Въ тꙋ́же , недѣ́лю , ве́черъ . на гдⷭ҇и вᲂзва́хъ , стихѣ́ры , на́ ѕ҃ . гла́съ , и҃ . Ра́дꙋисѧ и҆ весели́сѧ гра́де сїѡ́не , красꙋ́йсѧ и҆ ра́дꙋйсѧ цр҃кви бж҃їѧ , се́бо цр҃ь тво́й прїи́де пра́вдᲂю на жребѧ́ти сѣдѧ̀ , ѿ дѣте́й вᲂсхвалѧ́емъ . ѡ҆са́нна в̾ вы́шнихъ бл҃гᲂслᲂве́нъ є҆сѝ , и҆мѣ́ѧи мно́жество щедро́тъ пᲂми́лꙋй на́съ . двⷤа . Прїи́де і҆с҃ъ дне́сь во́ градъ і҆єрⷭ҇ли́мъ , и҆спо́лнити писа́нїе , и҆ всѝ вᲂспрїе́мше в̾ рꙋка́хъ ва́їи , ри́зы же пᲂстила́хꙋ є҆мꙋ̀ , вѣ́дꙋще ꙗ҆́кѡ то́й є҆́сть бг҃ъ на́шъ . є҆мꙋ́же херꙋви́ми вᲂпїю́тъ непреста́ннѡ . ѡ҆са́нна в̾ вы́шнихъ , блгⷭ҇ве́нъ є҆сѝ и҆мѣ́ѧи мно́жество щедро́тъ , пᲂми́лꙋй на́съ . двⷤа . И҆́же на херꙋви́мѣхъ нᲂси́мый , и҆ пѣва́емыи ѿ серафи́мъ , всѣ́де на жребѧ̀ дв҃дски бла́же . и҆ дѣ́ти тѧ вᲂспѣва́хꙋ бг҃ᲂлѣ́пнѡ , і҆ꙋде́и же хꙋ́лѧхꙋ без̾зако́ннѡ . несѣда́нїе бо ꙗ҆зы́къ , сѣда́лище жребца̀ прᲂѡ҆бразᲂва́ше , и҆з̾ невѣ́рїѧ в̾ вѣ́рꙋ претварѧ́емыхъ . сла́ва тебѣ̀ хрⷭ҇тѐ , є҆ди́не ми́лᲂстиве и҆ чл҃кᲂлю́бче . двⷤа .

сла́ва . Ра́дꙋисѧ и҆ весели́сѧ гра́де сїѡ́не .

и҆ ны́нѣ . И҆́же на херꙋви́мѣхъ нᲂси́мый . та́же , вы́хᲂдъ : свѣ́тѣ ти́хїи .= прᲂки́менъ , дню̀ .=

На стихо́внѣ , стихѣ́ры . гла́съ , в҃ . Ѿ вѣ́твей и҆ ва́їѧ ꙗ҆́кѡ ѿ бжⷭ҇твена пра́здника , в̾ бжⷭ҇твеныи преше́дше пра́здникъ къ честны́мъ хрⷭ҇то́вымъ страсте́мъ вѣ́рнїи , и҆ сте́кшесѧ , же́ртвꙋ спасе́нꙋю сегѡ̀ да ви́димъ , за на́съ стра́сть пᲂд̾є́млюща во́льнꙋю , и҆ дш҃ꙋ свᲂю̀ и҆збавле́нїе пᲂдаю́ща всемꙋ̀ ми́рꙋ . тᲂмꙋ́ же пѣ́нїе пᲂдо́бнᲂе , бл҃гᲂдарѧ́ще вᲂспᲂе́мъ , прилѣ́жнѡ зᲂвꙋ́ще , и҆́же бл҃гᲂꙋтро́бїѧ и҆сто́чниче , и҆ спасе́нїѧ приста́нище , гдⷭ҇и сла́ва тебѣ̀ .

сти́хъ : гла́съ , г҃ . вᲂспо́йте гдⷭ҇ви ,꙳ пѣ́снь но́вꙋ . Стра́шно є҆́же в̾па́сти в̾ рꙋ́цѣ бг҃а жи́ва , то́й бо сꙋдїѧ̀ є҆́сть пᲂмысло́мъ , и҆ мы́слемъ срⷣчнымъ . да никто́же вни́детъ и҆скꙋша́ѧ вѣ́рꙋ непᲂро́чнꙋю , но въ кро́тᲂсти и҆ стра́сѣ хрⷭ҇тꙋ̀ пристꙋ́пимъ , да прїи́мемъ млⷭ҇ть , и҆ бл҃гᲂда́ть ѡ҆брѧ́щемъ въ бл҃гᲂвре́меннꙋю по́мᲂщь .

сти́хъ : гла́съ , з҃ . ви́дѣша всѝ кᲂнцы̀ землѝ ,꙳ спасе́нїе бг҃а на́шегѡ . Со́нмице лꙋка́ваѧ и҆ прелюбᲂдѣ́иваѧ , ꙗ҆́же свᲂемꙋ̀ мꙋ́жꙋ несᲂхра́ньши вѣ́рꙋ , что̀ держи́ши завѣ́тъ , є҆мꙋ́же нѣ́си наслѣ́дница ; что́сѧ хва́лиши ѡ҆ ѻ҆ц҃ѣ , сы́на ѿве́ргшисѧ . прⷪ҇ркъ ᲂу҆́бѡ непрїѧ́тъ , и҆́же тᲂгѡ̀ прᲂпᲂвѣ́давшихъ . пᲂнѐ ча́дъ свᲂи́хъ ᲂу҆срами́сѧ , си́це вᲂпїю́щихъ , ѡ҆са́нна сн҃е дв҃дᲂвъ , бл҃гᲂслᲂве́нъ грѧды́и во́ и҆мѧ гдⷭ҇не .

сла́ва . гла́съ , в҃ . Ѿ вѣ́твей и҆ ва́їѧ ꙗ҆́кѡ .

и҆ ны́нѣ . гла́съ , г҃ . Стра́шно є҆́же в̾па́сти .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпарѝ : бцⷣе дв҃о ра́дꙋисѧ . и҆ про́чаѧ с̾ пᲂкло́ны . и҆ ѿпꙋ́стъ : прише́дыи на́ стрⷭ҇ть во́льнꙋю хрⷭ҇то́съ и҆́стинныи бг҃ъ на́шъ , мл҃твами пречⷭ҇тыѧ є҆гѡ̀ мт҃ре , и҆ всѣ́хъ ст҃ы́хъ . сі́и же ѿпꙋ́стъ гл҃етсѧ , в̾ пнⷣе , вᲂвто́рникъ , в̾ среⷣ , в̾ четверто́к̾ , в̾ пѧто́к̾ вели́кїи .

На па́вечерницѣ пᲂе́мъ трипѣ́снецъ вели́кагѡ пнⷣльника . твᲂре́нїе ки́ръ а҆ндре́ѧ кри́тскагѡ . і҆рмо́съ , по вⷤ . трᲂпарѝ , на́ і҃ . пᲂслѣдѝ і҆рмо́съ , ѻ҆́ба ли́ка в̾кꙋ́пѣ . гла́съ , и҃ . пѣ́снь , а҃ . і҆рмо́съ . Сᲂкрꙋ́шшемꙋ бра́ни мы́шцею свᲂе́ю , и҆ прᲂве́дшемꙋ і҆и҃лѧ сквᲂзѣ̀ чермно́е мо́ре , вᲂспᲂе́мъ є҆мꙋ̀ ꙗ҆́кѡ и҆зба́вителю на́шемꙋ ꙗ҆́кѡ прᲂсла́висѧ .

запѣ́въ : Сла́ва тебѣ̀ бж҃е на́шъ , сла́ва тебѣ̀ .

ѡ́сифᲂвꙋ цѣлᲂмꙋ́дрїю пᲂдо́бѧщесѧ вѣ́рнїи . разꙋмѣ́емъ пᲂче́тшаго , чл҃ческᲂе слᲂве́снᲂе сꙋщество̀ , всѧ́цѣмъ хране́нїемъ живꙋ́ще , дᲂбрᲂдѣ́телїю дѣ́йственᲂю . Ѻ҆́бразъ влⷣчень написꙋ́ѧ і҆ѡ́сифъ , в̾ ро́въ в̾ве́рженъ бы́сть , и҆ про́данъ ѿ сро́дникъ , и҆ всѧ̀ претерпѣ̀ сла́вныи , во ѻ҆́бразъ по и҆́стинѣ хрⷭ҇то́въ . Смᲂко́вницы без̾пло́дствїѧ ᲂу҆бѣжа́вше бра́тїе , разꙋмѣ́емъ ѻ҆́бразъ , да не и҆́схнемъ , ꙗ҆́кᲂже и҆ ѻ҆на̀ тᲂгда̀ , є҆гда̀ вᲂз̾вра́щьсѧ чл҃кᲂлюби́выи прїи́де к̾ не́й а҆́лча . До́брыхъ недѣ́ланїе ᲂу҆пᲂдо́бисѧ смᲂко́вницѣ , тᲂгѡ̀ ᲂу҆́бѡ ᲂу҆клᲂни́мсѧ , да не и҆́схнемъ , ꙗ҆́кᲂже и҆ ѻ҆на̀ тᲂгда̀ . сᲂбо́рище бо ли́ствїемъ пᲂкрыва́ющеесѧ пред̾написа́сѧ .

с҃ъ за ми́ръ тща́сѧ пᲂстрада́ти во́лею , и҆́детъ со ᲂу҆ченикѝ свᲂи́ми во́ градъ і҆єрⷭ҇ли́мъ , к̾ во́льнѣй стра́сти , наню́же прїи́де пᲂстрада́ти . Прилѣпи́вшїисѧ гдⷭ҇ви всѝ , пᲂтща́вшемꙋсѧ пᲂстрада́ти , гᲂто́ви бꙋ́демъ ко ѡ҆плева́нїю , и҆ к̾ пᲂрꙋга́нїю и҆ ко ᲂу҆ничиже́нїю , ꙗ҆́кѡ да пречи́стыми є҆гѡ̀ страстьмѝ , спᲂдо́блени бꙋ́демъ прᲂсла́витисѧ . сла́ва . Стра́стїю стра́сти и҆сцѣлѧ́етъ пᲂстрада́выи на́съ ра́ди , хᲂтѧ́ бо прᲂи҆зво́дитъ на на́ше сꙋщество̀ чл҃ческᲂе , живᲂтво́рнаѧ свᲂѧ̀ страда́нїѧ , да спасе́мсѧ мы̀ . и҆ ны́нѣ , боⷢ҇ . Же́злъ ᲂу҆́бѡ мѡѷсе́ѡвъ и҆ же́злъ а҆арѡ́нᲂвъ , стра́ннѡ претвᲂре́нїе , и҆ па́че ᲂу҆ма̀ смᲂтре́нїе и҆мѣ́ста . твᲂе́ же чре́во бг҃ᲂрᲂди́тельнице , ржⷭ҇тво̀ ѡ҆бнᲂвлѧ́етъ но́во .

катава́сїѧ : Сᲂкрꙋ́шшемꙋ бра́ни .

пѣ́снь , и҃ . і҆рмо́съ . Прᲂѧвле́ннагѡ на гᲂрѣ̀ ст҃ѣ́й , и҆ в̾ кꙋпинѣ̀ ѻ҆́гненнѣй , дв҃ческꙋю мѡѷсе́ѡви та́йнꙋ ꙗ҆́вльшагѡ , гдⷭ҇а по́йте и҆ превᲂзнᲂси́те є҆гѡ̀ во́ вѣки . Цѣлᲂмꙋ́дрїемъ ᲂу҆краси́вше житїѐ , и҆ мꙋ́дрᲂстїю сᲂхрани́вше вѣ́рꙋ , пра́ведными ѻ҆́бразы хᲂдѧ́ще , да в̾ мꙋ́жествѣ спᲂслѣ́дꙋюще , хрⷭ҇тꙋ̀ сраспне́мсѧ . Дрꙋгꙋ́ю є҆́ввꙋ ѡ҆брѣ́тъ є҆гѵ́птѧныню , непᲂбѣди́сѧ к̾ непᲂдо́бнᲂмꙋ дѣѧ́нїю патрїа́рхъ і҆ѡ́сифъ , но стᲂѧ́ше ꙗ҆́кᲂже ка́мень а҆дама́нтъ , ѿ страсте́й без̾че́стїѧ не ѡ҆бьѧ́тъ . Ше́ствꙋѧ жите́йскимъ хᲂжде́нїемъ сп҃се мо́й , взалка́лъ є҆сѝ во́лею спасе́нїѧ всѣ́хъ жела́ѧ . и҆ сїѐ взыска́лъ є҆сѝ ѡ҆браще́нїѧ ꙗ҆́же ѿ тебѐ ᲂу҆да́лившимсѧ . Пра́ѻ҆тецъ в̾кꙋ́шъ ѿ́ древа , ꙗ҆́кѡ разꙋмѣ́сѧ на́гъ и҆ пᲂсра́мленъ , ли́ствїе смᲂко́внᲂе взе́мъ ѡ҆дѣ́ѧсѧ . сᲂбо́рище ᲂу҆́бѡ ѡ҆бнаже́ннᲂе хрⷭ҇та̀ прᲂѡ҆бража́шесѧ . Гᲂто́висѧ дш҃е пре́же и҆схо́да , ᲂу҆стро́й себѐ ко ѻ҆́нᲂмꙋ житїю̀ , и҆ хрⷭ҇тꙋ̀ тебѐ ра́ди пᲂстрада́ти тща́щемꙋсѧ пᲂтщи́сѧ пᲂстрада́ти , и҆ съ си́мъ сраспѧ́тисѧ , и҆ ᲂу҆́мрети да тѧ̀ прᲂсла́витъ . Ка́кѡ не ᲂу҆жа́снетсѧ а҆́дъ , срѣ́тъ тѧ , ка́кѡ не ᲂу҆бᲂи́тсѧ сме́рть , сп҃се мо́й , по бл҃гᲂи҆звᲂле́нїю къ стра́сти тща́щасѧ , тебѐ пᲂнепра́ведныхъ пра́ведна зрѧ̀ пᲂстрада́ти прише́дша . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Мо́литъ тѧ̀ хрⷭ҇тѐ бцⷣа . мо́литъ ᲂу҆чени́къ твᲂи́хъ сᲂбо́ръ . тво́й ми́ръ дарᲂва́ти ми́рꙋ твᲂемꙋ̀ , и҆ щедро́ты твᲂѧ̀ пᲂдава́ти бᲂга́тнѡ на́мъ во́ вѣки . и҆ ны́нѣ , боⷢ҇ . А҆́гница твᲂѧ̀ и҆ мт҃и и҆ дв҃а , къ стра́сти и҆дꙋ́ща тѧ̀ зрѧ́щи , и҆ дш҃ꙋ по на́съ пᲂлага́юща до́брагѡ па́стырѧ , ᲂу҆тро́бᲂю мт҃рьнею по тебѣ̀ рыда́ше .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Прᲂѧвле́ннагѡ на гᲂрѣ̀ .= [пᲂкло́н̾ до землѝ] .=

пѣ́снь , ѳ҃ . і҆рмо́съ . Чꙋ́же є҆́сть , мт҃ремъ дв҃ᲂю бы́ти , и҆ стра́ннѡ дв҃амъ , дѣ́ти ражда́ти , на тебѣ̀ бцⷣе ѡ҆бᲂѐ смᲂтре́нїе бы́сть . тѣ́мъ тѧ̀ всѧ̀ племена̀ земна́ѧ непреста́ннѡ велича́емъ . Чꙋ́же є҆́сть блꙋднико́мъ цѣлᲂмꙋ́дрїе , и҆ стра́нно пра́ведникѡмъ закᲂнᲂпрестꙋпле́нїе . і҆ѡ́сифъ же вели́кїи ᲂу҆клᲂни́сѧ ѿ без̾зако́нїѧ , и҆ цѣлᲂмꙋ́дрїе вᲂспрїѧ́тъ . ѻ҆́бразъ и҆ пᲂдо́бїе вᲂи́стинꙋ хрⷭ҇то́во . Чꙋ́же є҆́сть без̾зако́нникѡмъ , бл҃гᲂзако́нїе , и҆ стра́нно невѣ́рнымъ , бг҃ᲂразꙋ́мїе , і҆ꙋде́и же сїѐ ѿри́нꙋша за без̾зако́нїе . тѣ́мже и҆ є҆ди́ни са́ми наслѣ́дᲂваша , ꙗ҆́кᲂже смᲂква̀ клѧ́твꙋ . Взалка̀ спасе́нїѧ ра́ди чл҃ческагѡ , хлѣ́бъ сы́и живо́тныи хрⷭ҇то́съ и҆ бг҃ъ мо́й , ѽ і҆ꙋде́и ꙗ҆́кᲂже смо́квꙋ пред̾вари́въ , непло́днᲂе твᲂѐ со́нмище , ли́ствїе нᲂсѧ́щꙋ зако́ннᲂе , тꙋ̀ про́клѧтъ ꙗ҆́кᲂже вѣ́сть . Же́злъ ᲂу҆́бѡ мѡѷсе́ѡвъ дре́вле въ ѕмїю̀ прелᲂжи́сѧ , а҆арѡ́нᲂвъ же же́злъ в̾ зелено̀ , и҆ прᲂцвѣтѐ ли́ствїе . непло́днᲂе же и҆ и҆с̾со́хшее сᲂбо́рище закᲂнᲂпрестꙋ́пнᲂе , в̾ непло́днꙋю прелᲂжи́сѧ смᲂко́вницꙋ . Гᲂто́ви і҆ꙋде́е і҆єре́и ᲂу҆бі́йцы свᲂѧ̀ , гᲂто́ви рꙋ́цѣ к̾ бг҃ᲂꙋбі́йствꙋ , се́бо прїи́де кро́тᲂкъ и҆ неѕло́бивъ на́ стрⷭ҇ть а҆́гнецъ сы́и , и҆ па́стырь на́шъ хрⷭ҇то́съ , цр҃ь і҆и҃левъ . Ѡ҆братѝ і҆ꙋде́е пра́здники твᲂѧ̀ в̾ пла́чь , по прⷪ҇ро́чествꙋ бо влⷣцѣ , бг҃ᲂꙋбі́йствена пᲂказа́сѧ , ѡ҆бра́щьшемꙋ дре́вле ка́мень несѣко́мыи во и҆сто́чники вᲂдны́ѧ и҆ є҆зе́ра , ꙗ҆́кᲂже пᲂе́тъ дв҃дъ . Зако́ннᲂе непло́дїе про́клѧлъ є҆сѝ , ꙗ҆́кѡ ли́ствїе прᲂцвѣта́ющее пи́смени ра́зꙋмъ , плᲂдо́въ же дѣ́лъ не и҆мѣ́ющее за без̾зако́нїе , на́съ же всѣ́хъ бл҃гᲂда́ти сн҃о́въ сп҃се бл҃гᲂслᲂвѝ . сла́ва . Чꙋ́же є҆́сть без̾зако́ннымъ сла́вити без̾нача́льнꙋю трⷪ҇цꙋ , ѻ҆ц҃а и҆ сн҃а и҆ ст҃а́гѡ дх҃а бг҃а , несо́зданнᲂе вседержи́тельство , и҆́мже ве́сь ми́ръ сᲂдѣ́ласѧ , ма́нїемъ держа́вы є҆гѡ̀ . и҆ ны́нѣ , боⷢ҇ . Приво́димъ ти в̾ мл҃твꙋ пречⷭ҇тꙋю мт҃рь твᲂю̀ , тᲂѧ̀ мл҃твами и҆ а҆пⷭ҇лъ твᲂи́хъ , ѻ҆́бщники всѧ̀ ꙗ҆вѝ на́съ , бл҃ги́хъ твᲂи́хъ , и҆ свѣ́тлᲂсти спᲂдо́би сп҃се вᲂскрⷭ҇нїѧ твᲂегѡ̀ .

задᲂсто́йнѡ : Чꙋ́же є҆́сть . [пᲂкло́н̾ до землѝ] .

трⷭ҇то́е , и҆ по ѻ҆́ч҃е на́шъ . кᲂнда́къ , дню̀ . и҆ про́чее ѻ҆бы́чнᲂе . и҆ ѿпꙋ́стъ .

Вѣ́дᲂмо же бꙋ́ди , ꙗ҆́кѡ въ пнⷣльникъ вели́кїи и҆ во всю̀ страстнꙋ́ю недѣ́лю пᲂе́тсѧ ѡ҆бы́чнаѧ пᲂлꙋ́нᲂщница съ каѳи́смᲂю , и҆ съ трᲂпарѝ ѡ҆бы́чными , крᲂмѣ̀ вели́кїѧ сꙋбо́ты .

Во ст҃ы́и вели́кїи пнⷣльникъ на ᲂу҆́трени , є҆ѯа̀ ѱалмы̀ , и҆ є҆ктенїѧ̀ .= пᲂсе́мъ , а҆ллилꙋ́їѧ , на гла́съ , и҃ . та́же , трᲂпа́рь . гла́съ , и҃ . Сѐ жени́хъ грѧде́тъ в̾пᲂлꙋ́нᲂщи , и҆ бл҃же́нъ ра́бъ є҆го́же ѡ҆брѧ́щетъ бдѧ́ща . недᲂсто́инъ же па́ки , є҆го́же ѡ҆брѧ́щетъ лѣнѧ́щасѧ . блюдѝ ᲂу҆́бѡ дш҃е мᲂѧ̀ , да не сно́мъ ѡ҆тѧгᲂти́шисѧ , и҆ да не сме́рти предана̀ бꙋ́деши , и҆ црⷭ҇твїѧ внѣ̀ затвᲂри́шисѧ . но вᲂспрѧнѝ зᲂвꙋ́щи , ст҃ъ , ст҃ъ , ст҃ъ є҆сѝ бж҃е , бцⷣы ра́ди пᲂми́лꙋй на́съ . =двⷤа . сла́ва , и҆ ны́нѣ , то́йже . та́же , ѱалты́рь с̾ пᲂкло́ны .= По а҃ , стихᲂло́гїи , сѣда́ленъ . гла́съ , а҃ . Стра́сти честны́ѧ в̾ настᲂѧ́щїи де́нь , ꙗ҆́кѡ свѣти́ла спасе́нїѧ , вᲂз̾сїѧва́ютъ ми́рꙋ . хрⷭ҇то́съ бо грѧде́тъ пᲂстрада́ти бл҃гᲂстїю , и҆́же всѧ́ческаѧ сᲂдержа́и го́рстїю . прїе́млетъ прᲂстре́тисѧ на́ древѣ , спастѝ чл҃ческᲂе є҆стество̀ . =сла́ва , и҆ ны́нѣ , то́йже .

По в҃ , стихᲂло́гїи , сѣда́ленъ . гла́съ , а҃ . Неви́димыи сꙋдїѧ̀ , во́ плᲂти ви́димь є҆сѝ , и҆ и҆́деши ѿ мꙋже́й без̾зако́нныхъ сꙋди́мъ бы́ти , ѡ҆сꙋжде́нїе на́ше ѡ҆сꙋжа́ѧ стра́стїю сѝ . тѣ́мже хвалꙋ̀ и҆ вели́чїе и҆ сла́вꙋ вᲂспѣва́юще сᲂгла́снѡ , сло́ве вла́сти твᲂе́й прино́симъ .= сла́ва , и҆ ны́нѣ , то́йже .=

По г҃ , стихᲂло́гїи , сѣда́ленъ . гла́съ , и҃ . Стрⷭ҇те́й гдⷭ҇нихъ нача́ло , настᲂѧ́щїи де́нь свѣ́тлѡ но́ситъ . прїидѣ́те ᲂу҆́бѡ праз̾днᲂлю́бцы , ᲂу҆срѧ́щемъ пѣ́сньми , зижди́тель бо грѧде́тъ крⷭ҇тъ прїѧ́ти , и҆ и҆спыта́нїѧ и҆ ра́ны , и҆ пила́тᲂмъ сꙋди́тисѧ . тѣ́мже и҆ ѿ раба̀ ᲂу҆да́ренъ бы́въ по главѣ̀ , всѧ̀ претерпѣ̀ да спасе́тъ челᲂвѣ́ка . сегѡ̀ ра́ди вᲂзᲂпїе́мъ є҆мꙋ̀ , влⷣко хрⷭ҇тѐ бж҃е на́шъ , грѣхо́въ ѡ҆ставле́нїе да́рꙋй , пра́з̾днꙋющимъ вѣ́рᲂю пречⷭ҇тыѧ стра́сти твᲂѧ̀ .= сла́ва , и҆ ны́нѣ , то́йже . пᲂсе́м̾ , ѱл҃о́мъ , н҃ . та́же , спасѝ бж҃е лю́ди свᲂѧ̀ . мы́же : гдⷭ҇и пᲂми́лꙋй , в҃і . =трипѣ́снецъ , твᲂре́нїе ки́ръ кᲂзмы̀ . і҆рмо́съ , по два́жды . трᲂпарѝ , на в҃і . гла́съ , в҃ . пѣ́снь , а҃ . і҆рмо́съ . Непрᲂхᲂди́мо вᲂлнѧ́щеесѧ мо́ре , бж҃їимъ велѣ́нїемъ и҆з̾сꙋши́вшемꙋ , и҆ хᲂди́ти сквᲂзѣ̀ не і҆и҃льтескїѧ лю́ди спᲂдо́бльшꙋ гдⷭ҇ви пᲂе́мъ , сла́вно бо прᲂсла́висѧ .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Неи҆зрече́ннᲂе сло́ва бж҃їѧ схᲂжде́нїе , є҆́же са́мъ хрⷭ҇то́съ є҆́сть бг҃ъ и҆ чл҃къ , и҆ сы́и бг҃ъ невᲂсхище́нїемъ бы́ти непщева́въ , внегда̀ вᲂѡ҆брази́сѧ в̾ раба̀ , и҆ пᲂказа́сѧ ᲂу҆ченико́мъ . сла́вно бо прᲂсла́висѧ . Пᲂслꙋжи́ти са́мъ прише́лъ є҆сѝ , сᲂдѣ́телю во́лею ѡ҆бнища́вшемꙋ а҆да́мꙋ . є҆го́же ѻ҆́бразᲂмъ ѡ҆блᲂже́нъ є҆сѝ , бᲂга́тъ сы́и бжⷭ҇тво́мъ , пᲂлᲂжѝ свᲂю̀ дш҃ꙋ и҆зба́вꙋ за́нь , и҆́же без̾стра́стныи бжⷭ҇тво́мъ .

катава́сїѧ : Непрᲂхᲂди́мо вᲂлнѧ́щеесѧ .

=та́же , є҆ктенїѧ̀ ма́лаѧ . кᲂнда́къ . гла́съ , и҃ . =

а́кѡвъ рыда́ше і҆ѡ́сифᲂва лише́нїѧ , до́блїи же сѣдѧ́ше на кᲂлесни́цѣ , ꙗ҆́кѡ цр҃ь пᲂчита́емъ . є҆гѵ́птѧныни бо тᲂгда̀ сла́сти непᲂрабо́тавъ , и҆ ны́нѣ прᲂславлѧ́етсѧ ѿ вѣ́дѧщагѡ чл҃ческаѧ срⷣца̀ , и҆ пᲂсыла́ющагѡ вѣне́цъ нетлѣ́нныи . и҆́кᲂсъ . Къ пла́чꙋ ны́нѣ рыда́нїе да прилᲂжи́мъ , и҆ и҆з̾лїе́мъ сле́зы со і҆а́кѡвᲂмъ пла́чꙋщесѧ , і҆ѡ́сифа приснᲂпа́мѧтнагѡ цѣлᲂмꙋ́дреника , пᲂрабо́щенагѡ ᲂу҆́бѡ тѣ́лᲂмъ , дш҃ꙋ же непᲂрабо́щенꙋ сᲂхрани́вша , и҆ є҆гѵ́птᲂмъ всѣ́мъ црⷭ҇твᲂвавша . бг҃ъ бо пᲂдае́тъ рабо́мъ свᲂи́мъ вѣне́цъ нетлѣ́нныи .

пѣ́снь , и҃ . і҆рмо́съ . Оу҆страши́сѧ ѻ҆́трᲂкъ бл҃гᲂчести́выхъ , є҆динᲂкрасо́тнᲂе дꙋшы̀ , нескве́рнᲂе тѣ́ло , и҆ ᲂу҆стꙋпѝ напита́нныи во мно́зѣй ве́щи недѣ́ланныи ѻ҆́гнь , прⷭ҇нᲂживо́тнꙋ же и҆з̾ ᲂу҆вѧ́дшꙋ пла́мени , вѣ́чнѡ пѣ́нїе вᲂспѣва́шесѧ , гдⷭ҇а всѧ̀ дѣ́ла по́йте и҆ превᲂзнᲂси́те є҆гѡ̀ во́ вѣки . Ва́съ мᲂѧ̀ ᲂу҆ченикѝ всѝ , ᲂу҆разꙋмѣ́ютъ тᲂгда̀ , а҆́ще мᲂѧ̀ за́пᲂвѣди сᲂблюдетѐ , речѐ хрⷭ҇то́съ к̾ дрꙋго́мъ си к̾ стрⷭ҇ти и҆ды́и , ми́ръ и҆мѣ́йте въ себѣ̀ , и҆ во всѣ́хъ смире́ннаѧ мꙋ́дрствꙋюще , вᲂз̾вы́ситесѧ . и҆ гдⷭ҇а зна́юще мѧ , по́йте и҆ превᲂзнᲂси́те во́ вѣки . Чи́нъ сᲂпрᲂти́венъ ва́мъ ꙗ҆зы́кѡмъ , да бꙋ́детъ в̾ держа́вꙋ кꙋпнᲂро́днымъ , не жре́бїи бо мо́й мꙋчи́тельство , но во́лѧ самᲂи҆зво́льна . и҆́же ᲂу҆́бѡ пред̾и҆зѧ́щныи въ ва́съ бы́ти хᲂтѧ́и дрꙋги́хъ , да бꙋ́детъ всѣ́хъ пᲂслѣ́днѣйшїи . и҆ гдⷭ҇а зна́юще мѧ , по́йте и҆ превᲂзнᲂси́те во́ вѣки .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Оу҆страши́сѧ ѻ҆́трᲂкъ бл҃гᲂчести́выхъ .= [пᲂкло́н̾ до землѝ] .= честнѣ́йшꙋю непᲂе́мъ .

пѣ́снь , ѳ҃ . і҆рмо́съ . Вᲂз̾вели́чилъ є҆сѝ хрⷭ҇тѐ ро́ждьшꙋю тѧ̀ бцⷣꙋ , ѿ неѧ́же сᲂзда́телю на́шъ , пᲂдᲂбᲂстра́стнымъ ѡ҆блᲂжи́сѧ тѣ́лᲂмъ . є҆́же на́шимъ невѣ́дѣнїемъ рѣши́тельно . сїю̀ ᲂу҆блажа́юще , всѝ ро́ди тебѐ велича́емъ . Скве́рнꙋ всѧ́кꙋ страстнꙋ́ю ѿве́ргше , дᲂсто́йнѡ бж҃їѧ црⷭ҇твїѧ во́лю вᲂспрїими́те , бг҃ᲂмꙋ́дрᲂстнѡ а҆пⷭ҇лѡмъ пред̾ре́клъ є҆сѝ , сꙋ́щаѧ премꙋ́дрᲂсте , в̾ не́йже прᲂсла́витесѧ свѣтѧ́щесѧ па́че сл҃нца свѣ́тᲂмъ . Взира́юще на мѧ̀ , ре́клъ є҆сѝ гдⷭ҇и свᲂи́мъ ᲂу҆ченико́мъ , немꙋ́дрствꙋйте высо́каѧ , но пᲂдо́битесѧ смире́ннымъ . ча́шꙋ мᲂю̀ ю҆́же пїю̀ , пі́йте , ꙗ҆́кѡ да во црⷭ҇твїи ѻ҆ц҃а мᲂегѡ̀ со мно́ю прᲂсла́витесѧ .

задᲂсто́йнѡ : Вᲂзвели́чилъ є҆сѝ хрⷭ҇тѐ .= [пᲂкло́н̾ до землѝ] . свѣти́ленъ . Черто́гъ тво́й ви́жꙋ сп҃се мо́й ᲂу҆кра́шенъ , и҆ ѻ҆де́жды не и҆́мамъ да вни́дꙋ во́нь . прᲂсвѣти́ ми ѡ҆дѣѧ́нїе дш҃и , свѣтᲂда́вче и҆ спаси́ мѧ . =двⷤа . сла́ва , и҆ ны́нѣ , то́йже .

На хвали́тѣхъ , стихѣ́ры , на д҃ . гла́съ , а҃ . И҆ды́и гдⷭ҇ь к̾ во́льнѣй стра́сти а҆пⷭ҇лѡмъ гл҃аше на пꙋтѝ , сѐ вᲂсхо́димъ во і҆єрⷭ҇ли́мъ , и҆ пре́данъ бꙋ́детъ сн҃ъ чл҃ческїи , ꙗ҆́кᲂже є҆́сть пи́сано ѡ҆ не́мъ . прїи́демъ ᲂу҆́бѡ и҆ мы̀ , ѡ҆чище́ными ᲂу҆мы̀ , и҆ ше́ствꙋемъ с̾ни́ми и҆ с̾распне́мсѧ , и҆ ᲂу҆мертви́мсѧ є҆гѡ̀ ра́ди ѿ жите́йскихъ сласте́й , да и҆ сᲂѡ҆живе́мъ с̾ ни́мъ , и҆ ᲂу҆слы́шимъ вᲂпїю́ща є҆гѡ̀ , ᲂу҆́же не в̾земны́и і҆єрⷭ҇ли́мъ , во є҆́же пᲂстрада́ти , но вᲂсхᲂждꙋ̀ ко ѻ҆ц҃ꙋ мᲂемꙋ̀ , и҆ бг҃ꙋ мᲂемꙋ̀ , и҆ бг҃ꙋ ва́шемꙋ , и҆ сᲂвᲂз̾вы́шꙋ ва́съ с̾ сᲂбо́ю в̾ го́рнїи і҆єрⷭ҇ли́мъ , въ црⷭ҇тво нбⷭ҇нᲂе . два́жды . гла́съ , є҃ . Дᲂсти́гше вѣ́рнїи спасе́нꙋю стрⷭ҇ть хрⷭ҇та̀ бг҃а , неи҆з̾рече́ннᲂе є҆гѡ̀ дᲂлгᲂтерпѣ́нїе прᲂсла́вимъ , ꙗ҆́кѡ да бл҃гᲂꙋтро́бїемъ свᲂи́мъ , сᲂвᲂз̾дви́гнетъ и҆ на́съ ᲂу҆мерщве́нных̾ грѣхѝ , ꙗ҆́кѡ бл҃гъ и҆ чл҃кᲂлю́бец̾ . Гдⷭ҇и къ та́инствꙋ неи҆з̾гл҃аннᲂмꙋ , твᲂегѡ̀ смᲂтре́нїѧ , не дᲂвлѣ́ющи сн҃ꙋ зеведе́ѡвꙋ мт҃и , прᲂша́ше ᲂу҆ тебѐ вре́менна црⷭ҇тва по́честь , дарᲂва́тисѧ ча́дᲂма є҆ѧ̀ , но в̾мѣ́стѡ тᲂѧ̀ ча́шꙋ сме́рти ѡ҆бѣща́лъ є҆сѝ пи́ти дрꙋго́мъ свᲂи́мъ , ю҆́же ча́шꙋ пре́же сегѡ̀ и҆спи́ти са́мъ гл҃алъ є҆сѝ , грѣхо́мъ во ѡ҆чище́нїе . тѣ́мже ти вᲂпїе́мъ , спасе́нїе дш҃а́мъ на́шимъ сла́ва тебѣ̀ . сла́ва , и҆ ны́нѣ . гла́съ , то́йже . Гдⷭ҇и , и҆дꙋ́щꙋ ти к̾ страда́нїю , свᲂѧ̀ ᲂу҆твержа́ѧ ᲂу҆ченикѝ гл҃аше , ѡ҆со́бь пᲂе́мъ и҆́хъ , ка́кѡ слᲂве́съ мᲂи́хъ непо́мните , и҆́хже пре́же реко́хъ ва́мъ , ꙗ҆́кѡ всѧ́кᲂмꙋ прᲂро́кꙋ нѣ́сть пи́сано , а҆́ще во і҆єрⷭ҇ли́мѣ ᲂу҆бїе́нꙋ бы́ти . ны́нѣ ᲂу҆́бѡ вре́мѧ наста̀ , є҆́же реко́хъ ва́мъ , сѐ ᲂу҆́бѡ пре́данъ быва́ю въ рꙋ́цѣ грѣ́шныхъ пᲂрꙋ́ганъ бы́ти , и҆́же и҆ ко крⷭ҇тꙋ́ мѧ пригвᲂзди́вше , и҆ пᲂгребе́нїю преда́вше , ѡ҆ме́рзена в̾мѣнѧ́тъ ꙗ҆́кѡ ме́ртва . но ᲂу҆́бѡ дерза́йте , тридне́вно бо вᲂста́нꙋ , в̾ ра́дᲂсть вѣ́рнымъ , и҆ в̾ жи́знь вѣ́чнꙋю .

На стихо́внѣ , стихѣ́ры . гла́съ , є҃ . Гдⷭ҇и сᲂверше́ннѣйшаѧ мꙋ́дрствᲂвати свᲂѧ̀ наказꙋ́ѧ ᲂу҆ченикѝ , не ᲂу҆пᲂдо́битесѧ ꙗ҆зы́кѡмъ гл҃аше , во є҆́же старѣ́йшинствᲂвати ме́ньшими . не та́кѡ ᲂу҆́бѡ да бꙋ́детъ ва́мъ мᲂи́мъ ᲂу҆ченико́мъ , ꙗ҆́кѡ ни́щъ хᲂтѧ̀ є҆́смь . но пе́рвыи ᲂу҆́бѡ в̾ ва́съ , да бꙋ́детъ всѣ́мъ слꙋга̀ . нача́льствꙋѧи же , ꙗ҆́кѡ пᲂд̾ нача́льствꙋемыи . пред̾и҆зѧ́щныи же , ꙗ҆́кѡ пᲂслѣ́днїи . и҆́бо прїидо́хъ а҆́зъ са́мъ ѡ҆бнища́вшемꙋ а҆да́мꙋ пᲂслꙋжи́ти , и҆ и҆збавле́нїе да́ти за мно́гихъ дш҃ꙋ мᲂю̀ , вᲂпїю́щихъ мѝ , гдⷭ҇и сла́ва тебѣ̀ .

сти́хъ : и҆спо́лнихᲂмсѧ заꙋ́тра млⷭ҇ти . и҆ па́ки тꙋ́же , стихѣ́рꙋ .

сти́хъ : гла́съ , и҃ . и҆ бꙋ́ди свѣ́тлᲂсть гдⷭ҇а бг҃а . И҆с̾со́хшїѧ смᲂко́вницы занепло́дїе , клѧ́твы ᲂу҆бᲂѧ́вшесѧ бра́тїе , плᲂды̀ дᲂсто́йны пᲂкаѧ́нїѧ принесе́мъ хрⷭ҇тꙋ̀ , пᲂдаю́щемꙋ на́мъ ве́лїю млⷭ҇ть .

сла́ва , и҆ ны́нѣ . гла́съ , то́йже . Втᲂрꙋ́ю є҆́ввꙋ є҆гѵ́птѧныню ѡ҆брѣ́тъ ѕмі́й глаго́лъ ра́ди , тща́шесѧ ласка́нїемъ запѧ́ти і҆ѡ́сифа . но то́й ѡ҆ста́вль ри́зꙋ , бѣжа̀ ѿ грѣха̀ , и҆ на́гъ нестыдѧ́шесѧ , ꙗ҆́кᲂже первᲂзда́нныи пре́же преслꙋша́нїѧ . тᲂгѡ̀ мл҃твами хрⷭ҇тѐ пᲂми́лꙋй на́съ .

та́же , бл҃го є҆́сть . и҆ про́чаѧ , по ѡ҆бы́чаю съ пᲂкло́ны . ча́съ же , а҃ , без̾ каѳи́смы . и҆ про́чаѧ , с̾ пᲂкло́ны . та́же , ѿпꙋ́стъ .

Во ст҃ы́и и҆ вели́кїи пᲂнлⷣьникъ , на ѕ҃ мъ , часѣ̀ . трᲂпа́рь , гла́съ , ѕ҃ . Дш҃е́ю сᲂкрꙋше́ннᲂю припа́даемъ тебѣ̀ , и҆ мо́лимтисѧ сп҃се ми́ра . ты́ бо є҆сѝ бг҃ъ ка́ющихсѧ . сла́ва , кᲂне́цъ . и҆ ны́нѣ , ве́сь . прᲂки́менъ . гла́съ , д҃ . внегда̀ вᲂз̾врати́тъ гдⷭ҇ь плѣ́нъ сїѡ́нь . сти́хъ : тᲂгда̀ и҆спо́лнишасѧ ра́дᲂсти .

ѿ пррⷪ҇чества і҆єзекі́илева , чте́нїе .

Бы́сть в̾ тридесѧ́тᲂе лѣ́то , в̾ четве́ртыи мцⷭ҇ъ , в̾ пѧ́тыи де́нь мѣ́сеца . и҆ а҆́зъ бѣ́хъ пᲂсредѝ плѣне́нїѧ при рѣцѣ̀ хᲂва́ръ , и҆ ѿверзо́шасѧ небеса̀ , и҆ ви́дѣхъ видѣ́нїе бж҃їе в̾ пѧ́тыи де́нь мцⷭ҇а . сѐ лѣ́то пѧ́тᲂе плѣне́нїе і҆ѡаки́ма цр҃ѧ і҆ꙋ́дина . И҆ бы́сть сло́во гдⷭ҇не ко і҆єзекі́илю сн҃ꙋ вᲂѡ҆зі́евꙋ сщ҃е́нника , в̾ землѝ халдѣ́йстѣй , при рецѣ̀ хᲂва́ръ . и҆ бы́сть на мнѣ̀ рꙋка̀ гдⷭ҇нѧ . и҆ ви́дѣхъ , и҆ сѐ дх҃ъ вᲂз̾двиза́ѧсѧ и҆дѧ́ше ѿ сѣ́вера , и҆ ѻ҆́блакъ вели́къ в̾ не́мъ , и҆ свѣ́тъ ѻ҆́крⷭ҇тъ є҆гѡ̀ , и҆ ѻ҆́гнь блиста́ѧисѧ . и҆ пᲂсредѣ̀ є҆гѡ̀ ꙗ҆́кѡ видѣ́нїе и҆ле́ктра пᲂсредѣ̀ ѻ҆гнѧ̀ , и҆ свѣ́тъ в̾не́мъ . и҆ пᲂсредѣ̀ ꙗ҆́кѡ пᲂдо́бїе четы́рехъ живо́тныхъ , и҆ сѐ видѣ́нїе и҆́хъ , ꙗ҆́кѡ пᲂдо́бїе чл҃ка в̾ ни́хъ . и҆ четы́ре лица̀ є҆ди́нᲂмꙋ , и҆ четы́ре крила̀ є҆ди́нᲂмꙋ , и҆ сте́гна и҆́хъ пра́вы , и҆ перна́ты но́ги и҆́хъ , и҆ и҆́скры ꙗ҆́кѡ блиста́ющаѧсѧ мѣ́дь . и҆ ле́гцы крила̀ и҆́хъ , и҆ рꙋка̀ чл҃ча пᲂд̾ кри́лами и҆́хъ ѿ четы́рехъ стра́нъ и҆́хъ , и҆ ли́ца и҆́хъ и҆ кри́ла и҆́хъ четы́рехъ , бли́зъ ка́ѧждо кᲂе́йждо , и҆ держа́щесѧ дрꙋ́гъ дрꙋ́га и҆ ли́ца и҆́хъ неѡ҆браща́хꙋсѧ внегда̀ хᲂди́ти и҆́мъ , ко́ждо прѧ́мѡ лицꙋ̀ и҆́хъ хᲂжда́хꙋ , и҆ пᲂдо́бїе ли́цъ и҆́хъ , лицѐ чл҃че , и҆ лицѐ льво́во , ѡ҆деснꙋ́ю четы́рехъ . и҆ лицѐ те́льче , ѡ҆шꙋ́юю четы́рехъ . и҆ лицѐ ѻ҆́рле четы́рехъ . и҆ ли́ца и҆́хъ и҆ кри́ла и҆́хъ , прᲂсте́рта гᲂрѣ̀ четы́рехъ , кᲂмꙋ́ждо два̀ с̾прѧже́на , дрꙋ́гъ ко́ дрꙋгꙋ . и҆ два̀ пᲂкрыва́хꙋ верхꙋ̀ телѣсѐ и҆́хъ . и҆ ко́ждо прᲂти́вꙋ лицꙋ̀ є҆гѡ̀ и҆дѧ́ше . и҆дѣ́же а҆́ще бѧ́ше дх҃ъ ше́ствꙋѧи , и҆дѧ́хꙋ и҆ не ѡ҆браща́хꙋсѧ . и҆ пᲂсредѣ̀ живо́тныхъ видѣ́нїе , ꙗ҆́кѡ ᲂу҆́глїе ѻ҆гнѧ̀ гᲂрѧ́ща , и҆ ꙗ҆́кѡ ви́дъ свѣща́мъ сᲂѡ҆браща́ющимсѧ пᲂсредѣ̀ живо́тныхъ , и҆ свѣ́тъ ѻ҆гнѧ̀ , и҆ ѿ ѻ҆гнѧ̀ и҆схᲂжда́ше ꙗ҆́кѡ мо́лнїѧ . и҆ живо́тнаѧ теча́хꙋ и҆ вᲂз̾враща́хꙋсѧ , ꙗ҆́кѡ видѣ́нїе везе́кᲂво . и҆ ви́дѣхъ , и҆ сѐ ко́ло є҆ди́но на землѝ держа́сѧ живо́тнымъ четы́ремъ , и҆ видѣ́нїе кᲂлесе́мъ и҆ сᲂтвᲂре́нїе и҆́мъ , ꙗ҆́кѡ видѣ́нїе ѳарси́съ . и҆ пᲂдо́бїе въ четы́рехъ и҆ видѣ́нїе и҆́хъ и҆ дѣ́ло и҆́хъ бѧ́ше , ꙗ҆́кᲂже а҆́ще є҆́сть кᲂлесо̀ въ кᲂлесѝ . на четы́ре страны̀ и҆́хъ ше́ствᲂвахꙋ , и҆ не ѡ҆браща́хꙋсѧ внегда̀ ше́ствᲂвахꙋ ни хребты̀ и҆́хъ . и҆ высᲂта̀ и҆́мъ бѧ́ше ве́лїѧ , и҆ стра́шни бѧ́хꙋ . и҆ ви́дѣхъ та̀ , и҆ плещѝ и҆́хъ и҆спо́лнь ѻ҆че́съ ѻ҆́крⷭ҇тъ четы́рехъ . и҆ внегда̀ ше́ствᲂвати живо́тнымъ , ше́ствᲂвахꙋ и҆ кᲂле́са держа́щесѧ и҆́хъ . и҆ внегда̀ вᲂз̾двиза́тисѧ живо́тнымъ ѿ землѝ , вᲂз̾двиза́хꙋсѧ и҆ кᲂле́са . и҆ и҆дѣ́же а҆́ще бѧ́ше ѻ҆́блакъ , та́мѡ бѧ́ше и҆ дх҃ъ ᲂу҆стремлѧ́ѧсѧ . є҆́же ше́ствᲂвати , ше́ствᲂвахꙋ и҆ живо́тнаѧ , и҆ кᲂле́са вᲂз̾двиза́хꙋсѧ с̾ ни́ми , зане́же дх҃ъ жи́зни бѧ́ше въ кᲂле́сѣхъ . прᲂки́менъ . гла́съ , д҃ . а҆́ще не гдⷭ҇ь сᲂзи́ждетъ до́мꙋ , всꙋ́е трꙋди́шасѧ зи́ждꙋщїи . сти́хъ : а҆́ще не гдⷭ҇ь сᲂхрани́тъ гра́дъ , всꙋ́е бдѧ̀ стрегі́и .