МЦⷭ҇А ТОГО́ЖЕ ВЪ ДІ҃ ДН҃Ь

Прпⷣбнагѡ и҆ бг҃ᲂно́снагѡ ѻ҆ц҃а на́шегѡ а҆вѯе́нтїѧ . =Ве́черъ , на гдⷭ҇и вᲂзва́хъ , стихѣ́ры . гла́съ , д҃ . поⷣ . да́лъ є҆сѝ зна́менїе . Вᲂз̾раще́нїе пᲂще́нїѧ пᲂказꙋ́ѧ а҆вѯе́нтїе ,꙳ дарᲂва́нїемъ прᲂзѧбе́нїе .꙳ ѿ́ бг҃а прїѧ́лъ є҆сѝ цѣли́ти недꙋ́ги ,꙳ бѣ́сы ѿгᲂнѧ́ти ,꙳ призыва́нїемъ хрⷭ҇то́вѣмъ в̾вѣ́ренъ .꙳ и҆ дх҃а пребл҃же́нне бжⷭ҇твенныѧ бл҃гᲂда́ти ,꙳ и҆спо́лньсѧ и҆ си́лы .꙳ є҆ѧ̀ ра́ди ꙗ҆́вѣ ѡ҆кᲂрмлѧ́емь ,꙳ в̾ приста́нище дᲂсти́глъ є҆сѝ . Бл҃гᲂда́тїю и҆сцѣле́нїемъ и҆ чꙋде́съ ѡ҆бᲂга́тисѧ ,꙳ ѡ҆чи́щьсѧ ᲂу҆мо́мъ .꙳ страсте́мъ бо недꙋ́ги и҆ пло́ти ѡ҆мраче́нїе ,꙳ и҆ тревᲂлне́нїе ѿтрѧсѐ ,꙳ и҆ свѣ́тло дш҃е́внᲂе сᲂдѣ́ла ᲂу҆стрᲂе́нїе .꙳ ѿ сю́дꙋ и҆ прᲂсїѧ́лъ є҆сѝ ꙳ во и҆́нᲂческихъ ли́цѣхъ ,꙳ мᲂлѧ̀ чл҃кᲂлю́бца ꙳ ѡ҆ вᲂсхвалѧ́ющихъ тѧ̀ . Вᲂз̾расти́лъ є҆сѝ тала́нты ,꙳ да́нныѧ тѝ премꙋ́дре ,꙳ бᲂга́тнѡ дѣ́лавъ ,꙳ и҆ сѣ́ѧвъ со слеза́ми ,꙳ в̾ ра́дᲂсти ны́нѣ ѻ҆́ч҃е жне́ши .꙳ мнᲂгᲂсꙋгꙋ́бнꙋю ра́дᲂсть и҆ ᲂу҆тѣше́нїе вᲂи́стинꙋ пᲂжина́ѧ .꙳ ꙗ҆́кѡ и҆мѣ́ѧ дерзнᲂве́нїе ᲂу҆́бѡ ко влⷣцѣ ,꙳ мᲂли́сѧ ѡ҆ пᲂю́щихъ тѧ̀ ,꙳ бг҃ᲂно́сне а҆вѯе́нтїе . =сла́ва . гла́съ , и҃ . Ст҃а́ѧ дх҃а ст҃а́гѡ премꙋ́дрᲂсть в̾се́льшисѧ в̾ чи́стᲂе срⷣце твᲂѐ , пребл҃же́нне а҆вѯе́нтїе прпⷣбне ѻ҆́ч҃е , на́ дꙋхи лꙋка́вствїѧ стра́шна тѧ̀ гᲂни́телѧ пᲂказа̀ . и҆ нето́кмѡ стра́шна , но и҆ нелицемѣ́рна недꙋ́гѡмъ врача̀ . тѣ́мже дерзнᲂве́нїе стѧжа́въ , к̾ чл҃кᲂлю́бцꙋ бг҃ꙋ , непреста́ннᲂю мл҃твᲂю сѝ , дш҃е́вныхъ страсте́й на́съ и҆ тѣле́сныхъ свᲂбᲂдѝ . и҆ ны́нѣ , боⷢ҇ . и҆лѝ , крⷭ҇тᲂбоⷢ҇ . А҆́гньца а҆́гница ꙗ҆́кѡ ᲂу҆зрѣ̀ , на́ древѣ прᲂсте́рта во́лею распина́тельнѣ . вᲂпїѧ́ше мт҃рьски , и҆ бᲂлѧ́щи с̾ пла́чемъ . сн҃е мо́й , что̀ стра́ннᲂе сѐ видѣ́нїе . и҆́же всѣ́мъ живо́тъ даѧ́и ꙗ҆́кѡ бг҃ъ . ка́кѡ ᲂу҆мира́еши дᲂлгᲂтерпѣли́ве , чл҃кѡмъ пᲂдаѧ́и вᲂскрⷭ҇нїе . сла́влю твᲂѐ мно́гᲂе бж҃е мо́й смᲂтре́нїе .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́с̾ , а҃ . Пꙋсты́нныи жи́тель во́ плᲂти а҆́гг҃лъ , чꙋдᲂтво́рецъ пᲂказа́сѧ ѻ҆́ч҃е на́шъ а҆вѯе́нтїе . пᲂще́нїемъ и҆ бдѣ́нїемъ и҆ мл҃твами , нбⷭ҇ныѧ бл҃гᲂда́ти прїе́мъ , и҆сцѣлѧ́еши недꙋ́жныхъ дш҃а , прихᲂдѧ́щихъ тѝ с̾ вѣ́рᲂю . сла́ва да́вшемꙋ тѝ крѣ́пᲂсть . сла́ва вѣнча́вшемꙋ тѧ̀ . сла́ва дѣ́йствꙋющемꙋ тᲂбо́ю всѣ́мъ и҆сцѣле́нїе .= сла́ва , и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .=

Кано́нъ . твᲂре́нїе ѳеѡ́фанᲂво . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆и҃ль , крⷭ҇тᲂѡ҆бра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть .

запѣ́в : Прпⷣбне ѻ҆́ч҃е а҆вѯе́нтїе , мᲂлѝ бг҃а ѡ҆ на́съ . Вᲂз̾расти́въ є҆́же к̾ бг҃ꙋ любо́вь свᲂю̀ ѻ҆́ч҃е а҆вѯе́нтїе . и҆ мирскꙋ́ю любо́вь ѡ҆ста́вль , бг҃ᲂно́сенъ сᲂсꙋ́дъ в̾мѣсти́теленъ ст҃о́мꙋ дх҃ꙋ дарᲂва́нїемъ ꙗ҆ви́лсѧ є҆сѝ . Пᲂд̾вше́лъ є҆сѝ свᲂи́ми хᲂтѣ́ньми ѻ҆́ч҃е а҆вѯе́нтїе , ты̀ пᲂд̾ и҆́го гдⷭ҇не бл҃го́е . и҆ зе́млю дѣ́лалъ є҆сѝ , дᲂбрᲂдѣ́телей слеза́ми ᲂу҆маща́ѧ дᲂстᲂчꙋ́дне . Оу҆страни́въ жите́йскїѧ мᲂлвы̀ , свᲂю̀ дш҃ꙋ и҆ ᲂу҆́мъ , и҆ к̾ бг҃ꙋ прибли́жь ᲂу҆се́рднѡ . крѣ́пкими вᲂз̾держа́ньми , на землѝ ꙗ҆́кѡ беспло́тенъ пᲂживѐ пребл҃же́нне . боⷢ҇ . Въ тебѣ̀ ны́нѣ ви́дѣсѧ влⷣчце , непᲂстижи́мᲂе бг҃ᲂмꙋ́жнᲂе сᲂше́ствїе хрⷭ҇то́во . ꙗ҆́кѡ бг҃ъ бо и҆ чл҃къ и҆з̾ тебѐ чⷭ҇таѧ рᲂди́сѧ , ѡ҆бнᲂвлѧ́ѧ сꙋщество̀ мᲂѐ .

пѣ́снь , г҃ . і҆рмо́съ . Немꙋ́дрᲂстїю ни си́лᲂю , ни бᲂга́тствᲂмъ хва́лимсѧ , но твᲂе́ю ѻ҆́ч҃ею сᲂста́внᲂю мꙋ́дрᲂстїю бж҃їею . ꙗ҆́кѡ нѣ́сть ст҃а па́че тебѐ чл҃кᲂлю́бче . Вжилѧ́емь крⷭ҇тнᲂю си́лᲂю , ᲂу҆праздни́лъ є҆сѝ бѣсо́мъ стремле́нїѧ , и҆ кᲂва́рства раз̾рꙋши́лъ є҆сѝ . вᲂз̾держа́нїемъ пᲂбѣжда́ѧ , си́хъ наше́ствїѧ .= А҆́гг҃льскᲂмꙋ житїю̀ на землѝ пᲂдо́бѧсѧ . чи́стᲂе в̾ мл҃твахъ , во бдѣ́нїихъ крѣпча́йшее , ᲂу҆се́рднѡ прᲂше́лъ є҆сѝ ѻ҆́ч҃е а҆вѯе́нтїе . Ꙗ҆́дъ сме́ртныи , дш҃а́мъ прᲂи҆схᲂда́тающь а҆вѯе́нтїе , пᲂразꙋмѣ́въ сла́дᲂсть . вᲂз̾держа́нїемъ ᲂу҆мертви́лъ є҆сѝ , тᲂѧ̀ движе́нїѧ , бг҃ᲂмꙋ́дре прпⷣбне . =боⷢ҇ . И҆́же сᲂзда́выи в̾ нача́тцѣхъ ѿ пе́рсти мѧ чл҃ка , зи́ждетсѧ менѐ ра́ди , во ᲂу҆тро́бѣ твᲂе́й пренепᲂро́чнаѧ , дре́внее паде́нїе и҆справлѧ́ѧ .

сѣда́ленъ . гла́съ , и҃ . Землена́ѧ всѧ̀ ѡ҆ста́вль , и҆ в̾ ми́рѣ сы́и тѣле́снѣ , дх҃ᲂмъ бы́лъ є҆сѝ а҆́гг҃лѡмъ сᲂбесѣ́дникъ . сꙋ́щаѧ бо стра́сти ᲂу҆мертви́въ тѣле́сныѧ , трⷪ҇цы пᲂказа́сѧ ᲂу҆го́дникъ бл҃же́нне . тѣ́мже недꙋ́гꙋющимъ и҆сцѣлѧ́еши стра́сти , и҆ сло́вᲂмъ дꙋ́хи ѿго́ниши бл҃гᲂда́тїю , бг҃ᲂно́сне а҆вѯе́нтїе . мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , чтꙋ́щимъ любо́вїю ст҃ꙋ́ю па́мѧть твᲂю̀ . сла́ва , и҆ нн҃ѣ , боⷢ҇ . Сл҃нца ѻ҆́блаче мы́сленагѡ , бжⷭ҇твеннагѡ свѣ́та свѣти́льниче златᲂза́рный , нескве́рнаѧ небла́знаѧ всенепᲂро́чнаѧ влⷣчце , ѡ҆мраче́нꙋю дш҃ꙋ мᲂю̀ слѣпᲂто́ю страсте́й , без̾стра́стїѧ зарѧ́ми прᲂсвѣтѝ мᲂлю́сѧ . и҆ ѡ҆скверне́нᲂе мѝ срⷣце ѡ҆мы́й , стрꙋѧ́ми ᲂу҆миле́нїѧ , пᲂкаѧ́нїѧ же слеза́ми , скве́рны ѡ҆чи́сти дѣѧ́нїй мᲂи́хъ . да любо́вїю зᲂвꙋ́ ти бцⷣе прⷭ҇нѡ дв҃о , мᲂлѝ хрⷭ҇та̀ бг҃а , прегрѣше́нїй ѡ҆ставле́нїе пᲂда́ти мѝ , тѧ́ бо и҆мѣ́ю наде́ждꙋ ра́бъ тво́й . крⷭ҇тᲂбоⷢ҇ . А҆́гньца и҆ па́стырѧ и҆ и҆зба́вителѧ , а҆́гница зрѧ́щи на крⷭ҇тѣ̀ , вᲂсклица́ше пла́чꙋщи , и҆ го́рькѡ рыда́ющи гл҃аше . ми́ръ ᲂу҆́бѡ ра́дꙋетсѧ прїе́млѧ тᲂбо́ю и҆збавле́нїе . ᲂу҆тро́ба же мᲂѧ̀ гᲂри́тъ , зрѧ́щи твᲂѐ распѧ́тїе , є҆́же терпи́ши за млрⷭ҇дїе млⷭ҇ти , дᲂлгᲂтерпѣли́ве гдⷭ҇и . млⷭ҇ти пꙋчи́но , и҆ и҆сто́чниче неи҆счерпа́емыи . ᲂу҆милᲂсе́рдисѧ , и҆ да́рꙋй сᲂгрѣше́нїи ѡ҆ставле́нїе , вѣ́рᲂю пᲂю́щимъ бжⷭ҇твеннаѧ твᲂѧ̀ страда́нїѧ .

пѣ́снь , д҃ . і҆рмо́съ . Вᲂз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . Пᲂбѣди́тель на́ дꙋхи лꙋка́вствїѧ , ст҃а́гѡ дх҃а ѻ҆́ч҃е дѣ́йствᲂмъ ꙗ҆ви́сѧ и҆ бл҃гᲂда́тїю . зᲂвы̀ а҆вѯе́нтїе , сла́ва си́лѣ твᲂе́й гдⷭ҇и . Ѿ пᲂто́къ бг҃ᲂно́сне без̾зако́нїѧ , мᲂли́твᲂю пребл҃же́нне себѐ ᲂу҆тве́рждь , ᲂу҆бѣжѐ смꙋще́нїѧ . пи́щꙋ же пᲂто́ка ᲂу҆лꙋчи́лъ є҆сѝ , дᲂсто́йнѡ пребᲂга́те . Бг҃ᲂно́сецъ , вѣ́рꙋ и҆ любо́вь ю҆́же к̾ бг҃ꙋ вᲂз̾расти́въ , к̾ го́рнѣй высᲂтѣ̀ бжⷭ҇твеннагѡ присвᲂе́нїѧ , вᲂз̾вы́сисѧ , зᲂвы̀ , сла́ва си́лѣ твᲂе́й гдⷭ҇и . боⷢ҇ . Бг҃а сло́ва ро́ждьшꙋю ꙗ҆́вѣ зна́юще пло́тїю , вᲂи́стинꙋ бцⷣꙋ вѣ́рнїи всѝ и҆менꙋ́емъ . зва́нїе пᲂко́емꙋждо є҆стествꙋ̀ ве́щемъ принᲂша́юще .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . Бли́зъ сꙋ́щаѧ твᲂегѡ̀ пꙋтѝ ѻ҆́ч҃е сᲂбла́зны , ѻ҆́стрымъ ᲂу҆мо́мъ невреди́мъ преше́лъ є҆сѝ , и҆ дш҃е́внᲂю чистᲂто́ю . Житїѐ твᲂѐ свѣ́тлѡ , и҆ вѣ́ра правᲂсла́вна вᲂз̾держа́нїе чꙋ́дно , раствᲂре́но сло́во бл҃гᲂда́тїю а҆вѯе́нтїе . И҆зравне́нїемъ ᲂу҆ма̀ , жи́знь преше́лъ є҆сѝ , вре́меннаѧ ми́мѡ тека́ѧ . к̾ вѣ́чнымъ же ѻ҆́ч҃е при́снѡ прилага́ѧсѧ . боⷢ҇ . Оу҆́мъ и҆мꙋ́ще пра́выхъ ᲂу҆че́нїи и҆спо́лненъ , тѧ̀ пречⷭ҇таѧ бцⷣꙋ и҆менꙋ́емъ всѝ , и҆ любо́вїю ᲂу҆блажа́емъ .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Сн҃а тѧ̀ свѣ́тꙋ и҆ днѝ пᲂказа̀ , житїѐ твᲂѐ бл҃же́нне . бл҃гᲂѡ҆бра́знѡ вᲂи́стинꙋ хᲂдѧ́ща , и҆ свѣти́льника жи́зни в̾ ми́рѣ сло́во и҆мꙋ́ща . двⷤа . Пᲂꙋче́нїе сме́ртнᲂе , житїѐ свᲂѐ пᲂло́жь . лꙋ́чшее предѣ́ла мꙋ́дрᲂсти ѻ҆́ч҃е пᲂразꙋмѣ́въ , прелᲂжи́лсѧ є҆сѝ к̾ премꙋ́дрᲂсти сᲂста́внѣй . боⷢ҇ . Хра́мъ тѧ бж҃їи и҆ черто́гъ зна́емъ , рꙋ́чкꙋ и҆ свѣ́щникъ и҆ скрижа́ль , и҆мꙋ́щꙋю в̾нꙋ́трь напи́сано , и҆́же за млрⷭ҇дїе вᲂпло́щьшеесѧ сло́во всенепᲂро́чнаѧ .

кᲂнда́къ . гла́съ , в҃ . Наслади́всѧ бг҃ᲂмꙋ́дре вᲂз̾держа́нїѧ , и҆ жела́нїе пло́ти свᲂеѧ̀ ѡ҆бꙋзда́въ , ꙗ҆ви́лсѧ є҆сѝ вѣ́рᲂю сїѧ́ѧ , и҆ ꙗ҆́кѡ са́дъ пᲂсредѝ раѧ̀ прᲂцвѣ́лъ є҆сѝ , а҆вѯе́нтїе ѻ҆́ч҃е сщ҃е́нне . и҆́кᲂсъ . Кто̀ по́двиги твᲂѧ̀ ны́нѣ и҆зрече́тъ , и҆лѝ бᲂлѣ́зни твᲂѧ̀ ѻ҆́ч҃е , и҆́хже пᲂдъѧ́тъ на землѝ , за бжⷭ҇твеннᲂе наслажде́нїе , зако́нѡмъ гдⷭ҇нимъ пᲂслѣ́дᲂвавъ , и҆ пᲂвелѣ́нїемъ сегѡ̀ пᲂслꙋжи́въ , но́въ на́мъ ꙗ҆ви́сѧ і҆́ѡвъ бᲂре́ньми . ми́рᲂви ꙗ҆ви́сѧ пришле́цъ , и҆ землѝ все́й ꙗ҆́кѡ стра́ненъ , пᲂще́нїемъ вѣ́рᲂю вᲂз̾держа́всѧ . бдѣ́нїе и҆ чистᲂтꙋ̀ вᲂз̾люби́лъ є҆сѝ , а҆вѯе́нтїе ѻ҆́ч҃е сщ҃е́нне .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃гᲂвѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и . Ꙗ҆́кѡ ᲂу҆ѧ́звленъ влⷣчнею ѻ҆́ч҃е бжⷭ҇твеннᲂю любо́вїю , всѐ къ немꙋ̀ непреста́ннᲂе жела́нїе , срⷣца свᲂегѡ̀ прелᲂжи́лъ є҆сѝ зᲂвы́и , бл҃гᲂслᲂве́нъ є҆сѝ в̾ цр҃кви сла́вы твᲂеѧ̀ гдⷭ҇и . двⷤа . Прᲂсщ҃е́нъ сп҃сᲂвᲂю заре́ю мꙋ́дре , тмѣ̀ пред̾ста́телѧ ѡ҆бличи́лъ є҆сѝ терпѣли́внѡ . мирᲂде́ржца же низ̾лᲂжи́лъ є҆сѝ , бл҃гᲂслᲂве́нъ є҆сѝ зᲂвы́и в̾ цр҃кви сла́вы твᲂеѧ̀ гдⷭ҇и . боⷢ҇ . И҆стлѣ́вшее дре́вле , є҆́же к̾ лꙋ́чшемꙋ вᲂз̾веде́нїю є҆стество̀ чл҃ческᲂе , пречⷭ҇таѧ вᲂсхᲂтѣ́въ ѡ҆бнᲂви́ти . всели́сѧ сᲂдѣ́тель бг҃ъ во ᲂу҆тро́бꙋ твᲂю̀ , є҆ди́на препѣ́таѧ .

пѣ́снь , и҃ . і҆рмо́с̾ . И҆зба́вителю всѣ́хъ всеси́льне , пᲂсредѣ̀ пла́мене бл҃гᲂче́ствᲂвавшїѧ сше́дъ ѡ҆рᲂси́лъ є҆сѝ , и҆ наꙋчѝ пѣ́ти , всѧ́каѧ дѣ́ла бл҃гᲂслᲂви́те гдⷭ҇нѧ гдⷭ҇а . Ве́сь к̾ бг҃ꙋ прелᲂже́нъ , ѿтрѧсѐ плᲂтьско́е бл҃гᲂстра́стїе . и҆ чꙋдесе́мъ прїѧ́лъ є҆сѝ дѣ́йство , пᲂѧ̀ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . двⷤа . Стра́шенъ ꙗ҆ви́сѧ бѣсо́мъ , хрⷭ҇та̀ стѧжа́въ пᲂмо́щника . є҆го́же крⷭ҇тъ взе́мъ пᲂслѣ́дᲂвалъ є҆сѝ , пᲂѧ̀ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . боⷢ҇ . Виті́йствꙋетъ ꙗ҆́вльсѧ а҆рха́гг҃лъ , и҆ вᲂз̾вѣща́етъ сло́во тебѣ̀ пречⷭ҇таѧ , є҆́же вы́ше сло́ва зача́тїе спаси́тельнᲂе ми́рꙋ . всѧ̀ дѣ́ла бл҃гᲂсло́вимъ ржⷭ҇тво́ ти .

пѣ́снь , ѳ҃ . і҆рмо́съ . Ка́мень нерꙋкᲂсѣ́чныѧ гᲂры̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , сᲂвᲂкꙋпи́въ раз̾стᲂѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Всемꙋ̀ бжⷭ҇твꙋ̀ ѻ҆́ч҃е , кр҃ще́нїемъ свᲂи́мъ ѡ҆бѣща́сѧ . и҆ сᲂблю́дъ чи́стѣ ѻ҆́браза бл҃же́нне дᲂстᲂѧ́нїе , к̾ трисїѧ́ннѣй свѣ́тлᲂсти , с̾ весе́лїемъ в̾мѣсти́сѧ . Ны́нѣ ни в̾ гада́нїи ѻ҆́ч҃е , ни в̾ зерца́лѣ зри́ши , бг҃ᲂнача́льнᲂе прᲂсвѣще́нїе , лице́мъ же к̾ лицꙋ̀ , и҆́же па́че ᲂу҆ма̀ свѣ́тлᲂсти , и҆ бг҃ᲂвидѣ́нїѧ спᲂдо́бленъ . Ꙗ҆́кѡ и҆мѣ́ѧ мно́го дерзнᲂве́нїе ко всѣ́мъ цр҃ю ѻ҆́ч҃е , и҆зба́витисѧ мᲂли́сѧ , и҆́же твᲂю̀ па́мѧть твᲂрѧ́щимъ ны́нѣ , ѿ всѧ́кᲂгѡ ѡ҆б̾стᲂѧ́нїѧ , да тѧ̀ всѝ ᲂу҆бл҃жа́емъ . боⷢ҇ . Плени́ца мᲂи́хъ сᲂгрѣше́нїи разрѣшѝ дв҃о , ꙗ҆́же млрⷭ҇дїѧ и҆сто́чникъ ро́ждьши , є҆ди́на бг҃ᲂбл҃же́ннаѧ . и҆ ᲂу҆тѣше́нїѧ и҆спо́лни , ꙗ҆́кѡ да дᲂсто́йнѡ тѧ̀ велича́ю .

свѣти́ленъ . Мирска́гѡ бл҃гᲂстра́стїѧ , ꙗ҆́кѡ ѿ скве́рны ᲂу҆клᲂни́лсѧ є҆сѝ . и҆ не ꙗ҆де́нїемъ пло́ть ᲂу҆вѧди́въ , ѡ҆бнᲂви́лъ є҆сѝ дш҃е́внꙋю крѣ́пᲂсть прпⷣбне , и҆ сла́вᲂю ѡ҆бᲂгати́сѧ нбⷭ҇нᲂю сла́вне . тѣ́мже мᲂлѧ́сѧ непреста́й ѡ҆ всѣ́хъ на́съ гдⷭ҇ви . боⷢ҇ . Сᲂє҆динѧ́етсѧ по сᲂста́вꙋ пло́тїю , пресꙋ́щнᲂе сло́во дꙋшѝ пᲂсредѣ̀ , и҆ мы́сленѣ и҆ сᲂверше́нѣ . и҆ є҆ди́нъ ѿ двᲂю̀ прᲂхо́дитъ и҆з̾ тебѐ , несмѣ́снѡ пречⷭ҇таѧ , ѡ҆бᲂжи́въ є҆́же прїѧ́тъ . тѣ́мже тѧ̀ прᲂславлѧ́етъ , вᲂи́стинꙋ бцⷣꙋ .