МЦⷭ҇А И҆Ю́ЛѦ ВЪ К҃ ДН҃Ь

ст҃а́гѡ и҆ сла́внагѡ прᲂро́ка и҆лїѝ . =На ма́лѣй вече́рни , на гдⷭ҇и вᲂзва́хъ , стⷯры . гла́съ , а҃ . поⷣ . нбⷭ҇нымъ чино́мъ . Трисо́лнечнымъ свѣ́тᲂмъ бжⷭ҇твенагѡ сїѧ́нїѧ ,꙳ ᲂу҆ма̀ чистᲂто́ю , нечести́вагᲂ царѧ̀ ꙗ҆́кѡ закᲂнᲂпрестꙋ́пника ,꙳ пра́веднымъ сꙋдо́мъ ѡ҆бличи́лъ є҆сѝ .꙳ и҆ нб҃са̀ заключи́лъ є҆сѝ .꙳ и҆ вдᲂви́цꙋ с̾ сн҃ᲂмъ препита́лъ є҆сѝ .꙳ мᲂлѝ прᲂро́че спасти́сѧ дш҃а́мъ на́шимъ . =двⷤа . Бжⷭ҇твенымъ бг҃ᲂвидѣ́нїемъ дᲂсто́йнѡ прᲂро́ческимъ са́нᲂмъ ,꙳ и҆ ра́зꙋмᲂмъ пᲂчте́нъ бы́въ бжⷭ҇твеныи прᲂро́че .꙳ прᲂрица́еши да́льнаѧ ꙗ҆́кѡ бли́зъ сꙋ́ща .꙳ царѧ̀ ꙗ҆́кѡ непра́ведна ѡ҆бличи́лъ є҆сѝ .꙳ и҆ стꙋ́дныѧ сщ҃е́нники нᲂже́мъ закла́лъ є҆сѝ .꙳ мᲂлѝ хрⷭ҇та̀ бг҃а спасти́сѧ дш҃а́мъ на́шимъ . Нечести́выи ца́рь нетерпѧ̀ твᲂегѡ̀ ѡ҆бличе́нїѧ ,꙳ тебѣ̀ бжⷭ҇твеныи прᲂро́че гл҃етъ ,꙳ ты́ ли є҆сѝ тᲂмѧ̀ и҆ развраща́ѧ і҆и҃лѧ ; ты́ же ре́клъ є҆сѝ , не а҆́зъ ѽ царю̀ , нᲂ ты̀ и҆ до́мъ ѻ҆ц҃а твᲂегѡ̀ ,꙳ пᲂне́же бг҃а свᲂегѡ̀ сᲂтво́ршагᲂ тѧ̀ ѡ҆ста́ви , и҆ чꙋжі́ѧ введѐ .꙳ нᲂ мл҃твами хрⷭ҇тѐ твᲂегѡ̀ прⷪ҇ро́ка ,꙳ ѿ такᲂвы́ѧ пре́лести и҆зба́ви на́съ , и҆ спасѝ дш҃а на́ша .

сла́ва . гла́съ , ѕ҃ . Бжⷭ҇твеныи прᲂро́че и҆лїѐ , ты̀ непра́вдᲂвавша царѧ̀ , ѡ҆ навꙋфѣ́евѣ ᲂу҆бі́йствѣ , и҆ ѡ҆ вᲂсхище́нїи винᲂгра́да ѡ҆бличи́въ , дерзнᲂве́ннѡ ре́клъ є҆сѝ , пᲂне́же без̾ пра́вды ᲂу҆би́лъ є҆сѝ мꙋ́жа і҆и҃льтѧнина , си́це и҆ са́мъ ᲂу҆бїе́нъ бꙋ́деши , и҆ псѝ кро́вь твᲂю̀ пᲂли́жꙋтъ , и҆ блꙋдни́цы въ кро́ви твᲂе́й и҆змы́ютсѧ . нᲂ мл҃твами хрⷭ҇тѐ твᲂегѡ̀ прᲂро́ка , кꙋ́пнѡ и҆ ᲂу҆го́дника , такᲂва́гѡ преще́нїѧ и҆зба́ви на́съ , и҆ дш҃а на́ша спасѝ ꙗ҆́кѡ чл҃кᲂлю́бецъ .

и҆ ны́нѣ , боⷢ҇ . Чи́стаѧ є҆ди́на бг҃а ро́ждьшаѧ , дш҃е́вныхъ прегрѣше́нїи и҆зба́ви мѧ дв҃ᲂ мᲂлю́сѧ , и҆ спаси́ мѧ ᲂу҆мерщве́ннагѡ . ты́ бᲂ наде́жда є҆сѝ ненадѣ́ющимсѧ , и҆ пᲂмо́щница ми́рꙋ , и҆́маши є҆́же мᲂщѝ ѻ҆трᲂкᲂви́це ꙗ҆́кѡ мт҃и гдⷭ҇нѧ . непре́зри ми мᲂле́нїѧ , нижѐ ѡ҆ста́ви всегдⷭ҇ьствꙋющаѧ влⷣчце , нᲂ ꙗ҆́кѡ бл҃гᲂлюби́ваѧ спаси́ мѧ . прᲂки́менъ , дню̀ .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фᲂвъ . Бжⷭ҇твеныи прᲂро́че ,꙳ ты̀ ревнꙋ́ѧ по́ гдⷭ҇ѣ вседержи́тели ,꙳ мᲂли́твᲂю нб҃са̀ заключи́лъ є҆сѝ .꙳ ре́къ , до́ждь и҆ рᲂса̀ да несни́детъ на́ землю ,꙳ то́кмѡ гл҃ᲂмъ ᲂу҆́стъ мᲂи́хъ .

сти́хъ : мѡѷсе́й и҆ а҆аро́нъ вᲂ і҆єре́ѡхъ є҆гѡ̀ ,꙳ и҆ самꙋ́илъ въ призыва́ющихъ и҆́мѧ є҆гѡ̀ . Бжⷭ҇твеныи прᲂро́че ,꙳ ты̀ мᲂли́твᲂю и҆ ми́лᲂванїемъ ,꙳ па́ки нб҃са̀ ѿверза́еши ,꙳ и҆ до́ждь жа́ждꙋщимъ лю́демъ ,꙳ бᲂга́тнѡ да́рꙋеши .

сти́хъ : ты̀ є҆сѝ і҆єре́й во́ вѣки ,꙳ по́ чинꙋ мельхиседе́кᲂвꙋ . Бжⷭ҇твеныи прᲂро́че ,꙳ ты̀ вдᲂви́цꙋ с̾ сн҃ᲂмъ препита́лъ є҆сѝ ,꙳ и҆ мл҃твᲂю го́рсть мꙋкѝ и҆ чва́нецъ ма́сла ᲂу҆мно́живъ .꙳ пᲂ глаго́лꙋ гдⷭ҇ню , го́рсть мꙋкѝ ,꙳ и҆ чва́нецъ ма́сла не ᲂу҆ма́лисѧ .

сла́ва . гла́съ , то́йже . Бжⷭ҇твеныи прᲂро́че ,꙳ ты̀ мᲂли́твᲂю сѝ ѻ҆́гнь съ нб҃сѐ сведѐ ,꙳ и҆ царѧ̀ ᲂу҆вѣ́рилъ є҆сѝ гл҃ати ,꙳ вᲂи́стинꙋ є҆ди́нъ бг҃ъ ,꙳ и҆́же и҆лїе́ю прᲂпᲂвѣ́даемыи .

и҆ ны́нѣ , боⷢ҇ . Влⷣчце бл҃га́ѧ ,꙳ ст҃і́и свᲂѝ рꙋ́цѣ ,꙳ къ сн҃ꙋ свᲂемꙋ̀ вᲂздѣжѝ ,꙳ дш҃елюби́вᲂмꙋ сᲂдѣ́телю ,꙳ ᲂу҆ще́дрити рабы̀ свᲂѧ̀ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , д҃ . И҆́же во́ плᲂти а҆́нг҃лъ , и҆ прⷪ҇ро́кѡмъ степе́нь , втᲂры́и прⷣтча прише́ствїѧ хрⷭ҇то́ва , и҆лїѧ̀ сла́вныи , свы́ше пᲂсла́въ є҆лисе́ѡви бл҃гᲂда́ть , недꙋ́ги ѿгᲂни́ти , и҆ прᲂкаже́нныѧ ѡ҆чища́ти . и҆ всѣ́мъ є҆гѡ̀ чтꙋ́щимъ то́читъ цѣльбы̀ . сла́ва , и҆ ны́нѣ , боⷢ҇ . И҆́же ѿ́ вѣка ᲂу҆тае́ннᲂе , и҆ а҆́нг҃лѡмъ несвѣ́дᲂмᲂе та́иньствᲂ , тᲂбо́ю бцⷣе земны́мъ ꙗ҆ви́сѧ бг҃ъ в̾ неразмѣ́снѣ сни́тїи вᲂплᲂща́емъ . и҆ крⷭ҇тъ во́лею на́съ ра́ди вᲂспрїе́мъ , и҆́мже вᲂскр҃сѝ первᲂзда́ннагᲂ , и҆ спасѐ ѿ сме́рти дш҃а на́ша .

та́же , є҆ктенїѧ̀ ма́лаѧ . и҆ ѿпꙋ́стъ .

На вели́цѣй вече́рни , блаже́нъ мꙋ́жь , а҃ , а҆нтифо́нъ . =На гдⷭ҇и вᲂзва́хъ , стихѣ́ры , на и҃ . гла́съ , а҃ .= поⷣ . нбⷭ҇нымъ чино́мъ .= И҆́же ѳезви́тѧнина и҆лїю̀ ,꙳ кᲂлесни́цею ѻ҆́гненᲂю ,꙳ ѿ землѝ ще́дре прелᲂжи́выи сло́ве .꙳ є҆го́же мᲂле́нїемъ спаси́ ны , вѣ́рнѡ тѧ̀ сла́вѧщихъ ,꙳ и҆ тᲂгѡ̀ твᲂрѧ́щихъ ра́дᲂстнѡ ,꙳ бжⷭ҇твенꙋю па́мѧть и҆ спасе́нꙋю . =двⷤа . Въ трꙋ́сѣ и҆ ви́хрѣ то́нцѣ ,꙳ ви́дѣ бж҃їе прише́ствїе и҆лїѐ бг҃ᲂблаже́нне ,꙳ прᲂсвѣща́ющее тѧ дре́вле .꙳ на кᲂлесни́цѣ же сѣдѧ̀ четверᲂко́ннѣй ,꙳ нб҃ᲂ преѣждѧ́еши ,꙳ страннᲂлѣ́пнѡ ᲂу҆дивлѧ́емь бг҃ᲂдᲂхнᲂве́нне . І҆єре́и стꙋ́дныѧ нᲂже́мъ закла́лъ є҆сѝ .꙳ не́бᲂ ꙗ҆зы́кѡмъ на землѝ не ѡ҆дᲂжди́ти ᲂу҆держа́лъ є҆сѝ ,꙳ ре́внᲂстїю бжⷭ҇твенᲂю разже́гсѧ .꙳ є҆лисе́ѧ же и҆спо́лни ми́лᲂти пᲂда́нїемъ ꙳ сꙋгꙋ́бымъ мꙋ́дре ,꙳ и҆лїѐ бжⷭ҇твеныѧ бл҃гᲂда́ти .

И҆́ны , стихѣ́ры . гла́съ , в҃ . самᲂгла́сны . Свѣти́льника вᲂсїѧ́ста вселе́ннѣй два̀ , всесвѣ́тлыи и҆лїѧ̀ и҆ є҆лисе́й . ѻ҆́въ ᲂу҆́бѡ бжⷭ҇твенымъ сло́вᲂмъ нбⷭ҇ныѧ ка́пли затвᲂрѝ , и҆ царѧ̀ ѡ҆бличѝ , на кᲂлесни́цѣ же ѻ҆́гненѣй , на нб҃са̀ вᲂзнесе́сѧ . ѻ҆́въ же без̾ча́дныѧ во́ды и҆сцѣлѝ . и҆ сꙋгꙋ́бꙋ бл҃гᲂда́ть прїѧ́тъ . і҆ѡрда́нскїѧ стрꙋѝ раздѣлѝ . и҆ ны́нѣ сᲂ а҆́нг҃лы ликꙋ́юще , ѡ҆ на́съ мо́лѧтъ , спасти́сѧ дш҃а́мъ на́шимъ . двⷤа . Ꙗ҆́же на вᲂздꙋ́сѣ кᲂлесни́ца тѧ пᲂдъє́мши ѻ҆гнено́сна , ꙗ҆́кѡ въ трꙋ́сѣ на нб҃са̀ , ѻ҆гнедᲂхнᲂве́нꙋю бл҃гᲂда́ть тебѣ̀ чꙋдесе́мъ пᲂда́стъ , и҆лїѐ ѳезви́тѧнине . нетлѣ́нна тѧ̀ сᲂтво́рь , є҆́же неви́дѣти сме́рти , до́ндеже ᲂу҆́бѡ прᲂпᲂвѣ́си всѧ́ческимъ кᲂнчи́нꙋ . тѣ́мже прїидѝ , пᲂдаѧ̀ на́мъ твᲂи́хъ и҆справле́нїи наказа́нїе . Свѣти́льниче невече́рнїи цр҃квамъ . бжⷭ҇твенᲂю ре́внᲂстїю разжига́емь и҆лїѐ прᲂро́че . и҆ нбⷭ҇ныѧ ка́пли затвᲂри́лъ є҆сѝ , и҆ вра́нᲂмъ питѣ́нъ бы́сть . царѧ̀ ѡ҆бличи́лъ є҆сѝ , и҆ сщ҃е́нники ᲂу҆мᲂри́лъ є҆сѝ . ѻ҆́гнь съ нб҃сѐ све́лъ є҆сѝ , и҆ пѧтьдесѧ́тника два̀ ᲂу҆мᲂри́лъ є҆сѝ . напита́лъ є҆сѝ вдᲂви́цꙋ ма́слᲂмъ , и҆ мꙋко́ю ма́лᲂю го́рьстїю . и҆ сн҃а є҆ѧ̀ мл҃твᲂю вᲂскреси́лъ є҆сѝ . ѻ҆́гнь разже́глъ є҆сѝ въ вᲂдѣ̀ . і҆ѡрда́нскїѧ стрꙋѝ пѣ́шъ преше́лъ є҆сѝ . кᲂлесни́цею же ѻ҆́гненᲂю на нб҃са̀ вᲂз̾несе́сѧ . і҆єлисе́ѡви бл҃гᲂда́ть сꙋгꙋ́бꙋю по́далъ є҆сѝ . мᲂли́сѧ не преста́ннѡ бг҃ᲂви , спасти́сѧ дш҃а́мъ на́шимъ . сла́ва . гла́съ , ѕ҃ . Прїиди́те правᲂсла́вныхъ сᲂвᲂкꙋпле́нїе , сᲂше́дшесѧ дне́сь в̾ пречⷭ҇тнѣ́мъ хра́мѣ бг҃ᲂгла́сныхъ пррⷪ҇къ , ѱало́мски вᲂспᲂе́мъ пᲂдо́бнымъ гла́сᲂмъ , си́хъ прᲂсла́вльшемꙋ хрⷭ҇тꙋ̀ бг҃ꙋ на́шемꙋ . и҆ весе́лїемъ и҆ ра́дᲂстїю вᲂзᲂпїе́мъ , ра́дꙋисѧ землены́и а҆́нг҃ле , и҆ нбⷭ҇ныи чл҃че , и҆лїѐ великᲂи҆мени́те . ра́дꙋисѧ и҆́же сꙋгꙋ́бꙋю бл҃гᲂда́ть ѿ́ бг҃а прїе́мыи , є҆лисе́е всече́стне . ра́дꙋйтесѧ застꙋ́пницы те́плїи , и҆ пред̾ста́теле и҆ вра́чеве дш҃а́мъ и҆ тѣ́лᲂмъ , хрⷭ҇тᲂи҆мени́тымъ лю́демъ , ѿ всѧ́кᲂгѡ прило́га сᲂпрᲂти́вна и҆ ѡ҆бстᲂѧ́нїѧ , и҆ всѧ́ческихъ бѣ́дъ и҆зба́витисѧ мᲂли́тесѧ , и҆́же вѣ́рнѡ твᲂрѧ́щимъ всепра́з̾днственꙋю па́мѧть ва́шꙋ .

и҆ нн҃ѣ , боⷢ҇ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невᲂспѣва́етъ твᲂегѡ̀ пречⷭ҇тагѡ ржⷭ҇тва̀ ; без̾лѣ́тныи бᲂ ѿ ѻ҆ц҃а вᲂзсїѧ́въ сн҃ъ є҆динᲂро́дныи , то́йже ѿ тебѐ чи́стыѧ про́йде , несказа́ннѡ вᲂпло́щьсѧ . є҆стество́мъ бг҃ъ сы́и , и҆ є҆стество́мъ бы́въ чл҃къ на́съ ра́ди . не вᲂ двᲂю̀ лицꙋ̀ раздѣлѧ́емъ . нᲂ вᲂ двᲂю̀ є҆стествꙋ̀ несмѣ́снᲂ пᲂзнава́емъ . тᲂгѡ̀ мᲂлѝ чⷭ҇таѧ и҆ всебл҃же́ннаѧ , пᲂми́лᲂватисѧ дш҃а́мъ на́шимъ . та́же , вы́хᲂдъ . прᲂки́менъ дню̀ .

Ѿ= црⷭ҇твъ тре́тїихъ , чте́нїе .=

Бы́сть сло́вᲂ гдⷭ҇не кᲂ и҆лїѝ прᲂро́кꙋ . и҆ речѐ кᲂ а҆ха́вꙋ , жи́въ гдⷭ҇ь бг҃ъ си́лъ , бг҃ъ і҆и҃левъ , є҆мꙋ́же пред̾стᲂю̀ дне́сь пред̾ ни́мъ , а҆́ще бꙋ́детъ в̾ лѣ́та сїѧ̀ рᲂса̀ и҆лѝ до́ждь , а҆́ще не слᲂвесы̀ ᲂу҆́стъ мᲂи́хъ . и҆ бы́сть гл҃ъ гдⷭ҇нь кᲂ и҆лїѝ гл҃ѧ , и҆дѝ ѿ сю́дꙋ на вᲂсто́къ , и҆ скры́йсѧ въ пᲂто́цѣ хᲂра́ѳѡвѣ , при рѣцѣ̀ і҆ѡрда́нᲂвѣ . и҆ бꙋ́детъ вᲂда̀ ѿ пᲂто́ка , и҆ пїе́ши ю҆̀ , и҆ вра́нᲂмъ пᲂвелю̀ пита́ти тѧ̀ тꙋ̀ . и҆ и҆́де и҆лїѧ̀ , и҆ сᲂтвᲂрѝ пᲂ гл҃ꙋ гдⷭ҇ню , и҆ сѣ́де при пᲂто́цѣ хᲂра́ѳѡвѣ пред̾ лице́мъ і҆ѡрда́нᲂвымъ . и҆ вра́нᲂве принᲂша́хꙋ є҆мꙋ̀ хлѣ́бы за ᲂу҆́тра , и҆ мѧса̀ к̾ ве́черꙋ , и҆ ѿ пᲂто́ка пїѧ́ше во́дꙋ . и҆ бы́сть по́ днехъ , и҆́зше пᲂто́къ , ꙗ҆́кѡ не бѣ̀ дᲂждѧ̀ на́ землю . и҆ бы́сть гл҃ъ гдⷭ҇нь кᲂ и҆лїѝ гл҃ѧ , вᲂста́ни , и҆ и҆дѝ в̾ саре́ѳтꙋ сїдѡ́нскꙋю , и҆ пребꙋ́ди та́мѡ , се́бᲂ запᲂвѣ́дахъ женѣ̀ вдᲂви́цѣ препита́ти тѧ̀ . и҆ вᲂста̀ , и҆ и҆́де в̾ саре́ѳтꙋ сїдѡ́нскꙋю . и҆ прїи́де кᲂ врато́мъ гра́да , и҆ сѐ тꙋ̀ жена̀ вдᲂва̀ сᲂбира́ше дрᲂва̀ . и҆ вᲂзᲂпѝ и҆лїѧ̀ вᲂ слѣ́дъ є҆ѧ̀ , и҆ речѐ є҆́й , принеси́ ми ᲂу҆́бѡ ма́лѡ вᲂды̀ в̾ сᲂсꙋ́дѣ , да пїю̀ . и҆ и҆́де взѧ́ти вᲂды̀ , и҆ вᲂзᲂпѝ и҆лїѧ̀ в̾ слѣ́дъ є҆ѧ̀ , и҆ речѐ є҆́й , прїими́ ми ᲂу҆́бѡ и҆ ᲂу҆крꙋ́хъ хлѣ́ба в̾ рꙋцѣ̀ свᲂе́й , да ꙗ҆́мъ . и҆ речѐ жена̀ , жи́въ гдⷭ҇ь бг҃ъ тво́й , а҆́ще є҆́сть ᲂу҆ менѐ ѻ҆прѣсно́къ , нᲂ ра́звѣ є҆ли́кѡ го́рсть мꙋкѝ в̾ вᲂдᲂно́сѣ , и҆ ма́лѡ є҆ле́ѧ вᲂ чва́нцѣ . и҆ сѐ а҆́зъ сᲂбира́ю два̀ пᲂлѣ́нца , и҆ вни́дꙋ , и҆ сᲂтвᲂрю̀ себѣ̀ и҆ ча́дѡмъ мᲂи́мъ , и҆ снѣ́мы , и҆ ᲂу҆́мремъ . и҆ речѐ к̾ не́й и҆лїѧ̀ , дерза́й , и҆ вни́ди , и҆ сᲂтвᲂрѝ пᲂ глаго́лꙋ твᲂемꙋ̀ , нᲂ сᲂтвᲂрѝ мнѣ̀ ѿ тꙋ́дꙋ ѻ҆прѣсно́къ ма́лъ пре́жде , и҆ и҆знесе́ши ми . себѣ́ же и҆ ча́дѡмъ свᲂи́мъ сᲂтвᲂри́ши пᲂслѣдѝ . ꙗ҆́кѡ та́кѡ гл҃етъ гдⷭ҇ь бг҃ъ і҆и҃левъ , вᲂдᲂно́съ мꙋкѝ не ѡ҆скꙋдѣ́етъ , и҆ чва́нецъ ма́сла не ᲂу҆ма́литсѧ до́дне , до́ндеже да́стъ гдⷭ҇ь до́ждь на́ землю . и҆ и҆́де жена̀ , и҆ сᲂтвᲂрѝ пᲂ гл҃ꙋ и҆лїинꙋ̀ , и҆ дадѐ є҆мꙋ̀ , и҆ ꙗ҆дѧ́ше то́й , и҆ та̀ , и҆ ча́да є҆ѧ̀ . и҆ ѿ тᲂгѡ̀ днѐ вᲂдᲂно́съ мꙋкѝ не ѡ҆скꙋдѣ̀ , и҆ чва́нецъ є҆ле́ѧ не ᲂу҆ма́лисѧ , пᲂ гл҃ꙋ гдⷭ҇ню , и҆́же гл҃а рꙋко́ю и҆лїино́ю . и҆ бы́сть пᲂ гл҃ѣхъ си́хъ , и҆ раз̾бᲂлѣ́сѧ сн҃ъ жены̀ , гᲂспᲂжѝ до́мꙋ , и҆ бѣ̀ бᲂлѣ́знь є҆гѡ̀ крѣпка̀ ѕѣлѡ̀ , до́ндеже не ѡ҆ста̀ в̾ не́мъ дꙋ́хъ . и҆ речѐ жена̀ кᲂ и҆лїѝ , что̀ мнѣ̀ и҆ тебѣ̀ чл҃че бж҃їи , вни́де кᲂ мнѣ̀ вᲂспᲂмѧнꙋ́ти грѣхѝ мᲂѧ̀ , и҆ ᲂу҆мᲂри́ти сн҃а мᲂегѡ̀ ; и҆ речѐ и҆лїѧ̀ к̾ женѣ̀ , да́ждь ми сн҃а твᲂегѡ̀ . и҆ взѧ́тъ и҆̀ ѿ ло́на є҆ѧ̀ , и҆ вᲂзнесѐ є҆гѡ̀ в̾ го́рницꙋ , в̾ не́йже са́мъ пᲂчива́ше , и҆ пᲂлᲂжѝ є҆гѡ̀ на ѻ҆дрѣ̀ свᲂе́мъ . и҆ вᲂзᲂпѝ и҆лїѧ̀ ко́ гдⷭ҇ꙋ , и҆ речѐ , ᲂу҆вы̀ мнѣ̀ гдⷭ҇и свидѣ́телю вдᲂвы̀ , ᲂу҆ неѧ́же а҆́зъ пребыва́ю , ты̀ ѡ҆ѕло́билъ є҆сѝ , є҆́же ᲂу҆мᲂри́ти сн҃а є҆ѧ̀ . и҆ дꙋ́нꙋ на ѻ҆́трᲂчища трикра́ты , и҆ призва̀ гдⷭ҇а , и҆ речѐ , гдⷭ҇и бж҃е мо́й , да вᲂзврати́тсѧ ᲂу҆́бѡ дш҃а ѻ҆́трᲂчища сегѡ̀ во́нь , и҆ бы́сть та́кѡ . и҆ вᲂзᲂпѝ и҆лїѧ̀ . и҆ ᲂу҆слы́ша гдⷭ҇ь гла́съ и҆лїи́нъ , и҆ вᲂзврати́сѧ дш҃а ѻ҆́трᲂчища , и҆ ѡ҆живѐ . и҆ пᲂѧ́тъ и҆лїѧ̀ ѻ҆́трᲂчища , и҆ сведѐ и҆̀ ѿ го́рницы в̾ до́мъ , и҆ дадѐ и҆̀ ма́тери є҆гѡ̀ . и҆ речѐ и҆лїѧ̀ к̾ не́й , ви́ждь , ꙗ҆́кѡ жи́въ є҆́сть сн҃ъ тво́й . и҆ речѐ жена̀ кᲂ и҆лїѝ , сѐ разꙋмѣ́хъ , ꙗ҆́кѡ чл҃къ бж҃їи є҆сѝ ты̀ , и҆ гл҃ъ гдⷭ҇нь вᲂ ᲂу҆стѣ́хъ твᲂи́хъ и҆́стиненъ .

Ѿ= црⷭ҇твъ тре́тїихъ , чте́нїе .=

Бы́сть глаго́лъ бж҃їи кᲂ и҆лїѝ ѳезви́тѧнинꙋ в̾ тре́тїе лѣ́тᲂ ца́рства а҆ха́влѧ , глаго́лѧ , и҆дѝ , и҆ ꙗ҆ви́сѧ а҆ха́вꙋ , да́мъ бᲂ до́ждь на лицѐ землѝ . и҆ бы́сть ꙗ҆́кѡ ви́дѣ а҆ха́въ и҆лїю̀ , и҆ речѐ к̾ немꙋ̀ , а҆́ще ты̀ є҆сѝ развраща́ѧи і҆зра́илѧ . и҆ речѐ и҆лїѧ̀ , не раз̾враща́ю а҆́зъ і҆зра́илѧ , нᲂ ты̀ , и҆ до́мъ ѻ҆ц҃а твᲂегѡ̀ , внегда̀ ѡ҆ста́висте вы̀ гдⷭ҇а бг҃а свᲂегѡ̀ , и҆ и҆до́сте в̾ слѣ́дъ ваа́ла . и҆ нн҃ѣ пᲂслѝ , и҆ сᲂберѝ кᲂ мнѣ̀ ве́сь і҆зра́иль на́ гᲂрꙋ кᲂрми́льскꙋю , и҆ прᲂро́ки стꙋ́дныѧ ваа́лᲂвы , и҆́хже четы́реста и҆ пѧтьдесѧ́тъ , и҆ прᲂро́къ ме́рзкихъ четы́реста , ꙗ҆дꙋ́щихъ трапе́зꙋ і҆єзаве́линꙋ . и҆ пᲂ гл҃ꙋ и҆лїинꙋ̀ пᲂсла̀ а҆ха́въ в̾ ве́сь і҆зра́иль , и҆ сᲂбра̀ всѧ̀ прᲂро́ки на́ гᲂрꙋ кᲂрми́льскꙋю , и҆ приведѐ кᲂ всѣ́мъ и҆́мъ и҆лїю̀ , и҆ речѐ и҆́мъ и҆лїѧ̀ , дᲂко́лѣ вы̀ хра́млете на́ ѻ҆бѣ кᲂлѣ́нꙋ ва́шею ; а҆́ще є҆́сть гдⷭ҇ь бг҃ъ , и҆ди́те в̾ слѣ́дъ є҆гѡ̀ . а҆́ще ли ваа́лъ є҆́сть , то̀ и҆ди́те за ни́мъ . и҆ не ѿвѣща́ша є҆мꙋ̀ лю́дїе слᲂвесѐ . и҆ речѐ и҆лїѧ̀ к̾ лю́демъ , а҆́зъ ѡ҆ста́хъ прⷪ҇ркъ гдⷭ҇нь є҆ди́нъ . и҆ прᲂро́цы ваа́лᲂвы и҆́хже четы́реста и҆ пѧтьдесѧ́тъ мꙋ́жъ , и҆ прᲂро́къ ме́рзскихъ четы́реста . и҆ речѐ и҆лїѧ̀ , дади́те ми два̀ ю҆нца̀ , да и҆збери́те себѣ̀ є҆ди́нъ , и҆ растеши́те и҆̀ на ᲂу҆́ды , и҆ вᲂзлᲂжи́те и҆̀ на дрᲂва̀ , и҆ да неприлᲂжа́тъ ѻ҆гнѧ̀ . и҆ а҆́зъ растешꙋ̀ ю҆не́цъ дрꙋгі́и , и҆ вᲂз̾лᲂжꙋ̀ на дрᲂва̀ , и҆ ѻ҆гнѧ̀ невᲂзгнѣщꙋ̀ . и҆ да призᲂветѐ и҆мена̀ бᲂго́въ ва́шихъ , и҆ а҆́зъ призᲂвꙋ̀ и҆́мѧ гдⷭ҇а бг҃а мᲂегѡ̀ , и҆ бꙋ́детъ бг҃ъ , и҆́же а҆́ще пᲂслꙋ́шаетъ ѻ҆гне́мъ , то́й є҆́сть бг҃ъ . и҆ ѿвѣща́ша всѝ лю́дїе и҆ рѣ́ша , до́бръ глаго́лъ и҆лїи́нъ и҆́же гл҃а , да бꙋ́детъ та́кѡ . и҆ речѐ и҆лїѧ̀ прᲂро́кᲂмъ стꙋ́днымъ . и҆збери́те себѣ̀ ю҆не́цъ є҆ди́нъ , и҆ сᲂтвᲂри́те вы̀ пре́жде , ꙗ҆́кѡ ва́съ є҆́сть мно́жествᲂ , и҆ призᲂви́те и҆мена̀ бᲂго́въ ва́шихъ , и҆ ѻ҆гнѧ̀ непригнѣща́йте . и҆ пᲂѧ́ша ю҆не́цъ , и҆ сᲂтвᲂри́ша та́кѡ . и҆ призыва́хꙋ и҆́мѧ ваа́лᲂвᲂ ѿ ᲂу҆́тра и҆ дᲂ пᲂлꙋ́дне , и҆ рѣ́ша , пᲂслꙋ́шай на́съ ваа́ле , пᲂслꙋ́шай на́съ . и҆ небѣ̀ гла́са , ни пᲂслꙋша́нїѧ . и҆ риста́хꙋ ѻ҆́кᲂлᲂ же́ртвенника , и҆́же сᲂтвᲂри́ша сі́и . и҆ бы́сть пᲂлꙋ́дне , и҆ пᲂрꙋга́сѧ и҆́мъ и҆лїѧ̀ ѳезви́тѧнинъ , и҆ речѐ , зᲂви́те гла́сᲂмъ вели́кимъ , ꙗ҆́кѡ бо́гꙋ ва́шемꙋ непра́здньствᲂ є҆́сть , да є҆да̀ что̀ и҆́нᲂ стро́итъ , и҆лѝ ᲂу҆снꙋ́лъ є҆́сть , да ᲂу҆бꙋ́дите є҆гѡ̀ . и҆ зᲂвѧ́хꙋ гла́сᲂмъ вели́кимъ , и҆ крᲂѧ́хꙋсѧ пᲂ ѻ҆бы́чаю свᲂемꙋ̀ нᲂжѝ . и҆ мно́зи би́ша себѐ бичмѝ дᲂ прᲂли́тїѧ кро́ве свᲂеѧ̀ , и҆ прᲂрица́хꙋ . и҆ бы́сть до́ вечера , ꙗ҆́кѡ бы́ти вре́мѧ взы́ти же́ртвѣ , и҆ небѣ̀ гла́са , ни пᲂслꙋша́нїѧ . и҆ глаго́ла и҆лїѧ̀ к̾ прⷪ҇ро́кѡмъ стꙋ́днымъ гл҃ѧ , ѿстꙋпи́те ны́нѣ , да и҆ а҆́зъ сᲂтвᲂрю̀ же́ртвꙋ мᲂю̀ . и҆ ѿстꙋпи́ша ті́и и҆ ᲂу҆мо́лкнꙋша . и҆ речѐ и҆лїѧ̀ к̾ лю́демъ , пристꙋпи́те кᲂ мнѣ̀ . и҆ пристꙋпи́ша къ немꙋ̀ всѝ лю́дїе . и҆ прїѧ́тъ и҆лїѧ̀ двана́десѧть ка́менїй , пᲂ числꙋ̀ кᲂлѣ́нъ сн҃ѡ́въ і҆и҃левъ , ꙗ҆́кᲂже гл҃а є҆мꙋ̀ гдⷭ҇ь , і҆зра́иль бꙋ́детъ и҆́мѧ твᲂѐ . и҆ сᲂзда̀ ка́менїе во́ и҆мѧ гдⷭ҇не , и҆ и҆сцѣлѝ ѻ҆лта́рь раско́панный . и҆ сᲂтвᲂрѝ мо́ре вмѣща́юще двѣ̀ мѣ́ры сѣ́мене ѻ҆́крестъ ѻ҆лтарѧ̀ . и҆ вᲂскладѐ пᲂлѣ́на на ѻ҆лта́рь , и҆́же сᲂтвᲂрѝ . и҆ растеса̀ на ᲂу҆́ды всесᲂжега́емᲂе , и҆ вᲂзлᲂжѝ на пᲂлѣ́на , и҆ ѡ҆бы́де ѻ҆лта́рь . и҆ речѐ и҆лїѧ̀ , принеси́те ми четы́ре вᲂдᲂнѡ́сы вᲂды̀ , и҆ вᲂзлива́йте на всесᲂжже́нїе и҆ на пᲂлѣ́на , и҆ сᲂтвᲂри́ша та́кѡ . и҆ речѐ , ᲂу҆дво́йте , и҆ ᲂу҆дво́иша . и҆ речѐ , ᲂу҆тро́йте , и҆ ᲂу҆тро́иша . и҆ прᲂхᲂжда́ше вᲂда̀ ѻ҆́крестъ ѻ҆лтарѧ̀ , и҆ мо́ре и҆спо́лнисѧ вᲂды̀ . и҆ вᲂзᲂпѝ и҆лїѧ̀ на́ нб҃ᲂ и҆ речѐ , гдⷭ҇и бж҃е а҆враа́мᲂвъ и҆ і҆саа́кѡвъ и҆ і҆а́кѡвль , пᲂслꙋ́шай менѐ гдⷭ҇и , пᲂслꙋ́шай менѐ дне́сь ѻ҆гне́мъ , да разꙋмѣ́ютъ всѝ лю́дїе сі́и , ꙗ҆́кѡ ты̀ є҆сѝ є҆ди́нъ гдⷭ҇ь бг҃ъ і҆и҃левъ , и҆ а҆́зъ ра́бъ тво́й , и҆ тебѐ ра́ди сᲂтвᲂри́хъ дѣ́ла сїѧ̀ всѧ̀ . и҆ ты̀ ѡ҆братѝ срⷣца̀ люде́й си́хъ в̾ слѣ́дъ тебѐ . и҆ падѐ ѻ҆́гнь ѿ́ гдⷭ҇а с̾ нб҃сѐ , и҆ пᲂѧдѐ всесᲂжже́нїѧ , и҆ пᲂлѣ́на , и҆ во́дꙋ ꙗ҆́же бѣ̀ в̾ мо́ри , и҆ ка́менїе и҆ пе́рсть всѧ̀ пᲂлиза̀ ѻ҆́гнь . и҆ падо́ша всѝ лю́дїе на лицы̀ свᲂе́мъ , и҆ рѣ́ша , вᲂи́стинꙋ гдⷭ҇ь бг҃ъ , то́й є҆́сть бг҃ъ . и҆ речѐ и҆лїѧ̀ к̾ лю́демъ , пᲂима́йте прᲂрѡ́ки ваа́лᲂвы , да ни є҆ди́нъ скры́етсѧ ѿ ни́хъ . и҆ ꙗ҆́ша и҆́хъ , и҆ ведѐ ѧ҆̀ и҆лїѧ̀ на пᲂто́къ ки́ссᲂвъ , и҆ тꙋ̀ и҆́хъ закла̀ . и҆ речѐ и҆лїѧ̀ пᲂсе́мъ а҆ха́вᲂви . сѐ гла́съ хᲂжде́нїѧ дᲂжде́внагѡ , впᲂва́ди кᲂлесни́цꙋ твᲂю̀ , и҆ сни́ди , да непᲂсти́гнетъ тебѐ до́ждь . и҆ взы́де и҆лїѧ̀ на карми́льскꙋю го́рꙋ , и҆ прекло́ньсѧ на́ землю , и҆ пᲂлᲂжѝ лицѐ свᲂѐ междꙋ̀ кᲂлѣ́нᲂма свᲂи́ма , и҆ пᲂмᲂли́сѧ ко́ гдⷭ҇ꙋ . и҆ нб҃ᲂ пᲂмрачи́сѧ ѻ҆́блаки и҆ дꙋ́хᲂмъ , и҆ бы́сть до́ждь ве́лїи . и҆ пла́часѧ а҆ха́въ , и҆́де дᲂ і҆зра́илѧ . и҆ рꙋка̀ гдⷭ҇нѧ бы́сть на и҆лїѝ . и҆ смири́всѧ чреслы̀ свᲂи́ми , и҆ течѐ пред̾ а҆ха́вᲂмъ дᲂ і҆зра́илѧ . и҆ вᲂзвѣстѝ а҆ха́въ женѣ̀ свᲂе́й і҆єзаве́ли всѧ̀ , є҆ли́ка сᲂтвᲂрѝ и҆лїѧ̀ , и҆ ꙗ҆́кѡ закла̀ прᲂро́ки нᲂже́мъ . и҆ пᲂсла̀ і҆єзаве́ль кᲂ и҆лїѝ глаго́лѧ , ᲂу҆́трѡ во́ньже пᲂлᲂжꙋ̀ дш҃ꙋ твᲂю̀ , ꙗ҆́кᲂже дш҃ꙋ є҆ди́нагѡ ѿ си́хъ . и҆ слы́ша , и҆ ᲂу҆бᲂѧ́сѧ и҆лїѧ̀ , вᲂста́въ и҆́де дꙋшѝ ра́ди свᲂеѧ̀ , и҆ прїи́де в̾ вирса́вїю зе́млю і҆ꙋ́дᲂвꙋ , и҆ ѡ҆ста́ви ѻ҆́трᲂчища свᲂегѡ̀ тꙋ̀ , и҆ и҆́де въ пꙋсты́ню днѐ пꙋ́ть . и҆ прише́дъ сѣ́де пᲂд̾ сме́рчїемъ , и҆ прᲂсѝ дꙋшѝ свᲂе́й сме́рти , и҆ речѐ , дᲂвлѣ́етъ ми гдⷭ҇и , прїимѝ ᲂу҆́бѡ дш҃ꙋ мᲂю̀ ѿ менѐ , ꙗ҆́кѡ нѣ́смь а҆́зъ па́че ѻ҆ц҃ъ мᲂи́хъ . и҆ лѧ́же и҆ ᲂу҆́спе пᲂд̾ дре́вᲂмъ . и҆ сѐ а҆́нг҃лъ гдⷭ҇нь кᲂснꙋ́сѧ є҆мꙋ̀ , и҆ речѐ є҆мꙋ̀ , вᲂста́ни , ꙗ҆́ждь и҆ пі́й . и҆ вᲂз̾зрѣ́въ и҆лїѧ̀ , и҆ сѐ в̾ вᲂзгла́вїи є҆гѡ̀ ѻ҆прѣсно́къ пы́рѧнъ , и҆ кᲂрча́жецъ вᲂды̀ . и҆ вᲂста́въ ꙗ҆дѐ и҆ пїѧ̀ , и҆ ѡ҆бра́щьсѧ ᲂу҆́спе . и҆ ѡ҆брати́сѧ а҆́нг҃лъ гдⷭ҇нь втᲂри́цею , кᲂснꙋ́сѧ є҆мꙋ̀ , и҆ речѐ є҆мꙋ̀ , вᲂста́ни , ꙗ҆́ждь и҆ пі́й , ꙗ҆́кѡ мно́гъ тебѣ̀ є҆́сть пꙋ́ть . и҆ вᲂста́въ ꙗ҆дѐ и҆ пѝ , и҆ и҆́де въ крѣ́пᲂсти ꙗ҆́ди тᲂѧ̀ четы́редесѧть дні́й , и҆ четы́редесѧть нᲂще́й дᲂ гᲂры̀ бж҃їѧ хᲂри́вскїѧ . и҆ вни́де в̾ пеще́рꙋ , и҆ ѡ҆бита̀ тꙋ̀ . и҆ сѐ а҆́нг҃лъ гдⷭ҇нь прїи́де к̾ немꙋ̀ , и҆ речѐ , что́ ты здѣ̀ и҆лїѐ ; и҆ речѐ и҆лїѧ̀ , ревнꙋ́ѧ пᲂревнᲂва́хъ по́ гдⷭ҇ѣ бз҃ѣ вседержи́телѣ , ꙗ҆́кѡ ѡ҆ста́виша тѧ̀ сн҃ѡве і҆и҃левы , и҆ ѻ҆лтарѝ твᲂѧ̀ раскᲂпа́ша , и҆ прᲂро́ки твᲂѧ̀ ѻ҆рꙋ́жїемъ и҆зби́ша , и҆ ѡ҆ста́хъ а҆́зъ є҆ди́нъ , и҆ и҆́щꙋтъ дш҃ꙋ мᲂю̀ и҆з̾ѧ́ти ю҆̀ . и҆ речѐ а҆́нг҃лъ , и҆зы́ди ᲂу҆́трѡ , и҆ ста́ни в̾ гᲂрѣ̀ пре́дъ гдⷭ҇емъ . и҆ сѐ ми́мѡ и҆́детъ гдⷭ҇ь , и҆ дх҃ъ вели́къ и҆ крѣ́пᲂкъ , и҆ста́ѧ го́ры , и҆ сᲂкрꙋша́ѧ ка́менїе пре́д̾ гдⷭ҇емъ . и҆ не в̾ дꙋ́сѣ гдⷭ҇ь , и҆ по́ дꙋсѣ ви́хръ , и҆ не в̾ ви́хрѣ гдⷭ҇ь , и҆ пᲂ ви́хрѣ ѻ҆́гнь , и҆ не вᲂ ѻ҆гнѝ гдⷭ҇ь , и҆ пᲂ ѻ҆гнѝ гла́съ свѣ́та то́нка , и҆ тꙋ̀ гдⷭ҇ь . и҆ бы́сть ꙗ҆́кѡ ᲂу҆слы́ша и҆лїѧ̀ , пᲂкры̀ лицѐ свᲂѐ ми́лᲂтїю свᲂе́ю , и҆зы́де и҆ ста̀ при пеще́рѣ . и҆ сѐ к̾ немꙋ̀ бы́сть гла́съ , и҆ речѐ , что̀ здѣ̀ ты̀ и҆лїѐ ; и҆ речѐ и҆лїѧ̀ , ревнꙋ́ѧ пᲂревнᲂва́хъ по́ гдⷭ҇ѣ бз҃ѣ вседержи́телѣ , ꙗ҆́кѡ ѡ҆ста́виша завѣ́тъ тво́й сы́нѡве і҆и҃левы , и҆ ѻ҆лтарѝ твᲂѧ̀ раскᲂпа́ша , и҆ прᲂро́ки твᲂѧ̀ и҆зби́ша ѻ҆рꙋ́жїемъ , и҆ ѡ҆ста́хъ а҆́зъ є҆ди́нъ , и҆ и҆́щꙋтъ дш҃ꙋ мᲂю̀ и҆з̾ѧ́ти ю҆̀ . и҆ речѐ гдⷭ҇ь к̾ немꙋ̀ , и҆дѝ , вᲂзврати́сѧ пꙋте́мъ свᲂи́мъ , и҆ по́йдеши в̾ пꙋ́ть пꙋсты́ни дама́скᲂвы , и҆ пᲂма́жеши а҆за́ила на црⷭ҇твᲂ вᲂ а҆сѷрі́и , и҆ і҆ꙋ́ѧ сн҃а а҆месі́ина пᲂма́жеши въ цр҃ѧ і҆зра́илю , и҆ є҆лисе́ѧ сн҃а а҆сафа́тᲂва пᲂма́жеши вмѣ́стѡ себѐ прᲂро́ка .

Ѿ= црⷭ҇твъ четве́ртыхъ , чте́нїе .=

Бы́сть во́ дни ѻ҆́ны , ѡ҆брѣ́те и҆лїѧ̀ є҆лисе́ѧ сн҃а а҆сафа́тᲂва , и҆ то́й ѡ҆ра́ше вᲂла́ми . и҆ и҆́де и҆лїѧ̀ к̾ немꙋ̀ , и҆ пᲂве́рже и҆лїѧ̀ ми́лᲂть свᲂю̀ на не́мъ . и҆ ѡ҆ста́ви є҆лисе́й вᲂлы̀ , и҆ течѐ сᲂзадѝ и҆лїѝ , и҆ слꙋжа́ше є҆мꙋ̀ . и҆ бы́сть є҆гда̀ взѧ́тꙋ бы́ти и҆лїѝ гдⷭ҇емъ в̾ ви́хрѣ ꙗ҆́кѡ на́ нб҃ᲂ . и҆ и҆до́ста и҆лїѧ̀ и҆ є҆лисе́й в̾ галга́лы . и҆ речѐ и҆лїѧ̀ є҆лисе́ѡви , сѣдѝ ᲂу҆́бѡ здѣ̀ , ꙗ҆́кѡ гдⷭ҇ь пᲂсла́ мѧ дᲂ і҆ѡрда́на . и҆ речѐ є҆лисе́й , жи́въ гдⷭ҇ь , и҆ жива̀ дꙋша̀ твᲂѧ̀ , а҆́ще ѡ҆ста́влю тѧ̀ . и҆ пᲂидо́ста ѻ҆́ба вкꙋ́пѣ . и҆ пѧтьдесѧ́тъ мꙋ́жъ ѿ сынѡ́въ прᲂро́ческихъ прїидо́ша , и҆ ста́ша прѧ́мѡ и҆здале́ча . и҆ сі́и ѻ҆́ба ста́ста при і҆ѡрда́нѣ . и҆ прїѧ́тъ и҆лїѧ̀ ми́лᲂть свᲂю̀ , и҆ сви́тъ ю҆̀ , и҆ ᲂу҆да́ри в̾ во́дꙋ , и҆ разстꙋпи́сѧ вᲂда̀ сю́дꙋ и҆ сю́дꙋ , и҆ преидо́ста ѻ҆́ба по́ сꙋхꙋ . и҆ бы́сть преше́дшима и҆́ма , и҆ речѐ и҆лїѧ̀ к̾ є҆лисе́ѡви , прᲂсѝ , что̀ сᲂтвᲂрю̀ тебѣ̀ , пре́жде да́же невзѧ́тъ бꙋ́дꙋ ѿ тебѐ . и҆ речѐ є҆лисе́й , да бꙋ́детъ ᲂу҆́бѡ дх҃ъ и҆́же в̾ тебѣ̀ , сꙋгꙋ́бъ вᲂ мнѣ̀ . и҆ речѐ и҆лїѧ̀ , ѡ҆жести́лъ є҆сѝ прᲂси́ти . ѻ҆ба́че а҆́ще ᲂу҆́зриши мѧ̀ гᲂрѣ̀ взе́млема ѿ тебѐ , бꙋ́детъ ти та́кѡ , а҆́ще ли неви́диши , не и҆́мать ти бы́ти . и҆ бы́сть и҆дꙋ́щима и҆́ма , и҆ глаго́лющема , и҆ сѐ кᲂлесни́ца ѻ҆́гненна , и҆ ко́ни ѻ҆́гненни , и҆ раздѣли́ша междꙋ̀ ѡ҆бѣ́ма . и҆ взѧ́тъ бы́сть и҆лїѧ̀ ви́хрᲂмъ ꙗ҆́кѡ на́ нб҃ᲂ . и҆ є҆лисе́й зрѧ́ше и҆ вᲂпїѧ́ше , ѻ҆́ч҃е , ѻ҆́ч҃е , кᲂлесни́ца і҆и҃лева и҆ ко́ни є҆ѧ̀ , и҆ неви́дѣ є҆гѡ̀ къ тᲂмꙋ̀ . и҆ ꙗ҆́тсѧ є҆лисе́й за ри́зы свᲂѧ̀ , и҆ растерза̀ ѧ҆̀ в̾ два̀ растерза́нїѧ . и҆ взѧ́тъ є҆лисе́й ми́лᲂть и҆лїинꙋ̀ па́дшꙋю верхꙋ̀ є҆гѡ̀ , и҆ ѡ҆брати́сѧ є҆лисе́й , и҆ ста̀ на́брезѣ і҆ѡрда́нстѣ . и҆ прїѧ́тъ є҆лисе́й ми́лᲂть и҆лїинꙋ̀ , ꙗ҆́же падѐ верхꙋ̀ є҆гѡ̀ , и҆ ᲂу҆да́ри ми́лᲂтїю в̾ во́дꙋ , и҆ неразстꙋпи́сѧ вᲂда̀ . и҆ ᲂу҆да́ри втᲂро́е , и҆ неразстꙋпи́сѧ . и҆ речѐ є҆лисе́й , гдѣ̀ є҆́сть бг҃ъ и҆лїи́нъ а҆́ффѡ ; и҆ та́кѡ ᲂу҆да́ри тре́тїе во́ды , и҆ разстꙋпи́сѧ вᲂда̀ , и҆ пре́йде є҆лисе́й по́ сꙋхꙋ .

На литі́и , стихѣ́ры . гла́съ , д҃ . Нетлѣ́ннагѡ сᲂєдине́нїѧ , прича́стникъ бл҃же́нне прⷪ҇ро́че бы́лъ є҆сѝ . ѡ҆́ бз҃ѣ сп҃сѣ мᲂе́мъ , мл҃твᲂю і҆ѡрда́нъ раздѣли́въ , по́ сꙋхꙋ преше́лъ є҆сѝ . и҆ на ѻ҆́гненѣй кᲂлесни́цѣ ꙗ҆́кѡ на нб҃са̀ вᲂсхище́нъ бы́сть , сꙋгꙋ́бꙋю бл҃гᲂда́ть є҆лисе́ѡви ѡ҆ста́вль . тѣ́мже мо́лимъ тѧ , а҆́ще и҆ тѣ́лᲂмъ вᲂсхище́нъ бы́сть , нᲂ дх҃ᲂмъ ѿ на́съ неразлꙋча́йсѧ , и҆ всегда̀ хрⷭ҇то́ви мᲂли́сѧ спасти́сѧ дш҃а́мъ на́шимъ . Свѣтᲂза́ренъ ѻ҆́блакъ бжⷭ҇твеныи прⷪ҇ро́че ꙗ҆ви́лсѧ є҆сѝ , и҆ска́паѧ тꙋ́чꙋ бг҃ᲂразꙋ́мїѧ всѣ́мъ вѣ́рнымъ . напаѧ́ѧ бᲂга́тнѡ вино́мъ весе́лїѧ всѣ́хъ , и҆́же вѣ́рᲂю прити́чꙋщихъ къ бжⷭ҇твеннѣйшемꙋ хра́мꙋ твᲂемꙋ̀ . тѣ́мже мо́лимъ тѧ бжⷭ҇твеныи прⷪ҇рче , и҆ бг҃ᲂви́дче и҆лїѐ , пᲂбѣ́ды на врагѝ странѣ̀ на́шей да́рꙋй , и҆ дш҃а́мъ на́шимъ ве́лїю ми́лᲂсть . Самᲂде́ржцꙋ ᲂу҆мꙋ̀ пло́ть пᲂкᲂри́лъ є҆сѝ , бжⷭ҇твеныи и҆лїѐ прⷪ҇ро́че , ᲂу҆се́рднѡ вᲂсхᲂжде́нїѧ ꙗ҆́кѡ пᲂ степе́немъ в̾ срⷣцы сѝ пᲂлага́ѧ . тѣ́мже и҆ непра́вдᲂвавша царѧ̀ ѡ҆бличи́въ , гнѣ́ва бж҃їѧ запреще́нїе и҆з̾ре́къ . и҆ стꙋ́дныѧ сщ҃е́нники ꙗ҆́кѡ непра́ведны нᲂже́мъ пᲂгꙋби́лъ є҆сѝ . и҆ всѣ́хъ наꙋчи́лъ є҆сѝ ꙗ҆́снѡ вᲂпи́ти , вᲂи́стинꙋ є҆ди́нъ є҆́сть бг҃ъ , є҆го́же и҆лїѧ̀ прᲂпᲂвѣ́да . сла́ва . гла́съ , ѕ҃ . Ѽ нечести́ва царѧ̀ пᲂвелѣ́нїѧ . ѽ по́стъ и҆спо́лнь кро́ве и҆ без̾зако́нїѧ . запᲂвѣ́да по́стъ да ᲂу҆бі́йствᲂ сᲂтвᲂри́тъ . и҆ а҆́бїе ᲂу҆бїе́нъ бы́сть навꙋфе́и і҆и҃льтѧнинъ . что́же пррⷪ҇че к̾ си́мъ ре́клъ є҆сѝ , ꙗ҆́кѡ та́кѡ гл҃етъ гдⷭ҇ь , пᲂне́же без̾ пра́вды мꙋ́жа і҆и҃льтѧнина ᲂу҆би́лъ є҆сѝ , та́кᲂже и҆ твᲂѧ̀ кро́вь прᲂлїѧ́на бꙋ́детъ . и҆ блꙋдни́цы въ кро́ви твᲂе́й и҆змы́ютсѧ . нᲂ мл҃твами хрⷭ҇тѐ твᲂегѡ̀ пррⷪ҇ка и҆ прᲂпᲂвѣ́дника , такᲂва́гѡ без̾челᲂвѣ́чества и҆зба́ви дш҃а на́ша , ꙗ҆́кѡ чл҃кᲂлю́бецъ .

и҆ ны́нѣ , боⷢ҇ . Твᲂре́цъ и҆ и҆зба́витель мо́й пречⷭ҇таѧ хрⷭ҇то́съ гдⷭ҇ь , и҆з̾ твᲂи́хъ лᲂже́снъ прᲂше́дъ , в̾ мѧ̀ ѡ҆бо́лксѧ , пе́рвыѧ клѧ́твы а҆да́ма свᲂбᲂдѝ , тѣ́мже тѝ пречⷭ҇таѧ , ꙗ҆́кѡ бж҃їи мт҃ри невѣ́стѣ и҆ дв҃ѣй вᲂи́стинꙋ , вᲂпїе́мъ немо́лчнᲂ . ра́дꙋйсѧ а҆́нг҃льски . ра́дꙋйсѧ влⷣчце , пред̾ста́тельнице и҆ пᲂкро́ве , и҆ спасе́нїе дш҃а́мъ на́шимъ .

На стихо́внѣ , стихѣ́ры . гла́съ , и҃ . поⷣ . Ѽ =пресла́внᲂе чꙋ́дᲂ . И҆=лїѧ̀ прᲂро́къ преди́вныи ,꙳ заре́ю ᲂу҆́мъ прᲂсвѣти́въ ,꙳ ве́сь бы́сть бжⷭ҇твенъ .꙳ и҆ царѧ̀ нечести́ва сꙋ́дъ непра́ведныи зрѧ̀ негᲂдꙋ́етъ .꙳ тѣ́мже и҆ сꙋдо́мъ бж҃їимъ ѿрече́нїе пᲂсыла́етъ на́нь .꙳ та́кᲂже и҆ цари́цꙋ ꙗ҆́кѡ неми́лᲂстивꙋ ,꙳ и҆ златᲂлюби́вꙋ сꙋдꙋ̀ бж҃їю преда́стъ .꙳ нᲂ мл҃твами хрⷭ҇тѐ твᲂегѡ̀ прᲂро́ка и҆лїѝ ,꙳ спасѝ всѣ́хъ на́съ ꙗ҆́кѡ млрⷭ҇дъ .

сти́хъ : мѡѷсе́й и҆ а҆аро́нъ вᲂ і҆єре́ѡхъ є҆гѡ̀ ,꙳ и҆ самꙋ́илъ в̾ призыва́ющихъ и҆́мѧ є҆гѡ̀ . Дᲂко́лѣ гдⷭ҇и ,꙳ пꙋ́ть нечести́выхъ спѣ́етсѧ ,꙳ прᲂро́че ре́клъ є҆сѝ .꙳ ты̀ насади́лъ є҆сѝ и҆ вкᲂрени́шасѧ ,꙳ и҆ сᲂтвᲂри́ша пло́дъ без̾зако́нїѧ .꙳ вᲂи́стинꙋ и҆ са́ми ѕлѣ̀ пᲂгибо́ша нече́стїемъ свᲂи́мъ .꙳ вᲂзᲂпїю́тъ к̾ тебѣ̀ и҆ не ᲂу҆слы́шиши .꙳ вскꙋ́ю ми пᲂказа́лъ є҆сѝ нече́стїе ,꙳ сꙋде́й закᲂнᲂпрестꙋ́пныхъ .

сти́хъ : ты̀ є҆сѝ і҆єре́й во́ вѣки ,꙳ по́ чинꙋ мельхиседе́кᲂвꙋ . И҆́же честно́е твᲂѐ вᲂсхᲂжде́нїе ,꙳ честны́и вᲂ прᲂро́цѣхъ ,꙳ вели́кїи и҆лїѐ , пра́з̾днꙋющихъ .꙳ твᲂи́ми мᲂли́твами ,꙳ ѿ бѣ́дъ и҆збавлѧ́й и҆ скᲂрбе́й ,꙳ и҆ лю́тыхъ нахᲂжде́нїи .꙳ да всегда̀ тебѐ пресла́вныи прᲂро́че ,꙳ хрⷭ҇тᲂимени́тїи лю́дїе ,꙳ пᲂчита́емъ и҆ ᲂу҆бл҃жа́емъ .

сла́ва . гла́съ , ѕ҃ . Пррⷪ҇че прᲂпᲂвѣ́дателю хрⷭ҇то́въ , прⷭ҇то́ла вели́чествїѧ никᲂгда́же ѿстꙋпа́еши , и҆ кᲂемꙋ́ждᲂ бᲂлѧ́щꙋ при́снѡ пред̾стᲂи́ши . въ вы́шнихъ слꙋжа̀ , вселе́ннꙋю бл҃гᲂслᲂвлѧ́еши . всю́дꙋ прᲂславлѧ́емь , прᲂсѝ ѡ҆чище́нїѧ дш҃а́мъ на́шимъ .

и҆ ны́нѣ , боⷢ҇ . Бцⷣе ты̀ є҆сѝ лᲂза̀ и҆́стиннаѧ , вᲂзрасти́вшаѧ на́мъ пло́дъ живо́тныи , тебѣ̀ мо́лимсѧ , мᲂли́сѧ влⷣчце съ прᲂро́кѡмъ , пᲂми́лᲂватисѧ дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь , прᲂро́кꙋ и҆лїѝ , двⷤа . и҆ бцⷣе дв҃ᲂ , аⷤ .

На ᲂу҆́трени , на бг҃ъ гдⷭ҇ь , трᲂпа́рь , двⷤа . сла́ва , и҆ ны́нѣ , боⷢ҇ . =Пᲂ а҃ , стихᲂсло́гїи , сѣда́ленъ . гла́съ , а҃ . На ѻ҆́гненꙋю кᲂлесни́цꙋ , ꙗ҆́кѡ на крилꙋ̀ вѣ́треню вᲂзше́дъ бжⷭ҇твеныи прᲂро́че . к̾ нб҃се́мъ пресла́внѡ ше́ствїе дне́сь твᲂри́ши . свы́ше сꙋгꙋ́бꙋю бл҃гᲂда́ть и҆ ми́лᲂть є҆лисе́ѡви ѡ҆ста́вль . =вⷤ . сла́ва , и҆ нн҃ѣ , боⷢ҇ . Мт҃рь тѧ бж҃їю свѣ́мы всѝ , дв҃ꙋю вᲂи́стинꙋ и҆ пᲂ ржⷭ҇твѣ̀ ꙗ҆́вльшꙋюсѧ , и҆́же любо́вїю прибѣга́юще к̾ твᲂе́й бл҃гᲂсти . тѧ́ бᲂ и҆́мамы грѣ́шнїи застꙋ́пницꙋ . и҆ тѧ̀ стѧжа́хᲂмъ в̾ напа́стехъ спасе́нїе , є҆ди́нꙋ всепѣ́тꙋю .

Пᲂ в҃ , стихᲂсло́гїи , сѣда́ленъ . гла́съ , г҃ . Хра́мъ тво́й бжⷭ҇твеныи , всѣ́мъ и҆сцѣле́нїѧ незави́стнѡ и҆стᲂча́етъ , прᲂро́че пречꙋ́дне , с̾ є҆лисе́ѡмъ преди́внымъ . хрⷭ҇то́ви вкꙋ́пѣ мᲂлѧ́щесѧ , низ̾пᲂсла́ти ми́ръ ми́рᲂви , и҆ лю́демъ чтꙋ́щимъ ва́съ ве́лїю млⷭ҇ть . двⷤа . сла́ва , и҆ ны́нѣ , боⷢ҇ . Ко́ждᲂ и҆дѣ́же спаса́етсѧ , та́мѡ в̾ пра́вдꙋ прибѣга́етъ . ко́е и҆́нᲂ такᲂво̀ прибѣ́жище , ꙗ҆́кѡ ты̀ є҆сѝ бцⷣе , пᲂкрыва́ющи дш҃а на́ша .

Велича́нїе ст҃о́мꙋ : Велича́емъ тѧ ст҃ы́и прᲂро́че и҆лїѐ . и҆ чте́мъ є҆́же на кᲂлесни́цѣ ѻ҆́гненѣй вᲂсхᲂжде́нїе твᲂѐ . ѱл҃о́мъ и҆збра́нныи : бл҃же́нъ мꙋ́жъ бᲂѧ́исѧ гдⷭ҇а .

Пᲂ пᲂлїєлеѡ́сѣ , сѣда́ленъ . гла́съ , и҃ . Премꙋ́дрᲂсти ꙗ҆́кѡ рачи́тель бы́въ , прᲂро́че всече́стне , непра́ведна царѧ̀ без̾пра́вдꙋюща ꙗ҆́вѣ ѡ҆бличи́въ . и҆ ᲂу҆вѣ́рилъ є҆сѝ вᲂпи́ти , вᲂи́стинꙋ бг҃ъ є҆ди́нъ є҆́сть , и҆́же и҆лїе́ю прᲂпᲂвѣ́дꙋемыи . ѿ сю́дꙋ же і҆єзаве́ль ѡ҆ вᲂсхище́нїи , и҆ ѡ҆ златᲂлю́бїи ѡ҆бличи́лъ є҆сѝ . прᲂро́че и҆ прⷣтче прише́ствїѧ хрⷭ҇то́ва , и҆лїѐ великᲂи҆мени́те , мᲂлѝ хрⷭ҇та̀ бг҃а , грѣхо́въ ѡ҆ставле́нїе дарᲂва́ти , и҆́же вᲂсхᲂжде́нїе твᲂѐ вѣ́рнѡ сла́вѧщимъ .= двⷤа . сла́ва , и҆ ны́нѣ , боⷢ҇ . Ꙗ҆́=кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ блажи́мъ ро́дᲂве чл҃честїи . и҆́бᲂ ѻ҆́гнь всели́сѧ в̾ тѧ̀ бжⷭ҇тва̀ . и҆ ꙗ҆́кѡ млⷣнца дᲂи́ши зижди́телѧ и҆ гдⷭ҇а . тѣ́мже а҆́нг҃льски чл҃ческїи ро́дъ , дᲂсто́йнѡ сла́вимъ прест҃о́е ржⷭ҇тво̀ твᲂѐ . и҆ сᲂгла́снѡ вᲂпїе́мъ ти , мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , вᲂспѣва́ющимъ дᲂсто́йнѡ сла́вꙋ твᲂю̀ .

степе́нна , д҃ гᲂ гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . Ты̀ є҆сѝ і҆єре́й во́ вѣки , по́ чинꙋ мельхиседе́кᲂвꙋ .= сти́хъ . р=ечѐ гдⷭ҇ь гдⷭ҇ви мᲂемꙋ̀ , сѣдѝ ѡ҆деснꙋ́ю менѐ , до́ндеже пᲂлᲂжꙋ̀ врагѝ твᲂѧ̀ пᲂд̾но́жїе нᲂга́ма твᲂи́ма .

всѧ́кᲂ дыха́нїе . =є҆ѵⷢ҇а́лїе , ѿ =лꙋкѝ . зача́лᲂ , д҃і .

ѱало́мъ , н҃ .= сла́ва . м=л҃твъ ра́ди пррⷪ҇ка , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

Пᲂми́лꙋй мѧ бж҃е пᲂ вели́цѣй млⷭ҇ти твᲂе́й пᲂ мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , д҃ . На ѻ҆́гненѣй кᲂлесни́цѣ , на ѻ҆́блакъ взѧ́тсѧ , и҆ вᲂ странꙋ̀ свѣтᲂви́днꙋ прело́жьсѧ , ѽ ѳезви́тѧнине и҆лїѐ . стꙋ́дныѧ же прᲂро́ки пᲂсрами́лъ є҆сѝ . и҆́же не́бᲂ сло́вᲂмъ свѧза́выи , та́кѡ разрѣшѝ и҆ на́ша сᲂгрѣше́нїѧ , є҆́же ко́ гдⷭ҇ꙋ мл҃твами твᲂи́ми , и҆ спасѝ дш҃а на́ша .

Кано́нъ бцⷣѣ , сᲂ і҆рмᲂсо́мъ на́ ѕ҃ . і҆рмᲂсы̀ пᲂ два́жды . =и҆ ст҃о́мꙋ , два̀ , кано́на , на́ и҃ .=

Кано́нъ , прест҃ѣ́й бцⷣѣ . гла́съ , и҃ . пѣ́снь , а҃ . і҆рмо́съ . Во́дꙋ прᲂше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вᲂпїѧ́ше , и҆зба́вителю бг҃ꙋ на́шемꙋ пᲂе́мъ .

запѣ́въ : Прⷭ҇та́ѧ гжⷭ҇е бцⷣе спасѝ на́съ .= М=но́гими сᲂдержи́мъ напа́стьми , к̾ тебѣ̀ прибѣга́ю спасе́нїѧ и҆скі́й , ѽ мт҃и сло́вꙋ и҆ дв҃ᲂ , ѿ лю́тыхъ и҆ нꙋ́жныхъ мѧ спасѝ . Страсте́й мѧ смꙋща́ютъ прило́зи , и҆ мно́гїѧ печа́ли и҆спᲂлнѧ́ютъ ми дш҃ꙋ , ᲂу҆мирѝ ѻ҆трᲂкᲂви́це , тишино́ю сн҃а и҆ бг҃а твᲂегѡ̀ всенепᲂро́чнаѧ . Сп҃са ро́ждьшꙋю тѧ̀ и҆ бг҃а , мᲂлю̀ дв҃це и҆зба́вити мѧ̀ ѿ лю́тъ . к̾ тебѣ́ бᲂ ны́нѣ прибѣга́ю , прᲂстира́ѧ дш҃ꙋ и҆ пᲂмышле́нїе . Въ ско́рби мѧ сꙋ́ща и҆ в̾ тꙋзѣ̀ , пᲂсѣще́нїѧ бжⷭ҇твенагѡ прᲂмышле́нїѧ є҆́же ѿ тебѐ спᲂдо́би , є҆ди́на бг҃ᲂмт҃и ꙗ҆́кѡ бл҃га̀ бл҃го́мꙋ же рᲂди́тельнице .

Кано́нъ , ст҃о́мꙋ , гла́съ , в҃ . пѣ́снь , а҃ . і҆рмо́съ . Пᲂе́мъ гдⷭ҇ви . запѣ́въ : Ст҃ы́и сла́вныи прᲂро́че и҆лїѐ , мᲂлѝ бг҃а ѡ҆ на́съ . Ви́дѣти жела́ющїи , и҆лїѝ чꙋде́съ ѻ҆гнедᲂхнᲂве́ннꙋю си́лꙋ , ѻ҆гнезра́чнагѡ и҆ честна́гѡ ꙗ҆зы́ка , дх҃а крѣ́пᲂсть , пᲂ дᲂстᲂѧ́нїю сᲂбра́хᲂмсѧ . Оу҆стнѐ бг҃ᲂно́се , и҆ недᲂꙋмѣ́ннагѡ ꙗ҆зы́ка , теснᲂтꙋ́ же и҆ хꙋдᲂгла́сїе , дѣ́йствᲂмъ и҆́же въ тебѣ̀ дх҃а ѿве́рзи , и҆ ᲂу҆ѧснѝ к̾ пѣ́нїю чꙋде́съ твᲂи́хъ . Дае́ши ꙗ҆́же па́че є҆стества̀ , пᲂвинꙋ́вшимсѧ сло́ве , чⷭ҇тны́мъ ти пᲂвелѣ́нїемъ . и҆ пᲂкᲂрѧ́еши дᲂждю̀ две́ри дх҃ᲂмъ , ᲂу҆твержа́емᲂ сло́вᲂ сᲂдѣва́ѧ .= боⷢ҇ . П=ᲂе́мъ гдⷭ҇ви , и҆́же ѿ дв҃ы рᲂжде́ннᲂмꙋ , и҆ ми́ра ѡ҆бно́вльшемꙋ , и҆ тᲂѧ̀ ра́ди на́мъ жи́знь бжⷭ҇твенꙋю дарᲂва́вшемꙋ , пѣ́снь пᲂбѣ́днꙋю , ꙗ҆́кѡ прᲂсла́висѧ .

Дрꙋгі́и кано́нъ . твᲂре́нїе і҆єрмᲂна́ха пахо́мїѧ , є҆мꙋ́же краегране́сїе : пᲂю̀ хвалꙋ̀ вели́кᲂмꙋ и҆лїѝ . гла́съ , и҃ . пѣ́снь , а҃ . і҆рмо́съ . Во́дꙋ прᲂше́дъ . запѣ́въ : Ст҃ы́и сла́вныи прᲂро́че и҆лїѐ , мᲂлѝ бг҃а ѡ҆ на́съ . Ѻ҆рга́нъ ꙗ҆ви́лсѧ є҆сѝ , ᲂу҆дарѧ́емь бжⷭ҇твенымъ брѧца́лᲂмъ , прᲂро́че пречꙋ́дныи . всевѣ́дца бг҃а вᲂспѣва́ѧ , и҆́же ѿмще́нїе пра́веднᲂ , всѣ́мъ даю́ща пᲂ дѣ́лᲂмъ и҆́хъ . Ꙗ҆́же нетерпѧ̀ пре́лесть прᲂро́че чꙋ́дныи , царѧ̀ непра́вдꙋюща ѡ҆ без̾зако́нїи . тѣ́мже сꙋ́дъ бж҃їи по́лнъ гнѣ́ва тᲂмꙋ̀ нане́слъ є҆сѝ ѡ҆сꙋжде́нїѧ . сла́ва . Прᲂро́че и҆ прⷣтче бл҃гᲂда́ти , бжⷭ҇твеныи и҆лїѐ , а҆ха́ва нечести́вагѡ царѧ̀ , ты̀ ꙗ҆́кѡ закᲂнᲂпрестꙋ́пника ѡ҆бличи́въ . и҆ стꙋ́дныѧ сщ҃е́нники , ꙗ҆́кѡ непрепᲂдо́бны пᲂгꙋби́лъ є҆сѝ . и҆ ны́нѣ , боⷢ҇ . Хрⷭ҇то́вꙋ мт҃рь в̾ пѣ́снехъ вᲂспѣ́ти , дᲂсто́йнѡ вѣ́рнїи пᲂтщи́мсѧ , ꙗ҆́кѡ сп҃са всѣ́хъ ро́ждьшꙋю . и҆́же живᲂто́мъ и҆ сме́ртїю вла́сть и҆мꙋ́щагѡ . катава́сїѧ : Ѿве́рзꙋ ᲂу҆ста̀ мᲂѧ̀ .

пѣ́снь , г҃ . і҆рмо́съ . Нбⷭ҇нᲂмꙋ крꙋ́гꙋ верхᲂтво́рче гдⷭ҇и , и҆ цр҃кви зижди́телю , ты̀ менѐ ᲂу҆твердѝ в̾ любвѝ свᲂе́й . жела́нїемъ сы́и кра́й , и҆ вѣ́рнымъ ᲂу҆тверже́нїе , є҆ди́не чл҃кᲂлю́бче . Застꙋпле́нїе и҆ пᲂкро́въ жи́зни мᲂе́й , пᲂлᲂжи́хъ тѧ бг҃ᲂрᲂди́тельнице дв҃ᲂ , ты̀ менѐ ѡ҆кᲂрмѝ к̾ приста́нищꙋ свᲂемꙋ̀ , бл҃ги́мъ вино́вна , и҆ вѣ́рнымъ ᲂу҆тверже́нїе , є҆ди́на всепѣ́таѧ . Мᲂлю̀ дв҃це , дш҃е́внᲂе смꙋще́нїе , и҆ печа́ли бꙋ́рю разᲂри́ти ми . ты́ бᲂ бг҃ᲂневѣ́стнаѧ , нача́льника тишинѣ̀ хрⷭ҇та̀ рᲂдила̀ є҆сѝ , є҆ди́на пречи́стаѧ . Бл҃гᲂда́телѧ ро́ждьши до́брымъ вино́внагᲂ , бл҃гᲂдѣѧ́нїѧ бᲂга́тьствᲂ всѣ́мъ и҆стᲂчѝ . всѧ́ бᲂ мо́жеши , ꙗ҆́кѡ си́льна в̾ крѣ́пᲂсти , хрⷭ҇та̀ ро́ждьши бг҃ᲂбл҃же́ннаѧ . Лю́тыми недꙋ́ги , и҆ бᲂлѣ́знеными стрⷭ҇тьмѝ и҆стѧза́емꙋ , дв҃ᲂ ты́ ми пᲂмᲂзѝ , и҆сцѣле́нїемъ бᲂ неѡ҆скꙋ́днᲂ тѧ̀ зна́ю сᲂкро́вище , некра́дᲂмᲂ и҆ неи҆здае́мᲂ .

и҆́нъ , і҆рмо́съ . На ка́мени мѧ вѣ́ры . Ꙗ҆́кѡ и҆зрѧ́денъ прᲂро́че кᲂрми́тель , и҆́же вра́нᲂмъ твᲂрѧ̀ тебѣ̀ гᲂще́нїе , є҆ди́ныи насыща́ѧи всѧ́кᲂ живо́тнᲂ бл҃гᲂвᲂле́нїѧ . є҆мꙋ́же всѝ зᲂве́мъ , ты̀ є҆сѝ бг҃ъ на́шъ , и҆ нѣ́сть ст҃а па́че тебѐ гдⷭ҇и . Бл҃гᲂда́ть бл҃гᲂда́телю и҆ стрᲂи́телю , и҆́же вдᲂви́цꙋ и҆ прᲂро́ка напита́вшемꙋ , не и҆з̾рече́ннымъ прᲂмышле́нїемъ . є҆мꙋ́же всѝ зᲂве́мъ , ты̀ є҆сѝ бг҃ъ на́шъ , и҆ нѣ́сть ст҃а па́че тебѐ гдⷭ҇и . Затвᲂри́выи тꙋчено́сныѧ ѻ҆́блаки ѡ҆дᲂжди́ти , пи́щи лиша́емѣ саре́ффѣ , ѡ҆ста́нᲂкъ бра́шна , непреста́ннѡ рᲂси́ти сᲂтвᲂрѝ . ты́же взыва́ше , нѣ́сть ст҃а па́че тебѐ гдⷭ҇и . боⷢ҇ . Ты̀ є҆ди́на па́че всѣ́хъ и҆́же ѿ́ вѣка , вели́кимъ спᲂдо́бисѧ и҆ па́че є҆стества̀ . бг҃а бᲂ невмѣсти́магᲂ все́й тва́ри , во́ чревѣ прїѧ́ла є҆сѝ , и҆ вᲂплᲂти́ла є҆сѝ . тѣ́мже бцⷣꙋ тѧ̀ всѝ пᲂчита́емъ .

и҆́нъ , і҆рмо́съ . Нбⷭ҇нᲂмꙋ крꙋ́гꙋ . Всѣ́хъ млⷭ҇тивнѡ пррⷪ҇че наказꙋ́еши , и҆ всѣ́хъ ми́лꙋеши , к̾ тебѣ̀ вѣ́рᲂю притека́ющихъ во́ храмъ тво́й . и҆ по́мᲂщи ѿ тебѐ прᲂсѧ́щїи , ни ка́кᲂ же пᲂгрѣши́ша . А҆ха́ва нечести́вагᲂ царѧ̀ , ты̀ бжⷭ҇твеныи пррⷪ҇че ѡ҆бличи́лъ є҆сѝ . и҆ ꙗ҆́кѡ престꙋ́пника зако́нꙋ , сꙋдо́мъ бж҃їимъ ѡ҆сꙋди́лъ є҆сѝ . сла́ва . Без̾стꙋ́днаѧ цари́ца і҆єзаве́ль , тебѐ бжⷭ҇твенѣйшїи пррⷪ҇че и҆ска́ше ᲂу҆би́ти . ꙗ҆́кѡ на тᲂѧ̀ несвѧще́нныѧ сщ҃е́нники , пᲂ дᲂстᲂѧ́нїю сꙋ́дъ сме́ртныи наве́лъ є҆сѝ . и҆ нн҃ѣ , боⷢ҇ . Мѣ́стᲂ сщ҃е́нїѧ сла́вы , и҆ мы́сленꙋю чи́стаѧ трапе́зꙋ , хлѣ́бъ хрⷭ҇та̀ жи́знь всѣ́хъ прїе́мшꙋю , пᲂе́мъ тѧ̀ влⷣчце . катава́сїѧ : Твᲂѧ̀ пѣвцы̀ .

сѣда́лен̾ . гла́съ , и҃ . И҆сто́чника чꙋде́съ , пррⷪ҇кᲂмъ ᲂу҆дᲂбре́нїе , всѝ пѣ́сненѡ вѣ́рнїи вᲂсхва́лимъ , ѳезви́тѧнина и҆лїю̀ . с̾ пло́тїю бᲂ є҆щѐ сы́и без̾сме́ртенъ , ꙗ҆́кѡ ме́ртвъ ᲂу҆вѣрѧ́етъ ме́ртвыхъ вᲂста́нїе . тѣ́мже дерзнᲂве́нїе к̾ бг҃ꙋ и҆мѣ́ѧ , пᲂдава́етъ и҆сцѣле́нїѧ вѣ́рᲂю прᲂсѧ́щимъ . и҆ мо́литсѧ хрⷭ҇то́ви прилѣ́жнѡ , сᲂгрѣше́нїемъ ѡ҆ставле́нїе пᲂда́ти , пра́зднꙋющимъ любо́вїю ст҃ꙋ́ю па́мѧть є҆гѡ̀ . два́жды . сла́ва , и҆ нн҃ѣ , боⷢ҇ . Въ напа́сти мнᲂгᲂплете́нныѧ впа́дъ , ѿ вра́гъ ви́димыхъ и҆ неви́димыхъ , мᲂлво́ю сᲂдержи́мъ є҆́смь , без̾мѣ́рныхъ сᲂгрѣше́нїи мᲂи́хъ . и҆ ꙗ҆́кѡ к̾ те́плᲂмꙋ застꙋпле́нїю , и҆ пᲂкро́вꙋ мᲂемꙋ̀ чи́стаѧ , къ приста́нищꙋ притека́ю твᲂеѧ̀ бл҃гᲂсти . тѣ́мже прест҃а́ѧ , и҆з̾ тебѐ вᲂплᲂще́ннагѡ без̾ сѣ́мене мᲂлѝ , ѡ҆ всѣ́хъ рабѣ́хъ твᲂи́хъ , непреста́ннѡ пᲂю́щихъ тѧ̀ , бцⷣе всечⷭ҇таѧ . мᲂлѧ́щи тᲂгѡ̀ прилѣ́жнѡ , сᲂгрѣше́нїемъ ѡ҆ставле́нїе дарᲂва́ти , пᲂклᲂнѧ́ющимсѧ вѣ́рᲂю ржⷭ҇твꙋ̀ твᲂемꙋ̀ .

пѣ́снь , д҃ . і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́иньствᲂ , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Страсте́й мᲂи́хъ смꙋще́нїе , ꙗ҆́же ко́рмчїю ро́ждьши гдⷭ҇а , бꙋ́рю ᲂу҆ти́ши мᲂи́хъ прегрѣше́нїй , бг҃ᲂневѣ́стнаѧ . Милᲂсе́рдїѧ бе́зднꙋ призыва́ющꙋ твᲂю̀ пᲂда́ждь ми , ꙗ҆́же бл҃гᲂсе́рдагᲂ ро́ждьши , и҆ сп҃са всѣ́мъ пᲂю́щимъ тѧ̀ . Наде́жꙋ и҆ ᲂу҆тверже́нїе , и҆ спасе́нїѧ стѣ́нꙋ недви́жимꙋ , стѧжа́вше тѧ̀ всенепᲂро́чнаѧ , ѕлᲂлю́тыхъ всѣ́хъ и҆збавлѧ́емсѧ .= Н=а ѻ҆дрѣ̀ бᲂлѣ́зни мᲂеѧ̀ грѣхо́внѣ слежа́ща мѧ̀ , ꙗ҆́кѡ чл҃кᲂлюби́ва , пᲂмᲂзи́ ми бцⷣе мт҃и прⷭ҇нѡ дв҃ᲂ .

и҆́нъ , і҆рмо́съ . Оу҆слы́шахъ гдⷭ҇и . Кᲂренᲂсѣка́тель ᲂу҆́бѡ ꙗ҆ви́лсѧ є҆сѝ ѕло́бѣ , мꙋ́дре прᲂро́че , дᲂбрᲂдѣ́тели же насади́тель . тѣ́мже тѧ̀ ᲂу҆блажа́емъ . Оу҆кᲂрѧ́ше тѧ слᲂвесы̀ вдᲂви́ца , пи́щею сме́рти прᲂро́че . ѻ҆́трᲂка вᲂста́нїе ᲂу҆вѣрѧ́ющи . Назна́менᲂва сла́вꙋ трⷪ҇ческꙋю ꙗ҆́вѣ , дꙋнᲂве́нїемъ тричи́сленымъ . мт҃ри дѣ́тища жи́ва дарᲂва̀ . Ко́ль разжже́сѧ , палѧ̀ бжⷭ҇твенымъ ѻ҆гне́мъ , и҆ ре́внᲂстїю ѽ прᲂро́че , царѧ̀ ѡ҆блича́ѧ твᲂрѧ́ща без̾зако́нїѧ . боⷢ҇ . Мо́лимъ тѧ чⷭ҇таѧ , ꙗ҆́же бг҃а без̾ сѣ́мене заче́ншꙋю , прⷭ҇нѡ мᲂли́тисѧ за рабы̀ твᲂѧ̀ .

и҆́нъ , і҆рмо́съ . Оу҆слы́шахъ гдⷭ҇и . Вѣнча́ тѧ гдⷭ҇ь прᲂро́ка премꙋ́дре , и҆ бл҃гᲂда́ть тебѣ̀ да́рꙋѧ прᲂрица́ти бꙋ́дꙋщаѧ , ꙗ҆́кѡ настᲂѧ́щаѧ . тѣ́мже ны́нѣ слᲂвесе́мъ сбытїѐ зрѧ́ще , хвала́ми прⷭ҇нѡ тебѐ ꙗ҆́кѡ и҆́стиннагѡ прᲂро́ка ᲂу҆блажа́емъ . Є҆ли́кѡ пᲂ премно́гᲂмꙋ смиренᲂмꙋ́дрїемъ ᲂу҆крашена̀ , прᲂро́ка твᲂегѡ̀ дш҃а хрⷭ҇тѐ бж҃е , тᲂли́кѡ па́че ѻ҆гнѧ̀ ре́внᲂстїю распалѧ́ема , стꙋ́дныѧ сщ҃е́нники пᲂгꙋбѝ . сла́ва . Лице́мъ ꙗ҆́кѡ зерца́лᲂмъ разрѣ́шшимсѧ , лицꙋ̀ хрⷭ҇то́вꙋ пред̾стᲂи́ши , пречꙋ́дныи прᲂро́че . ѿ ню́дꙋ же на́съ млⷭ҇тивнᲂ пᲂсѣща́й , да всѝ тѧ̀ хвала́ми ꙗ҆́кѡ прⷪ҇ро́ка ᲂу҆блажа́емъ . и҆ нн҃ѣ , боⷢ҇ . Наде́ждꙋ и҆ ᲂу҆тверже́нїе , и҆ спасе́нїѧ стѣ́нꙋ нерꙋши́мꙋ , тѧ̀ стѧжа́вше всепѣ́таѧ , ѕло́бы всѧ́кїѧ и҆збавлѧ́емсѧ . катава́сїѧ : Сѣдѧ́и вᲂ сла́вѣ .

пѣ́снь , є҃ . і҆рмо́съ . Прᲂсвѣтѝ на́съ пᲂвелѣ́нїемъ

сѝ гдⷭ҇и , и҆ мы́шцею высо́кᲂю , твᲂегѡ̀ ми́ра пᲂда́ждь на́мъ , є҆ди́не чл҃кᲂлю́бче . И҆спо́лни чⷭ҇таѧ весе́лїѧ живᲂта̀ на́шегѡ , твᲂю̀ нетлѣ́ннꙋю даю́щи ра́дᲂсть , весе́лїѧ ро́ждьши сꙋ́щагѡ винꙋ̀ . И҆зба́ви на́съ ѿ бѣ́дъ бцⷣе чⷭ҇таѧ , вѣ́чнᲂе ро́ждьши и҆збавле́нїе , и҆ ми́ра всѧ́къ ᲂу҆́мъ преи҆мꙋ́щагᲂ . Разрѣшѝ мглꙋ̀ прегрѣше́нїй мᲂи́хъ бг҃ᲂневѣ́стᲂ , свѣ́тᲂмъ твᲂеѧ̀ свѣ́тлᲂсти , ꙗ҆́же свѣ́тъ ро́ждьшаѧ бжⷭ҇твеный и҆ превѣ́чный . И҆сцѣлѝ чⷭ҇таѧ дш҃и мᲂеѧ̀ немᲂже́нїе , пᲂсѣще́нїемъ сѝ ᲂу҆бѣ́ждьшисѧ , и҆ здра́вїе мᲂльба́ми сѝ пᲂда́ждь мѝ .

и҆́нъ , і҆рмо́съ . Свѣ́та пᲂда́телю . Зако́нъ ѻ҆те́ческїи тѧ̀ , ꙗ҆́кѡ мᲂли́твеника всеи́стинна пᲂказа̀ , чꙋдᲂдѣ́йственика , ѡ҆браща́юща є҆стества̀ сᲂста́вᲂмъ и҆лїѐ , и҆ препᲂдо́бнꙋ же́ртвꙋ пᲂпалѧ́юща вᲂда́ми . Пᲂсрами́лъ є҆сѝ и҆зрѧ́днѡ , ꙗ҆́кѡ и҆́стинѣ слꙋжи́телю прпⷣбне , скве́рнагѡ стꙋда̀ прᲂро́ки , всебл҃же́нне и҆лїѐ . ꙗ҆́вѣ начерта́въ трⷪ҇ческꙋю си́лꙋ . Сло́вᲂмъ бл҃гᲂда́ти сщ҃е́нствꙋѧ и҆лїѐ . закла́лъ є҆сѝ сщ҃е́нники негᲂдᲂва́нныѧ , непᲂви́нныма сѝ рꙋка́ма . ꙗ҆́кᲂже ѻ҆гне́мъ ре́внᲂстїю ѡ҆палѧ́емь . боⷢ҇ . Тебѣ̀ ро́ждьшей хрⷭ҇та̀ всемꙋ̀ сᲂдѣ́телѧ , взыва́емъ ра́дꙋисѧ чⷭ҇таѧ . ра́дꙋисѧ ꙗ҆́же свѣ́тъ вᲂсїѧ́вшаѧ на́мъ . ра́дꙋисѧ вмѣ́щшаѧ бг҃а невмѣсти́магᲂ .

и҆́нъ , і҆рмо́съ . Вскꙋ́ю мѧ ѿри́нꙋ . И҆́же бжⷭ҇твеныѧ бл҃гᲂда́ти ꙗ҆вле́на незахᲂди́маѧ зарѧ̀ , и҆ ᲂу҆́мъ бжⷭ҇твенѣйшїи пррⷪ҇че и҆лїѐ , и҆́скренᲂ стѧжа́въ , бл҃гᲂчести́выхъ к̾ пѣ́нїю вᲂз̾ставлѧ́еши . Кто̀ не ᲂу҆диви́тсѧ бжⷭ҇твенѣй ре́внᲂсти твᲂе́й , прᲂро́че всечⷭ҇тне ; кто́ ли невᲂспᲂе́тъ хрⷭ҇та̀ , и҆́же тᲂли́кꙋ крѣ́пᲂсть тебѣ̀ дарᲂва́вшагᲂ . сла́ва . Ѿ бг҃а прᲂро́че ᲂу҆краси́сѧ прᲂро́чествᲂмъ , и҆лїѐ пречꙋ́дне , ѿ ню́дъ бг҃ᲂви ве́сь сᲂедини́всѧ . пре́лесть ѡ҆блича́ѧ , і҆и҃льты к̾ бж҃їю пᲂзна́нїю приве́лъ є҆сѝ . и҆ нн҃ѣ , боⷢ҇ . Сл҃нце ро́ждьши бцⷣе незахᲂди́мᲂе , всего́ мѧ прᲂсвѣтѝ ѡ҆мраче́ннагᲂ стрⷭ҇тьмѝ . и҆ и҆спо́лни мѧ̀ бжⷭ҇твенагᲂ свѣ́та .

катава́сїѧ : Оу҆диви́шасѧ всѧ́ческаѧ .

пѣ́снь , ѕ҃ . і҆рмоⷭ҇ . Мл҃твꙋ прᲂлїю̀ ко́ гдⷭ҇ꙋ , и҆ тᲂмꙋ̀ вᲂз̾вѣщꙋ̀ печа́ль мᲂю̀ . ꙗ҆́кѡ ѕѡ́лъ дш҃а мᲂѧ̀ напо́лнисѧ , и҆ живо́тъ мо́й а҆́дꙋ прибли́жисѧ . и҆ мᲂлю́сѧ ꙗ҆́кѡ і҆ѡ́на , ѿ тлѝ бж҃е мо́й вᲂз̾веди́ мѧ . Сме́рти и҆ тлѝ ꙗ҆́кѡ спа́слъ є҆́сть , са́мъсѧ и҆з̾да́въ на сме́рть , тлѣ́нїемъ и҆ сме́ртїю мᲂѐ є҆стество̀ ꙗ҆́тᲂ бы́вшее . дв҃ᲂ мᲂлѝ гдⷭ҇а и҆ сн҃а свᲂегѡ̀ , врагѡ́въ ѕлᲂдѣ́йствїѧ мѧ̀ и҆зба́вити . Застꙋ́пницꙋ тѧ̀ живᲂтꙋ̀ свѣ́мъ , и҆ храни́тельницꙋ тве́рдꙋ дв҃це , напа́стей рѣша́щꙋ мᲂлвы̀ , и҆ нало́ги бѣсо́мъ ѿгᲂнѧ́щꙋ . и҆ мᲂлю́сѧ всегда̀ , страсте́й мѧ и҆зба́вити всенепᲂро́чнаѧ .= Ꙗ҆́=кѡ стѣ́нꙋ и҆ прибѣ́жище стѧжа́хᲂмъ , и҆ дш҃а́мъ тѧ̀ сᲂверше́нᲂе спасе́нїе , и҆ прᲂстра́нствᲂ въ ско́рбѣхъ ѻ҆трᲂкᲂви́це . и҆ свѣ́тᲂмъ тѝ прⷭ҇нѡ ра́дꙋемсѧ , ѽ влⷣчце , ны́нѣ на́съ ѿ стрⷭ҇те́й и҆ бѣ́дъ спасѝ . На ѻ҆дрѣ̀ ны́нѣ не́мᲂщїю низ̾лежꙋ̀ , и҆ нѣ́сть и҆сцѣле́нїѧ пло́ти мᲂе́й . нᲂ ꙗ҆́же бг҃а и҆ сп҃са ми́рꙋ , и҆ и҆зба́вителѧ недꙋ́гᲂмъ ро́ждьшаѧ , тебѣ̀ мᲂлю́сѧ бл҃го́й , ѿ и҆стлѣ́нїѧ бᲂлѣ́зней вᲂста́ви мѧ .

и҆́нъ , і҆рмо́съ . Бе́здна грѣхо́въ . Сто́лпъ бл҃гᲂче́стїѧ , и҆ житїѧ̀ чи́стагѡ , сади́тель чистᲂтѣ̀ бы́лъ є҆сѝ . а҆́нг҃лѡмъ же пᲂдо́бникъ , чꙋ́дныи и҆лїѐ бг҃ᲂно́сне . Гнѣ́въ тѧ прⷪ҇рᲂкᲂꙋбі́йцы жены̀ ᲂу҆страши́въ . и҆́же вѧза́ти и҆ рѣша́ти прїи́мша , дᲂжде́мъ тече́нїе , чꙋ́дныи и҆лїѐ ѿго́нитъ . Вᲂз̾вы́силъ є҆сѝ кᲂлѣ́на преклᲂни́въ , ᲂу҆ма̀ превᲂзнесе́нᲂе ѻ҆́кᲂ , мᲂльбо́ю и҆зрѧ́днᲂю рѣше́нїе твᲂрѧ̀ . и҆ бразды̀ землены́ѧ ᲂу҆пᲂи́лъ є҆сѝ тꙋ́чами . боⷢ҇ . Кꙋпина́ тѧ въ сина́и , не ѡ҆па́льнѡ прибли́жьшисѧ ѻ҆гню̀ , пред̾написꙋ́етъ мт҃рь прⷭ҇нѡ дв҃ꙋю , всепѣ́таѧ бцⷣе мр҃їе .

и҆́нъ , і҆рмо́съ . Ѡ҆чи́сти мѧ сп҃се . Мᲂле́бнᲂе пѣ́нїе принᲂсѝ к̾ бг҃ꙋ пррⷪ҇че всечⷭ҇тны́и , ѡ҆ всѣ́хъ и҆́же в̾ бжⷭ҇твеныи хра́мъ тво́й притека́ющихъ , да тѧ̀ всегда̀ ꙗ҆́кѡ вели́ка застꙋ́пника пᲂчита́емъ . Оу҆́мъ чл҃чь недᲂсти́гнетъ житїѐ твᲂѐ прᲂро́че , пᲂ дᲂсто́инствꙋ пᲂхвали́ти . па́че ᲂу҆́бѡ ᲂу҆́мныхъ чинѡ́въ вᲂзвели́чисѧ , зрѧ́ше хрⷭ҇то́вᲂ преѡ҆браже́нїе . сла́ва . И҆́же всѧ́ческимъ гдⷭ҇ь и҆ твᲂре́цъ на́мъ ꙗ҆ви́сѧ , пᲂ твᲂемꙋ̀ прᲂро́чествꙋ бл҃же́нне и҆лїѐ , всѧ̀ челᲂвѣ́ки призыва́ѧ к̾ пᲂзна́нїю свᲂемꙋ̀ , ꙗ҆́кѡ чл҃кᲂлю́бецъ . и҆ ны́нѣ , боⷢ҇ . Мр҃і́е чи́стыи дв҃ства сᲂсꙋ́де , ѡ҆чи́сти мѝ ᲂу҆́мъ ѿ стрⷭ҇тна́гѡ ѡ҆мраче́нїѧ . и҆ и҆спо́лни бл҃гᲂда́ти и҆ пра́вды , срⷣце мᲂѐ всенепᲂро́чнаѧ .

катава́сїѧ : Бжⷭ҇твенᲂе сѐ и҆ всечестно́е .

кᲂнда́къ . гла́съ , в҃ . Пррⷪ҇че и҆ прᲂви́дче вели́кихъ дѣ́лъ бг҃а на́шегѡ , и҆лїѐ великᲂимени́те . и҆́же вѣща́нїемъ свᲂи́мъ ᲂу҆ста́вивыи вᲂдᲂто́чныѧ ѻ҆́блаки , мᲂлѝ ѡ҆ на́съ є҆ди́нагѡ чл҃кᲂлю́бца . и҆́кᲂсъ . Мно́гᲂе чл҃кѡмъ без̾зако́нїе , бж҃їе же мно́гᲂе чл҃кᲂлю́бїе , зрѧ̀ прᲂро́къ смꙋща́шесѧ , и҆лїѧ̀ ꙗ҆рѧ́сѧ . и҆ слᲂвеса̀ неми́лᲂстивна , къ ми́лᲂстивнᲂмꙋ пᲂдви́же . прᲂгнѣ́вайсѧ вᲂзᲂпи́въ , на ѿме́щꙋщїѧсѧ тебѐ ны́нѣ , сꙋдїѐ пра́ведныи . нᲂ ᲂу҆тро́бꙋ бл҃га́гѡ ника́кᲂже пᲂдви́же , є҆́же мꙋ́чити тᲂго̀ ѿмета́ющихсѧ . при́снѡ бᲂ пᲂкаѧ́нїѧ всѣ́хъ жде́тъ , є҆ди́ныи чл҃кᲂлю́бецъ .

пѣ́снь , з҃ . і҆рмо́с̾ . И҆́же ѿ і҆ꙋде́и , дᲂше́дше ѻ҆́трᲂцы в̾ вавилѡ́нъ дре́вле , вѣ́рᲂю ᲂу҆тверже́нїи , пла́мень пе́щныи пᲂпра́вше гл҃юще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . На́ше спасе́нїе ꙗ҆́кᲂже вᲂсхᲂтѣ̀ сп҃се , ᲂу҆стро́ити во́ чревᲂ дв҃ыѧ всели́сѧ . ю҆́же ми́рꙋ застꙋ́пницꙋ пᲂказа̀ . ѻ҆ц҃ъ на́шихъ бж҃е блгⷭ҇ве́нъ є҆сѝ .= В=ᲂли́телѧ млⷭ҇ти , є҆го́же рᲂдѝ мт҃и ны́нѣ ᲂу҆мᲂлѝ , и҆зба́вити мѧ ѿ прегрѣше́нїй и҆ дш҃е́вныѧ скве́рны , сн҃ꙋ твᲂемꙋ̀ зᲂвꙋ́ща , ѻ҆ц҃ъ на́шихъ бж҃е блгⷭ҇ве́нъ є҆сѝ . Сᲂкро́вище спасе́нїѧ , и҆ и҆сто́чникъ нетлѣ́нїѧ , тебѐ ро́ждьшꙋю , сто́лпъ ᲂу҆тверже́нїѧ , и҆ две́рь пᲂкаѧ́нїѧ , вᲂпїю́щимъ пᲂказа̀ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Тѣле́сныѧ недꙋ́ги , и҆ дш҃е́вныѧ грѣхѝ , бг҃ᲂрᲂди́тельнице , любо́вїю пристꙋпа́ющимъ к̾ кро́вꙋ твᲂемꙋ̀ дв҃це , и҆сцѣли́ти спᲂдо́би , ꙗ҆́же сп҃са хрⷭ҇та̀ на́мъ ро́ждьшаѧ .

и҆́нъ , і҆рмо́съ . Кꙋпина̀ в̾ гᲂрѣ̀ . Пресла́внѡ бжⷭ҇твенᲂю ты̀ вᲂѡ҆браже́нᲂю си́лᲂю ѡ҆бле́ксѧ , пи́щею четыредесѧтᲂдне́внᲂю , и҆лїѐ чꙋ́дныи , до́лгїи ше́ствᲂвалъ є҆сѝ пꙋ́ть . тѣ́мже в̾ хᲂри́вѣ глаго́лаше , бл҃гᲂслᲂве́нъ бг҃ъ ѻ҆ц҃ъ на́шихъ . Хла́дъ кро́тᲂкъ пᲂказа̀ и҆ то́нᲂкъ , гдⷭ҇а тебѣ̀ и҆лїѐ , по́ бз҃ѣ ревнꙋ́ющꙋ вседержи́тели . не дх҃ъ бꙋ́ренъ , ни трꙋ́съ , ни ѻ҆́гнь страша́и . тѣ́мже і҆с҃ꙋ кро́ткᲂмꙋ пᲂѧ́ше , бл҃гᲂслᲂве́нъ бг҃ъ ѻ҆ц҃ъ на́шихъ . Бг҃ᲂѧвле́нїѧ спᲂдо́бисѧ и҆ прᲂро́чества , ꙗ҆́кᲂже вели́кїи мѡѷсе́й , прᲂро́ки пᲂмазꙋ́ѧ дх҃ᲂмъ , и҆ царѝ и҆лїѐ чꙋ́дныи . и҆ сла́вы на ѳавѡ́рѣ хрⷭ҇то́вы зри́тель бы́въ , пᲂѧ́ше бл҃гᲂслᲂве́нъ бг҃ъ ѻ҆ц҃ъ на́шихъ . боⷢ҇ . Ражда́еши без̾ сѣ́мене без̾нача́льнагѡ и҆ превѣ́чнагѡ гдⷭ҇а , ѻ҆́ч҃а сн҃а , мꙋ́дрᲂсть же и҆ си́лꙋ , на пᲂслѣ́дᲂкъ пречи́стаѧ , па́че є҆стества̀ пло́тїю , на ѻ҆бнᲂвле́нїе землены́хъ . тѣ́мже и҆з̾ тебѐ ро́ждьшемꙋсѧ зᲂве́мъ , бл҃гᲂслᲂве́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . И҆́же ѿ і҆ꙋде́и . Лю́дїе і҆и҃левы , и҆́же с̾ пѧтидесѧтᲂнача́льникᲂмъ , к̾ тебѣ̀ бжⷭ҇твеныи и҆лїѐ прише́дше , ѻ҆гне́мъ с̾ нб҃сѐ , ꙗ҆́кѡ недᲂсто́йныхъ пᲂпали́лъ є҆сѝ . И҆́же бг҃ᲂвидѣ́нїемъ ѡ҆сїѧ́емь , дᲂсто́йнѡ бжⷭ҇твенѣйшїи прᲂро́къ бы́лъ є҆сѝ , и҆лїѐ всечестны́и . и҆ ваа́лᲂвы же́ртвы ѿ ню́дъ ᲂу҆праздни́лъ є҆сѝ . Є҆ли́кѡ дх҃ъ прест҃ы́и пᲂдадѐ прᲂрица́ти , всечестны́и прᲂро́че и҆лїѐ , прᲂре́клъ є҆сѝ ѡ҆ прише́ствїи сн҃а бж҃їѧ , и҆ непᲂгрѣшѝ всеблаже́нне , є҆мꙋ́же пᲂе́мъ , бл҃гᲂслᲂве́нъ бг҃ъ ѻ҆ц҃ъ на́шихъ . сла́ва . Стꙋ́днымъ сщ҃е́нникѡмъ , и҆́же трапе́зꙋ і҆єзаве́линꙋ непра́веднѡ ꙗ҆дꙋ́щимъ , вᲂи́стинꙋ сꙋдо́мъ бж҃їимъ , и҆ прᲂро́ка рꙋко́ю , ꙗ҆́дъ сме́рти пᲂ дᲂстᲂѧ́нїю ѿры́гнꙋсѧ . и҆ ны́нѣ , боⷢ҇ . Спаси́ мѧ мт҃и бж҃їѧ , сᲂдержи́ма глꙋбино́ю сᲂгрѣше́нїи , и҆ всѧ́кїѧ вра́гъ и҆схитѝ ѕло́бы . да твᲂѐ спаса́емь велича́ю застꙋпле́нїе .

катава́сїѧ : Непᲂслꙋжи́ша тва́ри .

пѣ́снь , и҃ . і҆рмо́съ . Цр҃ѧ нбⷭ҇нагѡ , є҆го́же пᲂю́тъ вѡ́и а҆́нг҃льстїи . хвали́те и҆ превᲂзнᲂси́те є҆гѡ̀ во́ вѣки . По́мᲂщи ꙗ҆́же ѿ тебѐ тре́бꙋющїѧ , непре́зри дв҃ᲂ пᲂю́щїѧ , и҆ превᲂзнᲂсѧ́щїѧ хрⷭ҇та̀ во́ вѣки . Немᲂже́нїе дш҃и мᲂеѧ̀ и҆сцѣлѧ́еши и҆ тѣле́сныѧ бᲂлѣ́зни дв҃ᲂ , ꙗ҆́кѡ да тѧ̀ пᲂе́мъ , и҆ превᲂзно́симъ чи́стꙋю во́ вѣки . И҆сцѣле́нїемъ бᲂга́тьствᲂ и҆злива́еши , вѣ́рнѡ пᲂю́щимъ тѧ̀ дв҃це , и҆ превᲂзнᲂсѧ́щимъ хрⷭ҇та̀ во́ вѣки . Напа́стныѧ ты̀ прило́ги ѿгᲂнѧ́еши , и҆ страстны́ѧ нахо́ды дв҃ᲂ , ꙗ҆́кѡ да тѧ̀ пᲂе́мъ и҆ превᲂзно́симъ чи́стꙋю во́ вѣки .

и҆́нъ , і҆рмо́съ . Оу҆страши́сѧ ѻ҆́трᲂкъ . И҆зрѧ́днѡ ѡ҆брѣ́те а҆хаа́въ ро́да бл҃гᲂлѣ́пїе , всегꙋби́тельствᲂ прᲂро́ка ѡ҆бличе́нїемъ , скве́рнагѡ ᲂу҆бі́йства ме́рзскᲂ мꙋче́нїе . ѳезви́тѧнинъ же , ѿ ѻ҆гнедᲂхнᲂве́нна ᲂу҆ма̀ , жизнᲂда́телю пѣ́снь вᲂспѣва́ше , гдⷭ҇а всѧ̀ дѣ́ла по́йте , и҆ превᲂзнᲂси́те є҆гѡ̀ во́ вѣки . Дᲂжди́тъ тебѣ̀ ѻ҆́гнь с̾ нб҃сѐ пᲂпалѧ́ѧ , и҆лїѐ ѡ҆держи́мыхъ пѧтьдесѧ́те сꙋгꙋ́бᲂ , ꙗ҆́кѡ бж҃їю и҆зрѧ́днꙋ слꙋжи́телю . держа́щемꙋ же приснᲂживо́тнꙋю жи́знь , бг҃ᲂлѣ́пнѡ пѣ́снь взыва́ше , гдⷭ҇а всѧ̀ дѣ́ла по́йте , и҆ превᲂзнᲂси́те є҆гѡ̀ во́ вѣки . Таи́нника тѧ̀ пᲂказа̀ хрⷭ҇то́съ , ꙗ҆́кѡ чистᲂтѣ̀ сади́телѧ . и҆́же дв҃ства пребжⷭ҇твенᲂе прᲂзѧбе́нїе , на ѳавѡ́рѣ бжⷭ҇твенагѡ вᲂплᲂще́нїѧ , бжⷭ҇тва̀ непᲂсти́жимыи свѣ́тъ , вᲂ свᲂе́й пло́ти пᲂказа́въ тебѣ̀ зᲂвꙋ́щꙋ . гдⷭ҇а всѧ̀ дѣ́ла по́йте , и҆ превᲂзнᲂси́те є҆гѡ̀ во́ вѣки . боⷢ҇ . Всебᲂга́тна бы́сть ᲂу҆тро́ба бж҃їѧ мт҃ре , ꙗ҆́кѡ прїе́мши сло́вᲂ дебельство́мъ пло́ти , ѿ неѧ̀ смѣ́шена земле́нагѡ зра́ка пᲂ сᲂста́вꙋ , ꙗ҆ви́сѧ гра́дъ бж҃їи , в̾ не́мже вы́шнїи жи́ти бл҃гᲂи҆зво́ли . є҆мꙋ́же пᲂе́мъ , гдⷭ҇а всѧ̀ дѣ́ла по́йте , и҆ превᲂзнᲂси́те є҆гѡ̀ во́ вѣки .

и҆́нъ , і҆рмо́с̾ . Цр҃ѧ нбⷭ҇нагѡ . И҆́же всѧ̀ вѣ́дыи ꙗ҆́кѡ бг҃ъ , бꙋ́дꙋщихъ и҆ бы́ти хᲂтѧ́щихъ ра́зꙋмъ , тебѣ̀ и҆лїѐ ꙗ҆́кѡ вѣ́рнꙋ сꙋ́щꙋ в̾вѣрѧ́етъ , и҆ дале́че сꙋ́щаѧ ꙗ҆́кѡ бли́зъ пᲂказꙋ́етъ . Бл҃гᲂчести́вымъ дерзнᲂве́нїемъ , вжили́въ ᲂу҆́мъ сво́й бл҃же́нне прᲂро́че , прᲂрица́еши разстᲂѧ́щаѧсѧ ꙗ҆́кѡ бли́зъ сꙋ́ща , всечестны́и прⷪ҇ро́че . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Ѡ҆чи́стивъ ѿ всѧ́кїѧ скве́рны , бжⷭ҇твеныи пррⷪ҇че сво́й ᲂу҆́мъ . тѣ́мъ и҆ ве́сь ст҃ъ бы́лъ є҆сѝ , к̾ бжⷭ҇твенᲂмꙋ свѣ́тꙋ всѣ́хъ наставлѧ́ѧ . и҆ нн҃ѣ , боⷢ҇ . Є҆го́же рᲂдила̀ є҆сѝ сло́вᲂ па́че сло́ва , бг҃ᲂрᲂди́тельнице чⷭ҇таѧ , ѡ҆ на́съ мᲂлѝ вѣ́рнѡ чтꙋ́щихъ тѧ̀ . катава́сїѧ : Хва́лимъ бл҃гᲂслᲂви́мъ . Ѻ҆́трᲂки бл҃гᲂчести́выѧ .

пѣ́снь , ѳ҃ . і҆рмо́съ . Вᲂи́стинꙋ бцⷣꙋ тѧ̀ и҆спᲂвѣ́дающе , спасе́ннїи тᲂбо́ю дв҃це чⷭ҇таѧ , с̾ нбⷭ҇ными вѡ́и тѧ̀ велича́емъ .= Т=о́ка сле́зъ мᲂи́хъ не ѿврати́сѧ , ꙗ҆́же ѿ всѧ́кагѡ лица̀ всѧ̀ сле́зы ѿе́мшагѡ , дв҃це хрⷭ҇та̀ ро́ждьшаѧ . Ра́дᲂсти мᲂѐ се́рдце и҆спо́лни дв҃ᲂ , ꙗ҆́же ра́дᲂсти прїе́мши и҆спᲂлне́нїе грѣхо́внꙋю печа́ль пᲂтреблѧ́ющи . Свѣ́та твᲂегѡ̀ зарѧ́ми прᲂсвѣтѝ дв҃ᲂ , мра́къ невѣ́денїѧ ѿгᲂнѧ́щи , бл҃гᲂвѣ́рнѡ бцⷣꙋ тѧ̀ и҆спᲂвѣ́дающихъ . Въ мѣ́стѡ ѡ҆ѕлᲂбле́нїѧ , не́мᲂщи низ̾лежа́щагѡ , дв҃ᲂ и҆сцѣлѝ , и҆з̾ не здра́вїѧ вᲂ здра́вїе претвᲂрѧ́ющи .

и҆́нъ , і҆рмо́съ . Ꙗ҆́же пре́жде сл҃нца . Нетре́ннᲂе челᲂвѣ́ки ше́ствїе , на землѝ по́живъ , ми́лᲂтїю стрꙋю̀ і҆ѡрда́нскꙋю , ѳезви́тѧнинъ преше́дъ . ѻ҆рꙋ́жникъ вᲂздꙋ́шныи , небᲂте́чнᲂе сᲂвершѝ стра́ннᲂе ше́ствїе дх҃ᲂмъ . Бл҃гᲂче́стїѧ ре́внᲂстїю , ѳезви́тѧнинъ ѡ҆палѧ́емь , на ѻ҆гнезра́чнѣй кᲂлесни́цѣ взима́етсѧ . ми́лᲂть же сᲂвле́къ , є҆ю́же ᲂу҆таи́тисѧ невᲂзмо́же , є҆лисе́ѡви ѡ҆дѣ́ѧвшꙋсѧ , прїе́млетъ бжⷭ҇твенꙋю бл҃гᲂда́ть . Оу҆жасе́сѧ бг҃ᲂви́децъ ѳезви́тѧнинъ , съ мѡѷсе́ᲂмъ зри́тъ , ꙗ҆́же ѻ҆́кᲂ неви́дѣ , и҆ ᲂу҆́хᲂ неслы́ша , и҆ на́ срⷣце чл҃къ земленᲂро́дныхъ не взы́де , вᲂплᲂще́на гдⷭ҇а , на ѳавѡ́рѣ вседержи́телѧ . боⷢ҇ . Ю҆́же неми́лᲂстивнагѡ дре́внѧгѡ пᲂгꙋбле́нїѧ ѡ҆сꙋжде́нїе , и҆ пра́матере и҆справле́нїе , ю҆́же ро́дꙋ к̾ бг҃ꙋ винꙋ̀ присвᲂе́нїѧ , ю҆́же к̾ зижди́телю мо́стъ , тѧ̀ бцⷣе велича́емъ .

и҆́нъ , і҆рмо́съ . Вᲂи́стинꙋ бцⷣꙋ . Заре́ю невеще́ственᲂю , живᲂнача́льныѧ трⷪ҇цы , прᲂро́че и҆лїѐ ѡ҆бᲂжа́емь . тѣ́мъ тебѐ всѝ к̾ бг҃ꙋ ѡ҆́ мирѣ мᲂли́твеника приво́димъ бл҃же́нне . На земли́ тѧ а҆́нг҃ла пᲂзна́хᲂмъ , бжⷭ҇твеныи пррⷪ҇че , и҆ на́ небеси ѿ ню́дъ чл҃ка бж҃їѧ , ꙗ҆́кᲂже и҆ са́мъ гдⷭ҇ь ре́клъ є҆́сть . пᲂне́же и҆лїѧ̀ чл҃къ жесто́къ є҆сѝ , сᲂгрѣша́ющꙋ і҆и҃лю терпѣ́ти немо́жеши , взы́ди ты̀ кᲂ мнѣ̀ , да а҆́зъ до́лѣ сни́дꙋ . сла́ва . На землѝ бжⷭ҇твеныи пррⷪ҇че , ꙗ҆́кѡ беспло́тенъ по́жилъ є҆сѝ . и҆ ны́нѣ на нб҃са̀ вᲂзнᲂси́мь , сᲂ а҆́нг҃льскими ли́ки ликᲂствꙋ́еши , на́съ свы́ше назира́й пᲂю́щихъ тѧ̀ бл҃же́нне . и҆ нн҃ѣ , боⷢ҇ . Но́сиши на рꙋкꙋ̀ бг҃а , нᲂсѧ́щагᲂ всѧ́ческаѧ , и҆ питѣ́еши пита́телѧ чⷭ҇таѧ , на́мъ ᲂу҆пᲂдо́бльшасѧ . є҆го́же мᲂлѝ , лю́демъ твᲂи́мъ дарᲂва́ти , всѣ́хъ лю́тыхъ и҆збавле́нїе .

катава́сїѧ : Всѧ́къ зе́менъ .= Дᲂсто́йнѡ є҆́сть . свѣти́ленъ . На нбⷭ҇ныхъ крꙋзѣ́хъ , ѻ҆́гненᲂю кᲂлесни́цею вᲂзнесе́сѧ . ны́нѣ твᲂю̀ сᲂверша́ющїѧ па́мѧть вѣ́рнѡ , назира́ѧ ꙗ҆́кѡ свѣ́та бли́зъ сы́и , свѣ́тъ мы́сленыи на́мъ дава́й . вⷤ . сла́ва , и҆ ны́нѣ , боⷢ҇ . И҆́=же ѿ́ бг҃а ми́рᲂви по́данᲂмъ бл҃ги́мъ , ты̀ вина̀ бы́сть бцⷣе . нᲂ и҆ ны́нѣ мᲂлѝ ѡ҆ ѻ҆́бщемъ спасе́нїи , бл҃гᲂпремѣ́ннагѡ бг҃а .

На хвали́тѣхъ , стихѣ́ры . гла́съ , и҃ . поⷣ . что́ тѧ и҆менꙋ́емъ а҆пⷭ҇ле .= Є҆=гда̀ ты̀ прᲂро́че чꙋ́дныи ,꙳ бг҃ᲂви дᲂбрᲂдѣ́телїю и҆ житїе́мъ чи́стымъ ,꙳ смѣси́сѧ с̾ ни́мъ , ѻ҆́бласть прїе́мъ ,꙳ тва́рь пᲂ ра́зꙋмꙋ и҆з̾мѣ́рилъ є҆сѝ .꙳ и҆ две́ри дᲂжде́вныѧ во́лею затвᲂри́лъ є҆сѝ .꙳ и҆ свы́ше ѻ҆́гнь низве́лъ є҆сѝ ,꙳ и҆ врагѝ пᲂгꙋби́лъ є҆сѝ .꙳ мᲂлѝ спасти́сѧ дш҃а́мъ на́шимъ . Ре́внᲂстїю гдⷭ҇нею распала́емь ,꙳ без̾зако́нныѧ царѝ ты̀ и҆зъѡ҆бличи́лъ є҆сѝ ѕѣлѡ̀ .꙳ стꙋ́дныѧ сщ҃е́нники ты̀ ᲂу҆мᲂри́лъ є҆сѝ те́плѣ .꙳ вже́гъ ѻ҆́гнь в̾ вᲂдѣ̀ блаже́нне .꙳ пи́щꙋ же недѣ́ланнꙋю и҆стᲂчи́лъ є҆сѝ ,꙳ и҆ во́ды і҆ѡрда́нскїѧ ,꙳ ми́лᲂтїю свᲂе́ю пресѣ́клъ є҆сѝ .꙳ мᲂлѝ спасти́сѧ дш҃а́мъ на́шимъ . Є҆гда̀ ты̀ прᲂро́че пᲂказа́лъ є҆сѝ ,꙳ на землѝ ꙗ҆́кѡ вᲂи́стинꙋ ю҆́же на́ нб҃си жи́знь .꙳ жи́знїю сꙋ́щею в̾ тебѣ̀ сᲂста́внᲂю ѡ҆бᲂгатѣ́ѧсѧ ,꙳ ѻ҆́трᲂка ме́ртва вᲂскреси́лъ є҆сѝ .꙳ сме́рти крᲂмѣ̀ на лѣ́та лꙋ́чша пребыва́еши .꙳ на кᲂлесни́цꙋ ѻ҆́гненꙋ всѣ́лъ є҆сѝ ,꙳ на высᲂтꙋ̀ вᲂзвыша́емь .꙳ мᲂлѝ спасти́сѧ дш҃а́мъ на́шимъ .

И҆́ны стихѣ́ры . гла́съ , а҃ . И҆лїѧ̀ ревни́выи , и҆ страсте́мъ самᲂде́ржецъ , на вᲂздꙋ́сѣ нᲂси́мь бѧ́ше дне́сь , всеми́рнагѡ таи́нникъ спасе́нїѧ начина́тель . ѽ сла́вы честны́ѧ , є҆́йже спᲂдо́бисѧ небᲂпа́рныи прᲂро́къ , и҆ прᲂро́кѡмъ и҆зрѧ́днᲂе ᲂу҆дᲂбре́нїе . се́й бᲂ во́ плᲂти а҆́нг҃лъ , и҆ беспло́тенъ чл҃къ пᲂказа́сѧ и҆справле́ньми . є҆го́же хва́лѧще рце́мъ , застꙋпѝ на́съ мꙋ́дре в̾ де́нь сꙋ́дныи . Дх҃о́вными пѣ́сньми прᲂро́ки хрⷭ҇то́вы всѝ вᲂсхва́лимъ . и҆лїѧ́ бᲂ ѳезви́тѧнинъ , нб҃ᲂше́ственикъ бы́сть , и҆ ми́лᲂтїю є҆лисе́й бл҃гᲂда́ть прїѧ́тъ сꙋгꙋ́бꙋ ѿ бг҃а . и҆ свѣти́льницы свѣ́тлїи вселе́ннѣй ꙗ҆ви́шасѧ , мᲂлѧ́ще непреста́ннѡ ѡ҆ дш҃а́хъ на́шихъ . Дв҃дски дне́сь вѣ́рнїи , прᲂро́ка гдⷭ҇нѧ пѣ́сньми пᲂчте́мъ , и҆лїю̀ ѳезви́тѧнина , и҆ ревни́телѧ пресвѣ́тла . се́й бᲂ ꙗ҆зы́кᲂмъ нб҃ᲂ ꙗ҆́кѡ ко́жꙋ затвᲂрѝ , и҆ зе́млю плᲂдᲂви́тꙋю непло́днꙋ сᲂтвᲂрѝ . ѽ пресла́внᲂмꙋ чꙋдесѝ , зе́мленъ чл҃къ , небесе́мъ ѡ҆дᲂжди́ти дᲂждѧ̀ неда́стъ . ѽ чꙋ́дᲂ , тлѣ́ненъ челᲂвѣ́къ в̾ нетлѣ́нїе ѡ҆блачи́тсѧ , и҆ небеса̀ ѡ҆бтека́етъ ѻ҆́гненᲂю кᲂлесни́цею . ми́лᲂтїю є҆лисе́ѡви сꙋгꙋ́бꙋ бл҃гᲂда́ть да́рꙋетъ . царѧ̀ ѡ҆блича́ѧ , и҆ лю́ди непᲂкᲂри́выѧ гла́дᲂмъ растлѣва́етъ . і҆єре́и стꙋ́дныѧ всѧ̀ пᲂсрамѝ , и҆ вдᲂви́ча сы́на сло́вᲂмъ вᲂскресѝ . тᲂгѡ̀ мᲂльба́ми хрⷭ҇тѐ бж҃е на́шъ , в̾ ми́рѣ сᲂхранѝ странꙋ̀ на́шꙋ , и҆ пᲂбѣ́ды ѡ҆дᲂлѣ́нїѧ на врагѝ то́й да́рꙋй .

сла́ва . гла́съ , и҃ . Прᲂро́кѡмъ верхо́вники , и҆ всесвѣ́тлыѧ свѣти́льники вселе́нныѧ , въ пѣ́снехъ пᲂчте́мъ вѣ́рнїи , и҆лїю̀ и҆ є҆лисе́ѧ . и҆ хрⷭ҇то́ви вᲂзᲂпїе́мъ ра́дᲂстнѡ , бл҃гᲂꙋтро́бне гдⷭ҇и , пᲂда́ждь лю́демъ твᲂи́мъ , мᲂльба́ми прᲂро́къ твᲂи́хъ , ѡ҆ставле́нїе грѣхо́въ и҆ ве́лїю млⷭ҇ть .

и҆ ны́нѣ , боⷢ҇ . Влⷣчце прїимѝ мл҃твꙋ ра́бъ свᲂи́хъ , и҆ и҆зба́ви на́съ ѿ всѧ́кїѧ нꙋ́жды и҆ печа́ли . Славᲂсло́вїе вели́кᲂе , и҆ ѿпꙋ́стъ .

На литꙋргі́и , бл҃же́нна , на и҃ . ѿ а҃ гѡ кано́на , пррⷪ҇кꙋ , пѣ́снь г҃ ѧ . и҆ в҃ гѡ кано́на , пѣ́снь ѕ҃ ѧ .

Пᲂ вхо́дѣ , а҆́ще ли хра́мъ хрⷭ҇то́въ , и҆лѝ бцⷣы : трᲂпа́рь хра́мꙋ , и҆ прᲂро́кꙋ . сла́ва , кᲂнда́къ прᲂро́кꙋ . и҆ ны́нѣ , хра́мꙋ .

Пᲂ вхо́дѣ , а҆́ще хра́мъ ст҃ы́мъ : трᲂпа́рь пррⷪ҇кꙋ . сла́ва , кᲂнда́къ прᲂро́кꙋ . и҆ ны́нѣ , кᲂнда́къ : застꙋ́пнице хрⷭ҇тїа́нѡмъ .

прᲂки́менъ , ѱл҃о́мъ дв҃дᲂвъ . Ты̀ є҆сѝ і҆єре́й во́ вѣки , по́ чинꙋ мельхиседе́кᲂвꙋ .= сти́хъ . речѐ гдⷭ҇ь гдⷭ҇еви мᲂемꙋ̀ , сѣдѝ ѡ҆деснꙋ́ю менѐ , до́ндеже пᲂлᲂжꙋ̀ врагѝ твᲂѧ̀ пᲂд̾но́жїе нᲂга́ма твᲂи́ма . =а҆пⷭ҇лъ , ѿ =сᲂбо́рнагѡ пᲂсла́нїѧ , і҆а́кѡвлѧ чте́нїе . зача́лᲂ , н҃з . а҆ллилꙋ́їѧ . Мѡѷсе́й и҆ а҆арѡ́нъ вᲂ і҆єре́ѡхъ є҆гѡ̀ , и҆ самꙋ́илъ в̾ призыва́ющихъ и҆́мѧ є҆гѡ̀ . =є҆ѵⷢ҇а́лїе , ѿ лꙋкѝ . заⷱ҇ , д҃і . прича́стенъ , въ па́мѧть вѣ́чнꙋю бꙋ́детъ пра́ведникъ .