѐ ѿ вра́гъ мᲂи́хъ . Вᲂзнᲂсѧ́и мѧ ѿ вра́тъ сме́ртныхъ , ꙗ҆́кѡ да вᲂз̾вѣщꙋ̀ всѧ̀ хвалы̀ твᲂѧ̀ , во вратѣ́хъ дще́ри сїѡ́нѧ . Вᲂз̾ра́дꙋемсѧ ѡ҆ спасе́нїи твᲂе́мъ , ᲂу҆глѣбо́ша ꙗ҆зы́цы в̾ па́гꙋбѣ , ю҆́же сᲂтвᲂри́ша . Въ сѣ́ти се́й ю҆́же с̾кры́ша , ᲂу҆вѧ́зе нᲂга̀ и҆́хъ . Зна́емъ є҆́сть гдⷭ҇ь сꙋдьбы̀ твᲂрѧ̀ , въ дѣ́лѣхъ рꙋ́кꙋ свᲂе́ю ᲂу҆вѧ́зе грѣ́шникъ . Да вᲂз̾вратѧ́тсѧ грѣ́шницы во а҆́дъ , всѝ ꙗ҆зы́цы забыва́ющїи бг҃а . Ꙗ҆́кѡ не до кᲂнца̀ забве́нъ бꙋ́детъ ни́щїи , терпѣ́нїе ᲂу҆бо́гихъ не пᲂги́бнетъ до кᲂнца̀ . Вᲂскрⷭ҇нѝ гдⷭ҇и , да не крѣпи́тсѧ чл҃къ . да сꙋ́дѧтсѧ ꙗ҆зы́цы пред̾ тᲂбо́ю . Пᲂста́ви гдⷭ҇и закᲂнᲂда́вца над̾ ни́ми , да разꙋмѣ́ютъ ꙗ҆зы́цы , ꙗ҆́кѡ чл҃цы сꙋ́ть . Въскꙋ́ю гдⷭ҇и ѿстᲂѧ̀ дале́че ; пре́зриши во́ благо вре́мѧ въ печа́лѣхъ . Въ го́рдᲂсти нечести́вагѡ вᲂз̾гара́етсѧ ни́щїи , ᲂу҆вѧза́ютъ в̾  сᲂвѣ́тѣхъ , ꙗ҆́же пᲂмышлѧ́ютъ . Ꙗ҆́кѡ хвали́мь є҆́сть грѣ́шныи в̾ по́хᲂтѣхъ дш҃и свᲂеѧ̀ , и҆ ѡ҆би́дѧи бл҃гᲂслᲂви́мъ . Раз̾дражѝ гдⷭ҇а грѣ́шныи , по мно́жествꙋ гнѣ́ва свᲂегѡ̀ не взы́щетъ . Нѣ́сть бг҃а пред̾ ни́мъ , ѡ҆сквернѧ́ютсѧ пꙋтїѐ є҆гѡ̀ на всѧ́ко вре́мѧ . Ѿе́млютсѧ сꙋдьбы̀ твᲂѧ̀ ѿ лица̀ є҆гѡ̀ . всѣ́мъ врагѡ́мъ свᲂи́мъ ѡ҆дᲂлѣ́етъ . Рече́ бо въ се́рдцы свᲂе́мъ , не пᲂдви́жꙋсѧ ѿ́ рᲂда в̾ ро́дъ без̾ ѕла̀ . Є҆мꙋ́же клѧ́твы ᲂу҆ста̀ є҆гѡ̀ по́лна сꙋ́ть , и҆ го́рести и҆ льстѝ , пᲂд̾ ꙗ҆зы́кѡмъ є҆гѡ̀ трꙋ́дъ и҆ бᲂлѣ́знь . Присѣди́тъ въ ла́ѧтелехъ съ бᲂга́тыми , в̾  та́йныхъ ᲂу҆би́ти непᲂви́ннаго . Ѻ҆́чи є҆гѡ̀ , на ни́щагѡ призира́етѣ , лᲂви́тъ в̾ та́йныхъ , ꙗ҆́кѡ ле́въ во ѡ҆гра́дѣ свᲂе́й . Лᲂви́тъ вᲂсхи́тити ᲂу҆бо́гагѡ , вᲂсхи́тити ни́щагѡ внегда̀ привлещѝ и҆̀ . Въ сѣ́ти свᲂе́й смири́тъ и҆̀ , преклᲂни́тсѧ и҆ паде́тъ , є҆гда̀ ᲂу҆дᲂлѣ́етъ ᲂу҆бо́гимъ . Рече́ бо в̾  срⷣцы свᲂе́мъ , забы̀ бг҃ъ , ѿвратѝ лицѐ свᲂѐ , да не ви́дитъ до кᲂнца̀ . Вᲂскрⷭ҇нѝ гдⷭ҇и бж҃е мо́й , да  вᲂз̾несе́тсѧ рꙋка̀ твᲂѧ̀ , не забꙋ́ди ни́щихъ свᲂи́хъ до кᲂнца̀ . Чесѡ̀ ра́ди прᲂгнѣ́ва нечести́выи бг҃а ; рече́  бо в̾ срⷣцы свᲂе́мъ , не взы́щетъ . Ви́диши , ꙗ҆́кѡ ты̀ бᲂлѣ́знь и҆ ꙗ҆́рᲂсть смᲂтрѧ́еши , да пре́данъ бꙋ́детъ въ  рꙋ́цѣ твᲂѝ . Тебѣ̀ ѡ҆ста́вленъ є҆́сть ни́щїи , си́рꙋ ты̀ бꙋ́ди пᲂмо́щникъ . Сᲂкрꙋшѝ мы́шцꙋ грѣ́шнᲂмꙋ и҆ лꙋка́вᲂмꙋ . взы́щетсѧ грѣ́хъ є҆гѡ̀ , и҆ не ѡ҆брѧ́щетсѧ . Гдⷭ҇ь цр҃ь во́ вѣки , и҆ в̾ вѣ́къ вѣ́ка . пᲂги́бнете ꙗ҆зы́цы ѿ землѝ є҆гѡ̀ . Жела́нїе ᲂу҆бо́гихъ ᲂу҆слы́шалъ є҆сѝ гдⷭ҇и , ᲂу҆гᲂто́ванїе срⷣца и҆́хъ внѧ́тъ ᲂу҆́хо твᲂѐ . Сꙋдѝ си́рꙋ и҆ смире́нꙋ , да не прилᲂжи́тъ пᲂто́мъ велича́тисѧ челᲂвѣ́къ на землѝ .

ѱл҃о́мъ дв҃дᲂвъ , і҃ .

На́ гдⷭ҇а ᲂу҆пᲂва́хъ , ка́кѡ рече́тъ дш҃и мᲂе́й , превита́й по гᲂра́мъ ꙗ҆́кѡ пти́ца . Ꙗ҆́кѡ сѐ грѣ́шницы налѧко́ша лꙋ́къ , ᲂу҆гᲂто́ваша стрѣ́лы в̾ тꙋ́лѣ , сᲂстрѣлѧ́ти во́ мрацѣ пра́выѧ срⷣцемъ . Занѐ ꙗ҆́же ты̀ сᲂвершѝ , ѻ҆нѝ разрꙋши́ша , пра́ведникъ  же что̀ сᲂтвᲂрѝ ; гдⷭ҇ь въ цр҃кви ст҃ѣ́й свᲂе́й . Гдⷭ҇ь на́  нб҃си прⷭ҇то́лъ є҆гѡ̀ . Ѻ҆́чи є҆гѡ̀ на  ни́щагѡ призира́етѣ , вѣ́жди є҆гѡ̀ и҆спыта́етѣ сн҃ы чл҃ческїѧ . Гдⷭ҇ь и҆спыта́етъ пра́веднаго , и҆ нечести́ваго . любѧ́и же не пра́вдꙋ , ненави́дитъ свᲂю̀ дш҃ꙋ . Ѡ҆дᲂжди́тъ на  грѣ́шники сѣ́ти , ѻ҆́гнь и҆ жꙋ́пелъ и҆ дꙋ́хъ бꙋ́ренъ , ча́сть ча́ша и҆́хъ . Ꙗ҆́кѡ пра́веденъ гдⷭ҇ь , и҆ пра́вдꙋ вᲂзлюбѝ , пра́ваѧ ви́дѣ лицѐ є҆гѡ̀ .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

ѱл҃о́мъ дв҃дᲂвъ , а҃і .

Спаси́  мѧ гдⷭ҇и , ꙗ҆́кѡ ѡ҆скꙋдѣ̀ прпⷣбныи , ꙗ҆́кѡ ᲂу҆ма́лишасѧ и҆́стины ѿ сн҃о́въ чл҃ческихъ . Сꙋ́етнаѧ глаго́ла ко́ждо ко и҆́скренемꙋ свᲂемꙋ̀ . ᲂу҆стны̀ льсти́выѧ в̾ срⷣцы , и҆ въ срⷣцы гл҃аша ѕла́ѧ . Пᲂтреби́тъ гдⷭ҇ь всѧ̀ ᲂу҆стны̀ льсти́выѧ , ꙗ҆зы́къ велерѣ́чивъ . Ре́кшаѧ , ꙗ҆зы́къ на́шъ вᲂз̾вели́чимъ . ᲂу҆стны̀ на́ша при на́съ сꙋ́ть , кто̀ на́мъ гдⷭ҇ь є҆́сть ; Стра́сти ра́ди ни́щихъ и҆ вᲂз̾дыха́нїѧ ᲂу҆бо́гихъ , нн҃ѣ вᲂскрⷭ҇нꙋ̀ гл҃етъ гдⷭ҇ь . Пᲂлᲂжꙋ́сѧ во спасе́нїе , не ѡ҆бинꙋ́ѧсѧ ѡ҆ не́мъ . Слᲂвеса̀ гдⷭ҇нѧ , слᲂвеса̀ чи́ста . сребро̀ раждьже́но и҆скꙋше́но землѝ , ѡ҆чище́но седмери́цею . Ты̀ гдⷭ҇и сᲂхрани́ши ны̀ и҆ сᲂблюде́ши ны̀ ѿ́ рᲂда сегѡ̀ , и҆ во́ вѣки . Ѻ҆́крестъ нечести́вїи хо́дѧтъ , по высᲂтѣ̀ твᲂе́й ᲂу҆мно́жилъ є҆сѝ сн҃ы чл҃ческїѧ .

ѱл҃о́мъ дв҃дᲂвъ , в҃і .

Дᲂко́лѣ гдⷭ҇и забꙋ́деши мѧ до кᲂнца̀ ; дᲂко́лѣ ѿвраща́еши лицѐ свᲂѐ ѿ менѐ ; Дᲂко́лѣ пᲂлᲂжꙋ̀ сᲂвѣ́ты в̾ дш҃и мᲂе́й , бᲂлѣ́зни в̾ срⷣцы мᲂе́мъ де́нь и҆ но́щь ; Дᲂко́лѣ вᲂз̾несе́тсѧ вра́гъ мо́й на мѧ̀ . при́зри и҆ ᲂу҆слы́ши мѧ гдⷭ҇и бж҃е мо́й . Прᲂсвѣтѝ ѻ҆́чи мᲂѝ , да некᲂгда̀ ᲂу҆снꙋ̀ въ сме́рть , да  некᲂгда̀ рече́тъ вра́гъ мо́й ᲂу҆крѣпи́хсѧ на́нь . Стꙋжа́ющїи ми вᲂз̾ра́дꙋютсѧ , а҆́ще  сѧ пᲂд̾ви́жꙋ , а҆́зъ же на ми́лᲂсть твᲂю̀ ᲂу҆пᲂва́хъ . Вᲂз̾ра́дꙋетсѧ срⷣце мᲂѐ , ѡ҆ спасе́нїи твᲂе́мъ . вᲂспᲂю̀ гдⷭ҇ви бл҃гᲂдѣ́ѧвшемꙋ мнѣ̀ , и҆ пᲂю̀ и҆́мени гдⷭ҇ню вы́шнемꙋ .

ѱл҃о́мъ дв҃дᲂвъ , г҃і .

Речѐ безꙋ́менъ въ срⷣцы свᲂе́мъ , нѣ́сть бг҃ъ . Растлѣ́ша и҆ ѡ҆мрази́шасѧ въ  начина́нїихъ , нѣ́сть твᲂрѧ́и бл҃гᲂсты́ни . Гдⷭ҇ь съ нб҃сѐ прини́че на́  сн҃ы чл҃ческїѧ , ви́дѣти , а҆́ще є҆́сть разꙋмѣва́ѧи , и҆лѝ взыска́ѧи бг҃а ; Всѝ ᲂу҆клᲂни́шасѧ , вкꙋ́пѣ неключи́ми бы́ша . нѣ́сть твᲂрѧ́и бл҃гᲂсты́ню , нѣ́сть до є҆ди́нагѡ . Ни лѝ разꙋмѣ́ютъ всѝ дѣ́лающїи без̾зако́нїе , снѣда́ющїи лю́ди мᲂѧ̀ в̾ хлѣ́ба мѣ́стѡ . Гдⷭ҇а не призва́ша . та́мѡ ᲂу҆бᲂѧ́шасѧ стра́ха , и҆дѣ́же не бѣ̀ стра́ха . Ꙗ҆́кѡ гдⷭ҇ь в̾ ро́дѣ пра́ведныхъ . сᲂвѣ́тъ ни́щагѡ пᲂсрами́сте , гдⷭ҇ь же ᲂу҆пᲂва́нїе є҆гѡ̀ є҆́сть . Кто̀ да́стъ ѿ сїѡ́на спасе́нїе і҆зра́илево ; Внегда̀ вᲂз̾врати́тъ гдⷭ҇ь плѣне́нїе люде́й свᲂи́хъ , вᲂз̾ра́дꙋетсѧ і҆а́кѡвъ , и҆ вᲂз̾весели́тсѧ і҆зра́иль .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

ѱл҃о́мъ дв҃дᲂвъ , д҃і .

Гдⷭ҇и , кто̀ ѡ҆бита́етъ в̾ жили́щи твᲂе́мъ ; лѝ кто̀ всели́тсѧ во ст҃ꙋ́ю го́рꙋ твᲂю̀ ; Хᲂдѧ́и без̾ пᲂро́ка , и҆ дѣ́лаѧи пра́вдꙋ . гл҃ѧи и҆́стинꙋ въ срⷣцы свᲂе́мъ , и҆́же не  ᲂу҆льстѝ ꙗ҆зы́кѡмъ свᲂи́мъ . И҆ не сᲂтвᲂрѝ и҆́скренемꙋ свᲂемꙋ̀ ѕла̀ , и҆ пᲂнᲂше́нїѧ не прїѧ́тъ на бли́жнїѧ свᲂѧ̀ . Оу҆ничиже́нъ є҆́сть пред̾ ни́мъ лꙋка́выи , бᲂѧ́щїѧжесѧ гдⷭ҇а сла́витъ . Клены́исѧ и҆́скренемꙋ свᲂемꙋ̀ , и҆ не  ѿмета́ѧсѧ . сребра̀ свᲂегѡ̀ не да́стъ въ ли́хвꙋ , и҆ мзды̀ на непᲂви́нныхъ непрїѧ́тъ . Твᲂрѧ́и сїѧ̀ , не пᲂдви́житсѧ во́ вѣки .

ѱл҃о́мъ дв҃дᲂвъ , є҃і .

Сᲂхрани́  мѧ гдⷭ҇и , ꙗ҆́кѡ на тѧ̀ ᲂу҆пᲂва́хъ . рѣ́хъ гдⷭ҇ви , гдⷭ҇ь мо́й є҆сѝ ты̀ , ꙗ҆́кѡ бл҃ги́хъ мᲂи́хъ не тре́бꙋеши . Ст҃ы́мъ и҆́же сꙋ́ть на землѝ є҆гѡ̀ , ᲂу҆дивѝ гдⷭ҇ь всѧ̀ хᲂтѣ́нїѧ свᲂѧ̀ в̾ ни́хъ . Оу҆мно́жишасѧ не́мᲂщи и҆́хъ , по си́хъ ᲂу҆скᲂри́ша . Не сᲂберꙋ̀ сᲂбо́ры и҆́хъ ѿ крᲂві́й , ни пᲂмѧнꙋ́ же и҆ме́нъ и҆́хъ ᲂу҆стна́ма мᲂи́ма . Гдⷭ҇ь ча́сть дᲂстᲂѧ́нїѧ мᲂегѡ̀ , и҆ ча́ши мᲂеѧ̀ . ты̀ є҆сѝ ᲂу҆стрᲂѧ́и дᲂстᲂѧ́нїе мᲂѐ мнѣ̀ . Ю҆́жа дᲂпадо́ша мѝ в̾  держа́вныхъ мнѣ̀ . и҆́бо дᲂстᲂѧ́нїе мᲂѐ держа́вно є҆́сть мнѣ̀ . Бл҃гᲂслᲂвлю̀ гдⷭ҇а вразꙋми́вшаго мѧ̀ , є҆ще́ же и҆ до́ нᲂщи пᲂказа́ мѧ ᲂу҆тро́ба мᲂѧ̀ . Пред̾зрѣ́хъ гдⷭ҇а предо мно́ю вы́нꙋ , ꙗ҆́кѡ ѡ҆деснꙋ́ю менѐ є҆́сть , да́сѧ не пᲂдви́жꙋ . Сегѡ̀ ра́ди вᲂз̾весели́сѧ срⷣце мᲂѐ , и҆ вᲂз̾ра́дᲂвасѧ ꙗ҆зы́къ мо́й , є҆ще́ же и҆ пло́ть мᲂѧ̀ всели́тсѧ на ᲂу҆пᲂва́нїе . Ꙗ҆́кѡ не ѡ҆ста́виши дш҃ꙋ мᲂю̀ во а҆́дѣ , ни да́си же прпⷣбнᲂмꙋ свᲂемꙋ̀ ви́дѣти и҆стлѣ́нїѧ . Сказа́лъ  ми є҆сѝ пꙋтѝ живᲂта̀ . и҆спо́лниши мѧ̀ весе́лїѧ с̾ лице́мъ твᲂи́мъ . красᲂта̀ в̾  десни́цѣ твᲂе́й в̾ кᲂне́цъ .

ѱл҃о́мъ дв҃дᲂвъ , ѕ҃і .

Оу҆слы́ши гдⷭ҇и пра́вдꙋ мᲂю̀ , вᲂньмѝ мᲂле́нїе мᲂѐ . Внꙋшѝ мл҃твꙋ мᲂю̀ , не во ᲂу҆стна́хъ льсти́выхъ . Ѿ лица̀ твᲂегѡ̀ сꙋдьба̀ мᲂѧ̀ и҆зы́детъ , ѻ҆́чи мᲂѝ да ви́дитѣ пра́вᲂты . И҆скꙋси́лъ є҆сѝ срⷣце мᲂѐ , пᲂсѣти́лъ є҆сѝ но́щїю . и҆скꙋси́лъ  мѧ є҆сѝ , и҆ не ѡ҆брѣ́тесѧ во мнѣ̀ не пра́вда . Ꙗ҆́кѡ да не вᲂз̾гл҃ютъ ᲂу҆ста̀ мᲂѧ̀ дѣ́лъ чл҃ческихъ . за слᲂвеса̀ ᲂу҆сте́нъ твᲂи́хъ , а҆́зъ сᲂхрани́хъ пꙋтѝ же́стᲂки . Сᲂвершѝ стᲂпы̀ мᲂѧ̀ в̾ стезѧ́хъ твᲂи́хъ , да не пᲂдви́жꙋтсѧ стᲂпы̀ мᲂѧ̀ . А҆́зъ вᲂз̾ва́хъ ꙗ҆́кѡ ᲂу҆слы́ша мѧ̀ бж҃е . приклᲂнѝ ᲂу҆́хо твᲂѐ мнѣ̀ , и҆ ᲂу҆слы́ши гл҃ы мᲂѧ̀ . Оу҆дивѝ млⷭ҇ти твᲂѧ̀ , спаса́ѧи ᲂу҆пᲂва́ющихъ на тѧ̀ . Ѿ прᲂти́вѧщихсѧ десни́цѣ твᲂе́й , сᲂхрани́ мѧ гдⷭ҇и ꙗ҆́кѡ зѣ́ницꙋ ѻ҆́ка . Въ кро́вѣ крилꙋ̀ твᲂе́ю пᲂкры́еши мѧ̀ , ѿ  лица̀ нечести́выхъ ѡ҆стра́стьшихъ мѧ̀ . Вразѝ мᲂѝ дш҃ꙋ мᲂю̀ ᲂу҆держа́ша , тꙋ́къ сво́й затвᲂри́ша , ᲂу҆ста̀ и҆́хъ глаго́лаша гᲂрды́ню . И҆згᲂнѧ́щїи мѧ̀ ны́нѣ ѡ҆быдо́ша мѧ̀ , ѻ҆́чи свᲂѝ вᲂз̾лᲂжи́ша ᲂу҆клᲂни́ти на́  землю . Ѡ҆бьѧ́ша  мѧ ꙗ҆́кѡ ле́въ гᲂто́въ на́  лᲂвъ , и҆ ꙗ҆́кѡ ски́менъ ѡ҆бита́ѧ въ сᲂкро́вищихъ . Вᲂскрⷭ҇нѝ гдⷭ҇и пред̾варѝ ѧ҆̀ , и҆ запнѝ и҆́мъ . и҆змѝ дш҃ꙋ мᲂю̀ ѿ  нечести́выхъ , ѻ҆рꙋ́жїѧ твᲂѧ̀ , ѿ  вра́гъ рꙋ́къ твᲂи́хъ . Гдⷭ҇и ѿма́ль ѿ  землѝ , раздѣлѝ ѧ҆̀ в̾ живᲂтѣ̀ и҆́хъ . и҆ сᲂкрᲂве́нныхъ твᲂи́хъ и҆спо́лнисѧ ᲂу҆тро́ба и҆́хъ . Насы́тишасѧ сн҃о́въ , и҆ ѡ҆ста́виша ѡ҆ста́нки млⷣнцемъ свᲂи́мъ . А҆́зъ же пра́вдᲂю ꙗ҆влю́сѧ лицꙋ̀ твᲂемꙋ̀ , насы́щꙋсѧ внегда̀ ꙗ҆ви́т̾мисѧ сла́ва твᲂѧ̀ .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .