Во ст҃ы́и и҆ вели́кїи пᲂнлⷣьникъ ве́черъ . на гдⷭ҇и вᲂзва́хъ , стихѣ́ры , на́ і҃ . гла́съ , а҃ . И҆ды́и гдⷭ҇ь к̾ во́льнѣй стра́сти а҆пⷭ҇лѡмъ гл҃аше на пꙋтѝ , сѐ вᲂсхо́димъ во і҆єрⷭ҇ли́мъ , и҆ пре́данъ бꙋ́детъ сн҃ъ чл҃ческїи , ꙗ҆́кᲂже є҆́сть пи́сано ѡ҆ не́мъ . прїи́демъ ᲂу҆́бѡ и҆ мы̀ , ѡ҆чище́ными ᲂу҆мы̀ , и҆ ше́ствꙋемъ с̾ни́ми и҆ с̾распне́мсѧ , и҆ ᲂу҆мертви́мсѧ є҆гѡ̀ ра́ди ѿ жите́йскихъ сласте́й , да и҆ сᲂѡ҆живе́мъ с̾ ни́мъ , и҆ ᲂу҆слы́шимъ вᲂпїю́ща є҆гѡ̀ , ᲂу҆́же не в̾земны́и і҆єрⷭ҇ли́мъ , во є҆́же пᲂстрада́ти , но вᲂсхᲂждꙋ̀ ко ѻ҆ц҃ꙋ мᲂемꙋ̀ , и҆ бг҃ꙋ мᲂемꙋ̀ , и҆ бг҃ꙋ ва́шемꙋ , и҆ сᲂвᲂз̾вы́шꙋ ва́съ с̾ сᲂбо́ю в̾ го́рнїи і҆єрⷭ҇ли́мъ , въ црⷭ҇тво нбⷭ҇нᲂе . двⷤа .

гла́съ , є҃ . Дᲂсти́гше вѣ́рнїи спасе́нꙋю стра́сть хрⷭ҇та̀ бг҃а , неи҆з̾рече́ннᲂе є҆гѡ̀ дᲂлгᲂтерпѣ́нїе прᲂсла́вимъ , ꙗ҆́кѡ да бл҃гᲂꙋтро́бїемъ свᲂи́мъ , сᲂвᲂз̾дви́гнетъ и҆ на́съ ᲂу҆мерщве́нных̾ грѣхѝ , ꙗ҆́кѡ бл҃гъ и҆ чл҃кᲂлю́бецъ . двⷤа .

Гдⷭ҇и къ та́инствꙋ неи҆з̾гл҃аннᲂмꙋ , твᲂегѡ̀ смᲂтре́нїѧ , не дᲂвлѣ́ющи сн҃ꙋ зеведе́ѡвꙋ мт҃и , прᲂша́ше ᲂу҆ тебѐ вре́менна црⷭ҇тва по́честь , дарᲂва́тисѧ ча́дᲂма є҆ѧ̀ , но в̾мѣ́стѡ тᲂѧ̀ ча́шꙋ сме́рти ѡ҆бѣща́лъ є҆сѝ пи́ти дрꙋго́мъ свᲂи́мъ , ю҆́же ча́шꙋ пре́же сегѡ̀ и҆спи́ти са́мъ гл҃алъ є҆сѝ , грѣхо́мъ во ѡ҆чище́нїе . тѣ́мже ти вᲂпїе́мъ , спасе́нїе дш҃а́мъ на́шимъ сла́ва тебѣ̀ . двⷤа .

Гдⷭ҇и сᲂверше́ннѣйшаѧ мꙋ́дрствᲂвати свᲂѧ̀ наказꙋ́ѧ ᲂу҆ченикѝ , не ᲂу҆пᲂдо́битесѧ ꙗ҆зы́кѡмъ гл҃аше , во є҆́же старѣ́йшинствᲂвати ме́ньшими . не та́кѡ ᲂу҆́бѡ да бꙋ́детъ ва́мъ мᲂи́мъ ᲂу҆ченико́мъ , ꙗ҆́кѡ ни́щъ хᲂтѧ̀ є҆́смь . но пе́рвыи ᲂу҆́бѡ в̾ ва́съ , да бꙋ́детъ всѣ́мъ слꙋга̀ . нача́льствꙋѧи же , ꙗ҆́кѡ пᲂд̾ нача́льствꙋемыи . пред̾и҆зѧ́щныи же , ꙗ҆́кѡ пᲂслѣ́днїи . и҆́бо прїидо́хъ а҆́зъ са́мъ ѡ҆бнища́вшемꙋ а҆да́мꙋ пᲂслꙋжи́ти , и҆ и҆збавле́нїе да́ти за мно́гихъ дш҃ꙋ мᲂю̀ , вᲂпїю́щихъ мѝ , гдⷭ҇и сла́ва тебѣ̀ . двⷤа .

гла́съ , и҃ . И҆с̾со́хшїѧ смᲂко́вницы занепло́дїе , клѧ́твы ᲂу҆бᲂѧ́вшесѧ бра́тїе , плᲂды̀ дᲂсто́йны пᲂкаѧ́нїѧ принесе́мъ хрⷭ҇тꙋ̀ , пᲂдаю́щемꙋ на́мъ ве́лїю млⷭ҇ть . двⷤа . сла́ва . гла́съ , то́йже . Втᲂрꙋ́ю є҆́ввꙋ є҆гѵ́птѧныню ѡ҆брѣ́тъ ѕмі́й гл҃ъ ра́ди , тща́шесѧ ласка́нїемъ запѧ́ти і҆ѡ́сифа . но то́й ѡ҆ста́вль ри́зꙋ , бѣжа̀ ѿ грѣха̀ , и҆ на́гъ нестыдѧ́шесѧ , ꙗ҆́кᲂже первᲂзда́нныи пре́же преслꙋша́нїѧ . тᲂгѡ̀ мл҃твами хрⷭ҇тѐ пᲂми́лꙋй на́съ . и҆ ны́нѣ . гла́съ , є҃ . Гдⷭ҇и грѧдꙋ́щꙋ ти к̾ стра́сти , и҆ ѡ҆со́бь пᲂе́мъ свᲂѧ̀ ᲂу҆ченикѝ ᲂу҆твержа́ѧ и҆́хъ гл҃аше , ка́кѡ глаго́лъ мᲂи́хъ непо́мните , и҆́хже пре́же реко́хъ ва́мъ , ꙗ҆́кѡ пи́сано всѧ́кᲂмꙋ прᲂро́кꙋ ᲂу҆бїе́нꙋ бы́ти , нѣ́сть крᲂмѣ̀ і҆єрⷭ҇ли́ма . ны́нѣ ᲂу҆́бѡ вре́мѧ наста̀ , є҆́же реко́хъ ва́мъ , се́бо предаю́сѧ в̾ рꙋ́ки грѣ́шныхъ пᲂрꙋ́ганъ бы́ти , и҆́же и҆ ко крⷭ҇тꙋ́ мѧ пригвᲂзди́вше , и҆ пᲂгребе́нїю преда́вше , ѡ҆ме́рзена в̾мѣнѧ́тъ ꙗ҆́кѡ ме́ртва . но ѡ҆ба́че дерза́йте , тридне́вно бо вᲂста́нꙋ , в̾ ра́дᲂсть вѣ́рнымъ , и҆ в̾ жи́знь вѣ́чнꙋю .

вы́хᲂдъ , с̾ є҆ѵⷢ҇а́лїемъ : свѣ́тѣ ти́хїи . прᲂки́менъ . гла́съ , ѕ҃ . бл҃гᲂслᲂви́тъ тѧ гдⷭ҇ь ѿ сїѡ́на , и҆ ᲂу҆́зриши бл҃га́ѧ і҆єрⷭ҇ли́мꙋ . сти́хъ : бл҃же́ни всѝ бᲂѧ́щїисѧ гдⷭ҇а , хᲂдѧ́щїи в̾ пꙋте́хъ є҆гѡ̀ .

ѿ и҆схо́да , чте́нїе .

Сїѧ̀ и҆мена̀ сн҃о́мъ і҆и҃левымъ в̾хᲂдѧ́щимъ во є҆гѵ́петъ , в̾кꙋ́пѣ со і҆а́кᲂвѡмъ ѻ҆ц҃е́мъ и҆́хъ , ко́ждо со всѣ́мъ до́мᲂмъ свᲂи́мъ в̾нидо́ша , рꙋви́мъ сѷмеѡ́нъ , леві́й , і҆ꙋ́да , и҆саха́ръ , заꙋло́нъ , венїами́нъ , да́нъ , и҆ нефѳали́мъ , га́дъ , и҆ а҆си́ръ . і҆ѡ́сифъ же бѧ́ше во є҆гѵ́птѣ . Бѧ́ше же всѣ́хъ дꙋ́шъ и҆зше́дшихъ и҆з̾ і҆а́кѡва се́дмьдесѧть и҆ пѧ́ть . скᲂнча́жесѧ і҆ѡ́сифъ и҆ всѧ̀ бра́тїѧ є҆гѡ̀ и҆ ве́сь ро́дъ ѻ҆́ныи . сн҃ᲂве же і҆и҃левы вᲂз̾расто́ша и҆ ᲂу҆мно́жишасѧ , и҆ дᲂво́льни бы́ша и҆ крѣплѧ́хꙋсѧ ѕѣлѡ̀ ѕѣлѡ̀ , ᲂу҆мно́жижесѧ землѧ̀ ѿ ни́хъ . Вᲂста́ же ца́рь и҆́нъ во є҆гѵ́птѣ , и҆́же незна́ѧше і҆ѡ́сифа . рече́ же ꙗ҆зы́кꙋ свᲂемꙋ̀ , сѐ наро́дъ сн҃о́въ і҆и҃левыхъ вели́кᲂе мно́жество , и҆ ᲂу҆крѣплѧ́етсѧ па́че на́съ . прїидѣ́те ᲂу҆́бѡ и҆ ᲂу҆премꙋ́дрствимъ и҆́хъ , да некᲂгда̀ ᲂу҆мно́жатсѧ . и҆ внегда̀ а҆́ще приключи́тсѧ на́мъ бра́нь , прилᲂжа́тсѧ и҆ ті́и къ сᲂпᲂста́тнымъ . и҆ и҆зра́тᲂвавше на́съ , и҆зы́дꙋтъ и҆з̾ землѝ на́шеѧ . и҆ приста́вимъ и҆́мъ настᲂѧ́тели дѣ́лѡмъ , да ѡ҆ѕло́бѧтъ и҆́хъ в̾ дѣ́лѣхъ . и҆ ᲂу҆зизда́ша гра́ды тве́рды фараѡ́нꙋ , пи́фо и҆ рамеси́съ , и҆ ѻ҆́нъ , є҆́же є҆́сть и҆ лїꙋпо́ль . по є҆ли́кꙋ же и҆́хъ смирѧ́хꙋ . тᲂли́кѡ мно́жайши быва́хꙋ , и҆ ᲂу҆крѣплѧ́хꙋсѧ ѕѣлѡ̀ . и҆ вельмѝ гнꙋша́хꙋсѧ є҆гѵ́птѧне сн҃о́въ і҆и҃левыхъ , и҆ наси́льствᲂвахꙋ сн҃о́мъ і҆и҃левымъ нꙋ́ждею , и҆ бᲂлѣ́зненꙋ тѣ́мъ жи́знь твᲂрѧ́хꙋ , въ дѣ́лѣхъ жесто́кихъ , бре́нїемъ и҆ пли́нфами , и҆ всѣ́ми дѣ́лы є҆́же в̾ пᲂлѧ́хъ , и҆ во всѣ́хъ дѣ́лѣхъ , и҆́хже пᲂрабᲂща́хꙋ и҆́хъ съ нꙋ́ждею . и҆ речѐ ца́рь є҆гѵ́петскїи ба́бамъ є҆вре́йскимъ , и҆́мѧ є҆ди́нᲂй сепфо́ра , и҆ и҆́мѧ втᲂро́й фꙋ́а , є҆гда̀ ба́бите є҆вре́ѧнынѧмъ , и҆ сꙋ́ть к̾ рᲂжде́нїю , а҆́ще ᲂу҆́бѡ мꙋ́жескїи по́лъ бꙋ́детъ , ᲂу҆бива́йте и҆̀ . а҆́ще ли же́нскїи по́лъ , с̾набдѣва́йте и҆̀ . ᲂу҆бᲂѧ́шажесѧ ба́бы бг҃а , и҆ несᲂтвᲂри́ша ꙗ҆́кᲂже пᲂвелѣ̀ и҆́мъ ца́рь є҆гѵ́петскїи , и҆ живлѧ́хꙋ мꙋ́жескїи по́лъ . призва́ же ца́рь є҆гѵ́петскїи ба́бы , и҆ речѐ и҆́мъ , что̀ ꙗ҆́кѡ сᲂтвᲂри́сте ве́щь сїю̀ , и҆ ѡ҆живлѧ́ете мꙋ́жескїи по́лъ ; реко́ша же ба́бы фараѡ́нꙋ , не та́кѡ жены̀ є҆гѵ́птѧныни , ꙗ҆́кѡ жены̀ є҆вре́ѧныни сꙋ́ть . ражда́ютъ бо пре́же да́же невни́ти к̾ ни́мъ ба́бамъ , и҆ ражда́хꙋ . и҆ тᲂгѡ̀ ра́ди бл҃го твᲂрѧ́ше бг҃ъ ба́бамъ , и҆ мно́жахꙋсѧ лю́дїе , и҆ крѣплѧ́хꙋсѧ ѕѣлѡ̀ .

прᲂки́менъ . гла́съ , ѕ҃ . бл҃гᲂслᲂви́хᲂмъ вы̀ во́ и҆мѧ гдⷭ҇не . сти́хъ : мно́жицею бра́шасѧ со мно́ю ѿ ю҆́нᲂсти мᲂеѧ̀ .

ѿ і҆́ѡва , чте́нїе .

Чл҃къ нѣ́кїи бѧ́ше во странѣ̀ а҆всиди́т̾стѣй , є҆мꙋ́же и҆́мѧ і҆́ѡвъ . и҆ бѧ́ше челᲂвѣ́къ то́й непᲂро́ченъ , пра́веденъ , и҆́стиненъ ѿгреба́ѧсѧ ѿ всѧ́кагѡ ѕла̀ дѣ́ла . бы́ша же є҆мꙋ̀ сн҃ᲂве се́дмь , и҆ дще́ри трѝ . и҆ бѧ́хꙋ ско́ти є҆гѡ̀ , ѻ҆ве́цъ се́дмь ты́сѧщь , и҆ вельбꙋ́дъ трѝ ты́сѧщи . и҆ сꙋпрꙋ́гъ вᲂло́выхъ пѧтьсо́тъ , и҆ ѻ҆слѧ́тъ пасо́мыхъ пѧтьсо́тъ ста́дъ . и҆ слꙋже́нїе мно́гѡ ѕѣлѡ̀ . и҆ дѣ́ла ве́лїѧ бѧ́хꙋ є҆мꙋ̀ на землѝ . и҆ бѧ́ше чл҃къ ѻ҆́нъ бл҃гᲂро́денъ ѿ всѣ́хъ и҆́же ѿ вᲂсто́къ сл҃нца . схᲂдѧ́щежесѧ сн҃ᲂве є҆гѡ̀ дрꙋ́гъ ко́ дрꙋгꙋ , твᲂрѧ́хꙋ пи́ръ на всѧ́къ де́нь . съ пᲂе́млюще в̾кꙋ́пѣ и҆ трѝ сестры̀ свᲂѧ̀ , ꙗ҆́сти и҆ пи́ти с̾ ни́ми , и҆ ꙗ҆́кѡ ᲂу҆́бѡ скᲂнча́шасѧ дні́е пи́рꙋ , пᲂсыла́ше і҆́ѡвъ , и҆ ѡ҆чища́ше и҆́хъ , вᲂстаю́щихъ заꙋ́тра , и҆ принᲂша́ше же́ртвы ѡ҆ ни́хъ по числꙋ̀ и҆́хъ , и҆ ю҆нца̀ є҆ди́нагѡ ѡ҆ грѣсѣ́хъ за дш҃а и҆́хъ . гл҃аше бо і҆́ѡвъ , є҆да̀ ка́кѡ сн҃ᲂве мᲂѝ въ срⷣца́хъ свᲂи́хъ ѕла́ѧ пᲂмы́слиша к̾ бг҃ꙋ . Си́це твᲂрѧ́ше і҆́ѡвъ по всѧ̀ днѝ . И҆ бы́сть ꙗ҆́кѡ де́нь се́й , и҆ сѐ прїидо́ша а҆́нг҃ли бж҃їи пред̾ста́ти пре́д̾ гдⷭ҇емъ бг҃ᲂмъ , и҆ дїѧ́вᲂлъ прїи́де с̾ ни́ми . и҆ речѐ гдⷭ҇ь бг҃ъ к̾ дїѧ́вᲂлꙋ , ѿкꙋ́дꙋ прише́лъ є҆сѝ ; и҆ ѿвѣща́въ дїѧ́вᲂлъ гдⷭ҇ꙋ речѐ , ѡ҆бше́дъ зе́млю и҆ прᲂше́дъ пᲂд̾нбⷭ҇нꙋю , и҆ прїидо́хъ . и҆ речѐ є҆мꙋ̀ гдⷭ҇ь , в̾нѧ́тъ ли мы́слїю твᲂе́ю на раба̀ мᲂегѡ̀ і҆́ѡва , ꙗ҆́кѡ нѣ́сть чл҃къ пᲂдо́бенъ є҆мꙋ̀ ѿ и҆́же на землѝ , чл҃къ непᲂро́ченъ пра́веденъ , и҆́стиненъ бг҃ᲂчести́въ , ѿгреба́ѧсѧ ѿ всѧ́кагѡ ѕла̀ дѣ́ла . и҆ ѿвѣща̀ дїѧ́вᲂлъ и҆ речѐ пре́д̾ гдⷭ҇емъ , є҆да̀ тꙋ́не і҆́ѡвъ чте́тъ бг҃а , не ты́ ли ѡ҆гради́лъ є҆сѝ є҆мꙋ̀ внꙋ́трешнѧѧ и҆ внѣ́шнѧѧ до́мꙋ є҆гѡ̀ и҆ всѣ́хъ сꙋ́щихъ є҆мꙋ̀ ѻ҆́крⷭ҇тъ . дѣ́ла же рꙋ́кꙋ є҆гѡ̀ бл҃гᲂслᲂви́лъ є҆сѝ , и҆ скᲂты̀ є҆гѡ̀ мно́ги сᲂтвᲂри́лъ є҆сѝ на землѝ , но пᲂслѝ рꙋ́кꙋ твᲂю̀ , и҆ кᲂсни́сѧ всѣ́хъ и҆́хже и҆́мать , а҆́ще не в̾ лице́ тѧ бл҃гᲂсло́витъ . и҆ речѐ гдⷭ҇ь к̾ дїѧ́вᲂлꙋ , сѐ всѐ є҆ли́ка сꙋ́ть є҆мꙋ̀ даю̀ , в̾ рꙋ́кꙋ твᲂю̀ , но самᲂго̀ да неко́снешисѧ . и҆ и҆зы́де дїѧ́вᲂлъ ѿ лица̀ гдⷭ҇нѧ .

та́же , да́сѧ и҆спра́витъ мᲂли́тва .= є҆ѵⷢ҇а́лїе , ѿ матѳе́ѧ . заⷱ҇ , ч҃и .= та́же , є҆ктенїѧ̀ , рце́мъ всѝ . и҆ про́чаѧ , прежесщ҃е́нныѧ . а҆́ще ли же нѣ́сть прежесщ҃е́ннᲂй , и҆ пᲂе́мъ , на гдⷭ҇и вᲂз̾ва́хъ , пᲂлᲂви́нꙋ ѿ стихѣ́ръ , на́ ѕ҃ . стⷯра , гла́съ , а҃ . и҆ды́и гдⷭ҇ь к̾ во́льнѣй стра́сти . вⷤ . гла́съ , є҃ . дᲂсти́гше вѣ́рнїи . вⷤ . гдⷭ҇и к̾ та́инствꙋ неи҆з̾гл҃аннᲂмꙋ . вⷤ . сла́ва , и҆ ны́нѣ . гдⷭ҇и грѧдꙋ́щꙋ ти к̾ стра́сти . вы́хᲂдъ , съ є҆ѵⷢ҇а́лїемъ : свѣ́те ти́хїи . та́же , прᲂки́менъ , и҆ паремїѝ , и҆ є҆ѵⷢ҇а́лїе . на стихо́внѣ , стихѣ́ра , гла́съ , є҃ . гдⷭ҇и сᲂверше́ннѣйшаѧ мꙋ́дрствᲂвати . сти́хъ : к̾ =тебѣ̀ вᲂз̾ведо́хъ ѻ҆́чи . и҆= па́ки , тꙋ́же , стⷯрꙋ . сти́хъ : гла́съ , и҃ . пᲂми́лꙋй на́съ гдⷭ҇и . и҆с̾со́хшїѧ смᲂко́вницы . сла́ва , и҆ ны́нѣ . втᲂрꙋ́ю є҆́ввꙋ . та́же , ны́нѣ ѿпꙋща́еши . и҆ про́чаѧ , ѡ҆бы́чна с̾ пᲂкло́ны . и҆ по кᲂне́чнᲂмъ трⷭ҇то́мъ , и҆ по ѻ҆́ч҃е на́шъ , гдⷭ҇и пᲂми́лꙋй , в҃і . та́же , мл҃тва , всест҃а́ѧ трⷪ҇це . и҆ бꙋ́ди и҆́мѧ гдⷭ҇не . и҆ ѿпꙋ́стъ . си́це ᲂу҆́бѡ твᲂри́мъ во вто́рникъ , и҆ в̾ сре́дꙋ . на трапе́зѣ же ꙗ҆́мы сꙋхᲂѧде́нїе , и҆́миже ᲂу҆дᲂвлѧ́емсѧ , ꙗ҆́кᲂже и҆ в̾ пе́рвᲂй нлⷣи ст҃а́гѡ сегѡ̀ пᲂста̀ . та́кᲂже бꙋ́детъ и҆ в̾ си́хъ дне́хъ в̾ вели́кїи пнⷣе , и҆ во вто́рникъ , и҆ в̾ сре́дꙋ .

Во ст҃ы́и и҆ вели́кїи пᲂнлⷣьникъ , па́вечерницꙋ пᲂе́мъ вели́кꙋю с̾ пᲂкло́ны . на не́йже пᲂе́мъ , трипѣ́снецъ , твᲂре́нїе ки́ръ а҆ндре́ѧ кри́тскагѡ .= і҆рмо́съ , по вⷤ . трᲂпарѝ , на́ і҃ . пᲂслѣдѝ і҆рмо́съ , ѻ҆́ба ли́ка в̾кꙋ́пѣ . гла́съ , и҃ . пѣ́снь , в҃ . і҆рмо́съ . В=ᲂнмѝ нб҃о и҆ вᲂз̾глаго́лю , и҆ вᲂспᲂю̀ хрⷭ҇та̀ , и҆́же ѿ дв҃ы ро́ждьшагᲂсѧ на спасе́нїе на́ше .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Пᲂе́мъ бг҃ꙋ , во́лею и҆дꙋ́щемꙋ пᲂстрада́ти , и҆ тᲂгѡ̀ милᲂсе́рдїе славᲂсло́вимъ . Оу҆слы́шимъ гл҃ы влⷣчни , ꙗ҆́же речѐ на́мъ , ꙗ҆́кѡ вре́мѧ прибли́жисѧ с̾кᲂнча́нїѧ ва́шегѡ .= По́йдемъ со хрⷭ҇то́мъ , к̾ гᲂрѣ̀ є҆леѡ́нстѣй та́йнѡ , и҆ со а҆пⷭ҇лы вᲂдвᲂри́мсѧ є҆мꙋ̀ . Разꙋмѣ́й смире́наѧ дш҃е , что̀ є҆́сть же́рнᲂвнаѧ при́тча , ю҆́же пре́же речѐ хрⷭ҇то́съ , и҆ и҆стрезви́сѧ про́чее . Гᲂто́ви сама̀ себѐ ѽ дш҃е мᲂѧ̀ ко и҆схо́дꙋ , прише́ствїе приближа́етсѧ , неꙋмᲂли́магѡ сꙋдїѝ . Зна́менїемъ чꙋдеса̀ сᲂвᲂкꙋпи́въ , скᲂнча́нїѧ хрⷭ҇тѐ , всѧ̀ ꙗ҆́вѣ разꙋмѣва́ющимъ прᲂѡ҆брази́лъ є҆сѝ . Тала́нтъ да́нныи тѝ дш҃е мᲂѧ̀ , да нескры́еши в̾ землѝ , ꙗ҆́кѡ с̾ ли́хвᲂю пᲂда́си хрⷭ҇тꙋ̀ до́лгъ . Пᲂчита́й бл҃гᲂразꙋ́мныѧ рабы̀ дне́сь , дѣ́лай при́снѡ та́йнᲂе дѣ́ланїе , нетлѣ́нныѧ жи́зни . Вᲂста́ните , жени́хъ приближа́етсѧ . ᲂу҆гᲂто́вимсѧ про́чее , черто́гъ бо ѿве́рзесѧ . кто̀ ᲂу҆́бѡ дᲂсто́инъ , да вни́детъ . Оу҆краси́сѧ нбⷭ҇ныи черто́гъ , нн҃ѣ гᲂто́витесѧ , и҆́же в̾ нетлѣ́нныи невѣ́стникъ хᲂтѧ́щїи вни́ти . П=ᲂмина́й мꙋ́дрыѧ дв҃ы дш҃е пᲂмина́й , да со хрⷭ҇то́мъ в̾ни́деши в̾ черто́гъ свѣ́тлѡ .

и҆́нъ , і҆рмо́съ . Ви́дите ви́дите ꙗ҆́кѡ .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Ви́дите ви́дите ꙗ҆́кѡ а҆́зъ є҆́смь бг҃ъ , и҆́же пре́жде бытїѧ̀ всѣ́хъ , и҆ пре́жде сᲂтвᲂре́нїѧ землѝ и҆ нб҃а , вѣ́мъ всѧ̀ . и҆ ве́сь сы́и во ѻ҆ц҃ѣ , и҆ всегѡ̀ нᲂшꙋ̀ в̾ себѣ̀ . Сло́вᲂмъ сᲂста́вихъ нб҃о в̾кꙋ́пѣ и҆ зе́млю , со ѻ҆ц҃е́мъ бо бѣ́хъ , и҆ сло́вᲂмъ нᲂшꙋ̀ всѧ̀ , ꙗ҆́кѡ сло́во и҆ мꙋ́дрᲂсть и҆ си́ла и҆ ѻ҆́бразъ , сᲂдѣ́йственъ и҆ равнᲂдѣ́теленъ . Кто̀ времена̀ пᲂлᲂжѝ ; кто̀ вѣ́ки сᲂблюда́ѧи ; кто̀ мѣ́рила вѣ́сть жи́зни ; кто̀ и҆́же всѣ́мъ пᲂвелѣва́ѧи ѡ҆браща́тисѧ ; ра́звѣ сᲂбез̾нача́льныи при́снѡ со ѻ҆ц҃е́мъ , ꙗ҆́кᲂже зарѧ̀ в̾ свѣ́тѣ . Ѽ без̾мѣ́рнᲂмꙋ тѝ чл҃кᲂлю́бїю і҆с҃е , сказа́лъ бо є҆сѝ на́мъ с̾кᲂнча́нїѧ с̾вы́ше вре́мѧ , скры́въ ча́съ . ᲂу҆ѧсни́въ же свѣ́тлѡ и҆здале́ча ѻ҆́бразъ є҆гѡ̀ . Всѧ̀ зна́еши , всѧ̀ вѣ́си і҆с҃е , ꙗ҆́кѡ и҆мѣ́ѧ всѐ в̾ себѣ̀ ѻ҆те́ческᲂе дᲂстᲂѧ́нїе бо́жески , и҆ всегѡ̀ дх҃а сꙋ́ществено нᲂсѧ̀ в̾ себѣ̀ , сᲂбез̾нача́льнаго ѻ҆ц҃ꙋ . Влⷣко гдⷭ҇и , и҆́же вѣко́мъ тво́рче , спᲂдо́би и҆ на́съ сщ҃е́ннаго ѻ҆́нᲂгѡ гла́са ᲂу҆слы́шати , зᲂвꙋ́ща и҆збра́нныѧ ѻ҆вца̀ , во црⷭ҇тво нбⷭ҇нᲂе . сла́ва . Сᲂбез̾нача́льнаѧ несᲂзда́ннаѧ , трⷪ҇це нераздѣ́льнаѧ є҆ди́нице . трⷪ҇ца сꙋ́щи и҆ є҆ди́на , ѻ҆́ч҃е и҆ сн҃е и҆ дш҃е , є҆ди́ныи бж҃е прїимѝ пѣ́нїе ѿ бре́нныхъ ꙗ҆зы́къ , ꙗ҆́кѡ и҆ ѿ ᲂу҆́стъ пла́менныхъ . и҆ ны́нѣ , боⷢ҇ . Селе́нїе ст҃о ꙗ҆ви́ласѧ є҆сѝ дв҃о бж҃їе , в̾ тѧ́ бо нбⷭ҇ныи цр҃ь всели́сѧ пло́тїю , про́йде красе́нъ , чл҃ка в̾ себѣ̀ вᲂѡ҆бразѝ бо́жески .

катава́сїѧ : Ви́дите ви́дите ꙗ҆́кѡ а҆́зъ є҆́смь бг҃ъ , и҆́же дре́вле і҆и҃лѧ сквᲂзѣ̀ чермно́е мо́ре прᲂве́дъ , и҆ спа́слъ и҆ пита́въ , и҆ ѿ лю́ты рабо́ты свᲂбо́ждь фараѡ́ни .

пѣ́снь , и҃ . і҆рмо́съ . А҆́нг҃лы нб҃са̀ , на престо́лѣ сла́вы сѣдѧ́щагѡ , и҆ ꙗ҆́кѡ бг҃а непреста́ннѡ сла́вимагѡ , блгⷭ҇ви́те по́йте , и҆ превᲂзнᲂси́те є҆гѡ̀ во́ вѣки . Всѧ́кѡ слы́шала є҆сѝ дш҃е , ка́кѡ хрⷭ҇то́съ бжⷭ҇твенымъ ᲂу҆ченико́мъ свᲂи́мъ , прᲂвᲂз̾глаша́ше гл҃ѧ кᲂнчи́нꙋ . разꙋмѣ́вши же сво́й кᲂне́цъ , ᲂу҆гᲂто́висѧ про́чее , вре́мѧ бо и҆схо́да прїи́де . Пᲂзна́вши лѣни́ваѧ дш҃е , лꙋка́вагѡ раба̀ при́тчꙋ , бо́йсѧ и҆ нелѣни́сѧ ѡ҆ дарᲂва́нїи . є҆го́же прїѧ́ла є҆сѝ , да нескры́еши в̾ зе́млю , но да кꙋ́плю дѣ́еши . Чл҃ческᲂе житїѐ , пꙋтѝ и҆ тᲂржествꙋ̀ ᲂу҆пᲂдо́бисѧ . ты́же ᲂу҆́бѡ дш҃е мᲂѧ̀ в̾ си́хъ хᲂдѧ́щи , прїѡ҆брѧ́щи нѣ́что . и҆ стѧжѝ сᲂкро́вище некра́дᲂмо , дᲂбрᲂдѣ́телей бᲂга́тство .= Да ᲂу҆ѧсни́тсѧ свѣща̀ , да прилїе́тсѧ к̾ се́й ма́сло , ꙗ҆́кᲂже дв҃амъ тᲂгда̀ ми́лᲂванїе , да ѡ҆брѧ́щеши дш҃е мᲂѧ̀ черто́гъ хрⷭ҇то́въ тᲂгда̀ ѿве́рстъ . Въ сꙋбо́тꙋ бѣ́г̾ство и҆ в̾ зимѣ̀ , гл҃ѧ ᲂу҆чи́тель , седьма́гѡ вѣ́ка ско́рбь прᲂѧвлѧ́ѧ . в̾ не́мже ꙗ҆́кѡ зима̀ кᲂнчи́на прїи́детъ . Ꙗ҆́кᲂже ско́рᲂсть мо́лнїи прᲂхᲂдѧ́щи , та́кѡ разꙋмѣ́етсѧ дш҃е стра́шнᲂе ѻ҆́но , влⷣки твᲂегѡ̀ прише́ствїе . и҆ бꙋ́ди гᲂто́ва ко прїидꙋ́щемꙋ житїю̀ . Без̾зако́нныхъ сщ҃е́нницы и҆ фарисе́и , сᲂвѣ́тъ на всѧ́ческихъ твᲂрца̀ и҆ бг҃а на́шегѡ сᲂбира́ютъ ско́тски . и҆ за всѧ̀ пᲂстрада́ти хᲂтѧ́и , претерпѣва́етъ во́лею . Пᲂказа́ти хᲂтѧ̀ і҆с҃е , свᲂегѡ̀ дᲂлгᲂтерпѣ́нїѧ мно́жество , про́данъ бы́ти , и҆ взѧ́тисѧ и҆зво́лилъ є҆сѝ . и҆ ѡ҆блᲂбыза́тисѧ , и҆ всѧ̀ страда́ти , терпи́ши свᲂе́ю во́лею . Є҆гда̀ прїи́детъ сꙋдїѧ̀ , со тма́ми и҆ ты́сѧщами а҆́нг҃льскими чи́нми и҆ си́лами , тᲂгда̀ кі́и стра́хъ дш҃е мᲂѧ̀ , кі́и тре́петъ . тꙋ̀ наги́мъ стᲂѧ́щимъ всѣ́мъ . =бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Є҆ди́нъ бг҃ъ ᲂу҆́бѡ трⷪ҇ца . ни ѻ҆ц҃ꙋ престꙋпи́вшꙋ въ сн҃ᲂвство̀ , ни сн҃ꙋ прело́жшꙋсѧ во и҆схᲂжде́нїе дх҃а . но трѝ во є҆ди́нствѣ , свѣ́тъ бг҃а прᲂславлѧ́ю во́ вѣки . и҆ нн҃ѣ , боⷢ҇ . Мл҃твами бж҃е бцⷣы , прїимѝ мл҃твы на́ша . низ̾пᲂсли́ же млⷭ҇ти твᲂѧ̀ на всѣ́хъ бᲂга́тнѡ . и҆ ми́ръ тво́й пᲂда́ждь лю́демъ твᲂи́мъ .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . А҆́нг҃лы нб҃са̀ на прⷭ҇то́лѣ .= [пᲂкло́н̾ до землѝ] .=

пѣ́снь , ѳ҃ . і҆рмо́съ . Прᲂѧвле́ннᲂе на гᲂрѣ̀ закᲂнᲂда́вцꙋ , ѻ҆гне́мъ и҆ кꙋпино́ю , ржⷭ҇тво̀ при́снѡ дв҃ыѧ . въ на́ше вѣ́рныхъ спасе́нїе , пѣ́сньми немо́лчными велича́емъ . Слы́шала є҆сѝ дш҃е мᲂѧ̀ , сꙋдїѝ пред̾вᲂзгласи́вшꙋ , и҆ ᲂу҆ча́щꙋ тѧ̀ кᲂнчи́нѣ вре́меннѣй гᲂто́ви ꙗ҆́же на и҆схо́дъ дѣ́ла , є҆да̀ ка́кѡ ꙗ҆́кѡ неи҆скꙋ́сна , бг҃а ѿве́ржена бꙋ́деши . Смᲂко́вницею ѽ дш҃е мᲂѧ̀ , наꙋчи́сѧ кᲂнчи́нѣ . є҆гда̀ ма́лѡ бꙋ́детъ вѣ́твїе , и҆ прᲂзѧ́бнетъ ли́ствїе , то̀ ᲂу҆́бѡ жа́твы ча́съ . про́чее и҆ ты̀ , є҆гда̀ сїѧ̀ ви́диши , разꙋмѣ́й ꙗ҆́кѡ при две́рехъ є҆́сть . Кто̀ ра́звѣ тебѐ и҆́нъ твᲂегѡ̀ зна́етъ ѻ҆ц҃а . и҆лѝ кто̀ зна́етъ , ра́звѣ тебѐ ча́съ и҆лѝ де́нь . ᲂу҆ тебе́ бо сᲂкро́вища премꙋ́дрᲂсти , всѣ́хъ сꙋ́ть хрⷭ҇тѐ бж҃е . Кни́ги ᲂу҆́бѡ ра́згнꙋтсѧ тᲂгда̀ , прⷭ҇то́лᲂмъ пᲂста́вленᲂмъ , дѣѧ́нїѧ же ѡ҆блича́ютсѧ , наги́мъ стᲂѧ́щимъ всѣ́мъ . ни свидѣ́телемъ ни клеветнико́мъ стᲂѧ́щимъ , ѡ҆бнаже́на бо всѧ̀ бг҃ꙋ .= Прибли́жисѧ па́сха на́ша вели́каѧ и҆ бжⷭ҇твенаѧ , хрⷭ҇то́съ ᲂу҆чи́тъ . по двᲂю́ бо дню̀ , стра́сти прᲂписꙋ́ѧ де́нь , во́ньже ѻ҆ц҃ꙋ же́ртва приведе́тсѧ . Грѧде́тъ всѣ́хъ сꙋдїѧ̀ , и҆звести́сѧ на сꙋ́дъ . и҆́же на прⷭ҇то́лѣ херꙋви́мстѣ сѣдѧ́и , ꙗ҆́кѡ пᲂви́ненъ пред̾ста́ти пила́тꙋ , и҆ всѧ̀ пᲂстрада́ти , да мы̀ спасе́мсѧ . При крⷭ҇тѣ̀ твᲂе́мъ і҆с҃е , пред̾стᲂѧ́щи мт҃и , и҆ твᲂѐ непра́веднᲂе зрѧ́щи закᲂле́нїе , вᲂпїѧ́ше , ᲂу҆вы̀ мнѣ̀ ча́до мᲂѐ . ᲂу҆вы̀ мнѣ̀ незахᲂди́мыи свѣ́те . прᲂсїѧ́й всѣ́мъ сл҃нце сла́вы свѣ́тъ сы́и . =сла́ва . Є҆ди́нице ст҃а́ѧ трⷪ҇це , є҆ди́но бжⷭ҇тво̀ и҆ трⷪ҇ца . є҆ди́ница бж҃е . трисᲂста́внᲂе є҆стество̀ . є҆динᲂчестна́ѧ , и҆ нераздѣли́маѧ сла́во , и҆зба́ви ѿ бѣ́дъ дш҃а на́ша . и҆ ны́нѣ , боⷢ҇ . Прїимѝ мт҃ре твᲂеѧ̀ і҆с҃е мᲂльбꙋ̀ , да мл҃твами є҆ѧ̀ ᲂу҆мири́ши ми́ръ , и҆ ᲂу҆тверди́ши црⷭ҇твїѧ ски́птры . и҆ цр҃кви твᲂѧ̀ сᲂвᲂкꙋпи́ши во є҆ди́но . задᲂсто́йнѡ : Прᲂѧвле́ннᲂе на гᲂрѣ̀ . [пᲂкло́нъ до землѝ] . трⷭ҇то́е , и҆ по ѻ҆́ч҃е на́шъ . кᲂнда́къ , дню̀ . та́же , гдⷭ҇и си́лъ с̾ на́ми . и҆ про́чее ѡ҆бы́чно . и҆ ѿпꙋ́стъ .

Во ст҃ы́и вели́кїи вто́рникъ , на ᲂу҆́трени , є҆ѯа̀ ѱалмы̀ , и҆ є҆ктенїѧ̀ .= пᲂсе́мъ , а҆ллилꙋ́їѧ , на гла́съ , и҃ . та́же , трᲂпа́рь . гла́съ , и҃ . Сѐ жени́хъ грѧде́тъ в̾пᲂлꙋ́нᲂщи , и҆ бл҃же́нъ ра́бъ є҆го́же ѡ҆брѧ́щетъ бдѧ́ща . недᲂсто́инъ же па́ки , є҆го́же ѡ҆брѧ́щетъ лѣнѧ́щасѧ . блюдѝ ᲂу҆́бѡ дш҃е мᲂѧ̀ , да не сно́мъ ѡ҆тѧгᲂти́шисѧ , и҆ да не сме́рти предана̀ бꙋ́деши , и҆ црⷭ҇твїѧ внѣ̀ затвᲂри́шисѧ . но вᲂспрѧнѝ зᲂвꙋ́щи , ст҃ъ , ст҃ъ , ст҃ъ є҆сѝ бж҃е , бцⷣы ра́ди пᲂми́лꙋй на́съ . =два́жды . сла́ва , и҆ ны́нѣ , то́йже . та́же , ѱалты́рь с̾ пᲂкло́ны .= По а҃ , стихᲂло́гїи , сѣда́ленъ . гла́съ , д҃ . Жениха̀ бра́тїе вᲂз̾лю́бимъ , свѣщѝ свᲂѧ̀ ᲂу҆кра́симъ , дᲂбрᲂдѣ́тельми сїѧ́юще , и҆ вѣ́рᲂю пра́вᲂю . да ꙗ҆́кѡ мꙋ́дрыѧ дѣ́вы с̾ гдⷭ҇ѣмъ гᲂто́ви в̾ни́демъ на́ браки . жени́хъ бо да́ры ꙗ҆́кѡ бг҃ъ , всѣ́мъ пᲂдае́тъ нетлѣ́нныѧ вѣнцы̀ . =сла́ва , и҆ нн҃ѣ . гла́съ , є҃ . Скᲂнча́нїѧ вре́мѧ дне́сь ꙗ҆влѧ́ѧ сп҃се ᲂу҆ченико́мъ написꙋ́еши ; ꙗ҆́кѡ нб҃о и҆ землѧ̀ пᲂкᲂлѣ́блютсѧ стра́шнѡ в̾ прише́ствїе твᲂѐ , и҆ ты̀ на прⷭ҇то́лѣ ꙗ҆́кѡ сꙋдїѧ̀ всѣ́мъ прїи́деши внеза́пꙋ . сегѡ̀ ра́ди тебѣ̀ вѣ́рᲂю вᲂпїе́мъ , пᲂми́лꙋй ми́лᲂстиве , и҆ и҆зба́ви на́съ ѻ҆гнѧ̀ палѧ́щагѡ .

По в҃ , стихᲂло́гїи , сѣда́ленъ . гла́съ , д҃ . Сᲂвѣ́тъ сп҃се без̾зако́ненъ натѧ̀ , сщ҃е́нницы и҆ кни́жницы сᲂвѣща́ша , за́вистїю лю́тᲂю сᲂбра́шасѧ , и҆ въ преда́нїе пᲂдвиго́ша і҆ꙋ́дꙋ . тѣ́мже без̾стꙋ́днѡ и҆дѧ́ше , и҆ глаго́лаше натѧ̀ без̾зако́ннымъ лю́демъ , что́ ми речѐ хо́щете да́ти , и҆ а҆́зъ ва́мъ преда́мъ є҆гѡ̀ в̾ рꙋ́ки ва́ша . ѡ҆сꙋжде́нїѧ ᲂу҆́бѡ сегѡ̀ и҆зба́ви гдⷭ҇и дш҃а на́ша . сла́ва , и҆ ны́нѣ . гла́съ , ѕ҃ . Є҆́же с̾ нб҃сѐ стра́шнᲂе прише́ствїе , дне́сь хрⷭ҇то́съ на гᲂрѣ̀ є҆леѡ́нстѣй , вᲂз̾вѣща́ѧ пред̾гл҃етъ всѣ́мъ ꙗ҆́внѡ . тѣ́мже сегѡ̀ ѡ҆жида́юще , на прⷭ҇то́лѣ сꙋдїю̀ прїитѝ хᲂтѧ́ща , вᲂпїю́ще вѣ́рᲂю взыва́емъ , са́мъ бꙋ́ди с̾на́ми , и҆ никто́же наны̀ .

П=о г҃ , стихᲂло́гїи , сѣда́ленъ . гла́съ , и҃ . =

ꙋ́да нра́вᲂмъ сребрᲂлю́бствꙋѧ , на ᲂу҆чи́телѧ ꙗ҆́кѡ ѕлᲂчести́въ , пᲂд̾виза́етсѧ сᲂвѣ́тꙋѧ . пᲂꙋча́етсѧ на преда́нїе , свѣ́та ѿпа́даетъ тмꙋ̀ прїе́мъ . сᲂглаша́етсѧ со ѻ҆тцы̀ , прᲂдае́тъ бесцѣ́ннаго . тѣ́мже и҆ ᲂу҆давле́нїю вᲂз̾ме́здїе ѡ҆брѣта́етъ ѻ҆каѧ́нныи , ѡ҆ ни́хже теча́ше преда́въ тебѐ гдⷭ҇а . тᲂгѡ̀ на́съ ча́сти и҆зба́ви хрⷭ҇тѐ бж҃е . и҆ сᲂгрѣше́нїемъ ѡ҆ставле́нїе да́рꙋй пра́зднꙋющимъ вѣ́рᲂю , пречи́стыѧ стрⷭ҇ти твᲂѧ̀ . сла́ва , и҆ ны́нѣ , то́йже . та́же , ѱл҃о́мъ , н҃ .= та́же , спасѝ бж҃е лю́ди свᲂѧ̀ . мы́же : гдⷭ҇и пᲂми́лꙋй , в҃і . пᲂсе́м̾ , є҆ктенїѧ̀ ма́лаѧ . =кᲂнда́къ . гла́съ , в҃ . Ча́съ дш҃е кᲂнца̀ пᲂмы́сливши , и҆ пᲂсѣче́нїѧ смᲂко́вницы ᲂу҆бᲂѧ́вшисѧ , да́нныи ти тала́нтъ , трꙋдᲂлю́бнѡ дѣ́лай всегда̀ ѻ҆каѧ́ннаѧ , бо́дрствꙋющи и҆ зᲂвꙋ́щи . да непребꙋ́демъ внѣ̀ черто́га хрⷭ҇то́ва . и҆́кᲂсъ . Что̀ лѣни́шисѧ дш҃е мᲂѧ̀ ѻ҆каѧ́ннаѧ ; что̀ прельща́ешисѧ без̾вре́менными пᲂпече́нми непᲂле́зными . что̀ ᲂу҆пражнѧ́ешисѧ въ мимᲂтекꙋ́щихъ ; пᲂслѣ́днїи ча́съ є҆́сть ны́нѣ , и҆ раз̾лꙋчи́тисѧ хо́щемъ ѿ сꙋ́щихъ здѣ̀ . и҆ до́ндеже вре́мѧ и҆́маши , вᲂзни́кни зᲂвꙋ́щи , сᲂгрѣши́хъ ти сп҃се мо́й , непᲂсѣцы̀ менѐ , ꙗ҆́кᲂже непло́днꙋю смᲂко́вницꙋ . но ꙗ҆́кѡ млрⷭ҇дъ гдⷭ҇и , ᲂу҆ще́дри со́ страхᲂмъ зᲂвꙋ́ща , да не пребꙋ́демъ внѣ̀ черто́га твᲂегѡ̀ хрⷭ҇тѐ .

Та́же , двᲂепѣ́снецъ . твᲂре́нїе кᲂзмы̀ и҆́нᲂка . і҆рмо́съ , по два́жды . стихи́ же на в҃і . пᲂслѣди́ же і҆рмо́съ , ѻ҆́ба ли́ка в̾кꙋ́пѣ .= гла́съ , в҃ . пѣ́снь , и҃ . і҆рмо́съ . В=елѣ́нїѧ мꙋчи́телева ст҃і́и ѻ҆́трᲂцы непᲂслꙋ́шавше , въ пе́щь в̾ве́ржени бг҃а и҆спᲂвѣ́дахꙋ . пᲂю́ще , блгⷭ҇ви́те дѣ́ла гдⷭ҇нѧ гдⷭ҇а .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Лѣ́нᲂсть дале́че ѿ себѐ ѿве́ргше , и҆ со свѣ́тлыми свѣща́ми без̾сме́ртнаго жениха̀ хрⷭ҇та̀ , пѣ́нїемъ ᲂу҆срѧ́щемъ , бл҃гᲂслᲂви́те вᲂпїю́ще дѣ́ла гдⷭ҇нѧ гдⷭ҇а . Да ᲂу҆дᲂвлѣ́етъ ѻ҆бщи́тельнᲂе дш҃и на́шеѧ , ма́сло въ сᲂсꙋ́дѣхъ ; ꙗ҆́кѡ да че́стемъ непᲂгꙋби́вше вре́мѧ кꙋ́пли , пᲂе́мъ , бл҃гᲂслᲂви́те дѣ́ла гдⷭ҇нѧ гдⷭ҇а . Тала́нтъ є҆ли́цы ѿ́ бг҃а прїѧ́сте , равнᲂси́льнꙋ бл҃гᲂда́ть , по́мᲂщїю да́вшагѡ хрⷭ҇та̀ вᲂз̾расти́мъ , пᲂю́ще , блгⷭ҇ви́те дѣ́ла гдⷭ҇нѧ гдⷭ҇а .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Велѣ́нїѧ мꙋчи́телева .= [пᲂкло́н̾ до землѝ] .=

честнѣ́йшꙋю непᲂе́мъ .

пѣ́снь , ѳ҃ . і҆рмо́съ . И҆́же невмѣсти́магѡ бг҃а , во́ чрево вмѣсти́вшаѧ , и҆ ра́дᲂсть ми́рꙋ ро́ждьшаѧ , тебѐ бцⷣꙋ велича́емъ всѝ . Оу҆ченико́мъ бл҃гі́и , бди́те ре́клъ є҆сѝ . во́ньже бо ча́съ прїи́детъ гдⷭ҇ь , неразꙋмѣ́ете , ѿда́ти кᲂмꙋ́ждо пᲂдѣ́лᲂмъ є҆гѡ̀ . Во втᲂрѣ́мъ твᲂе́мъ и҆ стра́шнѣмъ прише́ствїи влⷣко , десны́мъ ѻ҆вца́мъ мѧ причтѝ , прегрѣше́нїи презрѣ́въ мѝ мно́жества .

задᲂсто́йнѡ : И҆́же невмѣсти́магѡ .= [пᲂкло́н̾ до землѝ] . свѣти́ленъ . Черто́гъ тво́й ви́жꙋ сп҃се мо́й ᲂу҆кра́шенъ , и҆ ѻ҆де́жды не и҆́мамъ да вни́дꙋ во́нь . прᲂсвѣти́ ми ѡ҆дѣѧ́нїе дш҃и , свѣтᲂда́вче и҆ спаси́ мѧ . =двⷤа . сла́ва , и҆ ны́нѣ , то́йже .

На хвали́тѣхъ , стихѣ́ры , на д҃ . гла́съ , а҃ . Въ свѣ́тлᲂсть ст҃ы́хъ твᲂи́хъ , ка́кѡ вни́дꙋ недᲂсто́йныи ; а҆́ще бо дерзнꙋ̀ вни́ти в̾ черто́гъ , ѡ҆дѣѧ́нїе мѧ̀ ѡ҆блича́етъ , ꙗ҆́кѡ нѣ́сть бра́чно , и҆ свѧ́занъ и҆ и҆згна́нъ бꙋ́дꙋ ѿ а҆́нг҃лъ . тѣ́мже ѡ҆чи́сти гдⷭ҇и скве́рнꙋ дш҃и мᲂеѧ̀ , и҆ спаси́ мѧ ꙗ҆́кѡ чл҃кᲂлю́бецъ . двⷤа . гла́съ , в҃ . Дш҃е́внᲂю лѣ́нᲂстїю вᲂз̾дрема́всѧ , нестѧжа́хъ женишѐ хрⷭ҇тѐ , гᲂрѧ́ща свѣти́льника и҆́же ѿ дᲂбрᲂдѣ́телей . и҆ дв҃амъ ᲂу҆пᲂдо́бихсѧ бꙋ́имъ , во́ времѧ дѣ́ланїѧ глꙋмѧ́хсѧ прельща́ѧсѧ . млрⷭ҇дїе щедро́тъ твᲂи́хъ незатвᲂри́ ми влⷣко . но ѿтрѧ́съ мᲂѐ ѡ҆мраче́нїе ѿ сна̀ вᲂста́ви млⷭ҇тиве , и҆ с̾ мꙋ́дрыми сᲂчета́й мѧ дв҃ами въ черто́зѣ свᲂе́мъ , и҆дѣ́же гла́съ чи́стъ пра́зднꙋющихъ , и҆ вᲂпїю́щихъ без̾преста́ни , гдⷭ҇и сла́ва тебѣ̀ . гла́съ , д҃ . Скры́вшагѡ тала́нтъ , ѡ҆сꙋжде́нїе ᲂу҆слы́шавши ѽ дш҃е , нескрыва́й слᲂвесѐ бж҃їѧ , но вᲂз̾вѣща́й чꙋдеса̀ є҆гѡ̀ , да ᲂу҆мно́живши да́ръ , вни́деши в̾ ра́дᲂсть гдⷭ҇а свᲂегѡ̀ . сла́ва , и҆ ны́нѣ . гла́съ , ѕ҃ . Прїиди́те вѣ́рнїи , дѣ́лаемъ ᲂу҆се́рднѡ влⷣцѣ . пᲂдᲂба́етъ бо рабо́мъ бᲂга́тство , и҆ по ра́венствꙋ ко́йждо да ᲂу҆сꙋгꙋ́битъ бл҃гᲂда́ти тала́нтъ . ѻ҆́въ ᲂу҆́бѡ мꙋ́дрᲂсть да прино́ситъ дѣ́лы бл҃ги́ми , дрꙋгі́и же слꙋже́бнѣй свѣ́тлᲂсти да прилѣжи́тъ . да прїѡ҆бщи́т̾жесѧ сло́вᲂмъ вѣ́рныи , не навы́кшемꙋ та́йнꙋ . и҆ да раздае́тъ бᲂга́тство ни́щимъ дрꙋгі́и . си́це бо мздꙋ̀ мно́гꙋ ᲂу҆сꙋгꙋ́бимъ , и҆ ꙗ҆́кѡ стрᲂи́телѧ вѣ́рнїи бл҃гᲂда́ти влⷣчни , ра́дᲂсти спᲂдо́бимсѧ . тᲂѧ̀ на́съ спᲂдо́би хрⷭ҇тѐ бж҃е , ꙗ҆́кѡ чл҃кᲂлю́бецъ .

На стихо́внѣ , стихѣ́ры . гла́съ , ѕ҃ . Є҆гда̀ прїи́деши во сла́вѣ , со а҆́нг҃льскими си́лами , и҆ сѧ́деши на прⷭ҇то́лѣ і҆с҃е сꙋ́днѣмъ , па́стырю до́брыи не ѿлꙋчѝ менѐ , пꙋти́ бо десны́ѧ вѣ́си , раз̾враще́ни же сꙋ́ть шꙋ́їи . да не ᲂу҆́бѡ с̾ ко́злищи грѣхо́вными пᲂгꙋби́ши менѐ , но съ десны́ми мѧ̀ сᲂчета́й ѻ҆вца́ми , и҆ спаси́ мѧ ꙗ҆́кѡ чл҃кᲂлю́бецъ .

сти́хъ : и҆спо́лнихᲂмсѧ заꙋ́тра млⷭ҇ти . и҆ па́ки тꙋ́же , стихѣ́рꙋ . сти́хъ : и҆ бꙋ́ди свѣ́тлᲂсть гдⷭ҇а . Женишѐ , и҆́же дᲂбро́тᲂю красе́нъ є҆сѝ па́че всѣ́хъ чл҃къ , призва́выи на́съ къ трапе́зѣ дх҃о́внѣй черто́га твᲂегѡ̀ . ѕлᲂѡ҆бра́зныи мо́й зра́къ прегрѣше́ньми сᲂвлецы̀ , и҆ прича́стїемъ страда́нїй твᲂи́хъ , и҆ ѻ҆де́ждею сла́вы ѡ҆дѣ́ѧвъ твᲂеѧ̀ красᲂты̀ , и҆ сᲂѻ҆́бщника свѣ́тла пᲂкажѝ твᲂегѡ̀ црⷭ҇твїѧ , ꙗ҆́кѡ млрⷭ҇дъ . сла́ва , и҆ ны́нѣ . гла́съ , з҃ . Сѐ тебѣ̀ тала́нтъ влⷣка пᲂрꙋча́етъ дш҃е мᲂѧ̀ , со́ страхᲂмъ прїимѝ да́ръ , заи́мствꙋй да́вшемꙋ ти , пᲂдава́й ни́щимъ , и҆ сᲂтвᲂрѝ дрꙋ́га гдⷭ҇а , да ста́неши ѡ҆деснꙋ́ю є҆гѡ̀ , є҆гда̀ прїи́детъ в̾ сла́вѣ , и҆ ᲂу҆слы́шиши бл҃же́нныи гла́съ , вни́ди ра́бе в̾ ра́дᲂсть гдⷭ҇а свᲂегѡ̀ . тᲂѧ̀ дᲂсто́йна мѧ̀ сᲂтвᲂрѝ сп҃се заблꙋди́вшаго , вели́кїѧ ра́ди твᲂеѧ̀ млⷭ҇ти .

=и҆ =про́чаѧ слꙋ́жба с̾ пᲂкло́ны , ᲂу҆́трени и҆ часо́мъ , ꙗ҆́кᲂже ᲂу҆каза́сѧ в̾ пᲂнлⷣникъ вели́кїи .

Во ст҃ы́и и҆ вели́кїи вто́рникъ . на ѕ҃ мъ , часѣ̀ . трᲂпа́рь , гла́съ , а҃ . Без̾мѣ́рнѡ сᲂгрѣша́ющимъ , бᲂга́тнѡ прᲂстѝ сп҃се . и҆ спᲂдо́би на́съ не ѡ҆сꙋжде́ннѡ пᲂклᲂни́тисѧ твᲂемꙋ̀ ст҃о́мꙋ вᲂскрⷭ҇нїю , мл҃твами пречⷭ҇тыѧ ти мт҃ре , є҆ди́не мнᲂгᲂмлⷭ҇тиве . сла́ва , кᲂне́цъ . и҆ ны́нѣ , ве́сь .

прᲂки́менъ . гла́съ , д҃ . ꙗ҆́кѡ ѿ́ гдⷭ҇а ми́лᲂсть , и҆ мно́го ѿ негѡ̀ и҆збавле́нїе . сти́хъ : и҆з̾ глꙋбины̀ вᲂз̾ва́хъ к̾ тебѣ̀ гдⷭ҇и , гдⷭ҇и ᲂу҆слы́ши гла́съ мо́й .

ѿ пррⷪ҇чества і҆єзекі́илева , чте́нїе .

Внегда̀ хᲂди́ти живо́тнымъ , хᲂжда́хꙋ и҆ кᲂле́са , и҆ внегда̀ стᲂѧ́ти и҆́мъ , стᲂѧ́хꙋ и҆ кᲂле́са с̾ ни́ми . и҆ внегда̀ в̾зима́тисѧ и҆́мъ ѿ землѝ , в̾зима́хꙋсѧ с̾ ни́ми и҆ кᲂле́са , ꙗ҆́кѡ дх҃ъ жи́зни бѧ́ше въ кᲂлесѣ́хъ . и҆ пᲂдо́бїе над̾ главо́ю живо́тныхъ ꙗ҆́кѡ тве́рдᲂсть , и҆ ꙗ҆́кѡ видѣ́нїе ле́да стра́шна , прᲂсте́рто ѡ҆крила́хъ и҆́хъ с̾вы́ше , и҆ пᲂд̾ тве́рдїю кри́ла и҆́хъ прᲂсте́рта , сᲂкрылѧ́ющесѧ дрꙋ́гъ к̾ дрꙋ́гꙋ , кᲂмꙋ́ждо двѣ̀ спрѧже́нѣ прикрыва́юще тѣлеса̀ свᲂѧ̀ . и҆ слы́шахъ гла́съ крилꙋ̀ и҆́хъ , ꙗ҆́кѡ гла́съ во́дъ мно́гъ , ꙗ҆́кѡ гла́съ бг҃а са́д̾да и҆ дᲂво́льна . внегда̀ хᲂди́ти и҆́мъ , гла́съ слᲂве́съ , ꙗ҆́кѡ гла́съ пᲂлка̀ , и҆ внегда̀ стᲂѧ́ти и҆́мъ , пᲂчива́хꙋ кри́ла и҆́хъ . и҆ сѐ гла́съ превы́ше тве́рди сꙋ́щей над̾ главо́ю и҆́хъ . внегда̀ стᲂѧ́ти и҆́мъ , вᲂз̾двиза́хꙋсѧ кри́ла и҆́хъ . и҆ превы́ше тве́рди ꙗ҆́же над̾ главо́ю и҆́хъ , ꙗ҆́кѡ видѣ́нїе ка́мене сапфи́ра , и҆ пᲂдо́бїе прⷭ҇то́ла на не́мъ , и҆ на пᲂдо́бїи прⷭ҇то́ла , пᲂдо́бїе ꙗ҆́кѡ видѣ́нїе чл҃ка с̾вы́ше . и҆ ви́дѣхъ ꙗ҆́кѡ видѣ́нїе и҆ле́ктра , ꙗ҆́кѡ и҆ видѣ́нїе ѻ҆гнѧ̀ в̾не́мъ , и҆ свѣ́тъ ѡ҆́крⷭ҇тъ , ѿ видѣ́нїѧ чре́слъ и҆ гᲂрѣ̀ . и҆ ѿ видѣ́нїѧ чре́слъ и҆ да́же до́лꙋ ви́дѣхъ а҆́ки видѣ́нїе ѻ҆гнѧ̀ , и҆ зарѧ̀ є҆гѡ̀ ѡ҆́крⷭ҇тъ , ꙗ҆́кѡ видѣ́нїе дꙋгѝ , є҆гда̀ є҆́сть на ѻ҆́блацѣхъ в̾ де́нь дᲂждѧ̀ , си́це стᲂѧ́нїе зарѝ ѡ҆́крⷭ҇тъ . сѐ видѣ́нїе пᲂдо́бїѧ сла́вы гдⷭ҇ни .

прᲂки́менъ . гла́съ , д҃ . да ᲂу҆пᲂва́етъ і҆и҃ль на́ гдⷭ҇а , ѿ ны́нѣ и҆ до́ вѣка . сти́хъ : гдⷭ҇и невᲂз̾несе́сѧ срⷣце мᲂѐ , невᲂзнесо́стесѧ ѻ҆́чи мᲂѝ .