На воз̾несе́нїе гдⷭ҇а на́шегѡ і҆с҃а хрⷭ҇та̀ . стихо́въ , л҃є . припѣ́въ : Велича́емъ тѧ̀ живода́вче хрⷭ҇тѐ , и҆ почита́емъ є҆́же на нб҃са̀ , съ пречи́стою тѝ пло́тїю бжⷭ҇твеное вознесе́нїе .

Всѝ ꙗ҆зы́цы восплещи́те рꙋка́ми , воскли́кните бг҃ꙋ гла́сомъ ра́дости .꙳ Ꙗ҆́кѡ гдⷭ҇ь вы́шнїи стра́шенъ , цр҃ь ве́лїи по все́й землѝ . Покорѝ лю́ди на́мъ , и҆ ꙗ҆зы́ки по́д̾ ноги на́ша . И҆збра̀ на́мъ достоѧ́нїе своѐ , добро́тꙋ і҆а́кѡвлю ю҆́же возлюбѝ . Взы́де бг҃ъ в̾ воскликнове́нїи , гдⷭ҇ь во́ гласѣ трꙋ́бнѣмъ .꙳ Взы́де на херꙋви́мъ и҆ летѣ̀ , возлетѣ̀ на крилꙋ̀ вѣ́треню . Полога́ѧ ѻ҆́блаки на восхожде́нїе своѐ , ходѧ́и на крилꙋ̀ вѣ́треню . Возми́те врата̀ кнѧ́зи ва́ши . и҆ возми́тесѧ врата̀ вѣ́чнаѧ , и҆ вни́детъ цр҃ь сла́вы . Кто̀ є҆́сть се́й цр҃ь сла́вы ; гдⷭ҇ь держа́вныи и҆ си́льныи , гдⷭ҇ь си́ленъ во́ брани . Возми́те врата̀ кнѧ́зи ва́ши , и҆ возми́тесѧ врата̀ вѣ́чнаѧ , и҆ вни́детъ цр҃ь сла́вы . Кто̀ є҆́сть се́й цр҃ь сла́вы ; гдⷭ҇ь си́ламъ , то́й є҆́сть цр҃ь сла́вы . Гдⷭ҇ь на́ нб҃си ᲂу҆гото́ва прⷭ҇то́лъ сво́й , и҆ сѣди́тъ гдⷭ҇ь цр҃ь во́ вѣки . Речѐ гдⷭ҇ь гдⷭ҇ви моемꙋ̀ , сѣдѝ ѡ҆деснꙋ́ю менѐ , до́ндеже положꙋ̀ врагѝ твоѧ̀ под̾но́жїе но́гъ твои́хъ . Гдⷭ҇ь на́ нб҃си прⷭ҇то́лъ є҆гѡ̀ , и҆ си́ла є҆гѡ̀ на ѻ҆́блацѣхъ . Поклони́тесѧ є҆мꙋ̀ всѝ а҆́нг҃ли є҆гѡ̀ .꙳ Бг҃ъ сѣди́тъ на прⷭ҇то́лѣ ст҃ѣ́мъ свое́мъ . И҆ то́й сꙋ́дитъ вселе́ннѣй въ пра́вдꙋ , сꙋ́дитъ лю́демъ пра́вотою . Пра́вдою и҆ сꙋдьбо́ю и҆спра́виши прⷭ҇то́лъ сво́й . Гдⷭ҇и на́ нб҃си ми́лость твоѧ̀ , и҆ и҆́стина твоѧ̀ до ѻ҆́блакъ . Престо́лъ тво́й бж҃е в̾ вѣ́къ вѣ́ка .꙳ Го́товъ престо́лъ тво́й ѿ то́лѣ ѿ́ вѣка ты̀ є҆сѝ . Возше́лъ є҆сѝ на высотꙋ̀ , плѣни́лъ є҆сѝ плѣ́нъ , и҆ сѣ́лъ є҆сѝ на престо́лѣ сꙋдѧ́и пра́вдꙋ . Ꙗ҆́кѡ взѧ́тсѧ велелѣ́пота твоѧ̀ превы́ше нб҃съ . По высотѣ̀ твое́й , ᲂу҆мно́жилъ є҆сѝ сн҃ы чл҃ческїѧ . Оу҆праздни́тесѧ и҆ разꙋмѣ́йте , ꙗ҆́кѡ а҆́зъ є҆́смь бг҃ъ . Вознесꙋ́сѧ во ꙗ҆зы́цѣхъ , вознесꙋ́сѧ на землѝ . Вознеси́сѧ на нб҃са̀ бж҃е , и҆ по все́й землѝ сла́ва твоѧ̀ .꙳ Вознеси́сѧ сꙋдѧ́и землѝ , ди́венъ въ высо́кихъ гдⷭ҇ь . Жи́въ гдⷭ҇ь , и҆ бл҃гослове́нъ бг҃ъ , и҆ вознесе́тсѧ бг҃ъ спасе́нїѧ моегѡ̀ . Кто̀ ꙗ҆́кѡ гдⷭ҇ь бг҃ъ на́шъ , и҆́же на высо́кихъ живы́и , и҆ на смире́нныѧ призира́ѧ , на́ нб҃си и҆ на землѝ . Нб҃о небесѝ гдⷭ҇ви , зе́млю же да́стъ сыновѡ́мъ чл҃ческимъ . Вознеси́сѧ гдⷭ҇и си́лою твое́ю , воспое́мъ и҆ пое́мъ си́лы твоѧ̀ . Црⷭ҇твїѧ земна́ѧ по́йте бг҃ꙋ , воспо́йте гдⷭ҇ви , возше́дшемꙋ на́ нб҃о небе́сное на восто́ки . По́йте бг҃ꙋ на́шемꙋ по́йте , по́йте цр҃е́ви на́шемꙋ по́йте . Возноси́те гдⷭ҇а бг҃а на́шегѡ , и҆ поклонѧ́йтесѧ в̾ горѣ̀ ст҃ѣ́й є҆гѡ̀ , ꙗ҆́кѡ ст҃ъ гдⷭ҇ь бг҃ъ на́шъ .꙳

Сла́ва ѻ҆ц҃ꙋ и҆ сн҃ꙋ и҆ ст҃о́мꙋ дꙋ́хꙋ .꙳ И҆ ны́нѣ и҆ при́снѡ и҆ во́ вѣки вѣкѡ́мъ , а҆ми́нь .꙳

А҆ллилꙋ́їѧ , а҆ллилꙋ́їѧ , сла́ва тебѣ̀ бж҃е . гⷤ .