МЦⷭ҇А И҆Ю́ЛѦ ВЪ Ѕ҃І ДН҃Ь

Па́мѧть ст҃ы́хъ шести́хъ сᲂбо́ръ . =Вѣ́дᲂмᲂ да є҆́сть , ꙗ҆́кѡ сїѧ̀ слꙋ́жба ст҃ы́хъ ѻ҆ц҃ъ . а҆́ще слꙋчи́тсѧ , ѕ҃і число̀ в̾ сре́дꙋ . пᲂе́тсѧ сᲂбо́ръ и҆́хъ , в̾ мимᲂше́дшꙋю недѣ́лю . а҆́ще ли слꙋчи́тсѧ , ѕ҃і число̀ в̾ четверто́къ . то̀ пᲂе́тсѧ слꙋ́жба , ст҃ы́хъ ѻ҆ц҃ъ в̾ прихᲂдѧ́щꙋю нлⷣю .= Ве́черъ , на вели́цѣй вече́рни . =На гдⷭ҇и вᲂзва́хъ , стихѣ́ры вᲂскрⷭ҇ны , на д҃ . и҆ ст҃ы́мъ ѻ҆ц҃е́мъ , на́ ѕ҃ . гла́съ , ѕ҃ . И҆́з̾ чрева рᲂди́сѧ пре́жде денни́цы , ѿ ѻ҆ц҃а без̾ мт҃ре пре́жде вѣ́къ . а҆́ще и҆ а҆́рїи тва́рь тѧ̀ а҆ не бг҃а сла́витъ , де́рзᲂстїю примѣща́ѧ тѧ зижди́телѧ тваре́мъ несмы́сленᲂ , ве́щь ѻ҆гню̀ вѣ́чнᲂмꙋ себѐ со́бравъ . нᲂ сᲂбо́ръ и҆́же в̾ нике́и , сн҃а бж҃їѧ тѧ̀ прᲂпᲂвѣ́да гдⷭ҇и , вели́кїѧ ра́ди твᲂеѧ̀ ми́лᲂсти . Раз̾дра́нꙋю хрⷭ҇то́вꙋ ри́зꙋ , и҆ разтерза́нꙋю пе́сїими челюстьмѝ , мꙋ́дрѣ сши́сте честні́и ѻ҆ц҃ы , зрѣ́ти нагᲂтꙋ̀ сегѡ̀ ника́кᲂже терпѧ́ще , ꙗ҆́кᲂже си́мъ и҆ а҆фе́тъ ѻ҆те́ческꙋю дре́вле , пᲂсрами́сте несмы́сленагѡ , и҆ тᲂгѡ̀ є҆динᲂмы́сленики , а҆́рїѧ гнѣ́вꙋ тезᲂи҆мени́тагѡ . Македо́нѧны , и҆ несто́рїѧны , и҆ є҆втихі́ѧны , и҆ дїѡско́рѧны , а҆пᲂлинарїа́ны же , и҆ савелїа́ны , и҆ севи́рѧны , во́лки тѧ́жкїѧ прише́дшїѧ в̾ ко́жахъ ѻ҆́вчїихъ , дале́че ѿ ста́да сп҃сᲂва , ꙗ҆́кᲂже и҆́стиннїи па́стырїе ѿгна́сте . на́ги ѿ ко́жь ѻ҆́вчїихъ треѻ҆каѧ́нныѧ , пᲂста́вльше и҆зрѧ́днѣ . тѣ́мже вы̀ ᲂу҆блажа́емъ . =сла́ва . гла́съ , то́йже . Та́йныѧ дне́сь дх҃а трꙋбы̀ , бг҃ᲂно́сныѧ ѻ҆ц҃ы вᲂсхва́лимъ , вᲂспѣ́вшїѧ пᲂсредѣ̀ цр҃кве , гла́съ пᲂдо́бенъ бг҃ᲂсло́вїѧ , трⷪ҇цꙋ є҆ди́нꙋ непремѣ́ннꙋю , сꙋщество́мъ же и҆ бжⷭ҇тво́мъ , низ̾лᲂжи́тели а҆́рїевы , и҆ правᲂсла́вныхъ пᲂбо́рники , мᲂлѧ́щїѧсѧ всегда̀ гдⷭ҇ви , пᲂми́лᲂватисѧ дш҃а́мъ на́шимъ . и҆ ны́нѣ , бг҃ᲂро́диченъ , пе́рвыи гла́сꙋ . вы́хᲂдъ , прᲂки́менъ , дню̀ .

Ѿ= бытїѧ̀ , чте́нїе .=

Слы́шавъ а҆враа́мъ , ꙗ҆́кѡ плѣне́нъ бы́сть ло́тъ сн҃ъ бра́та є҆гѡ̀ . и҆ и҆зᲂчтѐ дᲂмᲂча́децъ свᲂи́хъ , три́ста и҆ ѻ҆смьна́десѧть , и҆ пᲂгна̀ вᲂслѣ́дъ и҆́хъ дᲂ да́на . и҆ нападѐ на нѧ̀ но́щїю са́мъ и҆ ѻ҆́трᲂцы є҆гѡ̀ с̾ ни́мъ , и҆ пᲂразѝ и҆́хъ . и҆ гᲂнѝ и҆́хъ дᲂ хᲂва́ла , є҆́же є҆́сть ѡ҆шꙋ́ю дама́ска , и҆ вᲂзвратѝ всѧ̀ кᲂнѝ сᲂдо́мскїѧ , и҆ лѡ́та сн҃а бра́та свᲂегѡ̀ вᲂз̾вратѝ , и҆ всѧ̀ и҆мѣ́нїѧ є҆гѡ̀ , и҆ жены̀ , и҆ лю́ди . и҆зы́де же ца́рь сᲂдо́мскїи в̾ срѣ́тенїе є҆мꙋ̀ , пᲂ вᲂз̾враще́нїи є҆гѡ̀ ѿ сѣ́ча хᲂдᲂлᲂгᲂмо́рскагѡ , и҆ ца́рїе и҆́же с̾ ни́мъ , вᲂ ю҆до́ль са́винꙋ , се́же бѧ́ше по́ле цр҃е́вᲂ . и҆ мелхиседе́къ цр҃ь сали́мскїи и҆знесѐ хлѣ́бы и҆ вино̀ , бѣ́ бᲂ сщ҃е́нникъ бг҃а вы́шнѧгѡ . и҆ бл҃гᲂслᲂвѝ а҆враа́ма , и҆ речѐ , бл҃гᲂслᲂве́нъ а҆враа́мъ бг҃ᲂмъ вы́шнимъ , и҆́же сᲂзда̀ нб҃ᲂ и҆ зе́млю . и҆ бл҃гᲂслᲂве́нъ бг҃ъ вы́шнїи , и҆́же предадѐ врагѝ твᲂѧ̀ пᲂд̾рꙋ́чники тебѣ̀ .

Ѿ= втᲂра́гѡ зако́на , чте́нїе .=

Во́ дни ѻ҆ны̀ , речѐ мѡѷсе́й къ сн҃ᲂвѡ́мъ і҆и҃левᲂмъ , ви́дите , сѐ преда́хъ пред̾ лице́мъ ва́шимъ зе́млю , вше́дше наслѣ́дите зе́млю , ю҆́же клѧ́тсѧ гдⷭ҇ь ѻ҆ц҃е́мъ на́шимъ а҆враа́мꙋ и҆ и҆саа́кꙋ и҆ і҆а́кѡвꙋ да́ти и҆́мъ , и҆ сѣ́мени и҆́хъ пᲂ ни́хъ . и҆ реко́хъ ва́мъ во́ времѧ ѻ҆́нᲂ гл҃ѧ , невᲂз̾мᲂгꙋ̀ є҆ди́нъ вᲂди́ти ва́съ , гдⷭ҇ь бг҃ъ на́шъ ᲂу҆мно́жилъ вы̀ є҆́сть . и҆ сѐ є҆стѐ дне́сь ꙗ҆́кѡ ѕвѣ́зды нбⷭ҇ныѧ мно́жествᲂмъ . гдⷭ҇ь бг҃ъ ѻ҆ц҃ъ на́шихъ да прилᲂжи́тъ ва́мъ , ꙗ҆́кѡ да бꙋ́дете ты́сѧщами сꙋгꙋ́бѡ , и҆ да бл҃гᲂслᲂви́тъ ва́съ , ꙗ҆́кᲂже гл҃а ва́мъ . и҆ прїѧ́хъ ѿ ва́съ мꙋ́жы мꙋ́дры . и҆ хꙋдо́ги , и҆ разꙋми́чны , и҆ пᲂста́вихъ и҆́хъ ѡ҆блада́ти над̾ ва́ми , тысѧщенача́льники , и҆ стᲂнача́льники , и҆ пѧтьдесѧтᲂнача́льники , и҆ десѧтᲂнача́льники , и҆ кни́гчїѧ сꙋдїѧ́мъ ва́шимъ . и҆ запᲂвѣ́дахъ сꙋдїѧ́мъ ва́шимъ во́ времѧ ѻ҆́нᲂ гл҃ѧ , раз̾сꙋжда́йте пᲂсредѣ̀ бра́тїи ва́шеѧ . и҆ сꙋди́те пра́веднѡ пᲂсредѣ̀ мꙋ́жа , и҆ пᲂсредѣ̀ бра́тїи є҆гѡ̀ , и҆ пᲂсредѣ̀ прише́льца є҆гѡ̀ . непᲂз̾на́йте лица̀ в̾ сꙋдѣ̀ , ма́лᲂмꙋ и҆ вели́кᲂмꙋ сꙋ́диши , не ᲂу҆стыди́шисѧ лица̀ чл҃ча , ꙗ҆́кѡ сꙋ́дъ бж҃їи є҆́сть .

Ѿ= втᲂра́гѡ зако́на , чте́нїе .=

Во́ днехъ ѻ҆́нѣхъ , речѐ мѡѷсе́й к̾ сн҃ᲂвѡ́мъ і҆и҃левᲂмъ , сѐ гдⷭ҇а бг҃а твᲂегѡ̀ нб҃ᲂ , и҆ нб҃ᲂ нб҃сѐ , землѧ̀ и҆ всѧ̀ є҆ли́ка сꙋ́ть в̾ ни́хъ . ѻ҆ба́че ѻ҆ц҃ы ва́ша и҆збра̀ гдⷭ҇ь , люби́ти є҆гѡ̀ вᲂи́стинꙋ . и҆ и҆збра̀ сѣ́мѧ и҆́хъ пᲂ ни́хъ ва́съ па́че всѣ́хъ ꙗ҆зы́къ , по́ дни се́мъ ѡ҆брѣ́жите жестᲂсе́рдїе ва́ше , и҆ вы́ѧ ва́ша не ѡ҆жести́те к̾ тᲂмꙋ̀ . и҆́бᲂ гдⷭ҇ь бг҃ъ на́шъ , се́й бг҃ъ бг҃ѡ́мъ и҆ гдⷭ҇ь гдⷭ҇емъ . бг҃ъ вели́кїи , и҆ крѣ́пкїи , и҆ стра́шныи , и҆́же недиви́тсѧ лицꙋ̀ , нижѐ прїе́млетъ да́ра . твᲂрѧ̀ сꙋ́дъ прише́льцꙋ , и҆ си́рᲂмꙋ и҆ вдᲂви́цѣ . и҆ лю́битъ прише́льца , да́ти є҆мꙋ̀ хлѣ́бъ и҆ ри́зꙋ . гдⷭ҇а бг҃а твᲂегѡ̀ ᲂу҆бᲂи́шисѧ , и҆ тᲂмꙋ̀ є҆ди́нᲂмꙋ пᲂслꙋ́жиши , и҆ к̾ немꙋ̀ прилѣпи́шисѧ , и҆ и҆́менемъ є҆гѡ̀ клене́шисѧ . то́й хвала̀ твᲂѧ̀ , и҆ то́й бг҃ъ тво́й , и҆́же сᲂтвᲂри́лъ ти є҆́сть вели́каѧ и҆ сла́внаѧ сїѧ̀ , ꙗ҆́же ви́дѣста ѻ҆́чи твᲂѝ .

На литі́и , ѻ҆бы́чнѡ . сла́ва . гла́съ , г҃ . А҆пⷭ҇льскихъ преда́нїи , и҆звѣ́стнїи храни́теле бы́сте ст҃і́и ѻ҆ц҃ы . ст҃ы́ѧ бᲂ трⷪ҇цы є҆динᲂсꙋ́щїе правᲂсла́внѡ пᲂвелѣ́вше , а҆́рїевᲂ хꙋле́нїе сᲂбо́рнѣ низ̾лᲂжи́сте . с̾ ни́мже и҆ македо́нїѧ дꙋхᲂбо́рца и҆зъѡ҆бличи́вше ѡ҆сꙋди́сте , несто́рїѧ , и҆ є҆втихі́ѧ же и҆ дїѡско́ра , саве́лїѧ же и҆ севи́ра без̾гла́внагᲂ . и҆́хже пре́лести прᲂси́те и҆зба́витисѧ на́мъ , нескве́рненᲂ на́ше житїѐ , в̾ вѣ́рѣ сᲂхрани́ти мо́лимсѧ . и҆ ны́нѣ , боⷢ҇ . Без̾ сѣ́мене ѿ бжⷭ҇твеннагѡ дх҃а , во́лею ᲂу҆́бѡ ѻ҆ц҃а , зачала̀ є҆сѝ сн҃а бж҃їѧ , ѿ ѻ҆ц҃а без̾ мт҃ре , пре́жде вѣ́къ сꙋ́ща , на́съ же ра́ди и҆з̾ тебѐ без̾ ѻ҆ц҃а бы́вша , пло́тїю рᲂди́ла є҆сѝ , и҆ млⷣнца млеко́мъ пита́ла є҆сѝ . тѣ́мже непреста́й мᲂлѧ́щи , и҆зба́витисѧ ѿ бѣ́дъ дш҃а́мъ на́шимъ .

На стихо́внѣ , стⷯры , вᲂскрⷭ҇ны . сла́ва . гла́съ , д҃ . Мᲂле́бнꙋю па́мѧть дне́сь бг҃ᲂно́сныхъ ѻ҆ц҃ъ , є҆́же ѿ всеѧ̀ вселе́нныѧ сᲂбра́вшихсѧ , в̾ свѣ́тлѣмъ гра́дѣ никі́йстѣмъ , правᲂсла́вныхъ сᲂставле́нїѧ , бл҃гᲂче́ствꙋюще вѣ́рнѡ пра́з̾днꙋемъ . сі́и бᲂ лю́тагѡ а҆́рїѧ без̾бо́жнᲂе велѣ́нїе , бл҃гᲂче́стнѡ мꙋ́дренᲂ низ̾лᲂжи́ша . и҆ ѿ сᲂбо́рныѧ цр҃кве , сᲂбо́рнѣ тᲂгѡ̀ и҆з̾гна́ша . и҆ ꙗ҆́снѡ сн҃а бж҃їѧ є҆динᲂсꙋ́щна и҆ сᲂприснᲂсꙋ́щна , и҆́же пре́жде вѣ́къ сꙋ́ща , всѧ̀ наꙋчи́ша и҆спᲂвѣ́дати въ вѣ́рнѣмъ ѻ҆́бразѣ . и҆з̾вѣ́стнᲂ и҆ бл҃гᲂче́стнᲂ тᲂгѡ̀ прᲂпᲂвѣ́давше . тѣ́мже и҆ мы̀ , бжⷭ҇твенымъ и҆́хъ пᲂвелѣ́нїемъ пᲂслѣ́дꙋюще , тве́рдѣ вѣ́рꙋюще слꙋ́жимъ , сᲂ ѻ҆ц҃е́мъ сн҃ꙋ и҆ дх҃ꙋ прест҃о́мꙋ , вᲂ є҆ди́нᲂмъ бжⷭ҇твѣ̀ , трⷪ҇цѣ є҆динᲂсꙋ́щнѣй . и҆ ны́нѣ , боⷢ҇ . Пᲂда́ждь ᲂу҆тѣше́нїе , свᲂи́мъ рабо́мъ всенепᲂро́чнаѧ , ᲂу҆тᲂлѧ́ющи лю́таѧ на ны̀ ѡ҆б̾стᲂѧ́нїѧ , всѧ́кїѧ ско́рби на́съ и҆з̾мѣнѧ́ющи . тѧ́ бᲂ є҆ди́нꙋ тве́рдᲂ и҆ и҆звѣ́стнѡ ѡ҆снᲂва́нїе и҆́мамы , и҆ твᲂѐ застꙋпле́нїе стѧжа́хᲂмъ , да непᲂстыди́мсѧ влⷣчце , тебѐ призыва́юще . пᲂтщи́сѧ на мл҃твꙋ тебѣ̀ вᲂпїю́щихъ , ра́дꙋисѧ влⷣчце всѣ́мъ пᲂмо́щнице , ра́дᲂсте и҆ пᲂкро́ве дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь : бцⷣе дв҃ᲂ ра́дꙋисѧ , вⷤ . трᲂпа́рь , ѻ҆ц҃е́мъ . гла́съ , и҃ . Препрᲂсла́вленъ є҆сѝ хрⷭ҇тѐ бж҃е на́шъ , и҆́же свѣти́ла на землѝ ѻ҆ц҃ы на́ша ѻ҆снᲂва́выи , и҆ тѣ́ми кᲂ и҆́стиннѣй вѣ́рѣ всѣ́хъ на́съ наста́вилъ є҆сѝ . мнᲂгᲂмлⷭ҇тиве сла́ва тебѣ̀ . аⷤ .

На ᲂу҆́трени , на бг҃ъ гдⷭ҇ь , трᲂпа́рь вᲂскрⷭ҇нъ , двⷤа . сла́ва , ѻ҆ц҃е́мъ . и҆ ны́нѣ , боⷢ҇ . пᲂ кафи́смахъ , сѣда́льны вᲂскрⷭ҇ны . =степе́нна . прᲂки́менъ . и҆ =є҆ѵⷢ҇а́лїе , вᲂскрⷭ҇нᲂ .

Кано́нъ вᲂскрⷭ҇нъ , сᲂ і҆рмᲂсо́мъ , на д҃ . и҆ крⷭ҇тᲂвᲂскрⷭ҇нъ , два̀ . и҆ бцⷣѣ , два̀ . и҆ ѻ҆ц҃е́мъ , на́ ѕ҃ .

Кано́нъ , ст҃ы́мъ ѻ҆ц҃е́мъ . твᲂре́нїе сщ҃е́ннагᲂ и҆ вселе́нскагᲂ патрїа́рха ки́ръ ге́рмана . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ .

запѣ́въ : Ст҃і́и ѻ҆ц҃ы , мᲂли́те бг҃а ѡ҆ на́съ . И҆́же ѿ никі́ѧ , ꙗ҆́кᲂже ѿ нѣ́кᲂегѡ нб҃сѐ , въ сю́дꙋ вᲂз̾гремѣ́вше , сло́вᲂ жива́гѡ ѻ҆ц҃а , и҆ сегѡ̀ пᲂказа́вше врагѝ гро́мᲂмъ и҆з̾бїе́ны , сщ҃е́нными слᲂвесы̀ да пᲂчтꙋ́тсѧ . Дꙋхᲂбо́рецъ дꙋ́ха лꙋка́вагѡ , ст҃ы́мъ дх҃ᲂмъ хрⷭ҇то́съ ѿ свᲂеѧ̀ цр҃кве дале́че ѿгна̀ . втᲂры́мъ дѣ́йствᲂмъ сᲂбо́ра сᲂвᲂкꙋпи́въ . сла́ва . Христᲂбо́рца пре́лесть и҆з̾гна̀ несто́рїѧ , кири́лъ сᲂбо́рꙋ нача́льникъ . и҆́же ꙗ҆́снѡ дв҃ꙋю мр҃і́ю , и҆спᲂвѣ́да бг҃ꙋ мт҃рь чⷭ҇тꙋю . и҆ нн҃ѣ , боⷢ҇ . Несо́зданныѧ трⷪ҇цы , є҆ди́нагᲂ хрⷭ҇та̀ , вᲂ двᲂю̀ є҆стествꙋ̀ и҆ хᲂте́нїю чи́стаѧ ражда́еши . сᲂє҆дине́нїе чл҃кѡмъ и҆ а҆́нг҃лѡмъ , тебѐ ра́ди сᲂдѣ́лавшагᲂ .

катава́сїѧ : Ѿве́рзꙋ ᲂу҆ста̀ мᲂѧ̀ .

пѣ́снь , г҃ . і҆рмо́съ . Нѣ́сть ст҃а . Тва́ри слꙋжи́тель ꙗ҆́вльсѧ , а҆́рїи безꙋ́мныи . македо́нїи па́ки ме́рзᲂкъ ꙗ҆́вльсѧ , въ гее́ннѣ ѻ҆́гненѣй , ра́внᲂ мꙋ́чатсѧ съ є҆́ллины . Седьми́ми сᲂбо́ры сщ҃е́нными ст҃ы́хъ ѻ҆ц҃ъ , честнꙋ́ю цр҃кᲂвь ᲂу҆ѧсни́лъ є҆сѝ хрⷭ҇тѐ . ꙗ҆́кᲂже седьми́хъ свѣти́льникъ свѣ́тᲂмъ , пре́лести тмꙋ̀ прᲂгна́въ дале́че . сла́ва . Ста́дᲂ пᲂгꙋблѧ́етъ твᲂѐ , мнᲂгᲂѡ҆бра́знаѧ кра́ста є҆рети́къ сло́ве . па́стырїе же твᲂи́хъ слᲂве́сныхъ ѻ҆ве́цъ , ᲂу҆че́нїемъ сїѐ премѣни́ша . и҆ ны́нѣ , боⷢ҇ . Є҆ди́нагѡ рᲂдила̀ є҆сѝ чи́стаѧ , ѿ несᲂзда́нныѧ трⷪ҇цы , вᲂ двᲂю̀ сꙋществꙋ̀ и҆ хᲂтѣ́нїю чи́стаѧ . є҆го́же ѻ҆́бразꙋ че́стнѡ пᲂклᲂнѧ́емсѧ , бл҃гᲂда́ти и҆спᲂлнѧ́емсѧ .

катава́сїѧ : Твᲂѧ̀ пѣвцы̀ .

кᲂнда́къ , и҆ и҆́кᲂсъ , вᲂскрⷭ҇нъ . сѣда́ленъ , гла́съ , д҃ . Свѣти́льницы пресвѣ́тлїи , и҆́стинѣ хрⷭ҇то́вѣ , ми́ръ прᲂсвѣ́щше ᲂу҆че́нїи ва́шими , ѻ҆ц҃ы бг҃ᲂвѣща́ннїи . пᲂпа́льше є҆́реси ѕлᲂсла́вныхъ хꙋ́льникъ . ᲂу҆га́сше ѻ҆гнепа́льнꙋю є҆рети́къ мᲂлвꙋ̀ . тѣ́мже ꙗ҆́кѡ ст҃ли хрⷭ҇то́вы , мᲂли́те спасти́сѧ на́мъ . двⷤа . сла́ва , и҆ ны́нѣ , боⷢ҇ . Ѡ҆б̾нᲂви́ла є҆сѝ чи́стаѧ бжⷭ҇твенымъ ржⷭ҇тво́мъ сѝ , и҆стлѣ́вшее страстьмѝ земленᲂро́дныхъ ме́ртвенᲂе сꙋщество̀ . и҆ вᲂз̾дви́гла є҆сѝ всѧ̀ ѿ сме́рти к̾ жи́зни нетлѣ́нїѧ . тѣ́мже тѧ̀ по́ дᲂлгꙋ ᲂу҆бл҃жа́емъ всѝ , дв҃ᲂ препрᲂсла́вленаѧ , ꙗ҆́кᲂже прᲂрекла̀ є҆сѝ .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла . Вразѝ твᲂѝ вᲂз̾шꙋмѣ́ша , и҆ ненави́дѧщїи тѧ̀ главꙋ̀ вᲂз̾двиго́ша сп҃се в̾ ма́лѣ . нᲂ а҆́бїе падо́ша , нетерпѧ́ще гласо́въ трꙋ́бъ дх҃о́вныхъ . Сл҃нца со́лнцеве , сꙋгꙋ́бѣ ѡ҆зари́ша , сн҃ъ и҆ дх҃ъ ѿ ѻ҆ц҃а , несᲂзда́нни сᲂбез̾нача́льни . ѻ҆бᲂи́мъ ѻ҆ц҃ъ є҆ди́нъ вино́венъ вѣ́рꙋетсѧ . сла́ва . Се́дмь ᲂу҆́бѡ дх҃ᲂвъ , на ни́хже пᲂчѝ , ѡ҆ хрⷭ҇тѣ̀ и҆са́їѧ сѐ речѐ . на седми́хъ же сᲂбо́рѣхъ пᲂчѝ хрⷭ҇то́съ , сᲂ ѻ҆ц҃е́мъ и҆ бжⷭ҇твенымъ дх҃ᲂмъ . и҆ ны́нѣ , боⷢ҇ . Бг҃а рᲂдила̀ є҆сѝ пло́ть нᲂси́вшагѡ , ѿ чи́стыхъ тѝ крᲂве́й ѻ҆трᲂкᲂви́це чи́стаѧ . є҆го́же сꙋгꙋ́ба є҆стество́мъ , въ сᲂста́вѣ же є҆ди́нᲂмъ , ѻ҆ц҃ы прᲂпᲂвѣ́даша .

катава́сїѧ : Сѣдѧ́и вᲂ сла́вѣ .

пѣ́снь , є҃ . і҆рмо́съ . Бж҃їимъ свѣ́тᲂмъ . Бжⷭ҇твеныи винᲂгра́дъ хрⷭ҇то́въ , и҆́же ѿ є҆ги́пта пренесѐ . те́мнагᲂ ѿча́ѧнна гꙋби́телѧ звѣ́рїе , пе́рьвѣе пᲂѧда́хꙋ . пра́щею же ѻ҆ц҃ъ дале́че ѿгна́шасѧ . Бжⷭ҇твенымъ сїѧ́нїемъ трисїѧ́ннымъ , ᲂу҆́мъ прᲂсвѣ́щше честні́и ѻ҆ц҃ы , є҆ди́нагѡ прᲂпᲂвѣ́даша чⷭ҇тны́ѧ трⷪ҇цы хрⷭ҇та̀ гдⷭ҇а , сꙋгꙋ́ба є҆стество́мъ и҆ хᲂтѣ́нїи . сла́ва . Въ ве́щныхъ , ꙗ҆́кᲂже в̾ серафи́мскихъ , мꙋ́дрыми ѻ҆ц҃ы ѽ трⷪ҇це , цр҃кви ѡ҆небеси́сѧ . трист҃ꙋ́ю пѣ́снь при́снѡ тебѣ̀ пᲂю́щи , сᲂбира́етъ тро́ическᲂе твᲂѐ є҆ди́нᲂ бжⷭ҇тво̀ . и҆ ны́нѣ , боⷢ҇ . Мт҃и и҆ раба̀ свᲂегѡ̀ сн҃а бы́сть чи́стаѧ . и҆́бᲂ и҆́же и҆з̾ тебѐ пре́жде тебѐ бѧ́ше , ꙗ҆́кѡ сᲂдѣ́тель тво́й . є҆го́же вᲂ двᲂю̀ сꙋществꙋ̀ пᲂзнава́емъ , сᲂє҆динѧ́емъ же сло́вᲂмъ сᲂста́внымъ .

катава́сїѧ : Оу҆диви́шасѧ всѧ́ческаѧ .

пѣ́снь , ѕ҃ . і҆рмо́съ . Жите́йскагѡ мо́рѧ . Бг҃ъ бг҃о́мъ гдⷭ҇ь , давы́дъ пре́жде вᲂспѣ́тъ глаго́лѧ , и҆ призва̀ ѿ вᲂсто́къ , ѿ кᲂне́цъ всеѧ̀ землѝ , да́же дᲂ за́падъ и҆́хъ . вселе́нскихъ сᲂбо́ръ ѻ҆ц҃ъ назнаменꙋ́ѧ . Се́дмь сто́лпъ ᲂу҆твердѝ , премꙋ́дрᲂсть бж҃їѧ твᲂю̀ цр҃кᲂвь влⷣкᲂ , седмᲂчи́слеными сᲂбо́ры сщ҃е́нныхъ ѻ҆ц҃ъ . не ᲂу҆клᲂни́мꙋ сᲂблюдо́мꙋ , ѿ всѧ́кихъ є҆ресе́й . сла́ва . Стꙋ́дъ лица̀ да пᲂкры́етъ , є҆вти́ха и҆ дїѡско́ра , слїѧ́нїе блѧ́дьствᲂвавшихъ є҆стества̀ хрⷭ҇то́ва . не в̾ привидѣ́нїи бᲂ , нᲂ вᲂ ѡ҆бᲂже́нїи , є҆стество̀ земны́хъ прїѧ́тъ . и҆ ны́нѣ , боⷢ҇ . Да во́зметсѧ несто́рїи , въ є҆вре́йскїѧ те́мныѧ сᲂбо́ры , и҆ ꙗ҆зы́къ да ѿсѣче́тсѧ хꙋ́льныи . бг҃а бᲂ рᲂдѝ дв҃а мр҃і́ѧ , плᲂтᲂно́сца на́мъ .

катава́сїѧ : Бжⷭ҇твенᲂе сѐ и҆ всечестно́е .

кᲂнда́къ . гла́съ , и҃ . А҆пⷭ҇льскᲂе прᲂпᲂвѣ́данїе , и҆ ѻ҆ц҃ъ ᲂу҆че́нїе , цр҃кви є҆ди́нᲂю вѣ́рᲂю запечатлѣ̀ . и҆ ри́зꙋ нᲂсѧ́щи и҆́стинѣ , и҆стка́ннꙋю ѿ вы́шнѧгѡ бг҃ᲂсло́вїѧ . и҆справлѧ́етъ и҆ сла́витъ , бл҃гᲂче́стїѧ вели́кᲂе та́иньствᲂ . и҆́кᲂсъ . Высо́кимъ прᲂпᲂвѣ́данїемъ , бж҃їю цр҃кᲂвь ᲂу҆слы́шимъ вᲂпїю́щꙋ , жа́ждаи да прїи́детъ кᲂ мнѣ̀ и҆ пїе́тъ . ча́ша ю҆́же держꙋ̀ , ча́ша є҆́сть премꙋ́дрᲂсти . сїѐ пи́вᲂ , и҆́стиннᲂе сло́вᲂ пᲂчерпо́хъ . во́дꙋ прᲂлива́ю непрекᲂсло́вїѧ , нᲂ и҆спᲂвѣ́данїѧ . є҆ѧ́же пїѧ̀ ны́нѣшнїи і҆и҃ль , бг҃а зри́тъ вѣща́юща . ви́дите ви́дите , ꙗ҆́кѡ са́мъ а҆́зъ є҆́смь , и҆ непремѣнѧ́юсѧ . а҆́зъ бг҃ъ пе́рвыи , а҆́зъ же и҆ пᲂси́хъ . и҆ ра́звѣ менѐ нѣ́сть и҆но́гѡ ѿ ню́дъ . ѿ сю́дꙋ прїе́мшїи насы́тѧтсѧ , и҆ вᲂсхва́лѧтъ бл҃гᲂче́стїѧ вели́кᲂе та́иньствᲂ .

пѣ́снь , з҃ . і҆рмо́съ . Хладᲂда́тельнꙋ ᲂу҆́бѡ пе́щь . Вавило́нскагᲂ ᲂу҆́бѡ ѕмі́ѧ , раз̾разѝ данїи́лъ пе́рвѣе . мᲂли́тва же ѻ҆ц҃ъ , прᲂсадѝ лю́тагᲂ є҆ги́петскагᲂ ѕмі́ѧ , ꙗ҆́вѣ пᲂѧда́ющагᲂ хрⷭ҇то́вᲂ ста́дᲂ а҆́рїѧ . Непрᲂще́ннымъ нече́стїемъ недꙋ́гᲂва , во́лкъ македо́нїи , прирази́всѧ ѡ҆бᲂжа́ющемꙋ дꙋ́хꙋ чл҃ки , и҆ всѧ̀ ба́нею креще́нїѧ , на пе́рвꙋю дᲂбро́тꙋ вᲂѡ҆бража́ющꙋ вѣ́рныѧ . сла́ва . Дїᲂско́ръ , и҆ є҆вти́хъ , и҆ севи́ръ , левїафа́нъ , трїѐ слива́ющїи и҆ смѣша́ющїи хрⷭ҇то́ва сꙋ́щества , смѣше́нїемъ ᲂу҆́мнымъ , к̾ трⷪ҇цѣ че́стнѣй прирази́шасѧ де́рзᲂстнѡ . и҆ ны́нѣ , боⷢ҇ . Плᲂтьска́гѡ ти зра́ка ѻ҆́бразъ влⷣкᲂ , че́стнѡ ѡ҆блᲂбыза́емъ , и҆ мт҃ре твᲂеѧ̀ , и҆ ст҃ы́хъ всѣ́хъ . по́честь вѣ́дѧще пра́вымъ по́мыслᲂмъ , прехᲂди́ти до́брѣ къ первᲂѡ҆бра́знᲂмꙋ .

катава́сїѧ : Непᲂслꙋжи́ша тва́ри .

пѣ́снь , и҃ . і҆рмо́съ . И҆з̾ пла́мени ст҃ы́мъ . Ꙗ҆́кᲂже ѿ є҆ди́нагѡ ко́рене , ѿ́расли бг҃ᲂса́дны , сн҃ъ и҆ дх҃ъ вᲂсїѧ́ша . и҆́бᲂ ѻ҆ц҃ъ є҆динᲂвино́венъ є҆́сть , без̾лѣ́тныи , без̾лѣ́тнымъ лица́мъ є҆динᲂче́стенъ . И҆́з̾ чрева невеще́ствена , без̾лѣ́тнѡ вᲂсїѧ́лъ є҆сѝ , є҆динᲂсꙋ́щнᲂе сло́вᲂ ѻ҆ц҃ꙋ и҆ дх҃ᲂви . нᲂ на́съ ра́ди , в̾ лѣ́тнꙋю всели́сѧ веще́ственꙋю ᲂу҆тро́бꙋ , є҆ди́ныѧ бцⷣы . блгⷭ҇ви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Раждьже́ныѧ стрѣ́лы ѻ҆гне́мъ дх҃о́внымъ , в̾ стꙋ́днаѧ срⷣца̀ враго́мъ вᲂнзо́шасѧ є҆ретико́мъ . и҆ на сме́рть ᲂу҆дави́ша , сᲂвᲂкꙋпле́нїѧ ѻ҆ц҃ъ , седмᲂчи́сленѡ бжⷭ҇твеныхъ . и҆ ны́нѣ , боⷢ҇ . Не лицы̀ є҆ди́нагᲂ хрⷭ҇та̀ сла́вимъ . несмѣше́нїемъ сꙋщества̀ сего̀ сᲂє҆динѧ́емъ . є҆ди́нъ бᲂ сы́и и҆ то́й же лице́мъ , раз̾двᲂѧ́етсѧ є҆стествы̀ дв҃ᲂ , тво́й сн҃ъ и҆ сᲂдѣ́тель . катава́сїѧ : Хва́лимъ бл҃гᲂслᲂви́мъ . Ѻ҆́трᲂки бл҃гᲂчести́выѧ .

пѣ́снь , ѳ҃ . і҆рмо́съ . Бг҃а чл҃кѡмъ . Не пᲂдᲂба́етъ прилᲂжи́ти , и҆лѝ ѡ҆ста́вити что̀ сщ҃е́ннагѡ преда́нїѧ , правᲂсла́вныѧ на́шеѧ вѣ́ры . в̾ ню́же бᲂ вѣ́рнѡ крⷭ҇ти́хᲂмсѧ . а҆ и҆́же прелᲂжи́тели сеѧ̀ вѣ́ры , в̾ пра́вдꙋ пре́дани бꙋ́дꙋтъ преще́нїю прᲂклѧ́тїѧ . Ра́дᲂстїю срⷣца̀ всѝ взыгра́емъ , сщ҃е́нныѧ сᲂбо́ры ѻ҆ц҃ъ сᲂвᲂкꙋ́пльше . тѣ́хъ бᲂ ра́ди свѣ́тъ ви́дѣхᲂмъ правᲂсла́вїѧ . свѣти́льницы бᲂ ꙗ҆ви́шасѧ , всѧ̀ наставлѧ́юще к̾ пра́вымъ ᲂу҆че́нїѧ ѡ҆брѣ́тенїемъ . сла́ва . Дш҃а́мъ и҆спро́симъ ѡ҆чище́нїе , и҆ бл҃гᲂче́стнѡ житїѐ препрᲂвᲂди́ти пᲂтщи́мсѧ . ꙗ҆́кѡ да прича́стницы бꙋ́демъ ст҃ы́мъ ѻ҆ц҃е́мъ , и҆́же скры́ша пра́выхъ ᲂу҆че́нїи бᲂга́тствᲂ , на́мъ ча́дᲂмъ и҆́хъ . и҆ ны́нѣ , боⷢ҇ . Бг҃ъ ѿ бᲂкꙋ̀ твᲂе́ю вᲂсїѧ̀ мт҃и бж҃їѧ , и҆ ро́дъ чл҃ческїи ѡ҆бᲂжѝ , и҆ сла́вы свᲂеѧ̀ спᲂдо́би . и҆ с̾ наслѣ́дники всѣ́хъ пᲂказа̀ , и҆́же тѧ̀ бцⷣꙋ вᲂи́стинꙋ при́снѡ прᲂпᲂвѣ́дающїѧ .

катава́сїѧ : Всѧ́къ зе́менъ .= Дᲂсто́йнѡ є҆́сть . свѣти́ленъ , вᲂскрⷭ҇нъ . сла́ва , ѻ҆ц҃е́мъ . Ѻ҆ц҃ъ бжⷭ҇твеныхъ па́мѧть дне́сь пра́з̾днꙋюще , мᲂльба́ми си́хъ мо́лимсѧ всеще́дре , всѧ́кагѡ вре́да є҆рети́ческа и҆зба́ви лю́ди свᲂѧ̀ гдⷭ҇и . и҆ всѧ̀ спᲂдо́би , ѻ҆ц҃а и҆ сло́ва сла́вити и҆ всест҃а́гѡ дх҃а . =и҆ ны́нѣ , боⷢ҇ . Ра́дꙋисѧ бж҃їѧ пᲂла́тᲂ . ра́дꙋисѧ гᲂро̀ присѣ́ннаѧ , ра́дꙋисѧ неѡ҆пали́маѧ кꙋпино̀ . ра́дꙋисѧ престо́лѣ сла́вы . ра́дꙋисѧ бжⷭ҇твенаѧ трапе́зᲂ . ра́дꙋисѧ рꙋ́чкᲂ всезлата́ѧ . ра́дꙋисѧ свѣти́льниче всесвѣ́тлыи . ра́дꙋисѧ ле́гкїи ѻ҆́блаче , дв҃ᲂ мт҃и мр҃і́е .

На хвали́тѣхъ , стⷯры , вᲂскрⷭ҇ны , д҃ . и҆ ѻ҆ц҃е́мъ , д҃ . гла́съ , ѕ҃ . поⷣ . всѐ ᲂу҆пᲂва́нїе .= Всю̀ сᲂдержа́вше ꙳ дш҃е́внꙋю хи́трᲂсть ,꙳ и҆ бжⷭ҇твенымъ дх҃ᲂмъ спᲂꙋчи́вшесѧ ,꙳ и҆ нбⷭ҇ныи че́стныи ѻ҆́бразъ ,꙳ честні́и ѻ҆ц҃ы ,꙳ бг҃ᲂпи́саннᲂ начерта́ша .꙳ во́нь же ꙗ҆вле́ннᲂ ро́ждьшемꙋ ,꙳ сᲂбез̾нача́льна сло́ва наꙋча́ютъ ,꙳ и҆ вᲂи́стинꙋ є҆динᲂсꙋ́щна .꙳ а҆пⷭ҇льскимъ пᲂслѣ́дꙋюще ꙗ҆́вѣ ᲂу҆че́нїемъ ,꙳ бг҃ᲂче́стнїи и҆ пребᲂга́тїи ,꙳ вᲂи́стинꙋ и҆ бг҃ᲂмꙋ́дрїи . В=сѐ прїе́мше ꙳ ᲂу҆́мнᲂе сїѧ́нїе ст҃а́гѡ дх҃а ,꙳ преє҆сте́ственᲂе бг҃ᲂсло́вїе ,꙳ кра́ткими глаго́лы ,꙳ и҆ мно́гимъ ра́зꙋмᲂмъ ,꙳ бг҃ᲂдᲂхнᲂве́ннᲂ прᲂвѣща́ша .꙳ ꙗ҆́кѡ хрⷭ҇то́вы прᲂпᲂвѣ́дницы ,꙳ є҆ѵⷢ҇а́льскимъ приста́вницы ᲂу҆че́нїемъ бл҃же́ннїи ,꙳ и҆ бл҃гᲂче́стнымъ преда́нїемъ ,꙳ свы́ше прїе́мше си́хъ ѿкрᲂве́нїе ꙗ҆́вѣ .꙳ и҆ прᲂсвѣ́щшесѧ ,꙳ и҆злᲂжи́ша вѣ́рꙋ бг҃ᲂнаꙋче́ннꙋю .

сти́хъ : блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ ,꙳ и҆ хва́льнᲂ и҆ прᲂсла́вленᲂ и҆́мѧ твᲂѐ во́ вѣки . Всю̀ сᲂбра́вше ꙳ па́стырьскꙋю хи́трᲂсть ,꙳ и҆ ꙗ҆́рᲂсть пᲂд̾ви́гше ны́нѣ пра́веднꙋ .꙳ ѡ҆сꙋжде́ннᲂ ѿгна́ша тѧ́жкїѧ и҆ па́гꙋбныѧ во́лки ,꙳ пра́щею дх҃а и҆з̾мета́вше ,꙳ ѿ церко́вныѧ по́лнᲂсти ,꙳ па́дшїѧ ꙗ҆́кѡ к̾ сме́рти ,꙳ и҆ ꙗ҆́кѡ неи҆сцѣ́льнᲂ недꙋ́гᲂвавшїѧ ,꙳ бжⷭ҇твенїи па́стырїе ,꙳ и҆ ꙗ҆́кѡ рабѝ при́снїи хрⷭ҇то́вы ,꙳ и҆ бжⷭ҇твенагѡ прᲂпᲂвѣ́данїѧ ,꙳ ᲂу҆ченицы̀ сщ҃е́ннїи .

сти́хъ : ꙗ҆́кѡ пра́веденъ є҆сѝ ѡ҆ всѣ́хъ ,꙳ и҆́хже сᲂтвᲂри́лъ є҆сѝ на́мъ . Всю̀ сᲂдержа́вше ꙳ дш҃е́внꙋю хи́трᲂсть ,꙳ и҆ бжⷭ҇твенымъ дх҃ᲂмъ спᲂꙋчи́вшесѧ ,꙳ и҆ нбⷭ҇ныи че́стныи ѻ҆́бразъ ,꙳ честні́и ѻ҆ц҃ы ,꙳ бг҃ᲂпи́саннᲂ начерта́ша .꙳ во́нь же ꙗ҆вле́ннᲂ ро́ждьшемꙋ ,꙳ сᲂбез̾нача́льна сло́ва наꙋча́ютъ ,꙳ и҆ вᲂи́стинꙋ є҆динᲂсꙋ́щна .꙳ а҆пⷭ҇льскимъ пᲂслѣ́дꙋюще ꙗ҆́вѣ ᲂу҆че́нїемъ ,꙳ бг҃ᲂче́стнїи и҆ пребᲂга́тїи ,꙳ вᲂи́стинꙋ и҆ бг҃ᲂмꙋ́дрїи .

сла́ва . гла́съ , и҃ . Ст҃ы́хъ ѻ҆ц҃ъ ли́къ , ѿ вселе́нскихъ кᲂне́цъ сте́кшесѧ . ѻ҆ц҃а и҆ сн҃а и҆ дх҃а ст҃а́гѡ , є҆ди́нᲂ сꙋщество̀ прᲂпᲂвѣ́даша и҆ є҆стество̀ . и҆ та́иньствᲂ бг҃ᲂсло́вїѧ , ꙗ҆́снѡ преда́ша цр҃кви . и҆́хже пᲂхвалѧ́юще вѣ́рᲂю ᲂу҆блажи́мъ гл҃юще , ѽ бжⷭ҇твеныи по́лче , бг҃ᲂглаго́ливїи ѻ҆рꙋ́жницы ѡ҆пᲂлче́нїѧ гдⷭ҇нѧ . ѕвѣ́зды всесвѣ́тлыѧ мы́сленыѧ тве́рди . мы́сленагѡ сїѡ́на не ѡ҆бᲂри́мїи стᲂлпѝ . мѷрᲂꙋха́ннїи цвѣ́ти ра́йстїи . всезлата́ѧ ᲂу҆ста̀ сло́ва . церко́внаѧ пᲂхвало̀ . вселе́ннѣй ᲂу҆краше́нїе , прилѣ́жнѡ пᲂмᲂли́тесѧ ѡ҆ дш҃а́хъ на́шихъ .

и҆ ны́нѣ , гла́съ , в҃ . Преблгⷭ҇ве́на є҆сѝ бцⷣе дв҃ᲂ , вᲂпло́щшимбᲂсѧ и҆з̾ тебѐ , а҆́дъ плѣни́сѧ , а҆да́мъ призва́сѧ . клѧ́тва пᲂтреби́сѧ , и҆ є҆́вва свᲂбᲂди́сѧ . сме́рть ᲂу҆мертви́сѧ , и҆ мы̀ ѡ҆жи́хᲂмъ . тѣ́мъ пᲂю́ще вᲂзᲂпїе́мъ , бл҃гᲂслᲂве́нъ бг҃ъ на́шъ , и҆зво́ливыи та́кѡ .

Славᲂсло́вїе вели́кᲂе , и҆ ѿпꙋ́стъ . и҆ стихѣ́ра , є҆ѵⷢ҇а́льскаѧ . ча́съ , а҃ . и҆ кᲂне́чныи ѿпꙋ́стъ .

На литꙋргі́и , бл҃же́нна , гла́сꙋ , на́ ѕ҃ . и҆ ѻ҆ц҃е́мъ , пѣ́снь г҃ ѧ , на д҃ .

Пᲂ вхо́дѣ , а҆́ще хра́мъ хрⷭ҇то́въ : трᲂпа́рь , вᲂскрⷭ҇нъ , и҆ ѻ҆ц҃е́мъ . кᲂнда́къ , вᲂскрⷭ҇нъ . сла́ва , ѻ҆ц҃е́мъ . и҆ ны́нѣ , хра́мꙋ .

Пᲂ вхо́дѣ , а҆́ще хра́мъ бцⷣы : трᲂпа́рь , вᲂскрⷭ҇нъ , и҆ хра́мꙋ , и҆ ѻ҆ц҃е́мъ . кᲂнда́къ , вᲂскрⷭ҇нъ . сла́ва , ѻ҆ц҃е́мъ . и҆ ны́нѣ , хра́мꙋ .

Пᲂ вхо́дѣ , а҆́ще ли хра́мъ ст҃ы́мъ : трᲂпа́рь , вᲂскрⷭ҇нъ , и҆ ѻ҆ц҃е́мъ , и҆ хра́мꙋ . кᲂнда́къ , вᲂскрⷭ҇нъ , и҆ ѻ҆ц҃е́мъ . сла́ва , хра́мꙋ . и҆ ны́нѣ , кᲂнда́къ : застꙋ́пнице хрⷭ҇тїа́нѡмъ .

прᲂки́менъ гла́сꙋ . и҆ дрꙋгі́и , пѣ́снь ѻ҆ц҃е́мъ . бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ , и҆ хва́льнѡ и҆ прᲂсла́вленѡ и҆́мѧ твᲂѐ во́ вѣки . а҆пⷭ҇лъ , дню̀ , и҆ ѻ҆ц҃е́мъ , къ є҆вре́ѡмъ . заⷱ҇ , тл҃д .= а҆ллилꙋ́їѧ , гла́сꙋ . и҆ ѻ҆ц҃е́мъ , сти́хъ . бг҃ъ бᲂгѡ́мъ гдⷭ҇ь глаго́ла , и҆ призва̀ зе́млю ѿ вᲂсто́къ сл҃нца дᲂ за́падъ . =є҆ѵⷢ҇а́лїе , дню̀ , и҆ ѻ҆ц҃е́мъ , ѿ і҆ѡа́нна . заⷱ҇ , н҃ѕ . прича́стенъ , хвали́те гдⷭ҇а с̾ нб҃съ . дрꙋгі́и , в̾па́мѧть вѣ́чнꙋю бꙋ́детъ пра́ведникъ .