каѳи́сма , з҃ . ѱл҃о́мъ дв҃дᲂвъ , м҃ѕ .

Всѝ ꙗ҆зы́цы вᲂсплещи́те рꙋка́ми , вᲂскли́кните бг҃ꙋ гла́сᲂмъ ра́дᲂсти . Ꙗ҆́кѡ гдⷭ҇ь вы́шнїи стра́шенъ , цр҃ь ве́лїи по  все́й землѝ . Пᲂкᲂрѝ лю́ди на́мъ , и҆ ꙗ҆зы́ки по́д̾ нᲂги на́ша . И҆збра̀ на́мъ дᲂстᲂѧ́нїе свᲂѐ , дᲂбро́тꙋ і҆а́кѡвлю ю҆́же вᲂз̾любѝ . Взы́де бг҃ъ в̾  вᲂскликнᲂве́нїи , гдⷭ҇ь во́ гласѣ трꙋ́бнѣ . По́йте бг҃ꙋ на́шемꙋ по́йте , по́йте цр҃е́ви на́шемꙋ по́йте . Ꙗ҆́кѡ цр҃ь все́й землѝ бг҃ъ , по́йте разꙋ́мнѡ . Вᲂцр҃и́сѧ бг҃ъ над̾ ꙗ҆зы́ки , бг҃ъ сѣди́тъ на прⷭ҇то́лѣ ст҃ѣ́мъ свᲂе́мъ . Кнѧ́зи лю́дьстїи сᲂбра́шасѧ съ бг҃ᲂмъ а҆враа́млемъ , ꙗ҆́кѡ бж҃їи держа́внїи землѝ ѕѣлѡ̀ вᲂз̾несо́шасѧ .

ѱл҃о́мъ дв҃дᲂвъ , м҃з .

Ве́лїи гдⷭ҇ь , и҆ хва́ленъ ѕѣлѡ̀ , во́ градѣ бг҃а на́шегѡ , в̾ гᲂрѣ̀ ст҃ѣ́й є҆гѡ̀ . Бл҃гᲂкᲂре́ннᲂмъ ра́дᲂванїемъ всеѧ̀ землѝ , го́ры сїѡ́нскїѧ , ре́бра сѣ́верᲂва , гра́дъ цр҃ѧ вели́кагѡ . Бг҃ъ въ тѧ́жестѣхъ є҆гѡ̀ зна́емь є҆́сть , є҆гда̀ застꙋпа́етъ и҆̀ . Ꙗ҆́кѡ сѐ цр҃їе зе́мстїи сᲂбра́шасѧ , снидо́шасѧ вкꙋ́пѣ . Ті́и ви́дѣвше та́кѡ диви́шасѧ , смꙋти́шасѧ пᲂд̾виза́шасѧ , тре́петъ прїѧ́тъ ѧ҆̀ . Тꙋ̀ бᲂлѣ́зни ꙗ҆́кѡ ражда́ющей . дх҃ᲂмъ бꙋ́рнᲂмъ сᲂкрꙋши́ши кᲂраблѝ ѳарсі́йскїѧ . Ꙗ҆́кᲂже слы́шахᲂмъ , та́кѡ и҆ ви́дѣхᲂмъ , во́ градѣ гдⷭ҇а си́лъ , во́ градѣ бг҃а на́шегѡ . Бг҃ъ ѡ҆снᲂва̀ и҆̀ в̾ вѣ́къ . прїѧ́хᲂмъ бж҃е млⷭ҇ть твᲂю̀ , пᲂсредѣ̀ люде́й твᲂи́хъ . По и҆́мени твᲂемꙋ̀ бж҃е , та́кѡ и҆ хвала̀ твᲂѧ̀ на кᲂнцы́хъ землѝ , пра́вды и҆спо́лнь десни́ца твᲂѧ̀ . Да вᲂз̾весели́тсѧ гᲂра̀ сїѡ́нскаѧ , и҆ вᲂз̾ра́дꙋютсѧ дще́ри і҆ꙋде́йскїѧ , сꙋде́бъ ра́ди твᲂи́хъ гдⷭ҇и . Ѡ҆бы́дите сїѡ́нъ и҆ прїимѣ́те и҆̀ , вᲂз̾вѣсти́те в̾ стᲂлпѣ́хъ є҆гѡ̀ . Пᲂлᲂжи́те срⷣца̀ ва́ша в̾ си́лꙋ є҆гѡ̀ , и҆ раздѣли́те до́мъ є҆гѡ̀ , ꙗ҆́кѡ да пᲂвѣ́сте в̾ ро́дѣ и҆́нᲂмъ . Ꙗ҆́кѡ то́й є҆́сть бг҃ъ на́шъ во́ вѣки и҆ в̾ вѣ́къ вѣ́ка . то́й ᲂу҆пасе́тъ на́съ во́ вѣки .

ѱл҃о́мъ дв҃дᲂвъ , м҃и .

Оу҆слы́шите сїѧ̀ всѝ ꙗ҆зы́цы , внꙋши́те всѝ живꙋ́щїи по вселе́ннѣй . Земні́и же и҆ сы́нᲂве чл҃честїи , вкꙋ́пѣ бᲂга́тъ и҆ ᲂу҆бо́гъ . Оу҆ста̀ мᲂѧ̀ вᲂз̾гл҃ютъ премꙋ́дрᲂсть , и҆ пᲂꙋче́нїе срⷣца мᲂегѡ̀ ра́зꙋмъ . Приклᲂню̀ в̾ при́тчахъ ᲂу҆́хо мᲂѐ , ѿве́рзꙋ во ѱалты́ри гана́нїе мᲂѐ . Въскꙋ́ю бᲂю́сѧ в̾ де́нь лю́тъ ; без̾зако́нїе пѧты̀ мᲂеѧ̀ ѡ҆бы́детъ мѧ̀ . Надѣ́ющїисѧ си́лѣ свᲂе́й , и҆ мно́жествᲂмъ бᲂга́тства свᲂегѡ̀ хвалѧ́щесѧ . Бра́тъ не и҆зба́витъ , и҆зба́витъ ли чл҃къ ; не да́стъ бг҃ꙋ и҆змѣ́ны за сѧ̀ , и҆ цѣ́нꙋ и҆збавле́нїѧ дш҃и свᲂеѧ̀ ; и҆ ᲂу҆трꙋди́сѧ во́ вѣки , и҆ жи́въ бꙋ́детъ до кᲂнца̀ . Не ᲂу҆́зритъ па́гꙋбы , є҆гда̀ ви́дитъ премꙋ́дрыѧ ᲂу҆мира́юща . Вкꙋ́пѣ безꙋ́менъ и҆ несмы́сленъ пᲂги́бнета , и҆ ѡ҆ста́вѧтъ чꙋжди́мъ бᲂга́тство свᲂѐ , и҆ гро́би и҆́хъ жили́ща и҆́хъ во́ вѣки . Селе́нїѧ и҆́хъ в̾ ро́дъ и҆ ро́дъ , нареко́ша и҆мена̀ свᲂѧ̀ на земны́хъ . и҆ чл҃къ в̾ че́сти сы́и , не разꙋмѣ̀ , прилᲂжи́сѧ скᲂтѡ́мъ несмы́сленымъ и҆ ᲂу҆пᲂдо́бисѧ и҆́мъ . Се́й пꙋ́ть и҆́хъ сᲂбла́знъ и҆́мъ , и҆ пᲂси́хъ во ᲂу҆стѣ́хъ свᲂи́хъ бл҃гᲂи҆зво́лѧтъ . Ꙗ҆́кѡ ѻ҆вца̀ во а҆́дѣ пᲂлᲂже́ни сꙋ́ть , сме́рть ᲂу҆пасе́тъ и҆́хъ . и҆ ѡ҆блада́ютъ и҆́ми пра́вїи заꙋ́тра . И҆ по́мᲂщь и҆́хъ ѡ҆бетша́етъ во а҆́дѣ , ѿ сла́вы свᲂеѧ̀ и҆зри́нᲂвени бы́ша . Ѻ҆ба́че бг҃ъ и҆зба́витъ дш҃ꙋ мᲂю̀ и҆з̾ рꙋкѝ а҆́дᲂвы , є҆гда̀ прїе́млетъ мѧ̀ . Не ᲂу҆бᲂю́сѧ є҆гда̀ разбᲂга́тѣетъ чл҃къ , и҆лѝ є҆гда̀ ᲂу҆мно́житсѧ сла́ва до́мꙋ є҆гѡ̀ . Ꙗ҆́кѡ є҆гда̀ ᲂу҆мира́етъ , не ѡ҆ста́витъ  ли всѧ̀ . нижѐ сни́детъ с̾ ни́мъ сла́ва є҆гѡ̀ ; Ꙗ҆́кѡ дш҃а є҆гѡ̀ въ живᲂтѣ̀ є҆гѡ̀ бл҃гᲂслᲂви́тсѧ , и҆спᲂвѣ́стьтисѧ є҆гда̀ бл҃го сᲂтвᲂри́ши є҆мꙋ̀ . Всели́тсѧ да́же до́ рᲂда ѻ҆ц҃ъ свᲂи́хъ , да́же до́  вѣка не ᲂу҆́зритъ свѣ́та . И҆ чл҃къ въ че́сти сы́и , не разꙋмѣ̀ , прилᲂжи́сѧ скᲂтѣ́хъ несмы́сленыхъ , и҆ ᲂу҆пᲂдо́бисѧ и҆́мъ .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

ѱл҃о́мъ дв҃дᲂвъ , м҃ѳ .

Бг҃ъ бᲂгѡ́мъ гдⷭ҇ь гл҃а , и҆ призва̀ зе́млю , ѿ вᲂсто́къ сл҃нца до за́падъ . Ѿ сїѡ́на бл҃гᲂлѣ́пїе красᲂты̀ є҆гѡ̀ . Бг҃ъ ꙗ҆́вѣ прїи́детъ , бг҃ъ на́шъ , и҆ не премᲂлчи́тъ . ѻ҆́гнь пред̾ ни́мъ вᲂз̾гᲂри́тсѧ , и҆ ѻ҆́крестъ є҆гѡ̀ бꙋ́рѧ ѕѣ́льна . Призᲂве́тъ не́бо свы́ше , и҆ зе́млю разсꙋди́ти лю́ди свᲂѧ̀ . Сᲂберѣ́те є҆мꙋ̀ прпⷣбныѧ є҆гѡ̀ , завѣща́ющїѧ завѣ́тъ є҆гѡ̀ ѡ҆ же́ртвахъ . И҆ вᲂз̾вѣстѧ́тъ нб҃са̀ пра́вдꙋ є҆гѡ̀ , ꙗ҆́кѡ бг҃ъ сꙋдїѧ̀ є҆́сть . Слы́шите лю́дїе мᲂѝ , и҆ вᲂз̾глаго́лю ва́мъ . і҆зра́илю , и҆ засвидѣ́тельствꙋю тѝ . бг҃ъ бг҃ъ тво́й є҆́смь а҆́зъ . Не ѡ҆ же́ртвахъ твᲂи́хъ ѡ҆бличꙋ́ тѧ , всесᲂжже́нїѧ  же твᲂѧ̀ предо мно́ю сꙋ́ть вы́нꙋ . Не прїимꙋ̀ ѿ́ дᲂмꙋ твᲂегѡ̀ тельца̀ , ни ѿ ста́дъ твᲂи́хъ кᲂзлы̀ . Ꙗ҆́кѡ мᲂѝ сꙋ́ть всѝ ѕвѣ́рїе дꙋбра́внїи , ско́ти въ гᲂра́хъ , и҆ вᲂло́ве . Пᲂзна́хъ всѧ̀ пти́цы небе́сныѧ , и҆ красᲂта̀ се́льнаѧ со мно́ю є҆́сть . А҆́ще вза́лчꙋ , не рекꙋ̀ тебѣ̀ , мᲂѧ́ бо є҆́сть вселе́ннаѧ , и҆ и҆спᲂлне́нїе є҆ѧ̀ . Є҆да̀ ꙗ҆́мъ мѧса̀ ю҆́нча ; и҆лѝ кро́вь ко́злїю пїю̀ ; Пᲂжрѝ бг҃ᲂви же́ртвꙋ хвалѣ̀ , и҆ вᲂз̾да́ждь вы́шнемꙋ мᲂли́твы твᲂѧ̀ . И҆ призᲂви́ мѧ в̾ де́нь печа́ли твᲂеѧ̀ , и҆ и҆зба́влю тѧ̀ , и҆ прᲂсла́виши мѧ̀ . Грѣ́шникꙋ же речѐ бг҃ъ , въскꙋ́ю ты̀ пᲂвѣ́даеши ѡ҆правда́нїѧ мᲂѧ̀ , и҆ вᲂспрїе́млеши завѣ́тъ мо́й ᲂу҆стны̀ твᲂи́ми . Ты́ же вᲂз̾ненави́дѣ наказа́нїе , и҆ ѿве́рже слᲂвеса̀ мᲂѧ̀ вспѧ́ть . А҆́ще ви́дѧше та́тѧ , теча́ше с̾ ни́мъ , и҆ с̾ прелюбᲂдѣ́емъ ᲂу҆ча́стїе свᲂѐ пᲂлага́ше . Оу҆ста̀ твᲂѧ̀ ᲂу҆мно́жиша ѕло́бꙋ , и҆ ꙗ҆зы́къ тво́й сплета́ше льще́нїѧ . Сѣдѧ̀ на бра́та свᲂегѡ̀ клевета́ше , и҆ на́  сн҃а мт҃ре свᲂеѧ̀ пᲂлага́ше сᲂбла́знъ . Сїѧ̀ сᲂтвᲂри́лъ є҆сѝ , и҆ ᲂу҆мᲂлча́хъ . вᲂз̾непщева́лъ є҆сѝ без̾зако́нїе , ꙗ҆́кѡ бꙋ́дꙋ тебѣ̀ пᲂдо́бенъ . ѡ҆бличꙋ́ тѧ , и҆ пред̾ста́влю пред̾ лице́мъ твᲂи́мъ грѣхѝ твᲂѧ̀ . Разꙋмѣ́йте же сїѧ̀ забыва́ющїи бг҃а , да некᲂгда̀ пᲂхи́титъ и҆ не бꙋ́детъ и҆збавлѧ́ѧи . Же́ртва хвалѣ̀ прᲂсла́витъ мѧ̀ , и҆ тꙋ̀ пꙋ́ть , и҆́мже ꙗ҆влю̀ є҆мꙋ̀ спасе́нїе мᲂѐ .

ѱл҃о́мъ дв҃дᲂвъ , н҃ .

Пᲂми́лꙋй  мѧ бж҃е по вели́цѣй млⷭ҇ти твᲂе́й . И҆ по мно́жествꙋ щедро́тъ твᲂи́хъ , ѡ҆чи́сти без̾зако́нїе мᲂѐ . Наипа́че ѡ҆мы́й мѧ ѿ без̾зако́нїѧ мᲂегѡ̀ , и҆ ѿ грѣха̀ мᲂегѡ̀ ѡ҆чи́сти мѧ . Ꙗ҆́кѡ без̾зако́нїе мᲂѐ а҆́зъ зна́ю , и҆ грѣ́хъ мо́й предо мно́ю є҆́сть вы́нꙋ . Тебѣ̀ є҆ди́нᲂмꙋ сᲂгрѣши́хъ , и҆ лꙋка́вᲂе пред̾ тᲂбо́ю сᲂтвᲂри́хъ . Ꙗ҆́кѡ да ѡ҆правди́шисѧ во слᲂвесѣ́хъ свᲂи́хъ , и҆ пᲂбѣди́ши внегда̀ сꙋди́ти . Се́бо въ без̾зако́нїихъ зача́тъ є҆́смь , и҆ во грѣсѣ́хъ рᲂди́ мѧ мт҃и мᲂѧ̀ . Се́бо и҆́стинꙋ вᲂз̾люби́лъ є҆сѝ , без̾вѣ́стнаѧ и҆ та́йнаѧ премꙋ́дрᲂсти твᲂеѧ̀ , ꙗ҆ви́лъ ми є҆сѝ . Ѡ҆крᲂпи́ши мѧ ѵ҆с̾со́пᲂмъ , и҆ ѡ҆чи́щꙋсѧ . ѡ҆мы́еши мѧ̀ , и҆ па́че снѣ́га ᲂу҆бѣлю́сѧ . Слꙋ́хꙋ мᲂемꙋ̀ да́си ра́дᲂсть и҆ весе́лїе , вᲂз̾ра́дꙋютсѧ ко́сти смире́нныѧ . Ѿвратѝ лицѐ твᲂѐ ѿ грѣ́хъ мᲂи́хъ , и҆ всѧ̀ без̾зако́нїѧ мᲂѧ̀ ѡ҆чи́сти . Се́рдце чи́сто сᲂзи́жди во мнѣ̀ бж҃е , и҆ дх҃ъ пра́въ ѡ҆бнᲂвѝ во ᲂу҆тро́бѣ мᲂе́й . Не ѿве́рзи менѐ ѿ лица̀ твᲂегѡ̀ , и҆ дх҃а твᲂегѡ̀ ст҃а́гѡ не ѿи҆мѝ ѿ менѐ . Вᲂз̾да́ждь мѝ ра́дᲂсть спасе́нїѧ твᲂегѡ̀ , и҆ дх҃ᲂмъ влⷣчнᲂмъ ᲂу҆тверди́ мѧ . Наꙋчꙋ̀ без̾зако́нныѧ пꙋте́мъ твᲂи́мъ , и҆ нечести́вїи к̾ тебѣ̀ ѡ҆братѧ́тсѧ . И҆зба́ви мѧ ѿ крᲂві́й бж҃е , бж҃е спасе́нїѧ мᲂегѡ̀ , вᲂз̾ра́дꙋетсѧ ꙗ҆зы́къ мо́й пра́вдѣ твᲂе́й . Гдⷭ҇и ᲂу҆стнѣ̀ мᲂѝ ѿве́рзеши , и҆ ᲂу҆ста̀ мᲂѧ̀ вᲂз̾вѣстѧ́тъ хвалꙋ̀ твᲂю̀ . Ꙗ҆́кѡ а҆́ще  бы вᲂсхᲂтѣ́лъ же́ртвѣ , да́лъ бы́хъ ᲂу҆́бѡ . всесᲂжже́нїѧ не бл҃гᲂвᲂли́ши . Же́ртва бг҃ꙋ дх҃ъ сᲂкрꙋше́нъ . срⷣце сᲂкрꙋше́но и҆ смире́но бг҃ъ не  ᲂу҆ничижи́тъ . Оу҆блажѝ гдⷭ҇и бл҃гᲂвᲂле́нїемъ твᲂи́мъ сїѡ́на , и҆ да сᲂзи́ждꙋтсѧ стѣ́ны і҆єрᲂсали́мскїѧ . Тᲂгда̀ бл҃гᲂвᲂли́ши же́ртвꙋ пра́вдѣ , вᲂз̾нᲂше́нїе и҆ всесᲂжега́емаѧ . Тᲂгда̀ вᲂз̾лᲂжа́тъ на ѻ҆лта́рь тво́й тельца̀ .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

ѱл҃о́мъ дв҃дᲂвъ , н҃а .

Что́  сѧ хва́лиши въ ѕло́бѣ си́льне без̾зако́нїемъ ; ве́сь де́нь не пра́вдꙋ ᲂу҆мы́сливъ . ꙗ҆зы́къ тво́й ꙗ҆́кѡ бри́тва и҆з̾ѡ҆щре́нна , сᲂтвᲂри́лъ є҆сѝ ле́сть . Вᲂз̾люби́лъ є҆сѝ ѕло́бꙋ , па́че бл҃гᲂсты́ни , не  пра́вдꙋ , не́же глаго́лати пра́вдꙋ . Вᲂз̾люби́лъ є҆сѝ всѧ̀ гл҃ы пᲂто́пныѧ , ꙗ҆зы́къ льсти́въ . Сегѡ̀ ра́ди бг҃ъ разрꙋши́тъ  тѧ до кᲂнца̀ , вᲂсто́ргнетъ тѧ̀ и҆ пресели́тъ  тѧ ѿ селе́нїѧ твᲂегѡ̀ , и҆ ко́рень тво́й ѿ землѝ живы́хъ . Оу҆́зрѧтъ пра́веднїи и҆ ᲂу҆бᲂѧ́тсѧ , и҆ ѡ҆ не́мъ вᲂз̾смѣю́тсѧ и҆ рекꙋ́тъ . Се́й челᲂвѣ́къ , и҆́же не  пᲂлᲂжѝ бг҃а пᲂмо́щника себѣ̀ , но ᲂу҆пᲂва̀ на мно́жество бᲂга́тства свᲂегѡ̀ , и҆ вᲂз̾мо́же сꙋето́ю свᲂе́ю . А҆́зъ же ꙗ҆́кѡ ма́слина плᲂдᲂви́та в̾  дᲂмꙋ̀ бж҃їи , ᲂу҆пᲂва́хъ на млⷭ҇ть бж҃їю во́ вѣки , и҆ в̾ вѣ́къ вѣ́ка . И҆спᲂвѣ́мсѧ тебѣ̀ во́ вѣки , ꙗ҆́кѡ сᲂтвᲂри́лъ є҆сѝ . и҆ терплю̀ и҆́мѧ твᲂѐ ꙗ҆́кѡ бл҃го , пред̾ прпⷣбными твᲂи́ми .

ѱл҃о́мъ дв҃дᲂвъ , н҃в .

Речѐ безꙋ́менъ въ срⷣцы свᲂе́мъ , нѣ́сть бг҃а . Растлѣ́ша и҆ ѡ҆мрази́шасѧ въ  без̾зако́нїихъ , нѣ́сть твᲂрѧ́и бл҃гᲂсты́ню . Бг҃ъ с̾ нб҃сѐ прини́че на́  сыны челᲂвѣ́ческїѧ , ви́дѣти , а҆́ще є҆́сть разꙋмѣва́ѧ , и҆лѝ взыска́ѧ бг҃а ; Всѝ ᲂу҆клᲂни́шасѧ , вкꙋ́пѣ непᲂтре́бни бы́ша . нѣ́сть твᲂрѧ́и бл҃го́е , нѣ́сть до є҆ди́нагѡ . Ни лѝ разꙋмѣ́ютъ всѝ дѣ́лающїи без̾зако́нїе , снѣда́ющїи лю́ди мᲂѧ̀ в̾ хлѣ́ба мѣ́стѡ ; Бг҃а не призва́ша , та́мѡ ᲂу҆страши́шасѧ стра́ха , и҆дѣ́же не бѣ̀ стра́ха . Ꙗ҆́кѡ бг҃ъ разсы́па ко́сти чл҃кᲂꙋго́дникѡмъ . пᲂстыдѣ́шасѧ , ꙗ҆́кѡ бг҃ъ ᲂу҆ничижѝ и҆́хъ . Кто̀ да́стъ ѿ сїѡ́на спасе́нїе і҆зра́илево ; внегда̀ вᲂз̾врати́тъ бг҃ъ плѣне́нїе люде́й свᲂи́хъ , вᲂз̾ра́дꙋетсѧ і҆а́кѡвъ , и҆ вᲂз̾весели́тсѧ і҆зра́иль .

ѱл҃о́мъ дв҃дᲂвъ , н҃г .

Бж҃е во́ и҆мѧ твᲂѐ спаси́ мѧ , и҆ в̾ си́лѣ твᲂе́й сꙋди́ ми . Бж҃е ᲂу҆слы́ши мл҃твꙋ мᲂю̀ , внꙋшѝ глаго́лы ᲂу҆́стъ мᲂи́хъ . Ꙗ҆́кѡ чꙋ́ждїи вᲂста́ша на мѧ̀ , и҆ крѣ́пцыи взыска́ша дш҃ꙋ мᲂю̀ , и҆ не  пред̾лᲂжи́ша бг҃а пред̾ сᲂбо́ю . Се́бо бг҃ъ пᲂмᲂга́етъ ми , и҆ гдⷭ҇ь застꙋ́пникъ дш҃и мᲂе́й . Ѿврати́тъ ѕла́ѧ врагѡ́мъ мᲂи́мъ , и҆́стинᲂю твᲂе́ю пᲂтребѝ и҆́хъ . Во́лею пᲂжрꙋ̀ тебѣ̀ , и҆спᲂвѣ́мсѧ и҆́мени твᲂемꙋ̀ гдⷭ҇и , ꙗ҆́кѡ бл҃го . Ꙗ҆́кѡ ѿ всѧ́кїѧ печа́ли и҆зба́ви мѧ . и҆ на врагѝ мᲂѧ̀ вᲂз̾зрѣ̀ ѻ҆́ко мᲂѐ .

ѱл҃о́мъ дв҃дᲂвъ , н҃д .

Внꙋшѝ бж҃е мл҃твꙋ мᲂю̀ , и҆ не пре́зри мᲂле́нїѧ мᲂегѡ̀ . вᲂньми́ ми , и҆ ᲂу҆слы́ши мѧ . Вᲂз̾скᲂрбѣ́хъ печа́лїю мᲂе́ю , и҆ смꙋти́хсѧ , ѿ́  гласа вра́жїѧ и҆ ѿстꙋже́нїѧ грѣ́шнича . Ꙗ҆́кѡ ᲂу҆клᲂни́ша на мѧ̀ без̾зако́нїе , и҆ во́ гнѣвѣ враждᲂва́хꙋ мѝ . Се́рдце мᲂѐ смꙋти́сѧ во мнѣ̀ , и҆ стра́хъ сме́рти нападѐ на мѧ̀ . Бᲂѧ́знь и҆ тре́петъ прїи́де на мѧ̀ , и҆ пᲂкры́  мѧ тма̀ . И҆ рѣ́хъ , кто̀ да́стъ  ми крилѣ̀ ꙗ҆́кѡ го́лꙋби ; и҆ пᲂлещꙋ̀ , и҆ пᲂчі́ю . Сѐ ᲂу҆дали́хсѧ бѣ́гаѧ , и҆ вᲂдвᲂри́хсѧ въ  пꙋсты́ни . Ча́ѧхъ бг҃а спаса́ющагѡ мѧ̀ , ѿ малᲂдꙋ́шїѧ и҆ бꙋ́ри . Пᲂтᲂпѝ гдⷭ҇и , и҆ раздѣлѝ ꙗ҆зы́ки и҆́хъ . ꙗ҆́кѡ ви́дѣхъ без̾зако́нїе , и҆ пререка́нїе во́ градѣ . Де́нь и҆ но́щь ѡ҆бы́детъ и҆̀ по стѣна́мъ є҆гѡ̀ , без̾зако́нїе и҆ трꙋ́дъ пᲂсредѣ̀ є҆гѡ̀ , и҆ не пра́вда . И҆ не  ѡ҆скꙋдѣ̀ ѿ пꙋте́й є҆гѡ̀ ли́хва и҆ ле́сть . Ꙗ҆́кѡ а҆́ще бы вра́гъ пᲂнᲂси́лъ мѝ , претерпѣ́лъ бы́хъ ᲂу҆́бѡ . И҆ а҆́ще бы ненавидѧ́и  мѧ на мѧ̀ велерѣ́чевалъ , ᲂу҆кры́лбыхсѧ ѿ негѡ̀ . Ты́  же чл҃че равнᲂдꙋ́шне , влⷣко мо́й и҆ зна́емыи мо́й , и҆́же кꙋ́пнѡ наслади́лъ мѧ є҆сѝ бра́шна , во́ храмѣ бж҃їи хᲂди́хᲂвѣ є҆динᲂмышле́нїемъ . Да прїи́детъ же сме́рть на нѧ̀ , и҆ сни́дꙋтъ во а҆́дъ жи́ви . ꙗ҆́кѡ лꙋка́вство в̾ жили́щихъ и҆́хъ , пᲂсредѣ̀ и҆́хъ . А҆́зъ къ бг҃ꙋ вᲂз̾ва́хъ , и҆ гдⷭ҇ь ᲂу҆слы́ша мѧ . Ве́черъ и҆ заꙋ́тра и҆ пᲂлꙋ́дне , пᲂвѣ́мъ и҆ вᲂз̾вѣщꙋ̀ , и҆ ᲂу҆слы́шитъ гла́съ мо́й . И҆зба́витъ ми́рᲂмъ дш҃ꙋ мᲂю̀ ѿ приближа́ющихсѧ мнѣ̀ , ꙗ҆́кѡ во мно́зѣ бѧ́хꙋ со мно́ю . Оу҆слы́шитъ бг҃ъ , и҆ смири́тъ и҆́хъ , сы́и пре́жде вѣ́къ . Нѣ́сть бо и҆́мъ и҆змѣне́нїѧ , ꙗ҆́кѡ не ᲂу҆бᲂѧ́шасѧ бг҃а . Про́стретъ рꙋ́кꙋ свᲂю̀ на вᲂз̾даѧ́нїе , ѡ҆скверни́ша завѣ́тъ є҆гѡ̀ . Раздѣли́шасѧ ѿ́  гнѣва лица̀ є҆гѡ̀ , и҆ прибли́жишасѧ срⷣца̀ и҆́хъ . ᲂу҆мѧ́кнꙋша слᲂвеса̀ и҆́хъ па́че є҆ле́ѧ , и҆ та̀ сꙋ́ть стрѣ́лы . Вᲂз̾ве́рзи на́ гдⷭ҇а печа́ль твᲂю̀ , и҆ то́й тѧ̀ препита́етъ . не да́стъ в̾ вѣ́къ мᲂлвы̀ пра́ведникꙋ . Ты́  же бж҃е низ̾веде́ши и҆́хъ в̾ стꙋдене́цъ и҆стлѣ́нїѧ . Мꙋ́жїе кро́ви и҆ льстѝ , не препᲂлᲂвѧ́тъ дне́й свᲂи́хъ , а҆́зъ же гдⷭ҇и ᲂу҆пᲂва́ю на  тѧ̀ .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .