МЦⷭ҇А ТОГО́ЖЕ ВЪ К҃ ДН҃Ь

Прпⷣбнагѡ ѻ҆ц҃а на́шегѡ льва̀ , є҆пкⷭ҇па ката́нскагѡ . =Ве́черъ , на гдⷭ҇и вᲂзва́хъ , стихѣ́ры . гла́съ , и҃ . Гдⷭ҇и , ты̀ ст҃лѧ в̾ ми́рѣ , а҆пⷭ҇лѡмъ прее́мника пᲂказа́лъ є҆сѝ , дѣ́лы и҆ слᲂвесы̀ , пра́вымъ ᲂу҆че́нїемъ прᲂпᲂвѣ́дника . и҆ сегѡ̀ ра́ди наста́вника пᲂлᲂжи́лъ є҆сѝ ст҃лемъ , и҆ сла́вѣ сᲂприча́стника нетлѣ́ннѣй тѝ . Сто́лпъ тѧ̀ львѐ , хрⷭ҇то́ва цр҃кви жи́въ , и҆ глаго́льника держа́щи , пра́вымъ ᲂу҆че́нїемъ сло́вꙋ . сегѡ̀ зрѧ́щи непᲂкᲂлѣби́ма и҆́стинѣ , при́снѡ пребыва́етъ , сла́вѧщи влⷣкꙋ всѣ́хъ и҆ гдⷭ҇а , тѧ̀ прᲂсла́вльшаго . Гдⷭ҇и , ты̀ ст҃лѧ сло́во и҆зᲂщре́нъ пᲂказа́лъ є҆сѝ ме́чь , на ѕлᲂче́ствꙋющихъ , в̾ правᲂсла́внꙋю вѣ́рꙋ твᲂю̀ , и҆ тѣ́мъ пᲂсѣка́ѧ ло́жнаѧ мꙋдрᲂва́нїѧ , бл҃гᲂче́стїѧ в̾ ми́рѣ ᲂу҆мно́жилъ є҆сѝ , ᲂу҆че́нїѧ влⷣко . =сла́ва , и҆ ны́нѣ , боⷢ҇ . Ви́ждь ми сᲂкрꙋше́нᲂе срⷣце , и҆ стᲂна́нїѧ бг҃ᲂневѣ́стнаѧ прїимѝ дв҃о мр҃і́е . и҆ не ѿри́ни всенепᲂро́чнаѧ , рꙋ́кꙋ мᲂею̀ чⷭ҇таѧ вᲂз̾дѣ́нїе , ꙗ҆́кѡ бл҃гᲂлюби́ва , да пᲂю̀ и҆ велича́ю , вᲂз̾вели́чившꙋю ро́дъ на́шъ . крⷭ҇тᲂбоⷢ҇ . А҆́гньца тѧ̀ є҆гда̀ а҆́гница и҆ дв҃аѧ , к̾ закᲂле́нїю ведо́ма ви́дѣ , со слеза́ми сло́ве пᲂслѣ́дᲂваше и҆ взыва́ше , гдѣ̀ тщи́шисѧ ча́до мᲂѐ ; сни́дꙋ с̾ тᲂбо́ю пресла́дкїи , нетерплю́ бо незрѣ́ти тѧ̀ , і҆с҃е мо́й мнᲂгᲂмлⷭ҇тиве .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , д҃ . Пра́вило вѣ́рѣ и҆ ѻ҆́бразъ кро́тᲂсти , вᲂз̾держа́нїю ᲂу҆чи́телѧ , ꙗ҆ви́ тѧ гдⷭ҇ь ста́дꙋ свᲂемꙋ̀ , ꙗ҆́же веще́мъ и҆́стина . сего̀ ра́ди стѧжа̀ смире́нїемъ высо́каѧ , нището́ю бᲂга́таѧ , ѻ҆́ч҃е на́шъ ст҃лю львѐ , мᲂлѝ хрⷭ҇та̀ бг҃а , спасти́сѧ дш҃а́мъ на́шимъ .= сла́ва , и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .=

Кано́нъ . гла́съ , и҃ . пѣ́снь , а҃ . і҆рмо́съ . Во́дꙋ прᲂше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вᲂпїѧ́ше , и҆зба́вителю бг҃ꙋ на́шемꙋ пᲂе́мъ .

запѣ́въ : Прпⷣбне ѻ҆́ч҃е львѐ , мᲂлѝ бг҃а ѡ҆ на́съ . Свѣти́льника тѧ̀ бжⷭ҇твена хрⷭ҇то́ва свѣ́тла , цр҃кви стѧжа́вши львѐ мꙋ́дре , дᲂбрᲂдѣ́тельными твᲂи́ми сїѧ́ньми , и҆ чꙋдесмѝ бᲂга́тнѡ прᲂсвѣща́етсѧ . Ѿ младе́нства вᲂз̾лᲂжи́лъ є҆сѝ са́мъ себѐ всѣ́хъ влⷣцѣ . и҆ ᲂу҆мерщве́нїемъ сласте́й , жива̀ семꙋ̀ бы́лъ є҆сѝ же́ртва , закала́ѧ себѐ без̾кро́ве бл҃же́нне . Житїѐ твᲂѐ сїѧ́етъ , дᲂбрᲂдѣ́тельми ᲂу҆крашено̀ . и҆ чꙋде́съ блиста́ньми , ᲂу҆дᲂбрено̀ бг҃ᲂно́сне , ꙗ҆вле́на тѧ̀ всѣ́мъ сᲂдѣ́ла . боⷢ҇ . Цр҃кви бы́сть бж҃їѧ , нескве́рнаѧ ѻ҆трᲂкᲂви́це , все́льшемꙋсѧ па́че ᲂу҆ма̀ в̾ тѧ̀ бцⷣе , и҆ ле́сть ѿ дꙋ́шъ чл҃ческихъ ѿгна́вшемꙋ .

пѣ́снь , г҃ . і҆рмо́съ . Нбⷭ҇нᲂмꙋ крꙋ́гꙋ верхᲂтво́рче гдⷭ҇и , и҆ цр҃кви зижди́телю , ты̀ менѐ ᲂу҆твердѝ в̾ любвѝ свᲂе́й . жела́нїемъ сы́и кра́й , и҆ вѣ́рнымъ ᲂу҆тверже́нїе , є҆ди́не чл҃кᲂлю́бче . Спаси́тельна ѻ҆́ч҃е , и҆ бл҃гᲂче́стна ᲂу҆че́нїѧ , правᲂсла́вїѧ хранѧ̀ невреди́ма . ста́до ᲂу҆па́слъ є҆сѝ на па́житѣхъ живᲂно́сныхъ и҆ в̾ нбⷭ҇нꙋю ѻ҆гра́дꙋ всели́лсѧ є҆сѝ . Вᲂз̾ше́дъ на высᲂтꙋ̀ дᲂбрᲂдѣ́телей прпⷣбне , пᲂма́занїе сщ҃е́нно прїѧ́тъ , и҆ превысо́каго всемꙋ́дре вᲂсхвали́лъ є҆сѝ . навысо́цѣ сѣда́лищи пᲂслꙋжи́въ , бл҃гᲂда́тїю сегѡ ꙗ҆́кѡ а҆́гг҃лъ . Напа́сти претерпѣ́въ хрⷭ҇та̀ ра́ди прпⷣбне , без̾сме́ртїю причасти́лсѧ є҆сѝ ѡ҆бᲂже́нїѧ . мѵ́ро же бл҃гᲂво́нно непреста́ннѡ и҆стᲂча́ѧ , ѡ҆сщ҃а́еши вѣ́рᲂю к̾ тебѣ̀ притека́ющїѧ . боⷢ҇ . Оу҆́глѧ бжⷭ҇твеннагѡ и҆ свѣтᲂза́рнагѡ клещѐ , кꙋпино̀ ѻ҆гне́мъ не ѡ҆пали́вшисѧ бжⷭ҇тва̀ , сѣно́вныѧ мѝ всѧ̀ пᲂпалѝ стра́сти . и҆ ѻ҆гнѧ̀ и҆схитѝ вѣ́чнꙋющагѡ .

сѣда́ленъ . гла́съ , г҃ . Ꙗ҆́кѡ вели́ко сл҃нце вселе́ннѣй дᲂбрᲂдѣ́телей твᲂи́хъ сїѧ́ньми , и҆ чꙋде́съ свѣтлᲂстьмѝ прᲂсвѣ́щь вѣ́рныхъ сᲂбо́ры . и҆ пᲂтреби́въ страсте́мъ ѡ҆мраче́нїе , львѐ прпⷣбне хрⷭ҇та̀ бг҃а мᲂлѝ , дарᲂва́ти на́мъ ве́лїю млⷭ҇ть . сла́ва , и҆ ны́нѣ , боⷢ҇ . Бжⷭ҇твеннагѡ є҆стества̀ не ѿлꙋ́чьсѧ , пло́ть бы́въ во ᲂу҆тро́бѣ твᲂе́й , но бг҃ъ въ чл҃чьсѧ пребы́сть . и҆́же по ржⷭ҇твѣ̀ дв҃ꙋ мт҃рь тѧ̀ , ꙗ҆́кѡ пре́жде ржⷭ҇тва̀ сᲂхра́нь всенепᲂро́чнꙋ є҆ди́нꙋ гдⷭ҇ь . тᲂгѡ̀ прилѣ́жнѡ мᲂлѝ , дарᲂва́ти на́мъ ве́лїю млⷭ҇ть . крⷭ҇тᲂбоⷢ҇ . Нескве́рнаѧ а҆́гница сло́вꙋ , нетлѣ́ннаѧ дв҃а мт҃и , на крⷭ҇тѣ́ тѧ ви́дѣвши ви́сима , и҆́же и҆з̾ неѧ̀ без̾ бᲂлѣ́зни прᲂзѧ́бшагѡ , мт҃рьски пᲂдо́бнѡ рыда́ющи в̾зыва́ше . ᲂу҆вы̀ мнѣ̀ ча́до мᲂѐ , ка́кѡ стра́ждеши , хᲂтѧ̀ и҆зба́вити ѿ страсте́й бесче́стїѧ чл҃ка .

пѣ́снь , д҃ . і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Ꙗ҆́кᲂже землѝ ᲂу҆глꙋби́въ браздꙋ̀ ты̀ свᲂю̀ мы́сль , стᲂри́ческїи гла́съ прине́слъ є҆сѝ пребᲂга́те , дᲂбрᲂдѣ́тели бжⷭ҇твенныхъ и҆сцѣле́нїи . Ст҃а́ѧ твᲂѧ̀ сла́вне ра́ка , вы́нꙋ ма́сло ст҃о и҆стᲂча́етъ , ѡ҆сщ҃а́ющи дш҃а , вѣ́рᲂю к̾ тебѣ̀ притека́ющимъ . Недꙋ́гѡмъ ѡ҆чище́нїе , лꙋка́вымъ бѣсо́мъ ѿгᲂни́тель , ст҃лю бы́лъ є҆сѝ . и҆ вѣ́рнымъ чл҃кѡмъ прибѣ́жище . боⷢ҇ . И҆́же всѣ́мъ нев̾мѣсти́мыи пречⷭ҇таѧ , в̾мѣща́етсѧ во ᲂу҆тро́бѣ твᲂе́й , спаса́ѧ мѧ бл҃гᲂстїю , пᲂгрꙋже́ннаго грѣхмѝ .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Оу҆мо́мъ чи́стѣйшимъ , ᲂу҆ма̀ всѣ́хъ вино́внаго смᲂтрѧ́ѧ . ѿ негѡ̀ прїѧ́тъ дарᲂва́нїемъ зарю̀ бг҃ᲂдᲂхнᲂве́нне , и҆ и҆сцѣле́нїемъ сщ҃е́нна свѣтᲂли́тїѧ . и҆́миже разрѣша́еши страсте́мъ ѡ҆мраче́нїе . И҆́же прелестьмѝ бѣсо́в̾скими , всѧ̀ вѣ́рꙋющїѧ хрⷭ҇то́ви , прельща́ющаго ѻ҆́гненᲂмꙋ сꙋдꙋ̀ пре́далъ є҆сѝ пра́веднѡ бл҃же́нне . и҆ дш҃а и҆зба́вилъ є҆сѝ всегꙋби́тельнагѡ сегѡ̀ вреда̀ , ꙗ҆́кѡ па́стырь и҆́стиненъ и҆ спаси́теленъ . Разгᲂрѣ́вшꙋсѧ ѻ҆гню̀ , пᲂсредѝ ста́лъ є҆сѝ неѡ҆пали́мь пресла́вне . бжⷭ҇твенна бо рᲂса̀ , ст҃а́гѡ ѡ҆крꙋжи́ тѧ дх҃а , ꙗ҆́кѡ сщ҃еннᲂтаи́нника . ꙗ҆́кѡ слꙋжи́телѧ бжⷭ҇твенныѧ сла́вы , ꙗ҆́кѡ вы́шнѣй свѣ́тлᲂсти прича́стника . боⷢ҇ . Ви́дѣвше дре́вле бжⷭ҇твено бг҃ᲂра́дᲂваннаѧ , честні́и прᲂро́цы , та́инства глꙋбинꙋ̀ не и҆зрече́ннꙋю , честна́гѡ ржⷭ҇тва̀ твᲂегѡ̀ пречⷭ҇таѧ , разли́чными ѻ҆бразы̀ , ꙗ҆́кᲂже в̾мѣсти́ша , сегѡ̀ прᲂвᲂз̾вѣсти́ша .

пѣ́снь , ѕ҃ . і҆рмо́съ . Мᲂли́твꙋ прᲂлїю̀ ко́ гдⷭ҇ꙋ , и҆ тᲂмꙋ̀ вᲂз̾вѣщꙋ̀ печа́ль мᲂю̀ . ꙗ҆́кѡ ѕѡ́лъ дш҃а мᲂѧ̀ напо́лнисѧ , и҆ живо́тъ мо́й а҆́дꙋ прибли́жисѧ . и҆ мᲂлю́сѧ ꙗ҆́кѡ і҆ѡ́на , ѿ тлѝ бж҃е мо́й вᲂз̾веди́ мѧ . Слѣпі́и мл҃твами твᲂи́ми ѻ҆́ч҃е , прїѧ́ша прᲂзрѣ́нїе бг҃ᲂмꙋ́дре . хрⷭ҇та́ бо дѣ́йственика и҆мѣ́ѧ , и҆ к̾ немꙋ̀ дш҃е́внѣй ѻ҆́чи стѧжа́въ вы́нꙋ , прᲂше́нїѧ бᲂга́тнѡ прїѧ́лъ є҆сѝ . Бы́лъ є҆сѝ цр҃е́ви чꙋ́дне стра́шенъ , внегда̀ и҆ды́и во двᲂрѣ́хъ є҆гѡ̀ , нᲂсѧ̀ ѻ҆де́ждꙋ прикᲂснꙋ́вшꙋюсѧ ᲂу҆́глїемъ . прᲂсла́ви бо тѧ бг҃ъ , є҆го́же житїе́мъ свᲂи́мъ львѐ прᲂсла́вилъ є҆сѝ . Бл҃гᲂꙋха́етъ ра́ка мᲂще́й твᲂи́хъ , и҆ и҆злива́етъ при́снѡ пребл҃же́нне , ꙗ҆́кᲂже и҆сто́чникъ чи́стъ бл҃гᲂво́нно ма́сло бжⷭ҇твено . и҆́мже ѿгᲂнѧ́ютсѧ недꙋ́зи ѿ вѣ́рныхъ , и҆ здра́вїе тре́бꙋющимъ да́рꙋетсѧ . боⷢ҇ . Ѡ҆ст҃и дш҃ꙋ мᲂю̀ дв҃о , ꙗ҆́же ст҃о́е ро́ждьши сло́во . и҆́же вᲂи́стинꙋ во ст҃ы́хъ , ꙗ҆́кѡ пречи́стѡ пᲂчива́юща , є҆ди́наго бг҃а на́шегѡ . и҆ да́рꙋй ми ꙗ҆́кѡ млⷭ҇тива , ᲂу҆миле́нїѧ тꙋ́чꙋ пренепᲂро́чнаѧ .

кᲂнда́къ . гла́съ , г҃ . Пресла́внагѡ ст҃лѧ всѝ , ꙗ҆́кѡ прᲂпᲂвѣ́дника и҆́стины , и҆ ѕлᲂвѣ́рнымъ ѡ҆бличи́телѧ , дне́сь вѣ́рнїи прїиди́те , в̾ пѣ́снехъ , и҆ пѣ́нїихъ вᲂсхва́лимъ , вели́кагѡ па́стырѧ и҆ ᲂу҆чи́телѧ , льва̀ премꙋ́драгѡ . хрⷭ҇то́ви бо мо́литсѧ спасти́сѧ на́мъ .= дрꙋгі́и , кᲂнда́къ . гла́съ , и҃ . И҆=збра́нъ бы́сть бжⷭ҇твеннагѡ дх҃а бл҃гᲂда́тїю , сщ҃е́нства прⷭ҇то́лꙋ , всемꙋ́дрыи сказа́тель ꙗ҆ви́сѧ бжⷭ҇твенныхъ слᲂве́съ , ѕлᲂвѣ́рныхъ ѡ҆бличи́лъ є҆сѝ смы́слы , вѣ́рныѧ же всѧ̀ прᲂсвѣтѝ , правᲂсла́внѡ зᲂвꙋ́щихъ ти , ра́дꙋисѧ львѐ ѻ҆́ч҃е бг҃ᲂмꙋ́дре .

пѣ́снь , з҃ . і҆рмо́съ . Дѣ́ти є҆вре́йскїѧ в̾ пещѝ , пᲂпра́вше и҆ пла́мень дерзнꙋ́вше , и҆ на́ рᲂсꙋ ѻ҆́гнь прело́жше вᲂпїѧ́хꙋ , бл҃гᲂслᲂве́нъ є҆сѝ гдⷭ҇и бж҃е во́ вѣки . Чинѡ́мъ бжⷭ҇твеннымъ беспло́тнымъ с̾пло́тїю пᲂдо́бѧсѧ бг҃ᲂмꙋ́дре , слꙋжа́ше бг҃ᲂви и҆ пᲂѧ́ше дᲂсто́йнѡ , бл҃гᲂслᲂве́нъ бг҃ъ ѻ҆ц҃ъ на́шихъ . Оу҆́ши глꙋхі́ѧ пребл҃же́нне , мл҃твами свᲂи́ми ѿве́рзлъ є҆сѝ бжⷭ҇твенными . и҆ хрᲂмы́мъ ꙗ҆́в̾ственѡ по́далъ є҆сѝ бл҃гᲂтече́нїе , бл҃гᲂслᲂве́нъ є҆сѝ вᲂпїѧ̀ бж҃е ѻ҆ц҃ъ на́шихъ . Манᲂве́нїемъ бжⷭ҇твеннымъ влⷣки , неѡ҆пали́мь пребы́сть , пᲂсредѝ ѻ҆гнѧ̀ прᲂше́дъ . прича́стникъ же сегѡ̀ , сꙋдо́мъ пра́веднымъ ѡ҆палѧ́етсѧ , ст҃лю бг҃ᲂно́сне . боⷢ҇ . Твᲂѐ чре́во не ѡ҆палѝ бжⷭ҇тва̀ ѻ҆́гнь , дв҃о мт҃и , вᲂплᲂща́етсѧ и҆з̾ тебѐ . кᲂнцы̀ ѡ҆рᲂша́ѧ бжⷭ҇твенными свѣтлᲂстьмѝ . сегѡ̀ ра́ди тѧ пᲂе́мъ .

пѣ́снь , и҃ . і҆рмо́с̾ . Пᲂбѣди́тели врагꙋ̀ и҆ пла́мени , бл҃гᲂда́тїю бы́вше , и҆́же по за́пᲂвѣди ѕѣлѡ̀ пᲂбᲂра́юще дѣ́ти пᲂѧ́хꙋ , бл҃гᲂслᲂви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . И҆злїѧ́сѧ бл҃гᲂда́ть ѻ҆́ч҃е во ᲂу҆стнꙋ̀ твᲂе́ю , сщ҃еннᲂтаи́нниче . сегѡ̀ ра́ди тѧ̀ львѐ , бг҃ъ пᲂма́за ст҃лѧ , лю́демъ вᲂпїю́щимъ , бл҃гᲂслᲂви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Цр҃ю пребл҃же́нне вѣ́чнꙋющемꙋ бл҃гᲂꙋгᲂди́лъ є҆сѝ , земле́нᲂмꙋ львѐ цр҃е́ви пред̾ста́лъ є҆сѝ ᲂу҆́глїе нᲂсѧ̀ . и҆ сегѡ̀ ѻ҆́ч҃е ᲂу҆дивлѧ́ѧ мы́сль , чꙋдесы̀ ѕѣлѡ̀ пресла́вными . Ꙗ҆́кѡ ма́слина ѻ҆́ч҃е насажде́нъ бы́въ , плᲂдᲂви́та в̾ дᲂмꙋ̀ гдⷭ҇ни , пло́дъ принᲂша́еши по кᲂнчи́нѣ , ѿ бжⷭ҇твеннагѡ тѣ́ла свᲂегѡ̀ , ма́сло бжⷭ҇твено . вѣ́рнымъ всѧ́къ недꙋ́гъ ѡ҆гᲂнѧ̀ всегда̀ , и҆́же по́ дᲂлгꙋ тѧ̀ прⷭ҇нѡ хва́лѧщимъ . боⷢ҇ . И҆́же хᲂтѣ́нїемъ всѧ̀ съверша́ѧи , пренепᲂро́чнаѧ и҆ бл҃гᲂслᲂве́наѧ , вᲂсхᲂтѣ́въ во́чрево твᲂѐ в̾сели́сѧ , и҆ пло́тїю ꙗ҆ви́сѧ . и҆ ѡ҆бᲂжи́ мѧ и҆стлѣ́вша пре́жде , льсти́вагѡ ѕлы́мъ сᲂвѣ́тᲂмъ .

пѣ́снь , ѳ҃ . і҆рмо́с̾ . Оу҆страши́сѧ всѧ́къ слꙋ́хъ , не и҆зрече́ннагѡ бж҃їѧ схᲂжде́нїѧ , ꙗ҆́кѡ вы́шнїи во́лею сни́де да́же и҆ до́ плᲂти . ѿ дв҃ческагѡ бо чре́ва бы́въ ᲂу҆́бѡ чл҃къ . тѣ́мже тѧ̀ пречи́стꙋю бцⷣꙋ , вѣ́рнїи велича́емъ . Да тѧ̀ бжⷭ҇твенными гла́сы ᲂу҆бл҃жа́емъ , прпⷣбнѡ пᲂжи́вша , и҆ на нб҃са̀ вᲂз̾ше́дша и҆ ра́дꙋющасѧ . ѿ страсте́й и҆ скᲂрбе́й на́съ мл҃твами сѝ спаса́й ѿ ѡ҆бстᲂѧ́нїи , ст҃лю и҆ па́стырю дᲂстᲂчꙋ́дне . Ꙗ҆́кѡ рᲂзга̀ винᲂгра́да и҆́стиннагѡ бы́въ ѻ҆́ч҃е , прᲂзѧ́блъ є҆сѝ дᲂбрᲂдѣ́тельны гре́зны , и҆́же чꙋде́съ сла́дᲂсть и҆ска́пающе . ѿ ни́хже пїю́ще вѣ́рнѡ , здра́вїе прїе́млютъ и҆ ра́дᲂсть , хва́лѧщїи тѧ̀ прⷭ҇нѡ львѐ всемꙋ́дре . Тѣ́ло твᲂѐ бы́сть хра́мъ ст҃а́гѡ и҆ чⷭ҇тна́гѡ ѻ҆́ч҃е дх҃а , и҆ ны́нѣ лежи́тъ в̾нꙋ́трь бжⷭ҇твеннагѡ хра́ма . є҆го́же со́здалъ є҆сѝ в̾ сла́вꙋ львѐ и҆ че́сть , лꙋкі́и мч҃нцы . чꙋде́съ и҆стᲂча́ѧ на́мъ рѣ́ки , бл҃гᲂче́стнѡ тѧ̀ пᲂчита́ющимъ . Ꙗ҆́кᲂже сл҃нце свѣтᲂза́рнѡ , дᲂбрᲂдѣ́тельными свѣща́ми кᲂнцы̀ ѡ҆зарѧ́ѧ прⷭ҇нѡ . и҆ ны́нѣ к̾ свѣ́тꙋ преминꙋ́лъ є҆сѝ незахᲂди́мᲂмꙋ . тѣ́мже свѣтᲂно́снꙋю тѝ па́мѧть пра́зднꙋющїѧ львѐ пребᲂга́те , ѡ҆мраче́нїѧ вселю́тыхъ и҆зба́ви . боⷢ҇ . Страшꙋ́сѧ твᲂегѡ̀ є҆ди́не цр҃ю втᲂра́гѡ прише́ствїѧ , и҆ ᲂу҆бᲂѧ́хсѧ без̾мѣ́рнѡ сᲂгрѣши́въ тѝ , и҆ пᲂра́зꙋмѣ не ᲂу҆тве́рждьсѧ . но ꙗ҆́кѡ сы́и бл҃гъ , ѡ҆братѝ и҆ спаси́ мѧ , ро́ждьшїѧ тѧ̀ ра́ди , бл҃гᲂпрїѧ́тными і҆с҃е мл҃твами .