каѳи́сма , и҃ . ѱл҃о́мъ дв҃дᲂвъ , н҃є .

Пᲂми́лꙋй  мѧ бж҃е , ꙗ҆́кѡ пᲂпра́ мѧ челᲂвѣ́къ , ве́сь де́нь бᲂрѧ̀ стꙋжи́ ми . Пᲂпра́ша мѧ вразѝ мᲂѝ ве́сь де́нь , ꙗ҆́кѡ мно́зи бᲂрю́щїи мѧ̀ свы́ше . Въ де́нь не ᲂу҆бᲂю́сѧ , а҆́зъ же ᲂу҆пᲂва́ю на  тѧ̀ . Ѻ҆́ бз҃ѣ пᲂхвалю̀ слᲂвеса̀ мᲂѧ̀ , на́  бг҃а ᲂу҆пᲂва́хъ , не ᲂу҆бᲂю́сѧ что̀ сᲂтвᲂри́тъ мнѣ̀ пло́ть ; Ве́сь де́нь слᲂве́съ мᲂи́хъ гнꙋша́хꙋсѧ , на мѧ̀ всѧ̀ пᲂмышле́нїѧ и҆́хъ на ѕло̀ . Вселѧ́тсѧ и҆ скры́ютъ , ті́и пѧ́тꙋ мᲂю̀ хранѧ́тъ . Ꙗ҆́кᲂже пᲂтерпѣ́ша дш҃ꙋ мᲂю̀ , ни ѡ҆ чесѡ́мъ же ѡ҆ста́виши и҆́хъ . гнѣ́вᲂмъ лю́ди низ̾бїе́ши . Бж҃е живо́тъ мо́й вᲂз̾вѣсти́хъ тебѣ̀ , пᲂлᲂжи́лъ є҆сѝ сле́зы мᲂѧ̀ пред̾ сᲂбо́ю , ꙗ҆́кѡ и҆ во ѡ҆бѣтᲂва́нїи твᲂе́мъ . Да вᲂз̾вратѧ́тсѧ вразѝ мᲂѝ вспѧ́ть , во́ньже де́нь а҆́ще призᲂвꙋ́ тѧ . сѐ пᲂзна́хъ , ꙗ҆́кѡ бг҃ъ мо́й є҆сѝ ты̀ . Ѻ҆́ бз҃ѣ пᲂхвалю̀ глаго́лъ , ѡ҆́ гдⷭ҇ѣ пᲂхвалю̀ сло́во . На́ бг҃а ᲂу҆пᲂва́хъ , не ᲂу҆бᲂю́сѧ что̀ сᲂтвᲂри́тъ мнѣ̀ челᲂвѣ́къ ; Во мнѣ̀ бж҃е мᲂли́твы , ꙗ҆́же вᲂзда́мъ хвалѣ̀ твᲂе́й . Ꙗ҆́кѡ и҆зѧ́тъ дш҃ꙋ мᲂю̀ ѿ сме́рти , ѻ҆́чи мᲂѝ ѿ сле́зъ , и҆ но́зѣ мᲂѝ ѿ пᲂпᲂлзнᲂве́нїѧ . бл҃гᲂꙋгᲂждꙋ̀ пре́д̾ гдⷭ҇емъ , во́ свѣтѣ живы́хъ .

ѱл҃о́мъ дв҃дᲂвъ , н҃ѕ .

Пᲂми́лꙋй  мѧ бж҃е , пᲂми́лꙋй мѧ , ꙗ҆́кѡ на тѧ̀ ᲂу҆пᲂва̀ дш҃а мᲂѧ̀ . И҆ на  сѣ́нь крилꙋ̀ твᲂе́ю надѣ́юсѧ , до́ндеже пре́йдетъ без̾зако́нїе . Вᲂз̾зᲂвꙋ̀ къ бг҃ꙋ вы́шнемꙋ , бг҃ꙋ бл҃гᲂдѣ́ѧвшемꙋ мнѣ̀ . Пᲂсла̀ съ нб҃сѐ , и҆ спасе́ мѧ . дадѐ въ пᲂнᲂше́нїе пᲂпира́ющїѧ мѧ̀ . Пᲂсла̀ бг҃ъ млⷭ҇ть свᲂю̀ , и҆ и҆́стинꙋ свᲂю̀ , и҆ и҆зѧ́тъ дш҃ꙋ мᲂю̀ ѿ среды̀ ски́менъ . пᲂспа́хъ смꙋще́нъ . Сы́нᲂве челᲂвѣ́честїи , зꙋ́бы и҆́хъ ѻ҆рꙋ́жїѧ и҆ стрѣ́лы , и҆ ꙗ҆зы́къ и҆́хъ ме́чь ѻ҆́стръ . Вᲂз̾неси́сѧ на  нб҃са̀ бж҃е , и҆ по все́й землѝ сла́ва твᲂѧ̀ . Сѣ́ть ᲂу҆гᲂто́ваша нᲂга́мъ мᲂи́мъ , и҆ смири́ша дш҃ꙋ мᲂю̀ . И҆скᲂпа́ша пред̾ лице́мъ мᲂи́мъ ꙗ҆́мꙋ , и҆ впадо́шасѧ в̾ ню̀ . Гᲂто́во срⷣце мᲂѐ бж҃е , гᲂто́во срⷣце мᲂѐ , пᲂю̀ и҆ вᲂспᲂю̀ в̾ сла́вѣ мᲂе́й . Вᲂста́ни сла́ва мᲂѧ̀ , вᲂста́ни ѱалты́рю и҆ гꙋ́сли , вᲂста́нꙋ ра́нѡ . И҆спᲂвѣ́мсѧ тебѣ̀ в̾ лю́дѣхъ гдⷭ҇и , пᲂю̀ тебѣ̀ во  ꙗ҆зы́цѣхъ . Ꙗ҆́кѡ вᲂз̾вели́чисѧ до  небе́съ млⷭ҇ть твᲂѧ̀ , и҆ да́же до ѻ҆́блакъ и҆́стина твᲂѧ̀ . Вᲂз̾неси́сѧ на небеса̀ бж҃е , и҆ по все́й землѝ сла́ва твᲂѧ̀ .

ѱл҃о́мъ дв҃дᲂвъ , н҃з .

А҆́ще вᲂи́стинꙋ ᲂу҆́бѡ пра́вдꙋ гл҃ете , пра́ваѧ сꙋди́те сы́нᲂве челᲂвѣ́честїи . И҆́бо въ се́рдцы без̾зако́нїе дѣ́лаете на землѝ , не  пра́вдꙋ рꙋ́ки ва́ша сплета́ютъ . Ѡ҆чꙋжде́ни бы́ша грѣ́шницы ѿ лᲂже́снъ , заблꙋди́ша ѿ́  чрева , гл҃аша лжꙋ̀ . Ꙗ҆́рᲂсть и҆́хъ по пᲂдо́бїю ѕмїинꙋ̀ , ꙗ҆́кѡ а҆́спида глꙋ́ха затыка́ющагѡ ᲂу҆́ши свᲂѝ . И҆́же неслы́шитъ гла́са ѡ҆бава́ющихъ . ѡ҆бава́емъ , ѡ҆бава́етсѧ ѿ премꙋ́дра . Бг҃ъ сᲂкрꙋши́тъ зꙋ́бы и҆́хъ во ᲂу҆стѣ́хъ и҆́хъ , и҆ члѣно́вныѧ львѡ́мъ сᲂкрꙋши́лъ є҆́сть гдⷭ҇ь . Оу҆ничижа́тсѧ ꙗ҆́кѡ вᲂда̀ мимᲂтекꙋ́щаѧ , напрѧ́жетъ лꙋ́къ сво́й до́ндеже и҆знемо́гꙋтъ . Ꙗ҆́кѡ во́скъ раста́ѧвъ ѿи́мꙋтсѧ . падѐ ѻ҆́гнь на ни́хъ , и҆ неви́дѣша сл҃нца . Пре́жде да́же разꙋмѣ́ти те́рнїѧ ва́шегѡ ра́мна , ꙗ҆́кѡ жи́вы , ꙗ҆́кѡ во́  гнѣвѣ по́жретъ и҆́хъ . Вᲂз̾весели́тсѧ пра́ведникъ , є҆гда̀ ви́дитъ ѿмще́нїе , рꙋ́цѣ свᲂѝ ᲂу҆мы́етъ въ  крᲂвѝ грѣ́шника . И҆ рече́тъ чл҃къ , а҆́ще ᲂу҆́бѡ є҆́сть пло́дъ пра́ведника , а҆́ще є҆́сть бг҃ъ сꙋдѧ̀ и҆́мъ на землѝ .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

ѱл҃о́мъ дв҃дᲂвъ , н҃и .

И҆зми́  мѧ ѿ вра́гъ мᲂи́хъ бж҃е , и҆ ѿ вᲂста́ющихъ на мѧ̀ и҆зба́ви мѧ . И҆зми́ мѧ ѿ твᲂрѧ́щихъ без̾зако́нїе , и҆ ѿ мꙋ́жь кро́ве спаси́ мѧ . Ꙗ҆́кѡ сѐ ᲂу҆лᲂви́ша дш҃ꙋ мᲂю̀ , нападо́ша на мѧ̀ крѣ́пцыи . Ни без̾зако́нїе мᲂѐ , ни грѣ́хъ мо́й гдⷭ҇и . Без̾ без̾зако́нїѧ теко́хъ , и҆ напра́вихъ . Вᲂста́ни в̾ стрѣ́тенїе мᲂѐ , и҆ ви́ждь . и҆ ты̀ гдⷭ҇и бж҃е си́лъ , бж҃е і҆зра́илевъ . Вᲂньмѝ пᲂсѣти́ти всѧ̀ ꙗ҆зы́ки , не  ᲂу҆ще́дриши всѧ̀ дѣ́лающїѧ без̾зако́нїе . Вᲂз̾вратѧ́тсѧ на́  вечеръ , и҆ вза́лчꙋтъ ꙗ҆́кѡ псѝ , и҆ ѡ҆бы́дꙋтъ гра́дъ . Сѐ ті́и ѿвѣща́ютъ ᲂу҆сты̀ свᲂи́ми , и҆ ѻ҆рꙋ́жїе во ᲂу҆стна́хъ и҆́хъ . ꙗ҆́кѡ кто̀ слы́ша ; И҆ ты̀ гдⷭ҇и пᲂсмѣе́шисѧ и҆́мъ , ᲂу҆ничижи́ши всѧ̀ ꙗ҆зы́ки . держа́вꙋ мᲂю̀ к̾ тебѣ̀ сᲂхраню̀ . Ꙗ҆́кѡ ты̀ бж҃е застꙋ́пникъ мо́й є҆сѝ . бг҃ъ мо́й , млⷭ҇ть є҆гѡ̀ пред̾вари́тъ мѧ . Бг҃ъ мо́й ꙗ҆ви́тъ мнѣ̀ на вразѣ́хъ мᲂи́хъ . не ᲂу҆бі́й и҆́хъ , да некᲂгда̀ забꙋ́дꙋтъ зако́нъ тво́й . Разженѝ и҆́хъ си́лᲂю твᲂе́ю , и҆ низ̾лᲂжѝ и҆́хъ защи́тниче мо́й гдⷭ҇и . Грѣ́хъ ᲂу҆́стъ и҆́хъ , сло́во ᲂу҆сте́нъ и҆́хъ , и҆ ꙗ҆́ти бꙋ́дꙋтъ в̾ гᲂрды́ни свᲂе́й . И҆ ѿ клѧ́твы и҆ лжѝ вᲂз̾вѣстѧ́тсѧ въ кᲂнчи́нѣ , во́  гнѣвѣ кᲂнчи́ны , и҆ небꙋ́дꙋтъ . И҆ ᲂу҆вѣ́дѧтъ , ꙗ҆́кѡ бг҃ъ ѡ҆блада́етъ і҆а́кѡвᲂмъ и҆ кᲂнцы̀ землѝ . Вᲂз̾вратѧ́тсѧ на́  вечеръ , и҆ вза́лчꙋтъ ꙗ҆́кѡ псѝ , и҆ ѡ҆бы́дꙋтъ гра́дъ . Ті́и разы́дꙋтсѧ ꙗ҆́сти . а҆́ще ли же ненасы́тѧтсѧ и҆ пᲂро́пщꙋтъ . а҆́зъ же вᲂспᲂю̀ си́лꙋ твᲂю̀ , и҆ вᲂз̾ра́дꙋюсѧ заꙋ́тра млⷭ҇ти твᲂе́й . Ꙗ҆́кѡ бы́сть застꙋ́пникъ мо́й , и҆ прибѣ́жище мᲂѐ , въ де́нь печа́ли мᲂеѧ̀ . Пᲂмо́щникъ мо́й є҆сѝ тебѣ̀ пᲂю̀ . ꙗ҆́кѡ бг҃ъ пᲂмо́щникъ мо́й є҆́сть , бж҃е мо́й млⷭ҇ть мᲂѧ̀ .

ѱл҃о́мъ дв҃дᲂвъ , н҃ѳ .

Бж҃е ѿри́нꙋлъ ны є҆сѝ , и҆ низ̾лᲂжи́лъ є҆сѝ на́съ . раз̾гнѣ́валсѧ є҆сѝ , и҆ ᲂу҆ще́дрилъ є҆сѝ на́съ . Стрѧ́слъ є҆сѝ зе́млю , и҆ смꙋтѝ ю҆̀ . и҆сцѣлѝ сᲂкрꙋше́нїе є҆ѧ̀ , ꙗ҆́кѡ пᲂд̾ви́жасѧ . Ꙗ҆ви́лъ є҆сѝ лю́демъ свᲂи́мъ жесто́каѧ . напᲂи́лъ є҆сѝ на́съ винѡ́мъ ᲂу҆миле́нїѧ . Да́лъ є҆сѝ бᲂѧ́щимсѧ тебѐ зна́менїе , є҆́же ᲂу҆бѣжа́ти ѿ лица̀ лꙋ́ка . Ꙗ҆́кѡ да и҆зба́вѧтсѧ вᲂз̾лю́бленїи твᲂѝ , спасѝ десни́цею твᲂе́ю , и҆ ᲂу҆слы́ши мѧ̀ . Бг҃ъ вᲂз̾глаго́ла во  ст҃ѣ́мъ свᲂе́мъ , вᲂз̾ра́дꙋюсѧ и҆ раздѣлю̀ сики́мꙋ , и҆ ю҆до́ль жили́щь размѣ́рю . Мо́й є҆́сть галаа́дъ , и҆ мо́й є҆́сть манасі́й , и҆ є҆фре́мъ крѣ́пᲂсть главы̀ мᲂеѧ̀ . І҆ꙋ́да цр҃ь мо́й . мѡа́въ кᲂно́бъ ᲂу҆пᲂва́нїѧ мᲂегѡ̀ . На и҆дꙋме́ю прᲂстрꙋ̀ сапо́гъ мо́й , мнѣ̀ и҆нᲂплеме́нницы пᲂкᲂри́шасѧ . Кто̀ в̾веде́тъ мѧ во́ градъ ѡ҆бстᲂѧ́нїѧ ; и҆лѝ кто̀ наста́витъ мѧ до и҆дꙋме́ѧ ; Не ты́ ли бж҃е ѿри́нꙋвыи на́съ ; и҆ не  и҆зы́деши бж҃е в̾ си́лахъ на́шихъ . Да́ждь на́мъ по́мᲂщь ѿ печа́ли , и҆ сꙋ́етно спасе́нїе чл҃ческо . Ѻ҆́ бз҃ѣ сᲂтвᲂри́мъ си́лꙋ , и҆ то́й ᲂу҆ничижи́тъ стꙋжа́ющїѧ на́мъ .

ѱл҃о́мъ дв҃дᲂвъ , ѯ҃ .

Оу҆слы́ши бж҃е мᲂле́нїе мᲂѐ , вᲂньмѝ мл҃твѣ мᲂе́й . Ѿ кᲂне́цъ землѝ к̾ тебѣ̀ вᲂз̾ва́хъ . є҆гда̀ ᲂу҆ны̀ срⷣце мᲂѐ , на ка́мень вᲂз̾несе́ мѧ . Наста́вилъ мѧ є҆сѝ , ꙗ҆́кѡ бы́сть ᲂу҆пᲂва́нїе мᲂѐ , сто́лпъ крѣ́пᲂсти ѿ лица̀ вра́жїѧ . Вселю́сѧ в̾ жили́щи твᲂе́мъ во́ вѣки , пᲂкры́юсѧ в̾ кро́вѣ кры́лъ твᲂи́хъ . Ꙗ҆́кѡ ты̀ бж҃е ᲂу҆слы́ша мл҃твы мᲂѧ̀ , да́лъ є҆сѝ дᲂстᲂѧ́нїе бᲂѧ́щимсѧ и҆́мене твᲂегѡ̀ . Де́нь ѿ́  дне цр҃е́ви прилᲂжи́ши лѣ́та є҆гѡ̀ , до́ дне ро́да и҆ ро́да . Пребыва́етъ в̾ вѣ́къ пре́д̾ бг҃ᲂмъ . ми́лᲂсть и҆ и҆́стинꙋ є҆гѡ̀ кто̀ взы́щетъ ; Та́кѡ пᲂю̀ и҆́мени твᲂемꙋ̀ во́ вѣки , вᲂз̾да́ти ми мᲂли́твы мᲂѧ̀ де́нь днѐ .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

ѱл҃о́мъ дв҃дᲂвъ , ѯ҃а .

Не бг҃ꙋ ли пᲂвине́тсѧ дш҃а мᲂѧ̀ ; ѿ тᲂго́  бо спасе́нїе мᲂѐ . И҆́бо то́й бг҃ъ мо́й , и҆ сп҃съ мо́й , застꙋ́пникъ мо́й , непᲂд̾ви́жꙋсѧ па́че . Дᲂко́лѣ належитѐ на чл҃ка . ᲂу҆бива́ете всѝ вы̀ , ꙗ҆́кѡ стѣ́нꙋ преклᲂне́нꙋ , и҆ пло́ть вᲂз̾ринᲂве́нъ . Ѻ҆ба́че цѣ́нꙋ мᲂю̀ сᲂвѣща́ша ѿри́нꙋти , теко́ша въ жа́жди . Оу҆сты̀ свᲂи́ми бл҃гᲂслᲂвлѧ́хꙋ , и҆ се́рдцемъ свᲂи́мъ кленѧ́хꙋ . Ѻ҆ба́че бг҃ᲂви пᲂвини́сѧ дш҃е мᲂѧ̀ , ꙗ҆́кѡ ѿ тᲂгѡ̀ терпѣ́нїе мᲂѐ . И҆́бо то́й бг҃ъ мо́й , и҆ сп҃съ мо́й застꙋ́пникъ мо́й , непᲂд̾ви́жꙋсѧ . Ѻ҆́ бз҃ѣ спасе́нїе мᲂѐ и҆ сла́ва мᲂѧ̀ . Бг҃ъ по́мᲂщи мᲂеѧ̀ , и҆ ᲂу҆пᲂва́нїе мᲂѐ на́  бг҃а . ᲂу҆пᲂва́йте на́нь ве́сь со́нмъ люде́й , и҆злїѧ́йте пред̾  ни́мъ срⷣца̀ ва́ша , ꙗ҆́кѡ бг҃ъ пᲂмо́щникъ на́шъ . Ѻ҆ба́че сꙋ́етни сы́нᲂве чл҃честїи , лжи́ви сы́нᲂве чл҃честїи , въ мѣри́лѣхъ не ѡ҆правди́ти , ті́и ѿ  сꙋеты̀ вкꙋ́пѣ . Не ᲂу҆пᲂва́йте на не пра́вдꙋ , и҆ на вᲂсхище́нїе не жела́йте . бᲂга́тство а҆́ще тече́тъ не прилага́йте се́рдца . Є҆ди́нᲂю глаго́ла бг҃ъ , дво́е сѐ слы́шахъ . ꙗ҆́кѡ держа́ва бж҃їѧ , и҆ твᲂѧ̀ гдⷭ҇и млⷭ҇ть , ꙗ҆́кѡ ты̀ вᲂз̾да́си кᲂмꙋ́ждо по дѣ́лᲂмъ є҆гѡ̀ .

ѱл҃о́мъ дв҃дᲂвъ , ѯ҃в .

Бж҃е бж҃е мо́й , к̾ тебѣ̀ ᲂу҆́тренюю . вᲂз̾жада̀ тебѐ дш҃а мᲂѧ̀ , ко́ль мно́жицею тебѣ̀ пло́ть мᲂѧ̀ . въ землѝ пꙋ́стѣ и҆ не  прᲂхо́днѣ и҆ без̾во́днѣ . Та́кѡ во ст҃ѣ́мъ ꙗ҆ви́хсѧ тебѣ̀ ви́дѣти си́лꙋ твᲂю̀ , и҆ сла́вꙋ твᲂю̀ . Ꙗ҆́кѡ лꙋ́чше млⷭ҇ть твᲂѧ̀ па́че живо́тъ , ᲂу҆стнѣ̀ мᲂѝ пᲂхвали́тѣ тѧ̀ . Та́кѡ бл҃гᲂслᲂвлю́ тѧ въ живᲂтѣ̀ мᲂе́мъ , ѡ҆ и҆́мени твᲂе́мъ вᲂз̾дежꙋ̀ рꙋ́цѣ мᲂѝ . Ꙗ҆́кѡ ѿ́ тꙋка и҆ ма́сти и҆спо́лнисѧ дш҃а мᲂѧ̀ , и҆ ᲂу҆стнѣ̀ ра́дᲂсти вᲂсхва́лѧтъ тѧ̀ ᲂу҆ста̀ мᲂѧ̀ . А҆́ще пᲂмина́хъ тѧ на пᲂсте́ли мᲂе́й , на ᲂу҆́тренихъ пᲂꙋча́хсѧ в̾ тѧ̀ . Ꙗ҆́кѡ бы́сть пᲂмо́щникъ мо́й , и҆ в̾ кро́вѣ крылꙋ̀ твᲂе́ю вᲂз̾ра́дꙋюсѧ . Прильпѐ дш҃а мᲂѧ̀ по тебѣ̀ , мене́ же прїѧ́тъ десни́ца твᲂѧ̀ . Ті́и же в̾сꙋ́е и҆ска́ша дш҃ꙋ мᲂю̀ , вни́дꙋтъ въ преи҆спо́днѧѧ землѝ . Предадѧ́тсѧ в̾ рꙋ́ки ѻ҆рꙋ́жїю , ча́сти ли́сᲂвᲂмъ бꙋ́дꙋтъ . Цр҃ь  же вᲂз̾весели́тсѧ ѡ҆́ бз҃ѣ , пᲂхва́литсѧ всѧ́къ клены́исѧ и҆́мъ . Ꙗ҆́кѡ загради́шасѧ ᲂу҆ста̀ глаго́лющихъ не  пра́вдꙋ .

ѱл҃о́мъ дв҃дᲂвъ , ѯ҃г .

Оу҆слы́ши бж҃е мᲂли́твꙋ мᲂю̀ , внегда̀ мᲂли́тимисѧ к̾ тебѣ̀ , ѿ́  страха вра́жїѧ и҆змѝ дш҃ꙋ мᲂю̀ . Пᲂкры́й мѧ ѿ со́нма лꙋка́внꙋющихъ , и҆ ѿ мно́жества дѣ́лающихъ не пра́вдꙋ . И҆́же и҆з̾ѡ҆стри́ша ꙗ҆́кѡ ѻ҆рꙋ́жїе ꙗ҆зы́ки свᲂѧ̀ , напрѧго́ша лꙋ́къ сво́й ве́щь го́рькꙋ . Сᲂстрѣлѧ́ти въ та́йныхъ непᲂро́чна . внеза́пꙋ сᲂстрѣлѧ́ютъ є҆гѡ̀ , и҆ не ᲂу҆бᲂѧ́тсѧ . Оу҆тверди́ша себѣ̀ сло́во лꙋка́во , пᲂвѣ́даша скры́ти сѣ́ть . рѣ́ша , кто̀ ᲂу҆́зритъ и҆́хъ ; И҆спыта́ша без̾зако́нїе , и҆счезо́ша и҆спыта́ющїи и҆спыта́нїѧ . пристꙋ́питъ челᲂвѣ́къ , и҆ се́рдце глꙋбᲂко̀ , и҆ вᲂз̾несе́тсѧ бг҃ъ . Стрѣ́лы младе́нецъ бы́ша ꙗ҆́звы и҆́хъ , и҆ и҆знемᲂго́ша в̾ ни́хъ ꙗ҆зы́цы и҆́хъ . Смꙋти́шасѧ всѝ ви́дѧщїи и҆́хъ , и҆ ᲂу҆бᲂѧ́сѧ всѧ́къ чл҃къ . И҆ вᲂз̾вѣсти́ша дѣ́ла бж҃їѧ , и҆ твᲂре́нїѧ є҆гѡ̀ разꙋмѣ́ша . Вᲂз̾весели́тсѧ пра́ведникъ ѡ҆́ гдⷭ҇ѣ , и҆ ᲂу҆пᲂва́етъ на́нь . и҆ пᲂхва́лѧтсѧ всѝ пра́вїи се́рдцемъ .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .