11 февраля: св. сщмч. Власия и благов. князя Всеволода

МЦⷭ҇А ТОГО́ЖЕ ВЪ АІ҃ ДН҃Ь

Ст҃а́гѡ сщ҃еннᲂмч҃нка вла́сїѧ . =Преставле́нїе ст҃а́гѡ бл҃гᲂвѣ́рнагѡ кн҃зѧ все́вᲂлᲂда , нарече́ннагѡ во ст҃о́мъ кр҃ще́нїи гаврїи́ла , пскᲂвска́гѡ чꙋдᲂтво́рца . Прпⷣбнагѡ ѻ҆ц҃а на́шегѡ дими́трїѧ , во́лᲂгᲂдскагѡ чꙋдᲂтво́рца . слꙋ́жбы и҆́мъ пи́саны по се́й слꙋ́жбѣ .= Ве́черъ , на гдⷭ҇и вᲂзва́хъ , стихѣ́ры . гла́съ , а҃ . поⷣ . нбⷭ҇нымъ чино́мъ .= Дᲂбрᲂдѣ́телемъ ве́рхъ и҆ вѣ́рнымъ ѡ҆снᲂва́нїе ,꙳ ст҃лемъ сла́ва , и҆ мч҃нкѡмъ пᲂхвала̀ ,꙳ всѧ̀ призыва́етъ свѣ́тлѡ вѣ́рныѧ ,꙳ в̾ па́мѧть свᲂю̀ чⷭ҇тнꙋ́ю ,꙳ вᲂспѣ́ти и҆́же сего̀ ꙗ҆́кѡ пᲂбѣди́телѧ ,꙳ на землѝ бг҃а прᲂсла́вльшагѡ . Вᲂста́въ ꙗ҆вле́нїемъ ,꙳ сᲂбᲂрᲂнача́льника хрⷭ҇та̀ ,꙳ сᲂбра́нїе без̾зако́нныхъ ви́дѣвъ мч҃нче ,꙳ ᲂу҆се́рдно на сꙋди́ще прїи́де мꙋ́дре .꙳ сла́вы взе́мъ пᲂбѣди́тельнаѧ ,꙳ ны́нѣ на́ нб҃сѣхъ вᲂдвᲂрѧ́ешисѧ преѡ҆сщ҃е́нне . Кро́вными ка́плѧми твᲂи́ми мч҃нче вла́сїе ,꙳ ѻ҆де́жда цр҃кви и҆стка́сѧ краснѡ̀ .꙳ бл҃гᲂпᲂма́занїи пе́стрыми ᲂу҆кра́шьсѧ ,꙳ сꙋгꙋ́быми бᲂлѣ́зней ѡ҆багре́ньми .꙳ є҆ю́же ѡ҆дѣва́етсѧ , ꙗ҆́кѡ красᲂто́ю невѣ́стнᲂю ,꙳ вᲂспѣва́ющи жениха̀ хрⷭ҇та̀ . А҆́ще є҆́сть по́стъ , сла́ва , и҆ ны́нѣ , боⷢ҇ . а҆́ще ли среда̀ и҆ пѧто́къ , крⷭ҇тᲂбоⷢ҇ . пи́саны сего̀ мцⷭ҇а , въ є҃і дн҃ь . а҆́ще ли нѣ́сть пᲂста̀ , пᲂе́мъ : сла́ва . гла́съ , д҃ . Ꙗ҆́кѡ до́бръ дѣ́темъ пѣ́стꙋнъ , и҆ ᲂу҆чи́тель бл҃гᲂче́стїѧ . дѣ́йственᲂю си́лᲂю бжⷭ҇твенныхъ слᲂве́съ твᲂи́хъ , жены̀ бг҃ᲂлюбе́зны приве́лъ є҆сѝ , к̾ пᲂдвиго́мъ мч҃нческимъ . не́мᲂщь є҆стества̀ тѣ́мъ ᲂу҆крѣплѧ́ѧ ѡ҆ хрⷭ҇тѣ̀ . с̾ни́ми тече́нїе страда́нїи до́брѣ скᲂнча́въ , в̾ черто́зѣ нбⷭ҇нѣмъ свѣ́тлѡ ра́дꙋешисѧ . сꙋгꙋ́бымъ вѣнце́мъ , бжⷭ҇твенныѧ сла́вы ᲂу҆краша́ѧсѧ и҆ прᲂсѧ̀ с̾ни́ми , ми́ръ на́мъ дарᲂва́ти , и҆ ве́лїю млⷭ҇ть . и҆ ны́нѣ , боⷢ҇ . и҆лѝ , крⷭ҇тᲂбоⷢ҇ . поⷣ . ꙗ҆́кѡ до́блѧ . Р=аспина́ема ви́дѧщи ,꙳ и҆ ре́бра и҆скᲂпава́ема ,꙳ кᲂпїе́мъ пречⷭ҇таѧ хрⷭ҇та̀ чл҃кᲂлю́бца ,꙳ пла́чꙋщи вᲂпїѧ́ше ,꙳ что́ се сн҃е мо́й ;꙳ что́ ти без̾бл҃гᲂда́тнїи лю́дїе вᲂз̾да́ша ,꙳ за є҆́же сᲂтвᲂри́лъ є҆сѝ до́браѧ и҆́мъ ;꙳ и҆ тщи́шисѧ без̾ча́дствᲂвати мѧ ѿ тебѐ вселюбе́зныи .꙳ дивлѧ́юсѧ милᲂсе́рде ,꙳ во́льнᲂмꙋ твᲂемꙋ̀ распѧ́тїю .

На стихо́внѣ , во ѻ҆кта́и . сла́ва . гла́съ , ѕ҃ . Прᲂзѧ́бъ в̾ пᲂще́нїи бжⷭ҇твенныхъ дᲂбрᲂдѣ́телей , тезᲂи҆ме́нно вла́сїе прᲂцвѣ́лъ є҆сѝ дв҃дски , ꙗ҆́кѡ фи́никъ во дво́рѣхъ гдⷭ҇нихъ . и҆ ꙗ҆́кѡ ке́дръ ᲂу҆мно́жилсѧ є҆сѝ и҆справле́ньми . ꙗ҆́кѡ винᲂгра́дъ же плᲂдᲂви́тъ в̾ дᲂмꙋ̀ бж҃їи , во́ времѧ мꙋче́нїѧ ᲂу҆рѣ́заемь . мꙋче́ными дѣѧ́нїи ѿ плᲂда̀ по́двигъ твᲂи́хъ , и҆стᲂчи́въ на́мъ вино̀ разꙋ́мнᲂе . ѿ него́же пїю́ще , весе́лїѧ бжⷭ҇твенна срⷣца напᲂлнѧ́емъ . и҆ сᲂгла́снѡ съше́дшесѧ в̾ чⷭ҇тнꙋ́ю па́мѧть твᲂегѡ̀ скᲂнча́нїѧ , ᲂу҆блажа́юще вᲂсхвалѧ́емъ тѧ̀ , прᲂсѧ́ще прїѧ́ти тᲂбо́ю ми́ръ , и҆ ве́лїю млⷭ҇ть .= и҆ ны́нѣ , боⷢ҇ . и҆лѝ , крⷭ҇тᲂбоⷢ҇ . поⷣ . в̾ тре́тїи де́нь . Л=ю́дїе без̾зако́ннїи ,꙳ непра́веднѡ пригвᲂзди́ша тѧ̀ на́ древѣ ,꙳ дв҃аѧ и҆ чⷭ҇таѧ мт҃и твᲂѧ̀ зрѧ́щи ,꙳ ꙗ҆́кᲂже сѷмеѡ́нъ прᲂречѐ ,꙳ ᲂу҆тро́бᲂю сп҃се ᲂу҆ѧзвлѧ́шесѧ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , д҃ . И҆ нраво́мъ прича́стникъ , и҆ престо́лѡмъ намѣ́стникъ а҆пⷭ҇лѡмъ бы́въ . дѣѧ́нїемъ ѡ҆брѣ́те бг҃ᲂдх҃нᲂве́нне , в̾ видѣ́нїихъ вᲂсхо́дъ . сего̀ ра́ди сло́во и҆́стины и҆справлѧ́ѧ , за вѣ́рꙋ пᲂстрада́лъ є҆сѝ до́крᲂве . сщ҃еннᲂмч҃нче вла́сїе , мᲂлѝ хрⷭ҇та̀ бг҃а да спасе́тъ дш҃а на́ша .= сла́ва , и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .=

Кано́нъ . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆и҃ль , крⷭ҇тᲂѡ҆бра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть .

запѣ́в̾ : Ст҃ы́и сщ҃еннᲂмч҃нче вла́сїе , мᲂлѝ бг҃а ѡ҆ на́съ . Хвале́нїѧ сᲂгла́сїе дне́сь хрⷭ҇то́ви принесе́мъ , сла́внꙋю вла́сїѧ мꙋ́драгѡ твᲂрѧ́ще па́мѧть , мѡѷсе́йски праз̾днᲂлю́бцы пᲂю́ще пѣ́снь бг҃ꙋ на́шемꙋ , ꙗ҆́кѡ прᲂсла́висѧ . До́льнимъ презира́тель вла́сїе , и҆ хрⷭ҇то́въ рачи́тель , ꙗ҆́кѡ ст҃ль и҆ мч҃нкъ и҆ па́стырь , є҆́же дѣ́лᲂмъ пᲂказа́нїе . и҆ пред̾ло́жь бжⷭ҇твеннꙋю трапе́зꙋ , на снѣде́нїе сᲂзыва́етъ на́съ . Житїѐ дᲂбрᲂдѣ́тельми ѡ҆чи́стилъ є҆сѝ , и҆ сᲂсꙋ́дъ ꙗ҆ви́сѧ пᲂтре́бенъ , бжⷭ҇твеннагѡ ми́ра на вᲂспрїѧ́тїе , честна́гѡ слꙋже́нїѧ мꙋ́дре . ѻ҆де́ждꙋ же крᲂвьмѝ мꙋче́нїѧ и҆спестри́лъ є҆сѝ . боⷢ҇ . Вᲂста̀ ѿ ѻ҆́ч҃а паде́нїѧ , бг҃ᲂрᲂди́тельнице чⷭ҇таѧ . и҆ ѿ клѧ́твы и҆зба́висѧ ꙗ҆́вѣ прамт҃рьнїѧ , прест҃а́ѧ твᲂи́мъ ржⷭ҇тво́мъ , ро́дъ ве́сь чл҃ческїи .

пѣ́снь , г҃ . і҆рмоⷭ҇ . Весели́тсѧ ѡ҆ тебѣ̀ цр҃кви твᲂѧ̀ хрⷭ҇тѐ зᲂвꙋ́щи , ты́ ми крѣ́пᲂсть гдⷭ҇и , и҆ прибѣ́жище и҆ ᲂу҆тверже́нїе . Ꙗ҆́кѡ вѣ́дᲂмъ бг҃ᲂви , сщ҃е́нствᲂвати хрⷭ҇то́ви пᲂма́засѧ и҆ наꙋчи́сѧ дх҃ᲂмъ . са́мсѧ кро́вїю ѡ҆ст҃и́лъ є҆сѝ . Оу҆че́ньми вᲂи́стинꙋ , с̾бы́тїемъ мꙋ́дрыхъ дѣ́лъ твᲂи́хъ , цр҃кви бы́лъ є҆сѝ , мч҃нкъ и҆ ᲂу҆чи́тель вла́сїе . Ѻ҆́бразъ бл҃гᲂче́стїѧ цр҃кви хрⷭ҇то́вѣ бы́лъ є҆сѝ , сщ҃е́ннꙋю ѻ҆де́ждꙋ свᲂю̀ крᲂвьмѝ ᲂу҆ѧсни́лъ є҆сѝ , страда́нїи твᲂи́хъ . боⷢ҇ . Ро́ждьши на землѝ пребᲂга́таго бг҃а чи́стаѧ , чл҃ческᲂе паде́нїе на нб҃са̀ вᲂз̾вела̀ є҆сѝ .

сѣда́ленъ . гла́съ , и҃ . Бл҃гᲂче́стїѧ сы́и прᲂзѧбе́нїе че́стнѡ , нече́стїѧ ꙗ҆ви́сѧ пᲂтреби́тель , вла́сїе прехва́льне , си́лᲂю дх҃о́внᲂю . на сꙋди́щи бо и҆́дᲂльскꙋю ле́сть ѡ҆бличи́лъ є҆сѝ , и҆ бл҃гᲂдерзнᲂве́ннѡ пѣ́ти трⷪ҇цꙋ прᲂпᲂвѣ́далъ є҆сѝ . тѣ́мже и҆ без̾зако́ннымъ преда́всѧ стрⷭ҇тᲂте́рпче , ѕвѣ́рѧ ᲂу҆мᲂри́лъ є҆сѝ , ѕлᲂнача́льнагѡ ѕмі́ѧ . сегѡ̀ ра́ди вᲂпїе́мъ тѝ , мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , чтꙋ́щимъ любо́вїю ст҃ꙋ́ю па́мѧть твᲂю̀ . сла́ва , и҆ ны́нѣ , боⷢ҇ . Сл҃нца ѻ҆́блаче мы́сленагѡ , бжⷭ҇твеннагѡ свѣ́та свѣти́льниче златᲂза́рный , нескве́рнаѧ небла́знаѧ всенепᲂро́чнаѧ влⷣчце , ѡ҆мраче́нꙋю дш҃ꙋ мᲂю̀ слѣпᲂто́ю страсте́й , без̾стра́стїѧ зарѧ́ми прᲂсвѣтѝ мᲂлю́сѧ . и҆ ѡ҆скверне́нᲂе мѝ срⷣце ѡ҆мы́й , стрꙋѧ́ми ᲂу҆миле́нїѧ , пᲂкаѧ́нїѧ же слеза́ми , скве́рны ѡ҆чи́сти дѣѧ́нїй мᲂи́хъ . да любо́вїю зᲂвꙋ́ ти бцⷣе прⷭ҇нѡ дв҃о , мᲂлѝ хрⷭ҇та̀ бг҃а , прегрѣше́нїй ѡ҆ставле́нїе пᲂда́ти мѝ , тѧ́ бо и҆мѣ́ю наде́ждꙋ ра́бъ тво́й . крⷭ҇тᲂбоⷢ҇ . А҆́гньца и҆ па́стырѧ и҆ и҆зба́вителѧ , а҆́гница зрѧ́щи на крⷭ҇тѣ̀ , вᲂсклица́ше пла́чꙋщи , и҆ го́рькѡ рыда́ющи гл҃аше . ми́ръ ᲂу҆́бѡ ра́дꙋетсѧ прїе́млѧ тᲂбо́ю и҆збавле́нїе . ᲂу҆тро́ба же мᲂѧ̀ гᲂри́тъ , зрѧ́щи твᲂѐ распѧ́тїе , є҆́же терпи́ши за млрⷭ҇дїе млⷭ҇ти , дᲂлгᲂтерпѣли́ве гдⷭ҇и . млⷭ҇ти пꙋчи́но , и҆ и҆сто́чниче неи҆счерпа́емыи . ᲂу҆милᲂсе́рдисѧ , и҆ да́рꙋй сᲂгрѣше́нїи ѡ҆ставле́нїе , вѣ́рᲂю пᲂю́щимъ бжⷭ҇твеннаѧ твᲂѧ̀ страда́нїѧ .

пѣ́снь , д҃ . і҆рмо́съ . Вᲂз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . Оу҆твержа́емь жезло́мъ и҆́стиннымъ , мѡѷсе́йски низ̾лᲂжи́лъ є҆сѝ пре́лести ѕмїю̀ , вла́сїе ᲂу҆го́дниче хрⷭ҇то́въ . ѡ҆бличи́въ мꙋчи́телѧ , и҆ наста́вль но́выѧ лю́ди . Слᲂве́снымъ тѧ̀ и҆ без̾слᲂве́снымъ бл҃гᲂда́телѧ , є҆́же к̾ бг҃ꙋ присвᲂе́нїе пᲂказа̀ бл҃же́нне , и҆справле́нїи твᲂи́хъ . тѣ́мже ᲂу҆́бѡ прїѧ́лъ є҆сѝ , и҆сцѣле́нїемъ дарᲂва́нїѧ . Во ᲂу҆до́лѣ и҆дѣ́же пᲂлᲂжи́сѧ бᲂлѣ́знь , сꙋ́щимъ ѡ҆ хрⷭ҇тѣ̀ твᲂи́мъ ѻ҆вца́мъ пра́веднѡ . всѐ ѻ҆́ч҃е ᲂу҆дави́лъ є҆сѝ сло́вᲂмъ бл҃гᲂда́ти , без̾зако́нїѧ те́рнїе . боⷢ҇ . Ꙗ҆́кѡ ра́й пᲂсредѝ цр҃кве насажде́нъ ꙗ҆ви́сѧ , ро́ждьши дре́во жи́зни препѣ́таѧ . ѿ него́же ᲂу҆́бѡ в̾кꙋси́вше , пᲂзна́хᲂмъ хрⷭ҇та̀ бг҃а на́шегѡ .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . На па́жити бжⷭ҇твеннѣй , прᲂсте́ръ предѣ́лы ста́да свᲂегѡ̀ ст҃лю . бг҃ᲂмꙋ́дрено ле́сть ѿгна́лъ є҆сѝ ѿ всеѧ̀ землѝ . Оу҆че́ньми мꙋ́дре ст҃лю , ста́до твᲂѐ ᲂу҆тверди́лъ є҆сѝ в̾ вѣ́рѣ . се́бо и҆ жены̀ ле́сть пᲂпра́ша . Любо́вїю хрⷭ҇то́вᲂю снѣда́емы жены̀ , к̾ пᲂдо́бїю прихо́дѧтъ по́двигъ твᲂи́хъ ѻ҆́ч҃е , закала́емы ᲂу҆се́рднѡ хрⷭ҇то́ви . боⷢ҇ . Оу҆мертви́сѧ вᲂи́стинꙋ ржⷭ҇тво́мъ тѝ влⷣчце , наи́тїе сме́ртнᲂе . свѣ́тᲂмъ бо тма̀ разᲂрѧ́ема ви́дитсѧ .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Красᲂто́ю разли́чныхъ ра́нъ тѣле́сныхъ , та́йныѧ ѻ҆де́жды твᲂеѧ̀ ᲂу҆краси́лъ є҆сѝ лѣпᲂтꙋ̀ . и҆ ѡ҆бᲂю́дꙋ ст҃лю вѣнча́сѧ бл҃гᲂда́тїю . Вѣ́рᲂю хрⷭ҇то́вᲂю ꙗ҆́кѡ прїѡ҆брѣ́те жены̀ , стра́ждꙋщїѧ с̾ тᲂбо́ю ѻ҆́ч҃е , и҆ ᲂу҆се́рднѡ ᲂу҆ме́рша вла́сїе . любо́вїю твᲂрѧ́щихъ па́мѧть твᲂю̀ сᲂхранѝ . Ре́внᲂстїю хрⷭ҇то́вᲂю раз̾же́гшесѧ мч҃нцы , ласка́тельныѧ льстѝ пре́лесть ѿве́ргше , мꙋ́камъ тᲂмле́нїѧ запали́ша кро́вїю . боⷢ҇ . Крѣ́пᲂсть мᲂѧ̀ вᲂи́стинꙋ ты̀ , и҆ пѣ́нїе є҆сѝ бг҃ᲂрᲂди́тельнице . на тѧ́ бо наде́ждꙋ мᲂю̀ вᲂз̾лᲂжи́хъ , и҆ вᲂз̾вы́сихъ тᲂбо́ю на врагѝ мᲂѧ̀ ро́гъ мо́й .

кᲂнда́къ . гла́съ , и҃ . Сщ҃е́нїѧ пᲂма́занїемъ , и҆ мꙋче́нїѧ кро́вїю ᲂу҆краси́сѧ сла́вне вла́сїе , и҆ сїѧ́еши всю́дꙋ в̾ вы́шнихъ ликꙋ́ѧ . и҆ на́съ назира́ѧ , и҆́же в̾ хра́мъ тво́й прише́дшїѧ , и҆ в̾ не́мъ тѝ непреста́ннѡ зᲂвꙋ́щїѧ , всѣ́хъ на́съ сᲂблюдѝ . и҆́кᲂс̾ . Сᲂтща́нїемъ бра́тїе сᲂбери́тесѧ , и҆ хра́мъ мч҃нка дᲂсти́гните , ꙗ҆́кѡ да сегѡ̀ вᲂспᲂе́мъ дне́сь , ꙗ҆́кѡ да бл҃гᲂда́тїю є҆гѡ̀ наслади́мсѧ . дꙋ́ши бо спаса́етъ и҆ тѣлеса̀ , ѿ страсте́й мнᲂгᲂразли́чныхъ , ꙗ҆́кѡ мч҃нкъ , ꙗ҆́кѡ прпⷣбенъ . ꙗ҆́кѡ вѣ́ренъ ст҃ль и҆ пᲂбо́рникъ , вᲂпїю́щимъ є҆мꙋ̀ ѿ дꙋшѝ чи́сты всѣ́хъ на́съ сᲂблюдѝ .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃гᲂвѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и . Дв҃дски тебѣ̀ взыва́емъ , ѽ ѻ҆́ч҃е вла́сїе любо́вїю . гдⷭ҇ви ꙗ҆ви́сѧ ты̀ пᲂдо́бникъ , и҆ стᲂпы̀ твᲂѧ̀ непᲂзна́шасѧ . и҆́бо стезѧ̀ твᲂѧ̀ ѡ҆́ гдⷭ҇ѣ ꙗ҆ви́сѧ на вᲂда́хъ . Сп҃сᲂвᲂю насла́ждьшесѧ мч҃нцы бл҃гᲂда́тїю , вᲂи́стинꙋ ра́дᲂсть в̾мѣни́сте , напа́сти мꙋче́нїе . чꙋ́до же ꙗ҆́кѡ превы́ше чл҃ка , крᲂве́мъ прело́жьшимсѧ во млеко̀ ᲂу҆жа́снѡ . Мт҃рьне ᲂу҆́бѡ къ мꙋче́нїю дерзнᲂве́нїе зрѧ́ще , вѣ́рᲂю хрⷭ҇то́вᲂю дѣ́ти , и҆ тᲂгѡ̀ бл҃гᲂлѣ́пїѧ наслажда́ютсѧ , ко влⷣцѣ ра́дꙋющесѧ тща́хꙋсѧ . боⷢ҇ . Вы́шнѧгѡ ѡ҆сщ҃е́нно бжⷭ҇твеннᲂе селе́нїе ра́дꙋисѧ . тᲂбо́ю бо даде́сѧ ра́дᲂсть бцⷣе вᲂпїю́щимъ тѝ бл҃гᲂслᲂве́на ты̀ в̾ жена́хъ , пренепᲂро́чнаѧ влⷣчце .

пѣ́снь , и҃ . і҆рмо́съ . Рꙋ́цѣ распрᲂсте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ ᲂу҆гаси́ша дᲂбрᲂдѣ́телїю пᲂѧ́савшесѧ , и҆́же бл҃гᲂче́стїѧ люби́тели ѻ҆́трᲂцы взыва́юще , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Рꙋ́цѣ распрᲂсте́ръ ѱало́мски , пред̾ лице́мъ бж҃їимъ ѻ҆́ч҃е , прине́слъ є҆сѝ сщ҃еннᲂдѣ́йствꙋѧ , кро́вїю свᲂе́ю мл҃твы свᲂѧ̀ хрⷭ҇то́ви . тѣ́мже ча́шꙋ мꙋ́дре спасе́нꙋю и҆́спивъ , вᲂпїѧ́ше . бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Вдᲂви́цѣ ревнꙋ́юще бл҃гᲂче́стнѡ , бжⷭ҇твеннꙋю па́мѧть твᲂю̀ съверша́емъ вѣ́рнѡ бг҃ᲂра́дᲂванне вла́сїе . и҆ са́мъ ᲂу҆́бѡ ѡ҆бѣща́нїѧ , є҆́же сᲂтвᲂрѝ к̾не́й , и҆ с̾не́ю к̾на́мъ дарᲂва́нїи бл҃ги́ми , на́мъ бꙋ́ди на́пᲂмᲂщь . боⷢ҇ . Бѧ́ше є҆стество̀ чл҃ческᲂе , є҆́же пре́жде ѡ҆сꙋжде́ннᲂе паде́нїемъ престꙋпле́нїѧ . ѡ҆брѣ́те же бцⷣе ржⷭ҇тво́мъ твᲂи́мъ , бл҃гᲂслᲂве́нїе вᲂи́стинꙋ , и҆ пᲂе́тъ ра́дᲂстнѡ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а .

пѣ́снь , ѳ҃ . і҆рмо́съ . Ка́мень нерꙋкᲂсѣ́чныѧ гᲂры̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , сᲂвᲂкꙋпи́въ раз̾стᲂѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Ꙗ҆́кᲂже в̾ пи́щи ра́йстѣй , и҆ в̾не́й црⷭ҇твїе , вла́сїе мꙋ́дре ст҃лю , наслѣ́дїе ᲂу҆гᲂто́ваѧ , на закᲂле́нїе пᲂтечѐ , ѡ҆́ гдⷭ҇ѣ ра́дꙋѧсѧ . Гᲂрды́ню пᲂсѣка́ше ты̀ бл҃же́нне дх҃о́внымъ мече́мъ , вᲂз̾несе́нꙋю сꙋ́етнѡ , и҆ не сты́днѡ без̾бо́жїе . свᲂи́ми крᲂвьмѝ , назнамена́въ бл҃гᲂче́стїе . Вла́сїе мꙋ́дре ст҃лю , со стра́ждꙋщими с̾ тᲂбо́ю жена́ми , в̾кꙋ́пѣ и҆ с̾ дѣтьмѝ бжⷭ҇твенными , бл҃гᲂслᲂве́ньми хва́лѧщїѧ тѧ̀ вѣнча́ти пᲂмᲂли́сѧ . ꙗ҆́кѡ ѿ нача́ла тебѣ̀ сло́во вᲂспѣ́вшихъ . боⷢ҇ . Въ ржⷭ҇твѣ̀ дв҃а ꙗ҆ви́сѧ , ꙗ҆́кѡ пре́жде ржⷭ҇тва̀ бцⷣе , и҆ по ржⷭ҇твѣ̀ та́ко же . ᲂу҆ста́вленыѧ зако́ны є҆стества̀ , преше́дши влⷣчце . тѣ́мже тѧ̀ всѝ велича́емъ .

свѣти́ленъ . Ст҃ль и҆ мч҃нкъ , прпⷣбенъ незло́бивъ ꙗ҆́вльсѧ вла́сїе . страсте́й хрⷭ҇то́выхъ ра́ны нᲂсѧ̀ , да́вшаго тѝ бл҃гᲂда́ть , и҆сцѣлѧ́ти всѧ̀ недꙋ́ги . боⷢ҇ . Тѧ̀ данїи́лъ пред̾написꙋ́етъ , несѣко́мꙋю го́рꙋ . и҆з̾ неѧ́же чⷭ҇тны́и ка́мень ѿсѣче́сѧ , и҆стнѣва́етъ и҆́дᲂльскїѧ хра́мы , бг҃ᲂрᲂди́тельнице мр҃і́е .

Слꙋ́жба на преставле́нїе ст҃а́гѡ бл҃гᲂвѣ́рнагѡ вели́кагѡ кн҃зѧ все́вᲂлᲂда , нарече́ннагѡ во ст҃ѣ́мъ кр҃ще́нїи гаврїи́ла . =Ве́черъ , пᲂе́мъ , бл҃же́нъ мꙋ́жь , а҃ , а҆нтифо́нъ . На гдⷭ҇и вᲂзва́хъ , стихѣ́ры , на и҃ . гла́с̾ , и҃ . поⷣ . ѽ пресла́внᲂе чꙋ́до . Бл҃же́нне бг҃ᲂмꙋ́дре кн҃же все́вᲂлᲂде ,꙳ чи́стаѧ твᲂѧ̀ дш҃а ,꙳ правᲂсла́внᲂю мꙋ́дрᲂстїю сїѧ́ющи ,꙳ ѡ҆блиста̀ дᲂбрᲂдѣ́телей свѣ́тлᲂстїю .꙳ и҆ ѡ҆зарѧ́етъ вѣ́рныхъ и҆спᲂлне́нїе ,꙳ бѣсо́въ тмꙋ̀ ѿгᲂнѧ́щи .꙳ тѣ́мже ꙗ҆́кѡ прича́стника ꙳ невече́рнѣй бл҃гᲂда́ти ,꙳ тѧ̀ бл҃гᲂче́стнѡ пᲂчита́емъ дᲂстᲂчꙋ́дне . =два́жды . И҆мѣ́ѧ дш҃ꙋ млⷭ҇тивнꙋ ,꙳ и҆ чи́стъ по́мыслъ , и҆ срⷣце бᲂдрели́во ,꙳ вѣ́рꙋ небла́зненꙋ ,꙳ и҆ любо́вь нелицемѣ́рнꙋ ,꙳ ѿ землѝ преста́висѧ к̾ нбⷭ҇нымъ ,꙳ лико́мъ пра́ведныхъ причте́нъ .꙳ тѣ́мже чте́мъ тѧ̀ сщ҃е́нными пѣ́сньми ,꙳ и҆ бл҃гᲂче́стнѡ всѝ ᲂу҆бл҃жа́емъ ,꙳ бл҃же́нне кнѧ́же все́вᲂлᲂде . Бжⷭ҇твенными пᲂꙋче́нїи в̾жилѧ́емь ,꙳ сла́сти страстны́ѧ ѿ дꙋшѝ ѿгна́лъ є҆сѝ ,꙳ и҆ трⷪ҇цѣ селе́нїе чи́сто бы́лъ є҆сѝ .꙳ тѣ́мже к̾ бжⷭ҇твеннᲂмꙋ наслажде́нїю ѿше́лъ є҆сѝ ,꙳ бг҃ᲂви сᲂблюда́ющꙋ ны́нѣ ꙳ нерꙋши́мо твᲂѐ честно́е тѣ́ло ,꙳ бжⷭ҇твенными сꙋдьба́ми .꙳ и҆́миже са́мъ вѣ́сть прᲂславлѧ́и тѧ ꙳ ꙗ҆́вѣ все́вᲂлᲂде .

и҆́ны , стихѣ́ры . гла́съ , д҃ . поⷣ . ꙗ҆́кѡ до́блѧ .= Ѿ= бл҃гᲂчести́вагѡ ко́рене ,꙳ бл҃гᲂвѣ́рїѧ вѣ́твь прᲂзѧбѐ ,꙳ по бжⷭ҇твеннᲂмꙋ па́влꙋ а҆пⷭ҇лꙋ .꙳ а҆́ще бо ко́рень ст҃ъ ,꙳ то̀ и҆ вѣ́тви є҆́же речѐ .꙳ ты́ же ѿ ди́вїѧ ма́слины ᲂу҆клᲂни́лсѧ є҆сѝ ,꙳ вᲂстечѐ на па́жить зако́на живᲂно́снагѡ .꙳ бл҃гᲂче́стїемъ ѡ҆сїѧ́емь ,꙳ бл҃же́нне кнѧ́же гаврїи́ле ,꙳ бл҃гᲂда́телю всѣ́хъ бг҃ꙋ бл҃гᲂꙋгᲂди́лъ є҆сѝ . двⷤа . Бл҃гᲂчести́въ и҆ непᲂро́ченъ ,꙳ правди́въ же и҆ и҆́стиненъ по і҆́ѡвꙋ ,꙳ пᲂꙋча́ѧсѧ в̾ за́пᲂвѣдехъ гдⷭ҇нихъ всегда̀ .꙳ и҆ ꙗ҆́кѡ дре́во сажде́но ,꙳ при и҆схо́дищихъ вᲂды̀ живо́тны ,꙳ бг҃ᲂви плᲂды̀ принᲂсѧ̀ бл҃гᲂче́стїѧ ,꙳ вᲂз̾дѣ́лаѧ хра́мы ст҃ы́ѧ мно́ги .꙳ и҆ написꙋ́ѧ рꙋко́ю сѝ бл҃же́нне живо́тнаѧ слᲂвеса̀ ,꙳ на ᲂу҆тверже́нїе цр҃квамъ . Бл҃гᲂче́стїѧ стᲂлпа̀ непᲂкᲂлѣби́ма ,꙳ дᲂбрᲂдѣ́телемъ ᲂу҆краше́нїе ,꙳ бл҃гᲂꙋтро́бїѧ сᲂкро́вище ,꙳ млⷭ҇ти пꙋчи́нꙋ неи҆счерпа́емꙋ ,꙳ во́ина на невѣ́рныѧ непᲂбѣди́ма ,꙳ все́вᲂлᲂда кро́ткаго пᲂчте́мъ ,꙳ и҆згна́нїе претерпѣ́вшаго .꙳ и҆ вѣнце́мъ терпѣ́нїѧ ,꙳ ѿ цр҃ѧ всѣ́хъ бг҃а вѣ́чнѡ вѣнча́на . сла́ва . гла́съ , ѕ҃ . Нача́льникꙋ бл҃гᲂвѣ́стїѧ бж҃їѧ сло́ва , и҆ неи҆зрече́нныхъ та́инъ слꙋжи́телю , нбⷭ҇нᲂмꙋ вᲂево́дѣ вы́шнихъ си́лъ тезᲂи҆мени́таго , бл҃гᲂчести́ваго вели́каго страти́га все́вᲂлᲂда , сᲂше́дшесѧ празднᲂлю́бцы , хвала́ми и҆ пѣ́сньми дх҃о́вными вᲂз̾вели́чимъ . и҆ сᲂгла́снѡ вᲂзᲂпїе́мъ є҆мꙋ̀ , ѽ всебл҃же́нне и҆ бг҃ᲂмꙋ́дре кнѧ́же гаврїи́ле , ꙗ҆́кѡ и҆мѣ́ѧ дерзнᲂве́нїе ко прест҃ѣ́й трⷪ҇цѣ , мᲂлѝ пᲂбѣ́дꙋ да́ти во́емъ бл҃гᲂчести́вымъ во бранѣ́хъ . и҆ ѿ сꙋпᲂста́тъ наше́ствїѧ гра́дъ сво́й п̾ско́въ сᲂхрани́ти , и҆ спастѝ дш҃а на́ша . и҆ ны́нѣ , боⷢ҇ . Кто̀ тебѐ небл҃жи́тъ . та́же , вы́хᲂдъ . прᲂки́менъ , дню̀ .

Ѿ при́тчей , чте́нїе .

Па́мѧть пра́веднагѡ с̾ пᲂхвала́ми , и҆ блгⷭ҇ве́нїе гдⷭ҇не на главѣ̀ є҆гѡ̀ . бл҃же́нъ чл҃къ , и҆́же ѡ҆брѣ́те мꙋ́дрᲂсть , и҆ сме́ртенъ и҆́же ᲂу҆вѣ́дѣ ра́зꙋмъ . лꙋ́чше бо сїю̀ кꙋпᲂва́ти , не́жели зла́та и҆ сребра̀ сᲂкро́вища . честнѣ́йши бо є҆́сть ка́менїѧ мнᲂгᲂцѣ́нна , все́же чⷭ҇тно́е , недᲂсто́йнѡ є҆́сть є҆́й . дᲂлгᲂта́ бо дні́й , и҆ лѣ́та живᲂта̀ , в̾ десни́цѣ є҆ѧ̀ , и҆ в̾ шꙋ́ицѣ є҆ѧ̀ бᲂга́тство и҆ сла́ва . ѿ ᲂу҆́стъ бо є҆ѧ̀ и҆схо́дитъ пра́вда , зако́нъ же и҆ млⷭ҇ть , на ꙗ҆зы́цѣ но́ситъ . пᲂслꙋ́шайте ᲂу҆́бѡ менѐ , ѽ ча́да , честна́ѧ бо рекꙋ̀ , и҆ бл҃же́нъ чл҃къ , и҆́же пꙋтѝ мᲂѧ̀ храни́тъ . и҆схо́ди бо мᲂѝ , и҆схо́ди живᲂта̀ , и҆ ᲂу҆гᲂто́ваетсѧ хᲂтѣ́нїе ѿ́ гдⷭ҇а . сегѡ̀ ра́ди мᲂлю̀ ва́съ , и҆ пред̾лага́ю мо́й гла́съ сн҃ᲂво́мъ чл҃ческимъ . ꙗ҆́кѡ а҆́зъ премꙋ́дрᲂсть всели́хъ , сᲂвѣ́тъ и҆ ра́зꙋмъ , и҆ смы́слъ а҆́зъ призва́хъ . мо́й сᲂвѣ́тъ и҆ ᲂу҆тверже́нїе , мо́й ра́зꙋмъ , мᲂѧ́ же крѣ́пᲂсть . а҆́зъ менѐ лю́бѧщїѧ люблю̀ , и҆ взыска́ющїи менѐ ѡ҆брѧ́щꙋтъ бл҃гᲂда́ть . разꙋмѣ́йте ᲂу҆́бѡ неѕло́бивїи кᲂва́рство , ненака́занїи же прилага́йте срⷣца̀ . пᲂслꙋ́шайте менѐ и҆ па́ки , честна́ѧ бо рекꙋ̀ , и҆ ѿве́рзꙋ ѿ ᲂу҆сте́нъ мᲂи́хъ пра́вдꙋ . ꙗ҆́кѡ и҆́стинѣ пᲂꙋча́етсѧ гᲂрта́нь мо́й , ме́рзски же предо мно́ю ᲂу҆стны̀ лжи́выхъ . с̾ пра́вдᲂю всѝ гл҃ы ᲂу҆́стъ мᲂи́хъ , ни что́же в̾ ни́хъ стро́пᲂтно ни развращено̀ . всѧ̀ пра́ва сꙋ́ть разꙋмѣва́ющимъ и҆́стинꙋ , и҆ здра́ва ѡ҆брѣта́ющимъ ра́зꙋмъ . наꙋчꙋ́ бо ва́съ и҆́стинѣ , да бꙋ́детъ ѡ҆́ гдⷭ҇ѣ наде́жда ва́ша , и҆ и҆спо́лнитесѧ дх҃а .

Ѿ= при́тчей , чте́нїе .=

=Ѿ =ᲂу҆́стъ пра́веднагѡ ка́плетъ премꙋ́дрᲂсть , ꙗ҆зы́къ же непра́веднагѡ пᲂтреби́тсѧ . ᲂу҆сты̀ мꙋже́й пра́ведныхъ свѣ́дѧтъ бл҃гᲂда́ть , ᲂу҆ста́ же нечести́выхъ разᲂрѧ́тсѧ . мѣ́рила ле́стна ме́рзᲂсть пре́д̾ гдⷭ҇емъ , мѣ́рило же пра́ведно прїѧ́тнѡ є҆мꙋ̀ є҆́сть . и҆дѣ́же а҆́ще вни́детъ дᲂсажде́нїе , тꙋ̀ и҆ бесче́стїе . ᲂу҆ста̀ смире́ныхъ пᲂꙋча́тсѧ премꙋ́дрᲂсти , кᲂнчи́на же пра́ведныхъ наста́витъ и҆́хъ . и҆ пᲂпᲂлзнᲂве́нїе закᲂнᲂпрестꙋ́пникъ плѣни́тъ ѧ҆̀ . непо́льзꙋетъ и҆мѣ́нїе в̾ дн҃ь ꙗ҆́рᲂсти , пра́вда же и҆збавлѧ́етъ ѿ сме́рти . ᲂу҆мира́ѧ пра́ведныи , ѡ҆ставлѧ́етъ пᲂпече́нїе . ме́рзᲂстна же быва́етъ и҆ на́гла нечести́выхъ пᲂги́бель . пра́вда непᲂро́чнагѡ и҆справлѧ́етъ пꙋтѝ , нече́стїемъ же свᲂи́мъ па́даетъ без̾зако́нныи . пра́вда мꙋже́й пра́ведныхъ и҆збавлѧ́етъ и҆́хъ , без̾сᲂвѣ́тїемъ же ᲂу҆лᲂвлѧ́ютсѧ закᲂнᲂпрестꙋ́пнїи . скᲂнча́вшꙋсѧ мꙋ́жꙋ пра́веднꙋ , не ѡ҆скꙋдѣ́етъ наде́жда , хвала́ же нечести́выхъ пᲂтреби́тсѧ . пра́ведникъ ѿ лᲂви́твы и҆збѣ́гнетъ , вмѣ́сто же є҆гѡ̀ предае́тсѧ нечести́выи . во ᲂу҆стѣ́хъ закᲂнᲂпрестꙋ́пныхъ сѣ́ть гражда́нѡмъ , чꙋ́вство же пра́ведныхъ бл҃гᲂспѣ́шнѡ . во бл҃гᲂсти пра́ведныхъ и҆спра́витсѧ гра́дъ , и҆ въ пᲂги́бели нечести́выхъ ра́дᲂванїе . во бл҃гᲂслᲂве́нїи пра́ведныхъ вᲂзвы́ситсѧ гра́дъ , ᲂу҆сты́ же нечести́выхъ раскᲂпа́етсѧ . рꙋга́етсѧ гражда́нѡмъ лише́ныи ра́зꙋма . мꙋ́жь же мꙋ́дръ без̾мо́лвїе во́дитъ .

Ѿ премꙋ́дрᲂсти сᲂло́мᲂни , чте́нїе .

Пра́ведникъ а҆́ще пᲂсти́гнетъ скᲂнча́тисѧ , в̾ пᲂко́й бꙋ́детъ . ѡ҆сꙋ́дитъ же пра́ведникъ ᲂу҆мира́ѧ живы́хъ нечести́выхъ . ᲂу҆́зрѧтъ бо кᲂнчи́нꙋ пра́веднагѡ , и҆ неразꙋмѣ́ютъ , что̀ сᲂвѣща́ша ѡ҆ не́мъ . ꙗ҆́кѡ пᲂве́ржетъ и҆́хъ гдⷭ҇ь без̾гла́сны ни́цъ , и҆ пᲂкᲂле́блетъ и҆́хъ ѿ ѡ҆снᲂва́нїѧ , и҆ да́же и҆ до пᲂслѣ́днѧгѡ и҆сче́знꙋтъ в̾ бᲂлѣ́зни , и҆ па́мѧть и҆́хъ пᲂги́бнетъ . прїи́дꙋтъ в̾ пᲂмышле́нїе сᲂгрѣше́нїй свᲂи́хъ ᲂу҆жа́сни , и҆ ѡ҆бличи́тъ и҆́хъ сᲂпрᲂти́въ без̾зако́нїѧ и҆́хъ . тᲂгда̀ ста́нетъ в̾ дерзнᲂве́нїи мно́зѣ пра́ведникъ , пред̾ лице́мъ ѡ҆скᲂрби́вшихъ є҆гѡ̀ , и҆ ѿмета́ющихъ трꙋды̀ є҆гѡ̀ . ви́дѣвше же смѧтꙋ́тсѧ стра́хᲂмъ мно́гимъ , и҆ ᲂу҆жа́снꙋтсѧ ѡ҆ пресла́внᲂмъ спасе́нїи є҆гѡ̀ . и҆ рекꙋ́тъ в̾ себѣ̀ ка́ющесѧ , и҆ в̾ тѣснᲂтѣ̀ дꙋ́ха вᲂздыха́юще . се́й бѣ̀ є҆го́же и҆мѣ́хᲂмъ нѣ́кᲂгда въ пᲂсмѣ́хъ , и҆ въ при́тчꙋ пᲂнᲂше́нїѧ . безꙋ́мнїи житїѐ є҆гѡ̀ вмѣни́хᲂмъ неи́стᲂво , и҆ кᲂнчи́нꙋ є҆гѡ̀ без̾че́стнꙋ . ка́кѡ вмѣни́сѧ в̾ сн҃ѣ́хъ бж҃їихъ , и҆ во ст҃ы́хъ жре́бїй є҆гѡ̀ є҆́сть ; ᲂу҆́бѡ заблꙋди́хᲂмъ ѿ пꙋтѝ и҆́стиннагѡ , и҆ пра́вды свѣ́тъ не ѡ҆блиста̀ на́съ , и҆ сл҃нце невᲂз̾сїѧ̀ на́мъ . без̾зако́нїѧ и҆спо́лнихᲂмсѧ во стезѧ́хъ и҆ пᲂги́бели . и҆ хᲂди́хᲂмъ сквᲂзѣ̀ пꙋсты́ни непрᲂхо́дны , пꙋти́ же гдⷭ҇нѧ неразꙋмѣ́хᲂмъ .

На литі́и , стихѣ́ры . гла́съ , а҃ . Наста̀ ны́нѣ всечестна́ѧ па́мѧть , вели́кагѡ кн҃зѧ все́вᲂлᲂда . нарече́ннагѡ по ѻ҆смᲂдне́внᲂмꙋ зако́нꙋ гдⷭ҇ню , но́выѧ бл҃гᲂда́ти гаврїи́ла , на́шегѡ застꙋ́пника , и҆ пᲂмо́щника в̾ ско́рбѣхъ . и҆ бᲂлѧ́щимъ врача̀ предо́бра , и҆ на бранѣ́хъ пᲂсо́бника непᲂбᲂри́ма . сегѡ̀ ра́ди прїидѣ́те всѝ кᲂнцы̀ земні́и . прїиди́ же и҆ ты̀ вели́кїи но́въ гра́де , и҆́же в̾ тебѣ̀ пᲂжи́выи се́й бл҃же́нныи , и҆ ст҃ы́ѧ цр҃кви мно́ги сᲂзда̀ . є҆го́же дᲂсто́йнѡ да ᲂу҆блажи́мъ , и҆ свѣ́тлѡ па́мѧть є҆гѡ̀ тᲂржествꙋ́емъ . мо́литъбᲂсѧ гдⷭ҇ви спасти́сѧ дш҃а́мъ на́шимъ . Житїѐ свᲂѐ по́ бз҃ѣ по́живъ , бл҃же́нне кн҃же гаврїи́ле . в̾ мᲂли́твѣ и҆ пᲂстѣ̀ по а҆пⷭ҇лꙋ , в̾ за́пᲂвѣдехъ гдⷭ҇нихъ пре́былъ є҆сѝ . вдᲂви́цъ и҆ ѡ҆би́димыхъ застꙋпа́ѧ ми́лᲂваше . тѣ́мже мᲂли́сѧ сп҃сꙋ всѣ́хъ за́ люди , є҆́же ѡ҆дᲂлѣ́ти и҆́мъ и҆нᲂвѣ́рныѧ ꙗ҆зы́ки , и҆ на́мъ и҆спрᲂсѝ ѿ́ гдⷭ҇а млⷭ҇ть в̾ де́нь сꙋ́дныи . гла́съ , в҃ . Ꙗ҆́кᲂже ᲂу҆слы́ша бг҃ᲂлюби́выи є҆пⷭ҇кпъ ни́фᲂнтъ , преставле́нїе твᲂѐ честно́е , тᲂгда̀ и҆ наро́ди вели́кагѡ нᲂва̀ гра́да , вᲂсхᲂтѣ́ша мо́щи твᲂѧ̀ взѧ́ти к̾ себѣ̀ . по́сланїи же ѿ сщ҃е́нныхъ дерзнꙋ́ша в̾зѧ́ти тѧ̀ и҆ не вᲂз̾мᲂго́ша . и҆ та́кѡ пре́былъ є҆сѝ всебл҃же́нне гаврїи́ле , непᲂдви́жимъ с̾мѣ́ста свᲂегѡ̀ . и҆ сꙋгꙋ́бо чꙋдᲂдѣ́йствїе пᲂказа́лъ є҆сѝ , ꙗ҆́кᲂже дре́вле чꙋ́дныи и҆лїѧ̀ , и҆ є҆лисе́ѡви ми́лᲂть свᲂю̀ , ᲂу҆сꙋгꙋ́бити дх҃а бл҃гᲂда́ть . ты́ же но́гᲂть ѿ честны́ѧ рꙋкѝ свᲂеѧ̀ , по́далъ є҆сѝ вели́кᲂмꙋ нᲂвꙋ̀ гра́дꙋ на и҆сцѣле́нїе и҆ застꙋпле́нїе . и҆ ны́нѣ мᲂли́сѧ ст҃е за́ градъ и҆ лю́ди твᲂѧ̀ , є҆́же и҆зба́витисѧ на́мъ ѿ ꙗ҆зы́ческагѡ наше́ствїѧ , и҆ спасти́сѧ дш҃а́мъ на́шимъ . сла́ва . гла́съ , д҃ . Прїидѣ́те сла́внагѡ гра́да п̾ско́ва , наро́ди ма́лїи и҆ вели́цыи , на́шегѡ застꙋ́пника , ѿ вы́ше гра́да к̾ на́мъ прише́дшаго , вели́каго кн҃зѧ все́вᲂлᲂда , хвала́ми и҆ пѣ́сньми ᲂу҆бл҃жи́мъ . млⷭ҇тынею же и҆ пᲂсто́мъ , и҆ всѣ́ми до́брыми дѣ́лы бг҃ꙋ ᲂу҆гᲂди́вша , и҆ дш҃ꙋ свᲂю̀ є҆мꙋ̀ преда́вша . и҆ гра́дъ п̾ско́въ мᲂли́твᲂю и҆зба́вльша ѿ ꙗ҆зы́ческагѡ наше́ствїѧ . на́мъ же честны́ѧ мо́щи свᲂѧ̀ ѡ҆ста́вль в̾ па́мѧть тᲂчи́ти неѡ҆скꙋ́днѡ и҆сцѣле́нїѧ , прихᲂдѧ́щимъ к̾ немꙋ̀ вѣ́рᲂю . тѣ́мже и҆ мы̀ припа́дающе мо́лимсѧ , ѽ всебл҃же́нне кн҃же гаврїи́ле , мᲂли́сѧ ст҃ѣ́й трⷪ҇цѣ , ѡ҆ дш҃а́хъ на́шихъ . и҆ ны́нѣ , боⷢ҇ . Пᲂда́ждь ᲂу҆тѣше́нїе .

На стихо́внѣ , стихѣ́ры . гла́съ , д҃ . поⷣ . да́лъ є҆сѝ зна́менїе .= Д=а́лъ є҆сѝ цр҃ю царе́мъ ,꙳ бл҃гᲂчести́ вᲂмꙋ твᲂемꙋ̀ кн҃зю все́вᲂлᲂдꙋ ,꙳ дв҃дᲂвꙋ кро́тᲂсть ,꙳ сᲂло́мѡню мꙋ́дрᲂсть ,꙳ і҆єзекі́ево раче́нїе .꙳ по влади́мирѣ вѣ́рѣ храни́телѧ ,꙳ цр҃квамъ стрᲂи́телѧ всеи҆зрѧ́дна ,꙳ і҆с҃е всеси́льне ,꙳ и҆ спа́се дш҃а́мъ на́шимъ .

сти́хъ : вᲂз̾весели́тсѧ пра́ведникъ ѡ҆́ гдⷭ҇ѣ ,꙳ и҆ ᲂу҆пᲂва́етъ на́нь . Да́стъ зна́менїе ,꙳ ᲂу҆го́дникᲂмъ свᲂи́мъ гдⷭ҇ь ,꙳ и҆сꙋ́сꙋ на́ввинꙋ ,꙳ стᲂѧ́ти со́лнечнᲂмꙋ тече́нїю ,꙳ во́ времѧ бра́ни .꙳ та́ко же и҆ бл҃же́ннᲂмꙋ кн҃зю гаврїи́лꙋ ,꙳ є҆гда̀ прїидо́ша ѿ нᲂва̀ гра́да мо́щи є҆гѡ̀ в̾зѧ́ти ,꙳ ра́ка же ста̀ ꙗ҆́кѡ дре́вле сл҃нце ,꙳ непᲂдви́жима с̾мѣ́ста свᲂегѡ̀ .

сти́хъ : бл҃же́нъ мꙋ́жь бᲂѧ́исѧ гдⷭ҇а ,꙳ въ за́по вѣдехъ є҆гѡ̀ вᲂсхо́щетъ ѕѣлѡ̀ . Да́лъ є҆сѝ зна́менїе ,꙳ бᲂѧ́щимсѧ тебѐ гдⷭ҇и ,꙳ бл҃гᲂчести́вᲂмꙋ цр҃ю кᲂнстанти́нꙋ ,꙳ крⷭ҇тъ тво́й честны́и пᲂбѣди́ти врагѝ .꙳ та́ко же и҆ ны́нѣ по́далъ є҆сѝ ꙳ ѿ честны́ѧ рꙋкѝ но́гᲂть ,꙳ бл҃гᲂчести́вагѡ кн҃зѧ гаврїи́ла ,꙳ на ᲂу҆тверже́нїе но́вꙋ гра́дꙋ ,꙳ и҆ всѣ́мъ на и҆сцѣле́нїе .

сла́ва . гла́с̾ , ѕ҃ . Ты̀ ве́лїи хᲂда́тай , и҆ вᲂбранѣ́хъ пᲂсо́бствꙋѧи на и҆нᲂꙗ҆зы́чныѧ , ст҃ѣ́й трⷪ҇цѣ пред̾стᲂѧ̀ в̾ дерзнᲂве́нїи мно́зѣ . тѣ́мже и҆ мы̀ ꙗ҆́кѡ жи́вꙋ тѝ сꙋ́щꙋ гл҃емъ , пребл҃же́нне кн҃же гаврїи́ле , и҆ ны́нѣ мᲂли́сѧ ѡ҆ странѣ̀ на́шей , є҆́же и҆зба́витисѧ ѿ нахᲂжде́нїѧ и҆нᲂвѣ́рныхъ ꙗ҆зы́къ . и҆ всѣ́мъ хрⷭ҇тᲂлюби́вымъ лю́демъ ѿ навѣ́тъ вра́жїихъ , и҆ спасти́сѧ дш҃а́мъ на́шимъ . и҆ ны́нѣ , боⷢ҇ . Твᲂре́цъ и҆ и҆зба́витель мо́й .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , д҃ . И҆́з̾млада ꙗ҆ви́лсѧ є҆сѝ бг҃ᲂмꙋ́дре кн҃же гаврїи́ле бжⷭ҇твенныи сᲂсꙋ́дъ , и҆з̾бра́нъ бг҃ᲂви , бл҃гᲂче́стїемъ вᲂспита́нъ . вѣ́рꙋ непᲂро́чнꙋ сᲂблю́дъ . мно́ги ст҃ы́ѧ цр҃кви ᲂу҆стро́ивъ . и҆з̾гна́нїе претерпѣ́лъ є҆сѝ ѿ свᲂи́хъ , ꙗ҆́кᲂже и҆ цѣлᲂмꙋ́дрїи пра́рᲂдители твᲂѝ ѿ бра́та ᲂу҆бїе́нїе . с̾ ни́миже пред̾стᲂѧ̀ ст҃ѣ́й трⷪ҇цѣ мᲂли́сѧ , держа́вы рꙋ́с̾скїѧ нача́льникѡмъ сᲂхране́нᲂмъ бы́ти , и҆ всѣ́мъ на́мъ спасти́сѧ . сла́ва , и҆ ны́нѣ , боⷢ҇ . И҆́же ѿ́ вѣка ᲂу҆тае́ннᲂе .

На ᲂу҆́трени , на бг҃ъ гдⷭ҇ь , трᲂпа́рь , ст҃о́мꙋ , двⷤа . сла́ва , и҆ ны́нѣ , боⷢ҇ , вᲂскрⷭ҇нъ . =По а҃ , стихᲂло́гїи , сѣда́ленъ . гла́съ , а҃ . Бл҃гᲂнаро́читꙋю па́мѧть пра́зднꙋетъ в̾кꙋ́пѣ всѧ̀ цр҃кви преставле́нїѧ , вели́кагѡ кн҃зѧ все́вᲂлᲂда , ᲂу҆го́дника хрⷭ҇то́ва . и҆ сегѡ̀ прилѣ́жнѡ мᲂлѧ́ща , и҆сцѣли́ти недꙋ́ги и҆ бᲂлѣ́зни на́ша , и҆ всѧ́кихъ и҆скꙋше́нїи и҆зба́вити , и҆́же вѣ́рᲂю вᲂсхвалѧ́ющихъ є҆гѡ̀ . =вⷤ . сла́ва , и҆ ны́нѣ , боⷢ҇ . Чꙋ́до чꙋдесе́мъ ѡ҆бра́дᲂваннаѧ , в̾ тебѣ̀ зрѧ́щи тва́рь ра́дꙋетсѧ . зача́тъ бо без̾сѣ́мене , и҆ рᲂдѝ несказа́ннѡ . є҆го́же а҆́гг҃льскаѧ чинᲂнача́лїѧ зрѣ́ти немо́гꙋтъ . тᲂгѡ̀ мᲂлѝ бцⷣе дв҃о спастѝ дш҃а на́ша .

По в҃ , стихᲂло́гїи , сѣда́ленъ . гла́съ , є҃ . Тве́рдаго а҆дама́нта , и҆ стᲂлпа̀ непᲂкᲂлѣби́ма вра́жїими прило́ги , вели́каго кн҃зѧ все́вᲂлᲂда пѣ́сньми пᲂчте́мъ . и҆́же в̾ вели́цѣй сла́вѣ , и҆ во и҆з̾ѡ҆би́лїи жи́въ лѣ́та свᲂѧ̀ , непᲂкᲂлѣби́мъ пребы́сть . терпѣ́нїемъ бо во и҆згна́нїи за и҆́стинꙋ , пᲂсрамѝ врага̀ . и҆ ны́нѣ мо́литъ спасти́сѧ на́мъ . двⷤа . сла́ва , и҆ ны́нѣ , боⷢ҇ . Оу҆жа́сно чꙋ́до зача́тїѧ , и҆ несказа́ненъ ѻ҆́бразъ ржⷭ҇тва̀ , в̾ тебѣ̀ пᲂзна́сѧ прⷭ҇нѡ дв҃о чⷭ҇таѧ . ᲂу҆жаса́етъ мѝ ᲂу҆́мъ , и҆ ᲂу҆дивлѧ́етъ мѝ пᲂмышле́нїѧ . сла́ва твᲂѧ̀ бцⷣе по всѣ́хъ прᲂстре́сѧ , во спасе́нїе дш҃а́мъ на́шимъ .

По пᲂлїєлеѡ́сѣ , сѣда́ленъ . глаⷭ҇ , и҃ . Бл҃гᲂче́стнѡ на землѝ в̾ зако́нѣ гдⷭ҇ни по́живъ , вѣ́рꙋ непᲂро́чнꙋ сᲂблю́дъ в̾ срⷣцы свᲂе́мъ . скᲂнча́въ до́брыи по́двигъ , плᲂды̀ дᲂбрᲂдѣ́телей вᲂз̾расти́въ . пᲂжа́лъ є҆сѝ кла́сы рꙋкᲂѧ́ти свᲂеѧ̀ . и҆ вѣне́цъ сꙋгꙋ́бъ ѿ вседержи́телѧ рꙋкѝ прїѧ́тъ бл҃же́нне кн҃же гаврїи́ле , и҆ тᲂгѡ̀ сла́вы спᲂдо́бисѧ . прⷭ҇то́лꙋ пред̾стᲂѧ̀ ст҃ѣ́й трⷪ҇цѣ , мᲂлѝ спастѝ гра́дъ и҆ лю́ди , чтꙋ́щихъ любо́вїю ст҃ꙋ́ю па́мѧть твᲂю̀ . =вⷤ . сла́ва , и҆ ны́нѣ , боⷢ҇ . Ѡ҆ =тебѣ̀ ра́дꙋетсѧ ѡ҆бра́дᲂваннаѧ всѧ́каѧ тва́рь , а҆рха́гг҃льскїи сᲂбо́ръ и҆ чл҃ческїи ро́дъ . ѽ сщ҃е́ннаѧ цр҃кви , и҆ раю̀ слᲂве́сныи , дв҃ственаѧ пᲂхвало̀ . и҆з̾ неѧ́же бг҃ъ вᲂплᲂти́сѧ , и҆ млⷣнцъ бы́сть , и҆́же пре́жде вѣ́къ сы́и бг҃ъ на́шъ . лᲂжесна́ бо твᲂѧ̀ прⷭ҇то́лъ сᲂтвᲂрѝ , и҆ твᲂе́ же чре́во прᲂстра́ннѣйши нб҃съ сᲂдѣ́ла дв҃це . ѡ҆ тебѣ̀ ра́дꙋетсѧ ѡ҆бра́дᲂваннаѧ всѧ́каѧ тва́рь сла́ва тебѣ̀ .

степе́нна , д҃ го гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . пра́ведникъ ꙗ҆́кѡ фи́никъ прᲂцвѣте́тъ , и҆ ꙗ҆́кѡ кѣ́дръ и҆́же в̾ лива́нѣ ᲂу҆мно́житсѧ .= сти́хъ . насажде́ни в̾ дᲂмꙋ̀ гдⷭ҇ни , во дво́рѣхъ бг҃а на́шегѡ прᲂцвѣтꙋ́тъ . всѧ́ко дыха́нїе . =є҆ѵⷢ҇а́лїе , ѿ лꙋкѝ . заⷱ҇ , л҃є . ѱало́мъ , н҃ .

сла́ва . мᲂли́твъ ра́ди бл҃гᲂвѣ́рнагѡ кн҃зѧ . и҆ ны́нѣ . мл҃твъ ра́ди бцⷣы . пᲂми́лꙋй мѧ бж҃е . стихѣ́ра . гла́съ , ѕ҃ . Дне́сь всечестна́ѧ па́мѧть вᲂсїѧ̀ , вели́кагѡ кн҃зѧ все́вᲂлᲂда . вѣ́рныхъ срⷣца̀ ᲂу҆ѧснѝ па́че сл҃нца , дᲂбрᲂдѣ́телей свᲂи́хъ блиста́ньми . и҆ ꙗ҆́кѡ лꙋча̀ свѣтла̀ ми́ръ ѡ҆зарѧ́ѧ чꙋдесы̀ свᲂи́ми . сл҃нце бо пра́веднᲂе хрⷭ҇то́съ бг҃ъ на́шъ , мл҃твами є҆гѡ̀ прᲂсвѣща́етъ дш҃а на́ша .

Кано́нъ бцⷣѣ , со і҆рмᲂсо́мъ , на́ ѕ҃ . и҆ ст҃о́мꙋ два̀ кано́на , на и҃ . кано́нъ , ст҃о́мꙋ . гла́съ , в҃ . пѣ́снь , а҃ . і҆рмо́съ . Во глꙋбинѣ̀ пᲂтᲂпѝ дре́вле , фараѡни́тскаѧ всѧ̀ во́инства , преѡрꙋже́нꙋ си́лꙋ . вᲂпло́щшеесѧ сло́во , преспѣ́ющїѧ грѣхѝ пᲂтреби́ло є҆́сть , пресла́вныи гдⷭ҇ь , ꙗ҆́кѡ прᲂсла́висѧ .

запѣ́въ : Ст҃ы́и бл҃гᲂвѣ́рныи кн҃же все́вᲂлᲂде , мᲂлѝ бг҃а ѡ҆ на́съ . Высᲂко̀ житїѐ и҆мѣ́ѧ , и҆ вᲂсхᲂжде́нїи бжⷭ҇твенными , ве́сь свѣ́телъ бы́въ . прᲂсвѣще́нїе мѝ и҆спрᲂсѝ , вᲂсхвалѧ́ющꙋ честны́ѧ твᲂѧ̀ по́двиги . и҆́миже до́брѣ по́живъ , ᲂу҆лꙋчи́лъ є҆сѝ все́вᲂлᲂде , и҆́хже надѣ́ѧлсѧ є҆сѝ . Мѷрᲂꙋха́ннаѧ любѧ̀ ᲂу҆че́нїѧ , и҆ во чте́нїи сщ҃е́нныхъ писа́нїи ᲂу҆пражнѧ́ѧсѧ , сласте́й ᲂу҆клᲂни́лсѧ є҆сѝ бл҃же́нне , смра́дныхъ и҆ без̾че́стныхъ . и҆ ѡ҆бл҃гᲂво́нилсѧ є҆сѝ , бжⷭ҇твенными дᲂбро́тами ᲂу҆краша́емь . Дрема́нїе ѻ҆́чїю ѿ дш҃и бл҃же́нне ѿгна́лъ є҆сѝ . бдѧ̀ и҆ бг҃ᲂви прїединѣва́ѧсѧ всено́щными стᲂѧ́нїи . непрекло́ненъ нꙋ́ждами є҆стества̀ . тѣ́мже ко́дню невече́рнемꙋ дᲂсти́глъ є҆сѝ . боⷢ҇ . Ꙗ҆́кѡ черто́гъ ѡ҆дш҃евле́нъ бж҃їи , и҆ кади́льницꙋ мы́сленагѡ и҆ свѣтᲂно́снагѡ ᲂу҆́глѧ , приснᲂбл҃гᲂда́тнꙋю ᲂу҆бл҃жа́емъ бцⷣꙋ . зᲂвꙋ́ще , ра́дꙋисѧ хᲂда́таице спасе́нагѡ вᲂскрⷭ҇нїѧ .

дрꙋгі́и кано́нъ ст҃о́мꙋ . гла́съ , д҃ . и҆ а҆́ще во́лиши пᲂвели́телѧ ᲂу҆вѣ́дѣти , в̾нача́лѣхъ трᲂпаре́й кано́на сего̀ . пѣ́снь , а҃ . і҆рмо́съ . Нѣ́сть тебѣ̀ пᲂдо́бенъ , пресла́вныи гдⷭ҇и , рꙋко́ю бо крѣ́пкᲂю и҆зба́вилъ є҆сѝ лю́ди , ꙗ҆́же стѧжа̀ чл҃кᲂлю́бче .

запѣ́въ : Ст҃ы́и бл҃гᲂвѣ́рныи кн҃же все́вᲂлᲂде , мᲂлѝ бг҃а ѡ҆ на́съ . Нѣ́смь пᲂдо́бенъ ка́кѡ вᲂспѣ́ти ѿ́ части , нбⷭ҇нᲂмꙋ вᲂево́дѣ тезᲂи҆мени́тагѡ вели́кагѡ кн҃зѧ все́вᲂлᲂда . вᲂсїѧ́вша в̾ слᲂве́нѣхъ насе́льшихсѧ , и҆дѣ́же первᲂзва́нныи во а҆пⷭ҇лѣхъ же́злъ вᲂдрꙋзѝ . Въ лѣ́та вели́кагѡ кн҃зѧ влади́мира . црⷭ҇кᲂю дїади́мᲂю , ѿ мᲂнама́ха че́стнѡ пᲂчте́на вᲂсїѧ́въ . пе́рвᲂмꙋ же вели́кᲂмꙋ влади́мирꙋ пᲂдража́въ , ꙗ҆́кѡ ѿ ко́рене и҆́хъ честна̀ вѣ́твь и҆зра́слъ є҆сѝ . сла́ва . Цр҃ѧ нбⷭ҇нагѡ сла́вима въ трⷪ҇цѣ , и҆́з̾млада ꙗ҆ви́сѧ сᲂсꙋ́дъ чи́стъ и҆ непᲂро́ченъ . є҆мꙋ́же ны́нѣ пред̾стᲂѧ̀ дерзнᲂве́ннѡ , ѡ҆ на́съ пᲂмᲂли́сѧ бл҃же́нне кн҃же гаврїи́ле . и҆ ны́нѣ , боⷢ҇ . Чтⷭ҇ꙋю тѧ̀ и҆ непᲂро́чнꙋю , а҆рха́гг҃лъ гаврїи́лъ ꙗ҆́кѡ ᲂу҆зрѣ̀ , ра́дꙋисѧ тебѣ̀ влⷣчце свѣ́тлѡ вᲂзᲂпѝ бра́кꙋ неи҆скꙋ́снаѧ . чл҃кѡмъ спасе́нїе , кн҃зе́мъ и҆ цр҃е́мъ пᲂхвала̀ и҆ честнᲂсло́вїе . катава́сїѧ : Ѿве́рзꙋ ᲂу҆ста̀ мᲂѧ̀ .

пѣ́снь , г҃ . і҆рмо́съ . На ка́мени мѧ вѣ́ры ᲂу҆твердѝ , раз̾ширѝ ᲂу҆ста̀ мᲂѧ̀ на врагѝ мᲂѧ̀ . вᲂз̾весели́бᲂсѧ дх҃ъ мо́й вᲂспѣва́ти , нѣ́сть ст҃а ꙗ҆́кᲂже бг҃ъ на́шъ , и҆ нѣ́сть пра́ведна па́че тебѐ гдⷭ҇и . Гл҃ѡмъ живᲂто́чнымъ внима́ѧ , и҆́спилъ є҆сѝ во́дꙋ спасе́нїѧ , вᲂз̾гнꙋша́всѧ го́рькагѡ грѣха̀ . и҆ пᲂѧ̀ гл҃аше бг҃ᲂви все́вᲂлᲂде , ꙗ҆́кѡ нѣ́сть ст҃а па́че тебѐ гдⷭ҇и . Ми́лᲂванїе стѧжа́лъ є҆сѝ хрⷭ҇тᲂпᲂдража́тельнѡ . ра́здалъ є҆сѝ бᲂга́тство тре́бꙋющимъ , нбⷭ҇нᲂе бᲂга́тство хᲂда́тайствꙋющее тебѣ̀ , є҆́же и҆ пᲂлꙋчи́лъ є҆сѝ . пᲂѧ̀ все́вᲂлᲂде , ꙗ҆́кѡ нѣ́сть ст҃а па́че тебѐ гдⷭ҇и . Присво́ивсѧ зижди́телю , любо́вїю бжⷭ҇твеннᲂю , прїѧ́тъ нбⷭ҇нᲂе наслѣ́дїе . и҆ дре́ва живо́тнагѡ прича́стникъ є҆сѝ , ѻ҆бще́нїемъ ѡ҆бᲂжа́емь . и҆ пᲂѧ̀ сла́вне , ꙗ҆́кѡ нѣ́сть ст҃а па́че тебѐ гдⷭ҇и . боⷢ҇ . Сꙋ́щи а҆́гг҃лъ честнѣ́йши , зижди́телѧ а҆́гг҃лѡмъ во ᲂу҆тро́бѣ нᲂси́ла є҆сѝ , и҆ рᲂдила̀ є҆сѝ неи҆зрече́ннѡ . є҆мꙋ́же всѝ пᲂе́мъ , ты̀ є҆сѝ бг҃ъ на́шъ , нѣ́сть ст҃а па́че тебѐ гдⷭ҇и .

и҆́нъ , і҆рмо́съ . Немꙋ́дрᲂстїю ни си́лᲂю , ни бᲂга́тствᲂмъ хва́лимсѧ , но твᲂе́ю ѻ҆́ч҃ею сᲂста́внᲂю мꙋ́дрᲂстїю бж҃їею . ꙗ҆́кѡ нѣ́сть ст҃а па́че тебѐ чл҃кᲂлю́бче . Сла́внагѡ стрⷭ҇тᲂте́рпца геѡ́ргїѧ , хра́мъ и҆ ѻ҆би́тель прече́стнꙋ со бл҃же́ннымъ кирїѧ́кᲂмъ вᲂз̾дви́же , и҆ в̾не́й мно́жество и҆́нѡкъ ѡ҆ тебѣ̀ бг҃ᲂмꙋ́дре хва́лѧтсѧ , и҆ мᲂльбꙋ̀ бг҃ᲂви прино́сѧтъ . Бᲂри́са цѣлᲂмꙋ́драгѡ пра́рᲂдителѧ свᲂегѡ̀ пᲂревнᲂва́въ , зако́ннᲂе сᲂчета́нїе , ꙗ҆́кᲂже вели́кїи мѡѷсе́й и҆ и҆са́їѧ и҆ мѣ́ста , бг҃ᲂвидѣ́нїѧ спᲂдо́бистасѧ . терпѣ́нїемъ до кᲂнца̀ , бл҃же́нство и҆ бж҃їе бл҃гᲂслᲂве́нїе пᲂлꙋчи́ша . сла́ва . Всеѧ̀ рᲂсі́и вели́каѧ кнѧги́нѧ бг҃ᲂмꙋ́драѧ ѻ҆́льга , ви́дѣ трисл҃нчныѧ лꙋчѝ сїѧ́юща на ᲂу҆́сть пле́скᲂвы , назна́менꙋѧ гра́дъ и҆ хра́мъ прест҃ы́ѧ трⷪ҇цы , в̾не́мъ бо и҆ ты̀ дᲂстᲂчꙋ́дне чꙋдеса̀ сᲂдѣ́ѧ , с̾не́ю же ѡ҆ на́съ мᲂли́сѧ . и҆ ны́нѣ , боⷢ҇ . Сказа́ѧ є҆́же дре́вле сᲂкрᲂве́ннᲂе та́инство ѻ҆трᲂкᲂви́це , тебѣ̀ и҆нᲂгда̀ гаврїи́лъ взыва́ѧ , ра́дꙋисѧ бж҃їѧ пᲂла́то , в̾ню́же всели́сѧ , всѧ̀ чл҃ки ѡ҆бᲂжи́лъ є҆́сть , ꙗ҆́кѡ млрⷭ҇дъ . катава́сїѧ : Твᲂѧ̀ пѣвцы̀ .

сѣда́ленъ . гла́съ , д҃ . Бл҃гᲂвᲂли́въ бл҃ги́ми дѣѧ́нїи , и҆скꙋси́сѧ ꙗ҆́кѡ зла́то в̾ пещѝ напа́стьми все́вᲂлᲂде сла́вне . тѣ́мже и҆ по сме́рти и҆стᲂча́еши бᲂга́тнѡ чꙋдеса̀ ꙗ҆́кѡ во́ды , и҆ недꙋ́ги и҆сцѣлѧ́еши , ѡ҆ на́съ прⷭ҇нѡ мᲂлѧ́сѧ , ꙗ҆́кѡ да сᲂгрѣше́нїемъ прᲂще́нїе прїи́мемъ .

и҆́нъ , сѣда́ленъ . гла́съ , г҃ . И҆мꙋ́щи дх҃ъ и҆́стинныи премꙋ́дре , є҆́же в̾ тебѣ̀ пᲂжи́лъ є҆́сть , сᲂсꙋ́дъ и҆ жили́ще прест҃ѣ́й трⷪ҇цѣ сᲂдѣ́ла , стро́ити и҆ сᲂблюда́ти цр҃квамъ бл҃гᲂлѣ́пїе и҆ ᲂу҆тверже́нїе . сегѡ̀ ра́ди и҆ мы̀ с̾ше́дшесѧ в̾ па́мѧть твᲂю̀ бг҃ᲂмꙋ́дре кн҃же гаврїи́ле мо́лимъ тѧ̀ , хрⷭ҇то́ви мᲂли́сѧ дарᲂва́ти на́мъ ве́лїю млⷭ҇ть . сла́ва , и҆ ны́нѣ , боⷢ҇ . Красᲂтѣ̀ дв҃ьства твᲂегѡ̀ , и҆ пресвѣ́тлѣй чистᲂтѣ̀ твᲂе́й , гаврїи́лъ дивѧ́сѧ вᲂпїѧ́ше тѝ бцⷣе , кꙋ́ю тѝ пᲂхвалꙋ̀ принесꙋ̀ дᲂсто́йнꙋ . что́ же нарекꙋ̀ недᲂвѣ́мъ и҆ чꙋждꙋ́сѧ . тѣ́мъ ꙗ҆́кᲂже пᲂвелѣ́но ми є҆́сть вᲂпи́ти , ра́дꙋисѧ ѡ҆бра́дᲂваннаѧ гдⷭ҇ь с̾ тᲂбо́ю .

пѣ́снь , д҃ . і҆рмо́съ . Прише́ствᲂвавъ ѿ дв҃ы , ни хᲂда́тай ни а҆́гг҃лъ , но ты̀ са́мъ гдⷭ҇и вᲂпло́щьсѧ , и҆ спасѐ всего́ мѧ чл҃ка , тѣ́мъ вᲂпїю́ ти , сла́ва си́лѣ твᲂе́й . Оу҆че́нїѧ ѻ҆те́ческаѧ хранѧ̀ невреди́мо , правᲂсла́вно мꙋдрᲂва́нїе . ты̀ ѿ младе́нства и҆мѣ́лъ є҆сѝ житїѐ нескве́рно , и҆ млⷭ҇тивенъ нра́въ дᲂстᲂчꙋ́дне . Нимᲂлва̀ мир̾ска́ѧ , ни вла́сти держа́нїе , ни сла́ва тлѣ́ннаѧ , твᲂѐ є҆́же к̾ бг҃ꙋ жела́нїе ᲂу҆ста́виша все́вᲂлᲂде . но бл҃гᲂвᲂли́лъ є҆сѝ вᲂи́стинꙋ бжⷭ҇твенными дѣѧ́нїи . Вᲂз̾выша́емъ бжⷭ҇твенными пᲂꙋче́нїи всегда̀ , врага̀ смири́лъ є҆сѝ . и҆ и҆сцѣле́нїемъ дѣ́йство прїѧ́тъ все́вᲂлᲂде , сꙋдо́мъ пра́веднымъ всѧ̀ ᲂу҆правлѧ́ющагѡ . И҆ска́пающи сла́дᲂсть ра́ка мᲂще́й твᲂи́хъ , бᲂга́тыхъ и҆сцѣле́нїи , стра́сти ѿгᲂнѧ́етъ все́вᲂлᲂде вѣ́рᲂю чтꙋ́щимъ тѧ̀ . и҆ пᲂпалѧ́етъ бѣсо́мъ всѧ̀ пᲂлкѝ . боⷢ҇ . Всепѣ́таѧ , и҆́же во́инствы го́рними пѣва́емаго бг҃а пᲂрᲂдила̀ є҆сѝ , чл҃ка вᲂи́стинꙋ бы́вша . є҆го́же ѡ҆ рабѣ́хъ свᲂи́хъ мᲂлѧ́щи непреста́й прⷭ҇нѡ дв҃о .

и҆́нъ , і҆рмо́съ . Неи҆зслѣ́днᲂмꙋ бж҃їю сᲂвѣ́тꙋ , є҆́же ѿ дв҃ы вᲂплᲂще́нїе тебѐ вы́шнѧгѡ , пррⷪ҇къ а҆вва́кꙋмъ дивѧ́сѧ вᲂпїѧ́ше , сла́ва си́лѣ твᲂе́й гдⷭ҇и . По бл҃гᲂслᲂве́нїю а҆рхїєре́ѧ со ѻ҆ц҃е́мъ свᲂи́мъ бг҃ᲂмꙋ́дре пᲂдви́гшесѧ , мно́гъ трꙋ́дъ пᲂказа́ша , вели́кїи но́въ гра́дъ мнᲂгᲂмꙋ́дрено сᲂдѣ́ласта , на ᲂу҆тверже́нїе вѣ́рᲂю зᲂвꙋ́щимъ , сла́ва си́лѣ твᲂе́й гдⷭ҇и . Є҆пкⷭ҇па вели́кагѡ но́ва гра́да сщ҃е́нїемъ цр҃квь мнᲂгᲂчꙋ́днꙋ , вели́кᲂмꙋ і҆ѡа́ннꙋ прⷣтчи , в̾ па́мѧть сн҃ꙋ свᲂемꙋ̀ премꙋ́дре гаврїи́ле вᲂз̾дви́же . с̾ни́мъ же пᲂѧ̀ , сла́ва си́лѣ твᲂе́й гдⷭ҇и . сла́ва . Гена́дїѧ патрїа́рха бг҃ᲂсло́вїю пᲂслѣ́дᲂва бг҃ᲂмꙋ́дре гаврїи́ле . трисᲂста́внагѡ сꙋщества̀ в̾ со́бствѣхъ , ѻ҆ц҃а и҆ сн҃а и҆ ст҃а́гѡ дх҃а во є҆ди́нᲂмъ бжⷭ҇твѣ̀ пᲂклᲂнѧ́ема бы́ти . є҆мꙋ́же с̾ни́мъ пᲂѧ̀ , сла́ва си́лѣ твᲂе́й гдⷭ҇и . и҆ ны́нѣ , боⷢ҇ . Всю́ тѧ дх҃ᲂмъ гаврїи́лъ , ѡ҆чи́ствᲂваннꙋ всенепᲂро́чнаѧ разꙋмѣ́въ . вᲂпїе́тъ тѝ ꙗ҆́в̾ствено , ѽ ра́дꙋисѧ клѧ́твы и҆збавле́нїе , и҆ пра́ѻ҆ц҃емъ вᲂз̾ва́нїе . катава́сїѧ : Сѣдѧ́и во сла́вѣ .

пѣ́снь , є҃ . і҆рмо́съ . Прᲂсвѣще́нїе во тмѣ̀ лежа́щимъ , и҆ спасе́нїе ненача́емымъ хрⷭ҇тѐ сп҃се мо́й , к̾ тебѣ̀ ᲂу҆́треннюю цр҃ю ми́рныи , прᲂсвѣти́ мѧ сїѧ́нїемъ си , и҆но́гѡ бо ра́звѣ тебѐ бг҃а незна́емъ . Заре́ю честно́ю ст҃ы́ѧ трⷪ҇цы прᲂсвѣще́нъ , зако́нᲂмъ же сеѧ̀ ѡ҆гражде́нъ , но́щь житїѧ̀ непрет̾кнᲂве́нно ты̀ преминꙋ́лъ є҆сѝ . видѣ́нїи бжⷭ҇твенными ѡ҆крилѧ́емь бл҃же́нне , и҆ в̾ бжⷭ҇твеннꙋю жи́знь всели́лсѧ є҆сѝ . Ны́нѣ на тебѣ̀ чꙋ́до ве́лїе зри́тсѧ , и҆ ᲂу҆́жаса и҆спо́лнь . ка́кѡ по пᲂгребе́нїи вᲂи́стинꙋ мно́го лѣ́тъ сᲂблюде́сѧ нерꙋши́мо бл҃же́нне , твᲂѐ тѣ́ло во́грᲂбѣ лежа́ще , сꙋдьба́ми и҆́миже вѣ́сть са́мъ прᲂславлѧ́ѧи тѧ̀ . Бл҃гᲂже твᲂемꙋ̀ є҆́же к̾ бг҃ꙋ дерзнᲂве́нїю . бл҃гᲂже жела́нїю є҆́же в̾ срⷣцы к̾немꙋ̀ и҆мѣ́лъ є҆сѝ , бл҃го пᲂжи́въ гаврїи́ле . прᲂсїѧ́лъ є҆сѝ пресла́внѡ бжⷭ҇твенными свѣтлᲂстьмѝ , и҆ ᲂу҆ѧсни́лъ є҆сѝ вѣ́рныхъ сᲂвᲂкꙋпле́нїѧ . боⷢ҇ . Ѡ҆ на́съ и҆з̾ тебѐ вᲂплᲂще́ннагѡ дв҃о мт҃и всегда̀ мᲂлѝ , бл҃гᲂче́стно тѧ̀ бл҃жа́щихъ , и҆зба́витисѧ бѣ́дъ , дꙋшетлѣ́нныхъ страсте́й и҆ печа́лей , и҆ вѣ́чнꙋющагѡ пла́мене мꙋче́нїѧ .

и҆́нъ , і҆рмо́съ . Ны́нѣ вᲂста́нꙋ пррⷪ҇чески речѐ бг҃ъ . ны́нѣ прᲂсла́влюсѧ . ны́нѣ вᲂзнесꙋ́сѧ , па́дшагѡ прїимꙋ̀ ѿ дв҃ы , и҆ к̾ свѣ́тꙋ ди́внꙋ , вᲂзнесꙋ̀ мᲂегѡ̀ бжⷭ҇тва̀ . Пско́ва гра́да и҆ ла́дᲂжане и҆збра́ннїи лю́дїе , при́звани нᲂвгᲂро́дскими мꙋжѝ , ᲂу҆мы́слившими на и҆згна́нїе твᲂѐ ст҃е , сᲂвѣ́тъ и҆́хъ раз̾верго́ша . вᲂз̾врати́ша тѧ̀ ра́дᲂстїю ми́ръ пᲂдаю́ще . Рꙋко́ю сѝ честно́ю написа́въ премꙋ́дре гаврїи́ле , свᲂегѡ̀ стрᲂе́нїѧ вели́кагѡ і҆ѡа́нна крⷭ҇тлѧ цр҃кви . пребᲂга́тᲂе твᲂегѡ̀ пра́веднагѡ даѧ́нїѧ закᲂнᲂпᲂлᲂже́нїе вѣ́чно , ми́ръ всѣ́мъ да́рꙋѧ . сла́ва . Мнᲂгᲂразсꙋ́днᲂе вселе́нскихъ ᲂу҆чи́телей , ѡ҆ цр҃кви хрⷭ҇то́вѣ раз̾смᲂтри́въ . и҆ свᲂи́хъ ст҃ᲂлѣ́пныхъ прарᲂди́тель зако́ннᲂе завѣща́нїе , и҆ ᲂу҆ста́вы сꙋдо́мъ ѻ҆ч҃ескимъ , пре́давъ цр҃ю сла́вы бг҃ᲂмꙋ́дре . а҆рхїєре́ѡмъ непᲂкᲂлѣби́мо сᲂблюда́ти . и҆ ны́нѣ , боⷢ҇ . Хра́мъ сꙋ́щи сщ҃е́нїѧ пренепᲂро́чнаѧ , вѣща́нїемъ гаврїи́ла а҆рха́гг҃ла , и҆́же во ст҃ы́хъ пᲂчива́ющаго , рᲂдила̀ є҆сѝ прест҃а́гѡ бг҃а , всѣ́хъ ѡ҆сщ҃а́ющагѡ , и҆ лю́тыхъ и҆зима́юща . катава́сїѧ : Оу҆диви́шасѧ всѧ́ческаѧ .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , не и҆з̾слѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Тᲂче́нїѧ сла́дка и҆ска́пахꙋ бл҃же́нне , по́тᲂве твᲂѝ и҆ ра́дᲂванїе , и҆ и҆сцѣле́нїи сїѧ́нїе , в̾ хвалꙋ̀ хрⷭ҇та̀ бг҃а на́шегѡ . Во дво́рѣхъ бж҃їихъ прᲂцвѣ́лъ є҆сѝ , винᲂгра́дъ мнᲂгᲂпло́денъ прᲂзѧ́бшїи , дᲂбрᲂдѣ́телей гро́здїе . дѣ́лателю дш҃а́мъ ѻ҆би́лїе пᲂда́въ . Црⷭ҇тво бж҃їе в̾желѣ́лъ є҆сѝ , и҆ над̾ страстьмѝ црⷭ҇твᲂвавъ все́вᲂлᲂде , по бл҃гᲂвᲂле́нїю лꙋ́чшемꙋ , ра́дᲂсть пра́ведныхъ пᲂлꙋчи́лъ є҆сѝ . боⷢ҇ . И҆збра́нна бг҃ᲂви бы́вши ꙗ҆́кѡ прекрасна̀ , село̀ прᲂстра́ннѡ семꙋ̀ дв҃о бы́сть , и҆ черто́гъ и҆ свѣ́щникъ и҆ трапе́за .

и҆́нъ , і҆рмо́с̾ . Вᲂзᲂпи́ша с̾ весе́лїемъ пра́ведныхъ дс҃и , ны́нѣ ми́рꙋ завѣ́тъ но́въ завѣща́етсѧ , и҆ крᲂпле́нїемъ ѡ҆бнᲂвѧ́тсѧ лю́дїе , бж҃їею кро́вїю . Бꙋ́ѧгѡ наро́да де́рзᲂсть на сꙋ́здаль , непᲂслꙋ́шавша ст҃лѧ бг҃ᲂнаказа́тельныхъ слᲂве́съ , чꙋжа́гѡ дᲂстᲂѧ́нїѧ нежела́ти . ты́ же пра́ведниче пра́вдꙋ вᲂз̾любѝ , в̾ ми́ръ си́хъ прелᲂжи́лъ є҆сѝ . Оу҆мо́мъ раз̾сꙋди́тельнымъ ѡ҆би́дѧщїѧ дᲂстᲂѧ́нїе , премꙋ́дрᲂсти бж҃їѧ цр҃кве и҆нᲂвѣ́рныѧ ꙗ҆зы́ки пᲂбѣди́въ . и҆ во́градѣ ю҆́рїевѣ , пра́рᲂдителѧ свᲂегѡ̀ , вѣ́рꙋ правᲂсла́внꙋю па́ки пред̾лᲂжи́лъ є҆сѝ . сла́ва . Въ чл҃цѣхъ бг҃ᲂлюбе́зенъ , и҆ ве́лїи властᲂде́ржецъ . и҆ цр҃кви прест҃ы́ѧ трⷪ҇цы стрᲂе́нїю с̾пᲂсо́бникъ , и҆ ꙗ҆́кѡ прᲂꙋвѣ́дѣвъ в̾не́й пᲂлᲂжи́тисѧ . є҆́йже пред̾стᲂѧ̀ сла́вне гаврїи́ле ѡ҆ на́съ мᲂли́сѧ . и҆ ны́нѣ , боⷢ҇ . Гл҃ѡмъ бжⷭ҇твеннымъ пᲂслꙋшли́ва гаврїи́лᲂвымъ была̀ є҆сѝ , без̾нача́льнаго сло́ва , пло́тїю пᲂрᲂдила̀ є҆сѝ , всѣ́хъ ѡ҆сщ҃а́ющаго , и҆ лю́тыхъ и҆зима́юща .

катава́сїѧ : Бжⷭ҇твеннᲂе сѐ и҆ всечестно́е .

кᲂнда́къ . гла́съ , и҃ . Мнᲂгᲂмꙋ́дренѡ пресели́всѧ во́градъ пско́въ , бл҃же́нне кн҃же гаврїи́ле . пло́дъ бл҃гі́и бг҃ᲂви в̾ жи́зни се́й бы́лъ є҆сѝ , прⷭ҇нѡ цвѣтꙋ́щъ дᲂбрᲂдѣ́тельми , и҆ ꙗ҆́кᲂже дв҃дъ незло́бїемъ . тᲂгѡ̀ ра́ди пᲂлꙋчи́лъ є҆сѝ жи́знь вѣ́чнꙋю на́ нб҃сѣхъ . всегда̀ зрѧ̀ ст҃ꙋ́ю трⷪ҇цꙋ , мᲂлѝ и҆зба́витисѧ на́мъ ѿ всѧ́кихъ бѣ́дъ , да зᲂве́мъ тѝ , ра́дꙋисѧ ᲂу҆тверже́нїе гра́дꙋ на́шемꙋ . и҆́кᲂсъ . Всечⷭ҇тнꙋ́ю па́мѧть пᲂчте́мъ , ᲂу҆го́дника хрⷭ҇то́ва , вели́кагѡ кн҃зѧ все́вᲂлᲂда , ѻ҆ч҃ескᲂю дїади́мᲂю ѿю҆́нᲂсти ᲂу҆кра́шена , хра́брагѡ во́ина на сꙋпᲂста́ты , и҆ вла́стелѧ бл҃гᲂꙋти́шна . и҆ ра́дᲂстныѧ гл҃ы , ѿ срⷣца вᲂз̾зᲂве́мъ к̾ немꙋ̀ си́це вᲂпїю́ще . ра́дꙋисѧ ꙗ҆́кѡ и҆з̾ млады́хъ нᲂгте́й бг҃а вᲂз̾люби́въ . ра́дꙋисѧ ꙗ҆́кѡ за́пᲂвѣдемъ є҆гѡ̀ нело́жныи храни́тель . ра́дꙋисѧ землѝ слᲂве́нстѣй ᲂу҆краше́нїе . ра́дꙋисѧ цр҃ко́вныи стрᲂи́телю и҆ ѡ҆бᲂгати́телю нескꙋ́дныи . ра́дꙋисѧ цр҃квамъ ᲂу҆краше́нїе , и҆ и҆́стинныи пᲂбо́рниче . ра́дꙋисѧ нело́жныи прави́телю ѻ҆ч҃ескихъ преда́нїи . ра́дꙋисѧ бл҃гᲂче́стїѧ сто́лпъ непᲂкᲂлѣби́мъ вра́жїими прило́ги . ра́дꙋисѧ ꙗ҆́кѡ во́времѧ вели́кагѡ гла́да , преи҆зᲂби́лыи ни́щимъ и҆ си́рымъ пита́телю . ра́дꙋисѧ бѣ́днымъ ᲂу҆тѣше́нїе и҆ застꙋ́пникъ . ра́дꙋисѧ и҆ весели́сѧ ꙗ҆́кѡ сꙋгꙋ́бꙋ мздꙋ̀ нбⷭ҇нꙋю сꙋгꙋ́ба ра́ди и҆згна́нїѧ ѿ бг҃а ѡ҆брѣ́те . ра́дꙋисѧ ꙗ҆́кѡ спᲂдо́бисѧ вᲂспрїѧ́ти сꙋгꙋ́быѧ бл҃гᲂда́ти , вѣне́цъ пресвѣ́телъ и҆ и҆сто́чникъ и҆сцѣле́нїѧ . ра́дꙋисѧ пресла́вныи кн҃же гаврїи́ле , кнѧзе́мъ рꙋ́с̾скимъ пᲂхвала̀ . ра́дꙋисѧ ᲂу҆тверже́нїе гра́дꙋ на́шемꙋ .

пѣ́снь , з҃ . і҆рмо́съ . Бг҃ᲂпрᲂти́вно велѣ́нїе без̾зако́ннꙋюща мꙋчи́телѧ , высо́къ пла́мень вᲂз̾несло̀ є҆́сть , хрⷭ҇то́съ же прᲂсте́ръ бг҃ᲂчести́вымъ дѣ́темъ , хла́дъ дх҃о́вныи , сы́и бл҃гᲂслᲂве́нъ и҆ препрᲂсла́вленъ . Крѣ́пᲂстїю в̾жили́всѧ живᲂда́вца , пло́ти ᲂу҆держа́лъ є҆сѝ жела́нїѧ пребᲂга́те . и҆ ᲂу҆́мъ в̾пери́лъ є҆сѝ к̾ нбⷭ҇нымъ , пᲂѧ̀ в̾ крѣ́пᲂсти , бл҃гᲂслᲂве́нъ бг҃ъ ѻ҆ц҃ъ на́шихъ . Са́мъ сѧ̀ бл҃гᲂро́денъ сᲂтвᲂрѝ , бл҃гᲂро́дны ѻ҆́бразы стѧжа́въ ᲂу҆ма̀ цѣ́лᲂстїю . пᲂꙋче́нїемъ же ᲂу҆пражнѧ́ѧсѧ бг҃ᲂдх҃нᲂве́нныхъ писа́нїи , всѐ свᲂѐ жела́нїе на́ бг҃а всеви́дца бл҃же́нне вᲂз̾лᲂжи́лъ є҆сѝ . Вы́шнемꙋ црⷭ҇твꙋ , вы́шнемꙋ гра́дꙋ , бж҃їю раю̀ , пра́ведныхъ наслажде́нїю , пи́щи нетлѣ́ннѣй , бᲂга́тствꙋ некра́дᲂмꙋ , свѣ́тꙋ невече́рнемꙋ , спᲂдо́билсѧ є҆сѝ бл҃же́нне все́вᲂлᲂде . боⷢ҇ . Є҆го́же рᲂдила̀ є҆сѝ влⷣчце , прⷭ҇нѡ мᲂлѝ , рабо́ты и҆зба́вити мѧ̀ страсте́й и҆ ѡ҆сꙋжде́нїѧ , и҆ ѡ҆держа́щагѡ мѧ̀ лю́тагѡ ѿча́ѧнїѧ , и҆ ѡ҆скᲂрблѧ́ющихъ мѧ̀ ᲂу҆держа́нїѧ чⷭ҇таѧ бг҃ᲂра́дᲂваннаѧ .

и҆́нъ , і҆рмо́съ . И҆скᲂнѝ без̾нача́льнᲂе сло́во , со ѻ҆ц҃е́мъ и҆ дх҃ᲂмъ , сн҃ъ є҆динᲂча́дыи , блгⷭ҇ве́нъ є҆сѝ препѣ́тыи бж҃е ѻ҆ц҃ъ на́шихъ . Вско́рбѣхъ па́ки пребыва́ѧ бл҃же́нне гаврїи́ле , ѿ раз̾сверѣ́пившихсѧ мꙋ́жъ , сᲂвѣ́тꙋющихъ натѧ̀ на кᲂне́чнᲂе и҆згна́нїе . но в̾ крѣ́пᲂсти дꙋшѝ бл҃гᲂда́рнѡ пᲂѧ̀ , бл҃гᲂслᲂве́нъ бг҃ъ ѻ҆ц҃ъ на́шихъ . Пѣснᲂсло́вивша тѧ̀ бг҃ᲂмꙋ́дренѡ по хрⷭ҇то́вѣ цр҃кви , бжⷭ҇твеннаѧ преда́нїѧ и҆ ѻ҆ч҃ескїи ᲂу҆ста́въ , прїе́мъ вели́кїи но́въ гра́дъ сᲂдержи́тъ пᲂѧ̀ бл҃гᲂслᲂве́нъ бг҃ъ ѻ҆ц҃ъ на́шихъ . сла́ва . Гри́внꙋ зла́тꙋ ѡ҆ свᲂе́й вы́и нᲂсѧ̀ , и҆ вѣне́цъ терпѣ́нїѧ ѿ вседержи́телѧ вᲂспрїе́млѧ . вы́нꙋ зрѧ̀ ᲂу҆́мныма ѻ҆чи́ма . трⷪ҇чнымъ свѣ́тᲂмъ гаврїи́ле прᲂсвѣща́емъ , в̾ весе́лїи пᲂѧ̀ , бл҃гᲂслᲂве́нъ бг҃ъ ѻ҆ц҃ъ на́шихъ . и҆ ны́нѣ , боⷢ҇ . Гаврїи́лъ а҆рхистрати́гъ по́сланъ бы́сть , ра́дᲂсть вᲂз̾вѣща́етъ тѝ , дв҃о мт҃и чⷭ҇таѧ . є҆ѧ́же ра́ди печа́ль преста̀ , и҆ клѧ́тва непло́ды бы́сть . бл҃гᲂслᲂве́нїе же вѣ́рнымъ кнѧзе́мъ прᲂцвѣтѐ во́ вѣки . катава́сїѧ : Непᲂслꙋжи́ша тва́ри .

пѣ́снь , и҃ . і҆рмо́съ . Въ пещѝ ѻ҆́трᲂчестѣй , прᲂѡ҆брази́лъ є҆сѝ и҆нᲂгда̀ свᲂю̀ мт҃рь гдⷭ҇и . ѻ҆́бразъ же си́хъ ѻ҆гнѧ̀ и҆з̾бавлѧ́ше , неѡ҆па́льнѡ вше́дшихъ . ю҆́же пᲂе́мъ ꙗ҆́вльшꙋсѧ тᲂбо́ю кᲂнце́мъ дне́сь , и҆ превᲂзно́симъ во всѧ̀ вѣ́ки . Ѻ҆́гнь пᲂмышлѧ́ѧ стра́шныи , пред̾ прⷭ҇то́лᲂмъ хрⷭ҇то́вѣмъ хᲂтѧ́щь пали́ти . ᲂу҆миле́нїемъ срⷣца теплы̀ и҆злива́еши ка́пли сле́зъ , пᲂгаша́ѧ тѣ́ми пе́щь страсте́й все́вᲂлᲂде бг҃ᲂмꙋ́дре . Всѐ пред̾лᲂжи́лъ є҆сѝ к̾ бг҃ꙋ мꙋ́дре дш҃е́внᲂе ѻ҆́ко , и҆ тᲂмꙋ̀ прилѣпи́лсѧ є҆сѝ вᲂпїѧ̀ ѱало́мски . хрⷭ҇тѐ мо́й , ка́ла мѧ и҆зба́ви смертᲂно́сныхъ страсте́й во́ вѣки . Терпѣ́нїемъ пᲂжда́тель , и҆ срⷣцемъ смире́нъ , ты̀ бы́лъ є҆сѝ млⷭ҇тивъ тре́бꙋющимъ . ѡ҆бы́чай принᲂсѧ̀ бл҃гъ , и҆ ѻ҆́бразы дᲂбрᲂдѣ́тельны всече́стне . в̾ни́хъ же до́брѣ по́живъ , чꙋде́съ то́чиши бл҃гᲂда́ть . Ра́зꙋмъ и҆мѣ́ѧ бжⷭ҇твенъ , и҆спо́лнитель влⷣчнимъ ꙗ҆ви́лсѧ є҆сѝ слᲂвесе́мъ . десны́ѧ любѧ̀ стезѝ , лѣ́выѧ же ꙗ҆́вѣ ᲂу҆клᲂнѧ́ѧсѧ , ꙗ҆́кѡ бл҃гᲂꙋ́менъ и҆ мꙋ́дръ . тѣ́мже тѧ̀ пᲂчита́емъ бг҃ᲂмꙋ́дре во́ вѣки . боⷢ҇ . А҆да́мᲂвъ сᲂдѣ́тель ѿ крᲂве́й твᲂи́хъ чи́стыхъ зи́ждетсѧ . и҆ млеко́мъ пита́етсѧ , пита́ѧи всѧ́ко дыха́нїе дв҃о бцⷣе . тѣ́мже ꙗ҆́кѡ бж҃їю тѧ̀ сла́вимъ мт҃рь .

и҆́нъ , і҆рмо́съ . Всѧ̀ дѣ́ла бж҃їѧ и҆ всѧ̀ тва́рь бл҃гᲂслᲂви́те гдⷭ҇а . прпⷣбнїи и҆ смире́нїи срⷣцемъ по́йте лю́дїе , и҆ превᲂзнᲂси́те є҆гѡ̀ во́ вѣки . Го́рнѧгѡ і҆єрⷭ҇ли́ма жела́ѧ наслѣ́дᲂвати . зва́нїемъ пᲂчита́емь бл҃гᲂнаро́читыхъ люде́й , ѿ вы́ше гра́да прїи́де во́ градъ п̾ско́въ . и҆ с̾ни́ми пᲂѧ̀ бл҃же́нне , и҆ превᲂзнᲂсѧ̀ гдⷭ҇а во́ вѣки . Раче́нїе неѕло́биво ко и҆згна́вшимъ тѧ̀ бл҃же́нне , ꙗ҆́кᲂже дв҃дъ ко а҆весᲂлѡ́мꙋ пᲂказа̀ . жела́ѧ в̾ вы́шнихъ кро́ткихъ зе́млю наслѣ́дити , вѣ́чнагѡ селе́нїѧ бг҃ᲂмꙋ́дре во́ вѣки . блгⷭ҇ви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Тᲂбо́ю бг҃ᲂбл҃же́нне кн҃же гаврїи́ле , гра́дъ п̾ско́въ вельмѝ хва́литсѧ . в̾не́мъ бо бл҃гᲂче́стнѡ по́живъ , спасе́нїе сᲂдѣ́ла , трⷪ҇цꙋ чти́ти наꙋчи́лъ є҆сѝ во є҆ди́нᲂмъ бжⷭ҇твѣ̀ . и҆ пᲂкланѧ́тисѧ то́й , и҆ бл҃гᲂсло́вити во́ вѣки . и҆ ны́нѣ , боⷢ҇ . Пред̾вᲂзвѣсти́тель вѣ́чнѣй та́йнѣ а҆рха́гг҃лъ гаврїи́лъ , є҆́же ра́дꙋисѧ тебѣ̀ бцⷣе в̾зыва́ѧ . тезᲂи҆мени́тыи же семꙋ̀ ѿ земны́хъ кн҃зь . твᲂегѡ̀ ᲂу҆спе́нїѧ хра́мꙋ съ бг҃ᲂмꙋ́дрымъ ни́фᲂнтᲂмъ , ѡ҆снᲂва́нїе пᲂлага́ютъ бл҃гᲂсло́вѧще тѧ̀ во́ вѣки . катава́сїѧ : Хва́лимъ блгⷭ҇ви́мъ . Ѻ҆́трᲂки бл҃гᲂчести́выѧ [пᲂкло́н̾] .

пѣ́снь , ѳ҃ . і҆рмо́съ . Без̾нача́льна рᲂди́телѧ сн҃ъ бг҃ъ и҆ гдⷭ҇ь , вᲂпло́щьсѧ ѿ дв҃цы на́мъ ꙗ҆ви́сѧ , ѡ҆мраче́нныѧ прᲂсвѣти́ти , и҆ сᲂбра́ти растᲂче́нныѧ . тѣ́мъ всехва́льнꙋю бцⷣꙋ велича́емъ . Ви́дѣти жела́ѧ сла́вꙋ бг҃а на́шегѡ , дᲂбрᲂдѣ́телемъ бл҃гᲂѡ҆бра́зїемъ , себѐ ᲂу҆дᲂбри́лъ є҆сѝ . и҆ свѣщꙋ̀ нᲂсѧ̀ вни́де в̾ свѣ́тлыи черто́гъ , со а҆́гг҃лы живы́и ꙗ҆́снѣе наслажда́ешисѧ бг҃ᲂвидѣ́нїѧ . Ꙗ҆́кѡ ᲂу҆́тро , ꙗ҆́кѡ сл҃нце вᲂсїѧ̀ па́мѧть твᲂѧ̀ , сꙋ́щаѧ во́мрацѣ срⷣца̀ прᲂсвѣща́ющи . ты́ бо свѣ́та и҆ днѐ ꙗ҆́кѡ вᲂи́стинꙋ сн҃ъ ꙗ҆ви́лсѧ є҆сѝ , бг҃ᲂмꙋ́дре все́вᲂлᲂде . сегѡ̀ ра́ди тѧ̀ пᲂчита́емъ . Мꙋ́дрᲂстїю ᲂу҆кра́шенъ , и҆ ра́зꙋмᲂмъ прᲂсвѣще́нъ . смире́нїемъ срⷣца лѣ́пᲂтствꙋѧ . высᲂто́ю житїѧ̀ сїѧ́ѧ , к̾ мы́сленымъ пре́йде двᲂро́мъ , и҆дѣ́же на́съ пᲂмина́еши пᲂчита́ющихъ тѧ̀ все́вᲂлᲂде . Де́нь пра́зднественыи , и҆ по́льзы хᲂда́тайственыи , честны́и тво́й сᲂверша́емъ ѿ землѝ преставле́нїѧ . ты́ бо гдⷭ҇нь ᲂу҆го́дникъ . и҆ тᲂгѡ̀ за́пᲂвѣдемъ дѣ́латель ꙗ҆ви́сѧ непᲂсты́денъ . дᲂстᲂчꙋ́дне все́вᲂлᲂде . боⷢ҇ . Свѣ́та прїѧ́телище ᲂу҆тро́ба твᲂѧ̀ бы́сть , прᲂсвѣ́щьшагѡ ми́ра бг҃ᲂра́дᲂваннаѧ . тѣ́мже мᲂлю́ тѧ ѻ҆каѧ́нныи , свѣ́тлꙋ зарю̀ пᲂда́ждь мѝ бг҃ᲂневѣ́сто , мᲂльба́ми все́вᲂлᲂда бг҃ᲂмꙋ́драгѡ .

и҆́нъ , і҆рмо́съ . Сᲂтвᲂрѝ держа́вꙋ мы́шцею свᲂе́ю , низ̾лᲂжи́ бо си́льныѧ со престо́лъ , и҆ вᲂз̾несѐ смире́нныѧ бг҃ъ і҆и҃левъ . в̾ ни́хже пᲂсѣтѝ на́съ вᲂсто́къ свы́ше , и҆ напра́вилъ ны̀ є҆́сть на пꙋ́ть ми́ренъ . Пи́щи без̾сме́ртнѣй , тѣ́ла и҆ кро́ве хрⷭ҇то́вы спᲂдо́бисѧ причасти́тисѧ бг҃ᲂмꙋ́дре . прᲂще́нїе и҆ ми́ръ всѣ́мъ да́въ , дш҃ꙋ свᲂю̀ нбⷭ҇нᲂмꙋ цр҃ю и҆ влⷣцѣ пре́далъ є҆сѝ . є҆мꙋ́же со всѣ́ми ст҃ы́ми пред̾стᲂѧ̀ всебл҃же́нне , ѡ҆ на́съ мᲂли́сѧ . Нᲂва̀ гра́да наро́ди ми́рнаѧ ᲂу҆стро́ивъ , ско́рѡ ше́дше в̾ пле́скᲂвъ , вᲂсхᲂтѣ́ша в̾зѧ́ти мо́щи твᲂѧ̀ ст҃е , но не вᲂз̾мᲂго́ша . сꙋгꙋ́бѡ чꙋдᲂдѣ́йствїе пᲂказа́въ , ста́ша непᲂдви́жими . и҆ по́далъ є҆сѝ и҆́мъ ѿ честны́ѧ рꙋкѝ свᲂеѧ̀ но́гᲂть , на и҆сцѣле́нїе и҆ в̾ па́мѧть вѣ́чнꙋю . сла́ва . Ско́рѡ пред̾ва́рше сщ҃е́ннᲂе ѡ҆пᲂлче́нїе , вла́сти же и҆ наро́читїи и҆ всѧ́къ во́зрастъ , в̾ пресла́внꙋю цр҃квь прест҃ы́ѧ трⷪ҇цы . и҆ пристꙋ́пльше к̾ чꙋдᲂтво́рнᲂй ра́цѣ вᲂпїе́мъ , ѽ всебл҃же́нне кн҃же гаврїи́ле , мᲂлѝ цр҃ѧ нбⷭ҇нагѡ , во́емъ пᲂбѣ́дꙋ на врагѝ , гра́дꙋ же и҆ на́мъ спасе́нїе и҆ и҆сцѣле́нїе . и҆ ны́нѣ , боⷢ҇ . Гдⷭ҇ᲂнача́льныи цр҃ю , со ѻ҆ц҃е́мъ сѣдѧ́и , и҆ серафи́мы пᲂе́мыи , при́зри на мᲂльбꙋ̀ ра́бъ свᲂи́хъ . пречⷭ҇тыѧ же тѝ мт҃ре , и҆ ᲂу҆го́дника твᲂегѡ̀ кн҃зѧ гаврїи́ла мᲂле́нїемъ , спасѝ гра́дъ и҆ лю́ди , и҆ ᲂу҆мно́жи плᲂды̀ земны́ѧ . и҆ ѡ҆чи́сти грѣхѝ на́ша и҆́мене твᲂегѡ̀ ра́ди .

катава́сїѧ : Всѧ́къ зе́менъ .= Дᲂсто́йнѡ є҆́сть . свѣти́ленъ . Бжⷭ҇твеннᲂю бл҃гᲂда́тїю прᲂсвѣти́всѧ , и҆ по сме́рти пᲂказа́лъ є҆сѝ свѣ́тлᲂсть житїѧ̀ твᲂегѡ̀ . и҆стᲂча́еши ми́рᲂви бл҃гᲂда́ть , притека́ющимъ к̾ ра́цѣ мᲂще́й твᲂи́хъ , всебл҃же́нне гаврїи́ле , и҆ мᲂлѝ спасти́сѧ чтꙋ́щимъ тѧ̀ . =двⷤа . сла́ва , и҆ ны́нѣ , боⷢ҇ . Въ тѧ̀ всели́сѧ прⷭ҇нѡ дв҃о бцⷣе ꙗ҆́вѣ , сᲂдѣ́тель и҆ гдⷭ҇ь всѣ́хъ , и҆ є҆ди́нꙋ трисїѧ́ннꙋ зра́кꙋ бжⷭ҇тва̀ . пᲂкланѧ́тисѧ бл҃гᲂчести́выми кн҃зи в̾ рꙋсі́и чл҃ческїи ро́дъ наꙋчѝ и҆ прᲂсвѣтѝ .

На хвали́тѣхъ , стихѣ́ры , на д҃ . гла́съ , а҃ . поⷣ . нбⷭ҇нымъ чино́мъ .= И҆́з̾млада и҆зво́ли храни́ти гдⷭ҇ни за́пᲂвѣди .꙳ пᲂлᲂжи́лъ є҆сѝ сᲂкро́вище неи҆стᲂщи́мᲂе ,꙳ во́храмъ вели́кагѡ і҆ѡа́нна крⷭ҇тлѧ .꙳ и҆ тѣ́мъ и҆збра́лъ є҆сѝ бᲂга́тство нбⷭ҇нᲂе ,꙳ со а҆́гг҃лы ликꙋ́еши в̾ нбⷭ҇ныхъ хра́мѣхъ .꙳ с̾ни́ми же мᲂли́сѧ хрⷭ҇тꙋ̀ бг҃ꙋ гаврїи́ле премꙋ́дре , ѡ҆ твᲂрѧ́щихъ па́мѧть твᲂю̀ . І҆́ѡвꙋ пра́веднᲂмꙋ пᲂревнᲂва́въ .꙳ во и҆скꙋше́нїи и҆згна́нїѧ непᲂкᲂлѣби́мъ пре́былъ є҆сѝ ,꙳ ꙗ҆́кѡ сто́лпъ непᲂдви́жимъ ,꙳ цр҃ко́внᲂе вᲂспитѣ́нїе ,꙳ бл҃гᲂче́стїѧ пᲂбо́рникъ , и҆ ᲂу҆тверже́нїе ѻ҆ч҃ескимъ преда́нїемъ .꙳ с̾ни́ми же мᲂли́сѧ гдⷭ҇ви спасти́сѧ на́мъ . По́жилъ є҆сѝ во́градѣ п̾ско́вѣ бг҃ᲂмꙋ́дре кн҃же гаврїи́ле ,꙳ и҆ дш҃ꙋ свᲂю̀ в̾не́мъ пред̾ѡ҆чи́стивъ , ꙗ҆́кѡ зла́то в̾ гᲂрни́лѣ ,꙳ влⷣцѣ хрⷭ҇тꙋ̀ пре́далъ є҆сѝ .꙳ тѣ́ло же твᲂѐ честно́е пᲂлᲂжи́сѧ , во́храмѣ сла́внагѡ стрⷭ҇тᲂте́рпца дими́трїѧ ,꙳ чꙋдесе́мъ нача́ло пᲂказа̀ .꙳ с̾ни́мъ же мᲂлѝ ст҃е сᲂхрани́ти гра́дъ тво́й непᲂкᲂлѣби́мъ . Во́храмѣ ст҃ы́ѧ трⷪ҇цы ,꙳ и҆дѣ́же лежи́тъ ны́нѣ чꙋдᲂтво́рнᲂе тѣ́ло твᲂѐ ,꙳ и҆сцѣле́нїѧ пᲂдаю́тсѧ всѣ́мъ чл҃кѡмъ ,꙳ вѣ́рᲂю притека́ющимъ к̾ бжⷭ҇твеннѣй ра́цѣ твᲂе́й .꙳ всебл҃же́нне кн҃же гаврїи́ле .꙳ тѣ́мже и҆ мы̀ мо́лимъ тѧ , мᲂлѝ спасти́сѧ дш҃а́мъ на́шимъ . =сла́ва . гла́съ , и҃ . Ра́дꙋисѧ п̾ско́вꙋ пᲂхвало̀ , ра́дꙋисѧ цр҃кви бж҃їи ᲂу҆краше́нїе . ра́дꙋисѧ прави́телю вѣ́ры бл҃гᲂче́стїѧ , ра́дꙋисѧ си́рымъ прибѣ́жище . ра́дꙋисѧ свѣти́льниче всесвѣ́тлыи , ра́дꙋисѧ сла́во , и҆ застꙋ́пниче гра́дꙋ на́шемꙋ . ра́дꙋисѧ бг҃ᲂмꙋ́дре кн҃же гаврїи́ле , ра́дꙋисѧ жи́телю раѧ̀ . ра́дꙋисѧ вѣ́рнымъ забра́ло , ра́дꙋисѧ до́ме и҆ жили́ще всест҃ы́ѧ трⷪ҇цы . ю҆́же мᲂлѝ ѡ҆ пᲂчита́ющихъ , всечⷭ҇тнꙋ́ю па́мѧть твᲂю̀ . и҆ ны́нѣ , боⷢ҇ . Влⷣчце прїимѝ мᲂли́твꙋ ра́бъ свᲂи́хъ , и҆ и҆зба́ви на́съ ѿ всѧ́кїѧ нꙋ́жды и҆ печа́ли . Славᲂсло́вїе вели́кᲂе , и҆ ѿпꙋ́стъ .

На литꙋргі́и , бл҃же́нна , на и҃ . ѿ а҃ гѡ кано́на ст҃о́мꙋ , пѣ́снь , г҃ ѧ . и҆ ѿ в҃ гѡ , пѣ́снь , ѕ҃ ѧ .

прᲂки́менъ , ѱл҃о́мъ дв҃дᲂвъ . вᲂз̾весели́тсѧ пра́ведникъ ѡ҆́ гдⷭ҇ѣ , и҆ ᲂу҆пᲂва́етъ на́нь . сти́х̾ . ᲂу҆слы́ши бж҃е мл҃твꙋ мᲂю̀ , внегда̀ мᲂли́тимисѧ к̾ тебѣ̀ . а҆пⷭ҇лъ , къ є҆вре́ѡмъ . заⷱ҇ , тк҃є . а҆ллилꙋ́їѧ . пра́ведникъ ꙗ҆́кѡ фи́никъ прᲂцвѣте́тъ , и҆ ꙗ҆́кѡ ке́дръ и҆́же в̾ лива́нѣ ᲂу҆мно́житсѧ . сти́хъ . насажде́ни в̾ дᲂмꙋ̀ гдⷭ҇ни , во дво́рѣхъ бг҃а на́шегѡ прᲂцвѣтꙋ́тъ . є҆ѵⷢ҇а́лїе , ѿ =лꙋкѝ . заⷱ҇ , ѯ҃з . прича́стенъ . в=ъ па́мѧть вѣ́чнꙋю бꙋ́детъ пра́ведникъ .

Въ то́йже де́нь прпⷣбнагѡ ѻ҆ц҃а на́шегѡ дими́трїѧ , во́лᲂгᲂдскагѡ чꙋдᲂтво́рца и҆гꙋ́мена , и҆́же на прилꙋ́цѣ . =На ма́лѣй вече́рни , на гдⷭ҇и вᲂзва́хъ , стⷯры . гла́съ , а҃ . поⷣ . нбⷭ҇нымъ чино́мъ . Дᲂбрᲂдѣ́телїю бжⷭ҇твеннᲂю ,꙳ пребл҃же́нне дими́трїе ,꙳ на нбⷭ҇ныѧ сла́вныѧ крꙋ́ги в̾зы́де .꙳ не во́мрацѣ за́йде невѣ́дѣнїѧ ,꙳ но в̾ бл҃гᲂда́ти бжⷭ҇твеннѣй ꙗ҆ви́сѧ ,꙳ прїе́млѧ неи҆зрече́ннаѧ сїѧ́нїѧ . двⷤа . Оу҆мо́мъ прᲂсвѣще́ннымъ ꙳ дш҃ꙋ свᲂю̀ ѻ҆́ч҃е прᲂсвѣти́въ ѡ҆ст҃и́сѧ .꙳ ѿ земны́хъ преста́висѧ въ хрⷭ҇то́во црⷭ҇твїе , дими́трїе пре бл҃же́нне .꙳ в̾ по́стницѣхъ ты̀ свѣ́телъ ꙗ҆ви́сѧ .꙳ пи́щи нестарѣ́емыѧ ны́нѣ насыща́ѧсѧ ,꙳ бжⷭ҇твеннᲂю сла́вᲂю ѡ҆блиста́емь . Трⷪ҇ца без̾нача́льнаѧ и҆ є҆динᲂсꙋ́щнаѧ ,꙳ ꙗ҆ви́ тѧ себѣ̀ селе́нїе ,꙳ бг҃ᲂно́се дими́трїе .꙳ и҆ пᲂказа́ тѧ пресвѣ́тла свѣти́льника .꙳ ѿ жите́йскихъ мѧте́жъ ᲂу҆клᲂни́лсѧ є҆сѝ срⷣцемъ ,꙳ и҆ житїѐ с̾ нбⷭ҇ными прїѡ҆брѣ́те . =сла́ва . гла́съ , г҃ . Прпⷣбне ѻ҆́ч҃е дими́трїе , крѣ́пкимъ пᲂще́нїемъ , и҆ же́стᲂкимъ вᲂз̾держа́нїемъ , по́тᲂмъ и҆ трꙋды̀ стезю̀ сїю̀ сᲂверши́лъ є҆сѝ . ꙗ҆́кѡ в̾ сла́дᲂстѣхъ пᲂчива́еши ра́дꙋѧсѧ . є҆ѵⷢ҇а́льски же мл҃твᲂю и҆ пᲂсто́мъ , пᲂлкѝ бѣсо́вскїѧ прᲂгᲂнѧ́ѧ . тѣ́мже со а҆́гг҃лы вᲂдвᲂрѧ́ешисѧ , во црⷭ҇твїи нбⷭ҇нѣмъ . и҆ ны́нѣ хрⷭ҇та̀ бг҃а мᲂлѝ , ѡ҆ и҆́же вѣ́рᲂю хва́лѧщихъ всечестнꙋ́ю па́мѧть твᲂю̀ . и҆ ны́нѣ , боⷢ҇ .

На стихо́внѣ , стихѣ́ры . гла́съ , в҃ . поⷣ . до́ме є҆в̾фра́фᲂвъ . Ꙗ҆́кѡ прехᲂдѧ́щꙋю жи́знь ,꙳ ꙗ҆́же на землѝ презрѣ́лъ є҆сѝ бл҃же́нне .꙳ тѣ́мъ спᲂдо́бисѧ ᲂу҆лꙋчи́ти ꙳ жи́зни бжⷭ҇твенныѧ .꙳ и҆ тᲂгѡ̀ прїѧ́лъ є҆сѝ сїѧ́нїе бг҃ᲂно́се .

сти́хъ : честна̀ пре́д̾ гдⷭ҇емъ ,꙳ сме́рть прпⷣбныхъ є҆гѡ̀ . Любвѐ ра́ди хрⷭ҇то́вы ,꙳ прпⷣбне дими́трїе ,꙳ пло́ти рачи́тельнᲂе ᲂу҆мертви́лъ є҆сѝ мꙋдрᲂва́ нїе .꙳ и҆ дш҃ꙋ ѿ страсте́й свᲂбо́днꙋ ꙳ бг҃ᲂви пред̾ ста́вилъ є҆сѝ .

сти́хъ : бл҃же́нъ мꙋ́жь бᲂѧ́исѧ гдⷭ҇а ,꙳ въ за́по вѣдехъ є҆гѡ̀ вᲂсхо́щетъ ѕѣлѡ̀ . Бо́дренными мл҃твами ,꙳ и҆ сле́зными и҆сто́чники ,꙳ цр҃кви вѣ́рныхъ ꙳ ѡ҆бᲂгати́лъ є҆сѝ ꙳ бг҃ᲂбл҃же́нне .

сла́ва , и҆ нн҃ѣ , боⷢ҇ . Вы́шнїи тѧ̀ ли́цы ꙳ бцⷣе дв҃о ,꙳ пᲂю́тъ с̾ ни́жними ,꙳ сла́вѧще непреста́ннѡ ꙳ ржⷭ҇тво̀ твᲂѐ пречⷭ҇тᲂе .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . глаⷭ҇ , а҃ . Свы́ше ѿ́ бг҃а прпⷣбне бл҃гᲂда́ть прїѧ́лъ є҆сѝ дх҃о́внꙋю , ѿ́ гдⷭ҇а бо пᲂзна́нъ бы́сть бл҃же́нне . тᲂгѡ̀ ра́ди и҆ ты̀ дх҃ᲂмъ пᲂзна́лъ є҆сѝ лꙋ́чшее є҆гѡ̀ , бꙋ́дꙋщагѡ вѣ́ка пребыва́нїе . и҆ по́стнически и҆спыта́всѧ в̾ свᲂи́хъ ѻ҆би́телехъ . и҆ ны́нѣ со а҆́гг҃лы ликᲂствꙋ́ѧ , сп҃сꙋ всѣ́хъ заны̀ мᲂли́сѧ ст҃е дими́трїе . да всѝ вᲂпїе́мъ , сла́ва да́вшемꙋ тѝ крѣ́пᲂсть . сла́ва вѣнча́вшемꙋ тѧ̀ . сла́ва даю́щемꙋ тᲂбо́ю всѣ́мъ и҆сцѣле́нїѧ .= сла́ва , и҆ ны́нѣ , боⷢ҇ . Гаврїи́лꙋ прᲂвѣща́вшꙋ тѝ дв҃о . =та́же , є҆ктенїѧ̀ ма́лаѧ . ѿпꙋ́стъ .

На вели́цѣй вече́рни , блаже́нъ мꙋ́жь , а҃ , а҆нти фо́нъ . =На гдⷭ҇и вᲂзва́хъ , стⷯры , на и҃ . гла́съ , в҃ . поⷣ . є҆гда̀ ѿ́ древа . Свѣти́ло вели́кᲂе ꙗ҆ви́сѧ на́мъ дне́сь , ми́ръ ве́сь прᲂсвѣща́ѧ , бг҃ᲂдарᲂва́нными чꙋдесы̀ ѻ҆́ч҃е прпⷣбне . ꙗ҆́кᲂже и҆сто́чникъ неи҆счерпа́емыи пᲂказа́сѧ , ꙗ҆́кѡ стрꙋѝ чꙋде́съ то́чиши и҆сцѣле́нїѧ , вѣ́рᲂю прихᲂдѧ́щимъ тѝ бл҃же́нне , и҆ припа́дающимъ ко́ грᲂбꙋ твᲂемꙋ̀ ст҃о́мꙋ . да́рꙋеши же дш҃а́мъ и҆ тѣ́лѡмъ здра́вїе неѡ҆скꙋ́дно , бᲂлѧ́щимъ вели́кᲂе врачева́нїе , чꙋдᲂтво́рче ѻ҆́ч҃е на́шъ дими́трїе . и҆ ѡ҆ на́съ нн҃ѣ мᲂли́сѧ ко сп҃сꙋ хрⷭ҇тꙋ̀ пра́зднꙋющихъ вѣ́рᲂю чⷭ҇тнꙋ́ю па́мѧть твᲂю̀ . =двⷤа . Сла́вꙋ же и҆ че́сть ны́нѣшнюю невᲂсхᲂтѣ́въ , тᲂгѡ̀ ра́ди ѡ҆ста́вль свᲂѐ ѻ҆те́чество . и҆ ѡ҆́ бз҃ѣ всѧ́чески в̾ ми́рѣ прᲂсла́висѧ , чꙋдᲂтво́рецъ ꙗ҆ви́сѧ . ѿ тꙋ́дꙋ бо ѿбѣжѐ , и҆ в̾ пꙋсты́ни при вᲂда́хъ пре́былъ є҆сѝ . и҆ па́ки пᲂсредѝ ми́ра и҆зво́ли , ᲂу҆є҆дини́сѧ дш҃е́ю бл҃же́нне ѿ мирски́хъ . и҆ бж҃їею бл҃гᲂда́тїю ѻ҆би́тель сᲂста́ви , в̾не́й же пᲂтрꙋди́сѧ и҆ преста́висѧ , и҆дѣ́же лежа́тъ честны́ѧ мо́щи твᲂѧ̀ , бг҃ꙋ бо тѧ̀ па́че прᲂславлѧ́ющꙋ . ты́ же и҆сцѣле́нїѧ ѿ негѡ̀ прᲂсѧ̀ , прихᲂдѧ́щимъ тѝ с̾ вѣ́рᲂю бл҃же́нне . и҆ на́съ ны́нѣ незабꙋ́ди мᲂли́твами , ко хрⷭ҇тꙋ̀ сп҃си́телю на́шемꙋ . На землѝ ꙗ҆́кѡ а҆́гг҃лъ по́жилъ є҆сѝ в̾ тѣлесѝ , дш҃и пло́ть пᲂвинꙋ́лъ є҆сѝ . пᲂще́нїемъ же и҆ вᲂз̾держа́нїемъ мно́гимъ свѣтлᲂѡ҆бра́зенъ всегда̀ ꙗ҆влѧ́ѧсѧ . ᲂу҆краси́бᲂсѧ дш҃е́ю бл҃же́нне , ст҃ѣ́й трⷪ҇цѣ ѻ҆би́тель себѐ сᲂдѣ́лалъ є҆сѝ . и҆ дарᲂва́нїѧ чꙋде́съ спᲂдо́бисѧ , бᲂльны́ѧ и҆ прᲂкаже́нныѧ и҆сцѣлѧ́ѧ , и҆ стра́ждꙋщимъ ѿ дꙋхо́въ нечи́стыхъ прᲂще́нїе пᲂдава́ѧ . и҆ на́съ застꙋпѝ ѿ вра́гъ ви́димыхъ и҆ неви́димыхъ всегда̀ , пра́зднꙋющихъ ст҃ꙋ́ю па́мѧть твᲂю̀ .

и҆́ны , стⷯры . гла́съ , и҃ . поⷣ . ѽ =пресла́внᲂе чꙋ́до . Прпⷣбне ѻ҆́ч҃е дими́трїе .꙳ ты̀ є҆ѵⷢ҇а́льски гдⷭ҇а бг҃а вᲂз̾люби́лъ є҆сѝ .꙳ бжⷭ҇твеннᲂе є҆гѡ̀ и҆́го ꙳ на ра́мꙋ свᲂю̀ вᲂспрїѧ́лъ є҆сѝ ,꙳ и҆ крⷭ҇тъ гдⷭ҇нь ꙗ҆́кѡ ле́гкᲂе є҆гѡ̀ бре́мѧ пᲂне́слъ є҆сѝ ,꙳ невᲂз̾враща́ѧсѧ на сла́сти вре́менныѧ ,꙳ и҆ бы́сть тᲂгѡ̀ ра́ди ᲂу҆пра́вленъ в̾ црⷭ҇твїе бж҃їе .꙳ тѣ́мже и҆ ны́нѣ за на́съ непреста́ннѡ хрⷭ҇та̀ мᲂлѝ ,꙳ спасти́сѧ дш҃а́мъ на́шимъ . =двⷤа . Прпⷣбне ѻ҆́ч҃е дими́трїе ,꙳ свᲂемꙋ̀ влⷣцѣ хрⷭ҇тꙋ̀ пᲂдража́тель бы́лъ є҆сѝ .꙳ и҆дѣ́же ᲂу҆́бѡ бл҃гᲂда́ть ст҃а́гѡ дх҃а прїѧ́лъ є҆сѝ ,꙳ та́кѡ и҆ пᲂдаѧ̀ и҆сцѣле́нїе недꙋ́гꙋющимъ .꙳ ѡ҆сла́бленыхъ мᲂли́твᲂю сѝ к̾ бг҃ꙋ ,꙳ сᲂтвᲂрѧ́ѧ здра́вы .꙳ тѣ́мже по́стникѡмъ бы́сть пᲂхвала̀ ,꙳ и҆ и҆́нᲂкꙋющимъ ᲂу҆тверже́нїе ,꙳ и҆ мᲂле́бникъ ко сп҃сꙋ , ѡ҆ всѣ́хъ к̾ тебѣ̀ притека́ющихъ . Прпⷣбне ѻ҆́ч҃е дими́трїе ,꙳ бꙋ́дꙋщїѧ ра́ди жи́зни ,꙳ до́блественѣ мл҃твᲂю и҆ пᲂсто́мъ ꙳ бг҃ꙋ ᲂу҆гᲂди́лъ є҆сѝ ,꙳ и҆ неви́димыхъ вра́гъ шата́нїѧ и҆ ко́зни пᲂпра́лъ є҆сѝ ,꙳ си́лᲂю крⷭ҇та̀ хрⷭ҇то́ва ᲂу҆крѣ́пльсѧ .꙳ тѣ́мже и҆ по сме́рти ны́нѣ ра́дꙋѧсѧ живе́ши .꙳ сегѡ̀ ра́ди и҆ мы̀ дне́сь вᲂпїе́мъ тѝ бл҃же́нне ,꙳ мᲂлѝ хрⷭ҇та̀ бг҃а спасти́сѧ дш҃а́мъ на́шимъ .

сла́ва . гла́съ , и҃ . Оу҆краше́нъ дᲂбрᲂдѣ́тельми дх҃о́вными , прпⷣбне ѻ҆́ч҃е на́шъ дими́трїе , прᲂсла́ви бо тѧ̀ гдⷭ҇ь бг҃ъ житїе́мъ же и҆ чꙋдесы̀ . въ преставле́нїи же твᲂе́мъ , дш҃а вѣ́рныхъ ѡ҆бл҃гᲂꙋха́лъ є҆сѝ и҆ тѣлеса̀ . дне́сь нн҃ѣ бл҃же́нне , и҆ на́съ мᲂли́твами сѝ ѡ҆чи́сти , ѿ всѧ́кихъ грѣхᲂпаде́нїи , пра́зднꙋющихъ ст҃ꙋ́ю па́мѧть твᲂю̀ . и҆ со́ страхᲂмъ и҆ любо́вїю припа́дающихъ , к̾ твᲂемꙋ̀ гро́бꙋ чꙋдᲂтво́рнᲂмꙋ , ѻ҆́бразъ пᲂдо́бїѧ твᲂегѡ̀ любе́знѡ цѣлꙋ́юще . непреста́й мᲂлѧ́сѧ за твᲂѐ ста́до бг҃ᲂзва́ннᲂе , ꙗ҆́кѡ да млⷭ҇тивыи гдⷭ҇ь спасе́тъ дш҃а на́ша . и҆ ны́нѣ , боⷢ҇ . Цр҃ь нбⷭ҇ныи . та́же , вы́хᲂдъ . прᲂки́менъ , дню̀ .

Ѿ премꙋ́дрᲂсти сᲂло́мᲂни , чте́нїе .

Пра́ведныхъ дш҃а в̾ рꙋцѣ̀ бж҃їи , и҆ неприко́снетсѧ и҆́хъ мꙋ́ка . непщева́ни бы́ша во ѻ҆́чїю безꙋ́мныхъ ᲂу҆́мрети , и҆ вмѣни́сѧ ѡ҆ѕлᲂбле́нїе и҆схо́дъ и҆́хъ , и҆ є҆́же ѿ на́съ ше́ствїе сᲂкрꙋше́нїе , ѻ҆ни́же сꙋ́ть в̾ ми́рѣ . и҆́бо пред̾ лице́мъ чл҃ческимъ а҆́ще и҆ мꙋ́кꙋ прїи́мꙋтъ , ᲂу҆пᲂва́нїе и҆́хъ без̾сме́ртїѧ и҆спо́лнь . и҆ ма́лымъ пᲂка́зани бы́ша , вели́каѧ вᲂспрїи́мꙋтъ , ꙗ҆́кѡ бг҃ъ и҆скꙋсѝ и҆́хъ , и҆ ѡ҆брѣ́те и҆́хъ дᲂсто́йны себѣ̀ . ꙗ҆́кѡ зла́то в̾ гᲂрни́лѣ и҆скꙋсѝ и҆́хъ , и҆ ꙗ҆́кѡ всепло́днꙋ же́ртвꙋ прїѧ́тъ и҆́хъ . и҆ во́ времѧ пᲂсѣще́нїѧ и҆́хъ вᲂз̾сїѧ́ютъ , и҆ ꙗ҆́кѡ и҆́скры по сте́блїю пᲂтекꙋ́тъ . сꙋ́дѧтъ ꙗ҆зы́кѡмъ , и҆ ѡ҆блада́ютъ людьмѝ , и҆ вᲂцр҃и́тсѧ гдⷭ҇ь в̾ ни́хъ во́ вѣки . надѣ́ющїисѧ на́нь разꙋмѣ́ютъ и҆́стинꙋ , и҆ вѣ́рнїи любо́вїю пребꙋ́дꙋтъ в̾ не́мъ . ꙗ҆́кѡ бл҃гᲂда́ть и҆ млⷭ҇ть в̾ прпⷣбныхъ є҆гѡ̀ , и҆ пᲂсѣще́нїе во и҆збра́нныхъ є҆гѡ̀ .

Ѿ премꙋ́дрᲂсти сᲂло́мᲂни , чте́нїе .

Пра́ведникъ а҆́ще пᲂсти́гнетъ скᲂнча́тисѧ , в̾ пᲂко́й бꙋ́детъ . ста́рᲂсть бо честна̀ не мнᲂгᲂлѣ́тна ни в̾ числѣ̀ лѣ́тъ и҆счита́етсѧ . сѣди́ны же сꙋ́ть , мꙋ́дрᲂсть чл҃кѡмъ . и҆ во́зрастъ ста́рᲂсти , житїѐ нескве́рно . бл҃гᲂꙋго́денъ бг҃ᲂви бы́въ , вᲂз̾лю́бленъ бы́сть . и҆ живы́и пᲂсредѣ̀ грѣ́шникъ , преста́вленъ бы́сть . вᲂсхище́нъ бы́сть , да не ѕло́ба и҆змѣни́тъ ра́зꙋма є҆гѡ̀ , и҆лѝ ле́сть прельсти́тъ дш҃ꙋ є҆гѡ̀ . раче́нїе бо ѕло́е , гꙋби́тъ до́браѧ , и҆ паре́нїе по́хᲂти , премѣнѧ́етъ ᲂу҆́мъ неѕло́бивъ . скᲂнча́всѧ в̾ ма́лѣ , и҆спо́лни лѣ́та мно́га , ᲂу҆го́дна бо бѣ̀ гдⷭ҇ви дш҃а є҆гѡ̀ . сего̀ ра́ди пᲂтща́сѧ ѿ среды̀ ѕло́бы . лю́дїе же ви́дѣвше и҆ неразꙋмѣ́вше , ни пᲂлᲂжи́ша в̾ пᲂмышле́нїи такᲂва́гѡ , ꙗ҆́кѡ бл҃гᲂда́ть и҆ млⷭ҇ть в̾ прпⷣбныхъ є҆гѡ̀ , и҆ пᲂсѣще́нїе во и҆збра́нныхъ є҆гѡ̀ .

Ѿ премꙋ́дрᲂсти сᲂло́мᲂни , чте́нїе .

Пра́ведницы во́ вѣки живꙋ́тъ , и҆ ѿ́ гдⷭ҇а мзда̀ и҆́мъ , и҆ пᲂмышле́нїе и҆́хъ пред̾ вы́шнимъ . сего̀ ра́ди прїи́мꙋтъ црⷭ҇твїе бл҃гᲂлѣ́пїѧ , и҆ вѣне́цъ дᲂбро́ты ѿ рꙋкѝ гдⷭ҇ни . ꙗ҆́кѡ десни́цею пᲂкры́етъ и҆́хъ , и҆ мы́шцею защи́титъ и҆́хъ . прїи́метъ всѐ ѡ҆рꙋ́жїе ре́внᲂсти є҆гѡ̀ , и҆ вᲂѡ҆рꙋже́но сᲂтвᲂри́тъ сᲂзда́нїе , в̾ ме́сть враго́мъ . и҆ ѡ҆блече́тъ ѧ҆̀ во брᲂнѧ̀ пра́вды , и҆ вᲂз̾лᲂжи́тъ шле́мъ сꙋ́дъ нелицемѣ́ренъ . и҆ прїи́метъ щи́тъ непᲂбѣди́мъ препᲂдо́бїе . по ѡ҆стри́тъ же напра́сенъ гнѣ́въ во ѡ҆рꙋ́жїи . и҆ пᲂбо́ретъ с̾ ни́мъ ми́ръ на безꙋ́мныѧ . и҆ по́йдꙋтъ правᲂлꙋ́чнѣ стрѣ́лы мо́лнїины , ꙗ҆́кѡ ѿ бл҃гᲂкрꙋ́гла лꙋ́ка ѻ҆блако́въ , на намѣ́ренїе летѧ́тъ . и҆ ѿ пра́щъ ка́менныхъ ꙗ҆́рᲂсти и҆спо́лнь , падꙋ́тъ гра́ды . вᲂзнегᲂдꙋ́етъ на ни́хъ вᲂда̀ мᲂрска́ѧ , рѣ́ки же пᲂтекꙋ́тъ жестᲂча́е . сᲂпрᲂти́въ ста́нетъ и҆́мъ дх҃ъ си́лы . и҆ ꙗ҆́кѡ ви́хᲂръ развѣ́етъ ѧ҆̀ . и҆ ѡ҆пꙋсти́тъ всю̀ зе́млю без̾зако́нїе , и҆ ѕлᲂдѣѧ́нїе преврати́тъ престо́лы си́льныхъ . слы́шите ᲂу҆́бѡ цр҃їе и҆ разꙋмѣ́йте , и҆ накажи́тесѧ сꙋдїѝ кᲂнце́мъ землѝ . внꙋши́те сᲂдержа́щїи мно́жества , и҆ гᲂрдѧ́щїисѧ ѡ҆ наро́дѣхъ ꙗ҆зы́къ , ꙗ҆́кѡ дана̀ бы́сть ѿ́ гдⷭ҇а держа́ва ва́мъ , и҆ си́ла ѿ вы́шнѧгѡ .

На литі́и , стихѣ́ры . гла́съ , а҃ . На́ нб҃о текꙋ́щею ѻ҆́ч҃е стезе́ю , дᲂсто́йнѡ хᲂди́ти и҆зво́лилъ є҆сѝ , бꙋ́дꙋщагѡ высо́кагѡ житїѧ̀ жела́ѧ . тᲂгѡ̀ ра́ди во вре́меннѣй се́й жи́зни , пꙋ́ть ᲂу҆́зкїи ше́ствꙋѧ . прᲂстра́ннаѧ же сладᲂстра́стїѧ ѿрѣва́ѧ . кра́йнее же житїѐ вᲂз̾держа́нїемъ препрᲂвᲂди́лъ є҆сѝ , смиренᲂмꙋ́дрїемъ ни́жнїѧ сла́вы ѿбѣжѐ . вы́шнѧгѡ гра́да і҆єрⷭ҇ли́ма смᲂтрѧ́ѧ сла́вы же и҆ красᲂты̀ и҆ вѣ́чнымъ бл҃ги́мъ наслѣ́дникъ ꙗ҆ви́сѧ , и҆ по́честь трꙋдо́въ свᲂи́хъ ѿ хрⷭ҇та̀ прїѧ́тъ . є҆го́же дими́трїе бл҃же́нне , мᲂлѝ ѡ҆ дш҃а́хъ на́шихъ . По́стникѡмъ пᲂхвалꙋ̀ дне́сь дими́трїѧ пᲂчте́мъ , на земли́ бо ꙗ҆́кѡ а҆́гг҃ла пᲂжи́вшаго . ревни́телѧ же и҆лїѝ фезви́тѧнина , ᲂу҆сꙋгꙋ́бившаго є҆лисе́ю бл҃гᲂда́ть дх҃о́внꙋю . се́й же свᲂемꙋ̀ ста́дꙋ ѡ҆ста́ви сꙋгꙋ́баѧ бл҃гᲂꙋха́нїѧ , бжⷭ҇твенныхъ а҆рама́тъ в̾ преставле́нїи свᲂе́мъ и҆спо́лни . и҆ по сме́рти бо прᲂцвѣтѐ чꙋдесы̀ , ꙗ҆́кѡ дре́во бг҃ᲂсажде́нно в̾ прїи҆схо́дищихъ во́дъ . насыща́ѧ дне́сь вѣ́рᲂю твᲂрѧ́щихъ па́мѧть є҆гѡ̀ , пи́щею дх҃о́внᲂю , и҆ сп҃сꙋ хрⷭ҇тꙋ̀ слꙋжа́щихъ прпⷣбїемъ и҆ пра́вдᲂю . Лѣ́ствица бжⷭ҇твеннаѧ и҆ честна́ѧ , на высᲂтꙋ̀ дᲂбрᲂдѣ́тели вᲂз̾вᲂдѧ́щаѧ , всѣ́мъ ꙗ҆ви́сѧ бг҃ᲂпрїѧ́тнᲂе житїѐ твᲂѐ . тезᲂи҆мени́тъ бы́въ селꙋ́н̾скᲂмꙋ дими́трїю , в̾ млⷭ҇ти же рачи́тель тᲂгѡ̀ млрⷭ҇дїю бы́лъ є҆сѝ прпⷣбне . ѻ҆́нъ ᲂу҆́бѡ сво́й гра́дъ ѿ пᲂга́ныхъ и҆зба́ви , ты́ же ст҃е и҆нᲂгда̀ сво́й гра́дъ ѿ междᲂꙋсо́бныѧ ра́ти сᲂхранѝ . ѻ҆́нъ ᲂу҆́бѡ и҆нᲂгда̀ ѿ плѣне́нїѧ чл҃ки и҆знᲂсѧ̀ на пра́здникъ сво́й , ты́ же бл҃же́нне всегда̀ свᲂбᲂжда́ѧ стра́ждꙋщихъ ѿ нечи́стыхъ бѣсо́въ , и҆́же и҆́мѧ твᲂѐ ст҃о́е и҆нᲂгда̀ нарица́ющихъ то́кмѡ . тѣ́мже и҆ мы̀ вᲂпїе́мъ тѝ ѻ҆́ч҃е на́шъ дими́трїе , со всѣ́ми ст҃ы́ми мᲂлѝ ѡ҆ на́съ , є҆ди́нᲂго чл҃кᲂлю́бца хрⷭ҇та̀ , спаса́ющаго дш҃а на́ша . сла́ва . гла́съ , ѕ҃ . Ра́дꙋисѧ и҆ весели́сѧ рꙋ́с̾скаѧ всесщ҃е́ннаѧ цр҃кви бж҃їѧ , со сщ҃е́нными и҆ съ кн҃зи бл҃гᲂчести́выми , и҆́нᲂки же и҆ прᲂсты́ѧ , бл҃же́ннаго дими́трїѧ дне́сь па́мѧть пᲂчита́юще , дх҃о́внѣ сᲂше́дшесѧ пра́зднꙋемъ . и҆ чⷭ҇тны́и гро́бъ є҆гѡ̀ ѡ҆б̾стᲂѧ́ще , любе́знѡ пᲂклᲂнѧ́ющесѧ мо́лимсѧ рекꙋ́ще . ра́дꙋисѧ прпⷣбне дими́трїе , свѣти́льниче пресвѣ́тлыи , и҆ врачꙋ̀ бᲂлѧ́щимъ . мл҃твениче ко сп҃сꙋ хрⷭ҇тꙋ̀ бг҃ꙋ на́шемꙋ , ѡ҆ и҆́же вѣ́рᲂю и҆ любо́вїю притека́ющихъ к̾ тебѣ̀ , спасти́сѧ дш҃а́мъ на́шимъ . и҆ нн҃ѣ , боⷢ҇ . Твᲂре́цъ и҆ и҆зба́витель .

На стихо́внѣ , стихѣ́ры . гла́съ , є҃ . поⷣ . ра́дꙋйсѧ живᲂно́сныи .= Р=а́дꙋисѧ сщ҃е́ннаѧ главо̀ , прпⷣбне ѻ҆́ч҃е на́шъ дими́трїе . а҆́гг҃льскимъ лико́мъ сᲂбесѣ́дниче в̾ вы́шнихъ , на земли́ бо дᲂбрᲂдѣ́тельнѡ по́жилъ є҆сѝ . и҆ ꙗ҆ви́сѧ пречи́сто и҆ нескве́рно зерца́ло , дх҃а ст҃а́гѡ зарѧ́ми блиста́ѧсѧ пребᲂга́те , и҆ ѡ҆зарѧ́емь зрѧ́ше бꙋ́дꙋщаѧ . тѣ́мже хрⷭ҇та̀ бг҃а мᲂлѝ , пᲂда́ти дш҃а́мъ на́шимъ ве́лїю млⷭ҇ть .

сти́хъ : честна̀ пре́д̾ гдⷭ҇емъ ,꙳ сме́рть прпⷣбныхъ є҆гѡ̀ . Ра́дꙋисѧ сщ҃е́ннаѧ главо̀ , по́стникѡмъ непᲂкᲂлеби́мыи сто́лпе , и҆ непᲂбѣди́мыи пᲂбо́рниче . страсте́мъ пᲂсѣка́ѧ кᲂре́нїѧ , и҆ бѣсо́мъ стремле́нїѧ пᲂгꙋбѝ , крⷭ҇тнымъ ѻ҆рꙋ́жїемъ всѧ̀ кᲂзнᲂдѣ́йства ѿгᲂнѧ́ѧ . и҆ по преставле́нїи свᲂе́мъ , жи́въ ст҃ѣ́й трⷪ҇цѣ пред̾стᲂи́ши , заны̀ мᲂлѧ́сѧ , дарᲂва́ти дш҃а́мъ на́шимъ ве́лїю млⷭ҇ть .

сти́хъ : бл҃же́нъ мꙋ́жь бᲂѧ́исѧ гдⷭ҇а ,꙳ въ за́по вѣдехъ є҆гѡ̀ вᲂсхо́щетъ ѕѣлѡ̀ . Ра́дꙋисѧ сщ҃е́ннаѧ главо̀ , пребл҃же́нне дими́трїе , мᲂли́твᲂю врагѝ ᲂу҆страша́ѧ , и҆ неи́стᲂвыѧ на ст҃ы́ню сꙋдо́мъ бж҃їимъ сме́рти предаѧ́и . с̾ вѣ́рᲂю же прихᲂдѧ́щимъ страстны́ѧ недꙋ́ги ѿгᲂнѧ́ѧ , и҆ ко́рчащїѧсѧ рꙋ́цѣ и҆справлѧ́ѧ , и҆ бѣ́сы ѿ чл҃къ прᲂгᲂнѧ́ѧ . мᲂли́твᲂю же и҆ сщ҃е́нныѧ вᲂды̀ крᲂпле́нїемъ , мно́гимъ и҆сцѣле́нїѧ пᲂдаѧ̀ . хрⷭ҇тꙋ̀ пᲂмᲂли́сѧ , дарᲂва́ти дш҃а́мъ на́шимъ ве́лїю млⷭ҇ть . сла́ва . гла́съ , и҃ . Прпⷣбне ѻ҆́ч҃е на́шъ дими́трїе , твᲂѧ̀ мо́щи честны́ѧ ѡ҆би́льнѡ и҆стᲂча́ютъ всегда̀ и҆сцѣле́нїѧ , вѣ́рᲂю прихᲂдѧ́щимъ к̾ твᲂемꙋ̀ гро́бꙋ . бл҃гᲂꙋха́нїѧ всѣ́хъ и҆спᲂлнѧ́ѧ дх҃о́внагѡ , и҆ тмꙋ̀ бѣсо́вскꙋю далечѐ ѿгᲂнѧ́ѧ . свѣ́тᲂмъ бл҃гᲂче́стїѧ вѣ́рныхъ срⷣца̀ ѡ҆зарѧ́ѧ . тѣ́мже мо́лимъ тѧ рабѝ твᲂѝ , всѧ́кᲂгѡ навѣ́та вра́жїѧ на́съ и҆зба́вити . ꙗ҆́кѡ да ра́дᲂстнᲂю дш҃е́ю , ст҃о́е твᲂѐ ᲂу҆спе́нїе дх҃о́внѡ пра́зднꙋюще , прᲂславлѧ́емъ сп҃са на́шегѡ , и҆́же тебѐ прᲂсла́вльшаго , є҆ди́наго во ст҃ы́хъ свᲂи́хъ бг҃а на́шегѡ . и҆ ны́нѣ , боⷢ҇ . Влⷣчце прїимѝ мᲂли́твы ра́бъ свᲂи́хъ , и҆ и҆зба́ви на́съ ѿ всѧ́кїѧ нꙋ́жды и҆ печа́ли .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ , двⷤа . и҆ бцⷣе дв҃о ра́дꙋисѧ ,= аⷤ .=

На ᲂу҆́трени , на бг҃ъ гдⷭ҇ь , трᲂпа́рь , ст҃о́мꙋ , двⷤа . сла́ва , и҆ ны́нѣ , боⷢ҇ , вᲂскрⷭ҇нъ . =По а҃ , стихᲂло́гїи , сѣда́ленъ . гла́съ , г҃ . Ꙗ҆́кѡ беспло́тенъ на землѝ ѻ҆́ч҃е по́жилъ є҆сѝ , и҆ превᲂзнᲂсѧ́щагᲂсѧ врага̀ смири́лъ є҆сѝ . тѣ́мже и҆ ны́нѣ с̾ невеще́ствеными во́инствы вᲂдвᲂрѧ́ешисѧ . бл҃же́нне , и҆́же та́мѡ бл҃же́нства наслажда́ѧсѧ , и҆ на́съ пᲂмина́й пра́зднꙋющихъ па́мѧть твᲂю̀ дне́сь . да всѝ ра́дᲂстными гла́сы вᲂспѣва́емъ сп҃са на́шегѡ і҆с҃а хрⷭ҇та̀ , и҆́же тебѣ̀ бл҃гᲂда́ть дарᲂва́вшагѡ и҆сцѣле́нїемъ . =вⷤ . сла́ва , и҆ ны́нѣ , боⷢ҇ . Бжⷭ҇твеннаѧ бы́сть сѣ́нь сло́ва є҆ди́на пречⷭ҇таѧ дв҃о мт҃и , чистᲂто́ю а҆́гг҃лѡвъ превᲂз̾ше́дши . и҆́же па́че всѣ́хъ менѐ пе́рсть бы́вша , ѡ҆скверне́на плᲂтьски́ми сᲂгрѣше́ньми . ѡ҆чи́сти мл҃твами твᲂи́хъ бжⷭ҇твенныхъ во́дъ , пᲂдаю́щи чⷭ҇таѧ ве́лїю млⷭ҇ть .

По в҃ , стихᲂло́гїи , сѣда́ленъ . гла́съ , д҃ . Ꙗ҆́кѡ сл҃нце вᲂсїѧ́въ , зарѧ́ми блиста́еши всемꙋ̀ ми́рꙋ и҆здале́ча чꙋдесы̀ твᲂи́ми , чꙋдᲂтво́рче дими́трїе , свѣтᲂно́сче бл҃же́нне , прпⷣбнымъ пᲂхвала̀ . двⷤа . сла́ва , и҆ ны́нѣ , боⷢ҇ . Въ кро́въ тво́й пречⷭ҇таѧ дв҃о прибѣга́ющихъ , мᲂльбꙋ̀ принесѝ ѡ҆ на́съ к̾ чл҃кᲂлю́бцꙋ бг҃ꙋ , спасти́сѧ рабо́мъ твᲂи́мъ .

По пᲂлїєлеѡ́сѣ , сѣда́ленъ . гла́съ , и҃ . Сладᲂстра́стїѧ но́щь пᲂсто́мъ ѻ҆́ч҃е ᲂу҆тᲂли́въ , и҆ бг҃ꙋ дш҃ꙋ свᲂю̀ непᲂро́чнꙋ сᲂблю́лъ є҆сѝ . и҆ прїе́мъ ѿ сп҃са бл҃гᲂда́ть ст҃а́гѡ дх҃а , и҆сцѣлѧ́ти стра́ждꙋщихъ тѣлесы̀ , и҆ дш҃а вѣ́рныхъ прᲂсвѣща́ти . сегѡ̀ ра́ди бл҃гᲂда́рственѡ вᲂпїе́мъ тѝ , дими́трїе ѻ҆́ч҃е на́шъ , мᲂлѝ хрⷭ҇та̀ бг҃а сᲂгрѣше́нїемъ прᲂще́нїе дарᲂва́ти , чтꙋ́щимъ любо́вїю ст҃ꙋ́ю па́мѧть твᲂю̀ . вⷤ . сла́ва , и҆ ны́нѣ , боⷢ҇ . Вᲂплᲂще́ннагѡ бг҃а ѿ твᲂеѧ̀ ᲂу҆тро́бы , ро́ждьши пречⷭ҇таѧ . менѐ растлѣ́ннаго грѣхѝ ѿ прило́гъ лꙋка́вагѡ , ᲂу҆крѣпѝ мт҃и бж҃їѧ . и҆ срⷣце мᲂѐ ѡ҆чи́сти бг҃ᲂбл҃гᲂда́тнаѧ , мт҃рьними сѝ мл҃твами . да и҆ а҆́зъ бл҃гᲂда́рнѡ зᲂвꙋ́ ти , мᲂлѝ хрⷭ҇та̀ бг҃а сн҃а свᲂегѡ̀ мр҃і́е бцⷣе , пᲂми́лᲂвати ста́до свᲂѐ , є҆́же стѧжа̀ всенепᲂро́чнаѧ .

степе́нна , д҃ го гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . честна̀ пре́д̾ гдⷭ҇емъ , сме́рть прпⷣбныхъ є҆гѡ̀ . сти́хъ . что̀ вᲂз̾да́мъ гдⷭ҇ви ѡ҆ всѣ́хъ , и҆́хже вᲂз̾да́стъ ми . всѧ́ко дыха́нїе . =є҆ѵⷢ҇а́лїе , ѿ =матѳе́ѧ . заⷱ҇ , м҃г . ѱало́мъ , н҃ .

сла́ва . мл҃твъ ра́ди прпⷣбнагѡ . и҆ ны́нѣ . мл҃твъ ра́ди бцⷣы . пᲂми́лꙋй мѧ бж҃е . стихѣ́ра . гла́съ , ѕ҃ . Вᲂз̾лю́бленъ бы́сть бг҃ᲂмъ ѿ́ чрева ма́тернѧ , ꙗ҆́кᲂже дрꙋгі́и се́ргїи прпⷣбныи вели́кїи , ѻ҆́ч҃е дими́трїе . и҆ с̾ни́мъ бл҃гᲂдꙋ́шственѡ сп҃си́телю бг҃ꙋ ᲂу҆гᲂди́лъ є҆сѝ . и҆ ст҃а́гѡ дх҃а сᲂсꙋ́дъ ꙗ҆ви́сѧ и҆з̾бра́нныи , и҆́нᲂкꙋющимъ же́злъ крѣ́пᲂсти , и҆ всѣ́мъ тре́бꙋющимъ чꙋдᲂтво́рныи пᲂда́тель . и҆спрᲂсѝ на́мъ ѿ хрⷭ҇та̀ сп҃са чтꙋ́щимъ тѧ̀ ве́лїю млⷭ҇ть .

Кано́нъ , бцⷣѣ . со і҆рмᲂсо́мъ , на́ ѕ҃ . гла́съ , и҃ . мно́гими сᲂдержи́м̾ . и҆ ст҃о́мꙋ два̀ кано́на , на и҃ . кано́нъ , прпⷣбнᲂмꙋ . гла́съ , в҃ . пѣ́снь , а҃ . і҆рмо́съ . Во глꙋбинѣ̀ пᲂтᲂпѝ дре́вле , фараѡни́тскаѧ всѧ̀ во́инства , преѡрꙋже́нꙋ си́лꙋ . вᲂпло́щшеесѧ сло́во , преспѣ́ющїѧ грѣхѝ пᲂтреби́ло є҆́сть , пресла́вныи гдⷭ҇ь , ꙗ҆́кѡ прᲂсла́висѧ .

запѣ́в̾ : Прпⷣбне ѻ҆́ч҃е дими́трїе , мᲂлѝ бг҃а ѡ҆ на́съ . Тебѣ̀ твᲂегѡ̀ бл҃же́нне ᲂу҆че́нїѧ , до́лгъ принᲂсѧ́ще вᲂзда́нїѧ прᲂстира́емъ , вѣне́цъ пᲂхвала́ми плетꙋ́ще . ты́ же млⷭ҇тивъ ꙗ҆ви́сѧ пребᲂга́те , твᲂи́ми мᲂльба́ми бл҃гᲂда́ть на́мъ пᲂда́ждь дх҃о́внꙋю . Всегꙋби́тельнᲂе стремле́нїе страсте́й , ѻ҆́ч҃е ᲂу҆вѧди́лъ є҆сѝ , слᲂве́снымъ ѡ҆бъѧ́тъ бг҃ᲂмꙋ́дрїемъ . бл҃гᲂпребы́тенъ бо бы́лъ є҆сѝ и҆ бл҃гᲂгла́сенъ , кро́тᲂкъ же и҆ смире́нъ , сло́вᲂмъ премꙋ́дрᲂсти дими́трїе , и҆ ра́зꙋма вѣнча́нъ . Сщ҃е́нно ᲂу҆краси́лъ є҆сѝ себѐ ѻ҆́ч҃е ра́зꙋмᲂмъ , и҆ дѣ́тельнымъ видѣ́нїемъ бл҃гᲂда́ти , бг҃ᲂгл҃иве дими́трїе . жела́ѧ вѣнца̀ сла́вы хрⷭ҇то́вы , и҆ свᲂю̀ наде́ждꙋ и҆зрѧ́днѡ пребл҃же́нне непᲂгрѣши́лъ є҆сѝ . Цѣлᲂмꙋ́дрїе ᲂу҆держа́лъ є҆сѝ ꙗ҆́вѣ , кра́йнюю же кро́тᲂсть , и҆ высо́кᲂе бг҃ᲂно́се смире́нїе . и҆́миже вᲂз̾выша́емь , трꙋдо́въ твᲂи́хъ дѣ́йствᲂмъ и҆ видѣ́нїемъ ра́дꙋѧсѧ принесе́сѧ , вѣне́цъ неꙋвѧда́емыи прїе́мъ . боⷢ҇ . Тва́рей ꙗ҆ви́ласѧ є҆сѝ чⷭ҇таѧ , всѣ́хъ ви́димыхъ и҆ неви́димыхъ превы́шьши всенепᲂро́чнаѧ . зижди́телѧ бо рᲂдила̀ є҆сѝ , ꙗ҆́кᲂже и҆зво́ли вᲂплᲂти́тисѧ во ᲂу҆тро́бѣ твᲂе́й . є҆го́же со дерзнᲂве́нїемъ мᲂлѝ , спастѝ пᲂю́щїѧ тѧ̀ .

дрꙋгі́и , кано́нъ , прпⷣбнᲂмꙋ . гла́съ , и҃ . пѣ́снь , а҃ . і҆рмо́съ . Пᲂе́мъ гдⷭ҇ви прᲂве́дшемꙋ лю́ди свᲂѧ̀ , сквᲂзѣ̀ чермно́е мо́ре , ꙗ҆́кѡ є҆ди́нъ , сла́вно бо прᲂсла́висѧ .

запѣ́в̾ : Прпⷣбне ѻ҆́ч҃е дими́трїе , мᲂлѝ бг҃а ѡ҆ на́съ . Да́ждь ми хрⷭ҇тѐ мо́й сп҃се , прᲂще́нїе мно́гихъ ми сᲂгрѣше́нїи , ꙗ҆́кѡ да и҆ мы̀ пᲂчита́емъ па́мѧть твᲂегѡ̀ ᲂу҆го́дника , прпⷣбнагѡ дими́трїѧ . є҆го́же мл҃твами бж҃е спасѝ на́съ . Твᲂи́ми мл҃твами же и҆ мᲂльба́ми , млⷭ҇тиваго ᲂу҆мᲂлѧ́й бг҃а , прпⷣбне ѻ҆́ч҃е на́шъ дими́трїе . и҆ грѣхо́вныи мра́къ печа́ли на́шеѧ разᲂрѝ , и҆ бл҃гᲂдꙋ́шїѧ ᲂу҆тѣше́нїѧ на́съ дх҃о́внагѡ и҆спо́лни . сла́ва . Ѿ младе́нства ты̀ бл҃же́нне дими́трїе , пᲂзна́нъ бы́сть бг҃ᲂмъ . и҆ к̾ немꙋ̀ надѣ́ѧсѧ , наставлѧ́емъ на спасе́наѧ є҆гѡ̀ пᲂвелѣ́нїѧ . є҆мꙋ́же ны́нѣ пред̾стᲂѧ̀ со дерзнᲂве́нїемъ ѡ҆ на́съ пᲂмᲂли́сѧ . и҆ ны́нѣ , боⷢ҇ . Є҆ди́наго ѿ ст҃ы́ѧ трⷪ҇цы , сло́ва и҆ сн҃а рᲂдила̀ є҆сѝ дв҃о пречⷭ҇таѧ . є҆го́же с̾ прпⷣбными и҆ пра́ведными мᲂлѝ ѡ҆ рабѣ́хъ свᲂи́хъ , вѣ́рᲂю прᲂсѧ́щихъ грѣхо́въ прᲂще́нїѧ . катава́сїѧ : Ѿве́рзꙋ ᲂу҆ста̀ .

пѣ́снь , г҃ . і҆рмо́съ . Прᲂцвѣла̀ є҆́сть пꙋсты́нѧ ꙗ҆́кѡ кри́нъ гдⷭ҇и , ꙗ҆зы́чнаѧ неплᲂдѧ́щаѧ цр҃кви прише́ствїемъ ти , ѡ҆ не́й же ᲂу҆тверди́сѧ мᲂѐ срⷣце . Прᲂсїѧ̀ в̾ житїѝ свᲂе́мъ бг҃ᲂно́се дими́трїе , ꙗ҆́кᲂже всесвѣ́тлᲂе сл҃нце в̾ ми́рѣ . и҆ прᲂсвѣтѝ и҆́же к̾ тебѣ̀ вѣ́рᲂю и҆ любо́вїю прихᲂдѧ́щаѧ , и҆ пᲂю́щаѧ тѧ̀ . Прᲂсвѣща́ютсѧ кᲂнцы̀ ᲂу҆че́нїи твᲂи́ми прпⷣбне . ꙗ҆́кᲂже бо свѣти́льникъ прᲂсвѣти́лъ є҆сѝ бг҃ᲂно́се цр҃квь хрⷭ҇то́вꙋ . ѡ҆ не́йже ᲂу҆тверди́сѧ мᲂѐ срⷣце . Непᲂрабо́щенꙋ сᲂблю́лъ є҆сѝ дш҃ꙋ свᲂю̀ страстьмѝ , и҆ сластьмѝ тѣле́сными , бг҃ᲂно́се дими́трїе всече́стне . тѣ́мже ны́нѣ по дᲂстᲂѧ́нїю вᲂсхвалѧ́емъ тѧ̀ . боⷢ҇ . Сказа̀ и҆нᲂгда̀ сᲂкрᲂве́ннᲂе та́инство , ѻ҆трᲂкᲂви́це тебѣ̀ дре́вле гаврїи́лъ зᲂвѧ́ше , ра́дꙋисѧ бж҃їѧ пᲂла́то . в̾ню́же в̾сели́сѧ , всѧ̀ чл҃ки ѡ҆бᲂжѝ ꙗ҆́кѡ млрⷭ҇дъ .

и҆́нъ , і҆рмо́съ . Ты̀ є҆сѝ ᲂу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пᲂе́тъ тѧ̀ дх҃ъ мо́й . Ты̀ є҆сѝ прпⷣбне ѻ҆́ч҃е дими́трїе , пᲂслꙋ́шатель є҆ѵⷢ҇а́льскихъ слᲂве́съ , самᲂгѡ̀ гдⷭ҇а рече́нїю , всѧ̀ любы̀ ми́ра сегѡ̀ ѿве́рже , и҆ пᲂслѣ́дᲂвалъ є҆сѝ стᲂпа́мъ хрⷭ҇то́вымъ . є҆мꙋ́же с̾ ли́ки а҆́гг҃лъ ны́нѣ слꙋжа̀ , и҆ ѡ҆ на́съ мᲂли́сѧ чтꙋ́щихъ тѧ̀ . Въ зако́нѣхъ по́стныхъ пᲂꙋча́ѧсѧ , не ѡ҆сла́бисѧ в̾ нача́льныхъ сᲂверше́ныхъ нача́лѣхъ , хᲂтѧ̀ ᲂу҆гᲂди́ти свᲂемꙋ̀ гдⷭ҇ꙋ . є҆мꙋ́же жела́тельнѣ ѡ҆бѣща́сѧ ᲂу҆се́рднѡ , да́же и҆ до кᲂнчи́ны , до́ндеже сн҃ъ црⷭ҇твїѧ є҆гѡ̀ пᲂказа́сѧ . сла́ва . Вᲂз̾держа́нїемъ кра́йнимъ пло́ть свᲂю̀ ᲂу҆мертви́лъ є҆сѝ дими́трїе , сегѡ̀ ра́ди дх҃ᲂмъ бжⷭ҇твеннымъ ѡ҆кри́лисѧ . тѣ́мже дᲂсти́же сщ҃еннᲂнача́льныхъ слꙋжи́телей , и҆дѣ́же нбⷭ҇ныхъ бж҃їихъ слꙋ́гъ беспло́тныхъ ра́дᲂванїѧ . и҆ ны́нѣ , боⷢ҇ . Бл҃гᲂслᲂве́наѧ всенепᲂро́чнаѧ бцⷣе дв҃о мр҃і́е , сло́во бж҃їе на́мъ ро́ждьшаѧ , свᲂбᲂжда́ющаго свᲂи́хъ прпⷣбныхъ ѿ тлѣ́ннаго ми́ра . и҆́хже ра́ди на́съ спаса́ющаго . катава́сїѧ : Твᲂѧ̀ пѣвцы̀ .

сѣда́ленъ . гла́съ , г҃ . И҆справле́нїе житїѧ̀ твᲂегѡ̀ всѣ́мъ прᲂсвѣща́етъ стᲂпы̀ , дими́трїе ѻ҆́ч҃е , вᲂи́стинꙋ вѣ́рᲂю пᲂдо́бѧщимтисѧ . тѣ́мже и҆́же любо́вїю блажа́щихъ тѧ̀ всегда̀ , спаса́й мᲂли́твами сѝ ѿ всѧ́кїѧ тѣснᲂты̀ , хрⷭ҇та̀ пребл҃га́го мᲂлѧ̀ , прпⷣбне бл҃же́нне дᲂстᲂчꙋ́дне . двⷤа . сла́ва , и҆ ны́нѣ , боⷢ҇ . Ꙗ҆́кѡ недѣ́ланенъ дв҃о винᲂгра́дъ , прекра́сныи гро́здъ вᲂзрасти́ла є҆сѝ . и҆стᲂча́ющъ на́мъ вино̀ спаси́тельнᲂе , всѣ́хъ веселѧ́ще дш҃а и҆ тѣлеса̀ . тѣ́мже винꙋ́ тѧ до́брымъ ᲂу҆блажа́юще , при́снѡ со а҆́гг҃лѡмъ вᲂпїе́мъ тѝ , ра́дꙋисѧ ѡ҆бра́дᲂваннаѧ .

пѣ́снь , д҃ . і҆рмо́съ . Прише́ствᲂвавъ ѿ дв҃ы , ни хᲂда́тай ни а҆́гг҃лъ , но ты̀ са́мъ гдⷭ҇и вᲂпло́щьсѧ , и҆ спасѐ всего́ мѧ чл҃ка , тѣ́мъ вᲂпїю́ ти , сла́ва си́лѣ твᲂе́й . Ты̀ дими́трїе и҆́нᲂкꙋющимъ бы́сть вѣне́цъ , не ка́менїемъ мнᲂгᲂцѣ́ннымъ ᲂу҆кра́шенъ , но дᲂбрᲂдѣ́телїю ѡ҆блᲂже́нъ . ꙗ҆ви́лсѧ є҆сѝ бл҃же́нне , бг҃ᲂра́дᲂваннᲂе вᲂи́стинꙋ ᲂу҆краше́нїе . Бжⷭ҇твеннꙋю бг҃ᲂмꙋ́дре пᲂче́лъ є҆сѝ премꙋ́дрᲂсть тѣ́мже дарᲂва́нїи тѧ̀ сїѧ̀ ѡ҆дарѝ , сла́вꙋ вѣ́чнꙋю тебѣ̀ хᲂда́тайствᲂвавшꙋ , ѻ҆́ч҃е дими́трїе всече́стне . Свѣ́тлᲂстїю нра́въ твᲂи́хъ , и҆ ѻ҆́бразы бл҃гᲂсти прпⷣбне дими́трїе , пᲂдо́бнѣ по́жилъ є҆сѝ . тѣ́мже пристꙋ́пенъ ты̀ всѣ́мъ бы́сть , всебл҃же́нне и҆ пречꙋ́дне . боⷢ҇ . Оу҆мерщве́нїе плᲂдо́мъ мѝ є҆́вва принесѐ . ты́ же жи́знь ро́ждьши сᲂста́внꙋю пречⷭ҇тꙋю , а҆́бїе и҆спра́вила є҆сѝ . тѣ́мже зᲂвꙋ́ ти , сла́ва си́лѣ твᲂе́й .

и҆́нъ , і҆рмоⷭ҇ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Рачи́тель сы́и млⷭ҇тивагѡ сп҃си́телѧ хрⷭ҇та̀ свᲂегѡ̀ , є҆́же млⷭ҇тивно к̾ немꙋ̀ наказꙋ́ѧ не к̾тᲂмꙋ̀ сᲂгрѣша́ти . раз̾сла́бленꙋю женꙋ̀ и҆сцѣли́лъ є҆сѝ , ꙗ҆́кᲂже при кꙋпѣ́ли и҆нᲂгда̀ . Ꙗ҆́кᲂже дре́во вᲂз̾держа́нїѧ при вᲂда́хъ , насажде́нъ бы́сть ѻ҆́ч҃е бл҃же́нне . бл҃гᲂра́слена лᲂза̀ ꙗ҆ви́сѧ , и҆знᲂсѧ̀ бл҃гᲂче́стїѧ гро́зды . сла́ва . Невᲂсхᲂтѣ̀ сла́вы сеѧ̀ тлѣ́нныѧ , па́че кн҃зѧ всѧ́чески бл҃гᲂчести́вагѡ , цр҃ю нбⷭ҇нᲂмꙋ хᲂтѧ̀ ᲂу҆гᲂди́ти . ѿ него́же по́честь трꙋдо́въ свᲂи́хъ прїѧ́тъ нетлѣ́ннꙋю . и҆ ны́нѣ , боⷢ҇ . Бы́вшее пᲂд̾ лѣ́тᲂмъ сло́во , вᲂсїѧ́вшаго ѿ ѻ҆ц҃а без̾лѣ́тно , бг҃ᲂмт҃и на́мъ рᲂдила̀ є҆сѝ . є҆го́же мᲂлѝ спастѝ пᲂю́щїѧ тѧ̀ . катава́сїѧ : Сѣдѧ́и во сла́вѣ .

пѣ́снь , є҃ . і҆рмоⷭ҇ . Хᲂда́тай бг҃ꙋ и҆ чл҃кѡмъ бы́сть хрⷭ҇тѐ бж҃е , тᲂбо́ю бо влⷣко к̾ свѣтᲂнача́льникꙋ ѻ҆ц҃ꙋ́ ти , ѿ́ нᲂщи невѣ́дѣнїѧ приведе́нїе ѡ҆брѣто́хᲂмъ . Стремле́нїе страсте́й без̾стра́стїемъ ᲂу҆держа́лъ є҆сѝ , бг҃ᲂно́се дими́трїе . видѣ́нїи и҆ дѣѧ́нїи , прᲂсвѣти́лъ є҆сѝ ѻ҆́ч҃е дш҃е́внᲂе ᲂу҆стрᲂе́нїе . Оу҆мо́мъ чи́стымъ и҆ писа́нїи дх҃о́вными бесѣ́дᲂвалъ є҆сѝ , бг҃ᲂгл҃иве дими́трїе . и҆ видѣ́нїѧ и҆ дѣѧ́нїѧ со́бравъ бᲂга́тство ѻ҆́ч҃е прпⷣбне . Премꙋ́дрᲂсти глꙋбинꙋ̀ и҆спыта́въ дими́трїе , дᲂсти́глъ є҆сѝ ѡ҆брѣстѝ є҆ли́кѡ бл҃гᲂпᲂтре́бно . и҆ би́серъ мнᲂгᲂцѣ́нныи , бᲂлѣ́зньми стѧжа́лъ є҆сѝ пребл҃же́нне ра́зꙋма . боⷢ҇ . Сѐ во́ чревѣ бцⷣе пречⷭ҇таѧ , хрⷭ҇та̀ бг҃а па́че сло́ва и҆мѣ́ла є҆сѝ , ꙗ҆́кᲂже и҆са́їѧ прᲂвᲂзгласѝ . вы́ше є҆стества̀ . сегѡ̀ бг҃ᲂрᲂди́тельнице рᲂдила̀ є҆сѝ .

и҆́нъ , і҆рмо́съ . Оу҆́треннююще вᲂпїе́мъ тѝ гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . А҆́ще и҆ земно́е ѻ҆ч҃ество бл҃же́нне дими́трїе ѡ҆ста́вилъ є҆сѝ , всѧ́чески бг҃ᲂи҆мени́тнꙋ ѻ҆би́тель сᲂвᲂкꙋпи́лъ є҆сѝ . тѣ́мже пе́рвᲂе ѻ҆ч҃ество нбⷭ҇нᲂе прїѧ́тъ , со дерзнᲂве́нїемъ хрⷭ҇то́ви заны̀ мᲂли́сѧ . Бл҃гᲂче́стїѧ па́ки на стезю̀ дими́трїе , наста́вленъ бы́сть ѻ҆́ч҃е ѿ́ бг҃а к̾неги́блемᲂмꙋ наслажде́нїю . пᲂсто́мъ и҆ мᲂли́твᲂю , в̾ вы́шнѧѧ приведе́сѧ . сла́ва . Ѕѣлѡ̀ млⷭ҇тива и҆ страннᲂпрїи́мца , пᲂказа́ тѧ сп҃съ на́шъ ми́рᲂви ѻ҆́ч҃е , врача̀ бᲂлѧ́щимъ дими́трїе , си́рымъ и҆ ᲂу҆бо́гимъ застꙋ́пника любе́зна . и҆ ны́нѣ , боⷢ҇ . Вᲂи́стинꙋ тѧ̀ мт҃рь бж҃їю , и҆спᲂвѣ́даемъ и҆́стиннꙋю бцⷣꙋ , твᲂи́мъ ржⷭ҇тво́мъ тлѣ́ннагѡ ѡ҆сꙋжде́нїѧ и҆зба́вльшїисѧ . млрⷭ҇дїѧ ра́ди чл҃кᲂлю́бца бг҃а , к̾ жи́зни нетлѣ́ннѣй по́звани бы́хᲂмъ . катава́сїѧ : Оу҆диви́шасѧ .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , не и҆з̾слѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Вселе́ннѣй свѣти́ло пресвѣ́тлᲂе , ѻ҆́ч҃е ꙗ҆ви́лсѧ є҆сѝ дими́трїе . слᲂве́съ свѣ́тлᲂстїю прᲂсвѣща́ѧ , и҆́же вѣ́рᲂю и҆ любо́вїю к̾ тебѣ̀ притека́ющаѧ .= Бл҃же́ннᲂе житїѐ прᲂше́лъ є҆сѝ , назда́въ ᲂу҆́бѡ чꙋ́вства , внѣ̀ бы́сть мир̾ска́гѡ мѧте́жа . и҆ бг҃ᲂви прибли́жилсѧ є҆сѝ дими́трїе . Ꙗ҆́кѡ до́бръ ꙗ҆́кѡ красе́нъ вѣне́цъ , и҆́мже нн҃ѣ вѣнча́сѧ премꙋ́дре дими́трїе , дᲂбрᲂдѣ́тельми вѣнча́емъ . и҆ над̾ страстьмѝ црⷭ҇твᲂвавъ преи҆зрѧ́дне . =боⷢ҇ . Вы́ше є҆стества̀ рᲂдила̀ є҆сѝ дв҃ᲂю , и҆ вѣ́чнꙋеши дв҃ᲂю . ꙗ҆́вльши и҆́стиннагѡ бжⷭ҇тва̀ , сн҃а и҆ бг҃а твᲂегѡ̀ ѻ҆́бразы .

и҆́нъ , і҆рмо́съ . Ри́зꙋ ми пᲂда́ждь свѣ́тлꙋ , ѡ҆дѣѧ́исѧ свѣ́тᲂмъ ꙗ҆́кѡ ри́зᲂю , мнᲂгᲂмлⷭ҇тиве хрⷭ҇тѐ бж҃е на́шъ . Въ дꙋшѝ свᲂе́й бжⷭ҇твеннаѧ бᲂга́тства дх҃а ст҃а́гѡ со́бравъ , непᲂро́чнꙋ мᲂли́твꙋ , и҆ чистᲂтꙋ̀ краснᲂлѣ́пнꙋ , бдѣ́нїе и҆ вᲂз̾держа́нїе . сегѡ̀ ра́ди жили́ще ст҃ѣ́й трⷪ҇цѣ ꙗ҆ви́сѧ . Ри́знꙋю хꙋ́дᲂсть и҆мѣ́лъ є҆сѝ пребᲂга́те , зимѣ́ же и҆ лѣ́тѣ непремѣнѧ́ѧ бᲂлѣ́знено , претерпѣ́лъ є҆сѝ бг҃а ра́ди сᲂверше́но . тѣ́мже нбⷭ҇нагѡ прїѧ́тїѧ наслѣ́дникъ бы́ти спᲂдо́бисѧ . сла́ва . На землѝ ꙗ҆́кѡ а҆́гг҃лъ бг҃ꙋ пᲂслꙋжи́лъ є҆сѝ всѧ́чески . и҆ ны́нѣ ᲂу҆ негѡ̀ со беспло́тными , и҆ с̾ прпⷣбными ра́дᲂстнѡ ликꙋ́еши , пребл҃же́нне дими́трїе . бл҃гᲂꙋха́нїѧ же чꙋде́съ на́мъ и҆спꙋсти́лъ є҆сѝ . и҆ ны́нѣ , боⷢ҇ . Бжⷭ҇твеннᲂе сло́во в̾лᲂжесна́хъ свᲂи́хъ прїѧ́ла є҆сѝ бцⷣе дв҃о мр҃і́е , и҆ па́че є҆стества̀ рᲂдила̀ є҆сѝ . є҆го́же мᲂлѝ , ѿ бѣ́дъ всѧ́кихъ на́съ и҆зба́вити рабы̀ твᲂѧ̀ пᲂю́щаѧ тѧ̀ . катава́сїѧ : Бжⷭ҇твеннᲂе сѐ и҆ всечестно́е .

кᲂнда́къ . гла́съ , и҃ . Ѿ ю҆́нᲂсти прпⷣбне крⷭ҇тъ сво́й взе́мъ , хрⷭ҇то́ви пᲂслѣ́дᲂвалъ є҆сѝ . в̾ мл҃твахъ и҆ пᲂще́нїихъ , во бдѣ́нїихъ же и҆ ѕлᲂстрада́нїихъ , пло́ть свᲂю̀ и҆знꙋрѧ́ѧ . тѣ́мже и҆ всеви́дѧщее ѻ҆́ко , твᲂѝ трꙋды̀ ви́дѣвъ , чꙋдесы́ тѧ прᲂславлѧ́етъ . и҆ всѣ́хъ зва́ти тебѣ̀ наꙋча́етъ , ра́дꙋисѧ прпⷣбне ѻ҆́ч҃е дими́трїе , по́стникѡмъ ᲂу҆дᲂбре́нїе . и҆́кᲂсъ . Бжⷭ҇твенными дᲂбрᲂдѣ́тельми твᲂи́ми себѐ мꙋ́дре ᲂу҆краси́лъ є҆сѝ , сп҃сꙋ хрⷭ҇тꙋ̀ жили́ще сᲂдѣ́ла ѻ҆́ч҃е мꙋ́жественѣ . ꙗ҆́кᲂже зла́то и҆скꙋси́сѧ вѣ́рᲂю к̾ бг҃ꙋ , и҆ наде́ждею и҆ любо́вїю ѻ҆бѣ́ты пᲂлага́ѧ . вᲂз̾держа́нїемъ пᲂсти́всѧ ꙗ҆́кѡ беспло́тенъ , в̾ цѣлᲂмꙋ́дрїи и҆ во смире́нїи вᲂзнесе́сѧ . тѣ́мже и҆ мы̀ мᲂли́твами твᲂи́ми прᲂсвѣ́щьшесѧ , прпⷣбне дими́трїе вᲂпїе́мъ тѝ . ра́дꙋисѧ ꙗ҆́кѡ и҆́з̾млада бг҃ꙋ пᲂслꙋжи́лъ є҆сѝ . ра́дꙋисѧ притека́ющимъ к̾ тебѣ̀ , спасе́нїю хᲂда́тай . ра́дꙋисѧ хрⷭ҇тᲂи҆мени́тымъ лю́демъ пᲂхвала̀ и҆ ᲂу҆тверже́нїе . ра́дꙋисѧ ꙗ҆́кѡ твᲂи́ми мл҃твами сᲂпрᲂти́внїи пᲂбѣжда́ютсѧ . ра́дꙋисѧ ꙗ҆́кѡ всѣ́мъ прᲂсѧ́щимъ дае́ши да́ръ , ѿ́ гдⷭ҇а дарᲂва́нныи тѝ и҆сцѣле́нїемъ . ра́дꙋисѧ ꙗ҆́кѡ и҆ чꙋдесы́ тѧ бг҃ъ прᲂславлѧ́етъ , и҆ всѣ́хъ зва́ти тебѣ̀ наꙋча́етъ . ра́дꙋисѧ прпⷣбне ѻ҆́ч҃е дими́трїе , по́стникѡмъ ᲂу҆дᲂбре́нїе .

пѣ́снь , з҃ . і҆рмо́съ . Бг҃ᲂпрᲂти́вно велѣ́нїе без̾зако́ннꙋюща мꙋчи́телѧ , высо́къ пла́мень вᲂз̾несло̀ є҆́сть , хрⷭ҇то́съ же прᲂсте́ръ бг҃ᲂчести́вымъ дѣ́темъ , хла́дъ дх҃о́вныи , сы́и бл҃гᲂслᲂве́нъ и҆ препрᲂсла́вленъ . Бл҃гᲂꙋха́ютъ прпⷣбне твᲂи́хъ ᲂу҆че́нїи слᲂвеса̀ , бл҃гᲂда́тїю дх҃а сїѧ́юще . бжⷭ҇тво́ бо є҆ди́но чтꙋ́щи в̾ тре́хъ ли́цѣхъ , сло́ва же вᲂплᲂще́нїе пᲂю́щи , бл҃гᲂꙋха́еши на́съ пребᲂга́те . Оу҆ма̀ чистᲂто́ю и҆ по́мысла , бг҃ᲂразꙋ́мїѧ свѣ́тлᲂстїю житїѐ преше́лъ є҆сѝ . чистᲂто́ю же тѣлесѐ , и҆ дв҃ьства сїѧ́нїемъ , и҆зрѧ́днѡ вᲂз̾лᲂже́нїе ꙗ҆́вльсѧ , всеви́дцꙋ и҆ вседержи́телю . Сло́во твᲂѐ со́лїю раствᲂрено̀ , и҆ житїѐ твᲂѐ бл҃гᲂда́тїю пребл҃же́нне сїѧ́ѧ ꙗ҆ви́сѧ пречꙋ́дне . тѣ́мже в̾ вы́шнїѧ ѻ҆би́тели ра́дꙋѧсѧ в̾сели́лсѧ є҆сѝ , хрⷭ҇то́ви со дерзнᲂве́нїемъ ны́нѣ пред̾стᲂѧ̀ . боⷢ҇ . Оу҆правлѧ́ющи пречⷭ҇таѧ мᲂѐ житїѐ , к̾ твᲂемꙋ̀ всети́хᲂмꙋ приста́нищꙋ напра́ви . бг҃а ро́ждьши бл҃ги́мъ и҆сто́чника , всѣ́мъ пᲂдаю́ща вѣ́рнымъ нетлѣ́нїѧ бл҃гᲂда́ти .

и҆́нъ , і҆рмо́съ . И҆́же ѿ і҆ꙋде́и , дᲂше́дше ѻ҆́трᲂцы в̾вавѷлѡ́нъ дре́вле , вѣ́рᲂю ᲂу҆тверже́нїи , пла́мень пе́щныи пᲂпра́вше гл҃юще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . И҆́же и҆нᲂгда̀ притека́ющихъ прпⷣбне дими́трїе , к̾ твᲂемꙋ̀ чꙋдᲂтво́рнᲂмꙋ гро́бꙋ с̾ вѣ́рᲂю , ка́ющихсѧ к̾ бг҃ꙋ грѣхо́въ свᲂи́хъ , мᲂльба́ми сѝ , ско́рченыхъ челᲂвѣ́къ рꙋ́цѣ и҆спра́вилъ є҆сѝ бл҃же́нне . И҆́же и҆нᲂгда̀ ѕлᲂчести́вагѡ ра́тника , бжⷭ҇твеннᲂю си́лᲂю ѿри́нꙋлъ є҆сѝ ѿ ст҃а́гѡ сѝ грᲂба̀ , и҆ не ᲂу҆лꙋчи́вша пᲂми́лᲂванїѧ . в̾ско́рѣ ѡ҆бᲂю̀ живᲂтꙋ̀ лиши́сѧ такᲂвы́и . сла́ва . И҆́же и҆нᲂгда̀ бл҃гᲂче́стнѡ бл҃гᲂгᲂвѣ́йнїи лю́дїе , твᲂи́ми ст҃е дими́трїе мл҃твами , и҆ крᲂпле́нїемъ кᲂгда̀ ст҃ы́ѧ вᲂды̀ сщ҃е́нныѧ , разли́чныѧ и҆сцѣле́нїѧ прїе́млютъ , припа́дающїи к̾ чꙋдᲂтво́рнᲂмꙋ тѝ гро́бꙋ . и҆ нн҃ѣ , боⷢ҇ . И҆зба́вихᲂмсѧ всѝ ѿ страсте́й и҆ бѣ́дъ и҆ ѡ҆б̾стᲂѧ́нїи , и҆ недꙋ́гѡвъ мнᲂгᲂѡ҆бра́зныхъ , мᲂльба́ми тѝ пречⷭ҇таѧ бг҃ᲂмт҃и . сп҃сꙋ хрⷭ҇тꙋ̀ зᲂвꙋ́ще , ѻ҆ц҃ъ на́шихъ бж҃е благᲂслᲂве́нъ є҆сѝ . катава́сїѧ : Непᲂслꙋжи́ша тва́ри .

пѣ́снь , и҃ . і҆рмо́съ . Пе́щь ѻ҆́гненна и҆нᲂгда̀ в̾ вавѷлѡ́нѣ , дѣ́йство раздѣлѧ́ше , бж҃їимъ велѣ́нїемъ халдѣ́и ѡ҆палѧ́ющи , вѣ́рныѧ же прᲂхлажда́ющи пᲂю́ща , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Вѣне́цъ бл҃гᲂлѣ́пенъ , хрⷭ҇то́съ живᲂда́вецъ на ве́рхъ , тво́й пᲂлᲂжѝ , тезᲂи҆мени́те дими́трїе . и҆́бо дѣѧ́ньми прᲂсїѧ́лъ є҆сѝ , и҆ видѣ́нїи ꙗ҆ви́лсѧ є҆сѝ , зᲂвы́и бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Всѐ преше́дъ чꙋ́вство пребл҃же́нне , ᲂу҆мꙋ̀ пе́рвᲂмꙋ прибли́жилсѧ є҆сѝ дш҃и свᲂеѧ̀ чистᲂто́ю , житїѧ́ же свѣ́тлᲂстїю . вѣнцено́сче дими́трїе зᲂвы́и , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Жела́нїемъ ѕѣ́льнымъ пребл҃же́нне , и҆з̾слѣ́дилъ є҆сѝ бг҃ᲂно́снагѡ се́ргїѧ вели́кагѡ житїѐ бжⷭ҇твеннᲂе . жи́зни свѣ́тлᲂстїю пᲂревнᲂва̀ прехва́льне . бы́въ ᲂу҆́бѡ и҆ сᲂбесѣ́дникъ сегѡ̀ и҆зрѧ́денъ вᲂи́стинꙋ . боⷢ҇ . Оу҆́мъ без̾стра́стенъ во ᲂу҆тро́бѣ твᲂе́й сᲂединѧ́етсѧ , чл҃ческᲂмꙋ ᲂу҆мꙋ̀ пречⷭ҇таѧ . пло́ти же дебельство́мъ пᲂд̾ лѣ́тᲂмъ бы́въ , лѣ́тъ превы́шшїи . тѣ́мъ тѧ̀ бцⷣе вѣ́рᲂю и҆ любо́вїю сла́вимъ .

и҆́нъ , і҆рмо́съ . Цр҃ѧ нбⷭ҇нагѡ , є҆го́же пᲂю́тъ вѡ́и а҆́гг҃льстїи . хвали́те и҆ превᲂзнᲂси́те є҆гѡ̀ во́ вѣки . Сто́лпъ ѡ҆дш҃евле́ныи ѻ҆́ч҃е дими́трїе , и҆ и҆сто́чникъ неѡ҆скꙋ́дныи вᲂи́стинꙋ , слѣпы́хъ прᲂсвѣща́ѧ , раз̾сла́бленыхъ ᲂу҆крѣплѧ́ѧ . и҆ бѣ́сы прᲂгᲂнѧ́ѧ , нето́кмѡ ᲂу҆́грᲂба но и҆ на мѣ́стѣхъ , и҆дѣ́же и҆́мѧ твᲂѐ нарица́ютъ с̾ любо́вїю . Ꙗ҆́кᲂже дрꙋгі́и и҆лїѧ̀ ꙗ҆ви́сѧ , сꙋгꙋ́бꙋ бл҃гᲂда́ть на́мъ да́лъ є҆сѝ , свᲂѧ̀ честны́ѧ мо́щи , тᲂчи́ти и҆сцѣле́нїѧ тре́бꙋющимъ . ꙗ҆вле́нїемъ же свᲂи́мъ и҆ по сме́рти прпⷣбне ѻ҆́ч҃е дими́трїе , и҆ны́хъ ѕлы́хъ ᲂу҆страша́ѧ , и҆ па́че и҆ны́мъ и҆сцѣле́нїѧ твᲂрѧ̀ вѣ́рнымъ . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . И҆нᲂгда̀ прᲂро́ческимъ да́рᲂмъ , ѿ́ бг҃а бл҃же́нне пᲂчте́нъ бы́лъ є҆сѝ . всѧ́чески же тре́бꙋющимъ млⷭ҇тивъ быва́ше . и҆ ны́нѣ ѻ҆́ч҃е дими́трїе , млⷭ҇тивᲂмꙋ сп҃сꙋ за ны̀ мᲂли́сѧ , вᲂспѣва́ющихъ и҆ превᲂзнᲂсѧ́щихъ є҆гѡ̀ во́ вѣки . и҆ ны́нѣ , боⷢ҇ . Ра́дꙋисѧ прⷭ҇то́лѣ гдⷭ҇нь ѻ҆гнезра́чныи . ра́дꙋисѧ две́ри невеще́ственагѡ блиста́нїѧ . ра́дꙋисѧ ѻ҆́блаче , сл҃нце вᲂсїѧ́вшїи пра́веднᲂе , хрⷭ҇та̀ сп҃са на́шегѡ . є҆го́же превᲂзно́симъ во́ вѣки . катава́сїѧ : Хва́лимъ блгⷭ҇ви́мъ . Ѻ҆́трᲂки бл҃гᲂчести́выѧ [пᲂкло́н̾] .

пѣ́снь , ѳ҃ . і҆рмо́съ . Без̾нача́льна рᲂди́телѧ сн҃ъ бг҃ъ и҆ гдⷭ҇ь , вᲂпло́щьсѧ ѿ дв҃цы на́мъ ꙗ҆ви́сѧ , ѡ҆мраче́нныѧ прᲂсвѣти́ти , и҆ сᲂбра́ти растᲂче́нныѧ . тѣ́мъ всехва́льнꙋю бцⷣꙋ велича́емъ . Пречⷭ҇тны́и дими́трїе , ны́нѣ чи́сто ᲂу҆слажда́ѧсѧ , и҆ пи́щꙋ прїе́млѧ па́че ᲂу҆́мныѧ , и҆дѣ́же сᲂбо́ри ст҃ы́хъ ѡ҆́крⷭ҇тъ гдⷭ҇а ликꙋ́ютъ бл҃же́нне . и҆́же тѧ̀ ны́нѣ чтꙋ́щїѧ , хᲂда́тайствꙋѧ к̾ себѣ̀ привлецы̀ . Пре́йде ра́дꙋѧсѧ жела́нїемъ кра́еви , к̾ є҆ди́нᲂмꙋ вᲂи́стинꙋ бл҃же́нствꙋ . к̾ пребо́льшей дᲂбро́тѣ , и҆ к̾ жи́зни вᲂи́стинꙋ нестарѣ́ющейсѧ , и҆ свѣ́тꙋ невече́рнемꙋ бг҃ᲂно́се ѻ҆́ч҃е дими́трїе . Ꙗ҆́кѡ сл҃нце прᲂсїѧ́лъ є҆сѝ , во и҆́нᲂческихъ сᲂбо́рѣхъ , ѿ млады́хъ нᲂгте́й ѡ҆сщ҃е́нъ бы́лъ є҆сѝ . ꙗ҆́кᲂже зарю̀ и҆спꙋща́ѧ дᲂбрᲂдѣ́тели свᲂегѡ̀ житїѧ̀ , пресла́дкїи дими́трїе бг҃ᲂно́сне ѻ҆́ч҃е прпⷣбне . боⷢ҇ . Разꙋмѣ́вше и҆здале́ча прᲂзᲂрли́выма ѻ҆чи́ма прⷪ҇ро́цы , тѧ̀ ꙗ҆́вѣ прᲂвᲂз̾вѣсти́ша , хᲂтѧ́щꙋю мт҃рь бы́ти вседѣ́телю влⷣцѣ всѣ́хъ . тѣ́мъ тѧ̀ всепѣ́таѧ , бцⷣꙋ и҆спᲂвѣ́даемъ .

и҆́нъ , і҆рмо́съ . Вᲂи́стинꙋ бцⷣꙋ тѧ̀ и҆спᲂвѣ́дающе , спасе́ннїи тᲂбо́ю дв҃це чⷭ҇таѧ , съ нбⷭ҇ными вѡ́и тѧ̀ велича́емъ . Ꙗ҆вле́нїемъ бжⷭ҇твеннымъ сїѧ́еши , ѻ҆́ч҃е дими́трїе прпⷣбне . ꙗ҆́кᲂже ѡ҆бѣща́сѧ бл҃же́нне , мл҃твᲂю гра́дъ сво́й сᲂхрани́лъ є҆сѝ , ѿ хᲂтѧ́щихъ вᲂева́ти без̾вины̀ лю́ди твᲂѧ̀ ст҃е . Ѿб́г҃а пᲂказа́сѧ на́мъ цѣли́тель , недꙋ́гꙋющимъ в̾паде́нїихъ . ѡ҆чи́стникъ же бл҃же́нне , и҆ прᲂгᲂни́тель лꙋка́вымъ дꙋхо́мъ . тѣ́мъ тѧ̀ всѝ велича́емъ . сла́ва . А҆́ще и҆ преста́висѧ ѿ на́съ ѻ҆́ч҃е дими́трїе , в̾ хра́мѣхъ бжⷭ҇твенныхъ ст҃ѣ́й трⷪ҇цѣ пред̾стᲂѧ̀ , хра́мъ дх҃ꙋ ст҃о́мꙋ бы́лъ є҆сѝ . мᲂли́сѧ за всѧ̀ христїа́ны , и҆́нᲂки же и҆ прᲂстьцы̀ , тебѐ велича́ющихъ . и҆ ны́нѣ , боⷢ҇ . Вᲂи́стинꙋ бцⷣе тᲂбо́ю спа́сшїисѧ и҆спᲂвѣ́даемъ тѧ̀ дв҃о влⷣчце . ꙗ҆́кѡ рᲂдила̀ є҆сѝ на́мъ бг҃а спаси́телѧ , є҆ди́нᲂго ѿ трⷪ҇цы сн҃а и҆ сло́ва , крⷭ҇то́мъ разо́ршаго сме́рть . є҆го́же ѡ҆ на́съ с̾ прпⷣбнымъ дими́трїемъ мᲂлѝ , тебѐ велича́ющихъ .

катава́сїѧ : Всѧ́къ зе́менъ .= Дᲂсто́йнѡ є҆́сть . свѣти́ленъ . Мирска́гѡ пристра́стїѧ , ꙗ҆́кѡ ѿ скве́рны ᲂу҆клᲂни́лсѧ є҆сѝ . и҆ а҆́лчьбᲂю пло́ть ᲂу҆вѧди́лъ є҆сѝ ѻ҆́ч҃е , и҆ нбⷭ҇нᲂю сла́вᲂю со а҆́гг҃лы ѡ҆бᲂгати́сѧ . тѣ́мже непреста́ннѡ мᲂлѝ ѡ҆ на́съ хрⷭ҇та̀ бг҃а , прпⷣбне дими́трїе . =вⷤ . сла́ва , и҆ нн҃ѣ , боⷢ҇ . Тѧ̀ пред̾ста́тельницꙋ и҆́мамы всѝ грѣ́шнїи , ѽ прⷭ҇та́ѧ дв҃о . ты̀ бл҃гᲂпремѣ́нна сᲂтвᲂрѝ сн҃а твᲂегѡ̀ , мт҃рьними сѝ мл҃твами .

На хвали́тѣхъ , стⷯры , на д҃ . гла́съ , є҃ . Прпⷣбне ѻ҆́ч҃е , дш҃ꙋ свᲂю̀ с̾ тѣ́лᲂмъ ѡ҆чи́стивъ , и҆ ст҃о́мꙋ дх҃ꙋ прекра́снаѧ ѻ҆би́тель ꙗ҆ви́сѧ , и҆ сла́вна тѧ кᲂнце́мъ пребл҃же́нне дими́трїе сᲂдѣ́ла . в̾ чꙋдесѣ́хъ же вели́кагѡ свѣти́льника , прᲂсвѣти́вшагѡ сꙋ́щихъ во́мрацѣ , ꙗ҆́кѡ наста́вника и҆́нᲂкѡмъ , сᲂше́дшесѧ велемꙋ́дренѡ ᲂу҆бл҃жи́мъ . двⷤа . Ꙗ҆ви́сѧ бг҃ᲂбл҃же́нне мꙋ́драѧ плени́ца , свѧза́ѧ мно́гаѧ вра́гъ ѡ҆пᲂлче́нїѧ . тѣ́мже и҆ вѣнце́мъ ᲂу҆вѧзе́сѧ неꙋвѧда́ющимъ . весе́лїе и҆ ра́дᲂсть и҆ сла́вꙋ вѣ́чнꙋю вᲂспрїѧ́лъ є҆сѝ бг҃ᲂмꙋ́дре дими́трїе . мᲂлѝ хрⷭ҇та̀ бг҃а дарᲂва́ти ми́ръ ми́рᲂви , и҆ дш҃а́мъ на́шимъ ве́лїю млⷭ҇ть . Прпⷣбне ѻ҆́ч҃е , тѣле́сныѧ стра́сти ѕѣ́льнымъ вᲂз̾держа́нїемъ , и҆ по́стническими мл҃твами же и҆ трꙋды̀ , сле́зными пᲂто́ки и҆ пᲂты̀ , ᲂу҆́глїѧ сла́дᲂсти пᲂгаси́лъ є҆сѝ . и҆ в̾ чꙋдесѣ́хъ сла́вна тѧ̀ пᲂказа̀ гдⷭ҇ь , рꙋ́с̾скимъ лю́демъ дими́трїе бл҃же́нне , и҆ ᲂу҆краси́ тѧ вы́шними дарᲂва́нїи . є҆мꙋ́же бо слꙋ́жиши с̾ нбⷭ҇ными си́лами , і҆с҃ꙋ чл҃кᲂлю́бцꙋ , и҆ сп҃сꙋ дш҃а́мъ на́шимъ . сла́ва . гла́съ , ѕ҃ . Прїиди́те празднᲂлю́бцы , и҆ по́стникъ сᲂсло́вїе , вѣ́рᲂю сᲂше́дшесѧ , и҆́стиннагѡ по́стника дне́сь пᲂчита́юще . ра́дꙋисѧ ше́ствᲂвавъ по стᲂпа́мъ влⷣки хрⷭ҇та̀ , ᲂу҆́зкїи пꙋ́ть и҆ без̾стра́стно житїѐ . ꙗ҆́кᲂже дре́вле а҆враа́мъ пра́ведныи ѻ҆́ч҃е дими́трїе , страннᲂлю́бїе притѧжа́лъ є҆сѝ . та́кᲂже пресели́сѧ ѿ ѻ҆те́чества сѝ до мѣ́ста , и҆дѣ́же ны́нѣ бл҃гᲂꙋха́етъ и҆сцѣле́нїѧ , честно́е тѣ́ло твᲂѐ , всѣ́мъ притека́ющимъ и҆ вᲂпїю́щимъ . ѽ всебл҃же́нне и҆ прпⷣбне , по́стникѡмъ пᲂхвало̀ , и҆ сᲂбесѣ́дниче беспло́тнымъ , и҆ наста́вниче и҆́нᲂкѡмъ , и҆ ѡ҆ на́съ мᲂли́сѧ хрⷭ҇тꙋ̀ бг҃ꙋ , спастѝ дш҃а на́ша . и҆ ны́нѣ , боⷢ҇ . Бцⷣе ты̀ є҆сѝ лᲂза̀ и҆́стиннаѧ , вᲂзрасти́вшаѧ на́мъ пло́дъ живо́тныи , тебѣ̀ мо́лимсѧ , мᲂли́сѧ влⷣчце с̾ прпⷣбнымъ , пᲂми́лᲂватисѧ дш҃а́мъ на́шимъ . Славᲂсло́вїе вели́кᲂе , и҆ ѿпꙋ́стъ .

На литꙋргі́и , бл҃же́нна , на и҃ . ѿ а҃ гѡ кано́на ст҃о́мꙋ , пѣ́снь , г҃ ѧ . и҆ ѿ в҃ гѡ , пѣ́снь , ѕ҃ ѧ .

прᲂки́менъ , ѱл҃о́мъ дв҃дᲂвъ . честна̀ пре́д̾ гдⷭ҇емъ сме́рть прпⷣбныхъ є҆гѡ̀ . сти́хъ . что̀ вᲂз̾да́мъ гдⷭ҇ви ѡ҆ всѣ́хъ , и҆́хже вᲂз̾да́стъ ми . а҆пⷭ҇лъ , къ гала́тѡмъ . заⷱ҇ , сг҃і .= а҆ллилꙋ́їѧ . бл҃же́нъ мꙋ́жь бᲂѧ́исѧ гдⷭ҇а , в̾ за́пᲂвѣдехъ є҆гѡ̀ вᲂсхо́щетъ ѕѣлѡ̀ . =сти́хъ . си́льнѡ на землѝ бꙋ́детъ сѣ́мѧ є҆гѡ̀ , ро́дъ пра́ведныхъ бл҃гᲂслᲂви́тсѧ .= є҆ѵⷢ҇а́лїе , ѿ лꙋкѝ . заⷱ҇ , к҃д . =прича́стенъ . въ па́мѧть вѣ́чнꙋю бꙋ́детъ пра́ведникъ .

<< Previous

Contents

Next >>