каѳи́сма , ѳ҃ . ѱл҃о́мъ дв҃дᲂвъ , ѯ҃д .

Тебѣ̀ пᲂдᲂба́етъ пѣ́снь бж҃е в̾ сїѡ́нѣ , и҆ тебѣ̀ вᲂз̾да́стсѧ мᲂли́тва во і҆єрⷭ҇ли́мѣ . Оу҆слы́ши мл҃твꙋ мᲂю̀ , к̾ тебѣ̀ всѧ́ка пло́ть прїи́детъ . Слᲂвеса̀ без̾зако́нникъ премᲂго́ша на́съ , и҆ нече́стїѧ на́ша ты̀ ѡ҆чи́стиши . Бл҃же́нъ є҆го́же и҆з̾бра̀ и҆ прїѧ́тъ , и҆ всели́ши во двᲂры̀ свᲂѧ̀ . И҆спо́лнимсѧ во бл҃ги́хъ до́мꙋ твᲂегѡ̀ . ст҃а̀ цр҃кви твᲂѧ̀ ди́вна в̾ пра́вдꙋ . Оу҆слы́ши ны бж҃е спаси́телю на́шъ , ᲂу҆пᲂва́нїе всѣ́мъ кᲂнце́мъ землѝ , и҆ сꙋ́щимъ в̾  мо́ри дале́че . Гᲂто́ваѧ го́ры крѣ́пᲂстїю свᲂе́ю , препᲂѧ́санъ си́лᲂю . Смꙋща́ѧи глꙋбины̀ мᲂрскі́ѧ , шꙋ́мꙋ во́лнъ є҆гѡ̀ кто̀ пᲂстᲂи́тъ ; Смꙋтѧ́тсѧ ꙗ҆зы́цы , и҆ ᲂу҆бᲂѧ́тсѧ живꙋ́щїи в̾ кᲂнцы́хъ ѿ зна́менїи твᲂи́хъ . И҆схо́ды ᲂу҆́трꙋ и҆ ве́черꙋ ᲂу҆краси́ши . пᲂсѣти́лъ є҆сѝ зе́млю и҆ ᲂу҆пᲂѝ є҆ѧ̀ , ᲂу҆мно́жилъ є҆сѝ ѡ҆бᲂга́тити є҆ѧ̀ . Рѣка̀ бж҃їѧ напо́лнисѧ во́дъ . ᲂу҆гᲂто́валъ є҆сѝ пи́щꙋ и҆́мъ , ꙗ҆́кѡ та́кѡ є҆́сть ᲂу҆гᲂто́ванїе . Бразды̀ є҆ѧ̀ ᲂу҆пᲂѝ , ᲂу҆мно́жи жи́та є҆ѧ̀ , в̾  ка́плѧхъ є҆ѧ̀ вᲂз̾весели́тсѧ вᲂз̾сїѧ́ющи . Бл҃гᲂслᲂви́ши вѣне́цъ лѣ́тꙋ бл҃гᲂсти твᲂеѧ̀ , и҆ пᲂлѧ̀ твᲂѧ̀ насы́тѧтсѧ тꙋ́ка . Разбᲂтѣ́ютъ кра́снаѧ пꙋсты́нѧ , и҆ ра́дᲂстїю хо́лми препᲂѧ́шꙋтсѧ . Ѡ҆дѣ́ѧшасѧ ѻ҆́вни ѻ҆́вчїи , и҆ ᲂу҆до́лїѧ ᲂу҆мно́жатъ пшени́цꙋ . вᲂз̾зᲂвꙋ́тъ , и҆́бо вᲂспᲂю́тъ .

ѱл҃о́мъ дв҃дᲂвъ , ѯ҃є .

Вᲂспо́йте гдⷭ҇ви всѧ̀ землѧ̀ , по́йте же и҆́мени є҆гѡ̀ , дади́те сла́вꙋ хвалѣ̀ є҆гѡ̀ . Рцѣ́те бг҃ꙋ , ко́ль стра́шна дѣ́ла твᲂѧ̀ ; во мно́жествѣ си́лы твᲂеѧ̀ , со́лжꙋтъ тебѣ̀ вразѝ твᲂѝ . Всѧ̀ землѧ̀ да пᲂкло́нит̾тисѧ , и҆ пᲂе́тъ тебѣ̀ , да пᲂе́тъ же и҆́мени твᲂемꙋ̀ вы́шнїи . Прїидѣ́те и҆ ви́дите дѣ́ла бж҃їѧ , ко́ль стра́шенъ в̾ сᲂвѣ́тѣхъ па́че сн҃о́въ чл҃ческихъ . Ѡ҆браща́ѧи мо́ре в̾ сꙋ́шꙋ , в̾ рѣцѣ̀ про́йдꙋтъ нᲂга́ми . Тꙋ̀ вᲂз̾весели́мсѧ ѡ҆ не́мъ , ѡ҆блада́ющемꙋ си́лᲂю свᲂе́ю вѣ́кꙋ . Ѻ҆́чи є҆гѡ̀ на ꙗ҆зы́ки призира́етѣ . прᲂгнѣ́вающїи да не вᲂз̾но́сѧтсѧ в̾  себѣ̀ . Бл҃гᲂслᲂви́те ꙗ҆зы́цы бг҃а на́шегѡ , и҆ ᲂу҆слы́шанъ сᲂтвᲂри́те гла́съ хвалы̀ є҆гѡ̀ . Пᲂло́жьшаго дꙋ́шꙋ мᲂю̀ в̾ живо́тъ , и҆ неда́вшаго во  смѧте́нїе но́гъ мᲂи́хъ . Ꙗ҆́кѡ и҆скꙋси́лъ  ны є҆сѝ бж҃е , раз̾жѐ ны̀ , ꙗ҆́кᲂже раз̾жиза́етсѧ сребро̀ . Вве́лъ  ны є҆сѝ в̾ сѣ́ть . пᲂлᲂжѝ ско́рби на  хребтѣ̀ на́шемъ . Вᲂз̾ведѐ чл҃ки на главы̀ на́ша . прᲂи҆до́хᲂмъ сквᲂзѣ̀ ѻ҆́гнь и҆ во́дꙋ , и҆ и҆зведѐ на́съ в̾  пᲂко́й . Вни́дꙋ в̾ до́мъ тво́й со  всесᲂжже́нїемъ , вᲂз̾да́мъ тебѣ̀ мл҃твы мᲂѧ̀ , ꙗ҆́же и҆з̾реко́стѣ ᲂу҆стнѣ̀ мᲂѝ , и҆ гл҃аша ᲂу҆ста̀ мᲂѧ̀ в̾ печа́ли мᲂе́й . Всесᲂжже́нїѧ тꙋ́чна вᲂз̾несꙋ̀ тебѣ̀ с̾ кади́лᲂмъ и҆ ѻ҆вны̀ , вᲂз̾да́мъ тебѣ̀ вᲂлы̀ с̾ кᲂзлы̀ . Прїидѣ́те ᲂу҆слы́шите , и҆ пᲂвѣ́мъ ва́мъ всѝ бᲂѧ́щїисѧ бг҃а , є҆ли́ка сᲂтвᲂрѝ дш҃ѝ мᲂе́й . Къ немꙋ̀ ᲂу҆сты̀ мᲂи́ми вᲂз̾ва́хъ , и҆ вᲂз̾несо́хъ пᲂд̾  ꙗ҆҆зы́кᲂмъ мᲂи́мъ . Не пра́вдꙋ а҆́ще пᲂзрѣ́хъ въ срⷣцы мᲂе́мъ , да не ᲂу҆слы́шитъ менѐ гдⷭ҇ь . Сегѡ̀ ра́ди ᲂу҆слы́ша мѧ бг҃ъ , внѧ́тъ гла́съ мᲂле́нїѧ мᲂегѡ̀ . бл҃гᲂслᲂве́нъ бг҃ъ , и҆́же не ѿста́ви мл҃твꙋ мᲂю̀ , и҆ млⷭ҇ть свᲂю̀ ѿ менѐ .

ѱл҃о́мъ дв҃дᲂвъ , ѯ҃ѕ .

Бж҃е ᲂу҆ще́дри ны̀ , и҆ бл҃гᲂслᲂви́ ны , прᲂсвѣтѝ лицѐ твᲂѐ на ны̀ и҆ пᲂми́лꙋй ны̀ . Пᲂзна́ти на землѝ пꙋ́ть тво́й , во всѣ́хъ ꙗ҆зы́цѣхъ спасе́нїе твᲂѐ . Да и҆спᲂвѣ́дѧтсѧ тебѣ̀ лю́дїе бж҃е , да и҆спᲂвѣ́дѧтсѧ тебѣ̀ лю́дїе всѝ . Да вᲂз̾веселѧ́тсѧ и҆ вᲂз̾ра́дꙋютсѧ ꙗ҆зы́цы , ꙗ҆́кѡ сꙋ́диши лю́демъ пра́вᲂтᲂю , и҆ ꙗ҆зы́ки на землѝ наста́виши . Да и҆спᲂвѣ́дѧтсѧ тебѣ̀ лю́дїе бж҃е , да и҆спᲂвѣ́дѧтсѧ тебѣ̀ лю́дїе всѝ . Землѧ̀ дадѐ пло́дъ сво́й . бл҃гᲂслᲂви́  ны бж҃е , бж҃е на́шъ . Бл҃гᲂслᲂви́  ны бж҃е , и҆ да ᲂу҆бᲂѧ́тсѧ є҆гѡ̀ всѝ кᲂнцы̀ землѝ .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

ѱл҃о́мъ дв҃дᲂвъ , ѯ҃з .

Да вᲂскрⷭ҇нетъ бг҃ъ , и҆ разы́дꙋтсѧ вразѝ є҆гѡ̀ . и҆ да бѣжа́тъ ѿ лица̀ є҆гѡ̀ не нави́дѧщїи є҆гѡ̀ . Ꙗ҆́кѡ и҆счеза́етъ ды́мъ , да и҆сче́знꙋтъ . ꙗ҆́кѡ та́етъ во́скъ ѿ лица̀ ѻ҆гнѧ̀ , та́кѡ да пᲂги́бнꙋтъ грѣ́шницы ѿ лица̀ бж҃їѧ . А҆ пра́ведницы да вᲂз̾веселѧ́тсѧ , вᲂз̾ра́дꙋютсѧ пре́д̾ бг҃ᲂмъ , насладѧ́тсѧ в̾ весе́лїи . Вᲂспо́йте бг҃ꙋ , по́йте и҆́мени є҆гѡ̀ . пꙋ́ть сᲂтвᲂри́те вᲂз̾ше́дшемꙋ на за́пады . гдⷭ҇ь и҆́мѧ є҆гѡ̀ , и҆ ра́дꙋйтесѧ пред̾  ни́мъ . Смѧтꙋ́тсѧ ѿ лица̀ є҆гѡ̀ , ѻ҆ц҃а си́рыхъ , и҆ сꙋдїѝ вдᲂви́цъ . бг҃ъ въ  мѣ́стѣ ст҃ѣ́мъ свᲂе́мъ . Бг҃ъ вселѧ́етъ є҆динᲂмы́сленыѧ въ до́мъ , вᲂз̾вᲂдѧ̀ ѡ҆кᲂва́нныѧ мꙋ́жествᲂмъ . та́кᲂжде прᲂгнѣ́вающїѧ , живꙋ́щїѧ во грᲂбѣ́хъ . Бж҃е є҆гда̀ и҆схᲂжда́ше пред̾ людьмѝ свᲂи́ми , є҆гда̀ ми́мѡ хᲂжда́ше въ пꙋсты́ни , землѧ̀ пᲂтрѧсе́сѧ . и҆́бо небеса̀ ка́нꙋша ѿ лица̀ бг҃а сина́ина , ѿ лица̀ бг҃а і҆и҃лева . До́ждь во́ленъ ѿлꙋчи́ши бж҃е дᲂстᲂѧ́нїю твᲂемꙋ̀ , и҆ и҆з̾немо́же , ты́  же сᲂвершѝ є҆̀ . Живо́тнаѧ твᲂѧ̀ живꙋ́тъ на не́й , ᲂу҆гᲂто́валъ є҆сѝ бл҃гᲂстїю твᲂе́ю ни́щемꙋ бж҃е . Гдⷭ҇ь да́стъ гл҃ъ бл҃гᲂвѣствꙋ́ющимъ си́лꙋ мно́гꙋ . Цр҃ь си́лъ вᲂз̾лю́бленнагѡ , лѣ́пᲂтᲂю до́мꙋ раздѣли́ти кᲂры́сть . А҆́ще пᲂспитѐ пᲂсредѣ̀ предѣ́лъ , крилѣ̀ гᲂлꙋби́нѣ пᲂсре́бренѣ , и҆ междᲂра́мїѧ є҆ѧ̀ , в̾ блеща́нїи зла́та . Є҆гда̀ ра́зньствитъ нбⷭ҇ныи цр҃ѧ на не́й , ѡ҆снѣжа́тсѧ в̾ селмо́нѣ . Гᲂра̀ бж҃їѧ , гᲂра̀ тꙋчна́ѧ . гᲂра̀ ᲂу҆сыре́ннаѧ , гᲂра̀ тꙋчна́ѧ . Въскꙋ́ю непщꙋ́ете го́ры ᲂу҆сыре́нныѧ , гᲂра̀ ю҆́же бл҃гᲂвᲂлѝ бг҃ъ жи́ти в̾ не́й . И҆́бо гдⷭ҇ь всели́тсѧ до кᲂнца̀ , кᲂлесни́ца бж҃їѧ тма́ми те́мъ , ты́сѧща гᲂбзꙋ́ющихъ . гдⷭ҇ь в̾ ни́хъ в̾ сина́йнѣ во ст҃ѣ́мъ . Вᲂз̾ше́лъ є҆сѝ на высᲂтꙋ̀ , плѣни́лъ є҆сѝ плѣ́нъ . прїѧ́лъ є҆сѝ даѧ́нїѧ в̾ челᲂвѣ́цѣхъ , и҆́бо не пᲂкарѧ́ющїѧсѧ є҆́же всели́тисѧ . Гдⷭ҇ь бг҃ъ блгⷭ҇ве́нъ , блгⷭ҇ве́нъ гдⷭ҇ь де́нь днѐ . пᲂспѣши́тъ на́мъ бг҃ъ спасе́нїи на́шихъ . Бг҃ъ на́шъ бг҃ъ спаса́ти . и҆ гдⷭ҇нѧ гдⷭ҇нѧ и҆схо́дища сме́ртнаѧ . Ѻ҆ба́че бг҃ъ сᲂкрꙋши́тъ главы̀ вра́гъ свᲂи́хъ , ве́рхъ вла́съ прехᲂдѧ́щихъ въ прегрѣше́нїихъ свᲂи́хъ . Речѐ гдⷭ҇ь , ѿ васа́на ѡ҆бращꙋ̀ , ѡ҆бращꙋ̀ въ  глꙋбина́хъ мᲂрски́хъ . Ꙗ҆́кѡ да  ѡ҆мо́читсѧ нᲂга̀ твᲂѧ̀ в̾ крᲂвѝ , ꙗ҆зы́къ пе́съ твᲂи́хъ ѿ вра́гъ ѿ негѡ̀ . Ви́дѣна бы́ша ше́ствїѧ твᲂѧ̀ бж҃е , ше́ствїѧ бг҃а мᲂегѡ̀ цр҃ѧ , є҆́же во ст҃ѣ́мъ . Пред̾вари́ша кнѧ́зи бли́зъ пᲂю́щихъ , пᲂсредѣ̀ дѣ́въ тимпа́нницъ . Въ цр҃квахъ блгⷭ҇ви́те бг҃а гдⷭ҇а , ѿ и҆сто́чникъ і҆и҃левъ . Тꙋ̀ венїами́нь ю҆́нᲂша во ᲂу҆́жасѣ . кнѧ́зи і҆ꙋ́дᲂви влады́ки и҆́хъ , кнѧ́зи заꙋло́ни , кнѧ́зи неѳфали́мли . Запᲂвѣ́ждь бж҃е си́лꙋ твᲂю̀ , ᲂу҆крѣпѝ бж҃е сѐ , є҆́же сᲂдѣ́ла в̾ на́съ . Ѿ цр҃кве твᲂеѧ̀ , во і҆єрⷭ҇ли́мъ . тебѣ̀ принесꙋ́тъ ца́рїе да́ры . Запрѣтѝ ѕвѣре́мъ тро́стнымъ , со́нмъ ю҆не́цъ въ ю҆ни́цахъ людски́хъ , затвᲂри́ти и҆скꙋше́нныѧ сребрѡ́мъ . раз̾рꙋшѝ ꙗ҆зы́ки хᲂтѧ́щїѧ бра́немъ . Прїи́дꙋтъ мᲂли́твеницы ѿ є҆ги́пта , є҆ѳїѡ́пїѧ , пред̾вари́тъ рꙋка̀ є҆ѧ̀ к̾ бг҃ꙋ . Црⷭ҇твїѧ земна́ѧ по́йте бг҃ꙋ , вᲂспо́йте гдⷭ҇ви , вᲂз̾ше́дшемꙋ на́ нб҃о нбⷭ҇нᲂе на вᲂсто́ки . Сѐ да́стъ гла́съ сво́й , гла́съ си́лы . дади́те сла́вꙋ бг҃ᲂви . на і҆зра́или велелѣ́пᲂта є҆гѡ̀ , и҆ си́ла є҆гѡ̀ на  ѻ҆́блацѣхъ . Ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . то́й да́стъ си́лꙋ и҆ держа́вꙋ лю́демъ свᲂи́мъ , бл҃гᲂслᲂве́нъ бг҃ъ .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

ѱл҃о́мъ дв҃дᲂвъ , ѯ҃и .

Спаси́  мѧ бж҃е , ꙗ҆́кѡ внидо́ша во́ды до дꙋшѝ мᲂеѧ̀ . Оу҆глѣбо́хъ в̾ тимѣ́нїи глꙋбины̀ , и҆ нѣ́сть пᲂстᲂѧ́нїѧ . Прїидо́хъ въ  глꙋбины̀ мᲂрскі́ѧ , и҆ бꙋ́рѧ пᲂтᲂпи́ мѧ . Оу҆трꙋди́хсѧ зᲂвы̀ , и҆з̾мᲂлчѐ гᲂрта́нь мо́й . и҆счезо́стѣ ѻ҆́чи мᲂѝ , ᲂу҆пᲂва́ющꙋ мѝ на́ бг҃а мᲂегѡ̀ . Оу҆мно́жишасѧ па́че вла́съ главы̀ мᲂеѧ̀ , ненави́дѧщїи мѧ̀ в̾сꙋ́е . ᲂу҆крѣпи́шасѧ вразѝ мᲂѝ , и҆з̾гᲂнѧ́щїи мѧ без̾ пра́вды . ꙗ҆́же невᲂсхища́хъ , тᲂгда̀ вᲂз̾даѧ́хъ . Бж҃е ты̀ ᲂу҆вѣ́дѣ безꙋ́мїе мᲂѐ , и҆ прегрѣше́нїѧ мᲂѧ̀ ѿ тебѐ не ᲂу҆таи́шасѧ . Да не пᲂстыдѧ́тсѧ ѡ҆  мнѣ̀ терпѧ́щїи тебѐ гдⷭ҇и , гдⷭ҇и си́лъ . нижѐ пᲂсра́мѧтсѧ ѡ҆ мнѣ̀ и҆́щꙋщїи тебѐ бж҃е і҆и҃левъ . Ꙗ҆́кѡ тебѐ ра́ди прїѧ́хъ пᲂнᲂше́нїе , пᲂкры̀ срамᲂта̀ лицѐ мᲂѐ . Чꙋ́ждь бы́хъ бра́тїи мᲂе́й , и҆ стра́ненъ сынᲂвѡ́мъ ма́тере мᲂеѧ̀ . Ꙗ҆́кѡ ре́внᲂсть до́мꙋ твᲂегѡ̀ снѣ́сть мѧ , и҆ пᲂнᲂше́нїе пᲂнᲂсѧ́щихъ тѝ , нападо́ша на мѧ̀ . И҆ пᲂкры́хъ пᲂстѡ́мъ дш҃ꙋ мᲂю̀ , и҆ бы́сть в̾ пᲂнᲂше́нїе мнѣ̀ . И҆ пᲂлᲂжи́хъ ѻ҆дѣѧ́нїе мᲂѐ вре́тище , и҆ бы́хъ и҆́мъ в̾ при́тчꙋ . Ѡ҆ мнѣ̀ глꙋмлѧ́хꙋсѧ сѣдѧ́щїи во вратѣ́хъ , и҆ ѡ҆ мнѣ̀ пᲂѧ́хꙋ пїю́щїи вино̀ . А҆́зъ же мл҃твᲂю мᲂе́ю к̾ тебѣ̀ бж҃е , вре́мѧ бл҃гᲂвᲂле́нїѧ . бж҃е , во мно́жествѣ ми́лᲂсти твᲂеѧ̀ ᲂу҆слы́ши мѧ , вᲂи́стинѣ спасе́нїѧ твᲂегѡ̀ . Спаси́ мѧ ѿ бре́нїѧ да не ᲂу҆глѣ́бнꙋ , и҆зба́ви мѧ ѿ ненави́дѧщихъ мѧ̀ , и҆ ѿ глꙋбо́кихъ во́дъ . Да не пᲂтᲂпи́тъ менѐ бꙋ́рѧ вᲂдна́ѧ , нижѐ пᲂжре́тъ менѐ глꙋбина̀ , нижѐ сведе́тъ ѡ҆ мнѣ̀ рᲂве́никъ ᲂу҆́стъ свᲂи́хъ . Оу҆слы́ши  мѧ гдⷭ҇и , ꙗ҆́кѡ бл҃га млⷭ҇ть твᲂѧ̀ . по мно́жествꙋ щедро́тъ твᲂи́хъ при́зри на мѧ̀ . Не ѿвратѝ лица̀ твᲂегѡ̀ ѿ ѻ҆́трᲂка твᲂегѡ̀ , ꙗ҆́кѡ скᲂрблю̀ , ско́рѡ ᲂу҆слы́ши мѧ . Вᲂньмѝ дꙋшѝ мᲂе́й и҆ и҆зба́ви є҆ѧ̀ , вра́гъ мᲂи́хъ ра́ди и҆зба́ви мѧ . Ты́  бо свѣ́си пᲂнᲂше́нїе мᲂѐ , и҆ стꙋ́дъ мо́й , и҆ срамᲂтꙋ̀ мᲂю̀ . пред̾ тᲂбо́ю всѝ стꙋжа́ющїи ми . Пᲂнᲂше́нїе прича́ѧ дш҃а мᲂѧ̀ и҆ стра́сть . и҆ жда́хъ и҆́же со мно́ю пᲂскᲂрби́тъ , и҆ не бѣ̀ , и҆ ᲂу҆тѣша́ющихъ , и҆ не ѡ҆брѣто́хъ . И҆ да́ша въ снѣ́дь мᲂю̀ же́лчь , и҆ в̾ жа́ждꙋ мᲂю̀ напᲂи́ша мѧ ѻ҆цта̀ . Да бꙋ́детъ трапе́за и҆́хъ пред̾ ни́ми в̾ сѣ́ть , и҆ в̾ вᲂз̾даѧ́нїе , и҆ в̾  сᲂбла́знъ . Пᲂмрачи́тѣсѧ ѻ҆́чи и҆́хъ не ви́дѣти , и҆ хребе́тъ и҆́хъ ѿ ню́дъ преклᲂнѝ . Прᲂле́й на нѧ̀ гнѣ́въ тво́й , и҆ ꙗ҆́рᲂсть гнѣ́ва твᲂегѡ̀ пᲂсти́гнетъ и҆́хъ . Да бꙋ́детъ дво́ръ и҆́хъ пꙋ́стъ , и҆ в̾ жили́щихъ и҆́хъ да небꙋ́детъ живꙋ́щагѡ . Занѐ є҆го́же ты̀ пᲂразѝ , ті́и пᲂгна́ша . и҆ къ бᲂлѣ́зни ꙗ҆́звъ мᲂи́хъ прилᲂжи́ша . Прилᲂжѝ без̾зако́нїе къ  без̾зако́нїю и҆́хъ , и҆ да не вни́дꙋтъ в̾ пра́вдꙋ твᲂю̀ . Да пᲂтребѧ́тсѧ ѿ  кни́гъ живꙋ́щихъ , и҆ с̾ пра́ведными не напи́шꙋтсѧ . Ни́щь и҆ бᲂлѧ̀ є҆́смь а҆́зъ , спасе́нїе твᲂѐ бж҃е прїѧ́тъ мѧ . Вᲂсхвалю̀ и҆́мѧ бг҃а мᲂегѡ̀ съ пѣ́снїю , и҆ вᲂз̾вели́чꙋ є҆гѡ̀ во  хвале́нїи . И҆ ᲂу҆го́днѡ бꙋ́детъ бг҃ꙋ , па́че тельца̀ ю҆́на , ро́ги и҆здаю́ща и҆ па́знᲂкти . Да ᲂу҆́зрѧтъ ни́щїи и҆ вᲂз̾веселѧ́тсѧ . взыщи́те бг҃а и҆ жива̀ бꙋ́детъ дш҃а ва́ша . Ꙗ҆́кѡ ᲂу҆слы́ша ни́щїѧ гдⷭ҇ь , и҆ ѡ҆кᲂва́нныхъ свᲂи́хъ не ᲂу҆ничижи́тъ . Да вᲂсхва́лѧтъ є҆гѡ̀ нб҃са̀ и҆ землѧ̀ , мо́ре , и҆ всѧ̀ живꙋ́щаѧ в̾ не́мъ . Ꙗ҆́кѡ бг҃ъ спасе́тъ сїѡ́на , и҆ сᲂзи́ждꙋтсѧ гра́ди і҆ꙋде́йстїи , и҆ вселѧ́тсѧ та́мѡ и҆ наслѣ́дѧтъ и҆̀ . И҆ сѣ́мѧ ра́бъ твᲂи́хъ ᲂу҆держи́тъ и҆̀ , и҆ лю́бѧщїи и҆́мѧ твᲂѐ , вселѧ́тсѧ в̾ не́мъ .

ѱл҃о́мъ дв҃дᲂвъ , ѯ҃ѳ .

Бж҃е в̾ по́мᲂщь мᲂю̀ вᲂньмѝ , гдⷭ҇и пᲂмᲂщи́  ми пᲂтщи́сѧ . Да пᲂстыдѧ́тсѧ , и҆ пᲂсра́мѧтсѧ и҆́щꙋщїи дꙋ́шꙋ мᲂю̀ . Да вᲂз̾вратѧ́тсѧ в̾спѧ́ть и҆ пᲂстыдѧ́тсѧ , мы́слѧщїи мѝ ѕла́ѧ . Да вᲂз̾вратѧ́тсѧ а҆́бїе стыдѧ́щесѧ , глаго́лющїи мѝ бла́гᲂже бла́гᲂже . Да вᲂз̾ра́дꙋютсѧ и҆ вᲂз̾веселѧ́тсѧ ѡ҆ тебѣ̀ , всѝ и҆́щꙋщїи тебѐ бж҃е . И҆ глаго́лютъ вы́нꙋ , да  вᲂз̾вели́читсѧ гдⷭ҇ь лю́бѧщїи спасе́нїе твᲂѐ . А҆́зъ же ни́щь є҆́смь и҆ ᲂу҆бо́гъ , бж҃е пᲂмᲂзи́ ми . Пᲂмо́щникъ мо́й и҆ и҆зба́витель мо́й є҆сѝ ты̀ гдⷭ҇и не закᲂснѝ .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .