Въ но́вꙋю нлⷣю , є҆́же є҆́сть ѳѡмина̀ . стихо́въ , к҃є . припѣ́въ : Велича́емъ тѧ̀ живода́вче хрⷭ҇тѐ , на́съ ра́ди во а҆́дъ сше́дшагѡ , и҆ съ собо́ю всѧ̀ воскреси́вшагѡ .

Гдⷭ҇ь воцр҃и́сѧ в̾ лѣ́потꙋсѧ ѡ҆блечѐ , ѡ҆блече́сѧ гдⷭ҇ь в̾ си́лꙋ и҆ препоѧ́сасѧ .꙳ И҆́бо ᲂу҆твердѝ вселе́ннꙋю , ꙗ҆́же не под̾ви́житсѧ . Кто̀ возглаго́летъ си́лы гдⷭ҇нѧ , слы́шаны сотвори́тъ всѧ̀ хвалы̀ є҆гѡ̀ . Да рекꙋ́тъ и҆зба́вленїи гдⷭ҇емъ , и҆́хже и҆зба́ви и҆з̾ рꙋкѝ вра́гъ . Да и҆сповѣ́дѧтсѧ гдⷭ҇ви млⷭ҇ти є҆гѡ̀ , и҆ чꙋдеса̀ є҆гѡ̀ сыновѡ́мъ чл҃ческимъ . Ꙗ҆́кѡ насы́тилъ є҆́сть дш҃ꙋ тщꙋ̀ , и҆ дш҃ꙋ а҆́лчꙋщꙋ и҆спо́лни бла́гъ . Сѣдѧ́щїѧ во тмѣ̀ и҆ сѣ́ни сме́ртнѣй , ѡ҆кова́нныѧ нището́ю и҆ желѣ́зомъ . Дш҃а и҆́хъ в̾ ни́хъ и҆з̾немо́же , и҆ не бѣ̀ помога́ющагѡ . И҆ возва́ша ко́ гдⷭ҇ꙋ внегда̀ скорбѣ́ти и҆́мъ , и҆ ѿ бѣ́дъ и҆́хъ и҆зба́ви и҆́хъ .꙳ И҆ и҆зведѐ и҆́хъ и҆з̾ тмы̀ и҆ сѣ́ни сме́ртныѧ . Да и҆сповѣ́дѧтсѧ гдⷭ҇ви млⷭ҇ти є҆гѡ̀ , и҆ чꙋдеса̀ є҆гѡ̀ сыновѡ́мъ чл҃ческимъ . Ꙗ҆́кѡ сокрꙋшѝ врата̀ мѣ́днаѧ , и҆ вереѧ̀ желѣ́зныѧ сломѝ , и҆ и҆зба́ви и҆́хъ ѿ растлѣ́нїихъ , и҆ ᲂу҆́зы и҆́хъ растерза̀ . Да и҆сповѣ́дѧтсѧ гдⷭ҇ви млⷭ҇ти є҆гѡ̀ , и҆ чꙋдеса̀ є҆гѡ̀ сыновѡ́мъ чл҃ческимъ . И҆ да по́жрꙋтъ є҆мꙋ̀ же́ртвꙋ хвалѣ̀ , и҆ да воз̾вѣстѧ́тъ дѣ́ла є҆гѡ̀ в̾ ра́дости . Да воз̾несꙋ́тъ є҆гѡ̀ в̾ цр҃кви лю́дьстѣй , и҆ на сѣда́лищи ста́рецъ восхва́лѧтъ є҆гѡ̀ . Ꙗ҆́кѡ ᲂу҆слы́ша ни́щїѧ гдⷭ҇ь , и҆ ѡ҆кова́нныхъ свои́хъ не ᲂу҆ничижи́тъ . Воста̀ ꙗ҆́кѡ спѧ̀ гдⷭ҇ь , и҆ поразѝ врагѝ своѧ̀ . Ꙗ҆́кѡ ѻ҆́чи гдⷭ҇ни на ᲂу҆пова́ющихъ на млⷭ҇ть є҆гѡ̀ , и҆ ᲂу҆́ши є҆гѡ̀ в̾ мл҃твꙋ и҆́хъ .꙳ Оу҆слы́шати воздыха́нїѧ ѡ҆кова́нныхъ , и҆ разрѣши́ти сы́ны ᲂу҆мерщве́ныхъ , и҆зба́витъ ѿ сме́рти дш҃а и҆́хъ . Ꙗ҆́кѡ помо́щникъ и҆ защи́титель и҆́мъ є҆́сть , и҆ гдⷭ҇нѧ гдⷭ҇нѧ и҆схо́дища сме́ртнаѧ . Да воскре́снетъ бг҃ъ и҆ разы́дꙋтсѧ вразѝ є҆гѡ̀ , и҆ да бѣжа́тъ ѿ лица̀ є҆гѡ̀ всѝ ненави́дѧщїи є҆гѡ̀ . Да восхва́лѧтъ є҆гѡ̀ нб҃са̀ и҆ землѧ̀ , ꙗ҆́кѡ ди́вна сотворѝ гдⷭ҇ь . Сі́й де́нь и҆́же сотворѝ гдⷭ҇ь , возра́дꙋемсѧ и҆ возвесели́мсѧ во́нь .꙳ Воскрⷭ҇нѝ гдⷭ҇и бж҃е мо́й , да вознесе́тсѧ рꙋка̀ твоѧ̀ , не забꙋ́ди ни́щихъ свои́хъ до конца̀ .꙳ Гдⷭ҇и бж҃е мо́й в̾ вѣ́къ и҆сповѣ́мсѧ тебѣ̀ .꙳

Сла́ва ѻ҆ц҃ꙋ и҆ сн҃ꙋ и҆ ст҃о́мꙋ дꙋ́хꙋ .꙳ И҆ ны́нѣ и҆ при́снѡ и҆ во́ вѣки вѣкѡ́мъ , а҆ми́нь .꙳

А҆ллилꙋ́їѧ , а҆ллилꙋ́їѧ , сла́ва тебѣ̀ бж҃е . гⷤ .