Во ст҃ꙋ́ю и҆ вели́кꙋю сꙋбо́тꙋ , пое́мъ непоро́чны . каѳи́сма , з҃і . На́ гласъ , є҃ . с̾ припѣ́вы на́ три статїѝ . на пе́рвой статїѝ , кади́тъ и҆гꙋ́менъ . на второ́й же , и҆ на тре́тїей , кадѧ́тъ сщ҃е́нницы . та́же , пое́тъ пе́рвое і҆єре́й , припѣ́въ сі́й посредѣ̀ цр҃кве . прекрести́вши кади́льницею .

Велича́емъ тѧ̀ живода́вче хрⷭ҇тѐ , на́съ ра́ди вчера̀ погребе́нъ є҆сѝ претерпѣ́вшагѡ . и҆ ѡ҆живлѧ́ющагѡ пресла́внѡ ме́ртвыѧ .

Бл҃же́ни непоро́чнїи въ пꙋ́ть , ходѧ́щїи въ зако́нѣ гдⷭ҇ни . Велича́емъ тѧ̀ живода́вче хрⷭ҇тѐ . и҆ почита́емъ страда́нїѧ твоѧ̀ честна́ѧ , и҆ сла́вное сла́вимъ погребе́нїе .

Бл҃же́ни и҆спыта́ющїи свидѣ́нїѧ є҆гѡ̀ , всѣ́мъ срⷣцемъ взы́щꙋтъ є҆гѡ̀ . Велича́емъ тѧ̀ і҆с҃е цр҃ю . и҆ почита́емъ погребе́нїе и҆ стра́сти твоѧ̀ , и҆́миже спа́слъ є҆сѝ на́съ и҆з̾ и҆стлѣ́нїѧ .

Недѣ́лающїи бо без̾зако́нїѧ , в̾ пꙋте́хъ є҆гѡ̀ ходи́ша . ты̀ заповѣ́далъ є҆сѝ за́повѣди твоѧ̀ , сохрани́ти ѕѣлѡ̀ . дабы̀ и҆спра́вилисѧ бы́ша пꙋтїѐ моѝ , сохрани́ти ѡ҆правда́нїѧ твоѧ̀ . Живо́тъ во́ гробѣ положи́сѧ хрⷭ҇тѐ , и҆ а҆́нг҃льскаѧ во́инства дивлѧ́хꙋсѧ зрѧ́ще . схожде́нїе твоѐ сла́вѧще .

Тогда̀ непостыжꙋ́сѧ , є҆гда̀ при́зрю на всѧ̀ за́повѣди твоѧ̀ . и҆сповѣ́мсѧ тебѣ̀ в̾ пра́вости срⷣца , внегда̀ наꙋчи́тимисѧ сꙋдьба́мъ пра́вды твоеѧ̀ . Влⷣка всѣ́хъ зри́тсѧ ме́ртвъ , и҆ во́ гробѣ но́вѣ полога́етсѧ , ѡ҆бно́вль гро́бы ме́ртвымъ .

Ѡ҆правда́нїѧ твоѧ̀ сохраню̀ , да не ѡ҆ста́виши менѐ до ѕѣла̀ в̾ че́мъ и҆спра́витъ ю҆́нныи пꙋ́ть сво́й , внегда̀ сохрани́ти словеса̀ твоѧ̀ . Живо́тъ во́ гробѣ положи́сѧ хрⷭ҇тѐ , и҆ сме́ртїю свое́ю сме́рть погꙋбѝ . и҆сточи́лъ є҆сѝ ми́рови жи́знь .

Всѣ́мъ срⷣцемъ мои́мъ взыска́хъ тебѐ , не ѿри́ни менѐ ѿ заповѣде́й твои́хъ . въ срⷣцы мое́мъ съкры́хъ словеса̀ твоѧ̀ , да не согрѣшꙋ̀ тебѣ̀ . Красе́нъ добро́тою па́че сыно́въ чл҃ческихъ , ꙗ҆́кѡ без̾зра́ченъ ме́ртвъ ꙗ҆влѧ́етсѧ , є҆стество̀ ᲂу҆краше́и всѧ́ческихъ .

Бл҃гослове́нъ є҆сѝ гдⷭ҇и , наꙋчи́ мѧ ѡ҆правда́нїемъ твои́мъ . ᲂу҆стна́ма мои́ма возвѣсти́хъ , всѧ̀ сꙋдьбы̀ ᲂу҆́стъ твои́хъ . Тебѣ̀ положе́нꙋ бы́вшꙋ во́ гробѣ созда́телю хрⷭ҇тѐ , а҆́дъскаѧ под̾виза́шасѧ ѡ҆снова́нїѧ . и҆ гро́бы ѿверзо́шасѧ земны́хъ .

Въ пꙋтѝ свидѣ́нїи твои́хъ наслади́хсѧ . ꙗ҆́кѡ ѡ҆ всѧ́комъ бога́тствѣ , в̾ за́повѣдехъ твои́хъ поꙋчꙋ́сѧ , и҆ ᲂу҆разꙋмѣ́ю пꙋтѝ твоѧ̀ . Зе́млю содержа́и дла́нїю , ᲂу҆мерщве́нъ пло́тїю , земле́ю ны́нѣ ѡ҆держи́мъ є҆́сть , ме́ртвыѧ и҆збавлѧ́ѧ а҆́дова ѡ҆держа́нїѧ .

Во ѡ҆правда́нїихъ твои́хъ поꙋчꙋ́сѧ , незабꙋ́дꙋ слове́съ твои́хъ . возда́ждь рабꙋ̀ твоемꙋ̀ живи́ мѧ , и҆ сохраню̀ словеса̀ твоѧ̀ . И҆з̾ и҆стлѣ́нїѧ взы́де живо́тъ мо́й сп҃се , тебѣ̀ ᲂу҆ме́ршꙋ , и҆ к̾ ме́ртвымъ прише́дшꙋ , и҆ сокрꙋ́шьшꙋ вереѧ̀ а҆́довы .

Ѿкры́й ѻ҆́чи моѝ , и҆ разꙋмѣ́ю чꙋдеса̀ ѿ зако́на твоегѡ̀ . пришле́цъ а҆́зъ є҆́смь на землѝ , не скры́й ѿ менѐ заповѣде́й твои́хъ . Ꙗ҆́коже свѣ́тъ свѣти́льника пло́ть бж҃їѧ , под̾ земле́ю ꙗ҆́коже под̾ спꙋ́домъ сокрыва́ема є҆́сть . ѿгонѧ́етъ тмꙋ̀ а҆́довꙋ .

Воз̾любѝ дш҃а моѧ̀ воз̾жела́ти сꙋдьбы̀ твоѧ̀ , на всѧ́ко вре́мѧ . запрети́лъ є҆сѝ горды́мъ . про́клѧти ᲂу҆клонѧ́ющїисѧ ѿ заповѣде́й твои́хъ . Ка́мень живо́тныи , прїе́мъ а҆́дъ всеѧ́децъ , и҆з̾блева̀ и҆́хже пожрѐ ѿ́ вѣка ме́ртвыѧ .

Ѿи҆мѝ ѿ менѐ поно́съ и҆ ᲂу҆ничиже́нїе , занѐ свидѣ́нїѧ твоѧ̀ взыска́хъ . и҆́бо сѣдо́ша кн҃зи и҆ на мѧ̀ клевета́хꙋ . ра́бъ же тво́й поꙋча́шесѧ во ѡ҆правда́нїихъ твои́хъ . Во́ гробѣ но́вѣ положи́сѧ хрⷭ҇тѐ , и҆ є҆стество̀ чл҃ческое ѡ҆бнови́лъ є҆сѝ . воскре́съ новолѣ́пно и҆з̾ ме́ртвыхъ .

И҆́бо свидѣ́нїѧ твоѧ̀ поꙋче́нїе моѐ є҆́сть . и҆ совѣ́ти моѝ ѡ҆правда́нїѧ твоѧ̀ . прильпѐ землѝ дш҃а моѧ̀ , живи́ мѧ по словесѝ твоемꙋ̀ . На́ землю сни́де да спасе́ши а҆да́ма . и҆ на землѝ сегѡ̀ не ѡ҆брѣ́тъ влⷣко , да́же до а҆́да сни́де и҆скі́и .

Пꙋтѝ моѧ̀ и҆сповѣ́дахъ и҆ ᲂу҆слы́шалъ мѧ̀ є҆сѝ , наꙋчи́ мѧ ѡ҆правда́нїемъ твои́мъ . пꙋтѝ ѡ҆правда́нїи твои́хъ вразꙋми́ мѧ , и҆ поꙋчꙋ́сѧ въ чꙋдесѣ́хъ твои́хъ . Ꙗ҆́коже зе́рно пшени́чно , в̾нѣ́дра земна́ѧ заше́дъ . многопе́рстныи во́здалъ є҆сѝ кла́съ , воз̾ста́вивъ земны́ѧ , ꙗ҆́же ѿ а҆да́ма .

Воз̾дрема̀ дш҃а моѧ̀ ѿ ᲂу҆ны́нїѧ , ᲂу҆тверди́ мѧ въ словесѣ́хъ твои́хъ . пꙋ́ть не пра́вды ѿста́ви ѿ менѐ , и҆ зако́номъ твои́мъ поми́лꙋй мѧ . Под̾ земле́ю скры́сѧ ꙗ҆́кѡ сл҃нце , ны́нѣ но́щїю сме́ртною покрове́нъ бы́сть . но воз̾сїѧ́й свѣтлѣ́йше сп҃се .

Пꙋ́ть и҆́стинныи и҆з̾во́лихъ , и҆ сꙋдьбы̀ твоѧ̀ незабы́хъ . прилѣпи́хсѧ свидѣ́нїемъ твои́мъ , гдⷭ҇и не посрамѝ менѐ . Ꙗ҆́коже крꙋгъ сл҃нчныи лꙋча̀ сокрыва́етъ сп҃се , тебѐ ны́нѣ гро́бъ сокры̀ , сконча́вшасѧ сме́ртїю пло́тьски .

Пꙋ́ть заповѣде́й твои́хъ теко́хъ , є҆гда̀ раз̾шири́лъ є҆сѝ срⷣце моѐ . законоположѝ мнѣ̀ гдⷭ҇и пꙋ́ть ѡ҆правда́нїи твои́хъ , и҆ взыщꙋ̀ и҆̀ вы́нꙋ . А҆́нг҃льскаѧ ра́дость сп҃се сы́и , ны́нѣ и҆ печа́ли си́хъ вина̀ , ви́димь пло́тїю без̾дыха́нїѧ ме́ртвъ .

Вразꙋми́ мѧ и҆ и҆спыта́ю зако́нъ тво́й , и҆ сохраню̀ и҆̀ всѣ́мъ срⷣцемъ мои́мъ . наста́ви мѧ на пꙋ́ть заповѣде́й твои́хъ , ꙗ҆́кѡ то́й восхотѣ̀ . Воз̾не́ссѧ на́ древо , и҆ жи́вы земны́ѧ совоз̾дви́жеши . под̾ земле́ю же бы́въ , лежа́щїѧ под̾ не́ю совоскреша́еши .

Приклонѝ срⷣце моѐ во свидѣ́нїѧ твоѧ̀ , а҆ не в̾ лихои́мство . ѿвратѝ ѻ҆́чи моѝ не ви́дѣти сꙋеты̀ , в̾ пꙋтѝ твое́мъ живи́ мѧ . Ꙗ҆́коже ле́въ ᲂу҆снꙋ́въ сп҃се пло́тїю . ꙗ҆́коже нѣ́кїи ски́менъ мла́дъ воста́еши , ѿ ло́жь ста́рость плотьскꙋ́ю .

Поста́ви рабꙋ̀ твоемꙋ̀ сло́во твоѐ в̾ стра́хъ тво́й . ѿи҆мѝ поноше́нїе моѐ , є҆́же не пщева́хъ , ꙗ҆́кѡ сꙋдьбы̀ твоѧ̀ бла́ги . Въ ре́бра прободе́нъ бы́сть , ребро̀ взе́мыи а҆да́мле , ѿ него́же всѐ со́здалъ є҆сѝ , и҆ и҆сточѝ то́ки чисти́тельныѧ .

Сѐ воз̾желѣ́хъ за́повѣди твоѧ̀ , в̾ пра́вдѣ твое́й живи́ мѧ . и҆ да прїи́детъ на мѧ̀ млⷭ҇ть твоѧ̀ гдⷭ҇и , спасе́нїе твоѐ по словесѝ твоемꙋ̀ . Та́йнѡ ᲂу҆́бѡ дре́вле закала́етсѧ а҆́гнецъ . ты́же ꙗ҆́вѣ жре́нъ бы́въ неѕло́биве , всю̀ тва́рь ѡ҆чи́стилъ є҆сѝ сп҃се .

И҆ ѿвѣща́ю поноша́ющимъ мѝ сло́во , ꙗ҆́кѡ ᲂу҆пова́хъ на словеса̀ твоѧ̀ . и҆ не ѿи҆мѝ ѿ ᲂу҆́стъ мои́хъ словесѐ и҆́стинна до ѕѣла̀ , занѐ на сꙋдьбы̀ твоѧ̀ ᲂу҆пова́хъ . Кто̀ и҆з̾рече́тъ ѻ҆́бразъ та́йно ᲂу҆жа́сныи , влады́и бо тва́рїю , дне́сь стра́сть прїе́млетъ , и҆ ᲂу҆мира́етъ на́съ ра́ди .

И҆ сохраню̀ зако́нъ тво́й всегда̀ во́ вѣки , и҆ в̾ вѣ́къ вѣ́ка . и҆ хожда́хъ в̾ широтѣ̀ , ꙗ҆́кѡ за́повѣди твоѧ̀ взыска́хъ . А҆́ще и҆ ме́ртвъ ꙗ҆ви́сѧ , но жи́въ ꙗ҆́кѡ бг҃ъ , ᲂу҆мерщве́ныѧ чл҃ки ѡ҆живи́лъ є҆сѝ , на́ше ᲂу҆мертвѝ ᲂу҆мерщве́нїе .

И҆ глаго́лахъ ѡ҆ свидѣ́нїихъ твои́хъ пред̾ царѝ и҆ нестыдѧ́хсѧ . и҆ поꙋча́хсѧ в̾ за́повѣдехъ твои́хъ . и҆́хже воз̾люби́хъ ѕѣлѡ̀ . и҆ воз̾двиго́хъ рꙋ́цѣ моѝ к̾ за́повѣдемъ твои́мъ , и҆́хже воз̾люби́хъ . и҆ поꙋча́хсѧ во ѡ҆правда́нїихъ твои́хъ . Ѽ ра́дости ѻ҆́ноѧ , ѽ мно́гїѧ сла́дости , є҆ѧ́же и҆́хъ же во а҆́дѣ напо́лнилъ є҆сѝ , во́ днехъ мра́чныхъ свѣ́тъ воз̾сїѧ́въ .

Помѧнѝ словесѐ твоегѡ̀ рабꙋ̀ твоемꙋ̀ , ѡ҆ не́мже ᲂу҆пова́нїе да́лъ ми є҆сѝ . та́ мѧ ᲂу҆тѣ́ши во смире́нїи мое́мъ , занѐ сло́во твоѐ ѡ҆живи́ мѧ . го́рдїи законопрестꙋпова́хꙋ до ѕѣла̀ , ѿ зако́на же твоегѡ̀ не ᲂу҆клони́хсѧ . А҆́ще и҆ во́ гробѣ покрыва́ешисѧ , и҆лѝ въ вереѧ́хъ а҆́дъскихъ , но и҆ гро́бы и҆стощи́лъ є҆сѝ , и҆ а҆́да ѡ҆бнажи́лъ є҆сѝ хрⷭ҇тѐ .

Помѧнꙋ́хъ сꙋдьбы̀ твоѧ̀ ѿ́ вѣка гдⷭ҇и , и҆ ᲂу҆тѣ́шихсѧ . печа́ли ѡ҆бдержа́тъ мѧ̀ ѿ грѣ́шникъ , ѡ҆ставлѧ́ющихъ зако́нъ тво́й . Во́лею соше́дъ сп҃се на́ землю , ᲂу҆мерщве́ныѧ чл҃ки ѡ҆живи́лъ є҆сѝ , и҆ воз̾ведѐ к̾ сла́вѣ ѻ҆́ч҃ей .

Пѣ́та бѧ́хꙋ мнѣ̀ ѡ҆правда́нїѧ твоѧ̀ , на мѣ́стѣ прише́льствїѧ моегѡ̀ . помѧнꙋ́хъ в̾ нощѝ и҆́мѧ твоѐ гдⷭ҇и , и҆ сохрани́хъ зако́нъ тво́й . И҆́же рꙋко́ю свое́ю созда́въ а҆да́ма ѿ землѝ , тогѡ̀ ра́ди є҆стество́мъ бы́сть чл҃къ , и҆ распѧ́сѧ во́лею свое́ю .

Сїѧ̀ бы́сть мнѣ̀ , занѐ ѡ҆правда́нїѧ твоѧ̀ взыска́хъ . ча́сть моѧ̀ є҆сѝ гдⷭ҇и , рѣ́хъ сохрани́ти зако́нъ тво́й . Послꙋ́шавъ сло́ве ѻ҆ц҃а своегѡ̀ , да́же до а҆́да соше́лъ є҆сѝ , и҆ воскр҃си́лъ є҆сѝ ро́дъ чл҃ческїи .

Помоли́хсѧ лицꙋ̀ твоемꙋ̀ всѣ́мъ срⷣцемъ мои́мъ . поми́лꙋй мѧ по словесѝ твоемꙋ̀ . помы́слихъ пꙋтѝ твоѧ̀ , и҆ воз̾врати́хъ но́зѣ моѝ во свидѣ́нїѧ твоѧ̀ . Кто̀ претерпи́тъ сло́ве зрѣ́ти тѧ ме́ртва во́ гробѣ , ꙗ҆́кѡ ᲂу҆мерщве́на лежа́ща , чл҃колю́бца влⷣкꙋ и҆ бг҃а .

Оу҆гото́вихсѧ и҆ несмꙋти́хсѧ , сохрани́ти за́повѣди твоѧ̀ , ю҆́жа грѣ́шникъ ѡ҆бѧза́шасѧ мнѣ̀ , и҆ зако́на твоегѡ̀ незабы́хъ . Оу҆вы̀ мнѣ̀ свѣ́те ми́рꙋ , ᲂу҆вы̀ мнѣ̀ свѣ́те мо́й , і҆с҃е мо́й воз̾желе́нныи , вопїѧ́ше дв҃аѧ съ пла́чемъ взыва́ющи .

Въ полꙋ́нощи воста́хъ , и҆сповѣ́датисѧ тебѣ̀ ѡ҆ сꙋдьба́хъ пра́вды твоеѧ̀ , прича́стникъ а҆́зъ є҆́смь всѣ́мъ боѧ́щимсѧ тебѐ , и҆ хранѧ́щимъ за́повѣди твоѧ̀ . ѽ бж҃їе сло́ве , ѽ ра́досте моѧ̀ , ка́кѡ претерплю̀ тридне́вное твоѐ погребе́нїе , ны́нѣ бо дви́жꙋсѧ ᲂу҆тро́бою ма́терьски .

Млⷭ҇ти твоеѧ̀ гдⷭ҇и и҆спо́лнена є҆́сть землѧ̀ , ѡ҆правда́нїемъ твои́мъ наꙋчи́ мѧ . бл҃гость сотвори́лъ є҆сѝ с̾ рабо́мъ твои́мъ гдⷭ҇и , по словесѝ твоемꙋ̀ . Кто̀ да́стъ мѝ во́дꙋ и҆сто́чникъ слеза́мъ , бг҃оневѣ́стнаѧ дв҃аѧ вопїѧ́ше , да воспла́чꙋ сла́дкагѡ сѝ і҆с҃а .

Бл҃гости и҆ наказа́нїю и҆ ра́зꙋмꙋ наꙋчи́ мѧ , занѐ за́повѣдемъ твои́мъ вѣ́ровахъ , пре́жде да́же несмири́хсѧ , а҆́зъ прегрѣши́хъ . сегѡ̀ ра́ди сло́во твоѐ сохрани́хъ . И҆ го́ры и҆ хо́лми , и҆ чл҃ческаѧ мно́жества , воспла́чите ны́нѣ , и҆ рыда́йте со мно́ю мт҃рїю бж҃їею .

Бл҃гъ є҆сѝ ты̀ гдⷭ҇и . и҆ бл҃гостїю твое́ю наꙋчи́ мѧ ѡ҆правда́нїемъ твои́мъ . ᲂу҆мно́жисѧ на мѧ̀ не пра́вда горды́хъ , а҆́зъ же всѣ́мъ срⷣцемъ мои́мъ и҆спыта́ю за́повѣди твоѧ̀ . Когда̀ ви́жꙋ тѧ сп҃се без̾лѣ́тнагѡ свѣ́та , ра́дость и҆ сла́дость срⷣца моегѡ̀ , дв҃аѧ ма́терьски взыва́ше .

Оу҆сыри́сѧ ꙗ҆́кѡ млеко̀ срⷣце и҆́хъ , а҆́зъ же зако́нꙋ твоемꙋ̀ поꙋчи́хсѧ . бла́го мнѣ̀ ꙗ҆́кѡ смири́лъ мѧ є҆сѝ , да наꙋчꙋ́сѧ ѡ҆правда́нїемъ твои́мъ . бла́гъ мнѣ̀ зако́нъ ᲂу҆́стъ твои́хъ , па́че ты́сѧщь зла́та и҆ сребра̀ . А҆́ще и҆ во́лею ꙗ҆ви́сѧ во́ гробѣ ме́ртвъ , но и҆ чл҃ки ꙗ҆́коже проречѐ , воскрⷭ҇нїемъ сп҃се мо́й воз̾дви́жеши .

Сла́ва ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ . Воспѣва́емъ тѧ̀ сло́ве всѣ́хъ бг҃а , со ѻ҆ц҃е́мъ и҆ дх҃омъ ст҃ы́мъ , сла́вимъ и҆ бжⷭ҇твеное погребе́нїе твоѐ .

И҆ ны́нѣ и҆ прⷭ҇нѡ и҆ во́ вѣки вѣкѡ́мъ , а҆ми́нь . Бл҃жи́мъ тѧ̀ бцⷣе чи́стаѧ , и҆ почита́емъ тридне́вное погребе́нїе сн҃а твоегѡ̀ , и҆ бг҃а на́шегѡ вѣ́рнѡ .

А҆ллилꙋ́їѧ , а҆ллилꙋ́їѧ , сла́ва тебѣ̀ бж҃е , три́жды , съ припѣ́вы : Велича́емъ тѧ̀ живода́вче хрⷭ҇тѐ , на́съ ра́ди вчера̀ погребе́нъ є҆сѝ претерпѣ́вшагѡ . и҆ ѡ҆живлѧ́ющагѡ пресла́внѡ ме́ртвыѧ .

та́же , статїю̀ вторꙋ́ю начина́етъ і҆єре́й , и҆ пое́тъ є҆ди́нощи : Досто́йнѡ є҆́сть велича́ти тѧ̀ , живода́вче хрⷭ҇тѐ , врата̀ а҆́дова сте́ршагѡ , и҆ наси́лїе дїѧ́воле разо́ршагѡ .

Рꙋ́цѣ твоѝ сотвори́стѣ мѧ и҆ созда́стѣ мѧ . вразꙋми́ мѧ и҆ наꙋчꙋ́сѧ заповѣде́мъ твои́мъ . Досто́йнѡ є҆́сть велича́ти тѧ̀ живода́вца , на крⷭ҇тѣ̀ рꙋ́цѣ просте́ршагѡ , и҆ сокрꙋ́шшагѡ держа́вꙋ вра́жїю .

Боѧ́щїисѧ тебѐ ᲂу҆́зрѧтъ мѧ̀ и҆ воз̾веселѧ́тсѧ , ꙗ҆́кѡ на словеса̀ твоѧ̀ ᲂу҆пова́хъ . разꙋмѣ́хъ гдⷭ҇и ꙗ҆́кѡ пра́вда повелѣ́нїѧ твоѧ̀ . и҆ вои́стинꙋ смири́лъ мѧ є҆сѝ . Досто́йнѡ є҆́сть велича́ти тѧ̀ всѣ́хъ зижди́телѧ . страда́нїи бо твои́ми и҆мѣ́хомъ без̾сме́ртїе , и҆зба́вльшесѧ и҆з̾ и҆стлѣ́нїѧ .

Бꙋ́ди же млⷭ҇ть твоѧ̀ , да ᲂу҆тѣ́шитъ мѧ̀ по словесѝ твоемꙋ̀ раба̀ твоегѡ̀ . да прїи́дꙋтъ мнѣ̀ щедро́ты твоѧ̀ , и҆ жи́въ бꙋ́дꙋ . ꙗ҆́кѡ зако́нъ тво́й поꙋче́нїе моѐ є҆́сть . Оу҆жасе́сѧ землѧ̀ , и҆ сл҃нце сп҃се сокры́сѧ , тебѣ̀ невече́рнемꙋ свѣ́тꙋ хрⷭ҇тѐ , заше́дшꙋ во́ гробъ пло́тїю .

Да постыдѧ́тсѧ го́рдїи , ꙗ҆́кѡ не пра́веднѣ без̾зако́новаша намѧ̀ . а҆́зъ же поꙋчꙋ́сѧ в̾ за́повѣдехъ твои́хъ . да ѡ҆братѧ́тъ мѧ̀ боѧ́щїисѧ тебѐ , и҆ вѣ́дꙋщїи свидѣ́нїѧ твоѧ̀ . Оу҆снꙋ́лъ є҆сѝ хрⷭ҇тѐ , є҆сте́ствено живо́тныи со́нъ во́ гробѣ , и҆ ѿ тѧ́жкагѡ сна̀ грѣхо́внагѡ , воз̾дви́гнꙋлъ є҆сѝ ро́дъ чл҃ческїи .

Да бꙋ́детъ срⷣце моѐ непоро́чно во ѡ҆правда́нїихъ твои́хъ , да́сѧ непостыжꙋ̀ . ѡ҆скꙋдѣва́етъ во спасе́нїе твоѐ дш҃а моѧ̀ , въ сло́во твоѐ ᲂу҆пова́хъ . За́йде по́д̾ землю , рꙋко́ю созда́выи чл҃ка , да воз̾дви́гнеши ѿ паде́нїѧ собо́ры чл҃ческїѧ , всеси́льною держа́вою .

Ѡ҆скꙋдѣ́ша ѻ҆́чи моѝ в̾ сло́во твоѐ гл҃юще , когда̀ ᲂу҆тѣ́шиши мѧ̀ . занѐ бы́хъ ꙗ҆́кѡ мѣ́хъ на сла́нѣ , ѡ҆правда́нїи твои́хъ незабы́хъ . Пла́чь сщ҃е́нныи прїидѣ́те воспое́мъ , хрⷭ҇то́ви ᲂу҆ме́ршемꙋ , ꙗ҆́кѡ дре́вле жены̀ мѷроно́сицы , да ра́дꙋйтесѧ ᲂу҆слы́шимъ с̾ ни́ми .

Коли́кѡ є҆́сть дні́й раба̀ твоегѡ̀ , когда̀ сотвори́ши ѿ гонѧ́щихъ мѧ̀ сꙋ́дъ . повѣ́даша мнѣ̀ законопрестꙋ́пницы глꙋмле́нїѧ , но не ꙗ҆́кѡ зако́нъ тво́й гдⷭ҇и . Ми́ро вои́стинꙋ є҆сѝ ты̀ сло́ве не и҆стощи́мое . тѣ́мже тѝ и҆ ми́ра приноша́хꙋ , ꙗ҆́кѡ ме́ртвꙋ живо́мꙋ , жены̀ мѷроно́сицы .

Всѧ̀ за́повѣди твоѧ̀ и҆́стина . без̾ пра́вды погна́ша мѧ помози́ ми . ма́ла не сконча́ша менѐ на землѝ . а҆́зъ же не ѡ҆ста́вихъ заповѣде́й твои́хъ . И҆злїѧ̀ ѡ҆ тебѣ̀ ᲂу҆мерщве́нѣ сло́ве ма́терьнѧѧ рыда́нїѧ , без̾ сѣ́мене ро́ждьшаѧ тѧ̀ , сп҃са дш҃а́мъ на́шимъ .

По млⷭ҇ти твое́й живи́ мѧ , и҆ сохраню̀ свидѣ́нїѧ ᲂу҆́стъ твои́хъ . во́ вѣки гдⷭ҇и сло́во твоѐ пребывае́тъ на́ нб҃си , въ ро́дъ и҆ ро́дъ и҆́стина твоѧ̀ . За́йде по́д̾ землю ѕвѣзда̀ пра́веднаѧ , и҆ ме́ртвыѧ ꙗ҆́коже ѿ сна̀ воз̾дви́глъ є҆сѝ , ѿгна́въ всѧ́кꙋ тмꙋ̀ и҆́же во а҆́дѣ .

Ѡ҆снова́лъ є҆сѝ зе́млю , и҆ пребыва́етъ ᲂу҆чине́нїемъ твои́мъ . пребыва́етъ де́нь , ꙗ҆́кѡ всѧ́ческаѧ рабо́тна тебѣ̀ . Зе́рно двоера́слено , є҆стество̀ жи́зненое , в̾ нѣ́дра земна́ѧ сѣ́етсѧ со слеза́ми дне́сь , но прозѧбѐ ми́рови ѡ҆бра́дованїе .

Ꙗ҆́кѡ а҆́ще незако́нъ тво́й поꙋче́нїе моѐ є҆́сть , тогда̀ ᲂу҆́бѡ поги́блъ бы́хъ во смире́нїи мое́мъ . во́ вѣки незабꙋ́дꙋ ѡ҆правда́нїи твои́хъ , занѐ въ ни́хъ живи́лъ мѧ є҆сѝ . Оу҆боѧ́сѧ а҆да́мъ , бг҃ꙋ ходѧ́щꙋ въ раѝ . ра́дꙋетъжесѧ томꙋ̀ , ко а҆́дꙋ соше́дшꙋ . пады́и пре́жде , ны́нѣ воз̾двиза́емь .

Тво́й є҆́смь а҆́зъ спаси́ мѧ , ꙗ҆́кѡ ѡ҆правда́нїи твои́хъ взыска́хъ . менѐ жда́ша грѣ́шницы погꙋби́ти мѧ̀ , свидѣ́нїѧ твоѧ̀ разꙋмѣ́хъ . Жре́тъ тѝ же́ртвꙋ сле́знꙋю , ро́ждьшаѧ тѧ̀ хрⷭ҇тѐ , пло́тїю положе́нꙋ во́ гробѣ , вопїю́щи , воста́ни ча́до ꙗ҆́коже проречѐ .

Всѧ́коѧ кончи́ны ви́дѣхъ коне́цъ , широка̀ за́повѣдь твоѧ̀ ѕѣлѡ̀ . ко́ль воз̾люби́хъ зако́нъ тво́й гдⷭ҇и , ве́сь де́нь поꙋче́нїе моѐ є҆́сть . Захо́диши по́д̾ землю сп҃се , сл҃нце пра́вдѣ , тѣ́мже ро́ждьшаѧ тѧ лꙋна̀ , печа́лїю ѡ҆скꙋдѣва́етъ , ви́да твоегѡ̀ лиша́ема .

Па́че вра́гъ мои́хъ ᲂу҆мꙋдри́лъ мѧ̀ є҆сѝ за́повѣдїю твое́ю , занѐ в̾ вѣ́къ моѧ̀ є҆́сть . па́че всѣ́хъ ᲂу҆ча́щихъ мѧ̀ разꙋмѣ́хъ , занѐ свидѣ́нїѧ твоѧ̀ поꙋче́нїе моѐ є҆́сть . Оу҆жасе́сѧ а҆́дъ сп҃се зрѧ́ тѧ живода́вца , бога́тство є҆гѡ̀ ᲂу҆праздни́вша , и҆ и҆́҆́же ѿ́ вѣка ме́ртвыѧ воз̾дви́жꙋща .

Па́че ста́рецъ разꙋмѣ́хъ , занѐ заповѣде́й твои́хъ взыска́хъ . ѿ всѧ́когѡ пꙋтѝ лꙋка́ва воз̾брани́хъ нога́мъ мои́мъ , да сохраню̀ словеса̀ твоѧ̀ . Сл҃нце свѣ́тъ воз̾сїѧва́етъ по́ нощи сло́ве . ты̀ ᲂу҆́бѡ воскре́съ , просїѧ̀ по сме́рти ꙗ҆́снѡ , ꙗ҆́кѡ ѿ черто́га .

Ѿ сꙋде́бъ твои́хъ не ᲂу҆клони́хсѧ , занѐ ты̀ зако́нъ положи́лъ ми є҆сѝ . ко́ль сладка̀ горта́ни моемꙋ̀ словеса̀ твоѧ̀ , па́че ме́да ᲂу҆сто́мъ мои́мъ . Землѧ̀ созда́телѧ в̾ нѣ́дра прїе́мши , тре́петомъ ѡ҆бъє́мшисѧ коле́блетсѧ , ᲂу҆спи́вши ме́ртвыѧ трѧсе́нїемъ .

Ѿ заповѣде́й твои́хъ разꙋмѣ́хъ , сегѡ̀ ра́ди воз̾ненави́дѣхъ всѧ́къ пꙋ́ть не пра́вды . свѣти́льникъ нога́мъ мои́мъ зако́нъ тво́й , и҆ свѣ́тъ стезѧ́мъ мои́мъ . Ты̀ сло́ве животꙋ̀ да́тель . тѣ́мже і҆ꙋдѣ́и на крⷭ҇тѣ̀ вознесе́нъ ᲂу҆́мрети , но воздви́же с̾ собо́ю всѧ̀ ме́ртвыѧ .

Клѧ́хсѧ и҆ поста́вихъ , сохрани́ти сꙋдьбы̀ пра́вды твоеѧ̀ . смири́хсѧ до ѕѣла̀ гдⷭ҇и , живи́ мѧ по словесѝ твоемꙋ̀ . Добро́тꙋ сло́ве пе́рвꙋю не и҆мѣ̀ ни ви́дъ , є҆гда̀ стражда́ше . но воскр҃съ провозсїѧ̀ , ᲂу҆до́бривъ человѣ́ки бжⷭ҇твеными зарѧ́ми .

Во́льнаѧ ᲂу҆́стъ мои́хъ бл҃говоли́ же гдⷭ҇и , и҆ сꙋдьба́мъ твои́мъ наꙋчи́ мѧ дш҃а моѧ̀ в̾ рꙋ́кꙋ твое́ю вы́нꙋ , и҆ зако́на твоегѡ̀ незабы́хъ . За́йде пло́тїю в̾ зе́млю , свѣ́те невече́рнїи . и҆ нетерпѧ̀ зрѣ́ти со́лнце поме́рче , полꙋ́дне и҆ є҆щѐ сꙋ́щи .

Положи́ша грѣ́шницы сѣ́ть мнѣ̀ , и҆ ѿ заповѣде́й твои́хъ незаблꙋди́хъ . наслѣ́довах̾ свидѣ́нїѧ твоѧ̀ во́ вѣки , ꙗ҆́кѡ ра́дованїе срⷣца моегѡ̀ сꙋ́ть . Сл҃нце в̾кꙋ́пѣ и҆ лꙋна̀ поме́ркше сп҃се , рабо́мъ бл҃горазꙋ́мнымъ подоблѧ́хꙋсѧ , и҆́же въ че́рны ѻ҆де́жды ѡ҆блача́тсѧ .

Приклони́хъ срⷣце моѐ , сотвори́ти ѡ҆правда́нїѧ твоѧ̀ , въ вѣ́къ за воз̾даѧ́нїе . законопрестꙋ́пныѧ воз̾ненави́дѣхъ , зако́нъ же тво́й воз̾люби́хъ . Оу҆снꙋ́лъ є҆сѝ ма́лѡ , ѡ҆живи́лъ є҆сѝ ᲂу҆ме́ршїѧ , и҆ воскр҃съ , воскреси́лъ є҆сѝ всѧ̀ спѧ́щїѧ ѿ́ вѣка бл҃же .

Помо́щникъ мо́й , и҆ застꙋ́пникъ мо́й є҆сѝ ты̀ , на словеса̀ твоѧ̀ ᲂу҆пова́хъ . ᲂу҆клони́тесѧ ѿ менѐ лꙋка́внꙋющїи , и҆ и҆спыта́ю за́повѣди бг҃а моегѡ̀ . Ꙗ҆́коже неꙗ҆́сыть ᲂу҆ѧ́звенъ в̾ ре́бра твоѧ̀ сло́ве . ѻ҆́троки своѧ̀ ᲂу҆ме́ршїѧ ѡ҆живи́лъ є҆сѝ , и҆ска́пивъ внꙋ́трь стрꙋѝ жи́зненыѧ .

Застꙋпи́ мѧ по словесѝ твоемꙋ̀ , и҆ жи́въ бꙋ́дꙋ . и҆ непосрамѝ менѐ ѿ ча́ѧнїѧ моегѡ̀ . помози́ ми и҆ спасꙋ́сѧ , и҆ поꙋчꙋ́сѧ во ѡ҆правда́нїихъ твои́хъ вы́нꙋ . Сл҃нце пре́жде ᲂу҆ста́ви и҆сꙋ́съ , и҆ноплеме́нники сѣкі́и , ты́же съкры́сѧ , низ̾лага́ѧ тмѣ̀ нача́льника .

Оу҆ничижи́лъ є҆сѝ всѣ́хъ ѿстꙋпа́ющихъ ѿ ѡ҆правда́нїи твои́хъ , ꙗ҆́кѡ непра́ведно помышле́нїе и҆́хъ . престꙋпа́ющихъ непщева́хъ всѧ̀ грѣ́шныѧ землѝ , сегѡ̀ ра́ди возлюби́хъ свидѣ́нїѧ твоѧ̀ . Прїи́де и҆ распѧ́сѧ , и҆́же на вода́хъ зе́млю повѣ́шеи , и҆ ꙗ҆́кѡ без̾дыха́ненъ въ не́й воз̾лега́етъ , и҆́же нетерпѧ́щи колеба́шесѧ лю́тѣ .

Пригвоздѝ ѿ́ страха твоегѡ̀ пло́ти моѧ̀ , ѿ сꙋде́бъ бо твои́хъ ᲂу҆боѧ́хсѧ . сотвори́хъ сꙋ́дъ и҆ пра́вдꙋ , не преда́ждь менѐ ѡ҆би́дѧщимъ мѧ̀ . И҆з̾ нѣ́дръ ѻ҆те́ческихъ не и҆схо́денъ пребы́сть ще́дре , чл҃къ бы́ти и҆зво́лилъ є҆сѝ , и҆ во а҆́дъ сни́де хрⷭ҇тѐ .

Воспрїимѝ раба̀ твоегѡ̀ во́ бл҃го , да не ѡ҆клевета́ютъ менѐ го́рдїи . ѻ҆́чи моѝ ѡ҆скꙋдѣ́ша во спасе́нїе твоѐ , и҆ въ сло́во пра́вды твоеѧ̀ .Оу҆жасе́сѧ ви́дѣвъ свѣ́тъ чꙋ́вственыи , неви́димагѡ свѣ́та тѧ̀ хрⷭ҇тѐ мо́й , во́ гробѣ сокрыва́ема без̾ дыха́нїѧ .

Сотворѝ с̾ рабо́мъ твои́мъ по млⷭ҇ти твое́й , и҆ ѡ҆правда́нїемъ твои́мъ наꙋчи́ мѧ . ра́бъ тво́й є҆́смь а҆́зъ , вразꙋми́ мѧ , и҆ ᲂу҆вѣ́мъ свидѣ́нїѧ твоѧ̀ . Оу҆ѧзвлѧ́юсѧ лю́то , возопѝ ро́ждьшаѧ тѧ̀ , є҆гда̀ на крⷭ҇тѣ́ тѧ ᲂу҆зрѣ̀ пробода́ема в̾ ре́бра копїе́мъ .

Вре́мѧ сотвори́ти гдⷭ҇ви , разори́ша зако́нъ тво́й . сегѡ̀ ра́ди воз̾люби́хъ за́повѣди твоѧ̀ , па́че зла́та и҆ топа́зїѧ . Пла́каше го́рько , пренепоро́чнаѧ мт҃и твоѧ̀ сло́ве , є҆гда̀ во́ гробѣ ви́дѣ тебѐ , без̾нача́льнагѡ и҆ нетлѣ́ннагѡ бг҃а .

Сегѡ̀ ра́ди ко всѣ́мъ за́повѣдемъ твои́мъ направлѧ́хсѧ , всѧ́къ пꙋ́ть не пра́вды воз̾ненави́дѣхъ . ди́вна свидѣ́нїѧ твоѧ̀ , сегѡ̀ ра́ди и҆спыта́етъ ѧ҆̀ дш҃а моѧ̀ . Ме́ртвость твою̀ , пренепоро́чнаѧ мт҃и твоѧ̀ зрѧ́щи , го́рько к̾ тебѣ̀ вѣща́ше , некоснѝ животѐ в̾ ме́ртвыхъ .

Ꙗ҆вле́нїе слове́съ твои́хъ , просвѣща́етъ и҆ вразꙋмлѧ́етъ младе́нца . ᲂу҆ста̀ моѧ̀ ѿверзо́хъ и҆ привлеко́хъ дх҃ъ , занѐ за́повѣди твоѧ̀ жела́хъ . А҆́дъ лю́тыи потрепета̀ , є҆гда́ тѧ ви́дѣ сл҃нца сла́вы без̾сме́ртне , и҆з̾дава́ше ᲂу҆́зники то́щно .

Сла́ва ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ . Без̾нача́льне бж҃е , соприсносꙋ́щне сло́ве , и҆ дꙋ́ше ст҃ы́и , хорꙋ́гви правосла́вныхъ цр҃е́й ᲂу҆крѣпѝ на ра́тныѧ , ꙗ҆́кѡ бла́гъ .

И҆ ны́нѣ и҆ прⷭ҇нѡ и҆ во́ вѣки вѣкѡ́мъ , а҆ми́нь . Жи́знь ро́ждьшаѧ , всенепоро́чнаѧ чи́стаѧ дв҃о , ᲂу҆толѝ цр҃ко́вныѧ собла́зны , и҆ пода́ждь смире́нїе .

А҆ллилꙋ́їѧ , а҆ллилꙋ́їѧ , сла́ва тебѣ̀ бж҃е , три́жды , съ припѣ́вы : Досто́йнѡ є҆́сть велича́ти тѧ̀ , живода́вче хрⷭ҇тѐ , врата̀ а҆́дова сте́ршагѡ , и҆ наси́лїе дїѧ́воле разо́ршагѡ .

тре́тїе статїѐ , пое́тъ і҆єре́й є҆ди́нощи : Ро́ди всѝ пѣ́снь , погребе́нїю твоемꙋ̀ прино́симъ ще́дре .

При́зри намѧ̀ и҆ поми́лꙋй мѧ , по сꙋдꙋ̀ лю́бѧщихъ и҆́мѧ твоѐ . Ро́ди всѝ пѣ́снь , погребе́нїю твоемꙋ̀ прино́симъ ще́дре .

Стопы̀ моѧ̀ напра́ви по словесѝ твоемꙋ̀ , и҆ да не ѡ҆долѣ́етъ ми всѧ́ко без̾зако́нїе . Ро́ди всѝ сп҃се , воспѣва́емъ стра́сти твоѧ̀ честны́ѧ .

И҆зба́ви мѧ ѿ клеветы̀ чл҃ческїѧ , и҆ сохраню̀ за́повѣди твоѧ̀ . лицѐ твоѐ просвѣтѝ на раба̀ твоегѡ̀ , и҆ наꙋчи́ мѧ ѡ҆правда́нїемъ твои́мъ . Грѧдѝ всѧ̀ тва́рь , пѣ́сни и҆схо́дныѧ принесе́мъ зижди́телю .

И҆схо́дища водна́ѧ и҆зведо́стѣ ѻ҆́чи моѝ , поне́же не сохрани́хъ зако́на твоегѡ̀ . пра́веденъ є҆сѝ гдⷭ҇и , и҆ пра́въ сꙋ́дъ тво́й . заповѣ́далъ є҆сѝ пра́вдꙋ свидѣ́нїѧ твоѧ̀ , и҆ и҆́стинꙋ ѕѣлѡ̀ . Ꙗ҆́кѡ ме́ртва жива́гѡ съ мѷроно́сицами , мѵ́ромъ пома́жемъ мꙋ́дрено .

И҆ста́ѧла мѧ є҆́сть ре́вность твоѧ̀ , ꙗ҆́кѡ забы́ша словеса̀ твоѧ̀ вразѝ моѝ . раз̾жже́но сло́во твоѐ ѕѣлѡ̀ , и҆ ра́бъ тво́й воз̾любѝ є҆̀ .

ѡ́сифе треблаже́нне , спрѧ́тай тѣ́ло хрⷭ҇та̀ жизнода́вца .

Ю҆́нѣйшїи а҆́зъ є҆́смь и҆ ᲂу҆ничиже́нъ , ѡ҆правда́нїи твои́хъ незабы́хъ . пра́вда твоѧ̀ пра́вда во́ вѣки , и҆ зако́нъ тво́й и҆́стина . Живода́вче сп҃се , сла́ва держа́вѣ твое́й , а҆́дъ разо́ршей .

Ско́рби и҆ нꙋ́жды ѡ҆брѣто́ша мѧ̀ , за́повѣди твоѧ̀ поꙋче́нїе моѐ . пра́вда свидѣ́нїѧ твоѧ̀ в̾ вѣ́къ , вразꙋми́ мѧ и҆ жи́въ бꙋ́дꙋ . Гора̀ тꙋ́чнаѧ , пречи́стаѧ тѧ̀ сло́ве , матерелѣ́пнѡ пла́каше .

Воз̾ва́хъ всѣ́мъ срⷣцемъ мои́мъ , ᲂу҆слы́ши мѧ гдⷭ҇и , ѡ҆правда́нїи твои́хъ взыщꙋ̀ . воз̾ва́хъ ти спаси́ мѧ , и҆ сохраню̀ свидѣ́нїѧ твоѧ̀ . Пла́чь сподвиза́ше ро́ждьшаѧ тѧ , тебѣ̀ сло́ве ᲂу҆ме́ршꙋ .

Пред̾вари́хъ в̾ без̾го́дїи и҆ воз̾ва́хъ , на словеса̀ твоѧ̀ ᲂу҆пова́хъ . пред̾вари́стѣ ѻ҆́чи моѝ ко ᲂу҆́трꙋ , поꙋчи́тисѧ словесе́мъ твои́мъ . Жены̀ с̾ мѵ́ромъ прїидо́ша пома́зати хрⷭ҇та̀ , бжⷭ҇твенаго ми́ра .

Гла́съ мо́й ᲂу҆слы́ши гдⷭ҇и , по млⷭ҇ти твое́й и҆ по сꙋдьбѣ̀ твое́й живи́ мѧ . прибли́жиша гонѧ́щїи мѧ без̾зако́нїе , ѿ зако́на же твоегѡ̀ ᲂу҆дали́шасѧ . Сме́рть сме́ртїю ᲂу҆мертви́лъ є҆сѝ бж҃е мо́й , бжⷭ҇твеною вла́стїю свое́ю .

Бли́зъ є҆сѝ ты̀ гдⷭ҇и , и҆ всѝ пꙋтїѐ твоѝ и҆́стина . и҆спе́рва позна́хъ ѿ свидѣ́нїи твои́хъ , ꙗ҆́кѡ во́ вѣки ѡ҆снова́лъ ѧ҆̀ є҆сѝ . Прельсти́сѧ преле́стникъ , прельсти́выисѧ и҆збавлѧ́етсѧ , премꙋ́дростїю твое́ю бж҃е мо́й .

Ви́ждь смире́нїе моѐ и҆ и҆зми́ мѧ , ꙗ҆́кѡ зако́на твоегѡ̀ не забы́хъ . сꙋдѝ сꙋ́дъ мо́й и҆ и҆зба́ви мѧ , ра́ди словесѐ твоегѡ̀ живи́ мѧ . Ѻ҆цто́мъ напое́нъ бы́сть и҆ же́лчїю ще́дре , дре́внее разрѣша́ѧ вкꙋше́нїе .

Дале́че ѿ грѣ́шникъ спасе́нїе , ꙗ҆́кѡ ѡ҆правда́нїи твои́хъ не взыска́ша . щедро́ты твоѧ̀ мно́ги гдⷭ҇и , по сꙋдьбѣ̀ твое́й живи́ мѧ . На крⷭ҇тѣ̀ пригвожде́нъ бы́сть , и҆́же дре́вле лю́ди своѧ̀ , столпо́мъ ѻ҆́блачнымъ покрыва́ѧ .

Мно́зи гонѧ́щїи мѧ̀ и҆ стꙋжа́ющїи ми , ѿ свидѣ́нїи твои́хъ не ᲂу҆клони́хсѧ . ви́дѣхъ неразꙋмѣва́ющїѧ и҆ и҆ста́ѧхъ , ꙗ҆́кѡ слове́съ твои́хъ не сохрани́ша . Мѷроно́сицы сп҃се ко́ гробꙋ прише́дше , мѵ́рѡ принесо́ша тѝ .

Ви́ждь ꙗ҆́кѡ за́повѣди твоѧ̀ воз̾люби́хъ гдⷭ҇и , по млⷭ҇ти твое́й живи́ мѧ . нача́ло слове́съ твои́хъ и҆́стина , и҆ во́ вѣки всѧ̀ сꙋдьбы̀ пра́вды твоеѧ̀ . Воста́ни ще́дре , ѿ ѡ҆снова́нїи а҆́дскихъ , воскреша́ѧ на́съ .

Кнѧ́зи погна́ша мѧ тꙋ́не , и҆ ѿ слове́съ твои́хъ ᲂу҆страши́сѧ срⷣце моѐ . воз̾ра́дꙋюсѧ а҆́зъ ѡ҆ словесѣ́хъ твои́хъ , ꙗ҆́кѡ ѡ҆брѣта́ѧи коры́сть мно́гꙋ . Воскреснѝ живода́вче , сле́зы точа́щи глаго́лаше ро́ждьшаѧ тѧ̀ .

Не пра́вдꙋ воз̾ненави́дѣхъ и҆ ѡ҆ме́рзѣ мѝ , зако́нъ же тво́й воз̾люби́хъ . седми́жды дне́мъ хвали́хъ тѧ̀ , ѡ҆ сꙋдьба́хъ пра́вды твоеѧ̀ . Потщи́сѧ воскреснꙋ́ти , печа́ль разрѣша́ѧ сло́ве , чи́стѡ ро́ждьшей тѧ̀ .

Ми́ръ мно́гъ лю́бѧщимъ зако́нъ тво́й , и҆ нѣ́сть и҆́мъ собла́знъ . ча́ѧхъ спасе́нїе твоѐ гдⷭ҇и , и҆ за́повѣди твоѧ̀ воз̾люби́хъ . Во́ гробѣ положе́нъ бы́сть , и҆ ме́ртвъ ви́дѣнъ бы́сть живо́тъ всѣ́хъ .

Сохранѝ дш҃а моѧ̀ свидѣ́нїѧ твоѧ̀ , и҆ воз̾любѝ ѧ҆̀ ѕѣлѡ̀ . сохрани́хъ за́повѣди твоѧ̀ , и҆ свидѣ́нїѧ твоѧ̀ , ꙗ҆́кѡ всѝ пꙋтїѐ моѝ пред̾ тобо́ю гдⷭ҇и .

Небе́сныѧ си́лы ᲂу҆диви́шасѧ стра́хомъ , ме́ртва тѧ̀ зрѧ́ще .

Да прибли́житсѧ мл҃тва моѧ̀ пред̾ тѧ̀ гдⷭ҇и , по словесѝ твоемꙋ̀ вразꙋми́ мѧ . да вни́детъ проше́нїе моѐ пред̾ тѧ̀ гдⷭ҇и , по словесѝ твоемꙋ̀ и҆зба́ви мѧ . Ꙗ҆́кѡ ме́ртвꙋ мѵ́рѡ принесо́ша жены̀ , пома́зати тѣ́ло твоѐ .

Да ѿры́гнꙋтъ ᲂу҆стнѣ̀ моѝ пѣ́нїе , є҆гда̀ наꙋчи́ши мѧ̀ ѡ҆правда́нїемъ твои́мъ . да провѣща́етъ ꙗ҆зы́къ мо́й словеса̀ твоѧ̀ , занѐ всѧ̀ за́повѣди твоѧ̀ пра́вда . Рыда́етъ и҆ пла́четъ тѧ̀ пречⷭ҇таѧ , мт҃и твоѧ̀ сп҃се и҆ бж҃е мо́й .

Да бꙋ́детъ рꙋка̀ твоѧ̀ спаса́ющи мѧ̀ , ꙗ҆́кѡ за́повѣди твоѧ̀ и҆зво́лихъ , воз̾желѣ́хъ спасе́нїе твоѐ гдⷭ҇и , и҆ зако́нъ тво́й поꙋче́нїе моѐ є҆́сть . Любо́вїю и҆ стра́хомъ , стра́сти твоѧ̀ почита́ющимъ , пода́ждь согрѣше́нїемъ разрѣше́нїе .

Жива̀ бꙋ́детъ дш҃а моѧ̀ и҆ восхва́литъ тѧ̀ , и҆ сꙋдьбы̀ твоѧ̀ помо́гꙋтъ мнѣ̀ . заблꙋди́хъ ꙗ҆́кѡ ѻ҆вча̀ поги́бшее , взыщѝ раба̀ твоегѡ̀ , ꙗ҆́кѡ заповѣде́й твои́хъ не забы́хъ . Смире́нїе цр҃кви , и҆ лю́демъ спасе́нїе , да́рꙋй воскрⷭ҇нїемъ свои́мъ .

Сла́ва ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ , и҆ ны́нѣ и҆ прⷭ҇нѡ и҆ во́ вѣки вѣкѡ́мъ , а҆ми́нь .

та́же пое́мъ , тропарѝ сїѧ̀ . гла́съ , є҃ . Блгⷭ҇ве́нъ є҆сѝ гдⷭ҇и , наꙋчѝ на́съ ѡ҆правда́нїемъ твои́мъ . А҆́нг҃льскїи собо́ръ ᲂу҆диви́сѧ , зрѧ̀ тебѐ в̾ ме́ртвыхъ вмѣ́ньшасѧ . сме́ртнꙋю же сп҃се крѣ́пость разо́рша , и҆ съ собо́ю а҆да́ма воз̾дви́гша , и҆ ѿ а҆́да всѧ̀ свобо́ждьша .

блгⷭ҇ве́нъ є҆сѝ гдⷭ҇и , наꙋчѝ на́съ ѡ҆правда́нїемъ твои́мъ . Почто̀ мѵ́рѡ , съ ми́лостивыми слеза́ми , ѽ ᲂу҆чени́цы и҆злива́ете , блиста́ѧсѧ на́ гробѣ а҆́нг҃лъ , мѷроно́сицамъ вѣща́ше , ви́дите вы̀ гро́бъ то́щь и҆ разꙋмѣ́йте , сп҃съ бо воскр҃се ѿ́ гроба .

блгⷭ҇ве́нъ є҆сѝ гдⷭ҇и , наꙋчѝ на́съ ѡ҆правда́нїемъ твои́мъ . Ѕѣлѡ̀ ра́нѡ , мѷроно́сицы теча́хꙋ , на́ гробъ рыда́юще . но пред̾ста̀ к̾ ни́мъ а҆́нг҃лъ и҆ речѐ , рыда́нїю вре́мѧ преста̀ непла́читесѧ . воскрⷭ҇нїе же а҆пⷭ҇лѡмъ рцѣ́те .

блгⷭ҇ве́нъ є҆сѝ гдⷭ҇и , наꙋчѝ на́съ ѡ҆правда́нїемъ твои́мъ . Мѷроно́сицы жены̀ , съ ми́ромъ прише́дше , ко́ гробꙋ твоемꙋ̀ сп҃се рыда́юще . а҆́нг҃лꙋ же к̾ ни́мъ вѣща́ющꙋ , что̀ с̾ ме́ртвыми жива́гѡ помышлѧ́ете ; и҆́бо ꙗ҆́кѡ бг҃ъ воскр҃се ѿ́ гроба .

сла́ва . Поклони́мсѧ ѻ҆ц҃ꙋ , и҆ тогѡ̀ сн҃ови и҆ ст҃о́мꙋ дх҃ꙋ , ст҃ѣ́й трⷪ҇цѣ во є҆ди́номъ сꙋществѣ̀ . с̾ серафи́ми зовꙋ́ще , ст҃ъ , ст҃ъ , ст҃ъ є҆сѝ гдⷭ҇и .

и҆ ны́нѣ . Жизнода́вца ро́ждьши , ѿ грѣха̀ дв҃це а҆да́ма и҆зба́вила є҆сѝ . ра́дость же є҆́ввѣ , в̾ печа́ли мѣ́сто дарова̀ , ѿпа́дшей жи́зни . тѣ́мъ па́ки къ то́й воз̾во́дитъ , и҆з̾ тебѐ воплоти́выисѧ бг҃ъ и҆ чл҃къ .

А҆ллилꙋ́їѧ , а҆ллилꙋ́їѧ , сла́ва тебѣ̀ бж҃е , гⷤ .