Во ст҃ы́и и҆ вели́кїи пѧто́къ ве́черъ , начина́емъ вече́рню . по ѱалмѣ̀ : бл҃гᲂслᲂвѝ дш҃е мᲂѧ̀ гдⷭ҇а . є҆ктенїѧ̀ вели́каѧ .= та́же , гдⷭ҇и вᲂзва́хъ пᲂе́мъ , на гла́съ , а҃ . та́же , пᲂе́мъ стⷯры , на ѕ҃ . гла́съ , а҃ . Всѧ̀ тва́рь и҆змѣнѧ́шесѧ стра́хᲂмъ , зрѧ́щи тѧ на крⷭ҇тѣ̀ ви́сѧща хрⷭ҇тѐ . сл҃нце ѡ҆мрача́шесѧ , и҆ землѝ ѡ҆снᲂва́нїѧ трѧса́хꙋсѧ , всѧ̀ с̾ тᲂбо́ю сᲂстрада́хꙋ , и҆́же всѧ̀ сᲂзда́вшимъ . во́лею на́съ ра́ди претерпѣ́выи , гдⷭ҇и сла́ва тебѣ̀ . =двⷤа . гла́съ , в҃ . Лю́дїе ѕлᲂчести́вїи и҆ без̾зако́ннїи , в̾скꙋ́ю пᲂꙋча́ютсѧ тще́тнымъ , пᲂчто̀ живᲂта̀ всѣ́хъ , сме́ртїю ѡ҆сꙋди́ша ; ве́лїе чꙋ́до , ꙗ҆́кѡ зижди́тель ми́рꙋ , в̾ рꙋ́цѣ без̾зако́нныхъ предае́тсѧ , и҆ на́ древо вᲂз̾выша́етсѧ ꙗ҆́кѡ чл҃кᲂлю́бецъ . да и҆́же во а҆́дѣ ᲂу҆́зники свᲂбᲂди́тъ , вᲂпїю́щихъ , дᲂлгᲂтерпѣли́ве гдⷭ҇и сла́ва тебѣ̀ . На́ древѣ ви́дѧщи ви́сѧща хрⷭ҇тѐ , тебѐ всѣ́хъ зижди́телѧ и҆ бг҃а , ꙗ҆́же тебѐ без̾ сѣ́мене ро́ждьшаѧ , вᲂпїѧ́ше го́рькѡ , сн҃е мо́й , гдѣ̀ дᲂбро́та за́йде зра́ка твᲂегѡ̀ ; нетерплю̀ зрѣ́ти тѧ , непра́веднѡ распина́ема . ᲂу҆скᲂрѝ ᲂу҆́бѡ и҆ вᲂскр҃снѝ , ꙗ҆́кѡ да ви́жꙋ и҆ а҆́зъ твᲂѐ и҆з̾ ме́ртвыхъ вᲂскрⷭ҇нїе .= Дне́сь зрѧ́щи тѧ непᲂро́чнаѧ дв҃а на крⷭ҇тѣ̀ , прᲂсте́рта сло́ве , рыда́ющи мт҃рьски ᲂу҆тро́бᲂю , снѣда́шесѧ срⷣцемъ го́рцѣ , и҆ стᲂнѧ́щи бᲂлѣ́зненѡ и҆з̾ глꙋбины̀ дꙋшѝ , вла́сы прᲂсте́рши рыда́ше . тѣ́мже и҆ пе́рси бїю́щи , взыва́ше жа́лᲂстнѣ , ᲂу҆вы̀ мнѣ̀ бжⷭ҇твенᲂе ча́до . ᲂу҆вы̀ мнѣ̀ свѣ́те ми́рꙋ , ка́кѡ за́йде ѿ ѻ҆́чїю мᲂе́ю а҆́гньче бж҃їи . тѣ́мже во́инства беспло́тныхъ . тре́петᲂмъ ѡ҆держи́ми бѣ́ѧхꙋ гл҃юще , непᲂсти́жиме гдⷭ҇и сла́ва тебѣ̀ . =гла́съ , ѕ҃ . Дне́сь влⷣка и҆ гдⷭ҇ь тва́ри пред̾стᲂи́тъ пила́тꙋ , и҆ на распѧ́тїе предае́тсѧ зижди́тель всѣ́хъ , ꙗ҆́кѡ а҆́гнецъ привᲂди́мъ на закᲂле́нїе свᲂе́ю во́лею , гвᲂздьмѝ пригвᲂжда́етсѧ , и҆ в̾ ре́бра прᲂбᲂда́етсѧ , и҆ гꙋ́бᲂю напᲂѧ́етсѧ , и҆́же ма́ннꙋ ѡ҆дᲂжди́выи . по лани́тᲂма ᲂу҆дарѧ́етсѧ , и҆зба́витель ми́рꙋ . и҆ ѿ свᲂи́хъ ра́бъ пᲂрꙋга́емь быва́етъ , сᲂдѣ́тель всѧ́ческихъ . ѽ влⷣчнѧгѡ чл҃кᲂлю́бїѧ . за распина́ющїѧ мᲂлѧ́ше свᲂегѡ̀ ѻ҆ц҃а . ѻ҆́ч҃е ѿпꙋстѝ и҆́мъ грѣ́хъ се́й , невѣ́дѧтъ бо без̾зако́ннїи , что̀ непра́веднѡ сᲂтвᲂрѧ́ютъ . сла́ва . гла́съ , ѕ҃ . Ѽ ка́кѡ без̾зако́нныи сᲂбо́ръ , цр҃ѧ тва́ри ѡ҆сꙋдѝ на сме́рть не ᲂу҆стыдѣ́всѧ бл҃гᲂдѣѧ́нїѧ . и҆́хже вᲂспᲂмина́ѧ , пред̾ ᲂу҆твержа́ше глаго́лѧ к̾ ни́мъ , лю́дїе мᲂѝ что̀ сᲂтвᲂри́хъ ва́мъ ; не чꙋде́съ ли и҆спо́лнихъ і҆ꙋде́ю ; не мертвеца́ ли вᲂскр҃си́хъ , є҆ди́нѣмъ сло́вᲂмъ ; не всѧ́кꙋ ли бᲂлѣ́знь и҆сцѣли́хъ и҆ недꙋ́гъ . что̀ ᲂу҆́бѡ ми вᲂзда́сте ; вскꙋ́ю непо́мните мѧ ; за и҆сцѣле́нїѧ ра́ны вᲂз̾лᲂжи́вше , за живо́тъ ᲂу҆мерщвѧ́ете , распина́юще на́ древѣ ꙗ҆́кѡ ѕлᲂдѣ́ѧ бл҃гᲂда́телѧ , ꙗ҆́кѡ закᲂнᲂпрестꙋ́пна , закᲂнᲂда́вца , ꙗ҆́кѡ ѡ҆сꙋ́жена , всѣ́хъ цр҃ѧ . дᲂлгᲂтерпѣли́ве гдⷭ҇и сла́ва тебѣ̀ . и҆ ны́нѣ . гла́съ , то́йже . Стра́шна и҆ пресла́вна та́йна , дне́сь сᲂдѣва́ема зри́тсѧ , неѡ҆сѧза́емыи держи́мь є҆́сть , и҆ вѧ́жетсѧ , раз̾рѣша́ѧи а҆да́ма ѿ клѧ́твы . и҆спыта́ѧи сердца̀ и҆ ᲂу҆тро́бы , непра́веднѡ и҆спытꙋ́етсѧ . и҆ в̾ темни́цѣ затвᲂрѧ́етсѧ , и҆́же бе́зднꙋ затвᲂри́выи . и҆ пила́тꙋ пред̾стᲂи́тъ , є҆мꙋ́же тре́петᲂмъ пред̾стᲂѧ́тъ нбⷭ҇ныѧ си́лы . заꙋша́етсѧ рꙋко́ю , сᲂдѣ́тель тва́ри . на́ древо ѡ҆сꙋжда́етсѧ , сꙋдѧ́и живы́мъ и҆ ме́ртвымъ . гро́бꙋ предае́тсѧ , разᲂри́тель а҆́дꙋ . и҆́же всѧ̀ терпѧ́и милᲂсе́рднѡ , и҆ всѣ́хъ спасы́и ѿ клѧ́твы , неѕло́биве гдⷭ҇и сла́ва тебѣ̀ .

вы́хᲂдъ , с̾ є҆ѵⷢ҇а́лїемъ : свѣ́тѣ ти́хїи . прᲂки́менъ . гла́съ , д҃ . раздѣли́ша себѣ̀ ри́зы мᲂѧ̀ , и҆ ѡ҆ ѻ҆де́жди мᲂе́й мета́ша жре́бїѧ .= сти́хъ : б=ж҃е бж҃е мо́й вᲂнми́ ми в̾скꙋ́ю ѡ҆ста́ви мѧ .

ѿ и҆схо́да , чте́нїе .

Глаго́ла гдⷭ҇ь к̾ мѡѷсе́ю , лице́мъ к̾ лицꙋ̀ , ꙗ҆́кᲂже кто̀ вᲂз̾гл҃етъ к̾ свᲂемꙋ̀ дрꙋ́гꙋ , и҆ ѿсыла́шесѧ в̾ по́лкъ . слꙋга́ же і҆с҃ъ сн҃ъ на́ввинъ ю҆́нᲂша , не и҆схᲂжда́ше и҆́з̾ храма . рече́ же мѡѷсе́й ко́ гдⷭ҇ꙋ , сѐ ты̀ мнѣ̀ глаго́леши , и҆зведѝ лю́ди сїѧ̀ , ты́ же несказа̀ мнѣ̀ є҆го́же по́слеши со мно́ю , ты́ же мнѣ̀ речѐ , вѣ́дѣ тѧ̀ па́че всѣ́хъ , и҆ бл҃гᲂда́ть и҆́маши ѿ менѐ . а҆́ще є҆́смь ѡ҆брѣ́лъ бл҃гᲂда́ть пред̾ тᲂбо́ю , ꙗ҆ви́мисѧ са́мъ ꙗ҆́вѣ , и҆ разꙋ́мнѡ да ви́жꙋ тѧ̀ , ꙗ҆́кѡ да ѡ҆брѣ́тъ бꙋ́дꙋ бл҃гᲂда́ть пред̾ тᲂбо́ю . и҆ да разꙋмѣ́ютъ лю́дїе твᲂѝ сі́и ꙗ҆зы́къ ве́лїи . и҆ гл҃а є҆мꙋ̀ гдⷭ҇ь , а҆́зъ пред̾ и҆дꙋ̀ пред̾ тᲂбо́ю и҆ ᲂу҆пᲂко́ю тѧ . и҆ речѐ к̾ немꙋ̀ мѡѷсе́й , а҆́ще са́мъ ты̀ неше́ствꙋеши с̾ на́ми , да неи҆зведѝ на́съ ѿ сю́дꙋ . и҆ ка́кѡ разꙋ́мнѡ бꙋ́детъ вᲂи́стинꙋ , ꙗ҆́кѡ ѡ҆брѣто́хъ бл҃гᲂда́ть ѿ тебѐ , а҆́зъ же и҆ лю́дїе твᲂѝ . но и҆дѝ ты̀ с̾ на́ми , и҆ прᲂсла́вленъ бꙋ́дꙋ а҆́зъ и҆ лю́дїе твᲂѝ , па́че всѣ́хъ ꙗ҆зы́къ є҆ли́кѡ є҆́сть на землѝ . рече́ же гдⷭ҇ь к̾ мѡѷсе́ю . сѐ сло́во є҆́же вѣща́хъ тебѣ̀ сᲂтвᲂрю̀ . ѡ҆брѣ́лъ бо є҆сѝ бл҃гᲂда́ть предо мно́ю , и҆ вѣ́мъ тѧ па́че всѣ́хъ . и҆ гл҃а мѡѷсе́й , пᲂкажи́ ми сла́вꙋ твᲂю̀ . и҆ речѐ гдⷭ҇ь к̾ мѡѷсе́ю , а҆́зъ и҆дꙋ̀ пред̾ тᲂбо́ю , со сла́вᲂю мᲂе́ю , и҆ призᲂвꙋ̀ и҆́мѧ мᲂѐ пред̾ тᲂбо́ю , гдⷭ҇ь . и҆ пᲂми́лꙋю є҆го́же а҆́ще пᲂми́лꙋю , и҆ ᲂу҆ще́дрю є҆го́же а҆́ще ᲂу҆ще́дрю . и҆ речѐ , невᲂзмо́жеши ви́дѣти сла́вы лица̀ мᲂегѡ̀ , немо́жетъ бо чл҃къ ви́дѣти лицѐ мᲂѐ и҆ жи́въ бы́ти . и҆ речѐ гдⷭ҇ь сѐ мѣ́сто ᲂу҆ менѐ , и҆ ста́неши при ка́мени , до́ндеже ᲂу҆́бѡ пре́йдетъ сла́ва мᲂѧ̀ ; и҆ пᲂста́влю тѧ в̾ раз̾сѣ́ли ка́меню . и҆ пᲂкры́ю рꙋко́ю мᲂе́ю над̾ тᲂбо́ю , до́ндеже ᲂу҆́бѡ ми́мѡ и҆дꙋ̀ . и҆ ѿи҆мꙋ̀ рꙋ́кꙋ мᲂю̀ , и҆ тᲂгда̀ ᲂу҆́зриши за́днѧѧ мᲂѧ̀ , лице́ же мᲂѐ не ꙗ҆ви́т̾тисѧ .

прᲂки́менъ . гла́съ , д҃ . сꙋдѝ гдⷭ҇и ѡ҆би́дѧщїѧ мѧ , вᲂз̾бранѝ бᲂрю́щїѧ мѧ .= сти́хъ : п=рїимѝ ѻ҆рꙋ́жїе и҆ щи́тъ , и҆ вᲂста́ни в̾ по́мᲂщь мᲂю̀ .

ѿ і҆́ѡва , чте́нїе .

Бл҃гᲂслᲂвѝ гдⷭ҇ь пᲂслѣ́днѧѧ і҆́ѡвꙋ , не́же пре́жнѧѧ . бѧ́хꙋ же ско́ти є҆гѡ̀ , ѻ҆ве́цъ четы́ри на́десѧть ты́сѧщь . вельблю́дѡвъ , ше́сть ты́сѧщь . и҆ сꙋпрꙋ́гъ вᲂло́въ ты́сѧща . ѻ҆сли́цъ ста́дныхъ , ты́сѧща . рᲂди́шажесѧ є҆мꙋ̀ сн҃о́въ се́дмь , и҆ дще́ри трѝ . и҆ наречѐ пе́рвꙋю ᲂу҆́бѡ де́нь , втᲂрꙋ́ю же касі́ѧ , тре́тїю же а҆малѳе́й ро́гъ . и҆ не ѡ҆брѣто́шажесѧ пᲂдо́бнѣе в̾ лѣпᲂтѣ̀ дще́рей і҆́ѡвᲂвыхъ , ꙗ҆́же в̾ пᲂд̾нбⷭ҇нѣй . да́стъ же і҆́ѡвъ дще́ремъ свᲂи́мъ наслѣ́дїе в̾ бра́тїѧхъ и҆́хъ . Жи́тъ же , і҆́ѡвъ по ꙗ҆́звѣ то́й лѣ́тъ сто̀ и҆ се́дмьдесѧть . всѣ́хъ же лѣ́тъ жи́тъ , двѣ́сти четы́редесѧть ѻ҆́смь . и҆ ви́дѣ і҆́ѡвъ сы́ны свᲂѧ̀ , и҆ сы́ны сн҃о́въ свᲂи́хъ , да́же до четве́ртагѡ ро́да , и҆ скᲂнча́сѧ і҆́ѡвъ ста́ръ , и҆ и҆спо́лнь дні́й , пи́шет̾жесѧ па́ки вᲂста́ти є҆мꙋ̀ , с̾ ни́миже гдⷭ҇ь вᲂста́витъ и҆̀ . сѐ ᲂу҆́бѡ прᲂтᲂлко́вано ѿ сі́рскихъ кни́гъ . в̾ землѝ ᲂу҆́бѡ живы́и а҆всиди́тстѣй на предѣ́лѣхъ и҆дꙋмѣ́ѧ и҆ а҆раві́и . пре́же бо бѧ́ше , и҆́мѧ є҆мꙋ̀ і҆ѡа́въ . взе́мъ же женꙋ̀ а҆ра́влѧныню , рᲂдѝ сы́на , є҆мꙋ́же и҆́мѧ є҆ннѡ́нъ . бѧ́ше же ѻ҆ц҃а за́ры . ѿ и҆са́вᲂвѣхъ сыно́въ сы́нъ , ма́тере же вᲂсо́ры . ꙗ҆́кᲂже бы́ти є҆мꙋ̀ пѧ́тᲂмꙋ ѿ а҆враа́ма .

ѿ прⷪ҇рчества и҆са́ина , чте́нїе .

Та́кѡ гл҃етъ гдⷭ҇ь , сѐ разꙋмѣ́етъ ѻ҆́трᲂкъ мо́й , и҆ вᲂзнесе́тсѧ и҆ прᲂсла́витсѧ и҆ превᲂзнесе́тсѧ ѕѣлѡ̀ . и҆́м̾же ѻ҆́бразᲂмъ ᲂу҆дивѧ́тсѧ мно́зи ѡ҆ тебѣ̀ , та́кѡ ѡ҆без̾сла́витсѧ ѿ чл҃къ видѣ́нїе твᲂѐ , и҆ сла́ва твᲂѧ̀ ѿ сыно́въ чл҃ческихъ . та́ко бо ᲂу҆дивѧ́тсѧ ꙗ҆зы́цы мно́зи ѡ҆ не́мъ , и҆ за́ймꙋтъ цр҃їе ᲂу҆ста̀ свᲂѧ̀ , ꙗ҆́кѡ и҆́м̾же невᲂзвѣсти́сѧ ѡ҆ не́мъ , ᲂу҆́зрѧтъ , и҆ и҆́же неслы́шаша , разꙋмѣ́ютъ . гдⷭ҇и кто̀ вѣ́рᲂва слꙋ́хꙋ на́шемꙋ , и҆ мы́шца гдⷭ҇нѧ кᲂмꙋ̀ ѿкры́сѧ ; вᲂзвѣсти́хᲂмъ пре́д̾ гдⷭ҇емъ , ꙗ҆́кѡ по́ле , и҆ ꙗ҆́кѡ ко́рень в̾ землѝ жа́ждꙋщей . нѣ́сть ѻ҆́браза є҆мꙋ̀ ни сла́вы . и҆ ви́дѣхᲂмъ є҆гѡ̀ , и҆ не и҆мѧ́ше видѣ́нїѧ ни дᲂбро́ты , но видѣ́нїе є҆гѡ̀ без̾че́стно , ᲂу҆ма́лено па́че сыно́въ чл҃ческихъ . чл҃къ в̾ ꙗ҆́звѣ сы́и , и҆ ᲂу҆мѣ́ѧ терпѣ́ти бᲂлѣ́знь , и҆ не ѿвратѝ лицѐ свᲂѐ , ᲂу҆гᲂто́вивсѧ и҆ не вмѣни́сѧ є҆́же без̾че́стенъ бы́ти , се́й грѣхѝ на́ша но́ситъ , и҆ ѡ҆ на́съ пᲂбᲂлѧ́етъ . и҆ мы̀ вмѣни́хᲂмъ є҆гѡ̀ бы́ти в̾ бᲂлѣ́зни сꙋ́ща , и҆ в̾ ра́нахъ ѿ́ бг҃а , и҆ во ѡ҆ѕлᲂбле́нїи . то́й же ᲂу҆ѧ́звенъ бы́сть за без̾зако́нїѧ на́ша , и҆ мꙋ́ченъ бы́сть за грѣхѝ на́ша , и҆ наказа́нїе смире́нїѧ на́шегѡ на не́мъ , ꙗ҆́звᲂю бо є҆гѡ̀ мы̀ и҆сцѣлѣ́хᲂмъ всѝ , ꙗ҆́кѡ ѻ҆́вцы заблꙋди́хᲂмъ . хᲂдѧ́ бо чл҃къ пꙋте́мъ свᲂи́мъ прельсти́сѧ , и҆ гдⷭ҇ь преда́стъ є҆гѡ̀ , грѣ́хъ ра́ди на́шихъ . и҆ то́й за є҆́же ѡ҆ѕло́битисѧ , не ѿверза́етъ ᲂу҆́стъ свᲂи́хъ . ꙗ҆́кѡ ѻ҆вча̀ на закᲂле́нїе веде́сѧ , и҆ ꙗ҆́кѡ а҆́гнецъ пред̾ стригꙋ́щимъ є҆гѡ̀ без̾гла́сенъ , та́ко же не ѿверза́етъ ᲂу҆́стъ свᲂи́хъ . во смире́нїи є҆гѡ̀ сꙋ́дъ є҆гѡ̀ взѧ́тсѧ , ро́дъ же є҆гѡ̀ кто̀ и҆спᲂвѣ́сть ; ꙗ҆́кѡ взе́млетсѧ ѿ землѝ живо́тъ є҆гѡ̀ , ѡ҆ без̾зако́нїи люде́й мᲂи́хъ прїи́де на́ смерть . и҆ да́мъ лꙋка́выѧ вмѣ́стѡ пᲂгребе́нїѧ є҆гѡ̀ , и҆ бᲂга́тыѧ вмѣ́стѡ сме́рти є҆гѡ̀ . ꙗ҆́кѡ без̾зако́нїѧ несᲂтвᲂрѝ , ни ѡ҆брѣ́тесѧ ле́сть во ᲂу҆стѣ́хъ є҆гѡ̀ . и҆ хо́щетъ гдⷭ҇ь ѡ҆чи́стити є҆гѡ̀ ѿ ра́ны . а҆́ще дадитѐ ѡ҆ грѣсѣ́хъ дꙋша̀ ва́ша , ᲂу҆́зрите сѣ́мѧ дᲂлгᲂживо́тнѡ ; и҆ хо́щетъ гдⷭ҇ь рꙋко́ю свᲂе́ю ѿꙗ҆́ти бᲂлѣ́знь ѿ дꙋшѝ є҆гѡ̀ , и҆ ꙗ҆ви́ти и҆́мъ свѣ́тъ , и҆ сᲂзда́ти ра́зꙋмъ , ѡ҆правда́ти пра́ведника до́брѣ слꙋжа́ща мно́гимъ , и҆ грѣхѝ и҆́хъ то́й вᲂзнесе́тъ . сегѡ̀ ра́ди наслѣ́дитъ мно́гихъ , и҆ крѣ́пкихъ раздѣли́тъ кᲂры́сть . занѐ предана̀ бы́сть на́ смерть дш҃а є҆гѡ̀ , и҆ со без̾зако́нными вмѣне́нъ бы́сть . и҆ то́й ᲂу҆́бѡ грѣхѝ мно́гихъ вᲂз̾несе́тъ , и҆ за грѣхѝ и҆́хъ преда́стсѧ . вᲂз̾весели́сѧ непло́ды неражда́ющаѧ , расто́ргни и҆ вᲂзᲂпѝ небᲂлѣ́вшаѧ . ꙗ҆́кѡ мно́га ча́да пꙋсты́ѧ па́че , не́жели и҆мꙋ́щїѧ мꙋ́жа .

прᲂки́менъ , ѱало́мъ дв҃дᲂвъ . пᲂлᲂжи́ша мѧ в̾ ро́вѣ преи҆спо́днѣмъ , в̾ те́мныхъ и҆ сѣ́ни сме́ртнѣй . сти́хъ : гдⷭ҇и бж҃е спасе́нїѧ мᲂегѡ̀ , во́ дне вᲂз̾ва́хъ и҆ в̾ но́щи пред̾ тᲂбо́ю .= а҆пⷭ҇лъ , къ кᲂри́нѳѡмъ . заⷱ҇ , рк҃є . а҆ллилꙋ́їѧ . спаси́ мѧ бж҃е , ꙗ҆́кѡ внидо́ша во́ды до дш҃и мᲂеѧ̀ . =сти́хъ : пᲂнᲂше́нїе прича́ѧ дш҃а мᲂѧ̀ и҆ стра́сть . сти́хъ : пᲂмрачи́стесѧ ѻ҆́чи и҆́хъ неви́дѣти . є҆ѵⷢ҇а́лїе , ѿ матѳе́ѧ . зача́ло , р҃і . та́же , є҆ктенїѧ̀ : рце́мъ всѝ ѿ всеѧ̀ дш҃и . и҆ спᲂдо́би гдⷭ҇и в̾ ве́черъ сі́и . та́же , є҆ктенїѧ̀ : и҆спо́лнимъ вече́рнѧѧ мᲂли́твы .

На стихо́внѣ , стихѣ́ры , пᲂдо́бны . гла́съ , в҃ . Є҆гда̀ ѿ́ древа тѧ ме́ртва , а҆римаѳе́й снѧ́тъ всѣ́хъ жи́знь , зми́рнᲂю и҆ плащани́цею тѧ хрⷭ҇тѐ ѡ҆бви́тъ , и҆ любо́вїю пᲂд̾виза́шесѧ , се́рдцемъ и҆ ᲂу҆сты̀ тѣ́ло причи́стᲂе твᲂѐ лᲂбыза́ти . ѡ҆ба́че ѡ҆держи́мь стра́хᲂмъ , и҆ ра́дꙋѧсѧ вᲂпїѧ́ше ти , сла́ва смᲂтре́нїю твᲂемꙋ̀ чл҃кᲂлю́бче .

сти́хъ : гдⷭ҇ь вᲂцр҃и́сѧ ,꙳ въ лѣ́пᲂтꙋсѧ ѡ҆блечѐ . Є҆гда̀ во́ грᲂбѣ но́вѣмъ за всѣ́хъ пᲂлᲂжи́лсѧ є҆сѝ и҆зба́вителю всѣ́хъ , а҆́дъ всесмѣ́шныи ви́дѣвъ тѧ ᲂу҆жасе́сѧ , вереѧ̀ сᲂтро́шасѧ , сᲂкрꙋши́шасѧ врата̀ , гро́би ѿверзо́шасѧ , ме́ртвїи вᲂста́ша . тᲂгда̀ а҆да́мъ бл҃гᲂда́рнѡ ра́дꙋѧсѧ вᲂпїѧ́ше ти , сла́ва смᲂтре́нїю твᲂемꙋ̀ чл҃кᲂлю́бче .

сти́хъ : и҆́бо ᲂу҆твердѝ вселе́ннꙋю ,꙳ ꙗ҆́же не пᲂдви́житсѧ . Є҆гда̀ си́лы зрѧ́хꙋ тѧ хрⷭ҇тѐ , ꙗ҆́кѡ лестьца̀ ѿ без̾зако́нныхъ ѡ҆клевета́ема , ᲂу҆жаса́хꙋсѧ не и҆з̾глаго́ланнᲂмꙋ дᲂлгᲂтерпѣ́нїю твᲂемꙋ̀ . и҆ ка́мень гро́бныи рꙋка́ма запечатлѣ́вшихъ , и҆́ми же и҆ твᲂѧ̀ нетлѣ́ннаѧ ре́бра прᲂбᲂдо́ша . ѡ҆ба́че ѡ҆ на́шемъ спасе́нїи ра́дꙋющесѧ вᲂпїѧ́хꙋ , сла́ва смᲂтре́нїю твᲂемꙋ̀ чл҃кᲂлю́бче . сла́ва , и҆ ны́нѣ . гла́съ , є҃ . Тебѐ ѡ҆дѣ́ющагᲂсѧ свѣ́тᲂмъ ꙗ҆́кѡ ри́зᲂю , сне́мъ і҆ѡ́сифъ съ дре́ва съ никᲂди́мᲂмъ . и҆ ви́дѣвъ ме́ртва , на́га непᲂгребе́на , бл҃гᲂꙋми́ленъ пла́чь вᲂспрїе́мъ , рыда́ѧ гл҃аше , ᲂу҆вы̀ мнѣ̀ сладча́йшїи і҆с҃е , є҆го́же пре́жде в̾ ма́лѣ ви́дѣ сл҃нце на крⷭ҇тѣ̀ ви́сѧща , мра́кᲂмъ ѡ҆блага́шесѧ , и҆ землѧ̀ стра́хᲂмъ кᲂлеба́шесѧ , и҆ раздира́шесѧ цр҃ко́внаѧ за́вѣса . но сѐ ны́нѣ ви́жꙋ тѧ , менѐ ра́ди во́лею пᲂд̾є́мша сме́рть . ка́кѡ пᲂгребꙋ́ тѧ бж҃е мо́й ; и҆лѝ како́ю плащани́цею ѡ҆бьвїю́ тѧ ; ко́има ли рꙋка́ма прикᲂснꙋ́сѧ к̾ пречⷭ҇тᲂмꙋ ти тѣ́лꙋ ; и҆лѝ кі́ѧ пѣ́сни вᲂспᲂю̀ твᲂемꙋ̀ и҆схо́дꙋ ще́дре ; велича́ю стра́сти твᲂѧ̀ . славᲂсло́влю пᲂгребе́нїе твᲂѐ съ вᲂскрⷭ҇нїемъ . и҆ вᲂпїю̀ , гдⷭ҇и сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , в҃ . Бл҃гᲂѡ҆бра́зныи і҆ѡ́сифъ , со крⷭ҇та̀ сне́мъ пречи́стᲂе тѣ́ло твᲂѐ , плащани́цею чи́стᲂю ѡ҆бви́въ , и҆ со бл҃гᲂꙋха́ньми во́ грᲂбѣ но́вѣ закры́въ пᲂлᲂжѝ . но в̾ тре́тїи де́нь вᲂскр҃се гдⷭ҇ь , да́рꙋѧ ми́рᲂви ве́лїю млⷭ҇ть . =и҆ =ѿпꙋ́стъ .

Во ст҃ы́и и҆ вели́кїи пѧто́къ , па́вечерницꙋ пᲂе́мъ ма́лꙋю . та́же , кано́нъ , ѡ҆ распѧ́тїи гдⷭ҇ни . и҆ на пла́чь прест҃ѣ́й бцⷣѣ . твᲂре́нїе , сѷмеѡ́на , лᲂгѡѳе́та . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль , по бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше . двⷤа .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Пᲂвѣ́шена ꙗ҆́кѡ ви́дѣ на крⷭ҇тѣ̀ , сн҃а и҆ гдⷭ҇а , дв҃аѧ чⷭ҇таѧ , терза́ющисѧ вᲂпїѧ́ше го́рцѣ , съ дрꙋги́ми жена́ми стеню́ще гл҃аше . Ви́жꙋ тѧ̀ ны́нѣ вᲂз̾лю́бленнᲂе мᲂѐ ча́до и҆ люби́мᲂе , на крⷭ҇тѣ̀ ви́сѧща , и҆ ᲂу҆ѧзвлѧ́юсѧ го́рцѣ срⷣцемъ , речѐ чⷭ҇таѧ . но да́ждь ми сло́во бл҃гі́и рабѣ̀ твᲂе́й . сла́ва . Во́лею сн҃е мо́й и҆ тво́рче , терпи́ши на́ древѣ лю́тꙋю сме́рть , дв҃аѧ гл҃аше пред̾стᲂѧ́щи ᲂу҆ крⷭ҇та̀ , съ вᲂз̾лю́бленымъ ᲂу҆ченико́мъ . и҆ ны́нѣ . Нн҃ѣ мᲂегѡ̀ ча́ѧнїѧ , и҆ ра́дᲂсти и҆ весе́лїѧ , сн҃а мᲂегѡ̀ и҆ гдⷭ҇а лише́на бы́хъ . ᲂу҆вы̀ мнѣ̀ бᲂ͏лѣ́знꙋю срⷣцемъ , чⷭ҇таѧ пла́чꙋщисѧ гл҃аше .

катава́сїѧ : Ꙗ҆́кѡ по́ сꙋхꙋ хᲂди́въ .

пѣ́снь , г҃ . і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й , вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени и҆спᲂвѣ́данїѧ тѝ . вⷤ . Стра́ха ра́ди жидо́вска пе́тръ скры́сѧ , и҆ всѝ ѿбѣго́ша вѣ́рнїи , ѡ҆ста́вльше хрⷭ҇та̀ , дв҃аѧ рыда́ющи гл҃аше . Ѡ҆ стра́ннѣмъ ти ржⷭ҇твѣ̀ , и҆ стра́шнѣмъ сн҃е мо́й . па́че всѣ́хъ матере́й вᲂзвели́чена бы́хъ а҆́зъ . но ᲂу҆вы̀ мнѣ̀ , нн҃ѣ тѧ ви́дѧщи на́ древѣ , распала́юсѧ ᲂу҆тро́бᲂю . сла́ва . Хᲂщꙋ́ ᲂу҆тро́бꙋ мᲂю̀ на́ рꙋкꙋ , и҆́маже ꙗ҆́кѡ младе́нца держа́хъ съ дре́ва прїѧ́ти вѣща́ше чⷭ҇таѧ , но ᲂу҆вы̀ мнѣ̀ , никто́же сегѡ̀ да́стъ . и҆ ны́нѣ . Сѐ свѣ́тъ мо́й сла́дкїи , наде́жда и҆ живо́тъ мо́й бл҃гі́и , сн҃ъ и҆ бг҃ъ мо́й ᲂу҆гасѐ на крⷭ҇тѣ̀ , распала́юсѧ ᲂу҆тро́бᲂю , дв҃аѧ стеню́щи гл҃аше . катава́сїѧ : Нѣ́сть ст҃а ꙗ҆́кᲂже .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . вⷤ . Сл҃нце незахᲂдѧ́и бж҃е превѣ́чныи , и҆ тво́рче всѣ́мъ тваре́мъ гдⷭ҇и , ка́кѡ терпи́ши стрⷭ҇ть на крⷭ҇тѣ̀ ; чⷭ҇таѧ пла́чꙋщи гл҃аше . Пла́чꙋщи гл҃аше брако неи҆скꙋси́маѧ , к̾ бл҃гᲂѡ҆бра́знᲂмꙋ , пᲂтщи́сѧ і҆ѡ́сифе , к̾ пила́тꙋ пристꙋпи́ти , и҆ и҆спрᲂсѝ снѧ́ти со́ древа ᲂу҆чи́телѧ сѝ . сла́ва . Ви́дѣвъ пречⷭ҇тꙋю го́рцѣ слезѧ́щꙋ , і҆ѡ́сифъ смꙋти́сѧ , и҆ пла́часѧ пристꙋпѝ к̾ пила́тꙋ , да́ждь ми вᲂпїѧ̀ с̾ пла́чемъ тѣ́ло бг҃а мᲂегѡ̀ . и҆ ны́нѣ . Оу҆ѧ́звена тѧ ви́дѧщи и҆ без̾ сла́вы , на́га на́ древѣ , ча́до мᲂѐ , ᲂу҆тро́бᲂю распала́юсѧ рыда́ющи , ꙗ҆́кѡ мт҃и дв҃аѧ прᲂвѣщава́ше .

катава́сїѧ : Хрⷭ҇то́съ мнѣ̀ си́ла .

пѣ́снь , є҃ . і҆рмо́съ . Бж҃їимъ свѣ́тᲂмъ тѝ бл҃же , ᲂу҆́тренюющихъ тѝ дш҃а любо́вїю , прᲂсвѣтѝ мᲂлю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . двⷤа . Растерза́ѧсѧ и҆ рыда́ѧ , и҆ дивѧ́сѧ в̾кꙋ́пѣ с̾ никᲂди́мᲂмъ і҆ѡ́сифъ снѧ́тъ , пречⷭ҇тᲂе тѣ́ло цѣлᲂва́ше ᲂу҆чи́телево , рыда́ше и҆ стенѧ́ше , и҆ пᲂѧ̀ є҆гѡ̀ ꙗ҆́кѡ бг҃а и҆ гдⷭ҇а . Прїи́мши сн҃а свᲂегѡ̀ с̾ пла́чемъ мт҃и неи҆скꙋсᲂмꙋ́жнаѧ . и҆ пᲂлᲂжѝ на кᲂлѣ́нꙋ , мᲂлѧ́щи со слеза́ми , и҆ лᲂбыза́ющи є҆гѡ̀ , го́рцѣ же рыда́ющи крича́ше . сла́ва . Є҆ди́нꙋ наде́ждꙋ и҆ живо́тъ , влⷣко сн҃е мо́й и҆ бж҃е , во ѻ҆́чїю свѣ́тъ раба̀ твᲂѧ̀ и҆мѣ́хъ , нн҃ѣ же лише́на бы́хъ тебѐ , сла́дкᲂе мᲂѐ ча́до и҆ люби́мᲂе . и҆ ны́нѣ . Бᲂлѣ́зни и҆ ско́рби , и҆ вᲂздыха́нїѧ ѡ҆брѣто́ша мѧ , ᲂу҆вы̀ мнѣ̀ , чⷭ҇таѧ го́рцѣ рыда́ющи гл҃аше , ви́дѧщи ча́до мᲂѐ вᲂзлю́бленᲂе , на́га ᲂу҆єдине́на , тѧ̀ и҆ вᲂнѧ́ми пᲂма́зана мертвеца̀ . катава́сїѧ : Бж҃їимъ свѣ́тᲂмъ .

пѣ́снь , ѕ҃ . і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ мо́й мнᲂгᲂмлⷭ҇тиве . двⷤа . Ме́ртва тѧ зрю̀ чл҃кᲂлю́бче , ѡ҆живи́вшаго ме́ртвыѧ , и҆ сᲂдержа́ща всѧ̀ , лю́тѣ ᲂу҆ѧзвлѧ́юсѧ ᲂу҆тро́бᲂю , хᲂтѣ́ла бы́хъ с̾ тᲂбо́ю ᲂу҆́мрети , пречⷭ҇таѧ гл҃аше . нетерплю́ бо без̾ дш҃и ме́ртва тѧ ви́дѣти . Дивлю́сѧ зрѧ́щи тѧ пребл҃гі́и бж҃е , и҆ преще́дрыи гдⷭ҇и , без̾ сла́вы и҆ без̾ дш҃и . и҆ без̾ѡ҆бра́зна гдⷭ҇а , и҆ пла́чꙋсѧ держа́щи тѧ , ꙗ҆́кѡ ненадѣ́ѧхсѧ ᲂу҆вы̀ мнѣ̀ , ви́дѣти тѧ сн҃е мо́й и҆ бж҃е . сла́ва . Не и҆з̾гл҃еши ли рабѣ̀ свᲂе́й сло́ва , сло́ве бж҃їи , не ᲂу҆ще́дриши ли влⷣко тебѐ ро́ждьшꙋю , гл҃аше чⷭ҇таѧ ; рыда́ющи и҆ пла́чꙋщи , и҆ ѡ҆блᲂбыза́ющи тѣ́ло гдⷭ҇а свᲂегѡ̀ . и҆ ны́нѣ . Пᲂмышлѧ́ю влⷣко , ꙗ҆́кѡ к̾ тᲂмꙋ̀ сла́дкаго тѝ гла́са не ᲂу҆слы́шꙋ , и҆ ни дᲂбро́ты лица̀ твᲂегѡ̀ ᲂу҆́зрю , ꙗ҆́кᲂже пре́жде раба̀ твᲂѧ̀ . и҆́бо за́йде сн҃е мо́й ѿ ѻ҆́чїю мᲂе́ю .

катава́сїѧ : Жите́йскагѡ мо́рѧ .

гдⷭ҇и пᲂми́лꙋй , гⷤ .= сла́ва , и҆ ны́нѣ . кᲂнда́къ . гла́съ , и҃ . На́съ ра́ди распе́ншагᲂсѧ , прїиди́те всѝ вѣ́рнїи вᲂспᲂе́мъ . тᲂго́ бо ви́дѣ мр҃і́ѧ на́ древѣ , и҆ гл҃аше , а҆́ще и҆ распѧ́тїе терпи́ши , ты̀ є҆сѝ сн҃ъ и҆ бг҃ъ мо́й . =и҆́кᲂсъ . Свᲂегѡ̀ а҆́гньца а҆́гница зрѧ́щи , къ закᲂле́нїю влеко́ма , пᲂслѣ́дᲂваше мр҃і́ѧ скᲂрбѧ́щи , съ дрꙋги́ми жена́ми сїѧ̀ вᲂпїю́щи , ка́мѡ и҆́деши ча́до . что̀ ра́ди ско́рѡ тече́нїе твᲂри́ши ; є҆да̀ дрꙋгі́и бра́къ па́ки є҆́сть в̾ ка́нѣ галиле́йстѣй , и҆ та́мѡ ли ны́нѣ тщи́шисѧ , да во́дꙋ въ вино̀ и҆́мъ прелᲂжи́ши . и҆дꙋ́ли с̾ тᲂбо́ю ча́до , и҆лѝ пᲂждꙋ̀ тебѐ па́че . да́ждь ми сло́во сло́ве , не мᲂлча̀ ми́мѡ и҆дѝ менѐ , и҆́же чи́стꙋ сᲂблюды́и мѧ , сн҃е и҆ бж҃е мо́й .

пѣ́снь , з҃ . і҆рмо́съ . Хладᲂда́тельнꙋ ᲂу҆́бѡ пе́щь сᲂтвᲂрѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ ᲂу҆вѣща̀ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . двⷤа . Гдѣ̀ сн҃е мо́й и҆ бж҃е бл҃гᲂвѣствᲂва́нїе , є҆́же ми гаврїи́лъ гл҃аше , цр҃ѧ́ тѧ вы́шнѧгѡ и҆ сн҃а и҆ бг҃а нарица́ше . ны́нѣ же тѧ ви́жꙋ , свѣ́те мо́й сла́дкїи , и҆ на́га и҆ ᲂу҆ѧ́звена мертвеца̀ . И҆збавлѧ́ѧ ѿ бᲂлѣ́зни , и҆ нн҃ѣ прїими́ мѧ с̾ сᲂбо́ю сн҃е мо́й и҆ бж҃е , да сни́дꙋ во а҆́дъ влⷣко с̾ тᲂбо́ю и҆ а҆́зъ . не ѡ҆ста́ви менѐ є҆ди́нꙋ є҆щѐ жи́ти , и҆́бо нетерплю̀ неви́дѧщи тебѐ , сла́дкаго мᲂегѡ̀ свѣ́та . сла́ва . Со дрꙋги́ми жена́ми мѷрᲂно́сицами , рыда́ющи непᲂро́чнаѧ го́рцѣ , нᲂси́ма ви́дѧщи хрⷭ҇та̀ , и҆ гл҃аше , ᲂу҆вы̀ мнѣ̀ что̀ ви́жꙋ , и҆ ка́мѡ и҆́деши ны́нѣ сн҃е мо́й . а҆ менѐ є҆ди́нꙋ ѡ҆ставлѧ́еши . и҆ ны́нѣ . И҆з̾немᲂга́ющи рыда́ше непᲂро́чнаѧ , мѷрᲂно́сицамъ гл҃аше , срыда́йте со мно́ю , и҆ пла́чите го́рько , се́бо свѣ́тъ мо́й сла́дкїи , и҆ ᲂу҆чи́тель ва́шъ гро́бꙋ предае́тсѧ . катава́сїѧ : Хладᲂда́тельнꙋ ᲂу҆́бѡ .

пѣ́снь , и҃ . і҆рмо́съ . И҆с̾пла́мени ст҃ы́мъ ро́сꙋ и҆стᲂчѝ , а҆ пра́веднагѡ же́ртвꙋ и҆ во́ды пᲂпалѝ , всѧ́ бо твᲂри́ши хрⷭ҇тѐ , є҆ли́ко хо́щеши , тѣ́мъ тѧ превᲂзно́симъ гдⷭ҇а во́ вѣки . двⷤа . Дв҃ꙋ рыда́ющꙋ і҆ѡ́сифъ ви́дѣвъ , растерза́шесѧ ве́сь , и҆ вᲂпїѧ́ше го́рькѡ , ка́кѡ тѧ ѽ бж҃е мо́й , ны́нѣ пᲂгребꙋ̀ ра́бъ тво́й ; ка́цѣми плащани́цами ѡ҆бвїю̀ тѣ́ло твᲂѐ . Па́че ᲂу҆ма̀ превзы́де стра́ннᲂе тебѐ видѣ́нїе , нᲂсѧ́щаго тва́рь всю̀ гдⷭ҇а . сегѡ̀ і҆ѡ́сифъ ꙗ҆́кѡ ме́ртва на рꙋкꙋ̀ свᲂе́ю с̾ нико ди́мᲂмъ , но́ситъ и҆ пᲂгреба́етъ . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Стра́ннꙋ и҆ пресла́внꙋ ви́жꙋ та́йнꙋ дв҃аѧ вᲂпїѧ́ше сн҃ꙋ и҆ гдⷭ҇ꙋ , ка́кѡ в̾ хꙋдо́мъ гро́бѣ пᲂлага́ешисѧ , ме́ртвыѧ пᲂвелѣ́нїемъ вᲂставлѧ́ѧ и҆з̾ гро́бъ . и҆ ны́нѣ . Ни ѿ гро́ба твᲂегѡ̀ вᲂста́нꙋ ча́до мᲂѐ , ни сле́зы преста́нꙋ тᲂча́щи раба̀ твᲂѧ̀ , до́ндеже и҆ а҆́зъ сни́дꙋ во а҆́дъ . немᲂгꙋ́ бо терпѣ́ти разлꙋче́нїѧ твᲂегѡ̀ свѣ́те мо́й .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . И҆с̾пла́мени ст҃ы́мъ .= [пᲂкло́н̾ до землѝ] .=

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́нг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во вᲂплᲂще́нно , є҆го́же велича́юще , с̾ нбⷭ҇ными вѡ́и тѧ̀ велича́емъ . двⷤа . Ра́дᲂсть мнѣ̀ ника́кᲂже ѿсе́лѣ прико́снетсѧ , рыда́ющи гл҃ѧ непᲂро́чнаѧ , свѣ́тъ мо́й и҆ ра́дᲂсть мᲂѧ̀ во́ грᲂбъ за́йде . но не ѡ҆ста́влю тебѐ є҆ди́нагѡ , здѣ́же и҆ ᲂу҆мрꙋ̀ и҆ спᲂгребꙋ́сѧ с̾ тᲂбо́ю . Дш҃е́внꙋю ми ꙗ҆́звꙋ ны́нѣ и҆сцѣлѝ ча́до мᲂѐ , пречⷭ҇таѧ вᲂпїѧ́ше слезѧ́щи , вᲂскрⷭ҇нѝ и҆ преста́ви ми бᲂлѣ́знь и҆ печа́ль . мо́жеши бо влⷣко є҆ли́кѡ хо́щеши , и҆ твᲂри́ши , а҆́ще и҆ пᲂгребе́сѧ во́лею . сла́ва . ѽ ка́кѡ ᲂу҆таи́ласѧ ти є҆́сть бе́здна щедро́тъ , мт҃ри в̾ та́йнѣ и҆з̾речѐ гдⷭ҇ь . тва́рь бо мᲂю̀ хᲂтѧ́щꙋ ми спастѝ , и҆зво́лихъ ᲂу҆́мрети . но вᲂскрⷭ҇нꙋ̀ , и҆ тебѐ вᲂз̾вели́чꙋ , ꙗ҆́кѡ бг҃ъ нб҃сѝ и҆ землѝ . и҆ ны́нѣ . Вᲂспѣва́ю млрⷭ҇дїе твᲂѐ чл҃кᲂлю́бче , и҆ пᲂкло нѧ́юсѧ бᲂга́тствꙋ млⷭ҇ти твᲂеѧ̀ влⷣко . сᲂзда́нїе бо свᲂѐ хᲂтѧ̀ спастѝ , сме́рть прїѧ́тъ речѐ пречⷭ҇таѧ , но вᲂскрⷭ҇нїемъ свᲂи́мъ , сп҃се пᲂми́лꙋй всѣ́хъ на́съ .

катава́сїѧ : Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́нг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во вᲂплᲂще́нно , є҆го́же велича́юще , съ нбⷭ҇ными вѡ́и тѧ̀ велича́емъ . [пᲂкло́н̾ до землѝ] .

трⷭ҇то́е , и҆ по ѻ҆́ч҃е на́шъ . кᲂнда́къ . гла́съ , и҃ . На́съ ра́ди распе́ншагᲂсѧ , прїиди́те всѝ вѣ́рнїи вᲂспᲂе́мъ . тᲂго́ бо ви́дѣ мр҃і́ѧ на́ древѣ , и҆ гл҃аше , а҆́ще и҆ распѧ́тїе терпи́ши , ты̀ є҆сѝ сн҃ъ и҆ бг҃ъ мо́й .= Гдⷭ҇и пᲂми́лꙋй , м҃ . =и҆ про́чее . и҆ ѿпꙋ́стъ .

на пᲂлꙋ́нᲂщницѣ , по пе́рвᲂмъ трⷭ҇то́мъ , и҆ по ѻ҆́ч҃е на́шъ . трᲂпа́рь : бл҃гᲂѡ҆бра́зныи і҆ѡ́сифъ . по втᲂро́мъ трⷭ҇то́мъ , и҆ по ѻ҆́ч҃е на́шъ . кᲂнда́къ : и҆́же бе́зднꙋ затвᲂри́выи . гдⷭ҇и пᲂми́лꙋй , в҃і . и҆ ѿпꙋ́стъ . мл҃твы же , пᲂмѧнѝ гдⷭ҇и , негл҃емъ .

Во ст҃ꙋ́ю и҆ вели́кꙋю сꙋбо́тꙋ , кле́плетъ , въ седмы́и ча́съ , но́щи . и҆ =сᲂбра́вшимсѧ бра́тїѧмъ в̾ цр҃квь , гл҃етъ , і҆єре́й : бл҃гᲂслᲂве́нъ бг҃ъ на́шъ . =и҆ =мы̀ : трⷭ҇то́е , и҆ по ѻ҆́ч҃е на́шъ . гдⷭ҇и пᲂми́лꙋй , в҃і . и҆ про́чее ѡ҆бы́чнᲂе ᲂу҆́трени . =та́же , є҆ѯа̀ ѱалмы̀ , и҆ є҆ктенїѧ̀ вели́каѧ .= на бг҃ъ гдⷭ҇ь . трᲂпа́рь . гла́съ , в҃ . Бл҃гᲂѡ҆бра́зныи і҆ѡ́сифъ , со крⷭ҇та̀ сне́мъ пречи́стᲂе тѣ́ло твᲂѐ , плащани́цею чи́стᲂю ѡ҆бви́въ , и҆ со бл҃гᲂꙋха́ньми во́ грᲂбѣ но́вѣ закры́въ пᲂлᲂжѝ . но в̾ тре́тїи де́нь вᲂскр҃се гдⷭ҇ь , да́рꙋѧ ми́рᲂви ве́лїю ми́лᲂсть . =два́жды . сла́ва . Є҆гда̀ сни́де к̾ сме́рти живᲂтѐ без̾сме́ртныи , тᲂгда̀ а҆́дъ ᲂу҆мертви́лъ є҆сѝ , блиста́нїемъ бжⷭ҇тва̀ . є҆гда́ же ᲂу҆ме́ршїѧ ѿ преиспо́днихъ вᲂскр҃си́лъ є҆сѝ , всѧ̀ си́лы нбⷭ҇ныѧ взыва́хꙋ ти , жизно да́вче хрⷭ҇тѐ бж҃е на́шъ сла́ва тебѣ̀ . и҆ ны́нѣ . Мѷрᲂно́сицамъ жена́мъ , при́ грᲂбѣ пред̾ста́въ а҆́нг҃лъ гл҃аше , мѵ́ро ме́ртвымъ є҆́сть дᲂсто́йнѡ , хрⷭ҇то́съ же и҆стлѣ́нїѧ ꙗ҆ви́сѧ чꙋ́ждь . но вᲂзᲂпі́ите пᲂю́ше , вᲂскр҃се гдⷭ҇ь , пᲂдаѧ̀ ми́рᲂви ве́лїю ми́лᲂсть .

пᲂсе́мъ , параеклисїа́рхъ пᲂставлѧ́етъ нало́й , на не́мже пра́здникъ , средѝ цр҃кви , и҆ свѣщѝ раздае́тъ бра́тїи . та́же , пᲂе́мъ , каѳи́смꙋ , з҃і .= бл҃же́ни непᲂро́чнїи . на́ гласъ , є҃ . =с̾ припѣ́вы на́ три статїѝ . на пе́рвᲂй статїѝ , кади́тъ и҆гꙋ́менъ . на втᲂро́й же , и҆ на тре́тїей , кадѧ́тъ сщ҃е́нницы . та́же , пᲂе́тъ пе́рвᲂе і҆єре́й , припѣ́въ сі́й пᲂсредѣ̀ цр҃кве . прекрести́вши кади́льницею .

Велича́емъ тѧ̀ живᲂда́вче хрⷭ҇тѐ , на́съ ра́ди вчера̀ пᲂгребе́нъ є҆сѝ претерпѣ́вшагѡ . и҆ ѡ҆живлѧ́ющагѡ пресла́внѡ ме́ртвыѧ .

Бл҃же́ни непᲂро́чнїи въ пꙋ́ть , хᲂдѧ́щїи въ зако́нѣ гдⷭ҇ни . Велича́емъ тѧ̀ живᲂда́вче хрⷭ҇тѐ . и҆ пᲂчита́емъ страда́нїѧ твᲂѧ̀ честна́ѧ , и҆ сла́внᲂе сла́вимъ пᲂгребе́нїе .

Бл҃же́ни и҆спыта́ющїи свидѣ́нїѧ є҆гѡ̀ , всѣ́мъ срⷣцемъ взы́щꙋтъ є҆гѡ̀ . Велича́емъ тѧ̀ і҆с҃е цр҃ю . и҆ пᲂчита́емъ пᲂгребе́нїе и҆ стра́сти твᲂѧ̀ , и҆́миже спа́слъ є҆сѝ на́съ и҆з̾ и҆стлѣ́нїѧ .

Недѣ́лающїи бо без̾зако́нїѧ , в̾ пꙋте́хъ є҆гѡ̀ хᲂди́ша . ты̀ запᲂвѣ́далъ є҆сѝ за́пᲂвѣди твᲂѧ̀ , сᲂхрани́ти ѕѣлѡ̀ . дабы̀ и҆спра́вилисѧ бы́ша пꙋтїѐ мᲂѝ , сᲂхрани́ти ѡ҆правда́нїѧ твᲂѧ̀ . Живо́тъ во́ грᲂбѣ пᲂлᲂжи́сѧ хрⷭ҇тѐ , и҆ а҆́нг҃льскаѧ во́инства дивлѧ́хꙋсѧ зрѧ́ще . схᲂжде́нїе твᲂѐ сла́вѧще .

Тᲂгда̀ непᲂстыжꙋ́сѧ , є҆гда̀ при́зрю на всѧ̀ за́пᲂвѣди твᲂѧ̀ . и҆спᲂвѣ́мсѧ тебѣ̀ в̾ пра́вᲂсти срⷣца , внегда̀ наꙋчи́тимисѧ сꙋдьба́мъ пра́вды твᲂеѧ̀ . Влⷣка всѣ́хъ зри́тсѧ ме́ртвъ , и҆ во́ грᲂбѣ но́вѣ пᲂлᲂга́етсѧ , ѡ҆бно́вль гро́бы ме́ртвымъ .

Ѡ҆правда́нїѧ твᲂѧ̀ сᲂхраню̀ , да не ѡ҆ста́виши менѐ до ѕѣла̀ в̾ че́мъ и҆спра́витъ ю҆́нныи пꙋ́ть сво́й , внегда̀ сᲂхрани́ти слᲂвеса̀ твᲂѧ̀ . Живо́тъ во́ грᲂбѣ пᲂлᲂжи́сѧ хрⷭ҇тѐ , и҆ сме́ртїю свᲂе́ю сме́рть пᲂгꙋбѝ . и҆стᲂчи́лъ є҆сѝ ми́рᲂви жи́знь .

Всѣ́мъ срⷣцемъ мᲂи́мъ взыска́хъ тебѐ , не ѿри́ни менѐ ѿ запᲂвѣде́й твᲂи́хъ . въ срⷣцы мᲂе́мъ съкры́хъ слᲂвеса̀ твᲂѧ̀ , да не сᲂгрѣшꙋ̀ тебѣ̀ . Красе́нъ дᲂбро́тᲂю па́че сыно́въ чл҃ческихъ , ꙗ҆́кѡ без̾зра́ченъ ме́ртвъ ꙗ҆влѧ́етсѧ , є҆стество̀ ᲂу҆краше́и всѧ́ческихъ .

Бл҃гᲂслᲂве́нъ є҆сѝ гдⷭ҇и , наꙋчи́ мѧ ѡ҆правда́нїемъ твᲂи́мъ . ᲂу҆стна́ма мᲂи́ма вᲂзвѣсти́хъ , всѧ̀ сꙋдьбы̀ ᲂу҆́стъ твᲂи́хъ . Тебѣ̀ пᲂлᲂже́нꙋ бы́вшꙋ во́ грᲂбѣ сᲂзда́телю хрⷭ҇тѐ , а҆́дъскаѧ пᲂд̾виза́шасѧ ѡ҆снᲂва́нїѧ . и҆ гро́бы ѿверзо́шасѧ земны́хъ .

Въ пꙋтѝ свидѣ́нїи твᲂи́хъ наслади́хсѧ . ꙗ҆́кѡ ѡ҆ всѧ́кᲂмъ бᲂга́тствѣ , в̾ за́пᲂвѣдехъ твᲂи́хъ пᲂꙋчꙋ́сѧ , и҆ ᲂу҆разꙋмѣ́ю пꙋтѝ твᲂѧ̀ . Зе́млю сᲂдержа́и дла́нїю , ᲂу҆мерщве́нъ пло́тїю , земле́ю ны́нѣ ѡ҆держи́мъ є҆́сть , ме́ртвыѧ и҆збавлѧ́ѧ а҆́дᲂва ѡ҆держа́нїѧ .

Во ѡ҆правда́нїихъ твᲂи́хъ пᲂꙋчꙋ́сѧ , незабꙋ́дꙋ слᲂве́съ твᲂи́хъ . вᲂзда́ждь рабꙋ̀ твᲂемꙋ̀ живи́ мѧ , и҆ сᲂхраню̀ слᲂвеса̀ твᲂѧ̀ . И҆з̾ и҆стлѣ́нїѧ взы́де живо́тъ мо́й сп҃се , тебѣ̀ ᲂу҆ме́ршꙋ , и҆ к̾ ме́ртвымъ прише́дшꙋ , и҆ сᲂкрꙋ́шьшꙋ вереѧ̀ а҆́дᲂвы .

Ѿкры́й ѻ҆́чи мᲂѝ , и҆ разꙋмѣ́ю чꙋдеса̀ ѿ зако́на твᲂегѡ̀ . пришле́цъ а҆́зъ є҆́смь на землѝ , не скры́й ѿ менѐ запᲂвѣде́й твᲂи́хъ . Ꙗ҆́кᲂже свѣ́тъ свѣти́льника пло́ть бж҃їѧ , пᲂд̾ земле́ю ꙗ҆́кᲂже пᲂд̾ спꙋ́дᲂмъ сᲂкрыва́ема є҆́сть . ѿгᲂнѧ́етъ тмꙋ̀ а҆́дᲂвꙋ .

Вᲂз̾любѝ дш҃а мᲂѧ̀ вᲂз̾жела́ти сꙋдьбы̀ твᲂѧ̀ , на всѧ́ко вре́мѧ . запрети́лъ є҆сѝ гᲂрды́мъ . про́клѧти ᲂу҆клᲂнѧ́ющїисѧ ѿ запᲂвѣде́й твᲂи́хъ . Ка́мень живо́тныи , прїе́мъ а҆́дъ всеѧ́децъ , и҆з̾блева̀ и҆́хже пᲂжрѐ ѿ́ вѣка ме́ртвыѧ .

Ѿи҆мѝ ѿ менѐ пᲂно́съ и҆ ᲂу҆ничиже́нїе , занѐ свидѣ́нїѧ твᲂѧ̀ взыска́хъ . и҆́бо сѣдо́ша кн҃зи и҆ на мѧ̀ клевета́хꙋ . ра́бъ же тво́й пᲂꙋча́шесѧ во ѡ҆правда́нїихъ твᲂи́хъ . Во́ грᲂбѣ но́вѣ пᲂлᲂжи́сѧ хрⷭ҇тѐ , и҆ є҆стество̀ чл҃ческᲂе ѡ҆бнᲂви́лъ є҆сѝ . вᲂскре́съ нᲂвᲂлѣ́пно и҆з̾ ме́ртвыхъ .

И҆́бо свидѣ́нїѧ твᲂѧ̀ пᲂꙋче́нїе мᲂѐ є҆́сть . и҆ сᲂвѣ́ти мᲂѝ ѡ҆правда́нїѧ твᲂѧ̀ . прильпѐ землѝ дш҃а мᲂѧ̀ , живи́ мѧ по слᲂвесѝ твᲂемꙋ̀ . На́ землю сни́де да спасе́ши а҆да́ма . и҆ на землѝ сегѡ̀ не ѡ҆брѣ́тъ влⷣко , да́же до а҆́да сни́де и҆скі́и .

Пꙋтѝ мᲂѧ̀ и҆спᲂвѣ́дахъ и҆ ᲂу҆слы́шалъ мѧ̀ є҆сѝ , наꙋчи́ мѧ ѡ҆правда́нїемъ твᲂи́мъ . пꙋтѝ ѡ҆правда́нїи твᲂи́хъ вразꙋми́ мѧ , и҆ пᲂꙋчꙋ́сѧ въ чꙋдесѣ́хъ твᲂи́хъ . Ꙗ҆́кᲂже зе́рно пшени́чно , в̾нѣ́дра земна́ѧ заше́дъ . мнᲂгᲂпе́рстныи во́здалъ є҆сѝ кла́съ , вᲂз̾ста́вивъ земны́ѧ , ꙗ҆́же ѿ а҆да́ма .

Вᲂз̾дрема̀ дш҃а мᲂѧ̀ ѿ ᲂу҆ны́нїѧ , ᲂу҆тверди́ мѧ въ слᲂвесѣ́хъ твᲂи́хъ . пꙋ́ть не пра́вды ѿста́ви ѿ менѐ , и҆ зако́нᲂмъ твᲂи́мъ пᲂми́лꙋй мѧ . Пᲂд̾ земле́ю скры́сѧ ꙗ҆́кѡ сл҃нце , ны́нѣ но́щїю сме́ртнᲂю пᲂкрᲂве́нъ бы́сть . но вᲂз̾сїѧ́й свѣтлѣ́йше сп҃се .

Пꙋ́ть и҆́стинныи и҆з̾во́лихъ , и҆ сꙋдьбы̀ твᲂѧ̀ незабы́хъ . прилѣпи́хсѧ свидѣ́нїемъ твᲂи́мъ , гдⷭ҇и не пᲂсрамѝ менѐ . Ꙗ҆́кᲂже крꙋгъ сл҃нчныи лꙋча̀ сᲂкрыва́етъ сп҃се , тебѐ ны́нѣ гро́бъ сᲂкры̀ , скᲂнча́вшасѧ сме́ртїю пло́тьски .

Пꙋ́ть запᲂвѣде́й твᲂи́хъ теко́хъ , є҆гда̀ раз̾шири́лъ є҆сѝ срⷣце мᲂѐ . закᲂнᲂпᲂлᲂжѝ мнѣ̀ гдⷭ҇и пꙋ́ть ѡ҆правда́нїи твᲂи́хъ , и҆ взыщꙋ̀ и҆̀ вы́нꙋ . А҆́нг҃льскаѧ ра́дᲂсть сп҃се сы́и , ны́нѣ и҆ печа́ли си́хъ вина̀ , ви́димь пло́тїю без̾дыха́нїѧ ме́ртвъ .

Вразꙋми́ мѧ и҆ и҆спыта́ю зако́нъ тво́й , и҆ сᲂхраню̀ и҆̀ всѣ́мъ срⷣцемъ мᲂи́мъ . наста́ви мѧ на пꙋ́ть запᲂвѣде́й твᲂи́хъ , ꙗ҆́кѡ то́й вᲂсхᲂтѣ̀ . Вᲂз̾не́ссѧ на́ древо , и҆ жи́вы земны́ѧ сᲂвᲂз̾дви́жеши . пᲂд̾ земле́ю же бы́въ , лежа́щїѧ пᲂд̾ не́ю сᲂвᲂскреша́еши .

Приклᲂнѝ срⷣце мᲂѐ во свидѣ́нїѧ твᲂѧ̀ , а҆ не в̾ лихᲂи́мство . ѿвратѝ ѻ҆́чи мᲂѝ не ви́дѣти сꙋеты̀ , в̾ пꙋтѝ твᲂе́мъ живи́ мѧ . Ꙗ҆́кᲂже ле́въ ᲂу҆снꙋ́въ сп҃се пло́тїю . ꙗ҆́кᲂже нѣ́кїи ски́менъ мла́дъ вᲂста́еши , ѿ ло́жь ста́рᲂсть плᲂтьскꙋ́ю .

Пᲂста́ви рабꙋ̀ твᲂемꙋ̀ сло́во твᲂѐ в̾ стра́хъ тво́й . ѿи҆мѝ пᲂнᲂше́нїе мᲂѐ , є҆́же не пщева́хъ , ꙗ҆́кѡ сꙋдьбы̀ твᲂѧ̀ бла́ги . Въ ре́бра прᲂбᲂде́нъ бы́сть , ребро̀ взе́мыи а҆да́мле , ѿ него́же всѐ со́здалъ є҆сѝ , и҆ и҆стᲂчѝ то́ки чисти́тельныѧ .

Сѐ вᲂз̾желѣ́хъ за́пᲂвѣди твᲂѧ̀ , в̾ пра́вдѣ твᲂе́й живи́ мѧ . и҆ да прїи́детъ на мѧ̀ млⷭ҇ть твᲂѧ̀ гдⷭ҇и , спасе́нїе твᲂѐ по слᲂвесѝ твᲂемꙋ̀ . Та́йнѡ ᲂу҆́бѡ дре́вле закала́етсѧ а҆́гнецъ . ты́же ꙗ҆́вѣ жре́нъ бы́въ неѕло́биве , всю̀ тва́рь ѡ҆чи́стилъ є҆сѝ сп҃се .

И҆ ѿвѣща́ю пᲂнᲂша́ющимъ мѝ сло́во , ꙗ҆́кѡ ᲂу҆пᲂва́хъ на слᲂвеса̀ твᲂѧ̀ . и҆ не ѿи҆мѝ ѿ ᲂу҆́стъ мᲂи́хъ слᲂвесѐ и҆́стинна до ѕѣла̀ , занѐ на сꙋдьбы̀ твᲂѧ̀ ᲂу҆пᲂва́хъ . Кто̀ и҆з̾рече́тъ ѻ҆́бразъ та́йно ᲂу҆жа́сныи , влады́и бо тва́рїю , дне́сь стра́сть прїе́млетъ , и҆ ᲂу҆мира́етъ на́съ ра́ди .

И҆ =сᲂхраню̀ зако́нъ тво́й всегда̀ во́ вѣки , и҆ в̾ вѣ́къ вѣ́ка . и҆ хᲂжда́хъ в̾ ширᲂтѣ̀ , ꙗ҆́кѡ за́пᲂвѣди твᲂѧ̀ взыска́хъ . А҆́ще и҆ ме́ртвъ ꙗ҆ви́сѧ , но жи́въ ꙗ҆́кѡ бг҃ъ , ᲂу҆мерщве́ныѧ чл҃ки ѡ҆живи́лъ є҆сѝ , на́ше ᲂу҆мертвѝ ᲂу҆мерщве́нїе .=

И҆ глаго́лахъ ѡ҆ свидѣ́нїихъ твᲂи́хъ пред̾ царѝ и҆ нестыдѧ́хсѧ . и҆ пᲂꙋча́хсѧ в̾ за́пᲂвѣдехъ твᲂи́хъ . и҆́хже вᲂз̾люби́хъ ѕѣлѡ̀ . и҆ вᲂз̾двиго́хъ рꙋ́цѣ мᲂѝ к̾ за́пᲂвѣдемъ твᲂи́мъ , и҆́хже вᲂз̾люби́хъ . и҆ пᲂꙋча́хсѧ во ѡ҆правда́нїихъ твᲂи́хъ . Ѽ ра́дᲂсти ѻ҆́нᲂѧ , ѽ мно́гїѧ сла́дᲂсти , є҆ѧ́же и҆́хъ же во а҆́дѣ напо́лнилъ є҆сѝ , во́ днехъ мра́чныхъ свѣ́тъ вᲂз̾сїѧ́въ .

Пᲂмѧнѝ слᲂвесѐ твᲂегѡ̀ рабꙋ̀ твᲂемꙋ̀ , ѡ҆ не́мже ᲂу҆пᲂва́нїе да́лъ ми є҆сѝ . та́ мѧ ᲂу҆тѣ́ши во смире́нїи мᲂе́мъ , занѐ сло́во твᲂѐ ѡ҆живи́ мѧ . го́рдїи закᲂнᲂпрестꙋпᲂва́хꙋ до ѕѣла̀ , ѿ зако́на же твᲂегѡ̀ не ᲂу҆клᲂни́хсѧ . А҆́ще и҆ во́ грᲂбѣ пᲂкрыва́ешисѧ , и҆лѝ въ вереѧ́хъ а҆́дъскихъ , но и҆ гро́бы и҆стᲂщи́лъ є҆сѝ , и҆ а҆́да ѡ҆бнажи́лъ є҆сѝ хрⷭ҇тѐ .

Пᲂмѧнꙋ́хъ сꙋдьбы̀ твᲂѧ̀ ѿ́ вѣка гдⷭ҇и , и҆ ᲂу҆тѣ́шихсѧ . печа́ли ѡ҆бдержа́тъ мѧ̀ ѿ грѣ́шникъ , ѡ҆ставлѧ́ющихъ зако́нъ тво́й . Во́лею сᲂше́дъ сп҃се на́ землю , ᲂу҆мерщве́ныѧ чл҃ки ѡ҆живи́лъ є҆сѝ , и҆ вᲂз̾ведѐ к̾ сла́вѣ ѻ҆́ч҃ей .

Пѣ́та бѧ́хꙋ мнѣ̀ ѡ҆правда́нїѧ твᲂѧ̀ , на мѣ́стѣ прише́льствїѧ мᲂегѡ̀ . пᲂмѧнꙋ́хъ в̾ нᲂщѝ и҆́мѧ твᲂѐ гдⷭ҇и , и҆ сᲂхрани́хъ зако́нъ тво́й . И҆́же рꙋко́ю свᲂе́ю сᲂзда́въ а҆да́ма ѿ землѝ , тᲂгѡ̀ ра́ди є҆стество́мъ бы́сть чл҃къ , и҆ распѧ́сѧ во́лею свᲂе́ю .

Сїѧ̀ бы́сть мнѣ̀ , занѐ ѡ҆правда́нїѧ твᲂѧ̀ взыска́хъ . ча́сть мᲂѧ̀ є҆сѝ гдⷭ҇и , рѣ́хъ сᲂхрани́ти зако́нъ тво́й . Пᲂслꙋ́шавъ сло́ве ѻ҆ц҃а свᲂегѡ̀ , да́же до а҆́да сᲂше́лъ є҆сѝ , и҆ вᲂскр҃си́лъ є҆сѝ ро́дъ чл҃ческїи .

Пᲂмᲂли́хсѧ лицꙋ̀ твᲂемꙋ̀ всѣ́мъ срⷣцемъ мᲂи́мъ . пᲂми́лꙋй мѧ по слᲂвесѝ твᲂемꙋ̀ . пᲂмы́слихъ пꙋтѝ твᲂѧ̀ , и҆ вᲂз̾врати́хъ но́зѣ мᲂѝ во свидѣ́нїѧ твᲂѧ̀ . Кто̀ претерпи́тъ сло́ве зрѣ́ти тѧ ме́ртва во́ грᲂбѣ , ꙗ҆́кѡ ᲂу҆мерщве́на лежа́ща , чл҃кᲂлю́бца влⷣкꙋ и҆ бг҃а .

Оу҆гᲂто́вихсѧ и҆ несмꙋти́хсѧ , сᲂхрани́ти за́пᲂвѣди твᲂѧ̀ , ю҆́жа грѣ́шникъ ѡ҆бѧза́шасѧ мнѣ̀ , и҆ зако́на твᲂегѡ̀ незабы́хъ . Оу҆вы̀ мнѣ̀ свѣ́те ми́рꙋ , ᲂу҆вы̀ мнѣ̀ свѣ́те мо́й , і҆с҃е мо́й вᲂз̾желе́нныи , вᲂпїѧ́ше дв҃аѧ съ пла́чемъ взыва́ющи .

Въ пᲂлꙋ́нᲂщи вᲂста́хъ , и҆спᲂвѣ́датисѧ тебѣ̀ ѡ҆ сꙋдьба́хъ пра́вды твᲂеѧ̀ , прича́стникъ а҆́зъ є҆́смь всѣ́мъ бᲂѧ́щимсѧ тебѐ , и҆ хранѧ́щимъ за́пᲂвѣди твᲂѧ̀ . ѽ бж҃їе сло́ве , ѽ ра́дᲂсте мᲂѧ̀ , ка́кѡ претерплю̀ тридне́внᲂе твᲂѐ пᲂгребе́нїе , ны́нѣ бо дви́жꙋсѧ ᲂу҆тро́бᲂю ма́терьски .

Млⷭ҇ти твᲂеѧ̀ гдⷭ҇и и҆спо́лнена є҆́сть землѧ̀ , ѡ҆правда́нїемъ твᲂи́мъ наꙋчи́ мѧ . бл҃гᲂсть сᲂтвᲂри́лъ є҆сѝ с̾ рабо́мъ твᲂи́мъ гдⷭ҇и , по слᲂвесѝ твᲂемꙋ̀ . Кто̀ да́стъ мѝ во́дꙋ и҆сто́чникъ слеза́мъ , бг҃ᲂневѣ́стнаѧ дв҃аѧ вᲂпїѧ́ше , да вᲂспла́чꙋ сла́дкагѡ сѝ і҆с҃а .

Бл҃гᲂсти и҆ наказа́нїю и҆ ра́зꙋмꙋ наꙋчи́ мѧ , занѐ за́пᲂвѣдемъ твᲂи́мъ вѣ́рᲂвахъ , пре́жде да́же несмири́хсѧ , а҆́зъ прегрѣши́хъ . сегѡ̀ ра́ди сло́во твᲂѐ сᲂхрани́хъ . И҆ го́ры и҆ хо́лми , и҆ чл҃ческаѧ мно́жества , вᲂспла́чите ны́нѣ , и҆ рыда́йте со мно́ю мт҃рїю бж҃їею .

Бл҃гъ є҆сѝ ты̀ гдⷭ҇и . и҆ бл҃гᲂстїю твᲂе́ю наꙋчи́ мѧ ѡ҆правда́нїемъ твᲂи́мъ . ᲂу҆мно́жисѧ на мѧ̀ не пра́вда гᲂрды́хъ , а҆́зъ же всѣ́мъ срⷣцемъ мᲂи́мъ и҆спыта́ю за́пᲂвѣди твᲂѧ̀ . Кᲂгда̀ ви́жꙋ тѧ сп҃се без̾лѣ́тнагѡ свѣ́та , ра́дᲂсть и҆ сла́дᲂсть срⷣца мᲂегѡ̀ , дв҃аѧ ма́терьски взыва́ше .

Оу҆сыри́сѧ ꙗ҆́кѡ млеко̀ срⷣце и҆́хъ , а҆́зъ же зако́нꙋ твᲂемꙋ̀ пᲂꙋчи́хсѧ . бла́го мнѣ̀ ꙗ҆́кѡ смири́лъ мѧ є҆сѝ , да наꙋчꙋ́сѧ ѡ҆правда́нїемъ твᲂи́мъ . бла́гъ мнѣ̀ зако́нъ ᲂу҆́стъ твᲂи́хъ , па́че ты́сѧщь зла́та и҆ сребра̀ . А҆́ще и҆ во́лею ꙗ҆ви́сѧ во́ грᲂбѣ ме́ртвъ , но и҆ чл҃ки ꙗ҆́кᲂже прᲂречѐ , вᲂскрⷭ҇нїемъ сп҃се мо́й вᲂз̾дви́жеши .

Сла́ва ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ . Вᲂспѣва́емъ тѧ̀ сло́ве всѣ́хъ бг҃а , со ѻ҆ц҃е́мъ и҆ дх҃ᲂмъ ст҃ы́мъ , сла́вимъ и҆ бжⷭ҇твенᲂе пᲂгребе́нїе твᲂѐ .

И҆ ны́нѣ и҆ прⷭ҇нѡ и҆ во́ вѣки вѣкѡ́мъ , а҆ми́нь . Бл҃жи́мъ тѧ̀ бцⷣе чи́стаѧ , и҆ пᲂчита́емъ тридне́внᲂе пᲂгребе́нїе сн҃а твᲂегѡ̀ , и҆ бг҃а на́шегѡ вѣ́рнѡ .

А҆ллилꙋ́їѧ , а҆ллилꙋ́їѧ , сла́ва тебѣ̀ бж҃е , три́жды , съ припѣ́вы : =Велича́емъ тѧ̀ живᲂда́вче хрⷭ҇тѐ , на́съ ра́ди вчера̀ пᲂгребе́нъ є҆сѝ претерпѣ́вшагѡ . и҆ ѡ҆живлѧ́ющагѡ пресла́внѡ ме́ртвыѧ .=

та́же , статїю̀ втᲂрꙋ́ю начина́етъ і҆єре́й , и҆ пᲂе́тъ є҆ди́нᲂщи : Дᲂсто́йнѡ є҆́сть велича́ти тѧ̀ , живᲂда́вче хрⷭ҇тѐ , врата̀ а҆́дᲂва сте́ршагѡ , и҆ наси́лїе дїѧ́вᲂле разо́ршагѡ .

Рꙋ́цѣ твᲂѝ сᲂтвᲂри́стѣ мѧ и҆ сᲂзда́стѣ мѧ . вразꙋми́ мѧ и҆ наꙋчꙋ́сѧ запᲂвѣде́мъ твᲂи́мъ . Дᲂсто́йнѡ є҆́сть велича́ти тѧ̀ живᲂда́вца , на крⷭ҇тѣ̀ рꙋ́цѣ прᲂсте́ршагѡ , и҆ сᲂкрꙋ́шшагѡ держа́вꙋ вра́жїю .

Бᲂѧ́щїисѧ тебѐ ᲂу҆́зрѧтъ мѧ̀ и҆ вᲂз̾веселѧ́тсѧ , ꙗ҆́кѡ на слᲂвеса̀ твᲂѧ̀ ᲂу҆пᲂва́хъ . разꙋмѣ́хъ гдⷭ҇и ꙗ҆́кѡ пра́вда пᲂвелѣ́нїѧ твᲂѧ̀ . и҆ вᲂи́стинꙋ смири́лъ мѧ є҆сѝ . Дᲂсто́йнѡ є҆́сть велича́ти тѧ̀ всѣ́хъ зижди́телѧ . страда́нїи бо твᲂи́ми и҆мѣ́хᲂмъ без̾сме́ртїе , и҆зба́вльшесѧ и҆з̾ и҆стлѣ́нїѧ .

Бꙋ́ди же млⷭ҇ть твᲂѧ̀ , да ᲂу҆тѣ́шитъ мѧ̀ по слᲂвесѝ твᲂемꙋ̀ раба̀ твᲂегѡ̀ . да прїи́дꙋтъ мнѣ̀ щедро́ты твᲂѧ̀ , и҆ жи́въ бꙋ́дꙋ . ꙗ҆́кѡ зако́нъ тво́й пᲂꙋче́нїе мᲂѐ є҆́сть . Оу҆жасе́сѧ землѧ̀ , и҆ сл҃нце сп҃се сᲂкры́сѧ , тебѣ̀ невече́рнемꙋ свѣ́тꙋ хрⷭ҇тѐ , заше́дшꙋ во́ грᲂбъ пло́тїю .

Да пᲂстыдѧ́тсѧ го́рдїи , ꙗ҆́кѡ не пра́веднѣ без̾зако́нᲂваша намѧ̀ . а҆́зъ же пᲂꙋчꙋ́сѧ в̾ за́пᲂвѣдехъ твᲂи́хъ . да ѡ҆братѧ́тъ мѧ̀ бᲂѧ́щїисѧ тебѐ , и҆ вѣ́дꙋщїи свидѣ́нїѧ твᲂѧ̀ . Оу҆снꙋ́лъ є҆сѝ хрⷭ҇тѐ , є҆сте́ствено живо́тныи со́нъ во́ грᲂбѣ , и҆ ѿ тѧ́жкагѡ сна̀ грѣхо́внагѡ , вᲂз̾дви́гнꙋлъ є҆сѝ ро́дъ чл҃ческїи .

Да бꙋ́детъ срⷣце мᲂѐ непᲂро́чно во ѡ҆правда́нїихъ твᲂи́хъ , да́сѧ непᲂстыжꙋ̀ . ѡ҆скꙋдѣва́етъ во спасе́нїе твᲂѐ дш҃а мᲂѧ̀ , въ сло́во твᲂѐ ᲂу҆пᲂва́хъ . За́йде по́д̾ землю , рꙋко́ю сᲂзда́выи чл҃ка , да вᲂз̾дви́гнеши ѿ паде́нїѧ сᲂбо́ры чл҃ческїѧ , всеси́льнᲂю держа́вᲂю .

Ѡ҆скꙋдѣ́ша ѻ҆́чи мᲂѝ в̾ сло́во твᲂѐ гл҃юще , кᲂгда̀ ᲂу҆тѣ́шиши мѧ̀ . занѐ бы́хъ ꙗ҆́кѡ мѣ́хъ на сла́нѣ , ѡ҆правда́нїи твᲂи́хъ незабы́хъ . Пла́чь сщ҃е́нныи прїидѣ́те вᲂспᲂе́мъ , хрⷭ҇то́ви ᲂу҆ме́ршемꙋ , ꙗ҆́кѡ дре́вле жены̀ мѷрᲂно́сицы , да ра́дꙋйтесѧ ᲂу҆слы́шимъ с̾ ни́ми .

Кᲂли́кѡ є҆́сть дні́й раба̀ твᲂегѡ̀ , кᲂгда̀ сᲂтвᲂри́ши ѿ гᲂнѧ́щихъ мѧ̀ сꙋ́дъ . пᲂвѣ́даша мнѣ̀ закᲂнᲂпрестꙋ́пницы глꙋмле́нїѧ , но не ꙗ҆́кѡ зако́нъ тво́й гдⷭ҇и . Ми́ро вᲂи́стинꙋ є҆сѝ ты̀ сло́ве не и҆стᲂщи́мᲂе . тѣ́мже тѝ и҆ ми́ра принᲂша́хꙋ , ꙗ҆́кѡ ме́ртвꙋ живо́мꙋ , жены̀ мѷрᲂно́сицы .

Всѧ̀ за́пᲂвѣди твᲂѧ̀ и҆́стина . без̾ пра́вды пᲂгна́ша мѧ пᲂмᲂзи́ ми . ма́ла не скᲂнча́ша менѐ на землѝ . а҆́зъ же не ѡ҆ста́вихъ запᲂвѣде́й твᲂи́хъ . И҆злїѧ̀ ѡ҆ тебѣ̀ ᲂу҆мерщве́нѣ сло́ве ма́терьнѧѧ рыда́нїѧ , без̾ сѣ́мене ро́ждьшаѧ тѧ̀ , сп҃са дш҃а́мъ на́шимъ .

По млⷭ҇ти твᲂе́й живи́ мѧ , и҆ сᲂхраню̀ свидѣ́нїѧ ᲂу҆́стъ твᲂи́хъ . во́ вѣки гдⷭ҇и сло́во твᲂѐ пребывае́тъ на́ нб҃си , въ ро́дъ и҆ ро́дъ и҆́стина твᲂѧ̀ . За́йде по́д̾ землю ѕвѣзда̀ пра́веднаѧ , и҆ ме́ртвыѧ ꙗ҆́кᲂже ѿ сна̀ вᲂз̾дви́глъ є҆сѝ , ѿгна́въ всѧ́кꙋ тмꙋ̀ и҆́же во а҆́дѣ .

Ѡ҆снᲂва́лъ є҆сѝ зе́млю , и҆ пребыва́етъ ᲂу҆чине́нїемъ твᲂи́мъ . пребыва́етъ де́нь , ꙗ҆́кѡ всѧ́ческаѧ рабо́тна тебѣ̀ . Зе́рно двᲂера́слено , є҆стество̀ жи́зненᲂе , в̾ нѣ́дра земна́ѧ сѣ́етсѧ со слеза́ми дне́сь , но прᲂзѧбѐ ми́рᲂви ѡ҆бра́дᲂванїе .

Ꙗ҆́кѡ а҆́ще незако́нъ тво́й пᲂꙋче́нїе мᲂѐ є҆́сть , тᲂгда̀ ᲂу҆́бѡ пᲂги́блъ бы́хъ во смире́нїи мᲂе́мъ . во́ вѣки незабꙋ́дꙋ ѡ҆правда́нїи твᲂи́хъ , занѐ въ ни́хъ живи́лъ мѧ є҆сѝ . Оу҆бᲂѧ́сѧ а҆да́мъ , бг҃ꙋ хᲂдѧ́щꙋ въ раѝ . ра́дꙋетъжесѧ тᲂмꙋ̀ , ко а҆́дꙋ сᲂше́дшꙋ . пады́и пре́жде , ны́нѣ вᲂз̾двиза́емь .

Тво́й є҆́смь а҆́зъ спаси́ мѧ , ꙗ҆́кѡ ѡ҆правда́нїи твᲂи́хъ взыска́хъ . менѐ жда́ша грѣ́шницы пᲂгꙋби́ти мѧ̀ , свидѣ́нїѧ твᲂѧ̀ разꙋмѣ́хъ . Жре́тъ тѝ же́ртвꙋ сле́знꙋю , ро́ждьшаѧ тѧ̀ хрⷭ҇тѐ , пло́тїю пᲂлᲂже́нꙋ во́ грᲂбѣ , вᲂпїю́щи , вᲂста́ни ча́до ꙗ҆́кᲂже прᲂречѐ .

Всѧ́кᲂѧ кᲂнчи́ны ви́дѣхъ кᲂне́цъ , ширᲂка̀ за́пᲂвѣдь твᲂѧ̀ ѕѣлѡ̀ . ко́ль вᲂз̾люби́хъ зако́нъ тво́й гдⷭ҇и , ве́сь де́нь пᲂꙋче́нїе мᲂѐ є҆́сть . Захо́диши по́д̾ землю сп҃се , сл҃нце пра́вдѣ , тѣ́мже ро́ждьшаѧ тѧ лꙋна̀ , печа́лїю ѡ҆скꙋдѣва́етъ , ви́да твᲂегѡ̀ лиша́ема .

Па́че вра́гъ мᲂи́хъ ᲂу҆мꙋдри́лъ мѧ̀ є҆сѝ за́пᲂвѣдїю твᲂе́ю , занѐ в̾ вѣ́къ мᲂѧ̀ є҆́сть . па́че всѣ́хъ ᲂу҆ча́щихъ мѧ̀ разꙋмѣ́хъ , занѐ свидѣ́нїѧ твᲂѧ̀ пᲂꙋче́нїе мᲂѐ є҆́сть . Оу҆жасе́сѧ а҆́дъ сп҃се зрѧ́ тѧ живᲂда́вца , бᲂга́тство є҆гѡ̀ ᲂу҆праздни́вша , и҆ и҆́҆́же ѿ́ вѣка ме́ртвыѧ вᲂз̾дви́жꙋща .

Па́че ста́рецъ разꙋмѣ́хъ , занѐ запᲂвѣде́й твᲂи́хъ взыска́хъ . ѿ всѧ́кᲂгѡ пꙋтѝ лꙋка́ва вᲂз̾брани́хъ нᲂга́мъ мᲂи́мъ , да сᲂхраню̀ слᲂвеса̀ твᲂѧ̀ . Сл҃нце свѣ́тъ вᲂз̾сїѧва́етъ по́ нᲂщи сло́ве . ты̀ ᲂу҆́бѡ вᲂскре́съ , прᲂсїѧ̀ по сме́рти ꙗ҆́снѡ , ꙗ҆́кѡ ѿ черто́га .

Ѿ сꙋде́бъ твᲂи́хъ не ᲂу҆клᲂни́хсѧ , занѐ ты̀ зако́нъ пᲂлᲂжи́лъ ми є҆сѝ . ко́ль сладка̀ гᲂрта́ни мᲂемꙋ̀ слᲂвеса̀ твᲂѧ̀ , па́че ме́да ᲂу҆сто́мъ мᲂи́мъ . Землѧ̀ сᲂзда́телѧ в̾ нѣ́дра прїе́мши , тре́петᲂмъ ѡ҆бъє́мшисѧ кᲂле́блетсѧ , ᲂу҆спи́вши ме́ртвыѧ трѧсе́нїемъ .

Ѿ запᲂвѣде́й твᲂи́хъ разꙋмѣ́хъ , сегѡ̀ ра́ди вᲂз̾ненави́дѣхъ всѧ́къ пꙋ́ть не пра́вды . свѣти́льникъ нᲂга́мъ мᲂи́мъ зако́нъ тво́й , и҆ свѣ́тъ стезѧ́мъ мᲂи́мъ . Ты̀ сло́ве живᲂтꙋ̀ да́тель . тѣ́мже і҆ꙋдѣ́и на крⷭ҇тѣ̀ вᲂзнесе́нъ ᲂу҆́мрети , но вᲂздви́же с̾ сᲂбо́ю всѧ̀ ме́ртвыѧ .

Клѧ́хсѧ и҆ пᲂста́вихъ , сᲂхрани́ти сꙋдьбы̀ пра́вды твᲂеѧ̀ . смири́хсѧ до ѕѣла̀ гдⷭ҇и , живи́ мѧ по слᲂвесѝ твᲂемꙋ̀ . Дᲂбро́тꙋ сло́ве пе́рвꙋю не и҆мѣ̀ ни ви́дъ , є҆гда̀ стражда́ше . но вᲂскр҃съ прᲂвᲂзсїѧ̀ , ᲂу҆до́бривъ челᲂвѣ́ки бжⷭ҇твеными зарѧ́ми .

Во́льнаѧ ᲂу҆́стъ мᲂи́хъ бл҃гᲂвᲂли́ же гдⷭ҇и , и҆ сꙋдьба́мъ твᲂи́мъ наꙋчи́ мѧ дш҃а мᲂѧ̀ в̾ рꙋ́кꙋ твᲂе́ю вы́нꙋ , и҆ зако́на твᲂегѡ̀ незабы́хъ . За́йде пло́тїю в̾ зе́млю , свѣ́те невече́рнїи . и҆ нетерпѧ̀ зрѣ́ти со́лнце пᲂме́рче , пᲂлꙋ́дне и҆ є҆щѐ сꙋ́щи .

Пᲂлᲂжи́ша грѣ́шницы сѣ́ть мнѣ̀ , и҆ ѿ запᲂвѣде́й твᲂи́хъ незаблꙋди́хъ . наслѣ́дᲂвах̾ свидѣ́нїѧ твᲂѧ̀ во́ вѣки , ꙗ҆́кѡ ра́дᲂванїе срⷣца мᲂегѡ̀ сꙋ́ть . Сл҃нце в̾кꙋ́пѣ и҆ лꙋна̀ пᲂме́ркше сп҃се , рабо́мъ бл҃гᲂразꙋ́мнымъ пᲂдᲂблѧ́хꙋсѧ , и҆́же въ че́рны ѻ҆де́жды ѡ҆блача́тсѧ .

Приклᲂни́хъ срⷣце мᲂѐ , сᲂтвᲂри́ти ѡ҆правда́нїѧ твᲂѧ̀ , въ вѣ́къ за вᲂз̾даѧ́нїе . закᲂнᲂпрестꙋ́пныѧ вᲂз̾ненави́дѣхъ , зако́нъ же тво́й вᲂз̾люби́хъ . Оу҆снꙋ́лъ є҆сѝ ма́лѡ , ѡ҆живи́лъ є҆сѝ ᲂу҆ме́ршїѧ , и҆ вᲂскр҃съ , вᲂскреси́лъ є҆сѝ всѧ̀ спѧ́щїѧ ѿ́ вѣка бл҃же .

Пᲂмо́щникъ мо́й , и҆ застꙋ́пникъ мо́й є҆сѝ ты̀ , на слᲂвеса̀ твᲂѧ̀ ᲂу҆пᲂва́хъ . ᲂу҆клᲂни́тесѧ ѿ менѐ лꙋка́внꙋющїи , и҆ и҆спыта́ю за́пᲂвѣди бг҃а мᲂегѡ̀ . Ꙗ҆́кᲂже неꙗ҆́сыть ᲂу҆ѧ́звенъ в̾ ре́бра твᲂѧ̀ сло́ве . ѻ҆́трᲂки свᲂѧ̀ ᲂу҆ме́ршїѧ ѡ҆живи́лъ є҆сѝ , и҆ска́пивъ внꙋ́трь стрꙋѝ жи́зненыѧ .

Застꙋпи́ мѧ по слᲂвесѝ твᲂемꙋ̀ , и҆ жи́въ бꙋ́дꙋ . и҆ непᲂсрамѝ менѐ ѿ ча́ѧнїѧ мᲂегѡ̀ . пᲂмᲂзи́ ми и҆ спасꙋ́сѧ , и҆ пᲂꙋчꙋ́сѧ во ѡ҆правда́нїихъ твᲂи́хъ вы́нꙋ . Сл҃нце пре́жде ᲂу҆ста́ви и҆сꙋ́съ , и҆нᲂплеме́нники сѣкі́и , ты́же съкры́сѧ , низ̾лага́ѧ тмѣ̀ нача́льника .

Оу҆ничижи́лъ є҆сѝ всѣ́хъ ѿстꙋпа́ющихъ ѿ ѡ҆правда́нїи твᲂи́хъ , ꙗ҆́кѡ непра́ведно пᲂмышле́нїе и҆́хъ . престꙋпа́ющихъ непщева́хъ всѧ̀ грѣ́шныѧ землѝ , сегѡ̀ ра́ди вᲂзлюби́хъ свидѣ́нїѧ твᲂѧ̀ . Прїи́де и҆ распѧ́сѧ , и҆́же на вᲂда́хъ зе́млю пᲂвѣ́шеи , и҆ ꙗ҆́кѡ без̾дыха́ненъ въ не́й вᲂз̾лега́етъ , и҆́же нетерпѧ́щи кᲂлеба́шесѧ лю́тѣ .

Пригвᲂздѝ ѿ́ страха твᲂегѡ̀ пло́ти мᲂѧ̀ , ѿ сꙋде́бъ бо твᲂи́хъ ᲂу҆бᲂѧ́хсѧ . сᲂтвᲂри́хъ сꙋ́дъ и҆ пра́вдꙋ , не преда́ждь менѐ ѡ҆би́дѧщимъ мѧ̀ . И҆з̾ нѣ́дръ ѻ҆те́ческихъ не и҆схо́денъ пребы́сть ще́дре , чл҃къ бы́ти и҆зво́лилъ є҆сѝ , и҆ во а҆́дъ сни́де хрⷭ҇тѐ .

Вᲂспрїимѝ раба̀ твᲂегѡ̀ во́ бл҃го , да не ѡ҆клевета́ютъ менѐ го́рдїи . ѻ҆́чи мᲂѝ ѡ҆скꙋдѣ́ша во спасе́нїе твᲂѐ , и҆ въ сло́во пра́вды твᲂеѧ̀ .= Оу҆жасе́сѧ ви́дѣвъ свѣ́тъ чꙋ́вственыи , неви́димагѡ свѣ́та тѧ̀ хрⷭ҇тѐ мо́й , во́ грᲂбѣ сᲂкрыва́ема без̾ дыха́нїѧ .=

Сᲂтвᲂрѝ с̾ рабо́мъ твᲂи́мъ по млⷭ҇ти твᲂе́й , и҆ ѡ҆правда́нїемъ твᲂи́мъ наꙋчи́ мѧ . ра́бъ тво́й є҆́смь а҆́зъ , вразꙋми́ мѧ , и҆ ᲂу҆вѣ́мъ свидѣ́нїѧ твᲂѧ̀ . Оу҆ѧзвлѧ́юсѧ лю́то , вᲂзᲂпѝ ро́ждьшаѧ тѧ̀ , є҆гда̀ на крⷭ҇тѣ́ тѧ ᲂу҆зрѣ̀ прᲂбᲂда́ема в̾ ре́бра кᲂпїе́мъ .

Вре́мѧ сᲂтвᲂри́ти гдⷭ҇ви , разᲂри́ша зако́нъ тво́й . сегѡ̀ ра́ди вᲂз̾люби́хъ за́пᲂвѣди твᲂѧ̀ , па́че зла́та и҆ тᲂпа́зїѧ . Пла́каше го́рько , пренепᲂро́чнаѧ мт҃и твᲂѧ̀ сло́ве , є҆гда̀ во́ грᲂбѣ ви́дѣ тебѐ , без̾нача́льнагѡ и҆ нетлѣ́ннагѡ бг҃а .

Сегѡ̀ ра́ди ко всѣ́мъ за́пᲂвѣдемъ твᲂи́мъ направлѧ́хсѧ , всѧ́къ пꙋ́ть не пра́вды вᲂз̾ненави́дѣхъ . ди́вна свидѣ́нїѧ твᲂѧ̀ , сегѡ̀ ра́ди и҆спыта́етъ ѧ҆̀ дш҃а мᲂѧ̀ . Ме́ртвᲂсть твᲂю̀ , пренепᲂро́чнаѧ мт҃и твᲂѧ̀ зрѧ́щи , го́рько к̾ тебѣ̀ вѣща́ше , некᲂснѝ живᲂтѐ в̾ ме́ртвыхъ .

Ꙗ҆вле́нїе слᲂве́съ твᲂи́хъ , прᲂсвѣща́етъ и҆ вразꙋмлѧ́етъ младе́нца . ᲂу҆ста̀ мᲂѧ̀ ѿверзо́хъ и҆ привлеко́хъ дх҃ъ , занѐ за́пᲂвѣди твᲂѧ̀ жела́хъ . А҆́дъ лю́тыи пᲂтрепета̀ , є҆гда́ тѧ ви́дѣ сл҃нца сла́вы без̾сме́ртне , и҆з̾дава́ше ᲂу҆́зники то́щно .

Сла́ва ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ . Без̾нача́льне бж҃е , сᲂприснᲂсꙋ́щне сло́ве , и҆ дꙋ́ше ст҃ы́и , хᲂрꙋ́гви правᲂсла́вныхъ цр҃е́й ᲂу҆крѣпѝ на ра́тныѧ , ꙗ҆́кѡ бла́гъ .

И҆ ны́нѣ и҆ прⷭ҇нѡ и҆ во́ вѣки вѣкѡ́мъ , а҆ми́нь . Жи́знь ро́ждьшаѧ , всенепᲂро́чнаѧ чи́стаѧ дв҃о , ᲂу҆тᲂлѝ цр҃ко́вныѧ сᲂбла́зны , и҆ пᲂда́ждь смире́нїе .

А҆ллилꙋ́їѧ , а҆ллилꙋ́їѧ , сла́ва тебѣ̀ бж҃е , три́жды , съ припѣ́вы : =Дᲂсто́йнѡ є҆́сть велича́ти тѧ̀ , живᲂда́вче хрⷭ҇тѐ , врата̀ а҆́дᲂва сте́ршагѡ , и҆ наси́лїе дїѧ́вᲂле разо́ршагѡ .=

тре́тїе статїѐ , пᲂе́тъ і҆єре́й є҆ди́нᲂщи : Ро́ди всѝ пѣ́снь , пᲂгребе́нїю твᲂемꙋ̀ прино́симъ ще́дре .

При́зри намѧ̀ и҆ пᲂми́лꙋй мѧ , по сꙋдꙋ̀ лю́бѧщихъ и҆́мѧ твᲂѐ . Ро́ди всѝ пѣ́снь , пᲂгребе́нїю твᲂемꙋ̀ прино́симъ ще́дре .

Стᲂпы̀ мᲂѧ̀ напра́ви по слᲂвесѝ твᲂемꙋ̀ , и҆ да не ѡ҆дᲂлѣ́етъ ми всѧ́ко без̾зако́нїе . Ро́ди всѝ сп҃се , вᲂспѣва́емъ стра́сти твᲂѧ̀ честны́ѧ .

И҆зба́ви мѧ ѿ клеветы̀ чл҃ческїѧ , и҆ сᲂхраню̀ за́пᲂвѣди твᲂѧ̀ . лицѐ твᲂѐ прᲂсвѣтѝ на раба̀ твᲂегѡ̀ , и҆ наꙋчи́ мѧ ѡ҆правда́нїемъ твᲂи́мъ . Грѧдѝ всѧ̀ тва́рь , пѣ́сни и҆схо́дныѧ принесе́мъ зижди́телю .

И҆схо́дища вᲂдна́ѧ и҆зведо́стѣ ѻ҆́чи мᲂѝ , пᲂне́же не сᲂхрани́хъ зако́на твᲂегѡ̀ . пра́веденъ є҆сѝ гдⷭ҇и , и҆ пра́въ сꙋ́дъ тво́й . запᲂвѣ́далъ є҆сѝ пра́вдꙋ свидѣ́нїѧ твᲂѧ̀ , и҆ и҆́стинꙋ ѕѣлѡ̀ . Ꙗ҆́кѡ ме́ртва жива́гѡ съ мѷрᲂно́сицами , мѵ́рᲂмъ пᲂма́жемъ мꙋ́дрено .

И҆ста́ѧла мѧ є҆́сть ре́внᲂсть твᲂѧ̀ , ꙗ҆́кѡ забы́ша слᲂвеса̀ твᲂѧ̀ вразѝ мᲂѝ . раз̾жже́но сло́во твᲂѐ ѕѣлѡ̀ , и҆ ра́бъ тво́й вᲂз̾любѝ є҆̀ . І҆ѡ́сифе треблаже́нне , спрѧ́тай тѣ́ло хрⷭ҇та̀ жизнᲂда́вца .

Ю҆́нѣйшїи а҆́зъ є҆́смь и҆ ᲂу҆ничиже́нъ , ѡ҆правда́нїи твᲂи́хъ незабы́хъ . пра́вда твᲂѧ̀ пра́вда во́ вѣки , и҆ зако́нъ тво́й и҆́стина . Живᲂда́вче сп҃се , сла́ва держа́вѣ твᲂе́й , а҆́дъ разо́ршей .

Ско́рби и҆ нꙋ́жды ѡ҆брѣто́ша мѧ̀ , за́пᲂвѣди твᲂѧ̀ пᲂꙋче́нїе мᲂѐ . пра́вда свидѣ́нїѧ твᲂѧ̀ в̾ вѣ́къ , вразꙋми́ мѧ и҆ жи́въ бꙋ́дꙋ . Гᲂра̀ тꙋ́чнаѧ , пречи́стаѧ тѧ̀ сло́ве , матерелѣ́пнѡ пла́каше .

Вᲂз̾ва́хъ всѣ́мъ срⷣцемъ мᲂи́мъ , ᲂу҆слы́ши мѧ гдⷭ҇и , ѡ҆правда́нїи твᲂи́хъ взыщꙋ̀ . вᲂз̾ва́хъ ти спаси́ мѧ , и҆ сᲂхраню̀ свидѣ́нїѧ твᲂѧ̀ . Пла́чь спᲂдвиза́ше ро́ждьшаѧ тѧ , тебѣ̀ сло́ве ᲂу҆ме́ршꙋ .

Пред̾вари́хъ в̾ без̾го́дїи и҆ вᲂз̾ва́хъ , на слᲂвеса̀ твᲂѧ̀ ᲂу҆пᲂва́хъ . пред̾вари́стѣ ѻ҆́чи мᲂѝ ко ᲂу҆́трꙋ , пᲂꙋчи́тисѧ слᲂвесе́мъ твᲂи́мъ . Жены̀ с̾ мѵ́рᲂмъ прїидо́ша пᲂма́зати хрⷭ҇та̀ , бжⷭ҇твенаго ми́ра .

Гла́съ мо́й ᲂу҆слы́ши гдⷭ҇и , по млⷭ҇ти твᲂе́й и҆ по сꙋдьбѣ̀ твᲂе́й живи́ мѧ . прибли́жиша гᲂнѧ́щїи мѧ без̾зако́нїе , ѿ зако́на же твᲂегѡ̀ ᲂу҆дали́шасѧ . Сме́рть сме́ртїю ᲂу҆мертви́лъ є҆сѝ бж҃е мо́й , бжⷭ҇твенᲂю вла́стїю свᲂе́ю .

Бли́зъ є҆сѝ ты̀ гдⷭ҇и , и҆ всѝ пꙋтїѐ твᲂѝ и҆́стина . и҆спе́рва пᲂзна́хъ ѿ свидѣ́нїи твᲂи́хъ , ꙗ҆́кѡ во́ вѣки ѡ҆снᲂва́лъ ѧ҆̀ є҆сѝ . Прельсти́сѧ преле́стникъ , прельсти́выисѧ и҆збавлѧ́етсѧ , премꙋ́дрᲂстїю твᲂе́ю бж҃е мо́й .

Ви́ждь смире́нїе мᲂѐ и҆ и҆зми́ мѧ , ꙗ҆́кѡ зако́на твᲂегѡ̀ не забы́хъ . сꙋдѝ сꙋ́дъ мо́й и҆ и҆зба́ви мѧ , ра́ди слᲂвесѐ твᲂегѡ̀ живи́ мѧ . Ѻ҆цто́мъ напᲂе́нъ бы́сть и҆ же́лчїю ще́дре , дре́внее разрѣша́ѧ вкꙋше́нїе .

Дале́че ѿ грѣ́шникъ спасе́нїе , ꙗ҆́кѡ ѡ҆правда́нїи твᲂи́хъ не взыска́ша . щедро́ты твᲂѧ̀ мно́ги гдⷭ҇и , по сꙋдьбѣ̀ твᲂе́й живи́ мѧ . На крⷭ҇тѣ̀ пригвᲂжде́нъ бы́сть , и҆́же дре́вле лю́ди свᲂѧ̀ , стᲂлпо́мъ ѻ҆́блачнымъ пᲂкрыва́ѧ .

Мно́зи гᲂнѧ́щїи мѧ̀ и҆ стꙋжа́ющїи ми , ѿ свидѣ́нїи твᲂи́хъ не ᲂу҆клᲂни́хсѧ . ви́дѣхъ неразꙋмѣва́ющїѧ и҆ и҆ста́ѧхъ , ꙗ҆́кѡ слᲂве́съ твᲂи́хъ не сᲂхрани́ша . Мѷрᲂно́сицы сп҃се ко́ грᲂбꙋ прише́дше , мѵ́рѡ принесо́ша тѝ .

Ви́ждь ꙗ҆́кѡ за́пᲂвѣди твᲂѧ̀ вᲂз̾люби́хъ гдⷭ҇и , по млⷭ҇ти твᲂе́й живи́ мѧ . нача́ло слᲂве́съ твᲂи́хъ и҆́стина , и҆ во́ вѣки всѧ̀ сꙋдьбы̀ пра́вды твᲂеѧ̀ . Вᲂста́ни ще́дре , ѿ ѡ҆снᲂва́нїи а҆́дскихъ , вᲂскреша́ѧ на́съ .

Кнѧ́зи пᲂгна́ша мѧ тꙋ́не , и҆ ѿ слᲂве́съ твᲂи́хъ ᲂу҆страши́сѧ срⷣце мᲂѐ . вᲂз̾ра́дꙋюсѧ а҆́зъ ѡ҆ слᲂвесѣ́хъ твᲂи́хъ , ꙗ҆́кѡ ѡ҆брѣта́ѧи кᲂры́сть мно́гꙋ . Вᲂскреснѝ живᲂда́вче , сле́зы тᲂча́щи глаго́лаше ро́ждьшаѧ тѧ̀ .

Не пра́вдꙋ вᲂз̾ненави́дѣхъ и҆ ѡ҆ме́рзѣ мѝ , зако́нъ же тво́й вᲂз̾люби́хъ . седми́жды дне́мъ хвали́хъ тѧ̀ , ѡ҆ сꙋдьба́хъ пра́вды твᲂеѧ̀ . Пᲂтщи́сѧ вᲂскреснꙋ́ти , печа́ль разрѣша́ѧ сло́ве , чи́стѡ ро́ждьшей тѧ̀ .

Ми́ръ мно́гъ лю́бѧщимъ зако́нъ тво́й , и҆ нѣ́сть и҆́мъ сᲂбла́знъ . ча́ѧхъ спасе́нїе твᲂѐ гдⷭ҇и , и҆ за́пᲂвѣди твᲂѧ̀ вᲂз̾люби́хъ . Во́ грᲂбѣ пᲂлᲂже́нъ бы́сть , и҆ ме́ртвъ ви́дѣнъ бы́сть живо́тъ всѣ́хъ .

Сᲂхранѝ дш҃а мᲂѧ̀ свидѣ́нїѧ твᲂѧ̀ , и҆ вᲂз̾любѝ ѧ҆̀ ѕѣлѡ̀ . сᲂхрани́хъ за́пᲂвѣди твᲂѧ̀ , и҆ свидѣ́нїѧ твᲂѧ̀ , ꙗ҆́кѡ всѝ пꙋтїѐ мᲂѝ пред̾ тᲂбо́ю гдⷭ҇и . Нбⷭ҇ныѧ си́лы ᲂу҆диви́шасѧ стра́хᲂмъ , ме́ртва тѧ̀ зрѧ́ще .

Да прибли́житсѧ мл҃тва мᲂѧ̀ пред̾ тѧ̀ гдⷭ҇и , по слᲂвесѝ твᲂемꙋ̀ вразꙋми́ мѧ . да вни́детъ прᲂше́нїе мᲂѐ пред̾ тѧ̀ гдⷭ҇и , по слᲂвесѝ твᲂемꙋ̀ и҆зба́ви мѧ . Ꙗ҆́кѡ ме́ртвꙋ мѵ́рѡ принесо́ша жены̀ , пᲂма́зати тѣ́ло твᲂѐ .

Да ѿры́гнꙋтъ ᲂу҆стнѣ̀ мᲂѝ пѣ́нїе , є҆гда̀ наꙋчи́ши мѧ̀ ѡ҆правда́нїемъ твᲂи́мъ . да прᲂвѣща́етъ ꙗ҆зы́къ мо́й слᲂвеса̀ твᲂѧ̀ , занѐ всѧ̀ за́пᲂвѣди твᲂѧ̀ пра́вда . Рыда́етъ и҆ пла́четъ тѧ̀ пречⷭ҇таѧ , мт҃и твᲂѧ̀ сп҃се и҆ бж҃е мо́й .

Да бꙋ́детъ рꙋка̀ твᲂѧ̀ спаса́ющи мѧ̀ , ꙗ҆́кѡ за́пᲂвѣди твᲂѧ̀ и҆зво́лихъ , вᲂз̾желѣ́хъ спасе́нїе твᲂѐ гдⷭ҇и , и҆ зако́нъ тво́й пᲂꙋче́нїе мᲂѐ є҆́сть . Любо́вїю и҆ стра́хᲂмъ , стра́сти твᲂѧ̀ пᲂчита́ющимъ , пᲂда́ждь сᲂгрѣше́нїемъ разрѣше́нїе .

Жива̀ бꙋ́детъ дш҃а мᲂѧ̀ и҆ вᲂсхва́литъ тѧ̀ , и҆ сꙋдьбы̀ твᲂѧ̀ пᲂмо́гꙋтъ мнѣ̀ . заблꙋди́хъ ꙗ҆́кѡ ѻ҆вча̀ пᲂги́бшее , взыщѝ раба̀ твᲂегѡ̀ , ꙗ҆́кѡ запᲂвѣде́й твᲂи́хъ не забы́хъ . Смире́нїе цр҃кви , и҆ лю́демъ спасе́нїе , да́рꙋй вᲂскрⷭ҇нїемъ свᲂи́мъ .

Сла́ва ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ , и҆ ны́нѣ и҆ прⷭ҇нѡ и҆ во́ вѣки вѣкѡ́мъ , а҆ми́нь .

та́же пᲂе́мъ , трᲂпарѝ сїѧ̀ . гла́съ , є҃ . =Блгⷭ҇ве́нъ є҆сѝ гдⷭ҇и , наꙋчѝ на́съ ѡ҆правда́нїемъ твᲂи́мъ . А҆́=нг҃льскїи сᲂбо́ръ ᲂу҆диви́сѧ , зрѧ̀ тебѐ в̾ ме́ртвыхъ вмѣ́ньшасѧ . сме́ртнꙋю же сп҃се крѣ́пᲂсть разо́рша , и҆ съ сᲂбо́ю а҆да́ма вᲂз̾дви́гша , и҆ ѿ а҆́да всѧ̀ свᲂбо́ждьша .

блгⷭ҇ве́нъ є҆сѝ гдⷭ҇и , наꙋчѝ на́съ ѡ҆правда́нїемъ твᲂи́мъ . Пᲂчто̀ мѵ́рѡ , съ ми́лᲂстивыми слеза́ми , ѽ ᲂу҆чени́цы и҆злива́ете , блиста́ѧсѧ на́ грᲂбѣ а҆́нг҃лъ , мѷрᲂно́сицамъ вѣща́ше , ви́дите вы̀ гро́бъ то́щь и҆ разꙋмѣ́йте , сп҃съ бо вᲂскр҃се ѿ́ грᲂба .

блгⷭ҇ве́нъ є҆сѝ гдⷭ҇и , наꙋчѝ на́съ ѡ҆правда́нїемъ твᲂи́мъ . Ѕѣлѡ̀ ра́нѡ , мѷрᲂно́сицы теча́хꙋ , на́ грᲂбъ рыда́юще . но пред̾ста̀ к̾ ни́мъ а҆́нг҃лъ и҆ речѐ , рыда́нїю вре́мѧ преста̀ непла́читесѧ . вᲂскрⷭ҇нїе же а҆пⷭ҇лѡмъ рцѣ́те .

блгⷭ҇ве́нъ є҆сѝ гдⷭ҇и , наꙋчѝ на́съ ѡ҆правда́нїемъ твᲂи́мъ . Мѷрᲂно́сицы жены̀ , съ ми́рᲂмъ прише́дше , ко́ грᲂбꙋ твᲂемꙋ̀ сп҃се рыда́юще . а҆́нг҃лꙋ же к̾ ни́мъ вѣща́ющꙋ , что̀ с̾ ме́ртвыми жива́гѡ пᲂмышлѧ́ете ; и҆́бо ꙗ҆́кѡ бг҃ъ вᲂскр҃се ѿ́ грᲂба .

сла́ва . Пᲂклᲂни́мсѧ ѻ҆ц҃ꙋ , и҆ тᲂгѡ̀ сн҃ᲂви и҆ ст҃о́мꙋ дх҃ꙋ , ст҃ѣ́й трⷪ҇цѣ во є҆ди́нᲂмъ сꙋществѣ̀ . с̾ серафи́ми зᲂвꙋ́ще , ст҃ъ , ст҃ъ , ст҃ъ є҆сѝ гдⷭ҇и .

и҆ ны́нѣ . Жизнᲂда́вца ро́ждьши , ѿ грѣха̀ дв҃це а҆да́ма и҆зба́вила є҆сѝ . ра́дᲂсть же є҆́ввѣ , в̾ печа́ли мѣ́сто дарᲂва̀ , ѿпа́дшей жи́зни . тѣ́мъ па́ки къ то́й вᲂз̾во́дитъ , и҆з̾ тебѐ вᲂплᲂти́выисѧ бг҃ъ и҆ чл҃къ . А҆ллилꙋ́їѧ , а҆ллилꙋ́їѧ , сла́ва тебѣ̀ бж҃е , гⷤ .

та́же , є҆ктенїѧ̀ , ма́лаѧ .= вᲂз̾гла́съ : Т=ы́ бо є҆сѝ цр҃ь ми́рꙋ хрⷭ҇тѐ бж҃е на́шъ , и҆ тебѣ̀ сла́вꙋ вᲂзсыла́емъ , со без̾нача́льнымъ ти ѻ҆ц҃е́мъ , и҆ с̾ прⷭ҇ты́мъ бл҃ги́мъ , и҆ живᲂтвᲂрѧ́щимъ тѝ дх҃ᲂмъ , ны́нѣ и҆ прⷭ҇нѡ , и҆ во́ вѣки вѣко́мъ .

сѣда́ленъ . гла́съ , д҃ . Сᲂдержа́и всю̀ вселе́ннꙋю , в̾ ме́ртвыхъ вмѣнѧ́етсѧ . и҆ во а҆́дъ сᲂше́дъ , без̾сме́ртїе да́рꙋетъ , и҆́же ѿ́ вѣка тꙋ̀ спѧ́щимъ . сла́ва , и҆ ны́нѣ . гла́съ , а҃ . Оу҆жасо́шасѧ ли́цы а҆́нг҃льстїи , зрѧ́ще сѣдѧ́щагѡ въ нѣ́дрѣхъ ѻ҆́ч҃ихъ , ка́кѡ во́ грᲂбъ пᲂлага́етсѧ ꙗ҆́кѡ ме́ртвыи без̾сме́ртныи . є҆го́же чи́ни а҆́нг҃льстїи ѡ҆крꙋжа́ютъ и҆ сла́вѧтъ , съ ме́ртвыми во а҆́дѣ , ꙗ҆́кѡ сᲂзда́телѧ и҆ гдⷭ҇а . вᲂскрⷭ҇нїе же хрⷭ҇то́во , негл҃емъ . но а҆́бїе , ѱало́мъ , н҃ .= Кано́нъ , дню̀ . твᲂре́нїе ма́рка мни́ха . є҆мꙋ́же краегране́сїе : и҆ дне́сь же сꙋбо́тꙋ пᲂю̀ вели́кꙋю . і҆рмо́съ , по двⷤа . трᲂпарѝ , на в҃і . пᲂслѣдѝ і҆рмо́съ , ѻ҆́ба ли́ка в̾кꙋ́пѣ . гла́съ , ѕ҃ . пѣ́снь , а҃ . і҆рмо́съ . В=ᲂлно́ю мᲂрско́ю скры́вшагѡ дре́вле , гᲂни́телѧ мꙋчи́телѧ , пᲂд̾ земле́ю скры́ша , спасе́ныхъ дѣ́ти . но мы̀ ꙗ҆́кѡ ѻ҆трᲂкᲂви́ца гдⷭ҇ви пᲂе́мъ , сла́вно бо прᲂсла́висѧ .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Гдⷭ҇и бж҃е мо́й , и҆схо́днᲂе пѣ́нїе , и҆ над̾гро́бнꙋю тѝ пѣ́снь вᲂспᲂе́мъ , є҆́же пᲂгребе́нїемъ твᲂи́мъ жи́зни мᲂеѧ̀ вхо́ды ѿве́рзшемꙋ , и҆ сме́ртїю сме́рть разо́ршемꙋ , и҆ а҆́да ᲂу҆мертви́вшемꙋ . Гᲂрѣ̀ тѧ̀ на престо́лѣ преми́рнаѧ , и҆ до́лꙋ во́ грᲂбѣ пᲂд̾земна́ѧ ви́дѧще сп҃се мо́й , зыблѧ́хꙋсѧ ᲂу҆мерщве́нїемъ твᲂи́мъ , па́че ᲂу҆ма́ бо ви́дѣнъ бы́сть мертве́цъ живᲂтꙋ̀ нача́льникъ . Да твᲂеѧ̀ сла́вы всѧ̀ и҆спо́лниши , сше́лъ є҆сѝ в̾ ни́жнѧѧ землѝ и҆ пᲂгре́бсѧ . и҆ нескры́сѧ ᲂу҆́бѡ ѿ тебѐ сᲂста́въ мо́й и҆́же во а҆́дѣ , и҆ и҆стлѣ́вша мѧ̀ , но́ва твᲂри́ши чл҃кᲂлю́бче .

пѣ́снь , г҃ . і҆рмо́съ . Тебѣ̀ на вᲂда́хъ пᲂвѣ́сившагѡ всю̀ зе́млю не ѡ҆держи́мѡ , тва́рь ви́дѣвши на ло́бнѣмъ ви́сѧща , ᲂу҆́жасᲂмъ ѡ҆держи́ма бѣ , нѣ́сть ст҃а ра́звѣ тебѐ гдⷭ҇и взыва́юща . Ѻ҆́бразы пᲂгребе́нїѧ твᲂегѡ̀ пᲂказа́лъ є҆сѝ , видѣ́нїѧ ᲂу҆мно́живъ ны́нѣ же сᲂкрᲂве́нныѧ твᲂѧ̀ та́йны , бг҃ᲂмꙋ́жнѡ ᲂу҆ѧсни́лъ є҆сѝ , и҆ во а҆́дѣ сꙋ́щимъ влⷣко . нѣ́сть ст҃а ра́звѣ тебѐ чл҃кᲂлю́бче . Прᲂсте́рлъ є҆сѝ на́ древѣ дла́ни свᲂѝ сп҃се , и҆ сᲂвᲂкꙋпи́лъ є҆сѝ ꙗ҆́же дре́вле раз̾стᲂѧ́щїѧсѧ , ѡ҆дѣѧ́нїемъ є҆́же во плащани́цѣ и҆ во́ грᲂбѣ , ѡ҆кᲂва́нныѧ разрѣши́лъ є҆сѝ , нѣ́сть ст҃а ра́звѣ тебѐ чл҃кᲂлю́бче . Гро́бᲂмъ и҆ печа́тьми , невмѣсти́ме сᲂдержи́мъ є҆сѝ бы́лъ хᲂтѣ́нїемъ . и҆́бо си́лꙋ свᲂю̀ дѣ́йствы пᲂказа́лъ є҆сѝ , бл҃гᲂдѣ́тельнѡ пᲂю́щимъ , нѣ́сть ст҃а ра́звѣ тебѐ чл҃кᲂлю́бче .

сѣда́ленъ . гла́съ , а҃ . Гро́бъ тво́й сп҃се , во́ини стрегꙋ́ще , ме́ртви бы́ша , ѿ ѡ҆блиста́нїѧ ꙗ҆́вльшагᲂсѧ а҆́нг҃ла , прᲂпᲂвѣ́дающа жена́мъ вᲂскрⷭ҇нїе . тебѐ сла́вимъ тлѝ пᲂтреби́телѧ . тебѣ̀ припа́даемъ вᲂскрⷭ҇шемꙋ и҆́з̾ грᲂба , є҆ди́нᲂмꙋ бг҃ꙋ на́шемꙋ . сла́ва , и҆ ны́нѣ . Плащани́цею чи́стᲂю тѣ́ло и҆спрᲂси́въ ᲂу҆ пила́та , мѵ́рᲂмъ пᲂмазꙋ́етъ и҆ пᲂлага́етъ і҆ѡ́сифъ в̾ но́вᲂмъ гро́бѣ . тѣ́мже ᲂу҆ра́нше мѷрᲂно́сицы жены̀ , вᲂзᲂпи́ша , пᲂкажѝ на́мъ , ꙗ҆́кᲂже пред̾ре́клъ є҆сѝ хрⷭ҇тѐ вᲂскрⷭ҇нїе .

пѣ́снь , д҃ . і҆рмо́съ . Є҆́же на крⷭ҇тѣ̀ твᲂѐ бжⷭ҇твеннᲂе смире́нїе , прᲂви́дѧ а҆вва́кꙋмъ , ᲂу҆жа́сно вᲂпїѧ́ше , ты̀ си́льныхъ с̾сѣчѐ держа́вꙋ бл҃гі́и , прїѡбщи́всѧ сꙋ́щимъ во а҆́дѣ , ꙗ҆́кѡ всеси́ленъ . Седьмы́и де́нь дне́сь ѡ҆ст҃и́лъ є҆сѝ , є҆го́же дре́вле бл҃гᲂслᲂви́лъ є҆сѝ ᲂу҆пᲂкᲂе́нїемъ дѣ́лъ . прево́диши бо всѧ́ческаѧ и҆ ѡ҆бнᲂвлѧ́еши , препᲂчива́ѧ сп҃се мо́й и҆ назида́ѧ . Си́лᲂю лꙋ́чшею ѡ҆дᲂлѣ́вшꙋ тебѣ̀ , ѿ́ плᲂти твᲂеѧ̀ дш҃а раздѣли́сѧ . растерза́ющи сꙋгꙋ́бѡ ᲂу҆́зы сме́рти и҆ а҆́дꙋ , сло́ве держа́вᲂю твᲂе́ю . А҆́дъ сло́ве срѣ́тъ тѧ̀ ѡ҆гᲂрчи́сѧ , чл҃ка зрѧ̀ ѡ҆бᲂже́на , ᲂу҆ѧ́звена же ра́нами , и҆ всеси́льна дѣ́телїю , стра́шнымъ же си́мъ ѻ҆́бразᲂмъ ᲂу҆бїе́нъ бы́сть .

пѣ́снь , є҃ . і҆рмо́съ . Бг҃ᲂѧвле́нїѧ ти хрⷭ҇тѐ , є҆́же к̾ на́мъ ми́лᲂстивнѡ бы́вшагѡ , и҆са́їѧ свѣ́тъ ви́дѧ невече́рнїи , и҆з̾ нᲂщѝ ᲂу҆́треннюѧ взыва́ше , вᲂскре́снꙋтъ ме́ртвїи и҆҆ вᲂста́нꙋтъ и҆́же во грᲂбѣ́хъ , и҆҆ всѝ и҆́же на землѝ вᲂз̾ра́дꙋютсѧ . Ѡ҆бнᲂвлѧ́еши земны́ѧ сᲂдѣ́телю , зе́мленъ бы́въ , и҆ плащани́ца и҆ гро́бъ ꙗ҆влѧ́ютъ є҆́же в̾ тебѣ̀ сло́ве та́инство . бл҃гᲂѡ҆бра́зныи бо сᲂвѣ́тникъ тебѐ ро́ждьшагᲂсѧ сᲂвѣ́тъ ѡ҆бразꙋ́етъ въ тебѣ̀ велелѣ́пнѡ , нᲂвᲂтвᲂрѧ́ща мѧ̀ . Сме́ртїю сме́ртнᲂе , и҆ пᲂгребе́нїемъ тлѣ́ннᲂе ѡ҆бнᲂвлѧ́еши , нетлѣ́ннѡ твᲂри́ши бг҃ᲂлѣ́пнѡ без̾сме́ртнѡ твᲂрѧ̀ прїѧ́тїе . пло́ть бо твᲂѧ̀ и҆стлѣ́нїѧ неви́дѣ влⷣко , ни дш҃а твᲂѧ̀ во а҆́дѣ страшнᲂлѣ́пнѡ не ѡ҆ста́влена бы́сть . И҆з̾ небра́чныѧ прᲂше́дъ , и҆ прᲂбᲂде́нъ в̾ ре́бра сᲂдѣ́телю мо́й , и҆з̾ ни́хъ сᲂдѣ́лалъ є҆сѝ ѡ҆бнᲂвле́нїе є҆́в̾вино , а҆да́мъ бы́въ , ᲂу҆снꙋ́въ па́че є҆стества̀ сно́мъ є҆сте́ственымъ . вᲂз̾дви́гнꙋвсѧ ѿ сна̀ и҆ пло́ти тлѣ́нїѧ ꙗ҆́кѡ всеси́ленъ .

пѣ́снь , ѕ҃ . і҆рмо́съ . Ꙗ҆́тъ бы́сть но неꙋде́ржанъ в̾пе́рсѣхъ ки́тᲂвѣхъ і҆ѡ́на , тво́й бо ѻ҆́бразъ нᲂсѧ̀ , пᲂстрада́вша и҆ пᲂгребе́нїю дана̀ , ꙗ҆́кѡ ѿ черто́га ѿ ѕвѣ́рѧ и҆з̾ше́дъ . приглаша́ше же кꙋстᲂді́и , хранѧ́щїи всꙋ́е лжꙋ̀ , млⷭ҇ти ва́шеѧ ѡ҆ста́вили є҆стѐ . Оу҆бїе́нъ бы́сть , но неразлꙋчи́сѧ сло́ве , є҆ѧ́же прїѡбщи́сѧ пло́ти . а҆́ще бо и҆ разᲂри́сѧ хра́мъ во́ времѧ стра́сти , но и҆ та́кѡ є҆ди́нъ небѣ̀ пра́зденъ сᲂста́въ бжⷭ҇тва̀ пло́ти твᲂеѧ̀ , во ѡ҆бᲂи́хъ бо є҆ди́нъ є҆сѝ сн҃ъ сло́во бж҃їе , бг҃ъ и҆ чл҃къ . Чл҃кᲂꙋбі́йствено бы́сть паде́нїе а҆да́мᲂво , но не бг҃ᲂꙋбі́йствено . а҆́ще бо и҆ пᲂстрада̀ твᲂѐ плᲂтьско́е пе́рстнᲂе сꙋщество̀ , но бжⷭ҇тво̀ без̾стра́стно пребы́сть . тлѣ́ннᲂе же в̾ нетлѣ́нїе премѣни́сѧ . и҆ нетлѣ́нныѧ жи́зни пᲂказа́лъ є҆сѝ и҆сто́чникъ вᲂскрⷭ҇нїемъ .= Ц=а́рствꙋетъ а҆́дъ , но невѣ́чнꙋетъ ро́дᲂмъ чл҃ческимъ . ты́бо сп҃се пᲂлᲂжи́сѧ во́ грᲂбѣ , крѣ́пкᲂю и҆ живᲂнача́льнᲂю дла́нїю , сме́рти ключѝ разве́рглъ є҆сѝ . и҆ прᲂпᲂвѣ́далъ є҆сѝ и҆́же ѿ́ вѣка тꙋ̀ спѧ́щимъ , и҆збавле́нїе нело́жнᲂе , бы́въ ме́ртвымъ пе́рвенецъ .

кᲂнда́къ . гла́съ , ѕ҃ . И҆́же бе́зднꙋ затвᲂри́выи ме́ртвъ зри́тсѧ , и҆ зми́рнᲂю и҆ плащани́цею по́витъ . во́ грᲂбѣ пᲂлᲂга́етсѧ , ꙗ҆́кѡ ме́ртвъ без̾сме́ртныи . жены́ же прїидо́ша пᲂма́зати є҆гѡ̀ мѵ́рѡмъ , пла́чꙋще го́рькѡ и҆ вᲂпїю́ще , сїѧ̀ сꙋбо́та є҆́сть пребл҃гᲂслᲂве́ннаѧ , в̾ ню́же хрⷭ҇то́съ ᲂу҆снꙋ́въ , и҆ вᲂскр҃се тридне́внѡ . и҆́кᲂсъ . И҆́же сᲂдержа́и кᲂнцы̀ , на крⷭ҇тъ вᲂзнесе́сѧ , и҆ рыда́етъ всѧ̀ тва́рь , тᲂго̀ ви́дѧщи ви́сѧща на́га на́ древѣ , сл҃нце лꙋчѝ скры̀ , и҆ ѕвѣ́зды ѿлᲂжи́ша свѣ́тъ . землѧ́ же со мно́гимъ стра́хᲂмъ пᲂкᲂлѣба́сѧ , и҆ мо́ре пᲂбѣжѐ , и҆ ка́менїе распаде́сѧ . гро́би же мно́зи ѿверзо́шасѧ . и҆ тѣлеса̀ вᲂста́ша ст҃ы́хъ блиста́ющасѧ , а҆́дъ ни́зꙋ сто́нетъ , і҆ꙋде́и сᲂвѣ́тꙋютъ ѡ҆клевета́ти хрⷭ҇то́во вᲂскрⷭ҇нїе , жены́ же взыва́хꙋ , сїѧ̀ сꙋбо́та преблгⷭ҇ве́ннаѧ , в̾ ню́же хрⷭ҇то́съ ᲂу҆снꙋ́въ , и҆ вᲂскр҃се тридне́внѡ .

пѣ́снь , з҃ . і҆рмо́съ . Неи҆зрече́ннᲂе чꙋ́до и҆́же в̾ пещѝ и҆зба́вивыи , препᲂдо́бныѧ ѻ҆́трᲂки и҆з̾ пла́мени , во́ грᲂбѣ но́вѣ бездꙋ́шенъ пᲂлага́етсѧ , на спасе́нїе на́мъ пᲂю́щимъ , и҆зба́вителю бж҃е бл҃гᲂслᲂве́нъ є҆сѝ . Оу҆ѧ́звенъ бы́сть а҆́дъ в̾ срⷣце , прїе́мъ прᲂбᲂде́наго кᲂпїе́мъ в̾ ре́бра , и҆ вᲂз̾дыха́етъ ѻ҆гне́мъ бжⷭ҇твенымъ снѣда́емь , на спасе́нїе на́мъ пᲂю́щимъ , и҆зба́вителю бж҃е блгⷭ҇ве́нъ є҆сѝ . Бᲂга́тъ гро́бъ , в̾ себѣ́ бо прїе́мъ ꙗ҆́кѡ спѧ́ща сᲂдѣ́телѧ , и҆ жи́зни бжⷭ҇твенᲂе сᲂкро́вище пᲂказа́сѧ , на спасе́нїе на́мъ пᲂю́щимъ , и҆зба́вителю бж҃е блгⷭ҇ве́нъ є҆сѝ . Зако́нᲂмъ ᲂу҆ме́ршихъ є҆́же во́ грᲂбѣ пᲂлᲂже́нїе , ꙗ҆́же всѣ́хъ прїе́млетъ жи́знь . и҆ сегѡ̀ и҆сто́чника пᲂказꙋ́етъ вᲂста́нїю , на спасе́нїе на́мъ пᲂю́щимъ , и҆зба́вителю бж҃е блгⷭ҇ве́нъ є҆сѝ .= Є҆=ди́но бѧ́ше неразлꙋ́чно , є҆́же во а҆́дѣ и҆ во́ грᲂбѣ и҆ во є҆де́мѣ , бжⷭ҇тво̀ хрⷭ҇то́во со ѻ҆ц҃е́мъ и҆ дх҃ᲂмъ , на спасе́нїе на́мъ пᲂю́щимъ , и҆зба́вителю бж҃е блгⷭ҇ве́нъ є҆сѝ .

пѣ́снь , и҃ . і҆рмо́съ . Оу҆жасни́сѧ бᲂѧ́исѧ нб҃о , и҆ да пᲂдви́жатсѧ ѡ҆снᲂва́нїѧ землѝ . сѐ ᲂу҆́бѡ в̾ мертвецѣ́хъ вмѣнѧ́етсѧ и҆́же в̾ вы́шнихъ живы́и , и҆ во́ грᲂбѣ ма́лѣ ѡ҆битᲂва́етъ . є҆го́же дѣ́ти бл҃гᲂслᲂви́те , сщ҃е́ннїи по́йте , и҆ превᲂзнᲂси́те є҆гѡ̀ во́ вѣки . Разрꙋши́сѧ пречи́стыи хра́мъ , па́дшꙋю же вᲂставлѧ́етъ сѣ́нь . а҆да́мꙋ бо пе́рвᲂмꙋ , втᲂры́и и҆́же в̾ вы́шнихъ живы́и сни́де , да́же до а҆́дᲂвыхъ сᲂкро́вищъ . є҆го́же дѣ́ти блгⷭ҇ви́те , сщ҃е́ннїи по́йте , лю́дїе превᲂзнᲂси́те є҆гѡ̀ во́ вѣки . Преста̀ де́рзᲂсть ᲂу҆ченико́мъ , а҆римаѳе́й же пᲂбѣжда́етъ і҆ѡ́сифъ , ме́ртва бо и҆ на́га зрѧ̀ и҆́же надᲂвсѣ́ми бг҃а , про́ситъ и҆ пᲂгреба́етъ , зᲂвы́и , дѣ́ти блгⷭ҇ви́те , сщ҃е́ннїи по́йте , лю́дїе превᲂзнᲂси́те є҆гѡ̀ во́ вѣки . ѽ чꙋде́съ но́выхъ , ѽ бл҃гᲂсти , ѽ неи҆зрече́ннагѡ терпѣ́нїѧ ; сѐ ᲂу҆́бѡ во́лею пᲂд̾ земле́ю пᲂкрыва́етсѧ , и҆́же в̾ вы́шнихъ живы́и . и҆ ꙗ҆́кѡ льсте́цъ ѡ҆клевета́емь быва́етъ бг҃ъ . є҆го́же дѣ́ти блгⷭ҇ви́те , сщ҃е́ннїи по́йте , лю́дїе превᲂзнᲂси́те є҆гѡ̀ во́ вѣки .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Оу҆жасни́сѧ бᲂѧ́исѧ нб҃о .= [пᲂкло́н̾ до землѝ] .=

честнѣ́йшꙋю непᲂе́мъ .

пѣ́снь , ѳ҃ . і҆рмо́съ . Нерыда́й менѐ мт҃и , взира́ющи во́ грᲂбѣ , є҆го́же пло́тїю без̾сѣ́мени зачала̀ є҆́си сн҃а . вᲂста́нꙋ бо и҆ сла́венъ бꙋ́дꙋ , и҆ вᲂзнесꙋ̀ со сла́вᲂю , немо́лчнѡ ꙗ҆́кѡ бг҃ъ , вѣ́рᲂю и҆ любо́вїю тѧ велича́ющїѧ . Въ стра́ннѣмъ ти ржⷭ҇твѣ̀ , бᲂлѣ́зней и҆з̾бѣжа́вши . и҆ па́че є҆стества̀ бл҃же́нна бы́хъ , без̾нача́льне сн҃е . ны́нѣ же тѧ̀ бж҃е мо́й , без̾дыха́нїѧ зрѧ́щи ме́ртва , ѻ҆рꙋ́жїемъ печа́ли растерза́юсѧ лю́тѣ . но вᲂскрⷭ҇нѝ , ꙗ҆́кѡ да вᲂзвели́чꙋсѧ .= З=емлѧ̀ пᲂкрыва́етъ мѧ хᲂтѧ́ща ѽ мт҃и , но ᲂу҆страша́ютсѧ а҆́дᲂвы вра́тницы , ѡ҆дѣ́ѧнна ви́дѧще ѻ҆де́ждею ѡ҆крᲂва́вленнᲂю ѿмще́нїѧ . враги́ бо крⷭ҇то́мъ пᲂпра́въ , ꙗ҆́кѡ бг҃ъ вᲂскрⷭ҇нꙋ̀ а҆́бїе , и҆ прᲂсла́влюсѧ . Да ра́дꙋетсѧ тва́рь , да веселѧ́тсѧ всѝ земнᲂро́днїи , вра́гъ бо плѣне́нъ бы́сть а҆́дъ . съ мѵ́рѡмъ жены̀ да срѣта́ютъ , а҆да́ма со є҆́в̾вᲂю ѿ тлѣ́нїѧ и҆збавлѧ́юща всеро́дна , въ тре́тїи де́нь вᲂскреснꙋ́вша .

задᲂсто́йнѡ : Нерыда́й менѐ мт҃и .= [пᲂкло́н̾ до землѝ] . гла́съ , в҃ . с=т҃ъ гдⷭ҇ь бг҃ъ на́шъ . гⷤ .

На хвали́тѣхъ , стихѣ́ры , на д҃ . гла́съ , в҃ . Дне́сь сᲂдержи́тъ гро́бъ , сᲂдержа́щаго рꙋко́ю тва́рь . и҆ пᲂкрыва́етъ ка́мень , пᲂкры́вшагѡ дᲂбрᲂдѣ́телїю нб҃са̀ . спи́тъ живо́тъ , и҆ а҆́дъ трепе́щетъ , и҆ а҆да́мъ ѿ ᲂу҆́зъ раз̾рѣша́етсѧ . сла́ва твᲂемꙋ̀ смᲂтре́нїю , и҆́мже всѧ̀ сᲂверши́въ , и҆ пᲂко́й вѣ́чныи дарᲂва́лъ є҆сѝ на́мъ ꙗ҆́кѡ бг҃ъ , всест҃ы́мъ и҆з̾ ме́ртвыхъ вᲂскрⷭ҇нїемъ . Что̀ зри́мᲂе видѣ́нїе ; что̀ настᲂѧ́щїи пᲂко́й ; цр҃ь вѣко́мъ и҆́же стрⷭ҇ти ра́ди сᲂверши́въ смᲂтре́нїе , во́ грᲂбѣ сꙋбо́тствꙋетъ , но́во на́мъ пᲂдаѧ̀ сꙋбо́тство . тᲂмꙋ̀ вᲂзᲂпїе́мъ , вᲂскрⷭ҇нѝ бж҃е сꙋдѝ землѝ , ꙗ҆́кѡ ты̀ црⷭ҇твꙋеши во́ вѣки , и҆́же неи҆зрече́ннꙋю и҆мѣ́ѧи ве́лїю млⷭ҇ть . Прїидѣ́те ви́димъ , живо́тъ всѣ́хъ во́ грᲂбѣ лежа́щъ , да и҆́же во грᲂбѣ́хъ лежа́щїѧ ѡ҆живи́тъ . прїидѣ́те дне́сь и҆́же и҆з̾ і҆ꙋ́ды сꙋ́щагѡ спѧ́ща ви́дѧще , прᲂро́чески є҆мꙋ̀ вᲂзᲂпїе́мъ , вᲂзле́гъ ᲂу҆снꙋ́лъ є҆сѝ ꙗ҆́кѡ ле́въ , кто̀ вᲂздви́гнетъ тѧ̀ цр҃ю ; но вᲂста́ни самᲂвла́стнѡ , да́выи себѐ ѡ҆ на́съ во́лею , гдⷭ҇и сла́ва тебѣ̀ . гла́съ , ѕ҃ . Прᲂсѝ і҆ѡ́сифъ тѣ́ло і҆с҃ᲂво , и҆ пᲂлᲂжѝ є҆̀ в̾ но́вѣмъ свᲂе́мъ гро́бѣ . пᲂдᲂба́ше бо є҆мꙋ̀ и҆́з̾ грᲂба ꙗ҆́кѡ и҆з̾ черто́га прᲂйтѝ . сᲂкрꙋши́выи держа́вꙋ сме́рти , и҆ ѿверзы́и врата̀ раю̀ чл҃кѡмъ , гдⷭ҇и сла́ва тебѣ̀ . сла́ва . гла́съ , то́йже . Дне́шнюю та́йнꙋ , вели́кїи мѡѷсе́й прᲂѡ҆бразᲂва́ше гл҃ѧ , и҆ бл҃гᲂслᲂвѝ бг҃ъ де́нь седьмы́и , сїѧ́ бо є҆́сть бл҃гᲂслᲂве́наѧ сꙋбо́та . се́й є҆́сть пᲂко́ищныи де́нь , во́ньже пᲂчѝ ѿ всѣ́хъ дѣ́лъ свᲂи́хъ , є҆динᲂро́дныи сн҃ъ бж҃їи , и҆́же на сме́рть смᲂтре́нїемъ пло́тїю пᲂчи́въ , и҆ во є҆́же бѣ̀ , па́ки вᲂзврати́всѧ , вᲂскрⷭ҇нїѧ ра́ди , да́рꙋѧ на́мъ живо́тъ вѣ́чныи , ꙗ҆́кѡ є҆ди́нъ бл҃гъ и҆ чл҃кᲂлю́бецъ . и҆ ны́нѣ . гла́съ , в҃ . Преблгⷭ҇ве́на є҆сѝ бцⷣе дв҃о , вᲂпло́щ̾шимбᲂсѧ и҆з̾ тебѐ , а҆́дъ плѣне́нъ бы́сть , а҆да́мъ призва́сѧ , клѧ́тва разрꙋши́сѧ , и҆ є҆́вва свᲂбᲂди́сѧ . сме́рть ᲂу҆мертви́сѧ , и҆ мы̀ ѡ҆жи́хᲂмъ . тѣ́мъ пᲂю́ще вᲂзᲂпїе́мъ , бл҃гᲂслᲂве́нъ хрⷭ҇то́съ бг҃ъ на́шъ , и҆зво́ливыи та́кѡ .

Славᲂсло́вїе вели́кᲂе . і҆єре́й же ѡ҆блачи́тсѧ в̾ патрахи́ль и҆ в̾ ѳелѡ́нь , и҆ и҆схо́дитъ с̾ є҆ѵⷢ҇а́лїемъ .= п=ред̾хᲂдѧ́щимъ є҆мꙋ̀ лампа́дᲂмъ на свѣ́щницѣ . на́мъ же пᲂю́щимъ трⷭ҇то́е , над̾гро́бнᲂе .

та́же , стихѣ́ра . гла́съ , є҃ . Прїидѣ́те ᲂу҆блажи́мъ і҆ѡ́сифа приснᲂпа́мѧтнагѡ , и҆́же в̾ нᲂщѝ к̾ пила́тꙋ прише́дша , и҆ живᲂта̀ всѣ́хъ и҆спрᲂси́вша . да́ждь мѝ сегѡ̀ стра́ннаго , и҆́же не и҆мѣ́етъ гдѣ̀ главꙋ̀ пᲂд̾клᲂни́ти . да́ждь ми сегѡ̀ стра́ннаго , є҆го́же ᲂу҆чени́къ лꙋка́выи на сме́рть предадѐ . да́ждь ми сегѡ̀ стра́ннаго , є҆го́же мт҃и зрѧ́щи на крⷭ҇тѣ̀ ви́сѧща , рыда́ющи вᲂпїѧ́ше , и҆ мт҃рьски крича́ше . ᲂу҆вы̀ мнѣ̀ ча́до мᲂѐ , ᲂу҆вы̀ мнѣ̀ свѣ́те мо́й , и҆ ᲂу҆тро́бо мᲂѧ̀ вᲂзлю́бленаѧ . симеѡ́нъ бо прᲂречѐ , с̾бы́стьсѧ дне́сь гл҃ющее в̾ цр҃кви . твᲂѐ срⷣце ѻ҆рꙋ́жїе про́йдетъ . но в̾ ра́дᲂсть вᲂскрⷭ҇нїѧ твᲂегѡ̀ пла́чь прелᲂжѝ . Пᲂкланѧ́емсѧ стрⷭ҇те́мъ твᲂи́мъ хрⷭ҇тѐ= [пᲂкло́н̾ до землѝ] . Пᲂкланѧ́емсѧ стрⷭ҇те́мъ твᲂи́мъ хрⷭ҇тѐ [пᲂкло́н̾ до землѝ] .= Пᲂкланѧ́емсѧ стрⷭ҇те́мъ твᲂи́мъ хрⷭ҇тѐ , и҆ ст҃о́мꙋ вᲂскрⷭ҇нїю= [пᲂкло́н̾ до землѝ] .=

і҆єре́й , и҆лѝ дїа́кᲂнъ , вᲂз̾гла́съ : премꙋ́дрᲂсть про́сти . та́же , трᲂпа́рь . паремїѝ , гла́съ , в҃ . Сᲂдержа́и кᲂнцы̀ , гро́бᲂмъ держа́тисѧ и҆зво́лилъ є҆сѝ хрⷭ҇тѐ , да ѿ а҆́дᲂва пᲂглᲂще́нїѧ и҆зба́виши чл҃чество . и҆ вᲂздви́гъ ѡ҆живи́ши на́съ , ꙗ҆́кѡ бг҃ъ без̾сме́ртенъ . сла́ва , =кᲂне́цъ . =и҆ ны́нѣ , =ве́сь трᲂпа́рь . =та́же , прᲂки́менъ , гла́съ , д҃ . вᲂскрⷭ҇нѝ гдⷭ҇и пᲂмᲂзѝ на́мъ , и҆ и҆зба́ви на́съ и҆́мене ра́ди твᲂегѡ̀ . сти́хъ : бж҃е ᲂу҆ши́ма на́шима ᲂу҆слы́шахᲂмъ , и҆ ѻ҆ц҃ы на́ши вᲂз̾вѣсти́ша на́мъ .

ѿ прⷪ҇рчества і҆єзекі́илева , чте́нїе .

Бы́сть на мнѣ̀ рꙋка̀ гдⷭ҇нѧ , и҆ и҆зведе́ мѧ дх҃ᲂмъ гдⷭ҇нимъ , и҆ пᲂста́ви мѧ пᲂсредѝ по́лѧ , и҆ то̀ бѧ́ше по́лно кᲂсте́й чл҃ческихъ , и҆ ѡ҆б̾веде́ мѧ ѡ҆ ни́хъ ѻ҆́крестъ ѡ҆́кᲂло , и҆ сѐ мно́зи ѕѣлѡ̀ . на лицы̀ по́лѧ , и҆ сꙋ́хи ѕѣлѡ̀ . и҆ речѐ ко мнѣ̀ , сн҃е чл҃чь , а҆́ще ѡ҆живꙋ́тъ ко́сти сꙋхі́ѧ сїѧ̀ , и҆ реко́хъ , гдⷭ҇и бж҃е , ты̀ вѣ́си та̀ . и҆ речѐ ко мнѣ̀ , сн҃е чл҃чь , прᲂрцы̀ на ко́сти сїѧ̀ . и҆ рече́ши и҆́мъ , ко́сти сꙋхі́ѧ , слы́шите сло́во гдⷭ҇не . та́кѡ гл҃етъ а҆дана́й гдⷭ҇ь кᲂсте́мъ си́мъ , сѐ а҆́зъ принᲂшꙋ̀ на ва́съ дх҃ъ жи́зни , и҆ да́мъ на ва́съ жи́лы , и҆ вᲂзведꙋ̀ на ва́съ пло́ти , и҆ прᲂтѧ́гнꙋ на ва́мъ ко́жꙋ , и҆ да́мъ в̾ ва́съ дх҃ъ мо́й , и҆ жи́ви бꙋ́дете , и҆ пᲂзна́ете ꙗ҆́кѡ а҆́зъ гдⷭ҇ь є҆́смь . и҆ прᲂреко́хъ ꙗ҆́кᲂже запᲂвѣ́да ми гдⷭ҇ь . и҆ бы́сть гла́съ внегда́ ми прᲂро́чествᲂвати , и҆ сѐ трꙋ́съ бы́сть , и҆ сᲂвᲂкꙋплѧ́хꙋсѧ ко́сть к̾ ко́сти к̾ сᲂста́вꙋ свᲂемꙋ̀ . и҆ ви́дѣхъ , и҆ сѐ на ни́хъ жи́лы и҆ пло́ти растѧ́хꙋ . и҆ вᲂсхᲂжа́ше на ни́хъ ко́жа верхꙋ̀ , и҆ дх҃а небѧ́ше в̾ ни́хъ . и҆ речѐ ко мнѣ̀ , прᲂрцы̀ ѡ҆́ дс҃ѣ , прᲂрцы̀ сн҃е чл҃чь . и҆ реко́хъ дх҃ꙋ , сїѧ̀ гл҃етъ гдⷭ҇ь бг҃ъ , ѿ четы́рехъ вѣ́трᲂвъ , да прїи́детъ дх҃ъ , и҆ да дхне́тъ на ме́ртвыѧ сїѧ̀ , и҆ да ѡ҆живꙋ́тъ . и҆ прᲂреко́хъ ꙗ҆́кᲂже ми запᲂвѣ́да гдⷭ҇ь . и҆ вни́де в̾ни́хъ дх҃ъ , и҆ ѡ҆жи́ша и҆ ста́ша на нᲂга́хъ свᲂи́хъ , со́нмъ мно́гъ ѕѣлѡ̀ . и҆ гл҃а гдⷭ҇ь ко мнѣ̀ гл҃ѧ , сн҃е чл҃чь , ко́сти сїѧ̀ , ве́сь до́мъ і҆и҃левъ є҆́сть . ті́и бо гл҃ютъ , сꙋ́хи бы́ша ко́сти на́ши , пᲂги́бе ᲂу҆пᲂва́нїе на́ше , и҆ ᲂу҆бїе́ни бы́хᲂмъ . сегѡ̀ ра́ди прᲂрцы̀ , и҆ рцы̀ к̾ ни́мъ , си́це гл҃етъ гдⷭ҇ь бг҃ъ , сѐ а҆́зъ ѿверза́ю гро́бы ва́ши , и҆ и҆зведꙋ̀ ва́съ ѿ грᲂбо́въ ва́шихъ лю́дїе мᲂѝ . и҆ в̾ведꙋ̀ ва́съ в̾ зе́млю і҆и҃левꙋ . и҆ пᲂзна́ете ꙗ҆́кѡ а҆́зъ є҆́смь бг҃ъ , внегда̀ ѿверсти́ ми гро́бы ва́ши , є҆́же вᲂзвестѝ ва́съ ѿ гро́бъ ва́шихъ лю́дїе мᲂѝ , и҆ да́мъ дх҃ъ мо́й в̾ ва́съ и҆ жи́ви бꙋ́дете . и҆ пᲂлᲂжꙋ̀ ва́съ в̾ землѝ ва́шей , и҆ пᲂзна́ете ꙗ҆́кѡ а҆́зъ є҆́смь гдⷭ҇ь , гл҃ахъ и҆ сᲂтвᲂри́хъ , гл҃етъ гдⷭ҇ь бг҃ъ .

прᲂки́менъ , ѱало́мъ дв҃дᲂвъ . вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ , незабꙋ́ди ни́щихъ свᲂи́хъ до кᲂнца̀ . сти́хъ : и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ , пᲂвѣ́мъ всѧ̀ чꙋдеса̀ твᲂѧ̀ . а҆пⷭ҇лъ , къ кᲂри́нѳѡмъ . заⷱ҇ , рл҃г . Бра́тїе , ма́лъ ква́съ , всѐ смѣше́нїе ква́ситъ . ѡ҆чи́стите ᲂу҆́бѡ ве́тхїи ква́съ , да бꙋ́дете но́во смѣше́нїе , ꙗ҆́кᲂже є҆стѐ бесква́сни . и҆́бо па́сха на́ша заны̀ пᲂжре́нъ бы́сть хрⷭ҇то́съ . тѣ́мже да пра́зднꙋемъ не в̾ ква́сѣ ве́тсѣ , ни в̾ ква́сѣ ѕло́бы и҆ лꙋка́вствѣ , но въ бесква́сныхъ , чистᲂты̀ и҆ и҆́стины . хрⷭ҇то́съ ны̀ и҆скꙋпи́лъ є҆́сть ѿ клѧ́твы зако́нныѧ бы́въ по на́съ клѧ́тва . пи́сано бо є҆́сть , про́клѧтъ всѧ́къ ви́сѧи на́ древѣ . да въ ꙗ҆зы́цѣхъ бл҃гᲂслᲂве́нїе а҆враа́мле бꙋ́детъ ѡ҆ хрⷭ҇тѣ̀ і҆с҃е , да ѡ҆бѣтᲂва́нїе дх҃а прїи́мемъ вѣ́рᲂю .

а҆ллилꙋ́їѧ . да вᲂскрⷭ҇нетъ бг҃ъ и҆ разы́дꙋтсѧ вразѝ є҆гѡ̀ . сти́хъ : ꙗ҆́кѡ и҆счеза́етъ ды́мъ , да и҆сче́знꙋтъ . сти́хъ : та́кѡ да пᲂги́бнꙋтъ грѣ́шницы ѿ лица̀ бж҃їѧ , а҆ пра́ведницы да вᲂзвеселѧ́тсѧ .

є҆ѵⷢ҇а́лїе , ѿ матѳе́ѧ . заⷱ҇ , рд҃і . Во ᲂу҆́трѣи же де́нь и҆́же є҆́сть по пѧтцѣ̀ , сᲂбра́шасѧ а҆рхїєре́е и҆ фарисе́е къ пила́тꙋ глаго́люще , го́спᲂди , пᲂмѧнꙋ́хᲂмъ , ꙗ҆́кѡ льсте́цъ ѻ҆́нъ речѐ є҆щѐ сы́и жи́въ , по трїе́хъ дне́хъ вᲂста́нꙋ . пᲂвелѝ ᲂу҆́бѡ ᲂу҆тверди́ти гро́бъ , до тре́тїѧгѡ днѐ . да нека́кѡ прише́дше ᲂу҆чн҃цы̀ є҆гѡ̀ , но́щїю ᲂу҆кра́дꙋтъ є҆гѡ̀ , и҆ рекꙋ́тъ лю́демъ , вᲂста̀ ѿ ме́ртвыхъ . и҆ бꙋ́детъ пᲂслѣ́днѧѧ ле́сть , го́рша пе́рвыѧ . рече́ же и҆́мъ пила́тъ , и҆́мате кꙋстᲂді́ю и҆ди́те ᲂу҆тверди́те ꙗ҆́кᲂже вѣ́сте . ѻ҆ни́ же ше́дше , ᲂу҆тверди́ша гро́бъ , зна́менавше ка́мень с̾ кꙋстᲂді́ею .

та́же , є҆ктенїѧ̀ : пᲂми́лꙋй на́съ бж҃е . и҆ пᲂсе́мъ : и҆спо́лнимъ за ᲂу҆́тренѧѧ мл҃твы . и҆ ѿпꙋ́стъ .

Присᲂвᲂкꙋплѧ́емъ же , и҆ ча́съ а҃ . тре́тїи же ча́съ , и҆ ѕ҃ , и҆ ѳ҃ , пᲂе́мъ про́сто в̾ притво́рѣ , вкꙋ́пѣ со бл҃же́ннами во свᲂѐ вре́мѧ .