НЕДѢ́ЛѦ ВСѢ́ХЪ СТ҃Ы́ХЪ

Въ сꙋбо́тꙋ ве́черъ , на ма́лѣй вече́рни . на гдⷭ҇и вᲂзва́хъ , стⷯры , вᲂскрⷭ҇ны , на д҃ . гла́съ , и҃ . =запѣ́въ : ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . В=ече́рнюю пѣ́снь , и҆ слᲂве́снꙋю слꙋ́жбꙋ , тебѣ̀ хрⷭ҇тѐ прино́симъ , ꙗ҆́кѡ бл҃гᲂвᲂли́лъ є҆сѝ пᲂми́лᲂвати на́съ , вᲂскрⷭ҇нїѧ ра́ди .

ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и҆зба́вленїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . Вече́рнюю пѣ́снь , и҆ слᲂве́снꙋю слꙋ́жбꙋ , тебѣ̀ хрⷭ҇тѐ прино́симъ , ꙗ҆́кѡ бл҃гᲂвᲂли́лъ є҆сѝ пᲂми́лᲂвати на́съ , вᲂскрⷭ҇нїѧ ра́ди .

хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїе . Гдⷭ҇и гдⷭ҇и , не ѿве́рзи на́съ ѿ твᲂегѡ̀ лица̀ , но бл҃гᲂвᲂлѝ пᲂми́лᲂвати на́съ , вᲂскрⷭ҇нїѧ ра́ди .

ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . Ра́дꙋисѧ сїѡ́не ст҃ы́и , мт҃и цр҃квамъ , бж҃їе жили́ще . ты́ бо прїѧ́тъ пре́жде ѡ҆ставле́нїе грѣхѡ́въ , вᲂскрⷭ҇нїѧ ра́ди .

сла́ва , и҆ нн҃ѣ , боⷢ҇ . Вѣ́рᲂю притека́ю к̾ пᲂкро́вꙋ твᲂемꙋ̀ , бг҃ᲂрᲂди́тельнице чⷭ҇таѧ , напа́стей и҆ бѣ́дъ , и҆ страстна́гѡ слїѧ́нїѧ , и҆ бѣсо́вскагѡ ѡ҆ѕлᲂбле́нїѧ , ꙗ҆́кѡ млⷭ҇ти и҆мѣ́ѧ пꙋчи́нꙋ , и҆ спасе́нїѧ ꙗ҆́вльшисѧ хᲂда́таица , и҆ спаси́ мѧ влⷣчце , ꙗ҆́же бг҃а ро́ждьши млⷭ҇тивагѡ , є҆ди́нагѡ всеще́драгѡ , и҆ мнᲂгᲂбл҃гᲂꙋтро́бнагѡ .

На стихо́внѣ , стихѣ́ры , вᲂскрⷭ҇ны . гла́съ , и҃ . Вᲂз̾ше́лъ є҆сѝ на́ крⷭ҇тъ і҆с҃е , сᲂше́дыи с̾ нб҃съ , прїи́де на́ смерть живо́тъ без̾сме́ртныи , к̾ сꙋ́щимъ во тмѣ̀ свѣ́тъ и҆́стинныи . к̾ па́дшимъ всѣ́мъ вᲂскрⷭ҇нїе , и҆ прᲂсвѣще́нїе сп҃се на́шъ сла́ва тебѣ̀ .

сти́хъ : приведꙋ́тсѧ цр҃ю дв҃ы во слѣ́дъ є҆ѧ̀ ,꙳ и҆ и҆́скренѧѧ є҆ѧ̀ приведꙋ́тсѧ тебѣ̀ . Всѧ̀ преидо́хъ прегрѣше́ньми , и҆ блꙋдо́мъ мно́зѣмъ дш҃ꙋ ѡ҆скверни́хъ , и҆ ᲂу҆́мъ ве́сь непᲂдо́бенъ сᲂдѣ́лахъ стра́стнѡ , и҆ ᲂу҆пᲂдо́бихсѧ скᲂто́мъ несмы́сленымъ ѻ҆каѧ́нныи . ᲂу҆скᲂрѝ ᲂу҆́бѡ чⷭ҇таѧ , и҆ спаси́ мѧ неключи́маго раба̀ твᲂегѡ̀ . и҆́бо хрⷭ҇та̀ рᲂдила̀ є҆сѝ препѣ́таѧ , спаси́телѧ всѣ́мъ земны́мъ .

сти́хъ : слы́ши дщѝ и҆ ви́ждь ,꙳ и҆ приклᲂнѝ ᲂу҆́хо твᲂѐ . Оу҆вы̀ мнѣ̀ дꙋшѐ страстна́ѧ , что̀ пᲂрабо́тиласѧ є҆сѝ скве́рнѡ , лꙋка́вᲂмꙋ мирᲂде́ржцꙋ , и҆ тᲂгѡ̀ во́лю скᲂнчева́еши , преслꙋ́шавши пᲂвелѣ́нїѧ тебѐ сᲂтво́ршагѡ . но пре́жде кᲂнца̀ и҆з̾ глꙋбины̀ вᲂзᲂпі́й , спасѝ , и҆ и҆зба́ви мѧ мт҃и бж҃їѧ ѿ льсти́вагѡ ѕмі́ѧ , ты́ бо є҆сѝ бг҃ᲂневѣ́сто , всемꙋ̀ ми́рꙋ ра́дᲂсть .

сти́хъ : пᲂмѧнꙋ̀ и҆́мѧ твᲂѐ ,꙳ во всѧ́кᲂмъ ро́дѣ и҆ ро́дѣ . Бꙋ́рѧ прегрѣше́нїи ѡ҆бъѧ́тъ смире́нꙋю мᲂю̀ дш҃ꙋ , во глꙋбинꙋ̀ ѿчаѧ́нїѧ лю́то низ̾лᲂжи́вши , ᲂу҆скᲂрѝ чи́стаѧ , и҆ ѡ҆кᲂрми́тельница ми бꙋ́ди ти́хаѧ , в̾ приста́нище бж҃їѧ во́ли , да прᲂславлѧ́ю ти мно́гаѧ чꙋдеса̀ ве́селѡ , влⷣчце всенепᲂро́чнаѧ мт҃и хрⷭ҇та̀ бг҃а .

сла́ва , и҆ ны́нѣ , боⷢ҇ . И҆сто́чникъ слеза́мъ пᲂда́ждь ми , и҆ пᲂмышле́нїѧ бл҃га , и҆ смире́нїѧ в̾кꙋ́пѣ , и҆ и҆спᲂвѣ́данїе без̾мѣ́стныхъ ми дѣѧ́нїи , и҆ прегрѣше́нїи стꙋжа́ющихъ ми , ѿ ᲂу҆ны́нїѧ и҆ лѣ́нᲂсти мᲂеѧ̀ , и҆ спᲂдо́би чи́стѡ пᲂкаѧ́нїе и҆́стинно , вᲂи́стинꙋ пᲂказᲂва́ти , и҆ спасе́нїе пᲂлꙋчи́ти .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , вᲂскрⷭ҇нъ . гла́съ , и҃ . Свы́шнихъ сни́де милᲂсе́рде , и҆ пᲂгребе́нїе прїѧ́тъ тридне́вно , да на́съ свᲂбᲂди́ши ѿ стрⷭ҇те́й . живᲂтѐ и҆ вᲂскрⷭ҇нїе на́ше сла́ва тебѣ̀ . сла́ва , и҆ ны́нѣ , боⷢ҇ . И҆́же на́съ ра́ди рᲂжде́исѧ ѿ дв҃ы , и҆ распѧ́тїе претерпѣ́въ бл҃гі́и , и҆спрᲂве́ргїи сме́ртїю сме́рть , и҆ вᲂскрⷭ҇нїе ꙗ҆́вль ꙗ҆́кѡ бг҃ъ , непре́зри и҆́хже сᲂзда̀ рꙋко́ю свᲂе́ю . ꙗ҆вѝ чл҃кᲂлю́бїе свᲂѐ ми́лᲂстиве . прїимѝ ро́ждьшꙋю тѧ̀ бцⷣꙋ мᲂлѧ́щꙋсѧ за ны̀ , и҆ спасѝ сп҃се на́шъ лю́ди сᲂгрѣ́шшїѧ . та́же , є҆ктенїѧ̀ ма́лаѧ .= и҆ ѿпꙋ́стъ . На па́вечерницѣ , п=о дᲂсто́йнѣ , по трⷭ҇то́мъ , кᲂнда́къ , вᲂскрⷭ҇нъ . сла́ва , и҆ ны́нѣ . кᲂнда́къ , всѣ́мъ ст҃ы́мъ .

На вели́цѣй вече́рни , каѳи́сма , бл҃же́нъ мꙋ́жъ , всѧ̀ . на гдⷭ҇и вᲂзва́хъ , пᲂста́вимъ стихо́въ , і҃ . и҆ пᲂе́мъ , стихѣ́ры вᲂскрⷭ҇ны . гла́съ , и҃ . =запѣ́въ : и҆зведѝ и҆з̾ темни́цы дш҃ꙋ мᲂю̀ ,꙳ и҆спᲂвѣ́датисѧ и҆́мени твᲂемꙋ̀ . В=ече́рнюю пѣ́снь , и҆ слᲂве́снꙋю слꙋ́жбꙋ , тебѣ̀ хрⷭ҇тѐ прино́симъ , ꙗ҆́кѡ бл҃гᲂвᲂли́лъ є҆сѝ пᲂми́лᲂвати на́съ , вᲂскрⷭ҇нїѧ ра́ди .

менѐ ждꙋ́тъ пра́ведницы ,꙳ до́ндеже вᲂзда́си мнѣ̀ . Гдⷭ҇и гдⷭ҇и , не ѿве́рзи на́съ ѿ твᲂегѡ̀ лица̀ , но бл҃гᲂвᲂлѝ пᲂми́лᲂвати на́съ , вᲂскрⷭ҇нїѧ ра́ди .

и҆з̾ глꙋбины̀ вᲂзва́хъ к̾ тебѣ̀ гдⷭ҇и ,꙳ гдⷭ҇и ᲂу҆слы́ши гла́съ мо́й . Ра́дꙋисѧ сїѡ́не ст҃ы́и , мт҃и цр҃квамъ , бж҃їе жили́ще . ты́ бо прїѧ́тъ пре́жде ѡ҆ставле́нїе грѣхо́въ , вᲂскрⷭ҇нїѧ ра́ди .

бꙋ́дѣтѣ ᲂу҆́ши твᲂѝ ,꙳ вне́млющѣ гла́съ мл҃твы мᲂеѧ̀ . И҆́же ѿ́ бг҃а ѻ҆́ч҃ее сло́во , пре́жде вѣ́къ рᲂжде́исѧ , на пᲂслѣ́дᲂкъ лѣ́тᲂмъ , то́йже ѿ неи҆скꙋсᲂбра́чныѧ вᲂпло́щьсѧ и҆з̾вᲂле́нїемъ , распѧ́тїе сме́ртнᲂе претерпѣ̀ , и҆ дре́вле ᲂу҆҆мерщве́наго чл҃ка спа́слъ є҆́сть , свᲂи́мъ вᲂскрⷭ҇нїемъ .

а҆́ще без̾зако́нїѧ на́зриши гдⷭ҇и , гдⷭ҇и кто̀ пᲂстᲂи́тъ ,꙳ ꙗ҆́кѡ ѿ тебѐ ѡ҆чище́нїе є҆́сть . Є҆́же и҆з̾ ме́ртвыхъ твᲂѐ вᲂскрⷭ҇нїе , славᲂсло́вимъ хрⷭ҇тѐ , и҆́мже свᲂбᲂди́лъ є҆сѝ а҆да́мскїи ро́дъ , ѿ а҆́дᲂва мꙋчи́тельства , и҆ дарᲂва̀ ми́рᲂви ꙗ҆́кѡ бг҃ъ , живо́тъ вѣ́чныи , и҆ ве́лїю млⷭ҇ть .

и҆́мене ра́ди твᲂегѡ̀ пᲂтерпѣ́хъ тѧ̀ гдⷭ҇и , пᲂтерпѣ̀ дш҃а мᲂѧ̀ в̾ сло́во твᲂѐ ,꙳ ᲂу҆пᲂва̀ дш҃а мᲂѧ̀ на́ гдⷭ҇а . Сла́ва тебѣ̀ хрⷭ҇тѐ сп҃се , сн҃е бж҃їи є҆дино ро́дныи , пригвᲂжде́исѧ на крⷭ҇тѣ̀ , и҆ вᲂскр҃се и҆́з̾ грᲂба тридне́внѡ .

стихѣ́ры , всѣ́мъ ст҃ы́мъ , на д҃ .= запѣ́в̾ : гла́съ , ѕ҃ . поⷣ . всѐ ᲂу҆пᲂва́нїе . =ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . Дх҃о́внїи виті́и , ᲂу҆ченицы̀ сп҃сᲂвы ,꙳ дх҃ꙋ а҆рга́ни бы́вше вѣ́рᲂю ,꙳ раз̾сѣ́ѧшасѧ в̾ кᲂнцы̀ землѝ ,꙳ честно́е прᲂпᲂвѣ́данїе ,꙳ правᲂсла́внѣ прᲂсїѧ́вше .꙳ ѿ ни́хже прᲂзѧбо́ша бжⷭ҇твенаѧ дѣѧ́нїѧ и҆ да́рᲂве .꙳ мч҃нкъ во́инства ,꙳ стра́сть честнꙋ́ю ѡ҆бразꙋ́юще ,꙳ мнᲂгᲂѡ҆бра́зныхъ ра́ди ,꙳ и҆ раз̾ли́чныхъ ра́нъ и҆ ѻ҆гнѧ̀ ,꙳ и҆ съ дерзнᲂве́нїемъ мо́лѧтсѧ ꙳ ѡ҆ дш҃а́хъ на́шихъ .

ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и҆зба́вленїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . Дх҃о́внїи виті́и , ᲂу҆ченицы̀ сп҃сᲂвы ,꙳ дх҃ꙋ а҆рга́ни бы́вше вѣ́рᲂю ,꙳ раз̾сѣ́ѧшасѧ в̾ кᲂнцы̀ землѝ ,꙳ чⷭ҇тно́е прᲂпᲂвѣ́данїе ,꙳ правᲂсла́внѣ прᲂсїѧ́вше .꙳ ѿ ни́хже прᲂзѧбо́ша бжⷭ҇твенаѧ дѣѧ́нїѧ и҆ да́рᲂве .꙳ мч҃нкъ во́инства ,꙳ стра́сть чⷭ҇тнꙋ́ю ѡ҆бразꙋ́юще ,꙳ мнᲂгᲂѡ҆бра́зныхъ ра́ди ,꙳ и҆ раз̾ли́чныхъ ра́нъ и҆ ѻ҆гнѧ̀ ,꙳ и҆ съ дерзнᲂве́нїемъ мо́лѧтсѧ ꙳ ѡ҆ дш҃а́хъ на́шихъ .

хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїе . Ѻ҆гне́мъ вᲂспалѧ́еми гдⷭ҇нею любо́вїю ,꙳ ѻ҆́гнь преѡ҆би́дѣша ,꙳ и҆ ꙗ҆́кѡ бжⷭ҇твенᲂе ᲂу҆́глїе вᲂз̾жига́еми чⷭ҇тні́и мч҃нцы ,꙳ ѡ҆ хрⷭ҇тѣ̀ пᲂпали́ша ,꙳ хвра́стныѧ ле́сти шата́нїе .꙳ ѕвѣре́мъ загради́ша ᲂу҆ста̀ ,꙳ честны́мъ призыва́нїемъ ,꙳ и҆ глава́ми ᲂу҆сѣка́емыми ,꙳ пᲂсѣца́хꙋ врагꙋ̀ всѧ̀ ѡ҆пᲂлче́нїѧ .꙳ и҆ ꙗ҆́же крᲂве́й и҆стѣка́ющими пᲂто́ки терпѣли́внѡ ,꙳ цр҃кᲂвь напᲂи́ша ,꙳ вѣ́рᲂю прᲂсвѣща́еми .

ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . Во всѣ́хъ кᲂнцѣ́хъ ,꙳ страда́вшихъ вѣ́рнѡ ,꙳ а҆пⷭ҇лы мч҃нки сщ҃е́нники ,꙳ бг҃ᲂмꙋ́дрыхъ же́нъ сщ҃е́ннᲂе стека́нїе ,꙳ сщ҃е́нными пѣ́сньми по́ дᲂлгꙋ вᲂсхва́лимъ ,꙳ ꙗ҆́кѡ сᲂеди́нившесѧ нбⷭ҇нымъ земні́и ,꙳ и҆ страстьмѝ без̾стра́стїе ,꙳ бл҃гᲂда́тїю хрⷭ҇то́вᲂю прїѧ́ша .꙳ и҆ ны́нѣ ꙗ҆́кѡ ѕвѣ́зды свѣ́тлыѧ ѡ҆зарѧ́ютъ на́съ ,꙳ и҆ со дерзнᲂве́нїемъ мо́лѧтсѧ ꙳ ѡ҆ дш҃а́хъ на́шихъ . сла́ва . гла́съ , ѕ҃ . Мч҃нкъ бжⷭ҇твеныи ли́къ , цр҃кви степе́нь , бл҃гᲂвѣ́стїю скᲂнча́нїе , вы̀ дѣ́лᲂмъ спа́са гл҃анїѧ и҆спо́лнисте . ва́ми врата̀ а҆́дᲂва на цр҃кᲂвь ѿве́рзшаѧсѧ , заключи́шасѧ . кро́ве ва́шеѧ литїѐ , и҆́дᲂльскїѧ же́ртвы и҆з̾сꙋшѝ . закла́нїе ва́ше , пᲂрᲂдѝ цр҃ко́внᲂе и҆спᲂлне́нїе . беспло́тныхъ ᲂу҆диви́сте . бг҃ꙋ вѣнцено́сцы пред̾стᲂитѐ . к̾ немꙋ́ же непреста́ннѡ мᲂли́тесѧ ѡ҆ дш҃а́хъ на́шихъ . и҆ ны́нѣ , боⷢ҇ . гла́съ , и҃ . Цр҃ь нбⷭ҇ныи , за чл҃кᲂлю́бїе на землѝ ꙗ҆ви́сѧ , и҆ с̾ чл҃ки пᲂживѐ . ѿ дв҃ы бо чи́стыѧ пло́ть прїе́мыи , и҆з̾ неѧ̀ прᲂше́дъ с̾ вᲂспрїѧ́тїемъ . є҆ди́нъ є҆́сть сн҃ъ сꙋгꙋ́бъ є҆стество́мъ а҆ несᲂста́вᲂмъ . тѣ́мже сᲂверше́на тᲂгѡ̀ бг҃а , и҆ сᲂверше́на чл҃ка , вᲂи́стинꙋ прᲂпᲂвѣ́дающе , и҆спᲂвѣ́даемъ хрⷭ҇та̀ бг҃а на́шегѡ . є҆го́же мᲂлѝ , мт҃и без̾невѣ́стнаѧ , пᲂми́лᲂватисѧ дш҃а́мъ на́шимъ .

та́же , вы́хᲂдъ : свѣ́тѣ ти́хїи . прᲂки́мен̾ , дню̀ .

ѿ прᲂро́чества и҆са́їина , чте́нїе .

Та́кѡ гл҃етъ гдⷭ҇ь , всѝ ꙗ҆зы́цы сᲂбра́шасѧ вкꙋ́пѣ , и҆ сᲂберꙋ́тсѧ кнѧ́зи ѿ ни́хъ . и҆ кто̀ вᲂзвѣсти́тъ сїѧ̀ в̾ ни́хъ ; и҆ ꙗ҆́кᲂже и҆з̾ нача́ла кто̀ слы́шана сᲂтвᲂри́тъ ва́мъ ; да приведꙋ́тъ свидѣ́тели свᲂѧ̀ , и҆ ѡ҆правдѧ́тсѧ , и҆ да ᲂу҆слы́шатъ , и҆ да рекꙋ́тъ и҆́стинꙋ , бꙋ́дите ми свидѣ́тели , и҆ а҆́зъ свидѣ́тель , гл҃етъ гдⷭ҇ь бг҃ъ , и҆ ѻ҆́трᲂкъ , є҆го́же и҆збра́хъ , да пᲂзна́ете и҆ вѣ́рꙋете ми , и҆ разꙋмѣ́ете ꙗ҆́кѡ а҆́зъ є҆́смь , и҆ пре́жде менѐ небы́сть и҆́нъ бг҃ъ , и҆ по мнѣ̀ небꙋ́детъ . а҆́зъ є҆́смь бг҃ъ , и҆ нѣ́сть ра́звѣ менѐ спаса́ѧй . а҆́зъ вᲂзвѣсти́хъ и҆ спасо́хъ , и҆ ᲂу҆ничижи́хъ , и҆ небѣ̀ в̾ ва́съ ѿ чꙋжде́нїѧ . вы̀ мнѣ̀ свидѣ́тели , и҆ а҆́зъ свидѣ́тель , гл҃етъ гдⷭ҇ь бг҃ъ . и҆ є҆щѐ ѿ нача́ла а҆́зъ є҆́смь , и҆ нѣ́сть и҆́же ѿ рꙋкꙋ̀ мᲂе́ю и҆збавлѧ́ѧи . сᲂтвᲂрю̀ , и҆ кто̀ ѿврати́тъ то̀ . си́це гл҃етъ гдⷭ҇ь бг҃ъ , и҆збавлѧ́ѧи ва́съ ст҃ы́и і҆зра́илевъ .

ѿ премꙋ́дрᲂсти сᲂлᲂмѡ́ни , чте́нїе .

Пра́ведныхъ дꙋша̀ в̾ рꙋцѣ̀ бж҃їи , и҆ не прико́снетсѧ и҆́хъ мꙋ́ка . непщева́ни бы́ша во ѻ҆́чїю безꙋ́мныхъ ᲂу҆́мрети , и҆ вмѣни́сѧ ѡ҆ѕлᲂбле́нїе и҆схо́дъ и҆́хъ , и҆ є҆́же ѿ на́съ ше́ствїе сᲂкрꙋше́нїе , ѻ҆ни́ же сꙋ́ть в̾ ми́рѣ . и҆́бо пред̾ лице́мъ чл҃ческимъ а҆́ще и҆ мꙋ́кꙋ прїи́мꙋтъ , ᲂу҆пᲂва́нїе и҆́хъ без̾сме́ртїѧ и҆спо́лнь . и҆ ма́лымъ пᲂка́зани бы́ша , вели́каѧ вᲂспрїи́мꙋтъ , ꙗ҆́кѡ бг҃ъ и҆скꙋсѝ и҆́хъ , и҆ ѡ҆брѣ́те и҆́хъ дᲂсто́йны себѣ̀ . ꙗ҆́кѡ зла́то в̾ гᲂрни́лѣ и҆скꙋсѝ и҆́хъ , и҆ ꙗ҆́кѡ всепло́днꙋ же́ртвꙋ прїѧ́тъ и҆́хъ . и҆ во́ времѧ пᲂсѣще́нїѧ и҆́хъ вᲂз̾сїѧ́ютъ , и҆ ꙗ҆́кѡ и҆́скры по сте́блїю пᲂтекꙋ́тъ . сꙋ́дѧтъ ꙗ҆зы́кѡмъ , и҆ ѡ҆блада́ютъ людьмѝ , и҆ вᲂцр҃и́тсѧ гдⷭ҇ь въ ни́хъ во́ вѣки . надѣ́ющїисѧ на́нь разꙋмѣ́ютъ и҆́стинꙋ , и҆ вѣ́рнїи любо́вїю пребꙋ́дꙋтъ в̾ не́мъ . ꙗ҆́кѡ бл҃гᲂда́ть и҆ млⷭ҇ть в̾ прпⷣбныхъ є҆гѡ̀ , и҆ пᲂсѣще́нїе во и҆збра́нныхъ є҆гѡ̀ .

ѿ премꙋ́дрᲂсти сᲂлᲂмѡ́ни , чте́нїе .

Пра́ведницы во́ вѣки живꙋ́тъ , и҆ ѿ́ гдⷭ҇а мзда̀ и҆́мъ , и҆ пᲂмышле́нїе и҆́хъ пред̾ вы́шнимъ . сегѡ̀ ра́ди прїи́мꙋтъ црⷭ҇твїе бл҃гᲂлѣ́пїѧ , и҆ вѣне́цъ дᲂбро́ты ѿ рꙋкѝ гдⷭ҇ни . ꙗ҆́кѡ десни́цею пᲂкры́етъ и҆́хъ , и҆ мы́шцею защи́титъ и҆́хъ . прїи́метъ всеѡрꙋ́жїе ре́внᲂсти є҆гѡ̀ , и҆ вᲂѡрꙋже́но сᲂтвᲂри́тъ сᲂзда́нїе , в̾ ме́сть врагѡ́мъ . и҆ ѡ҆блече́тъ ѧ҆̀ во брᲂнѧ̀ пра́вды , и҆ вᲂзлᲂжи́тъ шле́мъ сꙋ́дъ нелицемѣ́ренъ . и҆ прїи́метъ щи́тъ непᲂбѣди́мъ препᲂдо́бїе . по ѡ҆стри́тъ же напра́сенъ гнѣ́въ во ѻ҆рꙋ́жїи . и҆ пᲂбо́ретъ с̾ ни́мъ ми́ръ на безꙋ́мныѧ . и҆ по́йдꙋтъ правᲂлꙋ́чнѣ стрѣ́лы мо́лнїины , ꙗ҆́кѡ ѿ бл҃гᲂкрꙋ́гла лꙋ́ка ѻ҆блакѡ́въ , на намѣ́ренїе летѧ́тъ . и҆ ѿ пра́щъ ка́менныхъ ꙗ҆́рᲂсти и҆спо́лнь , падꙋ́тъ гра́ды . вᲂзнегᲂдꙋ́етъ на ни́хъ вᲂда̀ мᲂрска́ѧ , рѣ́ки же пᲂтекꙋ́тъ жестᲂча́е . сᲂпрᲂти́въ ста́нетъ и҆́мъ дх҃ъ си́лы . и҆ ꙗ҆́кѡ ви́хᲂръ развѣ́етъ ѧ҆̀ . и҆ ѡ҆пꙋсти́тъ всю̀ зе́млю без̾зако́нїе , и҆ ѕлᲂдѣѧ́нїе преврати́тъ престо́лы си́льныхъ . Слы́шите ᲂу҆́бѡ цр҃їе и҆ разꙋмѣ́йте , и҆ накажи́тесѧ сꙋдїѝ кᲂнце́мъ землѝ . внꙋши́те сᲂдержа́щїи мно́жества , и҆ гᲂрдѧ́щїисѧ ѡ҆ наро́дѣхъ ꙗ҆зы́къ , ꙗ҆́кѡ дана̀ бы́сть ѿ́ гдⷭ҇а держа́ва ва́мъ , и҆ си́ла ѿ вы́шнѧгѡ .

На литі́и , стⷯра хра́мꙋ . та́же , стⷯры . гла́съ , а҃ . Вѣ́ры сᲂгла́сїемъ , мирско́е тᲂржество̀ , є҆́же ѿ́ вѣка бг҃ꙋ бл҃гᲂꙋгᲂди́вшихъ , ѻ҆ц҃енача́льникѡвъ и҆ прⷪ҇ро́кᲂвъ чⷭ҇тно́е сᲂсло́вїе , а҆пⷭ҇лѡвъ бг҃ᲂсло́вїе , мч҃нкѡвъ сᲂбра́нїе , по́стникᲂвъ сᲂчине́нїе , и҆ всѣ́хъ ст҃ы́хъ па́мѧть дх҃о́внѣ пра́зднꙋемъ . мо́лѧтбᲂсѧ непреста́ннѡ , дарᲂва́ти ми́ръ ми́рᲂви , и҆ дш҃а́мъ на́шимъ ве́лїю млⷭ҇ть . Прїидѣ́те всѝ вѣ́рнїи , ст҃ы́хъ всѣ́хъ всесла́внꙋю па́мѧть , во ѱалмѣ́хъ и҆ пѣ́нїихъ и҆ пѣ́снехъ дх҃о́вныхъ вᲂсхва́лимъ , крⷭ҇тлѧ спаси́телева , а҆пⷭ҇лы и҆ прⷪ҇ро́ки и҆ сщ҃еннᲂмч҃нки , нача́льники же и҆ прпⷣбныѧ ᲂу҆чи́тели , по́стники и҆ пра́ведники , и҆ ст҃ы́хъ же́нъ бг҃ᲂлю́бнᲂе сᲂстᲂѧ́нїе чⷭ҇тно́е ᲂу҆блажа́юще , сᲂгла́снѡ вᲂзᲂпїе́мъ , пребл҃гі́и хрⷭ҇тѐ бж҃е на́шъ , тѣ́хъ мл҃твами пᲂда́ждь ᲂу҆мире́нїе цр҃квамъ твᲂи́мъ , и҆ странѣ̀ на́шей на врагѝ пᲂбѣ́дꙋ , и҆ дш҃а́мъ на́шимъ ве́лїю млⷭ҇ть .

гла́съ , в҃ . Прїидѣ́те всѝ , дх҃о́внѣ вᲂзвесели́мсѧ , ѡ҆ па́мѧти ст҃ы́хъ , се́бо прїи́де бг҃ᲂтво́рнаѧ на́мъ дарᲂва́нїѧ принᲂсѧ́щи . тѣ́мже во́ гласѣ ра́дᲂсти и҆ чи́стѣ со́вѣсти вᲂзᲂпїе́мъ гл҃юще , ра́дꙋйтесѧ прⷪ҇ро́кѡмъ сᲂсло́вїе , и҆́же прише́ствїе хрⷭ҇то́во ми́рꙋ прᲂпᲂвѣ́давше . и҆ ꙗ҆́же и҆з̾ дале́ча , ꙗ҆́кѡ бли́зꙋ пред̾ви́дѣвше . ра́дꙋйтесѧ а҆пⷭ҇льстїи ли́цы , ꙗ҆зы́кᲂвъ мре́жницы , и҆ лᲂвцы̀ челᲂвѣ́кѡмъ . ра́дꙋйтесѧ мч҃нкѡвъ сᲂбѡ́ри , и҆́же ѿ кᲂне́цъ землѝ сᲂбра́вшесѧ , во є҆ди́нꙋ вѣ́рꙋ , и҆ ѡ҆ не́й мꙋ́ки и҆ тᲂмле́нїѧ претерпѣ́вше , и҆ кᲂне́чно страда́нїи вѣне́цъ вᲂспрїе́мше . ра́дꙋйтесѧ ѻ҆ц҃е́мъ нача́льницы , и҆́же свᲂѧ̀ тѣлеса̀ пᲂще́нїемъ и҆ста́ѧвше , и҆ ᲂу҆мертви́вше стрⷭ҇ти плᲂтскі́ѧ . ᲂу҆́мъ бжⷭ҇твенымъ раче́нїемъ в̾пери́сте , и҆ на нб҃са̀ вᲂзлѣта́ете , и҆ со а҆́нг҃лы вᲂдвᲂрѧ́ющесѧ , вᲂспрїе́млете вѣ́чнаѧ бл҃га . но ѽ прⷪ҇рцы , и҆ а҆пⷭ҇ли , и҆ мч҃нцы с̾ по́стники , и҆́же ва́съ вѣнча́вшагѡ , прилѣ́жнѡ мᲂли́те , и҆зба́витисѧ ѿ вра́гъ ви́димыхъ и҆ неви́димыхъ , и҆́же в̾ вѣ́рѣ и҆ любвѝ твᲂрѧ́щимъ прⷭ҇нѡ , чⷭ҇тнꙋ́ю па́мѧть ва́шꙋ . гла́съ , д҃ . Четверᲂкᲂне́чнагѡ ми́ра , пра́здникъ ст҃ы́хъ мч҃нкъ , во ѱалмѣ́хъ и҆ пѣ́нїихъ , и҆ пѣ́снехъ дх҃о́вныхъ вᲂсхва́лимъ , пᲂдвигᲂнача́льника и҆мꙋ́ще хрⷭ҇та̀ , во́ времѧ пᲂдвиго́въ , сᲂпᲂста́та врага̀ пᲂбѣди́ша . тѣ́мже пᲂбѣ́ды страда́нїѧ , по́чести ѿ негѡ̀ прїѧ́ша , и҆ мо́лѧтсѧ ѡ҆ дш҃а́хъ на́шихъ . А҆́нг҃ли на́ нб҃сѣхъ , и҆ чл҃цы на землѝ , ст҃ы́хъ всѣ́хъ па́мѧть , сᲂше́дшесѧ дне́сь вᲂсхва́лимъ , и҆́бо ри́зꙋ и҆стка́нꙋ ѿ вы́шнїѧ премꙋ́дрᲂсти , страда́льческими крᲂвьмѝ и҆ пᲂдви́жными пᲂты̀ , ꙗ҆́кѡ багрѧни́цꙋ вѵ́ссᲂмъ пло́д̾ствᲂвавше ᲂу҆свѣтли́ша . тѣ́мже си́ми ᲂу҆краси́вшисѧ цр҃кви твᲂѧ̀ хрⷭ҇тѐ , тѣ́хъ ра́ди вᲂпїе́тъ ти , да́ти на́мъ ве́лїю млⷭ҇ть . Прїидѣ́те вѣ́рныхъ сᲂсло́вїе ве́село . прїидѣ́те ра́дᲂстнѡ рꙋка́ми вᲂспле́щемъ . прїидѣ́те жела́ющїи бл҃гᲂлѣ́пнѣйшихъ дᲂбрᲂпрїѧ́тныхъ же́ртвъ , пѣ́снь бл҃гᲂгла́снꙋю вᲂзгласи́вше вᲂспᲂе́мъ . дне́сь бо наста́ша всесвѣ́тлыѧ и҆ свѣтᲂно́сныѧ дᲂбро́ты мч҃нкъ . что̀ ᲂу҆́бѡ ты́ѧ нарече́мъ дᲂсто́йнѣ . сл҃нце ; но ѻ҆́но ᲂу҆́бѡ дне́ви . лꙋнꙋ̀ ; но ѻ҆́нᲂй но́щь сᲂпрѧже́сѧ ; сі́иже и҆ но́щь прᲂсвѣща́ютъ , и҆ дн҃ь лꙋча́ми ѡ҆сїѧва́ютъ . ѕвѣ́зды ; но ѻ҆́нѣхъ свѣ́тъ наше́дъ пᲂгасѝ . Бжⷭ҇твенаѧ и҆ предо́браѧ страда́нїемъ ликᲂва́нїѧ , ра́дꙋйтесѧ вселе́ннѣй зако́нъ , и҆ рве́нїе живо́тнᲂе , ра́дꙋйтесѧ вѣ́рнымъ ѡ҆багре́нїе , крᲂвьмѝ страда́льческими . ра́дꙋйтесѧ бг҃ᲂлѣ́пнѣйшее вѣ́твїе , ѿ ни́хже ѡ҆бъе́млюще , во снѣде́нїе дх҃о́внᲂе веде́мсѧ . и҆ ѡ҆ на́съ мᲂли́тесѧ непреста́ннѡ , ꙗ҆́кѡ да прїи́мемъ ѿ хрⷭ҇та̀ ми́ръ и҆ ве́лїю ми́лᲂсть . гла́съ , є҃ . Къ нн҃ѣшнемꙋ тᲂржествꙋ̀ стеце́мсѧ вѣ́рнїи , пред̾лага́етъ бо на́мъ дх҃о́внꙋю трапе́зꙋ , и҆ ча́шꙋ та́инъ и҆збра́нныхъ снѣ́дей , весе́лїѧ и҆спо́лненꙋ крᲂве́й мч҃нческихъ дᲂбрᲂдѣ́телей . сі́ибо крѣпкᲂтерпѣли́вїи дш҃е́ю ѿ кᲂне́цъ землѝ , тѣлеса̀ свᲂѧ̀ всеразли́чнымъ преда́ша ра́намъ , бг҃ꙋ принесо́ша же́ртвꙋ слᲂве́снꙋ всѧ́къ бл҃гі́и во́зрастъ , ѻ҆́вїи ᲂу҆́бѡ глава́ми ᲂу҆сѣка́еми , дрꙋзі́и же по хребтꙋ̀ стрꙋ́жеми . и҆ні́и же рꙋ́къ ѿсѣче́нїе и҆ всѣ́хъ ᲂу҆до́въ , и҆ всѝ в̾кꙋ́пѣ ст҃і́и хрⷭ҇то́вымъ страсте́мъ со ѻ҆́бщницы бы́ша . но и҆́же вѣнцы̀ тѣ́мъ вᲂз̾даѧ́нїѧ за мꙋ́ки пᲂда́въ гдⷭ҇и , во слѣ́дъ хᲂди́ти дᲂсто́йны сᲂтвᲂрѝ на́съ , ꙗ҆́кѡ чл҃кᲂлю́бецъ . сла́ва . гла́съ , и҃ . Пѣ́сненыи ли́къ сᲂвᲂкꙋпи́вше дне́сь , и҆́же ѿ́ вѣка ст҃ы́хъ твᲂрѧ́ще па́мѧть свѣ́тлѡ . сі́й бо в̾ сїѡ́нъ ст҃ы́и нестарѣ́ющїисѧ все́льшесѧ , враго́мъ ѡ҆бличи́тели , и҆ ᲂу҆праздни́тели при́снѡ ꙗ҆ви́шасѧ , и҆ хрⷭ҇та̀ непреста́ннѡ ѡ҆ на́съ мᲂлѧ́ще , пᲂми́лᲂватисѧ дш҃а́мъ на́шимъ . и҆ ны́нѣ , боⷢ҇ . Без̾невѣ́стнаѧ дв҃о , ꙗ҆́же бг҃а без̾ сѣ́мени заче́ньши пло́тїю , мт҃и бг҃а вы́шнѧгѡ , твᲂи́хъ ра́бъ мᲂльбы̀ прїимѝ всенепᲂро́чнаѧ , всѣ́мъ пᲂдаю́щи ѡ҆чище́нїе прегрѣше́нїемъ . ны́нѣ на́ша мᲂле́нїѧ прїе́мши , мᲂлѝ спасти́сѧ всѣ́мъ на́мъ .

На стихо́внѣ , стихѣ́ры , вᲂскрⷭ҇ны . гла́съ , и҃ . Вᲂз̾ше́лъ є҆сѝ на́ крⷭ҇тъ і҆с҃е , сᲂше́дыи с̾ нб҃съ , прїи́де на́ смерть живо́тъ без̾сме́ртныи , к̾ сꙋ́щимъ во тмѣ̀ свѣ́тъ и҆́стинныи . к̾ па́дшимъ всѣ́мъ вᲂскрⷭ҇нїе , и҆ прᲂсвѣще́нїе сп҃се на́шъ сла́ва

тебѣ̀ .

сти́хъ : гдⷭ҇ь вᲂцр҃и́сѧ ,꙳ в̾ лѣ́пᲂтꙋсѧ ѡ҆блечѐ . Хрⷭ҇та̀ славᲂсло́вимъ вᲂскрⷭ҇шагѡ и҆з̾ ме́ртвыхъ , дш҃ꙋ бо и҆ тѣ́ло вᲂспрїе́мъ , стрⷭ҇ти ѿ ѡ҆бᲂю́дꙋ ѿсѣчѐ . прест҃а́ѧ ᲂу҆́бѡ дш҃а во а҆́дъ сᲂше́дши , є҆го́же и҆ плѣнѝ . во́ грᲂбѣ же и҆стлѣ́нїѧ неви́дѣ ст҃о́е тѣ́ло , и҆зба́вителѧ дш҃а́мъ на́шимъ .

сти́хъ : и҆́бо ᲂу҆҆твердѝ вселе́ннꙋю ,꙳ ꙗ҆́же не пᲂд ви́житсѧ . Ѱалмы̀ и҆ пѣ́сньми славᲂсло́вимъ хрⷭ҇тѐ , є҆́же и҆з̾ ме́ртвыхъ твᲂѐ вᲂскрⷭ҇нїе , и҆́мже на́съ свᲂбᲂди́лъ є҆сѝ мꙋчи́тельства а҆́дᲂва . и҆ ꙗ҆́кѡ бг҃ъ дарᲂва̀ , живо́тъ вѣ́чныи и҆ ве́лїю млⷭ҇ть .

сти́хъ : до́мꙋ твᲂемꙋ̀ пᲂдᲂба́етъ ,꙳ ст҃ы́ни гдⷭ҇и в̾ дᲂлгᲂтꙋ̀ дні́й . ѽ влⷣко всѧ́ческимъ , непᲂсти́жиме тво́рче не́бꙋ и҆ землѝ . крⷭ҇та̀ ра́ди и҆ страсте́й , мнѣ̀ без̾стра́стїе и҆стᲂчи́лъ є҆сѝ . пᲂгребе́нїе же прїе́мъ , и҆ вᲂскр҃съ во сла́вѣ , сᲂвᲂскр҃си́лъ є҆сѝ а҆да́ма рꙋко́ю всеси́льнᲂю . сла́ва твᲂемꙋ̀ тридне́внᲂмꙋ вᲂста́нїю , и҆́мже дарᲂва̀ на́мъ вѣ́чныи живо́тъ , и҆ ѡ҆чище́нїе грѣхо́въ , ꙗ҆́кѡ є҆ди́нъ млрⷭ҇дъ .

сла́ва . гла́съ , ѕ҃ . Прїидѣ́те вѣ́рнїи , дне́сь ли́къ сᲂвᲂкꙋпи́вше , бл҃гᲂче́стнѡ тᲂржествꙋ́емъ , и҆ всѣ́хъ ст҃ы́хъ пресла́внꙋю и҆ честнꙋ́ю па́мѧть , сла́внѡ пᲂчте́мъ , гл҃юще , ра́дꙋйтесѧ а҆пⷭ҇ли сла́внїи , и҆ прⷪ҇ро́цы и҆ мч҃нцы и҆ ст҃лїе . ра́дꙋйтесѧ прпⷣбныхъ сᲂбо́ръ и҆ пра́ведныхъ . ра́дꙋйтесѧ честны́хъ же́нъ ли́къ , и҆ хрⷭ҇та̀ за́ миръ мᲂли́те , пᲂбѣ́ды странѣ̀ на́шей на ва́рвары дарᲂва́ти , и҆ дш҃а́мъ на́шимъ ве́лїю млⷭ҇ть . и҆ ны́нѣ , боⷢ҇ . Твᲂре́цъ и҆ и҆зба́витель мо́й пречⷭ҇таѧ хрⷭ҇то́съ гдⷭ҇ь , и҆з̾ твᲂи́хъ лᲂже́снъ прᲂше́дъ , в̾ мѧ̀ ѡ҆бо́лксѧ , пе́рвыѧ клѧ́твы а҆да́ма свᲂбᲂдѝ , тѣ́мже тѝ пречⷭ҇таѧ , ꙗ҆́кѡ бж҃їи мт҃ри невѣ́стѣ и҆ дв҃ѣй вᲂи́стинꙋ , вᲂпїе́мъ немо́лчно . ра́дꙋйсѧ а҆́нг҃льски . ра́дꙋйсѧ влⷣчце , пред̾ста́тельнице и҆ пᲂкро́ве , и҆ спасе́нїе дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь : бцⷣе дв҃о ра́дꙋисѧ , вⷤ . и҆ трᲂпа́рь , всѣ́мъ ст҃ы́мъ ,= аⷤ . про́чее .=

Въ нлⷣю , всѣ́хъ ст҃ы́хъ . на ᲂу҆́трени , на бг҃ъ гдⷭ҇ь , трᲂпа́рь , вᲂскрⷭ҇нъ . гла́съ , и҃ . Свы́шнихъ сни́де милᲂсе́рде , и҆ пᲂгребе́нїе прїѧ́тъ тридне́вно , да на́съ свᲂбᲂди́ши ѿ стрⷭ҇те́й . живᲂтѐ и҆ вᲂскрⷭ҇нїе на́ше сла́ва тебѣ̀ . двⷤа . сла́ва , ст҃ы́мъ . гла́съ , д҃ . И҆́же во все́мъ ми́ре мчн҃къ твᲂи́хъ гдⷭ҇и , ꙗ҆́кѡ багрѧни́цею и҆ ви́ссᲂмъ крᲂвьмѝ и҆́хъ цр҃кви твᲂѧ̀ ᲂу҆краси́вшисѧ . тѣ́хъ ра́ди вᲂпїе́тъ ти , хрⷭ҇тѐ бж҃е , лю́демъ твᲂи́мъ щедро́ты твᲂѧ̀ низ̾пᲂслѝ , и҆ ми́ръ гра́дꙋ твᲂемꙋ̀ да́рꙋй , и҆ дш҃а́мъ на́шимъ ве́лїю ми́лᲂсть . и҆ ны́нѣ , боⷢ҇ . И҆́же ѿ́ вѣка ᲂу҆тае́ннᲂе , и҆ а҆́нг҃лѡмъ несвѣ́дᲂмᲂе та́инство , тᲂбо́ю бцⷣе земны́мъ ꙗ҆ви́сѧ бг҃ъ в̾ неразмѣ́снѣ сни́тїи вᲂплᲂща́емъ . и҆ крⷭ҇тъ во́лею на́съ ра́ди вᲂспрїе́мъ , и҆́мже вᲂскр҃сѝ первᲂзда́ннаго , и҆ спасѐ ѿ сме́рти дш҃а на́ша .

По а҃ , стихᲂло́гїи , сѣда́ленъ . гла́съ , и҃ . Чл҃цы сп҃се гро́бъ тво́й зна́менаша , и҆ а҆́нг҃лъ ка́мень ѿ две́рей ѿвалѝ , жены́ же зрѧ́хꙋ вᲂста́вша ѿ ме́ртвыхъ , и҆ ты́ѧ бл҃гᲂвѣсти́ша ᲂу҆ченико́мъ твᲂи́мъ в̾ сїѡ́нѣ , ꙗ҆́кѡ вᲂскр҃се живо́тъ всѣ́хъ , и҆ разрꙋши́шасѧ ᲂу҆́зы сме́ртныѧ , гдⷭ҇и сла́ва тебѣ̀ . сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ , незабꙋ́ди ни́щихъ свᲂи́хъ до кᲂнца̀ . и҆ =па́ки , то́йже , сѣда́ленъ . =сла́ва , и҆ нн҃ѣ , боⷢ҇ . И҆́же на́съ ра́ди рᲂжде́исѧ ѿ дв҃ы , и҆ распѧ́тїе претерпѣ́въ бл҃гі́и , и҆спрᲂве́ргїи сме́ртїю сме́рть , и҆ вᲂскрⷭ҇нїе ꙗ҆́вль ꙗ҆́кѡ бг҃ъ , непре́зри и҆́хже сᲂзда̀ рꙋко́ю свᲂе́ю . ꙗ҆вѝ чл҃кᲂлю́бїе свᲂѐ млⷭ҇тиве . прїимѝ ро́ждьшꙋю тѧ̀ бцⷣꙋ мᲂлѧ́щꙋсѧ за ны̀ , и҆ спасѝ сп҃се на́шъ лю́ди сᲂгрѣ́шшїѧ .

По в҃ , стихᲂло́гїи , сѣда́ленъ . гла́съ , и҃ . Вᲂскрⷭ҇лъ є҆сѝ и҆з̾ ме́ртвыхъ живᲂтѐ всѣ́хъ , и҆ а҆́нг҃лъ свѣ́телъ жена́мъ вᲂпїѧ́ше , преста́ните ѿ сле́зъ , и҆ а҆пⷭ҇лѡмъ бл҃гᲂвѣсти́те , вᲂзᲂпі́йте пᲂю́ще , ꙗ҆́кѡ вᲂскр҃се хрⷭ҇то́съ бг҃ъ , бл҃гᲂи҆зво́ливыи спастѝ , ꙗ҆́кѡ бг҃ъ ро́дъ чл҃ческїи . сти́хъ : и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ , пᲂвѣ́мъ всѧ̀ чꙋдеса̀ твᲂѧ̀ . и҆ =па́ки , то́йже , сѣда́ленъ . =сла́ва , и҆ ны́нѣ , боⷢ҇ . Пᲂвелѣ́ннᲂе та́инство прїе́мъ в̾ ра́зꙋмѣ в̾ кро́вѣ і҆ѡ́сифᲂвѣ , ско́рѡ пред̾ста̀ беспло́тныи . гл҃ѧ неи҆скꙋ́снѣй бра́кꙋ , преклᲂне́и схᲂжде́нїемъ нб҃са̀ , в̾мѣща́етсѧ неи҆змѣ́ннѡ ве́сь в̾ тѧ̀ . є҆го́же и҆ ви́дѧ в̾ лᲂжесна́хъ твᲂи́хъ прїе́мша ра́бїи зра́къ , ᲂу҆жаса́юсѧ зва́ти тѝ , ра́дꙋисѧ невѣ́сто неневѣ́стнаѧ .

По непᲂро́чнахъ , трᲂпарѝ , а҆́нг҃льскїи сᲂбо́ръ . и҆пако́й . Мѷрѡно́сицы живᲂда́внᲂмꙋ пред̾стᲂѧ́ще гро́бꙋ , влⷣкꙋ и҆ска́хꙋ в̾ ме́ртвыхъ без̾сме́ртнаго . и҆ ра́дᲂсть бл҃гᲂвѣ́щенїѧ ѿ а҆́нг҃ла прїе́мше , а҆пⷭ҇лѡмъ вᲂз̾вѣща́хꙋ , вᲂскр҃се хрⷭ҇то́съ бг҃ъ , пᲂдаѧ̀ ми́рᲂви ве́лїю млⷭ҇ть .

степе́нны . гла́съ , и҃ . а҆нтифо́нъ , а҃ . пᲂе́мъ по вⷤ . Ѿ ю҆́нᲂсти мᲂеѧ̀ вра́гъ мѧ̀ и҆скꙋша́етъ , и҆ сластьмѝ пали́тъ мѧ , а҆́зъ же надѣ́ѧсѧ на тѧ̀ гдⷭ҇и , пᲂбѣжда́ю сегѡ̀ . Ненави́дѧщїи сїѡ́на да бꙋ́дꙋтъ ᲂу҆́бѡ , пре́жде вᲂстᲂрже́нїѧ ꙗ҆́кѡ трава̀ , с̾сѣче́тъ бо хрⷭ҇то́съ вы́и и҆́хъ , ᲂу҆сѣче́нїемъ мꙋ́къ . Ст҃ы́мъ дх҃ᲂмъ є҆́же жи́ти всѧ́ческимъ , свѣ́тъ ѿ́ свѣта бг҃ъ вели́къ , со ѻ҆ц҃е́мъ бо пᲂе́мъ є҆гѡ̀ и҆ с̾сло́вᲂмъ .

а҆нтифо́нъ , в҃ . Вᲂзва́хъ к̾ тебѣ̀ гдⷭ҇и , вᲂнмѝ , приклᲂни́ ми ᲂу҆́хо твᲂѐ вᲂпїю́щꙋ , и҆ ѡ҆чи́сти пре́жде да́же нево́змеши менѐ ѿ сю́дꙋ . На́ гдⷭ҇а и҆мѣ́ѧ наде́ждꙋ , не ᲂу҆страши́тсѧ тᲂгда̀ , є҆гда̀ ѻ҆гне́мъ всѧ̀ сꙋди́ти и҆́мать и҆ мꙋ́кᲂю . Ст҃ы́и дх҃ъ бг҃ᲂсло́вїѧ є҆ди́ница трист҃а́ѧ , ѻ҆ц҃ъ бо без̾нача́ленъ ѿ него́же рᲂди́сѧ сн҃ъ без̾лѣ́тенъ , и҆ дх҃ъ сᲂпресто́ленъ , со ѡ҆бра́зно ѿ ѻ҆ц҃а спрᲂсїѧ́ша .

а҆нтифо́нъ , г҃ . Срⷣце мᲂѐ , стра́хᲂмъ твᲂи́мъ да пᲂкры́етсѧ , смиреннᲂмꙋ́дрствꙋющи , да невᲂзне́ссѧ ѿпаде́тъ ѿ тебѐ всеще́дре . Къ мт҃ри свᲂе́й землѝ , ѿхᲂдѧ́и всѧ́къ , а҆́бїе разрѣша́етсѧ прїѧ́ти мꙋ́ки , и҆лѝ по́чести пᲂжи́вшихъ . Ст҃ы́мъ дх҃ᲂмъ , всѧ́къ кто̀ бжⷭ҇твеннѣ ви́дитъ и҆ пред̾гл҃етъ , чꙋдᲂдѣ́етъ вы́шнѧѧ , в̾ трїе́хъ є҆ди́нагѡ бг҃а пᲂѧ̀ . а҆́ще бо и҆ трисїѧ́нно , є҆ди́но нача́ло бжⷭ҇твеннᲂе .

а҆нтифо́нъ , д҃ . Сѐ что̀ дᲂбро̀ , и҆лѝ что̀ красно̀ , но є҆́же жи́ти бра́тїе в̾ кꙋ́пѣ . ѡ҆ се́мъ бо гдⷭ҇ь ѡ҆бѣща̀ живо́тъ вѣ́чныи . Ри́зы є҆гѡ̀ и҆́же кри́ны се́льныѧ , ми́рᲂви пᲂвелѣва́етъ ни чи́мъ же пещи́сѧ . Ст҃ы́мъ дх҃ᲂмъ , є҆динᲂви́днᲂю вино́ю всѧ̀ сᲂдержа́и мирᲂпᲂда́тельнѡ , бг҃ъ бо се́й є҆́сть , ѻ҆ц҃ꙋ́ же и҆ сн҃ꙋ є҆динᲂсꙋ́щенъ , и҆ гдⷭ҇ь .

прᲂки́менъ , ѱл҃о́мъ дв҃дᲂвъ . вᲂцр҃и́тсѧ гдⷭ҇ь во́ вѣки , бг҃ъ тво́й сїѡ́не в̾ ро́дъ и҆ ро́дъ . сти́хъ : хвалѝ дш҃е мᲂѧ̀ гдⷭ҇а , вᲂсхвалю̀ гдⷭ҇а в̾ живᲂтѣ̀ мᲂе́мъ . всѧ́ко дыха́нїе . є҆ѵⷢ҇а́лїе , ѿ =матѳе́ѧ . заⷱ҇ , рѕ҃і . =та́же , Вᲂскрⷭ҇нїе хрⷭ҇то́во ви́дѣвше .

ѱало́мъ , н҃ . сла́ва . мл҃твъ ра́ди а҆пⷭ҇лъ , млⷭ҇тиве ѡ҆чи́сти мно́жество сᲂгрѣше́нїи на́шихъ .

и҆ ны́нѣ . мᲂли́твъ ра́ди бцⷣы , млⷭ҇тиве ѡ҆чи́сти мно́жество сᲂгрѣше́нїи на́шихъ .

Пᲂми́лꙋй мѧ бж҃е , по вели́цѣй млⷭ҇ти твᲂе́й , по мно́гимъ щедро́тамъ твᲂи́мъ , ѡ҆чи́сти без̾ зако́нїѧ мᲂѧ̀ , бж҃е сп҃се мо́й .

стихѣ́ра , вᲂскрⷭ҇на . гла́съ , ѕ҃ . Вᲂскр҃съ і҆с҃ъ ѿ́ грᲂба , ꙗ҆́кᲂже прᲂречѐ . и҆ дарᲂва̀ на́мъ живо́тъ вѣ́чныи , ми́ръ и҆ ве́лїю ми́лᲂсть . і҆єре́й , гл҃етъ : спасѝ бж҃е лю́ди . пᲂе́м̾ : гдⷭ҇и пᲂми́лꙋй , ві҃ . і҆єре́й , вᲂз̾гла́с̾ : млⷭ҇тїю и҆ щедро́тами и҆ чл҃кᲂлю́бїемъ . кано́нъ , вᲂскрⷭ҇нъ , со і҆рмᲂсо́мъ , на д҃ . и҆ крⷭ҇тᲂвᲂскрⷭ҇нъ , на́ два . и҆ =бцⷣѣ , на́ два . =и҆ всѣ́мъ ст҃ы́мъ , на́ ѕ҃ .

Кано́нъ , вᲂскрⷭ҇нъ . гла́съ , и҃ . пѣ́снь , а҃ . і҆рмо́съ . Вᲂѡ҆рꙋже́на фараѡ́на пᲂгрꙋзѝ , чꙋдᲂтвᲂрѧ́й дре́вле , мѡѷсе́йскїи же́ѕлъ крⷭ҇тᲂѡ҆бра́знѡ прᲂразѝ , и҆ раздѣлѝ мо́ре , і҆и҃лѧ же бѣжа́ща , пѣ́ша хᲂдѧ́ща спасѐ , пѣ́снь бг҃ᲂви вᲂз̾сыла́юща . запѣ́въ : сла́ва гдⷭ҇и вᲂскрⷭ҇нїю твᲂемꙋ̀ . Всеси́льнꙋ хрⷭ҇то́вꙋ бжⷭ҇твꙋ̀ ка́кѡ недиви́мсѧ , ѿ страсте́й ᲂу҆́бѡ всѣ́мъ вѣ́рнымъ , без̾стра́стїе и҆ нетлѣ́нїе тᲂча́ща . ѿ ребра́ же ст҃а́гѡ и҆сто́чникъ без̾сме́ртныи и҆ска́пающа и҆ живо́тъ и҆́з̾ грᲂба приснᲂсꙋ́щныи . Ꙗ҆́кѡ бл҃гᲂлѣ́пенъ жена́мъ а҆́нг҃лъ ны́нѣ ꙗ҆ви́сѧ , и҆ свѣ́тлыѧ нᲂсѧ̀ є҆сте́ственыѧ ѻ҆́бразы , невеще́ственыѧ чистᲂты̀ . зра́кᲂмъ же вᲂзвѣща́ѧ свѣ́тъ вᲂскрⷭ҇нїѧ , вᲂпїѧ̀ вᲂскр҃се гдⷭ҇ь . боⷢ҇ . Пресла́внаѧ вᲂз̾гл҃ашасѧ ѡ҆ тебѣ̀ в̾ ро́дѣхъ рᲂдо́въ , ꙗ҆́же бж҃їе сло́во во́ чревѣ вмѣсти́вши , чи́ста же пребы́вши бцⷣе мр҃і́е . тѣ́мже тѧ всѝ пᲂчита́емъ , сꙋ́щее с̾ бг҃ᲂмъ застꙋпле́нїе на́ше .

кано́нъ , крⷭ҇тᲂвᲂскрⷭ҇нъ . і҆рмо́съ . Во́дꙋ прᲂше́дъ . запѣ́въ : сла́ва гдⷭ҇и крⷭ҇тꙋ̀ твᲂемꙋ̀ и҆ вᲂскрⷭ҇нїю . Взѧта̀ бы́ша врата̀ бᲂлѣ́зненаѧ , и҆ ᲂу҆страши́шасѧ а҆́дъстїи вра́тарїе , зрѧ́ще в̾ преи҆спо́днѧѧ сᲂше́дшаго , и҆́же всѧ́кᲂгѡ превы́ше є҆стества̀ . Оу҆диви́шасѧ чи́ни а҆́нг҃льстїи , зрѧ́ще на прⷭ҇то́лѣ бжⷭ҇твенѣмъ пᲂсажено̀ ѿпа́дшее є҆стество̀ чл҃ческᲂе , затвᲂре́нᲂе в̾ преи҆спо́днихъ землѝ .

и҆́нъ , кано́н̾ , прест҃ѣ́й бцⷣѣ . і҆рмо́с̾ . Пᲂе́мъ гдⷭ҇ви . запѣ́въ : прест҃а́ѧ гжⷭ҇е бцⷣе спасѝ на́съ . Прест҃а́ѧ бцⷣе , ꙗ҆́же вᲂпло́щшеесѧ приснᲂсꙋ́щнᲂе и҆ пребжⷭ҇твенᲂе сло́во , па́че є҆стества̀ ро́ждьши пᲂе́мъ тѧ . Гро́здъ тѧ живᲂно́сенъ и҆ всекра́сныи . дв҃аѧ хрⷭ҇тѐ пᲂрᲂдила̀ є҆́сть , и҆́же всемꙋ̀ ми́рꙋ ка́плюща сла́дᲂсть спасе́нїѧ . Ро́дъ а҆да́мскїи ко и҆́же па́че ᲂу҆ма̀ бл҃же́нствꙋ , тᲂбо́ю вᲂз̾веде́ныи бцⷣе дᲂсто́йнѡ сла́витъ тѧ .

кано́нъ , всѣ́мъ ст҃ы́мъ . гла́съ , и҃ . і҆рмо́съ . Вᲂѡ҆рꙋже́на фараѡ́на . запѣ́въ : ст҃і́и всѝ , мᲂли́те бг҃а ѡ҆ на́съ . Твᲂи́хъ ст҃ы́хъ вᲂспѣва́ющꙋ чи́ны , твᲂи́мъ свѣ́тᲂмъ дш҃и мᲂе́й , мл҃твами си́хъ , ѡ҆зари́ти мᲂлю́сѧ . ты́ бо є҆сѝ свѣ́тъ непристꙋ́пенъ , невѣ́дѣнїѧ ве́сь мра́къ ѿженѝ ѿ менѐ твᲂи́ми свѣтлᲂстьмѝ , сло́ве бж҃їи свѣтᲂда́вче хрⷭ҇тѐ .= вⷤ .= Є҆гда̀ вᲂзнесе́сѧ на́ древо , привле́къ є҆сѝ ко свᲂемꙋ̀ пᲂзна́нїю , ꙗ҆зы́кѡвъ всѐ наслѣ́дїе твᲂѐ влⷣко , и҆ свѣ́тᲂмъ ᲂу҆ѧсни́лъ є҆сѝ ст҃ы́ѧ трⷪ҇цы , а҆пⷭ҇лы ст҃ы́ми твᲂи́ми , и҆ мглꙋ̀ пре́лести ѿгна́лъ є҆сѝ . Закᲂнᲂпᲂлᲂже́нїемъ твᲂи́мъ хрⷭ҇тѐ , ѡ҆бразꙋ́еми твᲂѝ а҆пⷭ҇ли , ꙗ҆́же на землѝ всѧ̀ , бл҃гᲂче́стнѡ ѿри́нꙋша . и҆ свѣ́тᲂмъ бл҃гᲂда́ти ѡ҆свѣти́ша всю̀ вселе́ннꙋю сла́внїи , бл҃гᲂвѣ́стнѡ тѧ прᲂпᲂвѣ́дающе . сла́ва . Ра́дꙋющесѧ мч҃нцы крⷭ҇тъ тво́й взе́мше , и҆ честно́й стра́сти неꙋкло́ннѡ пᲂдо́бѧщесѧ . мꙋчи́тельскагѡ не ᲂу҆страши́шасѧ преще́нїѧ до́блїи , ни ѻ҆гнѧ̀ ни меча̀ ни ра́нъ , но нижѐ гла́да , нижѐ сме́рти . и҆ ны́нѣ , боⷢ҇ . И҆звᲂле́нїе мꙋ́жеско дв҃ы всечⷭ҇таѧ вᲂспрїе́мше , ꙗ҆́ве мꙋ́ченическими страда́ньми , крѣ́пкѡ пᲂстрада́ша . и҆ ѱало́мски во слѣ́дъ тебѐ , сн҃ꙋ твᲂемꙋ̀ дв҃о , бжⷭ҇твенѣ сра́дꙋющесѧ всецр҃ю приведо́шасѧ . катава́сїѧ : ѿве́рзꙋ ᲂу҆ста̀ мᲂѧ̀ .

пѣ́снь , г҃ . і҆рмо́съ . Оу҆тверже́и нб҃са̀ в̾ нача́тцѣ ра́зꙋмᲂмъ , и҆ зе́млю на вᲂда́хъ ѡ҆снᲂва́выи , на ка́мени мѧ хрⷭ҇тѐ цр҃ко́внѣмъ ᲂу҆твердѝ , ꙗ҆́кѡ нѣ́сть ст҃а , па́че тебѐ чл҃кᲂлю́бче . Ѻ҆сꙋжде́наго а҆да́ма вкꙋше́нїемъ грѣха̀ , пло́ти твᲂеѧ̀ спаси́тельнᲂю стра́стїю ѡ҆правда́лъ є҆сѝ хрⷭ҇тѐ . са́мъ бо сы́и непᲂви́ненъ сме́ртнаго и҆скꙋ́са бы́лъ є҆сѝ без̾грѣ́шне . Вᲂскрⷭ҇нїѧ свѣ́тъ вᲂсїѧ̀ , сꙋ́щимъ во тмѣ̀ и҆ сѣ́ни сме́ртнѣй сѣдѧ́щимъ , бг҃ъ мо́й і҆с҃ъ , и҆ свᲂи́мъ бжⷭ҇тво́мъ крѣ́пкаго свѧза́въ , и҆ сᲂсꙋ́ды є҆гѡ̀ расхити́лъ є҆́сть . боⷢ҇ . Херꙋви́мъ и҆ серафи́мъ , превы́шши ꙗ҆ви́ласѧ є҆сѝ бцⷣе . ты́ бо є҆ди́на прїѧ́тъ невмѣсти́маго бг҃а , во свᲂе́мъ чре́вѣ несквѣ́рнаѧ . тѣ́мже тѧ вѣ́рнїи всѝ чи́стаѧ пѣ́сньми ᲂу҆бл҃жа́емъ .

и҆́нъ , і҆рмо́съ . Нбⷭ҇нᲂмꙋ крꙋ́гꙋ . Ѿве́ргшагᲂсѧ пре́жде за́пᲂвѣди гдⷭ҇и , и҆з̾ринᲂве́на мѧ ѿ тебѐ сᲂтвᲂри́лъ є҆сѝ , въ него́ же вᲂѡ҆брази́сѧ . пᲂслꙋша́нїемъ же наказа́въ , к̾ себѣ̀ всели́лъ є҆сѝ распѧ́тїѧ ра́ди . Въ премꙋ́дрᲂсти всѧ̀ прᲂꙋвѣ́дѣвъ со́здалъ є҆сѝ , и҆ ра́зꙋмᲂмъ вᲂдрꙋзи́въ преи҆спо́днѧѧ . не неспᲂдо́билъ є҆сѝ схᲂжде́нїемъ тѝ сло́ве бж҃їи , вᲂскр҃си́ти сꙋ́щаго и҆́же по ѻ҆́бразꙋ свᲂемꙋ̀ .

и҆́нъ , і҆рмо́съ . Ты̀ є҆сѝ ᲂу҆тверже́нїе . Да́ждь на́мъ по́мᲂщь твᲂи́ми мл҃твами всечⷭ҇таѧ , прило́ги разрꙋша́ющи лю́тыхъ ѡ҆б̾стᲂѧ́нїи . Є҆́ввѣ пра́мт҃ри ты̀ и҆справле́нїе бы́сть , нача́льника жи́зни ми́рꙋ хрⷭ҇та̀ , бцⷣе ро́ждьши . Препᲂѧ́ши мѧ си́лᲂю свы́ше всечи́стаѧ , ꙗ҆́же вᲂи́стиннꙋ бг҃а ро́ждьши пло́тїю , ѻ҆́ч҃ꙋю сᲂста́внꙋю си́лꙋ .

и҆́нъ , і҆рмо́съ . Оу҆тверже́и нб҃са̀ . Въ сщ҃е́нство сщ҃е́нно , сщ҃е́нницы и҆ па́стырїе ѡ҆бле́кшесѧ , и҆ то̀ премꙋ́дрствено ѡ҆кᲂрми́вше хрⷭ҇тꙋ̀ , житїе́мъ ᲂу҆краси́ша . ᲂу҆чи́тельства сло́во ст҃і́и , свы́ше вᲂи́стинꙋ прїе́мше ѡ҆бᲂга́тившасѧ .= двⷤа .= Оу҆краси́вшесѧ ᲂу҆дᲂбре́ньми пе́рвагѡ дᲂбрᲂтвᲂре́нїѧ , и҆ ꙗ҆ви́вшесѧ ꙗ҆́кѡ незахᲂдѧ́щаѧ свѣти́ла . и҆ ѡ҆небеси́сте цр҃кᲂвь хрⷭ҇то́вꙋ ст҃і́и , ѿ ню́дъ краснѡ̀ всѝ тꙋ̀ разли́чнѡ ᲂу҆краси́вше .= вⷤ .= сла́ва . Зако́нꙋ пᲂвинꙋ́ющесѧ твᲂемꙋ̀ , бл҃же́нныхъ сᲂбо́ры , мнᲂгᲂѡ҆бра́зными дᲂбрᲂдѣ́тельми прᲂсвѣти́вшесѧ , наслѣ́дᲂваша ѻ҆би́тели нбⷭ҇ныѧ влⷣко . и҆ ѿ и҆́нꙋдꙋ и҆́нъ , всѝ ті́и дᲂсто́йнѡ и҆спо́лниша . и҆ ны́нѣ , боⷢ҇ . Ѿ ́чрева дв҃ствена , є҆́же ѿ́ бг҃а бг҃а сло́ва , рᲂдила̀ є҆сѝ на́мъ бг҃ᲂмт҃и . є҆го́же дв҃ы чⷭ҇тыѧ бг҃ᲂлѣ́пнѡ вᲂз̾люби́ша , и҆ в̾слѣ́дъ тебѐ всѧ̀ семꙋ̀ ꙗ҆́вѣ пᲂслѣ́дᲂваша . катава́сїѧ : твᲂѧ̀ пѣвцы̀ .

кᲂнда́къ , вᲂскрⷭ҇нъ . гла́съ , и҃ . Вᲂскр҃съ и҆́з̾ грᲂба , ᲂу҆ме́ршихъ вᲂз̾дви́глъ є҆сѝ , и҆ а҆да́ма вᲂскр҃си́лъ є҆сѝ . и҆ є҆́вва ликꙋ́етъ в̾ твᲂе́мъ вᲂскрⷭ҇нїи . мирсті́и кᲂнцы̀ тᲂржествꙋ́ютъ в̾ вᲂста́нїи твᲂе́мъ и҆з̾ ме́ртвыхъ мнᲂгᲂмлⷭ҇тиве . и҆́кᲂсъ . А҆́дᲂва црⷭ҇твїѧ плѣни́въ , и҆ ме́ртвыхъ вᲂскр҃си́въ дᲂлгᲂтерпѣли́ве , жены̀ мѷрѡно́сицы ᲂу҆срѣ́тъ , в̾мѣ́стѡ печа́ли ра́дᲂсть прине́съ , и҆ а҆пⷭ҇лѡмъ твᲂи́мъ вᲂз̾вѣсти́лъ є҆сѝ зна́менїѧ пᲂбѣ́ды , сп҃се мо́й живᲂда́телю , и҆ тва́рь прᲂсвѣща́еши чл҃кᲂлю́бче . сегѡ̀ ра́ди и҆ ми́ръ кꙋ́пнѡ ра́дꙋетсѧ в̾ вᲂста́нїи твᲂе́мъ и҆з̾ ме́ртвыхъ мнᲂгᲂмлⷭ҇тиве .

сѣда́ленъ . гла́съ , и҃ . Претерпѣ́вше , го́ры терпѣ́нїѧ ꙗ҆ви́стесѧ , и҆ стᲂлпы̀ дх҃о́внїи , мч҃нцы прехва́льнїи хрⷭ҇та̀ бг҃а на́шегѡ . ѿ землѝ взе́мшесѧ на высᲂтꙋ̀ , прелᲂже́нїемъ к̾ нбⷭ҇нѣй сла́вѣ , самᲂви́дцы бы́вше . тѣ́мже по дᲂстᲂѧ́нїю ѡ҆бᲂгати́вшесѧ бл҃гᲂда́тїю дх҃а . всегда̀ и҆сцѣле́нїе пᲂдава́ете , стрⷭ҇тᲂте́рпцы прехва́льнїи . мᲂли́те хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , пра́зднꙋющимъ любо́вїю ст҃ꙋ́ю па́мѧть ва́шꙋ . сла́ва . Пра́ѻ҆ц҃ъ ѻ҆ц҃ъ , патрїа́рхъ , а҆пⷭ҇лъ мч҃нкъ и҆ прⷪ҇ркъ , ст҃ль прпⷣбныхъ и҆ пра́ведныхъ , и҆ всѣ́хъ ст҃ы́хъ твᲂи́хъ в̾кꙋ́пѣ , и҆ же́нъ бжⷭ҇твенᲂе сᲂсло́вїе , ст҃ꙋ́ю па́мѧть твᲂрѧ́ще хрⷭ҇тѐ бж҃е , всѣ́хъ пᲂдвиза́емъ на мᲂли́твꙋ мᲂлѧ́щесѧ , ᲂу҆мирѝ ми́ръ сво́й тѣ́хъ ра́ди ꙗ҆́кѡ чл҃кᲂлю́бецъ . да всѝ вᲂпїе́мъ ти бж҃е , прᲂславлѧ́емыи во́ свѣтѣ ст҃ы́хъ твᲂи́хъ , ꙗ҆́кѡ вᲂи́стинꙋ прᲂславлѧ́ѧи дᲂсто́йнѡ па́мѧть и҆́хъ . и҆ ны́нѣ , боⷢ҇ . Нбⷭ҇нꙋю две́рь и҆ кᲂвче́гъ , прест҃ꙋ́ю го́рꙋ , и҆ свѣ́тлыи ѻ҆́блакъ вᲂспᲂе́мъ , неѡ҆пали́мꙋю кꙋпинꙋ̀ , слᲂве́сныи ра́й , и҆ є҆́ввы вᲂзва́нїе , вселе́ннѣй все́й вели́кїи сᲂсꙋ́дъ . ꙗ҆́кѡ спасе́нїе в̾ не́мъ сᲂдѣ́ласѧ ми́рᲂви , и҆ ѡ҆ставле́нїе дре́внимъ сᲂгрѣше́нїемъ . тѣ́мже и҆ вᲂпїе́мъ є҆́й , мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , бл҃гᲂче́стнѡ пᲂкланѧ́ющимсѧ прест҃о́мꙋ ржⷭ҇твꙋ̀ твᲂемꙋ̀ [пᲂкло́н̾] .

пѣ́снь , д҃ . і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла

ми , ты́ ми бг҃ъ , ты́ ми ра́дᲂванїе , не ѡ҆ста́вль нѣ́дра ѻ҆́ч҃а , но ми́лᲂстїю сѝ на́шꙋ нищетꙋ̀ пᲂсѣти́в̾ , тѣ́мъ с̾ пррⷪ҇кᲂмъ а҆вва́кꙋмᲂмъ зᲂвꙋ̀ , си́лѣ твᲂе́й сла́ва чл҃кᲂлю́бче . Ты̀ ме́рзска мѧ сꙋ́ща ѕѣлѡ̀ вᲂз̾люби́лъ є҆сѝ . ты̀ и҆стᲂща́нїемъ стра́ннымъ сни́де на́ землю , бл҃гᲂꙋтро́бне сп҃се , пᲂслѣ́днѧго ми дᲂсажде́нїѧ не ѿве́ргсѧ . и҆ пребы́въ на высᲂтѣ̀ пречⷭ҇тыѧ твᲂеѧ̀ сла́вы , пре́жде без̾че́ствᲂванаго прᲂсла́вилъ є҆сѝ . Кто̀ зрѧ̀ влⷣко ны́нѣ недиви́тсѧ , ра́ди страсте́й сме́рть разᲂрѧ́емꙋ , крⷭ҇то́мъ же бѣжа́щꙋ тлѣ́нїю ; и҆ сме́рти ра́ди , а҆́дᲂво бᲂга́тство и҆стᲂщава́емо бжⷭ҇твенᲂю си́лᲂю , тебѐ распѧ́таго . чꙋ́дно дѣ́ло чл҃кᲂлю́бче . боⷢ҇ . Ты̀ вѣ́рнымъ пᲂхвала̀ є҆сѝ без̾невѣ́стнаѧ . ты̀ пред̾ста́тельница . ты̀ и҆ прибѣ́жище хрⷭ҇тїа́нѡмъ , стѣна̀ и҆ приста́нище . к̾ сы́нꙋ бо свᲂемꙋ̀ мᲂльбы̀ но́сиши всенепᲂро́чнаѧ , и҆ спаса́еши ѿ бѣ́дъ , и҆́же вѣ́рᲂю и҆ любо́вїю бцⷣꙋ чⷭ҇тꙋю тебѐ вѣ́дꙋщихъ .

и҆́нъ , і҆рмо́съ . Оу҆слы́шахъ гдⷭ҇и . На крⷭ҇тѣ́ тѧ пригвᲂзди́ша , закᲂнᲂпрестꙋ́пныхъ дѣ́ти хрⷭ҇тѐ бж҃е , и҆́мже спа́слъ є҆сѝ ꙗ҆́кѡ млрⷭ҇дъ , сла́вѧщихъ твᲂѧ̀ страда́нїѧ . Вᲂскр҃съ ѿ́ грᲂба , всѧ̀ сᲂвᲂскр҃си́лъ є҆сѝ сꙋ́щїѧ во а҆́дѣ ме́ртвыѧ , и҆ прᲂсвѣти́лъ є҆сѝ ꙗ҆́кѡ бл҃гᲂꙋтро́бенъ , сла́вѧщихъ твᲂѐ вᲂскрⷭ҇нїе .

и҆́нъ , і҆рмо́съ , то́йже . И҆́же кла́съ вᲂзрасти́вши живᲂтво́рныи , не ѡ҆ра́ннаѧ ни́ва , даю́щаго ми́рᲂви жи́знь , бцⷣе спаса́й пᲂю́щихъ тѧ . Бцⷣꙋ тѧ всечⷭ҇таѧ , прᲂсвѣ́щшїисѧ всѝ зна́емъ , сл҃нце бо пра́вды рᲂдила̀ є҆сѝ прⷭ҇нѡ дв҃о . Ѡ҆чище́нїе да́рꙋй на́шимъ невѣ́дѣнїемъ , ꙗ҆́кѡ без̾грѣ́шенъ , и҆ ᲂу҆мирѝ ми́ръ сво́й бж҃е , мл҃твами ро́ждьшїѧ тѧ̀ .

и҆́нъ , і҆рмо́съ . Ты́ ми хрⷭ҇тѐ гдⷭ҇ь . Сᲂвᲂкꙋпи́всѧ сᲂбо́ръ ст҃ы́хъ твᲂи́хъ , ра́ди любвѐ , и҆ тебѐ наслажда́ѧсѧ и҆́стинно же и҆ чи́сто , въ ра́дᲂсти ли́къ неразрꙋша́емыхъ со а҆́нг҃лы ликꙋ́ютъ ᲂу҆ тебѐ живᲂда́вче , бж҃е всѣ́хъ и҆ гдⷭ҇и .= двⷤа .= Ю҆́нᲂшски сла́внїи сщ҃еннᲂмч҃нцы , мꙋ́ченическимъ вѣнце́мъ ᲂу҆вѧзо́стесѧ , бг҃ᲂдѣ́тельнымъ пᲂма́занїемъ , и҆́же пе́рвѣе сщ҃е́нства ᲂу҆кра́шени пребᲂга́тїи . тѣ́мже сꙋгꙋ́бы вѣнцы̀ по дᲂстᲂѧ́нїю прїе́мше , со хрⷭ҇то́мъ вѣ́чнѡ ра́дꙋетесѧ . Плᲂтско́е мꙋдрᲂва́нїе всѐ дꙋ́хꙋ бг҃ᲂно́снїи вᲂи́стинꙋ пᲂвинꙋ́сте , вᲂздержа́тельнѡ , тᲂѧ̀ стремле́нїѧ неꙋдержи́маѧ пᲂсто́мъ ᲂу҆вѧди́вше . и҆ ны́нѣ без̾стра́стїѧ свѣ́тᲂмъ прᲂсвѣти́вшесѧ , мздꙋ̀ трꙋдо́мъ прїѧ́сте . сла́ва . Ꙗ҆́кѡ хрⷭ҇то́вы мч҃нцы первᲂмч҃нка мꙋ́ки ѕѣлѡ̀ претерпѣ́сте , тве́рдѣ же и҆ до́блественѣ , ꙗ҆́кѡ в̾ чꙋжи́хъ стра́жꙋще тѣлесѣ́хъ сла́внїи . и҆ ны́нѣ црⷭ҇твїѧ наслѣ́дницы пᲂказа́вшесѧ , вѣ́рнымъ цѣльбы̀ то́чите . и҆ ны́нѣ , боⷢ҇ . Невѣ́сто бж҃їѧ пребы́сть бцⷣе чⷭ҇таѧ , сего́ бо сло́во превѣ́чнᲂе , тѣле́снѣ рᲂдила̀ є҆сѝ на́мъ . ѡ҆ не́мже и҆ жены̀ ст҃ы́ѧ ст҃ᲂпᲂжи́вшїѧ , честьмѝ всеразли́чными , тᲂбо́ю ᲂу҆краси́вшесѧ , прамт҃рьнее паде́нїе и҆спра́виша .

катава́сїѧ : сѣдѧ́и во сла́вѣ .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Ѡ҆дѣ́ѧтисѧ претерпѣ̀ в̾ багрѧни́цꙋ пᲂрꙋга́емъ , пре́жде страсте́й твᲂи́хъ сп҃се , первᲂзда́ннаго пᲂкрыва́ѧ без̾ѡ҆бра́знᲂе ѡ҆бнаже́нїе , и҆ на́гъ пригвᲂзди́сѧ на крⷭ҇тѣ̀ пло́тїю , сᲂвлача́ѧ хрⷭ҇тѐ ѻ҆дѣѧ́нїе ᲂу҆мерщве́нїѧ . Ѿ =пе́рсти сме́ртныѧ па́дшее ми па́ки на́здалъ є҆сѝ сꙋщество̀ , вᲂскр҃съ и҆з̾ ме́ртвыхъ , несᲂстарѣ́ющесѧ хрⷭ҇тѐ сᲂтвᲂри́лъ є҆сѝ , ꙗ҆́вль па́ки ꙗ҆́кᲂже црⷭ҇кїи ѻ҆́бразъ , нетлѣ́нїѧ свѣ́тᲂмъ блиста́ющъ . =боⷢ҇ . Мт҃рьне дерзнᲂве́нїе , є҆́же к̾ сн҃ꙋ свᲂемꙋ̀ и҆мꙋ́щи всечⷭ҇таѧ , сро́днагѡ прᲂмышле́нїѧ на́шегѡ , непре́зри мо́лимсѧ , ꙗ҆́кѡ тебѐ є҆ди́нꙋ хрⷭ҇тїа́не ко влⷣцѣ , ѡ҆чище́нїе бл҃гᲂпремѣни́тельно пред̾лага́емъ .

и҆́нъ , і҆рмо́съ . Прᲂсвѣтѝ на́съ . Наста́ви на́съ к̾ свѣ́тꙋ си́лᲂю крⷭ҇та̀ твᲂегѡ̀ хрⷭ҇тѐ , сегѡ̀ ра́ди ти припа́даемъ , тво́й ми́ръ пᲂда́ждь на́мъ чл҃кᲂлю́бче . Ѡ҆кᲂрмѝ живᲂта̀ на́шегѡ хрⷭ҇тѐ бж҃е на́шъ , пᲂю́щихъ твᲂѐ вᲂста́нїе , и҆ ми́ръ пᲂда́ждь на́мъ чл҃кᲂлю́бче .

и҆́нъ , і҆рмо́съ . Оу҆́треннююще вᲂпїе́мъ ти . Оу҆тᲂлѝ непᲂстᲂѧ́ннꙋю бꙋ́рю страсте́й на́шихъ дв҃о , ꙗ҆́же бг҃а ро́ждьши ѡ҆кᲂрми́телѧ и҆ гдⷭ҇а . Слꙋ́жатъ ржⷭ҇твꙋ̀ твᲂемꙋ̀ пречⷭ҇таѧ бцⷣе , а҆́нг҃льстїи чи́нᲂве , и҆ земны́хъ сᲂставле́нїѧ . Мр҃і́е бцⷣе без̾невѣ́стнаѧ , ᲂу҆пᲂва́нїѧ враго́въ сꙋ́етна сᲂтвᲂрѝ , а҆ пᲂю́щихъ тѧ̀ ѡ҆б̾веселѝ .

и҆́нъ , і҆рмо́съ . Вскꙋ́ю мѧ ѿри́нꙋ . Прᲂзрѣ́ти ꙗ҆́кѡ прⷪ҇рцы бжⷭ҇твенїи , пᲂслѣ́днѧѧ хᲂтѧ́щаѧ бы́ти спᲂдо́бистесѧ , вᲂздержа́нїемъ бо пᲂле́знѣ дꙋ́ши ѡ҆чи́стивше , житїе́мъ чи́стымъ ѽ бг҃ᲂгла́снїи , прᲂсвѣща́еми си́лᲂю ст҃а́гѡ дх҃а .= вⷤ .= Ли́къ всѣ́хъ ст҃ы́хъ ны́нѣ свѣ́титсѧ , бжⷭ҇твеными дарᲂва́ньми , и҆́же пре́жде зако́на всѝ ѻ҆ц҃енача́льницы , прᲂро́цы и҆ а҆пⷭ҇ли и҆ мч҃нкъ сᲂбо́ри , и҆ по́стникъ и҆ ᲂу҆чи́телей и҆ пра́ведныхъ , и҆ сщ҃еннᲂмч҃нкъ .= вⷤ .= сла́ва . Свѣтѧ́щьсѧ зрѧ́ще твᲂи́хъ ст҃ы́хъ сᲂбо́ръ дне́сь , твᲂе́ю сп҃се свѣ́тлᲂстїю , и҆ свѣща́ми неꙋгаса́емыми бл҃гᲂда́ти , твᲂѐ бжⷭ҇твенᲂе бᲂга́тство бл҃ги́хъ , и҆ спѣ́шьство , вᲂспѣва́емъ непреста́ннѡ чл҃кᲂлю́бче . и҆ ны́нѣ , боⷢ҇ . Преди́внᲂе твᲂѐ ржⷭ҇тво̀ вᲂзлюби́вше жены̀ бг҃ᲂлюби́выѧ , кра́снаѧ житїю̀ нивᲂчто́же вмѣни́ша всечи́стаѧ . но є҆гѡ̀ є҆ди́ны рачи́тельно жела́юще свѣ́тлᲂсти , и҆ бжⷭ҇твенаго ѡ҆сїѧ́нїѧ .

катава́сїѧ : ᲂу҆диви́шасѧ всѧ́ческаѧ .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . Дре́ва ра́ди низ̾лᲂжи́ мѧ крѣ́пкѡ , нача́льникъ ѕло́бы , ты́ же хрⷭ҇тѐ вᲂз̾дви́гсѧ на крⷭ҇тѣ̀ , крѣпча́йше низ̾лᲂжи́лъ є҆сѝ пᲂсрами́въ тᲂгѡ̀ , па́дшаго же вᲂскр҃си́въ . Ты̀ ᲂу҆ще́дрилъ сїѡ́на вᲂсїѧ́въ ѿ́ грᲂба , но́ва за ве́тхаго сверши́лъ є҆сѝ ꙗ҆́кѡ млрⷭ҇дъ , бжⷭ҇твенᲂю сѝ кро́вїю , и҆ нн҃ѣ црⷭ҇твꙋеши в̾ не́мъ во́ вѣки хрⷭ҇тѐ . боⷢ҇ . Да и҆зба́вимсѧ ѿ лю́тыхъ сᲂгрѣше́нїи , мᲂльба́ми твᲂи́ми бг҃ᲂрᲂди́тельнице чи́стаѧ , и҆ да ᲂу҆лꙋчи́мъ пречⷭ҇таѧ бжⷭ҇твенᲂе сїѧ́нїе , и҆́же и҆з̾ тебѐ неи҆зрече́ннѡ вᲂплᲂще́ннагѡ сн҃а бж҃їѧ .

и҆́нъ , і҆рмо́съ . Мл҃твꙋ прᲂлїю̀ ко́ гдⷭ҇ꙋ . Дла́ни на крⷭ҇тѣ̀ распрᲂсте́ръ є҆сѝ , и҆сцѣлѧ́ѧ не ᲂу҆держа́нно прᲂсте́ртꙋю рꙋ́кꙋ во є҆де́мѣ первᲂзда́ннагѡ . и҆ свᲂе́ю во́лею же́лчи вкꙋси́въ хрⷭ҇тѐ , и҆ спа́слъ є҆сѝ ꙗ҆́кѡ си́ленъ , пᲂю́щїѧ твᲂѐ сп҃се вᲂста́нїе . Сме́рти и҆зба́витель вкꙋсѝ , и҆ во а҆́дъскаѧ сᲂше́дъ ꙗ҆́кѡ крѣ́пᲂкъ , ꙗ҆́кѡ да пе́рвагѡ ѡ҆сꙋжде́нїѧ , и҆ тлѣ́нїѧ црⷭ҇тво разрꙋши́тъ , вᲂскр҃се хрⷭ҇то́съ , и҆ спасѐ пᲂю́щїѧ є҆гѡ̀ вᲂскрⷭ҇нїе .

и҆́нъ , і҆рмо́съ . Ри́зꙋ ми пᲂда́ждь . Хра́мъ тѧ бж҃їи и҆ кᲂвче́гъ , и҆ черто́гъ ѡ҆дш҃евле́нъ , и҆ две́рь нбⷭ҇нꙋю , бцⷣе вѣ́рнїи вᲂз̾вѣща́емъ . Тре́бищемъ разᲂри́тель , бы́вшее ржⷭ҇тво̀ твᲂѐ мр҃і́е бг҃ᲂневѣ́сто , пᲂклᲂнѧ́емъ є҆́сть , ꙗ҆́кѡ бг҃ъ со ѻ҆ц҃е́мъ и҆ дх҃ᲂмъ . Сло́во бж҃їе тебѐ пᲂказа̀ , земны́мъ лѣ́ствицꙋ нбⷭ҇нꙋю . тебе́ бо ра́ди къ на́мъ сни́де .

и҆́нъ , і҆рмо́съ . Ѡ҆чи́сти мѧ сп҃се . Ꙗ҆́кѡ че́стенъ и҆́збранъ , пᲂлᲂже́нъ ка́мень краеꙋго́льныи , ст҃і́и въ сїѡ́нѣ ѡ҆брѣ́тше тѧ влⷣко , ᲂу҆тверже́нїе непᲂкᲂлѣби́мо , и҆збра́ннаѧ ка́менїѧ себѐ назда́ша .= двⷤа .= Прᲂбᲂде́нᲂмъ ти ре́брᲂмъ , ка́пли кро́ве и҆ска́павше с̾ вᲂдо́ю бг҃ᲂдѣ́тельно , ве́сь ми́ръ ѡ҆бнᲂви́ша , и҆ бжⷭ҇твеныи сᲂбо́ръ всѣ́хъ ст҃ы́хъ къ бл҃гᲂда́телю привлеко́ша .= двⷤа .= сла́ва . Пᲂе́мъ всѝ бл҃гᲂче́стнѡ мч҃нкъ ѻ҆́блакъ бжⷭ҇твеныи , прᲂсвѣще́ныи бл҃гᲂда́тїю свы́ше , пресвѣ́тлѡ вᲂсїѧ́вшїи , и҆ свѣтлѣ́йшїи , багрѧни́цею кро́ве , и҆ червлени́цею тѣ́хъ тве́рдагѡ страда́нїѧ . и҆ ны́нѣ , боⷢ҇ . Мт҃рь всеи́стиннꙋю бж҃їю тѧ̀ всѝ зна́емъ , є҆ѧ́же ра́ди є҆стество̀ же́нско и҆сцѣлѣ̀ , и҆ ᲂу҆крѣпи́вшисѧ всенепᲂро́чнаѧ ѡ҆ хрⷭ҇тѣ̀ пᲂстрада̀ , дᲂбрᲂдѣ́тели же всѧ́кїѧ и҆ бл҃гᲂче́стїѧ бы́сть и҆спо́лнено .

катава́сїѧ : бжⷭ҇твенᲂе сѐ и҆ всечестно́е .

кᲂнда́къ , всѣ́мъ ст҃ы́мъ . гла́съ , в҃ . Ꙗ҆́кѡ нача́тки є҆стества̀ , сᲂдѣ́телю тва́ри , вселе́ннаѧ прино́ситъ ти гдⷭ҇и , бг҃ᲂно́сныѧ мч҃нки . тѣ́хъ мл҃твами в̾ ми́рѣ глꙋбо́цѣ , цр҃кᲂвь свᲂю̀ и҆ жи́тельство свᲂѐ бцⷣы ра́ди сᲂблюдѝ , є҆ди́не мнᲂгᲂмлⷭ҇тиве . и҆́кᲂсъ . И҆́же по все́й землѝ мꙋ́чившїисѧ , на нб҃са̀ пресели́вшасѧ . и҆ и҆́же стрⷭ҇те́мъ хрⷭ҇то́вымъ пᲂдо́бѧщесѧ , и҆ стра́сти на́ша ѿе́млюще , сѐ здѣ̀ дне́сь сᲂбира́ютсѧ . пе́рвенцы рᲂже́ныхъ ꙗ҆́вльшесѧ цр҃кви вы́шнїѧ . и҆ ꙗ҆́кѡ го́рнїи ѻ҆́бразъ прича́ствꙋемъ и҆мꙋ́ще , хрⷭ҇тꙋ̀ вᲂпїю́тъ , ѻ҆ц҃а ра́ди сᲂблюдѝ ꙗ҆́кѡ бг҃ъ на́шъ ты̀ є҆сѝ мнᲂгᲂмлⷭ҇тиве .

пѣ́снь , з҃ . і҆рмо́съ . Бж҃їѧ схᲂжде́нїѧ ѻ҆́гнь ᲂу҆стыде́сѧ в̾ вавилѡ́нѣ дре́вле , сегѡ̀ ра́ди ѻ҆́трᲂцы в̾ пещѝ ра́дᲂваннᲂю нᲂго́ю , ꙗ҆́кѡ во́ свѣтѣ ликᲂва́хꙋ пᲂю́ще , блгⷭ҇ве́нъ бг҃ъ ѻ҆ц҃ъ на́шихъ . Сла́внᲂе и҆стᲂща́нїе бжⷭ҇твенагѡ бᲂга́тства , и҆ нищета̀ твᲂѧ̀ хрⷭ҇тѐ ᲂу҆дивлѧ́етъ а҆́нг҃лы , на крⷭ҇тѣ̀ зрѧ́ще тѧ пло́тїю пригвᲂжда́ема , за є҆́же спастѝ вѣ́рᲂю вᲂпїю́щихъ , бл҃гᲂслᲂве́нъ бг҃ъ ѻ҆ц҃ъ на́шихъ . Бжⷭ҇твенымъ твᲂи́мъ сᲂше́ствїемъ , свѣ́та и҆спо́лнилъ є҆сѝ преи҆спо́днѧѧ , и҆ тма̀ прᲂгна́на бы́сть , пре́жде гᲂнѧ́щаѧ . тѣ́мже вᲂскресо́ша и҆́же ѿ́ вѣка ᲂу҆́зницы , вᲂпїю́ще , блгⷭ҇ве́нъ бг҃ъ ѻ҆ц҃ъ на́шихъ . трⷪ҇ченъ . Всѣ́хъ ᲂу҆́бѡ гдⷭ҇а , є҆ди́нᲂмꙋже то́кмѡ , є҆динᲂро́днᲂмꙋ сн҃ꙋ , правᲂсла́внѡ ѻ҆ц҃а бг҃ᲂсло́вѧще тѧ вᲂз̾вѣща́емъ . и҆ є҆ди́нъ вѣ́дѧще тво́й и҆схᲂдѧ́щъ дх҃ъ пра́выи , сᲂесте́ственъ и҆ сᲂприснᲂсꙋ́щенъ .

и҆́нъ , і҆рмо́съ . И҆́же ѿ і҆ꙋде́и . Спасе́нїе сᲂдѣ́ла бж҃е пᲂсредѣ̀ вселе́нныѧ , прᲂро́чески вᲂпїе́мъ , на́ древо вᲂзнесе́нъ бы́въ , всѧ̀ призва̀ вѣ́рᲂю зᲂвꙋ́щихъ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Вᲂскр҃съ ѿ́ грᲂба ꙗ҆́кѡ ѿ сна̀ ще́дре , а҆́да плѣни́лъ є҆сѝ , тва́рь ᲂу҆вѣ́рисѧ а҆пⷭ҇лъ ра́ди , прᲂпᲂвѣ́давшихъ вᲂскрⷭ҇нїе . ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

и҆́нъ , і҆рмо́съ , то́йже . Ѿ дв҃ческагѡ лᲂжесна̀ вᲂплᲂти́выисѧ , ꙗ҆ви́сѧ на спасе́нїе на́ше , сегѡ̀ ра́ди твᲂю̀ мт҃рь вѣ́дꙋще бцⷣꙋ , бл҃гᲂда́рственѡ вᲂпїе́мъ , ѻ҆ц҃ъ на́шихъ бж҃е блгⷭ҇ве́нъ є҆сѝ . Же́злъ прᲂрастѐ дв҃о ѿ ко́рене і҆єссе́ѡва всебл҃же́нныи пло́дъ , цвѣ́тъ нᲂсѧ́щи спаси́тельныи , вѣ́рᲂю сн҃ꙋ твᲂемꙋ̀ вᲂпїю́щимъ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Премꙋ́дрᲂсти и҆спо́лни всѣ́хъ , и҆ крѣ́пᲂсти бжⷭ҇твеныѧ , сᲂста́внаѧ премꙋ́дрᲂсте вы́шнѧгѡ , бцⷣы ра́ди , вѣ́рᲂю тебѣ̀ вᲂпїю́щихъ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

и҆́нъ , і҆рмо́съ . Бж҃їѧ схᲂжде́нїѧ . Ст҃ы́хъ чи́нᲂве , и҆́же во ст҃ы́хъ пᲂчива́ющемꙋ , немо́лчнѡ вᲂпїю́ще , пи́щи бжⷭ҇твеныѧ ны́нѣ наслажа́ютсѧ , и҆ ра́дꙋющесѧ ликꙋ́ютъ пᲂю́ще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .= двⷤа .= Бжⷭ҇твеными сїѧ́ньми трисо́лнечнагѡ свѣтᲂпрᲂли́тїѧ , честні́и ст҃ы́хъ сᲂбо́ри ѡ҆блиста́вшесѧ , и҆ є҆ди́ницꙋ тричи́сленꙋю бг҃ᲂсло́вѧще , вᲂспѣва́ютъ ра́дꙋющесѧ , бл҃гᲂслᲂве́нъ бг҃ъ ѻ҆ц҃ъ на́шихъ . Неи҆зрече́ннᲂю сла́вᲂю твᲂе́ю , є҆гда̀ ꙗ҆ви́шисѧ стᲂѧ̀ пᲂсредѣ̀ бᲂго́въ , дᲂсто́йнаѧ вᲂздаѧ́и , и҆ вѣнцы̀ та́инъ , и҆ да́ры да́рꙋѧ , тᲂгда́ мѧ сп҃се спᲂдо́би пѣ́ти тебѣ̀ , бл҃гᲂслᲂве́нъ бг҃ъ ѻ҆ц҃ъ на́шихъ . сла́ва . Ра́дꙋющесѧ пᲂе́мъ твᲂи́хъ ст҃ы́хъ всѣ́хъ сᲂбо́ръ , ѿ всю́дꙋ сᲂбра́вшихсѧ . и҆ ро́ды вкꙋ́пѣ и҆ дᲂсто́инства , и҆ жи́тельства , с̾ ни́ми пᲂю́ще зᲂве́мъ , блгⷭ҇ве́нъ бг҃ъ ѻ҆ц҃ъ на́шихъ . и҆ нн҃ѣ , боⷢ҇ . Мр҃і́ю пречⷭ҇тꙋю и҆ прест҃ꙋ́ю бг҃ᲂрᲂди́тельницꙋ , ѻ҆трᲂкᲂви́цы всѧ̀ , ли́къ бжⷭ҇твенъ кꙋ́пнѡ сᲂста́ вивше , велегла́снѡ вᲂзᲂпі́йте , ра́дꙋисѧ , ꙗ҆́же ра́дᲂсти и҆сто́чникъ на́мъ и҆стᲂча́ющи .

катава́сїѧ : непᲂслꙋжи́ша тва́ри .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти блгⷭ҇ви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки .

с҃ᲂва бжⷭ҇тва̀ пребжⷭ҇твенаѧ си́ла , въ на́съ бг҃ᲂлѣ́пнѡ вᲂсїѧ́ла є҆́сть . пло́тїю бо вкꙋ́шъ за всѣ́хъ сме́рть крⷭ҇тнꙋю , разᲂрѝ а҆́дᲂвꙋ крѣ́пᲂсть . є҆го́же непреста́ннѡ дѣ́ти блгⷭ҇ви́те , сщ҃е́ннїи вᲂспо́йте лю́дїе , превᲂзнᲂси́те є҆гѡ̀ во́ вѣки . Распѧ́тыи вᲂскр҃се , велича́выи паде́сѧ , пады́исѧ и҆ сᲂкрꙋше́ныи и҆спра́висѧ . тлѧ̀ ѡ҆прᲂве́ржена бы́сть , и҆ нетлѣ́нїе прᲂцвѣтѐ . жи́знїю бо ме́ртвенᲂе пᲂже́рто бы́сть . дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , превᲂз нᲂси́те є҆гѡ̀ во́ вѣки . трⷪ҇ченъ . Трисїѧ́ннᲂе бжⷭ҇тво̀ , во є҆ди́нᲂй сїѧ́ющее зарѝ , ѿ є҆ди́нᲂгѡ трисᲂста́внагѡ є҆стества̀ , рᲂди́телѧ без̾нача́ль на , и҆ є҆динᲂєсте́ственᲂе же сло́во ѻ҆́ч҃ее , и҆ съ црⷭ҇твꙋющъ є҆динᲂсꙋ́щенъ дх҃ъ , дѣ́ти бл҃гᲂсло ви́те , сщ҃е́ннїи вᲂспо́йте лю́дїе , превᲂзнᲂси́те є҆гѡ̀ во́ вѣки .

и҆́нъ , і҆рмо́съ . Пᲂбѣди́тели врагꙋ̀ .= И҆́=же на́ древѣ рꙋ́цѣ мнѣ̀ прᲂсте́ршаго , ѡ҆бнаже́наго призыва́ юща мѧ , свᲂе́ю бл҃гᲂѡ҆бра́знᲂю сᲂгрѣ́ѧти наго то́ю , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . И҆́же и҆з̾ преи҆спо́днѧго а҆́да вᲂзне́сша мѧ па́дшаго , и҆ высᲂкᲂпресто́льнᲂю , сла́вᲂю ро ди́телѧ пᲂче́тшаго , бл҃гᲂслᲂви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки .

и҆́нъ , і҆рмо́съ . Цр҃ѧ нбⷭ҇нагѡ . Сᲂпрᲂти́вныхъ раз̾ жже́ныѧ и҆ пламенᲂви́дныѧ на на́съ ᲂу҆гасѝ стрѣ́лы , ꙗ҆́кѡ да пᲂе́мъ тѧ чи́стаѧ во́ вѣки . Па́че є҆стества̀ сᲂдѣ́телѧ и҆ сп҃са , бг҃а сло́ва рᲂдила̀ є҆сѝ дв҃о . є҆го́же превᲂзно́симъ во всѧ̀ вѣ́ки . Свѣ́тлꙋю тѧ̀ и҆ златᲂза́рнꙋю пᲂказа̀ свѣщꙋ̀ ми́рꙋ , в̾сели́выисѧ в̾ тѧ̀ свѣ́тъ непристꙋ́пныи , дв҃о чи́стаѧ , тѣ́мже тѧ пᲂе́мъ во́ вѣки всѧ̀ .

и҆́нъ , і҆рмо́съ . Се́дмь седми́цею пе́щь . Ра́дꙋйтесѧ мч҃нцы , и҆ прᲂро́цы со а҆пⷭ҇лы , сщ҃еннᲂмч҃нкъ честны́и сᲂбо́ръ , пра́ведныхъ и҆ прпⷣбныхъ , и҆ ᲂу҆чи́телей бжⷭ҇твенїи ли́цы , с̾ мѷрѡно́сицами жена́ми вᲂпїю́ще , дѣ́ти бл҃гᲂслᲂви́те , сщ҃е́ннїи по́йте лю́дїе , и҆ превᲂзнᲂси́те є҆гѡ̀ во́ вѣки .= вⷤ .= И҆́же па́че ᲂу҆ма̀ , свѣтлᲂстьмѝ насыща́еми ст҃і́и бжⷭ҇твенагѡ весе́лїѧ , и҆ бл҃гᲂда́ти и҆спᲂлнѧ́еми , бо́зи быва́ете , и҆́же к̾ бг҃ꙋ приближе́нїемъ , бл҃гᲂдѣѧ́ннымъ свѣ́тлᲂстемъ прїѡбща́ющесѧ . и҆ сла́вы неи҆зрече́нныѧ прᲂсвѣти́вшесѧ лꙋча́ми , хрⷭ҇та̀ превᲂзнᲂсѧ́ще во́ вѣки .= вⷤ .= бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Ꙗ҆ви́вшесѧ ст҃і́и ꙗ҆́кѡ ѕвѣ́зды мнᲂгᲂсвѣ́тлы , цр҃ко́внᲂе не́бо ᲂу҆ѧснѧ́ете , разли́чными бл҃гᲂда́тьми , и҆ свѣ́ тлыми дᲂбро́тами , в̾ пра́вдꙋ , и҆ в̾ цѣлᲂмꙋ́дрїе и҆ мꙋ́жество и҆ мꙋ́дрᲂсть ѡ҆бо́лкшесѧ . влⷣцѣ взы ва́юще , сщ҃е́ннїи по́йте лю́дїе , и҆ превᲂзнᲂси́те є҆гѡ̀ во́ вѣки . и҆ ны́нѣ , боⷢ҇ . Съ весе́лїемъ всѧ̀ жены̀ бг҃ᲂмꙋ́дрыѧ скᲂнча́вшїѧсѧ , пᲂю́тъ дх҃ᲂмъ дв҃ꙋ пречⷭ҇тꙋю и҆́стиннꙋю мт҃рь бж҃їю , є҆́же ѿ клѧ́твы прама́тере є҆́ввы на́съ и҆зба́вльшꙋю , и҆ бл҃гᲂгᲂвѣ́йно пред̾стᲂѧ́ще , и҆́же тᲂѧ̀ вᲂспѣ ва́юще пло́дъ во́ вѣки . катава́сїѧ : хва́лимъ бл҃гᲂслᲂви́мъ . ѻ҆́трᲂки бл҃гᲂчести́выѧ .= честнѣ́йшꙋю пᲂе́мъ .=

пѣ́снь , ѳ҃ . і҆рмо́съ . Оу҆диви́сѧ ᲂу҆́бѡ ѡ҆ се́мъ нб҃о , и҆ землѝ ᲂу҆жасо́шасѧ кᲂнцы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твᲂѐ бы́сть прᲂстра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинᲂнача́лїѧ велича́емъ . Бжⷭ҇твенымъ и҆ без̾нача́льнымъ є҆стество́мъ про́стъ сы́и , слᲂжи́лсѧ є҆сѝ прїѧ́тїемъ пло́ти . въ себѣ̀ сїѐ сᲂста́вивъ сло́ве бж҃їи , и҆ пᲂстрада̀ ꙗ҆́кѡ чл҃къ , пре́былъ є҆сѝ крᲂмѣ̀ страсте́й ꙗ҆́кѡ бг҃ъ . тѣ́мже тѧ̀ во двᲂю̀ сꙋществꙋ̀ нераз̾дѣ́льно и҆ неслїѧ́нно велича́емъ . Ѻ҆ц҃а по сꙋ́ществꙋ бжⷭ҇твенᲂмꙋ , ꙗ҆́кᲂже є҆стество́мъ бы́въ чл҃къ , сы́и бг҃ъ вы́шнїи к̾ рабо́мъ сᲂше́дъ . вᲂскр҃съ же ѿ́ грᲂба бл҃гᲂда́тїю ѻ҆ц҃а . земнᲂро́днымъ пᲂлᲂжи́въ по є҆стествꙋ̀ бг҃а же и҆ влⷣкꙋ . съ ни́мже тѧ всѝ велича́емъ . боⷢ҇ . Ꙗ҆ви́сѧ ѽ дв҃о мт҃и бж҃їѧ , па́че є҆стества̀ ро́ждьши во́ плᲂти бл҃го́е сло́во , є҆го́же ѻ҆ц҃ъ ѿры́гнꙋ ѿ́ срⷣца свᲂегѡ̀ , пре́жде всѣ́хъ вѣ́къ ꙗ҆́кѡ бл҃гъ . є҆го́же ны́нѣ и҆ теле́съ превы́шша разꙋмѣ́емъ , а҆́ще и҆ в̾ тѣ́ло ѡ҆блече́сѧ .

и҆́нъ , і҆рмо́съ . Оу҆страши́сѧ всѧ́къ слꙋ́хъ . Бж҃їѧ тѧ сн҃а є҆стество́мъ , зача́таго вᲂꙋтро́бѣ бг҃ᲂмт҃ре свѣ́мы , и҆ бы́вшагѡ на́съ ра́ди чл҃ка , и҆ зрѧ́щи тѧ̀ на крⷭ҇тѣ̀ , є҆стество́мъ ᲂу҆́бѡ стра́ждꙋща чл҃ческимъ , без̾стра́стна же ꙗ҆́кѡ бг҃а велича́емъ . Разрꙋши́сѧ тма̀ лю́таѧ а҆́да , вᲂсїѧ́ бо сл҃нце пра́вды хрⷭ҇то́съ , землѝ прᲂсвѣща́ѧ всѝ кᲂнцы̀ , сїѧ́ѧ бжⷭ҇тва̀ зарѧ́ми , нбⷭ҇ныи чл҃къ , бг҃ъ земны́и . є҆го́же во двꙋ̀ є҆стествꙋ̀ велича́емъ .

и҆́нъ , і҆рмо́съ . Вᲂи́стинꙋ бцⷣꙋ . Ра́дᲂсти и҆ весе́лїѧ и҆спо́лнь є҆́сть па́мѧть твᲂѧ̀ , прихᲂдѧ́щимъ и҆сцѣле́нїѧ тᲂча́щи , и҆́же бл҃гᲂче́стнѡ бцⷣꙋ тѧ̀ вᲂз̾вѣща́ющимъ . Ѱалмы̀ вᲂспѣва́емъ тѧ̀ ѡ҆бра́дᲂваннаѧ , и҆ немо́лчнѡ ти є҆́же ра́дꙋисѧ вᲂпїе́мъ , ты́ бо и҆стᲂчи́ла є҆сѝ всѣ́мъ ра́дᲂсть . Красе́нъ бцⷣе прᲂрастѐ пло́дъ тво́й , не тлѧ́ бо причаща́ющимсѧ , но хᲂда́тай жи́зни , ꙗ҆́же вѣ́рᲂю тѧ̀ велича́ющимъ .

и҆́нъ , і҆рмо́съ . Оу҆диви́сѧ ᲂу҆́бѡ . Наде́ждею и҆ любо́вїю вᲂѡ҆рꙋже́нѡ , и҆ вѣ́рнѡ ѡ҆гражде́но счине́нїе и҆збра́нныхъ , всѧ̀ мꙋчи́телей прило́ги и҆ мꙋ́ки и҆ ра́ны , ра́дꙋющесѧ претерпѣ́ша . бл҃гᲂсла́внѡ ѿ хрⷭ҇та̀ ѡ҆бᲂгати́вшесѧ , и҆ ли́ка верхо́вныхъ дᲂстиго́ша , и҆́стинна пе́рвᲂмч҃нка .= двⷤа .= Приста́нище спасе́нїѧ , крⷭ҇тлѧ , а҆пⷭ҇лы , прᲂро́ки , и҆ мч҃нки . спо́стники и҆ бжⷭ҇твеныѧ ᲂу҆чи́тели , и҆ сщ҃е́нники и҆ патрїа́рхи и҆мꙋ́ще , и҆ сщ҃еннᲂмч҃нки , бл҃гᲂсла́вныѧ жены̀ и҆ бг҃ᲂлюбе́зны , и҆ прпⷣбныѧ и҆ пра́ведныѧ ны́нѣ дᲂсто́йнѡ велича́емъ .= двⷤа .= сла́ва . Ѻ҆гне́мъ и҆скꙋси́вшїисѧ напа́стей , и҆ пи́щею не ᲂу҆слади́вшїисѧ , весели́тесѧ . и҆ чи́стѣ прⷭ҇то́лꙋ влады́чню свѣтᲂви́днїи пред̾стᲂѧ́ще сла́внїи , сᲂбо́ри ст҃ы́хъ на́ нб҃сѣхъ , разрѣши́вшимсѧ зерца́лᲂмъ . сѣ́ни бо ми́мѡ ше́дши , и҆́стинными ꙗ҆вле́ньми . и҆ ны́нѣ , боⷢ҇ . Ꙗ҆ви́сѧ раз̾стᲂѧ́щимсѧ , сᲂвᲂкꙋпи́тельна . тебе́ бо ра́ди а҆́нг҃лѡмъ є҆динᲂсе́льницы на́ нб҃сѣхъ , чл҃цы бы́ша вᲂи́стинꙋ . и҆ свидѣ́тельствꙋютъ чи́нᲂве всѣ́хъ ст҃ы́хъ , и҆ с̾ ни́ми пᲂю́ще твᲂѐ ржⷭ҇тво̀ дв҃о бг҃ᲂмт҃и , в̾ вѣ́чныхъ пѣ́снехъ .

катава́сїѧ : всѧ́къ зе́менъ .= дᲂсто́йнѡ є҆́сть .=

та́же , ст҃ъ гдⷭ҇ь бг҃ъ на́шъ ,= на́ гласъ , и҃ .=

свѣти́ленъ , вᲂскрⷭ҇нъ . Со ᲂу҆ченикѝ в̾зы́демъ на́ гᲂрꙋ галиле́йскꙋю , вѣ́рᲂю хрⷭ҇та̀ ви́дѣти , гл҃юща вла́сть прїѧ́ти вы́шнихъ и҆ ни́жнихъ . и҆ наꙋчи́мсѧ , ка́кѡ ᲂу҆чи́тъ крⷭ҇ти́ти ꙗ҆зы́ки всѧ̀ , во́ и҆мѧ ѻ҆ц҃а и҆ сн҃а , и҆ ст҃а́гѡ дх҃а , и҆ спребыва́ти со ᲂу҆ченикѝ , ꙗ҆́кᲂже ѡ҆бѣща́сѧ , до скᲂнча́нїѧ вѣ́ка . сла́ва , ст҃ы́мъ . Ст҃ы́хъ мнᲂгᲂи҆мени́тᲂе мно́же ство , да вᲂсхва́литсѧ дне́сь , патрїа́рхъ и҆ а҆пⷭ҇лъ , с̾ прⷪ҇ро́ки пра́ведницы , мч҃нцы пᲂстрада́вшїи в̾ зако́нѣ и҆ бл҃гᲂда́ти , и҆ же́нъ сᲂбо́ри , ꙗ҆́кѡ да си́хъ мл҃твами ѡ҆брѧ́щемъ разрѣше́нїе сᲂгрѣше́ нїемъ . и҆ ны́нѣ , боⷢ҇ . Мр҃і́е чи́стѣйшаѧ злата́ѧ кади́льнице , нераздѣ́льнагѡ ѿ трⷪ҇цы прїѧ́те лище бы́вши . є҆ѧ́же ѻ҆ц҃ъ бл҃гᲂи҆зво́ли , сн҃ъ же всели́сѧ , и҆ дх҃ъ прест҃ы́и ѡ҆сѣни́ тѧ ѻ҆трᲂкᲂви́це , и҆ пᲂказа̀ бцⷣꙋ .

На хвали́тѣхъ , стихѣ́ры , вᲂскрⷭ҇ны . гла́съ , и҃ . =запѣ́въ : хвали́те бг҃а во ст҃ы́хъ є҆гѡ̀ . Г=дⷭ҇и , а҆́ще и҆ на сꙋди́щи пред̾ста̀ пила́тᲂмъ сꙋди́мъ , но не ѿстꙋпѝ ѿ престо́ла , со ѻ҆ц҃е́мъ сѣдѧ̀ . и҆ вᲂскр҃съ и҆з̾ ме́ртвыхъ , ми́ръ свᲂбᲂди́лъ є҆сѝ , ѿ рабо́ты чꙋжа́гѡ , ꙗ҆́кѡ ще́дръ и҆ чл҃кᲂлю́бецъ .

хвали́те є҆гѡ̀ во ᲂу҆тверже́нїи си́лъ є҆гѡ̀ . Гдⷭ҇и , ѻ҆рꙋ́жїе крⷭ҇тъ тво́й на дїа́вᲂла да́лъ є҆сѝ на́мъ , трепе́щетъ бо и҆ трѧсе́тсѧ , немᲂгі́и взира́ти на си́лꙋ є҆гѡ̀ , ꙗ҆́кѡ ме́ртвыѧ вᲂскреша́етъ , и҆ сме́рть ᲂу҆҆праздни́лъ є҆́сть . сегѡ̀ ра́ди пᲂклᲂнѧ́емсѧ пᲂгребе́нїю твᲂемꙋ̀ и҆ вᲂскрⷭ҇нїю [пᲂкло́н̾] .

хвали́те є҆гѡ̀ на си́лахъ є҆гѡ̀ ,꙳ хвали́те є҆гѡ̀ по премно́гᲂмꙋ вели́чествїю є҆гѡ̀ . Гдⷭ҇и , а҆́ще ꙗ҆́кѡ ме́ртва тѧ , во́ грᲂбѣ і҆ꙋде́и пᲂлᲂжи́ша , но ꙗ҆́кѡ цр҃ѧ спѧ́ща , во́ини тебѐ стрежа́хꙋ . и҆ ꙗ҆́кѡ живᲂта̀ сᲂкро́вище печа́тїю печатлѣ́ша . но вᲂскр҃се , и҆ по́далъ є҆сѝ нетлѣ́нїе дш҃а́мъ на́шимъ .

хвали́те є҆гѡ̀ во́гласѣ трꙋ́бнѣмъ ,꙳ хвали́те є҆гѡ̀ во ѱалты́ри и҆ гꙋ́слѣхъ . А҆́нг҃лъ тво́й гдⷭ҇и , и҆́же вᲂскрⷭ҇нїе прᲂпᲂвѣ́да на́мъ . стра́жи ᲂу҆́бѡ ᲂу҆҆страшѝ , жена́мъ же вᲂз̾гласѝ глаго́лѧ , что̀ и҆́щете жива́го с̾ ме́ртвыми , вᲂскр҃се бг҃ъ сы́и , и҆ вселе́ннѣй жи́знь дарᲂва̀ .

стихѣ́ры , всѣ́мъ ст҃ы́мъ .= запѣ́въ : гла́съ , д҃ . поⷣ . ꙗ҆́кѡ до́блѧ . хвали́те є҆гѡ̀ в̾ тѷмпа́нѣ и҆ ли́цѣ ,꙳ хвали́те є҆гѡ̀ во стрꙋ́нахъ и҆ ѻ҆рга́нѣхъ . С=т҃ы́хъ гдⷭ҇ь и҆́же на землѝ ᲂу҆дивѝ ,꙳ тᲂго́ бо ра́ны и҆ стра́сти ,꙳ в̾ пло́ти вᲂспрїѧ́ша .꙳ в̾ си́хъ красѧ́щесѧ ,꙳ бжⷭ҇твеными ᲂу҆дᲂбре́ньми ,꙳ ꙗ҆вле́ннѡ ᲂу҆дᲂбрѧ́еми .꙳ и҆́хже вᲂспᲂе́мъ ꙗ҆́кѡ не ᲂу҆вѧда́ющїѧ цвѣ́ты ,꙳ и҆ ꙗ҆́кѡ ѕвѣ́зды непреле́стныѧ цр҃кве ,꙳ ꙗ҆́кѡ во́льнаѧ закᲂле́нїѧ .

хвали́те є҆гѡ̀ в̾ кѷмва́лѣхъ дᲂбрᲂгла́сныхъ , хвали́те є҆гѡ̀ в̾ кѷмва́лѣхъ вᲂсклица́нїѧ .꙳ всѧ́ко дыха́нїе да хва́литъ гдⷭ҇а . Ст҃ы́хъ гдⷭ҇ь и҆́же на землѝ ᲂу҆дивѝ ,꙳ тᲂго́ бо ра́ны и҆ стра́сти ,꙳ в̾ пло́ти вᲂспрїѧ́ша .꙳ въ си́хъ красѧ́щесѧ ,꙳ бжⷭ҇твеными ᲂу҆дᲂбре́ньми ,꙳ ꙗ҆вле́ннѡ ᲂу҆до брѧ́еми .꙳ и҆́хже вᲂспᲂе́мъ ꙗ҆́кѡ неᲂу҆вѧда́ющїѧ цвѣ́ты ,꙳ и҆ ꙗ҆́кѡ ѕвѣ́зды непреле́стныѧ цр҃кве ,꙳ ꙗ҆́кѡ во́льнаѧ закᲂле́нїѧ .

сти́хъ : вᲂзва́ша пра́веднїи ,꙳ и҆ гдⷭ҇ь ᲂу҆слы́ша и҆́хъ . Съ прⷪ҇ро́ки и҆ а҆пⷭ҇лы ,꙳ с̾ прпⷣбными ᲂу҆чи́тели .꙳ со сщ҃еннᲂмч҃нки ,꙳ и҆ жены̀ пᲂстрада́вшїѧ ,꙳ и҆ любо́вїю пᲂсти́вшїѧсѧ ст҃ы́хъ мно́жества ,꙳ и҆ пра́ведныхъ чи́нᲂве ,꙳ да хвали́ми бꙋ́дꙋтъ сщ҃е́нными пѣ́сньми ,꙳ ꙗ҆́кѡ вы́шнѧгѡ црⷭ҇твїѧ наслѣ́дницы ,꙳ и҆ ꙗ҆́кѡ ра́йстїи жи́тели .

сти́хъ : мно́ги ско́рби пра́веднымъ ,꙳ и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь . И҆́же зе́млю ѡ҆небеси́вше ,꙳ дᲂбрᲂдѣ́телей свѣ́тлᲂстїю ,꙳ и҆ хрⷭ҇то́вꙋ сме́рть пᲂдража́вше ,꙳ без̾сме́ртїѧ хᲂда́тайственыи пꙋ́ть ше́ствᲂвавше .꙳ и҆ ꙗ҆́же стра́сти чл҃кѡмъ ,꙳ рꙋкᲂдѣ́йствїемъ дх҃а и҆счища́юще ,꙳ и҆ и҆́же во все́мъ ми́рѣ є҆динᲂдꙋ́шно ꙳ пᲂстрада́вшїи , до́блественѣ ꙳ да вᲂсхва́лѧтсѧ мч҃нцы .

сла́ва . гла́съ , а҃ . На́ гᲂрꙋ ᲂу҆ченико́мъ и҆дꙋ́щимъ , за земно́е вᲂзнесе́нїе , пред̾ста̀ гдⷭ҇ь , и҆ пᲂклᲂни́шасѧ є҆мꙋ̀ . и҆ в̾ да́ннꙋю вла́сть всю́дꙋ наꙋчи́вше , в̾ пᲂд̾нбⷭ҇нꙋю пᲂсыла́ютсѧ , прᲂпᲂвѣ́дати є҆́же и҆з̾ ме́ртвыхъ вᲂскрⷭ҇нїе , и҆ є҆́же на небеса̀ вᲂзнесе́нїе . и҆́мже и҆ вѣ́чнѣ спребыва́ти нело́жныи ѡ҆бѣща́сѧ хрⷭ҇то́съ бг҃ъ , и҆ сп҃съ дш҃а́мъ на́шимъ .

и҆ ны́нѣ , боⷢ҇ . гла́съ , в҃ . Преблгⷭ҇ве́на є҆сѝ бцⷣе дв҃о , вᲂпло́щьшимбᲂсѧ и҆з̾ тебѐ , а҆́дъ плѣни́сѧ , а҆да́мъ призва́сѧ . клѧ́тва пᲂтреби́сѧ , и҆ є҆́вва свᲂбᲂди́сѧ . сме́рть ᲂу҆мертви́сѧ , и҆ мы̀ ѡ҆жи́хᲂмъ . тѣ́мъ пᲂю́ще вᲂзᲂпїе́мъ , бл҃гᲂслᲂве́нъ бг҃ъ на́шъ , и҆зво́ливыи та́кѡ . Сла́вᲂсло́вїе вели́кᲂе .

та́же , трᲂпа́рь . Вᲂскре́съ и҆́з̾ грᲂба и҆ ᲂу҆́зы растерза́въ , разрꙋши́лъ є҆сѝ гдⷭ҇и сме́рти ѡ҆сꙋже́нїе , и҆ всѧ̀ ѿ сѣ́ти непрїѧ́зненыѧ и҆зба́вль . ꙗ҆вѝ себѐ а҆пⷭ҇лѡмъ свᲂи́мъ , и҆ пᲂсла́въ и҆́хъ на́ прᲂпᲂвѣдь , и҆ тѣ́ми ми́ръ сво́й по́далъ є҆сѝ вселе́ннѣй , є҆ди́не мнᲂгᲂмлⷭ҇тиве .

пᲂсе́мъ , є҆ктенїѝ . и҆ ѿпꙋ́стъ . та́же , ча́съ , а҃ .

На а҃ мъ часѣ̀ , трᲂпа́рь , вᲂскрⷭ҇нъ . сла́ва , всѣ́мъ ст҃ы́мъ . кᲂнда́къ , вᲂскрⷭ҇нъ . и҆ кᲂне́чныи ѿпꙋ́стъ .

На г҃ мъ часѣ̀ , трᲂпа́рь , вᲂскрⷭ҇нъ . сла́ва , всѣ́мъ ст҃ы́мъ . кᲂнда́къ , всѣ́мъ ст҃ы́мъ .

На ѕ҃ мъ часѣ̀ , трᲂпа́рь , вᲂскрⷭ҇нъ . сла́ва , всѣ́мъ ст҃ы́мъ . кᲂнда́къ , вᲂскрⷭ҇нъ .

На ѳ҃ мъ часѣ̀ , трᲂпа́рь , вᲂскрⷭ҇нъ . сла́ва , всѣ́мъ ст҃ы́мъ . кᲂнда́къ , всѣ́мъ ст҃ы́мъ .

По ѡ҆сла́би , кᲂнда́къ , вᲂскрⷭ҇нъ .= сла́ва , и҆ ны́нѣ . в=сѣ́мъ ст҃ы́мъ .

На литꙋргі́и , бл҃же́нна , вᲂскрⷭ҇на , на́ ѕ҃ .

Во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ , ꙗ҆́кѡ тѣ́хъ є҆́сть црⷭ҇тво нбⷭ҇нᲂе . бл҃же́ни пла́чꙋщїи , ꙗ҆́кѡ ті́и ᲂу҆тѣ́шатсѧ . бл҃же́ни кро́тцыи , ꙗ҆́кѡ ті́и наслѣ́дѧтъ зе́млю .

пᲂе́мъ : Пᲂмѧнѝ на́съ хрⷭ҇тѐ сп҃се ми́ра , ꙗ҆́кᲂже разбо́йника пᲂмѧнꙋ̀ на́ древѣ , и҆ спᲂдо́би всѣ́хъ є҆ди́не ще́дре , нбⷭ҇нᲂмꙋ црⷭ҇твїю тѝ .

гла́съ , и҃ . бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . Дне́сь хрⷭ҇то́съ вᲂскр҃съ ѿ́ грᲂба , всѣ́мъ вѣ́рнымъ пᲂдаѧ̀ нетлѣ́нїе , и҆ ра́дᲂсть ѡ҆бнᲂвѝ мѷрѡно́сицамъ вᲂскрⷭ҇нїѧ твᲂегѡ̀ гдⷭ҇и .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . На́ древѣ пригво́ждьсѧ сп҃се на́шъ во́лею , дре́вᲂмъ а҆да́ма ѿ клѧ́твы и҆зба́вилъ є҆сѝ , по́далъ є҆сѝ ꙗ҆́кѡ ще́дръ є҆́же по ѻ҆́бразꙋ , и҆ раѧ̀ вселе́нїе .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Ꙗ҆́кѡ на́ нб҃си мно́жество а҆́нг҃лъ , та́кѡ и҆ на землѝ ро́ди чл҃честїи , всест҃о́е вᲂскрⷭ҇нїе пра́зднꙋютъ , бл҃гᲂсти твᲂеѧ̀ гдⷭ҇и .

бл҃же́ни мирᲂтво́рцы ,꙳ ꙗ҆́кѡ ті́и сы́нᲂве бж҃їи нарекꙋ́тсѧ . Вᲂз̾дви́гни на́съ ѿ́ грᲂба грѣхо́внагѡ сп҃се , страстьмѝ мно́гими ᲂу҆мерщве́нныѧ , и҆ вᲂста́нїемъ сѝ разᲂрѝ мꙋчи́тельство сме́ртнᲂе , ꙗ҆́кѡ чл҃кᲂлю́бецъ .= С=лы́ши а҆да́ме , и҆ ра́дꙋисѧ со є҆́ввᲂю , ꙗ҆́кѡ ѡ҆бнажи́выи пре́жде ѻ҆бᲂю̀ вы̀ , и҆ пре́лести ра́ди прїе́мъ ва́съ плѣ́нники крⷭ҇то́мъ хрⷭ҇то́вымъ ᲂу҆праздни́сѧ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Без̾нача́льнаѧ трⷪ҇це , нераздѣ́ льнаѧ сꙋщество́мъ , сᲂпрⷭ҇то́льнаѧ є҆ди́нице , є҆динᲂчестна́ѧ сла́вᲂю , пренача́льнᲂе є҆стество̀ и҆ црⷭ҇тво , спасѝ вѣ́рᲂю вᲂспѣва́ющихъ тѧ .

и҆ =ѿ кано́на , ст҃ы́мъ . пѣ́снь г҃ ѧ , на д҃ . =бл҃же́ни є҆стѐ є҆гда̀ пᲂно́сѧтъ ва́мъ , и҆ и҆з женꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Въ сщ҃е́нство сщ҃е́нно , сщ҃е́нницы и҆ па́стырїе ѡ҆бле́кшесѧ , и҆ то̀ премꙋ́дрствено ѡ҆кᲂрми́вше хрⷭ҇тꙋ̀ , житїе́мъ ᲂу҆краси́ша . ᲂу҆чи́тельства сло́во ст҃і́и , свы́ше вᲂи́стинꙋ прїе́мше ѡ҆бᲂга́тившасѧ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Оу҆краси́вшесѧ ᲂу҆дᲂбре́ньми пе́рвагѡ дᲂбрᲂтвᲂре́нїѧ , и҆ ꙗ҆ви́вшесѧ ꙗ҆́кѡ незахᲂдѧ́щаѧ свѣти́ла . и҆ ѡ҆небеси́сте цр҃кᲂвь хрⷭ҇то́вꙋ ст҃і́и , ѿ ню́дъ краснѡ̀ всѝ тꙋ̀ разли́чнѡ ᲂу҆краси́вше .

сла́ва . Зако́нꙋ пᲂвинꙋ́ющесѧ твᲂемꙋ̀ , бл҃же́н ныхъ сᲂбо́ры , мнᲂгᲂѡ҆бра́зными дᲂбрᲂдѣ́тель ми прᲂсвѣти́вшесѧ , наслѣ́дᲂваша ѻ҆би́тели нбⷭ҇ныѧ влⷣко . и҆ ѿ и҆́нꙋдꙋ и҆́нъ , всѝ ті́и дᲂсто́йнѡ и҆спо́лниша .

и҆ ны́нѣ . Ѿ ́чрева дв҃ствена , є҆́же ѿ́ бг҃а бг҃а сло́ва , рᲂдила̀ є҆сѝ на́мъ бг҃ᲂмт҃и . є҆го́же дв҃ы чⷭ҇тыѧ бг҃ᲂлѣ́пнѡ вᲂз̾люби́ша , и҆ в̾слѣ́дъ тебѐ всѧ̀ семꙋ̀ ꙗ҆́вѣ пᲂслѣ́дᲂваша .

По вхо́дѣ . трᲂпарѝ : вᲂскрⷭ҇нъ , всѣ́мъ ст҃ы́мъ . кᲂндакѝ : вᲂскрⷭ҇нъ . сла́ва , и҆ нн҃ѣ , всѣ́мъ ст҃ы́мъ .

прᲂки́мен̾ , ѱл҃о́мъ дв҃дᲂв̾ . ст҃ы́мъ и҆́же сꙋ́ть на землѝ є҆гѡ̀ , ᲂу҆дивѝ гдⷭ҇ь всѧ̀ во́лѧ свᲂѧ̀ в̾ ни́хъ . сти́хъ : пред̾зрѣ́хъ гдⷭ҇а предᲂмно́ю вы́нꙋ , ꙗ҆́кѡ ѡ҆деснꙋ́ю менѐ є҆́сть дасѧ̀ непᲂдви́жꙋ . а҆пⷭ҇лъ , к̾ є҆вре́ѡмъ . заⷱ҇ , т҃л .= а҆ллилꙋ́їѧ . вᲂзва́ша пра́веднїи , и҆ гдⷭ҇ь ᲂу҆слы́ша и҆́хъ , и҆ ѿ всѣ́хъ печа́лей и҆́хъ и҆зба́ви и҆́хъ . =сти́хъ : мно́ги ско́рби пра́веднымъ , и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь .= є҆ѵⷢ҇а́лїе , ѿ= матѳе́ѧ . зача́ло , л҃и . приⷱ҇ , хвали́те гдⷭ҇а с̾ нб҃съ . дрꙋгі́и , ра́дꙋйтесѧ пра́веднїи ѡ҆́ гдⷭ҇ѣ .

На трапе́зѣ ᲂу҆теше́нїе , бра́тїѧмъ .