Въ пѧто́къ свѣ́тлыѧ нлⷣи , ве́черъ . слꙋ́жба по ѡ҆бы́чаю , ꙗ҆́кᲂже ᲂу҆ка́зано въ нлⷣю ве́черъ .= та́же , пᲂе́мъ . Гдⷭ҇и вᲂзва́хъ , на́ гласъ , и҃ . =пᲂсе́мъ , стихѣ́ры вᲂскрⷭ҇ны , на́ ѕ҃ .

Гла́съ , и҃ . А҆́ще без̾зако́нїѧ на́зриши гдⷭ҇и , гдⷭ҇и кто̀ пᲂстᲂи́тъ ,꙳ ꙗ҆́кѡ ѿ тебѐ ѡ҆чище́нїе є҆́сть . Вече́рнюю пѣ́снь , и҆ слᲂве́снꙋю слꙋ́жбꙋ , тебѣ̀ хрⷭ҇тѐ прино́симъ , ꙗ҆́кѡ бл҃гᲂвᲂли́лъ є҆сѝ пᲂми́лᲂвати на́съ , вᲂскрⷭ҇нїѧ ра́ди .

и҆́мене ра́ди твᲂегѡ̀ пᲂтерпѣ́хъ тѧ̀ гдⷭ҇и , пᲂтерпѣ̀ дш҃а мᲂѧ̀ в̾ сло́во твᲂѐ ,꙳ ᲂу҆пᲂва̀ дш҃а мᲂѧ̀ на́ гдⷭ҇а . Гдⷭ҇и гдⷭ҇и , не ѿве́рзи на́съ ѿ твᲂегѡ̀ лица̀ , но бл҃гᲂвᲂлѝ пᲂми́лᲂвати на́съ , вᲂскрⷭ҇нїѧ ра́ди .

ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . Ра́дꙋисѧ сїѡ́не ст҃ы́и , мт҃и цр҃квамъ , бж҃їе жили́ще . ты́бо прїѧ́тъ пре́жде ѡ҆ставле́нїе грѣхѡ́въ , вᲂскрⷭ҇нїѧ ра́ди .

ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и҆зба́вленїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . И҆́же ѿ́ бг҃а ѻ҆́ч҃ее сло́во , пре́жде вѣ́къ рᲂжде́исѧ , напᲂслѣ́дᲂкъ лѣ́тᲂмъ , то́йже ѿ неи҆скꙋсᲂбра́чныѧ вᲂпло́щьсѧ и҆звᲂле́нїемъ , распѧ́тїе сме́ртнᲂе претерпѣ̀ , и҆ дре́вле ᲂу҆҆мерщве́наго челᲂвѣ́ка спа́слъ є҆́сть , свᲂи́мъ вᲂскрⷭ҇нїемъ .

хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїе . Є҆́же и҆з̾ ме́ртвыхъ твᲂѐ вᲂскрⷭ҇нїе , славᲂсло́вимъ хрⷭ҇тѐ , и҆́мже свᲂбᲂди́лъ є҆сѝ а҆да́мскїи ро́дъ , ѿ а҆́дᲂва мꙋчи́тельства , и҆ дарᲂва̀ ми́рᲂви ꙗ҆́кѡ бг҃ъ , живо́тъ вѣ́чныи , и҆ ве́лїю ми́лᲂсть .

ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . Сла́ва тебѣ̀ хрⷭ҇тѐ сп҃се , сн҃е бж҃їи є҆динᲂро́дныи , пригвᲂжде́исѧ на крⷭ҇тѣ̀ , и҆ вᲂскр҃се и҆́з̾ грᲂба тридне́внѡ .

сла́ва . Тебѐ сла́вимъ гдⷭ҇и , во́лею на́съ ра́ди распѧ́тїе претерпѣ́вша . и҆ тебѣ̀ пᲂклᲂнѧ́емсѧ всеси́льне сп҃се [пᲂкло́н̾] , не ѿве́рзи на́съ ѿ лица̀ твᲂегѡ̀ , но ᲂу҆҆слы́ши и҆ спасѝ на́съ , вᲂскрⷭ҇нїѧ ра́ди твᲂегѡ̀ чл҃кᲂлю́бче . и҆ ны́нѣ , боⷢ҇ . Цр҃ь нбⷭ҇ныи , за чл҃кᲂлю́бїе на землѝ ꙗ҆ви́сѧ , и҆ с̾ чл҃ки пᲂживѐ . ѿ дв҃ы бо чи́стыѧ пло́ть прїе́мыи , и҆з̾ неѧ̀ прᲂше́дъ с̾ вᲂспрїѧ́тїемъ . є҆ди́нъ є҆́сть сн҃ъ сꙋгꙋ́бъ є҆стество́мъ а҆ несᲂста́вᲂмъ . тѣ́мже сᲂверше́на тᲂгѡ̀ бг҃а , и҆ сᲂверше́на чл҃ка , вᲂи́стинꙋ прᲂпᲂвѣ́дающе , и҆спᲂвѣ́даемъ хрⷭ҇та̀ бг҃а на́шегѡ . є҆го́же мᲂлѝ , мт҃и без̾невѣ́стнаѧ , пᲂми́лᲂватисѧ дш҃а́мъ на́шимъ .

вы́хᲂдъ : свѣ́тѣ ти́хїи . прᲂки́менъ , ѱало́мъ дв҃дᲂвъ . да́лъ є҆сѝ дᲂстᲂѧ́нїе бᲂѧ́щимсѧ тебѐ гдⷭ҇и . сти́хъ : пᲂкры́юсѧ кро́вᲂмъ кри́лъ твᲂи́хъ . сти́хъ : ѿ кᲂне́цъ землѝ к̾ тебѣ̀ вᲂзва́хъ . сти́хъ : та́кѡ пᲂю̀ и҆́мени твᲂемꙋ̀ вы́шнїи . та́же , да́лъ є҆сѝ дᲂстᲂѧ́нїе бᲂѧ́щимсѧ тебѐ гдⷭ҇и .

є҆ктенїѧ̀ : рце́мъ всѝ . та́же , спᲂдо́би гдⷭ҇и в̾ ве́чер̾ . є҆ктенїѧ̀ : и҆спо́лнимъ вече́рнїѧ мл҃твы .

На стихо́внѣ , стихѣ́ра . гла́съ , и҃ . Вᲂз̾ше́лъ є҆сѝ на́ крⷭ҇тъ і҆с҃е , сᲂше́дыи с̾ нб҃съ , прїи́де на сме́рть живо́тъ без̾сме́ртныи , къ сꙋ́щимъ во тмѣ̀ свѣ́тъ и҆́стинныи . к̾ па́дшимъ всѣ́мъ вᲂскрⷭ҇нїе , и҆ прᲂсвѣще́нїе сп҃се на́шъ сла́ва тебѣ̀ .

та́же , пᲂе́мъ , стихѣ́ры па́сцѣ , со стихѝ и҆́хъ . сти́хъ : да вᲂскрⷭ҇нетъ бг҃ъ , и҆ про́чїѧ . сла́ва , и҆ ны́нѣ . вᲂскрⷭ҇нїѧ де́нь . хрⷭ҇то́съ вᲂскр҃се , гⷤ .

и҆ про́чаѧ , ꙗ҆́кᲂже пи́сано в̾ нлⷣю на вече́рни .

Въ сꙋбо́тꙋ свѣ́тлыѧ нлⷣи , на ᲂу҆́трени , пре́же нача́ла , вжига́етъ , свѣщѝ и҆ кади́ла параєклисїа́рхъ . та́же , і҆єре́й ста́въ пред̾ ст҃о́ю трапе́зᲂю с̾ кади́лᲂмъ кадѧ̀ крⷭ҇тᲂѡ҆бра́знѡ , и҆ глаго́летъ : Блгⷭ҇ве́нъ бг҃ъ на́шъ . мы́ же : а҆ми́нь . та́же , і҆єре́й пᲂе́тъ : Хрⷭ҇то́съ вᲂскр҃се и҆з̾ ме́ртвыхъ сме́ртїю на сме́рть настꙋпѝ , и҆ гро́бнымъ живо́тъ дарᲂва̀ ,= вⷤ . Х=рⷭ҇то́съ вᲂскр҃се и҆з̾ ме́ртвыхъ сме́ртїю на сме́рть настꙋпѝ . мы́ же : =и҆ =гро́бнымъ живо́тъ дарᲂва̀ . мы́ же : хрⷭ҇то́съ вᲂскр҃се , гⷤ .

и҆ про́чее , со стихѝ , ꙗ҆́кᲂже пи́сано в̾ нлⷣю на вече́рни . та́же , є҆ктенїѧ̀ вели́каѧ .

И҆ =по вᲂз̾гла́сѣ начина́етъ і҆єре́й , і҆рмо́съ . вᲂскрⷭ҇нїѧ дн҃ь . =и҆ пᲂе́мъ кано́нъ . І҆рмо́съ , по вⷤ . трᲂпари́ же , на в҃і . пᲂслѣди́ же , катава́сїѧ , і҆рмо́съ , ѻ҆́ба ли́ка вкꙋ́пѣ . По г҃ , пѣ́сни , ѵ҆пакᲂй : Предвари́ша ᲂу҆́тро . По ѕ҃ , пѣ́сни , кᲂнда́къ : А҆́ще и҆ во́ грᲂбъ сни́де . и҆ и҆́кᲂсъ . та́же , Вᲂскрⷭ҇нїе хрⷭ҇то́во , гⷤ . Вᲂскр҃съ і҆с҃ъ , гⷤ .

По ѳ҃ , пѣ́сни , свѣти́ленъ , гⷤ . та́же , хвали́те гдⷭ҇а с̾ нб҃съ . На хвали́тѣхъ . стⷯры , вᲂскрⷭ҇ны . =Гла́съ , и҃ . Хвали́те є҆гѡ̀ на си́лахъ є҆гѡ̀ ,꙳ хвали́те є҆гѡ̀ по премно́гᲂмꙋ вели́чествїю є҆гѡ̀ . Г=дⷭ҇и , а҆́ще и҆ на сꙋди́щи пред̾ста̀ пила́тᲂмъ сꙋди́мъ , но неѿстꙋпѝ ѿ прⷭ҇то́ла , со ѻ҆ц҃е́мъ сѣдѧ̀ . и҆ вᲂскр҃съ и҆з̾ ме́ртвыхъ , ми́ръ свᲂбᲂди́лъ є҆сѝ , ѿ рабо́ты чꙋжа́гѡ , ꙗ҆́кѡ ще́дръ и҆ чл҃кᲂлю́бецъ .

хвали́те є҆гѡ̀ во́ гласѣ трꙋ́бнѣмъ ,꙳ хвали́те є҆гѡ̀ во ѱалты́ри и҆ гꙋ́слѣхъ . Гдⷭ҇и , ѻ҆рꙋ́жїе крⷭ҇тъ тво́й на дїа́вᲂла да́лъ є҆сѝ на́мъ , трепе́щетъ бо и҆ трѧсе́тсѧ , немᲂгі́и взира́ти на си́лꙋ є҆гѡ̀ , ꙗ҆́кѡ ме́ртвыѧ вᲂскреша́етъ , и҆ сме́рть ᲂу҆҆праздни́лъ є҆́сть . сегѡ̀ ра́ди пᲂклᲂнѧ́емсѧ пᲂгребе́нїю твᲂемꙋ̀ и҆ вᲂскрⷭ҇нїю [пᲂкло́н̾] .

хвали́те є҆гѡ̀ в̾ тѷмпа́нѣ и҆ ли́цѣ ,꙳ хвали́те є҆гѡ̀ во стрꙋ́нахъ и҆ ѻ҆рга́нѣхъ . Гдⷭ҇и , а҆́ще ꙗ҆́кѡ ме́ртва тѧ , во́ грᲂбѣ і҆ꙋде́и пᲂлᲂжи́ша , но ꙗ҆́кѡ цр҃ѧ спѧ́ща , во́ини тебѐ стрежа́хꙋ . и҆ ꙗ҆́кѡ живᲂта̀ сᲂкро́вище печа́тїю печатлѣ́ша . но вᲂскр҃се , и҆ по́далъ є҆сѝ нетлѣ́нїе дш҃а́мъ на́шимъ .

хвали́те є҆гѡ̀ в̾ кѷмва́лѣхъ дᲂбрᲂгла́сныхъ , хвали́те є҆гѡ̀ в̾ кѷмва́лѣхъ вᲂсклица́нїѧ .꙳ всѧ́ко дыха́нїе да хва́литъ гдⷭ҇а . А҆́нг҃лъ тво́й гдⷭ҇и , и҆́же вᲂскрⷭ҇нїе прᲂпᲂвѣ́да на́мъ . стра́жи ᲂу҆́бѡ ᲂу҆҆страшѝ , жена́мъ же вᲂз̾гласѝ глаго́лѧ , что̀ и҆́щете жива́го с̾ ме́ртвыми , вᲂскр҃се бг҃ъ сы́и , и҆ вселе́ннѣй жи́знь дарᲂва̀ .

та́же , пᲂе́мъ , стихѣ́ры па́сцѣ , со стихѝ и҆́хъ . сти́хъ : да вᲂскрⷭ҇нетъ бг҃ъ , и҆ про́чїѧ . сла́ва , и҆ ны́нѣ . вᲂскрⷭ҇нїѧ де́нь . хрⷭ҇то́съ вᲂскр҃се , гⷤ .

пᲂсе́мъ : є҆ктенїѧ̀ : пᲂми́лꙋй на́съ бж҃е . і҆єре́й , вᲂз̾гла́съ . та́же : и҆спо́лнимъ заꙋ́треннїѧ мл҃твꙋ . и҆ по вᲂз̾гла́сѣ : сы́и бл҃гᲂслᲂве́нъ . и҆ мы̀ : а҆ми́нь . ᲂу҆твердѝ бж҃е вѣ́рꙋ хрⷭ҇тїа́нскꙋю .

та́же , дїа́кᲂнъ : Премꙋ́дрᲂсть . мы́ же : Хрⷭ҇то́съ вᲂскр҃се и҆з̾ ме́ртвыхъ сме́ртїю на сме́рть настꙋпѝ , и҆ гро́бнымъ живо́тъ дарᲂва̀ .= три́жды , с̾ пᲂкло́нами .= пᲂсе́мъ і҆єре́й твᲂри́тъ , ѿпꙋ́стъ , держа́и крⷭ҇тъ . пᲂе́тъ : Хрⷭ҇то́съ вᲂскр҃се и҆з̾ ме́ртвыхъ сме́ртїю на сме́рть настꙋпѝ . мы́же : И҆гро́бнымъ живо́тъ дарᲂва̀ . і҆єре́й : И҆́стинныи бг҃ъ на́шъ , мл҃твами пречⷭ҇тыѧ є҆гѡ̀ мт҃ре , си́лᲂю чⷭ҇тна́гѡ и҆ живᲂтвᲂрѧ́щагѡ крⷭ҇та̀ , и҆ ст҃ы́хъ сла́вныхъ и҆ всехва́льныхъ а҆пⷭ҇лъ , и҆ всѣ́хъ ст҃ы́хъ пᲂми́лꙋетъ и҆ спасе́тъ на́съ , ꙗ҆́кѡ бл҃гі́и чл҃кᲂлю́бецъ .

та́же , і҆єре́й крⷭ҇тъ вᲂзвыша́ѧ гл҃етъ : Хрⷭ҇то́съ вᲂскр҃се . гⷤ . мы́же : Вᲂи́стинꙋ вᲂскр҃се . гⷤ . и҆ пᲂе́мъ : И҆ =на́мъ дарᲂва̀ живо́тъ вѣ́чныи , пᲂкланѧ́емсѧ тридне́внᲂмꙋ є҆гѡ̀ вᲂскрⷭ҇нїю =[пᲂкло́нъ] .

та́же , а҃ й ча́съ . ꙗ҆́кᲂже ᲂу҆каза́сѧ в̾ нлⷣю на ᲂу҆́трени .= С=и́це же быва́етъ , слꙋ́жба ᲂу҆́тренѧѧ во всю̀ седми́цꙋ свѣ́тлꙋю .

На литꙋргі́и , а҆нтифо́ны . и҆ є҆ли́цы во хрⷭ҇та̀ крⷭ҇ти́стесѧ , па́сцѣ непремѣ́ннѡ , ꙗ҆́кᲂже ᲂу҆ка́зано в̾ нлⷣю па́схи .

прᲂки́менъ , ѱало́мъ дв҃дᲂвъ . гдⷭ҇ь прᲂсвѣще́нїе мᲂѐ , и҆ спаси́тель мо́й , кᲂго́сѧ ᲂу҆бᲂю̀ . сти́хъ : гдⷭ҇ь защи́титель живᲂтꙋ̀ мᲂемꙋ̀ , ѿ кᲂго́сѧ ᲂу҆страшꙋ̀ . а҆пⷭ҇лъ , въ дѣѧ́нїихъ . заⷱ҇ , и҃ . а҆ллилꙋ́їѧ . гдⷭ҇ь вᲂцр҃и́сѧ в̾ лѣ́пᲂтꙋсѧ ѡ҆блечѐ . сти́хъ : и҆́бо ᲂу҆твердѝ вселе́ннꙋю ꙗ҆́же непᲂдви́житсѧ . є҆ѵⷢ҇а́лїе , ѿ і҆ѡа́нна . заⷱ҇ , а҃і . прича́стенъ . тѣ́ло хрⷭ҇то́во .

А҆́ще ли неприлꙋчи́тсѧ бы́ти литꙋргі́и , часы̀ пᲂе́мъ па́сцѣ по ѡ҆бы́чаю . Бл҃же́нна ѿ кано́на па́сцѣ пѣ́снь , ѳ҃ ѧ , на и҃ . А҆пⷭ҇лъ , и҆ є҆ѵⷢ҇а́лїе , вышепи́саннѡ . По ѻ҆сла́би кᲂнда́къ , па́сцѣ . и҆ про́чаѧ ꙗ҆́кᲂже ᲂу҆каза́сѧ в̾ недѣ́лю па́схи .

На трапе́зѣ ве́лїе ᲂу҆тѣше́нїе бра́тїи . і҆єре́й гл҃етъ : За мл҃твъ ст҃ы́хъ ѻ҆ц҃ъ на́шихъ . мы́ же : Хрⷭ҇то́съ вᲂскр҃се , гⷤ . та́же , ѻ҆́ч҃е на́шъ . сла́ва , и҆ ны́нѣ , гдⷭ҇и пᲂми́лꙋй , вⷤ , гдⷭ҇и блгⷭ҇вѝ . і҆єре́й : Хрⷭ҇тѐ бж҃е блгⷭ҇вѝ ꙗ҆́стїе и҆ питїѐ рабо́мъ свᲂи́мъ . и҆ сѧ́демъ ко́ждо на мѣ́стехъ свᲂи́хъ . По вᲂста́нїи же ѿ трапе́зы , і҆єре́й гл҃етъ : За мл҃твъ ст҃ы́хъ ѻ҆ц҃ъ на́шихъ . мы́ же : Хрⷭ҇то́съ вᲂскр҃се , гⷤ . та́же , свѣти́сѧ свѣти́сѧ . сла́ва , и҆ ны́нѣ , гдⷭ҇и пᲂми́лꙋй , вⷤ , гдⷭ҇и блгⷭ҇вѝ . і҆єре́й гл҃етъ := Блгⷭ҇ве́нъ бг҃ъ ми́лꙋѧи и҆ пита́ѧи ѿ свᲂи́хъ бᲂга́тыхъ даро́въ свᲂе́ю бл҃гᲂда́тїю и҆ чл҃кᲂлю́бїемъ , всегда̀ и҆ ны́нѣ и҆ при́снѡ и҆ во́ вѣки вѣкѡ́мъ . мы́ же : гдⷭ҇и пᲂми́лꙋй , в҃і . =и҆ про́чее . Си́це же твᲂри́мъ , до ѿда́нїѧ па́сцѣ .