каѳи́сма , г҃ . ѱл҃о́мъ дв҃дᲂвъ , з҃і .

Вᲂз̾люблю́  тѧ гдⷭ҇и крѣ́пᲂсти мᲂѧ̀ . Гдⷭ҇ь ᲂу҆тверже́нїе мᲂѐ , и҆ прибѣ́жище мᲂѐ , и҆ и҆зба́витель мо́й . Бг҃ъ мо́й пᲂмо́щникъ мо́й , и҆ ᲂу҆пᲂва́ю на́нь . Защи́титель мо́й , и҆ ро́гъ спасе́нїѧ мᲂегѡ̀ , и҆ застꙋ́пникъ мо́й . Хвалѧ̀ призᲂвꙋ̀ гдⷭ҇а , и҆ ѿ вра́гъ мᲂи́хъ спасꙋ́сѧ . Ѡ҆держа́ша мѧ̀ бᲂлѣ́зни сме́ртныѧ , и҆ пᲂто́цы без̾зако́нїѧ смꙋти́ша мѧ̀ . Бᲂлѣ́зни а҆́дᲂвы ѡ҆быдо́ша мѧ̀ , пред̾вари́ша  мѧ сѣ́ти сме́ртныѧ . И҆ внегда̀ скᲂрбѣ́ти ми , призва́хъ гдⷭ҇а , и҆ к̾ бг҃ꙋ мᲂемꙋ̀ вᲂз̾ва́хъ . Оу҆слы́ша ѿ цр҃кве ст҃ы́ѧ свᲂеѧ̀ гла́съ мо́й , и҆ во́пль мо́й пред̾ ни́мъ вни́детъ пред̾ ѻ҆чи́ма є҆гѡ̀ . И҆ пᲂд̾ви́жасѧ , и҆ тре́петна бы́сть землѧ̀ , и҆ ѻ҆снᲂва́нїѧ го́ръ смꙋти́шасѧ , и҆ пᲂд̾виза́шасѧ ꙗ҆́кѡ прᲂгнѣ́васѧ на нѧ̀ бг҃ъ . Взы́де ды́мъ гнѣ́вᲂмъ є҆гѡ̀ , и҆ ѻ҆́гнь ѿ лица̀ є҆гѡ̀ вᲂспла́нетсѧ , ᲂу҆́глїѧ вᲂз̾гᲂрѣ́шасѧ ѿ негѡ̀ . И҆ преклᲂнѝ нб҃са̀ и҆ сни́де , и҆ примра́къ пᲂд̾ нᲂга́ма є҆гѡ̀ . И҆ взы́де на херꙋви́мъ и҆ летѣ̀ , вᲂз̾летѣ̀ на крилꙋ̀ вѣ́треню , и҆ пᲂлᲂжѝ тмꙋ̀ за кро́въ сво́й , ѻ҆́крестъ є҆гѡ̀ селе́нїе є҆гѡ̀ . темна̀ вᲂда̀ во ѻ҆́блацѣхъ вᲂз̾дꙋ́шныхъ . Ѿ ѡ҆блиста́нїѧ пред̾ ни́мъ ѻ҆́блацы прᲂидо́ша , гра́дъ и҆ ᲂу҆́глїе ѻ҆́гнено . И҆ вᲂз̾гремѣ̀ съ нб҃сѐ гдⷭ҇ь , и҆ вы́шнїи дадѐ гла́съ сво́й . Пꙋстѝ стрѣ́лы и҆ разгна̀ ѧ҆̀ , и҆ мо́лнїѧ ᲂу҆мно́жи , и҆ смꙋтѝ и҆́хъ . И҆ ꙗ҆ви́шасѧ и҆сто́чницы вᲂдні́и , и҆ ѿкры́шасѧ ѻ҆снᲂва́нїѧ вселе́нныѧ . Ѿ запреще́нїѧ твᲂегѡ̀ гдⷭ҇и , ѿ дᲂхнᲂве́нїѧ дх҃а гнѣ́ва твᲂегѡ̀ . Пᲂсла̀ свы́ше и҆ прїѧ́тъ мѧ , вᲂспрїѧ́тъ мѧ ѿ во́дъ мно́гъ . И҆зба́витъ мѧ̀ ѿ вра́гъ мᲂи́хъ си́льныхъ , и҆ ѿ ненави́дѧщихъ мѧ̀ , ꙗ҆́кѡ ᲂу҆крѣпи́шасѧ па́че менѐ . Пред̾вари́ша  мѧ въ де́нь ѡ҆ѕлᲂбле́нїѧ мᲂегѡ̀ , и҆ бы́сть гдⷭ҇ь ᲂу҆тверже́нїе мᲂѐ . И҆ и҆зведе́ мѧ на ширᲂтꙋ̀ , и҆зба́витъ мѧ̀ ꙗ҆́кѡ вᲂсхᲂтѣ́ мѧ . И҆ вᲂз̾да́стъ мѝ гдⷭ҇ь по пра́вдѣ мᲂе́й . и҆ по  чистᲂтѣ̀ рꙋ́кꙋ мᲂе́ю вᲂз̾да́стъ мѝ . Ꙗ҆́кѡ сᲂхрани́хъ пꙋтѝ гдⷭ҇нѧ , и҆ не нече́ствᲂвахъ ѿ́ бг҃а мᲂегѡ̀ . Ꙗ҆́кѡ всѧ̀ сꙋдьбы̀ є҆гѡ̀ предо мно́ю , и҆ ѡ҆правда́нїѧ є҆гѡ̀ не ѿстꙋпи́ша ѿ менѐ . И҆ бꙋ́дꙋ непᲂро́ченъ с̾ ни́мъ , и҆ сᲂхраню́сѧ ѿ  без̾зако́нїѧ мᲂегѡ̀ . И҆ вᲂз̾да́стъ  ми гдⷭ҇ь по пра́вдѣ мᲂе́й и҆ по чистᲂтѣ̀ рꙋ́кꙋ мᲂе́ю , пред̾ ѻ҆чи́ма є҆гѡ̀ . Съ прпⷣбнымъ прпⷣбенъ бꙋ́деши . и҆ с̾ мꙋ́жемъ непᲂви́ннымъ непᲂви́ненъ бꙋ́деши . И҆ со и҆збра́ннымъ и҆збра́нъ бꙋ́деши , и҆ со стрᲂпти́вымъ разврати́шисѧ . Ꙗ҆́кѡ ты̀ лю́ди смире́нныѧ спасе́ши , и҆ ѻ҆́чи го́рдыхъ смири́ши . Ꙗ҆́кѡ ты̀ прᲂсвѣща́еши свѣти́льникъ мо́й гдⷭ҇и , бж҃е мо́й прᲂсвѣща́еши тмꙋ̀ мᲂю̀ . Ꙗ҆́кѡ тᲂбо́ю и҆зба́влюсѧ ѿ и҆скꙋше́нїѧ , и҆ ѡ҆́ бз҃ѣ мᲂе́мъ прелѣ́зꙋ стѣ́нꙋ . Бг҃ъ мо́й , непᲂро́ченъ пꙋ́ть є҆гѡ̀ , слᲂвеса̀ гдⷭ҇нѧ раждеже́на , защи́титель є҆́сть всѣ́мъ ᲂу҆пᲂва́ющимъ на́нь . Ꙗ҆́кѡ кто̀ бг҃ъ , ра́звѣ гдⷭ҇а ; и҆лѝ кто̀ бг҃ъ , ра́звѣ бг҃а на́шегѡ . Бг҃ъ препᲂѧ́са  мѧ си́лᲂю , и҆ пᲂлᲂжѝ непᲂро́ченъ пꙋ́ть мо́й . Съверша́ѧ но́зѣ мᲂѝ ꙗ҆́кѡ є҆ле́ни , и҆ на высо́кихъ пᲂставлѧ́ѧ мѧ̀ . Наꙋча́ѧ рꙋ́цѣ мᲂѝ на́  брань , и҆ пᲂлᲂжѝ лꙋ́къ мѣ́дѧнъ мы́шцамъ мᲂи́мъ . И҆ да́лъ ми є҆сѝ защище́нїе спасе́нїѧ , и҆ десни́ца твᲂѧ̀ прїѧ́тъ мѧ . И҆ наказа́нїе твᲂѐ и҆спра́витъ мѧ̀ въ кᲂне́цъ , и҆ наказа́нїе твᲂѐ то́мѧ наꙋчи́тъ . Оу҆ши́рилъ є҆сѝ стᲂпы̀ мᲂѧ̀ пᲂдо мно́ю , и҆ не и҆знемо́жетѣ плеснѣ̀ мᲂѝ . Пᲂженꙋ̀ врагѝ мᲂѧ̀ , и҆ пᲂсти́гнꙋ ѧ҆̀ , и҆ не вᲂз̾вращꙋ́сѧ до́ндеже скᲂнча́ютсѧ . Ѡ҆скᲂрблю̀ и҆́хъ , и҆ не вᲂз̾мо́гꙋтъ ста́ти , падꙋ́тъ пᲂд̾ нᲂга́ма мᲂи́ма . И҆ препᲂѧ́салъ мѧ є҆сѝ си́лᲂю на́  брань , спѧ́лъ є҆сѝ всѧ̀ вᲂста́ющїѧ на мѧ̀ пᲂд̾ мѧ̀ . И҆ вра́гъ мᲂи́хъ да́лъ ми є҆сѝ хребе́тъ , и҆ ненави́дѧщїѧ мѧ̀ пᲂтреби́лъ є҆сѝ . Вᲂз̾ва́ша , и҆ не бѣ̀ спаса́ѧи , ко́ гдⷭ҇ꙋ , и҆ не  ᲂу҆слы́шаше и҆́хъ . И҆ и҆стню̀ и҆́хъ ꙗ҆́кѡ пра́хъ пред̾ лице́мъ вѣ́тра , ꙗ҆́кѡ бре́нїе пꙋтѝ пᲂгла́ждꙋ и҆́хъ . И҆ и҆зба́ви мѧ ѿ прерѣка́нїѧ люде́й , пᲂста́виши мѧ̀ во главꙋ̀ ꙗ҆зы́кѡмъ . Лю́дїе и҆́хже не вѣ́дѣхъ , пᲂрабо́таша мѝ , в̾ слꙋ́хъ ᲂу҆́ха ᲂу҆слы́шаша мѧ̀ . Сы́нᲂве чꙋжді́и сᲂлга́ша мѝ , сы́нᲂве чꙋжді́и ѡ҆бетша́ша , и҆ ѡ҆хрᲂмо́ша ѿ  сте́зь свᲂи́хъ . Жи́въ гдⷭ҇ь , и҆ блгⷭ҇ве́нъ бг҃ъ , и҆ вᲂз̾несе́тсѧ бг҃ъ спасе́нїѧ мᲂегѡ̀ . Бг҃ъ даѧ́и ѿмще́нїе мнѣ̀ , и҆ пᲂвинꙋ́ѧи лю́ди пᲂд̾ мѧ̀ , и҆зба́витель мо́й , ѿ  вра́гъ мᲂи́хъ гнѣвли́выхъ . Ѿ вᲂста́ющихъ на мѧ̀ вᲂз̾несе́ши мѧ , ѿ́ мꙋжа не пра́ведна и҆зба́виши мѧ̀ . Сегѡ̀ ра́ди и҆спᲂвѣ́мсѧ тебѣ̀ въ ꙗ҆зы́цѣхъ гдⷭ҇и , и҆ и҆́мени твᲂемꙋ̀ пᲂю̀ . Велича́ѧ спасе́нїѧ цр҃е́ва , и҆ твᲂрѧ́и млⷭ҇ть хрⷭ҇тꙋ̀ свᲂемꙋ̀ дв҃дꙋ , и҆ сѣ́мени є҆гѡ̀ до́  вѣка .

сла́ва , и҆ нн҃ѣ . А҆ллилꙋ́їѧ а҆ллилꙋ́їѧ сла́ва тебѣ̀ бж҃е , гⷤ . Гдⷭ҇и пᲂми́лꙋй , гⷤ . сла́ва , и҆ нн҃ѣ .

ѱл҃о́мъ дв҃дᲂвъ , и҃і .

Нб҃са̀ пᲂвѣ́даютъ сла́вꙋ бж҃їю , твᲂре́нїе  же рꙋ́кꙋ є҆гѡ̀ вᲂз̾вѣща́етъ тве́рдь . Де́нь днѝ ѿрыга́етъ гл҃ъ , и҆ но́щь но́щи вᲂз̾вѣща́етъ ра́зꙋмъ . Не сꙋ́ть рѣ́чи ни слᲂвеса̀ , и҆́хже не слы́шатсѧ гла́си и҆́хъ . Во всю̀ зе́млю и҆зы́де вѣща́нїе и҆́хъ , и҆ в̾ кᲂнцы̀ вселе́нныѧ гл҃ы и҆́хъ . Въ сл҃нцы пᲂлᲂжѝ селе́нїе свᲂѐ , и҆ то́й ꙗ҆́кѡ жени́хъ и҆схᲂдѧ́и ѿ черто́га свᲂегѡ̀ . Вᲂз̾ра́дꙋетсѧ ꙗ҆́кѡ и҆спᲂли́нъ тещѝ пꙋ́ть , ѿ кᲂнца̀ нб҃съ и҆схо́дъ є҆гѡ̀ . И҆ срѣ́тенїе є҆гѡ̀ до кᲂнца̀ нб҃съ , и҆ нѣ́сть и҆́же ᲂу҆кры́етсѧ теплᲂты̀ є҆гѡ̀ . Зако́нъ гдⷭ҇нь непᲂро́ченъ , ѡ҆браща́ѧи дш҃а . свидѣ́тельство гдⷭ҇не вѣ́рно ᲂу҆мꙋдрѧ́ѧ младе́нца . Ѡ҆правда́нїѧ гдⷭ҇нѧ пра́ва веселѧ́щаѧ срⷣце , за́пᲂвѣдь гдⷭ҇нѧ свѣтла̀ прᲂсвѣща́ющи ѻ҆́чи . Стра́хъ гдⷭ҇нь чи́стъ , пребыва́ѧ в̾ вѣ́къ вѣ́ка . сꙋдьбы̀ гдⷭ҇ни и҆́стинны , ѡ҆правда́нны в̾кꙋ́пѣ . И҆ вᲂжделѣ́нны па́че зла́та , и҆ ка́мене че́стна мно́га , и҆ сла́ждьша па́че ме́да и҆ со́та . И҆́бо ра́бъ тво́й храни́тъ и҆́хъ , внегда̀ сᲂхрани́ти и҆́хъ , вᲂз̾даѧ́нїе мно́го . Грѣхᲂпа́данїѧ кто̀ разꙋмѣ́етъ ; ѿ та́йныхъ мᲂи́хъ ѡ҆чи́сти мѧ̀ , и҆ ѿ чꙋжди́хъ пᲂщадѝ раба̀ твᲂегѡ̀ . А҆́ще не ᲂу҆дᲂлѣ́ютъ мѝ , тᲂгда̀ непᲂро́ченъ бꙋ́дꙋ и҆ ѡ҆чи́щꙋсѧ ѿ грѣха̀ вели́ка . И҆ бꙋ́дꙋтъ во бл҃гᲂвᲂле́нїе слᲂвеса̀ ᲂу҆́стъ мᲂи́хъ , и҆ пᲂꙋче́нїе срⷣца мᲂегѡ̀ пред̾ тᲂбо́ю вы́нꙋ . гдⷭ҇и пᲂмо́щниче мо́й , и҆ и҆зба́вителю мо́й .

ѱл҃о́мъ дв҃дᲂвъ , ѳ҃і .

Оу҆слы́шитъ тѧ̀ гдⷭ҇ь в̾ де́нь печа́ли , защи́титъ тѧ̀ и҆́мѧ бг҃а і҆а́кѡвлѧ . По́слетъ тѝ по́мᲂщь ѿ ст҃а́гѡ , и҆ ѿ  сїѡ́на застꙋ́питъ тѧ̀ . Пᲂмѧне́тъ всѧ́кꙋ же́ртвꙋ твᲂю̀ , и҆ всѧ̀ сᲂжже́нїѧ твᲂѧ̀ тꙋ́чна бꙋ́ди . Да́стъ ти гдⷭ҇ь по́ срⷣцꙋ твᲂемꙋ̀ , и҆ ве́сь сᲂвѣ́тъ тво́й и҆спо́лнитъ . Вᲂз̾ра́дꙋемсѧ ѡ҆ спасе́нїи твᲂе́мъ , и҆ во́ и҆мѧ гдⷭ҇а бг҃а на́шегѡ вᲂз̾вели́чимсѧ . И҆спо́лнитъ гдⷭ҇ь всѧ̀ прᲂше́нїѧ твᲂѧ̀ . ны́нѣ пᲂзна́хъ , ꙗ҆́кѡ спа́слъ є҆́сть гдⷭ҇ь хрⷭ҇та̀ свᲂегѡ̀ . Оу҆слы́шитъ є҆гѡ̀ с̾ нб҃сѐ ст҃а́гѡ свᲂегѡ̀ , в̾ си́лахъ спасе́нїе десни́ца є҆гѡ̀ . Сїѝ на кᲂлесни́цахъ , и҆ сїѝ на ко́нихъ , мы́  же во́ и҆мѧ гдⷭ҇а бг҃а на́шегѡ призᲂве́мъ . Ті́и спѧ́ти бы́ша и҆ падо́ша , мы́  же вᲂста́хᲂмъ и҆ и҆спра́вихᲂмсѧ . Гдⷭ҇и спасѝ цр҃ѧ , и҆ ᲂу҆слы́ши ны , во́ньже де́нь а҆́ще призᲂве́мъ тѧ̀ .

ѱл҃о́мъ дв҃дᲂвъ , к҃ .

Гдⷭ҇и , си́лᲂю твᲂе́ю вᲂз̾весели́тсѧ цр҃ь , и҆ ѡ҆ спасе́нїи твᲂе́мъ вᲂз̾ра́дꙋетсѧ ѕѣлѡ̀ . Жела́нїе срⷣца є҆гѡ̀ да́лъ є҆сѝ є҆мꙋ̀ . и҆ хᲂтѣ́нїѧ ᲂу҆стнꙋ̀ є҆гѡ̀ нѣ́си лиши́лъ є҆гѡ̀ . Ꙗ҆́кѡ пред̾вари́лъ є҆сѝ є҆гѡ̀ бл҃гᲂслᲂве́нїемъ бл҃гᲂсты́ннымъ , пᲂлᲂжи́лъ є҆сѝ на главѣ̀ є҆гѡ̀ вѣне́цъ ѿ ка́мене че́стна . Живᲂта̀ прᲂси́лъ є҆́сть ᲂу҆ тебѐ , и҆ да́лъ є҆сѝ є҆мꙋ̀ дᲂлгᲂтꙋ̀ дні́й въ вѣ́къ вѣ́ка . Ве́лїѧ сла́ва є҆гѡ̀ спасе́нїемъ твᲂи́мъ , сла́вꙋ и҆ велелѣ́пїе вᲂз̾лᲂжи́ши на́нь . Ꙗ҆́кѡ да́си є҆мꙋ̀ бл҃гᲂслᲂве́нїе въ вѣ́къ вѣ́ка , вᲂз̾весели́ши є҆гѡ̀ ра́дᲂстїю с̾ лице́мъ твᲂи́мъ . Ꙗ҆́кѡ цр҃ь ᲂу҆пᲂва́етъ на́ гдⷭ҇а , и҆ млⷭ҇тїю вы́шнѧгѡ не пᲂд̾ви́житсѧ . Ѡ҆брѧ́щетсѧ рꙋка̀ твᲂѧ̀ всѣ́мъ врагѡ́мъ твᲂи́мъ , десни́ца твᲂѧ̀ ѡ҆брѧ́щетъ всѧ̀ ненави́дѧщїѧ тебѐ . Ꙗ҆́кѡ пᲂлᲂжи́ши и҆́хъ ꙗ҆́кѡ пе́щь ѻ҆́гненꙋю , во́ времѧ лица̀ твᲂегѡ̀ , гдⷭ҇ь гнѣ́вᲂмъ свᲂи́мъ смѧте́тъ ѧ҆̀ , и҆ снѣ́сть и҆́хъ ѻ҆́гнь . Пло́дъ и҆́хъ ѿ землѝ пᲂгꙋби́ши , и҆ сѣ́мѧ и҆́хъ ѿ сн҃о́въ чл҃ческихъ . Ꙗ҆́кѡ ᲂу҆клᲂни́ша на тѧ̀ ѕла́ѧ , пᲂмы́слиша сᲂвѣ́ты , и҆́хже не вᲂз̾мᲂго́ша сᲂста́вити . Ꙗ҆́кѡ пᲂлᲂжи́ши и҆́хъ хребе́тъ во и҆збы́тцѣхъ свᲂи́хъ , ᲂу҆гᲂто́ваеши лицѐ и҆́хъ . Вᲂз̾неси́сѧ гдⷭ҇и си́лᲂю твᲂе́ю , вᲂспᲂе́мъ и҆ пᲂе́мъ си́лы твᲂѧ̀ .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

ѱл҃о́мъ дв҃дᲂвъ , к҃а .

Бж҃е бж҃е мо́й вᲂньми́ ми , въскꙋ́ю ѡ҆ста́ви мѧ . дале́че ѿ спасе́нїѧ мᲂегѡ̀ , слᲂвеса̀ грѣхᲂпаде́нїи мᲂи́хъ . Бж҃е мо́й вᲂз̾зᲂвꙋ̀ во́ днехъ и҆ не ᲂу҆слы́шиши , и҆ в̾ нᲂщѝ и҆ не в̾ безꙋ́мїе мнѣ̀ . Ты́ же во ст҃ѣ́мъ живе́ши хвала̀ і҆и҃лева . На тѧ̀ ᲂу҆пᲂва́ша ѻ҆ц҃ы на́ши . ᲂу҆пᲂва́ша , и҆ и҆зба́вилъ є҆сѝ и҆́хъ . Къ тебѣ̀ вᲂз̾ва́ша и҆ спасо́шасѧ , на тѧ̀ ᲂу҆пᲂва́ша и҆ не  пᲂстыдѣ́шасѧ . А҆́зъ же є҆́смь че́рвь , а҆ не чл҃къ . пᲂнᲂше́нїе чл҃кѡмъ , и҆ ᲂу҆ничиже́нїе лю́демъ . Всѝ ви́дѧщїи мѧ̀ пᲂрꙋга́шамисѧ гл҃аша ᲂу҆стна́ми , пᲂкива́ша главꙋ̀ . Оу҆пᲂва̀ на́  гдⷭ҇а , да и҆зба́витъ и҆̀ , да спасе́тъ є҆гѡ̀ ꙗ҆́кѡ хо́щетъ є҆гѡ̀ . Ꙗ҆́кѡ ты̀ є҆сѝ и҆сто́ргїи мѧ и҆́з̾ чрева . ᲂу҆пᲂва́нїе мᲂѐ ѿ сᲂсцꙋ̀ мт҃ре мᲂеѧ̀ . Къ тебѣ̀ приве́рженъ є҆́смь ѿ лᲂже́снъ , ѿ́ чрева мт҃ре мᲂеѧ̀ . Бг҃ъ мо́й є҆сѝ ты̀ , не ѿстꙋпѝ ѿ менѐ . Ꙗ҆́кѡ ско́рбь бли́зъ , ꙗ҆́кѡ нѣ́сть пᲂмᲂга́ющагѡ мѝ . Ѡ҆быдо́ша мѧ тельцы̀ мно́зи , ю҆́ньцы тꙋ́чнїи ѡ҆держа́ша мѧ . Ѿверзо́ша на мѧ̀ ᲂу҆ста̀ свᲂѧ̀ , ꙗ҆́кѡ ле́въ вᲂсхища́ѧи и҆ рыка́ѧи . Ꙗ҆́кѡ вᲂда̀ и҆злїѧ́сѧ , и҆ разсы́пашасѧ всѧ̀ ко́сти мᲂѧ̀ . бы́сть срⷣце мᲂѐ , ꙗ҆́кѡ во́скъ та́ѧ пᲂсредѣ̀ чре́ва мᲂегѡ̀ . И҆́з̾сше ꙗ҆́кѡ скꙋде́ль крѣ́пᲂсть мᲂѧ̀ , и҆ ꙗ҆зы́къ мо́й прильпѐ гᲂрта́ни мᲂемꙋ̀ , и҆ въ  пе́рсть сме́рти све́лъ мѧ є҆сѝ . Ꙗ҆́кѡ ѡ҆быдо́ша мѧ псѝ мно́зи , со́нмъ лꙋка́выхъ ѡ҆держа́ша мѧ . И҆скᲂпа́ша рꙋ́цѣ мᲂѝ и҆ но́зѣ мᲂѝ , и҆счето́ша всѧ̀ ко́сти мᲂѧ̀ . Ті́и же смᲂтри́ша , и҆ презрѣ́ша мѧ . раздѣли́ша ри́зы мᲂѧ̀ себѣ̀ , и҆ ѡ҆ ѻ҆де́жди мᲂе́й мета́ша жре́бїѧ . Ты́ же гдⷭ҇и не ᲂу҆да́ли по́мᲂщь твᲂю̀ ѿ менѐ , на застꙋпле́нїе мᲂѐ вᲂнмѝ . И҆змѝ ѿ ѻ҆рꙋ́жїѧ дш҃ꙋ мᲂю̀ , и҆ и҆з̾ рꙋкѝ пе́сїѧ є҆динᲂро́днꙋю мᲂю̀ . Спаси́ мѧ ѿ ᲂу҆́стъ льво́въ , и҆ ѿ ро́гъ є҆динᲂро́жь смире́нїе мᲂѐ . Пᲂвѣ́мъ и҆́мѧ твᲂѐ бра́тїи мᲂе́й , пᲂсредѣ̀ цр҃кве вᲂспᲂю́ тѧ . Бᲂѧ́щїисѧ гдⷭ҇а вᲂсхвали́те и҆̀ , всѐ сѣ́мѧ і҆а́кѡвле , прᲂсла́вите є҆гѡ̀ . Да ᲂу҆бᲂи́т̾жесѧ ѿ негѡ̀ всѐ сѣ́мѧ і҆и҃лево , ꙗ҆́кѡ не ᲂу҆ничижѝ ни негᲂдᲂва̀ мл҃твы ни́щагѡ . ни ѿврати́ же лица̀ свᲂегѡ̀ ѿ менѐ . и҆ є҆гда̀ вᲂз̾ва́хъ к̾ немꙋ̀ , ᲂу҆слы́ша мѧ̀ . Ѿ тебѣ̀ пᲂхвала̀ мᲂѧ̀ , въ цр҃кви вели́цѣ и҆спᲂвѣ́мсѧ тебѣ̀ , мᲂли́твы мᲂѧ̀ вᲂз̾да́мъ пред̾ бᲂѧ́щимисѧ є҆гѡ̀ . Ꙗ҆дѧ́тъ ни́щїи , и҆ насы́тѧтсѧ , и҆ вᲂсхва́лѧтъ гдⷭ҇а взыска́ющїи є҆гѡ̀ , жива̀ бꙋ́дꙋтъ срⷣца̀ и҆́хъ в̾ вѣ́къ вѣ́ка . Пᲂмѧнꙋ́тсѧ и҆ ѡ҆братѧ́тсѧ ко́ гдⷭ҇ꙋ всѝ кᲂнцы̀ землѝ , и҆ пᲂкло́нѧтсѧ пред̾ ни́мъ всѧ̀ ѻ҆те́чествїѧ ꙗ҆зы́къ . Ꙗ҆́кѡ гдⷭ҇не є҆́сть црⷭ҇твїе , и҆ то́й ѡ҆блада́етъ ꙗ҆зы́ки . Ꙗ҆до́ша и҆ пᲂклᲂни́шасѧ всѝ тꙋ́чнїи землѝ . пред̾ ни́мъ припадꙋ́тъ всѝ низ̾хᲂдѧ́щїи въ зе́млю . И҆ дш҃а мᲂѧ̀ тᲂмꙋ̀ живе́тъ , и҆ сѣ́мѧ мᲂѐ пᲂрабо́таетъ є҆мꙋ̀ . Вᲂз̾вѣсти́тъ гдⷭ҇ви ро́дъ грѧдꙋ́щїи , и҆ вᲂз̾вѣстѧ́тъ пра́вдꙋ є҆гѡ̀ лю́демъ ро́ждьшимсѧ , и҆́хже сᲂтвᲂрѝ гдⷭ҇ь .

ѱл҃о́мъ дв҃дᲂвъ , к҃в .

Гдⷭ҇ь пасе́тъ мѧ , и҆ ничто́же мѧ лиши́тъ . На мѣ́стѣ ѕла́чнѣ та́мѡ всели́ мѧ , на вᲂдѣ̀ пᲂко́йнѣ вᲂспита́ мѧ , дш҃ꙋ мᲂю̀ ѡ҆братѝ . Наста́ви мѧ на стезѝ пра́вы , и҆́мене ра́ди є҆гѡ̀ . А҆́ще бо и҆ пᲂйдꙋ̀ пᲂсредѣ̀ сѣ́ней сме́ртныхъ , не ᲂу҆бᲂю́сѧ ѕла̀ , ꙗ҆́кѡ ты̀ со мно́ю є҆сѝ . же́злъ тво́й и҆ па́лица твᲂѧ̀ та́  мѧ ᲂу҆тѣ́шиста . Оу҆гᲂто́валъ є҆сѝ предо  мно́ю трапе́зꙋ , пред̾ стꙋжа́ющихъ мнѣ̀ . ᲂу҆ма́стилъ є҆сѝ є҆ле́ѡмъ главꙋ̀ мᲂю̀ . и҆ ча́ша твᲂѧ̀ ᲂу҆пᲂѧва́ющи мѧ̀ ꙗ҆́кѡ держа́вна . И҆ млⷭ҇ть твᲂѧ̀ пᲂжене́тъ мѧ во всѧ̀ днѝ живᲂта̀ мᲂегѡ̀ . и҆ всели́тимисѧ в̾ до́мъ гдⷭ҇нь в̾ дᲂлгᲂтꙋ̀ дні́й .

ѱл҃о́мъ дв҃дᲂвъ , к҃г .

Гдⷭ҇нѧ є҆́сть землѧ̀ , и҆ и҆спᲂлне́нїе є҆ѧ̀ . вселе́ннаѧ , и҆ всѝ живꙋ́щїи на не́й . То́й на  мᲂрѣ́хъ ѡ҆снᲂва́лъ ю҆̀ є҆́сть , и҆ на рѣка́хъ ᲂу҆гᲂто́валъ ю҆̀ є҆́сть . Кто̀ взы́детъ на́  гᲂрꙋ гдⷭ҇ню ; и҆лѝ кто̀ ста́нетъ на  мѣ́стѣ ст҃ѣ́мъ є҆гѡ̀ ; Непᲂви́ненъ рꙋка́ма и҆ чи́стъ срⷣцемъ , и҆́же не  прїѧ́тъ на сꙋ́е дш҃ꙋ свᲂю̀ , и҆ не клѧ́тсѧ ле́стїю и҆́скреннемꙋ свᲂемꙋ̀ . Се́й прїи́метъ бл҃гᲂслᲂве́нїе ѿ́ гдⷭ҇а , и҆ ми́лᲂстыню ѿ́ бг҃а сп҃са свᲂегѡ̀ . Се́й ро́дъ и҆́щꙋщихъ гдⷭ҇а , и҆́щꙋщихъ лицѐ бг҃а і҆а́кѡвлѧ . Вᲂз̾мѣ́те врата̀ кнѧ́зи ва́ша , и҆ вᲂз̾мѣ́тесѧ врата̀ вѣ́чнаѧ , и҆ вни́детъ цр҃ь сла́вы . Кто̀ є҆́сть се́й цр҃ь сла́вы ; гдⷭ҇ь крѣ́пᲂкъ и҆ си́ленъ , гдⷭ҇ь си́ленъ во́  брани . Вᲂз̾мѣ́те врата̀ кнѧ́зи ва́ша , и҆ вᲂз̾мѣ́тесѧ врата̀ вѣ́чнаѧ , и҆ вни́детъ цр҃ь сла́вы . Кто̀ є҆́сть се́й цр҃ь сла́вы ; гдⷭ҇ь си́ламъ , то́й є҆́сть цр҃ь сла́вы .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .