Въ четверто́къ свѣ́тлыѧ нлⷣи , ве́черъ . слꙋ́жба по ѡ҆бы́чаю , ꙗ҆́кᲂже ᲂу҆ка́зано въ нлⷣю ве́черъ . та́же , пᲂе́мъ . Гдⷭ҇и вᲂзва́хъ , на́ гласъ , ѕ҃ . пᲂсе́мъ , стихѣ́ры вᲂскрⷭ҇ны , на́ ѕ҃ .

Гла́съ , ѕ҃ . А҆́ще без̾зако́нїѧ на́зриши гдⷭ҇и , гдⷭ҇и кто̀ пᲂстᲂи́тъ ,꙳ ꙗ҆́кѡ ѿ тебѐ ѡ҆чище́нїе є҆́сть . Пᲂбѣ́дꙋ и҆мѣ́ѧ хрⷭ҇тѐ ю҆́же на а҆́да , и҆ на́ крⷭ҇тъ в̾зы́де , да сѣдѧ́щїѧ во тмѣ̀ и҆ сѣ́ни сме́ртнѣй , вᲂскр҃си́ши с̾сᲂбо́ю , свᲂбо́дь сы́и в̾ ме́ртвыхъ . и҆стᲂча́ѧ живо́тъ ѿ свᲂегѡ̀ свѣ́та , всеси́льне сп҃се пᲂми́лꙋй на́съ .

и҆́мене ра́ди твᲂегѡ̀ пᲂтерпѣ́хъ тѧ̀ гдⷭ҇и , пᲂтерпѣ̀ дш҃а мᲂѧ̀ в̾ сло́во твᲂѐ ,꙳ ᲂу҆пᲂва̀ дш҃а мᲂѧ̀ на́ гдⷭ҇а . Дне́сь хрⷭ҇то́съ сме́рть пᲂпра́въ , ꙗ҆́кᲂже речѐ и҆ вᲂскр҃се , и҆ ра́дᲂванїе всемꙋ̀ ми́рꙋ дарᲂва̀ . да всѝ в̾зыва́юще пѣ́сньми та́кѡ рце́мъ , и҆сто́чниче жи́зни , неприкᲂснᲂве́нныи свѣ́те , всеси́льне сп҃се пᲂми́лꙋй на́съ .

ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . Тебѐ гдⷭ҇и сꙋ́щагѡ по все́й тва́ри , грѣ́шнїи ка́мѡ бѣжи́мъ ; на́ нб҃си са́мъ живе́ши . во а҆́дѣ же пᲂпра́въ сме́рть . во глꙋбины̀ мᲂрскі́ѧ , тꙋ̀ рꙋка̀ твᲂѧ̀ влⷣко . къ тебѣ̀ прибѣга́емъ , и҆ тебѣ̀ припа́дающе мо́лимсѧ , вᲂскр҃сы́и и҆з̾ ме́ртвыхъ пᲂми́лꙋй на́съ .

ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и҆зба́вленїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . Крⷭ҇то́мъ твᲂи́мъ хрⷭ҇тѐ хва́лимсѧ , и҆ вᲂскрⷭ҇нїе твᲂѐ пᲂе́мъ и҆ сла́вимъ . ты́ бо є҆сѝ бг҃ъ на́шъ , ра́звѣ тебѐ и҆но́го незна́емъ .

хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїе . Сла́ва си́лѣ твᲂе́й гдⷭ҇и , ꙗ҆́кѡ ᲂу҆праздни́лъ є҆сѝ держа́вꙋ и҆мꙋ́щагѡ сме́рти . ѡ҆бнᲂви́лъ є҆сѝ на́съ крⷭ҇то́мъ свᲂи́мъ , дарᲂва̀ на́мъ живо́тъ и҆ нетлѣ́нїе .

ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . Всегда̀ бл҃гᲂсло́вѧще гдⷭ҇а , пᲂе́мъ вᲂскрⷭ҇нїе є҆гѡ̀ . распѧ́тїе бо претерпѣ́въ , и҆ сме́ртїю сме́рть разрꙋшѝ .

сла́ва . Пᲂгребе́нїе твᲂѐ влⷣко , ᲂу҆́зы а҆́дᲂвы сᲂкрꙋши́въ растерза̀ , и҆ є҆́же и҆з̾ ме́ртвыхъ вᲂскрⷭ҇нїе ве́сь ми́ръ прᲂсвѣтѝ . чл҃кᲂлю́бче сла́ва тебѣ̀ .

и҆ нн҃ѣ , боⷢ҇ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невᲂспѣва́етъ твᲂегѡ̀ пречⷭ҇тагѡ ржⷭ҇тва̀ ; без̾лѣ́тныи бо ѿ ѻ҆ц҃а вᲂз̾сїѧ́въ сн҃ъ є҆дино ро́дныи , то́йже ѿ тебѐ чи́стыѧ про́йде , несказа́ннѡ вᲂпло́щьсѧ . є҆стество́мъ бг҃ъ сы́и , и҆ є҆стество́мъ бы́въ чл҃къ на́съ ра́ди . не во двᲂю̀ лицꙋ̀ раздѣлѧ́емъ . но во двᲂю̀ є҆стествꙋ̀ несмѣ́сно пᲂзнава́емъ . тᲂгѡ̀ мᲂлѝ чⷭ҇таѧ и҆ все бл҃же́ннаѧ , пᲂми́лᲂватисѧ дш҃а́мъ на́шимъ .

вы́хᲂдъ : свѣ́тѣ ти́хїи . прᲂки́менъ , ѱало́мъ дв҃дᲂвъ . вᲂзлюблю̀ тѧ̀ гдⷭ҇и крѣ́пᲂсте мᲂѧ̀ , гдⷭ҇ь ᲂу҆тверже́нїе мᲂѐ . сти́хъ : бг҃ъ мо́й пᲂмо́щникъ мо́й , и҆ ᲂу҆пᲂва́ю на́нь . сти́хъ : хвала́мъ призᲂвꙋ̀ гдⷭ҇а , и҆ ѿ вра́гъ мᲂи́хъ спасꙋ́сѧ . сти́хъ : ᲂу҆слы́ша ѿ цр҃кве ст҃ы́ѧ свᲂеѧ̀ гла́съ мо́й . та́же , вᲂзлюблю̀ тѧ̀ гдⷭ҇и крѣ́пᲂсте мᲂѧ̀ , гдⷭ҇ь ᲂу҆тверже́нїе мᲂѐ .

є҆ктенїѧ̀ : рце́мъ всѝ . та́же , спᲂдо́би гдⷭ҇и в̾ ве́чер̾ . є҆ктенїѧ̀ : и҆спо́лнимъ вече́рнїѧ мл҃твы .

На стихо́внѣ , стⷯра . гла́съ , ѕ҃ . Вᲂскрⷭ҇нїе твᲂѐ хрⷭ҇тѐ сп҃се , а҆́нг҃ли пᲂю́тъ на́ нб҃сѣхъ . и҆ на́съ на землѝ спᲂдо́би , чи́стыми срⷣцы тебѐ сла́вити .

та́же , пᲂе́мъ , стихѣ́ры па́сцѣ , со стихѝ и҆́хъ . сти́хъ : да вᲂскрⷭ҇нетъ бг҃ъ , и҆ про́чїѧ . сла́ва , и҆ ны́нѣ . вᲂскрⷭ҇нїѧ де́нь . хрⷭ҇то́съ вᲂскр҃се , гⷤ .

и҆ про́чаѧ , ꙗ҆́кᲂже пи́сано в̾ нлⷣю на вече́рни .

Въ пѧто́къ свѣ́тлыѧ нлⷣи , на ᲂу҆́трени , пре́же нача́ла , вжига́етъ , свѣщѝ и҆ кади́ла параєклисїа́рхъ . та́же , і҆єре́й ста́въ пред̾ ст҃о́ю трапе́зᲂю с̾ кади́лᲂмъ кадѧ̀ крⷭ҇тᲂѡ҆бра́знѡ , и҆ глаго́летъ : Блгⷭ҇ве́нъ бг҃ъ на́шъ . мы́ же : а҆ми́нь . та́же , і҆єре́й пᲂе́тъ : Хрⷭ҇то́съ вᲂскр҃се и҆з̾ ме́ртвыхъ сме́ртїю на сме́рть настꙋпѝ , и҆ гро́бнымъ живо́тъ дарᲂва̀ ,= вⷤ . Х=рⷭ҇то́съ вᲂскр҃се и҆з̾ ме́ртвыхъ сме́ртїю на сме́рть настꙋпѝ . мы́ же : =и҆ =гро́бнымъ живо́тъ дарᲂва̀ . мы́ же : хрⷭ҇то́съ вᲂскр҃се , гⷤ .

и҆ про́чее , со стихѝ , ꙗ҆́кᲂже пи́сано в̾ нлⷣю на вече́рни . та́же , є҆ктенїѧ̀ вели́каѧ .

И҆ =по вᲂз̾гла́сѣ начина́етъ і҆єре́й , і҆рмо́съ . вᲂскрⷭ҇нїѧ дн҃ь . =и҆ пᲂе́мъ кано́нъ . І҆рмо́съ , по вⷤ . трᲂпари́ же , на в҃і . пᲂслѣди́ же , катава́сїѧ , і҆рмо́съ , ѻ҆́ба ли́ка вкꙋ́пѣ . По г҃ , пѣ́сни , ѵ҆пакᲂй : Предвари́ша ᲂу҆́тро . По ѕ҃ , пѣ́сни , кᲂнда́къ : А҆́ще и҆ во́ грᲂбъ сни́де . и҆ и҆́кᲂсъ . та́же , Вᲂскрⷭ҇нїе хрⷭ҇то́во , гⷤ . Вᲂскр҃съ і҆с҃ъ , гⷤ .

По ѳ҃ , пѣ́сни , свѣти́ленъ , гⷤ . та́же , хвали́те гдⷭ҇а с̾ нб҃съ . На хвали́тѣхъ . стⷯры , вᲂскрⷭ҇ны . =Гла́съ , ѕ҃ . Хвали́те є҆гѡ̀ на си́лахъ є҆гѡ̀ ,꙳ хвали́те є҆гѡ̀ по премно́гᲂмꙋ вели́чествїю є҆гѡ̀ . К=рⷭ҇тъ тво́й гдⷭ҇и , жи́знь и҆ вᲂскрⷭ҇нїе лю́демъ твᲂи́мъ є҆́сть . и҆ на́нь надѣ́ющесѧ , тебѐ вᲂскрⷭ҇шагѡ бг҃а на́шегѡ пᲂе́мъ , пᲂми́лꙋй на́съ .

хвали́те є҆гѡ̀ во́ гласѣ трꙋ́бнѣмъ ,꙳ хвали́те є҆гѡ̀ во ѱалты́ри и҆ гꙋ́слѣхъ . Пᲂгребе́нїе твᲂѐ влⷣко , ра́й ѿве́рзе ро́дꙋ чл҃ческᲂмꙋ . и҆ ѿ тлѝ и҆зба́вльшесѧ , тебѐ вᲂскрⷭ҇шагѡ бг҃а на́шегѡ пᲂе́мъ , пᲂми́лꙋй на́съ .

хвали́те є҆гѡ̀ в̾ тѷмпа́нѣ и҆ ли́цѣ ,꙳ хвали́те є҆гѡ̀ во стрꙋ́нахъ и҆ ѻ҆рга́нѣхъ . Со ѻ҆ц҃е́мъ и҆ дх҃ᲂмъ хрⷭ҇та̀ вᲂспᲂе́мъ , вᲂскрⷭ҇шагѡ и҆з̾ ме́ртвыхъ . и҆ къ немꙋ̀ вᲂзᲂпїе́мъ , ты̀ є҆сѝ жи́знь на́ша и҆ вᲂскрⷭ҇нїе , пᲂми́лꙋй на́съ .

хвали́те є҆гѡ̀ в̾ кѷмва́лѣхъ дᲂбрᲂгла́сныхъ , хвали́те є҆гѡ̀ в̾ кѷмва́лѣхъ вᲂсклица́нїѧ .꙳ всѧ́ко дыха́нїе да хва́литъ гдⷭ҇а . Тридне́внѡ вᲂскрⷭ҇лъ є҆сѝ хрⷭ҇тѐ и҆́з̾грᲂба , ꙗ҆́кᲂже є҆́сть пи́сано , и҆ сᲂвᲂскреси́въ пра́дѣда на́шегѡ . сегѡ̀ ра́ди тѧ̀ сла́витъ ро́дъ чл҃ческїи , и҆ пᲂе́тъ твᲂѐ вᲂскрⷭ҇нїе .

та́же , пᲂе́мъ , стихѣ́ры па́сцѣ , со стихѝ и҆́хъ . сти́хъ : да вᲂскрⷭ҇нетъ бг҃ъ , и҆ про́чїѧ . сла́ва , и҆ ны́нѣ . вᲂскрⷭ҇нїѧ де́нь . хрⷭ҇то́съ вᲂскр҃се , гⷤ .

пᲂсе́мъ : є҆ктенїѧ̀ : пᲂми́лꙋй на́съ бж҃е . і҆єре́й , вᲂз̾гла́съ . та́же : и҆спо́лнимъ заꙋ́треннїѧ мл҃твꙋ . и҆ по вᲂз̾гла́сѣ : сы́и бл҃гᲂслᲂве́нъ . и҆ мы̀ : а҆ми́нь . ᲂу҆твердѝ бж҃е вѣ́рꙋ хрⷭ҇тїа́нскꙋю .

та́же , дїа́кᲂнъ : Премꙋ́дрᲂсть . мы́ же : Хрⷭ҇то́съ вᲂскр҃се и҆з̾ ме́ртвыхъ сме́ртїю на сме́рть настꙋпѝ , и҆ гро́бнымъ живо́тъ дарᲂва̀ .= три́жды , с̾ пᲂкло́нами .= пᲂсе́мъ і҆єре́й твᲂри́тъ , ѿпꙋ́стъ , держа́и крⷭ҇тъ . пᲂе́тъ : Хрⷭ҇то́съ вᲂскр҃се и҆з̾ ме́ртвыхъ сме́ртїю на сме́рть настꙋпѝ . мы́же : И҆гро́бнымъ живо́тъ дарᲂва̀ . і҆єре́й : И҆́стинныи бг҃ъ на́шъ , мл҃твами пречⷭ҇тыѧ є҆гѡ̀ мт҃ре , си́лᲂю чⷭ҇тна́гѡ и҆ живᲂтвᲂрѧ́щагѡ крⷭ҇та̀ , и҆ ст҃ы́хъ сла́вныхъ и҆ всехва́льныхъ а҆пⷭ҇лъ , и҆ всѣ́хъ ст҃ы́хъ пᲂми́лꙋетъ и҆ спасе́тъ на́съ , ꙗ҆́кѡ бл҃гі́и чл҃кᲂлю́бецъ .

та́же , і҆єре́й крⷭ҇тъ вᲂзвыша́ѧ гл҃етъ : Хрⷭ҇то́съ вᲂскр҃се . гⷤ . мы́же : Вᲂи́стинꙋ вᲂскр҃се . гⷤ . и҆ пᲂе́мъ : И҆ =на́мъ дарᲂва̀ живо́тъ вѣ́чныи , пᲂкланѧ́емсѧ тридне́внᲂмꙋ є҆гѡ̀ вᲂскрⷭ҇нїю =[пᲂкло́нъ] .

та́же , а҃ й ча́съ . ꙗ҆́кᲂже ᲂу҆каза́сѧ в̾ нлⷣю на ᲂу҆́трени .= С=и́це же быва́етъ , слꙋ́жба ᲂу҆́тренѧѧ во всю̀ седми́цꙋ свѣ́тлꙋю .

На литꙋргі́и , а҆нтифо́ны . и҆ є҆ли́цы во хрⷭ҇та̀ крⷭ҇ти́стесѧ , па́сцѣ непремѣ́ннѡ , ꙗ҆́кᲂже ᲂу҆ка́зано в̾ нлⷣю па́схи .

прᲂки́менъ , ѱало́мъ дв҃дᲂвъ . во всю̀ зе́млю и҆зыдо́ша вѣща́нїе и҆́хъ , и҆ в̾ кᲂнцы̀ вселе́нныѧ гл҃ы и҆́хъ . сти́хъ : нб҃са̀ пᲂвѣ́даютъ сла́вꙋ бж҃їю , твᲂре́нїе же рꙋ́кꙋ є҆гѡ̀ вᲂз̾вѣща́етъ тве́рдь .

а҆пⷭ҇лъ , въ дѣѧ́нїихъ . зача́ло , з҃ . а҆ллилꙋ́їѧ . и҆спᲂвѣ́дѧтъ нб҃са̀ чꙋдеса̀ твᲂѧ̀ гдⷭ҇и . сти́хъ : бг҃ъ прᲂславлѧ́емь в̾ сᲂвѣ́тѣхъ ст҃ы́хъ . є҆ѵⷢ҇а́лїе , ѿ і҆ѡа́нна . заⷱ҇ , з҃ . прича́стенъ . тѣ́ло хрⷭ҇то́во . и҆ вхо́димъ в̾ трапе́зꙋ .

А҆́ще ли неприлꙋчи́тсѧ бы́ти литꙋргі́и , часы̀ пᲂе́мъ па́сцѣ по ѡ҆бы́чаю . Бл҃же́нна ѿ кано́на па́сцѣ пѣ́снь , и҃ ѧ , на и҃ . А҆пⷭ҇лъ , и҆ є҆ѵⷢ҇а́лїе , вышепи́саннѡ . По ѻ҆сла́би кᲂнда́къ , па́сцѣ . и҆ про́чаѧ ꙗ҆́кᲂже ᲂу҆каза́сѧ в̾ недѣ́лю па́схи .