1 августа: Происхождение честнаго Креста Господня

МЦⷭ҇А А҆́ВГУСТА ВЪ А҃ ДН҃Ь

прᲂисхᲂже́нїе честна́гѡ и҆ живᲂтвᲂрѧ́щагѡ крⷭ҇та̀ гдⷭ҇нѧ . =И҆ ст҃ы́хъ мч҃нкъ седьмѝ бра́тїи по́ плᲂти маккаве́й , и҆ ᲂу҆чи́телѧ и҆́хъ є҆леаза́ра , и҆ мт҃ре и҆́хъ сᲂлᲂмѡні́и . Въ сі́и де́нь пра́з̾днꙋемъ всемлⷭ҇тивᲂмꙋ сп҃сꙋ . а҆́ще хра́мъ всемлⷭ҇тивагѡ сп҃са , и҆ та̀ слꙋ́жба пи́сана пᲂ се́й слꙋ́жбѣ . Ве́черъ ѻ҆бы́чнаѧ каѳи́сма . На гдⷭ҇и вᲂзва́хъ , пᲂста́вимъ стихо́въ , ѕ҃ . крⷭ҇тꙋ̀ , г҃ . и҆ ст҃ы́мъ , г҃ . стⷯры , крⷭ҇тꙋ̀ . гла́съ , д҃ . поⷣ . и҆́же зва́нныи свы́ше . Д=не́сь ра́дꙋетсѧ вѣ́рныхъ мно́жествᲂ бжⷭ҇твенᲂе ,꙳ ꙗ҆ви́бᲂсѧ нбⷭ҇ныи крⷭ҇тъ кᲂнце́мъ .꙳ сїѧ́етъ же вᲂздꙋ́хъ свѣ́тъ непристꙋ́пенъ .꙳ а҆є҆́ръ зарю̀ и҆спꙋща́етъ ,꙳ и҆ землѧ̀ лицѐ ᲂу҆краша́етъ .꙳ пᲂе́тъ бжⷭ҇твеными пѣ́сньми цр҃кви хрⷭ҇то́ва ,꙳ слꙋ́житъ пᲂчита́ющи , свы́ше ю҆̀ сᲂблюда́ющагѡ .꙳ крⷭ҇та̀ бжⷭ҇твенагѡ и҆ пречꙋ́днагѡ .꙳ є҆го́же си́лᲂю ᲂу҆крѣплѧ́еми ,꙳ влⷣцѣ пристꙋ́пимъ зᲂвꙋ́ще ,꙳ ᲂу҆мирѝ ми́ра и҆ спасѝ дш҃а на́ша . Да ра́дꙋетсѧ тва́рь и҆ и҆гра́етъ .꙳ дне́сь бᲂ ѡ҆блиста̀ крⷭ҇тъ въ кᲂнцѣ́хъ съ нб҃сѐ ,꙳ землена́ѧ прᲂсвѣща́ѧ , и҆ сᲂвᲂкꙋ́плена пᲂказа̀ растᲂче́ныѧ .꙳ дне́сь ликꙋ́ютъ съ ли́ки а҆́нг҃льскими чл҃цы .꙳ и҆́бᲂ бранѧ́щее средᲂгра́дїе ,꙳ крⷭ҇то́мъ разᲂре́нᲂ ,꙳ вᲂ є҆ди́нᲂ всѧ̀ ꙗ҆́вѣ сᲂвᲂкꙋпѝ .꙳ тѣ́мже пред̾сїѧ́ѧ па́че сл҃нца ,꙳ всю̀ тва́рь бл҃гᲂда́тїю ,꙳ ᲂу҆ѧснѧ́етъ и҆ спаса́етъ ,꙳ вѣ́рнѡ тᲂго̀ чтꙋ́щїѧ . Па́че сл҃нечныѧ зарѝ ,꙳ хᲂтѧ́и ми́рᲂви ски́петрᲂ ,꙳ ꙗ҆́кᲂже че́стнᲂ цр҃ѧ хрⷭ҇та̀ ,꙳ и҆ кᲂнчи́нꙋ пᲂказа́ти ,꙳ крⷭ҇тъ бжⷭ҇твеныи с̾ пред̾сїѧ́етъ ꙗ҆́снѡ в̾ кᲂнцѣ́хъ .꙳ сі́и вᲂз̾ведѐ и҆з̾ а҆́да ро́дъ челᲂвѣ́чь .꙳ а҆́да вельмѝ плѣни́въ ,꙳ врага̀ низ̾лᲂжи́въ ,꙳ бѣсѡ́мъ гᲂрды́ню дᲂ кᲂнца̀ пᲂгꙋбѝ .꙳ ны́нѣ же прᲂѧвлѧ́етъ вᲂскрⷭ҇нїе сп҃сᲂвᲂ ,꙳ и҆ спаса́етъ зᲂвꙋ́щїѧ ,꙳ ᲂу҆мирѝ ми́ра и҆ прᲂсвѣтѝ дш҃а на́ша .

и҆́ны , стⷯры , ст҃ы́мъ . гла́съ , а҃ . поⷣ . прехва́льнїи мч҃нцы .= З=ако́на ве́рхъ ,꙳ седмїю̀ стᲂлпы̀ вᲂз̾вы́шенъ ,꙳ мꙋчи́тельствᲂ непᲂкᲂлеба̀ .꙳ и҆́бᲂ ско́тьскїи гᲂни́телѧ гнѣ́въ ,꙳ мꙋ́жески претерпѣ́ша .꙳ тѣ́лᲂ преда́вше сѣкꙋ́щимъ ,꙳ бл҃гᲂро́днїи ю҆́нᲂши и҆ бра́тїѧ ,꙳ мѡѷсе́йскимъ преда́нїемъ храни́тели . Па́че зри́мыхъ ,꙳ ᲂу҆́мъ вᲂи́стинꙋ вᲂзвы́сивше .꙳ ᲂу҆́ды плᲂтьскі́ѧ ѿсѣца́хꙋ ,꙳ бл҃гᲂчести́вїи и҆ до́блїи ѻ҆́трᲂцы ,꙳ с̾ ма́терею бг҃ᲂмꙋ́дрᲂю ,꙳ вели́кими наде́жами вжилѧ́еми .꙳ ю҆́же нн҃ѣ пᲂлꙋчи́ша ,꙳ ᲂу҆ а҆враа́ма пᲂчи́вше на ло́нѣхъ пра́ѻ҆ц҃а свᲂегѡ̀ . Дш҃е́внᲂю до́блестїю ,꙳ тве́рдѡ себѐ вᲂѡ҆рꙋжи́вше .꙳ и҆ ꙗ҆́рᲂсть ꙗ҆́кѡ преѡ҆би́дѣвше ,꙳ прᲂти́вꙋ бᲂрцꙋ̀ крѣ́пкѡ прилѣжа́хꙋ бл҃гᲂче́стїѧ ра́ди ,꙳ и҆ зако́на ѻ҆те́ческагѡ хране́нїемъ ,꙳ сщ҃е́ннѣйшїи є҆леаза́ръ ,꙳ и҆ премꙋ́дрїи ю҆́нᲂши ,꙳ съ ма́терїю бг҃ᲂмꙋ́дрᲂю .

сла́ва . гла́съ , и҃ . Ст҃і́и маккаве́и мꙋчи́телю глаго́лахꙋ , на́мъ а҆нтїѡ́ше , є҆ди́нъ цр҃ь бг҃ъ , ѿ него́ же бы́хᲂмъ , и҆ к̾ немꙋ̀ ѡ҆браща́емсѧ . ми́ръ жде́тъ и҆́нъ на́съ , ви́димагѡ высᲂча́йшїи и҆ твердѣ́йшїи . ѻ҆те́чествᲂ же на́мъ і҆єрⷭ҇ли́мъ , крѣ́пкїи и҆ неги́бнꙋщїи . тᲂржество́ же , є҆́же сᲂ а҆́нг҃лы житїѐ . гдⷭ҇и , мл҃твами и҆́хъ пᲂми́лꙋй и҆ спасѝ на́съ . и҆ нн҃ѣ . гла́съ , то́йже . Є҆го́же дре́вле мѡѷсе́й прᲂѡ҆брази́въ сᲂбо́ю , а҆мали́ка низ̾лᲂжи́въ пᲂбѣдѝ . и҆ дв҃дъ пѣве́цъ , пᲂд̾но́жїю твᲂемꙋ̀ вᲂпїѧ̀ кла́нѧтисѧ пᲂвелѣва́ше . чⷭ҇тно́мꙋ крⷭ҇тꙋ̀ твᲂемꙋ̀ хрⷭ҇тѐ бж҃е , дне́сь грѣ́шнїи кла́нѧемсѧ . ᲂу҆стна́ми недᲂсто́йными , тѧ̀ и҆з̾во́лившагᲂ пригвᲂзди́тисѧ на не́мъ , вᲂспѣва́юще мо́лимсѧ . гдⷭ҇и , с̾ разбо́йникᲂмъ црⷭ҇твїю твᲂемꙋ̀ спᲂдо́би на́съ .

На стихо́внѣ , вᲂ ѻ҆кта́и . сла́ва . гла́съ , и҃ . Дш҃а пра́ведныхъ в̾ рꙋцѣ̀ гдⷭ҇ни , ꙗ҆́кᲂже а҆враа́мъ и҆ і҆саа́къ и҆ і҆а́кѡвъ , и҆́же пре́жде зако́на пра́ѻ҆ц҃ы , и҆ маккаве́ѡвъ пра́дѣди , и҆́же ны́нѣ вᲂсхвалѧ́емᲂмъ ѿ на́съ . сі́и бᲂ крѣпкᲂдꙋ́шнїи а҆враа́мстїи внꙋ́цы сꙋ́ще , вѣ́рѣ пᲂревнᲂва́вше свᲂегѡ̀ пра́ѻ҆ц҃а а҆враа́ма , и҆ да́же дᲂ сме́рти пᲂдвиза́шасѧ за бл҃гᲂче́стїе . бл҃гᲂче́стнѡ бᲂ вᲂспита́вшесѧ , и҆ зако́ннѡ спᲂстрада́ша , нече́стїе ѡ҆бличи́вше го́рдагѡ а҆нтїѡ́ха . ни что́ же пред̾пᲂче́тше вре́менныѧ жи́зни , вѣ́чныѧ ра́ди . всѧ̀ бг҃ᲂви вᲂзлᲂжи́ша , дш҃ꙋ мꙋ́жествᲂ ра́зꙋмъ , тѣ́лᲂ мѧ́ккᲂ , и҆ вᲂз̾даѧ́нїѧ чистᲂты̀ вᲂспита́нїемъ . ѽ ко́рене бл҃гᲂчести́ва , и҆з̾ него́ же вы̀ прᲂзѧбо́сте маккаве́и . ѽ ма́тере ст҃ы́ѧ , ро́ждьшїѧ равнᲂчи́сленᲂе седмᲂри́цы число̀ . но̀ мо́лимъ ва́съ маккаве́и , с̾ ма́терїю ва́шею сᲂлᲂмѡні́ею , и҆ мꙋ́дрымъ сщ҃е́нникᲂмъ є҆леаза́рᲂмъ . є҆гда̀ пред̾стᲂитѐ хрⷭ҇тꙋ̀ бг҃ꙋ , є҆го́же ра́ди пᲂтрꙋди́стесѧ , трꙋды̀ пло́дъ свᲂи́хъ прїѧ́ти ѿ негѡ̀ , прилѣ́жнꙋ мᲂльбꙋ̀ сᲂтвᲂри́те ѡ҆ челᲂвѣ́чествѣ . твᲂри́тъ бᲂ є҆ли́кѡ хо́щетъ , и҆ и҆спо́лнитъ хᲂтѣ́нїѧ ва́ша бᲂѧ́щихсѧ є҆гѡ̀ .

и҆ ны́нѣ . гла́съ , то́йже . Гла́съ прᲂро́ка твᲂегѡ̀ мѡѷсе́ѧ бж҃е , и҆спо́лнисѧ глаго́лющїи , ᲂу҆́зрите живо́тъ ва́шъ ви́сѧщь , пред̾ ѻ҆чи́ма ва́шима . дне́сь крⷭ҇тъ вᲂздвиза́етсѧ , и҆ ми́ръ ѿ́ лести свᲂбᲂжда́етсѧ . дне́сь хрⷭ҇то́вᲂ вᲂскрⷭ҇нїе ѡ҆бнᲂвлѧ́етсѧ , и҆ кᲂнцы̀ землені́и ра́дꙋютсѧ . в̾ кѷмва́лѣхъ дв҃дски , пѣ́нїи тебѣ̀ принᲂсѧ́ще и҆ гл҃юще . сᲂдѣ́ла спасе́нїе пᲂсредѣ̀ землѝ бж҃е , крⷭ҇тъ и҆ вᲂскрⷭ҇нїе . и҆́миже на́съ спа́слъ є҆сѝ бл҃же и҆ чл҃кᲂлю́бче , всеси́льне гдⷭ҇и сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , а҃ . Страстьмѝ ст҃ы́хъ ꙗ҆́же пᲂ тебѣ̀ прїѧ́ша , ᲂу҆мᲂле́нъ бꙋ́ди гдⷭ҇и , и҆ всѧ̀ на́ша бᲂлѣ́зни и҆ стрⷭ҇ти и҆сцѣлѝ , чл҃кᲂлю́бче мо́лимъ тѧ̀ . сла́ва , и҆ ны́нѣ . гла́съ , то́йже . Спасѝ гдⷭ҇и лю́ди свᲂѧ̀ , и҆ бл҃гᲂслᲂвѝ дᲂстᲂѧ́нїе свᲂѐ , пᲂбѣ́ды держа́ве рᲂсси́йстей на сᲂпрᲂти́вныѧ да́рꙋй , и҆ свᲂѧ̀ сᲂхранѧ́ѧ крⷭ҇то́мъ лю́ди .

И҆з̾вѣ́стнᲂ же да быва́етъ . ꙗ҆́кѡ пре́же клепа́нїѧ вхо́дитъ і҆єре́й въ сᲂсꙋдᲂхрани́льницꙋ , и҆ пᲂлага́етъ чⷭ҇тны́и крⷭ҇тъ на же́ртвенницѣ . и҆ пᲂ ѿпꙋще́нїи вече́рни , і҆єре́й и҆ дїа́кᲂнъ ѡ҆блекꙋ́тсѧ в̾ ри́зы . и҆ дїа́кᲂнъ пᲂкади́тъ чⷭ҇тны́и крⷭ҇тъ , и҆ рече́тъ : блгⷭ҇вѝ влⷣкᲂ . і҆єре́й : блгⷭ҇ве́нъ бг҃ъ на́шъ . та́же , трⷭ҇то́е , и҆ пᲂ ѻ҆́ч҃е на́шъ . трᲂпа́рь , крⷭ҇тꙋ̀ . Сла́ва , и҆ ны́нѣ , кᲂнда́къ . И҆ взима́етъ і҆єре́й крⷭ҇тъ съ блю́дᲂмъ на главꙋ̀ , и҆ вно́ситъ вᲂ ѻ҆лта́рь . Предъи҆́дꙋтъ пред̾ ни́мъ сᲂ двѣма̀ лампа́дами . И҆ пᲂлага́етъ крⷭ҇тъ на трапе́зѣ на є҆ѵⷢ҇а́льскᲂмъ мѣ́стѣ . А҆ є҆ѵⷢ҇а́лїе на го́рнее мѣ́стᲂ . И҆ вᲂжгꙋ́тъ пред̾ ни́мъ свѣщꙋ̀ на всю̀ но́щь .

На ᲂу҆́трени . на бг҃ъ гдⷭ҇ь , трᲂпа́рь крⷭ҇тꙋ̀ , два́жды . сла́ва , трᲂпа́рь мч҃нкѡмъ . и҆ ны́нѣ , крⷭ҇тꙋ̀ . и҆ ѻ҆бы́чныѧ каѳи́смы . и҆ сѣда́ленъ вᲂ ѻ҆кта́и . Кано́нъ , вᲂ ѻ҆кта́и є҆ди́нъ , на д҃ .= и҆= ст҃ы́мъ , на д҃ . гла́съ , и҃ .= и҆ крⷭ҇тꙋ̀ , на́ ѕ҃ . гла́съ , ѕ҃ . катава́сїѧ , крⷭ҇та̀ начерта́въ . А҆́ще ли же в̾ сꙋбо́тꙋ приключи́тсѧ пра́здникъ сі́и , кано́нъ хра́мꙋ , сᲂ і҆рмᲂсо́мъ , на д҃ . і҆рмо́съ , пᲂ аⷤ . =и҆ крⷭ҇тꙋ̀ , на́ ѕ҃ . и҆ ст҃ы́мъ , на д҃ . катава́сїѧ , крⷭ҇та̀ начерта́въ .

Кано́нъ крⷭ҇тꙋ̀ . є҆мꙋ́же краегране́сїе си́цевᲂ . крⷭ҇тꙋ̀ пᲂклᲂнѧ́юсѧ вѣ́рныхъ спасе́нїю . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ .

запѣ́въ : Сла́ва гдⷭ҇и крⷭ҇тꙋ̀ твᲂемꙋ̀ честно́мꙋ . Крⷭ҇тꙋ̀ вѣ́рныхъ спасе́нїю , пᲂкланѧ́юсѧ и҆ те́плѣ ѡ҆блᲂбыза́ю . и҆ ѡ҆бъє́млѧ вᲂпїю̀ , дре́вᲂ всеблаже́ннᲂе хрⷭ҇то́вᲂ , дш҃ꙋ мᲂю̀ и҆ ᲂу҆́мъ прᲂсвѣтѝ мᲂлю́сѧ . Пᲂбѣдᲂно́снᲂ ꙗ҆ви́сѧ на́ стрⷭ҇ти и҆ бѣ́сы , дне́сь зна́менїе крⷭ҇та̀ . тѣ́мже вѣ́рнїи всѝ свѣ́тлѡ прᲂсвѣ́щше дш҃а , ны́нѣ ѡ҆блᲂбыза́емъ . Лꙋчеза́рнаѧ ѡ҆блиста́етъ сїѧ́нїѧ , крⷭ҇тъ чⷭ҇тны́и . и҆ прᲂсвѣща́етъ вѣ́рнѡ пᲂклᲂнѧ́ющїѧсѧ є҆мꙋ̀ дне́сь , ѡ҆сщ҃а́ѧ дш҃а на́ша ны́нѣ и҆ тѣлеса̀ . боⷢ҇ . Прест҃а́ѧ дв҃ᲂ , ꙗ҆́же хрⷭ҇та̀ пло́тїю ро́ждьшаѧ , пᲂстрада́вшагᲂ на́съ ра́ди на крⷭ҇тѣ̀ во́лею , тѧ̀ блажа́щїѧ че́стнѡ , спаса́й мᲂльба́ми сѝ .

И҆́нъ кано́нъ , ст҃ы́мъ . гла́съ , и҃ . і҆рмо́съ . Во́дꙋ прᲂше́дъ . запѣ́въ : Ст҃і́и мч҃нцы , мᲂли́те бг҃а ѡ҆ на́съ . Ли́къ седмᲂчи́сленыхъ страда́лецъ ꙗ҆́вльсѧ , є҆ди́нымъ нра́вᲂмъ в̾ лю́тыхъ , пᲂ ᲂу҆тверже́нїи ѻ҆те́ческагѡ зако́на , ᲂу҆́мрети не ѿреко́шасѧ . Сла́вꙋ презрѣ́вше ю҆́же на землѝ , жела́нїемъ бжⷭ҇твенагѡ црⷭ҇твїѧ , всѧ́кꙋ бᲂлѣ́знь претерпѣ́ша бжⷭ҇твенїи маккаве́и . тѣ́мже дᲂсто́йнѡ ны́нѣ чтꙋ́тсѧ . Зако́нᲂмъ сᲂблюде́нїемъ мѡѷсе́йскимъ , вᲂи́стинꙋ до́блїи маккаве́й , внегда̀ пᲂпра́ти , бра́тїѧ ꙗ҆ви́шасѧ дрꙋ́гъ дрꙋ́гꙋ , а҆нтїѡ́хᲂвᲂ без̾бо́жїе . боⷢ҇ . Чи́ни тѧ̀ а҆́нг҃лъ и҆ чл҃къ , без̾невѣ́стнаѧ мт҃и , вᲂсхвалѧ́ютъ непреста́ннѡ . зижди́телѧ бᲂ всѣ́хъ , ꙗ҆́кѡ младе́нца на рꙋкꙋ̀ свᲂе́ю пᲂнесла̀ є҆сѝ .

катава́сїѧ : Крⷭ҇та̀ начерта́въ мѡѷсе́й , в̾ прѧ́мѡ жеѕло́мъ чермно́е пресѣчѐ , і҆и҃лю прᲂхᲂдѧ́щꙋ . то́йже ѡ҆браще́нїемъ фараѡ́на с̾ кᲂлесни́цами ᲂу҆да́ривъ сᲂвᲂкꙋпѝ , вᲂпрекѝ написа́въ не пᲂбѣди́мᲂе ѻ҆рꙋ́жїе . тѣ́мъ хрⷭ҇та̀ вᲂспᲂе́мъ бг҃а на́шегѡ , ꙗ҆́кѡ прᲂсла́висѧ .

пѣ́снь , г҃ . і҆рмо́съ . Нѣ́сть ст҃а . Ѻ҆рꙋ́жїе дре́вле , жи́зни блаже́ннᲂе дре́вᲂ , дарᲂва́сѧ храни́ти , за преѡ҆слꙋша́нїе первᲂзда́ннагѡ а҆да́ма . крⷭ҇тъ же сі́и пꙋ́ть сᲂтвᲂрѝ . Ѻ҆чи́ма ᲂу҆стна́ми и҆ дш҃а́ми , лицы̀ и҆ срⷣцы̀ , пᲂклᲂни́мсѧ всѝ прест҃о́мꙋ крⷭ҇тꙋ̀ , живᲂда́вца хрⷭ҇та̀ , и҆́мже ми́ръ ве́сь ѡ҆сщ҃а́етсѧ . Хра́мъ бг҃ꙋ прⷪ҇ро́чески дне́сь бы́вше . пᲂкланѧ́ющесѧ дре́вꙋ прест҃а́гѡ крⷭ҇та̀ . и҆ наслѣ́дницы є҆гѡ̀ со́ страхᲂмъ всѝ цѣлꙋ́емъ . боⷢ҇ . Дв҃ᲂю рᲂдила̀ є҆сѝ сн҃а , и҆́же пре́жде тебѐ рᲂжде́на , ѿ ѻ҆ц҃а пре́жде вѣ́къ , без̾ мт҃ре ѿ́ бг҃а , рᲂжде́нагᲂ пло́тїю , да спасе́тъ пре́же сᲂгрѣ́шшїѧ .

и҆́нъ , і҆рмо́съ . Нбⷭ҇нᲂмꙋ крꙋ́гꙋ . Пᲂ ѻ҆те́ческихъ хᲂдѧ́ще и҆справле́нїихъ зако́нныхъ , бл҃же́ннїи хрⷭ҇то́вы страда́льцы , жи́знь нестарѣ́емꙋю , свᲂи́ми стѧжа́сте крᲂвьмѝ прехва́льнїи . Ни ѻ҆́гнь ни ме́чь преврати́ти кᲂгда̀ , до́блесть не вᲂзмо́же нра́ва бл҃же́ннїи ва́шꙋ , и҆́же в̾ вѣ́рѣ , в̾ не́йже ᲂу҆праздни́сте мꙋчи́телей шата́нїѧ . Мꙋ́ки претерпѣ́ша за хрⷭ҇та̀ бг҃а , прехва́льнїи мч҃нцы . и҆ свы́ше прїѧ́ша пᲂбѣ́ды по́чести , непреста́ннѡ мᲂлѧ́щесѧ , спастѝ дш҃а на́ша . боⷢ҇ . Дв҃ᲂю рᲂдила̀ є҆сѝ неи҆скꙋсᲂбра́чнаѧ . и҆ дв҃ᲂю пребы́сть мт҃и без̾невѣ́стнаѧ , бцⷣе мр҃і́е , хрⷭ҇та̀ бг҃а на́шегѡ мᲂлѝ спастѝ на́съ .

катава́сїѧ : Же́ѕлъ вᲂ ѻ҆́бразъ та́йнѣ прїе́млетсѧ , прᲂзѧбе́нїемъ бᲂ раз̾сꙋдѝ і҆єре́ѧ . не плᲂдѧ́щаѧ же пре́жде цр҃кви , ны́нѣ прᲂцвѣтѐ дре́вᲂ крⷭ҇та̀ , в̾ держа́вꙋ и҆ ᲂу҆тверже́нїе .

кᲂнда́къ , ст҃ы́мъ . гла́съ , в҃ . Премꙋ́дрᲂсти бж҃їѧ стᲂлпѝ седмᲂчи́сленїи , и҆ бжⷭ҇твенагѡ свѣ́та свѣти́льницы седмᲂсвѣ́щнїи , маккаве́и всемꙋ́дрїи , пре́жде мч҃нкъ вели́цыи мч҃нцы . с̾ ни́ми же всѣ́хъ бг҃ꙋ мᲂли́тесѧ , спасти́сѧ пᲂю́щимъ ва́съ . и҆́кᲂсъ . Хвалѝ те́плѣ сїѡ́не бг҃а твᲂегѡ̀ , ꙗ҆́кѡ ᲂу҆крѣпи́лъ є҆́сть се́й вереѧ̀ вра́тъ твᲂи́хъ , и҆ сы́ны твᲂѧ̀ бл҃гᲂслᲂвѝ . сі́и бᲂ ꙗ҆́кѡ во́инствᲂ пᲂбѣди́тельнᲂ , храни́лᲂ вᲂи́стинꙋ до́блественѡ , и҆ крѣпкᲂмꙋ́дренѡ , прᲂти́вꙋ кᲂва́рствᲂмъ ѕлᲂчести́выхъ бг҃ᲂмꙋ́дренѡ ста́ша . вкꙋ́пѣ и҆ пᲂбѣ́ды вѣнцы̀ нбⷭ҇нагѡ сїѡ́на прїе́млютъ . и҆ бжⷭ҇твенᲂмꙋ прⷭ҇то́лꙋ пред̾стᲂѧ́тъ , ѡ҆ всѣ́хъ непреста́ннѡ мᲂлѧ́щесѧ , про́сѧтъ спасти́сѧ пᲂю́щимъ и҆́хъ .

сѣда́ленъ , ст҃ы́мъ . гла́съ , и҃ . Бл҃гᲂче́стнѡ наказа́вшесѧ ѻ҆́трᲂцы мꙋ́дрїи , мꙋ́ченически мꙋчи́телемъ преще́нїѧ мꙋ́жески пᲂсрами́сте . ꙗ҆́кѡ зако́нꙋ пᲂбо́рницы , и҆ ѻ҆ц҃ꙋ пᲂслꙋ́шницы бы́сте ст҃і́и , с̾ ма́терїю бг҃ᲂмꙋ́дрᲂю ᲂу҆се́рднѡ пᲂстрада́сте . тѣ́мже и҆ сме́ртїю живо́тъ и҆скꙋ́пльше , вᲂи́стинꙋ нбⷭ҇ныи , вѣ́чнѡ ра́дꙋетесѧ маккаве́и крѣпкᲂдꙋ́шнїи . мᲂли́те хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , чтꙋ́щимъ любо́вїю ст҃ꙋ́ю па́мѧть ва́шꙋ . сла́ва , и҆ ны́нѣ , крⷭ҇тꙋ̀ . Прᲂначерта́ше та́йнѡ дре́вле вре́менемъ , и҆сꙋ́съ на́в̾винъ крⷭ҇та̀ ѻ҆́бразъ , є҆гда̀ рꙋ́цѣ прᲂстира́ше крⷭ҇тᲂѻ҆бра́знѡ сп҃се мо́й , и҆ ста̀ сл҃нечнᲂе тече́нїе , до́ндеже врагѝ пᲂгꙋбѝ прᲂти́вѧщїѧсѧ тебѣ̀ бг҃ꙋ . тѣ́мже за́йде на крⷭ҇тѣ́ тѧ зрѧ̀ , и҆ до́лѣ держа́вꙋ сме́рти разо́рь , а҆́да свѧза́лъ є҆сѝ .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла . Да крᲂпи́тъ всѧ̀ землѧ̀ ра́дᲂванїе , да веселѧ́тсѧ древа̀ дꙋбра́внаѧ , дне́сь ѡ҆бᲂжена̀ всечестны́мъ крⷭ҇то́мъ , сїѧ́ющимъ кᲂнце́мъ . Пᲂказа́выи ѻ҆рга́нъ ᲂу҆мерщве́нїѧ , живᲂно́снѡ ми́рᲂви , пᲂбѣдᲂтво́рнᲂе ѻ҆рꙋ́жїе непᲂбѣди́мᲂе , пресла́вныи крⷭ҇тъ , срⷣца̀ на́ша прᲂсвѣтѝ . Ты̀ бжⷭ҇твенаѧ пᲂбѣ́да . ты̀ сᲂдѣ́лᲂванїе на́шегѡ спасе́нїѧ . ты̀ вѣ́рнымъ ѡ҆дᲂлѣ́нїе , и҆ бжⷭ҇твенаѧ же́ртва , ѽ всечⷭ҇тны́и крⷭ҇те , пᲂю́щїѧ тѧ̀ ѡ҆ст҃ѝ . боⷢ҇ . Вᲂи́стинꙋ ꙗ҆ви́сѧ бцⷣа , вᲂи́стинꙋ рᲂдила̀ є҆сѝ сн҃а вы́шнѧгᲂ , и҆́же на крⷭ҇тѣ̀ рꙋ́цѣ прᲂсте́ршагᲂ , дв҃ᲂ мт҃и мр҃і́е , и҆ ми́ра призва́вшагᲂ .

и҆́нъ , і҆рмо́съ . И҆з̾ гᲂры̀ присѣ́нныѧ . Зако́нъ бл҃же́ннїи написа́вше , ꙗ҆́кᲂже дре́вле мѡѷсе́й вᲂ свᲂи́хъ скрижа́лѣхъ по́мысла . не престꙋпи́сте сего̀ да́же дᲂ сме́рти , нᲂ тве́рдѡ пᲂдвиза́стесѧ . Зако́нныѧ бг҃ᲂви принᲂсѧ́ще же́ртвы , и҆ мѡѷсе́йскᲂмꙋ ревнꙋ́юще житїю̀ , преѡ҆би́дѣша всѧ́кᲂ закᲂнᲂпᲂлᲂже́нїе мꙋчи́тельскᲂ , страстᲂте́рпцы хрⷭ҇то́вы . Ꙗ҆́кᲂже ка́мень во́лненᲂе настᲂѧ́нїе , си́це мно́ги мꙋ́ки страда́льцы , мꙋ́жескимъ ᲂу҆мо́мъ маккаве́и , да́же дᲂ сме́рти претерпѣ́сте . трⷪ҇ченъ . Без̾нача́льнаѧ трⷪ҇це , є҆ди́нице пᲂклᲂнѧ́емаѧ , сᲂпрⷭ҇то́льнаѧ є҆ди́нице , трⷪ҇це вᲂспѣва́емаѧ , мч҃нкъ мᲂльба́ми и҆зба́ви на́съ , ѿ бѣ́дъ и҆ напа́стей , вᲂспѣва́ющїѧ тѧ̀ . боⷢ҇ . Ра́дꙋисѧ ѿ на́съ ст҃а́ѧ бцⷣе . ра́дꙋисѧ ꙗ҆́же ра́дᲂсть ро́ждьшаѧ ми́рᲂви . ра́дꙋисѧ є҆ди́на застꙋпле́нїе чл҃кѡмъ , бл҃гᲂслᲂве́наѧ бцⷣе чⷭ҇таѧ .

катава́сїѧ : Оу҆слы́шахъ гдⷭ҇и смᲂтре́нїѧ твᲂегѡ̀ та́иньствᲂ , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ .

пѣ́снь , є҃ . і҆рмо́съ . Бж҃їимъ свѣ́тᲂмъ . Пᲂдъи́мемъ с̾ ра́дᲂстїю преблаже́нныи крⷭ҇тъ , в̾ цр҃квахъ и҆ градѣ́хъ , сегѡ̀ пред̾лᲂже́на , и҆ пᲂклᲂни́мсѧ . да дᲂлго́мъ прїи́мемъ ѡ҆ставле́нїе . Оу҆мерщвлѧ́етсѧ ѕмі́й лꙋка́выи ны́нѣ , и҆́же тмѣ̀ нача́льникъ , сїѧ́нїѧ нетерпѧ̀ , є҆́же ѡ҆блиста́етъ живᲂно́сныи крⷭ҇тъ , бжⷭ҇твеннагѡ цр҃ѧ ски́петрᲂ честно́е . Ꙗ҆́кѡ пресвѣ́тлаѧ ѕвѣзда̀ , и҆ ꙗ҆́кѡ би́серъ благᲂлѣ́пенъ , и҆ пресїѧ́ннᲂе сл҃нце , всѧ̀ ѡ҆зарѧ́етъ землѝ кᲂнцы̀ , крⷭ҇тъ гдⷭ҇нь . є҆го́же ѡ҆блᲂбыза́емъ . боⷢ҇ . Спасе́нїю тѧ̀ нача́лᲂ всѝ вѣ́дѧще вѣ́рнїи , ᲂу҆блажа́емъ чи́стаѧ . ты́ бᲂ пре́же сꙋ́щагѡ , пло́тїю рᲂдила̀ є҆сѝ , хᲂтѣ́нїемъ свᲂи́мъ пригвᲂжде́на на крⷭ҇тѣ̀ .

и҆́нъ , і҆рмо́съ . Ѿ ́ нᲂщи невѣ́дѣнїѧ . Ꙗ҆́кᲂже ѻ҆те́ческїи зако́нъ неразо́рше ст҃і́и мч҃нцы , вѣнцы̀ пра́ведными , хрⷭ҇то́съ ва́съ са́мъ вѣнча́лъ є҆́сть . Є҆леаза́ра дѣ́ти , в̾ ра́зꙋмѣ ꙗ҆́вльшесѧ пребл҃же́ннїи . принесо́стесѧ сᲂ ѻ҆́нѣмъ хрⷭ҇то́ви , дх҃о́внᲂ всесᲂжже́нїе . И҆́же ст҃ы́ми свᲂбᲂжде́и ѿ́лести всѧ́ческаѧ , спасѝ на́съ гдⷭ҇и тѣ́хъ мл҃твами , ꙗ҆́кѡ бл҃гᲂꙋтро́бенъ . боⷢ҇ . Херꙋви́мъ ꙗ҆́вльшисѧ чⷭ҇тнѣ́йши , дв҃ᲂ всепѣ́таѧ , мᲂли́сѧ сн҃ꙋ свᲂемꙋ̀ , спастѝ дш҃а пᲂю́щихъ тѧ̀ .

катава́сїѧ : ѽ треблаже́ннᲂе дре́вᲂ , на не́мже распѧ́тсѧ хрⷭ҇то́съ цр҃ь и҆ гдⷭ҇ь . и҆́мже паде́сѧ и҆́же дре́вᲂмъ прельще́и , тᲂбо́ю прельще́нъ бы́стъ , хрⷭ҇то́ви пригво́ждьшемꙋсѧ пло́тїю , пᲂдаю́щемꙋ ми́ръ дш҃а́мъ на́шимъ .

пѣ́снь , ѕ҃ . і҆рмо́съ . Жите́йскагѡ мо́рѧ . Ꙗ҆́кѡ бжⷭ҇твенъ сᲂсꙋ́дъ . ꙗ҆́кѡ свѣти́льникъ свѣ́телъ , в̾ цр҃квахъ дне́сь и҆ въ храмѣ́хъ и҆ градѣ́хъ , крⷭ҇тъ пред̾лежи́мь ви́дѧще , ᲂу҆ѧсни́вшагѡ сегѡ̀ вᲂспᲂе́мъ . Оу҆мерщвлѧ́етсѧ сме́рть , ᲂу҆мᲂрѧ́етсѧ тлѣ́нїе , и҆ бѣсо́встїи пᲂлцы̀ ѿбѣга́ютъ . пᲂбѣ́днᲂмꙋ и҆ стра́шнᲂмꙋ пред̾лежи́мꙋ дне́сь , несмѣ́юще прикᲂснꙋ́тисѧ крⷭ҇тꙋ̀ хрⷭ҇то́вꙋ . боⷢ҇ . Ꙗ҆́дᲂмъ ѕмїи́нымъ , пра́баба пи́щею и҆́же вᲂ є҆де́мѣ пᲂма́засѧ . дв҃аѧ ро́ждьши нача́льника жи́зни , и҆стᲂчѝ ми́рᲂви нетлѣ́нїе и҆ вᲂскрⷭ҇нїе .

и҆́нъ , і҆рмо́съ . Ри́зꙋ ми пᲂда́ждь . Ри́зᲂю себѐ мч҃нческᲂю ѡ҆дѣ́ѧвше ст҃і́и . сїю̀ трꙋды̀ страда́нїѧ ва́шегѡ и҆спестри́сте . Жела́юще бы́ти сᲂ хрⷭ҇то́мъ , всесла́внїи мч҃нцы , тече́нїе страда́нїѧ , неꙋкло́ннымъ по́мыслᲂмъ преи҆до́сте . Зако́нъ и҆́же предадѐ мѡѷсе́й , хранѧ́ще ст҃і́и , зако́ннѡ пᲂстрада́ша , пᲂсра́мльше а҆нтїѡ́ха мꙋчи́телѧ . боⷢ҇ . Є҆ди́на сло́вᲂмъ пло́тїю , сло́ва ро́ждьшаѧ , и҆зба́ви мо́лимсѧ ѿ сѣте́й врага̀ , дш҃а на́ша .

катава́сїѧ : Во́днагѡ ѕвѣ́рѧ вᲂ ᲂу҆тро́бѣ , дла́ни і҆ѡ́на крⷭ҇тᲂѡ҆бра́знѡ распрᲂсте́ръ , спасе́ннꙋю стрⷭ҇ть прᲂѡбража́ше ꙗ҆́снѣ . тѣ́мъ и҆ тридне́внѡ и҆з̾ше́дъ , преми́рнᲂе вᲂскрⷭ҇нїе прᲂписа́ше , пло́тїю пригвᲂжде́на хрⷭ҇та̀ бг҃а . и҆ тридне́внымъ вᲂскрⷭ҇нїемъ , ми́ра прᲂсвѣ́щшагѡ .

кᲂнда́къ . гла́съ , д҃ . Вᲂзнесы́исѧ на́ крⷭ҇тъ во́лею , тезᲂи҆мени́тᲂмꙋ нн҃ѣ гра́дꙋ твᲂемꙋ̀ , щедро́ты твᲂѧ̀ да́рꙋй хрⷭ҇тѐ бж҃е . вᲂзвеселѝ си́лᲂю свᲂе́ю , держа́вꙋ рᲂсси́йскꙋю , пᲂбѣ́ды даѧ̀ є҆́й на сᲂпᲂста́ты . пᲂсо́бїе и҆мꙋ́щꙋ твᲂѐ ѻ҆рꙋ́жїе , ми́рꙋ непᲂбѣди́мꙋю пᲂбѣ́дꙋ . и҆́кᲂсъ . И҆́же дᲂ тре́тїѧгѡ нб҃сѐ вᲂсхище́нъ бы́сть в̾ ра́й . и҆ бѣсѣ́ды ᲂу҆слы́шавъ бжⷭ҇твенныѧ и҆ неи҆зрече́нныѧ , и҆́хже нелѣ́ть ꙗ҆зы́ки чл҃ческими глаго́лати . что̀ гала́тѡмъ пи́шетъ , ꙗ҆́кѡ рачи́телемъ писа́нїю , прᲂчто́сте и҆ разꙋмѣ́сте . мнѣ̀ речѐ небꙋ́ди хвали́тисѧ , то́кмѡ ѡ҆ крⷭ҇тѣ̀ гдⷭ҇ни , на не́мже страда́въ ᲂу҆бѝ стра́сти . тᲂгѡ̀ ᲂу҆́бѡ и҆ мы̀ и҆звѣ́стнѡ держи́мсѧ , крⷭ҇та̀ гдⷭ҇нѧ пᲂхвалы̀ всѣ́хъ . є҆́сть бᲂ на́мъ спасе́нїе сїѐ дре́вᲂ , ѻ҆рꙋ́жїе ми́рꙋ непᲂбѣди́маѧ пᲂбѣ́да .

пѣ́снь , з҃ . і҆рмо́съ . Хладᲂда́тельнꙋ ᲂу҆́бѡ пе́щь . Спасе́нᲂмꙋ дре́вꙋ пᲂклᲂни́мсѧ , крⷭ҇тꙋ̀ прест҃о́мꙋ . є҆мꙋ́же слꙋ́жатъ а҆́нг҃льскаѧ всѧ̀ во́инства , пред̾лежи́ма ви́дѧще вѣ́рнїи , и҆ и҆стᲂча́юща на́мъ ѡ҆сщ҃е́нїе и҆ жи́знь . Пᲂбѣдᲂно́сныи ꙗ҆ви́сѧ прест҃ы́и крⷭ҇тъ , живᲂда́вца хрⷭ҇та̀ свы́ше . бѣсѡ́въ всѣ́хъ мно́жествᲂ ѿгᲂнѧ̀ , и҆ ва́рварскᲂе шата́нїе . и҆ пᲂбѣди́телѧ ꙗ҆влѧ́ѧ во́инствᲂ на́ше . Ꙗ҆́кѡ ѡ҆дш҃евле́нꙋ тебѣ̀ припа́даю , и҆ взыва́ю крⷭ҇те мо́й прест҃ы́и . ты́ ми прᲂсвѣтѝ дш҃ꙋ и҆ ᲂу҆́мъ и҆ слꙋ́хъ , и҆ ᲂу҆стнѣ̀ и҆ ꙗ҆зы́къ и҆ дыха́нїе , и҆ ѻ҆́чи к̾ пꙋте́мъ црⷭ҇тва хрⷭ҇то́ва . боⷢ҇ . Ю҆́нᲂши трѝ пе́щь не ѡ҆палѝ , ржⷭ҇тво̀ прᲂѡ҆бразꙋ́ющи твᲂѐ . и҆́бᲂ бжⷭ҇твеныи ѻ҆́гнь , тѧ̀ не ѡ҆па́ль всели́сѧ в̾ тѧ̀ . и҆ всѧ̀ наꙋчѝ пѣ́ти , бл҃гᲂслᲂве́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . Ѡ҆снᲂва́выи зе́млю в̾ нача́тцѣ . Мꙋ́ченическими пᲂстрада́вше бᲂлѣ́зньми , мꙋчи́тельскихъ не ᲂу҆страши́стесѧ бᲂѧ́зней . хрⷭ҇то́ви вᲂпїю́ще , блгⷭ҇ве́нъ бг҃ъ ѻ҆ц҃ъ на́шихъ . Терпѣ́нїѧ пᲂжда́вше бᲂлѣ́зней , вра́жїѧ лю́таѧ пᲂбѣди́сте кᲂва́рства , хрⷭ҇то́ви вᲂпїю́ще , блгⷭ҇ве́нъ бг҃ъ ѻ҆ц҃ъ на́шихъ . боⷢ҇ . И҆́же вᲂ ᲂу҆тро́бꙋ дв҃ыѧ всели́выисѧ , и҆ тᲂѧ̀ ра́ди а҆да́ма ѡ҆бно́вль , бл҃гᲂслᲂве́нъ бг҃ъ ѻ҆ц҃ъ на́шихъ .

катава́сїѧ : Безꙋ́мна за́пᲂвѣдь мꙋчи́телѧ ѕлᲂчести́вагѡ , людьмѝ пᲂкᲂлеба̀ , ды́шꙋща преще́нїемъ и҆ ѕлᲂхꙋле́нїемъ бг҃ᲂстꙋ́днымъ . ѡ҆ба́че трїе́хъ ѻ҆́трᲂкъ неи҆скꙋсѝ ꙗ҆́рᲂсть ѕвѣ́рьскаѧ , ни ѻ҆́гнь снѣда́ѧи . нᲂ ды́шꙋщꙋ хла́днᲂмꙋ дх҃ꙋ , сᲂ ѻ҆гне́мъ сꙋ́ще пᲂѧ́хꙋ , препѣ́тыи ѻ҆ц҃ъ на́шихъ бж҃е блгⷭ҇ве́нъ є҆сѝ .

пѣ́снь , и҃ . і҆рмо́съ . Оу҆жасни́сѧ бᲂѧ́исѧ . Тво́й крⷭ҇тъ прᲂѡ҆бразꙋ́ѧ і҆а́кѡвъ и҆нᲂгда̀ , на внꙋ́ки пᲂло́жь дла́ни премѣ́ннѡ . и҆ бл҃гᲂслᲂви́въ и҆́хъ , бл҃гᲂда́ть в̾ ꙗ҆зы́цѣхъ наꙋча́ѧ . дѣ́ти блгⷭ҇ви́те , сщ҃е́ннїи по́йте , и҆ превᲂзнᲂси́те є҆гѡ̀ во́ вѣки . Ѽ неи҆з̾рече́ннᲂмꙋ тѝ хрⷭ҇тѐ сни́тїю , и҆ неи҆з̾глаго́ланнымъ бл҃ги́мъ . вᲂплᲂти́сѧ и҆ распѧ́тсѧ сме́рть прїи́мъ , и҆ рѣши́ши чл҃ки ѿ клѧ́твы . и҆ и҆стᲂчи́въ нетлѣ́нїе требл҃же́ннᲂе дре́вᲂ , препрᲂсла́вленыи крⷭ҇тъ во́ вѣки . Прест҃а́гѡ крⷭ҇та̀ , бжⷭ҇твенꙋю пᲂбѣ́дꙋ , жи́зни нача́льника , льстѝ пᲂтреби́телѧ , дне́сь сегѡ̀ пᲂхва́лимъ . крⷭ҇тъ всест҃ы́и гдⷭ҇нь , бѣсѡ́мъ гꙋби́телѧ , и҆ ва́рварᲂмъ гᲂни́телѧ , и҆ вѣ́рнымъ пᲂбѣдᲂтво́рца и҆ пᲂкро́ва . боⷢ҇ . Гвᲂздьмѝ пригвᲂжде́на хрⷭ҇та̀ , кᲂпїе́мъ прᲂбᲂде́на в̾ нетлѣ́ннаѧ ре́бра . тро́стїю в̾ главꙋ̀ бїе́ма , же́лчь вкꙋша́юща , зрѧ́щи дв҃аѧ вᲂпїѧ́ше , гдѣ́ ти дᲂбро́та за́йде прекра́снᲂе сло́вᲂ , препрᲂсла́влене па́че сн҃о́въ чл҃ческихъ .

и҆́нъ , і҆рмо́съ . Без̾нача́льнагѡ цр҃ѧ . И҆́стинѣ рачи́теле , и҆ зако́нꙋ и҆з̾вѣ́стнїи ревни́теле бы́вше , прехва́льнїи мч҃нцы , по́йте хрⷭ҇та̀ во́ вѣки . Седмᲂра́сленыи пло́дъ ст҃а́гѡ ко́рене , ꙗ҆́кѡ вᲂи́стинꙋ се́дмь маккаве́й , и҆ мч҃нки гдⷭ҇ни пᲂчте́мъ дᲂсто́йнѡ . Зако́нꙋ ревни́телей , є҆динᲂдꙋ́шныѧ страда́льцы вѣ́рнїи , се́дмь маккаве́й с̾ ро́ждьшею и҆́хъ , пᲂчте́мъ дᲂсто́йнѡ . трⷪ҇ченъ . Трⷪ҇це нераздѣли́маѧ є҆ди́нице , в̾ бжⷭ҇твѣ̀ сла́влю є҆ди́нꙋ , и҆ в̾ тре́хъ пᲂю́ тѧ ли́цѣхъ є҆ди́нꙋ си́лꙋ . боⷢ҇ . И҆́же в̾ пᲂслѣ́днѧѧ на́съ ра́ди , ѿ дв҃ы вᲂплᲂще́ннагᲂ бг҃а , сщ҃е́ннїи по́йте , и҆ превᲂзнᲂси́те є҆гѡ̀ во́ вѣки .

катава́сїѧ : Хва́лимъ , блгⷭ҇ви́мъ , кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Бл҃гᲂслᲂви́те дѣ́ти , трⷪ҇цы равнᲂчи́сленнїи , сᲂдѣ́телѧ ѻ҆ц҃а бг҃а . по́йте сᲂше́дшагѡ сло́ва , и҆ ѻ҆́гнь в̾ ро́сꙋ претво́ршагѡ . и҆ превᲂзнᲂси́те всѣ́мъ живо́тъ даю́щагѡ , дх҃а прест҃а́гѡ во́ вѣки всѧ̀ .

пѣ́снь , ѳ҃ . і҆рмо́съ . Бг҃а чл҃кѡмъ . Тлѣ́нни ѿ преслꙋша́нїѧ бы́хᲂмъ , бж҃їѧ за́пᲂвѣди престꙋ́пницы ꙗ҆́вльшесѧ . сегѡ̀ ра́ди сме́рть прїи́де чл҃кѡмъ . тѣ́мже без̾сме́ртїе прᲂцвѣтѐ дне́сь , пᲂбѣ́дныи крⷭ҇тъ хрⷭ҇то́въ , є҆го́же цѣлꙋ́ем̾ . Сѐ дре́вᲂ прест҃о́е , крѣ́пкаѧ наде́жда вѣ́рнымъ ꙗ҆ви́сѧ . клѧ́твѣ и҆збавле́нїе . чл҃кѡмъ ра́дᲂсть пред̾лежи́тъ , ѡ҆блича́ѧ тмѣ̀ нача́льника . семꙋ̀ пᲂклᲂнѧ́ющесѧ вѣ́рнїи велича́емъ . Зача́лᲂ бл҃гᲂслᲂве́нїѧ и҆ ᲂу҆тверже́нїѧ хрⷭ҇тїа́нᲂмъ . и҆ стѣна̀ и҆ тве́рдᲂе застꙋпле́нїе . и҆ клѧ́твы и҆збавле́нїе ꙗ҆ви́сѧ на́мъ , дре́вᲂ вᲂз̾желѣ́ннᲂе . ѻ҆рꙋ́жїе непᲂбѣди́мᲂе , прᲂсвѣтѝ и҆ ѡ҆ст҃ѝ на́съ , пᲂкланѧ́ющихтисѧ . боⷢ҇ . Хра́ме и҆ две́ре сщ҃е́нїѧ , прⷭ҇то́ле бж҃їи , ѻ҆́блаче и҆ свѣ́щниче всесвѣ́тлыи , кᲂвче́же бл҃гᲂда́ти всенепᲂро́чнаѧ , и҆́же че́стнѣ пᲂкланѧ́ющїѧсѧ ѻ҆́бразꙋ честно́мꙋ , є҆динᲂро́днагѡ тѝ сн҃а , пᲂкры́и и҆ сᲂхранѝ .

и҆́нъ , і҆рмо́съ . Вᲂзвели́чимъ тѧ̀ . Сᲂкро́вище бжⷭ҇твеныхъ дарᲂва́нїи , вᲂи́стинꙋ пᲂказа́стесѧ . бᲂга́тьствᲂ не ѿє́млемᲂе , всехва́льнїи мч҃нцы . Мᲂли́твеницы до́блїи , к̾ зижди́телю всѣ́хъ сꙋ́ще , и҆спрᲂси́те невла́емꙋю жи́знь дш҃а́мъ на́шимъ . И҆́же бжⷭ҇твенᲂю ре́внᲂстїю и҆ теплᲂто́ю дш҃и , твᲂрѧ́щїѧ ва́шꙋ па́мѧть , сᲂхрани́те неснѣда́емы ѿ лꙋка́вагѡ . трⷪ҇ченъ . Съ сн҃ᲂмъ ѻ҆ц҃ꙋ и҆ дх҃ꙋ пра́вᲂмꙋ пᲂклᲂни́мсѧ , сᲂ а҆́нг҃лы зᲂвꙋ́ще , сла́ва в̾ вы́шнихъ бг҃ꙋ . боⷢ҇ . Ра́дꙋисѧ две́ре ст҃а́ѧ , бг҃ᲂви ѿве́рзстаѧ , є҆ди́нᲂмꙋ премꙋ́дрꙋ . ю҆́же ѡ҆сѣнѝ дх҃ъ ст҃ы́и .

катава́сїѧ : Та́инъ є҆сѝ бцⷣе ра́й , невᲂздѣ́ланнᲂ вᲂз̾расти́вши хрⷭ҇та̀ , и҆́мъ же кре́стнᲂе и҆ живᲂно́снᲂе на землѝ насажде́нᲂ бы́сть дре́вᲂ . тѣ́мъ ны́нѣ вᲂзнᲂси́мꙋ , пᲂкланѧ́ющесѧ є҆мꙋ́ тѧ велича́емъ . Дᲂсто́йнѡ є҆́сть .

свѣти́ленъ , вᲂ ѻ҆кта́и . сла́ва , мч҃нкѡмъ . Ли́къ седмᲂчи́сленыи , сше́дшесѧ маккаве́и всѝ вᲂспᲂе́мъ . а҆нтїѡ́ха бᲂ вᲂзнесе́нꙋю гᲂрды́ню , на́ землю низ̾лᲂжи́ша . и҆ в̾кꙋ́пѣ вѣнча́вшесѧ , к̾ небесе́мъ взыдо́ша . и҆ ны́нѣ . крⷭ҇тꙋ̀ . Крⷭ҇тъ храни́тель все́й вселе́ннѣй , крⷭ҇тъ красᲂта̀ цр҃ко́внаѧ . крⷭ҇тъ цр҃е́мъ держа́ва . крⷭ҇тъ вѣ́рнымъ ᲂу҆тверже́нїе . крⷭ҇тъ а҆́нг҃лѡмъ сла́ва . крⷭ҇тъ бѣсо́мъ ꙗ҆́зва .

На хвали́тѣхъ , пᲂста́вимъ , стихо́въ , ѕ҃ . стихѣ́ры , крⷭ҇тꙋ̀ . гла́съ , а҃ . поⷣ . нбⷭ҇нымъ чино́мъ .= Н=бⷭ҇наѧ ше́ствїѧ крⷭ҇тъ честны́и гᲂто́витъ ,꙳ всѣ́мъ и҆́же тᲂмꙋ̀ пᲂклᲂнѧ́ющимсѧ ,꙳ вѣ́рᲂю несꙋмѣ́ннᲂю .꙳ и҆ лико́мъ невеще́ственыхъ си́лъ ,꙳ и҆́же на не́мъ пригвᲂзди́выисѧ сᲂчета́етъ ,꙳ любо́вїю пᲂю́щихъ тᲂгѡ̀ . Кла́нѧющїисѧ вѣ́рᲂю крⷭ҇тꙋ̀ честно́мꙋ ,꙳ и҆́же на не́мъ распе́ншагᲂсѧ вᲂспᲂе́мъ влⷣкꙋ .꙳ тᲂгѡ̀ манᲂве́нїемъ ,꙳ ᲂу҆стнѣ̀ вкꙋ́пѣ и҆ дш҃ꙋ ѡ҆чища́юще .꙳ и҆ сїѧ́нїи сегѡ̀ мы́слеными ,꙳ ᲂу҆ѧсни́мсѧ хва́лѧще є҆гѡ̀ . Го́рести дре́вле ᲂу҆слажда́ѧ мѡѷсе́й ,꙳ и҆зба́ви і҆и҃лѧ ,꙳ ѻ҆́бразъ крⷭ҇та̀ написꙋ́ѧ .꙳ мы́ же сегѡ̀ всѝ бжⷭ҇твенᲂ вѣ́рнїи ,꙳ та́йнѡ вᲂѡ҆бража́емъ в̾ срⷣца́хъ всегда̀ ѡ҆бра́знѡ .꙳ и҆ спаса́емсѧ держа́вᲂю є҆гѡ̀ .

и҆́ны стⷯры . самᲂгла́сны , ст҃ы́мъ . гла́съ , то́йже . Мнᲂгᲂстрада́льнаѧ мт҃и , к̾ пᲂдвигѡ́мъ сᲂзва́вши свᲂѧ̀ дѣ́ти гл҃аше , а҆враа́мстѣй сѣди́нѣ пᲂслѣ́дꙋйте , да закᲂле́нїю і҆саа́кᲂвꙋ причастите́сѧ , ті́и же прїима́хꙋ наставлѧ́ющꙋю , пред̾пᲂсыла́хꙋ ᲂу҆ча́щꙋю , сꙋгꙋ́быхъ тᲂмле́нїи мꙋ́ки ви́дѧще . и҆́хже мл҃твами бж҃е пᲂми́лꙋй на́съ . гла́съ , д҃ . Се́дмь сто́лпъ и҆з̾бра́ннїи , ѿ є҆ди́нагѡ ка́менѧ слᲂве́снагѡ ᲂу҆сѣче́ни бы́ша , непᲂкᲂлѣби́мъ пᲂказа́сѧ зако́на сто́лпъ . тѣ́мже бл҃гᲂвᲂлѝ сп҃се , в̾ ми́рѣ сᲂхрани́тисѧ дш҃а́мъ на́шимъ . гла́съ , є҃ . И҆́же зако́нꙋ храни́тели , и҆ сᲂлᲂмѡні́и сн҃ᲂве , на сꙋди́щи стра́ждꙋще , кᲂ а҆нтїѡ́хꙋ вᲂпїѧ́хꙋ . мы̀ а҆нтїѡ́ше , пᲂ ѻ҆те́ческᲂмъ зако́нѣ терпи́мъ . не ѿлꙋчи́тъ же на́съ , ни ѻ҆́гнь ни ме́чь , ни ѕвѣ́рїе ни ра́ны . нᲂ вкꙋ́пѣ ᲂу҆́мремъ с̾ ма́терїю ста́рицею , и҆ ᲂу҆чи́телемъ ѻ҆ц҃е́мъ , живꙋ́ще и҆ сра́дꙋющесѧ в̾ некᲂнча́емыѧ вѣ́ки .

сла́ва . гла́съ , д҃ . И҆́же на маккаве́и сᲂбра́вшꙋюсѧ ра́ть , прїиди́те ᲂу҆́зримъ вѣ́рныхъ мно́жествᲂ . мꙋчи́тель цр҃ь всѧ̀ ꙗ҆зы́ки ᲂу҆держа́въ . держи́мь бѣ́ѧше ѿ ста́рца , и҆ дѣте́й седьмѝ , и҆ є҆ди́ныѧ жены̀ . тѣ́мже мл҃твами и҆́хъ бж҃е пᲂми́лꙋй на́съ . и҆ ны́нѣ , крⷭ҇тꙋ̀ . гла́съ , то́йже . Пᲂсᲂби́выи гдⷭ҇и кро́ткᲂмꙋ дв҃дꙋ , пᲂбѣди́ти и҆нᲂплеме́нника , и҆ держа́вѣ на́шей спᲂсо́бствꙋй . и҆ ѻ҆рꙋ́жїемъ крⷭ҇та̀ низлᲂжѝ врагѝ на́ша . пᲂкажѝ млрⷭ҇де на на́съ , дре́внїѧ млⷭ҇ти твᲂѧ̀ , и҆ разꙋмѣ́ютъ вᲂи́стинꙋ , ꙗ҆́кѡ ты̀ є҆сѝ бг҃ъ , и҆ на тѧ̀ надѣ́ющесѧ пᲂбѣжда́емъ . мᲂлѧ́щесѧ прилѣ́жнѡ пречⷭ҇тѣй тѝ мт҃ри , дарᲂва́ти на́мъ ми́ръ и҆ ве́лїю млⷭ҇ть . Славᲂсло́вїе вели́кᲂе , и҆́з̾легка и҆ со́ гласᲂмъ .= і҆єре́ю сꙋ́щꙋ вᲂ все́мъ чинꙋ̀ сщ҃е́нническᲂмъ . прихо́дитъ же с̾ кади́лᲂмъ кᲂ ст҃ѣ́й трапе́зѣ , пред̾хᲂдѧ́щꙋ є҆мꙋ̀ дїа́кᲂнꙋ с̾ лампа́дᲂю , и҆ кади́тъ ст҃ꙋ́ю трапе́зꙋ , и҆ честны́и крⷭ҇тъ . =и҆ =та́кѡ взима́етъ чⷭ҇тны́и крⷭ҇тъ с̾ блю́дᲂмъ на главꙋ̀ , и҆ и҆схо́дитъ сѣ́верными дверьмѝ и҆з̾ ѻ҆лтарѧ̀ , пред̾ и҆дꙋ́щимъ є҆мꙋ̀ дїа́кᲂнᲂмъ с̾ лампа́дами и҆ с̾ кади́лᲂмъ . Прихо́дитъ же прѧ́мѡ црⷭ҇кихъ двере́й , и҆ тꙋ̀ стᲂи́тъ ѡ҆жида́ѧ кᲂнца̀ трⷭ҇то́мꙋ . Кᲂнча́емꙋ же трⷭ҇то́мꙋ , дїа́кᲂнъ вᲂзгласи́тъ : премꙋ́дрᲂсть про́сти . =начина́ютъ кли́рицы , трᲂпа́рь : Спасѝ гдⷭ҇и лю́ди свᲂѧ̀ , и҆ бл҃гᲂслᲂвѝ дᲂстᲂѧ́нїе свᲂѐ , пᲂбѣ́ды держа́ве рᲂсси́йстей на сᲂпрᲂти́вныѧ да́рꙋй , и҆ свᲂѧ̀ сᲂхранѧ́ѧ крⷭ҇то́мъ лю́ди . три́жды . и҆ =та́кѡ прихо́дитъ і҆єре́й нᲂсѧ̀ чⷭ҇тны́и крⷭ҇тъ пред̾ ст҃ы́ѧ црⷭ҇кїѧ две́ри к̾ а҆нало́ю . ᲂу҆кра́шенꙋ же сꙋ́щꙋ та́мѡ а҆нало́гꙋ сᲂ мнᲂгᲂцѣ́ннᲂю па́вᲂлᲂкᲂю . и҆ пᲂлага́етъ на не́мъ чⷭ҇тны́и крⷭ҇тъ . пригᲂто́ванѣ же и҆ вᲂдѣ̀ в̾ ча́ши , и҆лѝ и҆схо́димъ на и҆сто́чники вᲂдны́ѧ . и҆ прише́дъ на́ вᲂдꙋ , дїа́кᲂнъ гл҃етъ : бл҃гᲂслᲂвѝ влⷣкᲂ . і҆єре́й же : бл҃гᲂслᲂве́нъ бг҃ъ на́шъ . =в̾ то́ же вре́мѧ дїа́кᲂнъ , и҆лѝ і҆єре́й кади́тъ ча́шꙋ , и҆лѝ і҆ѡрда́нъ крⷭ҇тᲂѡ҆бра́знѡ .

и҆ пᲂе́мъ сїѧ̀ стихѣ́ры сщ҃е́нїю . гла́съ , ѕ҃ .

Ра́дꙋисѧ ꙗ҆́же ѿ а҆́нг҃ла ра́дᲂсть прїе́мши , и҆ ро́ждьши зижди́телѧ свᲂегѡ̀ , дв҃ᲂ спасѝ тебѐ велича́ющихъ . Вᲂспѣва́емъ сн҃а твᲂегѡ̀ бцⷣе , и҆ вᲂпїе́мъ пречⷭ҇таѧ влⷣчце , всѧ́кїѧ бѣды̀ и҆зба́ви мᲂли́твеники свᲂѧ̀ . Цр҃е́мъ прᲂро́кѡмъ , и҆ а҆пⷭ҇лѡмъ и҆ мч҃нкѡмъ є҆сѝ пᲂхвала̀ , и҆ пред̾ста́тельница ми́рꙋ всенепᲂро́чнаѧ . Ꙗ҆зы́къ всѧ́къ правᲂсла́вныхъ вᲂспѣва́етъ , и҆ блажи́тъ и҆ сла́витъ пречⷭ҇тᲂе ти ржⷭ҇тво̀ , мр҃і́е бг҃ᲂневѣ́стнаѧ . Да́ждь хрⷭ҇тѐ мо́й мнѣ̀ недᲂсто́йнᲂмꙋ , сᲂгрѣше́нїемъ ѡ҆ставле́нїе мᲂлю́сѧ , тебѐ ро́ждьшїѧ мᲂльба́ми , ꙗ҆́кѡ бл҃гᲂꙋтро́бенъ . На тѧ̀ наде́ждꙋ мᲂю̀ вᲂз̾лᲂжи́хъ бцⷣе , спаси́ мѧ мᲂльба́ми сѝ , и҆ да́рꙋй ми сᲂгрѣше́нїемъ ѡ҆ставле́нїе . Ѡ҆живи́ мѧ ро́ждьшаѧ жизнᲂда́вца и҆ сп҃са , и҆ спасѝ мᲂльба́ми си , бл҃гᲂслᲂве́наѧ наде́жде дш҃а́мъ на́шимъ . Ꙗ҆́же зижди́телѧ всѣ́хъ заче́ньши , и҆ ро́ждьши дв҃ᲂ всенепᲂро́чнаѧ , тᲂгѡ̀ мᲂлѝ спастѝ дш҃а на́ша . Бцⷣе ро́ждьшаѧ ѻ҆́ч҃ее сло́вᲂ , па́че сло́ва сн҃а всепѣ́таѧ . тᲂгѡ̀ мᲂлѝ спастѝ дш҃а на́ша . Ми́лᲂстива же сн҃а свᲂегѡ̀ и҆ сꙋдїю̀ , сᲂгрѣши́вшемꙋ мнѣ̀ па́че всѧ́кагѡ чл҃ка , твᲂи́ми мᲂльба́ми сᲂдѣ́лай влⷣчце . По́ дᲂлгꙋ вᲂпїе́мъ ти бцⷣе , ра́дꙋисѧ чⷭ҇таѧ прⷭ҇нѡ дв҃ᲂ , мᲂлѧ́щесѧ мл҃твами твᲂи́ми спасти́сѧ . И҆зми́ мѧ бг҃ᲂрᲂди́тельнице ѻ҆гнѧ̀ вѣ́чнагᲂ , и҆ мꙋ́къ ча́ющихъ менѐ , ꙗ҆́кѡ да ᲂу҆блажа́ю тѧ . Да не пре́зриши мᲂле́нїѧ твᲂи́хъ ра́бъ , мо́лимъ тѧ̀ влⷣчце всепѣ́таѧ , ꙗ҆́кѡ да и҆зба́вимсѧ всѧ́кагѡ ѡ҆бстᲂѧ́нїѧ . Бᲂлѣ́зней и҆ всѧ́кихъ стрⷭ҇те́й , и҆ бѣ́дъ свᲂбᲂдѝ на́съ пᲂмо́щнице , кᲂ сщ҃е́ннᲂмꙋ твᲂемꙋ̀ пᲂкро́вꙋ прибѣга́ющихъ . Стра́ннѡ чꙋ́дᲂ , є҆́же в̾ тебѣ̀ бг҃ᲂрᲂди́тельнице пᲂказа́сѧ , на́съ бᲂ ра́ди и҆ пᲂ на́съ бы́сть , всѣ́хъ зижди́тель и҆з̾ тебѐ бг҃ъ на́шъ . Хра́мъ тво́й бцⷣе пᲂказа́сѧ , врачевство̀ бᲂлѣ́зненымъ всегда̀ , и҆ печа́льнымъ дш҃а́мъ ᲂу҆тѣше́нїе . Прест҃а́ѧ бцⷣе ро́ждьшаѧ сп҃са , ѿ бѣ́дъ спасѝ , и҆ ѿ всѧ́кїѧ и҆ны́ѧ нꙋ́жды рабы̀ свᲂѧ̀ . И҆змѝ ѿ всѧ́кагѡ гнѣ́ва прихᲂдѧ́щагᲂ , свᲂѧ̀ рабы̀ прест҃а́ѧ влⷣчце , и҆ всѧ́кїѧ па́кᲂсти дш҃е́вныѧ же и҆ тѣле́сныѧ . Спасѝ всѣ́хъ мᲂльба́ми твᲂи́ми дв҃ᲂ бцⷣе , к̾ тебѣ̀ притѣка́ющихъ , и҆ и҆змѝ ѿ всѧ́кїѧ бѣды̀ и҆ печа́ли . Мᲂльба́ми ми́лᲂстиве мт҃ре твᲂеѧ̀ пречⷭ҇тыѧ , и҆ всѣ́хъ ст҃ы́хъ твᲂи́хъ , твᲂеѧ̀ ми́лᲂсти лю́демъ си да́рꙋй . Ѿ всѣ́хъ ᲂу҆мᲂлѧ́емь ще́дре , ст҃ы́хъ и҆ вы́шнихъ чинѡ́въ , ѡ҆чи́сти мѧ ро́ждьшїѧ тѧ̀ ра́ди . Пᲂщадѝ сп҃се дш҃ъ ᲂу҆ме́ршихъ , ѡ҆ наде́жди жи́зни вѣ́чныѧ бра́тїи на́шеѧ , и҆ ѡ҆сла́би и҆ ѡ҆ста́ви и҆́хъ прегрѣше́нїѧ . Ра́дꙋисѧ ми́рꙋ ѡ҆чище́нїе дв҃ᲂ . ра́дꙋисѧ сᲂсꙋ́де и҆ кади́льнице всеѕлата́ѧ , бжⷭ҇твеныѧ ма́нны , и҆ свѣ́та бг҃ᲂневѣ́стнаѧ .

сла́ва . Пᲂе́мъ тѧ бг҃а и҆́же в̾ трⷪ҇цѣ , взыва́юще гла́сы , трист҃ы́и мо́лимъ тѧ спасе́нїе пᲂлꙋчи́ти . и҆ ны́нѣ . ѽ дв҃ᲂ ро́ждьшаѧ сп҃са , и҆ влⷣкꙋ ми́рꙋ и҆ гдⷭ҇а . тᲂгѡ̀ мᲂлѝ спастѝ дш҃а на́ша .

и҆́ны , стихѣ́ры . гла́съ , то́йже .

Милᲂсе́рдїѧ две́ри ѿве́рзи на́мъ , бл҃гᲂслᲂве́наѧ бцⷣе дв҃ᲂ , надѣ́ющїисѧ на тѧ̀ непᲂги́бнемъ , нᲂ да и҆зба́вимсѧ тᲂбо́ю ѿ бѣ́дъ , ты́ бᲂ є҆сѝ спасе́нїе ро́дꙋ хрⷭ҇тїа́нскᲂмꙋ . Нн҃ѣ пред̾ста̀ вре́мѧ всѣ́хъ ѡ҆сщ҃а́ѧ на́съ , и҆ пра́ведныи жде́тъ сꙋдїѧ̀ . нᲂ ѡ҆брати́сѧ дш҃е к̾ пᲂкаѧ́нїю , ꙗ҆́кᲂже блꙋдни́ца зᲂвꙋ́щи сᲂ слеза́ми , гдⷭ҇и пᲂми́лꙋй мѧ . Вᲂда́ми навᲂдни́въ хрⷭ҇тѐ и҆сто́чникъ и҆сцѣле́нїи , в̾ пречестнѣ́мъ хра́мѣ дв҃ыѧ дне́сь , и҆ твᲂегѡ̀ бл҃гᲂꙋтро́бїѧ крᲂпле́нїемъ , ѿгна́въ бᲂлѣ́зни бᲂлѧ́щихъ , врачꙋ̀ дш҃ъ и҆ тѣле́съ на́шихъ . Дв҃ᲂю ро́ждьши не и҆скꙋсᲂбра́чнаѧ хрⷭ҇та̀ бг҃а , и҆ дв҃ᲂю пребы́сть мт҃и без̾невѣ́стнаѧ бцⷣе мр҃і́е , тᲂгѡ̀ мᲂлѝ спасти́сѧ на́мъ . Прест҃а́ѧ бцⷣе дв҃ᲂ , рꙋ́къ на́шихъ дѣ́ла и҆спра́ви , и҆ прᲂще́нїе сᲂгрѣше́нїемъ на́шимъ и҆спрᲂсѝ , внегда̀ пѣ́ти на́мъ а҆́нг҃льскꙋю пѣ́снь .

та́же : Ст҃ы́и бж҃е , ст҃ы́и крѣ́пкїи , ст҃ы́и без̾сме́ртныи , пᲂми́лꙋй на́съ . три́жды пᲂе́мъ велегла́снѡ . пᲂсе́мъ дїа́кᲂнъ : во́нмемъ .= і҆єре́й : ми́ръ всѣ́мъ . чте́цъ : и҆= дх҃ᲂви твᲂемꙋ̀ . дїа́кᲂнъ : премꙋ́дрᲂсть во́нмемъ . чте́цъ : прᲂки́менъ , ѱл҃о́мъ дв҃дᲂвъ . Гдⷭ҇ь прᲂсвѣще́нїе мᲂѐ , и҆ спаси́тель мо́й кᲂго́сѧ ᲂу҆бᲂю̀ . сти́хъ . гдⷭ҇ь защи́титель живᲂтꙋ̀ мᲂемꙋ̀ , ѿ кᲂго́ сѧ ᲂу҆страшꙋ̀ .

а҆пⷭ҇лъ , къ є҆вреѡ́мъ . зача́лᲂ , т҃ѕ .

Бра́тїе , є҆гда̀ ст҃ѧ́и и҆ ст҃ѧ́емїи , ѿ є҆ди́нᲂгѡ всѝ , є҆ѧ́же ра́ди вины̀ нестыди́тсѧ бра́тїю нарица́ти и҆́хъ гл҃ѧ . вᲂз̾вѣщꙋ̀ и҆́мѧ твᲂѐ бра́тїи мᲂе́й . пᲂсредѣ̀ цр҃кве вᲂспᲂю́ тѧ . и҆ па́ки , а҆́зъ бꙋ́дꙋ надѣ́ѧсѧ на́нь . и҆ па́ки , сѐ а҆́зъ и҆ дѣ́ти ꙗ҆́же ми да́лъ є҆́сть бг҃ъ . пᲂне́же ᲂу҆́бѡ дѣ́ти приѡ҆бщи́шасѧ пло́ти и҆ кро́ви , и҆ то́й пᲂдо́бнѣ приѡ҆бщи́сѧ тѣ́хже , да сме́ртїю ᲂу҆пра́зднитъ и҆мꙋ́щагѡ держа́вꙋ сме́рти , си́рѣчь дїа́вᲂла . и҆ и҆зба́витъ си́хъ є҆ли́цы стра́хᲂмъ сме́рти пᲂ всемꙋ̀ житїю̀ пᲂви́нны бѣ́ша рабо́тѣ . не ѿ а҆́нг҃лъ ᲂу҆́бѡ кᲂгда̀ прїе́млетъ , нᲂ ѿ сѣ́мене а҆враа́мᲂва прїе́млетъ , ѿ ню́дꙋ же до́лженъ бѣ̀ пᲂ всемꙋ̀ пᲂдо́битисѧ бра́тїи , да ми́лᲂстивъ бꙋ́детъ и҆ вѣ́ренъ первᲂсщ҃е́нникъ ꙗ҆́же к̾ бг҃ꙋ , вᲂ є҆́же ѡ҆чи́стити грѣхѝ людьскі́ѧ . ѡ҆ не́мже бᲂ пᲂстрада̀ са́мъ и҆скꙋше́нъ бы́въ , мо́жетъ и҆ напа́ствᲂваннымъ пᲂмᲂщѝ .

ѱл҃о́мъ дв҃дᲂвъ , а҆ллилꙋ́їѧ . гла́съ гдⷭ҇нь на вᲂда́хъ мно́гахъ .= а҆ллилꙋ́їѧ . таⷤ , дїа́кᲂнъ : п=ремꙋ́дрᲂсть про́сти , ᲂу҆слы́шимъ ст҃а́гѡ є҆ѵⷢ҇а́лїѧ .

є҆ѵⷢ҇а́лїе , ѿ і҆ѡа́нна . заⷱ҇ , д҃і .

Вᲂ вре́мѧ ѻ҆́нᲂ , взы́де і҆с҃ъ вᲂ і҆єрⷭ҇ли́мъ . є҆́сть же вᲂ і҆єрⷭ҇ли́мѣхъ на ѻ҆́вчей кꙋпѣ́ли , ꙗ҆́же гл҃етсѧ є҆вре́йски виѳе́зда , пѧ́ть притво́ръ и҆мꙋ́щи . в̾ тѣ́хъ слежа́ше мно́жествᲂ бᲂлѧ́щихъ , слѣпы́хъ , хрᲂмы́хъ , сꙋхи́хъ , ча́ющихъ движе́нїѧ вᲂды̀ . а҆́нг҃лъ бᲂ гдⷭ҇нь на всѧ́кᲂ лѣ́тᲂ схᲂжда́ше в̾ кꙋпѣ́ль , и҆ вᲂз̾мꙋща́ше во́дꙋ . и҆ и҆́же пе́рвѣе вла́зѧше пᲂ вᲂз̾мꙋще́нїи вᲂды̀ , здра́въ быва́ше , ꙗ҆́цѣмъ же недꙋ́гᲂмъ ѡ҆держи́мъ быва́ше .

та́же , дїа́кᲂнъ гл҃етъ , є҆ктенїю̀ . Ми́рᲂмъ гдⷭ҇ꙋ пᲂмо́лимсѧ . ѡ҆ свы́шнѣмъ ми́рѣ , и҆ ѡ҆ спасе́нїи дш҃ъ на́шихъ , гдⷭ҇ꙋ пᲂмо́лимсѧ .= ѡ҆= ми́рѣ всегѡ̀ ми́ра , и҆ ѡ҆ бл҃гᲂстᲂѧ́нїи ст҃ы́хъ бж҃їихъ цр҃квахъ , и҆ ѡ҆ сᲂвᲂкꙋпле́нїи всѣ́хъ , гдⷭ҇ꙋ пᲂмо́лимсѧ .= ѡ҆= ст҃ѣ́мъ хра́мѣ се́мъ , и҆ є҆́же с̾ вѣ́рᲂю и҆ бл҃гᲂгᲂвѣ́нїемъ , и҆ со́ страхᲂмъ бж҃їимъ вхᲂдѧ́щихъ во́нь , гдⷭ҇ꙋ пᲂмо́лимсѧ .= ѡ҆= митрᲂпᲂли́те на́шемъ , і҆мⷬ҇къ , честна́гѡ презви́терства , и҆ є҆́же ѡ҆́ хрⷭ҇тѣ̀ дїа́кᲂнства , и҆ всегѡ̀ при́чта , и҆ ѡ҆́ людехъ , гдⷭ҇ꙋ пᲂмо́лимсѧ . ѡ҆ странѣ̀ на́шей , и҆ ѡ҆ спасе́нїи є҆ѧ̀ , гдⷭ҇ꙋ пᲂмо́лимсѧ .= ѡ҆= пᲂсᲂби́ти и҆ пᲂкᲂри́ти по́д̾ нᲂзѣ є҆ѧ̀ , всѧ́кагᲂ врага̀ и҆ сᲂпᲂста́та , гдⷭ҇ꙋ пᲂмо́лимсѧ . ѡ҆́ градѣ се́мъ , и҆ ѡ҆ ст҃ѣ́й ѻ҆би́тели се́й , и҆ ѡ҆ всѧ́кᲂмъ гра́дѣ и҆ страна́хъ , и҆ и҆́же вѣ́рᲂю живꙋ́щихъ в̾ ни́хъ , гдⷭ҇ꙋ пᲂмо́лимсѧ .= ѡ҆= бл҃гᲂраствᲂре́нїи вᲂздꙋ́ха , и҆ ѡ҆ ᲂу҆мнᲂже́нїи плᲂдо́въ земны́хъ , и҆ ѡ҆ времене́хъ ми́рныхъ , гдⷭ҇ꙋ пᲂмо́лимсѧ . ѡ҆ пла́вающихъ , и҆ пꙋ́ть ше́ствꙋющихъ , недꙋ́гꙋющихъ , стра́ждꙋщихъ , плѣне́ныхъ , и҆ ѡ҆ спасе́нїи и҆́хъ , гдⷭ҇ꙋ пᲂмо́лимсѧ .= ѡ҆= ѡ҆ст҃и́тисѧ вᲂдѣ̀ се́й наше́ствїемъ и҆ си́лᲂю и҆ дѣ́йствїемъ ст҃а́гѡ дх҃а , гдⷭ҇ꙋ пᲂмо́лимсѧ . ѡ҆ низ̾пᲂсла́тисѧ є҆́й бл҃гᲂда́ти , и҆ и҆збавле́нїе и҆ бл҃гᲂслᲂве́нїе и҆ і҆ѡрда́нᲂвᲂ , гдⷭ҇ꙋ пᲂмо́лимсѧ . ѡ҆ =є҆́же прᲂсвѣти́тисѧ на́мъ свѣ́тᲂмъ ра́зꙋма и҆ бл҃гᲂче́стїѧ , ра́ди є҆динᲂсꙋ́щныѧ трⷪ҇цы , гдⷭ҇ꙋ пᲂмо́лимсѧ . =ѡ҆ и҆зба́витисѧ на́мъ ѿ всѧ́кїѧ ско́рби , гнѣ́ва и҆ нꙋ́жды , гдⷭ҇ꙋ пᲂмо́лимсѧ .= Застꙋпѝ и҆ спасѝ и҆ пᲂми́лꙋй , и҆ сᲂхранѝ на́съ бж҃е свᲂе́ю бл҃гᲂда́тїю . Прест҃ꙋ́ю чи́стꙋю и҆ пребл҃гᲂслᲂве́нꙋю влⷣчцꙋ на́шꙋ бцⷣꙋ и҆ прⷭ҇нѡ дв҃ꙋ мр҃і́ю , сᲂ всѣ́ми ст҃ы́ми пᲂмѧнꙋ́вше , са́ми себѐ и҆ дрꙋ́гъ дрꙋ́га , и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ . =вᲂз̾гла́съ . Ꙗ҆́кѡ пᲂдᲂба́етъ тѝ всѧ́ка сла́ва , че́сть и҆ пᲂклᲂнѧ́нїе , ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ . нн҃ѣ и҆ прⷭ҇нѡ и҆ во́ вѣки вѣко́мъ .= кли́рицы же пᲂю́тъ : а҆ми́нь . =дїа́кᲂнъ : гдⷭ҇ꙋ пᲂмо́лимсѧ .= кли́рицы же : гдⷭ҇и пᲂми́лꙋй . І҆єре́й гл҃етъ , вᲂ ᲂу҆слы́шанїе всѣ́мъ , мᲂли́твꙋ сїю̀ , велегла́снѡ :=

Гдⷭ҇и бж҃е на́шъ , вели́кїи во́ свѣтѣ , и҆ ди́вныи в̾ дѣ́лѣхъ , и҆́же всеѧ̀ тва́ри сᲂдѣ́телю . хранѧ́и завѣ́тъ сво́й , и҆ ми́лᲂсть свᲂю̀ лю́бѧщимъ тѧ̀ , и҆ хранѧ́щимъ твᲂѧ̀ пᲂвелѣ́нїѧ . и҆́же всѣ́хъ в̾ нꙋ́жахъ ᲂу҆миле́нныѧ прїе́млѧ сле́зы . сего́ бᲂ ра́ди прише́лъ є҆сѝ в̾ ра́бїи ѻ҆́бразѣ , да не привидѣ́нїемъ на́съ ᲂу҆жаси́ши , нᲂ и҆ здра́въ тѣ́лꙋ и҆́стиннᲂе хᲂтѧ̀ , и҆ гл҃ѧ , сѐ здра́въ бы́сть к̾ тᲂмꙋ̀ несᲂгрѣша́й . нᲂ и҆ ѿ бре́нїѧ здра́вы ѻ҆́чи сᲂдѣ́ла , и҆ ᲂу҆мы́тисѧ пᲂвелѣ́въ , и҆ свѣ́тꙋ всели́тисѧ сᲂтвᲂри́въ сло́вᲂмъ . и҆́же сᲂпрᲂти́вныхъ страсте́й тмы̀ смꙋще́нїѧ , и҆ житїѧ̀ сегѡ̀ сла́нᲂе мо́ре и҆з̾сꙋши́въ , и҆ тѧжелᲂно́сныѧ вᲂлны̀ сласте́й ᲂу҆крᲂти́въ . са́мъ чл҃кᲂлю́бче влⷣкᲂ , да́выи на́мъ снѣгᲂсвѣ́тлᲂю ѡ҆дѣ́ѧтисѧ ᲂу҆́тварїю ѿ вᲂды̀ и҆ дх҃а . и҆ ра́ди вᲂды̀ сеѧ̀ прича́стїѧ и҆ крᲂпле́нїѧ , твᲂѐ бл҃гᲂслᲂве́нїе на́мъ низ̾пᲂслѝ , скве́рнꙋ сласте́й ѡ҆мыва́ѧ . є҆́й , мо́лимсѧ тѝ пᲂсѣтѝ на́шꙋ не́мᲂщь , и҆ и҆сцѣлѝ на́ша бᲂлѣ́зни , дш҃е́вныѧ же и҆ тѣле́сныѧ ми́лᲂстїю твᲂе́ю . мл҃твами пречⷭ҇тыѧ и҆ пребл҃гᲂслᲂве́ныѧ влⷣчцы на́шеѧ бцⷣы и҆ при́снѡ дв҃ы мр҃і́и . и҆ ст҃ы́хъ нбⷭ҇ныхъ си́лъ беспло́тныхъ . чⷭ҇тна́гѡ и҆ сла́внагѡ прᲂро́ка и҆ прⷣтчи и҆ крⷭ҇ти́телѧ і҆ѡа́нна . ст҃ы́хъ сла́вныхъ и҆ всехва́льныхъ а҆пⷭ҇лъ . и҆ ст҃ы́хъ дᲂбрᲂпᲂбѣ́дныхъ мч҃нкъ . прпⷣбныхъ и҆ бг҃ᲂно́сныхъ ѻ҆ц҃ъ на́шихъ . и҆ ст҃ы́хъ пра́ведныхъ бг҃ᲂѻ҆ц҃ъ і҆ѡаки́ма и҆ а҆́нны . и҆ ст҃ы́хъ чꙋдᲂтво́рецъ и҆ без̾сре́бреникъ , кᲂзмы̀ и҆ дамїа́на . ки́ра и҆ і҆ѡа́нна . пантеле́ймᲂна , и҆ є҆рмᲂла́ѧ . самѱѡ́на , и҆ дїѡми́да . три́фѡна , и҆ фалиле́ѧ .= и҆ ст҃а́гѡ , і҆мⷬ҇къ , є҆го́же хра́мъ .= и҆ и҆́же вᲂ ст҃ы́хъ ѻ҆ц҃ъ на́шихъ вселе́нскихъ ᲂу҆чи́телей , васи́лїѧ вели́кагѡ , григо́рїѧ бг҃ᲂсло́ва , и҆ і҆ѡа́нна ѕлатᲂꙋ́стагѡ . и҆ и҆́же вᲂ ст҃ы́хъ ѻ҆ц҃ъ на́шихъ пресщ҃е́нныхъ а҆рхїє҆пⷭ҇кпᲂвъ а҆леѯандрі́йскихъ , а҆ѳана́сїѧ вели́кагѡ , и҆ кири́ла . и҆ и҆́же вᲂ ст҃ы́хъ ѻ҆ц҃а на́шегѡ нико́лы а҆рхїє҆пⷭ҇кпа ми́ръ ликі́йскихъ чꙋдᲂтво́рца . и҆ и҆́же вᲂ ст҃ы́хъ ѻ҆ц҃ъ на́шихъ пресщ҃е́нныхъ митрᲂпᲂли́тᲂвъ кі́евскихъ , и҆ всеѧ̀ рꙋсі́и чꙋдᲂтво́рцевъ , петра̀ , и҆ а҆леѯі́ѧ , и҆ і҆ѡ́ны . и҆ ст҃ы́хъ пра́ведныхъ стрⷭ҇тᲂте́рпецъ , кн҃зе́й рꙋ́сскихъ , ѻ҆бᲂю̀ бра́тꙋ по́ плᲂти , бᲂри́са и҆ глѣ́ба , вᲂ ст҃о́мъ креще́нїи нарече́нныхъ рᲂма́на и҆ дв҃да , и҆ и҆́же вᲂ ст҃ы́хъ ѻ҆ц҃ъ на́шихъ і҆ѡа́нна и҆ є҆вфи́мїѧ , а҆рхїє҆пⷭ҇кпᲂвъ нᲂвᲂгᲂро́дскихъ чꙋдᲂтво́рцевъ . и҆ леѡ́нтїѧ , и҆ и҆са́їи є҆пⷭ҇кпᲂвъ рᲂсто́вскихъ чꙋдᲂтво́рцевъ . и҆ стефа́на є҆пⷭ҇кпа пе́рмьскагѡ чꙋдᲂтво́рца . и҆ прпⷣбныхъ и҆ бг҃ᲂно́сныхъ ѻ҆ц҃ъ на́шихъ , а҆нтѡ́нїѧ вели́кагѡ , и҆ ѳеᲂдѡ́сїѧ , и҆ є҆вфи́мїѧ , и҆ са́вы ѡ҆сщ҃е́ннагѡ , и҆ і҆ѡа́нна списа́телѧ лѣ́ствицы . и҆ прпⷣбныхъ и҆ бг҃ᲂно́сныхъ ѻ҆ц҃ъ на́шихъ , се́ргїѧ , и҆ варла́ма , и҆ кири́ла , и҆ нико́лы , и҆ пафнꙋ́тїѧ . и҆ прпⷣбнᲂмч҃нка ники́ты сто́лпника переѧсла́вскагѡ чꙋдᲂтво́рца . и҆ прпⷣбнагѡ ѻ҆ц҃а на́шегѡ дими́трїѧ , и҆́же на прилꙋ́цѣ во́лᲂгᲂдскагѡ чꙋдᲂтво́рца . и҆ ст҃ы́хъ мч҃нкъ и҆ и҆спᲂвѣ́дникъ , кн҃зѧ миха́ила черни́гᲂвскагѡ , и҆ бᲂлѧ́рина є҆гѡ̀ ѳео́дѡра . и҆ прпⷣныхъ ѻ҆ц҃ъ зᲂси́мы и҆ саваті́ѧ сᲂлᲂве́цкихъ , и҆ а҆леѯа́ндра сви́рскагѡ чꙋдᲂтво́рца . и҆ ст҃ы́хъ бл҃же́нныхъ хрⷭ҇та̀ ра́ди ᲂу҆ро́дивыхъ , и҆си́дᲂра , и҆ прᲂко́пїѧ , маѯи́ма , и҆ васи́лїѧ , мᲂско́вскихъ чꙋдᲂтво́рцевъ . и҆ ст҃а́гѡ сщ҃еннᲂмч҃нка и҆ и҆спᲂвѣ́дника а҆вва́кꙋма и҆ и҆́же с̾ ни́мъ за бл҃гᲂче́стїе пᲂстрада́вшихъ . и҆ и҆́же вᲂ ст҃ы́хъ ѻ҆ц҃а на́шегѡ и҆ и҆спᲂвѣ́дника а҆мвро́сїѧ митрᲂпᲂли́та белᲂкрини́цкагѡ , и҆ ст҃ы́хъ сщ҃е́ннᲂмч҃нкъ , мч҃нкъ и҆ и҆спᲂвѣ́дникъ и҆ и҆́же с̾ ни́ми в̾ рꙋ́сстей землѝ за вѣ́рꙋ хрⷭ҇то́вꙋ пᲂстрада́вшихъ , и҆ ст҃ы́хъ прпⷣбнᲂмч҃нкъ кᲂнстанти́на и҆ а҆рка́дїѧ шама́рскихъ чꙋдᲂтво́рцевъ , И҆ ст҃ы́хъ мч҃нкъ седьмѝ бра́тїи маккаве́й , и҆ мт҃ре и҆́хъ сᲂлᲂмѡні́и , и҆ ᲂу҆чи́телѧ и҆́хъ є҆леаза́ра , и҆ всѣ́хъ ст҃ы́хъ твᲂи́хъ .

Спасѝ гдⷭ҇и и҆ пᲂми́лꙋй гᲂспᲂди́на на́шегѡ , і҆мⷬ҇къ , преѡ҆сщ҃е́ннейшагѡ митрᲂпᲂли́та мᲂско́вскагᲂ и҆ всеѧ̀ рꙋсі́и . и҆ всѧ́кѡ є҆пⷭ҇кпствѡ пресщ҃е́нныхъ митрᲂпᲂли́тᲂвъ , и҆ а҆рхїє҆пⷭ҇кпᲂвъ и҆ є҆пⷭ҇кпᲂвъ правᲂсла́вныхъ , и҆справлѧ́ющихъ сло́вᲂ твᲂеѧ̀ и҆́стины , и҆ всегѡ̀ сщ҃е́нническагѡ , и҆ и҆́нᲂческагѡ чи́на . и҆ спасе́нїѧ и҆́хъ . пᲂмѧнѝ гдⷭ҇и плᲂдᲂнᲂсѧ́щихъ . и҆ дᲂбрᲂтвᲂрѧ́щихъ кᲂ ст҃ы́мъ твᲂи́мъ цр҃квамъ . пᲂмѧнѝ гдⷭ҇и ненави́дѧщихъ и҆ ѻ҆би́дѧщихъ и҆ лю́бѧщихъ на́съ . пᲂмѧнѝ гдⷭ҇и слꙋжа́щихъ , и҆ пред̾стᲂѧ́щихъ , и҆ ра́ди бл҃гᲂсло́вныхъ ви́нъ ѿше́дшихъ ѻ҆ц҃ъ и҆ бра́тїи на́шихъ , и҆ запᲂвѣ́давшихъ на́мъ недᲂсто́йнымъ ѡ҆ ни́хъ мᲂли́тисѧ . и҆ всѐ правᲂсла́внᲂе хрⷭ҇тїа́нствᲂ в̾ ми́рѣ и҆ в̾ тишинѣ̀ , и҆ вᲂ бл҃гᲂде́нствїи сᲂблюдѝ . пᲂмѧнѝ гдⷭ҇и и҆́хъ и҆ на́съ пᲂ вели́цѣй ми́лᲂсти твᲂе́й , всѧ́кїѧ нꙋ́жды и҆збавлѧ́ѧ . ꙗ҆́кѡ ты̀ є҆сѝ бг҃ъ сп҃съ на́шъ , и҆ тебѣ̀ сла́вꙋ вᲂз̾сыла́емъ , сᲂ без̾нача́льнымъ тѝ ѻ҆ц҃е́мъ , и҆ съ прест҃ы́мъ бл҃ги́мъ и҆ живᲂтвᲂрѧ́щимъ тѝ дх҃ᲂмъ . ны́нѣ и҆ при́снѡ и҆ во́ вѣки вѣко́мъ . кли́рицы же пᲂю́тъ : а҆ми́нь .

І҆єре́й : ми́ръ всѣ́мъ . кли́рицы пᲂю́тъ : и҆ дх҃ᲂви твᲂемꙋ̀ .= дїа́кᲂнъ : главы̀ ва́ша гдⷭ҇ви приклᲂни́те . =кли́рицы пᲂю́тъ : тебѣ̀ гдⷭ҇и .

І҆єре́й гл҃етъ , мл҃твꙋ в̾ та́й . Приклᲂнѝ гдⷭ҇и ᲂу҆́хᲂ твᲂѐ и҆ ᲂу҆слы́ши ны , и҆́же вᲂ і҆ѡрда́нѣ крⷭ҇ти́тисѧ вᲂспрїѧ́тъ , и҆ ѡ҆ст҃и́въ во́ды . бл҃гᲂслᲂвѝ всѣ́хъ на́съ , є҆́же преклᲂне́нїѧ ра́ди свᲂеѧ̀ вы́ѧ , на зна́менꙋющихъ рабо́тныи ви́дъ . и҆ спᲂдо́би на́съ и҆спо́лнитисѧ ѡ҆сщ҃е́нїѧ твᲂегѡ̀ , ра́ди вᲂды̀ сеѧ̀ прича́стїѧ . и҆ бы́ти на́мъ гдⷭ҇и , вᲂ здра́вїе дш҃и́ же и҆ тѣ́лꙋ . вᲂз̾гла́съ . Ꙗ҆́кѡ ты̀ є҆сѝ ѡ҆сщ҃е́нїе на́ше , и҆ тебѣ̀ сла́вꙋ вᲂз̾сыла́емъ , сᲂ без̾нача́льнымъ тѝ ѻ҆ц҃е́мъ , и҆ съ прест҃ы́мъ бл҃ги́мъ и҆ живᲂтвᲂрѧ́щимъ тѝ дх҃ᲂмъ . ны́нѣ и҆ при́снѡ и҆ во́ вѣки вѣко́мъ . ме́дленнѡ пᲂе́мъ : а҆ми́нь .

та́же , прїе́мъ чⷭ҇тны́и крⷭ҇тъ . бл҃гᲂслᲂвлѧ́етъ во́дꙋ крⷭ҇тᲂѻ҆бра́знᲂ , три́жды , низ̾вᲂдѧ̀ крⷭ҇тъ пра́вѣ . гл҃ѧ , трᲂпа́рь сі́и , три́жды . гла́съ , а҃ .

Спасѝ гдⷭ҇и лю́ди свᲂѧ̀ , и҆ бл҃гᲂслᲂвѝ дᲂстᲂѧ́нїе свᲂѐ , пᲂбѣ́ды держа́ве рᲂсси́йстей на сᲂпрᲂти́вныѧ да́рꙋй , и҆ свᲂѧ̀ сᲂхранѧ́ѧ крⷭ҇то́мъ лю́ди . =три́жды . и҆ =прїе́мъ сщ҃е́ннꙋю во́дꙋ , с̾ чⷭ҇тны́мъ крⷭ҇то́мъ на блю́дѣ , и҆ бл҃гᲂꙋха́нныѧ кри́ны , и҆лѝ василькѝ , и҆ крᲂпи́тъ , ѻ҆лта́рь и҆ цр҃квь , и҆ настᲂѧ́телѧ , и҆ про́чїѧ лю́ди .

та́же пᲂе́мъ , трᲂпа́рь . гла́съ , ѕ҃ . Твᲂи́хъ даро́въ дᲂсто́йны сᲂтвᲂрѝ на́съ бцⷣе дв҃ᲂ , презрѧ́ще сᲂгрѣше́нїѧ на́ша , и҆ пᲂдаю́щи и҆сцѣле́нїѧ , и҆́же съ вѣ́рᲂю и҆ любо́вїю прїе́млющимъ бл҃гᲂслᲂве́нїе твᲂѐ пречⷭ҇таѧ . сла́ва . гла́съ , д҃ . И҆сто́чникъ и҆сцѣле́ней , и҆мꙋ́ще ст҃і́и без̾сре́бреницы , и҆сцѣле́нїѧ пᲂдава́ете , всѣ́мъ тре́бꙋющимъ . ꙗ҆́кѡ вели́кимъ даро́мъ спᲂдо́бльшесѧ , ѿ прⷭ҇нᲂтекꙋ́щагѡ и҆сто́чника сп҃са на́шегѡ . рече́ бᲂ к̾ ва́мъ гдⷭ҇ь , ꙗ҆́кѡ є҆динᲂревни́телемъ а҆пⷭ҇льскимъ . сѐ да́хъ ва́мъ вла́сть над̾ дꙋхѝ нечи́стыми . ꙗ҆́кѡ тѣ́хъ и҆згᲂнѧ́ти , и҆ и҆сцѣли́ти всѧ́къ недꙋ́гъ , и҆ всѧ́кꙋ бᲂлѣ́знь . є҆го́же ра́ди , пᲂвелѣ́ньми є҆гѡ̀ до́брѣ пᲂжи́вше , тꙋ́не прїѧ́сте , тꙋ́не и҆ пᲂдава́ете . и҆сцѣлѧ́юще стра́сти , дш҃ъ и҆ тѣле́съ на́шихъ . и҆ ны́нѣ , боⷢ҇ . Ѿ всѧ́кихъ напа́стей сᲂхранѧ́й рабы̀ свᲂѧ̀ , бл҃гᲂслᲂве́наѧ бцⷣе . да сла́вимъ тѧ̀ , ᲂу҆пᲂва́нїе дш҃а́мъ на́шимъ .

пᲂси́хъ трᲂпарѧ́хъ , сᲂтвᲂрѧ́емъ пᲂклᲂне́нїе чⷭ҇тно́мꙋ крⷭ҇тꙋ̀ , по́ чинꙋ , г҃ ѧ нлⷣи , вели́кагᲂ пᲂста̀ . Прихо́дитъ и҆гꙋ́менъ , и҆ і҆єре́й слꙋжа́щїи къ мѣ́стꙋ , и҆дѣ́же чⷭ҇тны́и крⷭ҇тъ , и҆ пᲂклᲂнѧ́ютсѧ , три́жды , чⷭ҇тно́мꙋ крⷭ҇тꙋ̀ , пᲂю́ще тихᲂгла́снѡ .= Крⷭ҇тꙋ̀ твᲂемꙋ̀ пᲂклᲂнѧ́емсѧ влⷣкᲂ , и҆ ст҃о́е вᲂскрⷭ҇нїе твᲂѐ сла́вимъ . =и҆ =ли́кᲂве то́же пᲂю́тъ велегла́снѡ . та́же , цѣлꙋ́ютъ чⷭ҇тны́и крⷭ҇тъ , и҆ пᲂклᲂнѧ́ютсѧ па́ки є҆ди́нᲂю . пᲂю́ще , стихѣ́ры , самᲂгла́сны . гла́съ , в҃ . Прїидѣ́те вѣ́рнїи живᲂтвᲂрѧ́щемꙋ дре́вꙋ пᲂклᲂни́мсѧ , на не́мже хрⷭ҇то́съ цр҃ь сла́вы во́лею рꙋ́цѣ прᲂсте́ръ . вᲂзнесѐ на́съ на пе́рвᲂе блаже́нствᲂ , и҆́хже пе́рвѣе вра́гъ ле́стїю снѣ́днѡ ᲂу҆кра́дъ , и҆з̾гна́ны ѿ́ бг҃а сᲂтвᲂрѝ . прїидѣ́те вѣ́рнїи дре́вꙋ пᲂклᲂни́мсѧ , и҆́мже спᲂдо́бихᲂмсѧ неви́димыхъ вра́гъ сᲂкрꙋши́ти главы̀ . прїидѣ́те всѧ̀ ѻ҆те́чествїѧ ꙗ҆зы́къ , крⷭ҇тъ гдⷭ҇нь пѣ́сньми пᲂчте́мъ . ра́дꙋисѧ крⷭ҇те , па́дшагѡ а҆да́ма сᲂверше́нᲂе и҆збавле́нїе . ѡ҆ тебѣ́ бᲂ вѣ́рнїи хва́лѧтсѧ , ꙗ҆́кѡ твᲂе́ю си́лᲂю и҆зма́ильтескїѧ лю́ди держа́внѡ пᲂкарѧ́ютъ . тебѐ нн҃ѣ со́ страхᲂмъ хрⷭ҇тїа́не цѣлꙋ́юще , и҆ и҆́же на тебѣ̀ пригвᲂзди́вшагᲂсѧ бг҃а сла́вимъ гл҃юще , гдⷭ҇и и҆́же на не́мъ пригвᲂжде́исѧ пᲂми́лꙋй на́съ , ꙗ҆́кѡ бл҃гъ и҆ чл҃кᲂлю́бецъ . =гла́съ , є҃ . Зрѧ́щи тѧ̀ тва́рь всѧ̀ на крⷭ҇тѣ̀ на́га ви́сѧща , твᲂрца̀ и҆ зижди́телѧ всѣ́хъ , и҆змѣнѧ́шесѧ стра́хᲂмъ и҆ рыда́ше . сл҃нце же свѣ́тъ ѡ҆мрачѝ , и҆ землѧ̀ кᲂлеба́шесѧ . ка́менїе же раз̾сѣда́шесѧ , и҆ цр҃ко́внаѧ свѣ́тлᲂсть раз̾дира́шесѧ . ме́ртвїи вᲂста́ша ѿ грѡ́бъ , и҆ а҆́нг҃льскїѧ си́лы ᲂу҆жасо́шасѧ гл҃юще . ѽ чꙋдесѝ сꙋдїѧ̀ сꙋди́мъ быва́етъ , и҆ стра́жетъ хᲂтѧ̀ за спасе́нїе ми́ра и҆ ѡ҆бнᲂвле́нїе . гла́съ , и҃ . Дне́сь влⷣка тва́ри , и҆ гдⷭ҇ь сла́вѣ , на крⷭ҇тѣ̀ пригвᲂжда́етсѧ , и҆ в̾ ре́бра прᲂбᲂда́етсѧ . же́лчь и҆ ѻ҆це́тъ вкꙋша́етъ , сла́дᲂсть цр҃ко́внаѧ . вѣнце́мъ ѿ те́рнїѧ ѡ҆блага́етсѧ , пᲂкрыва́ѧи небеса̀ дᲂбрᲂдѣ́телїю . и҆ багрѧни́цею ѡ҆блага́етсѧ пᲂрꙋга́нїѧ . и҆ заꙋша́етсѧ бре́ннᲂю рꙋко́ю , и҆́же рꙋко́ю , сᲂзда́выи челᲂвѣ́ка . пᲂплеще́ма бїе́нъ быва́етъ , ѡ҆дѣва́ѧи нб҃ᲂ ѻ҆́блаки . заплева́нїѧ и҆ ра́ны прїе́млетъ , нарꙋга́нїѧ и҆ пᲂнᲂше́нїѧ . и҆ всѧ̀ терпи́тъ менѐ ра́ди ѡ҆сꙋжде́ннагѡ , и҆зба́витель мо́й и҆ бг҃ъ , да спасе́тъ ми́ра ѿ пре́лести , ꙗ҆́кѡ милᲂсе́рдъ . сла́ва , и҆ ны́нѣ . гла́съ , то́йже . Дне́сь и҆́же неприкᲂснᲂве́нныи сꙋщество́мъ , прикᲂснᲂве́нъ мнѣ̀ быва́етъ . и҆ стра́ждетъ стрⷭ҇ти , свᲂбᲂжда́ѧ мѧ̀ ѿ страсте́й . и҆́же свѣ́тъ пᲂдава́ѧ слѣпы́мъ , ѿ без̾зако́нныхъ ᲂу҆сте́нъ ѡ҆плева́етсѧ , и҆ дае́тъ плещѝ за плѣне́ныхъ на ра́ны . сегѡ̀ чи́стаѧ дв҃аѧ и҆ мт҃и на крⷭ҇тѣ̀ зрѧ́щи , бᲂлѣ́зненѡ вѣща́ше . ᲂу҆вы̀ мнѣ̀ ча́дᲂ мᲂѐ , что́ се сᲂтвᲂри́лъ є҆сѝ ; краснѣ́йшїи дᲂбро́тᲂю па́че всѣ́хъ чл҃къ , без̾ дыха́нїѧ и҆ без̾ зра́ка ꙗ҆влѧ́ешисѧ , не и҆мѣ́ѧ видѣ́нїѧ ни дᲂбро́ты . ᲂу҆вы̀ мнѣ̀ мо́й свѣ́те , немᲂгꙋ̀ без̾ дыха́нїѧ зрѣ́ти тѧ̀ . ᲂу҆тро́бᲂю ᲂу҆ѧзвлѧ́юсѧ , и҆ лю́тᲂе ѻ҆рꙋ́жїе срⷣце мᲂѐ прᲂхо́дитъ . вᲂспѣва́ю ти стра́сти , и҆ пᲂклᲂнѧ́юсѧ милᲂсе́рдїю твᲂемꙋ̀ . дᲂлгᲂтерпѣли́ве сла́ва тебѣ̀ .

и҆́ны стихѣ́ры . гла́съ , а҃ .

Дне́сь ꙗ҆́кѡ вᲂи́стинꙋ ст҃ᲂвѣща́нныи глаго́лъ дв҃дᲂвъ , кᲂне́цъ прїѧ́тъ . се́бᲂ ꙗ҆́вѣ пречⷭ҇тꙋю но́гꙋ твᲂе́ю пᲂклᲂнѧ́емсѧ пᲂдно́жїю . и҆ въ крилꙋ̀ твᲂе́ю надѣ́ющесѧ сѣ́ни , всеще́дре вᲂпїе́мъ тѝ . да зна́менаетсѧ на на́съ свѣ́тъ лица̀ твᲂегѡ̀ . правᲂсла́вныхъ люде́й твᲂи́хъ ро́гъ вᲂзнесѝ , чⷭ҇тна́гѡ крⷭ҇та̀ твᲂегѡ̀ вᲂз̾дви́женїемъ хрⷭ҇тѐ мнᲂгᲂмлⷭ҇тиве . Насажде́нᲂе на кра́нїевѣ мѣ́стѣ , дре́вᲂ вᲂи́стинꙋ жи́зни , и҆́мже сᲂдѣ́ла спасе́нїе превѣ́чныи цр҃ь пᲂсредѝ землѝ , вᲂз̾двиза́емᲂ дне́сь , ѡ҆сщ҃а́етъ ми́рꙋ кᲂнцы̀ и҆ ѡ҆бнᲂвлѧ́етсѧ вᲂскрⷭ҇нїѧ хра́мъ . ра́дꙋютсѧ а҆́нг҃ли на́ нб҃си , и҆ веселѧ́тсѧ чл҃цы на землѝ , дв҃дски вᲂпїю́ще и҆ гл҃юще , вᲂзнᲂси́те гдⷭ҇а бг҃а на́шегѡ , и҆ пᲂклᲂнѧ́йтесѧ пᲂдно́жїю но́гꙋ є҆гѡ̀ ꙗ҆́кѡ ст҃ᲂ є҆́сть , пᲂдаѧ́и ми́рᲂви ве́лїю млⷭ҇ть . гла́съ , в҃ . Бжⷭ҇твенᲂе сᲂкро́вище в̾ землѝ кры́емᲂ , живᲂда́вца . крⷭ҇тъ на́ нб҃сѣхъ пᲂка́зᲂвашесѧ цр҃ю бл҃гᲂчести́вᲂмꙋ , и҆ пᲂбѣ́ды на врагѝ ѻ҆́бразъ да́въ мы́сленѡ . и҆́мже ра́дꙋѧсѧ вѣ́рᲂю и҆ со́ страхᲂмъ , бжⷭ҇твенᲂ вᲂсте́къ к̾ видѣ́нїѧ высᲂтѣ̀ . тща́нїемъ же сегѡ̀ ѿ землены́хъ нѣ́дръ и҆з̾несѐ , ми́рꙋ на и҆збавле́нїе , и҆ спасе́нїе дш҃а́мъ на́шимъ . Ты́ ми пᲂкро́въ держа́венъ є҆сѝ , трича́стныи крⷭ҇те хрⷭ҇то́въ , ѡ҆ст҃и́ мѧ си́лᲂю свᲂе́ю , да вѣ́рᲂю и҆ лю́бᲂвїю пᲂклᲂнѧ́юсѧ и҆ сла́влю тѧ̀ . гла́съ , г҃ . Хрⷭ҇тѐ бж҃е на́шъ , и҆́же во́льнᲂе распѧ́тїе вᲂ ѻ҆́бщее вᲂскрⷭ҇нїе ро́да чл҃ча прїе́мыи . и҆ тро́стїю крⷭ҇тнᲂю ѡ҆багре́нїи крᲂвны́ми свᲂѧ̀ пе́рсты ѡ҆крᲂвави́въ . ѡ҆ставле́нїе на́мъ цр҃ски написа́ти чл҃кᲂлю́бствᲂвавъ . непре́зри на́съ в̾ бѣдѣ̀ сꙋ́щихъ , и҆ па́ки є҆́же ѿ тебѐ раз̾стᲂѧ́нїе . нᲂ ᲂу҆ще́дри є҆ди́не дᲂлгᲂтерпѣли́ве , сꙋ́щїѧ в̾ напа́сти лю́ди твᲂѧ̀ , и҆ вᲂста́въ пᲂбѣдѝ ра́тꙋющихъ на́съ , ꙗ҆́кѡ всеси́ленъ . гла́съ , ѕ҃ . Прᲂро́честїи гла́си , дре́вᲂ ст҃о́е прᲂвᲂзвѣсти́ша , и҆́мже дре́внїѧ клѧ́твы сме́ртныѧ свᲂбᲂди́сѧ а҆да́мъ . тва́рь же дне́сь вᲂзнᲂша́емꙋ семꙋ̀ сᲂверша́етъ гла́съ , є҆́же ѿ́ бг҃а прᲂсѧ́щи бᲂга́тыѧ млⷭ҇ти . нᲂ є҆ди́ныи в̾ млⷭ҇ти без̾мѣ́рныи влⷣкᲂ , ѡ҆чище́нїе бꙋ́ди на́мъ , и҆ спасѝ дш҃а на́ша . Крⷭ҇те хрⷭ҇то́въ , хрⷭ҇тїа́нѡмъ ᲂу҆пᲂва́нїе . заблꙋ́ждьшимъ наста́вниче . трꙋжа́ющимсѧ тишина̀ . вᲂ бранѣ́хъ пᲂбѣ́да . вселе́ннѣй ᲂу҆тверже́нїе . недꙋ́жнымъ врачꙋ̀ . ме́ртвымъ вᲂскрⷭ҇нїе , пᲂми́лꙋй на́съ . Дне́сь прᲂи҆схо́дитъ крⷭ҇тъ гдⷭ҇нь , и҆ вѣ́рнїи пᲂдъє҆́млютъ тᲂгѡ̀ с̾ любо́вїю , и҆ прїе́млютъ и҆сцѣле́нїѧ дш҃а́мъ и҆ тѣ́лᲂмъ , и҆ всѧ́кїѧ бᲂлѣ́зни . тᲂгѡ̀ цѣлꙋ́емъ ра́дᲂстїю и҆ стра́хᲂмъ . стра́хᲂмъ , грѣха̀ ра́ди , ꙗ҆́кѡ недᲂсто́йни сꙋ́ще . ра́дᲂстїю же спасе́нїѧ ра́ди , є҆́же пᲂдае́тъ ми́рᲂви , и҆́же на не́мъ пригвᲂжде́исѧ хрⷭ҇то́съ гдⷭ҇ь , и҆мѣ́ѧи ве́лїю млⷭ҇ть . сла́ва , и҆ ны́нѣ . гла́съ , и҃ . Гла́съ прⷪ҇рка твᲂегѡ̀ мѡѷсе́ѧ бж҃е , и҆спо́лнисѧ глаго́лющїи , ᲂу҆́зрите живо́тъ ва́шъ ви́сѧщь , пред̾ ѻ҆чи́ма ва́шима . дне́сь крⷭ҇тъ вᲂздвиза́етсѧ , и҆ ми́ръ ѿ́ лести свᲂбᲂжда́етсѧ . дне́сь хрⷭ҇то́вᲂ вᲂскрⷭ҇нїе ѡ҆бнᲂвлѧ́етсѧ , и҆ кᲂнцы̀ землені́и ра́дꙋютсѧ . в̾ кѷмва́лѣхъ дв҃дски , пѣ́нїи тебѣ̀ принᲂсѧ́ще и҆ глаго́люще . сᲂдѣ́ла спасе́нїе пᲂсредѣ̀ землѝ бж҃е , крⷭ҇тъ и҆ вᲂскрⷭ҇нїе . и҆́миже на́съ спа́слъ є҆сѝ бл҃же и҆ чл҃кᲂлю́бче , всеси́льне гдⷭ҇и сла́ва тебѣ̀ .

та́же , є҆ктенїѧ̀ : пᲂми́лꙋй на́съ бж҃е . и҆ и҆спо́лнимъ ᲂу҆́треннїю мл҃твꙋ . и҆ ѿпꙋ́стъ .

ча́съ , а҃ . и҆ кᲂне́чныи ѿпꙋ́стъ .

На часѣ́хъ , трᲂпа́рь , крⷭ҇тꙋ̀ . сла́ва , мч҃нкѡмъ . и҆ нн҃ѣ , боⷢ҇ , часо́въ . Пᲂ трⷭ҇то́мъ , и҆ пᲂ ѻ҆́ч҃е на́шъ , кᲂндакѝ , премѣнѧ́емъ : крⷭ҇тꙋ̀ , и҆ мч҃нкѡмъ .

На литꙋргі́и , бл҃же́нна , на и҃ . ѿ кано́на , крⷭ҇тꙋ̀ , пѣ́снь , г҃ ѧ . и҆ мч҃нкѡмъ , пѣ́снь , ѕ҃ ѧ .

Пᲂ вхо́дѣ , а҆́ще хра́мъ хрⷭ҇то́въ : трᲂпа́рь , крⷭ҇тꙋ̀ , и҆ мч҃нкѡмъ . сла́ва , кᲂнда́къ , мч҃нкѡмъ . и҆ ны́нѣ , крⷭ҇тꙋ̀ .

Пᲂ вхо́дѣ , а҆́ще хра́мъ бцⷣы : трᲂпа́рь , крⷭ҇тꙋ̀ , и҆ хра́мꙋ , и҆ мч҃нкѡмъ . кᲂнда́къ , крⷭ҇тꙋ̀ . сла́ва , мч҃нкѡмъ . и҆ ны́нѣ , хра́мꙋ .

Пᲂ вхо́дѣ , а҆́ще ли хра́мъ ст҃ы́мъ : трᲂпа́рь , крⷭ҇тꙋ̀ , и҆ хра́мꙋ , и҆ мч҃нкѡмъ . кᲂнда́къ , хра́мꙋ . сла́ва , мч҃нкѡмъ . и҆ ны́нѣ , крⷭ҇тꙋ̀ .

прᲂки́менъ , ѱл҃о́мъ дв҃дᲂвъ . Спасѝ гдⷭ҇и лю́ди свᲂѧ̀ , и҆ бл҃гᲂслᲂвѝ дᲂстᲂѧ́нїе свᲂѐ . сти́хъ . къ тебѣ̀ гдⷭ҇и вᲂз̾зᲂвꙋ̀ , бж҃е мо́й непремᲂлчѝ ѿ менѐ . дрꙋгі́и , мч҃нкѡмъ . Ст҃ы́мъ и҆́же сꙋ́ть на землѝ є҆гѡ̀ , ᲂу҆дивѝ гдⷭ҇ь всѧ̀ во́лѧ свᲂѧ̀ в̾ни́хъ . а҆пⷭ҇лъ , крⷭ҇тꙋ̀ , к̾ кᲂри́нѳѡмъ . заⷱ҇ , рк҃є . и҆ мч҃нкѡмъ , к̾ є҆вре́ѡмъ . заⷱ҇ , т҃л .= а҆ллилꙋ́їѧ . Пᲂмѧнѝ со́нмъ тво́й , и҆́же стѧжа̀ и҆спе́рва . =сти́хъ . бг҃ъ же цр҃ь на́шъ пре́жде вѣ́къ , сᲂдѣ́ла спасе́нїе пᲂсредѣ̀ землѝ . и҆ мч҃нкѡмъ . Вᲂзва́ша пра́веднїи и҆ гдⷭ҇ь ᲂу҆слы́ша и҆́хъ , и҆ ѿ всѣ́хъ печа́лей и҆́хъ и҆зба́ви и҆́хъ . є҆ѵⷢ҇а́лїе , крⷭ҇тꙋ̀ , ѿ і҆ѡа́нна . заⷱ҇ , ѯ҃ . и҆ мч҃нкѡмъ , ѿ матѳе́ѧ . заⷱ҇ , л҃и . прича́стенъ , зна́менасѧ на на́съ свѣ́тъ лица̀ твᲂегѡ̀ гдⷭ҇и . дрꙋгі́и , ра́дꙋйтесѧ пра́веднїи ѡ҆́ гдⷭ҇ѣ .

Рѧ́дъ же вычита́емъ напре́дь , и҆лѝ пᲂд̾ зача́лᲂ .

А҆́ще хра́мъ всемлⷭ҇тивагѡ сп҃са . =Вече́ръ . блаже́нъ мꙋ́жь , а҃ , а҆нтифо́нъ . На гдⷭ҇и вᲂзва́хъ , стⷯры , пра́здникꙋ , д҃ . и҆ стихѣ́ры , крⷭ҇тꙋ̀ , д҃ . стихѣ́ры , всемлⷭ҇тивᲂмꙋ сп҃сꙋ . гла́съ , д҃ . поⷣ . да́лъ є҆сѝ зна́менїе . Гра́дъ тво́й пресвѣ́тлѡ чте́мъ ,꙳ всемлⷭ҇тиве гдⷭ҇и ,꙳ пра́зднествᲂ твᲂѐ ве́селᲂ тᲂржествꙋ́юще .꙳ ты̀ ᲂу҆́бѡ а҆пⷭ҇льскимъ лико́мъ ᲂу҆ча́ ны бжⷭ҇твенᲂ ,꙳ мы́ же со́ страхᲂмъ и҆ ра́дᲂстїю зрѧ́ще к̾ тебѣ̀ ,꙳ про́симъ неи҆з̾гл҃анныѧ пи́щи .꙳ ты́ бᲂ са́мъ живо́тнᲂе пита́нїе ,꙳ сше́дыи съ нб҃сѐ ,꙳ і҆с҃е всеси́льне ,꙳ сп҃се дш҃а́мъ на́шимъ . =вⷤ . Ѻ҆те́ческихъ не ѡ҆ста́вль нѣ́дръ ,꙳ ꙗ҆́кѡ всемлⷭ҇тивъ сᲂ ᲂу҆ченикѝ вᲂдвᲂрѧ́ѧсѧ .꙳ ты́ бᲂ є҆сѝ живо́тныи хлѣ́бъ ,꙳ ѿ него́ же ми́ръ причаща́етсѧ ,꙳ и҆ пребыва́етъ на́мъ пи́ща не ѡ҆скꙋдѣва́ема .꙳ причаще́нїемъ же ѡ҆живлѧ́етъ ,꙳ на нетлѣ́нїе чл҃чествᲂ ,꙳ сме́ртныѧ и҆змѣни́въ ѕло́бы .꙳ і҆с҃е всеми́лᲂстиве ,꙳ сп҃се дш҃а́мъ на́шимъ . Хва́лимъ твᲂѐ пра́зднествᲂ вѣ́рнїи ,꙳ всемлⷭ҇тиве хрⷭ҇тѐ ,꙳ ꙗ҆́кѡ ѿ ѻ҆ц҃а прїи́де спасти́ ны .꙳ тѣ́мже пᲂе́мъ тѧ пѣ́сньми бл҃гᲂда́рными ,꙳ ꙗ҆́кѡ ты̀ ѡ҆бнажѝ на́мъ бг҃ᲂлѣ́пнᲂ , бжⷭ҇твенꙋю твᲂю̀ си́лꙋ ,꙳ пресла́внѡ чꙋ́дᲂ твᲂрѧ̀ ,꙳ на спасе́нїе на́мъ бл҃гᲂтвᲂрѧ́щимъ .꙳ тѣ́мже сла́вимъ млрⷭ҇де смᲂтре́нїе твᲂѐ ,꙳ і҆с҃е всемᲂгі́и ,꙳ сп҃се дш҃а́мъ на́шимъ .

и҆́ны стихѣ́ры , крⷭ҇тꙋ̀ . гла́съ , то́йже . поⷣ . и҆́же зва́нныи свы́ше .= Дне́сь ра́дꙋетсѧ вѣ́рныхъ мно́жествᲂ бжⷭ҇твенᲂе ,꙳ ꙗ҆ви́бᲂсѧ нбⷭ҇ныи крⷭ҇тъ кᲂнце́мъ .꙳ сїѧ́етъ же вᲂздꙋ́хъ свѣ́тъ непристꙋ́пенъ .꙳ а҆є҆́ръ зарю̀ и҆спꙋща́етъ ,꙳ и҆ землѧ̀ лицѐ ᲂу҆краша́етъ .꙳ пᲂе́тъ бжⷭ҇твеными пѣ́сньми цр҃кви хрⷭ҇то́ва ,꙳ слꙋ́житъ пᲂчита́ющи , свы́ше ю҆̀ сᲂблюда́ющагѡ .꙳ крⷭ҇та̀ бжⷭ҇твенагѡ и҆ пречꙋ́днагѡ .꙳ є҆го́же си́лᲂю ᲂу҆крѣплѧ́еми ,꙳ влⷣцѣ пристꙋ́пимъ зᲂвꙋ́ще ,꙳ ᲂу҆мирѝ ми́ра и҆ спасѝ дш҃а на́ша . =двⷤа . Да ра́дꙋетсѧ тва́рь и҆ и҆гра́етъ .꙳ дне́сь бᲂ ѡ҆блиста̀ крⷭ҇тъ въ кᲂнцѣ́хъ съ нб҃сѐ ,꙳ землена́ѧ прᲂсвѣща́ѧ , и҆ сᲂвᲂкꙋ́плена пᲂказа̀ растᲂче́ныѧ .꙳ дне́сь ликꙋ́ютъ съ ли́ки а҆́нг҃льскими чл҃цы .꙳ и҆́бᲂ бранѧ́щее средᲂгра́дїе ,꙳ крⷭ҇то́мъ разᲂре́нᲂ ,꙳ вᲂ є҆ди́нᲂ всѧ̀ ꙗ҆́вѣ сᲂвᲂкꙋпѝ .꙳ тѣ́мже пред̾сїѧ́ѧ па́че сл҃нца ,꙳ всю̀ тва́рь бл҃гᲂда́тїю ,꙳ ᲂу҆ѧснѧ́етъ и҆ спаса́етъ ,꙳ вѣ́рнѡ тᲂго̀ чтꙋ́щїѧ . Па́че сл҃нечныѧ зарѝ ,꙳ хᲂтѧ́и ми́рᲂви ски́петрᲂ ,꙳ ꙗ҆́кᲂже че́стнᲂ цр҃ѧ хрⷭ҇та̀ ,꙳ и҆ кᲂнчи́нꙋ пᲂказа́ти ,꙳ крⷭ҇тъ бжⷭ҇твеныи с̾ пред̾сїѧ́етъ ꙗ҆́снѡ в̾ кᲂнцѣ́хъ .꙳ сі́и вᲂз̾ведѐ и҆з̾ а҆́да ро́дъ челᲂвѣ́чь .꙳ а҆́да вельмѝ плѣни́въ ,꙳ врага̀ низ̾лᲂжи́въ ,꙳ бѣсѡ́мъ гᲂрды́ню дᲂ кᲂнца̀ пᲂгꙋбѝ .꙳ ны́нѣ же прᲂѧвлѧ́етъ вᲂскрⷭ҇нїе сп҃сᲂвᲂ ,꙳ и҆ спаса́етъ зᲂвꙋ́щїѧ ,꙳ ᲂу҆мирѝ ми́ра и҆ прᲂсвѣтѝ дш҃а на́ша . сла́ва . гла́съ , то́йже . Живᲂнача́льныи и҆сто́чникъ , всемлⷭ҇тивыи хрⷭ҇то́съ сп҃съ на́шъ , и҆́же ѿ дв҃ческїѧ твᲂеѧ̀ рᲂди́всѧ ᲂу҆тро́бы пло́тьски , цр҃кᲂвь и҆ две́рь нбⷭ҇нꙋю пᲂказа̀ , тебѐ хва́лѧщимъ . ты́же непреста́й мᲂлѧ́щисѧ к̾ немꙋ̀ , ѡ҆ пᲂю́щихъ и҆ хва́лѧщихъ тѧ̀ , мл҃твами сѝ и҆ млⷭ҇тїю ᲂу҆твержа́ющи црⷭ҇твїе . и҆ нн҃ѣ . гла́съ , и҃ . Є҆го́же дре́вле мѡѷсе́й прᲂѡ҆брази́въ сᲂбо́ю , а҆мали́ка низ̾лᲂжи́въ пᲂбѣдѝ . и҆ дв҃дъ пѣве́цъ , пᲂд̾но́жїю твᲂемꙋ̀ вᲂпїѧ̀ кла́нѧтисѧ пᲂвелѣва́ше . чⷭ҇тно́мꙋ крⷭ҇тꙋ̀ твᲂемꙋ̀ хрⷭ҇тѐ бж҃е , дне́сь грѣ́шнїи кла́нѧемсѧ . ᲂу҆стна́ми недᲂсто́йными , тѧ̀ и҆з̾во́лившагᲂ пригвᲂзди́тисѧ на не́мъ , вᲂспѣва́юще мо́лимсѧ . гдⷭ҇и , с̾ разбо́йникᲂмъ црⷭ҇твїю твᲂемꙋ̀ спᲂдо́би на́съ .

та́же , вы́хᲂдъ . прᲂки́менъ , дню̀ .

Ѿ= при́тчей , чте́нїе .=

Сн҃е , непренемᲂга́й в̾ наказа́нїи гдⷭ҇ни , и҆ не ѡ҆слабѣ́й ѿ негѡ̀ ѡ҆блича́емь . є҆го́же бᲂ лю́битъ гдⷭ҇ь наказꙋ́етъ , и҆ бїе́тъ всѧ́кагᲂ сн҃а ѻ҆ц҃ъ , є҆го́же прїе́млетъ . бл҃же́нъ чл҃къ , и҆́же ѡ҆брѣ́те премꙋ́дрᲂсть , и҆ сме́ртенъ и҆́же ᲂу҆вѣ́дѣ ра́зꙋмъ . лꙋ́чше бᲂ тꙋ̀ кꙋпᲂва́ти , не́жели зла́та и҆лѝ сребра̀ сᲂкро́вища . дража́йши же є҆́сть ка́менїѧ мнᲂгᲂцѣ́ннагᲂ . непрᲂти́витсѧ є҆́й ничто́же лꙋка́вᲂ . бл҃гᲂразꙋ́мна є҆́сть всѣ́мъ лю́бѧщимъ ю҆̀ . все́ же чⷭ҇тно́е недᲂсто́йнᲂ є҆́сть є҆́й . дᲂлгᲂта́ бᲂ житїю̀ , и҆ лѣ́та жи́зни в̾ десни́цѣ є҆ѧ̀ , и҆ в̾ шꙋ́йцѣ є҆ѧ̀ бᲂга́тьствᲂ и҆ сла́ва . ѿ ᲂу҆́стъ є҆ѧ̀ и҆схо́дитъ пра́вда , зако́нъ же и҆ ми́лᲂсть на ꙗ҆зы́цѣ но́ситъ . пꙋтїѐ є҆ѧ̀ , пꙋтїѐ дᲂбры̀ , и҆ всѧ̀ стезѝ є҆ѧ̀ ми́рны . дре́вᲂ живᲂта̀ є҆́сть всѣ́мъ держа́щимсѧ є҆ѧ̀ , и҆ вᲂсклᲂнѧ́ющимсѧ на ню̀ , ꙗ҆́кѡ на́ гдⷭ҇а тве́рда .

Ѿ= прᲂро́чества и҆са́їина , чте́нїе .=

Та́кѡ гл҃етъ гдⷭ҇ь , ѿве́рзꙋтсѧ врата̀ твᲂѧ̀ і҆єрⷭ҇ли́ме вы́нꙋ де́нь и҆ но́щь , и҆ незатвᲂрѧ́тсѧ , ввестѝ к̾ тебѣ̀ си́лꙋ ꙗ҆зы́къ , и҆ царѝ и҆́хъ ведо́мы . ꙗ҆зы́цы бᲂ и҆ цр҃їе , и҆́же тебѣ̀ непᲂрабо́таютъ , пᲂги́бнꙋтъ , и҆ ꙗ҆зы́цы запꙋстѣ́нїемъ запꙋстѣ́ютъ . и҆ сла́ва лива́нᲂва к̾ тебѣ̀ прїи́детъ , кѷпари́сᲂмъ и҆ пе́ѵгᲂмъ и҆ ке́дрᲂмъ , вкꙋ́пѣ прᲂсла́вити мѣ́стᲂ ст҃о́е мᲂѐ , и҆ мѣ́стᲂ но́гꙋ мᲂе́ю прᲂсла́влю . и҆ по́йдꙋтъ к̾ тебѣ̀ бᲂѧ́щесѧ сы́нᲂве смири́вшихъ тѧ , и҆ прᲂгнѣ́вавшихъ тѧ . и҆ пᲂкло́нѧтсѧ стᲂпа́мъ но́гꙋ твᲂе́ю всѝ прᲂгнѣ́вавшїи тѧ̀ . и҆ нарече́шисѧ гра́дъ гдⷭ҇нь , сїѡ́нъ ст҃а́гѡ і҆и҃лева . за є҆́же бы́ти тѝ ѡ҆ста́вленꙋ и҆ вᲂзненави́дѣнꙋ , и҆ небѣ̀ пᲂмᲂга́ющагᲂ ти , и҆ пᲂлᲂжꙋ́ тѧ в̾ ра́дᲂсть вѣ́чнꙋю , и҆ весе́лїе рᲂдо́мъ рᲂдо́въ . и҆ пᲂссе́ши млеко̀ ꙗ҆зы́кѡмъ , и҆ бᲂга́тьствᲂ царе́й снѣ́си , и҆ разꙋмѣ́еши , ꙗ҆́кѡ а҆́зъ гдⷭ҇ь спаса́ѧи тѧ , и҆ и҆збавлѧ́ѧи тѧ бг҃ъ ст҃ы́и і҆и҃левъ .

Ѿ= при́тчей , чте́нїе .=

Премꙋ́дрᲂсть сᲂзда̀ себѣ̀ хра́мъ , и҆ ᲂу҆твердѝ сто́лпъ се́дмь . закла̀ свᲂѧ̀ же́ртвеннаѧ , и҆ черпа̀ в̾ ча́ши свᲂе́й вино̀ . и҆ ᲂу҆гᲂто́ва свᲂю̀ трапе́зꙋ , пᲂсла̀ свᲂѧ̀ рабы̀ , сᲂзыва́ющи с̾ высо́кимъ прᲂпᲂвѣ́данїемъ на ча́шꙋ , гл҃ющи , и҆́же є҆́сть безꙋ́менъ , да ᲂу҆клᲂни́тсѧ кᲂ мнѣ̀ . и҆ тре́бꙋющимъ ᲂу҆ма̀ речѐ , прїиди́те и҆ ꙗ҆ди́те мо́й хлѣ́бъ , и҆ пі́йте вино̀ , є҆́же черпа́хъ ва́мъ . ѡ҆ста́вите безꙋ́мїе , и҆ жи́ви бꙋ́дете . взыщи́те премꙋ́дрᲂсть , да пᲂживетѐ , и҆ и҆спра́вите в̾ вѣ́дѣнїи ра́зꙋмъ . кажа́и ѕлы́ѧ , прїе́млетъ себѣ̀ без̾че́стїе . ѡ҆блича́ѧй же нечести́вагᲂ пᲂрече́тъ себѐ . ѡ҆бличе́нїе бᲂ нечести́вᲂмꙋ мᲂзо́лїе є҆мꙋ̀ є҆́сть . не ѡ҆блича́й ѕлы́хъ , да не вᲂз̾ненави́дѧтъ тебѐ . ѡ҆блича́й премꙋ́дра , и҆ вᲂзлю́битъ тѧ . да́й премꙋ́дрᲂмꙋ винꙋ̀ , и҆ премꙋ́дрѣе бꙋ́детъ . сказꙋ́й првⷣнᲂмꙋ , и҆ прилᲂжи́тъ прїима́ти . зача́лᲂ премꙋ́дрᲂсти , стра́хъ гдⷭ҇нь . и҆ свѣ́тъ ст҃ы́хъ , ра́зꙋмъ . а҆ є҆́же разꙋмѣ́ти зако́нъ , по́мысла є҆́сть бл҃га . си́мъ бᲂ ѻ҆́бразᲂмъ мно́гѡ пᲂживе́ши лѣ́тъ , и҆ прилᲂжа́ттисѧ лѣ́та живᲂтꙋ̀ .

На литі́и , стихѣ́ры . гла́съ , а҃ . Дне́сь ꙗ҆́кѡ вᲂи́стинꙋ ст҃ᲂвѣща́нныи глаго́лъ дв҃дᲂвъ , кᲂне́цъ прїѧ́тъ . се́бᲂ ꙗ҆́вѣ пречⷭ҇тꙋю но́гꙋ твᲂе́ю пᲂклᲂнѧ́емсѧ пᲂдно́жїю . и҆ въ крилꙋ̀ твᲂе́ю надѣ́ющесѧ сѣ́ни , всеще́дре вᲂпїе́мъ тѝ . да зна́менаетсѧ на на́съ свѣ́тъ лица̀ твᲂегѡ̀ . правᲂсла́вныхъ люде́й твᲂи́хъ ро́гъ вᲂзнесѝ , чⷭ҇тна́гѡ крⷭ҇та̀ твᲂегѡ̀ вᲂз̾дви́женїемъ хрⷭ҇тѐ мнᲂгᲂмлⷭ҇тиве . Насажде́нᲂе на кра́нїевѣ мѣ́стѣ , дре́вᲂ вᲂи́стинꙋ жи́зни , и҆́мже сᲂдѣ́ла спасе́нїе превѣ́чныи цр҃ь пᲂсредѝ землѝ , вᲂз̾двиза́емᲂ дне́сь , ѡ҆сщ҃а́етъ ми́рꙋ кᲂнцы̀ и҆ ѡ҆бнᲂвлѧ́етсѧ вᲂскрⷭ҇нїѧ хра́мъ . ра́дꙋютсѧ а҆́нг҃ли на́ нб҃си , и҆ веселѧ́тсѧ чл҃цы на землѝ , дв҃дски вᲂпїю́ще и҆ гл҃юще , вᲂзнᲂси́те гдⷭ҇а бг҃а на́шегѡ , и҆ пᲂклᲂнѧ́йтесѧ пᲂдно́жїю но́гꙋ є҆гѡ̀ ꙗ҆́кѡ ст҃ᲂ є҆́сть , пᲂдаѧ́и ми́рᲂви ве́лїю млⷭ҇ть . Прᲂѡ҆бразꙋ́ѧ крⷭ҇тъ тво́й хрⷭ҇тѐ , патрїа́рхъ і҆а́кѡвъ , внꙋ́кѡмъ бл҃гᲂслᲂве́нїе да́рꙋѧ , на глава́хъ премѣне́ны рꙋ́цѣ сᲂтвᲂрѝ . є҆го́же мы̀ сп҃се дне́сь вᲂзнᲂсѧ́ще взыва́емъ , да́рꙋй хрⷭ҇тᲂлюби́вымъ лю́демъ пᲂбѣ́ды , ꙗ҆́кѡ кᲂнстанти́нꙋ ѡ҆дᲂлѣ́нїе .

сла́ва , и҆ ны́нѣ . гла́съ , є҃ . Зрѧ́щи тѧ̀ тва́рь всѧ̀ на крⷭ҇тѣ̀ на́га ви́сѧща , твᲂрца̀ и҆ зижди́телѧ всѣ́хъ , и҆змѣнѧ́шесѧ стра́хᲂмъ и҆ рыда́ше . сл҃нце же свѣ́тъ ѡ҆мрачѝ , и҆ землѧ̀ кᲂлеба́шесѧ . ка́менїе же раз̾сѣда́шесѧ , и҆ цр҃ко́внаѧ свѣ́тлᲂсть раз̾дира́шесѧ . ме́ртвїи вᲂста́ша ѿ гро́бъ , и҆ а҆́нг҃льскїѧ си́лы ᲂу҆жасо́шасѧ гл҃юще . ѽ чꙋдесѝ сꙋдїѧ̀ сꙋди́мъ быва́етъ , и҆ стра́жетъ хᲂтѧ̀ за спасе́нїе ми́ра и҆ ѡ҆бнᲂвле́нїе .

На стихо́внѣ , стихѣ́ры . гла́съ , є҃ . поⷣ . ра́дꙋисѧ .= Р=а́дꙋисѧ живᲂно́сныи крⷭ҇те , бл҃гᲂвѣ́рїѧ непᲂбѣди́маѧ пᲂбѣ́да , две́ре ра́йскаѧ , вѣ́рнымъ ᲂу҆тверже́нїе , цр҃ко́внᲂе ѡ҆гражде́нїе . и҆́мже тлѧ̀ разᲂри́сѧ и҆ ᲂу҆праздни́сѧ , и҆ пᲂпра́сѧ сме́ртнаѧ держа́ва , и҆ вᲂзнесо́хᲂмсѧ ѿ землѝ к̾ нбⷭ҇нымъ . ѻ҆рꙋ́жїе непᲂбѣди́мᲂе , бѣсо́мъ сᲂпрᲂти́вниче . сла́ва мꙋ́ченикѡмъ , и҆ прпⷣбнымъ ꙗ҆́кѡ вᲂи́стинꙋ ᲂу҆краше́нїе . приста́нище спасе́нїѧ , пᲂдаѧ́и ми́рᲂви ве́лїю млⷭ҇ть .

сти́хъ : вᲂз̾нᲂси́те гдⷭ҇а бг҃а на́шегѡ ,꙳ и҆ кланѧ́йтесѧ пᲂд̾но́жїю но́гꙋ є҆гѡ̀ ꙗ҆́кѡ ст҃ᲂ є҆́сть . Ра́дꙋйсѧ гдⷭ҇нь крⷭ҇те , и҆́мже разрѣши́сѧ ѿ клѧ́твы чл҃чествᲂ . сꙋ́щїѧ ра́дᲂсти зна́менїе , прᲂгᲂнѧ́ѧ врагѝ свᲂи́мъ вᲂзнесе́нїемъ прече́стне . на́мъ пᲂмо́щниче , крѣ́пᲂсть пра́веднымъ . сщ҃е́нникѡмъ бл҃гᲂлѣ́пїе . и҆́мже зна́менꙋющесѧ , лю́тыхъ и҆збавлѧ́емсѧ . же́ѕлъ си́лы , и҆́мже спасе́мсѧ . ѻ҆рꙋ́жїе ми́рꙋ , є҆го́же со́ страхᲂмъ ѡ҆бстᲂѧ́тъ а҆́нг҃ли . хрⷭ҇то́ва бжⷭ҇твенаѧ сла́ва , пᲂдаю́щаѧ ми́рᲂви ве́лїю млⷭ҇ть .

сти́хъ : бг҃ъ же цр҃ь на́шъ пре́жде вѣ́къ ,꙳ сᲂдѣ́ла спасе́нїе пᲂсредѣ̀ землѝ . Ра́дꙋисѧ слѣпы́мъ вᲂждꙋ̀ . немᲂщны́мъ врачꙋ̀ . и҆ вᲂскрⷭ҇нїе всѣ́мъ ᲂу҆ме́ршимъ . вᲂз̾дви́гнꙋвыи на́съ вᲂ тлю̀ па́дшихъ , крⷭ҇те всечестны́и . и҆́мже разᲂри́сѧ клѧ́тва , и҆ прᲂцвѣтѐ нетлѣ́нїе , и҆ землені́и ѡ҆бᲂже́ни бы́хᲂмъ , и҆ дїа́вᲂлъ ѿ ню́дъ низ̾лᲂже́нъ бы́сть . дне́сь вᲂз̾двиза́ема рꙋка́ма тѧ̀ ви́дѧще ст҃льскима . вᲂз̾но́симъ вᲂз̾не́сшагᲂсѧ пᲂсредѣ̀ тебѐ . и҆ тебѣ̀ пᲂклᲂнѧ́емсѧ , пᲂчерпа́юще бᲂга́тнѡ ве́лїю ми́лᲂсть .

сла́ва . гла́съ , д҃ . Ѻ҆те́ческихъ не ѡ҆ста́вль нѣ́дръ , ꙗ҆́кѡ всемлⷭ҇тивъ сᲂ ᲂу҆ченикѝ вᲂдвᲂрѧ́ѧсѧ . ты́ бᲂ є҆сѝ живо́тныи хлѣ́бъ , ѿ него́ же ми́ръ причаща́етсѧ , и҆ пребыва́етъ на́мъ пи́ща не ѡ҆скꙋдѣва́ема . причаще́нїемъ же ѡ҆живлѧ́етъ , на нетлѣ́нїе чл҃чествᲂ , сме́ртныѧ и҆змѣни́въ ѕло́бы . і҆с҃е всемлⷭ҇тиве , сп҃се дш҃а́мъ на́шимъ .

и҆ ны́нѣ . гла́съ , и҃ . Гла́съ пррⷪ҇ка твᲂегѡ̀ мѡѷсе́ѧ бж҃е , и҆спо́лнисѧ глаго́лющїи , ᲂу҆́зрите живо́тъ ва́шъ ви́сѧщь , пред̾ ѻ҆чи́ма ва́шима . дне́сь крⷭ҇тъ вᲂздвиза́етсѧ , и҆ ми́ръ ѿ́ лести свᲂбᲂжда́етсѧ . дне́сь хрⷭ҇то́вᲂ вᲂскрⷭ҇нїе ѡ҆бнᲂвлѧ́етсѧ , и҆ кᲂнцы̀ землені́и ра́дꙋютсѧ . в̾ кѷмва́лѣхъ дв҃дски , пѣ́нїи тебѣ̀ принᲂсѧ́ще и҆ гл҃юще . сᲂдѣ́ла спасе́нїе пᲂсредѣ̀ землѝ бж҃е , крⷭ҇тъ и҆ вᲂскрⷭ҇нїе . и҆́миже на́съ спа́слъ є҆сѝ бл҃же и҆ чл҃кᲂлю́бче , всеси́льне гдⷭ҇и сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , и҃ . Свы́шнихъ призира́ѧ , ᲂу҆бо́гїѧ прїе́млѧ , пᲂсѣтѝ на́съ ѡ҆ѕло́бленныѧ грѣхѝ , влⷣкᲂ всемлⷭ҇тиве . мл҃твами бцⷣы , да́рꙋй дш҃а́мъ на́шимъ ве́лїю млⷭ҇ть . сла́ва , и҆ ны́нѣ , крⷭ҇тꙋ̀ . гла́съ , а҃ . Спасѝ гдⷭ҇и лю́ди свᲂѧ̀ , и҆ бл҃гᲂслᲂвѝ дᲂстᲂѧ́нїе свᲂѐ , пᲂбѣ́ды держа́ве рᲂсси́йстей на сᲂпрᲂти́вныѧ да́рꙋй , и҆ свᲂѧ̀ сᲂхранѧ́ѧ крⷭ҇то́мъ лю́ди .

На ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , двⷤа . сла́ва , и҆ ны́нѣ , крⷭ҇тꙋ̀ . =Пᲂ а҃ , стихᲂло́гїи , сѣда́ленъ . гла́съ , ѕ҃ . То́кмѡ вᲂдрꙋзи́сѧ дре́вᲂ хрⷭ҇тѐ крⷭ҇та̀ твᲂегѡ̀ , ѡ҆снᲂва́нїѧ пᲂдвиза́шасѧ сме́рти гдⷭ҇и . є҆го́же бᲂ пᲂжрѐ любо́вїю а҆́дъ , ѿпꙋстѝ трепе́ща . ꙗ҆ви́лъ є҆сѝ на́мъ спасе́нїе твᲂѐ ст҃ы́и , и҆ славᲂсло́вимъ тѧ̀ сн҃е бж҃їи , пᲂми́лꙋй на́съ . =сла́ва , и҆ ны́нѣ , то́йже .

Пᲂ в҃ , стихᲂло́гїи , сѣда́ленъ . гла́съ , ѕ҃ . Дне́сь прᲂро́ческᲂе и҆спо́лнисѧ сло́вᲂ . се́бᲂ пᲂклᲂнѧ́емсѧ на мѣ́стѣ , и҆дѣ́же стᲂѧ́стѣ но́зѣ твᲂѝ гдⷭ҇и . и҆ дре́вᲂ спасе́нїѧ прїе́мше , грѣхо́вныхъ стрⷭ҇те́й свᲂбо́дꙋ пᲂлꙋчи́хᲂмъ , мл҃твами бцⷣы , є҆ди́не чл҃кᲂлю́бче . сла́ва , и҆ ны́нѣ , то́йже .

Велича́нїе : Велича́емъ тѧ живᲂда́вче хрⷭ҇тѐ , и҆ чте́мъ крⷭ҇тъ тво́й ст҃ы́и , и҆́мже на́съ спа́слъ є҆сѝ ѿ рабо́ты вра́жїѧ . ѱл҃о́мъ и҆збра́нныи : Сꙋдѝ гдⷭ҇и ѡ҆би́дѧщимъ мѧ .

Пᲂ пᲂлїєлеѡ́сѣ , сѣда́ленъ . гла́съ , и҃ . Въ раи́ мѧ пре́жде дре́вᲂ ѡ҆бнажѝ , ѡ҆ вкꙋше́нїи вра́гъ принᲂсѧ̀ ме́ртвᲂсть . крⷭ҇тнᲂе же дре́вᲂ , живᲂта̀ ѡ҆дѣѧ́нїе чл҃кѡмъ нᲂсѧ̀ , вᲂдрꙋзи́сѧ на землѝ , и҆ ми́ръ ве́сь и҆спо́лнисѧ ра́дᲂсти всѧ́кїѧ . є҆го́же зрѧ́ще вᲂз̾нᲂси́ма , бг҃ꙋ вѣ́рᲂю лю́дїе сᲂгла́снѡ вᲂзᲂпїе́мъ , и҆спо́лнь сла́вы до́мъ тво́й . сла́ва , и҆ ны́нѣ , то́йже .

степе́нна , д҃ гᲂ гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . Ви́дѣша всѝ кᲂнцы̀ землѝ спасе́нїе бг҃а на́шегѡ . сти́хъ . вᲂспо́йте гдⷭ҇еви пѣ́снь но́вꙋ , ꙗ҆́кѡ ди́вна сᲂтвᲂрѝ гдⷭ҇ь . всѧ́кᲂ дыха́нїе . є҆ѵⷢ҇а́лїе , ѿ =і҆ѡа́нна . заⷱ҇ , м҃в , ѿ пᲂлꙋ̀ . ѱало́мъ , н҃ . =сла́ва . мл҃твъ ра́ди а҆пⷭ҇лъ , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

Пᲂми́лꙋй мѧ бж҃е пᲂ вели́цѣй млⷭ҇ти твᲂе́й пᲂ мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , ѕ҃ . Крⷭ҇те хрⷭ҇то́въ , хрⷭ҇тїа́нѡмъ ᲂу҆пᲂва́нїе , заблꙋ́ждьшимъ наста́вниче , пла́вающимъ приста́нище , вᲂ бранѣ́хъ пᲂбѣ́да , вселе́ннѣй ᲂу҆тверже́нїе , недꙋ́гꙋющимъ врачꙋ̀ , ме́ртвымъ вᲂскрⷭ҇нїе , пᲂми́лꙋй на́съ .

Кано́нъ , пра́здникꙋ , сᲂ і҆рмᲂсо́мъ , на́ и҃ .= і҆рмо́съ пᲂ два́жды . трᲂпарѝ , на́ ѕ҃ . и҆ =крⷭ҇тꙋ̀ , на́ ѕ҃ .

Кано́нъ , всемлⷭ҇тивᲂмꙋ сп҃сꙋ . гла́съ , и҃ . пѣ́снь , а҃ . і҆рмо́съ . Мо́ре ѡ҆гꙋсти́лъ є҆сѝ , пᲂгрꙋзи́выи сᲂ ѻ҆рꙋ́жїемъ , го́рдагѡ фараѡ́на . и҆ лю́ди спасѐ ѿ рабо́ты , и҆ введѐ и҆́хъ в̾ го́рꙋ ст҃ы́ни вᲂпїю́ща , пᲂе́мъ тебѣ̀ бг҃ꙋ на́шемꙋ пѣ́снь пᲂбѣ́днꙋю , ꙗ҆́кѡ прᲂсла́висѧ .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Грѧди́те вѣ́рнїи , хвала́ми и҆ пѣ́сньми свѣтᲂно́снꙋю цр҃кᲂвь ᲂу҆бл҃жа́юще , бл҃гᲂче́стїѧ держа́телемъ прᲂсїѧ́вшꙋ . в̾ не́й же всемлⷭ҇тивагᲂ хрⷭ҇та̀ бг҃а на́шегѡ , да прᲂсла́вимъ вᲂпїю́ще , пᲂе́мъ тебѐ бг҃ꙋ на́шемꙋ , ꙗ҆́кѡ прᲂсла́висѧ . Оу҆́мъ да вᲂзвыша́етсѧ , всѣ́хъ вѣ́рныхъ къ нб҃сѝ , вы́спрь сѣдѧ́щемꙋ , в̾ пребжⷭ҇твенѣй є҆гѡ̀ цр҃кви . и҆ ликᲂствꙋ́юще вѣ́рнѡ , бжⷭ҇твенᲂе пра́з̾днествᲂ , смири́вшагѡ земна́ѧ съ нбⷭ҇ными . боⷢ҇ . Скрижа́ль бг҃ᲂпи́санна , ᲂу҆тро́ба твᲂѧ̀ бцⷣе , в̾ не́й же сло́вᲂ ѻ҆́ч҃ее написа́сѧ , є҆го́же чꙋ́вственѡ на́мъ пᲂро́ждьши . к̾ немꙋ̀ мᲂли́сѧ , и҆зба́вити ны̀ ѿ всѧ́кїѧ нꙋ́жи и҆ ско́рби . боⷢ҇ . Весели́тсѧ свѣ́тлѡ ве́рхъ прᲂро́ческїи , ѡ҆ тебѐ дв҃це . и҆са́їѧ без̾мꙋ́жнᲂе твᲂѐ ржⷭ҇тво̀ ви́дѧ , прᲂро́чествꙋетъ . ѻ҆́ч҃ее бᲂ сло́вᲂ ро́ждьши на́мъ , и҆ пᲂ ржⷭ҇твѣ̀ дв҃ᲂю пребы́сть .

Дрꙋгі́и кано́нъ , крⷭ҇тꙋ̀ . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль .

запѣ́въ : Сла́ва гдⷭ҇и крⷭ҇тꙋ̀ твᲂемꙋ̀ честно́мꙋ . Крⷭ҇тꙋ̀ вѣ́рныхъ спасе́нїю , пᲂкланѧ́юсѧ и҆ те́плѣ ѡ҆блᲂбыза́ю . и҆ ѡ҆б̾е́млѧ вᲂпїю̀ , дре́вᲂ всеблаже́ннᲂе хрⷭ҇то́вᲂ , дш҃ꙋ мᲂю̀ и҆ ᲂу҆́мъ прᲂсвѣтѝ мᲂлю́сѧ . Пᲂбѣдᲂно́снᲂ ꙗ҆ви́сѧ на́ стрⷭ҇ти и҆ бѣ́сы , дне́сь зна́менїе крⷭ҇та̀ . тѣ́мже вѣ́рнїи всѝ свѣ́тлѡ прᲂсвѣ́щше дш҃а , ны́нѣ ѡ҆блᲂбыза́емъ . Лꙋчеза́рнаѧ ѡ҆блиста́етъ сїѧ́нїѧ , крⷭ҇тъ чⷭ҇тны́и . и҆ прᲂсвѣща́етъ вѣ́рнѡ пᲂклᲂнѧ́ющїѧсѧ є҆мꙋ̀ дне́сь , ѡ҆сщ҃а́ѧ дш҃а на́ша ны́нѣ и҆ тѣлеса̀ . боⷢ҇ . Прест҃а́ѧ дв҃ᲂ , ꙗ҆́же хрⷭ҇та̀ пло́тїю ро́ждьшаѧ , пᲂстрада́вшагᲂ на́съ ра́ди на крⷭ҇тѣ̀ во́лею , тѧ̀ бл҃жа́щїѧ че́стнѡ , спаса́й мᲂльба́ми сѝ .

пѣ́снь , г҃ . і҆рмо́съ . Оу҆тверди́сѧ се́рдце мᲂѐ ѡ҆́ гдⷭ҇ѣ , вᲂзнесе́сѧ ро́гъ мо́й ѡ҆́ бз҃ѣ мᲂе́мъ , раз̾шири́шасѧ на врагѝ мᲂѧ̀ ᲂу҆ста̀ мᲂѧ̀ , вᲂз̾весели́хсѧ ѡ҆ спасе́нїи твᲂе́мъ . Ликᲂствꙋ́ютъ с̾ на́ми дне́сь , кꙋ́пнѡ всѧ̀ а҆́нг҃льскаѧ чинᲂнача́лїѧ . нечꙋ́вственѡ нᲂ дх҃о́внѡ ѡ҆бстꙋпа́юще влⷣкᲂ , твᲂю̀ ст҃ꙋ́ю цр҃кᲂвь . ты́ же свы́ше ми́ръ сво́й пᲂда́жь на́мъ , ꙗ҆́кѡ всемлⷭ҇тивъ . Ликꙋ́етъ дне́сь с̾ на́ми , ли́къ прᲂро́ческїи , кꙋ́пнѡ же и҆ а҆пⷭ҇льскїи сп҃се , и҆ всѝ мꙋ́ченичестїи ли́цы . дх҃ᲂмъ прᲂзрѧ́ще тебѐ мнᲂгᲂимени́тагᲂ бг҃а , вѣ́рными сла́вима . боⷢ҇ . Дв҃дски ты̀ и҆менᲂва́сѧ , ᲂу҆сыре́нна гᲂра̀ дв҃це , без̾лѣ́тнᲂе сло́вᲂ ѻ҆́ч҃ее , ѡ҆младѣ́вшеесѧ вᲂ ᲂу҆тро́бѣ сѝ прїе́мъ , и҆ ро́ждьши пло́тїю , бж҃їю сᲂста́внꙋю мꙋ́дрᲂсть . боⷢ҇ . Мы́сленыи сᲂкрꙋши́сѧ тᲂми́тель , ѿ го́рнѧгѡ неи҆сцѣ́льнꙋю ꙗ҆́звꙋ прїе́мъ ка́мене , ѿ́ чрева твᲂегѡ̀ хрⷭ҇та̀ бг҃а на́шегѡ . прᲂше́дъ бᲂ земна́ѧ с̾ нбⷭ҇ными сᲂвᲂкꙋпѝ .

и҆́нъ , і҆рмо́съ . Нѣ́сть ст҃а . Ѻ҆рꙋ́жїе дре́вле , жи́зни блаже́ннᲂе дре́вᲂ , дарᲂва́сѧ храни́ти , за преѡ҆слꙋша́нїе первᲂзда́ннагѡ а҆да́ма . крⷭ҇тъ же сі́и пꙋ́ть сᲂтвᲂрѝ . Ѻ҆чи́ма ᲂу҆стна́ми и҆ дш҃а́ми , лицы̀ и҆ срⷣцы̀ , пᲂклᲂни́мсѧ всѝ прест҃о́мꙋ крⷭ҇тꙋ̀ , живᲂда́вца хрⷭ҇та̀ , и҆́мже ми́ръ ве́сь ѡ҆сщ҃а́етсѧ . Хра́мъ бг҃ꙋ прᲂро́чески дне́сь бы́вше . пᲂкланѧ́ющесѧ дре́вꙋ прест҃а́гѡ крⷭ҇та̀ . и҆ наслѣ́дницы є҆гѡ̀ со́ страхᲂмъ всѝ цѣлꙋ́емъ . боⷢ҇ . Дв҃ᲂю рᲂдила̀ є҆сѝ сн҃а , и҆́же пре́жде тебѐ рᲂжде́на , ѿ ѻ҆ц҃а пре́жде вѣ́къ , без̾ мт҃ре ѿ́ бг҃а , рᲂжде́нагᲂ пло́тїю , да спасе́тъ пре́же сᲂгрѣ́шшїѧ .

кᲂнда́к̾ , пра́здникꙋ . гла́съ , д҃ . Всѧ́кїѧ скве́рны , всемлⷭ҇тивыи сп҃се , а҆́зъ бы́хъ дѣ́латель , и҆ вᲂ ѿчаѧ́нїѧ ро́въ впа́дсѧ . нᲂ стеню̀ ѿ́ срⷣца , и҆ вᲂпїю̀ к̾ тебѣ̀ сло́ве , ᲂу҆скᲂрѝ ще́дрыи , и҆ пᲂтщи́сѧ на́ пᲂмᲂщь на́шꙋ , ꙗ҆́кѡ млⷭ҇тивъ . и҆́кᲂсъ . И҆мꙋ́ще тебѐ всемлⷭ҇тивыи сп҃се , крѣ́пкᲂе ᲂу҆тверже́нїе , и҆ пречⷭ҇тꙋю мт҃рь твᲂю̀ , стѣ́нꙋ неразᲂри́мꙋ , и҆ ти́хᲂе приста́нище , неᲂу҆бᲂи́мсѧ никᲂгда́ же вра́жїихъ вᲂста́нїи . твᲂи́мъ бᲂ неви́димымъ ра́зꙋмᲂмъ , сᲂхранѧ́еми и҆ пᲂкро́вᲂмъ , ви́димыѧ и҆ неви́димыѧ врагѝ пᲂбѣжда́емъ . твᲂю̀ пречⷭ҇тꙋю мт҃рь и҆мѣ́юще пᲂмо́щницꙋ , вра́жїихъ кᲂзне́й ꙗ҆́кѡ ѿ сѣте́й и҆з̾бѣга́емъ . ра́дᲂстїю вᲂспѣва́емъ прера́дᲂваннаѧ , ᲂу҆скᲂрѝ ще́дрыи , и҆ пᲂтщи́сѧ на́ пᲂмᲂщь на́шꙋ , ꙗ҆́кѡ млⷭ҇тивъ .

сѣда́ленъ , пра́здникꙋ . гла́съ , д҃ . Ско́рᲂе и҆ тве́рдᲂе и҆ крѣ́пкᲂе ᲂу҆тѣше́нїе , всемлⷭ҇тиве пᲂслѝ на́мъ . да тѝ во́ гласѣ хвале́нїѧ , трист҃ꙋ́ю пѣ́снь вᲂз̾сыла́емъ , дш҃е́ю сᲂкрꙋше́нᲂю припа́дающе мо́лимсѧ , сп҃се всегѡ̀ ми́ра , ты̀ є҆сѝ бг҃ъ ка́ющихсѧ . сла́ва , и҆ ны́нѣ , крⷭ҇тꙋ̀ . гла́съ , и҃ . Прᲂначерта́ше та́йнѡ дре́вле вре́менемъ , и҆сꙋ́съ на́в̾винъ крⷭ҇та̀ ѻ҆́бразъ , є҆гда̀ рꙋ́цѣ прᲂстира́ше крⷭ҇тᲂѻ҆бра́знѡ сп҃се мо́й , и҆ ста̀ сл҃нечнᲂе тече́нїе , до́ндеже врагѝ пᲂгꙋбѝ прᲂти́вѧщїѧсѧ тебѣ̀ бг҃ꙋ . тѣ́мже за́йде на крⷭ҇тѣ́ тѧ зрѧ̀ , и҆ до́лѣ держа́вꙋ сме́рти разо́рь , а҆́да свѧза́лъ є҆сѝ .

пѣ́снь , д҃ . і҆рмо́съ . Прᲂро́къ а҆вва́кꙋмъ , мы́сленныма ѻ҆чи́ма прᲂви́дѣ гдⷭ҇и прише́ствїе твᲂѐ . тѣ́мже и҆ вᲂпїѧ́ше , ѿ ю҆́га прїи́детъ бг҃ъ . сла́ва си́лѣ твᲂе́й , сла́ва хрⷭ҇тѐ прише́ствїю твᲂемꙋ̀ . Шестᲂкри́льнїи ми́лᲂстиве , и҆ мнᲂгᲂѡчи́тїи херꙋви́ми влⷣкᲂ , твᲂемꙋ̀ прⷭ҇то́лꙋ пред̾стᲂѧ́ще сла́вѧтъ . и҆́хже пᲂслѝ на́мъ вѣ́рнымъ , и҆ ѡ҆ст҃ѝ твᲂю̀ бжⷭ҇твенꙋю цр҃квь съ вᲂпїю́щими , сла́ва си́лѣ твᲂе́й , сла́ва хрⷭ҇тѐ прише́ствїю твᲂемꙋ̀ . Дв҃дъ вᲂз̾вели́чисѧ сп҃се , твᲂи́мъ бжⷭ҇твенымъ прᲂсїѧ̀ дх҃ᲂмъ , прᲂпᲂвѣ́давыи ѿ дв҃ы твᲂѐ ржⷭ҇тво̀ . ты́ же ꙗ҆́кѡ всемлⷭ҇тивъ , вᲂз̾вели́чи и҆ вᲂзвы́си твᲂю̀ ст҃ᲂлѣ́пнꙋю цр҃квь бжⷭ҇твенꙋю . боⷢ҇ . Лꙋ́къ крѣ́пкагѡ мирᲂде́ржца , твᲂи́мъ прижи́тїемъ влⷣчце сᲂкрꙋши́сѧ . ты́ бᲂ пло́ть бжⷭ҇твенагѡ вᲂплᲂще́нїѧ , свѣтᲂно́снѣ пᲂда́вши ᲂу҆́дицѣ ѻ҆́ч҃ꙋ сло́вꙋ , пра́дѣдна ᲂу҆лᲂвѝ на́шегѡ врага̀ . тѣ́мъ є҆мꙋ̀ вᲂпїе́мъ , сла́ва си́лѣ твᲂе́й гдⷭ҇и . боⷢ҇ . Дв҃дски вᲂзвели́чисѧ , и҆ гла́сы прᲂро́чески , гᲂра̀ бж҃їѧ ᲂу҆сыре́на ꙗ҆ви́сѧ дв҃це . ка́мень ᲂу҆сѣче́ныи ѿ́ чрева твᲂегѡ̀ ражда́етсѧ хрⷭ҇то́съ бг҃ъ . є҆мꙋ́же пᲂе́мъ , сла́ва си́лѣ твᲂе́й , сла́ва хрⷭ҇тѐ прише́ствїю твᲂемꙋ̀ .

и҆́нъ , і҆рмо́съ . Хрⷭ҇то́съ мнѣ̀ си́ла . Да крᲂпи́тъ всѧ̀ землѧ̀ ра́дᲂванїе , да веселѧ́тсѧ древа̀ дꙋбра́внаѧ , дне́сь ѡ҆бᲂжена̀ всечестны́мъ крⷭ҇то́мъ , сїѧ́ющимъ кᲂнце́мъ . Пᲂказа́выи ѻ҆рга́нъ ᲂу҆мерщве́нїѧ , живᲂно́снѡ ми́рᲂви , пᲂбѣдᲂтво́рнᲂе ѻ҆рꙋ́жїе непᲂбѣди́мᲂе , пресла́вныи крⷭ҇тъ , срⷣца̀ на́ша прᲂсвѣтѝ . Ты̀ бжⷭ҇твенаѧ пᲂбѣ́да . ты̀ сᲂдѣ́лᲂванїе на́шегѡ спасе́нїѧ . ты̀ вѣ́рнымъ ѡ҆дᲂлѣ́нїе , и҆ бжⷭ҇твенаѧ же́ртва , ѽ всечⷭ҇тны́и крⷭ҇те , пᲂю́щїѧ тѧ̀ ѡ҆ст҃ѝ . боⷢ҇ . Вᲂи́стинꙋ ꙗ҆ви́сѧ бцⷣа , вᲂи́стинꙋ рᲂдила̀ є҆сѝ сн҃а вы́шнѧгᲂ , и҆́же на крⷭ҇тѣ̀ рꙋ́цѣ прᲂсте́ршагᲂ , дв҃ᲂ мт҃и мр҃і́е , и҆ ми́ра призва́вшагᲂ .

пѣ́снь , є҃ . і҆рмо́съ . Гдⷭ҇и бж҃е на́шъ , ми́ръ да́ждь на́мъ . гдⷭ҇и бж҃е на́шъ , стѧжи́ ны . гдⷭ҇и , ра́звѣ бᲂ тебѐ и҆но́гѡ незна́емъ , и҆́мѧ твᲂѐ и҆мѧнꙋ́емъ . Црⷭ҇твꙋетъ прⷭ҇нѡ твᲂѐ пребжⷭ҇твенᲂе и҆́мѧ , ѻ҆́ч҃е сло́ве же и҆ дш҃е . лю́бѧщимъ тѧ̀ свы́ше ꙗ҆́кѡ млⷭ҇тивъ , ми́рнꙋю ᲂу҆правлѧ́й жи́знь . Вѣкѡ́мъ сы́и твᲂре́цъ , смᲂтре́нїемъ сѝ пло́ти прибли́жисѧ . да пло́ть ѡ҆бᲂжи́въ вᲂзве́лъ є҆сѝ на высᲂтꙋ̀ кᲂ ѻ҆ц҃ꙋ , и҆ кᲂ свᲂемꙋ̀ хᲂтѣ́нїю . боⷢ҇ . Трапе́зꙋ сло́ва жи́зненагѡ , бракᲂнеи҆скꙋ́снаѧ мр҃і́е , разꙋмѣ́хᲂмъ тѧ̀ вѣ́рнїи , ѿ плᲂда̀ пᲂпо́лзшїисѧ . плᲂдо́мъ же чре́ва твᲂегѡ̀ , к̾ свѣ́тꙋ разꙋ́мнᲂмꙋ приведе́ни бы́хᲂмъ . боⷢ҇ . Сїѧ́ютъ прᲂро́честїи гла́си , ꙗ҆́кѡ сл҃нце лꙋчѝ пресвѣ́тлыѧ пꙋща́юще , твᲂѐ прᲂвᲂзвѣща́юще без̾мꙋ́жнᲂе дв҃ᲂ ржⷭ҇тво̀ . ѻ҆ц҃ъ и҆зво́ли , сн҃ъ же хᲂтѣ́нїемъ во́ чревѣ твᲂе́мъ младе́нствꙋетъ ,

дѣ́йствᲂмъ ст҃а́гѡ дх҃а , и҆ пребыва́еши дв҃ᲂю .

и҆́нъ , і҆рмо́съ . Бж҃їимъ свѣ́тᲂмъ . Пᲂдъи́мемъ с̾ ра́дᲂстїю преблаже́нныи крⷭ҇тъ , в̾ цр҃квахъ и҆ градѣ́хъ , сегѡ̀ пред̾лᲂже́на , и҆ пᲂклᲂни́мсѧ . да дᲂлго́мъ прїи́мемъ ѡ҆ставле́нїе . Оу҆мерщвлѧ́етсѧ ѕмі́й лꙋка́выи ны́нѣ , и҆́же тмѣ̀ нача́льникъ , сїѧ́нїѧ нетерпѧ̀ , є҆́же ѡ҆блиста́етъ живᲂно́сныи крⷭ҇тъ , бжⷭ҇твеннагѡ цр҃ѧ ски́петрᲂ честно́е . Ꙗ҆́кѡ пресвѣ́тлаѧ ѕвѣзда̀ , и҆ ꙗ҆́кѡ би́серъ благᲂлѣ́пенъ , и҆ пресїѧ́ннᲂе сл҃нце , всѧ̀ ѡ҆зарѧ́етъ землѝ кᲂнцы̀ , крⷭ҇тъ гдⷭ҇нь . є҆го́же ѡ҆блᲂбыза́емъ . боⷢ҇ . Спасе́нїю тѧ̀ нача́лᲂ всѝ вѣ́дѧще вѣ́рнїи , ᲂу҆блажа́емъ чи́стаѧ . ты́ бᲂ пре́же сꙋ́щагѡ , пло́тїю рᲂдила̀ є҆сѝ , хᲂтѣ́нїемъ свᲂи́мъ пригвᲂжде́на на крⷭ҇тѣ̀ .

пѣ́снь , ѕ҃ . і҆рмо́съ . Ꙗ҆́кѡ во́ды мᲂрскі́ѧ чл҃кᲂлю́бче , во́лны жите́йскїѧ пᲂгрꙋжа́ютъ мѧ . тѣ́мъ ꙗ҆́кѡ і҆ѡ́на вᲂпїю́ ти сло́ве , вᲂз̾ведѝ ѿ тлѝ живо́тъ мо́й млрⷭ҇де гдⷭ҇и . Тᲂржествꙋ́етъ ве́селᲂ дне́сь , великᲂи҆мени́тыи гра́дъ , хрⷭ҇тᲂи҆мени́тїи лю́дїе , ѿ тебѐ свы́ше про́сѧтъ вели́кихъ даро́въ сп҃се . ты́ же ꙗ҆́кѡ бл҃гъ и҆ всемлⷭ҇тивъ , ста́дᲂ свᲂѐ сᲂхранѧ́й . Крѣ́пкᲂе ᲂу҆тверже́нїе , свы́ше пᲂслѝ хрⷭ҇тѐ сп҃се , крѣ́пкагᲂ тѧ̀ с̾ вѣ́дꙋщимъ , и҆ всемлⷭ҇тивагᲂ бг҃а , и҆ хрⷭ҇тᲂи҆мени́тꙋю цр҃кᲂвь , ᲂу҆твердѝ ꙗ҆́кѡ всемᲂга́и . боⷢ҇ . И҆зба́ви мѧ лю́тыхъ дв҃це , ᲂу҆мᲂлѧ́щи пᲂбѣди́телѧ лю́тᲂмꙋ врагꙋ̀ , и҆ спᲂдо́би мѧ̀ дᲂсто́йнѡ ѡ҆деснꙋ́ю ста́ти твᲂегѡ̀ сн҃а .= боⷢ҇ . Т=ы̀ ѡ҆бᲂжи́ мѧ влⷣчце , бг҃а ро́ждьши . ты̀ ме́ртвенᲂе сꙋщество́ ми , ѿ сме́рти к̾ жи́зни преведѐ . да мᲂегѡ̀ престꙋпле́нїѧ клѧ́твꙋ пᲂтреби́тъ , бжⷭ҇твенᲂю любо́вїю тѧ̀ ᲂу҆бл҃жа́юща .

и҆́нъ , і҆рмо́с̾ . Жите́йскагᲂ мо́рѧ . Ꙗ҆́кѡ бжⷭ҇твенъ сᲂсꙋ́дъ . ꙗ҆́кѡ свѣти́льникъ свѣ́телъ , в̾ цр҃квахъ дне́сь и҆ въ храмѣ́хъ и҆ градѣ́хъ , крⷭ҇тъ пред̾лежи́мь ви́дѧще , ᲂу҆ѧсни́вшагѡ сегѡ̀ вᲂспᲂе́мъ . Оу҆мерщвлѧ́етсѧ сме́рть , ᲂу҆мᲂрѧ́етсѧ тлѣ́нїе , и҆ бѣсо́встїи пᲂлцы̀ ѿбѣга́ютъ . пᲂбѣ́днᲂмꙋ и҆ стра́шнᲂмꙋ пред̾лежи́мꙋ дне́сь , несмѣ́юще прикᲂснꙋ́тисѧ крⷭ҇тꙋ̀ хрⷭ҇то́вꙋ . боⷢ҇ . Ꙗ҆́дᲂмъ ѕмїи́нымъ , пра́баба пи́щею и҆́же вᲂ є҆де́мѣ пᲂма́засѧ . дв҃аѧ ро́ждьши нача́льника жи́зни , и҆стᲂчѝ ми́рᲂви нетлѣ́нїе и҆ вᲂскрⷭ҇нїе .

пѣ́снь , з҃ . і҆рмо́съ . Халдѣ́йскаѧ пе́щь ѻ҆гне́мъ распала́ема , прᲂхлажда́шесѧ дх҃ᲂмъ бж҃їимъ застꙋпле́нїемъ , ѻ҆́трᲂцы же пᲂѧ́хꙋ , бл҃гᲂслᲂве́нъ бг҃ъ ѻ҆ц҃ъ на́шихъ . Ты̀ є҆сѝ нбⷭ҇нагѡ крꙋ́га верхᲂтво́рче гдⷭ҇и . тѧ̀ свѣ́дꙋще всемлⷭ҇тивагᲂ припа́даемъ тѝ вᲂпїю́ще . ᲂу҆скᲂрѝ ще́дрыи , и҆ пᲂтщи́сѧ на́ пᲂмᲂщь на́шꙋ , ѻ҆́трᲂчески пᲂю́щихъ , бл҃гᲂслᲂве́нъ бг҃ъ ѻ҆ц҃ъ на́шихъ . Дверь млрⷭ҇дїемъ ѿве́рзлъ є҆сѝ на́мъ неи҆з̾гл҃анныѧ пи́щи . ѿве́рзи и҆ ны́нѣ всемлⷭ҇тиве сп҃се , твᲂѧ̀ свы́ше бжⷭ҇твеныѧ да́ры тебѣ̀ вѣ́рнѡ вᲂпїю́щимъ , бл҃гᲂслᲂве́нъ бг҃ъ ѻ҆ц҃ъ на́шихъ . трⷪ҇ченъ . Ѻ҆ц҃а прᲂсла́вимъ и҆ сн҃а и҆ дх҃а , вᲂ є҆ди́нᲂмъ бжⷭ҇твѣ̀ , трисᲂста́внᲂе є҆стество̀ . сꙋщество̀ нераз̾дѣ́льнᲂ , несᲂз̾да́ннᲂ без̾нача́льнᲂ , и҆ пресꙋ́щественᲂ . боⷢ҇ . Прᲂѡ҆брази́ша твᲂю̀ неѡ҆пали́мꙋю ᲂу҆тро́бꙋ , неѡ҆пали́мыѧ в̾ пещѝ ѻ҆́гненѣй ю҆́нᲂши , ѻ҆гне́мъ бжⷭ҇тва̀ прᲂхлажа́еми . є҆го́же прїи́мши пᲂрᲂдѝ бг҃а сло́ва пᲂю́щимъ , бл҃гᲂслᲂве́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . Хладᲂда́тельнꙋ ᲂу҆́бѡ . Спасе́нᲂмꙋ дре́вꙋ пᲂклᲂни́мсѧ , крⷭ҇тꙋ̀ прест҃о́мꙋ . є҆мꙋ́же слꙋ́жатъ а҆́нг҃льскаѧ всѧ̀ во́инства , пред̾лежи́ма ви́дѧще вѣ́рнїи , и҆ и҆стᲂча́юща на́мъ ѡ҆сщ҃е́нїе и҆ жи́знь . Пᲂбѣдᲂно́сныи ꙗ҆ви́сѧ прест҃ы́и крⷭ҇тъ , живᲂда́вца хрⷭ҇та̀ свы́ше . бѣсѡ́въ всѣ́хъ мно́жествᲂ ѿгᲂнѧ̀ , и҆ ва́рварскᲂе шата́нїе . и҆ пᲂбѣди́телѧ ꙗ҆влѧ́ѧ во́инствᲂ на́ше . Ꙗ҆́кѡ ѡ҆дш҃евле́нꙋ тебѣ̀ припа́даю , и҆ взыва́ю крⷭ҇те мо́й прест҃ы́и . ты́ ми прᲂсвѣтѝ дш҃ꙋ и҆ ᲂу҆́мъ и҆ слꙋ́хъ , и҆ ᲂу҆стнѣ̀ и҆ ꙗ҆зы́къ и҆ дыха́нїе , и҆ ѻ҆́чи к̾ пꙋте́мъ црⷭ҇тва хрⷭ҇то́ва . боⷢ҇ . Ю҆́нᲂши трѝ пе́щь не ѡ҆палѝ , ржⷭ҇тво̀ прᲂѡ҆бразꙋ́ющи твᲂѐ . и҆́бᲂ бжⷭ҇твеныи ѻ҆́гнь , тѧ̀ не ѡ҆па́ль всели́сѧ в̾ тѧ̀ . и҆ всѧ̀ наꙋчѝ пѣ́ти , бл҃гᲂслᲂве́нъ бг҃ъ ѻ҆ц҃ъ на́шихъ .

пѣ́снь , и҃ . і҆рмо́съ . А҆́нг҃лы нб҃са̀ , на престо́лѣ сла́вы сѣдѧ́щагѡ , и҆ ꙗ҆́кѡ бг҃а непреста́ннѡ сла́вимагѡ , блгⷭ҇ви́те по́йте , и҆ превᲂзнᲂси́те є҆гѡ̀ во́ вѣки . Держа́вꙋ црⷭ҇твїѧ сᲂхранѧ́й сло́ве , ꙗ҆́кѡ всемлⷭ҇тивъ , пра́ѻ҆ц҃ъ мл҃твами , крѣ́пкᲂю тѝ си́лᲂю . крѣ́пᲂсть же и҆ си́лꙋ , неѡ҆скꙋ́днѡ на прᲂти́вныѧ пᲂда́ждь , да вᲂпїе́мъ , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Пѣ́снь бжⷭ҇твенꙋю принᲂсѧ́ще , тебѐ всемлⷭ҇тиве въ пречⷭ҇тѣй цр҃кви , и҆з̾бра́ннїи лю́дїе твᲂѝ тебѐ хва́лѧтъ . ты́ же ꙗ҆́кѡ всемлⷭ҇тивъ , ѡ҆сѣнѝ вы́шнею тѝ си́лᲂю , да вᲂпїе́мъ тѝ , блгⷭ҇ви́те всѧ̀ дѣ́ла гдⷭ҇нѧ гдⷭ҇а . боⷢ҇ . Кла́съ живо́тенъ недѣ́ланенъ вᲂзрасти́вши бжⷭ҇твеныи , чи́стаѧ дв҃ᲂ . тричи́слена бжⷭ҇тва̀ сїѧ́нїе , ѻ҆́ч҃ее без̾лѣ́тнᲂе сло́вᲂ в̾ лѣ́тᲂ пᲂро́ждьши . к̾ немꙋ́ же за ны̀ ꙗ҆́кѡ мт҃и мᲂли́сѧ ѡ҆ пᲂю́щихъ тѧ̀ . боⷢ҇ . Без̾нача́льна рᲂди́телѧ нѣ́дръ не ѿстꙋ́пль , в̾ нѣ́дрѣхъ дв҃цы вᲂдвᲂрѧ́ѧсѧ , и҆ ро́ждьсѧ пло́тїю , ѡ҆чища́ѧ ми пло́ть и҆ дш҃ꙋ па́дшꙋю . є҆мꙋ́же пᲂе́мъ , блгⷭ҇ви́те хвали́те , и҆ превᲂзнᲂси́те є҆гѡ̀ во́ вѣки .

и҆́нъ , і҆рмо́съ . Оу҆жасни́сѧ бᲂѧ́исѧ . Тво́й крⷭ҇тъ прᲂѡ҆бразꙋ́ѧ і҆а́кѡвъ и҆нᲂгда̀ , на внꙋ́ки пᲂло́жь дла́ни премѣ́ннѡ . и҆ бл҃гᲂслᲂви́въ и҆́хъ , бл҃гᲂда́ть в̾ ꙗ҆зы́цѣхъ наꙋча́ѧ . дѣ́ти блгⷭ҇ви́те , сщ҃е́ннїи по́йте , и҆ превᲂзнᲂси́те є҆гѡ̀ во́ вѣки . Ѽ неи҆з̾рече́ннᲂмꙋ тѝ хрⷭ҇тѐ сни́тїю , и҆ неи҆з̾глаго́ланнымъ бл҃ги́мъ . вᲂплᲂти́сѧ и҆ распѧ́тсѧ сме́рть прїи́мъ , и҆ рѣши́ши чл҃ки ѿ клѧ́твы . и҆ и҆стᲂчи́въ нетлѣ́нїе требл҃же́ннᲂе дре́вᲂ , препрᲂсла́вленыи крⷭ҇тъ во́ вѣки . Прест҃а́гѡ крⷭ҇та̀ , бжⷭ҇твенꙋю пᲂбѣ́дꙋ , жи́зни нача́льника , льстѝ пᲂтреби́телѧ , дне́сь сегѡ̀ пᲂхва́лимъ . крⷭ҇тъ всест҃ы́и гдⷭ҇нь , бѣсѡ́мъ гꙋби́телѧ , и҆ ва́рварᲂмъ гᲂни́телѧ , и҆ вѣ́рнымъ пᲂбѣдᲂтво́рца и҆ пᲂкро́ва . боⷢ҇ . Гвᲂздьмѝ пригвᲂжде́на хрⷭ҇та̀ , кᲂпїе́мъ прᲂбᲂде́на в̾ нетлѣ́ннаѧ ре́бра . тро́стїю в̾ главꙋ̀ бїе́ма , же́лчь вкꙋша́юща , зрѧ́щи дв҃аѧ вᲂпїѧ́ше , гдѣ́ ти дᲂбро́та за́йде прекра́снᲂе сло́вᲂ , препрᲂсла́влене па́че сн҃о́въ чл҃ческихъ .

пѣ́снь , ѳ҃ . і҆рмо́съ . Чꙋ́же є҆́сть , мт҃ремъ дв҃ᲂю бы́ти , и҆ стра́ннѡ дв҃амъ , дѣ́ти ражда́ти , на тебѣ̀ бцⷣе ѡ҆бᲂѐ смᲂтре́нїе бы́сть . тѣ́мъ тѧ̀ всѧ̀ племена̀ земна́ѧ непреста́ннѡ велича́емъ . Чꙋ́вственѡ влⷣкᲂ дне́сь хва́лѧтъ тѧ̀ бжⷭ҇твенїи сᲂбо́ри , въ пречꙋ́днѣй ти цр҃кви , цр҃ѝ кꙋ́пнѡ и҆ лю́ди , и҆ сщ҃е́нныхъ сᲂбо́ри . ты́ же ꙗ҆́кѡ млⷭ҇тивъ спаса́й , да тѧ̀ всѧ̀ кᲂлѣ́на земна́ѧ непреста́ннѡ велича́емъ . Пѣ́снь вᲂз̾сыла́емъ дне́сь вѣ́рнїи , мнᲂгᲂи҆мени́тᲂмꙋ тебѐ хрⷭ҇тꙋ̀ бг҃ꙋ всѣ́хъ . и҆ твᲂѐ всемлⷭ҇тиве дх҃о́внѡ пра́зднꙋюще пра́зднествᲂ , про́симъ ѿ тебѐ , да ᲂу҆тверди́ши недви́жимᲂ держа́вꙋ на́шꙋ . боⷢ҇ . Є҆мманꙋ́ила бг҃а же и҆ чл҃ка , ѻ҆ц҃а без̾нача́льнагѡ сло́ва , ꙗ҆ви́сѧ мт҃и дв҃це , влады́чествᲂ призыва́ющее тѧ̀ при́зри и҆ ᲂу҆твержа́й , прᲂти́вныѧ пᲂкарѧ́ющи в̾ де́нь бра́ни . боⷢ҇ . Ѿи҆мѝ ѽ дв҃це , ве́щь тлѣ́ннꙋю ᲂу҆ма̀ мᲂегѡ̀ , ᲂу҆́мъ нбⷭ҇ныи пло́тїю ро́ждьшаѧ . прᲂсвѣтѝ глꙋбо́кꙋю тмꙋ̀ мᲂегѡ̀ неразꙋ́мїѧ , свѣ́тъ прижи́вшаѧ , и҆ превзы́ти мѧ спᲂдо́би крило́ма разꙋ́мныма , в̾ тишинꙋ̀ бжⷭ҇твенагѡ хᲂтѣ́нїѧ .

и҆́нъ , і҆рмо́съ . Бг҃а чл҃кѡмъ . Тлѣ́нни ѿ преслꙋша́нїѧ бы́хᲂмъ , бж҃їѧ за́пᲂвѣди престꙋ́пницы ꙗ҆́вльшесѧ . сегѡ̀ ра́ди сме́рть прїи́де чл҃кѡмъ . тѣ́мже без̾сме́ртїе прᲂцвѣтѐ дне́сь , пᲂбѣ́дныи крⷭ҇тъ хрⷭ҇то́въ , є҆го́же цѣлꙋ́емъ . Сѐ дре́вᲂ прест҃о́е , крѣ́пкаѧ наде́жда вѣ́рнымъ ꙗ҆ви́сѧ . клѧ́твѣ и҆збавле́нїе . чл҃кѡмъ ра́дᲂсть пред̾лежи́тъ , ѡ҆блича́ѧ тмѣ̀ нача́льника . семꙋ̀ пᲂклᲂнѧ́ющесѧ вѣ́рнїи велича́емъ . Зача́лᲂ бл҃гᲂслᲂве́нїѧ и҆ ᲂу҆тверже́нїѧ хрⷭ҇тїа́нᲂмъ . и҆ стѣна̀ и҆ тве́рдᲂе застꙋпле́нїе . и҆ клѧ́твы и҆збавле́нїе ꙗ҆ви́сѧ на́мъ , дре́вᲂ вᲂз̾желѣ́ннᲂе . ѻ҆рꙋ́жїе непᲂбѣди́мᲂе , прᲂсвѣтѝ и҆ ѡ҆ст҃ѝ на́съ , пᲂкланѧ́ющихтисѧ . боⷢ҇ . Хра́ме и҆ две́ре сщ҃е́нїѧ , прⷭ҇то́ле бж҃їи , ѻ҆́блаче и҆ свѣ́щниче всесвѣ́тлыи , кᲂвче́же бл҃гᲂда́ти всенепᲂро́чнаѧ , и҆́же че́стнѣ пᲂкланѧ́ющїѧсѧ ѻ҆́бразꙋ честно́мꙋ , є҆динᲂро́днагѡ тѝ сн҃а , пᲂкры́и и҆ сᲂхранѝ .

свѣти́ленъ , сп҃сꙋ . Свѣ́тъ невече́рнїи хрⷭ҇тѐ , прᲂсвѣтѝ на́съ лица̀ твᲂегѡ̀ зра́кᲂмъ , и҆ свѣ́тлᲂсти ст҃ы́хъ спᲂдо́би , є҆гда̀ сѧ́деши вᲂзда́ти кᲂмꙋ́ждᲂ пᲂ дѣ́лᲂмъ , мл҃твами ро́ждьшїѧ тѧ̀ бцⷣы . вⷤ . сла́ва , и҆ ны́нѣ . крⷭ҇тꙋ̀ . Крⷭ҇тъ храни́тель все́й вселе́ннѣй , крⷭ҇тъ красᲂта̀ цр҃ко́внаѧ . крⷭ҇тъ цр҃е́мъ держа́ва . крⷭ҇тъ вѣ́рнымъ ᲂу҆тверже́нїе . крⷭ҇тъ а҆́нг҃лѡмъ сла́ва . крⷭ҇тъ бѣсо́мъ ꙗ҆́зва .

На хвали́тѣхъ стихѣ́ры , на ѕ҃ . пра́здникꙋ , г҃ . гла́съ , д҃ . поⷣ . да́лъ є҆сѝ зна́менїе .= Г=ра́дъ тво́й пресвѣ́тлѡ чте́мъ ,꙳ всемлⷭ҇тиве гдⷭ҇и ,꙳ пра́зднествᲂ твᲂѐ ве́селᲂ тᲂржествꙋ́юще .꙳ ты̀ ᲂу҆́бѡ а҆пⷭ҇льскимъ лико́мъ ᲂу҆ча́ ны бжⷭ҇твенᲂ ,꙳ мы́ же со́ страхᲂмъ и҆ ра́дᲂстїю зрѧ́ще к̾ тебѣ̀ ,꙳ про́симъ неи҆з̾гл҃анныѧ пи́щи .꙳ ты́ бᲂ са́мъ живо́тнᲂе пита́нїе ,꙳ сше́дыи съ нб҃сѐ ,꙳ і҆с҃е всеси́льне ,꙳ сп҃се дш҃а́мъ на́шимъ . Ѻ҆те́ческихъ не ѡ҆ста́вль нѣ́дръ ,꙳ ꙗ҆́кѡ всемлⷭ҇тивъ сᲂ ᲂу҆ченикѝ вᲂдвᲂрѧ́ѧсѧ .꙳ ты́ бᲂ є҆сѝ живо́тныи хлѣ́бъ ,꙳ ѿ него́ же ми́ръ причаща́етсѧ ,꙳ и҆ пребыва́етъ на́мъ пи́ща не ѡ҆скꙋдѣва́ема .꙳ причаще́нїемъ же ѡ҆живлѧ́етъ ,꙳ на нетлѣ́нїе чл҃чествᲂ ,꙳ сме́ртныѧ и҆змѣни́въ ѕло́бы .꙳ і҆с҃е всеми́лᲂстиве ,꙳ сп҃се дш҃а́мъ на́шимъ . Хва́лимъ твᲂѐ пра́зднествᲂ вѣ́рнїи ,꙳ всемлⷭ҇тиве хрⷭ҇тѐ ,꙳ ꙗ҆́кѡ ѿ ѻ҆ц҃а прїи́де спасти́ ны .꙳ тѣ́мже пᲂе́мъ тѧ пѣ́сньми бл҃гᲂда́рными ,꙳ ꙗ҆́кѡ ты̀ ѡ҆бнажѝ на́мъ бг҃ᲂлѣ́пнᲂ , бжⷭ҇твенꙋю твᲂю̀ си́лꙋ ,꙳ пресла́внѡ чꙋ́дᲂ твᲂрѧ̀ ,꙳ на спасе́нїе на́мъ бл҃гᲂтвᲂрѧ́щимъ .꙳ тѣ́мже сла́вимъ млрⷭ҇де смᲂтре́нїе твᲂѐ ,꙳ і҆с҃е всемᲂгі́и ,꙳ сп҃се дш҃а́мъ на́шимъ .

стихѣ́ры , крⷭ҇тꙋ̀ . гла́съ , а҃ . поⷣ . нбⷭ҇нымъ чино́мъ .= Н=бⷭ҇наѧ ше́ствїѧ крⷭ҇тъ честны́и гᲂто́витъ ,꙳ всѣ́мъ и҆́же тᲂмꙋ̀ пᲂклᲂнѧ́ющимсѧ ,꙳ вѣ́рᲂю несꙋмѣ́ннᲂю .꙳ и҆ лико́мъ невеще́ственыхъ си́лъ ,꙳ и҆́же на не́мъ пригвᲂзди́выисѧ сᲂчета́етъ ,꙳ любо́вїю пᲂю́щихъ тᲂгѡ̀ . Кла́нѧющїисѧ вѣ́рᲂю крⷭ҇тꙋ̀ честно́мꙋ ,꙳ и҆́же на не́мъ распе́ншагᲂсѧ вᲂспᲂе́мъ влⷣкꙋ .꙳ тᲂгѡ̀ манᲂве́нїемъ ,꙳ ᲂу҆стнѣ̀ вкꙋ́пѣ и҆ дш҃ꙋ ѡ҆чища́юще .꙳ и҆ сїѧ́нїи сегѡ̀ мы́слеными ,꙳ ᲂу҆ѧсни́мсѧ хва́лѧще є҆гѡ̀ . Го́рести дре́вле ᲂу҆слажда́ѧ мѡѷсе́й ,꙳ и҆зба́ви і҆и҃лѧ ,꙳ ѻ҆́бразъ крⷭ҇та̀ написꙋ́ѧ .꙳ мы́ же сегѡ̀ всѝ бжⷭ҇твенᲂ вѣ́рнїи ,꙳ та́йнѡ вᲂѡ҆бража́емъ в̾ срⷣца́хъ всегда̀ ѡ҆бра́знѡ .꙳ и҆ спаса́емсѧ держа́вᲂю є҆гѡ̀ .

сла́ва , и҆ ны́нѣ . гла́съ , д҃ . Пᲂсᲂби́выи гдⷭ҇и кро́ткᲂмꙋ дв҃дꙋ , пᲂбѣди́ти и҆нᲂплеме́нника , и҆ держа́вѣ на́шей спᲂсо́бствꙋй . и҆ ѻ҆рꙋ́жїемъ крⷭ҇та̀ низлᲂжѝ врагѝ на́ша . пᲂкажѝ млрⷭ҇де на на́съ , дре́внїѧ млⷭ҇ти твᲂѧ̀ , и҆ разꙋмѣ́ютъ вᲂи́стинꙋ , ꙗ҆́кѡ ты̀ є҆сѝ бг҃ъ , и҆ на тѧ̀ надѣ́ющесѧ пᲂбѣжда́емъ . мᲂлѧ́щесѧ прилѣ́жнѡ пречⷭ҇тѣй тѝ мт҃ри , дарᲂва́ти на́мъ ми́ръ и҆ ве́лїю млⷭ҇ть . Славᲂсло́вїе вели́кᲂе . та́же , свѧще́нїе вᲂдѣ̀ , и҆ пᲂклᲂне́нїе честно́мꙋ крⷭ҇тꙋ̀ . и҆ є҆ктенїѝ .

и҆ ѿпꙋ́стъ . ча́съ , а҃ . и҆ кᲂне́чныи ѿпꙋ́стъ .

На часѣ́хъ , трᲂпа́рь , сп҃сꙋ . сла́ва , крⷭ҇тꙋ̀ . и҆ нн҃ѣ , боⷢ҇ , часо́въ . Пᲂ трⷭ҇то́мъ , и҆ пᲂ ѻ҆́ч҃е на́шъ , кᲂндакѝ , премѣнѧ́емъ : сп҃сꙋ , и҆ крⷭ҇тꙋ̀ .

На литꙋргі́и , бл҃же́нна , на и҃ . ѿ кано́на , сп҃сꙋ , пѣ́снь , г҃ ѧ . и҆ крⷭ҇тꙋ̀ , пѣ́снь , ѕ҃ ѧ .

Пᲂ вхо́дѣ , а҆́ще хра́мъ хрⷭ҇то́въ : трᲂпа́рь , сп҃сꙋ , и҆ крⷭ҇тꙋ̀ . сла́ва , кᲂнда́къ , сп҃сꙋ . и҆ ны́нѣ , крⷭ҇тꙋ̀ .

Пᲂ вхо́дѣ , а҆́ще хра́мъ бцⷣы : трᲂпа́рь , сп҃сꙋ , и҆ крⷭ҇тꙋ̀ , и҆ хра́мꙋ . кᲂнда́къ , сп҃сꙋ . сла́ва , крⷭ҇тꙋ̀ . и҆ ны́нѣ , хра́мꙋ .

Пᲂ вхо́дѣ , а҆́ще ли хра́мъ ст҃ы́мъ : трᲂпа́рь , сп҃сꙋ , и҆ крⷭ҇тꙋ̀ , и҆ хра́мꙋ . кᲂнда́къ , сп҃сꙋ . сла́ва , хра́мꙋ . и҆ ны́нѣ , крⷭ҇тꙋ̀ .

прᲂки́менъ , ѱл҃о́мъ дв҃дᲂвъ . Спасѝ гдⷭ҇и лю́ди свᲂѧ̀ , и҆ бл҃гᲂслᲂвѝ дᲂстᲂѧ́нїе свᲂѐ . сти́хъ . къ тебѣ̀ гдⷭ҇и вᲂз̾зᲂвꙋ̀ , бж҃е мо́й непремᲂлчѝ ѿ менѐ . а҆пⷭ҇лъ , к̾ кᲂри́нѳѡмъ . заⷱ҇ , рк҃є .= а҆ллилꙋ́їѧ . Пᲂмѧнѝ со́нмъ тво́й , и҆́же стѧжа̀ и҆спе́рва . =сти́хъ . бг҃ъ же цр҃ь на́шъ пре́жде вѣ́къ , сᲂдѣ́ла спасе́нїе пᲂсредѣ̀ землѝ .= є҆ѵⷢ҇а́лїе , ѿ і҆ѡа́нна . заⷱ҇ , ѯ҃ . На литꙋргі́и пᲂе́мъ дᲂсто́йнѡ , а҆ не і҆рмо́съ , крⷭ҇тꙋ̀ . =прича́стенъ , зна́менасѧ на на́съ свѣ́тъ лица̀ твᲂегѡ̀ гдⷭ҇и .

<< Previous

Contents

Next >>