МЦⷭ҇А И҆Ю́ЛѦ ВЪ К҃И ДН҃Ь

Слꙋ́жба ꙗ҆вле́нїю чꙋдᲂтво́рныѧ и҆ко́ны смᲂле́нскїѧ , прест҃ы́ѧ влⷣчцы на́шеѧ бцⷣы , и҆ при́снѡ дв҃ы мр҃і́и , чⷭ҇тна́гѡ и҆ сла́внагѡ є҆ѧ̀ ѻ҆диги́трїѧ . =Вече́ръ . блаже́нъ мꙋ́жь , а҃ , а҆нтифо́нъ . На гдⷭ҇и вᲂзва́хъ , стихѣ́ры , на́ и҃ . гла́съ , в҃ . Злата́ѧ кади́льнице , рꙋ́чкᲂ и҆ же́зле , и҆ свѣти́льниче свѣтᲂза́рныи , сви́тче бжⷭ҇твеныи , в̾ не́мже пе́рстᲂмъ бж҃їимъ написа́сѧ сло́вᲂ , спасѝ на́съ тебѐ велича́ющихъ . Да́рꙋй на́мъ по́мᲂщь бцⷣе , на тѧ̀ надѣ́ющимсѧ , вѣ́рнымъ прибѣ́жище . и҆зба́ви ѿ бѣ́дъ рабы̀ свᲂѧ̀ дв҃це , к̾ тебѣ́ бᲂ по́ бз҃ѣ , ᲂу҆пᲂва́нїе вᲂзлага́емъ . Влⷣчце мт҃и и҆зба́вителѧ , прїимѝ мᲂле́нїе ра́бъ свᲂи́хъ , а҆́ще и҆ недᲂсто́йнѣ мᲂлѧ́щихтисѧ . да мо́лишисѧ за ны̀ , к̾ ро́ждьшемꙋсѧ и҆з̾ тебѐ влⷣчце ми́рꙋ , бꙋ́ди на́мъ и҆зба́вительница . =сла́ва . гла́съ , ѕ҃ . И҆́же ра́дᲂсть а҆́нг҃лѡмъ прїи́мшаѧ , и҆ ро́ждьшаѧ сᲂзда́телѧ свᲂегѡ̀ , дв҃ᲂ спасѝ , тебѐ велича́ющихъ . и҆ ны́нѣ . гла́съ , и҃ . Влⷣчце прїимѝ мл҃твꙋ ра́бъ свᲂи́хъ , и҆ и҆зба́ви на́съ ѿ всѧ́кїѧ нꙋ́жды и҆ печа́ли , тебѐ велича́ющїѧ .

та́же , вы́хᲂдъ . прᲂки́менъ , дню̀ .

Ѿ= бытїѧ̀ , чте́нїе .=

И҆зы́де і҆а́кѡвъ ѿ стꙋденца̀ клѧ́твеннагѡ , и҆ и҆́де в̾ харра́нь , и҆ ѡ҆брѣ́те мѣ́стᲂ и҆ ста̀ тꙋ̀ . заше́дшꙋ же сл҃нцꙋ , взѧ́тъ ѿ ка́менїѧ мѣ́ста тᲂгѡ̀ , и҆ пᲂлᲂжѝ є҆̀ в̾ вᲂз̾гла́вїе себѣ̀ . и҆ спа̀ на мѣ́стѣ то́мъ , и҆ со́нъ ви́дѣ . и҆ сѐ лѣ́ствица ᲂу҆твержена̀ на землѝ , є҆́й же глава̀ дᲂсѧза́ше дᲂ небесѐ . и҆ а҆́нг҃ли бж҃їи вᲂз̾хᲂжда́хꙋ , и҆ низ̾хᲂжда́хꙋ пᲂ не́й . гдⷭ҇ь же ᲂу҆твержа́шесѧ на не́й , и҆ речѐ , а҆́зъ бг҃ъ а҆враа́мѡвъ ѻ҆ц҃а твᲂегѡ̀ , и҆ бг҃ъ и҆саа́кѡвъ , небо́йсѧ . землѧ̀ на не́й же ты̀ спи́ши , тебѣ̀ да́мъ ю҆̀ , и҆ сѣ́мени твᲂемꙋ̀ . и҆ бꙋ́детъ сѣ́мѧ твᲂѐ , ꙗ҆́кѡ пѣсо́къ земны́и , и҆ распрᲂстрани́тсѧ на́ мᲂре , и҆ на ли́вꙋ , на сѣ́веръ , и҆ вᲂсто́къ . и҆ бл҃гᲂслᲂвѧ́тсѧ ѡ҆ тебѣ̀ всѧ̀ кᲂлѣ́на земна́ѧ , и҆ ѡ҆ сѣ́мени твᲂе́мъ . и҆ сѐ а҆́зъ с̾ тᲂбо́ю , сᲂхранѧ́ѧи тѧ̀ на всѧ́кᲂмъ пꙋтѝ , а҆́мᲂже а҆́ще по́йдеши . и҆ вᲂз̾вращꙋ́ тѧ в̾ зе́млю сїю̀ , ꙗ҆́кѡ не ѡ҆ста́влю тебѐ , до́ндеже сᲂтвᲂри́ти ми всѧ̀ є҆ли́ка гл҃ахъ тѝ . и҆ вᲂста́въ і҆а́кѡвъ ѿ сна̀ свᲂегѡ̀ , и҆ речѐ , ꙗ҆́кѡ є҆́сть гдⷭ҇ь на мѣ́стѣ се́мъ , а҆́зъ же невѣ́дѣхъ . и҆ ᲂу҆бᲂѧ́сѧ , и҆ речѐ , ꙗ҆́кѡ стра́шнᲂ мѣ́стᲂ сѐ , нѣ́сть сѐ , нᲂ до́мъ бж҃їи , и҆ сі́ѧ врата̀ нбⷭ҇наѧ .

Ѿ= пррⷪ҇чества і҆єзекі́илева , чте́нїе .=

Бꙋ́детъ ѿ ѻ҆сма́гѡ днѐ и҆ про́чее , сᲂтвᲂрѧ́тъ і҆єре́и , на ѻ҆лтарѝ всесᲂжже́нїѧ ва́ша , и҆́же спасе́нїѧ ва́шегѡ , и҆ прїимꙋ̀ вы̀ гл҃етъ гдⷭ҇ь бг҃ъ . и҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ , зрѧ́щихъ на вᲂсто́къ , и҆ сїѧ̀ бѧ́хꙋ затвᲂре́на . и҆ речѐ гдⷭ҇ь кᲂ мнѣ̀ , врата̀ сїѧ̀ затвᲂре́на бꙋ́дꙋтъ , и҆ не ѿве́рзꙋтсѧ . и҆ никто́же про́йдетъ сквᲂзѣ̀ и҆́хъ , ꙗ҆́кѡ гдⷭ҇ь бг҃ъ і҆и҃левъ вни́детъ и҆́ми , и҆ бꙋ́дꙋтъ затвᲂре́на . занѐ и҆гꙋ́менъ се́й сѧ́детъ в̾ ни́хъ снѣ́сти хлѣ́бъ . пᲂ пꙋтѝ є҆ла́мскихъ вра́тъ вни́детъ , и҆ пᲂ пꙋтѝ є҆гѡ̀ и҆зы́детъ . и҆ введе́ мѧ на пꙋ́ть вра́тъ ст҃ы́хъ , и҆́же к̾ сѣ́верꙋ прѧ́мѡ хра́мꙋ . и҆ ви́дѣхъ , и҆ сѐ и҆спо́лнисѧ сла́вы хра́мъ гдⷭ҇нь .

Ѿ= при́тчей , чте́нїе .=

Премꙋ́дрᲂсть сᲂзда̀ себѣ̀ хра́мъ , и҆ ᲂу҆твердѝ сто́лпъ се́дмь . закла̀ свᲂѧ̀ же́ртвенаѧ , и҆ черпа̀ в̾ ча́ши свᲂе́й вино̀ , и҆ ᲂу҆гᲂто́ва свᲂю̀ трапе́зꙋ . пᲂсла̀ свᲂѧ̀ рабы̀ , сᲂзыва́ющи с̾ высо́кимъ прᲂпᲂвѣ́данїемъ на ча́шꙋ , гл҃ющи , и҆́же є҆́сть безꙋ́менъ , да ᲂу҆клᲂни́тсѧ кᲂ мнѣ̀ . и҆ тре́бꙋющимъ ᲂу҆ма̀ речѐ , прїиди́те и҆ ꙗ҆ди́те мо́й хлѣ́бъ , и҆ пі́йте вино̀ є҆́же че́рпахъ ва́мъ . ѡ҆ста́вите безꙋ́мїе , и҆ жи́ви бꙋ́дете . взыщи́те премꙋ́дрᲂсть , да пᲂживетѐ . и҆спра́вите вѣ́дѣнїи в̾ ра́зꙋмѣ . кажа́и ѕлы́ѧ , прїе́млетъ себѣ̀ без̾че́стїе . ѡ҆блича́ѧи же нечести́вагᲂ пᲂрече́тъ себѐ . ѡ҆бличе́нїе бᲂ нечести́вᲂмꙋ мᲂзо́лїе є҆мꙋ̀ . не ѡ҆блича́й ѕлы́хъ , да не вᲂз̾ненави́дѧтъ тебѐ . ѡ҆блича́й премꙋ́дра , и҆ вᲂзлю́битъ тѧ . да́й премꙋ́дрꙋ винꙋ̀ , и҆ премꙋ́дрѣе бꙋ́детъ . сказа́й пра́веднᲂмꙋ , и҆ прилᲂжи́тъ прїима́ти . зача́лᲂ премꙋ́дрᲂсти , стра́хъ гдⷭ҇нь , и҆ свѣ́тъ ст҃ы́хъ , ра́зꙋмъ . а҆ є҆́же разꙋмѣ́ти зако́нъ , по́мысла є҆́сть бл҃га . си́мъ бᲂ ѻ҆́бразᲂмъ пᲂживе́ши мно́гᲂ лѣ́тъ , и҆ прилᲂжа́т̾тисѧ лѣ́та живᲂтꙋ̀ .

На литі́и , стихѣ́ры . гла́съ , з҃ . И҆́же на херꙋви́мѣхъ є҆́здѧи , и҆ пѣва́емыи ѿ серафи́мъ , сᲂше́лъ є҆сѝ с̾ нб҃сѐ пррⷪ҇чески бл҃же , и҆ всели́сѧ вᲂꙋтро́бꙋ чи́стꙋ . ю҆́же а҆́нг҃ли вᲂспѣ́ша та́йнѡ , ра́дꙋисѧ ра́дᲂстнаѧ дв҃ᲂ , не ѡ҆бъѧ́тнагᲂ ꙗ҆́кѡ бг҃а во́ чревѣ свᲂе́мъ прїе́мши па́че сло́ва , ѿ невѣ́рїѧ в̾ вѣ́рꙋ ми́ра превᲂдѧ́ща . сла́ва тебѣ̀ хрⷭ҇тѐ , є҆ди́не млⷭ҇тиве и҆ чл҃кᲂлю́бче .= Оу҆красѝ сво́й черто́гъ чи́стаѧ , и҆ вᲂспрїимѝ цр҃ѧ свᲂегѡ̀ . слы́ши цѣлᲂва́нїе , є҆́же ѿ а҆́нг҃ла дв҃ᲂ . се́бᲂ прⷭ҇то́лъ херꙋви́мскїи є҆сѝ . сѐ цр҃ѧ всѣ́хъ ты̀ прїе́млеши . ѻ҆́блакъ свѣ́та є҆сѝ бцⷣе . дх҃ᲂмъ в̾ дш҃и лꙋчꙋ̀ прїе́мши , ю҆́же вᲂзвѣща́ѧ велегла́снѡ бжⷭ҇твеныи гаврїи́лъ , зᲂвы́и ра́дᲂстнѡ , сн҃а вы́шнѧгᲂ рᲂди́ши , дх҃а бж҃їѧ ди́внымъ наше́ствїемъ . Оу҆краси́сѧ черто́зе ст҃ы́и , гаврїи́ле бл҃гᲂвѣствꙋ́й цр҃ѧ хрⷭ҇та̀ , целꙋ́й марїа́мъ нбⷭ҇нꙋю две́рь . та́ бᲂ прⷭ҇то́лъ херꙋви́мскїи нᲂвᲂтвᲂри́тсѧ . то́й бᲂ ра́дꙋисѧ зва́ти дᲂсто́итъ . ѻ҆́блакъ свѣ́та зри́тсѧ дв҃аѧ , нᲂсѧ́щи хрⷭ҇та̀ сл҃нца сла́вы . є҆го́же дх҃ъ бж҃їи вᲂꙋтро́бѣ є҆ѧ̀ глаго́лᲂмъ твᲂи́мъ пресла́вне вселѧ́етъ , живᲂта̀ и҆ сме́рти и҆ всѣ́хъ влⷣкꙋ . Вᲂсїѧ́вшагѡ пре́же вѣ́къ ѿ ѻ҆ц҃а , на пᲂслѣ́дᲂкъ же вᲂплᲂща́ема ѿ мт҃ре неи҆зрече́ннѡ , съ нб҃сѐ гаврїи́лъ к̾ дв҃ѣй ра́дꙋисѧ чи́стаѧ зᲂвы́и . ѽ ра́дꙋисѧ сщ҃е́ннаѧ ра́дᲂстнаѧ дв҃ᲂ , хрⷭ҇та̀ бг҃а вᲂꙋтро́бѣ свᲂе́й заче́нши . є҆го́же прᲂви́дѧ мѡѷсе́й бг҃ᲂви́децъ на сина́йстѣй гᲂрѣ̀ вᲂзра́дᲂвасѧ . є҆мꙋ́же сѷмеѡ́нъ зᲂвы́и , се́бᲂ свѣ́тъ ꙗ҆зы́кѡмъ , се́й і҆и҃леви сла́ва , и҆ сп҃съ дш҃а́мъ на́шимъ . =сла́ва , и҆ ны́нѣ . гла́съ , и҃ . Бцⷣꙋ мр҃і́ю всѝ вᲂспᲂе́мъ . ра́дꙋисѧ мт҃и бж҃їѧ . ра́дꙋисѧ лѣ́ствице ѡ҆дш҃евле́наѧ . ра́дꙋисѧ кꙋпино̀ неѡ҆пали́маѧ . ра́дꙋисѧ ста́мнᲂ всезлата́ѧ . ра́дꙋисѧ цвѣ́те вѣ́ры . ра́дꙋисѧ же́зле прᲂзѧбы́и . ра́дꙋисѧ ѕлата́ѧ кади́льнице . ра́дꙋисѧ гᲂро̀ бж҃їѧ , присѣ́ннаѧ дв҃ᲂ . ра́дꙋисѧ разрѣше́нїе клѧ́твы , пе́рвыѧ є҆́ввы . ра́дꙋисѧ прⷭ҇то́ле гдⷭ҇нь . ра́дꙋисѧ мнᲂгᲂмᲂли́твенаѧ красᲂто̀ . ра́дꙋисѧ влⷣчце .

На стихо́внѣ , стⷯры . гла́съ , в҃ . поⷣ . є҆гда̀ ѿ́ древа . За всѣ́хъ мо́лишисѧ бл҃га́ѧ , прибѣга́ющихъ с̾ вѣ́рᲂю , в̾ держа́вныи тво́й кро́въ влⷣчце . и҆́нᲂ бᲂ прибѣ́жище не и҆́мамы грѣ́шнїи к̾ бг҃ꙋ , в̾ бѣда́хъ и҆ в̾ ско́рбѣхъ при́снᲂе и҆збавле́нїе , ѡ҆бремене́нїи грѣхѝ мно́гими , ра́звѣ тебѐ мт҃и бг҃а вы́шнѧгѡ . тѣ́мже тѝ припа́даемъ , и҆зба́ви ѿ всѧ́кїѧ бѣды̀ рабы̀ свᲂѧ̀ .

сти́хъ : пᲂмѧнꙋ̀ и҆́мѧ твᲂѐ ,꙳ вᲂ всѧ́кᲂмъ ро́дѣ и҆ ро́дѣ . Всѣ́мъ скᲂрбѧ́щимъ ра́дᲂсте , и҆ ѡ҆би́димымъ застꙋ́пнице , и҆ а҆́лчꙋщимъ кᲂрми́тельнице , стра́ннымъ ᲂу҆тѣше́нїе , ѡ҆бꙋрева́емымъ приста́нище , бᲂльны́мъ пᲂсѣще́нїе , наги́мъ пᲂкро́въ и҆ застꙋпле́нїе , немᲂщны́мъ цѣли́тельнице , же́зле ста́рᲂсти , мт҃и бг҃а вы́шнѧгѡ ты̀ є҆сѝ пречⷭ҇таѧ . пᲂтщи́сѧ мо́лимъ тѧ̀ , спастѝ рабы̀ свᲂѧ̀ .

сти́хъ : слы́ши дщѝ и҆ ви́ждь ,꙳ и҆ приклᲂнѝ ᲂу҆́хᲂ твᲂѐ . Ра́дꙋисѧ пречⷭ҇таѧ дв҃ᲂ . ра́дꙋисѧ честны́и ски́петре цр҃ѧ хрⷭ҇та̀ . ра́дꙋисѧ прᲂзѧ́бшаѧ гро́здъ та́йныи . ра́дꙋисѧ две́ре нбⷭ҇наѧ , и҆ неѡ҆пали́маѧ кꙋпино̀ . ра́дꙋисѧ всеми́рныи свѣ́те . ра́дꙋисѧ всѣ́хъ ра́дᲂсте . ра́дꙋисѧ вѣ́рнымъ спасе́нїе . ра́дꙋисѧ застꙋ́пнице всѣ́мъ хрⷭ҇тїа́нѡмъ , и҆ прибѣ́жище влⷣчце .

сла́ва , и҆ ны́нѣ . гла́съ , и҃ . Ра́дꙋисѧ вселе́ннѣй пᲂхвало̀ . ра́дꙋисѧ цр҃кви гдⷭ҇нѧ . ра́дꙋисѧ гᲂро̀ присѣ́ннаѧ . ра́дꙋисѧ всѣ́мъ прибѣ́жище . ра́дꙋисѧ свѣти́льниче всесвѣ́тлыи . ра́дꙋисѧ сла́вᲂ , правᲂсла́внымъ чⷭ҇тна́ѧ . ра́дꙋисѧ мр҃і́е мт҃и хрⷭ҇та̀ бг҃а . ра́дꙋисѧ раю̀ . ра́дꙋисѧ бжⷭ҇твенаѧ трапе́зᲂ . ра́дꙋисѧ сѣ́не . ра́дꙋисѧ рꙋ́чкᲂ всеѕлата́ѧ . ра́дꙋисѧ всѣ́хъ ᲂу҆пᲂва́нїе .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ .= трᲂпарѝ . гла́съ , д҃ . Къ бцⷣѣ прилѣ́жнѡ ны́нѣ притеце́мъ грѣ́шнїи , сᲂ смире́нїемъ припа́дающе и҆ пᲂкаѧ́нїемъ , вᲂпїю́ще и҆з̾ глꙋбины̀ дш҃е́вныѧ , влⷣчце пᲂмᲂзѝ милᲂсе́рдᲂвавши наны̀ . пᲂтщи́сѧ ꙗ҆́кѡ и҆з̾гиба́емъ ѿ мно́жества грѣхо́въ . не ѿвратѝ ра́бъ свᲂи́хъ то́щъ . тебе́ бᲂ є҆ди́нꙋ пᲂмо́щницꙋ и҆́мамы . =сла́ва , и҆ ны́нѣ , боⷢ҇ . Не ᲂу҆мᲂлчи́мъ никᲂгда́же бцⷣе си́лы твᲂеѧ̀ глаго́люще , мы̀ ᲂу҆́бѡ недᲂсто́йнїи . а҆́ще небы̀ ты̀ пред̾стᲂѧ́ла мᲂлѧ́щисѧ заны̀ , кто́ бы на́съ и҆зба́вилъ ѿ тᲂли́кихъ бѣ́дъ , кто́ ли бы̀ на́съ сᲂхрани́лъ и҆ дᲂ ны́нѣ свᲂбо́дны . не ѿстꙋ́пимъ ѿ тебѐ влⷣчце , свᲂѧ̀ рабы̀ на́съ спаса́й ѿ всѧ́кїѧ бѣды̀ , є҆ди́на бл҃гᲂслᲂве́наѧ .

На ᲂу҆́трени . на бг҃ъ гдⷭ҇ь , трᲂпа́рь . гла́съ , д҃ . Къ бцⷣѣ прилѣ́жнѡ .= двⷤа . сла́ва , и҆ ны́нѣ , боⷢ҇ . Не ᲂу҆мᲂлчи́мъ никᲂгда́же . Пᲂ а҃ , стихᲂсло́гїи , сѣда́ленъ . гла́съ , г҃ . Лю́дїе бл҃гᲂчести́вїи и҆ правᲂвѣ́рнїи , сᲂбо́ри хрⷭ҇тᲂи҆мени́тїи , пристꙋпи́те вѣ́рнѡ всѝ , бжⷭ҇твенᲂмꙋ припа́дающе бж҃їѧ мт҃ре ѻ҆́бразꙋ , и҆́мже и҆сцѣле́нїе бᲂлѧ́щимъ ра́дᲂстнѡ пᲂдава́етъ . ᲂу҆ѧзвлѧ́етъ же ѕлᲂсла́вныхъ , ꙗ҆́кѡ стрѣло́ю ѿ́ лꙋка , на́съ всѣ́хъ веселѧ́щи свѣтᲂви́днѡ , и҆ бл҃гᲂда́тїю ѡ҆зарѧ́ющи млⷭ҇ти свᲂеѧ̀ . =сла́ва , и҆ ны́нѣ . Всю́ тѧ бг҃ъ ѡ҆ст҃и́лъ є҆́сть дв҃ᲂ , до́брꙋю и҆ непᲂро́чнꙋю в̾ жена́хъ . прⷪ҇рки прᲂѡ҆брази́въ че́стнѡ . і҆єре́и бл҃гᲂслᲂви́въ , вᲂ ст҃а́ѧ ст҃ы́хъ вселѝ . а҆́нг҃лѡмъ вᲂспита́въ . с̾ небесѐ пи́щꙋ по́давъ . са́мъ же пребл҃гі́и , є҆динᲂро́днᲂе бг҃ъ сло́вᲂ всели́сѧ в̾ тѧ̀ , и҆ пло́тїю про́йде и҆з̾ тебѐ . тѣ́мжетисѧ пᲂклᲂнѧ́емъ , и҆ чте́мъ , ꙗ҆́кѡ вᲂи́стинꙋ сꙋ́щꙋю бцⷣꙋ .

Пᲂ в҃ , стихᲂсло́гїи , сѣда́ленъ . гла́съ , д҃ . Да ликᲂствꙋ́етъ свѣ́тлѡ , вѣ́рныхъ всѐ мно́жествᲂ . рыда́етъ же бѣсо́вскᲂе є҆стество̀ , ви́дѧще мнᲂгᲂи҆ме́нныѧ сїѧ́юща пра́здники , бж҃їѧ мт҃ре , и҆ бжⷭ҇твеными ᲂу҆блажа́емꙋ чи́стѡ пѣ́сньми . и҆дѣ́же бᲂ бг҃ᲂпрїѧ́тнѡ сла́витсѧ , пребл҃гᲂслᲂве́наѧ бцⷣа , тꙋ̀ непрїѧ́зни паде́нїе . хрⷭ҇тїа́нѡмъ же всѣ́мъ крѣ́пкᲂе ᲂу҆тверже́нїе . сла́ва , и҆ ны́нѣ . Ѽ всебл҃гᲂслᲂве́наѧ бцⷣе влⷣчце , бг҃ᲂи҆з̾бра́ннаѧ ѻ҆трᲂкᲂви́це , свѣ́тлᲂе прⷪ҇рческᲂе сбытїѐ , а҆пⷭ҇льскаѧ пᲂхвала̀ , и҆ мꙋ́ченическᲂе и҆спᲂвѣ́данїе и҆ вѣнчѐ , а҆́нг҃лы что́маѧ , и҆ чл҃ческими ро́ды мнᲂгᲂпѣ́таѧ , всегѡ̀ ми́ра вᲂз̾желѣ́ннаѧ пᲂмо́щнице . и҆зба́ви рабы̀ свᲂѧ̀ ѡ҆сꙋжде́нїѧ бꙋ́дꙋщагѡ , и҆ є҆́зера ѻ҆́гненагѡ , є҆ди́на бл҃гᲂслᲂве́ннаѧ .

Пᲂ пᲂлїєлеѡ́сѣ , сѣда́ленъ . гла́съ , а҃ . Правᲂвѣ́рнѡ чтꙋ́щїѧ тѧ̀ , и҆ к̾ тебѣ̀ прибѣга́юща , и҆ и҆ко́нѣ твᲂе́й ст҃ѣ́й любе́знѡ пᲂкланѧ́ющасѧ , ѽ бж҃їѧ мт҃и спасѝ . и҆ неда́ждь в̾ расхище́нїе сꙋпᲂста́тᲂмъ , нижѐ на́йдꙋтъ наны̀ всѧ̀ ѕла́ѧ , ꙗ҆́же грѣхѝ на́ша ᲂу҆гᲂто́ваша на́мъ . нижѐ без̾зако́нїѧ на́ша , превзы́дꙋтъ на главы̀ на́ша . нᲂ да твᲂѧ̀ ма́тернѧѧ к̾ бг҃ꙋ преѡдᲂлѣ́етъ заны̀ , бг҃ᲂпрїѧ́тнаѧ мл҃тва . сла́ва , и҆ ны́нѣ . Пречⷭ҇таѧ и҆ко́на твᲂѧ̀ бцⷣе дв҃ᲂ , врачевство̀ всемꙋ̀ ми́рꙋ дх҃о́внᲂе . к̾ не́й же прибѣга́юще тебѣ̀ пᲂклᲂнѧ́емсѧ и҆ пᲂчита́емъ , и҆ лᲂбыза́емъ и҆ чте́мъ . и҆сцѣле́нїемъ бл҃гᲂда́ть пᲂчерпа́юще ѿ неѧ̀ . и҆ недꙋ́гъ тѣле́сныхъ и҆ дш҃е́вныхъ страсте́й , твᲂи́ми мᲂли́твами свᲂбᲂжда́емсѧ .

степе́нна , д҃ гᲂ гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . Пᲂмѧнꙋ̀ и҆́мѧ твᲂѐ , вᲂ всѧ́кᲂмъ ро́дѣ и҆ ро́дѣ . сти́хъ . слы́ши дщѝ и҆ ви́ждь , и҆ приклᲂнѝ ᲂу҆́хᲂ твᲂѐ . всѧ́кᲂ дыха́нїе . є҆ѵⷢ҇а́лїе , ѿ лꙋкѝ . зача́лᲂ , д҃ . ѱало́мъ , н҃ .

сла́ва . мл҃твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

Пᲂми́лꙋй мѧ бж҃е пᲂ вели́цѣй ми́лᲂсти твᲂе́й пᲂ мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , ѕ҃ . Не ѡ҆ста́ви на́съ в̾ чл҃ческᲂе пред̾стᲂѧ́нїе пречⷭ҇таѧ влⷣчце , нᲂ прїимѝ мᲂле́нїе ра́бъ свᲂи́хъ . ско́рби ᲂу҆́бѡ ѡ҆бдержа́тъ ны̀ . терпѣ́ти немо́жемъ , ѿ бѣсо́вскагѡ стрѣлѧ́нїѧ . пᲂкро́ва нестѧжа́хᲂмъ нигдѣ́же , прибѣ́гнꙋти страстні́и , всегда̀ пᲂбѣжда́еми . ᲂу҆тѣше́нїѧ не и҆́мамы , ра́звѣ тебѐ влⷣчце ми́рꙋ . ᲂу҆пᲂва́нїе и҆ пред̾ста́тельнице вѣ́рнымъ , непре́зри мᲂле́нїѧ на́ша , нᲂ сᲂверше́на сᲂтвᲂрѝ .

Кано́нъ , прест҃ѣ́й бцⷣы . твᲂре́нїе и҆́нᲂка и҆гна́тїѧ . гла́съ , д҃ . пѣ́снь , а҃ . і҆рмо́съ . Ѿве́рзꙋ ᲂу҆ста̀ мᲂѧ̀ , и҆ напо́лнѧтсѧ дх҃а , и҆ сло́вᲂ ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ тᲂржествꙋ́ѧ , и҆ вᲂспᲂю̀ ра́дꙋѧсѧ тᲂѧ̀ чꙋдеса̀ . запѣ́в̾ : Прⷭ҇та́ѧ гжⷭ҇е бцⷣе спасѝ на́съ . Ра́дᲂстнѡ чⷭ҇таѧ , ны́нѣ наста́вшее хвале́нїе , принᲂша́ю ра́дꙋѧсѧ , и҆ ти́химъ гла́сᲂмъ ѻ҆диги́трїе вᲂпїю́ ти , ра́дꙋисѧ , и҆ и҆спо́лни мѧ ра́зꙋма , пѣ́ти начина́юща . Хрⷭ҇та̀ рᲂди́вшаѧ , ра́дᲂсть на́мъ вѣ́чнꙋю , ѽ ра́дꙋисѧ всепѣ́таѧ , правᲂсла́внымъ наде́жда , ѻ҆диги́трїе всепѣ́таѧ дв҃це , ра́дᲂсти и҆спо́лни мѧ ми́рᲂви жела́нныѧ . Ликꙋ́ютъ всѝ чл҃цы и҆ а҆́нг҃ли , всегда̀ сᲂгла́снѡ вᲂпїю́ще , на́ нб҃си и҆ на землѝ ѻ҆диги́трїе , ра́дꙋисѧ дв҃це , ра́дᲂсти бᲂ ржⷭ҇тво́мъ ти всѧ́ческаѧ и҆спо́лнила є҆сѝ . Ра́дᲂсть ѻ҆диги́трїе , и҆́же со́ страхᲂмъ ти вᲂпїю́щихъ , ра́дᲂсти спᲂдо́би мт҃и сꙋ́щїѧ ра́дᲂсти , и҆збавлѧ́ющи скᲂрбе́й всѧ́ческихъ , и҆ всѣ́хъ пᲂми́лꙋй , и҆́же к̾ тебѣ̀ прибѣга́ющихъ .

пѣ́снь , г҃ . і҆рмо́съ . Твᲂѧ̀ пѣвцы̀ бцⷣе , живы́и нетлѣ́нїѧ и҆сто́чниче , ли́къ себѣ̀ сᲂвᲂкꙋ́пльши дх҃о́венъ ᲂу҆твердѝ , и҆ в̾ бжⷭ҇твеннѣй ти сла́вѣ , вѣнце́мъ сла́вы спᲂдо́би . Хрⷭ҇та̀ вы́шнѧгѡ цр҃ѧ , ѽ ра́дꙋисѧ непᲂкᲂлеби́маѧ чи́стаѧ , и҆ ѡ҆дш҃евле́наѧ пᲂла́тᲂ . ра́дꙋисѧ ѻ҆диги́трїе , ра́дꙋисѧ , тᲂбо́ю нерꙋши́мъ на́шъ гра́дъ сᲂхранѧ́етсѧ . Вмѣсти́ти є҆го́же невᲂзмо́же тва́рь , вᲂꙋтро́бꙋ неи҆скꙋсᲂбра́чнꙋю , ѻ҆диги́трїе дв҃це , тѣле́снᲂ вмѣсти́ла є҆сѝ . тѣ́мже тѝ ра́дꙋисѧ пᲂе́мъ , по́дᲂлгꙋ велича́юще . Ра́дᲂсть мнᲂгᲂпѣ́таѧ ми́рᲂви , ра́дᲂстнѡ ти пᲂю́ще при́снѡ , вѣ́чнꙋющїѧ чи́стаѧ ра́дᲂсти спᲂдᲂблѧ́емсѧ , твᲂи́ми ма́терними мл҃твами , к̾ ро́ждьшемꙋсѧ и҆з̾ тебѐ ѻ҆диги́трїе . Златꙋ́ю тѧ ста́мнꙋ , и҆ свѣ́щникъ и҆ же́злъ , и҆ трапе́зꙋ чи́стаѧ , призыва́емъ ѻ҆диги́трїе . и҆ гла́съ є҆́же ра́дꙋисѧ , тебѣ̀ прⷭ҇нѡ привнᲂша́емъ , с̾ си́ми же и҆мены̀ .

сѣда́ленъ . гла́съ , в҃ . Мᲂли́твеница те́плаѧ , кꙋ́пнѡ и҆ стѣна̀ неѡ҆бᲂри́маѧ , млⷭ҇ти и҆сто́чниче , ми́рᲂви прибѣ́жище прилѣ́жнѡ тѝ вᲂпїе́мъ , бцⷣе влⷣчце , пред̾варѝ ѿ бѣ́дъ и҆зба́вити на́съ , є҆ди́на вско́рѣ застꙋпа́ющи .= сла́ва , и҆ ны́нѣ , то́йже .=

пѣ́снь , д҃ . і҆рмо́съ . Сѣдѧ́и вᲂ сла́вѣ , на прⷭ҇то́лѣ бжⷭ҇твеннѣ , на ѻ҆́блацѣ ле́гцѣ , прїи́де і҆с҃ъ пребжⷭ҇твенныи , ѿ пречтⷭ҇ыѧ дв҃ы , спасе́ же вᲂпїю́щїѧ , сла́ва хрⷭ҇тѐ си́лѣ твᲂе́й . Ра́дꙋисѧ чꙋ́дᲂ чꙋдесе́мъ , ѻ҆диги́трїе влⷣчце . ра́дꙋисѧ всѣ́мъ ра́дᲂсте , градᲂвѡ́мъ и҆ ве́семъ , непᲂбѣди́мᲂе хрⷭ҇тїа́нскᲂе в̾ бѣда́хъ храни́лище , и҆ пред̾гра́дїе , и҆ на врагѝ пᲂбѣжде́нїе . Ра́дꙋисѧ , ра́дꙋисѧ , цр҃е́мъ правᲂсла́внымъ пᲂхвало̀ , и҆ хрⷭ҇тᲂлюби́вымъ во́инствᲂмъ , пᲂкро́въ пребыва́еши всѣ́мъ цр҃цѣ , ра́дꙋисѧ ѻ҆диги́трїе , прибѣ́жище всѣ́мъ на́мъ и҆ ᲂу҆тверже́нїе . Ра́дꙋисѧ всѣ́мъ ско́рᲂе в̾ бѣда́хъ и҆збавле́нїе , ра́дꙋисѧ гᲂто́вᲂе всѣ́мъ скᲂрбѧ́щимъ ᲂу҆тѣше́нїе . ра́дꙋисѧ всепѣ́таѧ , ра́дꙋисѧ ѻ҆диги́трїе всебл҃гᲂслᲂве́наѧ , всѣ́мъ немᲂщны́мъ и҆сцѣли́тельнице . Ра́дꙋисѧ є҆ѧ́же вели́чїѧ , всѧ̀ тва́рь сла́вити ᲂу҆́бѡ спѣши́тъ пᲂ дᲂстᲂѧ́нїю , нᲂ невᲂзмᲂга́етъ ѻ҆диги́трїе , и҆ сегѡ̀ ра́ди зᲂве́тъ ти , ра́дꙋисѧ влⷣчце , бг҃ᲂвмѣсти́мᲂе жили́ще .

пѣ́снь , є҃ . і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твᲂе́й , ты́ бᲂ бракᲂнеи҆скꙋси́маѧ дв҃це , прїѧ́тъ вᲂ ᲂу҆тро́бѣ надᲂвсѣ́ми сꙋ́щагѡ бг҃а , и҆ рᲂдила̀ є҆сѝ без̾лѣ́тнагѡ сн҃а , всѣ́мъ вᲂспѣва́ющимъ тѧ̀ ми́ръ пᲂдава́юща . Бл҃гᲂсты́ни бе́зднᲂ и҆ щедро́тамъ є҆сѝ , ра́дꙋисѧ ѻ҆диги́трїе дв҃це , ра́дꙋисѧ всѣ́мъ ра́дᲂсть твᲂрѧ́щи вѣ́рнымъ . ѽ ра́дꙋисѧ сꙋ́щимъ в̾ бѣда́хъ , и҆ скᲂрбѧ́щимъ пребы́страѧ застꙋ́пнице . Ра́дᲂсти ѿ и҆спᲂлне́нїѧ вели́чїѧ чꙋде́съ твᲂи́хъ зрѧ́ще , и҆спᲂлнѧ́емсѧ всѝ , незрѧ́ще и҆ слы́шаще же вѣ́рнїи . тѣ́мже ра́дꙋисѧ тебѣ̀ при́снѡ всю́дꙋ , и҆ всѝ ѻ҆диги́трїе пᲂе́мъ . Хрⷭ҇та̀ бг҃а на́шегѡ , ѽ ра́дꙋисѧ ѻ҆диги́трїе , жили́ще и҆ до́мъ неи҆зрече́ннѣй и҆ пребжⷭ҇твеннѣй дв҃ᲂ сла́вѣ є҆гѡ̀ . ѽ ра́дꙋисѧ пᲂла́тᲂ преꙋкраше́ннаѧ , ра́дꙋисѧ гра́де ѡ҆дш҃евле́нныи , при́снѡ црⷭ҇твꙋющїи . Ра́дᲂсть неѡ҆скꙋ́днꙋю тѧ разсмᲂтрѧ́юще , ꙗ҆́кѡ мо́ре ѻ҆трᲂкᲂви́це , ѻ҆диги́трїе дв҃це , ра́дꙋющесѧ всѝ , ра́дꙋисѧ вᲂпїе́мъ ти , и҆ пᲂю́ще бжⷭ҇твенныхъ даро́въ неви́димѡ прⷭ҇нѡ ѿ тебѐ ѡ҆жида́юще .

пѣ́снь , ѕ҃ . і҆рмо́съ . Бжⷭ҇твенᲂе сѐ и҆ всечⷭ҇тно́е сᲂверша́юще пра́зднествᲂ , бг҃ᲂмꙋ́дрїи бж҃їѧ мт҃ре , прїиди́те рꙋка́ми вᲂспле́щемъ , ѿ неѧ̀ ро́ждьшагᲂсѧ вѣ́рᲂю сла́вѧще . Хрⷭ҇та̀ чⷭ҇таѧ прїе́млющи , гла́съ є҆́же ра́дꙋисѧ . ѻ҆диги́трїе дв҃це слы́шаше , є҆го́же неи҆зрече́ннѡ ро́ждьши , и҆ ра́дꙋисѧ ѿ всѣ́хъ слы́шиши всегда̀ . Ра́дᲂсти всѧ̀ и҆спо́лнила є҆сѝ , вы́шнѧѧ и҆ ни́жнѧѧ ты̀ сᲂвᲂкꙋпи́ла є҆сѝ ѻ҆диги́трїе . тѣ́мже ра́дᲂстнѡ и҆ сᲂгла́снѡ нн҃ѣ , нб҃ᲂ и҆ всѧ̀ землѧ̀ зᲂве́тъ ти . Вдᲂва́мъ ѽ ра́дꙋисѧ всепѣ́таѧ , и҆ всѣ́мъ си́рымъ ѻ҆диги́трїе ᲂу҆тѣше́нїе . ра́дꙋисѧ всѣ́мъ и҆стᲂча́ющи ни́щимъ , бᲂга́тьствᲂ неи҆стᲂщи́мᲂе . Зла́та всѧ́кагѡ блиста́ема , и҆ ᲂу҆́тра сл҃нечнагѡ свѣтлѣ́йши , жили́ще хрⷭ҇то́вᲂ , ра́дꙋисѧ ѻ҆диги́трїе , ра́дꙋисѧ дв҃це , ра́дꙋисѧ невѣ́стᲂ неневѣ́стнаѧ .

кᲂнда́къ . гла́съ , ѕ҃ . Не и҆́мамы и҆ны́ѧ по́мᲂщи , не и҆́мамы и҆ны́ѧ наде́жды , ра́звѣ тебѐ влⷣчце . ты̀ на́мъ пᲂмᲂзѝ , на тебе́ сѧ надѣ́емъ , и҆ тᲂбо́юсѧ хва́лимъ , твᲂи́ бᲂ є҆смы̀ рабѝ , дасѧ̀ непᲂстыди́мъ . дрꙋгі́и , кᲂнда́къ . гла́съ , то́йже . Застꙋ́пнице хрⷭ҇тїа́нѡмъ непᲂсты́днаѧ , хᲂда́таице къ твᲂрцꙋ̀ непрело́жнаѧ , непре́зри грѣ́шныхъ мᲂле́нїѧ гла́сы , нᲂ пред̾варѝ ꙗ҆́кѡ бла́га на́ пᲂмᲂщь на́шꙋ , вѣ́рнѡ вᲂпїю́щихъ тѝ . ᲂу҆скᲂрѝ на мᲂли́твꙋ , и҆ пᲂтщи́сѧ на ᲂу҆мᲂле́нїе , застꙋпа́ющи прⷭ҇нѡ бцⷣе чтꙋ́щихъ тѧ̀ . и҆́кᲂсъ . Прᲂстрѝ дла́ни свᲂѝ и҆́маже всѣ́хъ влⷣкꙋ ꙗ҆́кѡ млⷣнца прїѧ́тъ , за мно́жествᲂ бл҃гᲂсти , не ѡ҆ста́ви на́съ всегда̀ надѣ́ющихсѧ натѧ̀ . бо́дренᲂю сѝ мл҃твᲂю , и҆ неи҆сче́тнᲂю прᲂсты́нею ᲂу҆ще́дри на́съ , и҆ пᲂда́ждь дш҃а́мъ на́шимъ млрⷭ҇дїе свᲂѐ во́ вѣки и҆стᲂча́ющи . тебе́ бᲂ и҆́мамы грѣ́шнїи застꙋ́пницꙋ , ѿ нахᲂдѧ́щихъ наны̀ бѣ́дъ и҆ ѕѡ́лъ . нᲂ ꙗ҆́кѡ и҆мꙋ́щи млрⷭ҇дїѧ щедро́ты , ᲂу҆скᲂрѝ на мл҃твꙋ , и҆ пᲂтщи́сѧ на ᲂу҆мᲂле́нїе , застꙋпа́ющи прⷭ҇нѡ бцⷣе чтꙋ́щихъ тѧ̀ .

пѣ́снь , з҃ . і҆рмо́съ . Непᲂслꙋжи́ша тва́ри бг҃ᲂмꙋ́дрїи па́че зижди́телѧ , нᲂ ѻ҆́гненнᲂе преще́нїе , мꙋ́жески пᲂпра́вше ра́дᲂвахꙋсѧ пᲂю́ще , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ блгⷭ҇ве́нъ є҆сѝ . Ра́дꙋисѧ , ра́дꙋисѧ бцⷣе ѻ҆диги́трїе , всѣ́хъ и҆ всегда̀ наставлѧ́ющи вѣ́рныхъ , ше́ствᲂвати кᲂ всѧ́кᲂмꙋ пꙋтѝ спасе́нᲂмꙋ . ра́дꙋисѧ влⷣчце , тᲂбо́ю бᲂ прⷭ҇нѡ и҆збавлѧ́емсѧ , настᲂѧ́щїѧ ва́рварскїѧ бѣды̀ . Ра́дꙋисѧ , ра́дꙋисѧ ѻ҆диги́трїе , бдѧ́щи и҆ мᲂлѧ́щисѧ ѡ҆ на́съ к̾ бг҃ꙋ , и҆ всѧ́кїѧ ѕло́бы хᲂда́тайствᲂмъ ти , всѧ́ческихъ скᲂрбе́й бг҃ᲂрᲂди́тельнице , всѣ́хъ люде́й и҆збавлѧ́ющи . Ра́дꙋисѧ , ра́дꙋисѧ прест҃а́ѧ ѻ҆диги́трїе , и҆́же прᲂше́нїѧ на́ша к̾ по́льзѣ на́мъ и҆спᲂлнѧ́ющи , и҆ хᲂтѧ́щи всѣ́мъ прⷭ҇нѡ всегда̀ любᲂдрꙋ́жнᲂе бл҃го́е є҆ди́нствᲂ , спѣ́шнᲂе же вᲂ и҆зѧ́щныхъ . Ра́дꙋисѧ , ра́дꙋисѧ кᲂрабле́мъ ѻ҆диги́трїе , нꙋ́жнѡ пла́вающимъ , и҆збавлѧ́ющи вѣ́рныхъ , и҆ всѣ́мъ и҆збавле́нїе ѿ всѧ́кїѧ ско́рби , и҆ недꙋ́ги пестро́тныѧ , и҆ ме́дленыѧ разрѣша́ющи вско́рѣ .

пѣ́снь , и҃ . і҆рмо́съ . Ѻ҆́трᲂки бл҃гᲂчести́выѧ в̾ пещѝ , ржⷭ҇тво̀ бг҃ᲂро́диче спасло̀ є҆́сть . тᲂгда̀ ᲂу҆́бѡ ѡ҆бразꙋ́емᲂ , ны́нѣ же дѣ́йствꙋемᲂ , вселе́ннꙋю всю̀ вᲂз̾дви́же пѣ́ти , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . Ра́дꙋисѧ всебл҃гᲂслᲂве́наѧ мр҃і́е , и҆з̾ тебе́ бᲂ всеблгⷭ҇ве́ныи бг҃ъ ѡ҆дѣ́ѧсѧ , вᲂ всего́ мѧ чл҃ка , и҆ ѡ҆дѣ́ѧвсѧ сᲂє҆динѝ свᲂемꙋ̀ бжⷭ҇твꙋ̀ , неи҆зрече́ннымъ сᲂє҆дине́нїемъ , дв҃ᲂ ѻ҆диги́трїе . ра́дꙋисѧ ѡ҆бра́дᲂваннаѧ , ра́дᲂсте всего̀ ми́ра . Ра́дꙋисѧ лꙋка́выхъ дх҃о́въ прᲂгᲂни́тельнице , ра́дꙋисѧ бцⷣе ѻ҆диги́трїе . ра́дꙋисѧ , ꙗ҆́кѡ тебѐ нбⷭ҇наѧ неви́димаѧ во́инства славᲂсло́вѧтъ всегда̀ , и҆ велича́ютъ ꙗ҆́кѡ мт҃рь бж҃їю бы́вшꙋю . ра́дꙋисѧ ꙗ҆́же ни́жнѧѧ сᲂчета́вши с̾ вы́шними . Ра́дꙋисѧ всѣ́хъ нбⷭ҇ныхъ си́лъ без̾ разсꙋжде́нїѧ превᲂсхᲂдѧ́щаѧ , ра́дꙋисѧ ѻ҆диги́трїе , ра́дꙋисѧ всѧ́кїѧ тва́ри , бг҃а ро́ждьшаѧ гдⷭ҇ьствꙋющи , є҆́й влⷣчце всепѣ́таѧ . ра́дꙋисѧ пребыва́еши дв҃ᲂю чⷭ҇таѧ и҆ пᲂ ржⷭ҇твѣ̀ . Ра́дꙋисѧ жена́мъ всѣ́мъ сла́вᲂ , хра́ме преѡ҆сщ҃е́нныи бг҃а на́шегѡ , ра́дꙋисѧ ѻ҆диги́трїе , ра́дꙋисѧ дш҃еспаси́тельнаѧ все́й вселе́ннѣй . ра́дꙋисѧ пᲂкрыва́ющїи ѻ҆́блаче небе́съ ши́ршаѧ . ра́дꙋисѧ мирᲂпᲂло́жнице , бжⷭ҇твеннагѡ ми́ра пᲂлна̀ .

пѣ́снь , ѳ҃ . і҆рмо́съ . Всѧ́къ зе́менъ , да взыгра́етсѧ дх҃ᲂмъ прᲂсвѣща́емъ . да ликᲂвствꙋ́етъ же , беспло́тныхъ ᲂу҆мо́въ є҆стество̀ , пᲂчита́ѧ ст҃о́е тᲂржество̀ бж҃їѧ мт҃ре . и҆ да пᲂе́тъ , ра́дꙋисѧ пребл҃же́ннаѧ , бцⷣе чи́стаѧ прⷭ҇нѡ дв҃ᲂ . Ра́дꙋисѧ свѣщѐ , свѣ́тъ невече́рнїи пᲂне́сшаѧ , и҆ в̾ ржⷭ҇твѣ̀ твᲂе́мъ мнᲂгᲂбо́жїѧ тмꙋ̀ разрꙋши́вшаѧ , и҆ а҆́дᲂвы про́пасти и҆зба́вльшаѧ лю́ди . ра́дꙋисѧ ѻ҆диги́трїе бцⷣе , дᲂбро́тъ всѣ́хъ пред̾хᲂда́таице . Ра́дꙋисѧ землѐ , и҆з̾ неѧ́же кла́съ прᲂзѧ́бшїи нбⷭ҇ныи вѣ́рнымъ , и҆ ми́ра всегѡ̀ дш҃егꙋ́бнагѡ гла́да и҆зба́ви , разꙋ́мнаѧ и҆ ѡ҆дш҃евле́наѧ . ѽ ра́дꙋисѧ винᲂгра́де , и҆́же гро́здъ живо́тныи ро́ждьшаѧ , бцⷣе чи́стаѧ ѻ҆диги́трїе . Ра́дꙋисѧ та́йныхъ цвѣто́въ , прекра́сныи сꙋ́щїи раю̀ . ра́дꙋисѧ мт҃и дв҃ᲂ , неви́димыхъ ра́зꙋмъ , чистᲂто́ю страннᲂлѣ́пнѡ пᲂбѣ́ждьши бг҃ᲂрᲂди́тельнице . ра́дꙋисѧ ѻ҆трᲂкᲂви́це , ра́дꙋисѧ ѻ҆диги́трїе , всеми́рнᲂе чꙋ́дᲂ и҆ слы́шанїе . Лѣ́тᲂ живᲂта̀ на́шегѡ , про́чее сᲂхранѝ неврежде́нѡ , пᲂмᲂже́нїемъ твᲂи́мъ дв҃ᲂ ѻ҆трᲂкᲂви́це . и҆ спᲂдо́би кᲂне́цъ бл҃гі́и пᲂлꙋчи́ти на́мъ , вᲂспѣва́ющимъ тѧ и҆ взыва́ющимъ , ра́дꙋисѧ всебл҃же́ннаѧ бцⷣе чⷭ҇таѧ ѻ҆диги́трїе .

Дᲂсто́йнѡ є҆́сть .

свѣти́ленъ . Да пᲂчте́тсѧ всепѣ́таѧ мт҃и бж҃їѧ , жи́знь сꙋ́щꙋю ро́ждьши хрⷭ҇та̀ бг҃а на́шегѡ . ра́йскимъ двере́мъ ѿверзе́нїе , всегѡ̀ ми́ра ѡ҆чище́нїе , къ живᲂтꙋ̀ вᲂз̾веде́нїе . се́й є҆́сть прⷪ҇рки гл҃анныи . тᲂмꙋ̀ пᲂклᲂни́мсѧ бг҃ꙋ и҆ сп҃сꙋ дш҃а́мъ на́шимъ . сла́ва , и҆ ны́нѣ . Прїидѣ́те вѣ́рнїи с̾ чи́стᲂю со́вѣстїю , вᲂз̾вели́чимъ мт҃рь бг҃а на́шегѡ , чꙋ́днꙋю и҆ко́нꙋ . и҆ бжⷭ҇твенагᲂ младе́нца сп҃са хрⷭ҇та̀ , є҆го́же ꙗ҆́кѡ ро́ждьшаѧ на рꙋкꙋ̀ нᲂси́вши , и҆ ма́терне дерзнᲂве́нїе к̾ немꙋ̀ и҆мꙋ́щи , непреста́ннѡ мо́литъ заны̀ , и҆ пᲂдае́тъ рабо́мъ свᲂи́мъ бᲂга́тыѧ ми́лᲂсти .

На хвали́тѣхъ , стⷯры . гла́съ , а҃ . Наста́вницꙋ тѧ̀ заблꙋ́ждьшимъ , и҆ приста́нище спаси́тельнᲂ , в̾ пꙋчи́нѣ влⷣчце и҆ в̾ бꙋ́ри , вᲂ и҆скꙋше́нїи и҆ печа́лѣхъ , хрⷭ҇то́съ всѣ́мъ пᲂказа̀ , сн҃ъ тво́й и҆ бг҃ъ , вѣ́рнѡ прихᲂдѧ́щимъ тѝ . є҆го́же мᲂлѝ ѿ ѕлы́хъ бѣ́дъ и҆зба́витисѧ , вѣ́дѧщимъ тѧ̀ бцⷣꙋ , вᲂи́стинꙋ наста́вницꙋ . вⷤ . Тлѣ́нїе и҆ бᲂлѣ́знь пᲂтреби́ла є҆сѝ всепѣ́таѧ , дре́внюю всю̀ ржⷭ҇тво́мъ свᲂи́мъ . живо́тъ бᲂ ми́рꙋ ро́ждьши , сме́рть разрꙋши́вша . и҆ бᲂлѣ́зни бл҃га́ѧ и҆сцѣлѧ́еши , вѣ́рнѡ тво́й чꙋде́сныи ѻ҆́бразъ вᲂспѣва́ющихъ , и҆ любо́вїю кла́нѧющихсѧ , и҆ чтꙋ́щихъ тѧ̀ чи́стꙋю наста́вницꙋ . Ꙗ҆́кѡ и҆сто́чника тѧ̀ всепѣ́таѧ живᲂта̀ свѣ́мы , и҆ ꙗ҆́кѡ чꙋдесе́мъ тѧ̀ пᲂда́телѧ и҆ цѣльба́мъ , страсте́мъ же дш҃е́внымъ и҆ тѣле́снымъ , ꙗ҆́кѡ ско́рᲂе ѡ҆ставле́нїе , млⷭ҇ти и҆ щедро́тъ неи҆з̾черпа́емᲂе мо́ре вѣ́дѧще , тебѣ̀ припа́даемъ всѝ , прᲂсѧ́ще ѿ ско́рби раз̾рѣше́нїѧ , и҆ бꙋ́дꙋщагѡ мꙋче́нїѧ .

сла́ва , и҆ ны́нѣ . гла́съ , и҃ . И҆́же на херꙋви́мѣхъ є҆́здѧи , и҆ пѣва́емыи ѿ серафи́мъ , сᲂше́лъ є҆сѝ с̾ нб҃сѐ пррⷪ҇чески бл҃же , и҆ всели́сѧ вᲂꙋтро́бꙋ чи́стꙋ . ю҆́же а҆́нг҃ли вᲂспѣ́ша та́йнѡ , ра́дꙋисѧ ра́дᲂстнаѧ дв҃ᲂ , неѡ҆бьѧ́тнагᲂ ꙗ҆́кѡ бг҃а во́ чревѣ свᲂе́мъ прїе́мши па́че сло́ва , ѿ невѣ́рїѧ в̾ вѣ́рꙋ ми́ра превᲂдѧ́ща . сла́ва тебѣ̀ хрⷭ҇тѐ , є҆ди́не млⷭ҇тиве и҆ чл҃кᲂлю́бче .

Славᲂсло́вїе вели́кᲂе , и҆ ѿпꙋ́стъ .

На литꙋргі́и , бл҃же́нна , ѿ кано́на , пѣ́снь г҃ ѧ , и҆ ѕ҃ ѧ , на и҃ .

Пᲂ вхо́дѣ , а҆́ще ли хра́мъ гдⷭ҇ьскїи : трᲂпа́рь , хра́мꙋ , и҆ пра́здникꙋ . сла́ва , кᲂнда́къ , хра́мꙋ . и҆ ны́нѣ , пра́здникꙋ .

Пᲂ вхо́дѣ , а҆́ще ли хра́мъ бцⷣѣ , и҆лѝ ст҃ы́мъ : трᲂпа́рь , пра́здникꙋ . сла́ва , и҆ ны́нѣ . кᲂнда́къ , пра́здникꙋ .

прᲂки́менъ , пѣ́снь бцⷣы . Вели́читъ дш҃а мᲂѧ̀ гдⷭ҇а , и҆ вᲂз̾ра́дᲂвасѧ дх҃ъ мо́й ѡ҆́ бз҃ѣ сп҃сѣ мᲂе́мъ . сти́хъ . ꙗ҆́кѡ призрѣ̀ на смире́нїе рабы̀ свᲂеѧ̀ , се́бᲂ ѿ нн҃ѣ бл҃жа́тъ мѧ всѝ ро́ди . а҆пⷭ҇лъ , къ= є҆вре́ѡмъ . зача́лᲂ , т҃к . =а҆ллилꙋ́їѧ . Слы́ши дщѝ и҆ ви́ждь , и҆ приклᲂнѝ ᲂу҆́хᲂ твᲂѐ . сти́хъ . лицꙋ̀ твᲂемꙋ̀ пᲂмо́лѧтсѧ бᲂга́тїи лю́дьстїи . є҆ѵⷢ҇а́лїе , ѿ =лꙋкѝ . зача́лᲂ , н҃д . прича́стенъ , ч=а́шꙋ спасе́нїѧ прїимꙋ̀ и҆ и҆́мѧ гдⷭ҇не призᲂвꙋ̀ .