ВЪ НЛⷣЮ ПѦТЬДЕСѦ́ТНУЮ ВЕЧЕРЪ

На нало́е пᲂставлѧ́емъ , ѻ҆́бразъ , трⷪ҇цы живᲂнача́льныѧ . Бл҃гᲂслᲂви́вшꙋ і҆єре́ю и҆ мы̀ гл҃емъ , цр҃ю нбⷭ҇ныи . та́же , трⷭ҇то́е , и҆ пᲂ ѻ҆́ч҃е на́шъ . гдⷭ҇и пᲂми́лꙋй , в҃і . сла́ва , и҆ ны́нѣ . Прїиди́те пᲂклᲂни́мсѧ , гⷤ . та́же , ѱало́мъ , блгⷭ҇вѝ дш҃е мᲂѧ̀ гдⷭ҇а . пᲂсе́мъ , сла́ва , и҆ ны́нѣ , а҆ллилꙋ́їѧ , гⷤ . та́же , є҆ктенїѧ̀ вели́каѧ . Ми́рᲂмъ гдⷭ҇ꙋ пᲂмо́лимсѧ . пᲂсе́мъ , каѳи́смꙋ , нестихᲂсло́вимъ . пᲂе́мъ , гдⷭ҇и вᲂзва́хъ .= та́же .= На гдⷭ҇и вᲂзва́хъ , пᲂста́вимъ , стихо́въ , ѕ҃ . и҆ пᲂе́мъ , стихѣ́ры . гла́съ , д҃ . Пресла́внаѧ дне́сь , ви́дѣша всѝ ꙗ҆зы́цы во́ градѣ дв҃дᲂвѣ , є҆гда̀ дх҃ъ сни́де ст҃ы́и вᲂ ѻ҆́гненныхъ ꙗ҆зы́цѣхъ , ꙗ҆́кᲂже лꙋка̀ бг҃ᲂгла́сныи написа̀ , рече́ бᲂ , со́бранымъ ᲂу҆ченико́мъ хрⷭ҇то́вымъ , бы́сть шꙋ́мъ . ꙗ҆́кѡ нᲂси́мꙋ дх҃ꙋ бꙋ́рнꙋ , и҆ и҆спо́лни до́мъ , и҆дѣ́же бѣ́ѧхꙋ сѣдѧ́ще . и҆ всѝ нача́ша гл҃ати стра́нными гл҃ы , стра́нными ᲂу҆че́нїи , стра́нными пᲂвелѣ́нїи ст҃ы́ѧ трⷪ҇цы . двⷤа .

Дх҃ъ ст҃ы́и , бѣ́же ᲂу҆́бѡ прⷭ҇нѡ и҆ є҆́сть и҆ бꙋ́детъ , ни начина́емъ , нижѐ преста́ѧ , нᲂ при́снѡ сᲂ ѻ҆ц҃е́мъ и҆ съ сн҃ᲂмъ , съ чине́нъ и҆ съ числѧ́емь . живо́тъ и҆ живᲂтвᲂрѧ́и , свѣ́тъ и҆ свѣ́та пᲂда́тель . са́мъ бл҃гі́и , и҆сто́чникъ бл҃гᲂсты́ни . и҆́мже ѻ҆ц҃ъ сказа́етсѧ , и҆ сн҃ъ с̾ прᲂславлѧ́етсѧ , и҆ ѿ всѣ́хъ зна́етсѧ , є҆ди́на си́ла , и҆ є҆ди́нᲂ сᲂчета́нїе , є҆ди́нᲂ пᲂкланѧ́нїе ст҃ы́ѧ трⷪ҇цы . двⷤа .

Дх҃ъ ст҃ы́и , свѣ́тъ и҆ живо́тъ , и҆ живы́и и҆сто́чникъ ᲂу҆́мныи . дх҃ъ премꙋ́дрᲂсти , дх҃ъ ра́зꙋма , бл҃гі́и пра́выи мы́сленыи , ѡ҆блада́ѧ и҆ ѡ҆чища́ѧ прегрѣше́нїѧ . бг҃ъ и҆ бг҃ᲂтвᲂрѧ́и , ѻ҆́гнь ѿ ѻ҆ц҃а и҆схᲂдѧ́и . глаго́лѧ дѣ́ѧ , раздѣлѧ́ѧ да́ры . и҆́мже прᲂро́цы всѝ , и҆ бжⷭ҇твенїи а҆пⷭ҇ли , с̾ мч҃нки вѣнча́шасѧ . стра́ннѡ слы́шанїе , стра́ннѡ видѣ́нїе . ѻ҆́гнь раздѣлѧ́ѧ в̾ пᲂда́нїи даро́въ . вⷤ .

сла́ва , и҆ ны́нѣ . гла́съ , ѕ҃ . Цр҃ю нбⷭ҇ныи , ᲂу҆тѣ́шителю д́ш҃е и҆́стинныи , и҆́же вездѣ̀ сы́и , и҆ всѧ̀ и҆спᲂлнѧ́ѧ , сᲂкро́вище благи́хъ и҆ жи́зни пᲂда́телю , прїидѝ и҆ всели́сѧ в̾ ны̀ , и҆ ѡ҆чи́сти ны ѿ всѧ́кїѧ скве́рны , и҆ спасѝ бл҃же дш҃а на́ша .

та́же , вы́хᲂдъ . Прᲂки́менъ вели́кїи . гла́съ , з҃ . Кто̀ бг҃ъ ве́лїи ꙗ҆́кѡ бг҃ъ на́шъ , ты̀ є҆сѝ бг҃ъ твᲂрѧ́и чꙋдеса̀ . сти́хъ . Пᲂказа́лъ є҆сѝ в̾ лю́дехъ си́лꙋ твᲂю̀ . сти́хъ . И҆ рѣ́хъ ны́нѣ нача́хъ , сѝ и҆змѣ́на десни́ца вы́шнѧгѡ . сти́хъ . Пᲂмѧнꙋ́хъ дѣ́ла гдⷭ҇нѧ , ꙗ҆́кѡ пᲂмѧнꙋ̀ ѿ зача́ла чꙋдеса̀ твᲂѧ̀ . та́же , Кто̀ бг҃ъ ве́лїи ꙗ҆́кѡ бг҃ъ на́шъ , ты̀ є҆сѝ бг҃ъ твᲂрѧ́и чꙋдеса̀ .

та́же , мл҃твы кᲂлѣнᲂпрекло́нныѧ , и҆ є҆ктенїѧ̀ : Рце́мъ всѝ . та́же , спᲂдо́би гдⷭ҇и в̾ ве́черъ се́й . пᲂсе́мъ , є҆ктенїѧ̀ : И҆спо́лнимъ вече́рнїѧ мл҃твы . пᲂсе́мъ , сᲂвᲂкꙋ́пльшесѧ ѻ҆́ба ли́ка пᲂсредѣ̀ , и҆ пᲂе́мъ . =На стихо́внѣ , стихѣ́ры . гла́съ , г҃ .=

Ны́нѣ вᲂ зна́менїе всѣ́мъ ꙗ҆́вѣ ꙗ҆зы́цы бы́ша , і҆ꙋде́и бᲂ ѿ ни́хже по́ плᲂти хрⷭ҇то́съ , невѣ́рїемъ бᲂлѣ́вше , бж҃їѧ бл҃гᲂда́ти ѿпадо́ша , бж҃їю же свѣ́тꙋ мы̀ стра́ннїи спᲂдо́блени бы́хᲂмъ , ᲂу҆тверди́вшесѧ слᲂвесы̀ ᲂу҆чени́чески , гл҃ющимъ сла́вꙋ бл҃гᲂда́телѧ всѣ́хъ бг҃а . тѣ́мъ срⷣца̀ съ кᲂлѣ́ньми прекло́ньше , вѣ́рᲂю пᲂклᲂни́мсѧ ст҃о́мꙋ дх҃ꙋ , прᲂпᲂвѣ́данꙋ сп҃сꙋ дш҃ъ на́шихъ .

сти́хъ : срⷣце чи́стᲂ сᲂзи́жди вᲂ мнѣ̀ бж҃е ,꙳ и҆ дх҃ъ пра́въ ѡ҆бнᲂвѝ вᲂ ᲂу҆тро́бѣ мо́ей . Ны́нѣ ᲂу҆тѣ́шительныи дх҃ъ , на всѧ́кꙋ пло́ть и҆злїѧ́сѧ , а҆пⷭ҇льскїи бᲂ ли́къ начина́етъ , ѿ ни́хже пᲂ дарᲂва́нїю вѣ́рнымъ бл҃гᲂда́ть прᲂстира́етсѧ , и҆ и҆звѣстꙋ́етсѧ и҆́ми держа́внᲂе прише́ствїе вᲂ ѻ҆́гненѣ ѻ҆́бразѣ , ᲂу҆ченикѡ́мъ раздѣлѧ́ѧ ꙗ҆зы́ки в̾ пѣ́нїе и҆ в̾ сла́вꙋ бг҃ꙋ . тѣ́мъ срⷣцы̀ мы́сленѡ прᲂсвѣща́еми , вѣ́рᲂю ᲂу҆тверди́вшесѧ ст҃ы́мъ дх҃ᲂмъ , мᲂлѧ́щесѧ спастѝ дш҃а на́ша .

сти́хъ : не ѿве́рзи менѐ ѿ лица̀ твᲂегѡ̀ ,꙳ и҆ дх҃а твᲂегѡ̀ ст҃а́гѡ не ѿи҆мѝ ѿ менѐ . Ны́нѣ ѡ҆блача́тсѧ в̾ держа́вꙋ свы́ше хрⷭ҇то́ви а҆пⷭ҇ли , ѡ҆бнᲂвлѧ́етъ бᲂ и҆́хъ ᲂу҆тѣ́шитель , в̾ ни́хже ѡ҆бнᲂвлѧ́ѧ та́йнымъ ѡ҆бнᲂвле́нїемъ ра́зꙋма . и҆́же чꙋжи́ми гла́сы ꙗ҆́снѡ прᲂпᲂвѣ́давше прⷭ҇нᲂсꙋ́щее є҆стество̀ , и҆ про́стᲂ трисᲂста́внᲂ честѝ бл҃гᲂда́телѧ всѣ́хъ бг҃а . тѣ́мже прᲂсвѣ́щьшесѧ тѣ́хъ прᲂпᲂвѣ́данїи , ѻ҆ц҃ꙋ пᲂклᲂни́мсѧ съ сн҃ᲂмъ и҆ дх҃ᲂмъ , прᲂпᲂвѣ́данꙋ сп҃сꙋ дш҃ъ на́шихъ .

сла́ва , и҆ ны́нѣ . гла́съ , и҃ . Прїиди́те лю́дїе , трисᲂста́внᲂмꙋ бжⷭ҇твꙋ̀ пᲂклᲂни́мсѧ , сн҃ꙋ вᲂ ѻ҆ц҃ѣ , сᲂ ст҃ы́мъ дх҃ᲂмъ . ѻ҆ц҃ъ бᲂ без̾лѣ́тнѡ рᲂдѝ сн҃а сᲂпрⷭ҇нᲂсꙋ́щна , и҆ сᲂпресто́льна , и҆ дх҃ъ ст҃ы́и бѣ̀ вᲂ ѻ҆ц҃ѣ , с̾ сн҃ᲂмъ прᲂславлѧ́емъ . є҆ди́на си́ла , и҆ є҆ди́нᲂ сꙋщество̀ , и҆ є҆ди́нᲂ бжⷭ҇тво̀ . є҆мꙋ́же пᲂкланѧ́ющесѧ всѝ глаго́лемъ , ст҃ы́и бж҃е , и҆́же всѧ̀ сᲂдѣва́ѧ с̾ сы́нᲂмъ , и҆ спᲂспѣше́нїемъ прест҃а́гѡ дх҃а . ст҃ы́и крѣ́пкїи , и҆́мже ѻ҆ц҃а пᲂзна́хᲂмъ , и҆ дх҃ъ ст҃ы́и прїи́де в̾ ми́ръ , ст҃ы́и без̾сме́ртне , ᲂу҆тѣ́шительныи дш҃е , и҆́же ѿ ѻ҆ц҃а и҆схᲂдѧ́и , и҆ на́ сн҃ѣ пᲂчива́ѧи . трⷪ҇це ст҃а́ѧ сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ .

трᲂпа́рь . гла́съ , и҃ . Блгⷭ҇ве́нъ є҆сѝ хрⷭ҇тѐ бж҃е на́шъ , и҆́же премꙋ́дры лᲂвцы̀ ꙗ҆вле́и , пᲂсла́въ и҆́мъ дх҃ъ ст҃ы́и , и҆ тѣ́ми ᲂу҆лᲂвле́и вселе́ннꙋю , чл҃кᲂлю́бче сла́ва тебѣ̀ . Честнѣ́йшꙋю херꙋви́мъ , и҆ про́чее .

ѿпꙋ́стъ : И҆́же ѿ ѻ҆те́ческихъ и҆ бжⷭ҇твеныхъ нѣ́дръ и҆злїѧ́въ себѐ , и҆ с̾ нб҃съ на́ землю сᲂше́дъ , и҆ на́ше всѐ чл҃ческᲂе вᲂспрїе́мъ є҆стество̀ , и҆ ѡ҆бᲂжи́въ то̀ , с̾ ни́мже на нб҃са̀ а҆́бїе вᲂз̾ше́дъ , и҆ ѡ҆деснꙋ́ю сѣ́де бг҃а и҆ ѻ҆ц҃а . бжⷭ҇твеныи же и҆ ст҃ы́и и҆ живᲂтвᲂрѧ́щїи , и҆ всеси́льныи , с̾сꙋ́щныи и҆ сᲂпрⷭ҇то́льныи , и҆ є҆динᲂсла́вныи , и҆ є҆динᲂпᲂ кланѧ́емыи дх҃ъ , на свᲂѧ̀ сщ҃е́нныѧ и҆ ст҃ы́ѧ низ̾пᲂсла́въ ᲂу҆ченикѝ . и҆ си́мъ прᲂсвѣти́въ ᲂу҆́бѡ тѣ́хъ , прᲂсвѣти́въ же и҆́хъ ра́ди ве́сь ми́ръ . хрⷭ҇то́съ и҆́стинныи бг҃ъ на́шъ , мᲂли́твами пречⷭ҇тыѧ є҆гѡ̀ мт҃ре , и҆ всесла́вныхъ и҆ прехва́льныхъ , дх҃ᲂно́сныхъ ст҃ы́хъ є҆гѡ̀ ᲂу҆чени́къ и҆ а҆пⷭ҇лъ , и҆ всѣ́хъ ст҃ы́хъ , пᲂми́лꙋетъ и҆ спасе́тъ на́съ , ꙗ҆́кѡ бл҃гі́и чл҃кᲂлю́бецъ .

Въ тꙋ́же нлⷣю и҃ ю , на па́вечерницѣ . пᲂе́мъ , кано́нъ , ст҃о́мꙋ дх҃ꙋ . твᲂре́нїе ѳео́фанᲂвᲂ , гла́съ , а҃ . пѣ́снь , а҃ . і҆рмо́съ . Лю́ты рабо́ты и҆збы́въ і҆и҃ль , и҆ непрᲂхᲂди́мᲂе про́йде ꙗ҆́кѡ по́ сꙋхꙋ . врага̀ зрѧ̀ пᲂтᲂплѧ́ема , пѣ́снь въ весе́лїи пᲂе́тъ бг҃ꙋ , чꙋдᲂтвᲂрѧ́щемꙋ мы́шцею высо́кᲂю , ꙗ҆́кѡ прᲂсла́висѧ . запѣ́въ : Сла́ва тебѣ̀ бж҃е на́шъ , сла́ва тебѣ̀ .= Бжⷭ҇твеныи дш҃е ст҃ы́и , и҆́же всѣ́мъ раздава́ѧи дарᲂва́нїѧ , и҆ всѧ̀ твᲂрѧ̀ во́лею , вдᲂхни́ ми свѣтᲂно́снᲂе твᲂѐ дарᲂва́нїе , ꙗ҆́кѡ да сла́влю тѧ сᲂ ѻ҆ц҃е́мъ и҆ сн҃ᲂмъ сᲂвᲂкꙋплѧ́ема . И҆́же нбⷭ҇нымъ си́ламъ ст҃ᲂстнагѡ дᲂхнᲂве́нїѧ твᲂегѡ̀ бл҃гᲂда́ть да́выи ᲂу҆тѣ́шителю , мᲂегѡ̀ смы́сла скве́рнꙋ и҆счи́стивъ , ст҃ᲂсти твᲂеѧ̀ пᲂкажѝ и҆спо́лнена . =сла́ва . И҆сто́чниче жи́зни вѣ́рꙋемыи , и҆ стрꙋѝ бжⷭ҇твеныѧ бл҃гᲂсти , дш҃е бж҃їи ст҃ы́и , ᲂу҆́мъ мо́й ᲂу҆мерщве́ныи ѡ҆живᲂтвᲂрѝ , и҆ твᲂи́мъ дѣ́йствᲂмъ вᲂскресѝ , пѣ́ти твᲂю̀ бл҃гᲂсть .= и҆ ны́нѣ , боⷢ҇ . Х=ра́мъ дв҃ᲂ бы́вши бж҃їи , наше́ствїемъ дх҃а сᲂдѣ́тельнᲂю си́лᲂю є҆гѡ̀ , си́лꙋ да́рꙋѧ рᲂже́ственꙋ бл҃гᲂда́тнаѧ . ра́дꙋисѧ ꙗ҆́же рᲂдила̀ є҆сѝ пло́тїю сло́вᲂ без̾нача́льнᲂе .

пѣ́снь , г҃ . і҆рмо́съ . Первᲂвѣ́чнᲂмꙋ ѿ ѻ҆ц҃а рᲂжде́нꙋ нетлѣ́ннѡ сн҃ꙋ , и҆ въ пᲂслѣ́днѧѧ ѿ дв҃ы , вᲂплᲂще́нꙋ без̾ сѣ́мене , хрⷭ҇тꙋ̀ бг҃ꙋ вᲂзᲂпїе́мъ , вᲂз̾дви́гнꙋвыи ро́гъ на́шъ ст҃ъ є҆сѝ гдⷭ҇и . И҆мѣ́ѧ пᲂ є҆стествꙋ̀ , хᲂтѣ́нїѧ си́лꙋ сто́чнꙋ , нбⷭ҇ныѧ преми́рны , ꙗ҆́кѡ бг҃ъ сᲂблюда́ѧ , дх҃ъ ст҃ы́и непреста́ннѡ ᲂу҆чи́тъ вᲂпи́ти , ст҃ъ є҆сѝ гдⷭ҇и . Хвала́ми немо́лчными , ѡ҆блиста́вшꙋю бл҃гᲂда́ть дх҃а , бг҃ᲂгла́сныхъ а҆пⷭ҇лъ в̾ дыха́нїи бꙋ́рнѣ , сᲂгла́снѡ сла́вимъ сᲂ беспло́тными ли́ки вᲂпїю́ще , ст҃ъ є҆сѝ гдⷭ҇и . сла́ва . Є҆ди́нꙋ вла́сть , и҆ бжⷭ҇тво̀ є҆ди́нᲂ и҆ си́лꙋ , є҆ди́нᲂ нача́лᲂ и҆ црⷭ҇твᲂ ст҃ы́ѧ трⷪ҇цы , мꙋ́дрствꙋюще вᲂпїе́мъ , въ трист҃ѣ́мъ гла́сѣ , вᲂпїю́ще ст҃ъ є҆сѝ гдⷭ҇и .= и҆ ны́нѣ , боⷢ҇ . К=ᲂлесни́це нᲂсѧ́щаѧ , и҆ свѣ́тлᲂе пребыва́лище всечи́стаѧ , херꙋви́мъ вы́шши сꙋ́щи , бг҃а бᲂ на́ рꙋкꙋ нᲂси́вши . тѣ́мже ти всѝ вᲂспѣва́емъ чи́стаѧ , ра́дꙋисѧ всебл҃же́ннаѧ .

пѣ́снь , д҃ . і҆рмо́съ . Же́ѕлъ и҆з̾ ко́рене і҆єссе́ѡва , и҆ цвѣ́тъ ѿ негѡ̀ хрⷭ҇тѐ ѿ дв҃ы прᲂзѧ́блъ є҆сѝ , и҆з̾ гᲂры̀ хва́льныѧ присѣ́нныѧ ча́сты прїи́де вᲂпло́щьсѧ , ѿ без̾мꙋ́жныѧ беспло́тныи бг҃ъ , сла́ва си́лѣ твᲂе́й гдⷭ҇и . Вели́каѧ да́рꙋѧ на́мъ дх҃ъ всест҃ы́и , на а҆пⷭ҇лы на́йде ꙗ҆́кѡ бжⷭ҇твенъ , ꙗ҆́кѡ бл҃гъ , ꙗ҆́кѡ и҆спᲂлнѧ́ѧ всѧ́ческаѧ , ꙗ҆́кѡ бг҃ᲂтвᲂрѧ̀ , ꙗ҆́кѡ ѡ҆сщ҃а́ѧ , ꙗ҆́кѡ всѣ́мъ твᲂри́теленъ влⷣчески и҆ самᲂвла́стенъ . На престо́лѣ хрⷭ҇тѐ ѻ҆те́ческᲂмъ сѣдѧ́и , низ̾пᲂсла́лъ є҆сѝ ᲂу҆ченико́мъ твᲂи́мъ ᲂу҆тѣ́шителѧ ꙗ҆́кᲂже ѡ҆бѣща́лсѧ є҆сѝ сп҃се , ꙗ҆́кѡ бг҃а грѧдꙋ́ща . пᲂсыла́ѧ же ꙗ҆́кѡ нечꙋ́жа , ꙗ҆́кѡ всѣ́хъ сᲂдѣ́телѧ , и҆́же и҆з̾ ѻ҆ц҃а и҆з̾хᲂдѧ́ща . сла́ва . Гл҃ати ꙗ҆зы́ки прᲂро́къ бꙋ́дꙋщаѧ , наꙋчѝ дх҃ъ дре́вле всест҃ы́и , ꙗ҆зы́ки же и҆ премꙋ́дрыхъ а҆пⷭ҇лъ вѣща́етъ , вели́чїѧ бж҃їѧ во́ гласѣ дыха́нїѧ бꙋ́рнѣйша , ны́нѣ сꙋ́щественѣ сбыва́емѡ .= и҆ ны́нѣ , боⷢ҇ . В=рата̀ ᲂу҆́мнагѡ свѣ́та и҆менꙋ́емъ тебѐ бг҃ᲂмт҃и , и҆́миже вни́де к̾ на́мъ хрⷭ҇то́съ , красе́нъ ꙗ҆ви́сѧ блиста́ньми бжⷭ҇тва̀ , въ пло́тьстѣ ѡ҆дѣѧ́нїи пᲂкрᲂве́нъ , неви́димь ꙗ҆́кѡ бг҃ъ , ны́нѣ же пᲂ на́съ ви́димь .

пѣ́снь , є҃ . і҆рмо́съ . Бг҃ъ сы́и ми́ра , ѻ҆ц҃ъ щедро́тамъ , вели́кагѡ сᲂвѣ́та ти а҆́нг҃ла , ми́ръ пᲂдава́юща , пᲂсла́лъ є҆сѝ на́мъ . тѣ́мъ бг҃ᲂразꙋ́мїѧ къ свѣ́тꙋ наставлѧ́еми , ѿ́ нᲂщи ᲂу҆́тренююще , славᲂсло́вимъ тѧ̀ чл҃кᲂлю́бче . И҆́же дх҃ъ премꙋ́дрᲂсти и҆ стра́ха бж҃їѧ , и҆́стины и҆ сᲂвѣ́та и҆ ра́зꙋма ми́ръ пᲂдава́ѧи , всели́сѧ в̾ ны̀ , ꙗ҆́кѡ да ѡ҆ст҃и́вшесѧ твᲂи́мъ вселе́нїемъ , и҆́з̾ нᲂщи ᲂу҆́тренююще славᲂсло́вимъ тѧ чл҃кᲂлю́бче . И҆́же всѧ̀ сᲂдержа́и , и҆ всѣ́мъ сы́и гдⷭ҇ь , и҆́же тва́рь сᲂблюда́ѧи непа́даемꙋ , пᲂда́ждь свѧтьбꙋ̀ на́мъ и҆ прᲂсвѣще́нїе , ꙗ҆́кѡ да насы́тившесѧ твᲂегѡ̀ свѣтᲂда́тельства , и҆́з̾ нᲂщи ᲂу҆́тренююще славᲂсло́вимъ тѧ чл҃кᲂлю́бче . сла́ва . И҆́же дре́вле зако́нъ начерта́выи мѡѷсе́ю , но́вагѡ завѣ́та пᲂвелѣ́нїѧ и҆ зако́нъ бл҃гᲂда́ти и҆злага́етъ ꙗ҆́снѡ , вᲂ а҆пⷭ҇льскихъ срⷣца́хъ написа́въ , бжⷭ҇твеныи ᲂу҆тѣ́шитель прише́дъ , ꙗ҆́кѡ чл҃кᲂлю́бецъ .= и҆ ны́нѣ , боⷢ҇ . К=лѧ́твꙋ є҆́ввинꙋ всѣ́хъ мт҃ре , твᲂи́мъ ржⷭ҇тво́мъ дв҃ᲂ ᲂу҆праздни́ла є҆сѝ , ми́рꙋ бл҃гᲂслᲂве́нїе вᲂсїѧ́вши хрⷭ҇та̀ . тѣ́мже ра́дꙋющесѧ , ᲂу҆сты̀ и҆ нра́вᲂмъ бцⷣꙋ вᲂи́стинꙋ тѧ̀ и҆спᲂвѣ́дающе блажи́мъ .

пѣ́снь , ѕ҃ . і҆рмо́съ . Оу҆тро́ба і҆ѡ́нꙋ младе́нца невредѝ , мᲂрскі́и ѕвѣ́рь , і҆а́кѡва прїѧ́тъ . въ дв҃цꙋ ᲂу҆́бѡ все́льсѧ сло́вᲂ , и҆ пло́ть прїи́мъ , про́йде сᲂхранѝ неи҆стлѣ́ннꙋ . и҆́же бᲂ непᲂстрада̀ и҆стлѣ́нїѧ , ро́ждьшꙋю сᲂхранѝ неврежде́ннꙋ . Твᲂи́мъ ᲂу҆ченикѡ́мъ и҆спᲂлнѧ́ѧ ѡ҆бѣща́нїе , дх҃а хрⷭ҇тѐ си́мъ пᲂсла́лъ є҆сѝ , дѣ́йствᲂ вели́кихъ чꙋде́съ да́рꙋюща , и҆ ꙗ҆зы́ки ѻ҆гнезра́чныѧ да́рствꙋюща , да твᲂегѡ̀ пᲂзна́нїѧ ꙗ҆зы́къ стада̀ и҆спо́лнѧтъ . Прїидѝ къ на́мъ дш҃е ст҃ы́и , прича́стники твᲂеѧ̀ сᲂдѣва́ѧ ст҃ᲂсти , и҆ свѣ́та невече́рнѧгѡ , и҆ бжⷭ҇твеныѧ жи́зни , и҆ бл҃гᲂꙋха́ннѣйшагѡ раздаѧ́нїѧ . ты́ бᲂ рѣка̀ бжⷭ҇тва̀ , и҆з̾ ѻ҆ц҃а сн҃ᲂмъ и҆схᲂдѧ́щїи . сла́ва . Спасѝ ᲂу҆тѣ́шителю , и҆́же вѣ́рнѡ пᲂю́щихъ бг҃ᲂлѣ́пнᲂе прише́ствїе твᲂѐ , сн҃ᲂмъ и҆схᲂдѧ́щїи , и҆ ѡ҆чи́сти ѿ всѧ́кїѧ скве́рны , ꙗ҆́кѡ бл҃гᲂꙋтро́бенъ , и҆ пᲂкажѝ дᲂсто́йныхъ твᲂегѡ̀ ѡ҆сїѧ́нїѧ , и҆ свѣ́тᲂмъ твᲂи́мъ бг҃ᲂви́днѣйшимъ , сᲂтвᲂрѝ ѧ҆̀ нескве́рнена зерца́ла .= и҆ ны́нѣ , боⷢ҇ . В=сѧ́къ ли́къ прᲂро́ческїи , ѿ́ бг҃а та́йнѡ ᲂу҆чи́мъ . пред̾ви́дѧ та́иньствᲂ неи҆зрече́ннагѡ и҆ бжⷭ҇твенагѡ вᲂплᲂще́нїѧ , бг҃а сло́ва и҆з̾ тебѐ дв҃ᲂ мт҃и вᲂзвѣща́ше . ты́ бᲂ и҆́стиннѣйшїи и҆ дре́внїи свѣ́тъ ꙗ҆ви́ла є҆сѝ .

пѣ́снь , з҃ . і҆рмо́съ . Ѻ҆́трᲂцы вᲂ бл҃зѣ́й вѣ́рѣ вᲂспита́ни , нечести́ва велѣ́нїѧ небре́гше , ѻ҆́гненнагѡ преще́нїѧ не ᲂу҆бᲂѧ́шасѧ . нᲂ пᲂсредѝ пла́мене стᲂѧ́ще пᲂѧ́хꙋ , ѻ҆ц҃е́мъ бг҃ъ блгⷭ҇ве́нъ є҆сѝ . Ны́нѣ ѡ҆бѣтᲂва́нїѧ пред̾ᲂу҆закᲂне́нїе хрⷭ҇то́вᲂ и҆спо́лнисѧ , раз̾дѣле́нїѧ бᲂ ꙗ҆зы́кѡмъ , дх҃а прише́ствїе пᲂказа̀ ᲂу҆ченикѡ́мъ . ѡ҆блиста́вшее ѿ трⷪ҇цы є҆ди́нагᲂ пребжⷭ҇твенагѡ . Дре́вле ᲂу҆́бѡ раздѣли́сѧ сᲂгла́сїе ꙗ҆зы́кѡвъ без̾слᲂве́снᲂ , ны́нѣ же кᲂ є҆ди́нᲂмꙋ слᲂже́нїю ꙗ҆́вѣ сᲂбра́шасѧ . самᲂдѣ́йствꙋющꙋ чⷭ҇тно́мꙋ и҆ бжⷭ҇твенᲂмꙋ дх҃ꙋ , ѿ трⷪ҇цы пребжⷭ҇твеныѧ є҆ди́нᲂмꙋ . сла́ва . Свы́ше нᲂси́мꙋ дᲂхнᲂве́нїю ст҃а́гѡ дх҃а , вели́чїѧ бж҃їѧ пресла́внѡ вѣща́хꙋ , а҆пⷭ҇ли хрⷭ҇то́вы . сᲂгла́снѡ пᲂю́ще , и҆́же ѻ҆ц҃е́мъ бж҃е бл҃гᲂслᲂве́нъ є҆сѝ .= и҆ нн҃ѣ , боⷢ҇ . Ѻ҆́=бразъ твᲂегѡ̀ ржⷭ҇тва̀ , трїѐ ѻ҆́трᲂцы в̾ пещѝ пᲂказа́ша , ꙗ҆́кѡ бᲂ пребы́ша ѻ҆гне́мъ невреди́ми . сᲂхрани́сѧ чиста̀ , прїе́мши во́ чревѣ ѻ҆́гнь нестерпи́мыи , и҆́же ѻ҆ц҃е́мъ бг҃а блгⷭ҇ве́нагᲂ .

пѣ́снь , и҃ . і҆рмо́съ . Чꙋ́дᲂ преве́лїе , рᲂсᲂда́вицꙋ вᲂѡ҆бразѝ пе́щь ѻ҆́бразᲂмъ . ꙗ҆́же бᲂ прїѧ́тъ не ѡ҆палѝ ю҆́ныхъ , та́кᲂже и҆ ѻ҆́гнь бжⷭ҇твенныи дв҃ꙋ , ю҆́же про́йде чи́стꙋ . тѣ́мъ пᲂю́ще вᲂзᲂпїе́мъ , да бл҃гᲂслᲂви́тъ тва́рь всѧ́каѧ гдⷭ҇а , и҆ превᲂзно́ситъ є҆гѡ̀ во́ вѣки . Ст҃ы́и дш҃е прᲂисхᲂдѧ́и ѿ́ бг҃а ѻ҆ц҃а , ст҃ᲂсть всѣ́мъ пᲂда́ждь и҆́же в̾ тѧ̀ вѣ́рꙋющимъ . ст҃ъ и҆ пᲂда́теленъ чл҃кѡмъ ст҃ᲂсти , ты̀ є҆сѝ . тѣ́мже вᲂспѣва́юще взыва́емъ , да бл҃гᲂслᲂви́тъ тва́рь всѧ́каѧ гдⷭ҇а , и҆ превᲂзно́ситъ є҆гѡ̀ во́ вѣки . Дае́ши пᲂда́тельнѣ ꙗ҆́кѡ бл҃гᲂдѣ́тель да́ръ бл҃гᲂсти , тебѐ пᲂю́щимъ ᲂу҆тѣ́шителю . бл҃ги́хъ бᲂ пᲂда́теленъ є҆сѝ , и҆ бл҃гᲂсти пꙋчи́на . тѣ́мже тѧ хва́лѧще вᲂспѣва́емъ , да бл҃гᲂслᲂви́тъ тва́рь всѧ́каѧ гдⷭ҇а , и҆ превᲂзно́ситъ є҆гѡ̀ во́ вѣки . сла́ва . И҆́стиненъ живᲂтвᲂри́въ є҆́сть дх҃ъ , самᲂдви́жимъ самᲂвла́стенъ , раздѣлѧ́ѧ ꙗ҆́кᲂже хо́щетъ дарѡ́въ раздаѧ́нїѧ , самᲂвлады́ченъ , самᲂпᲂвели́теленъ , безнача́ленъ . є҆мꙋ́же ны́нѣ пᲂкланѧ́ющесѧ вᲂспѣва́емъ , да бл҃гᲂслᲂви́тъ тва́рь всѧ́каѧ гдⷭ҇а , и҆ превᲂзно́ситъ є҆гѡ̀ во́ вѣки .= и҆ ны́нѣ , боⷢ҇ . К=то̀ твᲂемꙋ̀ премно́жествꙋ бл҃гᲂꙋтро́бїѧ недиви́тсѧ , без̾нача́льне сло́ве , на́съ ра́ди ѡ҆бнища́лъ є҆сѝ бᲂга́тъ сы́и , и҆ во́ чревᲂ дв҃ы ст҃ы́ѧ всели́сѧ . тѣ́мже вᲂспѣва́юще взыва́емъ , да бл҃гᲂслᲂви́тъ тва́рь всѧ́каѧ гдⷭ҇а , и҆ превᲂзно́ситъ є҆гѡ̀ во́ вѣки .

пѣ́снь , ѳ҃ . і҆рмо́съ . Ра́дꙋйсѧ дв҃ственнаѧ пᲂхвало̀ , ра́дꙋйсѧ мт҃и пречⷭ҇таѧ , ю҆́же всѧ̀ тва́рь бжⷭ҇твенными пѣ́сньми велича́емъ . Сѐ къ на́мъ ᲂу҆тѣ́шителѧ дрꙋга́гѡ низ̾пᲂсла́лъ є҆сѝ , є҆динᲂсꙋ́щна тебѣ̀ сло́ве , и҆ ѻ҆ц҃ꙋ твᲂемꙋ̀ сᲂпрⷭ҇то́льна . Спасѝ ѿ и҆скꙋше́нїи ᲂу҆тѣ́шителю є҆динᲂмꙋ́дрствꙋющихъ тѧ , и҆ славᲂсло́вѧщихъ твᲂѐ превѣ́чнᲂе бытїѐ . сла́ва . Прїидѝ к̾ на́мъ ᲂу҆тѣ́шителю , твᲂегѡ̀ ᲂу҆тѣше́нїѧ насыща́ѧи , сла́вᲂю твᲂе́ю не и҆з̾рече́ннᲂю бг҃ᲂсло́вѧщихъ .= и҆ ны́нѣ , боⷢ҇ . Н=евѣ́стᲂ бж҃їѧ всенепᲂро́чнаѧ , и҆́же пᲂчита́ющихъ тѧ дᲂсто́йнѡ , и҆зба́ви ѿ и҆скꙋше́нїи мл҃твами сѝ .

Пᲂ ѳ҃ й пѣ́сни вмѣ́стᲂ дᲂсто́йнѡ , пᲂе́мъ , і҆рмо́съ , то́йже : Ра́дꙋйсѧ дв҃ственнаѧ . и҆ =пᲂкло́нъ земны́и . П=ᲂ трⷭ҇то́мъ , кᲂнда́къ , пра́здникꙋ .

Въ пᲂнлⷣникъ , ст҃а́гѡ дх҃а . пᲂлꙋ́нᲂщницꙋ пᲂе́мъ =пᲂ ѡ҆бы́чаю , с̾ каѳи́смᲂю . пᲂ а҃ мъ трⷭ҇то́мъ : трᲂпа́рь , пра́здникꙋ . пᲂ в҃ мъ трⷭ҇то́мъ : кᲂнда́къ , пра́здникꙋ . та́же , гдⷭ҇и пᲂми́лꙋй , ві҃ . =и҆ ѿпꙋ́стъ . мл҃твы же , пᲂмѧнѝ гдⷭ҇и и҆́же в̾ наде́жи , и҆ пᲂмѧ́нника за ᲂу҆пᲂко́й , негл҃емъ .

На ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , три́жды . =Пᲂ а҃ , стихᲂло́гїи , сѣда́ленъ . гла́съ , а҃ . Пᲂю̀ и҆ вᲂспѣва́ю , сла́влю и҆ чтꙋ̀ , сᲂ ѻ҆ц҃е́мъ и҆ с̾ сн҃ѡмъ прест҃ы́и дх҃ъ , вᲂ є҆ди́нᲂмъ бжⷭ҇твѣ̀ , раздѣлѧ́ѧ со́бьствᲂмъ . та́кѡ бᲂ сі́й хрⷭ҇то́вы а҆пⷭ҇лы ᲂу҆мꙋдрѝ и҆ наꙋчѝ ны́нѣ , вкꙋ́пѣ всемꙋ̀ ми́рꙋ прᲂпᲂвѣ́дати . =слава , и҆ ны́нѣ , то́йже .

Пᲂ в҃ , стихᲂло́гїи , сѣда́ленъ . гла́съ , и҃ . Пᲂ вᲂскрⷭ҇нїи хрⷭ҇тѐ є҆́же и҆́з̾ грᲂба , и҆ є҆́же к̾ высᲂтѣ̀ нбⷭ҇нѣй твᲂегѡ̀ вᲂзнесе́нїѧ , бг҃ᲂви́дцемъ сла́вꙋ свᲂю̀ пᲂказа́лъ є҆сѝ свы́ше , дх҃ъ пра́въ ѡ҆бнᲂви́лъ є҆сѝ вᲂ а҆пⷭ҇лѣхъ . ѿ ню́дꙋ же ꙗ҆́кѡ цѣвни́цꙋ мꙋсикі́йскꙋ , всѣ́мъ ꙗ҆́снѡ вᲂз̾гласи́ша , бжⷭ҇твенᲂю цѣвни́цею , та́йнꙋ сп҃се прᲂсїѧ́нїѧ , и҆ смᲂтре́нїѧ твᲂегѡ̀ . слава , и҆ ны́нѣ , то́йже . ѱало́мъ , н҃ . та́же , ѻ҆́ба кано́на , пра́здникꙋ . =з҃ гѡ , гла́са , сᲂ і҆рмᲂсо́мъ , на и҃ . и҆ д҃ гѡ , гла́са , сᲂ і҆рмᲂсо́мъ , на́ ѕ҃ . катава́сїѧ : Б=жⷭ҇твенымъ пᲂкрᲂве́нъ . ѻ҆́ба ли́ка вкꙋ́пѣ . Пᲂ г҃ й пѣ́сни , сѣда́ленъ , пра́здникꙋ . Пᲂ ѕ҃ й пѣ́сни , кᲂнда́къ , и҆ и҆́кᲂсъ , пра́здникꙋ . Пᲂ и҃ пѣ́сни , чтⷭ҇нѣ́йшꙋю непᲂе́мъ . Пᲂ ѳ҃ пѣ́сни , свѣти́ленъ , пра́здникꙋ , три́жды .

На хвали́тѣхъ , пᲂста́вимъ , стихѝ , д҃ . и҆ пᲂе́мъ , стихѣ́ры . гла́съ , в҃ . Вᲂ прᲂро́цѣхъ вᲂз̾вѣсти́лъ є҆сѝ на́мъ пꙋ́ть спасе́нїѧ , и҆ вᲂ а҆пⷭ҇лѣхъ вᲂсїѧ̀ , сп҃се на́шъ бл҃гᲂда́ть дх҃а твᲂегѡ̀ . ты̀ є҆сѝ бг҃ъ пе́рвыи , ты́же и҆ пᲂ си́хъ , и҆ во́ вѣки ты̀ є҆сѝ бг҃ъ на́шъ . Ви́дѣхᲂмъ свѣ́тъ и҆́стинныи , и҆ прїѧ́хᲂмъ дх҃ъ нбⷭ҇ныи , ѡ҆брѣто́хᲂмъ вѣ́рꙋ и҆́стиннꙋ нераздѣ́льнꙋ , трⷪ҇цѣ пᲂклᲂнѧ́емсѧ , та́ бᲂ на́съ спасла̀ є҆́сть . Вᲂ дво́рѣхъ твᲂи́хъ , пᲂю́ тѧ сп҃са ми́рꙋ . и҆ прекло́нь кᲂлѣ́на , пᲂклᲂнѧ́юсѧ твᲂе́й непᲂбѣди́мѣй си́лѣ . ве́черъ и҆ ᲂу҆́трᲂ и҆ пᲂлꙋ́дне , и҆ на всѧ́кᲂ вре́мѧ бл҃гᲂслᲂвлю́ тѧ гдⷭ҇и . Вᲂ дво́рѣхъ твᲂи́хъ гдⷭ҇и , вѣ́рнїи кᲂлѣ́на дш҃ъ и҆ тѣле́съ прекло́ньше . вᲂспѣва́емъ тѧ без̾нача́льнагᲂ ѻ҆ц҃а , и҆ сᲂбезнача́льнагᲂ сн҃а , и҆ сᲂприснᲂсꙋ́щна прест҃а́гѡ дх҃а , прᲂсвѣща́ющагᲂ и҆ ѡ҆сщ҃а́ющагᲂ дш҃а на́ша .

сла́ва , и҆ ны́нѣ . гла́съ , и҃ . Ꙗ҆зы́цы и҆нᲂгда̀ размѣси́шасѧ , де́рзᲂсти ра́ди стᲂлпᲂтвᲂре́нїѧ , ꙗ҆зы́цы же ны́нѣ ᲂу҆мꙋдри́шасѧ , сла́вы ра́ди бг҃ᲂразꙋ́мїѧ . та́мᲂбᲂ ѡ҆сꙋдѝ нечести́выѧ сᲂгрѣше́нїемъ , здѣ́же прᲂсвѣти́лъ є҆́сть хрⷭ҇то́съ лᲂвцы̀ дх҃ᲂмъ . тᲂгда̀ ᲂу҆праздни́сѧ ра́зньствᲂ натᲂмле́нїе , ны́нѣ ѡ҆бнᲂвлѧ́етсѧ сᲂгла́сїе кᲂ спасе́нїю дш҃а́мъ на́шимъ .

Славᲂсло́вїе вели́кᲂе , и҆ ѿпꙋ́стъ .

На литꙋргі́и , бл҃же́нна ѿ кано́на , пра́здникꙋ , пѣ́снь , г҃ ѧ , и҆ ѕ҃ ѧ . та́же , вхо́дъ : Вᲂзнесы́исѧ гдⷭ҇и си́лᲂю твᲂе́ю , вᲂспᲂе́мъ и҆ пᲂе́мъ си́лы твᲂѧ̀ .

і҆єре́й : Прїиди́те пᲂклᲂни́мсѧ и҆ припаде́мъ хрⷭ҇тꙋ̀ .= мы́же : С=пасѝ на́съ ᲂу҆тѣ́шителю благі́и пᲂю́щихъ ти , а҆ллилꙋ́їѧ , а҆ллилꙋ́їѧ , а҆ллилꙋ́їѧ .

трᲂпа́рь : Блгⷭ҇ве́нъ є҆сѝ хрⷭ҇тѐ бж҃е на́шъ . сла́ва , и҆ ны́нѣ . кᲂнда́къ : Є҆гда̀ сше́дъ ꙗ҆зы́ки размѣсѝ . та́же , трист҃о́е .

прᲂки́менъ , ѱл҃о́мъ дв҃дᲂвъ . Спасѝ гдⷭ҇и лю́ди свᲂѧ̀ , и҆ бл҃гᲂслᲂвѝ дᲂстᲂѧ́нїе свᲂѐ . сти́хъ . к̾тебѣ̀ гдⷭ҇и вᲂз̾зᲂвꙋ̀ , бж҃е мо́й непремᲂлчѝ ѿ менѐ . а҆пⷭ҇лъ , къ є҆фесе́ѡмъ . заⷱ҇ , ск҃ѳ . а҆ллилꙋ́їѧ . Пᲂми́лꙋй мѧ бж҃е пᲂ вели́цѣй млⷭ҇ти твᲂе́й . сти́хъ . не ѿве́рзи менѐ ѿ лица̀ твᲂегѡ̀ , и҆ дх҃а твᲂегѡ̀ ст҃а́гѡ не ѿи҆мѝ ѿ менѐ . є҆ѵⷢ҇а́лїе , ѿ матѳе́ѧ . заⷱ҇ , ѻ҃є . прича́стенъ , дх҃ъ тво́й бл҃гі́и наста́витъ мѧ на́ землю пра́вꙋ .

Вѣ́дᲂмᲂ же да є҆́сть , ꙗ҆́кѡ в̾ седми́цꙋ сїю̀ ст҃ы́ѧ , н҃ цы . негл҃емъ , ни междᲂча́сїе , ни кано́на бцⷣѣ на па́вечерницѣ . и҆ литі́й непᲂе́мъ за ᲂу҆пᲂко́й на се́й недѣ́ли .