22 февраля: свв. мчч. иже в Евгении

МЦⷭ҇А ТОГО́ЖЕ ВЪ К҃В ДН҃Ь

Ѻ҆брѣ́тенїе мᲂще́мъ ст҃ы́хъ мч҃нкъ , и҆́же в̾ є҆вге́нїи . =Ве́черъ , на гдⷭ҇и вᲂзва́хъ , стⷯры . гла́с̾ , д҃ . поⷣ . и҆́же зва́нныи свы́ше . Мнᲂгᲂѡ҆бра́зными ви́ды мꙋче́нїи ,꙳ сᲂвле́кшесѧ ᲂу҆мерщве́нїѧ ри́зъ ,꙳ мч҃нцы сла́внїи ,꙳ в̾ нетлѣ́нїѧ ри́зꙋ ѡ҆блеко́стесѧ .꙳ и҆ ны́нѣ на́ нб҃сѣхъ живетѐ ,꙳ бжⷭ҇твеннᲂмꙋ прⷭ҇то́лꙋ ꙳ всегда̀ пред̾стᲂѧ́ще ,꙳ пресвѣ́тли бг҃ᲂбл҃же́ннїи .꙳ тѣ́мже вѣ́рᲂю ,꙳ всесвѣ́тлꙋю па́мѧть ва́шꙋ пра́зднꙋемъ ,꙳ ра́кꙋ мᲂще́й сщ҃е́ннѡ ѡ҆блᲂбыза́юще . =Ѿ не́мᲂщи чл҃кѡмъ ,꙳ си́лᲂю бжⷭ҇твеннᲂю ,꙳ и҆сцѣле́нїе пᲂдава́етсѧ пристꙋпа́ющимъ .꙳ пе́рсть хꙋда̀ тѣле́сна страстᲂте́рпецъ ,꙳ и҆сто́чникъ чꙋдесе́мъ и҆стᲂча́етъ бл҃гᲂда́тїю .꙳ пристꙋ́пимъ чл҃цы , и҆ пᲂчерпе́мъ здра́вїе дш҃а́мъ ,꙳ здра́вїе тѣлесе́мъ .꙳ в̾зыва́юще бл҃гᲂда́рныѧ гла́сы и҆ гл҃юще ,꙳ сп҃се ми́рᲂви ,꙳ и҆́же тебѐ ра́ди пᲂстрада́ша , честні́и страстᲂте́рпцы крѣ́пкѡ ,꙳ тѣ́хъ мл҃твами всѧ́кагѡ вре́да и҆змѝ на́съ . И҆́же на лѣ́та до́лга сᲂкрᲂве́ни ,꙳ дᲂбрᲂпᲂбѣ́днїи мч҃нцы .꙳ ны́нѣ ꙗ҆ви́шасѧ ,꙳ ꙗ҆́кᲂже бᲂга́тство мнᲂгᲂцѣ́нно ,꙳ црⷭ҇кїи гра́дъ ѡ҆бᲂгаща́юще ,꙳ рꙋка́ма нᲂси́ми а҆рхїєре́ѧ мꙋ́драгѡ .꙳ и҆ въ цр҃квь принᲂси́ми че́стнѣ бжⷭ҇твеннꙋю ,꙳ и҆ прᲂсѧ́щимъ пᲂдава́юще всѧ́ко здра́вїе , в̾ по́льзꙋ ꙳ в̾ прᲂсвѣще́нїе , в̾ застꙋпле́нїе ꙳ тѣ́хъ прїе́млющимъ ,꙳ ꙗ҆́кѡ бж҃їѧ вѣ́рныѧ ᲂу҆го́дники . сла́ва , и҆ ны́нѣ , боⷢ҇ . И҆́же бл҃гᲂче́стнѡ пᲂкланѧ́ющаѧсѧ ꙳ твᲂемꙋ̀ ржⷭ҇твꙋ̀ ,꙳ ѿ всѧ́кᲂгѡ спаса́й навѣ́та вра́жїѧ ,꙳ бг҃ᲂрᲂди́тельнице пренепᲂро́чнаѧ ,꙳ ꙗ҆́кѡ пред̾ста́тельница всѣ́мъ сꙋ́щи .꙳ тѧ́ бо ны́нѣ по́мᲂщь и҆́мамы ,꙳ прибѣ́жище же и҆ ᲂу҆тверже́нїе ,꙳ и҆ хᲂда́таицꙋ ко влⷣцѣ хрⷭ҇тꙋ̀ бг҃ꙋ .꙳ є҆го́же мᲂлѝ , дарᲂва́ти ꙳ смире́нїе ми́рꙋ мо́лимсѧ ,꙳ и҆ сᲂгрѣше́нїемъ раз̾рѣше́нїе , притека́ющимъ в̾ кро́въ тво́й . крⷭ҇тᲂбоⷢ҇ . Нерыда́й менѐ мт҃и ,꙳ зрѧ́щи на́ древѣ ви́сѧща ,꙳ свᲂегѡ̀ сн҃а и҆ бг҃а ,꙳ и҆́же на вᲂда́хъ ѡ҆бѣ́сившаго зе́млю неѡ҆держи́мо ,꙳ и҆ всю̀ тва́рь сᲂзда́вшаго .꙳ и҆́бо вᲂста́нꙋ , и҆ сла́венъ бꙋ́дꙋ .꙳ и҆ а҆́дᲂва црⷭ҇тва сᲂкрꙋшꙋ̀ си́лᲂю ,꙳ и҆ пᲂтреблю̀ сегѡ̀ си́лꙋ .꙳ и҆ свѧ́заныѧ и҆зба́влю тᲂгѡ̀ ѕлᲂдѣ́йствїѧ , ꙗ҆́кѡ млрⷭ҇дъ .꙳ и҆ ѻ҆ц҃ꙋ свᲂемꙋ̀ принесꙋ̀ ,꙳ ꙗ҆́кѡ чл҃кᲂлю́бецъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , д҃ . Мч҃нцы твᲂѝ гдⷭ҇и , во страда́нїи свᲂе́мъ вѣнцы̀ прїѧ́ша нетлѣ́нныѧ ѿ тебѐ бг҃а на́шегѡ . и҆мꙋ́ще крѣ́пᲂсть твᲂю̀ непᲂбѣди́мꙋю , мꙋ́чащихъ ᲂу҆праздни́ша , и҆ разрꙋши́ша бѣсо́мъ немᲂщна́ѧ шата́нїѧ . тѣ́хъ мᲂли́твами хрⷭ҇тѐ бж҃е , спасѝ дш҃а на́ша .= сла́ва , и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .=

Кано́нъ . гла́съ , и҃ . пѣ́снь , а҃ . і҆рмо́съ . Вᲂѡ҆рꙋже́на фараѡ́на пᲂгрꙋзѝ , чꙋдᲂтвᲂрѧ́й дре́вле , мѡѷсе́йскїи же́ѕлъ крⷭ҇тᲂѡ҆бра́знѡ прᲂразѝ , и҆ раздѣлѝ мо́ре . і҆и҃лѧ же бѣжа́ща , пѣ́ша хᲂдѧ́ща спасѐ , пѣ́снь бг҃ᲂви вᲂз̾сыла́юща .

запѣ́въ : Ст҃і́и мч҃нцы , мᲂли́те бг҃а ѡ҆ на́съ . Мч҃нческими ᲂу҆краше́ни дарᲂва́ньми , и҆ вели́кᲂмꙋ свѣ́тꙋ , всесвѣ́тли любо́вїю пред̾стᲂѧ́ще мч҃нцы . ѻ҆́блаки дꙋ́шъ на́шихъ и҆ страсте́й зи́мꙋ разᲂри́сте , бл҃гᲂда́тїю всеси́льнагѡ бг҃а на́шегѡ . Вᲂз̾лᲂжи́всѧ мч҃нческїи сᲂбо́ръ , всеви́дцꙋ бг҃ꙋ . и҆ тᲂгѡ̀ любо́вїю дш҃а привѧза́вше , раз̾рѣши́ша сᲂю́зъ ѕло́бѣ . и҆ разрѣше́нїе грѣхо́въ пᲂдава́ютъ , вѣ́рᲂю тѣ́хъ бл҃жа́щимъ . Ѻ҆гне́мъ бжⷭ҇твеннымъ , стрⷭ҇тᲂте́рпцы мч҃нцы распалѧ́еми . и҆ мы́сленᲂю си́лᲂю дш҃а в̾жили́вше , ꙗ҆́кѡ ᲂу҆́глїе ꙗ҆ви́стесѧ , пᲂпалѧ́юще ве́щь мнᲂгᲂбо́жїѧ . и҆ прᲂсвѣща́юще сїѧ́нїемъ бл҃гᲂче́стїѧ кᲂнцы̀ . боⷢ҇ . Ѿ ви́димыхъ и҆ неви́димыхъ и҆зба́ви мѧ дв҃о мт҃и враго́въ , ꙗ҆́же бг҃а сло́ва ви́димаго ро́ждьши , неви́дима сꙋ́ща . и҆ стрⷭ҇те́й мᲂи́хъ мᲂлвꙋ̀ твᲂе́ю тишино́ю ѿженѝ , є҆ди́на чл҃кѡмъ и҆справле́нїе .

пѣ́снь , г҃ . і҆рмо́съ . Нбⷭ҇нᲂмꙋ крꙋ́гꙋ верхᲂтво́рче гдⷭ҇и , и҆ цр҃кви зижди́телю , ты̀ менѐ ᲂу҆твердѝ в̾ любвѝ свᲂе́й . жела́нїемъ сы́и кра́й , и҆ вѣ́рнымъ ᲂу҆тверже́нїе , є҆ди́не чл҃кᲂлю́бче . Раз̾же́гшесѧ любо́вїю бжⷭ҇твеннᲂю мч҃нцы , ѻ҆́гнь без̾бо́жїѧ кро́вьными стрꙋѧ́ми ᲂу҆гаси́сте . и҆ прᲂсїѧ́вше свѣтᲂви́днѡ ꙗ҆́кѡ ѕвѣ́зды , всю̀ пᲂд̾со́лнечнꙋю ᲂу҆ѧсни́сте . Блиста́ютъ мч҃нкъ свѣтᲂза́рныѧ мо́щи , сїѧ́нїе и҆сцѣле́нїемъ , и҆́же вѣ́рᲂю к̾ си́мъ притека́ющимъ . бл҃гᲂда́ть бо пᲂчерпо́ша ѿ и҆сто́чникъ сп҃сᲂвъ . сегѡ̀ во́льнѣй стрⷭ҇ти пᲂревнᲂва́вше . И҆́же вѣ́рѣ стᲂлпѝ , хрⷭ҇то́ва закла́нїѧ , во́ времѧ ᲂу҆́бѡ мно́го сᲂкрᲂве́ни , ны́нѣ ꙗ҆ви́шасѧ . а҆рхїєре́йскима рꙋка́ма , бл҃гᲂче́стнѡ и҆ прпⷣбнѡ пренесе́ни бы́ша . боⷢ҇ . Ра́дꙋисѧ є҆ди́на ро́ждьши всѧ́ческихъ гдⷭ҇а . ра́дꙋисѧ ꙗ҆́же ра́дᲂсть чл҃кѡмъ и҆схᲂда́таивши . ра́дꙋисѧ присѣ́ннаѧ и҆ несѣко́маѧ гᲂро̀ , вѣ́рнымъ ᲂу҆тверже́нїе . ра́дꙋисѧ всенепᲂро́чнаѧ .

сѣда́ленъ . гла́съ , д҃ . Ѿ землѝ вᲂсїѧ́вше , ꙗ҆́кᲂже свѣти́льницы , нече́стїѧ всѧ́кᲂгѡ пᲂтреби́сте м̾глꙋ̀ . и҆ вѣ́рныѧ прᲂсвѣти́сте мч҃нцы бжⷭ҇твеннїи , трⷪ҇цѣ пᲂбо́рницы . сла́ва , и҆ ны́нѣ , боⷢ҇ . Пречⷭ҇тѣи рꙋ́цѣ свᲂѝ дв҃о мт҃и прᲂсте́рши , пᲂкры́й ᲂу҆пᲂва́ющїѧ натѧ̀ . и҆ сн҃ꙋ твᲂемꙋ̀ зᲂвꙋ́щїѧ , всѣ́мъ пᲂда́ждь хрⷭ҇тѐ млⷭ҇ти твᲂѧ̀ . крⷭ҇тᲂбоⷢ҇ . На́ древѣ ви́дѧщи вᲂз̾дви́жена , сн҃а свᲂегѡ̀ пречⷭ҇таѧ , ᲂу҆тро́бᲂю мт҃рьски жа́лᲂстнѡ распала́ема в̾зыва́ше . ᲂу҆вы̀ мнѣ̀ , ка́кѡ за́йде свѣ́те мо́й без̾лѣ́тныи .

пѣ́снь , д҃ . і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дᲂванїе . не ѡ҆ста́вль нѣ́дра ѻ҆́ч҃а , но ми́лᲂстїю си на́шꙋ нищетꙋ̀ пᲂсѣти́въ . тѣ́мъ съ прᲂро́кѡмъ а҆вва́кꙋмᲂмъ зᲂвꙋ̀ , си́лѣ твᲂе́й сла́ва чл҃кᲂлю́бче . Твᲂѐ закᲂле́нїе и҆ во́льнꙋю сме́рть живᲂда́вче , сᲂбо́ръ вᲂз̾желѣ̀ страда́лецъ . и҆ мнᲂгᲂви́дныѧ бᲂлѣ́зни претерпѣ́въ , въ небᲂлѣ́зненᲂе пре́йде и҆ бжⷭ҇твеннᲂе весе́лїе . пᲂѧ̀ бл҃гᲂда́рствено , си́лѣ твᲂе́й сла́ва чл҃кᲂлю́бче . Крⷭ҇тными ѡ҆гражде́ни брᲂнѧ́ми , и҆ любо́вїю бжⷭ҇твеннᲂю ᲂу҆твержа́еми , ѻ҆рꙋ́жїе низ̾лᲂжи́ша враго́въ . и҆ ѡ҆пᲂлче́нїѧ си́хъ вѣ́рᲂю пᲂтреби́ша , мч҃нцы бжⷭ҇твеннїи , пᲂю́ще ᲂу҆се́рднѡ , си́лѣ твᲂе́й сла́ва чл҃кᲂлю́бче . Дᲂбро́тами дᲂбрᲂдѣ́телей прᲂсвѣща́еми , кро́вьнᲂю багрѧни́цею ѡ҆дѣ́ѧстесѧ мч҃нцы ꙗ҆́кᲂже ски́петро крⷭ҇та̀ пᲂбѣ́дꙋ нᲂсѧ́ще , со хрⷭ҇то́мъ црⷭ҇твᲂвати спᲂдо́бистесѧ вᲂи́стинꙋ , бл҃же́нныхъ наде́ждъ прїе́мше . боⷢ҇ . Мт҃и бж҃їѧ бл҃гᲂслᲂве́наѧ пренепᲂро́чнаѧ , страда́лецъ бжⷭ҇твенныхъ ᲂу҆дᲂбре́нїе , ᲂу҆небеси́вшаѧ на́ше є҆стество̀ , ѿстꙋ́пльшее сᲂвѣ́тᲂмъ ѕмїи́нымъ , спаси́ мѧ ѿ всѧ́кихъ житїѧ̀ сᲂбла́знъ , и҆ ᲂу҆лꙋчи́ти спасе́нїе пᲂмᲂли́сѧ .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Ст҃ы́хъ твᲂи́хъ сп҃се , вре́мѧ дᲂво́льнѡ сᲂхра́нь , сᲂкрᲂве́нныѧ ко́сти ꙗ҆ви́лъ є҆сѝ ны́нѣ , ꙗ҆́кᲂже и҆зво́ли . лю́демъ твᲂи́хъ сло́ве , на ѡ҆сщ҃е́нїе и҆ спасе́нїе , и҆ в̾ стꙋ́дъ враго́мъ хꙋ́лѧщимъ тѧ̀ . Стꙋ́день пре́лести теплᲂто́ю вѣ́ры разᲂри́сте сла́внїи , мно́гихъ мꙋ́къ прᲂше́дше мнᲂгᲂплете́нныѧ сѣ́ти . к̾ вы́шнемꙋ гра́дꙋ в̾перѧ́еми любо́вїю , пᲂчи́ли є҆стѐ сла́вᲂю и҆спᲂлнѧ́еми . Терпѣ́нїемъ ра́нъ , всѧ́ко низ̾ло́жьше вра́жїе шата́нїе , тве́рдїи ѻ҆рꙋ́жницы . и҆ терза́еми и҆ ѡ҆бѣ́шаеми , и҆ ѻ҆гню̀ веще́ственᲂмꙋ прибли́жьшесѧ , всѧ́кꙋ ве́щь без̾бо́жїѧ запали́сте бл҃гᲂда́тїю . боⷢ҇ . Превы́шши є҆сѝ вы́шнихъ си́лъ бг҃ᲂра́дᲂваннаѧ , заче́ньши сло́во , и҆́же всѧ̀ сло́вᲂмъ сᲂтво́ршаго . и҆ ро́ждьши сегѡ̀ , и҆́же ѿ ѻ҆ц҃а пре́жде вѣ́къ рᲂжде́на , нетлѣ́ннѡ пречⷭ҇таѧ .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . Ꙗ҆́кᲂже кри́нъ в̾ мы́сленыхъ ᲂу҆до́лїихъ прᲂцвѣ́тше , бжⷭ҇твенныѧ вᲂнѧ̀ всѧ̀ напᲂлнѧ́ете прехва́льнїи . и҆ дш҃а́мъ ѿгᲂнѧ́ете смра́дъ всѧ́къ , страстᲂте́рпцы прехва́льнїи . Ссѣка́еми на ᲂу҆́ды , и҆ мнᲂгᲂѡ҆бра́зно мꙋ́чими . терпѣ́нїемъ и҆́стиннымъ , мече́мъ с̾сѣко́ша врагѝ невѣ́дꙋщїѧ тѧ̀ , до́блїи сло́ве страстᲂте́рпцы твᲂѝ , вᲂспѣва́юще тѧ̀ . Стрꙋ́пы мч҃нчестїи дш҃а́мъ и҆сцѣлѧ́ютъ сᲂкрꙋше́нїѧ . си́ми бо врага̀ крѣ́пкѡ ᲂу҆ѧзви́вше , врачева́нїѧ бе́здна , теплᲂто́ю прᲂсѧ́щимъ , бжⷭ҇твеннымъ дх҃ᲂмъ бы́ша . боⷢ҇ . И҆з̾ тебѐ бг҃ъ , ме́ртвымъ , плᲂтьски́мъ ꙗ҆ви́сѧ прїѧ́тїемъ . бᲂга́тъ сы́и , мᲂю̀ нищетꙋ̀ пренепᲂро́чнаѧ и҆з̾ тебѐ взѧ́тъ , без̾сме́ртїѧ вхо́ды ми пᲂдава́ѧ .

кᲂнда́къ . гла́съ , и҃ . Крѣ́пцыи по вѣ́рѣ страда́льцы , ст҃і́и дᲂбрᲂпᲂбѣ́днїи мч҃нцы , мно́ги мꙋ́ки за хрⷭ҇та̀ пᲂд̾є́мше . и҆ на лѣ́та мно́га сᲂкрᲂве́ни бы́ша . и҆ ны́нѣ ꙗ҆ви́стесѧ , ꙗ҆́кѡ бᲂга́тство мнᲂгᲂцѣ́нно . в̾ цр҃квь бж҃їю че́стнѡ внесе́ни , а҆рхїє҆ре́ѧ бж҃їѧ дла́ньма . и҆ прᲂсѧ́щимъ раз̾дава́еми на по́льзꙋ . мᲂли́те за дш҃а на́ша .

пѣ́снь , з҃ . і҆рмо́съ . Бж҃їѧ схᲂжде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ дре́вле . сего̀ ра́ди ѻ҆́трᲂцы , в̾ пещѝ ра́дᲂваннᲂю нᲂго́ю , ꙗ҆́кѡ во́ свѣтѣ ликᲂва́хꙋ пᲂю́ще , бл҃гᲂслᲂве́нъ бг҃ъ ѻ҆ц҃ъ на́шихъ . Вѣ́дᲂми твᲂрцꙋ̀ , мꙋче́нїемъ дре́вле бы́вше , бе́з̾вѣсти сᲂкрᲂве́ни . на́мъ ны́нѣ пᲂзна́ни бы́сте , пᲂю́щимъ прехва́льнїи мч҃нцы , бл҃гᲂслᲂве́нъ бг҃ъ ѻ҆ц҃ъ на́шихъ . Пᲂчерпи́те чл҃цы , ѿ и҆сто́чника тᲂча́щагѡ во́дꙋ спасе́нꙋю , тече́нїемъ невеще́ственымъ , мᲂщьмѝ мч҃нкъ дне́сь . и҆ по́йте си́хъ прᲂсла́вльшемꙋ , бл҃гᲂслᲂве́нъ бг҃ъ ѻ҆ц҃ъ на́шихъ . Свѣ́тꙋ жили́ща ꙗ҆ви́шасѧ , мꙋ́ками мно́гими , сᲂкрᲂве́нїемъ те́мнымъ во́ времѧ дᲂво́льнѡ . ꙗ҆́кѡ ѿ незахᲂди́мыхъ свѣти́льницы прᲂсїѧ́ша страда́льцы твᲂѝ хрⷭ҇тѐ , прᲂсвѣща́юще на́съ , ѻ҆ц҃е́мъ бж҃е бл҃гᲂслᲂве́нъ є҆сѝ . боⷢ҇ . Прᲂро́цы прᲂвᲂз̾вѣсти́ша , глꙋбинꙋ̀ дв҃о та́инства твᲂегѡ̀ . ѿ чⷭ҇тыхъ бо крᲂве́й бг҃а ѻ҆трᲂкᲂви́це во́чревѣ нᲂси́ла є҆сѝ . и҆ въ сꙋществꙋ̀ двᲂю̀ пᲂрᲂдила̀ є҆сѝ , на спасе́нїе на́мъ и҆ и҆збавле́нїе .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . Ꙗ҆́кᲂже винᲂгра́да ло́зїе , невеще́ственагѡ сꙋ́ще , гро́здїе на́мъ бг҃ᲂразꙋ́мїѧ прᲂзѧбо́ша . и҆ вино̀ и҆стᲂчи́ша без̾сме́ртїѧ всѣ́мъ ꙗ҆́вѣ , пїѧ́нство дш҃е́внᲂе ѿрѣва́юще мч҃нцы . вᲂпїю́ще , сщ҃е́ннїи вᲂспо́йте лю́дїе , превᲂзнᲂси́те є҆гѡ̀ во́ вѣки . Тече́нїи кро́вьными , рѣ́ки и҆з̾сꙋши́ша и҆́дᲂльскагѡ гнѣ́ва . и҆ раз̾жже́нїе ᲂу҆гаси́ша без̾бо́жнагѡ велѣ́нїѧ страда́льцы , сла́вᲂю хрⷭ҇то́вᲂю . всѧ́ко же вѣ́рнѡ вᲂпїю́ще срⷣце напᲂи́ша бᲂга́тнѡ . сщ҃е́ннїи вᲂспо́йте лю́дїе , и҆ превᲂзнᲂси́те гдⷭ҇а во́ вѣки . Ст҃лемъ лꙋ́чшїи сщ҃е́нно бы́въ , вᲂз̾враще́нїе че́стнѡ сᲂтвᲂрѝ ва́ше пребл҃же́ннїи . и҆ мᲂле́бнѡ сїѐ пᲂчита́етъ , пᲂѧ̀ со всѣ́ми сщ҃е́нники , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те гдⷭ҇а во́ вѣки . боⷢ҇ . Ѡ҆сщ҃ьшисѧ дх҃ᲂмъ бцⷣе пренепᲂро́чнаѧ , во ст҃ы́хъ пᲂчива́ющаго рᲂдила̀ є҆сѝ ст҃а́гѡ , и҆ бл҃гᲂда́телѧ є҆ди́наго бг҃а . всѧ̀ вᲂпїю́щїѧ , ѡ҆сщ҃а́юща вѣ́рᲂю , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки .

пѣ́снь , ѳ҃ . і҆рмо́съ . Оу҆диви́сѧ ᲂу҆́бѡ ѡ҆ се́мъ не́бо , и҆ землѝ ᲂу҆жасо́шасѧ кᲂнцы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твᲂѐ бы́сть прᲂстра́ннѣе нб҃съ , тѣ́мъ тѧ̀ бцⷣе , а҆́гг҃лъ и҆ чл҃къ чинᲂнача́лїѧ велича́емъ . Вкꙋ́пѣ сᲂбира́ющесѧ , къ жи́зни дерза́ти пᲂвелѣва́юще са́ми себѣ̀ , ра́ны претерпѣ́ша , вᲂпїю́ще страда́льцы . сѐ вре́мѧ бл҃гᲂпрїѧ́тнѡ , ста́немъ и҆ пᲂбѣди́мъ врага̀ . хрⷭ҇то́съ пᲂдвигᲂпᲂло́жникъ прᲂстира́етъ вѣнцы̀ , и҆́же на́съ ра́ди страда́ти и҆зво́ливыи . Вᲂз̾дви́жесѧ на́ древо сло́ве бж҃їи , и҆ мч҃нкъ стада̀ привле́клъ є҆сѝ к̾ себѣ̀ . стра́сть вᲂѡ҆брази́вшихъ и҆ закᲂле́нїе , є҆́же во́лею влⷣко прїѧ́тъ за млрⷭ҇дїе на́съ ра́ди . тѣ́мже тѧ̀ до́блїи вᲂз̾лю́бльше страда́льцы , ꙗ҆́кѡ ѻ҆вча́та закала́ютсѧ . Со хрⷭ҇то́мъ црⷭ҇твᲂвати всегда̀ , страда́льцы прехва́льнїи мч҃нцы , ра́дᲂстнѡ спᲂдо́бльшесѧ на́ нб҃сѣхъ . и҆ всѣ́мъ дш҃е́внᲂе и҆спрᲂси́те спасе́нїе . и҆ всѣ́мъ и҆́же вѣ́рᲂю хва́лѧщимъ ва́съ дне́сь . боⷢ҇ . Ѻ҆́блаче сл҃нца мы́сленагѡ , дꙋшѝ мᲂеѧ̀ ѻ҆́блаки раз̾женѝ . две́ри бж҃їѧ , ѿве́рзи мѝ две́ри мᲂлю́ тѧ пра́вдѣ влⷣчце . и҆ ко в̾хо́дѡмъ бл҃ги́мъ в̾ведѝ дв҃о , ѿ пꙋті́й мнᲂгᲂѡ҆бра́зныхъ лꙋка́вагѡ и҆збавлѧ́ющи мѧ̀ .

<< Previous

Contents

Next >>